About Bible Thianghlim | ©

BibleThianghlim – Laireltu

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Laireltu

12345678910
11121314151617181920
21

• A ngantu: Theih a si lo
• A huap sung cān: B.C. 1360-1085 hrawng
• Ngan kum: B.C. 1000 hrawng

Hi cabu hin Joshua le siangpahrangpawl karlak (B.C. 1360-1050 hrawng) tikcucān sung a huap. Hih cān sungih Israel hotupawl cu “Laireltupawl” tiih kawh an si. Ziangruangahtile annihpawl hi siangpahrangpawl um hlanih Israel hotu dingih Pathian ih a dĭnsuah mi an si. Annihpawl hi lairelnak hna lawng ṭuan an si lo ih, ralkappawl hotu khal an si. Annihpawl cu Israel ramhnen pakhat khat in Israel an nehsawh tikah, runsuaktu dingih Pathian ruat mi an si. Siangpahrangpawl vekin a sangsángten Israel ram pumpi ah lai an rel ve lo. Israel ram ah ṭum khat ah hmun dangdangah laireltu dangdang an um cān khal a um. An ramhnen miphun dang pawl in Israel an palbĕt leuhleuh ṭheu, cucu Pathian in Israel nunsimnak ih a rak hman mi a si.

Israel-mipawl in Pathian an phatsan leuhleuh ih, pathian dang pawl an rak thlun ruangah Pathian in nun a rak sim ṭheu hai. Hi cabu hin Israel-mipawl in Kanaan-mipawl an băng deuhdeuh nak ruangih an tluksiat sinsin nak thu a rel. Bung 1-nak ah, Israel hnámpawl in an ram ihsin Kanaan-mipawl an dawisuak thei lo thu kan hmu. Bung 2:1-10 sungah Israel-mipawlih thulunlonak le căwkpawlh nun ruangih Pathian a lungawi lo thu kan hmu. Hi cabu tluansuak ah Israel-mipawlih nundān cu bung 2 nak ah hibang tukin a lang: (1) Israel-mipawlih sualnak (2:11-13), (2) Sál tānnak (2:14), (3) Riahsiatnak (2:15), (4) Runsuahnak (2:16). Cule cuti vekin a herkûalsal rero (2:17). Hi cabu sungah hiti vekih herkûalsal rero nak hi kan hmu leuhleuh.

Laireltupawl san sungih thil cang mi tampi lak ihsin thuanthu pawimawh zet pahnih cu hi cabu netnakah ngan an si (bung 17-18; 19-21). Pathian an ngaihthah ih, “Mi kip in anmai mit ih dik an ti mi vekin an tuah,” (17:6; 21:25) ruangah, Kanaan-mipawl vekin Israel-mipawl cu ziang tluk rangin an hlothlau ti cu hi thuanthu pahnih hin in sim. Thuṭhentu tamsawn cu mipi hnakin an ṭha ce cuang lo. Hi cabu-ih thupi cu minungpawl an rinum lo lai khalih Pathian rinumnak a si.

1

Israel-mipawl in Kanaan-mipawl an Do

1 ^aCun Joshua a thih hnuah hitin a si, Israel tefapawl in, “Kanaan-mipawl do dingah zo so kan hrangah a so hmaisabik ding?” tiin Jehovah an sut.

1:1^a Sem 10:18; Mip 2:3-9; Jos 24:29; 1Sp 20:14

2 ^aCule Jehovah in, “Judah a feh pei. Ngai hnik uh, a kut ah ram ka pe zo a si,” tiah a ti.

1:2^a Sem 49:10

3 Cun Judah in a unaupa Simeon hnenah, “Kanaan-mipawl kan donak dingah ka covo ram ah ka zawngah hung so ve aw. Cule kei khal na covo ram ah na zawngah ka feh ve ding,” tiah a ti. Cule Simeon cu amai zawngah a feh. 4 ^aCule Judah cu a hung so ih, Jehovah in Kanaan-mipawl le Periz-mipawl cu an kut ah a pe, cule Bezek ah pacang 10000 an that. 5 Bezek ah Adoni-Bezek an hmu ih, amah cu an do, cule annih in Kanaan-mipawl le Periz-mipawl an neh. 6 Asinan Adoni-Bezek cu a tlân ih, amah cu an dawi, cule an kai. Cule a kut zungpipawl le a ke zungpipawl an tansak. 7 ^bAdoni-Bezek cun, “Kut zungpipawl le ke zungpipawl tansak mi siangpahrang 70 in ka cabuai hnuaiih rawl ṭil an sar ṭheu, keimai rak tuah mi vekin Pathian in i lehrūl a si hi,” tiah a ti. Cun anih cu Jerusalem ah an hruai ih, cu tawkah a thi.

1:4^a Sem 13:7; Jos 3:10

1:7^b Pui 24:19; Jer 25:12

8 ^aCun Judah-ih tefapawl in Jerusalem an do ih an la, ralnâm hriam in Jerusalem cu an do ih khawpi cu mei in an ur. 9 ^bCule cu ṭhehin Judah-ih tefapawl cu tlang ram, Negev le phairawn ih cêng, Kanaan-mipawl do dingah an suk. 10 ^cCun Judah cu Hebron ih cêng, Kanaan-mipawl do dingah a feh. Hebron hmin cu a hlanah cun Kirjath Arba ti a si. Cule Sheshai, Ahiman le Talmai tla an that.

1:8^a Jos 15:63

1:9^b Sem 12:9; 21:1; Jos 11:21; Isa 30:6

1:10^c Sem 13:18; 35:27; Mip 13:22; Jos 15:13-14

11 ^aCu tawk ihsin Debir khua ih cêngpawl doin an feh. A hlanah cun Debir khaw hmin cu Kirjath Sefer ti a si.

1:11^a Jos 10:38

12 ^aCun Kaleb in, “Kirjath Sefer khua do ih a latu zokhal a nupi dingah ka fanu Akhsah ka pe ding,” tiah a ti. 13 Cule Kaleb-ih naupa Kenaz-ih fapa Othniel in cuih khua cu a la, cule a nupi ah a fanu Akhsah cu Othniel a pek. 14 Cun hitin a si, a hnenih cu nu a thlen tikah, cu nu cun lóram pakhat a pa dil dingin, a pasal cu a ngen. Cu nu cu a lāk par ihsin a ṭum ih, Kaleb in a hnenah, “Ziang so na duh?” tiah a sut.

1:12^a Jos 15:17

15 Cule anih in a hnenah, “Thlawsuah i pe aw, Negev ih hmun i pe zo ta cengmang cu, tihna khal i pe lawlaw aw,” tiah a ti. Cule Kaleb in anih cu tihna tlunta le tihna hnuaita a pe.

16 ^aMosi-ih pu Keni tefapawl cu Arad kiang, Negev ih Judah Ramṭhing ah, Judah-ih tefapawl thawn Ṭhulhfau Khawpi ihsin an hung so. Cule an feh ih mipi lakah an cêng. 17 ^bCule Judah cu a unaupa Simeon zawngah a feh ih, Zefath khua ih cêng, Kanaan-mipawl an do, cule cuih khua cu an ṭhiatbăl thluh. Curuangah cuih khaw hmin cu Hormah tiah kawh a si. 18 ^cJudah khal in Gaza khua le a ramri tiang, Ashkelon khua le a ramri tiang, cule Ekron khua le a ramri tiang a la. 19 ^dCutin Jehovah cu Judah hnenah a um. Cule tlangparmipawl an dawisuak. Asinan thir rang lêngpawl an neih ruangah, phaikuam ih cêngpawl cu an dawisuak thei lo. 20 ^eCun Mosi in a rak sim vekin, Hebron cu Kaleb an pe. Cule Anak-ih fapa pathum pawl cu, cu tawk ihsin Kaleb cun a dawisuak hai. 21 ^fAsinan Benjamin-ih tefapawl cun Jerusalem ih a cêng mi Jebus-mipawl an dawisuak lo. Cutin Jebus-mipawl cu tuihni tiangin Benjamin-ih tefapawl zawngah Jerusalem ah an cêng.

1:16^a Sem 15:19; Mip 10:29; 21:1; Dnp 34:3; Jos 12:14; 2San 28:15

1:17^b Mip 14:45

1:18^c Jos 11:22

1:19^d Mip 13:17; 14:43; Jos 17:16

1:20^e Jos 10:36; 14:13

1:21^f Jos 9:15; 1San 11:4

22 ^aCule Joseph-ih sungza khal Bethel doin an so ih, an hnenah Jehovah a um. 23 ^bCun Joseph sungza cun Bethel thlingthla dingah mipapawl an thlah. A hlanah cun cuih khawpi hmin cu Luz a si. 24 ^cCule thlingthlatupawl in mipa pakhat khawpi ihsi ra suak an hmu, a hnenah, “Zangfahten khawpi luhnak in hmuh aw, cule zahngainak na parah kan langter ve ding,” tiah an ti. 25 Cutin anih cun khawpi luhnak a hmuh hai ih, khawpi cu ralnâm hriam in an do. Asinan cu pa le a sungkua zaten an thlahsuak. 26 ^dCule cu pa cu Heth-mipawlih ram ah a feh, khawpi a dĭn ih, a hmin ah Luz a sak, cucu tuihni tiangih a hmin a si.

1:22^a Jos 7:2

1:23^b Sem 28:19

1:24^c Sem 47:28

1:26^d Sem 28:19; Eze 16:3

Kanaan-mipawlih Ngunkhuai Peknak

27 ^aCule Manasseh cun Beth Shean khua luahtupawl le a khaw ṭêk pawl siseh, Taanak khua le a khaw ṭêk pawl siseh, Dor khaw luahtupawl le a khaw ṭêk pawl siseh, Ibleam khaw luahtupawl le a khaw ṭêk pawl siseh, Megiddo khaw luahtupawl le a khaw ṭêk pawl siseh a dawisuak hai lo, ziangahtile Kanaan-mipawl cun cuih ram suahsan an tum hrimhrim lo. 28 ^bCule hitin a si, Israel a cak tikah, Kanaan-mipawl cu ngunkhuai pekter an si, asinan anmah cu an dawisuak thluh lo.

1:27^a Jos 12:21; 17:11-12; 1Sp 9:21

1:28^b Jos 17:12-13

29 ^aEfraim khal in Gezer khua ih cêng, Kanaan-mipawl a dawisuak lo. Cutin Kanaan-mipawl cu Gezer khua ah anmah lakah an cêng.

1:29^a Jos 10:33; 14:4; 16:10

30 Zebulun khal in Kitron khua ih um mipawl le Nahalol khua ih um mipawl a dawisuak lo. Cutin Kanaan-mipawl cu anmah lakah an cêng ih, ngunkhuai pekter an si.

31 ^aAsher khal in Akkho khaw luahtupawl siseh, Sidon khaw luahtupawl siseh, Ahlab khaw luahtupawl siseh, Akzib khaw luahtupawl siseh, Helbah khaw luahtupawl siseh, Afik khaw luahtupawl siseh, Rehob khaw luahtupawl siseh a dawisuak lo. 32 Cule Asher-mipawl cu ram luahtu Kanaan-mipawl lakah an cêng. Ziangahtile annihpawl cu an dawisuak lo a si.

1:31^a Sem 49:13; Mip 13:21; Jos 12:18; 17:7

33 ^aNaftali khal in Beth Shemesh khaw luahtupawl le Beth Anath khaw luahtupawl a dawisuak lo, ram luahtu, Kanaan-mipawl lakah an cêng sawn. Asinan Beth Shemesh khaw luahtupawl le Beth Anath khaw luahtupawl cu anmah hnenih ngunkhuai pekter an si.

1:33^a Jos 15:10

34 ^aCule Dân-ih tefapawl cu Amor-mipawl in tlang ram ah hramhramin an umter, ziangahtile annihpawl cu phaikuam ih sukthlak an siang lo. 35 ^bCule Amor-mipawl cu Heres tlang, Aijalon ah le Shaalbim ihsi suah an tum hrimhrim lo. Sikhalsehla Joseph sungza-ih cahnak a ṭhan vivo tikah, annih cu ngunkhuai pekter an si.

1:34^a Sem 30:6; Mip 13:29; 1Sam 7:14

1:35^b Jos 19:42; 1Sp 4:9

36 ^aCun Amor-mipawlih ramri cu Akrabbim khaw sohnak ihsin le Sela khua ihsin a so vivo.

1:36^a Jos 15:3; Sam 106:34; Isa 16:1; 42:11

2

Israel-ih Thulunlonak

1 ^aCun Jehovah-ih vancungmi cu Gilgal khua ihsin Bokim khua ah a hung so ih, “Izip ram ihsin nan pupápawl hnenih sia ka rak săm mi ram ah ka lo hruai. Cule kei in, ‘Nangmah thawi ka thukham ka siatbăl dah hrimhrim lo ding. 2 ^bCun hi ram luahtupawl thawn thukham nan tuah lo pei, an biakṭhengpawl nan siatbăl pei,’ ka rak lo ti. Asinan ka thu nan lung lo. Ziangah so hi vekih nan rak tuah? 3 ^cCuruangah keimah thotho in, ‘Anmah cu nan hmai ihsin ka dawisuak lo ding, asinan annih cu nan hnak hrangah hling an si ding ih, an pathianpawl cu nan hrangah tháng an si ding,’ tiah ka lo ti,” tiah a ti. 4 ^dCun hitin a si, Jehovah-ih vancungmi in Israel tefapawl zate hnenih hih thupawl a sim tikah, mipi cu an aw an suah ih an ṭap. 5 Cun cu tawk hmun cu a hmin ah ^eBokim tiah an sak, cule cu tawkah Jehovah hnenah rai an thawi.

2:1^a Sem 16:7; 17:8; 20:2; Pui 26:42-44; Dnp 7:9; 11:30

2:2^b Dnp 7:2-5

2:3^c Suah 10:7; Mip 33:55; Jos 23:13

2:4^d Sem 27:28; Mip 25:6

2:5^e Bokim: A sullam cu ṭap tinak a si.

Joshua Thihnak

6 Cule Joshua in mipi a fehter hnuah, Israel tefapawl cu ram va la dingah ro ih an co mi cio ah an feh. 7 Cutin Joshua dam sung hmuahhmuah le Israel hrangih Jehovah in a rak tuah mi hna ropi hmuahhmuah a hmutu Joshua hnuih a nung mi upapawl dam sung cu, mipi in Jehovah an rian. 8 ^aCun Nun-ih fapa Joshua, Jehovah-ih siahhlawh cu kum 110 a ti ah a thi. 9 ^bCule amah cu Gaash tlang sak lam, Efraim tlang ram ih ro ih a co mi ramri sung, Timnath Heres khua ah an phum. 10 ^cCule cuih san minung hmuahhmuah khal an pupápawl hnenah fĭnkhawm an si, cule anmah hnuah Jehovah thei lo tu le Israel hrangih a rak tuah mi thei lo tu san dang minung an ra suak.

2:8^a Jos 1:1; Isa 8:1-8

2:9^b Jos 19:50

2:10^c Suah 5:2; Gal 4:8

Israel Rinumlonak

11 Cun Israel tefapawl cun Jehovah-ih mithmuh ah thil ṭha lo an tuah ih, Baalpawl an rian. 12 ^aCule Izip ram ihsin a rak hruaisuaktu an pupápawlih Pathian Jehovah an tlansan ih, an kiangkap mipawlih pathianpawl lakih pathianpawl cu an thlun. Cule cupawl hmaiah an băwkkhup ih, Jehovah-ih thinhengnak an căwktho. 13 ^bJehovah an tlansan ih, Baal le Ashtoreth-pawl an rian. 14 ^cCule Jehovah-ih thinhengnak cu Israel parah a so. Cutin anih in anmah rămtupawlih kut ah annihpawl cu a pek, cule an kiangkapih an ralpawl kut ah annih cu a zuar, cutin annih in an ralpawl cu an celh lo. 15 ^dJehovah in a rak sim zo le Jehovah in an hnenih sia a rak săm zo vekin, an fehnak kip ah Jehovah-ih kut cun an parah vanduainak a thlen. Cule annih cu nasa zetin an van a sâng.

2:12^a Mip 11:33; Dnp 32:12; Sam 78:58; 106:36; Dan 4:25

2:13^b 1Sam 7:3; 31:10; Neh 9:26; Sam 78:56; Jer 11:10

2:14^c Dnp 31:17; 32:30; Neh 9:27; Eze 34:8

2:15^d Amo 9:4

16 ^aSikhalsehla, anmah rămtupawlih kut ihsin runsuak dingah Jehovah in laireltupawl a dĭnsuak. 17 ^bCuti cing khalin an laireltupawl an ngaithla cuang lo, pathian dang pawl hnenah hlawhhlannak an tuah ih an hmaiah an băwkkhup sawn riangri. An pupápawl in Jehovah-ih thupekpawl thlunih an rak fehnak lamzin ihsin rang zetin an pial, an pupápawl vekin an tuah ve lo. 18 ^cCule Jehovah in an hrangih laireltupawl a dĭnsuah tikah, Jehovah cu laireltu hnenah a um ih, laireltu dam sung hmuahhmuah cu an ralpawlih kut sung ihsin anmah a runsuak. Ziangahtile anmah palbĕttu le vansanglamtertupawl ruangih an aihramnak cun Jehovah cu anmah zangfah ding ko a tuah. 19 ^dCule hitin a si, laireltu a thih tikah, an dungtawlh ih, pathian dang pawl rian dingin le an hmaiih băwkkhup dingin, pathian dang pawl an thlun ih, an pupápawl hnakih bawrhhlawhsawnin an nung. An thil ti mipawl le an luhlulnak lamzin khal an cawlhsan cuang lo.

2:16^a Rut 1:1; 1Sam 12:11; Neh 9:27; Apo 13:20

2:17^b Suah 34:15; Dnp 9:12

2:18^c Suah 2:24; Dnp 32:36

2:19^d Sem 6:11; Suah 32:9; Dnp 4:16; 32:17; Sam 78:57; Jer 44:3, 9

20 ^aCun Israel parah Jehovah-ih thinhengnak cu a so, cule anih in, “Hi miphun in an pupápawl thu ka rak pek mi, ka thukham an pahbăl ih, ka aw an ngaithla lo, 21 ^bcuruangah kei khal in, Joshua in a thih tikih a tān ta mi miphunpawl lakih mi pakhat hman an hmai ihsin ka dawisuak ve nawn lo ding, 22 ^can pupápawl ih an rak zawh bangin, Jehovah-ih lamzinpawl an zawh maw zawh lo ti Israel hniksaknak dingah anmah ka hmang ding,” tiah a ti. 23 Curuangah Jehovah in cuih miphunpawl cu dawisuak lohli loin, a umter hai ih, Joshua kut khalah a rak ap hai lo.

2:20^a Dnp 31:17; Jos 7:11; 23:16

2:21^b Jos 23:5

2:22^c Sem 22:1; Suah 15:25

3

1 ^aCun Kanaan ram ih ral doawknak pakhat hman thei lo, Israel hmuahhmuah cu miphun dang pawl hmangin a hniksak thei nak dingih Jehovah in a tanter mi miphun dang pawl cu, hipawl hi an si. 2 ^bIsrael tefapawlih tesinfanaupawl, tuihlanih ral doawknak zianghman rak thei lo pawl kha ral dodān zirh an sinak ding liolio ih tānter mi an si. 3 ^cCupawl cu Filisṭia-mipawlih lal panga, Kanaan-mi hmuahhmuah, Sidon-mipawl le Baal Hermon tlang ihsin Hamath khaw luhnak tiang, Lebanon tlang ih cêng Hiv-mipawl an si. 4 ^dCule annih cu Jehovah in Mosi-ih kut in an pupápawl hnenih thu a rak pek zo mi thupekpawl tla an thlun maw thlun lo ti theihnak dingah Israel hniksaknak ih a tān mi an si.

3:1^a Suah 15:25

3:2^b 2San 12:8

3:3^c Sem 10:14; Suah 3:8; Mip 13:21; Dnp 3:8; Jos 13:3

3:4^d Suah 15:25

5 ^aCutin Israel tefapawl cu Kanaan-mipawl, Heth-mipawl, Amor-mipawl, Periz-mipawl, Hiv-mipawl le Jebus-mipawl lakah an cêng. 6 ^bCule an fanupawl cu an nupi dingah an lâk ih, an fanupawl cu an fapapawl an pe. Cule annih cun an pathianpawl an rian.

3:5^a Jos 3:10; 11:3; Ezr 9:1

3:6^b Suah 34:16; Ezr 10:18; Neh 13:23; Mal 2:11

Othniel

7 ^aCutin Israel tefapawl cun Jehovah-ih mithmuh ah thil ṭha lo an tuah. Jehovah an Pathian an hngilh ih, Baalpawl le Asherah-pawl an rian. 8 ^bCuruangah Jehovah-ih thinhengnak cu Israel parah a so ih, Mesopotamia siangpahrang Kushan-Rishathaim kut ah annihpawl cu a pek. Cule Israel tefapawl in Kushan-Rishathaimmipawl cu kum riat sung an rian. 9 ^cIsrael tefapawl cu Jehovah hnenih an ṭah tikah Jehovah in Israel tefapawl hrangah, anmah rak runsuaktu Kenaz-ih fapa Othniel, Kaleb-ih naupa cu runsuaktu ah a ruat. 10 ^dA parah Jehovah-ih Thlarau a thleng ih, Israel tlunah lai a rel. Anih cu ral donak ah a feh ih Jehovah in a kut ah Mesopotamia siangpahrang Kushan-Rishathaim cu a pek. Cule a kut in Kushan-Rishathaim cu a neh. 11 ^eCutin ram cu kum 40 sung a dai. Cun Kenaz-ih fapa Othniel cu a thi.

