About Bible Thianghlim | ©

BibleThianghlim – Mathai

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Mathai

12345678910
11121314151617181920
2122232425262728

• A ngantu: Mathai
• A siartu: Jew-pawl
• Ngan kum: A.D. 50

Thukham Hlun sungah Messiah ratnak ding thu simsungnak tampi a um. Pathian in Thukham Hlun kamsuakthupawl a pek netabik hnu, kum 400 hrawngah leitlun ah a Fapa a run thlah. Thuthangṭha pali pawl in Jesu-ih nun lam tluan, a thihnak le a thawhsalnak thuthangṭha an rel ṭheh. Jesu Khrih thuhla Thukham Hlun ih simsungnakpawl cu Jesu Khrih-ih nun lam tluan le hnaṭuan ah a famkim ti langter dingin Mathai in a thuthangṭha hi A.D. 50 ah a ngan. Hi cabu hi Jesu cu Messiah a si ti a hleicein Jew-pawl hmĭn dingih a ngan mi a si.

Mathai cu Levi ti khalih theih a si. Amah cu Bawipa in a nun a danglamter hlan le apostol si dingih amah kawh a si hlanah cun siah khawngtu a rak si (Mar 2:14). Cu laiah cun Rom-mipawl in Jew-pawl an rak uk, curuangah Jew-pawl in anmah cu ral vekin an hmu. Siah khawngtupawl cun an ralpawl hrangah sum an khawnsak ṭheu, asinan a hrekkhat cu anmai hrangah an ret thup ṭheu. Himi hna sualrál lak ihsin Bawipa in Mathai a rak kosuak ih, Bawipa in Mathai a danglamter hnuah hi thuthangṭha ngantu ah a hmang.

Himi cabu-ih câng hmaisabik in a cabu-ih thuken a tarlang. Jesu cu Messiah a si. Bung 1-nak sungih a um mi cithlah sâwngawkdān ih kan hmuh vekin, amah cu Abraham-ih Fapa a si; cule David-ih Fapa khal a si. A cabu tluansuakin Mathai in David le lalram thu hmun tampi ah a ngan. Jesu cu Thukham Hlun simsungnakpawl thlengkimtertu Siangpahrang a si. Amah cu Israel-mipawlih Messiah a si. Miphun zate ih Messiah khal a si. Hi cabu cemnakah miphun zate dungthluntu ih tuah ding Jesu-ih thupek kan hmu.

Mathai in a casiartupawl hrangah a thucah fiangfaiter dingin fimkhur zetin hi cabu hi a rĕmkhawm. Jesu-ih nun lam tluan le a rawngbawlnak thu ṭhen thum in a ṭhen. Mathai in a thu hlawm pakhat ciar sungah thupi dangdang a ngan. Thuanthu le zirhnak cu thlĕngaw vivoin a um. A zirhnak lakih langsarbik mi cu Tlang par Thusim hi a si (bung 5-7).

Jesu cu miphun zate ih Siangpahrang le Messiah a si. Amah zum ih, a dung thlun ding kan si.

1

Jesu Khrih Thlahtupawl

1 ^aHimi hi Abraham-ih Fapa, David-ih Fapa, Jesu Khrih-ih cithlah sâwngawkdān cazual a si.

1:1^a Isa 9:6-7; Jer 23:5-6; Luk 1:32, 69; Gal 3:16; Thu 22:16

2 ^aAbraham cu Isak-ih pa a si, Isak cu Jakob-ih pa a si, Jakob cu Judah le a unaupawlih pa a si. 3 ^bJudah cu Perez le Zerah-ih pa a si, an nu cu Tamar a si. Perez cu Hezron-ih pa a si ih, Hezron cu Ram-ih pa a si. 4 Ram cu Amminadab-ih pa a si, Amminadab cu Nahshon-ih pa a si ih, Nahshon cu Salmon-ih pa a si. 5 ^cSalmon cu Boaz-ih pa a si, Boaz-ih nu cu Rahab a si. Boaz cu Obed-ih pa a si, Obed-ih nu cu Ruth a si, Obed cu Jessi-ih pa a si.

1:2^a Sem 21:3, 12; 25:26; 29:35

1:3^b Sem 38:27-30

1:5^c Heb 11:31

6 ^aJessi cu Siangpahrang David-ih pa a si. Siangpahrang David cu Solomon-ih pa a si ih, Solomon-ih nu cu Uriah-ih nupi a rak si dah. 7 Solomon cu Rehoboam-ih pa a si, Rehoboam cu Abijah-ih pa a si ih, Abijah cu Asa-ih pa a si. 8 Asa cu Jehoshafat-ih pa a si, Jehoshafat cu ^bJoram-ih pa a si ih, Joram cu Uzziah-ih pa a si. 9 Uzziah cu Jotham-ih pa a si, Jotham cu Ahaz-ih pa a si ih, Ahaz cu Hezekiah-ih pa a si. 10 ^cHezekiah cu Manasseh-ih pa a si, Manasseh cu Amon-ih pa a si ih, Amon cu Josiah-ih pa a si. 11 ^dBabilon-mipawl in Jew-pawl Babilon ih an hruai lai hrawngah Josiah cu ^eJekoniah le a unaupawlih pa a si.

