About Bible Thianghlim | ©

BibleThianghlim – Rom

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Rom

12345678910
111213141516

• A ngantu: Paul
• A siartu: Rom khawpi ih zumtupawl
• Ngan kum: A.D. 56

Thukham Thar san laiah Rom uknak in Mediṭerenian kiangkap ram a rak huap ṭheh ih, a ram pumpi ih an khawpi cu khawpi tûm zet Rom a si. Hi khawpi ropi ah Pathian in kawhhran ropi a rak dĭn ih, apostol Paul cun cuih kawhhran ih va thlen a câk zet (15:23). A netnakah A.D. 60 ah cuih hmun a thlengngah nân, Rom uknak hnuaiih thawngtla pakhat dinhmun ih va thleng mi a si. Paul ih cakuat dang zate deuhthaw hi a tlawn hai hnuih a kuat mi an si, asinan Rom cakuat bélte hi cu a va tlawn hlanih a kuat mi a si. Hi kawhhran hi amai dĭn mi a si lo. Paul in 15:20 ih a simdān vek asile, Rom kawhhran hi Peter ih dĭn mi a si ti khal rinhlelh ding a um. Rom ihsin Jerusalem ih rak feh, Jew hrekkhat Pentikos ni ah Khrih an cohlan a zumum (Apo 2:10). Cumi hnuah an umnak Rom khawpi ih an kirsal tikah kawhhran an rak dĭn a si thei. Cuihhleiah Paul in cu tawkih zumtu tampi fiang zetin a thei hai (bung 16 zoh aw). Cuihtlunah cu tawkih zumtu hrekkhat cu Paul in peng dangih rawng a bawl laiih piangthar an si men thei.

Hi cakuat hi Paul in Masidonia le Akhai rampawl ih a rawngbawlnak a ṭheh hnuih a ngan mi a si (15:22-33 zoh aw). Zentel kawhhranpawl hnen ihsin a khawnkhawm mi sumpai kha Jerusalem ih mifarah zumtupawl hnenah va pe dingin, Jerusalem lam panin Paul cu kirsal lohli a tum. Cumi hlan Korinth khua ih thla thum sung rawng a bawlnak cem lamah, Rom cakuat hi Paul in A.D. 56 hrawngih a ngan mi a si ding (Apo 20:3).

Hi cakuat sungah Khristian thurin ih a thupi mi thu tampi kan hmu thei. Minung in thuthangṭha zarin Pathian dingfelnak a co thei dān thu cu hi cakuat hin a simfiang. Thuthangṭha cu “a zumtu pauhpauh hrangah rundamnak dingih Pathian huham” rori a si (1:16).

1

Cibaibûknak

1 ^aJesu Khrih-ih sál, apostol si dingih kawh mi, Pathian thuthangṭha hrangih serhhran mi keimah Paul in, 2 ^bcuih thuthangṭha cu hlanlai ah a profetpawl hmangin Cathiang Thianghlim pawl sungah Pathian in a rak tiamkam cia a si. 3 ^cCumi cu a Fapa, kan Bawipa Jesu Khrih-ih thuhla a si. Taksa dān ah cun anih cu David cithlah ihsi ra mi a si. 4 ^dMithi lak ihta thawhter a sinak in anih cu thianhlimnak Thlarau in Pathian Fapa a si ti huham thawn a phuang. 5 ^eAmai hmin ruangah miphunpawl hmuahhmuah lakah zumnak thulun a si thei nak dingah amah thawngin zangfahnak le Apostol sinak kan co a si. 6 ^fNannih khal anmah lakah Jesu Khrih ih kawh mi nan si.

1:1^a Apo 9:15; 1Ko 1:1; 2Ko 2:12

1:2^b Luk 1:70; Apo 13:32; Tit 1:2

1:3^c Mat 1:1; Joh 1:14

1:4^d Apo 2:36; 13:32-33; 2Ko 13:4

1:5^e Apo 9:15; 15:18; 16:26

1:6^f Jud 1:1; Thu 17:14

7 ^aPathian ih duhdawt mi, mithiang si dingih kawh mi, Rom ih a um mi nan zate hnenah ca ka lo kuat.

1:7^a Apo 9:13; 1Ko 1:3; Efe 1:2; 1Th 1:4

Kan Pa Pathian le Bawipa Jesu Khrih hnen ihsin nan hnenah zangfahnak le hnangamdaihnak um hram seh.

Rom Tlawn Duhnak

8 ^aNan zumnak cu leitlun pumpi ih a thansuak ruangah, nan zate hrangah Jesu Khrih zarah a hmaisabikah ka Pathian hnenah lungawi thu ka sim. 9 ^bZiangahtile catbang loin ka thlacamnak ah ka lo telh ringring ti cu a Fapaih thuthangṭha phuannak ah ka thinlung zate ih ka rĕn mi Pathian cu i theihpitu a si. 10 ^cTu thlang talih Pathian remtinak in nan hnenih rat thei nak lamzin ziangmaw titiih hmu thei dingin ka ngen ringring. 11 ^dZiangahtile nan hngeh thei nak dingah, thlarau thilpek hrekkhat lo pe dingin lo hmuh ding ka hiar zet. 12 Cuih thlarau thilpek cu nan zumnak le ka zumnak hmangin tha kan peawtăwn ding ka tinak a si.

1:8^a 1Ko 1:4; Efe 1:16; 1Th 2:13

1:9^b Jer 42:5; Fil 1:8; 2Ti 1:3

1:10^c 1Sam 12:23; Luk 18:1; Apo 1:14; Efe 1:16; Fil 1:4; Kol 1:9; 2Th 1:11; 2Ti 1:3; Flm 1:4

1:11^d 1Ko 1:7

13 Unaulenuh, Zentel dang pawl hnen vekin nan hnen khalih rah ka neih thei nak dingah, vei tampi nan hnenih rat ka tum ṭheu ti atu-ah thei loih nan um ding ka duh lo. Asinan atu tiang khamtu a um.

14 ^aGrikmipawl hnen le ^bBarbaros-pawl hnenah, mifimpawl le mi-âpawl hnen khalah leiba ka nei. 15 Cun Rom ih a um mi nanmah hnen khalah thuthangṭha ka ti theipatawpih phuang dingin ka tiar a si.

1:14^a 1Ko 9:16

1:14^b Barbaros: Grik si lo mi, cathiam lo mi.

Midingfel cu Zumnak in a Nung

16 ^aZiangahtile Khrih-ih thuthangṭha cu ka zahpi lo, ziangahtile a zumtu pauhpauh hrangah rundamnak dingih Pathian huham a si. A hmaisaah Jew-mi hrangah a si ih, Grikmi hrang khalah a si ve. 17 ^bZiangahtile,

1:16^a Joh 3:15; 1Ko 1:18; 2Ti 1:8

1:17^b Hab 2:4; Gal 3:11; Fil 3:9; Heb 10:38

“Mifel cu zumnak in a nung ding,”

tiih ngan vek khan, thuthangṭha ah Pathian dingfelnak cu zumnak ihsin zum sin nak ah phuanlăng a si.

Midingfel lo parih Pathian Thinlingnak

18 ^aZiangahtile an dingfellonak ih thutak hupbĕttu, minungpawlih Pathian ngaihsaklonak le dingfellonak zate parah, Pathian thinlingnak cu van ihsin a rung lang. 19 ^bPathian thuhla an theih ding mi cu Pathian in an hnenih a lăngfiangter zo ruangah anmah ah a langfiang a si. 20 ^cZiangahtile a sersiam mi thilpawl ihsin mit ih hmuh thei lo mi Pathian ih thil umpawl cu leilung sersiam thawk ihsin fiang zetih hmuh an si, Pathian-ih kumkhaw huham le Pathian-ih sinak tiang hman theihthiam an si. Curuangah puhmawh ding an nei lo.

1:18^a Joh 3:36; Efe 5:6; Kol 3:6; 1Th 1:10; Thu 19:15

1:19^b Apo 14:17

1:20^c Sam 19:1-6

21 ^aPathian thei na cingin, amah cu Pathian vekin an sunlawih lo ih, lungawi thu khal an sim lo ruangah, an khawruahnak cu thulolak menah a cang sawn ih, an thinlung â cu thim ih khat ah a cang. 22 ^bKan fim tiah an tiaw nân, mi-â ah an cang. 23 ^cCule a ṭawihrál thei lo mi Pathian-ih ropitnak cu a ṭawihrál thei mi minung lem, vatepawl, ramsapawl le bawkvâkpawl lem ah an thlĕng.

1:21^a Sem 8:21; Jer 2:5; Efe 4:17-18

1:22^b 1Ko 1:20, 27

1:23^c Dnp 4:16-17; Jer 2:11; Apo 17:29

24 ^aCuruangah anmah le anmah lakah anmai taksa rori hman ningzakzaih hmang dingin, an thinlung câkhiarnak vekin Pathian in anmah cu bawrhhlawhnak ah a ap hai. 25 ^bPathian thutak cu thuphan ah an thleng ih, Sersiamtu hnakin sersiam mi thil sawn cu bia le rianin an um. Sersiamtu cu kumkhuain thangṭhatin um seh. Amen.

1:24^a Sam 81:12; Efe 4:19; 1Pe 4:3

1:25^b Isa 44:20; Jer 10:14; 2Ko 11:31

26 ^aCumi ruangah Pathian in annih cu ningzakza hurnak ah a ap hai. Ziangahtile an nunaupawl hmanin an nunau sinak a dān kel vekih hmang loin, nunau tidān kalh zawngin an hmang. 27 ^bCuti vek thothoin mipapawl khal in nunau thawi pawlawk dān kel cu an bansan ih, pakhat le pakhat sūpaw thei lo câkhiarnak in an ît-aw. Mipa in mipa dang hnenah ningzakza thil sual an tuah ih, an thil sual tuah ruangih dāntatnak an hmuh ding mi cu an co a si.

1:26^a Pui 18:22-23; Efe 4:19; 1Th 4:5

1:27^b Pui 18:22; 1Ko 6:9

28 Cule an theihnak ah Pathian kaih hnget an duh lo ruangah, Pathian in a se linglet mi lungthin sungah thil mawi lo pawl ti dingin a ap hai. 29 ^aAnnih cu dingfellonak, nunau-mipa sualnak, sualralnak, duhhamnak, mi dang parih lungput sia neihnak, iksiknak thawi khahnak, laithahnak, tawhawknak, mi bumnak, mi dang parih thil ṭha lo tuah duhnak pawl hmuahhmuah in an khat. Annih cu hmurkâ tam, 30 ^bmi relsiathmang, Pathian huatu, mipuarthau, mitluangkhâwng, mipawrhaw, thil ṭha lo thar tuahtu, nu le pa thulung lo, 31 ^ctheihthiamnak nei lo, rinsan tlak lo, suahkeh duhdawtnak nei lo, remawknak duh lo, zahngainak nei lo an si. 32 ^dCuvek thilpawl a tuahtupawl cu thi tlak an si tiih Pathian thuṭhennak dik cu thei cingin, anmah in an tuah lawng si loin, mi dang a tuahtupawl khal an lungkimpi.

1:29^a 1Ti 5:13; 3Joh 1:10

1:30^b 2Ti 3:2

1:31^c 2Ti 3:3

1:32^d Sam 50:18; Luk 11:48; Apo 8:1

2

Jew-pawl parih Thuṭhennak

1 ^aCuruangah maw minung, nang mi thu va ṭhentu zo va si khal awla, puhmawh ding zianghman na nei lo. Ziangahtile mi dang thu na va ṭhen tikah, nang khal cuvek thotho na tuah ve ruangah nangmah le nangmah thiam lo na coawter a si. 2 Asinan cuvek thil a titupawl Pathian in thu a ṭhen tikah, thutak milin thu a ṭhen a si ti kan thei. 3 Maw minung, hivek thil a tuahtupawl thuṭhensaktu, cuvek thilpawl tuah ve na cingin, Pathian in thu a ṭhen tikah ka luat ding tiah na ruat maw si? 4 ^bAsilole Pathian ṭhatnak cun lungthlĕngnak ah a lo hruai ti thei loin, a ṭhatnak, mi a zāwi thei nak le a thinsaunak lenzia pawl tla ziang siar loin maw na um?

2:1^a 2Sam 12:5-7; Mat 7:1-2

2:4^b Efe 1:7, 18; 1Pe 3:15; 2Pe 3:9

5 ^aPathian thinlingnak ni le a thuṭhennak dik a lăngter ding ni ah na luhlulnak le na thinlung na thlĕnglonak zulhin, nangmai hrangah thinlingnak na khawlkhawm rero a si. 6 ^bAnih cun mi tin an ṭuan mi vek cio in a rul ding. 7 ^cThinsau zetih hnaṭuan ṭha tuah ṭenṭo tu le thangṭhatnak le upatnak le ṭawihrál thei lo mi a hawltu cu, Pathian in an hnenah kumkhaw nunnak a pe ding. 8 ^dAsinan mai ṭānghma lawng sial, thutak thlun lo ih, dingfellonak a thluntupawl hnenah, Pathian in aithawknak le thinlingnak a pe ding. 9 ^eThil ṭha lo a tuah vivo tu mi kip parah harsatnak le ānhainak a thleng ding. Jew-mi parah a thleng hmaisa ding ih, Grikmi par khalah a thleng ding. 10 Asinan thangṭhatnak le upatnak le hnangamdaihnak cu thil ṭha a tuahtu mi kip hnenah a thleng ding. Jew-mi hnenah a thleng hmaisa ding ih, cu ṭhehin Grikmi hnen khalah a thleng ding. 11 ^fZiangahtile Pathian in mi thleidan a nei lo.

