BibleThianghlim – Efesa

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Efesa

1 2 3 4 5 6

A ngantu: Paul
A siartu: Efesa khua ih zumtupawl
Ngan kum: A.D. 60

Paul cu a missionary khualtlawn a vei hnihnak ah Anṭiok lamih a kir phahah cān rei lo te sung Efesa khua a pál (Apo 18:19-20). Nehhnuah rawngbawlnak hlawhtling zet neiin kum thum sung a ra umsal (Apo 19). A missionary khualtlawn a vei thumnak cem lamah Jerusalem ih a kir phahah Efesa elder-pawl a táwng hai (Apo 20:17-38). Paul in Rom khawpi ih a hmaisa thawng a tlak laiah, a rak dĭn zo mi kawhhranpawl hnenah ca a kuat. Pakhat cu Efesa kawhhran hnenah a kuat.

Efesa cu Rom uknak hnuaiih um, Asia ramṭhen sungih khawpi thupi a si, Asia Minor ih sumdawnnak hmunpi le năwmcennak le milem biaknak hmunpi a si.

Zumlotupawl in pathian tampi an rak bia. An khawzingnu Diana hi an sakhua ih langsarbik a si. Paul ih sim mi Khrih thu in Diana sakhua a hnînter. Cumi in dokalhnak nasa zet a suakter (Apo 19:23-41).

Hih cakuat hi Paul in milem biaknak hmunpi ah Khrih hrangih nung dingin Efesa khua ih zumtupawl thapeknak hrangah A.D. 60 hrawngih a kuat mi a si.

Kannih zumtu in Khrih hrangih kan nun tikah, ropitnak cu “Khrih Jesu ruangah san hmuahhmuah ah, kumkhuaih kumkhua tiangin kawhhran ah um seh” (3:21) ti mi cu Pathian in a co ding.

Thu Hlawm Ṭhen

I. Thuhmaihruai (1:1-2)
II. Khrih ih um ti cu ziang a si (1:3-3:21)
III. Khrih ih um a sinak milin ziangtin zumtu a nung ding (4:1-6:9)
IV. Zumtu in thlarau lam doawknak ah ziangtin a neh (6:10-20)
V. Thukharnak (6:21-24)

Cibaibûknak

1 ^aPathian duh zawngih Jesu Khrih-ih apostol a si mi Paul in, Khrih Jesu ih mirinum, Efesa khua ih mithiangpawl hnenah:

1:1^a 1Ko 1:1; Kol 1:1

2 ^aKan Pa Pathian le Bawipa Jesu Khrih hnen ihsin zangfahnak le hnangamdaihnak nan hnenah um hram seh.

1:2^a Rom 1:7

Khrih ah Thlarau lam Malsawmnak

3 ^aKan Bawipa Jesu Khrih-ih Pathian le Pa cu thangṭhatin um seh, anih cun van hmunpawl ah thlarau lam malsawmnak hmuahhmuah thawn Khrih ah mal in sawm. 4 ^bCuti vek thothoin, Pathian in leilung hram a bun hlanin duhdawtnak ruangah, amai hmaika ih thianghlim le sawisel ding um lo kan si thei nak dingah, Khrih ah in rak hril zo. 5 ^cPa Pathian in amai duhdān amai lunghmui zawng bangtukin, Jesu Khrih in amai hnen roriah fa si dingin in rak ruat. 6 ^dA zangfahnak ropi kan thangṭhat thei nak dingah cuti vekin a tuah a si. Cuih zangfahnak cu a Duhdawt Mi ah cun a lakin in rak pe.

1:3^a 2Ko 1:3; 1Pe 1:3

1:4^b Kol 1:22; 2Th 2:13

1:5^c Rom 8:14-15, 29; 1Ko 1:21; Kol 1:19

1:6^d Mat 3:17

7 ^aA zangfahnak a luanliam bangtukin amah ah a thisen zarah mawhsualnakpawl ngaidamnak, tlennak kan nei. 8 Cuih zangfahnak cu fimnak hmuahhmuah le theihthiamnak hmuahhmuah thawn Pa Pathian in khatliamin in vur a si. 9 ^bA lunghmui zawng zulhih amah ih a thil ti tum, a duhnak thuthup cu kan hnenah in theihter zo. 10 ^cCumi cu famkimnak cān bikhiah ṭhen a thlen tikah, Khrih ah cun thil ziangkim, van ih thil um mipawl le leitlun ih thil um mipawl hmunkhat ih a hruaikhawm thei nak dingah a si. 11 ^dAmai tumtahnak in a rak remruat cia ruangah Khrih ah ro conak khal kan rak ngah a si, anih cu thil ziangkim amai duhdān vekih tuahsuaktu a si. 12 Cutin Khrih parih ruahsannak a rak nei hmaisa tu kannihpawl hi mi in a ropitzia an thangṭhatnak kan rak si ding.

