About Bible Thianghlim | ©

BibleThianghlim – Dān Peksalnak

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Dān Peksalnak

12345678910
11121314151617181920
21222324252627282930
31323334

• A ngantu: Mosi
• A huap sung cān: B.C. 1445-1406 hrawng
• Ngan kum: B.C. 1406 hrawng

Hi cabu hin Suahlannak, Puithiam Hnaṭuannak le Mipum Siarnak sungih ngan zo mi Jehovah-ih Dānpawl tampi a nawlhsal. Cuihtlunah zin phunphunin a pek cia mi dānpawl cu a bêt. Kanaan ram ih nundān thar ih nunnak ah Pathian Dān hmandān ding Dān Peksalnak cabu ah kan hmu. Ṭhimnakah, ziangtin an inn an sak ding (22:8) ti le, ziangtin an ló an let ding (25:4) ti mi thu zirhnak tla a um.

Cuihhleiah Dān Peksalnak ih dānpawl cu mi senpi hnenih Mosi in thu a rak sim mipawl lakih thu hrekkhat an si. Amai thihnak ding hrang a timlam rero. Cuih san minung nautadeuh pawl in Kanaan an lak ding le amai thih hnuah rinumteih Pathian an rĕn ding kha Mosi in a duh tuk lawmmam. Curuangah Dān Peksalnak ah dānpawl a tam vekin, ralrin peknak le thapeknak khal a tam. A thupibikin Mosi in an thinlung thuhla Israel-mipawl hnenah khohkhah zetin a sim. Jehovah hnenah le a thukham lakah pumpak ih an pekawk cio ding a duh. Thinlung in Bawipa duhdawt cio dingin (6:5) le ṭihzah cio dingin (5:29) Israel-mipawl a ngen hai.

Dān Peksalnak hin thu hlawm pali a nei. Bung 1-4 sungah, Mosi in Israel thuanthu a nawlhkirsal. Pathian zangfahnak le an hrangih a hnaṭuan ropi pawl tla cu mi senpi a theihtersal. A takih mirinum an si thei nak dingah anmah kha thapek a duh. Bung 5-26 sungah dān tamsawn an tel. Dān hrampi in a thawk ih (bung 5-11), dān cipciar ah a ṭhawn (bung 12-26). Cun bung 27-30 pawl in Israel-ih duhhrilnak rahsuahpawl kan hmu. Thulunnak in malsawm a hring ding ih, thulunlonak in camsiatnak a hring ding. Jehovah duhdawt le a thulun ruangih nunnak hril sawn dingin, Mosi in mi senpi a ngen (30:19-20). A netnakah bung 31-34 pawl ah Mosi-ih a netabik cangvaihnak le thusimpawl ngan a si. A thih hlanah, Mosi in Israel hruaitu thar dingah Joshua a ruat. Cule Israel-mipawl cu Kanaan la dingin an tiar thlang.

Dān Peksalnak cu Khristian hrangah a thupi tuk. Apostol Paul in Korinth kawhhran zirh dingah Dān Peksalnak sungih dān hi a rak hmang (1Ko 9:8-11). Apostol Peter in Jesu cu Dān Peksalnak 18 sungih Pathian thutiamkam profet ropi a si a rak ti (Apo 3:22-23). Jesu amah rori in Setan sualfawrhnak a donak ah hi cabu sungih thu a phunphun a rak hmang (Mat 4:1-11). Thinlung zate ih Pathian duhdawt ding thu Dān Peksalnak 6:5 ih thupek ropibik kha Jesu in a rak zirh fawn (Mat 22:37-38).

1

Mosi in Israel-mipawl Thu a Sim

1 ^aHipawl cu Jordan nisuahnak lam kap ramṭhing, Paran, Tofel, Laban, Hazeroth le Dizahab pawl karlakih um Suf hmai zawn Arabah phairawn ah Israel miphun zate hnenah Mosi ih a sim mi ṭawngkampawl an si. 2 ^bHoreb ihsin Kadesh Barnea cu Seir tlang zin zawhin ni hleikhat feh a si. 3 ^cA kum sawmlitnak, thla hleikhatnak a ni khatnak ah hitin a si, an hrangih thupekpawl si dingah Jehovah in amah thu a pek mi hmuahhmuah bangtukin, Mosi in Israel tefapawl hnenah a sim. 4 ^dMosi in Heshbon ih cêng, Amor-mipawlih siangpahrang Sihon le Edrei khua le Ashtaroth khua ih cêng Bashan siangpahrang Og a thah hnuih a sim mi a si.

1:1^a Mip 10:12; 13:29; Jos 3:16

1:2^b Mip 24:18; Jos 15:3

1:3^c Mip 33:38; Jos 4:19

1:4^d Mip 21:21-35; Jos 9:10

5 ^aMoab ram ih Jordan nisuahnak lam kapah Mosi in hih dān hi simfiang a thawk ih, 6 ^b“Horeb ah Jehovah kan Pathian in kan hnenah, ‘Himi tlang ah hin nan cêng rei thlang, 7 ^cher uhla, nan khualtlawn thawk uh. Amor-mipawlih tlangpawl le Arabah phairawn ih an kiangkap ram hmuahhmuah, tlangpawl le phairawnpawl, Negev le tifinriat kap tluan, Kanaan-mipawlih ram le Lebanon, tiva pi, Zufraṭis tiva tiang feh uh. 8 ^dZoh hnik uh, nan hmaiah ram ka ret cia, anmah le an hnuih an cithlahpawl pe dingah, Jehovah in nan pupápawl a si mi Abraham, Isak le Jakob pawl hnenih sia a rak săm mi ram ah cun va lut uhla, va la uh,’ tiin in sim.

1:5^a Mip 21:11

1:6^b Suah 3:1; Mip 10:13

1:7^c Sem 2:14; Mip 21:1; Jos 11:16

1:8^d Suah 13:11; Mip 34:2; Jos 23:13

Hruaitu Hrilnak

9 ^a“Cule cu laiah nan hnenah, ‘Keimah lawng cun ka lo tlin hai lo. 10 ^bJehovah nan Pathian in a rak lo karhzaiter ih, ngai hnik uh, tuihsun ah van ih arsi zat in nan karhzai zo a si. 11 ^cJehovah nan pupápawlih Pathian cun atu-ih nan mipum ih let 1000 in lo karhzaiter sehla, thu a lo kam cia vekin, thlawsuah lo pe hram seh! 12 ^dZiangtin so keimah lawng cun, nan buainakpawl, nan phurritpawl le nan elbuaiawknakpawl ka phurh thei ding. 13 ^eNan hnámpawl sung ihsin, mifim, thu theithiam mi le thil thei mi pacangpawl hril uhla, anmahpawl kha nanmai tlunah lubân ah ka tuah hai ding,’ tiin ka lo ti. 14 Cule nannih in in sawn ih, ‘Tuah dingih in sim mi thil hi a ṭha a si,’ tiah in ti. 15 ^fCutin kei in, mifim le thil thei mi, nan hnámpawlih lubânpawl kha ka hril hai ih, nanmai tlunih lubân ah, a thawng hotu, a za hotu, sawmnga hotu, pahra hotu le nan hnámpawl hrangih bawipawl ah ka tuah hai a si.

1:9^a Suah 18:18; Mip 11:14; Sam 38:4

1:10^b Sem 15:5; Suah 32:13

1:11^c Mip 10:36

1:12^d Suah 5:22

1:13^e Sem 47:6

1:15^f Suah 5:14; 18:25; Mip 1:4; 1Sp 14:27

16 ^a“Cun cuih ṭumah nan thuṭhentupawl hnenah thu ka pe ih, ‘Nan unaupawl karlakih thubuaipawl kha ngaithla uhla, mi pakhat le a unaupa karlakih thubuai siseh, mi pakhat le a zawngih um ram dang mi karlakih thubuai siseh dik zetin thu nan ṭhensak pei. 17 ^bThuṭhennak ah mi thleidan nan nei lo pei, mitenau le miupa bangrepin nan ngaithlaksak pei. Zohman nan ṭih lo pei, ziangahtile thuṭhennak cu Pathian ta a si. Nan hrangih a har tuk mi thubuai cu ka hnenah rak thlen uhla, keimah in cumi cu ka ngaithla ding,’ ka lo ti. 18 ^cCule nan tuah ding mi thil zaten cuih ṭumah thu ka rak lo pe.

1:16^a Sem 31:37; Suah 12:19, 49; 1Sp 3:9; Sam 72:1; Thf 2:9; Joh 7:24, 51

1:17^b Suah 18:26; Thf 29:25; Apo 10:34; Jam 2:1

1:18^c Sem 39:11

Thlingthlatupawl Thlahsuahnak

19 ^a“Cule Jehovah kan Pathian ih thu in pek vekin, Horeb tlang ihsin kan păwksuak ih, Amor-mipawlih tlang zin ih nan hmuh mi ramṭhing kau zet le rapthlak zet kha kan pahtlăng. Cun Kadesh Barnea kan thleng. 20 Cule nan hnenah, ‘Jehovah kan Pathian ih in pek mi Amor-mipawlih tlang ram nan thleng. 21 ^bZoh hnik, Jehovah na Pathian in na hmaiah ram a ret cia, Jehovah na pupápawlih Pathian in na hnenih a sim cia vekin fehso awla, va la aw, ṭih hlah, na bei khal dawng hlah seh,’ tiin ka lo sim.

1:19^a Mip 13:26; Sam 136:16; Jer 2:2, 6; Hos 13:5

1:21^b Mip 14:9; Jos 1:6, 9, 18; 8:1; 2Sam 10:12

22 ^a“Cule nan zaten ka kiangah nan ra ih, ‘Kan hmaiah mi thlah uhsi. Cupawl cun kan hrangah ram va hāl hai sehla, khui lamzin in kan fehso ding ih, khui khuapawl ah kan thleng ding ti thu in simsal ding,’ tiah nan ti. 23 ^bCuih thil cun ka lung i hmuiter. Cule hnám khat ihsin mi pakhat ciar, nan lak ihsin mi hleihnih ka hril. 24 ^cCule annih cu an păwksuak ih, tlang ram ah an kaiso. Cule Eshkol Hawrkuam ah an feh ih, cumi cu an va thlingthla. 25 ^dAn kut in cuih ram ih thingthei rah hrekkhat an lo ih kan hnenah an run keng, cule kan hnenah thuhla an run thlensal ih, ‘Jehovah kan Pathian ih in pek mi ram cu ram ṭha a si,’ tiah an ti.

1:22^a Sem 42:9; Mip 13:1-3

1:23^b Mip 13:1-3

1:24^c Mip 13:21-25

1:25^d Mip 13:27; 14:7; Jos 1:2

Israel Helnak

26 ^a“Sikhalsehla nannih cu nan hung feh duh lo, cuhnakin Jehovah nan Pathian thupek dokalhin nan hél sawn riangri. 27 ^bCule nan puanthlampawl sungah nan phunzai ih, ‘Jehovah in in huat ruangah, in siatsuah dingah, Amor-mipawl kut sungih pe dingin Izip ram ihsin in hruaisuahnak a si. 28 ^cKhui lamah kan hung fehso ding? Kan unaupawl in, “Cu tawkih minungpawl cu kannih hnakin an tumin an sângsawn. An khuapawl cu an tûm ih van tăwngih kulh hnget mi an si. Cuihhleiah cu tawk hmun ah cun Anak fapapawl kan rak hmu,” tiin kan thinlung in beidawngter,’ tiah nan ti.

1:26^a Mip 14:1-4, 9; Dnp 9:23; Heb 3:16

1:27^b Sam 106:25

1:28^c Mip 13:32

29 ^a“Cun kei in nan hnenah, ‘Thinphâng hlah uhla, anmahpawl cu ṭih fawn hlah uh. 30 ^bNan mithmuh ah Izip ram sungih nan hrangih a lo tuahsak mi hmuahhmuah bangtuk khan nan hmaiih a fehtu Jehovah nan Pathian in nan hrangah ral a lo dosak ding. 31 ^cCule nan fehnak lamzin hmuahhmuah ah himi hmun nan thlen tiangin mipa in a fapa a cawi vekin, ramṭhing ah Jehovah na Pathian in ziangtin a lo cawi ti na hmu,’ tiah ka lo ti. 32 ^dCuti cing khalin Jehovah nan Pathian nan rak zum cuang lo. 33 ^eAmah cu zan ah meisa, sun ah mero thawi nan fehnak ding lamzin lo khihhmuh dingin, nan riahhmun sāmnak ding lo hawlsak dingin, zin ih nan hmaiih a rak fehtu kha a si.

1:29^a Neh 4:14

1:30^b Suah 14:14

1:31^c Jer 31:32; Hos 11:3; Apo 13:18

1:32^d Mip 14:11; Zef 3:2; Heb 3:16-19

1:33^e Suah 13:21; Mip 10:33

Israel Dāntatnak

34 ^a“Cule Jehovah in nan ṭawngkampawl thawmvâng a thei ih, a thin a heng, cule, 35 ^b‘Nan pupápawl hnenah pe dingih sia ka săm mi ram ṭha cu Jefunneh-ih fapa Kaleb siarlo hi san minung ṭha lo pawl lakih mi pakhat hmanin an hmu hrimhrim lo ding; 36 ^canih cun a hmu ding ih, a pal zo nak ram kha amah le a tefapawl hnenah ka pe ding, ziangruangahtile anih cun pumhlum in Jehovah a thlun,’ tiin thukamnak a tuah.

1:34^a Mip 11:1; 14:23; 32:14; Eze 20:15; Heb 3:11

1:35^b Mip 14:29; Heb 3:18

1:36^c Mip 13:6; 14:24

37 ^a“Jehovah cu nanmai ruangah ka par khalah a thin a heng, ‘Nangmah tiangin cu tawk hmun ah na lut lo ding. 38 ^bNa hmaiih a ding mi Nun-ih fapa Joshua kha, cuih ram ah a lut ding. Amah cu thape aw. Ziangahtile anih in cuih ram cu Israel-mipawl ro ah a coter ding. 39 ^cCun mi ih thiarhloh men ding nan ti mi, nan fanau tete pawl le tuihni ih a sia le a ṭha theihnak nei lo, nan tefapawl cu, cuih ram ah an lut ding. Cuih ram cu anmah ka pe ding ih annih in an la ding. 40 ^dAsinan nannih bélte cu, her uhla, Tipi Sen zinin ramṭhing ah feh uh,’ in ti.

1:37^a Mip 27:13; Sam 106:32

1:38^b Mip 11:28; Jos 11:23; Sam 78:55

1:39^c Mip 14:3; Isa 7:15-16

1:40^d Suah 14:27; Lai 11:16

41 ^a“Cun nannih in in sawn ih ka hnenah, ‘Jehovah parah kan sual zo a si. Jehovah kan Pathian ih thu in pek mi hmuahhmuah vekin, kan hung so ding ih, kan do ding,’ tiah nan ti. Cule nan zaten ral donak ralthuampawl thawn nan thuamaw. Cun tlang lamih hung soh cu a áwl ding tiah nan rak ruat.

1:41^a Mip 14:40

42 ^a“Cule Jehovah in ka hnenah, ‘An hnenah, “Hung so hlah uh, do khal do hlah uh, ziangahtile ka lo umpi lo ding, nan ralpawl in an lo neh pang ding,” tiah sim hai aw,’ tiah i ti. 43 ^bNan hnenah ka lo sim nân, nan ngaithla duh lo, cuhnakin Jehovah-ih thupek dokalhin nan hél, hngal zetin nan cangvai ih, tlang parah nan hung so sawn. 44 ^cCule cuih tlang ih a cêng mi, Amor-mipawl cu nanmah lo táwng dingin an ra suak. Cule khuai ih mi an hual vekin an lo hual ih, Seir ihsin Hormah tiang an run lo neh. 45 ^dCun nan ra kir ih Jehovah hmaiah nan ṭap. Asinan Jehovah in nan aw a ngai lo, a hna khal a lo tŭn lo. 46 ^eCule cu tawkih ni nan hman zat zulhin, Kadesh ah ni tampi nan rak câm.

1:42^a Mip 14:41-43

1:43^b Mip 14:44; Dnp 17:12-13

1:44^c Mip 14:45; 24:18; Sam 118:12

1:45^d Mip 14:1; Job 27:9; Sam 18:41; Thf 1:28; 28:9; Isa 1:15; Jer 14:12; Ṭah 3:8; Mik 3:4; Joh 9:31

1:46^e Mip 20:1

2

Ramṭhing ih Khualtlawnnak

1 ^a“Cun Jehovah ih i sim vekin kan her ih, Tipi Sen zin ihsin ramṭhing lamah kan feh, cule Seir tlang kha ni tampi kan hēl.

2:1^a Suah 14:27; Mip 21:4; 24:18

2 “Cule Jehovah in ka hnenah, 3 ^a‘Hih tlang hi rei tawk nan rak hēl zo, sak lamah her thlang uh. 4 ^bCule mipi kha, “Seir ih um, Esau-ih cithlah, nan unaupawlih ramkulh sung nan fehtlăng zikte thlang. Annih cun an lo ṭih ding. Curuangah fimkhur zetin um uh. 5 ^cAnmah kha va do hlah uh, ziangahtile an ram khui tawk hman, keneh khat tia hman ka lo pe hrimhrim lo ding. Ziangruangahtile Seir tlang cu amai ta dingah Esau ka rak pe zo. 6 Nan ei dingah anmah hnen ihsin paisa in rawl nan lei pei. Cule nan in ding tidai khal an hnen ihsin paisa in nan lei pei,” tiin thu a pe hai,’ tiin i sim. 7 ^dZiangahtile Jehovah na Pathian in na kut hnaṭuan zaten mal a rak lo sawm. Anih in a kau zet mi, hi ramṭhing na fehtlăngnak a thei. Jehovah na Pathian cu hih kum 40 sung na hnenah a um. Zianghman na rak tlasam lo.

2:3^a Dnp 2:7, 14

2:4^b Sem 36:8; Suah 15:16; Mip 20:14-21

2:5^c Jos 24:4

2:7^d Suah 13:21; Mip 14:33; Jos 5:6; Neh 9:21; Amo 2:10

8 ^a“Cule Elath khua le Ezion Geber khua ihsin Arabah phairawn zin zawhin, Seir ih a cêng mi Esau-ih cithlah, kan unaupawlih ram kan lăn tikah, kan her ih, Moab Ramṭhing zinin kan feh. 9 ^bCun Jehovah in ka hnenah, ‘Moab kha va hnaihnăwk hlah uh, ral donak ah va do hlah uh. Ziangahtile an ram khui tawk hman na neih dingah ka lo pe lo ding. Ziangruangahtile Ar khua cu Lot cithlahpawl hnenah an ta dingah ka pek zo a si,’ tiah i ti,” tiah a sim hai.

2:8^a Mip 20:21; 21:4; 33:35; 1Sp 9:26

2:9^b Sem 19:37-38; Mip 21:15

10 ^a(Khuahlan ah cun cu tawkah Em-mipawl an rak cêng, cupawl cu Anak-mipawl vekin an cak, an tam ih an sâng. 11 ^bAnmahpawl cu Anak-mipawl vekin mimangkawngpawl tiah an ruat ih, Moab rammipawl cun Em-mipawl tiah an ko. 12 ^cA hlanah cun Seir ah Hor-mipawl an rak cêng dah, asinan Esau-ih cithlahpawl in anmah cu an dawisuak, anmai hmai ihsin an hloralter ih, anmahpawl aiah an va cêng. Cumi cu Jehovah in anmah a pek mi, an ta a si mi ram parih Israel-mipawl in an tuah ṭheu vek khan a si.)

2:10^a Sem 14:5; Mip 13:22, 33

2:11^b Sem 14:5

2:12^c Sem 14:6; Mip 21:25, 35

13 ^a“Jehovah in, ‘Atu-ah tho uhla, Zered Hawrkuam paltlăng uh,’ tiah a ti. Cutin Zered ruam cu kan paltlăng. 14 ^bJehovah in an hnenih sia a rak săm bangtukin, mipi riahhmun ihsin ral do mi lakih, cuih san minung zaten an thih ṭheh hlanlo, Kadesh Barnea ihsin Zered Hawrkuam kan paltlăng sung cu kum 38 a rei. 15 ^cThungaiten mipi riahhmun ihsin anmah hloralter dingin an thih ṭheh hlanlo, Jehovah-ih kut cu an parah a um.

2:13^a Mip 21:12

2:14^b Mip 14:28-35; Jos 5:6

2:15^c Jud 1:5

16 “Cule hitin a si, mipi lak ihsin ral do mi zaten an hloral ih an thih ṭheh tikah, 17 Jehovah in ka hnenah, 18 ^a‘Tuihsun hi Moab ramri a si mi, Ar khua paltlăng ding na si. 19 ^bCule Ammon tefapawl kiang na thlen tikah, anmahpawl kha hnaihnăwk hlah awla, do fawn hlah. Ziangahtile na ta dingah Ammon tefapawlih ram hmun khat hman ka lo pe lo ding. Ziangruangahtile cumi cu an ta dingah Lot tesinfapawl ka rak pe zo a si,’ tiah i ti,” tiah a ti.

2:18^a Mip 21:15

2:19^b Sem 19:38; 2San 20:10

20 ^a(Cuih ram cu mimangkawngpawl ram vekih ruah a si fawn. Hi hlanah cu tawkah mimangkawngpawl an rak cêng. Ammon-mipawl in anmah cu Zamzum-mipawl tiah an ko. 21 ^bAnak-mipawl vekin an cak, an tam ih an sâng. Asinan Jehovah in Ammon-mipawl hmaiah anmahpawl cu a hloralter hai. Cule Ammon-mipawl in cupawl cu an dawisuak ih anmah aiah an va cêng. 22 ^cAnmai hmaiih Hor-mipawl a hlohralter laiih Seir ih cêng Esau-ih tesinfapawl hrangih a rak tuah vekin a si. Cule Hor-mipawl cu Esau-ih tesinfapawl in an dawisuak ih an aiah tuihsun ni tiangin an cêng. 23 ^dCule Gaza tiang khawtepawl ih a um mi, Av-mipawl khal Kaftor ih a ra suak mi Kaftor-mipawl in an hloralter ih anmah aiah an va cêng.)

2:20^a Sem 14:5

2:21^b Dnp 2:10

2:22^c Sem 14:6

2:23^d Sem 10:14, 19; 2Sp 17:31; Jer 47:4; Amo 9:7

Siangpahrang Sihon Nehnak

24 ^a“Jehovah in, ‘Tho uhla, feh uh, cule Arnon tiva tankai uh. Zoh hnik uh, Heshbon khaw siangpahrang Amor-mi Sihon le a ram cu nan kut ah ka lo pe. Amah cu ral doin do uhla, cuih ram va la dingin thawk uh. 25 ^bTuihni ah van rāng hnuaiih um miphun hmuahhmuah parah nangmah huphurhnak le nangmah ṭihnak ret ka thawk ding. Na thuthang a theitu cu nangmah ruangah an khūr ding ih, thinharin an um ding,’ tiah i ti.

2:24^a Mip 21:13; Lai 11:13, 18

2:25^b Sem 35:5; Suah 15:14-16; Jos 2:9, 11; 1San 14:17; 2San 14:14; Isa 2:19

26 ^a“Cule Kedemoth Ramṭhing ihsin Heshbon siangpahrang Sihon hnenah remnak ṭawngkampawl kengin palaipawl ka thlah. 27 ^bA hnenah, ‘Na ram paltlăng ning; lamzin lawnglawng ka zawh ding ih, ka vawrh lamah siseh, ka keh lamah siseh ka pial lo ding. 28 ^cKa ei ding rawl paisa ih lei dingin i zawrh aw. Ka in ding tidai khal paisa ih lei dingin i zawrh aw. Ke thaw lawngin fehtlăng ning. 29 ^dJehovah kan Pathian in kanmah in pek ding mi ram lut dingih Jordan ka tankai hlanlo, Seir ih um, Esau-ih cithlahpawl le Ar khua ih um, Moab rammipawl in ka parih an rak tuah vekin tuah hram aw,’ tiah ka ti.

2:26^a Jos 13:18; Lai 11:21-22; 21:13; 2Sam 20:19; 1San 6:79

2:27^b Mip 21:21-22

2:28^c Mip 20:19

2:29^d Mip 20:18; Dnp 23:3-4; Lai 11:17

30 ^a“Asinan Heshbon siangpahrang Sihon cun a ram fehtlăng in siang lo. Ziangahtile Jehovah nan Pathian in a khawruahnak a hakter ih a thinlung a ruhter. Cutiin tuihni ih a cang mi vek hin, amah kha nan kut ih a lo pek thei nak a si.

2:30^a Suah 14:17; 1Sp 12:15; Ṭah 3:65; Rom 9:18

31 ^a“Cule Jehovah in ka hnenah, ‘Zoh hnik, Sihon le a ram cu na hnenih lo pek ka thawk zo. Cu paih ram cu ro ih na co thei nak dingah, cumi cu va lâk thawk thlang aw,’ tiah i ti. 32 ^bCun Sihon le a mipawl zaten, Jahaz khua ih kanmah do dingin an ra păwksuak. 33 ^cCule Jehovah kan Pathian in amah cu kan hnenah in rak pe. Cule Sihon, a fapapawl le a mipawl zaten kan neh. 34 ^dCuih ṭumah a khua zaten kan lâk ṭheh. Cule khaw kip ih um mipapawl, nunaupawl le an fanau tete pawl kha cimit ko kan that, zohman zuah mi kan nei lo. 35 ^eKanmai hrang dingah sumhnámpawl le kan lâk mi khuapawl ih ralthillawnpawl lawng ralthillâk ah kan la. 36 ^fArnon tiva kapih um, Aroer khua ihsin le kuam ih um khua ihsin Gilead tiangih um mi khuapawl cu kan hrangah a cak tuk ti mi khua pakhat hman an um lo. Jehovah kan Pathian in an zaten in pe a si. 37 ^gAsinan Jehovah kan Pathian in hmun hrekkhat naih lo dingin in kham. Ammon tefapawlih ram, Jabbok tiva naih hmun pauhpauh le tlang ram khuapawl khal kan naih lo.

2:31^a Sem 12:7

2:32^b Mip 21:23

2:33^c Suah 23:31; Mip 21:24

2:34^d Mip 21:2; Sam 106:34

2:35^e Sem 34:29

2:36^f Mip 32:34, 39; Sam 44:3

2:37^g Sem 32:22; Mip 21:24

3

Siangpahrang Og Nehnak

1 ^a“Cule kan her ih Bashan zinin kan so. Cun Bashan siangpahrang Og cu kanmah do dingah amah le a mipawl zaten Edrei ah doaw dingin an ra suak. 2 ^bCule Jehovah in ka hnenah, ‘Amah cu ṭih hlah, ziangahtile a minungpawl hmuahhmuah le a ram thawn amah cu na kut ah ka lo pe zo. Heshbon ih cêng, Amor-mipawlih siangpahrang Sihon parih na tuah vekin, a par khalah na tuah pei,’ tiah i ti.

3:1^a Mip 21:33

3:2^b 2Sp 19:6; Isa 7:4

3 ^a“Cutin Jehovah kan Pathian in Bashan siangpahrang Og le a miphun hmuahhmuah cu kan kut ah in pe. Cule minung pakhat te hman nungdam tâng nawn lo tiangin amah cu kan neh. 4 ^bCuih ṭumah a khuapawl hmuahhmuah kan la ṭheh. An hnen ihsin kan lâk lo mi khua pakhat hman a um lo. Bashan ram sungih Og ih uk mi ram, Argob ramṭhen hmuahhmuah ih khaw 60 pawl cu kan la. 5 Kulh nei lo khaw tampi hleiah, hi khuapawl hmuahhmuah hi hauhruang sangpi pi, kulh kăwtkapawl le kăwt hrawlhpawl thawi kulh hnget mi an si. 6 Cule anmah cu cimit ko kan that, Heshbon siangpahrang Sihon parih kan tuah vekin, khaw kip ih um mipapawl, nunaupawl le an fanau tete pawl tla cimit ko kan that ṭheh. 7 Asinan cuih khua sumhnám zate le ralthillâk cu kanmai hrangah ralthillawn ah kan la.

3:3^a Mip 21:24, 35

3:4^b Mip 3:6; 21:24, 33; Dnp 2:34-35

8 ^a“Cule cuih ṭumah ram cu Arnon tiva ihsin Hermon tlang tiang Jordan nisuahnak lamih a um mi, Amor-mipawlih siangpahrang pahnih hnen ihsin, 9 ^b(Hermon ti mi cu Sidon-mipawl in Sirion tiin an ko ih, Amor-mipawl in Sinir tiah an ko), 10 ^cBashan siangpahrang Og ih uk mi ram sungih khuapawl, phairawn khuapawl hmuahhmuah, Gilead ram pumpi, Bashan ram pumpi, Salkah le Edrei tiangin kan la. 11 ^dThungaiten, Bashan siangpahrang Og lawng hi mimangkawngpawl lak ihsin a tāngsŭn a si. Ngai hnik, a ihkhun cu thir ihkhun a si ih, cumi cu Ammon tefapawlih khawpi Rabbah ah tuihni tiang a um a si lo maw? Tahdān kel dawng bangtukin, a sau lam cu dawng kua a si ih, a kauh lam cu dawng li a si.

3:8^a Mip 32:33; Jos 11:3, 17; 13:8-12; Lai 3:3; 1San 5:23; Sam 42:6; Sol 4:8

3:9^b 1San 5:23; Sam 29:6; Sol 4:8; Eze 27:5

3:10^c Jos 12:5; 1San 5:11

3:11^d Sem 14:5; Jos 13:25; 2Sam 11:1; 1San 20:1; Jer 49:2; Eze 21:20; Amo 1:14

Nisuahnak lam Ram Ṭhenawknak

12 ^a“Cule hi ram cu, cuih ṭumah kan la. Arnon tiva kapih um Aroer kimvel ram cu Reuben-mipawl le Gad-mipawl ka pe. Gilead tlang hrek le cu tawkih khuapawl khal anmah ka pe. 13 ^bGilead ram a tāng lai mi le Og siangpahrang ih uk mi Bashan ram pumpi cu Manasseh hnám a hrek hnenah ka pe. Argob ramṭhen zate le Bashan ram pumpi cu mimangkawngpawlih ram tiah an ko. 14 ^cManasseh-ih fapa Jair in Argob ramṭhen zate, Geshur-mipawl le Maakath-mipawl ih ramri tiangin a lâk ih, Bashan cu amai hmin suangin Havoth Jair tiah hmin a sak, tuihni tiangin an ko. 15 ^dGilead ram cu Makir hnenah ka pe fawn. 16 ^eReuben-mipawl le Gad-mipawl hnenah cun Gilead ihsin Arnon tiva tiang, ramri dingah a kâwr laifang, Ammon tefapawlih ramri Jabbok tiva tiang ka pe. 17 ^fRamri dingah Jordan tiang Arabah phairawn khal ka pe. Kinnereth ihsin Cite Tipi ti mi Arabah phairawn tipi, Pisgah tlang hrâp pawlih tăng, nisuahnak lam tiang ka pe.

3:12^a Mip 32:33; 34:14; Dnp 2:36; Jos 12:2, 6; 13:8-12

3:13^b Sem 14:5

3:14^c Mip 32:41; Jos 12:5; 19:47; 2Sp 25:23; 1San 4:19; Sam 49:11; Jer 40:8

3:15^d Sem 50:23; Mip 32:39-40

3:16^e Mip 21:24

3:17^f Sem 14:3; Mip 34:11; 2Sam 2:29; Eze 47:8

18 ^a“Cun cuih ṭumah nan hnenah, ‘Jehovah nan Pathian in hi ram cu nan lâk dingah a lo pe zo. Nannih ral do mi zaten ralthuam thawn nan unau Israel tefapawl hmaiah nan tankai pei. 19 ^bAsinan nan nupipawl, nan fanau tete pawl le nan sumhnámpawl (sumhnám tampi nan nei ti ka thei) cu ka lo pek cia mi nan khuapawl ah, 20 ^cJehovah in nanmah a lo pek vekin, cawlhhahdamnak kha nan unaupawl hnenah a pek hlan tiang le Jehovah nan Pathian in a pek cia mi Jordan khat lam ram kha an lâk ve hlanlo an um hrih pei. Cun ka rak lo pek mi nanmai ta ciar ah nan kirsal ding,’ tiin thu ka rak lo pe.

3:18^a Mip 32:17; Jos 1:13

3:19^b Sem 31:50; Mip 32:16; Jos 1:14

3:20^c Jos 1:12-15

Kanaan ah Mosi Luh Sian a Si Lo

21 ^a“Cule cuih ṭumah Joshua hnenah, ‘Jehovah na Pathian in hi siangpahrang pahnih parah a tuah mipawl zaten na mit rori in na hmu ṭheh zo. Cutin Jehovah in na pahtlăng lai ding mi lalrampawl zate parah a tuah lai ding a si. 22 ^bAnmahpawl cu na ṭih lo pei, ziangahtile Jehovah na Pathian amah rori in a lo dosak ding a si,’ tiin thu ka rak pe.

3:21^a Jos 11:23

3:22^b Suah 14:14; 2San 32:8; Sam 23:4; Isa 41:10

23 ^a“Cun cuih ṭumah Jehovah kha, 24 ^b‘Maw Bawipa Jehovah, nangmah in na siahhlawh hi, na ropitnak le na kut cak hmuhter na thawk zo, ziangahtile ziang pathian so van ah siseh, leilung ah siseh, na hnaṭuanpawl vek le na cahnak thil ti vek ti thei? 25 ^cZangfahten, Jordan ralkhat lamih um ram ṭha, tlang mawi pawl le Lebanon ah i tánkaiter awla, i hmuter hram aw,’ tiin ka rak ngen.

3:23^a Mip 27:12-14; Dnp 32:48-52

3:24^b Suah 8:10; 2Sam 7:22; Sam 71:16

3:25^c Jos 1:4; Lai 3:3; 1Sp 4:33

26 ^a“Asinan Jehovah cu nanmah ruangah ka parah a thin a heng ih, i rak ngaithla duh lo. Cule Jehovah in ka hnenah, ‘Tawk seh! Hih thuhla cu ka hnenah sim nawn hlah. 27 ^bPisgah tlang zimah kai awla, nitlaknak lam, sak lam, thlang lam le nisuahnak lam pawl thlir aw. Cumi cu na mit in zoh aw, ziangahtile nang cun hi Jordan hi na tankai lo ding. 28 ^cAsinan Joshua kha thu pe aw, cule amah kha thape awla, cakter aw. Ziangahtile anih cu hi miphun hmaiah a feh ding ih, na thlir ding mi ram hi anih in anmah cu ro ah a coter hai ding a si,’ tiah i ti. 29 ^dCule kannih cu Beth Peor khaw ralden phaikuam ah kan câm.

