About Bible Thianghlim | ©

BibleThianghlim – Jonah

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Jonah

1234

• A ngantu: Theih a si lo; Jonah a si men thei
• A siartu: Israel
• Thil cang mi ih huap cān: B.C. Kum zabi pariat hrawng

Jonah cabu hi a dang profet cabu tawi pawl lakah a danglam hleice. Thucah si loin thuanthu a si.

Hi cabu hi amah Jonah ih ngan a si men thei, ziangruangahtile hi cabu sungih thuhla cipciar tampi hi amah Jonah lawngih theih mi an si zum a um.

Jonah in Jeroboam lalnak hnuaiah sak lam lalram a kauh ding thu a rak phuang (2Sp 14:25). Amai san ah Israel le Judah cu an doralpawl, Assiria telin, an ṭumsuk laiah, an ṭhangso.

Assiria umnak ram sungih khawpipawl lakih pakhat Nineveh khawpi ah dāntatnak thucah va sim dingih thupek a dawnnak in hi cabu hi a thawk. A ra thleng ding mi dāntatnak hmangih mipi ralrinnak pe dingin Pathian in profet a thlah asile, an hrangah lungthlĕngnak ding lamzin a ăwnsak ih, dāntatnak hrial ding lamzin a ăwnsak ti Jonah in a thei.

Jonah cabu in Pathian cu ziangkim tlun: tipi tlun, leilung tlun, tisuar tlun, nga tlun, thingkung le hrampi tlun, rannung tlunih Lal a sizia a phuanglang. Anih cu Israel tlun lawngah si loin, miphun dang pawl hmuahhmuah tlun khalih Pathian a si. Israel-mipawl parih a tuah zat in Nineveh khawmipawl par khalah thuṭhen thei nak le ngaidam thei nak a nei. Mi kip uktu le thuṭhentu ziangkimtithei Pathian cun thlaphâng ko mi a tuah thei. Asinan Jonah cabu in Pathian cu lainatnak nei a sizia khal a langter. Abraham hnenih thu a tiamkam vekin, miphun dang pawl cu Israel hmangin thlawsuah pek a duh (Sem 12:3).

Pathian cun Jonah le lăwng mâwngtupawl a zuah hai ih, misualrál Nineveh khawmipawl khal an lung an thlĕng tikah a zuah hai. Anih cun a sersiam mi milai a duhdawt ih, lungthlĕngnak cān remcâng le hi dāntatnak pumpelhdān ding remcānnak a pe hai.

1

Jonah-ih Thulunlonak

1 ^aAmittai-ih fapa Jonah hnenah Jehovah-ih kamsuakthu a thleng ih, 2 ^b“Tho aw, khawpi ropi Nineveh ah feh awla, cuih khawpi dokalhin ausuak aw; ziangahtile an sualralnak cu ka hnen a hung thleng a si,” tiah a ti. 3 ^cAsinan Jonah cu Jehovah hnen ihsin Tarshish lamih tlanhlo dingin a tho. Joppa lamah a suk ih, Tarshish feh ding lăwngpi a hmu; cule to man a pe ih, Jehovah hnen ihsin Tarshish lamah an zawngih feh dingin lăwng sungah a lut.

1:1^a 2Sp 14:25; Mat 12:39-41; 16:4; Luk 11:29-32

1:2^b Sem 10:11-12; Isa 37:37; Jon 4:11; Nah 1:1

1:3^c Sem 4:16; 10:4; Suah 4:13; Jos 19:40, 46; Job 1:12; 2:7; Sam 139:7-12; Isa 23:1; Jer 20:9; Amo 3:8; Apo 9:36, 43

Tifinriat Thlipi

4 ^aAsinan Jehovah in tifinriat parah a nasa zet mi thlipi a hrānter ih, tifinriat parah cun thlipi hran a nasa tuk, cutin lăwngpi cu a kuai zikte.

1:4^a Sam 107:23-32

5 ^aCun lăwng hnaṭuantupawl an lung a phâng; cule mi kip anmai pathian cio hnenah an ausuak ih, lăwng zângter dingin tifinriat ah thilri an hlăwn. Asinan Jonah cu lăwng hnuaitabik ah sukin, a rak zau ih, a itthat hluahhlo men.

1:5^a Apo 27:18-19

6 ^aCule lăwng hotu cu a hnenah a ra ih, “Ziangtin so na ihthah hluahhlo men? Tho awla, na pathian ko aw; kan hlohrallonak dingah na pathian in in ngaihtuahsak tla a si mahna,” tiah a ti.