1:7^a Rom 3:24-25

1:9^b Rom 16:25

1:10^c Rom 5:6; Gal 4:4; Kol 1:20

1:11^d Rom 8:29-30; Heb 6:17

13 ^aNannih khal in thutak kamsuakthu nan rundamnak thuthangṭha hna ih nan rak theih tikah, Khrih cu nan zum. Amah nan zum hnuah Pathian in tiamkam mi Thlarau Thianghlim in tacik a lo khĕn. 14 ^bPathian in a lei ih, a neih mipawl a tlen lai hlanlo, Thlarau Thianghlim hi kan co ding mi ro amahkhānnak a si, cu cun Pathian ropitzia thangṭhat ko in tuah.

1:13^a Rom 16:3; Kol 1:5

1:14^b Rom 3:24; 2Ko 5:5

Lungawi Thu Sim le Thlacam

15 ^aCuruangah kei khal in, Bawipa Jesu nan zumnak le mithiangpawl hmuahhmuah nan duhdawtzia ka thei. 16 ^bCumi ruangah ka thlacamnak ah ka lo máng ih, nan hrangih lungawi thu sim ka bang lo. 17 ^cKan Bawipa Jesu Khrih-ih Pathian, ropitnak Pa cun amah thei dingah, Thlarau fimnak le phuanlăngnak lo pe hram seh. 18 ^dA lo kawhnak ruahsannak le a ro khatliam ropitzia cu ziang a si ti mithiangpawl lakih nan theih thei nak dingah, nan theihthiamnak mit cu vanter si hram seh. 19 ^eCule a huham nasa zetih hna a ṭuan bangin kannih zumtupawl lamih a huham ropi zet cu nan theih thei nak ding hrang khalah thla ka cam. 20 ^fCuih huham hmangin Pathian cun Khrih ah a ṭuan ih anih cu mithi lak ihsin a kaitho, cule van hmunpawl ah a vawrh lamah a toter. 21 ^gAnih cu Pathian in uktu hmuahhmuah le thuneitu hmuahhmuah siseh, huham hmuahhmuah le lalnak hmuahhmuah le tuih san lawng si loin, a ra thleng lai ding mi san khalih hmin sak mi hmuahhmuah ih hmin tlun sangpi ah a toter.

1:15^a Kol 1:4

1:16^b Rom 1:8, 10

1:17^c Joh 20:17; Kol 1:9

1:18^d Rom 8:28; Kol 1:12; Heb 6:4

1:19^e Isa 40:26; Kol 1:29

1:20^f Mar 16:19; Apo 2:24

1:21^g Mat 12:32; Kol 1:16

22 ^aCule Pathian in thil ziangkim cu Khrih-ih ke thuaiah a ret ih, kawhhran hrangah thil ziangkim tlunih lu si dingah Pathian in a ruat. 23 ^bCuih kawhhran cu a taksaruangpum a si ih, ziangkimih ziangkim tlamtlingtertu amai famkimnak cu a si.

1:22^a Mat 22:44; 1Ko 11:3; Kol 1:18

1:23^b Joh 1:16; 1Ko 12:27

Thihnak ihsin Nunnak Ah

1 ^aCule nannih mawhsualnakpawl le sualpawl ih thi zo mi kha a lo nungter zo. 2 ^bCupawl ah cun kha laiah khan, nannih cu hi khawvel dān vekin, boruak ih thuneihnak lal, atu-ih thulung lo fātepawl lakih hna a ṭuan rero tu thlarau duh zawngin nan rak nung. 3 ^cCupawl lakah kannih khal kan zaten a liam cia mi cān ah kan tisa câkhiarnak tuahin, tisa le lungthin câkhiarnak tuahin kan rak um dah ve. Cule mi dang pawl vek thothoin kan suahkeh in thinlingnak fāte kan rak si.

2:1^a Kol 2:13

2:2^b Joh 12:31; Rom 11:30; 12:2; 1Pe 4:3

2:3^c Gal 5:24

4 ^aAsinan zahngainak tam zet neitu Pathian in a duhdawtnak maksak thawi in rak duhdawt ruangah, 5 ^bmawhsualnakpawl ih thi kan rak si lai hmanah, Khrih zawngah nuntlangter kan si, zangfahnak ih rundam nan si. 6 ^cCule Khrih Jesu ah in kaithotlang ih, van hmunpawl ah khin in totlangter. 7 ^dCutin a thleng lai ding mi sanpawl ah Khrih Jesu thawngin kanmah lamih a ngilneihnak in a zangfahnak lĕn natsatzia a lăngter thei nak dingah a si. 8 ^eZiangahtile zangfahnak in zumnak thawngih rundam nan si, cucu nanmah ihsi suak a si lo, Pathian thilpek a si. 9 ^fṬuannak ruangah a si lo, cuti a si lo ahcun, mi an tluangkhâwng pang ding. 10 ^gZiangahtile kannih cu amai kutsuak, hna ṭha pawl ṭuan dingih Khrih Jesu ih sersiam mi kan si, cuih hna ṭha pawl cu kan tuah dingah Pathian in a hlankhanin a rak timtuah cia.