2:5^a Sam 110:5; Jud 1:6; Thu 6:17

2:6^b Sam 62:12; Thf 24:12; Mat 16:27

2:7^c Mat 25:46; 1Ko 15:53-54; 2Ti 1:10

2:8^d Eze 22:31; 2Th 2:12

2:9^e Sam 32:10

2:11^f Apo 10:34

12 ^aCuruangah Dān tel loih thil sual a tuahtupawl hmuahhmuah cu Dān tel loin an hloral ding ih, Dān hnuaiih thil sual a tuahtupawl hmuahhmuah cu Dān hmangih thuṭhen an si ding. 13 ^bZiangahtile a theih men lawngih Dān a theitupawl cu, Pathian mithmuh ah midingfel an si lo, cuhnakin cuih Dān a thluntupawl cu thiamcoter an si sawn ding. 14 ^cZiangahtile Dān nei lo Zentelpawl in an pianphung sinak in Dān ih a ngĕn mi an tuah tikah, cumi cu anmai hrangah dān a si. 15 Cuih minungpawl cun Pathian in an thinlung ah Dān ih thil ti a ngan cia zo ti an langter. Cucu an sia le ṭha theihnak khal in a theihpi a si. An ruahnak cun anmah a mawhthluk thul, a hum thul. 16 ^dJesu Khrih hmangin Pathian in minungpawlih tuahthup mipawl cu thuṭhen ni ah ka thuthangṭha milin thu a ṭhen ding a si.

2:12^a 1Ko 9:20-21; Gal 4:21

2:13^b Jam 1:22-23, 25

2:14^c Apo 10:35

2:16^d Ths 12:14; Apo 10:42; 1Ko 4:5; 2Ti 2:8

Mosi Dān le Thuṭhennak

17 ^aNgai hnik, nang cu Jew-mi tiih kawh na si. Dān parah na ṭhumaw ih, Pathian ah na tluangkhâwng. 18 Cule Pathian duh zawng na thei ih, Dān ihsin an lo zirh zo ruangah thil ṭha zet pawl cu na pawm. 19 Cule mitcaw hruaitu ah, thim lakih umpawlih tleu ah, 20 mi-âpawl nun zirhtu ah, nausenpawl zirhtu ah, Dān ah theihnak le thutak nei ih na rintawkawk asile, 21 ^bnang mi dang zirhtu, nangmah le nangmah na zirhaw lo maw si? Rûkru lo dingih simtu, nangmah in na ru ding maw? 22 ^c“Uire hlah,” tiih titu, nangmah riangri na uire maw? Nang milempawl fihtu, milem temple-pawl ih thil an ret mipawl na suam maw? 23 Nang, Dān thu ih tluangkhâwngtu, Dān na pahbălnak in Pathian ziang na siar lo a si lo maw? 24 ^dZiangahtile,

2:17^a Jer 8:8; Mik 3:11; Joh 5:45

2:21^b Mat 23:3-4

2:22^c Apo 19:37

2:24^d Isa 52:5; Eze 36:22; 2Pe 2:2

“Nangmah ruangah Pathian hmin cu Zentelpawl lakah thangsiat a si,”

tiih ngan vek khan a si.

25 ^aZiangahtile Dān na thlun a si ahcun, serh zim tan nak hi a hlawk taktak ko. Asinan Dān pahbăltu na si ahcun, na serh zim tānnak cu serh zim tan lo vekah a cang. 26 ^bCuruangah serh zim tan lo mi pa in Dān ih a ngĕn mi dingfelnakpawl a thlun asile, a serh zim tanlonak cu serh zim tan ah pawmsak a si lo ding maw? 27 ^cCule nannih ngan mi Dān neitu le serh zim tan mi hman, dān pahbăltu nan si ahcun, taksa dān ih serh zim tan lo mi pa in Dān a thlun famkim a si ahcun, thu a lo ṭhen lo ding maw?

2:25^a Jer 4:4; Gal 5:3

2:26^b 1Ko 7:19

2:27^c Mat 12:41-42

28 ^aZiangah cutin ka ti tile, a leng lamih Jew-mi cu, Jew-mi taktak a si lo ih, leng lam titsa men serh zim tānnak khal serh zim tānnak taktak a si lo. 29 ^bAsinan sung lamih Jew a si mi cu Jew-mi taktak a si. Serh zim tānnak taktak cu thinlung serh zim tānnak hi a si. Cumi cu Thlarau in a si ih, Dān thu ngan mi in a si lo. Anih cu milaipawl ih an thangṭhat mi si loin, Pathian ih lăwm mi a si sawn.

2:28^a Mat 3:9; Joh 8:39; Gal 6:15

2:29^b Dnp 30:6; Joh 5:44; 1Ko 4:5; 2Ko 3:6; 10:18; Gal 1:10; Fil 3:3; Kol 2:11; 1Th 2:4

3

1 Cuti asile Jew-mi in ziang hlawknak a nei? Asilole serh zim tannak in teh ziang ṭhathnemnak a nei? 2 ^aA ṭhathnemnak phun tampi a um! A hmaisabikah Pathian kamsuakthupawl kilter an si ruangah a si. 3 ^bZiangahtile mi hrekkhat in an zum lo ah teh ziang a cang ding? An zumlonak cun Pathian rinumnak cu ṭhahnem lo ah a cangter ding maw? 4 ^cCangter lamlam hlah! Pathian cu midik si-aw sehla, mi kip hi thuphan per si sawn hai seh.

3:2^a Dnp 4:8; Sam 147:19; Apo 7:38

3:3^b 2Ti 2:13; Heb 4:2

3:4^c Sam 51:4; 116:11; Joh 3:33

“Cutin na kamsuakthupawl ah thiam na co ding ih,
Thuṭhen na si tikah na neh ding a si,”

tiih ngan vek khan a si.

5 ^aAsinan kan dingfellonak in Pathian dingfelnak a lăngter a si ahcun, ziang so kan sim ding? Pathian in a thinlingnak kan parih a thlenter tikah, anih cu midik lo a si ding maw? Minung ṭawng vekin ka ṭawng a si. 6 ^bSi lamlam hlah! Cutin rak si ta hnik sehla, ziangtin Pathian in leitlun mi thu a ṭhen ding?

3:5^a Gal 3:15

3:6^b Sem 18:25

7 Ziangahtile thuphan ka pernak in Pathian-ih thutak cu a cakter sinsin ih, thangṭhat a co sinsin asile, ziangah so kei cu Pathian in misual vekih thu i ṭhen? 8 Ziangah so, “Thil ṭha a suah thei nak dingah thil ṭha lo kan tuah pei?” tiah kan ti men lo. Mi hrekkhat in cuti vekin an ṭawng a si tiah thuphan in puh. Cuvek mipawl thiam lo an co cu thil dik a si.

Mi hmuahhmuah in Sual an Tuah Ṭheh

9 ^aCuti asile ziangtin? Kannih Jew-pawl hi annih hnakin kan cungnung cuang maw? Cungnung cuang lamlam hlah! Ziangahtile Jew-pawl le Grikpawl zaten sual hnuaiah an um thluh tiah kan rak puh.

3:9^a 1Sp 8:46; 2San 6:36; Sam 106:6; Gal 3:22

10 “Midingfel zohman an um lo, an um lo, pakhat hman;
11 Thu theithiam zohman an um lo,
Pathian hawltu zohman an um lo.
12 ^aAn zaten an rak pial ṭheh,
Miṭhahnem lo ah an cang thluh.
Thil ṭha tuah zohman an um lo, an um lo, pakhat hman.
13 ^bAn dang cu a áwngaw mi thlān vek a si,
An lei in mi bumnak an ṭawng;
An hmur hnuaiah rulngân tûr a um.
14 ^cAn kâ cu camsiatnak le siatkhâtnak ṭawngkam in a khat.
15 Thisen suah dingah an ke a rang zet,
16 An lamzin ah siatralnak le vanduainak a um;
17 ^dCule hnangamdaihnak lamzin an thei lo.
18 ^eAn mit ah Pathian ṭihzahnak a um lo,”

3:12^a Sam 14:1-3; 53:1-3; Ths 7:20

3:13^b Sam 5:9; 140:3

3:14^c Sam 10:7

3:17^d Thf 1:16; Isa 59:7-8

3:18^e Sam 36:1

tiih ngan vek khan a si.

19 ^aCun kâ hmuahhmuah an cip ih, leitlun mi hmuahhmuah Pathian hmaiih mawh nei an sizia a lăng thei nak dingah, Dān ih a sim mi kip cu Dān hnuaiih um mipawl hnenah a sim a si ti kan thei. 20 ^bCuruangah zohman Dān thil tipawl parah ṭhumawin, Pathian mithmuh ah thiam co an um lo ding, ziangahtile Dān ruangin sual theih famkimnak a um a si.

3:19^a Sam 63:11; Eze 16:63

3:20^b Apo 13:39; Gal 2:16

Zumnak thawngih Pathian Dingfelnak

21 ^aAsinan Dān tel loin Pathian in a dingfelnak cu a phuanglang zo. Cucu Dān thupawl le Profetpawl ih ngan mi thupawl in an theihpi. 22 ^bPathian hnen ihsin a dingfelnak cu Jesu Khrih zumnak in mi hmuahhmuah hnenah le mi hmuahhmuah parah a ra. Ziangahtile Pathian hmaiah danglamnak zianghman a um lo. 23 Ziangahtile mi hmuahhmuah in sual an rak tuah ih, Pathian ropitnak an thleng bān lo. 24 ^cPathian in annih cu a zangfahnak in Khrih Jesu ih um mi tlennak hmangin a lakin thiam a coter hai. 25 ^dPathian in Jesu Khrih cu Pathian dingfelnak lăngternak ah, zumnak thawngin a thisen hmangin tlăwnlungawithawinak ah a langter, ziangruangahtile Pathian thinsaunak in tuih hlanih tuah mi sualpawl cu a lan ta a si. 26 Pathian cu midik le Jesu parih zumnak ṭhumtupawl thiamcotertu a si thei nak dingah, tuih cān ah amai dingfelnak langter dingah a si.

3:21^a Isa 46:13; Jer 23:6; Apo 10:43

3:22^b Joh 3:15; Gal 2:16; 3:28; Kol 3:11

3:24^c Sam 130:7; Joh 1:14, 16; 1Ko 1:30; 2Ko 12:9; Gal 4:5; Efe 1:7, 14; 2:8; Kol 1:14; Tit 2:11; Heb 4:16; 9:12

3:25^d Suah 25:17; Pui 16:15; Sam 65:3; Apo 14:16; 20:28; Efe 1:7; Heb 2:17; 9:12, 14; 1Pe 1:19; 1Joh 4:10; Thu 1:5

27 ^aCuti asile ziangtin mi a tluangkhâwng thei ding? Tluangkhawnnak ding lamzin a um lo. Ziang dān in so a dawnkham? A ṭuannak in maw? Si lamlam hlah, zumnak dān in a dawnkham sawn a si. 28 ^bCuruangah Dān thil ti tel loin, minung cu zumnak in Pathian in thiam a coter ti hi kan thunetnak a si. 29 ^cAsilole Pathian cu Jew-pawl hrang lawngih Pathian a simaw? Zentelpawlih Pathian khal a si ve lo maw? Si e, Zentelpawlih Pathian khal a si ve. 30 ^dZiangahtile serh zim tanpawl cu zumnak in le serh zim tan lo pawl khal zumnak ih thiamcotertu Pathian pakhat a um. 31 Cuti asile zumnak thawngin Dān cu zianghmanlo ah kan canter tinak maw si? Si lamlam hlah! Cuhnakin Dān cu kan hngetter sawn a si.

3:27^a 1Ko 1:29-31; Efe 2:9

3:28^b Apo 13:39; Gal 2:16; Efe 2:9; Jam 2:20, 24, 26

3:29^c Apo 10:34-35; Gal 3:28

3:30^d Gal 3:8

4

Abraham cu Zumnak in Thiam a Co

1 ^aCuti asile taksa dān ih kan pa Abraham thu ah ziang kan sim ding? Ziang a hmu? 2 ^bZiangahtile Abraham cu a ṭuannak in thiamcoter asile, Abraham in tluangkhawn ding a nei tinak a si ding, asinan Pathian hmaiah cun a nei lo. 3 ^c Cathiang in ziangtin a ti? “Abraham in Pathian a zum ih, cumi cu a hrangih dingfelnak ah siarsak a si,” tiah a ti.

4:1^a Luk 3:8

4:2^b 1Ko 1:31

4:3^c Sem 15:6; Gal 3:6; Jam 2:23

4 Cun mi pakhat in hna a ṭuan tikah, a ṭuan man cu zangfah thilpek tiin siarsak a si lo, leiba ih ruah a si sawn. 5 Asinan hnaṭuan loin, Pathian ngaihsak lo thiamcotertu Pathian zum sawn tu hrangah cun a zumnak cu dingfelnak ah siarsak a si. 6 Cu vekin David khal in ṭuannak tel loih, Pathian in midingfel ih a siar mi pa mithlawsuak a sinak cu hitin a sim,

7 “An dān pahbălnakpawl ngaidamsak si ih,
An sualpawl khuhsak a si mipawl cu mithlawsuak an si.
8 ^aBawipa in sual ih a puh lo mi pa cu mithlawsuak a si,”

4:8^a Sam 32:1-2; 2Ko 5:19

tiah a ti.

9 ^aHi mithlawsuak sinak cu serh zim tan mipawl hrang lawngah a simaw, asilole serh zim tan lo mipawl hrang khalah a simaw? Ziangahtile zumnak cu Abraham hrangih dingfelnak ah siarsak a si tiah kan ti. 10 Ziang tikah cumi cu siarsak a si? Serh zim a tan hnuah maw, serh zim a tan hlanah? Serh zim a tan hnuah si loin, serh zim a tan hlanah a si sawn. 11 ^bCule Abraham cun serh zim tan hminsinnak a co ih, cumi cu serh zim tan a si hlanih a neih mi zumnak ih dingfelnak tacik a si. Cutin anih cu zumtu zate, serh zim tan lo mipawl hmanih pa a si thei nak dingah le dingfelnak cu an hrang khalih siarsak an si thei nak ding hrangah a si. 12 Cule serh zim tan mipawl lawngih serh zim tan papi si loin, serh zim tan an si hlanih kan pa Abraham in a neih mi zumnak keneh a zawhtupawlih pa khal a si.