3:26^a Dnp 1:37; 31:2; 34:4

3:27^b Sem 13:14; Mip 20:12; 21:20; 27:12-14; Dnp 32:48-52

3:28^c Mip 27:18-23

3:29^d Mip 23:28; Jos 13:20

4

Thulung dingih Mipi Thupeknak

1 ^a“Cule Maw Israel-mipawl, atu-ah cun Jehovah nan pupápawlih Pathian in a lo pek ding mi ram ah nungdamih, nan luh ih, nan lâk thei nak dingah nan thlun dingih ka lo zirh mi sakhaw dānpawl le zīn le dān pawl hi ngaithla uh. 2 ^bThu ka lo pek mi Jehovah nan Pathian-ih thupekpawl nan thlun thei nak dingah, thu ka lo pek mi kamsuakthu parah nan bêt lo pei, cumi sung ihsi khalin nan lahlo fawn lo pei. 3 ^cJehovah in Baal Peor ah ziang a tuah ti kha nan mit in a hmu zo. Ziangahtile Jehovah nan Pathian in Baal Peor thluntu zaten, nan lak ihsin a hloralter ṭheh a si. 4 Asinan nannih Jehovah nan Pathian a rak pawk hnget tu kip cu, tuihni ah nan nungdam a si.

4:1^a Pui 18:4-5; Rom 10:5

4:2^b Dnp 12:32; Ths 12:13; Thu 22:18-19

4:3^c Mip 25:1-9; Sam 106:28

5 ^a“Ngai hnik uh, Jehovah ka Pathian ih thu i rak pek vekin nan hnenah sakhaw dānpawl le zīn le dān pawl cu ka lo zirh zo, cutin la dingih nan va fehnak ram ah cupawl bangtukin nan tuahsuak ding a si. 6 ^bCuruangah cupawl thlun dingin fimkhur uh. Ziangahtile himi cu miphunpawl mithmuh ah nan fimnak le theihthiamnak a si. Hi sakhaw dānpawl hmuahhmuah hi an ngaithla ding ih, ‘Hi miphun ropi cu mifim le theihthiamnak nei mi an si,’ tiah an ti ding.

4:5^a Suah 18:20; Pui 27:34; Ezr 9:11; Jer 32:33

4:6^b 1Sp 2:3; Job 28:28; Thf 2:5

7 ^a“Kan kawh tinteih Jehovah kan Pathian in in naih vekih anmah naih ṭheu tu Pathian nei miphun ropi zo so um? 8 ^bCule hi tlukih dingfel sakhaw dānpawl le zīn le dān pawl tuihsun ih nan hmaiih ka ret mi, hi dān hmuahhmuah vek nei ziang miphun ropi so um? 9 ^cNanmah hrangah fimkhur uhla, nanmah le nanmah taima zetin kilkhawiaw uh, cu lo asile nan mit ih a hmuh zo mi thilpawl nan hngilh pang ding ih, nan dam sung hmuahhmuah ah nan thinlung ihsin an tlânsuak pang ding. Cule cupawl cu nan fātepawl le nan tulepawl theihter uh. 10 ^dJehovah in ka hnenah, ‘Leilung parih an dam sung hmuahhmuah keimah ṭihzah an zir ih, an fātepawl an zirh thei nak dingah, ka hnenah mipi pungkhawmawter awla, ka ṭawngkampawl ka ngaithlater hai ding,’ i rak ti laiah khan, nannih cu Horeb ah Jehovah nan Pathian hmaiah, cuih ni ah nan rak ding ti kha hngilh hlah uh.

4:7^a Mip 23:21; 2Sam 7:23; Sam 46:1; Apo 17:27

4:8^b Rom 3:2

4:9^c Sem 14:14; Suah 10:2; 23:13; Efe 6:4

4:10^d Suah 19:9

11 ^a“Cun nan ra nai ih tlang hramah nan ding. Tlang cu van laifang tiangin a kāng. Cu tawkah cun thim, khawdur le thim sahpi a um. 12 ^bCule Jehovah cu meialh lak ihsin nan hnenah thu a sim. A kamsuakthupawlih thawmvâng cu nan rak thei, asinan ziang pianhmang hman nan hmu lo, aw lawng nan rak thei. 13 ^cCun nan tuah dingih thu a lo pek mi a thukham, ^dThupek Pahra kha nan hnenah a thăn. Cupawl cu lung pheng pahnih parah a ngan. 14 ^eCule cuih ṭumah ka hnenah Jehovah in la dingih nan va tankainak ram ah, cumipawl nan thlun thei nak dingah, nanmah kha sakhaw dānpawl le zīn le dān pawl lo zirh dingin thu i rak pe.

4:11^a Suah 3:1; 19:9, 16-18; Heb 12:18-19

4:12^b Suah 19:9, 16-18; 20:22; Heb 12:18-19

4:13^c Suah 24:12; 31:15-18; 34:27-28; Dnp 9:9-11; Rom 9:4

4:13^d Thupek Pahra: A ṭawng hrampi ah ṭawngfáng pahra ti a si ih, Jew-pawl in cutin an hmang ṭheu.

4:14^e Suah 21:1

Milem Biaknak Hrial Uh

15 ^a“Curuangah ṭhaten fimkhur uh. Ziangahtile Horeb ah meisa lak ihsin Jehovah in a lo biak ni ah ziang pianhmang hman nan rak hmu lo. 16 ^bCuti si lo sehla sualrál zetin nan nung ding ih nanmai hrangah, mipa asilole nunau băngnak neiin maw, 17 ^cleilung parih a um mi rannung pakhat khat băngnak neiin maw, van ih a zam mi thla nei vate pakhat khat băngnak neiin maw, 18 lei parih bawkvâk mi thil pakhat khat băngnak neiin maw, lei hnuai tidai sungih nga pakhat khat băngnak neiin maw, thil pakhat khat băngnak nei mi sercawp mi milim nan tuah pang ding. 19 ^dCulole van na cuan ding ih Jehovah na Pathian in van rāng hnuai miphun zakip hnenih a rak pek mi, van ih thilmak rual hmuahhmuah, ni, thlapi le arsipawl na hmuh tikah anmah be ding le rian dingah hīp na si pang ding.

4:15^a Dnp 4:12; Jos 23:11; Mal 2:15

4:16^b Suah 20:4-5; Pui 26:1; Dnp 5:8; 27:15

4:17^c Rom 1:23

4:19^d Sem 1:16; 2:1; Mip 25:3; 2Sp 23:11; Apo 7:42

20 ^a“Jehovah cun tuihni ih nan sinak vek hin Izip ram thir rawhtitnak hmun ihsin a miphun si dingin a ro dingah a lo la ih, a lo hruaisuak a si. 21 ^bAsinan Jehovah cu nanmai ruangah ka parah a thin a heng ih, Jordan ka tankailonak dingah le Jehovah na Pathian in ro ih a lo pek mi ram ṭha ka luhlonak dingah sia a rak săm. 22 ^cKei lawngte cu hi ram ah ka thi ding, Jordan ka tankai lo ding, asinan nannih cu nan tankai ding ih cuih ram ṭha cu nan va la ding. 23 ^dNanmah hrangah fimkhur uh, culole Jehovah nan Pathian in nan hnenih a tuah mi thukham nan hngilh ding ih, Jehovah na Pathian in a lo kham mi, thil pakhat khat pianhmang nei ih sercawp nanmai hrangah milim nan tuah pang ding. 24 ^eZiangahtile Jehovah nan Pathian cu kăngralhmang meisa, thîkthusia Pathian a si.

4:20^a Suah 8:22; 19:5; Dnp 7:6; 14:2; 26:18; Tit 2:14; 1Pe 2:9

4:21^b Mip 20:12

4:22^c Mip 27:13-14

4:23^d Suah 20:4

4:24^e Suah 15:7; 20:5; Heb 12:29

25 ^a“Fātepawl le tulepawl tla nan hrin ih cuih ram ih nan um rei tikah, sualrál zetih nungin thil pakhat khat pianhmang nei ko sercawp milim tuahin le a thinhengter dingin, Jehovah nan Pathian mithmuh ah thil ṭha lo nan tuah tikah, 26 ^bJordan tánkaiin nan va lâk ding mi ram ihsin rang zetih cimit ko nan hlohralnak dingah, tuihni ah nanmah dokalhih theihpitu dingah lei le van ka ko a si. Cu tawkah cun nan nunkhua a sau lo ding, cuhnakin cimit ko nan hloral ṭheh sawn ding a si. 27 ^cJehovah in minungpawl lakah a lo thehdarh ding, Jehovah in a lo dawisuahnak miphunpawl lakah mipum málte lawng nan tāng ding. 28 ^dCu tawkah a hmuh khal hmu thei lo, theih khal thei thei lo, ei khal ei thei lo, rim khal hnīm thei lo, thing le lung minung kut ih tuahcawp mi pathianpawl nan rian ding. 29 ^eAsinan cu tawk ihsin Jehovah nan Pathian cu nan hawl ding, nan thinlung zate le nan nunnak zate thawn amah nan hawl asile nan hmu ding. 30 ^fNi neta cān ah, vansang na lam ih, hi thil zaten na parih a thlen tikah, Jehovah na Pathian hnenah na kir ding ih a thu na lung ding. 31 ^gZiangahtile Jehovah na Pathian cu zahngai thei Pathian a si, a lo thlauthla lo ding ih a lo siatsuah fawn lo ding, an hnenih sia a rak săm mi na pupápawlih thukham khal a hngilh fawn lo ding.

4:25^a 1Sp 11:6; 2Sp 17:2, 17

4:26^b Sem 31:50; Sam 50:4; Thf 14:5

4:27^c Isa 17:6; Oba 1:5

4:28^d Dnp 28:36; 1Sam 26:19; Apo 19:26; Thu 9:20

4:29^e 2San 7:14; Jer 26:19

4:30^f Jer 23:20; Hos 3:5; Heb 1:2

4:31^g Suah 34:6; 1San 28:9, 20; Neh 9:31

Jehovah cu Pathian a Si

32 ^a“Ziangahtile Pathian in leilung parih minung a tuah ihsi thawkin, na suah hlan a liam cia mi nipawl kha sut aw, van rāng dĕng khat lam ihsin a khat lam tiang sut aw, himi thil ropi vek a si mi thil pakhat khat a cang dah maw, asilole hi thil vek hi theih a si dah maw? 33 ^bMeisa lak ihsin Pathian ṭawng mi aw nan rak theih vekih thei, nungdam miphun teh an um dah maw? 34 ^cAsilole Jehovah nan Pathian in Izip ram sungah nan mithmuh ih nan hrangih a tuah mi hmuahhmuah vekin, hniksaknakpawl, hminsinnakpawl, mangbangzapawl, ral donak, kut cak zet le bân suahnak le ṭihnung rapthlakzapawl hmangin, Pathian in a dang miphun pakhat lak ihsin miphun pakhat kha amai ta si dingah feh ih la dingin a zuam dah maw?

4:32^a Sem 1:27; 2Sam 7:23; Isa 45:12; Mat 24:31

4:33^b Suah 20:22

4:34^c Suah 3:20; 4:17; 14:30; 15:11; 1San 16:12; Sam 9:1; Isa 7:12; Jer 32:20

35 ^a“Jehovah amah lawng hi Pathian a si ti na theihnak dingah, cumi cu hmuhter na si, amah siarlo a dang an um lo. 36 ^bNangmah lo zirh dingin van ihsin aw a lo theihter. Leitlun ah a meialh rapthlak a lo hmuter ih, meialh sung ihsin nang in a ṭawngkampawl na rak thei. 37 ^cNa pupápawl a duhdawt hai ruangah, an hnuih an cithlah a rak hril. Cule Izip ram ihsin a umpinak le a cahnak huham thawn a lo hruaisuak a si. 38 ^dLo hruailutin, ro dingah an ram lo pe dingin, tuihni ih a sidān vekin, nangmah hnakih tamsawn le caksawn miphunpawl na hmai ihsin a dawisuak hai.

4:35^a Suah 8:10; 1Sam 2:2; 1Sp 8:60; 2Sp 19:19; Isa 43:10; Mar 12:32

4:36^b Suah 19:19; Heb 12:25

4:37^c Suah 3:20; Sam 44:3; Jer 31:3; Hos 11:1; Mal 1:2

4:38^d Mip 34:14-15

39 ^a“Curuangah tuihni ah tlun lam van ah le hnuai lam leilung parah Jehovah amah lawng hi Pathian a si ti nan thinlung sungah ruatin thei uh. Mi dang zohman an um lo. 40 ^bJehovah na Pathian in kumkhaw hrangih a lo pek mi ram ah nangmah le na hnuih na tefapawl na lam a tluannak dingah le na nunkhua a saunak dingah, tuihni ih ka lo pek mi a sakhaw dānpawl le a thupekpawl hi na thlun pei,” tiah a ti.

4:39^a Suah 8:10; 15:11

4:40^b Sem 26:5; Suah 23:26; Pui 22:31; Isa 3:10; 48:18; Efe 6:2-3

Răwlhimnak Khawpipawl

41 ^aCun Mosi in Jordan hi lam kap nisuahnak lamah khawpi pathum kha a hran in a ṭhen. 42 ^bA innhnen pa kha tum lo pi le a hlan khalih huatnak nei loih a thattu mi that pang tu cu, cu tawkih a tlanluh thei nak dingah a si. Himi khawpipawl pakhat khat sungah a tlânluttu pa cu a nung ding. 43 ^cCuih khawpipawlih hminpawl cu Reuben-mipawl hrangah tlang rawn par ramṭhing ih Bezer, Gad-mipawl hrangah Gilead ih Ramoth, Manasseh-mipawl hrangah Bashan ih Golan khawpipawl an si.

4:41^a Mip 35:6; Dnp 19:2-13

4:42^b Suah 21:13

4:43^c Jos 20:7-9; 21:38; 1Sp 22:3; 2Sp 8:28

Dān Dĭnsuahnak

44 Himi hi Mosi in Israel tefapawl hmaiih a ret mi dān cu a si: 45 hipawl hi Israel tefapawl Izip ram ihsin an suah hnuah Mosi in an hnenih a sim mi, theihpinakpawl, sakhaw dānpawl le zīn le dān pawl cu an si. 46 ^aIzip ram ihsin an suah hnu, Mosi le Israel tefapawl ih an thah mi, Heshbon ih cêng, Amor-mipawlih siangpahrang Sihon-ih ram sung, Beth Peor ralden phaikuam, Jordan nisuahnak lam kapih an um laiih a sim mi a si. 47 ^bJordan hi lam kap nisuahnak lamih um, Amor-mipawlih siangpahrang pahnih, Bashan siangpahrang Og-ih ram le Sihon-ih ram cu an lâk. 48 ^cArnon tiva kapih um, Aroer khua ihsin Hermon ti mi Sion tlang tiang le, 49 Jordan nisuahnak lam Arabah phairawn hmuahhmuah, Pisgah tlang hrâp pawl tăngih Arabah phairawn tipi tiang a si.

4:46^a Mip 21:26

4:47^b Mip 21:33-35

4:48^c Dnp 2:36; 3:9, 12, 17; Sam 133:3

5

Thupek Pahra

1 ^aMosi in Israel miphun zaten a ko ih an hnenah, “Maw Israel-mipawl, nan zir ih fimkhur zetih thlun dingin, tuihni ah nan hnatheih ih ka sim mi sakhaw dānpawl le zīn le dān pawl hi ngai uh. 2 ^bJehovah kan Pathian in Horeb ah kanmah thawn thukham a tuah. 3 ^cJehovah in himi thukham hi kan pupápawl thawn a rak tuah lo, cuhnakin tuihni ih hi tawkih a um mi, a nungdam mi kan zate, kanmah hnenah a tuah sawn a si. 4 ^dJehovah in tlang parah meisa lak ihsin nan hnenah hmaităwnin a lo bia. 5 ^eCuih cān ah keimah cu Jehovah-ih kamsuakthu nan hnenih thăn dingah Jehovah le nanmah karlakah ka ding. Ziangahtile nannih cu meisa nan ṭih ruangah tlang ah nan rak kaiso lo. Jehovah in,

5:1^a Suah 18:20

5:2^b Suah 19:5; 24:7-8

5:3^c Mip 26:63-65; Heb 8:9

5:4^d Mip 14:14

5:5^e Gal 3:19

6 ^a‘Keimah cu Jehovah na Pathian, Izip ram, sál tānnak hmun ihsin a lo hruaisuaktu ka si.
7 ^b‘Ka hmaiah pathian dang pawl na nei lo pei.
8 ^c‘Khercawp milim, tlun lam van ihta siseh, hnuai lam leilung ihta siseh, leilung hnuai tidai ihta siseh, cupawl băngnak nei na hrangah zianghman na tuah lo pei. 9 ^dAn hmaiah na kûn lo pei ih, na rian hai fawn lo pei. Ziangahtile keimah, Jehovah na Pathian cu thîkthusia Pathian, keimah huatupawl cu an palepawlih mawhsualnak kha an tefa parah san thum san li tiang lehrūl ṭheu tu ka si. 10 ^eAsinan keimah i duhdawtupawl le ka thupekpawl thluntu thawng tampi hnenih zahngainak langtertu ka si.
11 ^f‘Jehovah na Pathian hmin cu umze nei loin na hmang lo pei, ziangahtile umze nei loih a hmin hmangtu cu Jehovah in mawhnak nei lo ah a ruat lo ding.
12 ^g‘Jehovah na Pathian in thu a rak lo pek vekin, Sabbath ni thianghlim teih ul dingin, cuih ni cu hmang aw. 13 Ni ruk sung ṭuanbāngin, na hna zaten na ṭuan pei. 14 ^hAsinan a ni sarihnak cu Jehovah na Pathian-ih Sabbath a si. Cuih ni ah hna zianghman na ṭuan lo pei. Nangmah na cawlh vekin na siahhlawh nunau le na siahhlawh mipa khal an cawlh ve thei nak dingah, nangmah siseh, na fapa siseh, na fanu siseh, na siahhlawh mipa siseh, na siahhlawh nunau siseh, na caw cang siseh, na lāk siseh, na ran rual lakih pakhat khat siseh, na kăwtkapawl sungih na mikhual siseh, ziang hna hman nan ṭuan lo pei. 15 ⁱCule nangmah kha Izip ram ah sál na rak si ih Jehovah na Pathian in cu tawk ihsin kut cak le bān suahin a lo hruaisuak a si ti kha mangsuak aw. Curuangah Jehovah na Pathian in Sabbath ni ul dingin thu a lo pe a si.
16 ^j‘Jehovah na Pathian ih thu a rak lo pek vekin na nu le na pa upat aw, cutin na san a sau ding ih Jehovah na Pathian ih a lo pek ding mi ram ah na lam a tluang ding.
17 ^k‘Lai na that lo pei.
18 ^l‘Na uire lo pei.
19 ^m‘Rûk na ru lo pei.
20 ⁿ‘Na innhnen parah theihpinak dik lo na rel lo pei.
21 ^o‘Na innhnen nupi na daw lo pei, na innhnen teih inn siseh, lóram siseh, a siahhlawh mipa siseh, a siahhlawh nunau siseh, a caw cang siseh, a lāk siseh, na innhnen thil zianghman na daw lo pei,’ tiah a ti.

5:6^a Suah 13:3; Pui 26:1; Sam 81:10

5:7^b Suah 20:2-3; 23:13; Hos 13:4

5:8^c Pui 26:1; Sam 78:58

5:9^d Suah 34:7, 17; Mip 10:35; Dnp 4:15-20; 27:15

5:10^e Suah 34:6-7; Mip 14:18; Dnp 7:9-10; Neh 1:5; Jer 32:18; Dan 9:4

5:11^f Suah 20:7; Pui 19:12

5:12^g Suah 16:23-30; 31:12-14; Mar 2:27-28

5:14^h Suah 23:12; 31:15; 34:21; 35:2; Pui 23:3; Mat 12:1-2

5:15ⁱ Sem 15:13; Suah 20:11

5:16^j Dnp 27:16; Thf 3:1-2; Mal 1:6; Mat 15:4; 19:19; Mar 7:10; 10:19; Luk 18:20; Efe 6:2-3

5:17^k Sem 9:6; Pui 24:17; Ths 3:3; Mat 5:21; Jam 2:11

5:18^l Mat 5:27; Mar 10:19; Luk 18:20; Rom 13:9

5:19^m Pui 19:11; Mat 19:18-19; Mar 10:19

5:20ⁿ Suah 23:1; Luk 18:20

5:21^o Rom 7:7; 13:9

Mipi in Pathian an Ṭih

22 ^a“Hi kamsuakthupawl hi Jehovah in meisa, khawdur le a sah zet mi thim lak ihsin tlang parah aw ring zetin a pungkhawm mi nan zate hnenah a rak sim ih, zianghman a bêt nawn lo. Cule cupawl cu lung pheng pahnih parah a rak ngan ih cupawl cu keimah i rak pe.

5:22^a Suah 20:21; 24:12; Heb 12:18-21

23 ^a“Cule hitin a si, meisa in tlang a kăng laiah, thim lak ihsin aw nan theih tikah nan hnám lubânpawl le nan upapawl zaten ka hnenah in rak naih a si kha! 24 ^bCule nannih in, ‘Ngai hnik, Jehovah kan Pathian in a sunlawinak le a ropitnak in hmuh zo, meisa lakih a aw kan thei zo. Pathian in minung a bia ih, cu pa cu a nung thotho ti tuihsun ah kan hmu zo. 25 ^cAtu-ah ziangah so kan thih ding? Ziangahtile himi a nasa zet mi meisa hin in kangrál mai ding. Jehovah kan Pathian aw kan theihbêt a si ahcun, kan thi ding. 26 ^dZiangahtile minung zate lakah kanmah vekih meisa lak ihsin a nung mi Pathian aw thei ih nungdam zo so um? 27 ^eNangmah va feh nai awla, Jehovah kan Pathian in a sim ding mi zaten va ngai aw. Cule Jehovah kan Pathian in na hnenih a sim mi zaten kanmah in sim awla, kannih in cumi cu kan ngai ding ih, cumi cu kan tuah ding,’ tiah nan ti.

5:23^a Suah 3:16

5:24^b Suah 19:19

5:25^c Suah 20:18-19; Heb 12:19

5:26^d Suah 33:20; Lai 6:22-23; Isa 6:5

5:27^e Suah 19:8; 24:7; Heb 12:18-19

28 ^a“Cule nannih in ka hnenih nan sim tikah, Jehovah in nan kamsuak aw a thei. Cule Jehovah in ka hnenah, ‘Na hnenih an sim mi, hi mipi kamsuak aw hi ka rak thei. An sim mipawl hmuahhmuah cu a ṭha a si. 29 ^bAnmah le an tefapawl kumkhuain an lam a tluan thei nak dingah, keimah in ṭihzah ding le ka thupekpawl hmuahhmuah thlun camcin ding hi an thinlung sungah um sehla cu aw! 30 Feh awla an hnenah, “Nan puanthlampawl ah kir uh,” tiah sim aw. 31 ^cAsinan nang tu cu ka kiangah dīng awla, anmah na zirh hai ding mi thupekpawl, sakhaw dānpawl le zīn le dān pawl hmuahhmuah ka lo sim ding, cumi cu va la dingih anmah ka pek mi ram ah an thlun ding,’ tiah i ti.

5:28^a Dnp 18:17

5:29^b Jos 22:5; Sam 78:7

5:31^c Suah 24:12

32 ^a“Curuangah Jehovah nan Pathian ih thu a rak lo pek vekih tuah dingah nan fimkhur pei, nan vawrh lamah siseh, nan keh lamah siseh, nan pial lo pei. 33 ^bNan nungdam ih nan lam a tluannak dingah le nan lâk ding mi ram ah nan nunkhua a saunak dingah, Jehovah nan Pathian ih thu a lo pek mi zin hmuahhmuah nan zawh pei.

5:32^a Jos 1:7; 1Sp 15:5; 2Sp 22:2; Thf 4:27

5:33^b Isa 3:10; Jer 7:23; Luk 1:6

6

Thulun ruangih Malsawm

1 ^a“Nangmah lo zirh dingih Jehovah na Pathian in thu i pek mi thupek, sakhaw dānpawl le zīn le dān pawl cu hihi an si, la dingih na tankainak ram ah, cumi cu na thlun ding. 2 ^bCutin nangmah, na fapa le na tupa pawl in thu ka lo pek mi a sakhaw dānpawl le a thupekpawl hmuahhmuah na dam sung hmuahhmuah thlun dingin Jehovah na Pathian kha na ṭihzah thei ding, cutin na nunkhua a sau ding a si. 3 ^cCuruangah maw Israel, ngaithla aw, cule hipawl hi thlun dingin fimkhur aw. Cutin Jehovah na pupápawlih Pathian in a lo tiamkam zo vekin hnawi ti le khuai tizu luannak ram ah na lam a tluang ding ih nasa zetin nan karhzai ding.

6:1^a Suah 20:20; 1Sam 12:24

6:2^b Sem 26:5; Suah 20:12

6:3^c Sem 15:5; Suah 3:8; 13:5; 19:5

Nundān ding Zirhnak

4 ^a“Maw Israel, ngai hnik, Jehovah kan Pathian, Jehovah cu pakhat a si. 5 ^bJehovah na Pathian cu na thinlung zaten, na nunnak zaten le na cahnak zaten na duhdaw pei. 6 ^cTuihni ih thu ka lo pek mi hih kamsuakthupawl hi na thinlung sungah um seh. 7 ^dNa inn ih na to tikah siseh, lamzin ih na feh tikah siseh, na ih tikah siseh, na thawh tikah siseh, cupawl cu taima zetin na fātepawl na zirh pei ih na sim hai pei. 8 ^eNa kut ah hminsinnak ah na ṭem pei ih, na mit le mit karlakah cal ṭawnnak vek an si ding a si. 9 ^fNa inn sângka biangpawl parah le na kăwtkapawl parah na ngan pei.

6:4^a Neh 9:6; Sam 86:10; Isa 44:6; Zek 14:9; Mar 12:29, 32; Joh 10:30; 1Ko 8:4; Efe 4:6; Jam 2:19

6:5^b Jos 22:5; 1Sam 12:24; Mat 22:37; Mar 12:30, 33; Luk 10:27

6:6^c Thf 3:3; Eze 40:4

6:7^d Thf 22:6; Efe 6:4

6:8^e Suah 13:9; Mat 23:5

6:9^f Dnp 11:18-20

10 ^a“Hitin a si ding, na pupápawl, Abraham, Isak le Jakob pawl hnenih sia a rak săm mi ram sungah Jehovah na Pathian in a lo hruailuh tikah, na dĭn lo mi a tûm le a mawi mi khuapawl, 11 ^bnangmai khahter mi si lo thil ṭha hmuahhmuah thawi a khat mi innpawl, nangmai laih mi si lo laih cia mi tikhurpawl, nangmai phŭn mi si lo sabit hmuanpawl le olif thingpawl a lo pe ding. Na ei ih na khawh tikah, 12 ^cralring aw, culole na sál tānnak hmun Izip ram ihsin a lo hruaisuaktu Jehovah na hngilh pang ding.

6:10^a Sem 11:4; 12:7; 26:3; 28:13; Jos 24:13; Sam 105:44

6:11^b Pui 26:5; Jer 2:13

6:12^c 2Sp 17:38; Sam 44:17

13 ^a“Jehovah na Pathian na ṭihzah pei ih amah na rian pei, cule a hmin in sia na săm pei. 14 ^bNa kimvelih miphunpawlih pathianpawl a si mi pathian dang pawl dung na thlun lo pei, 15 ^cziangahtile Jehovah na Pathian cu nan lakah thîkthusia Pathian a si. Culole Jehovah na Pathian-ih thinhengnak cu na parah a alh ding ih leilung vangdâp ihsin a lo hloralter pang ding. 16 ^dJehovah nan Pathian cu Massah ih nan hniksak vekin, nan hniksak lo pei. 17 ^eJehovah nan Pathian-ih thupekpawl, na hnenih thu a rak lo pek mi a thutheihter mipawl le a sakhaw dānpawl cu ṭhahnemngai zetin nan thlun pei. 18–19 ^fJehovah-ih mithmuh ah a dik mi le a ṭha mi na tuah pei, cutin na lam a tluang ding ih, Jehovah ih a tiamkam cia vekin, na hmai ihsin na ralpawl hmuahhmuah na dawisuaknak in Jehovah in na pupápawl hnenih sia a rak săm mi ram ṭha ah na lutin na nei thei ding.

6:13^a Suah 20:5, 7; 1Sam 7:3; 20:3; Sam 33:8; Jer 44:10; Mat 4:10; 5:33; Luk 4:8

6:14^b Dnp 13:7

6:15^c Suah 33:3; Dnp 4:24

6:16^d Suah 17:1-7; Mat 4:7; Luk 4:12

6:17^e Pui 26:3; Sam 119:4, 56, 100, 134, 168

6:18-19^f Suah 23:27; Jos 21:44; 2Sp 18:6; Sam 78:53; Isa 36:7

Jehovah Ṭhatnak Cing Aw

20 ^a“A ra lai ding mi cān ah na fapa in a lo suh tikah, ‘Jehovah kan Pathian ih thu a lo pek mi, theihpinakpawl, sakhaw dānpawl le zīn le dān pawl hi ziang tican an si?’ a lo ti tikah, 21 ^bna fapa hnenah, ‘Kannih cu Izip ram ah Faro-ih sál kan rak si dah, Izip ram ihsin Jehovah in kut cak hmangin in hruaisuak, 22 cule Izip, Faro le a sungkua zate parah a nasa zet mi le a rapthlak zet mi hminsinnakpawl le mangbangzapawl kha kan hmaiah Jehovah in in rak hmuter. 23 Cun kan pupápawl hnenih sia a rak săm mi ram cu in pe dingin, in hruailut dingin, cu tawk ihsin in rak hruaisuak. 24 ^cCule tuihni ih a sidān vekin, amah in in nungdamter dingin kan ṭhat ringring nak ding hrangah Jehovah kan Pathian ṭihzah dingin hi sakhaw dān hmuahhmuah thlun dingah Jehovah in thu in rak pe. 25 ^dAmah ih thu in pek vekin, Jehovah kan Pathian hmaiah hi thupekpawl hmuahhmuah thlun dingin, kan fimkhur asile, cumi cu kan hrangah dingfelnak a si ding,’ tiin na sim pei.

6:20^a Suah 10:2

6:21^b Suah 13:3

6:24^c Sam 27:12; Jer 32:39; Rom 10:5

6:25^d Sam 103:18; Rom 9:31

7

Miphunpawl Hlohralternak

1 ^a“Jehovah na Pathian in nei dingih na va fehnak ram ah a lo hruailuh ih nangmah hnakih tamsawn le caksawn miphun pasarih, Heth-mipawl le Girkash-mipawl le Amor-mipawl le Kanaan-mipawl le Periz-mipawl le Hiv-mipawl le Jebus-mipawl na hmai ihsin miphun tampi a lo dawisuahsak tikah, 2 ^bJehovah na Pathian in anmahpawl kha na hnenih a lo pek tikah, anmahpawl cu na neh hai ding ih na cimitter ṭheh pei. Anmahpawl thawn thukham na tuah lo pei, an parah zahngainak na hmuh lo pei. 3 ^cAnmahpawl thawn ṭhitumnak khal na tuah lo pei. Na fanu cu an fapa na pe lo pei, an fanu khal na fapa hrangah na la fawn lo pei. 4 ^dZiangahtile pathian dang pawl rian dingin keimah in thlunnak ihsin na fapa an pialter ding, cutin Jehovah-ih thinhengnak cu nan parah a tho ding ih a lo hloralter lohli ding. 5 ^eCuhnakin anmah parah hiti vekin nan tuah sawn pei, an biakṭhengpawl nan siatbăl pei, an ṭhuamserhpawl nan ṭhiat pei, an Asherah-pawl nan hautlu pei ih an sercawp milimpawl meisa in nan ur pei.

7:1^a Sem 10:16-17; 13:7; Pui 14:34; Jos 3:10; Apo 13:19

7:2^b Suah 23:32; Mip 31:17; Jos 11:11

7:3^c Jos 22:16; Dan 9:7

7:4^d Lai 3:6

7:5^e Suah 34:13; Dnp 12:3

Pathian Hril Miphun

6 ^a“Ziangahtile nang cu Jehovah na Pathian hrangah miphun thianghlim na si. Jehovah na Pathian in leilung vangdâp parih miphun hmuahhmuah lak ihsin hlawnthil hleice a miphun si dingah a lo hril zo. 7 ^bMiphun dang pakhat khat hnakih nan tamsawn ruangah Jehovah in a lo hahiau ih a lo hril khal a si lo, nannih cu miphun hmuahhmuah lakah a malbik simaw nan si. 8 ^cJehovah in a lo duhdawt ruangah le nan pupápawl hnenih sia a săm mi thukam a kilṭhat ruang sawnah, Jehovah cun kut cakin a lo hruaisuak ih Izip siangpahrang Faro kut, sál tānnak hmun ihsin a rak lo tlen. 9 ^dCuruangah Jehovah na Pathian, amah cu Pathian a si, amah a duhdaw ih a thupekpawl thluntupawl hnenah san 1000 tiang thukham le zahngainak kil ṭha tu Pathian rinum a si ti thei aw. 10 ^eAmah huatupawl cu anmah par lala ah anmah hloralter dingin a lehrūl hai. Amah huatu parah a tlâi lo ding, amai par lala ah a lehrūl ding ti thei aw.

