About Bible Thianghlim | ©

BibleThianghlim – 1 Siangpahrang

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 Siangpahrang

12345678910
11121314151617181920
2122

• A ngantu: Theih a si lo
• Thil cang kum: B.C. 971-853
• Ngan kum: B.C. 586 hnu.

Siangpahrang cabu pakhatnak le pahnihnak hi a thawk ah cun bu khat a rak si. A ngantu in a thuanthu ngan mi a ngan thei nak dingah ngan cia mi cabu ṭansan ṭha tampi a nei ti a fiang (1Sp 11:41; 15:23, 31). Jew-pawl thuanthu vek cun profet Jeremiah in Siangpahrang cabu pakhatnak le pahnihnak sung thu a tamsawn hi a ngan ti a si.

Samuel cabu pahnihnak thawhtirah Saul thuhla kan hmu ih, cu lo hmuahhmuah cu David-ih thuhla a si vekin Siangpahrang cabu pakhatnak a thawknak lamah David-ih thuhla kan hmu ih, cu lo hmuahhmuah cu Solomon-ih thuhla a si (B.C. 971). Asinan hi cabupawlih hmuitin mi bik cu siangpahrangpawl le lalrampawl thuanthu a si lo. A taktakah cun, Siangpahrang cabu pakhatnak le pahnihnak ah hin siangpahrangpawl cu a pawimawhbik an si lo. Cipciar zetih ngan mi thuanthupawl hi an dik ih an thupi, asinan a thuanthu ih a thupitter mi bik cu Pathian a si. Siangpahrang cabu pakhatnak le pahnihnak ih thupi laimu cu Pathian kamsuakthu in thuneihnak pumhlum a nei ih, rinsan tlak a si taktak ti hi a si. Hi cabu ngantu in himi thupi hi a phunphunin a rel. Siangpahrang cabu pakhatnak le pahnihnak ah “Jehovah-ih kamsuakthu” ti hi vei 55 hrawng a lang (San Siarnak cabupawl ah cun vei 20 hrawng lawng).

“Jehovah in hitin a ti” ti khal vei 39 hrawng a lang (San Siarnak cabupawl ah cun vei 15 hrawng lawng). Siangpahrang cabu pakhatnak le pahnihnak in simsungnak le cumi a tlamtlinnak vei 40 hnakih tam a telh. Simsungnak thleng famkimcih mi a ngan tikah, thleng famkim hrih lo mipawl khal an thleng famkim tengteng ding tiin kan zumnak a hngetter. Pathian kamsuakthu phuannak hmanrua ngaingai cu profetpawl hi an si. “Profet,” “simsung” ti le “simsungnak” ti ṭawngkampawl hi siangpahrang cabu pakhatnak le pahnihnak ah vei 89 hrawng an lang (San Siarnak cabupawl ah cun vei 40 hrawng lawng). Siangpahrang cabupawl siarlo ah profet nun le hnaṭuan rel uar tu cu Jeremiah lawng a si. Siangpahrangpawlih cabu ah profet 17 a tarlang ih, profet bur ti khal a tarlang. Profet hrangih hmin dang a sim mi “Pathian mi” ti mi cu Siangpahrang cabu pakhatnak le pahnihnak ah vei 55 a lang (San Siarnak ah vei 7 lawng).

Siangpahrang cabu pakhatnak le pahnihnak ih kan hmuh mi thupi in zumtu kip hnenah “Jehovah-ih kamsuakthu” pauhpauh ah hnîn thei lo zumnak in pe ding a si.

A rak sim mi cu a sim vekin Jehovah in a tuah ding ti rinhlelhnak pauhpauh cu Siangpahrang cabu pakhatnak le pahnihnak in an haikiang ding a si.

1

Siangpahrang David Bawm dingin Abishag a Ra

1 David siangpahrang cu a upa in a tar zet thlang, cule puan an sĭn nân anih cu a hlum thei cuang lo. 2 Curuangah a siahhlawhpawl in a hnenah, “Ka bawi siangpahrang hrangah fala him hawl si sehla, cu nu cu siangpahrang hmaiah um seh, cule anih in amah kilkhawi seh. Cule ka bawi siangpahrang a hlum thei nak dingah na ṭāng sungah it seh,” tiah an ti. 3 ^aCutin Israel ramkulh sung hmuahhmuah ah fala duhum an hawl ih, Shunam-mi Abishag an hmu, cule amah cu siangpahrang hnenah an hruai. 4 Falanu cu duh a nung zet. Cu nu cun siangpahrang cu a kilkhawi ih amah a rian, asinan siangpahrang in cuih fala cu a ihpi lo.

1:3^a Jos 19:18; 2Sam 3:7

Siangpahrang ah Adonijah a Phuangaw

5 ^aCun Haggith-ih fapa Adonijah cu khaisângawin, “Siangpahrang ka si ding,” tiah a ti. Cule amai hrangah a hmaiih tlân dingah rang lêngpawl, rang ralkappawl le pacang 50 a timtuah. 6 ^bCule a pa in, “Ziangruangah cuvek na rak tuah?” tiin ziangtik khalah amah a kawk dah lo. Amah cu pa hmelṭha zet khal a si, Absalom hnuih a hrin mi a si.

1:5^a 1Sam 8:11; 2Sam 3:4

1:6^b 2Sam 3:3-4

7 ^aCun Adonijah in Zeruiah-ih fapa Joab le puithiam Abiathar a sawm hai, cule Adonijah cu an thlun ih an bawm. 8 ^bAsinan puithiam Zadok, Jehoiada-ih fapa Benaiah, profet Nathan, Shimei, Rei le David-ih micak ralthiampawl cu Adonijah lamah an ṭâng lo. 9 ^cCule Adonijah cun tuu le caw cang pawl le ṭilva thau pawl thawn En Rogel kiangih um Zoheleth lung kiangah thawinak a tuah. Siangpahrang fapapawl, a unau mipapawl zate le siangpahrangih siahhlawhpawl a si mi, Judah mipa zaten a sawm. 10 ^dAsinan profet Nathan, Benaiah, micak ralthiampawl le a unaupa Solomon cu a sawm lo.

1:7^a 1Sam 22:20; 2Sam 2:13

1:8^b 1Sam 2:35; 2Sam 8:17-18; 23:8

1:9^c 2Sam 17:17

1:10^d 2Sam 12:24

Nathan le Bathsheba in Siangpahrang David Ralrinnak an Pe

11 ^aCun Nathan in Solomon-ih nu Bathsheba hnenah, “Haggith-ih fapa Adonijah cu siangpahrang ah a cang zo ih, kan bawi David in cumi cu a thei lo ti na hna in na thei hrih lo maw? 12 ^bCuruangah ra aw, zangfahten, na nunnak le na fapa Solomon-ih nunnak na runhim thei nak dingah thurawn lo pe hnik ning. 13 Siangpahrang David hnenah feh lohli awla a hnenah, ‘Maw siangpahrang, ka bawipa, ka hnuah, “Na fapa Solomon in a uk tengteng ding ih, ka laltokham parah a to ding,” tiin na siahhlawh nu hnenah sia na săm zo a si lo maw? Ziangah so Adonijah cu siangpahrang ih a can?’ tiah na ti pei. 14 Cun cu tawkih siangpahrang thawi nan biakawk laiah, ngai hnik, keimah khal na dungah ka ra ding ih, na ṭawngkampawl ka nĕmhnget ding,” tiah a ti.

1:11^a 2Sam 12:24

1:12^b Thf 15:22

15 Cule Bathsheba cu siangpahrang hnen pindan sungah a va lut. Atu-ah cun siangpahrang cu a tar zet thlang ih, Shunam-mi Abishag in siangpahrang cu a rian. 16 Cule Bathsheba cu a lu a kûn ih siangpahrang hmaiah a băwkkhup. Cun siangpahrang in, “Ziang na duh?” tiah a rak ti.

17 Cun cu nu cun a hnenah, “Ka bawipa, ‘Na fapa Solomon in ka hnuah a uk tengteng ding ih, ka laltokham parah a to ding,’ tiin Jehovah na Pathian hmin in na siahhlawh nu hnenah sia na rak săm. 18 Atu-ah cun zoh hnik! Adonijah cu siangpahrang ah a cang zo, cule atu-ah, ka bawi siangpahrang, nang in cuih thu cu na thei lo. 19 Anih cun caw cang pawl le ṭilva thau pawl le tuu tampi thawn thawinak a tuah ih, siangpahrang fapapawl hmuahhmuah, puithiam Abiathar le ralkap hotu Joab tipawl tla a sawm. Asinan na siahhlawh Solomon cu a sawm lo. 20 Cule nangmai hrang lawngte ah cun, Maw siangpahrang, ka bawipa, na parah Israel miphun zate ih mit cu a fu a si. Curuangah nangmah in ka bawi siangpahrangih laltokham ah amai hnuih totu ding anmah na sim a ṭul. 21 ^aCu lo asile hitin a si ding, ka bawi siangpahrang cu a pupápawl hnenih a cawlh tikah, keimah le ka fapa Solomon cu thil sual tuahtu ih siar kan si ding,” tiah a ti.

1:21^a Sem 15:15

22 Cule zoh hnik, cu nu in siangpahrang a biak rero laiah profet Nathan khal a ra thleng ve. 23 Cun annih in siangpahrang hnenah, “Zoh hnik, profet Nathan a um,” tiin siangpahrang an sim. Cule anih cu siangpahrang hmaiih a thlen tikah, siangpahrang hmaiah a hmai leisin bihin a băwkkhup. 24 Cule Nathan in, “Maw siangpahrang, ka bawi, ‘Keimah hnuah Adonijah in a uk ding ih, ka laltokham parah a to ding,’ na rak ti dah maw? 25 Ziangahtile anih cu tuihsun ah a suk ih caw cang pawl le ṭilva thau pawl le tuu tampi thawn thawinak a tuah ih, siangpahrang fapapawl zate le ralkap hotupawl le puithiam Abiathar tla a sawm. Cule zoh hnik, a hmaiah an ei ih an in rero. Cule, ‘Siangpahrang Adonijah a san sau hram seh!’ tiah an ti. 26 Asinan na siahhlawh keimah siseh, puithiam Zadok siseh, Jehoiada-ih fapa Benaiah siseh, na siahhlawh Solomon siseh a sawm lo. 27 Himi hi ka bawi siangpahrang ih rak tuah mi thil siin, amah hnuih ka bawi siangpahrang laltokham parih totu ding mi na siahhlawh pa na rak sim lo a simaw?” tiah a ti.

David in Siangpahrang ah Solomon a Phuang

28 Cun Siangpahrang David in a let ih, “Ka hnenah Bathsheba ko aw,” tiah a ti. Cule siangpahrang hnenah Bathsheba a ra thleng ih siangpahrang hmaiah a ding. 29 ^aCule siangpahrang cun sia a săm ih, “Vansannak phunkim lak ihsin ka nunnak i rak tlentu Jehovah a nun rori bangin, 30 ^b‘Na fapa Solomon cu ka hnuah siangpahrang a si tengteng ding ih, keimah aiah ka laltokham parah a to ding,’ tiin Israel-ih Pathian Jehovah hmin in na hnenih sia ka rak săm vekin, tuihsun khalah ka tuah rori ding a si,” tiah a ti.

1:29^a 2Sam 4:9

1:30^b 1San 23:1

31 Cun Bathsheba cu lei ah a hmai kûn phahin siangpahrang hmaiah a băwkkhup ih, “Ka bawi Siangpahrang David kumkhuain dam hram seh!” tiah a ti.

32 ^aCule Siangpahrang David in, “Puithiam Zadok, profet Nathan le Jehoiada-ih fapa Benaiah pawl tla ka hnenah ko uh,” tiah a ti. Cutin annih cu siangpahrang hmaiah an ra thleng. 33 ^bAn hnen khalah siangpahrang in, “Nan bawipaih siahhlawhpawl nan hnenah hruai uhla, keimai lākrang parah ka fapa Solomon toterin amah cu ^cGihon ah hruaithla uh. 34 ^dCu tawkah puithiam Zadok le profet Nathan in Israel tlunih siangpahrang dingah amah cu hriak thih hai seh. Cule tuu pa ki phaw in, ‘Solomon siangpahrang a san sau hram seh!’ ti hai seh. 35 Cun Solomon dungah nan so pei ih anih cu a ra ding, cule ka laltokham parah a to ding. Cule keimah aiah siangpahrang a si ding. Ziangahtile amah cu Israel le Judah tlunih uktu dingah ka hril zo a si,” tiah a ti.

1:32^a 1Sam 2:35

1:33^b 2San 32:30

1:33^c Gihon: Jerusalem tihna pakhat a si.

1:34^d 1Sam 10:1

36 Jehoiada-ih fapa Benaiah in siangpahrang cu a let ih, “Amen! Ka bawi siangpahrangih Pathian Jehovah in cu vekin ṭawng ve hram seh. 37 ^aJehovah cu ka bawi siangpahrang hnenih a rak um bangin, Solomon hnen khalah um ve hram sehla, a laltokham cu ka bawi Siangpahrang David-ih laltokham hnakin ropisawn hram seh,” tiah a ti.

1:37^a Jos 1:5, 17

38 ^aCuti cun puithiam Zadok, profet Nathan, Jehoiada-ih fapa Benaiah, Kereth-mipawl le Peleth-mipawl cu an suk ih Siangpahrang David-ih lākrang parah Solomon cu an toter, cule amah cu Gihon ah an hruai. 39 ^bCun puithiam Zadok in Biakbûk ihta hriak retnak ki a la ih, Solomon a thih. Cule tuu pa ki an phaw ih mi hmuahhmuah in, “Siangpahrang Solomon a san sau hram seh!” tiah an ti. 40 ^cCule amah thlunin mi hmuahhmuah an fehso ih mipi cu phirivaupawl tumin aipuannak nasa zet thawn lungawi aipuangin an um, cutin an thâwm ruangah leilung a khĭng ṭheh zik a bang.

1:38^a 1Sam 30:14

1:39^b Suah 26:7; Mip 23:21; 1Sam 10:1; 2Sp 11:12, 14; Sam 89:20

1:40^c 1Sam 10:5

Adonijah in Solomon Siangpahrang a Si ti a Thei

41 ^aCule Adonijah le a hnenih um a sawm mipawl zaten, ei an khawp tikah, cumi cu an hna in an thei. Cule Joab in tuu pa ki thâwm a thei ih, “Ziangruangah so cu tlukih thâwmri thangin khawpi a um?” tiah a ti. 42 ^bA ṭawng rero laiah zoh hnik, puithiam Abiathar-ih fapa Jonathan a ra thleng. Cule Adonijah in a hnenah, “Rung lut aw, ziangahtile nang cu mizahum na si ih, thuthang ṭha run keng aw,” tiah a ti.

1:41^a 2San 23:12-13

1:42^b 2Sam 15:27, 36; 18:27

43 Cun Jonathan in a let ih Adonijah hnenah, “Si hlah e! Kan bawi Siangpahrang David in siangpahrang ah Solomon a tuah zo. 44 Solomon zawngah siangpahrang in puithiam Zadok, profet Nathan, Jehoiada-ih fapa Benaiah, Kereth-mipawl le Peleth-mipawl a thlah ih, siangpahrangih lākrang parah amah an toter zo. 45 Cule puithiam Zadok le profet Nathan in Gihon ah amah cu siangpahrang ah hriak an thih zo, cule cu tawk ihsin lungawi aipuangin an fehso, cutin khawpi cu a khâwk rumro. Thâwmri na rak theih mi cu cumi cu a si. 46 ^aSolomon cu uknak laltokham ah a to fawn. 47 Cule cuihhleiah siangpahrangih siahhlawhpawl cu kan bawi Siangpahrang David thlawsuah pe dingin an feh, ‘Pathian in na hmin hnakin Solomon-ih hmin ṭhater sawn hram sehla, amah in na laltokham hnakin amai laltokham ropiter sawn seh,’ tiah an ti. Cun siangpahrang cu ihkhun parah a lu a kûn. 48 Cule siangpahrang khal cun hitin a ti, ‘Israel-ih Pathian Jehovah, ka mit ih hmu dingin tuihsun roriih ka laltokham parih totu ding ruattu cu thangṭhatin um seh,’ tiin,” tiah a ti.

1:46^a Dnp 17:18

Solomon in Adonijah a Zuah

49 Cutin Adonijah hnenih um a sawm mipawl hmuahhmuah in an ṭih ih an tho, cule mi kip mai zin cio ah an feh. 50 ^aCule Adonijah in Solomon a ṭih ih, anih cu a tho, cule a feh ih Biakṭheng kipawl a pâwk. 51 Cule cumi cu, “Ngai hnik, Adonijah in Siangpahrang Solomon a ṭih, ziangahtile zoh hnik, anih cun Biakṭheng kipawl a pāwk ih, ‘Tuihsun ah amah in ralnâm thawn a siahhlawh a that lo ding, tiin Siangpahrang Solomon in siasăm seh,’ tiah a ti,” tiin Solomon cu an sim.

1:50^a Suah 27:2

52 Cu tikah Solomon in, “Mitling ih a nĕmhngehawk asile, a sám phang khat hman leilung ah a tla lo ding, asinan amah ah sualralnak hmuh a si ahcun, amah cu a thi ding a si,” tiah a ti. 53 Cule Siangpahrang Solomon in Biakṭheng ihsin amah hruaithla dingin anmah cu a thlah. Cule Adonijah cu a thleng ih Siangpahrang Solomon hmaiah a hlăwnaw, cule Solomon in a hnenah, “Na inn ah tlung aw,” tiah a ti.

2

David in Solomon Thu a Sim

1 ^aAtu-ah cun David ih thih ding ni a nai thlang, cule anih in a fapa Solomon thu a cah, 2 ^b“Leilung mi hmuahhmuah lamzin ah ka feh, curuangah cak zetin um awla, pacang na sinak langter aw. 3 ^cCule na tuah mi hmuahhmuah le na fehnak pauhpauh ih na hmuingil thei nak dingah, Mosi Dān sungih ngan vekin, Jehovah na Pathian in a lamzinpawl zawh ding le a sakhaw dānpawl, a thupekpawl, a zīn le dān pawl, a thutheihter mipawl thlun dingih a thucah mi hi thlun aw. 4 ^dCutin Jehovah in ka thuhla ih, ‘Na fapapawl in an thinlung zate le an nunnak zate in ka hmaiah thutak ih feh dingah an nundān an fimkhur a si ahcun, Israel laltokham parih totu na tlasam lo ding,’ tiih a rak ṭawng mi a kamsuakthu kha a famkimter ding.

2:1^a Sem 47:29

2:2^b Jos 1:6; 23:14

2:3^c Dnp 4:6; Jos 1:7; 1San 22:13

2:4^d 2Sp 18:3-6; 2San 23:3; Sam 26:1-3

5 ^a“Cuihhleiah Zeruiah-ih fapa Joab in ka parih a rak tuah mi le a rak thah mi Israel ralkappawl hotu pahnih Ner-ih fapa Abner le Jether-ih fapa Amasa parih a rak tuah mi khal na thei. Cule remdaihnak cān ah ral donak thisen a suah ih, ral donak thisen cu a tâi kimvelih a taikhap ah le a ke ih a um mi a kedampawl parah an um. 6 Curuangah na fimnak vekin tuah awla, a sám var cu daiten Sheol ah suk hlah seh.

2:5^a 1Sam 14:50; 2Sam 2:18; 3:27; 17:25

7 ^a“Asinan Gilead-mi Barzillai-ih fapapawl hnenah ngilneihnak langter awla, annih cu na cabuai ih eitupawl lakih mi si hai seh. Ziangahtile annih cu na unaupa Absalom hnen ihsin ka tlan laiah ka hnenah an ra a si.

2:7^a 2Sam 17:27

8 ^a“Cule zoh hnik, Mahanaim ih ka feh ni ah huat um zet camsiatnak thawn i rak camsetu Bahurim ihsin Benjamin-mi, Gera-ih fapa Shimei na hnenah a um. Asinan anih cu Jordan ah i hmuak dingin a suk ih, Jehovah hmin in a hnenah, ‘Ralnâm in ka lo that lo ding,’ tiah sia ka rak săm. 9 Curuangah atu-ah mawhnak nei lo vekin amah cu zoh hlah, ziangahtile mifim na si ih a parah ziang na tuah a ṭul ti na thei. A sám var cu Sheol ah thisen thawn kenglut sawn aw,” tiah a ti.

2:8^a Sem 32:2; 2Sam 16:5-13; 19:18-23

David Thihnak

10 ^aDavid cu a pupápawl hnenah a cawl ih, David-ih Khawpi ah phum a si. 11 ^bIsrael tlunih David a lal sung cu kum 40 a si. Hebron ah kum sarih a lal ih, Jerusalem ah kum 33 a lal. 12 ^cCule Solomon cu a pa David-ih laltokham parah a to ih, a lalram cu hnget zetin dĭn hngeh a si.

2:10^a 2Sam 5:7; Apo 2:29

2:11^b 2Sam 5:4-5

2:12^c 1San 17:14; 2San 1:1; 9:8

Solomon in Adonijah a That

13 ^aHaggith-ih fapa Adonijah cu Solomon-ih nu Bathsheba hnenah a ra. Cule Bathsheba cun, “Daihnak thawn na ra maw?” tiah a rak ti.

2:13^a 1Sam 16:4

Cule anih in, “Daihnak thawn,” tiah a ti. 14 Cuihhleiah Adonijah cun, “Na hnenih lo sim ding ka nei,” tiah a ti.

Cule Bathsheba in, “Cumi cu sim aw,” tiah a ti.

15 Cun anih cun, “Lalram cu ka ta a si ti na thei ih, keimah in ka uk a ṭul ti Israel miphun zate in ka parah an ruahsannak an ṭhum. Sikhalsehla lalram cu a linglet ih ka unaupaih ta ah a cang. Ziangahtile cumi cu Jehovah hnen ihsin amai ta a si. 16 Atu-ah thil pakhat ka lo dil, i ^ael siang hram hlah,” tiah a ti.

2:16^a el: A ṭawng hrampi ah, “hmai hmun dang hawisan,” ti a si.

Cule Bathsheba in a hnenah, “Cumi cu sim aw,” tiah a ti.

17 Cun anih in, “Nupi ah Shunam-mi Abishag i pek thei nak dingah zangfahten Siangpahrang Solomon be aw, ziangahtile anih cun a lo êl lo ding” tiah a ti.

18 Cutin Bathsheba in, “A ṭha e, siangpahrang hnenah ka lo simsak ding,” tiah a ti.

19 ^aCuruangah Bathsheba cu Adonijah simsak dingin Siangpahrang Solomon hnenah a feh. Cule siangpahrang cu amah hmuak dingah a tho ih a hnenah a kûn. Cule a laltokham parah a to ih, siangpahrangih nu hrangah laltokham a hunter, cutin anih cu siangpahrang vawrh lamah a to. 20 Cun Bathsheba in, “Na hnenah dilnak fate pakhat neih ka duh, i êl siang hram hlah,” tiah a ti.

2:19^a 2San 15:16; Sam 45:9

Cule siangpahrang in a hnenah, “Cumi cu dil aw, ka nu, ziangahtile ka lo êl lo ding,” tiah a ti.

21 Cutin Bathsheba cun, “Shunam-mi Abishag cu na unaupa Adonijah hnenah nupi dingih pek si seh,” tiah a ti.

22 ^aCule Siangpahrang Solomon in a sawn ih a nu hnenah, “Atu-ah Adonijah hrangah ziangah so Shunam-mi Abishag cu na dil? Lalram khal dilsak lawlaw hmen, ziangahtile amah cu ka u a si. A hrangah siseh, puithiam Abiathar hrangah siseh, Zeruiah-ih fapa Joab hrang khalah dil lawlaw hmen!” tiah a ti. 23 ^bCule Siangpahrang Solomon cun Jehovah hmin in, “Himi ṭawngkam cu Adonijah in amai nunnak dokalhih a ṭawng mi a si lo na vaih ahcun, Pathian in cu vekin i tuah sehla, cuhnakih nasa khalin! 24 ^cCuruangah atu-ah, nĕmhngetin ka hrangih sungza a rak dĭnsuaktu ka pa David-ih laltokham parih i rettu Jehovah a nun rori bangin, thu a kam vekin Adonijah cu tuihsun ah thah a si ding a si!” tiin sia a săm.

2:22^a 1Sam 22:20

2:23^b Rut 1:17

2:24^c 2Sam 7:11-16

25 ^aCuti cun Siangpahrang Solomon cun Jehoiada-ih fapa Benaiah cu a thlah, cule anih in Adonijah parah kut a thlak ih, a thi.

2:25^a 2Sam 8:18

Joab Thah a Si

26 ^aCule siangpahrang in puithiam Abiathar hnenah, “Anathoth ah, nangmai ló ah feh aw, ziangahtile nang cu thi tlak na si. Asinan atu-ah cun ka lo that lo ding, ziangruangahtile ka pa David hmaiah Bawipa Jehovah-ih Kuang na rak phur ih, ka pa a zăwnzaih tintein na rak zawnzai ve,” tiah a ti. 27 ^bCun Eli sungkua thuhla ah Jehovah in Shiloh ih a sim mi Jehovah-ih kamsuakthu a famkimternak dingah, Solomon in Abiathar cu Jehovah-ih puithiam sinak ihsin a hlăwn.

2:26^a Jos 21:18; 1Sam 22:20; 2Sam 15:14, 24

2:27^b 1Sam 2:27-36

28 ^aZiangahtile Joab cu Absalom hnenah a rak ṭâng lo nân, Adonijah hnenah a rak ṭâng a si ti mi thuthang cu Joab hnenah a thleng. Cutin Joab cu Jehovah-ih Biakbûk ah a tlânsia ih Biakṭheng kipawl a kai. 29 ^bCule, “Jehovah-ih Biakbûk ah a tlânsia, ngai hnik, amah cu Biakṭheng kiang teah a um,” tiin Siangpahrang Solomon hnenah an sim. Cu tikah Solomon in Jehoiada-ih fapa Benaiah a thlah ih, “Feh awla amah cu vawthlu aw,” tiah a ti.

2:28^a Suah 27:2

2:29^b Suah 21:14

30 ^aCule Benaiah cu Jehovah-ih Biakbûk ah a feh ih a hnenah, “Siangpahrang in, ‘Ra suak aw,’ a ti,” tiah a ti.

2:30^a Suah 21:14

Cule Joab in, “Si lo e, hi tawkah ka thi sawn ding,” tiah a ti. Cule Benaiah in siangpahrang hnenah thu a thlensal ih, “Joab in hitin a ti ih, anih in hitin in let a si,” tiah a ti.

31 ^aCun siangpahrang in a hnenah, “Ka hnen ihsin le ka paih sungza ihsin mawhnak nei lo thisen Joab in a suah mi na lâkhlohnak dingah, a sim vekin tuah aw, amah cu vawthlu awla phum aw. 32 ^bCutin amah hnakih dingfelsawn le ṭhasawn mi pahnih, Israel ralkap bawi Ner-ih fapa Abner le Judah ralkap bawi Jether-ih fapa Amasa tla ka pa David ih theih loin a sat ih ralnâm in a thah hai ruangah, Jehovah in a thisen man cu amai lu par roriah a kirsalter ding. 33 Curuangah an thisen man cu Joab-ih lu parah le a tesinfapawlih lu parah a kir kumkhua ding a si. Asinan David le a tesinfapawl, a sungza le a laltokham ah cun Jehovah hnen ihsin kumkhuain daihnak a um ding,” tiah a ti. 34 ^cCule Jehoiada-ih fapa Benaiah cu a fehso ih Joab cu a bei ih a that. Cule amah cu ramṭhing ih amai inn sung roriah phum a si. 35 ^dSiangpahrang in Jehoiada-ih fapa Benaiah cu amah aiawhin ralkappawl tlunah a ret ih, puithiam Zadok cu Abiathar aiah a ret.