2:4^a Joh 3:16

2:5^b Joh 5:24; Apo 15:11

2:6^c Rom 6:5

2:7^d Rom 2:4; Tit 3:4

2:8^e Rom 3:2

2:9^f Dnp 9:5; Rom 4:2; 1Ko 1:29; 2Ti 1:9; Tit 3:5

2:10^g Isa 29:23; Tit 2:14

Khrih ah Pumkhat

11 ^aCuruangah nannih hlanih suahkeh ihsi Zentel si cia, taksa ah kut ih serh zim tan an ti mipawl in serh zim tan lo tiih an lo kawh mi nan si ti kha cîng ringring uh. 12 ^bCu laiah nannih cu Khrih nei loin, Israel khua le ti ihsin khawtluang mi siin, tiamkam thukhampawl ah mikhual siin, ruahsannak nei lo le leitlun ah Pathian nei loin nan rak um. 13 ^cAsinan atu-ah cun Khrih Jesu ah hla zetih a rak um dah mi nannih cu Khrih thisen in naite ah a lo umter.

2:11^a Kol 2:11

2:12^b Isa 14:1; Gal 3:17; 1Th 4:13

2:13^c Kol 1:20

14 ^aZiangahtile amah cu kan remawknak, pahnih pakhat ih tuahtu, a laiih in ṭhentu phar ṭhiattu a si. 15 Anih cun ralawknak, Dān thupekpawl zirhawknak hmangih an pek sâwngsin mi hman a taksa in a ṭhiathlo, cutin amah ah mi pahnih cu minung thar pakhat ah tuahin remawknak a tuah. 16 ^bRalawknak cu amah ah a thah zo ruangah, pahnih cu khraws ruangin Pathian ah taksaruangpum pakhat ah a remawter thei ding. 17 ^cCule anih cu a ra ih hla zetih um nanmahpawl hnenah le nai teih a um mipawl hnenah remawknak thuthangṭha a sim. 18 ^dZiangahtile amah thawngin Thlarau pakhat hmangin Pa hnenih luh thei nak kan nei veve.

2:14^a Joh 14:27; 1Ko 2:14; Gal 3:28

2:16^b 2Ko 5:18; Kol 1:20

2:17^c Isa 57:19; Luk 2:14

2:18^d 1Ko 12:13; Kol 1:12

19 ^aCuruangah mikhual le ram dang mi nan si nawn lo ih, mithiangpawl thawi ram khat mi le Pathian sungkua sung tel nan si sawn a si. 20 ^bṬohram a si mi apostolpawl le profetpawl parih sak mi nan si ih, Jesu Khrih amah rori cu a kilih lung pawimawhbik ah a cang. 21 ^cAmah ah cun sak mi inn pumpi cu rem zetih buntlang thluh a si ih, Bawipa ah temple thianghlim si dingin a ṭhang vivo. 22 ^dNannih khal amah ah Thlarau in Pathian cēnnak hmun dingah sakkhawm mi nan si.

2:19^a Gal 6:10; Fil 3:20

2:20^b Mat 16:18; Apo 4:11; 1Ko 3:9; 1Pe 2:4-8

2:21^c 1Ko 3:16-17

2:22^d 1Ko 3:16

Paul cu Zentelpawl hnenih Thusimtu a Si

1 ^aHimi ruangah keimah, Paul hi nannih Zentelpawl hrangah Khrih Jesu ih thawngtla ka si.

3:1^a Apo 23:18; 2Ti 1:8; Flm 1:1, 9

2 ^aPathian zangfahnak kilkhawi hna cu nan hlawknak ding hrangah pek ka si kha nan rak thei zo. 3 ^bHi hlanah tawiteih ka rak ngan zo vek khan, thuthup cu phuansuahnak in ka hnenah i theihter zo. 4 ^cCumi nan siar tikah, Khrih-ih thuthup ka theihzia nan theithiam ding. 5 ^dCumi cu atu-ih amai apostol thianghlim pawl le profetpawl hnenih Thlarau in a phuanlăng vekin, san dangdang pawl ah minung fapapawl hnenah theihter a rak si lo. 6 ^eCumi cu thuthangṭha ruangah Khrih Jesu ah Zentelpawl ro copitu an si ding le taksaruangpum bangrep le a thutiam copitu an sinak ding hi a si. 7 ^fA huham hnaṭuan hmual nei zetin ka hnenih pek a si mi Pathian zangfahnak thilpek bangtukin, cuih thuthangṭha rawngbawltu ah ka cang.

