About Bible Thianghlim | ©

BibleThianghlim – 1 Samuel

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 Samuel

12345678910
11121314151617181920
21222324252627282930
31

• A ngantu: Theih a si lo
• Thil cang kum: B.C. 1120-1011 hrawng
• Ngan kum: B.C. 900 hnu

Samuel bu khatnak le bu hnihnak hi a thawk ah cun cazual pakhat ih rak ngan mi an si. A ngantu le a ngan kum thei dingin Samuel bu hnihnak thuhmaihruai zoh aw. Samuel bu khatnak le bu hnihnak cu Israel laireltu netabik le profet hmaisabik Samuel-ih hmin bun a si (3:20). Anih in Israel siangpahrang hmaisabik pahnih (Saul le David) hriak a rak thih.

Samuel bu khatnak cu Samuel hrinnak in a thawk ih (B.C. 1124-1115 hrawng), kum zabi pakhat hrawng a rei hnu (B.C. 1011), siangpahrang Saul thih tiang a huap. Israel cu laireltupawl in an uk laiah, Filisṭia-mipawl in kum 40 sung an palbĕt ih (Lai 13:1), cumi palbĕtnak a thawhtirah Samuel bu khatnak thuanthu hi a thawk. Samuel bu khatnak bung 4-nak ih ral donak ah (B.C. 1104), Samuel hmin tarlăng si lo hman sehla, laireltu a si thawknak cu khaih bung ihsin a si.

Saul-ih uknak cu hi cabu cem tiang huap khal sehla, bung 16 in David rel uar a thawk. Bung 16 ihsin bung 31 tiang hi cabu ngantu in David le Saul a khaikhin. “Miphun dang pawl hmuahhmuah vek” (8:5, 19-20) an si thei nak dingah Saul cu Israel-mipawl ih duh mi siangpahrang a si. Miphun hleice an si thei nak ding le miphun dang pawl thawi bangaw lo an sinak dingah, David cu Pathian ih duh mi (13:14) siangpahrang a si.

Hminsin tlak mithupi zet a dang mi pakhat cu Saul-ih ro cotu, a fapa Jonathan hi a si. David hnakin kum 20 ihsin kum 30 hrawngih upasawn si khal sehla, Pathian in David a hril, ti Jonathan in a theithiam. Jonathan in David a rualpiṭhatnak le a parih a rinumnak cu cawn tlak a si.

Pathian kawhnak hmin thupi zet Thukham Hlun ih “ralkap rualpawlih Jehovah” ti mi hi Samuel bu khatnak ah a lang hmaisabik (1:3, 11).

“Jehovah-ih kut” ti hi vei li a lang ih (5:6, 7, 9), cangantu in thil cang mipawl cangtertu bik cu Jehovah a si ti a malbikah vei 75 a simfiang (1:5-6, 19, 27). Hruaitu si dingih a mi hril mi cu hniksaknak le khawtlainak tampi hmangin Pathian in ziangtin a humhim ih a timtuah ti Samuel bu khatnak in in sim. Saul hnuih siangpahrang si dingah Pathian in David hriak a thih na cingin, siangpahrang a can hlanah harsatnak le ṭihnungza tampi a rak nei. Asinan cumi a hngah sungah Pathian in David-ih zumnak a ṭhangter. Hih harsatnak cān sungah, David in Sam hla tampi a phuah.

1

Hannah in Fa a Dil

1 ^aEfraim tlang ram, Ramathaim Zofim khua ah pa pakhat, a hmin Elkanah ti mi a rak um; amah cu Jeroham-ih fapa a si, cumi cu Elihu-ih fapa a si, cumi cu Toho-ih fapa a si ih, cumi cu Efrath-mi Zuf-ih fapa a si. 2 Anih cun nupi pahnih a nei: pakhat ih hmin cu Hannah a si ih, a dang pakhat ih hmin cu Peninnah a si. Peninnah cun faletla a nei nân, Hannah cun fa a nei lo. 3 ^bCu pa cu ralkap rualpawlih Jehovah be ding le thawinak pe dingin kum tinte a khua ihsin Shiloh khua ah a feh. Cu tawkah Jehovah-ih puithiam Eli-ih fapa pahnih Hofni le Finehas an rak um. 4 ^cElkanah hrangih thilhlăn cān a thlen tinten a nupi Peninnah le a fapapawl zate le a fanupawl zate hnenah vo a zem ṭheu. 5 ^dJehovah in Hannah cu fa nei thei lo ko a tuah nân, Elkanah in Hannah a duhdawt ruangah a letin vo a pe ṭheu. 6 ^eJehovah in fa nei thei lo ko a tuah ruangah a khîngpi in beidawng dingin nasa zetin a nautat ṭheu. 7 ^fKum tinte hitin a rak si, Jehovah inn ih Hannah a hung soh tikah, Penninah in a sâwisak ṭheu ruangah, anih cu a ṭap ih rawl khal a ei lo.

1:1^a Jos 7:17-18; 21:20-22; 1San 6:27, 34-35

1:3^b Suah 23:14; Dnp 12:5-7; Jos 18:1; 1Sam 2:19; Luk 2:41

1:4^c Pui 7:15-18; Dnp 12:17-18

1:5^d Sem 11:30; 30:1-2

1:6^e Sem 16:4

1:7^f 2Sam 12:17

8 ^aCun a pasal Elkanah in a hnenah, “Hannah, ziangah so na ṭah? Ziangruangah rawl na ei lo? Ziangruangah na thin a nat? Fapa pahra hnakin na hrangah ka ṭhasawn lo maw?” tiah a ti.

1:8^a Rut 4:15

9 ^aHannah cu Shiloh khua ih ei le in an ṭheh hnuah a tho. Cu laiah puithiam Eli cu Jehovah temple sângka ṭhuam kiang tokham parah a to. 10 ^bHannah cu thinharin a um ih Jehovah hnenah thla a cam, cule riahsiain a ṭap. 11 ^cCun thutiamnak a tuah ih, “Maw ralkap rualpawlih Jehovah, na siahhlawh nuih thinharnak na zoh ih i máng, cule na siahhlawh na hngilh lo ngaingai asile, na siahhlawh nu hi fapa pe awla, a nun sung hmuahhmuah Jehovah hnenah cuih fapa cu ka pe ding ih, a lu parah sam ziahnak nâmte a thleng lo ding,” tiah a ti.

1:9^a 1Sam 3:3

1:10^b Job 3:20; Isa 38:15

1:11^c Sem 29:32; Mip 6:1-21; Lai 13:5; Luk 1:15

12 Cule hitin a si, Jehovah hmaiih Hannah thlacam a peh laiah, Eli in a kâ a zoh. 13 ^aHannah cun a thinlung in a ṭawng, a hmur lawng a cāng ih a aw theih a si lo ruangah, Eli in zu ri-ah a ruat. 14 Eli in a hnenah, “Ziangtik tiang so zu ri-ih na um ding? Na sabit zu cu na hnen ihsin ṭhawnhlo aw,” tiah a ti.

1:13^a Sem 24:42-45

15 ^aCule Hannah in a let ih, “A si lo, ka bawipa, kei cu riahsia mi nunau ka si. Sabit zu simaw, zu simaw ka in lo, Jehovah hmaiah ka thinlung ka thlebung sawn a si. 16 ^bNa siahhlawh nu hi nunau hlothlau ah ruat hlah, ziangahtile ka phunzainak le thinnatnak khatliam mi atu tiang ka ṭawng rero a si,” tiah a ti.

1:15^a 2Sp 4:27; Sam 42:4; 62:8; Ṭah 2:19

1:16^b Dnp 13:13; Sam 55:2

17 ^aCun Eli in a sawn ih, “Hnangamten tlung aw, amah na dil mi na zangfah dilnak cu Israel-ih Pathian in a lo pe a si,” tiah a ti.

1:17^a Sem 25:21; Mip 6:26; 2Sp 5:19

18 ^aCule Hannah in, “Na siahhlawh nu in na hmaiah duhsaknak hmu hram seh,” tiah a ti. Nunaunu cu amai zin ah a feh ih a ei, cule a mithmai a se nawn lo.

1:18^a Sem 18:3; Rut 2:10; Rom 15:13

Samuel Hrinnak

19 ^aCun zingpit teah an tho ih Jehovah an bia, cule an kirsal ih, Ramah ih an inn ah an tlung. Cule Elkanah in a nupi Hannah a ^bthei ih, Jehovah in amah nu cu a máng. 20 ^cCutin tikcucān cu a liam ih, hitin a si, Hannah in nau a pai ih fapa a hring, “Amah cu Jehovah hnenih ka dil mi a si ruangah,” tiah a hmin ah ^dSamuel a sak.

1:19^a Sem 30:22; Jos 18:25

1:19^b thei: Ihpi tinak a si.

1:20^c Sem 17:19; Suah 2:10; Jer 15:1; Mat 1:21; Heb 11:32

1:20^d Samuel: Hebru ṭawngfáng awsuah Hebru ṭawng ih “Pathian dil” asilole “Pathian ih theihsak” vek a si.

21 ^aKum tin thawinak le a thutiam Jehovah hnenih hlan dingin pacang Elkanah le a sungkua zaten an so. 22 ^bAsinan Hannah cu a so lo, ziangahtile a pasal hnenah, “Naute hnawi thlei hnuah ka feh ding, amah cu Jehovah hmaiih lang ding le kumkhuaih a um ta thei nak dingah amah cu ka hruai ding a si,” tiah a ti.

1:21^a Sem 28:20; Mip 30:2; Dnp 12:11

1:22^b 1Sam 1:11, 28; Luk 2:22

23 ^aA pasal Elkanah in a hnenah, “Na hrangih ṭhabik na ti mi cu tuah aw, amah hnawi na thlei tiang hngak aw. Jehovah in a kamsuakthu hmunter hram seh,” tiah a ti. Cun nunaunu cu a tāng ta ih a fapa hnawi a thlei hlanlo a fapa a um.

1:23^a Sem 21:8; Mip 30:7

24 ^aHannah in a fapa hnawi a thlei tikah, caw pa pathum, sangphŭt efa khat le sabit zu thâwl khat thawn a fapa cu amai zawngah a hruai ih, Shiloh ih Jehovah inn ah a fehpi. Nauhak pa cu a note lai. 25 ^bCun caw pa an that ih nauhak pa cu Eli hnenah an hruai. 26 ^cCule Hannah in, “Aw ka bawipa! Na nun taktak vekin ka bawipa, keimah cu hi tawkah Jehovah hnenih thlacam ih na kiangih dīngtu kha ka si. 27 ^dHi nauhak pa hrangah thla ka rak cam ih Jehovah in amah ka dil mi ka zangfah dilnak cu in pe. 28 ^eCuruangah amah cu Jehovah hnenah ka ap, a nun sung hmuahhmuah Jehovah hnenah ap a si ding,” tiah a ti. Cu tawkah Jehovah an bia.

1:24^a Mip 15:8-10

1:25^b Luk 2:22

1:26^c 2Sp 2:2, 4, 6; 4:30

1:27^d Sam 66:19-20

1:28^e Lai 13:7

2

Hannah-ih Thangṭhatnak Hla

1 ^aCule Hannah cu thla a cam ih,

2:1^a Sam 13:5; 20:5; 89:17; 112:9; Zek 10:7; Luk 1:46-55

“Jehovah ah ka thinlung lungawi aipuangin a um.
Jehovah ah ka ^aki khaisan a si.
Ka ralpawl ka hnihsan hai,
Ziangruangahtile na ^brunsuahnak ah lungawi aipuangin ka um.
2 ^cJehovah vekih thianghlim zohman an um lo,
Ziangahtile nangmah siarlo zohman an um lo,
Kan Pathian vek ziang lungpi khal an um lo.
3 ^dPuarthau zetin ṭawng nawn hlah uh,
Nan kâ ihsin duhawknak suak hlah seh,
Ziangahtile Jehovah cu ziangkim thei Pathian a si ih,
Căngvaihnakpawl amah in a khīngkhai.
4 ^eMicakpawlih thálpawl an kiak ih,
A bah mipawl cahnak in ṭem an si.
5 ^fPumpuar zetih eitupawl in rawl hrangah an hlawhaw pei ih,
Rilrawngpawl an ril a râwng nawn lo ding.
Micing nu khal in fa pasarih a nei ih,
Fāte tampi neitu nu cu miṭawnṭai ah a cang.
6 ^gJehovah cun a that ih a nungter.
Anih in Sheol ah a dirtla ih a suah.
7 ^hJehovah in a farahter ih a lianter.
Anih in a hnûkniam ih a cawisâng.
8 ⁱAnih in mifarah kha leivut ihsin a tungding ih,
Mitlasam kha hnawm penkhawm ihsin a khaisuak,
Mizahumpawl lakih toter dingah le
Ropitnak laltokham ro ih coter dingah.
Ziangahtile leilung ṭhuampawl cu Jehovah-ih ta an si ih,
Cupawl parah leilung a rak toh.
9 ^jAnih in a mirinumpawlih ke cu a kilveng ding,
Asinan misualrálpawl cu thim ah daiten an um ding.
Ziangahtile zohman in cahnak in an neh lo ding.
10 ^kJehovah doralpawl cu khuaidarh an si ding,
Van ihsin anmahpawl dokalhin khawri vekin a thâwm ding.
Jehovah in leilung dĕng tiang thu a ṭhen ding.
A siangpahrang hnenah cahnak a pe ding ih,
A hriak thih mi ki cu a khaisâng ding,” tiah a ti.

2:1^a ki: Cahnak relnak a si ṭheu nân, hi tawkah cun Hannah-ih fātepawl a sawhkhih.

2:1^b runsuahnak: Thlarau lam runsuahnak si loin, taksa lam runsuahnak a sawhkhih.

2:2^c Suah 8:10; 15:11; Pui 11:45; Dnp 32:4, 37; Sam 31:3; Isa 40:25

2:3^d Thf 15:11; 16:2; Jer 11:20

2:4^e 2Sam 1:27; Sam 37:15; Heb 11:34

2:5^f Sam 113:9; Isa 54:1; Jer 15:9; Luk 1:53

2:6^g Dnp 32:39; 2Sp 5:7; Isa 1:19, 26; Eze 37:3, 12

2:7^h Dnp 8:18; Job 5:11; Isa 2:12; Dan 4:37

2:8ⁱ Job 36:7; Sam 72:12; 104:5; Thf 8:29; Jam 2:5

2:9^j Sam 33:16; 91:11; Thf 3:26; Jer 13:16; Zek 4:6; Mat 8:12

2:10^k Suah 15:6; Dnp 33:17; 2Sam 22:14; Job 37:4-5; Sam 9:2; 89:24; 96:13; Isa 66:6; Mat 25:31-32; Luk 1:69

11 ^aCun Elkanah cu Ramah khua ih a inn ah a tlung. Asinan nauhak pa cu puithiam Eli hmaiah Jehovah a rian.

2:11^a 1Sam 2:18; 3:1

Eli Fapapawlih Sualnak

12 ^aEli-ih fapapawl cu mihlothlau an si ih, Jehovah an thei lo. 13 ^bCule puithiampawl in mipi hnenih an tidān cu, mi pakhat in thawinak a hlăn tikah sa suan a si laiah, puithiamih siahhlawh pakhat cu a kut ah ṭêk thum nei sa thurnak hmanrua thawn a ra. 14 Cun cuih sa lâknak hmanrua cu bel dau pi, asilole dâwt nei bel, asilole hna nei bel, asilole bel sungah a vun sawh, cule sa lâknak hmanrua ih a lâk thei mi zaten puithiam in amai hrangah a lâk. Cun Shiloh khua ih ra, Israel-mi zate hnenah an tuah. 15 ^cCuihtlunah a thau an ur hlanah, puithiam-ih siahhlawh cu thawinak a tuahtu pa hnenah a ra ih, “Puithiam hrangah sa em ding pe aw, ziangahtile anih in na hnen ihsin suan mi sa a la lo ding, a hél a la sawn ding,” tiah a ti.

2:12^a Jer 2:8

2:13^b Dnp 18:3

2:15^c Pui 3:3-5, 16

16 ^aCule cu pa in a hnenah, “A thau an ur hmaisat rori a ṭul, cuih hnuah na thinlung ih duh zat na la thei a si,” tiah a ti tikah, cu pa cun, “Si lo e, atu-ah na pe sawn ding a si, culole hramhramin ka la ding,” tiah a sawn. 17 ^bTlangval pahnih sualnak cu Jehovah hmaiih a natsat tuk ruangah mi in Jehovah hnenih thilhlăn an fih.

2:16^a Pui 3:3; 7:31-36

2:17^b Mip 14:11; Eze 22:26; Mal 2:7-9

Samuel a Ṭhang Vivo

18 ^aNauhakte a si ko nân, pat zai fêmte ih tah mi Puithiam Kâwrcung hrukin, Samuel cu Jehovah hmaiah rawng a bawl. 19 Cuihtlunah a nu in kâwrfual fate a tuahsak ih, kum tin a hnenah a nu cun a pasal zawngih kum tin thawinak pe dingih a feh tikah a kensak ṭheu. 20 Cule Eli in Elkanah le a nupi cu thlawsuah a pek ih, “Jehovah hnenih a rak dil mi a ap ruangah, hi nunaunu hnen ihsin Jehovah in cithlah lo pe seh,” tiah a ti. Cun an inn ah an tlung. 21 ^bCule Jehovah in Hannah cu a vehvai, cutin anih cu fa a vun ih fapa pathum le fanu pahnih a hring. Cu laiah nauhak Samuel cu Jehovah hmaiah a ṭhang vivo.

2:18^a 2Sam 6:14; 1San 15:27

2:21^b Sem 21:1; Lai 13:24; Luk 1:80

Eli Fapapawlih Sualnak a Peh Vivo

22 ^aEli cu a tar zet thlang, a fapapawl in Israel miphun zate parih an tuah mi tinkim le mipi Tawnawknak Puanthlam sângka ih pungkhawm nunaupawl cu ziang vekin an ihpi ti a hna in a thei. 23 Cule anih in an hnenah, “Ziangruangah hivek thil nan tuah? Ziangahtile mi hmuahhmuah hnenin nan thil ṭha lo tuah mipawl ka hna in ka thei. 24 Hiti ding a si lo, ka fapale tla! Ziangahtile ka hna ih ka theih mi hi thuthang ṭha a si lo. Jehovah-ih minungpawl dān nan pahbălter. 25 ^bMi pakhat in mi dang parih thil sual a tuah asile, Pathian in cu pa cu thu a ṭhen ding. Asinan mi pakhat cu Jehovah parih thil sual a tuah asile, zo in so thla a camsak ding,” tiah a ti. Sikhalsehla Jehovah in anmah thah a duh ruangah, annih in an paih thu an lung cuang lo.

2:22^a Suah 38:8

2:25^b Suah 32:10; Mip 15:30; Dnp 1:17; Jos 11:20; Job 9:33; Heb 10:26

26 ^aCule nauhak Samuel cu ruangrai ah le Jehovah le mi ih duhsaknak khalah a ṭhang vivo.

2:26^a Thf 3:3-4; Luk 2:52

Eli Ralrin Peknak

27 ^aCun Pathian mi pakhat cu Eli hnenah a ra ih, a hnenah, “Jehovah in hitin a ti, ‘Izip ram Faro inn ih an um laiah, na paih sungkua hnenah fiangten ka langawter a si lo maw? 28 ^bKa puithiam si dingah, Biakṭheng parih hlan dingah, rimhmui ur dingah le ka hmaiih Puithiam Kâwrcung hruh dingah, Israel hnámpawl lak ihsin amah cu ka hril a si lo maw? Cule meisa ih tuah mi, Israel tefapawlih thilhlănpawl zaten na paih sungkua ka pe a si lo maw? 29 ^cZiangruangah thu ka rak pek mi ka cēnnak ih ka thawiawknak le ka thilhlăn na hmuhsuam ih, ka mi Israel-ih thilhlăn ṭhabik bik zate in cawm thauaw dingah keimah hnakin na fapapawl na upat sawn? 30 ^dCuruangah Israel-ih Pathian Jehovah in, Thungaiten na sungkua le na paih sungkua cu ka hmaiah an feh kumkhua ding tiah ka rak ti, tiah a ti. Asinan atu-ah cun Jehovah in, cucu ka hnen ihsin hla seh, ziangahtile i cawimawitu cu ka cawimawi ve ding ih, zianghman ih i siar lo tu cu, zianghman ih siar an si lo ding, tiah a ti. 31 ^eNgai hnik, na sungkua ah putar um lo dingin, na bân ka sâtcat ih, na paih sungkua bân ka sahcat ding cān a thleng ding. 32 ^fCule Israel parih ṭhatnak hmuahhmuah tuah a si laiah ka cēnnak hmun ah doral na hmu ding. Cule na sungkua ah tar an um lo kumkhua ding. 33 ^gAsinan ka Biakṭheng ihsin ka sahcat lo mipawl in na mit an siatsuah ding ih, na thin an nater ding. Cule na sungkua-ih tesinfa hmuahhmuah an vanglai takah an thi thluh ding. 34 ^hCun himi hi na fapa pahnih Hofni le Finehas parih thleng ding mi hminsinnak a si ding, an pahnih in ni khat ah an thi ding. 35 ⁱCun ka thinlung le ka ruahnak ih um mi vekih tuahtu ding puithiam rinum keimah hrangah ka tungding ding. Sungza hnget ka dĭnsak ding ih, anih cu ka hriak thih hmaiah kumkhuain a feh ding. 36 ^jCule hitin a si ding, na inn ih tāng mi pauhpauh cu ngun fate le sang hlăwm khat hrangah ra in an kûn ding ih a hnenah, “Zangfahten, rawl málte ka ei thei nak dingah puithiam dinhmun pakhat khat ah in ret aw,” an ti ding,’ a ti,” tiah a ti.

2:27^a Suah 4:14-16; Dnp 33:8

2:28^b Suah 28:1; 30:7; Pui 7:35-36

2:29^c Dnp 12:5

2:30^d Suah 29:9; Isa 53:3; Jer 18:10; Nah 3:6; Mal 2:2, 8-9

2:31^e 1Sam 4:11, 17-20; 22:17-20

2:32^f 1Sp 2:26-27; Jer 7:12, 14

2:33^g Jer 9:18-21

2:34^h 1Sam 4:11; 1Sp 13:3

2:35ⁱ 1Sam 25:28; 2Sam 8:17; 1Sp 1:8, 34; 2:27, 35; 11:38; Eze 44:15-16

2:36^j Eze 44:10-14

3

Samuel hnenih Jehovah Lăngnak

1 ^aCule nauhak pa Samuel cu Eli hmaiah Jehovah a rian. Cu laiah Jehovah-ih kamsuakthu a vâng zet ih, larawknak langsar khal a um lo.

3:1^a Sam 74:9; Ṭah 2:9; Eze 7:26; Amo 8:11

2 ^aCule cuih cān ah hitin a si, Eli cu a umnak hmun ih a zau lai le a mit a māl vivo ih khua a hmuh thei nawn lo tikah, 3 ^bPathian Kuang umnak Jehovah temple ih Pathian meito a mih hlan, Samuel a zau laiah, 4 ^cJehovah in Samuel a ko. Cule Samuel in, “Hi tawkah ka um!” tiah a sawn. 5 Cun Samuel cu Eli hnenah a tlân ih, “In kawh ruangah hi tawkah ka um,” tiah a ti.

3:2^a Sem 27:1

3:3^b Suah 25:31-37; Pui 24:1-4; Dnp 10:1-5; 1Sp 6:19

3:4^c Sem 22:1; Suah 3:4

Cule Eli in, “Ka lo ko lo, zausal aw,” tiah a ti. Cutin Samuel cu a va zausal.

6 Cule Jehovah in a kosal, “Samuel!”

Cun Samuel cu a tho ih Eli hnenah a feh, “In kawh ruangah hi tawkah ka um,” tiah a ti.

Anih in, “Ka lo ko lo, ka fapa, zausal aw,” tiah a ti. 7 ^aSamuel in Jehovah a thei hrih lo, Jehovah-ih kamsuakthu khal a hnenih phuanlăng a si hrih lo.

3:7^a Mip 12:6; Amo 3:7; Apo 19:2

8 Cule Jehovah in a vei thumnak Samuel a kosal. Samuel cu a tho ih Eli hnenah a feh ih, “I kawh ruangah hi tawkah ka um,” tiah a ti. Cu tikah Eli cun Jehovah in nauhak pa cu a ko a si, ti a theithiam.

9 Curuangah Eli in Samuel hnenah, “Feh awla, zau aw, hitin a si ding, a lo kawh asile, ‘Thusim aw, Jehovah, ziangahtile na siahhlawh in a lo ngai a si,’ na ti tengteng pei,” tiah a ti. Cutin Samuel cu a feh ih a umnak hmun ah a zau.

10 ^aJehovah cu a ra ih a ding, cule cān dang vekin, “Samuel! Samuel!” tiah a ko.

3:10^a Suah 3:4

Cule Samuel in, “Thusim aw, ziangahtile na siahhlawh in a lo ngai a si,” tiah a sawn.

11 ^aCule Jehovah in Samuel hnenah, “Ngai hnik, Israel hnenah thil ziang simaw ka tuah ding, cumi a theitu pauhpauh ih hna cu a pahnih hnih in a khīng ding. 12 Cuih ni ah Eli dokalhin a sungkua thuhla ka rak sim mi hmuahhmuah, a thawk ihsin a cem tiang ka tisuak ding. 13 ^bZiangahtile a theih mi mawhsualnak ruangah kumkhuain a sungkua thu ka ṭhen ding, tiah amah ka rak sim zo, ziangruangahtile a fapapawl cu anmah le anmah an bawrhhlawhawter ih, anih in a kham hai lo. 14 Curuangah Eli sungkua-ih mawhsualnak cu raithawinak simaw, thilhlăn in simaw sualkhuhthawinak tuahsak si kumkhua hlah seh tiah Eli sungkua parah sia ka săm,” tiah a ti.

3:11^a 2Sp 21:12; Jer 19:3

3:13^b 1Sam 2:17; 1Sp 1:6

15 Cun Samuel cu zing lam tiang a zau, cule Jehovah inn sângkapawl a áwng. Samuel in larawknak cu Eli sim ding a ngam lo. 16 Cule Eli in Samuel a ko ih, “Samuel, ka fapa!” tiah a ti.

Cule anih in, “Hi tawkah ka um,” tiah a sawn.

17 ^aCule Eli in, “Jehovah in na hnenih a lo sim mi thu cu ziang a si? Zangfahten ka hnen ihsin thup hlah. Na hnenih a sim mi thil hmuahhmuah lak ihsin ziang simaw ka hnen ihsi na thuh asile, Pathian in na parah a titiin ti sehla, cuhnakih tam khalin,” tiah a ti. 18 ^bCun Samuel in anih cu ziangkim a sim ih, a hnen ihsin zianghman a thup lo. Cule Eli in, “Cucu Jehovah a si. Ṭha a ti mi cu tuah ko seh,” tiah a ti.

3:17^a Rut 1:17; 2Sam 3:35; 1Sp 22:16

3:18^b Lai 10:15

19 ^aCutin Samuel cu a ṭhang vivo, Jehovah in a umpi ih a ṭawngkampawl pakhat hman ^blei ah a tla lo. 20 ^cCule Dan ihsin Beersheba tiang, Israel miphun zaten Samuel cu Jehovah-ih profet ah ruat mi a si, ti an rak thei. 21 ^dCun Samuel hnenah Jehovah-ih kamsuakthu hmangin Jehovah cu a phuanawk ruangah Shiloh khua ah Jehovah a langsal.

3:19^a Sem 21:22; 39:2; Mip 14:43; 1Sam 9:6

3:19^b lei ah a tla lo: A tlawlh lo tinak a si.

3:20^c Dnp 18:22; Lai 20:1; Eze 33:33

3:21^d Sem 12:7; Mip 12:6

4

Pathian Kuang Lâksalnak

1 ^aCule hitin a si, Samuel-ih ṭawngkam cu Israel miphun zate hnenah a thangsuak, cun Filisṭia-mipawl do dingah Israel cu a feh ih, Ebenezer kiangah ṭanhmun an khuar. Cun Filisṭia-mipawl cu Afek ah ṭanhmun an khuar ve. 2 Cun Israel do dingah Filisṭia-mipawl cu an tlaraw. An doawk tikah, Filisṭia-mipawl in Israel cu an neh, ramlak ah ralkap 4000 hrawng an that. 3 ^bCule an riahhmun ih mipi an thlen tikah, Israel miupapawl in, “Ziangruangah Jehovah in Filisṭia-mipawl hmaiah tuihsun ah in neh? Jehovah-ih Thukham Kuang cu Shiloh khua ihsin kan hnenah thiar uhsi, cutin kan lakih a thlen tikah, kan ralpawl kut ihsin in run ding,” tiah an ti. 4 ^cCun Shiloh khua ah, cherub karlakih cêng ralkap rualpawlih Jehovah-ih Thukham Kuang cu lasuak dingin mi an thlah. Cule Eli-ih fapa Hofni le Finehas cu Pathian Thukham Kuang zawngah an um.

