About Bible Thianghlim | ©

BibleThianghlim – Hosea

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Hosea

12345678910
11121314

• A ngantu: Beeri Fapa Hosea
• A siartu: Sak lam Lalram, Israel
• Ngan kum: B.C. 725 hrawng

Jeroboam II a uknak cem lamah Hosea in thuphuan a thawk. Assiria in Israel khawpi Samaria a neh hlante tiang Hosea cun rawng a bawl (B.C. 755-725). Cuih cān ah Israel cu a hmuingil ih ralkap cahnak a nei (bung 2; 4-5). Asinan Hosea-ih rawngbawlnak a cem tikah Israel cu ramkhel lamah a hnget nawn lo. Jeroboam II hnuah siangpahrang paruk in an uk. Pali cu thah an si ih, pahnih in kum khat hnak mal an uk. Israel cu a cak zet mi rampawl in sak lam ihsin Assiria in, thlang lam ihsin Izip in an năwr. Sak lam lalram-mi sinak nei (7:5) le hlawhhlang nupi ṭhi dingih Pathian in a fial mi thu siarlo, Hosea thuhla theih ding a mal zet. Hlawhhlang nupi ih ṭhit ding cu ṭuanvo thil maktak a si. Pathian in a mipawl a pehtlaihnak hmuhsaknak dingah a nupi rinum lo parih rinumteih um dingin Pathian in Hosea a fial. Hosea in fāte pathum a nei ih, an hminpawl hmangin Pathian in minungpawl hnenah thucah a sim.

A hmaisa bung thum hin hi cabu hrangah thutlangpi a zăm. Pasal in a nupi uire cing khalih a nupi thawi an tuah mi thukham parih rinum zet tu pasal kha Hosea hin a langter. Israel cu Izip ram ihsi runsuah Pathian-ih mihleice an si. Thulungtu hrangah malsawmnak le thulung lo tu hrangah dāntatnak thutiamkam thukham cu ramṭhing ah Pathian in Israel thawn a tuah, asinan Israel in Pathian a dungtun. A hnen ihsi an dăwn mi malsawmpawl cu Pathian hnenin a si ti an pawm lo. Anmah thawi a tuah mi thukham cu an pahbăl ih, pathian dang pawl lamah an pial, cule miphun dang pawl an rinsan. Hosea thuanthu ih a laimu cu Israel cu hlawhhlang ih cang nupi, pasal dungtun ih mipa dang pawl hnenih feh vek a si thu hi a si.

Hosea cabu a hrek neta (bung 4-14) ah cun, Pathian in Israel cu dāntatnak thawn a hro. Asinan an hrangah a duhdawtnak cu a langter ih, a hnenih kirsal dingin a ngen hai. Hosea cabu ah tundīnsalnak le ngaidamnak ruahsannak thu kan hmu. Israel cu rinum lo si khal hai sehla, Pathian cu an parah a rinum thotho.

Hosea cabu in kan pumhlum ih Pathian hnenih peaw dingin in ngen a si. Amah hnenih kan rinum lo tik khalah, Pathian cu a mipawl tungdingsal dingin a rinum ringring.

1

1 ^aJudah siangpahrang Uzziah, Jotham, Ahaz le Hezekiah san le Israel siangpahrang Jehoash-ih fapa, Jeroboam san ih Beeri-ih fapa Hosea hnenih Jehovah-ih kamsuakthu thleng.

1:1^a 2Sp 15:32; 16:1; 2San 26:1-23; 29:1; Isa 1:1; Amo 1:1; Mik 1:1

Hosea-ih Sungkua

2 ^aHosea hmangin Jehovah in thusim a thawh tikah Jehovah in Hosea hnenah:

1:2^a Dnp 31:16; Jer 3:1, 14; Eze 23:3-21; Hos 3:1

“Feh aw, nupi ah hlawhhlang ṭhi awla
Hlawhhlannak faletla nei aw.
Ziangahtile ram cun Jehovah tansănin
Rapthlak zetin a hlawhhlang a si,”

tiah a ti.

3 ^aCule Hosea cu a va feh ih, Diblaim-ih fanu Gomer a ṭhi, cule anih cun fa a rai ih, fapa a hrinsak. 4 ^bCun Jehovah in a hnenah:

1:3^a Hos 3:1-2

1:4^b 2Sp 10:1-14; 17:6; 18:11; 2San 22:8

“Jezreel tiah hmin sak aw,
Ziangahtile a rei hlanah
Jezreel hmun ih thisen an suah man ah Jehu teih sungza dān ka tat ding,
Cule Israel sungza lalram cem ko ka tuah ding.
5 ^aCuih ni ah cun Israel-ih thál cu Jezreel phaikuam ah ka khiak ding a si,”

1:5^a 2Sp 15:29

tiah a ti.

6 ^aCule Gomer in fa a rai leh sal ih fanu a hring. Cun Pathian in a hnenah:

1:6^a 2Sp 17:6; Hos 2:4

“^aLo-Ruhamah tiah hmin sak aw,
Ziangahtile Israel sungza parah lainatnak ka nei nawn lo ding ih,
Anmah ka ngaidam hrimhrim lo ding.
7 ^bAsinan Judah sungza parah cun lainatnak ka nei ding,
Annih cu thál in siseh, ralnâm in siseh, doawknak in siseh,
Rangpawl in siseh, rang ralkappawl hmang khalin siseh ka rundam hai lo ding ih,
Jehovah an Pathian hmangin ka rundam hai sawn ding,”

1:6^a Lo-Ruhamah: Lainatnak um lo tinak a si.

1:7^b Dnp 30:1-3; 2Sp 19:29-35; Sam 44:6; Zek 4:6

tiah a ti.

8 Gomer in Lo-Ruhamah hnawi a thleingah tikah, fa a rai ih fapa a hring. 9 ^aCun Pathian in,

1:9^a 1Pe 2:10

“^aLo-Ammi tiah hmin sak aw,
Ziangahtile nannih cu ka mi nan si lo ih,
Kei khal nan Pathian ka si lo,”

1:9^a Lo-Ammi: Ka mi a si lo mipawl tinak a si.

tiah a ti.

Tundinsal ding Tiamkamnak

10 ^aAsinan Israel tefa mipum cu tipi kapih tah cawk lo le siar cawk lo vunnel zat vek an si ding. Cule, “Nannih cu ka minung nan si lo,” a tinak hmun ah, “Nannih cu a nung mi Pathian fapapawl nan si,” tiah an hnenah ti an si ding. 11 ^bCun Judah-ih tefapawl le Israel tefapawl cu hmunkhat ah fĭnkhawm an si ding ih an hrangah hruaitu pakhat ruat a si ding. Cule annihpawl cu cuih ram ihsin an ra suak ding. Ziangahtile Jezreel-ih ni cu a nasa zet ding.

1:10^a Sem 22:17; Isa 63:16; 64:8; Jer 33:22; Hos 2:23; Rom 9:26

1:11^b Isa 11:12-13; Jer 23:5-8; 30:21; Eze 37:15-23; Hos 3:5

2

1 ^aNan unaupawl hnenah,

2:1^a 1Pe 2:10

“^aAmmi,” tiin le
Nan farnupawl hnenah, “^bRuhamah,” tiah ti uh.

2:1^a Ammi: Ka mipawl tinak a si.

2:1^b Ruhamah: Lainatnak a cohlang tinak a si.