1:6^a 1Sam 16:1; 2Sam 12:24

1:8^b Joram: “Jehoram” ti khalih kawh a si.

1:10^c 2Sp 20:21

1:11^d 2Sp 24:14-16; Jer 27:20; Dan 1:1

1:11^e Jekoniah: 2Sp 24:15 ih “Jehoiakin” thawn a bangaw.

12 ^aCule Babilon ih hruai an si hnuah, Jekoniah cu Shealtiel-ih pa a si, Shealtiel cu Zerubbabel-ih pa a si. 13 Zerubbabel cu Abiud-ih pa a si, Abiud cu Eliakim-ih pa a si ih, Eliakim cu Azor-ih pa a si. 14 Azor cu Zadok-ih pa a si, Zadok cu Akim-ih pa a si ih, Akim cu Eliud-ih pa a si. 15 Eliud cu Eleazar-ih pa a si, Eleazar cu Mathan-ih pa a si ih, Mathan cu Jakob-ih pa a si. 16 ^bCule Jakob cu Joseph-ih pa a si, Joseph cu Khrih an ti mi Jesu hringtu Mary-ih pasal a si.

1:12^a Ezr 3:2

1:16^b Mat 27:17; Luk 1:27

17 Cutin san hmuahhmuah cu Abraham ihsin David tiang san hleili, David ihsin Babilon sál ih an tān tiang san hleili, Babilon sál ih an tān ihsin Khrih tiang san hleili a si.

Mary in Jesu a Hring

18 ^aJesu Khrih suahnak cu hitin a si: a nu Mary cu Joseph thawn an hamaw, an umtlang hlanah Mary cu Thlarau Thianghlim in fa a vunter ti hmuh a si. 19 ^bCun a pasal Joseph cu mifel a si ih, mipi theihih Mary mualphoter a duh lo ruangah a thupten Mary cu tansăn a tum.

1:18^a Luk 1:35

1:19^b Dnp 24:1

20 ^aNgai hnik, cuih thilpawl a ruah rero laiah a mang ah Bawipaih vancungmi cu a hnenah a lang ih, “David-ih fapa Joseph, na nupi ih Mary ṭhit ding ṭih hlah, ziangahtile a vun mi cu Thlarau Thianghlim hnen ihsin a si. 21 ^bAnih in Fapa a hring ding, cule JESU tiah hmin na sak pei. Ziangahtile anih in a mipawl kha an sualpawl ihsin a rundam hai ding a si,” tiah a ti.

1:20^a Mat 27:19; Apo 5:19

1:21^b Sam 130:8; Luk 1:31; 2:11; Joh 3:17; Apo 5:31; Rom 11:14; Tit 2:14

22 ^aCule profet hmangin Bawipa ih a rak sim mi a thlenkim thei nak dingah hi hmuahhmuah hi tuah an si. 23 ^bProfet cun, “Ngai hnik, fala him in fa a vun ding ih, fapa a hring ding. A hmin ah Immanuel, tiah an ko ding,” tiah a ti. Immanuel tiih a tican cu, “Pathian kan hnenah a um,” tinak a si.

1:22^a Mat 2:15; Luk 4:21; Joh 13:18

1:23^b Isa 7:14; 8:8, 10

24 ^aJoseph cu a ihthahnak ihsin a hung ṭhang tikah, Bawipaih vancungmi in thu a pek vekin a tuah ih, Mary cu a nupi ah a ṭhi. 25 ^bCule a fapa hmaisabik a hrin hlanlo Joseph in Mary cu a ihpi lo. Cule Joseph in a fapa cu JESU tiah hmin a sak.

1:24^a Apo 5:19

1:25^b Luk 1:31

2

Mifimpawl

1 ^aSiangpahrang Herod san laiah Judia peng, Bethlehem ah Jesu a suak. Ngai hnik, mifimpawl cu nisuahnak lam ihsin Jerusalem ah an ra thleng. 2 ^bAnnih in, “Jew-pawlih Siangpahrang a suak mi cu khuiah a um? Ziangahtile nisuahnak lamah a arsi kan hmu ih, amah be dingah kan ra a si,” tiah an ti.

