About Bible Thianghlim | ©

BibleThianghlim – Suahlannak

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Suahlannak

12345678910
11121314151617181920
21222324252627282930
31323334353637383940

• A ngantu: Mosi
• A huap sung cān: B.C. 1446 hrawng
• Ngan kum: B.C. 1446 le 1400 karlak

Semtirnak thuanthu ih thil cang mi netabik pawl le Suahlannak ih thil cang mi hmaisabik pawl karlak hi kum 400 hrawng a rei. Himi tikcucān sungah Pathian in Abraham-ih tesinfapawl karhzaiter dingin a thutiamkam a rak kilhim. Israel-mipawl cu Izip ah miphun tumpi ah an rak cang. Anmahpawl Kanaan ram peknak ding thutiamkam tlamtlinternak ding Pathian hrangah cān a ra thleng. Asinan thubuai tumpi pakhat a rak um. Israel-mipawl cu Izip-mipawl le an siangpahrang hrohrang zet, Faro-ih sál an si. Suahlannak cabu in Izip ihsin anmah hruaisuak ding le Kanaan zin ih a hruai hai dān Pathian ih hnaṭuan thuanthu maksak a rel. Hih cabu hin Pathian in Israel thawi pehzăwmawknak hleice neih a tum thu a simfiang fawn.

Bung 1-18 in Israel-mipawl runsuahnak thu a rel. A hmaisabikah Pathian in Israel hruaitu si dingah Mosi a humhim ih a timlam. Cun hremnak phun hra thawn Izip hrem dingin Pathian in Mosi a hmang. Hremnak netabikah Pathian in Izip-mipawlih fatir a that, asinan Israel-mipawl cu a zuah hai. Israel-mipawl cu tuu fa no raithawinak thisen in humhim an si. Israel-mipawl an pawhsuak tikah, Izip-mipawl hnen ihsin anmah runsuak dingah Pathian in Tipi Sen a ṭhencat.

Bung 19-40 ah Israel-mipawl in Sinai ih an tawnteh mi ngan a si. Hi tawkah Jehovah in a ropitnak le “puithiam miphun” dinhmun ih rawng an bawlnak ding Israel-mipawl hrangih a thil tum khal a phuanglang (19:6). Anih in cuih miphun thawn zangfahnak ih khat in thukham a tuah. Cumi in a dānpawl parih thulunnak a phût. Asinan cumi in anmah lakih Pathian cencilhnak hamṭhatnak a pe fawn. Biakbûk ah anih cu a cêng ding. Sikhalsehla hi Biakbûk sak an thawk hlanah mi senpi in thil sual an tuah. Milem an bia, cutin Pathian in thihnak in anmah lakih mi tampi a hrem. Cun Biakbûk an sak ih, Pathian in Israel-mipawl a ngaidam hai, cule Biakbûk parah a ropitnak a rung ṭum.

Jesu Khrih ih runsuah kan sidān cu Suahlannak cabu ah a thlam kan hmu. Anih cun Setan sál ihsin in runsuak. Himi in kan aiawh dingih Jesu-ih thisen luannak a huaptel. Thulungten amah kan rian ih, kan aipuang ih, leitlun ah a ropitnak kan lăngternak dingah, Khrih in in zalenter a si. Israel-mipawl vekin, Khristianpawl cu “rawngbawl dingih rundam” kan si.

1

1 ^aHipawl hi Jakob thawi Izip ram ih a thlengtu Israel tefapawlih hmin an si. Mi kip anmai sungkua cio thawn an thleng. 2 Cupawl cu Reuben, Simeon, Levi le Judah, 3 Issakar, Zebulun le Benjamin, 4 ^bDan, Naftali, Gad le Asher tla an si. 5 ^cJakob-ih tesinfapawl cu an zaten mi 70 an si, ziangahtile Joseph cu Izip ah a rak um cia. 6 ^dCule Joseph le a unaupawl zate le amai san minung zaten an thi thluh. 7 ^eAsinan Israel tefapawl cu ci tampi an thlah ih, a tawr le sĕngin an ṭhang, an karhzai ih, nasa zetin an cak deuhdeuh, cule ram sungah an khat ṭheh.

1:1^a Sem 46:8

1:4^b Mip 1:20-43

1:5^c Sem 46:26; Dnp 10:22

1:6^d Sem 50:26; Apo 7:15

1:7^e Sem 12:2; Dnp 7:13; Eze 16:7

Izip Ram ih Israel Tuarnak

8 ^aCun Joseph thei lo tu Izip siangpahrang thar a hung suak. 9 ^bCule anih in a mipawl hnenah, “Zoh hnik uh, Israel tefapawlih miphun cu kanmah hnakin an tam in an caksawn. 10 ^cRa uh, anmah cu fim zetin tawlrel uhsi, cu lo asile an karhzai ding ih, hitin a si ding, ral do cān ah kan ralpawl lamah ṭang tahratin in do ding ih, ram ihsin an suak pang ding,” tiah a ti. 11 ^dCuruangah an phurritpawl thawi anmah zawnzaiter dingin an tlunah khâwngtupawl an ruat. Cule Faro hrangah thilri retnak khawpi Pithom le Raamses an dĭn. 12 An zăwnzaihter deuhdeuh le an pungzai ih an ṭhang sinsin riangri. Cule Israel tefapawl in anmahpawl cu an râp. 13 ^eCule Izip-mipawl in Israel tefapawl cu harsa zetin hna an ṭuanter. 14 ^fCule annih in a har zet mi sál tānnak, tlăk, tlăkrawh le ló ih hnaṭuan phunkim ṭuannak in an nun cu har fualfo ko an tuah. An ṭuanter mi hnaṭuan hmuahhmuah cu an harsa zet.

1:8^a Jer 43:11; Apo 7:18-19

1:9^b Sem 26:16

1:10^c Sam 105:24-25; Apo 7:17-19

1:11^d Sem 47:11; Isa 60:10

1:13^e Sem 15:13-14; Sam 129:1; Isa 30:6; Jer 11:4

1:14^f Sem 11:3; Mip 20:15; Sam 66:11; Apo 7:19

15 ^aCun Izip siangpahrang cun Hebru nau sartupawl a sim, an lakih pakhat ih hmin cu Shifarah a si ih, a dangih hmin cu Puah a si. 16 Cule siangpahrang in, “Hebru nunaupawl nau nan hrinter tikah nau hrinnak hmun nan zoh pei ih, naute cu fapa asile nan that pei. Asinan naute cu fanu asile a nung pei,” tiah a ti. 17 ^bAsinan nau sartupawl cun Pathian an ṭihzah ruangah Izip siangpahrang thupek mi vekin tuah loin mipa nautepawl cu an zuah. 18 Cule Izip siangpahrang in nau sartupawl cu a ko hai ih an hnenah, “Ziangruangah hivek thil tuahin, mipa nautepawl tla nan zuah?” tiah a ti.

1:15^a Sem 35:17

1:17^b 1Sam 22:17; Thf 16:6; Dan 3:16-18; Apo 4:18

19 ^aCule nau sartupawl in Faro hnenah, “Ziangruangahtile Hebru nunaupawl cu Izip nunaupawl vek an si lo, ziangahtile annih cun annih cu an cakvak ih an hnenih nau sartupawl an thlen hlanah fa an hring,” tiah an ti.

1:19^a Jos 2:4-6; 2Sam 17:20

20 ^aCuruangah nau sartupawl cu Pathian in ṭha zetin a zoh hai ih, miphun cu an karhzai, cule an cak deuhdeuh. 21 ^bCun hitin a si, nau sartupawl in Pathian an ṭihzah ruangah anih in an hrangah sungkuapawl tla a pe.

1:20^a Thf 11:18; Ths 8:12; Isa 3:10; Heb 6:10

1:21^b 1Sam 2:35; 2Sam 7:11, 27-29; 1Sp 11:38

22 ^aCule Faro in a mipawl zate hnenah, “A suak mi fapa kip cu Nâl tiva pi sungah nan hlăwn pei ih, fanu kip cu nan zuah pei,” tiin thu a pe.

1:22^a Sem 41:1; Apo 7:19

2

Mosi a Suak

1 ^aLevi hnám ihsin mi pakhat a feh ih, Levi fanu pakhat nupi ah a ṭhi. 2 ^bCule nunau cu fa a vun ih fapa a hring. Cun cu nu in amah cu naute hmelṭha a si ti a hmuh tikah thla thum sung a thup. 3 ^cAsinan naute a thuh thei nawn lo tikah naute hrangah phaiphengpawl thawi a tuah mi bâwm a la ih katṭaya le thing thlîng thawn a erh. Naute cu cumi sungah a ret ih Nâl tiva pi kap câlte rûl lakah a ihter. 4 Cule a unu cu naute parah ziang a cang pei ti thei dingin hlaralah a ding.

2:1^a Sem 29:34; Mip 26:59

2:2^b Sem 39:6; Heb 11:23

2:3^c Sem 6:14; 41:2; Job 8:11; Isa 18:2; Apo 7:21

5 Cun Faro-ih fanu cu khawlhaw dingin Nâl tiva pi ah a vung ṭum. Cule a falapawl cu Nâl tiva pi kap tluanah an feh. Cule câlte rûl lakih bawmte a hmuh tikah va la dingin a siahhlawh nu a hei thlah. 6 Cule cumi cu a ăwn tikah naute a hmu ih, ngai hnik, mipa naute cu a ṭap. Cun a parah lainatnak a nei ih, “Himi hi Hebrumipawlih fātepawl lakih pakhat a si hi,” tiah a ti.

7 Cun Faro-ih fanu hnenah a unu in, “Naute hnawi lo peksaktu dingah Hebru nunau lak ihsin hnawi fawhtu ding na hrangah ko dingin ka feh pei maw?” tiah a ti.

8 Cule Faro-ih fanu in a hnenah, “Feh aw,” tiah a ti. Cun cu nute cu a feh ih naute nu cu a ko. 9 Cun Faro-ih fanu in cu nu hnenah, “Hih naute hi lain hnawi in peksak awla, na hlawh man ka lo pe ding,” tiah a ti. Cule cu nu cun naute cu a la ih a hnawi a fawh. 10 ^aCule naute cu a ṭhang ih, a nu in Faro-ih fanu hnenah a hruai, cule a fapa ah a cang. Cun cu nu in, “Amah cu tidai ihsin ka hnuhsuak ruangah,” tiin a hmin ah Mosi a sak.

2:10^a 1Sam 1:20; 2Sam 22:17; Apo 7:21

Mosi in Izip Pa a That

11 ^aCu laiah hitin a si, Mosi cu a pitlin tikah a unaupawl hnenah a fehsuak ih an phurritpawl tla a zoh. Cule a unaupawl lakih pakhat a si mi Hebru-mi pakhat cu Izip pa pakhat in a vuak rero lai a hmu. 12 Cu tikah khaw dang a tang ih, zohman a hmuh lo tikah Izip pa cu a that ih vunnel sungah a thup. 13 ^bCule a ni hnihnak a fehsuak tikah, ngai hnik, Hebru-mi mi pahnih cu an sualaw rero, cule a mawhtu pa hnenah, “Ziangah so na hawipi na vuak rero?” tiah a ti.

2:11^a Apo 7:23; Heb 11:24-26

2:13^b Apo 7:26-28

14 ^aCun anih in, “Kan tlunih uktu le thuṭhentu ah zo in a lo tuah? Izip-mi na rak thah bangin thah i tum maw si?” tiah a ti.

2:14^a Sem 13:8; Apo 7:27-28

Cu tikah Mosi cun a ṭih ih, “Hih thil cu theihngah taktak a si hi!” tiah a ti. 15 ^aFaro in himi thu a theih tikah Mosi cu thah a tum. Asinan Mosi cu Faro hmaika ihsin a tlân ih Midian ram ah a va cêng, cule tikhur kiangah a to.

2:15^a Sem 31:21; Heb 11:27

16 ^aMidian puithiam in fanu pasarih a nei. Cun cupawl cu an ra ih tidai an khai, cule an paih rante rual tidai pe dingin tikuangpawl an thunkhat. 17 ^bCun ran khāltupawl an ra ih annih cu an hnawhsuak. Asinan Mosi cu a dīng ih anmah a bawm, cule an rante rual cu tidai a pe.

2:16^a Sem 24:11; 30:38

2:17^b Sem 29:3, 10; 1Sam 30:8; Sam 31:2

18 ^aAn pa Reuel hnen an thlen tikah an pa cun, “Ziangtin tuihsun cu nan va thleng tuan ve?” tiah a rak ti hai.

2:18^a Mip 10:29

19 Cule annih in, “Izip pa pakhat in ran khāltupawl kut ihsin in runsuak ih tidai tiang hman khawp ko in khaisak ih rante rual tla tidai in peksak,” tiah an ti.

20 ^aCu tikah anih in a fanupawl hnenah, “Amah cu khuiah so a um? Ziangruangah cu pa cu nan tān ta men? Amah cu rawl ei dingin ko uh,” tiah a ti.

2:20^a Sem 31:54

21 ^aCun Mosi cu cu pa hnenih um dingin a lung a kim ih, cu pa cun a fanu Zipporah cu Mosi hnenah a pek. 22 ^bCule cu nu in fapa pakhat Mosi a hrinsak ih a hmin ah ^cGershom a sak, ziangahtile, “Keimah cu ram dangah mikhual ka si,” tiah a ti.

2:21^a Mip 12:1

2:22^b Sem 23:4; Lai 18:30; Heb 11:13

2:22^c Gershom: “Cu tawkih mikhual” tinak a si.

23 ^aNi tampi a rei hnuah hitin a rak cang, Izip siangpahrang cu a thi. Cun Israel tefapawl cu sál tānnak ruangah an hrûm ih an ausuak. Cule sál tānnak ruangih an aunak cu Pathian hnenah a thleng. 24 ^bCule Pathian in an hrūmnak a thei ih, Abraham, Isak le Jakob thawi a thukham cu Pathian in a máng. 25 ^cCule Israel tefapawl cu Pathian in a zoh hai ih, Pathian in a thei hai.

2:23^a Mip 20:15-16; Dnp 26:7

2:24^b Sem 8:1; 9:15

2:25^c Luk 1:25; Apo 7:34

3

Thing Bŭk Alh le Mosi

1 ^aMosi cu Midian puithiam, a pu Jethro-ih rante rual a khāl. Cule ramṭhing nitlaknak lamah a rante rual a hruai ih, Pathian tlang, Horeb a thleng. 2 ^bCule a hnenah Jehovah-ih vancungmi cu thing bŭk ihsin meisa alh lakah a rung lang. Cule anih in a zoh ih, ngai hnik, thing bŭk cu a kāng rero nân, thing bŭk cu a ziam lo. 3 Cule Mosi in, “Ka va pial ding ih, hi hmuhnak maksak hi ka zoh hnik pei, ziangah so thing bŭk cu a kangrál lo,” tiah a ti.

3:1^a Mip 10:29; Dnp 1:2, 6; Mal 4:4

3:2^b Sem 16:7; Apo 7:30

4 ^aCule zoh dingin a va pial kha Jehovah in a hmuh tikah, Pathian in thing bŭk lak ihsin amah a ko ih, “Mosi, Mosi!” tiah a ti.

3:4^a 1Sam 3:4

Cule anih in, “Hinah ka um,” tiah a ti.

5 ^aCun anih in, “Hi hmun rak naih hlah. Na kedam phawih aw, ziangahtile na dīnnak hmun hi lei thianghlim a si,” tiah a ti. 6 ^bCule anih in, “Keimah cu na paih Pathian, Abraham-ih Pathian, Isak-ih Pathian le Jakob-ih Pathian ka si,” tiah a ti. Cule Pathian zoh ding a ṭih ruangah Mosi cun a hmai a thup.

3:5^a Sem 28:17; Jer 30:21; Apo 7:33

3:6^b Sem 24:12; Isa 6:5; Apo 3:13

7 ^aCule Jehovah in, “Izip ih a um mi ka mipawl palbĕt an sinak fiangten ka hmu zo ih, anmah khâwngtupawl ruangih an aunak ka thei zo, ziangahtile an zăwnzaihnakpawl ka thei. 8 ^bCule Izip-mipawlih kut ihsin anmah runsuak dingah le cu tawk ram ihsin a ṭha mi le a kau mi ram, hnawi ti le khuai tizu luannak ram, Kanaan-mipawl, Heth-mipawl, Amor-mipawl, Periz-mipawl, Hiv-mipawl le Jebus-mipawlih hmun ah anmah hruaisuak dingin ka rung ṭum zo. 9 ^cCuruangah ngai hnik, Israel tefapawlih aunak ka hnenah a thleng zo ih, Izip-mipawl in palbĕtnak ih anmah an palbĕtzia ka hmu zo. 10 ^dCuruangah atu-ah ra aw, Izip ihsin ka mi Israel tefapawl hruaisuak dingah Faro hnenah ka lo thlah ding,” tiah a ti.

3:7^a Apo 7:34

3:8^b Sem 11:5; 12:7; Mip 13:27; Dnp 1:25; Eze 20:6; Apo 7:34

3:9^c Mip 10:9

3:10^d Sem 15:13; Dnp 4:20; Jos 24:5; 1Sam 12:6, 8; 1Sp 8:16; Sam 105:26; Mik 6:4; Apo 7:34

11 ^aAsinan Mosi in Pathian hnenah, “Faro hnenah fehin le Izip ihsin Israel tefapawl hruaisuak dingah zo so ka si?” tiah a ti.

3:11^a Lai 6:15; Jer 1:6

12 ^aCu tikah anih in, “Na hnenah ka um rori ding ih, himi hi ka lo thlahnak hminsinnak a si ding: Izip ihsin mipi na hruaisuak ṭheh hnuah hi tlang ah Pathian nan rian ding a si,” tiah a ti.

3:12^a Sem 26:3; Mip 26:10; Jos 2:12; Lai 6:17; Sam 86:17; Isa 7:14; Rom 8:31

13 ^aCun Mosi in Pathian hnenah, “Ngai hnik, Israel tefapawl hnenah fehin an hnenah, ‘Nan pupápawlih Pathian in nan hnenah i thlah,’ tiih ka sim tikah, ‘A hmin zo so?’ in ti asile, an hnenah ziang so ka sim ding?” tiah a ti.

3:13^a Sem 32:29

Keimah cu Keimah ka Si

14 ^aPathian in Mosi hnenah, “KEIMAH CU KEIMAH KA SI,” tiah a ti. Cule anih in, “Israel tefapawl hnenah, ‘KEIMAH in nan hnenah i thlah,’ tiin na va ti hai pei,” tiah a ti. 15 ^bCuihhleiah Pathian in Mosi hnenah, “Israel tefapawl hnenah hitin na sim pei, ‘Nan pupápawlih Pathian Jehovah, Abraham-ih Pathian, Isak-ih Pathian le Jakob-ih Pathian in nan hnenah i thlah. Hihi ka hmin a si kumkhua ih, himi hi san hmuahhmuah tiangih keimah in cīn ringring nak ding a si,’ tiah na sim pei. 16 ^cFeh awla Israel upapawl hmunkhat ah fĭnkhawmaw, cule an hnenah, ‘Nan pupápawlih Pathian Jehovah, Abraham, Isak le Jakob-ih Pathian cu ka hnenah a lang ih, “Ka lo vehvai taktak zo ih, Izip ah nan parah ziang tuah a si ti ka hmu zo; 17 ^dcule Izip ram ih zăwnzaihnak ihsin Kanaan-mipawl, Heth-mipawl, Amor-mipawl, Periz-mipawl, Hiv-mipawl le Jebus-mipawlih ram, hnawi ti le khuai tizu luannak ram ah ka lo hruaisuak ding,” tiah ka rak sim zo,’ tiah sim aw. 18 ^eCun na aw an ngaithla ding, cule nangmah le Israel upapawl cu Izip siangpahrang hnenah nan ra ding ih a hnenah, ‘Hebrumipawlih Pathian Jehovah in kanmah in táwng zo ih, atu-ah Jehovah kan Pathian hnenih raithawi dingin zangfahten ni thum feh, ramṭhing ah in fehter aw,’ tiah nan ti pei. 19 ^fAsinan kut cak rori hmang hmanin Izip siangpahrang in a lo suakter lo ding ti ka thei. 20 ^gCule ka kut ka hawi ding ih a sungih ka tuah ding mi ka mangbangza thil hmuahhmuah thawn Izip ka vaw ding, cule cumi hnuah a lo fehter ding. 21 ^hCule Izip-mipawl mithmuh ah hi miphun hi duhsaknak ka pe ding. Cule hitin a si ding, nan feh tikah kutlawng in nan feh lo ding. 22 ⁱCuhnakin nunau pakhat cio in a innhnen le a inn ih a cêng mi hnen roriah ngun thilri, sui thilri le hnipuan a dil pei ih nan fapapawl le nan fanupawl nan hruhter sawn pei. Cutin Izip-mipawl nan răm ding a si,” tiah a ti.

3:14^a Joh 8:58; Heb 13:8; Thu 1:8

3:15^b Sem 31:42; Sam 45:17; Isa 42:8; Jer 16:21; Dan 2:23; Hos 12:5

3:16^c Pui 4:15; Mip 11:16; Dnp 5:23; Thf 31:23; Eze 8:11

3:17^d Sem 15:16; Suah 3:8

3:18^e Sem 14:13; 30:36; Mip 23:4, 16

3:19^f Mip 14:11; Dnp 4:34; Neh 9:10; Isa 41:10; Jer 21:5; 32:20; Dan 9:15; Mik 7:15; Apo 7:36

3:20^g Dnp 4:34, 37; 2Sp 17:36; 2San 6:32; Jer 32:20; Mik 7:15; Apo 7:36

3:21^h Sem 39:21; 1Sp 8:50; 2San 30:9; Neh 1:11; Thf 16:7; Jer 42:12

3:22ⁱ Sem 15:14; Ezr 1:4, 6; Job 27:16-17; Eze 29:10; 39:10

4

Hminsinnakpawl

1 Mosi in a sawn ih, “Asinan ngai hnik, in zum lo ding ih ka aw khal an ngai lo ding, ziangahtile, ‘Na hnenah Jehovah a rak lang lo,’ an ti ding,” tiah a ti.

2 ^aCule Jehovah in a hnenah, “Na kut ih um mi kha ziang a si?” tiah a ti.

4:2^a Sem 38:18; Mip 17:2; Jos 8:18; Lai 6:21; 1Sam 14:27; 2Sp 4:29

Anih in, “Kianghrăwl,” tiah a ti.

3 ^aCule anih in, “Cucu lei ah hlăwn aw,” tiah a ti. Cutin lei ah a hlăwn ih cumi cu rul ah a cang, cule cumi cu Mosi in a tlansan. 4–5 ^bCun Jehovah in Mosi hnenah, “An pupápawlih Pathian Jehovah, Abraham-ih Pathian, Isak-ih Pathian le Jakob-ih Pathian cu na hnenah a lang ti an zum thei nak dingah, na kut suah awla a mei in kai aw,” tiah a ti. Cun a kut a suah ih a kai, cule a kut ah kianghrăwl ah a cang.

4:3^a Suah 7:10-12

4:4-5^b Suah 3:6, 15

6 ^aCuihhleiah Jehovah in a hnenah, “Na kut in na âwm pur aw,” tiah a ti. Cule a kut in a âwm a pur ih a lâksal tikah, ngai hnik, vur bangin a kut a phâr. 7 ^bCule Jehovah in, “Na kut in na âwm pur lala aw,” tiah a ti. Cule a kut in a âwm a pur lala, cule a kut cu a âwm ihta a hnuksuah tikah, ngai hnik, a titsa dang vekah a cangsal. 8 ^c“Cun hitin a si ding, an lo zum lo ih, hminsinnak hmaisa thucah an ngai lo a si khalle, a netasawn hminsinnak thucah cu an zum ding. 9 Cule hitin a si ding, hi hminsinnak pahnih khal zum loin simaw, na aw ngai loin simaw an um asile Nâl tiva pi ihsin tidai na la pei ih, lei ro parah na thle pei. Cule Nâl tiva pi ihsin na lâk mi tidai cu lei ro parah thisen ah a cang ding,” tiah a ti.

4:6^a Pui 13:2, 11; Mip 12:10; Dnp 24:9; 2Sp 5:1, 27; 2San 26:21

4:7^b 2Sp 5:14; Mat 8:3; Luk 17:12-14

4:8^c Lai 6:17; 1Sp 13:3; Isa 7:14; Jer 44:29

10 Cun Mosi in Jehovah hnenah, “Maw ka Bawipa, kei cu tuih hlanah siseh, na siahhlawh hnenih na ṭawng hnuah siseh, keimah cu kamnâl mi ka si lo, ṭawng hnâng le awhak ka si sawn,” tiah a ti.

11 ^aCu tikah Jehovah in a hnenah, “Minung kâ cu zo in so a tuah? Asilole ṭawng thei lo, hnaset, mitvâng le mitcaw cu zo in so a tuah? Keimah, Jehovah ka si lo maw? 12 ^bCuruangah atu-ah feh awla, na kâ cu ka umpi ding ih na sim ding mi ka lo zirh ding,” tiah a ti.

4:11^a Sam 94:9; Mat 11:5; Luk 1:20, 64; Joh 10:21

4:12^b Mip 23:5; Dnp 18:15, 18; Isa 50:4; Jer 1:9; Mat 10:19-20; Mar 13:11; Luk 12:12

13 ^aAsinan anih in, “Maw ka Bawipa, zangfahten thucah cu mi dang hmangin thlah mai aw,” tiah a ti.

4:13^a Jon 1:1-3

14 ^aCule Jehovah-ih thinhengnak cu Mosi dokalhin a alh ih, “Levi-mi Aaron cu na unau a si lo maw? Ṭawng a thiam zet ti ka thei. Cun zoh hnik, amah khal nangmah lo táwng dingin a ra rero lai. Nangmah a lo hmuh tikah a thinlung ah a lung a awi ding. 15 ^bA hnenah thu na sim pei ih a kâ ah ṭawngkampawl na ret pei. Cule na kâ le amai kâ cu ka umpi ding ih nan tuah ding mi ka lo zirh ding. 16 ^cCutin anih cu miphun hnenah na hrangih ṭawngtu a si ding. Cule amah rori cu na hrangah kâ vek a si ding ih nang cu a hrangah Pathian vek na si ding. 17 ^dCule na kut in hi kianghrăwl hi na keng pei ih, cumi thawn hminsinnakpawl na tuah ding a si,” tiah a ti.

4:14^a Suah 4:27; Mip 11:1, 10, 33; Dnp 7:25; Jos 7:1; Job 17:8

4:15^b Mip 23:5, 12, 16; Dnp 18:18; Jos 1:8; Isa 51:16; Jer 1:9

4:16^c Mip 33:1; Sam 77:20; Jer 15:19; Mik 6:4

4:17^d Mip 14:11; Dnp 4:34; Sam 74:9

Izip ah Mosi a Kir

18 Mosi cu a feh ih a pu Jethro hnenah a kirsal, cule a hnenah, “Zangfahten Izip ram ih a um mi ka unaupawl, an nung lai maw ti vehvai dingin an hnenah i fehterin, i kirter aw,” tiah a ti.

Cule Jethro in Mosi hnenah, “Hnangamten feh aw,” tiah a ti.

19 ^aCule Jehovah in Midian ih Mosi hnenah, “Feh aw, Izip ram ah kir aw, ziangahtile na nunnak hawltu mipa zaten an thi thluh zo,” tiah a ti. 20 ^bCun Mosi in a nupi le a fapapawl cu a hruai ih lāk parah a toh hai, cule Izip ram ah a kir. Cun Mosi in a kut in Pathian-ih kianghrăwl cu a keng.

4:19^a Mat 2:20

4:20^b Suah 4:17; 17:9; 18:3-4; Apo 7:29

21 ^aCule Jehovah in Mosi hnenah, “Izip ram ih na kirsal tikah na kut ih ka lo pek mi thilmak hmuahhmuah hi Faro hmaiah na tuah tengteng pei. Asinan mipi fehter lo dingin a thinlung ka hakter ding. 22 ^bCun Faro hnenah, ‘Jehovah in hitin a ti, “Israel cu ka fapa, ka fatir a si. 23 ^cCule na hnenah, ‘Ka fapa cu in rian dingah feh seh,’ tiah ka lo sim. Asinan fehter ding na el a si ahcun, ngai hnik, na fapa, na fatir ka that ding,” tiah Jehovah in a ti,’ tiah sim aw,” tiah a ti.

4:21^a Dnp 2:30; Jos 11:20; 1Sam 6:6; Sam 105:25; Isa 6:10; Joh 12:40; Rom 9:18

4:22^b Sem 10:15; Dnp 32:6; Isa 9:6; Jer 3:19; Hos 11:1; Mal 2:10; Rom 9:4; 2Ko 6:18

4:23^c Sem 49:3; Mip 8:17; Sam 78:51

Mosi Fapa Serh Zim Tannak

24 ^aCule lamzin ah hitin a si, Mosi cu riahbûk ah Jehovah in a táwng ih thah a tum. 25 ^bCun Zipporah cun ṭêklung hriam a la ih, a fapaih serh vun a tansak ih Mosi-ih ke a daiter, cule, “Nangmah cu ka hrangah thisen pasal rori na si!” tiah a ti. 26 Cutin Jehovah in Mosi cu a fehter. Cun a nupi in, serh zim tan nak ruangah, “Nangmah cu thisen pasal na si!” tiah a ti.

4:24^a Mip 22:22

4:25^b Sem 17:14; Jos 5:2-3

Jehovah in Aaron a Bia

27 ^aJehovah in Aaron hnenah, “Mosi táwng dingah ramṭhing ah feh aw,” tiah a ti. Cule anih cu a feh ih, Pathian tlang ah amah cu a va táwng ih a hnam. 28 Cule Mosi in Aaron hnenah amah thlahtu Jehovah-ih kamsuakthu hmuahhmuah le tuah dingih thu a rak pek mi hminsinnak hmuahhmuah kha a sim. 29 Cun Mosi le Aaron cu an feh ih Israel tefapawlih upapawl zaten an kokhawm. 30 Cule Aaron in Mosi hnenih Jehovah in a rak sim mi kamsuakthu hmuahhmuah tla cu a sim. Cun mipi mithmuh ah hminsinnakpawl tla a tuah. 31 ^bCu tikah mipi in an zum, cule Jehovah in Israel tefapawl a rak vehvai hai ih an zăwnzaihnak tla a hmu ti an hna ih an theih tikah an kûn ih, an bia.

4:27^a Sem 27:27; Suah 3:1; 18:5; 24:13

4:31^b Sem 16:11; 24:26; 1San 29:20

5

Faro Hmaiah Mosi le Aaron

1 Cumi hnuah Mosi le Aaron cu an feh ih Faro hnenah, “Israel-ih Pathian Jehovah in, ‘Ka mipawl in ramṭhing ah ka hnenih puai an tuah thei nak dingah feh hai seh,’ tiin a sim,” tiah an ti.

2 ^aCule Faro in, “Israel-mipawl fehter dingah a thu ka lun ding mi Jehovah cu zo a si? Jehovah ka thei lo, Israel-mipawl khal ka fehter hai lo ding,” tiah a ti.

5:2^a Lai 2:10; Job 21:15; Mal 3:14

3 ^aCu tikah annih in, “Hebrumipawlih Pathian in in táwng zo. Zangfahten ni thum feh ramṭhing ah in fehter awla, Jehovah kan Pathian hnenah rai kan thawi ding, culole nathri sia simaw, ralnâm simaw kan parah a tla pang ding,” tiah an ti.

5:3^a Sem 30:36; Pui 26:25; Mip 14:12; Dnp 28:21; 2Sam 24:13

4 Cun Izip siangpahrang in an hnenah, “Mosi le Aaron, ziangah so mipi hnaṭuan lo ko nan tuah? Nanmai ritphurh ah kirsal uh,” tiah a ti. 5 ^aCule Faro in, “Zoh uh, atu-ah rammipawl an tam zet ih anmah cu an ritphurh nan cawlhter!” tiah a ti.

5:5^a Sem 12:2

6 ^aCule cuih ni thothoah Faro in mipi khâwngtupawl le an hotupawl hnenah, 7 “Tuih hlan bangin minungpawl tla tlăkrawh tuahnak ding cangpâwl nan pe nawn lo pei. Annih cu feh hai sehla, anmai hrangah cangpâwl khawm hai seh. 8 Cule tuih hlanih an rak tuah mi zat tlăkrawh nan tuahter ding a si. Nan ṭhumsak ding a si lo. Ziangahtile, annih cu an zang a zel. Curuangah, ‘Kan Pathian hnenah raithawi dingin kan feh ding,’ tiin an au. 9 Mipapawl parah hnaṭuan tamsin ṭhum si seh, cutin cumi ah ṭuanbāng hai sehla, bumnak ṭawngkampawl ngai hlah hai seh,” tiin thu a pe hai.

5:6^a Sem 11:3

10 Cule mipi khâwngtupawl le an hotupawl cu an fehsuak ih minungpawl hnenah, “Faro in hitin a sim, ‘Cangpâwl ka lo pe lo ding. 11 Feh uh, nan hmuh thei nak ihta nanmah ten cangpâwl la uh. Asinan nan hnaṭuan cu zianghman ṭhumsak si hlah seh,’ tiin a sim,” tiah an ti. 12 Cutin mipi cu Izip ram zate hrawhsuak thluh in cangpâwl aiah fang ko khawm dingah an vâkdarh. 13 Cule mikhâwngtupawl in, “Cangpâwl a um lai vekin nan hnaṭuan, nan ni tin hnaṭuan ṭuan ṭheh uh,” tiin hmanhmawh dingin an năwr. 14 ^aFaro-ih mikhâwngtupawl in Israel tefapawl hotu dingih an ruat mipawl cu vua-in, “Ziangruangah tuih hlan vekin mizan le tuihsun hmuah nan tlăkrawh tuah ṭuanvo nan rak ṭheh lo?” tiah an sut.

5:14^a Isa 10:24

15 Cun Israel tefa hotupawl cu Faro hnenah an ra ih, “Ziangah so na siahhlawhpawl hi hi vekih in tuah? 16 Na siahhlawhpawl hnenah cangpâwl pek a si lo ih, kan hnenah annih in, ‘Tlăkrawh tuah uh!’ tiah in ti. Cule ngai hnik, nangmai mipawlih ti sual a si sawn nân, na siahhlawhpawl vuak an si,” tiin an au.

17 Asinan anih in, “Nannih cu mizangzêl nan si, mizangzêl nan si! Curuangah, ‘Jehovah hnenah raithawi dingin feh uhsi,’ tiah nan ti. 18 ^aCule atu-ah feh uhla ṭuan uh, cangpâwl pek nan si lo ding, cuti cingin nan tlăkrawh tuah ding mi zat nan tuah thotho ding a si,” tiah a ti hai. 19 Cule Israel tefa hotupawl cun, “Nan ni tin ṭuanvo zat tlăkrawh cu ṭhum a si lo ding,” tiih sim an si hnu cun an dinhmun a sia ti an hmu.

5:18^a Sem 15:13

20 Cule Faro hnen ihsin an ra suah tikah, anmah táwng dingih ding Mosi le Aaron cu an táwng. 21 ^aCule annih in an hnenah, “Jehovah in lo zohin thu lo ṭhen seh. Ziangruangahtile in that dingin an kut ih ralnâm ret dingah Faro mithmuh ah le a siahhlawhpawl mithmuh ah nanmah in fihnungza ah in tuah zo a si,” tiah an ti.

5:21^a Sem 16:5; 34:30; Mip 14:3

22 ^aCuti cun Mosi cu Jehovah hnenah a kirsal ih, “Bawipa, ziangah so hi mi senpi hnenah buainak na thlen? Ziangruangah so i rak thlah? 23 ^bZiangahtile na hmin in thusim dingin Faro hnen ka thlen ihsin anih in hi mi senpi hnenah thil ṭha lo a rak tuah. Nang in le na mipawl na runsuak hai fawn si lo,” tiah a ti.

5:22^a Mip 11:11; Dnp 1:12; Jos 7:7

5:23^b Jer 4:10; Eze 14:9

6

Pathian Thutiamkam

1 ^aJehovah in Mosi hnenah, “Atu-ah Faro hnenih ka tuah ding mi na hmu ding. Ziangahtile a cak mi kut in anmah cu a fehter hai ding ih, a cak mi kut in a ram ihsin anmah a dawisuak ding,” tiah a ti.

6:1^a Dnp 5:15

2 ^aCule Pathian in Mosi a bia ih a hnenah, “Keimah cu Jehovah ka si. 3 ^bZiangkimtithei Pathian dinhmun in Abraham hnen, Isak hnen le Jakob hnenah ka rak lang, asinan Jehovah ti mi ka hmin in an hnenah ka rak theihteraw lo. 4 ^cKanaan ram anmah pe dingin anmah thawn ka thukham ka rak dĭn fawn. Cumi cu an khualtlawnnak ram, mikhual vekih an umnak ram a si. 5 ^dCuihtlunah Izip-mipawl in sál ih an ret mi Israel tefapawlih hrūmnak cu ka thei ih, ka thukham ka máng. 6 ^eCuruangah Israel tefapawl hnenah, ‘Keimah cu Jehovah ka si, Izip-mipawlih phurrit hnuai ihsin ka lo hruaisuak ding. An sál tānnak ihsin ka lo runsuak ding ih, bān suahin le thuṭhennak rapthlak pawl in ka lo tlen ding. 7 ^fKa mi ah ka lo la ding ih, keimah cu nan Pathian ka si ding. Cun keimah cu Izip-mipawlih phurrit hnuai ihsin a lo lasuaktu Jehovah nan Pathian ka si ti nan thei ding. 8 ^gAbraham, Isak le Jakob hnenah pe dingih ^hsia ka săm zo mi ram ah ka lo hruailut ding ih, cumi cu nan co dingah ka lo pe ding. Keimah cu Jehovah ka si,’ tiah sim aw,” tiah a ti. 9 ⁱCule Mosi in Israel tefapawl hnenah hitin thu a sim, asinan thinlung ānhainak le a har zet mi sál tānnak ruangah Mosi cu an ngaithla lo.

6:2^a Pui 11:44; Joe 2:27

6:3^b Sem 17:1; Sam 48:10; Isa 52:6; Jer 16:21; Eze 37:6, 13; Joh 8:58

6:4^c Sem 6:18; 12:7; 17:8; Apo 7:5; Rom 4:13; Gal 3:16

6:5^d Sem 9:15; Apo 7:34

6:6^e Dnp 6:12; 7:8; Neh 1:10; Job 19:25; Sam 19:14; Apo 13:17

6:7^f Sem 17:7; Eze 11:19-20; 39:6; Joe 3:17; Rom 9:4

6:8^g Sem 12:7; 14:22; Jer 11:5; Eze 20:6; Thu 10:5-6

6:8^h sia ka săm: A ṭawng hrampi ah “ka kut ka phar” ti a si.

6:9ⁱ Sem 34:30

10 Cule Jehovah in Mosi hnenah, 11 “Va lut aw, Israel tefapawl a ram ihsin suakter dingah Izip siangpahrang Faro va sim aw,” tiin a sim.

12 Cule Mosi in Jehovah hmaiah, “Israel tefapawl in in rak ngaithla lo. Cuti cun ziangtin so Faro in i ngaithlak ding, ziangahtile kei cu ^aṭawngkam thiam lo ka si?” tiin a sim. 13 Cun Jehovah in Mosi le Aaron a bia ih, Israel tefapawl cu Izip ram ihsin hruaisuak dingah Israel-mipawl hrangah le Izip siangpahrang Faro hrangah thupek a pe hai.

6:12^a ṭawngkam thiam lo: A ṭawng hrampi ah “hmur serh tan lo” ti a si.

Israel Tesinfapawl

14 ^aHipawl hi an palepawlih sungza lubân an si. Israel-ih fatir, Reuben-ih fapapawl cu: Hanok, Pallu, Hezron le Karmi tla an si. Hipawl hi Reuben-ih hrinpawl an si. 15 ^bSimeon-ih fapapawl cu Jemuel, Jamin, Ohad, Jakin, Zohar le Kanaan nunaunuih fapa a si mi Shaul tla an si. Hipawl hi Simeon-ih hrinpawl an si. 16 ^cAn tesinfanaupawl zulhin hipawl hi Levi fapapawlih hmin an si, Gershon, Kohath le Merari tla an si. Levi dam sung kum cu 137 a si. 17 ^dGershon-ih fapapawl cu an hrinpawl zulhin Libni le Shimi tla an si. 18 ^eCule Kohath-ih fapapawl cu Amram, Izhar, Hebron le Uzziel tla an si. Cule Kohath-ih dam sung kum cu 133 a si. 19 ^fMerari-ih fapapawl cu Mahli le Mushi an si. Hipawl hi an cithlah sâwng zulhin Levi hrinpawl an si.

