About Bible Thianghlim | ©

BibleThianghlim – Ezra

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Ezra

12345678910

• A ngantu: Ezra
• A siartu: Sál tān hnuih Israel-mipawl
• Ngan kum: B.C. 430 hrawng

Hebru Bible ah cun Ezra cabu le Nehemiah cabu hi Ezra ih ngan mi cabu pakhat a si (Neh 8:2). Persia siangpahrang Artazerzis I in hi Jew mi pahnih te hi cān dangdangah, Jerusalem ih kirsal dingin thu a rak pe hai. Puithiam le cangantu sikăwp Ezra cu temple an saksal hnu kum 60 zikte, B.C. 458 ah a kirsal. Artazerzis I ih thupek bangtukin, Ezra in Jerusalem ah Pathian biaknak a dĭnsal, Pathian Dān mi senpi a zirh ih, cuzah pek mi thuneihnak cu bikhiah neiin a hmang (7:1-26).

Babilon ihsi a hmaisabik an kirsalnak săn cu “Jehovah inn” saksalnak ding hrangah a si; cumi cu saksal tengteng ding a si. Ezra cabu sungah (a hleicein bung 1-6), “Pathian inn” asilole “Jehovah-ih temple” relnak hmun 70 zikte a um. “Pathian kut” (7:6, 9, 28; 8:18, 22, 31) ti mi a bu pumpi ah a lang. Jew-pawl cu an kirsal ih temple an saksal thei nak dingah, Pathian in Siangpahrang Sairas (1:1), Jew mi tampi (1:5) le hruaitupawl (Hag 1:14) a căwktho hai.

Jew-pawl thawi pehzăwmawknak nei lo pawl cu Persia lalram ṭawng Aramik hmangih Ezr 4:8-6:18 le 7:12-26 hi ngan a si. Hih bung le câng pawl ah cuzah thawi dawrawknak le Jew kiangkapih cêng an ralpawl in Siangpahrang Artazerzis I hnenih Jew-mi hēknak ah Aramik ṭawng an hmang. Hih Bible bung le câng pawl cun Jew-pawl a hmuitin lo ruangah Aramik ṭawng ih ngan a si.

Cule cucu Jeremiah ih simsung mi bangtukih tuah a si (Jer 29:10-14). Thuanthu umdān ah cun, hi cabu hin Jew-pawl ziangtin an kirsal ti le ziangtin temple an saksal ti in sim.

Pathian thuhla zawng cun, Pathian Lalnak, Pathian rinumnak le milai mawhphurhnak a tarlang. Nunpinak lamah cun, Pathian miphun cun miphun dang pawl hnen ihsin an thiarfihlimaw ding ih (danglam takih nun) Jehovah an hawldān ding hi cabu hin a uar (6:21).

1

Judah-mipawl Kirsalnak

1 ^aPersia siangpahrang Sairas a lal kum khatnak ah Jeremiah kâ hmangih Jehovah-ih kamsuakthu a thlenkim thei nak dingah, Jehovah in Persia siangpahrang Sairas-ih thinlung a căwktho, cutin a lalram hmuahhmuah ah thawngthannak a tuah ih, ca sungah,

1:1^a Ezr 6:22; Jer 25:11-12; Zek 1:12-16

2 ^a“Persia siangpahrang Sairas in a ti:

1:2^a Sam 72:11; Isa 41:2, 25; Hag 1:2

Leilung lalrampawl hmuahhmuah hi van Pathian Jehovah in i pe ṭheh zo. Cule Judah ram Jerusalem ah inn amah saksak dingin thu i rak pe. 3 ^aNan lakih a mi a si mi zokhal, a Pathian in umpi hram sehla, Judah ram ih Jerusalem ah hung so seh, cule Israel-ih Pathian Jehovah inn sak seh, amah cu Jerusalem ih um Pathian a si. 4 ^bCule a cēnnak khui hmun khalih a tang ta tu zokhal, amai hmun ih um mipawl in Jerusalem ih um Pathian inn hrangih palungsuak thawhhlawm hleiah, sui le ngun, thilripawl le rannungpawl in bawm seh,” tiin a ngan.

1:3^a Dan 6:26

1:4^b Suah 3:22; Sam 50:14; 72:8-10; Isa 10:20-22; Thu 21:24

5 ^aCun Judah le Benjamin pupápawlih sungza lubânpawl, puithiampawl le Levi-mipawl cu an thinlung Pathian in a thawhter mi hmuahhmuah thawn Jerusalem ih um Jehovah inn sak dingin le hung so dingin an tho. 6 ^bCule mai palungsuakih an thawh mi hmuahhmuah hleiah, an kimvelih um hmuahhmuah in ngun thilri, sui thilri, bungruapawl le rannungpawl le thil mankhung pawl thawn tha an rak pe.

1:5^a Suah 35:20-22; 2San 11:1, 3; Neh 11:4; Sam 127:1; Hag 1:14; Fil 2:13

1:6^b Suah 3:22

7 ^aSiangpahrang Sairas khal in Nebukhadnezzar in Jehovah inn ih bungruapawl Jerusalem ihsin la tahratin a pathianpawlih temple ih a ret mipawl cu a kengsuak. 8 ^bCule cupawl cu Persia siangpahrang Sairas in sum kiltu Mithredath kut ihsin a lasuak ih, a siar, cule Judah mipawimawh Sheshbazzar a pe. 9 A zat cu hihi a si: sui khēng dau 30, ngun khēng dau 1000, nâmte 29; 10 sui cawhtawlh 30, khavek phun thotho ngun cawhtawlh 410 le a dang bungbel 1000 an si. 11 Sui le ngun bungbel a zaten 5400 an si. Cupawl hmuahhmuah cu ralkaihpawl, Babilon ihsin Jerusalem ih hruai an si tikah, Sheshbazzar in a la.

1:7^a 2Sp 24:13; 2San 36:7, 10; Jer 52:17-19

1:8^b Ezr 5:14

2

Jerusalem ih Kirsal Dawisuah Mipawl

1 ^aRalkaihnak ihsi hung kirsal ramṭhen minung, hruaihloh mi, Babilon siangpahrang Nebukhadnezzar in Babilon ih a hruaihloh mi, Jerusalem le Judah ih kirsal, mi kip mai khua cio ih tlungkirpawl cu hipawl hi an si.

2:1^a 2Sp 24:16; 1San 9:2; 2San 36:20; Neh 7:73

2 ^aJerubbabel zawngih ra kirpawl cu Jeshua, Nehemiah, Seraiah, Reelaiah, Mordekai, Bilshan, Mispar, Bigvai, Rehum le Baanah tla an si. Israel mipa mipum zat cu: 3 ^bParosh tefa 2172, 4 Shefatiah tefa 372, 5 ^cArah tefa 775, 6 ^dPahath-Moab tefapawl lakih Jeshua le Joab tefa 2812, 7 Elam tefa 1254, 8 Zattu tefa 945, 9 Zakkai tefa 760, 10 Bani tefa 642, 11 Bebai tefa 623, 12 Azgad tefa 1222, 13 ^eAdonikam tefa 666, 14 Bigvai tefa 2056, 15 Adin tefa 454, 16 Hezekiah-mipawl lakih Ater tefa 98, 17 Bezai tefa 323, 18 Jorah tefa 112, 19 Hashum tefa 223, 20 Gibbar tefa 95, 21 ^fBethlehem khawmi 123, 22 Netofah khawmi 56, 23 Anathoth khawmi 128, 24 Azmaveth tefa 42, 25 Kirjath Arim, Kefirah le Beeroth khawmi 743, 26 ^gRamah le Geba tefa 621, 27 Mikmash khawmi 122, 28 ^hBethel khawmi le Ai khawmi 223, 29 Nebo-ih tefa 52, 30 Magbish tefa 156, 31 A dang Elam khawmi 1254, 32 Harim khawmi 320, 33 Lod khawmi, Hadid khawmi le Ono khawmi 725, 34 ⁱJeriko khawmi 345, 35 Senaah khawmi 3630.

2:2^a 1San 3:19; 6:14; Neh 10:2; Hag 1:1, 12; Zek 3:1-10; Mat 1:12; Luk 3:27

2:3^b Ezr 8:3; Neh 3:25

2:5^c Neh 7:10

2:6^d Neh 7:11

2:13^e Ezr 8:13

2:21^f Sem 35:19; Mik 5:2; Mat 2:6

2:26^g Jos 18:25

2:28^h Sem 12:8

2:34ⁱ 1Sp 16:34; 2San 28:15

36 ^aPuithiampawl: Jedaiah tesinfapawl lakih Jeshua sungza 973, 37 ^bImmer tefa 1052, 38 ^cPashur tefa 1247, 39 ^dHarim tefa 1017 an si.