3:7^a Dnp 4:9; 16:21; Isa 17:8

3:8^b Sem 24:10; Sam 44:12; Isa 50:1

3:9^c 1Sam 12:10; Neh 9:7

3:10^d 1Sam 11:6

3:11^e Suah 16:35; Mip 14:15; Jos 15:17

Ehud

12 ^aCule Israel tefapawl cu Jehovah-ih mithmuh ah thil ṭha lo an tuahsal. Cun Jehovah mithmuh ih thil ṭha lo an tuah ruangah, Jehovah in Israel dokalhin Moab siangpahrang Eglon a cakter. 13 ^bCun Eglon cun Ammon tefapawl le Amalek tefapawl a hnenah a khawm, an feh ih Israel an neh. Cule Ṭhulhfau Khawpi-ih neih thil a lâk. 14 Cutin Israel tefapawl in kum hleiriat sung, Moab siangpahrang Eglon an rian.

3:12^a 1Sam 12:9

3:13^b Sem 14:7; 19:38; Dnp 34:3

15 ^aAsinan Jehovah hnenih Israel tefapawl an ṭah tikah, Jehovah in an hrangah Benjamin-mi, Gera-ih fapa Ehud, kehtlak pa cu runsuaktu ah a ruat. Amah hnenin Israel tefapawl in Moab siangpahrang Eglon hnenah laksawng an kuat. 16 Cun Ehud in a hrangah dawng khat sau, kap hnih hriam nâm a tuah ih, cumi cu a vawrh lam tâi parih a hnipuan hnuaiah a ṭawn. 17 ^bCutin Moab siangpahrang Eglon hnenah laksawng a keng. Eglon cu pa thau zet a si. 18 Cule laksawng pek a ṭheh tikah, laksawng phurtu milaipawl cu a suakter hai. 19 Asinan amah tu cu, Gilgal ih lungto milimpawl sernak hmun ihsin a kirsal ih, “Maw siangpahrang, na hrangah thuthup thucah ka nei,” tiah a ti.

3:15^a 1Sp 4:21; Est 10:1; Sam 68:29; Ths 2:8; Isa 60:5; Hos 10:6

3:17^b Sam 73:4

Siangpahrang in, “Daiten um!” tiah a ti. Cule amah kiltupawl cu a hnen ihsin an fehsuak.

20 ^aCule anih cu inn tlunta a bulpâk pindan dai ih a to laiah Ehud cu a hnenah a ra. Cun Ehud in, “Na hrangah Pathian hnen ihsin thucah pakhat ka nei,” tiah a sim. Cun siangpahrang cu a tonak ihsin a tho. 21 ^bCun Ehud cu a keh lam kut a suah ih a vawrh lam tâi ihta nâm a la, cule a nâm cun siangpahrang pum ah a sun. 22 A hlăwk tiangin a fáng thawn a lut ih a thau in a fáng a khuh. Ziangahtile nâm cu a pum ihsin a lasuak thei lo, cule a sungrilpawl an pawt. 23 Cun Ehud cu hulhliap lamah a suak ih, a dungih inn tlun sângkapawl cu a khar ih, a kalh hai.

3:20^a Neh 8:5

3:21^b 2Sam 2:16

24 A fehsuak tikah, Eglon-ih siahhlawhpawl cu an ra, cule ngai hnik, inn tlun sângkapawl cu kalhawin a um ti an hmu. Cu tikah annih in “Anih hi pindan dai ah a daileng lai a si men ding,” tiah an ti. 25 ^aCutin an beidăwng tiangin an hngak, zoh hnik, anih cun inn tlun pindan sângkapawl ăwn ti a nei lo. Curuangah tawhfung an la ih an áwng. Cule cu tawkah an pu cu zial ah tlu ih thiin a rak um.

3:25^a 2Sp 2:17

26 Asinan an khawtlai sungah Ehud cu a rak tlânsuak ih lungto milim sernak a lan ih, Seirah ah a tlân. 27 ^aCule hitin a si, a thlen tikah Efraim tlang ram ah tuu pa ki a phaw ih, Israel tefapawl cu tlang ihsin amah thawn an suk, cule anih in annihpawl cu a hruai. 28 ^bCun an hnenah, “I thlun uh, ziangahtile Jehovah in nan ral a si mi, Moab rammipawl cu nan kut ah a lo pe zo,” tiah a ti. Cutin a dung thlunin an suk, Moab fehnak Jordan kāipawl cu an kulh ih zohman fehtlăng an siang lo. 29 Cule cumi laiah Moab-mi, micak le miralṭha hlir pacang 10000 hrawng an that, mi pakhat hman an tlânsuak lo. 30 ^cCutin cuih ni ah Moab cu Israel kut hnuaiah a duai. Cule ram cu kum 80 sung a dai.

3:27^a Pui 25:9; 2Sam 2:28; Isa 18:3; Jer 42:14

3:28^b Sem 19:37; Mip 13:29; Jos 2:7, 24

3:30^c Sem 36:35

Shamgar

31 ^aEhud hnuah Anath-ih fapa Shamgar a lang, anih cun caw cang khalhnak fung in Filisṭia pacang 600 a that, cule anih khal in Israel a runsuak ve.

3:31^a Jos 13:2; 23:10; 1Sam 5:1; 2Sam 8:1; Jer 25:20

4

Deborah le Barak

1 Ehud a thih tikah, Israel tefapawl cun Jehovah-ih mithmuh ah thil ṭha lo an tuah lala. 2 ^aCule anmah cu, Hazor khua ih lal, Kanaan siangpahrang Jabin kut ah Jehovah in a zuar hai. Jabin-ih ralkappawl hotu lu bik cu, Harosheth Hagoyim khua ih cêng Sisera a si. 3 ^bCule Jabin cun thir rang lêng 900 a nei ih, kum 20 sung Israel tefapawl râwng zetin a palbĕt hai ruangah, Israel tefapawl cu Jehovah hnenah an ṭap.

4:2^a Dnp 32:30; Jos 11:1, 10; Sam 83:9

4:3^b Jos 17:16; Sam 106:42

4 ^aCun nunau profet Deborah, Lapidoth-ih nupi cu, cu laiah Israel tlunah lai a rel. 5 ^bCule anih cu Efraim tlang ram ih a um mi Ramah le Bethel karlakih Deborah-ih ṭhulhfau kung hnuaiah a to. Cule Israel tefapawl cu a hnenah an thu lairelsak dingin an so. 6 ^cCun Deborah in Naftali ram Kedesh ihsin mi a thlah ih Abinoam-ih fapa Barak cu a ko, cule a hnenah, “Israel-ih Pathian Jehovah in, ‘Feh awla, Tabor tlang lam va naih aw, Naftali fapapawl le Zebulun fapapawl lak ihsin mipa 10000 na zawngah hruai aw. 7 ^dCule nangmah dokalhin Sisera, Jabin-ih ralkappawl hotu lu bik cu a rang lêngpawl le a mi burpi thawn Kishon tiva ah na hnen lam ka naihter ding. Cule amah cu na kut ah ka lo pe ding,’ tiin thu a lo pe a si lo maw?” tiah a ti.

4:4^a Suah 15:20; Luk 2:36

4:5^b Jos 12:9; 18:25; 1Sam 14:2

4:6^c Sem 30:8; Jos 19:22; 1Sam 12:11; Heb 11:32

4:7^d Jos 11:1; 1Sp 18:40; Sam 83:9

8 Cule Barak cun a hnenah, “Ka hnenih na feh ding a si ahcun, ka feh ding, asinan ka hnenih na feh lo ding asile, ka feh lo ding!” tiah a ti.

9 ^aCule anih in, “Na hnenah ka feh tengteng ding. Sikhalsehla na fehnak lam tluanah na hrangah sunlawinak a um lo ding, ziangahtile Jehovah in nunau pakhat kut ah Sisera a zuar ding,” tiah a ti. Cun Deborah cu a tho ih Kedesh khaw lamah Barak zawngah a feh. 10 ^bCule Barak in Kedesh khua ah Zebulun le Naftali cu a ko hai. Anih cu a thu hnuaiih um, mipa 10000 thawn a so ih, a zawngah Deborah a feh.

4:9^a Jos 12:22

4:10^b 2San 36:23; Ezr 1:2; Isa 41:2

11 ^aCun Mosi-ih pu Hobab-ih tefapawl lakih Keni-mi, Heber cu Ken-mipawl lak ihsin a thiarfihlimaw ih, Kedesh khaw kiangih um, Zaanaim ram ih elon thingkung kiangah a puanthlam a zar.

4:11^a Sem 15:19; Mip 10:29; Jos 19:33; 24:26

12 Cule Abinoam-ih fapa Barak cu Tabor tlang ah a so zo ti Sisera an sim. 13 ^aCule Sisera cun a rang lêngpawl hmuahhmuah, thir rang lêng 900 le a zawngih um mipi zaten Harosheth Hagoyim khua ihsin Kishon tiva tiang a fĭnkhawm.

4:13^a Jos 17:16

14 ^aCun Deborah in Barak hnenah, “Tho aw! Ziangahtile tuihni hi Jehovah in na kut sungih Sisera a lo pek ni a si. Jehovah cu na hmaiah a feh a si lo maw?” tiah a ti. Cutin Barak cu amah thluntu mipa 10000 thawn Tabor tlang ihsin a suk. 15 ^bCule Jehovah in Sisera le a rang lêngpawl hmuahhmuah le a ralkappawl zaten ralnâm hriam in Barak hmaiah a vaivuanter hai, cule Sisera cu a rang lêng ihsin a ṭum ih ke in a tlân. 16 ^cAsinan Barak cun rang lêngpawl le ralkappawl cu, Harosheth Hagoyim khua tiangin a dawi, cule Sisera-ih ralkappawl zaten ralnâm hriam hmangin an tlu, mi pakhat hman an tâng lo.

4:14^a Dnp 9:3; 1Sam 8:20; Sam 68:7

4:15^b Suah 14:24; Sam 18:14

4:16^c Suah 14:28; Sam 83:9

Jael in Sisera a That

17 ^aSikhalsehla Sisera cu Ken-mi Heber-ih nupi, Jael-ih puanthlam lamah ke in a tlânsia. Ziangahtile Hazor siangpahrang Jabin le Keni-mi Heber-ih sungkua karlakah daihnak a um. 18 ^bCule Jael cu Sisera táwng dingah a fehsuak ih a hnenah, “Ra pial aw, ka bawipa, ka hnenah ra pial aw, ṭih hlah,” tiah a ti. Cule a puanthlam sungih a pialluh hnuah amah cu puan a khuh.

4:17^a Sem 15:19; Jos 11:1

4:18^b 2Sp 6:19

19 ^aCule anih in a hnenah, “Ka ti a hāl ruangah zangfahten in ding tidai málten i pe aw,” tiah a ti. Cu tikah Jael in hnawi bawm a áwng ih in ding a pe, cule amah cu a khuh. 20 Cule Sisera in a hnenah, “Puanthlam sângka ah ding awla, zo simaw ra in, ‘Hi tawkah mi pakhat tal an um maw?’ tiin a lo suh asile, ‘Um lo,’ rak ti aw,” tiah a ti. 21 ^bCun Heber-ih nupi Jael cun a kut in puanthlam khenkilhnak le sobul a la ih, Sisera hnenah dimten a feh, cule khenkilhnak cu a depdep ah a khĕn. Cumi cu leilung ah a tlăng, ziangahtile Sisera cu a cau ih thithlepin a itthat. Cutin anih cu a thi. 22 Cule zoh hnik, Barak cun Sisera a dawi. Jael cu Barak hmuak dingin a va suak ih a hnenah, “Ra aw, na hawl mi pa ka lo hmuh ding,” tiah a ti. Cule a puanthlam sungih a luh tikah, zoh hnik, Sisera cu a depdep ah puanthlam khenkilhnak thawn tlu ih thiin a um.

4:19^a Sem 18:8

4:21^b Sem 2:21; 1Sam 26:12; Isa 29:10; Jon 1:5

23 ^aCutin cuih ni ah Pathian in Kanaan siangpahrang Jabin cu Israel tefapawl hmaika ah a duaiter. 24 ^bCule Israel tefapawlih kut cu Kanaan siangpahrang Jabin dokalhin, Kanaan siangpahrang Jabin an nuairal tiangin a caksin vivo.

4:23^a Jos 11:1; Neh 9:24; Sam 18:47

4:24^b Sam 83:9

5

Deborah Hla

1 ^aCun Deborah le Barak, Abinoam-ih fapa cun cuih ni ah,

5:1^a Suah 15:1; Sam 32:7

2 ^a“Israel ram ah hotupawl in an hruai tikah,
Mai lungpuakih mipi an hlănawk tikah,
Jehovah cu thangṭhat uh!
3 ^bMaw siangpahrangpawl, ngai uh!
Maw mizahumpawl nan hna tŭn uh!
Kei, keimah rori hmanin Jehovah hnenah hla ka sak ding,
Israel-ih Pathian Jehovah hnenah thangṭhat hla ka sak ding.
4 ^cJehovah, Seir ihsin na fehsuak tikah,
Edom ramlak ihsin na karsuah tikah,
Leilung cu a khūr ih van in an burh,
Khawdurpawl khal in tidai an burh,
5 ^dTlangpawl an hnîn Jehovah hmaiah,
Himi Sinai khal, Israel-ih Pathian Jehovah hmaiah.
6 ^eAnath-ih fapa Shamgar san laiah,
Jael san laiah,
Zinpipawl tla an ṭhing,
Cule khualtlawngpawl in zinte an zawh.
7 Israel ram ah khawtepawl an ṭhing,
Kei, Deborah, Israel ram ih nu pakhat ka thawh hlanlo an ṭhing.
8 ^fAnnih in pathian thar pawl an hril,
Cun kăwtkapawl ah ral doawknak a um,
Israel ram ah mi 40000 lakah ralphaw le fei hmuh ding a um lo.
9 Ka thinlung cu mipi zawngih mai lungsuakih hlanaw mi,
Israel uktupawl hnenah a um.
Jehovah cu thangṭhat uh!
10 ^gNannih lāk var pawl parih topawl,
Nannih puan sah zet parih topawl le,
Nannih lamzin tluanih fehpawl, phuang uh.
11 ^hThálsai thiam pawl thawmvâng ihsi hlatnak, tidai khainak hmunpawl lakah,
Cu tawkah Jehovah cangvaihnak dingfelpawl an siarsal ding,
Israel ram ah a khawmipawl hrangih a dingfel mi căngvaihnakpawl cu,
Jehovah-ih minungpawl cu kăwtkapawl ah an ṭum ding.
12 ⁱṬhang law, ṭhang law, Deborah!
Ṭhang law, ṭhang law, hlasak law!
Tho law, Barak, cule na ralkaihpawl hruaihlo aw,
Maw, Abinoam-ih fapa!
13 Cun a nungdampawl an ra suk, minungpawl in mipawimawhpawl an dokalh,
Jehovah cu ka hrangah micak dokalhin a ra ṭum.
14 ^jAmalek-mipawlih hrihrampawl cu Efraim ihsin an si.
Nangmah hnuah, Benjamin, na mipawl thawn,
Makir ihsin uktupawl an ra suk ih,
Zebulun ihsin cangantupawlih fungfêk kengtu.
15 ^kCule Issakar-ih ralbawipawl cu Deborah zawngah,
Issakar vekin, Barak khal phaikuam ah a thupek hnuaiah thlah a si,
Reuben bur ṭhen pawl lakah,
Nasa zetih tumruhnak thinlung a um.
16 ^lZiangah so rante hruangkulhpawl lakah,
Rante rual be ngai dingih nan to?
Reuben bur ṭhen pawl in nasa zetih thinlung cekawknak an nei.
17 ^mGilead cu Jordan ralah a tâp ta,
Cule ziangah so Dan cu lăwngpawl parah a tān ta?
Asher cu tipi kapah a um ringring ih,
A li tengsâwl ah a tâp.
18 ⁿZebulun cu an nunnak thihnak tiangih ui lo minung an si,
Naftali khal, doawknak hmun sâng pawl ah cuvek thotho a si.
19 ^oSiangpahrangpawl an ra ih, an do,
Cun Kanaan siangpahrangpawl in an do,
Taanak khua ah, Megiddo tipi kiangah cun;
Ralthillawn ngun zianghman an la lo.
20 ^pAnnih in van ihsin an do,
Arsipawl in an zin ihsin Sisera an do.
21 ^qKishon tiva in anmah a fĕnhlo,
Cuih khuahlan tiva, Kishon tiva cun.
Maw, ka nunnak, cahnak thawn hmai năwr aw!
22 ^rCun rangpawl an tlân cak tuk ruangah an ke tínpawl lei ah an khâwng tluttlo,
A rang tlân cak pawl a săwtin an săwt.
23 ‘Meroz cu camsiat uh,
A sungih umpawl cu nasa zetin camsiat uh,
Ziangahtile annih cu Jehovah băwmnak ah an ra lo,
Micak donak ih Jehovah băwmnak ah cun,’ tiah Jehovah-ih vancungmi in a ti.
24 ^sNunaupawl lakih mithlawsuakbik cu Jael a si,
Ken-mi Heber-ih nupi;
Puanthlampawl sungih nunaupawl lakah anih cu mithlawsuak a si.
25 ^tSisera in tidai a dil, Jael in hnawi a pe,
Jael in khēng mawi zetin hnawi khăl a kengsuak.
26 Jael-ih kut cu puanthlam khenkilhnak lamah a suah,
A vawrh lam kut cu hnaṭuantupawlih sobul lamah;
Sisera a khêng, a lu a sŭn,
Jael cun a khēng ih, a depdep ah tlăng ko a khêng.
27 Jael ke hramah Sisera cu a sâwn, a tlu, a tlulan ta,
Jael ke hramah anih cu a sâwn, a tlu,
A sawnnak hmun ah, a tluthat.
28 ^uSisera-ih nu in tukvirh ihsin a cuan,
Cule tukvirh kalhpaṭheng ihsin,
‘Ziangah so a rang lêng a va thleng har ve?
Ziangah so a rang lêng awn a khawtlai?’ tiin a ausuak.
29 Sisera-ih nunau fimbik pawl in amah Sisera cu an sawn,
A si, amah le amah khal a sawnaw,
30 ^v‘Ralthillawn an hmu ih an ṭhenaw rero lo maw si?
Mipa kip in nunau pakhat, asilole pahnih;
Sisera hrangah, buh mi ralthillawn sinfenpawl,
Ṭelh mi le buh mi ralthillawn sinfenpawl,
Ralthillâk hngawng ih bah ding mi khat lam le khat lam buh le ṭelh mi,’ tiin.
31 ^wCuti vek cun na ralpawl zaten hloral hai seh, Maw, Jehovah!
Asinan amah duhdawtu cu tha cak zetih suak ni vek si hai seh,”

5:2^a Sam 110:3

5:3^b Suah 15:1

5:4^c Suah 13:21; Mip 24:18; Dnp 33:2; Sam 18:7; 68:8; Isa 2:19, 21; Jer 10:10; Joe 3:16; Nah 1:5; Hab 3:6

5:5^d Suah 19:18; Sam 29:6; Isa 64:3

5:6^e Pui 26:22; Sam 125:5; Isa 33:8; 59:8

5:8^f Mip 25:7; Dnp 32:17; Jos 2:5

5:10^g Sem 49:11

5:11^h Sem 24:11; 29:2; Dan 9:16; Mik 6:5

5:12ⁱ Sam 44:23; 68:18; Isa 51:9, 17; Efe 4:8

5:14^j Sem 41:52; 50:23; Mip 34:21

5:15^k Sem 30:18

5:16^l Sem 49:14

5:17^m Jos 12:2; 17:7

5:18ⁿ Sem 30:20; Sam 68:27

5:19^o Jos 11:5; Thu 16:16

5:20^p Jos 10:12-14

5:21^q Suah 15:2; Jos 1:6

5:22^r Jer 8:16

5:24^s Sem 15:9; Luk 1:42

5:25^t Sem 18:8

5:28^u Thf 7:6

5:30^v Suah 15:9; 2Sam 1:24; Sam 45:14; 68:12; Eze 16:10

5:31^w Mip 10:35; 2Sam 18:32; Job 37:21; Isa 18:4

tiin hla an sak.

Cule ram cu kum 40 sung ralmûangin a um.

