About Bible Thianghlim | ©

BibleThianghlim – Galatia

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Galatia

123456

• A ngantu: Paul
• A siartu: Galatia thlang lamih um zumtupawl
• Ngan kum: A.D. 49

Hih cakuat hi Galatia peng ih kawhhranpawl hnenih Apostol Paul ih kuat mi a si (1:1-2). Paul in a missionary khualtlawn hmaisabikah hi ram thlang lamih khawpipawl ah kawhhran a rak dĭn (Apo 13:14-14:23). A vei hnihnak (Apo 16:6) le a vei thumnak (Apo 18:23) missionary khual a tlawn tikah, cuih peng cu a pálsal.

Hih cakuat a ngan cān hi a vei hnihnak le vei thumnak missionary khual a tlawnsal hlanih a kuat mi a si ding. Cumi cu Galatia bung 1-2 siar tikah a langfiang. Hih cakuat hi Paul in A.D. 49 hrawngih a kuat mi si ding a bang bik. Cucu Paul in a vei khatnak missionary khual a tlawn hnuah, Galatia thlang lamih um kawhhranpawl hnenih a ngan mi a si ding tinak a si (Apo 14:27-28).

Apostolpawlih cangvaihnak cabu bung 13-14 kan siar hmaisa asile, Galatia cakuat hi theihthiam a áwl cuang. Jew mi hrekkhat le Zentel mi tampi cu Paul ih thusim mi ruangah Bawipa lamah an hawikir. Asinan Jew mi hrekkhat cun amah an do. Donak nasa zet karlakah mi tampi cu Khristian ah an cang. Paul le a hnaṭuanpipawl in kawhhran an dĭn ih, elder-pawl an nĕmhnget. Paul in Galatia a fehsan tikah, Jew-pawl in zumtu thar pawl kha an hruaipêng. Cuih an zuamnak cu an hlawhtling zet a bang.

Cu tikah Paul in an hnenih a rak phuan mi thuthangṭha humhimin a zamrang thei bikin ca a kuat hai. Paul in thiamconak le thianhlimnak cu Dān thil ti ruangah si loin, Khrih zumnak ruang lawngin a sizia zumtupawl a zirh.

Paul in ralṭha zetin, “thuthangṭha thutak” a sim (2:5, 14), “Khrih in in zalenter zo ruangah cuih zalĕnnak ah cun ding hnget” dingin zumtupawl hnenah thu a pe (5:1).

1

Cibaibûknak

1 ^aMinungpawl ih thlah le mi pakhat khat hmangih thlah si lo, mithi lak ihsin Jesu kaithotu Pa Pathian le Jesu Khrih ih thlah mi Apostol Paul le 2 ^bka hnenih a um mi unaupawl hmuahhmuah thawn, Galatia peng ih um, kawhhranpawl hnenah:

1:1^a Apo 9:15; 1Ko 1:1

1:2^b Apo 16:6; Fil 4:21

3 ^aPa Pathian le kan Bawipa Jesu Khrih hnen ihsin zangfahnak le hnangamdaihnak cu nan hnenah um hram seh. 4 ^bAnih cu Pa le kan Pathian duhnak bangtukin, tuih san san sia sung ihsin in runsuak thei nak dingah, kan sualpawl hrangah Jesu Khrih cu a peaw. 5 ^cPathian kan Pa hnenah ropitnak cu kumkhuain kumkhua tiang um hram seh. Amen.

1:3^a Rom 1:7

1:4^b Mat 20:28; Rom 4:25; 1Ko 15:3; Fil 4:20

1:5^c Rom 11:36

Thuthangṭha dang a Um Lo

6 ^aKhrih zangfahnak hmangin a lo kotu hnen ihsin khati tluk rangih thuthangṭha danglamih nan rak ṭhawnhlo mai cu ka mang a bang. 7 ^bCumi cu thuthangṭha ngaingai a si lo. Nanmah lo buaiter ih, Khrih-ih thuthangṭha lingletter duhtu mi hrekkhat an um a si sawn. 8 ^cAsinan kanmah hmanin siseh, van ihsi a ra mi vancungmi khal in siseh nan hnenih kan rak phuan zo mi kalhih thuthangṭha dang nan hnenih an phuan asile, a phuangtu cu camsiatin um seh. 9 ^dHi hlanih kan rak lo sim zo vekin, atu-ah ka lo simsal, mi pakhat khat in nan rak cohlan cia zo mi kalhih thuthangṭha dang nan hnenih a phuan a si ahcun, cu pa cu camsiatin um seh.

1:6^a Rom 8:28; 2Ko 11:4

1:7^b Jer 23:16, 36; Apo 15:24

1:8^c Rom 9:3; 1Ko 15:1

1:9^d Rom 16:17

10 ^aZiangahtile atu-ah minung ih pawm ding maw, Pathian ih pawm ding so ka hawl? Asilole minung lunghmuiter maw ka tum? Ziangahtile minung ka lunghmuiter men a si ahcun, kei cu Khrih-ih sál ka si lo ding.