7:6^a Sem 22:17; Suah 19:5-6; Dnp 4:20; 14:2; 26:18; Sam 30:4; Rom 9:4; Tit 2:14; 1Pe 2:9

7:7^b Dnp 4:37

7:8^c Suah 32:13; Dnp 10:15, 22; Sam 44:3

7:9^d Suah 20:6; 1Sp 8:23; 2San 6:14; Neh 1:5; Sam 18:25; Isa 49:7; Jer 42:5; Hos 11:12; 1Ko 1:9

7:10^e Suah 20:5-6; 34:6-7; Pui 26:28; Mip 10:35; 14:18; Dnp 5:9-10; Nah 1:2

Thulunnakih Malsawm

11 “Curuangah tuihni ih thu ka lo pek mi thupek, sakhaw dānpawl le zīn le dān pawl hi thlun dingin fimkhur aw. 12 ^aCun hitin a si ding, nannih in himi zīn le dān pawl hi nan ngaithla ih, fimkhur zetih nan thlun ruangah Jehovah na Pathian in na pupápawl hnenih sia a rak săm mi thukham le zahngainak cu na hrangah a kil ṭha ding. 13 ^bCun a lo duhdaw ding ih thlawsuah a lo pe ding, cule a lo karhzaiter ding. Na pupápawl hnenah nangmah lo pe dingih sia a rak săm mi ram ah na rilrah, na leiram rah, na thlairawl, na sabit zu thar le na hriak thar pawl, na ranpi fa no le na rante fa no kha thlawsuah a pe ding. 14 ^cMiphun hmuahhmuah hnakin thlawsuah pek na si ding. Nan lakah le na sumhnám lakah a cing mi a pa siseh, a nu siseh an um lo ding. 15 ^dJehovah in na hnen ihsin natnak zaten a lahlo ding, na rak tawnteh mi Izip ih a rapthlak mi natnakpawl lakih pakhat hman a thlengter lo ding, a lo huatu zate parah cun cupawl cu a thlengter ding. 16 ^eJehovah na Pathian in a lo pek mi miphunpawl hmuahhmuah na hloralter ṭheh pei. Lainatnak mit in na zoh lo pei, an pathianpawl khal na rian lo pei, ziangahtile cumi cu na hrangah tháng a si ding.

7:12^a Pui 26:3-13; Mik 7:20

7:13^b Mip 18:12; Joh 14:21

7:14^c Suah 23:26

7:15^d Suah 9:9; 15:26; 23:25; Dnp 11:13-17

7:16^e Suah 10:7; Jos 6:2; Lai 3:6; Ezr 9:1; Sam 106:36

17 ^a“Na thinlung sungah, ‘Hih miphunpawl hi kei hnakin an tamsawn, ziangtin anmahpawl cu ka dawisuak thei ding,’ tiin na ti asile, 18 ^banmah na ṭih lo pei, cuhnakin Jehovah na Pathian in Faro le Izip-mi hmuahhmuah parah ziang a tuah ti kha ṭhaten na cîng ringring sawn pei. 19 ^cNa mit ih a hmuh mi hniksaknak nasa pawl, hminsinnakpawl le mangbangzapawl, kut cak le bān suahin Jehovah na Pathian in a rak lo hruaisuak ti kha ṭhaten na cîng ringring pei. Cu vekin Jehovah na Pathian in na ṭih mi miphunpawl hmuahhmuah parah a tuah ding a si. 20 ^dCuihhleiah Jehovah na Pathian in a tāng lai mipawl, na hnen ihsin a relh mipawl hlohralter an si hlanlo, an lakah khuaingal a thlah ding. 21 ^eAnmah ruangah na thin a phâng lo pei, ziangahtile Jehovah na Pathian, ropi le maksak Pathian cu nan lakah a um a si. 22 ^fCule Jehovah na Pathian in cuih miphunpawl cu na hmaika ah málte ten a dawisuak ding. Hmakhatteih anmah siatsuah dingin nan ti thei lo ding, culole nan hrangah ramsapawl kha an tam tuk ding. 23 ^gJehovah na Pathian cun annihpawl cu na hnenah a lo pe ding ih, an hlohral ṭheh hlanlo, an parah buainak rapthlak a thleng ding. 24 ^hAn siangpahrangpawl na kut ah a lo pe ding, cule nang in an hmin cu van rāng hnuai ihsin na hloralter ding. Anmah na hlohralter ṭheh hlanlo nangmah dokalhin zohman an dīng thei lo ding. 25 ⁱAn milim sercawp pathianpawl kha meisa in na ur pei. Cupawl parih um mi, sui le ngun pawl na daw lo pei, na hrang khalah na la fawn lo pei, culole cupawl cu na hrangah tháng ah an cang pang ding. Ziangahtile cumi cu Jehovah na Pathian hrangah fihnungza a si. 26 ^jNa inn sung khalah thil fihnungza na kenglut lo pei. Culole cumi vekih hlohralter dingih thiam lo coter na si pang ding. Cupawl cu na hua thluh pei ih na fih thluh ding a si, ziangahtile cumi cu hlohralter dingih thiam lo coter mi thil a si.

7:17^a Mip 33:53

7:18^b Mip 14:9; Sam 105:5

7:19^c Sam 136:12

7:20^d Suah 23:28

7:21^e Mip 14:14; Jos 3:10; Neh 1:5; Isa 9:6; Dan 9:4

7:22^f Suah 23:28-30

7:23^g Suah 23:27

7:24^h Suah 23:31; Jos 1:5; 10:8, 24; 21:44

7:25ⁱ Suah 4:14; 20:17; Jos 7:21

7:26^j Pui 27:28-29

8

Jehovah Tuah mi Cing ringring Uh

1 ^a“Nan nungdam ih nan karhzai ih, Jehovah in nan pupápawl hnenih sia a rak săm mi ram nan lut ih nan lâk thei nak dingah, tuihni ih thu ka lo pek mi thupek kip thlun dingin nan fimkhur tengteng pei. 2 ^bA thupekpawl na thlun ding le ding lo na thinlung ih um mi thei dingah, lo tăngdawrter ih lo hniksak dingin, Jehovah na Pathian in ramṭhing ah hi kum 40 sung lamzin tluanin a lo hruai ti na cîng ringring pei. 3 ^cMilai cu sang lawngin a nung lo ding, cuhnakin Jehovah-ih kâ ihsi a suak mi kamsuakthu tin in a nung sawn ding ti lo theihter dingah a lo tăngdawrter, na ril a lo rawngter, cule na theih lo mi le na pupápawl khalih theih lo mi manna in a lo câwm a si. 4 ^dHi kum 40 sung na hruh mi na sinfen an rak hnawh lo ih, na ke khal an thling lo.

8:1^a Suah 19:5; Job 36:11; Sam 16:11; Eze 20:19

8:2^b Sem 22:1; Amo 2:10

8:3^c Sem 3:19; Suah 16:4; Job 23:12; Mat 4:4; Luk 4:4

8:4^d Neh 9:21

5 ^a“Mi pakhat in a fapa nun a sim vekin, Jehovah na Pathian in nun a lo sim a si ti na thinlung in thei aw. 6 ^bCuruangah a lamzinpawl ih feh dingah le amah ṭihzah dingah, Jehovah na Pathian-ih thupekpawl na thlun pei. 7 ^cZiangahtile Jehovah na Pathian in, phaikuampawl le tlangpawl ihsin a luangsuak mi tidai um mi hawrkuampawl, tihnapawl le cirhtipawl umnak ram, 8 ^dsangvut le barli sangvut, sabit hripawl le theipi kungpawl le talê rahpawl umnak ram, olif hriak le khuai tizu umnak ram, ram ṭha ah a lo hruai thlang ding. 9 ^eSambau lo teih rawl na ei thei nak, zianghman tlaksamlonak ram, a lungpawl thir a si mi ram le a tlangpawl ihsin dar sen laih thei nak ram, ram ṭha ah a lo hruai thlang ding. 10 ^fNa ei ih na khawh tikah, a lo pek mi ram ṭha ruangah Jehovah na Pathian cu na thangṭhat ding a si.

8:5^a 2Sam 7:14; Job 5:17; Heb 12:5-11; Thu 3:19

8:6^b Suah 33:13; 1Sp 3:14

8:7^c Jer 3:19; Eze 20:6

8:8^d Sem 49:11; Suah 9:31; Mip 13:23; 1Sp 4:25; Sam 81:16

8:9^e Lai 18:10; Job 28:2

8:10^f Dnp 6:11-12

11 “Tuihni ih thu ka lo pek mi a thupekpawl, a zīn le dān pawl, a sakhaw dānpawl thlunlonak in Jehovah na Pathian hngilh lo dingin fimkhur aw. 12 ^aCulole na ei ih na khawp, cule inn mawi pawl na sak ih an sungah na cêng ih, 13 na ranpi rualpawl le na rante rualpawl an karhzai, cule na sui le ngun a karhzai ih, na neih mi hmuahhmuah an karhzai tikah, 14 ^bna thinlung a puarthau ding ih, sál tānnak hmun Izip ram ihsin a lo hruaisuaktu Jehovah na Pathian na hngilh pang ding. 15–16 ^cLo tăngdawrterin le lo hniksak ih, a netnakah na hrang thil ṭha a tuah thei nak dingah, rulngânpawl le tlangkaikuangpawl le tidai um lo ram car, a kau mi le a rapthlak mi ramṭhing paltlăngih a lo hruaitu, ṭêklung lungpi sung ihsin na hrangih tidai pûtsuaktertu in, ramṭhing ah na pupápawl ih theih dah lo mi manna in a rak lo câwm. 17 ^dNa thinlung sungah, ‘Hih lennak hi ka huham le ka kut cahnak ih i ngahter mi a si,’ tiah na ti pang ding. 18 ^eTuihni ih a sidān vek hin, na pupápawl hnenih sia a rak săm mi a thukham nĕmhnget dingin, anih in lennak ngah thei nak huham a lo pe. Curuangah Jehovah na Pathian cu na cîng ringring pei.

8:12^a Thf 30:9; Hos 13:5-6

8:14^b Sam 78:7

8:15-16^c Sem 22:1; Suah 16:14-15; 17:6; Mip 21:6; Job 28:9; Isa 14:29; Hos 13:5-6

8:17^d Lai 7:2; Sam 44:3; Isa 10:13

8:18^e Sem 26:13; 1Sam 2:7; Sam 25:13; Thf 8:18; Ths 9:11; Hos 2:8

19 ^a“Cule hitin a si ding, Jehovah na Pathian na hngilh ih, pathian dang pawl dung thlunin na rian ih na biak asile, nan hloral tengteng ding ti tuihni ah ka lo theihter hai a si. 20 ^bJehovah nan Pathian aw nan ngaithlak lo ruangah, Jehovah in nan hmaika ah a hlohralter mi, miphunpawl vekin nannih khal nan siatrál ve ding.

8:19^a Sam 16:4; Jer 7:6

8:20^b 2Sp 21:2; Sam 10:16; Eze 5:5-17

9

Israel parih Pathian Rinumnak

1 ^a“Maw Israel, ngai hnik, nang cu tuihni ah Jordan tankai ding na si. Nangmah hnakih tamsawn le caksawn miphunpawl dawisuak dingin lut aw, khawpipawl cu an tûm ih, a hnget mi khaw kulhpawl cun van an tăwng. 2 ^bAnnih cu na theih hai mi Anak tesinfapawl an si ih, mitum le misâng miphun an si. Mi in, ‘Zo so Anak tesinfapawl hmaiah dīng thei ding?’ tiih an ti mi na hna in na rak thei.

9:1^a Sem 11:4; Mip 13:28; 35:10

9:2^b Mip 13:22; Jos 11:22

3 ^a“Curuangah Jehovah na Pathian cu na hmaiih a tánkaitu ding, mi kăngralhmang meisa a si ti kha tuihni ah theithiam aw. Anih in anmahpawl kha a hloralter hai ding ih, na hmaiah a duaiter hai ding. Cutin na hnenih Jehovah in a rak sim bangin anmah cu na dawisuak hai ding ih, rang zetin na hloralter hai ding. 4 ^bJehovah na Pathian in anmahpawl cu na hmai ihsin a rak dawisuak hnuah, na thinlung in, ‘Ka dingfelnak ruangah Jehovah in hi ram va nei dingah i hruailut a si,’ tiin na ti lo pei. Cuhnakin hi miphunpawlih sualralnak ruangah, annihpawl cu Jehovah in na hmai ihsin a dawisuak hai sawn a si. 5 ^cNa dingfelnak le na thinlung dĭngnak ruangah an ram co dingin na lut a si lo. Cuhnakin hi miphunpawlih sualralnak ruangah le Jehovah in na pupá Abraham, Isak le Jakob pawl hnenih sia a rak săm mi ṭawngkam kimter dingin na hmai ihsin Jehovah na Pathian in a dawisuak hai a si. 6 ^dCuruangah na dingfelnak ruangah hi ram ṭha hi la dingin, Jehovah na Pathian in a lo pe lo ti hi theithiam aw, thungaiten nang cu lungruh minung na si.

9:3^a Suah 15:7; 23:31; Jos 3:11; Heb 12:29

9:4^b Suah 23:24; Pui 18:21; 2Sp 16:3; Ezr 9:11

9:5^c Sem 12:7; Pui 18:25; Eze 36:32; Efe 2:9; Tit 3:5

9:6^d Suah 32:9; Apo 7:51

Israel Helnak

7 ^a“Ramṭhing ah Jehovah na Pathian thinling dingin ziangtin na căwktho ti kha hngilh hlah, cing ringring aw! Izip ram ihsi na pawhsuah ni ihsin himi hmun nan thlen tiang, Jehovah lakah nan hél a si. 8 ^bHoreb khalah Jehovah thinling dingin nan căwktho, cutin nanmah lo hloralter dingin Jehovah cu nan parah a thin a heng. 9 ^cNan hnenih a tuah mi thukham, Jehovah ih a ngannak lung pheng pawl la dingin tlang parih ka soh laiah khan tlang parah ni 40 le zan 40 sung ka câm. Rawl ka ei lo ih, ti khal ka in lo. 10 ^dCun Jehovah in ka hnenah Pathian kut zung ih ngan mi lung pheng pahnih i pe. Cule cupawl parah cun punkhawm ni ih meisa lak ihsin tlang parih Jehovah in nanmah a lo sim mi kamsuakthu hmuahhmuah an um. 11 ^eCule hitin a si, ni 40 le zan 40 a cemnakah, Jehovah in lung pheng pahnih, thukham lung pheng pawl i rak pe.

9:7^a Suah 14:11; 23:21; Mip 11:33

9:8^b Sem 7:4; Suah 24:12

9:9^c Suah 24:18

9:10^d Suah 31:18

9:11^e Suah 24:12

12 ^a“Cule Jehovah in ka hnenah, ‘Tho aw, hi tawk ihsin zamrangten sukthla aw, ziangahtile Izip ram ihsin na rak hruaisuah mi, na minungpawl cun sualrál zetin thil an rak ti. Anmah thu ka pek mi zin ihsin zamrang zetin an rak pial. Burcawp milim pakhat anmai hrangah an tuah,’ tiah i ti.

9:12^a Lai 2:17

13 “Jehovah in ka hnenah, ‘Hi minungpawl cu ka hmu hai zo, ngai hnik, lungruh minung an si. 14 ^aI hnaihnăwk hlah uh, ka hloralter hai ding ih, van rāng hnuai ihsin an hmin ka thaihlo ding. Cule anmah hnakih caksawn le tamsawn nangmah ihsin miphun pakhat ka tuah ding,’ tiah i ti.

9:14^a Suah 32:10; Mip 14:12; Jer 7:16

15 ^a“Cun ka her ih tlang ihsin ka ṭum, cule tlang cu meisa in a kāng. Cule ka kut pahnih ah thukham lung pheng pahnih an um. 16 ^bCule ka zoh, ngai hnik, nannih in Jehovah nan Pathian parah thil sual nan rak tuah. Nanmai hrangah burcawp caw no nan rak tuah. Jehovah in thu a rak lo pek mi zin ihsin zamrang zetin nan rak pial a si. 17 ^cCun lung pheng pahnih cu ka lâk ih, ka kut pahnih ihta ka hlăwn. Cule nan mithmuh ah ka khuaidarh hai. 18 ^dCule thinheng dingin amah căwktho dingah, Jehovah-ih mithmuh ah sualrál zetin nan um ih, nan rak tuah mi nan sualpawl hmuahhmuah ruangah a hmaisa vekin, ni 40 le zan 40 sung Jehovah hmaiah ka băwkkhup. Rawl ka ei lo ih, ti khal ka in lo. 19 ^eJehovah-ih thinhengnak le thinsonak ka ṭih a si. Nanmah parih a thin a heng ruangah lo hlohralter a duh. Cuih cān ah, Jehovah in in rak ngaithla lala. 20 Cule Jehovah cu Aaron parah amah thah duh tiangin a thin a rak heng tuk. Cun cuih cān ṭhiamṭhiam ah, Aaron hrang khalah thla ka camsak a si. 21 ^fCun nan sualnak, nan rak tuah mi caw no lem cu ka la ih, meisa in ka ur, cule leivut vekih a vut hlanlo, ka phăwm ih ka rialdip. Cule tlang ihsi a rung luang mi, lihăwng va sungah a vut cu ka hlăwn.

9:15^a Suah 32:15

9:16^b Suah 32:4

9:17^c Suah 32:19

9:18^d Suah 34:28

9:19^e Suah 32:14; Mip 11:2; 1Sam 7:9; Jer 15:1; Heb 12:21

9:21^f Suah 32:20; Isa 2:18; 29:5; Mik 1:7

22 ^a“Taberah, Massah le Kibroth Hattaavah hmunpawl khalah thinling dingin Jehovah nan căwktho. 23 ^bCule Jehovah in Kadesh Barnea ihsin, ‘So uhla, ka rak lo pek mi ram cu va la uh,’ tiih a lo thlah tikah, Jehovah nan Pathian thupek dokalhin nan rak hél, cule amah nan rak zum lo ih, a thu khal nan lung fawn lo. 24 Ka lo theih ni ihsin nannih cu Jehovah lakih helhmang nan rak si.

9:22^a Suah 17:7; Mip 1:53; 11:3, 34

9:23^b Mip 13:17-20, 30-33; 14:9; Dnp 1:20-21, 26; Sam 106:24; Heb 3:16

25 ^a“Curuangah Jehovah hmaiah ka băwkkhup. Jehovah in, ‘Ka lo hloralter ding,’ a lo ti ruangah ni 40 le zan 40 sung ka băwk ringring. 26 ^bJehovah hnenah thla ka cam ih, ‘Maw Bawipa Jehovah, Izip ram ihsin na kut cak ih na hruaisuah mi, na ropitnak hmangih na rak tlen mi nangmai miphun le nangmai ro cu hloralter hram hlah. 27 ^cNa siahhlawh Abraham, Isak le Jakob pawl kha máng hram aw. Hi miphunih lungruhnak siseh, sualralnak siseh, sualnak siseh zoh hram hlah. 28 ^dCu lo ahcun kanmahpawl in hruaisuahnak ram in, “Jehovah in anmah a tiamkam mi ram ah anmahpawl a hruailuh thei hai lo ruangah le a huat hai ruangah, ramṭhing ah anmah that dingin a hruai hai a si,” tiah an ti pang ding. 29 ^eAnnih cu na huham ropi le na bân suahih na hruaisuah hai mi na miphun le na ro an si,’ tiah ka ti.

9:25^a Sem 7:4; Suah 33:17

9:26^b Suah 6:6; 32:11; 33:13; 34:9; 2Sam 7:23; Sam 78:35

9:27^c Suah 32:9

9:28^d Suah 32:12; Jos 7:9

9:29^e Suah 33:13; 34:9; Neh 1:10

10

Lung Pheng Thar Pahnih

1 ^a“Cuih cān ah Jehovah in ka hnenah, ‘A hmaisa tapawl vekin nangmah hrangah lung pheng pahnih ser aw, cule nangmah hrangah thing in Kuang tuah awla, tlang ah ka hnenah hung so aw. 2 ^bCule na rak khuai mi a hmaisa lung pheng pawl parih ngan mi ṭawngkampawl kha, cuih lung pheng pawl parah ka ngan ding ih, cupawl cu Kuang sungah na ret pei,’ tiah i ti.

10:1^a Suah 34:1-2

10:2^b Suah 25:16, 21; 2San 5:10

3 ^a“Akasia thing in Kuang ka tuah, cun a hmaisa tapawl vekin lung pheng pahnih ka ser, cule cuih lung pheng pahnih cu ka kut ih kengin tlang ah ka hung so. 4 ^bCule cuih lung pheng pawl parah cun, a hmaisa ih ngan mi vekin, punkhawm ni ih meisa lak ihsin tlang ah Jehovah in nan hnenih a sim mi Thupek Pahra a ngan. Cule Jehovah in cupawl cu ka hnenah i pek. 5 ^cCun ka kir ih, tlang ihsin ka rung suk ih, lung pheng pawl cu ka tuah mi Kuang sungah ka ret. Cule Jehovah ih thu i pek vekin, cu tawkah an um.

10:3^a Suah 34:4; 37:1-9

10:4^b Suah 20:1

10:5^c Suah 19:11; 25:10, 21; 1Sam 3:3; 1Sp 8:9

6 ^a“(Cule Israel tefapawl cu ^bBene Jaakan tikhurpawl ihsin Moserah ah an feh. Cu tawk hmun ah Aaron a thi ih, cuih hmun ah an phum. A fapa Eleazar in amah airawlin puithiam hna a ṭuan. 7 ^cCu tawk ihsin Gudgodah ah an feh ih, Gudgodah ihsin tidai luang mi tivapawl umnak ram Jotbathah an thleng.

10:6^a Suah 6:23; Mip 20:25-28; 27:13; 33:30, 38

10:6^b Bene Jaakan: “Jaakan fapapawl” tinak.

10:7^c Mip 33:32-34; Sam 42:1; Sol 5:12; Isa 32:2

8 ^a“Cu laiah Jehovah-ih Thukham Kuang phur dingah, Jehovah hmaiah dīng ih amah rian dingin le amai hmin ih thlawsuah pe dingin tuihni tiang Jehovah in Levi hnám cu a rethran. 9 ^bCuruangah Levi cu a unaupawl lakah covo a nei lo ih, ro khal a nei fawn lo. Jehovah na Pathian ih a rak tiamkam vekin amah Jehovah cu a ro a si.)

10:8^a Sem 48:20; Mip 3:5-8; 10:33; 16:9; 1San 23:26

10:9^b Mip 18:20

10 ^a“A hmaisa ṭum vekin, tlang ah ni 40 le zan 40 sung ka câm. Cuih ṭum khalah Jehovah in i ngaithla ih, Jehovah in nanmah lo hlohralter ding a rak hril lo. 11 Cun Jehovah in ka hnenah, ‘Tho aw, mi senpi khualtlawn hmai hruai aw, cutin an pupápawl hnenih anmah pe dingih sia ka rak săm mi ram ah lutin an la ding a si,’ tiah i ti.

10:10^a Suah 33:17; 34:28

Jehovah Ṭih Aw

12 ^a“Cule atu-ah, Israel, Jehovah na Pathian in tuah dingin ziang so a lo dil? Na ṭhatnak dingah Jehovah na Pathian ṭihzah ding, a lamzin hmuahhmuah ih feh ding le amah duhdawt ding, na thinlung hmuahhmuah le na nunnak hmuahhmuah thawi Jehovah na Pathian rĕn ding, 13 ^btuihni ih thu ka lo pek mi, Jehovah-ih thupekpawl le a sakhaw dānpawl thlun ding hi a si. 14 ^cNgai hnik, van le a sangbik mi van cu leilung le a sungih um mi hmuahhmuah thawn Jehovah na Pathian ta an si. 15 ^dJehovah cu na pupápawl lawng a hahiau hai ih, a duhdawt hai. Cule tuihsun ih sidān vek hin nannih, an cithlahpawl cu anmai hnuah miphun zate lak ihsin a lo hril a si. 16 ^eCuruangah nan thinlung serh vun zim tán uhla, nan lungruh nawn hlah seh. 17 ^fZiangahtile Jehovah nan Pathian cu pathianpawlih Pathian, bawipawlih Bawi, Pathian ropi, cak le maksak, zohman thleidan nei lo le nawhthuh ei lo a si. 18 ^gPa nei lo pawl le nuhmeipawl hrangah dik zetih thuṭhen ih, mikhual duhdawtin rawl le hnipuan a pe. 19 ^hCuruangah nanmah khal Izip ram ah mikhual nan rak si dah ruangah, mikhual duhdawt uh. 20 ⁱJehovah na Pathian cu na ṭihzah pei, amah na rian pei, cule amah kha hnget zetin na pawkbĕt pei ih, a hmin in sia na săm pei. 21 ^jAnih cu na thangṭhatnak le na Pathian a si. Na mit ih a rak hmuh mi himi a nasa le a maksak mi, thilpawl hi na hrangah a lo tuahsak. 22 ^kNa pupápawl Izip ram ih an feh laiah mipum 70 an si, atu-ah cun Jehovah na Pathian in van ih arsi zat in mi tampi ah a rak lo tuah.

10:12^a Suah 20:20; 1Sp 2:3; Mik 6:8; Mat 22:37; 1Ti 1:5

10:13^b Dnp 6:24

10:14^c Suah 19:5; Neh 9:6; Sam 24:1; Apo 17:24

10:15^d Mip 14:8; Rom 11:28; 1Pe 2:9

10:16^e Sem 17:11; Suah 32:9; Pui 26:41; Jer 32:39

10:17^f Jos 22:22; Sam 135:5; 136:3; Dan 2:47; Apo 10:34; Rom 2:11; Gal 2:6; Efe 6:9; 1Ti 6:15; Thu 17:14; 19:16

10:18^g Mip 10:32; Sam 68:5

10:19^h Suah 22:21; Pui 19:34; Eze 47:22-23

10:20ⁱ Suah 20:7; Dnp 6:13; Isa 38:3; Mat 4:10; 5:33-37

10:21^j Suah 15:2; 1Sam 12:24; 2Sam 7:23

10:22^k Sem 12:2; 15:5; 22:17; 34:30; 46:27; Mip 10:35-36; Apo 7:14

11

Jehovah Duhdawtin a Thu Thlun Aw

1 ^a“Curuangah Jehovah na Pathian na duhdawt pei ih, a thucah, a sakhaw dānpawl, a zīn le dān pawl le a thupekpawl na thlun camcin pei. 2 ^bTuihni ah thei uh, Jehovah nan Pathian nunsimnak, a ropitnak, a kut cak le a bân suahnak pawl thei dah lo le hmu dah lo nan tefapawl hnenih ka sim mi a si lo. 3 ^cAnnih cun Izip-mipawl lakah, Izip siangpahrang Faro le a ram pumpi parah a tuah mi a hminsinnakpawl le a thil tipawl an rak thei lo ih, an rak hmu lo. 4 ^dIzip ralkappawl le an rangpawl le an rang lêngpawl parah ziang a rak tuah, nanmah an lo dawi laiah Tipi Sen ti in khuh hai dingin ziangtin a rak tuah ih, Jehovah in tuihni tiang anmahpawl kha ziangtin a hloralter hai ti an rak thei lo ih an hmu lo. 5 Himi hmun nan thlen hlan tiang, ramṭhing ah nan hrangah ziang a rak tuah ti an thei lo ih an hmu lo. 6 ^eReuben-ih fapa Eliab, Eliab-ih fapa Dathan le Abiram pawl parah ziangtin a tuah, Israel miphun zate lakah an sungkuapawl, an puanthlampawl le an hruai mi an sumhnámpawl zaten ziangtin leilung in a kâ ang tahratin a dawlh hai ti an rak thei lo ih, an rak hmu lo. 7 Asinan nan mit in Jehovah ih a tuah mi thil ti ropi tinkim a rak hmu.

11:1^a Pui 8:35

11:2^b Sam 78:6; 136:12

11:3^c Suah 7:8-21

11:4^d Suah 14:27-28; 15:1; Mip 21:4

11:6^e Mip 16:1-35; Sam 106:16-18

8 ^a“Curuangah tuihni ih ka lo pek mi thupek kip in nan thlun pei. Cutin va la dingih Jordan nan tankainak ram ah nan cak ding ih, va lutin nan va la ding a si. 9 ^bCule hnawi ti le khuai tizu luannak ram, anmah le an cithlahpawl hnenah pe dingih Jehovah in nan pupápawl hnenih sia a rak săm mi ram ah nan nunkhua a sau ding. 10 ^cZiangruangahtile thungaiten la dingih na va fehnak ram cu hanghnah hangrah hmuan bangih na thlaici na cîng ih ^dna ke thawi tidai pek ṭulnak ram, nan ra suahnak Izip ram vek a si lo. 11 ^eVa la dingih na tankainak ram cu, vanruah ti dáwng tlangmûalpawl le phaikuampawl umnak ram a si. 12 ^fCuih ram cu Jehovah na Pathian ih a kilkhawi mi, Jehovah na Pathian mit cu, kum thawk ihsin kum cem tiang a parih a um camcin nak ram a si.

11:8^a Jos 1:7; Ezr 9:10

11:9^b Suah 3:8

11:10^c Isa 11:15

11:10^d na ke thawi tidai: Tidān ziang simaw hmangih thlai tipek tinak a si. Ziangruangahtile Izip ram ah ruah a mál.

11:11^e Neh 9:25; Eze 36:4

11:12^f 1Sp 8:29

13 ^a“Cule tuihni ih thu ka lo pek mi ka thupekpawl, Jehovah nan Pathian duhdawt ding le nan thinlung hmuahhmuah le nan nunnak hmuahhmuah thawn amah rĕn ding hi ṭhahnemngai zetih nan thlun asile, hitin a si ding. 14 ^bNan ram ah ruah hmaisa le ruah neta tiin ruahpi amai tikcu teah ka surter ding, cutin na thlairawl, na sabit zu thar le na hriak thar pawl na khawm ding. 15 ^cCule nan sumhnám hrangah nan lórampawl ah hrampi ka khoter ding, cutin nan ei ding ih, nan puar ding. 16 ^dNanmah hrangah fimkhur uh, cu lo asile nan thinlung bumin a um ding ih, pial tahratin pathian dang pawl rianin nan be hai pang ding. 17 ^eCulole nan parah Jehovah-ih thinhengnak a alh ding ih, van a phit ding, cuti cun ruah a um lo ding, ram in rahsuah a suah lo ding, cule Jehovah ih a lo pek mi ram ṭha ihsin zamrang zetin nan siatrál pang ding.

11:13^a Jer 17:24

11:14^b Pui 26:4; Jer 3:3; Joe 2:23; Apo 14:17; Jam 5:7

11:15^c Pui 26:5

11:16^d Job 31:9, 27

11:17^e Pui 26:3-5, 18-20; Dnp 7:12-16; 28:1-14; 1Sp 17:1; 2San 6:26

18 ^a“Curuangah hi ka kamsuakthupawl hi nan thinlung le nan nunnak ah nan thun pei, nan kut ah hminsinnak ah nan ṭem pei ih, nan mit le mit karlakah cal ṭawnnak vek an si ding a si. 19 ^bNa inn ih na to tikah siseh, lamzin ih na feh tikah siseh, na ih tikah siseh, na thawh tikah siseh, cupawl cu nan fātepawl nan zirh pei ih nan sim pei. 20 ^cCule cupawl cu na inn sângka biangpawl parah le na kăwtkapawl parah na ngan pei. 21 ^dCutin leilung tlun van ih van an hmun zat nipawl vekin, Jehovah nan Pathian in nan pupápawl hnenah pek dingih sia a rak săm mi ram ah nan san le nan fātepawlih san cu a sau ding. 22 Ziangahtile Jehovah nan Pathian duhdawt ding, a lamzinpawl hmuahhmuah thlun ding le amah pawkbĕt dingah tuah dingih thu ka lo pek mi hi thupekpawl hmuahhmuah hi ṭhateih nan thlun asile, 23 ^e“Jehovah in hi miphun hmuahhmuah hi nan hmai ihsin a lo dawisuaksak ding ih, nanmah hnakih tamsawn le caksawn miphunpawl nan dawisuak ding. 24 ^fNan ke zaphak ih a pal mi pauhpauh nan ta a si ding, ramṭhing le Lebanon ihsin, tiva pi, Zufraṭis tiva ihsin nitlaknak lam tifinriat tiangin nan ramkulh a si ding. 25 ^gNan hmaiah zohman an dīng thei lo ding. Nan hnenih a rak sim vekin, Jehovah nan Pathian in nan pal mi ram zate parah nanmah ruangih râpnak le lo ṭihnak a ret ding.

11:18^a Suah 13:9; Dnp 6:6-9

11:19^b Suah 12:26; Sam 145:4; Isa 38:19; Jer 32:39

11:20^c Dnp 6:9

11:21^d Job 5:26; Sam 72:5; Thf 3:2

11:23^e Suah 23:28

11:24^f Sem 2:14; 15:18; Jos 1:3

11:25^g Suah 23:27; Jos 1:3-5

26 ^a“Ngai hnik uh, tuihni ah nan hmaiah malsawmnak le camsiatnak ka ret. 27 ^bTuihni ih thu ka lo pek mi Jehovah nan Pathian thupekpawl nan thlun asile, malsawmnak a si ding. 28 ^cCule Jehovah nan Pathian thupekpawl ngaithla loin, nan theih dah lo mi pathian dang pawl dung thlun dingah tuihni ih thu ka lo pek mi zin ihsin nan pial sawn asile, camsiatnak a si ding. 29 ^dCule hitin a si ding, Jehovah na Pathian in va la dingih na va fehnak ram ih a lo hruailuh tikah, Gerizim tlang parah malsawmnak le Ebal tlang parah camsiatnak na ret pei. 30 ^eCuih tlangpawl cu, Jordan khat lam nitlaknak lam, Arabah phairawn ih cêng Kanaan-mipawlih ram, Moreh ih elon thingkungpawl kiang, Gilgal raldenah an um a si lo maw? 31 ^fZiangahtile Jehovah nan Pathian ih a lo pek mi ram nei dingah lutin Jordan nan tankai thlang ding, cule ram cu nan la ding ih, cu tawkah nan cêng ding. 32 Cule tuihni ih nan hmaiih ka ret mi sakhaw dānpawl le zīn le dān pawl hmuahhmuah thlun dingin nan fimkhur pei.

11:26^a Pui 26:14-17; Ṭah 2:17; Dan 9:11; Hag 1:11; Mal 2:2

11:27^b Sam 24:5

11:28^c 1Sam 26:19; 2San 24:20; Jer 42:13

11:29^d Dnp 27:11-14; Jos 8:30, 33-35; Lai 9:7; Joh 4:20

11:30^e Lai 2:1; 2Sp 2:1; Mik 6:5

11:31^f Mip 33:53; Jos 11:23

12

Pathian Biaknak Hmun

1 ^a“Hipawl hi Jehovah na pupápawlih Pathian in la dingih a lo pek mi ram ah leilung parih na dam sung hmuahhmuah fimkhur zetih na thlun ding mi sakhaw dānpawl le zīn le dān pawl an si. 2 ^bTlang sâng pawl parah le tlangmûalpawl parah le thing bŭk nîm hnuai kip ah an pathianpawl riantu nan dawisuak ding mi miphunpawlih hmun hmuahhmuah kha nan siatbăl ṭheh pei. 3 ^cCule an biakṭhengpawl nan siatbăl pei, an ṭhuamserhpawl nan khiak pei ih, an Asherah-pawl meisa in nan ur pei, kher mi an milim sercawp pathianpawl nan hautlu pei. Cuih hmun ihsin an hminpawl nan hloralter pei.