4:9^a Sem 15:6

4:11^b Sem 17:10-11; Luk 3:8

Abraham-ih Thiamconak cu Mosi Dān Thlunnak in a Si Lo

13 ^aZiangahtile leitlun ro cotu ding tiih thutiamkam cu Abraham le a cithlah in Dān thawngin si loin, zumnak ih an co mi dingfelnak thawngin an ngah sawn a si. 14 ^bZiangahtile Dān thu ih nungpawl kha ro cotu rak si hai hnik sehla, zumnak cu thulolak men a si ding ih, thutiamkam khal santlailo ah a cang ding, 15 ^cziangruangahtile Dān cun Pathian thinlingnak a suah. Ziangahtile Dān a umlonak hmun ah dān pahbălnak a um lo.

4:13^a Sem 17:4-6; Apo 13:32; Gal 3:16, 29

4:14^b Gal 3:18

4:15^c 1Ko 15:56; 2Ko 3:7; Gal 3:10

16 ^aCuruangah thutiamkam cu zangfahnak ruangin a si thei nak dingah, zumnak parih ṭhumaw a si; cutin thutiamkam cu Abraham-ih cithlah hmuahhmuah, Dān parih ṭhumawpawl hnen lawngah si loin, kan zate pa a si mi Abraham-ih zumnak parih ṭhumawpawl hnen khalah a fiang thei ding. 17 ^b“Miphun tampi pa ah ka lo tuah zo,” tiih ngan vek khan, Abraham cu mithipawl nunnak petu le thil um lo um vekih reltu a zum mi Pathian hmaiah anih cu kan pa a si. 18 ^c“Na cithlahpawl cu khi zat khi an si ding,” tiih rak sim cia mi vekin, miphun tampi ih pa a can thei nak dingah, ruahsan ding a neih lo laiah, Abraham cun ruahsannak thawn a zum.

4:16^a Luk 3:8; Gal 3:16

4:17^b Sem 17:5; Isa 48:13; 59:7-8; Joh 5:21

4:18^c Sem 15:5

19 ^aCule a taksa a thi a si ti le amah cu kum 100 a si zo ih, Sarah-ih sūl khal a thi a si ti thei na cingin a zumnak a derdai cuang riai lo. 20 ^bAnih cu zumnak tlasamin Pathian-ih thutiamkam cu a ringhlel lo, cuhnakin zumnak ah a cak ih Pathian a thangṭhat sawn. 21 ^cCule Pathian in a tiamkam zo mi cu a tuahsuak thei a si ti a theifiang. 22 ^dCuruangah “cumi cu a hrangih dingfelnak ah siarsak a si.”

4:19^a Sem 17:17; 18:11; Heb 12:11-12

4:20^b 1Sam 30:6; Mat 4:8

4:21^c Sem 18:14; Mat 19:26

4:22^d Sem 15:6

23 “Cumi cu a hrangah siarsak a si,” tiih ngan mi hi Abraham hrang lawngah a si lo, 24 ^akan hrang khalah a si. Mithi lak ihsin kan Bawipa Jesu a thotertu Pathian kan zum asile, kan zumnak cu dingfelnak ah in siarsak ding. 25 ^bKan mawhsualnak ruangah anih cu hlăn a si ih, thiam kan conak dingah thawhter a si.

4:24^a Hab 2:2; 1Ko 9:10; 2Ti 3:16-17; 1Pe 1:21

4:25^b Isa 53:5-6, 11; 1Ko 6:11; 2Ko 5:21

5

Thiamconakih Rahsuah

1 ^aZumnak in thiamcoter kan si zo ruangah, kan Bawipa Jesu Khrih thawngin Pathian thawn remawknak kan nei. 2 ^bAmai zarah zumnak in cuih zangfahnak sungih luhnak lamzin khal kan nei. Cuih zangfahnak ah cun kan dīng ih, Pathian ropitnak ruahsanin lungawi aipuangin kan um. 3 ^cCule cumi lawng si loin, harsatnak kan neih tik khalah, cumi ah cun kan ai a puang a si. A săn cu harsatnak in tuarfainak a suakter ti kan thei. 4 Cule tuarfainak cun tawntehnak a suakter ih tawntehnak cun ruahsannak a suakter. 5 ^dCun ruahsannak cun kan ning in zakter lo, ziangruangahtile Pathian in kan hnenih in pek mi Thlarau Thianghlim hmangin kan thinlung ah a duhdawtnak a burh zo.

5:1^a Luk 2:14

5:2^b 1Ko 15:1; Efe 2:18; Heb 3:6

5:3^c Mat 5:12; Heb 10:36

5:5^d Joh 3:16; Apo 2:33; Fil 1:20; Tit 3:5-6; Heb 3:6

6 ^aZiangahtile cahnak nei lo kan si laiah, a cān teah Khrih cu Pathian ngaihsak lo pawl hrangah a thi. 7 Ziangahtile midingfel hrangih mi pakhat thih ding cu thil vâng zet a si; miṭha hrangah cun mi zo tal simaw an thi ngam khal a si thei. 8 ^b Asinan misual kan si laiah Khrih kan hrangih a thihnak in, Pathian in kanmah lamih a duhdawtnak cu a langter.

5:6^a Mar 1:15; Gal 4:4; Efe 1:10

5:8^b Joh 3:16; 1Pe 3:18; 1Joh 3:16

9 Cuihhleiah atu-ah Khrih thisen thawngin thiamcoter kan si zo ruangah, amah thawngin Pathian thinlingnak ihsin run kan si ding. 10 ^aZiangahtile a doral kan si lai hmanih, a Fapa thihnak in Pathian thawi kan remawk zo a si ahcun, remaw zo kan si hnuah cun, a Fapaih nunnak in in rundam sinsin ding. 11 Cule cuti lawng si loin, kan Bawipa Jesu Khrih thawngin Pathian hnen khalah lungawi aipuangin kan um, atu-ah Jesu Khrih thawngin remawknak kan co zo.

5:10^a 2Ko 5:18-19; Kol 1:20-22; Heb 7:25

Adam ah Thihnak, Khrih ah Nunnak

12 ^aCuruangah mi pakhat ruangin leitlun ah sual a lut ih, cuih sual ruangah leitlun ah thihnak a luh vekin, thihnak in mi hmuahhmuah a fángsuak, ziangruangahtile mi hmuahhmuah cu an sual thluh zo. 13 Ziangahtile Dān a thlen hlanah leitlun ah sual a um zo, asinan Dān a um lo laiah, sual cu sual ih siar a rak si lo. 14 ^bSihmansehla Adam ihsin Mosi tiang Adam-ih dān pahbăl mi vek sual a tuah lo tupawl par khalah thihnak in a uk. Adam cu a ra ding mi pa hmuhsaknak a si.

5:12^a Sem 2:17; 3:1-7; 1Ko 15:21-22

5:14^b Sem 3:11-12; 1Ko 15:22, 45

15 ^aAsinan a lakih thilpek cu Adam-ih mawhsualnak vek a si lo. Ziangahtile mi pakhat ih mawhsualnak ruangah mi tampi an thih a si ahcun, Pathian zangfahnak le mi pakhat, Jesu Khrih thawngih a ra mi zangfah thilpek ruangah cun mi tampi hnenah a luangliam sinsin ding. 16 Cule cuih a lakih thilpek cu mi pakhat sualnak ruangih thil ra thleng mi vek a si lo. Ziangahtile thuṭhennak cu mi pakhat sualnak ruangah thiam lo mi coter dingah a thleng. Asinan thil sual tuahnak tampi ruangih a lakih thilpek cun thiamconak a thlen a si. 17 ^bZiangahtile mi pakhat ih mawhsualnak ruangah, cuih mi pakhat ruangah thihnak in a uk asile, a luangliam mi zangfahnak le dingfelnak thilpek cotupawl in nunnak ah mi pakhat, Jesu Khrih thawngin an uk sinsin ding.

5:15^a Apo 15:11

5:17^b Joh 10:10

18 ^aCuruangah mawhsualnak pakhat ruangah mi hmuahhmuah hnenah thiam lo conak a thleng. Cuvek thothoin, dingfelnak thil ti pakhat in mi hmuahhmuah hnenah nunnak ngah thei nak thiamconak a thlen a si. 19 ^bZiangahtile mi pakhat ih thulunlonak ruangah mi tampi cu misual ih canter an si bangin, mi pakhat ih thulunnak thawngin mi tampi cu midingfel ih canter an si ding.

5:18^a Isa 53:11

5:19^b Fil 2:8

20 ^aCuihtlunah mawhsualnak a karh thei nak dingah, Dān a ra thleng. Asinan sual a karhnak hmun ah zangfahnak a luangliam sinsin. 21 ^bCuti cun sual cun thihnak ih a rak uk dah bangin, zangfahnak cun Jesu Khrih kan Bawipa thawngin kumkhaw nunnak ah dingfelnak in a uk thei nak dingah a si.

5:20^a Gal 3:19; 1Ti 1:13-14

5:21^b Mat 25:46

6

Sual ah Thi, Pathian ah Nung

1 Cuti asile ziang kan sim ding? Zangfahnak a karh sin nak dingah, sual ah kan umpeh vivo ding maw? 2 ^aUmpeh lamlam hlah! Kannih sual ih thi zo, ziangtin sual ah kan nung vivo thei ding? 3 ^bAsilole kannih Khrih Jesu ih baptisma a cotupawl hmuahhmuah hi a thihnak ah baptisma kan co a si ti nan thei lo maw? 4 ^cCuruangah Khrih cu mithi lak ihsin Paih ropitnak hmangih thawhter a si vekin, kannih khal nun thar ih kan nun thei nak dingah, baptisma hmangin Khrih zawngah thihnak ah phum kan si.

6:2^a Kol 3:5; 1Pe 2:24

6:3^b Mat 28:19

6:4^c Apo 2:24; 2Ko 5:17; Efe 4:22-24; Kol 3:10

5 ^aZiangahtile a thihnak băngnak neiin hmunkhat ah zăwmawkter zo kan si ahcun, a thawhsalnak băngnak nei khalin hmunkhat ah zăwmawkter kan si ding. 6 ^bSual taksa cu zianghman ti thei loih a umnak dingah, cutin sual rawng kan bawl nawn lo nak dingah, kan minung hlun cu Khrih zawngah khĕnbet a si zo ti mi hi kan thei a si. 7 Ziangahtile a thi zo mi cu sual ihsin a luat zo. 8 Khrih zawngih kan thih zo asile, amah zawngah kan nung ve ding ti kan zum. 9 ^cKhrih cu mithi lak ihsin thawhter a si ih, a thisal nawn lo ding ti kan thei. Thihnak in a parah thu a nei nawn lo. 10 ^dZiangahtile a thih tikah, sual lamah sankhuk hrangah vei khat a thi; asinan a nun tikah, Pathian lamah a nung a si.

6:5^a 2Ko 4:10; Efe 2:6; Fil 3:10-11; Kol 2:12; 2Ti 2:11

6:6^b 2Ko 4:10; Gal 2:20; 5:24; Efe 4:22; Fil 3:10; Kol 2:12, 20; 3:9

6:9^c Apo 2:24; Thu 1:18

6:10^d Heb 7:27

11 Cuti vek thothoin, nannih khal sual lamah thi taktakah ruataw uh, asinan Khrih Jesu kan Bawipa ah cun Pathian lamah nung ah ruataw uh.

12 Curuangah nan tisa câkhiarnak thlun dingin, a thi thei mi nan taksa parah sual in lo uk hlah seh. 13 ^aCule nan taksa ṭêk pawl cu dingfellonak hmanrua vekin, sual hnenah pe hlah uh, cuhnakin mithi lak ihsi nungsal vekin, Pathian hnenah peaw sawn uhla, nan taksa ṭêk pawl cu dingfelnak hmanrua vekin Pathian hnenah pe uh. 14 Ziangahtile nannih cu Dān hnuaiih um nan si lo ih, zangfahnak hnuaiih um nan si sawn ruangah, sual in nan parah thu a nei nawn lo ding.

6:13^a 2Ko 5:14-15; 1Pe 2:24

Dingfelnak Sál Ah

15 Cuti asile ziangtin? Kannih cu Dān hnuaiah um loin zangfahnak hnuaiih kan um ruangah, sual kan tuah ding maw? Tuah lamlam hlah! 16 ^aMi pakhat khat hnenah sál vekin a thu lung dingih nan pekawk asile, a thu nan lun mi paih sál nan si ti nan thei lo maw? Cuti asile, nannih cu thihnak ih mi hruaitu sualih sál, asilole dingfelnak ih mi hruaitu thulunnakih sál nan si. 17 ^bA hlanah cun nannih cu sualih sál nan rak si. Sikhalsehla nan hnenih pek mi zirhnak nan thinlung in nan lun ruangah, Pathian hnenah lungawi thu ka sim a si. 18 ^cCule sual ihsin luatter nan si zo ruangah, nannih cu dingfelnakih sál ah nan cang.

6:16^a Sem 4:7; Sam 57:5; Joh 8:34; 2Pe 2:19

6:17^b 2Ko 2:14; 2Ti 1:13

6:18^c 1Pe 4:1

19 ^aNan taksa a cah lo ruangah minung dān in thu ka sim a si. Nan taksa ṭêk pawl cu a bawrhhlawh mi thil lamah le dān pahbălnak lamah sál vekin nan rak pe. Cuih dān pahbălnak cun dān pahbăl sinsin nak ah a hruai. Cu vekin atu-ah nan taksa ṭêk pawl cu thianhlimnak ih hruaitu dingfelnak sál vekin pe uh. 20 Ziangahtile nannih cu sualih sál nan si laiah, dingfelnak in a lo uk lo. 21 Atu-ih nan zahpi mi thilpawl in khaih cān ah ziang hlawknak so a lo pek? Ziangahtile cuih thilpawlih cemnetnak cu thihnak a si. 22 ^bAsinan atu-ah cun sual ihsin luatter nan si zo ih, Pathian sál ah nan cang zo. Thianhlimnak le a netnakih kumkhaw nunnak ih hruaitu rah nan nei. 23 ^cZiangahtile sualih hlawh man cu thihnak a si, asinan Pathian thilpek bélte cu Khrih Jesu kan Bawipa thawngin kumkhaw nunnak a si.

