About Bible Thianghlim | ©

BibleThianghlim – Haggai

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Haggai

12

• A ngantu: Haggai
• A siartu: Persia-mipawlih uk laiih Jew-pawl
• A huap sung cān: B.C. 519

Bible sungah profet Haggai le profet Zekariah an lăng hmaisabiknak cu Ezra cabu hi a si. Babilon le Persia ih Jew-pawl sál an tān hnuah, Jerusalem temple thar saksalnak ah ṭan an la. Persia Siangpahrang Sairas in Jew-pawl temple saksal dingin Jerusalem ih kir ding siannak a pe. Cule B.C. 536 ah a lungphum an ṭhehfel. Asinan Sairas a thih hnu tawkfang ah (B.C. 529 hrawngah), Jew-pawlih ralpawl in Persia Siangpahrang dang hnenah ca an ngan ih, Jerusalem ih temple saktupawl cun amah do an tum tiah an puh. Cumi hlanih Jerusalem khawpi uktu siangpahrangpawl in miphun dang siangpahrangpawl parih helhmang an sinak thupawl a hliakhlaifel hnuah, Jew-pawlih ralpawl ih an puhnak cu a dik men thei tiah a zum. Cule Jew-pawlih temple sak cu hramhramih cawlter dingin thu a pe.

Sairas in hi hlan kum tampi ah temple saksal dingin thu a rak pe ko nân (Ezr 1:1-4), Jew-pawl cun siangpahrang netaih thupek cu an cohlang. Jew-pawl in “Jehovah inn sak ding cān” a thleng hrih lo tiah an pawm (Hag 1:2). Asinan Haggai le Zekariah in an hnenih thu an sim hnuah, mipi cu cuih hna hrangah an thinlung an thartersal ih an ṭuansal. Cuih ṭumah cun siangpahrang thar hnenah Sairas ih thu a rak suah mi cu an sim (Ezr 5:13-16; 6:1-5). Zerubbabel cu temple saktupawl hruaitu ṭuanvo neitu a si ruangah Haggai in a hnenah a thucah cu a sim (1:1; zohbêt aw 1:12, 14; 2:2, 4, 21, 23).

Profet Haggai in a thuphuan cu B.C 519 laifang hrawngin a thawk ih, cumi cu thla thum hnuah ṭhehfel a si. A thuken laimu cu: Jehovah-ih lalram hna ah amai duh zawngin um uhla, a thutiam thukham malsawmpawl tla nan co ding ti a si.

Pathian in a khawkhan a hlensuak ding ih, a khawkhan mi thupibik ih rettupawl cu thlawsuah a pe ding.

1

Pathian-ih Inn Sak dingih Thupek

1 ^aSiangpahrang Darias a lal kum hnihnak, a thla ruknak, ni hmaisabikah Jehozadak-ih fapa puithiam lu bik Joshua le Judah ram uktu Shealtiel-ih fapa Zerubbabel hnenah profet Haggai hmangin Jehovah-ih kamsuakthu a thleng: 2 ^b“Ralkap rualpawlih Jehovah ih sim mi cu hihi a si: hi minungpawl in, ‘A cān a thleng hrih lo, Jehovah inn sak ding cān cu,’ an ti,” tiah a ti.

1:1^a Ezr 2:2; 3:2; 4:24; 5:1-3; 6:14; Neh 7:6-7; Zek 6:11

1:2^b Ezr 1:2

3 ^aCun Jehovah-ih kamsuakthu cu profet Haggai hmangin a thleng, 4 ^b“Hi temple hmuah siat ih a tlûk laiah, nanmah hrangah nan ceimawi mi innpawl sungih um cān a simaw?

1:3^a Ezr 6:14

1:4^b 2Sam 7:2; Jer 33:10, 12

5 ^a“Curuangah atu-ah ralkap rualpawlih Jehovah ih sim mi cu hihi a si:

1:5^a Ṭah 3:40; Hag 2:15

“Nan lamzinpawl ruat hnik uh!
6 ^aTampi nan tuh ih, málte nan ngah;
Nan ei, asinan khăwpkham nan nei lo;
Nan in, asinan nan khawp lo;
Hnipuan nan hruh, asinan zohman nan hlum cuang lo;
Cule hlawh man ngahtu in, dip păwp sungah a ngah mi hlawh man cu a săn a si.

1:6^a Pui 26:20; Hos 8:7; Hag 2:16

7 “Ralkap rualpawlih Jehovah ih sim mi cu hitin a si: nan lamzinpawl ruat hnik uh! 8 ^aKa lung a awi ih sunlawih ka si thei nak dingah tlang ah kaiin zanthing run keng uhla, temple sak uh, Jehovah in a ti. 9 ^bTampi ngah nan beisei ih, ngai hnik uh, málte lawng nan ngah; cule inn ih nan tlun tikah, ka lo semhlohsak. Ziangruangah so? Ralkap rualpawlih Jehovah in a ti. Ka inn siatih a um laiah nan zaten mai inn cio ih nan tlān men ruangah a si. 10 ^cCuruangah nan tlunih van in daifim an sūp ih, leilung in a rah a sûp. 11 ^dZiangahtile leiram le tlangpawl parah, thlairawl le sabit zu thar le hriak thar parah, lei in a rahsuah mi pauhpauh parah, minung le sumhnám parah le na kut ṭuan mi zate parah khuakheng dingin ka ko a si,” tiin.