2:36^a 1San 24:7

2:37^b 1San 24:14

2:38^c 1San 9:12

2:39^d 1San 24:8

40 ^aLevi-mipawl: Hodaviah tefa Jeshua le Kadmiel teih tefa 74 an si.

2:40^a Sem 29:34; Mip 3:9; Dnp 18:6-7; Ezr 3:9; Neh 12:24

41 ^aHlasaktupawl: Asaf tefapawl cu 128 an si.

2:41^a 1San 15:16

42 ^aKăwtka kiltupawlih tefapawl: Shallum tefapawl, Ater tefapawl, Talmon tefapawl, Akkub tefapawl, Hatita tefapawl le Shobai tefapawl cu an zaten 139 an si.

2:42^a 1San 9:17

43 ^aNethin-mipawl: Ziha tefapawl, Hasufa tefapawl, Tabbaoth tefapawl; 44 Keros tefapawl, Siaha tefapawl, Padon tefapawl, 45 Lebanah tefapawl, Hagabah tefapawl, Akkub tefapawl, 46 Hagab tefapawl, Shalmai tefapawl, Hanan tefapawl, 47 Giddel tefapawl, Gahar tefapawl, Reaiah tefapawl, 48 Rezin tefapawl, Nekoda tefapawl, Gazzam tefapawl, 49 Uzza tefapawl, Paseah tefapawl, Besai tefapawl, 50 Asnah tefapawl, Meunim tefapawl, Nefusim tefapawl, 51 Bakbuk tefapawl, Hakufa tefapawl, Harhur tefapawl, 52 Bazluth tefapawl, Mehida tefapawl, Harsha tefapawl, 53 Barkos tefapawl, Sisera tefapawl, Tamah tefapawl, 54 Neziah tefapawl le Hatifa tefapawl.

2:43^a 1San 9:2; Neh 11:21

55 ^aSolomon-ih siahhlawhpawlih tefapawl: Sotai tefapawl, Sofereth tefapawl, Peruda tefapawl, 56 Jaala tefapawl, Darkon tefapawl, Giddel tefapawl, 57 Shefatiah tefapawl, Hattil tefapawl, Zebaim-mi Pokereth tefapawl le Ami tefapawl. 58 ^bNethin-mi zate le Solomon-ih siahhlawhpawlih tefapawl cu 392 an si.

2:55^a 1Sp 9:21

2:58^b 1San 9:2

59 ^aCule hipawl hi Tel Melah, Tel Harsha, Kherub, Addan le Immer ihsi hung sopawl an si; asinan an pupápawlih sungza asilole an cithlah, Israel an si le si lo an hliakhlai thei lo mipawl cu: 60 Delaiah tefa, Tobiah tefa le Nekoda tefa 652 an si. 61 ^bCule puithiam tefapawl lakih: Habaiah tefapawl, Koz tefapawl, Gilead-mi Barzillai fanupawl lakih mi nupi ah ṭhi ih a hmin pucihtu Barzillai tefapawl in, 62 ^ccithlah sâwngawknak hmin khumnak ah an hmin an hawl nân, an hmu lo. Curuangah annih cu mibawrhbang an si tiin puithiam sinak ah telh an si lo. 63 ^dCule ram uktu in an hnenah puithiam in Urim le Thummim thawi thu a ráwn thei hlanlo thil thianghlimbik pawl an ei lo pei a ti hai.

2:59^a Mip 1:18

2:61^b 2Sam 17:27

2:62^c Mip 16:39-40

2:63^d Suah 28:30; Pui 2:3, 10

64 Mipungkhawm pumpi cu 42360 an si, 65 ^aan mipa siahhlawh le nunau siahhlawh 7337 tel loin; cule hlasaktu mipa le nunau 200 an nei. 66 An rangpawl cu 736 an si ih, an lākrangpawl cu 245 an si, 67 an kalaukpawl cu 435 le an lākpawl cu 6720 an si.

2:65^a Neh 12:42

68 ^aJerusalem ih Jehovah inn an thlen tikah, pupápawlih sungza lubânpawl hrekkhat in Pathian inn cu amai hmun ih tungding dingin lungpuak thawhhlawm an pe: 69 ^banmai tithei dān vekin, hnaṭuannak hrangah thawhhlawm retnak ah sui darakma 61000 le ngun ^cmina 5000 le puithiam sinfen 100 an pe.

2:68^a Suah 25:2

2:69^b Ezr 8:25-34

2:69^c mina: Bible ih tahnak phunphun simfiangnak zoh aw.

70 ^aCun puithiampawl le Levi-mipawl, mipi lak ihsin mi hrekkhat, hlasaktupawl, kăwtka kiltupawl le Nethin-mipawl cu anmai khuapawl ah an cêng ih, Israel miphun zate khal anmai khuapawl ah an cêng.

2:70^a 1San 9:2; Neh 11:3-4

3

Jerusalem ah Pathian Biaknak Tundinsal a Si

1 ^aA thla sarihnak a ra thleng ih, Israel tefa khawpipawl ih an um tikah, mipi cu mi pakhat vekin Jerusalem ah an fĭnkhawmaw. 2 ^bCun Jozadak-ih fapa Jeshua le a unau puithiampawl, Shealtiel-ih fapa Zerubbabel le a unaupawl cu an tho ih, Pathian mi Mosi Dān sungih ngan bangtukin, a parih Meiur Thilhlănpawl hlan dingah Israel-ih Pathian-ih biakṭheng an dâwl. 3 ^cCuih rampawl luahtu minungpawl ruangah ṭihnak an parah a thleng na cingin, biakṭheng cu a hmun dingah an dâwl, cule cumi parah Jehovah hnenah Meiur Thilhlănpawl an hlan, zing lam le zan lamah Meiur Thilhlănpawl an hlan. 4 ^dNgan mi zulhin Bûkte Puai khal an tuah ih, ni tin Meiur Thilhlănpawl cu ni tin hrangah zīn le dān ih a ngĕn zat in an hlan. 5 ^eCuih hnuah tuah ṭheu mi Meiur Thilhlăn, Thla Thar Thilhlănpawl le serhhran mi Jehovah hrangih ruat mi puaipawl zate le palungsuak thawhhlawm lungtho teih Jehovah hnenih an hlăn mi cu an pe. 6 Jehovah-ih temple lungphum cu phum a si hrih lo nain, thla sarihnak a ni khatnak ihsin Jehovah hnenah Meiur Thilhlănpawl hlăn an thawk. 7 ^fLungser thiam pawl le lettamapawl hnen khalah tangka an pe, cule Persia siangpahrang Sairas hnen ihsin siannak an ngah mi vekin, sidar thingpawl Lebanon ihsin tifinriat ah, Joppa ah run keng dingin Sidon-mipawl le Ṭaiar-mipawl cu rawl, in ding le hriak an pe.

3:1^a Pui 23:24; Neh 7:73

3:2^b Suah 20:24; 1San 3:17; Hag 1:1; Zek 6:11

3:3^c Suah 29:39; Mip 28:1-8

3:4^d Suah 23:16; Mip 29:12-38; Neh 8:14-18; Zek 14:16-19

3:5^e Pui 23:1-44; Mip 28:14; 29:39; Kol 2:16

3:7^f 1San 14:1; Ezr 1:2-4; Isa 35:2; Apo 9:36

Temple Dĭnsal an Thawk

8 ^aJerusalem ah, Pathian inn ih an thlen kum hnihnak, a thla hnihnak ah Shealtiel-ih fapa Zerubbabel, Jozadak-ih fapa Jeshua le a tāng mi an unau puithiampawl le Levi-mipawl le ralkaihnak ihsi Jerusalem ih ra tlungpawl zaten hna an ṭuan thawk ih, kum 20 ihsin a tlun lam Levi-mipawl cu Jehovah inn hnaṭuan hotu dingah an ruat. 9 ^bCun Jeshua cu a fapapawl le a unaupawl thawn, Kadmiel cu a fapapawl thawn, cule Judah-ih fapapawl cu Pathian inn hnaṭuan hoha dingin mi pakhat vekin an tho: Henadad-ih fapapawl cu an fapapawl le an unau Levi-mipawl thawn.

