About Bible Thianghlim | ©

BibleThianghlim – Tita

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Tita

123

• A ngantu: Paul
• A siartu: Tita
• Ngan kum: A.D. 65

Zentel-mi Tita hi Paul-ih rawngbawlnak ruangih zumtu ih cang mi a si men thei (1:4). Anih cu Anṭiok le Jerusalem ah Paul thawn an thlunaw dah (Gal 2:1-3). Anih hi Paul in Galatia ramṭhen pálin a vei khatnak missionary khual a tlawn laiah a tel ding ti zum a si. Paul ih missionary khualtlawn a vei thumnak khalah a tel ih, Korinth khua ih thubuai tifel dingah Paul ih a hril mi a si (Korinth cakuat pahnihnnak thuhmaihruai siar aw). Tita-ih hmin hi Korinth cakuat pahnihnak sungah vei tampi a lang (2Ko 2:13; 7:6, 13-15; 8:6, 16, 23; 12:18). Cumi in amah hi nun dik nei mi le rawngbawlnak ah rin tlak a si ti a langter. Cuvek minung a si ruangah Khirit kawhhran pitlingter dingah Paul in a hril hi mangbang ding a um lo (Tit 1:5).

Mediṭerenian Tifinriat ih Khirit tikulh kaupi hi Rom in a rak uk mi a si. Hi tikulhmipawl hi nuncan lam le tlanlendān lamah an hmin a rak sia (1:12), asinan thuthangṭha cun an nun a thlĕng. Khirit mipawl in Pentikos ni ah Peter ih thusim mi an ngainak ihsin an hnenah thuthangṭha a rak thleng thawk a si men thei (Apo 2:11). Hi tikulh hi Paul in thawngtla dinhmun in Rom khawpi a pan tikah a pál phah (Apo 27:7-13). Rom ralkappawl in Paul an thlah hnuah (1 Timothy thuhmaihruai siar aw), Tita thawn Khirit ah a tlawngsal. Cumi ṭumah reideuh a cambâng. Khirit a suahsan tikah cu tawkih rawngbawlnak hlensuak dingin Tita a ruat (1:5). Paul in Efesa le Masidonia a tlawn hnuah Tita hnenah, a hrangih lamhmuhtu ah, cakuat a ngan. Cuih kum cu A.D. 65 hrawng a si.

Tita cakuat hin thurin dik thawn milawin hna ṭha kan ṭuan ih, nundān dikin kan nun le kan tlanlēn thei nak dingah, Khrih in in rundam thu in zirh. Sikhalsehla cumi dawnkhamtu thil pathum Paul in a buaipi, cupawl cu zirhnak dik lo, Pathian ngaihsaklonak le leitlun câkhiarnak tla an si. Dawnkhamtu a pakhatnak cu bung khatnak ah a buaipi ih, a tling mi elder-pawl nĕmhngeh a pawimawhzia a sim. Bung 2-3 ah dawnkhamtu dang pahnih thu a buaipi ih, kawhhran sungih zumtupawl cu an kum izirih kăwmdan ding le pehtlaihdān ding pawl a rel.

Pathian zangfahnak in rundamnak ah in hruai ih, sual nehdān le hnaṭuan ṭha hrangih ṭhahnemngaidān ding thupawl in zirh (2:11-14).

1

Cibaibûknak

1 ^aPathian hril mipawlih zumnak le Pathian ngaihsak zawngih thutak theihnak famkim zulhih Pathian-ih sál le Jesu Khrih-ih apostol Paul in, 2 ^bthuphan per thei lo Pathian in leilung sēm hlanin sankhuk nunnak ruahsannak a rak tiam. 3 ^cAsinan in rundamtu Pathian thupek bangtukin ka hnenih ap mi cu, thusimnak thawngin a kamsuakthu cu a tikcu teah a langter. 4 ^dZumnak hmunkhat ih ka fapa taktak Tita hnenah:

1:1^a Rom 1:1; 1Ko 1:1; 1Ti 2:4

1:2^b Mip 23:19; 2Ti 1:9; Heb 6:18

1:3^c Luk 1:47; 2Ko 1:1; 1Ti 2:6

1:4^d Rom 1:7; 2Ko 2:13; 1Ti 1:2

Pa Pathian le in Rundamtu Bawipa Jesu Khrih hnen ihsin zangfahnak, zahngainak le hnangamdaihnak um hram seh.