4:1^a Jos 12:18; 1Sam 7:12; 1Sp 20:26

4:3^b Mip 10:35; Jos 6:7; 7:7; 18:1

4:4^c Sem 3:24; Suah 25:22; Sam 80:1

5 ^aCule an ṭanhmun khuarnak ih Jehovah-ih Thukham Kuang a thlen tikah, leilung hnîn tiangin Israel miphun zaten ring zetin an au. 6 Cun Filisṭia-mipawl in auaw an theih tikah, annih in, “Hebrumipawl ṭanhmun khuarnak ih authâwm nasa zet cu ziang a si?” tiah an ti. An ṭanhmun khuarnak ah Jehovah-ih Kuang a thleng zo a si, ti an thei. 7 ^bCutin Filisṭia-mipawl cun an ṭih, ziangahtile annih cun, “An ṭanhmun khuarnak ah Pathian a thleng zo,” tiah an ti. Cule annih in, “Kan hmakhua a pit a si! Ziangahtile hivek thil hi tuih hlanah a thleng dah kel lo. 8 ^cKan hmakhua a pit a si! A cak zet mi hih pathianpawlih kut ihsin zo in so in runsuak ding? Hih pathianpawl cu ramṭhing ih Izip-mipawl hremnak hmuahhmuah thawi vawtu an si. 9 ^dNannih Filisṭia-mipawl, cak zetin um uhla, pacangpawl vekin pacan cuh uh. Nan siahhlawh an rak si dah vekin, Hebrumipawlih siahhlawh si hlah uh. Pacangpawl vekin pacan cuh uhla do uh!” tiah an ti.

4:5^a Jos 6:5

4:7^b Suah 15:14

4:8^c Suah 12:30

4:9^d Lai 13:1

10 ^aFilisṭia-mipawl in an do ih Israel cu neh a si, cule mi kip mai puanthlam cio ah an tlânsia. Thahawknak nasa ngaingai a um ih, Israel ke ralkap 30000 an thi. 11 ^bPathian Kuang khal an lâksak. Eli-ih fapa pahnih, Hofni le Finehas khal an thi.

4:10^a Dnp 28:25

4:11^b Sam 78:64; Jer 7:12

Eli Thihnak

12 ^aCun cuih ni ah Benjamin-mi mi pakhat doawknak ihsin a tlân ih, Shiloh khua ah a lu parah leivut le a hnipuan tlêk thawn a thleng. 13 A thlen tikah, ngai hnik, Eli cu Pathian Kuang ruangah a thin a khūr ih lamzin kap tokheng parah toin khua a cuan. Cule cu pa cu khaw sung a thleng ih cuih thu a sim tikah, khaw sung mi zaten an ausuak. 14 Eli in auaw a theih tikah, “Himi awthâwm murmo cu ziang a si?” tiah a ti. Cule cu pa cu rang zetin a ra ih, Eli a sim. 15 Eli cu kum 98 a si ih a mit a māl zet thlang, khua a hmu thei lo.

4:12^a Jos 7:6; 2Sam 1:2; Job 2:12

16 Cun cu pa cun Eli hnenah, “Kei cu ral doawknak hmun ihsi ra ka si. Cule doawknak in tuihni ah ka tlânsuak,” tiah a ti.

Cule Eli in, “Ziang a cang, ka fapa?” tiah a ti.

17 ^aCuih palai cun a sawn ih, “Israel cu Filisṭia-mipawl hmaiah a tlânsia ih, mipi lakah thahawknak nasa zet a um. Na fapa pahnih Hofni le Finehas khal an thi, cule Pathian Kuang khal lakin a um,” tiah a ti.

4:17^a Sam 78:60-61

18 ^aCun hitin a si, cu pa in Pathian Kuang thu a relsuah tikah, Eli cu a tar ih a rit tuk ruangah kăwtka kiang a tonak ihsin dung lamah a tla, cule a hngawng a kiak ih a thi. Eli in kum 40 sung Israel tlunah lai a rel.

4:18^a Lai 2:16

19 Cule a mo, Finehas-ih nupi cu nau a pai ih a hrin cān a kim. Pathian Kuang lâksak thu le a pasalih pa le a pasal an thih thu a theih tikah, amah ten a kûn ih fa a hring, ziangahtile a fahrin nat a parah a thleng. 20 Cule a thi zikte ih a kiangih ding nunaupawl in a hnenah, “Ṭih hlah, ziangahtile fapa na hring a si,” tiah an ti. Asinan a sawn hai lo ih, a ngaihsak fawn lo. 21 ^aCun Pathian Kuang an lâksak ih, a pasalih pa le a pasal an thih ruangah Finehas-ih nupi cun, “Ropitnak in Israel a suahsan zo!” tiin naute cu ^bIkabod, tiah hmin a sak. 22 ^cCule amah nu cun, “Pathian Kuang an lâksak ruangah Ropitnak in Israel a suahsan zo a si,” tiah a ti.

4:21^a Sem 35:18; Sam 26:8; Jer 2:11; Eze 1:28

4:21^b Ikabod: Hebru ṭawng a si ih a sullam cu “Ropitnak a um lo” asilole “Ropitnak cu khuiah so?” tinak a si.

4:22^c Suah 24:16; Sam 78:61; Jer 7:12

5

Filisṭia-mipawl le Pathian Kuang

1 ^aCun Filisṭia-mipawl in Pathian Kuang an lâk ih, cumi cu Ebenezer ihsin Ashdod khua ah an thiar. 2 ^bFilisṭia-mipawl in Pathian Kuang an lâk tikah, Kuang cu ^cDagon inn ah an kenglut ih, Dagon kiangah an ret. 3 ^dCule Ashdod khawmipawl zingteih an thawh tikah, ngai hnik, Dagon cu Jehovah-ih Kuang hmaiah a hmai leilung hawiin a tlu. Cun Dagon cu an tung ih, a umnak ah an retsal. 4 ^eCule a thaizing zingteih an thawh tikah, ngai hnik, Dagon cu Jehovah-ih Kuang hmaiah leilung hawiin a tlu. Dagon lu le a kut zaphak a pahnih cu tánin an um ih, sângka hnuai zawn zial parah an um, Dagon ruangpi lawng a tâng. 5 ^fCuruangah Dagon-ih puithiampawl le Dagon inn ih ra, zokhal in Ashdod khua ih Dagon-ih sângka hnuai zawn zial cu tuihni tiang an pál lo.

5:1^a Jos 11:22; 13:3; 1Sam 4:1

5:2^b Lai 16:23; 1San 10:10

5:2^c Dagon: Filisṭia-mipawlih pathian a si ih, a lu le a kutpawl cu milai vek a si nân, a taksaruangpi cu nga vek a si.

5:3^d Isa 2:17-18; 40:20; Jer 10:4

5:4^e Eze 6:4-6; Mik 1:7

5:5^f Zef 1:9

6 ^aAsinan Jehovah-ih kut cu Ashdod khawmipawl parah a rit ih, Ashdod khua le a ramṭhenpawl cu Jehovah in a siatsuah hai ih taksa bol nat in a vuak. 7 Cule Ashdod mipapawl in cu vekih a um an hmuh tikah, annih in, “Israel-ih Pathian Kuang cu kan hnenah um hrimhrim hlah seh, ziangahtile a kut cu kanmah lamah le kan pathian Dagon lamah a hrohrang a si,” tiah an ti. 8 ^bCuruangah annih in Filisṭia-mipawlih bawipawl an cah ih an hnenah an kokhawm, cule, “Israel-ih Pathian Kuang hi ziangtin kan tuah pei?” tiah an ti.

5:6^a Suah 9:3; 15:26; Dnp 28:27; Apo 13:11

5:8^b Jos 11:22; Lai 16:18

Cule annih in, “Israel-ih Pathian Kuang cu Gath khua ah thiar si seh,” tiah an sawn. Cutin Israel-ih Pathian Kuang cu an thiarhlo. 9 ^aCun hitin a si, Pathian Kuang an thiar hnuah, Jehovah-ih kut in Gath khua cu siatnak nasa zetin a bei ih a tûm a te in cuih khua mipapawl cu a vuak hai, cule taksa bol nat an parah a thleng.

5:9^a Dnp 2:15; 1Sam 7:13

10 ^aCuruangah Pathian Kuang cu Ekron khua ah an kuat. Cun hitin a si, Pathian Kuang Ekron khua a thlen tikah, Ekron khawmipawl cun, “Kanmah le kan mipi that dingah, Israel-ih Pathian Kuang cu kan hnenah an rak keng,” tiin an ausuak. 11 Cun Filisṭia-mipawlih bawipawl zaten an cah ih an kokhawm, cule, “Kanmah le kan mipi a thahlonak dingah, Israel-ih Pathian Kuang cu thiarhlo uhla, amai umnak kel ah kirtersal uh,” tiah an ti. Ziangahtile thihnak tlak siatnak khaw sung hmuahhmuah ah a um ih, cu tawkah Pathian kut cu a rit tuk. 12 ^bCule a thi lo mipawl cu taksa bol nat ih vuak an si ih, khaw sung mipawlih ṭahnak cu van tiang a thleng.

5:10^a Jos 13:3

5:12^b Suah 12:30; Isa 15:3

6

Beth Shemesh ah Pathian Kuang a Kirsal

1 Jehovah-ih Kuang cu Filisṭia-mipawlih ram ah thla sarih a um thlang. 2 ^aCule Filisṭia-mipawl in puithiampawl le tinzoh thiam pawl an ko ih, “Jehovah-ih Kuang cu ziangtin kan tuah pei? A umnak hmun ah ziangtin kan kuat ding in sim uh,” tiah an ti.

6:2^a Suah 7:11; Isa 44:25

3 ^aCule annih in, “Israel-ih Pathian Kuang nan thiarhlo asile, a lawngin kuat hlah uh, Pathian hnenah Mawh Thilhlăn thawn kuatkir tengteng uh. Cun tidam nan si ding ih, ziangruangah nan par ihsin a kut a rak lakir lo ti nan thei ding,” tiah an ti.

6:3^a Suah 23:15; Pui 5:15; Dnp 16:16

4 ^aCun annih in, “A hnenih kan pekkirsal ding mi Mawh Thilhlăn cu ziang a si?” tiah an ti.

6:4^a Jos 13:3; 2Sam 24:25

Annih in, “Filisṭia-mipawlih bawipawl mipum zat zulhin, sui thawi tuah mi taksa bol nat panga le sui zinghnam panga tuah uh. Ziangahtile khavek nathri sia cu nan zate parah le nan bawipawl parah a um. 5 ^aCuruangah nan taksa bol natpawlih milimpawl le ram siatsuahtu zinghnam lem nan tuah pei ih, Israel-ih Pathian sunlawihnak nan pe ding a si, anih cun nan hnen ihsin, nan pathianpawl hnen ihsin le nan ram ihsin a kut a zângter men thei. 6 ^bZiangah so Izip-mipawl le Faro in an thinlung an hahter vekih nan thinlung nan hahter? An lakih mangbangza thilpawl Pathian in a tuah tikah, mipi păwksuak dingin an suakter lo a si ta lo maw? 7 ^cCuruangah atu-ah caw lêng thar tuah uh, hngawngkol bât dah lo mi caw pi hnawi sawr lai pahnih la uhla, lêng ah thluah uh. Cule anmah hnen ihsin an fāte cu inn ah tlŭn uh. 8 ^dCun Jehovah-ih Kuang cu la uhla, lêng parah ret uh, cule Jehovah hnenih Mawh Thilhlăn ih nan peksal mi sui thilpawl cu a kapih kuang ah ret uh. Cun Kuang cu kuathlo uhla, fehter uh. 9 ^eCule zoh uh, Kuang cu Beth Shemesh khaw lam, amai ram lamzin ih a fehso asile, kan parih hi a nasa zet mi thil ṭha lo hi Jehovah ih tuah mi a rak si ding. Asinan cuti asilole, in vawtu cu Jehovah-ih kut a si lo ti kan thei ding, kan parih thleng ve hrimhrim a si ding,” tiah an sawn.

6:5^a Jos 7:19; Thu 14:7

6:6^b Suah 4:21; 10:3; 12:31-33

6:7^c Mip 19:2; 2Sam 6:3; 1San 13:7

6:8^d 1Sam 6:4-5

6:9^e Jos 15:10

10 Cun mipapawl cun cuvek cun an tuah, hnawi sawr lai caw pi pahnih an la ih, caw lêng ah an thluah, cule an fātepawl cu inn ah an khum ta. 11 Cule Jehovah-ih Kuang cu caw lêng tlunah sui zinghnampawl le sui thawi tuah mi taksa bol natpawlih lem pawl cu thingkuang thawn an ret. 12 Cun cawpawl cu Beth Shemesh khaw lam lamzin cu an pan vivo ih zinpi an zawh, an feh phahin an paw vivo ih, keh lam le vawrh lamah an pial lo. Cule an dung ihsin Filisṭia-mipawlih bawipawl in Beth Shemesh khua ramri tiang an thlun.

13 ^aBeth Shemesh khawmipawl cu phaikuam ah an sangvut an at rero, cule khua an tâng ih Kuang an hmu. Kuang an hmuh ruangah lungawi aipuangin an um. 14 ^bCun caw lêng cu Beth Shemesh khawmi Joshua-ih ló sungah a thleng, cule cu tawkah a ding. Cu tawkah lungto tumpi a um. Cun annih cun caw lêng thing cu an băl ih, cawpawl cu Jehovah hnenah Meiur Thilhlăn ah an pe. 15 ^cLevi-mipawl in Jehovah-ih Kuang le a sungih sui thilripawl um mi kuang cu an la ih, lungto tumpi parah an ret. Cun Beth Shemesh mipapawl in Meiur Thilhlănpawl an hlan ih, a ni lala ah raithawinakpawl Jehovah hnenah an tuah. 16 Cule cumi cu Filisṭia-mipawlih bawi panga pawl in an hmuh tikah, a ni lala ah Ekron khua ah an kirsal.

6:13^a Sem 30:14

6:14^b 2Sam 24:22; 1Sp 19:21

6:15^c Jos 3:3

17 ^aHipawl hi Filisṭia-mipawl in Jehovah hnenih Mawh Thilhlăn ih an pekkirsal mi sui thawi tuah mi taksa bol nat milimpawl cu an si: Ashdod khua hrangah pakhat, Gaza khua hrangah pakhat, Ashkelon khua hrangah pakhat, Gath khua hrangah pakhat, Ekron khua hrangah pakhat le, 18 sui zinghnampawl cu khua hmuahhmuah, kulh nei khawpi le khawtepawl siar thluh ih bawi panga pawlih ta Filisṭia-mipawlih khaw zat a si. Jehovah-ih Kuang an ṭhumnak lungto tumpi cu Beth Shemesh khawmi Joshua ih ló ah atu tiangin a um lai a si.

6:17^a Jos 13:3

19 ^aCun Jehovah-ih Kuang sung an zoh ruangah, Beth Shemesh mipapawl cu Jehovah in a vaw hai. An lakih mipa 50070 cu a vua, Jehovah in mipi cu a nasa zet mi thahnak in a vuak hai ruangah mipi an ṭap.

6:19^a Mip 4:5; 2Sam 6:6-7

Kirjath Jearim ah Pathian Kuang

20 ^aCule Beth Shemesh mipapawl in, “Hi Jehovah Pathian thianghlim hmaiah zo so dīng thei? Kan hnen ihsin zo hnenah Kuang cu fehso tak pei maw?” tiah an ti. 21 ^bCun annih in Kirjath Jearim luahtupawl hnenah, “Filisṭia-mipawl in Jehovah-ih Kuang an rak kuatkirsal zo, rung suk uhla, nan hnenah la uh,” tiin palaipawl an thlah.

6:20^a Pui 11:45; 2Sam 6:9; Sam 130:3; Mal 3:2; Thu 6:17

6:21^b Jos 9:17; 1San 13:5

7

Samuel San ah Ṭhangphawknak

1 ^aCun Kirjarth Jearim mipapawl an ra ih, Jehovah-ih Kuang cu an la, cule mual parih Abinadab inn ah an ṭhum. Cule Jehovah-ih Kuang kiltu dingah a fapa Eleazar cu an serhhran. 2 ^bCule hitin a si, Kirjath Jearim ah Kuang cu reipi a tâp, kum 20 sung lai, cu tawkah cun a um. Cule Israel sungza hmuahhmuah in Jehovah an ṭahhnawh.

7:1^a 2Sam 6:2-3; 1San 13:5-7

7:2^b 1San 13:3; Sam 132:8

3 ^aCun Samuel in Israel sungza hmuahhmuah hnenah, “Jehovah hnenah nan thinlung zaten nan kirsal ih, nan lak ihsin ram dang pathianpawl le Ashtoreth-pawl nan hlăwn ih, nan thinlung cu Jehovah hrangah timlamin, amah lawng nan rĕn asile, anih in Filisṭia-mipawlih kut ihsin a lo runsuak ding,” tiin a sim. 4 Cun Israel tefapawl cun Baalpawl le Ashtoreth-pawl cu an hlăwn ih, Jehovah lawng an rian. 5 ^bCule Samuel in, “Israel miphun zaten Mizpah ah pungkhawmter uhla, nan hrangah Jehovah hnenah thla ka cam ding,” tiah a ti.

7:3^a Dnp 6:13; 30:2-10; Lai 2:12-13, 18; 1Sp 8:48; 2Sp 18:4; Jer 24:7; Joe 2:12; Mat 4:10; Luk 4:8

7:5^b Dnp 9:19; Lai 20:1; 21:5; 1Sam 12:19; Sam 99:6; Jer 15:1

6 ^aCutin Mizpah ah an ra pungkhawm, tidai an khai ih Jehovah hmaiah an thlebung. Cule cuih ni cu rawl an ul ih, cu tawkah, “Jehovah dokalhin kan sual a si,” tiah an ti. Cule Samuel in Mizpah ah Israel tefapawl tlunah lai a rel.

7:6^a Suah 32:30; Lai 2:16; 1Sp 8:47; Ṭah 2:19

7 Filisṭia-mipawl in Israel tefapawl Mizpah ah an táwngkhawmaw ti an theih tikah, Filisṭia-mipawlih bawipawl cu Israel do dingin an so. Cule Israel tefapawl in cuih thuthang an hna ih an theih tikah, Filisṭia-mipawl cu an ṭih. 8 ^aCule Israel tefapawl in Samuel hnenah, “Filisṭia-mipawl kut ihsin anih ih in runnak dingah, Jehovah kan Pathian hnenih kan hrangih au kha cawl hlah aw,” tiah an ti.

7:8^a Mip 21:7; 1Sam 12:19-24; 1Sp 18:24; Isa 37:4

Filisṭia-mipawl Neh an Si

9 ^aCule Samuel in hnawi fawp lai tuu fa no a lâk ih, Jehovah hnenah a pumhlum in Meiur Thilhlăn ah a hlan. Cun Samuel cu Israel hrangah Jehovah hnenah a au ih, Jehovah in anih cu a let. 10 ^bSamuel in Meiur Thilhlăn a hlăn laiah Filisṭia-mipawl cu Israel do dingin an ra nai vivo. Asinan cuih ni ah Jehovah in Filisṭia-mipawl parah a ring zet mi khawri a rîtter ih a buaiter hai, cule Israel hmaiah an duai. 11 Cule Mizpah ihsin Israel mipapawl an păwksuak ih Filisṭia-mipawl cu an dawi, Beth Kar tăng tiang annih cu an neh vivo. 12 ^cCun Samuel in lungto a lâk ih, Mizpah le Shen karlakah a phun, cule cumi cu a hmin ah, “Hi tawk tiang Jehovah in in bawm,” tiin ^dEbenezer a sak.

7:9^a Pui 22:27; Dnp 9:19; Sam 99:6

7:10^b Suah 9:23; 14:24; 1Sam 2:10; Sam 18:13-14

7:12^c Sem 28:18, 22; Dnp 27:2; Jos 4:9

7:12^d Ebenezer: Hebru ṭawng a si ih a sullam cu “bawmtu lung” tinak a si.

13 ^aCutin Filisṭia-mipawl cu an duai ih, Israel ramkulh sungah an ra lut nawn lo. Cule Jehovah-ih kut cu Filisṭia-mipawl dokalhin Samuel dam sung hmuahhmuah a um. 14 ^bCun Filisṭia-mipawl in Israel hnen ihsin an lawn mi khawpi Ekron ihsin Gath tiang Israel hnenih pekkir an si, cule Israel in Filisṭia-mipawl hnen ihsin a ramṭhen cu a lasal. Cuihtlunah Israel le Amor-mipawl karlakah remdaihnak a um.

7:13^a Lai 13:1-5

7:14^b Jos 13:3; Lai 1:34

Samuel in Israel Tlunah Lai a Rel

15 ^aCule Samuel in a dam sung hmuahhmuah Israel tlunah lai a rel. 16 ^bKum khat hnu kum khat, Bethel, Gilgal le Mizpah pawl ah a fehkûal ih, cuih hmunpawl ah Israel tlunah lai a rel. 17 ^cAsinan Ramah ah a kirsal ringring, ziangahtile cu tawkah a inn a um. Cu tawkah Israel tlunah lai a rel ih, cu tawkah Jehovah hrangah biakṭheng a dâwl.

7:15^a Lai 2:16, 18; Apo 13:20

7:16^b Sem 12:8; Jos 10:43; Amo 5:5

7:17^c Jos 18:21, 25; 2Sam 24:25

8

Israel in Siangpahrang a Dil

1 ^aSamuel a tar tikah hitin a si, Israel tlunih laireltu dingah a fapapawl a tuah. 2 ^bA fatir hmin cu Joel a si ih, a pahnihnak hmin cu Abijah a si, annih cu Beersheba ah laireltu an si. 3 ^cAsinan a fapapawl cun an paih lamzin an zawh lo, dik loih ngahnak, nawhthuh lâknak le diknak merhkawinak ah an pial.

8:1^a Dnp 16:18-19

8:2^b Sem 22:19; 1Sp 19:3; 1San 6:28; Amo 5:4-5

8:3^c Suah 23:2, 6, 8; Dnp 16:19; Job 34:27; Sam 14:3; Thf 17:23; Isa 53:6

4 ^aCun Israel upapawl zaten an khawmaw ih Ramah ah Samuel hnenah an feh. 5 ^bCule a hnenah, “Zoh hnik, na tar thlang ih, na fapapawl in na lamzinpawl an zawh lo. Miphun dang pawl hmuahhmuah vekin kan tlunih laireltu dingah siangpahrang in pe aw,” tiah an ti. 6 ^cAsinan, “Lai in relsaktu dingah siangpahrang in pe aw,” tiih an ti mi cun Samuel ^dlung a hmuiter lo. Cun Samuel cu Jehovah hnenah thla a cam. 7 ^eCule Jehovah in Samuel hnenah, “Na hnenih mipi ih an lo sim mi zaten ngai aw, ziangahtile nangmah an lo hnáwng si loin, an tlunih ka uklonak dingah keimah in hnáwng a si sawn. 8 ^fIzip ihsi anmah ka hruaisuah ni thawkin, tuihni tiang an thil tipawl zaten in thlauthla ih pathian dang pawl an rian, cu vekin na hnen khalah an tuah ve. 9 ^gCuruangah atu-ah an thu ngai aw. Sikhalsehla anmah cu nasa zetin ralrinnak pe hai awla, anmah uktu ding siangpahrangih cangvaihdān ding hmuh hai aw” tiah a ti.

8:4^a 2Sam 5:3

8:5^b Dnp 17:14-20; Hos 13:10-11

8:6^c 1Sam 12:17

8:6^d lung a hmuiter lo: A ṭawng hrampi ah cun, “Mithmuh ah thil ṭha lo a si,” ti a si.

8:7^e Suah 16:8; Mip 11:20; 1Sam 10:19

8:8^f Suah 32:1, 4; Jer 2:17

8:9^g 1Sam 10:25; Eze 3:18

Siangpahrang Dokalhih Ralrin Peknak

10 ^aCun Samuel in siangpahrang a diltu milaipawl hnenah Jehovah-ih kamsuakthupawl zaten a sim thluh hai. 11 ^bCule anih in, “Himi hi nanmah a lo uktu ding siangpahrangih cangvaihdān a si ding: anih cun nan fapapawl cu a la ding ih amai rang lêngpawl hrangah le a rang ralkap dingah a ruat hai ding, cule mi hretkhat cu a rang lêngpawl hmaiah an tlân ding. 12 ^cAnih in a thawng uktu ding ralbawipawl le sawmnga uktu ding ralbawipawl a ruat ding ih, mi hrekkhat cu a lei lettu ding le a thlai khawmtu dingah le mi hrek cu ral doawknak hrangih hriamhreipawl le a rang lêngpawl sertu ah a ret ding. 13 Nan fanupawl cu zihmui tuahtu, rawl suangtu le sang rawhtu dingah a lo lâksak ding. 14 ^dCule anih in nan lópawl, nan sabit hmuanpawl le nan olif hmuanpawl lakih a ṭhabik bik a la ding ih, a siahhlawhpawl a pe ding. 15 ^eNan thlairawl le nan sabit hmuanih ṭhen hra ṭhen khat a la ding ih a ralbawipawl le a siahhlawhpawl a pe ding. 16 Cule nan siahhlawh mipapawl, nan siahhlawh nunaupawl, nan tlangval ṭhabik pawl le nan lākpawl a la ding ih a hnaṭuantu dingah a tuah hai ding. 17 Anih in nan tuu ṭhen hra ṭhen khat a la ding. Cule nannih cu a siahhlawh nan si ding. 18 ^fCule cuih ni ah nanmai hrangih nan hril mi nan siangpahrang ruangah nan ṭap ding ih, cuih ni ah cun Jehovah in a lo ngaithla lo ding,” tiah a ti.

8:10^a Suah 19:7

8:11^b Dnp 17:16; 1Sam 14:52; 2Sam 15:1; 1Sp 1:5; 2San 1:14

8:12^c Dnp 1:15

8:14^d 1Sp 21:7, 15; Eze 46:18; Mik 2:2

8:15^e Sem 41:34

8:18^f 1Sp 12:4; Job 27:9; Sam 18:41; Thf 1:28; Isa 1:15; 8:21; Jer 14:12; Eze 8:18; Mik 3:4

19 ^aSikhalsehla mipi in Samuel thu lun ding an êl ih, “Si lo e, in uktu ah siangpahrang nei sawn ko nung, 20 cutin miphun dang pawl hmuahhmuah vek kan si ve ding ih, kan siangpahrang in lai in relsak ding ih kan hmaiah fehin ral in dosak ding,” tiah an ti. 21 ^bCule Samuel in mipi ṭawngkam zaten a thei ih, Jehovah hnatheih ah cupawl cu a relsal ṭheh. 22 Cun Jehovah in Samuel hnenah, “An thu ngai ko awla, siangpahrang pe hai aw,” tiah a ti.

8:19^a Thf 1:24; Jer 7:13; 44:16

8:21^b Lai 11:11

Cule Samuel in Israel mipapawl hnenah, “Mi kip mai khua ciar ah tlung uh,” tiah a ti.

9

Saul

1 ^aBenjamin hnám, miralṭha thiltithei, Benjamin-mi, pa pakhat a um, a hmin cu Kish a si. Amah cu Abiel-ih fapa a si ih, cumi cu Zeror-ih fapa, cumi cu Bekorath-ih fapa, cumi cu Afiah-ih fapa a si. 2 ^bCule cu pa cun fapa cungcuang le mawi a nei ih, a hmin cu Saul a si. Israel tefapawl lakah amah hnakih tuak le mawi an um lo. Anih cu mi hmuahhmuah tlunah a liang tlun lam a lăwr.

9:1^a Rut 2:1; 1Sam 14:51; 1San 8:33; Est 2:5; Apo 13:21

9:2^b Sem 39:6; 1Sam 10:23

3 Saul-ih pa, Kish-ih lākpawl an hlo. Cule Kish in a fapa Saul hnenah, “Zangfahten, siahhlawh pakhat hruai awla, lākpawl hawl dingah feh aw,” tiah a ti. 4 ^aCutin anih cu Efraim tlang ram le Shalisha ram a hrawh, asinan a hmu lo. Cun Shaalim ram an hrawhsuak, cu tawk khalah a um lo. Cun Benjamin-mipawlih ram an hrawh, asinan an hmu cuang lo.

9:4^a Jos 24:33; 2Sp 4:42

5 Zuf ram an thlen tikah, a zawngih tel a siahhlawh hnenah Saul in, “Ra aw, kan kir pei, culole ka pa in lākpawl ruat loin, kanmah riangri in ruat-har pang ding,” tiah a ti.

6 ^aCule a siahhlawh in a hnenah, “Zoh hnik, hi khua ah Pathian mi a um ih, amah cu upat tlak a si, a sim mi zaten an cangsuak taktak. Cu tawkah kan feh pei, anih in kan fehnak ding lamzin in hmuh thei mahna,” tiah a ti.