Rinum Lo Israel

2 ^a“Nan nu kawk uh, kawk uh;
Ziangahtile anih cu ka nupi a si lo ih,
Kei khal a pasal ka si lo!
A mithmai ihsin a hlawhhlannak hlăwn seh,
Cule a pawhte karlak ihsin a uiretnak hlăwn seh.
3 ^bCulole taklawng ko ka tuah ding ih,
A suah ni bangin ka lawngfangkhehter ding,
Cule anih cu ramṭhing vekin ka tuah ding ih,
Ram car vekin ka ret ding,
Cule tihâlin ka that ding.
4 ^cA falepawl parah lainatnak ka nei lo ding,
Ziangahtile annih cu hlawhhlannak fāte an si.
5 ^dZiangahtile an nu cun hlawhhlannak a tuah;
Anmah vuntu nu cun ningzakzain a cangvai.
Ziangahtile anih in, ‘Ka rawl le ka ti,
Ka sahmul le ka pat zai,
Ka hriak le ka in ding in petu,
Ka duhdawt mipawlih dung ka thlun ding,’ tiah a ti.
6 ^eCuruangah zoh hnik, na zin cu hling rûl in ka phit ding ih,
Amah nu in a zinpawl a hmuh thei lo nak dingah hruang ka tung ding.
7 ^fA duhdawt mipawl a dûm ding,
Asinan a man cuang hai lo ding.
A si, a hawl hai ding, asinan a táwng hai lo ding.
Cun anih in, ‘Ka pasal hmaisa hnenah ka kirsal ding,
Ziangahtile kha laiih ka dinhmun kha atu hnakin a ṭhasawn,’ tiah a ti ding.
8 ^gZiangahtile kei in a thlairawl, sabit zu thar le hriak thar ka pe ti le,
Baal hrangih an timtuah mi a sui le a ngun ka pungter ti a thei lo.
9 ^hCuruangah ka thlairawl cu amai cān ah le
Ka sabit zu thar cu a tikcucān ah ka lakirsal ding,
Cule a taklawng khuhnak dingih pek mi
Ka sahmul le ka pat zai puan khal ka lakirsal ding.
10 ⁱA duhdawt mipawlih mithmuh ah fihnungza hursualnak a tuah mi ka langter ding ih,
Zohman in ka kut ihsin anih cu an runsuak lo ding.
11 ^jA hlimnak zaten ka cemter ding,
A puai nipawl,
A thla thar pawl,
A Sabbath-pawl le
A khiah cia mi puaipawl hmuahhmuah khal.
12 ^kCule a sabit hmuan le a theipi kungpawl ka tisiat ding,
Cupawl thuhla ah amah nu cun,
‘Hibangpawl tla hi ka duhdawt mipawl ih in rak pek mi hlawh man an si,’ tiah a ti.
Cule anmah cu thing rûl ah ka tuah hai ding ih,
Ramsapawl in an eirál ding.
13 ^lBaal hnenih rimhmui a ur nipawl ruangah amah cu dān ka tat ding.
Amah cu hnakhaih le ceiawknak thawn a ceiaw ih,
A duhdawt mipawl dung a thlun,
Asinan kei cu i hngilh, Jehovah in a ti.

2:2^a Isa 1:21; 50:1; Jer 3:1; Hos 1:2; 2:5

2:3^b Isa 32:13-14; Eze 16:4-22, 35-39; Hos 13:15; Amo 8:11-13

2:4^c Jer 13:14; Eze 8:18; Hos 1:6

2:5^d Jer 3:6; 44:17-18; Hos 2:8

2:6^e Job 3:23; 19:8; Ṭah 3:7, 9

2:7^f Isa 54:5; Jer 3:1; Eze 16:8; Hos 5:13-15; Luk 15:17-18

2:8^g Mip 18:12; Dnp 8:18; Isa 1:3; Hos 2:13

2:9^h Hos 8:7; 9:2

2:10ⁱ Jer 13:26; Eze 16:37; 23:9-10; Hos 2:3

2:11^j Isa 1:13-14; 24:8-11; Jer 7:34; 16:9; Amo 5:21; 8:10

2:12^k Isa 5:6; 7:23; Jer 5:17; 8:13; Hos 13:8

2:13^l Isa 65:6-7; Jer 44:15-17; Eze 16:17-18; Hos 4:13

Pathian in Israel a Tungdingsal

14 ^a“Curuangah ngai hnik, amah nu cu ka thlimthluai ding,
Ramṭhing ah ka hruai ding ih,
Aw ^bnemten ka be ding.
15 ^cCu tawk hmun ihsin a sabit hmuanpawl cu amah ka pe ding,
Cule Akor phaikuam cu ruahsannak sângka ah ka tuah ding.
Anih in cu tawk hmun ah
A no lai cān le Izip ram ihsi a ra suah ni bangin,
Hla a sak ding.
16 ^d“Jehovah in, cuih ni ah cun, ‘Ka pasal,’ tiah i ko ding,
‘Ka bawipa,’ tiah i ko nawn lo ding, tiah a ti.
17 ^eZiangahtile a kâ ihsin Baal pathianpawl hmin ka lahlo ding ih,
Annih cu an hmin sāl a si nawn lo ding.
18 ^fCuih ni ah an hrangah ramsapawl thawn,
Tlun zuang vatepawl thawn le
Leilung parih thilnung petzuang pawl thawn thukham ka tuah ding.
Ralmûang zetih zau ko ka tuah hai thei nak dingah,
Leilung ihsin thál, ral donak ralnâm ka ṭhiatbăl ding.
19 ^gKa hrangah kumkhaw hrangah ka lo ham ding.
A si, dingfelnak le diknak le,
Lainat duhdawtnak le lainatnak in ka hrangah ka lo ham ding.
20 ^hRinumnak in ka hrangah ka lo ham ding,
Cule nang in Jehovah na thei ding.
21 ⁱ“Jehovah in cuih ni ah ka lo sawn ding a ti.
Van ka sawn ding ih,
Annih in leilung an sawn ding.
22 ^jLeilung in thlairawl thawn,
Sabit zu thar le
Hriak thar thawn an sawn ve ding.
Annih in ^kJezreel an sawn ding.
23 ^lCun anih cu ka hrangah lei ah ka cīng ding,
Cule lainatnak co lo amah parah lainatnak ka nei ding;
Cun ka mi a si lo mipawl hnenah, ‘Nannih cu ka mi nan si!’ tiah ka ti hai ding ih,
Annih in, ‘Nang cu kan Pathian na si!’ tiah in ti ding,” tiah a ti.

2:14^a Isa 40:2; Eze 19:13

2:14^b nemten: A ṭawng hrampi ah cun, “thinlung ah” ti a si.

2:15^c Suah 15:1-18; Jos 7:24-26; Isa 65:10; Jer 2:2; Eze 28:26

2:16^d Isa 54:5; Hos 2:7

2:17^e Suah 23:13; Jos 23:7; Zek 13:2

2:18^f Pui 26:5; Isa 2:4; Jer 23:6; Eze 34:25; Zek 9:10

2:19^g Isa 1:27; 54:8; 62:4

2:20^h Jer 31:34; Hos 6:6; 13:4

2:21ⁱ Zek 8:12; Mal 3:10

2:22^j Hos 1:4-5; 14:7; Joe 2:19

2:22^k Jezreel: Hebru ṭawng ih a sullam cu “Pathian in a tuh” tinak a si.

2:23^l Jer 29:12; 31:27; Hos 1:6, 9-10; Rom 9:25; 1Pe 2:10

3

Hosea in Gomer a Tungdingsal

1 ^a Cun Jehovah in ka hnenah, “Va fehsal aw, pathian dang pawl lamih pialtu le rairingpawlih sabit rah car duhtu Israel tefapawl Jehovah in a duhdawt hai bangin, mi dangih duhdawt mi uire nunau kha va duhdaw aw,” tiah i ti.

3:1^a 2Sam 6:19; Jer 3:20; Hos 1:2

2 ^aCuih nunau cu ngun shekel hleinga le barli sangvut homer khat le a hrek in keimai hrangah ka lei. 3 Cule a hnenah, “Ka hnenah cān reipi na cêng ding, hlawhhlannak na tuah nawn lo ding, mipa dang khal na nei lo ding, kei khal cuti vekin na lakah ka um ve ding,” tiah ka ti. 4 ^bZiangahtile Israel tefapawl cu siangpahrang le bawi nei lo, raithawinak le ṭhuamserh nei lo, Puithiam Kâwrcung le sungkaw milem nei loin cān reipi an um ding. 5 ^cCumi hnuah Israel tefapawl an kirsal ding ih, Jehovah an Pathian le an siangpahrang David an hawl ding. Ni neta lamah Jehovah le a ṭhatnak an ṭihzah ding.