3:8^a Mip 4:3; 1Sp 6:1; Zek 4:9

3:9^b Ezr 2:40

10 ^aInn saktupawl in Jehovah-ih temple lungphum an phum tikah, Israel siangpahrang David-ih zīn le dān bangtukin, Jehovah thangṭhat dingah puithiampawl cu an thuam thuamawin tawtawrawtpawl thawn le Levi-mi Asaf-ih fapapawl cu sumselpawl thawn an ding. 11 ^bJehovah hnenah sawnawin hla an sak, an thangṭhat ih, lungawi thu an sim,

3:10^a Mip 10:2; 1San 6:31; 25:1; 2San 5:13; Ezr 5:16; Hag 2:15; Zek 6:12

3:11^b 1San 16:34, 41; 2San 7:3; Neh 12:24, 40; Sam 30:5; Hag 2:18; Zek 4:9

“Ziangahtile anih cu a ṭha,
Ziangahtile a zahngainak cu Israel lamah kumkhuain a hmun a si,”

tiah an ti.

Jehovah an thangṭhat tikah, Jehovah inn lungphum cu phum ṭheh a si ruangah mipi zaten nasa zetin an au.

12 ^aAsinan puithiam tampi le Levi-mipawl le pupápawlih sungza lubânpawl, temple hmaisa rak hmutu putarpawl cu an mithmuh ih temple lungphum an phum tikah aw ring zetin an ṭap. Asinan mi tampi cu aipuan ruangah ringpin an au. 13 ^bCutin mipi in aipuan authâwm maw, mipi ṭap thâwm ti an thleidang thei lo, ziangahtile mipi cu ring tukin an au ih, thâwm cu hmun hlatpi ihsin theih a si.

3:12^a Jer 31:9; Hag 2:3, 9

3:13^b Job 8:21; Sam 27:6

4

Temple Saksal Dodalnak

1 ^aJudah le Benjamin-ih doralpawl in sál tang tefapawl in Israel-ih Pathian Jehovah-ih temple an sak rero ti an theih tikah, 2 ^bZerubbabel le pupápawlih sungza lubânpawl hnenah an ra ih an hnenah, “Kan lo sak bawm ding, ziangahtile kannih khal nanmah bangin nan Pathian kan hawl ve a si; cule hi tawkih in hruaitu Assiria siangpahrang Esarhaddon san ihsin a hnenah rai kan thawi,” tiah an ti. 3 Asinan Zerubbabel le Jeshua le Israel pupápawlih sungza lubânpawl a tāng mipawl in an hnenah, “Kan Pathian hrang inn sak dingah kan zawngah zianghman nan tuah thei lo; Persia siangpahrang Sairas ih thu in pek vekin, Israel-ih Pathian Jehovah hnenah kanmah lawngin kan sak ding a si,” tiah an ti.

4:1^a Neh 2:20

4:2^b 2Sp 17:24, 41

4 ^aCun cuih rammipawl in Judah-mipawl thanauter ding an zuam. An inn saknak ah buainak an tuah ih, 5 Persia siangpahrang Sairas san hmuahhmuah ihsin Persia siangpahrang Darias in a uk tiang an tumtah tlawlhter dingin anmah dokalhin thurawn petu an hlang.

4:4^a Ezr 3:3

Jerusalem Dĭnsal Dodalnak

6 ^aAhasuras a lal lai, a lal thawkpekah, Judah le Jerusalem luahtupawl dokalhin hēknak ca an ngan.

4:6^a Est 1:1; 3:13; Dan 9:1

7 ^aArtazerzis san khalah Bishlam, Mithredath, Tabel le a dang an hawipipawl in Persia siangpahrang Artazerzis hnenah ca an ngan, cule an kuat mi ca cu Aramik cafáng ih ngan a si ih, Aramik ṭawng in an let. 8 Ralkap hotu Rehum le cangantu Shimshai in Jerusalem dokalhin hiti vekin siangpahrang Artazerzis hnenah ca an ngan, 9 ^bRalkap hotu Rehum hnen, cangantu Shimshai hnenin le a dang an hawipi: Dinai-mipawl, Afarsath-mipawl, Tarpeli-mipawl, Persia-mipawl, Erek-mipawl, Babilon-mipawl, Shushan-mipawl, Dehav-mipawl, Elam-mipawl le, 10 ^ca tāng mi miphun dang pawl cu miropi le mipawimawh ^dOsnapper in ralkaih ah a hruai hai ih Samaria khawpipawl ah umhmun a khuarter, cule a tāng mipawl cu Zufraṭis tiva khat lam ral hmun dangdangah umhmun a khuarter. 11 Hihi an hnenih an kuat mi cakuat ngan sâwng mi a si:

4:7^a 2Sp 18:26; Neh 2:1; Isa 36:11; Dan 2:4

4:9^b Sem 10:10; Neh 1:1; Est 1:22; Dan 8:2

4:10^c 2Sp 17:24; Neh 4:2

4:10^d Osnapper: Hi pa hi Esarhaddon fapa Ashurbanipal-ih hmin dang a ni.

“Siangpahrang Artazerzis hnenah, Zufraṭis tiva hi lam ralih um na siahhlawhpawl in: 12 ^ana hnen ihsi hung so Jew-pawl cu kan hnenah Jerusalem ah an ra ih, khawpi helhmang le ṭha lo cu an dĭn rero ih, a kulh cu an ṭheh rero thlang, cule a lungphumpawl an rĕmṭha rero ti siangpahrang in rak thei seh. 13 ^bHi khawpi hi dĭn a si ih, a kulhpawl ṭhehfel a si ahcun, siah, ngunkhuai asilole thilri siah an pe lo ding, cule siangpahrangih sum retnak inn cu a kiam ding ti atu-ah siangpahrang in rak thei seh. 14 Siangpahrang inn ihsin băwmnak kan ngah ruangah, siangpahrang zahlonak hmuh cu kan hrangah thil ṭha a si lo, curuangah mi kan thlah ih, siangpahrang kan theihter, 15 ^ccutin na pupápawl cazual ih ngankhum mi na hawl thei ding. Cule cazual sungih ngankhum mi na hmu ding ih, hi khawpi cu helhmang khawpi, siangpahrang le a ramṭhenpawl hrangah siatnak a si, cule hlanlai ah hi khawpi sungah hin hél dingin an rak tăwkphirh, cumi ruangah hi khawpi cu a siat ti na thei ding. 16 Hih khawpi hi dĭnsal a si ih, a kulhpawl ṭhehfel a si ahcun, a rahsuah cu Zufraṭis tiva hi lam ralah covo na nei lo ding tiah siangpahrang thu kan theihter a si,” tiin.

4:12^a 2San 36:13

4:13^b Neh 5:4

4:15^c Ezr 5:17; Est 3:8

17 Siangpahrang in thulehnak a kuat,

“Ralkap hotu Rehum, cangantu Shimshai, Samaria ih cêng an hawipi dang le Zufraṭis tiva kha lam ralih a tāng mipawl hnenah: remdaihnak um hram seh, tivekpawl.

18 “Ca in kuat mi cu ka hmaiah fiangteih siar a si. 19 ^aCule thu ka pe ih, hawlsuahnak cu tuah a si, cule hlanlai ah hi khua in siangpahrangpawl a do ṭheu, a sungah helnak le dodalnak a rak câwm ti hmuhsuah a si. 20 ^bJerusalem ah siangpahrang cak zetzet, Zufraṭis tiva hi lam ralih ram zate tlunih uktu khal an rak um; cule anmah hnenah siah, ngunkhuai le thilri siah an rak pe. 21 Keimah in thupek ka pek hlanlo, hi khawpi dĭn a silonak dingah atu-ah hi minungpawl cawl dingin thupek pe uh. 22 ^cHimi tuah tlawlh lo dingin fimkhur uh. Ziangah so siangpahrang hrangah siatnak a luar ding?” tiin.

4:19^a 2Sp 18:7

4:20^b Sem 15:18-21; Suah 23:31; Jos 1:4; 1Sp 4:21; 1San 18:3; Sam 72:8-11

4:22^c Dan 6:2

23 Cule siangpahrang Artazerzis-ih cakuat ngan sâwngsin mi cu Rehum, cangantu Shimshai le an hawipipawl hmaiih siar a si tikah, Jerusalem ih um Jew-pawl dokalhin manhlap zetin an so ih, thuneihnak thawn duh lo theih loin an cawlter. 24 ^aCuti vekin Jerusalem ih Pathian inn hnaṭuan cu a cawl, cule Persia siangpahrang Darias a lal kum hnihnak tiang hna cu cawlhsan a si.