6:14^a Sem 29:32; Mip 1:1

6:15^b Sem 29:33

6:16^c Sem 29:34; 46:11; Mip 3:17; Jos 21:7; 1San 6:1, 16-19

6:17^d Mip 3:18

6:18^e Mip 3:19, 27; 1San 6:2, 18

6:19^f Mip 3:20, 33

20 ^aCule Amram cun a paih farnu Jokebed cu nupi ah a ṭhi ih, Aaron le Mosi a hrinsak. Cule Amram-ih dam sung kum cu 137 a si. 21 ^bIzhar-ih fapapawl cu Korah, Nemfeg le Zikri tla an si. 22 ^cCule Uzziel-ih fapapawl cu Mishael, Elzafan le Zithri tla an si. 23 ^dAaron in Amminadab-ih fanu Elisheba, Nahshon-ih farnu cu a nupi ah a ṭhi ih Nadab, Abihu, Eleazar le Ithamar a hrinsak. 24 ^eCule Korah-ih fapapawl cu Assir, Elkanah le Abiasaf tla an si. Hipawl hi Korah-mipawlih hrinpawl an si. 25 ^fAaron-ih fapa Eleazar in Putiel fanupawl lakih pakhat cu a nupi ah a ṭhi ih Finehas a hrinsak. Hipawl hi an hrinpawl zulhin Levi-mipawlih pupápawlih sungza lubânpawl an si.

6:20^a Mip 26:59; 1San 23:13

6:21^b Mip 16:1; 1San 6:37-38

6:22^c Pui 10:4; Mip 3:30; 2San 29:13

6:23^d Mip 1:7; 3:2, 32; Jos 14:1; Rut 4:19; 1San 2:10; 6:3; Mat 1:4

6:24^e Mip 16:1; 1San 6:22, 37

6:25^f Mip 25:7, 11; Jos 24:33; Sam 106:30

26 Hipawl hi Aaron le Mosi hnenah Jehovah in, “An ralkappawl zulhin Israel tefapawl cu Izip ram ihsin hruaisuak uh,” a rak ti mipawl kha an si. 27 ^aHih Mosi le Aaron hi Izip ihsin Israel tefapawl hruaisuak dingah Izip siangpahrang Faro hnenih ṭawngtu an si.

6:27^a Mip 3:1; Sam 77:20

28 Cule hitin a si, Izip ram ah Jehovah in Mosi hnenih a ṭawng ni ah, 29 Jehovah in Mosi hnenah, “Keimah cu Jehovah ka si. Izip siangpahrang Faro hnenah na hnenih ka sim mi zaten sim aw,” tiah a rak ti.

30 Asinan Mosi in Jehovah hmaiah, “Ngai hnik, kei cu ^aṭawngkam thiam lo mi ka si ih, ziangtin so Faro in ka thu a ngaithlak ding?” tiah a rak ti.

6:30^a ṭawngkam thiam lo: 6:12 simfiangnak zoh aw.

7

1 ^aJehovah in Mosi hnenah, “Zoh hnik, nangmah cu Faro hrangah pathian vekah ka lo tuah zo ih, na unaupa Aaron cu na profet a si ding. 2 Thu ka lo pek mi zaten na sim ding a si. Cule na unaupa Aaron in a ram sung ihsin Israel tefapawl suah dingah Faro hnenah a sim ding a si. 3 ^bCule Faro-ih thinlung ka hakter ding ih, Izip ram ah ka hminsinnakpawl le ka mangbangzapawl ka karhter ding. 4 ^cSikhalsehla Faro in a lo ngaithla lo ding, cutin Izip parah ka kut ka thlak ding ih, ka ralkappawl le ka mi Israel tefapawl cu dāntatnak rapthlak hmangin Izip ram ihsin ka lasuak hai ding. 5 ^dCule Izip parah ka kut suahin anmai lak ihsin Israel tefapawl ka hruaisuak tikah Izip-mipawl in keimah cu Jehovah ka si ti an thei ding,” tiah a ti.

7:1^a Apo 14:12

7:3^b Apo 7:36; Rom 9:18

7:4^c Apo 7:36

7:5^d Sam 138:7; Eze 6:14

6 ^aCun Mosi le Aaron in cuti vek cun an tuah, Jehovah in anmah thu a pek hai vekin an tuah. 7 ^bCule Faro hnenih thu an sim laiah Mosi cu kum 80 mi a si ih, Aaron cu kum 83 mi a si.

7:6^a Sem 6:22; 7:5

7:7^b Dnp 29:5; 31:2; 34:7; Apo 7:23, 30

Kianghrăwl Rul ah a Cang

8 Jehovah in Mosi le Aaron hnenah, 9 ^a“Faro in, ‘Nanmai hrangah thilmak langter hnik uh,’ tiin nan hnenih a ti tikah, nang in Aaron hnenah, ‘Na kianghrăwl la aw, cule Faro hmaiah hlăwn awla rul ah cang seh,’ na ti ding,” tiin a sim. 10 Cule Mosi le Aaron cu Faro hnenah an lut ih, Jehovah in thu a pek vekin an tuah. Cule Aaron in Faro le a siahhlawhpawl hmaiah a kianghrăwl a hlăwn ih, cumi cu rul ah a cang.

7:9^a Dnp 6:22; 2Sp 19:29; Sam 78:43; Isa 7:11; Joh 2:11

11 ^aAsinan Faro khal in mifimpawl le dawithiampawl a ko, cule Izip mitkher thiam pawl khal in an camnakpawl thawn cu vekin an tuah ve. 12 Mi kip in an kianghrăwl an hlăwn ih, rul ah an cang. Asinan Aaron-ih kianghrăwl in an kianghrăwlpawl cu a dawlh thluh. 13 Cule Faro-ih thinlung cu a hak ih, Jehovah ih a sim cia bangin, anmah cu a ngaithla hai lo.

7:11^a Sem 41:8; Dnp 18:10; 1Sam 6:2; 2Sp 21:6; Isa 2:6; Jer 27:9; Dan 2:2; Mal 3:5; Mat 24:24; 2Ti 3:8

Tidai Thisen ah a Cang

14 Jehovah in Mosi hnenah, “Faro-ih thinlung cu a hak, mipi fehter ding a êl. 15 ^aZing ah Faro hnenah feh aw, tidai hmun ih a fehsuak tikah Nâl tiva pi kapah amah táwng dingin na dīng pei ih, rul ih a cang dah mi kianghrăwl kha na kut in na keng pei. 16 Cule a hnenah, ‘Hebrumipawlih Pathian Jehovah in na hnenah i thlah, “Ramṭhing ih in rĕn thei nak dingah ka mipawl feh hai seh,” tiah a ti. Asinan ngai hnik, atu tiangah na ngaithla cuang lo! 17 ^bJehovah in, “Himi in keimah cu Jehovah ka si ti na thei ding. Ngai hnik, ka kut ih a um mi kianghrăwl thawn Nâl tiva pi sungih a um mi tidai ka vaw ding ih, cupawl cu thisen ah an cang ding. 18 ^cCule Nâl tiva pi sungih ngapawl an thi ding, Nâl tiva pi cu a namsé ding ih, Izip-mipawl in Nâl tiva pi ih tidai in ding an fih ding,” a ti,’ tiah na ti pei,” tiah a ti.

7:15^a Sem 41:1

7:17^b Thu 11:6

7:18^c Sam 78:44; Isa 19:6

19 ^aCun Jehovah in Mosi hnenah, “Aaron hnenah, ‘Thisen ih an can thei nak dingah, na kianghrăwl la awla, Izip tipi tlun, an tiva te pawl tlun, an tiva pi pawl tlun, an tilipawl tlun le an tuahcawp tilipawl tlunah na kut hawi aw. Cule Izip ram pumpi ih thing khukhēngpawl le lung khukhēngpawl sungah thisen a um ding,’ tiin sim aw,” tiah a ti. 20 ^bCule Mosi le Aaron in Jehovah ih thupek vekin an tuah. Cule anih in a kianghrăwl a hawi ih, Faro mithmuh ah le a siahhlawhpawlih mithmuh ah Nâl tiva pi ih tidai cu a vuak. Cule Nâl tiva pi ih tidai zaten thisen ah a cang. 21 Nâl tiva pi sungih ngapawl an thi, Nâl tiva pi cu a namsia ih Izip-mipawl in Nâl tiva pi ih tidai an in thei lo. Curuangah Izip ram pumpi ah thisen a um.

7:19^a 2Sp 5:11

7:20^b Sam 78:44; Hab 3:8

22 ^aCun Izip-mi mitkher thiam pawl in an thiamnak thuthuppawl hmangin cuvek an tuah ve, cule Faro-ih thinlung cu a hak. Cule Jehovah ih a rak sim vekin a ngaithla hai lo. 23 Cule Faro cu a kir ih a inn sungah a lut, hi thu cu zianghman ah a siar cuang lo. 24 Cule Izip-mi zaten Nâl tiva pi kap tluan hmuahhmuah ah in ding tidai an lai, ziangruangahtile Nâl tiva pi ih tidai an in thei lo. 25 Cule Jehovah in Nâl tiva pi a vuak hnuah ni sarih a rung rei.

7:22^a Sem 41:8; Sam 105:28; Mat 24:24

8

Butlak

1 Jehovah in Mosi hnenah, “Faro hnenah feh awla a hnenah, ‘Jehovah in, “In rĕn thei nak dingah ka mipawl feh hai seh. 2 ^aAsinan anmah fehter ding na el asile, ngai hnik, na ramkulh sung zaten butlak in ka hrem ding. 3 Cule na inn sungah, na ihnak pindan sungah, na ihkhun parah, na siahhlawhpawlih inn sungah, na mipawl parah, na thŭkpawl ah le na sang nawnnak kheng kûm pawl sungah suak le lut dingin Nâl tiva pi in butlak a tawrih tawrin a suah ding. 4 Cule na parah, na mipawl parah le na siahhlawh zate parah butlak an kai ding,” a ti,’ tiah sim aw,” tiah a ti.

8:2^a Sam 78:45; Thu 16:13

5 Cun Jehovah in Mosi a bia ih, “Aaron hnenah, ‘Izip ram parah butlak hung suak dingah tiva te pawl tlun, tivapawl tlun le tilipawl tlunah na kianghrăwl hawi aw,’ tiah sim aw,” tiah a ti. 6 ^aCule Aaron in Izip tipi parah a kut a hawi ih, butlak an hung suak, cule Izip ram an khuh ṭheh. 7 ^bCule mitkher thiam pawl in an thiamnak thuthuppawl hmangin cuvek an tuah ve ih, Izip ram ah butlak an hung suak.

8:6^a Sam 78:45

8:7^b Mat 24:24

8 ^aCun Faro in Mosi le Aaron cu a ko hai ih, “Ka hnen ihsin le ka mipawl hnen ihsin butlak a lâkhlonak dingah Jehovah in dilsak uh, cule Jehovah hnenih rai an thawi thei nak dingah mi senpi ka fehter hai ding,” tiah a ti.

8:8^a Mip 21:7; 1Sam 12:19; 1Sp 13:6; Jer 42:2; Apo 8:24

9 Cule Mosi in Faro hnenah, “Na hnen le na innpawl ihsin butlak siatsuah ih Nâl tiva pi sung lawngih tāng dingin na hrang, na siahhlawhpawl hrang le na mipawl hrangih ka lo dilsak ding cān na thiahnak dingah upatnak ka lo pe,” tiah a ti.

10 ^aCule Faro in, “Thaizing ah,” tiah a ti.

8:10^a Dnp 3:24; 2Sam 7:22; 1Sp 8:23; 2San 6:14; Sam 71:19; Isa 40:18; Jer 10:6; Mik 7:18

Cule Mosi in, “Jehovah kan Pathian vek zohman an um lo ti na theihnak dingah na ṭawng bangtukin thleng seh. 11 Cule butlak cun na hnen ihsin, na innpawl ihsin, na siahhlawhpawl hnen ihsin le na mipawl hnen ihsin an lo suahsan ding. Nâl tiva pi sung lawngah an tāng ding,” tiah a ti.

12 Cun Mosi le Aaron cu Faro hnen ihsin an suak. Cule Mosi cu Faro hnenih a rak umter mi butlak thu ah Jehovah hnenah a ausuak. 13 ^aCule Jehovah in Mosi-ih ṭawngkam bangtukin a tuah. Cule inn sung ihta, kăwt sung ihta le lópawl ihta butlak cu an thi. 14 Cupawl cu an pengkhawm ih ram sung cu a namsia. 15 ^bAsinan Faro in thawvennak a um ti a hmuh tikah, Jehovah in a rak sim cia vekin, a thinlung a hakter ih a ngaithla hai lo.

8:13^a Jam 5:16-18

8:15^b Ths 8:11

Fikte

16 Jehovah in Mosi hnenah, “Aaron hnenah, ‘Izip ram pumpi ah ram ih leivut kha fikte a can ṭheh thei nak dingah na kianghrăwl hawiin cuih ram ih leivut vaw aw,’ tiin sim aw,” tiah a ti. 17 ^aCule cu vekin an tuah. Aaron in a kut a hawi ih, leilung leivut a vuak ruangah leivut cu minung par le ṭilva parah fikte ah an cang. Ram ih leivut zaten Izip ram pumpi ah fikte ah an cang.

8:17^a Sam 105:31

18 ^aMitkher thiam pawl in an thiamnak thuthuppawl hmangin fikte suahter an tum nân, an ti thei lo. Cutin minung le ṭilva parah fikte an um. 19 ^bCun mitkher thiam pawl in Faro hnenah, “Himi cu Pathian kut zung a si,” tiah an ti. Sikhalsehla Jehovah ih a rak sim cia vekin, Faro-ih thinlung a hak ih, anmah a ngaithla hai lo.

8:18^a Dan 5:8

8:19^b 1Sam 6:9; Neh 9:6; Sam 8:3; Luk 11:20

Thothe

20 Jehovah in Mosi hnenah, “Zing ah tuanten tho awla, Faro cu tidai hmun ih a ra suah tikah a hmaiah dīng aw. Cun a hnenah, ‘Jehovah in, “Keimah in rĕn thei nak dingah, ka mipawl feh hai seh. 21 Cuti si loih ka mipawl fehter na sian lo a si ahcun, ngai hnik, na par, na siahhlawhpawl par, na mipawl par le na innpawl sungah thothe rual ka thlah ding. Izip-mipawlih innpawl le an dīnnak lei par khalah thothe rual an khat thluh ding. 22 ^aCule cuih ni ah hi leilung tlunah keimah cu Jehovah ka si ti na theihnak dingah ka mipawlih cēnnak a si mi Goshen cu ka danglamter ding, cu tawkah thothe rual an um lo ding. 23 Ka mipawl le na mipawl karlakah ^bdanglamnak ka tuah ding. Hih hminsinnak cu thaizing ah a um ding,” tiin a sim,’ tiah sim aw,” tiah a ti. 24 ^cCule Jehovah in cu vekin a tuah. Faro-ih inn sungah, a siahhlawhpawlih inn sungah le Izip ram pumpi ah thothe rual sahpi an thleng. Thothe rual ruangah ram cu a siat.

8:22^a Dnp 4:20; 1Sp 8:36; Job 36:11; Sam 33:12; Mal 3:17

8:23^b danglamnak: Hebru ṭawng ah cun “tlennak” tinak a si.

8:24^c Sam 78:45

25 Cun Faro in Mosi le Aaron a ko ih, “Feh uh, hi ram ah nan Pathian hnenah raithawi uh,” tiah a ti.

26 ^aCule Mosi in, “Cu vekih tuah cu a dik lo, ziangahtile Jehovah kan Pathian hnenah Izip-mipawl ih fih mi rai kan thawi ah a cang ding. An mithmuh ah Izip-mipawlih fih mi rai kan thawi asile lungto in in deng lo ding maw? 27 ^bNi thum feh ramṭhing ah kan feh ding ih, amah in thu in pek vekin, Jehovah kan Pathian hnenah rai kan thawi ding,” tiah a ti.

8:26^a Sem 43:32

8:27^b Sem 30:36

28 ^aCule Faro in, “Jehovah nan Pathian hnenih rai nan thawi thei nak dingah ramṭhing ah ka lo fehter ding, hla tuk cu feh hlah uh. Ka hrang khalah in dilsak uh,” tiah a ti.

8:28^a Jer 37:3; Apo 8:24

29 ^aCun Mosi in, “Ngai hnik, na hnen ihsin ka fehsuak ding ih, Faro hnen ihsin, a siahhlawhpawl hnen ihsin le a mipawl hnen ihsin thaisun ah thothe rual an tlān thei nak dingah Jehovah hnenah ka dil ding. Asinan Faro in Jehovah hnenah raithawi dingah mi senpi fehter lo dingin bumnak hmang nawn hlah seh,” tiah a ti.

8:29^a Isa 26:10

30 Cule Mosi cu Faro hnen ihsin a suak ih Jehovah hnenah a dil. 31 Cule Mosi-ih ṭawngkam bangtukin Jehovah in a tuah; cule Faro hnen ihsin, a siahhlawhpawl hnen ihsin le a mipawl hnen ihsin thothe rual cu a ṭhawn. Pakhat te hman an tâng lo. 32 Asinan Faro cun hih cān khalah a thinlung a hakter ih, mipi fehter a siang cuang lo.

9

Ṭilva Thihnak

1 Jehovah in Mosi hnenah, “Faro hnenah feh awla, ‘Hebrumipawlih Pathian Jehovah in, “Keimah in rĕn thei nak dingah ka mipawl feh hai seh. 2 Ziangahtile anmah fehter ding na el ih, na kaibĕt hai a si ahcun, 3 ^angai hnik, ló ih na sumhnámpawl par, rangpawl par, lākpawl par, kalaukpawl par, ranpi rualpawl par le rante rualpawl parah Jehovah-ih kut a thleng ding. Cumi cu a khirhkhan zet mi nathri sia a si ding. 4 Cule Jehovah in Israel sumhnám le Izip sumhnám karlakah danglamnak a tuah ding. Cule Israel tefapawlih ta pauhpauh cu pakhat hman an thi lo ding,” tiin a rel,’ tiah amah sim aw,” tiah a ti. 5 Cun Jehovah in, “Thaizing ah Jehovah in ram sungah hi thil hi a tuah ding,” tiin cān khiah a tuah.

9:3^a Pui 5:6; 26:25; Job 13:21; Sam 32:4; 78:50; Amo 4:10; Apo 13:11

6 ^aCule Jehovah in a thaizing ah hi thil hi a tuah ih, Izip sumhnám zaten an thi nân, Israel tefapawlih sumhnám cu pakhat hman an thi lo. 7 Cun Faro in mi a thlah ih, ngai hnik, Israel-mipawlih sumhnám cu pakhat te hman an thi lo. Asinan Faro-ih thinlung cu a hung hak ih, mipi a fehter hai lo.

9:6^a Sam 78:48-50

Khuaihli

8 Cule Jehovah in Mosi le Aaron hnenah, “Nanmai hrangah meipi ihsin vutcâm zate khat in la uhla, cumi cu Mosi in Faro mithmuh ah van lamah theh seh. 9 ^aCule cumi cu Izip ram sungah leivut ah a cang ding ih, cumi cun Izip ram hmuahhmuah ih minung le ṭilva pawl parah hnai nei khuaihli a puaksuakter ding,” tiah a ti. 10 Cun meipi ihsin vutcâm an la ih Faro hmaiah dīngin Mosi in van lamah a theh. Cule cumi cun minung le ṭilva pawl parah hnai a nei mi khuaihli a puaksuakter. 11 Cule khuaihli cu mitkher thiam pawl le Izip-mi zate parih a um ruangah mitkher thiam pawl cu khuaihli ruangah Mosi hmaiah an dīng thei lo. 12 Sikhalsehla Jehovah in Faro-ih thinlung a hakter ih, Mosi hnenih Jehovah in a rak sim cia vekin, a ngaithla hai lo.

9:9^a Pui 13:18; Dnp 28:27, 35; 2Sp 20:7; Job 2:7; Isa 38:21; Thu 16:2

Rial

13 Cun Jehovah in Mosi hnenah, “Zing ah tuanten tho awla Faro hmaiah dīng aw, cule a hnenah, ‘Hebrumipawlih Pathian Jehovah in, “Keimah in rĕn thei nak dingah ka mipawl feh hai seh, 14 ^aziangahtile leilung hmuahhmuah ah keimah bangtuk zohman an um lo ti na theihnak dingah, na thinlung roriah le na siahhlawhpawl par le na mipawl parah ka hremnak zaten tuih cān ah ka thlah ding. 15 Atu-ah ka kut hawisuakin nangmah le na mipawl nathri sia in lo vaw ningla cu leilung ihsin thaihloh na rak si zo ding. 16 Asinan thungaiten nangmah ah ka huham ka lăngter thei nak dingah le leilung hmuahhmuah ah ka hmin aupi a si thei nak dingah himi hrang roriah nangmah ka lo tungding a si. 17 Anmah na fehter lo mi hi ka mipawl dokalhin nangmah le nangmah na khaisângaw lai thotho a si. 18 Ngai hnik, thaizing atu vek tikcu ah Izip dĭnsuah a si ihsin tu tiangah hmuh a rak si dah lo mi rial nasa zet ka surter ding. 19 Curuangah atu-ah thlah awla na sumhnám le lóram ih na neih mi zaten khawm aw, ziangahtile inn ih tlŭn lo mi le lóram ih hmuh mi rannung kip par le mi kip parah rial a tla ding ih, an thi ding,” tiah a rel,’ tiin sim aw,” tiah a ti.

9:14^a 1Sam 2:2; 2Sam 7:22; 1Sp 8:23; 1San 17:20; Sam 35:10; Isa 46:9; Jer 10:6; Mik 7:18

20 Faro-ih siahhlawhpawl lakih Jehovah-ih kamsuakthu a ṭihzahtu pa cun amai siahhlawhpawl le a sumhnámpawl cu inn lamah a tlânter. 21 Asinan Jehovah-ih kamsuakthu ziang a siar lo tu cun ló ah a siahhlawhpawl le a sumhnámpawl a tan.

22 Cun Jehovah in Mosi hnenah, “Izip ram pumpi ih rial a tlaknak dingah van lamah na kut hawi aw, cutin Izip ram ih minung par, rannung par le ló ih thlaikung le hramkung kip parah rial a tla ding,” tiah a ti. 23 Cule Mosi cun van lamah a kianghrăwl a hawi ih, Jehovah in khawri le rial a thlah, cule lei parah meisa a tla. Cun Jehovah in Izip ram parah rial a surter. 24 Cutin rial a um ih, cuih rial lakah meisa a um. Cu vekih a nasa zet mi rial cu ram pakhat a can ihsi thawkin Izip ram pumpi ah a um dah lo. 25 ^aCule rial in Izip ram pumpuluk lóram ih a um mi hmuahhmuah minung siseh, rannung siseh a deng. Cule lóram ih thlaikung le hramkung kip cu rial in a deng ih, lóram ih thingkung kip cu an parh ṭheh. 26 ^bIsrael tefapawl umnak hmun Goshen ram lawngah rial a tla lo.

9:25^a Sam 78:28, 47; 105:32-33; Eze 13:13

9:26^b Isa 32:18-20; Amo 4:7

27 ^aCule Faro cun mi thlahin Mosi le Aaron a ko ih an hnenah, “Tuih cān ah thil sual ka tuah a si. Jehovah cu a dingfel ih, kei le ka mipawl cu misualrál kan si. 28 ^bPathian khawri le rial a um nawn lo nak dingah Jehovah dil uh, ziangahtile a tawk thlang. Ka lo fehter ding ih, hi tawkah nan um nawn lo ding,” tiah a ti.

9:27^a Mip 14:40; Dnp 1:41; Jos 7:11; Lai 10:10; 1Sam 15:24; 2San 12:6; Sam 11:7; Jer 12:1; Ṭah 1:18

9:28^b Apo 8:24

29 ^aCule Mosi in a hnenah, “Khawpi ihsin ka suah veten Jehovah hnenah ka kut ka pharh ding ih, khawri a reh ding. Rial khal a um nawn lo ding. Cutin leilung hi Jehovah-ih ta a si ti na thei ding. 30 ^bAsinan nangmah le na siahhlawhpawl lawngte cun Jehovah Pathian nan ṭihzah hrih cuang lo ding ti ka thei,” tiah a ti. 31 ^cCule pat kung le barli sangvut pawl cu a siatsuah, ziangahtile barli vuih lai a si ih, pat kung khal a mûm lai a si. 32 ^dAsinan sangvut le kusemet sangvut cu thlai neta an si ruangah den an si lo.

9:29^a 1Sp 8:22, 38; Job 11:13; 41:11; Sam 24:1; 77:2; Isa 1:15; 1Ko 10:26

9:30^b Isa 26:10

9:31^c Dnp 8:8; Rut 1:22; 2Sam 14:30; Isa 28:25; Eze 4:9; Joe 1:11

9:32^d Isa 28:25

33 Cule Mosi cu Faro hnen ihsin khawpi in a suak ih, Jehovah hnenah a kut a phar. Cun khawri le rial a reh ih, leilung parah ruah a sur nawn lo. 34 Cule Faro in ruah, rial le khawri a reh ti a hmuh tikah thil sual a tuahbêt lai hrih. Cule a thinlung a hakter, amah le a siahhlawhpawl thawn. 35 Cule Faro-ih thinlung cu a hak, Jehovah in Mosi hmangih a rak sim vekin, Israel tefapawl cu a fehter cuang lo.

10

Kharbawk

1 ^aJehovah in Mosi hnenah, “Faro hnenah feh aw, ziangahtile a hmaiah hi ka hminsinnakpawl ka lăngter thei nak dingah a thinlung le a siahhlawhpawlih thinlung ka hakter zo. 2 ^bKei hi Jehovah ka si ti nan theihnak dingih Izip ram ih siava zetih ka rak tuah zo mi thilpawl le an lakih ka rak tuah mi hminsinnakpawl cu na fapa le na fapaih fapa theihah na sim pei,” tiah a ti.

10:1^a Jos 11:20; 24:17; Neh 9:10; Sam 74:9; Joh 12:40; Rom 9:18

10:2^b Dnp 4:9; Jos 4:6; 1Sam 6:6; Sam 44:1; Joe 1:3

3 ^aCule Mosi le Aaron cu Faro hnenah an lut ih a hnenah, “Hebrumipawlih Pathian Jehovah in, ‘Ka hmaiih tăngdawr dingah ziangtik tiang so na el ding? Keimah in rĕn thei nak dingah ka mipawl feh hai seh. 4 ^bCuti si loih ka mipawl feh ding na el asile, ngai hnik, thaizing ah na ram sungah kharbawkpawl ka thlah ding. 5 ^cCule zohman in leilung hmu thei lo dingin cupawl in leilung vangdâp an khuh ding, cule rial ih a lo tăn mi, a tāngsŭn an ei ding ih, lóram ah na hrangih a kho mi thingkung kip cu an ei ding. 6 ^dNa innpawl, na siahhlawh hmuahhmuah ih innpawl le Izip-mi hmuahhmuah ih innpawl ah an khat ding. Na palepawl le na pupápawl khal in leilung ih an um ni ihsin tuihni tiang cumi cu an hmu dah lo,’ tiin a sim,” tiah an ti. Cule anih cu a kir ih, Faro hnen ihsin a suak.

10:3^a 1Sp 21:29; 2Sp 22:19; 2San 7:14; Job 42:6; Isa 58:3; Dan 5:22; Jam 4:10; 1Pe 5:6

10:4^b Dnp 28:38; Sam 105:34; Thf 30:27; Joe 1:4; Thu 9:3

10:5^c Joe 1:4; 2:25

10:6^d Joe 2:9

7 ^aCun Faro-ih siahhlawhpawl in a hnenah, “Hi pa hi ziangtik tiang so kan hrangih tháng a si ding? Jehovah an Pathian rian dingah mipapawl feh hai seh. Izip cu siatsuah a si ti na thei hrih lo maw si?” tiah an ti.

10:7^a Sem 20:3; Dnp 7:16; Jos 23:7-13; Lai 2:3; 1Sam 18:21; Sam 106:36; Ths 7:26

8 Cule Mosi le Aaron cu Faro hnenah an hruaisal lala ih, anih in an hnenah, “Feh uh, Jehovah nan Pathian va rian uh. Zopawl saw a fehtu ding?” tiah a ti hai.

9 Cule Mosi in, “Kan mino le kan upa pawl thawn kan feh ding, kan fapapawl le kan fanupawl thawn, kan rante rualpawl le kan ranpi rualpawl thawn kan feh ding. Ziangahtile Jehovah hnenah puai kan tuah ding,” tiah a ti.

10 Cule anih in an hnenah, “Nan hnenih Jehovah um si sehla cu nanmah le nan fanau tete pawl hi ka lo fehter ding! Ralring uh, ziangahtile nan hmaiah thil ṭha lo a um. 11 Lamlam ah! Nannih mipapawl, atu-ah feh uhla, Jehovah va rian uh, ziangahtile cumi cu nan duh mi a si,” tiah a ti. Cule annih cu Faro hmaika ihsin dawisuah an si.

12 Cun Jehovah in Mosi hnenah, “Izip ram ah kharbawk an ra suak ih, rial in a hlah mi hmuahhmuah, cuih ram thlaikung le hramkung tinkim an einak dingah kharbawk suak dingin Izip ram tlunah na kut hawi aw,” tiah a ti. 13 ^aCule Mosi in Izip ram tlunah a kianghrăwl a hawi ih, cuih sun hmuahhmuah le cuih zan hmuahhmuah ah Jehovah in nisuahnak lam thli a thlah. Zing lam a ra thlen tikah nisuahnak lam thli in kharbawkpawl a run phur. 14 ^bCule Izip ram pumpi ah kharbawk an ra suak ih, Izip ram sung hmuahhmuah ah an fu. An tam tuk lawmmam, a hlanah cuvek kharbawk an rak um dah lo, anmai hnu khalah cuvek an um dah lo ding. 15 ^cZiangahtile leilung vangdâp pumpi an khuh ṭheh, cutin ram cu a thim ih, rial ih a hlah mi ram thlaikung le hramkung tinkim le thingkung rah zaten an ei thluh. Cule Izip ram thingkungpawl le lóram thlaikungpawl le hramkungpawl parah thil hring zianghman a tâng lo.

10:13^a Mip 20:8; Sam 78:46; Amo 4:9; Nah 3:16

10:14^b Dnp 28:38; Sam 78:46; 105:34; Isa 33:4; Joe 1:4; Amo 4:9; Thu 9:3

10:15^c Dnp 28:38; Sam 105:34-35; Joe 1:4; Amo 7:2; Mal 3:11

16 Cun Faro in hmanhmawh zetin Mosi le Aaron cu a ko ih, “Jehovah nan Pathian le nanmah dokalhin ka rak sual a si. 17 ^aCuruangah atu-ah hi vei khatte lawng hi ka sual in ngaidam uhla, hi thihnak hi ka hnen ihsin lahlo taktak dingin Jehovah nan Pathian in dilsak uh,” tiah a ti. 18 Cule anih cu Faro hnen ihsin a suak ih, Jehovah a dilsak. 19 Cule kharbawkpawl lahlo ih Tipi Sen sungih hrăntu, thli cu a cak zet mi nitlaknak lam thli ah Jehovah in a canter. Izip ram sung hmuahhmuah ah kharbawk pakhat hman an tâng nawn lo. 20 Asinan Jehovah in Faro-ih thinlung cu a hakter ih, Israel tefapawl a fehter cuang lo.

10:17^a 1Sam 15:25; 1Sp 13:6

Thimkhawzing

21 ^aCun Jehovah in Mosi hnenah, “Tham theih khawp a si mi thimkhawzing Izip ram ih thleng dingah van lamah na kut thlir aw,” tiah a ti. 22 ^bCule Mosi cun van lamah a kut a thlir ih, Izip ram sung hmuahhmuah ah ni thum sung a sah zet mi thimkhawzing a tlung. 23 ^cPakhat le pakhat an hmu-aw thei lo ih, ni thum sung cu zohman an umnak hmun ihsin an tho lo. Asinan Israel tefa hmuahhmuah cun an cēnnak hmunpawl ah tleu an nei.

10:21^a Dnp 28:29

10:22^b Sam 105:28; Isa 13:10; Thu 16:10

10:23^c Amo 4:7

24 ^aCun Faro in Mosi a ko ih, “Feh uh, Jehovah va rian uh, nan rante rualpawl le nan ranpi rualpawl lawng tân ta uh. Nan fanau tete pawl khal nan zawngah feh ve hai seh,” tiah a ti.

10:24^a Sem 45:10

25 ^aAsinan Mosi in, “Jehovah kan Pathian hnenih rai kan thawi thei nak dingah, nang khal in raithawinakpawl le Meiur Thilhlănpawl in pe tengteng ding a si. 26 Kan sumhnámpawl khal kan zawngah an feh ve ding, an ke tín pakhat hman tān ta a si lo ding. Ziangahtile Jehovah kan Pathian rian dingah anmah lakih a hrekkhat kan la ding ih, a khui mi bik thawn Jehovah kan rian ding ti mi khal cu tawk kan thlen hlanlo kan thei lo,” tiah a ti.

10:25^a Sem 8:20

27 Asinan Jehovah in Faro-ih thinlung a hakter ih, anih in anmah fehter a siang cuang lo. 28 Cun Faro in a hnenah, “Ka hnen ihsin suak aw! Nangmah hrangah fimkhur awla, ka hmel hmu nawn hlah! Ziangahtile ka hmel na hmuh ni ah na thi ding!” tiah a ti.

29 ^aCule Mosi in, “Dik zetin na ṭawng a si. Na hmel ka hmusal dah nawn lo ding,” tiah a ti.

10:29^a Heb 11:27

11

Fatir Thihnak Sim Cia Nak

1 Jehovah in Mosi hnenah, “Faro par le Izip parah hremnak pakhat ka langter hrih ding. Cuih hnuah hi tawk ihsin a lo fehter ding. A lo fehter tikah cun hi tawk ihsin a lo hnawhsuak thluh rori ding. 2 Atu-ah mipi hnatheih ah sim aw, mipa kip in a innhnen ihsin le nunau kip in a innhnen ihsin ngun thilripawl le sui thilripawl dil seh,” tiah a ti. 3 ^aCule Izip-mipawlih mithmuh ah Jehovah in mipi cu duhsaknak a pe. Cuihhleiah pacang Mosi cu Izip ram ah, Faro-ih siahhlawhpawlih mithmuh ah le mipi mithmuh ah a ropi zet.

11:3^a Sem 39:21; Dnp 34:11; 2Sam 7:9; Est 9:4; Sam 89:27; 106:46

4 ^aCun Mosi in, “Jehovah in, ‘Zanṭim hrawngah Izip-mi lakah ka fehsuak ding ih, 5 ^bIzip ram ih fatir zaten, a laltokham parih to Faro-ih fatir ihsin, rial lung phenih a to mi siahhlawh nunau ih hrin mi fatir tiangin le rannung fatir zaten an thi ding. 6 ^cCun Izip ram pumpi ah aihramnak nasa zet a um ding ih, cuti vek cu a rak um dah lo ih, a um khal a umsal nawn lo ding. 7 Asinan Israel tefapawl lakih mipa pakhat asilole rannung pakhat hman uico in a bo lo ding, cutin Jehovah cun Izip-mipawl le Israel-mipawl a thleidang ti nan thei thei ding,’ tiin a sim. 8 ^dCule hi na siahhlawh hmuahhmuah hi ka hnenah an ra ding ih, ka hnenah kûnin, ‘Fehsuak aw, nangmah a lo thluntu mipi zate thawn!’ an ti ding. Cuih hnuah ka feh ding,” tiah a ti. Cun anih cu Faro hnen ihsin a lingi lingih thinhengin a fehsuak.

11:4^a Job 34:20; Sam 81:5

11:5^b Isa 47:2

11:6^c Thf 21:13; Amo 5:17

11:8^d Heb 11:27

9 Asinan Jehovah in Mosi hnenah, “Izip ram ih ka mangbangzapawl a karhzai thei nak dingah Faro in a lo ngaithla lo ding,” tiah a ti. 10 ^aCule Mosi le Aaron in Faro hmaiah hi mangbangza hmuahhmuah hi an tuah ih, Jehovah in Faro-ih thinlung a hakter, cule a ram ihsin Israel tefapawl a fehsuakter lo.

11:10^a Rom 2:5

12

A Hmaisabik Lantanak

1 Izip ram ah Jehovah in Mosi le Aaron hnenah, 2 ^a“Tuih thla hi nan thla thawknak a si pei, himi hi kum khat sungih nan hrangah thla hmaisabik a si ding a si. 3 ^bIsrael mipi umkhawm zate hnenah, ‘Tuih thla a ni hratnak ah mipa pakhat cio in anmai hrangah ^ctuu fa no pakhat, an paih sungkua zulhin, sungkurûn pakhat hrangah tuu fa no pakhat an keng fingfing pei. 4 Cule sungkua cu tuu fa no hrangah an mál tuk asile, amah le amai inn sangtu a innhnen in an mipum zulhin tuu fa no pakhat an keng pei. Mi tin an ei thei zat izirin tuu fa no cu nan ruat pei. 5 ^dNan ran fa no cu kum khat a si mi a pa, sawisel ding um lo mi a si pei. Cumi cu tuu rual lak ihsin asilole me rual lak ihsin na la ding a si. 6 ^eCun cumi cu cuih thla thotho a ni hleilitnak a ti hlanlo na retṭha pei. Cun ^fkhawthim zawngah Israel mipi umkhawm burpi zaten cumi cu an that pei. 7 ^gCule thisen hrekkhat an la pei ih, sângka biang pahnih parah le cumi an einak innpawlih sângka lu parah an mān pei. 8 ^hCun cuih zan ah a sa cu an ei pei; meisa ah rawhin, thilnu telh lo sang le a khâ mi thlaihnah thawn an ei ding a si. 9 ⁱCumi cu a hringin siseh, tidai thawn suangin siseh ei hlah uh, cuhnakin a lu, a kepawl le a sungrilpawl thawn meisa ah nan rawh sawn pei. 10 ^jCumi ihta cu zing lam tiang zianghman nan tāngter lo pei ih, zing lam tiang a tāng mi cu meisa in nan ur pei. 11 ^kCule nan eidān ding cu hitin a si, nan tâi ah taikhap, nan ke ah kedam le nan kut ih kianghrăwl thawn nan ei ding a si. Cule manhlap zetin nan ei pei. Cumi cu Jehovah-ih Lantanak a si.

12:2^a Dnp 16:1

12:3^b Mar 14:12; 1Ko 5:7

12:3^c tuu fa no: Himi cu tuu fa no, asilole me fa no khal a si thei. Câng 5-nak zoh awla, a fiang.

12:5^d Pui 1:3; Mip 6:14; Dnp 15:21; Heb 9:14; 1Pe 1:19

12:6^e Pui 23:5; Mip 9:1-3, 5, 11; Dnp 16:4, 6; Jos 5:10; 2San 30:2

12:6^f khawthim zawngah: Hebru ṭawng ah cun “zan le zan karlak” a si.

12:7^g Eze 9:6

12:8^h Pui 7:15; Mip 9:11-12; Dnp 16:3-4, 7; 2San 35:7; 1Ko 5:8

12:9ⁱ Pui 3:3

12:10^j Pui 22:30; Dnp 16:4

12:11^k Pui 23:5; Mip 9:2, 4; Dnp 16:1, 3; Jos 5:10; 2Sp 23:21, 23; 2San 30:1; Ezr 6:19; Isa 31:5; 48:20; Eze 45:21

12 ^a‘Ziangahtile cuih zan ah Izip ram ka paltlăng ding ih, Izip ram ih fatir zaten, minung siseh, rannung siseh ka that thluh ding, cule Izip pathianpawl hmuahhmuah dokalhin thuṭhennak ka tuah ding. Keimah cu Jehovah ka si. 13 ^bCun nan umnak innpawl ih thisen cu nan hrangah hminsinnak a si ding. Cule thisen ka hmuh tikah ka lo lăn ding ih, Izip ram ka vuak tikah nanmah lo siatsuah dingin nan parah hremnak a thleng lo ding.