3:2^a Rut 4:10

3:4^b Suah 28:4-12; Lai 17:5-6; Dan 11:31; 12:11; Hos 10:3; 13:11

3:5^c Isa 2:2; Jer 30:9; 50:4-5; Eze 34:23-24; Mik 4:1-2; Apo 15:16

4

Pathian in Israel Sual a Puh

1 ^aNannih Israel tefapawl,
Jehovah-ih kamsuakthu hi ngaithla uh,
Ziangahtile Jehovah in ram luahtupawl a khîng a si:
Ram sungah thutak siseh, lainat duhdawtnak siseh,
Pathian theihnak siseh a um lo.
2 ^bSesămnak, thuphan pernak,
Thahawknak, rûkrûknak le uiretnak a um.
Sūpawk thei nak zaten an pahbăl,
Thisen suahnak cu thisen suahnak in a thlun.
3 ^cCuruangah ram in a tuar ding ih,
A sungih cêng pauhpauh cu
Ramsapawl le
Tlun zuang vatepawl thawn an zăwi ding;
Tifinriat nga tiang an hloral ding.
4 ^dZohman in khing hlah sehla, zohman in mi dang kawk hlah seh;
Ziangahtile na mipawl cu puithiam khīngtupawl vek an si.
5 ^eCuruangah sun ah na bah ding;
Profet khal na zawngah zan ah a bah ve ding;
Cule na nu ka hloralter ding.
6 ^fKa mipawl cu theihnak tlaksam ruangah an hloral.
Theihnak na hnawn ruangah,
Kei khal in ka hrangih puithiam sinak ihsin ka lo hnáwng ve ding;
Na Pathian Dān na rak hngilh ruangah,
Kei khal in na tefapawl ka hngilh ve ding.
7 ^gPuithiam an karh tam pauh le,
Ka parah an sual tam;
An ropitnak cu ningzahnak ah ka thlĕng ding.
8 ^hKa mipawlih sual thawinak sa in an câwmaw;
An thinlung cu ka mipawlih mawhsualnak parah an ret.
9 ⁱCule hitin a si ding: Puithiam vekin mipi an si ding.
An nuntudān ruangah dān ka tat hai ding ih,
An thil ti mipawl ka lehrūl hai ding.
10 ^jZiangahtile an ei ding, asinan an khawp lo ding;
An hlawhhlang ding, asinan an karhzai cuang lo ding;
Ziangruangahtile Jehovah thulun an cawlhsan.
11 ^kHlawhhlannak, sabit zu le sabit zu thar in an theihthiamnak a lahlo.
12 ^lKa mipawl cun an thing milempawl thu an ráwn ih,
An ^mkianghrăwl in thu a thăn hai.
Ziangahtile hlawhhlannak thinlung cun a hruaipêng hai ih,
An Pathian dokalhin hlawhhlannak an tuah.
13 ⁿAn zârhnem a ṭhat ruangah,
Elon thing hnuai, ^olibna thing hnuai le ela thing hnuai pawl,
Tlang zim pawl ah raithawi mipawl an hlan ih,
Tlangmûalpawl ah rimhmui an ur.
Curuangah nan fanupawl in hlawhhlannak an tuah ih,
Nan molepawl in uiretnak an tuah.
14 ^pNan fanupawl in hlawhhlannak an tuah tikah dān ka tat hai lo ding,
Nan molepawl in uiretnak an tuah tik khalah;
Ziangahtile mipapawl anmah rori hlawhhlangpawl thawn an kăwpaw-ih,
Sakhaw hlawhhlangpawl thawn raithawi mipawl an hlan.
Curuangah theihthiamnak nei lo minungpawl cu an siatrál ding.
15 ^qNang, Israel, hlawhhlannak tuah khal awla,
Judah cu mawh co hlah seh.
Gilgal ah so hlah,
Beth Aven khalah so fawn hlah,
“Jehovah a nun rori vekin,” ti khalin siasăm hlah.
16 ^rZiangahtile Israel cu caw la vekin a lung a ruh;
Ran tlannak hmun kaupi ih tuu fa no tlanter mi vekin,
Jehovah in annihpawl cu a tlangter thei hai ding maw si?
17 ^sEfraim cun milempawl a kăwp,
Buaipi hlah uh.
18 ^tAn zu in a net tikah,
Cawl loin hlawhhlannak an tuah.
Anmah uktupawl in mualpho an duh tuk lawmmam.
19 ^uThli in a thla sungah a tuam hai ih,
An raithawi mipawl ruangah mualphoin an um ding.

4:1^a Job 10:2; Isa 1:3; Jer 2:9; 7:28; Hos 12:2; Mik 6:2

4:2^b 2Sp 21:16; Isa 1:15; 59:3; Jer 9:2; Eze 22:2, 9; Hos 7:3

4:3^c Isa 24:4; Jer 4:25, 28; Eze 38:20; Zef 1:3

4:4^d Dnp 17:12; Eze 3:26; Amo 5:10

4:5^e Eze 7:19; Hos 2:2; 5:5

4:6^f Isa 5:13; Hos 2:13; 8:1, 12; Mal 2:7-8

4:7^g Hos 9:11; Hab 2:16

4:8^h Isa 56:11; Mik 3:11

4:9ⁱ Isa 24:2; Jer 5:31; Hos 8:13; 9:9

4:10^j Pui 26:26; Hos 7:14; Mik 6:14

4:11^k Pui 10:9; Thf 20:1; Isa 5:12; 28:7; Hos 5:4

4:12^l Mip 15:39; Isa 44:19-20; Jer 2:27; Hab 2:19

4:12^m kianghrăwl: Aizohnakih an hman mi a si.

4:13ⁿ Isa 1:29; 57:5, 7; Jer 2:20; 3:6; Hos 2:13; Amo 7:17

4:13^o libna thing: Ṭhang cak zet thingkung sang tuk lo a si ih, hnah hring le hnah var a nei, thingkung tumpi a si ih, mirang in poplar thingkung râng an ti.

4:14^p Sem 38:21; Dnp 23:17; Thf 10:21; Hos 9:10

4:15^q 1Sp 12:29; Jer 4:2; Hos 5:8; 9:15; Amo 8:14

4:16^r Suah 32:9; Isa 5:17; Jer 3:6; 31:18

4:17^s Sam 81:12; Mat 15:14

4:18^t Mik 3:11

4:19^u Isa 1:29; Hos 12:1; 13:15

5

Israel le Judah parih Thleng cing ding mi Dāntatnak

1 ^aMaw puithiampawl, hihi ngaithla uh!
Maw Israel sungza, fimkhur uh!
Maw siangpahrang sungza, nan hna thawng uh!
Ziangahtile dāntatnak cu nan hrangah a si,
Ziangruangahtile nang cu Mizpah ah thangkam mi le Tabor tlang ah sur pharh mi na rak si.
2 ^bMihélpawl cu mi thahnak ah an lut thûk zet,
An zaten ka kawk hai ding.
3 ^cEfraim ka thei ih,
Israel cu ka hnen ihsin thuh a si lo;
Ziangahtile atu-ah, Maw Efraim, hlawhhlannak na tuah;
Israel cu a bawrhbang a si.
4 ^dPathian lamih kir dingin an thil ti mipawl in anmahpawl cu a hawiter lo,
Ziangahtile an lakah hlawhhlannak thinlung a um ih,
Jehovah an thei lo.
5 ^eIsrael hngalnak cu a mithmai ah a lang;
Curuangah Israel le Efraim cu an mawhsualnak ah an bah;
Judah khal anmah zawngah a bah ve.
6 ^fAn rante rual le ranpi rual thawn
Jehovah hawl dingin an feh ding,
Asinan an hmu lo ding;
Anih cu an hnen ihsin a sîp zo.
7 ^gJehovah hnenah rinum loin an rak um,
Ziangahtile ^hkham mi fāte an hring.
Anmah le an leiram cu Thla Thar in a eirál ding.
8 ⁱGibeah ah tuu pa ki phaw uh,
Ramah ah tawtawrawt!
Beth Aven ah, na dungah,
Maw Benjamin, tiah ring zetin au uh.
9 ^jKawk ni ah Efraim ram cu a ṭhing ding;
Israel hnámpawl lakah thufiang ka thăn a si.
10 ^kJudah hotupawl cu ramri lungphun ṭhawntu vek an si;
An parah tidai bangin ka thinlingnak ka burh ding.
11 ^lEfraim cu thuṭhennak ah palbĕtin le tisiatin a um.
Ziangruangahtile anih cun milai nunphung dān cu lungsi zetin a thlun.
12 ^mCuruangah Efraim hrangah sunhrûl vek ka si ding ih,
Judah sungza hrangah ngĕt vek ka si ding.
13 ⁿEfraim in a natnak a hmu ih,
Judah in a hriamhma a hmuh tikah,
Efraim cu Assiria ah a feh ih
Siangpahrang Jareb hnenah băwmnak a dil.
Asinan anih cun a lo damter thei lo ih,
Na hriamhma khal a damter thei lo.
14 ^oZiangahtile Efraim hrangah kiosa vek ka si ding ih,
Judah sungza hrangah kiosa vanglai vek ka si ding.
Kei, keimah rori in ka băwtthlek thluh hai ding ih, ka fehhlo ding.
Ka thiarhlo hai ding ih, zohman in an run lo ding.
15 ^pAn mawhsualnak an pawm hlanlo,
Ka umnak hmun ah ka kirsal ding.
Cun ka mithmai an hawl ding;
An vansannak ah nasa zetin keimah in hawl ding.

