About Bible Thianghlim | ©

BibleThianghlim – 2 San Siarnak

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

2 San Siarnak

12345678910
11121314151617181920
21222324252627282930
313233343536

• A ngantu: Ezra
• A siartu: Sál tān hnu Israel-mipawl
• Thil cang kum: B.C. 971-538
• Ngan kum: B.C. 430 hrawng

San Siarnak bu khatnak le bu hnihnak hi a thawk ah cun bu khat a si (San Siarnak bu khatnak Thuhmaihruai zoh aw).

Siangpahrang bu hnihnak bangin San Siarnak bu hnihnak hin Jew-pawlih lalram thuanthu Solomon-ih uknak ihsin Babilon sál tān tiang a huap. Siangpahrang bu hnihnak vek si loin, San Siarnak bu hnihnak cun thlang lam lalram a hmuitin hleice.

San Siarnak bu khatnak Thuhmaihruai in San Siarnak cabu pahnih ih thupi pawimawhpawl a rel. Hih thupi tamsawn cun a bur le bulpâk ih Pathian biak a rel uar. Cule zohṭhim tlak ih Pathian biak le rinumnak cu San Siarnak cabupawl hin an rel nasa. An thinlung Jehovah an pek ruangih a hmuingil mi siangpahrangpawlih thuhla in San Siarnak cabupawl ah hmunram tam zet a luah. Bung 65 lakah bung 38 pawl cun David-ih thlah sâwng siangpahrang 22 lakih mi panga: David, Solomon, Jehoshafat, Hezekiah le Josiah thu a ngan.

Pathian biak ti mi cu milai ih Pathian lehrulhnak a si. Kap khat lamah Pathian biak ti miih thupi cu Pathian ih milai a lehrulhnak a si. Cuti vekin himi Pathian ih lehrulhnak thupi cun a ṭha lam le a ṭha lo lam a sawhkhih thei. San Siarnak cabupawl in Pathian malsawm an uar ih a hman mi ṭawngkampawl cu: “bawm” (vei 26), “hmuingil” (vei 13) le “cawlhahdam” (vei 7) an si. Thil cang zo mi tampi cu Pathian ngaihsak le ngaihsak lo parih a ṭhumawkzia hi cabu ngantu in vei tam zet a simfiang (1San 28:9; 2San 15:2).

A hramthăwkih a siartupawlih dinhmun theihfiang a si ahcun, hi cabu siartu in San Siarnak cabu-ih thupipawl hi thupi ah a ruat ko ding. Sál tān hnuih Jew-pawlih nun ah rinumnak le rinumlonak kan hmu. A cān ah cun dik zetin Pathian kamsuakthu an lehrūl, asinan cān dangah cun Pathian Dān an pahbăl. Annih cu thanauumza tikcucān ah an um. Solomon-ih temple ropi cu tisiat a si ih, cumi cu temple tenau in a airawl. A nungdamsŭnpawl cu an cak lo ih, an kimvelah ral tam zet an cêng. Ezra in harsa zetih um, a nungdamsŭnpawl cu tha a pe ih, ralrinnak khal a pe. An thuanthu ihsin Pathian băwmnak le hmuingilnak thlengtertu le a lunghmuilonak le a nunsimnak thlengtertu an lungput le an cangvaihnak a theihter hai.

Ziang san khalah amah tlansantupawl Jehovah in a tlansan hai, asinan mah le mah phahniamawtu, amah hawltu le Bible ih zirh vekih amah betupawl a bawm ti San Siarnak cabupawl in in zirh.

1

1 ^aDavid-ih fapa Solomon cu a lalram ah a ticakaw, cule Jehovah a Pathian in a umpi ih, nasa zetin a khaisâng.

1:1^a Sem 21:22; Mip 14:43; 1Sp 2:12; 1San 29:25

Gibeon ih Solomon Máng

2 ^aCule Israel miphun zate hnen, ralkap 1000 hotupawl le ralkap 100 hotupawl hnen, laireltupawl hnen le Israel miphun zate lakih uktu a si mi pupápawlih sungza lubânpawl hnenah Solomon in thu a sim. 3 ^bCun Solomon le a hnenih um mipungkhawm hmuahhmuah cu Gibeon ih umhmun sâng lamah an so; ziangahtile cu tawkah Jehovah-ih siahhlawh Mosi in ramṭhing ih a rak tuah mi Pathian thawi Tawnawknak Puanthlam cu a um. 4 ^cAsinan Pathian Kuang cu Kirjath Jearim ihsin David in a rak timlam cia mi hmun ah a thiar, ziangahtile cumi hrangah Jerusalem ah puanthlam a rak zar zo. 5 ^dCule Hur fapa Uri-ih fapa Bezalel ih a tuah mi dar biakṭheng cu Jehovah Biakbûk hmaiah a um; Solomon le mipungkhawm in cu tawkah amah an hawl. 6 Cule Solomon cu cu tawk, Jehovah hmaiih um dar biakṭheng, Tawnawknak Puanthlam ah a hung so ih, cumi parah Meiur Thilhlăn 1000 a hlan.

1:2^a 1San 9:1

1:3^b Suah 40:18; Pui 17:4; Jos 9:3

1:4^c 2Sam 6:17; 1San 15:25

1:5^d Suah 31:2; 38:2; 1San 13:3

7 Cuih zan ah Solomon hnenah Pathian a lang ih, “Dil aw! Ziang so ka lo pe ding?” tiah a ti.

8 ^aCule Solomon in Pathian hnenah, “Ka pa David hnenah zahngainak ropi na rak hmuh zo ih, a aiah siangpahrang ah i tuah. 9 ^bAtu-ah, Maw Jehovah Pathian, ka pa David hnenih na tiamkam mi cu ding hnget hram seh, ziangahtile nang in leilung leivut bangtukih tam mipi tlunah siangpahrang ah i tuah. 10 ^cHi minungpawl hmaiah lut le suakih ka um thei nak dingah atu-ah fimnak le theihnak i pe aw; ziangahtile hi zozai na minungpawl cu zo in so a uk thei ding?” tiah a ti.

1:8^a 1San 23:1

1:9^b Sem 12:2; Mip 23:10; 2Sam 7:25; 1Sp 8:25

1:10^c Mip 27:17; 2Sam 5:2; 1Sp 3:9; Thf 8:15-16

11 ^aCun Pathian in Solomon hnenah, “Na thinlung ah himi a um ih lennak, neihnunnak, upatnak le na ralpawlih nunnak dil lo le nun saunak khal dil loin, an tlunih siangpahrang ih ka lo tuahnak ka mipawl na uk thei nak dingah nangmai hrangah fimnak le theihnak na dil sawn ruangah, 12 ^bfimnak le theihnak cu na hnenih pek an si; cule lennak, neihnunnak le upatnak ka lo pe ding, na hlanih siangpahrangpawl zohman in cuvek cu an rak nei lo ih, na hnuah zohman in an nei fawn lo ding,” tiah a ti.

1:11^a Dnp 17:17

1:12^b 1San 29:22, 25; 2San 9:22; Neh 13:26; Jam 1:5

13 Cule Solomon cu Gibeon ih umhmun sâng, Tawnawknak Puanthlam ihsin Jerusalem ah a tlung, cule Israel tlunah a lal.

Solomon cu Milian ah a Cang

14 ^aCun Solomon in rang lêngpawl le rang ralkappawl a khawm; rang lêng 1400 le rang ralkap 12000 a nei, cupawl cu rang lêng khawpipawl le siangpahrang hnen Jerusalem ah a ret. 15 ^bCuihtlunah siangpahrang in Jerusalem ah sui le ngun cu lungto tlukin a umter ih, sidarpawl khal phairawn ih ^csikamor kungpawl tlukih tam in a umter. 16 Solomon in Izip le Kue ihsin lakluh mi rangpawl khal a nei; cupawl cu siangpahrangih sumtuahpawl in Kue ah a man tawnin an rak lei ṭheu. 17 ^dIzip ihsin rang lêng pakhat ah ngun tangka shekel 600 le rang pakhat ah shekel 150 in an ngah ih an lalut. Cuti vekin cupawl cu Heth-mipawlih siangpahrangpawl le Siria siangpahrangpawl zate hnenah an kuatsuak.

1:14^a 1Sam 8:11; 1Sp 9:19

1:15^b 1Sp 9:28; 2San 9:27; Isa 60:5

1:15^c sikamor: 1Sp 10:27 simfiangnak zoh aw.

1:17^d 2Sp 10:29

2

Solomon in Temple Sak a Timlam

1 ^aCun Jehovah hmin hrangah temple sak dingin le a lalram hrangah inn sak dingin Solomon in a ruatcat.

2:1^a Dnp 12:5; 1Sp 5:5; Ths 2:4

2 Solomon in thil phurtu dingah mipa 70000, tlang parih lungto sertu dingah mi 80000 le cupawl hohatu dingah mi 3600 a ruat.

3 ^aCun Solomon in Ṭaiar siangpahrang Hiram hnenah mi a thlah ih, “Ka pa David hrangih na tuah vekin le cēnnak dingah amai hrang inn saknak dingah sidar thingpawl na kuat vekin, ka hrang khalah tuah aw. 4 ^bNgai hnik, a hnenih hlăn dingah, Jehovah ka Pathian hmin hrangah temple ka sak ding. Cumi cu Sabbath-pawl, Thla Thar pawl le Jehovah kan Pathian ih ruat mi puaipawl ah a hmaiih rimhmui thaw ur dingah, cawl loih Sangserh hrangah le zing le tlâi ih Meiur Thilhlănpawl hrangah a si pei. Cumi cu Israel hrangah kumkhaw zīn le dān a si ding a si. 5 ^cCule ka sak ding mi temple cu a ropi zet ding, ziangahtile kan Pathian cu pathian dang pawl hmuahhmuah hnakin a tumsawn a si. 6 ^dAsinan anih cu vanih van hmanah a tlem lo ruangah zo in so inn saksak thei ding? A hmaiih thawinak ur dah ti lo, inn saksak dingin kei teh zo so ka si?

2:3^a 2Sam 5:11; 1Sp 5:1-11; 1San 14:1

2:4^b Suah 25:30; 29:42; 30:7; Pui 23:38; Mip 28:3, 14; Dnp 12:5

2:5^c Suah 12:12; 1San 16:25; 22:5

2:6^d Suah 3:11; 1Sp 8:27; Jer 23:24

7 ^a“Curuangah Judah ram le Jerusalem ih ka hnenih um ka pa David in a timlam cia mi kut zungthiampawl thawn ṭuan dingah sui le ngun, dar le thir le puan sendup, puan senlar le puan mepian tuah thiam tu kutthiam neipawl kha i rak kuat aw. 8–9 Lebanon ihsin sidar thing, mirang far thing le algum thing pawl khal i rak kuat aw, ziangahtile na siahhlawhpawl khan Lebanon thing hau an thiam ti ka thei; cule ngai hnik, thing tampi i timlamsak dingin ka siahhlawhpawl cu na hlawhfapawl hnenah an ṭuan ve ding, ziangahtile ka sak ding mi temple cu a tumin a mak ding a si. 10 ^bCule ngai hnik, thing hautu na siahhlawhpawl cu sangvut rialdip kor 20000, barli sangvut kor 20000, sabit zu bath 20000 le olif hriak bath 20000 ka pe hai ding,” tiah a ti.

2:7^a Suah 35:31; 1Sp 7:14; 1San 22:16

2:10^b 1Sp 5:11; Ezr 3:7

11 ^aCun Ṭaiar siangpahrang Hiram in cakuat in a let ih, cumi cu Solomon hnenah a kuat: “Jehovah in a mipawl a duhdawt hai ruangah, an tlunih siangpahrang ah a lo tuah a si,” tiin.

2:11^a 1Sp 10:9

12 ^aCuihtlunah Hiram in, “Lei le van tuahtu Israel-ih Pathian Jehovah cu thangṭhatin um seh, ziangahtile anih in Siangpahrang David hnenah fapa fim a pe ih Jehovah hrangah temple le a lalram hrangah inn pakhat a sak thei nak dingah khawruah thiamnak le theihthiamnak thawn a thuam.

2:12^a Neh 9:6; Sam 8:3; 146:6

13 ^a“Cule atu-ah kutzungthiam pa, theihthiamnak nei Huram ka rak thlah. 14 ^bAmah cu Dan tesinfa nunau pakhat ih fapa a si, asinan a pa cu Ṭaiar khawmi a si. Anih cun sui le ngun, dar le thir, lung le thing, puan sendup le mepian, puan nem páte le puan senlar tuah thiam a si ih, amah cu thil kher ziangkim tuah le a hnenih pek mi ruahmannak ziangkhal hlensuak thei mi a si. Anih cu na kut zungthiampawl le ka bawi David, na paih kut zungthiampawl zawngah a ṭuan ve ding.

2:13^a 1Sp 7:13; 2San 4:16

2:14^b Suah 31:6; 35:31

15 ^a“Curuangah atu-ah ka bawi in a rak rel dah mi sangvut, barli sangvut, hriak le sabit zu cu a siahhlawhpawl hnenah rak kuat seh. 16 ^bCule Lebanon ihsin thing na ṭul zatzat kan hau ding, cucu Joppa khua ah tipi ihsin pûm in ka run thiar ding ih Jerusalem ah na phurso ding,” tiah a ti fawn.

2:15^a Ezr 3:7

2:16^b Jos 19:46; 1Sp 5:8-9; Joh 1:3

17 ^aCun a pa David in mipum a rak siar cia mi, khawtluang mipawl hmuahhmuah mipum a siar ih, mipum tingkhat le thawng sawmnga thawngthum le zaruk hmuh an si. 18 ^bCule cupawl lakah mi 70000 cu thil phurtu ah, mi 80000 cu tlang parih lungto sertu ah, hohatu 3600 cu hnaṭuan tawlrel saktu ah a tuah hai.

2:17^a 2Sam 24:2; 1Sp 5:13-16; 1San 22:2

2:18^b 1San 22:2

3

Solomon in Temple a Sak

1 ^aCun Solomon in a pa David hnenih Jehovah a lăngnak hmun Jerusalem ih ^bMoriah tlang par, David ih a rak timlamnak Jebus-mi Ornan-ih hruih hmun ah Jehovah inn sak a thawk. 2 ^cCule a lal kum litnak thla hnihnak ni hnihnak ah inn sak a thawk.

3:1^a Sem 28:17; 2Sam 24:18; Apo 7:47

3:1^b Moriah: Hebru ṭawng a si ih a sullam cu “Jehovah ih hril,” tinak a si.

3:2^c 1Sp 5:1; Ezr 5:11

Temple Sung lam le Leng Lam

3 ^aHimi hi Pathian inn saknak hrangih Solomon in lungphum a phumdān cu a si: a sau lam cu tahdān hlun dawng vekin, dawng 60 le a kauh lam dawng 20 a si. 4 Cule inn hmaiih hulhliap cu inn sau lam can dawng 20 a si ih, a san lam cu dawng 120 a si. A sung cu sui hlirhlăng a khût. 5 ^bPindan tumsawn phar ah sui hlirhlăng a khût mi mirang far thing a bĕn ih, cumi parah ṭhulhfau kungpawl le cikcin a kher. 6 Cule a mawinak dingah inn cu lung mankhung pawl in a ceimawi ih, cuih sui cu Parvaim sui an si. 7 ^cInn, a tlângpawl le sângka biangpawl, a pharpawl le sângkapawl cu sui a khût; cule pharpawl ah cherub lem pawl a kher.

3:3^a Eze 41:2

3:5^b 1Sp 6:15; Eze 40:16

3:7^c Sem 3:24; Eze 41:18

8 ^aCule Hmun Thianghlim Bik a tuah. A sau lam cu inn kauh lam can, dawng 20 a si ih, a kauh lam khal dawng 20 a si. Cumi cu sui hlirhlăng talent 600 a khût. 9 ^bTlawngkhen khing rih zat cu sui shekel 50 a si, cule sâwng tlunta pindan cu sui a khût.

3:8^a Suah 26:33

3:9^b Suah 26:32

10 ^aCule Hmun Thianghlim Bik sungah cherub lem pahnih, kherih thuammawi mi a tuah, cule cumi cu sui a khût hai.

3:10^a Suah 25:18; 1Sp 6:23

11 ^aCherub-pawlih thla sau lam cu dawng 20 a si: cherub pakhat ih thla cu dawng nga a si ih pindan phar a dai, cule khat lam thla khal dawng nga a si ih a dang cherub-ih thla a dai; 12 a dang cherub-ih thla khal dawng nga a si ih, pindan phar a dai, cule a dang thla khal dawng nga a si ih, a dang cherub-ih thla a dai. 13 ^bHi cherub-pawlih thla kauh lam cu dawng 20 vuakvel a si. An ke in an dīng ih, an hmai cu sung lam an hawi.

3:11^a Cherub-pawl: Vancungmi phun khat an si.

3:13^b Suah 25:18, 20

14 ^aCule anih in puanzar mepian, sendup, senlar le puan nem páte pawl tla a tuah ih, a parah cherub lem cuangin a tak.

3:14^a Sem 3:24; Suah 26:31, 33

Ṭhuam Pahnih

15 ^aTemple hmai lam khalah dawng 35 sâng ṭhuam pahnih a phun ih, an luzim parih lu bol um lukhuh cu dawng nga veve an si. 16 ^bHmun thianghlim sungtadeuh pindan sungah cikcin hri a tuah ih, cuih ṭhuampawlih luzim ah a bât; cule talê rah 100 lai a tuah ih, cikcinpawl parah cun a thlaih vivo. 17 Cun temple hmaiah ṭhuampawl a phun, pakhat cu vawrh lamah, pakhat cu keh lamah an um; vawrh lamih um mi cu Jakin tiah hmin a sak ih, keh lam ta cu Boaz tiah hmin a sak.

3:15^a 1Sp 7:22; Thu 3:12

3:16^b 1Sp 6:21; 7:17, 20

4

Temple Bungruapawl

1 ^aCuihtlunah dawng 20 sau, dawng 20 kau le dawng hra sâng dar biakṭheng pakhat in a tuah.

4:1^a Suah 20:24; 1Sp 8:64

2 ^aCun Dar bur Tikuangpi a tuah ih, a tlâng cu khat lam ihsin khat lam tiang dawng hra a si, cumi cu a kûal. A san lam dawng nga a si ih, a tlâng kimvel cu dawng 30 a si. 3 Cule cumiih hnuai cu caw cang lem bangin a vĕlsuak ih, dawng khat ah pahra vivoin Dar Tikuangpi kimvelah cun an um. Dar Tikuangpi bur a si tikah caw cang lem cu tlar hnih ih bur a si. 4 ^bDar Tikuangpi cu caw cang lem hleihnih tlunah a ṭhumaw ih, pathum in sak lam an hawi; cule pathum in nitlaknak lam an hawi, pathum in nisuahnak lam an hawi, pathum in thlang lam an hawi; Tikuangpi cu an parah hūn a si ih, an taw lam zaten sung lam an hawi thluh. 5 Tikuangpi cu za băwk tia a sah; cule a tlâng cu no tlâng pianhmang, lily par hlâw vekih tuah a si. Cumi in bath 3000 a dâwl.

4:2^a Thu 4:6

4:4^b Mip 2:3-25; Eze 48:30-34; Thu 21:13-14

6 ^aCule khawlhawknak dingah maihum pahra khal a tuah ih, vawrh lam kapah panga, keh lam kapah panga a hung; annihpawl cu Meiur Thilhlăn an hlăn tikah a sungah an khawlhaw ta ding a si, asinan Tikuangpi cu puithiampawl khawlhawknak dingah a si.

4:6^a Suah 30:18; 1Sp 7:38; Neh 3:5, 9; Eze 40:38

7 ^aCule ruahman cia mi vek cio in, sui meito ṭhuam pahra a tuah ih, temple sungah panga cu vawrh lamah, panga cu keh lamah tiin a ret.

4:7^a Suah 25:31-40; 1Sp 7:49

8 ^aCabuai pahra khal a tuah ih, cupawl cu temple sungah thlang lamah panga, sak lamah panga tiin a ret. Cule sui kheng kûm 100 khal a tuah.

4:8^a Suah 25:23-30; Mip 4:14

9 ^aCuihtlunah puithiampawlih tualrawn, tualrawn kaupi le tualrawn hrangah sângkapawl khal a tuah; cule cuih sângkapawl cu dar a khût hai. 10 Tikuangpi cu vawrh lam, nisuahnak lamah thlang lam hawiin a hûng.

4:9^a 1Sp 6:36

11 ^aCun Huram in belpawl, suahdurpawl le kheng kûm pawl a tuah. Cutin Pathian inn hrangih Siangpahrang Solomon a tuahsak mi hna cu Huram in a ṭheh: 12 ṭhuam pahnih le cuih ṭhuam pahnih zim ih kheng kûm vek lu bol, ṭhuampawl tlunih kheng kûm vek a lu bol pahnih tuamtu thil ṭial ṭhikṭhek pahnih; 13 cumi tuamnak thil ṭial ṭhikṭhek pahnih hrangih talê rah 400, ṭhuampawl zim ih kheng kûm vek lu bol pahnih tuamnak ding ṭial ṭhikṭhek veve hrangah talê rah tlar hnih vevein, 14 ^ba tohkālpawl le a tohkālpawl parih maihum khal a tuah; 15 Tikuangpi pakhat le a hnuaiih caw cang hleihnih thawn; 16 ^ccuihtlunah belpawl, suahdurpawl, sa lâknak hmanruapawl le an bungbelpawl hmuahhmuah khal Huram in Jehovah inn hrangah hnawhtlet mi dar ihsin Siangpahrang Solomon a tuahsak.

4:11^a 1Sp 7:14, 40

4:14^b 1Sp 7:27-30

4:16^c 1Sp 7:13; 2San 2:13

17 ^aJordan phairawn, Sukkoth le Zaredah karlakih bel lei hmun ah siangpahrang in cupawl cu a bur hai. 18 ^bCule Solomon in hi bungbel hmuahhmuah cu tam ngaingaiin a tuah ih, dar rih zat cu tah cawk a si lo.

4:17^a Sem 33:17; 1Sp 7:46

4:18^b 1Sp 7:23; 1San 18:8

19 ^aCuti vek cun Solomon in Pathian inn hrangah bungruapawl hmuahhmuah cu a tuah: sui biakṭheng le a parih Sangserh um cabuaipawl; 20 ^bhmun thianghlim sungta hmaiih vandān ding vekin Meito ṭhuampawl le an meitopawl cu sui hlirhlăng in a tuah, 21 cun pangparpawl, meitopawl le caicehpawl cu sui le sui hlirhlăng in, 22 ^ccun caicehpawl, kheng kûm pawl, hai dau pawl le meiling ruhnakpawl cu sui hlirhlăng in a tuah. Hmun thianghlim luhnak, Hmun Thianghlim Bik luhnak sângkapawl le temple sângkapawl cu sui in a tuah.

4:19^a Suah 25:23

4:20^b Suah 25:31; 27:20

4:22^c 1Sp 7:50

5

Solomon in Temple sungah Ziangkim a Ret

1 ^aCutin Solomon in Jehovah inn hrangih a ṭuan mi hna hmuahhmuah cu ṭhehfel a si; cule a pa David ih a rak serhhran mi thilpawl, ngun, sui le bungruapawl hmuahhmuah cu Solomon in a thiarlut ih, Pathian inn ih hlawnthilpawl lakah a ret hai.

5:1^a 2Sam 8:11; 1Sp 6:14; 7:51

Temple Hlănnak

2 ^aCun Solomon in Israel upapawl le hnám lubânpawl hmuahhmuah, Israel tefapawlih hotu pupápawl cu Zion a si mi, David-ih Khawpi ihsin Jehovah-ih Thukham Kuang an zâwn thei nak dingah Jerusalem ah a kokhawm hai. 3 ^bCuruangah Israel mipa zaten thla sarihnak puai ah siangpahrang hnenah an táwngkhawmaw. 4 Cule Israel upapawl zaten an ra ih, Levi-mipawl in Kuang cu an kengso. 5 ^cCun annih in Kuang, Tawnawknak Puanthlam le Puanthlam sungih bungrua thianghlim pawl zaten an kengso. Puithiampawl le Levi-mipawl in cupawl cu an kengso. 6 Cuihhleiah Siangpahrang Solomon le a hnenih ra pungkhawm, Kuang hmaiih Israel mipi umkhawm hmuahhmuah cu tuu le caw cang an tam tuk ruangih siar cawk lo le a zat rel cawk lo thawn thawinak an tuah.

5:2^a Mip 3:31; 1San 15:25

5:3^b 1San 9:1

5:5^c Mip 3:31; 1Sp 8:4; 1San 15:2

7 ^aCun puithiampawl in Jehovah-ih Thukham Kuang cu amai hmun, temple Hmun Thianghlim sungta, Hmun Thianghlim Bik ih cherub-pawl thla hnuaiah an zâwnlut. 8 ^bZiangahtile cherub-pawl cun Kuang hmun tlun zawnah an thla an pharh ih, cherub-pawl in Kuang le a zawnfungpawl cu an hliap. 9 A zawnfungpawl cu an sau ih, kuang zawnfungpawlih zim cu Hmun Thianghlim, Hmun Thianghlim sungta hmai ihsin hmuh theih a si, asinan leng lam ihsi cun hmuh theih an si lo. Cule cupawl cu tuihni tiangin cu tawkah an um. 10 ^cIzip ihsin an suah laiah, Jehovah in Israel tefapawl thawi thukham a tuah tikih Mosi in Horeb ih a ret mi lung pheng pahnih siarlo Kuang sungah zianghman a um lo.

5:7^a 1Sp 8:6; Thu 11:19

5:8^b Sem 3:24; Suah 25:15

5:10^c Suah 16:34; Dnp 10:2, 5; Heb 9:4

11 ^aCule hitin a si, Hmun Thianghlim ihsin puithiampawl an ra suak, ziangahtile khui bur ṭhen ih um an si khalle, a rak um mi puithiampawl zaten an thianfaiaw ta thluh, 12 ^bLevi-mi hlasak thiam pawl, cupawl zate lak ihsin Asaf, Heman, Jeduthun le an fapapawl le an unaupawl cu biakṭheng netnakih nisuahnak lamah pat zai fêm var hnipuan thuamawin, sumselpawl, cawngcingpawl le ṭingṭangpawl kengin an ding, cule an zawngah puithiam 120 cun tawtawrawt an phaw ih, 13 ^chitin a si, tawtawrawt phawtupawl le hlasaktupawl cun aw khat vekin Jehovah thangṭhatnak le lungawi thu simnak ih an tum awn cu aw pakhat vekih theih a si ih, tawtawrawtpawl le sengsengpawl le awnmawi hmanruapawl thawn an aw suahin,

5:11^a 1San 24:1; 2San 35:4

5:12^b 1Sp 10:12; 1San 9:33; 13:8; Sam 68:25

5:13^c Suah 40:34; 1San 16:34; Ezr 3:11; Sam 100:5; Jer 33:11

“Ziangahtile anih cu a ṭha,
Ziangahtile a zahngainak cu kumkhuain a hmun,”

tiih Jehovah an thangṭhat tikah, cuih inn, Jehovah inn cu mero in a khat, 14 ^acutin puithiampawl cun khawdur ruangah rawngbawl an pehzăwm thei lo; ziangahtile Jehovah-ih ropitnak in Pathian inn cu a luahkhat.

5:14^a Suah 19:16; 29:43; 40:35; Thu 15:8

6

Solomon-ih Hlănnak Thlacam

1 ^aCun Solomon in,

6:1^a Suah 19:9

“ ‘Khawdur thim lakah ka cêng ding,’ tiah Jehovah in a ti.
2 ^aInn ropi ka lo saksak,
Kumkhua na cēnnak ding hmun cu,”

6:2^a Ezr 6:12; Sam 135:21

tiah a ti.

3 Cun siangpahrang cu a heraw ih Israel mipungkhawm zate an dīn laiah, Israel mipungkhawm pumpi cu thlawsuah a pe. 4–6 ^aCule anih in, “Ka pa David hnenah a kâ in, ‘Izip ram ihsin ka mi Israel ka hruaisuah ni ihsin Israel hnám lakih khui khua hman ka hmin umnak ding inn saknak dingah ka hril dah lo, ka mi Israel uktu dingah zohman ka hril fawn lo. Asinan ka hmin umnak dingah Jerusalem ka hril ih, ka mi Israel uktu dingah David ka hril a si,’ tiih titu, amai kut rori ih famkimtertu Israel-ih Pathian Jehovah cu thangṭhatin um seh.