2:31^a Dnp 19:13

2:32^b Lai 9:57; 2Sam 17:25

2:34^c 2Sam 2:18; 2San 21:13

2:35^d 1Sam 2:35; 2Sam 8:18

Shimei Thah a Si

36 ^aCun siangpahrang in mi a thlah ih Shimei a ko, cule a hnenah, “Na hrangah Jerusalem ah inn sak awla, cu tawkah cêng aw. Cule cu tawk ihsin khui tawk hman feh hlah aw. 37 ^bZiangahtile hitin a si ding, na fehsuak ih Kidron Hawrkuam na paltlăng ni ah na thi tengteng ding ti thei aw, na thisen man cu nangmai lu par roriah a um ding,” tiah a ti.

2:36^a 2Sam 16:5

2:37^b 2Sam 15:23

38 Cule Shimei in siangpahrang hnenah, “Na sim mi cu a ṭha. Ka bawi siangpahrang in a sim vekin, na siahhlawh in a tuah ding,” tiah a ti. Cutin Shimei cu Jerusalem ah ni tampi a cêng.

39 ^aCun kum thum a cem tikah hitin a si, Shimei-ih siahhlawh pahnih cu Maakah-ih fapa Akish, Gath siangpahrang hnenah an tlân. Cule Shimei hnenah, “Zoh hnik, Gath khawpi ah na siahhlawhpawl an um!” tiah an sim. 40 Cule Shimei cu a tho, a lāk a dăm ih a siahhlawhpawl hawl dingin, Akish hnenah Gath ah a feh. Cule Shimei cu a feh ih, Gath ihsin a siahhlawhpawl cu a hruai hai.

2:39^a 1Sam 27:2

41 Cule Shimei cu Jerusalem ihsin Gath ah a feh ih a thlengkirsal ti Solomon an sim. 42 ^aCu tikah siangpahrang in mi a thlah ih Shimei cu a ko. Cule a hnenah, “ ‘Fiangten thei aw, na fehsuak ih na tlawnnak pauhpauh ah na tlawn ni ah na thi tengteng ding a si,’ tiin Jehovah hmin in sia ka rak lo sămter ih, ralrinnak ka lo pe a si lo maw? Cule nang in ka hnenah, ‘Ka theih mi thu cu a ṭha,’ tiah na ti. 43 Ziangruangah Jehovah-ih thukam le ka lo pek mi thupek na rak thlun lo,” tiah a ti. 44 ^bSiangpahrang in Shimei hnenah, “Na thinlung in a theih bangin, ka pa David hnenih na tuah mi sualralnak hmuahhmuah tla na thei. Curuangah Jehovah in nangmai lu par roriah na sualralnak a lo khirh ding. 45 ^cAsinan Siangpahrang Solomon cu thlawsuah a si ding ih, David-ih laltokham cu Jehovah hmaiah kumkhuain dĭn hngeh a si ding,” tiah a tibêt. 46 ^dCun siangpahrang in Jehoiada-ih fapa Benaiah thu a pe, cule anih cu a fehsuak ih Shimei cu a bei, cule Shimei cu a thi. Cuti cun lalram cu Solomon kut ah dĭn hngeh a si.

2:42^a 2Sam 19:23

2:44^b 2Sam 16:5-13

2:45^c 2Sam 7:13

2:46^d 2Sam 8:18

3

Solomon in Fimnak a Dil

1 ^aSolomon in Izip siangpahrang Faro thawn pehtlaihawknak a tuah ih, Faro-ih fanu a ṭhi, cule cu nu cu amai inn, Jehovah inn le Jerusalem khaw kimvel hmuahhmuah kulh a dĭn ṭheh tiangin David-ih Khawpi ah a ret. 2 ^bCu laiah mipi cun hmun sâng pawl ah an thawiaw, ziangruangahtile cuih ni tiangah Jehovah hmin hrangih inn sak mi a rak um lo. 3 ^cCule hmun sâng pawl ah rai a thawi ih, rimhmui a ur ti bak lo cu, Solomon cun a pa David-ih sakhaw dānpawl thlunin Jehovah a duhdawt. 4 ^dHmun sâng ropi a si ruangah cu tawkih raithawi dingin siangpahrang cu Gibeon ah a feh. Solomon in cuih biakṭheng parah Meiur Thilhlăn 1000 a hlan.

3:1^a 2Sam 5:7; 7:2; 2San 8:11

3:2^b Pui 17:3-5; Dnp 12:14; 14:23

3:3^c Pui 17:3-5; Dnp 6:5; 10:12; 17:19; Jos 1:7

3:4^d 1San 16:39; 2San 1:3

5 ^aZan ah Gibeon ah cun Solomon hnenah a mang ah Jehovah a lang, cule Pathian in, “Dil aw! Ziang ka lo pe ding?” tiah a ti.

3:5^a Mat 7:7

6 ^aCule Solomon in, “Na siahhlawh ka pa David hnenah zahngainak ropi na rak hmuh zo. Ziangruangahtile anih cu na hmaiah thutak, dingfelnak le thinlung dĭngnak thawn a feh. Nang in a hrangah hih ngilneihnak nasa hi na pebêt vivo ih, tuihni vekin, a laltokham parih totu ding fapa na pe. 7 ^bAtu-ah, Maw Jehovah ka Pathian, ka pa David aiawhin na siahhlawh cu siangpahrang ah na tuah zo, asinan kei cu nauhakte ka si. Thil tidān ding ka thei lo. 8 ^cCule na siahhlawh cu na rak hril mi mipi, mipi tam zet, siar cawk loih tam tuk mi na mipawl lakah a um. 9 ^dCuruangah na siahhlawh hnenah na mipawl thuṭhen dingin a ṭha le a ṭha lo ka thleidan thei nak dingah theihthiamnak thinlung i pe aw. Ziangahtile hi zozai na minungpawl cu zo in so a uk thei ding?” tiah a ti. 10 Solomon in himi thil a dilnak ṭawngkam in Bawipaih lung a hmuiter.

3:6^a 2San 1:8-10

3:7^b Mip 27:17; Jer 1:6

3:8^c Sem 12:2; Dnp 7:6; 1San 27:23

3:9^d Dnp 1:16; 2Sam 14:17; Heb 5:14; Jam 1:5

11 ^aCun Pathian in a hnenah, “Hih thil na dil ruangah le na hrangah nun saunak na dil lo ih, na hrangah lennakpawl khal na dil lo, cule na ralpawlih nunnak khal na dil fawn lo, cuhnakin na hrangah diknak thleidan thei nak dingah theihthiamnak na dil ruangah, 12 ^bngai hnik, na ṭawngkampawl vekin ka tuah zo a si. Zoh hnik, fimnak le theihthiamnak thinlung ka lo pe, cutin na hlanah nangmah vek mi pakhat hman an rak um lo ih, na hnu khalah nangmah vek an um lo ding. 13 ^cCule na dil lo mi lennakpawl le cawimawinak khal ka lo pe, cutin na dam sungah siangpahrangpawl lakah zohman nangmah bang an um lo ding. 14 ^dCule na pa David ih a zawh bangin ka sakhaw dānpawl le ka thupekpawl thlun dingin ka lamzinpawl na zawh asile, na san khal ka sauter ding,” tiah a ti.

3:11^a 1San 22:12; Jam 4:3

3:12^b 2Sam 14:20; Ths 1:16; 1Joh 5:14-15

3:13^c 1Sp 3:28; Neh 13:26

3:14^d Sam 25:13; 91:16; Thf 3:1-2

15 ^aCun Solomon cu a ṭhangharh ih, ngai hnik, cumi cu mang a rak si. Cule anih cu Jerusalem ah a feh ih Jehovah-ih Thukham Kuang hmaiah dīngin, Meiur Thilhlănpawl a hlan, Remnak Thilhlănpawl a hlan ih, a siahhlawhpawl hmuahhmuah hrangah puai a tuah.

3:15^a Sem 28:16; Pui 6:8-13; 7:11-12

Fim zetin Solomon in Thu a Ṭhen

16 Cun siangpahrang hnenah nunau hlawhhlang pahnih an ra thleng ih a hmaiah an ding. 17 Cule nunau pakhat in, “Maw ka bawipa, hih nunau le keimah cu inn khat ah kan cêng, cule inn sungih amah a um laiah fa ka hring. 18 Cun hitin a si, fa ka hrin a ni thum hnuah hih nunau khal in fa a hring ve. Cule kannih cu kan umtlang. Inn sungih kanmah pahnih ti lo cu inn sungah mi pakhat hman kan hnenah an um lo. 19 Cule hih nunaunuih fapa cu zan ah a thi, ziangruangahtile amah in a nĕn. 20 Cule zan laiah a tho ih na siahhlawh nu a ih laiah ka kiangih ka fapa a lâk ih amah cu a ṭāng sungah a hlum, cule ka ṭāng sungah a thi mi a fapa a hlum. 21 Cule ka fapa hnawi fawh dingin zing ka thawh tikah, ngai hnik, anih cu a rak thi. Asinan anih cu zing ah ka zohfiang tikah, ngai hnik, ka hrin mi ka fapa a si lo,” tiah a ti.

22 Cule a dang nunau in, “A si lo! A nung mi sawn hi ka fapa a si ih, a thi mi sawn hi na fapa a si,” tiah a ti.

Cule a hmaisa nunau khan, “A si lo! A thi mi hi nangmai fapa a si ih, a nung mi hi ka fapa a si,” tiah a ti. Cutin siangpahrang hmaika ah an rel.

23 Cule siangpahrang in, “Pakhat in, ‘Hi a nung mi sawn hi ka fapa a si ih a thi mi sawn hi na fapa a si,’ a ti. Cun a dang in, ‘A si lo! Na fapa cu a thi mi sawn a si ih a nung mi sawn hi ka fapa a si,’ a ti,” tiah a ti. 24 Cun siangpahrang in, “Ralnâm i hun pe uh,” tiah a ti. Cutin siangpahrang hmaiah ralnâm an rak keng. 25 Cule siangpahrang in, “A nung mi naute kha pahnih in ṭhen uhla a hrek cu pakhat hnenah pe uh, cule a hrek a dang pakhat hnenah,” tiah a ti.

26 ^aCun a nung mi fapa neitu nunau cun a fapa a lainat tuk ruangah siangpahrang hnenah a ṭawng ih, “Maw ka bawipa, a nung mi nauhak cu amah pe uhla that hrimhrim hlah uh!” tiah a ti.

3:26^a Isa 49:15; Hos 11:8

Asinan pakhat sawn cun, “Amah cu ka ta khal si hlah seh, nangmai ta khal si hlah seh. Ṭhen sawn uh,” tiah a ti.

27 Cun siangpahrang in a let ih, “Nunau hmaisa tu hi a nung mi naute pe uhla, naute cu that hrimhrim hlah uh, amah nu hi a nu a si,” tiah a ti.

28 ^aCule Israel miphun zate in siangpahrang ih thuṭhennak a tidān an hna in an thei ih, siangpahrang cu an ṭih. Ziangahtile diknak ih hoha dingah Pathian fimnak amah ah a um ti an hmu.

3:28^a 2Sam 14:20

4

Solomon-ih Bawipawl

1 Solomon cu Israel miphun zate tlunih siangpahrang a si. 2 ^aCule hipawl hi a hotupawl an si: Zadok-ih fapa Azariah cu puithiam a si, 3 ^bShisha-ih fapa: Elihoref le Ahijah cu cangantu an si, Ahilud-ih fapa Jehoshafat cu ngankhumtu a si, 4 ^cJehoiada-ih fapa Benaiah cu ralkap hotu a si, Zadok le Abiathar cu puithiam an si, 5 Nathan-ih fapa Azariah cu hotupawl uktu a si, Nathan-ih fapa Zabud cu puithiam le siangpahrang rualpi a si, 6 ^dAhisar cu lal sungkua hotu a si, cule Abda-ih fapa Adoniram cu hramhramih hnaṭuanter mipawl hotu a si.

4:2^a 1San 6:10

4:3^b 2Sam 8:16-17

4:4^c 2Sam 8:17-18

4:6^d 2Sam 20:24; 1Sp 5:14

7 Cule Solomon in siangpahrang le a sungkua rawl petu, Israel ramṭhenpawl zate tlunih ram uktu hleihnih a nei, pakhat in kum khat ah thla khat cio rawl an timtuah. 8 ^aHipawl hi an hmin a si: Efraim tlang ram ah Ben-Hur, 9 ^bMakaz khua, Shaalbim khua, Beth Shemesh khua ah Ben-Deker, 10 ^cArubboth ah Ben-Hesed, Sokoh le Hefer ram zaten amai ta a si. 11 ^dDor ramṭhen hmuahhmuah ah Ben-Abinadab, cu pa in Solomon-ih fanu Tafath nupi ah a nei. 12 ^eAhilud-ih fapa Baana in Taanak khua le Megiddo khua ah siseh, Jezreel khaw hnuai, Jerethan khua kiangih um Beth Shean bial hmuahhmuah siseh, Beth Shean ihsin Abel Meholah siseh, Jokneam ram khat lam ral tiangin a co. 13 ^fRamoth Gilead khua ah Ben-Geber, cu pa cun Gilead ram ih um Manasseh-ih fapa Jair-ih khuapawl khal amah in a co. Bashan ram ih a um mi Argob ramṭhen, kulh le kăwtka kalhnak dar tlâng nei khaw tumpi pi khaw 60 khal a co. 14 ^gMahanaim khua ah Iddo-ih fapa Ahinadab, 15 ^hNaftali ram ah Ahimaaz, anih khal in Solomon-ih fanu Basemath nupi ah a nei. 16 ⁱAsher le Aloth khua ah Hushai-ih fapa Baanah, 17 Issakar ram ah Paruah-ih fapa Jehoshafat, 18 Benjamin ah Elah-ih fapa Shimei, 19 ^jAmor-mipawlih siangpahrang Sihon-ih ram le Bashan siangpahrang Og-ih ram ah, Uri-ih fapa Geber, amah cu cuih ram ih um uktu umsŭn a si.

4:8^a Jos 24:33

4:9^b Jos 15:10; Lai 1:35

4:10^c Jos 15:35

4:11^d Jos 11:2

4:12^e Jos 17:11

4:13^f Mip 32:40; Dnp 3:4

4:14^g Jos 13:26

4:15^h 2Sam 15:27

4:16ⁱ 2Sam 15:32

4:19^j Dnp 3:8-10; Jos 12:2, 4

Solomon-ih Neihnunnak le Fimnak

20 ^aJudah le Israel pawl tam lam cu tifinriat vunnel zat in an tam ih, ei le in le nuamin an um. 21 ^bSolomon in Zufraṭis tiva ihsin Filisṭia-mipawlih ram tiangih lalram hmuahhmuah, Izip ramri tiang a uk. Annih in ngunkhuai an rak keng ih, a dam sung hmuahhmuah Solomon cu an rian. 22 Cun Solomon-ih ni khat rawl ei mi cu sangvut phut kor 30, sangvut kor 60 le, 23 ^ccaw cang thau 10, ran tlannak ihta caw cang 20 le sakhi, zuknêngpawl, sakhi pa pawl le vate thau hleiah tuu 100 tla an si. 24 ^dHi lam Zufraṭis tiva khat lam ral ram hmuahhmuah, Tifsah ihsin Gaza tiang, Zufraṭis tiva ih hi lam kap siangpahrang hmuahhmuah tlunah a lal, cule a kimvel hmuahhmuah tlunah remdaihnak a nei. 25 ^eSolomon-ih san sung hmuahhmuah, Judah le Israel cu mi kip mai sabit hri le theipi kung hnuai cio ah, Dan ihsin Beersheba tiangin, ralmûangten an cêng. 26 ^fSolomon in a lêngpawl hrang rang inn 40000 le rang ralkap mipa 12000 a nei. 27 Cule himi ram uktupawl in anmai thla kim cio ah Siangpahrang Solomon le Siangpahrang Solomon cabuai ih ra zate hrangah rawl an timtuah. An rawl timtuah mi ah tlaksam mi a um lo. 28 Rangpawl le rang tlân cak pawl hrangah barli sangvut le cangpâwl khal mi kip mai ṭuanvo cio in a hmun dik ah an ret.

4:20^a Sem 12:2; 1San 22:9

4:21^b 2San 9:26; Sam 72:11

4:23^c Neh 5:18

4:24^d 1San 22:9; Sam 72:11

4:25^e Jer 23:6; Mik 4:4; Zek 3:10

4:26^f Dnp 17:16

29 ^aSolomon cu Pathian in fimnak le theihthiamnak nasa zetih ropi le tifinriat kapih vunnel vekih kau thinlung a pe. 30 ^bCutin Solomon cun nisuahnak lamih mifimpawl hmuahhmuah le Izip fimnak hmuahhmuah a hleih. 31 Ziangahtile anih cu mi hmuahhmuah hnakin a fimsawn: Ezrah-mi Ethan le Mahol fapapawl Heman, Kalkol le Darda pawl hnakin a fimsawn, cule a hmin cu a kiangkapih miphunpawl hmuahhmuah lakah a thang. 32 ^cThufim 3000 a ṭawngsuak ih, a hlapawl cu fing 1005 a si. 33 ^dCuihtlunah thingkung thuhla khal Lebanon tlang ih sidar thing ihsin kulh ih a kho mi hissop thu tiangin a sim, ramsapawlih thuhla, vatepawlih thuhla, bawkvâkpawlih thuhla le ngapawlih thuhla khal a sim. 34 ^eSolomon-ih fimnak thuhla rak theitu leitlun siangpahrang hmuahhmuah ihsin miphun hmuahhmuah cu Solomon-ih fimnak ngai dingin an ra.

4:29^a 1Sp 3:12

4:30^b Dan 1:20; Apo 7:22

4:32^c Thf 1:1; Ths 12:9; Sol 1:1

4:33^d Pui 14:49

4:34^e 2San 9:23

5

Temple Sak dingin Solomon a Timlam

1 ^aṬaiar siangpahrang Hiram in Solomon cu a pa aiah siangpahrang ah hriak an thih zo ti a hna in a theih ruangah a hnenah a siahhlawhpawl a thlah, ziangahtile Hiram in David a duhdawt ringring. 2 Cun Solomon in Hiram hnenah mi a thlah ih, 3 ^b“Ka pa David cun a kil kip in amah dokalhih ral doawknakpawl ruangah a ke zaphak hnuaiah Jehovah in a ralpawl a ret hlanlo cu Jehovah a Pathian hmin hrangah inn a sak thei lo ti na thei. 4 ^cAsinan atu-ah cun Jehovah ka Pathian in a kil kip ah cawlhnak i pe, doral siseh, thil ṭha lo thleng mi siseh a um lo. 5 ^dCule ngai hnik, Jehovah in ka pa David hnenih, ‘Na laltokham ah na aiah ka ret ding mi na fapa in ka hmin hrangah inn a sak ding a si,’ tiin a rak sim bangin, Jehovah ka Pathian hmin hrangah inn sak ka tum a si. 6 ^eCuruangah atu-ah, Lebanon ihta ka hrangih sidar thingpawl hau dingin thu pe awla, ka siahhlawhpawl in na siahhlawhpawl an bawm ding ih, na sim mi pauhpauh bangtukin na siahhlawhpawl hrangah hlawh man ka lo pe ding. Ziangahtile Sidon-mipawl bangih thing hau thiam kan lakah zohman an um lo ti na thei,” tiah a ti.

5:1^a 2Sam 5:11; 1San 14:1

5:3^b 2Sam 7:5; 1San 22:8

5:4^c 1San 22:9

5:5^d Dnp 12:5; 2Sam 7:13; 1San 17:12

5:6^e 2San 2:8

7 ^aCule hitin a si, Hiram in Solomon-ih ṭawngkampawl a theih tikah, nasa zetih lungawi aipuangin a um ih, “Tuihsun ah Jehovah cu thangṭhatin um seh, ziangahtile amah in David hnenah hi mipi ropi tlunah fapa fim a pe!” tiah a ti. 8 Cun Hiram in Solomon hnenah mi a thlah ih, “I kuat mi thu ka rak ruat ih, sidar thing le mirang far thing thu ah na duh mi zaten ka tuah ding. 9 ^bKa siahhlawhpawl in tifinriat ah cupawl cu Lebanon tlang ihsin an run keng ding, cupawl cu tifinriat ihsin i sim mi hmun ah pûm in ka tawlh hai ding ih, cu tawkah cupawl cu ka phelhter hai ding, cule cupawl cu na rak la thei ding. Cule ka sungkua hrangih rawl i peknak in ka duhnak na famkimter ding,” tiah a ti.

5:7^a Isa 60:6

5:9^b Ezr 3:7

10 Cun Hiram in Solomon hnenah sidar thing le mirang far thing a duh zat in a pe. 11 Cule Solomon in Hiram hnenah a sungkua rawl hrangah sangvut kor 20000 le sawr mi hriak kor 20 a pe. Cuti cun Solomon in Hiram hnenah kum tinten a pe. 12 ^aCule Jehovah in amah a rak tiamkam zo bangin, Solomon cu fimnak a pe. Hiram le Solomon karlakah remdaihnak a um ih, an pahnih in thukham an tuah.

5:12^a 1Sp 3:12

13 ^aCun Solomon in Israel miphun zate lak ihsin hramhramih ṭuanter mi hnaṭuantu a dĭnsuak ih, hramhramih ṭuanter mi hnaṭuantu mipa 30000 an si. 14 ^bAnmah cu Lebanon tlang ah thla khat ih thlengaw vivoin mi 10000 a thlah ṭheu: Lebanon tlang ah thla khat, inn ah thla hnih tiin anmah cu a thlah hai. Adoniram cu hramhramih ṭuanter mi hnaṭuantu hotu a si. 15 Solomon in phur thiartu mi 70000 le tlangpawl ih lung sertu mi 80000 a nei, 16 cuhleiah Solomon cun hnaṭuan kilkhawitu tlunih hotu hleice, hnaṭuan zohhliahtu mi 3300 a nei. 17 ^cCule siangpahrang in thu a pe ih, annih in temple lungphum phum dingin lung tumpi pi, lung mankhung pawl le ser zo mi lungpipawl tla an rak keng. 18 ^dSolomon-ih inn saktupawl, Hiram-ih inn saktupawl le Gebal rammipawl in an ser ih temple sak dingah thing le lungpipawl an timtuah.

5:13^a Pui 25:39

5:14^b 2Sam 20:24

5:17^c 1San 22:2

5:18^d Jos 13:5

6

Solomon in Temple a Sak

1 ^aCule hitin a si, Israel tefapawl Izip ram ihsin an suah hnu kum 480-nak, Solomon in Israel tlunih a lal kum litnak, thla hnihnak a si mi, Ziv thla ah Jehovah inn sak a thawk.

6:1^a 2San 3:1; Apo 7:47

Temple leng lam Lăngdan

2 ^aSiangpahrang Solomon in Jehovah hrangih a sak mi inn cu a sau lamah dawng 60, a kauh lamah dawng 20 le a san lamah dawng 30 a si. 3 ^bTemple Hmun Thianghlim hmaiih hulhliap cu inn sau lam can dawng 20 le inn hmai ihsin hulhliap kauh lam cu dawng 10 a si. 4 ^cCule Solomon in inn tukvirhpawl hrangah a tlâng kawkalhpawl a tuah.

6:2^a Suah 26:1

6:3^b Eze 40:49

6:4^c Eze 41:16

5 ^aTemple phar dungtunin a kimvelah, temple pharpawl dung tluanah Hmun Thianghlim le sungta Hmun Thianghlim sung kimvel hmuahhmuah ah pindanpawl a sak. Cutin a kimvelah a sir pindanpawl a tuah. 6 A niambik pindan cu dawng nga a kau, a laita cu dawng ruk a kau ih, a pathumnak cu dawng sarih a kau. Ziangahtile a dotu tlâng pawl cu temple pharpawl sungih hrawlh ṭul loin, temple leng lam tluanah a hngahnak bitepawl a tuah. 7 ^bTemple cu sak rero lai a si tikah, lung lâknak ih ser ṭheh mi lungto thawn sak a si, cutin temple sak a si laiah sobul simaw, hreitlung simaw, thir hmanrua thâwm simaw theih a si lo. 8 A sâwng hnihnak sângka zin cu temple vawrh lam sirah a um. Cupawl cu kailawnpawl ihsin sâwng laita ah, a laita ihsin a pathumnak ah an fehso. 9 ^cCutin Solomon in temple a sak ih a ṭheh, cule temple cu sidar thing tlâng pawl le thing pheng pawl in a tuam. 10 Temple pumpi sir tluanah dawng nga cio sângin pindanpawl a sak, cupawl cu sidar thing tlâng pawl thawn temple ah an pehaw.

6:5^a Eze 44:5-6

6:7^b Dnp 27:5; 1Sp 5:18

6:9^c Sol 1:17

Pathian in Solomon a Besal

11 ^aSolomon hnenah Jehovah-ih kamsuakthu a thleng, 12 ^b“Na sak rero mi temple thuhla ah, ka sakhaw dānpawl na zawh, ka zīn le dān pawl na thlun, ka thupekpawl hmuahhmuah na kilhim ih, cupawl na thlun asile, na pa David hnenih ka rak sim mi, ka kamsuakthu cu nangmah ah ka tuahsuak ding. 13 ^cCule Israel tefapawl lakah ka cêng ding ih, ka mi Israel ka thlauthla lo ding,” tiah a ti.

6:11^a Jer 40:1

6:12^b 2Sam 7:12-16

6:13^c Dnp 31:6; Heb 13:5

Temple Sung Lam

14 ^aCuti cun Solomon cun Temple a sak ih a ṭheh. 15 ^bSidar thing pheng pawl thawn temple sung pharpawl a sak. Temple zial ihsin a siling tiang thing thawn a sung a tuam. Temple zial khal mirang far thing pheng pawl thawn a tuam. 16 ^cCun temple dung lamah dawng 20 pindan cu zial ihsin siling tiangin sidar thing pheng pawl thawn a sak. A sung lamah sungta Hmun Thianghlim a sak, cumi cu Hmun Thianghlim Bik a si. 17 Cule cumi hmaiah temple innpi cu dawng 40 a sau. 18 ^dTemple sung lam cu par mûm pawl le par parh pawl lemih kher mawi mi sidar thing hlir a si, lungto hmuh ding a um lo.

6:14^a 1San 28:20; 2San 5:1; Apo 7:47

6:15^b Eze 41:15

6:16^c Suah 26:33

6:18^d Sam 74:6; Eze 41:18

19 ^aCule Jehovah-ih Thukham Kuang retnak dingah temple sungih sungta Hmun Thianghlim cu a timtuah. 20 ^bSungta Hmun Thianghlim cu dawng 20 sau, dawng 20 kau le dawng 20 sâng a si. Cumi cu sui hlirhlăng a khût ih sidar biakṭheng khal a khût. 21 Cutin Solomon in temple sung cu sui hlirhlăng a khût. Sungta Hmun Thianghlim hmai lam hrawhin sui cikcinpawl a zar ih, cumi cu sui a khût. 22 Temple zate a ṭheh tiangin, temple pumpi cu sui a khût, sungta Hmun Thianghlim ih a um mi Biakṭheng pumpi khal sui a khût.

