About Bible Thianghlim | ©

BibleThianghlim – Mark

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Mark

12345678910
111213141516

• A ngantu: John Mark
• A siartu: Rom ih zumtupawl
• Ngan kum: A.D. 67-69

Jesu Khrih rawngbawlnak hi kum thum luan fangte lawng a rei mi a si nân, a hnaṭuan le a zirhnak cu a tam zet. Mark cun Thlarau Thianghlim khihhmuhnak hnuaiah Khrih-ih zirhnak hnakin a hnaṭuan thu tamsawn in a tarlang. Mark in Khrih tuarnak khal a tarlang leuhleuh fawn. A hnaṭuan le a zirhnak pawl hi a siar hmaisabik tu Rom khawpi ih zumtupawl ih an ṭul mi thawn a milaw zet. Hih zumtupawl hin A.D. 65 hrawngah hremnak nasa zet an rak tuar thawk. Mark in hi a thuthangṭha cabu hi A.D. 67-69 karlak hrawngih a ngan mi a si men thei. Peter ih thusim mipawl kha a thih hnuah, Mark in a bu in a tuah ti hi kawhhran hmaisa pawlih ruahdān a si. Hih thuthangṭha in Khrih cu harsatnak nehtu vekin a lăngter ruangah, hi thuthangṭha hin Rom khawpi ih zumtupawl tha a pe.

Mark hi John ti khalih kawh a si (Apo 12:12). Kawhhran hmaisa pawl cu Jerusalem ih Mark teih inn ah an khawmaw ṭheu (Apo 12:12). Mark hi an vei khatnak missionary khualtlawnnak ah Paul le Barnabas teih zawngah a rak feh ve (Apo 13:4-12). Asinan an khualtlawn an thawk hnu, a rei hlanah a kirsan hai (Apo 13:13). Paul cun a vei hnihnak missionary khualtlawnnak ih hruai a duh nawn lo nân, Mark-ih unaupa (Kol 4:10) Barnabas cun hruaisal a duh. Paul cun Silas a fehpi hnuah, Barnabas cun Mark hruaiin Saipras lamah a feh (Apo 15:3-40). Nehhnuah cun Mark hi hman tlakah a cangsal ih, a netnakah cun Paul khal in a cohlang (2Ti 4:11).

Mark in a thuthangṭha hi ṭhen hnih in a ṭhen. Mark in Jesu ih tuah mi thilmak 18 a tarlang ih, a tamsawn cu himi a ṭhen khatnak ah hin kan hmu. Khrih cun ziangkimah thu a nei. Hi thuthangṭha sungah “Minung Fapa” ti mi a hmin hi vei 14 a lang. Cumi cun Jesu-ih thuneihnak le Pathian sinak famkim le minung sinak famkim neitu a sinak a langter. Sikhalsehla Mark in hi Minung Fapa hin a tuar khal a ṭul ti a langter. Anih cu, “mi rian dingin le mi tampi tlen dingah a nunnak pe dingin a ra sawn a si,” (10:45).

Jesu cun a dungthluntupawl hrangah a tuar ih, anmah khal tuarnak nun nei dingin a ko hai. Anih in harsatnak tlunah nehnak a co zo ih, a mipawl khal a runsuak hai fawn ding.

1

Baptisma Petu John in Lamzin a Sial

1 ^aPathian Fapa Jesu Khrih-ih thuthangṭha hramthawhnak cu. 2 ^bProfetpawlih cazual sungah,

1:1^a Mat 4:3

1:2^b Mal 3:1; Mat 11:10; Luk 7:27

“Ngai hnik, na hmaiah ka palai ka thlah ding,
Anih in na lamzin cu na hmaiah a timlam ding.
3 ^aRamṭhing ih mi pakhat auaw cun,
‘Bawipaih lamzin sial uh,
A zintepawl kha dĭngter uh,’ a ti,”

1:3^a Isa 40:3; Joh 1:23

tiin ngan a si.

4 ^aJohn cu a ra suak ih, ramṭhing ah baptisma a pe, cule sualpawl ngaidamnak ding hrangah lungthlĕngnak baptisma thu a sim. 5 Judia peng ih um mipawl hmuahhmuah le Jerusalem ih um mipawl cu a hnenah ra in, an sualpawl tla an phuang ih, John in an zaten Jordan tiva ah baptisma a pe hai. 6 ^bJohn cu kalauk hmul ih tah mi hnipuan a hruh, a tâi ah savun taikhap a khap ih, kharbawkpawl le hramlak khuai tizu a ei. 7 ^cCule, “Ka dungih ra pa hi, kei hnakin a nasasawn, kei cu kûn tahratih a kedam hri phawihsaktu ding hmanah ka tlak lo. 8 ^dKei cun ti ah baptisma ka lo pe taktak, asinan anih cun Thlarau Thianghlim ah baptisma a lo pe ding,” tiah thu a sim.

1:4^a Mat 3:1; Luk 1:77; Joh 1:26, 33; Apo 1:5, 22

1:6^b Pui 11:22; 2Sp 1:8

1:7^c Apo 13:25

1:8^d Isa 44:3; Joe 2:28; Joh 1:33; Apo 1:5

John in Jesu Baptisma a Pe

9 ^aCule hitin a si, cu laiah Galili peng Nazareth khua ihsin Jesu cu John umnak ah a feh ih, John in Jordan tiva ah baptisma a pe. 10 ^bCule Jesu kha ti sung ihsin a hung suah veten, John in van áwngawin le Thlarau cu thuro bangin Jesu parih a rung ṭum kha a hmu. 11 ^cCun van ihsin aw pakhat in, “Nang cu ka duhdawt zet mi ka Fapa na si, na parah ka lung a hmui zet,” tiah a ti.

1:9^a Mat 2:23; 3:1

1:10^b Joh 1:32

1:11^c Mat 3:17

Setan in Jesu Sual a Fawrh

12 Hmakhatteah Thlarau in Jesu cu ramṭhing ah a fehter. 13 ^aCule cu tawkah ni 40 a um, Setan in sual a fawrh ih, sahrangpawl lakah a um. Cule vancungmipawl in an rian.

1:13^a Suah 24:18; Mat 4:10; Heb 4:15

Jesu Rawngbawl a Thawk

14 ^aJohn thawngthlak a si hnuah, Jesu cu Galili peng ah a feh ih, Pathian uknak thuthangṭha a sim. 15 ^b“A tikcucān a kim zo a si, Pathian uknak cu a nai zo. Nan lungthlĕng uhla, thuthangṭha zum uh,” tiah a ti.

1:14^a Mat 3:1; 4:12, 23

1:15^b Joh 3:15; Rom 5:6; Gal 4:4; Efe 1:10

Dungthluntu Hmaisa Pawl Kawhnak

16 Galili Tili kapih a feh laiah, Simon le a naupa Andru kha tili sungah sur vawrh reroin a hei hmu, ziangahtile annih cu nga kaitu an si. 17 Cun Jesu in an hnenah, “I thlun uh, cule minung kaitu ah ka lo tuah ding,” tiah a ti. 18 ^aAn sûrpawl cu hmakhatteah an tân ta ih, amah cu an thlun.

1:18^a Mat 4:19

19 Cu tawk ihsin málte hladeuh a feh ih, Zebedi-ih fapa James le a naupa John kha lăwng sungah an sûrpawl an thawlh rero lai a hei hmu. 20 Jesu in hmakhatteah a ko hai ih, an pa Zebedi cu lăwng sungah an hlawhfapawl thawn an tān ta ih, a dung an thluncih.

Khawse Bawrhhlawh Dawisuaknak

21 ^aJesu le a dungthluntupawl cu Kapernaum khua ah an feh, cule Jesu cu Sabbath ni ah sinakok ah a lutcih ih, thu a zirh. 22 ^bCun a thuzirh mi ah an khawruah a har zet, ziangahtile Dān zirhtupawl vekin zirh loin, thuneitu pakhat vekin a zirh.

1:21^a Mat 4:23

1:22^b Mat 7:28-29

23 An sinakok sungah cun thlarau bawrhhlawh nei pa pakhat a um ih, cu pa cun, 24 ^a“Hâ! Nazareth Jesu, kanmah ten um nung, nang le kannih ziang so pehtlaihawknak kan neih? Kanmah siatsuah dingah maw na rat? Zo na si ti ka lo thei, nang cu Pathian-ih Mi Thianghlim na si,” tiah a ti.

1:24^a Lai 13:5; Sam 16:10; Mat 8:29; Luk 24:19; Joh 1:45-46; Apo 4:10; 1Joh 2:20

25 Cule Jesu in amah cu a kawk ih, “Daiten um, a sung ihsin suak aw!” tiah a ti. 26 Thlarau bawrhhlawh in cu pa cu nasa zetin a caihter ih, ring zetin a au ruangro hnuah, a sung ihsin a suak. 27 Cun an zaten an mang a bang, pakhat le pakhat thu an sutaw, “Hivek thil cu ziang a si? Ziang vek zirhnak thar so a si? Ziangahtile thlarau bawrhhlawh pawl hman thu nei zetin thu a pe hai ih a thu an lung,” tiah an ti.

28 ^aCule hmakhatteah Jesu-ih thuhla cu Galili peng hmuahhmuah ah a thang.

1:28^a Mat 9:26

Jesu in Mi Tampi a Damter

29 Sinakok ihsin an suah veten, Simon le Andru teih inn ah James le John thawn an lut. 30 Cule Simon nupi-ih nu kha khawsik nat tuarin a it. Cuih thu cu Jesu an sim lohli. 31 ^aJesu cu a hnen lam panin a feh ih, a kut in a kai, cule a thoter. Cun a khawsik nat cu a reh vukvi ih, anmah a rian hai.

1:31^a Luk 7:14

32 ^aNi a tla ih, zan lam a thlen tikah, mina hmuahhmuah le khawse pawlh mipawl tla a hnenah an run hruai. 33 Cule an khawsen in cuih inn sângka kiangah an ra pungkhawm. 34 ^bCun Jesu in nathri phunphun tuartupawl a damter ih, khawsia tampi a dawisuak. Cule khawsiapawl in amah cu zo a si ti an theih ruangah an ṭawng ding a siang hai lo.

1:32^a Mat 4:24

1:34^b Mat 4:23; Apo 16:17-18

Ramṭhing ah Jesu Thla a Cam

35 ^aJesu cu khawvâng hlan, zingpit teah a tho, a suak ih, ramṭhing ah a va feh, cule cu tawkah thla a cam. 36 Cule Simon le Jesu hnenih umpawl in amah cu an hawl. 37 An va hmuh tikah, “Mi hmuahhmuah in an lo hawl sokhaw,” tiah an sim.

1:35^a Luk 3:21

38 ^aCule Jesu in an hnenah, “An hnen khalih thu ka sim thei ve nak dingah, hi kiangkap khuapawl khalah feh uhsi; ziangruangahtile cucu ka rat săn mi a si,” tiah a ti. 39 ^bGalili peng hmuahhmuah ih an sinakokpawl ah thu a sim ih, khawsiapawl a dawisuak.

1:38^a Isa 61:1

1:39^b Mat 4:23-24

Miphar Damternak

40 Miphar pakhat Jesu hnenah a ra, khukbilin, “Na duh ahcun i thiangter thei a si,” tiah băwmnak a dil.

41 Jesu cun a lainat zet ih, a kut a suah ih a hei thâm, cule cu pa hnenah, “Ka duh a si, thiang aw,” tiah a ti.

42 A ṭawng ṭheh hnu hmakhatteah, a phār nat a hlo ih, a thiang. 43 Cule Jesu in khoh zetin thu a tiam hnuah, a fehter lohli. 44 ^aJesu in a hnenah, “Zo hnen hmanah hi thu hi sim lo dingin fimkhur aw. Va feh awla, puithiam hnenah na taksa va hmuh sawn aw, mithiang na si theihpinak dingah Mosi ih thu a lo pek mi thilpawl va hlan aw,” tiah a ti. 45 ^bSikhalsehla cu pa cu a fehsuak ih a damnak thu cu nasa zetih phuan le thehdarh a thawk, cutin Jesu cu khaw sungah langhnganin a lut thei nawn lo, khaw leng ramṭhing sawnah a um ih, hmun kip ihsin mi in an ra pan.

1:44^a Pui 13:49; Mat 8:4

1:45^b Luk 5:15-16; Joh 6:2

2

Jesu in Mizéng pa a Damter

1 Ni tawkfang a rei hnuah, Jesu cu Kapernaum khua ah a lutsal, cule inn ah a um ti thâwm mi in an thei. 2 Hmakhatteah mi tampi an pungkhawmaw, cutin sângka kiang tiang hman an khat ṭheh. Cule Jesu in an hnenah kamsuakthu a sim. 3 ^aJesu hnenah mi hrekkhat an ra ih, mi pali in mizéng pa pakhat cu zâwnin an rak keng. 4 Mipi ruangah a hnen an va naih thei lo tikah, Jesu umnak tlun zawn inn tlun khuh kha an hâwk. An bauh ṭhehin mizéng pa cu a ihphah thawn an vun ṭhum.

2:3^a Mat 4:24

5 ^aJesu in an zumnak a hmuh tikah, mizéng pa hnenah, “Ka fapa, na sualpawl ngaidam ṭheh a si zo,” tiah a ti.

2:5^a Luk 7:48

6 Cule cu tawk hmun ih Dān zirhtu hrekkhat tokhawmin an thinlung sungten, 7 ^a“Ziangah so hi pa hin hiti vekin Pathian a thangsiat? Pathian lawngin sualpawl a ngaidam thei a si lo maw?” tiah an ti.

2:7^a Isa 43:25

8 Cule hmakhatteah, Jesu cun a thlarau in an thinlung sungten hi vekin thusuhnak an nei rero ti a thei ih, an hnenah, “Ziangah so nan thinlung sungten hi thilpawl nan suh rero? 9 Hi mizéng pa hnenah, ‘Na sualpawl ngaidam ṭheh a si zo,’ ti maw, ‘Tho awla, na ihphah lain feh aw,’ ti so áwlsawn? 10 ^aSikhalsehla Minung Fapa in leitlun ah sualpawl ngaidam thei nak thuneihnak a nei a si ti nan theihnak dingah hihi tuah a si,” tiah a ti. Cu ṭhehin mizéng pa hnenah, 11 “Na hnenah ka lo sim a si, tho aw, na ihphah la awla, na inn ah tlung aw,” tiah a ti. 12 ^bMizéng pa cu a tho lohli, a ihphah a la ih, an zate hmaiah a fehsuak. Curuangah an zaten an mang a bang tuk. Pathian an thangṭhat ih, “Hivek thil cu kan hmu dah lo,” tiah an ti.

2:10^a Mat 8:20

2:12^b Mat 9:8, 33

Levi Kawhnak

13 ^aJesu cu tili kapah a va fehsal ih, mipi zaten a hnenah an ra, cule thu a zirh hai. 14 ^bA feh phahin Alfias-ih fapa Levi kha a siahkhawnnak bûk ah toin a hei hmu. Cule Jesu in a hnenah, “I thlun aw,” tiah a ti. Levi cu a tho ih, Jesu a thlun.

2:13^a Luk 5:15; Joh 6:2

2:14^b Mat 4:19

15 Cun hitin a si, Jesu cu Levi inn ah rawl ei dingin a to. Cule siah khawngtu tampi le misualpawl khal Jesu le a dungthluntupawl an hilpi ve. Cuih mi tampi cun Jesu an thluncih. 16 ^aDān zirhtupawl le Farasipawl in Jesu cu siah khawngtupawl le misualpawl thawi rawl an eikhawm lai an hmuh tikah, a dungthluntupawl hnenah, “Ziangtin so Jesu cu siah khawngtupawl le misualpawl hnenih ei le in ih a um?” tiah an ti.

2:16^a Mat 9:11

17 ^aJesu in a theih hai tikah, an hnenah, “Miharhdampawl in sibawi an ṭul lo, minapawl lawngin an ṭul. Midingfelpawl ko dingah ka ra lo, misualpawl lungthlĕng dingih ko dingah ka ra sawn a si,” tiah a ti.

2:17^a Luk 19:10; 1Ti 1:15

Rawl Ulh Thu Jesu an Sut

18 ^aJohn-ih dungthluntupawl le Farasipawlih dungthluntupawl cu rawl an ul ṭheu. Cule mi hrekkhat Jesu hnenah an ra ih a hnenah, “John-ih dungthluntupawl le Farasipawlih dungthluntupawl cu rawl an ul ṭheu, ziangah so nangih dungthluntupawl hmuah rawl an ulh ve lo?” tiah an ti.

2:18^a Mat 6:16-18; Apo 13:2

19 Cule Jesu in an hnenah, “Mo neitu pa an hnenih a um laiah, mo lawmtupawl cun rawl an ul thei ding maw? Mo neitu pa an hnenih a um sung hmuah cu rawl an ul thei lo ding. 20 ^aAsinan an hnen ihsin mo neitu pa lâkhloh ni a thleng leh ding, cu tikah rawl an ul leh ding.

2:20^a Luk 17:22

21 “Zohman in a cawm thei mi puanthan thar belcâwng in sinfen hlun an belh kel lo, an belh asile a thar in a hlun cu a dir ding ih, a tlêk kau sin ding. 22 Cule zohman in sabit zu thar kha savun thâwl hlun sungah an thun kel lo, an thun asile sabit zu thar in savun thâwl hlun cu a kekter ding. Cule sabit zu cu a dăwk ding ih savun thâwl hlun khal cu a siat ding. Sabit zu thar cu savun thâwl thar sungih thun tengteng sawn ding a si,” tiah a ti.

Jesu cu Sabbath Lal a Si

23 ^aCun hitin a si, Jesu cu Sabbath ni ah sangvut ló lakin a feh; cule a dungthluntupawl in an feh phahin sangvut vuipawl sih an thawk. 24 ^bCule Farasipawl in Jesu hnenah, “Zoh hnik, ziangah so Dān in Sabbath ni ih tuah a sian lo mi an tuah?” tiah an ti.

2:23^a Dnp 23:25

2:24^b Mat 12:2

25 Cu tikah Jesu in an hnenah, “David in amah le a zawngih umpawl ei ding nei loin tlasam le rilrawngin an um tikah, ziang a tuah ti le, 26 ^aziang vekin puithiam lu bik Abiathar san ah Pathian-ih inn sungah lutin, Dān in puithiampawl lawng a ei sian mi Sangserh ei-in, ziangmaw zat cu a zawngih umpawl a pe ve hai ti nan siar dah lo maw?” tiah a ti.