6:4-6^a Suah 20:24; Dnp 12:5; 1San 28:4; Isa 14:1

7 ^a“Israel-ih Pathian Jehovah hmin hrangih temple sak dingin ka pa David-ih thinlung ah a rak um. 8 Asinan Jehovah in ka pa David hnenah, ‘Ka hmin hrangah temple sak ding cu na thinlung sungah a um, cutiih na thinlung ih a um cu na ti ṭha a si. 9 Sikhalsehla nang in temple cu na sak lo ding, na taksa ihsi a suak ding mi na fapa sawnin ka hmin hrangah temple a sak ding a si,’ tiah a ti. 10 Jehovah in a ṭawngsuak mi a kamsuakthu cu a famkimter ih, Jehovah ih a rak tiamkam vekin kei in ka pa David-ih dinhmun ka luah, Israel laltokham parah ka to; cule Israel-ih Pathian Jehovah hmin hrangah temple ka sak. 11 ^bCule cu tawkah Israel tefapawl thawi a rak tuah mi Jehovah-ih Thukham umnak Kuang cu ka ret,” tiah a ti.

6:7^a 1Sam 10:7; 1San 17:2; Apo 7:46

6:11^b Dnp 10:2; Sam 25:10

12 Cun Jehovah-ih biakṭheng hmaiah Israel mipungkhawm zate hmuh ah Solomon cu a dīng ih, a kut a pharh, 13 ^aziangahtile Solomon in dawng nga sau, dawng nga kau, dawng thum sâng dar dawnsâng a tuah ih, tualrawn laiah a ret; cule a parah amah cu a ding, Israel mipungkhawm zate hmaiah a khuk a bil ih van lam hawiin a kut a pharh; 14 ^bcule anih in, “Jehovah, Israel-ih Pathian, an thinlung zate ih na hmaiih a fehtu, na siahhlawhpawl thawn na thukham le zahngainak kilhimtu lei ah le van ah nangmah vek Pathian an um lo. 15 ^cNang cun na siahhlawh ka pa David na tiamkam mi na rak kilhim. Tuihsun ih a si bangin, nang cun na kâ in na rak sim ih na kut in na famkimter. 16 ^dCuruangah Jehovah Israel-ih Pathian, atu-ah na siahhlawh ka pa David hnenih, ‘Na fapapawl in an nundān an fimkhur ih ka hmaiih nangmah na rak feh bangin ka dān ih an feh a si ahcun, ka hmaiah Israel-ih laltokham parih totu ding pa na tlasam lo ding,’ tiih na rak sim mi hlensuak aw. 17 Cule atu-ah, Maw Israel-ih Pathian Jehovah, na siahhlawh David hnenih na rak sim mi, na kamsuakthu thleng dik hram seh.

6:13^a 1Sp 8:54; Neh 8:4; Sam 95:6

6:14^b Suah 8:10; Dnp 7:9

6:15^c 2Sam 7:12; 1San 22:10

6:16^d 2Sam 7:13, 15; Sam 132:12

18 ^a“Asinan Pathian cu leilung milai hnenah a cêng taktak ding maw si? Zoh hnik, van le vanih van ah na tlem lo si khawh, ka sak mi hi inn cu ziang tluk a te sinsin pei! 19 Cuti cingin na siahhlawhih thlacam le a dilnak ngaihsakin, Maw Jehovah ka Pathian, na hmaiih na siahhlawhih auaw le thlacamnak thlacam hi ngaithla aw: 20 ^bhimi temple lam, ‘Cu tawkah ka hmin ka ret ding a si,’ tiih na sim mi hmun lamah na mit cu sun le zanin meng hram seh, cutin na siahhlawh in hi hmun lam hawiih a thlacam thei hram aw. 21 ^cCule hi hmun lam hawiih thla an cam tikah, na siahhlawh le na mi Israel-ih dilnak ngaithla hram aw. Na cēnnak hmun van ihsin ngaithla awla, na theih tikah, ngaidam hai hram aw.

6:18^a Sam 11:4; Isa 40:22; Thu 21:3

6:20^b Suah 3:16; Dnp 12:11; Sam 34:15

6:21^c Sam 51:1; Isa 33:24; Mik 7:18

22 ^a“Mi pakhat khat in a innhnen parah thil sual a tuah ih, hramhramin thukam lâkter a si ih, hi temple sungih na biakṭheng hmaiah ra in thukamnak a lâk asile, 23 ^bvan ihsin ngaithla awla cangvai aw, misualrál cu a lu parah a nundān ṭhumnak thawn airulhnak ṭhumnak in siseh, midingfel cu a dingfelnak vekih lehrulih thiamcoternak in na siahhlawhpawl cu thuṭhen aw.

6:22^a Suah 22:11; 1Sp 8:31

6:23^b Isa 3:11; Mat 16:27

24 ^a“Asilole na mi Israel cu na parih thil sual an tuah ruangah ral hmaiih neh an si, cule hawikirin na hmin hlâmin le himi inn sungah na hmaiah thlacamnak le dilnak an tuah asile, 25 van ihsin ngaithla hai awla, na mi Israel-ih sual cu ngaithiamin an pupápawl hnen le anmah hnenih na rak pek mi ram ah hruaikirsal hai aw.

6:24^a Pui 26:17; Dnp 28:25

26 ^a“Na parih thil sual an tuah ruangah van khar a si ih, ruah a um lo tikah, hi hmun lam hawiin thla an cam ih, na hmin an hlám, cule anmah na zawnzaiter hai ruangih an sual ihsin an kir asile, 27 van ihsin ngaithla hai awla, na mi Israel, na siahhlawhpawlih sual ngaidam aw, cutin an zawh ding mi lamzin ṭha na zirh hai ding ih, na mipawl hnenih ro ih na rak pek mi na ram parah ruah surter aw.

6:26^a Pui 26:19; Dnp 11:17; 2Sam 1:21

28 “Ram sungah mangṭam siseh, nathri sia siseh, rocarnak siseh, ṭawihnak siseh, kharbawkpawl siseh, khaukhuappawl siseh an um ih, an ralpawl in an ram sung ^akhawpipawl ih anmah an kulhkhŭm tikah siseh, ziang vek nathri le ziang vek natnak a tlun tikah siseh, 29 mi zokhal in, asilole na mi Israel zaten mi pakhat cio in mai phurrit cio le mai thinnatnak cio an thei ih, himi temple lamah an kut pharhin ziang vek thlacamnak siseh, ziang vek dilnak siseh an tuah tikah: 30 ^bna cēnnak hmun van ihsin ngaithla hai awla ngaidamin, mi kip anmai umdān hmuahhmuah bangtuk cio in pe hai aw, an thinlung na thei a si, ziangahtile nangmah lawng in minung fapapawlih thinlung na thei, 31 ^ccutin kan pupápawl hnenih na pek mi ram ah an nun sung na lamzinpawl zawhin an lo ṭihzah ding.

6:28^a khawpipawl: A ṭawng hrampi ah, “kăwtkapawl,” ti a si.

6:30^b Sam 7:9; Thf 16:2

6:31^c Dnp 6:13; Sam 34:7, 9; Thf 8:13

32 ^a“Cuihhleiah, na mi Israel a si lo nân, na hmin ropi le na kut cak le na bân suah mi ruangah ram hlapi ihsin a ra mi, ram dang mi thuhla ah, himi temple sungah rain thla an cam tikah, 33 ^bna cēnnak hmun van ihsin ngaithla awla ram dang mi in nangmah a lo kawhdān hmuahhmuah zulhin tuah aw, cutin na mi Israel vekin leitlun ih miphunpawl hmuahhmuah in na hmin an thei ding ih an lo ṭihzah ding, cule ka sak mi himi temple hi na hmin ih kawh mi a si ti an thei ding.

6:32^a Suah 3:19-20

6:33^b Suah 12:43

34 ^a“Na mipawl na thlah hai nak hmun kip ah an ralpawl do dingin an fehsuak ih, na hril mi hi khawpi lam hawi le na hmin hrangih ka sak mi temple lam hawiih thla an cam asile, 35 van ihsin an thlacam le an dilnak ngaithla awla, an thuhla relsak hai hram aw.

6:34^a Dnp 28:7; 1San 5:20; 2San 14:11-12

36 ^a“Na parah thil sual an tuah, ziangahtile thil sual tuah lo mi pakhat hman an um lo, an parah na thinhengin anmah cu ralpawl hnenah na ap, cule anmahpawl cu a hla ah simaw, a nai ah simaw, ram ah ralkaih ah an hruai, 37 ^bcu cingin ralkaih ih hruai an sinak ram ah an hmusuakaw ih, ralkaih ih hruai an sinak ram ah lungthlĕngin, ‘Thil sual kan rak tuah ih, thil kan ti palh, sualralnak kan rak tuah a si,’ tiin na hnenah dilnak an tuah ih, 38 ralkaih ih an hruainak hmun, sál tānnak ram ah, an thinlung zate le an ruahnak zaten na lam an hawisal ih an pupápawl na pek mi ram lam le na hril mi na khawpi le na hmin hrangih ka sak mi temple lam hawiih na hnenih thla an cam asile, 39 na cēnnak hmun van ihsin an thlacam le an dilnakpawl cu ngaithla awla, an thuhla pawmsak hai hram aw, cule na parih thil sual tuahtu na mipawl ngaidam hai hram aw.

6:36^a Pui 26:44; 1Sp 8:46; Job 11:12; Sam 143:2; Ths 7:20; Isa 58:3; Jer 9:5; Rom 3:9; Efe 2:3

6:37^b 1Sp 8:48; Isa 58:3; Jer 24:7

40 ^a“Atu-ah, ka Pathian, ka lo ngen a si, hi hmun ih tuah mi thlacamnak lamah na mit meng awla, na hna thawng aw.

6:40^a 1Sp 8:29, 52; Neh 1:6, 11; Sam 17:6; Isa 37:17

41 ^a“Curuangah atu-ah, tho aw, Maw Jehovah Pathian, na cawlhhahdamnak hmun ah,
Nangmah le na cahnak thukham kuang cu.
Maw Jehovah Pathian, na puithiampawl cu runsuahnak thawn thuamaw hai sehla,
Na mithiangpawl ṭhatnak ah lungawi aipuangin um hai seh.
42 ^bMaw Jehovah Pathian, na hriak thih mi paih hmai cu herkirter hlah aw,
Na siahhlawh David hnenih zahngainakpawl mang aw,”

6:41^a 1San 28:2; Sam 3:7; 13:6; 132:16; 142:7; Isa 33:10

6:42^b Sam 2:2; 89:24, 28

tiah a ti.

7

Temple Hlănnak a Cem

1 ^aSolomon in thlacam a ṭheh tikah, van ihsin meisa a rung tla ih, Meiur Thilhlăn le thawinakpawl a kāngfai ṭheh; cule Jehovah-ih ropitnak in temple a luahkhat. 2 ^bCule Jehovah-ih ropitnak in Jehovah inn a luahkhat ruangah Jehovah inn sungah puithiampawl an lut thei lo. 3 ^cIsrael tefapawl hmuahhmuah in meisa a rung tlakdān le temple parih Jehovah-ih ropitnak a um mi an hmuh tikah, lung rĕm mi parah an hmai leisin bihin an kûn ih, Jehovah cu an bia,

7:1^a Suah 16:10; 19:18; Pui 9:24; 1Sp 18:38; Sam 26:8; Isa 65:24

7:2^b Suah 29:43; 1Sp 8:11

7:3^c 1San 16:34; Ezr 3:11

“Ziangahtile anih cu a ṭha,
Ziangahtile a zahngainak cu kumkhuain a hmun,”

tiin an thangṭhat.

4 Cun siangpahrang le miphun zaten Jehovah hmaiah thawinakpawl an hlan. 5 Siangpahrang Solomon in thawinak caw pa 22000 le tuu tingkhat le thawngkul a hlan. Cuti vek cun siangpahrang le mipi hmuahhmuah in Pathian inn cu an hlan a si. 6 ^aCule “Ziangahtile a zahngainak cu kumkhuain a hmun,” tiih David in a ti tikah, puithiampawl cu an rawngbawlnak hmun ah Levi-mipawl thawn Jehovah thangṭhatnak dingih Siangpahrang David ih a rak tuah mi Jehovah-ih awnmawi hmanruapawl kengin an ding. Cule puithiampawl cun an hmaiah tawtawrawt an phaw ih, Israel miphun zaten an ding thluh.

7:6^a 1San 15:16, 24

7 ^a Cuihhleiah Solomon in Jehovah inn hmaiih um tual lai cu a serhhran ih, cu tawkah Meiur Thilhlănpawl le Remnak Thilhlănpawlih thau a hlan. Ziangahtile Meiur Thilhlănpawl, Thlairawl Thilhlănpawl le sa thau pawl kha Solomon ih tuah mi dar biakṭheng in a dawngsáwng thei lo.

7:7^a Suah 29:13; 1Sp 8:64

8 ^aCuih cān ah Solomon in a zawngih um Israel miphun zate thawn, Hamath khaw luhnak ihsin Izip Hawrkuam tiangih mipungkhawm nasa zet thawn ni sarih sung puai a tuah. 9 ^bCule a ni riatnak ah tawnkhawmawknak hleice an nei, ziangahtile biakṭheng apnak ni sarih sung an hmang ih, ni sarih sung puai an tuah. 10 Cule David, Solomon le a mi Israel parih Jehovah in ṭhatnak a lăngter ruangah thla sarih, ni 23-nak ah mipi cu anmai puanthlam cio ah thinlung aipuang le lungawiin a tlunter hai. 11 ^cCuti vekin Solomon in Jehovah inn le siangpahrang inn cu a ṭheh; cule Solomon in Jehovah inn le amai inn hrangah tuah dingih a thinlung ih ra thleng hmuahhmuah cu hlawhtling zetin a tuahsuak ṭheh.

7:8^a Sem 15:18; Mip 13:21; 1San 9:1; Neh 8:17

7:9^b Pui 23:36

7:11^c 1San 28:20

Solomon hnenah Pathian a Langsal

12 ^aCun zan ah Solomon hnenah Jehovah a lang ih a hnenah, “Na thlacam ka thei ih, hi hmun cu keimah hrangih raithawinak inn si dingah ka hril a si. 13 ^bVan ka khar ih ruah a sur lo tikah siseh, ram eicem dingin kharbawk thu ka pek tikah siseh, ka mipawl lakih nathri sia ka thlenter tikah siseh, 14 ^cka hmin ih kawh mi ka mipawl in phahniamawin thla an cam ih, ka mithmai hawlin, an sualralnak lamzin ihsin an kir asile, van ihsin ka ngaithla hai ding, cule an sual ngaidamin an ram ka tidam ding. 15 ^dAtu-ah cun ka mit ka meng ding ih, hi hmun ih thlacam mi lamah ka hna ka thawng thlang ding. 16 ^eZiangahtile cu tawkih ka hmin kumkhuaih a um thei nak dingah hi inn hi ka hril ih ka tithianghlim a si; cule ka mit le ka thinlung cu cu tawkah a um tlaitluan ding. 17 ^fNangmah cu na pa David ih a tuah bangin, ka hmaiah na feh ih thu ka lo pek mi hmuahhmuah bangtukin na tuah ih, ka sakhaw dānpawl le ka zīn le dān pawl na thlun asile, 18 ^g‘Israel parah uktu ding mi na tlasam lo ding,’ tiin na pa David hnenih thukham ka tuah bangin, na lalram laltokham ka dĭn hnget ding.

7:12^a Dnp 12:11, 15

7:13^b Dnp 11:17; Amo 4:7

7:14^c Suah 10:3; 15:26; Mip 6:27; 2Sp 17:13; 1San 16:11; Isa 30:26; 55:7; Jer 33:6; Eze 18:32; Zek 1:4; Mal 4:2

7:15^d 1Sp 8:29; Neh 1:6

7:16^e Dnp 12:5

7:17^f Pui 19:37; Dnp 28:1; 1Sp 2:3; 9:4

7:18^g 2Sam 7:13; 1San 17:12; Isa 9:7; 55:4; Jer 33:17, 21; Mik 5:2

19 ^a“Asinan nan hmaiih ka ret mi ka sakhaw dānpawl le ka thupekpawl pialsanin, nan thlauthlak ih, pathian dang pawl hnenah fehin nan rian ih anmah nan biak asile, 20 ^banmah ka pek mi ka ram ihsin anmah cu ka phawi hai ding; cule ka hmin hrangih ka tithianhlim zo mi hih inn cu ka hmuh băn lo ah ka hlăwnsuak ding ih, miphunpawl zate lakah cumi cu phungthluk le puahcăwk ah ka tuah ding.

7:19^a Dnp 28:15; 1San 28:9; Jer 9:13

7:20^b Dnp 28:37; 29:28; 1Sp 14:15; Jer 12:14

21 ^a“Cule khaisan a si mi himi inn thu ah cun, himi paltlăngtu mi kip in mak tiin, ‘Ziangah so hi ram le hi inn ah Jehovah in hi vekin a tuah?’ tiah an ti ding. 22 ^bCu tikah annih in, ‘Izip ram ihsin anmah hruaisuaktu, an pupápawlih Pathian Jehovah cu an thlauthla ih pathian dang pawl an rak pawm, cupawl cu an bia ih an rĕn ruangah hih vanduainak hmuahhmuah hi an parah a thlengter a si,’ tiah thu an let ding,” tiah a ti.

7:21^a Dnp 29:24; 2San 29:8; Jer 19:8

7:22^b Jer 16:11

8

Solomon-ih Khawpi le Hnaṭuantu Pawl

1 ^aCule hitin a si, kum 20 a rei tikah, Solomon in Jehovah inn le amai inn a sak ṭheh. 2 Cule Hiram in Solomon a pek mi khawpipawl cu, Solomon in a sak hai ih, cu tawkah Israel tefapawl a umter. 3 Cule Hamath Zobah ah Solomon a feh ih a kulhkhŭm ih a la. 4 ^bRamṭhing ah Tadmor khal a dĭn ih Hamath ah thilri khawlnak khawpipawl a sak. 5 ^cBeth Horon tlunta le Beth Horon hnuaita, khaw kulh nei khawpipawl cu an hruangpawl thawn, kăwtkapawl le a kalhnak tlângpawl tla neiin, 6 ^dBaalath le Solomon-ih a neih mi thilri retnak khawpipawl le rang lêngpawl hrangih khawpipawl zate, rang ralkappawl hrangih khawpipawl a sak. Cuihtlunah Solomon in Jerusalem, Lebanon le a uknak ram hmuahhmuah ah sak a duh mi hmuahhmuah a sak.

8:1^a 2Sam 7:2; 1Sp 9:10

8:4^b Mip 13:22; 2Sam 8:9

8:5^c Jos 10:10

8:6^d Jos 19:44; 1Sp 9:19

7 ^aA tāng mi hmuahhmuah, Israel si lo mi Heth-mipawl, Amor-mipawl, Periz-mipawl, Hiv-mipawl le Jebus-mipawl, 8 cupawl cu, an hnuih cuih ram ih an tān mi an tesinfapawl, Israel tefapawl ih an rak hlohralter lo mi, tuihni tiangih a si bang hin, cupawl lak ihsin Solomon in hramhramih ṭuanter mi hnaṭuantupawl a dĭn. 9 Asinan Solomon in Israel tefapawl cu a hna hrangih siahhlawh ah a tuah hai lo. Mi hrekkhat cu ralthiampawl, ralkappawl hotu bawipawl, a rang lêngpawl le rang ralkappawl hotupawl an si. 10 Cule mi dang pawl cu Siangpahrang Solomon-ih hotupawlih lupawl: mipi uktu 250 an si.

8:7^a Sem 10:16; Ezr 9:1

Temple ih Thilhlănpawl

11 ^aCule Solomon in David-ih Khawpi ihsin Faro-ih fanu cu a hrangih a sak mi inn ah a hruaiso, ziangahtile anih in, “Ka nupi cu Israel siangpahrang David-ih inn ah khua a sa lo pei, ziangruangahtile Jehovah-ih Kuang a rak thlennak hmunpawl cu an thianghlim a si,” tiah a ti.

8:11^a 1Sp 3:1

12 ^aCun Solomon in hulhliap hmaiih a rak dawl mi Jehovah-ih biakṭheng parah Jehovah hnenah Meiur Thilhlănpawl a hlan, 13 ^bni tin bituk tawk bangtukin, Mosi thupek bangtukih thilhlăn, Sabbath ah, Thla Thar ah le khiah mi puai, kum khat ah vei thum: Thilnu telh lo Sang Puai, Zarhkar Sarih hnu Puai le Bûkte Puai hrangah a hlan. 14 ^cCule a pa David ih remruat cia bangtukin puithiampawl cu an rawngbawlnak hrangah bur ṭhen a ruat ih, Levi-mipawl cu an ṭuanvo a ruatsak. An ṭuanvo cu an ni tin ṭuanvo ih a phût vekin thangṭhatnak hlasak le puithiampawl hmaiih rawngbawl a si. Kăwtka kip kiltupawl khal a bur a bur in a ruat, ziangahtile cuti vek cun Pathian mi David in thu a rak pe a si. 15 Puithiampawl le Levi-mipawl cun siangpahrang thupek ihsin ziang thu khalah siseh, hlawnthil thuhla khalah siseh an pialsan lo.

8:12^a 1Sp 8:64

8:13^b Suah 12:17; 23:14, 16; 29:38; Mip 10:10; 28:9, 16-25; 29:12-38; Neh 8:17

8:14^c 1San 9:17; 23:6; 24:1; 25:1; Neh 12:24, 36, 45

16 Jehovah inn lungphum ni ihsin an ṭhehfel tiangin Solomon-ih hnaṭuan hmuahhmuah cu felfaiteih tuah a si. Cuti vek cun Jehovah inn cu ṭhehfel a si.

Edom ihsin Sui

17 Cun Solomon cu Edom ram ih tifinriat kap tluan Ezion Geber le Elath ah a feh. 18 Cule Hiram in a siahhlawhpawlih kut in lăwngpawl le tifinriat theitu siahhlawhpawl a hei kuat. Annih cu Solomon-ih siahhlawhpawl thawn Ofir ah an feh ih, cu tawk ihsin sui talent 450 an ngah, cule cumi cu Siangpahrang Solomon hnenah an keng.

9

Sheba Siangpahrang Bawinu

1 ^aSheba siangpahrang bawinu in Solomon-ih hminthanzia a theih tikah, thusuhnak har pawl thawn Solomon hniksak dingin, thluntu tam zet hruaiin kalaukpawl in rimhmuipawl, sui tam zet le lung mankhung pawl phurin Jerusalem ah a ra ih, Solomon hnen a thlen tikah a thinlung ih um mi zaten a sim ṭheh. 2 Cun Solomon in a thusuhnakpawl zaten a sang ṭheh; Solomon hrangih har tuk, a hnenih a simfiang thei lo mi zianghman a um lo. 3 ^bCule Sheba siangpahrang bawinu in Solomon-ih fimnak, a sak mi inn, 4 a cabuai parih rawl, a siahhlawhpawl todān, a hnaṭuantupawlih hnaṭuandān le an thuamawkdān, a no kengtupawl le an thuamawkdān le Jehovah inn a luhsonak zinpawl a hmuh tikah, thinlung mumal a nei nawn lo.

9:1^a Sem 10:7; 1Sp 10:1; Eze 23:42; Mat 12:42; Luk 11:31

9:3^b 1Sp 5:12; 10:3

5 Cun anih in siangpahrang hnenah, “Ka ram ih ka rak theih mi na ṭawngkampawl le na fimnak hi a dik mi thuthan a rak si. 6 Sikhalsehla ka rat ih ka mit rori ih ka hmuh hlan sung cu an ṭawngkampawl ka rak zum lo; cule ngai hnik, na fimnak ropitzia hi a hrek hman in rak sim lo hi a si. Na hminthannak ka theih mi cu na lan riaiaw. 7 Na mipapawl cu mithlawsuak an si ih, na hmaiah dīng tlaitluanih na siahhlawh na hmaiih ding camcin ih na fimnak theitupawl cu mithlawsuak an si. 8 ^aJehovah na Pathian hrangih siangpahrang dingih a laltokham ih lo toter dingih na parih lungsinak neitu Jehovah na Pathian cu thangṭhatin um seh! Ziangahtile na Pathian in Israel a duhdawt ih, kumkhuaih anmah dĭn hngeh an sinak dingah le nangmah cu diknak le dingfelnak tuah dingah an tlunih siangpahrang ah a lo tuah a si,” tiah a ti.

9:8^a 1Sp 2:12; 1San 17:14

9 Cule siangpahrang bawinu in sui talent 120, rimhmui a tawri tawr le lung mankhung pawl tla siangpahrang a pe; Sheba siangpahrang bawinu in Siangpahrang Solomon hnenih a pek mi rimhmui vek hi a um dah kel lo.

10 Ofir ihsi sui rak kengtu, Hiram-ih siahhlawhpawl le Solomon-ih siahhlawhpawl khal in algum thing le lung mankhung pawl an rak keng. 11 Cule siangpahrang in algum thing cu Jehovah-ih inn le siangpahrang inn fehnak hrangah le hlasaktupawl hrangih ṭingṭangpawl le cawngcingpawl ah a tuah. Cule Judah ram ah hi hlanah hivek hi hmuh a rak si dah lo.

12 Siangpahrang hnenih a run ken mi hnakih tam, Siangpahrang Solomon in Sheba siangpahrang bawinu ih duh mi hmuahhmuah, a dil mi pauhpauh cu a pe. Cule a her ih amai ram ah a siahhlawhpawl thawn a tlung.

Solomon-ih Neihnunnak

13 Solomon hnenih kum tin a thleng mi sui cu talent 666 rit a si, 14 ^acumi sungah sumtuah khualtlawngpawl le sumdâwngpawl ih ken mi a tel hrih lo. Cule Arabia ram siangpahrangpawl zate le ram uktupawl in Solomon hnenah sui le ngun an rak keng. 15 Cule Siangpahrang Solomon in sŭt pheng mi sui in ralphaw hlai zetzet 200 a tuah, ralphaw pakhat ah sŭt pheng mi sui shekel 600 ciar a feh. 16 ^bSŭt pheng mi sui in ralphaw te 300 khal a tuah; ralphaw pakhat ah sui shekel 300 ciar a feh. Cupawl cu siangpahrang in Lebanon Tupi Inn sungah a ret hai.

9:14^a Isa 21:13; Jer 25:24; Eze 27:21

9:16^b 1Sp 7:2

17 ^aCuihtlunah siangpahrang in vui ho laltokham ropi a tuah ih, cumi cu sui hlirhlăng a khût. 18 Cuih laltokham ih karbak paruk cu sui ke retnak thawn, laltokham thawn pehawin a um; tonak sir veve ah kut hngahnak a um, cule kut hngahnakpawl sirah kiosa lem pahnih an ding. 19 Cu tawkah, karbak paruk pakhat cio ih khat lam le khat lam sirah kiosa lem hleihnih an ding; lalram dangah hivek hrimhrim zianghman tuah a si dah lo.

9:17^a 1Sp 22:39

20 Siangpahrang Solomon-ih thil innak bungbel zaten sui an si ih, Lebanon Tupi Inn ih bungbel zate khal sui hlirhlăng an si. Ngun pakhat hman a um lo, ziangahtile Solomon san laiah cun ngun cu zianghman ah an siar lo. 21 Ziangahtile siangpahrangih lăwngpawl cu Hiram-ih siahhlawhpawl thawn Tarshish ah an feh. Kum thum dan ah vei khat sumdawnnak lăwngpawl cu Tarshish in an ra thleng, sui, ngun, vui ho, zawng tumpi pawl le utāwngpawl tla an rak phur.

22 ^aCutin Siangpahrang Solomon cun lennak le fimnak ah leilung siangpahrangpawl hmuahhmuah a hleih ṭheh. 23 ^bCule Pathian in a thinlung sungih a ret mi a fimnak ngaithla dingah, leilung siangpahrangpawl hmuahhmuah in Solomon-ih umnak an ra hawl. 24 ^cMi kip in anmai laksawng cio kum tin pek bikhiah neiin ngun le sui bungbelpawl, sinfenpawl, ralthuampawl, rimhmuipawl, rangpawl le lākrangpawl tla an rak keng.

9:22^a 1Sp 3:13

9:23^b 1Sp 4:34; Jam 1:5

9:24^c Sam 45:12; Isa 18:7

25 ^aSolomon in rangpawl le rang lêng retnak dingah rang retnak pindante te 4000 le rang ralkap 12000 a nei. Cupawl cu rang lêng khuapawl ah le Jerusalem ih siangpahrang hnenah a ret hai.

9:25^a 1Sam 8:11

26 ^aAnih in Zufraṭis tiva ihsin Filisṭia-mipawlih ram tiang, Izip ramri tiang siangpahrangpawl zaten a uk. 27 Siangpahrang in Jerusalem ah ngun cu lungto tlukin a umter ih, sidar thingpawl khal phairawn ih ^bsikamor kungpawl tlukih tam in a umter. 28 Cule Izip le ram kip ihsin Solomon hnenah rangpawl an rak hruai.

9:26^a Sem 15:18-21; 1Sp 4:21; Sam 72:8-11

9:27^b sikamor: 1Sp 10:27 simfiangnak zoh aw.