9:6^a Dnp 33:1; Lai 13:6; 1Sam 3:19

7 ^aCun Saul in a siahhlawh hnenah, “Asinan zoh hnik, kan feh asile, cu pa cu ziang so kan kĕn ding? Kan dip sungih sang le a cem thluh fawn si, Pathian mi pek ding laksawng zianghman a um lo. Ziang so kan neih?” tiah a ti.

9:7^a Sem 32:20; 1Sp 13:7; 2Sp 4:42; Jer 40:5

8 Cule siahhlawh pa cun Saul cu a sawnsal ih, “Zoh hnik, hi tawkah ngun tangka shekel pakhat ih ṭhen li ṭhen khat ka nei. Kan lamzin in sim dingah, cumi cu Pathian mi ka pe ding,” tiah a ti. 9 ^a(Hlanlai ah, Israel ram ah Pathian thusut dingih mi pakhat a feh asile, “Ra uh, hmutu hnenah feh uhsi,” tiah an ti, ziangahtile atu-ih profet tiih kawh mi hi hlanlai ah cun hmutu tiah an ko.)

9:9^a Sem 25:22; 2Sam 15:27; 2Sp 17:13; 1San 29:29; 2San 19:2; Isa 29:10; Amo 7:12

10 Cun Saul in a siahhlawh hnenah, “Na ṭawng mi cu thil ṭha a si, kan feh pei,” tiah a ti. Cutin Pathian mi umnak khua ah cun an feh.

11 ^aKhaw pannak mual an soh tikah, tidai khai dingih fehsuak fala hrekkhat an táwng ih, an hnenah, “Hi tawkah hmutu a um maw?” tiah an ti.

9:11^a Sem 24:11, 13

12 ^aCule annih in an let ih, “Aw, ngai hnik uh, nan hmaiah a um. Zamrang uh, ziangahtile tuihsun ah hi khua ah a ra, ziangruangahtile hmun sâng ah tuihsun ah mipipawlih thawiawknak a um. 13 ^bKhaw sung nan luh veten, hmun sâng ih rawl ei dingih a feh hlanah amah cu nan táwngngah tengteng ding. Ziangahtile amah a thlen hlanlo mipi rawl an ei lo ding, ziangruangahtile anih in thawiawknak cu thlawsuah a pe ding, cuih hnuah sawm mipawl an ei ding. Curuangah atu-ah fehso uh, atu vek tikcu ah amah cu nan táwng ding,” tiah an ti. 14 Cule annih cu khaw lamah cun an fehso. Khaw sung an luh tikah, ngai hnik, Samuel cu anmah lam panin hmun sâng lam so-in a ra.

9:12^a Mip 28:11-15; 1Sp 3:2

9:13^b Mat 14:19; Joh 6:11; 1Ti 4:3-5

Siangpahrang ah Saul Hril a Si

15 ^aSaul a ra thlen hlan ni khat duhah Jehovah in Samuel hnenah, 16 ^b“Thaisun tu vek tikcu ah Benjamin ram ihsin na hnenah mi pakhat ka thlah ding, cule Filisṭia-mipawl kut ihsin ka mipawl a runsuah thei nak dingah, amah cu ka mi Israel hruaitu ah hriak na thih pei. Ziangahtile ka mipawl ka zoh hai a si, ziangruangahtile an ṭahnak ka hnen a thleng,” tiin a rak sim cia.

9:15^a 1Sam 15:1; Apo 13:21

9:16^b Sem 16:11; Suah 2:23-25; 3:7-9; 1Sam 10:1; 2Sam 3:18; 7:8; 2Sp 11:12; Sam 2:2; 102:1

17 Cun Samuel in Saul a hmuh tikah, Jehovah in a hnenah, “Ngai hnik, amah hi a si ka lo sim mi pa cu! Hi pa hin ka mipawl a uk ding,” tiah a ti. 18 Cun Saul in Samuel cu kăwtka kiangah a va naih ih, “Zangfahten in sim aw, khui tawkah hmutuih inn a um?” tiah a ti.

19 Samuel in Saul cu a let ih, “Keimah hi hmutu cu ka si. Hmun sâng ah ka hmaiah feh aw, ziangahtile tuihsun cu ka hnenah rawl na ei pei ih, thaisun ah ka lo fehter ding, cule na thinlung sungih um mi zaten ka lo sim ding. 20 ^aAsinan a liam cia ni thum ih a hlo mi na lākpawl hrangah lungphâng hlah, ziangahtile an hmu thluh zo. Israel-ih hiar mi hmuahhmuah cu zawih parah so a si ding? Na par le na paih sungkua parah a si lo maw?” tiah a ti.

9:20^a 1Sam 8:5, 19; 9:3; 12:13; Hag 2:7

21 ^aCule Saul in a sawn ih, “Israel hnámpawl lakih a fatebik Benjamin-mi ka si ih, ka innsang khal Benjamin hnámih hrin zate lakih fatebik a si lo maw? Ziangah so hiti vekin ka hnenih na ṭawng?” tiah a ti.

9:21^a Suah 3:11; Lai 6:15; 1Sam 15:17; Mat 2:6; 1Ko 15:9

22 Cule Samuel in Saul le a siahhlawh cu pindanpi sungah a hruailut hai ih, an mi sawm mipawl lakah hmun zahumbik ah a toter hai, mi 30 hrawng an si. 23 Cule Samuel in rawl suangtu hnenah, “ ‘A dangten ret aw,’ tiih ka lo sim zo mi ka lo pek mi vo kha rak keng aw,” tiah a ti. 24 ^aCule rawl suangtu cun sa liang cu a parih kăwp mi thawn a lasuak ih, Saul hmaiah a ret. Cule Samuel in, “Ngai hnik, himi cu na hrangih rethran mi a si, ei aw. Ziangahtile mi ka sawm ka ti lai ihsin tuih cān tiang nangmai hrangih ret mi a si,” tiah a ti. Cule cuih ni ah Saul cu Samuel hnenah rawl a ei.

9:24^a Pui 7:32

25 ^aHmun sâng ihsin khaw sungih an rung suh tikah, inn tlun parah Samuel in Saul a bia. 26 Zingpit ten an tho, khawvan zawng hrawngah Samuel in Saul cu inn tlun parah a ko ih, “Tho aw, ka lo tlungter thlang ding,” tiah a ti. Cule Saul cu a tho ih, amah le Samuel cu an pahnih in khaw lengah an suak.

9:25^a Dnp 22:8; Jos 2:8; Mat 24:17; Luk 5:19

27 Khaw leng an thlen tikah, Samuel in Saul hnenah, “Na siahhlawh hi kan hmaiih feh vivo dingin sim aw,” tiah a ti. Cule a siahhlawh cu a feh. “Asinan nang cu rei lo te hi tawkah dīng aw, cule na hnenah Pathian kamsuakthu ka thăn ding,” tiah a ti.

10

Profet vekin Saul Thu a Phuang

1 ^aCun Samuel in hriak thâwl a lâk ih, Saul-ih lu ah a thlawrh, cule amah cu a hnam ih, “Jehovah in a ro parih uktu si dingin hriak a lo thih a si lo maw? 2 ^bTuihsun ah ka hnen ihsin na fehsuak tikah, Benjamin ramri Zelzah ih Rachel thlān kiangah mi pahnih na táwng ding. Cule annih in na hnenah, ‘Na hawl mi lāk hlo pawl an hmu zo. Cule ngai hnik, na pa in lāk hlo pawl a ruat-har nawn lo ih, nanmah a lo ruat-har, “Ka fapa cu ziangtin ka tuah ding,” a ti rero,’ tiah an lo sim ding. 3 ^cCun cu tawk ihsin na feh vivo ding ih, Tabor ih elon thingkung na thleng ding. Cu tawkah Bethel ih Pathian hnenih fehso mi pathum na táwng ding, pakhat in me no pathum a keng ding, a dang pakhat in sang hlăwm thum a keng ding ih, a dang pakhat in sabit zu savun thâwl khat a keng ding. 4 ^dCule annih in cibai an lo bûk ding ih, sang hlăwm hnih an lo pe ding, cucu an kut ihsin na rak cohlang pei. 5 ^eCuih hnuah Filisṭia ṭanhmun kiltu ralkappawl umnak Pathian tlang na thleng ding. Cule hitin a si ding, khua na thlen tikah, cawngcing, khuangte, phirivau le ṭingṭang tum phahin hmun sâng ihsin profet rual rung suk na táwng ding ih annih in thu an phuang ding. 6 ^fCun Jehovah Thlarau na parah a thleng ding ih, anmah zawngah thu na phuang ve ding, cule mi danglam ah na thlĕngaw ding. 7 ^gCule hitin si seh, hi hminsinnakpawl na hnenih a thlen tikah, na kut in tuah ding a hmuh mi cu tuah aw, ziangahtile Pathian na hnenah a um a si. 8 ^hKa hmaiah Gilgal ah na rak suk pei ih, ngai hnik, Meiur Thilhlănpawl hlan dingah le Remnak Thilhlăn thawiawknakpawl thawi dingah na hnenah ka rung ding. Na hnen ka rat ih na tuah ding mi ka lo hmuh hlanlo ni sarih sung in rak hngak pei,” tiah a ti.

10:1^a Suah 29:7; 34:9; 2Sam 5:2; 1Sp 1:39; 2Sp 9:1, 3

10:2^b Sem 35:19-20; 1Sam 9:3-5

10:3^c Sem 28:19; 35:8

10:4^d Thf 18:16

10:5^e Sem 31:27; Mip 11:29; 1Sam 19:20; 1Sp 1:40; 2Sp 2:3, 15; 3:15; 1San 25:1; Isa 30:29; Jer 31:4; 1Ko 14:1

10:6^f Mip 11:25

10:7^g Jos 1:5; Lai 9:33; 2Sam 7:3; Ths 9:10; Luk 1:28; Heb 13:5

10:8^h Jos 4:20; 1Sam 11:14-15

9 ^aCun hitin a si, Samuel hnen ihsin feh dingin a dung lam a hawi tikah, Pathian in Saul cu thinlung dang a pek, cule cuih ni ah cuih hminsinnakpawl zaten a thlengkim. 10 ^bCu tawkih mual an thlen tikah, amah táwng dingin profet rual an rak um, cun Pathian Thlarau cu Saul parah a thleng ih, an lakah thu a phuang ve. 11 ^cCule hitin a si, a hlanih Saul rak theitupawl in profetpawl lakih thu a phuan ve an hmuh tikah pakhat le pakhat, “Kish fapa parih thleng mi hi ziang a si? Saul teh profetpawl lakih mi a si ve maw si?” tiah an tiaw. 12 Cun cu tawkih mi pakhat in a sawn ih, “An pa cu zo a si?” tiah a ti. Curuangah, “Saul teh profetpawl lakih mi a si ve maw si?” ti cu thufim pakhat ah a cang. 13 Cule thuphuan a ṭheh tikah, Saul cu hmun sâng ah a feh.

10:9^a Isa 38:7

10:10^b Mip 11:25

10:11^c Jer 29:26; Hos 9:7; Mat 13:54; Joh 7:15

14 Cun a paseu in Saul le a siahhlawh hnenah, “Khui nan rak feh?” tiah a ti hai.

Anih in, “Lākpawl hawl dingah. Khui tawk hmanah hmuh ding an um lo ti kan hmuh tikah, Samuel hnenah kan feh,” tiah a ti.

15 Cule Saul-ih paseu in, “Zangfahten Samuel ih a lo sim mi cu in sim aw,” tiah a ti.

16 Cule Saul in a paseu hnenah cun, “Anih in fiang zetin lākpawl hmuh an si zo tiah in sim,” tiah a ti. Asinan Samuel ih sim mi lalram thuhla cu a sim lo.

Saul cu Siangpahrang ih Thăn a Si

17 Cun Samuel in Mizpah ah Jehovah hnenah mipi a kokhawm ih, 18 ^aIsrael tefapawl hnenah, “Israel-ih Pathian Jehovah in hitin a ti, ‘Israel cu Izip ihsin ka hruaisuak ih, Izip-mipawl kut, lalrampawl hmuahhmuah kut le a lo palbĕttu hnen ihsin ka lo runsuak,’ tiah a ti. 19 ^bAsinan tuihsun ah nan buainakpawl le nan harsatnakpawl hmuahhmuah lak ihta a lo runsuaktu nan Pathian cu nan hnáwng ih a hnenah, ‘Kan duh lo, kan tlunah siangpahrang ret aw!’ tiah nan rak ti. Curuangah atu-ah a hnám a hnám le a hrin a hrin cio in Jehovah hmaiah lang uh,” tiah a ti.

10:18^a Suah 1:14; Mip 10:9

10:19^b Mip 11:20; Jos 7:14; Sam 7:10; 145:19

20 Cule Samuel in Israel hnám zaten a ra naihter, Benjamin hnám cu hril a si. 21 ^aBenjamin hnám cu a hrin a hrin ih a ra naihter hai tikah, Matri-ih hrin cu hrilsuah a si. Cule Kish-ih fapa Saul cu hril a si. Asinan amah an hawl tikah an táwng lo. 22 ^bCuruangah, “Hi tawkah amah a thleng zo maw?” tiah Jehovah an sutbêt.

10:21^a Est 3:7; Thf 16:33

10:22^b Sem 25:22; Lai 18:5

Cule Jehovah in, “Zoh hnik uh, thilri lakah a relh lai,” tiah a let hai.

23 Cun an va tlân ih cu tawk ihsin amah cu an hruai. Mipi lakih a dīn tikah, anih cu mi hmuahhmuah hnakin a liang tlun cu a lăwr. 24 ^aCule Samuel in mipi zate hnenah, “Jehovah ih hril mi cu nan hmu maw, amah vek zohman mipi zate lakah an um lo?” tiah a ti.

10:24^a Dnp 17:15; 2Sam 21:6; 1Sp 1:25, 34, 39; 2Sp 11:12

Cu tikah mipi zaten an au ih, “Siangpahrang cu a san sau seh!” tiah an ti.

25 ^aCun Samuel in mipi hnenah lalram umdān ding a sim, cule cazual sungah a ngan ih Jehovah hmaiah a ret. Cule Samuel in mipi zaten, mi kip mai inn ciar ah a tlungter hai. 26 ^bCule Saul khal Gibeah ih a inn ah a tlung, cule Pathian ih an thinlung a tham mi miralṭhapawl in amah an thlun. 27 ^cAsinan mihlothlau hrekkhat in, “Ziangtin hi pa hin in run thei ding?” tiah an ti. Cutin anih cu an hmuhsuam ih, laksawng zianghman an kĕn lo. Asinan anih cu daiten a um.

10:25^a Dnp 17:14-20

10:26^b Lai 19:14; 20:44; 1Sam 15:34

10:27^c Dnp 13:13; 1Sp 10:25; 2San 17:5; Sam 68:29

11

Saul in Ammon-mipawl a Neh

1 ^aCun Ammon-mi Nahash cu a so ih, Jabesh Gilead do dingin ṭanhmun a khuar. Cule Jabesh khua mipapawl hmuahhmuah in Nahash hnenah, “Kanmah thawn thukham tuah aw, cule kan lo rian ding,” tiah an ti.

11:1^a Sem 19:38; Suah 23:32; Lai 21:8; 1Sam 12:12; 2Sam 2:4-5; 10:2

2 ^aCule Ammon-mi Nahash in, “Nan vawrh lam mit ka phawrh ding ih, Israel miphun zate tlunah ningzahnak ka thlen ding, culawngah nanmah thawn thukham ka tuah ding,” tiah a let hai.

11:2^a Sem 34:15; Mip 1:14, 16

3 ^aCun Jabesh khaw upapawl in a hnenah, “Ni sarih in rak hngak aw, cutin Israel ramṭhen hmuahhmuah ah palaipawl kan thlah ding. Cule zohman in runtu ding an um lo asile, na hnenah kan ra ding,” tiah an ti.

11:3^a Lai 2:16

4 ^aCutin palaipawl cu Saul umnak Gibeah an ra thleng ih mipi hnatheihin cuih thu cu an sim. Cule mipi zaten an au ih an ṭap. 5 ^bNgai hnik, Saul cu ramlak ihsin ranpi rual dungah a ra. Cule Saul in, “Ziangah saw mipi an ṭah?” tiah a ti. Cule annih in Jabesh mipapawlih ṭawngkampawl cu amah an sim. 6 ^cCun hi thu a theih tikah, Pathian Thlarau cu Saul parah a thleng ih a thinheng cu nasa zetin a tho. 7 ^dCun caw cang hâl khat a la ih a sâtcip nêknêk hai, cule palaipawl kut in Israel ramṭhenpawl hmuahhmuah ah cumi cu a kuat thluh ih, “Samuel le Saul zawngih ral do dingih a feh lo tu pauhpauh cu a cawpawl parah hi vekih tuah a si ding,” tiin thu a cah.

11:4^a Sem 27:38; Mip 25:6

11:5^b 1Sp 19:19

11:6^c Lai 3:10; 14:6

11:7^d Lai 19:29; 20:1; 21:5

Cule mipi tlunah Jehovah ṭihnak a thleng ih, lungrualten an ra păwksuak thluh. 8 ^aBezek hmun ih mipum a siar tikah, Israel tefapawl cu ting thum an si ih, Judah mipa 30000 an si.

11:8^a Lai 1:4; 20:2

9 Cule annih in a ra thleng mi palaipawl hnenah, “Gilead ih Jabesh mipapawl hnenah hitin nan sim pei, ‘Thaisun ni a hung sat tik cān ah, băwmnak nan ngah ding,’ tiin,” tiah an ti. Cutin palaipawl cu Jabesh mipapawl hnenah an kir ih cumi cu an sim, cule Jabesh mipapawl cu an lung a awi. 10 Curuangah Jabesh mipapawl in Nahash hnenah, “Thaisun ah na hnenah kan ra ding ih, ṭha na ti mimi cu kan parah tuah aw,” tiah an ti.

11 ^aCule a thaisun ah hitin a si, Saul in mipi cu bur thum ah a ṭhen, cule zing lam sentari kil cān ah, Ammon-mipawl ṭanhmun khuarnak laifangah an feh ih sun ni a hung sat tiang, Ammon-mipawl an that ciamco. Cule hitin a si, an thah hrelh mipawl cu an ṭekdarh thluh, cutin hmunkhat ih pahnih um khal an um lo.

11:11^a Sem 19:38; Lai 7:16

12 ^aCun mipi in Samuel hnenah, “Zo a si, ‘Saul in kan tlunah in uk ding maw?’ titu, cupawl cu rak hruai uhla kan that ding,” tiah an ti.

11:12^a 1Sam 10:27; Luk 19:27

13 ^aAsinan Saul in, “Tuihsun ah mi pakhat hman thah a si lo ding, ziangahtile tuihsun ah Jehovah in Israel ram ah runsuahnak a hlensuak zo a si,” tiah a ti.

11:13^a Suah 14:13; 2Sam 19:22; 1San 11:14

14 ^aCun Samuel in mipi hnenah, “Ra uh, Gilgal ah feh uhsi la, cu tawkah lalram tithar uhsi,” tiah a ti. 15 ^bCule mipi zaten Gilgal ah an feh ih, cu tawk Gilgal ah Saul cu Jehovah hmaiah siangpahrang ah an tuah. Cu tawkah Jehovah hmaiah Remnak Thilhlănpawl an thawi. Cule cu tawkah Saul le Israel mipapawl hmuahhmuah cu nasa zetih lungawi aipuangin an um.

11:14^a Jos 10:43

11:15^b Jos 5:9; 2Sam 19:15

12

Samuel Thucah Netabik

1 ^aSamuel in Israel miphun zate hnenah, “Ngai hnik uh, ka hnenih nan sim mi zaten nan thu ka lo ngai hai zo ih nan tlunah siangpahrang ka ret zo. 2 Cule atu-ah zoh hnik uh, siangpahrang cu nan hmaiah a feh rero. Kei cu ka tar ih ka ṭuak a par thlang, zoh hnik uh, ka fapapawl tla nan hnenah an um. Ka nauhak lai ihsin tuihni tiang nan hmaiah ka feh. 3 ^bZoh hnik uh, hi tawkah ka um. Jehovah hmaiah le a hriak thih mi hmaiah keimah dokalhin in theihter hnik uh: zawih caw cang so ka lâk, asilole zo-ih lāk so ka lâk, asilole zo so ka bum dah? Zo so ka palbĕt, asilole ka mit cawter dingin zo hnen ihsin nawhthuh ka lâk dah? Cumi cu ka lo rūlsal ding,” tiah a ti hai.

12:1^a 1Sam 8:7, 9, 22; 10:24; 11:14-15

12:3^b Suah 18:21; 23:8; Pui 25:14; Mip 16:15; 2Sam 1:14; Apo 20:33; 1Th 2:5

4 Cule annih in, “Nang in in bum dah lo ih, in palbĕt dah lo, zo hnen ihsi hmanin zianghman na lâk dah fawn lo,” tiah an ti.

5 ^aCun anih in an hnenah, “Ka kut ah zianghman thil dik lo nan hmu lo ti, nanmah dokalhin Jehovah cu theihpitu le a hriak thih mi cu tuihsun ah theihpitu a si,” tiah a ti hai.

12:5^a Sem 31:50; Suah 22:4; Apo 23:9

Cule annih in, “Jehovah cu theihpitu a si,” tiah an sawn.

6 ^aCun Samuel in mipi hnenah, “Jehovah cu Mosi le Aaron tungdingtu le nan pupápawl Izip ram ihsi hruaisuaktu a si. 7 ^bCuruangah Jehovah in nanmah le nan pupápawl hnenih a tuah mi dingfelnak thil ti mipawl hmuahhmuah thuhla Jehovah hmaiih nanmah ka lo ruahpi thei nak dingah daiten dīng uh. 8 ^cIzip ram ih Jakob a thlen tikah nan pupápawl cu Jehovah hnenah an ṭap, cule Jehovah in Mosi le Aaron cu nan pupápawl Izip ihsin runsuaktu le himi hmun ih cêngtertu ah a thlah. 9 ^dCule Jehovah an Pathian an hngilh tikah, annih cu Hazor ralkappawlih bawi, Sisera kut ah, Filisṭia-mipawlih kut ah le Moab siangpahrang kut ah a zuar hai, cule annih in anmah cu an do. 10 ^eCun annih cu Jehovah hnenah an ṭap ih, ‘Sual kan rak tuah a si, ziangruangahtile Jehovah kan hngilh ih Baalpawl le Ashtoreth-pawl kan rak bia. Asinan atu-ah kan ralpawl kut ihsin in run aw, cule nangmah kan lo rian ding,’ tiah an ti. 11 ^fCule Jehovah in Jerubbaal, Bedan, Jefthah le Samuel pawl cu a thlah hai ih, kil kip ih nan ralpawl kut sung ihsin a lo runsuak, cule ralmûangin nan cêng.

12:6^a Suah 3:10; Mik 6:4

12:7^b Jos 24:1-13; Lai 5:11; Isa 1:18; Jer 2:9; Eze 17:20; Mik 6:1-5

12:8^c Sem 46:6; Suah 2:23; 3:9-10

12:9^d Dnp 32:18, 30; Lai 3:7, 12; 4:2; 10:7

12:10^e Lai 10:10, 15

12:11^f Lai 4:6; 6:32; 11:1

12 ^a“Cule nanmah dokalhin Ammon-mipawlih siangpahrang Nahash a rat nan hmuh tikah, Jehovah nan Pathian hi nan siangpahrang a si laiah, ka hnenah, ‘A si lo, siangpahrang in in uk sawn seh,’ tiah nan ti. 13 Curuangah, ngai hnik uh, nan hril mi le nan duh mi siangpahrang cu! Cule zoh hnik uh, Jehovah in nan tlunah siangpahrang a ret zo. 14 ^b Jehovah nan ṭih, amah nan rian, a thu nan lung, Jehovah-ih thupekpawl dokalhih nan hél lo asile, cutin nanmah le a lo uktu siangpahrang thawn Jehovah nan Pathian nan thlun vivo ding. 15 ^cAsinan Jehovah-ih thu lung loin, Jehovah-ih thupekpawl dokalhih nan hél riangri asile, Jehovah-ih kut cu nan pupápawl dokalhih a rak um vekin, nanmah dokalhin a um ding.

12:12^a 1Sam 8:7; 11:1

12:14^b Jos 24:14

12:15^c Pui 26:14-17; Jos 24:20; Isa 1:20; Jer 4:17; Ṭah 1:18

16 ^a“Curuangah Jehovah in nan mithmuh ih a tuah ding mi, hi thil ropi hi dīng uhla zoh uh. 17 ^bTuihsun hi sangvut khawm cān a si lo maw? Jehovah ka ko ding ih anih in khawri le ruah a thlah ding, cule nanmai hrangih siangpahrang nan dil mi hi Jehovah mithmuh ih nan tuah mi, nan sualralnak maksak a si ti nan theithiam ding,” tiah a ti hai. 18 ^cCule Samuel in Jehovah a ko ih, cuih ni ah Jehovah in khawri le ruah a thlah, cule mipi zaten Jehovah le Samuel cu an ṭihzah zet.

12:16^a Suah 14:13, 31

12:17^b Sam 99:6; Thf 26:1; Jam 5:18

12:18^c Sem 3:10; Suah 14:31; Sam 99:6

19 ^aCule mipi zaten Samuel hnenah, “Kan thihlonak dingah Jehovah na Pathian hnenah na siahhlawhpawl hrangah thlacam aw. Ziangahtile hi thil ṭha lo kanmah hrangih siangpahrang kan dilnak hi, kan sualpawl hmuahhmuah tlunah kan bêt a si,” tiah an ti.

12:19^a 1Sam 7:8; Jer 37:3; 1Joh 5:16

20 ^aCule Samuel in mipi hnenah, “Ṭih hlah uh. Hi sualralnak hmuahhmuah hi nan rak tuah zo, sikhalsehla Jehovah thlunnak ihsin pial loin, Jehovah cu nan thinlung hmuahhmuah in rian sawn uh. 21 ^bCule pial hlah uh, ziangahtile hlawknak mi pe thei lo le mi run thei lo, kawlawng thilpawl nan thlun pang ding, cupawl cu zianghman an si si lo. 22 ^cZiangahtile Jehovah in a hmin ropi ruangah a mipawl a thlauthla lo ding, ziangruangahtile a minung ih lo tuah hi Jehovah lunghmui zawng a si. 23 ^dCuihtlunah, ka hrangah cun, nan hrangah thlacam bansannak ih Jehovah dokalhih thil sual tuah cu ka hnen ihsin hla seh. Lamzin ṭha le dik ka lo zirh sawn ding. 24 ^eJehovah ṭih uhla, nan thinlung hmuahhmuah in thutak in amah cu rian sawn uh. Ziangahtile nan hrangih thil ropi a tuah mipawl ruat uh. 25 ^fAsinan sualrál zetih thil nan ti thotho asile, nanmah le nan siangpahrang cu hlohralter nan si ding,” tiah a ti.

12:20^a Suah 32:30; Dnp 11:16

12:21^b Isa 41:29; Jon 2:8; Hab 2:18; Apo 14:15

12:22^c Dnp 14:2; Jos 7:9; 1Sp 6:13

12:23^d Mip 11:2; 1Sp 8:36; Sam 25:4; Thf 4:11; Rom 1:9-10

12:24^e Dnp 6:2, 5; 10:21; Jos 24:14; Ths 12:13; Isa 5:12

12:25^f Dnp 28:36; Jos 24:20; 1Sp 14:10

13

Filisṭia-mipawl Do dingin Saul a Feh

1 Saul in kum khat a uk, cule Israel tlunah kum hnih a uk tikah, 2 ^aSaul in Israel lak ihsin amai hrangah mipa 3000 a hril. Mikmash le Bethel tlang ah mipa 2000 pawl cu Saul hnenah an um ih, mipa 1000 pawl cu Benjamin ram Gibeah ah Jonathan hnenah an um. A dangpawl hmuahhmuah cu anmai puanthlam ciar ah a thlah hai. 3 ^bCule Jonathan in Geba ih Filisṭia-mipawlih ṭanhmun kiltu ralkappawl cu a do, cucu Filisṭia-mipawl in an hna in an thei. Cun Saul in ram sung hmuahhmuah ah, “Hebrumipawl in thei hai seh,” tiin tuu pa ki a phaw. 4 ^cIsrael miphun zaten Saul in Filisṭia ṭanhmun kiltu ralkappawl a do ti le Israel cu Filisṭia-mipawl hnenah fihnungza ah an cang ti thu an hna in an thei. Cule mipi cu Gilgal ah Saul hnenah hmunkhat ih kawhkhawm an si.