Elder Tlinnak

5 ^aKhirit tikulh ih ka lo tān ta nak săn cu thu ka lo pek vekin, thil tifel thluh lo mipawl tifel dingin le khaw tin ah elder-pawl ruat dingin a si. 6 ^bElder si dingah mi pakhat cu sawihnăwm kai lo, nupi pakhat nei, a fātepawl zumtu si mi, pawisaklonak nun ah simaw, luhlulnak thu ah simaw sawisel ding um lo a si ding a si. 7 ^cZiangahtile bishop cu Pathian thilri kilkhawitu a si vekin, sawihnăwm kai lo a si tengteng ding a si. Mai thu duh, thinheng áwl, sabit zu pham, mihrohrang, paisa duham mi a si lo ding a si. 8 ^dCuhnakin mikhual duhtu, thil ṭha duhtu, sūpaw thei, midingfel, mithianghlim, mah le mah thununaw thei mi a si sawn ding a si. 9 ^eZirh a rak si zo bangin rin tlak kamsuakthu kai hnget tu a si ding a si, cutin zirhnak ziktluak hmangin tha mi a pe thei ding ih, dokalhtupawl a êl thei hai ding.

1:5^a Apo 27:7

1:6^b 1Th 3:13; 1Ti 3:2

1:7^c 1Ko 4:1; 1Ti 3:1

1:8^d 2Ti 3:3

1:9^e 1Ti 1:10, 19; 2Ti 1:13

Elder Ṭuanvo

10 ^aZiangahtile thunun harsa pawl, thulolak men ṭawngtupawl le mi bumhmangpawl tampi an um, a hleicein cupawl cu serh zim tan pawl lak ihsin an si. 11 ^bCupawlih kâ cu huhsak tengteng ding a si, dik lo zetih hlawk duh ruangah zirh lo ding mi thilpawl an zirh ih, sungkurûn in mi an siatsuah. 12 ^cAnmai lakih mi pakhat, anmai profet rori hmanin, “Khirit tikulhmipawl cu thuphan per, sahrang sual, mizê rawl pham an si,” tiah a ti. 13 ^dHi theihternak cu a dik a si. Curuangah zumnak lamah an ziktluak thei nak dingah, Khirit tikulhmipawl cu na zetin kawk hai aw. 14 ^eJew-pawlih phuahcawp thuanthupawl le thutak dungtuntu minungpawlih thupekpawl cu ngaihsak hlah. 15 ^fMithiangpawl hrangah cun thil ziangkim hi an thiang. Asinan mibawrhbang le zumlotupawl hrangah cun a thiang mi zianghman a um lo. An lungthin le an sia le ṭha theihnak khal a bawrhhlawh ṭheh. 16 ^gPathian kan thei tiah an phuang nân, an hnaṭuannak in amah an phatsan. Annih cu Pathian huat mi tuahtu, thulung lo le hna ṭha ṭuannak tinkimih santlailo an si.

1:10^a Apo 10:45; 1Ti 1:6

1:11^b 1Ti 5:13

1:12^c Apo 2:11; 17:28

1:13^d 1Ti 5:20

1:14^e Kol 2:22; 1Ti 1:4; 2Ti 4:4

1:15^f Kol 2:20-22; 1Ti 6:5

1:16^g Jer 5:2; 1Joh 2:4

2

Kawhhran dik Tlinnak

1 ^aSikhalsehla nang cun zirhnak ziktluak thawi milaw mi thupawl sim aw: 2 ^bcutin kum upa mipapawl cu sūpawin, mizahum, thununaw thei mi, zumnak le duhdawtnak le tuarfainak ah ziktluak dingin zirh hai aw.