6:19^a Suah 25:10

6:20^b Suah 30:1; Eze 41:3-4

23 ^aSungta Hmun Thianghlim sungah olif thing in dawng hra sâng, cherub pahnih a tuah. 24 Cherub-ih thla pakhat cu dawng nga a si ih, a pakhat sawn ih thla khal dawng nga a si. Thla pakhat zim ihsin a dang thla pakhat zim tiang dawng hra a si. 25 Cule a dang cherub cu dawng hra a si, cherub pahnih cu an tia-aw ih, an bangaw. 26 Cherub pakhat ih san lam cu dawng hra a si ih, cu vekin a dang cherub khal a si. 27 ^bCun cherub-pawl cu pindan sungta sungah a ret hai ih, annih in cherub-pawlih thla cu an pharh, cutin pakhat ih thla in phar pakhat a dai ih, a dang cherub thla in a dang phar a dai. Cule pindan laifangah an thla pakhat le pakhat an daiaw. 28 Anih in cherub-pawl khal sui a khût.

6:23^a Suah 37:7-9; 2San 3:10-12

6:27^b Suah 25:20; 2San 5:8

29 ^aCun temple phar hmuahhmuah cu a kimvelin cherub-pawl, ṭhulhfau kungpawl le pangpar parh lem pawl kher mawi mi in pindan sungta le a lengta cu a kher. 30 Cule temple zial cu, pindan sungta le a lengta thawn sui a khût.

6:29^a Eze 41:18, 25

31 Cun sungta Hmun Thianghlim luhnak hrangah olif thing in sângkapawl a tuah, sângka tlun le sângka biangpawl cu a phar hmun nga ṭhen ih hmun khat tia a si. 32 ^aSângka pahnih cu olif thing in a si ih, an parah cherub-pawlih zuk cu ṭhulhfau kungpawl le pangpar parh pawl in a kher, cule cupawl cu sui a khût. Cule sui cu cherub-pawl le ṭhulhfau kungpawl ah a darhter.

6:32^a Eze 41:2

33 Hmun Thianghlim sângka hrangah olif thing in sângka biangpawl, phar ṭhen li ṭhen khat in a tuah fawn. 34 Cule sângka pahnih cu mirang far thing in, kăwp hnih cu bil theihin, a dang kăwp hnih khal bil theih an si. 35 Cherub-pawl, ṭhulhfau kungpawl le pangpar parh pawl an parah a kher ih, kher mi parah sui páte in a khût.

36 ^aCule tual sungta cu ser mi lung thuah thum in le sidar tlâng pawl thuah khat in a sak.

6:36^a 2San 4:9

37 A kum litnak, Ziv thla ah Jehovah inn lungphum cu phum a si. 38 ^aCule a kum hleikhatnak, a thla riatnak Bul thla ah inn cu a cipciar hmuahhmuah le ruahmandān hmuahhmuah vekin ṭheh a si. Cutin Solomon cu cumi saknak ah kum sarih a rei.

6:38^a Suah 25:9; 1San 28:19; Heb 8:5

7

Solomon ih Sak mi a dang Innpawl

1 ^aAsinan Solomon in amai inn saknak ah cun kum hleithum a rei, cutin a inn hmuahhmuah a ṭheh thluh. 2 ^bSolomon in sidar ṭhuam tlar li le ṭhuampawl parah sidar tlâng pawl thawn, a sau lam dawng 100, a kauh lam dawng 50 le a san lam dawng 30 in Lebanon Tupi Inn khal a sak. 3 Cule ṭhuam 45 tlunih a tlângpawl cu tlar khat ah hleinga vivoin, sidar thing pheng ih khuh a si. 4 Tlar thum in tukvirh a um ih, tukvirh cu hmai hawihawin sâwng thum in an um. 5 Cule sângkapawl le sângka biangpawl zaten thing pheng pawl in a tuah ih, tukvirh cu hmai hawihawin sâwng thum in an um.

7:1^a 1Sp 9:10

7:2^b 2San 9:16; Isa 22:8

6 Hulhliap cu ṭhuampawl thawn a tuah, cumiih sau lam cu dawng 50, a kauh lam dawng 30 a si ih, cupawlih hmaiah ṭhuampawl thawn hulhliap a um ih, an hmaiah daihnem a um. 7 ^aCun laltokham hrangah hulhliap, thu a ṭhennak ding thuṭhennak hulhliap a tuah, cule cumi cu a zial ihsin siling tiangin sidar thing ih tuam mi a si.

7:7^a 1Sam 7:15; Sam 122:5; Thf 20:8

8 Cule a cēnnak inn cun hulhliap sungah a dang vekin tual dang a nei. Solomon in nupi ih a rak neih mi Faro-ih fanu khal himi hulhliap vek inn a tuahsak.

9 Hipawl hmuahhmuah cu lung mankhung zetzet pawl, a tawk ciah vivoih ser mi, thil ahnak ih ah mi lungto ih sak a si, sung lam khal, leng lam khal a lungphum ihsin a zim tiangin le cuvek thothoin a leng ihsin tual kaupi tiangin. 10 A lungphum cu lung mankhung zetzet pawl, lung hlaipi pi, hrekkhat dawng hra le hrekkhat dawng riat a kau mi lungtopawl ih tuah a si. 11 Cule a tlun cu lung mankhung zetzet, a tawk ciah ih ser mi lung le sidar thing a si. 12 Tual kaupi cu ser mi lungto tlar thum le sidar thing pheng pawl tlar khat in kulh a si. Jehovah inn tual sungta le temple hulhliap vekin a si.

Zungthiam Huram

13 ^aSiangpahrang Solomon in mi a thlah ih, Ṭaiar ihsin Huram a hruai. 14 ^bAnih cu Naftali hnám nuhmei fapa a si ih, a pa cu Ṭaiar-mi, dar tuahtu a si, anih cu fimnak le theihthiamnak in a khat ih, dar tuahnak hnaṭuan phun zakip thiam a si. Cutin anih cu Siangpahrang Solomon hnenah a thleng ih a hna zaten a ṭuan.

7:13^a 2San 2:13

7:14^b 2San 4:11

Temple hrangih Dar Ṭhuampawl

15 ^aAnih in dar ṭhuam pahnih a bur, an san lam dawng hleiriat le an kimvel cu dawng hleihnih veve an si. 16 ^bCun ṭhuam zim pawl ih bun dingah dar bur mi lu bol pahnih a tuah. A tuamnak pakhat ah dawng nga a sâng, a tuamnak dang pakhat ih san lam khal dawng nga a si. 17 Ṭhuam zim ih lu bol hrangah cun ṭial ṭhikṭhek le ngerhawin, lu bol pakhat ah ngerh sarih le a dang lu bol pakhat ah ngerh sarih a tuah. 18 Cuti cun ṭhuampawl cu a tuah ih, cuih ṭhuampawl luzim ih lu bol pawl khuhnak dingah ṭial ṭhikṭhek tlunah a kimvelin talê rahpawl tlar hnih a tuah, cuti vekin a dang lu bol pakhat hrang khalah a tuah.

7:15^a 2San 3:15; Jer 52:21

7:16^b 2Sp 25:17; Jer 52:22

19 Hulhliap sung ṭhuampawl luzim ih dawng li a si mi a lu bol pawl cu lily pianzia vek an si. 20 ^aṬhuam pahnih luzim ih a lu bol pawlih a tlâng ah, ṭial ṭhikṭhek kiang teah talê rahpawl an um, cule talê rahpawl cu cuih lu bol pawl kimvel hmuahhmuah ah 200 veve a tlarin an um.

7:20^a 2San 3:16

21 ^aCun temple hulhliap ah ṭhuampawl a phun, vawrh lamah ṭhuam a phun ih cumi cu a hmin ah ^bJakin a sak, a keh lam khalah ṭhuam a phun ih cumi cu a hmin ah ^cBoaz a sak. 22 ^dṬhuam zim pawl cu lily pianzia vek an si. Cutin ṭhuam hnaṭuan cu ṭheh a si.

7:21^a 2San 3:17

7:21^b Jakin: Hebru ṭawng ih a sullam cu “a dĭn” tinak a si.

7:21^c Boaz: Hebru ṭawng a si ih, a sullam cu “cumi ah cahnak tha a um,” tinak a si.

7:22^d 2Sp 25:17

Maihum pi le Caw cang pawl

23 ^aCule Dar bur Tikuangpi a tuah ih, a tlâng cu khat lam ihsin khat lam tiang dawng hra a si, cumi cu a kûal. A san lam dawng nga a si ih, a tlâng kimvel cu dawng 30 a si. 24 A tlâng hnuaiah cei mi par mûm in a velkûal thluh, dawng khat ah pahra vivoin Tikuangpi kimvelin a si. Par mûm cu bur a si laiah tlar hnih in bur a rak si. 25 ^bDar Tikuangpi cu caw cang lem hleihnih tlunah a ṭhumaw ih, pathum in sak lam an hawi, pathum in nitlaknak lam an hawi ih, pathum in thlang lam an hawi, cule pathum in nisuahnak lam an hawi. Tikuangpi cu an parah hūn a si ih, an taw lam zaten sung lam an hawi thluh. 26 Tikuangpi cu za băwk tia a sah; cule a tlâng cu no tlâng pianhmang, lily par hlâw vekih tuah a si. Cumi in ^cbath 2000 a dâwl.

7:23^a 2Sp 25:13; 1San 18:8; Jer 52:17

7:25^b Jer 52:20

7:26^c bath 2000: Kalān 11500 hrawng a si.

Dar Tohkālpawl

27 Dar in tohkāl pahra khal a tuah, tohkāl kip ih sau lam cu dawng li, a kauh lam dawng li le a san lam dawng thum a si. 28 Cule hihi tohkālpawlih pianhmang a si: cupawl cun phar an nei ih, a pharpawl cu a tlâng karlakah a si. 29 A tlângpawl karlakih a pharpawl ah cun kiosapawl, caw cang pawl le cherub-pawl an um. Cule a tlângpawl zimah tohkāl a um. Kiosapawl le caw cang pawl hnuaiah ceimawi mi tete an um. 30 ^aTohkāl pakhat cio in dar lêng ke pali le dar kehrawlh fung a nei ih, a ke pali in dotu an nei. Maihum hnuaiah a tlâng kip ih dar bur mi dotupawl an um. 31 Cuih dotu sung lam tlâng cu dawng khat tluan a si, cule a kâ kimvel cu a kûal, tohkāl pianhmang nei, a leng lam ihsin dawng khat le a hrek a si. Cule a kua khal kher mi an si, asinan a kuar pawl cu pûm loin, kil li nei canaw an si. 32 Pharpawl hnuaiah lêng ke pali an um ih, a zâpawl cun a tohkāl an peh. Lêng ke pakhat ih san lam cu dawng khat le a hrek a si. 33 Cuih lêng kepawl tuahdān cu rang lêng kepawl tuahdān vek a si, an zâpawl, a kūalpawl, a kalhnakpawl le a lai bol pawl cu dar bur mi hlir an si. 34 Cule tohkāl pakhat cio ih a tlâng pali pawl ah dotu pali an nei, a dotupawl cu tohkāl thawn sakhat an si. 35 Tohkāl tlunah cun dawng hrek a sannak ah, a kūal lĕnglĕng a um. Cule tohkāl tlunah a hūnnakpawl le a kuar pawl khal bur mi an si ve. 36 A hūnnak ke pheng pawl par le a kuar pawl parah hmun an luahkauh dān izir ciar in cherub-pawl, kiosapawl, ṭhulhfau kungpawl a kher ih, a kimvelin ceimawinak a tuah. 37 Cuti cun tohkāl pahra a tuah. An zaten bangrepih sūn mi, tia-aw thluh le canaw thluh an si.

7:30^a 2Sp 16:7

38 ^aCun dar in maihum pahra a tuah, maihum pakhat cio ah ^bbath 40 a dâwl ih, maihum pakhat cio cu dawng li an si. Tohkāl pahra parah maihum pakhat cio a um. 39 Cule anih in inn vawrh lam sirah tohkāl panga le inn ih keh lam sirah tohkāl panga a ret. Tikuangpi cu inn vawrh lam kap, nisuahnak thlang lamah a ret hai.

7:38^a Suah 30:18

7:38^b bath 40: Kalān 230 hrawng a si.

Temple Bungruapawl

40 ^aHuram in maihumpawl, suahdurpawl le kheng kûm pawl a tuah. Cutin Jehovah inn hrangih Siangpahrang Solomon a tuahsak mi hna cu Huram in a ṭheh: 41 ṭhuam pahnih le cuih ṭhuam pahnih zim ih kheng kûm vek lu bol, ṭhuampawl tlunih kheng kûm vek a lu bol pahnih tuamtu thil ṭial ṭhikṭhek pahnih, 42 cumi tuamnak thil ṭial ṭhikṭhek pahnih hrangah talê rah 400, ṭhuampawl zim ih kheng kûm vek lu bol pahnih tuamnak ding ṭial ṭhikṭhek veve hrangih talê rah tlar hnih vevein, 43 tohkāl pahra le tohkālpawl parah maihum pahra, 44 Tikuangpi pakhat le Tikuangpi hnuaiih caw cang hleihnih, 45 ^bbelpawl, suahdurpawl le kheng kûm pawl a tuah ṭheh. Huram in Siangpahrang Solomon hrangah Jehovah inn hrangih a tuah mi, himi bungbelpawl cu dar hnawhtlet hlir ih tuah an si. 46 ^cJordan phairawn, Sukkoth le Zaretan karlakih bel lei hmun ah siangpahrang in cupawl cu a bur hai. 47 ^dCule Solomon in bungbelpawl zaten khing a khai lo, ziangruangahtile an tam tuk, dar ih rihnak cu theih cawk a si lo.

7:40^a Suah 27:3; Jer 52:18

7:45^b Suah 27:3

7:46^c Jos 3:16

7:47^d 1San 22:3; Jer 52:20

48 ^aCuti vek cun Solomon in Jehovah inn hrangah bungruapawl hmuahhmuah cu: sui Biakṭheng le a parih Sangserh retnak sui Cabuai, 49 ^bsui hlirhlăng in Meito ṭhuampawl, hmun thianghlim sungta hmaiih a vawrh lamah panga le a keh lamah panga, pangparpawl le meitopawl le caicehpawl thawn sui in, 50 ^ccawhtawlhpawl, caicehpawl, kheng kûm pawl, hai dau pawl le meiling ruhnakpawl cu sui hlirhlăng in, Hmun Thianghlim Bik ti mi pindan sungta sângkapawl le temple hulhliap sângkapawl hrangah sângka bunnakpawl cu sui in a tuah.

7:48^a Suah 25:23, 30

7:49^b 2San 4:7

7:50^c Jer 52:19

Solomon in Temple sungah Ziangkim a Ret

51 ^aCutin Siangpahrang Solomon in Jehovah inn hrangih a ṭuan mi hna hmuahhmuah cu ṭhehfel a si, cule a pa David ih a rak serhhran mi thilpawl, ngun, sui le bungruapawl cu Solomon in a thiarlut ih, Jehovah inn ih hlawnthilpawl lakah a ret hai.

7:51^a 2Sam 8:11

8

Temple Hlănnak

1 ^aCun Solomon in Israel upapawl le hnám lubânpawl hmuahhmuah, Israel tefapawlih hotu pupápawl cu Zion a si mi, David-ih Khawpi ihsin Jehovah-ih Thukham Kuang an zâwn thei nak dingah, Jerusalem ih Siangpahrang Solomon hnenah a kokhawm hai. 2 ^bCuruangah Israel mipa zaten thla sarihnak Ethanim thla ih puai ah Siangpahrang Solomon hnenah an táwngkhawmaw. 3 ^cCule Israel upapawl zaten an ra ih puithiampawl in Kuang cu an kengso. 4 ^dCun annih in Jehovah-ih Kuang, Tawnawknak Puanthlam le Puanthlam sungih bungrua thianghlim pawl zaten an kengso. Puithiampawl le Levi-mipawl in cupawl cu an kengso. 5 ^eCuihhleiah Siangpahrang Solomon le a hnenih ra pungkhawm, Israel mipi umkhawm hmuahhmuah cu Kuang hmaiah a zawngah an um ih, tuu le caw cang an tam tuk ruangih siar cawk lo le a zat rel cawk lo thawn thawinak an tuah.

8:1^a 2Sam 5:7

8:2^b Mip 29:12; Neh 8:17

8:3^c Mip 4:15; Dnp 31:9; Jos 3:3

8:4^d 1San 15:13

8:5^e 2Sam 6:13-17

6 ^aCun puithiampawl in Jehovah-ih Thukham Kuang cu amai hmun, temple Hmun Thianghlim sungta, Hmun Thianghlim Bik ih cherub-pawl thla hnuaiah an zâwnlut. 7 ^bZiangahtile cherub-pawl cun Kuang hmun tlun zawnah an thla pahnih an pharh ih, cherub-pawl in Kuang le a zawnfungpawl cu an hliap. 8 ^cA zawnfungpawl cu an sau ih, zawnfung zim pawl cu Hmun Thianghlim, Hmun Thianghlim sungta hmai ihsin hmuh theih a si, asinan leng lam ihsi cun hmuh theih an si lo. Cule cupawl cu tuihni tiangin cu tawkah an um. 9 ^dIzip ram ihsin an suah laiah, Jehovah in Israel tefapawl thawi thukham a tuah tikih, Mosi in Horeb ih a ret mi lung pheng pahnih siarlo, Kuang sungah zianghman a um lo.

8:6^a Suah 25:18; 26:33

8:7^b Suah 25:20

8:8^c Suah 25:13-15

8:9^d Suah 16:34; Heb 9:4

10 ^aCule hitin a si, puithiampawl cu Hmun Thianghlim ihsin an suah tikah, Jehovah inn cu khawdur in a khat, 11 ^bcutin puithiampawl cun khawdur ruangah rawngbawl an pehzăwm thei lo. Ziangahtile Jehovah-ih ropitnak in Jehovah inn cu a luahkhat.

8:10^a Suah 16:10

8:11^b 2San 7:2

Temple Hlănnak Thlacam

12 ^aCun Solomon in,

8:12^a Suah 40:34; 2Sam 22:10

“ ‘Khawdur thim lakah ka cêng ding,’ tiah Jehovah in a ti.
13 ^aThungaiten temple ropi ka lo saksak,
Kumkhua na cēnnak ding hmun cu,”

8:13^a Suah 15:17

tiah a ti.

14 ^aCun siangpahrang cu a heraw ih Israel mipungkhawm pumpi an dīn laiah, Israel mipungkhawm pumpi cu thlawsuah a pe. 15–16 ^bCule anih in, “Ka pa David hnenah a kâ in, ‘Izip ram ihsin ka mi Israel ka hruaisuah ni ihsin Israel hnám lakih khui khua hman ka hmin umnak ding inn saknak dingah ka hril dah lo, asinan ka mi Israel uktu dingah David ka hril a si,’ tiih titu, amai kut rori ih famkimtertu Israel-ih Pathian Jehovah cu thangṭhatin um seh.

8:14^a 2Sam 6:18

8:15-16^b Suah 3:10; 1San 16:36; Sam 89:3-4

17 ^a“Israel-ih Pathian Jehovah hmin hrangih temple sak dingin ka pa David-ih thinlung ah a rak um. 18 Asinan Jehovah in ka pa David hnenah, ‘Ka hmin hrangah temple sak ding cu na thinlung sungah a um, cutiih na thinlung ih a um cu na ti ṭha a si. 19 ^bSikhalsehla nang in temple cu na sak lo ding, na taksa ihsi a suak ding mi na fapa sawnin ka hmin hrangah temple a sak ding a si,’ tiah a ti. 20 ^cJehovah in a ṭawngsuak mi a kamsuakthu cu a famkimter ih, Jehovah ih a rak tiamkam vekin, kei in ka pa David-ih dinhmun ka luah, Israel laltokham parah ka to, cule Israel-ih Pathian Jehovah hmin hrangah temple ka sak. 21 Cule cu tawkah Kuang hrangah hmun ka tuah. Cumi sungah kan pupápawl thawn, Izip ram ihsin a hruaisuah hai laiih a rak tuah mi Jehovah-ih Thukham a um,” tiah a ti.

8:17^a 2Sam 7:27; Apo 7:46

8:19^b 2Sam 7:5, 13

8:20^c 2Sam 7:12; 1San 28:6

22 ^aCun Jehovah-ih biakṭheng hmaiah, Israel mipungkhawm zate hmuh ah, Solomon cu a dīng ih, van lamah a kut a pharh, 23 ^bcule anih in, “Jehovah, Israel-ih Pathian, an thinlung zate ih na hmaiih a fehtu, na siahhlawhpawl thawn na thukham le zahngainak kilhimtu tlun lam van ah siseh, hnuai lam lei ah siseh, nangmah vek Pathian an um lo. 24 Nang cun na siahhlawh ka pa David na tiamkam mi na rak kilhim. Tuihsun ih a si bangin, nang cun na kâ in na rak sim ih na kut in na famkimter.

8:22^a Suah 9:33; 2San 6:12; Ezr 9:5

8:23^b Dnp 7:9, 12; Neh 1:5; 9:32; Dan 9:4

25 ^a“Curuangah Israel-ih Pathian Jehovah, atu-ah na siahhlawh ka pa David hnenih, ‘Na fapapawl in an nundān an fimkhur ih ka hmaiih nangmah na rak feh bangin ka hmaiah an feh a si ahcun, ka hmaiah Israel-ih laltokham parih totu ding pa na tlasam lo ding,’ tiih na rak sim mi hlensuak aw. 26 ^bCule atu-ah, Maw Israel-ih Pathian, zangfahten na siahhlawh ka pa David hnenih na rak sim mi na kamsuakthu thleng dik hram seh.

8:25^a 2Sam 7:15; 1San 17:23; 2San 1:9

8:26^b 2Sam 7:25

27 ^a“Asinan Pathian cu leilung ah a cêng taktak ding maw si? Zoh hnik, van le vanih van ah na tlem lo si khawh, ka sak mi hi inn cu ziang tluk a te sinsin pei! 28 Cuti cingin na siahhlawhih thlacam le a dilnak ngaihsakin, Maw Jehovah ka Pathian, tuihsun ah na hmaiih na siahhlawhih auaw le thlacamnak thlacam hi ngaithla aw. 29 ^bHimi temple lam, ‘Cu tawkah ka hmin a um ding a si,’ tiih na sim mi hmun lamah na mit cu sun le zanin meng hram seh, cutin na siahhlawh in hi hmun lam hawiih a thlacam thei hram aw. 30 ^cCule hi hmun lam hawiih thla an cam tikah, na siahhlawh le na mi Israel-ih dilnak ngaithla hram aw. Na cēnnak hmun van ihsin ngaithla awla, na theih tikah ngaidam hai hram aw.

8:27^a 2San 2:6; Isa 66:1

8:29^b Dnp 12:11

8:30^c Neh 1:5-7

31 ^a“Mi pakhat khat in a innhnen parah thil sual a tuah ih, hramhramin thukam lâkter a si ih, hi temple sungih na Biakṭheng hmaiah ra in thukamnak a lâk asile, 32 ^bvan ihsin ngaithla awla cangvai aw, misualrál cu a lu parah a nundān ṭhumih thiam lo coternak in siseh, midingfel cu a dingfelnak vekih lehrulih thiamcoternak in na siahhlawhpawl cu thuṭhen aw.

8:31^a Suah 22:11

8:32^b Dnp 25:1

33 ^a“Na mi Israel cu na parih thil sual an tuah ruangah ral hmaiih neh an si tikah, na lam an hawikir ih na hmin hlâmin, himi temple sungah na hnenah thlacamnak le dilnak an tuah asile, 34 van ihsin ngaithla hai awla, na mi Israel-ih sual cu ngaithiamin, an pupápawl hnenih na rak pek mi ram ah hruaikirsal hai aw.

8:33^a Pui 26:17, 39

35 ^a“Na parih thil sual an tuah ruangah van khar a si ih, ruah a um lo tikah, hi hmun lam hawiin thla an cam ih, na hmin an hlám, cule anmah na zawnzaiter hai ruangih an sual ihsin an kir asile, 36 ^bvan ihsin ngaithla hai awla, na mi Israel, na siahhlawhpawlih sual ngaidam aw, cutin an zawh ding mi lamzin ṭha na zirh hai ding ih, na mipawl hnenih ro ih na rak pek mi na ram parah ruah surter aw.

8:35^a Dnp 28:24; Jer 5:25

8:36^b Zek 10:1

37 ^a“Ram sungah mangṭam siseh, nathri sia siseh, rocarnak siseh, ṭawihnak siseh, kharbawkpawl siseh, khaukhuappawl siseh an um ih, an ralpawl in an ram sung ^bkhawpipawl ih anmah an kulhkhŭm tikah siseh, ziang vek nathri le ziang vek natnak a tlun tikah siseh, 38 ^cmi zokhal in, asilole na mi Israel zaten mi pakhat cio in anmai thinlung fingfing in nathri an thei ih himi temple lamah an kut pharhin ziang vek thlacamnak siseh, ziang vek dilnak siseh an tuah tikah, 39 ^dna cēnnak hmun van ihsin ngaithla hai awla ngaidamin cangvai aw, cule mi kip anmai umdān hmuahhmuah bangtuk cio in pe hai aw, an thinlung na thei a si, ziangahtile nangmah lawng in minung fapapawl hmuahhmuah ih thinlung na thei, 40 ^ecutin kan pupápawl hnenih na pek mi ram ah an nun sung hmuahhmuah an lo ṭihzah ding.

8:37^a Pui 26:16, 25; Dnp 28:22

8:37^b khawpipawl: A ṭawng hrampi ah, “kăwtkapawl,” ti a si.

8:38^c Suah 9:29

8:39^d Sam 130:4; Joh 2:24; Thu 2:23

8:40^e Dnp 6:13; 12:1

41 ^a“Cuihhleiah, na mi Israel a si lo nân, na hmin ruangah ram hlapi ihsin a ra mi, ram dang mi thuhla ah 42 ^b(ziangahtile annih in na hmin ropi le na kut cak le na bân suah mi tla an hna in an thei ding a si), himi temple lamah rain thla a cam tikah, 43 ^cna cēnnak hmun van ihsin ngaithla awla ram dang mi in nangmah a lo kawhdān hmuahhmuah zulhin tuah aw, cutin na mi Israel vekin leitlun ih miphunpawl hmuahhmuah in na hmin an thei ding ih an lo ṭihzah ding, cule ka sak mi himi temple hi na hmin ih kawh mi a si ti an thei ding.

8:41^a Sem 31:15; Isa 56:3, 6

8:42^b Isa 60:3

8:43^c Dnp 28:10; Jos 4:24; 1Sam 17:46

44 ^a“Na mipawl na thlah hai nak hmun kip ah an ralpawl do dingin an fehsuak ih na hril mi, hi khawpi lam hawi le na hmin hrangih ka sak mi temple lam hawiin Jehovah hnenih thla an cam asile, 45 ^bvan ihsin an thlacam le an dilnak ngaithla awla, an thuhla relsak hai hram aw.