1:10^a Rom 2:9

Pathian in Paul a Ko

11 ^aAsinan u le nau tla, ka rak phuan mi thuthangṭha hi minung ih tuahcawp mi thu a si lo ti ka lo theihter. 12 ^bZiangahtile cumi cu minung hnen ihsi ka ngah mi a si lo ih, mi ih in zirh mi khal a si lo, Jesu Khrih phuanlăngawknak ihsin ka ngah mi a si sawn.

1:11^a 1Ko 15:1

1:12^b 1Ko 2:10; 11:23

13 ^aZiangahtile Jew-pawlih biaknak ah hi hlanih ka umdānpawl, Pathian kawhhran nasa zetin ka hrem ih siatsuah ka tum ciamco thu kha nan hna in nan rak thei. 14 ^bJew-pawlih biaknak lamah cun ka miphunpawl lakah ka khukṭhirual mi tampi ka hleih, ka pupápawlih thurosiahpawl parah nasa zetin ṭhahnem ka rak ngai.

1:13^a Apo 9:1; 1Ko 10:32

1:14^b Mat 15:2; Apo 21:20

15 ^aSikhalsehla amai lunghmui zawng vekin ka nuih pum sungih ka um lai ihsin Pathian cun i serhhran ih, a zangfahnak in i ko. 16 ^bZentelpawl hnenah Jesu Khrih-ih thuthangṭha ka phuan thei nak dingah, a Fapa keimah ih phuanlăng cu a lunghmui zawng a si, kha laiah khan titsa le thisen ka ráwn lohli lo. 17 ^cKa hlanih apostol a si mipawl ráwn dingah Jerusalem khalah ka so lo; Arabia Ram ah ka feh lohli sawn ih, Damaskas khua ah ka kirsal.

1:15^a Isa 49:1, 5; Jer 1:5; Rom 8:28

1:16^b Mat 16:17

1:17^c Apo 9:2

18 ^aCun kum thum hnuah Peter táwng dingin Jerusalem ah ka hung so ih, a hnenah ni hleinga ka câm. 19 ^bAsinan Bawipaih naupa James siarlo, apostol dang zohman ka hmu lo. 20 ^cNgai hnik uh, nan hnenih ka ngan mi thilpawl hi Pathian hmaiah thuphan ka sim lo. 21 ^dCuih hnuah, Siria ram le Silisia ram ah ka feh. 22 ^eCule Khrih ih a um mi, Judia peng kawhhranpawl cun pumpak takin in rak thei lo. 23 ^fAsinan, “Hlanih in rak hremtu pa khan atu-ah hlanih siatsuah a rak tum rero mi zumnak thu a phuang,” ti lawng an hna in an rak thei. 24 ^gCule keimah ruangah Pathian an thangṭhat.

1:18^a Apo 9:22-23, 26-27

1:19^b Mat 13:55; Apo 15:13

1:20^c Rom 1:9; 9:1

1:21^d Luk 2:2; Apo 6:9

1:22^e Rom 16:3; 1Th 2:14

1:23^f Apo 6:7; 8:3

1:24^g Mat 9:8

2

Apostolpawl in Paul an Cohlang

1 ^aCun kum hleili a rei hnuah, Barnabas thawn Jerusalem ah ka hung fehsal, Tita khal ka hnenah ka hruai. 2 ^bCule ka hnenih Pathian thuphuansuah mi ruangah ka hung feh ih, Zentelpawl hnenih ka phuan mi thuthangṭha cu anmah ka simfiang hai. Asinan a lak menih ka tlanlonak dingah le ka tlan zo nak kha a lak men a silonak dingah, hruaitu ih an ruah mipawl cu a dangten ka simfiang hai. 3 ^cKa hnenih um Tita cu Grikmi asinan, serh zim tan tengteng dingin an fial lo. 4 ^dCule cumi cu a thuptei an hruailuh mi unau deu pawl ruangah a si, sál ih in hruai thei nak dingah, annihpawl cu Khrih Jesu ih zalĕnnak kan neih mi kha thlingthla dingin a thupten an lut. 5 Thuthangṭha thutak nan hnenih a umpeh vivo thei nak dingah, cān málte sung hman cuih unau deu pawl hnenah kan rak peaw lo.