5:1^a Jer 5:26; Hos 6:9; 9:8

5:2^b Isa 29:15; Hos 4:2; 9:15

5:3^c Eze 23:7; Hos 1:2; 6:10; Amo 3:2; 5:12

5:4^d Jer 4:22; Hos 4:6, 11-12, 14; 7:10

5:5^e Isa 3:9; Jer 2:19; Eze 14:7; 23:31; Hos 7:10

5:6^f Thf 1:28; Isa 1:15; Eze 8:6; Hos 8:13; Mik 6:6-7; Mal 1:10

5:7^g Isa 1:14; 24:16; Jer 3:20; Hos 2:4, 11-12; 6:7

5:7^h kham: Pathian in ṭhit lo dingih a kham mi thawi neih mi fāte tinak a si.

5:8ⁱ Mip 10:2; Jos 7:2; Lai 19:12; Hos 4:15; 9:9; Joe 2:1

5:9^j Isa 28:1-4; 37:3; 46:10; Hos 9:11-17; Zek 1:6

5:10^k Dnp 19:14; 27:17; Eze 7:8

5:11^l Dnp 28:33; Hos 9:16; Mik 6:16

5:12^m Job 18:16; Sam 39:11; Isa 51:8

5:13ⁿ Jer 30:12; Ṭah 5:6; Hos 7:11; 10:6; 12:1; 14:3

5:14^o Dnp 32:39; Sam 7:2; Jer 4:7; Hos 6:1; Mik 5:8

5:15^p Pui 26:40; Mip 21:7; Sam 50:15; Isa 18:4; 64:9; Eze 20:43; Hos 3:5

6

Sual Sir dingih Kawhnak

1 ^aRa uh, Jehovah hnenah kir uhsi;
Ziangahtile anih in in băwtthlek, asinan anih in in tidamsal ding;
Anih in in tuahmawh, asinan anih in in tuamsak ding.
2 ^bNi hnih hnuah anih in in ṭhangphawksal ding;
A mithmuh ih kan nun thei nak dingah,
A ni thumnak ah in kaitho ding.
3 ^cThei uhsi,
Jehovah thei dingin ṭang uhsi.
A fehsuaknak cu khawfingcat a pelh dah lo vekin a si;
Anih cu ruahpi bangin kan hnenah a ra ding,
Lei ih sur ṭhal tawp ruah bangin.

6:1^a Mip 12:13; Isa 1:18; 10:20; Jer 3:22; Ṭah 3:11; Hos 5:14; 14:4

6:2^b Sam 30:5; 71:20; Mat 16:21

6:3^c Dnp 32:2; Sam 72:6; Hos 12:6; Joe 2:23

Israel le Judah Rinumlonak

4 ^aMaw Efraim, na hnenah ziang so ka tuah ding?
Maw Judah, na hnenah ziang so ka tuah ding?
Ziangahtile na lainat duhdawtnak cu zing mero vek le
Zingpit daifim rang zetih zupral vek a si.
5 ^bCuruangah profet hmangin cip nêknêkin ka tán hai,
Anmah cu ka kâ ih kamsuakthupawl in ka that hai;
Cule nan parih thuṭhennakpawl cu tleu êngsuak vek a si.
6 ^cZiangahtile thawinak si loin zahngainak,
Cule Meiur Thilhlănpawl hnakin Pathian theihnak ka duh sawn.
7 ^dAsinan ^eAdam khua ah thukham an pahbăl;
Cu tawkah ka parah an rinum lo.
8 ^fGilead cu thil ṭha lo tuahtupawlih khawpi a si ih,
Thisen in a bawrhbang.
9 ^gSuamhmang rual in mi an bawh bangin,
Puithiam rual cun Shekem zin ah mi an that;
Thungaiten fihnungza hursualnak an tuah a si.
10 ^hIsrael sungza ah tuksumza thil ka hmu:
Cu tawkah Efraim-ih hlawhhlannak a um;
Israel cu a bawrhbang a si.
11 ⁱCuihtlunah, Maw Judah, ka minungpawlih vanneihnak ka tundinsal tikah,
Na hrangah fang ah ding ruah cia a si.

6:4^a Sam 78:34-37; Hos 7:1; 11:8; 13:3

6:5^b Jer 1:9-10; 23:29; Heb 4:12

6:6^c Sam 40:6; Isa 1:11; Hos 2:20; Mik 6:8; Mat 9:13; 12:7; Joh 17:3

6:7^d Jer 11:10; Hos 5:7

6:7^e Adam: Milai hmaisabik Adam kha a si men thei.

6:8^f Hos 12:11

6:9^g Jer 5:30-31; 7:9-10; Eze 22:9; Hos 4:2; 5:1

6:10^h Jer 5:30-31; 23:14; Eze 23:7; Hos 5:3

6:11ⁱ Jer 51:33; Joe 3:13; Zef 2:7

7

1 ^aIsrael tidam ka tum tikah,
Efraim-ih mawhsualnak le
Samaria-ih sualralnak a lang.
Ziangahtile mi bum an hmang;
Fifir a lut;
Suamhmang rual in lengah mi an răm.
2 ^bAn sualralnak hmuahhmuah ka cîng ringring ti
An thinlung in an ruat lo;
An thil ti mipawl in anmah a kulh;
Cupawl cu ka hmaika ah an um.
3 ^cAn sualralnak in siangpahrang lungawi ko an tuah ih,
An thuphan pernak in hotupawl khal.
4 ^dAn zaten an uire.
Annih cu sang rawhtu in sangphŭt a nawn thawk ihsin a puam lai hlanlo, meisa a sēmalh ṭul nawn lo mi thŭk sa ringring mi vek an si.
5 ^eKan siangpahrangih ni ah
Hotupawl cu sabit zu ruangah an dam lo;
Anih cun mi hmuhsuamtupawl zawngah a kut a suah.
6 ^fMi an bawh tikah,
An thinlung cu thŭk vekin an timtuah;
An thinhengnak cu zanvar a itthat;
Zing lamah cun meisa alh vekin a hliau.
7 ^gAn zaten thŭk bangin an ling ih,
An thuṭhentupawl an eirál;
An siangpahrangpawl zaten an tlu.
An lakih pakhat hmanin keimah in ko lo.
8 ^hEfraim cu miphunpawl lakah a căwkpawlhawter;
Efraim cu khat lam leh lo mi sang per vek a si.
9 ⁱKhawtluang mipawl in a cahnak an eiralsak,
Asinan cucu a thei cuang lo.
A sámṭuak cu a parah a khat,
Asinan cumi cu a thei cuang lo.
10 ^jCule Israel-ih hngalnak cu a hmel ah a lang,
Asinan Jehovah an Pathian hnenah an kir lo ih,
Hibangpawl hmuahhmuah si cing khalin amah an hawl cuang lo.
11 ^kEfraim cu ruahnak nei lo, thuro â vek a si.
Izip hnenah băwmnak an dil ih,
Assiria ram ah an feh.
12 ^lAn fehnak kip ah,
An parah ka sur ka pharh ding;
Anmah cu tlun zuang vatepawl bangin ka dirtla hai ding;
Mipi umkhawmnak ih thuphuan mi bangtukin
Anmah cu nun ka sim hai ding.
13 ^mAn hmakhua a pit a si, ziangahtile ka hnen ihsin an tlan!
An parah siatnak a um,
Ziangruangahtile keimah dokalhin an hél!
Anmah tlen zo ding ka si ko nain,
Keimah dokalhin thuphan an per thotho.
14 ⁿAn ihkhun parih an râk rero tikah,
An thinlung thawn ka hnenah an rak ṭap lo.
Thlairawl le sabit zu thar hrangah an táwngkhawmaw ih,
Ka hnen ihsin an tlanhlo;
15 ^oAn bânpawl cu ka zirh ih ka cakter ko nain,
Keimah dokalhin thil ṭha lo khua an khâng thotho.
16 ^pAn kir, Cungnung Bik hnenah cun a si lo;
Anmah cu thál rinum lo vek an si.
An lei ih camsiatnakpawl ruangah
An hotupawl cu ralnâm in an tlu ding.
Himi cu Izip ram ah hnihsan an sinak a si ding.