1:6^a Sam 107:28

7 ^aCule pakhat le pakhat, “Ra uh, zawih ruangah hi harsatnak a cang ti thei dingah camcawhfung zûk uhsi,” tiah an tiaw. Camcawhfung an zûk ih, Jonah parah a tla. 8 Cun annih in a hnenah, “Zangfahten in sim hnik aw! Zo ruangah hi harsatnak hi kan parah a thleng? Ziang hnaṭuan na si? Khui rammi na si? Ziang miphun na si?” tiah an ti.

1:7^a Mip 32:23; Jos 7:10-18; 1Sam 14:41-45; Thf 16:33

9 ^aCule anih in an hnenah, “Keimah cu Hebru-mi ka si ih, tifinriat le khawmual tuahtu van Pathian, Jehovah ṭihtu ka si,” tiah a ti.

1:9^a Sem 1:9; Neh 9:6; Sam 96:9; 146:5-6; Dan 2:18; Apo 17:24

Tifinriat ah Jonah an Hlăwn

10 Cun milaipawl cu an thin a phâng tuk lawmmam ih a hnenah, “Ziangah hihi na rak tuah?” tiah an ti. Ziangahtile milaipawl cun amah ih a rak sim hai ruangah anih cu Jehovah hnen ihsin a tlân a si ti an thei. 11 Cun annih in a hnenah, “Tifinriat a daihreh thei nak dingah na parah ziang kan tuah ding?” tiah an ti. Ziangahtile tifinriat suar a nasa ih, thli hrang le a nasa deuhdeuh.

12 ^aCule anih in an hnenah, “I cawi uhla, tifinriat ah i hlăwn uh; cun tifinriat cu nan hrangah daiten a um ding. Ziangahtile keimah ruangah nan parah himi thlipi a thleng a si ti ka thei,” tiah a ti hai.

1:12^a 2Sam 24:17; 1San 21:17

13 ^aSikhalsehla pacangpawl cun an lăwng cu khawmual lam pan dingin nasaten an hlau rero, asinan an ti thei cuang lo. Ziangahtile tifinriat cu a săwp ih, anmah hawihin thlipi a hrang. 14 ^bCu tikah Jehovah hnenah an ausuak ih, “Maw Jehovah, kan lo ngen a si, hi paih nunnak ruangah in hloralter hram hlah awla, mawhnak nei lo thisen mawh kan parah thlengter hram hlah. Ziangahtile, Maw Jehovah nang cun na lunghmui zawng na tuah a si,” tiah an ti. 15 ^cCule Jonah cu an cawi ih tifinriat ah an hlăwn, cule tifinriat suar săwp luihlo cu a daireh depdep. 16 ^dCun milaipawl cun nasa zetin Jehovah an ṭih, Jehovah hnenah thawiawknak an hlan ih, thutiampawl an tuah.

1:13^a Thf 21:30

1:14^b Dnp 21:1-9; Sam 115:3; Dan 4:35

1:15^c Sam 107:29; Luk 8:24-25

1:16^d Mip 30:2; Sam 66:13-14; Mar 4:38-41

17 ^aCule Jonah dawlhtu dingah Jehovah in nga tumpi a rak timtuah. Cun Jonah cu ngapi pum sungah ni thum le zan thum sung a um.