8:44^a 2San 14:11

8:45^b Sam 9:4; 140:12

46 ^a“Na parah thil sual an tuah, ziangahtile thil sual tuah lo mi pakhat hman an um lo, an parah na thinhengin anmah cu ralpawl hnenah na ap, cule anmahpawl cu a hla ah simaw, a nai ah simaw, ralpawlih ram ah ralkaih ah an hruai, 47 ^bcu cingin ralkaih ih hruai an sinak ram ah an hmusuakaw ih, ralkaih ih hruai an sinak ram ah lungthlĕngin, ‘Thil sual kan rak tuah ih, thil kan ti palh, sualralnak kan rak tuah a si,’ tiin na hnenah dilnak an tuah ih, 48 ^cralkaih ih hruaitu an ralpawl ram ih an thinlung zate le an ruahnak zaten na lam an hawisal ih, an pupápawl na pek mi ram lam, na hril mi na khawpi lam le na hmin hrangih ka sak mi temple lam hawiih na hnenih thla an cam asile, 49 na cēnnak hmun van ihsin an thlacam le an dilnak cu ngaithla awla, an thuhla pawmsak hai hram aw. 50 ^dCule na parih thil sual a rak tuahtu na mipawl le na parih dān pahbălnak an rak tuah mi an dān pahbălnak hmuahhmuah tla ngaidam aw, cule an parah annih in lainatnak an neihnak dingah ralkaih ih anmah hruaitupawl hmaiah lainatnak hmuh aw, 51 ^eziangahtile annih cu na mi le na ro, thir rawhtitnak meipi lak, Izip ihsin na hruaisuah mi an si, 52 ^fcutin na mit cu na siahhlawhih dilnak le na mi Israel-ih dilnak ah mengin, nangmah an lo kawh tinten anmah ngaithla hram aw. 53 ^gZiangahtile Maw Bawipa Jehovah, kan pupápawl Izip ihsin na hruaisuak hai laiah na siahhlawh Mosi hmangih na sim bangin, annih cu na ro si dingah, leitlun ih miphun hmuahhmuah lak ihsin na rethran hai a si,” tiah a ti.

8:46^a 2Sp 25:21; 2San 6:36

8:47^b Pui 5:5; Ezr 9:7, 15; Neh 1:6; Jer 3:25; 14:20

8:48^c Dnp 4:29; Neh 1:9; Jer 23:3; 1Joh 1:8-10

8:50^d 2Sp 25:28; 2San 30:9

8:51^e Suah 32:11; Dnp 9:29; Jer 11:4

8:52^f Job 30:20

8:53^g Suah 19:5

Solomon in Thlawsuah a Pe

54 Cule hitin a si, Solomon in Jehovah hnenih hi thlacamnak le dilnak hmuahhmuah a ṭheh tikah, Jehovah-ih Biakṭheng hmaiah van lamih a kut thlir ih, a khuk a bilnak ihsin a tho. 55 ^aCun a dīng ih aw ring zetin Israel pungkhawm hmuahhmuah cu, 56 ^b“A thutiamkam hmuahhmuah zulhih a mi Israel cawlhnak petu Jehovah cu thangṭhatin um seh. A siahhlawh Mosi hmangih a thutiamkam ṭha zaten kam khat hman a pelhsawlh lo. 57 ^cJehovah kan Pathian cu kan pupápawl hnenih a rak um vekin kan hnenah um hram seh. In tlansanin in thlauthla hram hlah seh, 58 ^dcutin kan pupápawl hnenih a fial mi a lamzinpawl hmuahhmuah zawhin, a thupekpawl le a sakhaw dānpawl le a zīn le dān pawl kilhim dingin kan thinlung cu a hnenah hawiter hram seh. 59 A siahhlawh thuhla ah le a mi Israel thuhla ah ni tin a ṭuldān vekih a căngvaih thei nak dingah, hi ka ṭawngkampawl, Jehovah hmaiih dilnak ka rak tuah mi cu sun le zanin Jehovah kan Pathian hnenah um camcin hram seh. 60 ^eCule leitlun ih miphun hmuahhmuah in Jehovah cu Pathian a si, a dang a um lo, ti an thei thei ding. 61 ^fCuruangah nan thinlung cu a sakhaw dānpawl zawh dingin le a thupekpawl thlun dingin, tuihsun vekin, Jehovah kan Pathian ah hnget seh,” tiin thlawsuah a pe hai.

8:55^a Suah 39:43; Mip 6:23

8:56^b Suah 33:14; Dnp 1:10, 12; Jos 23:15; Jer 29:10; Heb 4:8

8:57^c Dnp 4:31; Mat 28:20; Heb 13:5

8:58^d Jos 24:23

8:60^e Dnp 4:35; Jos 4:24

8:61^f Dnp 6:5; 2Sp 20:3; 1San 28:9; 2San 16:9; Isa 38:3

Temple Hlănnak

62 ^aCun siangpahrang le amah thawn Israel miphun zaten Jehovah hmaiah thawinakpawl an hlan. 63 ^bSolomon in Jehovah hnenih a hlăn mi Remnak Thilhlănpawl thawinak a hlăn mi cu: caw pa 22000 le tuu 120000 a si. Cuti vek cun siangpahrang le Israel tefapawl hmuahhmuah in Jehovah inn cu an hlan. 64 ^cCuih ni thothoah, siangpahrang in Jehovah inn hmaiih um tual lai cu a serhhran ih, cu tawkah Meiur Thilhlănpawl, Thlairawl Thilhlănpawl le Remnak Thilhlănpawlih thau cu a hlan. Ziangahtile Meiur Thilhlănpawl, Thlairawl Thilhlănpawl le Remnak Thilhlănpawlih thau dawngsáwng dingin, Jehovah inn hmaiih um dar biakṭheng cu a fate tuk.

8:62^a 1San 29:21; Eze 45:17

8:63^b Ezr 6:16

8:64^c 2San 7:7

65 ^aCuih cān ah Solomon in a zawngih um Israel miphun zate thawn, Hamath khaw luhnak ihsin Izip Hawrkuam tiangih mipungkhawm nasa zet thawn Jehovah kan Pathian hmaiah ni sarih le a dang ni sarih, ni hleili sung puai a tuah. 66 ^bA ni riatnak ah minungpawl a thlahkir. Cule annih in siangpahrang thlawsuah an pe ih Jehovah in a siahhlawh David le a mi Israel hrangih a rak tuah mi thil ṭha hmuahhmuah ruangah aipuang le lungawiin an puanthlam ah an tlung.

8:65^a Sem 15:18; Mip 13:21

8:66^b Suah 18:9

9

Solomon hnenah Pathian a Langsal

1 ^aCule hitin a si, Solomon in Jehovah inn le siangpahrang inn sak le Solomon in tuah dingih a duh mi zaten a ṭheh thluh tikah, 2 Jehovah cu Gibeon khua ih a hnenih a rak lăng bangin, Solomon hnenah a vei hnihnak a lang. 3 ^bCule Jehovah in a hnenah, “Ka hmaiih na rak tuah mi na thlacamnak le na dilnak ka thei. Kumkhuain cu tawkah ka hmin pu dingih na rak sak mi himi inn cu ka serhhran zo, cule ka mit le ka thinlung cu cu tawkah a um tlaitluan ding. 4 ^cCun na pa David ih a tuah bangin, thu ka lo pek mi hmuahhmuah bangtukih tuah dingin thinlung felfai le dĭngnak in ka hmaiah na feh ih, ka sakhaw dānpawl le ka zīn le dān pawl na thlun asile, 5 ^dna pa David hnenih, ‘Israel laltokham parah mi na tlasam lo ding,’ tiih ka tiamkam bangin, a kumkhuain Israel tlunah na lalram laltokham ka dĭn hnget ding.

9:1^a 2Sam 7:2

9:3^b 1Sp 8:29

9:4^c 1San 28:9; Thf 4:4

9:5^d 2Sam 7:15; 1San 22:10

6 ^a“Asinan nangmah simaw, na fapapawl simaw in keimah thlunnak ihsin nan kir pumhlum ih, na hmaiih ka rak dĭn mi ka thupekpawl le ka sakhaw dānpawl thlun loih fehin, pathian dang pawl rianin anmah nan biak sawn asile, 7 ^bIsrael cu anmah ka rak pek mi ram ihsin ka sâtcat hai ding, cule ka hmin hrangih ka sehhran mi, himi inn hi ka mithmuh ihsin ka hlăwn ding. Israel cu miphun zate lakah ṭawngṭhimnak le hnihsuahsainak ah a cang ding. 8 ^cCule khaisan a si mi, himi inn thu ah cun, himi paltlăngtu mi kip in mak tiin, ‘Ziangah so hi ram le hi inn ah Jehovah in hi vekin a tuah?’ tiin an cekcek ding. 9 ^dCu tikah annih in, ‘Izip ram ihsin an pupápawl hruaisuaktu an Pathian Jehovah cu an thlauthla ih pathian dang pawl an rak pawm, cupawl cu an bia ih an rĕn ruangah hih vanduainak hmuahhmuah hi an parah a thlengter a si,’ tiah thu an let ding,” tiah a ti.

9:6^a 2Sam 7:14; 2Sp 18:12; Jer 17:27

9:7^b Pui 18:24-28; Dnp 4:26; 2Sp 17:23; Jer 7:4

9:8^c Dnp 29:24; 2San 7:21; Jer 22:8

9:9^d Dnp 31:29; 2Sp 22:17; Jer 5:19; 40:3

Solomon le Hiram Thilpek an Thlĕngaw

10 Cule hitin a si, kum 20 a rei tikah, Solomon in inn pahnih, Jehovah inn le siangpahrang inn a sak ṭheh. 11 Cule siangpahrang Solomon in Galili ram sungih khawpi 20 cu Hiram hnenah a pe (Ṭaiar siangpahrang Hiram in Solomon hnenah sidar thing, mirang far thing le sui a duh zatzat a rak kuat zo a si). 12 Cun Hiram cu Solomon in amah a rak pek mi khawpipawl zoh dingin Ṭaiar ihsin a ra, asinan cupawl cun a lung an hmuiter lo. 13 ^aCule anih in, “Ka unaupa, i rak pek mi khawpipawl cu ziang vek so an si?” tiah a ti. Anih in tuihni tiangih an hmin vek hin, cupawl cu ^bKabul ram tiah a ko hai. 14 Cun Hiram in sui talent 120 siangpahrang a rak kuat.

9:13^a Jos 19:27

9:13^b Kabul: Ṭawng lam mithiampawl himi ṭawngfáng sullam an reldān a bangaw lo; asinan fiang zetin “ziang hrang khalih ṭha lo” ti lam a sawhkhih.

Solomon-ih Khawpipawl le Hnaṭuantupawl

15 ^aCule himi hi Siangpahrang Solomon in hramhramih ṭuanter mi hnaṭuantupawl a dĭnnak săn a si: Jehovah inn, amai inn, Millo, Jerusalem khaw kulh, Hazor, Megiddo le Gezer sak dingah a si. 16 ^bIzip siangpahrang Faro cu a so ih, Gezer a la, cule meisa in a ur, cuih khua ih cêng Kanaan-mipawl a that, cule cuih khua cu a fanu, Solomon nupi hnenah thlahawknak thilpek ah a rak pe.

9:15^a Jos 10:33; 11:10; 2Sam 5:9

9:16^b Sam 45:12

17 ^aCule Solomon in Gezer, Beth Horon hnuaita, 18 ^bBaalath le Judah ram, ramṭhing ih Tadmor, 19 ^cSolomon-ih neih mi thilri retnak khawpipawl zate, rang lêngpawl hrangih khawpipawl, rang ralkappawl hrangih khawpipawl a sak. Cuihtlunah Solomon in Jerusalem, Lebanon le a uknak ram hmuahhmuah ah sak a duh mi pauhpauh a sak.

9:17^a Jos 10:10

9:18^b Jos 19:44

9:19^c Suah 1:11; Dnp 17:16; 2San 1:14

20 ^aA tāng mi hmuahhmuah, Israel tefa si lo mi Amor-mipawl, Heth-mipawl, Periz-mipawl, Hiv-mipawl le Jebus-mipawl, 21 ^bcupawl cu, an hnuih cuih ram ih an tān mi an tesinfapawl, Israel tefapawl ih an rak hlohralter verver thei lo mi, tuihni tiangih a si bang hin, cupawl lak ihsin Solomon in hramhramih ṭuanter mi hnaṭuantupawl a dĭn. 22 ^cAsinan Israel tefapawl cu Solomon in hramhramih ṭuanter mi hnaṭuantu ah a tuah hai lo, ziangruangahtile annihpawl cu ralthiampawl le a siahhlawhpawl, a bawipawl, a ralbawipawl, a rang lêngpawl le a rang ralkappawl hotupawl tla an si. 23 Mi dang pawl cu Solomon-ih hna tlunih hotupawlih lupawl: hnaṭuantu mipi tlunih uktu mi 550 an si.

9:20^a Mip 13:29; Jos 11:3

9:21^b Sem 9:25-26; Dnp 20:11; Jos 15:63

9:22^c Pui 25:39

Temple ih Thilhlănpawl

24 ^aAsinan Faro-ih fanu cu David-ih Khawpi ihsin Solomon in a saksak mi inn ah a thleng. Cun Solomon in Millo a dâwl.

9:24^a 2Sam 5:9

25 ^aCule Solomon in Jehovah hrangih a rak sak mi Biakṭheng parah Meiur Thilhlănpawl le Remnak Thilhlănpawl cu kum khat ah vei thum a hlan ih, cupawl thawn Jehovah hmaiih Biakṭheng parah rimhmui a ur. Cutin temple a sak ṭheh.

9:25^a Suah 23:14

Ofir ihsin Sui

26 ^aSiangpahrang Solomon in Edom ram, Tipi Sen kap Elath kiangih um, Ezion Geber ah lăwng rual a sak. 27 ^bCun Hiram in Solomon-ih siahhlawhpawl thawn ṭuankhawm dingah, tifinriat theitu lăwngto thiam pawl cu lăwng thawn a thlah hai. 28 ^cCule Ofir ah an feh ih, cu tawk ihsin sui talent 420 an ngah, cule cumi cu Siangpahrang Solomon hnenah an keng.

9:26^a Mip 33:35; 2Sp 14:22; 2San 20:37

9:27^b Eze 27:8

9:28^c Sem 10:29; 2San 1:15; Ths 2:8

10

Sheba Siangpahrang Bawinu ih Faknak

1 ^aSheba siangpahrang bawinu in Jehovah hmin thawn pehparin Solomon-ih hminthanzia a theih tikah, thusuhnak har pawl thawn amah hniksak dingin a ra. 2 ^bAnih cu dungthluntu tam ngaingai le rimhmui phurtu kalaukpawl thawn, sui tam zet le lung mankhung pawl thawn Jerusalem ah a ra ih, Solomon hnen a thlen tikah a thinlung ih um mi zaten a sim ṭheh. 3 Cun Solomon in a thusuhnakpawl zaten a let ṭheh, siangpahrang hrangih har tuk, a hnenih a simfiang thei lo mi zianghman a um lo. 4 Cule Sheba siangpahrang bawinu in Solomon-ih fimnak hmuahhmuah, a sak mi inn, 5 a cabuai parih rawl, a siahhlawhpawl todān, a hnaṭuantupawlih hnaṭuandān le an thuamawkdān, a no kengtupawl le Jehovah inn ih a Meiur Thilhlănpawl a hmuh tikah thinlung mumal a nei nawn lo. 6 Cun anih in siangpahrang hnenah, “Ka ram ih ka rak theih mi na ṭawngkampawl le na fimnak hi a dik mi thuthan a rak si. 7 ^cSikhalsehla ka rat ih ka mit rori ih ka hmuh hlan sung cu cuih ṭawngkampawl ka rak zum lo, cule ngai hnik, a hrek hman sim ka rak si lo aw. Na fimnak le na hmuingilnak in ka rak theih mi thuthang a lan. 8 ^dNa mipawl cu mithlawsuak an si ih, na hmaiah dīng tlaitluanih na fimnak ngaithlatu, hi na siahhlawhpawl cu mithlawsuak an si! 9 ^eNangmah ah lungsiin Israel laltokham parih lo rettu, Jehovah na Pathian cu thangṭhatin um seh! Ziangruangahtile Jehovah in kumkhuain Israel a duhdawt, curuangah diknak le dingfelnak tuah dingah siangpahrang ah a lo tuah a si,” tiah a ti. 10 ^fCule siangpahrang bawinu in sui talent 120, rimhmui a tawri tawr le lung mankhung pawl tla siangpahrang a pe. Sheba siangpahrang bawinu in Siangpahrang Solomon hnenih a pek zat ih tam rimhmuipawl a thlengsal dah nawn lo.

10:1^a Sem 10:7, 28; Mat 12:42; Luk 11:31

10:2^b Sem 24:10

10:7^c Sem 45:26; 1San 29:25

10:8^d Thf 8:34

10:9^e 2Sam 8:15; Sam 72:2

10:10^f Isa 60:6

11 ^aCuihhleiah Ofir ihsin Hiram-ih lăwngpawl ih ken mi suipawl, almug thing tam ngaingai le Ofir ihsin lung mankhung pawl an run phur. 12 Cule siangpahrang in almug thing cu Jehovah-ih inn le siangpahrang inn ṭhuam hrangah le hlasaktupawl hrangih ṭingṭangpawl le cawngcingpawl hrang khalah a hmang. Tuihni tiangin cu tawkah khavek almug thing a thleng nawn lo ih, cuvek cu hmuh khal a si nawn lo. 13 Solomon in a duhsak ruangih a pek mipawl hleiah, Siangpahrang Solomon in Sheba siangpahrang bawinu ih duh mi hmuahhmuah, a dil mi pauhpauh cu a pe. Cule a her ih amai ram ah a siahhlawhpawl thawn a tlung.

10:11^a Sem 10:29

Solomon-ih Neihnunnak

14 Solomon hnenih kum tin a thleng mi sui cu talent 666 rit a si, 15 cuihhleiah sumtuah khualtlawngpawl hnen ihsin, sumdâwngpawl hnen ihsin, Arabia siangpahrangpawl hmuahhmuah hnen ihsin le ram uktupawl hnen ihsi khalin a dáwng.

16 ^aCule Siangpahrang Solomon in sŭt pheng mi sui in ralphaw hlai zetzet 200 a tuah, ralphaw pakhat ah sui shekel 600 ciar a feh. 17 Sŭt pheng mi sui in ralphaw te 300 khal a tuah; ralphaw pakhat ah sui ^bmina thum ciar a feh. Cupawl cu siangpahrang in Lebanon Tupi Inn sungah a ret hai.

10:16^a 2Sam 8:7

10:17^b mina: Bible ih thil tahnak phunphun zoh aw.

18 Cuihtlunah siangpahrang in vui ho laltokham ropi a tuah ih, cumi cu sui hlirhlăng a khût. 19 Cuih laltokham in karbak paruk a nei ih, laltokham zim dung lam cu a pûm, tonak sir veve ah kut hngahnak a um, cule kut hngahnakpawl sirah kiosa lem pahnih an ding. 20 Cu tawkah, karbak paruk pakhat cio ih khat lam le khat lam sirah kiosa lem hleihnih an ding; lalram dangah hivek hrimhrim zianghman tuah a si dah lo.

21 ^aSiangpahrang Solomon-ih thil innak bungbel zaten sui an si ih, Lebanon Tupi Inn ih bungbel zate khal sui hlirhlăng an si. Ngun pakhat hman a um lo, ziangahtile Solomon san laiah cun ngun cu zianghman ah an siar lo. 22 ^bZiangahtile siangpahrang in tifinriat ah Hiram-ih sumdâwng lăwng rual thawn Tarshish lăwngpawl a nei. Sui, ngun, vui ho, zawng tumpi pawl le utāwngpawl tla Tarshish lăwngpawl in kum thum vei khat an phur ṭheu.

10:21^a Isa 60:17

10:22^b Sem 10:4; 2San 20:36

23 ^aCutin Siangpahrang Solomon cun lennak le fimnak ah leilung siangpahrangpawl hmuahhmuah a hleih ṭheh. 24 ^bCule Pathian in a thinlung sungih a ret mi a fimnak ngaithla dingah, leitlun hmuahhmuah in Solomon-ih umnak an ra hawl. 25 ^cMi kip in anmai laksawng cio kum tin pek bikhiah neiin ngun le sui bungbelpawl, sinfenpawl, ralthuampawl, rimhmuipawl, rangpawl le lākrangpawl tla an rak keng.

10:23^a Mat 6:29; 12:42

10:24^b 2Sam 14:20

10:25^c 1Sam 10:27

26 ^aCun Solomon in rang lêngpawl le rang ralkappawl a khawm; rang lêng 1400 le rang ralkap 12000 a nei, cupawl cu rang lêng khawpipawl le siangpahrang hnen Jerusalem ah a ret. 27 ^bSiangpahrang in Jerusalem ah ngun cu lungto tlukin a umter ih, sidar thingpawl khal phairawn ih ^csikamor kungpawl tlukih tam in a umter. 28 Solomon in Izip le Kue ihsin lakluh mi rangpawl khal a nei. Cupawl cu siangpahrangih sumtuahpawl in Kue ah a man tawnin an rak lei ṭheu. 29 ^dCun Izip ihsin an lakluh mi rang lêng pakhat man ah ngun tangka shekel 600 le rang pakhat ah shekel 150 a si. Cule cuti vekin, cupawl cu Heth-mipawlih siangpahrangpawl le Siria siangpahrangpawl zate hnenah an kuatsuak.

10:26^a Dnp 17:16

10:27^b 1San 27:28; Job 27:16; Isa 60:17

10:27^c sikamor: Theipi kung phun khat a si.

10:29^d Mip 13:29

11

Solomon Thinlung a Pial

1 ^aAsinan Siangpahrang Solomon in ram dang nunau tampi: Moab nunaupawl, Ammon nunaupawl, Edom nunaupawl, Sidon nunaupawl le Heth nunaupawl a duhdawt, Faro-ih fanu khal. 2 ^bCuih miphunpawl thuhla cu Jehovah in Israel tefapawl hnenah, “Ṭhitawknak in an lakah nan lut lo pei ih, anmah khal in nanmah lakah ṭhitawknak in an lut lo pei. Annih cun an pathianpawl lamah nan thinlung an lo hruaihlo tengteng ding,” tiah a rak sim. Solomon cu hipawl hnenah duhdawtnak in a kăwp hai. 3 ^cCule anih in nupi 700, siangpahrang bawinu ih canter mi le nusun 300 a nei. Cule a nupipawl in a thinlung an herpêng.

11:1^a Suah 34:16

11:2^b Suah 34:16

11:3^c Sem 22:24; Dnp 17:17; Neh 13:26

4 ^aZiangahtile hitin a si, Solomon cu a tar tikah, a nupipawl in pathian dang pawl hnenah a thinlung an herpêng ih, a pa David-ih thinlung vekin Jehovah a Pathian ah a thinlung a rinum lo. 5 ^bZiangahtile Solomon cu Sidon-mipawlih khawzingnu ^cAshtoreth a thlun ih, Ammon-mipawlih fihnungza Milkom a thlun. 6 ^dSolomon in Jehovah-ih mithmuh ah thil ṭha lo a tuah ih, a pa David bangin Jehovah a thlun famkim lo. 7 ^eCun Solomon in Jerusalem nisuahnak lamih tlang ah Moab-mipawlih fihnungza pathian Kemosh hrangah le Ammon-mipawlih fihnungza Molek hrangah hmun sâng a dĭn. 8 Cule cuvek thothoin ram dang mi a nupipawl hmuahhmuah, an pathianpawl hnenih rimhmui ur le thawiawpawl hrang khalah a tuah.

11:4^a Suah 34:16; 1San 29:19

11:5^b Pui 18:21; Lai 2:13; Zef 1:4-5

11:5^c Ashtoreth: Fonisia-mipawlih nunau pathian a si. “Astarte” ti khalih kawh a si.

11:6^d Dnp 4:25

11:7^e Pui 18:21; Mip 21:29; 2Sp 23:13; Apo 7:43

9–10 Cun Israel-ih Pathian Jehovah a hnenih vei hnih lang, himi thil thuhla ih pathian dang pawl dung thlun lo dingih a hnenih thu rak petu hnen ihsin a thinlung a pial ruangah, Jehovah cu Solomon parah a thin a heng, asinan Jehovah in thu a rak pek mi cu a thlun cuang lo. 11 ^aCuruangah Jehovah in Solomon hnenah, “Hivek na rak tuah ih thu ka lo pek mi ka thukham le ka sakhaw dānpawl na thlun lo ruangah, na hnen ihsin lalram ka ṭhen taktak ding ih, cumi cu na siahhlawh ka pe ding. 12 ^bSikhalsehla na pa David ruangah cumi cu nangmai san ah ka tuah lo ding, cumi cu na fapa kut ihsin ka ṭhen ding. 13 ^cAsinan lalram pumpi cun ka ṭhen lo ding, ka siahhlawh na pa David ruangah le ka hril zo mi Jerusalem ruangah hnám khat cu na fapa ka pe ding,” tiah a ti.

11:11^a Pui 18:4; 1Sam 15:27; 2Sp 17:21

11:12^b Sam 89:33

11:13^c Dnp 12:11; 2Sam 7:15

Solomon-ih Doralpawl

14 Jehovah in Solomon dokalhin doral pakhat Edom-mi Hadad a thoter, amah cu Edom siangpahrang tesinfa a si. 15 ^aZiangahtile hitin a rak cang, Edom ah David a um laiih a mi thah mipawl phum dingih ralkap bawipi Joab a feh ih, Edom mipa hmuahhmuah a thah hnuah, 16 (ziangruangahtile Joab cu Edom ih mipa hmuahhmuah a sahthluk thluh hlanlo, Israel miphun zate thawn thla ruk sung cu tawkah a cam a si), 17 cutin Hadad cu Izip ram ah, amah le a paih siahhlawhpawl lakih Edom-mi mi hrekkhat pawl thawn feh dingin a tlân. Hadad cu nauhakte a si lai. 18 ^bCun annih cu Midian ihsin an tho ih Paran an thleng, cule Paran ihsin an zawngah mipapawl an hruai ih, Izip ih Faro siangpahrang, amah inn rak petu, a hrangih rawl covo le ram rak petu hnenah an thleng. 19 Cule Hadad cu Faro mithmuh ah duhsaknak nasa zet a co, cutin a nupi-ih naunu cu nupi ah a pe, cu nu cu siangpahrang bawinu Tahpenes-ih unaunu a si. 20 Cun amah cu Tahpenes-ih unaunu in fapa Genubath a hrinsak, cuih fapa cu Tahpenes in Faro-ih inn ah hnawi a thlei. Cule Genubath cu Faro fapapawl lakah Faro sungkua ah a um.

11:15^a 1San 18:12

11:18^b Mip 10:12

21 Hadad in Izip ihsin David cu a pupápawl hnenah a cawl zo ti le, ralkap bawipi Joab a thi zo ti a theih tikah, Hadad in Faro hnenah, “Ka ram ih ka feh thei nak dingah, i suakter aw,” tiah a ti.

22 Cun Faro in a hnenah, “Ka hnenah hin ziang so tlaksam mi na neih, ngai hnik, cutiih na ram ih tlun na tum?” tiah a ti.

Cule anih in, “Zianghman a si lo, ziang a va si khalle i fehter hrimhrim aw,” tiah a sawn.