6:19^a Gal 3:15

6:22^b Mat 25:46; 1Ko 7:22; Efe 6:6; 1Pe 2:16

6:23^c Sem 2:17; Thf 10:16; Eze 18:4; Mat 25:46; Gal 6:7-8; Jam 1:15

7

Mosi Dān lamih Thi, Pathian lamih Nung

1 ^aDān theitu nanmah hnenah ka lo sim a si, unaulenuh, Dān cun mi pakhat parah a nun sung lawng a uk ti nan thei lo maw? 2 ^bZiangahtile pasal nei mi nunau cu a pasal a nun sung lawng Dān in a pasal parah a ṭemṭawn a si. Asinan a pasal a thih ahcun a pasalih Dān ihsin anih cu a luat. 3 ^cA pasal a nun laiah cu nu cu mipa dang thawi an neihawk asile, cu nu cu uire tiah an ti ding; asinan a pasal a thih a si ahcun, cu nu cu cuih Dān ihsin a luat ih, mi dang thawi an neihawk a si hmanah uire a si lo.

7:1^a Apo 1:16; 1Ko 1:10; Gal 3:15

7:2^b 1Ko 7:39

7:3^c Luk 16:18

4 ^aCuruangah ka u le ka nau tla, Pathian lamih rah kan rah thei nak dingah, mi dang, mithi lak ihsin thawhter mi ih ṭhit mi nan si thei nak dingah nannih khal Khrih-ih taksaruangpum thawngin Dān lamah mithi ah nan cang. 5 ^bZiangahtile tisa ih kan um laiah, Dān in a cawkthawh mi câkhiarnak sual cun kan taksa ṭêk pawl ah thihnak suah dingin hna a ṭuan. 6 ^cAsinan Dān thu ngan mi lamzin hlun in si loin, Thlarau lamzin thar in Pathian kan rĕn thei nak dingah, atu-ah cun in kaitangtu lakah thi zo in, Dān ihsin runsuah kan si zo.

7:4^a Gal 2:19; Kol 1:22

7:5^b Gal 5:24

7:6^c 2Ko 3:6

Sual thawi Buanawknak

7 ^aCuti asile ziang kan sim ding? Dān cu sual a simaw? Si lamlam hlah! Cuhnakin Dān ihsi lo cun sual cu ziang a si ti ka thei lo ding. Ziangahtile Dān cun, “Mi thil na daw lo pei,” ti lo sehla, mi thil dawt cu sual a si ti ka thei lo ding. 8 Asinan sual cun thupek cu remcângah lain, keimah ah câkhiarnak phunphun a umter. Ziangahtile Dān um lo cun sual cu a thi a si. 9 Vei khat laiah Dān tel loin ka rak nung dah, asinan thupek a ra thlen tikah, sual cu a nungsal ih, kei cu ka thi. 10 ^bCule nunnak thlentu ding thupek cun ka hnenah thihnak a thlen ti ka hmusuak. 11 ^cZiangahtile sual cun thupek cu remcângah lain i bum ih, thupek hmangin i that. 12 ^dCuruangah Dān cu a thianghlim ih, thupek khal a thianghlim, a dingfel ih ṭhat khal a ṭha.

7:7^a Suah 20:17; Dnp 5:21

7:10^b Pui 18:5; Luk 10:26-28; Gal 3:12

7:11^c Sem 3:13

7:12^d Gal 3:21; 1Ti 1:8

Mizia Pahnih thawi Buanawknak

13 Cuti asile thil ṭha cu ka parah thihnak ah a cang maw si? Cang lamlam hlah! Cuhnakin sual cu sual a sizia a lăngnak dingah sual cun thil ṭha hmangin keimah ah thihnak a suahter riangri, cutin thupek hmangin cuih sual cu sual sinsinih a lăng thei nak dingah sual cun keimah ah thihnak in a ṭuan a si. 14 ^aZiangahtile atu-ah Dān cu thlarau lam thil a si ti kan thei, asinan kei cu sual hnuaiih zuar mi tisa mi ka si. 15 ^bZiangahtile ka thil tuah mi hi ka theithiam lo. Ziangahtile tuah ding ka duh mi ka tuah lo ih, ka huat mi ka tuah sawn riangri. 16 Cutiih tuah ding ka duh lo mi ka tuah asile, Dān cu a ṭha a si tiah ka lungkimpi tinak a si. 17 ^cAsinan atu-ah, cumi a tuahtu cu keimah ka si nawn lo, ka sungih cêng sual a si sawn. 18 Ziangahtile ka sungah thil ṭha zianghman a cêng lo ti ka thei, cumi cu ka tisa ah ka tinak a si. Ziangahtile thil ṭha tuah duhnak cu keimah ah a um, asinan cumi tuahsuak thei nak lamzin ka hmu thei lo. 19 Ziangahtile thil ṭha tuah ka duh mipawl ka tuah lo ih, tuah ding ka duh lo mi thil ṭha lo pawl ka tuah sawn ṭheu a si. 20 Atu-ah tuah dingih ka duh lo mi ka tuah asile, cumi a tuahtu cu keimah ka si nawn lo, ka sungih cêng sual a si sawn.

7:14^a 1Sp 21:20, 25; 2Sp 17:17; 1Ko 3:1

7:15^b Gal 5:17

7:17^c Gal 5:24

21 Curuangah thil ṭha tuah ka duh tikah, thil ṭha lo ka hnenah a um ti mi dān hin keimah ah hna a ṭuan ti ka hmusuak. 22 ^aZiangahtile ka sung lam minung cu Pathian Dān ah a lung a awi zet. 23 ^bAsinan ka lungthin dān dokalhtu ka taksa ṭêk ah dān dang ka hmu, cumi cun ka taksa ṭêk pawl ih ṭuantu sual dānih sál ah i hruai. 24 Aw ka dinhmun hi a va harsa lawmmam ve! Hi thihnak taksaruangpum ihsin zo in so i runsuak ding? 25 ^cJesu Khrih kan Bawipa thawngin Pathian hnenah lungawi thu ka sim a si! Curuangah keimah rori cun ka lungthin thawn Pathian Dān ka rian, asinan ka taksa cun sual dān a rian a si.

7:22^a Sam 1:2; Efe 3:16

7:23^b Gal 5:17; Jam 4:1; 1Pe 2:11

7:25^c 2Ko 2:4

8

Thlarau thawngih Nunnak

1 Curuangah atu-ah cun tisa duh zawngih nung loin, Thlarau duh zawng sawn ih a nungtu, Khrih Jesu ih a um mipawl hrangah cun thiam lo conak a um nawn lo. 2 ^aZiangahtile Khrih Jesu thawngin Khrih Jesu ah nunnak Thlarau dān cun sual le thihnak dān ihsin i luatter zo. 3 ^bZiangahtile tisa ruangah Dān cu a cak lo ih a tuah thei lo mi cu Pathian in amai Fapa rori misual pian kengin sual hrangih raithawinak ah a run thlah ih, taksaruangpum ah sual cu thiam lo a coter. 4 ^cTisa duh zawngih nung loin, Thlarau duh zawng sawn ih a nungtu kanmah ah Dān ih ngĕn mi dingfelnak a famkim thei nak dingah a si.

8:2^a Joh 8:32, 36; 1Ko 15:45

8:3^b Gal 5:24; Fil 2:7; Heb 2:14, 17; 7:18

8:4^c Gal 5:16

5 ^aZiangahtile tisa duh zawngih a nungtupawl cun tisa lam thilpawl an ruat, asinan Thlarau duh zawngih a nungtupawl cun thlarau lam thilpawl an ruat. 6 ^bZiangahtile tisa lamzin ruah cu thihnak a si, asinan thlarau lamzin ruah cu nunnak le hnangamdaihnak a si. 7 ^cZiangruangahtile tisa lamzin ruah cu Pathian doral sinak a si. Ziangahtile tisa cu Pathian Dān ah a tlulut lo ih, a tlulut thei lo taktak. 8 ^dCuruangah tisa ih umpawl cun Pathian lung an hmuiter thei lo.

8:5^a Gal 5:19-21, 25

8:6^b Gal 6:8

8:7^c Jam 4:4

8:8^d Gal 5:24

9 ^aAsinan nannih cu tisa ih um nan si lo, Pathian Thlarau nanmah ih a cēn asile, nannih cu Thlarau ah nan um a si. Asinan zokhal Khrih Thlarau nei lo tu cu Khrih-ih ta a si lo. 10 ^bCule Khrih cu nan sungih a um asile, sual ruangah taksa cu a thi. Asinan dingfelnak ruangah Thlarau cu nunnak a si. 11 ^cAsinan mithi lak ihsin Jesu thotertu Pathian Thlarau nan sungih a cēn asile, mithi lak ihsin Khrih thotertu in nan sungih cêng a Thlarau thawngin a thi thei mi nan taksa cu nunnak a pe ve ding.

8:9^a Joh 14:17; Apo 16:7; 1Ko 6:19; Gal 5:24; 2Ti 1:14; 1Joh 4:13

8:10^b Suah 29:45; Joh 14:20, 23; 2Ko 13:5; Gal 2:20; Efe 3:17; Kol 1:27; Thu 3:20

8:11^c Apo 2:24

12 ^aCuruangah u le nau tla, leiba kan nei, asinan tisa duh zawngih nung dingin tisa ah cun a si lo. 13 ^bZiangahtile tisa duh zawngih nan nun asile, nan thi ding. Asinan Thlarau in cuih taksa thil tipawl nan thah asile, nan nung ding. 14 ^cZiangahtile Pathian Thlarau ih a hruai mipawl hmuahhmuah cu Pathian fāte an si. 15 ^dṬihih um dingin sál ih lo tāngsaltertu ding Thlarau nan co lo ih, fa sinak Thlarau nan co sawn a si. Cuih Thlarau in, “Abba, ka Pa,” tiin kan ausuak. 16 ^ePathian fāte kan si ti cu Thlarau rori in kan thlarau a theihfiangter. 17 ^fCule fa kan si ruangah, ro cotu khal kan si ih, Pathian ro cotu le Khrih ro copitu kan si. Amah zawngih kan tuar taktak asile, sunlawihtlang khal kan si ding.

8:12^a Gal 5:24

8:13^b Gal 6:8

8:14^c Mat 5:9; Gal 3:26; Thu 21:7

8:15^d Mar 14:36; Gal 4:5-6; 2Ti 1:7

8:16^e Joh 1:12; Efe 1:13

8:17^f Apo 20:32; 2Ko 1:5; Gal 3:29; Efe 3:6; 2Ti 2:12; Tit 3:7; 1Pe 4:13

Tuarnak ihsin Ropitnak Ah

18 ^aZiangahtile tuih cān ih kan tuarnakpawl hi kan hnenih phuanlăng leh ding mi ropitnak thaw cun tahṭhim tlakah ka ruat lo. 19 Ziangahtile Pathian falepawl lăng leh nak ding cu sersiam mipawl in beiseinak dik thawn hlawptlo zetin an hngak a si. 20 ^bZiangahtile sersiam mipawl cu zianghmanlo hnuaiih ret an si. Anmai duh ruangah si loin, a umtertu in ruahsannak thawn a umter a si sawn. 21 ^cZiangruangahtile sersiam mipawl rori khal ṭawihralnak sál ihsin luatter an si ding ih, Pathian fātepawl zalĕnnak ropi sungah luhter an si ding.

8:18^a 2Ko 4:17; 1Pe 4:13

8:20^b Sem 3:17-19

8:21^c Apo 3:21; 2Pe 3:13; Thu 21:1

22 ^aZiangahtile sersiam mi zaten atu tiangin hrûm le fahrin nat tuar vekin an umtlang a si ti kan thei. 23 ^bCulawng si loin, rah hmaisabik a si mi Thlarau neitu kanmah rori khal kan sung lam ihsin fa sinak a si mi, kan taksaruangpum tlennak cu hlawptlo zetih hngakin kan hrûm rero. 24 ^cZiangahtile kannih cu ruahsannak ah rundam kan si. Asinan hmuh thei mi ruahsan cu ruahsannak a si lo. Ziangahtile zo in so a hmuh mi thil cu a ruahsan nawn ding? 25 ^dAsinan kan hmuh lo mi kan ruahsan asile, hlawptlo zetin thinsaunak thawn kan hngak ṭenṭo ṭheu.

8:22^a Jer 12:4

8:23^b 2Ko 5:5; Gal 5:5

8:24^c 1Th 5:8; Tit 3:7

8:25^d Sam 37:7

26 ^aCuvek thothoin Thlarau cun kan ṭawnṭaihnakpawl ah in bawm. Ziangahtile ziang hrangah thla kan cam ding ti kan thei lo, asinan Thlarau rori cun ṭawngkam ih sim theih lo khawpih hrûmin in ngĕnsak. 27 ^bThinlung cĕktu cun Thlarau-ih lungthin khal a thei, ziangruangahtile Thlarau cun Pathian duh zawngin mithiangpawl hrangah a ngĕnsak.

8:26^a Efe 6:18

8:27^b Thu 2:23

28 ^aCule Pathian a duhdawtu, amai tumtah mi vekih a kawh mipawl hrangah thil ziangkim hin an ṭhatnak dingah an ṭuantlangkhawm a si ti kan thei. 29 ^bZiangahtile Pathian in a theih cia mipawl cu a Fapa băngnak ih thlĕngaw dingah a ruat cia hai, cutin Fapa cu unau tampi lakah fatir a si thei ding a si. 30 ^cCuihhleiah Pathian in a ruah cia mipawl cu a ko hai fawn; a kawh mipawl cu thiam a coter hai ih, thiam a coter mipawl cu a sunlawih hai fawn.