7:1^a Eze 24:13; Hos 4:2; 5:1; 6:4, 9; 7:13

7:2^b Job 35:15; Jer 2:19; 14:10; Hos 8:13; 9:15

7:3^c Jer 28:1-4; Hos 4:2; Mik 7:3; Rom 1:32

7:4^d Jer 9:2; 23:10

7:5^e Sam 1:1; Isa 28:1, 7

7:6^f Sam 21:9

7:7^g Sam 14:4; Isa 9:13; 64:7; Zef 1:6

7:8^h Sam 106:35; Hos 5:13

7:9ⁱ Isa 1:7; 57:1-11; Hos 4:6

7:10^j Isa 9:13; Hos 5:4-5

7:11^k Jer 2:18; Hos 5:13; 9:3; 11:11; 12:1

7:12^l Pui 26:14-39; Eze 12:13

7:13^m Jer 14:10; Eze 34:4-6; Hos 7:1; 9:17; Mat 23:37

7:14ⁿ Job 35:9-11; Jer 3:10; Hos 4:10; Amo 2:8; Zek 7:5

7:15^o Sam 2:1; 140:2; Nah 1:9, 11

7:16^p Sam 78:9, 57; Eze 23:32; Hos 8:13; 9:3; Mal 3:14

8

1 ^aNa kâ ah tuu pa ki thluah aw!
A doral cu Jehovah inn dokalhin muvanlai bangin a ra ding,
Ziangruangahtile annih in ka thukham an rak pahbăl ih,
Ka dān dokalhin an rak hél.
2 ^b“Ka Pathian, kannih Israel in kan lo thei,” tiah ka hnenah a au ding.
3 ^cIsrael in thil ṭha a rak hnáwng;
Amah cu doral in a dawi ding.
4 ^dAnnih in siangpahrangpawl an tungding, asinan keimah in si loin;
Hotupawl tla an ruat, asinan ka theihpi mi an si lo.
Sahcat an sinak dingah
Anmah hrangah an sui le ngun in milempawl tla an tuah.
5 ^eMaw Samaria, na caw pa no cu hnawn a si!
Anmah dokalhin ka thinhengnak a tho.
Ziang tik tiang so thianfaiaw thei loih an um ding?
6 ^fZiangahtile Israel hnen ihsi cun hitin a si:
Kutthiam nei pa in a tuah ih,
Pathian hnen ihsin a si lo.
Asinan cuih Samaria caw no cu khuaidarh a si ding.
7 ^gAnnih in thli an tuh ih,
Phusîng an at.
Thlaikung in vui a nei lo;
Cumi cun rawl a suah dah lo ding.
A suah pang a si khalle,
Khawtluang mipawl in an eirál thluh ding.
8 ^hIsrael cu dawlh a si;
Atu-ah anmah cu zohman ih duh lo mi bungbel bangin
Miphunpawl lakah an um.
9 ⁱZiangahtile mah lawng vâktawi hramlak lāk bangin,
Assiria hnenah an hung so.
Efraim cun duhdawttupawl a hlâng.
10 ^jA si, miphunpawl lakah an hlang ko nân,
Anmah cu ka fĭnkhawm thluh hai ding;
Cule hotupawlih siangpahrang phurrit ruangah
Riahsiat an thawk ding.
11 ^kEfraim in sual hrangah biakṭheng tampi a tuah ruangah,
Cuih biakṭhengpawl cu a hrangah a sual tuahnak hmun ah a cang.
12 ^lKa dān sungah a hrangah thu thawngza tampi ka rak ngan,
Asinan cupawl cu thil lamdangpi ah an ruat men.
13 ^mKa hrangih raithawinak thilhlănpawl thuhla ah cun, sa an thawi ih an ei.
Asinan Jehovah in cupawl cu a cohlang lo.
Anih in an mawhsualnak a cîng ding ih, an sualpawl ruangah anmah cu dān a tat ding.
Izip ram ah an kir leh ding.
14 ⁿZiangahtile Israel in amah Sersiamtu a rak hngilh ih,
Siangpahrang innpawl a sak;
Judah khal in kulh hnget nei khawpipawl a karhzaiter;
Asinan a khawpipawl parah meisa ka thlah ding ih,
Meisa cun a siangpahrang innpawl cu a kāng ding.