23 ^aCule Pathian in Solomon dokalhin doral dang, Eliadah-ih fapa Rezon, a bawi Hadadezer, Zobah siangpahrang hnen ihsi tlânsuak kha a run tungding. 24 ^bCun David in Zobah khawmipawl a thah laiah, Rezon cun a hnenah mipapawl a khawm ih, suamhmang bur hotu ah a cang. Cule Damaskas ah an feh ih, cu tawkah an cêng, cule Damaskas in an uk. 25 ^cHadad ih tuah mi buainak hleiah, amah cu Solomon dam sung hmuahhmuah ah Israel doral a si. Cule anih in Israel a fih ih Siria a uk.

11:23^a 2Sam 8:3

11:24^b 2Sam 8:5

11:25^c Sem 10:22; 2Sam 10:19

Jeroboam Helnak

26 ^aSolomon-ih siahhlawh Jeroboam, Nebat-ih fapa, Zereda khua ih Efraim-mi khal in siangpahrang dokalhin a hél, a nuih hmin cu Zeruah a si ih, nuhmei a si. 27 Cule himi hi siangpahrang dokalhih héltertu a si: Solomon in Millo a dĭn ih a pa David-ih Khawpi kulh siatnak hmunpawl a rĕm. 28 ^bPacang Jeroboam cu micak ralṭha a si ih, Solomon in cuih tlangvalpa cu mitaima a si ti a hmuh tikah, amah cu Joseph inn ih hnaṭuantupawl zate tlunih thuneitu ah a tuah.

11:26^a 2San 13:6

11:28^b Sem 39:4; Thf 22:29

29 ^aCuih cān ah hitin a si, Jeroboam cu Jerusalem ihsin a suah tikah, amah cu Shilon-mi, profet Ahijah in lamzin ah a táwng, Ahijah cu sinfen thar in a thuamaw ih, an pahnih lawngin ramlak ah an um. 30 ^bCun Ahijah cun a parih a sinfen thar cu a kai ih, cumi cu ṭhen hleihnih ah a thlek. 31 ^cCule anih in Jeroboam hnenah, “Na hrangah ṭhen hra la aw, ziangahtile Jehovah, Israel-ih Pathian in hitin a ti, ‘Ngai hnik, Solomon kut ihsin lalram ka ṭhen ding ih, hnám hra cu nangmah ka lo pe ding. 32 ^dAsinan anih in ka siahhlawh David ruangah le Israel hnám zate lak ihsin ka rak hril mi khawpi Jerusalem ruangah hnám khat a co ding. 33 ^eZiangruangahtile annih cun keimah in tlansan ih, Sidon-mipawlih khawzingnu Ashtoreth, Moab rammipawlih pathian Kemosh le Ammon-mipawlih pathian Milkom an bia, cule ka mithmuh ih a dik mi tuah ding le ka sakhaw dānpawl le ka zīn le dān pawl thlun dingin a pa David vekin ka lamzinpawl an zawh lo. 34 Sikhalsehla a kut ihsin lalram zate cun ka la lo ding, ziangruangahtile ka thupekpawl le ka sakhaw dānpawl a thlun ruangih ka hril mi ka siahhlawh David ruangah amah cu a dam sung hmuahhmuah uktu ah ka tuah zo. 35 Asinan lalram cu a fapa kut ihsin ka la ding ih, hnám hra cu nangmah ka lo pe ding. 36 ^fCule ka siahhlawh David in cu tawkih ka hmin retnak dingah, ka hril mi khawpi Jerusalem ah ka hmaiih meito a neih ringring thei nak dingah hnám khat cu a fapa ka pe ding. 37 ^gCun nangmah hi ka lo hril ding ih, na thinlung ih duh mi hmuahhmuah na uk ding, cule Israel siangpahrang na si ding. 38 ^hCun hitin a si ding, thu ka lo pek mi hmuahhmuah na ngaithla ih, ka lamzinpawl na zawh ih, ka siahhlawh David vekin ka sakhaw dānpawl le ka thupekpawl thlun dingin ka mithmuh ih a dik mi na tuah asile, na hnenah ka um ding ih, David hrangih ka sak bangin na hrangah rei a daih mi inn ka lo saksak ding, cule na hnenah Israel ka lo pe ding. 39 Cule David-ih tesinfapawl cu himi ruangah ka zawnzaiter hai ding, asinan kumkhua cun a si lo ding,’ tiin,” tiah a ti.

11:29^a 2San 9:29

11:30^b 1Sam 15:27

11:31^c 1Sam 15:27

11:32^d 2Sam 7:15

11:33^e Lai 2:13; 2Sp 21:22

11:36^f 2Sam 21:17

11:37^g 2Sam 3:21

11:38^h Suah 1:21; Dnp 17:19; 2Sam 8:15

40 ^aCuruangah Solomon in Jeroboam that dingin a hawl. Asinan Jeroboam cu a tho ih Izip ram ah, Izip siangpahrang Shishak hnenah a tlân, cule Solomon thih tiangin Izip ah a va um.

11:40^a 2San 10:2

Solomon Thihnak

41 Solomon-ih cangvaihnak dang, a tuah mi hmuahhmuah le a fimnakpawl cu Solomon-ih căngvaihnakpawl cazual ah ngan an si lo maw? 42 Solomon in Israel miphun zate tlunah Jerusalem ih a uk sung cu kum 40 a si. 43 ^aCun Solomon cu a pupápawl hnenah a itthat ih, a pa David-ih Khawpi ah phum a si. Cule a fapa Rehoboam cu a aiah a lal.

11:43^a Mat 1:7

12

Lalram Ṭhenawknak

1 ^aCule Rehoboam cu Shekem ah a feh, ziangahtile amah kha siangpahrang ih tuah dingah Israel miphun zaten Shekem ah an rak feh. 2 Cule hitin a si, Nebat-ih fapa Jeroboam in cuih thu a theih tikah, amah cu Izip ah a um hrih lai, Siangpahrang Solomon hmaika ihsin a tlânsuak ruangah Izip ram ah a va cêng. 3 Mi an thlah ih amah cu an ko. Cule Jeroboam le Israel mipungkhawm pumpi an ra ih Rehoboam hnenah, 4 ^b“Na pa in kan hngawngkol a ritter, curuangah atu-ah na paih phurrit hnaṭuan le kan parih a ṭhum mi a hngawngkol rit zet cu zângter aw, cule nangmah kan lo rian ding,” tiah an ti.

12:1^a Sem 12:6; Jos 24:32

12:4^b 1Sam 8:11-18

5 Cule anih in an hnenah, “Ni thum sung kiang hrih uh, cun ka hnenah ra kirsal uh,” tiah a ti hai. Cule mipi cu an suak.

6 Cun Siangpahrang Rehoboam cun a pa Solomon a dam laiih a hmaiih dīng ṭheu tu upapawl cu thu a ráwn hai ih an hnenah, “Hih milaipawl let dingah ziang vek ruahnak so in pek?” tiah a ti.

7 ^aCule annih in a hnenah, “Tuihsun ah hih milaipawl hnenih siahhlawh na si ih, anmah na rian ih, anmah na let ih, an hnenih ṭawngkam ṭha pawl na ṭawng asile, kumkhuain na siahhlawh an si ding,” tiah an ti.

12:7^a Thf 15:1

8 ^aAsinan a hnenih upapawl ih an rak pek mi ruahnak cu a hnáwng ih, a hmaiih ding, amah thawi ṭhanglian tlangvalpawl cu thu a ráwn. 9 Cule anih in an hnenah, “Nannih in ziang ruahnak so in pek ding? Hih mipi ka hnenih, ‘Na pa in kan parih a ṭhum mi hngawngkol hi zângter aw,’ tiih i titupawl hi ziangtin kan sawn pei?” tiah a ti hai.

12:8^a Pui 19:32

10 Cun amah thawi a ṭhanglian mi tlangvalpawl cun a hnenah, “Hi minungpawl, ‘Na pa in kan hngawngkol a ritter, asinan cumi cu nang in kan parah zângter aw,’ tiih lo titupawl hnenah, hitin ti hai aw, hitin an hnenah sim aw, ‘Ka zungte cu ka paih tâi hnakin a tumsawn ding. 11 Cule atu-ah ka pa in nan parah hngawngkol rit a ṭhum, nan hngawngkol cu ka bêt sinsin ding, ka pa in mivuaknak in nun a lo sim, asinan kei cun tlangkaikuangpawl in nun ka lo sim ding!’ tiin na ti pei,” tiah an ti.

12 Cule Jeroboam le mipi hmuahhmuah cu siangpahrang in, “A ni thumnak ah ka hnenah rasal uh,” tiih a cah vekin, a ni thumnak ah cun Rehoboam hnenah an ra. 13 Cun siangpahrang in mipipawl cu hrohrang zetin a rak sawn hai ih, upapawl ih an rak pek mi ruahnak cu a hnáwng. 14 ^aCule tlangvalpawl ih ruahnak pek mi vekin an hnenah, “Ka pa in nan hngawngkol a ritter ih, kei in nan hngawngkol parah ka bêt sinsin ding; ka pa in mivuaknak in nun a lo sim, asinan kei cun tlangkaikuangpawl in nun ka lo sim ding,” tiah a rak ti hai. 15 ^bCun siangpahrang in mipi cu a ngaithla hai lo, ziangahtile thil cangsuaktertu cu Jehovah hnen ihsin a si, Jehovah in Shilon-mi Ahijah hmangih Nebat-ih fapa Jeroboam hnenih thu a rak sim mi a famkimter thei nak dingah a si.

12:14^a 1Sam 8:11-18

12:15^b Dnp 2:30; 2San 25:20

16 ^aCule siangpahrang in anmah a ngaithla lo ti Israel miphun hmuahhmuah in an hmuh tikah, mipi in siangpahrang hnenah,

12:16^a 2Sam 20:1; Isa 7:17

“David ah ziang covo so kan neih?
Jessi-ih fapa ah ro kan nei lo.
Maw Israel, nan puanthlam cio ah!
Maw David, atu-ah nangmai sungkua ngaihtuah aw,”

tiah an let.

Cutin Israel miphun zaten anmai puanthlam cio ah an feh. 17 Asinan Judah khawpipawl ih cêng, Israel tefapawl cu Rehoboam in a uk.

18 ^aCun Siangpahrang Rehoboam in hramhramih hnaṭuanter mipawl hotu Adoram cu a thlah, asinan Israel miphun zate in amah cu lungto in an rak deng ih a thi. Curuangah Siangpahrang Rehoboam cu Jerusalem ih tlân dingin a rang lêng parah manhlap zetin a kai. 19 ^bCutin tuihni tiangin Israel cu David-ih sungza parah a hél lan ta.

12:18^a Jos 7:25; 2Sam 20:24

12:19^b 2Sp 17:21

20 ^aCule hitin a si, Israel miphun zate in Jeroboam a ra kir ti an theih tikah, a hnenah mi an thlah ih mipi umkhawm hnenah amah cu an ko, cule Israel-mi zate tlunih siangpahrang ah amah cu an tuah. Judah hnám ti lo cu David-ih sungza thluntu pakhat hman an um lo.

12:20^a Eze 37:16

Rehoboam in Lalram Lâksal a Tum

21 ^aCule Jerusalem ih Rehoboam a thlen tikah, Judah sungza hmuahhmuah cu Benjamin hnám thawn, Solomon-ih fapa Rehoboam hnenah lalram a dĭnsal thei nak dingah, Israel sungza do dingih hril mi mipa ral do thiam tingkhat le thawng sawmriat a fĭnkhawm.

12:21^a 2San 11:1

22 ^aAsinan Pathian kamsuakthu cu Pathian mi Shemaiah hnenah a rung thleng ih, 23 “Solomon-ih fapa Rehoboam, Judah siangpahrang hnen, Judah sungza le Benjamin sungza hmuahhmuah hnenah le a tāng mi mipi hnenah, 24 ‘Jehovah in hitin a ti, “Nan hung so lo pei ih, nan unau Israel tefapawl nan do fawn lo pei! Mi kip mai inn cio ah kir hai seh, ziangahtile hih thil cu keimah hnen ihsin a si,” tiin sim aw,’ i ti,” tiah a ti. Curuangah annih in Jehovah-ih kamsuakthu cu an lung, cule Jehovah-ih kamsuakthu vekin an kir ih an tlung.

12:22^a 2San 11:2; 12:5-7

Jeroboam-ih Sui Cawpawl

25 ^aJeroboam cu Efraim tlang ram ah Shekem khua a dĭn ih, cu tawkah a cêng. Cuihtlunah amah cu, cu tawk ihsin a fehsuak ih, Penuel khua a sat. 26 Cule Jeroboam in a thinlung sungah, “Ngai hnik, David-ih sungza hnenah lalram a kirsal pang pei maw: 27 ^bhih mipi in Jerusalem ih Jehovah inn ah raithawinakpawl hlan dingin an feh asile, hih mipipawlih thinlung cu an bawipa, Judah siangpahrang Rehoboam hnenah a kirsal ding, cule annih in keimah in that ding ih, Judah siangpahrang Rehoboam hnenah an kir ding,” tiah a ti.

12:25^a Lai 8:8

12:27^b Dnp 12:5-6

28 ^aCuruangah siangpahrang in ruahnak a dil hai, sui caw pa no pahnih a tuah, cule mipi hnenah, “Nan hrangah Jerusalem ih hung soh ding cu a har tuk. Zoh hnik uh, nan pathianpawl hi, Maw Israel, Izip ram ihsi a lo hruaisuaktu an si!” tiah a ti. 29 ^bCule anih cun Bethel ah pakhat a dĭn ih, Dān ah a dang pakhat a ret. 30 ^cCun hi thil hi sual ah a cang, ziangahtile mipi cu, cu tawkih ^da um mi be dingin Dān tiangtiangin an feh. 31 ^eJeroboam in hmun sâng pawl ah innpawl a sak ih, Levi fapa a si lo mi, mi menmen lak ihsin puithiampawl a tuah.

12:28^a Suah 32:4, 8; 2San 11:15

12:29^b Sem 12:8; Jos 7:2; Lai 18:27-31; Amo 8:14

12:30^c 2Sp 3:3; 17:21

12:30^d a um mi: Sui caw pa no a relnak a si (câng 28).

12:31^e Suah 29:9; Pui 26:30; 2Sp 17:29, 32; 2San 11:14-15

32 ^aJeroboam cun Judah ram ih puai an neih vekin, a thla riatnak ni hleingatnak ah puai a ruat ih, biakṭheng parah raithawinakpawl a hlan. Bethel khalah a tuah mi caw pa no pawl hnenah raithawinak a tuah. Cule Bethel ih a tuah mi hmun sâng pawl ah puithiampawl a ret. 33 ^bCutin a thla riatnak ni hleingatnak, amai thinlung sungih a remruat mi thla ah Bethel ih amai tuah mi biakṭheng parah raithawinakpawl a tuah. Cule Israel tefapawl hrangah puai a ruat ih, biakṭheng parah raithawipawl a hlan ih, rimhmui a ur.

12:32^a Mip 29:12; 2Sp 10:29

12:33^b 2Sp 23:15; Amo 7:13

13

Judah Ram ihsin Pathian Mi in Jeroboam Hnenah Thu a Sim

1 ^aCule zoh hnik, Pathian mi pakhat cu Jehovah-ih kamsuakthu vekin Judah ihsin Bethel ah a ra ih, Jeroboam cu biakṭheng kiangah rimhmui ur dingah a ding. 2 ^bPathian mi cun Jehovah-ih kamsuakthu hmangin biakṭheng dokalhin a au ih, “Maw biakṭheng, biakṭheng! Jehovah in hitin a ti, ‘Zoh hnik, fapa, a hmin Josiah cu David-ih sungza ah a suak ding ih, anih in na parih rimhmui ur ṭheu tu, hmun sâng pawlih puithiampawl hi na parah rai a thawi hai ding, cule mipapawlih ruhpawl cu na parah urkăng an si ding,’ a ti,” tiah a ti. 3 ^cCule anih in cuih ni ah hminsinnak a pe ih, “Himi hi Jehovah ih sim mi hminsinnak a si, ‘Biakṭheng cu a ṭhendarhaw tengteng ding ih, cumi parih vutcâm cu an bung ding a si,’ a ti,” tiah a ti.

13:1^a 2Sp 23:17; Amo 7:13

13:2^b Pui 26:30; 2Sp 23:15-16, 20; 2San 34:5

13:3^c Suah 4:8; Joh 2:11

4 Cule hitin a si, Siangpahrang Jeroboam in Bethel ih biakṭheng dokalhin a autu Pathian mi ih sim mi a theih tikah, biakṭheng ihsin a kut a suah ih, “Amah cu kai uh!” tiah a ti. Cun cu pa lamih a suah mi a kut cu a ro, cutin a kut cu a hnûksal thei lo. 5 Biakṭheng khal a ṭhendarhaw ih, Pathian mi in a rak pek mi Jehovah-ih kamsuakthu hminsinnak vekin vutcâm cu biakṭheng ihsin an bung. 6 ^aCun siangpahrang in Pathian mi cu a sawn ih, “Ka kut a damsal thei nak dingah, zangfahten Jehovah na Pathian-ih duhsaknak dil awla ka hrangah thlacam aw,” tiah a ti. Cutin Pathian mi cun Jehovah a dil ih siangpahrang kut cu a damsal, cule a hlan vekah a cang.

13:6^a Suah 8:8; 9:28; 10:17

7 ^aCun siangpahrang in Pathian mi hnenah, “Ka hnenah inn ah ra awla cawlhahdam aw, cule lawmman ka lo pe ding,” tiah a ti.

13:7^a 1Sam 9:7

8 ^aAsinan Pathian mi cun siangpahrang hnenah, “Na inn hrek i pe ding hman si awla, na zawngah ka feh lo ding ih, hi hmun ah rawl khal ka ei lo ding, tidai khal ka in fawn lo ding. 9 Ziangahtile cumi cu Jehovah-ih kamsuakthu in, ‘Rawl na ei lo pei ih, tidai khal na in fawn lo pei, na ratnak zin kel khalin na tlung fawn lo pei,’ tiah thu i pe a si,” tiah a ti. 10 Cutin zin dangah a feh ih Bethel a pannak zin ihsin a kir lo.

13:8^a Mip 22:18

Profet Hlun in Pathian Mi a Bum

11 Profet patar pakhat cu Bethel ah a cêng, cule a fapapawl an ra thleng, cuih ni ih Pathian mi in Bethel ih a tuah mi thil tipawl zaten amah cu an sim. Siangpahrang hnenih a sim mi ṭawngkampawl khal an pa cu an sim. 12 Cule an pa in an hnenah, “Khui tawk lamzin in a feh?” tiah a ti. Ziangahtile a fapapawl in Judah ram ihsin a ra mi Pathian mi in khui tawk zin a zawh ti an hmu. 13 Cun anih in a fapapawl hnenah, “Ka hrangah lāk dăm uh,” tiah a ti. Cutin a hrangah lāk cu an dam ih anih cu a parah a to, 14 cule Pathian miih dung ihsin a dawi ih, ela thingkung hnuaiih a to lai a va hmu. Cu tikah anih in a hnenah, “Nang hi Judah ram ihsi ra mi Pathian mi na simaw?” tiah a ti.

Cule anih in, “Ka si,” tiah a ti.

15 Cun anih in a hnenah, “Ka zawngah inn ah ra awla, rawl ra ei aw,” tiah a ti.

16 Cule anih in, “Na zawngah ka kir thei lo ih, na zawngah ka feh thei fawn lo, nangmah thawn hi tawkah rawl ei in le tidai in khalin ka um thei lo. 17 Ziangahtile Jehovah-ih kamsuakthu in, ‘Cu tawkah rawl na ei lo pei, tidai khal na in lo pei ih, na ratnak zin khalin na kir fawn lo pei,’ tiih sim ka si,” tiah a ti.

18 ^aAnih in a hnenah, “Kei khal nangmah bangin profet ka si ih, Jehovah-ih kamsuakthu hmangin vancungmi in ka hnenah, ‘Rawl ei ih tidai in dingin, amah kha na zawngah na inn ah hruaikir aw,’ tiin i sim a si,” tiah a ti. A hnenah thuphan a sim a si. 19 Cule amah zawngah cun a kir ih a inn ah rawl ei in, tidai a in.

13:18^a Sem 19:14; Dnp 13:3; Isa 36:10

20 Cun hitin a si, cabuai ih an to laiah amah hruaikirtu profet hnenah Jehovah-ih kamsuakthu a thleng. 21 ^aJudah ram ihsin a ra mi Pathian mi hnenah a au ih, “Jehovah in hitin a ti, ‘Jehovah-ih kamsuakthu na lung lo ih, Jehovah na Pathian ih thu a lo pek mi thupek na thlun lo ih, 22 kirsal sawnin, na hnenah Jehovah in, “Rawl ei hlah, tidai in hlah,” a lo tinak hmun ah rawl ei le tidai in ih na um sawn ruangah, na pupápawlih thlān ah na ruak a thleng lo ding,’ a ti,” tiah a ti.

13:21^a 1Sam 13:14

23 Cule hitin a si, rawl a ei ṭheh ih tidai a in ṭheh tikah, a rak hruaikir mi profet hrangah lāk a dăm. 24 A fehliam tikah, kiosa in lamzin ah amah cu a táwng ih a that. Cule a ruak cu lamzin parah hlăwn a si ih, a kiangah lāk cu a ding, cule kiosa khal ruak kiangah cun a ding. 25 Cule ngai hnik, lamzin sirih ruak le ruak kiangih a dīng mi kiosa cu miveivâkpawl in an hmu. Cun an feh ih profet patar cēnnak khawpi sungah fehin cuih thu cu an sim.

26 Cule lamzin ihsin amah hruaikirtu profet in cumi a theih tikah, “Pathian mi, Jehovah-ih kamsuakthu lung lo pa kha a si cu! Curuangah amah cu Jehovah in kiosa hnenah a pek. Cuti cun Jehovah in a hnenih a sim mi a kamsuakthu bangtukin, amah cu a thlek ih a that a si,” tiah a ti. 27 Cule anih in a fapapawl hnenah, “Ka hrangah lāk dăm uh,” tiah a ti. Cule annih in lāk cu an dăm. 28 Cun anih cu a feh ih lamzin parih thehvawrh mi a ruak le ruak kiangih ding lāk le kiosa cu a va hmu. Kiosa in ruak cu a ei lo ih, lāk khal a băwtthlek lo. 29 Profet cun Pathian miih ruak cu a la, lāk parah a hlum ih a phurkir. Cutin profet patar cu ṭah dingah le amah phum dingah khua a va thleng. 30 ^aCun a ruak cu amai thlān ah a hlum ih an ṭah, “Ai maw, ka unaupa!” tiah an ti.

13:30^a 2Sp 23:17; Jer 22:18

31 ^aCule hitin a si, amah a phum ṭheh hnuah a fapapawl hnenah, “Ka thih tikah Pathian mi phumnak thlān ah in phum pei ih ka ruhpawl cu a ruhpawl kiangah nan ret pei. 32 ^bZiangahtile Bethel ih biakṭheng dokalhin le Samaria khawpipawl ih umhmun sâng pawlih inn hmuahhmuah dokalhin Jehovah-ih kamsuakthu a aupi mi a thleng tengteng ding a si,” tiah a ti.

13:31^a 2Sp 23:18

13:32^b Pui 26:30; 1Sp 13:2; 2Sp 23:16

Jeroboam in Pathian thu a Lung lo Vivo

33 Himi thil a can hnuah, Jeroboam cu a lamzin ṭha lo ihsin a kir lo, cuhnakin hmun sâng pawl hrangah mi menmen lak ihsin puithiampawl a tuah sawn riangri, a duhtu pauhpauh cu a serhhran ih hmun sâng pawlih puithiampawl lakih pakhat ah a cang. 34 ^aCule himi thil hi Jeroboam sungza sualnak anmah cimittertu le leilung vangdâp ihsin hloráltertu a rak si.

13:34^a 1Sp 12:30; 2Sp 9:9; Amo 7:9

14

Pathian in Jeroboam Thu a Ṭhen

1 Cuih cān ah Jeroboam-ih fapa Abijah a dam lo. 2 Cule Jeroboam in a nupi hnenah, “Zangfahten tho awla, Jeroboam-ih nupi ti an lo theihlonak dingah danglamawter aw, cule Shiloh ah feh aw. Ngai hnik, cu tawkah hi minungpawl tlunih siangpahrang si dingih i rak simtu, profet Ahijah a um. 3 ^aCuihtlunah sang hlăwm hra, sang per pawl le khuai tizu thâwl khat na zawngah keng awla a hnenah feh aw. Anih in nauhak ziang a cang ding ti a lo sim ding,” tiah a ti.

14:3^a 1Sam 9:7

4 Cule cu vekin Jeroboam-ih nupi cun a tuah, a tho ih Shiloh ah a feh, cule Ahijah-ih inn a thleng. Asinan Ahijah cun khua a hmu thei nawn lo, ziangahtile a tar ruangah a mit a māl. 5 Cule Jehovah in Ahijah hnenah, “Ngai hnik, a fapa thu ah thil hrekkhat lo sut dingin, Jeroboam-ih nupi a ra, ziangahtile anih cu a dam lo. Cutin khatin a hnenah na sim pei. Ziangahtile hitin a si ding, a ra thlen tikah nunau dang pakhat vekin a umawter ding,” tiah a ti.

6 ^aCule hitin a si, Ahijah in sângka lam panin amah nu a thleng ti a kekar thâwm a theih tikah, “Rung lut aw, Jeroboam-ih nupi. Ziangruangah mi dang pakhat vekih na umawkter? Ziangahtile kei cu na hnenah thuthang sia thawi thlah mi ka si. 7 Feh aw, Jeroboam kha, ‘Israel-ih Pathian Jehovah in hitin a ti, mipi lakah ka lo khaisâng ih, ka mi Israel tlunih uktu ah ka lo tuah ruangah, 8 ^bDavid-ih sungza ihsin lalram cu ka thlek ih, cumi cu ka lo pe. Sikhalsehla ka thupekpawl kilhimtu le ka mithmuh ah a dik mi lawng tuah dingih a thinlung zate ih keimah thluntu ka siahhlawh David vek na rak si lo. 9 ^cCuhnakin nang cun na hlanih mi hmuahhmuah hnakin thil ṭha lo tamsin na tuah riangri, ziangahtile nang cu na feh ih ka thinhengnak căwktho dingin na hrangah pathian dang pawl le burcawp milimpawl tla na tuah ih, na dung i tŭn. 10 ^dCuruangah ngai hnik, Jeroboam sungza ah vanduainak ka thlen ding ih, Jeroboam ihsin Israel ram ih mipa kip in ṭemṭawn le miluat khal ka sâtcat ding, mi pakhat in a zate ih a cem tiangih êk a hlawnhloh vekin, Jeroboam sungza ih a tāngsŭn cu ka hlawnhlo ding. 11 ^eZokhal Jeroboam-ih sungkhat, khawpi sungih thi cu uicopawl in an ei ding ih, zokhal ramlak ih thi cu tlun zuang vatepawl in an ei ding. Ziangahtile Jehovah in a sim zo!’ tiin ti aw.

