About Bible Thianghlim | ©

BibleThianghlim – Zefaniah

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Zefaniah

123

• A ngantu: Zefaniah
• A siartu: Judah (Pathian-ih minungpawl)
• A huap sung cān: B.C. 640-612 Karlak

Zefaniah 1:1 vekin, profet Zefaniah cu Judah ram ih thlarau lam rĕmṭhatnak pipa hruaitu Pathian mi siangpahrang Hezekiah-ih tusin a si (2Sp 18:1-7 zoh aw). Zefaniah-ih rawngbawlnak cu a sungkhat hla, Josiah a lal lai a si (B.C. 640-609). Josiah hlanih Judah ram ih siangpahrang pahnih (Manasseh le Amon) in kum 50 hnak tam an uk ih, annih cu misualrál zet an si (2Sp 21 le 2San 33 zoh aw). Curuangah Zefaniah in Pathian hril mi milai (Judah) sualnak simaw, miphun dang pawl sualnak simaw, sual parih Pathian dāntatnak tam zet a phuang. Pathian in pathian dang biaknak cu a zoh men lo ding ih, amai dān kalhih cangvaihnak khal a zoh men lo ding.

Hi cabu-ih zirhnak tamsawn cu Jehovah-ih ni ti mi thu ah a khaikhawmaw (1:7, 8, 14, 15, 16, 18; 2:2, 3; 3:8, 11, 16). Jehovah-ih ni ti hi nazi 24 rei ni khat a si lo ih, a tumtah mipawl a hlensuahnak Jehovah-ih cān hleice a si sawn. Hi hin kap hnih a nei (misualpawl parih dāntatnak le Pathian mipawl parih malsawmnak), cule cān huap pahnih (a nai le a hla) a nei. Lungthlĕng duh lo pawl hnenah sual ruangah dāntatnak a thleng lohli ding, tiin Pathian in hi cabu siar hmaisa tupawl hnenah ralrinnak a pe. Josiah a lal laiih ṭhangphawknak tawite khan leng lam thlĕngawknak lawng a suah, curuangah Pathian in B.C. 605, 597 le 586 ah Judah dān a tat. Sikhalsehla, cumi cu hmai lam cān ih Pathian in misualpawl dān a tat ding le a mipawl thlawsuah a pek ding thlir sungnak a si.

Zefaniah cabu cu ṭhen hnih ih ṭhen theih a si, cumi ih kan hmuh mi cu Jehovah-ih ni ti hin dāntatnak le malsawmnak a sawhkhih thei ih, a nai le a hla khal a sawhkhih thei (1:2-3:8 le 3:9-20). Ṭhen hmaisaah, Pathian in an sual ruangah Judah-mipawl le miphunpawl dān a tat ding ti a sim hai.

Ṭhen hnihnak in (3:9-20) ruahsannak, malsawm le tundīnsalnak a rel uar. Curuangah Pathian in ṭhen hmaisa ih dāntatnak a lingletter. Pathian cu an hnenih a um ruangah an upat ih, a hnenah an tlulut ih, amah an bia ih an rĕn thei nak dingah, Pathian in Jew le Zentel cu a thianfai hai ding (3:15, 17).

1

1 ^aJudah siangpahrang Amon-ih fapa Josiah san lai Hezekiah fapa, Amariah fapa, Gedaliah fapa, Kushi fapa Zefaniah hnenih Jehovah-ih kamsuakthu thleng mi.

1:1^a 2Sp 22:1; 2San 34:1-33; 35:1-27; Jer 1:2

Judah le Jerusalem Ralrin Peknak

2 ^a“Leilung vangdâp ihsin
Ziangkim ka hloralter thluh ding, Jehovah in a ti.
3 ^bMinung le ramsa ka hloralter thluh ding;
Tlun zuang vatepawl,
Tifinriat ngapawl le,
Bahnak lungpawl cu misualrálpawl zawngah ka hloralter thluh ding.
Leilung vangdâp ihsin minung ka that ding, Jehovah in a ti.
4 ^cJudah dokalhin le Jerusalem luahtupawl hmuahhmuah dokalhin ka kut ka hawi ding.
Baal umsŭnpawl hi hmun ihsin ka ṭhiatbăl ding,
Milem bia puithiampawlih hmin cu puithiampawl zawngah.
5 ^dInn tlun ihsi van ih thilmak rual betupawl;
Milkom hmin sâlih sesăm si ih,
Jehovah betupawl le amah hmin ih sesămtupawl;
6 ^eJehovah hnen ihsi kirpawl le,
Jehovah hawl lo le amah ráwn lo tupawl khal,” tiin.