2:1^a Apo 15:2; 2Ko 2:13

2:2^b 1Ko 2:10; 9:24

2:3^c 1Ko 9:21; 2Ko 2:13

2:4^d Apo 1:16; 2Ko 11:26; Jud 1:4

6 ^aAsinan hruaitu ih ruah mipawl cu ziang vek mi an si khalle ka hrangah a thupi lo. Pathian cun leng lam lăngdan menin mi a pawm lo, ziangahtile hruaitu ih ruah mipawl cun ka phuan mi thu ah bêt mi zianghman an nei lo. 7 ^bCuhnakin serh zim tan mipawl hrangah thuthangṭha cu Peter hnenih ap a si vekin, serh zim tan lo mipawl hrangah thuthangṭha cu ka hnenah ap a si ti kha an hmu sawn riangri. 8 ^cZiangahtile serh zim tan mipawl hnenih apostol si dingih Peter hnenih a ṭuantu khan Zentelpawl hrangah apostol si dingin keimah ah a ṭuan a si. 9 ^dSutpiṭhuampawl ih an ruah mi James, Kefas le John tepawl in ka hnenih pek mi zangfahnak hi an theihfiang tikah, kannihpawl hi Zentelpawl hnenih feh dingin le annih cu serh zim tan mipawl hnenih feh dingin, keimah le Barnabas hnenah pawlkăwmnak vawrh lam kut in rak pe. 10 ^eAnnih in mifarahpawl kan hngilh lo ding lawng an duh, cumi rori cu keimah khal ka tuah hiar zet mi a si.

2:6^a 1Ko 15:11; Thu 2:23

2:7^b 1Th 2:4

2:8^c Apo 1:25; 1Ko 1:1

2:9^d Apo 9:15; 15:13; 1Ti 3:15; Thu 3:12

2:10^e Apo 24:17

Paul in Peter a Dokalh

11 ^aPeter cu Anṭiok khua a thlen tikah, mawhthluk dingih a um ruangah hmaităwnin amah cu ka dokalh. 12 ^bZiangahtile James hnen ihsin mi hrekkhat an ra thlen hlanah cun, anih cu Zentelpawl thawn rawl an rak eitlang. Asinan cupawl an ra thlen tikah, serh zim tan mipawl a ṭih hai ruangah dung a sīp ih, a thiarfihlimaw. 13 ^cCule a dang Jew-pawl khal ṭhaawterin a hnenah an tel ve. An ṭhatawkternak cun Barnabas tiangin a hruaipêng.

2:11^a Apo 11:19

2:12^b Apo 15:13

2:13^c Apo 4:36

14 ^aSikhalsehla annih cu thuthangṭha thutak bangtukin dĭng zetin an feh lo ti ka hmuh tikah, an zate hmaika ah Peter hnenah, “Nangmah cu Jew-mi si siin, Jew-pawl nundān vekih nung loin, Zentelpawl vekih na nun asile, ziangah so Zentelpawl cu Jew-pawl vekih nunter hramhram na tum? 15 ^bKannih cu suahkeh ihsin Jew kan si ih, Zentel misualpawl kan si lo. 16 ^cMinung cu Dān thlunnak ruangin thiam a co lo ih, Jesu Khrih zumnak ruang sawnin a si ti theiin, Dān thlunnak ruangin si loin, Khrih zumnak ruangin thiam kan co thei nak dingah kannih khal in Khrih Jesu cu kan rak zum a si; ziangahtile Dān thlunnak ruangin zohman thiam an co lo ding.

2:14^a Apo 10:28

2:15^b 1Sam 15:18; Luk 24:7; Fil 3:4-5

2:16^c Rom 3:28; 9:30

17 “Khrih ruangih thiamcoter mi si dingih kan hawl laiah kanmah rori khal misual ih hmuh kan si ahcun, Khrih cu sual karhtertu a simaw? Si lamlam hlah! 18 Ziangahtile ka rak siatbăl mi thilpawl ka saksal asile, keimah le keimah dān pahbăltu ah ka tuahaw a si. 19 ^aZiangahtile Pathian hrangih ka nun thei nak dingah, Dān hmangin Dān lamah ka thi a si. 20 ^bKei cu Khrih zawngah khĕnbetin ka um, a nungtu cu kei ka si nawn lo, keimah ah Khrih a nung sawn a si; atu taksa ih ka nun hi in duhdaw ih ka hrangih peawtu Pathian Fapa zumnak ih nung ka si. 21 Pathian zangfahnak ka hnáwng lo, ziangahtile dingfelnak cu Dān ihsin a rat asile, Khrih cu a lakih thi a si ding,” tiah ka ti.

2:19^a Rom 7:4; 2Ko 5:15

2:20^b Mat 4:3; Rom 6:6; 1Pe 4:2

3

Zumnak Maw, Dān Thlun

1 ^aMaw Galatia mi-âpawl! Nan hnenah fiang zetin an khĕnbet mi Jesu Khrih thu kan rak lo sim zo, thutak nan lunlonak dingah zo in so lo dawi â? 2 ^bHimi lawng hi nan hnen ihsin zir ka duh: Thlarau cu Dān thlunnak in maw, hna in thuthangṭha nan rak thei ih nan zumnak ruangin so nan co? 3 Hi tluk lawmmamin maw nan rak at? Thlarau in nan rak thawk ih, atu-ah tisa in nan netter ding maw? 4 Thil khati zat zozai kha teh a lak menin maw nan rak tuar, zianghmanlo men maw a si thluh ding? 5 ^cCuruangah nan hnenih Thlarau a lo petu le nan lakih thilmakpawl a tuahtu in cumi cu Dān thlunnak ruangah maw, hna ih nan rak theih mi nan zumnak ruangah so a tuah?