2:26^a Pui 24:5-9; 1Sam 21:1-6; 2Sam 8:17; 1San 24:6

27 ^aCule Jesu in an hnenah, “Minung hrangah Sabbath ni cu tuah a si ih, minung cu Sabbath ni hrangah tuah a si lo. 28 ^bCuruangah Minung Fapa cu sabbath tlun khalah Lal a si,” tiah a ti.

2:27^a Suah 23:12; Dnp 5:14; Kol 2:16

2:28^b Mat 8:20

3

Sabbath Ni ih Mi Damternak

1 ^aJesu cu sinakok sungah a lutsal ih, cu tawkah kut ro pa pakhat a rak um. 2 ^bJesu kha sual an puh thei nak dingah, Sabbath ni ah cu pa cu a damter pei maw, damter lo tiah ṭhaten an thlingthla. 3 Kut ro pa hnenah Jesu in, “Tho awla, a laiah hin ra ding aw,” tiah a ti. 4 Cun Jesu in an hnenah, “Dān in Sabbath ni ah thil ṭha tuah maw, thil ṭha lo tuah a siang, mi nunnak run ding maw, thah ding a siang?” tiah a sut hai. Asinan annih cu dai ṭhepṭhepin an um. 5 Cule thinhengin a kiangkapih mipi a zoh vivo, an lung a ruh tuk ruangah a thin khal a nâ. Cu pa hnenah cun, “Na kut hawi hnik,” tiah a ti. A kut cu a hun hawi ih a khat lam vekin a dam. 6 ^cCun Farasipawl cu an suak ih, Herod-ih milaipawl thawn Jesu thah thei dān ding thu an rawnawkhawm lohli.

3:1^a Mat 4:23

3:2^b Mat 12:10

3:6^c Mat 22:16

Mi Tampi in Jesu an Thlun

7 ^aCule Jesu cu a dungthluntupawl thawn tili lamah an va feh. Galili peng le Judia peng ihsin mipi tam zetin amah an thlun. 8 ^bThil tampi a tuah mipawl hna ih an theih tikah, Jerusalem le Idumia peng le Jordan tiva khat lam ral ram le Ṭaiar khua le Sidon khaw kiangkap rampawl ihsin mipi tam zet a hnenah an ra. 9 Mipi an tam tuk lawmmam ruangah amah an pah pang lo nak dingah, a hrangah lăwng fate pakhat timtuah cia dingin a dungthluntupawl a fial hai. 10 ^cMi tampi a damter ruangah zăwnzaihnak nei mi tampi cun amah thâmngah dingin an engaw ciamco. 11 ^dThlarau bawrhhlawh pawl in Jesu an hmuh tiktikah a hmaiah an băwkkhup ih, “Nang cu Pathian Fapa na si,” tin an au ṭheu. 12 ^eCupawl hnenah amah kha zo a si ti mi dang theihter lo dingin khoh zetin thu a tiam hai.

3:7^a Mat 4:25

3:8^b Mat 11:21

3:10^c Mat 4:23; 9:20

3:11^d Mat 4:3

3:12^e Mat 8:4; Apo 16:17-18

Apostol Hleihnih

13 ^aCule tlang parah a kai ih, a hnenah a mi duh mi vial a ko. Cule a hnenah an ra. 14 Cun a hnenih um dingah le thusim dingih a thlah thei nak dingah le, 15 ^bnatnakpawl damter thei nak le khawsiapawl dawisuak thei nak thuneihnak nei dingah mi hleihnih a ruat. 16 ^cCupawl cu: Peter tiih hmin dang a pek mi pa Simon, 17 Zebedi-ih fapa James le a naupa John, cute unau cu Buanekes tiin hmin dang a pek hai, a tican cu, “Khawri Fapapawl,” tinak a si. 18 Andru le Filip, Bartholomeo, Mathai, Thomas, Alfias-ih fapa James, Thaddias, Kanaan-mi Simon le, 19 Jesu phiarsawmtu Judas Iskariot tla an si.

3:13^a Mat 5:1

3:15^b Mat 10:1

3:16^c Joh 1:42

Jesu le Beelzabub

20 Cun inn sungah an lut. Mipi tam zet an ra pungkhawmsal rero ruangah rawl hman an ei thiam lo. 21 ^aCuih thu cu a sungtepawl in an theih tikah, annih in, “Jesu cu a â zo,” tiah an ti fawn ruangah amah hruai dingin a hnenah an ra.

3:21^a Joh 10:20; Apo 26:24

22 ^aJerusalem ihsi a ra mi Dān zirhtupawl in, “Hi pa hi Beelzabub ih pawlh mi a si ih, khawsiapawlih lal thawngin khawsiapawl a dawisuak a si hi!” tiah an ti.

3:22^a Mat 15:1; Joh 7:20

23 ^aJesu in a hnenah a ko hai ih, tahṭhimnak hmangin a zirh hai, “Ziangtin Setan in Setan lala a dawisuak thei ding? 24 Ram pakhat cu ṭhenawin amah le amah a doawk asile, cuih ram cu a dingsuak thei lo ding. 25 Innsang pakhat cu ṭhenawin anmah le anmah an doawk asile, cuih innsang cu a dingsuak thei lo ding. 26 Cule Setan cu amah le amah doawin a ṭhenawk asile, a dingsuak thei lo ding ih, a cemrál sawn riangri ding. 27 ^bMi pakhat in micak pa a ṭembĕt hmaisak ta lo ahcun, zohman in micak paih inn sungah lutin a thilri a lâksak thei lo ding. A ṭembĕt hnu lawngah a inn sung ihsin a thilripawl a lâksak thei ding. 28 Thungaiin ka lo sim, minungpawlih sualpawl hmuahhmuah le ziang vek thangsiatnak an ṭawng mi khal ngaidam a si ding. 29 ^cAsinan Thlarau Thianghlim a thangsiattu cu ngaidam a si dah lo ding, cuhnakin kumkhaw hrem dingah a tlak sawn a si,” tiah Jesu in a ti. 30 Ziangruangahtile annih in, “Thlarau bawrhhlawh a sungah a lut,” tiah an ti.

3:23^a Mat 4:10

3:27^b Isa 49:24-25

3:29^c Mat 12:31-32; Luk 12:10

Jesu Nu le a Naupalepawl

31 Cun a naupalepawl le a nu an ra, inn lengah an dīng ih, Jesu va ko dingin mi an thlah. 32 A kiangkapah mi tampi an to ih, annih in a hnenah, “Zoh hnik, na nu le na naupalepawl cu nangmah lo biak duhin lengah an um,” tiah an sim.

33 Cule anih in a sim hai ih, “Ka nu cu zo a si ih, ka naupalepawl cu zo an si?” tiah a ti.

34 Cule a kiangkapih to mipi kha a zoh hai ih, “Ngai hnik uh, hipawl hi ka nu le ka naupalepawl cu an si! 35 Ziangahtile zokhal Pathian duh zawng a tuahtu cu ka naupa le ka farnu le ka nu a si,” tiah a ti.

4

Thlaici Vawrh Tahṭhimnak

1 Jesu in tili kapah thuzirh a thawksal. Cule a hnenih a ra suakkhawm mi minung an tam tuk ruangah, Jesu cu lăwng sungah a lut ih a to. Lăwng cu ti parah a um ih, mipi zaten tili lam hawihin lei parah an um. 2 Cun tahṭhimnakpawl hmangin thil tampi a zirh hai ih, a zirhnak ah cun an hnenah, 3 “Ngai hnik uh! Zoh hnik uh, thlaici vawrhtu cu thlaici vawrh dingin a fehsuak. 4 Cule hitin thil a cang, thlaici a vawrh tikah, a hrekkhat cu lamzin kap tluanah an tla ih, tlun zuang vatepawl an ra ih an cuk thluh. 5 A hrekkhat cu lung umnak lei sedâp ah an tla ih, lei a sah lo ruangah thlaici cu an keuh lohli. 6 Asinan ni a hung sat tikah thlai ṭo pawl cu ni sa in a em hai ih, hrám an neih lo ruangah an ro ṭheh. 7 Cule thlaici hrekkhat cu hling rûl lakah an tla ih, hling rûl an ṭhan tikah thlaikungpawl kha a zâp ih rah a suah lo. 8 ^aCun thlaici dang cu leiram ṭha ah an tla. A ṭhang ih, a karh, cule rah a suah; a hrekkhat cu a let 30, a hrekkhat cu a let 60, a hrekkhat cu a let 100 tiangin rah an suah,” tiah a sim.

4:8^a Joh 15:5; Kol 1:6

9 ^aCule anih in an hnenah, “Theihnak hna a neitu cun thei seh!” tiah a ti.

4:9^a Mat 11:15

10 Cun Jesu amah lawng a um laiah, a kiangih umpawl le a dungthluntu hleihnih pawl in a tahṭhimnak thupawl cu an sut. 11 ^aCule anih in an hnenah, “Pathian uknak thu thawn pehparin thuthuppawl theih thei nak pek nan si zo. Asinan leng lam mipawl hrangah cun thil ziangkim tahṭhimnak in a tāng lai a si.

4:11^a Mat 3:2; 1Ko 5:12-13; Kol 4:5; 1Th 4:12; 1Ti 3:7

12 ^a‘Hmu na cingin, theihthiamnak thawn an hmu lo ding,
Ngaithla na cingin, an theihthiam lo ding;
Cu lo asile an hawikir ding ih,
An sualpawl ka ngaidam hai pang ding,’

4:12^a Isa 6:9-10; Mat 13:13-15

ti mi vekih cang dingin tahṭhimnak in ka sim a si,” tiah a ti.

13 Cule anih in an hnenah, “Hi tahṭhimnak thu hi nan theithiam lo maw si? Hiti cun ziangtin saw tahṭhimnak hmuahhmuah cu nan theihthiam thei ding? 14 ^aThlaici vawrhtu in kamsuakthu a vawrh. 15 ^bHipawl cu lamzin kap tluanih vawrh mi kamsuakthu an si. Hna ih an theih tikah, Setan a ra lohli ih, an thinlung sungih vawrh mi kamsuakthu cu a lâksak. 16 Cu vekin hipawl cu lung umnak lei sedâp ih vawrh mi an si. Kamsuakthu an thei ih lungawi zetih a cohlang lohli tu vek an si. 17 Asinan anmah ah hrám an neih lo ruangah, cān rei lo te sung lawng an daih. Kamsuakthu ruangih harsatnak le hremnak a ra thlen tikah an tlu lohli. 18 Hipawl cu hling rûl lakih vawrh mi an si. Annih cu kamsuakthu ngaithlatu an si. 19 ^cAsinan tulai khawvel dawnharnak, lennakih bumnak le thil dang câkhiarnak an ra lut ih, kamsuakthu cu an zâp ruangah rah nei lo ah a cang. 20 Hipawl cu leiram ṭha ih vawrh mi an si. Annih cun kamsuakthu an ngaithla, an cohlang ih rah an rah. A hrekkhat cu a let 30, a hrekkhat cu a let 60, a hrekkhat cu a let 100 rah an suah,” tiah a ti.

4:14^a Luk 1:2; Apo 4:31; Fil 1:14

4:15^b Mat 4:10

4:19^c Mat 19:23; 1Ti 6:9-10, 17; 1Joh 2:15-17

Meito

21 ^aCule anih in an hnenah, “Meito cu kho hnuaiah simaw, ihkhun hnuaiah simaw ret dingin ken a si dah maw? Meito ṭhuam parih ret ṭheu a si lo maw? 22 ^bZiangahtile phuanlăng leh lo dingih thuh mi zianghman a um lo; lang leh lo dingih thuh mi khal zianghman a um lo. 23 ^cZokhal theihnak hna a neih asile, thei seh,” tiah a ti.

4:21^a Mat 5:15

4:22^b Jer 16:17; Mat 10:26; Luk 8:17

4:23^c Mat 11:15

24 ^aCun anih in an hnenah, “Nan hna ih nan theih mi thu kha va fimkhur uh. Mi nan tahnak khan tah nan si ve ding. Cule a theitu nannih cu tamsinih pek nan si ding. 25 ^bZiangahtile zokhal a neitu cu tam sinsinin pek a si ding, cule a nei lo tu cu a neih cia mi hman a hnen ihsin lâksak a si ding,” tiah a ti hai.

4:24^a Mat 7:2

4:25^b Mat 25:29

A Ṭhang Mi Thlaici Tahṭhimnak

26 ^aCule anih in, “Pathian uknak cu mi pakhat in lei ah thlaici a vawrh ih, 27 amah cu zan ah it-in le sun ah thoin a um. Thlaici cu amah ten a keuh ih a ṭhang, ziangtin cu vekin a cang ti khal a thei lo. 28 Ziangahtile leilung in amah te rah a suah. A hmaisabikah hnah no a suah, cule a vui, cuih hnuah fáng a hun nei. 29 ^bA fáng a cût tikah, thlairawl khawm cān a cût thlang ruangah, thlairawl khawmnak favah thawi a khawm lohli tu vek a si,” tiah a ti.

4:26^a Mat 13:24

4:29^b Thu 14:15

Anṭam Ci Tahṭhimnak

30 ^aCun anih in, “Pathian uknak cu ziang thawn kan khaikhin pei? Asilole khaikhinnak dingah ziang tahṭhimnak so kan lo sim pei? 31 Leilung ih vawrh mi anṭam ci vek a si. Cumi cu leilung ih vawrh mi thlaici hmuahhmuah lakih a fatebik mi a si. 32 Vawrh a si hnuah a ṭo ih a ṭhang. Thlai dang hmuahhmuah hnakin a tumsawn. Hngeṭêk tumpi pi a nei ih, cuih zârhnem ah tlun zuang vatepawl tla an riak thei,” tiah a ti.

4:30^a Mat 13:24

33 ^aAn theihthiam ding tawkten hivek tahṭhimnakpawl hmangin Jesu in an hnenah kamsuakthu a sim. 34 ^bAn hnenah tahṭhimnak tel loin a sim lo. Anmah te lawng an um tikah, thil ziangkim a dungthluntupawl hnenah a simfiang.

4:33^a Joh 16:12

4:34^b Joh 16:25

Thli sia le Tisuar in Jesu-ih Thu an Lung

35 Cuih ni thothoah khua a thim tikah, an hnenah, “Tili khat lam ralah feh uhsi,” tiah a ti hai. 36 Mipi an tlunter hnuah, zianghman tuah nawn loin, Jesu cu lăwng in an fehpi lohli. Cu tawkah lăwng fate dang pawl khal an um ve. 37 Cule thlipi nasa zetin a hrang ciamco ih, tisuar cun lăwng sungah ti a thehlut ruangah lăwng cu ti in a khat. 38 Jesu cu lăwng mei lamah lukham khamin a itthat. An va ṭhang ih, “Zirhtu pa, kan pilhlo thluh ding, pawi na ti lo maw?” tiah an ti.

39 Cun Jesu cu a hung tho ih, thli cu a kawk, cule tipi hnenah cun, “Daiten um, dai aw!” tiah a ti. Cule thlipi cu a reh ih, a dai khepkhep.

40 ^aCule anih in a dungthluntupawl hnenah, “Ziangah so hi tluk lawmmamih nan ṭih? Ziangtin saw zumnak nan va nei lo ve?” tiah a ti hai.

4:40^a Mat 14:31

41 Cule an ṭih tuk lawmmam ih, pakhat le pakhat, “Hi pa hi ziang vek minung so a si, thlipi le tipi hmanin a thu an lun hi!” tiah an tiaw.

5

Khawse Bawrhhlawh Nei Damternak

1 Cun tili ralkhat lam Gadara ram an va thleng. 2 Cule lăwng sung ihsin Jesu a suah tikah, thlarau bawrhhlawh ih pawlh mi pa pakhat thlānmual ihsin a ra suak lohli ih, Jesu a ra táwng. 3 Cu pa cu thlānmual ih cêng a si ih, zohman in an ṭembĕt thei lo, cikcin thaw hmanin. 4 Vei tampi ke hrennak le thir cikcin in an hreng ṭheu. Asinan cikcin cu a catter ih, ke hrennakpawl khal a bauh ṭheh. Zohman in ngawingam ko an tuah thei lo. 5 A sun a zanin aukio le lungto ih ât-awin tlangpawl le thlānpawl ah a um.

6 Hlaral ihsin Jesu a hmuh tikah, a va tlân ih a hmaiah a băwkkhup. 7 ^aCule ring zetin a au ih, “Cungnung Bik Pathian Fapa, Jesu, nang le kei hi ziang pehtlaihawknak so kan neih? In hrem lo dingin, Pathian hmin in ka lo dil a si,” tiah a ti.

5:7^a Mat 8:29; Heb 7:1

8 Ziangahtile Jesu in a hnenah, “Nang thlarau bawrhhlawh, hi paih sung ihsin suak aw!” tiah a rak ti zo ruangah a si.

9 Cun Jesu in, “Na hmin zo a si?” tiah a sut.

Cu pa cun, “Ka hmin cu Lizon a si, ziangahtile mi tampi kan si,” tiah a sawn. 10 Cule khawse bawrhhlawh pawl kha cuih ram ihsin dawisuak lo dingin cu pa cun nasa zetin Jesu a dil.

11 Culaifangah cu tawk kiang tlang parah văwk rual tampi rawl an ei rero. 12 Cule khawsiapawl zate in Jesu hnenah, “An sungih lut dingin văwk rual hnenah in kuat hram aw,” tiah an dil. 13 Jesu in a sĕn lohli hai. Cule thlarau bawrhhlawh pawl cu cu paih sung ihsin an suak ih, văwk rual sungah an lut. Cuih văwk rual cu kham hrâp ihsin an tlânthla ih, tili sungah an pilhlo ṭheh, an zaten 2000 hrawng an si.