1:2^a Sem 6:7; Jer 7:20

1:3^b Isa 6:11; Jer 4:25; Eze 7:19; Hos 4:3

1:4^c 2Sp 23:4-5; Jer 6:12; 15:6; Hos 10:5; Mik 5:13

1:5^d Pui 18:21; Jer 5:7; 19:13

1:6^e Isa 1:4; Jer 2:13; Hos 7:7, 10

Jehovah-ih Ni Rapthlak

7 ^aBawipa Jehovah hmaiah daiten um uh;
Ziangahtile Jehovah-ih ni cu a nai thlang a si,
Ziangahtile Jehovah in raithawinak a timlam zo;
A mikhualpawl a rak sawm hai zo.
8 ^b“Cule Jehovah-ih raithawi ni ah hitin a si ding,
Bawipawl le siangpahrang fātepawl dān ka tat ding ih,
Ram dang hnipuan hruhtupawl hmuahhmuah thawn.
9 ^cCuih ni thothoah an pulepawlih innpawl thahrum suahnak le bumnak thawi khattertu,
Sângka hnuai zawn zial tlunih khirtupawl zaten dān ka tat hai ding.
10 ^d“Cule cuih ni ah, Jehovah in a ti.
Nga Kăwtka ihsin ṭah aw a thang ding,
Veng Thar ihsin ṭahrâk aw le
Tlangmûalpawl ihsin kekkuai aw a um ding.
11 ^eNannih Maktesh luahtupawl râk rero uh!
Ziangahtile sumdâwng zaten thah an si;
Paisa kaitu hmuahhmuah khal thah ṭheh an si.
12 ^fCule cuih cān ah hitin a si ding,
Jerusalem cu meitopawl thawn ka hawlsuak ding ih,
Hnangamih um huahhi men,
An thinlung sungteih,
‘Jehovah in thil ṭha siseh,
Thil ṭha lo khal siseh a tuah lo ding,’ titupawl dān ka tat hai ding.
13 ^gCuruangah an thilripawl cu ralthillawn ah an cang ding ih,
An innpawl a ṭhing ding;
Innpawl tla an sak ding, asinan an luah lo ding.
Sabit hmuanpawl an tuah ding, asinan sabit zu an inngah lo ding,” tiin.
14 ^hJehovah-ih ni rapthlak cu a nai a si;
Cumi cu a nai ih, a hmanhmawh zet.
Jehovah-ih ni thawmvâng cu a nasa tuk;
Miralṭhapawl nasa zetin an ausuak ding.
15 ⁱCuih ni cu thinling ni,
Harsat le vansanglam ni,
Siat le ṭhin ni,
Khawthim le lungsiat ni,
Khawdur le thim mepmep ni,
16 ^jTawtawrawt phawt ni,
Kulh hnget nei khawpipawl dokalh le
Dawlsâng dokalhih au ni a si.
17 ^k“Minungpawl parah vansannak ka thlen ding ih,
Mitcawpawl bangin an feh ding,
Ziangahtile Jehovah dokalhin thil sual an rak tuah a si;
An thisen cu leivut bangin sunbŭng a si ding ih,
An titsa cu êk bangin hlăwn a si ding,” tiah a ti.
18 ^lJehovah-ih thinling ni ah
An sui le an ngun in anmah a runsuak thei lo ding;
Asinan leilung tlun pumpi cu a thîksiatnak meisa in a kangrál thluh ding,
Ziangahtile leilung tlunih cêngpawl zaten rang zetin a hloralter verver ding.