6

Midia-mipawl in Israel an Palbĕt

1 ^aCun Israel tefapawl cun Jehovah-ih mithmuh ah thil ṭha lo an tuah. Cule Jehovah in anmah cu kum sarih sung, Midian kut ah a pek hai, 2 ^bcun Midian kut cun Israel a neh. Israel tefapawl in Midian-mipawl ruangah tlang ah anmai hrangah khurpawl, pûkpawl le ral hruangkulhpawl an tuah. 3 ^cCule hitin a si, Israel in thlaici a tuh tinten, Midian-mipawl an ra so, Amalek-mipawl le nisuahnak lam mipawl khal Israel dokalhin an ra so. 4 ^dCun Israel dokalhin ṭanhmun an khuar ih, Gaza tiangin leilung rahsuak an siatsuah, cule tuu siseh, caw cang siseh, lāk siseh, Israel hrangah ei ding zianghman an hlah lo. 5 ^eZiangahtile annih cu an sumhnámpawl le an puanthlampawl thawn kharbawkpawl vekih tam in an hung so, anmah le an kalaukpawl cu siar cawk lo an si. Cule ram siatsuah dingin ram sungah an lut. 6 ^fCun Israel cu Midian-mipawl ruangah nasa zetih farahterin a um, cule Israel tefapawl cu Jehovah hnenah an ausuak.

6:1^a Sem 25:2

6:2^b 1Sam 13:6; Job 24:8; Isa 2:19; 5:30; Jer 41:9; Heb 11:38

6:3^c Mip 13:29; Isa 11:4; Jer 49:28

6:4^d Sem 10:19; Pui 26:16; Isa 10:6

6:5^e Isa 21:7; Jer 49:32

6:6^f Dnp 28:43

7 Cule hitin a si, Midian-mipawl ruangah Israel tefapawl cu Jehovah hnenih an ausuah tikah, 8 ^aJehovah in Israel tefapawl hnenah profet a thlah ih, anih in an hnenah, “Israel-ih Pathian Jehovah in hitin a ti, ‘Izip ihsin ka lo hruaiso ih sál tānnak inn ihsin ka lo hruaisuak. 9 ^bCule Izip-mipawlih kut ihsin le a lo palbĕttu hmuahhmuah kut ihsin ka lo runsuak ih, anmah cu nan hmaiah dawisuakin an ram ka lo pe. 10 ^cCuihtlunah kei in nan hnenah, “Keimah cu Jehovah nan Pathian ka si, nan cēnnak ram, Amor-mipawlih pathianpawl cu ṭih hlah uh,” tiah ka lo ti. Sikhalsehla ka thu nan lung duh lo,’ a ti a si,” tiah a ti.

6:8^a Jos 24:17; Neh 9:29; Job 36:10; Eze 18:30-31

6:9^b Mip 10:9; Sam 136:24

6:10^c Suah 20:5; Jos 24:15

Gideon

11 ^aCun Jehovah-ih vancungmi a ra ih, Ofrah khua Abiezer-mi Joash-ih ela thingkung hnuaiah a to, a fapa Gideon cu Midian-mipawl ih hmuh lo dingin sabit sawrnak sungah sangvut a vua. 12 ^bCule Jehovah-ih vancungmi cu a hnenah a lang ih, a hnenah, “Na hnenah Jehovah a um, nang micak ralṭha!” tiah a ti.

6:11^a Sem 16:7; Jos 18:23; Lai 2:1; 6:14; Rut 2:17; Heb 11:32

6:12^b Jos 1:5; Rut 2:4; Sam 129:8

13 ^aGideon in a hnenah, “Maw, ka bawipa, Jehovah kan hnenih a um a si ahcun, ziangah so hivek thil hmuahhmuah tla hi kan parih a thlen? ‘Jehovah in Izip ihsin in hruaisuak a si lo maw?’ tiin kan pupápawl ih in rak sim mi a thilmakpawl teh khuiah so an um? Atu-ah Jehovah cun in thlauthla zo ih, Midian-mipawl kut ah in pe zo a si,” tiah a ti.

6:13^a Dnp 31:17; Jos 3:5; 2Sam 7:22; Sam 44:1

14 ^aCun Jehovah cu a lamah a hawi ih, “Himi na cahnak in feh awla, Midian-mipawlih kut ihsin Israel na runsuak ding a si. Ka lo thlah a si lo maw?” tiah a ti.

6:14^a 2Sp 14:27; Heb 11:34

15 ^aCule Gideon in a hnenah, “Maw ka Bawipa, ziangtin Israel cu ka run thei ding? Ngai hnik, ka hrin cu Manasseh lakih a cak lo bik a si, cule kei cu ka paih sungkua ah a tenaubik ka si fawn,” tiah a ti.

6:15^a 1Sam 9:21; Isa 60:22

16 ^aCule Jehovah in a hnenah, “Na hnenah ka um rori ding ih, Midian-mipawl cu minung pakhat vekin na neh hai ding a si,” tiah a ti.

6:16^a Suah 3:12; Jos 1:5

17 ^aCun Gideon in a hnenah, “Na mithmuh ih duhsaknak ka co asile, ka hnenih ṭawngtu hi nangmah na si ti hminsinnak i hmuh aw. 18 Na hmaiih ret ding ka thilhlăn ka va lâk ih, na hnen ka thlen lai hlanlo, zangfahten hi tawk ihsin tlân hram hlah aw,” tiah a ti.

6:17^a Sem 24:14; Suah 3:12

Cule anih in, “Na ra thlenkirsal tiang ka rak um ding,” tiah a ti.

19 ^aCule Gideon cu a lut ih, me note le thilnu telh lo sang cu sangvut efa khat a timtuah. A sa cu kho sungah a ret ih, bel sungah a hāng cu a ret. Cule cupawl cu ela thingkung hnuaiih Jehovah-ih vancungmi hnenah a keng ih a hlan. 20 Pathian-ih vancungmi in a hnenah, “Sa le thilnu telh lo sang cu la awla, himi lungpi parah ret aw, cule a ti thle aw,” tiah a ti. Cule cu vekin a tuah. 21 ^bCun Jehovah-ih vancungmi cun a kut sungih kianghrăwl zim cun sa le thilnu telh lo sang cu a tăwk. Cule lungpi ihsin meisa a suak ih, sa le thilnu telh lo sang cu an káng. Cule Jehovah-ih vancungmi cu a mithmuhnak ihsin a hlo.

6:19^a Sem 18:7-8; Pui 19:36

6:21^b Suah 4:2

22 ^aCun Gideon in amah cu Jehovah-ih vancungmi a si ti a theithiam. Cule Gideon in, “E heu, Maw Bawipa Jehovah! Hmaităwnin Jehovah-ih vancungmi ka hmu a si hi!” tiah a ti.

6:22^a Sem 32:30; Lai 13:21-22

23 ^aCun Jehovah in a hnenah, “Na hnenah daihnak um seh, ṭih hlah, na thi lo ding,” tiah a ti. 24 ^bCule Gideon in cu tawkah Jehovah hrangah biakṭheng a dâwl ih, cumi cu, ^cJehovah Shalom tiah a ko. Cuih biakṭheng cu tuihni tiangin Abiezer-mipawlih khua Ofrah ah a um lai.

6:23^a Sem 16:13; Dnp 5:26

6:24^b Sem 22:14; Jos 18:23

6:24^c Jehovah Shalom: “Jehovah cu Daihnak a si,” tinak a si.

Gideon in Baal Biakṭheng a Ṭhiatbăl

25 ^aCule hitin a si, cuih zan thothoah Jehovah in a hnenah, “Na paih caw pa tûai, a pahnihnak caw pa tûai kum sarih upa kha la awla, na paih neih mi Baal biakṭheng kha ṭhiatbăl aw, cule cumi kiangih Asherah khal hautlu aw. 26 Cule himi lungpi zimah Jehovah na Pathian hnenah rem thlipthlepten biakṭheng dâwl aw. Cule a pahnihnak caw pa tûai la awla, na hauthluk ding mi thing Asherah lim thawn Meiur Thilhlăn hlan aw,” tiah a ti. 27 Cule Gideon cun a siahhlawhpawl lakih mipa pahra a hruai ih, Jehovah in a hnenih a sim vekin a tuah. Cule hitin a si, sun laiih cumi tuah dingah a paih sungkua le khaw sung mipapawl a ṭih tuk lawmmam ruangah, zan ah a tuah.

6:25^a Suah 34:13

28 ^aCule khaw sung mipapawl zingteih an thawh tikah, zoh hnik, ṭhiahbăl mi Baal biakṭheng le a kiangih Asherah cu hauthlukin a rak um, cule a pahnihnak caw pa tûai cu dawl mi biakṭheng parah hlănin a um. 29 Cule pakhat le pakhat, “Zo in hivek thil a tuah?” tiah an tiaw.

6:28^a 1Sp 16:32; 2Sp 21:3

Cule an sut ih an suhkual tikah, “Joash-ih fapa Gideon in hivek thil a rak tuah,” tiah an ti.

30 Cule khaw sung mipapawl in Joash hnenah, “Thah a si thei nak dingah na fapa rak hruai aw, ziangahtile Baal biakṭheng a ṭhiatbăl ih, cumi kiangih Asherah khal a hautlu a si,” tiah an ti.

31 ^aAsinan Joash cun amah dokalhih a dīngtu zate hnenah, “Baal nan ṭan ding maw? Amah cu nan run ding maw? Amah ṭantu cu zing ah thah si seh! Baal cu pathian asile, amah le amah runaw seh, ziangahtile a biakṭheng cu ṭhiahbăl a si zo!” tiah a ti hai. 32 ^bCuruangah cuih ni ah Joash in Gideon cu, “Baal in Gideon dokalh seh, ziangahtile anih in a biakṭheng a ṭhiatbălsak a si,” tinak ah ^cJerubbaal tiah a sak.

6:31^a 1Sam 24:15; Jer 30:13

6:32^b 1Sam 12:11

6:32^c Jerubbaal: A sullam cu Baal in a do tinak a si.

33 ^aCun Midian-mi hmuahhmuah, Amalek-mi hmuahhmuah le nisuahnak lam mipawl an fĭnkhawmaw. Cule an hei tankai ih Jezreel phaikuam ah ṭanhmun an khuar. 34 ^bAsinan Jehovah Thlarau cu Gideon parah a rung ^cthleng, cule anih in tuu pa ki a phaw ih a dungah Abiezer-mipawl an pungkhawm. 35 ^dCule Manasseh ram pumpi hrawhsuakin Gideon in palaipawl a thlah ih, amah thlun dingin annih khal kawhkhawm an si. Asher, Zebulun le Naftali rampawl khalah palaipawl a thlah ih annihpawl cu amah táwng dingin an hung so.

6:33^a Sem 25:6; Mip 13:29; Hos 1:5

6:34^b Jos 6:20; 17:2

6:34^c thleng: A ṭawng hrampi ah cun, “thuam” ti a si.

6:35^d Jos 17:7

Gideon-ih Tuu Hmul

36 Cun Gideon in Pathian hnenah, “Na rak sim zo bangin ka kut hmangin Israel na run ding asile, 37 ^azoh hnik, hruih hmun ah tuu hmul ṭhuam khat ka ret ding ih sahmul par lawngah daifim a um ih, leilung par hmuahhmuah cu a ro asile, na rak sim zo bangin ka kut hmangin Israel na run ding ti ka thei ding,” tiah a ti. 38 Cule cutin a rak si taktak. A thaizing zingpitih a thawh tikah, tuu hmul cu a sawrkhawm ih daifim ihsin tidai kheng kûm khat a sawrsuak. 39 Cun Gideon in Pathian hnenah, “Ka parah na thinheng hlah aw, vei khat lawngin ka ṭawng hrih ding, zangfahten tuu hmul thawn vei khat lawng hniksak hrih ko ning, atu-ah cun tuu hmul lawng ro sehla, leilung hmuahhmuah ah daifim um seh,” tiah a ti. 40 ^bCule Pathian in cuih zan ah cu vekin a tuah. Tuu hmul lawng a ro, asinan leilung par hmuahhmuah ah daifim a um.

6:37^a Sem 24:14; Mip 18:27; Job 31:20

6:40^b Isa 38:7

7

Gideon-ih Ralkappawl

1 ^aCun Gideon ti mi Jerubbaal le a zawngih um minungpawl hmuahhmuah cu zing ten an tho ih Harod tikhur kiangah ṭanhmun an khuar. Midian-mipawlih ṭanhmun khuarnak cu an sak lam, phaikuam sungih Moreh tlang pâwng ah a si.

7:1^a Sem 12:6; 25:2

2 ^aCule Jehovah in Gideon hnenah, “Na hnenih um minungpawl hi an kut sungih Midian-mipawl pe dingah ka hrangah an tam tuk, culole, ‘Keimai kut rori in i run,’ tiin, Israel in keimah dokalhin sunlawinak a la pang ding. 3 ^bCuruangah mipi hnatheih ah, ‘Zokhal a khūr le a ṭihtu cu kir sehla, Gilead tlang ihsin tlân lohli seh,’ tiin phuang aw,” tiah a ti. Cule mi 22000 cu an kirsal ih, 10000 an tâng.

7:2^a Dnp 8:17

7:3^b Dnp 20:8; Jos 12:2

4 Asinan Jehovah in Gideon hnenah, “Milai an tam tuk lai thotho, tidai ah hruai hai awla, cu tawkah na hrangah anmah cu ka hniksak hai ding. Cun hitin a si ding, ‘Hi pa hi na hnenah a feh ding a si,’ tiih na hnenih ka lo ti mi cu na hnenah a feh ding ih, ‘Hi pa cu na hnenah a feh lo ding a si,’ tiih na hnenih ka ti mi cu a feh lo ding,” tiah a ti. 5 Cun milaipawl cu tidai ah a hruai hai. Cule Jehovah in Gideon hnenah, “Uico liah vekin an lei ih tidai a liaktu pauhpauh cu na rethran hai pei ih, cuvek thothoin, in dingih kûn tahratin khuk a biltu pauhpauh khal,” tiah a ti. 6 Cule an kâ ah an kut ret ih a liaktu mipum cu mipa 300 an si, asinan mi dang hmuahhmuah cu kûn tahratin khukbilin tidai an in. 7 ^aCun Jehovah in Gideon hnenah, “A liahih liaktu mipa 300 hmangin ka run ding ih, Midian-mipawl cu nan kut ah ka lo pe ding. Mi dang pawl hmuahhmuah mai hmun cio ah tlung hai seh,” tiah a ti. 8 Cutin mipi cun ei ding le an tuu pa kipawl cu an kut in an keng. Cule Gideon in a tāng mi Israel-mipawl cu, mi kip mah le puanthlam cio ah a tlungter hai ih, cuih mipa 300 cu a tāngter. Midian ṭanhmun khuarnak cu an hnuaiih phaikuam ah a si.

7:7^a Jos 8:7

9 ^aCun hitin a si, cuih zan ah Jehovah in Gideon hnenah, “Tho aw, riahhmun lamah suk aw, ziangahtile cumi cu na kut ah ka lo pe zo. 10 Asinan feh ding na ṭih asile, ṭanhmun khuarnak ah cun na siahhlawh Purah sukpi aw. 11 Cule an ṭawng mi na thei ding ih, cuih hnuah ṭanhmun khuarnak lamih suk dingah na kutpawl cahter an si ding,” tiah a ti. Cun ṭanhmun khuarnak ih ralthuam keng pacangpawl tăwntir ah a siahhlawh Purah thawn a suk. 12 ^bMidian-mipawl le Amalek-mipawl, nisuahnak lam mipawl hmuahhmuah cu kharbawk tlukih tam in phaikuam cu an luahkhat. An kalaukpawl khal siar cawk lo, tiva kapih vunnel vekih tam an si.

7:9^a Jos 2:24

7:12^b Mip 13:29; Jos 11:4; Jer 46:23; 49:29

13 Cule Gideon a thlen tikah, zoh hnik, mi pakhat a hawipi hnenih a mang sim rero lai a rak um. Cu pa cun, “Mang ka rak nei, zoh hnik, barli sangvut sang hlăwm khat hi Midian ṭanhmun khuarnak ah a rīl, cuih sang cu thlam ah a rīl ih, thlam cu a sawh, cutin thlam cu a tlu ih a linglet, cule thlam cu a cim,” tiin a sim.

14 Cun a hawipi cun a sawn ih, “Himi cu ziang dang a si lo, Israel pa pakhat Gideon, Joash-ih fapaih ralnâm a si cu! Pathian in a kut ah Midian le ṭanhmun khuarnak pumpuluk a pe zo a si hi,” tiah a ti.

15 Cule hitin a si, Gideon in an mang simawk mi le a hrilhfiah a theih tikah, Pathian a bia. Gideon cu Israel ṭanhmun khuarnak ah a kirsal ih, “Tho uh, ziangahtile Jehovah in nan kut ah Midian ṭanhmun khuarnak cu a lo pe zo a si,” tiah a ti. 16 ^aCun mipa 300 pawl cu bur thum ah a ṭhen hai ih, mi pakhat kut ciar ah tuu pa ki pakhat, lei bel kawlawng le a sungah meiser a um mi lei bel a kenter hai. 17 Cule anih in an hnenah, “In zoh uhla, ka tuah vekin nan tuah ve pei, zoh hnik uh, ṭanhmun khuarnak tăwntir ka thlen tikah ka tuah vekin nan tuah ve pei. 18 Tuu pa ki ka phawt tikah, keimah le ka zawngih a um mi zaten, ṭanhmun khuarnak pumpuluk kil kip ah tuu pa ki phaw in, ‘Jehovah le Gideon-ih ralnâm!’ tiah nan ti cio pei,” tiah a ti hai.

7:16^a Sem 14:15; 15:17; 24:14; Pui 25:9; 1Sam 11:11

19 Cutin Gideon le a hnenih um mipa 100 pawl cu, ^azan ralven laita thawktir, ralven an rak thlĕngawk pekah, ṭanhmun khuarnak tăwntir an thleng. Cule tuu pa ki an phaw ih an kut ih lei belpawl cu an khuai. 20 ^bCun mi bur bur thum cun an tuu pa ki an phaw ih, an lei belpawl an khuai. Meiserpawl cu an keh lam kut in an keng ih, tuu pa kipawl cu an kut vawrh lamah, cule, “Jehovah le Gideon-ih ralnâm!” tiin an au. 21 ^cCule ṭanhmun khuarnak kulhin mipa pakhat cio anmai hmun ah an ding fingfing ih, ralkap zaten an tlân, an au ih, an zâm. 22 ^dMipa 300 pawl in tuu pa ki an phawt tikah, Jehovah in mi kip an ralnâm thawn ṭanhmun khuarnak pumpuluk in anmai hawipi a doter. Cule ralkappawl cu Zererah lam, Beth Akasia tiang, Tabbath kiangih Abel Meholah ramri tiangin an tlânsia. 23 ^eCule Naftali, Asher le Manasseh hmuahhmuah ihsin Israel mipapawl cu an fĭnkhawmaw ih, Midian-mipawl an hei dawi.

7:19^a zan ralven laita: Zanṭim tinak a si.

7:20^b Sem 15:17; Dnp 32:41

7:21^c Suah 14:13; 2Sp 7:7

7:22^d Jos 6:20; 1Sam 18:19; 1Sp 4:12; 2San 20:23; Isa 9:1; Eze 38:21; Hab 3:14; Hag 2:22; Zek 14:13

7:23^e Jos 7:7; Sam 83:9

24 ^aCun Gideon in Efraim tlang ram hmuahhmuah ah palaipawl a thlah ih, “Midian-mipawl dokalhin rung suk uhla, anmah cu tidai umnak hmunpawl ihsin Beth Barah le Jordan tiangin kulh uh,” tiah a ti. Cun Efraim mipa zaten an fĭnkhawmaw ih tidai umnak hmunpawl ihsin Beth Barah le Jordan tiangin an kulh. 25 ^bCule Midian-mipawlih ralbawi pahnih, Oreb le Zeeb tla an kai. Oreb cu Oreb-ih lungpi ah an that ih, Zeeb cu Zeeb-ih sabit sawrnak ah an that. Midian cu an dawi ih Jordan ralkhat lamih Gideon hnenah Oreb le Zeeb-ih lupawl tla an hei keng.

7:24^a Jos 2:7

7:25^b Sam 83:11; 106:43; Isa 10:26

8

Gideon in Midia-mipawl a Duaiter

1 ^aCun Efraim mipapawl in Gideon hnenah, “Midian-mipawl do dingih na feh laiah khan, in rak sawm lo, ziangah saw cutiih na tuah?” tiah an ti. Cule annih in Gideon cu nâ zetin an kawk.

8:1^a Sem 25:2; 2Sam 19:41

2 Cule anih in an hnenah, “Ka tuah mi hi nan tuah mi thawn khaikhin tlak a si maw si? Abiezer-ih sabit lawh mi hnakin Efraim-ih sabit hlah mi sarkhawm mi hi a nasa lo maw? 3 Pathian in nan kut ah Midian ralbawi Oreb le Zeeb a lo pe zo. Cule nanmah thawn khaikhinin ziang so ka tuah thei mi?” tiah a ti hai. Cun cuih thu a sim tikah a parih an thinhengnak cu a dai.

Zebah le Zalmunna

4 Gideon cu Jordan a thlen tikah amah le a hnenih um mipa 300 pawl cun an tankai, cau zet cingin an dawi thotho. 5 ^aCun anih in Sukkoth mipapawl hnenah, “Zangfahten i thluntu minungpawl hnenah sang hlăwm pe uh. Ziangahtile annih cu an cau, kei cun Midian lal Zebah le Zalmunna ka dawi hai vivo lai ding,” tiah a ti.

8:5^a Job 16:7; Sam 6:6; 83:11; Jer 45:3

6 ^aCule Sukkoth hotupawl in, “Kannih in na ralkap hnenah sang pe dingin, Zebah le Zalmunna ih kutpawl tla na kut ah an um zo maw si?” tiah an ti.