14 Văwk kiltupawl cu an tlân ih, cuih thuhla cu khawpi ah le khawte ah an thăn ciamco. Cule thil cang mi zoh dingah mipi an va feh. 15 ^aCun Jesu hnen an va thleng ih, khawse pawlh dah mi lizon neitu pa cu lungfim le hnipuan hruhih a to an va hmu, cule an ṭih. 16 Cun khawse pawlh mi pa parih thil thleng mi a rak hmutupawl in cuih thu cu an thăn ih, văwk rual thuhla khal an thăncih. 17 Cule mipi in Jesu cu an ram suahsan dingin an dil.

5:15^a Mat 4:24

18 Cule lăwng sungih Jesu a luh tikah, khawse pawlh dah mi pa cun a hnenih um dingin a dil. 19 ^aAsinan Jesu in a siang lo, a hnenah, “Na sungte hnen le na rualpipawl hnenah va feh awla, na parah Bawipa in ziang thil ropi pawl a tuah ti le na parih lainatnak a neihzia kha va sim hai sawn aw,” tiah Jesu in a ti riangri. 20 ^bCule cu pa cu a feh ih, Jesu in a parih thil ropi pawl a rak tuah mipawl cu ^cDekapolis ram ah a phuang. Cule mi hmuahhmuah an mang a bang.

5:19^a Mat 8:4

5:20^b Mat 4:25

5:20^c Dekapolis: Khawpi pahra dĭnkhawm mi a si.

Mina Nu le Mithi Nute

21 ^aJesu cu tili khat lam ralah lăwng in a fehsal, tili kapih a umnak ah mi tampi in an ra pankhawm. 22 ^bNgai hnik, sinakok uktupawl lakih pakhat Jairas ti mi pa cu a ra ih, Jesu a hmuh tikah, a ke hramah a tlu. 23 ^cJairas cun nasa zetin zangfah a dil, “Ka fanute a thi zik thlang. A dam ih a nun thei nak dingah ra hramhram aw, cule a parah na kut ra suang aw,” tiah a ti.

5:21^a Mat 9:1

5:22^b Luk 13:14; Apo 13:15

5:23^c Mat 19:13; Luk 4:40; Apo 6:6

24 Cule Jesu cu Jairas hnenah a feh. Mipi in Jesu cu an thlun ih an êng phah rero. 25 ^aCu tawkah kum hleihnih sung thi put nat tuar nunau pakhat a rak um. 26 A neih mi thil hmuahhmuah cem ko in sibawi tampi hnenah a tuamhlawmaw rero zo nân, ṭhat lam pan loin a bese deuhdeuh sawn. 27 Cu nu cun Jesu-ih thuhla a theih tikah, mipi lakin Jesu dung ihsin a ra ih a sinfen a thâm. 28 ^bZiangahtile, “A sinfente hman ka tham asile, ka dam ding,” tiah a ruat.

5:25^a Pui 15:25-30

5:28^b Mat 9:20

29 Cule a thi put cu a reh lohli ih, cuih zăwnzaihnak ihsin a dam zo ti khal a taksa in a theicih. 30 ^aCule Jesu in a sung ihsin huham a suak ti a thei lohli, mipi lam a hawikûal ih, “Zo in ka hnipuan a thâm?” tiah a ti.

5:30^a Luk 5:17

31 Cule a dungthluntupawl in a hnenah, “Mipi hi zat in an lo năwr rero zia cu na hmu ko ih, ziangtin, ‘Zo in so i thâm?’ na ti,” tiah an ti.

32 Cule Jesu cun a thâmtu nu hmuh tumin a kiangkap a zoh vivo. 33 Nunaunu cu ṭih cing le khūr cing ten a parah ziang a tuahsak ti theiin a ra ih, Jesu hmaiah băwkkhupin a thuhla diktak cu a sim ṭheh. 34 ^aCule Jesu in a hnenah, “Ka fanu, na zumnak in a lo damter zo. Hnangamten va feh awla, na zăwnzaihnak cu dam lan ta seh,” tiah a ti.

5:34^a Mat 9:22; Apo 15:33

35 Cutiih Jesu a ṭawng rero laiah, sinakok uktu paih inn ihsin mi hrekkhat an ra ih, “Na fanu a thi zo. Ziangah so Zirhtu pa cu na tibuai duh nawn rero?” tiah sinakok uktu pa cu an ra ti.

36 Jesu in an ṭawng mi ṭawngkam a theih veten, sinakok uktu hnenah, “Phâng hrimhrim hlah, a zum lawng zum men aw,” tiah a ti.

37 ^aCule Jesu in Peter, James le James-ih naupa John siarlo mi dangih thlun a siang lo. 38 Cun sinakok uktu paih inn a va thleng ih, hnăwkbuai culci le mi ṭap le râk rero ih an um kha a hmu. 39 ^bInn sungah a vung lut ih, an hnenah, “Ziangah so hnăwkbuai culci le ṭap ih nan um? Hi nauhak nute hi a thi lo pi, a itthat sawn a si,” tiah a ti.

5:37^a Mat 4:21

5:39^b Mat 9:24

40 Cule an rak hnihsan. Asinan an zaten lengih a suahter hnuah, nauhak nuih nu le pa le a hruai mipawl thawn nauhak nu an retnak hmun lamah cun an lut. 41 ^aNauhak nuih kut cu a kai ih, “Talitha Kumi,” tiah a ti. A tican cu, “Nute, tho aw ka lo ti,” tinak a si.

5:41^a Luk 7:14

42 Nauhak nu cu a tho lohli ih a feh, ziangahtile cu nu cu kum hleihnih mi a si. Cule nasa zetin an mang a bang. 43 ^aCun Jesu in cuih thu cu zohman theihter lo dingin khoh zetin thu a pe hai ih, a ei ding rawl pe dingin a fial hai.

5:43^a Mat 8:4

6

Nazareth Khua ah Jesu an Hnáwng

1 ^aCuih hmun ihsin Jesu cu a păwksuak ih amai khua a thleng, cule a dungthluntupawl in an thlun. 2 ^bSabbath ni a thlen tikah, sinakok ah thuzirh a thawk. A thuzirh theitu lakih mi tampi cu an khawruah a har zet. “Hi pa hin hivek thilpawl hi khui tawkin a ngah a si pei? A hnenih pek mi fimnak hi ziang vek fimnak so a si? Thilmakpawl hi ziang vek so maw an si! 3 ^cAmah cu Mary-ih fapa, lettama, James le Joses le Judas le Simon tepawlih u kha a si lo sawm? A farnulepawl tla hi tawk kan hnenah an um a si lo maw?” tiah an ti. Cule amah ah an bah.

6:1^a Mat 2:23

6:2^b Mat 4:23

6:3^c Mat 12:46; Joh 6:61

4 ^aAsinan Jesu in an hnenah, “Profet cu amai khawmi, a sungkhatpawl le amai innsang siarlo ah cun upat a si,” tiah a ti. 5 Cule cu tawkah midam lo málte parah kut suangih a damter mi siarlo, thilmak a tuah thei lo. 6 ^bAn zumlonak ruangah a mang a bang. Cule a kiangkap khuapawl a tlawng ih, thu a zirh vivo.

6:4^a Luk 4:24; Joh 4:44

6:6^b Mat 9:35; Luk 13:22

Jesu in Mi Hleihnih a Thlah

7 ^aCule hleihnih pawl cu a hnenah a ko hai ih, pahnih pahnih in thlah a thawk, cule thlarau bawrhhlawh pawl neh thei nak thuneihnak a pek hai. 8 An khualtlawnnak ah kianghrăwl siarlo, zianghman keng lo dingin, khualtlawnnak zâl siseh, sang siseh, taiṭawn paisa bawm sungah paisa siseh keng lo dingin, 9 asinan kedam cu bŭnin, kâwrfual lawngte thuah hnih hruh lo dingin thu a pe. 10 Cule anih in an hnenah, “Inn nan va luhnak hmun pauhpauh ah, cuih hmun nan suahsan hlanlo, cu tawkah câm ringring uh. 11 ^bCule nanmah lo cohlang loin nan thu khal ngaithla duh lo tu pauhpauh cu, an khua suahsan uhla nan ke hnuaiih leivut kha anmah dokalhnak theihternak ah thingtla ta uh. Thungaiin ka lo sim, thuṭhennak ni ah cun cuih khua hnakin Sodom le Gomorrah cu an tuar a dêmsawn ding,” tiah a ti.

6:7^a Dnp 17:6; Mat 10:1; Luk 10:1

6:11^b Mat 10:14

12 ^aCule dungthluntupawl cu an fehsuak ih, mi lungthlĕng dingin thu an sim. 13 ^bKhawsia tampi an dawisuak ih, mina tampi hriak an thih ih an damter.

6:12^a Luk 9:6

6:13^b Jam 5:14

Baptisma Petu John-ih Lu Tānnak

14 ^aJesu hmin a thăn tuk ruangah, Siangpahrang ^bHerod in a thuhla a thei ve. Cule, “Baptisma petu John kha mithi lak ihsin a thosal a si. Curuangah thilmakpawl amah ah an lang a si hi,” tiah a ti.

6:14^a Mat 3:1

6:14^b Herod: Nauhakpawl thattu Herod-ih fapa Herod Anṭipas a si.

15 ^aMi dang pawl in, “Elijah a si,” an ti.

6:15^a Mal 4:5; Mat 16:14; 21:11

Cule a dangpawl cun, “Profet a si, asilole profetpawl lakih pakhat khat a bang,” tiah an ti.

16 Asinan Herod in cuih thu a theih tikah, “A lu ka tanter mi John a si tengteng ding. Mithi lak ihsin a thosal a si hi!” tiah a ti. 17 ^aZiangahtile cuih cān ah Herod in a unaupa ^bFilip-ih nupi Herodias cu nupi ah a ṭhit. ^cHerodias ruangah Herod in John kai dingin mi a thlah ih, John cu thawng an thlak ih, thir cikcin in an ṭem. 18 ^dCutiih a tuahnak săn cu, John in Herod hnenah, “Na nau nupi na ṭhit cu Dān in a siang lo,” a rak ti dah zo ruangah a si. 19 Curuangah Herodias in John cu a mit a kem ih, thah a duh, asinan a that thei lo. 20 ^eZiangahtile John cu midingfel le mithianghlim a si ti Herod in a theih ruangah a ṭih ih a hum. John-ih thusim a theih tikah, thil tampi a tuah ṭheu. John-ih thusim cu lungawi zetin a rak ngai.

6:17^a Mat 4:12; Luk 3:19-20

6:17^b Filip: Nauhakpawl thattu Herod-ih fapa Herod Filip I a si.

6:17^c Herodias: Nauhakpawl thattu Herod-ih tunu a si.

6:18^d Pui 18:16

6:20^e Mat 11:9

21 ^aHerod-ih suahcam a hung kim tikah, a mizahumpawl, a ralbawipawl le Galili pengih mithupibik upapawl cu zanriah ei puai a tuahsak ih, Herodias hrangah tikcu remcâng a si. 22 Cule Herodias-ih fanu cu a rung lut ih an hmaiah cun a lâm, cule Herod le rawl ei dingih a hnenih totupawl cu an lung a hmui tuk lawmmam, siangpahrang in falanute hnenah cun, “Na duh mi pauhpauh i dil awla, ka lo pe ding,” tiah a ti. 23 ^bCun a hnenah, “Ziangkhal i dil mi cu ka lo pe ding, ka lalram a hrek tiang khal ka lo pe ding,” tiah sia a săm.

6:21^a Est 1:3; Luk 3:1

6:23^b Est 5:3, 6

24 Cule cu nu cu a feh ih a nu hnenah, “Ziang ka dil pei?” tiah a sut.

A nu in, “Baptisma petu John-ih lu dil aw!” tiah a rak ti.

25 Hmakhatteah zamrang zetin siangpahrang umnak ah a lut ih, “Baptisma petu John-ih lu kha khēng in i pe lohli awla ka duh,” tiah a dil.

26 Cumi cun siangpahrang a riah a siatter zet. Asinan sesămin thu a rak kăm zo ruangah le a rawl hilpipawl ruangah a dil mi cu el a duh lo. 27 Cuveten siangpahrang cun mi thattu a thlah ih, John-ih lu rak keng dingin thu a pe. Cule cu pa cun thawnginn ah a va feh ih, John-ih lu cu a tan. 28 Cule a lu cu khēng in a rak keng ih, falanute cu a pe. Falanute cun a nu a pe sin. 29 John-ih dungthluntupawl in cuih thu an theih tikah an ra ih, a ruak cu an la, cule thlān ah an phum.

Mi 5000 Rawl Donak

30 ^aCun apostolpawl cu Jesu hnenah an panawkhawm ih, an tuah mi zate le an zirh mi zaten an sim. 31 Cule anih in an hnenah, “Nanmah vial keimah thaw lawng in ramṭhing ah feh uhsi la, málte sung tal cawl ta uhsi,” tiah a ti. Ziangahtile mi tampi ra na le kir na an um ruangah rawl einak cān hman an nei lo. 32 Cule mi zohman umlonak ramṭhing lamah lăwng in anmah lawng an feh.

6:30^a Mat 10:2; Luk 9:10; Apo 1:2, 26

33 Cule mipi in an pawhsuak lai an hmu ih, mi tampi in amah a si ti an theithiam. Curuangah khaw kip ihsin ke in an ra tlân. Jesu le a dungthluntupawl an cawlhnak ding hmun cu an thlen khelh ih, amah an ra pankhawm. 34 ^aJesu cu a fehsuak ih, mipi tampi a hmuh tikah, khāltu nei lo tuu rual vek an si ruangah a lainat hai ih, thu tampi zirh a thawk. 35 Khua a hung sim tikah, a dungthluntupawl cu a hnenah an ra ih, “Hi hmun hi ramṭhing a si, khua khal a sîm zo. 36 Mipi cu rawl ei ding zianghman an neih lo ruangah, kiangkap khuapawl ah ei ding rawl an leingah thei nak dingah thlah hai aw,” tiah an ti.

6:34^a Mat 9:36

37 ^aAsinan anih in a sawn hai ih an hnenah, “Nanmah in an ei ding rawl pe uh,” tiah a ti.

6:37^a 2Sp 4:42-44

Cule annih in a hnenah, “Dinari paisa 200 man sang kan lei ding ih, an ei dingah kan pe ding maw?” tiah an ti.

38 ^aCule anih in an hnenah, “Sang hlăwm ziang zat so nan neih? Feh uhla, va zoh hnik uh,” tiah a ti.

6:38^a Mat 15:34

Cule an theihsuah tikah, “Sang hlăwm nga le nga pahnih kan nei,” tiah an ti.

39 Cun a dungthluntupawl hnenah mipi an zaten hram hring parah a bur a bur ih toter dingin thu a pe. 40 Cule mipi cu 100 bur, 50 bur tiin an to. 41 ^aCule sang hlăwm nga le nga pahnih cu a la ih, van lam hawiin, lungawi thu a sim. Cun sang cu a phel ih, mipi hmaiih hung dingin dungthluntupawl a pek; nga pahnih khal cu an zaten a zem. 42 Cule an zaten an ei ih an khawp zet. 43 Nga nepnawi pawl cu an sar ih, kho hleihnih a khat. 44 Sang eitu cu patling 5000 hrawng an si.

6:41^a Mat 14:19

Jesu Ti parah a Feh

45 ^aJesu in mipi a tlunter hai laiah a hlanah tili khat lam ral Bethsaida khua ah rak feh sung dingin a dungthluntupawl cu lăwng sungah a lutter lohli. 46 ^bCule mipi a thlah hai hnuah, tlang parah thlacam dingin a feh.

6:45^a Mat 11:21

6:46^b Luk 3:21

47 Khua a sim tikah, lăwng cu tili laitakah a um ih, Jesu cu amah te lawng in khawmual ah a um lai. 48 Anmah lamih thlipi a hran ruangah, a dungthluntupawl in harsa zetin lăwng an hlau buai ciamco kha a hei hmu. Cun zan sentari kil a ṭum litnak ah Jesu cu anmah lam panin tili parah a feh ih, a hei lan zikte hai. 49 ^aCule tili parih a feh kha an hmuh tikah, thla ah an ruat ih an au ciamco. 50 ^bZiangahtile an zaten an hei hmu ih, an ṭih tuk. Asinan anih in hmakhatteah an hnenah, “Ṭih hlah uh! Keimah sokhaw ka si, ṭih hlah uh,” tiah a ti hai. 51 Cun an hnenah lăwng sungah a lut ih, thlipi cu a reh. Cumi cun an khawruah a harter ngaingai ih, an mang a bang nasa tuk. 52 An lung a ruh ruangah sang thuhla khal kha an theithiam lo.

6:49^a Luk 24:37

6:50^b Mat 14:27

53 ^aTili an tanngah tikah, Genesareth ram an va thleng ih, tili kapah an lăwng an hreng. 54 Cule lăwng sung ihsin an suah tikah, mipi in Jesu cu an theithiam lohli. 55 Cule cuih ram kiangkappawl hmuahhmuah ah an tlân ih, Jesu a um ti an theihnak hmun pauh ah, minapawl cu an ihnak thawn an run zâwn. 56 ^bKhawte ah siseh, khawpi ah siseh, ló ah siseh, Jesu a luhnak kip ah minapawl cu dawr hmun ah an rak thlenpi ih, a sinfen zimte tal thamter siang dingin an dil ciamco. Cule amah a thâmtu zaten an dam ngaingai.

6:53^a Joh 6:24-25

6:56^b Mat 9:20

7

A Thiang le Thiang Lo

1 Cule Farasipawl le Dān zirhtu hrekkhat cu, Jerusalem ihsin a hnenah an ra ih, Jesu cu an kulh vialvial. 2 ^aKut bawrhbang piin a dungthluntu hrekkhat rawl an ei kha an hmu, a umzia cu an kut ṭhaten an khawlh lo tinak a si. Curuangah Farasipawl cun an mawhthluk. 3 ^bZiangahtile Farasipawl le Jew-pawl zaten an pupápawlih thurosiah cu kai hngetin an kut an khawlhfai lo asile, rawl an ei lo. 4 ^cDawr ihsin an ra tlun tikah, ṭhateih an hnimpilawk ta lo ahcun rawl an ei lo. Cu lo a dang thil tampi thlun dingih an pawm mi thurosiah a um. Cupawl tla cu: no, bel, dar bel le ihphah pawl ṭhatei khawlhdān tla an si.