13:2^a Lai 19:14; Neh 11:31; Isa 10:28

13:3^b Jos 18:24; Lai 3:27; 6:34

13:4^c Sem 34:30; Suah 5:21

5 ^aCun Filisṭia-mipawl cu Israel do dingin hmunkhat ah an khawmaw, rang lêng 30000 le rang ralkap 6000 le minung tifinriat kapih vunnel zat ih tam an si. Cule Beth Aven ih nisuahnak lam Mikmash ah an so ih ṭanhmun an khuar. 6 ^bMipi an van a sān ruangah Israel mipapawl in dinhmun ṭihnungza ah an um ti an hmuh tikah mipi cu pûkpawl ah, phul lakah, lungpipawl ah, kuapawl ah, khurpawl ah an relh. 7 ^cCule Hebru-mi, mi hrekkhat cu Jordan an tán ih Gad le Gilead ram ah an tlân. Saul lawngte cu Gilgal ah a um lai ih, mipi hmuahhmuah in khūr cingin amah an thlun.

13:5^a Jos 7:2; 11:4; Thu 20:8

13:6^b Lai 6:2; Eze 33:27

13:7^c Suah 19:16; Mip 32:33

Saul in Puithiam Rawngbawlnak a Tuah

8 Cun Samuel ih cān khiah bangtukin, Saul in ni sarih sung a hngak. Asinan Samuel cu Gilgal ah a ra thleng lo, cule mipi cu Saul hnen ihsin an ṭekdarh. 9 ^aCu tikah Saul in, “Hi tawk ka hnenah Meiur Thilhlăn le Remnak Thilhlănpawl keng uh,” tiah a ti. Cule anih in Meiur Thilhlăn a hlan. 10 Cun hitin a si, Meiur Thilhlăn a hlăn ṭheh veten, zoh hnik, Samuel a ra thleng, cule Saul cu Samuel hmuak dingin a va suak.

13:9^a Dnp 12:5-14; 2Sam 24:25; 1Sp 3:4

11 Cule Samuel in, “Ziang simaw na tuah?” tiah a ti.

Cule Saul in, “Ka hnen ihsin mipi an ṭekdarh ti ka hmu ih nangmah le khiah mi cān ah na ra thleng fawn lo, Mikmash ah Filisṭia-mipawl hmunkhat ah an khawmaw a si, 12 ^acun, ‘Filisṭia-mipawl atu-ah Gilgal ah ka hnenah an ra thlang ding ih, Jehovah hnenah dilnak ka tuah hrih fawn si lo,’ tiah ka ti. Curuangah tuah ṭulin ka ruat ih Meiur Thilhlăn ka hlan,” tiah a ti.

13:12^a Dnp 4:29; Jos 10:43; Sam 119:58; Jer 26:19

13 ^aCule Samuel in Saul hnenah, “Atthlak zet thil na tuah a si. Jehovah na Pathian ih a lo pek mi thupekpawl na thlun lo. Ziangahtile Jehovah in na uknak cu Israel tlunah kumkhuain hngetter a rak tum. 14 ^bAsinan atu-ah cun na uknak cu a hmun vivo nawn lo ding. Jehovah in amai hrangah a thinlung vek pu mi a hawl zo ih, cu pa cu minungpawl tlunih thuneitu dingah thu a pe zo, ziangruangahtile Jehovah ih thu a lo pek mi na thlun lo a si,” tiah a ti.

13:13^a 1Sam 15:11; 2Sam 7:15; 1San 10:13; 2San 16:9

13:14^b 1Sam 15:28; 16:1; 2Sam 5:2; 6:21; 1Sp 13:21; 1San 10:14; Jer 30:9; Eze 34:23-24; Hos 3:5; 13:11; Apo 7:46; 13:22

15 Cun Samuel cu a tho ih Gilgal ihsin Benjamin ram Gibeah ah a feh. Cule Saul in amah zawngih um minung a siar, mipa 600 hrawng an si. 16 ^aSaul, a fapa Jonathan le anmah hnenih um mipi cu Benjamin ram Gibeah ah an tâng. Asinan Filisṭia-mipawl cu Mikmash ah ṭanhmun an khuar. 17 ^bCun Filisṭia-mipawlih ṭanhmun khuarnak ihsin mirămtupawl cu bur thum in an ra suak. Bur khat cu Shual ram ih Ofrah zin lam an pan, 18 ^cA dang bur khat cu Beth Horon zin lam an pan ih, a dang bur khat cun ramri zin lam an pan, cuih hmun ihsin ramṭhing lam kan zoh asile Zeboim phaikuam cu a hnuaiah a hmu ding.

13:16^a Jos 18:21-28

13:17^b Jos 18:23

13:18^c Jos 10:10; Neh 11:34

19 ^aIsrael ram sung hmuahhmuah ah soser pakhat hman hmuh ding an um lo, ziangahtile Filisṭia-mipawl in, “Hebrumipawl in ralnâm simaw, fei simaw an tuah pang ding,” tiah an ti. 20 Asinan Israel-mipawl zaten mai bul ta leilehnak thir hâ, lei laihnak thir zúm, hreitlung le tuhmui pawl ser-hriam dingin Filisṭia-mipawl hnenah an vung feh. 21 Tuhmuipawl, leilehnak thir zúm pawl, thir hai ṭêk pawl, hreitlungpawl tât-hriam man le thir fungpawl tuahter man ah ^bpim khat an la. 22 ^cCun ral do ni ah hitin a si, Saul le Jonathan zawngih um mipi lakih zo-ih kut hmanah ralnâm siseh, fei siseh a um lo. Saul le a fapa Jonathan hnen lawngah cupawl cu hmuh an si. 23 Cule Filisṭia-mipawlih ṭanhmun kiltu ralkappawl cu Mikmash lan dingin an feh.

13:19^a Sem 4:22; 2Sp 24:14

13:21^b pim khat: Shekel 2/3 a si ih, mi pakhat ni khat hlawh hnakin málten a tam.

13:22^c Lai 5:8; 1San 9:39

14

Jonathan in Filisṭia-mipawl a Neh

1 Ni khat cu hitin a si, Saul-ih fapa Jonathan in a ralthuam kengtu tlangval hnenah, “Ra aw, khat lam ralih Filisṭia-mipawlih ṭanhmun kiltu ralkappawl hnenah kan feh pei,” tiah a ti. Asinan a pa cu a sim lo. 2 ^aSaul cu Migron ih talê kung hnuai, Gibeah hnar pawnah a to. A hnenih um mipi cu 600 hrawng an si. 3 ^bShiloh ih Jehovah-ih puithiam Eli fapa, Finehas fapa, Ikabod-ih unaupa, Ahitub fapa Ahijah cu Puithiam Kâwrcung a hruk. Asinan Jonathan a fehsuak ti mipi in an thei lo.

14:2^a Suah 28:33; Lai 4:5; Isa 10:28

14:3^b 1Sam 4:21; Sam 78:60

4 Jonathan in Filisṭia-mipawlih ṭanhmun kiltu ralkappawl hnenih feh a tumnak tlang kāwn le tlang kāwn karlakah khat lam kapah lung hriam a um ih, khat lam kap khalah lung hriam a um. Cule pakhat ih hmin cu Bozez a si ih, a dang khat lam hmin cu Seneh ti a si. 5 ^aPakhat ih hmai lam cu sak lam a hawi ih, Mikmash ralden lamah a um, a dang pakhat cu thlang lamah Gibeah raldenah a um. 6 ^bCun Jonathan in a ralthuam kengtu tlangval hnenah, “Ra aw, himi serh zim tan lo ṭanhmun kiltu ralkappawl hnenah kan feh pei. Jehovah in kan hrangah hna a ṭuan tla a si mahna. Ziangahtile minung tampi hmangin simaw, minung málte hmangin simaw a mi runnak ihsin ziangkhal in Jehovah cu a dawnkham cuang lo,” tiah a ti.

14:5^a Jos 18:21-28

14:6^b Lai 7:4, 7; 14:3; Sam 33:16; Jer 9:26; Eze 28:10; Mat 19:26; Heb 11:34

7 Cun a ralthuam kengtu pa in a hnenah, “Na thinlung sungih um mi hmuahhmuah vekin tuah ko aw. Feh aw, ngai hnik, na thinlung bangtukin ka lo thlun ding,” tiah a ti.

8 Cun Jonathan in, “A ṭha tuk, hi mipapawl hnenah kan va feh pei ih, an hnenah kan va langawter pei. 9 Annih in kan hnenah, ‘Nan hnen kan rat hlanlo in rak hngak uh,’ in ti asile, kan umnak ah kan dīng ding ih, an hnenah kan so lo ding. 10 ^aAsinan annih in, ‘Kan hnenah ra uh,’ in ti asile, kan so ding. Ziangahtile Jehovah in anmah cu kan kut ah in pe zo a si, cule hihi kan hrangah hminsinnak a si ding,” tiah a ti.

14:10^a Sem 24:14; Jos 2:24

11 Cutin an pahnih in Filisṭia ṭanhmun kiltu ralkappawl hnenah an va langawter. Cule Filisṭin-mipawl in, “Zoh hnik uh, Hebrumipawl cu an relhnak kaw sung ihsin an ra suak,” tiah an ti. 12 ^aCun ṭanhmun kiltu ralkap mipapawl in Jonathan le a ralthuam kengtu pa cu an let ih, “Kan hnenah hung so uhla, ziang simaw kan lo hmuh ding,” tiah an ti.

14:12^a Lai 4:14; 2Sam 5:24

Jonathan in a ralthuam kengtu pa hnenah, “Ka dung ihsin i thlun aw, ziangahtile Jehovah in anmahpawl hi Israel kut ah a pe zo,” tiah a ti. 13 Cule Jonathan cu a kut le a khuk in a kaiso, a ralthuam kengtu pa in a dung ihsin a thlun, cule cupawl cu Jonathan hmaiah an rīl. A ralthuam kengtu pa cun Jonathan thawn dungtunawin a that hai vivo. 14 Jonathan le a ralthuam kengtu pa in an thah hmaisabik cu, caw hâl khat in ni khat ih lei a leh zat tiat a hrek sungah mipa 20 hrawng an si.

15 ^aṬanhmun khuarnak ah siseh, ló ah siseh, mipi zate lakah siseh, ṭihphannak a um. Ṭanhmun kiltu ralkappawl le mirămtupawl khal an khūr, cule ling a hnîn, cutin cumi cu khurhnak nasa ngaingai a si. 16 ^bBenjamin ram, Gibeah ih Saul ralvengtupawl in an thlir, cule ngai hnik, mipi an riaral ih a suk le a so ah an feh. 17 Cun Saul in a hnenih um milaipawl hnenah, “Hmin ko hnik uh, cule kan hnen ihsin zo a fehsuak ti cekfel uh,” tiah a ti. Cule hmin an kawh tikah, ngai hnik, Jonathan le a ralthuam kengtu pa an rak um lo. 18 ^cCule cu lai cān ah Pathian Kuang cu Israel tefapawl hnenih a um ruangah, Saul in Ahijah hnenah, “Hi tawkah Pathian Kuang rak keng uh,” tiah a ti. 19 ^dCun hitin a rak cang, Saul in puithiam a biak laiah, Filisṭia-mipawlih ṭanhmun khuarnak ih thawmvâng cu a thang deuhdeuh. Cule Saul in puithiam hnenah, “Na kut sūp aw,” tiah a ti. 20 ^eCun Saul le a hnenih um milai zaten an pungkhawmaw ih, ral donak ah an feh. Cule ngai hnik, mi kip ih ralnâm cun anmai innhnen an do ih, buainak nasa ngaingai a um. 21 Cuihtlunah, hi hlanih Filisṭia-mipawl hnenih um, an kiangkap rampawl ihsi ṭanhmun khuarnak ih Filisṭia-mipawl thawi rak so Hebrumipawl cun Saul le Jonathan hnenih um Israel-mipawl an kăwp. 22 Cuvek thothoin Efraim tlang ram ih relh Israel mipapawl hmuahhmuah khal Filisṭia-mipawl an tlânsuak ti an theih tikah, ral donak ah an dung tein an dawi. 23 ^fCutin Jehovah in cuih ni ah Israel a run, cule an doawknak cu Beth Aven lamah a ṭhawnaw.

14:15^a Sem 35:5; Suah 14:24; 2Sp 7:5-7

14:16^b 2Sam 18:24; 2Sp 9:17; Isa 52:8; Eze 33:2-6

14:18^c Lai 18:5; 1Sam 23:9; 30:7

14:19^d Mip 27:21

14:20^e Lai 7:22; Eze 38:21; Zek 14:13

14:23^f Suah 14:30; Jos 7:2

Saul in Sia a Sămter Hai

24 ^aCule cuih ni ah Israel mipapawl cu an van a sâng, ziangahtile Saul in mipi cu sesămnak hnuaiah a ret hai, “Zan a thlen hlan, ka ralpawl phuba ka lak hlanih ziang rawl khal a eitu cu camsiatin um seh,” tiah a ti. Mi zohman rawl an tep lo. 25 Cun ram sungih mi zaten hramlak ah an feh ṭheh, cule lei ah khuai tizu a um. 26 Cule mipipawl thingkung lak an thlen tikah, ngai hnik, khuai tizu a fâwr, asinan zohman in an kut an kâ ah an ret lo, ziangahtile mipi in thukamnak kha an ṭih. 27 ^bAsinan Jonathan cun a pa in mipi cu sesămnak hnuaiah a ret hai ti a thei ve lo. Curuangah a kut ih um fungfêk zim cu a suah ih khuai thlar sungah a sawh, cule a kut cu a kâ ah a retkir. Cule a mit a hung vâng. 28 Cun milaipawl lakih mi pakhat in, “ ‘Tuihsun ah rawl a eitu cu camsiat si seh,’ tiin na pa in fek zetin sesămnak thawn mipi a ngen,” tiah a ti. Mipi cu an cau.

14:24^a Jos 6:26

14:27^b Sam 19:10; Thf 16:24

29 ^aAsinan Jonathan in, “Ka pa in ram a tibuai a si. Zoh hnik uh, hi khuai tizu málte ka teh ruangah ka mit a hung vâng. 30 Mipi in an hmuh mi tuihsun ih ralthillâkpawl hi zalen zetin ei hai sehla, ziang tlukin a ṭha sinsin pei! Ziangahtile Filisṭia-mipawl lakah a nasa sinsin mi thahawknak a um lo ding maw?” tiah a ti.

14:29^a Jos 7:25; 1Sp 18:18

31 ^aIsrael-mipawl in cuih ni ah Filisṭia-mipawl Mikmash ihsin Aijalon tiang an nehkir. Cule mipi cu an tha a cem. 32 ^bCun mipi in ralthillâk cu an tlanhnawh ih tuu, caw cang pawl le caw note pawl an la ih, lei parah an that, cule mipi cun a thi thawn an ei. 33 ^cCun, “Zoh hnik, mipi cun thisen thawn ei in Jehovah dokalhin an sual!” tiah Saul an sim.

14:31^a Jos 10:12

14:32^b Sem 9:4; Pui 3:17; Est 9:10

14:33^c Sem 9:4; Pui 3:17

Cule anih in, “Dān nan pahbăl a si, tuihsun ah lungto tumpi ka hnenah rak hril uh,” tiah a ti. 34 ^aCun Saul in, “Mipi lakah vâkdarh uhla, an hnenah, ‘Mi kip caw cang le mi kip tuu cu hi tawkah ka hnenah rak hruai uh, hi tawkah that uhla ei uh. Cule thisen einak in Jehovah dokalhin sual hlah uh,’ a ti tiin,” sim uh. Cutin mipi lakih mi pakhat ciar in cuih zan ah mai caw cang cio an rak hruai ih, cu tawkah an that. 35 Cun Saul in Jehovah hrangah biakṭheng a dâwl. Hihi Jehovah hnenih a dawl mi biakṭheng hmasabik a si.

14:34^a Pui 19:26

36 ^aSaul in, “Filisṭia-mipawl dung ihsin zan ah suk uhsi la, zing khawvan hlanlo răm uhsi, cule anmah lakih pakhat hman tân hlah uhsi,” tiah a ti.

14:36^a Sem 25:22; Lai 18:5

Cule annih in, “Ṭha na tidān dānin tuah ko aw,” tiah an ti.

Cun puithiam in, “Hi tawkah Pathian naih uhsi,” tiah a ti.

37 ^aCun Saul in Pathian thurawn peknak a dil, “Filisṭia-mipawl dung ihsin ka suk pei maw? Anmah cu Israel kut ah na pe pei maw?” tiah a ti. Asinan cuih ni ah Pathian in amah cu a let lo. 38 ^bCule Saul in, “Hi tawkah ra hnik uh, nannih mipi hruaitupawl hmuahhmuah, tuihni ah hi sual hi ziang a si ti thei uhla hmu uh. 39 ^cZiangahtile Israel runtu Jehovah a nun rori vekin, ka fapa Jonathan a va si khalle a thi tengteng ding a si,” tiah a ti. Asinan mipi zate lakih mi pakhat hmanin an sawn lo. 40 Cule Israel miphun zate hnenah, “Nannih khat lamah um uhla, kei le ka fapa Jonathan hi lamah kan um ding,” tiah a ti hai.

14:37^a 2Sam 22:42; Sam 18:41

14:38^b Jos 7:11

14:39^c Mip 14:21; 2Sam 12:5; Job 19:25; Sam 18:46

Cule mipi in Saul hnenah, “Ṭha na tidān dānin tuah ko aw,” tiah an ti.

41 ^aCuruangah Saul in Israel-ih Pathian Jehovah hnenah, “Camcawhfung diktak langter aw,” tiah a ti. Cun Saul le Jonathan cun an la, asinan mipi cu an luat. 42 ^bCule Saul in, “Ka fapa Jonathan le keimah karlakah camcawhfung zûk uh,” tiah a ti. Cutin Jonathan parah a tla. 43 ^cCun Saul in Jonathan hnenah, “Ziang simaw na rak tuah, i sim aw,” tiah a ti.

14:41^a Thf 16:33; Apo 1:24

14:42^b Jon 1:7

14:43^c Jos 7:19

Cule Jonathan in a sim ih, “Ka kut ih um fungfêk zim in khuai tizu málte ka tep. Atu-ah ka thi tengteng ding a si,” tiah a ti.

44 ^aCule Saul in, “Pathian in cuti cun tuah sehla, cuhnakih nasa khalin, ziangahtile na thi hrimhrim ding a si, Jonathan,” tiah a ti.

14:44^a Rut 1:17; 1Sam 25:22

45 ^aAsinan mipi in Saul hnenah, “Israel ah hi runhimnak maksak a hlensuaktu Jonathan a thi ding maw? Thi lamlam hlah! Jehovah a nun rori bangtukin, a lu parih a sám phang khat hman lei ah tlawng hlah seh, ziangahtile tuihsun ah anih cu Pathian thawn hna a ṭuan a si,” tiah an ti. Cutin mipi in Jonathan cu an run ih, a thi lo. 46 Cun Saul cu Filisṭia-mipawl dawinak ihsin a kirsal, cule Filisṭia-mipawl cu anmai hmun ah an feh.

14:45^a 2Sam 14:11; 1Sp 1:52; Mat 10:30

Saul-ih Ral Nehnak

47 ^aCun Saul in Israel tlunah a lalram a dĭn ih, a kil kip ah a ralpawl zaten a do, Moab, Ammon tefapawl, Edom, Zobah siangpahrangpawl le Filisṭia-mipawl a do. A hawinak kip ah a neh vivo hai. 48 ^bCule ralkap a khawm ih Amalek-mipawl a do. Cule Israel cu anmah rak rămtupawlih kut ihsin a runsuak.

14:47^a Sem 19:37-38; 2Sam 8:3; 12:31

14:48^b Sem 36:12; Mip 13:29; Lai 3:13; 1Sam 15:3, 7; 2Sam 1:13; 1San 4:43

49 ^aSaul-ih fapapawl cu Jonathan, Jishui le Malkishua tla an si. A fanu pahnih teih hmin cu, upasawn Merab, nautasawn cu Mikal a si. 50 ^bSaul nupi hmin cu Ahimaaz-ih fanu Ahinoam a si. Cule a ralkap hotu lu bik cu Saul-ih paseu Ner-ih fapa Abner a si. 51 Saul-ih pa cu Kish a si ih, Abner-ih pa Ner cu Abiel-ih fapa a si.

14:49^a 1Sam 31:2; 1San 8:33

14:50^b 2Sam 2:8; 1Sp 2:5

52 Cun Saul dam sung hmuahhmuah Filisṭia-mipawl thawn nasa zetih doawknak a um. Cule Saul in micak, asilole miralṭha a hmuh mi pauhpauh cu amai hrangah a la.

15

Saul in Siangpahrang Agag a Zuah

1 Cuihtlunah Samuel in Saul hnenah, “Jehovah in a mipawl tlun, Israel tlunih siangpahrang si dingah hriak lo thih dingin i thlah. Curuangah atu-ah Jehovah-ih kamsuakthupawlih aw ngaithla aw. 2 ^aRalkap rualpawlih Jehovah in, ‘Amalek cu Israel parih a thil tuah mi ruangah dān ka tat ding, Izip ram ihsi Israel a hung soh laiah lamzin in a rak bawh. 3 ^bAtu-ah feh awla, Amalek cu do aw, cule an neih mi zaten siatsuah thluh aw, anmah cu zuah hai hlah. Cuhnakin a nu a pa in, hnawi fawp lai le nauhak, caw cang le tuu, kalauk le lāk pawl cu that aw,’ a ti,” tiah a ti.

15:2^a Sem 14:7; Suah 17:8; 2Sam 1:8

15:3^b Jos 6:17; Est 3:13

4 Cun Saul in mipi cu hmunkhat ah a kokhawm hai ih Telaim ah mipum a siar, ke ralkap ting hnih le Judah mipa 10000 an si. 5 Cule Saul cu Amalek-mipawlih khua ah a feh ih, hawrkuam in a rak hngak hai. 6 ^aCun Saul in Ken-mipawl hnenah, “Feh uh, păwk uhla, Amalek-mipawl lak ihsin suak uh, culole anmah zawngah ka lo siatsuah pang ding. Ziangahtile Israel tefapawl Izip ihsin an hung soh laiah ngilneihnak na rak langter,” tiah a ti. Cule Ken-mipawl cu Amalek-mipawl lak ihsin an suak. 7 ^bCule Saul in Amalek-mipawl cu Havilah ihsin Izip nisuahnak lam Shur tiang a do hai. 8 ^cAmalek-mipawlih siangpahrang Agag khal a nungin a kai, cule milaipawl an zaten ralnâm in a that thluh hai. 9 Asinan Saul le mipi in Agag siangpahrang le a ṭhabik bik mi tuupawl, caw cang pawl, rannung thau pawl, tuu fa no pawl le a ṭha mi hmuahhmuah cu siatsuah thluh an siang lo. Asinan zianghman ṭhahnem lo le santlailo mi tinkim cu an thathlo ṭheh.

15:6^a Sem 15:19; Mip 10:29-32; 24:21; Lai 1:16

15:7^b Sem 16:7

15:8^c Suah 17:8-16; Mip 24:7; Jos 8:23

Saul cu Siangpahrang ihsin Hnăwn a Si

10 Jehovah-ih kamsuakthu cu Samuel hnenah a thleng ih, 11 ^a“Siangpahrang ih Saul ka ret cu ka thin a na tuk, ziangahtile keimah i thlunnak ihsin dungah a kir ih, ka thupekpawl a tuahsuak lo,” tiin. Cule cumi cun Samuel thin a nater ih, zanvar Jehovah hnenah a au.

15:11^a Sem 6:6; Suah 32:14; Jos 22:16; 1Sam 16:1; 1Sp 9:6; Sam 28:5; Jer 48:10; Eze 18:24

12 ^aCun Samuel cu Saul táwng dingin zing ten a tho, Samuel hnenah, “Saul cu Karmel ah a feh ih, ngai hnik, amai hrangah hngilhlonak lung a phun, cule a fehkûal ih a lan, cule Gilgal ah a suk,” tiah an sim.

15:12^a Jos 15:55; 1Sam 13:12

13 Cun Samuel cu Saul hnenah a feh ih, Saul in a hnenah, “Nang Jehovah ih thlawsuah mi pa! Jehovah ih thupek cu ka tuahsuak a si,” tiah a ti.

14 Asinan Samuel in, “Ka hna ih theih mi hi tuu rual beaw le caw cang pawl paw hi teh ziang a si?” tiah a ti.

15 Cule Saul in, “Amalek-mipawl hnen ihsin an rak ken mi a si, ziangahtile mipi in Jehovah na Pathian hnenih thawi dingah, tuu rual ṭhabik bik le caw cang ṭhabik bik pawl cu an zuah, cule a dangpawl hmuahhmuah cu kan thatfai ṭheh,” tiah a ti.

16 Cun Samuel in Saul hnenah, “Daiten um aw! Cule Jehovah in mizan ih ka hnenih i sim mi ka lo sim ding,” tiah a ti.

Cule Saul in Samuel hnenah, “Sim aw,” tiah a ti.

17 ^aCule Samuel in, “Nangmai mit ih tenau na rak si laiah, Israel hnámpawlih lubân ah tuah na rak si lo maw? Cule Jehovah in Israel tlunih siangpahrang dingah hriak a lo thih a si lo maw? 18 ^bAtu-ah Jehovah in hnaṭuan dingah a lo thlah ih, ‘Feh awla Amalek-mi, misualpawl that thluh aw, cule an cemrál hlanlo anmah do vivo aw,’ tiah a lo ti. 19 ^cZiangah so Jehovah-ih thu cu na rak lun lo? Ziangruangah so ralthillâkpawl na cuhhnawh ih, Jehovah hmaiah thil ṭha lo na tuah?” tiah a ti.

15:17^a Suah 3:11; 1Sam 10:22

15:18^b 1Sam 15:3

15:19^c Sem 14:23

20 Cule Saul in Samuel hnenah, “Ai! Jehovah-ih thu cu ka rak lung ko, Jehovah ih i thlahnak hna ṭuan dingin ka rak feh, cule Amalek-mipawlih siangpahrang Agag cu ka rak hruai. Amalek-mipawl cu ka thatfel thluh. 21 Asinan mipi ih rak siatsuah thluh ding mi ralthillâkpawl lak ihsin a ṭhabik bik, tuu rual le caw cang pawl cu Gilgal ih Jehovah na Pathian hnenih thawi dingah an lâk,” tiah a ti.

22 ^aCu tikah Samuel in,

15:22^a Sam 40:6-8; Thf 21:3; Isa 1:11-18; Jer 7:22-23; Hos 6:6; Amo 5:25; Mik 6:6-8; Mar 12:33; Heb 10:4-10

“Jehovah in Meiur Thilhlănpawl le thawinakpawl cu
Jehovah-ih thu lun vekin a lungsi maw si?
Ngai hnik, thulun cu thawinak hnakin a ṭhasawn ih,
Thusim ngaithlak cu tuu cang pawlih thau hnakin.
23 ^aZiangahtile helnak cu thilcam thiam sualnak a si ih,
Lungruh cu mawhsualnak le milem biaknak tluk a si.
Jehovah-ih kamsuakthu na hnawn ruangah,
Anih khal in siangpahrang na sinak ihsin a rak lo hnáwng ve a si,”

15:23^a Dnp 18:10; 1Sam 13:14

tiah a sim.

24 ^aCun Saul in Samuel hnenah, “Thil sual ka rak tuah a si, ziangahtile Jehovah-ih thupek le na ṭawngkampawl ka rak pahbăl, ziangruangahtile mipi ka ṭih hai ih an thu ka rak lung. 25 ^bCuruangah zangfahten ka sual in ngaithiam awla, Jehovah ka biak thei nak dingah ka zawngah kirsal aw,” tiah a ti.

15:24^a Suah 9:27; Mip 22:34; Sam 51:4; Thf 29:25; Isa 51:12-13; Jer 42:11

15:25^b Suah 10:17

26 ^aAsinan Samuel in Saul hnenah, “Na zawngah ka kir lo ding, ziangahtile nang cun Jehovah-ih kamsuakthu na rak hnáwng ih, Jehovah in Israel tlunih siangpahrang na sinak ihsin a lo hnáwng zo,” tiah a ti. 27 ^bCule Samuel cu feh dingin a herawk zawngah, a kâwrfual zim cu Saul in a kai ih a tlêk. 28 ^cCun Samuel in a hnenah, “Tuihsun ah Jehovah in na hnen ihsin Israel lalram cu a băwtthlek zo ih, nang hnakih ṭhasawn na innhnen a pe zo. 29 ^dCule Israel-ih Cahnak cun thuphan a rel lo ding ih, a lung a thlĕng fawn lo ding. Ziangahtile lungthlĕng dingin, anih cu minung a si lo,” tiah a ti.

15:26^a Mip 15:31; 1Sp 14:7-10

15:27^b 1Sp 11:11, 31; 2Sp 17:21

15:28^c 1Sam 28:17; 2Sam 6:21

15:29^d Mip 23:19; Tit 1:2; Heb 7:21

30 ^aCun Saul in, “Thil sual ka rak tuah a si, asinan ka mipi upapawl le Israel hmaiah upatnak i coter hram awla, Jehovah na Pathian ka biak thei nak dingah ka zawngah kir ko aw,” tiah a ti. 31 Cule Samuel cun Saul a thlun ih Saul in Jehovah a bia.