3:2^a Kol 1:25

3:3^b Rom 16:25; 1Ko 2:10

3:4^c 2Ko 11:6

3:5^d Rom 16:26

3:6^e Eze 47:22; Rom 8:17

3:7^f Rom 12:3; 1Ko 3:5; Kol 1:29

8 ^aMithiangpawl hmuahhmuah lakih a tebik hnakih tesawn keimah hnenah hawlsuah băn rual lo Khrih-ih lennak cu Zentelpawl hnenih ka phuan thei nak dingah, hi zangfahnak hi ka hnenih pek a si. 9 ^bCule Jesu Khrih hmangih thil ziangkim sersiamtu Pathian hnenih leilung semtir ihsin thuhih a um mi ṭawmawknak thuthup cu mi hmuahhmuah hmuter dingin, cuih zangfahnak cu in pe. 10 ^cVan hmunpawl ih uktupawl le thuneitupawl hnenah atu-ah kawhhran hmangin Pathian fimnak tinkim theihter a si thei nak ding khalah a si fawn. 11 Cumi cu Pa Pathian in Khrih Jesu kan Bawipa ah a rak hlensuah mi a kumkhaw thil tum vek khan a si. 12 ^dAmah ah ralṭhatnak le ngăm zetih luh thei nak cu amah zumnak ruangin kan nei. 13 Curuangah nan hrangih ka harsatnakpawl ah nan beidawng lo dingin ka lo ngen, cuih harsat tuarnak cu nan sunlawinak a si.

3:8^a Rom 2:4; 1Ko 15:9

3:9^b Rom 16:25

3:10^c Rom 11:33; 1Ko 2:7; Kol 2:10, 15; 1Pe 1:12

3:12^d 2Ko 3:4; Heb 3:14; 1Joh 2:28

14 ^aHimi ruangah kan Bawipa Jesu Khrih-ih Pa hnenah ka khuk ka bil ṭheu. 15 Van le leitlun ih sungkua hmuahhmuah cu amai hmin sak mi an si. 16 ^bA Thlarau hmangih a thiltitheinak ih nan sung lam minung cahternak cu a ropitnak lendān zulhih lo pe dingin thla ka cam. 17 Cule zumnak in Khrih cu nan thinlung sungih a cēn thei nak ding hrang khalah thla ka cam; nannih cu duhdawtnak ih hram bun mi le phun hngeh mi nan si, 18 ^ccutin mithiangpawl hmuahhmuah thawn theih băn rual lo Khrih-ih duhdawtnak kauhzia, sauzia, thûkzia le sanzia cu ziang a si ti nan theithiam thei ding. 19 ^dCuih theih băn rual lo Khrih-ih duhdawtnak thei dingin, Pathian famkimnak hmuahhmuah thawi khahter nan si ding.

3:14^a Fil 2:10

3:16^b Rom 2:4

3:18^c Job 11:8

3:19^d Fil 4:7; Kol 2:10

20 ^aKanmah ih hnaṭuan ṭheu a huham zulhin, kan dil le kan ruah mi hmuahhmuah hnakih nasasawn ih ti thei tu hnenah, 21 ^bropitnak cu a hnenah Khrih Jesu ruangah san hmuahhmuah ah, kumkhuain kumkhua tiang kawhhran ah um hram seh. Amen.

3:20^a Rom 16:25

3:21^b Rom 11:36

Khrih Taksa ih Pumkhatnak

1 ^aCuruangah kei, Bawipaih thawngtla hin, kawh nan sinak milih nung dingah ka lo ngen a si. 2 ^bPhahniamawknak le zaidamnak hmuahhmuah thawn, thinsaunak thawn, duhdawtnak in pakhat le pakhat zāwiaw uh. 3 ^cRemnak ih ṭemkhawmin Thlarau ih pumkhatnak kaih hngeh ding nasa zetin zuam uh. 4 ^dKawh nan sinak ah ruahsannak pakhat ih kawh nan si bangin, taksaruangpum pakhat le Thlarau pakhat, 5 ^eBawi pakhat, zumnak pakhat le baptisma pakhat a um ih, 6 ^fziangkim tlunih um, ziangkim fángsuaktu le nan zate sungih um, mi hmuahhmuah ih Pa le Pathian pakhat lawng a um.

