About Bible Thianghlim | ©

BibleThianghlim – 2 Peter

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

2 Peter

123

• A ngantu: Peter
• A siartu: Asia Minor sak lamih zumtupawl
• Ngan kum: A.D. 66-67

Thathoum zet Pentikos ni (A.D. 30; Apo 2 zoh aw) ih thil cang hnu a rei hlanah, Khrih-ih hnaṭuan siatsuah dingin zirhtu dik lo pawl an suak. Jesu in cuvek mipawl an ra suah ding thu a rak sim cia (Mat 7:15; 24:4-5, 11, 24-26; Mar 13:22-23) ih, Paul khal in cuvek mipawl an rat ding thu ralrinnak a rak pe (Apo 20:29-30).

Zumtupawl in a ra rero lai mi zirhtu dik lo pawl thu ah timtuahaw cia dingin apostol Peter in Peter cakuat pahnihnak hi a ngan (2:1). Judas cakuat hi Peter cakuat pahnihnak thawn bangawknak tampi a nei. Asinan Judas cun zirhtu dik lo pawl zumtupawl lakih um rero zo vekin a rel (Jud 4). Curuangah hi cakuat hi Peter in Judas cakuat hlanih a ngan mi a si men thei.

Peter in hi cakuat hi himi zumtupawl hnenih a vei hnihnak a ngan mi a si thu a rel (3:1). A cakuat hmaisa cu Asia Minor ram sak lamih hremnak a tuar rero tupawl hnenih a ngan mi a si. Anmah thotho hi Peter cakuat pahnihnak rak dawngtu an si. Hi cakuat hi Peter in Peter cakuat pakhatnak hnuih a ngan mi a si ruangah A.D. 66-67 hrawngih a ngan mi a si ding. A thi cing ding ti amah le amah a theiaw (1:13-14). Curuangah a ra thleng lai ding mi ṭihnungzapawl hrangih timtuahaw dingah cakuat nganbêt a duh (1:15).

Peter in a cakuat thawhnak lamah cun zirhtu dik lo pawlih thu a buaipi lo. Cuhnakin thlarau lam ṭhanlennak thu cipciarin a rel sawn (1:1-11). Ṭhanlen a ṭulzia a sim ih, ṭhanlen duhnak nei dingin anmah a năwrbêt. A tambik ah cun thlarau lam nun ih ṭhanlennak hrangih hmanrua a si mi Cathianghlim theihnak thu a sim uar. Peter in zumtupawl kha Cathiang ngaihven dingin a sawm, ziangruangahtile cumi lawng hi thuneitu le a dik mi umsŭn a si (1:12-21). Bung hnihnak ah Peter in Cathiang le thuṭhimnakpawl hmangin siatráltertu zirhtu dik lo pawl le hmuhsuamtupawlih thu a phawrhlang (2:1-3:13). A cakuat hi Pathian thuṭhennak le Khrih ratsalnak le ralrin peknak zulhih thapeknak in a net (3:14-18).

Peter-ih thusim mi hi san hmuahhmuah ih zumtupawl hrangah a thupi zet mi a si. Kan Bawipa le in Rundamtu Jesu Khrih-ih zangfahnak ah le theihnak ah rak ṭhan (3:18) lawngin misualrálpawlih sualnak lakah kan ding hnget thei ding.

1

Cibaibûknak

1 ^aJesu Khrih-ih sál le apostol a si mi, Simon Peter in, kan Pathian le Rundamtu Jesu Khrih-ih dingfelnak zarih kanmai neih mi vek zumnak sunglawi neitupawl hnenah:

1:1^a Rom 1:1; 3:21-26; Tit 2:3; 1Pe 1:1

2 ^aPathian le kan Bawipa Jesu theihnak ruangah nan hnenah zangfahnak le hnangamdaihnak cu karh sinsin hram seh.

1:2^a Rom 1:7; Fil 3:8

Pathian Kawhnak le Hrilnak

3 ^aA ropitnak le a ṭhatnak maksak hmangih in kotu theihnak zarah nunnak le Pathian ngaihsaknak hrangih kan ṭul mi zaten a Pathian sinak huham cun in pe zo a si. 4 ^bCuih thilpawl hmangin a nasa zet mi le a sunglawi zet mi thutiamkampawl in pe, cucu câkhiarnak ruangih leitlun ih siatnak thleng mi ihsin nan tlânsuak ih, thutiamkampawl hmangih Pathian mizia ṭawmpitu nan si thei nak dingah a si.