3:1^a Luk 24:25; Apo 16:6; 1Ko 1:23

3:2^b Joh 20:22; Rom 10:17; Heb 4:2

3:5^c 1Ko 12:10

6 ^aCumi cu, “Abraham cun Pathian a zum ih, cumi cu a hrangih dingfelnak ah siarsak a si,” ti vek khan a si. 7 ^bCuruangah zumnak parah ṭhumawih a nung mipawl lawng Abraham tefa an si. 8 ^cCule Cathiang in Zentelpawl cu Pathian in zumnak parah ṭhumawin thiam a coter ding ti rak hmu cia in, “Nangmah thawngin miphun zaten thlawsuah an si ding,” tiah Abraham hnenah thuthangṭha a rak sim cia. 9 ^dCuti a si ruangah zumnak ih a nungtupawl cu zumnak nei Abraham thawn thlawsuah an si.

3:6^a Sem 15:6; Rom 4:3

3:7^b Luk 3:8

3:8^c Sem 12:3; 18:18; 22:18; 26:4; Apo 3:25

3:9^d Rom 4:16

Dān in Camsiatnak a Keng

10 ^aZiangahtile Dān thlunnak parih a ṭhumawtu hmuahhmuah cu camsiatnak hnuaiah an um; ziangahtile, “Dān cazual sungih ngan mi thil hmuahhmuah a tuah ringring lo tu pauhpauh cu camsiat an si,” tiih ngan a si. 11 ^bAsinan Pathian mithmuh ah zohman Dān ihsin thiam an co lo ti cu a fiang. “Ziangahtile mifel cu zumnak in a nung ding,” ti a si. 12 ^cDān cu zumnak parah a ṭhumaw lo, asinan, “Cuih thilpawl a thluntu cu cupawl in a nung ding,” ti a si.

3:10^a Dnp 27:26; Jer 11:3; Rom 4:15

3:11^b Hab 2:4; Rom 3:28; Heb 2:4; 10:38

3:12^c Pui 18:5; Rom 10:5

13 ^aKhrih cu kan hrangah camsiat mi ah cangin, Dān ih camsiatnak ihsin in rak tlen zo, ziangahtile, “Thing parih thlai mi pauhpauh cu camsiat mi an si,” tiih ngan a si. 14 ^bAbraham-ih thlawsuah cu Khrih Jesu thawngin Zentelpawl hnenah a thleng ih, zumnak thawngin tiamkam mi Thlarau kan co thei nak dingah, Khrih cun in rak tlen a si.

3:13^a Dnp 21:23; Apo 5:30

3:14^b Joe 2:28; Joh 20:22; Apo 2:33; Rom 4:9, 16

Dān le Thutiamkam

15 ^aU le nau tla, milai ṭawngdān vekin ka ṭawng ding: milai thukham si hman sehla, nĕmhngeh a si hnuah cun, zohman in an phelh dah lo, asilole a bêt khal an bêt dah lo. 16 ^bCun Pathian in Abraham hnen le a Cithlah hnenah thutiamkampawl a tuah. “Na cithlahpawl hnenah,” tiin mi tampi hnenih sim vekin a sim lo, tesinfa pakhat hnenih sim vekin, “Na Cithlah hnenah,” tiin a sim sawn, cucu Khrih a si. 17 Cule hihi ka sim a si, Pathian in Khrih ah a rak nĕmhngeh zo mi thukham cu kum 430 hnuih rak um mi Dān in a thaihlo thei lo ih, thutiamkam khal zianghmanlo ih cang ko a tuah lo. 18 ^cZiangahtile ro conak cu Dān parih ṭhumaw a si ahcun, thutiamkam parih ṭhumaw a si nawn lo; asinan Pathian in Abraham hnenah ro conak cu thutiamkam parah ṭhumawin a pe.

3:15^a Rom 7:1

3:16^b Sem 12:7; 13:15; 17:7, 19; 22:18; 24:7

3:18^c Rom 4:14

Dānih Tumtah

19 ^aAsile Dān cu ziang hrangih pek a si? Dān pahbălnak ruangah thutiamkam a tuahnak pa, cithlah a rung lăng hlan sung Dān cu bêt a si, vancungmipawl hmangin remnak palai kut in Dān cu dĭn a si. 20 ^bRemnak palai cun khat lam pawl lawng ai a awh lo, cuhnakin Pathian sawn cu pakhat a si.