15:30^a Mip 22:34; Isa 29:13; Joh 12:43

32 Cule Samuel in, “Hi tawk ka hnenah Amalek-mipawlih siangpahrang Agag cu rak hruai uh,” tiah a ti. Cule Agag cu a hnenah fimkhur zetin a feh.

Cule Agag in, “Thungaiten thihnakih khâtnak cu a liam zo a si,” tiah a ti.

33 ^aAsinan Samuel in, “Na ralnâm in nunau fa nei lo ko a rak tuah vekin, na nu khal nunau lakah fa nei loin um ve seh,” tiah a ti. Cule Samuel in Agag cu Jehovah-ih hmai Gilgal ah a satsăwm ṭheh.

15:33^a Sem 9:6; Jer 18:21

34 ^aCun Samuel cu Ramah ah a feh ih, Saul khal amai inn, Saul-ih khua Gibeah ah a so. 35 ^bCule Samuel cu Saul a thih ni tiangin amah táwng dingin a so nawn lo. Sikhalsehla Samuel cun Saul a ṭah, cule Jehovah cu Israel siangpahrang ih Saul a ret cu a thin a nâ.

15:34^a Lai 19:14

15:35^b Sem 6:6

16

Siangpahrang dingih David Hriak Thihnak

1 ^aJehovah in Samuel hnenah, “Saul cu Israel a uknak ihsin ka hnáwng a si ti na hmuh hnuhnu ah, ziangtik tiang so amah cu na sūn ding? Na ki dâwng cu hriak thawn khatter awla, feh aw. Bethlehem khawmi, Jessi hnenah ka lo thlah ding. Ziangahtile a fapapawl lak ihsin keimah le keimah siangpahrang ka peaw,” tiah a ti.

16:1^a Rut 4:17; 2Sam 5:2; 1Sp 8:16; 1San 12:23; Sam 78:70; Apo 13:22

2 Cule Samuel in, “Ziangtin ka feh thei ding? Saul in cuih thu a theih asile, i that ding,” tiah a ti.

Cule Jehovah in, “Na zawngah caw la hruai awla, ‘Jehovah hnenah thawi dingin ka ra a si,’ ti aw. 3 ^aCun thawinak hmun ih ra dingin Jessi sawm awla, na tuah ding mi ka lo hmuh ding, na hnenih ka lo sim mi cu ka hrangah hriak na thih pei,” tiah a ti.

16:3^a Suah 4:15; Dnp 17:15; Apo 9:6

4 ^aCutin Samuel cun Jehovah ih sim mi cu a tuah ih, Bethlehem ah a feh. Cule khaw sung upapawl cu amah a rat tikah an khūr, cule, “Remnak thawi ra na simaw?” tiah an ti.

16:4^a Sem 48:7; 1Sp 2:13; 2Sp 9:17; Luk 2:4

5 ^aCule anih in, “Remnak thawi ra ka si, Jehovah hnenih thawi dingin ka ra. Tithianghlimaw uhla, thawinak ah ka zawngah ra uh,” tiah a ti. Cun anih in Jessi le a fapapawl cu a serhhran hai ih thawinak ah a ko hai.

16:5^a Suah 19:10, 22

6 ^aCule an thlen tikah hitin a si, Samuel in Eliab cu a zoh ih, “Thungaiten Jehovah hriak thih mi Jehovah hmaiah a um a si!” tiah a ti.

16:6^a 1Sam 17:13, 28

7 ^aAsinan Jehovah in Samuel hnenah, “A lăngdan siseh, a ruangrai siseh zoh hlah, ziangruangahtile anih cu ka hnawn mi a si. Ziangahtile Jehovah cun minung hmuh vekin a hmu ve lo, minung cun leng lam lăngdan a zoh, asinan Jehovah cun thinlung a zoh sawn a si,” tiah a ti.

16:7^a Sam 44:21; 139:23; 147:10; Thu 2:23

8 Cule Jessi in Abinadab a ko ih Samuel hmaiah a fehter. Cule Samuel in, “Hi pa khal Jehovah in a hril lo,” tiah a ti. 9 ^aCule Jessi in Shammah a fehter. Cule Samuel in, “Hi pa khal Jehovah in a hril lo,” tiah a ti. 10 Cuti vek cun Jesse in a fapa pasarih pawl cu Samuel hmaiah a fehter hai. Cule Samuel in Jessi hnenah, “Jehovah in hipawl hi a hril hai lo,” tiah a ti. 11 ^bSamuel in Jessi hnenah, “Tlangval an zaten hi tawkah an um thluh maw?” tiah a ti.

16:9^a 1Sam 17:13

16:11^b Sem 37:2; 2Sam 7:8

Cun anih in, “Nautabik a tāng lai, ngai hnik, tuu a khāl,” tiah a ti.

Cule Samuel in Jessi hnenah, “Mi thlah awla, amah cu run hruai aw. Ziangahtile a ra thlen hlanlo hi tawkah kan to lo ding,” tiah a ti.

12 ^aCule Jesse in mi a thlah ih amah cu an run hruailut. Amah cu a sen telti, mitmen mawi le mimawi a si. Cule Jehovah in, “Tho awla, amah cu hriak thih aw, ziangahtile amah hi a si,” tiah a ti. 13 ^bCun Samuel in hriak ki dâwng cu a lâk ih a unaupawl hmaiah amah cu hriak a thih, cule Jehovah Thlarau cu cuih ni thawkin David parah a thleng. Cun Samuel cu a tho ih Ramah ah a feh.

16:12^a Sem 39:6; Suah 2:2; Apo 7:20

16:13^b 2Sam 22:51

David in Saul hrangah Ṭingṭang a Tum

14 ^aJehovah Thlarau in Saul a suahsan ih, Jehovah hnen ihsin thlarau sia in amah cu a buaiter ṭheu. 15 Cule Saul-ih siahhlawhpawl in a hnenah, “Ngai hnik, Pathian hnen ihsi thlarau sia in a lo tibuai ṭheu a si. 16 ^bAtu-ah kan pu in na hmaiih um, na siahhlawhpawl hi ṭingṭang tum thiam hawl dingin thu pe seh. Cule hitin si seh, Pathian hnen ihsin thlarau sia na parih a um tikah, anih in a kut in ṭingṭang tum sehla, na ṭha ding,” tiah an ti.

16:14^a Lai 9:23; 16:20; 2Sam 7:15

16:16^b 2San 29:26-27; Sam 49:4

17 Cule Saul in a siahhlawhpawl hnenah, “A tum thiam zet mi pakhat hawl uhla, ka hnenah hruai uh,” tiah a ti hai.

18 ^aCun siahhlawhpawl lakih pakhat in a sawn ih, “Zoh hnik, Jessi-ih fapa, Bethlehem khawmi, a tum thiam zet ka hmu, micak ralṭha a si ih ralthiam, ṭawnghmang thiam le mimawi a si, cule Jehovah in amah cu a umpi,” tiah a ti.

16:18^a Sem 39:2; Rut 4:17; 2Sam 17:8; 1San 22:11

19 Curuangah Saul in Jessi hnenah palai a thlah ih, “Tuu zawngih um na fapa David kha ka hnenah thlah aw,” tiah a ti. 20 ^aCule Jessi in sang le sabit zu thâwl khat phur lāk pakhat le me no pakhat a la ih cupawl cu a fapa David hnenin Saul hnenah a kuat. 21 ^bCutin David cu Saul hnenah a feh ih a hmaiah a ding. Cule Saul in David cu a duh zet ih, a ralthuam kengtu ah a cang. 22 Cun Saul in Jessi hnenah, “Ka hmaiah David dīng hram seh, ziangahtile ka mithmuh ah duhsaknak a co a si,” tiin thu a hei cah. 23 Cule hitin a si, Pathian hnen ihsin Saul parih thlarau a rat tinten, David in ṭingṭang a lâk ih a kut in a tum. Cule Saul cu a harh ih a ṭha, cule thlarau sia in amah cu a suahsan.

16:20^a Sem 32:13

16:21^b Sem 41:46

17

David le Goliath

1 ^aDoaw dingin Filisṭia-mipawl in an ralkappawl an fĭnkhawm, cule Judah ta a si mi Sokoh khua ah an fĭnkhawm. Annih cu Sokoh le Azekah karlak Efes Dammin ah ṭanhmun an khuar. 2 Cule Saul le Israel mipapawl cu fĭnkhawmawin, Elah phaikuam ah ṭanhmun an khuar ih, Filisṭia-mipawl do dingin an tlaraw. 3 Filisṭia-mipawl cu khat lam tlang parah an dīng ih, khat lam tlang parah Israel-mipawl an ding, an lakah kuam a um. 4 ^bFilisṭia-mipawlih ṭanhmun khuarnak ihsin an suanvawr bik, Gath-mi, a hmin Goliath cu a ra suak, amah cu dawng ruk le khâp khat a sâng. 5 A lu ah dar lukhum a khum ih thir kâwrcung a hruh, cuih kâwrcung cu dar shekel 5000 rit a si. 6 Cule a kepawl ah dar ralthuam a bun ih, a liang le liang karlakah dar feite a thlaih. 7 ^cA feipi ngul cu thiamtahtuih thiam tlâng vek a si ih, a thir feipi luzim cu shekel 600 rit a si, cule a hmaiah ralphaw kengtu pakhat a feh. 8 ^dCun anih cu a dīng ih Israel ralkappawl cu a auh hai, cule an hnenah, “Ziangruangah ral do ih tlaraw dingih nan ra suah? Keimah cu Filisṭia-mi ka si lo maw, nannih cu Saul-ih siahhlawh nan si lo maw? Nanmah aiah mi pakhat hril uhla, cu pa cu ka hnenah ra seh. 9 Keimah i do thei ih i that thei asile, nan siahhlawh ah kan cang ding. Asinan amah cu ka neh ih ka thah asile, nannih cu kan siahhlawh ah nan cang ding ih in rian ding,” tiah a ti. 10 ^eCule Filisṭia pa cun, “Tuihsun ah Israel ralkappawl ka lo zuam a si, keimah thawn doaw dingin mi pakhat rak suah hnik uh,” a ti. 11 Saul le Israel miphun zaten cuih Filisṭia paih ṭawngkampawl an theih tikah, an thla a phâng, nasa zetin an ṭih.

17:1^a Jos 10:10-11; 15:35; 2San 28:18

17:4^b 2Sam 21:19

17:7^c 2Sam 21:19; 1San 11:23

17:8^d 2Sam 2:14

17:10^e 2Sam 21:21

12 ^aDavid cu Judah ram Bethlehem khua ih Efrath peng-mi, fapa pariat nei, a hmin Jessi-ih fapa a si. Cule Saul san ah Jesse cu kum upa, tar zet a si thlang. 13 Jessi-ih fapa upa pathum pawl cu ral do dingin Saul an thlun. Ral do dingih fehtu a fapa pathum pawlih hmin cu: upabik ah Eliab, a naudeuh Abinadab le a pathumnak ah Shammah an si. 14 David cu nautabik a si. Cule upabik pathum cun Saul an thlun. 15 ^bAsinan David cu Bethlehem ah a paih tuu khāl dingin Saul hnen ihsin kir thul, feh thul in a um. 16 Cule Filisṭia pa cun a naih hai ih, ni 40 sung zing le zan a va langawter.

17:12^a Sem 35:16, 19; Rut 4:17; Sam 132:6

17:15^b Sem 37:2

A Ulepawl hnenah David a Feh

17 ^aCun Jessi in a fapa David hnenah, “Hi thlairawl kanro efa khat le hi sang hlăwm hra hi keng awla, na ulepawl hnen ṭanhmun khuarnak ah va tlân aw. 18 ^bCule himi hnawi khăl tlăng hra khal hi keng awla, 1000 hotu ralbawi sum aw, cule na ulepawl ziangtin an um ti zoh awla, an thuhla run kengkir aw,” tiah a ti. 19 Saul le a ulepawl le Israel mipa hmuahhmuah cu Elah phaikuam ah Filisṭia-mipawl thawn an rak doaw rero.

17:17^a Sem 43:9; 1Sam 25:18

17:18^b Sem 37:14

20 ^aCun David cu zingpit ten a tho, tuu rual cu tuu kiltu pakhat hnenah a tân ih, thilpawl a lâk ih Jessi ih fial vekin a feh. Cule ralkappawl doaw dingih an feh le an au laiah ralthuam retnak hmun a va thleng. 21 Ziangahtile Israel le Filisṭia-mipawl cu doaw dingin ralkap le ralkap epawtăwnin an tlaraw. 22 ^bCule David in a tirawlpawl cu tirawl kiltuih kut ah a tān ta, amah cu ralkappawl lakah a tlân ih a thleng, cule a ulepawl cibai a bûk. 23 Cun a ulepawl a biak hai laiah, Gath khua ih Filisṭia-mi, ngai hnik, an suanvawr, a hmin Goliath cu Filisṭia-mipawlih ralkappawl lak ihsin a ra suak, cule anih cun a ṭawngkampawl a kelin a ṭawng lala. Cupawl cu David in a thei. 24 Cule Israel mipa hmuahhmuah in cu pa an hmuh tikah, a hnen ihsin an zâm ih nasa tukin an ṭih. 25 Cun Israel mipapawl in, “A ra suak mi, hi pa hi na hmu zo maw? Israel zuam dingin a ra suak rori a si, hitin a si ding, cu pa thattu cu siangpahrang in lennak nasa zet thawn a lianter ding, a fanu khal a pecih ding ih, a paih sungkuapawl cu Israel ram ah siah a awlh ding,” tiah an ti.

17:20^a 1Sam 26:5, 7

17:22^b Jos 1:11

26 ^aCun David in a kiangih dīngpawl hnenah, “Hi Filisṭia pa thattu le Israel mualphonak lahlotu cu ziangti vekih tuah ding a si? Ziangahtile a nung mi Pathian-ih ralkappawl zuam rero tu, hi serh zim tan lo Filisṭia pa cu zo a si?” tiah a ti.

17:26^a Dnp 5:26; Jos 3:10; 2Sp 18:35

27 Cule mipi in anih cu hitin an let, “Hi pa thattu cu kan sim vek khan tuah a si ding,” tiin.

28 ^aDavid in mipapawl hnenih a ṭawng lai cu a unau upabik Eliab in a thei, cule Eliab-ih thinhengnak cu David parah a tho ih, “Ziangruangah hi tawkah na ra? Ramṭhing ih tuu málte cu zo hnenah so na tān ta? Na hngalzia le na thinlung siatzia ka thei, ziangahtile ral doawknak zoh dingah na ra a si ko,” tiah a ti.

17:28^a Sem 37:4

29 Cule David in, “Ziang so maw ka tuah ih? A săn a um a si lo sawm?” tiah a ti. 30 Cun anih cun a hnen ihsin mi dang hnen lam a hawisan ih, cuti vek thothoin a ṭawng. Cule mipi khal in a hlan vek thothoin an rak let.

David in Goliath a Neh

31 David ih a ṭawng mi ṭawngkampawl theih a si tikah, a ṭawngkampawl cu Saul hnenah an sim, cule anih in David cu a ko. 32 ^aCun David in Saul hnenah, “Amah ruangah zawih thin hman nau hlah seh, na siahhlawh hi a feh ding ih, hi Filisṭia pa hi a do ding,” tiah a ti.

17:32^a Dnp 20:3; Isa 7:4; Jer 4:9

33 ^aCule Saul in David hnenah, “Hi Filisiṭia-pa do dingah na feh thei lo ding, ziangahtile nang cu suakthuan na si lai ih, anih cu a suakthuan lai ihsin raldo thiam a si,” tiah a ti.

17:33^a Mip 13:31

34 ^aAsinan David in Saul hnenah, “Na siahhlawh hin a paih tuu a khāl ṭheu ih, kiosa simaw, savâwm simaw ra in rante rualpawl lak ihsin tuu fa no a lâk tikah, 35 ^ba dungin ka dawi ih ka vuak, cule a kâ sung ihta tuu fa no cu ka runsuak, cule anih in keimah i zăwn tikah a kha hmul in ka kai, cule ka vuak ih ka that. 36 ^cNa siahhlawh in kiosa le savâwm, a pahnih hnih in a that a si, cule hi serh zim tan lo Filisṭia pa cu, cupawl lakih pakhat vek a si ding, ziangahtile anih cun a nung mi Pathian-ih ralkappawl a zuam a si,” tiah a ti. 37 ^dCuihtlunah David in, “Kiosa kut tín le savâwm kut tín sung ihsin i runsuaktu Jehovah in hi Filisṭia paih kut ihsi khalin i runsuak ding a si,” tiah a ti.

17:34^a Job 10:16; Isa 31:4; Jer 49:19; Hos 13:8; Amo 3:12

17:35^b Amo 3:12

17:36^c 1San 11:22

17:37^d 2Ko 1:10; 2Ti 4:17

Cule Saul in David hnenah, “Feh aw, Jehovah in lo umpi seh!” tiah a ti.

38 ^aCun Saul in David cu a ^bralthuam a hrukter ih, a lu ah dar lukhum a khumter, cuihtlunah Saul in thir kâwrcung khal a hrukter. 39 A ralthuam parah David in a ralnâm a thlaih ih, feh a tum, ziangahtile cupawl cu a rak hruh sĭn hnik dah lo. Cule David in Saul hnenah, “Hipawl thawn ka feh thei lo, ziangahtile hipawl cu ka hruh sĭn dah lo,” tiah a ti. Cule David cun a hlit thluh. 40 Cun a kut in a kianghrăwl a keng, cule tiva te kua ihsin amai hrangah lung hlum ngil panga a hril ih, cupawl cu tuu khāltuih zâl, a neih mi dip sungah a săn, cule a herhli cu a kut ah a um. Cun Filisṭia pa cu a naih.

17:38^a Sem 41:42

17:38^b ralthuam: A ṭawng hrampi ah, “sinfen” asilole “hnipuan” ti a si.

41 Cule Filisṭia pa cu a ra suak ih, David lam va naih a thawk ih, a ralphaw kengtu cu Goliath hmaiah a feh. 42 ^aCule Filisṭia pacang in kiangkap a zoh ih David a hmu, amah cu a hmuhsuam, ziangahtile anih cu suakthuan lawng a si lai, sen telti le mituak a si. 43 ^bCun Filisṭia pa cun David hnenah, “Keimah cu uico maw ka si, fungfêkpawl thawi ka hnenih na rat?” tiah a ti. Cule Filisṭia pa cun David cu a pathianpawl sālin a camsiat. 44 ^cCule Filisṭia pa in David hnenah, “Ka hnenah ra awla, na sa cu tlun zuang vatepawl le ramsapawl ka pe ding,” tiah a ti.

17:42^a Sam 123:3-4

17:43^b 2Sam 3:8; 2Sp 8:13

17:44^c Sem 40:19; 2Sam 21:10; Jer 34:20; Thu 19:17

45 ^aCun David in Filisṭia pa hnenah, “Nang cun ralnâm, feipi le feite thawn i pan. Asinan kei cun na zuam mi ralkap rualpawlih Jehovah, Israel ralkappawlih Pathian hmin in ka lo pan a si. 46 ^bTuihsun ah ka kut ah Jehovah in nangmah hi i pe ding, ka lo vaw ding ih, na hnen ihsin na lu ka la ding. Cule tuihsun ah Filisṭia-mipawl ṭanhmun khuarnak ih ruangpawl cu tlun zuang vate le leilung sahrangpawl ka pe ding, cutin leilung hmuahhmuah in Israel ram ah Pathian a um ti an thei ding. 47 ^cCun hi mipungkhawm hin Jehovah in ralnâm le fei in a run lo ti an thei ding, ziangahtile doawknak cu Jehovah-ih ta a si ih, nannih cu kan kut ah amah in in pe ding,” tiah a ti.

17:45^a Dnp 20:1; 2San 13:12; Sam 20:7-8; Heb 11:32-34

17:46^b Dnp 28:26; Jos 4:24; 1Sp 18:36; 2Sp 5:8; Isa 37:20

17:47^c Suah 14:14; 2San 14:11; 20:15; Sam 44:6-7; Jer 39:18; Hos 1:7

48 Cun hitin a si, Filisṭia pa cu a tho ih David táwng dingih a ra naih tikah, David cu Filisṭia ralkap lamah Filisṭia pa táwng dingin a hmanhmawh ih a tlân. 49 Cule David cun a zâl sung a pur ih lung pakhat a lâk, cule cucu a herhli thawn a sai ih Filisṭia paih caldar ah a ngah, cutin a cal sungah lungto cu a pil ih, Filisṭia pa cu leilung ah băwkkhup zawngin a tlu ruairo.

50 Cun David in herhli le lungto saihlum in Filisṭia a neh ih, Filisṭia pa a sai ih a that. Asinan David kut ah ralnâm a um lo. 51 ^aCuruangah David cu a tlân ih Filisṭia paih tlunah a ding, a ralnâm cu a lâk ih a kawm sung ihsin a zûk, cule amah cu a that, cule cumi thawn a lu a tán. Cule Filisṭia-mipawl in an suanvawr bik a thi ti an hmuh tikah, an zâm. 52 ^bCun Israel mipapawl le Judah mipapawl cu an tho ih an au, cule Ekron khua kăwtkapawl le kuam luhnak tiang, Filisṭia-mipawl cu an dawi. An hriam mi, Filisṭia-mipawl cu Sharaim zin tluan, Gath zin tluan le Ekron zin tluan tiang an rīl teptep. 53 Cun Israel tefapawl cu Filisṭia-mipawl dûmnak ihsin an ra kir ih, an puanthlampawl cu an răm. 54 Cule David in Filisṭia paih lu cu a lâk ih Jerusalem ah a tlŭn, asinan a ralthuam cu a riahhmun ah a ret.

17:51^a Heb 11:34

17:52^b Jos 15:11, 36

55 ^aSaul in David in Filisṭia do dingin a feh lai a hmuh tikah, ralkap hotu lu bik, Abner hnenah, “Abner, hi suakthuan pate hi zo-ih fapa a si?” tiah a ti.

17:55^a 1Sam 16:12, 21-22

Cule Abner in, “Maw siangpahrang, na nun rori vekin, ka thei lo a si,” tiah a ti.

56 Cu tikah siangpahrang in, “Hi tlangval cu zo-ih fapa a si ti zăwihliah uh,” tiah a ti.

57 ^aCun Filisṭia pa thahnak ihsin David a kir tikah Abner in a hruai ih, a kut ah Filisṭia paih lu thawn Saul hmaiah a fehpi. 58 ^bCule Saul in a hnenah, “Tlangval, zo-ih fapa na si?” tiah a ti.

17:57^a 1Sam 17:54

17:58^b Rut 4:17

Cule David in, “Keimah cu Bethlehem khawmi, na siahhlawh Jessi-ih fapa ka si,” tiah a let.

18

Jonathan le David Thukham an Tuah

1 ^aCule hitin a si, David in Saul biak a ṭheh tikah Jonathan-ih nunnak cu David-ih nunnak ah a kăwp ih, Jonathan in amai nunnak vekin, David cu a duh. 2 Saul in David cu cuih ni ah a hruai ih a paih inn ah a tlungter nawn lo. 3 ^bCun Jonathan in amai nunnak vekin a duhdawt ruangah, Jonathan le David cu thukham an tuah. 4 ^cCule Jonathan in a parih a kâwrfual cu a hlit ih a ralthuam thawn David a pe, a ralnâm, a thál le a taikhap tiangin.

18:1^a Sem 44:30; 2Sam 1:26; 4:4

18:3^b 2Sam 21:7

18:4^c Sem 41:42; 2Sam 18:11

Saul in David a Iksik

5 ^aCutin David cu Saul-ih a thlahnak kip ah a feh ih, fim zetin a nung. Cule Saul in anih cu raldo thiam mipapawl tlunih hotu ah a ret, cule David cu mipi zate ih mithmuh ah le Saul-ih siahhlawhpawl mithmuh khalih cohlan mi a si. 6 ^bInn lam panih an feh laiah hitin a rak cang, Filisṭia pa thahnak ihsin David a ra kir tikah, siangpahrang Saul hmuak dingin, Israel khua hmuahhmuah ihsin nunaupawl cu, hlasak le lam phahin, khuangtepawl thawn, aipuannak thawn le awnmawi hmanruapawl thawn an ra suak. 7 ^cNunaupawl in lām phahin hla an sak ih,

18:5^a 2Sam 5:2

18:6^b Suah 15:20; 2Sam 1:20; Sam 68:25

18:7^c Suah 15:21; 2Sam 18:3

“Saul in a thawng a thawng in a that ih,
David in a thawng sawm a thawng sawm in a that,”

tiah an ti.

8 Cun Saul cu a thin a heng tuk ih, an ṭawng mi cun a ^alung a hmuiter lo, cule anih in, “David hnenah cun a thawng sawm an pe ih, kei hnenah cun a thawng men lawng in pe. Anih in lalram siarlo ziang so a neih thei bêt cuang ding,” tiah a ti. 9 Cun cuih ni thawk ihsin Saul in David cu a hmusual thlang.

18:8^a lung a hmuiter lo: A ṭawng hrampi ah cun, “Mithmuh ah thil ṭha lo a si,” ti a si.

10 ^aCule a thaisun ah hitin a si, Pathian hnen ihsin thlarau sia cu Saul parah a rung thleng ih, Saul cu inn sungah thu a rak phuang. Cu tikah David in ni dangih a ti kel vekin a kut in awnmawi a tum, asinan Saul-ih kut ah feipi a rak um. 11 ^bCule Saul in a feipi cu a khawh, ziangahtile anih in, “Phar sansiah ah David ka khawhbĕt ding!” tiah a rak ti. Asinan David in vei hnih a rak kian. 12 ^cJehovah in David a umpi, asinan Saul cu a tlansan, curuangah Saul in David a ṭih. 13 ^dCuruangah Saul in a hnen ihsin David cu a ṭhawn ih, mi 1000 hotu a ralbawi ah a tuah, cule David cun mipi a hruaisuak in a hruaikir ṭheu. 14 ^eCule David cu a tuah mi hmuahhmuah ah fim zetin a nung ih, Jehovah in a umpi. 15 Curuangah Saul in David cu fim zetin a nung ti a hmuh tikah, amah cu a ṭih. 16 ^fAsinan David cu Israel miphun zate le Judah miphun zate in an duh, ziangruangahtile anih in mipi cu a hruaisuak in a hruaikir ṭheu a si.

18:10^a Lai 9:23; 1Sam 16:23; 19:23-24

18:11^b 1Sam 19:10

18:12^c Jos 1:5; Lai 16:20; 1San 22:11

18:13^d Mip 27:17; 2Sam 5:2

18:14^e Sem 39:2-3; Mip 14:43; 2Sam 7:9

18:16^f 2Sam 5:2

David in Mikal a Ṭhi

17 ^aCun Saul in David hnenah, “Zoh hnik, ka fanu upabik Merab hi, amah cu na nupi ah ka lo pe ding. Ka hrangah ralṭha zetin um men awla, Jehovah-ih ral donak cu do aw,” tiah a ti. Ziangahtile Saul in, “Ka kut in amah do hlah seh, cuhnakin Filisṭia-mipawlih kut in amah cu do sawn seh,” tiah a ruat.

18:17^a Mip 21:14; 1Sam 17:25

18 ^aCule David in Saul hnenah, “Siangpahrang mâkpa si dingah, kei cu zo so ka si ih, Israel ram ah ka nunnak siseh, ka paih innsungsang siseh ziang so an si?” tiah a ti. 19 ^bAsinan hitin a rak cang, Saul fanu, Merab cu David an neihter cān a thlen zik zawngah, cu nu cu Meholath peng-mi, Adriel nupi ah pek a rak si riangri.

18:18^a Suah 3:11

18:19^b Lai 7:22; 2Sam 21:8

20 ^aSaul fanu, Mikal in David a duh. Cule Saul an sim ih, cuih thil cun Saul-ih lung a hmuiter. 21 ^bCule Saul in, “David hrangih tháng a si thei nak dingah le Filisṭia-mipawlih kut in amah an do thei nak dingah, ka fanu cu David ka pe ding,” tiah a ti. Curuangah Saul in David hnenah, “Tuihsun ah ka mâkpa na si ding,” tiah a vei hnihnak a ti. 22 Cule Saul in a siahhlawhpawl cu, “A thupten David sim uhla, ‘Ngai hnik, siangpahrang cu na parah a lungsi ih, a siahhlawhpawl zaten an lo duh. Curuangah siangpahrang mâkpa si ko aw,’ tiih be dingin,” thu a rak pe hai.

18:20^a Sem 29:26

18:21^b Suah 10:7; Dnp 7:16

23 Cun Saul-ih siahhlawhpawl in David ih hnatheih ah cuih ṭawngkampawl cu an rak sim. Cule David in, “Kei cu mifarah le milangsar lo ka si ih, siangpahrang mâkpa si ding ti cu thil áwlteah maw nan ruah?” tiah a ti.