1:7^a Isa 13:6; 34:6; 41:1; Jer 46:10; Joe 3:14; Amo 5:18-20; Hab 2:20

1:8^b Isa 2:6; 24:21; Jer 39:6

1:9^c 1Sam 5:5; Jer 5:27

1:10^d 2San 33:14; Isa 22:5; Eze 6:13

1:11^e Zek 14:21; Jam 5:1

1:12^f Sam 94:7; Jer 48:11; Eze 8:12; 9:4-11; Amo 6:1

1:13^g Dnp 28:30, 39; 2Sp 24:13; Ṭah 5:2; Amo 5:11; Mik 6:15

1:14^h Jer 30:7; Eze 7:7, 12; Joe 2:1, 11

1:15ⁱ Isa 22:5; Joe 2:2; Amo 5:18-20; Mar 13:24-25

1:16^j Dnp 28:52; Isa 2:12-15; Jer 4:19; Joe 2:1

1:17^k Dnp 28:29; Isa 59:10; Jer 8:2; 9:22

1:18^l Sem 6:7; Jer 4:4; Eze 7:5-7, 19; Zef 3:8

2

Sual sir dingih Kawhnak

1 ^aFĭnkhawmaw uh, a si,
Maw duhum lo miphun,
Fĭnkhawmaw uh,
2 ^bThusuah mi thlahsuak a si hlan le,
Fāng hi bangin ni a liam hlan,
Jehovah-ih thinheng ṭihnungza nan parih a thlen hlan,
Jehovah-ih thinheng ni nan parih a thlen hlanah!
3 ^cNannih amai diknak kai hnget tu,
Leilung tlunih mităngdawrpawl hmuahhmuah,
Jehovah cu hawl uh.
Dingfelnak hawl uh, tăngdawrnak hawl uh.
Jehovah-ih thinheng ni ah thuh nan si nahman maw!

2:1^a 2San 20:4; Jer 6:15; Joe 1:14

2:2^b Jer 10:25; Ṭah 4:11; Zef 1:18

2:3^c Sam 57:1; 76:9; Isa 1:17; Amo 5:6

Miphunpawl Dāntatnak

4 ^aZiangahtile Gaza cu thlauthlak a si ding ih,
Ashkelon cu a ṭhing reprep ding;
Sun laifangah Ashdod an dawisuak ding ih,
Ekron cu a hram ihsin phăwng a si ding.
5 ^bTifinriat kap tluanih um,
Kereth miphun, nan hmakhua a pit a si!
Filisṭia-mipawlih ram, Maw Kanaan,
Jehovah-ih kamsuakthu in a lo dokalh:
“Luahtu nei lo dingin
Ka lo siatbăl ding,” tiin.
6 ^cTifinriat kap tluan cu ran tlannak a si ding,
Rante rual khāltupawl hrangah beunak le rante rual hrangah hruangkulh a um ding.
7 ^dCuih tifinriat kap tluan cu Judah sungza a tāngsŭn hrangah a si ding;
Cu tawkah ei le in an hmu ding;
Ashkelon innpawl ah zan ah an zau ding.
Ziangahtile Jehovah an Pathian in a ngaihsak hai ding ih,
Ralkaihpawl a hruaikirsal ding.
8 ^e“Moab ih mi hmuhsuamnak le
Ammon-mipawl ih mi nautatnak ka hna in ka rak thei,
Ka mipawl an rak hmuhsuam ih,
An ramripawl dokalhin hngal zetin an hro.
9 ^fCuruangah ka nun rori vekin, Israel-ih Pathian, ralkap rualpawlih Jehovah in a ti.
Moab cu Sodom vek a si tengteng ding ih,
Ammon-mipawl cu Gomorrah vek an si ding,
Hling keuhnak hmun le cikhur ah a cang ding ih,
Kumkhua a ṭhing ta ding.
A tang hrih mi ka mipawl in anmah cu an sîm ding ih,
An rampawl cu a tāngsŭn ka mipawl in an luah ding,” tiin.
10 ^gHimi hi an hngal man ih an co ding mi a si,
Ziangruangahtile mi an rak hmuhsuam ih,
Ralkap rualpawlih Jehovah-ih mipawl cu hngal zetin an rak hro.
11 ^hJehovah cu an hrangah ṭihnungza a si ding,
Ziangahtile anih cun leilung tlunih pathianpawl zaten zianghmanlo ah a cangter thluh ding,
Mi kip anmai umnak hmun cio in,
Tifinriat kap tluan miphunpawl hmuahhmuah in amah an be ding.
12 ⁱ“Nannih Kush-mipawl khal,
Ka ralnâm ih thah nan si ding,” tiah a ti.
13 ^jCule sak lam dokalhin a kut a suah ding,
Assiria a tisiat ding ih,
Nineveh ṭhing ko a tuah ding,
Ramṭhing ro bangin.
14 ^kA sungah ranpi rual an kûal ding,
Ramsa phun zakip in.
^lKa-at va le kippod vate cu ṭhuam lupawl ah an riak ding;
Tukvirhpawl ah an aw a thang ding;
Sângka hnuai zawn zial a siat ding;
Ziangahtile sidar thing ih tuah mipawl a hâwkdarh ding.
15 ^mHimi cu ralmûang zetih um khawpi lungawi aipuang a si,
A thinlung in, “Keimah ka si, keimah siarlo a dang zohman an um lo,” tiah a ti.
Ziangtin anih cu ṭhing reprepih a căn,
Ramsapawl kūalnak hmun menah!
Amah lăntu pauhpauh in an heheu ding ih,
An kuttum an hmuh ding.