8:1^a Mip 10:2; Dnp 28:49; Jer 4:13; 11:10; Eze 33:3

8:2^b Sam 78:34; Tit 1:16

8:3^c Mat 7:23

8:4^d 2Sp 15:13, 17, 23, 25; Hos 13:1-2, 10

8:5^e Jer 13:27; Hos 10:5

8:6^f Suah 32:4; Isa 40:19; Jer 16:20; Hos 14:3

8:7^g Thf 22:8; Hos 9:16; 10:12-13; Nah 1:3; Gal 6:8

8:8^h 2Sp 17:6; Jer 22:28; 25:34; 51:34

8:9ⁱ Sem 16:12; Jer 2:18, 24; 22:20; Eze 16:33-34; 23:5

8:10^j Jer 42:2; Eze 16:37; 22:20

8:11^k Hos 10:1

8:12^l Dnp 4:6-8

8:13^m Jer 14:10; Hos 4:9; 7:2; 9:3-4, 6; Amo 8:7

8:14ⁿ Dnp 32:18; Jer 5:17; 17:27; Hos 2:13; Amo 2:5

9

Israel-ih Sual Dāntatnak

1 ^aMaw Israel, miphunpawl aipuan bangin lungawi aipuangin um hlah,
Ziangahtile na Pathian dokalhin na hlawhhlang a si.
Hruih hmun kip ah na hlawhhlannak man ngah na duh.
2 ^bHruih hmun le sabit sawrnak khur cun
Anmah a câwm lo ding ih,
Sabit zu thar in a beidawngter ding.
3 ^cJehovah-ih ram ah an cêng lo ding,
Asinan Efraim cu Izip ram ah a kirsal ding,
Cule Assiria ram ah rawl thiang lo a ei ding.
4 ^dJehovah hnenah sabit zu thilhlănpawl an hlan lo ding ih,
An raithawinakpawl in amah a lunghmuiter lo ding.
An rawl cu lusûn rawl vek a si ding ih,
A eitu zaten an bawrhbang ṭheh ding.
Ziangahtile an rawl cu anmai nunnak hrang lawngah a si ding,
An rawl cu Jehovah inn ah a lut lo ding.
5 ^eKhiah cia mi ni ah le
Jehovah-ih puai ni ah ziang nan tuah ding?
6 ^fZiangahtile zoh hnik, siatnak ruangah annih cu an feh ding.
Asinan Izip ram in a fĭnkhawm hai ding ih,
Memfis khua in a phum hai ding.
An hlawnthil ngunpawl cu hrampi in a khuh ding;
An puanthlampawl ah hling an ṭo ding.
7 ^gDāntat ni a thleng zo;
Phuba lâk ni a thleng zo.
Israel in cucu a thei!
Profet cu mi-â a si,
Thlarau mi khal a mawlh,
Ziangruangahtile na mawhsualnak a nasa tuk ih, na mi remlonak a nasa tuk.
8 ^hProfet cu ka Pathian aiih Efraim ralvengtu a si;
Asinan a zinpawl hmuahhmuah ah vate tháng hlir a khat ih,
A Pathian inn ah remawklonak a um.
9 ⁱGibeah san lai bangin
Hlohlaknak ah thûk zet an pil.
Anih in an mawhsualnak cu a cîng ringring ding;
An sualpawl ruangah anmah dān a tat ding.
10 ^jIsrael cu ramṭhing ih sabit rah vekin ka hmu;
Nan pupápawl cu theipi kung rah ṭum hmaisabikih rah hmaisabik bangin ka hmu hai.
Asinan Baal Peor an thleng ih, ningzakza ah an peaw;
An duhdawt mi vekin fihnungza ah an cang.
11 ^kEfraim-ih ropitnak cu vate bangin a zamhlo ding.
Fahrin, farai, farai tir ti a um nawn lo ding!
12 ^lAn fāte an kilkhawi ṭhanglian ko nain,
Pakhat hman um lo ko lusûnin ka tuah hai ding.
A si, anmah ka tlansan hai tikah hmakhaw pihnak cu an parah a um ding!
13 ^mEfraim cu hmun nuam ah phunawin, Ṭaiar bangin ka hmu,
Asinan Efraim cun a fātepawl cu laithattu hnenah a hruai ding.
14 ⁿMaw Jehovah, anmah cu ziang simaw pe hai aw.
Ziang na pe ding?
Fasiatnak sūl le
Hnawi car pe hai aw!
15 ^oAn sualralnak hmuahhmuah cu Gilgal ah a si,
Ziangahtile cuih hmun ah anmah cu ka rak hua hai.
An thil ti mi a ṭhat lo ruangah
Anmah cu ka inn ihsin ka dawisuak hai ding;
Ka duhdawt hai nawn lo ding.
An hotupawl hmuahhmuah tla mihél an si.
16 ^pEfraim cu vuakin a um,
An hram a ro;
Rah an rah lo ding.
A si, fa an hrin a si khalle an sūl fa duat pawl cu ka that ding.
17 ^qA thu an lun lo ruangah,
Ka Pathian in annih cu a hlăwnhlo hai ding.
Cule annih cu miphunpawl lakah an vâkvai ding.

9:1^a Isa 22:12; 24:16; Hos 7:14; 10:5

9:2^b Isa 24:7; Hos 2:9; Joe 1:10

9:3^c Pui 25:23; Jer 2:7; Eze 4:13; Hos 7:11, 16; Amo 7:17

9:4^d Jer 6:20; 16:7; Hos 8:13; Joe 1:9, 13; Hag 2:13-14

9:5^e Isa 10:3; Jer 5:31; Hos 2:11; Joe 1:13

9:6^f Isa 5:6; 7:23; Hos 7:11; 10:8; Zef 1:11

9:7^g Isa 34:8; 44:25; Jer 10:15; 29:26; Eze 13:3, 10; Mik 7:4; Luk 21:22

9:8^h Eze 3:17; 22:26; 33:7; Hos 5:1

9:9ⁱ Lai 19:16-30; Isa 31:6; Hos 7:2; 8:13; Zef 3:7

9:10^j Mip 25:1-5; Sam 106:28-29; Sol 2:13; Isa 28:4; Mik 7:1

9:11^k Isa 17:3; Hos 4:7

9:12^l Dnp 31:17; Eze 24:21

9:13^m Sam 78:67; Ṭah 2:22; Eze 26:1-21

9:14ⁿ Hos 9:11; Luk 23:29

9:15^o Isa 1:23; Hos 4:9, 15; 5:2; 7:2; 12:11

9:16^p Job 15:32; Eze 24:21; Hos 5:11; 8:7

9:17^q Dnp 28:65; Jer 6:30; Hos 4:10; 7:13; Zek 10:6

10

Israel-ih Sál Tānnak

1 ^aIsrael cu sabit hri nîm ciaiciai a si.
Amai hrangah rah a suah.
A rah a tamdān ihzirin,
Biakṭhengpawl tla a karhter.
A leiram a ṭhatdān ihzirin, a ṭhuamserhpawl tla a ceimawi.
2 ^bAn thinlung a phir;
Anmai mawh an phur ding.
Anih in an biakṭhengpawl a ṭhiatbăl ding;
An ṭhuamserhpawl a tisiat ding.
3 Annih in, “Siangpahrang kan nei lo,
Ziangahtile Jehovah kan ṭihzah lo.
Siangpahrang lawngte cu, anih in teh ziang in tuahsak ding?” tiah an ti ding.
4 ^cThu an rel menmen,
Sesămawknak santlailo in remawknak an tuah.
Asinan taza cuaiawknak cu lóbua lakih tûr nei hrampi bangin a kho.
5 ^dBeth Aven ih caw no ruangah
Samaria luahtupawl cun an ṭih ding.
Caw no le a ropitnak tlunih aipuang ṭheu milaipawl in cuih caw no cu an ṭah ding,
Ziangruangahtile ropitnak in cuih caw no cu a tlansan.
6 ^eSiangpahrang Jareb ngunkhuai hrangih pek dingah
Caw pa no cu Assiria ram ih thiar a si ding.
Efraim cu ningzahnak in a kaibĕt ding ih,
Israel in amai thurawn peknak a zahpi ding.
7 ^fSamaria cu a siangpahrang thawn tisiat a si ding,
Tidai parih funghreu vekin.
8 ^gCuihtlunah Aven hmun sâng pawl, Israel sual tuahnak hmun cu,
Tisiat an si ding.
An biakṭhengpawl parah hling le hram an ṭo ding.
Tlangpawl hnenah, “In khuh uh,” tiin le
Tlangmûalpawl hnenah, “In nĕn uh,” tiah an ti ding.
9 ^hMaw Israel, Gibeah san lai ihsin na rak sual zo;
Cu tawkah annih cun an peh vivo.
Midik lo pawl dokalhih ral doawknak in anmah cu Gibeah ah a man hai lo ding maw?
10 ⁱKa duh tikah nun ka sim hai ding.
Mawhsualnak thuahaw ruangih anmah ka ṭawn hai tikah
Miphunpawl cu fĭnkhawm an si ding.
11 ^jEfraim cu fang cīl duh sawizăwi cia caw la vek a si.
Asinan a hngawng mawi parah kol ka bun ding.
Efraim cu leilehnak ka dirter ding,
Judah in hâl a sun ding;
Jakob in lei a let ding.
12 ^kNanmah hrangah dingfelnak tuh uh.
Lainat duhdawtnak at uh;
Lei nan lehlonak leilung kha let uh,
Ziangahtile atu hi Jehovah hawl cān a si,
A rat hlan le nan parih dingfelnak ruah a surter hlanah.
13 ^lSualralnak lei nan let;
Mawhsualnak nan at.
Thuphan pernak rah nan rak ei,
Ziangruangahtile nangmai khawkhannak le na raldo thiam mi tampi na rak rinsan.
14 ^mCuruangah na mipi lakah authâwm a um ding ih,
Na kulh hnget zaten
Ral do ni ih Shalman in Beth Arbel a băl vek le
Nupinupawl le an fātepawl parh ṭheh ko a tuah vekin băl a si ding.
15 Na sualralnak a natsat tuk ruangah,
Maw Bethel, cu vekin na parah tuah a si ding.
Khawfingcah zawngah Israel siangpahrang cu thah a si ding.