24 Cule siahhlawhpawl in Saul cu, “David in hitin a ṭawng,” tiah an sim.

25 ^aCun Saul in, “Hitin David nan sim pei, ‘Siangpahrang in siangpahrangih ralpawl phuhlâm dingah, Filisṭia-mipawlih vun zim 100 dah ti lo, man ngĕn a duh lo,’ tiin,” tiah a ti hai. Asinan Saul cun Filisṭia-mipawlih kut ih David thihter ding a ruat. 26 Saul-ih siahhlawhpawl in hi ṭawngkampawl, David an sim tikah, cumi cun siangpahrang mâkpa si dingah a lung a hmuiter zet. Ni tiampawl a cem hrih lo, 27 ^bcuruangah David cu a tho ih a feh, amah le a milaipawl thawn; cule Filisṭia mipa 200 an that. Cule David in an vun zim pawl cu a keng ih, siangpahrang mâkpa a si thei nak dingah siangpahrang hnenah, cupawl cu kimten an pek. Cun Saul in a fanu Mikal cu a nupi ah a pek. 28 Jehovah in David a umpi ti Saul in a hmu ih a thei, cule Saul fanu Mikal in David cu a duhdawt. 29 Cule Saul in David a ṭih sinsin. Cutin Saul cu David-ih ral ah a cang lan ta.

18:25^a Sem 34:12; Sam 8:2; Jer 20:10

18:27^b 2Sam 3:14

30 Cun Filisṭia-mipawlih ralbawipawl cu ral do dingah an fehsuak. Cule hitin a si, an fehsuah i kip in, David cu Saul-ih siahhlawhpawl hmuahhmuah hnakin fimsawnin a nung, cutin a hmin cu nasa zetih khaisan a si.

19

Saul in David Thah a Duh

1 Saul in a fapa Jonathan le a siahhlawhpawl hmuahhmuah cu David that dingin a sim hai. 2 Asinan Saul-ih fapa Jonathan cu David parah a lung a si zet. Cun Jonathan in David cu, “Ka pa Saul in that dingin a lo hawl. Curuangah zangfahten zing lam tiang ralringten um aw, hmun thup ah um awla, relh aw. 3 Cule ka fehsuak ding ih na umnak ramlak, ka pa kiangah ka dīng ding, cule na thuhla ka pa ka ruah ding. Cun ka hmuhsuah mi ka lo sim leh ding,” tiah a ti.

4 ^aCuti vek cun Jonathan in a pa, Saul hnenah David-ih ṭhatnak thu a sim ih, a hnenah, “Ziangruangahtile nangmah dokalhin thil sual a rak tuah lo ih, a thil ti mipawl cu nangmah lamah an ṭha zet, na siahhlawh, David dokalhin siangpahrang in thil sual tuah hlah seh. 5 ^bZiangahtile amai nunnak thāpin, Filisṭia-mipawl a that, cule Jehovah in Israel miphun zate hrangah a maksak zet mi runsuahnak a thlengter. Cumi cu na hmu ih, lungawi aipuangin na rak um. Cuti si cingin ziangah so săn um loin, David that dingin mawhnak nei lo thisen dokalhin thil sual na tuah ding?” tiah a ti.

19:4^a Thf 17:13; 31:8-9; Jer 18:20

19:5^b Dnp 19:10-13; Lai 9:17; 1San 11:14

6 Cuti cun Saul in Jonathan aw cu a ngaithla ih, Saul in, “Jehovah a nun rori vekin, anih cu thah a si lo ding,” tiah sia a săm. 7 Cun Jonathan in David cu a ko ih, Jonathan in cuih thil hmuahhmuah cu a sim thluh. Cule Jonathan in David cu Saul hnenah a hruai ih, anih cu hi hlan vekin Saul hnenah a um.

8 Cule ral doawknak a umsal, David cu a fehsuak ih, Filisṭia-mipawl a do hai, nasa zetin a that hai ih a hnen ihsin an tlânsia.

9 ^aA kut ah feipi kengin, amai inn ih a to laiah, Saul parah Jehovah hnenin thlarau sia a rung thleng. Cule David in a kut in awnmawi a tum. 10 Cun Saul in a feipi thawn phar sansiah ih David khawhbĕt a tum, asinan David cu Saul hnen ihsin a tlanhlo, cule a feipi cu phar ah a khawh cukci. Cule cuih zan cu David a tlân ih a luat.

19:9^a Lai 9:23; 1Sam 16:16

11 ^aSaul in David-ih inn ah zing ah David bawh le that dingin palaipawl a thlah hai. Cule David-ih nupi Mikal in a hnenah, “Tuihzan ih na nunnak na humhim lo asile, thaizing cu thah na si ding,” tiah a sim. 12 ^bCutin Mikal in David cu tukvirh ihsin a ṭumter. Cule David cu a feh ih, a tlânsia, cule a luat. 13 ^cCule Mikal in milim a lâk ih, ihnak ah a hlum, a lukham dingah me hmul a ret ih cumi cu hnipuan in a khuh. 14 ^dDavid kai dingin Saul in palaipawl a thlah tikah Mikal in, “A dam lo,” tiah a rak ti hai.

19:11^a Lai 16:2

19:12^b Jos 2:15; Apo 9:25; 2Ko 11:33

19:13^c Sem 31:19

19:14^d Jos 2:4

15 Cun Saul in palaipawl cu David va táwng dingin a thlahsal hai ih, “Amah ka thah thei nak dingah, a ihnak thawn ka hnenah rak zâwn uh,” tiah a ti. 16 Cule palaipawl an luh tikah, ngai hnik, a lu ah me hmul khuh mi milim cu ihnak ah a um. 17 Cu tikah Saul in Mikal hnenah, “Ziangah so hi vekin i bum ih, a luatsuak thei nak dingah ka ral na thlah?” tiah a ti.

Cule Mikal in Saul cu, “Anih in ka hnenah, ‘I fehter aw! Ziangah so ka lo thah ding?’ i ti,” tiah a let.

18 David cu a tlân ih a luat, Ramah ah Samuel hnenah a feh. Cule Saul in a parih a tidān hmuahhmuah cu Samuel a sim thluh. Cule amah le Samuel cu an feh ih, Naioth ah an cêng. 19 Saul hnenah, “Ngai hnik, Ramah ih Naioth ah David a cêng!” tiah an sim. 20 ^aCutin David kai dingah Saul in palaipawl a thlah. Cule annih in profet rual thuphuang lai, an tlunah Samuel cu hotu siih dingin an hmuh tikah, Pathian Thlarau cu Saul-ih palaipawl parah a rung thleng ih, annih khal thu an phuang ve. 21 Cule Saul an sim tikah, palai dang pawl a thlahsal ih, thu an phuang ve thotho. Cun Saul in a vei thumnak palaipawl a thlahsal, cule annih khal thu an phuang ve thotho. 22 Cun amah khal Ramah ah a feh ih, Sekhu ih tikhur kau zet a thleng. Cule anih in a sut ih, “Samuel le David khuiah an um?” tiah a ti.

19:20^a Mip 11:25; Joh 7:32

Cule mi pakhat in, “Ngai hnik, Ramah ih Naioth ah an um,” tiah a sim.

23 Cule anih cu Ramah ih Naioth ah a feh. Cun Pathian Thlarau cu Saul par khalah a thleng ve ih, Ramah ih Naioth khua a thlen hlanlo thu a phuang vingvo. 24 ^aCule anih khal a hnipuan a hlit ih, Samuel hmaiah cuti vek cun thu a phuang, cule cuih sun pumhlum le cuih zan pumhlum cu taklawng in a zau. Curuangah mi in, “Saul teh profet lakah a tel ve maw si?” tiah an ti.

19:24^a 2Sam 6:20; Isa 20:2

20

David tlunih Jonathan Rinumnak

1 ^aCun David cu Naioth ihsin Ramah ah a tlân, cule a feh ih Jonathan hnenah, “Ziang simaw ka rak tuah ih? Ka mawhsualnak ziang a si ih, na paih hmaiih ka sualnak ziang a si, anih in ka nunnak a hawl?” tiah a ti.

20:1^a Sam 40:14

2 Jonathan in a hnenah, “Lamlam ah! Na thi lo ding! Ngai hnik, ka pa in in sim hmaisa ta loin, thil tûm siseh, thil fate siseh zianghman a tuah lo ding. Cule ziangah saw ka pa in hih thu cu ka lakah a thuh ding? A thup hrimhrim lo ding,” tiah a ti.

3 ^aCun David in sia a săm ih, “Na mit ah duhsaknak ka co ti na pa in a thei rori ih, anih in, ‘Himi cu Jonathan theihter hlah uh, culole a thin a na pang ding,’ tiah na pa in a ti. Asinan thungaingaiin Jehovah a nun rori vekin le nangmah na nun vekin, keimah le thihnak karlak cu kar khat lawng a si,” tiah a ti.

20:3^a Dnp 6:13

4 Cun Jonathan in David hnenah, “Na duh mi pauhpauh ka lo tuahsak ding,” tiah a ti.

5 ^aCule David in Jonathan hnenah, “Ngai hnik, thaisun cu Thla Thar a si ih, siangpahrang zawngih rawl ei tengteng ding ka si. Asinan ni thumnak zan lam tiang ramlak ih relh dingah feh hram ning. 6 Na pa in in hlam asile, ‘David cun a khua, Bethlehem ih va feh duak dingin nasa zetin i dil, ziangahtile cu tawkah an innsungsang zate hrangah kum tin thawinak a um,’ tiin na sim pei. 7 Anih in, ‘A ṭha e,’ tiih a ti asile, na siahhlawh cu a him ding. Asinan anih cu a thin a heng zet asile, anih in thil ṭha lo tuah a tum ti thei mai aw. 8 ^bCuruangah na siahhlawh hi ṭhaten i tuah hram aw, ziangahtile na siahhlawh cu na zawngah Jehovah thukham sungah na hruailut a si. Sikhalsehla keimah ah mawhsualnak a um asile, nangmah rori in i that mai aw, Ziangruangah so na pa hnen kherkher ih in hruai ding?” tiah a ti.

20:5^a Mip 10:10

20:8^b 2Sam 14:32

9 Asinan Jonathan in, “Na hnen ihsin cucu hla seh! Ziangahtile ka pa in na parah thil ṭha lo thlenter ding a tum a si ti ka theihfel asile, nangmah sim loin maw ka um ding?” tiah a ti.

10 Cun David in Jonathan hnenah, “Na pa in thaphrang zetin lo let sehla, zo in so in sim leh ding?” tiah a ti.

11 Cule Jonathan in David hnenah, “Ra aw, ramlak ah kan feh pei,” tiah a ti. Cun an pahnih in ramlak ah an feh. 12 Cule Jonathan in David hnenah, “Israel-ih Pathian Jehovah cu theihpitu si seh! Thaisun lole tipsun, tu tikcu hrawngah ka pa ka sut ding, ngai hnik, David parah duhsak zetih a um asile, na hnenah lo thlah lole lo hmuh loin ka um ding maw si? 13 ^aAsinan cumi in thil ṭha lo na parih tuah dingin ka pa a lunghmuiter asile, ka lo sim ding ih ka lo thlah ding, cutin himdamten na fehsuak ding. Cutiih ka tuah lo asile, Jehovah in a titiin ti sehla, Jonathan tlunah tam sinsinin. Ka pa a umpi vekin Jehovah in lo umpi hram seh. 14 ^bCule ka thihlonak dingah, ka nun laiah nang in Jehovah-ih ngilneihnak cu i hmuh lawng si loin, 15 ^cna ngilneihnak cu ka sungkuapawl hnen ihsin kumkhuain na sâtcat lo pei, lamlam ah, Jehovah in David-ih doralpawl hmuahhmuah leilung vangdâp ihsin a thah thluh tik khalah na sâtcat lo pei,” tiah a ti. 16 ^dCun Jonathan in, “Jehovah in David-ih ralpawl kut ah phût seh,” tiin, David sungkua thawn thukham a tuah. 17 ^eCun Jonathan in David a duhdawt ruangah, Jonathan in David cu thukam a tuahtersal, ziangahtile amai nunnak a duh vekin David cu a duh.

20:13^a Rut 1:17

20:14^b Sem 40:14

20:15^c 2Sam 9:7

20:16^d Jos 22:23

20:17^e 1Sam 18:1; 2Sam 1:26

18 Cule Jonathan in David hnenah, “Thaisun cu Thla Thar a si ih, na tonak a lawng ding ruangah, na um lozia a lang ding. 19 Cule ni thum na cām hnuah, zamrang zetin suk awla, hlanih buai ruri laiih na relhnak hmun ah ra aw. Cule Ezel lungpi kiangah rak um aw. 20 ^aCun hmui bah mi nei vekin, cuih sirah thál fung pathum ka rak sai ding. 21 Cule ngai hnik, nauhak ka thlah ding ih, ‘Va feh awla, thál fungpawl va hawl aw,’ ka ti ding. Nauhak pa hnenah, ‘Zoh hnik, thál fungpawl cu nangmah lam kapah an um, la awla ra aw,’ ka ti asile, Jehovah a nun rori bangin, na hrangah himnak a um ih, siatsuahawknak a um lo. 22 Asinan nauhak pa hnenah, ‘Zoh hnik, thál fungpawl cu nangmah lanah an um,’ ka ti asile, fehlan mai aw, ziangahtile Jehovah in a lo fehlanter a si. 23 ^bCule nang le kei in kan rak rel zo mi thuhla hrang lawngte ah cun, ngai hnik, Jehovah cu nangmah le keimah karlakah um kumkhua seh,” tiah a ti.

20:20^a 2Sp 13:5, 15

20:23^b Sem 31:49-50, 53; 1Sam 20:42

24 ^aCun David cu ramlak ah a relh. Cule Thla Thar a thlen tikah, siangpahrang cu rawl ei dingin a to. 25 Ni dang vekin, siangpahrang cu a tonak phar kiangah a to. Cule Jonathan cu a tho ih, Abner cu Saul kiangah a to, asinan David-ih hmun cu a lawng. 26 ^bSikhalsehla Saul in cuih ni ah zianghman a ṭawng lo, ziangahtile, “David parah thil pakhat khat a thleng a si ding, a thiang lo a si ding, a thiang lo a si riai ding,” tiah a ruat. 27 Cule hitin a si, a thaisun, thla thar ni hnihnak ah, David tonak a lawng thotho. Cule Saul in a fapa Jonathan hnenah, “Ziangruangah Jesse-ih fapa cu mizansun le tuihsun rawl ei dingah a rat lo?” tiah a ti.

20:24^a Mip 10:10

20:26^b Pui 7:20-21

28 Cu tikah Jonathan in Saul hnenah, “David in nasa tukin Bethlehem feh dingin i dil. 29 ^aAnih in, ‘I fehter hram aw, ziangahtile kan innsungsang in khua ah raithawinak kan nei ih, ka ulepawl in tel tengteng dingin thu in pe. Cule na mit ih duhsaknak ka co asile, ka ulepawl hmu dingin i fehter hram aw,’ i ti. Curuangah siangpahrang cabuai ah a ra tel thei lo,” tiah a let.

20:29^a Sem 8:20

30 Cun Saul-ih thinhengnak cu Jonathan dokalhin a tho ih, a hnenah, “Nang nunau hlothlau le hél fapa! Jessi-ih fapa cu na mualphonak ding le na nuih taklawngnak mualphoter dingin na hril ti thei lo maw ka si? 31 Ziangahtile Jessi-ih fapa leilung parih a nun sung cu, nang cu dĭn hngeh na si lo ding ih na uknak khal dĭn hngeh a si lo ding. Curuangah atu-ah kotu ding thlah awla, amah cu ka hnenah run hruai uh, ziangahtile ^aa thi tengteng ding a si,” tiah a ti.

20:31^a a thi tengteng ding: A ṭawng hrampi ah cun, “thihnak fapa,” ti a si.

32 ^aCule Jonathan in a pa Saul cu a sawn ih a hnenah, “Ziangruangah amah cu thah a si ding? Ziang so a rak tuah ih?” tiah a ti. 33 Cun Saul in Jonathan that dingin feipi in a khawh, cumi ihsin a pa in David thah a tum ti Jonathan in a thei. 34 Cule Jonathan cu nasa zetih thinhengin cabuai ihsin a tho ih, cuih thla a ni hnihnak sun cu rawl a ei lo, ziangahtile anih cu David hrangah a thin a nâ, ziangruangahtile a pa in David mualpho ko a tuah.

20:32^a Sem 31:36; Mat 27:23

35 Cule hitin a si, a thaizing ah David thawi an tikcu khiah cān ah Jonathan cu ramlak ah a feh, a zawngah nauhak pate khal a tel. 36 Cun a nauhak pate hnenah, “Va tlân awla, ka sai mi thál fungpawl va hawl aw,” tiah a ti. Cutiih nauhak pate a tlân laiah nauhak pate lanin thál fung cu a sai lala. 37 Nauhak pate cu Jonathan ih sai mi thál fung umnak hmun a va thlen tikah, nauhak pateih dung ihsin Jonathan a ausuak ih, “Thál fung cu nangmah lanah a si lo maw?” tiah a ti. 38 Cule nauhak pateih dung ihsin Jonathan cu a ausuak ih, “Manhlap aw, zamrang aw, muangcâng hlah!” tiah a ti. Cutin Jonathan-ih nauhak pate cun thál fungpawl cu a sarkhawm ih a pu hnenah a kirsal. 39 Asinan nauhak pate cun zianghman a thei lo. Jonathan le David lawngin cuih thuhla cu an thei. 40 Cun Jonathan in a hriamhreipawl cu nauhak pa a pe ih, a hnenah, “Feh aw, khua ah phur hai aw,” tiah a ti.

41 ^aNauhak pate a fehliam veten, thlang lam ihsin David a hung suak ih, a hmai lei lam hawiin a tlu, cule vei thum a kûn. Cule pakhat le pakhat an hnamaw ih, an ṭahaw, asinan David a ṭap luar deuh. 42 ^bCun Jonathan in David hnenah, “Hnangamten feh aw, ‘Jehovah cu nangmah le keimah karlakah le ka tesinfa le na tesinfa karlakah um kumkhua seh,’ tiin Jehovah hmin in sia kan săm zo kha,” tiah a ti. Cutin David cu a tho ih a fehsuak, cule Jonathan khal khaw sungah a tlung.

20:41^a Sem 45:14; Rut 2:10; 2Sam 1:2

20:42^b Sem 31:50; 2Sam 1:26; 9:1; Thf 18:24

21

David in Ahimelek a Bum

1 ^aDavid cu Nob khua ah puithiam Ahimelek hnenah a feh. Cule Ahimelek in David a tawn tikah a ṭih ih, “Ziangruangah so nangmah lawng na si, zohman na zawngih an um lo?” tiah a ti.

21:1^a Neh 11:32; Isa 10:32

2 Cun David in puithiam Ahimelek hnenah, “Siangpahrang in thil ti dingin thu i pe ih, ka hnenah, ‘Tuah dingih ka lo thlahnak săn thil ka lo tuahter tum mi, asilole thu ka lo pek mi hi zokhal theihter hlah,’ tiah i ti. Cule ka tlangvalpawl cu khui hmun khui tawkah ti ka sim cia hai. 3 Curuangah atu-ah na kut ah ziang na nei? Ka kut ah sang hlăwm nga i pe aw, culole na neih mi pauhpauh i pe aw,” tiah a ti.

4 ^aCule puithiam in David cu a sawn ih, “Ka kut ah sang menmen a um lo, asinan sang thianghlim cu a um, nunaupawl hnen ihsin tlangvalpawl an thiarfihlimawk tâk ah,” tiah a ti.

21:4^a Suah 19:15; Pui 15:18; 24:8-9; Mat 12:4

5 ^aCun David in puithiam cu a let ih, a hnenah, “Thungaingaiin, a liam cia ni thum ka pawhsuah thawk ihsin nunaupawl cu kan hnen ihsin tihran an si. Cule tlangvalpawlih ^bthilpawl khal an thianghlim, tuihni ah sang khal serhhran a si ko nân, sang menmen a si,” tiah a ti.

21:5^a Dnp 23:9-11; Jos 3:5; 2Sam 11:11; 1Th 4:4

21:5^b thilpawl: Tlangvalpawlih neih mi le hnipuan a relnak a si.

6 ^aCun puithiam in sang thianghlim cu a pe, ziangahtile cu tawkah cun Sangserh an lâk ni ih sang hlăwm ih thlĕng dingih Jehovah hmai ihsin an lâk mi sang dah ti lo sang dang a um lo. 7 Cuih sun ah Saul-ih siahhlawhpawl lakih pakhat, Jehovah hmaiih kaihtāng mi a um. Cule a hmin cu Doeg a si, Edom-mi a si, Saul-ih ranpi rual khāltupawl hotu lu bik a si.

21:6^a Suah 25:30; Mat 12:3-4; Mar 2:25-28; Luk 6:3-5

Goliath-ih Ralnâm David an Pe

8 Cule David in Ahimelek hnenah, “Na kut ah ralnâm pakhat, asilole feipi pakhat khat a um lo maw? Ziangahtile siangpahrang thil ti ding mi cu zamrang zetih tuah a ṭul ruangah ka zawngah ka ralnâm siseh, ka hriamhreipawl siseh ka keng lo,” tiah a ti.

9 Cun puithiam in, “Elah phaikuam ih na thah mi, Filisṭia pa Goliath-ih ralnâm cu, zoh hnik, Puithiam Kâwrcung dungah puan ih tuamin a um. Cumi cu na lâk ding asile la aw. Ziangahtile himi siarlo a dang a um lo,” tiah a ti.

Cule David in, “Cumi vek tluktu a um lo, i pe aw,” tiah a ti.

Gath ah David a Tlân

10 Cun David cu a tho ih cuih ni ah Saul hmai ihsin a tlân ih, Gath siangpahrang Akish hnenah a feh. 11 Cule Akish-ih siahhlawhpawl in a hnenah, “Hi pa cu hi ram siangpahrang David a si lo maw? Pakhat le pakhat lām phahin,

‘Saul in a thawng a thawngin a that ih,
David in a thawng sawm a thawng sawmin a that,’

tiin, amah cu hla in an awi a si lo maw?” tiah an ti.

12 Cun cuih ṭawngkampawl cu David in a thinlung sungah a ret ih, Gath siangpahrang Akish cu a ṭih zet. 13 Cule an hmaiah a umdān a thlĕng ih, mi-â vekin an kut tăngah a umawter, kăwtka kharpawl tla a hiat ih, a khabe hmul ah a khadi a fawrter thluahthlo. 14 Cun Akish in a siahhlawhpawl hnenah, “Zoh hnik uh, hi pa hi mi-â a si ti nan thei ko. Ziangruangah amah cu ka hnenih nan rak hruai. 15 Mi-â ka tlaksam ruangah maw hi pa hi a atzia langter dingin ka hmaiih nan rak hruai? Hi pa hi ka inn ah a lut ding maw?” tiah a ti.

22

David-ih Pacang 400

1 ^aCuruangah David cu, cu tawk ihsin a suak ih Adullam pûk ah a tlânlut. A ulepawl le a paih sungkua zaten cuih thu an theih tikah, cu tawkah a hnenah an ra. 2 ^bCule mivansang pauhpauh, leiba nei pauhpauh, ^clungawi tawknak nei lo pauhpauh cu a hnenah an táwngkhawmaw. Cutin anih cu an tlunih bawi ah a cang. Cule a hnenah pacang 400 hrawng an um.

22:1^a Sem 38:1

22:2^b 2Sam 15:20

22:2^c lungawi tawknak nei lo: A ṭawng hrampi ah, “thinlung khâtnak” ti a si.

3 Cun David cu cu tawk ihsin Moab ram Mizpah ah a feh, cule Moab siangpahrang hnenah, “Pathian in ka hrangah ziang a tuah ding ti ka theih hlanlo, zangfahten hi tawk na hnenah ka nu le ka pa rain um hai seh,” tiah a ti. 4 ^aCutin anih in anmah cu Moab siangpahrang hmaiah a hruai hai ih, ral hruangkulh sungih David a um sung hmuahhmuah annih cu a hnenah an cêng.

22:4^a Sem 19:37

5 ^aCun Profet Gad in David hnenah, “Ral hruangkulh sungah um nawn hlah, suak awla, Judah ram ah feh aw,” tiah a ti. Cule David cu a suak ih, Hereth tupi sungah a feh.

22:5^a 2Sam 23:14; 24:11; 1San 21:9; 2San 29:25

Saul in Puithiampawl a That

6 ^aDavid le a hnenih um pacangpawl hmuhsuah an si zo ti Saul in a theih tikah, Saul cu a kut ah a feipi kengin Gibeah peng ih Ramah khua ih esel thingkung hnuaiah a um, cule a siahhlawhpawl hmuahhmuah cu amah kulhin an ding. 7 ^bCule Saul in a kiangih ding a siahhlawhpawl hnenah, “Nannih Benjamin-mipawl, ngai uh! Jessi-ih fapa in ló siseh, sabit hmuan siseh a lo pe cio ding maw? Ralkap 1000 hotupawl le ralkap 100 hotupawl ah teh a lo ret thluh pei maw? 8 ^cNan zaten keimah in phiarthup ih, ka fapa in Jessi-ih fapa thawn thukham a tuah ti ka hnenih phuanglangtu zohman nan um lo ih, i riahsiatpitu le tuihsun vekin ka fapa in ka siahhlawh cu keimah dokalh dingin a căwkphur ti ka hnenih phuanglangtu nanmah lakah pakhat hman nan um lo,” tiah a ti hai.

22:6^a Sem 21:33; Lai 4:5

22:7^b Dnp 1:15; 1Sam 8:12; 1San 12:16-18

22:8^c 1Sam 20:16

9 Cun Saul-ih siahhlawhpawl hotu ih ret mi, Edom-mi Doeg in a let ih, “Jessi-ih fapa cu Nob khua ah Ahitub-ih fapa Ahimelek hnenih a feh ka hmu. 10 ^aCule anih in a hrangah Jehovah a ráwn ih, amah cu lamcaw le Filisṭia pa Goliath-ih ralnâm a pe,” tiah a sim.

22:10^a Mip 27:21

11 Cule siangpahrang in Ahitub-ih fapa, Puithiam Ahimelek le a paih sungkua hmuahhmuah le Nob khua ih puithiampawl ko dingin mi a thlah. Cule an zaten siangpahrang hnenah an ra. 12 Cule Saul in, “Ahitub-ih fapa, atu-ah ngai hnik,” tiah a ti.

Anih in, “Ka bawipa, hi tawkah ka um ko,” tiah a sawn.

13 Cun Saul in a hnenah, “Sang le ralnâm rak pein le Pathian rawnsakin, tuihni ih a ti vekih in do dingin le in bawh dingin ziangah saw nangmah le Jessi-ih fapa in in phiar?” tiah a ti.

14 Ahimelek in siangpahrang cu a let ih, “Siangpahrang mâkpa, thu na peknak ih fehtu, nan sungkua ih mizahum, David vek mirinum hi na siahhlawhpawl zate lakah zo so um? 15 Pathian ka rawnsak cu atu hi a hmaisabik a simaw? Si hlah! Siangpahrang in a siahhlawh siseh, a paih sungkua siseh, ziang thu hman puh hlah seh. Ziangahtile na siahhlawh in hi thu hmuahhmuah hi zianghman a thei lo, a tam simaw, a mál simaw,” tiah a ti.

16 Cule siangpahrang in, “Ahimelek, nang le na paih sungkua zaten nan thi hrimhrim ding,” tiah a ti. 17 ^aCun siangpahrang in a kiangih ding, kiltupawl hnenah, “Heraw uhla, Jehovah-ih puithiampawl that uh, ziangahtile an kut khalin David an ṭan, ziangruangahtile a tlan lai an thei ko na cingin in sim lo,” tiah a ti hai. Asinan siangpahrangih siahhlawhpawl in Jehovah-ih puithiampawl that dingin an kut an suah duh lo. 18 Cule siangpahrang in Doeg hnenah, “Nang heraw awla, puithiampawl that aw,” tiah a ti. Cutin Edom-mi Doeg cu a her ih puithiampawl cu a bei hai, cuih ni ah pat zai fêmte ih tah mi Puithiam Kâwrcung hruh mipa 85 a that. 19 Cuihtlunah, puithiampawlih khua, Nob khal ralnâm hriam in a bei ih, nunaupawl le mipapawl, nauhakpawl le nausen hnawi fawp lai pawl, caw cang pawl le lākpawl le tuu rual cu ralnâm hriam in a that hai.

22:17^a Suah 1:17

20 ^aAhitub-ih fapa, Ahimelek fapapawl lakih pakhat, a hmin Abiathar cu a luat ih David hnenah a tlân. 21 Cule Abiathar in David hnenah Saul in Jehovah-ih puithiampawl a thah thu a sim. 22 Cule David in Abiathar hnenah, “Edom-mi, Doeg, kha tawkih a um ni ah khan, Saul a sim tengteng ding ti ka thei cia. Na paih sungkuapawl hmuahhmuah cu keimah ruangih thi an si. 23 Ka hnenah um awla, ṭih hlah. Ziangahtile ka nunnak hawltu cun na nunnak khal a hawl ve, asinan ka zawngah nang cu na him ding,” tiah a ti.