2:1^a 1Ti 1:10

2:2^b 1Ti 3:2

3 ^aCuti vek thothoin, kum upa nunaupawl khal mi relsiathmang lo, sabit zu pham lo, thil ṭha zirhtu si sawnin, an nundān cu zahum zetih um dingin thape aw. 4 ^bCutin annih in nupinu no lai deuh pawl cu sūpaw thei dingin, an pasal duhdaw dingin, an fāte duhdaw dingin, 5 ^cthinlung fel zet pu dingin, thianghlim dingin, innsang kilkhawitu si dingin, ṭha zetih um dingin, an pasal thu ngai dingin nun an zirh thei ding. Cutin Pathian kamsuakthu cu thangsiatin a um lo ding.

2:3^a 1Ti 3:8, 11

2:4^b 1Ti 5:2

2:5^c Efe 5:22; 1Ti 6:1; Heb 4:12

6 ^aCuti vek thothoin, tlangvalpawl cu sūpaw dingin fawrh hai aw. 7 ^bThil ziangkimah thil ṭha tuahnak in zohṭhim ding mi ah tuahaw aw; zirhnak ah na takzia, na zahumzia, na dikzia, 8 ^cthiam lo coter theih lo na thusim ziktluak pawl langter aw. Cuti cun a lo dodaltu in na thuhla ah thil ṭha lo zianghman sim ding a neih lo ruangah a ning a zak ding.

2:6^a 1Ti 5:1

2:7^b 1Ti 4:12

2:8^c 1Pe 2:12

9 ^aSálpawl cu an bawipawlih ṭawng sawnkir loin, an thu lung sawn dingin le thil ziangkimah an lungawiter dingin fawrh hai aw. 10 ^bIn Rundamtu Pathian thuhla zirhnak cu thil ziangkimah duhum zetih an lăngter thei nak dingah, an bawipawlih thil rûksak loin rinumnak ṭha hmuahhmuah langter sawn dingin fawrh hai aw.

2:9^a Efe 6:5

2:10^b Mat 5:16; Luk 1:47

11 ^aZiangahtile rundamnak thlentu Pathian zangfahnak cu mi hmuahhmuah hnenah a rung lang zo. 12 ^bCuih Pathian zangfahnak cun Pathian ngaihsaklonak le khawvel câkhiarnak pawl tlansanin tulai san ah sūpaw le dingfel zet le Pathian ngaihsakih nung ding kan si ti in zirh. 13 ^cLungawiumza ruahsannak kan hngah laiah hin cuti vekih nung ding kan si, cuih ruahsannak cu Pathian ropi, in Rundamtu Jesu Khrih-ih rung lăngnak sunglawi zet cu a si. 14 ^dAnih cun dān pahbălnak hmuahhmuah sung ihsin in tlen thei nak dingah le amah hnenih thenfai mi, amai mihleice, hnaṭuan ṭha hrangih ṭhahnemngai mi kan si thei nak dingah kan hrangah amah le amah a peaw.

2:11^a Rom 3:24; 1Ti 2:4; 2Ti 1:10

2:12^b 2Ti 3:12

2:13^c 1Ko 1:7; 1Ti 6:4; 2Pe 1:1

2:14^d Mat 5:16; 20:28; 2Ko 8:21; Efe 2:10; Heb 1:3; 1Pe 2:12, 15; 1Joh 1:7

15 Hi thilpawl cu thuneihnak hmuahhmuah thawn sim aw, fawrh awla, kawk aw. Zohman in lo nautat hlah hai seh.

3

Thil Ṭha Ti

1 ^aUktupawl le thuneitupawl hnenah tlulut dingin, an thu ngai dingin, thil ṭha tinkim tuah dingih tiar cia dingin zumtupawl cu theihtersal hai aw. 2 ^bZo hnen hmanah ṭawng sia ṭawng lo le mi elbuaihmang si loin, zaidam le mi hmuahhmuah hnenah nunnemnak langter sawn dingin anmah cu theihtersal hai aw.