7:2^a Apo 10:14

7:3^b Luk 11:38

7:4^c Mat 23:25; Luk 11:39

5 ^aCun Farasipawl le Dān zirhtupawl in Jesu cu, “Ziangah so na dungthluntupawl in kan pupápawlih thurosiah thlun loin kut khawlh loih rawl an ei?” tiah an sut.

7:5^a Gal 1:14; Kol 2:8

6 Jesu in a sawn hai ih an hnenah, “Nannih midepdepawl, Isaiah in nan thuhla a phuan tikah a phuang dik a si. Hitin a ngan,

‘Hi minungpawl cun an hmur in in upat,
Asinan an thinlung cu ka hnen ihsin a hla zet.
7 ^aIn biaknak cu a lak men a si,
An thurin zirh mipawl khal minung ih thupek men an si,’

7:7^a Isa 29:13

tiin.

8 “Ziangahtile Pathian thupek cu nan tân ih, milai thurosiah sawn, bel le no khawlhdān cu nan thlun ih, cuvek a dang thil tampi khal nan tuah,” tiah a ti.

9 Anih in an hnenah, “Nan thurosiah thlun dingah, Pathian thupek cu nan hnáwng. Cutiih nan tuah tikah, thil ti ṭha ah nan ruataw. 10 ^aZiangahtile Mosi in, ‘Na nu le na pa upat aw,’ tiin le ‘A nu le a pa dokalhih, ṭawng sia a ṭawngtu cu thah a si pei,’ tiah a ti.

7:10^a Suah 20:12; 21:17; Pui 20:9; Dnp 5:16

11 ^a“Asinan nannih cun, ‘Mi pakhat in a pa hnenah simaw, a nu hnenah simaw, “Ka hnen ihsin nan rak ngah ding mi hlawknak pauhpauh cu Korban a si,” cumi cu Pathian hrangih thilpek a si, a ti ding,’ tiah nan ti. 12 Cule cu pa cu a nu simaw, a pa simaw hrangah ziang tuah hman nan siang nawn lo. 13 ^bNan rohawk sin vivo mi nan thurosiah hmangin, Pathian kamsuakthu cu zianghmanlo ah nan canter. Cule cu vekin thil tampi nan tuah,” tiah a ti.

7:11^a Mat 23:16, 18

7:13^b Heb 4:12

14 Jesu in mipi cu a hnenah a ko hai ih an hnenah, “Nan zaten i ngaithla uhla, theithiam uh. 15 Leng lam ihsin sung lamih a lut mi in minung hi a bawrhbangter thei lo; cuhnakin a sung lam ihsin a ra suak mi in a bawrhbangter sawn a si. 16 Zokhal theihnak hna a neih asile, thei seh!” tiah a ti.

17 Mipi hnen ihsin inn sungah a lut ih, a dungthluntupawl in cuih tahṭhimnak thu cu an ra sut. 18 Cule anih in an hnenah, “Nannih khal in nan theithiam lo maw? Leng lam ihsin ziang thil khal milai sungah lut sehla, a bawrhbangter thei lo ti nan theithiam lo maw? 19 ^aZiangahtile rawl cu a thinlung sungah a lut lo ih, a pum sungah a lut sawn, cutin dailennak hmun ah hlăwnsuah a si. Curuangah rawl hmuahhmuah hi a thiang a si,” tiah a ti.

7:19^a Apo 10:15; Rom 14:1-12; Kol 2:16; 1Ti 4:3-5

20 Cule anih in, “Milai sung ihsin a suak mi in milai a bawrhbangter. 21 Ziangahtile hi thilpawl cu milai thinlung sung ihsin a suak mi an si, ruahnak ṭha lo, uiretnak, nunau-mipa sualnak, laithahnak, 22 ^arûkrûknak, duhhamnak, sualralnak, mi bumnak, fihnungza hursual tuahnak, iksiknak, mi thangsiatnak, hngalnak le atthlak zetih umnak tla. 23 Hi thil ṭha lo hmuahhmuah hi milai sung ihsin an suak ih, mi a bawrhbangter,” tiah a ti.

7:22^a Mat 20:15

Siria Fonisia nu in a Zum

24 ^aJesu cu cu tawk ihsin a păwk ih, Ṭaiar ram le Sidon ram lamah a feh. Inn pakhat ah a lut ih, zohman in an theih ding a duh lo, asinan a thupaw thei cuang lo. 25 ^bNupinu pakhat a fanute thlarau bawrhhlawh nei mi nu in Jesu a um ti hna in a theih ruangah a ra ih, Jesu-ih ke hramah a băwkkhup. 26 Cu nu cu Grik miphun a si, a nu in Siria Fonisia ram ih a hrin mi a si. Cu nu cun a fanu sungih khawsia dawisuahsak dingin a dil.

7:24^a Mat 11:21

7:25^b Mat 4:24

27 Asinan Jesu in a hnenah, “Falepawl in khawp ko ei hmaisa hai seh, ziangahtile falepawlih rawl lâksak tahratih, uico tete pawl pek cu a ṭha lo,” tiah a ti.

28 Cule cu nu cun a sawn ih a hnenah, “A si ko, Bawipa, asinan cabuai hnuaiih uico tete pawl khal in falepawlih rawl ṭilfuan cu an ei ve a si kha!” tiah a ti.

29 Cun Jesu in a hnenah, “Hitiih na ṭawng ruangah, va tlung aw, na fanu sung ihsin khawsia cu a suakhlo zo,” tiah a ti.

30 Cule cu nu cu a inn a va thlen tikah, a fanu kha ihkhun parah a rak it ih, khawsia in a suahsan zo ti kha a hmu.

Hnaset le Ṭawng Ṭhiṭha Thei Lo Damternak

31 ^aJesu in Ṭaiar ram le Sidon ram cu a suahsansal ih, ^bDekapolis ram laifang fehtlăngin Galili Tili a va thleng. 32 ^cCun hnaset le ṭawng ṭhiṭha thei lo pa pakhat a hnenah an run hruai ih, a parih kut suang dingin an dil. 33 Cule cu pa cu Jesu in mipi lak ihsin hmun dangah a hruai ih, cu paih hna kua sungah a kut zung hnih a hrawlh ih, a cil a phui, cule a lei a thamsak. 34 ^dCun van lam a hun zoh ih, a hrûm. Cu pa hnenah, “Efata,” tiah a ti. A tican cu, “Vâng thlang seh,” tinak a si.

7:31^a Mat 11:21

7:31^b Dekapolis: Khawpi pahra dĭnkhawm mi a si.

7:32^c Mat 9:32; Luk 11:14

7:34^d Joh 11:41

35 ^aCuveten a hna cu a vâng ih, a lei tal dawntu a pawih, cule fiang zetin a ṭawngsuak. 36 ^bCun zohman sim lo dingin thu a pe hai. Asinan a kham tam pauh le an phuang tam sinsin. 37 A thil tuah mi cun mipi an khawruah a harter ngaingai. Cule, “Thil ziangkim hi ṭha tukin a tuah. Hnasetpawl an hna a vângter ih, ṭawng thei lo pawl ṭawng thei ko a tuah,” tiah an ti.

7:35^a Isa 35:5-6

7:36^b Mat 8:4

8

Mi 4000 Rawl Donak

1 Cuih cān ah mipi an tam zet ih, ei ding zianghman an neih lo ruangah, Jesu in a dungthluntupawl cu a hnenah a ko hai ih an hnenah, 2 ^a“Mipi parah lainatnak ka nei a si, ziangruangahtile ka hnenah ni thum an um zo ih, ei ding zianghman an nei lo. 3 Zianghman ei loih an inn ih ka tlunter hai asile, lamlak ah an va ṭāmsāwl ding; ziangahtile mi hrekkhat cu hmun hlapi ihsin an ra,” tiah a ti.

8:2^a Mat 9:36

4 Cule a dungthluntupawl cun a hnenah, “Ziangtin saw ramṭhing ah zo in milai hi zat daih khuiah rawl a hawl thei ding?” tiah an sawn.

5 Jesu in an hnenah, “Sang hlăwm ziang zat nan nei?” tin a sut hai.

Cule annih in, “Hlawm sarih,” tiah an ti.

6 Cule mipi cu lei parih to dingin thu a pe hai. Cun sang hlăwm sarih cu a la ih, lungawi thu a sim hnuah, a phel ih, mipi hmaiih hung vivo dingin a dungthluntupawl a pe. Cule annih in mipi hmaiah an hung vivo. 7 ^aNga fate te khal málte an nei. Lungawi thu a sim hnuah, zem vivo dingin thu a pe hai. 8 Cule an ei ih an khawp zet, an hlah mi nepnawi khopi sarih an sar. 9 A eitu patling 4000 hrawng an si. Cule annih cu a tlunter hai. 10 Cule hmakhatteah dungthluntupawl thawn lăwng sungah an lut ih, Dalmanutha ram ah an feh.

8:7^a Mat 14:19

Farasipawl in Hminsinnak an Hawl

11 ^aCun Farasipawl an ra ih, Jesu thu-el an thawk. Amah hniksaknak ding hrangah, van ihsin hminsinnak an duh. 12 Jesu cu nasa zetin a lung sungin a hrûm ih, “Ziangah so tuih san minungpawl in hminsinnak an duh lawmmam? Thungaiin ka lo sim, tuih san mi hnenah Pathian in hminsinnak a pe hrimhrim lo ding,” tiah a ti. 13 Cule anmah cu tân tain lăwng sungah a lut ih, tili khat lam ralah a feh.

8:11^a Mat 12:38

Farasipawl le Herod Thilnu

14 Dungthluntupawl in sang ken an hngilh ih, lăwng sungah sang hlăwm khat lawng an nei. 15 ^aCun Jesu in, “Farasipawlih thilnu le Herod milaipawlih thilnu kha va fimkhur uh,” tiah thu a cah hai.

8:15^a Mat 14:1; Luk 12:1; 1Ko 5:6-8

16 Cule annih in cuih thu cu an relkhawm ih, “Hitiih a tinak săn cu sang zianghman kan rak ken lo ruangah a si ding,” tiah an ti.

17 ^aJesu in ziang an relkhawm rero ti a thei ih, an hnenah, “Sang zianghman kan neih lo ruangah a si hi tiah ziangah so nan relkhawm rero? Ziangah so theifiang lo le theithiam loih nan um? Nan thinlung a ruh hrih lai maw? 18 Mit nei na cingin, ziangah so nan hmuh lo? Hna nei na cingin, ziangah so nan theih lo? Cule ziangah so nan man nawn lo? 19 ^bMinung 5000 hrangih sang hlăwm nga ka phel laiah khan, an hlah mi a nepnawi kho ziang zat khat nan sar?” tiah a sut hai. Cule annih in, “Kho hleihnih,” tiah an ti.

8:17^a Isa 6:9-10

8:19^b Mat 14:20; Luk 9:17; Joh 6:13

20 ^aCule Jesu in, “Mi 4000 hrangih sang hlăwm sarih ka phel laiah kha teh, an hlah mi a nepnawi khopi ziang zat khat so nan sar?” tiah a ti.

8:20^a Mat 15:37

Cule annih in, “Khopi sarih,” tiah an ti.

21 Cule an hnenah, “Ziangtin saw theithiam loin nan um hrih lai?” tiah a ti.

Bethsaida ih Mitcaw pa Damternak

22 ^aCun Jesu cu Bethsaida khua ah a feh ih, a hnenah mitcaw pa pakhat an rak hruai, cule thâm dingin Jesu an dil. 23 Anih in mitcaw paih kut cu a kai ih, khaw lengah a hruai. A mit ah cil a phui ih, a parah a kut a suang. Cule, “Ziang tal na hmu maw?” tiah a sut.

8:22^a Mat 11:21; Joh 9:1

24 Mitcaw pa cu van a tau ih, “Minung ka hmu, asinan thingkung feh rero vek an si,” tiah a ti.

25 Jesu in cu paih mit ah a kut a suangsal ih, khua hmu dingin a tuah. A mit cu a vângter ih ziangkim fiang zetin a hmu. 26 Cun Jesu in a inn ah a tlunter ih, “Khaw sungah va lutin, khaw sung mi zohman sim hlah,” tiah a ti.

Jesu Khrih a Si ti Phuannak

27 Jesu le a dungthluntupawl cu cuih hmun suahsanin, Kaisaria Filipi khawpi kiangkapih khawtepawl an tlâwng. Lamlak ah Jesu in a dungthluntupawl hnenah, “Mi in keimah hi zo in ti so?” tin a sut hai.

28 ^aAnnih in an let ih, “Baptisma petu John a si an lo ti; mi dang pawl in Elijah a si an lo ti; a dang pawl in profet pakhat khat a si an lo ti,” tiah an ti.

8:28^a Mal 4:5; Mat 3:1

29 ^aJesu in an hnenah, “Nannih in teh kei hi zo ka si tiah in ti?” tiah a ti hai.

8:29^a Joh 6:69

Peter in a sawn ih a hnenah, “Nangmah cu Khrih na si,” tiah a ti.

30 ^aCu tikah Jesu in khoh zetin, “Ka thuhla hi zohman sim hlah uh,” tiah thu a tiam hai.

8:30^a Mat 8:4; Luk 9:21

Jesu in a Thih ding le a Thawhsal ding Thu a Phuang

31 ^aCule anih in an hnenah, Minung Fapa in thil tampi a tuar ding, miupapawl le puithiam sâng pawl le Dān zirhtupawl in an hnáwng ding ih, an that ding, cule ni thum hnuah a thosal ding ti zirh a thawk. 32 ^bCuih ṭawngkam cu langhnganin a sim lawlaw hai. Cule Peter in a dang deuhah Jesu cu a hruai ih, kawk a thawk.

8:31^a Mat 8:20; 16:21; Apo 2:23

8:32^b Joh 18:20

33 ^aHeraw tahratin Jesu cun a dungthluntupawl cu a zoh ih, Peter cu a kawk, “Setan, ka dungah feh aw! Ziangahtile nang cun Pathian thilpawl ngaihsak loin, minung thilpawl na ngaihsak sawn a si,” tiah a ti.

8:33^a Mat 4:10

34 ^aJesu in mipi le a dungthluntupawl a hnenah a kokhawm ih, “Keimah i thlun a duhtu pauhpauh cun amah le amah êl-aw sehla, amai khraws lain i thlun seh. 35 ^bZiangahtile zokhal a nunnak humhim a duhtu cun a nunnak a hloh ding. Asinan zokhal keimah ruang le thuthangṭha ruangih a nunnak a hlohtu cun a nunnak a humhimngah ding. 36 Ziangahtile mi pakhat in leitlun pumpi hi neiin amai nunnak a hloh asile, a hrangah ziang hlawknak so a um? 37 Asilole a nunnak thlĕngnak ding hrangah minung in ziang so a pek ding? 38 ^cZiangahtile zokhal hi uire le sual i khat san minungpawl lakah hin, keimah le ka kamsuakthupawl a zahpitu cu Minung Fapa in a Paih ropitnak le a thianghlim mi vancungmipawl thawi a rat tikah a zahpi ve ding,” tiah a ti.

8:34^a Mat 10:38; Luk 14:27

8:35^b Joh 12:25

8:38^c Mat 8:20; Luk 12:9; 1Th 2:19

9

1 ^aCule Jesu in an hnenah, “Thungaiin ka lo sim, hi tawkih a dīng mi, mi hrekkhat cu huham thawi Pathian uknak a ra thlen an hmuh lai hlanlo, thihnak tep hrimhrim lo ding mi an um,” tiah a ti.

9:1^a Mat 24:30; Luk 22:18

Jesu Hmuihmel Thlĕngnak

2 ^aNi ruk hnuah Jesu in Peter, James le John cu a hruai hai ih, anmah vial tlang sâng parah a kaisohpi. Cule Jesu cu an hmaiah a hmuihmel a thlĕng. 3 ^bA hnipuan cu an tleu ih, vur bangin an var, leitlun puan sawptu zohman in cu tluk varin an tuah thei lo ding. 4 Cule an hnenah Elijah le Mosi an rung lang ih, Jesu thawn an beaw rero. 5 ^cCun Peter in a sawn ih Jesu hnenah, “Rabbi, hi tawkih kan um hi a ṭha, thlam pathum in kan sak pei. Na hrangah pakhat, Mosi hrangah pakhat, Elijah hrangah pakhat,” tiah a ti. 6 Ziangruangahtile an ṭih tuk ih, Peter in ziang ṭawng ding dang a thei lo.

9:2^a Mat 4:21

9:3^b Mat 28:3

9:5^c Mat 23:7

7 ^aCule mero a rung zām ih a run hliap hai, cule mero lak ihsin aw pakhat in, “Hihi ka duhdawt zet mi ka Fapa a si, a thu ngaithla uh!” tiah a ti. 8 Cuveten an kiangkap an zoh tikah, an hnenih um Jesu siarlo, zohman an hmu nawn lo.

9:7^a Suah 24:16; Mat 3:17

9 ^aTlang par ihsin an rung ṭum laiah, Jesu in mithi lak ihsin Minung Fapa a thawhsal lai hlanlo, an hmuh mi thilpawl zohman sim lo dingin thu a pe hai.

9:9^a Mat 8:20

10 Cuih ṭawngkam cu cingin, “Mithi lak ihsin thawhsal a ti mi hi ziang a si pei?” tiah pakhat le pakhat an sutaw rero.

11 Cule a hnenah, “Ziangah so Dān zirhtupawl in Elijah a ra hmaisa tengteng ding an ti?” tiah an sut.

12 ^aCun Jesu in a sawn hai ih an hnenah, “Elijah cu a ra hmaisa taktak ding ih, thil hmuahhmuah a rĕmṭhasal thluh ding. Asinan ziangruangah so Minung Fapa cu thil tampi a tuar ding ih, hmuhsuam a si ding tiih ngan a si? 13 ^bNan hnenah ka lo sim a si, Elijah cu a ra zo, amai thuhla ngan a si vekin, an tuah duh mi hmuah in a parah an rak tuah,” tiah a ti.

9:12^a Mat 8:20; Luk 23:11

9:13^b Mat 11:14

Khawse Bawrhhlawh Pawlh Mi Nauhak pa Damternak

14 Jesu cu dungthluntu dang pawl hnen a thlen tikah, mipi tampi in an kulh ih, Dān zirhtupawl le dungthluntupawl thu an el-awk rero kha a hmu. 15 Mipi zaten Jesu an hmuh veten an mang a bang zet. A hnenah an va tlân ih, cibai an bûk. 16 Cule Jesu in Dān zirhtupawl hnenah, “Anmah thawn ziang thu nan êlaw rero?” tiah a sut hai.