14:6^a 1Sam 28:12

14:8^b 1Sp 11:31, 38; 15:5

14:9^c 1Sp 12:28; 2San 11:15; Sam 50:17; Eze 23:35; 34:17

14:10^d Dnp 32:36; 2Sam 12:25; 1Sp 16:3; 2Sp 9:8-9

14:11^e Dnp 28:26; 1Sp 16:4; 21:24

12 “Curuangah nangmai inn ih feh dingin tho aw. Na ke in khawpi a luh tikah, nauhak cu a thi ding. 13 ^aCule Israel miphun zate in amah cu an sūn ding ih an phum ding, ziangahtile amah lawng hi thlān ih thleng ding mi, Jeroboam-ih milai pakhat a si, ziangruangahtile Jeroboam sungza lakah Israel-ih Pathian Jehovah lamih thil ṭha hrekkhat amah ah hmuh a si. 14 Cuihhleiah Jehovah in amah hrangah Israel tlunih siangpahrang pakhat, Jeroboam sungza cimittertu ding a tungding ding, cucu tuihni hi a si. Atu-ah teh ziang a cang pei? 15 ^bZiangahtile tidai sungih câlte a hninter vekin, Jehovah in Israel a vaw ding. Amah in an pupápawl hnenih a pek mi himi ram ṭha ihsin Israel a phawng ding ih, Zufraṭis tiva ralah anmah a ṭhekdarh ding, ziangruangahtile Jehovah thinheng ko căwktho dingin an Asherah an tuah. 16 Cule anih in Israel thil sual tuahter ih, thil sual tuahtu Jeroboam-ih sualpawl ruangah Israel a thlauthla ding,” tiah a ti.

14:13^a 2San 12:12

14:15^b Dnp 29:28; Sam 52:5; Jer 44:3

17 ^aCun Jeroboam-ih nupi cu a tho ih, a păwk, cule Tirzah khua a thleng. Inn sângka hram a thlen tikah nauhak cu a thi. 18 Cule amah cu an phum, cun Jehovah in a siahhlawh profet Ahijah hmangih a sim mi a kamsuakthu bangtukin Israel mi zate in amah cu an sûn.

14:17^a 1Sp 16:6

Jeroboam Uknak Cemnetnak

19 Cule Jeroboam-ih cangvaihnak dang pawl, ral a dodān le a ukdān pawl tla cu, ngai hnik, Israel siangpahrangpawlih san thuanthu cazual sungah ngan a si. 20 Jeroboam ih a uk sung cān cu kum 22 a si. Cutin anih cu a pupápawl hnenah a cawl. Cun a fapa Nadab cu a aiah a lal.

Judah Siangpahrang Rehoboam

Rehoboam Uknak Hramthawhnak

21 Cule Solomon-ih fapa Rehoboam in Judah ram a uk. Siangpahrang a hung si tikah, Rehoboam cu kum 41 a si. Jehovah in amai hmin umnak dingih Israel hnám zate lak ihsin a rak hril mi khawpi Jerusalem ah kum hleisarih sung a lal. A nuih hmin cu Naamah a si ih, Ammon-mi a si.

22 ^aCun Judah hnám cun Jehovah-ih mithmuh ah thil ṭha lo a tuah ih, an pupápawl ih an rak tuah mi hmuahhmuah hnakih nasasawnin thil sual an tuah mi an sualpawl cun a thîksiatnak an căwktho. 23 ^bZiangahtile annih khal anmai hrangah hmun sâng pawl, ṭhuamserhpawl le tlang sâng kip parah le thing bŭk nîm hnuai kip ah Asherah-pawl an dĭn. 24 ^cCule ram sungah mipa hlawhhlangpawl khal an um. Jehovah in Israel tefapawl hmaiih a rak dawisuak mi miphunpawlih thil fihnungza hmuahhmuah bangtukin an tuah a si.

14:22^a Dnp 32:21; 2Sp 17:19; 2San 12:1; Sam 78:58; 1Ko 10:22

14:23^b Suah 23:24; Dnp 12:2-3; 16:22; Eze 6:13; Hos 10:1

14:24^c Dnp 23:17; 2Sp 23:7; Ezr 9:11; Thf 21:27; Jer 16:18

Shishak in Jerusalem a Do

25 ^aSiangpahrang Rehoboam in kum nga a uknak ah hitin a si, Izip siangpahrang Shishak cu Jerusalem dokalhin a hung so. 26 ^bCule anih in Jehovah inn ih hlawnthilpawl le siangpahrang inn ih hlawnthilpawl a la, thil tinkim a la thluh. Solomon ih tuah mi sui ralphawpawl khal a la. 27 ^cCun Siangpahrang Rehoboam in an aiah dar ralphawpawl a tuah ih, cupawl cu kiltu ralbawipawl, siangpahrang inn luhnak kiltupawl hnenah a ap. 28 Cule hitin a si, Jehovah inn ih siangpahrang a luh tinten, kiltupawl in cuih dar phawpawl cu an keng ih, kiltupawlih pindan sungah an kengkirsal.

14:25^a 2San 12:2

14:26^b 2Sam 8:7

14:27^c 2Sp 11:5

Rehoboam Uknak Cemnetnak

29 Cule a tāng lai mi Rehoboam-ih cangvaihnak le a tuah mipawl hmuahhmuah cu Judah siangpahrangpawlih san siarnak cazual ah ngan a si lo maw? 30 ^aRehoboam le Jeroboam karlakah an dam sung hmuahhmuah doawknak a um. 31 Cun Rehoboam cu a pupápawl hnenah a itthat ih, David-ih Khawpi ah a pa hnenih phum a si. A nuih hmin cu Naamah, Ammon-mi a si. Cun a aiah a fapa Abijam a lal.

14:30^a 2Sam 3:1

15

Judah Siangpahrang Abijam

1 Nebat-ih fapa Siangpahrang Jeroboam a lal kum hleiriatnak ah, Abijam cu Judah ram ah siangpahrang ah a cang. 2 ^aJerusalem ah kum thum sung a lal. A nuih hmin cu Maakah, Abishalom-ih tunu a si. 3 Cule amai hlanih a pa ih tuah mi sualpawl zaten a tuah, a thinlung cu a pa David-ih thinlung bangin, Jehovah a Pathian ah a rinum lo.

15:2^a 2San 11:20

4 ^aSikhalsehla David ruangah Jehovah a Pathian in a hnuih a fapa tundīnnak in le Jerusalem dĭn hnget nak in amah cu Jerusalem ah meito a pe. 5 ^bZiangruangahtile David cun Jehovah-ih mithmuh ah a dik mi a tuah ih, Heth-mi Uriah thuhla siarlo ah cun, a dam sung hmuahhmuah ah thu a pek mi ziang lak hmanin a pial lo. 6 ^cCule a dam sung hmuahhmuah cu Rehoboam le Jeroboam karlakah doawknak a um.

15:4^a 2Sam 21:17

15:5^b Dnp 5:32; 2Sam 11:2-27

15:6^c 2San 16:9

7 Cun a tāng lai mi Abijam-ih căngvaihnakpawl le a tuah mi hmuahhmuah cu Judah siangpahrangpawlih san siarnak cazual ah ngan an si lo maw? Cule Abijam le Jeroboam karlakah doawknak a um. 8 Cutin Abijam cu a pupápawl hnenah a itthat ih, amah cu David-ih Khawpi ah an phum. Cun a aiah a fapa Asa a lal.

Asa in Judah Ram a Uk

Asa ih Uk Thawknak

9 Israel siangpahrang Jeroboam a lal kum 20-nak ah, Asa cu Judah ram ah siangpahrang ah a cang. 10 Cule anih cu Jerusalem ah kum 41 sung a lal. A piih hmin cu Maakah, Abishalom-ih tunu a si. 11 Asa cun a pa David bangin Jehovah mithmuh ih a dik mi a tuah.

12 ^aCule anih in temple ^bmipa hlawhhlangpawl cu ram sung ihsin a hnăwtsuak hai ih a pupápawl ih an rak tuah mi milem hmuahhmuah tla a ṭhiatbăl. 13 ^cCuihhleiah a pi Maakah khal fihnungza Asherah a tuah ruangah, siangpahrang bawinu sinak ihsin a hlăwn. Cule Asa in a fihnungza milem cu a hautlu ih, cumi cu Kidron Hawrkuam ah a ur. 14 ^dAsinan hmun sâng pawl cu ṭhiahbăl an si lo. Sikhalsehla Asa-ih thinlung cu a dam sung hmuahhmuah Jehovah parah a rinum. 15 ^eCuihtlunah a pa ih rak serhhran mi thilpawl le amah rori ih a rak serhhran mi ngun, sui le bungbelpawl cu Jehovah inn sungah a thiarlut.

15:12^a 2San 15:8

15:12^b mipa hlawhhlang: Sakhua thawi pehtlai mi hlawhhlang a si. An sakhua temple ah an um ṭheu.

15:13^c 2San 15:16-18

15:14^d 2San 14:5

15:15^e 2Sam 8:11

Asa in Siangpahrang Ben-Hadad a Rinsan

16 Cule Asa le Israel siangpahrang Baasha karlakah an dam sung hmuahhmuah doawknak a um. 17 ^aCule Israel siangpahrang Baasha in Judah a hung do ih, Judah siangpahrang Asa hnenah zohman suak le lut thei lo dingin Ramah khua a dĭn. 18 ^bCun Asa in Jehovah inn ih hlawnthilpawl retnak le siangpahrang inn ih hlawnthilpawl retnak ih a tāng mi sui le ngun hmuahhmuah cu a la ih, cupawl cu a siahhlawhpawl kut ah a pe. Cule Siangpahrang Asa in Damaska khua ih cêng Hezion-ih fa Tabrimmon-ih fapa, Siria siangpahrang Ben-Hadad hnenah, 19 ^c“Na pa le ka pa karlakih a rak um bangin, nangmah le keimah karlak khalah thukham um ve seh. Zoh hnik, ngun le sui laksawng ka lo kuat; Israel siangpahrang Baasha hi ka hnen ihsin a sīp thei nak dingah, ra awla, amah thawi nan thukham kha pahbăl aw,” tiah a ti ih cupawl cu a kuat.

15:17^a Jos 18:25

15:18^b 1Sp 14:26; 2Sp 12:18; 2San 16:2

15:19^c 2San 16:7

20 Cun Ben-Hadad in Siangpahrang Asa cu a ngaithla ih, Israel khawpipawl do dingin a ralkap bawipawl a thlah. Anih in Ijon khua, Dan khua, Abel Beth Maakah khua le Kinneroth peng hmuahhmuah, Naftali ram hmuahhmuah thawn a do. 21 ^aCule hitin a si, Baasha in cuih thu a theih tikah, Ramah khaw dĭn cu a bang ih Tirzah ah a tāng ta. 22 ^bCule Siangpahrang Asa in Judah ram hmuahhmuah ah thuphuansuah a tuah, a tel lo zohman um loin, Baasha in khaw dĭnnak hrangih a hman mi Ramah ihta lungtopawl le thingpawl cu an thiar. Cule Siangpahrang Asa in cupawl thawn Benjamin ram ih Geba khua le Mizpah khua a dĭn.

15:21^a Jos 18:25

15:22^b Jos 11:3; 18:24; 2Sp 23:8; Jer 41:9

Asa Uknak Cemnetnak

23 A tāng lai mi Asa-ih cangvaihnak hmuahhmuah, a cahnak hmuahhmuah, a tuah mi hmuahhmuah le a rak dĭn mi khawpipawl hmuahhmuah cu Judah siangpahrangpawlih san siarnak cazual ah ngan an si lo maw? Asinan a tar hnuah a kepawl ah nathri a um. 24 ^aCule Asa cu a pupápawl hnenah a itthat ih, a pa David-ih Khawpi ah phum a si. Cun a aiah a fapa Jehoshafat a lal.

15:24^a 2San 17:1; Mat 1:8

Israel Siangpahrang Nadab

25 Jeroboam-ih fapa Nadab cu Judah siangpahrang Asa a lal kum hnihnak ah Israel tlunah siangpahrang ah a cang. 26 Cule anih in Jehovah-ih mithmuh ah thil ṭha lo a tuah ih, a paih lamzin, Israel sual a tuahternak a sualnak cu a zawh ve.

27 ^aCun Issakar sungza lakih mi pakhat Ahijah-ih fapa Baasha in amah cu a phiarthup. Cule Nadab le Israel miphun zate in Gibbethon khua an kulhkhŭm laiah, Filisṭia-mipawlih ta a si mi, Gibbethon khua ah amah cu Baasha in a that. 28 Judah siangpahrang Asa in kum thum a uknak ah, amah cu Baasha in a that ih, a aiah amah cu a lal.

15:27^a Jos 19:44

29 Cule hitin a si, anih cu siangpahrang a can tikah, Jeroboam sungza hmuahhmuah a that ṭheh. Jehovah in Shilon-mi a siahhlawh Ahijah hmangin a rak sim mi a kamsuakthu bangtukin amah a hlohralter ṭheh hlanlo, thaw a thaw mi pakhat hman anih in Jeroboam hrangah a zuah lo. 30 ^aCumi cu Jeroboam-ih sualpawl, Israel a sualternak le a thil sual tuah mi ruangah le Israel-ih Pathian Jehovah thinheng ko a căwkthawhnak thinhengnak ruangah a si.

15:30^a 2Sp 3:3

31 Cun a tāng lai mi Nadab-ih căngvaihnakpawl le a tuah mi hmuahhmuah cu Israel siangpahrangpawlih san siarnak cazual ah ngan an si lo maw? 32 Cule Asa le Israel siangpahrang Baasha karlakah an dam sung hmuahhmuah doawknak a um.

Israel Siangpahrang Baasha

33 ^aJudah siangpahrang Asa a lal kum thumnak ah, Ahijah-ih fapa Baasha cu Tirzah khua ah Israel miphun zate tlunih siangpahrang ah a cang, cule kum 24 sung a lal. 34 Anih cun Jehovah-ih mithmuh ah thil ṭha lo a tuah ih, Jeroboam-ih lamzin a zawh, cule Israel sual a tuahternak a sualnak kha a tuah ve.

15:33^a 1Sp 15:16; Sol 6:4

16

1 ^aHanani-ih fapa Jehu hnenah Baasha dokalhin Jehovah-ih kamsuakthu a thleng ih, 2 ^b“Leivut lak ihsin ka lo khaisâng ih, ka mi Israel tlunih uktu ah ka lo tuah, cule Jeroboam-ih lamzin na zawh, an sualpawl thawn thinheng ko in căwktho dingin ka mi Israel sual na tuahter. 3 ^cNgai hnik, Baasha cithlah le a sungza cithlah ka hlăwnhlo ding ih, na inn cu Nebat-ih fapa Jeroboam inn vekah ka cangter ding. 4 ^dZokhal Baasha-ih innsang khawpi sungih thi mi cu uicopawl in an ei ding ih, zokhal ramlak ih thi mi cu tlun zuang vatepawl in an ei ding,” tiah a ti.

16:1^a 2San 16:7; 19:2

16:2^b 1Sam 2:8

16:3^c 2Sp 9:9

16:4^d 1Sp 14:11

5 Cun a tāng lai mi Baasha-ih căngvaihnakpawl, a tuah mi le a cahnakpawl cu Israel siangpahrangpawlih san siarnak cazual ah ngan an si lo maw? 6 Cutin Baasha cu a pupápawl hnenah a itthat ih, Tirzah khua ah phum a si. Cun a aiah a fapa Elah a lal. 7 Cuihtlunah Jeroboam-ih sungza thawn bangawin, a kut hnaṭuan mi in Jehovah thinheng dingih căwkthoin a mithmuh ah thil ṭha lo a tuah mi hmuahhmuah ruangah le anmah a thah ruangah, Hanani-ih fapa profet Jehu hmangin Baasha le a innsungsang dokalhin Jehovah-ih kamsuakthu a thleng fawn.

Israel Siangpahrang Elah

8 Judah siangpahrang Asa in kum 26 a uk sungah Baasha-ih fapa Elah cu Israel tlunah siangpahrang ah a cang, Tirzah khua ah kum hnih a lal. 9 ^aCule a siahhlawh Zimri, a rang lêng a hrek uktu ralbawi in amah dokalhin thil ṭha lo khua a khâng, cu laiah amah cu Tirzah khua ah, Tirzah khua ih a inn kilkhawitu Arza-ih inn ah in le ri-in a um. 10 ^bCule Judah siangpahrang Asa a lal kum 27-nak ah, Zimri cu a lut ih a parah kut a thlak ih a that, cule a aiah a lal. 11 Cun hitin a si, lal a thawk tikah a laltokham ih a to veten Baasha sungkua zaten a that, a sungkhatpawl siseh, a rualpipawl siseh mipa pakhat hman a zuah lo. 12 Cuti vek cun profet Jehu hmangin Baasha dokalhih a rak sim mi Jehovah-ih kamsuakthu bangtukin Baasha sungkua zaten Zimri in a that ṭheh, 13 ^cziangahtile an milempawl hmangin Israel-ih Pathian Jehovah thinhengnak căwkthoin, an tuah sualnak le Israel an sualternak, Baasha-ih sualpawl zate le a fapa Elah-ih sualpawl ruangah a si.

16:9^a Thf 31:4-5

16:10^b 2Sp 9:31

16:13^c Dnp 32:21

14 Cule a tāng lai mi Elah-ih căngvaihnakpawl le a tuah mi hmuahhmuah cu Israel siangpahrangpawlih san siarnak cazual ah ngan an si lo maw?

Israel Siangpahrang Zimri

15 ^aJudah siangpahrang Asa a lal kum 27-nak ah Zimri cu Tirzah khua ah ni sarih sung a lal. Cule mipi in Filisṭia-mipawlih ta a si mi, Gibbethon doin ṭanhmun an khuar. 16 Cun ṭanhmun khuartu mipi in, “Zimri in thil ṭha lo khua a khâng ih siangpahrang khal a that,” ti an rak thei. Cule Israel miphun zate in ralkap hotu Omri cu, cumi ni ah ṭanhmun khuarnak hmun ah, Israel siangpahrang ah an tuah. 17 Cun Omri le a hnenih Israel miphun zate cu Gibbethon khua ihsin an so ih Tirzah khua an kulh. 18 Cule hitin a si, Zimri in khawpi lâk a si zo ti a hmuh tikah, siangpahrang inn ih kulh hnget ah a lut ih amai parah meisa in siangpahrang inn cu a ur ih a thi. 19 Jehovah-ih mithmuh ah thil ṭha lo tuahin a rak tuah mi sualpawl ruangah le Jeroboam-ih lamzin zawhin le Israel sual a tuahternak a sualpawl ruangah a si. 20 Cule a tāng lai mi Zimri-ih căngvaihnakpawl le phiarthupnak a tuah mipawl cu Israel siangpahrangpawlih san siarnak cazual ah ngan an si lo maw?

16:15^a 1Sp 15:27

Israel Siangpahrang Omri

21 Israel-mipawl cu hmun hnih ah an ṭhenaw: a hrek in siangpahrang ih tuah dingah Ginath-ih fapa Tibni an thlun ih, a hrek in Omri an thlun. 22 Asinan Omri thluntu milaipawl in Ginath-ih fapa Tibni thluntu milaipawl cu an neh. Cutin Tibni cu a thi ih Omri in a uk.

23 ^aJudah siangpahrang Asa a lal kum 31-nak ah Israel tlunah Omri cu siangpahrang ah a cang, cule amah cu kum 12 sung a lal. Cun amah cu Tirzah khua ah kum ruk sung a lal. 24 ^bCule anih in Shemer hnen ihsin ngun talent hnih in Samaria tlangmûal a lei, cun tlangmûal ah khawpi a dĭn ih a dĭn mi cu tlang neitu Shemer hmin suangin Samaria tiah a sak.

16:23^a Jos 12:24

16:24^b Mat 10:5

25 ^aOmri in Jehovah-ih mithmuh ah thil ṭha lo a tuah ih, a hlanih mi hmuahhmuah hnakih siava sinin a tuah. 26 ^bZiangahtile anih cu Nebat-ih fapa Jeroboam-ih lamzinpawl hmuahhmuah a zawh, Israel sual a tuahternak a sualnak in Israel-ih Pathian Jehovah thinheng dingin a căwktho. 27 A tāng lai mi Omri-ih căngvaihnakpawl le a lăngter mi a cahnakpawl cu Israel siangpahrangpawlih san siarnak cazual ah ngan an si lo maw? 28 Cule Omri cu a pupápawl hnenah a cawl ih, Samaria khua ah phum a si. Cun a aiawhah a fapa Ahab a lal.

16:25^a Dnp 4:25; Mik 6:16

16:26^b Dnp 32:21

Israel Siangpahrang Ahab

29 Judah siangpahrang Asa a lal kum 38-nak ah Omri-ih fapa Ahab cu Israel tlunah siangpahrang ah a cang. Cun Omri-ih fapa Ahab cu Samaria ah kum 22 sung a lal. 30 Cun Omri-ih fapa Ahab cun a hlanih mi hmuahhmuah hnakin Jehovah-ih mithmuh ah thil ṭha lo tamsin a tuah. 31 ^aCule hitin a si, Nebat-ih fapa Jeroboam-ih sualpawl ih feh cu a hrangih thil tenau vekin, Sidon-mipawlih siangpahrang Ethbaal-ih fanu Jezebel cu nupi ah a ṭhi, cule a feh ih Baal a rian ih a bia. 32 ^bCun Samaria ih a rak sak mi Baal temple sungah Baal biakṭheng pakhat a dâwl. 33 ^cCule Ahab cun Asherah a tuah. Ahab cun amai hlanih Israel siangpahrangpawl hmuahhmuah hnakin Israel-ih Pathian Jehovah thinheng dingih căwktho dingah a tuah nasasawn.

16:31^a Lai 2:11; 18:7; 2Sp 3:2

16:32^b Lai 6:28; 2Sp 10:27

16:33^c Lai 3:7; 2Sp 13:6

34 ^aAmai san laiah Bethel-mi, Hiel in Jeriko a dĭn. Nun-ih fapa Joshua hmangih a rak sim mi Jehovah-ih kamsuakthu bangtukin, a fatir Abiram hlohin khaw lungphum cu a phum ih, a fapa nautabik Segub hlohin khaw kăwtkapawl a dĭn.

16:34^a Jos 6:26

17

Kerith Phaikuam ah Elijah a Um

1 ^aGilead luahtu lakih Tishbi-mi Elijah in Ahab hnenah, “A hmaiih ka dīn ṭheu nak Israel-ih Pathian Jehovah a nun rori vekin, ka ṭawngkam lo cun hi kumpawl ah daifim simaw, ruah simaw a um lo ding,” tiah a ti.

17:1^a Lai 12:4; Luk 1:17; 4:25; Jam 5:17

2 Jehovah-ih kamsuakthu cu a hnenah, 3 ^a“Hi tawk ihsin suak awla, nisuahnak lamah feh aw, cule Jordan ih a luangthla mi Kerith tiva teah relh aw. 4 ^bCule hitin a si ding, tiva te ihta na in ding ih, cu tawkah nangmah lo câwm dingin tlangâkpawl ka rak fial zo,” tiin a thleng. 5 Cutin anih cu a feh ih Jehovah-ih kamsuakthu vekin a tuah, cule a feh ih Jordan ih a luangthla mi Kerith tiva te kiangah a va um. 6 ^cTlangâkpawl in zing lamah sang le sa an rak ken ih, sîm lamah sang le sa, cule tiva te ti cu a in. 7 Cun tawkfang a rei hnuah hitin a si, cuih ram ah ruah a um lo ruangah tiva te cu a kâng.

17:3^a Jer 36:19, 26

17:4^b Sem 8:7

17:6^c Suah 16:8

Elijah le Zarefath Nuhmeinu

8 Jehovah-ih kamsuakthu cu a hnenah, 9 ^a“Tho aw, Sidon ta a si mi Zarefath khua ah feh awla, cu tawkah va cêng aw. Ngai hnik, cu tawkah nangmah lo câwm dingin nuhmei pakhat thu ka pe zo,” tiah a ti. 10 ^bCule anih cu a tho ih Zarefath ah a feh. Khawpi kăwtsuah a thlen tikah, ngai hnik, cu tawkah nuhmeinu thing fâwm reroin a um. Cule anih in amah nu cu a ko ih, “Zangfahten ka in dingah no in tidai málten in ken aw,” tiah a ti. 11 Cule anih in cumi lâk a tum tikah amah nu cu a ko ih, “Zangfahten na kut sungih sang thêm fate kha i ken aw,” tiah a ti.

17:9^a Oba 1:20; Luk 4:26

17:10^b Sem 24:17; Joh 4:7

12 ^aCu tikah nuhmeinu in, “Jehovah na Pathian a nun rori vekin, sang ka nei lo, kuang sungih sangvut phut zate khat le thâwl sungih hriak málte lawng ka nei, cule ngai hnik, ka lut ih keimai hrang le ka fapa hrangih ka timtuah thei nak dingah thing málte ka fâwm rero a si, cumi cu kan ei ding ih, kan thi ding,” tiah a ti.

17:12^a 2Sp 4:2

13 Cule Elijah in cu nu hnenah, “Ṭih hlah, feh awla na sim vek cun tuah ko, asinan cumi ihsin ka hrangah sang per fate tuah hmaisa awla, ka hnenah rak keng aw, cule cuih hnuah nangmai hrang le na fapa hrangah tuah aw. 14 Ziangahtile Israel-ih Pathian Jehovah in hitin a ti, ‘Jehovah in leitlun ih ruah a surter ni a thlen hlanlo, kuang ih sangvut phut cu hmancem a si lo ding ih, hriak thâwl khal a kâng fawn lo ding,’ tiin,” tiah a ti.

15 Cule nuhmeinu cu a fehsuak ih Elijah-ih ṭawngkam vekin a tuah, cule amah nu le Elijah le cu nuih sungkua in ni tampi sung an ei. 16 Elijah hmangih Jehovah-ih kamsuakthu bangtukin, kuang ih sangvut phut cu hmancem a si lo ih, hriak thâwl khal a kâng lo.

Elijah in Nuhmeinuih Fapa a Nungtersal

17 Cun hi thilpawl hnuah hitin a si, inn neitu nu, nunaunuih fapa cu a dam lo. Cule a natnak a luar zet ih amah ah thaw a um nawn lo. 18 ^aCule cu nu cun Elijah hnenah, “Maw Pathian mi, nang le kei hi ziang pehtlaihawknak so kan neih? Ka mawhsualnak i mangsalter dingah le ka fapa that dingah ka hnenah na ra maw si?” tiah a ti.

17:18^a Luk 5:8

19 Cule Elijah in cu nuih hnenah, “Na fapa cu i pe aw,” tiah a ti. Cule Elijah in nuhmeinuih ṭāng ihta a fapa cu a lâk ih, amai umnak inn tlun pindan ah a cawi ih a ihkhun parah a hlum. 20 ^aCun Elijah cu Jehovah hnenah a au ih, “Maw Jehovah ka Pathian, a fapa thahsaknak in ka thlen inn nuhmeinuih par tiang khalah thil ṭha lo na thlen maw si?” tiah a ti. 21 ^bCule nauhak parah vei thum a băwk ih, Jehovah hnenah a au ih, “Maw Jehovah ka Pathian, ka lo dil a si, a hnenah himi nauhakih nunnak kirtersal aw,” tiah a ti. 22 Cun Jehovah in Elijah-ih aw a thei ih nauhakih nunnak cu a hnenah a kirsal, cule anih cu a nungsal. 23 ^cElijah in nauhak cu a la ih inn tlun pindan ihsin inn sungah a hruai, cule a nu hnenah a pe. Cule Elijah in, “Zoh hnik, na fapa a nung!” tiah a ti.