8:6^a 1Sam 25:11

7 Cu tikah Gideon in, “Himi thu ah, Jehovah in ka kut sungih Zebah le Zalmunna i pek tikah cun, ramṭhing ih hling bur le hram bûar hmangin nan taksa ka thlek ding!” tiah a ti. 8 ^aCun Gideon cu cu tawk ihsin Penuel ah a so ih, an hnenah cuvek thothoin a ṭawng. Penuel ih mipapawl khal in Sukkoth mipapawl ih rak sawndān vekin amah an sawn ve. 9 Cule anih khal in Penuel mipapawl hnenah, “Daihnak thawn ka ratsal tikah, hi dawlsâng hi ka ṭhiatbăl ding!” tiah a ti.

8:8^a Sem 32:30

10 ^aCun Zebah le Zalmunna cu Karkor ah an um ih, an ralkappawl khal anmah zawngah an um, 15000 hrawng an si, nisuahnak lam mipawlih ralkap zate lakih a nungdamsŭn zate an si. Ziangahtile ralnâm kengtu mipa tingkhat le thawngkul pawl cu an tlu zo. 11 ^bCun Gideon cu Nobah le Jogbehah nisuahnak lam thlampawl ih a cêngtupawlih lamzin in a so ih, ṭanhmun khuarnak cu ralmûangih an theihawk laiah a do. 12 Zebah le Zalmunna an tlan tikah, Gideon in a dawi hai ih Midian siangpahrang pahnih, Zebah le Zalmunna cu a kai hai, cule ralkap zaten a buaiter.

8:10^a Isa 9:4

8:11^b Mip 32:42

13 Cun Joash-ih fapa Gideon cu ni a suah hlanah ral donak ihsin a kir. 14 Cule Sukkoth mipapawl lakih tlangval pakhat a kai ih, thu a sut. Cule cuih tlangval in Sukkoth hotupawl le Sukkoth upapawl mi 77 pawlih hmin cu a ngansak. 15 Cun Gideon cu Sukkoth mipapawl hnenah a hung so ih, “Zoh hnik uh, Zebah le Zalmunna hi, anmah hi sokhaw, ‘Zebah le Zalmunna cu na kut ih um zo vekin, cutiih na micaupawl sang kan hun pek mai ding cu?’ tiih in hnihsan kha,” tiah a ti. 16 ^aCule Gideon cun khaw upapawl cu a hruai hai ih, ramṭhing hling bur le hram bûar in Sukkoth mipapawl cu a zirh hai. 17 Cun Penuel dawlsâng a ṭhiatbăl ih, khaw sung mipapawl a that.

8:16^a 1Sam 14:12

18 ^aCule anih in Zebah le Zalmunna hnenah, “Tabor ih nan thah mi kha ziang vek mipa so an si?” tiah a ti hai.

8:18^a Jos 19:22

Cun annih in, “Annih khal nangmah vek an si, an zaten siangpahrang fapa an bang cio,” tiah an let.

19 ^aCun anih in, “Annih cu ka unau, ka nuih fapapawl an si. Jehovah a nun rori bangin, an nunnak rak zuah uhla cu ka lo that lo ding nân,” tiah a ti. 20 Cule a fapa upabik Jether hnenah, “Tho aw, anmah cu that aw!” tiah a ti. Asinan suakthuan cun a ralnâm a phawi lo, ziangahtile a ṭih, amah cu a suakthuan lai hrih ruangah a si.

8:19^a Mip 14:21

21 ^aCun Zebah le Zalmunna in, “Nangmah cu mipa na si, mipa tha na nei, nangmah rori tho awla, in that aw,” tiah an ti. Cule Gideon cu a tho ih, Zebah le Zalmunna cu a that hai, cule an kalaukpawl hngawng parih ceinak kûal pawl cu a la.

8:21^a Isa 3:18

Gideon-ih Puithiam Kâwrcung

22 Cun Israel mipapawl in Gideon hnenah, “In uk aw, nangmah le na fapa nan pahnih le na tupa khal, ziangahtile nang in Midian kut ihsin in runsuak a si,” tiah an ti.

23 ^aAsinan Gideon in an hnenah, “Ka lo uk lo ding ih, ka fapa khal in a lo uk lo ding, Jehovah in a lo uk ding a si,” tiah a ti hai. 24 ^bCun Gideon in an hnenah, “Thil pakhat lo dil ka duh, mi pakhat fingfing in nan ralthillawn ihsin hnakhaih in pe cio pei,” tiah a ti. Ziangahtile annih cun sui hnakhaihpawl an nei, ziangruangahtile annih cu Ishmael-mi an si.

8:23^a Suah 16:8; Mip 11:20; Sam 10:16

8:24^b Sem 16:11; 35:4; 49:27

25 Cun annih in, “Siang zetin kan lo pe ding,” tiah an ti. Cule sinfen an phah ih, mi kip in cumi parah an ralthillawn ihsin hnakhaihpawl an theh. 26 A dil mi sui hnakhaihpawlih rih lam cu ceiawknak kûal pawl, ṭhi le Midian siangpahrangpawlih hruk mi kâwrfual senduppawl le an kalaukpawl hngawng ih ṭhipawl siarlo in, sui shekel 1700 a si. 27 ^aCun cumi cu Gideon in Puithiam Kâwrcung pakhat ah a tuah ih, cumi cu amai khua, Ofrah ah a ret. Cule Israel miphun zate in cu tawkah cumi thawn hlawhhlannak an tuah. Cumi cu Gideon le a sungza hrangah tháng ah a cang.

8:27^a Suah 10:7; 25:7; Jos 18:23

28 Cuti cun Midian cu an lu tungsal nawn loin, Israel tefapawl hmaiah an duai. Cule Gideon dam sung hmuahhmuah ram cu kum 40 sung ralmûangin a um.

Gideon Thihnak

29 Cun Joash-ih fapa Jerubbaal cu a feh ih, amai inn ah a cêng. 30 ^aGideon cu nupi tampi a neih ruangah amai sung suak fapa 70 a nei. 31 ^bShekem khua ih a um mi a nusun khal in fapa pakhat a hrinsak. A hmin cu ^cAbimelek a si. 32 ^dCule Joash-ih fapa Gideon cu tar kûnin a thi, cule Abiezer-mipawlih Ofrah khua, a pa Joash-ih thlān ah phum a si.

8:30^a 2Sp 10:1

8:31^b Sem 22:24

8:31^c Abimelek: Ka pa cu siangpahrang a si tinak a si.

8:32^d Sem 5:15

33 Cun hitin a si, Gideon a thih veten Israel tefapawl cun Baalpawl thawn hlawhhlannak an tuahsal, cule ^aBaal-Berith cu an pathian ah an tuah. 34 ^bCutin Israel tefapawl in kil kip ih an ralpawl hmuahhmuah kut ihsin anmah runsuaktu Jehovah an Pathian an máng nawn lo, 35 Gideon tiih kawh mi Jerubbaal sungza par khalah Israel hrangih thil ṭha a rak tuah mi zulhin ṭhatnak an langter lo.

8:33^a Baal-Berith: Shekem pathian a si ih, a hmin sullam cu “thukham Baal” tinak a si.

8:34^b Neh 9:17

9

Abimelek

1 Cun Jerubbaal-ih fapa Abimelek cu Shekem khua ih a nuih ṭapalepawl hnenah a feh ih, anmah le a nuih paih sungkaw hrinpawl zaten a be hai ih, 2 ^a“Zangfahten Shekem mipapawl zate hnatheih ah, ‘Jerubbaal-ih fapa 70 pawl in nan tlunih an lo uk maw ṭha nan ti sawn, mi pakhat in nan tlunih a lo uk?’ tiah ti hnik uh. Cun kei cu nan titsa le ruh ka si ti cîng ringring uh,” tiah a ti.

9:2^a Sem 29:14

3 Cule a nuih ṭapalepawl in Shekem mipapawl hmuahhmuah ih hnatheih ah amai thuhla himi ṭawngkam hmuahhmuah hi an sim. Cule an thinlung cun Abimelek thlun ding an duh ih, annih in, “Anih cu kan unaupa a si,” tiah an ti. 4 ^aCun Abimelek cu ^bBaal-Berith temple ihta ngun shekel 70 an pe, cule cumi thawn anih in mihlothlau le pawisak nei lo pacangpawl a hlang, cule annih in amah cu an thlun. 5 ^cCun anih cu Ofrah khua ih a paih inn ah fehin a unaupapawl, Jerubbaal-ih fapa 70 pawl cu lungto pakhat parah a that hai. Asinan Jerubbaal-ih fapa nautabik Jotham cu a relh ruangah a tâng. 6 ^dCule Shekem mipa hmuahhmuah le Beth Millo khaw mipa hmuahhmuah cu an fĭnkhawmaw ih, an feh, cule Abimelek cu Shekem khua ih a um mi elon thingkung kiangih ṭhuam ah siangpahrang ah an tuah.

9:4^a 2San 13:7; Job 30:8

9:4^b Baal-Berith: Shekem pathian a si ih, a hmin sullam cu “thukham Baal” tinak a si.

9:5^c 2Sp 11:2; 2San 22:9

9:6^d Sem 12:6; 2Sp 12:20

Thingkung Tahṭhimnak

7 ^aJotham an sim tikah, anih cu a feh ih, Gerizim tlang zimah dīngin a aw suahin a au. Cule anih in an hnenah, “Pathian ih a lo ngaithlak thei nak dingah, i ngai hnik uh, nannih Shekem mipapawl!

9:7^a Dnp 11:29; Joh 4:20

8 “Vei khat cu thingkungpawl hi an siangpahrang ding hriak thih dingin an fehsuak. Cule olif thingkung hnenah, ‘In uk aw!’ tiah an ti.

9 “Asinan olif thingkung in an hnenah, ‘Pathian le milai an cawimawinak ka hriak peksuah hi cawlhsanin, thing parah thēnaw rero dingin ka feh ding maw si?’ tiah a ti.

10 “Cun thingkungpawl in theipi kung hnenah, ‘Nang ra awla, in uk aw!’ tiah an ti.

11 “Asinan theipi kung in an hnenah, ‘Ka thlumnak le ka rah ṭha hi suahsanin, thing parah thēnaw rero dingin ka feh ding maw si?’ tiah a ti.

12 “Cun thingkungpawl in sabit hri hnenah, ‘Nang ra aw, cule in uk aw,’ tiah an ti.

13 ^a“Asinan sabit hri in an hnenah, ‘Pathian le minungpawl lungawitertu, ka sabit zu thar cu cawlhsanin, thing tlunah thēnaw rero dingin ka feh ding maw si?’ tiah a ti.

9:13^a Ths 2:3; Sol 4:10

14 “Cun thingkungpawl hmuahhmuah in hling hnenah, ‘Nang ra awla, in uk aw!’ tiah an ti.

15 ^a“Cule hling in thingkungpawl hnenah, ‘Nan parih siangpahrang dingih hriak in thih ngaingai asile, ra uhla ka zârhnem ah beu uh, asinan cuti asilole hling ihsin meisa suak aw sehla, Lebanon ih sidar kangrál thluh seh!’ tiah a ti.

9:15^a 1Sp 5:6; Sam 29:5; Isa 2:13; 30:2

16 ^a“Curuangah Abimelek siangpahrang ih tuahnak ah thungaithlak le diktakin nan rak cangvai ih, Jerubbaal le a sungza cu ṭhateih nan rak zoh ih, a phu tawkin a hnenah nan rak tuah asile, lungawi aipuangin um uh. 17 ^bZiangahtile ka pa cun a nun thāpin nan hrangah ral a do ih, Midian kut ihsin a lo runsuak. 18 ^cAsinan tuihsun ah cun ka paih sungza dokalhin nan rak tho ih lungto pakhat parah a fapa 70 nan that, cule a siahhlawh nuih fapa Abimelek cu nan unaupa a si ruangah Shekem mipapawl parih siangpahrang ah nan tuah. 19 Tuihsun ah Jerubbaal le a sungza thawn thungaithlak le diktakin nan rak cangvai asile, Abimelek ah lungawi aipuangin um uhla, amah khal nanmah ah lungawi aipuangin um seh. 20 Asinan cuti asilole, Abimelek hnen ihsin meisa suakin Shekem le Beth Millo mipapawl kangrál thluh seh, cule Shekem mipapawl hnen ihsin le Beth Millo mipapawl hnen ihsin meisa suak sehla, Abimelek kangrál thluh seh,” tiah a ti. 21 Cule a unaupa Abimelek a ṭih ruangah, Jotham cu a tlanhlo ih a zâm. Cule Beer khua ah a feh ih, cu tawkah a cêng.

9:16^a Lai 8:35

9:17^b Job 13:14; Sam 119:109

9:18^c Lai 8:30-31

Abimelek Thihnak

22 Abimelek in Israel kum thum a uk hnuah, 23 ^aPathian in Abimelek le Shekem mipapawl karlakah lungput ṭha lo a thlah. Cule Shekem mipapawl in Abimelek parah hrăwkhrawl zetin an ti. 24 Cumi cu Jerubbaal-ih fapa 70 pawl tlunih râwng zetih an ti ruangih an parih phuba lâknak a rung thlen thei nak dingah le anmah thattu an unaupa Abimelek parah le a unaupawl that dingih a kut caktertu Shekem mipapawl parih an thisen a um thei nak dingah a si. 25 Cule Shekem mipapawl cun tlang tluan zim pawl ah amah bawhtu mipapawl an ret ih, cuih lamzin ih a fehtu hmuahhmuah cu an rak suam, cule cuih thu cu Abimelek hnenah sim a si.

9:23^a Dnp 27:15; 1Sam 16:14; 1Sp 2:32

26 Cun Ebed-ih fapa Gaal cu a unau mipapawl thawn Shekem khua ah a feh, cule Shekem mipapawl in amah ah rinngamnak an nei. 27 ^aCule annih cu lópawl ah an fehsuak ih, an sabit hmuanpawl ihta sabit rahpawl an khawm ih an cīl, cule nuam an cēn. Cun an pathian inn sungah an lut ih an ei ih an in, cule Abimelek an camsiat. 28 ^bCun Ebed-ih fapa Gaal in, “Kannih in amah rian dingah Abimelek cu zo a si ih, Shekem cu zo a si? Amah cu Jerubbaal-ih fapa a si lo maw? Zebul cu a kut tăng bawi a si lo maw? Shekem-ih pa Hamor-mipawl rian sawn uh, ziangah saw amah cu kan rĕn sawn ding? 29 ^cHi milaipawl hi ka thuneihnak hnuaiih um si hai sehla cu maw! Abimelek cu ka ṭhawnhlo ding nân,” tiah a ti. Curuangah anih in Abimelek hnenah, “Na ralkap karhter awla, ra suak aw!” tiah a ti.

9:27^a Isa 16:10; Amo 5:11

9:28^b Sem 33:19; 1Sam 25:10

9:29^c 2Sam 15:4

30 Khawpi uktu Zebul in Ebed-ih fapa Gaal-ih ṭawngkampawl a theih tikah, a thinhengnak cu a tho. 31 Cule a thupten Abimelek hnenah palaipawl a thlah ih, “Zoh hnik! Ebed-ih fapa Gaal le a unau mipapawl cu Shekem an thleng zo, zoh hnik, nangmah dokalhin khawpi an kulh. 32 ^aCuruangah atu-ah, nangmah le na hnenih um milaipawl tla zan ah tho uhla, ramlakin rak bawh uh. 33 Cule hitin a si ding, zing ni a suah veten zing ten nan tho ding ih, khua cu va luhhnawh uh. Cule nanmah dokalhin amah le a hnenih um milaipawl an suah tikah, remcānnak nan hmuhdān dān vekin an hnenah tuah uh,” tiah a ti.

9:32^a Jos 8:2

34 Cutin Abimelek le amah hnenih um milaipawl zaten zan ah an tho ih, bur li in Shekem khua cu an bawh. 35 ^aEbed-ih fapa Gaal cu a fehsuak ih, khawpi luhnak kăwtka ah a ding, Abimelek le a hnenih um milaipawl cu an mibawhnak ihsin an tho. 36 Cule Gaal in mipi a hmuh tikah, Zabul hnenah, “Zoh hnik, mipi tlang zim ihsin an ra ṭum rero khi!” tiah a ti.

9:35^a Jos 2:5; Sam 32:7; Jer 49:10

Asinan Zebul cun a hnenah, “Tlangpawlih thlahlim cu mipapawl vekin na hmu a si kha,” tiah a ti.

37 Cule Gaal cu a ṭawngsal ih, “Zoh hnik, mipi cu ram laifang ihsin an ra ṭum rero ih, bur khat cu ^aMeonenim elon thingkung ihsin an ra rero,” tiah a ti.

9:37^a Meonenim: Meonenim ti cu kut ṭial zoh thiam tinak a si ih, ram hmin a si.

38 Cun Zebul in a hnenah, “ ‘Abimelek cu zo a si ih, amah cu kan rĕn ding? Hi mipi hi na hnawn mipawl an si lo maw?’ tiih na simnak na kâ cu khuiah so? Na duh ahcun fehsuak awla, atu-ah anmah do aw,” tiah a ti.

39 Cule Gaal cu Shekem mipapawl hmaiah a fehsuak ih, Abimelek thawn an doaw. 40 Cun Abimelek in Gaal cu a dawi ih anih cu a hmai ihsin a tlânsia. Cule mi tampi cu khawpi kăwtsuah rori tiang hriamhma thawn an tlu. 41 Cun Abimelek cu Arumah khua ah a cêng ih, Zebul in Gaal le a unau mipapawl cu Shekem ih an cēnlonak dingah a dawisuak.

42 Cule a thaisun ah hitin a si, mipi cu ló ah an fehsuak ih, Abimelek an va sim. 43 ^aCu tikah anih in a mipawl cu bur thum ah a ṭhen hai ih, ramlakin an bawh. Cule a zoh ih, ngai hnik, khaw sung ihsin ra suak rero mipawl an um, cule anmah dokalhin a tho ih anmah a do. 44 Cun Abimelek le a hnenih um mi bur cu hmai an năwr lohli ih, khawpi kăwtsuah ah an ding. Cule mi bur dang pahnih pawl cun ramlak ih um milaipawl cu an va năm ih an that. 45 ^bCutin Abimelek in cuih ni pumhlum in khawpi cu a do. Khawpi a la ih cumi sungih um milaipawl cu a that. Cule khawpi cu a ṭhiatbăl ih, cuih khua ah cite a theh.

9:43^a Jos 8:2

9:45^b Jer 48:9

46 Shekem dawlsâng ih mipapawl hmuahhmuah in cuih thu an theih tikah, Berith pathian temple hauhruang sungah an lut. 47 Cule Shekem dawlsâng ih mipapawl zaten an fĭnaw, tiin Abimelek an sim. 48 Cun Abimelek cu amah le a hnenih um milai hmuahhmuah thawn, Zalmon tlang ah a so. Cule Abimelek cun a kut ah hreitlung pakhat a keng ih, thingkungpawl ihta hngeṭêk pakhat a cêkthla ih cumi cu a la, cule a liang in a pu. Cule a hnenih um milaipawl hnenah, “Ka tuah mi nan hmuh zo vekin zamrang uhla, keimah vekin tuah uh,” tiah a ti hai. 49 Cuti cun mi pakhat cio in cu vekin anmai thing hnge cekthlain Abimelek an thlun. Shekem dawlsâng ih um milaipawl, mipa le nunau 1000 hrawng, an thih thluh nak dingah hauhruang hngauhsan zawngin cupawl cu an ret ih, an tlun ihsin ralhruang cu mei in an ur.

50 Cun Abimelek cu Thebez khua ah a feh ih, Thebez dokalhin ṭanhmun a khuar ih a la. 51 Asinan khawpi sungah dawlsâng hnget pakhat a rak um ih, cu tawkah mipa le nunau hmuahhmuah, khawpi sungih um milaipawl hmuahhmuah an tlân ih, a sungah an kharkhumaw. Cun anmah cu dawlsâng zimah an kaiso. 52 Cutin Abimelek cu dawlsâng tiang a ra thleng ih, cumi cu a do. Cule cumi cu meisa ih ur dingin dawlsâng sângka kiang a va naih. 53 Asinan nunau pakhat in Abimelek lu parah rial lung tlunta a thlak ih, a lu ruh a kuai. 54 ^aCun Abimelek cun a ralthuam kengtu tlangval pakhat a ko lohli ih a hnenah, “Na ralnâm phawi awla i that aw, culole mi in, ‘Nunau in amah a that,’ in ti pang ding,” tiah a ti. Cule a tlangval cun amah cu a dawttlăng ih, a thi. 55 Cun Israel mipapawl in Abimelek a thi zo ti an hmuh tikah, mi kip anmai hmun cio ah an tlung.

9:54^a 2Sam 1:9

56 ^aCutin Abimelek-ih sualralnak, a unau mipa 70 tla thatin a pa parih a rak tuah mi cu Pathian in a lehrūl. 57 Cule Shekem mipapawlih ṭhatlonak khal Pathian in anmai lu parah a kirter ih, an parah Jerubbaal-ih fapa Jotham-ih camsiatnak a thleng.