17 Mipi lak ihsin mi pakhat in a sawn ih, “Zirhtu pa, khawsia in ṭawng thei loih a pawlh mi ka fapa cu na hnenah ka rak hruai. 18 Khawsia ih a kaih tinten leilung ah a hlăwnaw, a kâ ah a cilbuanra a suak, a hacâng a rial ih, a ṭawl vivo. Cuih khawsia dawisuak dingin na dungthluntupawl hnenah ka sim nân, an dawisuak thei lo,” tiah a ti.

19 Jesu in a sawn ih, “Maw zumnak nei lo tuih san minungpawl, ziangtik tiang so ka lo zāwi ding? Nauhak pa cu ka hnenah rak hruai hnik uh,” tiah a ti. 20 Cule Jesu hnenah an ratpi. Khawsia in Jesu a hmuh veten, nauhak pa cu a dirhcaih, leilung ah a rīl ih a kâ ihsin buanra a suak ciamco.

21 Jesu in, “Hitiih a cannak hi ziang tluk a rei zo?” tiah a pa a sut.

A pa in, “A sentet lai ihsin a si zo. 22 Vei tampi cu khawsia in amah that dingin meisa sungah le tidai sungah a hlăwn ṭheu. In bawm dingin thil ziang tal na tuah thei ah cun, in lainat hram aw,” tiah a ti.

23 ^aJesu in a hnenah, “Na zum thei asile, zumtu hrangah cun thil ziangkim a cang thei a si,” tiah a ti.

9:23^a Mat 21:21; Joh 11:40

24 Nauhak paih pa cu a ausuak lohli ih, mitthli thawn, “Bawipa, ka zum a si, ka zumlonak in bawm aw!” tiah a ti.

25 Jesu in mipi ra tlankhawm kha a hei hmuh tikah, thlarau bawrhhlawh cu hitin a kawk, “Nang, ṭawng thei lo le hnaset thlarau, a sung ihsin tlân awla, ra lutsal nawn hlah, tiah thu ka lo pe!” tiah a ti. 26 Cun thlarau cu a au ih, nauhak pa kha a dirhcaih, cule a tlânsuak. Nauhak pa cu mithi vekah a cang ih, mi tampi in, “A thi a si,” tiah an ti. 27 Asinan Jesu in a kut in a vun kaitho ih, a hung ding.

28 Inn sungih Jesu a luh tikah, a dungthluntupawl vial lawng in, “Ziangah so kannih hmuah in kan dawisuak thei lo?” tiah an sut.

29 Jesu in, “Thlacamnak le rawl ulhnak lo cun, hivek khawsia cu dawisuah theih a si lo,” tiah a ti hai.

Jesu in a Thih ding le a Thawhsal ding Thu a Simsal

30 Cu tawk ihsin an păwk ih, Galili peng paltlăngin an feh. Jesu in a dungthluntupawl thu a zirh phah ruangah an umnak zohman ih theih ding a duh lo. 31 ^aAnih in an hnenah, “Minung Fapa hi mi kut ah phiarsawm a si ding ih an that ding, an thah hnu ni thumnak ah a thosal ding,” tiah a ti. 32 ^bAsinan a sim mi cu an rak theithiam lo, cu cingin an sut ngam lo.

9:31^a Mat 8:20; Apo 2:23

9:32^b Luk 2:50; Joh 12:16

Zo so Mithupibik?

33 ^aCun Kapernaum khua a thleng. Cule inn sungih a um laiah, Jesu in an hnenah, “Lamzin tluanah ziang thu so nan el-awk rero?” tiah a sut hai. 34 ^bLamzin tluanah zo a thupibik ding ti an el-awk ruangah daiten an um. 35 ^cCule Jesu cu a to ih, dungthluntu hleihnih pawl kha a ko hai, an hnenah, “Zokhal mithupibik si a duhtu cu mitenaubik si hmaisa ta sehla, mi hmuahhmuah ih siahhlawh si seh,” tiah a ti. 36 Cun nauhakte pakhat a la ih an laiah a ret. Nauhak pate cu a kut in a cawi ih an hnenah, 37 ^d“Zokhal hivek nauhakte te pawl lakih pakhat ka hmin ih a rak cohlangtu cun, keimah i cohlang a si. Cule zokhal keimah i cohlangtu cu keimah si loin, i thlahtu a cohlang a si sawn,” tiah a ti.

9:33^a Mat 4:13

9:34^b Luk 22:24

9:35^c Mat 18:4; Luk 22:26

9:37^d Mat 10:40

In Do Lo Tu cu Kan Lam Ṭang a Si

38 ^aJohn in a sawn ih Jesu hnenah, “Zirhtu pa, kanmah in thlun lo tu mi pakhat na hmin ih khawse dawisuaktu kan hmu ih, kanmah in thlun lo ruangah kan kham ta,” tiah a ti.

9:38^a Mip 11:27-29

39 Asinan Jesu in, “Kham hlah uh, ziangahtile ka hmin ih thilmak a tuahtu cun i relse menmen lo ding. 40 ^aZiangahtile in do lo tu cu kan lam ṭang a si. 41 ^bZiangahtile zokhal Khrih ta nan si ruangih ka hmin ih ti no khat a lo petu cu, thungaiin ka lo sim, a lawmman a hloh hrimhrim lo ding.

9:40^a Mat 12:30; Luk 11:23

9:41^b Mat 10:42

Mi Tlukter Thu

42 ^a“Zokhal keimah i zumtu, hi nauhakte te pawl lakih pakhat a tlutertu cu a hngawng ah rial lung thlaih tahratin tifinriat sungah hlăwn sehla a hrangah a ṭhasawn. 43 ^bNa kut in a lo tlukter asile, tán mai aw, taksa kim loih nunnak sungih luh cu kut hnih thawi hell, a mit dah lo mi meisa sungih feh hnakin na hrangah a ṭhasawn.

9:42^a Mat 5:29; Luk 17:2

9:43^b Mat 5:29

44 ‘Cu tawkih an tholung cu an thi dah lo ih,
Meisa khal a mit dah lo.’

45 ^a“Cule na ke in a lo tlukter asile, tán mai aw, kebái ih nunnak sungih luh cu ke hnih thawi hell, a mit dah lo mi meisa sungih thlak na si hnakin na hrangah a ṭhasawn.

9:45^a Mat 5:29

46 ‘Cu tawkih an tholung cu an thi dah lo ih,
Meisa khal a mit dah lo.’

47 ^a“Cule na mit in a lo tlukter asile, phawrhsuak mai aw, mit pakhat thawi Pathian uknak sungih na luh ding cu, mit pahnih thawi hell meisa sungih thlak na si hnakin na hrangah a ṭhasawn.

9:47^a Mat 5:29

48 ^a‘Cu tawkih an tholung cu an thi dah lo ih,
Meisa khal a mit dah lo.’

9:48^a Isa 66:24; Mat 25:41

49 ^a“Ziangahtile mi kip meisa ih alter an si ding ih, thawinak kip cu ci ih alter an si ding.

9:49^a Pui 2:13

Cite

50 ^a“Cite cu a ṭha, asinan cite in a alnak hloh ta hnik sehla, ziangtin al ko nan tuahsal thei ding? Nanmah ah cite nei uh, pakhat le pakhat remawten um uh,” tiah a ti.

9:50^a Mat 5:13; Luk 14:34-35; Rom 12:18; 2Ko 13:11; Kol 4:6; 1Th 5:13

10

Nupi Mâk Thu

1 ^aCu tawk hmun ihsin Jesu cu a păwk ih, Jordan tiva ralkhat lam ihsin Judia peng ah a feh. Cule mi tampi in an ra pansal ih, a zirh kel vek ten thu a zirhsal.

10:1^a Mat 4:23; Joh 10:40

2 Farasipawl a hnenah an ra ih, “Pasal in a nupi mâk hi Dān in a siang maw?” tiah hniksakin an sut.

3 Cule Jesu in a sawn hai ih an hnenah, “Mosi in ziangtin thu a lo pe?” tiah a ti.

4 ^aAnnih in, “Mosi cun mâknak ca a ngan pei ih, a mâk thei a si in ti,” tiah an ti.

10:4^a Dnp 24:1-4; Mat 5:31

5 ^aCule Jesu in a sawn hai ih an hnenah, “Nan lung a ruh tuk ruangah, cuih thupek cu Mosi in nan hrangah a ngan a si. 6 ^bAsinan sersiam thawk ihsin, Pathian in mipa le nunau a tuah. 7 Cuti a si ruangah mipa in a nu le a pa a tân ta ding ih a nupi a kăwp ding. 8 ^cCule pahnih cu taksa pumkhat ah an cang ding, cutin annih cu mi pahnih an si nawn lo ih, taksa pumkhat an si sawn a si. 9 Curuangah Pathian ih a kăwm zo mi cu, minung in ṭhen hlah seh,” tiah a ti.

10:5^a Sam 95:8; Heb 3:15

10:6^b Sem 1:27; 5:2

10:8^c Sem 2:24; 1Ko 6:16

10 Inn sungih an um tikah, a dungthluntupawl in cuih thu cu an sutsal. 11 ^aJesu in an hnenah, “Zokhal a nupi a mâk ih nunau dang a ṭhitu cu a nupi a uiretsan a si. 12 ^bNunau khal in a pasal a ṭhen ih, pasal dang a neih ahcun, uire a si,” tiah a ti.

10:11^a Luk 16:18

10:12^b Rom 7:3; 1Ko 7:10-11

Jesu le Nauhakte te pawl

13 Cun a tham dingah nauhakte te pawl kha Jesu hnenah an rak hruai. Asinan a rak hruaitupawl cu a dungthluntupawl in an kawk. 14 ^aJesu in cumi a hmuh tikah, a lung a awi lo zet ih, “Nauhakte te pawl kha ka hnenah ra hai seh, kham hlah uh, ziangahtile Pathian uknak cu hivek mipawlih ta a si. 15 ^bThungaiin ka lo sim, zokhal nauhakte vekin Pathian uknak a cohlang lo tu cu, cuih uknak sungah a lut hrimhrim lo ding,” tiah a ti. 16 Cule nauhakte te pawl cu a cawi ih, an parah a kut suangin thlawsuah a pe.

10:14^a Mat 25:34

10:15^b Mat 18:3

Milian Tlangvalpa

17 ^aLamzin lam panih Jesu a feh laiah, mi pakhat a ra tlân ih a hmaiah khukbilin, “Zirhtu ṭha, kumkhaw nunnak ro ih ka co thei nak dingah ziang ka tuah pei?” tiah a sut.

10:17^a Luk 10:25; Apo 20:32

18 Jesu in a hnenah, “Ziangah so miṭha i ti? Pathian siarlo, zohman miṭha an um lo. 19 ^aThupekpawl na thei ko a si lo maw, ‘Uire hlah, laithat hlah, rûk ru hlah, theihpinak dik lo rel hlah, mi bum hlah, na nu le na pa upat aw,’ tipawl tla an si kha,” tiah a ti.

10:19^a Suah 20:12-16; Dnp 5:16-20; 24:14

20 Cule cu pa cun a sawn ih a hnenah, “Zirhtu pa, ka no lai ihsin cuih thil hmuahhmuah cu ka rak thlun thluh zo,” tiah a ti.

21 ^aCun Jesu in cu pa cu a zoh ih a duhdawt, cule a hnenah, “Thil pakhat te na sam hrih lai, va feh awla, na neih mi pauhpauh zuar awla mifarahpawl va pe aw, cule vanram ah hlawnthil na nei ding. Cule ra awla, khraws lain i thlun aw,” tiah a ti.

10:21^a Mat 6:20; Luk 12:33; Apo 2:45

22 Cule cu pa cu cuih ṭawngkam ah a thin a na ih, riahsia zetin a fehhlo; ziangahtile anih cun thil tampi a nei.

23 ^aJesu cun a kiangkap a zohkûal ih, a dungthluntupawl hnenah, “Milianpawl Pathian uknak sungih luh ding cu ziang tlukin so a har!” tiah a ti. 24 ^bCule a dungthluntupawl in a kamsuakthupawl an theih tikah, an khawruah a har. Asinan Jesu in a sawnsal hai ih an hnenah, “Falenuh, lennak a rinsantupawl hrangah Pathian uknak sungih luh ding cu ziang tlukin so a har! 25 ^cPathian uknak sungih milian luh hnakin, ṭhim hna kua sungih kalauk luh a áwlsawn,” tiah a ti.

10:23^a Sam 52:7; 1Ti 6:9-10, 17

10:24^b Mat 7:13-14; Joh 3:5

10:25^c Luk 12:16-20

26 Cuih thu cu an khawruah a har tuk ih, “Cuti asile zo so rundam si thei ding?” tiah an ti.

27 ^aCule Jesu in anmah cu a zoh hai ih, “Cumi cu milai hrangah cun thil cang thei a si lo, asinan Pathian hrangah cun thil cang thei a si. Ziangahtile Pathian hrangah cun thil hmuahhmuah a cang thei a si,” tiah a ti.

10:27^a Mat 19:26

28 ^aCun Peter in, “Ngai hnik, ziang hmuahhmuah tân tain nangmah kan lo thlun si khawh,” ti a thawk.

10:28^a Mat 4:19

29 Jesu in a sawn ih, “Thungaiin ka lo sim, keimah ruangah le thuthangṭha ruangah, a inn siseh, a unaupawl siseh, a farnupawl siseh, a pa siseh, a nu siseh, a nupi siseh, a fātepawl siseh, a leirampawl siseh, a tân ta tu cu, 30 ^atuih san sungah inn, unau, farnu, nu, fāte le leiram a let 100 le hremnakpawl tla a ngah ding. Cule a ra lai ding mi san ah kumkhaw nunnak a ngah ding. 31 ^bAsinan mi tampi a hmaisabik pawl kha a netabikah an cang ding ih, a netabik pawl kha a hmaisabikah an cang ding,” tiah a ti.

10:30^a Mat 6:33

10:31^b Mat 19:30

Jesu in a Thih ding le a Thawhsal ding Thu a Vei Thumnak a Sim

32 Jerusalem lam panin an hung so ih, Jesu cu an hmaiah a feh, cule a dungthluntupawl cu an mang a bang. Cule ṭih phahin amah cu an thlun. Cun a dungthluntu hleihnih pawl cu hmun dang deuhah a hruaisal hai ih, a parih thil thleng ding mipawl sim a thawk. 33 ^aAnih in, “Ngai hnik uh, Jerusalem ah kan hung so ding ih, Minung Fapa cu puithiam sâng pawl le Dān zirhtupawl hnenah phiarsawm a si ding. Cun annih in thi dingin thu an ṭhen ding ih, Zentelpawlih kut ah an thlen ding. 34 ^bAn hmuhsuam ding, an vaw ding, a parah cil an phui ding ih, an that ding. Cule a ni thumnak ah a thosal ding,” tiah a ti.

10:33^a Luk 9:51

10:34^b Mat 16:21; Apo 2:23

James le John-ih Dilnak

35 Cun Zebedi-ih fapa James le John cu a hnenah rain, “Zirhtu pa, kan lo dil mi ziangkim in tuahsak hram dingah kan duh,” tiah an ti.

36 Cule Jesu in an hnenah, “Ziang lo tuahsak nan duh?” tiah a ti.

37 ^aAnnih in a hnenah, “Na ropitnak ah na vawrh lamah pakhat, na keh lamah pakhat nangmah thawn in toter aw,” tiah an ti.

10:37^a Mat 19:28

38 ^a Cu tikah Jesu in an hnenah, “Nan dil mi nan theithiam lo, ka in mi no nan in thei ding maw? Ka co ding mi baptisma nan co thei ding maw?” tiah a ti.

10:38^a Job 38:2; Mat 20:22; Luk 12:50

39 ^a Cule annih in a hnenah, “Kan ti thei ding,” tiah an ti. Jesu in an hnenah, “Ka in mi no cu nan in taktak ding, ka co ding mi baptisma khal nan co ko ding. 40 Asinan ka vawrh lam le ka keh lamih to dingih lo pek ding cu keimai thu a si lo, a rak timtuah cia mipawl hrangah a si sawn,” tiah a ti.

10:39^a Apo 12:2; Thu 1:9

41 Cule pahra pawl in cuih thu an theih tikah, James le John parah nasa zetih lungawi lo an thawk. 42 Asinan Jesu in a hnenah a kokhawm hai ih an hnenah, “Zentelpawl lakih uktu ih ruah mipawl cu an uk mipawl parah an lal zet ih, an mithupipawl in an mipi parah thuneihnak an hmang ti nan thei. 43 Asinan nannih lakah cun cu vekin si hlah seh; cuhnakin zokhal nan lakih mithupi si a duhtu cu nan siahhlawh si sawn seh. 44 Cule zokhal nan lakih mithupibik si a duhtu cu nan sál a si ding a si. 45 ^aZiangahtile Minung Fapa hman mi ih rĕn mi si dingah a ra lo, mi rian dingin le mi tampi tlen dingah a nunnak pe dingin a ra sawn a si,” tiah a ti.

10:45^a Mat 20:28

Mitcaw Barṭimias a Mit a Vâng

46 Cule Jeriko khua an va thleng. Jesu le a dungthluntupawl le mipi cu Jeriko khua ihsin an fehsuak laiah, Ṭimias-ih fapa mitcaw pakhat zinpi kapah toin kut a dawh. A hmin cu Barṭimias a si ih, a tican cu Ṭimias-ih fapa tinak a si. 47 ^aCule Nazareth Jesu a si ti a theih tikah, au a thawk ih, “David-ih Fapa, Jesu, ka parah zahngai hram aw!” tiah a ti.

10:47^a Mat 9:27

48 Cu tikah mi tampi in daiten um dingin an rak kawk. Asinan anih cun, “David-ih Fapa, ka parah zahngai hram aw!” tiah nasa sinsinin a au.

49 Cule Jesu cu a dīng ih, mitcaw pa cu a hnenah hruai dingin a fial hai. Mitcaw pa cu an ko ih, “Ṭih hlah, tho aw, a lo ko a si,” tiah an ti. 50 Cule a sinfen sirah a hlăwn, a tho ih, Jesu hnenah a feh.