1:3^a Rom 8:28; 1Pe 1:5

1:4^b 2Ko 7:1; Efe 4:24; Heb 12:10; Jam 1:27; 1Joh 3:2

5 ^aCuti vek a si ruangah nasa zetin taimak suah uhla nan zumnak ah ṭhatnak, ṭhatnak ah theihnak, 6 ^btheihnak ah sūpawknak, sūpawknak ah tuarfainak, tuarfainak ah Pathian ngaihsaknak, 7 ^cPathian ngaihsaknak ah unau lainatawknak, unau lainatawknak ah duhdawtnak bêt uh. 8 ^dZiangahtile cuih thilpawl cu nanmah ah a um ih a ṭhan vivo asile, kan Bawipa Jesu Khrih nan theihnak ah ṭhahnem lo le rah nei loin nan um lo ding. 9 ^eAsinan cuih thilpawl nei lo tu cu mitcaw a si, hlapi a hmu thei lo ih, hi hlanih a sualpawl khawlhfaisak a si ti a hngilh a si.

1:5^a Kol 2:3

1:6^b Apo 24:25; Heb 10:36

1:7^c Rom 12:10; 1Th 3:12

1:8^d Joh 15:2; Kol 1:10; Tit 3:14

1:9^e Mat 1:21; Efe 5:26; 1Joh 2:11

10 ^aCuruangah u le nau tla, a lo kawhnak le a lo hrilnak fiangter dingin taimak suah sinsin uh, ziangahtile cumi nan tuah asile nan tlu dah riai lo ding. 11 ^bZiangahtile cuti vek cun kan Bawipa le Rundamtu Jesu Khrih ih kumkhaw uknak sungih luh thei nak cu nasa zetih pek nan si ding.

1:10^a Jud 1:24

1:11^b 2Ti 4:18

12 ^aCumi ruangah atu-ih thutak nan neih mi hi theiin, cumi ah hngehter si khal uhla, cuih thilpawl cu nannih lo theihtersal ringring ding hi ka daithlang lo ding. 13 ^bA si, hi puanthlam ih ka um sung cu lo theihthartersal ṭheu ih, lo cawkthawh cu dikin ka ruat. 14 ^cKan Bawipa Jesu Khrih in i hmuhter zo bangin, hi ka puanthlam hi a rei hlanah ka hlit tengteng ding ti ka thei. 15 ^dCuihtlunah ka fehsuah hnu khalih cuih thilpawl nan cīn ringring thei nak dingah taimak ka suah sinsin ding.

1:12^a Fil 3:1; 1Joh 2:21; 2Joh 1:2; Jud 1:5

1:13^b Isa 38:12; 2Ko 5:1, 4

1:14^c Joh 13:36; 2Ti 4:6

1:15^d Luk 9:31

Khrih Ropitnak le Simsungnak

16 ^aZiangahtile kan Bawipa Jesu Khrih-ih huham le a ratsalnak ding thupawl kan lo theihter laiah khan, hrăwkhrawl zetih phuahcawp thuanthu kan thlun lo ih, mit rori ih a cungnunnak hmutu kan si sawn. 17 ^bZiangah cutin ka ti tile Ropitnak Nasa zet ihsi a ra suak mi aw cun, “Hihi ka duhdawt zet mi ka Fapa a si, a parah ka lung a hmui zet,” ti thu a hnenih a rung thlen laiah khan Pa Pathian hnen ihsin cawimawinak le ropitnak a dawng.

1:16^a Mat 17:1-8; Mar 13:26

1:17^b Mat 3:17; 17:5; Mar 9:7; Luk 9:45

18 ^aTlang thianghlim ah a hnenih kan um laiah, van ihsi a rung thleng mi cuih aw cu kan thei a si.

1:18^a Mat 17:6

19 ^aCule rin tlak sinsin mi simsungnak thu kan nei, khua a van hlan le deirel arsi nan thinlung sungih a suah hlanlo simsungnak kamsuakthu cu thim lakih êng mi tleu vekih nan ngaihven asile, nan ti ṭha ding a si. 20 Cathiang sungih simsungnak thu hrimhrim hi mi pakhat khat hrilhfiahnak ihsi ra um a si lo ti hi a hmaisabikah thei uh. 21 ^bZiangahtile simsungnak thu cu milai duh zawngih ra a si dah lo, Thlarau Thianghlim ih a hruai hai vekin, Pathian mithianghlimpawl in an rak phuang a si sawn.