10:1^a 1Sp 14:23; Isa 5:1-7; Eze 15:2; Hos 13:15; Nah 2:2

10:2^b 1Sp 18:21; Hos 10:8; 13:16; Mik 5:13

10:4^c Sam 12:4; Eze 17:19; Amo 5:7

10:5^d Suah 32:4; 2Sp 23:5; Hos 5:8; 8:5-6; Zef 1:4

10:6^e 2Sp 16:7; Isa 30:3; Jer 7:24; 48:13; Hos 4:7; 5:13; 11:5

10:7^f Hos 13:11

10:8^g 1Sp 12:28-30; Isa 32:13; Hos 9:6; Amo 3:14-15; Luk 23:30; Thu 6:16

10:9^h Hos 9:9

10:10ⁱ Eze 5:13; Hos 4:9

10:11^j Dnp 28:48; Jer 15:12; 28:14

10:12^k Thf 11:18; Ths 11:1; Isa 45:8; Hos 6:3; 12:6; Jam 3:18

10:13^l Job 4:8; Sam 33:16; Thf 11:18; 22:8; Hos 4:2; 7:3; 8:7; Gal 6:7-8

10:14^m 2Sp 17:3, 6; 18:9; Isa 13:16; 17:3; Hos 13:16

11

Israel cu Pathian Fāte a Si

1 ^aNauhak a si laiah, Israel cu ka rak duhdawt,
Cule Izip ihsin ka fapa ka kosuak.
2 ^bAnmah ^can kawh tam pauh le,
An hnen ihsin an feh hla deuhdeuh;
Baalpawl hnenah rai an thawi ih,
Milimpawl hnenah rimhmui an ur.
3 ^dEfraim cu a bān ih kaiin fehdān ka zirh;
Asinan anmah ka tidam ti an rak thei lo.
4 ^eHri nemten ka dir hai,
Duhdawtnak hri in,
Cule keimah cu an hngawng ihta hngawngkol lâkthlaksaktu vekah ka cang.
Ka kûn ih anmah ka câwm hai.
5 ^fAnih cu Izip ram ah a kirsal lo ding;
Asinan sual sir an duh lo ruangah,
Assiria-mi cu an siangpahrang a si ding.
6 ^gCule ralnâm cun a khawpipawl a hrut ding,
An kăwt tlângpawl a sattán ding ih,
A eirál hai ding,
Anmai thurawn pek mipawl ruangah.
7 ^hKa mipawl cu ka hnen ihsin tlanhlo an tum ṭelhṭelh.
Cungnung Bik an ko nain,
Zohman in amah cu an khaisâng cuang lo.
8 ⁱEfraim, ziangtin ka lo dungtun thei ding?
Ziangtin ka lo pesuak thei ding, Israel?
Admah khua bangin ziangtin ka lo tuah thei ding?
Zeboiim khua bangin ziangtin ka lo tuah thei ding?
Ka sungah ka thinlung lingletin a um;
Ka zawnruahnak cu cawkphur a si.
9 ^jKa thinhengnak nasa zet cu ka ṭuansuak lo ding;
Efraim ka tisiatsal lo ding.
Ziangahtile kei cu minung ka si lo ih, Pathian ka si,
Nan lakih Mi Thianghlim ka si;
Cule thinlingnak thawn ka ra lo ding.
10 ^kAnnih cun Jehovah dung an thlun ding.
Anih cu kiosa bangin a hûk ding.
A hûk tikah a fātepawl cu nitlaknak ihsin khūr phah reroin an ra ding;
11 ^lVate bangin Izip ihsin khūr phah reroin an ra ding,
Thuro bangin Assiria ram ihsin.
Cule anmai inn cio ah ka cêngter hai ding, Jehovah in a ti.
12 ^mEfraim cun thuphan in i kulh ih,
Israel sungza cun bumnak in;
Asinan Judah cu Pathian thawn an fehtlang thotho,
Mirinum Mi Thianghlim thawn.

11:1^a Suah 4:22; Hos 12:9, 13; Mat 2:15

11:2^b Lai 10:6; 2Sp 17:15; Jer 18:15; Hos 2:13; 4:13; 13:1-2

11:2^c an: Profetpawl an si men thei.

11:3^d Suah 15:26; Dnp 1:31; 32:11; Sam 107:20; Jer 30:17; Hos 7:15

11:4^e Suah 16:32; Pui 26:13; Sam 78:25; Jer 31:2-3

11:5^f Hos 7:16; 10:6

11:6^g Sam 80:11-16; Isa 9:14; Ṭah 2:9; Hos 13:16

11:7^h Jer 3:6-7; 8:5; Hos 4:16

11:8ⁱ Sem 14:8; Dnp 29:23; Ṭah 3:32; Eze 33:11; Hos 6:4

11:9^j Mip 23:19; Dnp 13:17; 2Sp 19:22; Isa 5:24; 12:6; 31:1; Ṭah 3:22; Mal 3:6

11:10^k Isa 31:4; 42:13; 66:2, 5; Hos 3:5; Joe 3:16

11:11^l Isa 11:11; Eze 28:26; 34:27-28; Zek 10:10

11:12^m Dnp 7:9; Hos 4:2; 7:3

12

1 ^aEfraim cu thli in a câwmaw ih,
Nisuahnak thli a dawi;
Ni tin thuphan le nunrawnnak a karhter.
Cuihtlunah Assiria-mipawl thawn thukham khal an tuah ih,
Hriak cu Izip ah laksawng hrangah phurh a si.
2 ^bJudah dokalhin Jehovah in mawhthluknak a keng ih,
A zawh mi zin zulhin Jakob dān a tat ding;
A thil ti mipawl zulhin a lehrūl ding.
3 ^cSūl sungah a unaupaih kedil a kai ih,
A pitlin tikah Pathian thawn an buanaw.
4 ^dA si, vancungmi thawn an buanaw ih a neh;
A ṭap ih, a hnen ihsin duhsaknak a hawl.
Amah cu Bethel ah a táwngngah ih,
Cu tawkah Pathian cun kan hnenah thu a sim,
5 ^eRalkap rualpawlih Pathian Jehovah rori in.
Jehovah ti cu amah cīn ringring nak hmin a si.
6 ^f“Curuangah nang cu, na Pathian băwmnak thawngin ra kirsal aw;
Lainat duhdawtnak le diknak nunpi awla,
Na Pathian hngak ringring aw.”
7 ^gA kut ih bumnak cuai thlainak kengtu ^hKanaan-mi palbĕt cu a duh zawng a si.
8 ⁱCule Efraim in, “Thungaiten milian ah ka cangngah riai,
Keimah hrangah neihnunnak ka hmungah zo;
Ka ṭuanbăngnak hmuahhmuah ah
Sual a si mi mawhsualnak zianghman an hmu lo ding,” tiah a ti.
9 ^jAsinan Izip ram ihsi thawkin
Keimah cu Jehovah na Pathian ka rak si;
Na tuah ṭheu mi puai nipawl bangin,
Puanthlam sungah ka lo cêngter leh ding.
10 ^kProfetpawl hmangin thu ka sim ih,
Larnakpawl ka pungter;
Profetpawl hmangin tahṭhimnak thupawl tla ka rak pe.
11 ^lGilead ah mawhsualnak a um asile, cupawl cu zianghmanlo ah an cang tengteng ding.
Gilgal ah caw pa pawl in rai an thawi,
A si, an biakṭhengpawl cu ló sungih leileh kuar kapih lung pen vek an si.
12 ^mJakob cu Siria ram ah a tlân;
Israel cun nupi hrangah a ṭuan ih,
Nupi hrangah tuu a khāl.
13 ⁿProfet hmangin Jehovah in Israel cu Izip ihsin a hruaisuak ih,
Profet hmangin anih cu kilhim a si.
14 Efraim in nasa zetih thinheng ko amah cu a tuah;
Curuangah a Bawipa in a thisen suah mawh a parah a tân ding,
Cule a hminsiatnak cu a Bawipa in a parah a lehrūlsal ding.

12:1^a 2Sp 17:4; Sam 78:67; Jer 22:22; Eze 17:10; Hos 5:13

12:2^b Suah 32:34; Hos 4:1; 7:2; Amo 2:4; Mik 6:2

12:3^c Sem 25:26; 32:24-29

12:4^d Sem 28:12-19; 35:10-15

12:5^e Suah 3:15

12:6^f Jer 22:3; Eze 18:30; Hos 6:1-3; Joe 2:12; Mik 7:7

12:7^g Pui 19:36; Thf 11:1; Amo 8:5; Mik 6:11

12:7^h Kanaan-mi: Kanaan-mi hi sumdâwng hnám an si ruangah mi hrekkhat in sumdâwng mi, tiin an let.

