About Bible Thianghlim | ©

BibleThianghlim – FILEMON

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

FILEMON

  • A ngantu: Paul
  • A siartu: Filemon
  • Ngan kum: A.D. 61-62

Filemon hnenih cakuat hi Paul ih ngan mi lakah bulpak cakuat si bik le a cakuatpawl lakih a tawibik mi a si. Himi sungah a cakuat dangpawl bangin, tualsung kawhhran ih zumnak le nunpinak lam thu a ngan lo. Hi cakuat hi Rom thawnginn ih a um laiah, Khrih-ih a fa Filemon hnenih Onesimas aiawhih a ngan mi a si (1:19). Onesimas cu Filemon-ih sál, paisa, asilole thilri fir tahratin a hnen ihsin Rom khawpi ah tlânhlo ih, Paul thawn a táwngaw ngah mi pa a si. Onesimas cu Paul in Bawipa hnenah a hruai ih, Paul-ih ṭul mi tuahsakin cān a hmang (1:11, 13).

Sikhalsehla Paul cun sál cu dān vekin a pu hnenih kirsal ding a si ti a thei (1:13-14). Ṭaikikas cu Efesa-mipawl le Kolose-mipawl hnenih cakuat phurin, Asia ram lamih kir ding a si tikah (Efe 6:21-22; Kol 4:7-8), Paul in Onesimas kha Filemon hnenah Ṭaikikas zawngih kuat cih a tum. Paul ih ruah bik mi cu Onesimas tundinsalnak le Filemon thawn remdaihnak neih ding hi a si. Onesimas thawi kuat cih mi hi cakuat hi A.D. 61-62 hrawng, Rom ah Paul a vei khatnak thawng a tlak laiih a ngan mi a si.

Filemon hi zumtu ṭha pakhat le sál neitu a si (1:1, 5, 7). Filemon-ih nundān thu ah zumngamnak a nei ih, Onesimas hrangih a dilsak mi khal a famkimter ding ti Paul in a zum (1:21). Filemon in nun thar a nei mi a sálpaih sualnak ngaidam tahratin, amah cu sál vek si nawn loin duhdawt mi unau bangih cohlan ding Paul cun a duh (1:15-16). Hi cakuat in Apostol san laiih sál neihdān thu in sim. Himi in zumtupawl lakah pakhat le pakhat sual ngaidamawktăwn ding thu a thupi mi thutakpawl in zirh.

Hi cakuat hi Pathian in Khrih hmangih in ngaidamnak thu tahṭhimnak ropi khal a si. Paul cun Onesimas ih rak tuahsual mi le leiba hrangih sual cawhkuan phurhsak a huam (1:18). Cuvek thothoin, misual in a sual man ih a tuar ding mi hremnak cu Khrih amah rori in a phur. Misual cu a sualnak ihsin kirsalin, Khrih lawngih a zumnak a ṭhum tikah Pathian ngaidamnak a co.

Thuhlawm Ṭhen

  • I. Thuhmaihruai (câng 1-3)
  • II. Paul in Filemon a relmawi (câng 4-7)
  • III. Paul in Onesimas hrangah Filemon a dilsak (câng 8-14)
  • IV. Paul in a dilsak mi cungcangthu ah Filemon a ngen (câng 15-19)
  • V. Paul in Filemon phûr dingin a dil (câng 20-21)
  • VI. Paul in a dilsaknak a cemter (câng 22)
  • VII. Thukharnak (câng 23-25)

1

Cibaibûknak

1 Paul, Khrih Jesu-ih thawngtla le kan unaupa Timothy in, kan duhdawt zet mi le kan hnaṭuanpi Filemon hnenah le, 2 kan duhdawt mi Afia le kan ralkap ṭuanpi Arkippas hnenah le na inn ih kawhhran hnenah:

3 Pathian kan Pa le Bawi Jesu Khrih hnen ihsin zangfahnak le hnangamdaihnak cu nan hnenah um hram seh.

Filemon-ih Duhdawtnak le Zumnak

4 Ka thlacamnak ah na hmin sâl ringring in, Pathian hnenah lungawi thu ka sim ṭheu. 5 Cucu Bawi Jesu le mithiangpawl hmuahhmuah hnenih na duhdawtnak le na zumnak hna ih ka theih ruangah a si. 6 Cutin Khrih Jesu ah nanmah ih um thil ṭha tinkim theihnak ruangah na zumnak mi na va hlawm tikah hmual nei thei dingin thla ka cam. 7 Ziangahtile mithiangpawlih thinlung cu unaupa, nangmah in na harhtharter ruangah na duhdawtnak ah aipuannak le thlangamnak nasazet kan nei.

Onesimas hrang Paul-ih Ngĕnnak

8 Curuangah thildik ti dingih thu lo pek ding cu Khrih ah ralṭha zet thei si hman ningla, 9 kei, Paul, tar zet zo mi, atu khalih Jesu Khrih-ih thawngtla hin duhdawtnak ruangah a ngĕnin ka lo ngen sawn a si. 10 Ṭemṭawn ka sinak ih ka hrin mi ka fapa Onesimas hrangah ka lo ngen a si. 11 A liam cia mi cān ah cun na hrangah miṭhahnem lo a si, asinan atu ah cun nang le kei hrangah miṭhahnem a si.

12 Amah cu na hnenah ka rak kuatsal. Curuangah amah cu keimai thinlung vek rori in, cohlang hram aw. 13 Amah cu thuthangṭha ih ṭemṭawn ka si sung, nangmah aiawhih rawng i bawlsak theinak dingah, ka hnenih umter ka duh. 14 Sikhalsehla na ṭhatnak cu ti lo theih lo vek si loin, na duhnak hrimhrim ruang sawnah a si theinak dingah, na lungkimnak um lo cun zianghman tuah ka duh lo.

15 Rei lo te sung a lo ṭhennak săn hi nang in amah cu a kumkhuaih na neih theinak dingah a si thei men. 16 Sál vek si nawn loin, sál hnakih sângsawnin amah cu cohlang aw, amah hi ka hrangah duh zet mi unau a si hleice ih, milai ah le Bawipa ah na hrangah ziangtluk duh zet mi a si sinsin pei.

17 Curuangah na hnaṭuanpi pakhat ih i ruat asile, keimah vek rori in amah cu rak cohlang aw. 18 Anih in na parah tuahsual mi, asilole ziang simaw bâk mi a neih a si khalle keimai bâk ah ruat aw. 19 Kei, Paul in himi hi keimai kut rori in ka ngan a si, cumi cu ka rulhsak ding. Sikhalsehla ka hnenah nangmah rori khal in bâk mi na nei ti ka lo sim a si lo. 20 A si, unaupa, Bawipa ah na hnen ihsin aipuannak i neihter awla, Bawipa ah ka thinlung harhtharter aw. 21 Ka thu na ngai ding ti zumhngehnak ka neih ruangah, na hnenah hitin ka run ngan a si; ka sim mi hnakih nasasawnin na tuah ding ti khal ka thei.

22 Cule cēnnak ding hmun khal in rak timlamsak cih aw, ziangahtile nan thlacamnak zarah nan hnenah ka ra thei ding tiah ruahsannak ka nei.

23 Khrih Jesu ih ka thawngtlakpi Epafras in cibai a lo bûk. 24 Ka hnaṭuanpi Mark, Aristarkas, Demas le Luke lepawl in cibai an lo bûk.

25 Kan Bawipa Jesu Khrih-ih zangfahnak cu na thlarau ah um hram seh. Amen.