2:1^a Luk 1:5; 2:4-7

2:2^b Jer 23:5; Mar 15:2; Luk 23:38; Joh 1:49

3 Siangpahrang Herod in cuih thu a theih tikah, amah le Jerusalem ih um mi hmuahhmuah cu an thinlung a buai. 4 Cule Herod in puithiam sâng pawl le mipi Dān zirhtupawl zaten a kokhawm hai ih, Khrih suahnak ding hmun a suthliah hai.

5 ^aCule annih in a hnenah, “Judia peng Bethlehem khua ah a si ding, ziangahtile cumi cu profet in,

2:5^a Joh 7:42

6 ^a‘Judia ram ih um nang Bethlehem,
Judia uktupawl lakah a tenaubik na si hrimhrim lo;
Ziangahtile na sung ihsin ka mi Israel kilkhawitu ding,
Uktu a suak ding,’

2:6^a 2Sam 5:2; Mik 5:2

tiin a ngan,” tiah an ti.

7 Cun Herod in mifimpawl cu a thupten a ko hai ih, ngunngaih zetin arsi lăng tikcu cu a suthliah hai. 8 Cule Bethlehem ah a thlah hai ih an hnenah, “Va feh uhla, ngunngaih zetin naute thuhla cu va zingzawi uh. Nan hmuh hnuah in rak simsal uhla, kei khal amah be dingah ka feh ve ding,” tiah a ti hai.

9 Siangpahrang ih thusim mi an theih tikah an păwksuak, ngai hnik, nisuahnak lamih arsi an rak hmuh mi kha naute umnak hmun zawnih a dīn hlanlo an hmaiah a feh. 10 Cuih arsi an hmuh tikah, aipuannak nasa zet thawn an ai a puang. 11 ^aCule inn sungih an luh tikah, naute cu a nu Mary thawn an vung hmu, cule an băwkkhup ih, amah cu an bia. An hlawnthilpawl an phawrh ih, a hnenah an thilpek ken mi sui, frankinsense rimhmui le mura tla an pe. 12 ^bHerod hnenih kirsal lo dingin Pathian in an mang ih a sim hai ruangah anmai ram ah lamzin dang in an tlung.

2:11^a Sam 72:10; Isa 60:3

2:12^b Heb 11:7

Izip Ram ih Tlannak

13 ^aCule cuih mifimpawl an fehsuak hnuah, ngai hnik, Bawipaih vancungmi cu Joseph hnenah a mang ah a rung lang ih, “Tho aw, naute le a nu cu hruaiin, Izip ram ah tlanpi hai awla, thu ka lo simsal hlanlo cu tawkah vung um ringring aw; ziangahtile Herod in naute that dingin a hawl ding a si,” tiah a ti.

2:13^a Apo 5:19; Thu 12:4

14 Joseph cu a tho ih, naute le a nu cu a hruai hai, cule a zanzanin Izip ram ah an tlân. 15 ^a“Izip ihsin ka fapa ka kosuak,” tiih Bawipa in profet hmangih a rak sim mi a thlenkim thei nak dingah Herod a thih hlanlo cu tawkah an va um.

2:15^a Suah 4:22-23; Hos 11:1

Nauhakpawl Thahnak

16 Cun Herod in mifimpawl in in bum ti a theih tikah, a thin a heng tuk lawmmam. Cule anih in mi a thlah ih, mifimpawl hnen ihsin ngunngaih zetih a suhhliah mi cān thawn dengawin, Bethlehem le a khaw kiangkapih kum hnih le a hnuai lam mipa nauhak zaten a that thluh. 17 ^aCun profet Jeremiah ih a rak sim mi cu a kim a si.

2:17^a Mat 1:22

18 ^a“Ramah khua ah aw theih a si,
Mithi ṭah le ṭahnak le riahsiat ṭah aw a si.
Rachel in a falepawl a ṭah.
A fale an um nawn lo ruangah hnĕm theih khal a si lo,”

2:18^a Sem 35:19; Jer 31:15

tiah profet in a ngan.

Nazareth ah Jesu a Kir

19 ^aHerod a thih tikah, ngai hnik, Bawipaih vancungmi cu Izip ram ah Joseph hnenah a mang ah a rung lang ih, 20 ^b“Tho aw, naute le a nu kha hruai awla, Israel ram ah feh aw, ziangahtile naute that dingih hawltupawl an thi zo,” tiah a ti.

2:19^a Apo 5:19

2:20^b Suah 4:19

21 Cun Joseph cu a tho, naute le a nu cu a hruai ih, Israel ram ah a feh. 22 ^aAsinan Arkelaus in a pa Herod aiawhin Judia a uk ti Joseph in a theih tikah, cu tawk hmun feh cu a ṭih. Pathian in a mang ih a sim hnuah Galili peng ah a feh. 23 ^bCule profetpawl ih an rak sim cia mi, “Amah cu mi in Nazareth-mi tiah an ti ding,” ti mi a kim thei nak dingah Joseph cu Nazareth ah a feh ih cu tawkah a um ta.