1:8^a 1Sp 6:1; Ezr 3:7

1:9^b Neh 13:11; Thf 27:20; Hag 2:16-17

1:10^c Dnp 28:23; 1Sp 17:1; Joe 1:18-20

1:11^d Dnp 11:26; Hag 2:17; Mal 3:9

12 ^aCun Shealtiel-ih fapa Zerubbabel le Jehozadak-ih fapa puithiam lu bik Joshua cu a tāngsŭn mipi thawn Jehovah an Pathian thu le Jehovah an Pathian in a rak thlah vekin, profet Haggai-ih thu an lung, cule mipi in Jehovah an ṭihzah. 13 ^bCun Jehovah-ih thuphurtu Haggai in mipi hnenah Jehovah-ih thucah a phuang ih, “Ka lo umpi, tiah Jehovah in a ti,” tiin. 14 ^cCule Judah ram uktu Shealtiel-ih fapa Zerubbabel le Jehozadak-ih fapa puithiam lu bik Joshua-ih thinlung le a tāngsŭn mipi thinlung cu Jehovah in a căwktho; cule an feh ih, ralkap rualpawlih Jehovah an Pathian inn an sak, 15 ^dcucu siangpahrang Darias a lal kum hnihnak, a thla ruknak, ni 24-nak ah a si.

1:12^a Dnp 31:12; Ezr 5:2; Job 36:11; Isa 1:9, 19; 50:10; Hag 2:2

1:13^b Sem 26:3; Mip 14:9; 2San 36:15; Sam 46:11; Mal 2:7; Rom 8:31

1:14^c Ezr 1:5; 5:2; Hag 2:21

1:15^d Ezr 4:24; Hag 2:10

2

Pathian Inn a Ropi leh Ding

1 ^aThla sarihnak, cuih thla ni 21-nak ah Jehovah-ih kamsuakthu cu profet Haggai hmangin a thleng ih, hitin a ti: 2 ^b“Atu-ah Judah ram uktu Shealtiel-ih fapa Zerubbabel le Jehozadak-ih fapa puithiam lu bik Joshua hnen le a tāngsŭn mipi hnenah, 3 ^c‘Hi hlan ih hi temple ropitzia hmutu hi tawkah zo tal a tang nan um maw? Cun atu-ah teh ziangti vekin nan hmu? A hlan ta thawn khaikhin ah cun nan mithmuh ah atu-ih ta cu zianghmanlo men a simaw? 4 ^dCuti si khal sehla Zerubbabel, atu-ah cak zetin um aw, Jehovah in a ti. Cule nang Jehozadak-ih fapa puithiam lu bik Joshua le rammi hmuahhmuah tla, cak zetin um uh, Jehovah in a ti. Cule ṭuan uh; ziangahtile keimah in ka lo umpi a si, ralkap rualpawlih Jehovah in a ti. 5 ^eCucu Izip ihsi nan ra suah tikih nanmah thawi thukham ka rak tuah mi a si; ka Thlarau cu nan lakah a um, ṭih hlah uh.

2:1^a Pui 23:34; Ezr 5:1-2; Hag 1:1

2:2^b Hag 1:1, 12

2:3^c Ezr 3:12-13; Hag 2:9; Zek 4:10

2:4^d Suah 33:14; Mip 14:9; 2Sam 5:10; 1San 22:13; Zek 8:9; Apo 7:9; Efe 6:10

2:5^e Suah 29:45-46; Neh 9:20; Isa 63:11, 14

6 ^a‘Ziangahtile ralkap rualpawlih Jehovah ih sim mi cu hihi a si: a rei hlanah van le leilung, tifinriat le khawmual vei khat ka hnîn leh ding; 7 ^bcule miphunpawl hmuahhmuah khal ka hnîn ding ih, miphunpawl hmuahhmuah ih hlawnthilpawl cu a ra thleng ding, cule hi temple cu ropitnak in ka khatter ding, ralkap rualpawlih Jehovah in a ti. 8 ^cSui cu ka ta a si ih, ngun khal ka ta a si, ralkap rualpawlih Jehovah in a ti. 9 ^dHimi a netadeuh temple ropitzia cu hmaisa ta hnakin a nasadeuh ding, ralkap rualpawlih Jehovah in a ti. Cule hi hmun ah hnangamdaihnak ka umter ding, ralkap rualpawlih Jehovah in a ti,’ tiin sim aw,” tiin.