Solomon-ih Uknak Cemnetnak

29 ^aSolomon-ih cangvaihnak dang, a hmaisabik ihsin a netabik tiangin profet Nathan-ih cazual sungah le Shilon-mi Ahijah ih thuphuan mi sungah le Nebat-ih fapa Jeroboam thuhla ih hmutu Iddo ih larnak hmuh mi cazual sungah ngan an si lo maw? 30 Solomon in Israel miphun zate tlunah kum 40 sung Jerusalem in a uk. 31 ^bCun Solomon cu a pupápawl hnenah a itthat ih, a pa David-ih Khawpi ah phum a si. Cule a fapa Rehoboam cu a aiah a lal.

9:29^a 1Sp 11:29

9:31^b 2Sam 7:12; 1Sp 2:10

10

Siangpahrang Rehoboam

1 Cule Rehoboam cu Shekem ah a feh, ziangahtile amah kha siangpahrang ih tuah dingah Israel miphun zaten Shekem ah an rak feh. 2 ^aCule hitin a si, Nebat-ih fapa Jeroboam in cuih thu a theih tikah, Jeroboam cu Izip ihsin a ra tlungkir (amah cu siangpahrang Solomon hmaika ihsin a tlânsuak ih Izip ah a rak um dah). 3 ^bCun mi an thlah ih amah cu an ko. Cule Jeroboam le Israel miphun zaten an ra ih Rehoboam hnenah, 4 “Na pa in kan hngawngkol a ritter; curuangah atu-ah na paih phurrit hnaṭuan le kan parih a ṭhum mi a hngawngkol rit zet cu zângter aw, cule nangmah kan lo rian ding,” tiah an ti.

10:2^a 1Sp 11:40

10:3^b 1San 9:1

5 Cule anih in an hnenah, “Ni thum hnuah ka hnenah ra kirsal uh,” tiah a ti hai. Cule mipi cu an suak.

6 ^aCun Siangpahrang Rehoboam cun a pa Solomon a dam laiih a hmaiih dīng ṭheu tu upapawl cu thu a ráwn hai ih an hnenah, “Hih mipi let dingah ziang vek ruahnak so in pek?” tiah a ti.

10:6^a Job 8:8-9

7 ^aCule annih in a hnenah, “Hih mipi parah ngil na nei ih, an lung na hmuiter ih, an hnenih ṭawngkam ṭha pawl na ṭawng asile, kumkhuain na siahhlawh an si ding,” tiah an ti.

10:7^a 1Sp 12:7; Thf 15:1

8 ^aAsinan a hnenih upapawl ih an rak pek mi ruahnak cu a hnáwng ih, a hmaiih ding, amah thawi ṭhanglian tlangvalpawl cu thu a ráwn. 9 Cule anih in an hnenah, “Nannih in ziang ruahnak so in pek ding? Hih mipi ka hnenih, ‘Na pa in kan parih a ṭhum mi hngawngkol hi zângter aw,’ tiih i titupawl hi ziangtin kan sawn pei,” tiah a ti hai.

10:8^a Thf 13:20

10 Cun amah thawi a ṭhanglian mi tlangvalpawl cun a hnenah, “Hih mipi, ‘Na pa in kan hngawngkol a ritter, asinan cumi cu nang in kan parah zângter aw,’ tiih lo titupawl hnenah hitin ti hai aw, hitin an hnenah sim aw, ‘Ka zungte cu ka paih tâi hnakin a tumsawn ding. 11 Cule atu-ah ka pa in nan parah hngawngkol rit a ṭhum, nan hngawngkol cu ka bêt sinsin ding; ka pa in mivuaknak in nun a lo sim, asinan kei cun tlangkaikuangpawl in nun ka lo sim ding,’ tiin na ti pei,” tiah an ti.

12 Cule Jeroboam le mipi hmuahhmuah cu siangpahrang in, “Ni thumnak ah ka hnenah rasal uh,” tiih a cah hai vekin a ni thumnak ah cun Rehoboam hnenah an ra.

13 Cun siangpahrang in an hnenah hrohrang zetin a rak sawn hai. Siangpahrang Rehoboam in upapawl ih an rak pek mi ruahnak cu a hnáwng ih, 14 tlangvalpawl ih ruahnak pek mi vekin an hnenah, “Ka pa in nan hngawngkol a ritter ih, kei in nan hngawngkol parah ka bêt sinsin ding; ka pa in mivuaknak in nun a lo sim, asinan kei cun tlangkaikuangpawl in nun ka lo sim ding,” tiah a rak ti hai.

15 ^aCun Siangpahrang in mipi cu a ngaithla hai lo; ziangahtile thil cangsuaktertu cu Pathian hnen ihsin a si, Jehovah in Shilon-mi Ahijah hmangih Nebat-ih fapa Jeroboam hnenih thu a rak sim mi a famkimter thei nak dingah a si.

10:15^a 1Sp 11:29

16 ^aCule Siangpahrang in anmah a ngaithla lo ti Israel miphun hmuahhmuah in an hmuh tikah, mipi in siangpahrang hnenah,

10:16^a 1San 9:1

“David ah ziang covo so kan neih?
Jessi-ih fapa ah ro kan nei lo.
Maw Israel, mi tin mai puanthlam cio ah!
Maw David, atu-ah nangmai sungkua ngaihtuah aw,”

tiah an let. Cutin Israel miphun zaten anmai puanthlam cio ah an feh.

17 Asinan Judah khawpipawl ih cêng, Israel tefapawl cu Rehoboam in a uk hai. 18 ^aCun Siangpahrang Rehoboam in hramhramih hnaṭuanter mipawl hotu Hadoram cu a thlah; asinan Israel tefapawl in amah cu lungto in an rak deng ih a thi. Curuangah Siangpahrang Rehoboam cu Jerusalem ih tlân dingin a rang lêng parah manhlap zetin a kai. 19 Cutin tuihni tiangin Israel cu David-ih sungza parah a hél lan ta.

10:18^a 2Sam 20:24; 1Sp 4:6; 5:14

11

Rehoboam in Pathian a Thlun

1 ^aCule Jerusalem ih Rehoboam a thlen tikah, Judah sungza le Benjamin hnám ihsin, Rehoboam hnenah lalram a dĭnsal thei nak dingah, Israel do dingih hril mi mipa ral do thiam tingkhat le thawng sawmriat a fĭnkhawm. 2 ^bAsinan Jehovah kamsuakthu cu Pathian mi Shemaiah hnenah a rung thleng ih, 3 “Solomon-ih fapa, Rehoboam, Judah siangpahrang hnen, Judah ram le Benjamin ram ih Israel miphun hmuahhmuah hnenah, 4 ‘Jehovah in hitin a ti, “Nan hung so lo pei, nan unaupawl nan do fawn lo pei! Mi kip mai inn cio ah kir hai seh, ziangahtile hih thil cu keimah hnen ihsin a si,” tiin sim aw,’ i ti,” tiah a ti. Curuangah annih in Jehovah-ih kamsuakthupawl cu an lung ih, Jeroboam do dingih an feh ding cu an kirsal.

11:1^a 1Sp 12:21

11:2^b 1Sp 12:22

Kilhimawknak Khawpipawl

5 Cule Rehoboam cu Jerusalem ah a cêng ih, Judah ram ah kilhimawknak hrangah khawpipawl a dĭn. 6 Bethlehem, Etam, Tekoa, 7 Beth Zur, Sokoh, Adullam, 8 Gath, Mareshah, Zif, 9 Adoraim, Lakish, Azekah, 10 ^aZorah, Aijalon le Hebron pawl a dĭn, cupawl cu Judah ram le Benjamin ram ih kulh nei khawpipawl an si. 11 Cule ral hruangkulhpawl a hngetter ih, cupawl ah hotupawl le rawl, hriak le sabit zu pawl khawlkhawmnak inn a ret. 12 Khaw kip ah ralphawpawl le feipawl a ret ih, cuih khuapawl cu nasa zetin a cakter, Judah ram le Benjamin ram cu amai ta an si.

11:10^a Jos 10:20

Judah-mipawl in Kum Thum sung Pathian an Thlun

13 Cule Israel ram pumpi ih puithiampawl le Levi-mipawl cu anmai ram cio ihsin a hnenah an ra. 14 ^aZiangahtile Levi-mipawl cun an ran tlannak ram lawnglak pawl le an neih thilpawl an tân ih, Judah ram le Jerusalem ah an ra, ziangahtile Jeroboam le a fapapawl in Jehovah hrangih puithiam hna ṭuan lo dingin an bānter. 15 ^bCule hmun sâng pawl hrang, khawsiapawl hrang le caw pa no lem a tuah mipawl hrangah amai hrangah puithiampawl a ruat.

11:14^a Mip 35:2-5; 1San 6:81

11:15^b Pui 17:7; 1Sp 12:31; 13:33

16 Cule Israel hnám zate lak ihsin Israel-ih Pathian Jehovah hawl dingih thinlung a rettupawl cun an thlun, an pupápawlih Pathian Jehovah hnenah raithawi dingin Jerusalem ah an feh. 17 Cutin Judah lalram cu an cakter ih, kum thum sung Solomon-ih fapa Rehoboam cu an cakter, ziangahtile kum thum sung David le Solomon-ih lamzin an zawh.

Rehoboam-ih Innsungsang

18 Cule Rehoboam in David-ih fapa Jerimoth-ih fanu Mahalath cu nupi ah a ṭhi, cu nu cu Jessi-ih fapa Eliab-ih fanu Abihail fanu a si; 19 cu nu in fāte Jeush, Shamariah le Zaham a hrinsak. 20 ^aCule cu nuih hnuah Absalom-ih fanu Maakah a ṭhi, anih in Abijah, Attai, Ziza le Shelomith a hrinsak. 21 ^bCule Rehoboam cun Absalom fanu Maakah cu a nupipawl le a nusunpawl hmuahhmuah hnakin a duhdawt hleice, ziangahtile nupi hleiriat le nusun 60 a nei ih, fapa 28 le fanu 60 a nei. 22 ^cCule Rehoboam in Maakah-ih fapa Abijah cu a unaupawl lakih uktu lu bik ah a tuah; ziangahtile amah cu siangpahrang ih tuah dingah a ruat. 23 Cule anih cun fim zetin thil a ti ih, a fātepawl hmuahhmuah cu kulh nei khawpi lamah Judah ram le Benjamin ram pumpuluk ah a umdarhter ih ei ding tampi a pe hai. Cule nupi tampi a hawlsak hai.

11:20^a 1Sp 15:2

11:21^b Dnp 17:17; 1Sp 11:3

11:22^c Dnp 21:15-17

12

Faro Shishak in Judah a Sîm

1 ^aCule hitin a si, Rehoboam in lalram a dĭn hnget tik le a ticakawk tikah, amah le a hnenih um Israel miphun zaten Jehovah-ih Dān an thlauthla.

12:1^a 1San 9:1

2–3 ^aSiangpahrang Rehoboam in kum nga a uknak ah hitin a si, Izip siangpahrang Shishak cu rang lêng 1200, rang ralkap 60000 thawn Jerusalem dokalhin a hung so, ziangahtile Jehovah parah rinum loin an um. Izip ihsin a hnenih ra mipi cu siar cawk lo an si; Libia-mi, Sukkoth-mi le Kush-mi an si. 4 Anih in Judah ram ih kulh nei khawpipawl a la ih, Jerusalem a thleng.

12:2-3^a Sem 10:6; 1Sp 11:40; 14:24-25; 1San 5:25; Isa 18:2; Dan 11:43; Amo 9:7; Nah 3:9

5 ^aCun profet Shemaiah cu Rehoboam le Judah hotupawl, Shishak ruangih Jerusalem ih pungkhawmpawl hnenah a feh ih an hnenah, “Jehovah in hitin a ti: ‘Nannih in in thlauthla zo, curuangah kei khal in Shishak kut ah ka lo tân ve a si,’ a ti,” tiah a ti.

12:5^a Dnp 28:15

6 ^aCule Israel hotupawl le siangpahrang cu an phahniamaw ih, “Jehovah cu a dingfel a si,” tiah an ti.

12:6^a Suah 9:27; Pui 26:41; Ezr 9:15; Sam 11:7; Dan 9:14

7 ^aJehovah in an phahniamaw ti a hmuh tikah, Shemaiah hnenah Jehovah-ih kamsuakthu cu, “An phahniamaw, curuangah anmah cu ka hloralter lo ding, a hrekkhat ka runsuak hai sawn ding. Shishak-ih kut hmangin Jerusalem ah ka thinlingnak ka thlebung lo ding. 8 ^bCuti cing khalin annih cu a siahhlawh an si thotho ding, cutin keimai rawngbawl hna le miphunpawlih lalram rawngbawl hna an thleidang thiam ding,” tiin a thleng.

12:7^a Dnp 9:19; Sam 69:24; 78:38; Jer 7:20; Eze 5:13

12:8^b Dnp 28:48; Isa 26:13

9 Izip siangpahrang Shishak cu Jerusalem do dingin a so ih, Jehovah inn ih hlawnthilpawl le siangpahrang inn ih hlawnthilpawl a la, ziangtinkim a la thluh. Solomon ih tuah mi sui ralphawpawl khal a la. 10 Cun Siangpahrang Rehoboam in an aiah dar ralphawpawl a tuah ih, cupawl cu kiltu ralbawipawl, siangpahrang inn luhnak kiltupawl hnenah a ap. 11 Cule Jehovah inn ih siangpahrang a luh tinten, kiltupawl an ra ih cupawl cu an lasuak ih, kiltupawlih pindan sungah an kengkirsal.

12 ^aRehoboam a phahniamawk tikah, Jehovah-ih thinlingnak cu a hnen ihsin a ṭhawnhlo, cuti cun amah cu a siatsuah verver lo ih, Judah ram khalah thil umtudān a ṭha.

12:12^a 1Sp 14:13

Rehoboam Uknak Cemnetnak

13 ^aCuti cun Siangpahrang Rehoboam cu Jerusalem ah a ticakaw ih a uk. Siangpahrang a hung si tikah Rehoboam cu kum 41 a si. Jehovah in amai hmin umnak dingih Israel hnám zate lak ihsin a rak hril mi khawpi Jerusalem ah kum hleisarih sung a lal. A nuih hmin cu Naamah a si ih, Ammon-mi a si. 14 Cule Jehovah hawl dingin a thinlung a timlam lo ruangah thil ṭha lo a tuah. 15 Rehoboam-ih căngvaihnakpawl, a hmaisabik ihsin a netabik tiang profet Shemaiah-ih cazual ah le hmutu Iddo-ih cithlah sâwngawknak cabu ah an ngan a si lo maw? An nun sung hmuahhmuah Jeroboam le Rehoboam karlakah doawknak a um. 16 ^bCun Rehoboam cu a pupápawl hnenah a itthat ih, David-ih Khawpi ah phum a si. Cun a aiah a fapa Abijah a lal.

12:13^a Suah 20:24; Dnp 12:5; 1Sp 2:12

12:16^b 1San 3:10

13

Siangpahrang Abijah

1 Siangpahrang Jeroboam a lal kum hleiriatnak ah Abijah cu Judah ram ah siangpahrang ah a cang. 2 ^aJerusalem ah kum thum sung a lal. A nuih hmin cu Mikaiah a si, Uriel-ih fanu, Gibeah-mi a si.

13:2^a 1Sp 15:6

Israel thawi Doawknak

Cule Abijah le Jeroboam karlakah doawknak a um. 3 Abijah in hril mi ralkap doawknak ih micak ralthiam ting li cu ral do dingin a tlarter hai. Jeroboam khal in hril mi micak ralṭha ting riat thawn tlarawin a timlamaw ve.

4 ^aCun Abijah cu Efraim tlang tluan pawl parih Zemaraim tlang parah a ding ih, “Jeroboam le Israel miphun zaten, i rak ngai hnik uh: 5 ^bIsrael-ih Pathian Jehovah in Israel lalram cu David hnenah kumkhaw hrangin amah le a fapapawl hnenah cite thukham in a pe ti cu thei ding mawi nan si lo maw? 6 ^cCuti cingin David fapa Solomon-ih siahhlawh Nebat-ih fapa Jeroboam cu a tho ih, amai bawi parah a hél. 7 ^dCun Rehoboam a no lai le a thinlung nem lai le a dodal thei hai hlanah, santlailo mihlothlaupawl cu a hnenah an khawmaw ih, Solomon-ih fapa Rehoboam dokalhin an ticakaw.

13:4^a Jos 18:22; Lai 9:7

13:5^b Pui 2:13; 1San 17:12

13:6^c 1Sp 11:26; 2San 10:19

13:7^d Lai 9:4; 1Sp 21:13; 1San 29:1

8 ^a“Cule David-ih fapapawlih kut ih um Jehovah-ih lalram cu kham thei dingin nan ruat; nannih cu mi tam ngaingai nan si ih nan hnenah Jeroboam in nan pathian dingih sui caw pa no lem pawl a lo tuahsak mi khal an um. 9 ^bJehovah-ih puithiam Aaron-ih fapapawl le Levi-mipawl nan dawisuak ih, ram dang miphunpawl vekin nanmai hrangah puithiam nan tuah a si lo maw? Cutin caw cang tûai pakhat lole tuu cang pasarih thawn mah te serhhranaw dingih ra zokhal pathian si hlei lo pawlih puithiam a si ding.

13:8^a Suah 32:4; 1Sam 4:3

13:9^b Suah 29:31, 35-36; 1Sp 12:31; Jer 2:11; Gal 4:8

10 “Asinan kannih hrangah cun Jehovah cu kan Pathian a si ih, amah cu kan thlauthla lo; cule Jehovah hnenih rawngbawltu puithiampawl cu Aaron-ih fapapawl an si ih, Levi-mipawl in anmai ṭuanvo an ṭuan. 11 ^aCule annihpawl in zing tin zan tin Jehovah hnenah Meiur Thilhlănpawl le rimhmui thaw an ur; cuihtlunah cabuai thiang parah Sangserh khal remten an ret ih, zan tin sui meito ṭhuam cu a meitopawl thawn vâng dingin an ret; ziangahtile kannih cun Jehovah kan Pathian thupek kan thlun a si, asinan nannih cun amah nan thlauthla. 12 ^bAtu-ah, ngai hnik uh, Pathian rori cu kan hnenah kan hotu vekin a um ih, a puithiampawl in tawtawrawtpawl an phaw ding, nanmah dokalhih ral doaw dingah. Maw Israel tefapawl tla, nan pupápawlih Pathian Jehovah do hlah uh, ziangahtile nan hmuingil lo ding,” tiah a ti.

13:11^a Suah 25:6, 37; 29:39; 1San 9:32

13:12^b Mip 10:8-9; Lai 2:15; Job 9:4; Thf 21:30; Apo 5:39

13 ^aAsinan Jeroboam in an dung lamih ra ding mipawl a bawhthupter, cule annih cu Judah-pawl hmaiah an um ih, bawhthuptupawl cu an dungah an um. 14 ^bCule Judah cu a heraw ih, ngai hnik, ral donak tlar cu an hmai lam le an dung lamah a um, cule Jehovah hnenah an ausuak ih, puithiampawl in tawtawrawt an phaw. 15 ^cCun Judah-mipawl an au, cutiih Judah-mipawl an au tikah, hitin a si, Pathian in Jeroboam le Israel miphun zaten Abijah le Judah hmaiah Pathian in a vua. 16 Cule Israel tefapawl cu Judah hmaiah an zâm ih, annih cu Pathian in an kut ah a pek. 17 Cun Abijah le a milaipawl in annih cu thahnak nasa zetin an neh; hril mi Israel ting nga an that.

13:13^a Jos 8:9

13:14^b 1San 5:20

13:15^c 1San 9:1

18 ^aCuti cun Israel tefapawl cu cuih cān ah an duai ih, Judah-ih tefapawl in an neh, ziangruangahtile annih cun an pupápawlih Pathian Jehovah an rinsan a si.

13:18^a Sam 22:5

19 Cule Abijah in Jeroboam a dawi ih, a hnen ihsin khawpipawl a la: Bethel le a khaw ṭêk pawl, Jeshanah le a khaw ṭêk pawl, Efrain le a khaw ṭêk pawl thawn. 20 Abijah san sungah kelawhin Jeroboam a caksal nawn lo; cule Jehovah in amah cu a vuak ih, a thi.

Abijah-ih Uknak Cemnetnak

21 Asinan Abijah cu a cak deuhdeuh, nupi hleili a nei ih, fapa kul hluanhnih le fanu hleiruk a hring. 22 Abijah-ih cangvaihnak dang, a lamzinpawl le a sim mi thupawl cu profet Iddo-ih zirhnak cazual ah ngan an si.

14

Siangpahrang Asa

1 Cutin Abijah cu a pupápawl hnenah a itthat ih, amah cu David-ih Khawpi ah an phum. Cun a aiah a fapa Asa a lal. Amai san ah ram cu kum hra sung ralmûangin a um. 2 Asa cun Jehovah a Pathian mithmuh ih ṭha le a dik mi a tuah, 3 ^aziangahtile ram dang pathianpawlih biakṭhengpawl le hmun sâng pawl a ṭhawnhlo ih, ṭhuamserhpawl a ṭhiat, cule Asherah-pawl a hautlu. 4 ^bAn pupápawlih Pathian Jehovah hawl ding le dān le thupek thlun dingin Judah cu thu a rak pe. 5 ^cJudah khawpipawl hmuahhmuah ihsin hmun sâng pawl le rimhmui biakṭhengpawl khal a ṭhawnhlo ih, amai hnuaiah lalram cu ralmûangin a um.

14:3^a Suah 23:24; 34:13; Lai 2:2

14:4^b 1San 16:11; Isa 55:6-7; Amo 5:4

14:5^c 1Sp 15:14; Isa 27:9; Eze 6:4

6 ^aCule Judah ram ah kulh nei khawpipawl tla a dĭn, ziangahtile ram a cawl a si; cuih kumpawl ah anih in ral do a nei lo, ziangahtile Jehovah in amah cu cawlhnak a pe. 7 ^bCuruangah anih in Judah hnenah, “Hi khawpipawl hi dĭn uhsi, a kimvelin kulh, dawlsângpawl, kăwtkapawl, a kalhnak tlângpawl tla tuah uhsi. Ziangahtile Jehovah kan Pathian kan hawl ih ram cu kan hmaiah a um lai hrih ko. Amah kan hawl ih kil kip ah cawlhhahdamnak in pe a si,” tiah a ti. Cutin an dĭn ih an hmuingil.

14:6^a 1San 22:9

14:7^b 1San 22:9; 2San 15:15

Asa in Kush a Neh

8 ^aCun Asa in Judah ram ihsin ralphaw le fei keng ralkap ting thum le Benjamin ram ihsin ralphaw le thál hmang pacang ting hnih le thawng sawmriat a nei, cupawl cu an zaten micak ralṭha hlir an si.

14:8^a 1San 21:1

9 ^aCun anmah do dingin Kush-mi Zerah cu ralkap mipa tinghra le rang lêng 300 thawn a ra suak ih, Mareshah ah a thleng. 10 Asa cu amah do dingin a fehsuak ih, Mareshah ah Zefathah phaikuam ah ral do dingin ralkap burpi cu an tlarawter. 11 ^bCule Asa cu Jehovah a Pathian hnenah a ausuak ih, “Jehovah, na hrangah mi tam siseh, cahnak nei lo siseh bawm dingin danglamnak a um lo, in bawm aw, Maw Jehovah kan Pathian, ziangahtile na parah kan ṭhumaw ih, na hmin in hi mi tampi dokalhin kan feh a si. Maw Jehovah, nang cu kan Pathian na si, minung in lo neh hlah seh,” tiah a ti.

14:9^a Sem 10:8-9

14:11^b 1Sam 17:45; 1Sp 8:44; Sam 9:19; 60:11-12

12 ^aCun Asa le Judah hmaiah Kush-mipawl cu Jehovah in a vaw hai ih, Kush-mipawl cu an zâm. 13 ^bCule Asa le a hnenih um mipi in cupawl cu Gerar tiang an dawi. Cutin Kush-mipawl cu an duai ih, kel an awh thei nawn lo, ziangahtile Jehovah le a ralkappawl hmaiah siatsuah ṭheh an si. Cule ralthillâk tam ngaingai an la. 14 ^cCun Gerar kiangkapih khawpi zaten an neh thluh, ziangahtile Jehovah ṭihnak an parah a thleng; cule khawpipawl hmuahhmuah cu an răm, ziangahtile cuih khawpipawl ah ralthillâk tam ngaingai a um. 15 Sumhnám neipawlih puanthlam khal an siatsuah ih, tuupawl le kalaukpawl tampi an hruai, cule Jerusalem ah an tlung.

14:12^a 1Sp 8:45

14:13^b Sem 10:19; Neh 9:24; Sam 44:2

14:14^c Sem 35:5; Dnp 2:25

15

Asa in Thukamnak a Tuah

1 ^aOded-ih fapa Azariah parah Pathian Thlarau a rung thleng. 2 ^bCule anih cu Asa táwng dingin a fehsuak ih a hnenah, “I rak ngai uh, Asa le Judah hnám le Benjamin hnám zaten. Amah lamih nan ṭan sung hmuah cu Jehovah in a lo umpi a si. Amah nan hawl asile, nan hmu ding; asinan amah nan thlauthlak asile, a lo thlauthla ve ding. 3 Atu-ah cān reipi sung Israel cu Pathian dik nei lo, zirhtu puithiam nei lo le dān nei loin a um. 4 ^cAsinan an harsat tikah Israel-ih Pathian Jehovah hnenah an hawikir ih, amah cu an hawl, cule an hmu. 5 ^dCule cu laiah a fehsuak le a ra tlung mi hnenah hnangamnak a rak um lo, ram luahtupawl zate parah buainak nasa zetin a um. 6 ^eCutin miphun pakhat cu a dang miphun in a tisiat ih, khua pakhat cu a dang khua pakhat in, ziangahtile Pathian in anmah cu vanduainak phunkim in a buaiter hai. 7 ^fAsinan nang cu cak zetin um awla, na kut cak loin umter hlah, ziangahtile na hnaṭuan cu lawmman pek a si ding,” tiah a ti.

15:1^a Mip 11:25-26

15:2^b Dnp 31:17; 1San 28:9; Sam 78:34; Isa 45:19; Jer 29:13; Hos 3:5; Jam 4:8

15:4^c Dnp 4:29; Sam 106:44

15:5^d Lai 5:6; Zek 8:10

15:6^e Lai 2:14; 5:6; Isa 19:2; Mat 24:7; Mar 13:8; Luk 21:10

15:7^f Jos 1:7, 9; 1Sam 24:19; Sam 18:20; Thf 14:14; Jer 31:16

8 ^aCule Asa in hi ṭawngkampawl le profet Oded ih thuphuan mi a theih tikah, thazang a la ih, Judah ram le Benjamin ram hmuahhmuah ihsin le Efraim tlang ram ih a lâk mi khawpipawl ihsin fihnungza milempawl a ṭhawnhlo, cule Jehovah-ih hulhliap ih um Jehovah-ih biakṭheng cu a dĭnṭhasal.

15:8^a 1Sp 8:64; 15:12

9 Cun Judah hnám le Benjamin hnám hmuahhmuah, a hnenih khawsa ve, Efraim hnám, Manase hnám le Simeon hnámpawl cu a kokhawm hai, ziangahtile a hnenah Jehovah a Pathian a um ti an hmuh tikah Israel ram ihsin a hnenah mi tam zetin an run pan a si.

10 ^aAsa a lal kum hleingatnak, thla thumnak ah Jerusalem ah an táwngkhawmaw. 11 Cule cuih cān ah an rak lâk mi an ralthillâk lakih caw pa 700 le tuu 7000 cu Jehovah hnenah an hlan. 12 ^bAn thinlung zate le an nunnak zaten an pupápawlih Pathian Jehovah hawl dingin le, 13 ^cIsrael-ih Pathian Jehovah hawl lo tu zokhal a tûm a te, a nu a pa in thah si dingin thukham an tuah. 14 Cun Jehovah hnenah aw ring zetih auin, tawtawrawtpawl thawn, tuu pa kipawl thawn thukamnak an la.

15:10^a Pui 23:15-21

15:12^b 1San 16:11

15:13^c Suah 22:20; Dnp 13:9-16; 1Sp 18:40

15 ^aCule Judah zaten thukamnak ah lungawi aipuangin an um, ziangahtile an thinlung hmuahhmuah in sia an săm ih, an duhnak hmuahhmuah in amah cu an hawl. Cule amah cu an hmu ih, Jehovah in kil i kip ah cawlhhahdamnak a pe hai.

15:15^a Dnp 4:29; 1San 22:9

16 ^aCuihhleiah Siangpahrang Asa-ih nu Maakah khal fihnungza Asherah a tuah ruangah siangpahrang bawinu sinak ihsin a hlăwn. Cule Asa in a fihnungza milem cu a hautlu ih, cumi cu a sawprăwpter ih Kidron Hawrkuam ah a ur. 17 Asinan Israel ram ihsin hmun sâng pawl cu ṭhawnhlo an si cuang lo. Sikhalsehla Asa-ih thinlung cu a dam sung hmuahhmuah a rinum.