3:19^a Suah 20:19; Dnp 33:2; Apo 7:53; Rom 5:20

3:20^b 1Ti 2:5; Heb 8:6

21 ^aCuti asile Dān cun Pathian thutiamkampawl a dodal maw si? Dodal lamlam hlah! Ziangahtile nunnak mi pe thei tu Dān pek zo rak si ta sehla, thungaiten dingfelnak cu Dān parih ṭhumaw a si ding. 22 ^bAsinan Jesu Khrih zumnak ruangih thutiamkam cu a zumtupawl hnenih pek a si thei nak dingah, Cathiang in mi zaten sual hnuaiah a rak kharkhum thluh.

3:21^a Rom 7:12

3:22^b Rom 3:9-19

23 ^aSikhalsehla zumnak a ra thlen hlan cu a ra lang leh ding mi zumnak hrangah Dān cun in kharkhum ih, in rak kil a si. 24 ^bCuruangah Khrih hnenih hruai thlen kan si thei nak dingah le zumnak ruangih thiam kan co thei nak dingah, Dān cu in kilkhawitu le in zirhtu a si. 25 ^cAsinan zumnak a ra thlen hnuah cun, kannih cu kilkhawitu le zirhtu hnuaiah kan um nawn lo.

3:23^a Rom 11:32

3:24^b Rom 10:4

3:25^c Rom 7:4

Pathian Fāte

26 ^aZiangahtile nan zaten Khrih Jesu zumnak thawngin Pathian fāte nan si. 27 ^bZiangahtile Khrih sungih baptisma a co zo tu nan zaten Khrih in nan rak thuamaw zo a si. 28 Nan zaten Khrih Jesu ah pumkhat nan si ruangah, Jew ti le Grik ti a um lo, sál ti le miluat ti khal a um lo ih, mipa ti le nunau ti khal a um lo. 29 ^cCule nannih cu Khrih-ih ta nan si le, Abraham-ih cithlah nan si ih, thutiamkam bangtukin ro cotu nan si.

3:26^a Rom 6:3; 8:14

3:27^b Joe 2:29; Joh 17:11; Rom 13:14; 1Ko 12:13; Efe 2:14-15; Kol 3:11

3:29^c Luk 3:8; Rom 8:17

4

1 Atu-ah hihi ka sim a si, ro cotu cu ziangkim parah hotu si hman sehla, nauhak a si sung hmuahhmuah cu sál thawn danglamnak zianghman a um lo. 2 Sikhalsehla a pa ih bikhiah cān a thlen hlan sung cu kilkhawitupawl le zohkhentupawl ih kut hnuaiah a um. 3 ^aCuti vek thothoin kannih hnen khalah a si, nauhak kan si laiah cun, leitlun thuhramthawh zirhawknak hnuaiah sál kan rak si. 4 ^bSikhalsehla a tikcucān a kim tikah, Pathian in a Fapa a run thlah ih, nunau sungin Dān hnuaiah a suak. 5 ^cCutin Dān hnuaiih umpawl tlen dingah le fa sinak kan co thei nak dingah a si.

4:3^a Kol 2:8, 20

4:4^b Luk 2:27; Joh 3:17; Rom 5:6; Efe 1:10

4:5^c Joh 1:12; Rom 3:24

6 ^aCule fa nan si ruangah Pathian in a Fapaih Thlarau cu nan thinlung sungah a run thlah, cuih Thlarau cun, “Abba, ka Pa!” tiah a au. 7 ^bCuruangah nang cu sál na si nawn lo ih, fa na si sawn a si. Fa na si ahcun, Khrih zarah Pathian ro cotu na si.

4:6^a Apo 16:7; Rom 5:5

4:7^b Rom 8:17

Paul in Galatia-mipawl a Vei

8 ^aCuti si khal sehla thungaiten, Pathian nan rak theih lo laiah khan suahkeh ihsi pathian a si lo mipawlih sál ah nan rak um. 9 ^bAsinan atu-ah cun Pathian nan rak thei, asilole Pathian mi theih nan si ahcun, ziangtin saw a ṭawnṭai mi le ṭhathnemnak nei lo thuhramthawh zirhawknak ah hawikirin an sál ih can nan duhsal? 10 ^cNipawl, thlapawl, tikcucānpawl le kumpawl tla nan ul. 11 ^dNan hrangih nasa zetih ka ṭuan mi hi a lak men a si pang ding ti ka lo phansak.