12:12^a Mip 33:4; 2San 2:5; Sam 95:3; Isa 10:33; 19:1; Jer 43:12; Amo 5:17

12:13^b Heb 11:28

14 ^a‘Cule hih ni hi nan hrangah hngilhlonak a si pei ih, nan tesinfa san tiangin Jehovah hnenih puai pakhat ah nan hmang pei. Cumi cu kumkhaw sakhaw dān puai vekin nan hmang pei. 15 ^bNi sarih sung thilnu telh lo sang nan ei pei. A ni khatnak ah nan innpawl ihsin thilnu nan hlăwn tengteng ding a si. Ziangahtile zokhal a ni khatnak ihsin a ni sarihnak tiang thilnu tel mi sang a eitu, cu pa cu Israel-mipawl lak ihsin thaihloh a si pei. 16 ^cA ni khatnak ah tawnkhawmawknak thianghlim nan nei pei ih, a ni sarihnak ah tawnkhawmawknak thianghlim nan nei pei. Cuih nipawl ah cun ziang vek hna hman nan ṭuan lo pei, cuhnakin nan ti ding mi umsŭn cu nan ei ding mi timlam lawng hi a si pei. 17 ^dCule Thilnu telh lo Sang Puai nan hmang pei, ziangahtile himi ni thothoah Izip ram ihsin nan ralkappawl ka hruaisuak ding a si. Curuangah hih ni hi nan kumkhaw sakhaw dān ah nan tesinfanau san tiangin nan hmang pei. 18 A thla hmaisabik, cuih thla ni hleilitnak zan lam ihsin cuih thla ni 21-nak zan lam tiangin thilnu telh lo sang nan ei ding a si. 19 ^eNi sarih sung cu nan innpawl ah thilnu hmuh a si lo pei, ziangahtile zokhal thilnu rawi mi a eitu, cu pa cu ram dang mi an si ah simaw, rammi an si ah simaw, Israel mipi umkhawm lak ihsin sahcat a si pei. 20 ^fThilnu tel mi zianghman nan ei lo pei, nan cēnnak hmun hmuahhmuah ah thilnu telh lo sang nan ei pei,’ tiin sim uh,” tiah a sim hai.

12:14^a Pui 3:17; Mip 18:23

12:15^b Sem 17:14; Pui 23:6; Mip 28:17; Dnp 16:3; 1Ko 5:7

12:16^c Mip 29:35

12:17^d Pui 3:17; 19:36; Dnp 16:16; 2San 8:13; Ezr 6:22; Mat 26:17; Luk 22:1; Apo 12:3

12:19^e Mip 9:14; Dnp 1:16; Jos 8:33

12:20^f Pui 3:17; Mip 35:29; Eze 6:6

21 ^aCun Mosi in Israel miupa zaten a ko hai ih an hnenah, “Nan innsungsangpawl zulhin nanmai hrangah tuu fa no pawl hrilin la uhla, Lanta tuu fa no that uh. 22 ^bCule hissop tēl khat nan la pei ih, cawhtawlh sungih thisen ah nan hnīm pei, cule cawhtawlh sungih thisen in sângka lu le sângka biang pahnih nan măn ding a si. Cule zing lam tiang zohman mai inn sângka lengah nan suak lo pei. 23 ^cZiangahtile Izip-mipawl vaw dingah Jehovah a fehtlăng ding ih, sângka lu parah le sângka biang pahnih parah thisen a hmuh tikah Jehovah in cuih sângka cu a lăn ding ih, nanmah lo vaw dingin nan innpawl sungah siatsuahtu luh a siang lo ding. 24 Cule hi thil hi kumkhuain nangmah le na fapapawl hrangah sakhaw dān ah nan hmang ding a si. 25 ^dHitin a si ding, Jehovah in a lo tiamkam cia bangin a lo pek mi ram nan thlen tikah hi rawngbawl hna hi nan hmang ringring pei. 26 Cule nan fātepawl in nan hnenih, ‘Hih rawngbawl hna hi nan hrangah ziang sullam so a nei?’ tiih an lo suh tikah, hitin a si ding, 27 ^e‘Izip-mipawl a vuak ih kan sungkuapawl in runsuah laiah Izip ram ih Israel tefapawlih innpawl a rak lăntu Jehovah-ih Lanta raithawinak a si,’ nan ti pei,” tiah a ti. Cule mipi cu an lu an kûn ih an bia. 28 Cun Israel tefapawl cu an feh ih, Mosi le Aaron hnenah Jehovah in thu a pek hai vekin an tuah.

12:21^a Mar 14:12-16

12:22^b Pui 14:4, 6; Mip 19:18; Sam 51:7; Heb 11:28

12:23^c Sem 16:7; Isa 19:22; 37:36; Jer 6:26; 1Ko 10:10; Heb 11:28; Thu 7:3

12:25^d Sem 15:14

12:27^e Sem 24:26

Fatir Thihnak

29 ^aCule zanṭim ah hitin a si, a laltokham parih to Faro-ih fatir ihsi thawkin thawnginn thim sungih ralkaih fatir tiang le rannung fatir hmuahhmuah, Jehovah in Izip ram ih fatir hmuahhmuah cu a that ṭheh. 30 Cule Faro cu a siahhlawhpawl zate le Izip-mi zate thawn zan laiah a tho. Cule inn khat ah mithi pakhat tal umlonak a um lo ruangah aihramnak nasa zet Izip ram ah cun a thleng.

12:29^a Sem 19:13

31 Cun anih in zan ah Mosi le Aaron a ko ih, “Tho uh, nanmah le Israel tefapawl thawn ka mipawl lak ihsin suak uh. Cule feh uhla nan rak ṭawng zo vekin Jehovah cu va rian uh. 32 ^aNan sim zo bangin nan rante rualpawl le nan ranpi rualpawl tiangin hruai uhla, feh uh! Kei khal thlawsuah in pe uh,” tiah a ti.

12:32^a Sem 27:34

33 ^aCule anmah kha ram ihsin suakter dingin Izip-mipawl in mipi manhlap dingin an ngen. Ziangahtile annih in, “Kan zaten kan thi thluh ding,” tiah an ti. 34 Cule Israel mipi in an sang nawn mi ah thilnu a luhngah hlanah an la ih, an nawnnak kheng kûm pawl cu an hnipuan sungah tuamin an liang parah an pu. 35 ^bMosi-ih ṭawngkam bangtukin Israel tefapawl in an tuah ih, Izip-mipawl hnen ihsin ngun thilripawl, sui thilripawl le hnipuanpawl tla an dil. 36 ^cCule an dil mi an peknak dingah, Izip-mipawl mithmuh ah mi senpi cu Jehovah in duhsaknak a pe. Cuti cun Izip-mipawl cu an răm.

12:33^a Sem 20:3; 1Sam 6:6

12:35^b Sem 24:53

12:36^c Sem 39:21

37 ^aCun Israel tefapawl cu Rameses ihsin Sukkoth an pan, nauhakpawl hleiah mipa ting ruk hrawng ke in an feh. 38 ^bMipi căwkpawlh bur khat le sumhnám tam ngaingai, rante rualpawl le ranpi rualpawl tla anmai zawngah an feh. 39 Cule Izip ram ihsi an kensuak mi thilnu telh lo sang per nawn mipawl cu an káng, ziangahtile cumi cu thilnu a tel lo. Ziangruangahtile annih cu Izip ihsin dawisuak an si ih, tlâi thei an si lo, cuihtlunah anmai hrangah lamcaw an rak timtuah man lo.

12:37^a Sem 12:2; 47:11; Mip 1:46; 33:3-5

12:38^b Mip 11:4; Jos 8:35

40 ^aCun Izip ram ih a um mi Israel tefapawl cēn sung cu kum 430 a si. 41 Cule kum 430 a cem tikah hitin a si, cuih ni roriah hitin a thleng, Jehovah-ih ralkap zaten Izip ram ihsin an suak. 42 ^bCuih zan cu Israel tefa zaten an tesinfa san hmuahhmuah tiangin Jehovah hnenih an serh ding mi zan a si. Ziangruangahtile cuih zan ah Jehovah in Izip ram ihsin anmah hruaisuak dingin a rak kil hai.

12:40^a Sem 15:13; Apo 7:6; Gal 3:17

12:42^b Pui 3:17; Mip 9:3; Dnp 16:1, 6

43 ^aCule Jehovah in Mosi le Aaron hnenah, “Himi hi Lanta Puai thu ih sakhaw dān a si. Ram dang mi zohman in an ei ding a si lo. 44 ^bAsinan paisa ih lei mi mi pakhat khat ih sál cu a serh zim na tan tiktikah cumi cu a ei thei. 45 ^cMikhual le hlawhfa cun an ei hrimhrim lo pei. 46 ^dCumi cu inn pakhat sungah ei a si pei, a sa pakhat hman inn lengah na thiar lo pei, a ruhpawl lakih pakhat hman nan khiak lo pei. 47 Israel mipi umkhawm zaten cumi cu nan thlun ding a si. 48 ^eCule ram dang mi pakhat nan hnenih a cēn tikah Jehovah hnenah Lanta Puai hman a duh asile a mipa zaten serh zim tan si hai seh. Cule rak naihin cumi cu hmang seh, cule anih cu rammi vek a si ding. Ziangahtile serh zim tan lo mi cun cumi cu a ei hrimhrim lo pei. 49 ^fRammi le nan lakih cêng mikhual hrangah dān pakhat a um pei,” tiah a ti.

12:43^a Mip 9:14; 2San 6:32-33; Isa 14:1

12:44^b Sem 17:12-13

12:45^c Pui 22:10

12:46^d Mip 9:12; Sam 22:14; Thf 17:22; Joh 19:36

12:48^e Pui 19:18, 34; Mip 9:14; Eze 44:7

12:49^f Pui 24:22; Mip 5:15-16, 29; Dnp 1:16

50 Cuti cun Israel tefa hmuahhmuah in an tuah, Mosi le Aaron hnenih Jehovah in thu a pek hai vekin an tuah. 51 Cule hitin a si, cuih ni roriah anmai ralkappawl vek cio in Jehovah in Israel tefapawl cu Izip ram ihsin a hruaisuak hai.

13

Fatir Jehovah-ih Ta

1 Jehovah in Mosi hnenah, 2 ^a“Ka hnenah fatir zaten serhhran uh, Israel tefapawl lakih sūl awngtu pauhpauh, minung le rannung an pahnih in, cumi cu ka ta a si,” tiin a sim.

13:2^a Pui 27:26; Mip 3:13; Dnp 15:19; Neh 10:36; Luk 2:23

3 ^aCule Mosi in mipi hnenah, “Tuihni, Izip ihsi nan fehsuak ni, sál inn ihsi nan suah ni hi cîng ringring uh. Ziangahtile Jehovah-ih kut cakin hi tawk hmun ihsin a lo hruaisuak. Thilnu tel mi sang cu ei ding a si lo. 4 Abib thla, tuihni ah nan fehsuak a si. 5 Cule hitin a si ding, Jehovah in Kanaan-mipawl le Heth-mipawl le Amor-mipawl le Hiv-mipawl le Jebus-mipawl umnak ram, nangmah hnenih pe dingih na pupápawl hnenih sia a rak săm mi, hnawi ti le khuai tizu luannak ram ah a lo hruai tikah hi rawngbawl hna cu hi thla ah na hmang pei. 6 Ni sarih sung cu thilnu telh lo sang na ei ding ih, a ni sarihnak ah Jehovah hrangah puai a um ding. 7 Ni sarih sung thilnu telh lo sang ei a si pei. Cule nan lakah thilnu tel mi sang hmuh a si lo pei, cuihtlunah thilnu cu na ram sung hmuahhmuah ih nanmai lakah hmuh a si lo pei. 8 ^bCule na fapa hnenah cuih ni ah, ‘Himi hi Izip ram ihsin ka hung soh laiah Jehovah in ka hrangih a rak tuah ruangah tuah a si,’ tiin na sim pei. 9 ^cJehovah in kut cak in Izip ram ihsin a lo hruaisuak ruangah Jehovah-ih Dān hi na kâ sungih a um thei nak dingah himi hi na kut parah hminsinnak le na mit karlakah hngilhlonak a si pei. 10 ^dCuruangah hi sakhaw dān hi amai cān bikhiah ah kum khat hnu kum khat na hmang pei.

13:3^a Pui 26:13; Mip 1:1; 22:5; Dnp 4:45; Sam 81:10

13:8^b Sam 78:5-6

13:9^c Sem 3:3; Dnp 6:8; Isa 44:5; Mat 23:5

13:10^d Sam 76:2

11 ^a“Cule hitin a si ding, nangmah le na pupápawl hnenih sia a rak săm vekin Jehovah in Kanaan-mipawl umnak ram ah a lo hruailuh ih cumi cu nangmah a lo pek tikah, 12 ^bsūl awngtu hmuahhmuah, cumi cu na neih mi ṭilva ihsin fatir pauhpauh cu Jehovah hnenah na serhhran ding a si, a pa hmuahhmuah Jehovah-ih ta a si pei. 13 ^cAsinan lāk fatir pauhpauh cu tuu fa no in na tlen pei, na tlen lo asile a hngawng na khiak pei. Cule na fapapawl lakih fatir mipa hmuahhmuah cu na tlen ding a si. 14 Cule hitin a si ding, a ra thleng lai ding mi cān ah na fapa in, ‘Himi hi ziang a si?’ tiin a lo suh tikah a hnenah, ‘Jehovah in kut cak hmangin Izip ram ihsin, sál tānnak inn ihsin in hruaisuak. 15 Cule hitin a si, kanmah fehter ding thu ah Faro a lung a ruh tikah, Jehovah in Izip ram ih fatir zate, mipa fatir le rannung fatir a that ṭheh. Curuangah sūl awngtu a pa hmuahhmuah cu Jehovah hnenah rai ka thawi, asinan ka fapapawl lakih fatir zaten ka tlen,’ tiin na sim pei. 16 Hihi na kut parah hminsinnak vek le na mit le mit karlakah cal ṭawnnak vek a si pei, ziangahtile kut cak hmangin Izip ram ihsin Jehovah in in hruaisuak a si,” tiah a ti hai.

13:11^a Sem 12:7; 22:16; Dnp 1:8; Sam 105:42-45

13:12^b Sem 4:4; Pui 27:26; Mip 3:13; Luk 2:23

13:13^c Pui 27:11; Mip 3:46-47; 18:15; Isa 64:3

Jehovah in Ramṭhing Zinin a Hruai

17 Cun hitin a si, Faro in mipi a fehter hai tikah Filisṭia-mipawlih ram lamzin cu a nai ko nân, Pathian in cumi lamzin in a hruai hai lo. Ziangahtile Pathian in, “Mipi in ral donak an hmuh tikah, an lung thlĕngin Izip ram ah an kirsal pang ding,” tiah a ti a si. 18 ^aCule Pathian in mipi cu Tipi Sen ih ramṭhing lamzin in a hruaikûal hai. Cule Israel tefapawl cu Izip ram ihsin ral do ding tiar cia in an hung so. 19 ^bCule Mosi in a zawngah Joseph-ih ruhpawl cu a keng, ziangahtile Joseph in Israel tefapawl kha, “Pathian in a lo vehvai rori ding ih, ka ruhpawl cu nanmah zawngah hi tawk ihsin nan phurso pei,” tiin fek zetin sia a rak sămter hai. 20 ^cCule Sukkoth ihsin an khualtlawn an thawk ih, ramṭhing dĕngih Etham ah riahhmun an sâm. 21 ^dCule Jehovah cu lamzin hruai dingah sun ah mero ṭhuam in le zan ah tleu pe dingah meisa ṭhuam in an hmaiah a feh, cuti zawng cun a sun a zanin an feh thei. 22 ^eMipi hmai ihsin sun ih mero ṭhuam le zan ih meisa ṭhuam cu a lahlo dah lo.

13:18^a Jos 1:14; Sam 136:16; Eze 20:10

13:19^b Sem 47:29-30; Jos 24:32; Apo 7:16; Heb 11:22

13:20^c Mip 33:6

13:21^d Mip 9:16; Dnp 1:33; 2:7; Lai 4:14; Neh 9:12, 19; Sam 68:7; 78:14; Isa 4:5; Jer 2:2; Hab 3:3; 1Ko 10:1

13:22^e Neh 9:19

14

Tipi Sen Tankainak

1 Jehovah in Mosi hnenah, 2 ^a“Israel tefapawl hnenah sim aw, Pi Hahiroth hmai Migdol le tifinriat karlak Baal Zefon hmai zawnah herkirin riahhmun sâm hai seh. Tifinriat kap cu tawk hmaiah riahhmun nan sâm pei. 3 Ziangahtile Faro in Israel tefapawl thu ah, ‘Ram sungah anmah le anmah an awk-aw, ramṭhing in anmah a kharkhum,’ a ti ding. 4 ^bCun anmah a dawi hai nak dingah Faro-ih thinlung ka hakter ding. Cule Faro tlunah le a ralkap zate tlunah ka sunlawihaw ding, cutin Izip-mipawl in keimah cu Jehovah ka si ti an thei ding,” tiin a sim. Cule cuti vekin an tuah.

14:2^a Mip 33:7; Jer 44:1

14:4^b Suah 4:21; Sam 71:11; Eze 32:15; Rom 9:17, 22-23

5 ^aCun mipi an tlân zo ti mi thu Izip siangpahrang hnenah an sim ih, mipi thuhla ah Faro le a siahhlawhpawlih thinlung a thlĕngaw, cule annih in, “Israel-mipawl kanmah in rĕnnak ihsin kan fehsuahter hi, ziangruangah so maw hiti vekih kan rak tuah?” tiah an ti. 6 Cule anih cu a rang lêng a timtuah ih, a hnenah a mipawl a hruai. 7 Rang lêng ṭhabik bik 600 le Izip ram ih rang lêng hmuahhmuah, an zate tlunih bawipawl thawn a hruai hai. 8 ^bCule Jehovah in Izip siangpahrang Faro-ih thinlung cu a hakter ih, Israel tefapawl a dawi hai, cule Israel tefapawl cu calhngal zetin an fehsuak. 9 ^cAsinan anmah cu Izip-mipawl in an dawi, Faro-ih rangpawl le rang lêngpawl zate, a rang ralkappawl le a ralkappawl in annih cu Baal Zefon hmaiih Pi Hahiroth kiang, tifinriat kapih an riah laiah an hei man.

14:5^a Sem 31:21; Sam 105:25

14:8^b Suah 14:4; Mip 33:3; Apo 13:17

14:9^c Sem 47:17; Suah 15:9; Jos 24:6; Isa 43:17

10 ^aCule Faro a ra nai tikah, Israel tefapawl cun khua an cuan, cule ngai hnik, Izip-mipawl cun an dungin an rak pan. Cule an ṭih tuk ih, Israel-mipawl cu Jehovah hnenah an ausuak. 11 ^bCun annih in Mosi hnenah, “Izip ram ah thlānmual a um lo ruangah ramṭhing ah thi dingin in hruaihlo a si lo maw? Ziangah so Izip ram ihsin hitiih in hruaisuah? 12 ^c‘Izip-mipawl rianin kanmah ten um men nung,’ ti hi Izip ram ih kan lo sim mi ṭawngkam a si lo maw? Ziangahtile ramṭhing ih kan thih hnakin Izip-mipawl rĕn hi kan hrangah a ṭhasawn ding,” tiah an ti.

14:10^a Jos 24:7; Neh 9:9; Sam 5:2; 34:17; 107:6, 28

14:11^b Suah 5:21; 15:24; 16:2; Mip 11:1; Dnp 9:7

14:12^c Suah 6:9; Sam 106:7-8

13 ^aCule Mosi in mipi hnenah, “Ṭih hlah uh. Cāng lo ten dīng uhla, nan hrangih tuihsun ih a timtuah ding mi Jehovah-ih runsuahnak cu zoh uh. Ziangahtile tuihsun ih nan hmuh mi Izip-mipawl hi kumkhuain nan hmu leh sal nawn lo ding. 14 ^bJehovah in a lo dosak ding ih, nannih cu daiten nan um men ding,” tiah a ti.

14:13^a Sem 15:1; 46:3; Suah 14:30; 15:2; 20:20; 1Sam 12:16; 2San 20:15, 17

14:14^b Dnp 1:30; Sam 37:7; Isa 28:12; 42:13; Jer 41:12; Zek 2:13

15 ^aCule Jehovah in Mosi hnenah, “Ziangruangah so kei in auh? Hmai lam pan dingin Israel tefapawl sim aw. 16 ^bCun na kianghrăwl thlir awla tifinriat tlunah na kut hawiin cumi cu ṭhencat aw. Cule Israel tefapawl cu tifinriat laifang lei ro par ihsin an fehtlăng ding. 17 ^cCule ngai hnik, Izip-mipawlih thinlung ka hakter ding ih, annih in anmah an thlun ding. Cule Faro tlunah le a ralkap zate, a rang lêngpawl le a rang ralkappawl tlunah ka sunlawihaw ding. 18 ^dCun Faro, a rang lêngpawl le a rang ralkappawl tlunih ka sunlawihawk tikah Izip-mipawl in keimah cu Jehovah ka si ti an thei ding,” tiah a ti.

14:15^a Jos 7:10

14:16^b Suah 7:19; 14:21, 26; Isa 10:26

14:17^c Suah 14:4, 8

14:18^d Suah 14:25; Eze 32:15

19 ^aCule Israel riahhmun khuarnak hmaiih a feh rero tu Pathian-ih vancungmi cu a ṭhawn ih an dungah a feh, cule an hmai ihsin mero ṭhuam a ṭhawn ih, an dungah a ding. 20 ^bMero ṭhuam cu Izip-mipawlih riahhmun le Israel-mipawlih riahhmun khuarnak karlakah a ra. Cumi cu Izip-mipawl hrangah mero le khawthim a si, asinan cumi cun Israel-mipawl hrangah zan ah tleu a pe. Cule zanvar khat lam riahhmun khuarnak le khat lam riahhmun khuarnak an pannâiaw thei lo.

14:19^a Sem 16:7; Suah 13:21-22; Isa 6:9; 26:7; 1Ko 10:1

14:20^b Jos 24:7

Tipi Sen Ṭhenawknak

21 ^aCun Mosi in tifinriat tlunah a kut a hawi, cule Jehovah in cuih zan zanvar nisuahnak lam thli cak zet hmangin tifinriat a kirsalter, tifinriat cu lei ro ah a tuah ih, tipi cu an ṭhenaw. 22 ^bCule Israel tefapawl cu tifinriat sung lei ro parah an feh ih, tipi cu an vawrh lamah le an keh lamah an hrangah phar a si. 23 ^cCule Izip-mipawl in an dawi ih, Faro-ih rangpawl, a rang lêngpawl le a rang ralkappawl zaten tifinriat sungin an dung ihsin an feh.

14:21^a Sem 8:1; Suah 7:19; 14:16; Jos 3:16; 4:23; Sam 74:13; 136:13-14; Isa 63:12; Jer 23:19; 31:35; Nah 1:3

14:22^b Suah 15:19; Mip 33:8; Jos 3:17; 4:22; 24:6; Neh 9:11; Sam 66:6-7; Isa 43:16; 1Ko 10:1; Heb 11:29

14:23^c Suah 14:4, 17

24 ^aCule hitin a rak si, zing khawvâng zawng sentari kil cān ah meisa le mero ṭhuam ihsin Jehovah in Izip-mipawlih ralkappawl cu a vun cuan ih, Izip-mipawlih ralkappawl cu a tibuai. 25 ^bCule harsa zetih mâwng dingin Jehovah in an rang lêng kepawl a thlawngter. Cule Izip-mipawl in, “Israel-mipawl hmaika ihsin tlân uhsi, ziangahtile Jehovah in Izip-mipawl dokalhin anmah a dosak hai a si,” tiah an ti.

14:24^a Jos 10:10; 1Sam 5:9; 2Sp 7:6

14:25^b Suah 14:4, 14, 18; Dnp 32:31; 1Sam 2:2

Izip-mipawl Thahnak

26 ^aCun Jehovah in Mosi hnenah, “Izip-mipawl par, an rang lêngpawl par le an rang ralkappawl parih tipi a ra kirsal thei nak dingah tifinriat tlunah na kut hawi aw,” tiah a ti. 27 ^bCule Mosi cun tifinriat tlunah a kut a hawi ih, zing a thlen tikah, a sung lam panih Izip-mipawl an tlân rero laiah tifinriat cu a kel ah a cangkirsal. Cule Izip-mipawl cu Jehovah in tifinriat sungah a ^chlăwn hai. 28 ^dCun tipi cu a kirsal ih, an dung lam tifinriat sungih ra rang lêngpawl, rang ralkappawl le Faro-ih ralkappawl zaten a khuh ṭheh. An lakih mi pakhat hman an tâng lo. 29 ^eSikhalsehla Israel tefapawl cu tifinriat sung lei ro parah an feh ih, tipi cu an vawrh lamah le an keh lamah an hrangah phar a si.

14:26^a Suah 14:16

14:27^b Suah 15:1, 7; Dnp 11:4; Jos 4:18; Neh 9:11; Sam 78:5; Heb 11:19

14:27^c hlăwn: A ṭawng hrampi ah “thingtla” tinak a si.

14:28^d Jos 24:7; Lai 4:16; Neh 9:11

14:29^e Jos 24:11; 2Sp 2:8; Sam 66:6; 74:15; 78:13; Isa 11:15

30 ^aCutin Jehovah in cuih ni ah Izip-mipawlih kut sung ihsin Israel-mipawl a runsuak hai ih, Israel-mipawl in tifinriat kapah Izip-mi mithi ruakpawl an hmu. 31 ^bCule Jehovah in Izip ram ih a rak tuah mi a thil ti ropi cu Israel-mipawl in an hmu ih, mipi in Jehovah an ṭihzah, cule Jehovah le a siahhlawh Mosi cu an zum.

14:30^a Suah 14:13; 1Sam 14:23; 1San 11:14; Sam 44:7; Isa 43:3

14:31^b Suah 4:31; Jos 4:24; 1Sam 12:18; Sam 76:7; Joh 2:11

15

Mosi Hla

1 ^aMosi le Israel tefapawl in Jehovah hnenah hi hla hi an sak ih, hitin an ti:

15:1^a Mip 21:17; Sam 59:16; 76:6; 106:12; Isa 12:5; 42:10-12; Jer 51:21; Thu 15:3

“Jehovah hnenah hla ka sak ding,
Ziangahtile anih cu ropi zetin a cawisângaw!
Rang le a totu cu tifinriat sungah a rak hlăwn!
2 ^aJehovah cu ka cahnak le ka hla a si,
Cule anih cu ka runsuahnak ah a cang.
Amah cu ka Pathian a si ih, amah ka thangṭhat ding,
Amah cu ka paih Pathian a si ih, amah ka khaisâng ding.
3 ^bJehovah cu ral do mi a si,
A hmin cu Jehovah a si.
4 ^cTifinriat sungah Faro-ih rang lêngpawl le a ralkappawl a hlăwn.
A hril mi ralbawipawl khal Tipi Sen sungah an tla.
5 ^dThûknakpawl in anmah an khuh;
Lungto bangin a taw net ah an pil.
6 ^e“Na vawrh lam kut cu, Maw Jehovah, thiltitheinak thawn a ropi a si.
Na vawrh lam kut cun, Maw Jehovah, ral cu a khekkuai ṭheh.
7 ^fCule na cungnunnak nasa tak cun
Nangmah a lo dokalhtupawl na hloralter zo.
Na thinlingnak na thlahsuak,
Cumi in fang ko bangin anmah a kangrál thluh.
8 ^gCule na hnar ih thaw in tipi an kăwmaw,
Tilik cu thil penkhawm mi bangin a ding,
Ti thûknakpawl cu tifinriat laifangah an khál ṭheh.
9 ^hRal in, ‘Ka dawi ding,
Ka man ding,
Ralthillâk ka zem ding.
An parah ka duhnak a diriam ding.
Ka ralnâm ka phawi ding,
Ka kut in anmah a hloralter ding,’ tiah a ti.
10 ⁱNa thaw in na sēm hai,
Tifinriat in anmah a khuh ṭheh.
Sûan bangin a thûk zet mi tipi sungah an pil.
11 ^j“Maw Jehovah, pathianpawl lakah hin nang vek zo so um?
Thianhlimnak lamih ropi,
Thangṭhat tlak sinak lamih zahum,
Mangbangzapawl tuah ṭheu tu,
Nangmah vek zo so um?
12 ^kNa vawrh lam kut na pharh,
Leilung in anmah a dawlh ṭheh.
13 ^lNang cun na tlen cia mi miphun cu na zahngainak in na hruai hai.
Na cēnnak hmun thianghlim ah na cahnak thawn anmah na hruai hai zo.
14 ^m“Minungpawl in an thei ding ih an khūr ding.
Filisṭia luahtupawl cu riahsiatnak in a kai hai ding.
15 ⁿCun Edom hotupawl cu an lung a phâng ding.
Moab pacakpawl, khurhnak in a kai hai ding.
Kanaan ih cêngpawl zaten an zŭp thluh ding.
16 ^oAn parah ṭihnak le râpnak a thleng ding.
Na bân nasa tak ruangah lungto bangin daiten an um ding.
Na mipawl an fehtlăng tiang, Maw Jehovah,
Na lei zo mi na mipawl an fehtlăng tiangin.
17 ^pAnmah na hruailut ding ih, ro ih na co mi tlang ah anmah na phun ding;
Maw Jehovah, nangmai cēnnak hrangih na rak tuah mi hmun ah,
Maw Bawipa, na kut ih na rak dĭn mi, hmun thianghlim ah.
18 ^q“Jehovah in kumkhua ihsin kumkhua a uk ding,”

15:2^a Suah 3:6, 15-16; 2Sam 22:47; Sam 18:1-2; 48:14; 99:5; Isa 12:2; 25:1; Hab 3:18

15:3^b Suah 3:15; 6:2-3, 7-8; 14:14; Sam 24:8; 83:18; Thu 19:11

15:4^c Suah 14:6-7, 17, 28; Jer 11:4

15:5^d Suah 15:10; Neh 9:11

15:6^e Suah 3:20; 6:1; Mip 24:8; Sam 2:9; 16:11; 118:15-16

15:7^f Suah 14:27; Dnp 4:24; Sam 2:5; 18:8; 78:49-50; 150:2; Isa 5:24; Heb 12:29

15:8^g Suah 14:22, 29; Jos 3:13; Job 4:9; Sam 18:15; 78:13

15:9^h Suah 14:5, 8-9; Lai 5:30; Sam 7:5; Isa 53:12; Luk 11:22

15:10ⁱ Suah 14:27-28; 15:5; Neh 9:11; Sam 29:3

15:11^j Suah 8:10; 9:14; Pui 19:2; Dnp 3:24; 1Sam 2:2; 2Sam 7:22; 1Sp 8:23; Sam 22:23; 71:19; 72:18; 77:13; 86:8; 99:3; 136:4; Isa 6:3; Mik 7:18; Thu 4:8

15:12^k Suah 15:6; Mip 16:32; Dnp 11:6; Sam 106:17

15:13^l Suah 15:17; Neh 9:12; Sam 68:16; 71:23; 77:15; 78:54; Tit 2:14

15:14^m Dnp 2:25; Jos 2:9; 1Sam 4:7; Est 8:17; Sam 83:7; Eze 38:20; Hab 3:7

15:15ⁿ Sem 36:15, 40; Mip 22:3-4; Dnp 2:4; Jos 2:9, 11, 24; 5:1; Sam 114:7

15:16^o Sem 35:5; Suah 15:5-6, 13; 23:27; Dnp 2:4, 25; Jos 2:9; 1Sam 25:37; Sam 74:2; Isa 43:1; Jer 31:11; Tit 2:14; 2Pe 2:1

15:17^p Suah 23:20; 32:34; 2Sam 7:10; Sam 2:6; 44:2; 68:16; 76:2; 78:54, 68-69; 80:8, 15; 132:13-14; Isa 5:2; Jer 2:21; Amo 9:15; Zef 3:11

15:18^q Sem 21:33; Sam 9:7; 10:16; 29:10; Isa 57:15; Ṭah 5:19

tiin.

19 ^aZiangahtile Faro-ih rangpawl cu a rang lêngpawl le a rang ralkappawl thawn tifinriat sungah an fehlut, cule Jehovah in tifinriat tidai cu an parah a kirtersal. Asinan Israel tefapawl cu tifinriat sung lei ro parah an feh.

15:19^a Suah 14:22-23, 28-29

Miriam Hla

20 ^aCun nunau profet Miriam, Aaron-ih unu in a kut ah khuangte a keng, cule nunau zaten khuangtepawl thawn lām phahin an thlun.

15:20^a Sem 31:27; Suah 2:4; Mip 26:59; Lai 11:34; 1Sam 18:6-7; 1San 6:3; 15:16; Sam 68:25; 81:2; 149:3; Jer 31:4; Mik 6:4

21 ^aCule Miriam in an hnenah,
“Jehovah hnenah hlasak uh,
Ziangahtile anih cu a cawisângaw zo!
Rang le a parih to cu tifinriat sungah a hlăwn zo!”

15:21^a Suah 15:1

tiin a sawn hai.

Ti khâ Thlumternak

22 ^aCutin Mosi cun Israel-mipawl cu Tipi Sen ihsin a hruai hai, cun Shur Ramṭhing an thleng. Cule ni thum sung ramṭhing ah an feh ih, tidai an táwng lo. 23 ^bCun ^cMarah hmun an thlen tikah Marah tidai an in thei lo, ziangahtile cuih tidai cu a khâ. Curuangah a hmin cu Marah tiih kawh a si. 24 ^dCule mipi cu Mosi dokalhin, “Ziang kan in ding?” tiah an phunzai. 25 ^eCule anih in Jehovah hnenah a ausuak ih, Jehovah in thingkung pakhat a hmuh. Cumi cu tidai sungih a thlak tikah, tidai cu a thlum.

15:22^a Sem 16:7; 20:1; 25:18; Mip 20:2, 5; 33:8; Sam 77:20; 78:52-53; 107:5

15:23^b Mip 33:8; Rut 1:20

15:23^c Marah: “A khâ” tinak a si.

15:24^d Suah 14:11; 16:2; Mip 14:2; Jos 9:18; Sam 78:18, 42; 106:13; Eze 16:43; Mat 6:31

15:25^e Suah 14:10; 16:4; Dnp 8:2, 16; Jos 24:25; Lai 2:22; 3:1, 4; Sam 66:10; Eze 47:7-8

Cu tawkah anih in an hrangah sakhaw dān le zīn le dān a tuahsak hai. Cule cu tawkah anmah cu a hniksak ih, 26 ^a“Jehovah na Pathian aw ṭha zetin na ngai ih, a mithmuh ah a dik mi na tuah, a thupekpawl lamah na hna na tŭn ih, a sakhaw dānpawl zate ih na thlun thluh asile na parah Izip-mipawl parih ka rak thlen mi natnak zianghman ka thlengter lo ding. Ziangahtile keimah cu ^bJehovah Rapha ka si,” tiah a ti.

15:26^a Suah 19:5-6; 20:2-17; 23:25; Dnp 7:12, 15; 28:58, 60; 32:39; Sam 41:3-4; 103:3; 147:3

15:26^b Jehovah Rapha: “Nanmah a lo tidamtu Jehovah” tinak a si.

27 ^aCun tihna hleihnih le ṭhulhfau kung 70 umnak Elim hmun an thleng. Cule tidai kiangah riahhmun an sâm.

15:27^a Mip 33:9

16

Van ihsin Manna

1 ^aElim ihsin an fehsuak ih, Israel tefa umkhawm zaten Sin Ramṭhing an thleng, cumi cu Elim le Sinai karlakih um a si, Izip ram ihsin an pawhsuah hnu a thla hnihnak ni hleinga ni ah a si. 2 ^bCun Israel tefa umkhawm zaten Mosi le Aaron dokalhin ramṭhing ah an phunzai. 3 ^cCule Israel tefapawl in an hnenah, “Aw, sabelpawl kiangih kan to lai le khăwpkham takih sang kan ei laiah khan Jehovah-ih kut in Izip ram ah rak thi sawn ta nungna maw! Ziangahtile nannih in hi ramṭhing ah hi mipungkhawm hmuahhmuah hi rilrawngin that dingin in hruaisuak a si,” tiah an ti.

16:1^a Suah 12:6, 51; 19:1; Mip 33:10-11; Eze 30:15

16:2^b Suah 14:11; 15:24; Sam 106:25; 1Ko 10:10

16:3^c Sem 47:15; Suah 17:3; Mip 14:2-3; 20:3; Dnp 8:3; Jer 44:17; Ṭah 4:9

4 ^aCun Jehovah in Mosi hnenah, “Ngai hnik, nan hrangah van ihsin sang ka surter ding. Cule mipi an fehsuak pei ih, ni tin an covo tawkin ni khat hrangah an sar pei, cutin ka dān an thlun maw thlun lo ti ka hniksak thei hai ding. 5 ^bCule a ni ruknak ah hitin a si ding, an va sar mi cu an timtuah ding ih, cumi cu ni tin an sar mi ih a letin a tam ding,” tiah a ti.

16:4^a Sem 22:1; Suah 15:25; Dnp 8:2-3, 16; Neh 9:15; Sam 78:23-25; 105:40; Joh 6:31; 1Ko 10:3

16:5^b Suah 16:22; Pui 25:21

6 ^aCun Mosi le Aaron in Israel tefapawl zate hnenah, “Jehovah in Izip ram ihsin a lo hruaisuak a si ti tuihzan ah nan thei ding. 7 ^bCule zing lamah Jehovah-ih ropitnak nan hmu ding, ziangahtile Jehovah dokalhih nan phunzainak cu amah in a thei. Kannih cu ziang so maw kan si ih, kanmah dokalhih nan phunzai?” tiah an ti. 8 ^cCule Mosi in, “Kannih cu ziang so kan si? Jehovah in zan lamah ei ding sa le zing lamah sang khăwpkhamin a lo pek tikah le nan phunzainak Jehovah in a theih tikah nan phunzainakpawl cu kanmah dokalh si loin, Jehovah dokalh nan si sawn ti nan theithiam ding,” tiah a ti.

16:6^a Suah 6:7

16:7^b Suah 16:10, 12; Pui 9:6; Mip 11:1, 18; 14:27; 16:11, 19, 42; 17:5; Dnp 5:24; 1Sp 8:11; Sam 43:2; Isa 6:3; 35:2; 40:5; Eze 1:28; Hab 2:14; Hag 2:7; Joh 11:4, 40

16:8^c Mip 23:21; Dnp 33:5; Lai 8:23; 1Sam 8:7; Mat 10:40; Luk 10:16; Rom 13:2; 1Th 4:8

9 ^aCun Mosi in Aaron hnenah, “Israel tefa umkhawm zate hnenah, ‘Jehovah hmai ra naih uh, ziangahtile nan phunzainakpawl a thei zo,’ tiah sim aw,” tiah a ti. 10 ^bCule hitin a si, Israel tefa umkhawm zate hnenih Aaron in a sim tikah, ramṭhing lam an hawi ih, ngai hnik, Jehovah-ih ropitnak cu mero ah a lang.

16:9^a Mip 16:16

16:10^b Suah 13:21; 16:7; Mip 16:19; 1Sp 8:10; 2San 7:1; Eze 10:4; Joh 11:4

11 Cule Jehovah in Mosi hnenah, 12 ^a“Israel tefapawlih phunzainak ka thei zo. An hnenah, ‘^bKhawthim zawngah sa nan ei ding ih, zing lamah sang in pum puarter nan si ding. Cule keimah cu Jehovah nan Pathian ka si ti nan thei ding,’ tiin sim aw,” tiah a sim.

16:12^a Suah 6:7; 16:7-8; Mip 14:27; 1Sp 20:28; Joe 3:17

16:12^b Khawthim zawngah: 12:6 simfiangnak zoh aw.

13 ^aCule hitin a si, zan lamah vanîm an ra suak ih riahhmun khuarnak an khuhkhat ṭheh, cun zing lamah an riahbûk kiangkap hmuahhmuah ah dai a tla. 14 ^bCule cuih daitla cu a hŭl tikah, ngai hnik, ramṭhing vangdâp parah, vur var vek, thil hlûm fate lei parah a um. 15 ^cCule cumi cu Israel tefapawl in an hmuh tikah, pakhat le pakhat, “Himi hi ziang a si?” tiah an tiaw. Ziangahtile cumi cu ziang a si ti an thei lo.

16:13^a Mip 11:9, 31; Sam 78:27-29; 105:40

16:14^b Suah 16:31; Mip 11:7-9; Dnp 8:3, 16; Neh 9:15; Sam 78:24; 105:40

16:15^c Suah 16:4; Dnp 8:16; Neh 9:15, 20; Sam 78:24; Joh 6:31; 1Ko 10:3

Cule Mosi in an hnenah, “Himi hi Jehovah in nan ei dingih a lo pek mi sang a si. 16 ^aHimi hi Jehovah in, ‘Mi kip in an ṭuldān ciar vekin, mi pakhat hrangah omer khat ciar, nan minung pum zulhin, mi kip in an puanthlam sungih um mipawl hrangah sar hai seh,’ tiih thu a pek mi a si,” tiah a ti hai.