1:19^a Luk 1:78; 2Ko 4:6; 1Pe 1:10-11; Thu 22:16

1:21^b 2Sam 23:2; Apo 1:16; 2Ti 3:16; 1Pe 1:11

2

Profet dik lo le Zirhtu Dik Lo

1 ^aSihmansehla mipi lak khalih profet dik lo an um vek khan nan lakah zirhtu dik lo an um leh ding. Annih cun mi siatsuah thei zirhnak sual cu a thupten an run kenglut ding ih, anmah leitu Bawipa rori hman an hnáwng ding. Cule anmah ten cawp le cilhih siatralnak cu an parah an thlengter ding. 2 ^bCule mi tampi in an siatnak lamzinpawl cu an run thlun ding ih, anmai ruangah thutak lamzin cu thangsiatin a um ding. 3 ^c Duhhamnak ruangah bumnak ṭawngkampawl in anmai hlawknak dingah an lo hmang ding. Hlanlaipi ihsin anmah thuṭhennak cu a khawtlai dah lo ih, an siatralnak cu a itthat dah lo.

2:1^a Jer 6:13; Mat 7:15; 1Ko 6:20; 1Ti 4:1; Jud 1:4

2:2^b Jud 1:4

2:3^c 2Ko 2:17; 1Th 2:5

4 ^aZiangahtile sual a tuahtu vancungmipawl cu Pathian in a zuah hai lo ih, thuṭhensak dingin ^bhremnak hmun ah a thlak hai ih, hmun thim ah cikcin ih ṭawnin a khum sawn hai. 5 ^cCun amah ngaihsak lo pawlih umnak leitlun cu ti a likter ih, hlanlai leilung cu a zuah lo, asinan dingfelnak thusimtu, Noah cu mi dang pasarih thawn a runhim a si. 6 ^dCule Sodom khawpi le Gomorrah khawpi cu vutcâm ah a cangter ih, amah Pathian ngaihsak lo rung um leh ding pawl ih zohṭhim dingah hloral dingin thiam lo a coter. 7 ^eCule misualrálpawlih nundān bawrhhlawh ruangih thinna zet tu midingfel Lot kha a runsuak a si ahcun 8 ^f(ziangahtile cuih midingfel pa cu an lakih a cēn laiah, ni tin dān nei loih an nundānpawl a mit in a hmu ih, a hna in a theih tikah a dingfel mi a thinlung cu a nâ zet ṭheu a si), 9 Bawipa cun amah ngaihsaktupawl sualfawrhnak ihsin runsuahdān le midingfel lo pawl thuṭhen ni hrangih cawhkuan pek dingih retdān le, 10 ^ga hleicein, câkhiarnak bawrhhlawh cu dawi ih, taksa dān vekih nungtupawl le thuneitupawl nautattupawl dāntat dingih retdān a thei. Cupawl cu mihngalhngâwng le mai thu duh an si ih, huham ropi neitupawl relsiat khal an ṭih lo. 11 ^hCahnak le huham nei nasasawn vancungmipawl hmanin huham ropi neitupawl Bawipa hmaika ah an relse dah lo. 12 ⁱAsinan hibangpawl hi, pianphung ihsi ramsa â, kai tahratih hlohralter ding vek fang men hi an si, an theih lo mi thil an relsia ih, anmai siatnak ah cun an hloral nêknêk ding.

2:4^a Sem 6:1-4; 1Ti 3:6; Jud 1:6; Thu 20:1-2

2:4^b hremnak hmun: Grik ṭawngfáng Tartarus a si ih, Grik-mipawl in Pathian hremnak hmun, cu tawkah cun tuarnak nasa zet umnak hmun, cuih hmun cu Hades hmun hnakih niamsawnah an ruat.