4:24^a Neh 2:1-8; Dan 9:25; Hag 1:1, 15; Zek 1:1

5

Temple Dĭnsal Tharthawhsalnak

1 ^aProfetpawl, profet Haggai le Iddo-ih fapa profet Zekariah in Judah ram le Jerusalem ih um Jew-pawl hnenah an tlunih uktu Israel-ih Pathian hmin in thu an phuang. 2 ^bCutin Shealtiel-ih fapa Zerubbabel le Jozadak-ih fapa Jeshua cu an tho ih, Jerusalem ih Pathian inn sak an thawk, cule Pathian profetpawl in an umpi ih an bawm.

5:1^a Hag 1:1, 3, 12, 14-2:9; Zek 1:1

5:2^b 1San 3:19; Hag 1:14; 2:4; Zek 4:6-10

3 ^aCu laiah Zufraṭis tiva hi lam ral ram uktu Tattenai le Shethar-Boznai le an hawipipawl cu anmah hnenah an ra ih an hnenah hitin an ti, “Hi temple sak dingin le hi khaw kulh ṭheh dingin zo in thu a lo pe?” tiah an ti. 4 ^bCun annih in in suh ruangah hi inn sak rero tupawlih hminpawl cu kan sim. 5 ^cAsinan an Pathian mit cu Jew-pawlih upapawl parah a fu, cutin Darias hnenih thuhla theihter mi a thlen hlanlo, annih cu an cawlter thei lo. Cun hi thuhla ih ngan mi thulehnak cu kuatkir a si. 6 ^dHihi Tattenai-ih cakuat ngan sâwng mi kuat mi cu a si. Zufraṭis tiva hi lam ral ram uktu Tattenai le Shethar-Boznai le a hawipipawl, Zufraṭis tiva hi lam ral ram ih um Persia-mipawl cun siangpahrang Darias hnenah. 7 A hnenih ca an kuat mi ah hitiih ngan a si:

5:3^a Ezr 4:12; 6:6

5:4^b Ezr 5:10

5:5^c Neh 2:8, 18; Sam 33:18; Isa 66:14

5:6^d Ezr 4:9

“Siangpahrang Darias hnenah, remdaihnak hmuahhmuah um hram seh.

8 “Judia ramṭhen ah, Pathian ropi ih inn ah, lung tumpi pi thawi sak le phar ih thing rĕmkhawm mi ah kan feh, cule hi hna cu rang zetin a feh ih, an kut ah a hmuingil a si ti siangpahrang in thei seh. 9 Cun cuih upapawl cu kan sut ih, an hnenah, ‘Hih inn sak dingin le hi khaw kulhpawl ṭhehfel dingin zo in thu a lo pe?’ tiah kan ti. 10 An lakih hotu lupawlih hmin kan ngan thei nak dingah le nangmah lo theihter dingin an hminpawl khal anmah kan sut.

11 ^a“Annih in hitin săwnnak in pekir, ‘Kannih cu lei le van Pathian siahhlawh kan si ih, Israel siangpahrang ropi in kum reipi laiih a rak sak ih a ṭheh mi inn cu kannih in kan saksal a si. 12 ^bAsinan kan pupápawl in van Pathian thinling ko an căwkthawh ruangah, anmah cu Kaldia-mi Babilon siangpahrang Nebukhadnezzar kut ah a pek hai, anih cun hi inn hi a siatbăl ih mipi cu Babilon ah a thiarhlo. 13 ^cSihmansehla Babilon siangpahrang Sairas a lal kum khatnak ah, siangpahrang Sairas in hi Pathian inn sak dingin thusuah a suah. 14 ^dCuihhleiah Jerusalem ih um temple ihsin Nebukhadnezzar in Pathian inn ihta sui le ngun bungbelpawl a lâk ih, Babilon temple sungih a thiar mipawl cu siangpahrang Sairas in Babilon temple ihsin a la ih, cupawl cu ram uktu ih a tuah mi mi pakhat a hmin Sheshbazzar hnenah a pek. 15 Cule anih in a hnenah, “Hi bungbelpawl hi la awla, feh aw, Jerusalem ih um temple ah thiar aw, cule Pathian inn cu a hmun kel ah saksal si seh,” tiah a ti. 16 ^eCun Sheshbazzar thotho cu a ra ih Jerusalem ih um Pathian inn lungphum cu a phum, asinan cuih cān thawkin atu tiang, cumi cu sak rero a si ih, ṭheh a si hrih lo,’ tiin.

5:11^a 1Sp 6:1; 2San 3:1-2

5:12^b Dnp 21:10; 2Sp 24:1; 2San 36:16; Jer 1:3

5:13^c Ezr 1:1-4

5:14^d Ezr 1:7

5:16^e Ezr 3:10

17 ^a“Curuangah atu-ah siangpahrang in ṭha a ti asile, Babilon ih siangpahrang hlawnthil inn ah hawlsuahnak cu tuah si sehla, Jerusalem ih himi Pathian inn hi sak dingin siangpahrang Sairas in thupek a suah maw ti fiangter seh, cule siangpahrang in himi thuhla ah a rem tidān in kuat seh,” tiah an ti.

5:17^a Ezr 4:15

6

Darias-ih Thusuah

1 ^aSiangpahrang Darias in thusuah a suah ih, Babilon ih hlawnthil retkhawmnak hmun cazualpawl innpi ah hawlsuahnak cu an tuah. 2 Media ramṭhen ih um, Akmetha khawpi ih siangpahrang inn ah cazual cu hmuh a si, cule cumi sungah hitin ngankhum mi cu a nganaw:

6:1^a Ezr 5:17

3 ^a“Siangpahrang Sairas a lal kum khatnak ah, Jerusalem ih Pathian inn thuhla ah siangpahrang Sairas in thusuah a suah, ‘Raithawinakpawl an hlănnak hmun ah, inn cu dĭnsal si seh, cule a lungphumpawl cu hnget zetin phum si seh, a san lam dawng 60 le a kauh lam dawng 60 si seh, 4 ^blungto tumpi pi thawn tlar thum in, tlar khat cu thing in tuah si seh. A cem zat cu siangpahrang sum retnak ihsin pek si seh. 5 ^cCuihtlunah Nebukhadnezzar in Jerusalem ih um temple ihsin Pathian inn ihta sui bungbelpawl le ngun bungbelpawl a lâk ih, Babilon ih a thiar mipawl cu pekkir si sehla, Jerusalem ih um temple ah kenkir si seh, anmai hmun kel cio ah, cule Pathian inn ah ret si hai seh,’ tiin.

6:3^a Hag 2:3

6:4^b 1Sp 6:36

6:5^c 1San 29:2

6 ^a“Curuangah atu-ah, Zufraṭis tiva hi lam ral ram uktu Tattenai le Shethar-Boznai le Zufraṭis tiva ralkhat ih um Afarsak-mi, na hawipipawl, cuih hmun ihsin hla ah sīp uh. 7 Hih Pathian inn sak hna cu hnaihnăwk hlah uh, Jew-pawlih ram uktu le Jew-pawlih upapawl in hi Pathian inn cu a hmun kel ah sak hai seh.

6:6^a Ezr 5:3

8 ^a“Cuihtlunah hi Pathian inn saknak ding hrangah, hi Jew-pawlih upapawl hrangih na tuah ding mi thusuah ka suah a si, a man zat cu Zufraṭis tiva kha lam ral ram siah, siangpahrangih thilri ihsin pek si seh, an cawlhlonak dingah cumi cu hi minungpawl hnenah pek lohli si seh. 9 ^bCule van Pathian hnenih Meiur Thilhlănpawl hrangih an ṭul mi caw pa tûai pawl, tuu cang pawl le tuu fa no pawl, cun sangvut, cite, sabit zu le hriak cu Jerusalem ih um puithiampawl ih dilnak zulhin pelh lo ten ni tin pek si hai seh, 10 ^ccutin van Pathian hnenah rimthaw thawinakpawl an hlan thei ding ih, siangpahrang le a fapapawl nunnak hrangah thla an cam thei ding.

6:8^a Ezr 6:4; 7:14-22

6:9^b Pui 1:3, 10

6:10^c 1Ti 2:1-2

11 ^a“Cuihtlunah thusuah a danglamtertu zokhal a inn ṭhuam pakhat phawisuakin phun si sehla, amah cu cumi parah thlai si seh, cule cumi ruangah a inn cu êk penkhawm ah tuah si seh, tiah thusuah ka suah. 12 ^bCule cu tawkih a hmin cêngtertu Pathian cun siangpahrang pauhpauh simaw, cuih thu tidanglam dingih kut suahtu minungpawl simaw, Jerusalem ih um hi Pathian inn siatbăl dingih kut suahtu minungpawl simaw cu siatsuah seh. Keimah Darias in thusuah ka suah a si, cumi cu manhlap zetih tuahsuak si seh,” tiin.