16:16^a Suah 16:32, 36

17 Cun Israel tefapawl in cutin an tuah, cule mi hrek in tamdeuhin, mi hrek in máldeuhin an sar. 18 ^aCule tahnak omer ih an tah tikah tampi sartu in a hlei a nei cuang lo ih, málte sartu khal a tlasam cuang lo. Mi kip in an ṭuldān vek ciar in an sar. 19 ^bCule Mosi in, “Zohman in zing lam tiang zianghman tân hlah seh,” tiah a ti. 20 Sikhalsehla annih in Mosi an ngaithla cuang lo. An lakih mi hrekkhat in zing lam tiang a hrekkhat an tân ih, cumi cu a lúng ih a namsia. Cule Mosi cu an parah a thin a heng. 21 Cule mi kip in an ṭul tawk cio in zing tin cumi cu an sar. Cule ni a hung sat tikah cumi cu a zŭp.

16:18^a 2Ko 8:15

16:19^b Suah 12:10; 16:23; 23:18

22 ^aCule hitin a si, a ni ruknak ah a letih tam in sang an sar, mi pakhat ciar hrangah omer hnih in. Cule mipi umkhawm hotu zaten an ra ih Mosi an sim. 23 ^bCun anih in an hnenah, “Himi hi Jehovah in, ‘Thaizing cu Sabbath cawlh, Jehovah hrangih Sabbath thianghlim a si. Tuihsun ah nan kăn ding mi káng uhla, nan suan ding mi suang uh, cule thaizing tiang ret dingah a tāng mi zaten nanmai hrangah ret uh,’ tiih a sim mi a si,” tiah a ti. 24 ^cCule Mosi ih thu a pek vekin cumi cu zing lam tiang an ret, cule cumi cu a namsé lo ih, a sungah tholung khal an um lo. 25 Cun Mosi in, “Tuihsun cu Jehovah hrangih Sabbath a si ruangah sang cu tuihsun ah ei uh, cumi cu tuihsun ah cun ramlak ah nan hmu lo ding. 26 ^dNi ruk sung cumi cu nan khawm ding, asinan Sabbath a si mi a ni sarih ni ah cun pakhat hman a um lo ding,” tiah a ti.

16:22^a Suah 16:5; 34:31

16:23^b Sem 2:3; Suah 16:19; 20:8-11; 23:12; 31:15; 35:2; Pui 23:3; Dnp 5:13-14; Neh 9:13-14

16:24^c Suah 16:20

16:26^d Suah 20:9-10

27 Cule hitin a rak cang, mi hrekkhat cu a ni sarih ni ah sar dingin an fehsuak, asinan pakhat hman an hmu lo. 28 ^aCule Jehovah in Mosi hnenah, “Ziangtik tiang so ka thupekpawl le ka dānpawl thlun hi nan el ding? 29 Zoh hman! Jehovah in Sabbath a lo pek hi; curuangah a ni ruknak ah ni hnih hrang sang a lo pe. Mi kip in anmai hmun ah um hai seh; a ni sarihnak ah mi pakhat hman amai hmun ihsin fehsuak hlah seh,” tiah a ti. 30 Cutin mipi cu a ni sarihnak ah an cawl. 31 ^bCule Israel sungza in cumi cu manna tiah hmin an sak. Cumi cu ^cnānnān ci vek a si ih a var, a thawtdān cu khuai tizu thawi tuah mi sang per páte vek a si.

16:28^a Jos 9:14; 2Sp 17:14; Sam 78:10; 106:13; Jer 32:23

16:31^b Suah 16:14; Mip 11:7-9; Dnp 8:3, 16

16:31^c nānnān: Thlai phun khat a si ih, Mediṭerenian tipi kap tluan le Israel ram nisuahnak lam rampawl ih um a si. Cuih thlaikung cun pangpar var fate zet le sen dâng nawn a nei; a ci cu rimhmui hrangih hman a si.

32 Cun Mosi in, “Himi hi Jehovah in, ‘Nan tesinfanau tiang hrangih ret dingah, cumi cun omer pakhat khatter uh, cutin Izip ram ihsin ka lo hruaisuak laiah ramṭhing ih ka lo cawmnak sang an hmu thei ding,’ tiih thu a pek mi thil a si,” tiah a ti. 33 ^aCule Mosi in Aaron hnenah, “Bel pakhat la awla cumi sungah manna omer khat thun aw, cule cumi cu na tesinfanau san hrangih ret dingah Jehovah hmaiah retṭha aw,” tiah a ti. 34 ^bJehovah in Mosi thu a pek vekin, Aaron in ret ding hrangah, cumi cu ^cTheihpinak hmaiah a retṭha. 35 ^dCule Israel tefapawl cun minung umnak ram an thlen hlanlo, kum 40 sung manna an ei, Kanaan ram ramri an thlen hlanlo manna an ei. 36 ^eOmer khat cu efa khat ih ṭhen hra ṭhen khat a si.

16:33^a Heb 9:4; Thu 2:17

16:34^b Suah 25:16, 21; 27:21; 40:20; Pui 16:13; Mip 1:50; 17:10; Dnp 10:2; 1Sp 8:9; 2San 5:10

16:34^c Theihpinak: Himi hi Thukham Kuang hmin pakhat a si.

16:35^d Mip 14:33; Dnp 1:3; Jos 5:6, 12; Lai 3:11; Neh 9:20-21; Sam 95:10; Amo 5:25; Joh 6:31

16:36^e Suah 16:16; Pui 5:11; Mip 5:15

17

Lungpi ihsin Tidai

1 ^aIsrael tefa umkhawm zaten Jehovah-ih thupek bangtukin Sin Ramṭhing ihsin feh vivo dingin an păwksuak ih, Refidim ah riahhmun an sâm, asinan mipi hrangah in ding tidai a um lo. 2 ^bCuruangah mipi in Mosi an to ih, “Kan in dingah tidai in pe aw,” tiah an ti.

17:1^a Suah 16:1; 19:2; Mip 20:5; 33:12, 14

17:2^b Suah 14:11; 16:8; Mip 20:2-3, 13; Dnp 6:16; Sam 78:18, 41; 107:5; Mat 4:7; 1Ko 10:9

Cule Mosi in an hnenah, “Ziangah so keimah in tawh? Ziangah so Jehovah nan hniksak?” tiah a ti hai.

3 ^aCun mipi cu cu tawkah an ti a hâl ih, mipi cu Mosi parah an phunzai, cule, “Ziangah so kanmah le kan fātepawl le kan sumhnámpawl tihâlih thah dingah Izip ram ihsin in hruaisuak?” tiah an ti.

17:3^a Suah 12:38; 16:2-3

4 ^aCule Mosi cu Jehovah hnenah, “Hih mipi hi ziangtin ka tuah ding? Lungto ih in deng dingin an tiar ṭhepṭhep,” tiin a ausuak.

17:4^a Mip 14:10; 1Sam 30:6; Joh 8:59

5 ^aCule Jehovah in Mosi hnenah, “Mipi hmaiah feh awla Israel miupa hrekkhat na hnenah hruai aw. Nâl tiva pi na rak vuaknak na kianghrăwl khal na kut in keng awla, feh aw. 6 ^bNgai hnik, Horeb lungpi par, cu tawkah na hmaiah ka rak dīng ding, cule lungpi cu na vaw pei ih, cumi ihsin tidai a ra suak ding, cutin mipi in an in ding,” tiah a ti. Cule Mosi in Israel miupapawl mithmuh ah cuti cun a tuah. 7 ^cCule Israel tefapawlih tawhnak ruangah le, “Jehovah kan lakah a um maw um lo?” tiin Jehovah an hniksak ruangah, cuih hmun hmin cu ^dMassah le Meribah tiah a ko.

17:5^a Suah 3:16, 18; 7:20

17:6^b Suah 3:1; Mip 20:10-11; Dnp 8:15; Lai 15:19; 2Sp 3:20; Neh 9:15; Sam 78:15; 105:41; 114:8; Isa 30:25; 1Ko 10:4

17:7^c Mip 14:22; 20:13, 24; 27:14; Dnp 6:16; 9:22; 33:8; Sam 81:7; 95:8

17:7^d Massah: “Hniksak” tinak a si.

Amalek-mipawl thawi Doawknak

8 ^aCule Amalek-mipawl an ra ih, Refidim ah Israel-mipawl an do. 9 ^bCule Mosi in Joshua hnenah, “Kan hrangah mipa hrekkhat hril awla fehsuak aw, Amalek-mipawl do aw. Thaizing ah ka kut ih Pathian kianghrăwl thawn tlangmûal zimah ka dīng ding,” tiah a ti. 10 ^cCutin Mosi ih a sim vekin Joshua in a tuah ih, Amalek-mipawl a do. Cule Mosi, Aaron le Hur cu tlangmûal zimah an fehso. 11 ^dCule hitin a si, Mosi in a kut a hawiso tikah, Israel-mipawl in an neh, cule a kut a thlak tikah, Amalek-mipawl in an neh. 12 ^eAsinan Mosi-ih kut cu a khám, lungto an la ih, amai hnuaiah an ret, cule cumi parah a to. Cun Aaron le Hur cun a kut cu pakhat in khat lam, a dang pakhat in khat lam an dăwmsak, cule a kut cu ni tlak tiangin kel a awh. 13 Cule Joshua in Amalek le a mipawl cu ralnâm hriam in a neh.

17:8^a Sem 36:12; Suah 17:1; Mip 24:20; Dnp 25:17-19; 1Sam 15:2

17:9^b Suah 4:20; 24:13; Mip 11:28; Dnp 1:38; Jos 1:1; Apo 7:45

17:10^c Suah 24:14; 31:2

17:11^d Jam 5:16

17:12^e Jos 8:26; Isa 35:3

14 ^aCun Jehovah in Mosi hnenah, “Himi hi cazual sungah hngilhlonak dingah ngan awla, Joshua hnatheih ah cumi cu siarsal aw. Amalek cīn ringring nak cu van rāng hnuai ihsin ka thaihlo thluh ding,” tiah a ti. 15 ^bCule Mosi in biakṭheng pakhat a dâwl ih a hmin ah, ^cJehovah Nissi, tiah a ko. 16 ^dCule anih in, “^eA kut cu Jehovah-ih laltokham parah a um. Jehovah in, Amalek-mipawl cu san khat hnu san khat a do ding,” tiah a ti.

17:14^a Sem 36:12; Suah 24:4; 34:27; Mip 24:7; 33:2; Dnp 29:20; 31:9; Lai 3:13; 1Sam 30:17-18; Job 18:17; 19:23; Sam 9:5; 83:7; Isa 30:8; Jer 36:1; Eze 18:4

17:15^b Sem 8:20; 22:14; Suah 24:4; Lai 6:24

17:15^c Jehovah Nissi: “Jehovah cu ka thantar a si” tinak a si.

17:16^d Sem 22:16; Mip 24:7; 1Sam 15:8, 32; 1San 4:43; Est 3:1; 9:5

17:16^e A kut cu Jehovah-ih laltokham parah a um: “Jehovah in sia a săm zo” asilole “Amalek-mipawlih kut cu Jehovah dokalhin a um” tinak a si thei.

18

Jethro-ih Thurawn Pek

1 ^aMosi-ih pu, Midian puithiam Jethro in Mosi le Pathian mipi Israel-mipawl hrangih Pathian in a rak tuah mi hmuahhmuah, Jehovah in Izip ihsin Israel-mipawl a hruaisuah thu a rak thei. 2 ^bCun Mosi-ih pu, Jethro cun Mosi ih a rak thlahkirsal mi Mosi-ih nupi Zipporah cu, 3 ^ca fapa pahnih thawn a rak hruai. Pakhat ih hmin cu ^dGershom a si, ziangahtile Mosi in, “Keimah cu ram dangah mikhual ka rak si,” tiah a ti. 4 ^eA dang pakhat ih hmin cu ^fEliezer a si, ziangahtile Mosi in, “Ka paih Pathian cu i bawmtu a si ih, Faro-ih ralnâm ihsin i runsuak,” tiah a ti. 5 ^gCule Mosi-ih pu, Jethro cu Mosi-ih fapapawl le Mosi-ih nupi thawn, Pathian tlang hram, riahhmun an sāmnak hmun ramṭhing ih Mosi hnenah a thleng. 6 Cun anih in Mosi hnenah, “Kei, na pu Jethro cu, na nupi le a zawngih a fapa pahnih thawn, na hnenah ka ra a si,” tiah a ti.

18:1^a Suah 2:16, 18; 3:1

18:2^b Suah 2:21; 4:25

18:3^c Suah 2:22; 4:20; Apo 7:29

18:3^d Gershom: 2:22 simfiangnak zoh aw.

18:4^e Sem 49:25; Dnp 33:29; 1San 23:15, 17

18:4^f Eliezer: “Ka Pathian cu bawmtu a si” tinak a si.

18:5^g Suah 3:1, 12; 4:27; 24:13

7 ^aCule Mosi cu a pu hmuak dingin a fehsuak ih a băwk, cule amah cu a hnam. Cun pakhat le pakhat an thuhla an sutaw ih, puanthlam sungah an lut. 8 ^bCun Mosi in a pu hnenah, Israel-mipawl ruangih Jehovah in Faro hnen le Izip-mipawl hnenih a rak tuah mi hmuahhmuah, lamzin tluanih an parih a thleng mi retheih zăwnzaihnak hmuahhmuah le Jehovah in anmah a rak runsuahdān thupawl tla a sim. 9 ^cCun Izip-mipawlih kut ihsin a rak runsuah mi Israel-mipawl hrangih Jehovah in thil ṭha a tuah mi hmuahhmuah ruangah Jethro cu lungawi aipuangin a um. 10 ^dCule Jethro in, “Izip-mipawl kut ihsin le Faro kut ihsin a lo runsuaktu le Izip-mipawl kut hnuai ihsi mipi runsuaktu Jehovah cu thangṭhatin um seh. 11 ^eCun Jehovah cu pathianpawl hmuahhmuah hnakin a ropisawn ti ka thei, ziangahtile puarthau zetih an cangvaihnak thil roriah, cupawl tlunah anih cu a um,” tiah a ti. 12 ^fCun Mosi-ih pu, Jethro cun Pathian hnenah Meiur Thilhlăn le raithawinak dang pawl Pathian hnenih hlan dingin a la. Mosi-ih pu thawi Pathian hmaiih sang ei dingin Aaron cu Israel miupapawl thawn a ra.

18:7^a Sem 17:3; 29:13; 43:26-28; Suah 4:27; 2Sam 11:7

18:8^b Suah 4:23; 7:4-5; 15:6, 16; Mip 20:14; Neh 9:32; Sam 81:7

18:9^c Jos 21:45; 1Sp 8:66; Neh 9:25; Sam 145:7; Isa 63:7-14

18:10^d Sem 9:26; 14:20; 2Sam 18:28; 1Sp 8:56; Sam 68:19-20

18:11^e Suah 12:12; 15:11; 1San 16:25; 2San 2:5; Sam 95:3; 97:9; 135:5; Luk 1:51

18:12^f Sem 26:30; 31:54; Suah 24:5; Pui 1:2-9; Dnp 12:7

13 Cule hitin a si, a thaisun ah Mosi cu mipi thuṭhen dingin a to, cule mipi cu zing ihsin zan lam tiang Mosi hmaiah an ding. 14 Cun Mosi-ih pu in mipi hrangih Mosi ih tuah mi zaten a hmuh tikah, “Hih mipi hrangih na tuah mi thil hi ziang a si? Ziangruangah nangmah lawng na to ih, zing ihsin zan lam tiang na hmaiah mipi zate ih an dīn?” tiah a ti.

15 ^aCule Mosi in a pu hnenah, “Ziangruangahtile mipi cu Pathian ráwn dingah ka hnenah an ra. 16 ^bThubuai an neih tikah ka hnenah an ra ih, pakhat le pakhat karlakah thu ka ṭhen, cule Pathian-ih sakhaw dānpawl le a dānpawl ka theihter ṭheu hai,” tiah a ti.

18:15^a Sem 25:22; Mip 9:6, 8; 27:5; Dnp 17:8-13

18:16^b Suah 24:14; Mip 15:34; Dnp 1:17; Thf 24:23; Mal 2:9

17 Cule Mosi-ih pu in a hnenah, “Na tuah mi thil hi a ṭha lo. 18 ^aNangmah le na hnenih um hi mipi cu nan bāng hnephnep leh tengteng ding. Ziangahtile hi thil cu na hrangah a tam tuk, nangmah ten himi hi na ṭuansuak thei lo ding. 19 ^b Atu-ah ka aw ngaithla hnik, thurawn ka lo pe ding, Pathian in lo umpi aw sehla, thubuaipawl Pathian hnenih na thlen thei nak dingah mipi hrangah Pathian hmaiah dīng aw. 20 ^cCule sakhaw dānpawl le dānpawl cu anmah na zirh ding ih, an fehnak ding lamzin le an tuah ding mi hmuh aw. 21 ^dCun mipi zate lak ihsin thiltithei mipapawl, Pathian ṭihzah mi, midik, a dik lo mi hlawknak huatu tivekpawl na hril pei. Cule a thawng hotu, a za hotu, sawmnga hotu le pahra hotu ah tiin an tlunah na ret hai pei. 22 ^eCule ziangtik lai khalah anmah in mipi thuṭhen hai seh. Cun thu pipa kip cu na hnenah an run thlen pei, asinan thu tenau kip cu anmah ten an ṭhen pei. Cule annih in phurrit an lo phurhpi ding ih, na hrangah a áwldeuh ding. 23 Hih thil na tuah ih, cumi tuah ding Pathian in thu a lo pek a si ahcun, na dingsuak thei ding ih, hi mipi zate khal anmai hmun ah hnangamten an feh ve ding a si,” tiah a ti.

18:18^a Mip 11:11, 14, 17; Dnp 1:9, 12

18:19^b Mip 27:5

18:20^c Sem 39:11; Dnp 1:18; 4:1, 5; 5:1; Sam 119:12, 26, 68; 143:8

18:21^d Sem 22:12; 42:18; Suah 18:25; Mip 1:6; Dnp 1:13, 15; 16:19; 1Sam 12:3; 2Sam 23:3; 2San 19:5-10; Ezr 7:25; Sam 15:1-5; Apo 6:3

18:22^e Pui 24:11; Mip 11:17; Dnp 1:9, 17-18

Mosi in Hotupawl a Hril

24 Cun Mosi in a pu-ih aw cu a ngaithla ih, a sim mi zaten a tuah. 25 ^aCule Mosi in Israel miphun zate lak ihsin thiltithei mipapawl a hril ih, a thawng hotu, a za hotu, sawmnga hotu le pahra hotu ah tiin mipi tlunih lubân ah a tuah hai. 26 ^bCule annih cun ziangtik lai khalah mipi thu an ṭhen ṭheu, thu harsa pawl cu Mosi hnenah an thlen, asinan thu tenau pauhpauh cu anmah ten thu an ṭhen.

18:25^a Suah 18:21; Mip 1:16; Dnp 1:13-15; 16:18

18:26^b Suah 18:22; Dnp 1:17; Ezr 7:25

27 ^aCun Mosi in a pu cu a thlah ih, anih cu amai ram ah a tlung.

18:27^a Mip 10:29-30

19

Sinai Ramṭhing ah Israel-mipawl

1 ^aIsrael tefapawl Izip ram ihsin an fehsuah hnu a thla thumnak, cuih ni thothoah, Sinai Ramṭhing an thleng. 2 ^bCule Refidim ihsin an păwksuak ih, Sinai Ramṭhing an thleng thlang, cule ramṭhing ah riahhmun an sâm. Cule Israel-mipawl cu tlang hmai cu tawkah riahhmun an sâm.

19:1^a Suah 12:6, 51; 16:1; Dnp 1:6; 4:10, 15; 5:2

19:2^b Suah 3:1, 12; 17:1; 18:5; Mip 33:15

3 ^aCule Mosi cu Pathian hnenah a fehso ih, Jehovah in, “Jakob sungza hnenah hitin na sim pei ih, Israel tefapawl na sim pei: 4 ^b‘Izip-mipawl hnenih ka tuah mi le ziangti vekin muvanlai thla parah ka lo cawi ih, ka hnen roriah ka lo hruai ti nan hmu zo. 5 ^cCuruangah atu-ah ka thu nan lung taktak ih, ka thukham nan thlun asile ka hrangah miphun hmuahhmuah hnakin ka hlawnthil hleice nan si ding, ziangahtile leilung hmuahhmuah cu ka ta a si. 6 ^dCule ka hnenah puithiam miphun le miphun thianghlim nan si ding,’ tiin. Hipawl hi Israel tefapawl hnenih na sim ding mi kamsuakthupawl an si,” tiin tlang ihsin amah cu a ko.

19:3^a Suah 3:4; Apo 7:38

19:4^b Dnp 29:2; 32:11; Isa 40:31; Thu 12:14

19:5^c Sem 17:9; Suah 9:29; 15:26; Dnp 4:20; 5:2; 6:3; 7:6; 8:1; 10:14; 14:2; 26:18; Job 41:11; Sam 50:12; 78:10; 135:4; 1Ko 10:26; Tit 2:14; 1Pe 2:9

19:6^d Sem 18:19; Dnp 7:6; 14:21; 26:19; Isa 61:6; 62:12; 1Pe 2:5, 9; Thu 1:6; 5:10

7 ^aCule Mosi cu a ra ih, mipi upapawl a ko hai. Cule Jehovah in amah thu a pek mi hi kamsuakthu zaten an hmaiah a ret. 8 ^bCun mipi hmuahhmuah in a rual in an sawn ih, “Jehovah ih a rak sim mi zaten kan tuah ding,” tiah an ti. Cule Mosi in mipi ṭawngkampawl cu Jehovah hnenah a thlenkirsal.

19:7^a Suah 4:29-30; Pui 4:15; Mip 16:25; 1Sam 8:10

19:8^b Suah 4:31; 24:3, 7; Dnp 5:27; 26:17

9 ^aCule Jehovah in Mosi hnenah, “Ngai hnik, mipi in nangmah ka lo biak lai an hna in an thei ih an lo zum kumkhua thei nak dingah, mero sahpi sungah na hnenah ka ra thlang ding,” tiah a ti. Cutin Mosi in mipi ṭawngkampawl cu Jehovah hnenah a sim.

19:9^a Suah 19:16; 24:15-16; Dnp 4:11-12, 36; 2Sam 22:10, 12; Sam 18:11; 99:7; Joh 12:29

10 ^aCun Jehovah in Mosi hnenah, “Mipi hnenah feh awla tuihsun le thaisun ah serhhran hai aw, cule an hnipuan sawp hai seh. 11 ^bCule a ni thumnak hrangah tiar hai seh. Ziangahtile a ni thumnak ah mipi zate ih mithmuh ah Sinai tlang parah Jehovah a rung ṭum ding. 12 ^c‘Tlang ih kaiso lo dingin le tlang hram dai lo dingin fimkhur uh. Tlang a daitu pauhpauh cu thah tengteng an si pei. 13 ^dTlang daitu cu kut pakhat hmanin a thâm lo pei, cumi cu minung a si ah simaw, rannung a si ah simaw, lungto ih denthat asilole thál fung ih saithat tengteng a si pei, tlang daitu cu a nung lo pei,’ tiin mipi hrangah a kimvelin ramri khamsak aw. Tawtawrawt reipi a ăwn tikah tlang an rak naih ding a si,” tiah a ti.

19:10^a Sem 35:2; Pui 11:44-45; 15:5; Mip 8:7, 21; 11:18; 19:19; Joe 2:16; Heb 10:22; Thu 22:14

19:11^b Sem 11:5; Suah 19:16; Pui 7:38; Mip 3:1; Dnp 10:5; Neh 9:13; Gal 4:24

19:12^c Heb 12:20

19:13^d Suah 19:17; Jos 6:4; 1San 15:28; Sam 81:3; Heb 12:20

14 ^aCule Mosi cu tlang ihsin mipi hnenah a ṭum ih, mipi a serhhran hai, cule an hnipuan an sawp. 15 ^bCun anih in mipi hnenah, “A ni thumnak hrangah tiar uh, nunau naih hlah uh,” tiah a ti hai.

19:14^a Sem 35:2

19:15^b 1Sam 21:4; 1Ko 7:5

16 ^aCun a ni thumnak ah hitin a si, zing ah tlang parah khawri aw le nimthlakaupawl le mero sahpi a um, cule tuu pa ki phawt awn cu a ring zet, cuti cun riahhmun khuarnak ih um mipi zaten an khūr. 17 ^bCule Mosi in mipi cu Pathian táwng dingin riahhmun khuarnak ihta a hruaisuak hai ih, tlang hramah an ding. 18 ^cCun Sinai tlang cu meikhu in a khat ṭheh, ziangruangahtile Jehovah cu tlang parah meisa in a rung ṭum. A khu cu meipi khu vekin a kaiso ih, nasa zetin tlang pumpi cu a hnîn. 19 ^dCule tuu pa ki phawt mi cu reipiin a awn ih, a rin deuhdeuh tikah Mosi a ṭawng, cule Pathian in aw in amah cu a sawn. 20 ^eCun Jehovah cu Sinai tlang par, tlang zimah a rung ṭum. Cule Jehovah in tlang zimah Mosi a ko ih, Mosi cu a kaiso.

19:16^a Sem 3:10; Heb 12:18-19, 21; Thu 4:1

19:17^b Dnp 4:11

19:18^c Sem 15:17; 19:28; Suah 3:2; 24:17; Dnp 4:11, 24, 33-34; 5:4; Lai 5:5; 2San 7:1-3; Sam 68:7-8; 104:32; 144:5; Jer 4:24; Hag 2:6; Heb 12:18

19:19^d Sam 81:7

19:20^e Neh 9:13

21 ^aCule Jehovah in Mosi hnenah, “Ṭum awla mipi ralrinnak pe aw, cu lo asile Jehovah zoh dingin an pahtlăng ding ih, tampi an thi pang ding. 22 ^bCun Jehovah a naihtu puithiampawl cu anmah le anmah serhhranaw hai seh, cu lo asile Jehovah in a hrem hai pang ding,” tiah a ti.

19:21^a Suah 3:5; Mip 4:20; 1Sam 6:19

19:22^b Suah 19:24; 24:5; Pui 10:3; 21:6-8; 2Sam 6:7; Joe 2:16

23 ^aAsinan Mosi in Jehovah hnenah, “Sinai tlang parah mipi an kaiso thei lo, ziangahtile nangmah in, ‘Tlang kimvelin rikhamin serhhran aw,’ tiin ralrinnak in rak pe a si kha,” tiah a ti.

19:23^a Suah 19:12

24 ^aCun Jehovah in a hnenah, “Feh aw! Ṭum awla, na zawngah Aaron hun hruaiso aw. Asinan puithiampawl le mipi cu Jehovah hnenih ra kai dingin pahtlăng hlah hai seh, cu lo asile a hrem hai pang ding,” tiah a ti. 25 Cutin Mosi cu mipi hnenah a ṭum ih, anmah a sim.

19:24^a Suah 19:22; 24:1, 9, 12

20

Thupek Pahra

1 ^aPathian in hi kamsuakthu hmuahhmuah hi a ṭawngsuak:

20:1^a Dnp 10:4; Neh 9:13; Sam 119:9; Mal 4:4

2 ^a“Keimah cu Jehovah na Pathian, Izip ram, sál tānnak hmun ihsin a lo hruaisuaktu ka si.
3 ^b“Ka hmaiah pathian dang pawl na nei lo pei.
4 ^c“Khercawp milim, tlun lam van ihta siseh, hnuai lam leilung ihta siseh, leilung hnuai tidai ihta siseh, cupawl băngnak nei na hrangah zianghman na tuah lo pei. 5 ^dAn hmaiah na kûn lo pei ih, na rian hai fawn lo pei. Ziangahtile keimah, Jehovah na Pathian cu thîkthusia Pathian, keimah huatupawl cu an palepawlih mawhsualnak kha an tefa parah san thum san li tiang lehrūl ṭheu tu ka si. 6 ^eAsinan keimah i duhdawtupawl le ka thupekpawl thluntu thawng tampi hnenih zahngainak langtertu ka si.
7 ^f“Jehovah na Pathian hmin cu umze nei loin na hmang lo pei, ziangahtile umze nei loih a hmin hmangtu cu Jehovah in mawhnak nei lo ah a ruat lo ding.
8 ^g“Sabbath ni thianghlim teih ul dingin, cuih ni cu cîng ringring aw. 9 ^hNi ruk sung ṭuanbāngin, na hna zaten na ṭuan pei, 10 ⁱasinan a ni sarihnak cu Jehovah na Pathian-ih Sabbath a si. Cuih ni ah hna zianghman na ṭuan lo pei. Nangmah siseh, na fapa siseh, na fanu siseh, na siahhlawh mipa siseh, na siahhlawh nunau siseh, na ran siseh, na kăwtkapawl sungih na mikhual siseh ziang hna hman nan ṭuan lo pei. 11 ^jZiangahtile Jehovah in ni ruk sungah lei le van, tifinriat le a sungih um mi zaten a tuah ih, a ni sarihnak ah a cawl. Curuangah Jehovah in Sabbath ni cu a thlawsuah ih, cumi cu a tithianghlim.
12 ^k“Jehovah na Pathian ih a lo pek ding mi ram ah na san a sau thei nak dingah na nu le na pa upat aw.
13 ^l“Lai na that lo pei.
14 ^m“Na uire lo pei.
15 ⁿ“Rûk na ru lo pei.
16 ^o“Na innhnen parah theihpinak dik lo na rel lo pei.
17 ^p“Na innhnen teih inn na daw lo pei, na innhnen nupi siseh, a siahhlawh mipa siseh, a siahhlawh nunau siseh, a caw cang siseh, a lāk siseh, na innhnen thil zianghman na daw lo pei,”

20:2^a Sem 15:7; 17:7; Suah 13:3; 15:13, 16; Pui 19:2; 26:1; Dnp 5:6; 7:8; Sam 81:10; Isa 43:3; Eze 20:6, 19

20:3^b Suah 15:11; 20:23; Dnp 6:14; 2Sp 17:35; Sam 44:20; Jer 25:6; 35:15

20:4^c Pui 19:4; 26:1; Dnp 4:15-19; 27:15

20:5^d Sem 9:25; Suah 23:24; 34:6-7, 14; Mip 14:18, 33; Dnp 4:24; 5:9-10; Jos 23:7; 24:19; 1Sp 21:29; 2Sp 17:35; Jer 32:18; Nah 1:2

20:6^e Mip 14:18; Dnp 7:9

20:7^f Pui 19:12; Dnp 6:13; 10:20; Sam 63:11; Mat 5:33

20:8^g Suah 23:12; 31:13-16; Pui 26:2; Dnp 5:12; Isa 56:2; Jer 17:21-27; Eze 22:8

20:9^h Suah 34:21; 35:2-3; Pui 23:3; Dnp 5:13; Luk 13:14

20:10ⁱ Sem 2:3; Mip 28:9; Neh 13:16-19

20:11^j Sem 1:3-2:3; Suah 31:17; Heb 4:4

20:12^k Sem 31:35; Pui 19:3; Dnp 5:16, 33; 6:2; 11:8-9; 27:16; Jer 35:7; Mat 15:4; 19:19; Mar 7:10; 10:19; Luk 18:20; Efe 6:2-3

20:13^l Sem 4:23; 9:6; Suah 21:12; Pui 24:17; Mat 5:21; 19:18; Mar 10:19; Luk 18:20; Rom 13:9; Jam 2:11

20:14^m Pui 20:10; Dnp 5:18; Mat 5:27; 19:18; Rom 13:9

20:15ⁿ Suah 21:16; Pui 19:11, 13; Mat 19:18; Mar 10:19; Luk 18:20; Rom 13:9

20:16^o Suah 23:1, 7; Pui 19:18; Dnp 5:20; Mat 19:18

20:17^p Dnp 5:21; Thf 6:29; Mat 5:28; Luk 12:15; Rom 7:7; 13:9; Efe 5:3, 5; Heb 13:5

tiin a sim.

Mipi in Jehovah an Ṭih

18 ^aCun mipi zate in khawripawl, nimthlakaupawl, tuu pa ki awn le tlang meikhu pawl an hmu, cule mipi in cumi an hmuh tikah an khūr ih, hlaralah an ding. 19 ^bCun Mosi hnenah, “Kan hnenah nang ṭawng awla kan ngai ding, asinan Pathian cu kan hnenah ṭawng hlah seh, culole kan thi pang ding,” tiah an ti.

20:18^a Sem 3:10; Suah 19:16, 18; Heb 12:18-19; Thu 1:10

20:19^b Dnp 5:5, 23-27; Job 37:4-5; Gal 3:19; Heb 12:19

20 ^aCule Mosi in mipi hnenah, “Ṭih hlah uh, ziangahtile nan mithmai ah amah ṭihzahnak a um ih, cutin nan suallonak dingah Pathian cu nanmah hniksak dingin a ra zo,” tiah a ti. 21 ^bCule mipi cu hlaralah an ding, asinan Mosi cu Pathian umnak hmun thim sahpi lam a hei naih.

20:20^a Suah 14:13; 15:25; Dnp 4:10; 6:24; 13:3; Job 1:8; Thf 3:7; 16:6; Isa 8:13; 41:10, 13

20:21^b Suah 19:16; Dnp 5:22; Sam 18:9

22 ^aCun Jehovah in Mosi hnenah, “Israel tefapawl hnenah, ‘Van ihsin nanmah ka lo bia ti nan hmu zo. 23 ^bKeimah thawn umtlang dingin zianghman nan tuah lo pei, sui le ngun pathian dang pawl nanmai hrangah nan tuah lo pei. 24 ^cKa hrangah leilung biakṭheng na tuah pei ih, cumi parah na rante rual le na ranpi rualpawl in Meiur Thilhlănpawl le Remnak Thilhlănpawl na thawi pei. Ka hmin hngilh lo dingih ka umter hai nak hmun kip ah na hnenah ka ra ding ih, ka lo thlawsuah ding. 25 ^dCule ka hrangih lungto biakṭheng na dawl asile, ser mi lung in na tuah lo pei, ziangahtile cumi parih na hmanrua na hman asile cumi cu thiang lo ah na cangter a si. 26 ^eNa taklawngnak cu cumi parih lăngter a silonak dingah ka biakṭheng karbakpawl ah na kai fawn lo pei,’ tiin na sim hai pei.

20:22^a Dnp 4:36; 5:24, 26; Neh 9:13

20:23^b Suah 20:3; 32:1-2, 4; Dnp 29:17; Neh 9:18

20:24^c Sem 8:20; 12:2; Suah 10:25; 18:12; 20:25; 24:5; 27:1-8; Pui 1:2; Dnp 12:5; 16:6, 11; 26:2; 1Sp 9:3; 2San 6:6

20:25^d Dnp 27:5-6; Jos 8:31; 1Sp 6:7

20:26^e Suah 28:42-43; Eze 43:17

21

Sál Thuhla Dān

1 ^a“Hipawl hi an hmaiih na ret ding mi zīn le dān an si: 2 ^bHebru-mi sál na lei asile, kum ruk sung a lo rian pei ih, a kum sarihnak ah cun zianghman pe ta loin, zalenin a fehsuak pei. 3 Amah te lawng a ra lut asile, amah ten a suaksal pei, nupi neiih a ra lut asile, amai zawngah a nupi cu a fehsuak pei. 4 A pu in amah cu nupi a pek ih, cu nu in fapapawl lole fanupawl a hrinsak asile, a nupi le a fātepawl cu a pu-ih ta an si pei ih, anih cu amah te lawngin a fehsuak pei. 5 ^cAsinan sál cun tlăng takin, ‘Ka bawipa, ka nupi le ka fātepawl ka duhdawt, ka suakzalen lo ding,’ a ti asile, 6 ^da pu in amah cu thuṭhentupawl kiangah a hruai pei. A pu in cu pa cu sângka kiangah simaw, sângka biang ah simaw a hruai pei ih, a pu cun thir zúm in a hna a vit pei; cule kumkhuain a pu a rian pei.

21:1^a Suah 24:3-4; Dnp 4:14; 6:1; Dan 4:14

21:2^b Pui 25:39-43; Dnp 15:12-18; Jer 34:8, 14

21:5^c Dnp 15:16-17

21:6^d Dnp 17:9; Job 39:9; Sam 40:6

7 ^a“Cule mi pakhat in a fanu cu sál si dingah a zuar asile, cu nu cu sál mipapawl bangin a fehsuak lo pei. 8 Amai hrangih amah a rak hamtu a pu a lung a hmuiter lo asile, a pu in anih cu a tlenawter pei. Cu nu cu a rak bum ruangah a pu in anih cu ram dang mi hnenih zuar thei nak a nei lo. 9 Cule a pu in a fapa hrangih a ham asile, amah cu a fanupawl lakih pakhat vekin a zoh pei. 10 ^bNupi dang a ṭhit asile a rawl, a hnipuan le pasal a ihpi thei nak pawl a ṭhumsak lo pei. 11 Cule cu nuih hrangah a pu in hi thil pathum a tuahsak lo asile, paisa pe ta loin a suakzalen pei.

21:7^a Suah 21:2-3; Neh 5:5

21:10^b 1Ko 7:3-5

Nunrawnnak Thuhla Dān

12 ^a“Thi ko mi a thawitu cu thah tengteng a si pei. 13 ^bSikhalsehla a bawh hrim si loin, amai kut ah Pathian in a pek a si sawn ahcun, a tlansuahnak dingah na hrangah hmun ka ruat ding.

21:12^a Sem 4:14, 23; 9:6; Pui 20:9-10; 24:17; Mip 1:51; 35:30; Dnp 13:5; Job 31:11; Thf 20:20; Mat 26:52

21:13^b Mip 35:10-34; Dnp 4:42; 19:1-13; Jos 20:1-9; 1Sam 24:4, 10, 18

14 ^a“Asinan mi pakhat cu a innhnen dokalhin hrăwkhrawl zetin, thah tum tahratin tum cia nak thawn a cangvai asile, a thih thei nak dingah ka Biakṭheng ihsin amah cu nan hruai pei.

21:14^a Mip 35:20; Dnp 19:11-12; 2Sam 3:27; 1Sp 2:28-34; Heb 10:26

15 “A pa simaw, a nu simaw a thawitu cu thah tengteng a si pei.

16 ^a“Minung ru tahratih zuartu simaw, a kut sungih an hmuh ah simaw, cu pa cu thah tengteng a si pei.

21:16^a Sem 37:28; Dnp 24:7

17 ^a“A pa asilole a nu camsetu cu thah tengteng a si pei.

21:17^a Pui 20:9; Dnp 5:16; Thf 20:20; Mat 15:4; Mar 7:10

18 “Minungpawl cu pakhat le pakhat toawin pakhat in lungto thawn simaw, a kuttum thawn simaw mi dang kha a cūm ih, cu pa cu a thi lo nân, a ihkhun ah hmuntoin a um. 19 Cule a thosal ih a kianghrăwl thawn lengah a feh asile, amah vawtu cu thlah a si pei. A tikcu khawhral mi man lawng a kuan pei ih, a damfel tiangin a câwm pei.

20 “Mi pakhat in a siahhlawh mipa simaw, a siahhlawh nunau simaw fungfêk thawn a vuak ih a kut ih a thih asile, amah cu dāntat tengteng a si pei. 21 ^aSikhalsehla ni khat simaw, ni hnih simaw nungin a um a si ahcun, amah cu dāntat a si lo pei; ziangahtile amah cu a paisa a si.

21:21^a Pui 25:44-46

22 ^a“Mipapawl sualawin, nunau naupai an natter, cutin thla kim loin fa a hring nân, siatnak dang a um cuang lo asile, nunaunuih pasal in a hnenih a phût mi bangtukin dāntat a si pei. Cule thuṭhentupawlih thusah vekin a kuan pei. 23 ^bAsinan siatsuahawknak pakhat khat in a thlun a si ahcun, nunnak aiah nunnak, 24 ^cmit aiah mit, hâ aiah hâ, kut aiah kut, ke aiah ke, 25 meikāng aiah meikāng, hriamhma aiah hriamhma, vuaknak aiah vuaknak na pe pei.

21:22^a Suah 21:30; Dnp 22:18-19

21:23^b Pui 24:19; Dnp 19:21

21:24^c Pui 24:20; Dnp 19:21; Mat 5:38

26 “Mi in a siahhlawh mipa asilole a siahhlawh nunauih mit a thawi ih, a tisiat asile a mit ruangah a suakzalenter pei. 27 Cule a siahhlawh mipa simaw a siahhlawh nunau simaw ih hâ a thlawngter asile, a hâ ruangah a suakzalenter pei.