12:1^a 1Sp 8:40; Eze 20:19

12:2^b Mip 21:18; 1Sp 14:23; 2Sp 17:10; Jer 2:20

12:3^c Suah 23:13; 32:20; 34:13; Dnp 7:5-6; 1Sp 14:15, 23; 2Sp 11:18

4 ^a“Jehovah nan Pathian cu cubangtukin nan be lo pei. 5 ^bAmai cēnnak ding hmun hrangih a hmin retnak dingah, nan hnámpawl hmuahhmuah lak ihta Jehovah nan Pathian in a hril mi hmun cu nan hawl pei, cule cu tawkah nan feh pei. 6 ^cCu tawkah nan Meiur Thilhlănpawl, nan raithawinakpawl, nan kut ih nan ṭhen hra ṭhen khat pawl le cawikhai thilhlănpawl, nan thutiam thilhlănpawl, nan lungpuak thawhhlawmpawl le nan ranpi rualpawl le nan rante rualpawl lakih fatirpawl cu nan rak keng pei. 7 ^dCule cu tawkah Jehovah nan Pathian hmaiah nan ei pei, cule Jehovah na Pathian in a rak lo thlawsuah mi, nan kut hnaṭuan hmuahhmuah ah nanmah le nan sungkuapawl lungawi aipuangin nan um pei.

12:4^a 2Sp 17:15; Jer 10:2

12:5^b 1Sp 5:5; 2San 2:4; Ezr 6:12; Zek 2:12

12:6^c Sem 28:20; Pui 27:30; Jos 22:27; Isa 66:20

12:7^d Suah 18:12; Pui 23:40; Ths 3:12-13; Isa 62:9

8 ^a“Tuihsun ah mi kip in anmai mithmuh ih dik an ti mi pauhpauh an tuah. Asinan hi tawkih kan tuah mi vekin nan tuah hrimhrim lo pei. 9 ^bZiangahtile Jehovah nan Pathian ih a lo pek mi cawlhhmun ah le ro ih nan co ding mi hmun ah nan thleng hrih si lo. 10 ^cAsinan Jordan nan tankai ih Jehovah nan Pathian in ro ih co dingih a lo pek ding mi ram ah cêngin, nan kiangkapih nan ralpawl zate lak ihsin ralmuannak a lo pek ih, ralmûangih nan cēn tikah, 11 ^d“Jehovah nan Pathian in a hmin umnak dingih a hril mi hmun a um ding. Cu tawkah thu ka lo pek mi hmuahhmuah, nan Meiur Thilhlănpawl, nan raithawinakpawl, nan kut ih nan ṭhen hra ṭhen khat pawl le cawikhai thilhlănpawl le Jehovah hnenih nan thutiam mi nan thawhhlawm ṭhabik pawl hmuahhmuah nan run keng pei. 12 ^eCule Jehovah nan Pathian hmaiah nanmah, nan fapapawl, nan fanupawl, nan siahhlawh mipapawl le nan siahhlawh nunaupawl lungawi aipuangin nan um pei. Nan khawpi kăwtkapawl sungih um, Levi-mi cun nanmah bangtukin, covo le ro khal a neih lo ruangah nan zawngah lungawi aipuangin a um pei. 13 Nangmah hrangah fimkhur aw. Na hmuh mi hmun pauhpauh ah na Meiur Thilhlănpawl na hlan lo pei. 14 ^fJehovah ih a hril mi hmun, na hnámpawl lakih ramkulh pakhat sungah, cu tawkah na Meiur Thilhlănpawl na hlan pei, cule cu tawkah thu ka lo pek mi zaten na tuahsuak pei.

12:8^a Lai 17:6

12:9^b Suah 33:14; Sam 95:11; Mik 2:10

12:10^c Suah 33:14

12:11^d Pui 1:3; Jos 22:23

12:12^e Mip 18:20

12:14^f Joe 2:23; Jam 5:7

15 ^a“Sikhalsehla nangmah a rak lo pek mi Jehovah na Pathian-ih thlawsuah bangtukin, na thinlung ih a hiar mi pauhpauh cu na khaw kulh kăwtkapawl hmuahhmuah sungah na that ding ih, sa na ei ding. Sakhi sa le zuknêng sa na ei vekin, mithiang lo le mithiang khal in nan ei ding. 16 ^bThisen lawngte cu nan ei lo pei, cumi cu leilung ah tidai vekin nan thle pei. 17 ^cNa thlairawl, na sabit zu thar le na hriak thar ihsin ṭhen hra ṭhen khat, na ranpi rual le na rante rual lakih fatir, na thutiam mi na thawhhlawm pauhpauh, na lungpuak thawhhlawmpawl le na kut ih cawikhai thilhlăn cu na kulh kăwtka sungah na ei lo pei. 18 ^dAsinan nangmah, na fapa le na fanu, na siahhlawh mipa le na siahhlawh nunau le na khaw kulh kăwtkapawl sungih um, Levi-mi thawn, cupawl cu Jehovah na Pathian in a hril mi hmun ah Jehovah na Pathian hmaiah na ei tengteng pei. Cule na kut hnaṭuan hmuahhmuah ah Jehovah na Pathian hmaiah lungawi aipuangin na um pei. 19 ^eNan ram ih na dam sung hmuahhmuah Levi-mi na thlauthlaklonak dingah nangmah hrangah fimkhur aw.

12:15^a Dnp 6:11

12:16^b Sem 9:4; 35:14; Pui 7:26-27; 17:10-14; 19:26; Dnp 15:23; 1San 11:18; Jer 7:18; Joh 19:34; Apo 15:20

12:17^c Pui 27:30; Mip 18:12, 19

12:18^d Neh 8:10; Ths 3:12-13

12:19^e Neh 13:10; Mal 3:8

20 ^a“Jehovah na Pathian in a rak lo tiamkam vekin, na ramri a kauhter tikah, sa ei na ngai tuk ruangah nang in, ‘Sa ei thlang ning,’ na ti tikah, na thinlung ih a hiar zatzat in na ei ding. 21 ^bJehovah na Pathian in a hmin retnak dingih a hril mi hmun kha, na hnen ihsin a hlat tuk asile, Jehovah in a lo pek mi na ranpi rual le na rante rual kha, thu ka rak lo pek vekin na that pei, cule na thinlung ih a hiar zatzat in na kulh kăwtkapawl sungah na ei pei. 22 ^cSakhi sa le zuknêng sa na ei vekin, cupawl cu na ei hai pei. Mithiang lo le mithiang an pahnih in an ei pei. 23 ^dThisen lawngte cu ei lo dingin fimkhur aw, ziangahtile thisen cu nunnak a si. Nunnak cu a sa thawn na eicih lo pei. 24 ^eThisen cu na ei lo pei. Cumi cu tidai vekin leilung ah na thle pei. 25 ^fNangmah le na hnuih na tefapawl parah Pathian in thil ṭha a tuahnak dingah cumi cu na ei lo pei. Ziangruangahtile Jehovah mithmuh ih thil dik tuah na si ding.

12:20^a Sem 15:8; Suah 16:3; 34:24

12:21^b Pui 17:4

12:22^c Dnp 10:20

12:23^d Pui 7:26; Eze 33:25

12:24^e Pui 17:10-14

12:25^f Suah 15:26; 1Sp 11:38; 2Sp 12:2

26 ^a“Asinan na neih mi thil thianghlim pawl le na thutiam thawhhlawmpawl na la pei ih, Jehovah na Pathian ih a hril mi hmun ah na feh pei. 27 ^bCule na Meiur Thilhlănpawl cu, a sa le a thisen cu Jehovah na Pathian Biakṭheng parah na hlan pei. Cule na raithawinak thisen cu, Jehovah na Pathian Biakṭheng parah thlet a si pei ih, a sa cu na ei pei. 28 ^cNangmah le na hnuih na fātepawl parah kumkhuain Pathian in thil ṭha a tuahnak dingah, na hnenih thu ka lo pek mi, hi kamsuakthupawl thlun dingin fimkhur aw. Ziangruangahtile Jehovah-ih mithmuh ah thil dik le thil ṭha tuah na si ding.

12:26^a Mip 5:9-10

12:27^b Pui 1:13; 3:1-17

12:28^c Ths 8:12

Miphun Dang Pawl Thlun Hlah

29 ^a“Dawisuak dingih na va fehnak miphunpawl na hmai ihsin Jehovah na Pathian in a hlohralter ih, anmah na dawisuak ih an ram ih na cēn tikah, 30 ^banmahpawl kha na hmai ihsin hlohralter an si hnuah, anmai dung thlun dingin tháng ih awh na silonak dingah le, ‘Hih miphunpawl in ziangtin an pathianpawl an rian? Kei khal cu vekin ka tuah ve ding,’ tiin an pathianpawl thuhla na zingzawilonak dingah nangmah hrangah fimkhur aw. 31 ^cJehovah na Pathian cu, cuti vekin na be lo pei. Ziangahtile Jehovah ih a huat mi thil fihnungza tinkim in an pathianpawl hnenah an rak tuah a si. Thungaiten an pathianpawl hrangah an fapapawl le an fanupawl tiangin mei in an ur. 32 ^dNan hnenih thu ka lo pek mi pauhpauh thlun dingin fimkhur uh. Cumi parah na bêt lo pei ih, cumi ihsin na lahlo fawn lo pei.

12:29^a Jos 23:4

12:30^b Suah 10:7

12:31^c Pui 18:21, 25; 2Sp 3:27

12:32^d Dnp 4:2; Thu 22:18-19

13

Profet Deu Pawl

1 ^a“Nan lakah profet simaw, mang mantu simaw a suak ih, hminsinnak simaw, mangbangza simaw a lo sim ih, 2 ^ba rak lo sim mi hminsinnak simaw, mangbangza simaw a thleng ngaingai, cule na hnenah, ‘Na theih dah lo mi pathian dang pawl thlun uhsi, anmah rian uhsi,’ tiah a lo ti asile, 3 ^ccuih profet simaw, cuih mang mantu simaw ih ṭawngkampawl cu na ngaithla lo pei. Ziangahtile Jehovah nan Pathian in nan thinlung hmuahhmuah le nan nunnak hmuahhmuah thawn Jehovah nan Pathian kha nan duhdawt maw duhdawt lo ti thei dingah a lo hniksak a si. 4 ^dJehovah nan Pathian dung nan thlun pei ih, amah nan ṭihzah pei, cule a thupekpawl nan thlun pei ih a thu nan lung pei, cule amah nan rian pei ih, amah nan pawk hnget pei. 5 ^eCule Izip ram ihsin a lo hruaisuaktu le sál nan tānnak hmun ihsin a lo tlentu Jehovah nan Pathian lakih hél dingin le Jehovah na Pathian in zawh dingih thu a lo pek mi lamzin ihsin pialhlo dingin a rak ṭawng ruangah, cuih profet simaw, cuih mang mantu simaw cu thah a si pei. Cutin nan lak ihsin thil ṭha lo cu na hloralter pei.

13:1^a Sem 20:3; Jer 23:25; Mat 24:24; Mar 13:22; 2Th 2:9

13:2^b 1Sam 2:34; 2Sp 19:29; Isa 7:11

13:3^c Sem 22:1; 1Sam 28:6, 15; 1Sp 13:18; Jer 29:31; Eze 13:9; 1Ko 11:19; 2Pe 2:1

13:4^d 2Sp 23:3; 2San 34:31; Sam 5:7; 2Joh 1:6

13:5^e Suah 21:12; Lai 20:13; 1Ko 5:13

6–7 ^a“Na unaupa simaw, na nuih fapa simaw, na fapa simaw, na fanu simaw, na pawm lai na nupi simaw nangmai nunnak vek a si mi na rualpi in, nangmah le na pupápawl khalih theih dah lo mi pathianpawl, nangmah thawi a naihnak, asilole nangmah thawi a hlatnak ih um, leilung dĕng ihsin khat lam leilung dĕng tiang, na kimvelih miphunpawlih pathianpawl kha, ‘Feh in pathian dang pawl rian uhsi,’ tiin a thupten a lo lēm asile, 8 ^bamah cu na lungkimpi lo pei, asilole amah na ngaithla lo pei, lainatnak mit in na zoh fawn lo pei, amah na zuah fawn lo pei, asilole amah na thup lo pei. 9 ^cCuhnakin amah kha na that tengteng sawn pei. Amah that dingah a parah na kut na thlak hmaisabik pei ih, cuih hnuah mi hmuahhmuah in an kut an thlak pei. 10 ^dCule a thih hlanlo lungto in na deng pei, ziangruangahtile sál na tānnak hmun, Izip ram ihsin a lo hruaisuaktu, Jehovah na Pathian hnen ihsin lo pialhloter a tum a si. 11 ^eCule Israel miphun zaten an thei ding ih, an ṭih ding, cule nan lakah cuvek sualralnak an tuah nawn lo ding.

13:6-7^a Dnp 17:2

13:8^b Thf 1:10

13:9^c Pui 24:14

13:10^d Suah 20:3

13:11^e 1Ti 5:20

12 “Jehovah na Pathian in na cēnnak dingih a lo pek mi khuapawl lakih pakhat ah mi pakhat khat in, 13 ^a‘Nan lak ihsin mihlothlaupawl an rak suak ih, an khaw sungih um mipawl hnenah, “Feh uhsi la, nan rak theih dah lo mi pathian dang pawl rian uhsi,” tiin mi an pialhloter,’ ti na hna ih na theih asile, 14 ^bnan zingzawi pei ih, nan hawlsuak pei, cule taima zetin nan sut pei. Cule ngai hnik, cuvek thil fihnungza nan lakih tuah mi cu a dik ngai ih, a fiangfel ngai asile, 15 ^ccuih khawmipawl cu ralnâm hriam in na that tengteng hai pei, a khawpi, a sungih a um mi hmuahhmuah le a sumhnámpawl thawn ralnâm hriam in na siatsuah ṭheh pei. 16 ^dCule cuih khaw ralthillâk zaten khaw laiah na pengkhawm pei. Jehovah na Pathian hrangah an khawpi le a ralthillâk zaten meisa in na ur ṭheh pei. Cumi cu thil penkhawm ah a cang kumkhua ding. Cumi cu dĭnsal a si nawn lo ding. 17 ^eCutin Jehovah cu a nasa zet mi a thinhengnak ihsin a kir ding ih, na pupápawl hnenih sia a rak săm vekin zahngainak a lo hmuh ding, na parah lainatnak a nei ding ih, lo karhzaiter dingin, thiam lo coter mi thilpawl pakhat hman na kut sungah a tâng lo pei. 18 Ziangruangahtile tuihni ih thu ka lo pek mi a thupekpawl hmuahhmuah thlun dingah le Jehovah na Pathian mithmuh ih a dik mi tuah dingah Jehovah na Pathian thu na rak lung a si.

13:13^a Lai 19:22; 1Sam 2:12; 1Sp 21:10

13:14^b Lai 20:12

13:15^c Suah 22:20; Isa 24:6; Ṭah 2:6; Dan 9:11; Zek 8:13; Mal 4:6

13:16^d Jos 6:24; 8:28; 2Sp 25:9; Isa 7:16; Jer 39:8; 49:2; Eze 16:41; Mik 1:6

13:17^e Sem 12:2; 43:14; Suah 32:12; Mip 25:4

14

Mithi Sūn Dān

1 ^a“Nannih cu Jehovah nan Pathian fāte nan si. Mithi ruangah nanmah le nanmah nan at-aw lo pei ih, nan hmai lam sám nan ziatkawng fawn lo pei. 2 ^bZiangahtile nang cu Jehovah na Pathian hrangah a thianghlim mi miphun na si ih, Jehovah in amai miphun si dingah, leilung vangdâp parih a um mi miphunpawl zate lak ihsin hlawnthil hleice ah a lo hril zo.

14:1^a Pui 19:27-28; 21:5; Joh 1:12; Rom 8:14, 16

14:2^b Sem 28:14; Suah 8:22; 19:5-6; 22:31; Pui 20:26; Dnp 4:20; 7:6; 26:18; Isa 6:13; Mal 2:15; Rom 12:1; Tit 2:14; 1Pe 2:9

Sa Thiang le Thiang Lo

3 ^a“Fihnungza thil zianghman na ei lo pei. 4 ^bNan ei ding mi ṭilvapawl cu: câw, tuu, me, 5 ^czuknêng, sakhi, zuknêng phun khat, zâthar, zâtum phun khat, hramlak caw phun khat le tlang par tuu pawl tla an si. 6 Cule rannung lakah tín kâk, hmun hnih ih kâk suak mi tín nei, rawl irhsuaksal ih, ṭhialsal mi rannung pauhpauh cu nan ei thei.

14:3^a Eze 4:14

14:4^b Pui 7:23; Apo 10:14

14:5^c Job 39:1; Sam 104:18

7 “Sikhalsehla rawl irhsuaksal ih ṭhialsal, asilole tín kâk nei, hipawl lak ita, hibang: kalauk, sabek tûm phun le shafan hi nan ei lo pei. Ziangahtile annih cun rawl irhsuaksalin an ṭhialsal nân, tín kâk an neih lo ruangah nan hrangah an thiang lo. 8 ^aCule văwk cu tín kâk a nei nain, rawl irhsuaksalin a ṭhialsal lo ruangah nan hrangah a thiang lo. An sa nan ei lo pei ih, an ruak khal nan dai fawn lo pei.

14:8^a Pui 5:2

9 “Ti sungih a um mipawl lakah hipawl zaten nan ei thei: thla te le phawhir nei pauhpauh nan ei thei. 10 Cule thla te le phawhir nei lo mi pauhpauh cu nan ei lo pei, cupawl cu nan hrangah an thiang lo a si.

11 “A thiang mi vate hmuahhmuah nan ei thei. 12 Asinan nan ei lo ding mipawl cu: muvanlai, mulukawlh, khaupi, 13 ^akilaw sen, khau, khau phun pauhpauh, 14 ^btlangâk phun pauhpauh, 15 kalauk va, sambak, tifinriat va le khaute phun pauhpauh, 16 sumbuh te, sumbuh hrangkír, sumbuh râng, 17 ^cdka-at va, saruak ei mulukawlh, ngathûr va phun khat, 18 ngathûr, hngawngdâk va phun pauhpauh, vasuangtûar le palâp pawl tla an si. 19 Bawkvâk mi a zam mi pauhpauh cu nan hrangah thil thiang lo an si, cupawl cu ei ding an si lo. 20 ^eA thiang mi vate hmuahhmuah nan ei thei.

14:13^a Sem 1:11; Isa 34:15

14:14^b Sem 8:7

14:17^c Sam 102:6; Isa 13:21; Zef 2:14

14:17^d ka-at va: Pui 11:18 simfiangnak zoh aw.

14:20^e Pui 20:25

21 ^a“Amah teih a thi mi zianghman nan ei lo pei. Na khawpi kăwtkapawl sungih um khawtluang mi ih ei dingah, cumi cu na pe pei, asilole cumi cu ram dang mi hnenah na zuar pei. Ziangahtile nang cu Jehovah na Pathian hrangah miphun thianghlim na si. Me no cu a nuih hnawi ti in na suang lo pei.

14:21^a Suah 23:19; 34:26; Pui 11:39

Ṭhen Hra Ṭhen Khat Dān

22 ^a“Kum tin ló ih suak na thlairawl cīn mi ihsin a suak mi hmuahhmuah ih ṭhen hra ṭhen khat na pe tengteng pei. 23 ^bCule Jehovah na Pathian ṭihzah camcin ding na zirnak dingah, a hmin cēnnak dingih a hril mi hmun ah na thlairawl, na sabit zu thar, na hriak thar pawlih ṭhen hra ṭhen khat le na ranpi rualpawl le na rante rualpawl lakih fatir cu Jehovah na Pathian hmaiah na ei pei. 24 Cule Jehovah na Pathian in thlawsuah a lo pek tikah, na fehnak ding cu na hrangah a hla tuk ih, Jehovah in a hmin retnak ding a hril mi hmun cu na hnen ihsin a hlat tuk ruangah ṭhen hra ṭhen khat na phur thei lo asile, 25 ^ccumi cu tangka ah na thlĕng pei, na kut in paisa na keng pei ih, Jehovah na Pathian ih a hril mi hmun ah na feh pei. 26 ^dCule cuih paisa cu na thinlung ih a hiar mi pauhpauh hrangah: caw simaw, tuu simaw, sabit zu simaw, zu simaw, na thinlung ih a hiar mi pauhpauh hrangah na hmang pei. Jehovah na Pathian hmai, cu tawkah na ei pei ih, nangmah le na sungkua cu lungawi aipuangin nan um pei. 27 ^eNa khawpi kăwtkapawl sungih Levi-mi cu na thlauthla lo pei, ziangahtile anih cun na zawngah covo a nei lo ih, ro khal a nei fawn lo.

14:22^a Sem 14:20; Pui 27:30-33; Mip 18:21

14:23^b 1Sp 3:2; Sam 4:7; 22:23; Mal 2:5

14:25^c Mat 21:12; Joh 2:14

14:26^d Pui 10:9; 23:40; Ths 10:16-17

14:27^e Mip 18:20

28 ^a“Kum thumnak a cem tinten, cuih kum ih na ṭuan rahsuah ihsin ṭhen hra ṭhen khat cu na la pei ih, na khawpi kăwtka sungah na khawl pei. 29 ^bCule na khawpi kăwtkapawl sungih a um mi, Levi-mi, na zawngih covo le ro nei lo, mikhual le pa nei lo le nuhmei pawl kha an ra ding ih an ei ding, cule an khawp ding. Cutin Jehovah na Pathian in na tuah mi na kut hnaṭuan hmuahhmuah ah thlawsuah a lo pe ding a si.

14:28^a Pui 27:30

14:29^b Sem 47:22; Mip 26:62; Sam 41:1; 94:6; Thf 22:9; Isa 1:17; Mal 3:10

15

Leiba Awlhnak

1 ^a“Kum sarih a kim tinten leiba awlhnak na pe pei. 2 Cule himi hi leiba awlhdān cu a si: a innhnen hnenah thil a cawihtu kip in cumi cu a awlh pei, a innhnen, asilole a unaupa hnenin cumi cu a cawh nawn lo pei, ziangruangahtile cumi cu Jehovah ih leiba awlh kum tiih kawh a si. 3 ^bRam dang mi ta cu na cawh thei. Asinan na unaupa in a lo bâk mi cu na awlh pei.

15:1^a Neh 10:31

15:3^b Sem 31:15; Rut 2:10

4 ^a“Sikhalsehla Jehovah in cuih ram ah mal a lo sawm tengteng ding ruangah, nanmah lakah mifarah pakhat hman an um lo ding. Jehovah na Pathian in ro ih na lâk dingah cuih ram cu a lo pe. 5 ^bTuihni ih thu ka lo pek mi hi thupekpawl hmuahhmuah fimkhur zetih thlun dingah, Jehovah na Pathian thu ṭhateih na lun lawngah, cumi cu a cang ding. 6 ^cZiangahtile Jehovah na Pathian in a rak lo tiamkam vekin a lo thlawsuah ding. Miphun tampi hnenah na cawih ding, asinan nang cun na cawi lo ding. Miphun tampi na uk ding, asinan annih cun an lo uk lo ding.

15:4^a Dnp 7:13

15:5^b Suah 15:26

15:6^c Dnp 28:12

7 ^a“Jehovah na Pathian ih a lo pek mi na ram ih na ^bkhawpipawl lakih pakhat khat sungah, nanmah lakah na unaupawl lakih mi pakhat farah a um asile, cuih na unau farah pa hnen ihsin na thinlung na hakter lo pei ih, na kut na sûp fawn lo pei, 8 ^ccuhnakin a hnenah na kut saupin na suah pei ih, a ṭul mi pauhpauh, a ṭul mi hrangah haidaih ko siang zetin na cawih pei. 9 ^dRalring aw, culole na thinlung sungah ruahnak sualrál lutin, ‘A kum sarihnak, leiba awlh kum a nai thlang,’ tiin na unau farah pa mitkemin zianghman pe loin na um pang ding, cule anih cu nangmah dokalhin Jehovah hnenah a ausuak ding ih, cumi cu na hrangah sual ah a cang pang ding. 10 ^eAmah cu na pe tengteng pei ih, amah na pek tikah na thin a na lo pei. Ziangruangahtile hi thil ruangah sokhaw Jehovah na Pathian in na hnaṭuan hmuahhmuah le na kut na retnak pauhpauh ah thlawsuah a lo pek ding. 11 ^fZiangahtile na ram ihsin mifarah an cem dah lo ding. Curuangah na hnenah, ‘Na ram sungih um na mifarah le na mitlasam, na unaupa hnenah na kut saupin na suah tengteng pei,’ tiih thu ka lo peknak a si.

15:7^a Mat 26:11; 1Joh 3:17

15:7^b khawpipawl lakih pakhat khat: Hebru ah cun “kulh kăwtka sungah” ti a si.

15:8^c Pui 25:35-36; Mat 5:42; Luk 6:34; Apo 24:17

15:9^d Suah 22:23; Job 5:15; Mat 20:15; Jam 5:4

15:10^e 2Ko 9:5, 7

15:11^f Mat 26:11; Mar 14:7; Joh 12:8

Sál Luatternak

12 ^a“Na unau, Hebru mipa, asilole Hebru nunau kha na hnenah an rak zuar ih, kum ruk sung a lo rĕn asile, a kum sarihnak ah amah cu na hnen ihsin na suakzalenter pei. 13 Cule na hnen ihsin amah na zalenter tikah, kutlawng in na suakter lo pei. 14 ^bNa rante rual lak ihsin, na hruih hmun ihsin, na sabit sawrkhur ihsin siang zetin amah na pe pei. Jehovah na Pathian in a lo thlawsuah mi sung ihsin amah na pe pei. 15 ^cIzip ram ah sál na rak si ih, Jehovah na Pathian in a rak lo tlen a si ti kha na máng pei. Curuangah tuihni ah hi thil hi thu ka lo pe a si.

15:12^a Jer 34:14

15:14^b Mip 18:27

15:15^c Suah 13:3; 20:2; Jer 16:14; 34:13

Dam sung Sál Sinak

16 “Cule hitin a si ding, nangmah le na sungza a lo duhdawt hai ruangah le na hnenih a hmuingil ruangah, ‘Ka lo suahsan lo ding,’ a lo ti asile, 17 thir zúm na la pei ih sângka sansiah ah a hna na vit pei. Cule anih cu na sál a si kumkhua ding a si. Na sál nunau par khalah cuvek thothoin na tuah pei. 18 ^aNa hnen ihsin sál na zalenter tikah thil har vekah na ruat lo pei. Ziangahtile anih cun hlawhfa-ih a letin kum ruk sung hna a lo ṭuansak zo. Cun Jehovah na Pathian in na tuah mi hmuahhmuah ah a lo thlawsuah ding.

15:18^a Pui 25:39-46

Sumhnám Fatir hrang Dān

19 ^a“Na ranpi rual le na rante rual lak ihsin fatir a pa zaten Jehovah na Pathian hrangah na serhhran pei. Na ranpi fatir thawn ziang hna hman na ṭuan lo pei ih, na rante fatir hmul khal na met fawn lo pei. 20 ^bCumi cu nangmah le na sungkua in kum khat hnu kum khat Jehovah ih hril mi hmun ah Jehovah na Pathian hmaiah na ei pei. 21 ^cCule cumi rannung in himlonak pakhat a nei ih, a ke a bái simaw, a mit a caw simaw himlonak besia pakhat khat a neih asile, cumi cu Jehovah na Pathian hnenah raithawinak ah na hmang lo pei. 22 ^dNa khawpi kulh kăwtkapawl sungah cumi cu na ei pei. Sakhi le zuknêng sa ei vekin mithiang lo le mithiang in an ei veve pei. 23 ^eA thisen lawngte cu na ei lo pei. Cumi cu leilung parah tidai vekin na thle pei.

15:19^a Sem 4:4; Suah 13:2, 12; 22:30; Pui 27:9

15:20^b Pui 7:15-18

15:21^c Suah 12:5; Pui 22:19-25; Mal 1:8, 13

15:22^d Dnp 12:15-16

15:23^e Sem 9:4; Pui 7:26-27; 17:10-14; 19:26; Dnp 12:16, 23; Eze 33:25

16

Lanta Puai

1 ^a“Abib thla kha serhhran awla, Jehovah na Pathian hrangah Lanta Puai hmang aw. Ziangahtile Abib thla sungah Jehovah na Pathian in zan ah Izip ram ihsin a lo hruaisuak. 2 ^bCuruangah Jehovah na Pathian hrangih Lanta Puai thawinak cu na rante rual le na ranpi rual ihsin, Jehovah na Pathian in a hmin cēnnak dingih a hril mi hmun ah na hlan pei. 3 ^cCumi cu thilnu telh mi sang thawn na ei lo pei. Izip ram ihsin hmanhmawh zetin na ra suah ruangah zăwnzaihnak sang ti mi thilnu telh lo sang thawn ni sarih sung Lanta Puai raithawinak na ei pei. Cutin na dam sung hmuahhmuah ah, Izip ram ihsi na ra suah ni na cîng ringring thei ding. 4 ^dCule na ramkulh sung hmuahhmuah ah ni sarih sung na hnenah thilnu hmuh a si lo pei ih, a ni khatnak zan lamih na raithawinak sa ziangkhal a thaizing tiang na tāngter fawn lo pei.

16:1^a Suah 12:2, 11; Pui 23:5-8; Mip 28:16-25; 2Sp 23:21; Mat 26:17-29

16:2^b Dnp 15:20

16:3^c Suah 12:8, 11; 1Ko 5:8

16:4^d Suah 12:6, 8; Mar 14:12

5 “Lanta Puai raithawinak cu Jehovah na Pathian ih a lo pek mi khui tawk ^akhawpi hmanah na hlan lo pei. 6 ^bCuhnakin Jehovah na Pathian in a hmin cēnnak dingih a hril mi hmun, cu tawkah Izip ram ihsin na suah tikcu, ni tlak zawng, zan lamah Lanta Puai rai na thawi pei. 7 ^cCule a sa cu Jehovah na Pathian ih a hril mi hmun ah na rawh pei ih na ei pei. Cule zing ah na kir pei ih, na puanthlampawl ah na feh pei. 8 ^dNi ruk sung thilnu telh lo sang na ei pei ih, a ni sarihnak ah Jehovah na Pathian hrangah tawnkhawmawknak hleice a um pei. Cuih ni ah ziang hna hman na ṭuan lo pei.

16:5^a khawpi: Hebru ah cun “kulh kăwtka sungah” ti a si.

16:6^b Suah 12:42

16:7^c Suah 12:6

16:8^d Pui 23:8; Mat 26:17; Luk 2:41; Joh 2:13

Zarhkar Sarih hnu Puai

9 ^a“Nangmai hrangah zarh sarih na siar pei. Thlairawl ding lai parih favah na thluah thawk ihsin zarh sarih tiang siar na thawk pei. 10 ^bCu ṭhehin Jehovah na Pathian hrangah Zarhkar Sarih hnu Puai na hmang pei. Cun Jehovah na Pathian ih a lo thlawsuahdān izirin na kut ihta lungpuak thawhhlawm a daih tawkin na pe pei. 11 ^cJehovah na Pathian in a hmin cēnnak dingih a hril mi hmun ah, Jehovah na Pathian hmaiah, nangmah, na fapa le na fanu, na siahhlawh mipa le na siahhlawh nunau, na khawpi kăwtkapawl sungih um Levi-mi, nan lakih um mikhual le pa nei lo le nuhmei pawl thawn lungawi aipuangin na um pei. 12 Cule Izip ah sál na rak si ti kha cîng ringring awla, hi sakhaw dānpawl hi fimkhurten na thlun pei.

16:9^a Suah 23:16; Apo 2:1

16:10^b Pui 23:15-21; Mip 28:26-31

16:11^c Suah 20:24; 2Sam 7:13; Neh 8:10

Bûkte Puai

13 ^a“Na hruih hmun ihsin le na sabit sawrkhur ihsin na khawm ṭheh tikah, Bûkte Puai ni sarih sung na hmang pei. 14 Cule na puai ah cun nangmah le na fapa le na fanu, na siahhlawh mipa le na siahhlawh nunau le na khawpi kăwtkapawl sungih a um mi Levi-mi, mikhual le pa nei lo le nuhmei thawn lungawi aipuangin na um pei. 15 ^bNi sarih sung Jehovah ih a hril mi hmun ah Jehovah na Pathian hnenah a hleicein puai na hmang pei. Ziangruangahtile Jehovah na Pathian in na ṭuan rahsuah mi hmuahhmuah ah le na kut hnaṭuan hmuahhmuah ah a lo thlawsuah ding, cutin lungawi aipuangin na um taktak ding.

16:13^a Sem 27:37; Suah 23:16; Pui 2:14; 23:33-36, 39-43; Mip 29:12-38

16:15^b Job 38:7; Sam 4:7

16 ^a“Na mipapawl zaten kum khat ah vei thum Jehovah na Pathian hmaiah, a hril mi hmun ah Thilnu telh lo Sang Puai, Zarhkar Sarih hnu Puai le Bûkte Puai pawl ah an ra lang pei. Jehovah hmaiah kutlawng in an ra lang lo pei. 17 Jehovah na Pathian in na hnenih a lo pek mi thlawsuah izirin, mi kip anmai tithei tawk cio in an pe pei.

16:16^a Suah 12:17; 23:14, 16; 34:20; Ezr 3:4; Sam 84:7

Thuṭhennak Dān

18 ^a“Jehovah na Pathian ih a lo pek mi, na khawpipawl hmuahhmuah ah, na hnámpawl zulhin thuṭhentupawl le hotupawl na ruat pei. Cule annih in thuṭhennak dik in mi senpi thu an ṭhensak pei. 19 ^bDiknak na merhkâwi lo pei ih mi thleidan na nei lo pei. Nawhthuh cun mifim mit a cawter ih, midingfel ṭawngkampawl a merhkâwi ruangah nawhthuh na la fawn lo pei. 20 Diknak rori lawng na dawi pei, cutin na nungdam ding ih, Jehovah na Pathian ih a lo pek mi ram cu ro ah na co ding.