6:11^a Dnp 21:22-23; Est 2:23; Dan 2:5

6:12^b Dnp 12:5; 2San 6:2

Temple Ṭheh le Hlănnak

13 Zufraṭis tiva hi lam ral ram uktu Tattenai, Shethar-Boznai le an hawipipawl in siangpahrang Darias ih a rak kuat mi bangtukin manhlap zetin an tuah. 14 ^aJew-pawlih upapawl in an sak ih, profet Haggai le Iddo-ih fapa Zekariah teih thu an phuannak thawngin an hlawhtling. Cule Israel-ih Pathian ih thupeknak bangtuk le Sairas, Darias le Persia siangpahrang Artazerzis pawl ih thupek bangtukin an sak ih an ṭheh. 15 ^bCule hi inn cu Adar thla, a ni thumnak ah an ṭheh, cucu siangpahrang Darias a lal kum ruknak a si.

6:14^a Neh 2:1

6:15^b Est 3:7

16 ^aCun Israel tefapawl, puithiampawl le Levi-mipawl le a dang sál tang pawlih tefapawl in hi Pathian inn hlăn lăwmnak cu aipuang zetin an tuah. 17 ^bCule hi Pathian inn hlănnak ah, caw pa 100, tuu cang 200, tuu fa no 400 le Israel zate hrang Sual Thilhlăn hrangah Israel miphun zat zulhin me cang hleihnih thawinakpawl an hlan. 18 ^cMosi Cazual sungih ngan vekin, Jerusalem ih Pathian rawngbawl dingin puithiampawl cu anmai zulvo cio vekin le Levi-mipawl cu anmai bur ṭhen cio vekin ṭuanvo an pe.

6:16^a 1Sp 8:63

6:17^b 2Sam 6:13; 2San 29:21

6:18^c Mip 3:6-9; 1San 24:1; 2San 35:4

Lanta Puai Hmannak

19 ^aSál tang tefapawl in Lanta Puai cu thla hmaisabik a ni hleilitnak ah an hmang. 20 ^bZiangahtile puithiampawl le Levi-mipawl cu an thianfaiaw, an zaten an thiangfai a si. Cule sál tang tefapawl zate hrang, an unau puithiampawl hrang le anmai hrangah Lanta tuu fa no pawl an that. 21 ^cCun sál tānnak ihsi ra tlungkir Israel tefapawl le Israel-ih Pathian Jehovah hawl dingih cuih ram miphunpawlih thianlonak ihsi thiarfihlimaw mipawl zaten an eitlang. 22 ^dCule Thilnu telh lo Sang Puai aipuang zetin ni sarih sung an hmang, ziangahtile Pathian, Israel-ih Pathian inn hna ah an kut cakter dingin, Jehovah in aipuang ko le Assiria siangpahrang thinlung cu anmah lam hawi ko a tuah a si.

6:19^a Suah 12:11; Mip 28:16

6:20^b 2San 30:17

6:21^c Dnp 18:9; 1San 22:19; Neh 9:2; Sam 14:2; Eze 36:25

6:22^d Suah 12:17

7

Jerusalem ah Ezra a Thleng

1 ^aHi thilpawl hnuah Persia siangpahrang Artazerzis a lal laiah, Ezra cu Babilon ihsin a hung so, cumi cu Seraiah fapa a si, cumi cu Azariah fapa a si, cumi cu Hilkiah fapa a si, 2 ^bcumi cu Shallum fapa a si, cumi cu Zadok fapa a si, cumi cu Ahitub-ih fapa a si, 3 cumi cu Amariah fapa a si, cumi cu Azariah fapa a si, cumi cu Meraioth fapa a si, 4 cumi cu Zerahiah fapa a si, cumi cu Uzzi fapa a si, cumi cu Bukki fapa a si ih, 5 ^ccumi cu Abishua fapa a si, cumi cu Finehas fapa a si, cumi cu Eleazar fapa a si, cumi cu puithiam lu bik Aaron-ih fapa a si: 6 ^dhi Ezra cu Babilon ihsin a hung so, cule anih cu Israel-ih Pathian Jehovah ih a rak pek mi Mosi Dān ngan thiam a si. Jehovah a Pathian-ih kut a parih a um bangtukin, a dil mi zaten siangpahrang in a pe.

7:1^a 2Sp 22:4; 25:18

7:2^b 1Sp 1:8; 1San 6:8; Neh 11:11; Eze 40:46

7:5^c 1San 6:4

7:6^d 2Sp 25:28; Neh 12:36; Isa 41:20

7 ^aIsrael tefapawl lakih mi hrekkhat, puithiampawl, Levi-mipawl, hlasaktupawl, kăwtka kiltupawl le Nethin-mipawl cu Jerusalem ah siangpahrang Artazerzis a lal kum sarihnak ah an hung so. 8 Cule siangpahrang a lal kum sarihnak, a thla ngatnak ah Ezra cu Jerusalem ah a thleng. 9 ^bThla khatnak, a ni khatnak ah amah cu Babilon ihsin a păwk ih, a Pathian kut ṭha a parih a um vekin, thla ngatnak a ni khatnak ah Jerusalem a thleng. 10 ^cZiangahtile Ezra cu Jehovah Dān hawlih tuahsuak dingin le sakhaw dānpawl le zīn le dān pawl cu Israel ram ah zirh dingin a thinlung a rak timtuah.

7:7^a Ezr 8:1-14

7:9^b Ezr 7:6; Neh 2:8

7:10^c Dnp 33:10

Ezra hnenih Artazerzis Cakuat

11 Himi hi siangpahrang Artazerzis in puithiam le cangantu Ezra, Israel hnenih Jehovah thupek kamsuakthupawl le a sakhaw dānpawl ngantu hnenih a pek mi ngan sâwng mi cakuat a si:

12 ^a“Artazerzis, siangpahrangpawlih siangpahrang in, van Pathian Dān ngantu, puithiam Ezra hnenah: daihnak famkim le tivekpawl um hram seh.

7:12^a Eze 26:7; Dan 2:37

13 ^a“Ka ram sungih Israel-mi zate le an puithiampawl le Levi-mipawl ih mai palungsuakih Jerusalem ih feh duhtu zaten na zawngah an feh thei tiin thusuah ka suah a si. 14 ^bZiangahtile nang cu na kut ih na Pathian Dān thuhla ah Judah le Jerusalem suthliah dingin siangpahrang in a thurawn petu mi pasarih thawn a lo thlah a si, 15 ^ccule nang cu Jerusalem cêncilhtu Israel-ih Pathian hnenah siangpahrang le a thurawn petupawl in siang zetih an hlăn mi sui le ngun hei keng ding na si, 16 ^dcule Babilon ram hmuahhmuah ih na hmuh mi sui le ngun hmuahhmuah, mipi le puithiampawl ih palungsuak thawhhlawm, Jerusalem ih an Pathian inn hrangih siang zetih an pek mipawl thawn. 17 ^eCuruangah atu-ah hi tangka in caw pa pawl, tuu cang pawl le tuu fa no pawl, an Thlairawl Thilhlănpawl le Inding Thilhlănpawl lei dingin taima aw, cule cupawl cu Jerusalem ih nan Pathian inn ih biakṭheng parah na hlan pei.

7:13^a Ezr 6:1

7:14^b Est 1:14

7:15^c Dnp 12:5; 1San 29:6; 2San 6:2

7:16^d Suah 3:22; Zek 6:10

7:17^e Mip 5:5-10; Dnp 12:5-11; 2Sp 3:4

18 “Cule sui le ngun hman hlei mi thawn nangmah le na unaupawl in tuah dingih ṭha nan ti mi pauhpauh cu nan Pathian duhdān vekin tuah uh. 19 ^aPathian inn ih rawngbawlnak dingah bungbel an lo pek mipawl khal Jerusalem Pathian hnenah hlan thluh aw. 20 ^bCule na Pathian inn hrangih ṭulsăm mi ziangkhal, phihruksak a remcâng asile, siangpahrang hlawnthil inn ihsin rak tum seh.