22:20^a 1Sam 23:6; 2Sam 15:24; 1Sp 1:7

23

David in Keilah Khawpi a Run

1 ^aCun David hnenah, “Zoh hnik, Filisṭia-mipawl in Keilah khua an do ih, an hruih hmun ih thlairawl an lâksak,” tiah an sim.

23:1^a Mip 18:27; Jos 15:44; Joe 2:24

2 ^aCuruangah David in, “Ka feh ding ih hi Filisṭia-mipawl hi ka do pei maw?” tiah Jehovah a ráwn.

23:2^a 2Sam 2:1; 5:19

Cule Jehovah in David hnenah, “Feh awla, Filisṭia-mipawl cu do aw, cule Keilah khua run aw,” tiah a ti.

3 Asinan David-ih milaipawl in a hnenah, “Zoh hnik, hi tawk Judah ram ih um cing hmanin kan ṭih sokhaw. Filisṭia-mipawlih ralkappawl do dingin Keilah khua ah kan feh asile, ziang tlukin kan ṭih sinsin pei,” tiah an ti. 4 ^aCun David in Jehovah a ráwnsal.

23:4^a Jos 8:7

Cule Jehovah in amah cu a let ih, “Tho aw, Keilah ah vung feh aw. Ziangahtile Filisṭia-mipawl na kut ah ka lo pe ding,” tiah a ti. 5 Cule David le a milaipawl cu Keilah ah an suk ih Filisṭia-mipawl an do, nasa zetin an that ih an sumhnámpawl an lâksak. Cutin David in Keilah khua ih umpawl cu a run. 6 Cun hitin a rak cang, Ahimelek-ih fapa Abiathar cu Keilah khua, David hnenih a tlanluh laiah, a kut ah Puithiam Kâwrcung a keng.

7 ^aCule Keilah khua ah David a feh ti Saul an sim. Cu tikah Saul in, “Pathian in anih cu ka kut ah i pe zo, ziangahtile kăwtkapawl le a tlângpawl nei, khaw sungah lutin amah le amah a kharkhumaw,” tiah a ti. 8 Cun Saul in ral do dingah, David le a milaipawl kulh dingin, Keilah khua ih suk dingin a milaipawl zaten a kokhawm.

23:7^a Dnp 32:30; Sam 31:21

David in Pathian Kaihhruainak a Hawl

9 Saul in a parah thil ṭha lo khua a khâng ti David in a theih tikah, Puithiam Abiathar hnenah, “Hi tawkah Puithiam Kâwrcung rak keng aw,” tiah a ti. 10 Cun David in, “Maw Jehovah Israel-ih Pathian, na siahhlawh hin, Saul cu keimah ruangah khua tisiat dingin Keilah khua ih suk a tum ti ka thei. 11 Keilah pacangpawl in a kut ah in ap pei maw? Na siahhlawh in ka hna ih ka theih vekin, Saul teh a suk pei maw? Maw Jehovah, Israel-ih Pathian, na siahhlawh hi sim hram aw, ka lo ngen a si,” tiah a ti.

Cule Jehovah in, “A rung suk ding,” tiah a ti.

12 Cule David in, “Keilah pacangpawl in teh keimah le ka milaipawl hi Saul kut ah in ap pei maw?” tiah a ti.

Cule Jehovah in, “An lo ap ding,” tiah a ti.

Ramṭhing ah David a Tlân

13 Cun David le a milai 600 hrawng cu an tho ih, Keilah khua ihsin an suak, cule an feh thei nak nak ah an feh. Keilah khua ihsin David a tlânsuak ti thu Saul an sim, cule anih cun a dawi nawn lo.

14 ^aCule David cu ramṭhing ih ral hruangkulhpawl ah a um ih, Zif Ramṭhing ih tlang ram ah a câm. Saul in amah cu ni tinten a hawl, asinan Pathian in Saul kut ah anih cu a pe lo. 15 David cun a nunnak hawl dingin Saul a fehsuak ti a hmu. Cule David cu Zif Ramṭhing thing rûl lakah a um. 16 ^bCun Saul-ih fapa, Jonathan cu a tho ih David hnenah thing rûl lakah a feh, cule Jonathan in David cu Pathian ah a cakter. 17 Cule Jonathan in David hnenah, “Ṭih hlah, ziangahtile ka pa Saul-ih kut in a lo hmu lo ding. Nang cu Israel tlunah siangpahrang na si ding ih, kei cu nangmah sangtu ka si ding. Cumi cu ka pa Saul khal in a thei,” tiah a ti. 18 ^cCule an pahnih in Jehovah hmaiah thukham an tuah. Cun David cu thing rûl lakah a um ih, Jonathan cu a inn ah a tlung.

23:14^a Jos 15:24; Sam 32:7; 54:3-4; 55:7

23:16^b Sam 18:2

23:18^c 2Sam 9:1

19 Cun Gibeah ih Saul hnenah Zif-mipawl an so ih, “David cu kan hnenah thing rûl lakih ral hruangkulhpawl ah, Jeshimon thlang lam, Hakilah tlang ah a relh a si lo maw? 20 Curuangah atu-ah, Maw siangpahrang, na nunnak in rung suh a duh tuk bangtukin rung suk mai aw, kan mawhphurh cu siangpahrang kut ih amah peklut cu a si ko,” tiah an ti.

21 ^aCule Saul in, “Jehovah in thlawsuah lo pe hram seh, ziangahtile ka parah lainatnak nan nei a si. 22 Feh uhla hawlsuak rori uh, cule a relhnak hmun hmuh tum uh, cu tawkah zo in a hmu ti tla fiangten va zohhliah uh. Ziangahtile anih cu mihrăwkhrawl a si, tiah in sim a si. 23 ^bCuruangah a relhnak hmunpawl zaten thei thluh uhla, thufiang thawn ka hnenah rasal tengteng uh, cule nan hnenah ka feh ve ding. Cule hitin a si ding, hi ram ih a um asile, Judah hnám hmuahhmuah hrawhsuakin amah cu ka hawl ding,” tiah a ti.

23:21^a Rut 2:20; 2Sam 2:5

23:23^b Sem 31:36

24 ^aCule an tho ih Saul hlanah Zif ah an feh. Asinan David le a milaipawl cu Jeshimon thlang lam, Arabah phairawn ih Maon Ramṭhing ah an um.

23:24^a Jos 15:55

Maon Ramṭhing ah David a Um

25 Saul le a milaipawl amah hawl dingih an fehsuak tikah, David an sim. Curuangah David cu lungpi lamah a suk ih, Maon Ramṭhing ah a um. Saul in cuih thu a theih tikah, Maon Ramṭhing ah David cu a dawi. 26 ^aCun Saul cu tlangih khat lamah a feh ih, David le a milaipawl cu tlangih khat lamah an feh. Saul le a milaipawl cun David le a milaipawl cu kaingah dingin an kulh ruangah, David cu Saul ṭih ah tlânsuakngah dingin a hmanhmawh zet. 27 Asinan palai pakhat Saul hnenah a ra thleng ih, “Zamrang awla, ra tlung aw, ziangahtile Filisṭia-mipawl in kan ram in sîm,” tiah a ti. 28 Curuangah Saul cu David a dawinak ihsin a kir, cule Filisṭia-mipawl do ah a feh, curuangah cuih hmun cu, “Luatnak Lungpi,” tiah an ko. 29 ^bCun cu tawk ihsin David cu a so ih, En Gedi ih ral hruangkulhpawl ah a cêng.

23:26^a Sam 17:9

23:29^b Jos 15:62; 2San 20:2; Sol 1:14

24

David in Saul a Zuah

1 ^aCule hitin a si, Saul cu Filisṭia-mipawl dawinak in a kirsal tikah, “Zoh hnik, David cu En Gedi Ramṭhing ah a um,” tiin amah cu an sim. 2 Cun Saul in Israel miphun zate hnen ihsin hril mi mipa 3000 a hruai ih, David le a milaipawl hawl dingin Zâtharpawlih Lung khām lamah an feh. 3 ^bCule anih cu pûk umnak zin kiang, rante rual hruangkulh ah a thleng ih, cu tawkah zunpâwng thiar dingin Saul cu a feh. David le a milaipawl cu cuih pûk dĕngah an rak um. 4 ^cCun David-ih milaipawl in a hnenah, “Jehovah in na hnenih a lo sim mi ni cu hihi a si, ‘Ngai hnik, na kut ah na ral pa ka lo pe ding, cule ṭha na ti dandanin a parah na tuah pei,’ a ti kha,” tiah an ti. Cule David cu a tho ih, Saul-ih kâwrfual zim cu a thupten a tăn. 5 ^dCun neta lamah cun hitin a si, Saul-ih kâwrfual ruangah David a thin a nuam lo.

24:1^a Jos 15:62; 1Sam 23:28-29

24:3^b Lai 3:24

24:4^c 2Sam 4:8

24:5^d 2Sam 24:10

6 ^aCule a milaipawl hnenah, “Jehovah-ih hriak thih a si ti thei cingin, Jehovah-ih hriak thih ka bawi parih hi thil tuah ding, ka kut ka thlak ding cu Jehovah in i kham hram seh,” tiah a ti. 7 Hi ṭawngkampawl in David in a milaipawl a kham hai ih, Saul thah a siang hai lo. Cule Saul cu pûk ihsin a tho ih, a feh vivo.

24:6^a Sam 26:11

8 A hnu deuhah David khal pûk sungin a suak ih, “Ka bawi siangpahrang!” tiin Saul cu a hei auh. Cule Saul in a dung lam a zoh tikah, David cu a hmai leilung lam hawiin a kûn ih, a băwkkhup. 9 Cule David in Saul hnenah, “ ‘Ngai hnik, David in tuahmawh a lo tum,’ ti a lo simtu mipapawlih ṭawngkampawl cu ziangah na zum? 10 ^aZoh hnik, tuihsun ah nangmah cu pûk ah Jehovah in ka kut ah in pe ti tuihsun ah na mit in a hmu, nangmah lo thah in ngen. Asinan ka mit in a lo zuah ih, kei in, ‘Ka bawi parah ka kut ka thlak lo ding, ziangahtile anih cu Jehovah ih hriak thih mi a si,’ ka ti. 11 ^bCuihtlunah, ka pa, zoh hnik, a si, na kâwrfual zim ka kut ah a um ti na thei! Ziangahtile na kâwrfual zim ka tán nân, ka lo thahlonak in, ka kut ah thil ṭha lo a um lo ih, helnak khal a um lo ti le nangmah dokalhin thil sual ka tuah lo ti na hmu ih na thei. Cuti cingin nang cun ka nunnak la dingin na hawl. 12 ^cJehovah in nang le keiih karlakah lairel sehla, Jehovah in na parah phu i hlamsak seh. Asinan ka kut in a lo dokalh lo ding. 13 ^dHlanlai thufim ih a sim mi, ‘Sualralnak cu misualrál hnen ihsin a suak,’ a ti vekin, ka kut cu na parah thlak si hlah seh. 14 Israel siangpahrang cu zawih hnuah a ra suak? Zo so na dawi? Uico thi a simaw? Uihli a simaw? 15 ^eCuruangah Jehovah cu laireltu si sehla, nang le kei karlakah lairel seh, ka thuhla hmu sehla, i ṭăn seh, cule na kut ihsin i runsuak seh,” tiah a ti.

24:10^a Sam 7:3-4

24:11^b Sem 31:36; Sam 7:3; 35:7

24:12^c Sem 16:5; Lai 11:27; Job 9:15

24:13^d Mat 7:20

24:15^e Sem 16:5; Sam 26:1; 35:1, 23; 119:134, 154; Isa 49:25

Saul in a Thil Sual Tuah mi a Pawm

16 Cun hitin a si, Saul hnenah David in hi ṭawngkampawl a ṭawng tikah, Saul in, “Hihi na aw a simaw, ka fapa David?” tiah a ti. Cule Saul cu a aw a suah ih a ṭap. 17 ^aCun anih in David hnenah, “Nang cu kei hnakin na dingfelsawn, ziangahtile nang cun ka parah thil ṭha in i lehrūl ih, kei cun thil ṭha lo in ka lo lehrūl. 18 Cule ka parih thil ṭha na tizia tuihsun ah na langter, ziangahtile Jehovah in na kut ah keimah a lo pek tikah, i rak that lo. 19 ^bZiangahtile mi pakhat in a ral táwng sehla, himdamin a thlahsuak pei maw? Curuangah tuihsun ih ka parih thil ṭha ih i lehrulh ruangah Jehovah in thil ṭha in lo rul hram seh. 20 Cule ngai hnik, nang cu Israel siangpahrang na si tengteng ding ih, na kut ah Israel lalram tundīn a si ding ti ka thei. 21 ^cCuruangah lehhnu lamih ka tesinfapawl that lo dingin le ka paih sungkua ihsin ka hmin hloralter lo dingin Jehovah hmin in ka hnenah siasăm aw,” tiah a ti. 22 Cutin David in Saul hnenah sia a săm. Cule inn ah Saul a tlung, asinan David le a milaipawl cu ral hruangkulh ah an so.

24:17^a Sem 38:26; Suah 9:27; Mat 5:44

24:19^b Rut 2:12; 2San 15:7

24:21^c Sem 21:23; 2Sam 21:7

25

Samuel Thihnak

1 ^aCun Samuel cu a thi, cule Israel-mi zaten an fĭnkhawmaw ih amah an ṭah, cule Ramah khua, amai inn ah an phum. Cun David cu a tho ih Paran Ramṭhing ah a suk.

25:1^a Dnp 34:8; 1Sam 28:3

David le Nabal Nupi

2 ^aMaon khua ah mi pakhat a um, cule a thil neih mi cu Karmel tlang ah a si, amah cu milian zet a si, tuu 3000 le me 1000 a nei. Cule Karmel tlang ah cun a tuu hmul a met. 3 ^bCu paih hmin cu Nabal a si ih a nupi hmin cu Abigail a si. Cu nu cu nunau fimvar a si ih, mimawi zet a si, asinan amah pa cu mihrohrang le miṭha lo a si. Amah cu Kaleb sungza lakih mi pakhat a si. 4 Ramṭhing ihsin David in Nabal in tuu hmul a met lai rero ti a thei. 5 David in tlangval pahra a thlah, cule David in tlangval pahra pawl hnenah, “Karmel tlang ah hung so uh, Nabal hnenah feh uhla, amah cu ka hmin in cibaibûk uh. 6 ^cCule cuih mineinung zet pa hnenah cun hitin nan sim pei, ‘Na hnenah hnangamdaihnak um seh, na inn ah hnangamdaihnak um sehla, na thil neih mi zate tlunah hnangamdaihnak um seh. 7 Tuu hmul mettupawl na nei ti ka thei. Na tuu khāltupawl cu kan hnenah an um ih, kan tuahmawh lo, Karmel an um sungah thil zianghman an hloh fawn lo. 8 ^dNa tlangvalpawl sut awla, an lo sim ding. Curuangah ka tlangvalpawl in na mithmuh ah na duhsaknak ngah hram hai seh, ziangahtile puai ni ah kan thleng ngelcel. Zangfahten na kut ih um mi pauhpauh cu na siahhlawhpawl le na fapa David rak pe hram aw, a ti,’ va ti uh,” tiah a ti.

25:2^a Sem 31:19; 38:13; Jos 15:55

25:3^b Jos 14:13; Thf 31:10

25:6^c 1San 12:18; Sam 122:7; Mat 10:12

25:8^d Neh 8:10-12; Est 9:19, 22

9 David-ih tlangvalpawl an thlen tikah, David hmin in hi ṭawngkampawl hmuahhmuah cu Nabal an sim ih an hngak. 10 ^aCun Nabal in David-ih siahhlawhpawl hnenah a sawn hai ih, “David cu zo a si ih, Jessi-ih fapa cu zo a si? Tulaiah siahhlawh tampi mai pu tlansan an um. 11 ^bKa sang, ka tidai le ka tuu hmul mettupawl hrangih ka thah mi ka sa cu la tahratin, khui lam mi an si ti hman ka theih lo mi hnenah ka pe ding maw?” tiah a ti. 12 Cun David-ih tlangvalpawl cu an heraw ih an tlungkir, cule an ra ih cuih ṭawngkampawl hmuahhmuah cu an sim. 13 ^cCun David in a milaipawl hnenah, “Nan ralnâm thlaihaw cio uh,” tiah a ti. Cutin ralnâm an thlaihaw cio thluh ih, David khal a ralnâm a thlaihaw ve. Cule mipa 400 hrawng cu David zawngah an feh ih, mi 200 cu thilri kilin an tâng.

25:10^a Lai 9:28

25:11^b Lai 8:6, 15

25:13^c 1Sam 30:24

14 Tlangvalpawl lakih pakhat in Nabal-ih nupi Abigail hnenah, “Zoh hnik, David in ramṭhing ihsin kan pu cibaibûk dingah palaipawl a rak thlah, asinan anih in a rak zăwkzet hai men. 15 Asinan milaipawl cu kan parah an ṭha zet ih in tuahmawh lo, ramlak ih kan um laiih kan umkhawm lai sung hmuahhmuah ah khin, zianghman kan hloh lo. 16 ^aTuu khālin an hnenih kan um sung hmuahhmuah ah khan, sun ah siseh, zan ah siseh annih cu kan hrangah kulh an si. 17 ^bCuruangah atu-ah ziang na tuah ding ti thei awla, ruat aw, ziangahtile kan pu le a sungkuapawl zate tlunah siatnak tuah tum a si. Ziangahtile anih cu khavek mihlothlau kha a si ih, zohman in an be thei lo,” tiah a ti.

25:16^a Sem 31:38-40; Suah 14:22; Job 1:10

25:17^b Dnp 13:13

18 ^aCule Abigail cu manhlap zetin sang hlăwm 200 le sabit zu savun thâwl hnih, tuu panga sa suan dingih timlam cia, kăn mi thlairawl rel kua, sabit rah car bawr 100, thei rah hlawm 200 pawl cu a lâk ih, lākpawl a phurhter. 19 ^bCule a siahhlawhpawl hnenah, “Ka hmaiah feh uh, zoh hnik uh, nan dung ihsin ka ra ve ding,” tiah a ti hai. Asinan a pasal Nabal cu a sim ta lo. 20 Hitin a si, lāk parah cun a to ih tlang hramih a vung suh laiah, zoh hnik, amah lam panih David le a milaipawl ra rero lai cu a va táwng hai. 21 ^cDavid in, “Thungaiten zianghman a hlohlonak dingah, ramṭhing ah hi paih neih hmuahhmuah hi a lakin ka rak kilsak men a si hi, thil ṭha cu thil ṭha lo in i lehrūl men fawn. 22 ^dThaizing khawvâng ah a ta hmuahhmuah lak ihsin mipa pakhat te khal ka zuah asile, Pathian in David-ih ralpawl cu a titiin ti seh, cuhnakih nasa khalin,” tiah a ti.

25:18^a Sem 42:26; 2Sam 16:1; 1San 12:40; Thf 18:16

25:19^b Sem 32:20

25:21^c Mip 16:15; Sam 109:5

25:22^d Rut 1:17; 1Sp 14:10; 2Sp 9:8

23 ^aAbigail in David a hmuh tikah, a to mi lāk par ihsin a ṭum lohli ih, David hmaiah a hmai lei hawiin a hlăwnaw, cule lei ah a băwkkhup. 24 ^bDavid ke hramah a hlăwnaw ih, “Ka parah, ka bawipa, hi mawhsualnak hi ka parah tla seh! Cule na hnatheih ah na siahhlawh nu hi ṭawng sehla, na sál nuih ṭawngkampawl hi ngai aw. 25 ^cKa bawipa in hi mihlothlau ^dNabal cu ngaihsak hlah seh. Ziangahtile a hmin vek rori a si ko. A hmin Nabal a si ih, atnak in a umpi a si hi! Asinan ka bawipaih thlah mi tlangvalpawl cu na siahhlawh nu, kei cun ka rak hmu hai lo sokhaw.

25:23^a Sem 19:1

25:24^b 2Sam 14:9

25:25^c Thf 17:12, 16; Isa 32:5

25:25^d Nabal: Mi-â tinak a si.

26 ^a“Curuangah atu-ah ka bawipa, Jehovah a nun rori vek le nangmah na nun vekin, thisen suah lo ding le na kut rori ih phuba la lo dingin Jehovah in a lo kham fawn si ih, na ralpawl le ka bawipa hrangih thil ṭha lo tuah tumtupawl cu Nabal vek si ve hai seh. 27 ^bCule atu-ah ka bawipa pek dingih na siahhlawh nuih rak ken mi laksawng cu ka bawipa thluntu tlangvalpawl pek si seh. 28 ^cNa siahhlawh nuih dān pahbălnak cu ngaidam hram aw. Ziangahtile Jehovah in ka bawipa hrangah reipi daih sungkua a lo tuahsak tengteng ding, ziangruangahtile ka bawipa cun Jehovah-ih ral donakpawl a do ih, na nun sung hmuahhmuah ah nangmah ah thil ṭha lo hmuh a si lo. 29 ^dNangmah dawi ding le na nunnak hawl dingin mi pakhat cu tho hman sehla, ka bawipaih nunnak cu Jehovah na Pathian thawi nunnak têl lakih tēl a si ding, cule nan ralpawlih nunnak cu herhli ih a saihloh vekin a saihlo ding. 30 Cule hitin a si ding, Jehovah in na thuhla ih thil ṭha a rak ṭawng mi bangtukih ka bawipa tlunih a tuah tikah le Israel uktu ih a lo ruat tikah, 31 ^esăn um loin thisen na suah lo ih ka bawipa in amai hrangih phuba a lâk fawn lo hi, na hrangah thinnatnak a si hrimhrim lo ding ih, ka bawipa hrangah mawhthlukawknak a um hrimhrim lo ding. Asinan Jehovah in ka bawipa parih thil ṭha a tuah tikah, na siahhlawh nu hi máng hram aw,” tiah a ti.

25:26^a 2Sam 18:32; Heb 10:30

25:27^b Sem 33:11

25:28^c 2Sam 7:11, 26; 14:9

25:29^d 2Sam 4:8; Jer 10:18

25:31^e Sem 40:14; 1Sam 25:30

32 ^aCun David in Abigail hnenah, “Tuihsun ih keimah táwng dingih a lo thlahtu Israel-ih Pathian Jehovah cu thangṭhat si ko seh! 33 Cule na ruahnak peknak cu thlawsuahin um sehla, nangmah khal thlawsuah mi si aw, ziangruangahtile tuihsun ah thisen suah ding le keimai kut rori ih phuba lâk ding i khamtu na si. 34 Ziangahtile thungaingaiin nangmah tuahmawh lo dingih i khamtu, Israel-ih Pathian Jehovah a nun rori vekin, manhlapin keimah táwng dingin ra lo ta uhla cu, Nabal-ih mipapawl cu khawvan hlanah pakhat hman Nabal hnenah an tâng lo ding,” tiah a ti. 35 ^bCutin David cun Abigail in a hrangih a run ken mi thil cu Abigail kut ihsin a cohlang ih a hnenah, “Na inn ah hnangamten va tlung aw, zoh hnik, na aw ka ngaithla ih, nangmah rori cu ka lo upat a si,” tiah a ti.

25:32^a Sem 24:27

25:35^b Sem 19:21

36 ^aAbigail cu Nabal hnenah a feh ih, ngai hnik, anih cun a inn ah siangpahrang puai tuah vekin puai a tuah. Cule Nabal-ih thinlung cu amai lung sungah a nuamaw zet, ziangahtile anih cu zu a ri tuk. Curuangah a thaizing khua a van hlanlo, Abigail in amah cu thu tam thu mál in zianghman a sim lo. 37 ^bCun hitin a si, zing lamah, Nabal-ih sabit zu rit a reh tikah, a nupi in hih thilpawl cu Nabal a sim, cule a sungah a lungphu a cawl ih, amah cu lungto vekah a cang. 38 ^cCun hitin a si, ni hra hnuah Jehovah in Nabal cu a vuak ih a thi.

25:36^a Rut 3:7; Thf 20:1; Ths 10:17; Isa 5:11, 22; Hos 4:11

25:37^b Suah 15:16

25:38^c Dnp 32:35; 2Sam 6:7; Apo 12:23

39 ^aNabal a thi ti David in a theih tikah, anih in, “Nabal kut ihsi ka dawn mi mualphonak phuba i lâksaktu le a siahhlawh in thil ṭha lo ti lo dingih i kilhimtu Jehovah cu thangṭhatin um seh! Ziangahtile Jehovah in Nabal-ih sualralnak cu amai lu parah a thlengkirter,” tiah a ti. Cule David in mi a thlah ih Abigail cu a nupi dingah an va bia. 40 David-ih siahhlawhpawl Karmel tlang Abigail hnen an va thlen tikah a hnenah, “David in nangmah cu a nupi dingih lo dil dingah na hnenah in thlah a si,” tiah an sim.

25:39^a 1Sam 24:15; Thf 22:23; Sol 8:8

41 Cun Abigail cu a tho ih a hmai leilung hawiin a băwkkhup ih, “Zoh hnik, na siahhlawh nu hi ka bawipaih siahhlawhpawlih ke khawlhsak ko seh,” tiah a ti. 42 ^aCule Abigail cu manhlap zetin a tho ih, lāk parah a to, amah thlahtu dingah a siahhlawh nunau panga a hruai ih, David-ih palaipawl cu a thlun, cule a nupi ah a cang.

25:42^a 2Sam 2:2; 3:2; 1San 3:1

43 David in Jezreel-mi, Ahinoam khal a hruai ih, an pahnih in a nupi an si. 44 ^aAsinan Saul in a fanu Mikal, David-ih nupi kha Gallim khawmi, Laish-ih fapa Palti a rak neihter zo.

25:44^a 2Sam 3:15; Isa 10:30

26

David in Saul Nunnak a Vei Hnihnak a Zuah

1 Cun Zif-mipawl cu Gibeah ah Saul hnenah an ra ih, “David cu Jeshimon ral Hakilah tlang ah a relh a si lo maw?” tiah an ti. 2 Cun Saul cu a tho ih Zif Ramṭhing ah Israel mipapawl lakih hril mi 3000 a zawngah hruaiin, David hawl dingin Zif Ramṭhing ah a suk. 3 Cule Saul cu Jeshimon ral Hakilah tlang lamzin ah ṭanhmun a khuar. Asinan David cu ramṭhing ah a cêng ih, Saul cu ramṭhing ah a dung ihsin a ra ti David in a hmu. 4 Curuangah David in thlingthlatupawl a thlah ih, Saul a ra taktak zo ti a theingah.

5 Cule David cu a tho ih Saul-ih ralthuam retnak hmun ah a feh. Cule David in Saul le Ner-ih fapa Abner, a ralkap bawipiih ihnak hmun cu a hmu. Saul cu riahhmun sungah a it ih, mipi in anmah kulhin ṭanhmun an khuar. 6 ^aCun David in a let ih, Heth-mi Ahimelek le Joab-ih nau Zeruiah-ih fapa Abishai hnenah, “Ṭanhmun khuarnak ih Saul hnenah ka zawngah zo a feh ding?” tiah a ti.

26:6^a Sem 10:15; 2Sam 2:18; 1San 2:16; 11:20

Abishai in, “Na zawngah keimah ka feh ding,” tiah a ti.

7 Cutin David le Abishai cu milaipawl hnenah cun zan ah an feh, cule ngai hnik, Saul cu ralthuam retnak hmun sungah a lu kiang lei ah a feipi phunin a it. Cule amah kulhin Abner le a milaipawl an it. 8 Cun Abishai in David hnenah, “Tuihni ah Pathian in na ral cu na kut ah a lo pe. Curuangah zangfahten atu-ah, Saul cu ka feipi in leilung sansiah ah vei khat ah suntlăng hnik ning, vei hnih ka sun lo ding,” tiah a ti.

9 ^aCule David in Abishai hnenah, “Hloralter hlah, ziangahtile Jehovah ih hriak thih mi parah a kutthlak ih, mawhnak nei lo zo so um thei ding?” tiah a ti. 10 ^bDavid thotho in, “Jehovah a nun rori vekin Jehovah in a that leh ding, asilole a thih ni a thleng leh mai ding, asilole doawknak ah a fehsuak ding ih, a hloral leh ding. 11 ^cJehovah ih hriak thih mi parah ka kutthlak lo dingin Jehovah in i kham seh. Asinan a lu kiangih um a feipi le a tidai thâwl khat cu zangfahten la awla kan feh pei,” tiah a ti. 12 ^dCutin David in Saul-ih lu kiangih feipi le tidai thâwl khat cu a lâk ih an feh, cule zohman in an hmu lo, an thei lo ih an ṭhang fawn lo. Ziangahtile an zaten an itthat ṭheh, ziangruangahtile Jehovah hnen ihsin thithlep ihthahnak an parah a thleng.