28 ^a“Caw cang in mipa simaw nunau simaw, a khîtthat a si ahcun, cuih caw cang cu lungto ih denthat tengteng a si pei ih, a sa cu ei a si lo pei; asinan, caw cang neitu pa cu mawhnak nei lo a si pei. 29 Asinan caw cang in a hlanah a ki in mi khît a rak hmang ih, cumi cu a neitu theihter a rak si, cule anih in a rak khum lo, cutin cuih caw cang cun mipa asilole nunau a that a si ahcun, cuih caw cu lung ih denthat a si pei ih, a neitu khal thah a si pei. 30 A hnenah sumpai phût mi a um asile, a hnenih phût mi pauhpauh cu amai nunnak tlen dingin a kuan pei. 31 Cuih caw in fapa simaw, fanu simaw a khît asile, hi zīn le dān bangtukin a parah tuah a si pei. 32 ^bCaw cang in siahhlawh mipa simaw, siahhlawh nunau simaw a khît asile, an pu hnenah caw cang neitu in ngun tangka shekel 30 a pe pei ih, caw cang cu denthat a si pei.

21:28^a Sem 9:5; Suah 21:32

21:32^b Sem 37:28; Zek 11:12-13; Mat 26:15; 27:3, 9

33 ^a“Cule mi pakhat in khur a áwng, asilole mi pakhat in khur a lai ih, cumi cu a khuh lo ih, caw cang simaw, lāk simaw cumi sungih a tlak asile, 34 khur neitu in a rul pei; anmah neitu hnenah paisa a pe pei, asinan a thi mi ṭilva cu amai ta a si pei.

21:33^a Luk 14:5

35 “Mi pakhat ih caw cang in mi dang ta a tuahmawh ih, cumi cu a thi a si ahcun, a nungtu caw cang cu an zuar pei ih, cu miih paisa cu an ṭhenaw pei. Cule a thi mi caw khal an ṭhenaw pei. 36 Cuti si loin caw cang cun a hlanah mi khît a rak hmang ih, cumi neitu in a khum lo a si ti theih asile, caw cang aiah caw cang a rul tengteng pei ih, a thi mi ran cu amai ta a si pei.

22

Thil Neih mi Thuhla Dān

1 ^a“Mi pakhat in caw cang simaw, tuu simaw a rûk ih, cumi cu a that asilole a zuar a si ahcun, caw cang pakhat aiah caw cang panga le tuu pakhat aiah tuu pali in a rul pei. 2 ^bA bauh rero laifang fifir hmuh a si ih, amah cu vuak tuarin a thih asile, a thisen suak ruangah mawh a um lo pei. 3 ^cFifir paih parah ni a rak suak zo a si ahcun, a thisen suak ruangah mawh a um pei. A pekirsal thluh ding a si; zianghman a nei lo asile, a rûkrûk man ah amah zuar a si pei. 4 ^dRûkrûk mi cu a kut ah a nungin hmuh felfai asile, cumi cu caw cang a si ah simaw, lāk a si ah simaw, tuu a si ah simaw, a letin a rul pei.

22:1^a Pui 6:1-7; 2Sam 12:6; Thf 6:30-31; Luk 19:8

22:2^b Mip 35:27; Job 24:16; Jer 2:34; Hos 7:1; Mat 6:19-20; 24:23; 1Pe 4:15

22:3^c Mat 18:25

22:4^d Sem 43:12; Suah 22:7; 1Sam 12:5

5 “Mi pakhat in lóram simaw, sabit hmuan simaw eiter dingin, a ṭilva a thlah ih, mi dang lóram a eiter asile, amai lóram lakih a ṭhabik mi le a sabit hmuan lakih a ṭhabik in a rul pei.

6 ^a“Mei kāngter tahratin hling bur a kāngkai, cutin khawm mi thlairawl, a dīng lai mi thlairawl, asilole lóram a kangrál asile, mei kāngtertu in a rul tengteng pei.

22:6^a Lai 15:5

7 ^a“Mi pakhat in a innhnen hnenah paisa asilole thilri kil dingah a pe, cule cumi cu a inn ihta rûk mi a si ih, fifir cu hmuh asile, a letin a kuan pei. 8 ^bFifir cu hmuh a si lo ahcun, inn neitu cu a innhnenih thilripawl a la maw la lo ti thei dingah, thuṭhentupawl hnenah hruai a si pei.

22:7^a Sem 43:12; Pui 6:1-7

22:8^b Suah 22:8-9, 28; Dnp 17:8-9; 19:17; 25:1

9 ^a“Thil sual tuahnak thu pauhpauh ah caw cang thu ah siseh, lāk thu ah siseh, tuu thu ah siseh, asilole hnipuan thu ah siseh, asilole mi in amai ta siih a rel mi thil hlo ziang thu khalah siseh, an pahnih in thuṭhentupawl hmaiah hruai an si pei, cule thuṭhentupawl in thiam lo an coh mi pauhpauh cun a innhnen hnenah a letin a kuan pei. 10 Mi in a innhnen hnenah lāk, caw cang, tuu, asilole ṭilva pakhat khat kil dingin a ap ih cumi cu a thi, hriamhma a pu, asilole cumi cu zohman ih hmuh loin rûkhlo si ta sehla, 11 ^ba innhnenih thilripawl a lâk lo thu ah an pahnih karlakah Jehovah hmin in thukamnak a um pei, cumi cu a neitu in a pawm pei ih, a rūlsal lo pei. 12 Sikhalsehla cumi cu amai hnen ihsin rûksak rori a si ahcun, a neitu cu a rūlsal pei. 13 ^cCumi cu ramsa in a thlekdarh a si ahcun, cumi lăngternak a rak keng pei ih, thlek a si mi cu a rul lo pei.

22:9^a Dnp 25:1

22:11^b Pui 6:3; 2San 6:22; Heb 6:16

22:13^c Sem 31:9

14 “Cule mi pakhat in a innhnen ihsin ziangkhal a hlang ih hriamhma a pu asilole a thi asile, a neitu cu a ran zawngih a um lo a si ahcun, anih in cumi cu a rūlsal tengteng pei. 15 ^aA ran zawngah a neitu a um a si ahcun, cumi cu a rūlsal lo pei. Man pe ih sān mi a si ahcun, a san man lawng pek a si pei.

22:15^a Pui 19:13; Job 17:5

Serh le Sâng le Nuncan Thuhla Dān

16 ^a“Pa pakhat in ham lo mi fala him cu zawl tahratin a ihpi asile, a nupi si dingin cu nuih hrangah man a pe tengteng pei. 17 ^bA pa in a hnenih pek ding a el eueu a si ahcun, fala him pawlih man bangtukin ^cpaisa a pe pei.

22:16^a Sem 34:12; Dnp 22:28-29

22:17^b Sem 34:12; 1Sam 18:25

22:17^c paisa a pe: “Ngun khing a khai” tinak a si.

18 ^a“Dawithiam nu cu na nungter hrimhrim lo pei.

22:18^a Pui 19:26, 31; 20:6, 27; Dnp 18:10-11; 1Sam 28:3; 2San 33:6; Isa 57:3; Jer 27:9-10

19 ^a“Rannung a ihpitu pauhpauh cu thah tengteng an si pei.

22:19^a Pui 18:23; 20:15-16; Dnp 27:21

20 ^a“Jehovah hnen lawng siarlo, ziang pathian hnen khalih raithawitu cu hlohralter verver a si pei.

22:20^a Suah 32:8; 34:15; Pui 17:7; Mip 25:2; Dnp 17:2-3, 5; 1Sp 18:40; 2Sp 10:25

21 ^a“Miphun dang na tuah se lo pei ih, na palbĕt fawn lo pei, ziangahtile nanmah khal Izip ram ah mikhual nan rak si dah.

22:21^a Suah 23:9; Pui 19:33-34; 25:35; Mip 15:14; Dnp 1:16; 10:19; 27:19; Eze 22:29; Zek 7:10

22 ^a“Ziang vek nuhmei asilole pa nei lo nauhak na zawnzaiter lo pei. 23 ^bZiangti zawng khalih anmah na zawnzaiter ih, ka hnenih an au asile, an aunak cu ka ngaithla tengteng ding ih, 24 ^cka thinhengnak cu a sa ding, cule ralnâm in ka lo that ding. Nan nupipawl nuhmei ah an cang ding ih, nan fātepawl pa nei lo ah an cang ding.

22:22^a Dnp 10:18; 24:17-18; Thf 23:10-11; Jer 7:6-7; Zek 7:9-10; Mal 3:5; Jam 1:27

22:23^b Dnp 10:18; 15:9; Job 34:28; 35:9; Sam 10:14, 17-18; 18:6; 68:5; Luk 18:7; Jam 5:4

22:24^c Sam 109:2, 9; Ṭah 5:3

25 ^a“Nan lakih ka mi mifarahpawl hnenah paisa na cawih asile, a hnenah paisa cawihtu vekin na um lo pei, amah cu a ṭhang na dil lo pei. 26 ^bKămawknak ah na innhnen teih sinfen na lâksak asile, ni a tlak hlanah cumi cu a hnenah na pekirsal pei. 27 ^cZiangahtile cumi cu a khuhawknak neihsŭn a si, cumi cu a taksa hrangih a sinfen a si. Anih cu ziang thawn saw a ih ding? Cule hitin a si ding, anih cu ka hnenih a au tikah ka ngaithla ding, ziangahtile kei cu mi zangfah thei zet ka si.

22:25^a Pui 25:35-37; Dnp 15:7-11; 23:19-20; Neh 5:7, 10; Sam 15:5; Eze 18:8

22:26^b Dnp 24:6, 10-13; Job 24:3; Thf 20:16; Eze 33:15; Amo 2:8

22:27^c Suah 22:23; 34:6; 2San 30:9; Neh 9:17

28 ^a“Pathian na thangsiat lo pei ih, na mipawlih hotu khal na camsiat lo pei.

22:28^a Pui 24:15-16; Sam 102:8; Ths 10:20; Apo 23:5

29 ^a“A cu hmaisabik na thlai le na thei ti hmaisabik hlan dingah na tlâi lo pei. Na fapapawl lakih fatir cu keimah i pe pei. 30 ^bCuvek thothoin na caw cang le na tuu pawl khal na tuah pei. Cumi cu ni sarih sung a nu thawn a um pei, a ni riatnak ah cumi cu keimah i pe pei.

22:29^a Suah 13:2, 12; 23:16, 19; Mip 18:13; Dnp 18:4; 26:2-11; 1Sam 6:3; Thf 3:9

22:30^b Sem 17:12; Pui 12:3; 22:27; Dnp 15:19

31 ^a“Ka hnenah mithianghlim nan si ding, ramlak ih ramsapawl ih an bawhthlek mi sa nan ei lo pei, cumi cu uicopawl hnenah nan hlăwn ding a si.

22:31^a Suah 19:6; Pui 7:24; 11:44; 17:15; 19:2; Eze 4:14

23

1 ^a“A dik lo mi thuthang na sim sâwng lo pei. Theihpitu dik lo si dingah misualrál thawn va ṭuantlang hlah. 2 ^bThil ṭha lo tuah dingin mipi na thlun lo pei, thubuai relnak ah diknak merhkâwi dingin mi tam lam ṭangin thu na theihpi lo pei. 3 ^cMifarah pa hnenah a thubuai relnak ah thleidannak na langter lo pei.

23:1^a Suah 20:16; Pui 19:11; Dnp 5:20; 19:16-21; Sam 27:12; 35:11; 101:5; Thf 10:18; 19:5; Apo 6:11

23:2^b Dnp 16:19; 24:17

23:3^c Suah 23:6; Pui 19:15; Dnp 1:17; 16:19

4 ^a“Na ralih caw cang lole lāk a tlân mi na hmuh asile, a hnenah na hruaikirsal tengteng pei. 5 ^bNangmah a lo huatuih lāk cu a thil phurh mi hnuaiih a băwk na hmuh asile, băwm duhnak na neih lo a si khalah cu pa cu a lāk thawn na bawm tengteng pei.

23:4^a Pui 6:3; Dnp 22:1-4

23:5^b Dnp 22:4

6 ^a“A thubuai relnak ah na mifarahih thuṭhennak na merhkawisak lo pei. 7 ^bThuhla dik lo ihsin hlapi ah um aw; mawhnak nei lo le midingfel va that hlah. Ziangahtile misualrál cu thiam ka coter lo ding. 8 ^cNawhthuh na la lo pei, ziangahtile nawhthuh in thleidan thiamnak mit a câwtter ih, midingfelih ṭawngkampawl a merhkâwi.

23:6^a Suah 23:2-3; Pui 19:15; Dnp 23:16

23:7^b Suah 20:13, 16; 34:7; Dnp 19:18; 25:1; 27:25; Sam 119:29; Rom 1:18; Efe 4:25

23:8^c Dnp 10:17; 16:19; Thf 6:35; 15:27; 17:18, 23; Isa 5:22-23

9 ^a“Mikhual khal na palbĕt lo pei, ziangahtile mikhual thinlung cu nan thei. Ziangahtile nanmah cu Izip ram ah mikhual nan rak si dah.

23:9^a Suah 22:21; Pui 19:33-34; Dnp 24:17; 27:19; Eze 22:7

Sabbath Dān

10 ^a“Kum ruk sung na ló ah ci na tuh pei ih, a rah na khawm pei, 11 ^basinan a kum sarihnak ah cun ló cu na cawlter pei ih, na cūlter pei, cutin na mipawl lakih mifarahpawl in an ei thei ding; cule an hlah mi cu ramsapawl in an ei ding. Cuvek thothoin na sabit hmuan le na olif hmuan khal na tuah pei. 12 ^cNi ruk sung na hna na ṭuan pei ih, a ni sarihnak ah na cawl pei, cutin na caw cang le na lāk an cawl ding ih, na siahhlawh nunauih fapa le mikhual tla an tha a tharsal ding.

23:10^a Pui 25:1-7

23:11^b Pui 25:1-7; Neh 10:31

23:12^c Sem 2:2-3; Suah 20:8-11; 31:15; 34:21; 35:2-3; Pui 23:3; Dnp 5:13

13 ^a“Cule nan hnenih ka sim zo mi zaten ngaihsak uhla, pathian dang pawlih hmin hrimhrim sāl hlah uh, na kâ ihsi khalin cumi cu theih si hlah seh.

23:13^a Dnp 4:9, 23; Jos 23:7; Sam 16:4; Hos 2:17; 1Ti 4:16

Kum Tin Puai Phun Thum

14 ^a“Kum khat sungah ka hnenah puai vei thum na tuah pei: 15 ^bThilnu telh lo Sang Puai na hmang pei. Abib thla ih cān khiah mi ah thu ka lo pek zo vekin ni sarih sung thilnu telh lo sang na ei pei, ziangahtile cuih cān ah Izip ihsin na suak, ka hmaiah zohman kutlawng in an lang lo pei. 16 ^cNa lóram ih na cīn mi na ṭuanbăngnak rah hmaisabik pawl, ^dThlaithar Puai le lóram ihsin na hnaṭuan rahpawl na khawm ṭheh tikah, kum a cemin ^eRawlkhâwm Puai na tuah pei.

23:14^a Suah 23:17; 34:22-24; Dnp 16:16; Eze 46:9

23:15^b Suah 12:2, 14-20; 13:4; 22:29; 34:20; Pui 23:6-8; Mip 28:16-25; Mat 26:17; Apo 12:3

23:16^c Suah 34:22; Pui 23:9-10, 39; Mip 28:26; Dnp 16:9; Ezr 3:4; Jer 40:10

23:16^d Thlaithar Puai: “Pentikos Puai” asilole “Zarhkar Sarih hnu Puai” tiih kawh a si.

23:16^e Rawlkhâwm Puai: “Bûkte Puai” ti khalih kawh a si.

17 ^a“Na mipapawl zaten Bawipa Jehovah hmaiah kum khat ah vei thum an ra lang pei.

23:17^a Suah 23:14; 34:23; Dnp 16:16

18 ^a“Ka raithawinak thisen cu thilnu telh mi sang thawn na hlan lo pei, keimai puaiih a thau khal zing lam tiang a tâng lo pei. 19 ^bNa leiram rah hmaisabik pawl lakih a ṭhabik cu Jehovah na Pathian inn ah na keng pei. Me no cu a nuih hnawi ti in na suang lo pei.

23:18^a Suah 12:10; 34:25; Pui 2:11; 7:15; Dnp 16:4

23:19^b Suah 22:29; 34:26; Mip 18:12; Dnp 14:21; 26:2, 10; Neh 10:35; Thf 3:9

Israel hmaiah Vancungmi a Feh

20 ^a“Ngai hnik, lamzin ih lo kil dingin le ka timtuah cia mi hmun ih lo hruailut dingin na hmaiah vancungmi ka thlah. 21 ^bAmai ān ngai awla a thu lung aw, a lakah hél hlah; ziangahtile na dān pahbălnakpawl a lo ngaidam lo ding; ziangahtile ka hmin cu amah ah a um. 22 ^cAsinan a thu na lun taktak ih, ka sim mi zaten na tuah asile, na ralpawlih ral ka si ding ih, a lo dokalhtupawl dokalhtu ka si ding. 23 ^dZiangahtile ka vancungmi cu na hmaiah a feh ding ih, Amor-mipawl le Heth-mipawl le Periz-mipawl le Kanaan-mipawl le Hiv-mipawl le Jebus-mipawl hnenah a lo hruai ding, cule anmah cu ka thaihlo thluh hai ding. 24 ^eAn pathianpawl hnenah na kûn lo pei, na rian hai fawn lo pei, an hnaṭuan mipawl bangtukin na tuah fawn lo pei. Cuhnakin anmah cu na cimitter thluh sawn hai pei ih, an ṭhuamserhpawl na ṭhiatbăl ṭheh sawn pei.

23:20^a Sem 16:7; Suah 3:2; 14:19; 15:16-17; 23:23; 32:34; 33:2

23:21^b Suah 3:14; 6:3; 34:5-7; Mip 17:10; Dnp 9:7; Jos 24:19; Sam 78:40, 56

23:22^c Sem 12:3; Mip 24:9; Dnp 3:7; Jer 30:20

23:23^d Suah 23:20; Pui 18:3; 26:1; Mip 33:52; Dnp 7:5; 9:4; 16:22; Jos 24:8, 11; 1Sp 14:23; 2Sp 3:2; Isa 27:9

23:24^e Suah 20:5; 23:13, 33; 34:13; Pui 26:1; Mip 33:52; Dnp 7:5; 12:3, 30; 2Sp 3:2; 18:4

25 ^a“Cule Jehovah nan Pathian nan rian ding ih, na rawl le na tidai thlawsuah a lo pe ding. Cule nan lak ihsin natnak ka lahlo ding. 26 ^bNa ram ah zohman nausiat simaw, cing simaw an um lo ding. Na dam sung nipawl ka kimter ding.

23:25^a Suah 15:26; Pui 26:3-13; Dnp 6:13; 7:12-15; 10:12; 28:1-14; Jos 22:5; 1Sam 12:20; Mat 4:10

23:26^b Sem 15:15; Pui 26:3-4; Dnp 4:40; 7:14; Job 5:26; Sam 90:10; Mal 3:11

27 ^a“Na hmaika ah mipi ṭihnak nei ko ka tuah ding, na thlennak mipi zate lakah buainak ka umter ding ih, na ral zaten an ^bdung lo tŭn ko ka tuah ding. 28 ^cCule na hmai ihsin Hiv-mi, Kanaan-mi le Heth-mi pawl dawisuaktu ding na hmaiah khuaingalpawl ka thlah ding. 29 ^dAnmah cu kum khat sungah na hmai ihsin ka dawisuak hai lo ding, cu lo asile na hrangah ram cu a ṭhing ding ih, ramsapawl an tam tuk pang ding. 30 ^eNa karhzai ih ram na luahngah hlanlo na hmai ihsin málte ten anmah cu ka dawisuak ding. 31 ^fCule na ramripawl cu Tipi Sen ihsin ^gFilisṭia-mipawlih tifinriat tiang, cule ramṭhing ihsin Zufraṭis tiva tiang ka tuah ding. Ziangahtile ram luahtupawl cu na kut ah ka lo pe ding ih, na hmaiah na dawisuak hai pei. 32 ^hAnmah thawn siseh, an pathianpawl thawn siseh thukham zianghman na tuah lo pei. 33 ⁱNa ram ah an cêng lo pei, culole keimah dokalhin an lo sualter pang ding. Ziangahtile an pathianpawl na rian asile, cumi cu na hrangah tháng a si tengteng ding,” tiah a ti.

23:27^a Sem 35:5; Suah 15:16; Dnp 2:25; 7:23; Jos 2:9; 2Sam 22:41; Sam 18:40; 21:12

23:27^b dung lo tŭn ko: An tlan ding tinak.

23:28^c Suah 33:2; 34:11; Mip 13:29; Dnp 7:20; Jos 3:10; 24:12; Sam 78:55

23:29^d Dnp 7:22

23:30^e Dnp 7:22; Jos 23:5

23:31^f Sem 15:18; Dnp 1:7-8; 2:36; 7:24; 11:24; Jos 21:44; 24:12, 18; Ezr 4:20; Sam 80:8

23:31^g Filisṭia-mipawlih tifinriat: Mediṭerenian tifinriat a si.

23:32^h Sem 26:28; Suah 23:13, 24; 34:12; Mip 11:16; Dnp 7:2; Eze 17:13

23:33ⁱ Suah 34:12; Dnp 7:1-5, 16; 12:30; Jos 23:13; Lai 2:3; Sam 106:36

24

Thisen Thukham

1 ^aJehovah in Mosi hnenah, “Nangmah le Aaron, Nadab le Abihu le Israel miupa 70 pawl tla Jehovah hnenah hung so uhla, hlaral ihsin kûn uh. 2 ^bCule Mosi lawngin Jehovah a ra naih pei, asinan annih cun an naih lo pei, mipi khal a zawngah an fehso lo pei,” tiah a ti.

24:1^a Suah 6:23; 19:24; 28:1; Pui 10:1-2; Mip 11:16

24:2^b Mip 12:6-8

3 ^aCule Mosi cu a ra ih, Jehovah-ih kamsuakthu zate le zīn le dān zaten mipi a sim. Cule mipi zaten aw khat in an sawn ih, “Jehovah ih sim mi kamsuakthu zaten kan tuah ding a si,” tiah an ti. 4 ^bCule Mosi in Jehovah-ih kamsuakthu zaten a ngan. Anih cu zing takah a tho ih, tlang hramah biakṭheng a dâwl, cule Israel hnám hleihnih hrangah hngilhlonak ṭhuam hleihnih a phun. 5 ^cCun Meiur Thilhlănpawl hlantu le Jehovah hnenih caw pa tûai pawl ih Remnak Thilhlănpawl raithawitu Israel tefapawl lakih minopawl a thlah hai. 6 ^dCule Mosi in thisen a hrek a la ih, cawhtawlhpawl sungah a ret, cule thisen hrek cu biakṭheng parah a theh. 7 ^eCun Thukham Cazual a la ih, mipi hnatheih ah a siar. Cule annih in, “Jehovah ih a sim mi zaten kan tuah ding ih, thulung mi kan si ding,” tiah an ti.

24:3^a Suah 19:8; 24:7; Dnp 5:27; Jos 24:24; Gal 3:19

24:4^b Sem 8:20; 28:18; Suah 17:14-15; 34:27; Dnp 31:9

24:5^c Sem 31:54; Suah 18:12; Pui 1:3

24:6^d Pui 1:11; Sam 99:6; Mat 26:28; Heb 9:18

24:7^e Suah 24:3-4; 2Sp 23:2, 21; Jer 40:3; Heb 9:19

8 ^aCule Mosi in thisen a la ih, mipi parah a theh, “Zoh hnik uh, hi kamsuakthu hmuahhmuah bangtukih Jehovah in nanmah hnenih a tuah mi thukham thisen a si,” tiah a ti.

24:8^a Pui 26:3; Dnp 5:2-3; Jer 11:4, 8; Zek 9:11; Mat 26:28; Mar 14:24; Luk 22:20; 1Ko 11:25; Heb 9:19-20; 13:20

9 ^aCun Mosi le Aaron cu Nadab le Abihu le Israel miupa 70 pawl thawn an fehso. 10 ^bCule Israel-mipawlih Pathian an hung hmu. A ke hnuaiah safaira lung rĕm mi vek a um ih, cumi cu a fim kelkel mi van vek a si. 11 ^cSikhalsehla Israel tefapawlih mizahumpawl parah Pathian in a kut a thlak lo. Annih in Pathian an hmu, cule an ei ih an in.

24:9^a Suah 24:1

24:10^b Sem 16:13; Suah 24:11; Mip 12:8; Job 28:16; Isa 6:5; 54:11; Eze 1:26; 10:1; Joh 1:18; 6:46; Thu 4:3

24:11^c Sem 16:13; 32:30; Suah 24:10; Eze 44:3; Mat 26:29

12 ^aCun Jehovah in Mosi hnenah, “Tlang parah ka hnenah hung so awla, cu tawkah um aw. Cule mipi na zirh dingah lung pheng pawl parih ka ngan mi dān le thupekpawl ka lo pe ding,” tiah a ti. 13 ^bCule Mosi cu amah bawmtu Joshua thawn an tho ih, Pathian tlang ah cun Mosi cu a fehso.

24:12^a Suah 31:18; 32:15; Dnp 4:13; 5:22; 2Ko 3:3

24:13^b Suah 3:1; 17:9-14; 33:11

14 ^aCun miupapawl hnenah, “Nan hnenih kan ra thlenkirsal hlanlo hi tawk ihsin in rak hngak uh. Ngai hnik uh, nan hnenah Aaron le Hur an um. Mi pakhat khat in thubuai a neih asile, an kiangah va feh seh,” tiah a ti. 15 ^bCun Mosi cu tlang parah a fehso ih, tlang cu mero in a khuh.

24:14^a Sem 22:5; Suah 17:10, 12

24:15^b Suah 19:9; Mat 17:5

16 ^aCun Jehovah-ih ropitnak cu Sinai tlang ah a ṭhumaw ih, cuih tlang cu mero in ni ruk sung a khuh. Cule a ni sarihnak ah Jehovah in mero lak ihsin Mosi a ko. 17 ^bJehovah-ih ropitnak lăngdan cu Israel tefapawlih mit ah cun tlang zim ih thil kangrál rero mi meisa vek a si. 18 ^cCule Mosi cu mero lakah a lut ih, tlang ah a fehso. Cule Mosi cu tlang parah ni 40 le zan 40 sung a um.

24:16^a Suah 16:10; Pui 9:23; Mip 14:10; Sam 99:7; Eze 8:4

24:17^b Suah 3:2; Dnp 4:24; 9:3; Eze 1:28; Heb 12:18, 29

24:18^c Sem 7:4; Suah 34:28; Dnp 9:9; 10:10; 1Sp 19:8; Mat 4:2

25

Biakbûk hrang Thawhhlawm

1 Jehovah in Mosi hitin a sim, 2 ^a“Thawhhlawm in rak ken dingin Israel tefapawl hnenah sim aw. A thinlung in siang zetih a petu pauhpauh hnen ihsin ka thawhhlawm na khawng pei. 3 Cule himi hi an hnen ihsin na khawn ding mi thawhhlawm a si. Cupawl tla cu sui, ngun, dar, 4 ^bpat mepian, sendup le senlar ih cawih mi, puan nem páte le me hmul, 5 ^cbuh sen mi tuu cang phawpawl, ṭhakhas phawpawl le akasia thing, 6 ^dmei tleu hrang hriak, hnih mi hriak hrang le rimhmui thaw hrangah rimthawpawl, 7 ^eonik lungpawl, Puithiam Kâwrcung par le ṭāngbĕn ih bun ding mi lungpawl tla an si. 8 ^fCule an lakih ka cēnnak dingah hmun thianghlim in tuahsak hai seh. 9 ^gBiakbûk pianhmang le a bungrua zate ih pianhmang cu a zate ih ka lo hmuh bangtukin nan tuah pei.

25:2^a Suah 35:4-9, 21; 1San 29:3, 5, 9; Ezr 2:68; 2Ko 8:11-12; 9:7

25:4^b Suah 28:5-6, 8

25:5^c Mip 4:6, 10; Dnp 10:3

25:6^d Suah 27:20; 30:23; Pui 16:12; Mip 4:16; 2San 13:11

25:7^e Suah 28:4, 6-30

25:8^f Suah 29:45-46; 36:1-5; Mip 3:28; 5:3; Dnp 12:11; 1Sp 6:13; Zek 2:10; 2Ko 6:16; Heb 9:1-2; Thu 21:3

25:9^g Suah 25:40; 26:30; Apo 7:44; Heb 8:2, 5

Thukham Kuang

10 ^a“Cule akasia thing in Kuang na tuah pei, a sau lam cu dawng hnih le a hrek, a kauh lam dawng khat le a hrek, a san lam dawng khat le a hrek a si pei. 11 Cumi cu sui hlirhlăng na khût pei, a sung lam le a leng lam na khût pei ih, a kimvel zaten sui tlâng na tuah pei. 12 Cumi hrangah sui khâng pali na bur pei ih, a kil pali, khat lam sirah khâng hnih, a khat lam sirah khâng hnih tiin na bun pei. 13 Cule akasia thing in zawnfungpawl na tuah pei ih, cupawl cu sui na khût pei. 14 ^bCupawl hmangin Kuang an zawn thei nak dingah zawnfungpawl cu Kuang sirpawlih khângpawl sungah na hrawlh pei. 15 ^cZawnfungpawl cu Kuang khângpawl sungah an um pei ih, cu tawk ihsin lâk an si lo pei. 16 ^dCule Kuang sungah ka lo pek ding mi Theihpinak cu na ret pei.

25:10^a Suah 37:1-9; Dnp 10:3; Heb 9:4

25:14^b 1San 15:15

25:15^c 1Sp 8:8

25:16^d Suah 40:20; Dnp 10:2; 31:26; 1Sp 8:9; Heb 9:4

17 ^a“Sui hlirhlăng in Sualkhuhthawinak Hmun na tuah pei, a sau lam dawng hnih le a hrek le a kauh lam dawng khat le a hrek a si pei. 18 ^bCule sui cherub pahnih na tuah pei, Sualkhuhthawinak Hmun zim pahnih ihta pawl cu a serin na ser pei. 19 A zim pakhat ah cherub pakhat, a zim dangah a dang cherub pakhat tuah aw; cuih zim pahnih ah cherub cu Sualkhuhthawinak Hmun thawn sakhatin na tuah pei. 20 ^cCule cherub-pawl in tlunah an thla an pharh pei, an thla in Sualkhuhthawinak Hmun khuhin, pakhat le pakhat hmai an hawihaw pei. Cherub-pawlih hmai cun Sualkhuhthawinak Hmun lam an hawih pei. 21 ^dSualkhuhthawinak Hmun cu Kuang tlunah na ret pei ih Kuang sungah ka lo pek ding mi Theihpinak cu na ret pei. 22 ^eCule cu tawkah ka lo táwng ding ih, Theihpinak Kuang parih a um mi cherub pahnih karlak, Sualkhuhthawinak Hmun tlun ihsin Israel tefapawl hnenah thupek ih ka lo pek ding mi thil pauhpauh thuhla ah ka lo be ṭheu ding.

25:17^a Suah 37:6; Pui 16:13; Rom 3:25

25:18^b 1Sp 6:23, 27; 2San 3:10-13; Heb 9:5

25:20^c Sem 3:24; 1Sp 8:7; 1San 28:18; Joh 20:11-12; Heb 9:5

25:21^d Suah 25:16; 26:34; 40:20; Heb 9:4

25:22^e Suah 29:42-43; 30:6, 36; Pui 1:1; 16:2; Mip 7:89; 17:4; 1Sam 4:4; 2Sam 6:2; 2Sp 19:15; 1San 13:6; Sam 18:10; 80:1; Isa 37:16; Jer 3:16

Sangserh Cabuai

23 ^a“Akasia thing in cabuai khal na tuah pei, a sau lam dawng hnih, a kauh lam dawng khat, a san lam dawng khat le a hrek a si pei. 24 ^bCule cumi cu sui hlirhlăng na khût pei ih, sui in a kimvel zaten a tlâng na tuah pei. 25 Za băwk tia-in cumi hrangah a kimvel zaten tlângkawm na tuah pei ih, a kimvel zate ih tlângkawm hrangah sui tlâng na tuah pei. 26 Cule cumi hrangah sui khâng pali na tuah pei ih, cumiih a ke pali parih a um mi a kil pali pawl parah khângpawl na bun pei. 27 Cabuai dĭn thei tu zawnfungpawl kaitu ah khângpawl cun a tlângkawm naih hai seh. 28 Cule Cabuai zawnnak dingah akasia thing in zawnfungpawl na tuah pei ih, cupawl cu sui na khût pei. 29 ^cA khēngpawl, a hai dau pawl, a tawihnak hrangah thâwlpawl le kheng kûm pawl na tuah pei. Cupawl cu sui hlirhlăng na tuah pei. 30 ^dCule ka hmaiih Cabuai parah Sangserh na ret ringring pei.

25:23^a Suah 37:10-16; Pui 24:6; Mip 3:31; 1Sp 7:48; 1San 28:16; 2San 4:8, 19; Eze 41:22; Heb 9:2

25:24^b Suah 25:11

25:29^c Suah 37:16; Mip 4:7

25:30^d Suah 39:36; 40:23; Pui 24:5, 9; Mip 4:7; 1Sam 21:4-6; 1Sp 7:48; 1San 23:29; 1Ko 10:16-17

Sui Meito Ṭhuam

31 ^a“Sui hlirhlăng in Meito ṭhuam khal na tuah pei, Meito ṭhuam cu ser mi a si pei. A kopi, a ṭêkpawl, a kheng kûm pawl, a cângbolpawl le a pangparpawl cu an sakhat ding a si. 32 ^bCule cumiih sirpawl ihsin ṭêk paruk a ra suak pei. Cupawl cu sir khat ih Meito ṭhuam ṭêk pathum, a dang sirih Meito ṭhuam ṭêk pathum tla an si. 33 ^cA ṭêk pakhat parah ^dalmond par mûm vek kheng kûm pathum cu cângbol pakhat le pangpar pakhat thawn an um pei, cule a dang a ṭêk parah almond par mûm vek kheng kûm pathum cu cângbol pakhat le pangpar pakhat thawn tuah a si pei. Cutin a ṭêk paruk pawl cu Meito ṭhuam ihsin an suak pei. 34 ^eMeito ṭhuam par roriah almond par mûm vek kheng kûm pali cu pakhat cio in cângbol le pangpar ciar thawn tuah a si pei. 35 ^fCule Meito ṭhuam ihsin a ṭêk mi a ṭêk paruk pawl zulhin a pakhatnak a ṭêk pahnih hnuaiah cângbol pakhat, a pahnihnak a ṭêk pahnih hnuaiah cângbol pakhat, a pathumnak a ṭêk pahnih hnuaiah cângbol pakhat an um pei. 36 ^gAn cângbolpawl le an ṭêk pawl cu an sakhat pei, a zaten sui hlirhlăng ih ser mi a si pei. 37 ^hCumi hrangah meito pasarih na tuah pei ih, an hmai lam tleuter dingin, cuih meitopawl cu remten an um pei. 38 ⁱCule a caicehpawl le a meiling suahdurpawl cu sui hlirhlăng a si pei. 39 Meito ṭhuam le hi bungrua hmuahhmuah cu sui hlirhlăng talent khat hmangih tuah a si pei. 40 ^jCule tlang parih a pianhmang hmuh na si vekin na tuah pei.

25:31^a Suah 37:17-24; Pui 24:4; Mip 3:31; 1Sp 7:49; 2San 4:7; Zek 4:2; Heb 9:12

25:32^b Suah 37:18

25:33^c Suah 37:19

25:33^d almond: Sem 30:37 simfiangnak zoh aw.

25:34^e Suah 37:20

25:35^f Suah 37:21

25:36^g Suah 37:22; Mip 8:4

25:37^h Pui 24:3-4; Mip 8:2; 1Sam 3:3; 2San 13:11

25:38ⁱ Mip 4:9

25:40^j Suah 25:9; 26:30; Pui 8:10; Mip 1:50; 8:4; Jos 22:19, 29; 2Sam 7:2; 1Sp 1:39; Apo 7:44; Heb 8:5; Thu 21:3

26

Biakbûk

Biakbûk Tlun Khuh Puanzar Pakhatnak

1 ^a“Cuihhleiah hmawih mi pat zai fêmte puanzar pahra le pat mepian, sendup, senlar puan thawn Biakbûk na tuah pei; thiam zetih ruahman mi cherub-pawl cuangih tah mi in cupawl cu na tuah hai pei. 2 Puanzar kip ih sau lam cu dawng 28, a kauh lam dawng li cio a si pei. Cule puanzar kip in an canaw thluh pei. 3 Puanzar panga cu pakhat le pakhat an pehaw pei ih, a dang puanzar panga khal pakhat le pakhat an pehaw pei. 4 Cule puanzar peh khat tlâng parah pat mepian hnâpawl na tuah pei ih, cuvek thothoin a lengta sawn puanzar peh hnihnak tlâng par khalah na tuah ding a si. 5 Puanzar pakhat ah hnâ 50 na tuah pei, cule peh hnihnak puanzar zim khalah hnâ 50 in na tuah pei, cutin a hnâpawl cu a dungta thawn pakhat le pakhat an pehaw ding a si. 6 Cule sui in a kilhnak 50 na tuah pei ih, Biakbûk pakhat a can thei nak dingah kilhnakpawl in puanzarpawl cu na pehawter pei.

26:1^a Suah 36:8-19; Pui 8:10; Mip 1:50; Jos 22:19, 29; 2Sam 7:2; 1Sp 1:39; Apo 7:44; Heb 8:2; Thu 21:3

Biakbûk Tlun Khuh Puanzar Pahnihnak

7 ^a“Biakbûk tlun khuh hrangah me hmul in puanzarpawl khal na tuah pei. Puanzar hleikhat na tuah ding a si. 8 Puanzar pakhat ciar ih sau lam cu dawng 30 a si pei ih, puanzar pakhat ciar ih kauh lam cu dawng li a si pei, cule puanzar hleikhat pawl cu an canaw ṭheh ding a si. 9 Cule puanzar panga cu a dangten peh khat ah, puanzar paruk khal a dangten peh khat ah na pehawter pei ih, a paruknak puanzar cu Puanthlam hmai lamah na bil pei. 10 Puanzar peh khat tlâng ah hnâ 50 na tuah pei ih, a peh hnihnak puanzar tlâng khalah hnâ 50 na tuah pei. 11 Cule dar kilhnak 50 in na tuah pei, a kilhnak cu a hnâ sungah bun awla, pakhat a can thei nak dingah puanthlam cu na pehawter pei. 12 Puanthlam puanzar hlei a tāng mi, puanzar a tāng mi a hrek cu Biakbûk dung tlunah a tlai ding a si. 13 Cule Puanthlam puanzar a sau lamih a hlei mi khat lamih dawng khat le a dang khat lamih dawng khat cu Biakbûk sirpawl ah cumi khuh dingin hi lam sirah le khat lam sirah a tlai pei.

26:7^a Suah 36:14

Biakbûk Tlun Khuh Puanzar Pathumnak le Palitnak

14 ^a“Puanthlam hrangah buh sen mi tuu cang phawpawl in a khuhnak le cumi tlunah ṭhakhas phaw in khuhnak na tuah pei.

26:14^a Suah 36:19; Mip 3:25

Biakbûk Phar Tlêp le Phar Tlâng Pawl

15 ^a“Biakbûk hrangah akasia thing in phar tlêp pawl cu dĭng zetih dīngin na tuah pei. 16 Phar tlêp pakhat ih sau lam cu dawng hra a si pei ih, phar tlêp pakhat ciar ih kauh lam cu dawng khat le a hrek a si pei. 17 Phar tlêp pakhat le pakhat pehawknak hrangah ke pahnih a um pei. Cuti vek cun Biakbûk phar tlêp zaten na tuah ding a si. 18 Cule Biakbûk hrangah phar tlêp, thlang lam sir hrangah tlêp 20 in na tuah pei. 19 ^bPhar tlêp 20 pawl hnuaiah ngun in taw khuar 40, phar tlêp pakhat ciar hnuaiih a ke pahnih hrangah taw khuar pahnih na tuah pei. 20 Cule Biakbûk khat lam sir, sak lam sir hrangah phar tlêp 20 le, 21 ngun taw khuar 40, phar tlêp pakhat ciar hnuaiah taw khuar pahnih a um pei. 22 Biakbûk nitlaknak lam sir hrangah phar tlêp paruk na tuah pei. 23 Cule Biakbûk dung lam kil pahnih hrang khalah phar tlêp pahnih na tuah pei. 24 Cupawl cu a taw ah an pehaw pei ih, a zimah khâng pakhat in a pehkhawmawter ding a si. Cuti vek cun an pahnih hrangah a si pei. Cupawl cu a kil pahnih hrangah an si ding a si. 25 Cutin phar tlêp pariat pawl cu tlêp khat fingfing taw ah ngun taw khuar pahnih neiin, anmai taw khuar hleiruk thawn an um ding a si.