8:28^a 1Ko 1:9; Gal 1:6, 15; Heb 9:15; 1Pe 2:9

8:29^b Efe 1:5, 11; Kol 1:18; 1Pe 1:2

8:30^c Efe 1:5, 11

Kumkhaw Duhdawtnak

31 ^aCuti asile hi thilpawl thuhla ah ziang kan sim ding? Pathian kan lamih a ṭan ahcun, zo in so in do thei ding? 32 ^bAmai Fapa rori hman ui loin, kan zate hrangih petu cun, thil hmuahhmuah khal a Fapa zawngah a lakin in pecih loin a um ding maw? 33 ^cPathian ih hril zo mi cu zo in so sual a puh ding? Thiam a cotertu cu Pathian a si. 34 ^dThiam lo mi cotertu cu zo a si? A thitu cu Khrih a si, cuihhleiah anih cu mithi lak ihsin thawhter a si ih, Pathian vawrh lam roriah toin kan hrangih in ngĕnsaktu cu Khrih a si. 35 ^eKhrih-ih duhdawtnak ihsin zo in so in ṭhen ding? Harsatnak in simaw, vansannak in simaw, hremnak in simaw, mangṭam in simaw, taklawngnak in simaw, ṭihphannak in simaw, ralnâm in simaw in ṭhen thei ding maw?

8:31^a Sam 56:9; Hag 1:13; Heb 13:6

8:32^b Sem 22:13; Joh 3:16

8:33^c Isa 50:8-9

8:34^d Isa 53:12; Mar 16:19; Apo 2:24; Heb 7:25

8:35^e 1Ko 4:11; 2Ko 11:26

36 ^a“Nangmah ruangah sunnivu thahin kan um;
Kannih cu sathattu hrangih tuu vekih ruah mi kan si,”

8:36^a Sam 44:22; 1Ko 4:9; 2Ko 4:11

tiih ngan vek khan a si.

37 ^aSihmansehla cuih thil hmuahhmuah ah cun in duhdawtu zarah nehtupawl hnakin nehtu kan si. 38 ^bZiangahtile thihnak in simaw, nunnak khal in simaw, vancungmipawl khal in simaw, uktupawl khal in simaw, huhampawl khal in simaw, tuih cān ih thilpawl khal in simaw, hmai lam cān ih thil um ding mi khal in simaw, 39 thil sâng khal in simaw, thil thûk khal in simaw, sersiam mi ziang thil dang hmanin Khrih Jesu kan Bawipa ih um, Pathian duhdawtnak ihsin in ṭhen thei lo ti ka theifiang a si.

8:37^a 1Ko 15:57; Gal 2:20; Efe 5:2; Thu 1:5

8:38^b 1Ko 3:22; Efe 1:21; 1Pe 3:22

9

Pathian ih Israel a Hrilnak

1 ^aKhrih ah thutak ka sim a si, thuphan ka sim lo, Thlarau Thianghlim ah ka sia le ṭha theihnak khalin in theihpi ve. 2 Cumi cu ka thinlung ih riahsiatnak nasa zet le catbang lo thinnatnak ka neih mi hi a si. 3 ^bZiangahtile taksa dān ih ka sungkhat, ka unaupawl aiah keimah rori hi Khrih hnen ihsin ṭhenin, camsiat tiang hman si ningla ka duh. 4 ^cAnnih cu Israel-mi an si ih, fa sinak, ropitnak, thukhampawl, Dān peknak, Pathian rawngbawlnak le thutiamkampawl tla anmai ta a si; 5 ^dpupápawl khal anmai ta an si ih, Khrih cu taksa dān ih a sungkua a si mi anmah hnen ihsin a ra. Amah cu ziang hmuahhmuah tlunih Pathian a si, kumkhuain amah cu thangṭhat si ko seh. Amen.

9:1^a Sam 15:2; 2Ko 11:10; Gal 1:20; 1Ti 2:7

9:3^b Suah 32:32; Apo 22:5; 1Ko 12:3

9:4^c Sem 17:2; Suah 4:22; Dnp 7:6; Apo 3:25; Gal 3:16; Heb 9:5

9:5^d Mat 1:1-16; Kol 2:9

6 ^aAsinan Pathian kamsuakthu a hlawhsam tinak a si lo. Ziangahtile Israel miphun zaten Israel diktak an si thluh lo. 7 ^bCuvek thothoin Abraham cithlah an si ruang khalah Abraham fāte ngaingai an si thluh cuang lo. “Isak ah na cithlah tiih kawh a si ding,” ti a si sawn.

9:6^a Gal 6:16

9:7^b Sem 21:12; Heb 11:18

8 ^aCucu, taksa dān ih fātepawl cu Pathian fāte an si lo ih, tiamkam fātepawl cu cithlah ih pawm an si sawn tinak a si. 9 ^bZiangahtile, “Himi bikhiah mi cān ah ka rasal ding ih, Sarah in fapa a nei ding,” ti hi thutiamkam kamsuakthu cu a si.

9:8^a Gal 3:16

9:9^b Sem 18:10, 14

10 ^aCule culawng si loin, Rebekah khal in mi pakhat, kan pa Isak hnenin fa a vun tikah, 11 fa a hrin hlan, a falepawl in a sia le a ṭha zianghman an tuah hlanah, hrilnak thu ih Pathian thil tum a hngeh thei nak dingah, Pathian in cutin a tuah. Cucu thil ti parih ṭhumaw si loin, a kotu parih ṭhumaw a si sawn. 12 ^bRebekah hnenah, “A upadeuh in nautadeuh a rian ding,” tiih sim a si.

9:10^a Sem 25:21

9:12^b Sem 25:23

13 ^aCumi cu,

9:13^a Mal 1:2-3

“Jakob cu ka duhdawt, asinan Esau cu ka hua,”

tiih ngan mi vek khan a si.

14 Cuti asile ziang kan sim ding? Pathian cu a dingfel lo maw si? Si lamlam hlah! 15 ^aZiangahtile Pathian in Mosi hnenah, “Zahngainak ka neih ding mi parah zahngainak ka nei ding ih, lainatnak ka neih ding mi parah lainatnak ka nei ding,” tiah a ti.

9:15^a Suah 33:19

16 ^aCuti a si ruangah a duhtu le a tlân rero tu milai hnen ihsin a si lo ih, zahngainak a hmuhtu Pathian hnen ihsin a si sawn. 17 ^bZiangahtile Cathiang in Faro hnenah, “Nangmah ah ka huham ka lăngter thei nak dingah le leilung hmuahhmuah ah ka hmin aupi a si thei nak dingah, cuih tumtahnak rori hrangah nang cu ka lo tungding a si,” tiah a ti.

9:16^a Efe 2:8; Tit 3:5

9:17^b Suah 9:16; Sam 76:10

18 ^aCuruangah Pathian cun zahngai a duh mi parah zahngainak a nei ih, thinlung hahter a duh mi parah a hakter.

9:18^a Suah 4:21; Dnp 2:30; Jos 11:20

19 ^aNang in ka hnenah, “Cuti asile ziangah so Pathian in mawhsualnak a hawl hrih? Zo in a duhnak cu a dokalh?” tiah thu i sut ding maw? 20 ^bAsinan thungaiten, maw nang milai! Pathian kalh zawngih let ngam tu nang cu zo na si? Thil tuah mi in a tuahtu pa hnenah, “Ziangah hi vekin i tuah?” tiah thu a sut ding maw? 21 ^c Bel lei bangrep ihsin bel pakhat cu sunglawi zetih hman dingah le a dang bel pakhat cu a menmenih hman dingah bel tuahtu in bel lei parah thuneihnak a nei a si lo maw?

9:19^a 2Sam 16:10; 2San 20:6; Dan 4:35; 1Ko 15:35; Jam 2:18

9:20^b Job 1:22; Isa 29:16; 45:9; 64:8; Jer 18:6

9:21^c 2Ti 2:20

22 ^aPathian cun a thinlingnak lăngter le a huham theihter duh khal sehla, thinlingnak a cotu ding pawl parah le an siatnak ding a timlamsak mi thinhengnak belpawl parih thinsaunak nasa zet thawi a zāwi hai ahteh, ziang sim ding kan nei? 23 Cule hlan ihsi a rak timtuah hai mi zah a ngai mi belpawl parah a ropitnak lenzia a lăngter thei nak dingah a si. 24 Kannih hi a kawh mipawl cu kan si, Jew-pawl lak ihsi lawngin si loin, Zentelpawl lak ihsi khalin in ko a si. 25 ^bHosea cazual sungah Pathian in,

9:22^a Thf 16:4

9:25^b Hos 2:23; 1Pe 2:10

“Ka mi a si lo pawl kha, ‘Ka mi,’ tiah ka ko hai ding ih,
Ka duhdawt lo mi nu kha, ‘Ka duhdawt mi nu na si,’ tiah ka ti ding,”

tiah a ti.

26 ^a“Cule hitin a si ding, an hnenah,
‘Nannih cu ka minung nan si lo,’ tiih a rak tinak hmun ah khan,
Nannih cu a nung mi Pathian fapapawl tiah kawh an si ding,”

9:26^a Hos 1:10; Mat 16:16

tiah a ti.

27 ^aIsaiah khal in Israel thuhla ah,

9:27^a Sem 22:17; 2Sp 19:4; Jer 44:14; Hos 1:10; Joe 2:32

“Israel-mipawl cu tipithuanthum kapih vunnel zat in tam hman hai sehla,
A tāngsŭn lawng rundam an si ding.
28 ^aZiangahtile Pathian in hna cu a cemnet tiang a ṭheh ding ih, dingfelnak in a tántâwi ding.
Ziangruangahtile Bawipa in leitlun ah hna cu a tâwiter ding,” tiah a au. 29 ^bCucu Isaiah in hlanlai ah,
“Ralkap rualpawlih Bawi in kan hnenah cithlah hrekkhat tāngter lo sehla,
Sodom vek kan si zo ding ih, Gomorrah vek kan si zo ding,”

9:28^a Isa 10:22-23

9:29^b Sem 19:24-29; Isa 1:9; 13:19; Jer 50:40

tiih a ti vek khan a si.

Israel-ih Zumlonak

30 ^aCuti asile, ziang kan sim ding? Dingfelnak a dawi lo tu Zentelpawl in dingfelnak an hmungah zo. Cuih dingfelnak cu zumnak parih ṭhumaw a si. 31 ^bAsinan dingfelnak dān a dawitu Israel-mipawl in dingfelnak dān cu an hmungah lo. 32 ^cZiangruangah so? Ziangruangahtile zumnak parih ṭhumaw mi dingfelnak an dawi ve lo ih, Dān thlunnak parih ṭhumaw mi dingfelnak an dawi sawn ruangah a si. Curuangah cuih tlûkbahnak lung ah cun an bah. 33 ^dCucu,

9:30^a Gal 2:16; Fil 3:9; Heb 11:7

9:31^b Dnp 6:25; Isa 51:1; Gal 5:4

9:32^c 1Pe 2:8

9:33^d Isa 8:14; 28:16; 1Pe 2:6, 8

“Ngai hnik uh, Zion ah bahnak lung le tlûknak lungpi ka ret.
Zokhal amah zumtu cu ningzahter a si lo ding,”

tiih ngan vek khan a si.

10

1 ^aU le nau tla, Israel-mipawl hrangih ka thinlung ih a duh zet mi le Pathian hnenih ka thlacam mi cu anmahpawl rundam an si ding hi a si. 2 ^bZiangahtile Pathian hrangah ṭhahnem an ngaizia cu ka theihpi hai, asinan an ṭhahnemngainak cu theihnak famkim thawi milawin a si lo. 3 Ziangahtile Pathian dingfelnak thei loin, anmai dingfelnak dĭn hngehter an duh tikah, Pathian dingfelnak ah an tlulut lo. 4 ^cZiangahtile a zumtu pauhpauh dingfelnak an hmuh thei nak dingah, Khrih cu Dān cemnetnak a si.

10:1^a Sam 20:4

10:2^b Apo 21:20

10:4^c Gal 3:24

Rundamnak cu Mi hmuahhmuah Hrang

5 ^aZiangahtile Mosi cun Dān parih ṭhumaw mi dingfelnak thu ah, “Cuih thilpawl a thluntu cu cupawl in a nung ding,” tiah a ngan. 6 ^bAsinan zumnak parih ṭhumaw mi dingfelnak cun, “Na thinlung in, ‘Vancung ah zo a kai ding?’ ti hlah,” cumi cu tlun lam ihsin Khrih hruaisuk ding tinak a si, 7 ^casilole, “Na thinlung in, ‘Zo so a thûknak sungah a ṭum ding?’ ti fawn hlah,” cumi cu mithi lak ihsin Khrih cu hruaisoh ding tinak a si, tiin a ngan. 8 ^dSikhalsehla cangan mi in ziang a simbêt? “Kamsuakthu cu na kiang naite ah a um, na kâ le na thinlung ah a um,” cumi cu kan phuan mi zumnak kamsuakthu hi a si: 9 ^ena kâ in Jesu cu Bawi a si tiah na phuang ih, na thinlung in mithi lak ihsin Pathian in a kaitho ti na zum asile, rundam na si ding. 10 Ziangahtile mi pakhat in a thinlung in a zum ih, cumi cun dingfelnak ah a hruai, cule a kâ in a phuang ih, cumi cun rundamnak a hringsuak. 11 ^fZiangahtile Cathiang in, “Zokhal amah zumtu cu ningzahter a si lo ding,” tiah a ti. 12 ^gZiangahtile Jew-mi le Grikmi karlakah zianghman danglamnak a um lo, ziangahtile Bawi pakhat cu an zate tlunih Bawi a si, amah kotu hmuahhmuah hnenah a lian a si. 13 ^hZiangahtile, “Zokhal Bawipaih hmin a kotu cu rundam a si ding.”

10:5^a Pui 18:5; Dnp 4:1; Neh 9:29; Thf 19:16; Isa 55:3; Eze 20:11, 13, 21

10:6^b Dnp 30:12

10:7^c Dnp 30:13; Apo 2:24

10:8^d Dnp 30:14

10:9^e Mat 10:32; Joh 3:15; 13:13; Apo 2:24

10:11^f Isa 28:16

10:12^g Mat 28:18

10:13^h Joe 2:32; Apo 2:21

14 Amah an zum lo asile ziangtin amah cu an ko ding? Hna ih a thu an theih lo ahcun ziangtin so amah cu an zum ding? Cule phuangtu um loin ziangtin so an theih ding? 15 ^aCule thlah an si lo ahcun ziangtin so an phuan ding?