16:18^a Sem 31:37; Suah 18:21, 26

16:19^b Suah 18:21; 23:2, 6-8; Pui 19:15; 1Sam 8:3

Milem Biaknak Hrial Aw

21 ^a“Nangmah hrangah Jehovah na Pathian hrangih biakṭheng na dawl mi kiangah Asherah dingah nangmai hrangah ziang thingkung hman na phun lo pei. 22 ^bJehovah na Pathian ih a huat mi ṭhuamserh na dĭn lo pei.

16:21^a Suah 23:24; 34:13; 1Sp 14:15; 2Sp 17:16; 2San 33:3

16:22^b Pui 26:1

17

1 ^a“Jehovah na Pathian hnenah sawisel ding le himlonak pakhat khat nei mi caw pa simaw, tuu simaw in rai na thawi lo pei, ziangahtile cumi cu Jehovah na Pathian hmaiah fihnungza a si.

17:1^a Suah 12:5; Pui 22:20

Milem Biapawl Dāntatnak

2 ^a“Jehovah na Pathian ih a lo pek mi na ^bkhawpipawl lakih pakhat khat ah, Jehovah na Pathian mithmuh ah a thukham pahbălin a rak sualrál mi, mipa pakhat, asilole nunau pakhat kha, 3 ^cthu ka rak lo pek lo mi, pathian dang pawl hnenah rak fehin an rian ih, cupawl simaw, ni simaw, thlapi simaw, van ih thilmak rual lakih pakhat khat simaw an bia ti nan lakah hmuh a si ih, 4 cumi cu an lo sim ih na hna ih na theih asile, taima zetin na zingzawi pei. Cule ngai hnik, cuvek thil fihnungza Israel ram ih tuah mi cu a dik ngai ih, a fiangfel ngai asile, 5 ^dcuih thil sualrál a tuahtu mipa, asilole nunau cu na khawpi kulh kăwtkapawl ah na hruaisuak pei ih, cuih mipa, asilole nunau cu lungto in na dengthat pei. 6 ^eTheihpitu pahnih asilole pathum ih theihpinak ih thi tlak cu thah a si pei. Theihpitu pakhat ih theihpinak cun amah cu thah a si lo pei. 7 ^fCu pa parah theihpitupawl in that dingin an kut an thlak hmaisabik pei ih, cu hnuah mi senpi in an kut an thlak ding a si. Cutin nan lak ihsin thil ṭha lo na hloralter pei.

17:2^a Dnp 13:6

17:2^b khawpipawl lakih pakhat: 15:7 simfiangnak zoh aw.

17:3^c Sem 1:16; 2:1; Suah 22:20; Jer 7:31

17:5^d Pui 24:14

17:6^e Mip 35:30; Dnp 19:15; Mat 18:16; Joh 8:17; 2Ko 13:1; 1Ti 5:19; Heb 10:28

17:7^f Pui 24:14; Joh 8:7; Apo 7:58; 1Ko 5:13

Puithiam le Thuṭhentu ih Thuṭhennak

8 ^a“Thisen suahnak pahnih karlak thu, tazacuaiaw pahnih karlak thu, hriamhma baihawknak pahnih karlak thu ah na khawpi kăwtkapawl sungih thuhla buaipawl thuṭhen dingah na hrangih a har tuk mi thuhla a suak asile, na tho pei ih, Jehovah na Pathian ih a hril mi hmun ah na fehso pei. 9 ^bCule puithiampawl, Levi-mipawl le cuih cān ih thuṭhentu hnenah na feh pei ih na ráwn hai pei. Annih in thuṭhennak ih thu relcatnak cu na hnenah an lo thăn ding. 10 Jehovah in a hril mi cuih hmun ah na hnenih thu relcatnak an thăn bangtukin na tuah pei. Cule an lo khihhmuh mi hmuahhmuah bangtukih tuah dingah na fimkhur pei. 11 ^cAn lo khihhmuh mi thu relcatnak dān bangin, an lo sim mi thuṭhennak bangtukin na tuah pei. Na hnenih an thăn mi thu relcatnak ihsin vawrh lamah simaw, keh lamah simaw na pial lo pei. 12 ^dCule hngal zetih a cāngvaitu le Jehovah na Pathian hmaiih rawngbawl dingah, cu tawkih a dingtu puithiam, asilole thuṭhentu a ngaihsak duh lo tu pa, cu pa cu a thi pei. Cutin Israel lak ihsin thil ṭha lo na hloralter pei. 13 Cule mi senpi zate in hna in an thei ding ih an ṭih ding, cule hngal zetin an cangvai nawn lo ding.

17:8^a Suah 21:6; 2San 19:10; Sam 122:3-5

17:9^b Sem 25:22; Suah 21:6; Eze 44:24; Hag 2:11

17:11^c Pui 10:11

17:12^d Sem 17:14; Mip 15:30; 16:9; 1Sp 18:40; Jer 14:14; Hos 4:4; Zek 13:3

Siangpahrang hrang Dān

14 ^a“Jehovah na Pathian ih a lo pek mi ram ah na thleng ih, cumi cu na va la ih, a sungih na cēn ih, ‘Ka kimvelih a um mi miphunpawl hmuahhmuah vekin ka tlunah siangpahrang ka ret ding,’ na ti tikah, 15 ^bJehovah na Pathian ih a hril mi siangpahrang pakhat na tlunah na ret taktak ding. Na unaupawl lak ihsin mi pakhat kha na tlunih siangpahrang ah na ret pei. Na unaupa a si lo mi, ram dang mi kha na tlunah na ret lo pei. 16 ^cAsinan amai hrangah rangpawl a karhzaiter lo pei ih, rangpawl karhzaiter dingah mi senpi kha Izip ram ah kir ko a tuah hai fawn lo pei. Ziangahtile Jehovah in na hnenah, ‘Cuih zin ihsin na kirsal lo pei,’ tiah a lo ti. 17 ^dAmai hrangah nupi a karhzaiter fawn lo pei, culole a thinlung a pial pang ding. Amai hrangah sui le ngun khal nasa tukin a karhzaiter fawn lo pei.

17:14^a Mip 33:53; Jos 21:43; 1Sam 8:5, 19-20

17:15^b 1Sam 16:3; 2Sam 5:3; Jer 30:21

17:16^c Suah 13:17; 1Sp 4:26; 10:28; 2San 1:14, 16; 9:28; Isa 2:7

17:17^d Suah 34:16; 2Sam 5:13; 1Sp 10:14-22, 27; 11:1-8; 2San 1:15, 17; 9:27

18 ^a“Cule hitin a si ding, a siangpahrang tokham parih a to tikah, puithiampawl, Levi-mipawl hmai ihta dān ngan sâwng mi kha amai hrangah cazual pakhat sungah a ngan pei. 19 ^bCumi cu a hnenah a um pei ih, a dam sung hmuahhmuah cumi cu a siar pei. Cutin Jehovah a Pathian ṭihzah a zir ding ih hih dān le hih sakhaw dānpawlih kamsuakthupawl hmuahhmuah thlun dingin a fimkhur ding. 20 ^cCutin a unaupawl tlunah a thinlung a puarthau lo ding ih, thupekpawl ihsi khalin vawrh lamah simaw, keh lamah simaw a pial lo ding. Cutin Israel-mipawl lakah le a uk mi ram ah amah le a tefapawl thawn an nunkhua a sau ding.

17:18^a Jos 24:26; 1Sp 1:46; 2San 23:11

17:19^b Jos 1:8; 1Sp 3:3; 2Sp 22:2

17:20^c Jos 23:6; 1Sam 8:5; 1Sp 2:3; 9:4; 1San 28:8; Job 23:12

18

Puithiam hrang Thawhhlawm

1 ^a“Puithiampawl, Levi-mipawl le Levi hnám hmuahhmuah in Israel-mipawl zawngah covo le ro an nei lo. Annih cun meisa ih ur mi Jehovah-ih thilhlănpawl le a covo an ei pei. 2 ^bCuruangah an unaupawl lakah ro an nei lo pei. An hnenih a rak sim hai vekin, Jehovah cu an ro a si.

18:1^a Jer 33:18; 1Ko 9:13

18:2^b Mip 18:20; Jos 13:14

3 ^a“Cule raithawinak hlantu mi senpi hnen ihsin puithiam covo ding cu hihi a si: caw pa siseh, tuu siseh an hlăn tikah puithiam hnenah a liang, a khabepawl le a pumpi an pe pei. 4 ^bNa thlairawl thar hmaisa pawl le na sabit zu thar le na hriak thar le na tuupawl lakih hmul meh hmaisabik kha puithiam na pe pei. 5 ^cZiangahtile Jehovah na Pathian in na hnámpawl zate lak ihsin Jehovah hmin ih kumkhuain a rawngbawl dingih dīng dingah, amah le a fapapawl cu a hril a si.

18:3^a Suah 29:27; Pui 1:5; 7:28-34; Mip 18:12

18:4^b Suah 22:29; Mip 18:12

18:5^c Suah 28:1; 29:9

6 ^a“Cun Levi-mi pakhat cu Israel miphun zate lakih a cēnnak na ^bkhawpipawl lakih pakhat khat ihsin a ra ih, a lungthin ih hiar mi hmuahhmuah thawn Jehovah ih hril mi hmun ih a rat asile, 7 ^ccu tawk Jehovah hmaiih a dīng mi a unau Levi-mi hmuahhmuah vekin, Jehovah a Pathian hmin in rawng a bawl ding a si. 8 ^dA paih ro a zuar ih a ngah mi siartel loin, ei ding covo cu bangrepten an co pei.

18:6^a Mip 35:2-3

18:6^b khawpipawl lakih pakhat khat: 15:7 simfiangnak zoh aw.

18:7^c 1Sp 18:32

18:8^d Mip 18:24; 2San 31:4; Neh 12:44, 47

Miphun dang pawl tidān Hrial Aw

9 ^a“Jehovah na Pathian ih a lo pek mi ram na luh tikah, cuih miphunpawlih thil fihnungza pawl thlun dingin na zir lo pei. 10 ^bNan lakah a fapa simaw, a fanu simaw meisa fehtlăngtertu, tinzoh thiam, aizoh thiam, simsung thiam, dawithiam, 11 ^caizēl thiam, thlaraukawh thiam pawl, polpawl le mithi kawh thiam pawl pakhat hman hmuh a si lo pei. 12 ^dZiangahtile hi thilpawl a tuahtu hmuahhmuah cu Jehovah hrangah fihnungza a si. Cule hi thil fihnungza pawl ruangah Jehovah na Pathian in na hmai ihsin anmah cu a dawisuak hai a si. 13 ^eNangmah cu Jehovah na Pathian hmaiah sawihnăwm kai lo na si pei. 14 ^fZiangahtile na va dawisuak ding mi hi miphunpawl cun thilcam thiam le aizoh thiam an rak ngaithla. Asinan Jehovah na Pathian in na hrangah cuvekpawl cu a rak siang lo.

18:9^a Pui 18:3; 2Sp 21:2; 2San 28:3; Ezr 6:21; Jer 44:4

18:10^b Suah 7:11; 22:18; Pui 18:21; 19:26, 31; 1Sam 15:23

18:11^c Suah 22:18; Pui 19:31; 1Sam 28:7, 13; Isa 47:9

18:12^d Pui 18:24

18:13^e Sem 6:9; Mat 5:48

18:14^f 2Sp 21:6

Mosi Bangtuk Profet

15 ^a“Jehovah na Pathian in na unaupawl hnen ihsin, nanmah sungin keimah vek Profet na hrangah a suakter ding. Amah cu nan ngaithla pei, 16 ^bHoreb ih punkhawm ni ih, ‘Jehovah ka Pathian aw cu theisal hlah ning, hi meisa rapthlak khal hmu nawn hlah ning, culole ka thi ding,’ tiih na ti mi Jehovah na Pathian hnenih na dil mi hmuahhmuah bangtukin a cangsuak ding.

18:15^a Mat 21:11; Luk 2:25-35; 24:19, 25; Joh 1:21; Apo 3:22; 7:37

18:16^b Suah 20:19

17 ^a“Cule Jehovah in ka hnenah, ‘An rak sim mi cu a ṭha. 18 ^bAn unaupawl lak ihsin an hrangah nangmah vek Profet ka suakter ding ih, a kâ ah ka kamsuakthupawl ka ret ding. Cule a hnenih thu ka pek mi zaten anih in an hnenah a sim ding. 19 ^cCule hitin a si ding, zokhal ka hmin ih a sim mi ka kamsuakthupawl a ngaithla lo tu cu phu ka hlám ding.

18:17^a Dnp 5:28

18:18^b Sem 20:7; Suah 4:12; Isa 2:3; Mik 4:2; Joh 4:25-26; Apo 3:22

18:19^c Suah 23:21; Pui 19:12; Jos 22:23; 2Sp 2:24; Apo 3:23; Heb 12:25

Profet Dik Tahnak

20 ^a‘Asinan sim dingih amah thu ka pek lo mi ka hmin ih thusim ding a hngalpi zet tu profet le pathian dang pawl hmin ih a simtu profet cu a thi ding a si,’ tiah a ti. 21 Cule na thinlung sungah, ‘Jehovah ih a rak sim lo mi kamsuakthu a si ti ziangtin kan thei thei pei,’ na ti asile, 22 ^bprofet pakhat in Jehovah hmin in thu a sim tikah, a sim mi thil cu a cangsuak lo ih, a tlamtlin fawn lo ahcun, cuih thil cu Jehovah ih a sim lo mi a si. Cumi cu cuih profet in hngal zetih a sim mi a si ih, amah cu na ṭih lo pei.

18:20^a Suah 23:13

18:22^b 1Sam 3:20; 1Sp 22:28; Jer 28:9

19

Răwlhimnak Khawpipawl

1 “Jehovah na Pathian in a lo pek mi ram rak neitu miphunpawl kha Jehovah na Pathian in a hloralter hai ih, anmahpawl kha na dawisuak hai ih an khuapawl le an innpawl ih na cēn tikah, 2 ^aJehovah na Pathian in na lâk dingih a lo pek mi na ram sungah na hrangah khawpi pathum na rethran pei. 3 Nangmah hrangah zinpipawl na timtuah pei, cule Jehovah na Pathian in ro ih na co dingih a lo pek mi na ramkulh sung kha hmun thum ah na ṭhen pei, cutin mi that pang tu pauhpauh, cu tawkah an tlânlut thei ding.

19:2^a Jos 20:1-9

4 “Cule hihi a hlanih huat cia nak nei loin, tum lo piih a innhnen a thattu a nun thei nak dingih cu tawkih tlân, mi that pang tu paih dinhmun a si ding. 5 Ṭhimnakah mi pakhat kha a innhnen thawn thing hau dingah tupi sungah an feh ih, thing hau dingin a hreitlung a văi zawngah a hreitlung fáng kha a hrei hâ ihsin a tlâwng. Cule a innhnen pa a dengngah ih a thi. Cu pa cu hi khuapawl lakih pakhat khat ah a tlânlut ding ih, a nung ding. 6 ^aCuti a si lo ahcun thisen phuba latu pa in a thinheng a sat laiah mi that pang tu pa cu a dawi ding, cule lamzin a hlat ruangah a man ding ih, mi that pang tu pa in hi hlanah a innhnen pa cu a rak huat lo ruangah, amah cu thi tlak a si lo nân, a that pang ding. 7 Curuangah na hnenah, ‘Nangmai hrangah khua pathum rethran aw,’ tiin thu ka lo pe a si.

19:6^a Mip 35:12

8 ^a“Cule Jehovah na Pathian in na pupápawl hnenih sia a rak săm vekin, na ramri a kauter ih, na pupápawl hnenih pe dingih a rak tiamkam mi ram a lo pek asile, 9 ^btuihni ih thu ka lo pek mi Jehovah na Pathian duhdawt ding le a lamzinpawl ih feh camcin ding, hi thupekpawl hmuahhmuah na thlun ih, na tuah hai asile, hih khua pathum hleiah a dang khua pathum na hrangah na bêt leh ding. 10 ^cCulole ro dingah Jehovah na Pathian ih a lo pek mi na ram sungah mawhnak nei lo thisen suah a um pang ding ih, cuti cun thisen suahnak mawh na parah a um pang ding.

19:8^a Sem 15:8; Suah 34:24

19:9^b Jos 20:7-9

19:10^c Thf 6:17; Jer 7:6

11 ^a“Asinan mi pakhat khat in a innhnen a hua ih, amah cu a bawhthup, a zuanhnawh ih thi dingin a vua, cutin cu pa cu a thi. Cule amah cu himi khuapawl lakih pakhat ah a tlanluh asile, 12 cu paih khua ih khaw upapawl in mi an thlah pei ih, cu tawk ihsin cu pa cu an hruai pei. Cule cu pa cu thisen phuba latu hnenah an ap pei, cutin cu pa cu a thi ding. 13 ^bLainatnak mit in na zoh lo pei, cuhnakin Israel lak ihsin mawhnak nei lo thisen parih mawh cu na hloralter sawn pei. Cutin na lam a tluang ding. 14 ^cJehovah na Pathian in nei dingih a lo pek mi ram ih na co ding mi na ro sungah, khuahlan upapawl ih an tuah cia mi na innhnen ramri lung na ṭhawn lo pei.

19:11^a Suah 21:12; 1Joh 3:15

19:13^b 1Sp 2:31

19:14^c Dnp 27:17; Job 24:2; Sam 16:6; Thf 15:25; Isa 1:23; Hos 5:10

Theihpitupawl

15 ^a“Mawhsualnak pakhat khat, asilole a sual tuah mi sualnak pakhat khat thuhla ah mi pakhat dokalhin theihpitu pakhat a ding lo pei. Theihpitu pahnih simaw, pathum simaw ih kâ ihsin thuhla cu hngehter a si pei. 16 ^bTheihpitu dik lo in mi pakhat khat, thil sual tuah puhin a dīn asile, 17 ^ccumi thubuai neitu cu an pahnih in Jehovah hmaiah le cumi laiih rawngbawltu puithiampawl le thuṭhentu hmaiah an dīng pei. 18 ^dCule thuṭhentupawl in fimkhur zetin an zingzawi pei ih, ngai hnik, cuih theihpitu cu a unau parih dik lo zetin thu a theihtertu theihpitu dik lo a si ahcun, 19 ^ea unau parah tuah dingih a tum mi vekin amah parah na tuah pei. Cutin nan lak ihsin thil ṭha lo na hloralter pei. 20 ^fCule a tāng lai mipawl in an hna in an thei ding ih, an ṭih ding, cule cuih hnu ihsin nan lakah cuvek thil ṭha lo an tuah sual sal nawn lo ding. 21 ^gLainatnak mit in na zoh lo pei. Nunnak aiah nunnak, mit aiah mit, hâ aiah hâ, kut aiah kut, ke aiah ke a si pei.

19:15^a Mip 35:30; Dnp 17:6; Mat 18:16; Joh 8:17; 2Ko 13:1; 1Ti 5:19; Heb 10:28

19:16^b Suah 23:1; Thf 6:19

19:17^c Suah 21:6

19:18^d Suah 23:7

19:19^e Thf 19:5, 9; 1Ko 5:13

19:20^f Dnp 17:13

19:21^g Suah 21:23-25; Pui 24:19-20; Mat 5:38

20

Ral Dodān

1 ^a“Na ralpawl do dingah na fehsuak ih, rangpawl le rang lêngpawl le nangmah hnakih tamsawn miphun na hmuh tikah, cupawl cu ṭih hlah. Ziangahtile Izip ram ihsin a lo hruaisuaktu Jehovah na Pathian cu na hnenah a um a si. 2 Cun hitin a si ding, ral nan do zik thlang tikah, puithiam in a rak naih pei ih, mi senpi hnenah thu a sim pei. 3 ^bCule an hnenah, ‘Maw Israel, ngai hnik, tuihsun ah nan ralpawl nan do zik thlang. Zâm hlah uh, ṭih hlah uhla, hamhaih hlah uh, anmah ruangah nan thinphâng fawn hlah seh. 4 ^cZiangahtile Jehovah nan Pathian, nan zawngih a fehtu amah in nanmah lo run dingin nan hrangah nan ralpawl cu a do ding,’ tiah a ti ding.

20:1^a Mip 14:9; 1Sam 17:45; Sam 20:7; Isa 31:1; 41:10

20:3^b 1Sam 17:32; Job 23:16; Sam 22:14; Isa 7:4; Jer 51:46

20:4^c Suah 14:14; Lai 12:3; 1San 5:22; 2San 20:14-22; Neh 4:20; Sam 44:7

5 ^a“Cun hotupawl in mi senpi hnenah, ‘Inn thar sak ih, cumi ap hrih lo tu an um maw? Va fehin a inn ah va kirsal seh, culole ral donak ah a thi pang ding ih, mi dang in cumi cu an ap pang ding. 6 ^bSabit hmuan tuah naih ei hrih lo tu an um maw? Va fehin a inn ah va kirsal seh, culole ral donak ah a thi pang ding ih, mi dang in cumi cu an ei pang ding. 7 ^cCule nunau pakhat nupi dingah ham ih, amah nu ṭhi hrih lo tu an um maw? Va fehin a inn ah va kirsal seh, culole ral donak ah a thi pang ding ih, mi dang in cu nu cu an ṭhi pang ding,’ tiin an ti pei.

20:5^a Neh 12:27

20:6^b Jer 31:5; Eze 28:26; Mik 1:6; 1Ko 9:7

20:7^c Thf 5:18

8 ^a“Hotupawl in mi senpi hnenah thu simbêt hai sehla, ‘Miṭihhrut le zâm pa a um maw? Va fehin a inn ah va kirsal seh, culole amai thinlung vekin a unaupawlih thin a nau pang ding,’ tiah an ti pei. 9 Cule hitin a si ding, hotupawl in mi senpi hnenih thu an sim ṭheh tikah, mi senpi hotu ah ralkap bawipawl an ruat pei.

20:8^a Lai 7:3

10 ^a“Khua pakhat do dingih na va naih tikah, cuih khua hnenah remnak thu phuang aw. 11 ^bCule hitin a si ding, na remnak thuphuan mi an cohlang ih, kăwtka an lo ăwn asile, cuih khawpi sungih hmuh mi mi senpi zaten nangmah hrangih ṭuan dingin hramhramin na fial hai pei ih, nangmah an lo rian ding a si. 12 Cun cuih khua cun nangmah thawn remnak tuah loin, a lo do sawn ding asile, cuih khawpi cu na kulh pei. 13 ^cCule Jehovah na Pathian in cumi cu na kut ih a lo pek tikah, mipa zaten ralnâm hriam in na that ṭheh hai pei. 14 ^dAsinan nunaupawl, fanau tete pawl, sumhnámpawl le khaw sungih a um mi hmuahhmuah le cuih khua ralthillâk zaten nangmah hrangah na la pei. Cule Jehovah na Pathian ih a lo pek mi na ralpawlih ralthillâk na ei pei. 15 ^eHi miphunpawlih khuapawl a si lo mi, nangmah thawi a hlat tuk nak ih um khua hmuahhmuah parah hiti vekin na tuah pei.

20:10^a Luk 14:31-32

20:11^b 1Sp 9:21; 2Sp 6:22; 1San 22:2; Isa 31:8

20:13^c Mip 31:7

20:14^d Mip 31:11, 53; Jos 8:2

20:15^e Jos 9:9

16 ^a“Asinan Jehovah na Pathian in ro ih a lo pek mi, hi miphunpawlih khuapawl parah cun thaw a nei mi zianghman a nungin na zuah lo pei. 17 Cuhnakin Jehovah na Pathian in thu a rak lo pek vekin, Heth-mi, Amor-mi, Kanaan-mi, Periz-mi, Hiv-mi le Jebus-mi pawl cu na hloralter thluh hai sawn pei. 18 ^bCulole an pathianpawl hrangih an tuah mi, an thil fihnungza pawl hmuahhmuah bangtukin tuah dingah an lo zirh ding ih, Jehovah nan Pathian lakah nan sual pang ding.

20:16^a Suah 23:31-33; Mip 21:2-3; Jos 6:21

20:18^b Suah 10:7; 34:16

19 “Cun khaw pakhat la dingih na do laiah, cuih khua cu reipi na kulhkhŭm tikah, cu tawkih um mi thingkungpawl kha hreitlung ih hau-in na siatsuah hai lo pei. Cupawl ihta na ei thei asile, a kulhnak ih hman dingah cupawl cu na hau lo pei, ziangahtile lóram ih thingkung cu minung nunnak a si. 20 ^aRawl hrang ṭha thingkung an si lo ti na theih mipawl lawngte nangmah a lo dotu khua na lâk hlanlo, cuih khawpi kulhkhŭmnak saknak hrangah na siatsuah thei ih, na hau thei a si.

20:20^a Jer 6:6

21

A Thattu Theih Lo Mi Mithi hrang Dān

1 ^a“Jehovah na Pathian in la dingih a lo pek mi ram ah, a thattu zo a si ti theih lo mi, thah mi pakhat ramlak ah lumih hmuh asile, 2 na miupapawl le na thuṭhentupawl an fehsuak pei ih, thah mi pa hnen ihsin a kimvel khuapawl hlat zat an tah pei. 3 ^bCule hitin a si ding, thah mi pa a naihtu bik khaw upapawl in hnaṭuan dah lo le hngawngkol bât dah lo mi, caw la an la pei. 4 Cuih khaw upapawl cun caw la cu tidai luang rero lai mi hawrkuam ah an hruaithla pei. Cuih hmun cu lei leh dah lo mi le thlai cīn dah lo nak hmun a si ih, cu tawk hawrkuam ah caw la ih hngawng cu an khiak pei. 5 ^cCun Levi-ih fapapawl, puithiampawl in an va naih pei, ziangahtile annih cu Jehovah na Pathian in a hrangih rawngbawl dingah le Jehovah hmin ih thlawsuah pe dingah a hril mi an si. Anmai ṭawngkam in thubuai tinkim le tuahmawhawknak tinkim cu tifel a si pei. 6 ^dCule thah mi pa a naihtu bik khaw upapawl hmuahhmuah cun hawrkuam ih a hngawng an khiah mi caw la parah an kut an khawlh pei. 7 Cun annih in an let pei ih, ‘Hih thisen hi kan kut ih suah mi a si lo ih, kan mit khal in a rak hmu fawn lo. 8 ^eMaw Jehovah, na rak tlĕn mi na mi Israel parah sualkhuhthawinak tuahsak aw, mawhnak nei lo thisen suahnak mawh kha na mi Israel parah ret hram hlah,’ tiah an ti pei. Cule thisen mawh hrangah an aiah sualkhuhthawinak tuahsak a si pei. 9 ^fCutin Jehovah-ih mithmuh ah a dik mi na tuah tikah, nan lak ihsin mawhnak nei lo thisen suahnak mawh kha na hloralter ding.

21:1^a Mip 25:17

21:3^b Mip 19:2

21:5^c Sem 48:20; Suah 39:43

21:6^d Mat 27:24

21:8^e Mip 35:33-34

21:9^f Dnp 19:13

Ralkaih Nunau Ṭhitnak hrang Dān

10 ^a“Na ralpawl do dingin na fehsuak ih, Jehovah na Pathian in na kut ah anmahpawl cu a lo pek ih, anmahpawl cu ralkaih ih na hruai hai tikah, 11 ^bralkaihpawl lakah nunau hmelṭha na hmu, cule cu nu cu na nupi ih lâk dingah amah cu na hâ a hiau asile, 12 ^c cu nu cu na inn ah na hruai pei, cule a lu a ziat pei ih, a tínpawl tla a tán pei. 13 ^dA ralkaihnak hnipuan a hlit pei ih, na inn ah a tāng pei, cule thla khat pumhlum a nu le a pa a sūn pei. Cu hnuah a hnenah na lut ding ih, a pasal na si ding, cule anih cu na nupi a si ding. 14 ^eCule hitin a si ding, cu nuih parah na lung a si lo asile, amah cu a duhnak ah na fehter pei, asinan amah nu cu paisa ah na zuar hrimhrim lo pei. Amah cu sál vekin na tuah lo pei, ziangruangahtile amah nu cu ningzak mualpho ko na rak tuah zo.

21:10^a Jos 21:44; 1Sp 8:46; 1San 9:1; Ezr 5:12; Jer 40:1; Eze 1:1; Dan 2:25; Mik 4:10

21:11^b Sem 6:2; 34:8

21:12^c Pui 14:9; Mip 8:7; 1Ko 11:5

21:13^d Sam 45:10

21:14^e Sem 34:2

Fatir Ro Co Dān

15 ^a“Mi pakhat in nupi pahnih a nei ih, pakhat a duh ih pakhat a duh lo, cule cuih a duh mi le a duh lo mi an pahnih in fapa an hrinsak veve. Cule fapa fatir cu a duh lo mi nupi ih hrinsak mi asile, 16 ^bhitin a si pei, a neih mipawl kha a fapapawl hnenih ro a zem ni ah, fatir taktak a si mi, a duh lo mi nuih fapa aiah a duh mi nuih fapa kha fatir sinak a pe thei lo. 17 ^cCuhnakin a duh lo mi a nupi-ih fapa kha fatir a si ti lăngternak ah a neih mi zate sung ihsin covo a letin a pe sawn pei. Ziangahtile amah cu a thazang hramthăwknak a si. Fatir sinak thuneihnak cu amai ta a si.

21:15^a Sem 4:19; 29:33

21:16^b 1San 26:10

21:17^c Sem 25:31, 33; 49:3; 2Sp 2:9; Isa 40:2; Zek 9:12

Fapa Hél hrang Dān

18 ^a“Mi pakhat in a paih thu simaw, a nuih thu simaw thlun duh lo fapa lungruh le helhmang a nei ih, nun an sim tikih a lun lo asile, 19 amah kha a nu le a pa in an kaibĕt pei ih, a khaw upapawl hnen, amai umnak khua kăwtka ah an hruaisuak pei. 20 Cule annih in a khaw upapawl hnenah, ‘Hih kan fapa hi lungruh le helhmang a si. Kan thu a lung lo, amah hi misăwkphăk le zu pham a si,’ tiah an ti pei. 21 ^bCun a khawmi mipa hmuahhmuah in amah cu lungto in an dengthat pei. Cutin nan lak ihsin thil ṭha lo nan hloralter pei, cule Israel miphun zaten an thei ding ih an ṭih ding.

21:18^a Sem 31:35; Sam 78:8; Thf 1:8; 30:17; Isa 30:1; Jer 5:23; Zef 3:1; Efe 6:1-3

21:21^b Pui 20:9

22 ^a“Mi pakhat in thihnak tlak sual a tuah asile, thah a si pei ih, thing parah na thlai pei. 23 ^bRo dingah Jehovah na Pathian ih a lo pek mi ram na bawrhbanterlonak dingah a ruak cu thing parah zanvar a tâng lo pei, cuih ni ah amah cu na phum tengteng sawn pei, ziangahtile thing parih thlai mi cu Pathian camsiat mi a si.

21:22^a Mat 26:66; Mar 14:64

21:23^b Pui 18:25; Jos 8:29; Ezr 6:11; Est 2:23; Isa 50:11; Eze 39:12; Joh 19:31; Gal 3:13

22

Dān Phunphun

1 ^a“Na unaupaih caw simaw, tuu simaw a vâkhlo mi simaw na hmuh tikah, na umsan men lo pei. Cupawl cu na unaupa hnenah na hruaikirsal tengteng pei. 2 Cule na unaupa cu na kiang naiah a um lo ih, cu pa cu na theih lo asile, ran cu na inn ah na hruai pei, cule na unaupa in a hawl hlan sung na inn ah a um pei. Cun a hnenah na pesal pei. 3 Cuvek thothoin a lāk par khalah na tuah pei, cule a sinfen khalah na tuah pei. Na unaupaih thil hlo mi pauhpauh, cuih a hlohter mi na hmuh mi cu, cuvek thothoin na tuah pei. Na umsan men lo pei.

22:1^a Suah 23:4-5; Thf 27:10; Zek 7:9

4 ^a“Na unaupaih lāk simaw, a caw simaw lamzin ih a tlu na hmuh tikah, na umsan men lo pei. Cupawl thoter dingah amah cu na bawm tengteng pei.

22:4^a Suah 23:5; 1Ko 9:9

5 “Nunau in mipa thuamhnaw a hruk lo pei ih, mipa khal in nunau sinfen a hruk fawn lo pei. Ziangahtile cu vekih tuahtu hmuahhmuah cu Jehovah na Pathian hrangah fihnungza an si.

6 ^a“Na hmai zin tluanah thingkung par simaw, lei ah a fa note pawl simaw, a tipawl thawi a um mi simaw vate bu a um ih, a pinu in cuih a fa note pawl simaw, a tipawl simaw a ăwp lai asile, a fa note zawngah a pinu cu na lacih lo pei. 7 ^bA pinu kha na thlah tengteng pei ih, a fa no pawl kha nangmah hrangah na la pei. Cutin na lam a tluang ding ih, na nunkhua a sau ding.

22:6^a Pui 22:28

22:7^b Pui 22:28

8 ^a“Inn thar na sak tikah, mi pakhat khat na inn par ihsin a tlak ih na sungkua parah thisen suahnak mawh na thlĕnlonak dingah, na inn tlun khuh kimvelah khamtu na tuah pei.

22:8^a Jos 2:8; 1Sam 9:25; 2Sam 11:2

9 ^a“Na sabit hmuan ah thlaici phun dangdang na cingrawi lo pei. Culole na rak cīn mi thlaici rah le na sabit hmuan rah an bawrhbang pang ding.

22:9^a Pui 19:19

10 ^a“Caw cang le lāk in lei na lettlang lo pei.

22:10^a 2Ko 6:14

11 ^a“Sahmul le pat zai fêmte rawiih tah mi sinfen na hruk lo pei.

22:11^a Pui 19:19

12 ^a“Na sĭn mi puan a kil pali ah a fêm na tuah pei.