4:1^a Rom 8:28; Fil 1:27

4:2^b Kol 3:12-13

4:3^c Rom 15:5; Kol 3:15

4:4^d Rom 12:5; 1Ko 12:13

4:5^e 1Ko 8:6

4:6^f Rom 11:36

Thlarau Thilpekpawl

7 ^aSikhalsehla Khrih-ih thilpek tahdān bangtukin zangfahnak cu kanmah bulpâk hnen cio ah pek a si. 8 ^bCuruangah anih in,

4:7^a Rom 3:24; 12:3; 1Ko 12:7, 11

4:8^b Sam 68:18; Kol 2:15

“Tlun sang ih a kaisoh ah khan
Sál tang pawl cu sál ah a hruai ih
Thilpekpawl minung hnenah a pe,”

tiah a ti.

9 “A kaiso,” ti hi ziang a tinak a si? Lei hmun hnuai lam khalah a vung suk hmaisa tinak a si. 10 ^aThil hmuahhmuah a famkimter thei nak dingah, a sukthlatu kha vanpawl hmuahhmuah tlun khalih kaisotu thotho kha a si.

4:10^a Thf 30:1-4

11 ^aCule anih in mi hrekkhat cu apostol sinak, mi hrekkhat cu profet sinak, mi hrekkhat cu evangelist sinak, mi hrekkhat cu pastor le zirhtu sinak a pe. 12 ^bRawngbawl hna ṭuansuahnak hrangih mithiangpawl pitlinternak dingah le Khrih taksaruangpum tuahṭhatnak dingah a si. 13 ^cCumi cu kan zaten zumnak le Pathian Fapa theihnak ah kan lung a rual ih, Khrih-ih famkimnak ruangâm tahnak ah mipitling kan si tiang hrangah a si.

4:11^a Rom 12:6; 2Ti 4:5; Jam 3:1; 2Pe 3:2

4:12^b Rom 14:19; 1Ko 12:27

4:13^c Joh 1:16; Kol 1:28

14 ^aCuti cun minungpawlih bumawknak le fimhrăwkhrawlnak in minungpawl bum tahratih, hruaipēn tumtupawlih zirhnak thli hrang kip in khat lam le khat lamih a hranpet rero mi nauhak kan si nawn lo ding. 15 Cuhnakin duhdawtnak in thutak cu phuangin, lu a si mi Khrih ah thil ziangkimah kan ṭhanglian thei sawn ding. 16 ^bAmah Khrih hnen ihsin taksaruangpum zaten rem zetih pehzăwmawin an kaikhawmawtlang. Taksaruangpum ṭêk kip in anmai hna fingfing ṭha zetin an ṭuan, cutin hlikhlăwk kip in taksaruangpi cu a kaikhawmtlang ṭheh. Curuangah taksaruangpi cu duhdawtnak ah amah ten a ṭhang ih, a tuahṭhaaw.

4:14^a 1Ko 14:20; Jam 1:6

4:16^b 1Ko 12:7; Kol 2:19

Tleu Fāte vekih Nun

17 ^aCuruangah himi hi ka sim ih Bawipa ah ka theihter a si, lungthin mumal lo pu, Zentel dang pawl nundān vekin nung nawn hlah uh. 18 ^bCupawl cu an thinlung mit a câwt ruangah le anmah ih um theihlonak ruangah an theihthiamnak cu a thim ih, Pathian nunnak ihsin ṭhenhranin an um. 19 ^cCupawl cun zianghman pawisak nei loin, anmai duhdān dān in an nung ih, thil bawrhhlawh tinkim duham zetih tuah dingin anmah te fihnungza hursual tuahnak ah an peaw.

4:17^a Rom 1:21

4:18^b Rom 1:21; 2Ko 3:14

4:19^c Rom 1:24; Kol 3:5; 1Ti 4:2; 1Pe 4:3

20 Asinan Khrih thu zirh nan sidān cu cuti vek a si lo. 21 Jesu ah thutak a um vekin hna in a thu nan rak thei ih amah ih zirh zo mi nan si taktak ahcun, 22 ^abum câknak zulhih a se thluh mi nan hlanlai umdān minung hlun cu hlîtthla uh. 23 ^bCule nan khawruahnak thlarau tharter uh. 24 ^cDingfelnak le thianhlimnak diktakih Pathian in amah vekih a sersiam mi minung thar cu hruk uh.

4:22^a Rom 6:6; Kol 3:5, 8-9; Heb 3:13; 1Pe 2:1

4:23^b Rom 12:2; Kol 3:10

4:24^c Rom 6:4

Thlarau Thianghlim Thinnater Hlah Uh

25 ^aCuruangah thuphan sim bansanin, “Mi kip in anmai innhnen thawn thudik rel hai seh,” ziangahtile kannih cu pakhat le pakhat taksa ṭêktăwnaw kan si.