9:56^a Sem 9:5-6; Sam 94:23

10

Tola

1 ^aAbimelek hnuah Dodo-ih fapa, Puah-ih fapa, Tola, Issakar-mi mi pakhat cu Israel run dingah a tho. Cule anih cu Efraim tlang ram Shamir khua ah a cêng. 2 Anih cun kum 23 sung Israel lai a relsak, cule a thi ih Shamir khua ah phum a si.

10:1^a Sem 30:18; 46:13; Jos 15:48

Jair

3 Tola hnuah Gilead-mi, Jair a tho, cule anih in kum 22 sung Israel lai a relsak. 4 ^aAnih in lāk 30 parih to fapa 30 a nei. Annih in Gilead ram ah khaw 30 an nei ih, cupawl cu tuihni tiangin, Havoth Jair tiih kawh an si. 5 Cule Jair cu a thi ih, Kamon khua ah phum a si.

10:4^a Sem 49:11; Mip 32:41

Jehovah hnenih Israel Ausuahnak

6 ^aCun Israel tefapawl cu Jehovah-ih mithmuh ah thil ṭha lo an tuah lala ih, Baalpawl le Ashtoreth-pawl, Siria pathianpawl, Sidon pathianpawl, Moab pathianpawl, Ammon pathianpawl le Filisṭia pathianpawl tla an rian. Cule Jehovah an thlauthla ih amah an rian lo. 7 ^bCun Israel parah Jehovah-ih thinhengnak cu a so, cule anmah cu Filisṭia-mipawl kut sung le Ammon tefapawl kut ah a zuar hai. 8 Cuih kum ihsin annih in Israel tefapawl cu vansang an lāmter ih, an palbĕt, Jordan ral Gilead ram ih Amor-mipawl ram ih Israel tefapawl hmuahhmuah cu kum hleiriat sung an palbĕt. 9 Cuihhleiah Ammon tefapawl cu Judah, Benjamin le Efraim sungza do dingah, Jordan an tankai, cutin Israel cu nasa zetin an van a sâng.

10:6^a Sem 10:15; 19:37-38; 26:1; Mip 21:29; Dnp 32:15; Eze 27:16

10:7^b Dnp 31:17; 32:30

10 ^aCule Israel tefapawl cu Jehovah hnenah, “Nangmah dokalhin thil sual kan rak tuah a si, ziangruangahtile kan Pathian kan thlauthla ih, Baalpawl kan rian!” tiin an ausuak.

10:10^a Suah 9:27; Sam 32:5; Jer 2:27; 3:25

11 ^aCun Jehovah in Israel tefapawl hnenah, “Izip-mipawl lak ihsin siseh, Amor-mipawl lak ihsin siseh, Ammon tefapawl lak ihsin siseh, Filisṭia-mipawl lak ihsin siseh, ka lo runsuak a si lo maw? 12 ^bCuihhleiah Sidon-mipawl in siseh, Amalek-mipawl in siseh, Maon-mipawl in siseh, an lo palbĕt ih ka hnenah nan ausuak, cule kei in an kut ihsin ka lo runsuak. 13 ^cCuti cing khalin in rak thlauthla ih, pathian dang pawl nan rian. Curuangah ka lo runsuak nawn lo ding. 14 ^dFeh uhla nan rak hril mi pathianpawl hnenah au uh, nan vansan cān ah anmah in lo runsuak hai seh,” tiah a ti.

10:11^a Sem 14:7; Suah 14:30

10:12^b Sem 14:7; Jos 15:55

10:13^c Dnp 32:15; Jer 11:10

10:14^d Isa 44:17; Jer 2:28; Hab 2:18

15 ^aCule Israel tefapawl in Jehovah hnenah, “Thil sual kan rak tuah a si! Ṭha na ti dandanin kan parah tuah aw, zangfahten tuihni roriah in runsuak aw,” tiah an ti. 16 ^bCule annih in an lakih ram dang pathianpawl cu an hlăwnhlo ih, Jehovah an rian, cule Israel-ih mangbang vansannak ruangah a thin a nâ.

10:15^a Job 1:21; Isa 39:8

10:16^b Jos 24:23; Isa 63:9; Jer 18:8

17 ^aCun Ammon tefapawl cu an fĭnkhawmaw ih, Gilead ram ah ṭanhmun an khuar. Cule Israel tefapawl cu hmunkhat ah pungkhawmawin Mizpah ah ṭanhmun an khuar. 18 Cule mipi le Gilead hotupawl cu pakhat le pakhat, “Ammon tefapawl do thawktu ding pa cu zo a si? Amah cu Gilead ram luahtu zate tlunih lu a si tengteng ding,” tiah an ti.

10:17^a Sem 31:49

11

Jefthah

1 ^aGilead-mi, Jefthah cu micak ralṭha a si, asinan amah cu hlawhhlang fapa a si, cule Gilead in Jefthah a hring. 2 Gilead-ih nupi in fapapawl a hring, cule a nupi-ih fapapawl an pitlin tikah Jefthah cu an dawisuak ih a hnenah, “Kan paih inn ah co ding mi ro na nei ve lo, ziangahtile nang cu nunau dangih fapa na si,” tiah an ti. 3 Cun Jefthah cu a unau mipapawl hnen ihsin a tlân ih, Tob ram ah a cêng. Cule mipa hlothlaupawl cu Jefthah thawn an kăwpaw-ih, a zawngah an feh.

11:1^a Sem 38:15; 1Sam 12:1; Heb 11:32

4 ^aCule hitin a si, tawkfang reiah, Ammon tefapawl in Israel dokalhin ral doawknak an tuah. 5 Cule hitin a si, Ammon tefapawl in Israel dokalhin ral doawknak an tuah tikah, Gilead khua upapawl cu Tob ram ihsin Jefthah hruai dingin an feh. 6 Cun annih in Jefthah hnenah, “Ammon tefapawl kan do thei nak dingah, ra awla, kan ralbawipi si aw,” tiah an ti.

11:4^a Lai 10:9, 17

7 ^aCule Jefthah in Gilead khaw upapawl hnenah, “In hua ih ka paih inn ihsin in dawisuak a si lo maw? Ziangah saw nan vansan veteih ka hnenih nan rat?” tiah a ti hai.

11:7^a Sem 26:16

8 Cule Gilead khaw upapawl in Jefthah hnenah, “Curuangah a si atu-ah na lam kan hawikirsal, kan zawngah fehin Ammon tefapawl do dingah le Gilead khaw luahtupawl zate tlunih kan hotu si dingah,” tiah an ti.

9 Cule Jefthah in Gilead khaw upapawl hnenah, “Nannih in Ammon tefapawl do dingah inn ih in hruaikir ih, Jehovah in anmah cu ka hnenih a pek asile, nan hotu ka si ding maw?” tiah a ti.

10 ^aCun Gilead khaw upapawl in Jefthah hnenah, “Na ṭawngkampawl vekih kan tuah lo asile, kan lakah Jehovah cu thutheihpitu a si ding,” tiah an ti. 11 ^bCun Jefthah cu Gilead khaw upapawl zawngah a feh ih, amah cu mipi in an tlunih hotu le ralbawipi ah an tuah. Cule Jefthah in a ṭawngkampawl hmuahhmuah cu Mizpah ah Jehovah hmaiah a ṭawngsuak.

11:10^a Sem 31:50; Isa 1:2; Jer 29:23

11:11^b Suah 19:9; Jos 11:3; 1Sam 8:4, 21

12 Cule Jefthah in Ammon tefapawlih siangpahrang hnenah palaipawl a thlah ih, “Ka ram sungah keimah do dingah nan rat hi, nannih le kei hi ziang pehtlaihawknak so kan neih?” tiah a ti hai.

13 ^aCule Ammon tefapawlih siangpahrang in Jefthah-ih palaipawl cu a sawn hai ih, “Israel in Izip ihsin an fehsuak laiah, ka ram an la, Arnon ihsin Jabbok tiang le Jordan tiangin. Curuangah remawten cuih rampawl cu i pesal aw,” tiah a ti.

11:13^a Mip 21:13

14 Cule Jefthah in Ammon tefapawlih siangpahrang hnenah palaipawl a thlahsal, 15 ^acule a hnenah, “Jefthah in hitin a ti, ‘Israel in Moab ram a la lo ih, Ammon tefapawlih ram khal a la lo, 16 ^bziangahtile Israel cu Izip ihsin a hung soh laiah, ramṭhing fehtlăngin Tipi Sen lamah a feh ih, Kadesh a thleng. 17 ^cCun Israel in Edom siangpahrang hnenah palaipawl a thlah ih, “Zangfahten na ram ka paltlăng ding,” tiah a ti. Asinan Edom siangpahrang in a ngaithla lo. Cuvek thothoin Moab siangpahrang hnenah a thlah, asinan a lung a kim lo. Cule Israel cu Kadesh ah a tâng. 18 ^dCule ramṭhing an paltlăng ih, Edom ram le Moab ram cu an hēl, cule Moab nisuahnak lam ram an thleng ih, Arnon khat lam ralah ṭanhmun an khuar. Asinan Moab ram sungah an lut lo, ziangahtile Arnon cu Moab ramri a si. 19 ^eCun Israel in Amor-mipawlih siangpahrang Sihon, Heshbon khawpi siangpahrang hnenah palaipawl a thlah ih a hnenah, “Zangfahten na ram paltlăngin kan hmunram panin kan feh ding,” tiah an ti. 20 ^fAsinan Sihon in a ram sung paltlăng dingah Israel a zum lo. Cun Sihon in a milaipawl zaten a khawm, Jahaz ah ṭanhmun a khuar ih Israel cu a do. 21 Cule Israel-ih Pathian Jehovah in Sihon le a mipawl zaten Israel kut ah a pe ih, anmah cu an neh. Cuti cun Israel in cu tawk ram luahtu Amor-mipawlih neih mi ram zaten a nei ṭheh. 22 ^gAmor-mipawlih neih mi ramṭhen hmuahhmuah, Arnon ihsin Jabbok tiang le ramṭhing ihsin Jordan tiang an nei.

11:15^a Dnp 2:9

11:16^b Sem 14:7; Mip 14:25; Dnp 1:40

11:17^c Sem 32:3; Mip 20:14, 17; Jos 4:9; Jer 48:1

11:18^d Mip 20:21; 21:13; Dnp 2:8

11:19^e Mip 21:21-22; Jos 12:2

11:20^f Mip 21:23

11:22^g Mip 21:21-26; Dnp 2:26

23 ‘Cule Israel-ih Pathian Jehovah in a mi Israel hmaiah Amor-mipawl cu a hnawhsuak hai, curuangah nannih in ram cu nan nei ding maw? 24 ^aNan pathian Kemosh in nei dingih a lo pek mi pauhpauh cu nan nei ding a si lo maw? Cutin Jehovah kan Pathian in kan hmaiih a lawn mi pauhpauh kan nei ding a si. 25 ^bCule nannihpawl hi Zippor-ih fapa Balak, Moab siangpahrang hnakin nan ṭhasawn maw si? Anih cun Israel a to dah maw? Anmah cu a do dah hai maw? 26 ^cIsrael cu Heshbon le a khuapawl, Aroer le a khuapawl le Arnon kiang khuapawl hmuahhmuah ih kum 300 sung an cēn laiah khan, ziangah so cupawl cu nan rak lâksal lo? 27 ^dCuruangah nan parah thil sual ka tuah lo, nanmah sawnin keimah in donak in ka parah thil nan ti sual a si. Thuṭhentu Jehovah in tuihsun ah Israel tefapawl le Ammon tefapawl karlakah thuṭhen seh,’ a ti,” tiin. 28 Sikhalsehla, Ammon tefapawlih siangpahrang in Jefthah ih cah mi ṭawngkampawl cu a rak ngaithla lo.

11:24^a Mip 21:29; Dnp 2:36; Jos 3:10

11:25^b Mip 22:2

11:26^c Mip 21:25; Jos 13:9

11:27^d Sem 16:5; 18:25; 2San 20:12

Jefthah-ih Thutiam

29 ^aCun Jehovah Thlarau cu Jefthah parah a thleng, cule anih cun Gilead ram le Manasseh ram a paltlăng ih, Gilead ram Mizpah khua a paltlăng. Cule Gilead ram Mizpah khua ihsin Ammon tefapawl a pan. 30 ^bCule Jefthah in Jehovah hnenah thutiam a tuah ih, “Ka kut ah Ammon tefapawl i pek ngaingai ding asile, 31 ^chitin a si ding, Ammon tefapawl lak ihsin ralmûangih ka kir tikah, keimah táwng dingah ka inn sângka ihsin a ra suaktu pauhpauh Jehovah-ih ta an si tengteng ding a si. Cule cumi cu Meiur Thilhlăn ah ka hlan ding,” tiah a ti.

11:29^a Sem 31:49

11:30^b Sem 28:20; Mip 30:10; Thf 31:2

11:31^c Sem 28:21; Pui 1:3

32 Cutin Jefthah cun Ammon tefapawl do dingin a pan hai, cule Jehovah in anmah cu a kut ah a pek. 33 Cule Aroer khua ihsin Minith tiang a neh vivo ih, Abel Keramim tiang khaw 20 rori nasa zetin a that hai. Cutin Ammon-mipawl cu Israel tefapawl hmaiah an duai.

Jefthah Fanu

34 ^aJefthah cu Mizpah ih a inn a thlen tikah, ngai hnik, a fanu cu khuangte le lam phahin amah hmuak dingin a ra suak. Amah cu a fa neihsŭn a si. Amah siarlo fapa siseh, fanu siseh a nei lo. 35 ^bCule hitin a si, Jefthah in a fanu a hmuh tikah a hnipuan a thlek ih, “Ai law, ka fanu! Niam tukah i dir maw! Nang hi i tibuaitupawl lakih tel na si! Ziangahtile kei in Jehovah hnenah ka kâ ka ang zo ih, ka lakirsal thei lo,” tiah a ti.

11:34^a Sem 31:27; Suah 15:20; Lai 10:17; 11:11; Zek 12:10

11:35^b Mip 14:6; Dnp 23:21; Ths 5:2, 4-5

36 ^aCu tikah a fanu cun a hnenah, “Ka pa, Jehovah hnenih na kâ na an zo a si ahcun, na kâ ih suak mi vekin, ka parah tuah aw. Ziangruangahtile Jehovah in na ral, Ammon tefapawl phuba a lo lâksak zo a si,” tiah a ti. 37 Cun a fanu cun a pa hnenah, “Himi thil hi ka hrangah tuah si seh, thla hnih sung cu keimah te lawng um ning, cutin ka feh ding ih tlangpawl ah ka vâkkual ding, cule fala him ka sinak hi ka ṭah thlohthlo ding, keimah le ka rualpipawl in,” tiah a ti.

11:36^a Mip 31:3; Luk 1:38

38 Cun Jefthah in, “Feh aw,” tiah a ti. Cule a fanu cu thla hnih sung a thlah, a rualpipawl thawn fehin tlang ah fala him a sinak cu a ṭah. 39 Cule thla hnih a kim hnuah hitin a si, a pa hnenah a ra kirsal ih, Jefthah cun a fanu parih thu a rak tiam zo mi a thutiam cu a fanu parah cun a tuahsuak. A fanu in mipa zohman a thei lo. 40 Cule Israel ram ah Israel fanupawl in kum tin Gilead-mi Jefthah fanu ni li sung ṭah cu an nunphung ah a cang.

12

Jefthah le Efraim Buainak

1 ^aCun Efraim mipapawl cu an fĭnkhawmaw ih, sak lamah an feh, cule Jefthah hnenah, “Ziangruangah Ammon tefapawl do dingah na tankai ih, na hnenih feh dingih in sawm ve lo? Na inn thawn meisa in kan lo urcih ding!” tiah an ti.

12:1^a Jos 13:27

2 Cule Jefthah in an hnenah, “Ka mipawl le keimah cu Ammon tefapawl thawn nasa zetin kan doaw, cule băwmnak ka lo dil hai tikah an kut sung ihsin nannih in in runsuak lo. 3 ^aNannih in keimah in runsuak lo ti ka hmuh tikah, thih pawisa loin ka ṭang ih, Ammon tefapawl do dingin ka tankai. Cule Jehovah in anmah cu ka kut ah i pe. Cuti cun ziangah so keimah do dingah tuihsun ah ka hnenih nan rat?” tiah a ti.

12:3^a Dnp 20:4

4 ^aCun Jefthah in Gilead mipapawl zaten hmunkhat ah a kokhawm hai ih Efraim cu a do. Cule Gilead mipapawl in Efraim cu an neh. Ziangruangahtile annih in, “Nannih Gilead-mipawl cu Efraim-mipawl lak le Manasseh-mipawl lakih Efraim raltlân nan si,” tiah an ti.

12:4^a Sem 46:20; 1Sp 17:1; Isa 9:21

5 ^aGilead-mipawl in Efraim-mipawl thlen hlanah Jordan kāipawl an la. Cule a tlânsuak mi Efraim-mi zokhal in, “Tankai hram ning,” tiah a ti tikah, Gilead mipapawl in a hnenah, “Efraim-mi na simaw?” an ti ih anih in, “Si lo,” a ti asile, 6 a hnenah, “Asile, ‘sibawlet,’ ti aw,” tiah an ti.

12:5^a Jos 2:7

Cule anih in, “Tibawlet,” tiah a ti. Ziangahtile cumi cu anih in dikten a sāl thiam lo. Cule amah cu an kai ih Jordan kāipawl ah an that. Cuih cān ah Efraim-mi 42000 an thi.

7 Cule Jefthah in kum ruk sung Israel tlunah lai a rel. Cun Gilead-mi Jefthah cu a thi ih, Gilead ram khawpipawl lakih khaw pakhat ah phum a si.

Ibzan, Elon le Abdon

8 ^aAmai hnuah Bethlehem-ih Ibzan in Israel tlunah lai a rel. 9 Anih in fapa 30 a nei. Cule fanu 30 cu a sungkhat hladeuh hnenah pasal a neihter hai ih, a fapapawl hrangah hmun dang ihsin fanu 30 a hruailut. Kum sarih sung Israel tlunah lai a rel. 10 Cun Ibzan cu a thi ih Bethlehem ah phum a si.

12:8^a Sem 35:19

11 Amai hnuah Zebulun-mi Elon in Israel tlunah lai a rel. Kum hra sung Israel tlunah lai a rel. 12 ^aCule Zebulun-mi, Elon cu a thi ih, Zebulun ram Aijalon khua ah phum a si.

12:12^a Jos 10:12

13 ^aAmai hnuah Pirathon-mi, Hillel-ih fapa Abdon in Israel tlunah lai a rel. 14 Lāk no 70 parih totu fapa 40 le tu 30 a nei. Kum riat sung Israel tlunah lai a rel. 15 Cun Pirathon-mi Hillel-ih fapa Abdon cu a thi ih, Efraim ram, Amalek-mipawlih tlang ram, Pirathon khua ah phum a si.

12:13^a 2Sam 23:30; 1San 11:31

13

Samson Hrinnak

1 Israel tefapawl cun Jehovah-ih mithmuh ah thil ṭha lo an tuah lala ih, Jehovah in anmah cu kum 40 sung Filisṭia-mipawlih kut ah a pe. 2 ^aCun Zorah khua ah Dan hrin mi pakhat a rak um. A hmin cu Manoah a si ih a nupi cu a cing ih fāte a nei lo. 3 ^bCule cuih nunau hnenah Jehovah-ih vancungmi a rung lang ih a hnenah, “Ngai hnik, nang cu na cing ih, fāte na hring lo, sikhalsehla nau na pai ding ih fapa na hring ding. 4 ^cCuruangah sabit zu siseh, zu siseh in lo dingin le a thiang lo mi zianghman ei lo dingin fimkhur aw. 5 ^dZiangahtile ngai hnik, nau na pai ding ih fapa na hring ding. Cule a lu parah sám ziahnak nâmte a thleng lo pei, ziangahtile nauhak cu sūl sung ihsin Pathian hrangah ^eNazir-mi a si ding ih, amah in Filisṭia-mipawl kut ihsin Israel runsuah a thawk ding,” tiah a ti.

13:2^a Sem 11:30; 30:6; Jos 15:33

13:3^b Sem 16:7; Isa 7:14; Luk 1:13

13:4^c Mip 6:2-4; Luk 1:15

13:5^d Sem 3:15; Mip 6:2, 13; 1Sam 1:11; 7:13; Amo 2:11-12

13:5^e Nazir-mi: Nazir-mi ih thlun ding mi dān cu Mip 6:1-21 ah tarlăng a si.

6 ^aCutin cuih nunau cu a feh ih a pasal a sim, “Pathian mi pakhat ka hnenah a ra ih, a hmel cu Pathian-ih vancungmi hmel vek, ṭihzahum zet a si. Asinan amah cu khui tawk ihsin a si ti ka sut lo, amah khal in a hmin i sim lo. 7 ^bCule anih in ka hnenah, ‘Ngai hnik, nau na pai ding ih fapa na hring ding. Sabit zu siseh, zu siseh na in lo pei, a thiang lo mi zianghman na ei fawn lo pei, ziangahtile nauhak cu sūl sung ihsin a thih ni tiang Pathian hrangah Nazir-mi a si ding a si,’ i ti,” tiah a ti.