15:16^a Suah 34:13; 1Sp 2:19

18 Cuihtlunah a pa ih a rak serhhran mi thilpawl le amah rori ih a rak serhhran mi: ngun, sui le bungbelpawl cu Pathian inn sungah a thiarlut. 19 Cule Asa ih a lal kum 35-nak tiang doawknak a um lo.

16

Asa in Siria a Rinsan

1 ^aAsa a lal kum 36-nak ah, Israel siangpahrang Baasha cu Judah do dingin a hung so, cule Judah siangpahrang Asa hnenah zohman suak le lut thei lo dingin Ramah khua a dĭn. 2 Cun Asa in Jehovah inn le siangpahrang inn ih hlawnthilpawl retnak ihsin sui le ngun a thiar ih, Damaskas ih cêng Siria siangpahrang Ben-Hadad a kuat ih, 3 “Na pa le ka pa karlakih a um bangin, nangmah le keimah karlak khalah thukham um ve seh. Zoh hnik, sui le ngun ka lo kuat; Israel siangpahrang Baasha hi ka hnen ihsin a sīp thei nak dingah, ra awla, amah thawi nan thukham kha pahbăl aw,” tiah a ti.

16:1^a Jer 41:9

4 ^aBen-Hadad in siangpahrang Asa cu a ngaithla ih, Israel khawpipawl do dingin a ralkap bawipawl a thlah. Annih in Ijon khua, Dan khua, Abel Maim khua le Naftali ram ih thilri khawlnak khawpipawl hmuahhmuah an do thluh. 5 Cule hitin a si, Baasha in cuih thu a theih tikah, Ramah khua dĭn cu a bang ih a hnaṭuan a cawlhsan. 6 ^bCule siangpahrang Asa in Judah-mi zaten a hruai ih, Baasha in khaw dĭnnak hrangih a hman mi Ramah ihta lungtopawl le thingpawl cu an thiar, cule cupawl thawn anih in Geba khua le Mizpah khua a dĭn.

16:4^a 2Sp 15:20, 29

16:6^b 1Sp 15:22; Jer 41:9

7 ^aCule cuih cān ah Judah siangpahrang hnenah hmutu Hanani a ra ih a hnenah, “Jehovah na Pathian parah ṭhumaw loin, Siria siangpahrang parih na ṭhumawk ruangah, Siria siangpahrang ralkappawl cu na kut ihsin an tlânsuak a si. 8 ^bKush-mipawl le Libia-mipawl cu rang lêng tam zet thawn ralkap rual tam ngaingai le rang ralkap tam zet an si lo sawm? Sikhalsehla Jehovah parih na ṭhumawk ruangah na kut ah anmah a lo pe a si. 9 ^cZiangahtile amah lamih thinlung rinumpawl hnenih a cakzia langter dingin leilung pumpuluk ah Jehovah-ih mit cu a lengvēl a si. Himi thuhla ah â zetin na rak cangvai. Curuangah atu thawkin ral do ding na nei thlang ding,” tiah a ti. 10 ^dCun Asa cu hmutu parah a thin a heng ih, amah cu thawng a thlak, ziangahtile hi thu ruangah hmutu parah Asa a thin a so. Cule Asa in cuih cān lala ah mi hrekkhat a palbĕt.

16:7^a 1Sp 16:1

16:8^b Sem 10:6, 8-9

16:9^c 1Sam 13:13; 1Sp 15:6; Job 24:23; Sam 33:13-15; Thf 15:3; Jer 16:17; Zek 3:9

16:10^d 1Sp 22:27; 2San 18:26

Asa Uknak Cemnetnak

11 Ngai hnik, Asa-ih căngvaihnakpawl cu a hmaisabik ihsin a netabik tiangin, ngai hnik, Judah le Israel siangpahrangpawlih cazual sungah ngan an si. 12 ^aCule siangpahrang a ṭuan kum 39-nak ah, Asa cu a ke ah nat a suak ih, a nat cu a besia zet; cutiih nā cingin Jehovah a hawl cuang lo, sibawipawl a hawl sawn riangri.

16:12^a Sam 103:3; Jer 17:5-6

13 Cule Asa cu a pupápawl hnenah a itthat; a lal kum 41-nak ah a thi. 14 ^aDavid-ih Khawpi ih amai hrangih a tuah mi amai thlān ah an phum, amah cu rimhmui le rimthaw tuahtu in a rawi mi, rimthaw phunphun ih khat ihkhun parah an hlum. A hrangah meipi nasa zetin an sēp.

16:14^a Sem 50:2, 5; Jer 34:5

17

Siangpahrang Jehoshafat

1 ^aCun a fapa Jehoshafat cu a aiah a lal ih, Israel dokalhin a ticakaw. 2 Cule Judah ram ih kulh nei khawpipawl hmuahhmuah ah ralkap burpi a ret ih, Judah ram le a pa Asa ih a rak lâk mi Efraim ram khawpipawl ah ṭanhmun kiltu ralkappawl a ret. 3 ^bHlanlai ih a pa David-ih zin a zawh ruangah Jehovah in Jehoshafat cu a umpi; Baalpawl a rak hawl lo, 4 Israel căngvaih bangtuk si loin, a pa David-ih Pathian a rak hawl ih, a thupekpawl a thlun sawn. 5 ^cCuruangah Jehovah in a kut ah lalram a dĭn hnget ih, Judah hmuahhmuah in Jehoshafat hnenah laksawng an rak pe, cule anih in lennak le upatnak cu nasa zetin a nei. 6 ^dCule Jehovah-ih lamzin ah a thinlung a nuamaw, cuihtlunah Judah ram ihsin hmun sâng pawl le Asherah-pawl a ṭhawnhlo.

17:1^a 1Sp 2:12

17:3^b 1Sp 22:43; 2San 19:3

17:5^c 1Sam 10:27

17:6^d Suah 34:13; 1Sp 8:61; 15:14

Jehoshafat a Ropi Deuhdeuh

7 ^aCun a lal kum thumnak ah a ralbawi: Benhail, Obadiah, Zekariah, Nethanel le Mikaiah pawl cu zirh dingin Judah khuapawl ah a thlah hai. 8 ^bCule an zawngah Levi-mi: Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah le Tobadonijah, Levi-mipawl, cule an zawngah puithiam Elishama le Jehoram khal an tel. 9 ^cJudah ram ah an zirh, cule Jehovah-ih Dān Cazual cu an hnenah a um; Judah ram ih khawpipawl hmuahhmuah hrawhsuakin an feh ih, mipi an zirh vivo.

17:7^a Pui 10:11; Dnp 6:4-9; Neh 8:7; Mal 2:7

17:8^b Neh 8:7-8; Hos 4:6

17:9^c Dnp 28:61

10 ^aCule Judah ram kiangkapih um lalrampawl hmuahhmuah ah Jehovah ṭihnak a thleng, cutin Jehoshafat dokalhin ral an tho lo. 11 Filisṭia-mi mi hrekkhat in Jehoshafat hnenah ngunkhuai ah laksawng le ngun an rak keng; cule Arabia-mipawl in ranpi rual, tuu cang 7700 le me cang 7700 an rak ken.

17:10^a Sem 35:5; Dnp 2:25

12 Cutin nasa zetin Jehoshafat cu a ṭhangso sinsin ih, Judah ram ah kulh hnget pawl le thilri khawlnak khuapawl tla a sak. 13 Judah khawpipawl ah thil tampi a nei ih, Jerusalem ah raldo thiam pawl, micak ralṭha pawl tla a nei.

14 Hipawl hi an pupápawlih sungza zulhin an mipum cu an si. Judah hnám ih ralkap 1000 hotupawl: an ralbawi cu Adnah a si ih, a hnenah micak ralṭha ting thum an um; 15 cule a sangtu ah ralbawi Jehohanan a si ih, a hnenah ting hnih le thawng sawmriat an um; 16 ^acule a sangtu ah Jehovah hnenih palungsuakih hlanaw, Zikhri-ih fapa Amasiah a si ih, a zawngah, micak ralṭha ting hnih an um. 17 ^bBenjamin hnám ihsi ralbawi cu micak ralṭha Eliada a si ih, a hnenah thál le ralphaw thawn ting hnih an um; 18 cule a sangtu cu Jehozabad a si ih, a hnenah tingkhat le thawng sawmriat cu ral do ding tiar cia in an um. 19 Hipawl hi Judah ram pumpuluk hmuahhmuah ih kulh nei khawpipawl ih siangpahrang in a ret hai mi telh loin, siangpahrang riantu an si.

17:16^a Lai 5:9

17:17^b Mip 1:36

18

Jehoshafat in Ahab thawn Ṭantlangnak a Tuah

1 ^aJehoshafat in lennak le upatnak nasa zet a co ih, ṭhitawknak hmangin Ahab thawn an ṭangtlang. 2 Kum tawkfang a rei hnuah Samaria ah Ahab leng dingin a vung feh. Cule Ahab in Jehoshafat hrang le a hnenih um mipi hrangah tuu le caw tam ngaingai a rak that, cule Ramoth Gilead do dingah a zawngih feh dingin a sawm. 3 Israel siangpahrang Ahab in Judah siangpahrang Jehoshafat hnenah, “Ramoth Gilead do dingin ka zawngah na feh pei maw?” tiah a ti.

18:1^a 2Sp 8:18; 2San 17:5

Cule Jehoshafat in, “Nang le kei cu kan bangaw ih, ka mipawl khal na mipawl an si, ral donak ah na hnenah kan um ding,” tiah a ti.

4 Cuihtlunah Jehoshafat in Israel siangpahrang hnenah, “Zangfahten tuihsun ah Jehovah-ih kamsuakthu sut aw,” tiah a ti.

5 Cun Israel siangpahrang in profetpawl a kokhawm hai ih, mipa 400 an si, cule an hnenah, “Ramoth Gilead do dingin kan feh pei maw, kan sīp ding saw?” tiah a ti.

Annih in, “Fehso uh, ziangahtile Pathian in siangpahrang kut ah annih cu a pe ding,” tiah an ti.

6 Cule Jehoshafat in, “Amah kan suh thei nak dingah, hi tawkah Jehovah-ih profet pakhat tal an um hrih lai lo maw si?” tiah a ti.

7 ^aIsrael siangpahrang in Jehoshafat hnenah, “Amah hmangih Jehovah kan suh thei nak ding mi pakhat cu a um lai; asinan anih cu ka hua, ziangruangahtile ka thuhla ah a ṭha lam a phuang dah lo, a se lam lawnglawng a phuang ṭheu. Amah cu Imla-ih fapa Mikaiah a si,” tiah a ti.

18:7^a 1Sp 22:8-28; Mik 2:7

Cule Jehoshafat in, “Siangpahrang in cuvek thilpawl sim hlah seh!” tiah a ti.

8 Cu tikah Israel siangpahrang cun a bawipawl lakih pakhat a ko ih, “Imla-ih fapa Mikaiah cu zamrangten va hruai aw!” tiah a ti.

9 Israel siangpahrang le Judah siangpahrang Jehoshafat cu an kâwrfual hruhin an laltokham par veve ah an to; Samaria kăwtsuah ih hruih hmun ah an to, cule profetpawl zaten an hmaiah thu an phuang. 10 Cule Kenaanah-ih fapa Zedekiah in amah hrangah thir kipawl a tuah, cule anih in, “Jehovah in hitin a ti: ‘Hipawl thawn Siria-mipawl an siatrál hlanlo na khîk hai ding a si,’ tiin,” tiah a ti.

11 Cule profetpawl zaten cuti vek hlir in an phuang, “Ramoth Gilead ah so uhla, hmuingil uh, ziangahtile Jehovah in siangpahrang kut ah cumi cu a pe ding,” tiah an ti.

12 Cun Mikaiah ko dingih fehtu palai in a hnenah, “Ngai hnik, profetpawlih ṭawngkampawl cun lungrualin siangpahrang tha an pe. Curuangah zangfahten, na ṭawngkam cu anmah lakih mi pakhat ṭawngkam vek si sehla, thapeknak va ṭawng aw maw,” tiah a ti.

13 ^aCule Mikaiah in, “Jehovah a nun rori bangin, ka Pathian in a sim mi pauhpauh ka ṭawng ding,” tiah a ti.

18:13^a Mip 22:18, 20, 35; Jer 42:4

14 Cun anih cu siangpahrang hnenah a feh ih, siangpahrang in a hnenah, “Mikaiah, Ramoth Gilead do dingin kan feh pei maw, ka hnûkdawkaw ding saw?” tiah a ti.

Cule Mikaiah in, “Feh uhla hmuingil uh, anmah cu nan kut ih pek an si ding!” tiah a ti.

15 Cule siangpahrang in a hnenah, “Thutak siarlo ka hnenah Jehovah hmin ih sim lo dingin vei ziang zat meng so sia ka lo sămter ding?” tiah a ti.

16 ^aCun Mikaiah in, “Israel miphun zaten khāltu nei lo tuu bangin tlang parah ṭekdarhin ka hmu hai. Cule Jehovah in, ‘Hipawl in hotu an nei lo. Mi kip mai inn cio ah hnangamten tlungkir hai seh,’ a ti,” tiah a ti.

18:16^a Mip 27:17; 1San 9:1

17 Cule Israel siangpahrang in Jehoshafat hnenah, “Keimai thuhla ah anih in thil ṭha lo siarlo, thil ṭha a phuang lo ding ka lo ti a si lo maw?” tiah a ti.

18 ^aCun Mikaiah in, “Curuangah Jehovah-ih kamsuakthu ngaithla uh: Jehovah cu a laltokham parih to-in, a vawrh lam le a keh lamah van ralkap rual zaten dīngin ka hmu. 19 Cule Jehovah in, ‘Israel siangpahrang Ahab hi Ramoth Gilead ih hung so ih, thi dingin zo in a lēm pei?’ tiah a ti. Cule mi pakhat in, hitin a ti ih, a dang pakhat in khatin a ti. 20 Cun thlarau pakhat cu hmaiah a ra suak ih, Jehovah hmaiah a ding, cule, ‘Keimah in ka lēm ding,’ tiah a ti. Jehovah in a hnenah, ‘Ziangti zawngin?’ tiah a ti. 21 ^bCule anih in, ‘Ka fehsuak ding ih a profetpawl hmuahhmuah ih kâ ah thuphan per thlarau ka si ding,’ tiah a ti. Cun Jehovah in, ‘Amah cu na lēm pei ih, na neh fawn ding; fehsuak awla cuti cun tuah aw,’ tiah a ti. 22 ^cCuruangah zoh hnik! Hi na profetpawlih kâ ah Jehovah in thuphan per thlarau a ret ih, Jehovah in na parah thil ṭha lo a thăn a si,” tiah a ti.

18:18^a Dan 7:9

18:21^b 1San 21:1; Job 1:6; Zek 3:1; Joh 8:44; 1Joh 4:6

18:22^c Job 12:16; Eze 14:9

23 ^aCun Kenaanah-ih fapa Zedekiah in a va naih ih, Mikaiah-ih biang ah a beng, cule, “Jehovah Thlarau cu ka hnen ihsin na hnenih thusim dingah khui zin ah saw a feh?” tiah a ti.

18:23^a Apo 23:2

24 Cule Mikaiah in, “Ngai hnik, relh dingin pindan sungta ih na luh ni ah na hmu ding,” tiah a ti.

25 Cun Israel siangpahrang in, “Mikaiah hruai uhla, khawpi uktu Amon hnen le siangpahrang fapa Joash hnenah kirter uh; 26 ^acule, ‘Siangpahrang in hitin a ti: “Hi pa hi thawng ah khum uhla, daihnak thawi ka kirsal hlanlo, zăwnzaihnak rawl le zăwnzaihnak tidai pe uh,” tiin,’ a ti,” tiah a ti.

18:26^a Heb 11:36

27 Asinan Mikaiah cun, “Hnangamten na ra tlungkir asile, Jehovah in keimah hmangin thu a sim lo a si ding,” tiah a ti. Cule anih in, “Nannih mipi hmuahhmuah tla, fimkhur uh,” tiah a ti.

28 Cule Ramoth Gilead ah Israel siangpahrang le Judah siangpahrang Jehoshafat cu an hung so. 29 ^aIsrael siangpahrang in Jehoshafat hnenah, “Ka danglamawter ding ih doawknak ah ka feh ding, asinan nang cun na kâwrfual hruh aw,” tiah a ti. Cutin Israel siangpahrang cu a danglamawter ih, doawknak ah an feh.

18:29^a 1Sam 28:8

30 Cun Siria siangpahrang in a hnenih um a rang lêng ralbawipawl cu, “Israel siangpahrang siarlo mitum siseh, mite siseh do hlah uh,” tiin thu a rak pe.

31 Cule hitin a si, rang lêng ralbawipawl in Jehoshafat an hmuh tikah, “Hihi Israel siangpahrang a si!” tiah an ti. Curuangah amah do dingin an kulh. Asinan Jehoshafat cu a ausuak ih, Jehovah in amah cu a bawm, cule Pathian in anmahpawl cu Jehoshafat hnen ihsin a pialter hai. 32 Cule hitin a si, rang lêng ralbawipawl in cumi cu Israel siangpahrang a si lo ti an hmuh tikah, amah dawinak ihsin an kirsal.

33 Cun mi pakhat in hmuitin nei loin a thál a nawp ih, Israel siangpahrang cu a ralthuam pehawknakpawl karlakah a saingah. Cule siangpahrang in a rang lêng mâwngtu hnenah, “Her awla, doawknak ihsin i suahpi aw, ziangahtile tuahmawh ka si-aw,” tiah a ti. 34 Cuih ni ah doawknak cu a sosâng ih, Israel siangpahrang cu Siria-mipawl lam hawiin a rang lêng ah sîm lam tiang an dīngter ih ni tlak zawngah a thi.

19

1 Cun Judah siangpahrang Jehoshafat cu hnangamten Jerusalem ih amai inn ah a tlungkir. 2 ^aCule Hanani-ih fapa hmutu Jehu cu amah táwng dingin a păwksuak ih, Siangpahrang Jehoshafat hnenah, “Misualrál cu bawmin Jehovah huatu cu na duhdawt ding maw si? Curuangah Jehovah-ih thinlingnak cu na parah a um. 3 ^bCuti si khal sehla hi ram ihsin Asherah-pawl na ṭhawnhlo ih, Pathian hawl dingin na thinlung na timtuah ruangah nangmah ah thil ṭha hmuh an si,” tiah a ti.

19:2^a 1Sp 16:1; Sam 7:11; 139:21-22

19:3^b 1Sp 14:13

Jehoshafat in Hotupawl a Ruat

4 Cule Jehoshafat cu Jerusalem ah a cêng ih Beersheba ihsin Efraim tlang ram mipi lakah a fehsuaksal, cule an pupápawlih Pathian Jehovah hnenah annih cu a hruaikirsal hai. 5 ^aCun Judah ram ih kulh hnget khawpipawl hmuahhmuah, khawpi pakhat hnu pakhat ah laireltupawl a ret vivo ih, 6 ^ban hnenah, “Nan tuah mi ah fimkhur uh, ziangahtile minung hrangah thu nan ṭhen lo, cuhnakin thuṭhennak ih a lo umpitu Jehovah hrangah thu nan ṭhen sawn a si. 7 ^cCuruangah atu-ah, Jehovah ṭihzahnak cu nan parah um seh; fimkhurin thil ti uh, ziangahtile Jehovah kan Pathian ah dingfellonak a um lo, thleidannak khal a um lo ih, nawhthuh lâknak a um fawn lo,” tiah a ti.

19:5^a Suah 18:26; Dnp 16:18

19:6^b Pui 19:15; Dnp 16:18-20

19:7^c Sem 18:25; Suah 18:16; Dnp 10:17; Job 8:3; 13:10

8 ^aCuihtlunah Jerusalem ih an tlunkir tikah, Jehoshafat in Jerusalem ah Jehovah-ih thuṭhennak hrang le elbuaiawknak hrangah Levi-mi mi hrekkhat, puithiampawl le Israel pupápawlih lubân hrekkhat a ruat. 9 Cule anih in an hnenah, “Hiti vekin Jehovah ṭihzahnak ah rinum zetin le thinlung takin nan tuah pei: 10 ^banmai khua cio ih um nan unaupawl lak ihsin ziang vek thubuai khal siseh nan hnenah, thisen suahawk thu maw, dān le thupek dokalhih thil sual tuahnak maw, sakhaw dānpawl le zīn le dān dokalhnak simaw a thleng asile, Jehovah dokalhin thil an ti suallonak dingah ralrinnak pe hai uh, culole nan parah le nan unaupawl parah thinlingnak a thleng pang ding. Cumi cu tuah uhla, mawhnak nei lo nan si ding. 11 ^cCule ngai hnik uh, Jehovah thuhla hmuahhmuah ah puithiam sâng Amariah cu nan tlunah a um; cule siangpahrang thuhla zate hrangah Ishmael-ih fapa Zebadiah, Judah sungza uktu a um; Levi-mipawl khal nan hmaiah hotu an si ding. Ralṭha zetin tuah uhla, miṭhapawl cu Jehovah in a umpi hai ding,” tiah thu a pe.

19:8^a 1San 23:4; Eze 44:24

19:10^b Dnp 17:8-13

19:11^c 1San 6:11; 28:20

20

Jehoshafat in Moab le Ammon a Do

1 ^aHimi hnuah hitin a si, Moab-mipawl le Ammon-mipawl cu Jehoshafat do dingin an ra. Ammon-mipawl hleiah mi dang pawl khal an zawngah an ra ve. 2 ^bCun mi hrekkhat an ra ih Jehoshafat hnenah, “Nangmah do dingin mipi tam ngaingai tifinriat ralkhat, Siria ihsin an ra, ngai hnik, anmah cu En Gedi ti mi Hazazon Tamar ah an um,” tiah an sim. 3 ^cCule Jehoshafat cun a ṭih ih, Jehovah hawl dingin a timtuahaw, cule Judah ram hmuahhmuah ah rawl ulh a phuang. 4 ^dCutin Judah cu Jehovah hnenih băwmnak dil dingin hmunkhat ah an fĭnaw ih, Jehovah hawl dingin Judah khawpi hmuahhmuah ihsin an ra.

20:1^a 1San 4:41; Sam 83:6

20:2^b Sem 14:7; 1Sam 23:29; Sol 1:14

20:3^c 1Sam 7:6; Ezr 8:23; Neh 1:4; Est 4:16; Isa 58:6; Joe 1:14; Jon 3:5, 7

20:4^d Sam 50:15; Jer 36:6

5 Cun Jehoshafat cu Jehovah inn, tualrawn thar hmaiah, Judah le Jerusalem ih mipungkhawm lakah a ding, 6 ^acule, “Maw Jehovah, kan pupápawlih Pathian, nangmah cu van Pathian na si lo maw? Miphunpawlih lalram zate tlunih uktu na si lo maw? Na kut ah thiltitheinak le cahnak a um, curuangah zohman in an lo do thei lo a si lo maw? 7 ^bNa mi Israel hmaiah hi ram luahtupawl hnawhsuak ih, na rual Abraham-ih tesinfapawl hnenih kumkhaw hrangih petu cu nangmah kan Pathian na si lo maw? 8 Cule a sungah an cêng ih, cuih hmun ah na hmin hrangah hmun thianghlim an lo saksak, 9 ‘Kan parah thil ṭha lo: ralnâm, dāntatnak, nathri sia le mangṭam a thlen asile, na hmaika ah hi temple hmaiah kan dīng ding, ziangahtile na hmin cu hi temple ah a um ih, na hnenah kan zăwnzaihnak ihsin kan au ding, cule nang in na thei ding ih in run ding,’ tiah an ti ṭheu. 10 ^cCule atu-ah ngai hnik, Israel-mipawl Izip ram ihsin an ra suah tikah, nang in Israel-mipawl kha Ammon-mipawl, Moab-mipawl le Seir tlang mipawl lâk ding na sĕn hai lo. Cumi aiah cupawl hnen ihsin an pial ih, an tisiat lo. 11 ^dZoh hnik, annih in in lehrūl a si hi! Annih cu nang in ro ih co dingih in pek mi na neih mi ihsin in dawisuak dingin an ra. 12 ^eMaw kan Pathian, anmah thu na ṭhen hai lo ding maw? Ziangahtile kanmah do dingih ra hi mipi tam zet hmaiah thiltitheinak kan nei lo, ziang tuah ding ti khal kan thei lo, asinan kan mit cu na parah a fu a si,” tiah a ti.

20:6^a Dnp 4:39; 1San 29:11-12; Job 25:2; Isa 14:27; Jer 32:27; Mat 1:6, 9

20:7^b Sem 12:7; Suah 33:2; Isa 41:8; Jam 2:23

20:10^c Mip 20:14-21; Dnp 2:4-6, 9, 18-19; 1San 4:42

20:11^d Sam 83:12

20:12^e Lai 11:27; Sam 25:15; Isa 30:15; Mik 7:7

13 Judah-mi hmuahhmuah cu an fanau tete, an nupipawl le an fātepawl thawn Jehovah hmaiah an ding.

14 ^aCun mipungkhawm lakah, Levi-mi Asaf tefa lakih Mattaniah-ih fapa, Jeiel-ih fapa, Benaiah-ih fapa, Zekariah-ih fapa Jahaziel parah Jehovah Thlarau a rung thleng. 15 ^bCule anih in, “Nannih Judah-mi hmuahhmuah le nannih Jerusalem luahtupawl le nang, Siangpahrang Jehoshafat, rak ngai hnik uh! Jehovah in nan hnenah hitin a ti: ‘Hih mipi tam zet ruangah ṭih hlah uhla, thlaphângin um fawn hlah uh, ziangahtile doawknak cu nan ta a si lo, Pathian ta a si sawn a si. 16 Thaisun ah anmah do dingin suk uh. Ngai hnik uh, Ziz sohnak ihsin an ra so ding ih, Jeruel Ramṭhing hmai hawrkuam netnakah nan hmu hai ding. 17 ^cHi doawknak ah nan do a ṭul lo ding. Tlaraw uh, daiten dīng men uhla, a lo umpitu Jehovah-ih runsuahnak hi zoh uh, Maw Judah le Jerusalem!’ tiin. Ṭih hlah uhla, thlaphângin um fawn hlah uh; thaisun ah anmah do dingin fehsuak uh, ziangahtile Jehovah in a lo umpi a si,” tiah a ti.

20:14^a 1San 9:15; 12:18

20:15^b 1Sam 17:47; Sam 91:8

20:17^c Suah 14:13

18 ^aCule Jehoshafat cu a hmai lei lam hawiin a lu a kûn ih, Jehovah bia-in Judah-mi zate le Jerusalem luahtupawl zate cu Jehovah hmaiah an kûn. 19 Cun Levi-mipawl lak ihsin Kohath tefapawl le Korah tefapawl cu aw nasa zetih ringin Israel-ih Pathian Jehovah thangṭhat dingin an ding.

20:18^a Sem 24:26

20 ^aZingpit ten an tho ih Tekoa Ramṭhing ah an feh; cutiih an fehsuak tikah, Jehoshafat cu a dīng ih, “Maw Judah-mipawl le nannih Jerusalem luahtupawl i ngai hnik uh: Jehovah nan Pathian rinsan uh, cule dĭn hngeh nan si ding; a profetpawl rinsan uh, cule nan hmuingil ding,” tiah a ti. 21 ^bCule mipi thu a ráwn hnuah, ralkappawl hmaiah feh phahih Jehovah hnenih hlasaktu ding pawl le a thianhlimnak mawizia thangṭhattu ding pawl a ruat:

20:20^a Sem 39:3; Suah 14:31; Thf 16:3; Isa 7:9

20:21^b 1San 16:29; Sam 136:1

“Jehovah cu thangṭhat uh,
Ziangahtile a zahngainak cu kumkhuain a hmun,”

tiin.

22 Cun hlasak le thangṭhat an thawk tikah, Judah do dingih ra, Ammon-mipawl, Moab-mipawl le Seir tlang mipawl dokalhih bawhtu ding Jehovah in a ret; cule annih cu neh an si. 23 ^aZiangahtile Ammon-mipawl le Moab-mipawl cu Seir tlang luahtupawl that verver le siatsuah dingin an ding. Seir luahtupawl an thah thluh tikah, anmah le anmah thataw dingin an doaw.

20:23^a Sem 19:28; Lai 7:22; 1Sam 14:20; Eze 38:21

24 Judah-mipawl ramṭhing căwnnak hmun an thlen tikah, mi senpi lam cu an vun cuan; cule ngai hnik, leilung ah an mithi ruangpawl an rīl teptep ih, zohman a luatsuak an um lo.