4:25^a Zek 8:16; Rom 12:5; Kol 3:9

26 ^a“Nan thinheng khalle, sual tuah hlah uh”; nan thinlingnak cu ni in tlâkpi hlah seh. 27 ^bDiabol hmun kian fawn hlah uh. 28 ^cRûkrûkhmang cun ru nawn hlah seh, cuhnakin mitlasam hnenih pek ding a neih thei nak dingah a kut in thil ṭha tuahin hnaṭuan sawn seh.

4:26^a Sam 4:4; Mat 5:22

4:27^b 2Ko 2:10

4:28^c Gal 6:10; 1Th 4:11

29 ^aZohman in nan kâ ihsin ṭawng sia suakter hlah uh, a theitupawl hnenih zangfahnak pe thei tu ding, tuahṭhatawknak dingih ṭul mi suak sawn seh. 30 ^bCule Pathian Thlarau Thianghlim thinnater hlah uh, tlennak ni hrangah nannih cu cuih Pathian Thlarau Thianghlim ih tacik khĕn nan si. 31 Siatkhâtnak, thinlingnak, thinhengnak, aukionak, mi relsiatnak hmuahhmuah cu nan hnen ihsin hlăwnhlo uh, lungput siava hmuahhmuah thawn. 32 ^cCule pakhat le pakhat parah ngil neiin lainatnak neităwn uh. Khrih ruangah Pathian in a lo ngaidam bangin, pakhat le pakhat ngaidam awtăwn uh.

4:29^a Mat 12:36; Rom 14:19; Kol 3:8

4:30^b Kol 3:8; 1Pe 2:1

4:32^c 1Pe 3:8

Duhdawtnak ih Feh

1 ^aCuruangah duhdawt zet mi fale vekin, Pathian tidān cawngtu si uh. 2 ^bCule Khrih khal in in rak duhdaw ih rimhmui si dingah Pathian hnenah amah le amah thilhlăn ah le thawiawknak ih a pekawk vekin, duhdawtnak ah um uh.

5:1^a Mat 5:48

5:2^b Gal 1:4; Heb 7:27

3 ^aAsinan nunau-mipa sualnak le bawrhhlawhnak hmuahhmuah, asilole duhhamnakpawl cu nan lakah um hrimhrim hlah seh, cupawl cu mithiangpawl ih ti dingah a mawi lo. 4 Ti ding mawi lo mi thil bawrhhlawh pawl, thu atthlak relnakpawl le capoh bawrhhlawh thu relnakpawl cu um hlah seh, cuhnakin lungawi thu sim sawn uh. 5 ^bZiangahtile nunau-mipa sualnak tuahtu siseh, mibawrhhlawh siseh, milem betu a si mi miduhham siseh, hipawl in Khrih le Pathian uknak ram ah ro zianghman an nei lo ti nan thei. 6 ^cZohman in zianghmanlo ṭawngkam menmenin lo bum hlah hai seh, ziangahtile hi thilpawl ruangah Pathian thinlingnak cu thulung lo fātepawl parah a thleng ṭheu. 7 Curuangah an hnenih teltu va si hlah uh.

5:3^a 1Ko 6:18; Kol 3:5

5:5^b Mat 25:34; Kol 3:5

5:6^c Mar 13:5; Rom 1:18

Tleu ih Feh

8 ^aZiangahtile a hlanah nannih cu thim nan rak si dah, asinan atu-ah cun Bawipa ah tleu nan si. Tleu fāte vekin nung uh. 9 ^bZiangahtile Thlarau rah cu ṭhatnak hmuahhmuah, dingfelnak hmuahhmuah le thutak hmuahhmuah pawl ah a um a si. 10 ^cBawipaih cohlan tlak cu ziang a si ti theihfiang zuam uh. 11 ^dCule rah nei lo mi thim thil ti a tuahtupawl thawn pawlkăwmaw hlah uh, cuhnakin an dik lozia theifiangter sawn uh. 12 Ziangahtile annih ih a thuptei an tuah mi thilpawl cu rel men ding hman ningzakza a si. 13 ^eAsinan thil ziangkim tleu ih a theihfiangter mipawl cu an langfiang a si, ziangahtile thil ziangkhal langfiang ko a tuahtu cu tleu a si. 14 ^fCuruangah,

5:8^a Luk 16:8; Joh 8:12

5:9^b Mat 7:16-20; Rom 15:14; Gal 5:22

5:10^c 1Ti 5:4

5:11^d Rom 13:12; 2Ko 6:14

5:13^e Joh 3:20-21

5:14^f Isa 26:19; 60:1; Mal 4:2; Joh 5:25; Rom 13:11

“Nang itthat ṭhang aw,
Mithi lak ihsin tho aw,
Cule Khrih in tleu a lo pe ding,”

tiah a ti.