7:19^a Jer 27:21-22

7:20^b Ezr 6:4

21 ^a“Cule kei, siangpahrang Artazerzis in Zufraṭis tiva khat lam ral ram ih hlawnthil kiltupawl zate hnenah puithiam Ezra, van Pathian Dān ngantu in a lo dil mi ziangkhal manhlap zetih tuah si seh, tiin thusuah ka suah a si, 22 ngun talent 100, sangvut kor 100, sabit zu bath 100, hriak bath 100 tiang le cite cu bikhiah um loin si seh. 23 ^bVancung Pathian ih thupek pauhpauh, van Pathian inn hrangah taima zetih tuah si seh. Ziangahtile thinlingnak cu ziangah so siangpahrang le a fapapawl parah a um ding? 24 ^cCuihhleiah puithiampawl, Levi-mipawl, hlasaktupawl, kăwtka kiltupawl, Nethin-mipawl, asilole hi Pathian inn siahhlawhpawl hi siah, ngunkhuai, asilole thilri siah pekter dān in a siang lo ding ti kan lo theihter a si.

7:21^a Ezr 7:6

7:23^b Ezr 6:10

7:24^c Ezr 8:36

25 ^a“Cule nang Ezra, na Pathian ih a lo pek mi fimnak zulhin, Zufraṭis tiva hi lam ral ram ih umpawl hmuahhmuah thu an ṭhensak thei nak dingah na Pathian Dān theitupawl zaten uktupawl le laireltupawl ah ret aw, cule cuih dān thei lo tupawl cu zirh aw. 26 ^bNa Pathian Dān le siangpahrang dān thlun lo tu ding pauhpauh cu thihnak simaw, ram ihsin dawisuah simaw, an thilripawl lâksak simaw, thawngthlak simaw a parah rang zetin thuṭhennak tuah si seh,” tiin.

7:25^a Suah 18:21, 26; Pui 10:11

7:26^b Ezr 6:11

Ezra in Pathian a Thangṭhat

27 ^aJerusalem ih Jehovah inn ceimawi dingih siangpahrang thinlung ih hivek thil rettu le siangpahrang hmai le a thurawn petupawl hmaiah le, 28 ^bsiangpahrangih micak pawimawhpawl hmaiih zahngainak i rak petu kan pupápawlih Pathian Jehovah cu thangṭhatin um seh. Jehovah ka Pathian-ih kut ka parih a um vekin, kei cu thazang i neiter ih, ka zawngih hung so dingin Israel hruaitu deuhdeuh pawl cu ka fĭnkhawm a si.

7:27^a 1San 29:12

7:28^b 2Sp 25:28

8

Ezra thawi a Kirsal mi Sungkua Lubânpawl

1 ^aHipawl hi siangpahrang Artazerzis a lal laiih, Babilon ihsin ka zawngih hung so an pupápawlih lubânpawl le an cithlah sâwng pawl an si: 2 Finehas tefapawl lak ihsin Gershom; Ithamar tefapawl lak ihsin Daniel; David tefapawl lak ihsin Hattush; 3 ^bShekaniah tefapawl, Parosh tefapawl lak ihsin Zekariah; amah thawi suahkehnak hmin khum mi mipa 150 an si; 4 Pahath-Moab tefapawl lak ihsin Zerahiah fapa Eliehoenai, amah zawngih mipa 200; 5 Shekaniah tefapawl lak ihsin Ben Jahaziel, amah zawngih mipa 300; 6 ^cAdin tefapawl lak ihsin Jonathan-ih fapa Ebed, amah zawngih mipa 50; 7 Elam tefapawl lak ihsin Athaliah-ih fapa Jeshaiah, amah zawngih mipa 70; 8 Shefatiah tefapawl lak ihsin Maikal fapa Zebadiah, a zawngih mipa 80; 9 Joab tefapawl lak ihsin Jehiel fapa Obadiah, a zawngih mipa 218; 10 Shelomith tefapawl lak ihsin Ben-Josifiah, a zawngih mipa 160; 11 Bebai tefapawl lak ihsin Bebai fapa Zekariah, a zawngih mipa 28; 12 Azgad tefapawl lak ihsin Hakkatan fapa Johanan, a zawngih mipa 110; 13 Adonikam tefa netabik pawl lak ihsin an hminpawl tla cu Elifelet, Jeiel, Shemaiah le an zawngah mipa 60; 14 cuihtlunah Bigvai tefapawl lak ihsin Uthai le Zabbud, an zawngih mipa 70 an si.

8:1^a Ezr 7:7

8:3^b 1San 3:22

8:6^c Ezr 2:15; Neh 7:20

15 ^aAnmah cu Ahava ih luang tiva kapah ka fĭnkhawm hai ih, cu tawkah ni thum sung riahhmun kan khuar. Mipi le puithiampawl lak ka zoh ih, cu tawkah Levi tefa zohman ka hmu lo. 16 Cun hruaitu a si mi Eliezer, Ariel, Shemaiah, Elnathan, Jarib, Elnathan, Nathan, Zekariah, Meshullam pawl cu ka cah hai, theihthiamnak nei Joiarib le Elnathan khal. 17 ^bKasifia hmun ih hotu Iddo cah dingin thupek ka pe hai, cule kan Pathian inn ih rawngbawltu ding run hruai dingin Kasifia hmun ih Iddo le a unau Nethin-mipawl hnenih an sim ding mi ka sim hai. 18 Cun kan parih kan Pathian kut ṭha a um ruangah, theihthiamnak nei mipa kan hnenah an run hruai, Mahli tefapawl lak ihsin Levi fapa, Israel fapa, a hmin cu Sherebiah, a fapapawl le a unaupawl thawn mi hleiriat; 19 cule Hashabiah, a zawngih Merari-ih tefapawl lak ihsin Jeshaiah, a unaupawl le an fapapawl thawn mipa 20 an si; 20 ^cNethin-mipawl lak ihsin David le hruaitupawl in Levi-mipawlih rawngbawl hna hrangih an ruat mi Nethin-mi 220 an si. An zaten an hmin cio ih thiah an si.

8:15^a Ezr 2:40

8:17^b Ezr 2:43

8:20^c 1San 9:2

Humhimnak hrangih Rawl Ulh le Thlacam

21 ^aKan Pathian hmaiah kan phahniamaw ih, a hnenah kanmah le kan fanau tete le kan neih mi zate hrangah a hnen ihsin zin dik hawl dingin cu tawk Ahava tiva ah rawl ulh ka phuang. 22 ^bZiangahtile lamzin ah ral lak ihsin in bawm dingah kiltu ding ralkappawl le rang ralkappawl dil ding cun ka ning a zak, ziangruangahtile siangpahrang hnenah, “Kan Pathian kut cu thil ṭha hrangih amah hawltu zate tlunah a um, asinan amah thlauthlatupawl hmuahhmuah dokalhin a huham le a thinlingnak a um a si,” tiah kan rak sim zo. 23 ^cCutin rawl kan ul ih himi hrangah kan Pathian kan ngen, cule anih in kan thlacamnak in let.

8:21^a Sam 5:8

8:22^b Dnp 31:17; Neh 2:9

8:23^c 2San 20:3; Apo 14:23

Temple hrang Thawhhlawm

24 ^aCule puithiampawl hotu hleihnih Sherebiah, Hashabiah le an zawngih an unau pahra cu ka rethran hai. 25 ^bSiangpahrang le a thurawn petupawl le a mipawimawhpawl le cu tawkih um Israel miphun zate in kan Pathian inn hrangih an thawh mi sui, ngun le bungbelpawl rih zat cu khing ka khaisak hai ih ka rak hlan. 26 Khing ka khai ih an kut ih ka pek mi cu ngun talent 650, ngun bungbel talent 100 rit, sui talent 100, 27 darakma 1000 man sui cawhtawlh 20 le sui vekih mankhung dar tleu ih tuah mi bungbel pahnih an si. 28 ^cCule kei in an hnenah, “Nannih cu Jehovah hrangah nan thianghlim a si, bungbelpawl khal an thianghlim, cule sui le ngun pawl cu nan pupápawlih Pathian Jehovah hnenih palungsuak thawhhlawm an si. 29 Puithiam hotupawl le Levi-mipawl le Israel pupápawlih sungza lubânpawl hmai Jerusalem ih Jehovah inn pindan sungih khing nan khai hlanlo, kil uhla ret uh” tiah ka ti. 30 Cun puithiampawl le Levi-mipawl cun Jerusalem ah kan Pathian inn ih ken dingah khīngkhai mi sui le ngun le bungbelpawl cu an cohlang.