25 Jehoshafat le a mipawl cu ralthillâk la dingih an rat tikah, cupawl lakah thil mankhung tam ngaingai cu mithi ruangpawl parah an va hmu, cule anmah hrangih an phawihsuak mi ceiawknak thil mankhung zetzet pawl, an phurh theih lo tiangih tam in an la; cule a tam tuk ruangah ralthillâk cu ni thum sung an nâwl. 26 Cule ni litnak ah Berakah phaikuam ah an pungkhawmaw, ziangahtile cu tawkah Jehovah an thangṭhat; curuangah cuih hmun cu Berakah phaikuam, tiin tuihni tiangih kawh a si. 27 Cun Judah mipa pauhpauh le Jerusalem mipa pauhpauh cu an tlungkir; Jehoshafat in Jerusalem ih aipuang zetih tlungkir dingin hmai a hruai, ziangahtile Jehovah in an ralpawl parah lungawi aipuang dingin a tuah hai. 28 Cun Jerusalem ah cawngcingpawl, ṭingṭangpawl le tawtawrawtpawl thawn Jehovah inn ah an feh. 29 ^aCule Israel doralpawl Jehovah in a do ti an theih tikah, cuih rampawlih lalram zate parah Pathian ṭihnak a um. 30 ^bCun Jehoshafat-ih lalram cu ralmûangin a um, ziangahtile kil i kip ah a Pathian in cawlhhahdamnak a pe.

20:29^a Sem 35:5; Suah 14:14; Dnp 2:25

20:30^b 1San 22:9

Jehoshafat-ih Uknak Cemnetnak

31 Jehoshafat cu Judah tlunah siangpahrang a ṭuan. Siangpahrang a can tikah amah cu kum 35 a si ih, Jerusalem ah kum 25 sung a lal. A nuih hmin cu Azubah, Shilhi-ih fanu a si. 32 Cule a pa Asa-ih lamzin a zawh ih, cumi ihsin a pial lo, Jehovah-ih mithmuh ah a dik mi a tuah. 33 Sikhalsehla hmun sâng pawl cu lâkhlo an si lo, ziangahtile mipi cu an pupápawlih Pathian lamah an thinlung an rak timlam lo. 34 ^aCule a tāng lai mi Jehoshafat-ih căngvaihnakpawl, a hmaisabik ihsin a netabik tiang, ngai hnik, Hanani fapa Jehu-ih cazual sungah ngan an si, cucu Israel siangpahrangpawlih cazual sungah a cuang.

20:34^a 1Sp 16:1; 2San 19:2

Jehoshafat le Ahaziah Hawipiawknak

35 Himi hnuah Judah siangpahrang Jehoshafat cu sualrál zetih cāngvaitu Israel siangpahrang Ahaziah a kăwp. 36 Cule Tarshish ih feh ding lăwng tuah dingin amah cu a kăwp ih, Ezion Geber ah lăwngpawl an tuah. 37 ^aAsinan Mareshah-mi Dodavah-ih fapa Eliezer in Jehoshafat dokalhin thu a phuang, “Ahaziah na kăwp ruangah, Jehovah in na hnaṭuanpawl a tisiat a si,” tiin. Cun lăwngpawl cu an kuai, cutin Tarshish ah an feh thei lo.

20:37^a 1Sp 9:26

21

Siangpahrang Jehoram

1 ^aCule Jehoshafat cu a pupápawl hnenah a itthat ih, David-ih Khawpi ah a pupápawl hnenih phum a si. Cun a fapa Jehoram cu a aiah a lal.

21:1^a 1Sp 22:50; 1San 3:1

2 Anih cun unau a nei, Jehoshafat-ih fapapawl cu: Azariah, Jehiel, Zekariah, Azariahu, Maikal le Shefatiah tla an si; hipawl hmuahhmuah hi Judah siangpahrang Jehoshafat-ih fapapawl an si. 3 An pa in thilpek ropi ngun, sui le thil mankhung pawl a pe hai, Judah ram ih kulh nei khawpipawl thawn; asinan lalram cu Jehoram a pe, ziangahtile anih cu fatir a si. 4 ^aJehoram cu a paih lalram tlunih dĭn hngeh a si tikah, a ticakaw ih ralnâm in a unau mipa zaten a that, Israel mizahum hrekkhat khal a that.

21:4^a Sem 4:8; Lai 9:5; 1Sp 2:12

5 Siangpahrang a hung si tikah Jehoram cu kum 32 a si ih, Jerusalem ah kum riat sung a lal. 6 ^aCule Ahab sungza ih an rak tuah vekin, anih cun Israel siangpahrangpawlih lamzin a zawh, ziangahtile nupi ah Ahab-ih fanu a nei; Jehovah-ih mithmuh ah thil ṭha lo a tuah. 7 ^bCu cingin Jehovah in David-ih sungza cu a siatbăl duh lo, David thawi thukham a tuah mi ruangah le a fapapawl le amah parah kumkhuain meito pek a rak tiamkam ruangah a si.

21:6^a 1Sp 12:28-30

21:7^b 2Sam 7:13, 15; 21:17

Edom Helnak

8 Amai san ah Edom cu Judah-ih thuneihnak dokalhin a hél ih, anmah uktu ding siangpahrang an tuah. 9 Cule Jehoram cu a bawipawl le a hnenih um a rang lêngpawl hmuahhmuah thawn a fehsuak. Cule zan ah a tho ih amah kulhtu Edom-mipawl le rang lêng ralbawipawl cu a do. 10 ^aCuti vekin Edom cu tuihni tiangin Judah-ih thuneihnak dokalhin a hél. Cuih cān ah a uknak cu Libnah khal in a dokalh, ziangahtile, a pupápawlih Pathian Jehovah a thlauthla.

21:10^a Mip 33:20; 2Sp 8:21

11 Cuihtlunah Judah tlangpawl parah hmun sâng pawl a tuah ih, Jerusalem luahtupawl hlawhhlannak a tuahter hai, cule cu tawkah Judah a hruailut.

Elijah Cakuat

12 Cule profet Elijah hnen ihsin a hnenah cakuat a ra thleng,

“Na pa David-ih Pathian Jehovah in hitin a sim: na pa Jehoshafat-ih lamzin le Judah siangpahrang Asa-ih lamzin na zawh lo ih, 13 ^aIsrael siangpahrangpawlih lamzin na zawh sawn, Judah le Jerusalem luahtupawl cu Ahab sungza hlawhhlannak vekin hlawhhlannak na tuahter hai ih, na paih sungkua nangmah hnakih ṭhasawn na unaupawl na thah hai ruangah, 14 ngai hnik, Jehovah in na mipawl, na fapapawl, na nupipawl le na neih mi zaten hremnak nasa zetin a vaw ding; 15 ^bcule ril nat thawn bese zetin na na ding, cuih natnak ruangah na rilpawl pâwtsuak tiangin ni tin na na ding, a ti,” tiin.

21:13^a 1Sp 2:32; 16:29-33

21:15^b Mip 12:10

Jehoram Dāntatnak

16 Cuihtlunah Jehovah in Jehoram dokalh zawngin Filisṭia-mipawl lungthin le Ethiopia-mipawl kiangih um Arab-mipawl a căwktho. 17 ^aCule annih cu Judah ram ah an hung so ih, an sîm, cule siangpahrang inn ih an hmuh mi thil zaten an la ṭheh, a fapapawl le a nupipawl khal; cutin a fapapawl lakih a fapa nautabik Jehoahaz siarlo a hnenih tān mi fapa an um lo.

21:17^a Joe 3:5

18 Hipawl hmuahhmuah hnuah, Jehovah in amah cu tidam theih lo ril nat in a vua. 19 Cun cuih cān sungah hitin a si, kum hnih a liam hnuah, a natnak ruangah a ril an pâwtsuak; cule nâ ti zetin a thi. Cule a mipawl in a pupápawl hrangih meipi an sēp vekin a hrangah meipi an sēp ve lo.

Jehoram-ih Uknak Cemnetnak

20 Siangpahrang a hung si tikah amah cu kum 32 mi a si ih Jerusalem ah kum riat sung a lal. Cun zohman ih ui loin a fehliam. Cule amah cu David-ih Khawpi ah an phum, asinan siangpahrangpawlih thlān ah cun a si lo.

22

Siangpahrang Ahaziah

1 Cun Jerusalem luahtupawl in a fapa nautabik Ahaziah cu a aiah siangpahrang ah an tuah, ziangahtile Arab-mipawl thawi ra mirămtupawl in ṭanhmun khuarnak ah fapa upa zaten an that. Cutin Judah siangpahrang, Jehoram-ih fapa Ahaziah in a uk. 2 Siangpahrang a can tikah, Ahaziah cu ^akum 42 a si, Jerusalem ah kum khat a lal. A nuih hmin cu Athaliah a si ih, Omri-ih fanu a si. 3 Anih khal Ahab sungza-ih lamzin a zawh, ziangahtile a nu in sualrál zetih tuah dingin ruahnak a pe. 4 Curuangah Ahab sungza bangin Jehovah-ih mithmuh ah thil ṭha lo a tuah, ziangahtile anmah cu amai siatralnak ah a paih thih hnuah a thurawn petu an si.

22:2^a kum 42: Hebru ah cun kum 42 ti a si, asinan 2Sp 8:26 ah kum 22 ti a si. Cun Septuagint kut ngan ca hrekkhat khalah kum 22 ti a si. Vei hnih vei khat ah cun Hebru nambat an ngandān fate thlĕngaw mi in a sullam a danglamter.

5 An ruahnak pek mi khal a thlun ih, Ramoth Gilead ah Siria siangpahrang Hazael do dingin Israel siangpahrang Ahab-ih fapa Jehoram zawngah a feh; cule Siria-mipawl in Joram hriamhma an putter. 6 ^aCun anih cu Siria siangpahrang Hazael a do tikih, Ramah ih a ngah mi hriamhma dam dingin Jezreel ah a tlungkir. Cule Judah siangpahrang Jehoram-ih fapa Ahaziah cu Jezreel khua ah Ahab-ih fapa Jehoram a nat ruangah veh dingin a suk.

22:6^a 1Sp 19:15; 2Sp 8:13-15

Ahaziah Thihnak

7 ^aAhaziah-ih tlûknak cu Joram hnenih a va fehnak ihsin thleng dingin Pathian in a ruat, ziangahtile a thlen tikah, Ahab sungza that dingin Nimshi-ih fapa Jehovah ih hriak thih Jehu táwng dingin Jehoram zawngah a fehsuak. 8 ^bCule hitin a si, Ahab sungza parih dāntatnak Jehu in a tuah laiah, Judah mizahumpawl le Ahaziah riantu Ahaziah unaupawlih fapapawl a hmu hai ih, a that hai. 9 ^cCun anih in Ahaziah a hawl. Samaria ih a relh laiah, amah cu an kai. Cun Jehu hnenah amah cu an hruai ih, an that. Cule an phum, ziangahtile, “Anih cu a thinlung hmuahhmuah ih Jehovah hawltu, Jehoshafat-ih fapa a si,” tiah an ti. Cutin Ahaziah sungza in lalram kaitangtu ding a nei lo.

22:7^a 2Sp 9:16

22:8^b 2Sp 10:13

22:9^c Lai 9:5

Siangpahrangnu Athaliah

10 Ahaziah-ih nu Athaliah in a fapa a thi ti a hmuh tikah, a tho ih Judah siangpahrang cithlah zaten a that thluh. 11 Asinan Jehoshabeath, siangpahrang fanu in Ahaziah-ih fapa Joash cu an thah mi siangpahrang fapapawl lak ihsin a thupten a lahlo, cule amah umtu cu ihnak pindan sungah a ret. Cutin siangpahrang Jehoram-ih fanu Jehoshabeath, puithiam Jehoiada-ih nupi cun Athaliah in a thahlonak dingah a hnen ihsin a rak thup (ziangahtile cu nu cu Ahaziah-ih farnu a si). 12 Cule anih cu kum ruk sung an hnenah, Pathian inn ah cuih ram ih Athaliah a lal sung cu thuh a si.

23

Jehoiada in Joash cu Siangpahrang ah a Tuah

1 A kum sarihnak ah Jehoiada cu a ticakaw ih, ralkap 100 hotupawl thawn thukham a tuah: Jehoram-ih fapa Azariah, Jehohanan-ih fapa Ishmael, Obed-ih fapa Azariah, Adaiah-ih fapa Maaseiah, Zikhri-ih fapa Elisafat tla an si. 2 ^aCule Judah ram pumpi ah an fehsuak ih Judah khawpi hmuahhmuah ihsin Levi-mipawl le Israel pupápawlih sungza lubânpawl an fĭnkhawm ih, Jerusalem ah an ra.

23:2^a Mip 35:2-5; 2San 11:17

3 ^aCun mipungkhawm zate cun Pathian inn ah siangpahrang thawn thukham an tuah. Cule Jehoiada in an hnenah, “Ngai hnik uh, David-ih fapapawl thuhla Jehovah in a sim vekin siangpahrang fapa in a uk ding. 4 Hihi nan tuah ding mi a si: Sabbath ni ih ra nannih puithiampawl le Levi-mipawl, nan lakih ṭhen thum ṭhen khat in sângkapawl nan kil pei, 5 ṭhen thum ṭhen khat cu siangpahrang inn nan kil pei; a dang ṭhen thum ṭhen khat in Kăwtka Lungphum nan kil pei. Mipi zaten Jehovah inn tualrawn ah an um pei. 6 ^bAsinan puithiampawl le rawngbawl lai Levi-mipawl siarlo Jehovah inn ah zohman lut hlah hai seh. An thianhlim ruangah annih cu an lut thei, asinan mipi zate cun Jehovah an thlir hrih pei. 7 Cule mi kip mai kut ciar ah hriamhrei kengin, a kil kip in Levi-mipawl in siangpahrang an kulh pei; cule zokhal inn sungih lut cu thah a si pei. Nannih cu siangpahrang a luh le a suah tikah a zawngah nan um ding a si,” tiah thu a pe hai.

23:3^a 2Sam 7:12; 1Sp 2:4; 2Sp 11:17

23:6^b Zek 3:7

8 ^aCule Levi-mipawl le Judah-mipawl hmuahhmuah cun puithiam Jehoiada ih thu a pek mi hmuahhmuah bangtukin an tuah. Cule mi tin mai milai cio Sabbath ni ih ṭuanvo nei ding le Sabbath ni ih cawl ding pawl cu an hruai; ziangahtile puithiam Jehoiada in ṭuanvo nei bur ṭhen pawl cu a tlungter hai lo. 9 Cule puithiam Jehoiada in ralkap 100 hotupawl hnenah Siangpahrang David-ih feipawl le ralphaw a tûm le a te pawl cu a pe. Cupawl cu Pathian inn sung ihta an si. 10 Cun mipi zaten, mi kip mai hriamnâm cio mai kut ciar ah kengin, temple vawrh lam kap ihsin keh lam kap tiang, biakṭheng kiang le temple kiangah, siangpahrang kimvel hmuahhmuah ah a ret. 11 ^bCule annih in siangpahrang fapa cu an rak hruaisuak, a parah lallukhum khumterin le Theihpinak pein siangpahrang ah an tuah. Cun Jehoiada le a fapapawl in amah cu hriak an thih ih, “Siangpahrang cu a nunkhua sau hram seh!” tiah an ti.

23:8^a 2Sp 11:9; 1San 24:1

23:11^b Dnp 17:18

12 Cule Athaliah in mipi tlân thâwm le siangpahrang thangṭhat thâwm a theih tikah, mipi hnen Jehovah inn ah a ra. 13 ^aA zoh tikah, ngai hnik, siangpahrang cu luhnak amai ṭhuam kiangah dīngin a um, cule siangpahrang kiangah cun ralkap hotupawl le tawtawrawt phawtupawl um cu a hmu. Ram mipi zaten lungawi aipuangin le tawtawrawt phawin an um, hlasaktupawl khal awnmawi tumtupawl thawn thangṭhat hla an hruai. Cuti cun Athaliah cun a hnipuan a thlek ih, “Phiarawknak! Phiarawknak!” tiah a ti.

23:13^a Mip 10:10; 1Sp 1:41; 7:15

14 Cule puithiam Jehoiada in ralkappawl tlunih a ret mi, ralkap 100 hotupawl cu a hruaisuak hai ih an hnenah, “Hi nu hi kil phahin hruaisuak uhla, amah thluntu zokhal ralnâm in that uh,” tiah a ti. Ziangahtile puithiam in, “Jehovah-ih inn ah cu nu cu that hlah uh,” tiah a ti.

15 ^aCun Athaliah cu an kai ih, anih cu siangpahrang inn ah Rang Kăwt luhnak zinin a feh ih, amah cu cu tawkah an that.

23:15^a Jer 31:40

Jehoiada in Temple a Tifel

16 ^aCun Jehoiada in amah le mipi zate le siangpahrang karlakah Jehovah-ih mi an sinak dingah thukham a tuah. 17 ^bCule mipi hmuahhmuah cu Baal temple ah an feh ih, cumi cu an ṭhiatbăl. A biakṭhengpawl le milimpawl cu zâm seksekin an băl thluh ih, biakṭhengpawl hmaiah Baal puithiam Mattan an that. 18 ^cCuihtlunah David in a rak ruat vekin, lungawi aipuang le hlasaknak thawn Mosi Dān ih ngan a si vekin Jehovah-ih Meiur Thilhlănpawl hlan dingah, Jehoiada cun David in Jehovah inn hrangih a ruat mi, Levi-mi puithiampawl kut hmangin Jehovah inn kiltu a ruat. 19 ^dCule ziangti zawng khalih mithiang lo an luh thei lo nak dingah, anih in Jehovah inn kăwtkapawl ah kiltupawl a ret.

23:16^a Neh 9:38

23:17^b Dnp 13:6-9; 2Sp 11:18

23:18^c 1San 23:6, 28-32

23:19^d 1San 9:22; 26:1-19

20 ^aCun anih in ralkap 100 hotupawl, mizahumpawl, mipi uktupawl le ram mipi zaten a hruai hai, cule siangpahrang cu Jehovah inn ihsin a run hruai ih, Tlunta Kăwt ihsin siangpahrang inn ah an feh, cule siangpahrang cu lalram laltokham parah a to. 21 Cutin cuih ram mipi zaten lungawi aipuangin an um, cule Athaliah cu ralnâm in an rak thah zo ruangah khawpi cu ralmûangin a um.

23:20^a 2Sp 15:35

24

Siangpahrang Joash

1 Joash cu siangpahrang a can tikah kum sarih mi a si ih, Jerusalem ah kum 40 sung a lal. A nuih hmin cu Zibiah a si ih, Beersheba-mi a si. 2 Puithiam Jehoiada dam sung hmuahhmuah Jehovah mithmuh ih thil dik Joash in a tuah. 3 Cule Jehoiada in nupi pahnih a ṭhitsak ih, fanupawl le fapapawl a nei.

Joash in Temple a Rĕm

4 Himi hnuah hitin a si, Joash in Jehovah inn rĕmṭha dingin a ruat. 5 ^aCun puithiampawl le Levi-mipawl a kokhawm hai ih, an hnenah, “Judah khawpipawl ah feh uhla, Pathian inn rĕmnak dingah Israel miphun zate hnen ihsin kum tinten paisa khawngkhawm uh, cule cuih thu cu zamrang zetin tuah uh,” tiah a ti.

24:5^a Suah 30:16; 2Sp 12:4-5; 1San 11:1; 26:20; Neh 10:32-33; Mat 17:24

Asinan Levi-mipawl cun zamrangten cumi cu an tuah lo.

6 ^aCule siangpahrang in puithiam lu bik Jehoiada cu a ko ih a hnenah, “Ziangah so Levi-mipawl cu Judah ram le Jerusalem ihsin siah run keng dingih nan phût lo? Jehovah-ih siahhlawh Mosi in Israel mipungkhawm hnenah Theihpinak Puanthlam hrangah cumi cu a phût a si,” tiah a ti. 7 Ziangahtile misualrál nu Athaliah-ih fapapawl in Pathian inn cu an bauh ih Jehovah inn ih serhhran mi thil zaten Baalpawl hrangah an hmang a si.

24:6^a Suah 38:21

8 Cun siangpahrang thupek vekin kuang an tuah ih, cumi cu Jehovah inn kăwt lengah an ret. 9 Cule ramṭhing ah Pathian siahhlawh Mosi in Israel-mipawl a phût mi siah cu Jehovah hrangih run keng dingin Judah ram le Jerusalem ah thuthannak an tuah. 10 ^aCun hotupawl zate le mipi zate cu lungawi aipuangin an um, an siahpawl cu an run keng ih, a khah hlanlo kuang sungah an thlak. 11 Cule hitin a si, kuang cu Levi-mipawl kut in siangpahrangih khawnbawl hnenih ken a si ih, annih in tangka tampi a um ti an hmuh tikah, siangpahrangih cangantu le puithiam lu bik ih khawnbawl cu an ra ih kuang an kawlawngter, cule kuang cu an la ih a hmun ah an retkir. Cuti vek cun ni tin an tuah ih tangka tam ngaingai an khawm.

24:10^a Suah 25:2; 1San 29:3, 9

12 Siangpahrang le Jehoiada in Jehovah inn ih rawngbawl hna ṭuantupawl hnenah cumi cu an pe; cule lungser thiam le lettamapawl cu Jehovah inn dĭnsal dingin le Jehovah inn rĕm dingah thir le dar ṭuantu khal an hlang. 13 Cun hnaṭuantupawl cun an ṭuan ih, an dĭnṭhatnak hna cu a tluang zet; Pathian inn cu a dinhmun kel ah an dĭnṭhasal ih, an hngetkhohter. 14 An ṭheh tikah, tangka hlei cu siangpahrang hmai le Jehoiada hmaiah an rak keng. Cumi ihsin Jehovah inn hrangah bungbelpawl, rawngbawlnak le Meiur Thilhlăn hrang bungbelpawl, sui le ngun hai dau pawl le bungbelpawl an tuah. Cule Jehoiada dam sung hmuahhmuah cu cat loin Jehovah inn ah Meiur Thilhlăn an hlan.

Joash in Pathian a Hnáwng

15 Jehoiada cu a tar thlang ih, a kum a kim, cule a thi; a thih tikah amah cu kum 130 mi a si. 16 Cule amah cu David-ih Khawpi ah siangpahrangpawl lakah an phum, ziangruangahtile Israel lakah Pathian lam le a inn lamah thil ṭha a tuah a si.

17 Jehoiada a thih hnuah Judah hotupawl an ra ih siangpahrang hmaiah an kûn. Cule siangpahrang in a ngaithla hai. 18 ^aAn pupápawlih Pathian Jehovah inn an tlansan ih, Asherah-pawl le milempawl an rian. Cule an mawhsualnak ruangah Judah le Jerusalem parah thinlingnak a thleng. 19 ^bCule Jehovah hnenih kirtersal dingin an hnenah profetpawl a thlah, cule anmah dokalhin an theihter nân, an ngaithla lo.

24:18^a Suah 34:13; Jos 24:20; Jer 17:2

24:19^b 2San 36:15; Jer 7:25; 25:4; Zek 1:4

20 ^aCun puithiam Jehoiada-ih fapa Zekariah parah Pathian Thlarau a rung ^bthleng, anih cu mipi tlunah a dīng ih an hnenah, “Pathian in, ‘Ziangah so nan hmuingillonak dingah, Jehovah-ih thupekpawl nan pahbăl? Jehovah nan thlauthlak ruangah anih khal in a rak lo thlauthla ve a si,’ tiin a ti,” tiah a ti hai. 21 ^cCutin amah an phiarthup ih siangpahrang thupeknak in Jehovah inn tualrawn ah amah cu lungto in an dêng. 22 ^dCuti vek cun Zekariah-ih pa Jehoiada in a parih a rak tuah mi ngilneihnak cu siangpahrang Joash in a cîng lo, cuhnakin a fapa a thahsak sawn riangri. Cule a thih zawngah, “Jehovah in cucu zoh sehla lehrūl seh,” tiah a ti.

24:20^a Mip 14:41; Dnp 31:17; Lai 3:10; 1San 12:18; Mat 23:35; Luk 11:51

24:20^b thleng: A ṭawng hrampi ah, “thuam,” ti a si.

24:21^c Jos 7:25; Jer 20:2; 26:21

24:22^d Sem 9:5; Luk 11:51

Joash-ih Uknak a Cem

23 ^aCule hitin a si, kum tawp lamah, Siria ralkappawl cu amah dokalhin an ra suak; cule Judah le Jerusalem ah an ra ih, mipi lak ihsin mipi hotupawl hmuahhmuah an hloralter, cule an ralthillawn zaten Damaskas siangpahrang hnenah an kuat ṭheh. 24 ^bCutin Siria ralkappawl cu mipum málte thawn an ra ih Jehovah in ralkap tam ngaingai cu an kut ah a pe, ziangruangahtile an pupápawlih Pathian Jehovah an thlauthla. Cu vekin Joash parah Siria-mipawl in dāntatnak an tuah. 25 Joash cu bese zetih hriamhma pu ih tân tain a hnen ihsin an sīp tikah, puithiam Jehoiada-ih fapapawlih thisen ruangah, amai siahhlawhpawl in amah cu an phiarthup ih, a ihkhun parah an that. Cule anih cu a thi. Cun amah cu David-ih Khawpi ah an phum, asinan siangpahrangpawlih thlān ah cun an phum lo. 26 ^cAmah phiarthuptupawl cu: Ammon nu Shimeath-ih fapa Zabad le Moab-nu Shimrith-ih fapa Jehozabad tla an si.

24:23^a 2Sp 12:17-18; Sam 2:10

24:24^b Pui 26:23-25; Dnp 28:25

24:26^c Rut 1:4; 2Sp 12:21

27 Amai thuhla simsungnakpawl, a fapapawl thuhla le Pathian inn rĕmṭhat thuhla cu ngai hnik, siangpahrangpawlih thuanthu cazual sungah ngan an si. Cun a fapa Amaziah cu a aiah a lal.

25

Siangpahrang Amaziah

1 Amaziah cu siangpahrang a can tikah kum 25 mi a si ih, Jerusalem ah kum 29 sung a lal. A nuih hmin cu Jehoaddan a si ih, Jerusalem khawmi a si. 2 ^aCule anih cun Jehovah-ih mithmuh ah a dik mi a tuah, asinan a thinlung pumhlum cun a si lo.

25:2^a 1Sp 8:61

Mi Thattu Thuṭhensak a Si

3 Cule hitin a si, amah hrangih lalram dĭn hngeh a si veten, a pa siangpahrang rak thattu a siahhlawhpawl cu a that hai. 4 ^aAsinan an fātepawl cu a that hai lo, Mosi Cazual, Dān sungih, “Palepawl cu an fātepawl aiah thah an si lo pei ih, fātepawl khal an palepawl aiah thah an si lo pei, cuhnakin mi pakhat cu amai sual ruangah a thi sawn pei,” tiih Jehovah thupek ngan mi vekin a tuah sawn a si.

25:4^a Mip 26:11; Dnp 28:61

Edom Donak

5 ^aCuihtlunah Amaziah in Judah le Benjamin ram zate ihsin Judah-mipawl a khawm hai ih an pupápawlih sungza sungza zulhin, ralkap 1000 hotupawl, ralkap 100 hotupawl tiin a tuah hai. Cule kum 20 le a tlun lam mipum a siar hai ih, fei le ralphaw kai thei, ral do-ih feh thei hril mi, ting thum a hmungah. 6 Israel-mipawl lak ihsin micak ralṭha tingkhat khal ngun talent 100 in a hlâng. 7 Asinan a hnenah Pathian mi pakhat a ra ih, “Maw siangpahrang, Israel ralkappawl hi na zawngah fehter hai hlah, ziangahtile Jehovah in Israel a umpi lo ih, Efraim tefapawl zohman a umpi lo. 8 Asinan na feh thotho asile, feh ko! Doawknak ah cak zetin um aw! Cuti cing khalin doral hmaiah Pathian in a lo tluter ding, ziangahtile Pathian cun băwm thei nak le tlukter thei nak huham a nei a si,” tiah a ti.

25:5^a Suah 30:14; 2Sam 24:2; 1San 21:1

9 ^aCun Amaziah in Pathian mi hnenah, “Israel ralkappawl hnenih ka pek mi talent 100 cu ziangtin so kan tuah ding?” tiah a ti.

25:9^a Dnp 8:18; Thf 10:22; Fil 4:19

Cule Pathian mi cun, “Jehovah in himi hnakih tam ngaingai a lo pe thei a si,” tiah a ti.

10 Cule Efraim ihsin a hnenih ra ralkappawl cu Amaziah in inn lamih tlungkir dingin a thliardang. Curuangah an thinhengnak Judah parah nasa zetin a tho ih thinheng zetin inn lamah an tlungkir.

11 Cun Amaziah cu a ticakaw ih, a mipawl hruaiin, Cite Phaikuam ah a feh, cule Seir tefa 10000 a that. 12 ^aJudah-ih tefapawl in nungdamin ralkaih 10000 an hruai ih lungkhām luzim ah an fehpi, cule cupawl cu lungkhām luzim ihsin an hlăwnthla, cutin an zaten an sawprăwp ṭheh.

25:12^a Sam 141:6; Oba 1:3

13 Asinan Amaziah in a hnenih ral do dingih feh lo dingih a thlahkirsal mi mipipawlih ralkappawl cun Judah khuapawl cu Samaria ihsin Beth Horon tiang an sîm, mi 3000 an that ih ralthillâk tam zet an la.