3:1^a Rom 13:1; 2Ti 2:21; 1Pe 2:13-14

3:2^b Efe 4:31

3 ^aZiangahtile kanmah rori khal hi hlanah atnak ah, thulunlonak ah, bumnak ah, câkhiarnak a phunphun le năwmnak a phunphun rianin, mi dang parah lungput siava le iksiknak, huatthlala le pakhat le pakhat huaawtăwnin kan rak um dah. 4 ^bAsinan in Rundamtu Pathian-ih ngilneihnak le duhdawtnak cu minung hnenah a rung lang zo. 5 ^cDingfelnak hnaṭuan kan rak ṭuan mi ruangah si loin, a zahngainak zulh sawnin hrinsalnak hmangih khawlhfainak le Thlarau Thianghlim hmangih titharsalnak cun in rundam a si. 6 ^dCuih Thlarau Thianghlim cu in Rundamtu Jesu Khrih hmangin nasa zetin kan parah Pathian in a run burh. 7 ^eCuti cun kan ruahsan mi sankhuk nunnak zulhin ro cotu ih tuah kan si thei nak dingah, a zangfahnak in thiamcoter kan si. 8 ^fPathian rak zum zo tupawl cu hnaṭuan ṭha ṭuan vivo dingin ralring hai seh, ti thu hi milai hrangah a ṭha ih a hlawk a si. Hih ṭawngkam hi rinsan tlak a si. Hi thilpawl hi nasa zetin phuang awla ka duh.

3:3^a Efe 2:2

3:4^b Luk 1:47; Efe 2:7

3:5^c Rom 12:2; Efe 2:9; 1Pe 1:3

3:6^d Rom 5:5

3:7^e Mat 25:46; Rom 3:24; 8:17, 24

3:8^f 1Ti 1:15

9 ^aSikhalsehla atthlak thusuhnakpawl, cithlah sâwngawknak zâwtsalnak, tawhawknakpawl le Dān thu ih elawknakpawl cu hrial aw; ziangahtile cupawl cu hlawknak um lo le ṭhathnemnak nei lo an si. 10 ^bṬhenṭhêkawknak tuah ṭheu tu cu vei khat nunsim aw, a vei hnihnak nunsim leh awla, cuih hnu cun hnáwng aw. 11 Cuti vek minung cu amah le amah thiam lo coawterin a rak fehpêng ih, thil sual a tuah a si ti nan thei.

3:9^a 2Ti 2:14, 16

3:10^b Rom 16:17

Thucah le Cibaibûknak

12 ^aArṭemas asilole Ṭaikikas kha na hnenih ka rak thlah tikah, Nikopolis khua ah ka hnenah rat hramhram tum aw, ziangahtile thlatang sung cu tawkih um ka tum. 13 ^bDānthiam Zenas le Apollos in an khualtlawn vivo nak ah zianghman an tlaksamlonak dingah, ṭhahnemngai zetin rak bawm hai aw. 14 Cule kanmai mipawl khal in rah nei loih an umlonak dingah, ṭulpawinak ih hman dingah hnaṭuan ṭha ṭuan vivo zir hai seh.

3:12^a Apo 20:4; 2Ti 4:9, 21

3:13^b Apo 18:24

15 ^aKa hnenih um zate in cibai an lo bûk. Zumnak ih in duhdawtupawl kha cibai in rak bûksak aw.

3:15^a Kol 4:18; 1Ti 1:2

Nan zate hnenah zangfahnak um hram seh. Amen.