2:4^a Sem 10:19; Jer 47:5; Amo 1:7-8; Zek 9:5-7

2:5^b Pui 26:31; Jos 13:3; Eze 25:15-17

2:6^c Isa 7:25

2:7^d Dnp 30:3; Sam 126:4; Isa 11:16; Jer 29:14; Joe 3:1

2:8^e Sem 19:37; Isa 16:6; Jer 48:27; Eze 21:28; 25:3; Amo 1:13

2:9^f Dnp 23:6; 29:23; 2Sp 19:31; Isa 15:1-9; Jer 48:1-47; 49:1-6; Eze 25:1-11; Amo 2:1-3

2:10^g Job 40:12; Isa 16:6; Jer 48:27; Zef 2:8

2:11^h Sam 86:9; Isa 12:4; Joe 2:11; Zef 3:9; Mal 1:11

2:12ⁱ Isa 18:1-7; 20:4-5; Jer 46:10

2:13^j Mik 5:6; Nah 3:7; Zek 10:11

2:14^k Sam 10:6; Isa 14:23; 34:11; Thu 18:2

2:14^l Ka-at va: Pui 11:18 simfiangnak zoh aw.

2:15^m Isa 32:9; 47:8; Jer 18:16; Nah 3:19

3

Jerusalem Sualralzia

1 ^aKhawpi helhmang le bawrhhlawh,
Mi palbĕthmang khawpi,
Na hmakhua a pit a si!
2 ^bAnih cun zawih thu hman a ngai lo,
Nunrĕmnak khal a cohlang lo;
Jehovah a rak rinsan lo,
A Pathian a rak naih fawn lo.
3 ^cA sungih bawipawl cu kiosa hûk rero vek an si;
A thuṭhentupawl cu zing lam hrangih hlah mi nei lo,
Zan lam cinghnia vek an si.
4 ^dA profetpawl cu fimkhur lo, mirinum lo an si;
A puithiampawl in hmun thianghlim an bawrhhlawhter,
Dān an pahbăl.
5 ^eAn lakih um Jehovah cu a dingfel ih,
Dingfellonak a tuah lo ding.
Zing tin a diknak a langter;
A tlawlh dah lo,
Asinan midik lo cun ningzah a nei lo.
6 ^f“Miphunpawl ka rak that,
An kulh hnget pawl cu tisiat an si;
An kăwtthler ṭhing ko ka tuah,
Mivâk sukso an um lo.
An khawpipawl tisiat an si;
Zohman an um lo, luahtu a um lo.
7 ^gKei in, ‘Thungaiten nang in kei i ṭihzah ding,
Nunzirhnak na cohlang ding,
Culawngah amai thuhla ih ka rak ruah mi hmuahhmuah vekin,
A cēnnak hmun cu tisiat loin a rak um ding,’ tiah ka ti.
Asinan an thil ti ah sual tuah an hiar deuhdeuh.
8 ^hCuruangah keimah in hngak uh, Jehovah in a ti, răm dingih ka thawh ni tiang,
Miphunpawl fĭnkhawm,
Lalrampawl punkhawmawkter,
An parih ka aithawhnak,
Ka thinhengnak ṭihnungza hmuahhmuah burh hi ka thu ruahcat mi cu a si.
Leilung pumpi cu ka thîkthusiatnak meisa in a kangrál thluh ding.