4:8^a 2San 13:9; Isa 37:19; Jer 2:11; Rom 1:28; 1Ko 1:21; 8:4-5; 1Th 4:5; 2Th 1:8

4:9^b 1Ko 8:3; Kol 2:20

4:10^c Rom 14:5; Kol 2:16

4:11^d 1Th 3:5

12 ^aU le nau tla, kei khal nanmah vek ka si ruangah, nannih khal keimah vek si dingin ka lo ngen a si. Nannih in ka hnenah thil ṭha lo zianghman nan rak tuah lo. 13 ^bNan hnenih thuthangṭha ka phuan hmaisabik ṭumah khan ka taksa a ṭawnṭaihzia nan thei. 14 ^cCule ka titsa ah hniksaknak um cing khalin nannih in in nautat lo ih, a hnawn khal in hnáwng lo. Pathian-ih vancungmi vekin le Khrih Jesu vek rori in in rak cohlang sawn. 15 Cuti asile, nan rak neih mi thlawsuah cu ziang a si? Ziangah cutin ka ti tile, thil cang thei si sehla nan mit rori hman phawrhsuak tahratin in rak pe zo ding ti ka lo theihpi. 16 ^dThutak ka lo sim ruangah nan ral ah maw ka can?

4:12^a Rom 7:1

4:13^b 1Ko 2:3

4:14^c Mat 10:40

4:16^d Amo 5:10

17 Mi dang, nan hrangih ṭhahnemngaitupawl hin a ṭha zawngin ṭhahnem an ngai lo; a si, an hrangih ṭhahnem nan ngai thei nak dingah kan hnen ihsin lo ṭhen an duh. 18 Asinan nan hnenih ka um lai lawngah si loin, ziangtik lai khalih thil ṭha hrangih ṭhahnemngai ringring hi a ṭha. 19 ^aKa fahniangletla, Khrih bang ko thăwmngah thluh nan si hlanlo fahrin nat tuar vekin ka lo vei hai a si. 20 Atu-ah nan hnenah umin ka aw danglamter ka duh; ziangahtile nanmah lo rinhlelhnak ka nei.

4:19^a Rom 8:29; Efe 4:13; 1Th 2:11

Hakar le Sarah

21 ^aNannih Dān hnuaiih um a duhtupawl, in sim hnik uh, Dān thu nan ngaithla a si lo maw? 22 ^bZiangahtile Abraham in fapa pahnih a nei: pakhat cu sál nu hnen ihsin a si ih, a dang pakhat cu miluat nu hnen ihsin a si, tiih ngan a si. 23 ^cSál nu cun milai dān in fapa a hring ih, miluat nu cun thutiamkam thawngin fapa a hring.

4:21^a Rom 2:12

4:22^b Sem 16:15

4:23^c Sem 17:16-21; Rom 9:7-8; Heb 11:11

24 Cuih thilpawl cu khaikhinnak thu a si. Ziangahtile cuih nunau pahnih cun thukham pahnih ai an awh: nunau pakhat sawn cun Sinai tlang ai a awh. Sál si ding mi fa a hring ih, cu nu cu Hakar a si. 25 Ziangahtile hih Hakar cun Arabia ram ih Sinai tlang ai a awh. Tuihni ih Jerusalem thawn an bangaw ih, a sungih um a falepawl thawn sál ah an tâng. 26 ^aAsinan tlun lam Jerusalem cu sál a si lo ih, cumi cu kan zate ih nu a si.

4:26^a Heb 12:22; Thu 3:12

27 ^aZiangahtile,

4:27^a Isa 54:1

“Maw micing, nang fa hring dah lo,
Lungawi aipuangin um aw!
Nang fahrin nat tuar dah lo,
Puaksuakin au aw!
Ziangahtile pasal nei nunau hnakin
Thlauthlak mi nunau in fa a nei tamsawn,”

tiih ngan a si.

28 U le nau tla, Isak vekin, kannih cu thutiamkam fāte kan si. 29 ^aAsinan milai dān ih hrin mi fapa in Thlarau dān ih hrin mi fapa cu a hrem, atu khalah hin cuti vek cun a si thotho. 30 ^bSikhalsehla Cathiang ah ziangtin a um? “Sál nu le a fapa hi dawisuak aw, ziangahtile sál nuih fapa cu a luat mi nuih fapa ro copitu ding a si lo,” tiin a um.

4:29^a Sem 21:9

4:30^b Sem 21:10

31 ^aCuruangah u le nau tla, kannih cu sál nuih fāte kan si lo ih, a luat mi nuih fāte kan si sawn a si.

4:31^a Rom 7:4

5

Khrih ah Zalĕnnak

1 ^aKhrih in in zalenter zo ruangah cuih zalĕnnak ah cun dīng hnget uhla, sál tānnak hngawngkol ah va tāngsal nawn hlah uh.