2:5^c Sem 6:5-8, 19; Heb 11:7; 1Pe 3:20

2:6^d Sem 19:24-25; Mip 26:10; Mat 10:15; Rom 9:29; Jud 1:7

2:7^e Sem 19:16

2:8^f Mat 10:15; Rom 15:31; Thu 3:10

2:10^g Jud 1:8, 16, 18

2:11^h Jud 1:9

2:12ⁱ Jud 1:10

13 ^aAn dingfellonak hlawh man an ngah ding. Sun ih năwmcennak tuah cu nuam an ti. Nan hnenih puai an hman tikah kâwr răwngkai vek le bawrhhlawh kai vek hi an si ih, mi bum hi nuam an ti zawng tak a si. 14 ^bAn mit cu uiretnak in a khat ih, sual an bansan thei lo, mihnget lo pawl an thlemthlu. Duhhamnak thinlung an zirhaw ih, annih cu camsiat fa an si. 15 ^cDingfellonak hlawh man ngainatu, Beor-ih fapa Balaam-ih lamzin an thlun ih, lamzin dik cu tlansanin, an fehpêng. 16 ^dAsinan anih cu amai sualralnak ruangah nunsimin a um, ṭawng thei lo mi lāk cu minung ṭawng in a ṭawng ih, profet-ih atnak cu a rak kham.

2:13^a Rom 13:13; 1Ko 11:20-21; 1Th 5:7; Jud 1:12

2:14^b Efe 2:3; Jam 1:8

2:15^c Mip 22:4-20; Dnp 23:4; Jud 1:11; Thu 2:14

2:16^d Mip 22:21-30

17 ^aCupawl cu tidai um lo mi tikhur le thlipi ih a hrăn mi khawdurpawl vek an si, thim sah mepmep cu an hrangah retsak kumkhua a si.

2:17^a Jud 1:12-13

18 ^aZiangahtile thulolak men cu titeraw zetih relin, sual ih a um mipawl lak ihsi tlânsuak zo pawl cu taksa câkhiarnak le fihnungza hursual tuahnak hmangin an lēmkir ṭheu. 19 ^bZirhtu dik lo pawl cun anmah rori siatnak sál ah tāng cingin, mi dang hnenah luatnak ding thu an tiamkam. Ziangahtile milai cu thil ziang in simaw a neh asile, cuih a nehtu thilih sál a si. 20 ^cCupawl cun kan Bawipa le Rundamtu Jesu Khrih theihnak ruangah khawvel bawrhhlawhnak ihsin an tlânsuak hnuah, cumi thothoah lutsalin, nehih an um a si ahcun, an nundān netasawn cemnetnak cu a hmaisa hnakin a sesawn ding. 21 ^dZiangahtile dingfelnak zin theih hnuih an hnenih pek mi thupek thianghlim an tlansan hnakin, dingfelnak zin kha rak thei lo lawlaw hai sehla an hrangah a ṭhasawn. 22 ^eAsinan,

2:18^a Jud 1:16

2:19^b Rom 6:16

2:20^c Mat 12:45

2:21^d Eze 18:24; Heb 6:4-6

2:22^e Thf 26:11

“Amai luak ah uico cu a kirsal,” ih,
“A khawlhaw zo mi văwkpi cu ciarbêk lakah tâl dingin a kirsal,”

tiah a dik mi thufim ih a ti vekin an parah a thlengkim a si.

3

Bawipaih Ni

1 ^aDuhdawt mitla, atu-ah nan hnenah hi cakuat a pahnihnak hi ka ngan a si. A pahnih in nan lungthin thiang lo căwktho dingah hi thupawl lo theihthartersal dingin ka ngan a si. 2 ^bProfet thianghlim pawl in hi hlanih an rak sim mi kamsuakthupawl le kannih apostolpawl hmangih kan Bawipa le Rundamtuih thupek nan ngaihsak ringring thei nak ding hrang khalah ka ngan a si.

3:1^a 1Ko 10:14

3:2^b Luk 1:70; Apo 3:21; Efe 4:11

3 ^aHihi thei hmaisa uh: ni netaah cun mi hnihsanhmang an ra suak ding ih, anmai câkhiarnak bangtukin an nung ding. 4 ^bCule annih in, “A ratsalnak ding thutiamkam cu khuiah so a si? Ziangahtile kan pupápawl an ihthah ni ihsi khan thil hmuahhmuah hi sersiam thawk ihsin anmai sidān kelten an um,” tiah an ti ding. 5 ^cZiangah cutin an ti tile, Pathian kamsuakthu hmangin hlanlai ah van cu a rung um ih, leilung khal tidai ihsin le tidai hmangin tuah a si ti hi an ngaihthah hrim a si, 6 ^dcuih tidai cun leilung cu a khuh thluh ih, cuih leilung cu a siatsuah ta. 7 ^eAsinan cuih kamsuakthu thotho hmangin atu-ih van le leilung hi meisa ih urkāng dingin, Pathian ngaihsak lo pawl thu a ṭhen ni le an siatrál ding ni hrangah a zuah a si.