Fimnakih Feh

15 Curuangah mi-âpawl vekin nung loin, mifimpawl vekin fimkhurten nung uh. 16 ^aNitla an ṭhat lo ruangah, a ṭha thei bikin nan cān hmang uh.

5:16^a Kol 4:5

17 ^aCuruangah â hlah uh, Bawipaih duh zawng ziang a si ti theithiam sawn uh. 18 ^bCule sabit zu ri hlah uh, ziangahtile cumi cun pawisaklonak ah mi a hruai; Thlarau ih khatin um sawn uh. 19 ^cSam hlapawl, thangṭhatnak hlapawl le thlarau lam hlapawl in be awtăwn uhla, Bawipa hnenah nan thinlung sungin hlasak uhla hlaseh uh. 20 ^dThil ziangkim ruangah Pa a si mi Pathian hnenah kan Bawipa Jesu Khrih hmin in lungawi thu sim ringring uh. 21 ^ePathian nan ṭihzah ruangah pakhat le pakhat tlulutawtăwn uh.

5:17^a Rom 12:2; Kol 1:9

5:18^b Isa 28:7; Luk 1:15; Rom 13:13

5:19^c 1Ko 14:15; Kol 3:16

5:20^d Kol 3:17; Heb 13:15

5:21^e Gal 5:13; 1Pe 5:5

Nupipawl le Pasalpawl

22 ^aNupipawl, Bawipa hnenih nan tlukluh vekin, nanmai pasal hnenah tlulut uh. 23 Ziangahtile Khrih cu kawhhran lu a si bangin, pasal khal nupi-ih lu a si ih, Khrih cu taksaruangpum Rundamtu a si. 24 Curuangah kawhhran cu Khrih hnenih a tlukluh vekin, nupipawl cu ziangkimah anmai pasal hnenah tlulut hai seh.

5:22^a 1Ti 2:12; Tit 2:5; 1Pe 3:1, 5

25 ^aPasalpawl, Khrih khal in kawhhran a rak duhdaw ih, cumi hrangih amah rori a pekawk bangin, nan nupi duhdaw uh. 26 ^bCutin kawhhran cu ti thawi khawlh vekin kamsuakthu hmangin Khrih cun a thianghlimterin a faiter a si. 27 ^cCutin kawhhran ropi cu bāl kai lo, sawngkâwr lo le cuvek thil zianghman pu loin amah hnenih a hlăn thei nak dingah, kawhhran cu thianghlim le sawisel ding um lo a si thei nak dingah a khawlhfai a si. 28 Cu vekin mipapawl in an nupi cu anmai taksaruangpum vek roriih duhdaw ding an si. A nupi a duhdawtu cu amah le amah a duhdawaw a si. 29 Ziangahtile zohman in amai taksa a hua dah lo, cuhnakin Bawipa in kawhhran a câwm ih a duat bangin a taksa cu a câwm ih a duat sawn a si. 30 ^dZiangahtile kannih cu Khrih-ih taksaruangpum, a titsa le a ruh pawlih ṭêk kan si. 31 ^e“Ziangahtile himi thu ruangah mipa in a nu le a pa a tân ta ding ih a nupi a kăwp ding. Cule pahnih cu taksa pumkhat ah an cang ding,” tiih ngan a si.

5:25^a Kol 3:19

5:26^b Joh 17:19; Heb 2:11

5:27^c 2Ko 4:14

5:30^d Rom 12:5; 1Ko 12:27

5:31^e Sem 2:24; Mat 19:5; 1Ko 6:16

32 Hihi thuthup ropi a si, Khrih le kawhhran thuhla ka sim sawn a si. 33 Ziangkhal va si sehla, nanmah lakah mi pakhat khat in amah le amah a duhdawtawk bangin a nupi duhdaw seh, cule nupi khal in a pasal upat seh.

Nu le Pa le Fāte

1 ^aFalepawl, Bawipa ah nan nu le nan paih thu lung uh, ziangahtile cucu thil dik a si. 2 ^b“Na nu le na pa upat aw,” cumi cu thutiamkamnak thawi thupek hmaisabik a si. 3 ^c“Cumi cu na ṭhatnak ding le leitlun ih na damreinak ding hrangah a si.”

6:1^a Thf 6:20; Kol 3:20

6:2^b Suah 20:12; Dnp 5:16

6:3^c Suah 20:12; Dnp 5:16

4 ^aCule nannih palepawl, nan fātepawl thinling dingin tuah hlah uh, cuhnakin Bawipaih nunzirhnak le nunsimnak ah anmah cu kaihruai sawn uh.