13:6^a Mip 22:22; 1Sam 2:27; 1Sp 13:1; Sam 66:5

13:7^b Pui 10:9; 1Sam 1:28; Jer 35:6

8 Cun Manoah cun Jehovah hnenah a dil ih, “Maw ka Bawipa, zangfahten na thlah mi Pathian mi kha kan hnenah rasal sehla, a suak ding mi nauhak hrangah ziang kan tuah ding ti in sim seh,” tiah a ti.

9 Cule Pathian in Manoah-ih aw a ngai ih nunau cu ramlak ih a to laiah a hnenah Pathian-ih vancungmi a rasal. Asinan a pasal Manoah cu a hnenah a rak um lo. 10 Cun nunaunu cu manhlap zetin a tlân ih a pasal a sim, cule a pasal hnenah, “Zoh hnik, ni dangih ka hnenih ra pa kha atu te roriah ka hnenah a ra lang!” tiah a ti.

11 Cule Manoah cu a tho ih a nupi a thlun. Cu pa hnen a thlen tikah a hnenah, “Nangmah hi hih nunaunu hnenih rak ṭawngtu pa na simaw?” tiah a ti.

Cule anih in, “Ka si” tiah a ti.

12 Manoah in, “Atu-ah na ṭawngkampawl thleng seh! Nauhak paih nundān ding le a hna cu ziang a si ding?” tiah a ti.

13 Cu tikah Jehovah-ih vancungmi cun Manoah hnenah, “Nunau cun a hnenih ka sim mi hmuahhmuah ah fimkhur seh. 14 ^aSabit hri ihsi a ra mi thil zianghman a in lo pei ih, sabit zu siseh, zu siseh, zianghman a in lo pei, a thiang lo mi thil zianghman a ei lo pei. Amah ka fial mi zaten kilhim seh,” tiah a sim.

13:14^a Pui 10:9; Dnp 29:6

15 Cun Manoah in Jehovah-ih vancungmi hnenah, “Zangfahten kan lo kai hrih ding ih, na hrangah me no kan timtuah ding,” tiah a ti.

16 Cule Jehovah-ih vancungmi in Manoah hnenah, “Nang in i kai khal awla na rawl ka ei lo ding. Asinan Meiur Thilhlăn na hlăn asile, cumi cu Jehovah hnenah na hlan ding a si,” tiah a ti. Ziangahtile Manoah in amah cu Jehovah-ih vancungmi a si ti a thei lo.

17 ^aCun Manoah in Jehovah-ih vancungmi hnenah, “Na sim mipawl an thlen tikih, kan lo sunlawihnak dingah na hmin zo a si?” tiah a ti.

13:17^a Sem 32:29; Mip 11:23

18 ^aCule Jehovah-ih vancungmi in a hnenah, “Ziangruangah ka hmin i sut? Ka hmin cu khawruahharza tuk a si,” tiah a ti.

13:18^a Sem 32:29

19 Cun Manoah cun me no cu Thlairawl Thilhlăn thawn a la ih, cumi cu Jehovah hnenah lungpi parah a hlan. Cule Manoah le a nupi in an zoh laiah, vancungmi in khawruahharza zet thil a tuah. 20 ^aHitin a si, biakṭheng ihsin van lamah meialh a kaiso laiah Jehovah-ih vancungmi cu biakṭheng ih meialh lakin a kaiso! Manoah le a nupi in himi an hmuh tikah leisin bihin an băwkkhup. 21 Manoah le a nupi hnenah Jehovah-ih vancungmi a lăng nawn lo tikah, Manoah in amah cu Jehovah-ih vancungmi a si ti a thei.

13:20^a Sem 17:3; Pui 9:24

22 ^aCule Manoah in a nupi hnenah, “Kan thi tengteng ding, ziangruangahtile Pathian kan rak hmu-aw!” tiah a ti.

13:22^a Sem 16:13; Suah 3:6; Mip 17:12; Dnp 5:26

23 ^aAsinan a nupi in a hnenah, “Jehovah in thah in duh si sehla, kan kut ihsin Meiur Thilhlăn le Thlairawl Thilhlăn tla a cohlang lo ding, amah in himi thil hmuahhmuah khal in rak hmuter lo ding ih, hiti vekin atu-ah hivek thilpawl khal in sim fawn lo ding,” tiah a ti.

13:23^a Sam 25:4

24 ^aCutin nunaunu cun fapa a hring ih a hmin ah Samson a sak. Cule nauhak cu a ṭhanglian ih Jehovah in amah cu a thlawsuah. 25 Cule Jehovah Thlarau cu Zorah le Eshtaol karlak Dan ṭanhmun khuarnak ah Samson parah căngvaih a thawk.

13:24^a 1Sam 2:21, 26; Luk 1:80; Heb 11:32

14

Samson-ih Nupi

1 ^aCun Samson cu Timnah khua ah a suk ih, Timnah khua ih Filisṭia-mipawlih fanupawl lakih nunau pakhat a hmu. 2 ^bCule a hung so ih a nu le a pa hnenah, “Timnah khua ah Filisṭia-mipawlih fanupawl lakih nunau pakhat ka hmu, atu-ah amah cu ka nupi ah in ṭhitsak uh,” tiah a ti.

14:1^a Sem 38:12

14:2^b Sem 21:21

3 ^aCun a nu le a pa in a hnenah, “Na unaupawlih fanupawl lakah, asilole kan mipawl zate lakah nunau an um lo maw si, serh zim tan lo mi Filisṭia-mipawl hnen ihsin nupi va ṭhit na tum?” tiah an ti.

14:3^a Sem 24:3-4; 34:14; Suah 34:16; 1Sam 14:6

Cule Samson in a pa hnenah, “Amah cu in ṭhitsak aw, ziangahtile anih cu ka mithmuh ah a dik a si,” tiah a ti. 4 ^aAsinan a nu le a pa in cumi cu Jehovah hnen ihsi suak a si ti an thei lo. Ziangahtile Filisṭia-mipawl dokalhih cangvai dingah anih in remcānnak a hawl rero a si. Cu laiah cun Filisṭia-mipawl in Israel an uk.

14:4^a Dnp 2:30; Jos 11:20

5 Cutin Samson cu a nu le a pa thawn Timnah khua ah an suk ih, Timnah sabit hmuan an thleng. Cule ngai hnik, kiosa vanglai cu amah hrumhnawh phahin a ra. 6 ^aCule Jehovah Thlarau cu Samson parah cak zetin a thleng ih, a kut ah zianghman a nei lo nân mi pakhat in me note a thlek vekin, kiosa cu a thlek. Asinan ziang a tuah ti a nu khal a pa khal a sim lo.

14:6^a 1Sam 17:35

7 ^aCun Samson cu a suk ih, nunaunu thawn an beaw, cule cu nu cu Samson mithmuh ah a dik. 8 Ni tawkfang hnuah, amah ṭhi dingih a kirsal tikah, kiosa ruak zoh dingin sirah a pial. Cule ngai hnik, kiosa ruak sungah khuai bawm le khuai tizu a rak um. 9 A kut ah cumi ihta ziangmaw zat a la ih, ei phahin a feh vivo. A nu le a pa hnen a thlen tikah, an hnenah ziangmaw zat a pe ih annih khal in an ei. Asinan khuai tizu cu kiosa ruak ihsin a lâk thu anmah a sim lo.

14:7^a 2Sam 17:4

10 ^aCutin a pa cu nunaunu hnenah a suk. Cule Samson in cu tawkah puai a tuah, ziangahtile minopawl in cu vekin an tuah ṭheu. 11 Cule hitin a rak cang, Filisṭia-mipawl in amah an hmuh tikah amah thawi um dingah hawipi 30 an rak hruai. 12 ^bCun Samson in an hnenah, “Thu ka lo pawlh ding. Cumi cu ni sarih puai sungah nan hawlsuah ih ka hnenih in sim thei taktak asile, pat zai sinfen 30 le thlĕngawknak hnipuan zun 30 ka lo pe ding. 13 Asinan cumi cu ka hnenih in sim thei lo asile, nannih in pat zai sinfen 30 le thlĕngawknak hnipuan zun 30 in pe ding,” tiah a ti.

14:10^a Sem 29:22; 41:25

14:12^b Sem 29:27; 45:22; 2Sp 5:5, 22; Eze 17:2; Hos 12:10

Cule annih in a hnenah, “Kan theih dingah na thupawlh mi cu rel hnik,” tiah an ti.

14 Cuti cun anih in an hnenah,

“Eitu sung ihsin ei ding a suak ih,
A cak mi ihsin a thlum mi a suak,”

tiah a ti.

Cule annih in ni thum sung cuih thupawlh an sim thei lo.

15 ^aAsinan hitin a si, a ni litnak ah Samson-ih nupi hnenah, “Kan hnenih a thupawlh sim dingin na pasal lēm aw, cu lo asile nangmah le na paih inn cu mei in kan lo ur ding. Kan ta a si mi la dingah in rak sawm maw si? Cuti a si lo maw?” tiah an ti.

14:15^a Pui 20:14; Ths 7:26

16 Cun Samson-ih nupi cu a hnenah a ṭap ih, “I hua a si hi! Nang in i duhdawt lo! Ka minungpawlih fapapawl hnenah thu na pawlh, cumi cu i simfiang duh si lo,” tiah a ti.

Cule Samson in a hnenah, “Zoh hnik, cumi cu ka nu le ka pa khal ka sim lo. Na hnenah cumi cu ka lo sim ding maw?” tiah a ti. 17 ^aCun anih cu a hnenah an puai sung ni sarih sung a ṭap. Cule hitin a si, a ni sarihnak ah amah cu a simfiang, ziangruangahtile anih in amah cu a năwr tuk. Cun a nupi cun a minungpawlih fapapawl hnenah thupawlh cu a sim. 18 Cutin khawpi mipapawl in a ni sarihnak ni tlak hlanah,

14:17^a Est 1:5

“Khuai tizu hnakih thlumsawn cu ziang so?
Cun kiosa hnakih caksawn cu ziang so?”

tiin a hnenah an ti.

Cule anih in an hnenah,

“Ka caw la thawn lei let lo uhla cu,
Ka thupawlh nan thei lo ding!”

tiah a ti hai.

19 ^aCun Jehovah Thlarau cu Samson parah cak zetin a thleng ih Ashkelon khua ah a suk, cule an mipa 30 a that, an hnipuan a la ih, a thupawlh rak simtupawl hnenah thlĕngawknak hnipuan a pek. Cutin a thinheng cu a tho ih a paih inn ah a so. 20 ^bCule a nupi cu Samson-ih hawipi ṭhabik a rak si mi, a rual pa hnenah an pe.

14:19^a Jos 13:3; 1Sam 11:6

14:20^b Joh 3:29

15

Samson in Phuba a La

1 ^aTawkfang a rei hnuah, sangvut khawm tikcu ah, Samson cun me note thawn a nupi a veh. Cule anih in, “Ka nupi hnenah, a pindan sungah lut ning,” tiah a ti. Asinan a nupi-ih pa in luh ding a siang lo.

15:1^a Sem 29:21; 30:14; 38:17

2 A nupi-ih pa in, “Amah na hua taktakah ka rak ruat a si, curuangah amah cu na rual pa hnenah ka pe. A naunu hi anih hnakin a hmel a ṭhasawn a si lo maw? Zangfahten amah cu a u aiah ṭhi aw,” tiah a ti.

3 Cule Samson in an hnenah, “Tuih ṭum cu Filisṭia-mipawl ka tinat hai a si khalle sawihnăwm kai lo ka si ding!” tiah a ti. 4 ^aCun Samson cu a feh ih sihál 300 a kai, cule meiserpawl a la, sihálpawlih mei le mei a merh ih an mei pahnih karlakah meiser a ret. 5 ^bMeiserpawl cu a nawh hai tikah, Filisṭia-mipawlih thlairawl lakah sihálpawl cu a thlah. Cule thlairawl pen le thlairawl kung dīng lai pawl, sabit hmuanpawl le olif hmuanpawl an kāng.

15:4^a Sem 15:17; Sol 2:15

15:5^b Sem 15:17; Suah 22:6; 2Sam 14:30-31

6 ^aCun Filisṭia-mipawl in, “Hihi zo in a tuah?” tiah an ti.

15:6^a Sem 38:24

Cule annih in, “Timnah miih mâkpa Samson a si, ziangruangahtile a pu in a nupi a lâk ih amah cu Samson-ih hawipi hnenah a pe,” tiah an ti. Cule Filisṭia-mipawl cu an so ih meisa in amah nu le a pa cu an ur.

7 Samson in an hnenah, “Hiti vekin thil nan ti ruangah nan parah phuba ka lo sám tengteng ding ih, cumi hnuah ka cawl ding,” tiah a ti hai. 8 ^aCutin anih in nasa zetin anmah a vaw hai ih mi tampi a that, cun a suk ih, Etam lung khawkrăwk ah a cêng.

15:8^a Isa 2:21

9 Cule Filisṭia-mipawl cu an so ih, Judah ram ah ṭanhmun khuarin Lehi hmun ah an tlaraw. 10 Cule Judah mipapawl in, “Ziangruangah kanmah do dingih nan hung soh?” tiah an ti.

Cu tikah annih in, “Samson ṭawn dingah kan ra so, kan parih a tuah vekin a parih tuah dingah,” tiah an ti.

11 ^aCule Etam lung khawkrăwk ah Judah mipa 3000 an suk ih, Samson hnenah, “Filisṭia-mipawl hi kan parih uktu an si ti na thei lo maw si? Kan parih na thil ti mi hi ziang so a si?” tiah an ti.

15:11^a Sam 106:40-42

Cule anih in an hnenah, “Ka parih an tuah vekin an parah ka tuah a si,” tiah a ti.

12 ^aAsinan annih in a hnenah, “Nangmah lo ṭawn ih Filisṭia-mipawl kut ih lo pe dingah kan ra suk,” tiah an ti.

15:12^a Sem 47:31

Cun Samson in an hnenah, “Nannih in in that lo dingin siasăm uh,” tiah a ti.

13 Cule a hnenah, “That lo e, hnget zetin kan lo ṭawn ding ih an kut ah nangmah cu kan lo pe sawn ding, asinan kan lo that hrimhrim lo ding,” tiin an sim. Cule hri thar pahnih thawn amah cu an ṭawn ih lungpi ihsin an hruaiso.

14 ^aLehi hmun a thlen tikah, amah dokalhih au phahin Filisṭia-mipawl an thleng. Cun Jehovah Thlarau cu Samson parah cak zetin a thleng ih, a bân ih hripawl cu meisa ih pat phang kāng vekah an cang, cule a kutpawl ihsin a ṭawnnakpawl an tla. 15 ^bLāk khabe ruh thar a hmu, a kut a suah ih cumi cu a lâk. Cule cumi thawn mipa 1000 a that. 16 ^cCun Samson in,

15:14^a Jos 2:6

15:15^b Pui 26:8

15:16^c Suah 8:14; Jer 22:19

“Lāk khabe ruh in,
A pen i penkhawm,
Lāk khabe ruh in
Mipa 1000 ka that!”

tiah a ti.

17 Cule hitin a si, a ṭawng a ṭheh tikah a kut ihsin khabe ruh cu a hlăwn ih cu tawk hmun cu ^aRamath-Lehi tiah a ko. 18 ^bCun anih cu a ti a hâl tuk, cule Jehovah hnenah a ausuak ih, “Na siahhlawh kut hmangin himi runsuahnak ropi na pe zo, cule atu-ah serh zim tan lo mipawl kut ah tihâlin ka thi ding maw?” tiah a ti. 19 ^cCule Lehi hmun ih a um mi hmun kuar cu Pathian in a kakter ih tidai a ra suak, cule a in, cun a thinlung a caksal ih, a nung hlunhlo. Curuangah a hmin ah ^dEn-Hakkore tiah a sak, cumi cu tuihni tiangin Lehi hmun ah a um. 20 Cule anih in Filisṭia-mipawlih san laiah kum 20 sung Israel tlunah lai a rel.

15:17^a Ramath-Lehi: Khabe ruh hmun sâng tinak a si.

15:18^b Dnp 20:4

15:19^c Sem 45:27; Suah 17:6; Isa 40:29

15:19^d En-Hakkore: Hebru ṭawng a si ih, a sullam cu “kotuih tihna” tinak a si.

16

Samson le Delilah

1 ^aCule Samson cu Gaza khua ah a feh ih cu tawkah hlawhhlang pakhat a hmu, cule a hnenah a lut. 2 ^b“Samson hi tawkah a thleng zo,” tiah Gaza khawmipawl sim an si tikah, cuih hmun cu an kulh ih zanvarin khawpi kăwtka in an bawh. Zanvar daiten an um, “Zing lam khua a van tikah, amah kan that ding,” tiah an ti. 3 ^cCule Samson cu zan laifang tiang a it ih, zanṭim ah a tho, khawpi kăwtka sângkapawl le a ṭhuam pahnih cu a kai ih, a kalhnak thawn a zaten a phawi, a liang parah cupawl cu a ret ih Hebron zawnih tlang zimah a hun pu.

16:1^a Sem 10:19; 38:15

16:2^b Jos 2:5; 1Sam 19:11

16:3^c Jos 10:36

4 ^aCuih hnuah hitin a si, Sorek Hawrkuam ih nunau pakhat a duh, a hmin cu Delilah a si. 5 ^bCule cu nuih hnenah, Filisṭia-mipawlih bawipawl cu an ra ih a hnenah, “Amah lēm awla, amah zawnzaiter dingin amah kan ṭawn thei nak dingah a cahnak maksak khuiah a ṭhumaw ti le amah kan nehdān ding hawlsuak aw. Cule kan zaten ngun 1100 cio kan lo pe ding,” tiah an ti.

16:4^a Sem 24:67

16:5^b Suah 10:7; Jos 13:3

6 Cuti cun Delilah in Samson hnenah, “Zangfahten na cahnak maksak hi khuiah a um ih, lo zawnzaiter dingah ziang thawn ṭawn theih na si ding ti i sim aw,” tiah a ti.

7 Cule Samson in a hnenah, “A ro hrih lo mi, thál hri thar pasarih in in ṭawn asile, ka cak lo ding ih mipa dang vekah ka cang ding,” tiah a ti.

8 ^aCutin Filisṭia-mipawlih bawipawl in a hnenah a ro hrih lo mi, thál hri thar pasarih an rak keng ih, cupawl thawn anih in amah cu a ṭawn. 9 Cu laiah mipapawl cu, pindan sungah Delilah hnenah umin an bawh. Cule Delilah in a hnenah, “Samson, Filisṭia-mipawl in an ra lo do,” tiah a ti. Asinan thál hripawl cu mei in pat hri a kāngcat vekin an cat. Cutin a cahnak thuthup cu theih a si lo.

16:8^a Jos 2:21

10 Cun Delilah in Samson hnenah, “Zoh hnik, i rak bum ih thuphan i sim. Atu-ah, zangfahten ziang thawn nangmah ṭawn theih na si ding i sim aw,” tiah a ti.

11 Cule Samson cun a hnenah, “Hri thar hman dah lo mi thawn fek zetin in ṭawn asile, ka cak lo ding ih mipa dang vekah ka cang ding,” tiah a ti.

12 Curuangah Delilah cun hri thar pawl a la ih cupawl thawn amah cu a ṭawn ih a hnenah, “Samson, Filisṭia-mipawl in an ra lo do,” tiah a ti. Cule mipapawl cu pindan sungah umin an bawh. Asinan a bân ṭawnnakpawl cu pat vekin a catter. 13 Delilah in Samson hnenah, “Tu tik tiang i bum ih thuphan i sim. Ziang thawi ṭawn theih na si ding i sim aw,” tiah a ti.

Cule anih in a hnenah, “Ka lusam phiar pasarih hi puan ah tahcih aw,” tiah a ti. 14 Cuti cun cumi cu kilhnak in hnget zetin a tahcih ih a hnenah, “Samson, Filisṭia-mipawl in an ra lo do!” tiah a ti. Asinan a ihthahnak ihsin a tho ih a kilhnak cu puanbu thawn a dirsuak.

15 ^aCun Delilah in a hnenah, “Na thinlung ka hnenah um si loin ziangtin saw, ‘Ka lo duh,’ na ti thei? Hitin vei thum i bum zo ih, na cahnak maksak khuiah a um ti i sim lo,” tiah a ti. 16 Cule hitin a si, a ṭawngkampawl thawn ni tin a hnaihnăwk ih a năwr tikah, a thinlung cu thih duh tiangin a van a sâng.

16:15^a Mip 24:10

17 ^aCutin anih cun a thinlung zaten a sim ih a hnenah, “Ka lu cu sám ziahnak nâmte in a dai dah lo, ziangahtile keimah cu ka nuih sūl sung ihsin Pathian hrangah Nazir-mi ka si. Ziah ka si le, ka cahnak in i suahsan ding ih ka cak lo ding. Cule mipa dang vek ka si ding,” tiah a ti.

16:17^a Mip 6:2; Mik 7:5

18 ^aDelilah cun a thinlung zaten amah a sim ti a theih tikah, mi a thlah ih Filisṭia-mipawlih bawipawl a ko, cule, “Vei khatten ra hrih uh, ziangahtile a thinlung zaten i sim zo,” tiah a ti. Cuti cun Filisṭia-mipawlih bawipawl cu a hnenah an ra ih an kut ah paisa an keng. 19 ^bCun amah cu nunaunu in a cāwn parih itthat dingah a thlim. Cule mipa pakhat a ko ih a lu ih sám phiar pasarih cu a mehter. Cule Delilah in amah cu sawisak a thawk ih, a cahnak in amah cu a tlansan. 20 ^cCule anih in, “Samson, Filisṭia-mipawl in an ra lo do!” tiah a ti.