51 ^aJesu in a sawn ih a hnenah, “Ziang lo tuahsak so na duh?” tiah a ti.

10:51^a Mat 23:7

Mitcaw pa in, “^aRabboni, khawhmuh thei ka duh,” tiah a ti.

10:51^a Rabboni: Aramik ṭawng a si ih, zirhtu tinak a si.

52 ^aJesu in, “Va feh aw, na zumnak in a lo damter zo,” tiah a ti. Cuveten khua a hmu ih, Jesu a thluncih.

10:52^a Mat 9:22

11

Jerusalem ah Jesu Ropi zetin a Lut

1 ^aJerusalem an naih vivo ih, Olif Tlang hramih um, Betfat khua le Bethany khua an thlen tikah, Jesu in a dungthluntu pahnih a hei thlah ih, 2 ^ban hnenah, “Nan hmaiih khua ah khin va feh uhla, khaw sung nan luh veten, zohman ih to dah lo mi lāk fa no an hren mi nan hmu ding. Cumi cu phawih uhla, rak hruai uh. 3 Cule mi pakhat khat in, ‘Ziangah so hitin nan tuah?’ tiah a lo ti asile, ‘Bawipa in a ṭul a si,’ tiah va ti uh. Cule hi tawkah a lo hruaitercih ding,” tiah a ti.

11:1^a Mat 21:17

11:2^b Mip 19:2; Dnp 21:3; 1Sam 6:7

4 Cule an feh ih, khawlak lamzin pahnih tawnawknak kăwtka lengih an hren mi lāk fa no cu an hmu, cule a hri an phawih. 5 Cu tawkih a dīng mi mi hrekkhat in, “Ziangah so lāk fa no cu nan phawih?” tiah an ti.

6 Cule annih in Jesu ih thu a pek hai vekin an sim ih, an rak siang. 7 ^aCun lāk fa no cu Jesu hnenah an hei hruai ih, a parah an hnipuanpawl an phah hnuah, Jesu a to. 8 Cule minung tampi in lamzin ah an hnipuanpawl an rak phah, mi dang cun hnahsawl an sat ih, lamzin ah an phah. 9 ^bA hmaiih a fehtupawl le a dung lam ihsin a thluntupawl cu an au ih,

11:7^a Zek 9:9

11:9^b Sam 118:25-26; Mat 23:39

“Hosana!
Bawipaih hmin ih ra cu thangṭhatin um seh!
10 ^aBawipaih hmin ih a ra ding mi,
Kan pa David-ih lalram cu thangṭhatin um seh!
Cungnungbikah Hosana!”

11:10^a Luk 2:14

tiah an ti.

11 ^aCule Jesu cu Jerusalem khaw sungah le temple kulh sungah a lut. Thil ziangkim a zohkûal ih, khua a tlâi thlang ruangah, hleihnih pawl thawn Bethany ah an feh.

11:11^a Mat 21:12, 17

Theipi Kung Camsiatnak

12 A thaisun Bethany khua ihsin an kirsal tikah, Jesu cu a ril a râwng. 13 ^aCule lam hla nawnah a hnah nîm ciaiciai mi theipi kung pakhat a hei hmu, a rah ka hmuh pangah tiin a hei pan, a va thlen tikah a hnah lawng a hmu, ziangahtile thei rah cān a si lo. 14 Jesu in a let ih theipi kung hnenah, “A kumkhuain zohman in na rah lo ei nawn hlah hai seh,” tiah a ti.

11:13^a Luk 13:6-9

A ṭawng mi cu a dungthluntupawl in an thei.

Jesu in Temple a Thianfai

15 Jerusalem an thlen tikah, Jesu cu temple kulh sungah a lut ih, temple kulh sungih thil zuartupawl le leitupawl dawisuah a thawk. Paisa thlĕngtupawlih cabuaipawl le thuro zuartupawlih tonakpawl khal a linglet ṭheh. 16 Cule temple kulh sung tual ih thil phurih vah khal a kham ṭheh.

17 ^aCun a zirh ih an hnenah,

11:17^a Isa 56:7; Jer 7:11

“‘Ka inn cu miphun zate hrangih thlacamnak inn tiah kawh a si ding,’

tiih ngan a si lo maw? Asinan suamhmangpawl pûk ah nan canter a si,” tiah a ti.

18 ^aCule Dān zirhtupawl le puithiam sâng pawl in cuih thu an theih tikah, amah thah thei dān ding an hawl. Asinan a zirh mi thu in mipi zate an khawruah a harter tuk ruangah, Jesu cu an ṭih.

11:18^a Mat 21:46; Luk 20:19

19 ^aZan lam a si tikah, Jesu cu khaw lengah a suak.

11:19^a Luk 21:37

A Ro Mi Theipi Kung

20 A thaizing lamzin ih an feh laiah, a hram ihsin a ro ṭheh mi theipi kung cu an hmu. 21 ^aCule Peter in a vun mang ih Jesu hnenah, “Rabbi, zoh hnik, na camsiat mi theipi kung cu a ro thluh zo,” tiah a ti.

11:21^a Mat 23:7

22 Cu tikah Jesu in a sawn hai ih an hnenah, “Pathian rinsan uh. 23 ^aZiangahtile thungaiin ka lo sim, zokhal a thinlung sungah rinhlelhnak nei loin, a sim mi thilpawl vekin a cang rori ding ti zumin hi tlang hnenah, ‘Ṭhawn awla, tipithuanthum sungah va tla aw,’ tiih a titu cu a ṭawng vekin a cang ding. 24 ^bCuruangah ka lo sim a si, thla nan cam tikah, nan dil mi thil pauhpauh ka ngah a si tiah zum uhla, cupawl cu nan nei ding.

11:23^a Mat 21:21

11:24^b Mat 7:7

25 ^a“Cule thlacam ih nan dil tikah, mi dang parah lungkimlonak nan neih asile, ngaidam uh, cule van ih a um mi nan Pa khal in nan mawhsualnakpawl a lo ngaidam ve ding. 26 Asinan mi dang mawhsualnakpawl nan ngaidam lo ahcun, vancung ih a um mi nan Pa khal in nan mawhsualnakpawl a lo ngaidam ve lo ding,” tiah a ti.

11:25^a Mat 6:14

Jesu-ih Thuneihnak Thu an Sut

27 Cule Jerusalem an thlengsal. Cun temple kulh sungih Jesu a feh laiah, puithiam sâng pawl, Dān zirhtupawl le miupapawl cu a hnenah an ra ih, 28 a hnenah, “Ziang thuneihnak in so hih thilpawl hi na tuah? Hih thilpawl tuah dingin zo in hih thuneihnak hi a lo pe?” tiah an sut.

29 Cu tikah Jesu in a sawn hai ih an hnenah, “Kei khal in thu pakhat ka lo sut ve ding ih, in let uh, cule ziang thuneihnak in hih thilpawl ka tuah ti ka lo sim ding. 30 John-ih baptisma kha van ihsin maw, milai hnen ihsin so a si? In sim hnik uh,” tiah a ti.

31 Cuih thu cu anmah ten an relkhawm ih, “ ‘Van ihsin a si,’ tiah kan ti asile, ‘Cuti asile ziangah so amah cu nan zum lo?’ tiah in ti ding. 32 ^aCun, ‘Milai hnen ihsin a si,’ tiah kan ti asile,” tiah an ti. Mipi an ṭih, ziangahtile mi hmuahhmuah in John cu profet taktak a si tiah an pawm.

11:32^a Mat 11:9

33 Cule annih in Jesu cu an sawn ih, “Kan thei lo,” tiah an ti.

Cule Jesu in a sawn hai ih, an hnenah, “Kei khal in ziang thuneihnak in hih thilpawl hi ka tuah ti ka lo sim ve lo ding,” tiah a ti.

12

Sabit Hmuan Ṭuanhlawhtupawl

1 ^aJesu in an hnenah tahṭhimnakpawl thawn thusim a thawk, “Mi pakhat in sabit hmuan a tuah ih, a kimvelin hruang in a kulh. Sabit sawrnak khur a lai ih, dawlsâng a sak. Cule hmuan ṭuanhlawhtupawl hnenah a pek ta ih, khualtlawngin a feh. 2 Cule sabit rah lawh a cût tikah, hmuan ṭuanhlawhtupawl hnen ihsin sabit rah hrekkhat la dingin, a siahhlawh pakhat a thlah. 3 Cule amah cu an kai ih, an vuak ih kutlawng in an thlah. 4 Cun an hnenah siahhlawh dang pakhat a thlahsal. Cu pa cu lungto in an deng ih, a lu an tuahmawh hnuah, ningzakzaih sawisain an thlah. 5 A dang a hei thlah lala, cule an rak that. A dang tampi khal a thlah, a hrek cu an rak vua ih, a hrek cu an that. 6 ^bCuruangah a duhdawt zet mi a fapa pakhat lawng a tâng. Netabikah anih khal cu an hnenah a thlah ih, ‘Ka fapa cu an ṭihzah ko ding,’ tiah a ti. 7 Asinan hmuan ṭuanhlawhtupawl cun, ‘Hi pa hi ro cotu pa a si, ra uh, that uhsi la, a co ding ro cu kan ta a si ding,’ tiah an ti. 8 Cule cu pa cu an kai ih an that, cule sabit hmuan sung ihsin an hlăwnsuak.

12:1^a Isa 5:1-7

12:6^b Heb 1:1-3

9 “Curuangah sabit hmuan neitu pa in ziangtin a tuah pei? A ra ding ih hmuan ṭuanhlawhtupawl cu a that ṭheh ding, cule a sabit hmuan cu a dang hmuan ṭuanhlawhtupawl hnenah a pe ding. 10 ^aCule an hnenah,

12:10^a Apo 4:11

‘Inn saktupawl ih an hnawn mi lungto kha,
A kilih lungto pawimawhbik ah a cang.
11 ^aHimi hi Bawipa ih tuah mi a si ih,
Kan mithmuh ah mangbangza a si,’

12:11^a Sam 118:22-23

tiih Cathiang sungih an ngan mi nan siar dah lo maw si?” tiah a ti.

12 ^aCule cuih a tahṭhimnak cu anmah a ṭawng săn a si ti an theih ruangah a kaihdān ding an hawl, asinan mipi an ṭih. Cule an tlansan ih an fehhlo.

12:12^a Mat 22:22

Kaisar hnenih Ngunkhuai Pek Thu

13 ^aCun a kamsuakthupawl in amah Jesu an awh thei nak dingah, Farasipawl le Herod-ih milaipawl cu a hnenah an hei thlah. 14 A hnen an thlen tikah, “Zirhtu pa, nang cu midik na si, hmaisăwng mi zohman na nei lo ih mi thleidăn na nei lo ti kan thei. Pathian lamzin cu dik zetin na zirh sawn a si ti kan thei. Kaisar hnenih ^bngunkhuai pek hi Dān in a siang maw, siang lo? 15 Kan pe ding maw, pe lo ding?” tiah an sut.

12:13^a Mat 22:16

12:14^b ngunkhuai: Cuzah hnenih pitling mipa lu man siah a si.

Asinan Jesu in an depdetzia kha a thei ih an hnenah, “Ziangah so in hniksak rero? Ka zoh dingah dinari paisa cu rak keng hnik uh,” tiah a ti.

16 An rak keng ih, Jesu in an hnenah, “Hihi zo-ih zuk a si ih, ziang a ngan aw?” tiah a ti.

Annih in, “Kaisar-ih zuk le hmin,” tiah an ti.

17 ^aCule Jesu in a sawn hai ih an hnenah, “Kaisar-ih thilpawl cu Kaisar hnenah pe uhla, Pathian-ih thilpawl cu Pathian hnenah pe uh,” tiah a ti.

12:17^a Rom 13:7

Cule a parah an mang a bang.

Thawhsalnak Thusuhnak

18 ^aCun thawhsalnak a um lo titu Sadusi hrekkhat a hnenah an ra ih thu an sut. 19 ^b“Zirhtu pa, Mosi in hitin in ngansak, ‘Mi pakhat cu fāte nei loin a nupi a thihsăn asile, a nupi cu a naupa in a ṭhi pei ih a u hrangah ci a thlahsak pei,’ tiin. 20 Cule unau pasarih an um. Upabik in nupi a ṭhi ih, cithlah nei loin a thi. 21 Cule a pahnihnak pa in cu nu cu a nupi ah a run ṭhit ih, cithlah tân loin a thi, a pathumnak khal cuti vek thothoin a cang. 22 An unau pasarih in cu nu cu nupi ah an ṭhi ih, cithlah tân loin an thi ṭheh. Netabikah cu nu khal cu a thi ve. 23 Curuangah thawhsalnak ih an thawhsal tikah cu nu cu zo bik ih nupi a si ding? Ziangahtile an pasarih ten nupi ah an nei,” tiah an sut.

12:18^a Apo 4:1; 23:8; 1Ko 15:12

12:19^b Dnp 25:5

24 ^aJesu in a sawn hai ih an hnenah, “Cathiangpawl le Pathian huham nan theih lo ruangah nan fehpêng a si lo maw? 25 ^bZiangahtile thihnak ihsin mithipawl an thawhsal tikah, an ṭhiaw nawn lo ding, ṭhitumnak khal a um nawn lo ding ih, vanram ih um vancungmipawl vek an si sawn ding. 26 ^cAsinan mithi thawhsalnak thu ah cun, Pathian in thing bŭk lak ihsin, ‘Keimah cu Abraham-ih Pathian, Isak-ih Pathian le Jakob-ih Pathian ka si,’ a ti mi Mosi cazual sungah nan rak siar dah lo maw si? 27 Pathian cu mithipawlih Pathian a si lo, a nung mipawlih Pathian a si sawn. Curuangah nan fehpêng nasa a si,” tiah a ti hai.

12:24^a 2Ti 3:15-17

12:25^b 1Ko 15:42, 49

12:26^c Suah 3:6, 15

Thupek Pawimawhbik

28 ^aCun Dān zirhtupawl lakih pakhat a ra ih, an thu relkhawm mi a ra ngai. Jesu in ṭha tukin a rak sawn thiam ti a hmuh tikah, “Thupek hmuahhmuah lakah ziang a pawimawhbik?” tiah a sut.

12:28^a Luk 10:25-28

29 Jesu in a hnenah, “Thupek hmuahhmuah lakih pawimawhbik mi cu, ‘Maw Israel, ngai hnik, Bawipa kan Pathian, Bawipa cu pakhat a si. 30 ^aBawipa na Pathian cu na thinlung zaten, na nunnak zaten, na ruahnak zaten le na cahnak zaten na duhdaw pei.’ Hihi a pawimawhbik mi thupek a si. 31 ^bCule a pahnihnak cu hihi a si, ‘Nangmah le nangmah na duhdawtawk vekin na innhnen na duhdaw pei.’ Hi thupekpawl hnakih pawimawhsawn thupek a um lo,” tiah a sawn.

12:30^a Dnp 6:4-5

12:31^b Pui 19:18; Dnp 6:5; Mat 5:43

32 ^aDān zirhtu pa in a hnenah, “Zirhtu pa, na sim mi cu thutak a si, ziangahtile Pathian pakhat lawng a um, amah siarlo Pathian dang a um lo. 33 ^bCule thinlung zaten, theihthiamnak zaten, nunnak zaten le cahnak zateih amah Pathian duhdawt le mah le mah duhdawtawk vekih mai innhnen duhdawt cu meiur thawinak hmuahhmuah le raithawinak dang hmuahhmuah hnakin a pawimawhsawn,” tiah a ti.

12:32^a Dnp 4:35; Isa 45:6, 14

12:33^b Pui 19:18; Dnp 6:5; 1Sam 15:22; Hos 6:6; Mik 6:6-8; Heb 10:8

34 ^aFimfel zetih a sawn kha Jesu in a hmuh tikah, a hnenah, “Pathian uknak thawn nan hla-aw lo,” tiah a ti. Cuih hnuah zohman in thu an sut ngam nawn lo.

12:34^a Mat 3:2; Luk 20:40

Khrih cu Zo-ih Fapa a Si?

35 ^aCun temple kulh sungih Jesu thu a zirh laiah, a sawn hai ih, “Ziangtin so Dān zirhtupawl in Khrih cu David-ih Fapa a si tiah an ti thei? 36 ^bZiangahtile amah David rori in Thlarau Thianghlim in,

12:35^a Mat 26:55

12:36^b 2Sam 23:2; Sam 110:1; Mat 22:44

‘Bawipa in ka Bawipa hnenah,
“Na ralpawl na ke retnak ih ka tuah hlanlo,
Ka vawrh lamah to aw,” a ti,’

tiah a ti.

37 ^a “ Curuangah David rori in, ‘Bawipa,’ tiih a kawh asile, ziangtin so a Fapa a si thei ding?” tiah a ti. Cule mipi tampi cun lungawi zetin an rak ngai.

12:37^a Joh 12:9

Dān zirhtupawl kha va Ralring Uh

38 Cun a thu zirhnak ah Jesu in, “Dān zirhtupawl kha va ralring uh, annih cu an kâwrfual thawi tawihvah le dawr hmunpawl ah mi ih upatnak pek an duh. 39 ^aSinakok sungah tonak pawimawhbik bik an duh ih, puai hmunpawl ah a sangbik hmunpawl an duh. 40 Nuhmeipawlih inn an láwng ih, mi bumnak ah rei zetzet thla an camawter. Hipawl hin thuṭhennak nasasin an tuar ding,” tiah a ti.

12:39^a Luk 11:43

Nuhmeinuih Thawhhlawm

41 ^aJesu cu thawhhlawm bawm lam hawiin a to ih, thawhhlawm bawm sungih mipi paisa an thlak rero kha a zohhliah. Milian tampi cu tampi an thlak. 42 Cun nuhmei farah nu a ra ih, ^bkuadron pakhat tluk ^clepton pahnih a thlak.

12:41^a 2Sp 12:9; Joh 8:20

12:42^b kuadron: Grik ṭawng a si ih paisa man malbik lakih pakhat a si.

12:42^c lepton: Grik ṭawng a si ih paisa man malbik a si.