14 ^aCule hitin a si, Edom-mipawl nehnak ihsin Amaziah a tlun tikah, Seir-tefapawlih pathianpawl a tlŭn ih, cupawl cu a pathian dingah a ret hai, cule an hmaiah a kûn ih an hnenah rimthaw a ur. 15 ^bCuruangah Jehovah-ih thinhengnak cu Amaziah parah a tho, cule a hnenah, “Na kut ihsin amai mipi runsuak thei lo, miphun pathianpawl cu ziangah so na hawl?” tiih titu profet pakhat a thlah.

25:14^a Suah 20:3; Isa 44:15

25:15^b Isa 36:20

16 Cun hitin a si, amah a biak rero laiah, siangpahrang Amaziah in a hnenah, “Nangmah cu siangpahrang thurawn petu ah tuah na simaw si? Bāng aw! Ziangah so thah na si ding?” tiah a ti.

Cun profet cu a bāng ih, “Himi na tuah ih ruahnak ka lo pek mi na ngaithlak lo ruangah, Pathian in lo hloralter dingin a ruatcat zo ti ka thei,” tiah a ti.

Israel Donak

17 Cun Judah siangpahrang Amaziah in ruahnak a dil ih, Jehu fapa Jehoahaz-ih fa Israel siangpahrang Jehoash hnenah, “Ra aw, doawknak ah pakhat le pakhat kan hmaităwnaw pei,” tiin mi a thlah.

18 ^aCule Israel siangpahrang Jehoash in Judah siangpahrang Amaziah hnenah, “Lebanon tlang ih hling bur in Lebanon tlang ih sidar thing hnenah, ‘Na fanu hi ka fapa hnenah nupi ah pe aw,’ tiin mi a thlah. Cule Lebanon tlang ih ramsa pakhat a vâk ih cuih hling bur cu a pál. 19 ‘Ngai hnik, Edom-mipawl ka neh,’ tiah na ti ih, tluangkhâwng dingin na thinlung in a lo khaisâng. Atu-ah cun inn ah um men aw. Nangmah le Judah ram tlûknak dingah, ziangah so buainak taw na thawh ding?” tiin mi a thlah ve.

25:18^a Lai 9:8-15

20 Asinan Amaziah in a ngaithla cuang lo, ziangahtile Edom pathianpawl an hawl ruangah anmah cu an ralpawl kut ih pek dingah cumi cu Pathian ih tum mi a si. 21 Cun Israel siangpahrang Jehoash cu a fehsuak ih, Judah siangpahrang Amaziah thawn Judah ram Beth Shemesh khua ah an hmaităwnaw. 22 Cule Judah cu Israel in a neh ih, mi kip anmai riahbûk cio ah an tlânsia. 23 ^aCun Israel siangpahrang Jehoash in Judah siangpahrang, ^bJehoahaz-ih fapa Joash-ih fapa Amaziah cu Beth Shemesh ah a kaingah, cule amah cu Jerusalem ah a hruai, cun Jerusalem kulh cu Efraim Kăwt ihsin Kil Kăwt tiang dawng 400 a băl. 24 ^cCule anih in sui le ngun hmuahhmuah, Obed-Edom ih kilkhawi mi Pathian inn le siangpahrang inn ih hlawnthil retnak ih hmuh mi bungruapawl hmuahhmuah cu a la ih, âmkhām hrangih kaih mipawl thawn Samaria ah a tlung.

25:23^a 2Sp 14:13; Neh 8:16; Jer 31:38

25:23^b Jehoahaz: Ahaziah ti khalih kawh a si.

25:24^c 2Sp 14:14; 1San 26:15

Amaziah Thihnak

25 Joash-ih fapa Judah siangpahrang Amaziah cu ^aJehoahaz-ih fapa Israel siangpahrang Jehoash thih hnuah kum hleinga a nungdam. 26 Cule a tāng lai mi Amaziah-ih căngvaihnakpawl cu a hmaisabik ihsin a netabik tiangin, ngai hnik, Judah le Israel siangpahrangpawlih cazualpawl ah ngan an si lo maw? 27 ^bJehovah hnen ihsi Amaziah a pial ihsin, Jerusalem ah amah phiarthupnak an tuah, cule anih cu Lakish ah a tlân; asinan Lakish khua ah cun a dung ihsin mi an thlah ih, cu tawkah amah cu an that. 28 Cun amah cu rangpawl in an phur ih, Judah khawpi ah a pupápawl hnenah an phum.

25:25^a Jehoahaz: Câng 23 simfiangnak zoh aw.

25:27^b 2San 15:2

26

Siangpahrang Uzziah

1 ^aJudah mipi zaten kum hleiruk mi ^bUzziah cu an hril ih, a pa Amaziah aiah siangpahrang ah an tuah. 2 Siangpahrang cu a pupápawl hnenih a cawlh hnuah, Uzziah in Eloth khua a dĭnsal ih, cumi cu Judah ram ah a telhsal.

26:1^a 2Sp 15:2-3

26:1^b Uzziah: Azariah-ih hmin dang a si.

3 Siangpahrang a can tikah Uzziah cu kum hleiruk mi a si ih, Jerusalem ah kum 52 sung a lal. A nuih hmin cu Jekoliah a si ih, Jerusalem khawmi a si. 4 Cule a pa Amaziah ih tuah mi hmuahhmuah bangtukin, Jehovah-ih mithmuh ah a dik mi a tuah. 5 ^aPathian larawknak theihthiamnak neitu Zekariah san ah anih cun Pathian a hawl. Jehovah a hawl sung cu Pathian in a hmuingilter.

26:5^a 2San 15:2

Uzziah-ih Hlawhtlinnak

6 ^aFilisṭia-mipawl do dingin a fehsuak ih, Gath kulh, Jabneh kulh le Ashdod kulh pawl a ṭhiatbăl, cule Ashdod kiangkap le Filisṭia-mipawl lakah khawpipawl a dĭn. 7 Filisṭia-mipawl, Gur Baal ih cêng Arab-mipawl le Maon-mipawl do dingin amah cu Pathian in a bawm. 8 ^bCule Ammon-mipawl in Uzziah hnenah ngunkhuai an rak keng. A hminthanzia cu Izip ramri a thleng, ziangahtile anih cu a cak tuk lawmmam.

26:6^a Isa 2:6; Jer 25:20; Amo 1:8

26:8^b Sem 19:38

9 ^aCun Uzziah cun Jerusalem ih Kil Kăwtka, Kuam Kăwtka le kulh kĕlnak ṭhuampi ah dawlsângpawl a sak ih a hngetter. 10 Ramṭhing khalah dawlsângpawl a dĭn. Tikhur tampi a lai, ziangahtile phai ram ah le phairawn ah sumhnám tampi a nei. Tlang ram le Karmel ram ah lóthlopawl le sabit hmuan simsialtupawl a nei, ziangahtile anih cu ló thlawh duh mi a si.

26:9^a 2Sp 14:13; Neh 2:13

11 Cuihtlunah siangpahrangih ralbawipawl lakih pakhat Hananiah kut hnuai mi, cangantu Jeiel le bawi Maaseiah in mipum cazin an lak bangtukin ral do mi ralkap, a bur a bur ih ral do-ih fehsuak mi khal Uzziah in a nei. 12 Micak ralthiam pawlih pupápawlih sungza lubânpawl mipum cu 2600 an si. 13 Cule an thuneihnak hnuaiah ralkap ting thum le thawngsarih le zanga an um. Annihpawl cu ralpawl dokalhih siangpahrang bawmtu, nasa zetih ral do mi an si. 14 ^aCun Uzziah in ralkap zate hrangah ralphawpawl, feipawl, thir lukhumpawl, taksa ralthuampawl, thálpawl le lungtopawl sainak ding herhlipawl a timlam. 15 Cule Jerusalem ah dawlsângpawl par le a kilpawl parih ret ih, thál fungpawl sainak le lungto tûm zetzet pawl ih dennak ding, mithiampawl ih hmuhsuah mi cetpawl a tuah. Cutin a hmin cu hmun tin ram tin ah a thang, ziangahtile anih cu micak a si tiang mangbangzaih băwm a si.

26:14^a Jer 46:4

Uzziah-ih Sualnak

16 ^aAsinan anih cu a cak vivo tikah, a thinlung cu amai siatnak thlen tiangin a hngal, ziangahtile Jehovah a Pathian lakah rinum loin a cangvai, Rimhmui Biakṭheng parah rimhmui ur dingin Jehovah-ih temple ah a lut. 17 ^bCule puithiam Azariah cu amah hnuah a lut ih, a zawngah Jehovah-ih puithiam miralṭha 80 an tel. 18 ^cCule annih in siangpahrang Uzziah cu an kalh ih a hnenah, “Uzziah, Jehovah hnenih rimhmui ur cu nang ih ti ding a si lo, rimhmui ur dingih serhhran Aaron-ih fapa puithiampawl ih ti ding a si sawn a si. Hmun thianghlim ihsin suak aw, ziangahtile rinum loin na rak cangvai a si! Jehovah Pathian hnen ihsin cawisannak na co lo ding,” tiah an ti.

26:16^a Dnp 32:15; 2Sp 14:10; 16:12; 1San 5:25

26:17^b 1Sp 4:2

26:18^c Suah 30:7-8; Mip 16:39; 18:1-7; 1San 6:49; Heb 5:4

19 ^aCun Uzziah cu a thin a so, rimhmui ur dingin a kut ah meiling suahdur a keng. Cule puithiampawl parih a thin a heng laiah Jehovah inn ih puithiampawl hmai Rimhmui Biakṭheng kiangah a cal ah phâr a suak. 20 Cule puithiam lu bik Azariah le puithiam zaten amah cu an zoh, ngai hnik, a cal a phâr, cule cuih hmun ihsin anih cu an dawisuak. A si, Jehovah in amah cu a vuak ruangah amah khal suak dingin a manhlap zet.

26:19^a Mip 12:10

21 ^aSiangpahrang Uzziah cu a thih ni tiangin miphar a si. Miphar a si ruangah, anih cu inn pâk pakhat ah a cêng, ziangahtile anih cu Jehovah inn ihsin sahcat a si. Cun a fapa Jotham cu siangpahrang sungza tlunah, ram mipi lairelin a um.

26:21^a Suah 4:6; Pui 13:46; Mip 5:2

Uzziah-ih Uknak a Cem

22 ^aCule Uzziah-ih cangvaihnak dang pawl cu, a hmaisabik ihsin a netabik tiangin Amoz-ih fapa profet Isaiah in a ngan. 23 ^bCutin Uzziah cu a pupápawl hnenah a itthat ih, siangpahrangpawlih ta a si mi phumawknak lóram ah a pupápawl hnenah an phum, ziangahtile, “Anih cu miphar a si,” tiah an ti. Cun a fapa Jotham cu a aiah a lal.

26:22^a 2Sp 15:1; Isa 1:1

26:23^b 2Sp 14:21; Isa 1:1; Amo 1:1

27

Siangpahrang Jotham

1 ^aJotham cu siangpahrang a can tikah kum 25 mi a si ih, Jerusalem ah kum hleiruk sung a lal. A nuih hmin cu Jerusha a si ih, Zadok-ih fanu a si. 2 Cule anih cun Jehovah-ih mithmuh ah a dik mi a tuah, a pa Uzziah ih a rak tuah mi hmuahhmuah bangtukin a tuah. Sikhalsehla Jehovah-ih temple ah cun a lut lo. Asinan mipi cun thil bawrhhlawh an tuah vivo.

27:1^a 2Sp 15:5; 1San 3:12

3 ^aAnih in Jehovah inn ih Kăwtka Tlunta a sak ih, Ofel kulh cu nasa zetin a sak. 4 Cuihtlunah Judah tlangpawl ah khawpipawl a dĭn ih, kulh hnget pawl le dawlsângpawl tupi lakah a dĭn.

27:3^a Neh 3:26

5 ^aAmmon-mipawlih siangpahrang khal a do ih a neh hai. Cule Ammon-mipawl in cuih kum ah ngun talent 100, sangvut kor 10000 le barli sangvut kor 10000 amah an pe. Ammon-mipawl in kum hnihnak le kum thumnak khalah cumi cu an pe thotho. 6 Cutin Jehovah a Pathian hmaiah felfaiten nung dingin thu a ṭhencat ruangah Jotham cu micak zetah a hung cang.

27:5^a Sem 19:38

7 Cun a tāng lai mi Jotham-ih căngvaihnakpawl le a ral donak le a nundānpawl cu, ngai hnik, Israel le Judah siangpahrangpawlih cazual ah ngan an si. 8 Amah cu Siangpahrang a can tikah kum 25 mi a si ih, Jerusalem ah kum hleiruk sung a lal. 9 ^aJotham cu a pupápawl hnenah a itthat, cule David-ih Khawpi ah an phum. Cun a fapa Ahaz cu a aiah a lal.

27:9^a 2Sp 15:38

28

Siangpahrang Ahaz

1 ^aAhaz cu siangpahrang a can tikah, kum 20 mi a si ih, Jerusalem ah kum hleiruk sung a lal; cule anih cun a pupá David ih a rak tuah vekin Jehovah mithmuh ah a dik mi a tuah ve lo. 2 ^bCuhnakin Israel siangpahrangpawlih lamzin a zawh ih, Baalpawl hrangah burcawp milimpawl a tuah. 3 ^cHinnom Fapaih Phaikuam ah rimhmui a ur ih, Jehovah in Israel tefapawlih hmaika ihsin a dawisuak mi miphunpawlih thil fihnungza pawl bangtukin, a falepawl meisa ah a urkāng. 4 Cule hmun sâng pawl par, tlangmûalpawl par le thing bŭk nîm hnuai kip ah rai a thawi ih rimhmui a ur.

28:1^a 2Sp 16:1; 1San 3:13; Isa 1:1

28:2^b Suah 34:17

28:3^c Pui 18:21; Dnp 18:9; Jos 15:8; 2Sp 3:27; Eze 20:26

Ahaz Ralsunnak

5 ^aCuruangah Jehovah a Pathian in amah cu Siria siangpahrang kut ah a pe. Amah cu an neh ih, anmah lak ihsin mipi tampi cu ralkaih ah an hruai, cule Damaskas ah an fehpi. Cun amah cu Pathian in Israel siangpahrang kut khalah a pe, cuih siangpahrang cun cu pa cu thahnak nasa zet thawn a rak neh. 6 ^bZiangahtile Remaliah-ih fapa Pekah in ni khat sungah Judah-mi tingkhat le thawngkul a that, cupawl cu an zaten miralṭha hlir an si, ziangruangahtile an pupápawlih Pathian Jehovah an thlauthla. 7 Efraim micak ralthiam Zikri in siangpahrang fapa Maaseiah le inn uktu Azrikam le siangpahrang sangtu Elkanah a rak that. 8 ^cCule Israel tefapawl in an unau a si mi nunaupawl, an fapapawl le an fanupawl ting hnih cu ralkaih ah an hruai, cule an hnen ihsin ralthillâk tampi khal an la ih, cuih ralthillâk cu Samaria ah an thiar.

28:5^a 2Sp 16:5; Isa 7:1

28:6^b 2Sp 15:25, 27; Isa 9:21

28:8^c Dnp 28:25-41

9 Asinan cu tawkah Pathian-ih profet pakhat a um, a hmin cu Oded a si. Cule anih cu Samaria ih ra ralkappawl hmaiah a fehsuak ih an hnenah, “Ngai hnik uh, nan pupápawlih Pathian Jehovah cu Judah parah a thin a heng ruangah nan kut ah anmah cu a lo pe, asinan anmah cu van táwng thinsonak in anmah cu nan that hai. 10 ^aCule atu-ah Judah le Jerusalem tefapawl cu nan sál nu le nan sál pa dingah hramhramih tuah nan tum; asinan nannih khal Jehovah Pathian hmaiah mawhsualnak nan nei ve a si lo maw? 11 Curuangah atu-ah in rak ngai uhla, nan unaupawl hnen ihsin ralkaih ih nan hruai mi ralkaihpawl kha kirter hai uh, ziangahtile Jehovah-ih thinling sosâng cu nan parah a um a si,” tiah a ti.

28:10^a Pui 25:39-46

12 Cun Efraim tefapawlih lubân hrekkhat a si mi Johanan-ih fapa Azariah, Meshillemoth-ih fapa Berekiah, Shallum-ih fapa Jehizkiah le Hadlai-ih fapa Amasa cu ral donak ihsi ra tlung mipawl dokalhin an tho. 13 Cule an hnenah, “Kan sualpawl le kan mawhnak bêtnak in Jehovah hmaika ah kan parah mawhnak thlenter nan tum. Kan mawhsualnak cu a nasa tuk cia zo ih Israel dokalhin thinlingnak a sosâng a si. Himi ruangah, ralkaihpawl cu hi tawkah nan hruai lo pei,” tiah an ti hai. 14 Hriamhrei kai mipapawl in ralkaihpawl le ralthillâkpawl cu hotupawl hmai le mipungkhawm zate hmaiah an tân ta. 15 ^aCun hmin sal ih thiah mi mipapawl an tho ih, ralkaihpawl cu an hruai, cule an lakih taklawng ih umpawl cu ralthillâkpawl ihsin an thuam, an hruhter ih kedam an pe, rawl le in ding an pe ih hriak an hnih; cule miṭawnṭai zaten lāk parah an toter. Cule cupawl cu an unaupawl hnen, ṭhulhfau kung khawpi Jeriko ah an hruai ih Samaria ah an kir.

28:15^a Dnp 34:3; Lai 1:16; 2Sp 6:22; Thf 25:21-22; Isa 58:7; Luk 10:25-37

16 ^aCuih cān ah siangpahrang Ahaz in Assiria siangpahrangpawl hnenah amah bawm dingin mi a thlah. 17 ^bZiangahtile Edom-mipawl an ra leh sal ih Judah an do, cule ralkaih ah an hruai. 18 ^cFilisṭia-mipawl khal in Judah phai ram le Negev khuapawl an sîm ih, Beth Shemesh, Aijalon, Gederoth, Sokoh le a khaw ṭêk pawl, Timnah le a khaw ṭêk pawl, Gimzo le a khaw ṭêk pawl an la ih cu tawkah an cêng. 19 ^dIsrael siangpahrang Ahaz ruangah Jehovah in Judah cu a hnûkniam, ziangahtile anih in Judah-mipawl cu sūpawknak a tlasamter ih Jehovah parah an rinum lo zet. 20 ^eCule Assiria siangpahrang Tiglath-Pileser cu a hnenah a ra ih, amah cu a van a sângter, cule amah cu a rak bawm lo. 21 ^fJehovah inn, siangpahrang inn le hotupawl hnen ihsin thil hrekkhat cu Ahaz in a la ih, Assiria siangpahrang a pe; asinan anih cun amah cu a bawm cuang lo.

28:16^a 2Sp 16:5-7; Eze 23:12

28:17^b Sam 137:7; Isa 34:5; Jer 25:21; Eze 16:57; Amo 1:11

28:18^c Sem 38:12; Jos 10:12; 15:41; 1Sam 17:1; Isa 9:12; Jer 25:20; Eze 16:27, 57

28:19^d 1San 5:25

28:20^e 2Sp 15:29; 16:7; 1San 5:6; Isa 7:7; 10:20

28:21^f Jer 2:36

Ahaz a Sual Sinsin

22 ^aSiangpahrang Ahaz cu a vansan lai cān ah, Jehovah parah rinum loin a cangvai sinsin. 23 ^bCule amah nehtu Damaskas pathianpawl hnenah rai a thawi ih, “Siria siangpahrangpawlih pathianpawl in an băwm hai ruangah, keimah in băwm thei nak dingah an hnenah rai ka thawi ding,” tiah a ti. Asinan cupawl cu amah le Israel miphun zate siatnak ah an cang. 24 ^cAhaz in Pathian inn ih bungbelpawl a fĭnkhawm ih, Pathian inn ih bungbelpawl cu a satphel ṭheh, Jehovah inn sângkapawl a khar ih, amai hrangah Jerusalem kil kip ah biakṭheng a tuah. 25 Cule Judah khua pauhpauh ah pathian dang pawl hnenih rimhmui ur dingin hmun sâng pawl a tuah, cule a pupápawlih Pathian Jehovah thinheng ko a căwktho.

28:22^a Jer 5:3

28:23^b 1San 11:1; Isa 10:20; Jer 18:15; 44:17-18

28:24^c 2Sp 16:18; Mal 1:10

Ahaz-ih Uknak a Cem

26 Cule a tāng lai mi Ahaz-ih căngvaihnakpawl le a nundānpawl, a hmaisabik ihsin a netabik tiang, ngai hnik, Judah le Israel siangpahrangpawlih cazual ah ngan an si. 27 ^aCun Ahaz cu a pupápawl hnenah a itthat, cule khawpi sung, Jerusalem ah an phum. Asinan Israel siangpahrangpawlih thlān ah an ret lo. Cun a fapa Hezekiah cu a aiah a lal.

28:27^a 2San 21:20; Isa 14:28-32

29

Siangpahrang Hezekiah

1 ^aHezekiah cu kum 25 a ti tikah siangpahrang ah a cang, cule Jerusalem ah kum 29 sung a lal. A nuih hmin cu Abijah a si ih, Zekariah-ih fanu a si. 2 Cule anih cun a pupá David ih a rak tuah mi hmuahhmuah bangtukin Jehovah-ih mithmuh ah a dik mi a tuah.

29:1^a 2Sp 18:2; 1San 3:13

Temple Thianfainak

3 ^aA lal kum khatnak, thla khatnak ah, Jehovah inn a áwng ih a rĕm. 4 Cun puithiampawl le Levi-mipawl a hruailut hai ih nisuahnak lamih mual ah a fĭnkhawm hai, 5 ^bcule an hnenah, “Maw Levi-mipawl, i ngai hnik uh! Atu-ah serhhranaw uh, nan pupápawlih Pathian Jehovah inn cu serhhran uhla, hmun thianghlim ihsin thil bawrhhlawh pawl cu thiarsuak uh. 6 ^cZiangahtile kan pupápawl rinum loin an cangvai ih Jehovah kan Pathian mithmuh ah thil ṭha lo an rak tuah a si; amah cu an thlauthla, Jehovah-ih Biakbûk an hawisan ih, dung an tŭn. 7 ^dHulhliap sângkapawl khal an khar ih meitopawl kha an hmit ih rimhmui an ur lo, cule Israel-ih Pathian hnen hmun thianghlim ah Meiur Thilhlănpawl an hlan lo. 8 ^eCuruangah Jehovah-ih thinlingnak cu Judah le Jerusalem parah a thleng ih, anmah cu nan mit ih nan hmuh vekin tuksumza le lau-umza le hnihsan mi ah a tuah hai a si. 9 Ngai hnik, himi ruangah, kan pupápawl cu ralnâm in an tlu, cule kan fapapawl, kan fanupawl le kan nupipawl cu ralkaih ih hruai an si.

29:3^a 2Sp 18:16

29:5^b Pui 11:44; Neh 13:9

29:6^c 1San 5:25; Ezr 9:7; Sam 106:6-47; Jer 2:27; Eze 23:35

29:7^d Suah 30:7; Pui 24:2

29:8^e Pui 26:32; Dnp 28:25; Jer 18:16

10 “Atu-ah kan hnen ihsin a thinlingnak sosa a pialhlo thei nak dingah Israel-ih Pathian Jehovah thawn thukham tuah ding ka duh. 11 ^aKa fapapawl tla, atu-ah daithlang hlah uh, ziangahtile a hmaiih dīng dingah, amah rian dingah, a hrangih rawngbawl dingah le rimhmui ur dingah Jehovah in a lo hril zo a si,” tiah a ti hai.

29:11^a Mip 3:6; 1San 15:2

12 ^aCun hi Levi-mipawl: Kohath tesinfapawl lak ihsin Amasai-ih fapa Mahath le Azariah-ih fapa Joel; Merari tesinfapawl lak ihsin Abdi-ih fapa Kish le Jehallelel-ih fapa Azariah; Gershon-mipawl lak ihsin, Zimmah-ih fapa Joah le Joah-ih fapa Eden; 13 ^bElizafan tesinfapawl lak ihsin, Shimri le Jeiel; Asaf tesinfapawl lak ihsin Zekariah le Mattaniah; 14 Heman tesinfapawl lak ihsin, Jehiel le Shimei; Jeduthun tesinfapawl lak ihsin Shemaiah le Uzziel tepawl cu an tho.

29:12^a Mip 3:17-20

29:13^b Suah 6:22; 1San 6:39; 15:17

15 ^aCule an unaupawl an kokhawm, anmah te an serhhranaw ih, Jehovah-ih kamsuakthupawl a dawngtu siangpahrang thupek bangtukin, Jehovah inn thianfai dingin an feh. 16 ^bCun puithiampawl cu thianfai dingin Jehovah inn sungta lamah an lut ih, Jehovah inn sungih thil thiang lo an hmuh mi zaten Jehovah inn tualrawn ah an suah ṭheh. Cule Levi-mipawl in cupawl cu an lasuak ih Kidron Hawrkuam ah an thiar.

29:15^a 1San 23:28; Isa 1:25

29:16^b 2Sam 15:23; 2Sp 23:4

17 Thla khatnak, a ni khatnak ah serhhrannak an thawk ih, cuih thla ni riatnak ah Jehovah-ih hulhliap an thleng. Cule ni riat sung Jehovah inn an serhhran ih thla khatnak a ni hleiruknak ah an ṭheh.

18 Cun Siangpahrang Hezekiah hnenah an lut ih, “Meiur Thilhlănpawl hrang biakṭheng cu a bungbelpawl hmuahhmuah le Sangserh retnak cabuai cu a bungbelpawl hmuahhmuah thawn Jehovah inn pumpi cu kan thianfai ṭheh. 19 Cuihtlunah Siangpahrang Ahaz a lal laiih rinum loih a căngvaih tikih a hnawn mi bungbelpawl zaten kan timlam thluh ih kan serhhran; cule ngai hnik, cupawl cu Jehovah-ih biakṭheng hmaiah an um,” tiah an ti.

Temple ih Biaknak Dĭnṭhaṭsalnak

20 Cun Siangpahrang Hezekiah cu zing ten a tho, khawpi uktupawl a kokhawm ih Jehovah inn ah a hung so. 21 ^aCule caw pa pasarih, tuu cang pasarih, tuu fa no pasarih le me pa pasarih pawl cu lalram le hmun thianghlim le Judah-mipawl hrangih sual thilhlăn dingah an hruai. Cun Aaron-ih fapa puithiampawl cu Jehovah-ih biakṭheng parih hlan dingah thu a pe hai. 22 ^bCule caw pa pawl an that ih puithiampawl in a thisen an la, cule Biakṭheng parah an theh. Cuvek thothoin, tuu cang pawl khal an that ih, a thisen cu Biakṭheng parah an theh. Tuu fa no pawl khal an that ih a thisen cu Biakṭheng parah an theh. 23 ^cCun siangpahrang le mipungkhawm hmaiah Sual Thilhlăn hrangah me pa pawl cu an suah ih, cupawl parah an kut an suang. 24 ^dCule Israel miphun zate hrangih sualkhuhthawinak tuah dingah puithiampawl in cupawl cu an that ih an thisen cu Biakṭheng parah sual thilhlăn ah an pe; ziangahtile Israel-mi zate hrangah Meiur Thilhlănpawl le Sual Thilhlăn tuah dingin siangpahrang in thu a rak pe.

29:21^a Pui 4:13-14; Ezr 6:17

29:22^b Pui 4:18; 8:15; Mip 18:17; Heb 9:21-22

29:23^c Pui 1:4; 4:15; 16:5

29:24^d Suah 29:36; Pui 4:26; Ezr 8:35; Rom 5:10

25 ^aCule anih in David le siangpahrangih hmutu Gad le profet Nathan pawlih thupek bangtukin Jehovah inn ah sumselpawl, hri nei tum mipawl, ṭingṭangpawl thawn Levi-mipawl cu a umter hai. Himi cu profetpawl hmangin Jehovah-ih thupek a si. 26 ^bLevi-mipawl cu David ih tuah mi tum mi thilpawl thawn le puithiampawl cu tawtawrawtpawl thawn an ding. 27 ^cCun Hezekiah in Biakṭheng parih Meiur Thilhlănpawl hlan dingin thu a pe hai. Cule Meiur Thilhlăn thawh a si tikah, Jehovah-ih hla khal thawh a si ve, tawtawrawtpawl le Israel siangpahrang David ih tuah mi tum mi thilpawl thawn. 28 Cule mipungkhawm zaten Pathian an bia, hlasaktupawl in hla an sak ih, tawtawrawt phawtupawl in awn ko an phaw; Meiur Thilhlănpawl ṭheh a si hlanlo cupawl hmuahhmuah cu peh vivo a si. 29 Meiur Thilhlăn an ṭheh tikah, siangpahrang le a hnenih um mi zaten an khuk an bil ih Pathian an bia. 30 Cuihtlunah siangpahrang Hezekiah le hotupawl in Levi-mipawl cu David le hmutu Asaf-ih ṭawngkampawl thawn Jehovah hnenah thangṭhatnak hlasak dingin thu an rak pe. Lungawi zetin thangṭhatnak hla an sak ih khukbilin Pathian an bia.