2:6^a Eze 38:19; Joe 3:16; Hag 2:21; Heb 12:26; Thu 6:12

2:7^b 1Sp 8:11; Isa 60:4-9

2:8^c 1San 29:14, 16

2:9^d Sam 85:8-9; Isa 66:12; Zek 2:5

Malsawm Tiamkamnak

10 ^aDarias a lal kum hnihnak, a thla kuatnak, ni 24-nak ah Jehovah-ih kamsuakthu cu profet Haggai hnenah hitin a thleng, 11 ^b“Ralkap rualpawlih Jehovah ih sim mi cu hitin a si, ‘Atu-ah dān thuhla puithiampawl sut uh: 12 ^c“Mi pakhat in serhhran mi sa cu a sinfen in tuamin a keng ih, cuih a fun mi cun a zimten, sang simaw, suan mi simaw, sabit zu simaw, hriak simaw, ziang rawl khal simaw, a daingah pang asile, a rung thiang pei maw?” tiin,’ tiah a ti a si,” tiin.

2:10^a Hag 2:20

2:11^b Pui 10:10-11; Dnp 17:8-11; Mal 2:7

2:12^c Suah 29:37; Pui 6:27, 29; 7:6; Eze 44:19; Mat 23:19

Cun puithiampawl in an sawn ih, “Thiang hlah,” tiah an ti.

13 ^aCule Haggai in, “Mithi ruak a tham ruangih thiang lo mi pakhat in hi thilpawl lakih pakhat khat thâm sehla, cuih thil cu thiang loin a rung um ve pei maw?” tiah a ti.

2:13^a Pui 22:4-6; Mip 19:11, 13, 22

Puithiampawl in an sawn ih, “Thiang lo ah a cang ding,” tiah an ti.

14 ^aCun Haggai in a let ih, “Ka hmaiah hi mipi khal cuvek an si ih, hi miphun khal cuvek thotho an si ve, Jehovah in a ti, cule an kut ih an tuah mi kip in cuvek a si ih, an hlăn mi pauhpauh cu a thiang lo a si.

2:14^a Sam 51:17; Thf 15:8; Isa 1:11-15; 29:13

15 ^a“Cule atu-ah, tuihni ihsin hi hlan thil khâ ruat hnik uh: Jehovah-ih temple sungih lungto pakhat parah lungto dang an suan hlan, 16 ^bmi pakhat in thlairawl efa 20 beiseiin a ra ih, pahra lawng a um ih, mi pakhat cu sabit sawrnak ah bath 50 khaisuak dingin a ra ih, bath 20 lawng a um ni ihsi khan. 17 ^cNan kut ṭuan mi hmuahhmuah ah thil hring rocarnak, thil hring pangmăn kainak le rial pawl tla hmangin ka lo vaw hai; cuti cing khalin, ka hnenah nan kir cuang lo, Jehovah in a thăn. 18 ^dHi hlan thil kha ruat hnik uh: tuihni, a thla kuatnak, ni 24 ihsin Jehovah-ih temple lungphum phum ni tiang kha ruat uh. 19 ^eCuam sungah thlairawl mu pakhat tal a um maw? A si, sabit hri, theipi kung, talê kung le olif kung pawl tla in rah an suah lo. Asinan tuihni thawkin mal ka lo sawm hai ding,” tiah a ti.

2:15^a Ezr 3:10; Hag 1:5, 7; 2:18

2:16^b Zek 8:10

2:17^c Dnp 28:22; 1Sp 8:37-39; Isa 9:13; Jer 3:10; Amo 4:6-11

2:18^d Ezr 3:11; Hag 2:15; Zek 8:9, 12

2:19^e Sam 128:1-6; Zek 8:12; Mal 3:10

20 ^aCule cuih thla ni 24-nak ah Jehovah-ih kamsuakthu cu Haggai hnenah hitin a thlengsal, 21 ^b“Judah ram uktu Zerubbabel hnenah hitin sim aw,

2:20^a Hag 1:15; 2:10

2:21^b Ezr 5:2; Zek 4:6-10

‘Lei le van ka hnîn ding.
22 ^aLalrampawlih laltokhampawl ka linglet ding;
Miphunpawlih lalrampawl cahnak ka ṭhiatbăl ding.
Rang lêngpawl le a parih topawl ka linglet ding;
Rangpawl le an parih totupawl an ṭumthla ding,
Mi tin anmai unaupaih ralnâm in an thi ding.

2:22^a Eze 38:21; Amo 2:14-15; Mik 7:16; Zef 3:8

23 ^a‘Cuih ni ah, ralkap rualpawlih Jehovah in a ti, Shealtiel-ih fapa Zerubbabel, ka siahhlawh ka lo kai ding, Jehovah in a ti, nangmah cu ka zunghruk tacik vekin ka lo tuah ding, ziangahtile ka lo hril zo, tiah ralkap rualpawlih Jehovah in a ti,’ ti aw,” tiin.

2:23^a Sol 8:6; Isa 42:1; 43:10; Jer 22:24; Zek 4:10; 2Ko 1:22