43 Jesu in a dungthluntupawl a hnenah a ko hai ih an hnenah, “Thungaiin ka lo sim, thawhhlawm bawm sungih paisa a thlatu dang pawl hmuahhmuah hnakin, hi nuhmei farah nu in a thla tamsawn a si. 44 ^aZiangahtile mi dang pawl hmuahhmuah cun an neih hleifuan mi sung ihsin an thla. Asinan anih cun rethei zet cingin a nunkhawsaknak dingih a neih mi zaten a thla a si,” tiah a ti.

12:44^a 2Ko 8:12

13

Jesu in Temple Siat ding Thu a Sim

1 Temple kulh sung ihsin Jesu a suah zawngah, a dungthluntupawl lakih mi pakhat in, “Zirhtu pa, zoh hnik, hi lungtopawl le innpipawl hi an va maktak em!” tiah a ti.

2 ^aCule Jesu in a sawn ih a hnenah, “Hi tluk inn ropi pawl hi na hmu ko lo maw? Lungto pakhat parih lungto a suangaw mi pakhat hman tâng loin, hlăwn ṭheh an si leh ding,” tiah a ti.

13:2^a Luk 19:44

San Cemnak ding Hminsinnak

3 ^aTemple hmai ral Olif Tlang parih Jesu a to laiah, Peter, James, John le Andru tla anmah te lawngin a hnenah, 4 “Cuih thilpawl cu ziang tikah a thleng ding? Hih thilpawl an thlen famkim zik tikah, ziang vek hminsinnak so a um ding? In sim aw,” tiah an sut.

13:3^a Mat 21:1

5 ^aJesu in a let hai ih, hitin sim a thawk, “Zohman ih an lo bumlonak dingah va fimkhur uh. 6 Ziangahtile ka hmin in mi tampi an ra ding ih, ‘Khrih cu keimah hi ka si,’ tiah an ti ding, cule mi tampi an bum ding. 7 Ral doawknak thupawl le ral doawk ding titi thupawl nan theih tikah, nan thinphâng hlah uh, ziangahtile cuih thilpawl cu an ra thleng tengteng ding. Asinan a cemnetnak cu a si hrih lo ding. 8 Ziangahtile miphun pakhat le pakhat an doaw ding ih, ram khat le ram khat an doaw ding. Cule hmun dangdangah ling a hnîn ding ih, mangṭam le buainak a thleng ding. Hipawl cu nau hrin nat hramthăwknak an si.

13:5^a Jer 29:8; Efe 5:6; 2Th 2:3; 1Ti 4:1; 2Ti 3:13; 1Joh 4:6

9 ^a“Nanmah hrang hrimhrim ah ralring uh, ziangahtile khawnsilpawl hnenah an lo thlen ding, sinakok sungah an lo vaw ding, cule an hnenih thutheihpitu dingah keimah ruangah uktupawl le siangpahrangpawl hmaiah hruai nan si ding. 10 Cule thuthangṭha cu miphun hmuahhmuah hnenah phuan hmaisak a si ding. 11 ^bAn lo kai ih mi kut ih an lo thlen tikah, ziang ka ṭawng ding tiin khawruahhar cia hlah uh, a sawndān ding khal ruat cia hlah uh. Cumi tikcucān ih a lo pek mi kha ṭawng mai uh, ziangahtile a ṭawngtu cu nanmah nan si lo ih, Thlarau Thianghlim a si sawn.

13:9^a Mat 10:17

13:11^b Mat 10:19-20; Luk 12:11-12

12 ^a“Unau le unau thi dingin an phiarsawmaw ding, pa in fa a phiarsawm ding, falepawl in an nu le an pa an dodal ding ih, thihnak tiang an thlen ding. 13 ^bKa hmin ruangah mi hmuahhmuah in an lo hua ding. Asinan a cemnet tiangih a tuarsuaktu cu rundam a si ding.

13:12^a Mik 7:6; Mat 10:21; Luk 12:51-53

13:13^b Mat 10:22; Joh 15:21

Harsatnak Rapthlak

14 ^a“Profet Daniel ih sim mi fihnungza siatnak cu hmun thianghlim ih a dīn nan hmuh tikah, cumi a siartu cun theithiam seh. Cumi nan hmuh tikah, Judia peng ih umpawl cu tlangpawl ah tlân hai seh. 15 Inn parih um cu inn sungah rung ṭum hlah seh, thil la dingin a inn sung khalah lut hlah seh. 16 Cule ló ih um cu a hnipuan la dingin a inn ah tlungkir hlah seh. 17 ^bCuih cān ih favun mipawl le nausen hnawi fawp neipawl cu an hmakhua a pit a si! 18 Nan tlan cān cu thlatang a silonak dingah thlacam uh. 19 ^cZiangahtile cuih ni ah cun harsatnak cu Pathian ih sersiam mi sersiamnak hramthăwk ihsin atu tiangih a um dah kel lo mi le hmai lam khalih a umsal nawn lo ding mi harsatnak a thleng ding. 20 Bawipa in cuih cān cu a tawiter lo ahcun, zohman a tāng an um lo ding. Asinan a hril mi, hril mipawl ruangah cuih cān cu a tawiter ding a si. 21 ^dCun zo in simaw, ‘Zoh hnik, Khrih cu hi tawkah a um,’ tiin simaw, ‘Zoh hnik, khi tawkah a um,’ tiin simaw an lo ti asile, va zum hlah uh. 22 ^eZiangahtile khrih deu pawl le profet deu pawl an suak ding ih, cang thei sehla, hril mipawl hman an bum thei nak dingah hminsinnakpawl le mangbangzapawl an hmuh ding. 23 ^fFimkhur uh, ngai hnik uh, a hlankhanin thil ziangkim ka lo sim cia a si.

13:14^a Dan 9:27; 11:31; 12:11

13:17^b Luk 23:29

13:19^c Dan 9:26; Joe 2:2

13:21^d Luk 17:23

13:22^e Joh 4:48; 2Th 2:9-10

13:23^f 2Pe 3:17

Minung Fapa Ratsalnak

24 “Cuih harsatnak cān hnu, cuih nipawl ah ni a thim ding ih, thlapi in a êng a suah lo ding, 25 ^a van-ih arsipawl tla an tla ding ih, van ih a um mi huhampawl tla an hnîn ding. 26 ^bCun Minung Fapa cu huham nasa zet le ropitnak thawn mero parih a rat kha an hmu ding. 27 ^cCule a vancungmipawl a thlah ding ih, lei kil li ihta a hril mipawl cu leilung dĕng ihsin van dĕng tiang a fĭnkhawm ding.

13:25^a Isa 13:10; 34:4; Joe 2:10; Mat 24:29

13:26^b Dan 7:13; Thu 1:7

13:27^c Zek 2:6

Theipi Kung Thu

28 “Hi tahṭhimnak hi theipi kung ihsin zir hnik uh: a hnge note te suakin, a hnahpawl an cerhsuah tikah, ṭhal cān a nai thlang a si ti nan thei. 29 Cuvek thothoin, nannih khal in cuih thilpawl a ra cang ti nan hmuh tikah, Minung Fapa rat cān cu a nai tuk thlang, cumi cu sângka hram a thleng ti thei uh! 30 ^aThungaiin ka lo sim, cuih thil hmuahhmuah a kim thluh lai hlanlo tuih san minungpawl hi an hloral hrimhrim lo ding. 31 ^bLei le van an hloral ding, asinan ka kamsuakthupawl cu an hloral hrimhrim lo ding.

13:30^a Luk 17:25

13:31^b Mat 5:18

Zohman in a Ni le Cān an Thei Lo

32 ^a“Asinan cuih ni le cuih tikcucān cu zohman in an thei lo, van ih um vancungmipawl hmanin an thei lo, Fapa khal in a thei lo, Pa lawngin a thei. 33 A tikcu ra thlen ding cān nan theih lo ruangah, fimkhur uh, ralringten thlacam uh. 34 ^bZiang thawn a bangrep ti le, khualtlawngih a fehtu pa, a inn tân tain, a siahhlawhpawl hnenah thuneihnak le an ṭuanvo cio felten pe tain, sângka kiltu pa kha ṭhaten sângka kil dingin a cah ta tu pa vek a si.

13:32^a Apo 1:7; 1Th 5:1-2

13:34^b Mat 25:14

35 “Intêk pa cu, zan lamah maw, zanṭim ah maw, zing arkhuan cān ah maw, zing lamah maw a ra ding ti a cān nan thei lo, curuangah ralringin um uh. 36 Culole rin lo piin a ra ding ih, nan ihthah lai a lo táwng pang ding. 37 ^aNan hnenih ka sim mi hi mi hmuahhmuah hnen khalah ka sim a si, ‘Ralringten um uh!’ ” tiah a ti.

13:37^a Luk 12:37

14

Jesu Thah an Tum

1 ^aLanta Puai le Thilnu telh lo Sang Puai tuahnak ding ni hnih lawng a duh. Puithiam sâng pawl le Dān zirhtupawl in Jesu kha hrăwkhrawl zetin a kaihdān ding le thah thei dān ding an hawl. 2 Asinan, “Puai ni ah cun si hlah seh, mipi an buai pang ding,” tiah an ti.

14:1^a Mat 12:14; Joh 11:55

Bethany ah Jesu Hriak Thih a Si

3 ^aBethany khua ih a rak phār dah mi Simon inn ah cabuai a hil laiah, nunau pakhat in hriak rimhmui mankhung ^bspaiknard cu alabasṭa lung ih tuah mi thâwl in a rak keng ih, a thâwl cu a khuai hnuah Jesu-ih lu ah a tawih. 4 Mi hrekkhat cun thinhengin, “Ziangah so hi hriak rimhmui cu a riarálter men? 5 Ziangahtile cumi cu dinari 300 hnakih tam ah zuarin mifarahpawl rak pek tak ding,” tiah an ti. Cule nunaunu cu nasa zetin an sawisel.

14:3^a Mat 21:17; Luk 7:37-39

14:3^b spaiknard: Nard kung ihsi an tuah mi hriak rimhmui a si.

6 Jesu in, “Um ko seh, ziangah so amah cu nan tibuai rero? Anih in ka parah thil ṭha a tuah a si. 7 ^aZiangahtile mifarahpawl cu nan hnenah an um ringring ko, nan duh tikcān pauh ah an parah thil ṭha nan tuah thei. Asinan kei cu nan hnenah ka um ringring lo ding. 8 ^bAnih in a tithei tawk a tuah zo. In phumnak ding hrangih ka taksaruangpum hriak rimhmui a rak culh cia mi a si. 9 ^cThungaiin ka lo sim, hi thuthangṭha an simnak leitlun pumpi ah, hi nuih tuah mi khal amah hngilhlonak ah an sim ringring ding,” tiah a ti.

14:7^a Dnp 15:11

14:8^b Joh 19:40

14:9^c Mat 24:14

Judas in Jesu Phiarsawm ding a Lungkim

10 ^aCun hleihnih lakih pakhat Judas Iskariot cu an hnenih Jesu pe dingah puithiam sâng pawl hnenah a feh. 11 Cule puithiam sâng pawl in cuih thu an theih tikah, an lung a awi zet ih, paisa pe dingin thu an kam. Cule remcâng zetih Jesu pek thei dān ding a hawl.

14:10^a Mat 10:4

Lanta Puai le Bawipaih Zanriah

12 ^aThilnu telh lo Sang Puai a ni khatnak, Lanta Puai tuu fa no thah ni ah, a dungthluntupawl in Jesu hnenah, “Na ei ding mi Lanta Puai rawl khuiah so feh ih lo timtuahsak na duh?” tiah an sut.

14:12^a Suah 12:1-11; Dnp 16:1-4; 1Ko 5:7

13 Cule a dungthluntupawl lakih mi pahnih a hei thlah ih an hnenah, “Khawpi sungah va feh uhla, ti bel cawi pa in a lo táwng ding, cule amah kha thlun uh. 14 A va luhnak intêk pa hnenah cun, ‘Zirhtu pa in, “Ka dungthluntupawl thawn Lanta Puai rawl ka einak ding mikhual pindan cu khui tawkah a si?” a lo ti,’ tiah va ti uh. 15 ^aCun intêk pa in thil ṭul mi timtuah cia le rem cia mi, inn tlunta pindan tumpi cu a lo hmuh ding. Cu tawkah kan hrangah Lanta Puai rawl va timtuah cia uh,” tiah a ti.

14:15^a Apo 1:13

16 Dungthluntupawl cu an păwk ih khaw sung an thlen tikah, Jesu ih a sim vekin an va hmu, cule Lanta Puai rawl an timtuah.

17 Zan lam a thlen tikah, Jesu cu hleihnih pawl thawn an ra. 18 Cule rawl hil ih an ei laiah, Jesu in, “Thungaiin ka lo sim, nan lakih mi pakhat, keimah thawi rawl eitlangtu in i phiarsawm ding,” tiah a ti.

19 Cule dungthluntupawl cu riahsia ih um an thawk. Pakhat hnu pakhat, “Keimah ka simaw?” an ti. A dang pakhat in, “Keimah ka simaw?” tiah a ti.

20 ^aJesu in a sawn hai ih an hnenah, “Nanmah hleihnih lakih mi pakhat keimah thawi khēng sungih sang a hnimtlangtu a si. 21 ^bA thuhla ngan a si vekin, Minung Fapa cu a feh taktak ding. Asinan Minung Fapa a phiarsawmtu pa cu a hmakhua a pit a si. Rak suak lo lawlaw sehla a hrangah a ṭhasawn ding,” tiah a ti.

14:20^a Joh 13:18-27

14:21^b Mat 8:20

22 ^aRawl an ei laiah, Jesu in sang a la ih, lungawi thu a sim hnuah, a phel ih a pe hai, “La uhla, ei uh, hihi ka taksa a si,” tiah a ti.

14:22^a Mat 14:19

23 ^aCun no cu a la ih, lungawi thu a sim hnuah a pe hai ih an zaten an in. 24 ^bCule Jesu in an hnenah, “Himi cu mi tampi hrangih thlet mi ka thisen thukham thar a si. 25 ^cThungaiin ka lo sim, Pathian uknak sungah a thar ka insal ni a thlen lai hlanlo, sabit ti cu ka in nawn lo ding,” tiah a ti.

14:23^a 1Ko 10:16

14:24^b Mat 26:28

14:25^c Mat 3:2

26 ^aCule thangṭhatnak hla an sak hnuah, Olif Tlang ah an feh.

14:26^a Mat 21:1

Peter ih a Phatsan ding Thu Jesu in a Phuang

27 ^a Cun Jesu in an hnenah, “Tuihzan ah keimah ruangah nan zaten nan tlu ṭheh ding. Ziangahtile,

14:27^a Zek 13:7

‘Tuu khāltu ka vaw ding ih,
Tuupawl an ṭekdarh ding,’

tiih ngan a si.

28 “Asinan thawhtersal ka si hnuah, nan hmaiah Galili peng ah ka feh ding,” tiah a ti.

29 Peter in a hnenah, “An zateih an tlûk ṭheh hmanah, kei cu ka tlu lo ding,” tiah a ti.

30 ^aJesu in a hnenah, “Thungaiin ka lo sim, tuihni, tuihzan ar vei hnih a khuan hlanah, vei thum i phatsan ding,” tiah a ti.

14:30^a Luk 22:34; Joh 13:38

31 ^aAsinan Peter cun khohsinin, “Na zawngih thi ve ding si hman ningla, ka lo phatsan hrimhrim lo ding!” tiah a ti.

14:31^a Luk 22:33; Joh 13:37

An zaten cutin an ti ṭheh.

Gesmani Hmuan ah Jesu

32 Gesmani ti mi hmun an va thleng ih, a dungthluntupawl hnenah, “Thla ka cam sung hmuah, hi tawkah rak to uh,” tiah a ti. 33 ^aA hnenah Peter, James le John a hruai hai ih, khawruahhar le vansang zetih um a thawk, 34 ^bcule an hnenah, “Ka thinlung hi thihnak tlak khawpin, nasa zetin a riah a sia. Hi tawkah hin rak um uhla, in menpi uh,” tiah a ti hai.

14:33^a Mat 4:21

14:34^b Joh 12:27

35 ^aMálte hladeuhah a va feh ih, leilung ah a băwkkhup, cule, “A cang thei asile, cuih cān cu ka hnenin lanter aw,” tiah thla a cam. 36 ^bCule, “Abba, ka Pa, na hrangah thil ziangkim a cang thei ṭheh a si, hi no hi ka hnen ihsin lahlo hram aw, asinan ka duhnak vekin si hlah seh, nangmai duhnak vekin si sawn seh,” tiah a ti.

14:35^a Mat 26:18

14:36^b Mat 20:22; Rom 8:15; Gal 4:6

37 Cun a ra kir ih itthat ṭheh ih a hmuh hai tikah, Peter hnenah, “Simon, na itthat maw si? Nazi pakhat te tal na meng thei lo maw? 38 ^a Meng uhla thlacam uh, cu lo asile sualfawrhnak ah nan lut pang ding. Thlarau cun a huam taktak ko nân, taksa cu a cak lo a si hi!” tiah a ti.

14:38^a Mat 6:13; Rom 7:22-23

39 A va fehsal ih, a ṭawng cia mipawl vekin thla a camsal. 40 A ra kirsal tikah an ihthah ṭheh kha a hmu lala, ziangahtile an ih a hmu tuk. Ziangtiih săwn ding khal an thei lo.

41 ^a Cun a vei thumnak a kirsal ih an hnenah, “Itthat hrih uhla, cawl hrih ko uh. A tawk thlang, a tikcu a thleng zo, ngai hnik uh, Minung Fapa cu misualpawl kut ah phiarsawm a si thlang. 42 Tho uh, feh uhsi. Zoh hnik uh, i phiarsawmtu pa a ra nai zo khi!” tiah a ti.