3:1^a Dnp 21:18-21; Jer 5:23; Eze 23:30

3:2^b Sam 73:28; Jer 32:33

3:3^c Sam 22:13; Eze 22:27; Hab 1:8

3:4^d Jer 3:20; 23:11; Eze 22:26; Hos 9:7; Mal 2:7-8

3:5^e Dnp 32:4; Ezr 9:15; Jer 3:3; Ṭah 3:22-23; Eze 18:25

3:6^f Pui 26:31; Jer 9:12

3:7^g Jer 7:26-28; Hos 9:9

3:8^h Sam 27:14; 79:6; Ṭah 4:11; Joe 3:2, 11; Hab 2:3; Zef 1:18; Thu 16:1

Pathian in Miphunpawl a Thianfai Ding

9 ^a“Ziangahtile cuih cān ah an zaten Jehovah hmin an kawh thei nak dingah,
Thinlung hmunkhat ih amah rian thei dingah
Miphunpawl cu hmur thianghlim ka pe hai ding.
10 ^bKush tiva pawl ralkhat ih keimah i betupawl in,
Ka mivâkdarhpawl in,
Ka thilhlăn an run keng ding.
11 ^cCuih ni ah keimah lakih na helnak hnaṭuan ruangah na ning a zak lo ding;
Ziangahtile na sung ihsin mihngal le khaisângawpawl ka lahlo ding ih,
Nang cu ka tlang thianghlim ah na puarthau dah nawn lo ding.
12 ^dNa sungah minunnem le
Mităngdawrpawl ka tân ding ih,
Annih in Jehovah hmin an rinsan ding.
13 ^eIsrael tāngsŭn pawl cun dingfellonak an tuah lo ding ih,
Thuphan an rel lo ding,
An kâ sungah bumnak lei hmuh a si lo ding;
Ziangahtile zohman ih thlaphanter loin
An ei ding ih an cawlhahdam ding,” tiin.
14 ^fMaw Zion fanu, hlasak aw!
Maw Israel, au aw!
Maw Jerusalem fanu,
Na thinlung zaten lungawi awla lungawi aipuangin um aw!
15 ^gJehovah in nangmah dāntatnakpawl cu a lahlo zo,
Na doral a hlăwnhlo zo.
Israel Siangpahrang, Jehovah cu nan lakah a um;
Siatnak na hmu nawn lo ding.
16 ^hCuih ni ah Jerusalem hnenah,
“Ṭih hlah;
Zion, na kutpawl cak loin um hlah seh.
17 ⁱJehovah na Pathian cu nan lakah a um,
Runtu ding Micak Pa cu;
Anih cu nan parah lungawinak thawn lungawi aipuangin a um ding,
A duhdawtnak ruangah lo kawk lo ten a um ding,
Anih cu hlasaknak thawn nan parah lungawi aipuangin a um ding,” tiih sim a si ding.
18 ^j“Ruah cia mi puaipawl hrangih riahsia mipawl cu ka hruaikhawm hai ding,
Annih cu na hnen ihsin ka hruaihlo,
Annih cu ngunkhuai ah le zahpium ah an cang.
19 ^kZoh hnik, cuih cān ah nangmah lo dekcăwktu zaten dān ka tat ding;
Kebái ka run ding ih,
Dawisuah mipawl ka khawm ding;
Leilung tlun hmun kip ih an ningzahnak cu
Thangṭhatnak le hminthannak ah ka thlĕngsak hai ding.
20 ^lCuih cān ah, ka lo fĭnkhawm tikah,
Ka lo hruailut hai ding;
Ziangahtile leilung miphunpawl zate lakah
Na mithmuh ih na vanneihnak ka tundinsal tikah,
Hminthannak le thangṭhatnak ka lo pe ding,” tiah Jehovah in a ti.

3:9^a Isa 19:18; 57:19; Zef 2:11

3:10^b Sam 68:31; Isa 18:1; 60:6-7

3:11^c Suah 15:17; Pui 26:19; Sam 59:12; Isa 2:12; 5:15; 29:22; Joe 2:26-27

3:12^d Isa 14:30, 32; 50:10; 66:2; Jer 29:12-13

3:13^e Pui 26:6; Sam 119:3; Eze 34:13-15; Mik 4:7; Zef 2:7; Thu 14:5

3:14^f Isa 12:6; 51:11; Zek 2:10; 9:9

3:15^g Isa 54:14; Thu 18:20

3:16^h Job 4:3; Isa 25:9; 35:3-4; Heb 12:12

3:17ⁱ Isa 40:1-2; 62:4-5; 63:1; 65:19; Hos 14:4; Joe 2:21

3:18^j Sam 42:2-5

3:19^k Isa 14:1-2; 60:18; Eze 34:16; Mik 4:6; Zek 8:23

3:20^l Dnp 26:18-19; Isa 56:5; 66:22; Jer 29:14; Eze 37:12; Joe 3:1