29:25^a 1Sam 22:5; 1San 25:6

29:26^b 1San 15:16, 24

29:27^c 1Sam 16:16

31 ^aCun Hezekiah in a let ih, “Atu-ah Jehovah hnenah nan serhhranaw zo. Rak naih uhla, thawinakpawl le lungawi thu sim thilhlănpawl cu Jehovah inn ah rak keng uh,” tiah a ti. Cule mipungkhawmpawl cun thawinakpawl le lungawi thu sim thilhlănpawl an run keng ih, duhnak thinlung neitu zaten Meiur Thilhlănpawl an run keng. 32 ^bCule mipungkhawmpawlih Meiur Thilhlăn an run ken zat cu caw pa 70, tuu cang 100 le tuu fa no 200 an si; cupawl hmuahhmuah cu Jehovah hnenah Meiur Thilhlăn hrangih an run ken mi a si. 33 Cule serhhran mi thilpawl cu caw pa 600 le tuu 3000 an si. 34 ^cAsinan puithiam an mal tuk ruangah Meiur Thilhlăn zaten an vun an lip cawk lo; curuangah an unau Levi-mipawl in hna a cem hlan sung le a dang puithiampawl anmah te an serhhranawk hlanlo an bawm, ziangahtile puithiampawl hnakin Levi-mipawl cu mah te serhhranawknak ah an fekfelsawn. 35 ^dMeiur Thilhlăn tampi thawn Remnak Thilhlănpawlih thau le Meiur Thilhlăn kip hrang Inding Thilhlănpawl khal an um.

29:31^a Suah 25:2; Heb 13:15-16

29:32^b Pui 1:1-17

29:34^c Eze 44:11

29:35^d Sem 4:4; 35:14; Suah 29:13; Pui 7:11-21

Cubangtuk cun Jehovah inn ih rawngbawl hna cu an dĭnṭhasal. 36 Cun Pathian in mipi a timlam ruangah Hezekiah le mipi zaten lungawi aipuangin an um: ziangahtile cuih thil cu rin lo piih tuah a si.

30

Lanta Puai Hman a Si

1 ^aCule Hezekiah in Israel-ih Pathian Jehovah hnenah Lanta Puai hmang dingin Jerusalem ih Jehovah inn ih ra dingin Israel-mi zate le Judah-mi zate hnenah mi a thlah ih Efraim le Manasseh hnen khalah ca a kuat. 2 ^bSiangpahrang le a hotupawl le Jerusalem ih mipungkhawm zaten Lanta Puai cu a thla hnihnak ih hmang dingin an lung a kim. 3 ^cZiangahtile a serhhranaw mi puithiam mipum daih tawk an um lo ih, Jerusalem ah mipi an pungkhawm lo ruangah, a cān kel ah Lanta Puai an hmang thei lo. 4 Cule cuih thuhla cu siangpahrang le mipungkhawm zate in ṭha an ti. 5 ^dCuti cun Israel miphun zate hrawhsuakin Jerusalem ah Israel-ih Pathian Jehovah hnenah Lanta Puai hmang dingin an ra pei, tiah Beersheba ihsin Dan tiang tlangau dingin thutluknak an tuah, ziangahtile cumi cu mipi tampi thawn ngan cia mi vekih hman a rak si ṭheu lo.

30:1^a Sem 41:52; Suah 12:3-20; Mip 28:16; 1San 9:1

30:2^b Suah 12:6; Mip 9:10

30:3^c Mip 9:6-13

30:5^d Lai 20:1

6 Cun thuphurtupawl cu siangpahrang le hotupawlih ca kengin, Israel ram le Judah ram hmuahhmuah ah an feh ih, siangpahrang thupek vekin, “Israel tefapawl, Abraham, Isak le Israel ih Pathian Jehovah hnenah kir uh; cun nannih Assiria siangpahrangpawl kut ihsi tlânsuak mi a tāngsŭnpawl hnen lamah anih khal a kirsal ding. 7 ^aCule an pupápawlih Pathian Jehovah parih rinum loih thil an ti ruangih lau-umza ih a tuah hai mi nan hmuh bangtukin nan pupápawl le nan unaupawl vek cu si hlah uh. 8 ^bAtu-ah nan pupápawl vekin lungruh hlah uh, cuhnakin Jehovah hnenah tlulut sawn uhla, kumkhua hrangih a serhhran mi a hmun thianghlim ah lut uh, cule Jehovah nan Pathian cu rian uh, cuti cun a thinlingnak nasa zet cu nan hnen ihsin a pialhlo ding. 9 ^cZiangahtile Jehovah hnenih nan ra kir asile, nan unaupawl le nan fātepawl cu ralkaih ih hruaitupawlih lainatnak an co ding ih, cutin hi ram ah an ra kirsal ding; ziangahtile Jehovah nan Pathian cu zangfahnak le lainatnak ih khat a si ih, a hnenih nan kirsal asile, a lo hawisan lo ding,” tiah a sim.

30:7^a Dnp 28:25; 1San 5:25; Sam 78:8, 57; Jer 11:10; Eze 20:18

30:8^b Suah 32:9; Mip 25:4

30:9^c Suah 3:21; 22:27; Dnp 4:31; 30:2-5; 1Sp 8:50; Isa 1:16; Jer 25:5; Eze 33:11; Mik 7:18

10 Thuphurtupawl cu khaw khat hnu khaw khat Efraim le Manasseh ram an hrawhsuak ih Zebulun tiang an thleng, asinan an rak hnihsan ih an nautat men. 11 Sikhalsehla Asher hnám, Manasseh hnám le Zebulun hnámpawl ihsin mi hrekkhat phahniamawin Jerusalem ah an ra. 12 ^aCuihtlunah siangpahrang le hotupawlih thupek an thlunnak dingah, thinlung hmunkhat pe dingin Pathian kut cu Judah parah a um. Cuih thupek cu Jehovah-ih kamsuakthu ihsi ra a si.

30:12^a Jer 32:39; Eze 11:19

13 ^aCule thla hnihnak ah Thilnu telh lo Sang Puai hmang dingin mipi tam zet Jerusalem ah an pungkhawm ih mipungkhawm cu a nasa ngaingai. 14 ^bAn tho ih Jerusalem ih a um mi biakṭhengpawl an la, cule rimhmui urnak biakṭhengpawl a zaten an la ih Kidron Hawrkuam ah an hlăwn. 15 Cule Lanta Puai hrang tuu fa no pawl cu thla hnihnak ni hleilitnak ah an that. Puithiampawl le Levi-mipawl cu an ning a zak ih an serhhranaw, cule Jehovah inn ah Meiur Thilhlănpawl an keng. 16 Pathian mi Mosi Dān bangtukin anmai hmun cio ah an phunglam vekin an ding. Puithiampawl in Levi-mipawl hnen ihsi an ngah mi thisen cu an theh. 17 ^cZiangahtile mipungkhawm lakah a serhhranaw lo mi tampi an rak um; curuangah mithiang lo kip hrangih Jehovah hrang serhhran dingin Levi-mipawl in Lanta Puai tuu fa no pawl thah ding ṭuanvo an nei. 18–19 ^dEfraim hnám le Manasseh hnám, Issakar hnám le Zebulun hnám ihsin mi tampi cu an thianfaiaw lo, cuti cingin ngan mi kalh zawngin Lanta Puai cu an ei. Asinan Hezekiah in an hrangah thla a cam, “Pathian, a pupápawlih Pathian Jehovah hawl dingin a thinlung timlamtu kip cu hmun thianghlim thianfai vekin thiang lo khal sehla, Jehovah ṭha cun sualkhuhthawinak pe seh,” tiah a ti. 20 ^eCule Jehovah in Hezekiah cu a ngaithla ih mipi a damter.

30:13^a Mip 28:16; Joh 11:55

30:14^b 2Sam 15:23

30:17^c Ezr 6:20

30:18-19^d Suah 12:43-51; Mip 9:6-10; Job 42:8

30:20^e Mal 4:2; Jam 5:16

21 ^aCule Jerusalem ih um Israel tefapawl cun ni sarih sung Thilnu telh lo Sang Puai lungawi zetin an hmang; cun Levi-mipawl le puithiampawl cu awn ring zet tum mi thilpawl thawn ni tin Jehovah hnenah hlasakin, Jehovah an thangṭhat. 22 Cule Hezekiah in Jehovah rawngbawl hna thiam zet tu Levi-mipawl zate hnenah ^bthapeknak thu a sim hai, cule an pupápawlih Pathian Jehovah hnenah sual phuangin Remnak Thawinakpawl hlanin khiah mi ni sarih sung an ei. 23 Cun mipungkhawm zate in a dang ni sarih puai tuah leh an lung a kim, cule lungawi zetin a dang ni sarih puai an tuah leh sal. 24 ^cZiangahtile Judah siangpahrang Hezekiah in mipungkhawm hnenah caw pa 1000, tuu 7000 a pe ih, hotupawl in mipungkhawm hnenah caw pa 1000 le tuu 10000 an pe. Cule puithiam tam zet an serhhranaw.

30:21^a Suah 12:15, 17

30:22^b thapeknak: A ṭawng hrampi ah, “thinlung ah,” ti a si.

30:24^c 1Sp 8:5; Ezr 6:17

25 Judah mipungkhawm hmuahhmuah cu puithiampawl le Levi-mipawl le Israel ram ihsi ra mipungkhawm hmuahhmuah, Israel ram ihsin ra mikhualpawl le Judah ram ih cêngpawl cu lungawi aipuangin an um. 26 Jerusalem ah aipuannak nasa zet a um, ziangahtile David-ih fapa Israel siangpahrang Solomon san ihsin Jerusalem ah hivek a um dah kel lo. 27 ^aCule puithiampawl le Levi-mipawl an tho ih mipi thlawsuah an pe, an aw cu theihsak a si ih an thlacam cu a cēnnak thianghlim van a thleng.

30:27^a Suah 39:43

31

Milem an Siatbăl

1 ^aCun himi hmuahhmuah ṭhehfel a si tikah, a um mi Israel miphun zaten Judah khawpipawl ah an feh ih, ṭhuamserhpawl an khiak, Asherah-pawl an hautlu, cule hmun sâng pawl le biakṭhengpawl cu Judah ram le Benjamin ram hmuahhmuah ihsin, Efraim ram le Manasseh ram ihsin an siatbăl ih, a zate ih an siatbăl thluh tiangin an tuah. Cun Israel tefapawl zaten mi kip anmai neih mi le anmai khua cio ah an tlung.

31:1^a 2Sp 18:4; Isa 36:7

Mipi Ṭhen Hra Ṭhen Khat

2 ^aCule Hezekiah in a bur a bur in puithiampawl le Levi-mipawl cu a ruat hai, puithiampawl le Levi-mipawl cu mi kip mai rawngbawl hna fingfing vekin: Meiur Thilhlănpawl, Remnak Thilhlănpawl, Jehovah cēnnak kăwtpawl ih rawngbawl, lungawi thu sim le thangṭhatnak hlasak a si. 3 ^bJehovah Dān ih ngan vekin zing lam le zan lamih Meiur Thilhlănpawl hrang le Sabbath-pawl le Thla Thar pawl le khiah mi puaipawl hrang Meiur Thilhlănpawl hrangah siangpahrangih covo a neih mi sung ihsin Meiur Thilhlănpawl a ruat fawn. 4 ^cCuihtlunah Jehovah Dān ih an pumpekawk thei nak dingah puithiampawl le Levi-mipawl covo pe dingin Jerusalem ih um mipi cu thu a pe hai.

31:2^a 1San 15:2; 23:28-32; 24:1; Sam 7:17

31:3^b Mip 28:1-29; 1San 29:3; Eze 45:17

31:4^c Mip 18:8; Dnp 18:8; Neh 13:10

5 ^aThupek cu a darh veten, Israel tefapawl in thlairawl, sabit zu, hriak thar le khuai tizu le ló ihsi suak hmuahhmuah ih rah hmaisabik pawl cu a tawrin an run keng ih ṭhen hra ṭhen khat zaten a tawrin an run keng. 6 ^bCule Judah khawpipawl ih cêng, Israel le Judah-ih tefapawl in ṭhen hra ṭhen khat caw le tuu pawl an run keng; Jehovah an Pathian hnenih serhhran mi thil thianghlim ihsin ṭhen hra ṭhen khat khal an keng ih an peng. 7 ^cThla thumnak ah penkhawm an thawk ih, thla sarihnak ah an ṭheh.

31:5^a Suah 23:19; 34:26; Mip 18:12, 24; Dnp 12:17; Neh 13:12; Eze 44:30

31:6^b Pui 27:30; Rut 3:7; Neh 13:10-12

31:7^c Suah 23:16; Pui 23:16-24

8 ^aCule Hezekiah le hotupawl an ra ih penkhawmpawl cu an hmu, cule Jehovah le a mi Israel an thangṭhat. 9 Cun Hezekiah in penkhawmpawl thuhla ah puithiampawl le Levi-mipawl thu a sut. 10 ^bCule Zadok sungza a si mi, puithiam lu bik Azariah in a sawn ih, “Mipi in Jehovah inn ih thawhhlawm run ken an thawh tir ihsin ei khawp kan hmu ih, tam zet a hlei, ziangahtile Jehovah in a mipawl thlawsuah a pe; cule hi tluk tam hi a hlei lai hrih a si,” tiah a ti.

31:8^a 2Sam 6:18; Sam 144:13-15

31:10^b Suah 36:5; 2Sam 8:17; Eze 44:30; Mal 3:10-12; Fil 4:18

11 Cule Hezekiah in Jehovah inn ah pindanpawl tla simsial dingin thu a pe, cule cupawl cu an simsial. 12 Cun annih in rinum zetin thawhhlawm siseh, ṭhen hra ṭhen khat le serhhran mi thilpawl cu an run keng; Levi-mi Konaniah cu cumi ṭuanvo hotu a si ih, a nau Shimei cu a sangtu a si. 13 Jehiel, Azaziah, Nahath, Asahel, Jerimoth, Jozabad, Eliel, Ismakhiah, Mahath le Benaiah cu Konaniah le a nau Shimei thuneihnak hnuaiih hohatu an si. Cupawl cu siangpahrang Hezekiah le Pathian inn uktu Azariah ih ruat mi an si. 14 Cun Levi-mi Imnah-ih fapa Kore, nisuahnak lam kăwt kiltu, Pathian hnenih palungsuak thawhhlawmpawl tlunih ṭuanvo neitu cun Jehovah-ih thilhlănpawl le thil thianghlimbik pawl zem ding ṭuanvo a nei. 15 ^aCule amai hnuaiah puithiampawl umnak khuapawl ah amah bawmtu mirinum Eden, Miniamin, Jeshua, Shemaiah, Amariah le Shekaniah tla an um; cupawl cun an unaupawl cu a bur a bur in a tûm a sen in an covo ding an zem. 16 ^bCuihtlunah cithlah sâwng ngankhumnak ih tel, mipa kum thum le a tlun lam pawl khal, Jehovah inn ih an ni tin hna le an ṭuanvo ruangih anmai bur cio vekih luttupawl hnenah an zem.

31:15^a Jos 21:9-19

31:16^b 1San 23:3

17 Cule an pupápawlih sungza zulhin cithlah sâwng ngankhumnak ih tel puithiampawl hnen le Levi-mi kum 20 kim le a tlun lam hnenah anmai bur cio hnenah an ṭuanvo vekin an zem. 18 Cule cithlah sâwng ngankhumnak ih tel an fanau tete, an nupipawl, an fapapawl le fanupawl zaten pungkhawm pumpi hnenah an zem, ziangahtile rinum zetin thianhlimnak ah anmah te an serhhranaw a si. 19 ^aCuihtlunah puithiam a si mi Aaron-ih fapapawl cu an khawpipawlih ran tlannak lóram, asilole khaw kip ih umpawl hnenah an zem. Puithiampawl lakih mipa hmuahhmuah le Levi-mipawl lakih mipa hmuahhmuah hnenah cithlah sâwng ngankhumnak ih tel pauhpauh covo zem dingih hmin ih ruat hleice mipa an um.

31:19^a Mip 35:2-5

20 ^aCuti vekin Hezekiah in Judah ram pumpi a tuah ih, Jehovah a Pathian hmaiah ṭha le dik le rinum zetin a tuah. 21 ^bCule Pathian inn ih rawngbawl hna, Dān le thupek thu ih hnaṭuan kip a thawhnak ah Pathian a hawl ṭheu. Cumi cu a thinlung hmuahhmuah in a tuah ih a hmuingil a si.

31:20^a 2Sp 20:3

31:21^b Dnp 29:9; 2Sp 18:6

32

Sennakerib in Jerusalem a Do

1 ^aHimi thil ti rinumpawl hnuah, Assiria siangpahrang Sennakerib a ra ih Judah ram ah a lut, cule kulh nei khawpipawl dokalhin ṭanhmun a khuar, bauh tahratih amai hrangih an hnenih lut dingin a ruat. 2 ^bCule Hezekiah in Sennakerib a ra ti a thei, Jerusalem do a tum ti khal a thei.

32:1^a Isa 36:1

32:2^b 2Sp 18:13; Isa 36:1; Jer 1:15

3 Cule khawpi lengih tihna silh dingin a hotupawl le a ralbawipipawl a ráwn, cule annih in amah cu an bawm. 4 ^aCuti cun tihna zate le ram sungih luang tiva te silhtu mi tampi an pungkhawm ih, “Assiria siangpahrangpawl an rat tikah, tidai tampi hmu hlah hai seh,” tiah an ti.

32:4^a 2Sp 18:17; Isa 22:9, 11; Nah 3:14

5 ^aCule Hezekiah cu thazang a la ih a băl mi kulh zaten a dĭnṭhasal, dawlsângpawl a dĭn ih, lengah kulh dang a dâwl. David-ih Khawpi ah Millo a dinṭha ih, hriamhrei le ralphaw tampi a tuah. 6 Cun mipi tlunah ralbawipawl a ret ih, khawpi kăwt mual ah a hnenah a kokhawm hai, cule an hnenah thapeknak thu, 7 ^b“Cak zetin um uhla ralṭha uh, Assiria siangpahrang hmai le a hnenih um mipi hmuahhmuah hmaiah ṭihin um hlah uhla, thlaphângin um fawn hlah uh. A lamih ṭangtu hnakin kan lamih ṭangtu an tamsawn. 8 ^cA lamih ṭang cu taksa bân a si, asinan kan lamih ṭang cu in bawmtu ding le kan doawknak in dosaktu ding cu Jehovah kan Pathian a si,” tiin a sim. Cule mipi cu Judah siangpahrang Hezekiah-ih ṭawngkam cun an tha a tlungter.

32:5^a 1San 11:8; Isa 22:8, 10

32:7^b Mip 14:9; Dnp 31:6; 2Sp 6:16

32:8^c Dnp 3:22; 1Sam 17:45; 1San 5:22; Job 40:9; Sam 20:7; Isa 28:6; 52:10; Jer 17:5

9 ^aHimi hnuah Assiria siangpahrang Sennakerib le a hnenih um ralkappawl zate in Lakish an kulh laiah, Judah siangpahrang Hezekiah le Jerusalem ih um Judah-mi zate hnen Jerusalem ah a siahhlawhpawl a thlah ih an hnenah, 10 ^b“Assiria siangpahrang Sennakerib cun hitin a sim: ‘Ziang simaw nan rinsan ih, kulhkhŭm mi Jerusalem khaw sungih nan um lai thotho? 11 ^cHezekiah in, “Jehovah kan Pathian in Assiria siangpahrang kut ihsin in runsuak ding,” tiin laiṭam le tihâlih thi men dingin a lo hruai sual a si lo maw? 12 Cuih Hezekiah thotho in Jehovah-ih hmun sâng pawl le a biakṭhengpawl a lahlo zo ih Judah le Jerusalem hnenah, “Biakṭheng pakhat hmaiah nan be ding ih, a parah rimhmui nan ur pei,” tiah thu a pe a si lo maw? 13 Ram dang miphunpawl parah kei le pupápawl in ziang kan tuah ti nan thei lo maw? Cuih ram miphunpawlih pathianpawl in ka kut ihsin ziangti ti talin an rampawl an runsuak thei maw? 14 Cuih miphunpawlih pathianpawl zate lakah zo in so ka kut ihsin a mipawl runsuak thei? Ka pupápawl in cuih miphunpawl cu an hloter verver. Curuangah ziangtin so nan Pathian cun ka kut ihsin a lo runsuak thei cuang ding? 15 ^dCuruangah atu-ah, Hezekiah in lo bum hlah sehla, hi vekin lo hruai sual hlah seh, cule amah zum hlah uh, ziangahtile ziang miphun le ziang lalram pathian khal in ka kut le ka pupápawlih kut ihsin an mipawl an runsuak lo. Ziangtin saw nan Pathian sinsin cun ka kut ihsin a lo runsuah thei ding,’ a ti,” tiin an sim.

32:9^a Jos 10:3, 31; Mik 1:13

32:10^b 2Sp 18:19; Isa 36:4; Eze 29:16

32:11^c 2Sp 18:27; Isa 36:12, 18; 37:10

32:15^d Suah 5:2; Isa 37:10; Dan 3:15

16 Cule a siahhlawhpawl in Jehovah Pathian dokalhin le a siahhlawh Hezekiah dokalhin an ṭawngbêt. 17 ^aAnih khal in Israel-ih Pathian Jehovah zăwkzetin le amah dokalhin a ṭawng ih, “Ram dang miphunpawlih pathianpawl in ka kut ihsin an mipawl an runsuak thei lo vekin, Hezekiah-ih Pathian khal in ka kut ihsin a mipawl a runsuak thei ve lo ding,” tiin ca a kuat leuhleuh.

32:17^a 2Sp 9:14; 19:12; Sam 74:22; Isa 37:4, 14, 17

18 Cun khua cu an lâk thei nak dingah lungphângter ding le buaiter dingin, Jerusalem kulh parih um mipawl hnenah Hebru ṭawng in aw ring zetin an auh. 19 ^aCule milai kut ih tuah mi leitlun miphun pathianpawl dokalh vekin, Jerusalem Pathian dokalhin an ṭawng.

32:19^a Sam 115:4; Isa 2:8; Jer 1:16

20 ^aCumi ruangah Siangpahrang Hezekiah le Amoz-ih fapa profet Isaiah cu thla an cam ih van lamah an ausuak. 21 ^bCun Jehovah in vancungmi a thlah ih, cuih vancungmi cun Assiria siangpahrang ṭanhmun khuarnak ih micak ralṭha hmuahhmuah, hohatupawl le ralbawipawl a hloralter. Cule anih cu amai ram ah ningzak mithmai thawn a tlung. Cule a pathian temple sungih a luh tikah, amai rilrahpawl lakih mi hrekkhat in cu tawkah amah cu ralnâm in an sattlu.

32:20^a Isa 1:15

32:21^b Sem 19:13; 2Sp 19:35-37; Isa 37:36-38; Jer 41:2; Dan 6:22

22 Cuti vek cun Jehovah in Hezekiah le Jerusalem luahtupawl cu Assiria siangpahrang Sennakerib kut ihsin le mi dang hmuahhmuah kut ihsin a runsuak hai ih ziangtinkimah a kaihruai hai. 23 ^aCule mi tampi in Jehovah hnenah Jerusalem ah thilpek an run keng ih, Judah siangpahrang Hezekiah hnenah laksawng mankhung zetzet an run keng. Cutin anih cu cuih cān thawkin miphun zate mithmuh ah khaisan a si.

32:23^a 1Sam 10:27; Sam 68:18, 29; Isa 16:1; Zef 3:10; Zek 14:16-17

Hezekiah-ih Hngalnak

24 Cu laiah Hezekiah cu a na ih a thi zikte, cule Jehovah hnenah thla a cam, cule a hnenah a sim ih hminsinnak a pe. 25 ^aAsinan Hezekiah cun a hnenih duhsaknak lăngter a si vekin a rak let lo, ziangahtile a thinlung a hngal. Curuangah thinlingnak cu a par le Judah par le Jerusalem parah a thleng. 26 ^bCun Hezekiah cu a thinglung hngalnak ihsin a phahniamaw, amah le Jerusalem luahtupawl thawn, cutin Jehovah-ih thinlingnak cu an parah Hezekiah san ah a thleng lo.

32:25^a 2Sp 14:10

32:26^b Isa 39:8; Jer 26:18-19

27 ^aHezekiah in lennak le upatnak nasa zet a ngah. Cule amai hrangah, ngun, sui, lung mankhung pawl, rimhmuipawl, ralphawpawl le thil mankhung phunphun khawlnak inn a sak. 28 Thlairawl, sabit zu thar, hriak thar khawlnak inn a sak ih, ṭilva phun zakip hrangah inn le rante rual hrangah hruangkulh a tuah. 29 ^bCuihtlunah amah hrangah khawpipawl a dĭn ih, rante rual le ranpi rual a tawrin a nei; ziangahtile Pathian in amah cu neihnunnak nasa zet a pe.

32:27^a 1San 29:12

32:29^b Isa 39:2

30 ^aHi Hezekiah thotho hin Gihon Tlunta tihna suahnak a phit ih, David-ih Khawpi nitlaknak lamah tikáwng in a luanter. A hna tinkim ah Hezekiah cu a hmuingil.

32:30^a 2Sam 5:8; 1Sp 1:33; 2Sp 18:17; 20:20

31 ^aCutin a ram ih mangbangza zingzawi dingin a hnenah Babilon uktupawl ih an thlah mi palaipawl thuhla ah cun, a thinlung ih um mi zaten a theih thei nak dingah amah hniksak dingin Pathian in amah lawng a tān ta.

32:31^a Sem 22:1; Dnp 8:16; Isa 13:1; 38:7

Hezekiah Uknak Cemnak

32 Hezekiah-ih cangvaihnak dang pawl le a ṭhatnak cu, ngai hnik, Amoz-ih fapa profet Isaiah-ih larnak ah le Judah le Israel siangpahrangpawl cazual sungih ngan an si. 33 Cule Hezekiah cu a pupápawl hnenah a itthat ih, David-ih fapapawlih thlān tlunta ah an phum; cule a thih tikah Judah-mi zate le Jerusalem luahtupawl in amah upatnak an tuah. Cun a fapa Manasseh cu a aiah a lal.

33

Siangpahrang Manasseh

1 ^aManasseh cu siangpahrang a hung si tikah kum hleihnih mi a si ih, Jerusalem ah kum 55 sung a lal. 2 ^bAsinan anih cun Jehovah in Israel tefapawl hmaiih a rak hlăwnsuak zo mi miphunpawlih thil fihnungza pawl zulhin, Jehovah-ih mithmuh ah thil ṭha lo a tuah. 3 ^cCule anih cun a pa Hezekiah ih rak siatbăl mi hmun sâng pawl a dĭnsal; Baalpawl hrangah biakṭhengpawl a dâwl ih Asherahpawl a tuah; cule van ih thilmak rual zaten a bia ih a rian. 4 Anih in, “Jerusalem ah kumkhuain ka hmin a um ding tiih,” Jehovah ih a tinak Jehovah inn ah biakṭhengpawl khal a dâwl. 5 Cule Jehovah inn tualrawn pahnih ah van ih thilmak rual zate hrangah biakṭhengpawl a dâwl. 6 ^dCuihtlunah Hinnom Fapaih Phaikuam ah a fapapawl meisa a paltlăngter hai; aizoh thiamnak a hmang, thilcam thiamnak le dawi thiamnak a hmang ih, thlaraukawh thiam pawl le polpawl a ráwn. A thinhengnak căwktho dingah Jehovah hmaiah thil ṭha lo tam tuk a tuah.

33:1^a 2Sp 21:1-18; 1San 3:13

33:2^b Dnp 18:9; Jer 15:4

33:3^c Dnp 16:21-22; 17:3

33:6^d Suah 22:18; Pui 18:21; 19:31; Dnp 18:10; 1Sam 28:13

7–8 ^aPathian in David le a fapa Solomon hnenah, “Israel hnám zate lak ihsin ka hril mi hi inn ah le Jerusalem ah kumkhuain ka hmin ka ret ding. Cule dān pumpi le sakhaw dānpawl le zīn le dān pawl Mosi-ih kut hmangih anmah thu ka rak pek hai mipawl hmuahhmuah bangtukih tuah dingin an fimkhur asile, nan pupápawl hrangih ka ruat zo mi ram ihsin Israel ke cu ka ṭhawnsal nawn lo ding,” a rak tinak Pathian inn ah cun a tuah mi milem, khercawp milim a ret. 9 ^bCun Manasseh in Judah le Jerusalem luahtupawl cu Israel tefapawl hmaiih Jehovah in a rak siatsuah mi miphunpawl hnakih thil ṭha lo tamsin tuah dingin a hruai sual hai.