22:12^a Mip 15:37-41; Mat 23:5

Thianhlimnak hrang Dān

13 “Mi pakhat in nupi a nei ih, a hnenah a lut, cule amah cu a hua, 14 cule cu nuih parah ningzakza thilpawl a puh ih, hminseterin, ‘Hi nu hi ka nei ih, a hnenih ka luh tikah fala him a sinak fiangtertu ka hmu lo,’ a ti asile, 15 ^acuih fala-ih nu le pa in cuih fala, fala him a sinak fiangtertu kha an la pei ih, kulh kăwtka ih khaw upapawl hnenah an run keng pei. 16 Cule cuih fala-ih pa in, ‘Ka fanu hi hi pa hnenah a nupi dingah ka pe ih, amah cu a hua. 17 Cule ngai hnik uh, amah nuih thuhla ah, “Na fanu hi fala him a sinak fiangtertu ka hmu lo,” tiin ningzakza thilpawl a puh, asinan hipawl hi ka fanuih fala him a sinak fiangtertupawl an si,’ tiah a ti pei. Cule cuih puan cu khaw upapawl hmaiah an pharh pei. 18 ^bCun khaw upapawl in cu pa cu an hruai pei ih dān an tat pei. 19 Cule cu pa cu ngun tangka shekel 100 an kuanter pei ih, falanuih pa hnenah an pek pei. Ziangruangahtile Israel fala him hnenah hminsiatnak a thlenter a si. Cule cu nu cu a nupi a si pei ih, a dam sung hmuahhmuah ^ca mâk thei lo.

22:15^a Sem 23:10

22:18^b Suah 18:21

22:19^c a mâk: A ṭawng hrampi ah dawihlo ti a si.

20 “Asinan cuih thil cu a dik ih, falanuih hrangah fala him a si ti fiangtertu hmuhsuah a si lo ahcun, 21 ^acuih fala cu a paih inn sângka ah an suahpi pei ih, cu nuih umnak khawmi mipapawl in cu nu cu lungto in an dengthat pei. Ziangruangahtile a paih inn sungah nunau-mipa sualnak tuahnak in Israel ram ah ningzah mualphoza thil a tuah. Cutin nanmah lak ihsin thil ṭha lo cu na hloralter ding a si.

22:21^a Sem 34:7; Pui 19:29; 1Ko 5:13

22 ^a“Mi pakhat kha pasal a nei lai mi nunau thawn an ihtlang hmuh asile, cuih nunau a ihpitu pa le a nunau, an pahnih in an thi pei. Cutin Israel ram ihsin thil ṭha lo cu na hloralter pei.

22:22^a Sem 38:24; Suah 21:12; 2Sam 11:4; Mat 5:27-28; Joh 8:5; 1Ko 6:9; Heb 13:4

23 “Pasal nei dingih an ham mi fala him pakhat kha mipa pakhat in khaw sungah a táwng ih a ihpi asile, 24 ^acute pahnih cu khaw kulh kăwtka ah na hruaisuak hai pei ih, anmah cu lungto in na dengthat hai pei. Cuih falanu cu khaw sungah a um ko nân, a au lo ruangah le cu pa in a innhnen paih nupi ningzak mualpho ko a tuah ruangah a si. Cutin nanmah lak ihsin thil ṭha lo cu na hloralter ding a si.

22:24^a 1Ko 5:13

25 “Asinan mi pakhat in nupi dingih ham mi fala kha ramlak ah a táwng, cu nu cu kaihrem tahratin a ihpi asile, a ihpitu pa lawng a thi pei. 26 Asinan fala parah cun zianghman na tuah lo pei. Cuih fala parah thihnak tlak sual zianghman a um lo. Ziangahtile hih thubuai cu mi pakhat in a innhnen pa a zuanhnawh ih, a thah vek a si. 27 ^aZiangahtile cu pa cun cu nu cu ramlak ih a tawn mi a si, ham mi fala cu a rak au ko nân, amah runtu ding zohman an um lo.

22:27^a Sem 39:14

28 ^a“Mi pakhat in ham lo mi fala him a hmu ih a kaihrem ih a ihpi, cule annih cu hmuh an si le, 29 ^bcu nu a ihpitu pa in, cuih falanuih pa kha ngun tangka shekel 50 a pe pei. Cule cu nu cu anih in ningzak mualpho ko a tuah ruangah a nupi ah a cang pei. A dam sung hmuahhmuah cu nu cu a mâk thei lo.

22:28^a Suah 22:16-17

22:29^b Suah 22:16-17

30 ^a“Mi pakhat in a paih nupi a ṭhi lo pei ih, a paih puan zim a hlîp fawn lo pei.

22:30^a Sem 29:29; Pui 18:8; 20:11; Dnp 27:20; 1Ko 5:1

23

Mipi Umkhawmnak ih Tel Sian lo Mipawl

1 ^a“Sŭtkuai ruangih tilper mi le a zahmawh tán mi cu Jehovah hrangih punkhawmnak ah a lut lo pei.

23:1^a Pui 21:20

2 “Fa sâwn cu Jehovah hrangih punkhawmnak ah a lut lo pei. San hratnak tiang hman Jehovah hrangih punkhawmnak ah a cithlahpawl zohman an lut lo pei.

3 ^a“Ammon-mi le Moab rammi cu Jehovah hrangih punkhawmnak ah an lut lo pei. San hratnak tiang hman Jehovah hrangih punkhawmnak ah kumkhuain a cithlahpawl zohman an lut lo pei. 4 ^bZiangruangahtile Izip ram ihsin nan ra suah tikah lamzin ah ti le sang thawn an rak lo hmuak lo ih, nangmah camsiat dingah Mesopotamia ram, Pethor khua ih um Beor-ih fapa Balaam kha nangmah dokalhin an rak hlăn ruangah a si. 5 ^cSikhalsehla Jehovah na Pathian in Balaam cu a rak ngaithla duh lo, cuhnakin Jehovah na Pathian in a lo duhdawt ruangah, Jehovah na Pathian in camsiatnak cu na hrangah thlawsuah ah a cangter sawn a si. 6 ^dKumkhuain na dam sung hmuahhmuah ziangtik hmanah an hrangah remdaihnak na hawlsak lo pei ih, an lamtluannak ding khal na hawlsak fawn lo pei. 7 ^eEdom-mi na tĕn lo pei, ziangahtile anih cu na unaupa a si. Izip-mi na fih lo pei, ziangahtile amai ram ah khawtluang mi na rak si dah. 8 An hrin mi a san thumnak tefapawl cu Jehovah hrangih punkhawmnak ah an lut thei ding.

23:3^a Sem 19:38; Neh 13:1-2

23:4^b Sem 24:10; Mip 22:1-6; 23:7; 2Pe 2:15

23:5^c Mip 24:10; Jos 24:10; Thf 26:2

23:6^d Ezr 9:12; Eze 25:8; Zef 2:9; Mat 5:43

23:7^e Sem 25:26, 30; Pui 19:34

Thianfainak Dān

9 ^a“Na ralpawl do dingah ralkappawl an fehsuak tikah, thil sualrál kip lak ihsin nangmah le nangmah kilhimaw aw. 10 ^bNan lakih mipa pakhat khat cu, zan ah a hnen ihsi a suak mi thil ruangah a thiang lo asile, nan riahhmun khuarnak ihsin lengah a suak pei. Nan riahhmun khuarnak sung lamah a lut lo pei. 11 ^cAsinan hitin a si ding, zan lam a thlen tikah, tidai in a khawlhaw pei, cule ni a tlak tikah riahhmun khuarnak ah a lut pei.

23:9^a Pui 15:1-33

23:10^b Pui 15:16

23:11^c Pui 15:16; 1Sam 21:5

12 “Cuihhleiah riahhmun lengah na dailennak dingah hmun pakhat na nei pei. 13 Cule na ralthuam lakah hmanrua pakhat na kengcih pei ih, riahhmun khuarnak lengih na to tikah, cumi in na lai pei ih, na her pei, cule na zunpâwng kha na silh pei. 14 ^aZiangahtile Jehovah na Pathian cu nangmah runsuak dingah le na ralpawl na hnenih lo pe dingah na riahhmun sungah a vâkkual a si. Nan lakah a bāl mi pakhat khat a hmuh asile, nan hnen ihsin a kirhlo ding. Curuangah na riahhmun cu a thianghlim pei.

23:14^a Sem 3:8; Suah 3:5

Dān Phunphun

15 ^a“A pu hnen ihsin na hnenih a ra tlânsuaktu sál cu a pu hnenah na pekirsal lo pei. 16 ^bAnih cun amai duhnak hmun, na khawpipawl lakih pakhat khat sungah amai umnak ding a hril thei ih, nan lakah a cêng thei. Amah cu na palbĕt lo pei.

23:15^a 1Sam 30:15

23:16^b Suah 22:21

17 ^a“Israel fanupawl lakah sakhaw hlawhhlang an um lo pei ih, Israel fapapawl lak khalah sakhaw hlawhhlang an um fawn lo pei. 18 ^bHlawhhlang hlawh manpawl siseh, ^cuico hlawh man siseh, Jehovah na Pathian inn ah thutiam thawhhlawm pakhat khat hrangah na keng lo pei. Ziangahtile hite pahnih cu Jehovah na Pathian hrangah fihnungza an si.

23:17^a Sem 38:21; Pui 19:29; 1Sp 14:24; 2Sp 23:7

23:18^b Sem 19:5; Thu 22:15

23:18^c uico: Sakhua thawi pehtlaiaw mi mipa hlawhhlang a si. An sakhua temple ah an um ṭheu.

19 ^a“Na unaupa hnenah a ṭhangin na cawih lo pei. Paisa simaw, rawl simaw thil pakhat khat a ṭhangin na cawih lo pei. 20 ^bRam dang mi hnenah a ṭhangin na cawih thei, asinan la dingih na luhnak ram ah na kut ṭuan mi hmuahhmuah ah Jehovah na Pathian in a lo thlawsuahnak dingah, na unaupa hnenah a ṭhangin na cawih lo pei.

23:19^a Pui 25:35-37; Neh 5:2-7

23:20^b Sem 31:14-15; Suah 22:25; Pui 25:36-37; Dnp 15:7-11

21 ^a“Jehovah na Pathian hnenih thutiam na tuah tikah, cumi tlamtlingter dingah na tlâi lo pei. Ziangahtile Jehovah na Pathian in cumi cu na hnenah a lo hlám tengteng ding ih, cumi cu na hrangah sual a si ding. 22 ^bAsinan thutiam tuah na sūpawk asile, cumi cu na hrangah sual a si lo ding. 23 ^cNa hmur ihsin a rak suak zo mi cu tuahsuak dingin na fimkhur pei, ziangahtile Jehovah na Pathian hnenah na kâ in na rak tiamkam mi cu nangmai duhhrilnak in thu na rak tiam a si.

23:21^a Mip 6:21; 30:1-2; Lai 11:35; Job 22:27; Ths 5:4-5; Isa 19:21; Mat 5:33; Apo 5:3

23:22^b Mat 5:33-37; Apo 5:4

23:23^c Mip 30:2; Sam 66:13-14

24 “Na innhnen sabit hmuan ih na feh tikah, sabit rahpawl cu na duhtawkin khawp ko na ei thei, asinan na bawm sungah cun na săn lo pei. 25 ^aNa innhnen thlairawl dīng lai ló ih na feh tikah, a vuipawl cu na kut in na sik thei, asinan na innhnen thlairawl dīng lai parah favah na hmang lo pei.

23:25^a Mat 12:1; Mar 2:23; Luk 6:1

24

1 ^a“Mi pakhat in nupi a nei ih, a ṭhit tikah, hitin a si, cu nu ah thianghlimlonak a rak hmuhsuak ruangah cu nu in cu paih mit ah duhsaknak a táwng lo. Cule cu nuih hnenah cu pa cun mâknak ca a ngan ih, cumi cu cu nuih kut ah a ret, cule cu nu cu a inn ihsin a thlahsuak. 2 Cu nu cu a pasal inn ihsin a păwksuak, cule a feh ih, a dang mi pakhat ih nupi ah a cang.

24:1^a 2Sp 17:6; Isa 50:1; Jer 3:8; Mal 2:16; Mat 1:19; 5:31; 19:7; Mar 10:4-5

3 “A pasal neta in cu nu cu a hua ih, a hnenah mâknak ca a ngan, cumi cu cu nuih kut ah a ret ih, a inn ihsin a thlahsuak simaw, nupi ih a rak neitu a pasal neta a thi simaw asile, 4 ^acu nu a bawrhban hnuah cun a nupi si dingah amah mâktu a pasal hmaisa in cu nu cu a neisal thei lo. Ziangahtile cumi cu Jehovah hmaiah fihnungza a si. Ro dingih Jehovah na Pathian ih a lo pek mi ram ah sual na keng lo pei.

24:4^a Jer 3:1

5 ^a“Mi pakhat in nupi thar a ṭhit tikah, ral do dingah a fehsuak lo pei ih, hnaṭuan pakhat khat khalah ṭuanvo pek a si lo pei. Anih cu inn ah kum khat sung a âwl pei ih, a rak ṭhit mi a nupi hnenah lungawi aipuannak a thlen pei.

24:5^a Dnp 20:7

6 ^a“Zohman in kămawknak hrangah rial lung pumhlum simaw, rial lung tlunta simaw an la lo pei, ziangruangahtile kămawknak hrangah mi pakhat nunnak a lâksak vek a si ding.

24:6^a Suah 22:22

7 ^a“Mi pakhat in Israel tefapawl lakih a unau pakhat khat a ru ih, cu pa cu sál vekih a tuah simaw, a zuar simaw hmuh asile, a rutu pa cu a thi ding a si. Cule nan lak ihsin thil ṭha lo cu na hloralter pei.

24:7^a Suah 21:16; 1Ko 5:13

8 ^a“Phār nathri thuhla ah ralring aw, puithiam a si mi Levi-mipawlih an lo zirh ding mi hmuahhmuah bangtukin ṭha zetih thlun dingin fimkhur uh. Anmah thu ka rak pek vekin, tuah dingah nan fimkhur pei. 9 ^bIzip ram ihsin nan suah tikah, lamzin ah Miriam parah Jehovah na Pathian in ziang a tuah ti kha máng ringring aw.

24:8^a Pui 13:1-46

24:9^b Mip 12:10

10 ^a“Na innhnen hnenah thil pakhat khat na cawih tikah, a kămawknak va la dingin a inn ah na lut lo pei. 11 Nang cu lengah na dīng pei ih, thil na cawih mi pa in kămawknak cu lengah na hnenah a rak keng pei. 12 Cule cu pa cu a farah asile, a kămawknak cu zanvar na hreng lo pei. 13 ^bA kămawknak cu ni a tlak tikah a hnenah na khirhsal tengteng pei, cutin anih cu amai puan sungah a it thei ding ih thlawsuah a lo pe ding. Cule cumi cu Jehovah na Pathian hmaiah na hrangah dingfelnak a si ding.

24:10^a Suah 22:25-27

24:13^b Suah 22:26-27; Dan 4:27

14 ^a“Na unaupawl lakih pakhat simaw, na khawpi kăwtka sungih na ram ih um khawtluang mipawl lakih pakhat simaw, mifarah le mitlasam hlawhfa cu na palbĕt lo pei. 15 ^bA hlawh manpawl cu ni tin na pe pei ih, ni in tlâkpi hlah seh. Ziangahtile amah cu mifarah a si ih, cumi cu a hngahhlap mi a si. Culole Jehovah hnenah nangmah dokalhin a ausuak pang ding ih, cumi cu na hrangah sual a si pang ding.

24:14^a Pui 19:13; Job 24:4; Thf 14:31; Amo 4:1; 1Ti 5:18

24:15^b Suah 22:23; Pui 19:13; 25:35; Job 12:19; Mat 20:8; Jam 5:4

16 ^a“Palepawl cu an fātepawl aiah thah an si lo pei ih, fātepawl khal an palepawl aiah thah an si lo pei; mi pakhat cu amai sual ruangah thah a si pei.

24:16^a Mip 26:11; 2Sp 14:6; 2San 25:4; Jer 31:29; Eze 18:20

17 ^a“Ram dang mi le pa nei lo pawlih phu thuṭhennak cu na merhkâwi lo pei ih, kămawknak ah nuhmei sinfen na la fawn lo pei. 18 ^bAsinan nangmah cu Izip ram ah sál na rak si dah ih, cu tawk ihsin Jehovah na Pathian in a rak lo tlen ti kha máng ringring aw. Curuangah hi thil hi tuah dingah thu ka lo pe a si.

24:17^a Suah 22:21-22; Job 6:27; Sam 10:18; Thf 23:10; Eze 22:7

24:18^b Suah 23:9; Pui 19:33-34; Dnp 27:19

19 ^a“Na ló ih na thlairawl na ah tikah, ló ah fâng tēl na hngilh pang asile, cumi la dingah na kirsal lo pei. Jehovah na Pathian in na kut hnaṭuan zaten a lo thlawsuah thei nak dingah, cumi cu ram dang mi, pa nei lo le nuhmei pawl hrangah a si ding a si. 20 ^bNa olif kungpawl na ^cthawi tikah, a hngepawl kha na vawbêt lo pei. Cumi cu ram dang mi, pa nei lo le nuhmei pawl hrangah a si ding a si. 21 ^dNa sabit hmuan ih sabit rahpawl na lawh tikah, hnu na zulhsal lo pei. Cumi cu ram dang mi, pa nei lo le nuhmei pawl hrangah a si ding a si. 22 Cule nangmah cu Izip ram ah sál na rak si dah ti kha na máng ringring pei. Curuangah hi thil hi tuah dingah thu ka lo pe a si.

24:19^a Pui 19:9; Thf 19:17; Ths 11:1; Eze 47:22; Zek 7:10; Mal 3:5

24:20^b Pui 19:10

24:20^c thawi: A rahpawl tla dingin an thawi.

24:21^d Pui 19:9-10; 23:22

25

1 ^a“Mi taza an cuaiawk ih, thuṭhennak ih an thlen asile, thuṭhentupawl in an thu an ṭhensak pei ih midingfel cu thiam an coh ding ih, misualrál pa cu thiam lo an coh ding. 2 ^bCule hitin a si ding, misualrál pa kha vuak tlak asile, thuṭhentu in cu pa cu a itter pei ih, amai hmaika ah, a mawhdān izirin ziangmaw zat vuak a si pei. 3 ^cVei 40 a vaw pei ih, a vawbêt nawn lo pei, cu lo ahcun thuṭhentu in hi hnakih tam vei tampi a vaw pang ding ih, na unaupa cu na mithmuh ah ningzak mualphoin a um pang ding.

25:1^a Suah 21:6; 23:7; 1Sp 8:32; Apo 23:3

25:2^b Thf 10:13; Luk 12:47-48

25:3^c Jer 20:2; Mat 27:26; Joh 19:1; 2Ko 11:24

4 ^a“Caw cang in thlairawl a cīl laiah a hmur na ṭem lo pei.

25:4^a Mip 22:29; 1Ko 9:9; 1Ti 5:18

5 ^a“Unau mipapawl cu hmunkhat ah khua an sa, an lakih pakhat cu a thi ih, fapa a nei lo, a thi mi paih nuhmei cu sungkua leng, mi dang neihter a si lo pei, a pasalih unaupa cu a hnenah a lut pei ih, cu nu cu a nupi ah a ṭhi pei. Cule cu nu hnenah a pasalih unaupaih ṭuanvo a tuahsuak pei. 6 ^bCule hitin a si ding, a hrin mi fapa fatir cu a thi mi a unaupaih hmin hrangah a dīng ding, cutin Israel-mipawl lakah a hmin thaihloh a si lo ding.

25:5^a Rut 4:10, 13; Mat 22:24; Mar 12:19; Luk 20:28

25:6^b Sem 38:9; Rut 4:5, 10

7 ^a“Asinan cu pa cun a unaupaih nupi cu a ṭhi duh lo asile, a unaupaih nupi cu khawpi kulh kăwtka ih upapawl hnenah a hung fehso pei ih, ‘Israel ram ah a unaupa hrangah hmin pakhat dĭn ding ka pasalih unaupa in a êl. Pasal unaupaih ṭuanvo a ṭuansuak duh lo,’ tiah a ti ding. 8 ^bCun a umnak khaw upapawl in cu pa cu an ko pei ih, an be pei. Asinan cu pa cu ṭangbĕtin, ‘Cu nu ka ṭhi duh lo,’ a ti asile, 9 ^ca unaupaih nupi cun upapawl hmaika ah cu pa cu a ra naih pei ih, a kedam cu a ke ihsin a phawihsak pei, a hmaiah cil a phui pei, cule a sawn pei ih, ‘A unaupaih sungza dĭn duh lo tu paih parah hiti vekih tuah a si pei,’ tiah a ti pei. 10 ^dCule cu paih hmin cu Israel ram ah, ‘Kedam phawihsak mi paih sungza,’ tiah kawh a si pei.

25:7^a Sem 23:10; Rut 1:15; 4:1-2, 5-6

25:8^b Rut 4:6

25:9^c Mip 12:14; Jos 24:22; Rut 4:6-8, 11; Job 17:6; Isa 50:6

25:10^d Rut 4:7-8, 11

11 “Mi pahnih, mi pakhat le a unaupa, an sualaw ih, a thawitu paih kut ihsin a pasal run dingah pakhat deuh ih nupi in a rak naih ih, a kut a suah ih a til bawr in cu pa a kaih asile, 12 cu nuih kut cu na tansak pei, cu nu cu lainatnak mit in na zoh lo pei.

13 ^a“Na dip sungah cuailung dangdang, a rit le a zâng na nei lo pei. 14 Na inn sungah ^btahnak dangdang, a tûm le a te na nei lo pei. 15 ^cJehovah na Pathian ih a lo pek mi ram ah na nunkhua a sau thei nak dingah, cuailung kim le dik, tahnak kim le dik na nei pei. 16 ^dZiangahtile cuvek thilpawl a tuahtu hmuahhmuah, dingfel lo zetih a tuahtu hmuahhmuah cu Jehovah na Pathian hrangah fihnungza a si.

25:13^a Thf 11:1; Mik 6:11

25:14^b tahnak dangdang: A ṭawng hrampi ah cun, “efa khat le efa khat,” ti a si. “Efa” ti ṭawngfáng hi, hi tawkah a tlangpi tahnak hrangih hman a si.

25:15^c Suah 20:12

25:16^d Pui 19:35-36; Thf 11:1

17 ^a“Izip ram ihsin na ra suahnak lamzin ah Amalek in na parah ziang a tuah ih, 18 ^blamzin ah a rak lo táwng ih, thabāng le cau ih na um laiah, na dung lamih a um mi thazang nei lo pawl hmuahhmuah kha na dung lam ihsin ziangtin a lo do ti kha cîng ringring aw. Cule anih cun Pathian a ṭih lo. 19 ^cCuruangah hitin a si ding, Jehovah na Pathian in ro ah la dingih a lo pek mi ram ah Jehovah na Pathian in na kimvelih ral zate lak ihsin cawlhhahdamnak a lo pek tikah, Amalek cīn ringring nak cu van rāng hnuai ihsin na thaihlo pei. Cumi cu na hngilh lo pei.

25:17^a Sem 36:12

25:18^b Sam 36:1; Rom 3:18

25:19^c Sem 36:12; Suah 17:8-16; 33:14; 1Sam 15:2-9; Est 9:16; Heb 3:18-19

26

Ṭhen Hra Ṭhen Khat le Thlaithar

1 “Cule hitin a si ding, Jehovah na Pathian in ro ih a lo pek mi ram na thlen ih, cumi cu na la ih, na va cēn tikah, 2 ^aJehovah na Pathian ih a lo pek mi na ram ihsin na khawm ding mi, lei ih rahsuah mi zate lakih a hmaisabik lakih a hrekkhat na la pei ih, kho ah na ret pei, cule Jehovah na Pathian in a hmin cēnnak ah tuah dingih a hril mi hmun ah na feh pei.

26:2^a Suah 20:24; 22:29; 23:19

3 “Cule cuih cān ih puithiam a si mi pa hnenah na feh pei ih, a hnenah, ‘Kanmah pe dingin Jehovah in kan pupápawl hnenih sia a rak săm mi ram ah ka lut zo, tiah tuihni ah Jehovah na Pathian hnenah ka thăn a si,’ tiah na ti pei. 4 Cun puithiam cun na kut ihsin kho kha a la pei ih, Jehovah na Pathian-ih Biakṭheng hmaiah a ṭhum pei. 5 ^aCule nang in Jehovah na Pathian hmaiah na let pei ih, ‘Ka pa cu a thi cuahco mi Siria-mi a si, anih cu Izip ah a vung suk, cule mipum málte siin, cu tawkah a vung cêng. Cule cu tawkah miphun pakhat, ropi, cak le tampi ah a vung cang. 6 ^bAsinan Izip-mipawl in in tuah sia, in zawnzaiter ih kan parah a har zet mi sál tānnak in tuarter. 7 ^cCun Jehovah kan pupápawlih Pathian hnenah kan ausuak ih, Jehovah in kan aw a thei, cule kan zăwnzaihnak le kan ṭuanbăngnak le in palbĕtnak pawl tla a hmu. 8 ^dCule Jehovah in Izip ram ihsin, kut cak, bân suahnak, ṭihnung rapthlak le hminsinnakpawl le mangbangzapawl hmangin in hruaisuak. 9 ^eAnih in hi hmun ah in hruai ih, hi ram, hnawi ti le khuai tizu luannak ram hi in rak pe. 10 Cule atu-ah, ngai hnik, Maw Jehovah, keimah i pek mi leiramih rah hmaisabik ka rak keng a si,’ tiah na ti pei. Cun cumi cu Jehovah na Pathian hmaiah na ret pei ih, Jehovah na Pathian hmaiah na băwkkhup pei. 11 ^fJehovah na Pathian in nangmah le na sungza hnenih thil ṭha tinkim a rak lo pek mi parah nangmah cu Levi-mi le nan lakih um ram dang mi thawn lungawi aipuangin na um pei.

26:5^a Sem 12:2; 20:13; 25:20; 34:30; Apo 7:15

26:6^b Suah 1:13; Mip 20:15

26:7^c Sem 16:11; 21:17; Suah 3:9; 2Sp 13:4; Sam 42:9

26:8^d Suah 3:20; Mip 20:16

26:9^e Suah 3:8

26:11^f Dnp 12:7

12 ^a“A kum thumnak cu ṭhen hra ṭhen khat kum a si. Na ṭuan rahsuah ihsin ṭhen hra ṭhen khat hmuahhmuah na khawm ṭheh tikah, Levi-mi, ram dang mi, pa nei lo le nuhmei pawl na pe pei, cutin annih in na khawpi kăwtkapawl sungah an ei ding ih an puar ding. 13 ^bCun nang in Jehovah na Pathian hmaiah, ‘Ka inn ihsin thil thianghlim pawl ka rak ṭhawnhlo ih, thu i rak pek mi na thupekpawl hmuahhmuah bangtukin Levi-mi, ram dang mi, pa nei lo le nuhmei pawl ka rak pe fawn. Na thupekpawl cu ka pahbăl lo ih, ka hngilh hai fawn lo. 14 ^cLusûn ka si laiah, cumi sung ihta zianghman ka ei lo ih, ka thian lo laiah cumi sung ihta zianghman ka ṭhawn fawn lo, cule mithi hrangah cumi sung ihta zianghman ka pe fawn lo. Jehovah ka Pathian thu ka lung ih thu i pek mi hmuahhmuah bangtukin ka tuah. 15 ^dNa umnak hmun thianghlim, van ihsin run zoh awla, na mi Israel le kan pupápawl hnenih sia na rak săm vekih in pek mi ram, hnawi ti le khuai tizu luannak ram cu thlawsuah pe aw,’ tiah na ti pei.

26:12^a Sem 14:20; Mip 18:24; Dnp 14:28-29; Heb 7:5, 9

26:13^b Sam 119:141, 153, 176

26:14^c Pui 7:20; Hos 9:4

26:15^d Sam 68:5; Isa 63:15; Zek 2:13

16 “Tuihni ah Jehovah na Pathian in hi sakhaw dānpawl le zīn le dān pawl thlun dingah thu a lo pe a si. Curuangah nang cu, cupawl thlun dingah na thinlung hmuahhmuah le na nunnak hmuahhmuah in na fimkhur pei. 17 ^aJehovah cu na Pathian a si tiin, a lamzinpawl zawh dingin le a sakhaw dānpawl, a thupekpawl, a zīn le dān pawl thlun dingin le a thu lung dingin tuihni ah na phuang. 18–19 ^bJehovah in a lo tiamkam cia zo vekin nangmah cu a miphun hleice na si tiin le a thupekpawl hmuahhmuah na thlun ding le thangṭhatnak ah, hmin ah, upatnak ah, a rak semsuah mi miphun zate tlunah dinhmun sâng ih lo ret dingin le a rak sim zo vekin, Jehovah na Pathian hrangih miphun thianghlim na si ding, tiin tuihni ah a phuang,” tiah Mosi in a ti.

26:17^a Suah 19:8; Sam 48:14

26:18-19^b Suah 6:7; 19:5; Dnp 4:20; 7:6; 14:2; 1San 14:2; Sam 148:14; Isa 40:11; 62:7; Zef 3:20; Tit 2:14; 1Pe 2:9

27

Biakṭheng Dĭnnak

1 ^aMosi in Israel upapawl thawn mi senpi hnenah, “Tuihni ih thu ka lo pek mi thupekpawl hmuahhmuah hi thlun uh. 2 ^bCule Jehovah na Pathian ih a lo pek mi ram ah Jordan nan tankai ni ah hitin a si ding, nangmai hrangah lung tumpi pi na phun pei ih, ṭhúng na hnih pei. 3 ^cJordan na tankai tikah, cuih lungpi pi pawl parah cun hi dān thu hmuahhmuah hi na ngan pei. Cutin Jehovah na Pathian ih a lo pek mi ram, hnawi ti le khuai tizu luannak ram ah Jehovah na pupápawlih Pathian ih a rak lo tiamkam vekin na lut ding. 4 ^dCuruangah Jordan nan tankai tikah hitin a si ding, tuihni ih thu ka lo pek mi, hi lungtopawl hi Ebal tlang parah nan phun pei ih, ṭhúng na hnih hai pei.

27:1^a Sam 78:7

27:2^b Suah 24:4; Jos 4:1; 8:30-32; 24:26; 1Sam 7:12

27:3^c Suah 3:8

27:4^d Dnp 11:29; Jos 8:30

5 ^a“Cule cu tawkah Jehovah na Pathian hrangah biakṭheng, lungtopawl ih tuah mi biakṭheng na dâwl pei. Cupawl parah thir hmanrua na hmang lo pei. 6 Jehovah na Pathian-ih biakṭheng kha ser lo mi lungto hlir in na dâwl pei. Cule cumi parah Jehovah na Pathian hrangah Meiur Thilhlănpawl na hlan pei. 7 ^bRemnak Thilhlănpawl na that pei ih, cu tawkah na ei pei, cule Jehovah na Pathian hmaiah lungawi aipuangin na um pei. 8 ^cCule hi dān thu hmuahhmuah hi cuih lungtopawl parah fiang zetin na ngan pei,” tiah a ti.

27:5^a Suah 20:24-25

27:7^b Suah 32:6; Jos 8:31

27:8^c Jos 8:30-32; Isa 8:1; Hab 2:2

9 ^aCun Mosi le Levi-mi puithiampawl in Israel miphun zate hnenah, “Maw Israel, daiten um awla, ngai aw, tuihni ah nangmah cu Jehovah na Pathian-ih miphun ah na cang zo. 10 Curuangah Jehovah na Pathian thu na lung pei ih, tuihni ih thu ka lo pek mi a thupekpawl le a sakhaw dānpawl na thlun pei,” tiin thu an pe.

27:9^a Dnp 26:18

Malsawmnak le Camsiatnak

11 Cule cuih ni ah Mosi in mi senpi hnenah, 12 ^a“Jordan nan tankai tikah, mi senpi thlawsuah pe dingah Simeon, Levi, Judah, Issakar, Joseph le Benjamin pawl hi Gerizim tlang parah an dīng pei. 13 ^bCule camsiatnak săm dingah Ebal tlang ah Reuben, Gad, Asher, Zebulun, Dān le Naftali pawl hi an dīng pei.

27:12^a Sem 30:18; Dnp 11:29; Jos 8:33-35

27:13^b Dnp 11:29

Ebal tlang ihsi Camsiatnak

14 ^a“Cule Levi-mipawl in Israel mipa zate hnenah aw ring zetin, 15 ^b‘Jehovah hrangih fihnungza a si mi, zungthiam kut ih tuah mi, kher mi simaw, bur mi simaw milim tuahtu pa le a thupteih dĭntu pa cu camsiat si seh,’ tiah an sawn pei. Cule mi senpi hmuahhmuah in an sawn pei ih, ‘Amen,’ tiah an ti pei.

27:14^a Dnp 33:10; Dan 9:11

27:15^b Suah 20:4; 34:17; Pui 19:4; 26:1; Mip 5:22; Dnp 4:15-18; 5:8; 1Sp 11:5, 7; 2Sp 23:13; Isa 44:19; 1Ko 14:16

16 ^a“ ‘A pa simaw, a nu simaw a upat lo tu cu camsiatin um seh,’ tiah an ti pei. Cule mi senpi hmuahhmuah in, ‘Amen,’ tiah an ti pei.

27:16^a Sem 31:35; Suah 20:12; 21:12; Dnp 5:16

17 ^a“ ‘A innhnen paih ramri lung ṭhawntu cu camsiatin um seh,’ tiah an ti pei. Cule mi senpi hmuahhmuah in, ‘Amen,’ tiah an ti pei.

27:17^a Dnp 19:14

18 ^a“ ‘Lamzin ihsin mitcaw a pêngtertu cu camsiatin um seh,’ tiah an ti pei. Cule mi senpi hmuahhmuah in, ‘Amen,’ tiah an ti pei.

27:18^a Pui 19:14

19 ^a“ ‘Ram dang mi, pa nei lo le nuhmei pawlih phu, thuṭhennak a merhkâwitu cu camsiatin um seh,’ tiah an ti pei. Cule mi senpi hmuahhmuah in, ‘Amen,’ tiah an ti pei.

27:19^a Suah 22:21; 23:2, 9; Pui 19:33-34; Dnp 24:17-18

20 ^a“ ‘A paih nupi a ihpitu cu a paih puan zim a hlîp ruangah camsiatin um seh,’ tiah an ti pei. Cule mi senpi hmuahhmuah in, ‘Amen,’ tiah an ti pei.

27:20^a Sem 34:5; Pui 18:7-8; 20:11; Dnp 22:30

21 ^a“ ‘Ṭilva phun khat khat thawi a ittlangtu cu, camsiatin um seh,’ tiah an ti pei. Cule mi senpi hmuahhmuah in, ‘Amen,’ tiah an ti pei.

27:21^a Suah 22:19; Pui 18:23; 20:15

22 ^a“ ‘A farnu, a paih fanu simaw, a nuih fanu simaw a ihpitu cu camsiatin um seh,’ tiah an ti pei. Cule mi senpi hmuahhmuah in, ‘Amen,’ tiah an ti pei.