10:15^a Isa 52:7; Nah 1:15

“Remnak thuthangṭha a phuangtu le
Lungawiumza thil ṭha thuthang a phuangtupawlih ke cu ziang tlukin so a mawi!”

tiih ngan vek khan a si.

16 ^aAsinan thuthangṭha cu mi hmuahhmuah in an lung lo. Ziangahtile Isaiah in, “Bawipa, zo in so kan thuthan mi a zum?” tiah a ti. 17 ^bCuruangah zumnak cu hna ih theihnak in a ra ih, hna ih theihnak cu Pathian kamsuakthu ihsin a ra.

10:16^a Isa 53:1; Joh 12:38; Heb 4:2

10:17^b Gal 3:2, 5; Kol 3:16

18 ^aAsinan kei in, hna in an rak thei lo maw si? tiah ka ti. A si, thei taktak e,

10:18^a Sam 19:4; Mat 24:14; Kol 1:6, 23; 1Th 1:8

“An aw cu leilung tlun hmuahhmuah a thangsuak ih,
An ṭawngkampawl cu leitlun dĕng tiang a thang,”

tiah ka ti.

19 ^aAsinan kei in, Israel-mipawl in an theithiam lo maw si? tiah ka ti. A hmaisabikah Mosi in,

10:19^a Dnp 32:21

“Miphun si lo mi hmangin iksiknak ka lo neiter ding ih,
Miphun â hmangin ka lo thinhengter ding,”

tiah a ti.

20 ^aCule Isaiah cun ralṭha zetin,

10:20^a Isa 65:1

“I hawl lo tupawl in in hmu;
Ka thu a zingzawi lo tupawl hnenah keimah le keimah ka phuanglangaw,”

tiah a ti.

21 ^aAsinan Pathian in Israel-mipawl hnenah,

10:21^a Isa 65:2; Jer 35:17

“Thulung lo le thu-elhmang pawl hnenah
Sunvu in ka kut ka san,”

tiah a ti.

11

Israel cu Hnawn Lan ta a Si Lo

1 ^aAsile Pathian in a minungpawl cu a hnáwng hai maw si? Hnáwng lamlam hlah! Ziangahtile kei khal Israel-mi, Abraham cithlah, Benjamin hnám ka si. 2 Pathian in a rak theih cia mipawl cu a hnáwng lo. Asilole Cathiang in Elijah thuhla a sim mi nan thei lo maw? Anih cun Israel-mipawl dokalhin Pathian hnenah a ngen, 3 ^b“Bawipa, na profetpawl an that ih, na biakṭhengpawl an ṭhiatbăl. Keimah lawng ka tāng ih, ka nunnak la dingin an hawl,” tiah a ti. 4 ^cSikhalsehla Pathian in ziangtin a sawn? “Baal hmaiih khukbil dah lo mi 7000 ka hrangah ka rethim a si,” tiah a ti. 5 Cuvek thothoin tulai khalah Pathian in zangfahnak ih a hril mi a tāngsŭn an um a si. 6 Cule zangfahnak in a si ahcun, cuih hrilnak cu thil ti parih ṭhumaw mi a si nawn lo ding, cuti a si lo ahcun, zangfahnak cu zangfahnak a si nawn lo ding. Asinan thil ti parih ṭhumaw a si ahcun, zangfahnak in a si nawn lo ding; cutin asilole thil ti cu thil ti a si nawn lo ding.

11:1^a Pui 26:44; 1Sam 12:22; Sam 94:14; Jer 31:37; 2Ko 11:22; Fil 3:5

11:3^b 1Sp 19:10, 14

11:4^c 1Sp 19:18

7 Cuti asile ziangtin? Israel-mipawl in an hawl mi cu an ngah lo. Asinan hril mipawl cun an ngah ih, a tāng mipawlih thinlung cu a hak a si. 8 ^aCumi cu,

11:8^a Dnp 29:4; Isa 29:10; Mat 13:13-15

“Pathian in tuihni tiangin ihthah thlepthlep nak thlarau,
Hmuh thei lo nak mit le,
Theih thei lo nak hna a pe hai,”

tiih ngan vek khan a si.

9 Cule David in,

“An cabuai cu tháng le miawhnak, tlûknak le
Lehrulhawknak ah cang seh.
10 ^aKhua an hmuh thei lo nak dingah an mit thim sehla, an el kûn lan ta seh,”

11:10^a Sam 69:22-23

tiah a ti.

Israel Hnawnnak ih Tumtah Mi

11 ^aCuti asile, an tlûk lan ta nak dingah an bah maw si? tiah kei in ka ti. Si lamlam hlah! An mawhsualnak ruangah Zentelpawl hnenah rundamnak a thleng sawn ih, cumi cun Israel-mipawl thintăwk ih, iksiknak an neih thei nak dingah a si. 12 An mawhsualnak cun leitlun minungpawl hnenah lennak a thlen ih, an hlawhsamnak in Zentelpawl hnenah lennak a thlen a si ahcun, an famkimnak cun ziang tluk lennak thlen sinsin tak pei maw!

11:11^a Apo 13:46

13 ^aKeimah rori cu Zentelpawl hnenih apostol ka si ruangah nannih Zentelpawl hnenah ka lo sim, ka rawngbawlnak ka tluangkhawnpi a si. 14 ^bZiangmaw titiin taksa dānih ka miphunpawl in nahsuahnak an neih thei nak dingah an thin ka thawhter ih, cutin mi hrekkhat tal ka run thei nak dingah a si. 15 ^cZiangahtile anmah hnawnnak hman Pathian le leitlun mipawl remawknak a si ahcun, anmah cohlansalnak cu mithi lak ihsin nunnak a si lo ding maw?

11:13^a Apo 9:15

11:14^b Mat 1:21; Luk 2:11; Joh 3:17; Apo 4:12; 1Ko 1:21; 10:33; 1Th 2:16; 1Ti 2:4; Tit 3:5

11:15^c Luk 15:24, 32

16 ^aRah hmaisabik rawl thar cu a thianhlim asile, sang hlăwm pumpi khal a thianghlim a si. Cun a hram a thianhlim asile, a hngeṭêkpawl khal an thianghlim. 17 ^bCule a hngeṭêk hrekkhat cu khiah an si ih, nang cu Olif thing sungah peh na si. Nang cu hramlak Olif thing men na si nân, atu-ah cun, Olif thing ih hram le thau na ṭawm ve. 18 ^cHnawn mi hngeṭêkpawl thuhla ah tluangkhâwng hlah. Asinan na tluangkhawn asile, nang cun a hram na câwm lo ih a hram in a lo câwm sawn ti mi hi cîng ringring aw.

11:16^a Pui 23:10, 17; Mip 15:18-21

11:17^b Jer 11:16; Joh 15:2; Apo 2:39; Efe 2:11-13

11:18^c Joh 4:22

19 Cutin nang in, “A sungih peh ka si thei nak dingah a hngeṭêkpawl cu khiah an si,” tiah na ti ding. 20 ^aCumi cu a dik a si. An zum lo ruangah annih cu khiah an si, asinan nang cu zumnak in na ding. Nangmah le nangmah sâng tukah ruataw hlah aw, cuhnakin Pathian ṭihzah sawn aw. 21 Ziangahtile Pathian in a hngeṭêk taktak pawl a zuah lo asile, nang khal a lo zuah ve ce lo ding.

11:20^a 1Ko 10:12; 2Ko 1:24; 1Ti 6:17; 1Pe 1:17

22 ^aCuruangah Pathian ṭhatnak le a hrohrannak ruat aw. A tlu mipawl parah cun a hrohrang, asinan a ṭhatnak ih na umpeh vivo asile, anih cu na hrangah a ṭha a si. Culole nang khal a lo sattán ding. 23 ^bCule zumlonak ah an umpeh vivo lo asile, annih cu peh an si leh ding, ziangahtile Pathian cun anmah cu a pehsal thei. 24 ^cZiangahtile nang cu hramlak ih mah te kho mi Olif kung ihsin tan mi na si ih, dān kalhih cīn mi Olif kung ṭha sungih peh mi na si. Cumi cu a dik ruangah, ziang tluk nasa sinsinin ṭêk ngai a si mipawl kha anmai Olif kung ah peh si hai pei maw?

11:22^a Joh 15:2; 1Ko 15:2; Kol 1:23; Heb 3:6

11:23^b 2Ko 3:16

11:24^c Jer 11:16

Israel Zate Rundam

25 ^aZiangahtile ka u le nau tla, hi thuthup hi thei loih nan um ding ka duh lo, cuti asilole mifim ah nan ruataw pang ding. Cuih thuthup cu hihi a si, Zentel mipum an kim lai hlanlo, Pathian in Israel tamsawnih thinlung a hakter. 26 ^bCule cutin Israel miphun zaten rundam an si ding. Cumi cu,

11:25^a Luk 21:24; 1Ko 10:1; 2Ko 1:8; 1Th 4:13

11:26^b Isa 45:17; Jer 31:34

“Runsuaktu cu Zion ihsin a suak ding ih,
Jakob hnen ihsin Pathian ngaihsaklonak cu a lahlo ding.
27 ^aZiangahtile an sualpawl ka lâkhloh tikah,
Anmah thawi ka thukham cu hihi a si,”

11:27^a Isa 27:9; 59:20-21; Jer 31:33-34; Heb 8:10, 12

tiih ngan vek khan a si.

28 ^aThuthangṭha lam thu ah cun nanmai hlawknak dingah annih cu thuthangṭha doral an si. Asinan hrilnak lam thu ah cun pupápawl ruangah annih cu Pathian ih duhdawt mi an si. 29 ^bZiangahtile Pathian thilpekpawl le a kawhnak cu ṭhiah theih a si lo. 30 ^cZiangahtile a liam cia mi cān ah nannih in Pathian thu nan rak lun lo vek khan, thu an lun lo ruangah, atu-ah zahngainak nan co riangri. 31 Zahngainak nan co thei nak dingah, atu-ah annih cu thu an lung lo. Cuih zahngainak nan conak zarin annih khal in zahngainak an co ve ding. 32 Ziangahtile mi hmuahhmuah parih zahngainak a neih thei nak dingah Pathian in an zaten thulunlonak ah a khum ṭheh hai.

11:28^a Dnp 7:8

11:29^b Heb 7:21

11:30^c Efe 2:2

33 ^aAw, Pathian-ih fimnak lenzia le a theihnak lenzia cu an va thûk lawmmam ve!
A thuṭhennakpawl cu zohman in an hawlsuak theiin,
A lamzinpawl cu zohman in an va zawtsuak thei lo tak em!
34 ^b Ziangahtile “Zo in so Bawipaih lungthin thei?
Asilole zo so a thurawn mi si dah?”
35 ^c“Asilole zo in a rulhsal leh dingin a hnenah thil pe hmaisa dah?”

11:33^a Job 5:9; Ths 8:17; Isa 40:28; Efe 3:10; Kol 2:3

11:34^b Isa 40:13; 1Ko 2:16

11:35^c Job 41:11

36 ^aZiangahtile thil hmuahhmuah hi amah hnenin le amah ruangin le amah hrangah an si. A hnenah ropitnak cu um kumkhua hram seh! Amen.

11:36^a 1Ko 8:6; Kol 1:16; 1Ti 1:17; Heb 2:10; 1Pe 5:11; Thu 5:13

12

A Nung mi Raithawinak

1 ^aCuruangah ka u le ka nau tla, Pathian zahngainak ruangah nan taksaruangpum cu Pathian hnenah a nungih raithawi mi vekin le thianghlim le Pathian lunghmui tlakih hlan dingah ka lo ngen, cumi cu nan ti ding awm hrimhrim a si. 2 ^bCule a ṭha mi, pawm tlak le a famkim mi Pathian duhnak nan theihfiang thei nak dingah, tulai san mipawlih nundān vekin nung loin, nan lungthin tharternak in thlĕngaw sawn uh.

12:1^a 1Ko 6:20; 1Pe 2:5

12:2^b 1Ti 5:4; 1Pe 1:14; 1Joh 2:15

Thlarau Thilpek

3 ^aZiangahtile Pathian in zumnak a lo pek tawkte fingfing vekin, nanmah lakih zohman in a ruahawk ding tawk hnakih sângin ruataw hlah seh, ruahnak dikin ruat aw sawn seh tiah ka hnenih zangfahnak i pek mi thawngin ka lo sim a si. 4 ^bZiangahtile taksaruangpum pakhat ah ṭêk tampi kan nei, asinan cuih taksa ṭêk hmuahhmuah in hnaṭuan bangrep an nei lo. 5 ^cCu vekin kannih cu mi tampi kan si nân, Khrih ah taksaruangpum pumkhat kan si ih, a pâkpâk in pehzăwmawtăwn cio kan si. 6 ^dKan hnenih pek mi zangfahnak bangtukin thilpek phun dangdang kan nei cio. Thilpek cu profet thuphuanih thuphuan asile, zumnak kan neih tawkin profet thuphuan in thuphuang uhsi. 7 ^eThilpek cu mi rennak asile, cumi cu mi rennak ah hmang uhsi. Thilpek cu zirhnak asile, mi zirh seh. 8 ^fThilpek cu mi dang tha va peknak asile, thazang mi pe seh. Thilpek cu peknak asile, siang zetin pe seh. Thilpek cu hruaitu sinak asile, taima zetin hruai seh. Thilpek cu zahngainak asile, lungawi zetin zahngainak nei seh.

12:3^a 1Ko 15:10; Gal 2:9; Efe 3:7

12:4^b 1Ko 12:12; Efe 4:16

12:5^c 1Ko 6:15; Efe 2:16

12:6^d 1Ko 7:7; Efe 4:11; 1Pe 4:10

12:7^e Efe 4:11

12:8^f Apo 11:23; 2Ko 8:2

Khristian Nun

9 ^aDuhdawtnak cu a deu-in si hlah seh. A ṭha lo mi fih uhla, a ṭha mi kai hnget uh. 10 ^bUnau duhdawtnak in pakhat le pakhat duataw uh, nangmah le nangmah na upatawk hnakin, mi dang va upat sawn aw. 11 ^cZangzel hlah uh, nasa zetin hnaṭuan uh, thatho zetin Bawipa rian uh. 12 ^dRuahsannak ah lungawi aipuangin um uh, harsatnak nan tawn tikah tuar ṭenṭo uhla, bâng loin thlacam uh. 13 ^eA tlasam mi mithiangpawl thawn nan neih mi ṭawmaw uh, mikhual ṭhaten zoh uh.