16:18^a Jos 13:3; 1Sam 5:8

16:19^b Suah 1:11; Thf 7:26-27

16:20^c Mip 14:42; Jos 7:12; 1Sam 16:14

Cuti cun a ihthahnak ihsin a ṭhang ih, “Tuih hlan vekin ka fehsuak ding, cān dang pawl vekin ka tâlsuak leh mai ding!” tiah a ti. Asinan Jehovah in a fehsan ti a thei lo. 21 ^aCun Filisṭia-mipawl in amah cu an kai ih a mit an phawrh, cule Gaza khua ah an suhpi. Dar cikcin an bunter ih thawnginn sungih rial lung rialtu ah a cang. 22 Sikhalsehla a lusam cu meh a si hnuah a ṭhangsal.

16:21^a Sem 10:19; Mip 16:14; Job 31:10; Jer 47:1

Samson Thihnak

23 ^aCun Filisṭia-mipawlih bawipawl cu an pathian Dagon hnenah thawinak ropi hlan dingah le lungawi aipuangih um dingin an pungkhawm. Cule annih in,

16:23^a 1Sam 5:2; 1San 10:10

“Kan ral Samson cu kan kut ah
Kan pathian in in pe!”

tiah an ti.

24 ^aMipi in amah an hmuh tikah, an pathian an thangṭhat, ziangahtile annih in,

16:24^a 1San 10:9; Dan 5:4

“Kan kut ah kan pathian in kan ral in pe,
Kan ram siatsuahtu le,
Kan lakih mi tampi thattu cu,”

tiah an ti.

25 ^aCun hitin a si, an thinlung a năwm tikah, “In nuamtertu dingah Samson ko uh,” tiah an ti. Cuti cun thawnginn ihsin Samson cu an ko ih, an hrangah zohnuam a tuah. Cule amah cu ṭhuampawl karlakah an ret. 26 Cun Samson in a kut kaitu mipa nauhak hnenah, “Ka hngauhsan thei hai nak dingah, innpi dotu ṭhuampawl thâm ning,” tiah a ti. 27 ^bInnpi cu mipa le nunau an khat. Filisṭia-mipawlih bawipawl zaten, cu tawkah an um. Samson in zohnuam a tuah laiah inn tlunah a zohtu mipa le nunau 3000 hrawng an si. 28 ^cCun Samson in Jehovah a ko ih, “Maw Bawipa Jehovah, i máng hram aw! Maw Pathian, ka mit pahnih hrangah Filisṭia-mipawl parah hmakhatteih phuba ka lâk thei nak dingah, atu-ah vei khatten i cakter hram aw!” tiah a ti. 29 Cule Samson cun innpi dotu a laifangih ṭhuam pahnih cu a pāwk ih, pakhat a vawrh lamah le a dang a keh lamah a hngauhsan. 30 ^dCun Samson in, “Filisṭia-mipawl zawngah thi ko ning!” tiah a ti. Cule a tha zaten a tûl ih innpi cu bawipawl le cumi sungih um, mipi zate parah a tla. Cutin a thih zawngih a thah mi mithipawl cu a dam laiih a thah mi hnakin an tamsawn.

16:25^a Rut 3:7; Est 1:10

16:27^b Jos 2:8

16:28^c Jer 15:15

16:30^d Ths 9:10

31 ^aCule a unaupawl le a paih sungkua zaten an ra ih amah cu an la, cule an zawnso ih Zorah le Eshtoal karlakih a pa, Manoah-ih thlān ah amah cu an phum. Samson in kum 20 sung Israel tlunah lai a rel.

16:31^a Rut 1:1; 1Sam 4:18

17

Mikah-ih Milempawl

1 Cun Efraim tlang ram ah pa pakhat a rak um, a hmin cu Mikah a si. 2 ^aCule anih in a nu hnenah, “Na hnen ihsin lâk mi ngun shekel 1100, cumi parih ka hnatheih roriih na camsiat mi kha, ngai hnik, khaih ngun kha ka hnenah a um, ka lâk sokhaw,” tiah a ti.

17:2^a Rut 2:20; 1Sam 15:13; 2Sam 2:5

Cule a nu in, “Ka fapa cu Jehovah in thlawsuah hram seh,” tiah a ti. 3 ^aCule ngun shekel 1100 cu a nu hnenah a khirhsal, cule a nu in, “Ngun cu ka kut ihsin khercawp milim le burcawp milim tuah dingah ka fapa hrangah Jehovah hnenah ka serhhran pumhlum zo. Cumi cu na hnenah ka khirhsal ding,” tiah a ti. 4 ^bCuti cun a nu hnenah ngun cu a khirhsal. Cun a nu in ngun shekel 200 a la ih, cupawl cu ngun sertu hnenah a pe, cule anih in cumi cu khercawp milim le burcawp milim ah a tuah, cule cupawl cu Mikah-ih inn ah an um. 5 ^cCu pa Mikah in ^dinnte a nei ih Puithiam Kâwrcung pakhat le sungkaw milempawl a tuah, cule a fapapawl lakih pakhat, a puithiam si dingin a serhhran. 6 ^eCu laiah Israel ram ah siangpahrang a um lo, mi kip in anmai mit ih dik an ti mi an tuah.

17:3^a Suah 20:4

17:4^b Suah 32:4; Isa 17:8

17:5^c Sem 31:19; Suah 29:9; Mip 16:10; Isa 44:13; Eze 8:10

17:5^d innte: Hihi pathian biaknak innte a si.

17:6^e Dnp 12:8

7 ^aCun Judah ram ih Bethlehem khua ah tlangval pakhat, Judah hrin lakih cêng a um. Amah cu Levi-mi a si ih, cu tawkah a va tlâwng. 8 ^bCu pa cu a hmuh mi hmun pakhat khat ih um dingin, Judah ram ih Bethlehem khua ihsin a suak. Cun anih cu khual a tlawng ih, Efraim tlang ram ah a feh, cule Mikah inn ah a thleng. 9 Cule Mikah in a hnenah, “Khui tawk ihsin na ra?” tiah a ti.

17:7^a Sem 35:19; Mat 2:1

17:8^b Lai 19:18; Rut 1:1

Cun anih in a hnenah, “Judah ram Bethlehem khua ihsin Levi-mi ka si ih umnak hmun hawlin ka vâk a si,” tiah a ti.

10 ^aMikah in a hnenah, “Ka hnenah cêng awla, ka hrangah pa le puithiam si aw, cule kum tin ngun shekel hra, thlĕngawknak hnipuan le na ei ding ka lo pe ding,” tiah a ti. Cutin Levi-mi cu a lut. 11 Cun Levi-mi cu, cu pa hnenih cêng dingah a lung a kim, cule tlangvalpa cu a hnenah a fapapawl lakih pakhat vekah a cang. 12 ^bCutin Mikah cun Levi-mi cu a serhhran ih, tlangvalpa cu a puithiam ah a cang, cule Mikah-ih inn ah a um. 13 ^cCun Mikah in, “Puithiam ah Levi-mi ka neih ruangah atu-ah cun Jehovah cu ka parah a ṭha ding ti ka thei!” tiah a ti.

17:10^a Sem 45:8

17:12^b Mip 16:10

17:13^c Mip 18:7

18

Dan-mipawl Vaihnak

1 ^aCu laiah Israel ah siangpahrang a um lo. Cule cu laiah Dan hnám cun an hrangah cēnnak ding ro an hawl, ziangahtile cumi ni tiangah Israel hnámpawl lakih an ro cu an hnenah a rak thleng hrih lo. 2 ^bCuti cun Dân-ih tefapawl in an zate lak ihsin an hnám lakih mipa panga, Zorah khua le Eshtaol khua ihsin mipa ral do mipawl cu ram thlingthla le cumi hawl dingah an thlah. An hnenah, “Feh uh, ram va hawl uh,” tiah an ti. Cutin Efraim tlang ram ih Mikah inn ah an feh ih, cu tawkah an riak.

18:1^a Jos 19:47

18:2^b Sem 30:6; Mip 21:32; Jos 2:1

3 Mikah inn ih an um laiah, Levi tlangvalpaih awcawi cu an theithiam. Sir an her ih a hnenah, “Hi tawkah zo in a lo hruai? Hi tawkah ziang na tuah? Hi tawkah ziang na nei?” tiah an ti.

4 Anih in an hnenah, “Cutin khatin Mikah in ka hrangah a tuah. Amah in in ruai ih a puithiam ah ka rak cang,” tiah a ti.

5 ^aCule annih in a hnenah, “Kan fehnak lamzin tluanih kan hmuingil ding le ding lo kan theihnak dingah zangfahten Pathian sut aw,” tiah an ti.

18:5^a Sem 25:22; 1Sam 14:18; 2Sam 5:19; 2Sp 1:2

6 ^aCule puithiam in an hnenah, “Hnangamten feh uh. Nan lamzin tluanah Jehovah umpinak um seh,” tiah a ti.

18:6^a 1Sp 22:6

7 ^aCutin mipa panga pawl cu an suak ih Laish khua ah an feh, cu tawkih mipawl cu Sidon-mipawl bangin himten ralmûang zet le hnangam zetih an cēnzia an va hmu. Cuih ram ah ziangti lam khalih anmah ningzahnak thlentu ding palbĕttu an um lo. Sidon-mipawl thawn an hla-aw ih, zo thaw hmanin pehtlaihawknak an nei lo. 8 Cun thlingthlatupawl cu Zorah le Eshtaol ih an unaupawl hnenah an thlengkir ih, an unaupawl in an hnenah, “Nan thu thlen ding cu ziang a si?” tiah an ti.

18:7^a Sem 34:25; Jos 11:8; 19:47

9 ^aCu tikah annih in, “Tho uh, anmah va do uhsi. Ziangahtile cuih ram cu kan hmu zo ih, ngai hnik uh, cumi cu a ṭha zet mi a si. Nan cangvai lo ding maw si? Cuih ram ih va feh ding le va lut dingah le va la dingah muangcâng hlah uh. 10 ^bNan feh tikah, ralmûangteih um mipi hnenah le ram kaupi ah nan thleng ding. Ziangahtile cumi cu Pathian in nan kut ah a lo pe zo, leilung ih um mi zianghman săm mi umlonak hmun a si,” tiah an ti.

18:9^a Mip 13:30; 1Sp 22:3; Heb 6:12

18:10^b Dnp 8:9; 1San 4:40

11 Cule Zorah khua le Eshtaol khua ihsin Dan sungzapawl cu doawknak hriamhreipawl thawi a thuamaw mi, mipa 600 pawl cu an fehsuak. 12 ^aCun an so ih Judah ram ih Kirjath Jearim khua ah ṭanhmun an khuar. Curuangah cuih hmun cu tuihni tiangin ^bMahaneh Dan tiah an ko. Ngai hnik cumi cu Kirjath Jearim nitlaknak lamah a um. 13 Cule cu tawk ihsin Efraim tlang ram an paltlăng ih Mikah-ih inn an thleng.

18:12^a Jos 9:17

18:12^b Mahaneh Dan: Dan hnám ṭanhmun khuarnak tinak a si.

14 ^aCun Laish ram thlingthla dingih rak fehsuaktu mipa panga pawl in an unaupawl hnenah, “Himi innpawl ah Puithiam Kâwrcung, sungkaw milempawl, khercawp milim le burcawp an um ti nan thei maw? Curuangah atu-ah ziang nan tuah ding ti ruat uh,” tiah an ti. 15 ^bCule cu tawkah cun an pial ih, Mikah-ih inn, Levi tlangvalpaih umnak inn ah an thleng, cule amah cu an cibai. 16 Doawknak hriamhreipawl thawi a thuamaw mi, Dan tefa mipa 600 pawl cu kăwtsuah ah an ding. 17 ^cCun ram thlingthla dingih a fehsuaktu mi panga pawl cu an so. Cu tawkah lutin khercawp milim, Puithiam Kâwrcung, sungkaw milempawl le burcawp milimpawl an la. Puithiam cu kăwtsuah ih doawknak hriamhreipawl thawi a thuamaw mi, mipa 600 pawl zawngah a ding. 18 ^dHi mipapawl cu Mikah-ih inn sungah an lut ih khercawp milim, Puithiam Kâwrcung, sungkaw milempawl le burcawp milimpawl an lâk tikah puithiam in an hnenah, “Ziang nan tuah?” tiah a ti.

18:14^a Sem 31:19; Jos 19:47

18:15^b 1Sam 17:22

18:17^c Sem 31:19; Mik 5:13

18:18^d Sem 31:19; Isa 46:2; Jer 43:11; Hos 10:5

19 ^aCule annih in a hnenah, “Daiten um aw, na kâ kha na kut in hup awla, kanmah hnenah ra aw, kan hnenah pa le puithiam si aw. Mi pakhat sungkua puithiam simaw, Israel sungkua le hnám pakhat ih puithiam si so ṭhasawn?” tiah an ti. 20 Cutin cuih puithiam thinlung cu a lungawi, cule anih in Puithiam Kâwrcung, sungkaw milempawl le khercawp milim a la ih cupawl zawngah a feh.

18:19^a Mip 26:42; Job 13:5; Isa 52:15; Mik 7:16

21 Cun annih cu an heraw ih an păwk, cule an hmaiah an fanau tete pawl, sumhnám le bungruapawl an ret. 22 Mikah inn ihsin tawkfang an feh tikah, Mikah-ih inn kiangih um mipapawl an pungkhawmaw ih, Dân-ih tefapawl cu an va man. 23 Cule Dân-ih tefapawl cu an ko. Cun annih cu an her ih Mikah hnenah, “Mi bur hi zat na khawm hi ziang na duh?” tiah an ti.

24 Cule anih in, “Ka tuah mi ka pathianpawl le ka puithiam tla nan la ih nan rak fehhlo. Atu-ah ziang dang si ka neih lai? Ziangtin so ka hnenah, ‘Ziang na duh?’ nan ti thei?” tiah a ti.

25 Cule Dân-ih tefapawl in a hnenah, “Kan lakah na aw theih si hlah seh, cu lo asile na parah mipa thinhengpawl in an lo do ding ih, na nunnak le na sungkuapawlih nunnak na hloh pang ding!” tiah an ti. 26 ^aCun Dân-ih tefapawl cu an suak. Cule anmah cu a hrangah an cak tuk ti Mikah in a hmuh tikah a her ih a inn ah a tlung.

18:26^a 2Sam 3:39; Sam 18:17

27 ^aCutin Mikah ih tuah mi thilpawl le a rak neih mi puithiam cu an la ih Laish khua, ralmûang le him ih um mipi hnenah an feh, cule anmah cu ralnâm hriam in an that ih meisa in khawpi cu an ur. 28 ^bCumi cu Sidon ihsin a hlat ruangah le zo thaw hmanin kungkaihawknak an neih lo ruangah, cu tawkah runsuaktu an um lo. Cumi cu Beth Rehob kiang phaikuam ah a si. Cule khawpi an dĭn ih cu tawkah an cêng. 29 ^cCule khawpi hmin ah Israel ram ih a suak mi an pa Dan hmin thlunin, Dan tiah an sak. Sikhalsehla a hlanih khawpi hmin cu Laish a si. 30 ^dCun Dân-ih tefapawl in anmai hrangah khercawp milim an dĭn, cule Manasseh fa Gershom-ih fapa Jonathan le a fapapawl cu ram ihsin mipi hruaihloh an si hlanlo, Dan hnám hrangah puithiam an si. 31 ^eCutin Mikah in a tuah mi khercawp milim cu Shiloh khua ah Pathian inn a um sung hmuahhmuah cu anmai hrangah an dĭn.

18:27^a Sem 34:25; Mip 31:10; Jos 19:47

18:28^b Sem 10:19; Mip 13:21

18:29^c Sem 14:14; Jos 19:47

18:30^d Suah 2:22

18:31^e Jos 18:1; Jer 7:14

19

Levi-mi le a Nusun

1 ^aCule cu laiah hitin a si, Israel ram ih siangpahrang a um lo laiah, Efraim tlang ram dĕng lamih a um mi Levi-mi pakhat a rak um. Amai hrangah Judah ram ih Bethlehem ihta nusun pakhat a nei. 2 Asinan a nusun cun a rinum lo san ih a hnen ihsin Judah ram Bethlehem khua ih a paih inn ah a fehsan, cule cu tawkah thla li pumhlum a va um. 3 ^bCun a pasal cu a tho ih, a hnenah ^cnemteih ṭawng dingah le amah hruaikirsal dingah, a zawngah a siahhlawh le a lāk kăwp khat thawn a va feh. Cutin cu nu in amah cu a paih inn sungah a hruai, cule nunaunuih pa in Levi-mi a hmuh tikah, amah a tawn cu a lung a awi. 4 ^dCule a pu, nunaunuih pa in amah cu a kai ih a hnenah ni thum sung a câm. Cutin an ei ih an in, cule cu tawkah an riak.

19:1^a Rut 1:1

19:3^b Rut 2:13

19:3^c nemteih: A ṭawng hrampi ah cun, “thinlung ah,” ti a si.

19:4^d Suah 32:6

5 ^aCun a ni litnak ah hitin a si, zing lam zing ten an thawh tikah, Levi-mi cu fehsuak dingin a ding, asinan nunaunuih pa in a mâkpa hnenah, “Sang málte thawn na thinlung harhter awla, cuih hnuah feh aw,” tiah a ti. 6 Cuti cun an to ih, an pahnih cun an ei ih an intlang. Cun nunaunuih pa in mipa hnenah, “Zangfahten tuihzan riak hrih awla, na thinlung tla nuam seh,” tiah a ti. 7 Cule cu pa cu fehsuak dingih a dīn tikah a pu in amah a ngen, cutin cu tawkah a riak lala. 8 Cun a ni ngatnak ah fehsuak dingin zing lam zing ten a tho, asinan nunaunuih pa in, “Zangfahten na thinlung harhter aw,” tiah a ti. Cutin sîm lam tiang an um muangcâng ih, an pahnih in an ei. 9 Cule Levi-mi cu amah le a nusun le a siahhlawh thawn fehsuak dingin a dīn tikah, a pu, nunaunuih pa in a hnenah, “Zoh hnik, khua a tlâi zo, zangfahten tuihzan cu cām hrih aw. Zoh hman, khua a thim zik thlang, na thinlung a năwm thei nak dingah hinah riak aw. Inn thleng dingin thaizing ah na khualtlawnnak hrangah zing ten tho aw,” tiah a ti.

19:5^a Sem 18:5

10 ^aSikhalsehla cu pa cun cuih zan câm ding cu a duh lo; cutin a tho ih a fehsuak, cule Jerusalem ti mi, Jebus raldenah a thleng. A hnenah dăm cia, lāk pahnih an um; a nusun khal a hnenah a um. 11 ^bAnnih cu Jebus kiangah an um ih, khua a tlâi tuk zo, cule a siahhlawh in a pu hnenah, “Ra aw, zangfahten hi Jebus-mipawlih khawpi ah pialin, cuih khua ah riak uhsi,” tiah a ti.

19:10^a Jos 15:8

19:11^b Sem 10:16; Jos 3:10

12 ^aAsinan a pu in a hnenah, “Israel tefapawl si lo, ram dang mipawlih khua ah kan pial lo ding, Gibeah khua thleng kan feh vivo ding,” tiah a ti. 13 ^bCun a siahhlawh hnenah, “Ra aw, hi hmunpawl lakih pakhat kan naih pei ih, Gibeah khua ah, asilole Ramah khua ah zan kan riak pei,” tiah a ti. 14 Cule an lan ih, an feh vivo, cule Benjamin ram Gibeah kiang an thlen ah ni a tla. 15 ^cGibeah khua ih riak dingah feh dingin, cu tawkah an pial. Cule anih cu khaw sung a luh tikah khawlak mual ah a to, ziangahtile an inn ih zan riak dingih sawmtu zohman an um lo.

19:12^a Jos 15:57; 1Sam 10:26; Isa 10:29

19:13^b Jos 18:25

19:15^c Sem 19:2; 24:23

16 ^aCule ngai hnik, putar pakhat hi sîm lamah ló ih a hnaṭuannak ihsin a ra tlung, anih khal Efraim tlang ram ihsin a si ve, amah cu Benjamin-mipawlih umnak Gibeah khua ah a cêng. 17 ^bCule khua a tang ih, khawlak mual ih khualtlawng pa a hmu, cule putarpa in, “Khuiah nan feh ding ih, khui tawk ihsi ra nan si?” tiah a ti.

19:16^a Sam 104:23

19:17^b Sem 29:4

18 Cu tikah anih in a hnenah, “Judah ram Bethlehem khua ihsin Efraim tlang ram dĕng lamih feh tum kan si, cu tawkih um ka si. Judah ram Bethlehem khua ah ka va feh ih, atu-ah Jehovah inn ih feh ka tum. Asinan zohman an inn ih i hruaitu an um lo. 19 ^aKan lākpawl hrangah cangpâwl le ṭilva rawl le keimah, na siahhlawh nunau le na siahhlawhpawl hnenih a um mi tlangval hrangah sang le sabit zu khal a um, tlaksam mi zianghman a um lo,” tiah a ti.