27:22^a Pui 18:9; 20:17

23 ^a“ ‘A nupi-ih nu a ihpitu cu camsiatin um seh,’ tiah an ti pei. Cule mi senpi hmuahhmuah in, ‘Amen,’ tiah an ti pei.

27:23^a Pui 18:17; 20:14

24 ^a“ ‘A thupteih a innhnen a thattu cu camsiatin um seh,’ tiah an ti pei. Cule mi senpi hmuahhmuah in, ‘Amen,’ tiah an ti pei.

27:24^a Sem 4:23; Suah 21:12

25 ^a“ ‘Mawhnak nei lo that dingah nawhthuh eitu cu, camsiatin um seh,’ tiah an ti pei. Cule mi senpi hmuahhmuah in, ‘Amen,’ tiah an ti pei.

27:25^a Suah 23:7-8; Pui 19:16

26 ^a“ ‘Hih dān thu hmuahhmuah nunpinak ih a nĕmhnget lo tu cu camsiatin um seh,’ tiah an ti pei. Cule mi senpi hmuahhmuah in, ‘Amen,’ tiah an ti pei.

27:26^a Sam 119:21; Jer 11:3, 5; Gal 3:10, 13

28

Thulunnak ruangih Malsawm

1 ^a“Cule hitin a si ding, tuihni ih thu ka lo pek mi a thupekpawl hmuahhmuah fimkhurteih thlun dingah, Jehovah na Pathian thu kha ṭhahnemngai zetih na lun asile, Jehovah na Pathian in leilung ih miphun zate tlunah dinhmun sâng ah a lo ret ding. 2 ^bCule Jehovah na Pathian thu na lun ruangah hi thlawsuahpawl hmuahhmuah hi na parah an thleng ding ih, a lo dawiman ding. 3 ^cKhaw sungah thlawsuah na si ding ih, ramlak ah thlawsuah na si ding. 4 ^dNa rilrah, na leiram rah, na sumhnám pungzai mi, na ranpi fa no le na rante fa no pawl cu thlawsuah an si ding. 5 Na kho le na sang nawnnak kheng kûm cu thlawsuah an si ding. 6 ^eNa luh tikah thlawsuah na si ding ih, na fehsuak tikah thlawsuah na si ding.

28:1^a Pui 26:3-5; Mip 24:7; Dnp 11:13-17

28:2^b Jer 32:24; Zek 1:6

28:3^c Sem 39:5; Sam 144:15

28:4^d Sem 49:25

28:6^e Sam 121:8

7 ^a“Nangmah lo do dingih ra, na ralpawl cu Jehovah in na hmaiah a duaiter hai ding. Nangmah do dingah lamzin pakhat in an ra ding ih, lamzin pasarih in na hmaiah an zâm ding. 8 ^bJehovah in na rawl innpawl le na kut hnaṭuan hmuahhmuah ah na hrangah thlawsuahnak thu a pe ding ih, Jehovah na Pathian ih a lo pek mi ram ah a lo thlawsuah ding.

28:7^a Pui 26:8, 17; 2San 6:34

28:8^b Pui 25:21

9 ^a“Jehovah na Pathian thupekpawl na thlun ih, a lamzinpawl na zawh asile, na hnenah sia a rak săm vekin, Jehovah in amah hrangih miphun thianghlim ah a lo dĭn hnget ding. 10 ^bCun leilung miphun zaten Jehovah hmin putu na si kha an hmu ding, cule an lo ṭih ding. 11 ^cJehovah in na pupápawl hnenah nangmah lo pe dingih sia a rak săm mi ram ah, na rilrah, na sumhnám pungzai mi, na leiram rahpawl ah Jehovah in a tawr a tawrin thil ṭha a lo pe ding. 12 ^dJehovah in na ram ah a tikcu teih ruah surter dingah le na kut hnaṭuan hmuahhmuah ah lo thlawsuah dingin a hlawnthil ṭha khawlnak, van, a lo ăwnsak ding. Miphun tampi na cawih ding, asinan nang cun na cawi lo ding. 13 ^eCule tuihni ih thu ka lo pek mi, Jehovah na Pathian thupekpawl hi na ngaithla ih, cupawl thlun dingih na fimkhur asile, Jehovah in mei si loin lu ah a lo tuah ding ih, nang cu hnuaiah si loin tlun hlirah na um ding. 14 ^fCule anmah rian dingah pathian dang pawl dung thlun dingah, tuihni ih thu ka lo pek mi kamsuakthupawl lakih pakhat khat ihsin vawrh lamah simaw, keh lamah simaw na pial lo pei.

28:9^a Suah 19:6; Pui 26:3

28:10^b Mip 6:27; 1Sp 8:43; Jer 25:29; Dan 9:18

28:11^c Sem 30:27

28:12^d Pui 25:19; 26:4; 1Sp 8:35-36; Sam 65:11; Jer 31:12; Eze 34:26; Mal 3:12

28:13^e Jer 11:6

28:14^f Jos 1:7

Thulunlonak ruangih Camsiatnak

15 ^a“Asinan hitin a si ding, tuihni ih thu ka lo pek mi, a thupekpawl le a sakhaw dānpawl hmuahhmuah fimkhurteih thlun dingah, Jehovah na Pathian thu na lun lo a si ahcun, hi camsiatnakpawl hmuahhmuah hi na parah a thleng ding ih, a lo dawiman ding. 16 Khaw sungah camsiat na si ding ih, lóram ah camsiat na si ding. 17 Na kho le na sang nawnnak kheng kûm cu camsiat an si ding. 18 Na rilrah le na leiram rah, na ranpi fa note te le na rante fa note te pawl cu camsiat an si ding. 19 Na luh tikah camsiat na si ding ih, na fehsuak tikah camsiat na si ding.

28:15^a Jos 23:15; 1Sp 9:6; 2San 7:19; 12:5; Dan 9:11; Mal 2:2

20 ^a“Thil sualrál pawl na tuahnak in keimah in tlansan ruangah tuah dingih na kut na thlaknak hmuahhmuah ah, zamrang zetih na hlohral le na siatrál hlanlo, Jehovah in camsiatnak, buainak le kawknak pawl a thlengter ding. 21 ^bLa dingih na va luhnak ram ihsin a lo cemrálter hlanlo, Jehovah in na parah nathri sia in a lo bawmbĕtter ding. 22 ^cJehovah in cuap nat, khawsik nat, thlin nat, tak ling nat, ralnâm, thil hring rocarnak le thil hring pangmăn kainak thawn a lo vaw ding. Na siatrál hlanlo an lo dawi vivo ding. 23 ^dCule na lu tlunih van cu dar vek an si ding ih, na tăngih leilung cu thir vek a si ding. 24 ^eJehovah in na ram ih ruah cu, leivut le leiphut ah a cangter ding ih na hlohral hlanlo, cumi cu na parah van ihsin a surter ding.

28:20^a Suah 32:22; Sam 39:11; Isa 17:13; Jer 42:18; Eze 5:15; Mal 2:2

28:21^b Pui 26:25; Mip 14:12

28:22^c Pui 26:16; 1Sp 8:37; Amo 4:9; Hag 2:17; Mal 3:9

28:23^d Pui 26:19

28:24^e 1Sp 8:35; Isa 5:6; Jer 14:1; Hag 1:10

25 ^a“Jehovah in na ralpawl hmaiah a lo duaiter ding. Anmah do dingin lamzin pakhat ihsin na feh ding ih, lamzin pasarih in an hnen ihsin na tlânsuak ding. Cule leilung lalrampawl zate hrangah ṭihnungza ah na cang ding. 26 ^bNa ruak cu tlun zuang vatepawl le leilung ramsapawl hmuahhmuah ih rawl a si ding. Cule zohman in cupawl cu an ṭhihṭhaih lo ding. 27 ^cJehovah in Izip ram ih khuaihlipawl, taksa bol nat, vun thak le thakpherh in a lo vaw ding ih, cupawl ihsin na dam thei lo ding. 28 Jehovah in atnak, mitcâwtnak le thinlung buainak in a lo vaw ding. 29 ^dCule mitcaw in thim lakih a dap duado vekin sun laiah na dap duado ding. Na lamzinpawl ah na hlawhtling lo ding. Nang cu palbĕt le suam ringring na si sawn ding ih, zohman in an lo run lo ding.

28:25^a Pui 26:17; 2San 29:8; Jer 15:4; Eze 23:46

28:26^b Sem 40:19; Sam 79:2; Isa 18:6; Jer 7:33

28:27^c Dnp 28:60-61

28:29^d Job 5:14; Isa 59:10; Hos 13:4; Oba 1:21

30 ^a“Nupi na ham ding nân, mipa dang in a ihpi ding. Inn na sak ding nân, a sungah na cêng lo ding. Sabit hmuan na tuah ding nân, a rah na khawm lo ding. 31 ^bNa mithmuh ah na caw pa cu thah a si ding nân, a sa na ei lo ding. Na hmai ihsin na lāk kha an lo lawnsak ding ih, an lo pesal lo ding. Na tuu cu na ralpawl hnenih pek a si ding ih, cupawl lo runsaktu zohman na nei lo ding. 32 ^cNa fapapawl le na fanupawl kha miphun dang hnenah pek an si ding, cule anmah ngaiin sunnihlawh na mit in a thlir ding. Cule na kut ah thazang zianghman a um lo ding. 33 ^dNa theih lo mi miphun in na ram ih rahsuah mi le na ṭuansuah mi an lo eisak ding ih, nang cu palbĕt le palbĕt tlaitluan hlir in na um ding. 34 Na mit ih a hmuh mi thilpawl ruangah nangmah cu mi-â ah na cang ding. 35 ^eJehovah in na khuk le na cāwn pawl, na ke zaphak ihsin na luthlung tiang damter theih lo mi khuaihli siava in a lo vaw ding.

28:30^a Job 31:10

28:31^b Isa 65:22; Jer 12:13; Amo 5:11

28:32^c Dnp 28:41; 2San 29:9; Neh 5:5

28:33^d Jer 6:6; Eze 25:4

28:35^e Dnp 28:27

36 ^a“Jehovah in nangmah le na tlunih na ret mi na siangpahrang kha na pupápawl le nangmah khalih na theih lo mi miphun pakhat hnenah a lo hruai ding. Cu tawkah thing le lung ih tuah mi pathian dang pawl na rian ding. 37 ^bCule nang cu Jehovah ih a lo dawisuahnak ding hmun, miphunpawl zate lakah mak ti mi, phungthluk le puahcăwk ah na cang ding.

28:36^a 2Sp 24:14; 2San 33:11; Jer 15:14; Ṭah 1:3

28:37^b 1Sp 9:7; Jer 24:9; Ṭah 2:15

38 ^a“Na ló ah thlaici tampi na phur ding nân, málte lawng na khawm ding, ziangahtile cumi cu kharbawk in a eirál ding. 39 ^bSabit hmuanpawl na tuah ding ih, na kilkhawi ding, asinan sabit zu na in lo ding ih a rah khal na khawm fawn lo ding. Ziangahtile cupawl cu pangāng in an ei ding. 40 ^cNa ramri sung hmuahhmuah ah olif kungpawl na nei ding, asinan hriak na culhaw lo ding, ziangahtile na olif rahpawl an ṭil ṭheh ding. 41 ^dFanupawl le fapapawl na hring ding, asinan annih cu na ta an si lo ding. Ziangahtile annih cu ralkaih ah an feh ding. 42 ^eNa thingkung hmuahhmuah le na leiram rahsuah hmuahhmuah cu kharbawk in an co thluh ding.

28:38^a Joe 1:4

28:39^b Isa 5:10; Zef 1:13; Mal 3:11

28:40^c Mik 6:15

28:41^d Dnp 28:32

28:42^e Lai 6:5; Jer 46:23

43 “Nan lakih um khawtluang mi kha na tlunah sângsin sângsinah a kai ding ih, nang cu niamsin niamsinah na ṭumsuk ding. 44 ^aAnih in a lo cawih ding nân, nang in anih cu na cawih lo ding. Anih cu lu a si ding ih, nang cu mei na si ding.

28:44^a Dnp 28:12-13

45 ^a“Cuihtlunah hi camsiatnakpawl hi na parah a thleng ding ih, na siatrál ṭheh hlanlo an lo dawi ding, cule an lo man ding. Ziangruangahtile thu a rak lo pek mi a thupekpawl le a sakhaw dānpawl thlun dingin Jehovah na Pathian thu cu na rak lung lo. 46 ^bCule cupawl cu na parah le na cithlahpawl parah kumkhuaih hminsinnak le mangbangza an si ding. 47 ^cThil ziangkim khatliam thluh na cingin, Jehovah na Pathian kha thinlung aipuang le lungawiih na rĕn lo ruangah, 48 ^dJehovah in nangmah do dingih a thlah mi na ralpawl kha rilrawngin, tihâlin, taklawng in le ziangkimih tlasamin na rian hai ding. Cule a lo hlohralter hlanlo, Pathian in na hngawng ah thir hngawngkol a lo bun ding.

28:45^a Suah 15:9

28:46^b Mip 16:38; Eze 5:15; Zek 3:8

28:47^c Pui 23:40; Neh 9:35

28:48^d Jer 28:14

Lam hla Miphunpawlih Ralsimnak

49 ^a“Jehovah in an ṭawng na theihthiam lo mi miphun, muvanlai a zam tlukih rangin leilung dĕng, ram hlapi ihsin nangmah lo dokalhin miphun, 50 ^bupapawl khal upat loih minopawl parih zahngainak langter lo, mithmai ṭihnungum zet miphun pakhat a run hruai ding. 51 Cule nangmah hlohralter na si hlanlo, na sumhnám pungzai mipawl le na ram rahsuah mi an ei ding. Annih in nangmah an lo hlohralter hlanlo, na thlairawl siseh, na sabit zu thar siseh, na hriak thar siseh, na ranpi fa note te pawl le na rante fa note te pawl an lo tān lo ding.

28:49^a Jer 5:15; Ṭah 4:19; Hab 1:6

28:50^b Isa 47:6

52 ^a“Na rinsan mi, a sâng mi le a hnget mi na khaw kulhpawl a cim hlanlo, na ram pumpi ih na khawpipawl hmuahhmuah ah an lo kulh ṭheh ding. Cule Jehovah na Pathian in a rak lo pek mi na ram pumpi ih khawpipawl hmuahhmuah ah an lo kulh ṭheh ding. 53 ^bLo kulhkhŭmih a lo năwrcepnak in na ral in a lo palbĕt ding. Cu laiah Jehovah na Pathian ih a lo pek mi na rilrah, na fanupawl le na fapapawlih sa na ei ding. 54 Nan lakih awmnêm le nonal mipa in a unaupa, a nupi pawm lai le a tāng lai mi a fātepawl a mitkem ding. 55 ^cCutin a ei ding mi amai fātepawlih sa cu anmahpawl lakih mi pakhat hman a pe ve lo ding. Ziangruangahtile na ral in na khawpipawl zaten a lo kulhkhŭm le a lo năwrcepnak ih a lo palbĕt laiah, anih in rawl tâng zianghman a nei lo. 56 ^dNan lakih awmnêm le nonal nunau, a awmnêmnak le a nonalnak ruangih a ke zaphak thawi lei pal ngaih lo tunu hmanin, a pawm lai a pasal le a fanu le a fapa pawl, 57 ^ea ke karlakih a suak mi a sūl hlun le a hrin mi a fātepawl kha a mitkem ding. Ziangahtile na ral in na khawpipawl hmuahhmuah ah a lo kulhkhŭmnak le a lo năwrcepnak ih a lo palbĕt laiah, ziangtinkim tlaksamnak ruangah a thupten anmah a ei hai ding.

28:52^a 2Sp 17:15

28:53^b Pui 26:29; 2Sp 6:28-29; Ṭah 2:20

28:55^c 2Sp 6:29

28:56^d Isa 47:1; Ṭah 4:10

28:57^e 2Sp 6:28-29; Ṭah 4:10

58 ^a“Jehovah na Pathian tiih kawh mi, himi hmin ropi le maksak hi na ṭihzahnak dingah hih cazual sungih ngan mi himi dān thu hmuahhmuah hi fimkhurteih na thlun lo asile, 59 Jehovah in nangmah le na cithlahpawl tlunah khawruahharza hremnak, a khirhkhan mi le a awh rei mi hremnak, a besia mi le a awh rei mi natnak pawl a thlengter ding. 60 ^bCule na ṭih mi le Izip ram ih nathri zaten na parah a thlengtersal ding ih, na parah an lo bawmbĕt ding. 61 ^cCuihtlunah Jehovah in hi Dān Cazual sungih ngan lo mi natnak tinkim le hremnak tinkim cu na hlohral hlanlo, na parah a thlengter ding. 62 ^dJehovah na Pathian thu na thlun lo ruangah, van ih arsi zat in nan rak tam nân, mipum málte lawng nan tāng ding.

28:58^a Suah 3:15; Jos 7:9; Sam 96:4; Jer 5:22; Mal 1:14

28:60^b Suah 15:26

28:61^c Jos 1:8; 2Sp 14:6; 2San 17:9; Neh 8:1, 18; Mal 4:4

28:62^d Sem 22:17; Pui 26:22

Israel Ṭekdarhnak

63 ^a“Cule hitin a si ding, Jehovah in nan parih thil ṭha tuah dingin le nanmah lo karhzaiter dingin lungawi aipuangih a um vekin, Jehovah in nanmah lo hloralter dingah le lo cimitter dingah nan parah lungawi aipuangin a um ding, cule va la dingih na va luhnak ram ihsin a lo phawisuak ding. 64 ^bCun Jehovah in leilung dĕng khat lam ihsin a dang khat lam dĕng tiangih a um mi, miphun zate lakah a lo ṭhekdarh ding ih, cu tawkah nangmah le na pupápawl khalih nan theih lo mi thing le lung ih tuah mi pathian dang pawl na rian ding. 65 ^cCule cuih miphunpawl lakah cawlhhahdamnak na hmu lo ding ih, na ke zaphak khalin cawlhhahdamnak hmun a hmu lo ding. Asinan cu tawkah Jehovah in a khūr mi thinlung, a māl mi mit le a ānhai mi nunnak a lo pe ding. 66 Na nunnak cu na hmaiah rinhlelhnak in a um ding. Sun le zan na ṭih ding ih, lungdaih nun na nei lo ding. 67 Na thinlung a lo râptu ṭihnak ruangah le na mit ih a hmuh mi thilpawl ruangah, zing lamah, ‘Aw, zan lam si sehla maw!’ na ti ding. Cule zan lamah, ‘Aw, zing lam si sehla maw!’ na ti ding. 68 ^dCule, ‘Cumi cu na hmusal nawn lo ding,’ ka lo tinak lamzin ihsin lăwng thawn Izip ram ah Jehovah in a lo hruaikir ding. Cule cu tawkah nan ralpawl hnenah sál nu le sál pa si dingah nanmah le nanmah nan zuaraw ding, asinan zohman ih lei nan si lo ding,” tiah Mosi in thu a pe.

28:63^a Sem 6:7; Sam 52:5; Thf 1:26; Isa 62:5; Jer 12:14; 32:41; Zef 3:17

28:64^b Ezr 9:7; Neh 1:8; Sam 44:11; Isa 6:12; Jer 8:19; 13:24; 32:23

28:65^c Pui 26:16, 36; Job 11:20; Ṭah 1:3; Hos 9:17

28:68^d Suah 13:14

29

Pathian Thukham Thlirsalnak

1 ^aHipawl cu Horeb ah Israel tefapawl thawn a tuah mi thukham hleiah, Moab ram ah Israel tefapawl thawn tuah dingah Jehovah in Mosi thu a rak pek mi thukham thupawl an si.

29:1^a Suah 3:1; Pui 7:38

2 ^aCule Mosi in Israel miphun zaten a ko ih an hnenah, “Faro par le a siahhlawh zate par le a ram pumpi parih Jehovah in Izip ram ih nan mithmuh ah a tuah mi hmuahhmuah, 3 na mit ih a hmuh zo mi hniksaknak rapthlak pawl, hminsinnakpawl le mangbangza maksak pawl nan rak hmu ṭheh zo. 4 ^bCuti si khal sehla Jehovah in, tuihni tiang, theihthiamnak thinlung, hmuhnak mitpawl le theihnak hnapawl a lo pe hrih lo. 5 Cule kum 40 sung ramṭhing ah ka rak lo hruai. Nan hnipuan nan parah an hnawh lo ih, nan kedampawl khal nan ke parah an hnawh lo. 6 ^cKeimah hi Jehovah nan Pathian ka si ti nan theihnak dingah sang nan rak ei lo ih, sabit zu siseh, zu siseh nan rak in lo. 7 ^dCule hi hmun nan thlen tikah, Heshbon siangpahrang Sihon le Bashan siangpahrang Og cu kanmah do dingah an ra ih, anmah cu kan rak neh. 8 ^eAn ram kan lâk ih ro dingah Reuben-mipawl, Gad-mipawl le Manasseh hnám hrek hnenah kan pek.

29:2^a Suah 19:4

29:4^b Isa 6:10; Jer 5:21; Eze 12:2; Mat 13:15; Rom 11:8; Efe 4:18

29:6^c Pui 10:9

29:7^d Mip 21:21-35

29:8^e Mip 32:33; Sam 78:55

9 ^a“Curuangah hi thukham thupawl hi thlun uhla tuah uh, cutin nan tuah mi hmuahhmuah ah nan hlawhtling ding. 10 Tuihni ah nan zaten nan hruaitupawl le nan hnámpawl, nan upapawl, nan hotupawl, Israel mipa hmuahhmuah, 11 ^bnan fanau tete pawl le nan nupipawl le nan riahhmun ih um ram dang mi, nan thing hautu le nan ti khaitu tiangin Jehovah nan Pathian hmaiah nan ding a si. 12 Cutin tuihni ah Jehovah na Pathian in nangmah thawi a tuah mi Jehovah na Pathian thawi thukham sungah le a thukam sungah na lut ding a si. 13 ^cCule nan hnenih a rak sim vekin le nan pupá a si mi Abraham, Isak le Jakob tepawl hnenih sia a rak săm vekin, tuihni ah nanmah cu a miphun si dingah a lo dĭn ding ih, anih cu na Pathian a si ding.

29:9^a Jos 9:21, 23, 27; 1San 20:3

29:11^b Jos 9:21, 23, 27

29:13^c Sem 6:18; 17:7; Suah 19:6

14 ^a“Hih thukham le thukam hi nanmah hnen lawngah si loin, 15 ^btuihni ih Jehovah kan Pathian hmaiah hi tawkih a dingtu le tuihni ih hi tawkih a um lo mi hnen khalih ka tuah mi a si sawn. 16 (Ziangahtile Izip ram ah kan rak cêng ti le kan ratnak ah miphunpawl ^ckan rak pahtlăng ti nan thei. 17 ^dCule an lakih um mi an thil fihnungza pawl le thing le lung le sui le ngun ih tuah mi an milempawl nan rak hmu.) 18 ^eCu lo ahcun tuihni ah hi miphunpawlih pathianpawl hnenah feh ih rian dingah, Jehovah kan Pathian hnen ihsin a thinlung a fehpêngtu mipa simaw, nunau simaw, hrin simaw, hnám simaw nan lakah umin, nan lakah tûr le ^fla-ana kung khâ rahtu búlhram an um pang ding.

29:14^a Suah 19:5; Isa 59:21; Jer 31:31; Eze 16:62; Heb 8:7-8

29:15^b Sem 6:18; Apo 2:39

29:16^c kan rak pahtlăng: Hebru Bible ah “nan rak pahtlăng” ti a si.

29:17^d Suah 20:23; Apo 8:23

29:18^e Heb 12:15

29:18^f la-ana kung khâ: Hebru ṭawng ih la-ana an ti mi hi kung pakhat a si, tûr a nei ih a khâ zet.

19 ^a“Cule hi camsiatnak thupawl hna ih a theih tikah, a thinlung in amah le amah thlawsuah peawin, ‘Ka thinlungruhnak ka thlun ko nain, hnangamdaihnak ka nei ding,’ tiih a ti mi cu a cangsuak lo ding. Cumi cun a hnīng mi ram cu a ro mi ram zawngah siatralnak ah a hruai ding. 20 ^bCu pa cu Jehovah in a ngaidam lo ding. Ziangahtile Jehovah-ih thinhengnak le a thîksiatnak cu, cu pa parah a alh ding ih, hi cazual sungih ngan mi camsiatnak zaten a parah a ṭhumaw ding ih, Jehovah in van rāng hnuai ihsin a hmin a thaihlo ding. 21 ^cHih Dān Cazual sungih ngan mi thukham camsiatnak hmuahhmuah bangtukin, cu pa cu Jehovah in Israel hnámpawl zate lak ihsin thil ṭha lo co dingah a rethran ding.

29:19^a Sam 36:2; 72:17; Isa 65:16

29:20^b Suah 23:21; 34:14; 2Sp 13:23; Sam 74:1; Eze 23:25; 36:5; Zef 1:18; Thu 3:5

29:21^c Eze 7:26

22 ^a“Cuih ram ih hremnakpawl le a parih Jehovah in a ṭhum mi natnakpawl an hmuh tikah, a ra lai ding mi cithlah sâwng, nan hnuih a ra ding mi nan tesinfapawl le ram hla ihsin a ra mi ram dang mi in, 23 ^b‘Jehovah in a thinheng le a thinling ih a ṭhiahbăl mi: ṭhiahbăl mi Sodom, Gomorrah, Admah le Zeboiim pawl vekin an ram pumpi in kât le cite le kāngmei in a khat, thlai an cîng lo, zianghman a kho lo, hrampi khal a kho lo,’ an ti ding. 24 ^cMiphun hmuahhmuah in, ‘Ziangruangah Jehovah in hi ram parah hitin a tuah? Hih thinhengnak rapthlak alh-ih sullam cu ziang a si?’ an ti ding. 25 ^dCun mi in, ‘Anmahpawl cu Izip ram ihsin a hruaisuah hai laiah an hnenih a tuah mi, an pupápawlih Pathian Jehovah thukham an tlansan ruangah a si. 26 Ziangahtile pathian dang pawl, an rak theih lo mi le an hnenih a pek lo mi pathianpawl hnenah an feh, cule an rian ih, an bia. 27 Hih cazual sungih ngan mi camsiatnak zaten a parih thlĕn dingah, Jehovah-ih thinhengnak cu, hi ram parah a alh a si. 28 ^eTuihni ih a si vek hin, Jehovah in thinhengnak, thinlingnak le aithawknak rapthlak in an ram ihsin a phăwngsuak hai ih ram dangah a hlăwn hai,’ an ti ding. 29 ^fThuthup cu Jehovah kan Pathian ta a si. Hih dān thu hmuahhmuah kan tuahnak dingah, phuanlăng mipawl hi kumkhuain kanmah le kan tefapawl ta an si.

29:22^a Jer 19:8

29:23^b Sem 13:10; 14:8; 19:24-25; Isa 1:7; Jer 12:11; Eze 47:11; Mik 5:11; Zef 2:9; Mat 10:15; Rom 9:29

29:24^c 1Sp 9:8; 2San 36:19; Jer 16:10

29:25^d 2Sp 17:23; 2San 36:21

29:28^e 1Sp 14:15; 2San 7:20; Sam 7:11; 9:6; Thf 2:22; Jer 12:14; Eze 19:12

29:29^f Joh 5:39; Apo 1:7; 17:11; 2Ti 3:16

30

Jehovah hnenah Kir Aw

1 ^a“Cule hitin a si ding, na hmaiih ka ret mi malsawmnak le camsiatnak, hi thil zaten na parah a thleng ih, Jehovah na Pathian ih a lo dawisuahnak miphun zate lakah, cupawl kha na mangsal ih, 2 ^bnangmah le na fātepawl, na thinlung hmuahhmuah le na nunnak hmuahhmuah thawn tuihni ih thu ka lo pek mi hmuahhmuah bangtukin, Jehovah na Pathian hnenah na kirsal ih a thu na lun tikah, 3 ^cJehovah na Pathian in na vanneihnak a lo pekirsal ding ih, na parah lainatnak a nei ding, cule Jehovah na Pathian in a lo ṭhekdarhnak miphunpawl zate lak ihsin a lo khawmsal hai ding. 4 ^dVan rāng dĕngih dawisuah mi na si khalle cu tawk ihsin Jehovah na Pathian in a lo khawm ding ih, cu tawk ihsin a lo hruai ding. 5 Cule Jehovah na Pathian in na pupápawl ih rak lâk mi ram ah a lo hruai ding ih, cumi cu na la ding. Na pupápawl hnakih tam in a lo hlawhtlingter ding ih, a lo karhzaiter ding.

30:1^a Pui 26:40-45

30:2^b Sam 119:2

30:3^c Sem 11:4; 48:21; Sam 14:7; Isa 11:11; Jer 12:15; 30:18; Eze 16:53; Joe 3:1; Zef 2:7

30:4^d Neh 1:8-9; Sam 19:6; Isa 11:12; 17:6; Jer 29:14; 31:8, 10; Eze 20:34, 41

6 ^a“Na nun thei nak dingah Jehovah na Pathian cu na thinlung hmuahhmuah le na nunnak hmuahhmuah thawn duhdawt dingin Jehovah na Pathian in na thinlung le na cithlahpawlih thinlung serh vun zim a lo tansak ding. 7 ^bCule Jehovah na Pathian in himi camsiatnak zaten na ralpawl le a lo hremtu, a lo huatupawl parah a ret ding. 8 ^cCule na kirsal ding ih, Jehovah-ih thu na lung ding, cule tuihni ih thu ka lo pek mi a thupek zaten na tuah ding. 9 ^dCule Jehovah na Pathian in na kut hnaṭuannak hmuahhmuah ah, na rilrah ah, na sumhnám pungzai mi ah le na ram in a rahsuah mi ah luangliam ko a lo hlawhtlingter ding. Na pupápawl parih lungawi aipuangih a um vekin, 10 hi Dān Cazual sungih ngan mi a thupekpawl le a sakhaw dānpawl thlun dingah, Jehovah na Pathian aw na ngaithla ih, na thinlung hmuahhmuah le na nunnak hmuahhmuah thawn Jehovah na Pathian hnenih na kir asile, na parih thil ṭha tuah dingah Jehovah cu lungawi aipuangin a umsal ding. 11 ^eTuihni ih thu ka lo pek mi thupek hi na hrangah a harsa tuk mi an si lo ih, a hla mi khal a si fawn lo. 12 ^fNannih in, ‘Kan hna in kan thei ih, cumi tuahsuak dingah kan hrangah zo so vancung ah kaiin, kan hnenah run keng ding?’ nan tinak dingin van ih um mi a si lo. 13 ^gCule, ‘Kan hna in kan thei ih, cumi tuahsuak dingah kan hrangah tifinriat ral ah zo so tánkaiin, kan hnenah run keng ding?’ nan tinak dingin tifinriat pawn lamih um khal a si fawn lo. 14 ^hCumi na tuahsuak thei nak dingah, kamsuakthu cu na kiang naite ah a um, na kâ le na thinlung ah a um.

30:6^a Jer 32:39; Eze 11:19

30:7^b Sem 12:3

30:8^c Zef 3:20

30:9^d Jer 1:10

30:11^e Sam 19:8; Isa 45:19, 23

30:12^f Thf 30:4; Rom 10:6

30:13^g Job 28:14; Rom 10:7

30:14^h Rom 10:6-8

Nunnak Hril Aw

15 ^a“Zoh hnik, tuihni ah na hmaiah nunnak le thil ṭha, thihnak le thil ṭha lo hitin ka ret. 16 ^bNa nunnak dingah le na karhzainak dingah, Jehovah na Pathian duhdawt ding, a lamzinpawl zawh ding le a thupekpawl, a sakhaw dānpawl le a zīn le dān pawl thlun dingah, tuihni ah thu ka lo pe a si. Cun la dingih na va luhnak ram ah, Jehovah na Pathian in a lo thlawsuah ding.

30:15^a Sem 2:17; Job 36:11; Sam 25:13; Thf 3:1-2; 10:16; Jer 21:8

30:16^b Neh 9:29

17 “Asinan ngaithla lo dingin le hruaihloh na sinak dingah le pathian dang pawl be ding le anmah rian dingih na thinlung a pialhlo asile, 18 nan siatrál tengteng ding ti kha tuihni ah ka lo thăn a si. Lut dingah le la dingah Jordan nan tankainak ram ah nan nunkhua a sau lo ding. 19 ^aNan hmaiah nunnak le thihnak, thlawsuahnak le camsiatnak ka ret ti theihpitu ah nanmah dokalhin tuihni ah lei le van ka ko. Nangmah le na cithlahpawl nan nunnak dingah, nunnak hril aw. 20 ^bJehovah na Pathian duhdaw awla, a thu lung aw, cule amah pawmbĕt aw, ziangahtile amah cu na nunnak le na nunkhaw saunak a si. Cutin Jehovah in na pupá Abraham, Isak le Jakob tepawl hnenah pek dingih a rak sesăm mi ram ah na cêng ding,” tiah a ti.

30:19^a Dnp 4:26; 30:15

30:20^b Sem 12:7; 26:3; 28:13; Sam 27:1; 37:3; Thf 3:22; Joh 5:26; Apo 17:28

31

Israel Hruaitu Thar Joshua

1 Mosi cu a feh ih Israel miphun zate hnenah hi thupawl hi a sim hai. 2 ^a Cule anih in an hnenah, “Kei cu tuihni ah kum 120 ka si thlang. Lut le suakin ka um thei nawn lo. Jehovah in ka hnenah, ‘Hi Jordan hi na tankai lo ding,’ i ti. 3 ^bJehovah na Pathian cu na hmaiih tánkaitu a si. Anih in na hmai ihsin hi miphunpawl hi a hloralter ding, cule nang in annihpawl cu na dawisuak hai ding. Jehovah ih a rak sim vekin, Joshua cu na hmaiih tánkaitu ding a si. 4 ^cCule Jehovah in Amor-mipawlih siangpahrang Sihon le Og le an ram, anmah a hlohralter laiih a rak tuah vekin annihpawlih parah a tuah ding. 5 ^dNan hnenih thu ka rak lo pek mi thupek tinkim bangtukin, an parih nan tuahnak dingah Jehovah in nan hnenah anmah a lo pe ding.