12:9^a 2Ko 6:6; 1Th 5:21-22; 1Ti 1:5

12:10^b Fil 2:3; 1Th 4:9; 1Pe 1:22

12:11^c Apo 18:25

12:12^d Heb 10:32

12:13^e 1Ti 3:2; Heb 13:2; 1Pe 4:9

14 ^aA lo hremtupawl thlawsuah pe uh; thlawsuah pe uhla, camse hlah uh. 15 ^bLungawi aipuangih umpawl lungawi aipuangin umpi uhla, a ṭap mipawl ṭahpi uh. 16 ^cPakhat le pakhat lungthin hmunkhat pu-in um uh. Nanmah le nanmah sâng tukah ruataw hlah uhla, dinhmun niam pawl thawn kawmaw sawn uh. Mifim ka si tiah ruataw hlah uh.

12:14^a Mat 5:44

12:15^b Job 30:25

12:16^c Isa 5:21; Jer 45:5

17 ^aZo hnen hmanah ṭhatlonak cu ṭhatlonak in lehrūl hlah uh. Mi zate hmaiah thil ṭha tuah ding ruat uh. 18 ^bA cang thei asile, nan tithei tawkin mi hmuahhmuah thawn remawin um uh. 19 ^cDuhdawt mitla, phuba la hlah uh, cuhnakin Pathian thinlingnak kha hmun kian sawn uh. Ziangahtile, “Bawipa in, ‘Phuba lâk cu keimai ta a si, keimah in ka lehrūl ding,’ a ti,” tiih ngan a si. 20 ^dCuruangah,

12:17^a Thf 20:22; 2Ko 8:21

12:18^b Mar 9:50

12:19^c Dnp 32:35; 1Sam 26:10; Jer 51:36

12:20^d Suah 23:4; Thf 25:21-23; Mat 5:44; Luk 6:27

“Na ral a ril a rawn asile, rawl pe aw,
A ti a hāl asile, in ding pe aw;
Ziangahtile cutiih na tuahnak in a lu parah meiling na retkhawm a si.”

21 Thil ṭha lo in lo neh hlah seh, thil ṭha lo cu thil ṭha in neh sawn aw.

13

Thuneitu hnenih Tlukluh

1 ^aMi kip in an tlunih thuneitu sâng pawl hnenah tlulut hai seh. Ziangahtile Pathian ih dĭn lo mi thuneitu zohman an um lo ih, thuneitupawl hi Pathian ih ruat mi an si. 2 ^bCuruangah zokhal thuneitu dokalhtu cu Pathian dĭn mi dokalhtu a si, cule cutiih a dokalhtupawl cu anmah le anmah thuṭhennak an coawter ding. 3 ^cZiangahtile uktupawl cu hnaṭuan ṭha a ṭuantu hrangah ṭihnung an si lo. Thil ṭha lo a tuahtu hrang lawngte ah cun ṭihnung an si. Thuneitu ṭihnak ihsin luat na duh maw? Thil ṭha tuah awla, thuneitu cun a lo lawm ding. 4 ^dZiangahtile thuneitu cu na hnenih thil ṭha tuah dingah Pathian rawngbawltu a si. Asinan thil ṭha lo na tuah asile, ṭih aw; ziangahtile anih cun ralnâm cu tumtah neiin a keng; ziangahtile anih cu thil ṭha lo tuahtu parih thinlingnak thlentu, phulei samtu Pathian siahhlawh a si. 5 ^eCuruangah thinlingnak ruang lawngah si loin, sia le ṭha theihnak ruang khalah a hnenah tlulut uh.

13:1^a Joh 19:11; Tit 3:1; 1Pe 2:3, 14

13:2^b Suah 16:8

13:3^c 1Pe 2:14

13:4^d 1Th 4:6

13:5^e Thf 24:21

6 ^aCumi ruangah siah khal kimten nan pe, ziangahtile thuneitupawl cu Pathian siahhlawh an si. Annih cun cumi hrang roriah catbang loin cān an pe. 7 ^bCuruangah leiba nan neihnak hmuahhmuah hnenah nan leiba cu pe uh: siah nan bâk asile pe uh, ngunkhuai nan bâk asile pe uh, ṭihzah ding mi cu ṭihzah uh, upat ding mi cu upat uh.

13:6^a Mat 22:17

13:7^b Mat 17:25; 22:17, 21; Luk 23:2

Na Innhnen Duhdaw Aw

8 ^aPakhat le pakhat duhdawtawknak siarlo, zo hnen hmanah leiba nei hlah uh; ziangahtile mi dang a duhdawtu cun Dān a famkimter. 9 ^bZiangahtile Dān cun, “Na uire lo pei,” “Lai na that lo pei,” “Rûk na ru lo pei,” “Theihpinak dik lo na rel lo pei,” “Mi thil na daw lo pei,” tiah a ti. Cuih thupekpawl le a dang thupek ziangkhal, “Nangmah le nangmah na duhdawtawk vekin na innhnen na duhdaw pei,” ti mi ṭawngkam pakhat in a khaikhawm ṭheh. 10 Duhdawtnak cun a innhnen parah thil ṭha lo a tuah lo; curuangah duhdawtnak cu Dān famkimnak a si.

13:8^a Mat 5:43; Joh 13:34; Kol 3:14

13:9^b Suah 20:13-15, 17; Pui 19:18; Dnp 5:17-19, 21; Mat 5:43; 7:12

11 ^aTulai thil umdān nan theih ruangah le ihthahnak ihsin ṭhangharh a cût zo ruangah, cumi cu tuah uh; ziangahtile atu-ah cun kan rak zumtir lai hnakin kan rundamnak cu a nai sinsin a si. 12 ^bZan hi a cem zikte thlang, khua a vâng zikte zo. Curuangah thimih thil tipawl cu hlăwnin, tleuih ralthuam cu hruh uhsi. 13 ^cZu hmun nuamcēnin le zu ri-in siseh, hursualin le fihnungza hursualnak tuahin siseh, toaw le nahsuahawin siseh um loin, sun ih um vekin mawi zetin um uhsi. 14 ^dBawipa Jesu Khrih in thuamaw sawn uhla, tisa câkhiarnak tuah dingin tum cia hlah uh.

13:11^a 1Ko 7:29-31; Efe 5:14; Jam 5:8; 1Pe 4:7; 1Joh 2:18

13:12^b 1Th 5:8; Heb 10:25; 1Joh 2:8

13:13^c Luk 21:34; Gal 5:20; Efe 5:18; 1Pe 4:3

13:14^d Gal 3:27; 5:24; Efe 4:24; Kol 3:10

14

Khristian Zalĕnnak Umtuzia

1 ^aZumnak ih a cak lo mi cu rak cohlang uhla, ruahdān phun dangdang thu ah va êl ruri hlah uh. 2 Ziangahtile mi pakhat in thil ziang hmuahhmuah ka ei thei tin a zum, asinan zumnak ih a cak lo pa cun hanghnah hangrah lawng a ei. 3 ^bA eitu in a ei lo tu kha nautat hlah sehla, a ei lo tu khal in a eitu kha thuṭhen hlah seh; ziangahtile Pathian in anih cu a cohlang zo a si. 4 ^cMi dangih siahhlawh sawisêltu nang cu zo so na si? Cuih siahhlawh a dīn le a tlûk cu amai bawi rori ih hmaika ah a si. A si, anih cu dīnter a si ding, ziangahtile Pathian in anih cu a dīngter thei a si.

14:1^a 1Ko 8:9-12

14:3^b Luk 18:9; Kol 2:16

14:4^c Mat 7:1

5 ^aMi pakhat in ni khat cu ni dang hnakin thupisawnah a ruat, mi dang pakhat in ni i kip in bangrepin a ruat. Mi tin anmai lungthin cio ah fiang hai seh. 6 ^bNi thupi ih a ruattu cun, Bawipa hrangah a ruat. Cule ni thupi ih a ruat lo tu cun, Bawipa hrangah a ruat lo a si. A eitu cun Bawipa hrangah a ei, ziangahtile a ei tikah Pathian hnenah lungawi thu a sim. A ei lo tu cun Bawipa hrangah a ei lo a si. A ei lo tikah, Pathian hnenah lungawi thu a sim. 7 ^cZiangahtile kan lakah zohman mai hrang lawngih nung kan um lo ih, mai hrang lawngih thi khal kan um lo. 8 ^dZiangahtile kan nun asile, Bawipa hrangah kan nung; kan thih khal asile, Bawipa hrangah kan thi. Curuangah kan nun ah siseh, kan thih ah siseh, Bawipaih ta kan si.

14:5^a Gal 4:10; Kol 2:16

14:6^b 1Ti 4:3-4

14:7^c 2Ko 5:15; Gal 2:20

14:8^d Fil 1:20

9 ^aZiangahtile Khrih a thi ih, a tho ih a nunsalnak săn bik cu a thi mipawl le a nung mipawlih Lal a si veve thei nak dingah a si. 10 ^bCuti asile ziangah so nang in na unaupa thu na ṭhen? Asilole ziangah so na unaupa na nautat? Ziangahtile Khrih-ih thuṭhennak tokham hmaiah kan zaten kan dīng leh ding a si. 11 ^cZiangahtile,

14:9^a Apo 10:42; 2Ko 5:15; Thu 1:18

14:10^b Mat 7:1; 2Ko 5:10

14:11^c Isa 45:23; 49:18; Fil 2:10

“Bawipa in, ‘Ka nun rori vekin,
Ka hmaika ah khuk hmuahhmuah an bil ding ih,
Pathian hnenah lei hmuahhmuah an phuangaw ding,’ a ti,”

tiih ngan a si. 12 ^aCuruangah kan zaten mai thuhla cio Pathian hnenah kan sim leh ding.

14:12^a Mat 12:36; 1Pe 4:5

Tuahṭhatawktăwn

13 ^aCuruangah pakhat le pakhat thuṭhensakaw nawn hlah uhsi, cuhnakin kan unaupaih lamzin ah bahnak simaw, tlûknak simaw ret lo dingin thutluknak tuah sawn uhsi. 14 ^bAmah teih thiang lo mi zianghman a um lo ti Bawipa Jesu ah ka thei ih, ka fiang. Asinan mi pakhat in thil hrekkhat thiang loih a ruah asile, a hrangah cumi cu a thiang lo. 15 ^cNa ei mi in na unaupaih thin a natter asile, nang cu duhdawtnak ah na um nawn lo tinak a si. Na ei mi in a hrangih Khrih a thi mi na unaupa siatsuah hlah. 16 ^dCuruangah nan thil ṭha kha thangsiat dingah cangter hlah uh. 17 ^eZiangahtile Pathian uknak cu ei le in lam thu a si lo, cuhnakin dingfelnak, hnangamdaihnak le Thlarau Thianghlim ih aipuannak a si sawn. 18 ^fZiangahtile cuti zawngih Khrih a riantu cun Pathian lung a awiter ih, minungpawl khal in amah cu an pawm.

14:13^a Mat 7:1; 2Ko 6:3

14:14^b Apo 10:15; 1Ko 8:7

14:15^c 1Ko 8:11; Efe 5:2

14:16^d 1Ko 10:30

14:17^e Isa 32:17; 1Ko 8:8; Gal 5:22

14:18^f Luk 2:52; Apo 24:16; 2Ko 8:21

19 ^aCuruangah remawknak suaktertu thilpawl le pakhat le pakhat hngetawtăwntertu thilpawl cu dawi uhsi. 20 ^bRawl ruangah Pathian hnaṭuan cu siatter hlah. Thungaite ti ah cun thil ziangkim hi an thiang ṭheh, asinan a ei mi ruangih mi an bah asile, cucu a hrangah thil ṭha lo a si. 21 ^cNa unau bahnak ding simaw, a tlûknak ding simaw, a cah lo phah nak ding simaw ah cun, sa ei le sabit zu in le thil ziangkhal na ti lo a ṭha. 22 ^dZumnak na nei maw? Na neih mi zumnak cu Pathian le nangmah karlakah kilkhawi aw. A pawm mi thil ih amah le amah thiam lo coawter lo tu cu mithlawsuak a si. 23 Asinan mi pakhat in a ei tikah a ringhlel asile, zumnak parah ṭhumawin a ei lo ruangah, amah le amah thiam lo a coawter a si. Ziangahtile ziangkhal zumnak parih ṭhumaw lo mi pauhpauh cu sual a si.

14:19^a 2Ko 12:19; Efe 4:12, 29; 2Ti 2:22; Heb 12:14

14:20^b Apo 10:15; 1Ko 8:9-12

14:21^c Mat 5:29

14:22^d 1Joh 3:21

15

Mi dang Phurrit Phurhsak

1 ^aA cak mi kannihpawl in mah le mah lunghmuiawter men loin, a cak lo mipawlih cahlonak kan phurhpi tengteng ding a si. 2 ^bTuahṭhatawknak thlentu dingah, an ṭhatnak dingah mai innhnen lunghmuiter tum cio uhsi. 3 ^cZiangahtile Khrih amah rori khal in amah le amah a lunghmuiawter lo,

15:1^a 1Th 5:14

15:2^b 1Ko 10:24

15:3^c Sam 69:9; 2Ko 8:9

“A lo hmuhsuamtupawlih mi hmuhsuamnak cu ka parah a tla,”

tiih ngan vek khan a si sawn.

4 Ziangahtile hlanih an rak ngan mi thil hmuahhmuah hi in zirhtu dingih an ngan mi a si. Ruahsannak kan neih thei nak dingah Cathiangpawl cun tuarfainak in neihter ih, tha in pe. 5 ^aKhrih Jesu thawngin tuarfainak le thazang petu Pathian in pakhat le pakhat parah lungthin bangrep lo pe hram seh. 6 ^bCutin tumtah pakhat le kâ pakhat thawn kan Bawipa Jesu Khrih-ih Pa a si mi Pathian cu nan thangṭhat thei ding.