33:7-8^a 2Sam 7:10; 2San 7:17-22

33:9^b 2Sp 21:16; Jer 15:4; Eze 5:7

Manasseh a Sual a Sir

10 Cule Jehovah in Manasseh le a mipi hnenah thu a sim hai, asinan an ngaithla lo. 11 ^aCuruangah Jehovah in an parah Assiria siangpahrang ralkap bawipawl a thlah ih, Manasseh cu sio an thlaih, dar cikcin in an khit ih Babilon ah an hruai. 12 Cun amah cu zăwnzaihter a si tikah, Jehovah a Pathian a ngen ih, a pupápawlih Pathian hmaiah nasa zetin a phahniamaw, 13 cule a hnenah thla a cam; a ngĕn mi cu a cohlansak ih a dilnak cu a theihsak, cule amah cu Jerusalem ah lal dingin hruaikirsal a si. Cun Manasseh in Jehovah cu Pathian a si ti a thei.

33:11^a Dnp 28:36; 2Sp 19:28; Sam 149:8; Isa 5:26-30; 37:29; Eze 29:4; Amo 4:2

14 ^aCumi hnuah anih in David-ih Khawpi lengah Gihon nitlaknak lam, hawrkuam ah, Nga Kăwtka luhnak tiangin, kulh a dĭn; cule cumi cun Ofel a kulh ih sâng zetin a tuah. Cun kulh nei Judah khawpipawl hmuahhmuah ah ralkap bawipawl a ret. 15 ^bRam dang pathianpawl le milem cu Jehovah inn ihsin le Jehovah inn tlang par le Jerusalem ih a dawl mi biakṭhengpawl zaten a lahlo ih cupawl cu khaw lengah a hlăwn. 16 ^cJehovah-ih biakṭheng a rĕm, cumi parah remnak thilhlănpawl le lungawinak thilhlănpawl a thawi, cule Israel-ih Pathian Jehovah rian dingin Judah cu thu a pe. 17 Cuti si khal sehla mipi cun hmun sâng pawl ah rai an thawi lai hrih thotho, asinan Jehovah an Pathian hnen lawngah an thawi a si.

33:14^a 1Sp 1:33; Neh 3:3, 26; Zef 1:10

33:15^b 2Sp 23:12

33:16^c Pui 7:18

Manasseh Uknak Cemnak

18 Manasseh-ih cangvaihnak dang, a Pathian hnenih a thlacamnak le Israel-ih Pathian Jehovah hmin ih a hnenih ṭawngtu hmutupawlih kamsuakthu cu, ngai hnik, Israel siangpahrangpawlih cazual ah ngan an si. 19 ^aA thlacamnak, Pathian in a ngĕnnak a cohlanzia, a phahniamawk hlanih a sualnak le rinum loih a thil ti mi hmuahhmuah, hmun sâng a dĭnnak, Asherah-pawl le khercawp milimpawl a dĭnnak hmunpawl cu, ngai hnik, Hozai ih ngan mi thuhla lakah ngan an si. 20 ^bCutin Manasseh cu a pupápawl hnenah a itthat ih, amai inn roriah an phum. Cun a fapa Amon cu a aiah a lal.

33:19^a 2Sp 21:17

33:20^b 2Sp 21:18

Siangpahrang Amon

21 ^aAmon cu siangpahrang a hung si tikah kum 22 a si ih, Jerusalem ah kum hnih sung a lal. 22 Asinan anih cun a pa Manasseh in a rak tuah vekin, Jehovah-ih mithmuh ah thil ṭha lo a tuah, a pa Manasseh in a rak tuah mi khercawp milimpawl zate hnenah Amon cun thawinak a tuah ih a rian hai. 23 ^bCule a pa Manasseh a phahniamawk vekin, Jehovah hmaiah a phahniamaw lo; cuhnakin Amon cun a mawhsualnak a karhter deuhdeuh. 24 Cun amai siahhlawhpawl in amah an phiarthup ih, amai inn roriah amah cu an that. 25 Asinan cuih ram mipi in siangpahrang Amon phiarthuptu zaten an that ṭheh. Cun cuih ram mipi in a fapa Josiah cu a aiah siangpahrang ah an tuah.

33:21^a 1San 3:14

33:23^b Suah 10:3; Sam 18:27; Thf 3:34

34

Siangpahrang Josiah

1 ^aJosiah cu siangpahrang a hung si tikah kum riat mi a si ih, Jerusalem ah kum 31 sung a lal. 2 Cule anih cun Jehovah-ih mithmuh ah a dik mi a tuah ih, a pa David-ih lamzinpawl zaten a zawh; vawrh lamah simaw, keh lamah simaw a pial lo.

34:1^a 2Sp 22:1; 1San 3:14; Zef 1:1

Josiah in Pathian Thlun a Thawk

3 ^aA lal kum riatnak mino a si laiah a pupá David-ih Pathian hawl a thawk; cule kum hleihnihnak ah hmun sâng pawl, Asherah-pawl, khercawp milimpawl le burcawp milimpawl lakah Judah le Jerusalem thianfai a thawk. 4 ^bA hmaika ah Baalpawlih biakṭhengpawl an ṭhiatbăl ih cupawl tlunih rimhmui biakṭhengpawl a hautlu; cule Asherah-pawl, khercawp milimpawl le burcawp milimpawl cu a sawprăwpter ih, dip ko a tuah, cule cupawl hnenih thawiawtupawlih thlān parah a thehdarh hai. 5 ^cCule puithiam ruhpawl cu an biakṭhengpawl parah a ur ih, Judah le Jerusalem a thianfai. 6 Cule Manasseh le Efraim le Simeon khuapawl ah le Naftali le a kiangkapih a bălsiat mi hmuahhmuah tiangin a thianfai ṭheh. 7 ^dIsrael ram pumpi ih biakṭhengpawl le Asherah-pawl a ṭhiatbăl, khercawp milimpawl dip ko a tuah ih rimhmui biakṭhengpawl zaten a hautlu ṭheh, cule Jerusalem ah a tlung.

34:3^a 1San 16:11

34:4^b Suah 32:20; 34:13; Pui 26:30; 2San 33:3; Mik 1:5

34:5^c 1Sp 13:2; 2Sp 23:16, 20

34:7^d Suah 32:20

Josiah in Temple a Rĕm

8 A lal kum hleiriatnak ah, ram le temple a thianfai tikah Azaliah-ih fapa Shafan, khawpi uktu Maaseiah le Joahaz-ih fapa ngankhumtu Joah cu Jehovah a Pathian inn rĕm dingin a thlah hai. 9 ^aCun puithiam lu bik Hilkiah hnen an thlen tikah, Pathian inn ih rak ken mi tangka, sângkapawl kiltu Levi-mipawl in Manasseh hnám le Efraim hnám, a tāngsŭn Israel miphun zate, Judah hnám le Benjamin hnám zate le Jerusalem luahtupawl hnen ihsi an khawnkhawm mi cu a hnenah an hlan. 10 Cun cumi cu Jehovah inn vilvengtu hnaṭuantupawl kut ah an pe; cule inn rĕm le tuahṭhasal dingin cumi cu Jehovah inn ih hnaṭuantupawl hnenah an pe. 11 Annih in zungthiampawl le inn saktupawl hnenah ser mi lung, pehawknak hrang thing le Judah siangpahrangpawl in an rak siatbăl mi innpawlih luang tuahnak ding leinak hrangah an pe.

34:9^a 1San 6:13

12 ^aMipapawl cun hna cu rinumten an ṭuan. Hoha dingih anmah vilvengtupawl cu: Merari fapapawl lak ihsin Levi-mi Jahath le Obadiah, Kohath-mipawlih fapapawl lak ihsin Zekariah le Meshullam pawl an si. Levi-mi mi dang, awnmawitum thiam pawl hmuahhmuah cu, 13 ^bphur thiartupawl tlun le rawngbawl hna phun zakip a ṭuantupawl hohatu an si. Levi-mi mi hrekkhat cu cangantu, hotu le kăwtka kiltu an si.

34:12^a 2Sp 12:15; 1San 23:5; 25:1

34:13^b 1San 23:4

Hilkiah in Dān Cazual a Sar

14 Jehovah inn ih an kenluh mi tangka an rak ken tikah, Mosi hmangih pek mi Mosi Dān Cazual cu puithiam Hilkiah in a sar. 15 ^aCun Hilkiah in a sawn ih, cangantu Shafan hnenah, “Jehovah inn ah Dān Cazual ka sar,” tiah a ti. Cule Hilkiah in Shafan hnenah cuih cazual cu a pe. 16 Cun Shafan in cuih cazual cu siangpahrang hnenah a keng ih, “Na siahhlawhpawl hnenih fial mi hmuahhmuah cu an tuah rero ko. 17 Cule Jehovah inn ih an hmuh mi tangka khal an lakhawm ih, cumi cu vilvengtupawl le hnaṭuantupawl kut ah an pe,” tiin siangpahrang hnenah thu a thlĕnsal. 18 Cun cangantu Shafan in siangpahrang hnenah, “Puithiam Hilkiah in cazual i pe,” tiah a sim. Cule Shafan in cucu siangpahrang hmaika ah a siar.

34:15^a Dnp 31:24-26; 2Sp 22:8; Ezr 7:6; Neh 8:1

19 ^aCule hitin a si, Dān thupawl siangpahrang in a theih tikah, a hnipuan a thlek. 20 ^bCun siangpahrang in Hilkiah, Shafan-ih fapa Ahikam, Mikah-ih fapa Abdon, cangantu Shafan le siangpahrang siahhlawh Asaiah pawl cu, 21 ^c“Feh uh, sar mi cazual sung thupawl thawn pehparin keimai hrangah le Israel le Judah miphun lakih a tāng mipawl hrangah Jehovah sut uh; ziangahtile kan pupápawl in hi cazual sungih ngan mi hmuahhmuah bangtukih nung dingin Jehovah-ih kamsuakthu an thlun lo ruangah kan parih burh mi Jehovah-ih thinlingnak cu a nasa tuk,” tiin thu a pe hai.

34:19^a Dnp 28:3-68; Isa 36:22

34:20^b 2Sp 22:3, 12

34:21^c Ṭah 2:4; Eze 36:18

22 ^aCutin siangpahrang ih a thlah mipawl le Hilkiah cu Hasrah-ih fapa Tikvah, cumi fapa Shallum nupi-ih hnipuan kiltu nunau profet Huldah hnenah an feh. Cu nu cu Jerusalem khua ih Veng Thar ah a um. Cule a hnenah cuih thuhla cu an sim.

34:22^a Suah 15:20; Lai 4:4; Neh 6:14

23 Cun cu nu cun an hnenah, “Israel-ih Pathian Jehovah in hitin a ti, ‘Ka hnenih lo thlahtu pa hnenah, 24 ^a“Jehovah in hitin a ti: zoh hnik, Judah siangpahrang hmaika ih an rak siar mi cazual sungih ngan mi camsiatnak hmuahhmuah vanduainak cu hi hmun le a luahtupawl parah ka thlengter ding, 25 ^bziangruangahtile annih cun anmai kut ih tuah mi hmuahhmuah thawn ka thinlingnak căwktho dingah, keimah in tlansan ih pathian dang pawl hnenah rimhmui an ur. Curuangah hi hmun ah ka thinlingnak burh a si ding ih, a mit lo ding,” tiin sim uh,’ tiah a ti.

34:24^a Dnp 28:15-68; Thf 16:4; Isa 3:9; Jer 40:2

34:25^b Jer 22:9

26 “Asinan Jehovah sut dingih lo thlahtu Judah siangpahrang hrangah, a hnenah hitin nan sim pei, ‘Israel-ih Pathian Jehovah in hitin a ti: na rak theih mi ṭawngkampawl thawn pehparin, 27 ^ahi hmun dokalh le a luahtupawl dokalhih a kamsuakthupawl na hna ih na theih tikah, na thinlung a nem ih Pathian hmaiah na phahniamaw, cule ka hmaiah na phahniamaw, na hnipuan na thlek ih ka hmaiah na ṭap, curuangah kei khal in ka lo ngaithla ve a si, tiin Jehovah in a ti. 28 Zoh hnik, na pupápawl hnenah ka lo fĭn ding ih, na thlān ah hnangamten fĭn na si ding; cule hi hmun le a luahtupawl parih ka thlenter ding mi vanduainak zaten na mit in a hmu lo ding,’ tiin,” a ti. Cun annih in siangpahrang hnenah thu cu an phurkir.

34:27^a Suah 10:3

Josiah-ih Thukham

29 Cun siangpahrang in mi a thlah ih Judah ram le Jerusalem upapawl zaten an kokhawm. 30 ^aSiangpahrang cu Judah ram ih mipa zate le Jerusalem luahtupawl, puithiampawl, Levi-mipawl, mipi zate a tûm a te pawl thawn Jehovah inn ah a hung so. Cule anih in Jehovah inn sungih hmuhsuah mi Thukham Cazual sungih kamsuakthupawl zaten an hnatheih ah a siar.

34:30^a 2Sp 23:2

31 ^aCun siangpahrang cu amai hmun ah a dīng ih Jehovah thlun dingin, a thupekpawl le a thutheihter mipawl le a sakhaw dānpawl tla a thinlung zate le a nunnak zaten thlun dingin le hi cazual sungih ngan mi thukham thupawl cu tuahsuak dingin Jehovah hmaiah thukham a tuah. 32 Cule Jerusalem ih umpawl le Benjamin hnám zaten cumi vekin a umter hai. Cun Jerusalem luahtupawl cun an pupápawlih Pathian, Pathian thukham bangtukin an tuah. 33 ^bCule Josiah in Israel tefapawl ta a si mi ram hmuahhmuah ihsin thil fihnungza hmuahhmuah cu a hlăwnhlo thluh, cule Israel ram ih um hmuahhmuah cu Jehovah an Pathian rian dingin a tuah hai. Cutin annih cu amah a nun sung hmuahhmuah Jehovah, an pupápawlih Pathian thlunnak ihsin an pial lo.

34:31^a Dnp 13:4; 1Sp 7:15; 2Sp 11:17

34:33^b Dnp 18:9

35

Josiah in Lanta Puai a Hmang

1 ^aCule Josiah in Jehovah hnenah Lanta Puai cu Jerusalem ah a hmang ih, thla hmaisabik ni hleilitnak ah Lanta tuu fa no pawl an that.

35:1^a Suah 12:1-30; Mip 28:16

2 Cule puithiampawl cu anmai ṭuanvo cio ah a ruat hai ih, Jehovah inn rawngbawl hna hrangah tha a pe hai. 3 Cun Israel miphun zate zirhtu, Jehovah hrangih serhhran mi Levi-mipawl hnenah, “David-ih fapa Israel siangpahrang Solomon ih sak mi inn sungah Kuang thianghlim cu ret uh. Cumi cu nan liang in nan phur nawn lo ding. Atu-ah Jehovah nan Pathian le a mi Israel rian uh. 4 ^aIsrael siangpahrang David ih ngan mi zulhin le a fapa Solomon ih ngan mi zulhin, nan pupápawlih sungza bangtuk ciar in, nanmai bur vek cio in timlamaw uh. 5 Cule nan unau mi senpipawlih pupá sungza bur ṭhen zulhin le Levi-mipawlih pupá sungza bur ṭhen zulhin hmun thianghlim ah dīng uh. 6 ^bMosi-ih kut hmangih a pek mi Jehovah-ih kamsuakthu vekih an tuah thei nak dingah, Lanta tuu fa no pawl that uh, serhhranaw uhla nan unaupawl hrangah timlam uh,” tiah a ti.

35:4^a 1San 24:1; Ezr 6:18

35:6^b Pui 11:44

7 Cun Josiah in a um mi mi senpi zate hnenah rante rual lak ihsin tuu fa no pawl le me no pawl tla a pe. Cupawl cu Lanta thilhlăn hrangah an si, a zaten rante rual 30000 le ranpi 3000 an si. Hibangpawl cu siangpahrangih neih mi lak ihsin an si. 8 ^aCule a hotupawl khal in mipi hnen, puithiampawl hnen, Levi-mipawl hnenah palungsuakin an pe. Pathian inn uktu Hilkiah le Zekariah le Jehiel khal in puithiampawl hnenah Lanta thilhlăn dingah rante rual lak ihsin 2600 le ranpi 300 an pe. 9 Levi-mi hotu Konaniah le a unaupa Shemaiah le Nethanel, Hashabiah, Jeiel, Jozabad pawl in Levi-mipawl hnenah Lanta thilhlăn dingah rante rual lak ihsin 5000 le ranpi 500 an pe.

35:8^a 1San 6:13; 29:21

10 Cutin rawngbawl hna cu timlam a si ih, siangpahrangih thupek bangtukin puithiampawl cu anmai hmun ah le Levi-mipawl cu anmai bur cio ah an ding. 11 Cule Lanta tuu fa no pawl cu an that, cule Levi-mipawl in an ṭilva vun an hawh laiah, puithiampawl in an kut in thisen cu an theh. 12 Cun Mosi Cazual sungih ngan vekin Jehovah hnenih hlan dingah mi senpi pupápawlih sungza bur ṭhen zulhin pe dingah Meiur Thilhlănpawl cu an rethran. Cule caw pa pawl khal cutin an tuah. 13 ^aCutin Lanta tuu fa no pawl cu zīn le dān bangtukin meisa ah an em; asinan a dang serhhran mi thilhlănpawl cu bel, belpi le bel dau pawl sungah an suang ih, mipi zate hnenah zamrang zetin an keng.

35:13^a Suah 12:2-11

14 ^aCuih hnuah anmai hrang le puithiampawl hrangah vo an timtuah, ziangruangahtile Aaron tefa puithiampawl cu Meiur Thilhlănpawl le a thaupawl cu zan tiang an hlan; curuangah Levi-mipawl in anmai hrangah le Aaron tefa puithiampawl hrangah vo an timtuah. 15 ^bCule Asaf-ih fapa hlasatupawl cu David, Asaf, Heman le siangpahrangih hmutu Jeduthun pawl ih thupek bangtukin anmai hmun ah an um. Kăwtka kiltupawl khal kăwtka kip ah an um ih an hna an suahsan dah lo, ziangruangahtile an unau Levi-mipawl in an hrangah vo an timtuah.

35:14^a Suah 29:13

35:15^b 1San 25:1; Neh 12:46; Sam 68:25

16 Cun Siangpahrang Josiah thupek vekih Lanta Puai hmang ding le Jehovah-ih biakṭheng parih Meiur Thilhlăn hlan dingin Jehovah-ih rawngbawl hna hmuahhmuah cu cuih ni ah timlam a si. 17 Cule cu tawkih um, Israel tefapawl in cuih cān ah Lanta Puai an hmang ih, Thilnu telh lo Sang Puai khal ni sarih sung an hmang. 18 Profet Samuel san ihsi thawkin Israel ram ah Lanta Puai hiti vekih hman a um dah lo; cule puithiampawl, Levi-mipawl, cu tawkih um Judah-mi le Israel-mi zate le Jerusalem luahtupawl thawn Josiah ih Lanta Puai a hman vekin Israel siangpahrangpawl zohman in an hmang lo. 19 Josiah a lal kum hleiriatnak ah hi Lanta Puai hi hman a si.

Josiah Thihnak

20 ^aHipawl hmuahhmuah hnuah, Josiah in temple a timtuah tikah, Izip siangpahrang Neko cu Zufraṭis kiang Karkemish khua do dingin a ra suak; cule amah do dingin Josiah a păwksuak. 21 ^bAsinan Neko in a hnenah palaipawl a thlah ih, “Judah siangpahrang, nang le kei hi ziang pehtlaihawknak so kan neih? Tuihsun ah nangmah do dingin ka ra lo, cuhnakin ka do mi sungza do dingin ka ra sawn a si; ziangahtile Pathian in hmanhmawh dingin thu i pe. Pathian in a lo tisiatlonak dingah, i umpitu Pathian do hi bāng aw,” tiah a ti. 22 ^cCuti si khal sehla Josiah cu a hnen ihsin a kir lo, cuhnakin amah a do thei nak dingah a danglamawter ih, Pathian kâ ihsi suak Neko-ih ṭawngkampawl cu a ngaithla lo. Cutin Megiddo phaikuam ah ral do dingin a feh.

35:20^a Sem 2:14; 2Sp 23:29; Isa 10:9; Jer 46:2

35:21^b 1Sp 13:18; 2Sp 18:25

35:22^c 1Sam 28:8; Zek 12:11

23 ^aCun thálsai thiam pawl in siangpahrang Josiah an saingah, cule siangpahrang in a siahhlawhpawl hnenah, “I thiarhlo uh, ziangahtile bese zetin hriamhma ka pu a si,” tiah a ti. 24 Curuangah a siahhlawhpawl in amah cu cuih rang lêng par ihta an lasuak ih, amai neih mi rang lêng pahnihnak ah an ret, cule Jerusalem ah an tlunpi. Cutin anih cu a thi, cule a pupápawlih thlān ah phum a si. Cule Judah-mi zate le Jerusalem in Josiah cu an sûn.

35:23^a 1Sp 22:34

25 ^aJeremiah khal in Josiah cu ṭah hla a seh ve. Cule mipa hlasapawl le nunau hlasapawl hmuahhmuah in tuihni tiangin an ṭah hlapawl ah Josiah an sâl. Cucu Israel ram ih nunphung pakhat ah an tuah; cule ngai hnik, cupawl cu Ṭah hlapawl ah ngan an si.

35:25^a Sem 50:10; Jer 22:10, 15-16

26 Josiah-ih cangvaihnak dang le Jehovah Dān sungih ngan mi bangtukih a thil ti ṭhat mi le, 27 a thil ti mipawl a hmaisabik ihsin a netabik tiang, ngai hnik, Israel le Judah siangpahrangpawlih cazual sungih ngan an si.

36

Siangpahrang Jehoahaz

1 Cun ram mipi in Josiah-ih fapa Jehoahaz cu an hruai ih, a pa aiah Jerusalem ah siangpahrang ah an tuah. 2 Jehoahaz cu siangpahrang a hung si tikah, kum 23 mi a si ih, Jerusalem ah thla thum sung a lal.

3 Izip siangpahrang in amah cu Jerusalem ah a lalnak ihsin a thlak ih, a ram parah ngun talent 100 le sui talent khat a tuk. 4 ^aCun Izip siangpahrang in a unaupa Eliakim cu Judah le Jerusalem tlunih siangpahrang ah a tuah ih a hmin cu Jehoiakim, tiin a thlĕngsak. Cule Neko in a unaupa Jehoahaz cu a hruai ih Izip ah a tlunpi.

36:4^a Jer 22:10-12; Eze 19:4

Jehoiakim

5 ^aJehoiakim cu siangpahrang a hung si tikah, kum 25 mi a si ih, Jerusalem ah kum hleikhat sung a lal. Cule Jehovah a Pathian mithmuh ah thil ṭha lo a tuah. 6 ^bBabilon siangpahrang Nebukhadnezzar cu amah do dingin a hung so ih, Babilon ih hruai dingin Jehoiakim cu dar cikcin in a khit. 7 ^cBabilon siangpahrang Nebukhadnezzar in Jehovah inn ihsin bungbelpawl Babilon ah a keng, cule Babilon ih amai temple ah a ret hai.

36:5^a 2Sp 23:36; Jer 22:18; 26:21

36:6^b Jer 25:9; Eze 19:9; 29:18; Dan 1:1

36:7^c Ezr 1:7; Jer 27:6; Dan 1:2

8 Cun a tāng lai mi Jehoiakim-ih căngvaihnakpawl, a tuah mi thil fihnungza pawl le amah dokalhnak hmuhsuah mi thilpawl cu, ngai hnik, Israel le Judah siangpahrangpawlih cazual sungih ngan an si. Cun a fapa Jehoiakin cu a aiah a lal.

Jehoiakin

9 ^aJehoiakin cu siangpahrang a si tikah ^bkum riat mi a si ih, Jerusalem ah thla thum le ni hra sung a lal. Cule Jehovah mithmuh ah thil ṭha lo a tuah. 10 ^cdKum thawhtirah siangpahrang Nebukhadnezzar in mi a thlah ih Jehovah inn ihta thil mankhung pawl thawn amah cu Babilon ah a hruai, cule amai sungkhat pakhat Zedekiah cu Judah le Jerusalem tlunih siangpahrang ah a tuah.

36:9^a 2Sp 24:8-9; Jer 22:24-28

36:9^b kum riat: Hebru Bible hrekkhat le 2Sp 24:8 ah kum hleiriat tin a um.

36:10^c 2Sp 20:17; Ezr 1:7; Isa 52:11; Jer 14:18; Eze 17:12; Dan 5:2

36:10^d Kum thawhtirah: 2Sam 11:1 zoh aw.

Zedekiah

11 ^aZedekiah cu siangpahrang a si tikah kum 21 mi a si ih, Jerusalem ah kum hleikhat sung a lal. 12 ^bAnih cun Jehovah a Pathian mithmuh ah thil ṭha lo a tuah ih, Jehovah aiawhih thusimtu profet Jeremiah hmaika ah a phahniamaw lo. 13 ^cCule Pathian hmin ih thukamnak rak sesămtertu Siangpahrang Nebukhadnezzar lak khalah a hél, asinan a lung a ruhter ih Israel-ih Pathian Jehovah hnenih kir dingah a thinlung a hakter.

36:11^a 2Sp 24:17; Jer 27:1

36:12^b Dnp 8:3; Jer 37:3-9; 44:10

36:13^c Suah 32:9; Dnp 9:27; 2Sp 24:20; Jer 52:2; Eze 17:13

14 ^aCuihtlunah puithiampawl hotu hmuahhmuah le mipi khal in miphunpawlih thil fihnungza hmuahhmuah vekin rinum lo zetin an cangvai sinsin, cule Jerusalem ih serhhran mi Jehovah inn cu an bawrhbangter.

36:14^a 1San 5:25

15 ^aCule an pupápawlih Pathian Jehovah in a mipi par le a cēnnak hmun parih lainatnak a neih ruangah an hnenah a palaipawl hmangin thu a cah leuhleuh hai. 16 ^bAsinan annih cun Pathian palaipawl cu an nautat, a kamsuakthupawl ziang an siar lo ih, a profetpawl an hnihsan. A mipawl parih Jehovah-ih thinlingnak a thawh hlanlo le tidamnak um nawn lo tiangin cutin an tuah.

36:15^a Jer 7:13, 25

36:16^b 2San 30:10; Ezr 5:12; Thf 1:25; Jer 5:13

17 ^aCuruangah anih in an tlunah Kaldia-mipawlih siangpahrang ral a tlunter ih, anih in an tlangvalpawl cu an hmun thianghlim ah ralnâm in a that hai, cule tlangval le fala him par, tar le miṭawnṭai par khalah lainatnak a nei lo; a kut ah an zaten a pe ṭheh. 18 ^bCule Pathian inn ihta bungbel hmuahhmuah, a tûm a te ti loin, Jehovah inn ih hlawnthilpawl siseh, siangpahrangih hlawnthilpawl siseh, a hotupawlih hlawnthilpawl hmuahhmuah siseh, Babilon ah a thiar thluh. 19 ^cCun Pathian inn cu an ur, Jerusalem kulh an bălsiat thluh, inn ropi pawl zaten meisa in an ur ih, a neih mi thil mankhung pawl zaten an siatbăl ṭheh. 20 ^dCule ralnâm ihsi luatpawl hmuahhmuah cu Babilon ah a hruaihlo hai, cupawl cu Persia lalram uknak a thlen hlanlo a hrang le a fapapawl hrangah siahhlawh ah an cang.

36:17^a 2Sp 25:1-7; Eze 9:6

36:18^b Jer 27:19-22

36:19^c 2Sp 25:9; Sam 79:1-3; Jer 52:13; Ṭah 2:6

36:20^d 2Sp 24:14; Ezr 2:1; Neh 7:6; Jer 27:7

21 ^aJeremiah hmangih sim mi Jehovah-ih kamsuakthu thlengkimin ram in Sabbath a hman thei nak dingah kum 70 sung ram cu a răm ih a cawl a si.

36:21^a Pui 25:4; Jer 1:1; 29:10; Dan 9:2; Zek 1:12

Sál Tān Cemnak

22 ^aPersia siangpahrang Sairas a lal kum khatnak ah Jeremiah kâ hmangih Jehovah-ih kamsuakthu a thlenkim thei nak dingah, Jehovah in Persia siangpahrang Sairas-ih thinlung a căwktho, cutin a lalram hmuahhmuah ah thawngthannak a tuah ih ca sungah,

36:22^a Isa 44:28; Dan 1:21

23 ^a“Persia siangpahrang Sairas in a ti: leilung lalrampawl hmuahhmuah hi van Pathian Jehovah in i pe ṭheh zo. Cule Judah ram Jerusalem ah inn amah saksak dingin thu i rak pe. Nan lakih a mi a si mi zokhal hung so seh! Jehovah a Pathian in umpi hram seh, a ti,” tiin a ngan.

36:23^a Lai 4:10; Ezr 1:2-3; Dan 2:37