14:41^a Mat 26:18

Jesu an Kai

43 ^aCutiih a ṭawng rero laiah, hmakhatteah, hleihnih lakih pakhat Judas cu, puithiam sâng pawl, Dān zirhtupawl le miupapawl ih rak thlah mi, ralnâm le talhtum keng mi tampi thawn a ra thleng. 44 Jesu phiarsawmtu pa cun puithiam sâng pawl le miupapawl cu theihthiamnak a rak pek cia, “Ka hnăm ding mi pa cu nan kaih duh mi pa a si, kai uhla kil phahin hruai uh,” tiah a ti. 45 ^bA thlen veten Jesu cu a pan vurvo ih, “Rabbi, Rabbi!” a ti ih a hnam. 46 Cule an kut an suah ih, Jesu cu an kai. 47 Cule an lakih a dīng mi pakhat in a ralnâm a zûk ih, puithiam lu bik ih siahhlawh pa cu a sat ih, a hna a sahthlak. 48 Jesu in a sawn hai ih an hnenah, “Suamhmang kai ding bangin, ralnâm le talhtum thawn keimah kai dingah maw nan rat? 49 ^cNi tin temple kulh sungah thuzirhin nan hnenah ka um ko nân, in kai fawn lo. Asinan Cathiangpawl cu a kim a ṭul a si,” tiah a ti. 50 Cu tikah a dungthluntu zaten Jesu cu tân tain an tlanhlo ṭheh.

14:43^a Mat 10:4

14:45^b Mat 23:7

14:49^c Isa 53:7-12; Mat 1:22; 26:55

51 A taklawng khuhnak puan nem páte lawng sīn, tlangval pakhat in Jesu cu a thlun. Cu pa cu tlangvalpawl in an kai. 52 A puan nem páte cu tân tain, a taklawng in a tlânsuak.

Kaiafas le Sanhedrin hmaiah Jesu

53 Cule puithiam lu bik hnenah Jesu cu an hruai ih, puithiam sâng pawl, miupapawl le Dān zirhtupawl hmuahhmuah cu an táwngkhawmaw. 54 ^aPeter cun hla nawnin puithiam lu bik inn tual tiang a hei thlun ih, temple kiltupawl hnenah toin meisa a ai.

14:54^a Mat 26:3; Joh 18:18

55 ^aPuithiam sâng pawl le Sanhedrinpawl hmuahhmuah cun Jesu thah thei nak ding theihpinak an hawl nân, zianghman an hmu lo. 56 Ziangahtile mi tampi in theihpinak dik lo in an hēk nân, an thu a rualaw thei lo.

14:55^a Mat 5:22

57 Cun mi hrekkhat an ding ih, theihpinak dik lo in an hēk. 58 ^a“Annih cun, ‘Hi milai kut ih sak mi temple hi ka ṭhiatbăl ding ih, ni thum sungah kut ih sak lo mi a dang pakhat ka sak ding,’ ti a ṭawng lai kan thei a si,” tiah an ti. 59 Asinan cuih an thutheihternak khal cu a rualaw thei cuang lo.

14:58^a Joh 2:19

60 Cule puithiam lu bik cu an laiah a hung dīng ih, Jesu hnenah, “Ziang tal na sawn ve hai lo ding maw? Hipawl in nangmah dokalhih an thutheihter mipawl hi ziangtin a si?” tiah a sut. 61 ^aAsinan zianghman sawn loin, daiten a um.

14:61^a Isa 53:7; Mat 27:12, 14; Luk 23:9; Joh 19:9

Puithiam lu bik cun a hnenah, “Nangmah cu kan Thangṭhat Mi-ih Fapa, Khrih cu na simaw?” tiah a sut lala.

62 ^aJesu in, “Ka si ko. Minung Fapa cu huham neitu Paih vawrh lamih a to le van mero thawn a rat kha nan hmu ding,” tiah a ti.

14:62^a Sam 110:1; Dan 7:13; Thu 1:7

63 ^aPuithiam lu bik cun a hnipuan a thlek ih, “Theihpitu dang pawl kan ṭul nawn maw si? 64 ^bPathian a thangsiatzia cu nan thei ko! Ziangtin nan ruat?” tiah a ti.

14:63^a Pui 10:6; Mip 14:6; Apo 14:14

14:64^b Pui 24:16

Cule an zaten Jesu cu thi tlak a si tiah thiam lo an coter. 65 ^aCun mi hrek in a parah cil an phui, a hmai an hup ih, an thăwng. Cule a hnenah, “Profet thuphuan in thu phuang aw!” tiah an ti.

14:65^a Mat 16:21

Cule temple kiltupawl in an zaphak in an beng.

Peter in Jesu a Phat

66 Peter cu hnuaideuh ih um tual ih a um laiah, puithiam lu bik ih hnenum nu pakhat a hnenah a ra. 67 Cu nu in Peter meisa a ai lai a hmuh tikah, a zohhliah ih, “Nang khal Nazareth Jesu thawi umtlang mi na si,” tiah a ti.

68 Asinan Peter in, “Ka thei lo, ziang na sim ti ka theithiam lo,” tiah a phat ih, hulhliap lamah a va feh, cule ar a khuang.

69 Cule hnenum nu in a va hmu lala ih, a kiangih dīngpawl hnenah, “Hi pa hi an lakih mi pakhat a si,” tiih sim a thawk. 70 ^aAsinan anih cun a phat lala. Cuih hnu málte reideuh ah a kiangih dīngpawl in Peter cu, “Nang khal an lakih mi pakhat na si rori, ziangahtile na awcawi in Galili-mi na sizia a langter,” tiah an ti lala.

14:70^a Apo 2:7

71 Cun Peter cun siatcamawk le sesăm a thawk ih, “Nan sim mi pa cu ka thei lo!” tiah a ti.

72 Cule a vei hnihnak ar a khuang. Cu tikah Peter cun Jesu in a hnenih, “Ar vei hnih a khuan hlanah, vei thum i phatsan ding,” a ti mi ṭawngkam kha a vun máng. Cuih thu a ruah tikah a ṭap.

15

Sanhedrin hmaiah Jesu

1 ^aZingpit a thlen veten, puithiam sâng pawl cu miupapawl, Dān zirhtupawl le Sanhedrin pumpi thawn thu ruahkhawmnak an nei. Jesu cu an ṭawn ih an hruai, cule Pilat hnenah an thlen.

15:1^a Mat 27:1; Luk 22:66

Pilat hmaiah Jesu

2 ^aPilat in a hnenah, “Jew-pawlih Siangpahrang na simaw?” tiah a sut.

15:2^a Mat 2:2

Jesu in a sawn ih a hnenah, “Na sim vekin a si ko,” tiah a ti.

3 Cule puithiam sâng pawl cun sual tampi an puh nân, zianghman a let lo. 4 Pilat in a hnenah, “Zianghman na let lo ding maw? Ngai hnik, nangmah dokalhin hi tluk tam thu an theihter hi!” tiah a sutsal. 5 Jesu in zianghman a săwn lo ruangah, Pilat cu a mang a bang.

6 Lanta Puai tinten Pilat in mipi ih an dil mi thawngtla pakhat an hnenah a suah ṭheu. 7 Cu laiah Barabbas an ti mi pa, laithahnak ih helnak tuahtupawl cu, a helpipawl thawn thawng a rak tla. 8 Cun mipi cun Pilat ih a tuah ṭheu vekih a tuah ding duhin ringpin an au ih, dil an thawk. 9 Asinan Pilat in, “Jew-pawlih Siangpahrang hi nan hnenah suah ningla nan duh maw?” tiah a sawn hai. 10 Ziangahtile puithiam sâng pawl in iksiknak ruangah, a kut ah Jesu cu an thlen ti a thei.

11 ^aAsinan Barabbas suah sawn dingin puithiam sâng pawl in mipi an rak tăwkphirh cia. 12 Pilat in a sawn hai ih an hnenah, “Cuti asile Jew-pawlih Siangpahrang tiih nan kawh mi pa hi ziangtin tuah ningla nan duh?” tiah a tisal.

15:11^a Apo 3:14

13 Annih cun, “Khengbĕt aw!” tiah an ausal.

14 Cun Pilat in an hnenah, “Ziangruangah, ziang thil ṭha lo so a tuah?” tiah a ti.

Asinan annih cun, “Khengbĕt aw!” tiah an au sinsin.

15 ^aPilat in mipi lungawiter a duh ruangah, Barabbas cu an hnenah a suah ih, Jesu cu a ralkappawl a vuakter hnuah, khengbĕt dingin an kut ah a pe.

15:15^a Isa 53:6

Jesu an Hmuhsuam

16 ^aCun ralkappawl in Jesu cu Praetorium an ti mi innpi sungah an luhpi ih, ^bralkap bur khat pumpin an kokhawm. 17 Cule puan sendup an sĭnter ih, hling ih an phiar mi lukhum a lu ah an khumter. 18 Cule salam pek an thawk ih, “Jew-pawlih Siangpahrang, salam kan lo pe!” tiah an ti. 19 Cun a lu ah câlte fung in an vua, a parah cil an phui, an khukbilin an upatawter. 20 ^cAn hmuhsuam hnuah, puan sendup cu an hlihsak ih, amai hnipuan an hruhter, cule khengbĕt dingin an hruaisuak.

15:16^a Joh 18:28

15:16^b ralkap bur: Rom ralkap legion khat ṭhen hra ih ṭhen khat a si ih, ralkap 600 hrawng an um.

15:20^c Heb 13:12

Khraws parah Siangpahrang

21 ^aCun khawte ihsi ra, lamzin ih feh pa, Alexander le Rufus-ih pa, Sairin rammi Simon cu hramhramin Jesu-ih khraws cu an putter. 22 Cule Jesu cu Golgotha ti mi hmun ah an hei hruai, Golgotha ti cu Lu Ruh Hmun tinak a si. 23 ^bIn dingah mura thawi an rawi mi sabit zu an pe nân, anih in a in duh lo. 24 ^cAn khĕnbet hnuah, a sinfen cu an ṭhen ih, pakhat ciar ih an co ding mi thei dingin camcawhfung an zûk.

15:21^a Mat 27:32; Luk 23:26; Rom 16:13

15:23^b Sam 69:21; Thf 31:6

15:24^c Sam 22:18

25 An khĕnbet cān cu zing lam nazi pakua a si. 26 Cule Pilat in Jesu sual an puhnak catar, “JEW-PAWLIH SIANGPAHRANG,” tiah a ngan.

27 Amah thawn suamhmang pahnih, a vawrh lamah pakhat, a keh lamah pakhat an khengbĕt. 28 ^aCumi cun Cathiang sungih ngan mi, “Amah cu dān pahbăltupawl lakih siartel a si,” ti mi cu a famkimter a si.

15:28^a Isa 53:12

29 ^aCule a kiangih a fehtupawl in Jesu cu an thangsiat, dirĕm zetin an lu an thinhnawh ih, “Hei! Nang temple ṭhiatbăl ih, ni thum sungih saksaltu, 30 nangmah le nangmah runaw awla, khraws parin rung ṭum aw,” tiah an ti.

15:29^a Sam 22:7; Joh 2:19

31 ^aCuvek thothoin puithiam sâng pawl le Dān zirhtupawl cun anmah lakah hmuhsuamin, “Mi dang cu a run hai nân, amah le amah cu a runaw thei lo. 32 Israel-mipawlih Siangpahrang, Khrih cu khraws par ihsin atu roriah rung ṭum sehla, cutin kan hmu ding ih kan zum ding,” tiah an ti.

15:31^a Sam 22:7

Amah zawngih an khĕnbet mipawl khal in an zăwkzet ve.

Khraws parah Jesu a Thi

33 ^aSun nazi hleihnih a kimin sîm lam nazi pathum tiang, ram pumpi ah thimkhawzing a tlung. 34 ^bCule sîm lam nazi pathum ah Jesu cu, “Eloi, Eloi, lama sabakthani?” tiah ring zetin a au.

15:33^a Amo 8:9

15:34^b Sam 22:1

A tican cu, “Ka Pathian, ka Pathian, ziangah so i fehsan?” tinak a si.

35 ^aA kiangih dīng, mi hrekkhat in, cumi an theih tikah, “Zoh hnik uh, Elijah a ko a si hi!” tiah an ti. 36 Cun mi pakhat a va tlân ih, tihawp kha sabit zu thûr sungah a hnīm ih, câlte ko zimah a ṭem, cule in dingah a pe, cule, “Um hrih hnik seh, amah lathla dingah Elijah a ra maw, ra lo kan zoh hnik pei,” tiah an ti.

15:35^a Sam 69:21

37 ^a Cule Jesu cu ring zetin a au ih, a hnuk a cat.

15:37^a Joh 19:30

38 ^aCun temple hmun thianghlim puanzar cu a luzim ihsin a tawdĕng tiang ṭhen hnih ah a tlêk. 39 ^bJesu hmaiih ding, ralkap 100 hotu in a au le a hnukcah kha a hmuh tikah, “Hi pa cu Pathian Fapa rori a si ko e!” tiah a ti.

15:38^a Heb 10:19-20

15:39^b Mat 4:3

40 ^aHla nawnih a rak cuan ve tu nunau hrekkhat an um, cupawl lakah Mary Magdalin, James ^bnautasawn le Joses teih nu Mary le Salomi tla an tel. 41 ^cCupawl cu Galili peng a um laiih a thluntu le amah tuamhlawmtu le Jesu thawi Jerusalem ih ra nunau dang tampi tla an si.

15:40^a Sam 38:11; Luk 24:10; Joh 19:25

15:40^b nautasawn: Fatesawn tinak khal a si thei.

15:41^c Mat 27:55-56; Luk 8:2-3

Jesu an Phum

42 ^aCuih ni cu Sabbath ni hlanih timlamawk ni a si. Zan lam a hung si tikah, 43 ^btlangsuak upa lakih mithupi le Pathian uknak hngaktu Arimathia khawmi Joseph cu ralṭha zetin, Pilat hnenah a feh ih, Jesu-ih ruak cu a va dil. 44 Jesu a thihngah zo cu Pilat a mang a bang. A ralkap 100 hotu a ko ih, “A thihnak a rei zo maw?” tiah a sut. 45 A thi zo ti ralkap 100 hotu hnenin Pilat in a theih tikah, a ruak cu Joseph a lâkter. 46 Cun Joseph cun puan nem páte a lei ih, a ruak cu a lathla, cule puan nem páte in a tuam hnuah, lungpi virh mi thlān sungah a vui ih, a thlan kâ ah lung a hrilh ta. 47 Mary Magdalin le Joses-ih nu Mary in a ruak an vuinak hmun cu an hmu.

15:42^a Mat 27:62; Joh 19:31

15:43^b Mat 5:22; Luk 2:25, 38

16

Jesu a Thosal

1 ^aSabbath ni a cem tikah, Mary Magdalin, James-ih nu Mary le Salomi lepawl in a ruak va culh dingah rimhmui hriak an lei. 2 Zarh khat ih a ni khatnak zingpit te ni suah zawngah thlān ah an va feh. 3 Cule anmah lakah, “Thlān khar lungto teh zo in in hrilhsak ding?” tiah an rel rero. 4 Cule an hun zoh tikah, lung cu hrilh a rak si zo ti kha an hmu. Cuih lung cu lung tûm zet a si. 5 ^bThlān sung an vung luh tikah, kâwrfual var hru tlangval pakhat, vawrh lam kapih to an hmu ih, an lâu.

16:1^a Luk 23:56; Joh 19:39-40

16:5^b Joh 20:12

6 Anih cun an hnenah, “Thinphângin um hlah uh, an khĕnbet mi Nazareth Jesu nan hawl, anih cu a tho zo, hi tawkah a um lo, an retnak hmun hi zoh hman uh. 7 ^aVa feh uhla, ‘Nan hmaiah Galili peng ah a feh, a lo sim cia vekin, cu tawkah nan va hmu ding,’ tiah a dungthluntupawl le Peter kha va sim uh,” tiah a ti.

16:7^a Joh 21:1-23

8 Zamrangten an fehsuak ih, khūr le mangbangin thlān ihsin an tlânsuak. An ṭih tuk ruangah zo hnen hmanah zianghman an sim lo.

Mary Magdalin le Jesu

9 ^aZarh khat ih a ni khatnak zingpit teah, Jesu a thosal, khawsia pasarih a dawisuahsak mi Mary Magdalin hnenah a lang hmaisabik. 10 Anih cu a va feh ih, Jesu thawi umtlang dah mi, lungkuai ih a ṭap rero mipawl kha a va sim hai. 11 ^bCule Jesu a nung ti le, cu nu in a hmu ti an theih tikah, annih in an rak zum lo.

16:9^a Joh 20:11-18

16:11^b Luk 24:11

Dungthluntupawl le Jesu

12 ^aCuih hnuah, anmah lakih mi pahnih khawte lamih an feh laiah phun dang in an hnenah Jesu a lang. 13 Cute pahnih cu an va feh ih, dungthluntu dang pawl hnenah an sim nân, an zum cuang lo.

16:12^a Luk 24:13-32

Thupek Ropi

14 ^aCuih hnuah cabuai an hil laiah, a dungthluntu hleikhat hnenah a lang. A thawhsal hnuah mi hrek in an hmuh thu a dungthluntu hleikhat pawl in an zum lo ruangah, an zumlonak le an lungruhnak kha a kawk hai.

16:14^a Luk 24:36-43

15 ^aCule anih in an hnenah, “Leilung tlun hmuahhmuah ah va feh uhla, sersiam mi tinkim hnenah thuthangṭha va sim uh. 16 ^bA zum ih baptisma a cotu cu rundam a si ding. Asinan a zum lo tu cu thiam lo coter a si ding. 17 ^cCule a zumtupawl cu hi hminsinnakpawl in a thlun hai ding: ka hmin in khawsia an dawi ding, ṭawng thar in an ṭawng ding, 18 ^drulpawl tla an kai ding, thih thei nak ziang thil khal an in le an zianghman a pawi lo ding, mina parah an kut an suang ding ih, an dam ding,” tiah a ti.

16:15^a Mat 28:18-20; Luk 24:47-48; Apo 1:8

16:16^b Joh 3:16, 18, 36

16:17^c Luk 10:17; Joh 4:48; Apo 5:16; 1Ko 12:10

16:18^d Luk 10:19

Van ah Jesu a Kai

19 ^aAn hnenih thu a sim ṭheh hnuah, amah cu van ah lâksohin a um ih, Pathian vawrh lamah a to. 20 ^bCule an fehsuak ih, hmun kip ah thu an sim. Bawipa in an hnenah hna a ṭuan ih, kamsuakthu cu hminsinnakpawl hmangin a nĕmhnget vivo. Amen.

16:19^a Luk 24:50-51; Joh 6:62; Rom 8:34; Kol 3:1; 1Ti 3:16; Heb 1:3

16:20^b Joh 4:48