15:5^a 2Ko 13:11; Efe 4:3; Fil 2:2; Kol 3:14; 1Pe 3:8

15:6^b Sam 34:3; Thu 1:6

Pathian Sunlawihtlangnak

7 Curuangah Khrih khal in Pathian sunlawinak ding hrangih in cohlan vekin, pakhat le pakhat cohlangawtăwn uh. 8 ^aPupápawl hnenih Pathian in a pek mi thutiamkampawl hngetter dingah, Pathian thutak hrangah Jesu Khrih cu serh zim tan mipawlih siahhlawh ah a rung cang a si ti ka lo sim. 9 ^bCule Zentelpawl in a zahngainak ruangah Pathian an thangṭhat thei nak dingah, Jesu cu siahhlawh ah a rung cang.

15:8^a Mat 15:24; Apo 3:25-26; 2Ko 1:20

15:9^b 2Sam 22:50; Sam 18:49; Mat 9:8

“Cumi ruangah Zentelpawl lakah na hmin ka phuang ding ih,
Na hmin thangṭhatnak hla ka sak ding,”

tiih ngan vek khan a si. 10 ^aCule anih in,

15:10^a Dnp 32:43; Isa 66:10

“Maw Zentelpawl, a minungpawl thawn lungawi aipuangin um uh,”

tiah a tisal. 11 ^aCun,

15:11^a Sam 117:1

“Nannih Zentelpawl hmuahhmuah, Bawipa thangṭhat uh!
Nannih hrinpawl hmuahhmuah amah cu thangṭhat uh!”

tiah a tisal. 12 ^aCule Isaiah in,

15:12^a Isa 11:10; Mat 12:21; Thu 5:5

“Jessi-ih Búlhram a um ding ih,
Amah cu Zentelpawl uk dingih a ra lang ding mi pa a si.
Amah ah Zentelpawl in ruahsannak an nei ding,”

tiah a tisal.

13 ^aNan zum vekin ruahsannak petu Pathian in aipuannak le hnangamdaihnak hmuahhmuah thawn lo khatter hram seh, cutin Thlarau Thianghlim huham in ruahsannak thawn nan khatliam ding.

15:13^a 1Ko 2:4; 1Th 1:5

Paul in hi Cakuat a Ngannak Săn

14 ^aKa u le ka nau tla, nannih cu ṭhatnak in nan khat, theihnak hmuahhmuah thawn nan khat, pakhat le pakhat nun zirhaw thei khal nan si ti cu keimah rori in ka theifiang. 15 Sikhalsehla u le nau tla, thil hrekkhat thu thawn pehparin lo mangsuaktersal dingah Pathian ih i pek mi zangfahnak ruangah, ralṭha zetin nan hnenah ca ka ngan a si. 16 ^bCutin Zentelpawl hnenah Khrih Jesu-ih rawngbawltu le Pathian-ih thuthangṭha rawngbawl ka si thei ding. Cutin Zentelpawl cu Pathian cohlan tlak thilhlăn an si thei nak dingah Thlarau Thianghlim in a thianghlimter hai.

15:14^a 2Ko 8:7; Efe 5:9; 2Pe 1:12

15:16^b Isa 66:20

17 ^aCuruangah kei cu Pathian lam thu ah Khrih Jesu ah cun tluangkhawn ding ka nei a si. 18 ^bZiangahtile Zentelpawl in thu an lun thei nak dingah keimah hmangih ṭawngkam le thil ti ih Khrih ih a ṭuan ṭheh mi siarlo thil dang zianghman ka sim ngam lo. 19 ^cCumi cu Pathian Thlarau huham in hminsinnak huhampawl le mangbangza hnaṭuannakpawl ih a cang mi a si. Cutin Khrih-ih thuthangṭha cu Jerusalem ihsin Illirikam ram kiangkap hmuahhmuah tiangin ka phuang thluh zo. 20 ^dMi ih lungphum phum cia mi parih ka sakbêtlonak dingah Khrih hmin theihlonak hmun ah thuthangṭha phuan ding cu ka tumtah ringring mi a si. 21 ^eAsinan,

15:17^a Fil 3:3; Heb 2:17

15:18^b Apo 15:12

15:19^c Joh 4:48; Apo 19:11; 22:17-21; 2Ko 2:12

15:20^d 2Ko 10:15-16

15:21^e Isa 52:15

“Amai thu an rak sim dah lo mipawl in an hmu ding ih,
Hna ih a rak thei dah lo pawl in an theithiam ding,”

tiih ngan vek khan a si.

Rom Tlawn Tumnak

22 Cumi cun nan hnen ra thei lo dingin i kham ṭheu. 23 ^aAsinan atu-ah cun cuih rampawl ah hnaṭuannak ding hmunram ka nei nawn lo. Cule nan hnenih rat ka hiar zet nak hi kum a rei tuk zo. 24 ^bSpain ka tlawn tiktikah, nan hnenah ka ra ding. Ziangahtile ka tlawn phahah lo hmuh rori ka beisei ih, nanmah thawi pawlkăwmawknak khawp tawk kan neih hmaisak hnuah, Spain lam ka fehnak ah in bawm ding tiin ka beisei. 25 ^cAsinan atu cu mithiangpawl rian dingin Jerusalem ah ka feh ta ding. 26 ^dZiangahtile Masidonia peng le Akaia peng pawl ih mipawl in Jerusalem ih mithiangpawl lakih mifarahpawl băwmnak sumpai kuat ding cu an lung a hmui zet. 27 ^eCu cun an lung a hmuiter ih, annih cu an hnenih leiba nei an si. Ziangahtile Zentelpawl in thlarau lam thilpawl ah Jew-pawl an rak ṭawmpi zo a si ahcun, taksa thil ih va hlawm ve ding cu an ṭuanvo a si. 28 Curuangah hih ṭuanvo ka ṭheh ih, cuih băwmnak sumpai cu an hnenih himteih ka pekngahfel hnuah Spain ka tlawn phahah ka ra lo tlawng ding. 29 Cule nan hnenih ka rat tikah, Khrih-ih thuthangṭha-ih thlawsuahnak ih khatin ka ra ding ti ka thei.

15:23^a Apo 19:21

15:24^b 1Ko 16:6; Tit 3:13

15:25^c Apo 9:13; 19:21; 24:17

15:26^d Apo 16:9; 18:12; 24:17

15:27^e 1Ko 9:11

30 ^aKa u le ka nau tla, kan Bawipa Jesu Khrih zarin le Thlarau hnen ihsin duhdawtnak thawngin ka hrangah Pathian hnenih thla nan camnak ah ṭan in lâkpi hram dingin ka lo ngen a si, 31 ^bcutin Judia peng ih zumlotupawl hnen ihsin Pathian in i run ding ih, Jerusalem ih ka rawngbawlnak cu, cu tawkih mithiangpawl hrangah pawm tlak a si ding. 32 ^cPathian duhnak in nan hnenah aipuannak thawn ka ra ding ih nanmahpawl thawn hmunkhat ah kan tiharhaw ding a si. 33 ^dHnangamdaihnak petu Pathian cu nan zate hnenah um hram seh. Amen.

15:30^a 2Ko 1:11; Gal 5:22; Kol 1:8; 4:12

15:31^b Apo 9:13; 24:17; 2Ko 1:10; 2Th 3:2; 2Ti 3:11; 2Pe 2:9

15:32^c Apo 18:21; 1Ko 16:18; Flm 1:7

15:33^d 2Ko 13:11; Fil 4:9; 1Th 5:23; 2Th 3:16; Heb 13:20

16

Bulpâk Cibaibûknak

1 ^aKenkeria khua kawhhran siahhlawh, kan farnu Fibi hi nan hnenah lo theihter ka duh. 2 ^bMithiangpawl ih tuah ding mawi a si vekin, Bawipa ah amah cu cohlang uhla, a ṭul mi kip kha rak bawm uh. Ziangahtile anih cu mi tampi bawmtu le keimah i bawmtu khal a si.

16:1^a Apo 18:18; 2Ko 3:1

16:2^b Apo 9:13; Fil 2:29

3 ^aKhrih Jesu ih ka hnaṭuanpi Prisilla le Akuila kha cibai i rak bûksak uh. 4 Annih cu ka nunnak hrangih anmai hngawng rori thāptu an si. Keimah lawng si loin, Zentel kawhhran zate khal in an parah lungawi thu an sim a si.

16:3^a Apo 18:2; 1Ko 1:30; 16:19; 2Ko 5:17; 2Ti 4:19

5 ^aCuvek thothoin an inn ih kawhhran khal kha cibai i bûksak uh.

16:5^a Apo 2:9; 1Ko 16:15, 19; Kol 4:15; Flm 1:2

Akaia peng ih Khrih hrangih ^arah hmaisabik a si mi, ka duhdawt mi Epeneṭas kha cibai i bûksak uh.

16:5^a rah hmaisabik: Zumtu hmaisabik.

6 Kan hrangah nasa zetih hnaṭuantu Mary kha cibai i bûksak uh.

7 ^aKa sungkhat le ka thawngtlakpi Andronikas le Junia kha cibai i rak bûksak uh. Annih cu apostolpawl lakah mithupi an si ih, ka hlanih Khrih ih rak um zokhal an si.

16:7^a Kol 4:10; Flm 1:23

8 Bawipa ih ka duhdawt mi Amfelias kha cibai i bûksak uh.

9 Khrih ih kan hnaṭuanpi Urbanas kha cibai i bûksak uh.

Cule ka duhdawt mi Stakhis kha cibai i bûksak uh.

10 ^aApelles kha cibai i bûksak uh. Anih cu Pathian in Khrih ah a pawm. Aristobulas teih sungkua ih umpawl kha cibai i bûksak uh.

16:10^a Apo 11:14

11 ^aKa sungkhat Herodion kha cibai i bûksak uh. Bawipa ah a um mi Narkisas-ih sungkua ih umpawl kha cibai i bûksak uh.

16:11^a Apo 11:14

12 Bawipa ah nasa zetih hnaṭuantu nunau Traifena le Traifosa kha cibai i bûksak uh.

Mi kip ih an duhdawt mi Persis kha cibai i bûksak uh. Cu nu cun Bawipa ah nasa zetin hna a ṭuan a si.

13 ^aPathian in Bawipa ah a hril mi, Rufus kha cibai i bûksak uh. Ka hrang khalih nu a si ve mi a nu kha cibai i bûksak uh.

16:13^a Mar 15:21; 2Joh 1:1

14 Asinkriṭas, Felekon, Hermas, Patrobas, Hermes le an hnenih um mi unaupawl kha cibai i bûksak uh.

15 Filolokas, Julia, Nerias le a naunu, Olimpas le an hnenih um mithiangpawl hmuahhmuah kha cibai i bûksak uh.

16 ^aPakhat le pakhat hnămawknak thianghlim in cibaibûkaw uh. Khrih kawhhran hmuahhmuah in cibai an lo bûk a si.

16:16^a Apo 9:13; 1Ko 16:20; 2Ko 13:12; 1Pe 5:14

Thapeknak Netabik

17 ^aKa u le ka nau tla, tha ka lo pe a si. Ṭhenawknak suaktertupawl le nan rak zir zo mi zirhnak kalh zawngih mitlutertupawl lakah va fimkhur uhla, anmah cu hrial uh. 18 ^bZiangahtile cuvek mipawl cun kan Bawipa Jesu Khrih rian loin, anmai pumpi an rian sawn a si. Cun ṭawngkam nem le mi pawrhnak in mitluangtlampawlih thinlung an bum. 19 ^cZiangahtile thu nan lunnak cu mi hmuahhmuah in an rak thei zo. Curuangah nanmah ruangah lungawinak in ka khat. A ṭha mi ah fim in, a ṭha lo mi ah tluangtlam uhla ka duh. 20 ^dCule hnangamdaihnak petu Pathian in Setan cu nan ke hnuaiah a palbêk cing ding.

16:17^a Mat 18:15-17; 1Ko 5:11; Gal 1:8-9; 2Th 3:6, 14; 1Ti 1:3; 2Ti 3:5; Tit 3:10; 2Joh 1:10

16:18^b Isa 30:10; Fil 3:19; Kol 2:4

16:19^c 1Ko 14:20

16:20^d Mat 4:10; Gal 6:18; 1Th 5:28; Thu 22:21

Kan Bawipa Jesu Khrih-ih zangfahnak cu nan hnenah um hram seh. Amen.

Paul-ih Rualpipawl hnen ihsin Cibaibûknak

21 ^aKa hnaṭuanpi Timothy le ka sungkhat Lusias, Jason le Sosipaṭa pawl in cibai an lo bûk.

16:21^a Apo 13:1; 16:1; 17:5

22 Hi cakuat ngantu, keimah, Tersias in Bawipa ah cibai ka lo bûk hai.

23 ^aKeimah le kawhhran pumpi ih intêk a si mi Kaias in cibai a lo bûk.

16:23^a Apo 19:29; 2Ti 4:20

Khawpi thilri kilkhawitu Erasṭas le unaupa Kuarṭas tla in cibai an lo bûk.

24 Kan Bawipa Jesu Khrih-ih zangfahnak cu nan zate hnenah um hram seh. Amen.

Pathian Thangṭhatnak

25 ^aKa thuthangṭha le Jesu Khrih thuhla phuan mi zulhin, cān thawk hlan ihsi rak thuh mi si hman sehla atu-ih phuanlăng a si mi, 26 ^bprofetpawl ih ngan mi hmangih miphun zate hnenih theihter mi zulhin le kumkhaw Pathian-ih thupek bangtukin, zumnak ah thulung dingih a lo hngetter thei tu, 27 ^camah lawng Pathian fim a si mi hnenah, Jesu Khrih thawngin ropitnak cu kumkhuain um hram seh. Amen.

16:25^a Kol 1:26; 1Ti 3:16; 2Ti 2:8; Jud 1:24

16:26^b Apo 6:7; Efe 1:9

16:27^c 1Ti 1:7; 6:16