5:1^a Mat 23:4; Joh 8:32; Rom 7:4

2 ^aNgai hnik uh, kei, Paul in nan hnenah ka lo sim, serh zim nan tan asile, Khrih cu nan hrangah zianghman a ṭhahnem lo ding. 3 ^bCule serh zim a tantu mi kip hnenah Dān thu zate thlun dingih bâktu a si ti ka theihtersal. 4 ^cDān in thiam a lo coter asile, Khrih cu nan hrangah ṭhathnemnak nei lo ah a cang; zangfahnak cu nan rak tlûksan a si. 5 ^dZiangahtile kan ruahsan mi zumnak parih ṭhumaw mi dingfelnak cu, Thlarau zarah hngakhlap zetin kan hngak a si. 6 ^eZiangahtile Khrih Jesu ah cun serh zim tan siseh, tan lo siseh, zianghman a ṭhahnem lo, duhdawtnak hmangih zumnak hnaṭuan mi cun ṭhathnemnak a nei sawn.

5:2^a Apo 15:1

5:3^b Rom 2:25; Jam 2:10

5:4^c Rom 3:28; Heb 12:15; 2Pe 3:17

5:5^d Rom 8:23-24

5:6^e Rom 16:3; 1Ko 7:19; 1Th 1:3; Jam 2:22

Duhdawtnak in Dān a Kimter

7 ^aṬha zetin nan tlân. Thutak thu lung lo dingin zo in so a lo kham? 8 ^bHiti vek ruahnak cu a lo kotu hnen ihsin a ra lo. 9 ^cThilnu málte in sang hlăwm pumpuluk a thoter. 10 ^dLungthin dang nan nei lo ding, tiah Bawipa ah zum hngeh nak ka nei. Asinan buainak a lo petu cu zo a va si khalle a parih thuṭhennak cu a tuar ding.

5:7^a 1Ko 9:24

5:8^b Rom 8:28

5:9^c 1Ko 5:6

5:10^d 1Ko 2:3; Fil 3:15

11 ^aCule u le nau tla, kei in serh zim tan thu phuang ningla, ziangah so hremnak cu ka tuar lai hrih? Cucu phuang ningla, khraws ih mi a tlûkbahternak cu a reh ding. 12 Buainak a lo petupawl cu anmah le anmah sâtcataw hai sehla ka duh!

5:11^a Luk 2:34

13 ^aZiangahtile u le nau tla, nannih cu zalen dingih kawh mi nan si; nan zalĕnnak cu tisa hrangah remcānnak ah hmang loin, duhdawtnak in pakhat le pakhat rianawtăwn sawn uh. 14 ^bZiangahtile, “Nangmah le nangmah na duhdawtawk vekin na innhnen na duhdaw pei,” ti mi ṭawngkam pakhat ah Dān zaten a famkim ṭheh.

5:13^a 1Ko 8:9; 2Ko 4:5; Efe 5:21; 1Pe 2:16

5:14^b Pui 19:18; Mat 5:43; 22:39

15 Asinan pakhat le pakhat nan keuaw ih nan eiawk asile, pakhat le pakhat nan hlohralawkterlonak dingah ralring uh!

Thlarau ih Feh

16 ^aHihi ka sim a si: Thlarau ah feh uh, cule tisa câkhiarnak cu nan tuahsuak hrimhrim lo ding. 17 ^bZiangah cutin ka ti tile tisa duhnak cun Thlarau duhnak a dokalh ih, Thlarau duhnak in tisa duhnak a dokalh; annih cu pakhat le pakhat an dokalhaw. Curuangah nannih cun nan tuah duh mi thilpawl nan tuah lo. 18 ^cAsinan Thlarau ih hruai mi nan si ahcun, Dān hnuaiah nan um lo.

5:16^a Rom 8:2, 4-6, 9, 14; 2Ko 5:17

5:17^b Rom 8:5-8

5:18^c Rom 2:12; 1Ti 1:9

19 ^aCule tisa thil tipawl cu hipawl ah hin a langfiang a si, cupawl tla cu: uiretnak, nunau-mipa sualnak, bawrhhlawhnak, fihnungza hursual tuahnak, 20 milem biaknak, dawi thiamnak, mi huatnak, tawhawknak, thîkthusiatnak, thinlingnak, ṭānghmasialnak, lungruallonak, zirhsualnak, 21 ^biksiknak, laithahnak, zu rîtnak, zu hmun năwmcennak le cuvek thilpawl an si. Cuvek thilpawl a tuahtu cun Pathian uknak cu ro ah an co lo ding ti hi hlanih ka rak lo sim vekin ka lo sim cia a si.

5:19^a 1Ko 6:18

5:21^b Mat 25:34; Rom 13:13

22 ^aAsinan Thlarau rah cu duhdawtnak, aipuannak, hnangamdaihnak, thinsaunak, nunnemnak, ṭhatnak, rinumnak, 23 ^bzaidamnak, sūpawk thei nak pawl an si. Cuvek thilpawl dokalhtu dān a um lo. 24 ^cKhrih-ih ta a si mipawl cun tisa cu a câkhiarnak le a duhhiarnak thawn an khengbĕt zo. 25 Thlarau ih kan nun asile, Thlarau thothoah feh uhsi. 26 ^dMi dang hnakih ṭhasawnah ruataw hlah uhsi la, pakhat le pakhat thinṭeuawter loin, pakhat le pakhat iksikaw hlah uhsi.