26:9^a Sem 26:11; 2Sam 1:14; Ṭah 4:20

26:10^b Dnp 31:14; 1Sam 25:38; Sam 37:13; Rom 12:19

26:11^c 1Sam 24:6, 12; Rom 12:17, 19; 1Pe 3:9

26:12^d Sem 2:21

13 Cun David cu khat lam ralah a feh ih, an karlak hla zet tlang zimah a ding. 14 Cule David in Saul-ih milaipawl le Ner-ih fapa Abner cu, “Abner, i sawn lo ding maw?” tiah a auh hai.

Cule Abner in a let ih, “Siangpahrang auhtu cu zo na si?” tiah a ti.

15 Cule David in Abner hnenah, “Pacangṭha na si lo maw? Israel ram ah nangmah vek zo so um? Ziangah saw na bawi siangpahrang na kil lo? Ziangahtile milaipawl lakih pakhat cu na bawi siangpahrang hloralter dingin a ra. 16 Hi thil na tuah mi hi a ṭha lo. Jehovah a nun rori bangin thi tlak na si, ziangruangahtile Jehovah ih hriak thih mi na pu na kil lo. Cule atu-ah siangpahrang lu kiangih a feipi le tidai thâwl khat cu khuiah an si, zoh hnik,” tiah a ti.

17 Cun Saul in David aw a si ti a thei ih, “Ka fapa David, na aw a simaw?” tiah a ti.

David in, “Ka bawipa, siangpahrang, cucu ka aw a si,” tiah a ti. 18 ^aCule David in, “Ziangruangah ka bawipa in hiti vekin a siahhlawh a dawi rero? Ziangahtile ziang so ka rak tuah, asilole ka kut ah ziang thil ṭha lo so a um? 19 ^bCuruangah atu-ah ka bawipa siangpahrang in a siahhlawhih ṭawngkampawl zangfahten ngai seh: Jehovah in keimah do dingin a lo căwktho asile, amah cun thilhlăn cohlang seh. Asinan minung fāte an si ahcun, Jehovah hmaiah camsiat si hai seh, ziangahtile annih in, ‘Feh aw, pathian dang pawl rian aw,’ tiin Jehovah ro sungih ka cēn ve lo nak dingah, tuihsun ah in dawisuak a si. 20 ^cCuruangah Jehovah hmaika, leilung ah ka thisen fawr hlah seh. Ziangahtile tlang lakah mi pakhat in varit a pel bangin, Israel siangpahrang cu uihli hawl dingin a fehsuak a si,” tiah a ti.

26:18^a Job 13:23; Jer 37:18

26:19^b Dnp 4:28; 20:16; 2Sam 14:16; 16:11

26:20^c 1Sam 24:14; Amo 9:3

21 ^aCun Saul in, “Ka sual a si. Ka fapa David, ra kir aw. Tuihni ah ka nunnak hi na mit ih a hlût tuk ruangah ka lo tuahmawh nawn lo ding. Ngai hnik, mi-â bangin ka um ih, ka palh tuk lawmmam aw,” tiah a ti.

26:21^a Suah 9:27; Sam 72:14

22 Cule David in a let ih, “Ngai hnik, siangpahrang feipi hi, tlangvalpawl lakih pakhat ra sehla ra la seh. 23 ^aJehovah in mi kip an dingfelnak le an rinumnak man a rul leh ding, ziangahtile tuihsun ah ka kut ah nangmah cu Jehovah in i pe zo, sihmansehla Jehovah ih hriak thih mi parah kut ka thlak duh lo. 24 ^bCule ngai hnik, tuihsun ih na nunnak ka mit ih a man a khun zet vekin, Jehovah-ih mit ah ka nunnak hi mankhung zet ve seh, cule harsatnak hmuahhmuah sung ihsin anih in i runsuak seh,” tiah a ti.

26:23^a Rut 2:12; 2Sam 22:21, 25; Sam 7:8; 18:20; 62:12

26:24^b Sam 54:7

25 ^aCun Saul in David hnenah, “Ka fapa David, mithlawsuak si hram aw! Thil nasa zetzet na tuah ding ih, na neh vivo ding,” tiah a ti. Cutin David cu a feh vivo ih, Saul khal amai hmun lamah a tlung.

26:25^a 1Sam 24:19, 22

27

David in Filisṭia-mipawl a Kăwp

1 ^aCule David in a thinlung tein, “Ni khat khat ah cun Saul kut in ka hloral leh ko ding. Filisṭia ram ih zamrang zetih tlansuah hnakih thil ṭha ka hrangah a um lo, cule Israel ram hmun kip ih i hawl hi a bei a dawng ding. Cutin a kut ihsin ka luat ding,” tiah a ti. 2 ^bCun David cu a tho ih a hnenih um pacang 600 pawl thawn Gath siangpahrang, Maok-ih fapa Akish hnenah a feh. 3 Cutin David cu Gath ih Akish hnenah amah le a milaipawl, an sungkua fingfing cio thawn le David cu a nupi pahnih Jezreel-mi Ahinoam le Karmel-mi Nabal-ih nupi Abigail thawn an um. 4 Cule Gath ah David a tlân ti Saul an sim, cule anih in David a hawl nawn lo.

27:1^a 1Sam 26:19

27:2^b 1Sam 25:13; 1Sp 2:39

5 Cun David in Akish hnenah, “Atu-ah na mit ah duhsaknak ka co asile, ram sungih khawte lamah umnak hmun i pe ve awla, cu tawkah ka cêng ding. Ziangahtile Ziangruangah so na siahhlawh cu siangpahrang khawpi na hnenih a um ding?” tiah a ti. 6 ^aCutin Akish in cuih ni ah David cu Ziklag khua a pe. Curuangah tuihni tiang Ziklag khua cu Judah siangpahrangpawl ta a si. 7 Filisṭia-mipawl ram ih David a cēn sung cu kum khat pumpi le thla li a si.

27:6^a Jos 15:31; 1San 12:20; Neh 11:28

8 ^aCule David le a mipapawl cu an so ih Geshur-mipawl, Girz-mipawl le Amalek-mipawl an sîm. Ziangahtile cuih miphunpawl cu Shur ihsin na feh asile, Izip ram tiang hlanlai ihsi a ram luahtupawl an si. 9 David in ram a do tinten, mipa siseh, nunau siseh nungin a tân lo, an tuupawl, an caw cang pawl, an lākpawl, an kalaukpawl le an hnipuanpawl a lâksak thluh, cule a kir ih Akish hnenah a feh ṭheu. 10 ^bCun Akish in, “Tuihsun teh khui tawk lam na sîm?” a ti ih, David in, “Judah ram Negev hmunrampawl le Jerahmeel-mipawlih Negev hmunrampawl le Ken-mipawlih Negev hmunrampawl,” tiah a ti. 11 David cun Gath khua ih thuthang phurh dingah, mipa siseh, nunau siseh a nungin a zuah dah lo, “Culole, ‘Hitin David in a tuah,’ tiin annih in in rak thăn pang ding,” tiah a ti. Cule cutiih tuah cu Filisṭia-mipawl ram ih a um sung hmuahhmuah David-ih tidān phung a si.

27:8^a Sem 16:7; Suah 17:14; Jos 13:2; 2Sam 1:8

27:10^b Lai 1:16

12 ^aCule Akish in David cu a zum, “A mi Israel in amah nasa zetih hua dingin a tuah hi; curuangah anih cu ka siahhlawh a si kumkhua ding,” tiah a ti.

27:12^a Sem 34:30

28

Filisṭia Ralkappawl David in a Do

1 Cun cu laiah, hitin a si, Filisṭia-mipawl in ral donak hrangah, an ralkappawl Israel do dingah an fĭnkhawm. Cule Akish in David hnenah, “Nangmah le na mipapawl cu ral do dingin ka zawngah nan feh tengteng ding ti thei aw,” tiah a ti.

2 Cule David in Akish hnenah, “Thungaingaiin na siahhlawh in ziang a tuah thei ti na thei ko,” tiah a ti.

Cule Akish in David hnenah, “Curuangah nangmah cu i kiltu hotu bik pawl lakih pakhat ah ka lo tuah kumkhua ding,” tiah a ti.

3 ^aSamuel cu a thi ih, Israel miphun zaten amah cu an sûn, cule amai khua Ramah ah an phum. Cule Saul in a ram sungih thlaraukawh thiam pawl le polpawl cu a rak dawisuak thluh zo.

28:3^a Suah 22:18

4 ^aCun Filisṭia-mipawl cu an fĭnkhawmaw, cule an ra ih Shunem ah ṭanhmun an khuar. Saul in Israel miphun zaten hmunkhat ah a khawm ih, Gilboa ah ṭanhmun an khuar. 5 ^bSaul in Filisṭia-mipawlih ralkappawl a hmuh tikah, a thla a phâng ih nasa zetin a thin a khūr. 6 ^cCule Saul in Jehovah a sut, Jehovah cun mang in siseh, Urim in siseh, profetpawl hmangin siseh amah cu a let lo.

28:4^a Jos 19:18; 2Sam 1:6, 21

28:5^b Job 18:11

28:6^c Suah 28:30; Mip 27:21; Eze 20:3; Amo 8:11; Mik 3:7

En Dor ih Thlaraukawh Thiam

7 ^aCun Saul in a siahhlawhpawl hnenah, “Thlaraukawh thiam nunau pakhat i hawlsak uh, cule a hnenah ka feh ding ih amah thu ka sut ding,” tiah a ti.

28:7^a Jos 17:11; 1San 10:13; Sam 83:10; Apo 16:16

Cule a siahhlawhpawl in a hnenah, “Ngai hnik, En Dor ah thlaraukawh thiam nunau pakhat a um,” tiah an ti.

8 ^aCun Saul cu a thuam danglamaw ih, hnipuan dang a hruh, cule a feh, a zawngah mi pahnih an tel, cule nunaunu hnenah zan ah an thleng. Cule Saul in, “Zangfahten ka hrangah ai-ennak tuah awla, a hmin ka lo sim mi pauhpauh i kawhsuaksak aw,” tiah a ti.

28:8^a 1Sp 22:30; 2Sp 1:3; 2San 18:29; Isa 8:19

9 ^aCun nunaunu in a hnenah, “Zoh hnik, Saul in ziang a tuah ti na thei, a ram ih thlaraukawh thiam pawl le polpawl cu a that ṭheh zo. Ziangah so thi dingin ka nunnak hrangih tháng na kam?” tiah a ti.

28:9^a Job 18:10; Sam 9:16; Isa 8:14

10 Cule Saul in cu nuih hnenah cun Jehovah sālin, “Jehovah a nun rori bangin, himi thil ruangah na parah ziang dāntatnak khal a thleng lo ding,” tiah sia a săm.

11 Cun nunaunu in, “Zo so ka lo hruaisuahsak ding?” tiah a ti.

Cule anih in, “Samuel in hruaisuaksak aw,” tiah a ti.

12 ^aNunaunu in Samuel a hmuh tikah, aw ring zetin a au. Cule nunaunu in Saul hnenah, “Ziangruangah i bum? Nangmah hi Saul na si si!” tiah a ti.

28:12^a Sem 27:34-36; 1Sp 14:6

13 ^aCule siangpahrang in a hnenah, “Lungphângin um hlah. Ziang na hmu?” tiah a ti.

28:13^a Pui 19:31; 2San 33:6

Cule nunaunu in Saul hnenah, “Leilung sung ihsin pathianpawl hung so lai ka hmu,” tiah a ti.

14 ^aCule anih in nunaunu hnenah, “A pianzia ziang vek a si?” tiah a sut.

28:14^a 1Sam 15:27

Cule nunaunu cun, “Putar a hung suak ih, puan in a tuamaw,” tiah a ti. Cule Saul in cucu Samuel a si ti a thei ih, a hmai lei lam hawiin a kûn ih a băwkkhup.

15 ^aCule Samuel in Saul hnenah, “Ziangah so hruaisuah si tiang ko i hnaihnăwk?” tiah a ti.

28:15^a Lai 16:20; 1Sam 18:12

Cule Saul in, “Ka van a sâng tuk, ziangahtile Filisṭia-mipawl in keimah in do, cule Pathian in i tlansan ih, profetpawl hmangin siseh, mang hmangin siseh in let nawn lo. Curuangah ziang ka tuah ding ti ka hnenih phuanglang dingin ka lo ko a si,” tiah a ti.

16 Cun Samuel in, “Jehovah in a lo tlansan ih, a ral ah na cang thlang ti thei cingin, ziangah so i sut thotho? 17 ^aCule Jehovah cun amai hrangah keimah hmangih a rak sim vekin a tuah. Ziangahtile Jehovah in na kut ihta lalram a ṭhendarh ih na innhnen pa, David a pek. 18 Jehovah-ih thu na lun lo ruangah le Amalek parih a thinlingnak nasa zet vekih na tisuak lo ruangah, tuihsun ah Jehovah in na parah hi thil hi a tuah a si. 19 ^bCuihtlunah Jehovah khal in Israel cu nangmah thawn Filisṭia-mipawl kut ah a lo pe ding. Cule thaisun ah nangmah le na fapapawl cu ka hnenah nan um ding. Jehovah in Filisṭia-mipawl kut ah, Israel ralkappawl a pe ding,” tiah a ti.

28:17^a 1Sam 15:28; 23:17

28:19^b 1San 8:33; Job 3:17-19

20 Hmakhatteah Saul cu lei ah a tlu ziarziar ih, Samuel-ih ṭawngkampawl ruangah nasa ngaingaiin a lung a phâng. Cule tha a nei nawn lo, ziangahtile anih cu sunnihlawh le zanvar rawl a rak ei lo.

21 ^aCule nunaunu cu Saul hnenah a ra ih, nasa zetih buaiin a hmu, cule a hnenah, “Zoh hnik, na siahhlawh nu in na thu a lung ih ka nunnak thāpin, ka hnenih na sim mi thupawl ka thlun. 22 Curuangah atu-ah zangfahten na siahhlawh nuih thu thlun ve aw, na hmaiah sang phel lo hŭn ning, cule ei aw, cutin na tlunkir tikah tha na nei ding,” tiah a ti.

28:21^a Lai 9:17

23 ^aAsinan Saul cun a êl ih a hnenah, “Ka ei lo ding,” tiah a ti.

28:23^a 1Sp 21:4

A siahhlawhpawl cun nunaunu thawn an hnêk, cule an aw a ngai. Cun lei ihsin a tho ih ihkhun parah a to. 24 ^aNunaunu in cawm thau caw pa no pakhat a inn ah a nei ih, a va that lohli. Cule sangphŭt a lâk ih a nâwng, cule thilnu telh lo sang a káng. 25 Cule cu nu cun Saul le a siahhlawhpawl hmaiah a rak keng ih, an ei. Cun annih cu an tho ih cuih zan ah an tlung.

28:24^a Sem 18:7

29

Filisṭia-mipawl in David an Hnáwng

1 ^aCun Filisṭia-mipawl in an ralkappawl zaten Afek ah an fĭnkhawm ih Israel-mipawl cu Jezreel tihna kiangah ṭanhmun an khuar. 2 Cule Filisṭia-mipawlih bawipawl cu a zaza le a thawngthawng in an fehlan zutzo, asinan David le a milaipawl cu Akish thawn ne an khawr. 3 ^bCule Filisṭia-mipawlih ralbawipawl in, “Hi Hebrumipawl teh hi tawkah ziang an ra tuah?” tiah an ti.

29:1^a Jos 17:16; 1Sp 18:45; 2Sp 9:30; Hos 1:4

29:3^b 1San 12:19

Cule Akish in Filisṭia-mipawlih ralbawipawl hnenah, “Hi pa cu kum hiti zat, tu tiang ka hnenih rak um zo, Israel siangpahrang Saul-ih siahhlawh David kha a si lo maw? Cule ka hnenih a rung luh ihsin tuihni tiang a palhnak ka hmu lo,” tiah a ti.

4 ^aAsinan Filisṭia-mipawlih ralbawipawl cu a parah an thin a heng ih, Filisṭia-mipawlih ralbawipawl in a hnenah, “Hi pa cu na ruatsak mi hmun ah tlungkirter aw, kan hnenah ral do dingin feh ve hlah seh, culole doawknak ah kan ral lamah a ṭang pang ding. Ziangahtile ziang thawn hi pa hin a pu thawn remawknak a tuah thei ding? Hi Filisṭia-mipawlih lu a lâknak in a si lo ding maw? 5 Hi David hi a si lo sawm,

29:4^a 1San 12:19

‘Saul in a thawng a thawng in a that,
David in a thawng sawm a thawng sawm in a that,’

tiin a thuhla lām phahih pakhat le pakhat hla an sehawk mi kha a si lo maw?” tiah an ti.

6 Cule Akish in David a ko ih, “Thungaingaiin, Jehovah a nun rori bangin, nang cu midĭng na si ih, ralkap sungih ka zawngih na suah le na luh ka mit na tling. Ziangahtile ka hnen na rat thawk ihsin tuihni tiang nangmah ah thil ṭha lo ka hmu lo. Sikhalsehla, bawipawl in an lo duh lo. 7 Curuangah atu-ah, Filisṭia-mipawlih bawipawl ^alunghmui lo ko na tuahlonak dingah tlungkir awla, hnangamten feh aw,” tiah a ti.

29:7^a lunghmui lo: A ṭawng hrampi ah cun, “mithmuh ah thil ṭha lo a si,” ti a si.

8 Cule David in Akish hnenah, “Asile ziang thil so maw ka rak tuah ih? Cule na hnen ka um sung hmuahhmuah tuihni tiangin, ka bawi siangpahrangih ralpawl do loih ka kir leh salnak dingah na siahhlawh parah hin ziang hmuh mi so na neih?” tiah a ti.

9 ^aCun Akish in a sawn ih David hnenah, “Ka mithmuh ah cun Pathian-ih vancungmi vekin na ṭha ti ka thei, sikhalsehla Filisṭia-mipawlih ralbawipawl in, ‘Anih cu ral do dingah kan zawngah feh hlah seh,’ an ti. 10 ^bCuruangah atu-ah, na zawngih feh ve na pu-ih siahhlawhpawl thawn zing ten tho uh. Cule zing nan thawh ih khua a van veten păwk uh,” tiah a ti.

29:9^a 2Sam 14:17

29:10^b 1San 12:19

11 Cutin David le a milaipawl cu Filisṭia-mipawl ram ih kir dingin zing ten an tho. Cule Filisṭia-mipawl cu Jezreel tiang an so.

30

David in Amalek-mipawl a Do

1 Cule hitin a si, a ni thumnak ah David le a milaipawl Ziklag an thlen tikah, Amalek-mipawl in Negev le Ziklag khua cu an rak sîm ih, Ziklag khua cu meisa in an ur, 2 cule nunaupawl le cu tawkih a um mi zaten, a tûm a te in ralkaih ah an hruai, zohman an that lo, asinan an hruai ih an feh vivo. 3 ^aCun David le a milaipawl cu khua an va thleng, ngai hnik, meisa in a rak kāng ih, an nupipawl, an fapapawl le an fanupawl ralkaih ih hruai an si. 4 ^bCun David le a zawngih um milaipawl cu ṭahnak ding thazang nei nawn lo khawp tiangin an aw an suah ih an ṭap. 5 Cule David-ih nupi pahnih Jezreel-mi Ahinoam le Karmel-mi Nabal-ih nupi Abigail khal ralkaih ah hruai an si. 6 ^cCule David cu nasa zetin a van a sâng, ziangahtile a milaipawl in amah lungto ih den ding thu an ṭawng, ziangruangahtile mi kip an fapapawl le an fanupawl ruangah mi zate an thin a nâ. Asinan David cu Jehovah a Pathian ah amah le amah a cakawter.

30:3^a Sem 31:26

30:4^b Mip 14:1

30:6^c Suah 17:4; Sam 31:24; Joh 8:59; Rom 4:20

7 Cun David in Ahimelek-ih fapa puithiam Abiathar hnenah, “Zangfahten hi tawk ka hnenah Puithiam Kâwrcung rak keng aw,” tiah a ti. Cule Abiathar in David hnenah Puithiam Kâwrcung cu a rak keng. 8 ^aCun David in Jehovah cu, “Hi ralkap burpi hi ka dawi pei maw? Ka hei manngah hai pei maw?” tiah a sut.

30:8^a Sem 14:16; Sam 91:15

Cule Jehovah in a let ih, “Dawi aw, ziangahtile na hei manngah hai ding ih, a zaten na lakirsal thluh tengteng ding,” tiah a ti.

9 Cule David cu, amah le a zawngih um mipa 600 thawn a feh ih, dungih tān ta mipawl umnak Besor tiva te an thleng. 10 Asinan David cun amah le a milai 400 thawn a dawi vivo, ziangahtile mi 200 pawl cu an cau tuk ih, Besor tiva te an tankai thei lo.

11 Cun annih in ramlak ah Izip pa an táwng ih David hnenah an rak hruai, cule rawl an pe, a ei, cule tidai khal an tul. 12 ^aCule amah cu thei rah car pum khat le sabit rah car bawr hnih an pe. Cun a ei hnuah a tha a tlungsal, ziangahtile anih cun ni thum le zan thum rawl ei lo le tidai in loin a rak um zo. 13 Cun David in a hnenah, “Zo lam ṭang na si ih, khui lamin na ra?” tiah a ti.

30:12^a Lai 15:19

Cule anih in, “Keimah cu Izip tlangval, Amalek-mi paih siahhlawh ka si ih, ni thum liam zo ah khan ka nat ruangah, ka bawipa in dungah i tansăn. 14 ^aJudah ih co mi ram sung, Kereth-mipawlih Negev hmunrampawl le Kaleb-ih Negev hmunrampawl kan sîm ih, Ziklag khua cu meisa in kan urkāng,” tiah a ti.

30:14^a Jos 14:13; 2Sam 8:18; 1Sp 1:38, 44; 1San 18:17; Eze 25:16; Zef 2:5

15 ^aCule David in a hnenah, “Cuih ralkap burpi hnenah i hruai thei pei maw?” tiah a ti.

30:15^a Dnp 23:15

Cule anih in, “In that lo dingin le ka bawipa kut ih in pe lo dingin Pathian sālin ka hnenah siasăm awla, cuih ralkap bur hnenah ka lo hruai ding,” tiah a ti.

16 ^aCule cu pa in suk lamih a hruai tikah, annih cu Filisṭia-mipawlih ram le Judah ram ihsin an lâk mi ralthillâk tampi ruangah, ei le in le lamin, ngai hnik, ram hmuahhmuah ah an pharhaw. 17 ^bCun David cun anmah cu ni tlak ihsin a thaisun zan lam tiang a do hai. Tlangval 400 kalauk toih tlânsuak siarlo, zohman miluat an um lo. 18 ^cCutin David cun Amalek-mipawl ih an thiarhloh mipawl zaten a runsuak thluh, cule David in a nupi pahnih khal a run hai. 19 Cule a tûm a te in an fapapawl siseh, an fanupawl siseh, ralthillâkpawl siseh, an hnenih an rak lâk mi kim lo zianghman a um lo, David in a zaten a lakirsal thluh. 20 Cun David in rante rual hmuahhmuah le ranpi rual hmuahhmuah a la, cule annih in sumhnám dang pawl hmaiah an fehpi ih, “Hihi David-ih ralthillâk a si,” tiah an ti.

30:16^a Jos 22:8; Luk 12:19-20

30:17^b Lai 7:12; 2Sam 1:1, 8

30:18^c Sem 14:16

21 Cule mi 200 an cauh ruangih David thlun thei lo, Besor tiva te ih an tanter mi, mi 200 hnenah David a thleng. Cun cupawl cu David hmuak ding le a zawngih um milaipawl hmuak dingin an fehsuak, cule David cu a milaipawl a va naih ih cibai a bûk hai. 22 Cun David hnenih fehtupawl lakih misualrál le mihlothlau pacangpawl hmuahhmuah in an let ih, “Kan hnenih an feh ve lo ruangah annih cu an nupi le an fāte cio hruai ih an tlânsuak thei nak dingah, an nupi le an fāte cio siarlo runsuak mi ralthillâk zianghman kan pe ve hai lo ding,” tiah an ti.

23 Asinan David in, “Ka u le nau tla, in humhimsak ih in do dingih ra suak ralkap burpi kan kut ih in petu Jehovah ih in pek mi thil cu cutin nan tuah lo pei. 24 ^aZiangahtile himi thu ah zo in so lo ngaithla ding? Asinan doawknak ih a vung fehtupawlih co vek cu, thilri kiltu ih tāngpawl khal in an co ve ding a si, bangrep cio ih co ding a si,” tiah a ti. 25 Cun hitin a si, David in cuih ni thawkin cumi cu Israel hrangah sakhaw dān ah le zīn le dān ah tuihni tiang a tuah.

30:24^a Mip 31:27; Lai 5:30

26 ^aCun Ziklag ih David a thlen tikah, ralthillâk hrekkhat cu Judah upa a rualpipawl hnenah, “Ngai hnik uh, Jehovah-ih doralpawl hnen ihsi ralthillâk cu laksawng ah ka lo kuat a si,” tiin a kuat. 27 ^bBethel ih um mipawl, Negev ih Ramoth hmun ih um mipawl, Jattir ih um mipawl, 28 ^cAroer ih um mipawl, Sifmoth ih um mipawl, Eshtemoa ih um mipawl, 29 Rakhal ih um mipawl, Jerahmeel-mipawlih khuapawl ih um mipawl, Ken-mipawlih khuapawl ih um mipawl, 30 ^dHormah ih um mipawl, Korashan ih um mipawl, Athak ih um mipawl, 31 ^eHebron ih um mipawl le amah David le a mipapawl an tlanlēn ṭheu nak hmun hmuahhmuah hnen pawl ah a kuat a si.

30:26^a Sem 33:11

30:27^b Jos 7:2; 10:40; 15:48

30:28^c Mip 32:34; Jos 13:16; 15:50; 1San 27:27

30:30^d Mip 14:45; Jos 15:42

30:31^e Mip 13:22; Jos 10:36; 2Sam 2:1, 3-4

31

Saul le a Fapapawl Thihnak

1 Cule Filisṭia-mipawl in Israel an do ih, Filisṭia-mipawl hmaiah Israel mipapawl cu an tlânsia, cule an thah mipawl cu Gilboa tlang ah an rīl teptep. 2 Cun Filisṭia-mipawl in Saul le a fapapawl cu an dung tein an dawi ih, Filisṭia-mipawl cun Saul-ih fapa Jonathan, Abinadab le Malkishua cu an that. 3 Saul an donak cu a nasa deuhdeuh. Thálsai thiam pawl in Saul cu an rak saingah ih, anih cu thálsai thiam pawl in bese zetin an tuahmawh. 4 ^aCun Saul in a ralthuam kengtu hnenah, “Na ralnâm zûk awla, cumi in i dawttlăng aw, culole hi serh zim tan lo pawl hi an ra ding ih, in dawttlăng ding, cule in puahcăwk pang ding,” tiah a ti. Asinan a ralthuam kengtu in a duh lo, ziangahtile anih cun a ṭih tuk. Curuangah Saul in ralnâm a lâk ih a parah a bawhhnawh. 5 Cule a ralthuam kengtu in Saul a thi ti a hmuh tikah, anih khal a ralnâm a bawhhnawh ve ih, Saul zawngah a thi. 6 Cutin Saul, a fapa pathum, a ralthuam kengtu le a mipapawl zaten cuih ni ah an thitlang ṭheh.

31:4^a Sem 34:14; Lai 9:54; 1San 10:4

7 Cule phaikuam khat lam ralih um Israel-mipawl le Jordan tiva ralkhat ih um Israel-mipawl in Israel mipapawl an tlânsia ti le Saul le a fapapawl an thi ti an hmuh tikah, khawpipawl cu an tān ta ih an tlân, cule Filisṭia-mipawl an ra ih an cêng. 8 ^aCun a thaisun ah hitin a si, Filisṭia-mipawl cu an thah mipawlih thuam hlit dingih an rat tikah, Gilboa tlang ah Saul le a fapa pathum rīlin an hmu. 9 ^bCule Saul-ih lu cu an tán ih a ralthuam an hlihsak, cule cuih thu cu an milempawl temple ah le mipi lakah, Filisṭia-mipawlih ram hmuahhmuah ah thăn dingin an kuat. 10 ^cCun a ralthuam cu Ashtoreth temple ah an ret ih, a ruak cu Beth Shan khaw kulh ah an tar.

31:8^a 2Sam 1:20

31:9^b Lai 16:24; 2Sam 1:20

31:10^c Jos 17:11; Lai 2:13

11 ^aCule Jabesh Gilead luahtupawl in Filisṭia-mipawl ih Saul an tuahdān thu an theih tikah, 12 ^bmiralṭhapawl zaten an tho ih zanvar an feh, cule Saul-ih ruak le a fapapawlih ruak cu Beth Shan khaw kulh ihsin an la ih Jabesh ah an feh, cule cu tawkah meisa in an ur. 13 ^cCun an ruhpawl an la ih Jabesh ih esel thingkung hnuaiah an phum, cule ni sarih sung rawl an ul.

31:11^a Lai 21:8

31:12^b 2San 16:14; Amo 6:10

31:13^c Sem 50:10; 2Sam 21:12-14