17:20^a 2Sp 4:33

17:21^b 2Sp 4:34; Apo 20:10

17:23^c Heb 11:35

24 ^aCun nunaunu in Elijah hnenah, “Atu-ah cun himi ihsin nang cu Pathian mi na si ih, na kă sungih Jehovah-ih kamsuakthu cu thutak a si ti ka thei,” tiah a ti.

17:24^a Sam 119:43; Joh 16:30; 17:17

18

Elijah in Ahab hnenah Thu a Phuang

1 ^aCule hitin a si, ni tampi hnuah Jehovah-ih kamsuakthu cu, a kum thumnak ah, Elijah hnenah a ra thleng ih, “Feh aw, Ahab hnenah va langawter awla, leilung ah ruah ka surter ding,” tiah a ti. 2 ^bElijah cu Ahab hnenih va langawter dingin a feh ih, Samaria ah a nasa tuk mi mangṭam a um.

18:1^a Dnp 28:1; Luk 4:25

18:2^b Pui 26:26

3 ^aCule Ahab in a inn hohatu a si mi Obadiah cu a ko. Obadiah cun nasa zetin Jehovah a ṭihzah, 4 ^bziangahtile hitin a si, Jezebel in Jehovah-ih profetpawl a thah laiah khan, Obadiah in profet 100 a hruai ih 50 bur in pûk ah a thup hai, cule sang le tidai in anmah cu a rak câwm a si. 5 ^cCun Ahab in Obadiah hnenah, “Sumhnám pakhat hman kan hlohlonak dingah, ram sungih tihna hmuahhmuah ah le tiva te hmuahhmuah ah feh aw, rangpawl le lākrangpawl nunnak hum dingah hrampi kan hmuh pangah,” tiah a ti. 6 Cule ram fángsuak dingin anmah lakah ram an ṭhenaw, Ahab cu amah tein zin pakhat ah a feh ih, Obadiah cu amah tein zin dang pakhat ah a feh.

18:3^a Neh 7:2

18:4^b 2Sp 9:7; Isa 16:3; Jer 26:24; Oba 1:14

18:5^c Sem 47:4; Jer 14:3

7 ^aObadiah a feh laiah, ngai hnik, Elijah in amah cu a táwng, cule Obadiah in amah cu a theithiam ih, a hmai leisin bihin a băwk, cule, “Nangmah na simaw ka bawi Elijah?” tiah a ti.

18:7^a 2Sp 1:8; Zek 13:4

8 Cun anih in, “Keimah ka si. Feh aw, ‘Zoh hnik, hinah Elijah a um,’ tiin na bawipa va sim aw,” tiah a let.

9 Cu tikah anih in, “Ziang thil sual so ka rak tuah ih, in that dingin na siahhlawh hi Ahab kut ih i pek ding? 10 Jehovah na Pathian a nun rori vekin, nangmah lo hawl dingin ka bawipa in mi a thlahlonak miphun le lalram a um lo, cule annih in, ‘Hi tawkah amah a um lo,’ an ti tikah nangmah lo hmu thei lo tu lalram le miphun cu sia a sămter. 11 Cule atu-ah nang in, ‘Feh aw, “Hi tawkah Elijah a um,” tiin na bawipa sim aw,’ tiah i ti! 12 ^aCule hitin a si ding, na hnen ihsin ka fehliam veten Jehovah Thlarau in ka theihlonak hmun ah a lo hruai ding, cutin feh tahratin Ahab ka va sim tikah, anih in a lo hmungah thei lo ding ih, anih in keimah i that ding. Asinan kei na siahhlawh cun ka no lai ihsin Jehovah ka rak ṭihzah. 13 Jezebel in Jehovah-ih profetpawl a thah laiah ziang ka tuah, Jehovah-ih profet 100 tla, 50 bur bur in pûk ah ziangtin ka thup hai ih, rawl le tidai thawn anmah ka cawm thu ka bawipa hnenah simthan a si lo maw si? 14 Atu-ah nang in, ‘Feh aw, “Hi tawkah Elijah a um,” tiin na bawipa va sim aw,’ i ti. Anih in i that ding a si si!” tiah a ti.

18:12^a 2Sp 2:16; Eze 3:14; Apo 8:39

15 Elijah in, “A hmaiih ka dīn ṭheu mi ralkap rualpawlih Jehovah a nun rori vekin, tuihsun ah a hnenah ka langawter rori ding a si,” tiah a ti.

16 Cutin Obadiah cu Ahab táwng dingin a feh ih, amah cu a sim, cule Ahab cu Elijah táwng dingah a feh. 17 ^aCun hitin a si, Ahab in Elijah a hmuh tikah, Ahab in a hnenah, “Nangmah hi na si lo maw, Israel buaitertu pa cu?” tiah a ti.

18:17^a Jos 7:25; 1Sp 21:20; Apo 16:20

18 Cule anih in, “Kei in Israel ka buaiter lo, nangmah le na paih sungza sawn nan si, Jehovah-ih thupekpawl nan thlauthla ih Baalpawl nan thlunnak ah hin. 19 ^aCuruangah atu-ah, Karmel tlang ah Israel miphun zate thlahin, Jezebel-ih cabuai ih ei ve tu Baal profet 450 le Asherah profet 400 cu ka hnenah fĭnkhawm aw,” tiah a let.

18:19^a Jos 19:26; 2Sp 9:22; 10:19

Elijah in Baal Profetpawl a Zuam

20 ^aAhab in Israel tefapawl zate hnenah mi a thlah ih Karmel tlang ah profetpawl a kokhawm. 21 ^bCule mipi zate hnenah Elijah a thleng ih, “Ruahnak phun hnih karlakah ziangtik tiang so nan vaivuan ding? Jehovah cu Pathian a si ahcun, amah thlun uh, asinan Baal a si sawn le amah thlun uh,” tiah a ti hai. Asinan mipi cun kam khat hman an sawn lo.

18:20^a 2Sp 2:25

18:21^b Jos 24:15; 2Sp 17:41; Sam 100:3; 118:27; 119:113; Mat 6:24

22 ^aCun Elijah in mipi hnenah, “Jehovah-ih profet cu keimah lawng ka tâng, asinan Baal profet cu mipa 450 an si. 23 Curuangah caw pa pahnih in pe hai sehla, annih in anmai hrangah caw pa pakhat hril hai seh, cumi cu sâtcip nêknêkin, thing parah ret hai seh, asinan a hnuaiah meisa ret hlah hai seh; cule kei in caw pa dang ka timtuah ve ding ih, thing parah ka ret ding, asinan a hnuaiah meisa ka ret lo ding. 24 ^bCun nannih in nan pathianpawlih hmin ko uhla, kei in Jehovah hmin ka ko ding, cule meisa hmangih thulettu Pathian cu, Pathian a si,” tiah a ti.

18:22^a Jer 2:8

18:24^b Suah 19:18; 1Sp 18:38; 1San 21:26

Cutin mipi zate in an sawn ih, “Cucu thil ṭha a si,” tiah an ti.

25 Cule Elijah in Baal profetpawl hnenah, “Nan hrangah caw pa pakhat hril uhla, cumi cu timtuah hmaisa uh, ziangahtile nannih cu nan tam. Nan pathian hmin ko uh, asinan a hnuaiah meisa ret hlah uh,” tiah a ti hai.

26 ^aCun anmah an pek mi caw pa cu an la ih an timtuah, cule zing lam ihsin sun tiang Baal hmin an ko, “Maw Baal, in thei aw!” tiah an ti. Asinan aw a um lo, zohman in an sawn lo. Cun an rak tuah mi biakṭheng kiangah cun an khir ciamco.

18:26^a Sam 115:4-5; Isa 41:26; Jer 10:5; 1Ko 8:4; 12:2

27 ^aCule hitin a si, sundir ah Elijah in anmah cu a zăwkzet hai ih, “Ringpin au hnik uh, ziangahtile anih cu pathian a si, anih cu ngunngaih zetin thu a ruat simaw, a man lo zet simaw, khual a tlawng lai simaw, a itthat lai simaw tla siin ṭhang a ṭul khal a si thei,” tiah a ti. 28 ^bCule aw ring zetin an au ih an ti kel vekin nâmpawl le feipawl in anmah parih thisen khawhsuak tiangin anmah le anmah an âtaw. 29 Cule hitin a si, sun hrek a liam ih zan lam raithawinak hlăn tikcu tiang thu an phuang rero. Asinan aw a um lo, zohman in an sawn lo, zohman in an ngaithla lo.

18:27^a Hab 2:19

18:28^b Pui 19:28; 2Sp 19:12; Jer 10:5

30 Cun Elijah in mipi zate hnenah, “Ka hnenah rak naih uh,” tiah a ti. Cutin mipi zate cun amah cu an ra naih. Cule anih in a siat zo mi Jehovah-ih biakṭheng cu a rĕm. 31 ^aCule, “Na hmin cu Israel a si ding,” tiih Jehovah-ih kamsuakthu dawngtu Jakob fapapawlih hnám zat in lungto hleihnih Elijah in a la. 32 ^bCuih lungtopawl thawn anih cun Jehovah hmin in biakṭheng pakhat a dâwl ih, biakṭheng kimvelin fang ci pung khat tlem ih kau in khur a tuah. 33 ^cCule a sangsángten thing a ret, caw pa cu a cán nawi ih, thing parah a ret, cule, “Ti bel pali in tidai khatter uhla, Meiur Thilhlăn parah le thing parah burh uh,” tiah a ti. 34 Cun anih in, “A vei hnihnak tuah uh,” a ti ih annih in a vei hnihnak an tuah. Cule anih in, “A vei thumnak tuah uh,” a ti ih annih in a vei thumnak an tuah. 35 Cule biakṭheng kimvel hmuahhmuah ah tidai a luang; cule khur khal tidai a khatter.

18:31^a Sem 32:28; 2Sp 17:34

18:32^b Kol 3:17

18:33^c Sem 22:9

36 ^aCule hitin a si, zan lam raithawinak hlăn tikcu ah profet Elijah cun a va naih ih, “Abraham, Isak le Israel-ih Pathian Jehovah, tuihsun ah nang cu Israel ram ah Pathian na si ti le kei hi na siahhlawh ka si ih, hipawl hmuahhmuah hi na kamsuakthu ih ti ka sizia tuihsun ah theihter aw. 37 ^bI ngai aw, Maw Jehovah, hi mipi in nang cu Jehovah Pathian na si ti an lo thei ih, na hnenah an thinlung na kirtersal ti an theihnak dingah, i ngai aw,” tiah a ti. 38 ^cCun Jehovah-ih meisa cu a tla ih Meiur Thilhlăn le thing le lungtopawl le leivutpawl cu a kangrál ṭheh ih, khur sungih a li mi tidai khal a kâng ṭheh. 39 ^dCule mipi zate in cumi an hmuh tikah an băwkkhup ih, “Jehovah, amah cu Pathian a si! Jehovah, amah cu Pathian a si!” tiah an ti.

18:36^a Sem 24:12; Suah 3:6; Mip 16:28; Jos 4:24; 1Sam 17:46; Mat 22:32

18:37^b Jos 4:24

18:38^c Suah 19:18; Pui 9:24; 2Sp 1:10; 1San 21:26; 2San 7:1

18:39^d 1Sp 18:24

40 ^aCule Elijah in an hnenah, “Baal profetpawl kha kai uh! An lakih mi pakhat hman luatter hlah uh!” tiah a ti. Cutin annih in cupawl cu an kai, cule Elijah in cupawl cu Kishon tiva teah a hruaithla hai ih, cu tawkah anmah cu a that hai.

18:40^a Suah 22:20; Dnp 17:12; Lai 4:7; 2Sp 10:25

Elijah in Ruah Sur ding a Phuang

41 Elijah in Ahab hnenah, “Fehso aw, ei awla in aw, ziangahtile ruah tampi thâwm a um a si,” tiah a ti. 42 ^aCutin Ahab cu ei le in dingah a fehso. Cule Elijah cu Karmel tlang zimah a kai, cun lei ah a kûn ih, a khuk karlakah a hmai a ret. 43 Cule a siahhlawh hnenah, “Atu-ah fehso aw, tifinriat lam zoh hnik,” tiah a ti.

18:42^a 1Sam 12:17; Jam 5:18

Cun anih cu a fehso ih a zoh, cule, “Zianghman a um lo,” tiah a ti. “Fehsal aw,” tiin vei sarih a ti.

44 ^aCun hitin a si, a vei sarihnak ah, “Tifinriat ihsin a kaiso mi milai kuttum tia tlukih fate khawdur a um,” tiah a ti.

18:44^a Luk 12:54

Cule Elijah in, “Fehso aw, Ahab hnenah, ‘Na rang lêng timtuah awla ruahpi in a lo kham hlanah suk aw,’ tiin va sim aw,” tiah a ti.

45 ^aCule cumi laiah hitin a si, van cu khawdur le thli thawn a dum ah a cang ih, ruahpi tak zet a sur. Cutin Ahab cu a rang lêng a to ih, Jezreel ah a feh. 46 ^bCun Jehovah-ih kut cu Elijah tlunah a thleng, cule anih cun a tai a ṭawn ih, Ahab hmaiah Jezreel khaw luhnak ah a tlân.

18:45^a Jos 17:16; 1Sam 29:1; Hos 1:4

18:46^b Lai 3:10; 1Sam 11:6; 2Sp 4:29

19

Horeb tlang ah Elijah

1 ^aAhab in Elijah ih tuah mi zate le ralnâm in profetpawl zate a thahdān cu Jezebel a sim. 2 ^bCun Jezebel in Elijah hnenah palai pakhat a thlah ih, “Na nunnak hi thaisun atu tikcu ah anmah lakih mi pakhat ih nunnak vekin ka tuah lo a si ahcun, pathianpawl in cuti vek cun in tuah hai seh, cuhnakih nasa khalin,” tiah a ti. 3 ^cCule Elijah in cumi a hmuh tikah a tho ih a nunnak hrangah a tlân, cule Judah ta a si mi Beersheba ah a feh ih, cu tawkah a siahhlawh cu a tān. 4 ^dAmah tu cu ni khat feh ramṭhing ah a feh, cule a thleng ih juniper thing hnuaiah a to. Cun thi dingin thla a cam, “Tawk thlang seh! Atu-ah Jehovah, ka nunnak la aw, ziangahtile kei cu ka pupápawl hnakin ka ṭha cuangce lo!” tiah a ti.

19:1^a Suah 22:20

19:2^b Rut 1:17; 1Sp 20:10; Jer 20:10

19:3^c Sem 19:17; 31:21; Jos 19:2

19:4^d Mip 11:15; Job 6:9; Sam 69:19; Jer 20:18; Jon 4:8

5 ^aCun anih cu juniper thing hnuaiah a zau ih, a itthat, ngai hnik, vancungmi in amah cu a run thâm ih a hnenah, “Tho awla ei aw,” tiah a ti. 6 Cun a zoh ih, ngai hnik, a lu kiangah meiling parih kăn mi sang per le ti thâwl pakhat a rak um. Cutin a ei ih a in, cule a zau lala. 7 Cule Jehovah-ih vancungmi cu a vei hnihnak a rasal ih, amah cu a thâm, “Tho awla ei aw, ziangruangahtile na hrangah na khualtlawnnak hi a nasa tuk,” tiah a ti. 8 ^bCutin anih cu a tho ih, a ei ih a in, cule cuih rawlih thazang thawn Pathian tlang, Horeb tiangih hla ni 40 le zan 40 sung a feh.

19:5^a Sem 16:7; 28:11

19:8^b Suah 3:1; 24:18; Mat 4:2

9 ^aCule cu tawkih pûk sungah a feh ih, cuih hmun ah zan a riak, cule ngai hnik, a hnenah Jehovah-ih kamsuakthu a thleng ih a hnenah, “Hi tawkah ziang na tuah, Elijah?” tiah a ti.

19:9^a Dnp 9:9; Mat 4:2

10 ^aCu tikah anih in, “Ralkap rualpawlih Pathian Jehovah hrangah ṭhahnem ka rak ngai zet, ziangahtile Israel tefapawl in na thukham an thlauthla, na biakṭhengpawl an ṭhiatbăl ih, ralnâm in na profetpawl an that. Keimah lawng ka tāng ih, ka nunnak la dingin an hawl,” tiah a ti.

19:10^a Mip 25:13; Dnp 31:16; Jer 5:11; Rom 11:3

11 ^aCun anih in, “Fehsuak awla, tlang parah Jehovah hmaiah va dīng aw,” tiah a ti. Cule ngai hnik, Jehovah cu a fehtlăng ih, thlipi maktak le cak in tlangpawl a kakter, cule Jehovah hmaiah lungpipawl an kuaidarh, asinan Jehovah cu thli ah a um lo. Cule thli hnuah linghnîn a um, asinan linghnîn ah Jehovah a um lo. 12 ^bCule linghnîn hnuah meisa a um, asinan meisa ah Jehovah a um lo. Cule meisa hnuah aw dam ziaizo a um.

19:11^a Suah 33:19; 34:2; 2Sp 2:1; Nah 1:6

19:12^b Suah 3:2; Job 4:16; Zek 4:6; 2Ko 12:9

13 ^aCule hitin a si, Elijah in cumi a theih tikah a puan in a hmai a tuam ih a suak, cule pûk luhkâ ah a ding. Ngai hnik, a hnenah aw a thleng ih, “Hi tawkah ziang na tuah, Elijah?” tiah a ti.

19:13^a Suah 3:6

14 ^aCu tikah anih in, “Ralkap rualpawlih Pathian Jehovah hrangah ṭhahnem ka rak ngai zet, ziangruangahtile Israel tefapawl in na thukham an thlauthla, na biakṭhengpawl an siatsuah ih, ralnâm in na profetpawl an that. Keimah lawng hi ka tāng ih ka nunnak la dingin an hawl,” tiah a ti.

19:14^a Rom 11:3

15 ^aCun Jehovah in a hnenah, “Feh aw, Damaskas Ramṭhing lamah kir aw, cule na thlen tikah Siria siangpahrang dingah Hazael kha hriak thih aw. 16 ^bNimshi-ih fapa Jehu khal Israel tlunih siangpahrang dingah hriak na thih pei. Na aiih profet dingah Abel Meholah khawmi Shafat-ih fapa Elisha khal hriak na thih pei. 17 ^cHitin a si ding, zokhal Hazael-ih ralnâm ihsin a luattu cu Jehu in a that ding ih, zokhal Jehu-ih ralnâm ihsin a luattu cu Elisha in a that ding. 18 ^dSikhalsehla Israel ram ah Baal hmaiih khukbil hrih lo mi le kâ in amah hnam hrih lo mi zaten 7000 ka ret-him a si,” tiah a ti.

19:15^a 2Sp 8:7-15

19:16^b 2Sp 9:6; Luk 4:27

19:17^c 2Sp 8:12; Hos 6:5; Amo 1:4

19:18^d Hos 13:2; Rom 11:4

Elisha cu Elijah Siahhlawh ah a Cang

19 ^aCu tawk ihsin Elijah cu a păwk ih Shafat-ih fapa Elisha a va hmu, anih cu lei a rak let rero, a hmaiah caw cang hâl hleihnih a um, amah cu a hleihnihnak ah cun a um. Cun Elijah in amah cu a hei lăn ih a parah a puan a sēp. 20 ^bCule anih cun a caw cang pawl a tân ih, Elijah dungah a tlân ih, “Zangfahten ka pa le ka nu va hnam ta ning, cule ka lo thlun ding,” tiah a ti.

19:19^a Sem 41:42; 2Sp 2:8, 14

19:20^b Luk 9:61

Cule anih in a hnenah, “Va tlungkir aw, ziangahtile na hnenah ziang so ka rak tuah ih?” tiah a ti.

21 ^aCutin Elisha cu a hnen ihsin a va kirsal ih caw cang hâl khat a la ih a that hai, cule caw cang pawlih hmanrua hmangin an sa cu a suang ih, cumi cu mipi a pe, cule an ei. Cun anih cu a tho ih Elijah a thlun, cule a siahhlawh ah a cang.

19:21^a 1Sam 6:14

20

Israel le Siria Doawknak

1 Siria siangpahrang Ben-Hadad in a hnenih siangpahrang 32 le rangpawl le rang lêngpawl thawn ralkap zaten a fĭnkhawm. Cule a va so ih Samaria khua cu a kulh, cule cuih khua cu a do. 2 Cun khawpi sungih Israel siangpahrang Ahab hnenah palaipawl a thlah ih a hnenah, “Ben-Hahad in hitin a ti, 3 ‘Na sui le na ngun pawl cu ka ta an si, na nupi duhnungbik bik pawl le na fātepawl khal ka ta an si,’ a ti,” tiah a ti.

4 Cule Israel siangpahrang in a sawn ih, “Ka bawipa, Maw siangpahrang, na sim bangin, keimah le ka neih mi zate cu na ta an si,” tiah a ti.

5 Cule palaipawl cu an kirsal ih, “Ben-Hadad in hitin a ti, ‘Ka hnenah “Na sui le na ngun, na nupipawl le na fātepawl na thlah ding a si,” tiin mi ka thlah, 6 asinan thaisun tu vek tikcu ah na hnenah ka siahhlawhpawl ka thlah hai ding ih, annih in na inn le na siahhlawhpawlih innpawl an hawl ding. Cule hitin a si ding, na mit latu pauhpauh cu an kut ah an ret ding ih, cumi cu an la ding,’ tiin,” tiah an ti.

7 ^aCun Israel siangpahrang in a ram sungih upapawl cu a ko ih, “Zangfahten hminsin uhla, hi pa in ziangtin buainak tuah a tum ti hmu uh, ziangahtile anih cu ka hnenah ka nupipawl, ka fātepawl, ka sui le ka ngun hrangah mi a thlah ih, amah cu ka rak êl lo,” tiah a ti.

20:7^a 2Sp 5:7

8 Cule upapawl zate le mipi zate in a hnenah, “Ngaithla hlah aw, rem tipi fawn hlah,” tiah an ti.

9 Curuangah Ben-Hadad-ih palaipawl hnenah, “Ka bawi siangpahrang hnenah, ‘Na siahhlawh hnenih a hmaisa ih na ngĕn mi zaten ka tuah ding, asinan himi cu ka tuah thei lo a ti,’ tiin sim uh,” tiah a ti.

Cule palaipawl cu an fehsuak ih a hnenah thu an kengsal.

10 ^aCun Ben-Hadad in a hnenah mi a thlah ih, “Samaria khua ih leivut in ka dungthluntupawl hmuahhmuah ih ṭhuam khat ciar hman a daih a si ahcun, pathianpawl in an titiin in ti hai seh, cuhnakih nasa khalin,” tiah a ti.

20:10^a 1Sp 19:2

11 ^aCule Israel siangpahrang in a sawn ih, “ ‘Ralthuam hruhtu cu hlîttu vekin tluangkhâwng hlah seh,’ tiin amah sim uh,” tiah a ti.

20:11^a Thf 27:1; Jer 9:23; Amo 2:14

12 Cule hitin a si, Ben-Hadad in himi thu a theih tikah, amah le siangpahrangpawl cu an riahbûk ih an in rero laiah, a siahhlawhpawl hnenah, “Tiar cia uh,” tiah a ti hai. Cule khawpi do dingah tiar cia in an um.

13 ^aNgai hnik, profet pakhat in Israel siangpahrang Ahab a naih ih, “Jehovah in hitin a ti, ‘Hih mipi tam ngaingai hi na hmu maw? Ngai hnik, cumi cu tuihsun ah na kut ah ka lo pe ding ih, kei hi Jehovah ka si ti na thei ding,’ a ti,” tiah a ti.

20:13^a Suah 6:7; 1Sp 20:28

14 ^aCun Ahab in, “Zo hmangin?” tiah a ti.

20:14^a Lai 1:1

Cule anih in, “Jehovah in, ‘Ramṭhenpawl uktu minopawl hmangin,’ a ti,” tiah a ti.

Cun anih in, “Zo in ral dodān a tawlrel ding” tiah a ti.

Cule anih in, “Nangmah in,” tiah a ti.

15 Cun amah in ramṭhenpawl hotu minopawl a khawm ih mi 232 an si, cule anmai hnuah mipi zate le Israel tefapawl zaten a khawm, mi 7000 an si. 16 Cutin sundir laifangah an fehsuak. Cu laiah Ben-Hadad le amah bawmtu siangpahrang 32 cu an bûk ah an rak ri. 17 A hmaisabikah ramṭhenpawl uktu minopawl an fehsuak. Cule Ben-Hadad in thlingthlatu a thlah ih annih in a hnenah, “Samaria ihsin mipapawl an ra thleng rero!” tiah an sim.

18 Cule anih in, “Daihnak hrangih ra an si le a nungin anmah kai uh. Cun doawknak hrangih ra an si khalle a nungin kai uh,” tiah a ti.

19 Cun ramṭhenpawl uktu minopawl cu anmah thluntu ralkappawl thawn khawpi ihsin an fehsuak. 20 Cule pakhat cio in anmai tāwng fingfing an that, cutin Siria-mipawl cu an tlânsuak ih, Israel-mipawl in anmah an dawi. Cun Siria siangpahrang Ben-Hadad cu a rang parah rang ralkap thawn a tlânsuak. 21 Cun Israel siangpahrang cu a fehsuak ih rangpawl le rang lêngpawl cu a do, cule Siria-mipawl cu thahnak nasa zetin a that.

Israel le Siria Doawknak Dang

22 ^aCule Israel siangpahrang hnenah profet a ra thleng ih a hnenah, “Feh aw, cakawter aw, hminsin awla, na tuah ding mi ruat aw, ziangahtile ^bkum thawhtirah nangmah do dingin Siria siangpahrang a hung so ding,” tiah a ti.

20:22^a Lai 6:8; 2Sam 11:1

20:22^b kum thawhtirah: 2Sam 11:1 zoh aw.

23 ^aSiria siangpahrangih siahhlawhpawl in a hnenah, “An pathianpawl cu tlang pathian an si. Curuangah a si annih cu kanmah hnakih an cahsawn, asinan anmah cu phairawn ih kan do asile, anmah hnakin kan caksawn tengteng ding. 24 Cutin himi thil hi tuah aw: siangpahrangpawl hi an dinhmun cio ihsin bāngter hai awla, anmai hmunpawl ah ralbawipawl ret aw, 25 cule na hloh zo mi ralkap vekin, rang hrangah rang, rang lêng hrangah rang lêng tiin, ralkap na khawm pei. Cun anmah cu phairawn ah kan do ding ih, anmah hnakin kan caksawn tengteng ding,” tiah an ti. Cule an aw a ngai ih cuti cun a tuah.

20:23^a Isa 36:20; Rom 1:21-23

26 ^aCun hitin a si, ^bkum thawhtirah Ben-Hadad in Siria-mipawl a khawm ih Israel do dingin Afek ah a hung so. 27 ^cCule Israel tefapawl cu fĭnkhawm an si, cule an ṭul-hai mi pek an si ih, anmah do dingin an feh. Cule Siria-mipawl cu ramlak an luahkhah ṭheh laiah, Israel tefapawl cu me rual fāte rual hnih vekin, an hmaiah ṭanhmun an khuar.

20:26^a Jos 13:4; 1Sam 4:1; 2Sp 13:17

20:26^b kum thawhtirah: 2Sam 11:1 zoh aw.