26:15^a Suah 36:20-34

26:19^b Suah 38:27

26 ^a“Cule akasia thing in phar tlângpawl cu Biakbûk sir pakhat parih phar tlêp pawl hrangah panga, 27 Biakbûk sir khat lam parih phar tlêp pawl hrangah phar tlâng panga le a hlatnak nitlaknak lam sir parih Biakbûk phar tlêp pawl hrangah phar tlâng panga na tuah ding a si. 28 A laiih phar tlâng cu phar tlêp pawl laifangin khat lam zim ihsin khat lam zim tiang a fehtlăng ding a si. 29 Phar tlêp pawl cu sui na khût pei, phar tlângpawl kaitu dingah an sui khângpawl na tuah pei ih, phar tlângpawl cu sui na khût ding a si. 30 ^bCule tlang parih hmuhter na si mi pianhmang vekin Biakbûk na dĭn pei.

26:26^a Suah 36:21

26:30^b Suah 25:9, 40; Mip 9:15; Apo 7:44; Heb 8:5

Hmun Thianghlim Bik Pindan Puanzar

31 ^a“Tah mi pindan puanzar pakhat mepian, sendup le senlar le hmawih mi pat zai fêmte in na tuah pei. Cumi cu thiam zetih ruahman mi cherub-pawl cuangih tah mi a si pei. 32 Cumi cu sui khût mi akasia ih tuah mi ṭhuam pali parah na thlai pei. Ngun taw khuar pali tlunah ṭhuampawlih sui kūaipawl an um pei. 33 ^bCule a kilhnakpawl ihsin puanzar na thlaih pei. Cun cu tawk, puanzar dung lamah Theihpinak Kuang cu na kenglut pei. Puanzar cu na hrangah Hmun Thianghlim le Hmun Thianghlimbik ṭhentertu a si pei. 34 ^cHmun Thianghlimbik sungih Theihpinak Kuang parah Sualkhuhthawinak Hmun cu na ret ding a si. 35 ^dPuanzar lengah Cabuai na hung pei ih, thlang lam kap Biakbûk sir Cabuai zawnah Meito ṭhuam na ret pei, cule sak lam sirah Cabuai na ret pei.

26:31^a Suah 36:35-36; Mip 4:5; 2San 3:14; Mat 27:51; Luk 23:45; Heb 9:3

26:33^b Suah 25:16; 40:21; Pui 16:2, 16; Mip 3:31; 1Sp 6:16; 1San 3:8; 2San 3:14; Eze 41:4; Heb 9:2

26:34^c Suah 25:21; 40:20; Pui 16:2; Heb 9:5

26:35^d Suah 40:22, 24; Heb 9:2

Puanthlam Luhnak Puanzar

36 ^a“Puanthlam luhnak hrangah puantah thiam ih tah mi pat mepian, sendup le senlar le hmawih mi pat zai fêmte in puanzar pakhat na tuah pei. 37 ^bCule puanzar hrangah akasia thing ih tuah mi ṭhuam panga na tuah pei ih, sui na khût pei. An kūaipawl cu sui an si pei ih, an hrangah dar taw khuar panga na bur pei.

26:36^a Suah 36:37; Sam 45:14; Eze 16:10

26:37^b Suah 36:38

27

Meiur Thilhlăn Biakṭheng

1 ^a“Akasia thing in dawng nga sau le dawng nga kau Biakṭheng na tuah pei. Biakṭheng cu sir li canaw a si pei ih, a san lam dawng thum a si pei. 2 ^bCumiih a kil pali ah a kipawl na tuah pei, cuih kipawl cu Biakṭheng thawn an sakhat pei. Cule cumi cu dar in na khût ding a si. 3 ^cCun a vutcâm lawhnak ding hai dau pawl, suahdurpawl, cawhtawlhpawl, sa lâknak hmanruapawl le meiling suahdurpawl tla na tuah pei. A bungrua zaten dar in na tuah pei. 4 Biakṭheng hrangah dar ih tuah mi hrîknak khohrîk na tuah pei ih, a hrîknak parah cun a kil li ah dar khâng pali na tuah pei. 5 Cumi a hrîknak cu Biakṭheng laifang thleng dingin Biakṭheng biang hnuaiah na ret pei. 6 Cule Biakṭheng hrangah zawnfungpawl, akasia thing in zawnfungpawl na tuah pei ih, cupawl cu dar na khût pei. 7 ^dZawnfungpawl cu khângpawl sungah thluah an si pei ih, Biakṭheng sir pahnih ah zawnfungpawl cu Biakṭheng zâwn dingin an um ding a si. 8 ^eBiakṭheng cu kawráwngin thing pheng pawl in na tuah pei, cupawl cu tlang parih hmuh na si vekin tuah an si pei.

27:1^a Suah 38:1-7; 1Sp 8:64

27:2^b Pui 4:7; 1Sp 1:50; Sam 118:27; Jer 17:1; Eze 43:15; Amo 3:14; Zek 9:15

27:3^c Mip 4:14; 7:13; 1Sp 7:40, 45; 2Sp 12:13; 1San 28:17; Jer 2:18

27:7^d Mip 4:15

27:8^e Suah 25:40; 26:30; Apo 7:44; Heb 8:5

Biakbûk Tualrawn hrang Puanzar

9 ^a“Biakbûk tualrawn khal na tuah pei. Thlang lam sir, sir khat hrangah hmawih mi pat zai fêmte dawng 100 sau a tualrawn puanzar a um pei. 10 Cule cumiih a ṭhuam 20 le a taw khuar 20 pawl cu dar an si pei. Ṭhuampawlih kūaipawl le an tlângkhanpawl cu ngun a si pei. 11 Cuvek thothoin, sak lam sir tluanah dawng 100 sau puanzar, cumiih a ṭhuam 20 pawl le dar taw khuar 20 pawl, ngun ṭhuam kūaipawl le ngun tlângkhanpawl an um pei.

27:9^a Suah 38:9-20; Pui 6:16; Eze 40:14

12 “Cule nitlaknak lam sir tualrawn a kauhnak lam tluanah dawng 50 sau puanzar cu an ṭhuam pahra pawl le an taw khuar pahra pawl zawngah a um pei. 13 Nisuahnak lam sir tualrawn kauhnak lam cu dawng 50 a si pei. 14 Luhnak sir khat lamih puanzar cu dawng hleinga, an ṭhuam pathum pawl le an taw khuar pathum pawl thawn a si pei. 15 Cule a khat lam sirah dawng hleinga puanzar cu an ṭhuam pathum pawl le an taw khuar pathum pawl zawngah an um pei.

16 “Tualrawn luhnak hrangah thiamtah thiam ih tah mi, tah mi pat mepian, sendup le senlar le hmawih mi pat zai fêmte puanzar dawng 20 sau pakhat a um pei. Cumi cun ṭhuam pali le taw khuar pali a nei pei. 17 Tualrawn kimvelih ṭhuam zaten ngun tlângkhan an nei pei. An kūaipawl cu ngun an si pei ih, an taw khuar pawl cu dar an si pei. 18 Tualrawn sau lam cu dawng 100, a kauh lam cu a tluansuakin dawng 50, a san lam dawng nga, hmawih mi pat zai fêmte ih tuah mi le dar ih tuah mi a taw khuar pawl thawn a si pei. 19 Cumi ṭuannak zate hrangih Biakbûk bungrua zate, a hrĕn hnget nak zate le tualrawn hrĕn hnget nak zaten dar an si pei.

Meito Ṭhuam Hriak

20 ^a“Cule catlak loih meito ^bvâng dingin mei tleu hrangah sawr mi olif hriak fimte na hnenih rak keng dingin Israel tefapawl thu na pe pei. 21 ^cTawnawknak Puanthlam sungah, Theihpinak hmaiih puanzar lengah Aaron le a fapapawl in zan lam ihsin zing lam tiang Jehovah hmaiah cumi cu an kilkhawi pei. Cumi cu Israel-mipawl aiawhin an tesinfanaupawl hnenih kumkhaw sakhaw dān a si pei.

27:20^a Suah 35:8, 28; Pui 24:1-4

27:20^b vâng: A ṭawng hrampi ah cun, “kaisohter” ti a si.

27:21^c Suah 25:22; 26:31, 33; 28:43; 29:9, 42; 30:8, 36; Pui 1:1; 3:17; 16:34; Mip 1:1; 18:23; 19:21; Jos 18:1; 1Sam 3:3; 30:25; 1Sp 1:39; 2San 13:11

28

Puithiam Lu bik Sinfen

1 ^a“Puithiam dinhmun in keimah in rĕn thei nak dingah na unaupa Aaron cu a fapapawl thawn Israel-mipawl lak ihsin hril awla na kiangah hruai aw. Aaron le Aaron-ih fapapawl cu: Nadab, Abihu, Eleazar le Ithamar tla an si. 2 ^bCule ropitertu dingah le mawitertu dingah na unaupa Aaron hrangah sinfen thianghlim na tuah pei. 3 ^cCutin fimnak thlarau thawi ka khahter mi kutthiam nei zate hnenah na sim pei, cule puithiam dinhmun ih keimah rian dingah amah serhhran dingin Aaron-ih sinfen an tuah pei. 4 ^dAn tuah ding mi sinfen cu: ṭāngbĕn pakhat, Puithiam Kâwrcung pakhat, angki sau pakhat, thiam zetih tah mi kâwrfualpi pakhat, puithiam lu bik lupâwng pakhat le taikhap tla an si pei. Cule puithiam dinhmun ih i rĕn thei nak dingah, annih in na unaupa Aaron le a fapapawl hrangah sinfen thianghlim pawl an tuahsak pei.

28:1^a Suah 24:1, 9; Pui 8:2, 30; Mip 18:1-7; Dnp 18:5; 1Sam 2:28; Sam 99:6; Heb 5:1

28:2^b Suah 29:5, 29; 31:10; 39:1-31; Pui 8:7-9, 30; Mip 20:26-28

28:3^c Suah 31:3, 6; 35:25, 31-35; 36:1; Dnp 34:9; Isa 11:2; 1Ko 12:7-11; Efe 1:17

28:4^d Suah 28:15-43; Pui 10:5

Puithiam Kâwrcung

5 ^a“Annih in sui, pat mepian, sendup le senlar ih cawih mi le puan nem páte an la pei ih, 6 ^bPuithiam Kâwrcung cu themthiam zetih tuah mi sui, pat mepian, sendup le senlar le hmawih mi pat zai fêmte pawl in an tuah pei. 7 Lianghri pahnih cu an zim pahnih ah an pehaw pei, cuti vek cun an pehaw ding a si. 8 Cule thiam zetih tah mi Puithiam Kâwrcung parih Puithiam Kâwrcung taiṭem cu themthiamnak bangrepin sui, pat mepian, sendup le senlar le hmawih mi pat zai fêmte ih tuah mi a si pei.

28:5^a Suah 25:3

28:6^b Suah 39:2-7; Pui 8:7

9 ^a“Cule onik lung pahnih na la pei ih, an parah Israel fapapawlih hmin: 10 an hmin paruk cu lung pakhat parah, cule hmin paruk cu a dang lung parah an suahdăn a sangsángten na kher pei. 11 Tacik kherdān vekin, lung parih lung khertu in a ṭuannak in, lung pahnih cu Israel fapapawlih hmin cuangin na kher pei. Cupawl cu sui kuar pawl sungah na bun pei. 12 ^bCun lung pahnih cu Israel fapapawl hngilhlonak lung hrangah Puithiam Kâwrcung liang parah na bĕn pei. Cule Aaron in hngilhlonak hrangah a liang pahnih parah Jehovah hmaiah an hmin cu a hruh pei. 13 ^cSui kuar pawl khal na tuah pei ih, 14 hrihrual bangin sui hlirhlăng in cikcin pahnih na tuah pei, cule hmawih mi cikcin cu a kuar pawl sungah na bun hnget pei.

28:9^a Sol 8:6; Isa 49:6; Hag 2:23

28:12^b Suah 28:29; 39:6-7; Pui 24:7; Mip 10:10; 31:54; Dnp 33:12; Jos 4:7; Job 31:36; Zek 6:14; 1Ko 11:24

28:13^c Suah 39:16-18

Ṭāngbĕn

15 ^a“Thuṭhennak ih hman ding mi ṭāngbĕn na tuah pei. Cumi cu themthiam zetih tah mi Puithiam Kâwrcung tuahdān bangtukin na tuah pei, cumi cu sui, pat mepian, sendup le senlar le hmawih mi pat zai fêmte pawl in na tuah pei. 16 Cumi cu sir li canawin thuah ding a si pei ih, a sau lam khâp khat, a kauh lam khâp khat a si pei. 17 ^bCule cumi parah lung mankhung tlar li in lung mankhung pawl na phum pei: a tlar khatnak ah sardias pakhat, ṭopaz pakhat le emerald pakhat a si pei, cumi cu a tlar khatnak a si pei. 18 A tlar hnihnak ah turquoise pakhat, safaira pakhat le daimond pakhat a si pei. 19 A tlar thumnak ah jacinth pakhat, agate pakhat le amethist pakhat; 20 ^ccule a tlar litnak ah birul pakhat, onik pakhat le jasper pakhat tla an si pei. Cupawl cu sui kuar pawl sungah phum an si pei. 21 ^dCule lung mankhung pawl cun Israel fapapawlih hmin, an hmin zulhin hleihnih an nei pei. Tacik kher vekin anmai hmin ciar in hnám hleihnih zulhin an si pei.

28:15^a Suah 39:8-21

28:17^b Thu 21:19-20

28:20^c Eze 1:16; Dan 10:6

28:21^d Jos 4:8; Thu 7:4-8; 21:12

22 “Sui hlirhlăng ih phiar mi hrihrual vekin a zimah ṭāngbĕn hrangah cikcin na tuah pei. 23 Cule ṭāngbĕn hrangah sui khâng pahnih na tuah pei ih, cuih khâng pahnih cu ṭāngbĕn zim hnih ah na thlaih pei. 24 Cun phiar mi sui cikcin pahnih cu ṭāngbĕn zim pawl ih a um mi khâng pahnih ah na sih pei, 25 cule phiar mi cikcin pahnih ih a khat lam zim pahnih cu kuar pahnih ah na bun hnget pei ih, a hmai lamih Puithiam Kâwrcung lianghripawl ah na sih pei.

26 “Sui khâng pahnih na tuah pei ih, Puithiam Kâwrcung lam hawihtu ṭāngbĕn sung lamih a um mi, ṭāngbĕn zim hnih ih zîkah na thlaih pei. 27 Cule sui khâng dang pahnih na tuah pei ih, cupawl cu Puithiam Kâwrcung lianghri pahnih, a hmai lam hnuai, thiam zetih tah mi Puithiam Kâwrcung taiṭem a ṭhitnak cekci ah na thlaih pei. 28 Cupawl cun ṭāngbĕn cu cuih khângpawl hmangin Puithiam Kâwrcung khângpawl ah, hri mepian hmangin an sih pei, cutin cumi cu thiam zetih tah mi Puithiam Kâwrcung taiṭem tlunah a um pei ih, cutin ṭāngbĕn cu Puithiam Kâwrcung ihsin a pelh lo ding. 29 Cule Hmun Thianghlim ih Aaron a luh tikah a lung zawnih thuṭhennak ih hman ding mi ṭāngbĕn parah Israel fapapawlih hmin cu Jehovah hmaiih hngilhlonak ah a thlaih ringring ding a si.

Urim le Thummim

30 ^a“Cule thuṭhennak ih hman ding mi ṭāngbĕn sungah Urim le Thummim na ret pei ih, cupawl cu Jehovah hmaiih Aaron a luh tikah a lung zawnah an um pei. Cun Aaron in Israel tefapawlih thuṭhennak ih hman mi ṭāngbĕn cu a lung zawnah Jehovah hmaiah a thlaih ringring ding a si.

28:30^a Pui 8:8; Mip 27:21; Dnp 33:8; 1Sam 28:6; Ezr 2:63; Neh 7:65

Puithiam Kâwrcung Kâwrfual

31 ^a“Puithiam Kâwrcung kâwrfual cu pat mepian hlir in na tuah pei. 32 A laifangah a lu hrawlhnak hrangah kâ a um pei. A tlêklonak dingah a kâ kimvel zaten kâwr hngawng an khūl vekin tlâng khūlnak a nei pei. 33 ^bCule a fêm ah pat mepian, sendup le senlar in talê rahpawl, a fêm kimvel zate ah le cupawl karlak kimvel zaten sui khîngtepawl: 34 sui khîngte pakhat le talê rah pakhat, sui khîngte pakhat le talê rah pakhat tiin a kâwrfual fêm kimvel zate parah na tuah pei. 35 Cule rawng a bawl tikah Aaron parah hitin a si pei, Jehovah hmaika Hmun Thianghlim sungih a luh tikah le a suah tikah, a thihlonak dingah, cumi awn cu theih a si ding.

28:31^a Suah 39:22-26

28:33^b Mip 13:23; 14:2; 1Sp 7:18; Sol 4:3; Jer 52:22; Hag 2:19

Lupâwng le Sui Khēng

36 ^a“Sui hlirhlăng tlêp pakhat na tuah fawn pei ih, tacik kher vekin: JEHOVAH HRANGAH A THIANGHLIM, tiah a parah na kher pei.

28:36^a Suah 39:30-31; Pui 8:9; Zek 14:20

37 “Cule cumi cu puithiam lu bik lupâwng parih um dingin hri mepian parah na ret pei. Cumi cu puithiam lu bik lupâwng hmai lam parah a si pei. 38 ^aAaron in Israel tefapawl in an thawhhlawm thianghlim zate ih an tithianghlim mi, thil thianghlim pawlih mawhsualnak a phurh thei nak dingah cumi cu Aaron-ih cal ah a um pei. Cule annih cu Jehovah hmaiih cohlan an si thei nak dingah cumi cu a cal ah a um ringring pei.

28:38^a Sem 32:20; Pui 1:4; 5:1; 10:17; 22:16, 20, 27; 23:11; Mip 18:1; Isa 53:5-6, 11; 56:7; Eze 4:4-6; Heb 9:28; 1Pe 2:24

Puithiam Hnipuanpawl

39 ^a“Tah mi puan nem páte kâwrfualpi cu thiam zetin na tah pei, puithiam lu bik lupâwng puan nem páte na tuah pei ih, tah mi taikhap na tuah pei.

28:39^a Suah 39:27-29; Pui 16:4; Eze 24:17, 23

40 ^a“Aaron-ih fapapawl hrangah kâwrfualpipawl na tuah pei ih, an hrangah taikhappawl na tuahsak hai pei. Cule an hrangah ropitertu dingah le mawitertu dingah lupâwng na tuahsak hai pei. 41 ^bCule cupawl cu na unaupa Aaron parah le a hnenih um a fapapawl na hruhter pei. Puithiam dinhmun in keimah in rĕn thei nak dingah anmah cu hriak na thih hai pei, anmah cu na serhhran hai pei ih, anmah cu na tithianghlim hai pei. 42 ^cCule an taklawngnak khuhnak dingah pat zai ih tah mi bâwngbite na tuahsak hai pei. Cupawl cu tâi ihsin cāwn tiang an thleng pei. 43 ^dMawhsualnak suakterin an thihlonak dingah, cupawl cu Tawnawknak Puanthlam sung an luh tikah simaw, Hmun Thianghlim ah rawngbawl dingin Biakṭheng an ra naih tikah simaw Aaron parah le a fapapawl parah an um pei. Cumi cu amah le a hnuih a cithlahpawl hrangah sakhaw dān a si kumkhua ding a si.

28:40^a Suah 28:4; 29:9; 39:27-28, 41; Pui 8:13; Eze 44:18

28:41^b Suah 29:7, 9; 30:30; 40:15; Pui 4:3; 6:20; 8:1-36; 10:7; Mip 3:3; 35:25; Heb 7:28

28:42^c Suah 39:28; Pui 6:10; 16:4; Eze 44:18

28:43^d Suah 20:26; 27:21; Pui 16:13; Mip 1:51

29

Puithiampawl Serhhrannak

1 ^a“Puithiam dinhmun ih keimah in rian dingin anmah tithianghlim dingah himi hi an hnenih na tuah ding mi a si: sawisel ding um lo caw pa tûai pakhat le tuu cang pahnih, 2 ^bthilnu telh lo sang, hriak rawi mi thilnu telh lo sang per pawl le hriak măn mi thilnu telh lo sang per páte la aw; cupawl cu sangvut phut in na tuah pei. 3 Cupawl cu kho pakhat sungah na ret pei ih, caw pa tûai le tuu cang pahnih zawngah kho in na keng pei.

29:1^a Pui 8:1-34; 20:7; Jos 3:5; 1San 15:12; Eze 43:23

29:2^b Pui 2:1, 4; 6:19-23; Mip 6:15

4 ^a“Cule Aaron le a fapapawl cu Tawnawknak Puanthlam luhnak ah na hruai hai pei ih, anmah cu tidai in na khawlh pei. 5 ^bCun sinfen cu na la pei ih, Aaron cu kâwrfualpi na hrukter pei, cule Puithiam Kâwrcung kâwrfual, Puithiam Kâwrcung, ṭāngbĕn le thiam zetih tah mi Puithiam Kâwrcung taiṭem in na ṭawn pei. 6 ^cA lu ah puithiam lu bik lupâwng na pâwngter pei ih, puithiam lu bik lupâwng parah lukhap thianghlim na khapter pei. 7 ^dCule hnih mi hriak na la pei, cumi cu a lu parah na tawih pei ih, amah na thih pei. 8 ^eCun a fapapawl na hruai pei ih, an parah kâwrfualpi na hruhter hai pei. 9 ^fCule Aaron le a fapapawl cu taiṭawnpawl ṭawnsak awla, an parah lupâwngpawl pâwngter aw. Puithiam sinak cu an hrangah kumkhaw sakhaw dān a si pei. Cun Aaron le a fapapawl cu na serhhran hai pei.

29:4^a Suah 40:12; Pui 8:6; 14:8; Heb 10:22

29:5^b Suah 28:6, 8, 15, 31, 39; Pui 8:7

29:6^c Suah 28:4, 36-37, 39; Pui 8:9; Isa 3:23; Zek 3:5

29:7^d Suah 30:25; Pui 8:12; 21:10; Mip 35:25; Sam 133:2

29:8^e Suah 28:39-40; Pui 8:13; 16:4

29:9^f Suah 28:40-41; 40:15; Pui 8:1-36; Mip 3:10; 18:7; 25:13; Dnp 18:5; Lai 17:5; 1Sam 2:30; 1Sp 12:31

10 ^a“Tawnawknak Puanthlam hmaiah caw pa tûai ken mi khal na nei pei ih, Aaron le a fapapawl in caw pa tûai lu parah an kut an suang ding a si. 11 ^bCun Tawnawknak Puanthlam luhnak kiangah Jehovah hmaiah caw pa tûai na that pei. 12 ^cCaw pa tûai thisen hrekkhat na la pei ih, na kut zung in Biakṭheng kipawl ah na mān pei. Cule Biakṭheng tawphah kapah thisen cu na thle thluh pei. 13 ^dCule a sungril tuamtu thau zate, a thinhnûn thau le a kaileng pahnih le an parih a thau na la thluh pei ih, Biakṭheng parah na ur pei. 14 ^eAsinan caw pa tûai sa lawngte cu a vun le a êk thawn riahhmun khuarnak lengah meisa in na ur pei. Cumi cu Sual Thilhlăn a si.

29:10^a Pui 1:4; 8:14; Mip 8:12

29:11^b Pui 1:5

29:12^c Suah 27:2; 30:2; Pui 4:7; 8:15

29:13^d Pui 1:8; 3:3-4; Mip 18:17; 1Sam 2:15; 1Sp 8:64; 2San 7:7; Isa 43:24; Eze 44:15

29:14^e Pui 4:11-12, 21; Mip 19:3-5; Nah 3:6; Mal 2:3; Heb 13:11

15 ^a“Tuu cang pakhat khal na la pei, cule Aaron le a fapapawl in tuu cang lu parah an kut an suang pei ih, 16 tuu cang cu na that pei. Cule a thisen na la pei ih, cumi cu Biakṭheng kimvel zaten na theh pei. 17 ^bCun tuu cang cu na cán nawi pei, a sungrilpawl le a kepawl na khawlh pei ih, cupawl cu a sa cán nawi pawl le a lu thawn na ret pei. 18 ^cCule tuu cang cu a zaten Biakṭheng parah na ur pei. Cumi cu Jehovah hnenih Meiur Thilhlăn a si, cumi cu rimthaw, Jehovah hnenih meisa ih ur mi thilhlăn a si.

29:15^a Pui 3:2; 8:18; 2San 29:23

29:17^b Pui 1:9, 13

29:18^c Sem 8:21; Suah 29:25; 2Ko 2:15

Tuu Cang Serhhrannak

19 ^a“A pahnihnak tuu cang khal na la pei ih, Aaron le a fapapawl in tuu cang lu parah an kut an suang pei. 20 ^bCun tuu cang cu na that pei, cule a thisen hrekkhat na la pei ih Aaron-ih vawrh lam hna zimah le a fapapawlih vawrh lam hna zimah, an vawrh lam kut zungpi ah le an vawrh lam ke zungpi ah na mān pei. Cule thisen cu Biakṭheng kimvel zaten na theh pei. 21 ^cCule Biakṭheng parih a um mi thisen hrekkhat le hnih mi hriak hrekkhat na la pei ih, Aaron par le a sinfen parah, a fapapawl le a hnenih um a fapapawlih sinfen parah na theh pei. Cule amah le a sinfen, a fapapawl le a hnenih um a fapapawlih sinfen cu amah zawngah serhhran an si pei.

29:19^a Pui 8:22

29:20^b Pui 1:5; 14:14-15

29:21^c Suah 30:25, 31; Pui 8:30; Heb 9:22

22 “Tuu cang thau, a mei thau, a sungrilpawl tuamtu thau, a thinhnûn thau, a kaileng pahnih le an parih thau le serhhran mi tuu cang a si ruangah a vawrh lam cāwn, 23 ^asang hlăwm khat, hriak thawi tuah mi sang per pakhat le Jehovah hmaiih a um mi thilnu telh lo sang kho sung ihta sang per páte pakhat khal na la pei ih, 24 ^bhipawl zaten Aaron-ih kut le a fapapawlih kut ah na ret pei. Cule cupawl cu Jehovah hmaiih sēp thilhlăn hrangah na sēp pei. 25 ^cCupawl cu an kut ihsin na lasal pei ih, Jehovah hmaiih rimthaw dingah, Meiur Thilhlăn hrangah Biakṭheng parah na ur pei. Cumi cu Jehovah hnenih meisa ih ur mi thilhlăn a si.

29:23^a Pui 8:26

29:24^b Pui 7:30; Mip 6:20

29:25^c Pui 8:28

26 ^a“Cun Aaron serhhrannak tuu cang ih ṭâng na la pei ih, Jehovah hmaiih sēp thilhlăn hrangah na sēp pei, cumi cu nangmai vo a si pei. 27 Cule serhhran mi tuu cang ihsin sēp mi sēp thilhlăn saṭâng le cawikan mi cawikhai thilhlăn cāwn cu na serhhran pei. Cule himi hi cumi ihsin Aaron le a fapapawlih an co ding mi a si. 28 ^bCumi cu Israel tefapawl hnen ihsin Aaron le a fapapawl hrang le Israel tefapawl hrangah sakhaw dān a si kumkhua pei. Ziangahtile himi cu cawikhai thilhlăn a si, cumi cu an Remnak Thilhlănpawlih raithawinakpawl ihsin Israel tefapawl hnen ihsin cawikhai thilhlăn a si pei, cumi cu Jehovah hnenih an cawikhai thilhlăn a si.

29:26^a Pui 7:31-34; 8:29; Mip 18:11-12; Dnp 18:3

29:28^b Pui 7:30, 34

29 ^a“Cule Aaron-ih sinfen thianghlim cu amah hnuih a fapapawlih ta an si pei ih, annih cu cuih hnipuan hruhterin hriak thih le serhhran an si pei. 30 ^bAmai dinhmun ih puithiam ih a hung cangtu fapa in Hmun Thianghlim ih rawngbawl dingin Tawnawknak Puanthlam ih a luh tikah cupawl cu ni sarih sung a hruk pei.

29:29^a Pui 16:4; Mip 20:26, 28

29:30^b Pui 6:22; Mip 3:3

31 ^a“Cule serhhran mi tuu cang na la pei ih hmun thianghlim ah a sa na suang pei. 32 ^bCun tuu cang sa cu Aaron le a fapapawl in kho sungih sang thawn Tawnawknak Puanthlam luhnak ah an ei pei. 33 ^cAnmah tithianghlim ding le serhhran dingah sualkhuhthawinak tuahnak ih hman mi thilpawl cu an ei ding a si. Asinan mi dang pawl cun an ei lo pei, ziangruangahtile cupawl cu an thianghlim a si. 34 ^dCule serhhrannak thilhlănpawlih sa pakhat khat simaw, sang simaw zing lam tiang a hlei asile, a hlei mi cu meisa in na ur pei. Cumi cu ei a si lo pei, ziangruangahtile cumi cu a thianghlim a si.

29:31^a Pui 7:37; 8:31; Mip 19:9; Eze 42:13

29:32^b Mat 12:4

29:33^c Pui 10:14; 22:10, 13

29:34^d Suah 12:10; 23:18; 34:25; Pui 8:32

35 ^a“Cule thu ka lo pek mi hmuahhmuah vekin Aaron le a fapapawl hnenah na tuah pei. Ni sarih sung anmah na serhhran hai pei. 36 ^bCule sualkhuhthawinak hrangih Sual Thilhlăn ah ni tin caw pa tûai na hlan pei. Biakṭheng hrangih sualkhuhthawinak na tuah tikah Biakṭheng cu na thianfai pei, cule Biakṭheng tithianghlim dingah Biakṭheng cu hriak na hnih pei. 37 ^cNi sarih sung cu Biakṭheng hrangah sualkhuhthawinak na tuah pei ih, na tithianghlim pei. Cule Biakṭheng cu a thianghlim zet mi a si pei. Biakṭheng daitu ding pauhpauh cu an thianghlim pei.

29:35^a Pui 8:33

29:36^b Suah 40:10; Pui 1:4; Mip 6:11; Heb 10:11

29:37^c Suah 30:28; Eze 43:25; Mat 23:19

Ni Tin Thilhlănpawl

38 ^a“Himi hi Biakṭheng parih na hlăn ding mi a si: ni tin a pehpehin kum khat a ti mi tuu fa no pahnih na hlan pei. 39 ^bTuu fa no pakhat cu zing lamah na hlan pei ih, a dang tuu fa no pakhat cu khawthim zawngah na hlan pei. 40 ^cTuu fa no pakhat cu sawr mi hriak kalān khat ih ṭhen li ṭhen khat thawi rawi mi sangvut phut efa khat ih ṭhen hra ṭhen khat le Inding Thilhlăn hrangih sabit zu kalān ṭhen li ṭhen khat thawn a si pei. 41 ^dCule a dang tuu fa no pakhat cu khawthim zawngah na hlan pei ih, cumi cu Thlairawl Thilhlăn le Inding Thilhlăn thawn rimthaw hrangah Jehovah hnenih meisa ih ur mi thilhlăn ah, zing lamih na hlăn vekin, na hlan ding a si. 42 ^eCumi cu na tesinfa san tiangin Tawnawknak Puanthlam luhnak ah Jehovah hmaiih Meiur Thilhlăn a si ringring pei, cu tawkah nangmah lo be dingin ka lo táwng ṭheu ding. 43 ^fCule cu tawkah Israel tefapawl ka táwng ding ih, Biakbûk cu ka ropitnak in tithianghlim a si ding. 44 Cun Tawnawknak Puanthlam le Biakṭheng cu ka serhhran ding. Aaron le a fapapawl khal puithiam dinhmun ih keimah in rian dingin ka serhhran hai ding. 45 ^gIsrael tefapawl lakah ka cêng ding ih, an Pathian ka si ding. 46 ^hCule keimah cu Jehovah an Pathian, Izip ram ihsin anmah hruaisuaktu ka si ti an thei ding, cutin an lakah ka cêng ding. Keimah cu Jehovah an Pathian ka si.

29:38^a Pui 23:2; Mip 28:3-31; 29:6-38; 1San 16:40; 2San 8:13; Eze 46:13-15; Dan 12:11

29:39^b Mip 28:4, 8; 1Sp 18:36; 2San 13:11; Ezr 3:3; Eze 46:13-15

29:40^c Sem 35:14; Pui 23:37; Mip 15:4; 2Sp 16:3

29:41^d 1Sp 18:36; 2Sp 3:20; Ezr 9:3-4; Sam 26:8

29:42^e Suah 25:22; Mip 7:89; 17:4; Eze 46:15

29:43^f Pui 9:6; Sam 26:8; Eze 1:28; Hag 1:8

29:45^g Sem 17:7; Suah 25:8; Pui 26:12; Mip 5:3; 35:34; Dnp 12:11; Zek 2:10; Joh 14:17; Rom 8:9-11; 2Ko 6:16; Thu 21:3

29:46^h Suah 20:2; Dnp 5:6; Sam 114:1; Hag 2:5

30

Rimhmui Biakṭheng

1 ^a“Rimhmui urnak ding Biakṭheng pakhat na tuah pei, cumi cu akasia thing in na tuah ding a si. 2 Cumiih a sau lam cu dawng khat le a kauh lam khal dawng khat a si pei. Sir li canaw a si pei, cule a san lam cu dawng hnih a si pei. Cumiih kipawl cu amah thawn sakhat an si pei. 3 Cule a zim, a sir kimvel zate le a kipawl cu sui hlirhlăng na khût pei ih, a kimvel zaten sui tlâng na tuah pei. 4 Cumi hrangah sui khâng pahnih, a sir pahnih parih a tlâng hnuaiah na tuah pei. Cupawl cu a sir pahnih ah na bun pei ih, cupawl cu a zawnnak ding zawnfungpawl awktu an si ding. 5 Zawnfungpawl cu akasia thing in na tuah pei ih, cupawl cu sui na khût hai pei. 6 ^bCule cumi cu, nangmah ka lo tawnnak ding hmun, Theihpinak tlunih Sualkhuhthawinak Hmun hmai, Theihpinak Kuang hmaiih puanzar hmaiah na ret pei.

30:1^a Suah 37:25-29; Mip 4:11; Luk 1:11; Heb 9:4; Thu 8:3

30:6^b Suah 25:21

7 ^a“Cumi parah Aaron in zing tin rimthaw a ur pei, meitopawl a timtuah tikah, cumi parah rimhmui thaw a ur ding a si. 8 Cule Aaron in khawthim zawngih meito a van tikah, cumi parah rimhmui a ur pei, cumi cu nan tesinfa san tiangin Jehovah hmaiih rimhmui a si vivo pei. 9 ^bCumi parah rimhmui danglam siseh, Meiur Thilhlăn siseh, Thlairawl Thilhlăn siseh na hlan lo pei ih, cumi parah Inding Thilhlăn na burh fawn lo pei. 10 ^cCule Aaron in Biakṭheng kipawl parah sualkhuhthawinak cu sualkhuhthawinak Sual Thilhlăn thisen thawn kum khat vei khat a tuah pei. Amah in Biakṭheng parah nan tesinfa san tiangin kum khat vei khat sualkhuhthawinak a tuah pei. Cumi cu Jehovah hrangah a thianghlim zet mi a si,” tiah a ti.

30:7^a Mip 3:10; Dnp 33:10; 1Sam 2:28; 1San 6:49; 2San 2:4

30:9^b Pui 10:1; Mip 16:7, 40

30:10^c Pui 4:3; 9:7; 16:18; Mip 6:11

Tlennak Paisa

11 Cun Jehovah in Mosi hnenah, 12 ^a“Israel tefapawlih mipum hrangah mipum siarnak na tuah ih an mipum na siar tikah, mipa pakhat cio in Jehovah hnenah anmai hrangah tlennak an pe ding a si, cutin an mipum na siar tikah an lakah hremnak a thleng lo ding. 13 ^bHimi hi mipum siar mi pakhat cio ih an pek ding mi cu a si: hmun thianghlim shekel siarnak vekin shekel hrek (shekel khat cu gerah 20 a si). Shekel hrek cu Jehovah hnenih thawhhlawm a si pei. 14 ^cMipum siar mi lakih mi pakhat cio, kum 20 ihsin a tlun lam mi in Jehovah hnenah thawhhlawm a pe ding a si. 15 ^dNanmai hrangih sualkhuhthawinak tuah dingah Jehovah hnenih thawhhlawm nan pek tikah milian in tam cuangin a pe lo pei ih, mifarah in shekel hrek hnakih mál a pe lo pei. 16 ^eCule Israel tefapawlih sualkhuhthawinak paisa cu na la pei ih, cumi cu Tawnawknak Puanthlam rawngbawlnak hrangah na ruat pei, cutin nanmai hrangih sualkhuhthawinak tuah dingah cumi cu Israel-mipawl hrangah Jehovah hmaiih hngilhlonak a si thei ding,” tiin a sim.

30:12^a Suah 38:25-26; Mip 1:2, 49; 14:12; 26:2; 31:50; 2Sam 24:1, 13; 1Sp 8:37; Mat 20:28

30:13^b Pui 5:15; 27:25; Mip 3:47; Eze 4:10; 45:12; Mat 17:24

30:14^c Mip 1:3, 18; 2San 25:5

30:15^d Thf 22:2; Efe 6:9

30:16^e Mip 31:54; 2San 24:5

Dar Maihum

17 Cun Jehovah in Mosi hnenah, 18 ^a“Khawlhawknak hrangah dar maihum khal, a tohkūal khal dar in na tuah pei. Cumi cu Tawnawknak Puanthlam le Biakṭheng karlakah na ret pei. Cule cumi sungah tidai na ret pei. 19 ^bZiangahtile cumiih tidai in Aaron le a fapapawl in an kut le an ke an khawlh ding a si. 20 Jehovah hnenih meisa ih ur mi thilhlăn tuah dingin Tawnawknak Puanthlam sungih an luh tikah simaw, rawngbawl dingin Biakṭheng an rak naih tikah simaw tidai in an khawlhaw pei, culole an thi ding. 21 ^cCutin an thihlonak dingah an kut le an ke an khawlh pei. Cule cumi cu an tesinfa san hmuahhmuah tiangin amah le a cithlahpawl hnenih ka sakhaw dān a si kumkhua ding,” tiin a sim.

30:18^a Suah 38:8; 40:30; 1Sp 7:38; 2San 4:6

30:19^b Suah 40:31; Pui 8:6; Sam 26:6; Isa 52:11; Joh 13:10; Heb 10:22

30:21^c Suah 28:43

Hnih Mi Hriak Thianghlim

22 Cuihhleiah Jehovah in Mosi hnenah, 23 ^a“Na hrangah rimhmui ṭhabik pawl, mura ti shekel 500, cumi hrek tluk i rit thingthak rimthaw shekel 250 le kane rimthaw shekel 250, 24 ^bhmun thianghlim shekel bangtukin kassia shekel 500, olif hriak kalān khat pawl tla la aw. 25 ^cCule hipawl ihsin rimhmui tuahtu ih kutsuak bangtukin hnih mi hriak thianghlim, rawi mi hnih mi hriak na tuah pei. Cumi cu hnih mi hriak thianghlim a si pei. 26 ^dCumi thawn Tawnawknak Puanthlam le Theihpinak Kuang, 27 Cabuai le a bungrua zate, Meito ṭhuam le a bungruapawl, Rimhmui Biakṭheng, 28 Meiur Thilhlăn Biakṭheng le a bungrua zate thawn, Maihum le a tohkūal cu hriak na hnih pei. 29 ^eA thianghlim zet mi an si thei nak dingah cupawl cu na serhhran hai pei. Cupawl daitu ding ziangkhal a thianghlim pei. 30 ^fCule puithiam dinhmun in keimah in rĕn thei nak dingah Aaron le a fapapawl cu hriak na hnih pei ih, na serhhran hai pei.

30:23^a Sem 37:25; 43:11; Thf 7:17; Sol 4:14; Isa 43:24; Jer 6:20

30:24^b Sam 45:8; Eze 27:19

30:25^c Suah 37:29; 40:9; Pui 8:10; 1Sam 9:16; 1San 8:30

30:26^d Suah 40:9; Pui 8:10; Mip 7:1

30:29^e Pui 6:18, 27; 8:10-11; Mat 23:17

30:30^f Suah 29:7; Pui 8:2, 12, 20; 1San 15:12; Sam 133:2

31 “Cule Israel tefapawl hnenah, ‘Himi hi nan tesinfanau tluansuakin ka hrangih hnih mi hriak thianghlim a si pei. 32 ^aCumi cu minung taksa parah burh a si lo pei. Amah bang mi, cumi tuahdān bangtukih tuah mi a dang khal na tuah lo pei. Cumi cu a thianghlim ih, na hrangah a thianghlim ding a si. 33 ^bZokhal cumi vekih a tuahtu asilole zokhal cumi ihta ziangkhal mi dang parih a rettu cu a mipawl lak ihsin sahcat a si pei,’ tiin na sim pei,” tiah a sim.