1:17^a Jon 4:6-8; Mat 12:40; Luk 11:30

2

Jonah Thla a Cam

1 Cun ngapi pum sung ihsin Jonah in Jehovah a Pathian hnenah thla a cam. 2 ^aJonah in,

2:2^a Sam 18:3-6; 86:12-13; 120:1; Ṭah 3:55-58

“Ka zăwnzaihnak ruangah Jehovah hnenah ka au ih,
Anih cun i rak ngaithla.
Sheol pum sung ihsin ka au ih,
Nang cun ka aw na thei.
3 ^aZiangahtile nang in tifinriat laifang,
Ti thûk sungah i hlăwn ih,
Tilian cun i kulh;
Na tisuar tumpi pi le na ti hlăwkaw hmuahhmuah cu ka par ihsin an luang.
4 ^bCun kei in, ‘Na mithmuh ihsin hlăwnhloh ka rak si;
Cuti cing khalin na temple thianghlim lam ka hawisal ding,’ tiah ka ti.
5 ^cThi zik ko tipi in i kulh ih,
Tipi thûk in in tuam a si;
Timân in ka lu in zēl.
6 Tlang hramah ka sukthla;
Leilung le a ṭhuampawl cu ka kimvelah an um kumkhua.
Sikhalsehla, Maw Jehovah ka Pathian, nang in ka nunnak cu siatnak ihsin na dirsuak zo.
7 ^dKa thinlung a cauh tikah,
Jehovah ka máng;
Cule ka thlacamnak cu na hnenah,
Na temple thianghlim sung a thleng.
8 ^eSantlailo milempawl ngaihsaktupawl cun
Anmai lainat duhdawtnak an thlauthla.
9 ^fAsinan kei cun lungawi thu sim aw thawn na hnenah rai ka thawi ding;
Thu ka rak tiam mi ka pe ding.
Runsuahnak cu Jehovah-ih ta a si,”

2:3^a 2Sam 22:4-7; Sam 42:7-8; 88:6

2:4^b 1Sp 8:38-40, 46-53; Sam 31:22-24; Jer 7:15-17

2:5^c Job 17:15-16; Sam 30:2-5; 69:1-2; Ṭah 3:54-55

2:7^d 2San 30:27; Sam 11:4-7; 77:5-12; Isa 40:27-31

2:8^e Dnp 32:15-22; 1Sam 12:20-25; 2Sp 17:15-19, 23

2:9^f Suah 15:1-6; Mip 30:2; Sam 3:8; 42:4-6; 50:14-15, 23; 116:13-14; Ths 5:4-5; Jer 3:23; Hos 14:1-3; Mat 5:33-37; Heb 13:15-16

tiah a ti.

10 Cule Jehovah in ngapi cu thu a pe ih, khawmual ah ngapi cun Jonah cu a luak.

3

Nineveh ah Jonah Thu a Sim

1 ^aJonah hnenah a vei hnihnak Jehovah-ih kamsuakthu a thleng, 2 ^b“Tho awla, khawpi ropi, Nineveh ah feh aw, cule ka lo sim ding mi thucah kha va phuang aw,” tiah a ti.

3:1^a Jon 1:1

3:2^b Jon 1:2

3 ^aCule Jehovah-ih kamsuakthu bangtukin Jonah cu a tho ih, Nineveh ah a feh. Nineveh khua cu ^bkhawpi ropi nasa zet a si ih, a kauh lam cu ni thum feh a si. 4 ^cCule a ni khatnak ah Jonah cu khawpi sungah luh a thawk. Cule a ausuak ih, “Atu ihsin ni 40 sungah Nineveh cu tisiat a si ding!” tiah a ti.

3:3^a Jon 1:3

3:3^b khawpi ropi nasa zet: Hebru ah Pathian khawpi ropi ti a si.

3:4^c Jer 18:7-10

Nineveh Mipi in an Zum

5 ^aCule Nineveh mipi in Pathian an zum, rawl ulh an phuang ih, a fatebik in a tumbik tiang buri an sĭn. 6 ^bCun Nineveh siangpahrang hnenah cuih thuthang a thlen tikah, a siangpahrang tokham ihsin a tho ih a siangpahrang hnipuan a hlit, cule buri a sĭn ve ih, vutcâm lakah a to. 7 ^cCule siangpahrang le a mipawimawhpawl ih thusuah vekin, Nineveh khawpi sungah tlang a auter ih, thu a phuang. Cuih thuthan mi cu hitin a si: “Minung in siseh, rannung in siseh, ranpi rual in siseh, rante rual in siseh zianghman tep hlah hai seh; zianghman eiter hlah uhla, ti khal inter hlah uh. 8 ^dCuhnakin minung le rannung pawl cun buri khuhaw sawn cio hai sehla, nasa zetin Pathian ko hai seh. A si, mi kip in an nundān ṭha lo le an kut ih um nunrawnnak cu bansan hai seh. 9 ^eKan hlohrallonak dingah Pathian cun hawikirin le lamlêtsalin a nasa zet mi a thinhengnak cu a lahlo mahna.”