19:19^a Sem 14:18; 24:25; 42:27

20 Cule putarpa in, “Na hnenah daihnak um seh! Sikhalsehla na ṭul mi zate in hi ka mawhphurh si seh, mual ah cun zan riak hram hlah,” tiah a ti. 21 ^aCutin cu pa in amah cu a inn ah a hruai ih, lākpawl tla rawl a pe. Cule an ke an khawlh ih, an in ih an ei.

19:21^a Sem 24:32-33; Luk 7:44

Gibeah-mipawlih Sualralnak

22 ^aAn năwmawk rero laiah, ngai hnik, khawmi mipa hrekkhat, mihlothlaupawl in inn an kulh ih, sângka an run cum. Inn neitu pa cu an bia ih, “Na inn ih a thlengtu pa kha kan sualpi dingah rak hruaisuak aw!” tiah an ti.

19:22^a Sem 19:4-5; Dnp 13:13; Rom 1:26-27

23 ^aAsinan inn neitu pa cu an hnenah a suak ih an hnenah, “Si lo e, ka unaupawl! Zangfah ka lo dil, sualrál tukin cangvai hlah uh! Hi pa hi ka inn sungih a luh ruangah, hivek thil sual tuah hlah uh. 24 ^bZoh hnik uh, hi tawkah ka fanu fala him le hi paih nusun an um, atu-ah anmah ka rak hruaisuak ding. Duhtawkin sualpi uhla, nan mithmuh ih dik nan ti dandanin an parah tuah uh, asinan hi pa hnenah cun cuvek thil bawrhhlawh tuah hlah uh!” tiah a ti. 25 ^cAsinan cuih mipapawl in an ngaithla duh lo. Cutin cu pa cun a nusun cu a kai ih an hnenah a pe. Cule cu nu cu an sualpi ih, zanvarin zing lam tiang amah an sawisa. Cule khua a van zawngah cu nu cu an fehter.

19:23^a Sem 19:6-7; 34:7; Pui 19:24; Jos 7:15; Rom 1:27

19:24^b Sem 19:8

19:25^c 1Sam 31:4

26 Cun zing lam a hung si tikah nunaunu cu a feh ih, cu paih inn sângka, a bawipaih umnak hmun ah khawvâng tiangin a tlu. 27 A bawipa cu zing ah a tho ih, inn sângkapawl a áwng, cule feh tumin a va suak, ngai hnik, a nusun cu inn sângka ah a tlu ih, a kutpawl cu sângka kalkan tlâng parah an suangaw. 28 ^aCule anih in a nusun hnenah, “Tho awla kan feh pei,” tiah a ti. Asinan zianghman a let lo. Cule cu pa in cu nu cu lāk parah a cawiso, cule cu pa cu a tho ih, amai hmun ah a feh. 29 ^bA inn a luh tikah nâmte a la, a nusun cu a kai ih, ṭhen hleihnih ah a hlawm a hlawm in a ṭhen, cule Israel ramṭhen hmuahhmuah ah a kuat. 30 ^cCule hitin a si, cumi hmutu zate in, “Israel tefapawl Izip ram ihsin an fehsuak ihsin tuihni tiangah hivek thil hi tuah dah le hmuh dah a rak si lo. Cumi cu ruat uh, ráwn aw uhla, ṭawngsuak uh!” tiah an ti.

19:28^a Lai 20:5

19:29^b Sem 22:6; 1Sam 11:7

19:30^c Thf 13:10; Hos 9:9

20

Israel le Benjamin Doawknak

1 ^aCun Israel tefapawl zaten Dan khua ihsin Beersheba khua tiang, Gilead rammipawl khal an păwksuak ih, Mizpah khua ah mipi umkhawm cu Jehovah hmaiah mi pakhat vekin an fĭnkhawmaw. 2 ^bCule mipi hotu hmuahhmuah, Israel hnám hmuahhmuah, ralnâm keng, ke ralkap ting li cu Pathian mipawlih punkhawmnak ah an va ding. 3 (Cule Benjamin-ih tefapawl in Mizpah khua ah Israel tefapawl an so zo ti thawmvâng an thei.)

20:1^a Sem 21:14; Jos 11:3; 1Sam 11:7; 2Sam 3:10; 1Sp 4:25

20:2^b 1Sam 11:8

Cun Israel tefapawl in, “Ziangtin hi sualralnak hi a rak cang, rel uh?” tiah an ti.

4 ^aCule thah mi nunaunuih pasal, Levi-mi in a sawn ih, “Kei le ka nusun cu Benjamin ram Gibeah khua ah zan riak dingin kan feh. 5 Cule keimah dokalhin Gibeah mipapawl an tho ih, keimah ruangah zan ah inn an kulh ih thah in tum, cule keimah aiah ka nusun an sualpi, cuti cun anih cu a thi a si. 6 ^bCun ka nusun cu ka kai hnget ih, a hlawm a hlawm in ka cán, cule Israel-ih ro co ramṭhen hmuahhmuah ah amah cu ka kuat ṭheh a si, ziangruangahtile annih cun Israel ram ah fihnungza hursual tuahnak le mualphoza an tuah. 7 Zoh hnik uh! Israel tefapawl hmuahhmuah tla, hi tawkah atu-ah nan ruahnak le nan thurawn pek, pe hnik uh!” tiah a ti.

20:4^a Sem 24:23; Jos 15:57

20:6^b 2Sam 13:12

8 Cule mipi zaten mi pakhat vekin an tho ih, “Zohman mai puanthlam ah kan feh lo ding, mai inn khalah kan kirsal lo ding, 9 ^acuhnakin Gibeah parih kan tuah ding mi cu hihi a si: camcawhfung zûkin, cumi do dingin kan so ding. 10 Israel ram ih mualphoza an tuah mi hmuahhmuah ruangih dāntat an si thei nak dingih, Gibeah hmun ih Benjamin-mipawl an hung do tikih mipi ei ding petu ding hrangah, Israel hnám zate lak ihsin mipa 100 ah pahra, 1000 lak ihsin 100, cule 10000 lak ihsin 1000 kan rethran ding,” tiah an ti. 11 Cutin Israel mipapawl zaten mi pakhat vekih pumkhat in, cuih khua do dingin an pungkhawm.

20:9^a Pui 16:8

12 ^aCun Israel hnámpawl in Benjamin hnám zate hnenah mipapawl an thlah, “Nan lakih a rak cang mi sualralnak hi ziang a si? 13 ^bCuruangah atu-ah, anmah kan thah ih, Israel ihsin sualralnak cu kan thaihloh thei nak dingah, Gibeah ih um, mihlothlau mipapawl kha in ap uh!” tiah an ti. Asinan Benjamin-ih tefapawl cun an unau, Israel tefapawlih thu an lung lo. 14 Cuhnakin, Benjamin-ih tefapawl cu Israel tefapawl do dingin an khuapawl ihsin Gibeah khua ah an táwngkhawmaw. 15 ^cCule cu laiah an khuapawl ihsin Benjamin-ih tefapawl cu, Gibeah ih um, hril hleice mi, mipa mipum 700 siartel loin, ralnâm keng mi 26000 an si. 16 Hi minungpawl zate lakah kehtlak mipa hril hleice mi, lung hlum herhli ih sai ah sám phang pakhat hman ṭhelh lo mi 700 an um. 17 Cun Benjamin tel loin, ralnâm keng, Israel mipapawl cu thawng zali an si. Hipawl hmuahhmuah cu raldo thiam an si.

20:12^a Dnp 13:14

20:13^b Dnp 13:5, 13; 1Ko 5:13

20:15^c Mip 1:36-37; 2:2; 26:41

18 ^aCun Israel tefapawl cu an tho ih Pathian sut dingin Bethel ah an feh. Annih in, “Benjamin-ih tefapawl do dingah kan lakah, zo kan feh hmaisabik ding?” tiah an ti.

20:18^a Sem 49:10; Jos 12:9

Jehovah in, “Judah feh hmaisabik seh!” tiah a ti. 19 Cuti cun Israel tefapawl cu zing ah an tho ih, Gibeah do dingin ṭanhmun an khuar. 20 Cule Benjamin do dingin Israel mipapawl cu an fehsuak ih, Israel mipapawl cu Gibeah ah anmah va do dingin an tlaraw. 21 Cun Gibeah ihsin Benjamin-ih tefapawl cu an ra suak ih, cuih ni ah Israel mipa 22000 lei ah an sattlu. 22 Cule mipi, Israel mipapawl cu anmah le anmah tha an peaw ih, ni hmaisabikih an rak tlarawknak hmun ah ral do dingin an tlarawsal. 23 ^aCun Israel tefapawl cu an so ih zan tiangin Jehovah hmaiah an ṭap, “Benjamin, ka unaupaih tefapawl do dingah ka naihsal pei maw?” tiin Jehovah-ih thurawn pek an dil.

20:23^a Mip 14:1; Jos 7:6

Cule Jehovah in, “Amah do dingin feh aw,” tiah a ti.

24 Cule a ni hnihnak ah Israel tefapawl in Benjamin-ih tefapawl cu an va naih. 25 Cule a ni hnihnak ah Benjamin-ih tefapawl cu Gibeah ihsin anmah do dingin an fehsuak ih Israel tefa, ralnâm keng fingfing mipa 18000 cu lei ah an sattlu. 26 ^aCun Israel tefapawl hmuahhmuah, Israel miphun zaten an so, cule Pathian inn ah an feh ih, an ṭap. Jehovah hmaiah cu tawkah an to ih, cuih ni cu zan lam tiang rawl an ul. Cule Jehovah hmaiah Meiur Thilhlănpawl le Remnak Thilhlănpawl an hlan, 27 ^bcuih cān laiah cun cu tawkah, Pathian Thukham Kuang a um ih, 28 ^ccumi hmaiah Aaron fa Eleazar-ih fapa Finehas cu cuih cān laiah cun rawng a bawl, cun Israel tefapawl in Jehovah thu an rawn, “Benjamin, ka unaupaih tefapawl do dingin ka fehsuaksal hrih ding maw, ka cawl ding so?” tiah an ti.

20:26^a Suah 32:6; Pui 1:3; Mip 14:1; Lai 21:2

20:27^b Mip 10:33

20:28^c Mip 25:7; Dnp 18:5; Jos 2:24

Cule Jehovah in, “Feh aw, anmah cu thaizing ah na kut ah ka lo pe ding,” tiah a ti.

29 ^aCun Israel cun Gibeah kimvelah ral bawhtu mipapawl a ret. 30 Cule a ni thumnak ah Israel tefapawl cu, Benjamin-ih tefapawl do dingin an so ih cān dang pawl vekin Gibeah do dingin an tlaraw. 31 ^bCuti cun Benjamin-ih tefapawl cu mipi do dingin an fehsuak ih, khua ihsin bumsuah an si. Ni dang vek thothoin mi sahthluk an thawk ih mi hrekkhat an that, Pathian inn lamih so lamzin pakhat le a dang pakhat Gibeah khaw lamih so zinpipawl ah le ramlak ah Israel mipa 30 hrawng an that. 32 Cule Benjamin-ih tefapawl in, “A hmaisa vekin annih cu kan hmaiah neh an si,” tiah an ti.

20:29^a Jos 8:2

20:31^b Jos 8:16; 16:1

Sikhalsehla Israel-mipawl in, “Tlân uhsi la, khua ihsin zinpipawl ah anmah bumsuak uhsi,” tiah an ti. 33 ^aCuti cun Israel mipapawl hmuahhmuah cu an hmun ihsin an tho ih, Baal-Tamar hmun ah an tlaraw. Cun ralbawhih um mi Israel mipapawl cu Maareh-Geba ah an bawhnak hmun ihsin an pâwtsuak. 34 ^bCule Gibeah do dingin Israel miphun zate lakih hril hleice, mipa 10000 an ra ih, doawknak cu a nasa zet. Asinan Benjamin-mipawl in an parah siatnak a thleng ding ti an thei lo. 35 ^cJehovah in Israel hmaiah Benjamin a neh. Cule Israel tefapawl in cuih ni ah Benjamin-mipawl, ralnâm keng hlir mipa 25100 an that.

20:33^a Jos 8:19

20:34^b Jos 8:14

20:35^c 1Sam 9:21

36 ^aCule Benjamin-ih tefapawl in neh an si ti an thei. Israel mipapawl in Benjamin-mipawl hnen ihsin dung an sîp, ziangruangahtile Gibeah do dingih an ret mi mipa ral bawhtupawl kha an rinsan. 37 ^bCule ral bawhtu mipapawl cu Gibeah panin zamrang zetin an tlân, ral bawhtu mipapawl an darhaw ih ralnâm hriam thawn khaw minung zaten an that. 38 ^cIsrael mipapawl le ral bawhtu mipapawl karlakih hminsinnak tuah mi cu khaw sungih meikhu sahpi kaisohter ding hi a si. 39 ^dIsrael mipapawl cu ral donak ah dungah an sîp, cule Benjamin in do a rak thawk ih, Israel mipa 30 hrawng an that. Ziangahtile annih in, “Thungaingaiin annih cu doawknak hmaisa vekin kan hmaiah neh an si,” tiah an ti. 40 Asinan khaw sung ihsin meikhu sahpi kaiso a thawk tikah, Benjamin-mipawl cun an dung lam an hawi ih, zoh hnik, khaw pumpi cu van lamah meikhu in a kaiso rero. 41 ^eCule Israel mipapawl an herkirsal tikah, Benjamin mipapawl in an parah siatnak a thleng rero ti an hmuh ruangah an thla a phâng. 42 Curuangah Israel mipapawl dung an tŭn ih ramṭhing lamah an tlân, asinan doawknak in anmah a dawiman ih, zokhal khuapawl ihsi a ra suaktu cu an khaw sungah an rak that. 43 Benjamin-mipawl cu an kulh, an dawi ih nisuahnak lamih Gibeah ralden tiang áwl zetin anmah cu an dawiman. 44 ^fCule Benjamin mipa 18000 an tlu. Hipawl hi pa ralṭha hlir an si. 45 ^gCun a dangpawl cu an kir ih ramṭhing lamih Rimmon lungpi lamah an tlân. Asinan zinpipawl tluanah mipa 5000 an satthat. Cun annih cu Gidom tiangin, cawl loin an dawi ih, mi 2000 an that. 46 ^hCutin cuih ni ih a tlu mi Benjamin-mi zate cu ralnâm keng, mipa 25000 an si. Hipawl hi pa ralṭha hlir an si.

20:36^a Jos 8:2, 15

20:37^b Jos 8:19

20:38^c Jos 8:4-8

20:39^d Sam 78:9

20:41^e Isa 13:8

20:44^f 1Sam 10:26; Sam 76:5

20:45^g Jos 15:32

20:46^h 1Sam 9:21

47 Asinan mipa 600 cu an heraw ih, ramṭhing lamih Rimmon lungpi lamah an tlân, cule Rimmon lungpi ah thla li sung an um. 48 Cule Israel mipapawl cu Benjamin-ih tefapawl do dingin an kirsal ih, annih cun khaw kip ihta, minung le rannung, hmuh mi zaten ralnâm hriam in an sattlu. An thlennak khua hmuahhmuah khal meisa in an ur.

21

Benjamin-mipawl Nupi Peknak

1 ^aCun Israel mipapawl in Mizpah khua ah, “Kan lakih zohman in Benjamin hnenah a nupi ah a fanu a pe lo pei,” tiin sesămin thukamnak an tuah. 2 Cun mipi cu Bethel ah an ra ih, cu tawkah zan lam tiangin Pathian hmaiah an um. An aw an suah ih nasa zetin an ṭap. 3 Cule, “Maw Israel-ih Pathian Jehovah, ziangah so Israel ram ah hivek a thleng ih, tuihni ah Israel ah hnám pakhat kim loih a um ding?” tiah an ti.

21:1^a Jos 9:18; 11:3

4 Cule hitin a si, a thaizing ah mipi cu zing ten an tho ih, cu tawkah biakṭheng an dâwl, cule Meiur Thilhlănpawl le Remnak Thilhlănpawl an hlan. 5 Israel tefapawl in, “Israel hnám zate lakah Jehovah hnenih punkhawmnak ih rak tel ve lo tu cu zo a si?” tiah an ti. Ziangahtile Jehovah hnenih a ra suak lo tu mi kip thuhla ah Mizpah khua ah, “Amah cu thah tengteng a si pei,” tiin thukamnak khoh zet an rak tuah. 6 Cule Israel tefapawl cun an unaupa Benjamin hrangah an thin a na ih, “Tuihsun ah hnám pakhat cu Israel ihsin sahcat a si. 7 ^aA tāng mipawlih nupi hrangah ziang kan tuah ding, kan fanupawl tla nupi dingah kan pe lo ding, tiin Jehovah hmin sâlin sia kan rak săm zo fawn?” tiah an ti.

21:7^a Lai 21:1

8 ^aCule, “Israel hnámpawl lak ihsin Mizpah khua ih Jehovah hnenih a ra suak lo tu cu zo a si?” tiah an ti. Cule ngai hnik, ṭanhmun khuarnak ah Jabesh Gilead khawpi ihsin mi pakhat hman an rak suak lo. 9 Ziangahtile mipi an siar tikah, ngai hnik, Jabesh Gilead ih cêngpawl mi pakhat hman an um lo. 10 Cule cu tawkah mipi umkhawm cun an mipa ralṭha 12000 an thlahsuak ih anmah cu, “Feh uhla, ralnâm hriam thawn Jabesh Gilead ih cêng, nunaupawl le nauhakpawl telin that uh. 11 ^bCule hihi nan tuah ding mi a si: mipa kip le mipa ihpi zo tu nunau kip cu that thluh uh,” tiah thu an pe. 12 ^cCun Jabesh Gilead ih cêngpawl lak ihsin mipa a thei hrih lo tu fala him 400 an hmu, cule anmah cu Kanaan ram, Shiloh khua ih ṭanhmun khuarnak ah an hruai.

21:8^a 1Sam 11:1; 2Sam 21:12; 1San 10:11

21:11^b Mip 31:7, 17-18

21:12^c Jos 18:1

13 ^aCun Rimmon lungpi ih a um mi Benjamin-ih tefapawl hnenah mipi umkhawm hmuahhmuah cun thu an cah ih, an hnenah remdaihnak an phuang. 14 Cun Benjamin cu cuih cān ah a ra kirsal ih, Jabesh Gilead nunaupawl lakih nungih an zuah mi nunaupawl cu anmah an pe. Cuti cing khalin an hrangih daih tawk an hmu lo. 15 Cule Israel hnámpawl sungah Jehovah in himlonak a umter ruangah mipi cu Benjamin hrangah an thin a nâ.

21:13^a Dnp 2:26; Jos 15:32

16 Cule mipi umkhawm upapawl in, “Benjamin nunaupawl cu thah an si zo fawn, a tāng lai mipawlih nupi hrangah ziang kan tuah ding?” tiah an ti. 17 Cule annih in, “Israel ihsin hnám khat cimihter a silonak dingah, Benjamin-mi a nungdam mipawl hrangah ro a um tengteng ding a si. 18 ^aSikhalsehla kan fanupawl an nupi ah kan pe thei lo, ziangahtile Israel tefapawl in, ‘Benjamin hnenih nupi a petu cu camsiat si seh,’ tiin tiamkamin sia an săm zo,” tiah an ti. 19 ^bCun annih in, “Ngai hnik uh, Bethel sak lam, Bethel ihsin Shekem fehnak zinpi-ih nisuahnak lam, Lebonah khaw thlang lamih um Shiloh khua ah kum tin, Jehovah-ih puai a um,” tiah an ti.

21:18^a Lai 21:1

21:19^b Jos 17:7; 18:1

20 Curuangah Benjamin-ih tefapawl cu, “Feh uh, sabit hmuanpawl ah va bawh uh, 21 ^acule zoh hnik uh, Shiloh fanupawl tla an năwmawknak ah lām dingih an ra suah zawngah sabit hmuanpawl ihsin suak uhla, Shiloh fanupawl lak ihsin nanmai hrangah nupi ding kai cio uh, cun Benjamin ram ah feh uh. 22 Cun hitin a si ding, êl dingin an palepawl maw, an ṭapalepawl simaw kan hnen an rat tikah an hnenah, ‘Kanmai ruangah an parah ṭhatnak suah uh, ziangruangahtile doawk laiah anmai hrangah nupi kan rak pe thluh thei lo. Cule nannih khal in nan fanupawl an hnenah nan rak pe lo, pe uhla cu atu-ah mawh nei nan si ding,’ tiin kan rak ti ding,” tiah an sim.

21:21^a Suah 15:20

23 ^aCule cu vekin Benjamin-ih tefapawl in an tuah. A lāmtu, an kaih mi ihsin an mipum daih tawkin nupi an la. Cule an feh ih ro ih an co mi ram ah an kirsal. Cule khuapawl an dĭn ih, cupawl ah cun an cêng. 24 Cutin Israel tefapawl cu cuih cān ah mi kip anmai hnám le sungkua hnenah cu tawk ihsin an păwksuak, mi kip ro ih an co mi cio ah cu tawk ihsin an fehsuak. 25 ^bCu laiah Israel ram ah siangpahrang a um lo, mi kip in anmai mit ih dik an ti mi an tuah cio.

21:23^a Jos 24:28

21:25^b Dnp 12:8; Thf 21:2