30:32^a Suah 30:25, 37

30:33^b Sem 17:14; Suah 12:15; 30:38; Pui 7:20

Rimhmui

34 ^aCule Jehovah in Mosi hnenah, “Rimhmui thaw pawl, ^bnataf le ^cshekhelet le ^dkhelbenah le frankinsense hlirhlăng pawl cu rimhmui thaw pawl thawn na la pei, a tam zat an bangaw ciar pei. 35 Rimhmui tuahtu ih kutsuak bangtukih cawhrawi mi, cite thlak mi, a fai mi le a thianghlim mi cu hipawl ihsin rimhmui na tuah pei. 36 ^eCule cumiih a hrekkhat cu ṭha zetin na vaw pei ih, ka lo tawnnak ding hmun, Tawnawknak Puanthlam sungih Theihpinak hmaiah a hrekkhat na ret pei. Cumi cu nan hrangah a thianghlim zet mi a si ding a si. 37 ^fSikhalsehla na tuah ding mi rimhmui lawngte cu nan hrangah cumi tuahdān vekin zianghman na tuah lo pei. Cumi cu na hnenah Jehovah hrangih a thianghlim mi a si ding. 38 ^gCumi hnīm dingah cu vekih a tuahtu pauhpauh cu an mipawl lak ihsin sahcat an si pei,” tiah a ti.

30:34^a Sol 3:6

30:34^b nataf: Thingkung ihsi lâk mi hnai a si.

30:34^c shekhelet: Keplung ihsi tuah mi a si.

30:34^d khelbenah: Palisṭin nisuahnak lam ram ih um, kung fate ihsi lâk mi rimhmui tihnâi a si. Hmun Thianghlimbik hmaiih sui biakṭheng parih ur mi rimhmui a si.

30:36^e Suah 29:42; Pui 2:3

30:37^f Suah 30:32

30:38^g Suah 30:33

31

Themthiampawl

1 Jehovah in Mosi hnenah, 2 ^a“Zoh hman, Judah hnám Hur-ih fapa Uri, Uri-ih fapa Bezalel cu a hmin in ka ko zo. 3 ^bCule amah cu fimnak ah, theihthiamnak ah, theihnak ah le themthiamnak tinkim ah Pathian Thlarau in ka khatter zo. 4 Cutin amah cu kutthiam hnapawl ruang zĭng dingah, sui, ngun le dar ṭuan dingah, 5 rĕmkhawm dingih lung mankhung pawl tánin, thing kherin le kutthiam hna tinkim ṭuan dingah a si. 6 ^cCule keimah, ngai hnik, keimah rori in Dan hnám ihsin Ahisamak-ih fapa Aholiab cu amai zawngah ka ruat zo ih, thu ka lo pek mi zaten an tuahsuak thei nak dingah kutthiam nei hmuahhmuah ih thinlung ah fimnak ka ret zo. 7 ^dAnnih in Tawnawknak Puanthlam, Theihpinak Kuang le cumi parih um Sualkhuhthawinak Hmun, Puanthlam bungrua hmuahhmuah, 8 ^eCabuai le a bungruapawl, Sui hlirhlăng Meito ṭhuam le a bungrua hmuahhmuah, Rimhmui Biakṭheng, 9 ^fMeiur Thilhlănnak Biakṭheng le a bungrua hmuahhmuah, Maihum le a tohkūal, 10 ^grawngbawlnak sinfen, puithiam dinhmun ih rawngbawl dingin puithiam Aaron hrangih sinfen thianghlim le a fapapawlih sinfen, 11 ^hhnih mi hriak le hmun thianghlim hrangih rimhmui thaw pawl tla an tuah thei nak dingah ka ret a si. Thu ka lo pek mi hmuahhmuah bangtukin an tuah pei,” tiin a sim.

31:2^a Suah 35:30-36:1

31:3^b Suah 35:31; 1Sp 7:14; 1Ko 12:4-8

31:6^c Suah 35:34; 1Sp 7:14; 2San 2:14

31:7^d Suah 36:8-38; 37:1-9

31:8^e Suah 37:10-29; Pui 24:4

31:9^f Suah 38:1-8; Mip 4:14

31:10^g Suah 39:1

31:11^h Suah 30:23-32, 34-38

Sabbath Dān

12 Cule Jehovah in Mosi hnenah, 13 ^a“Israel tefapawl hnen khalah, ‘Ka Sabbath-pawl nan ul tengteng pei, ziangahtile keimah cu a lo tithianghlimtu Jehovah ka si ti nan theih thei nak dingah cumi cu nan tesinfa san tluansuakin keimah le nanmah karlakih hminsinnak a si. 14 ^bCuruangah Sabbath cu nan ul pei, ziangahtile cumi cu nan hrangah a thianghlim a si. Cumi a bawrhbangtertu kip cu thah tengteng an si pei, ziangahtile zokhal cuih ni ih hna a ṭuantu, cu pa cu a mipawl lak ihsin thaihloh a si pei. 15 ^cHna cu ni ruk sung ṭuan a si pei, asinan a ni sarihnak cu Sabbath cawlh, Jehovah hrangih a thianghlim mi a si. Sabbath ni ih hna a ṭuantu pauhpauh cu thah tengteng an si pei. 16 Curuangah Israel tefapawl cun Sabbath cu an ul tengteng pei. Kumkhaw thukham hrangah an tesinfa san hmuahhmuah tiangin Sabbath cu an ul ding a si. 17 ^dCumi cu keimah le Israel tefapawl karlakih hminsinnak a si kumkhua ding, ziangahtile Jehovah in ni ruk sungah van le leilung a tuah, cule a ni sarihnak ah a cawl ih, a tha a tharsal,’ tiin sim aw,” tiah a ti.

31:13^a Suah 20:8; 31:17; Pui 11:44; Isa 56:4; Eze 20:12, 20; 37:28

31:14^b Suah 31:15; 35:2; Mip 15:32-35; Joh 7:23

31:15^c Sem 2:2-3; Suah 16:23; 20:8-11; 23:12; 31:14; 34:21; 35:2-3; Pui 16:29; 23:3; Mip 28:7; Dnp 5:12-14

31:17^d Sem 1:31; 2:2-3; Suah 20:11; 31:13; Isa 56:2; Jer 17:11, 21; Eze 20:12, 20

18 ^aCule Jehovah in Sinai tlang parah Mosi thawi biakawk a ṭheh tikah, Mosi hnenah Pathian kut zung ih ngan mi lung pheng, Theihpinak lung pheng pahnih a pe.

31:18^a Suah 24:12; 32:15-16; 34:1, 28-29; Dnp 4:13; 5:22; 9:10; 2Ko 3:3; Heb 9:4

32

Sui Caw No

1 ^aMipi in tlang ihsin Mosi a rung ṭum tlâi ti an hmuh tikah, mipi cu Aaron hnenah an pungkhawmaw ih a hnenah, “Izip ram ihsin in rak hruaisuaktu hi Mosi parah ziang a cang ti kan thei lo. Curuangah ra awla, kan hmaiih fehtu ding pathianpawl in tuahsak aw,” tiah an ti.

32:1^a Sem 7:4; Suah 14:11; 24:18; Dnp 9:11-12; Apo 7:40

2 ^aCule Aaron in an hnenah, “Nan nupipawl, nan fapapawl le nan fanupawlih hna parih a um mi sui hnakhaihpawl kha phawih uhla, ka hnenah rak keng uh,” tiah a ti. 3 Cule mi senpi zaten anmai hna ihta sui hnakhaihpawl cu an phawih ih, Aaron hnenah an rak keng. 4 ^bCule anih in an kut ihta sui cu a cohlang ih, cumi cu a khernak hmanrua thawn a rĕm ih burcawp caw no a tuah. Cun annih in, “Maw Israel, himi hi Izip ram ihsin a lo hruaisuaktu na pathian a si!” tiah an ti.

32:2^a Suah 35:22; Lai 8:24-27

32:4^b Dnp 9:16; Neh 9:18; Sam 106:19; Apo 7:41

5 ^aCun Aaron in cumi a hmuh tikah a hmaiah biakṭheng a dâwl. Cule Aaron in thuthannak a tuah ih, “Thaizing cu Jehovah hnenih puai ni a si,” tiah a ti. 6 ^bCule a thaizing zing zetah an tho ih Meiur Thilhlănpawl an hlan ih, Remnak Thilhlănpawl tla an keng, cule mipi cu ei le in dingah an to ih, lek dingah an tho.

32:5^a Pui 23:2, 37; 2Sp 10:20; Joe 2:15

32:6^b Suah 32:17-19; Mip 6:14; 25:2; Apo 7:41; 1Ko 10:7

7 ^aCule Jehovah in Mosi hnenah, “Tho awla, ṭum aw! Ziangahtile Izip ram ihsin na hruaisuah mi na mipawl cu an bawrhhlawhawter zo. 8 ^bAnmah thu ka rak pek mi lamzin ihsin an rak pial rang tuk. An hrangah burcawp caw no an tuah, cule cumi cu an bia ih a hnenah raithawiin, ‘Maw Israel, hipawl hi Izip ram ihsin a lo hruaisuaktu na pathianpawl an si,’ tiah an ti,” tiah a ti. 9 ^cCule Jehovah in Mosi hnenah, “Hi mipi cu ka hmu zo ih, ngai hnik, hipawl hi lungruh minung an si! 10 ^dCuruangah ka thinhengnak cu anmah dokalhin a alh ih, anmah ka kangrálter thei nak dingah atu-ah keimah ten um ning. Cule nangmah ihsin miphun tumpi ka tuah ding,” tiah a ti.

32:7^a Sem 6:11; Suah 32:4, 11; Dnp 9:12; Eze 20:8

32:8^b Suah 20:3-4, 23; 22:20; 34:15; Dnp 32:17; 1Sp 12:28; Jer 7:26; Eze 23:8; Mal 2:8

32:9^c Suah 33:3, 5; 34:9; Mip 14:11-20; Sam 78:8; Isa 48:4; Apo 7:51

32:10^d Mip 14:12; 16:21, 45; Dnp 9:14, 19

Mosi in Israel a Ngĕnsak

11 ^aCule Mosi in Jehovah a Pathian a ngen ih, “Jehovah, ziangah so Izip ram ihsin huham ropi le kut cak thawn na rak hruaisuah mi na mipawl dokalhih na thin a heng? 12 ^bZiangah so Izip-mipawl in, ‘Amah in anmah siatsuah dingah, tlang parah anmah that dingin le leilung vangdâp ihsin anmah cimitter dingah a hruaisuak hai a si,’ an ti ding? Tuksumza na thinhengnak cu kiangter awla, na mipawl hnenih hi siatsuahnak ihsin lamlêt aw. 13 ^cAn hnenah, ‘Na cithlahpawl cu van ih arsipawl zat in ka karhzaiter ding ih, ka rak sim zo mi hi ram pumpi cu na cithlahpawl hnenah ka pe ding ih, kumkhuain an luah ding,’ tiih an hnenih nangmah rori ih sia na rak sămnak na siahhlawh Abraham, Isak le Israel tla cîng ringring aw,” tiah a ti. 14 ^dCule Jehovah in a mipawl hnenah a tuah tum mi siatsuahnak ihsin a lamlêt.

32:11^a Dnp 9:18, 26; 1Sam 7:9; Neh 1:10; Sam 9:10; 136:12

32:12^b Mip 14:13-19; Dnp 9:28; Jos 7:9

32:13^c Sem 12:7; 13:15; 15:5, 18; 17:8; 22:16-18; 26:4; 35:12; Suah 13:5, 11; 33:1; Heb 6:13

32:14^d Dnp 9:19; 1Sam 15:11; 2Sam 24:16; 1Sp 21:29; 1San 21:15; Sam 106:45; Jer 18:8; Amo 7:3, 6; Jon 3:10

15 ^aCule Mosi cu a her ih a kut ih Theihpinak lung pheng pahnih thawn tlang ihsin a ṭum. Lung pheng cu an hmai veve ah ngan an si ih, pakhat parah le a dang pakhat parih ngan an si. 16 Lung pheng cu Pathian ih tuah mi an si ih, ngan mi khal lung pheng parah kherin Pathian ih a ngan mi an si. 17 Cule mipi an au ih an thâwm Joshua in a theih tikah, Mosi hnenah, “Riahhmun khuarnak ah ral do thâwm a um,” tiah a ti.

32:15^a Suah 31:18; Dnp 9:15; 2Ko 3:3; Heb 9:4

18 Asinan anih in,

“Cumi cu nehnak authâwm a si lo,
Neh miih ṭahnak thâwm khal a si lo,
Ka theih mi cu hlasak thâwm sawn a si,”

tiah a ti.

19 ^aCule hitin a si, Mosi cu riahhmun khuarnak kiang a thlen veten caw no lem le milāmpawl a hmu. Cun Mosi-ih thinhengnak cu a sa, cule lung pheng pawl cu a kut ihsin a hlăwn ih, tlang hramah a khuai hai. 20 ^bCun an rak tuah mi caw no lem cu a la, cumi cu meisa ah a ur ih, a rialdip ṭheh, cule tidai parah thehdarh tahratin Israel tefapawl a inter hai. 21 Cule Mosi in Aaron hnenah, “Hi mi senpi hin ziang so na hnenah an rak tuah ih, an parih sual nasa tuk na rak thlen?” tiah a ti.

32:19^a Suah 32:6; Dnp 9:16-17; Ezr 9:3; Sam 119:53, 158; 1Ko 10:7

32:20^b Dnp 7:25; 9:21; Jos 7:1; 1San 14:12; Mik 1:7

22 ^aCule Aaron in, “Ka bawipaih thinhengnak cu so hlah seh. Mipi cu thil ṭha lo lam hawi cia an sizia na thei. 23 ^bZiangahtile annih in ka hnenah, ‘Izip ram ihsin in rak hruaisuaktu hi Mosi parah ziang a cang ti kan thei lo, curuangah kan hmaiih fehtu ding pathianpawl in tuahsak aw,’ tiah in ti. 24 ^cCule kei in an hnenah, ‘Sui neitu pauhpauh cun an suipawl cu phawih hai seh,’ tiah ka ti. Cutin cupawl cu annih in keimah in pe ih, cumi cu meisa ah ka thlak, cule hi caw no hi a ra suak,” tiah a ti.

32:22^a Sem 18:30; Dnp 9:24; Jer 4:4; Eze 6:9

32:23^b Suah 32:1-4; Apo 7:40

32:24^c Suah 32:4

25 ^aCule mipi cu Aaron in an ralpawl lakah ningzakzain a rak thlahthlam ruangah an duh duhin an rak um ti Mosi in a hmuh tikah, 26 Mosi cu riahhmun khuarnak luhnak ah dīngin, “Zo so Jehovah lamih ṭang? Ka hnenah ra seh,” tiah a ti. Cule a hnenah Levi tefa zaten an ra pungkhawm. 27 ^bCule an hnenah, “Israel-ih Pathian Jehovah in, ‘Mipa kip in an khēl ah ralnâm pai hai sehla, riahhmun khuarnak tluanih luhnak pakhat hnu pakhat lutin suak hai seh, cule mipa kip in an unaupa, mipa kip in an hawipi le mipa kip in an innhnen that hai seh,’ tiin a sim,” tiah a ti. 28 ^cCule Levi tefapawl in Mosi-ih ṭawngkam bangtukin an tuah. Cule cuih ni ah mipi lakih pacang 3000 hrawng an thi. 29 Cule Mosi in, “Tuihsun ah amah in nan parih thlawsuah a lo pek thei nak dingah, tuihsun ah Jehovah hnenah serhhranaw uh, ziangahtile mipa kip in anmai fapa le anmai unaupa an do a si,” tiah a ti.

32:25^a Sem 38:23; 1Sp 12:28-30; 14:16

32:27^b Mip 25:3, 5; Dnp 33:9; Eze 9:5

32:28^c Mip 25:7-13; Dnp 33:9

30 ^aCun a thaizing ah hitin a si, Mosi in mi senpi hnenah, “Sual rapthlak nan tuah zo. Curuangah atu-ah Jehovah hnenah ka fehso ding, nan sualnak hrangah sualkhuhthawinak ka tuah thei pangah,” tiah a ti.

32:30^a Pui 1:4; Mip 25:13; 1Sam 12:20, 23; Sam 25:11

31 ^aCun Mosi cu Jehovah hnenah a kirsal ih, “Hi mi senpi hin sual rapthlak an rak tuah ih, anmai hrangah sui pathianpawl an rak tuah hi aw! 32 ^bSikhalsehla atu-ah, an sual na ngaidam pei maw? Na ngaidam lo a si ahcun, na rak ngan zo mi na cazual ihsin i thaihlo dingin ka lo ngen a si,” tiah a ti.

32:31^a Suah 20:23; Dnp 9:8

32:32^b Mip 14:19; Sam 69:28; Isa 4:3; Eze 13:9; Dan 7:10; 12:1; Mal 3:16-17; Luk 10:20; Rom 9:3; Fil 4:3; Thu 3:5; 21:27

33 ^aCule Jehovah in Mosi hnenah, “Keimah dokalhih a rak sualtu pauhpauh cu ka cazual ihsin ka thaihlo ding. 34 ^bCuruangah feh aw, ka rak lo sim mi hmun ah mi senpi hruai aw. Ngai hnik, na hmaiah ka vancungmi a feh ding. Sikhalsehla lehrūl dingih ka rat ni ah cun an sual ruangah an parah ka lehrūl ding a si,” tiah a ti.

32:33^a Suah 17:14; Dnp 29:20; Job 21:20; Sam 9:5; Thu 3:5

32:34^b Sem 50:19; Suah 3:17; 23:20; Dnp 32:35; Sam 89:32; 99:8; Isa 27:1; Jer 5:9; Hos 2:2; Rom 2:5-6

35 ^aCule Jehovah in mi senpi cu Aaron ih tuah mi caw no lem thawi an tuah mi ruangah a hrem hai.

32:35^a Suah 32:4, 24, 28

33

Pathian ih Israel Umpinak

1 ^aJehovah in Mosi hnenah, “Hi tawk ihsin păwksuak uhla, nangmah le Izip ram ihsi na rak hruaisuak mi mi senpi cu, ‘Na cithlahpawl hnenah ka lo pe ding,’ tiin Abraham, Isak le Jakob hnenih sia ka rak săm mi ram ah fehso uh. 2 ^bCule na hmaiah ka vancungmi ka thlah ding ih, Kanaan-mi, Amor-mi, Heth-mi, Periz-mi, Hiv-mi le Jebus-mi pawl ka dawisuak hai ding. 3 ^cHnawi ti le khuai tizu luannak ram ah fehso uh, ziangahtile nan lakah ka fehso lo ding, cu lo asile lamzin ah ka lo cimitter thluh pang ding, ziangahtile nannih cu lungruh minung nan si,” tiah a ti.

33:1^a Sem 12:7; 26:1-3; 28:10; Suah 32:13; Mip 14:23; Heb 6:13

33:2^b Suah 23:27-31; 32:34; Jos 24:11

33:3^c Suah 3:8, 17; 32:9-10; 33:5; Apo 7:51

4 ^aCule mi senpi in hi thuthang sia an theih tikah lungkuaiin an ṭap ih, zohman in an ceiawknak an bĕnaw lo. 5 ^bZiangahtile Jehovah in Mosi hnenah, “Israel tefapawl hnenah, ‘Nannih cu lungruh minung nan si. Hmakhatteah nan lakah rain ka lo cimitter thluh thei. Curuangah na hnenah ziang ka tuah ding ti ka theihnak dingah atu-ah na ceiawknakpawl phawih aw,’ tiin sim aw,” tiah a ti. 6 Cule Israel tefapawl cun Horeb tlang kiangah anmah ten an ceiawknak an phawih.

33:4^a Mip 14:1, 39; Ezr 9:3; Est 4:1; Sam 119:53

33:5^b Suah 33:3

7 ^aMosi in puanthlam cu a la ih, cumi cu riahhmun khuarnak lengah, riahhmun khuarnak ihsin a hlatnak ah a zar ih, cumi cu tawnawknak puanthlam tiah a ko. Cule hitin a si, Jehovah a hawltu pauhpauh cu riahbûk lengih tawnawknak puanthlam ah an fehsuak. 8 ^bCule hitin a si, Mosi cu puanthlam panih a fehsuak tinten mi senpi zaten an tho, cule mi kip mai puanthlam luhnak cio ah an dīng ih, puanthlam sungih Mosi a luhngah tiangin an thlir. 9 ^cCule hitin a si, puanthlam sungih Mosi a luh tikah mero ṭhuam a rung ṭum ih, puanthlam luhnak ah a ding, cule Jehovah in Mosi a sim. 10 Mipi zaten puanthlam hmaiih a ding ringring mi mero ṭhuam an hmu, cule mipi zaten an tho ih, mi kip in mai puanthlam luhnak cio ah an bia. 11 ^dCule Jehovah in Mosi cu mi pakhat in a rualpi a biak vekin, hmaităwnin a bia. Cule anih cu riahhmun khuarnak ah a kirsal ṭheu, asinan amah bawmtu Nun-ih fapa tlangval Joshua cun puanthlam a suahsan lo.

33:7^a Sem 25:2; Suah 18:7, 12-16; 29:42; 1Sp 22:5

33:8^b Mip 16:27

33:9^c Suah 13:21; Dnp 31:15; Sam 99:7; 1Ko 10:1

33:11^d Suah 24:13; Mip 12:8; Dnp 5:4; 34:10

12 ^aCun Mosi in Jehovah hnenah, “Zoh hman, ka hnenah, ‘Hi mi senpi hi hruaiso aw,’ tiah i ti. Asinan ka zawngih na thlah ding mi cu i theihter hrih lo. Cuti cingin nang in, ‘Na hmin in ka lo thei ih, nang khal in ka mithmuh ah zangfahnak na hmu zo,’ tiah na ti. 13 ^bCuruangah atu-ah thla ka cam, na mithmuh ah zangfahnak ka co asile, atu-ah na lamzin i hmuh aw, cutin nangmah ka lo thei ding ih, na mithmuh ah zangfahnak ka co thei ding. Cule hi miphun hi na mipawl an si tiah ruat aw,” tiah a ti.

33:12^a Sem 6:8; Suah 3:10; 32:34; 33:2, 17; Isa 43:1; Joh 10:14; 2Ti 2:19

33:13^b Suah 3:7, 10; 5:1; 32:12, 14; Dnp 9:26, 29; Sam 25:4; 27:11; 51:13; 77:15; 86:11; 119:33

14 ^aCule Jehovah in, “Keimah rori in ka lo fehpi ding ih, cawlhhahdamnak ka lo pe ding,” tiah a ti.

33:14^a Dnp 4:37; 12:10; 25:19; Jos 1:13; 21:44; 22:4; 1Sp 8:56; Isa 63:9, 14; Jer 31:2; Hag 1:13; Mat 11:28; Heb 4:1-11

15 ^aCun anih in a hnenah, “Nangmah rori ih in fehpi lo ahcun, hi tawk ihsin in hruaiso hlah aw. 16 ^bZiangahtile kan zawngih na feh lo asile, na mipawl le kei in na mithmuh ah zangfahnak kan hmu ti ziangtin theih a si ding? Cutin kei le mi senpi cu leilung vangdâp parih miphun hmuahmuah lak ihsin kan danglamnak cu himi hi a si lo maw?” tiah a ti.

33:15^a 2Sp 13:23; Sam 51:11; 80:3, 7, 19; Jer 7:15

33:16^b Pui 20:24, 26; Mip 9:15; 23:9; Dnp 4:7, 32, 34

17 ^aCule Jehovah in Mosi hnenah, “Na sim zo mi hi thil khal ka tuah ve ding, ziangahtile ka mithmuh ah zangfahnak na hmu zo ih, na hmin in ka lo thei a si,” tiah a ti.

33:17^a Sem 4:8; Suah 33:12; Dnp 9:18, 25; Jam 5:16

18 ^aCule Mosi in, “Zangfahten, na ropitnak i hmuh aw,” tiah a ti.

33:18^a Suah 33:20-23; Joh 1:14; 1Ti 6:16; Thu 15:8

19 ^aCun anih in, “Na hmaiah ka ṭhatnak hmuahhmuah ka fehtlăngter ding ih, na hmaiah Jehovah hmin ka phuang ding. Ka zangfah ding mi cu ka zangfah ding ih, lainatnak ka neih ding mi parah lainatnak ka nei ding,” tiah a ti. 20 ^bJehovah in, “Ka hmel cu na hmu thei lo ding, ziangahtile i hmu ih nung zohman an um lo ding,” tiah a ti. 21 ^cCule Jehovah in, “Zoh hnik, ka kiangah hmun pakhat a um ih, lungpi parah na dīng pei. 22 ^dCule hitin a si ding, ka ropitnak a fehtlăng laiah, lungpi kâk sungah ka lo ret ding ih, ka fehtlăng laiah ka kut in ka lo hup ding. 23 ^eCun ka kut ka lakiang ding ih, ka dung lam na hmu ding, asinan ka hmel cu na hmu lo ding,” tiah a ti.

33:19^a Suah 34:6-7; 1Sp 9:11; Rom 9:15

33:20^b Sem 16:13; Dnp 5:26; Isa 6:5; Joh 1:18; 1Ti 6:16

33:21^c Sam 18:2, 46; 27:5; 61:2; 62:7

33:22^d Sem 49:24; 1Sp 19:9; Sam 27:5; 91:1, 4; Isa 2:21; 49:2; 51:16; Jer 4:29

33:23^e Suah 33:20; Joh 1:18

34

Lung Pheng Thar Pawl

1 ^aJehovah in Mosi hnenah, “A hmaisa tapawl vekin lung pheng pahnih ser aw, cule hi lung pheng pahnih parah na khuai mi a hmaisa lung pheng pawl parih a rak um mi kamsuakthupawl ka ngan ding. 2 ^bCule zing ah tiar awla, zing ah Sinai tlang ah hung so aw, cule cu tawk tlang zimah ka hnenah ra langawter aw. 3 ^cNa zawngah mi zohman an hung so lo pei, cule tlang pumpi ah mi zohman hmuh ding an um lo pei. Cuih tlang kimvel ah rante rualpawl siseh, ranpi rualpawl siseh an tláng lo pei,” tiah a ti.

34:1^a Suah 24:12; 31:18; 32:16, 19; Dnp 10:2, 4

34:2^b Suah 19:11, 18, 20

34:3^c Suah 19:12-13

4 ^aCun Mosi in a hmaisa tapawl vekin lung pheng pahnih a ser. Cun Mosi cu zingpit teah a tho ih, Jehovah in thu a rak pek vekin, Sinai tlang ah a kaiso. Cule cuih lung pheng pahnih cu a kut in a keng.

34:4^a Suah 34:1; Dnp 10:3

5 ^aCule Jehovah cu mero lakah a ṭum ih, cu tawkah Mosi zawngah a ding, cule Jehovah hmin cu a phuang. 6 ^bCule Jehovah cu a hmaiah a fehtlăng ih, “Jehovah, Jehovah Pathian, zahngainak le zangfahnak ih khat, thinsaunak le ṭhatnak le thutak ih khat, 7 ^cmi thawng tampi hrangih zahngainak kai hnget tu, mawhsualnak le dān pahbălnak le sual ngaidamtu, mimawh luatter men lo tu, palepawlih mawhsualnak cu fātepawl le fātepawlih fātepawl hnen, san thum le san li tiang lehrūltu,” tiin a phuang.

34:5^a Suah 19:9; 33:9

34:6^b Sem 19:16; Mip 14:18, 20; Dnp 4:31; Neh 9:17; Sam 61:7; 78:38; 86:15; 103:8; 108:4; 145:8; Jer 15:15; Ṭah 3:23; Joe 2:13; Rom 2:4; Jam 5:11

34:7^c Suah 20:5-6; 23:7; Dnp 5:10; 7:9-10; 9:9; Jos 24:19; 1Sp 8:30; Job 7:20-21; 10:14; Sam 86:5; 103:3; 130:3-4; Isa 41:25; Mik 6:1-16; Nah 1:3; 1Joh 1:9

8 ^aCule Mosi cu manhlap zetin leilung lam hawiin a lu a kûn ih, Pathian a bia. 9 ^bCun anih in, “Na mithmuh ah zangfahnak ka hmuh asile, Maw Bawipa, thla ka cam, kanmai lakah ka Bawipa feh seh. Kannih cu lungruh minung kan si nân, kan mawhsualnak le kan sualnak in ngaithiam awla, na ro ah in la aw,” tiah a ti.

34:8^a Suah 4:31

34:9^b Suah 32:9; 33:13; 34:7; Mip 11:15; 14:19; Dnp 4:20; 9:26, 29; 32:9; 1Sp 8:5, 53; Sam 19:12; 28:8; 33:12; Isa 19:25; Jer 10:16; Mik 7:18; Zek 2:12

10 ^aCule anih in, “Ngai hnik, thukham ka tuah. Na mi senpi zate hmaiah leilung hmuahhmuah parah siseh, ziang miphun lak khalah siseh tuah a rak si dah lo mi thil maksak pawl ka tuah ding; cule an lakih nan umnak mipi zaten Jehovah-ih hnaṭuan an hmu ding. Ziangahtile cumi cu thil maksak na hnenih ka tuah ding mi a si.

34:10^a Sem 6:18; Suah 34:27-28; Dnp 4:32; 5:2-3; Sam 72:18; 136:4

Jehovah cu Thîkthusia Pathian

11 ^a“Tuihni ih thu ka lo pek mi thlun aw. Ngai hnik, Amor-mi, Kanaan-mi, Heth-mi, Periz-mi, Hiv-mi le Jebus-mi pawl cu na hmai ihsin ka dawisuak hai ding. 12 ^bNangmah hrangah fimkhur aw, cu lo asile na fehnak ding ram luahtupawl thawn thukham na tuah pang ding, cu lo asile nan lakah cumi cu tháng ah a cang pang ding. 13 ^cAsinan an biakṭhengpawl nan siatbăl pei, an ṭhuamserhpawl nan ṭhiat pei ih, an Asherah-pawl nan hautlu pei 14 ^d(ziangahtile pathian dang na be lo pei, a hmin thîkthusia a si mi Jehovah cu thîkthusia Pathian a si), 15 ^ecu lo asile ram luahtupawl thawn thukham na tuah pang ding ih, an pathianpawl thawn hlawhhlannak an tuah ding ih, an pathianpawl hnenah rai an thawi ding ih, an lakih mi pakhat khat in lo sawm in an raithawinak na ei pang ding, 16 ^fcule na fapapawl hrangah an fanupawl na ṭhi ding ih, an fanupawl cu an pathianpawl thawn hlawhhlannak tuahin, na fapapawl khal in an pathianpawl thawn hlawhhlannak an tuah ve pang ding. 17 ^gNa hrangah burcawp pathianpawl na tuah lo pei.

34:11^a Suah 33:2; Dnp 6:25; Jos 11:15

34:12^b Suah 23:32-33; Lai 2:2

34:13^c Suah 23:24; Mip 33:52; Dnp 7:5; 12:3; 16:21; Lai 6:25-26; 2Sp 18:4; 2San 15:16; 34:3; Mik 5:14

34:14^d Suah 20:3, 5; Dnp 4:24; Isa 9:6

34:15^e Suah 22:20; 32:8; Mip 25:1-2; Dnp 23:6; 32:37-38; Lai 2:17; Amo 2:4; 1Ko 8:4

34:16^f Dnp 7:3-4; Jos 23:12-13; Lai 3:6; 1Sp 11:1-4; Mal 2:11

34:17^g Suah 20:4, 23; Pui 19:4; Dnp 5:8

Kum Tin Puaipawl

18 ^a“Thilnu telh lo Sang Puai na hmang pei. Thu ka lo pek vekin, Abib thla ih tikcu khiah mi ah, ni sarih sung thilnu telh lo sang na ei pei, ziangahtile Abib thla ah Izip ram ihsin na suak a si. 19 ^bNa sumhnámpawl lakih a pa fatir, sūl kâ awngtu ranpi zaten le rante zaten ka ta an si. 20 ^cAsinan lāk fatir cu tuu fa no in na tlen pei. Cule amah cu na tlen lo asile, a hngawng na khiak pei. Na fapapawl lakih fatir zaten na tlen ding a si. Cule ka hmaiah mi pakhat hman kutlawng in an ra lang ding a si lo. 21 ^dNi ruk sung hna na ṭuan pei, asinan a ni sarihnak ah cun na cawl pei, leileh tikcu le rawl khawm tikcu hmanah na cawl ding a si. 22 ^eCule kum cem tikah sangvut rah hmaisabik sĕngnak a si mi, ^fZarhkar Sarih hnu Puai le ^gRawlkhâwm Puai na hmang ding a si. 23 ^hNa mipapawl zaten Bawipa, Israel-ih Pathian Jehovah hmaiah kum khat ah vei thum an ra lang pei. 24 ⁱZiangahtile miphunpawl cu na hmaiah ka dawisuak hai ding ih na ramripawl ka kauter ding. Jehovah na Pathian hmaiih kum khat ah vei thum lang dingih na fehso tikah mi pakhat hmanin na ram an lo daw fawn lo ding.

34:18^a Suah 12:2, 15-17; 13:4; Pui 23:6; Mip 28:16; Mat 26:17; Luk 22:1; Apo 12:3

34:19^b Suah 13:2; 22:29

34:20^c Suah 13:13, 15; 22:29; 23:15; Mip 3:45; Dnp 16:16; Eze 46:9

34:21^d Sem 2:2-3; Suah 20:9; 23:12; 31:15; 35:2; Pui 23:3; Dnp 5:13; Neh 13:15; Isa 56:2

34:22^e Suah 23:16; Pui 2:12; Mip 28:26

34:22^f Zarhkar Sarih hnu Puai: “Pentikos Puai” asilole “Thlaithar Puai” tiih kawh a si.

34:22^g Rawlkhâwm Puai: “Bûkte Puai” ti khalih kawh a si.

34:23^h Suah 23:14-17

34:24ⁱ Suah 33:2; Dnp 12:20; Job 12:23; Sam 78:55

25 ^a“Ka raithawinak thisen cu thilnu telh mi sang thawn na hlan lo pei, Lanta Puai raithawinak khal zing lam tiang a tâng lo pei. 26 ^bNa leiram rah hmaisabik pawl lakih a ṭhabik cu Jehovah na Pathian inn ah na keng pei. Me no cu a nuih hnawi ti in na suang lo pei,” tiah a ti.

34:25^a Suah 12:10; 23:18

34:26^b Suah 23:19; Mip 18:12; Dnp 26:2

Mosi le Lung Pheng Thar Pawl

27 ^aCun Jehovah in Mosi hnenah, “Hi kamsuakthupawl hi ngan aw, ziangahtile hi kamsuakthupawl bangtukin nangmah le Israel-mipawl thawn thukham ka tuah zo,” tiah a ti. 28 ^bCule anih cu cu tawkah Jehovah hnenah ni 40 le zan 40 sung a um, anih cun sang a ei lo ih, tidai khal a in lo. Cule Jehovah cun lung pheng pawl parah thukham thu, Thupek Pahra pawl cu a ngan.

34:27^a Sem 6:18; Suah 17:14; 24:4; 34:10

34:28^b Sem 7:4; Suah 24:18; 31:18; 34:1; Dnp 4:13; 9:9, 18; 10:4; Ezr 10:6; Mat 4:2; Luk 4:2

29 ^aCule hitin a si, tlang ihsin a rung ṭum tikah Mosi-ih kut ah Theihpinak lung pheng pahnih a um. Mosi cu Sinai tlang ihsin a rung ṭum tikah Jehovah thawi an biakawk hnuah a hmai vun a êng ti Mosi in a thei lo. 30 ^bCule Aaron le Israel tefapawl hmuahhmuah in Mosi an hmuh tikah, ngai hnik, a hmai vun cu a êng ih, amah ra naih ding an ṭih. 31 Cun Mosi in annih cu a ko hai ih, Aaron le mipi umkhawm hotu zaten a hnenah an kirsal, cule Mosi in anmah a bia. 32 Cu hnuah Israel tefapawl hmuahhmuah in an ra naih ih, Sinai tlang ah a hnenah thupekpawl hrangih Jehovah in a rak sim mi zaten a pe hai. 33 ^cCule Mosi cu an hnenih ṭawng a ṭheh tikah puan in a hmai a khuh. 34 ^dAsinan amah be dingin Jehovah hmaiih Mosi a luh tinten a suah hlanlo puan cu a hlîp. Cule a suak ih a hnenih thupek mi pauhpauh Israel tefapawl hnenah a sim. 35 ^eCule Israel tefapawl cun Mosi-ih hmai an hmuh tinten, Mosi-ih hmai vun cu a rak êng ṭheu, cule Mosi cu Pathian be dingih a luh hlanlo puan in a hmai a khuhsal ṭheu.

34:29^a Suah 32:15; Sam 34:5; Isa 60:5; Mat 17:2; 2Ko 3:7, 13

34:30^b 2Ko 3:7

34:33^c 2Ko 3:13

34:34^d 2Ko 3:16

34:35^e 2Ko 3:13

35

Sabbath Cawlh

1 ^aMosi in Israel tefa umkhawm zaten a fĭnkhawmawter hai ih, an hnenah, “Hipawl hi Jehovah in tuah dingih thu a lo pek mi kamsuakthu cu an si: 2 ^bhna cu ni ruk sung ṭuan a si pei, asinan a ni sarihnak cu nan hrangih ni thianghlim, Jehovah hnenih Sabbath cawlh a si pei. Cumi ni ih ziang hna khal a ṭuantu pauhpauh cu thah an si pei. 3 ^cSabbath ni ah cun nan cēnnak hmun hmuahhmuah ah meisa hrimhrim nan muah lo pei,” tiah a ti.

35:1^a Suah 34:32

35:2^b Suah 16:23; 20:9-10; 23:12; 31:15; 34:21; Pui 23:3; Mip 15:32-36; Dnp 5:13-14

35:3^c Suah 12:16; 16:23

Biakbûk hrang Thawhhlawm

4 Cule Mosi in Israel tefa umkhawm zate hnenah, “Hih thil hi Jehovah ih thupek a si, 5 ^a‘Nan lak ihsin Jehovah hnenah thawhhlawm khawng uh. Duhnak thinlung a neitu pauhpauh in cumi cu Jehovah hnenih thawhhlawm hrangah keng hai seh, cupawl tla cu: sui, ngun, dar, 6 pat mepian, sendup le senlar ih cawih mi, puan nem páte le me hmul, 7 buh sen mi tuu cang phawpawl, ṭhakhas phawpawl le akasia thing, 8 ^bmei tleu hrang hriak, hnih mi hriak hrang le rimhmui thaw hrangah rimthawpawl, 9 onik lungpawl, Puithiam Kâwrcung par le ṭāngbĕn ih bun ding mi lungpawl tla rak keng hai seh.

35:5^a Suah 25:1-9

35:8^b Suah 25:26

Biakbûk Saknak

10 ^a‘Nan lakih kutthiam nei hmuahhmuah ra in, Jehovah ih thu a pek mi zaten tuah hai seh. 11 ^bBiakbûk hrangih thilpawl cu: a puanthlam, a khuhnak, a kilhnakpawl, a phar tlêp pawl, a phar tlângpawl, a ṭhuampawl le a taw khuar pawl, 12 ^cKuang le a zawnfungpawl, Sualkhuhthawinak Hmun le pindan puanzar, 13 ^dCabuai le a zawnfungpawl, a bungrua zate le Sangserh, 14 ^emei tleu hrangih Meito ṭhuam khal, a bungruapawl, a meitopawl le mei tleu hrang hriak, 15 ^fRimhmui Biakṭheng, a zawnfungpawl, hnih mi hriak, rimhmui thaw le Biakbûk luhnak sângka puanzar, 16 ^gMeiur Thilhlănnak Biakṭheng le a dar khohrîk, a zawnfungpawl le a bungruapawl hmuahhmuah, Maihum le a tohkūal, 17 ^htualrawn puanzar, a ṭhuampawl, an taw khuar pawl le tualrawn luhnak puanzar, 18 ⁱBiakbûk hrĕn hnget nak pawl, tualrawn hrĕn hnget nak pawl le an hripawl, 19 ^jHmun Thianghlim sungih rawngbawl dingin rawngbawlnak sinfen, puithiam dinhmun ih rawngbawl dingin puithiam Aaron hrangih sinfen thianghlim le a fapapawlih sinfen khal,’ tiah a ti,” tiin a sim.