3:5^a Dan 9:3; Mat 11:20-24; 12:41; Luk 11:32

3:6^b Est 4:1-3; Job 2:7-8, 12-13; Eze 27:30-31

3:7^c 2San 20:3-4; Ezr 10:1-8, 15-17; Dan 3:29

3:8^d Job 16:15-17; Sam 130:1-2; Jer 7:1-3; 25:4-7; Jon 1:6; 2:1; Luk 18:9-14

3:9^e 2Sam 12:21-23; Sam 85:2-7, 10; Jer 18:8; Joe 2:12-14; Amo 5:4, 10-15

10 ^aCun Pathian in an ṭhatlonak lamzin ihsin an hawikir ti an thil ti mipawl a hmuh tikah, an parih thlengter dingih a phuan mi siatnak thuhla ah Pathian a lamlêtsal, cule cumi cu a thlengtersal lo.

3:10^a Suah 32:7-14; Jer 18:8; Amo 7:1-6; Mat 7:15-20; Joh 8:38-44; 10:30-33, 37-38

4

Jonah Thinhengnak le Pathian Ngilneihnak

1 ^aAsinan cumi cun Jonah a lunghmuiter lo tuk lawmmam ih, a thin a heng. 2 ^bCule Jehovah hnenah thla a cam ih, “Maw Jehovah, ka ram ih ka um laiih ka rak lo sim vek kha hihi a si lo maw? Curuangah hi hlanah Tarshish ah ka rak tlân a si; ziangahtile nang cu zangfahnak nei, zahngainak nei Pathian, thinfûal, lainat duhdawtnak ih khat, siatnak tuah ding ihsi lamlêthmang na si ti ka rak lo thei. 3 ^cCuruangah atu-ah, Maw Jehovah, ka hnen ihsin ka nunnak la hram aw, ziangahtile ka hrangah nun hnakin thih a ṭhasawn,” tiah a ti.

4:1^a Sam 137:7-9; Eze 18:23, 30-32; Mat 20:11; Luk 9:51-56; 15:28

4:2^b Suah 22:25-27; 34:5-9; Mip 14:18-19; Dnp 4:31; Sam 86:5, 15-17; 103:8; Jer 20:7-8; Joe 2:13

4:3^c Mip 11:15; 1Sp 19:4; Job 7:1-21; Jer 8:3; Jon 4:8-9; Luk 23:30; Thu 6:12-17

4 ^aCun Jehovah in, “Na thinheng hi a dik maw si?” tiah a ti.

4:4^a Sem 4:6; Mat 5:21-22; 20:11-15

5 Cule Jonah cu khaw lengah a feh ih, khawpi nisuahnak lamah a to. Cu tawkah amai hrangah thlamte a tuah ih, khawpi sungah ziang a cang ti hmu dingin, a hnuai zârhnem ah a to. 6 ^aCule Jehovah Pathian in kung pakhat a timtuah ih, Jonah cu zârhnem in a harsatnak dêmter dingah a kiangah a ṭoter. Cule cuih kung ruangah Jonah cu a lung a awi zet.

4:6^a Jon 1:17; 4:7-8

7 ^aAsinan a thaizing khawvan zawngah, Pathian in pangāng a timtuah ih, cuih pangāng cun cuih kung cu a ei ih a vuai. 8 ^bCun hitin a si, ni a suah tikah, Pathian in a cak zet mi nisuahnak lam thli a timtuah. Cule ni in Jonah-ih lu a sat, cutin Jonah cu a cau zet. Jonah in thih a duh ruangah, “Ka hrangah nun hnakin thih a ṭhasawn,” tiah a ti.

4:7^a Job 1:20-22

4:8^b 1Sp 19:4; Jon 4:3

9 ^aCun Pathian in Jonah hnenah, “Cuih kung pakhat thuhla ih na thinheng hi a dik maw si?” tiah a ti.

4:9^a Jon 4:3-4

Cule anih in, “Thil dik a si ko, thihnak tlak khawpin ka thin a heng a si,” tiah a ti.

10 ^aAsinan Jehovah in, “Hi kung, a hrangah zianghman na ṭuan lo, nangmai ṭoter khal si lo, zan khat thilthu ah amah ten a kho ih, zan khat ah amah teih a thi mi cuih kung parah lainatnak na nei. 11 ^bMai vawrh lam kut le keh lam hman ṭhenfel thei lo milai tingkhat le thawngkul hnak tam minung umnak le rannung rual tampi umnak khawpi ropi Nineveh cu lainat loin ka um ding maw?” tiah a ti.

4:10^a Dnp 6:10-17; 1Pe 3:11

4:11^b Sem 3:22; Thf 3:5-7; Isa 7:16; 44:20; Jon 1:2; 3:2-3, 10; Heb 5:13-14