3:3^a 1Ti 4:1; 2Ti 3:1; Jud 1:18

3:4^b Isa 5:19; Eze 12:22; Mat 24:48; Mar 10:6; Luk 17:30

3:5^c Sem 1:6, 9; Heb 11:3

3:6^d Sem 7:21-22

3:7^e Mat 10:15; 2Th 1:7

8 ^aAsinan duhdawt mitla, Bawipaih ruahdān ah cun ni khat hi kum 1000 tluk a si ih, kum 1000 khal hi ni khat tluk a si ti mi thil pakhat hi hngilh hlah uh. 9 ^bMi hrekkhat in muangih an ruah bangin Bawipa cu a thutiamkam mi thuhla ah a muang lo; zohman an siatrál ding a duh lo ih, mi hmuahhmuah an lung an thlĕng ding a duh sawn ruangah, kanmah lamah thinsauin a um hrih sawn hi a si.

3:8^a Sam 90:4

3:9^b Rom 2:4; 1Ti 2:4; Heb 2:3; 10:37; Thu 2:21

10 ^aSikhalsehla Bawipaih ni cu zan ih fifir vekin a ra ding. Cuih ni ah van cu a nasa zet mi awn thawn an hloral ding ih, thil búlhrampawl cu meisa ih emzupin an um ding. Leilung le a sungih thil um mipawl cu an kangrál ṭheh ding.

3:10^a Isa 34:4; Mat 24:35; Luk 12:39; 2Th 1:7; Heb 12:27; Thu 21:1

11 Hih thil hmuahhmuah cu cuti vekin an siatrál ding ruangah, Pathian ngaihsak le nundān thianghlim ih nung ding mi nan si lo maw? 12 ^aPathian ni cu hngakhlap zetih hngakih nan um laiah, cuti vek cun nung uh. Cuih ni ah van cu meisa in a kangrál ding, cule thil búlhrampawl khal meisa ih emzup an si ding. 13 Sikhalsehla a thutiamkam bangin, dingfelnak umnak hmun van thar le lei thar cu kan hngak a si.

3:12^a Sam 50:3; Isa 65:17; 1Ko 1:7; Thu 21:1

Thucemternak

14 ^aCuruangah duhdawt mitla, cuvek thilpawl nan hngah ruangah bawrhhlawh kai lo, sawihnăwm kai lo le hnangam zetih nan um amah in a hmuh thei nak dingah taimak suah uh. 15 ^bCule kan duhdawt mi, kan unaupa Paul khal in a hnenih fimnak pek a si bangtukih nan hnenih ca a ngan vek khan, kan Bawipaih thinsauzia cu rundamnak ah ruat uh. 16 ^cA cakuatpawl hmuahhmuah khalah hi thilpawl hi a ngan. A thil ngan mi hrekkhat cu theihthiam an har ih, cupawl cu zir lo mipawl le mihnget lo pawl in an siat phah nak dingih a dang Cathiangpawl an lâkpen bangin an lapêng ṭheu.

3:14^a 1Th 3:13

3:15^b Rom 2:4; Efe 3:3

3:16^c Sam 56:5; Jer 23:36; Jam 1:8

17 ^aCuruangah duhdawt mitla, nannih in cuih thupawl cu nan rak theih cia zo ruangah fimkhur uh. Culole nanmah khal misualrálpawlih sualralnak ah hruaiin nan um ding ih, nan dīn hngeh nak ihsin nan tlu pang ding. 18 ^bCuhnakin kan Bawipa le in Rundamtu Jesu Khrih-ih zangfahnak ah le theihnak ah rak ṭhang sawn uh.

3:17^a 1Ko 10:12; Thu 2:5

3:18^b Rom 3:24; 11:36

Atu le a kumkhuain a hnenah ropitnak um seh. Amen.