12:8ⁱ Sam 62:10; Eze 28:5; Hos 13:6; Thu 3:17

12:9^j Pui 23:43; Neh 8:17

12:10^k 2Sp 17:13; Isa 20:2-5; Jer 7:25; Eze 17:2; 20:49

12:11^l Hos 6:8; 9:15; 10:1-2

12:12^m Sem 28:5; 29:20, 28

12:13ⁿ Suah 13:3; 14:19-22; Isa 63:11-14

13

Pathian Ngilneihnak le Thuṭhennak

1 ^aEfraim a ṭawng tikah khurhnak a um,
Israel ram ah a khaisângaw;
Asinan Baal ruangih mawhsualnak a neih tikah, anih cu a thi.
2 ^bAnnih cu an sual deuhdeuh ih,
Anmai hrangah burcawp milimpawl tla an tuah,
Thiam zetin ngun in milempawl an tuah.
Cupawl hmuahhmuah cu zungthiampawlih kutsuak an si.
“Raithawitupawl in caw pa no pawl hnam hai seh,” tiin, hipawl thuhla ah an ti ṭheu.
3 ^cCuruangah annih cu zingpit sumzing le
Zing daifim zupral men vek,
Hruih hmun ih fāng hi pet vek le
Meikhu suahnak ihsi meikhu vek an si ding.
4 ^dKeimah cu Izip ram ihsi thawkin Jehovah na Pathian ka si ih,
Keimah siarlo Pathian dang na thei ding a si lo;
Ziangahtile keimah siarlo Rundamtu an um lo.
5 ^eLeicar maksak, ramṭhing ah ka rak lo kilkhawi.
6 ^fTlimno an neih tikah an tlai;
An tlai ih, an thinlung a hngal;
Curuangah kei in rak hngilh.
7 ^gCun keimah cu an parah kiosa vek ka si ding;
Tlavang bangin zin kapin anmah ka bawhthup ding;
8 ^hA fa no lâksak mi savâwm bangin, anmah ka bei hai ding;
An ṭâng ka băwtthlek ding,
Cule cu tawkah kiosa pinu bangin ka eirál hai ding.
Ramlak sahrangpawl in anmah cu an băwtthlek ding.
9 ⁱMaw Israel, nangmah bawmtu in do hi na siatnak a si.
10 ^jNa khawpipawl hmuahhmuah ih lo runtu ding na siangpahrang cu khuiah so?
“Siangpahrang le uktupawl in pe aw,” tiih an thu na rel mi thuṭhentupawl teh khuiah so?
11 ^kKa thinhengin siangpahrang ka rak lo pe ih,
Ka thinlingin ka lo lâksaksal.
12 ^lEfraim-ih mawhsualnak cu ṭāwnkhâwm a si;
A sual cu a pengaw.
13 ^mNunau fahrin nat a parah a thleng ding.
Anih cu fapa fim lo a si,
Nau suah cān ah anih cu muangcâng ding a si si lo.
14 ⁿSheol thiltitheinak ihta annih cu ka tlen hai ding.
Thihnak ihsin ka tlen hai ding.
Maw Thihnak, na nathri sia cu khuiah so!
Maw Sheol, na mi hĕnnak cu khuiah so!
Zangfahnak cu ka mithmuhnak ihsin thuh a si ding.
15 ^oAnih cu a unaupawl lakah ṭhangso hman sehla,
Nisuahnak lam thlipi a ra ding ih,
Ramṭhing ihsin Jehovah-ih thlipi a ra ding,
Cule a cirhti a kāng ding ih,
A tihna a car ding.
Anih in hlawnthil khawlnak ihsin thil mankhung hmuahhmuah a răm ding.
16 ^pSamaria cu mawh neihter a si ding,
Ziangahtile a Pathian dokalhin a hél a si.
Ralnâm in an tlu ding,
An fahniangpawl cu leilung ah parh thluh ko hlăwn an si ding ih,
An nunau farai pawl cu raipăwp an si ding.

13:1^a Hos 8:6; 11:2

13:2^b 1Sp 19:18; Isa 44:17-20; Jer 10:4; Hos 2:8; 8:5-6

13:3^c Sam 1:4; Isa 17:13; Dan 2:35; Hos 6:4

13:4^d Suah 20:3; Isa 43:11; 45:21-22

13:5^e Dnp 1:19; 2:7; 8:15; 32:10

13:6^f Dnp 8:12-14; 32:18; Thf 30:7-9; Hos 2:13

13:7^g Job 10:16; Jer 4:7; Ṭah 3:10

13:8^h Sam 50:22; Ṭah 3:10; Hos 2:12

13:9ⁱ Dnp 33:29; Jer 2:17-19

13:10^j Dnp 32:38; 1Sam 8:5-6; 2Sp 17:4; Hos 7:7; 8:4

13:11^k 1Sam 8:7; 10:17-24; 13:14; 15:26; 1Sp 14:10; Hos 3:4

13:12^l Dnp 32:34; Rom 2:5

13:13^m Isa 13:8; 37:3; 66:9; Mik 4:9-10

13:14ⁿ Sam 16:10; Isa 25:8; Eze 37:12-13; 1Ko 15:55

13:15^o Jer 4:11-12; 20:5; 51:36; Eze 19:12; Hos 4:19; 10:1; 12:1

13:16^p 2Sp 8:12; 15:16; Isa 13:16; Hos 10:14; Amo 1:13

14

Kir Dingih Kawhnak

1 ^aMaw Israel, Jehovah na Pathian hnenah kir aw,
Ziangahtile na mawhsualnak ruangah na rak bah;
2 ^bThurel ding mi timlam awla,
Jehovah hnenah kir aw.
A hnenah, “Kan hmur ^craithawinak kan lo hlăn thei nak dingah,
Mawhsualnak zaten lahlo awla,
Ngilnei zetin in cohlang aw.
3 ^dAssiria cun in runsuak lo ding,
Rangpawl parah kan to lo ding,
Kan kutsuak hnen khalah, ‘Kan pathian,’ tiah kan ti nawn lo ding.
Ziangahtile pa nei lo pawl in na hnenah zahngainak an hmu,” tiah ti uh.
4 ^eAn dungtawlhnak ka tidam ding,
A lakin ka duhdawt hai ding,
Ziangahtile ka thinhengnak cu an hnen ihsin a pialhlo zo.
5 ^fIsrael hnenah daifim vek ka si ding;
Anih cu lily par bangin a mûm ding ih,
Lebanon thingkung bangin a hram a thla ding.
6 ^gA hngepawl an ṭhang ding;
A mawinak cu olif thingkung vek a si ding,
Cule a rimhmuizia cu Lebanon thingkung vek a si ding.
7 ^hAn kirsal ding ih, amai thlahlim ah an cêng ding;
Thlai bangin an ṭhang ding ih,
Sabit hri bangin an nîm ciaiciai ding.
An hminthannak cu Lebanon sabit zu vek a si ding.
8 ⁱMaw Efraim, milempawl thawn ziang pehtlaihawknak so ka neih nawn ding?
Keimah cu amah sawntu le kilhimtu ka si.
Keimah cu a nîm ciaiciai mi mirang far thing vek ka si;
Na rah cu keimah ah hmuh a si, tiin ti aw.
9 ^jZo so mifim?
Anih cun hi thilpawl hi theithiam seh.
Zo so khawruat thiam?
Anih cun hi thilpawl hi thei seh.
Ziangahtile Jehovah-ih lamzinpawl cu an dik;
Midingfelpawl in cuih zinpawl cu an zawh,
Asinan mihélpawl cu cuih zinpawl ah an bah.

14:1^a Isa 19:22; Jer 3:12; Joe 2:13

14:2^b Suah 34:9; Sam 51:16-17; Mik 7:18-19; Heb 13:15

14:2^c raithawinak: A ṭawng hrampi ah, “caw pa tûai pawl” tinak a si.

14:3^d Sam 33:17; 68:5; Isa 31:1; Hos 5:13; 7:11; Mik 5:10

14:4^e Isa 30:26; 55:1; 57:18; Jer 31:20; Zef 3:17

14:5^f Sem 27:28; Thf 19:12; Sol 2:1; Isa 35:2

14:6^g Sem 27:27; Sam 52:8; 92:12; Jer 11:16

14:7^h Sam 91:1-4; Eze 17:23

14:8ⁱ Isa 41:19; Eze 17:23; Hos 14:3

14:9^j Thf 4:18; 10:29; Isa 26:7; Zef 3:5; Apo 13:10; Rom 9:32