20:27^c 1Sam 13:6

28 ^aCun Pathian mi cun a va naih ih Israel siangpahrang hnenah a ṭawng, “Jehovah in hitin a ti, ‘Siria-mipawl in, “Jehovah cu tlangpawlih Pathian a si, phaikuampawlih Pathian cu a si lo,” tiah an ti, curuangah hi mipi tam zet zate hi na kut ah ka lo pe ding, cule nannih in keimah cu Jehovah ka si ti nan thei ding,’ tiin Jehovah in a ti,” tiah a ti.

20:28^a Suah 6:7; 1Sp 20:13

29 Cule annih cu pakhat le pakhat raldenawin ni sarih sung ṭanhmun an khuar. Cun hitin a si, a ni sarihnak ah doawknak an thawk ih, Israel tefapawl in ni khat sungah lei ralkap tingkhat an that. 30 ^aAsinan a dang cu Afek khawpi sungah an tlân, cun a tāng mi mipa 27000 parah khaw kulh a tlu. Cule Ben-Hadad cu a tlân ih khawpi sungih siangpahrang inn sung, pindan sungta ah a lut.

20:30^a 2Sp 9:2; 2San 18:24

31 ^aCun a siahhlawhpawl in Ben-Hadad hnenah, “Atu-ah zoh hnik, Israel sungza siangpahrangpawl cu zahngainak nei siangpahrang an si ti kan thei. Zangfahten, kan tâipawl vĕlin buri hnipuan hruhin le kan lu ah hri vĕlin, Israel siangpahrang hnenah feh uhsi, anih in na nunnak a zuah mahna!” tiah an ti. 32 Cutin an tâipawl vĕlin buri hnipuan hruhin le an lu ah hripawl vĕlin, Israel siangpahrang hnenah an thleng ih, “Na siahhlawh Ben-Hadad in, ‘Zangfahten i nungter hram seh,’ a ti,” tiah an sim.

20:31^a Sem 37:34; Job 41:3

Cule anih in, “Amah cu a nung lai maw si? Anih cu ka unaupa a si,” tiah a ti.

33 Cule mipapawl cu a hnen ihsin zahngainak hminsinnak ziang tal a suak pei maw tiin naih zetin an thlir cuahco, cule himi ṭawngkam hi zamrang zetin an kaingah ih, “Na unaupa Ben-Hadad,” tiah an ti.

Cule anih in, “Feh uh, amah cu run hruai uh,” tiah a ti. Cun Ben-Hadad cu a hnenah a ra suak ih, anih in amah cu rang lêng ah a lutter.

34 ^aCule Ben-Hadad in a hnenah, “Ka pa in na pa hnen ihta a lâk mi khawpipawl ka lo pesal ding ih, ka pa in Samaria ih a rak tuah vekin, Damaskas ah nangmah hrangah zinpi na dĭn ve pei,” tiah a ti.

20:34^a Sem 10:22; Suah 23:32; 2Sam 8:6

Cun Ahab in, “Himi thukham thawn ka lo thlah ding,” tiah a ti. Cutin amah thawn thukham a tuah ih amah cu a thlah.

Profet in Ahab Thih ding a Phuang

35 ^aCule profetpawlih fapapawl lakih pakhat in Jehovah-ih kamsuakthu hmangin a innhnen mi pakhat hnenah, “Zangfahten i vaw aw,” tiah a ti. Cule cu pa cun amah vuak ding a êl. 36 Cun anih in a hnenah, “Jehovah-ih thu na lun lo ruangah, ngai hnik, ka hnen ihsin na suah veten kiosa in a lo dehthat ding,” tiah a ti. Cule amah a fehsan veten, kiosa in amah cu a táwng ih a dehthat.

20:35^a 2Sp 2:3; Amo 7:14

37 Cule a dang mi pakhat a táwng ih, “Zangfahten i vaw aw,” tiah a ti. Cu pa cun a vua ih hma a baih. 38 Cun profet cu a fehsuak ih lamzin kapin siangpahrang a hngak, cule a mit tlun cal ṭawnnak in a mit tlun tluan ṭawnawin a danglamawter. 39 ^aCutin siangpahrang a ra thlen tikah, siangpahrang hnenah a au ih, “Na siahhlawh cu doawknak lakah a fehsuak ih, ngai hnik, mipa pakhat a ra ih ka hnenah mipa pakhat a rak hruai, cule, ‘Hi pa hi kil aw, ziangti zawng khalin amah a hloh asile, a nunnak aiah na nunnak a si ding, cu lo asile ngun talent khat na pe ding,’ tiah i ti. 40 ^bKhat lam khat lamih na siahhlawh a buai laiah, anih cu a rak hlo,” tiah a ti.

20:39^a Jos 2:14

20:40^b 2Sam 12:5

Cun Israel siangpahrang in a hnenah, “Na dāntatnak vekin si seh, cumi cu nangmah in thutluknak na tuah zo a si,” tiah a ti.

41 Cule a mit tlun ihsin a tuamnak cu zamrang zetin a phawih, cule Israel siangpahrang in profetpawl lakih pakhat a si ti a theithiam. 42 ^aCun anih in a hnenah, “Jehovah in hitin a ti, ‘Siatrál verver dingih ka ruah mi pa pakhat cu na kut ihsin na suahter ruangah, a nunnak aiah na nunnak a feh ding ih, a mipawl aiah na mipawl,’ tiin,” tiah a ti. 43 Cule Israel siangpahrang cu ngui zet le lunghmui lo zetin a inn ah a tin ih, Samaria a thleng.

20:42^a 2Sam 12:7; 1Sp 22:31-37; Jer 48:10

21

Naboth-ih Sabit Hmuan

1 ^aHih thilpawl hnuah hitin a si, Jezreel-mi, Naboth in sabit hmuan a nei, cucu Jezreel khua, Samaria siangpahrang Ahab inn kiangah a si. 2 Ahab in Naboth hnenah, “Na sabit hmuan i pe awla cumi cu hanghnah hangrah hmuan hrangah ka nei ding, ziangruangahtile cumi cu a nai, ka inn kiang a si, cule cumi hrangah cuhnakih ṭhasawn sabit hmuan dang ka lo pe ding. Asilole na hrangih ṭhasawn dingih na ruah asile, a man tawk cu paisa in ka lo pe ding,” tiah a ti.

21:1^a 1Sam 29:1; 2Sp 9:21; 10:1

3 ^aAsinan Naboth in Ahab hnenah, “Ka pupápawlih ro na hnenih lo pek ding cu Jehovah in i kham a si!” tiah a ti.

21:3^a Pui 25:23

4 ^aAhab cu Jezreel-mi Naboth in a hnenih a rak sim mi ṭawngkam ruangah ngui zet le lunghmui lo zetin a inn ah a tin, ziangahtile Naboth in, “Ka pupápawlih ro cu ka lo pe lo ding,” tiah a ti. Cule Ahab cu a ihkhun parah a it, khat lam a hawi ih, rawl a ei lo. 5 Cun a nupi Jezebel a ra thleng ih, a hnenah, “Ziangruangah so na nun a ngui ih rawl na ei lo?” tiah a ti.

21:4^a 1Sam 28:23

6 Anih in a hnenah, “Ziangruangahtile Jezreel-mi Naboth ka bia ih a hnenah, ‘Na sabit hmuan hi paisa in i leiter aw, culole na duh sawn ahcun cumi aiah sabit hmuan dang ka lo pe ding,’ tiah ka ti. Cule anih in, ‘Ka sabit hmuan ka lo pe lo ding,’ i ti,” tiah a sawn.

7 ^aCu tikah a nupi Jezebel in a hnenah, “Atu nang cu Israel lalram tlunih thuneitu na si lo maw? Tho aw, rawl ei awla na thinlung cu nuam zetin um seh, Jezreel-mi, Naboth-ih sabit hmuan cu ka lo pe ding,” tiah a ti.

21:7^a 1Sam 8:14

8 ^aJezebel cun Ahab hmin in ca a ngan ih, a tacik a khĕn, cule capawl cu khaw sungih Naboth thawi a cêng mi upapawl le mizahumpawl hnenah a kuat. 9 A cakuatpawl sungah, “Rawl ulh thu phuang uhla, Naboth cu mipi lakah upatnak ropi thawn toter uh. 10 ^bCule, ‘Pathian le siangpahrang na thangsiat a si,’ tiih thutheihpitu dingah mihlothlau pahnih a hmaiah toter uh. Cun amah cu lasuak uhla dengthat uh,” tiah a ngan.

21:8^a Sem 38:18; 1Sp 20:7

21:10^b Suah 22:28; Pui 24:15-16; Dnp 13:13; Apo 6:11

11 Cutin a khaw mipapawl, a khaw luahtu upapawl le mizahumpawl cun an hnenih Jezebel ih a kuat mi, cakuatpawl sungih ngan mi vekin an tuah. 12 ^aRawl ulh thu an phuang ih, Naboth cu mipi lakah upatnak ropi thawn an toter. 13 ^bCule mihlothlau mi pahnih an ra ih a hmaiah an to, cuih pa pahnih cun amah dokalhin thu an theihter, Naboth an dokalh ih, mipi hmaiah, “Naboth in Pathian le siangpahrang a thangsiat a si!” tiah an ti. Cun amah cu khawpi lengah an hruai ih lungto in an deng, cule a thi. 14 Cun Jezebel hnenah, “Naboth cu den a si ih a thi zo,” tiah mi an thlah.

21:12^a Isa 58:4

21:13^b Pui 24:16

15 ^aCule hitin a si, Naboth cu den a si ih a thi zo ti Jezebel in a theih tikah, Jezebel in Ahab hnenah, “Tho aw, Jezreel-mi, Naboth-ih sabit hmuan, paisa ih a lo leiter sian lo mi kha va nei thlang aw, ziangahtile anih cu a nung nawn lo, a thi zo,” tiah a ti. 16 Cule hitin a si, Naboth a thi zo ti Ahab in a theih tikah, Ahab cu a tho ih Jezreel-mi, Naboth-ih sabit hmuan nei dingin a feh.

21:15^a 1Sam 8:14

Elijah in Ahab le Jezebel hnenah Thucah a Phuang

17 Cun Tishbi-mi, Elijah hnenah Jehovah-ih kamsuakthu a thleng ih, 18 “Tho aw, Samaria ih um, Israel siangpahrang Ahab táwng dingin feh aw. Ngai hnik, amah cu Naboth-ih sabit hmuan ah a um, cumi va nei dingin a suk. 19 ^aA hnenah, ‘Jehovah in hitin a ti, “Na that ih, na neihsak fawn a si lo maw?” tiin,’ na ti pei, cule a hnenah, ‘Jehovah in hitin a ti, “Uicopawl in Naboth-ih thisen an liahnak hmun ah, na thisen, nangmai ta rori cu uicopawl in an liak ding a si,” tiin,’ tiah na ti pei,” tiah a ti.

21:19^a 2Sp 9:26; Sam 9:12; 68:23

20 ^aCule Ahab in Elijah hnenah, “I táwngngah riai maw, Maw ka ral pa?” tiah a ti.

21:20^a 2Sp 17:17; Rom 7:14

Cule anih in, “Ka lo táwngngah riaiaw, ziangruangahtile nang cun Jehovah mithmuh ih thil ṭha lo tuah dingah nangmah le nangmah na rak zuaraw, 21 ^a‘Ngai hnik, na parah thil ṭha lo ka thlen ding. Na cithlah ka lahlo ding ih, Ahab ihsin ṭemṭawn mi mipa siseh, miluat siseh, Israel ram ah ka sâtcat ding. 22 Nang in ka thin i hengter ih Israel na sualter ruangah, na sungza cu Nebat-ih fapa Jeroboam-ih sungza vekin le Ahijah fapa Baasha-ih sungza vekin ka tuah ding,’ tiah a ti. 23 ^bCule Jezebel thuhla khalah Jehovah in, ‘Jezreel khaw kulh kiangah uicopawl in Jezebel an ei ding,’ tiah a ti. 24 ^cZokhal Ahab-ih sungkhat, khaw sungih thi cu uicopawl in an ei ding ih, zokhal ramlak ih thi cu tlun zuang vatepawl in an ei ding,” tiah a ti.

21:21^a 1Sam 25:22; 1Sp 14:10; 2Sp 10:7

21:23^b 2Sp 9:10, 34-36

21:24^c Dnp 28:26; 1Sp 16:4

25 Asinan Jehovah-ih mithmuh ah sualralnak tuah dingin, Ahab vekih mah le mah zuaraw mi zohman an um lo, ziangruangahtile a nupi Jezebel in amah cu a căwktho. 26 ^aCule anih cun Jehovah in Israel tefapawl hmaiih a hnawhsuak mi Amor-mipawlih thil ti mi hmuahhmuah vekin, milempawl thlunin fihnungza zetin a nung.

21:26^a Sem 15:16

27 ^aCule hitin a si, Ahab in cuih ṭawngkampawl a theih tikah, a hnipuan a thlek ih a taksaruangpum ah buri a sĭn, cule rawl a ul ih buri puan sungah a zau, cule ralring zetin a feh. 28 Cule Tishbi-mi, Elijah hnenah Jehovah-ih kamsuakthu a thleng ih, 29 ^b“Ka hmaiih Ahab a tăngdawrawkterzia hi zoh hnik! Anih cu ka hmaiih a tăngdawrawkter ruangah amai san sungah cun thil ṭha lo ka thlen lo ding. A fapaih san sungah a sungkua parah thil ṭha lo ka thlen ding,” tiah a ti.

21:27^a Sem 37:34; 2Sam 12:16; Jer 4:8

21:29^b Suah 32:14; 2Sp 9:25; 22:20

22

Mikaiah in Ahab Ralrinnak a Pe

1 Siria le Israel karlakah ral um loin kum thum a liam. 2 Cule hitin a si, a kum thumnak ah Judah siangpahrang Jehoshafat cu Israel siangpahrang leng dingin a suk. 3 ^aCule Israel siangpahrang in a siahhlawhpawl hnenah, “Ramoth Gilead khua hi kanmai ta a si ti cingin, Siria siangpahrang kut ihsin cumi lâk ding cu kan ṭhukṭhun ti nan thei maw?” tiah a ti. 4 ^bCun anih in Jehoshafat hnenah, “Ramoth Gilead khua do dingin ka zawngah na feh pei maw?” tiah a ti.

22:3^a Dnp 4:43

22:4^b 2Sp 3:7

Jehoshafat in Israel siangpahrang hnenah, “Nang le kei cu kan bangaw ih, ka mipawl khal na mipawl an si, ka rangpawl cu na rangpawl tluk an si,” tiah a ti. 5 ^aCuihtlunah Jehoshafat in Israel siangpahrang hnenah, “Zangfahten, tuihsun ah Jehovah-ih kamsuakthu sut aw,” tiah a ti.

22:5^a 2Sp 3:11; Sam 32:8

6 ^aCun Israel siangpahrang in profetpawl a kokhawm hai ih, mipa 400 hrawng an si, cule an hnenah, “Ramoth Gilead do dingin ka feh pei maw, ka sīp ding saw?” tiah a ti.

22:6^a 1Sp 18:19

Cule annih in, “Fehso uh, ziangahtile Bawipa in siangpahrang kut ah annih cu a pe ding,” tiah an ti.

7 ^aCule Jehoshafat in, “Amah kan suh thei nak dingah, hi tawkah Jehovah-ih profet pakhat tal an um hrih lai lo maw si?” tiah a ti.

22:7^a 2Sp 3:11

8 ^aIsrael siangpahrang in Jehoshafat hnenah, “Amah hmangih Jehovah kan suh thei nak ding mi pakhat cu a um lai, Imla-ih fapa Mikaiah a si, asinan anih cu ka hua, ziangruangahtile ka thuhla ah a ṭha lam a phuang lo, a se lam lawnglawng a phuang ṭheu,” tiah a ti.

22:8^a Isa 5:20; Jer 23:17; Amo 5:10

Cule Jehoshafat in, “Siangpahrang in cuvek thilpawl sim hlah seh!” tiah a ti.

9 Cu tikah Israel siangpahrang cun bawi pakhat a ko ih, “Imla-ih fapa Mikaiah cu zamrangten va hruai aw!” tiah a ti.

10 ^aIsrael siangpahrang le Judah siangpahrang Jehoshafat cu an kâwrfual hruhin an laltokham par veve ah an to, Samaria kăwtsuah ih hruih hmun ah; cule profetpawl zaten an hmaiah thu an phuang. 11 ^bCule Kenaanah-ih fapa Zedekiah in amah hrangah thir kipawl a tuah, cule anih in, “Jehovah in hitin a ti, ‘Hipawl thawn Siria-mipawl an siatrál hlanlo na khîk hai ding a si,’ tiin,” tiah a ti. 12 Cule profetpawl zaten cuti vek hlir in an phuang, “Ramoth Gilead ah so uhla hmuingil uh, ziangahtile Jehovah in siangpahrang kut ah cumi cu a pe ding,” tiah an ti.

22:10^a Lai 6:37

22:11^b Dnp 33:17; Jer 27:2; Zek 1:18-21

13 Cun Mikaiah ko dingih fehtu palai in a hnenah, “Ngai hnik, profetpawlih ṭawngkampawl cun lungrualin siangpahrang tha an pe. Zangfahten na ṭawngkam cu anmah lakih mi pakhat ṭawngkam vek si sehla, thapeknak va ṭawng aw maw,” tiah a sim.

14 ^aCule Mikaiah in, “Jehovah a nun rori bangin, Jehovah in ka hnenih a sim mi pauhpauh ka ṭawng ding,” tiah a ti.

22:14^a Mip 22:18; 1Sam 3:17

15 Cun anih cu siangpahrang hnenah a feh ih, siangpahrang in a hnenah, “Mikaiah, Ramoth Gilead do dingin kan feh pei maw, kan hnûkdawkaw ding saw?” tiah a ti.

Cule Mikaiah in, “Feh awla hmuingil aw, cumi cu Jehovah in siangpahrang kut ah a pe ding!” tiah a ti.

16 Cule siangpahrang in a hnenah, “Thutak siarlo ka hnenah Jehovah hmin ih sim lo dingin vei ziang zat meng so sia ka lo sămter ding?” tiah a ti.

17 ^aCun Mikaiah in, “Israel miphun zaten khāltu nei lo tuu bangin tlang parah ṭekdarhin ka hmu hai. Cule Jehovah in, ‘Hipawl in hotu an nei lo. Mi kip mai inn cio ah hnangamten tlungkir hai seh,’ a ti,” tiah a ti.

22:17^a Mip 27:17; Isa 13:14; Nah 3:18; Mat 9:36

18 Cule Israel siangpahrang in Jehoshafat hnenah, “Keimai thuhla ah anih in thil ṭha lo siarlo, thil ṭha a phuang lo ding ka lo ti a si lo maw?” tiah a ti.

19 ^aCun Mikaiah in, “Curuangah Jehovah-ih kamsuakthu ngaithla uh, Jehovah cu a laltokham parih to-in, a vawrh lam le a keh lamah van ralkap rual zaten dīngin ka hmu. 20 Cule Jehovah in, ‘Ahab hi Ramoth Gilead ih hung so ih thi dingin zo in a lēm pei?’ tiah a ti. Cule mi pakhat in hitin a ti ih, a dang pakhat in khatin a ti. 21 Cun thlarau pakhat cu hmaiah a ra suak ih, Jehovah hmaiah a ding, cule, ‘Keimah in ka lēm ding,’ tiah a ti. 22 ^bJehovah in a hnenah, ‘Ziangti zawngin?’ tiah a ti. Anih in, ‘Ka fehsuak ding ih, a profetpawl hmuahhmuah ih kâ ah thuphan per thlarau ka si ding,’ tiah a ti. Cun Jehovah in, ‘Amah cu na lēm pei ih na neh fawn ding, fehsuak awla cuti cun tuah aw,’ tiah a ti. 23 ^cCuruangah zoh hnik! Hi na profetpawl hmuahhmuah ih kâ ah Jehovah in thuphan per thlarau a ret ih, Jehovah in na parah thil ṭha lo a thăn a si,” tiah a ti.

22:19^a Job 1:6; Sam 47:8; 103:20-21; Isa 6:1; Jer 23:18; Eze 1:26; Luk 2:13

22:22^b Lai 9:23; 2Th 2:11

22:23^c Dnp 13:3; 31:29; Eze 14:9

24 ^aCun Kenaanah-ih fapa Zedekiah in a va naih ih Mikaiah-ih biang ah a beng, cule, “Jehovah Thlarau cu ka hnen ihsin na hnenih thusim dingah khui zin ah saw a feh?” tiah a ti.

22:24^a 2San 18:23; Apo 23:2

25 Cule Mikaiah in, “Ngai hnik, relh dingin pindan sungta ih na luh ni ah na hmu ding!” tiah a ti.

26 Cun Israel siangpahrang in, “Mikaiah hruai uhla, khawpi uktu Amon hnen le siangpahrang fapa Joash hnenah kirter uh. 27 ^aCule, ‘Siangpahrang in hitin a ti, “Hi pa hi thawng ah khum uhla, daihnak thawi ka ra tlun hlanlo, zăwnzaihnak rawl le zăwnzaihnak tidai pe uh,” tiin,’ a ti,” tiah a ti.

22:27^a 2San 16:10; Jer 20:2; Heb 11:36

28 ^aAsinan Mikaiah cun, “Hnangamten na ra tlungkir asile, Jehovah in keimah hmangin thu a sim lo a si ding,” tiah a ti. Cule anih in, “Nannih mipi hmuahhmuah tla, fimkhur uh,” tiah a ti.

22:28^a Dnp 18:22

Doawknak ah Ahab a Thi

29 Cule Ramoth Gilead ah Israel siangpahrang le Judah siangpahrang Jehoshafat cu an hung so. 30 ^aIsrael siangpahrang in Jehoshafat hnenah, “Ka danglamawter ding ih doawknak ah ka feh ding, asinan nang cun na kâwrfual hruh aw,” tiah a ti. Cutin Israel siangpahrang cu a danglamawter ih, doawknak ah a feh.

22:30^a 1Sam 28:8

31 ^aCun Siria siangpahrang in a rang lêng ralbawi 32 pawl cu, “Israel siangpahrang siarlo, mitum siseh, mite siseh do hlah uh,” tiin thu a rak pe. 32 ^bCule hitin a si, rang lêng ralbawipawl in Jehoshafat an hmuh tikah, “Hihi Israel siangpahrang a si rori!” tiah an ti. Curuangah amah do dingin sir an her, cule Jehoshafat cu a ausuak. 33 Cule hitin a si, rang lêng ralbawipawl in cumi cu Israel siangpahrang a si lo ti an hmuh tikah, amah dawinak ihsin an kirsal. 34 ^cCun mi pakhat in hmuitin nei loin a thál a nawp ih, Israel siangpahrang cu a ralthuam pehawknakpawl karlakah a saingah. Cule siangpahrang in a rang lêng mâwngtu hnenah, “Her awla, doawknak ihsin i suahpi aw, ziangahtile tuahmawh ka si aw,” tiah a ti. 35 Cuih ni ah doawknak cu a sosâng ih, siangpahrang cu Siria-mipawl lam hawiin a rang lêng ah an dīngter ih, sîm lamah a thi. Thisen cu an tuahmawhnak ihsin rang lêng zial parah a luang thluahthlo. 36 ^dCun ni a tlak cuahco tikah, ralkappawl lakah, “Mi kip mai khua ah le mi kip mai ram ah!” tiin an au.

22:31^a Sem 10:22; 2Sam 10:19

22:32^b 2San 18:31

22:34^c 2Sp 9:24; 2San 35:23

22:36^d 2Sp 14:12

37 Cutin siangpahrang cu a thi ih Samaria ah phurh a si. Cule Samaria ah siangpahrang cu an phum. 38 Cun Samaria tili pakhat ah cuih rang lêng cu an khawlh, cuih hmun ah cun hlawhhlangpawl an khawlhaw; Jehovah in a rak sim mi a kamsuakthu bangtukin, uicopawl in a thisen cu an liak.

Ahab Uknak a Cem

39 ^aCun a tāng lai mi Ahab-ih căngvaihnakpawl le a tuah mi zate, vui ho inn a sak mi le khawpipawl a dĭn mi zaten, Israel siangpahrangpawlih san siarnak cazual ah ngan an si lo maw? 40 Cutin Ahab cu a pupápawl hnenah a cawl. Cun a aiah a fapa Ahaziah a lal.

22:39^a Sam 45:8; Amo 3:15

Judah Siangpahrang Jehoshafat

41 Israel siangpahrang Ahab a lal kum litnak ah, Asa-ih fapa Jehoshafat cu Judah tlunah siangpahrang ah a cang. 42 Siangpahrang a can tikah Jehoshafat cu kum 35 a si ih, Jerusalem ah kum 25 sung a lal. A nuih hmin cu Azulah, Shilhi-ih fanu a si. 43 ^aCule anih cun a pa Asa-ih lamzin zaten a zawh. Cupawl ihsin a rak pial lo, Jehovah-ih mithmuh ah a dik mi a tuah. Sikhalsehla hmun sâng pawl cu lâkhlo an si lo, ziangahtile mipi in hmun sâng pawl ah raithawinak an hlan ih rimhmui an ur. 44 Cuihtlunah Jehoshafat in Israel siangpahrang thawn remnak a tuah.

22:43^a 2San 17:3

45 Cule a tāng lai mi Jehoshafat-ih căngvaihnakpawl, a lăngter mi cahnak, ral a dodān pawl cu, Judah siangpahrangpawlih san siarnak cazual ah ngan an si lo maw?

46 ^aCule a pa Asa dam laiih ^bmipa hlawhhlang a tāng mipawl kha, a ram ihsin a hnawhsuak hai. 47 ^cCun Edom ah siangpahrang a rak um lo, siangpahrang aiawhtu lawng a um.

22:46^a Dnp 23:17

22:46^b mipa hlawhhlang: Sakhua thawi pehtlai mi hlawhhlang a si. An sakhua temple ah an um ṭheu.

22:47^c 2Sp 3:9

48 ^aJehoshafat in Ofir ih sui phur ding Tarshish lăwngpawl a tuah, asinan an feh dah lo, ziangahtile lăwngpawl cu Ezion Geber hmun ah an siat. 49 Cun Ahab-ih fapa Ahaziah in Jehoshafat hnenah, “Lăwngpawl sungah ka siahhlawhpawl hi na siahhlawhpawl zawngah feh hai seh,” tiah a ti. Asinan Jehoshafat cun a siang lo.

22:48^a Mip 33:35

50 Cule Jehoshafat cu a pupápawl hnenah a itthat ih, a pa David-ih Khawpi ah a pupápawl hnenih phum a si. Cun a aiah a fapa Jehoram a lal.

Israel Siangpahrang Ahaziah

51 Judah siangpahrang Jehoshafat a lal kum 17-nak ah, Ahab-ih fapa Ahaziah cu Samaria ah Israel tlunah siangpahrang ah a cang, cule Israel tlunah kum hnih a lal. 52 Jehovah-ih mithmuh ah thil ṭha lo a tuah ih, a paih lamzin, a nuih lamzin le Israel sualtertu Nabat fapa Jeroboam lamzin a zawh. 53 ^aZiangahtile anih cun Baal a rian ih a bia, cule a pa ih rak tuah mi hmuahhmuah vekin, Israel-ih Pathian Jehovah thinhengter dingin a căwktho.

22:53^a Lai 2:11