8:24^a Ezr 8:18-19

8:25^b Ezr 7:15-16; 8:33

8:28^c Pui 21:6

Jerusalem an Thleng

31 Cun thla hmaisabik, a ni hleihnihnak ah Jerusalem pan dingin, Ahava tiva ihsin kan păwk. Kan Pathian kut cu kan parah a um ih, anih cun ral kut ihsin le lamzin tluanih bawhthupnak ihsin in runsuak. 32 ^aCutin Jerusalem kan thleng ih, cu tawkah ni thum kan câm.

8:32^a Neh 2:11

33 ^aNi litnak ah sui, ngun le bungbelpawl cu kan Pathian inn ah puithiam Uriah-ih fapa Meremoth kut in khīngkhai an si ih, a zawngah Finehas-ih fapa Eleazar a um, anmah zawngah Levi-mipawl, Jeshua-ih fapa Jozabad le Binnui-ih fapa Noadiah an um. 34 Ziangkim siar thluh le khīngkhai thluh a si. Cuih cān ah a rih zat cu ngan thluh a si.

8:33^a Neh 3:4, 21, 24; 11:16

35 ^aRalkaih ih hruaihloh mipawlih tefa, sál tānnak ihsi ra tlungpawl in Israel-ih Pathian hnenah Meiur Thilhlănpawl an hlan: Israel miphun zate hrangah caw pa hleihnih, tuu cang 96, tuu fa no 77 le Sual Thilhlăn hrangah me pa hleihnih. Cupawl hmuahhmuah cu Jehovah hnenih Meiur Thilhlăn a si. 36 ^bCule siangpahrang thupekpawl cu siangpahrangih bawi tumpi pawl hnen le Zufraṭis tiva hi lam ral ram uktupawl hnenah an sim. Cule annih in mipi hnen le Pathian inn băwmnak ah an pe.

8:35^a Pui 1:3; 2San 29:21, 24

8:36^b Neh 2:7; Est 9:3

9

Hnám dang mi thawi Ṭhitawknak

1 ^aHi thilpawl tla ṭheh an si tikah, hotupawl ka hnenah an ra ih, “Israel-mipawl le puithiampawl le Levi-mipawl cu hi ram minungpawl lakah thiarfihlimaw loin, Kanaan-mipawl, Heth-mipawl, Periz-mipawl, Jebus-mipawl, Ammon-mipawl, Moab-mipawl, Izip-mipawl le Amor-mipawl ih thil fihnungza an tuah mi vekin an tuah ve. 2 ^bZiangahtile an fanu hrekkhat cu anmai hrang le an fapapawlih nupi ah an ṭhi, cutin ci thianghlim cu cuih ram miphunpawl thawn a căwkrawiaw. A si, hotupawl le uktupawlih kut cu hi rinumlonak ah hmaihruaitu an si,” tiah an ti. 3 ^cCule hi thil ka theih tikah, ka sinfen le ka kâwrfual ka thlek ih, ka lusam le ka khabe hmul ka phawi, cule khawruahharin ka to. 4 ^dCun ralkaih ih hruaihloh mi ra tlungkirpawlih rinumlonak ruangah, Israel-ih Pathian kamsuakthupawl ih a khūr mi mi kip cu ka hnenah an ra pungkhawm, cule kei cu zan lam raithawi cān tiang khawruahharin ka to.

9:1^a Sem 10:16; Suah 23:23; Pui 18:3; Dnp 12:3

9:2^b Dnp 7:3; 14:2; Ezr 10:2

9:3^c Suah 32:19; 2Sp 18:37; Neh 1:4

9:4^d Ezr 10:3; Dan 10:2

5 ^aZan lam raithawi cān a thlen tikah, rawl ulhnak ihsin ka tho, cule ka sinfen le ka kâwrfual tlêk thawn ka khuk ka bil ih, Jehovah ka Pathian hnenah ka kut ka phar. 6 ^bCule, “Maw ka Pathian, nangmah lam hawi dingin ka ning a zak ih, ka hmai a sen ṭheh a si, ka Pathian; ziangahtile kan mawhsualnakpawl cu kan lu hnakin a sângsawn ih, kan mawhnak cu van tiang a thleng. 7 ^cKan pupápawl san ihsin tuihni tiang nasa zetin kan rak mawh, cule kan mawhsualnak ruangah, kanmah, kan siangpahrangpawl le kan puithiampawl cu tuihni ih kan dinhmun vek hin, hi ram siangpahrangpawl kut ah siseh, ralnâm ah siseh, ralkaih ah siseh, rămsiatnak ah le mualphonak ah siseh pek kan si. 8 ^dKan Pathian in kan mit in vanter thei nak dingah le kan sál tānnak ih ṭhangphawknak ziangmaw cin in peknak dingah, tlânsuak dingah a tāngsŭn ah in tuah dingin le a hmun thianghlim ah ^ehimnak in pe dingin, atu-ah Jehovah kan Pathian hnen ihsin rei lo te sung zangfahnak hmuhter kan si. 9 ^fKannih cu sál kan si ko na cingin, kan Pathian in kan sál tānnak ah in thlauthla lo, cuhnakin in ṭhangphawk dingah, kan Pathian inn rĕm dingah, a siatnak rĕmsal dingah, Judah ram le Jerusalem ih khaw kulh in pe dingah, Persia siangpahrang mithmuh ah anih in kan parah zahngainak a karhter sawn a si.

9:5^a Suah 29:41; Neh 8:6

9:6^b Sam 38:4; Isa 59:12; Jer 3:25; 31:19; Thu 18:5

9:7^c 2San 29:6; Eze 21:1-32

9:8^d Sem 45:7; Sam 13:3; Ths 12:11; Isa 22:23; 33:2

9:8^e himnak: Hebru ṭawng ah cun kilhnak lole tlawngkhen tinak a si.

9:9^f 2Sp 25:28; Neh 9:36; Isa 43:1; Jer 32:44; Zek 1:16

10 ^a“Cule atu-ah, Maw kan Pathian, himi hnuah ziang so kan sim ding? Na thupekpawl kan rak thlauthla si ih, 11 ^bna siahhlawh profetpawl hmangih, ‘Nan va fehnak ding, nan ram luah ding mi cu a ram luahtupawlih thianlonak ruangah a thiang lo ih, khat lam dĕng ihsin khat lam dĕng tiang an fihnunnak in a khat thluh, an thianlonak thawn. 12 ^cCuruangah nan fanupawl cu an fapapawl nupi dingah pe hlah uhla, nan fapapawl hrangah an fanupawl la fawn hlah uh, cule nan cak ih cuih ram ṭhatnak nan ei thei nak dingah le nan tefapawl hnenih ro ding nan tān kumkhua thei nak dingah, an remdaihnak asilole an hmuingilnak hawl dah hlah uh,’ tiih thu na pek kha. 13 ^dKan thil ti ṭha lo mipawl ruangah le a nasa zet mi kan mawhnak ruangah hi thil hmuahhmuah kan parih a thlen hnuah, nang kan Pathian in kan mawhsualnak in a phu tawk hnakih nēp ih dān in tat hnuah, hi vekin runsuahnak in pek na cingin, 14 ^ena thupekpawl cu kan pahbălsal ih, hi thil fihnungza titu minungpawl thawn kan ṭhi cawkpawlhaw lai hrih thotho ding maw si? Tāngsŭn lole nungdam um loih in hloralter tiangin kan parah na thin a heng lo ding maw? 15 ^fMaw Jehovah Israel-ih Pathian, nang cu na dingfel a si, ziangahtile kannih cu tuihni ih kan dinhmun vek hin a tāngsŭn ah kan tâng a si hi! Ngai hnik, na hmaiah mawhnak neiin kan um, himi ruangah na hmaiah zohman kan dīng thei lo,” tiah an ti.