31:2^a Suah 7:7; Mip 20:12; 27:17; 1Sp 3:7

31:3^b Mip 27:18

31:4^c Mip 21:21-35

31:5^d Dnp 7:2; 20:10-20

6 ^a“Cak le ralṭhain um aw, anmah cu ṭih hai hlah awla, anmah ruangah thinphâng fawn hlah, ziangahtile Jehovah na Pathian amah cu na hnenih fehtu pa a si. Anih cun a lo tân lo ding ih, a lo thlauthla fawn lo ding,” tiah a ti. 7 ^bCule Mosi in Joshua a ko ih Israel miphun zate mithmuh ah a hnenah, “Cak le ralṭhain um aw, ziangahtile anmah pe dingah an pupápawl hnenih Jehovah in sia a rak săm mi ram ah hi mi senpi zawngah na feh tengteng pei, cule cuih ram cu anmahpawl hi ro ah na coter hai pei. 8 ^cJehovah amah cu na hmaiih a fehtu pa a si. A lo umpi ding, anih cun a lo tân lo ding ih a lo thlauthla fawn lo ding, ṭih hlah awla na thin khal nau fawn hlah,” tiah a ti.

31:6^a Sem 28:15; Jos 1:6, 9, 18; 1Sam 12:22; 1Sp 6:13; 1San 22:13; 2San 32:7; Sam 56:9; 94:14; Isa 41:17; Jer 1:8, 17; Eze 2:6; Mat 28:20; Heb 13:5

31:7^b Mip 27:23; Jos 1:6

31:8^c Sem 28:15; Suah 13:21; Jos 1:5; Heb 13:5

9 ^aCule Mosi in hi dān hi a ngan ih Jehovah-ih Thukham Kuang phurtu Levi-ih fapapawl puithiampawl le Israel upapawl zate hnenah a pe. 10 ^bCule Mosi in an hnenah, “Kum sarih a cem tinte, leiba awlh kum khiah mi cān ah, Bûkte Puai ah, 11 ^ca hril mi hmun ih Jehovah na Pathian hmaiah ra lang dingin Israel miphun zate an rat tikah, hi dān hi Israel-mi zate hmaiah an hnatheih ah na siar pei. 12 ^dAn ngaithlaknak dingah le Jehovah nan Pathian ṭihzah an zirnak dingah le hi dān thu hmuahhmuah fimkhur zetih an thlunnak dingah, mipapawl, nunaupawl le fanau tete pawl, na khawpi kăwtkapawl sungih a um mi ram dang mi tiin mipi na pungkhawmawter pei. 13 Cun cumi rak thei lo an tefapawl in an ngaithla ding ih, la dingih Jordan nan tankainak ram ih nan nun sung hmuahhmuah Jehovah nan Pathian ṭihzah an zir ding,” tiah thu a pe hai.

31:9^a Suah 17:14; 1San 15:2

31:10^b Suah 23:16; Dnp 15:12; 16:13-15

31:11^c Jos 8:34-35; 2Sp 23:2; Neh 8:2

31:12^d Hag 1:12; Mal 1:6

Pathian lakah Israel an Hél Ding

14 ^aJehovah in Mosi hnenah, “Ngai hnik, na thihnak ding tikcu a nai thlang. Joshua ko awla, Tawnawknak Puanthlam ah ding uh, cutin amah cu ṭuanvo ka pe ding,” tiah a ti. Cule Mosi le Joshua cu Tawnawknak Puanthlam ah an va feh ih an va ding. 15 ^bJehovah cu Puanthlam ah, mero ṭhuam in a rung lang ih mero ṭhuam cu Puanthlam luhnak tlunah a ding.

31:14^a Sem 25:8; Suah 33:9-11; Mip 27:13, 19, 23; Jos 1:1-9

31:15^b Suah 33:9

16 ^aCule Jehovah in Mosi hnenah, “Ngai hnik, nang cu na pupápawl hnenah na cawl thlang ding. Hi mi senpi hi an tho ding ih, an lakih um dingih an va luhnak ram ih, ram dang mipawlih pathianpawl hnenah hlawhhlang vekin an nung ding. Cule keimah in tlansan ding ih, anmah thawi ka rak tuah mi ka thukham an pahbăl ding. 17 ^bCule cuih ni ah ka thinhengnak an parah a alh ding ih, anmah ka tlansan hai ding, cule an hnen ihsin ka hmai ka thup ding ih, an cemrál ding. Cule thil ṭha lo tampi le buainak an parah a thleng ding. Cutin cuih ni ah annih in, ‘Kan lakih kan Pathian a um lo ruangah hi thil ṭha lo pawl hi kan parah a thleng a si lo maw?’ an ti ding. 18 Pathian dang pawl hnenih an hernak in an rak tuah mi thil ṭha lo hmuahhmuah ruangah cuih ni ah cun ka hmai ka thup tengteng ding.

31:16^a Sem 15:15; Suah 34:15; Lai 2:12; 10:6, 13; 1Sp 9:9; Jer 2:13

31:17^b Mip 14:42; Dnp 32:20; Lai 6:13; 2San 15:2; Isa 8:17; Eze 39:29

19 “Curuangah atu-ah, hi hla hi nan hrangah ngan awla, Israel tefapawl zirh aw, an kâ ah ret aw. Cutin hi hla hi Israel tefapawl dokalhin ka hrangah theihpitu a si ding. 20 ^aAn pupápawl hnenih sia ka rak săm mi hnawi ti le khuai tizu luannak ram ah ka hruailut hai ih, an ei ih an khawh ih, an thau tikah, pathian dang pawl hnenah an her ding ih, anmah an rian ding. Cule in hnáwng ding ih, ka thukham an pahbăl ding. 21 ^bCun hi hla cu an cithlahpawl ih kâ ah hngilh a si lo ding ruangah hitin a si ding, an parah thil ṭha lo tampi le buainak a thlen tikah, theihpitu vekin anmah dokalhin hi hla in thu a theihter ding. Ziangahtile sia ka rak săm mi ram ah ka hruailuh hai hlan hmanah an rak nun duh ṭheu dān tuihni ah ka thei,” tiah a ti.

31:20^a Sam 4:2; Jer 13:25; Dan 3:28; Amo 2:4

31:21^b 1San 28:9; Hos 5:3; Joh 2:24-25

22 Curuangah Mosi in hi hla hi cuih ni ah a ngan ih, Israel tefapawl a zirh hai. 23 ^aCule Nun-ih fapa Joshua cu ṭuanvo a pek ih, “Cak le ralṭhain um aw. Ziangahtile an hnenih sia ka rak săm mi ram ah Israel fātepawl na hruailut hai ding ih, ka lo umpi ding a si,” tiah a ti.

31:23^a Mip 27:23; Jos 1:6

24 ^aCule hitin a si, Mosi in cazual sungah hi dān thu ngan a ṭheh tikih, ṭhehfel an si tikah, 25 Mosi in Jehovah-ih Thukham Kuang phurtu Levi-mipawl thu a pe hai ih, 26 “Hi Dān Cazual hi la uhla, Jehovah nan Pathian-ih Thukham Kuang kiangah ret uh. Cutin cu tawkah cumi cu nangmah dokalhin theihpitu a si ding. 27 ^bZiangahtile nan helnak le nan lunghahnak ka thei. Zoh hnik uh, tuihsun nan zawngih ka nun lai hmanah Jehovah dokalhin nan rak hél, ka thih hnuah cun ziang tlukin nasa sinsin tak pei maw? 28 ^cKa hnenah nan hnám upapawl le nan hotupawl zaten rak pungkhawmawter uh, cutin an hnatheih ah hi thupawl hi ka sim ding ih, anmah dokalhih theihpi dingin lei le van ka ko ding. 29 ^dZiangahtile ka thih hnuah sualrál zetin nan nung ding, thu ka lo pek mi zin ihsin nan pial ding ti ka thei. Ni netaah cun nan parah thil ṭha lo a thleng ding, ziangruangahtile nan kut hnaṭuan hmangih a thinhengter dingah, Jehovah-ih mithmuh ah thil ṭha lo nan tuah ding,” tiah a ti. 30 Cule Mosi in Israel mipungkhawm zate ih hnatheih ah hi hla thupawl hi an cem hlanlo a sim.

31:24^a 2Sp 22:8

31:27^b Suah 23:21

31:28^c Job 20:27; Isa 26:21

31:29^d 1Sp 9:9; 2Sp 22:16; Thu 9:20

32

Mosi-ih Hla

1 ^a“Maw van, hna tŭn uhla, thu ka sim ding.
Maw leilung, ka kamsuakthupawl hi ngai aw.
2 ^bKa thuzirh mi hi ruah vekin sur seh,
Ka thusim mi hi daifim vekin tla seh,
Tlimno parih ruah hmai vek le
Hrampi parih ruahpi vekin.
3 ^cZiangruangahtile Jehovah hmin ka phuang ding:
Ropitnak cu kan Pathian coter uh.
4 ^dAmah cu Lungpi a si, a hnaṭuan cu a famkim.
Ziangahtile a lamzin hmuahhmuah cu an dik an si,
Amah cu Pathian rinum le diklonak nei lo,
Dingfelnak le felnak a si.
5 ^eSualrál zetin a hnenah an rak nung.
Sawisel ding an um ruangah,
Annih cu a fāte an si lo.
Zin pêng zawh le mikhêrmei san minung an si.
6 ^fMaw mi-â le mifim lo miphun,
Jehovah cu hi vekin maw nan lehrulh?
Amah cu a lo leitu nan Pa a si lo maw?
Amah in a rak lo tuah ih, a lo dĭn a si lo maw?
7 ^gKhuahlan nipawl máng aw,
San tampi kumpawl ruat aw.
Na pa sut awla, a lo theihter ding,
Na miupapawl sut hai awla, an lo sim ding.
8 ^hCungnung Bik in miphunpawl hnenih an ro a zem tikah,
Adam fapapawl a thliarhran tikah,
Israel tefapawlih mipum zulhin,
Minungpawl ramri a ṭhensak hai.
9 ⁱZiangahtile Jehovah-ih covo cu a miphun a si.
Jakob cu ro ih a covo a si.
10 ^jAmah cu ramṭhing,
Ram lawnglak,
Ramṭhing hûk durdo ah a táwng.
Amah cu a kulh, nun a zirh,
Amai mit mu vekin a kilhim.
11 ^kMuvanlai in a bu a căwktho,
A fa no pawl tlunah a thla a zâp,
A thla a pharh, anmah a cawi hai,
A thlapawl par ihsin a thiar hai vekin,
12 ^lAmah cu Jehovah lawngin a rak hruai ih,
A hnenah ram dang pathian a um lo.
13 ^mJehovah in leilung sannak ah a toter,
Israel in lórampawl rahsuah a ei,
Jehovah in amah cu lungpi ihsin khuai tizu,
Ṭêklungpi ihsin hriak a zûkter,
14 ⁿRanpi rual lak ihsin hnawi khăl le rante rual lakin hnawi ti,
Tuu fa no pawlih thau thawn,
Bashan ram tuu cang pawl le me cang pawl,
Sangvut ṭhabik thawn.
Cule sabit zu, sabit thisen na in.
15 ^oAsinan Jeshurun cu a hung thau ih a ke a sit.
Na hung thau, na hung cúm,
Na ngil hmemhmi!
Cun amah tuahtu Pathian a tlansan,
Cule a runsuahnak Lungpi a hmuhsuam.
16 ^pRam dang pathianpawl hmangin a thîksiatnak an căwktho,
Thil fihnungza pawl hmangin thinheng ko an căwktho.
17 ^qPathian hnenah si loin, khawsiapawl hnenah,
An theih lo mi pathianpawl hnenah,
Nan pupápawl ih an ṭihzah lo mi,
A thleng thar mi, pathian thar pawl hnenah rai an thawi.
18 ^rA lo hringtu Lungpi, na mangngaih nawn lo,
Cule a lo hringtu Pathian na rak hngilh.
19 ^sCule cumi cu Jehovah in a hmuh tikah,
Anmah a hnáwng hai.
Ziangruangahtile a fapapawl le a fanupawl in a thin an hengter.
20 ^tCule anih in, ‘An hnen ihsin ka hmai ka thup ding,
An cemnetnak ziang vek a si ding ti ka zoh ding,
Ziangahtile annih cu zin pêng zawh san minung,
Anmah ah rinumnak um lo mi fāte an si.
21 ^uPathian a si lo mi hmangin thîk dingah in rak căwktho.
An zianghmanlo milempawl hmangin thinheng dingin in rak căwktho.
Curuangah miphun a si lo mi hmangin thîk dingin ka căwktho hai ding.
Miphun â hmangin ka thinhengter hai ding.
22 ^vZiangahtile ka thinhengnak cu meisa bangin alh a thawk,
Sheol hnuaitabik tiang a kāng ding;
Leilung cu a rahsuah thawn cumi in a kangrál ding,
Cule tlang ṭohrampawl a kāng ding.
23 ^wAn parah vanduainak ka pengkhawm ding,
An parah ka thál fungpawl ka hmang thluh ding.
24 ^xAnnih cu rilrawnnak in a cauter hai ding,
Tak ling nat le siatralnak rapthlak in a dawlh hai ding.
An parah sahrangpawlih hâ,
Leivut lakih bawkvâkpawlih tûr ka thlah fawn ding.
25 ^yLeng lamah ralnâm in, sung lamah tuksumnak in,
Tlangval le fala him,
Hnawi fawp naute le ṭuakpar putar thawn siathlohralter an si ding.
26 ^zKei in, “Cip ṭheh ko ka cán hai ding,
Minungpawl lak ihsin anmah cīn ringring nak ka cemter ding,” tiah ka ti zikte,
27 ^aaRal thinlingnak ṭih loin rak um ningna cu,
An doralpawl in an theisual pang ding ih,
Annih in, “Kan kut cu khaisan a si,
Cule hi hmuahhmuah a tuahtu hi Jehovah a si lo,” an ti pang ding.
28 ^abZiangahtile annih cu thurawn pek nei lo miphun pakhat an si,
Anmah ah theihthiamnak a um fawn lo.
29 ^acMaw, rak fim hai sehla cu, hihi an rak thei ding,
An cemnetnak an rak ruat ding nân!
30 ^adZiangtin mi pakhat in 1000 a dûm thei ding ih,
Mi pahnih in 10000 an tlânter thei ding,
An Lungpi in anmah a rak zuar ih,
Jehovah in anmah a ap hai lo ahcun?
31 ^aeZiangahtile an lungpi cu kan Lungpi vek a si lo,
Kan ralpawl rori hmanih hmuhdān a si.
32 ^afZiangahtile an sabit hri cu Sodom sabit hri a si ih,
Gomorrah lórampawl ihta a si;
An sabitpawl cu tûr sabit an si,
An sabit bawr pawl cu a khâ.
33 An sabit zu cu rul tûr a si ih, cawngawr tûr ṭihnungza a si.
34 ^ag‘Himi cu ka hnenah khawlkhawm siin,
Ka hlawnthil ṭha khawlnak sungah erhcih a si lo maw?
35 ^ahPhuba lâk le lehrulh cu keimai ta a si,
A tikcu teah an ke a nâl ding;
Ziangahtile an vanduainak ni cu a nai ih,
An parih ra thleng ding mi thilpawl cu an hmanhmawh,’ tiah a ti.
36 ^aiAn thiltitheinak a cem ti le,
Mi zohman, sál le miluat an um nawn lo ti a hmuh tikah,
Jehovah in a mipawl thu a ṭhen ding ih,
A siahhlawhpawl parah lainatnak a nei ding.
37 ^ajAnih in, ‘Răwlhimnak ih an hawl mi lungpi,
An pathianpawl cu khuiah so an um?
38 ^akAn raithawinak sa thau eitu le,
An Inding Thilhlăn sabit zu intupawl cu.
Tho hai sehla lo bawm hai seh,
Cule nan răwlhimnak si hai seh.
39 ^alAtu-ah, zoh hnik uh, kei, keimah hi amah ka si ih,
Keimah siarlo Pathian an um lo,
Ka that ih ka nungter,
Ka hriam ih ka damter,
Ka kut sung ihsin a runsuaktu an um lo.
40 ^amZiangahtile van lamah ka kut ka thlir ih,
Kumkhuaih ka nun vekin,
41 ^anKa ralnâm tleu zukzo cu ka tât-hriam ih,
Ka kut in thuṭhennak hriamhrei ka kaih asile,
Ka doralpawl parah phuba ka la ding ih,
I huatupawl ka lehrūl ding.
42 ^aoKa thál fungpawl thisen ka riter hai ding ih,
Ka ralnâm in titsa a ei ding,
Thah mi le ralkaihpawlih thisen thawn,
Ral hotupawlih lupawl ihsin,’ tiah a ti ding.
43 ^apMaw miphunpawl, a minungpawl thawn lungawi aipuangin um uh;
Ziangahtile a siahhlawhpawlih thisen phuba a la ding ih,
A doralpawl hnenah phuba a la ding;
A ram le a minungpawl hrangah sualkhuhthawinak a pe ding,”

32:1^a Sam 49:1; Jer 2:12; Mik 1:2

32:2^b 2Sam 23:4; Sam 65:10; Isa 9:8; Mik 5:7

32:3^c Suah 33:19; Sam 118:17

32:4^d Sem 18:25; 49:24; 2Sam 22:31; Sam 18:30; 92:15

32:5^e Mat 17:17; Luk 9:41; Apo 2:40; Fil 2:15

32:6^f Suah 4:22; 2Sam 7:24; Sam 94:8; Jer 5:21

32:7^g Suah 10:2; Job 8:8; 15:18; Sam 44:1; 78:4; Isa 46:9; 51:9

32:8^h Sem 11:8; Mip 23:9; Sam 74:17; Jer 23:6; Apo 8:1; 17:26

32:9ⁱ Sam 16:5; Jer 10:16

32:10^j Sam 32:10; 107:40; Jer 31:22; Zek 2:8

32:11^k Suah 19:4

32:12^l Sam 106:9; Isa 43:12

32:13^m 2Sam 22:34; Job 29:6; Isa 33:16; Eze 36:2; Hab 3:19

32:14ⁿ Sem 49:11; Mip 21:33; Sam 65:9

32:15^o Isa 44:2; Eze 14:5

32:16^p Sam 78:58

32:17^q Lai 5:8; 1Ko 10:20; Thu 9:20

32:18^r Lai 3:7; Jer 2:32; Eze 23:35

32:19^s Sam 78:59; Amo 6:8

32:20^t Sam 4:6-7; Mat 17:17

32:21^u Mip 25:11; 1Sp 16:13; Sam 31:6; Jer 8:19; Rom 10:19; 1Ko 10:22

32:22^v Pui 26:20; Mip 16:31-35; Sam 7:11; 83:14; Jer 15:14; Ṭah 4:11; Amo 7:4

32:23^w Eze 5:16; Hab 3:9, 11

32:24^x Job 1:16, 20; Sam 58:4; Jer 8:17; Amo 5:18; Mik 7:17

32:25^y Ṭah 1:20; Eze 7:15; 2Ko 7:5

32:26^z Mip 14:12; Sam 34:16; Isa 14:20

32:27^aa Sam 140:8

32:28^ab Isa 27:11; Luk 19:41-44

32:29^ac Sam 81:13; Isa 47:7; Ṭah 1:9

32:30^ad Pui 26:8; Lai 2:14

32:31^ae Sem 49:24; Suah 14:25

32:32^af Job 6:4; Jer 23:14

32:34^ag Job 14:17; Jer 2:22; Hos 13:12

32:35^ah Sem 4:24; 30:2; Suah 32:34; Thf 4:19; Jer 23:12; 51:6; Eze 7:8-9; Rom 12:19; Heb 10:30

32:36^ai Pui 26:43; Lai 2:18; 1Sp 14:10; 2Sp 9:8; Sam 90:13; 135:14; Joe 2:14; Amo 7:3; Heb 10:30

32:37^aj Lai 10:14; Jer 2:28

32:38^ak Mip 25:1-2; Jer 11:12

32:39^al 1Sam 2:6; 2Sp 5:7; Job 5:18; Hos 6:1

32:40^am Sem 14:22; Thu 1:18

32:41^an Lai 7:20; Isa 27:1; Jer 12:12; 25:14; 46:10; Eze 21:9-10; Nah 1:2

32:42^ao 2Sam 2:26; Jer 12:12

32:43^ap 2Sp 9:7; Sam 65:1-3; Isa 1:24; 25:9; Jer 9:9; Rom 15:10; Heb 1:6; Thu 6:10; 19:2

tiin.

44 ^aCule Mosi cu Nun-ih fapa Joshua thawn a ra ih, mi senpi hnatheih ah hi hla thu zate in a sim. 45 Mosi in Israel miphun zate hnenah hi thu hmuahhmuah cu sim a ṭheh ih, 46 ^banih in an hnenah, “Tuihsun ih nan lakih ka theihter mi thu zate parah nan thinlung ret uh. Hih dān thu zaten fimkhur zetih thlun dingin cupawl cu nan fātepawl hnenah thu pe uh. 47 ^cZiangahtile hi thil hi nan hrangah thulolak men a si lo, ziangruangahtile cumi cu nan nunnak a si ih, la dingih Jordan nan tankainak ram ah hi thu hmangin nan nunkhua a sau ding,” tiah a ti.

32:44^a Mip 13:8, 16

32:46^b Joh 1:17

32:47^c Suah 23:26; Isa 65:22

Thi dingin Mosi a Timlamaw

48 ^aJehovah in Mosi hnenah cuih ni roriah, 49 ^b“Jeriko khat lam, Moab ram ih a um mi, himi tlang Abarim tlang tluanih Nebo tlang ah hung kai aw. An ta dingih Israel tefapawl ka pek mi, Kanaan ram cu va cuan aw. 50 ^cCule Hor tlang ih na u Aaron a thih ih a mipawl hnenih fĭn a si bangin, na hung kainak tlang ah hung thi awla, na mipawl hnenah fĭn na si ding. 51 ^dZin Ramṭhing ih, Meribah Kadesh tidai hmun ah, Israel tefapawl lakah ka parih nan rinum lo ruangah le Israel tefapawl lakah ka thianhlimnak nan rak hmuh lo ruangah a si. 52 ^eThungaiten cuih ram cu na hmaiah na hmu ding nân, Israel tefapawl ka pek mi ram sungah na lut lo ding,” tiin a sim.

32:48^a Mip 27:12

32:49^b Pui 14:34

32:50^c Sem 25:8; Mip 20:24-25, 28-29

32:51^d Mip 13:21; 27:14; Eze 47:19

32:52^e Mip 27:12-14; Dnp 3:23-27

33

Israel hrang Mosi-ih Malsawm Netabik

1 ^aHimi hi Pathian mi, Mosi in a thih hlanih Israel tefapawl thlawsuah a pek mi thlawsuah a si.

33:1^a Sem 27:4; Jos 14:6; 1Sam 2:27; 1Sp 12:22; 2Sp 1:9-13; Jer 35:4

2 ^aAnih in,

33:2^a Lai 5:4; Dan 7:10; Apo 7:53; Thu 5:11

“Jehovah cu Sinai ihsin a ra ih,
Seir ihsin an parah ni bangin a rung suak;
Paran tlang ihsin amah cu a rung êng ih,
Mithiang thawngza tampi thawn a ra,
A vawrh lam kut ihsin an hrangah meialh vek dān a thleng.
3 ^aA si rori, anih in miphunpawl a duhdawt,
A mithiangpawl zaten na kut ah an um,
Na ke hramah an to,
Mi kip in na kamsuakpawl an cohlang.
4 ^bMosi in kan hrangah dān in pe,
Jakob-ih mipi umkhawm co mi ro cu.
5 ^cCule mi senpi hotupawl,
Israel hnámpawl zate hmunkhat ih an punkhawm tikah,
Amah cu Jeshurun parah siangpahrang a si.

33:3^a Luk 10:39; Thu 4:10

33:4^b Joh 1:17

33:5^c Suah 16:8; Mip 23:21; 1Sam 10:19

Reuben hrang Malsawm

6 ^a“Reuben cu nung hram sehla, thi hram hlah seh,
A minungpawl khal mál hram hlah hai seh,”

33:6^a Sem 34:5

tiah a ti.

Judah hrang Malsawm

7 ^aCule himi hi Judah thuhla ah anih in,

33:7^a Sem 49:10

“Jehovah, Judah-ih aw ngaithla awla,
A mipawl hnenah hruailut aw.
Amai kut in amai hrangah do hai seh.
Nang cu a ralpawl dokalhin bawmtu si hram aw,”

tiah a ti.

Levi hrang Malsawm

8 ^aCule Levi thuhla ah anih in,

33:8^a Sem 29:34; Suah 17:7; 28:30; Mip 14:22; 20:13

“Na Thummim le na Urim cu na mithianghlim,
Massah ih na rak hniksak mi le
Meribah tidai hmun ih na rak tawh mi pa hnenah um seh.
9 ^aA nu le a paih thuhla ah,
‘Anmah ka rak hmu dah hai lo,’ tiah a ti,
Cun a unaupawl khal a theithiam lo ih
Amai fātepawl khal a thei lo,
Ziangahtile annih cu na kamsuakthu an rak thlun ih
Na thukham an rak nunpi.
10 ^bNa zīn le dān pawl cu Jakob,
Na dān cu Israel an zirh ding.
Na hmaiah rimhmui,
Na Biakṭheng parah pumhlum meiur raithawinak an ret ding.
11 ^cJehovah, a neihnunnak malsawm awla,
A kut hnaṭuan cohlansak aw,
Amah dokalhtupawl le amah huatupawl an thawhsal nawn lo nak dingah
An khēl khiak hai aw,”

33:9^a Suah 32:26-29; Mal 2:5-6; Mat 10:37

33:10^b Suah 30:7; Pui 10:11; 16:12-13; Ezr 7:10; Neh 8:18; Jer 23:22; Mal 2:6

33:11^c 2Sam 24:23

tiah a ti.

Benjamin hrang Malsawm

12 ^aBenjamin thuhla ah anih in,

33:12^a Sem 35:18; Suah 19:4; 28:12; Isa 5:1

“Jehovah-ih duhdawt mi cu sunvu-ih amah a kulhtu kiangah
Thlangamtein a cêng ding.
Cule a liang le a liang karlakah khua a sa ding,”

tiah a ti.

Joseph hrang Malsawm

13 ^aCule Joseph thuhla ah anih in,

33:13^a Sem 27:28; 30:24; Sam 148:7

“Jehovah in,
Van thil mankhung pawl thawn, daifim thawn,
Hnuai lamih băwk mi ti thûk thawn,
14 Ninu rahsuah thil mankhung pawl thawn,
Nithlapawlih rahsuah thil mankhung thawn,
15 ^aKhuahlan tlangpawlih thil ṭhabik pawl thawn,
Kumkhaw tlangmûalpawlih thil mankhung pawl thawn,
16 ^bLeilung thil mankhung pawl le a sung um mi tinkim le
Thing bŭk sungih cêngtu paih duhsaknak thawn a ram cu malsawm seh.
Malsawm cu, Joseph-ih lu par,
A unaupawl hnen ihsi ṭhenhran a si mi paih luthlung parah thleng hram seh.
17 ^cA ropitnak cu caw pa fatir vek le
A kipawl cu ramlak caw cang kipawl vek a si.
Anmahpawl hmangin anih in miphun hmuahhmuah cu
Leilung dĕng tiangin a nâm hai ding.
Annih cu Efraim-ih ta thawng sawm siar an si ih,
Manasseh-ih ta a thawng siar an si,”

33:15^a Hab 3:6

33:16^b Sem 37:8; Suah 3:2-4; Apo 7:30-35

33:17^c Sem 41:51-52; Mip 23:22; 1Sam 2:10; 2Sam 22:3; 1Sp 22:11; Sam 44:5; Eze 34:21

tiah a ti.

Zebulun le Issakar hrang Malsawm

18 ^aCule Zebulun thuhla ah anih in,

33:18^a Sem 30:18, 20

“Maw Zebulun, na fehsuaknak ah aipuang aw,
Maw Issakar, na puanthlampawl sungah aipuang aw.
19 ^aAnnih in miphunpawl kha tlang ah an ko ding,
Cu tawkah annih in dingfelnak raithawinakpawl an that ding.
Ziangahtile tifinriat lennak luangliam le
Vunnel sungih a thupaw mi hlawnthilpawl an cēn ding,”

33:19^a Suah 15:17; Isa 2:3; 18:7; Jer 31:6; Hag 2:7; Zek 14:14

tiah a ti.

Gad hrang Malsawm

20 ^aCule Gad thuhla ah anih in,

33:20^a Sem 30:11

“Gad kautertu cu malsawmin um seh,
Anih cu kiosa vekin a cêng ih, bân le luthlung a băwtthlek.
21 ^aAnih in amai hrangah covo hmaisabik a hril,
Ziangahtile cu tawkah Dān petuih covo cu zuah a si.
Anih cu mi senpi lubânpawl thawn a ra,
Anih in Jehovah-ih diknak le
Thuṭhennakpawl cu Israel thawn a tuahsuak,”

33:21^a Mip 32:1-5, 31-32; 34:14; Jos 22:1-3

tiah a ti.

Dan hrang Malsawm

22 ^aCule Dan thuhla ah anih in,

33:22^a Sem 49:16; Mip 1:38

“Dan cu kiosa fa no a si,
Bashan ihsin a khir ding,”

tiah a ti.

Naftali hrang Malsawm

23 ^aCule Naftali thuhla ah anih in,

33:23^a Sem 30:8

“Maw Naftali, Jehovah-ih duhsaknak thawi khăwpkham le
A malsawm thawi khăwptu,
Tifinriat lam le thlang lam na la pei,”

tiah a ti.

Asher hrang Malsawm

24 ^aCule Asher thuhla ah anih in,

33:24^a Sem 30:13; 49:20

“Asher cu fapapawl lakah malsawm co bik a si,
A unaupawl in cohlang hram hai sehla,
Hriak sungah a ke hnīm hram seh.
25 ^aNa sângka hrenpawl cu thir le dar an si ding,
Na dam sung nipawl zulhin, na cahnak a um ding.
26 ^b“Nangmah lo bawm dingah van par le
Khawdurpawl parih a cungcuannak thawi totu,
Jeshurun Pathian vek zohman an um lo.
27 ^cKumkhaw Pathian cu na răwlhimnak a si ih,
Thuai lam cu kumkhaw bānpawl an si,
Anih in na hmai ihsin ral a dawisuak ih,
‘Hloralter aw!’ tiin a ti ding.
28 ^dCun Israel, Jakob-ih tesinfa lawng thlangamten a cêng ding,
Thlairawl le sabit zu thar ram ah,
Amai van khal in daifim an tlater ding.
29 ^eMaw Israel, nang cu mithlawsuak na si!
Nangmah vekih Jehovah ih a rundam mi miphun cu zo a si?
Anih cu a lo bawmtu ralphaw le na cungnunnak ralnâm a si.
Na ralpawl na hnenah a deu-in an ra tlulut ding ih,
An hmun sâng pawl kha na cīl ding,”

33:25^a Neh 3:3; Sam 147:13

33:26^b Suah 15:7; 2Sam 22:10; Sam 18:10; 104:3; Dan 7:13

33:27^c Sem 21:33; Suah 15:18; 34:11; Jos 24:18; Sam 9:9; Isa 40:28

33:28^d Sem 27:28; Suah 33:16; Pui 25:18; Sam 16:9; Thf 1:33; Isa 14:30

33:29^e Suah 18:4; Mip 33:52; 2Sam 7:23; Sam 1:1; Hos 13:9; Hab 3:19

tiah a ti.

34

Nebo Tlang ah Mosi a Thi

1 ^aMosi cu Moab phairawn ihsin Jeriko khat lam ral, Nebo tlang, Pisgah tlang zimah a kaiso. Cule Jehovah in amah cu Gilead ram pumpi, Dan tiang, 2 ^bNaftali ram pumpi, Efraim le Manasseh ram pawl, Judah ram pumpi Nitlaknak Tifinriat tiang, 3 ^cNegev le ṭhulhfau kung khawpi Jeriko phaikuam kimvel ram Zoar tiangin a hmuh. 4 ^dCun Jehovah in a hnenah, “Himi hi Abraham, Isak le Jakob tepawl hnenah, ‘Na cithlahpawl hnenah cumi cu ka pe ding,’ tiin, pe dingih sia ka rak săm mi ram cu a si. Cumi cu na mit in ka lo hmuter, asinan cu tawkah cun na va kai lo ding,” tiah a ti.

34:1^a Sem 14:14; Mip 21:20; 32:3

34:2^b Suah 23:31

34:3^c Sem 12:9; 13:10; Lai 1:16; 2San 28:15

34:4^d Sem 12:7; 26:3; 28:13; Jos 21:43

5 ^aCutin Jehovah-ih siahhlawh Mosi cu Jehovah-ih kamsuakthu bangtukin, cu tawk Moab ram ah a thi. 6 ^bCule Beth Peor khat lam ral, Moab ram sungih phaikuam ah amah cu Jehovah in a phum. Asinan a thlān cu tuihni tiang zohman in an thei lo. 7 ^cMosi cu a thih tikah kum 120 mi a si. A mit a māl lo ih, a tha kel khal a ṭum lo.

34:5^a Sem 25:8; Mip 12:7

34:6^b Jud 1:9

34:7^c Sem 15:15; 27:1; Suah 7:7

8 ^aCule Israel tefapawl in Mosi cu Moab phairawn ah ni 30 sung an ṭah. Cutin Mosi an ṭahnak le an sūnnak nipawl cu a cem.

34:8^a Sem 37:34; Mip 21:11; 2Sam 11:27

9 ^aCule Nun-ih fapa Joshua cu thlarau fimnak in a khat, ziangahtile a parah Mosi in a kut a rak suang. Cun Israel tefapawl in amah an rak ngaithla ih, Jehovah in Mosi thu a rak pek vekin an tuah.

34:9^a Sem 41:38; Suah 28:3; Isa 11:2; Apo 6:6

10–11 ^aFaro le a siahhlawh hmuahhmuah le amai ram pumpi parah hminsinnakpawl le mangbangzapawl Izip ram ah tuah dingin Jehovah in a thlah mi, Jehovah in hmaităwnih a theih mi Mosi vek hi, cuih hnu ihsin Israel ram ah profet an lang nawn lo. 12 ^bIsrael miphun zate mithmuh ih Mosi in a rak tuah mi thiltitheinak cak tak hmuahhmuah le ṭihnung rapthlak hmuahhmuah tuahtu zohman an um lo.

34:10-11^a Sem 20:7; Suah 11:3; 33:11

34:12^b Heb 3:1-6