35:10^a Suah 31:6

35:11^b Suah 26:1-30

35:12^c Suah 25:10-22

35:13^d Suah 25:23-30

35:14^e Suah 25:31

35:15^f Suah 30:1-6, 25, 34-38

35:16^g Suah 27:1-8

35:17^h Suah 27:9-18

35:18ⁱ Suah 27:19

35:19^j Suah 28:2; 31:10; 39:1

20 Cule Israel tefa umkhawm zaten Mosi hmaika ihsin an suak ṭheh. 21 ^aCun thinlung thathotu kip le duhnak thinlung a neitu kip cu an ra ih, Tawnawknak Puanthlam hna hrang, Biakbûk rawngbawlnak zate hrang le sinfen thianghlim hrangah Jehovah-ih thawhhlawm an rak keng. 22 A nu a pa in duhnak thinlung nei hmuahhmuah an ra ih, hnakhaihpawl le hnarkhaihpawl, zunghrukpawl le ṭhipawl, sui thilpawl a zaten an rak keng. Cuti vek cun sui thawhhlawm a thawhtu mi kip cun Jehovah hnenah an rak keng. 23 Cule mi kip in pat mepian, sendup le senlar ih cawih mi, puan nem páte, me hmul, tuu cang phaw sen pawl le ṭhakhas phawpawl neitu pauhpauh in an rak keng. 24 Mi kip ngun simaw, dar simaw thawhhlawm thawhtu in Jehovah-ih thawhhlawm an rak keng. Cule akasia thing neitu mi kip in rawngbawlnak hna tinkim hrangah an rak keng. 25 ^bNunau kutthiam nei zaten an kut in pat an hnûk ih, an rak hnuh mi pat mepian, sendup, senlar le puan nem páte pawl tla an rak keng. 26 Cule fimnak thawn thinlung thatho mi nunau zaten me hmul pat an hnûk. 27 ^cHotupawl in onik lungpawl, Puithiam Kâwrcung le ṭāngbĕn ih bun ding mi lungpawl, 28 ^dmei tleu hrang, hnih mi hriak hrang le rimhmui thaw hrangah rimthawpawl le hriakpawl tla an rak keng. 29 ^eJehovah in Mosi hmangin tuah dingih thu a rak pek mi hna phunkim hrangah duhnak thinlung neitu Israel tefa, mipa le nunau zaten Jehovah hnenah lungpuak thawhhlawm an run keng.

35:21^a Suah 25:2; 35:5, 22, 26, 29; 36:2

35:25^b Suah 28:3

35:27^c 1San 29:6, 8

35:28^d Suah 30:23

35:29^e Suah 35:21; 2Sp 12:4; 1San 29:9

Bezalel le Aholiab

30 ^aCule Mosi in Israel tefa hnenah, “Zoh uh, Judah hnám Hur-ih fapa Uri, Uri-ih fapa Bezalel cu Jehovah in a hmin in a ko zo, 31 ^bcule Jehovah in anih cu fimnak ah le theihthiamnak ah, theihnak ah le themthiamnak tinkim ah Pathian Thlarau in a khatter zo, 32 kutthiam hnapawl ruang zĭng dingah, sui, ngun le dar ṭuan dingah, 33 rĕmkhawm dingih lung mankhung pawl tánin, thing kherin le kutthiam hna tinkim ṭuan dingah a si. 34 ^cCule anih in Bezalel le Dan hnám ihsin Ahisamak fapa Aholiab-ih thinlung ah zirh thei nak a ret zo. 35 ^dAnnih cu thil kher hna, ruang zĭng hna, pat mepian, sendup le senlar ih cawih mi le puan nem páte cawih hna, hna phun kip ṭuantu le kutthiam hnapawl ruang zĭngtu thiamtah hnapawl hmuahhmuah ṭuan dingah themthiamnak in a khatter hai zo.

35:30^a Suah 31:1-6

35:31^b 2San 2:7, 14

35:34^c Suah 31:6; 2San 2:14

35:35^d Suah 31:3, 6; 35:31; 1Sp 7:14

36

1 “Bezalel le Aholiab le hmun thianghlim rawngbawlnak hrangih hna hmuahhmuah ṭuandān ding thei dingin Jehovah in fimnak le theihthiamnak a pek zo mi kutthiam nei kip in Jehovah in thu a rak pek mi hmuahhmuah bangtukin an tuah pei,” tiah a ti.

Ṭul mi hnakih tam Thawhhlawm

2 ^aCun Mosi in Bezalel le Aholiab le Jehovah in fimnak a rak pek mi kutthiam nei kip, thinlung thatho mi kip cu ra tahratih hnaṭuan dingin a ko hai. 3 Cule Israel tefapawl in hmun thianghlim tuahnak rawngbawl hna hrangih an rak ken mi thawhhlawm zaten Mosi hnen ihsin an dawng. Cun a hnenah lungpuak thawhhlawmpawl cu zing tinten an rak keng ringring. 4 Cun hmun thianghlim hna hmuahhmuah a ṭuan rero tu zungthiam zaten an ṭuan lai mi an hna ihsin an ra suak cio, 5 ^bcule Mosi hnenah, “Mipi in Jehovah ih tuah dingih thu in pek mi rawngbawl hna hrangah a daih tawk hnakih tamsawn an rak keng,” tiin an sim.

36:2^a Suah 35:21, 26

36:5^b 2San 24:14; 31:6-10; 2Ko 8:2-3

6 Cule Mosi cun thupek a pe ih, riahhmun khuarnak tluanah, “Mipa in siseh, nunau in siseh hmun thianghlim thawhhlawm hrangah hnaṭuan nawn hlah hai seh,” tiin an phuangter. Cule mi senpi cu thawhhlawm ken an bâng, 7 ^aziangahtile an thilri neih mi cu an hnaṭuan hmuahhmuah ṭheh nak dingah a daih zo, a tam tuk lam a si.

36:7^a 1Sp 7:47; 8:64

Biakbûk Sak

Tlun Khuh Puanzarpawl

8 ^aCun Biakbûk ṭuantupawl lakih kutthiam nei hmuahhmuah cun an ṭuan. Bezalel in puanzar pahra cu hmawih mi pat zai fêmte, pat mepian, sendup le senlar in a tuah. Cule thiam zetih ruahman mi cherub-pawl cuangin cupawl cu a tuah. 9 Puanzar kip ih sau lam cu dawng 28 a si ih, puanzar kip ih kauh lam cu dawng li a si, puanzarpawl cu an canaw thluh. 10 Cule puanzar panga cu pakhat le pakhat a pehawter ih, a dang puanzar panga khal pakhat le pakhat a pehawter. 11 Puanzar peh khat tlâng ah pat mepian in hnâpawl a tuah, cuvek thothoin a lengta sawn puanzar peh hnihnak tlâng par khalah a tuah. 12 ^bPuanzar pakhat ah hnâ 50 a tuah ih, a peh hnihnak puanzar zim ah tlâng hnâ 50 thotho a tuah. A hnâpawl in puanzar pakhat le pakhat an awk-aw. 13 ^cCule sui in a kilhnak 50 a tuah ih, Biakbûk pakhat a can thei nak dingah kilhnakpawl in puanzarpawl pakhat le pakhat a pehawter.

36:8^a Suah 26:1-14

36:12^b Suah 26:5

36:13^c Suah 26:6; 36:18

14 ^aAnih in Biakbûk tlun khuh hrangah me hmul in puanzarpawl a tuah, puanzar hleikhat a tuah. 15 Puanzar pakhat ciar ih sau lam cu dawng 30 a si ih, puanzar pakhat ciar ih kauh lam cu dawng li a si, cule puanzar hleikhat pawl cu an canaw ṭheh. 16 Anih in puanzar panga cu a dangten peh khat ah, puanzar paruk khal a dangten peh khat ah a pehawter. 17 Cule a lengtabik puanzar peh khat ih tlâng ah hnâ 50 le a peh hnihnak puanzar tlâng khalah hnâ 50 a tuah. 18 ^bPuanthlam cu a pehaw ih, pakhat a can thei nak dingah anih in dar kilhnak 50 khal a tuah. 19 Cun buh sen mi tuu cang phawpawl in puanthlam khuhnak le cumi tlunih ṭhakhas phaw khuhnak a tuah.

36:14^a Suah 26:7-14

36:18^b Suah 36:13

Biakbûk Phar Tlêp le Phar Tlâng Pawl

20 ^aBiakbûk hrangah akasia thing in phar tlêp pawl cu dĭng zetih dīngin a tuah. 21 Phar tlêp pakhat ciar ih sau lam cu dawng hra an si ih, phar tlêp pakhat ciar ih kauh lam cu dawng khat le a hrek an si. 22 Phar tlêp pakhat ciar cu pakhat le pakhat an pehawknak dingah a ke pahnih a tuah. Cuti vek cun Biakbûk hrangih phar tlêp zate hrangah a tuah. 23 Cule Biakbûk hrangah phar tlêp, thlang lam sir hrangah tlêp 20 in a tuah. 24 Phar tlêp 20 pawl hnuaiah ngun in taw khuar 40 a tuah, phar tlêp pakhat ciar hnuaiih a ke pahnih hrangah taw khuar pahnih a um. 25 Cule Biakbûk khat lam sir, sak lam sir hrangah phar tlêp 20 le 26 ^bngun taw khuar 40, phar tlêp pakhat ciar hnuaiah taw khuar pahnih a tuah. 27 Biakbûk nitlaknak lam sir hrangah phar tlêp paruk a tuah. 28 Biakbûk dung lam kil pahnih hrang khalah phar tlêp pahnih a tuah. 29 Cule a taw ah an pehaw ih, a zimah khâng pakhat in a pehkhawmawter. Cuti vek cun a kil pahnih pawl hrangah an pahnih in a tuah. 30 Cutin phar tlêp pariat pawl cu tlêp khat fingfing taw ah ngun taw khuar pahnih neiin, anmai taw khuar hleiruk thawn an um.

36:20^a Suah 26:15-29

36:26^b Suah 12:37; 30:12-15, 37; Mip 1:46; 26:51

31 ^aCule akasia thing in phar tlângpawl cu Biakbûk sir pakhat parih phar tlêp pawl hrangah panga, 32 Biakbûk sir khat lam parih phar tlêp pawl hrangah phar tlâng panga le a hlatnak nitlaknak lam sir parih Biakbûk phar tlêp pawl hrangah phar tlâng panga a tuah. 33 Cule a laiih phar tlâng cu phar tlêp pawl laifangin khat lam zim ihsin khat lam zim tiang fehtlăngin a tuah. 34 Phar tlêp pawl cu sui a khût, phar tlângpawl kaitu dingah an sui khângpawl a tuah ih, phar tlângpawl cu sui a khût.

36:31^a Suah 26:26-29

Pindan Puanzar

35 ^aCule pat mepian, sendup le senlar le hmawih mi pat zai fêmte in pindan puanzar pakhat a tuah; cumi cu thiam zetih ruahman mi cherub-pawl cuangin tuah a si. 36 Cumi hrangah akasia ṭhuam pali, cupawl cu sui khûtin, an sui kūaipawl a tuah. Cule an hrangah ngun taw khuar pali a bur.

36:35^a Suah 26:31-37; Mat 27:51; Luk 23:45; Heb 9:3

Luhnak Puanzar

37 ^aPuanthlam luhnak hrangah puantah thiam ih tah mi pat mepian, sendup le senlar le hmawih mi pat zai fêmte in puanzar pakhat, 38 ^bcule an kūaipawl thawn a ṭhuam panga khal a tuah. Cule an luzimpawl le an tlângkhanpawl cu sui a khût, asinan an taw khuar panga pawl cu dar an si.

36:37^a Suah 26:36

36:38^b Suah 26:37

37

Thukham Kuang

1 ^aBezalel in akasia thing in Kuang a tuah, a sau lam cu dawng hnih le a hrek, a kauh lam dawng khat le a hrek, a san lam dawng khat le a hrek a si. 2 A sung lam le leng lam cu sui hlirhlăng a khût ih, a kimvel zaten sui tlâng a tuah. 3 Cule cumiih a kil pali ih bun dingah sui khâng pali, khat lam sirah khâng hnih, a khat lam sirah khâng hnih tiin a bur. 4 Akasia thing in zawnfungpawl a tuah ih, cupawl cu sui a khût. 5 Cule Kuang zawn dingin Kuang sirpawlih khângpawl sungah zawnfungpawl a hrawlh. 6 ^bAnih in sui hlirhlăng in Sualkhuhthawinak Hmun a tuah. A sau lam dawng hnih le a hrek, a kauh lam dawng khat le a hrek a si. 7 ^cSer mi sui in cherub pahnih a tuah, Sualkhuhthawinak Hmun zim pahnih ah cupawl cu sakhatin a tuah, 8 cherub pakhat cu hi lam zimah le a dang cherub pakhat cu khat lam zimah a tuah. ^dCherub-pawl cu Sualkhuhthawinak Hmun zim pahnih ah a tuah. 9 ^eCherub-pawl in tlunah an thla an pharh ih, an thla in Sualkhuhthawinak Hmun khuhin pakhat le pakhat hmai an hawihaw. Cherub-pawlih hmai cun Sualkhuhthawinak Hmun lam an hawih.

37:1^a Suah 25:10-20; Dnp 10:3

37:6^b Heb 9:5

37:7^c Eze 41:18

37:8^d Cherub-pawl: Vancungmi phun khat an si.

37:9^e Dnp 10:3; Heb 9:5

Sangserh Cabuai

10 ^aAnih in akasia thing in cabuai a tuah, a sau lam dawng hnih, a kauh lam dawng khat, a san lam dawng khat le a hrek a si. 11 Cule cumi cu sui hlirhlăng a khût ih, sui in a kimvel zaten a tlâng a tuah. 12 Za băwk tia-in cumi hrangah a kimvel zaten tlângkawm a tuah ih, a kimvel zate ih tlângkawm hrangah sui tlâng a tuah. 13 Cule cumi hrangah sui khâng pali a bur ih, a ke pali parih a um mi a kil pali pawl parah khângpawl a bun. 14 Cabuai dĭn thei tu zawnfungpawl kaitu ah khângpawl cun a tlângkawm an naih. 15 Cule Cabuai zawnnak dingah akasia thing in zawnfungpawl a tuah ih, cupawl cu sui a khût hai. 16 Cabuai parih a um mi sui hlirhlăng bungruapawl a si mi: a khēngpawl, a hai dau pawl, a kheng kûm pawl le a burnak thâwlpawl tla a tuah.

37:10^a Suah 25:23-29; Heb 9:2

Meito ṭhuam

17 ^aSui hlirhlăng in Meito ṭhuam khal a tuah, Meito ṭhuam cu a serin a ser. A kopi, a ṭêkpawl, a kheng kûm pawl, a cângbolpawl le a pangparpawl cu sakhat an si. 18 Cule a sirpawl ihsin ṭêk paruk a ra suak, cupawl tla cu: sir khat ih Meito ṭhuam ṭêk pathum, a dang sirih Meito ṭhuam ṭêk pathum tla an si. 19 A ṭêk pakhat parah ^balmond par mûm vek kheng kûm pathum cu cângbol pakhat le pangpar pakhat thawn an um. Cule a dang a ṭêk parah almond par mûm vek khēngkum pathum cu cângbol pakhat le pangpar pakhat thawn tuah a si. Cutin a ṭêk paruk pawl cu Meito ṭhuam ihsin an suak. 20 Meito ṭhuam par roriah almond par mûm vek kheng kûm pali cu pakhat cio in cângbol le pangpar ciar thawn an um. 21 Meito ṭhuam ihsin a ṭêk mi a ṭêk paruk pawl zulhin a pakhatnak a ṭêk pahnih hnuaiah cângbol pakhat, a pahnihnak a ṭêk pahnih hnuaiah cângbol pakhat, a pathumnak a ṭêk pahnih hnuaiah cângbol pakhat an um. 22 ^cAn cângbolpawl le an ṭêk pawl cu sakhat an si ih, a zate in sui hlirhlăng thawn sakhat ih ser an si. 23 Cule Bezalel in cumi hrangah meito pasarih cu a caicehpawl le a meiling suahdurpawl thawn sui hlirhlăng in a tuah. 24 Meito ṭhuam le a bungrua hmuahhmuah cu sui hlirhlăng talent khat in a tuah.

37:17^a Suah 25:31-39; Heb 9:2; Thu 1:2

37:19^b almond: Sem 30:37 simfiangnak zoh aw.

37:22^c Mip 8:4

Rimhmui Biakṭheng

25 ^aAkasia thing in Rimhmui Biakṭheng a tuah. A sau lam cu dawng khat le a kauh lam khal dawng khat a si, cumi cu a sir li canaw mi a si ih, a san lam cu dawng hnih a si. Cumiih kipawl cu amah thawn sakhat an si. 26 Cule cumi cu a zim, a sir kimvel zate le a kipawl cu sui hlirhlăng a khût. A kimvel zaten sui tlâng a tuah. 27 ^bA zawnnak ding zawnfungpawl awktu dingah a sir pahnih ih a kil pahnih kiangah cumi hrangah a tlângkawm hnuaiah sui khâng pahnih a tuah. 28 Zawnfungpawl cu akasia thing in a tuah ih, cupawl cu sui a khût.

37:25^a Suah 30:1-5

37:27^b Luk 1:11; Heb 9:4; Thu 8:3; 9:13

29 ^aHnih mi hriak thianghlim le rimhmui hlirhlăng a si mi rimthawpawl khal, rimhmui tuahtu ih kutsuak bangtukin a tuah.

37:29^a Suah 30:23-25, 34-35

38

Dar Biakṭheng

1 ^aAnih in akasia thing in Meiur Thilhlănnak Biakṭheng a tuah, a sau lam dawng nga, a kauh lam khal dawng nga, sir li canaw a si ih, a san lam dawng thum a si. 2 ^bCumiih a kil pali ah a kipawl a tuah, cuih kipawl cu cuih Meiur Thilhlănnak Biakṭheng thawn sakhat an si. Cule cumi cu dar a khût. 3 Biakṭheng hrangih bungrua hmuahhmuah a si mi: hai dau pawl, suahdurpawl, cawhtawlhpawl, sa lâknak hmanruapawl le meiling suahdurpawl tla a tuah. A bungrua zaten dar in a tuah. 4 Cule Biakṭheng hrangah a taw ihsin a laifang tiang, a biang hnuaiah, dar ih tuah mi hrîknak khohrîk a tuah. 5 Zawnfungpawl awktu dingah dar khohrîk kil pali pawl hrangah, khâng pali a bur. 6 Cule akasia thing in zawnfungpawl a tuah ih, cupawl cu dar a khût. 7 Cun anih in Biakṭheng sirpawlih khângpawl sungah Biakṭheng zâwn dingin zawnfungpawl cu a thluah. Biakṭheng cu thing pheng pawl in kawráwngin a tuah.

38:1^a Suah 27:1-8

38:2^b 2San 1:5

Maihum

8 ^aDar maihum le a dar tohkūal cu Tawnawknak Puanthlam luhnak ih a pungkhawm mi rawngbawltu nunaupawlih dar thlalangpawl hmangin a tuah.

38:8^a Suah 30:18; Dnp 23:17; 1Sam 2:22; 1Sp 14:24

Tualrawn

9 ^aCun tualrawn a tuah ih, thlang lam sirah tualrawn puanzar cu tah mi puan nem páte dawng 100 sau-in a tuah. 10 Cupawl hrangah ṭhuam 20 cu dar taw khuar 20 thawn an um. Ṭhuampawlih kūaipawl le an tlângkhanpawl cu ngun a si. 11 Sak lam sirih puanzar cu dawng 100 sau, a ṭhuam 20 le dar taw khuar 20 pawl thawn an si. A ṭhuampawlih kūaipawl le tlângkhanpawl cu ngun a si. 12 Cule nitlaknak lam sirah dawng 50 puanzar cu ṭhuam pahra le an taw khuar pahra pawl thawn an um. A ṭhuampawlih kūaipawl le an tlângkhanpawl cu ngun a si. 13 Nisuahnak lam sir hrangih puanzar cu dawng 50 a si. 14 Luhnak sir khat lamih puanzar cu dawng hleinga a sau ih, an ṭhuam pathum pawl le an taw khuar pathum pawl, 15 tualrawn luhnakih a khat lam sirah bangawin, hi lam sir le khat lam sirah dawng hleinga a si mi puanzarpawl khal, an ṭhuam pathum le an taw khuar pathum thawn an um. 16 Tualrawn kimvel hmuahhmuah ih puanzarpawl tinkim cu tah mi puan nem páte an si. 17 Ṭhuampawlih taw khuar pawl cu dar a si, ṭhuampawlih kūaipawl le an tlângkhanpawl cu ngun a si ih, an luzimpawl khal ngun khût a si, cule tualrawn ṭhuam zate in ngun tlângkhanpawl an nei.

38:9^a Suah 27:9-19

Tualrawn Luhnak

18 Tualrawn luhnak hrangih puanzarpawl cu pat mepian, sendup le senlar le hmawih mi pat zai fêmte thawi tah mi an si. A sau lam cu dawng 20 a si, cule a san lam cu dawng nga a si ih, cumi cu tualrawn puanzarpawl thawn zawnaw a si. 19 Cule ṭhuam pali cu an dar taw khuar pali thawn an um, an kūaipawl cu ngun a si, cule an luzimpawl le an tlângkhanpawl khûtnak cu ngun a si. 20 Biakbûk le a tualrawn kimvel zate hrĕn hnget nak hmuahhmuah cu dar an si.

21 ^aHimi hi Mosi thupek bangtukih siarkhawm mi, Theihpinak Biakbûk, Biakbûk thilri zat cu a si. Ziangahtile cumi cu puithiam Aaron-ih fapa Ithamar kaihhruainak hnuaiah, Levi-mipawlih rawngbawlnak a si.

38:21^a Mip 1:50, 53; 4:28, 33; 1San 23:32; 2San 24:6; Apo 7:44; Thu 15:5

22 ^aJudah hnám, Hur fapa Uri, Uri-ih fapa Bezalel cun Jehovah in Mosi thu a pek mi zaten a tuah ṭheh. 23 ^bCule Bezalel thawn Dan hnám, Ahisamak-ih fapa Aholiab cu thil kher thiam le ruangzĭng thiam, pat mepian, sendup le senlar ih cawih mi le puan nem páte tah thiam a si.

38:22^a Suah 31:2

38:23^b Suah 31:6

Biakbûk Thilpawl

24 ^aHmun thianghlim hnaṭuannak tinkimih an hman mi sui zaten sui thawhhlawm ihsin a si. Cumi cu hmun thianghlim shekel bangtukin talent 29 le shekel 730 a si. 25 ^bCule mipi umkhawm lakih siar mipawl hnen ihsin ngun cu hmun thianghlim tahnak bangtukin talent 100 le shekel 1775 a si. 26 Mi pakhat cio in bekah khat, cucu hmun thianghlim shekel tahnak bangtukin shekel hrek a si ih, mipa kum 20 ihsin a tlun lam mi siartelhin, mipa ting ruk le thawngthum le zanga le sawmnga hrangah a si. 27 Cule ngun talent 100 cu hmun thianghlim taw khuar pawl le puanzar tawzim hrennakpawl ah bur a si, taw khuar 100 hrangah talent 100, taw khuar pakhat ciar hrangah talent pakhat a si. 28 Cun shekel 1775 ihsin ṭhuam kūaipawl a tuah, an luzimpawl khût an si ih, an hrangah tlângkhanpawl tuah a si.

38:24^a Suah 30:13; Pui 27:25; Mip 3:27; 18:16

38:25^b Suah 30:11-16

29 Dar thawhhlawm cu talent 70 le shekel 2400 a si. 30 Cule cumi in Tawnawknak Puanthlam luhnak hrangih taw khuar pawl, Dar Biakṭheng, cumi hrangih dar khohrîk le Biakṭheng hrangih bungrua hmuahhmuah, 31 tualrawn kimvel zate hrangih taw khuar pawl, tualrawn luhnak hrangih a tawzim hrenpawl, Biakbûk hrangih kilhnak zate le tualrawn kimvel zate hrangih a hrĕn hnget nak hmuahhmuah ah a tuah.

39

Puithiam Hnipuan

1 ^aPat mepian, sendup le senlar ih cawih mi hmun thianghlim ih rawngbawlnak hrangah, rawngbawlnak hnipuan an tuah. Jehovah in Mosi thu a rak pek vekin Aaron hrangah sinfen thianghlim an tuah.

39:1^a Suah 31:10; 35:19, 23

2 ^aAnih in sui, pat mepian, sendup le senlar le hmawih mi pat zai fêmte in Puithiam Kâwrcung a tuah. 3 Cule sui cu a pheng páte ah an sŭt ih, sui cu a phangte teah an phel, cumi cu thiam zetih ruahman mi vekih tuah mi pat mepian, sendup le senlar ih cawih mi le puan nem páte ih tah mi ih cawih dingah a si. 4 Pehaw dingin Puithiam Kâwrcung hrangah lianghri an tuah, cumi cu an zim pahnih ah an pehaw. 5 Cule thiam zetih tah mi Puithiam Kâwrcung parih Puithiam Kâwrcung taiṭem cu themthiamnak bangrepin sui, pat mepian, sendup le senlar le hmawih mi pat zai fêmte in, Jehovah in Mosi thu a rak pek vekih tah mi a si.

39:2^a Suah 28:6-12

6 ^aCule onik lungpawl an bun ih, sui kuar pawl sungah an bun; cule cuih lungpawl cu Israel fapapawlih hmin cuangin, tacik kherdān vekih kher an si. 7 ^bCupawl cu Israel fapapawl hngilhlonak lung hrangah Puithiam Kâwrcung liang parah, Jehovah in Mosi thu a rak pek vekin a bĕn hai.

39:6^a Suah 28:9-11

39:7^b Suah 28:12; Pui 24:7; Jos 4:7

8 ^aCule anih in themthiam zetih Puithiam Kâwrcung tuahdān vekin sui, pat mepian, sendup le senlar le hmawih mi pat zai fêmte pawl in ṭāngbĕn a tuah. 9 Ṭāngbĕn cu a canaw mi sir li nei a thuahin an tuah. An thuah tikah a sau lam khâp khat, a kauh lam khâp khat a si. 10 Cule cumi parah lung mankhung tlar li in an phum: sardias pakhat, ṭopaz pakhat le emerald pakhat tlar cu, a tlar khatnak a si, 11 a tlar hnihnak ah turquoise pakhat, safaira pakhat le daimond pakhat, 12 a tlar thumnak ah jacinth pakhat, agate pakhat le amethist pakhat, 13 a tlar litnak ah birul pakhat, onik pakhat le jasper pakhat tla an si. Cupawl cu sui kuar pawl sungih bun an si. 14 ^bIsrael fapapawlih hmin zulhin lung mankhung hleihnih an um, cupawl cu an hmin vek cio in hnám hleihnih zulhin anmai hmin ciar in tacik kher mi vekih kher an si. 15 Cule sui hlirhlăng ih phiar mi hrihrual vekin a zimah ṭāngbĕn hrangah cikcin an tuah. 16 Sui kuar pahnih le sui khâng pahnih khal an tuah ih, cuih khâng pahnih cu ṭāngbĕn zim hnih ah an thlaih. 17 Cule phiar mi sui cikcin pahnih cu ṭāngbĕn zim pawl ih a um mi khâng pahnih ah an sih. 18 Cule phiar mi cikcin pahnih ih a khat lam zim pahnih cu kuar pahnih ah an bun hnget ih, a hmai lamih Puithiam Kâwrcung lianghripawl ah an sih. 19 Cule sui khâng pahnih an tuah ih, Puithiam Kâwrcung lam hawihtu ṭāngbĕn sung lamih a um mi, ṭāngbĕn zim hnih ih zîkah an thlaih. 20 Sui khâng dang pahnih an tuah ih, cupawl cu Puithiam Kâwrcung lianghri pahnih, a hmai lam hnuai, thiam zetih tah mi Puithiam Kâwrcung taiṭem a ṭhitnak cekci ah an thlaih. 21 Cule Jehovah in Mosi thu a rak pek bangtukin annih in ṭāngbĕn cu cuih khângpawl hmangin Puithiam Kâwrcung khângpawl ah, hri mepian hmangin an sih, cutin cumi cu thiam zetih tah mi Puithiam Kâwrcung taiṭem tlunah a um, cutin ṭāngbĕn cu Puithiam Kâwrcung ihsin a pelh lo.

39:8^a Suah 28:15-28; Pui 8:8

39:14^b Thu 21:12

22 ^aBezalel in pat mepian hlir ih tah mi Puithiam Kâwrcung kâwrfual a tuah. 23 ^bCule cuih kâwrfual laifangah a kâ a um, a tlêklonak dingah a kâ kimvel zaten kâwr hngawng an khūl vekin a tlâng khūl a si. 24 Annih in kâwrfual fêm ah pat mepian, sendup le senlar in talê rahpawl le hmawih mi pat zai fêmte an tuah. 25 Cule annih in sui hlirhlăng in sui khîngtepawl an tuah ih, sui khîngtepawl cu kâwrfual fêm kimvel zate ih talê rahpawl karlakah an ret. Sui khîngtepawl cu talê rahpawl karlakah, 26 Jehovah in Mosi thu a rak pek vekin sui khîngte pakhat le talê rah pakhat, sui khîngte pakhat le talê rah pakhat tiin rawngbawlnak hrangah kâwrfual fêm kimvel zaten an ret.

39:22^a Suah 28:31, 34

39:23^b Suah 28:32

27 ^aAnnih in Aaron le a fapapawl hrangah kâwrfualpipawl, themthiam zetih hmawih mi pat zai fêmte, 28 ^bpuan nem páte puithiam lu bik lupâwng pakhat, mawi zetih tah mi puan nem páte lukhumpawl, hmawih mi pat zai ih tah mi bâwngbitepawl, 29 taikhap cu hmawih mi pat zai fêmte, mepian, sendup le senlar pawl in Jehovah in Mosi thu a pek vekin thiamtah thiam pawl in an tuah.

39:27^a Suah 28:39-40, 42; Pui 6:10

39:28^b Pui 8:9; Isa 61:10

30 ^aCun sui hlirhlăng tlêp lukhap thianghlim an tuah ih, cumi parah tacik kher vekin: JEHOVAH HRANGAH A THIANGHLIM, ti mi catar pakhat an ngan. 31 Cule Jehovah in Mosi thu a rak pek vekin, cumi cu puithiam lu bik lupâwng parah hnget dingin hri mepian in an ṭawn.

39:30^a Suah 28:36-37

Hna Ṭhehfel a Si

32 Cuti cun Tawnawknak Puanthlam, Biakbûk hnaṭuan hmuahhmuah cu ṭheh a si. Cule Israel tefapawl in Jehovah in Mosi hnenih thu a rak pek bangtukin an tuah thluh, cuti vek rori in an tuah. 33 Cule Biakbûk cu Mosi hnenah puanthlam le a bungrua zate, a kilhnakpawl, a phar tlêp pawl, a phar tlângpawl, a ṭhuampawl, a taw khuar pawl, 34 buh sen mi tuu cang phaw khuhnak, ṭhakhas phaw khuhnak le pindan puanzar, 35 Theihpinak Kuang le a zawnfungpawl, Sualkhuhthawinak Hmun, 36 Cabuai, a bungrua zate le Sangserh, 37 sui hlirhlăng ih tuah mi Meito ṭhuam le remteih ret mi meitopawl, a bungrua zate, mei tleu hrang hriak, 38 Sui Biakṭheng, hnih mi hriak, rimhmui thaw le Puanthlam luhnak puanzar, 39 Dar Biakṭheng, a dar khohrîk, a zawnfungpawl le a bungruapawl hmuahhmuah, Maihum le a tohkūal, 40 ^atualrawn puanzarpawl, a ṭhuampawl, an taw khuar pawl le tualrawn luhnak puanzar, a hripawl le a hrĕn hnget nak pawl, Tawnawknak Puanthlam hrangih Biakbûk rawngbawlnak hrang bungrua zate, 41 Hmun Thianghlim sungih rawngbawl dingin rawngbawlnak sinfen, puithiam dinhmun ih rawngbawl dingin puithiam Aaron hrangih sinfen thianghlim le a fapapawlih sinfen khal an keng.

39:40^a Isa 23:18; Zek 14:20

42 Cutin Jehovah in Mosi thu a rak pek mi hmuahhmuah bangtukin hna zaten Israel tefapawl cun an tuah ṭheh. 43 ^aCun Mosi in hnaṭuan mi zaten a zoh, cule ngai hnik, cumi cu an tuah ṭheh. Jehovah in thu a rak pek vekin, cuti vek cun an rak tuah ṭheh. Cule Mosi in anmah cu mal a sawm hai.

39:43^a Sem 31:35; Pui 9:22-23; Mip 6:23-27; Dnp 21:5; 2Sam 6:18; 1Sp 8:14; 1San 16:2; 2San 30:27

40

Biakbûk Dĭn a Si

1 Jehovah in Mosi hnenah, 2 ^a“Thla hmaisabik, a ni khatnak ah Tawnawknak Puanthlam, Biakbûk na dĭn pei. 3 ^bCumi sungah Theihpinak Kuang na ret pei ih, Kuang cu puanzar in na dang pei. 4 ^cCabuai na lalut pei ih, cumi parah remteih ret ding mi thilpawl na remfel pei, cule Meito ṭhuam na kenglut pei ih, a meitopawl na vâng pei. 5 ^dTheihpinak Kuang hmaiah rimhmui hrangih Sui Biakṭheng khal na ret pei ih, Biakbûk luhnak puanzar na zar pei. 6 ^eCun Tawnawknak Puanthlam, Biakbûk luhnak hmaiah Meiur Thilhlăn Biakṭheng na ret pei. 7 ^fCule Tawnawknak Puanthlam le Biakṭheng karlakah Maihum na ret pei ih, a sungah tidai na ret pei.

40:2^a Suah 19:1; 40:17; Pui 1:1; Mip 1:1; 9:1; Jos 18:1; Jer 7:12

40:3^b Suah 26:33; 40:21; Mip 4:5

40:4^c Suah 25:30; 26:35; 40:22-24

40:5^d Suah 40:26

40:6^e 2Sp 6:14; 2San 4:1

40:7^f Suah 30:18; 40:30

8 “A kimvel hmuahhmuah ah tualrawn na tuah pei ih, tualrawn luhnak ah puanzar na zar pei. 9 ^aCule hnih mi hriak na la pei ih, Biakbûk le a sung ihta hmuahhmuah na hnih pei; cule cumi le a sungih bungrua zaten na tithianghlim pei ih, Biakbûk cu a thianghlim pei. 10 ^bMeiur Thilhlăn Biakṭheng le a bungrua zaten hriak na hnih pei ih, Biakṭheng cu na serhhran pei. Biakṭheng cu a thianghlim zet mi a si pei. 11 Cule Maihum le a tohkūal cu hriak na hnih pei ih, na serhhran pei.

40:9^a Suah 30:26; Pui 8:10; Mip 7:1

40:10^b Suah 29:37

12 ^a“Cun Aaron le a fapapawl cu Tawnawknak Puanthlam luhnak ah na hruai hai pei ih, tidai in anmah cu na khawlh pei. 13 ^bPuithiam dinhmun ih keimah in rĕn thei nak dingah, Aaron cu sinfen thianghlim na hrukter pei ih, amah cu hriak na hnih pei, cule na serhhran pei. 14 ^cCule a fapapawl na hruai pei ih, puithiam kâwrfualpi na hruhter hai pei. 15 ^dPuithiam dinhmun in annih in keimah in rĕn thei nak dingah an pa hriak na thih vekin, annih cu hriak na thih hai pei, ziangahtile an hriak thihnak cu an tesinfa san hmuahhmuah tiangin kumkhua puithiam sinak a si tengteng ding a si,” tiah a ti. 16 ^eCuvek cun Mosi cun a rak tuah, a hnenih Jehovah in thu a rak pek mi hmuahhmuah vekin, cuti vek cun a rak tuah thluh.

40:12^a Pui 8:1-6; Mip 8:9

40:13^b Suah 28:41; Pui 8:12-13

40:14^c Pui 10:5

40:15^d Suah 29:9; Mip 25:13

40:16^e Sem 6:22

17 ^aCule hitin a si, a kum hnihnak, a thla hmaisabik, cuih thla a ni khatnak ah Biakbûk cu dĭn a rak si. 18 ^bCun Mosi in Biakbûk cu a rak dĭn, a taw khuar pawl a hngetter, a phar tlêp pawl a tung, a phar tlângpawl a khang ih, a ṭhuampawl a tung. 19 Cule Biakbûk tlun khuh a pharh ih, Jehovah in Mosi thu a rak pek vekin, cumiih zimah a dang puanthlam khuhnak in a khuh. 20 ^cAnih in Theihpinak cu a la ih Kuang sungah a ret, zawnfungpawl cu Kuang khângpawl sungah a hrawlh, cule Kuang parah Sualkhuhthawinak Hmun a ret. 21 ^dCule Jehovah in Mosi thu a rak pek vekin, anih in Biakbûk sungah Kuang cu a kenglut, khuhnak puanzar a zar ih, Theihpinak Kuang cu a dángpit.

40:17^a Suah 40:2; Mip 7:1

40:18^b 2San 1:3

40:20^c Suah 25:16; Dnp 10:5; 1Sp 8:9; 2San 5:10; Heb 9:4

40:21^d Sem 6:22; Suah 26:33

22 ^aCabuai cu Tawnawknak Puanthlam sungih Biakbûk sak lam sir, a puanzar lengah a ret. 23 ^bCule Jehovah in Mosi thu a rak pek vekin sang cu Jehovah hmaika ah remten a ret. 24 Meito ṭhuam cu Tawnawknak Puanthlam sungah, Cabuai hmai zawnah, Biakbûk thlang lam sirah a ret. 25 ^cCule meitopawl cu Jehovah in Mosi thu a rak pek vekin Jehovah hmaika ah a vâng. 26 ^dAnih in puanzar hmaiih Tawnawknak Puanthlam sungah Sui Biakṭheng a ret. 27 ^eCule Jehovah in Mosi thu a rak pek vekin, cumi parah rimhmui thaw a ur. 28 Biakbûk luhnak ah puanzar a zar. 29 ^fCule Tawnawknak Puanthlam ih Biakbûk luhnak hmaiah Meiur Thilhlăn Biakṭheng a ret ih, Jehovah in Mosi thu a rak pek vekin, Meiur Thilhlăn le Thlairawl Thilhlăn cu a parah a hlan. 30 Tawnawknak Puanthlam le Biakṭheng karlakah Maihum a ret ih, khawlhawknak hrangah cu tawkah tidai a ret. 31 ^gCule Mosi, Aaron le a fapapawl cun cu tawkih tidai in an kut le an ke an khawlh. 32 ^hTawnawknak Puanthlam an thlen tinten le Biakṭheng an naih tikah, Jehovah in Mosi thu a rak pek vekin an khawlh. 33 ⁱCule Biakbûk le Biakṭheng kimvel hmuahhmuah ah tualrawn a tuah ih, tualrawn luhnak puanzar a zar. Cutin Mosi cun hna cu a ṭheh thluh.

40:22^a Suah 26:35

40:23^b Sem 6:22; Suah 25:30; Pui 24:5-8

40:25^c Sem 6:22; Suah 25:37; 40:4

40:26^d Suah 30:6; 40:5

40:27^e Sem 6:22; Suah 30:7

40:29^f Sem 6:22; Suah 29:38-42; 40:6

40:31^g Suah 30:19-20

40:32^h Sem 6:22

40:33ⁱ Suah 27:9-18; 40:8

Mero le Ropitnak in Biakbûk a Luahkhat

34 ^aCun Tawnawknak Puanthlam cu mero in a khuh ih, Biakbûk cu Jehovah-ih ropitnak in a khat. 35 ^bCule Mosi cu Tawnawknak Puanthlam sungah a lut thei lo, ziangruangahtile cumi tlunah mero a cawl ih, Biakbûk cu Jehovah-ih ropitnak in a khat. 36 ^cBiakbûk tlun ihsin mero lâkso a si tinten Israel tefapawl cu an khualtlawn an peh ṭheu. 37 ^dAsinan mero cu lâkso a si lo ahcun, cumi lâkso a si ni hlanlo khual an tlâwng lo. 38 ^eZiangahtile an khualtlawn sung hmuahhmuah Israel sungza hmuahhmuah ih mithmuh ah sun ah Jehovah-ih mero cu Biakbûk tlunah a zām ih, cu tawkah zan ah mei a ra um ṭheu.

40:34^a Pui 16:2; Mip 9:15-23; 1Sp 8:11; Isa 6:4; Eze 43:4; Joh 1:14; Thu 15:8

40:35^b 1Sp 8:11; 2San 5:13-14

40:36^c Mip 9:17-23; Neh 9:19

40:37^d Mip 9:19-22

40:38^e Suah 13:21; Mip 9:12, 15; Sam 78:14; Isa 4:5; 1Ko 10:1