6:4^a Thf 13:24; Kol 3:21

Sálpawl le an Bawipawl

5 ^aSálpawl, Khrih-ih thu nan lun bangin, ṭih le khūrin le thinlung takin, minung dān ih nan bawipawl hnenah thulung mi si uh. 6 ^bAn lo zoh lai lawngah an lunghmuiter tum loin, Khrih-ih sál nan si vekin nan thinlung ihsin Pathian duh zawng tuah sawn uh. 7 ^cDuhsaknak ṭha thawn minung hnenah si loin, Bawipa hnenih hnaṭuan vekin ṭuan uh. 8 ^dSál siseh, miluat siseh zokhal thil ṭha a tuahtu cun Bawipa hnen ihsin cumi vek cu a ngahsal ding ti nan thei.

6:5^a Kol 3:22; 1Ti 6:1; 1Pe 2:18

6:6^b Rom 6:22

6:7^c Kol 3:23

6:8^d Mat 16:27; Kol 3:24

9 ^aCule nannih bawipawl, cuti vek thothoin an parah tuah uh. Nannihih Bawi khal van ah a um ti le anih in mi thleidan a nei lo ti theiin annih cu hro hlah uh.

6:9^a Job 31:13; Apo 10:34

Pathian Ralthuam

10 ^aA netabikah ka u le ka nau tla, Bawipa ah le a cahnak ih thiltitheinak ah cak zetin um uh. 11 ^bDiabol-ih phiarthupnakpawl cu doin nan dīn thei nak dingah, Pathian ralthuam hruk uh. 12 ^cZiangahtile kan buan mi hi titsa le thisen an si lo, uktupawl, thuneitupawl, hi khawvel thim tlunih uktupawl le van hmunpawl ih thlarau sualrál pawl an si sawn. 13 ^dCuruangah ni ṭha lo ni ih nan khamawk thei nak dingah le ziangkim nan tuah hnu khalih nan dīn thei nak dingah, Pathian ralthuam cu la uh. 14 ^eCuruangah dīng hnget uh, nan tâi cu thutak in khap uhla, dingfelnak awmphaw hruk uh. 15 ^fCule remnak thuthangṭha timlamnak cu nan ke ah bun uh. 16 ^gCupawl hmuahhmuah tlunah, zumnak ralphaw la uhla, cumi cun misualrál pa ih kah mi thál fung alh hmuahhmuah nan mitter thei ding. 17 ^hCule rundamnak thir lukhum le Thlarau ralnâm a si mi Pathian kamsuakthu la uh. 18 ⁱThlacamnak tinkim le dilnak tinkim in ziangtik lai khalah Thlarau ah thlacam uh. Cun mithiangpawl hmuahhmuah hrangah taimaknak hmuahhmuah le dilnak hmuahhmuah thawn ngaihven uh. 19 ^jCule ka kâ ka ān tikah, phuan ding mi thu ka hnenah pek a si ih, cutin ralṭha zetin thuthangṭha thuthup ka theihter thei nak ding hrang khalah in dilsak uh. 20 ^kKei cu thuthangṭha ruangah cikcin ih ṭawn mi aiawh palai ka si. Ka sim ding vekih ralṭha zetih ka sim thei nak dingah thla in camsak uh.

6:10^a Hag 2:4; 1Ko 16:13; 2Ti 2:1

6:11^b Rom 13:12; 1Th 5:8

6:12^c Rom 8:38; Heb 2:14

6:13^d 2Ko 6:7

6:14^e Isa 11:5; 54:11; 59:17; 1Th 5:8

6:15^f Isa 52:7; Rom 10:15

6:16^g Mat 5:37; 1Joh 5:4

6:17^h Isa 49:2; 59:17; Heb 4:12

6:18ⁱ Mat 26:41; Luk 18:1; Kol 1:3

6:19^j Rom 16:25; 1Th 5:25

6:20^k Apo 21:33

Cibaibûknak Neta

21 ^aAsinan nannih khal in ziangtin ka um ti ka thuhla nan theih thei nak dingah, Bawipa ah duhdawt mi unaupa le rawngbawltu rinum Ṭaikikas in thil ziangkim a lo theihter ding. 22 ^bHimi tumtahnak rori hrangah kan thuhla nan theih thei nak dingah le nan thinlung a lo thlangăm thei nak dingah amah cu nan hnenah ka rak thlah a si.

6:21^a Apo 20:4

6:22^b Kol 4:7-9

23 ^aPa Pathian le Bawipa Jesu Khrih hnen ihsin hnangamdaihnak le zumnak thawi duhdawtnak cu unaupawl hnenah um hram seh. 24 Kan Bawipa Jesu Khrih catbang loih duhdaw taktak tu zate hnenah zangfahnak um hram seh. Amen.

6:23^a Gal 6:16; 1Pe 5:14