9:10^a Dnp 11:8

9:11^b Pui 18:25-28; Dnp 4:5; 1Sp 14:24

9:12^c Sem 45:18; Suah 34:15-16; Dnp 1:8; Eze 37:25; Joe 3:20

9:13^d Suah 32:22; Job 11:6; Sam 103:10

9:14^e Dnp 9:8, 14; Neh 13:27

9:15^f Sem 18:25; 1Sp 8:47; 2San 12:6; Neh 9:8; Sam 51:4; 76:7; Isa 24:16; Ṭah 1:18; Dan 9:7; Zef 3:5

10

Ṭhitawknak Ṭhiṭha lo ruangih Sualphuannak

1 ^aPathian inn hmaiah băwkkhupin Ezra thla a cam rero lai le sual phuangin a ṭah rero laiah, Israel ihsin mipa, nunau le nauhak pungkhawm tumpi a hnenah an táwngkhawmaw, ziangahtile lungzûr zetin mipi an ṭap. 2 ^bCule Elam fapapawl lakih pakhat Jehiel-ih fapa Shekaniah in Ezra hnenah a ṭawngsuak ih, “Kan Pathian parah rinum loin kan rak um ih, hi ram miphunpawl hnen ihsin ram dang mi nupi kan rak ṭhi, cuti cing khalin atu-ah Israel hrangah ruahsan ding a um lai hrih. 3 ^cCuti a si ruangah atu-ah ka bawipa le kan Pathian thupek parih khūrtu hmuahhmuah ih thurawn pek bangtukin, cuih nupipawl hmuahhmuah le an lakih hrin mipawl cu hlăwnhlo dingin, kan Pathian hnenah thukham tuah uhsi, cule cumi cu dān bangtukin tuah si seh. 4 Tho aw, ziangahtile hi thuhla cu na mawhphurh a si. Kannih khal na lamah kan ṭang a si. Ralṭhain um awla, cumi cu tuah aw,” tiah a ti.

10:1^a 2San 20:9; Dan 9:20

10:2^b Dnp 30:8-10; Ezr 9:2

10:3^c Suah 34:16; 2Sp 11:17

5 ^aCun Ezra cu a tho ih, puithiam hotupawl, Levi-mipawl le Israel miphun zaten himi ṭawngkam bangtukih tuah dingin sesămin thukamnak a tuahter hai. Cuti vekin sesăm thukamnak an tuah. 6 ^bCun Ezra cu Pathian inn hmai ihsin a tho ih, Eliashib fapa Jehohanan-ih pindan sungah a lut, cule cu tawkih a luh tikah, rawl zianghman a ei lo ih, tidai khal a in lo, sál tang pawlih rinumlonak ruangah a ṭap.

10:5^a Neh 5:12

10:6^b Suah 34:28; Dnp 9:18; Sam 102:4; Jon 3:7

7 Cule Judah ram hmuahhmuah le Jerusalem ih sál tang tefapawl zate hnenah an hotupawl le an upapawl ih thurawn pek vekih Jerusalem ih fĭnkhawmaw ih, 8 ni thum sungih ra lo tu zokhal a thilri zaten lawnsak thluh ih, amah rori khal sál tang pawl punkhawmnak lak ihsin ṭhenhran a si ding, tiin thuphuan an suah.

9 Cun Judah-mipawl le Benjamin-mipawl cu ni thum sungah Jerusalem ah an fĭnkhawmaw thluh. Cumi cu a thla kuatnak ni 20 ni a si, Pathian inn tualrawn ah mipi zaten an to ih, cuih thuhla ruangah le ruahpi nasa zet a sur ruangah an khūr ciamco. 10 ^aCun puithiam Ezra cu a dīng ih an hnenah, “Israel mawhnak bêtin, rinum loin nan rak um ih, ram dang mi nupi nan rak ṭhi. 11 ^bCuruangah nan pupápawlih Pathian Jehovah hnenah sualphuang uhla, a duh zawng tuah uh, hi ram miphunpawl le ram dang mi nupipawl hnen ihsin thiarfihlimaw uh,” tiah a ti.

10:10^a 2San 28:13

10:11^b Dnp 24:1; Neh 9:2; Mal 2:10-16

12 Cun mipungkhawm zate in an sawn ih, aw ring zetin, “A si! Na sim vek rori in kan tuah tengteng ding. 13 Asinan mi kan tam tuk; ruah le a tak tuk lai, lengah kan dīng thei lo. Cun himi cu ni hnihkhat hna men a si lo, ziangahtile hih thuhla ah kan lakih mi tampi le an rak hél fawn si. 14 ^aKan mipungkhawm zate hotupawl ding hai seh, cule kan hnen ihsin himi thuhla ah kan Pathian thinlingnak nasa zet hi a kianhloh hlanlo, kan khawpipawl ih um ram dang mi nupi ṭhitupawl zaten, khaw tin upapawl le laireltupawl thawn cān bikhiah ah ra hai seh,” tiah an ti. 15 ^bHi thu cu Asahel-ih fapa Jonathan le Tikvah-ih fapa Jahaziah lawngin an dokalh ih, Meshullam le Levi-mi Shabbethai in an bawm.

10:14^a Mip 25:4; Dnp 16:18; 2San 29:10

10:15^b Neh 3:4

16 Cun cuti vek cun sál tang tefapawl in an rak tuah. Puithiam Ezra in an pupápawlih sungkua vek cio in, an hmin ciar tarlangin pupápawlih sungza lubânpawl a serhhran hai, cule a thla hratnak ni khatnak ah cuih thuhla tifel dingin an to. 17 Thla khatnak a ni khatnak ah ram dang mi nupi ṭhitupawl mipa zaten zăwifel an ṭheh.

Ram dang Nupipawl Hlăwnhlohnak

18 ^aPuithiam fapapawl lakah mi hrekkhat ram dang mi nupi ṭhitupawl hmuh an si, cupawl cu Jozadak-ih fapa Jeshua fapapawl le a unau Maaseiah, Eliezer, Jarib le Gedaliah pawl an si. 19 ^bCule annih in an nupipawl hlăwnhlo dingin an tiamkamnak an pe, cule an mawh ruangah Mawh Thilhlăn ah an rante rualpawl lak ihsin tuu cang an pe.

10:18^a Ezr 5:2; Hag 1:1; Zek 3:1

10:19^b Pui 5:15; 2Sp 10:15

20 ^aCuihhleiah Immer fapapawl lak ihsin Hanani le Zebadiah; 21 ^bHarim fapapawl lak ihsin, Maaseiah, Elijah, Shemaiah, Jehiel le Uzziah; 22 ^cPashur fapapawl lak ihsin, Elioenai, Maaseiah, Ishmael, Nethanel, Jozabad le Elasah an si.

10:20^a 1San 24:14

10:21^b 1San 24:8

10:22^c 1San 9:12

23 ^aCuihtlunah Levi-mipawl lak ihsin Jozabad, Shimei le Kelaiah (cucu Kelita a si) Pethahiah, Judah le Eliezer an si. 24 ^bHlasaktupawl lak ihsi khalin Eliashib; cule kăwtka kiltupawl lak ihsin Shallum, Telem le Uri an si.

10:23^a Neh 8:7

10:24^b Neh 3:1

25 ^aCule a dang Israel lak, Parosh fapapawl lak ihsin Ramiah, Jeziah, Malkiah, Mijamin, Eleazar, Malkijah le Benaiah; 26 Elam fapapawl lak ihsin Mattaniah, Zekariah, Jehiel, Abdi, Jeremoth le Eliah; 27 ^bZattu fapapawl lak ihsin Elioenai, Eliashib, Mattaniah, Jeremoth, Zabad le Aziza; 28 Bebai fapapawl lak ihsin Jehohanan, Hananiah, Zabbai le Athlai; 29 Bani fapapawl lak ihsin Meshullam, Malluk, Adaiah, Jashub, Sheal le Ramoth; 30 Pathath-Moab fapapawl lak ihsin Adna, Khelal, Benaiah, Maaseiah, Mattaniah, Bezalel, Binnui le Manasseh; 31 ^cHarim fapapawl lak ihsin Eliezer, Ishijah, Malkijah, Shemaiah, Shimeon, 32 Benjamin, Malluk le Shemariah: 33 Hashum fapapawl lak ihsin Mattenai, Mattattah, Zabad, Elifelet, Jeremai, Manasseh le Shimei; 34 Bani fapapawl lak ihsin Maadai, Amram, Uel, 35 Benaiah, Bedeiah, Keluh, 36 Vaniah, Meremoth, Eliashib, 37 Mattaniah, Mattenai, Jaasai, 38 Bani, Binnui, Shimei, 39 Shelemiah, Nathan, Adaiah, 40 Maknadebai, Shashai, Sharai, 41 Azarel, Shelemiah, Shemaraih, 42 Shallum, Amariah le Joseph; 43 ^dNebo fapapawl lak ihsin Jeiel, Mattithiah, Zabad, Zebina, Jaddai, Joel le Benaiah tla an si.

10:25^a Ezr 2:3

10:27^b Ezr 2:8; Neh 7:13

10:31^c Neh 3:11

10:43^d Ezr 2:29

44 ^aHipawl hmuahhmuah in ram dang mi nupi ah an ṭhi, mi hrekkhat cun an nupipawl hnen ihsin faletla an nei.

10:44^a Ezr 10:3