5:22^a Efe 5:9

5:23^b Apo 24:25

5:24^c Rom 6:6; Kol 2:11

5:26^d Fil 2:3

6

Mi hmuahhmuah hrangih thil ṭha Tuah

1 ^aU le nau tla, mawhsualnak in mi pakhat a kaih asile, nannih thlarau mipawl in cu pa cu zaidamnak thinlung thawn tungding uh, fimkhur aw, culole sualfawrhnak na táwng ve pang ding. 2 ^bPakhat le pakhat phurrit sâwngawtăwn uhla, cuti zawngin Khrih dān cu nan kimter a si. 3 ^cZiangahtile mi pakhat in zianghman si si loin, mithupi ih a ruahawk asile, amah le amah a bumaw a si. 4 ^dAsinan mi kip in anmai hnaṭuan mi cio cekfel hai seh, cule mi dang parah si loin amai par lawngah aipuannak an nei ding. 5 ^eZiangahtile mi kip in mai phur ciar an phur ding a si.

6:1^a Mat 18:15; 2Ko 2:7

6:2^b Jam 2:8

6:3^c Rom 12:13

6:4^d 2Ko 13:5

6:5^e Jer 31:30

6 ^aKamsuakthu zirhnak a dawngtu cun, a zirhtu hnenah thil ṭha a neih mi zaten hlawm ve seh.

6:6^a 1Ko 9:11; 1Ti 5:17

7 ^aBumin um hlah uh, Pathian cu hmuhsuam men ding a si lo; ziangahtile mi in a tuh mi pauhpauh cu, a ah khal a at ding. 8 ^bZiangahtile amai tisa lamih a tuhtu cun cuih tisa ihsin siatralnak a at ding, asinan Thlarau lamih a tuhtu cun Thlarau hnen ihsin kumkhaw nunnak a at ding. 9 ^cCule thil ṭha tuah dingah thanau hlah uhsi, ziangahtile kan bansan lo asile, a tikcucān teah kan at leh ding. 10 ^dCuruangah cān remcâng kan neihdān ihzirin, mi hmuahhmuah hnenah thil ṭha tuah uhsi, a hleicein zumnak ih kan sungkuapawl hnenah tuah uhsi.

6:7^a Jer 34:17; 1Ko 6:9; 2Ko 9:6

6:8^b Rom 6:23; Jam 3:18

6:9^c Heb 12:3

6:10^d Efe 2:19; 1Pe 4:17

Serh Zim Tan Si Loin, Pathian Sersiam Thar

11 ^aKa kut rori in nan hnenah cafáng tumpi pi ih ca ka ngan mi hi zoh uh!

6:11^a 1Ko 16:21

12 ^aMilai hmuh ih ṭha si a duhtu hmuahhmuah in, serh zim tan dingin an lo fial. Khrih-ih khraws ruangah hremnak an tuarlonak ding hrang lawngah cumi cu an tuah a si. 13 ^bZiangahtile serh zim tannak a cotupawl hmanin Dān thu cu an thlun cuang lo, asinan nan taksa ih tluang an khawnnak dingah serh zim nan tan ding an duh. 14 ^cSikhalsehla kan Bawipa Jesu Khrih-ih khraws siarlo tluangkhawnpi dah lo hram ningla ka duh, amah zarah khawvel hi ka hrangah khĕnbet a si zo ih, kei khal khawvel hrangah khĕnbet ka si zo. 15 ^dZiangahtile Khrih Jesu ah cun serh zim tan siseh, tan lo siseh, zianghman a ṭhahnem lo, sersiam thar nak sawn hi a thupi mi cu a si.

6:12^a Mat 23:25-26

6:13^b Rom 2:25; Fil 3:3

6:14^c Rom 6:2, 6; 1Ko 2:2

6:15^d 1Ko 7:19; 2Ko 5:17

16 Cule cuih dān vekih a nungtu hmuahhmuah hnenah le Pathian-ih Israel parah hnangamdaihnak le zahngainak um hram seh.

17 ^aAtu thawkin zohman in i tibuai nawn hlah hai seh, ziangahtile ka taksaruangpum ah Bawipa Jesu-ih hmaphe ka pu a si.

6:17^a Isa 44:5; 2Ko 1:5

18 ^aU le nau tla, kan Bawipa Jesu Khrih-ih zangfahnak cu nan thlarau ah um hram seh. Amen.

6:18^a Rom 6:20; Fil 4:23; 2Ti 4:22; Flm 1:25