2:22^a Luk 2:39

2:23^b Isa 11:1; 13:10; Mar 1:24; Luk 1:26; Joh 1:45

3

Baptisma Petu John in Lamzin a Sial

1 ^aCuih cān ah, baptisma petu John cu a feh ih, Judia peng ramṭhing ah thu a sim. 2 ^b“Lung thlĕng uh, ziangahtile vancung uknak cu a nai zo,” tiah a ti. 3 ^cZiangahtile profet Isaiah in a thuhla a rak sim mi kha amah hi a si.

3:1^a Luk 1:13, 57-66; Apo 19:3-4

3:2^b Dan 7:14; Luk 11:20; Joh 3:3, 5; Apo 1:3, 6

3:3^c Isa 40:3; Mal 3:1; Luk 1:76; Joh 1:23

“Ramṭhing ih mi pakhat auaw cun,
‘Bawipaih lamzin sial uh,
A zintepawl kha dĭngter uh,’ a ti,”

tiah a ti a si.

4 ^aCuih John thotho cu kalauk hmul ih tah mi hnipuan a hruh, a tâi ah savun taikhap a khap; a rawl cu kharbawk le hramlak khuai tizu a si.

3:4^a Pui 11:22; 2Sp 1:8; Mat 3:1

5 Cun Jerusalem khaw sungin siseh, Judia peng zate le Jordan tiva kiangkap peng zate in siseh a hnenah mi an ra, 6 ^aan sualpawl tla an phuang ih, John in Jordan tiva ah baptisma a pe hai.

3:6^a Mar 1:4

7 ^aFarasi mi tampi le Sadusi mi tampi a baptisma co dingih a hnenih an rat kha John in a hmuh tikah an hnenah, “Rulngân cithlahpawl! A ra thleng lai ding mi thinlingnak ihsin tlânsuak dingah zo in so ralrinnak a rak lo pe? 8 ^bCuruangah lungthlĕngnak thawi milaw mi rah suah uh. 9 ^c‘Abraham cu kan pa a si,’ tiin nan thinlung sungin ruat hlah uh. Ziangahtile Pathian cun hi lungtopawl ihsin Abraham hrangah tesinfa a tuah thei a si, tiah nan hnenah ka lo sim. 10 ^dThingkungpawl hramah hreitlung ret a si zo. Curuangah rah ṭha a rah lo mi thingkung kip in hauthluk an si ding ih, meisa sungah paih an si ding.

3:7^a Rom 1:18

3:8^b Apo 26:20

3:9^c Luk 3:8

3:10^d Luk 3:9; Joh 15:2, 6

11 ^a“Lungthlĕngnak ah kei cun ti ah baptisma ka lo pe taktak, asinan ka dungih ra pa hi kei hnakin a nasasawn. Kei cu a kedampawl kengtu ding hmanah ka tlak lo. Anih cun Thlarau Thianghlim ah le meisa ah baptisma a lo pe ding. 12 ^bSangvut thehnak hmanrua a kut ah a um ih, sangvut cīlnak hruih cu a thianfai ṭheh ding. Amai sangvut cu cuam sungah a thun ding. Asinan a hi cu hmih theih lo mi meisa in a urkāng thluh ding,” tiah a ti.

3:11^a Isa 4:4; Mar 1:4, 8

3:12^b Sangvut thehnak hmanrua: Sangvut tifainak hrangih thirkut vekih thing ih tuah mi a si, cumi in sangvut thli ih semfaiternak dingah an theh ṭheu.

John in Jesu Baptisma a Pe

13 ^aCun Jesu cu Galili peng ihsin Jordan tiva ah John-ih baptisma co dingin a feh. 14 Cule John in, “Nangmah ih baptisma pek ka ṭul si khawh, ka hnenah na ra maw?” tiin dăwn a tum.

3:13^a Mar 1:4

15 Asinan Jesu in a sawn ih a hnenah, “Atu-ah rem ti ko aw, ziangahtile dingfelnak hmuahhmuah cu cuti vekih famkimter thluh ding cu kan hrangah a awm a si,” tiah a ti. Cule John in rem a rak ti ve.

16 ^aJohn in Jesu baptisma a pek hnuah, Jesu cu ti sung ihsin a hung suak lohli. Ngai hnik, van khi a hrangah an áwngaw. Cule John in thuro bangin Pathian Thlarau a rung ṭum lai le Jesu parih a rung fut kha a hmu. 17 ^bCule ngai hnik, van ihsin aw pakhat in, “Hihi ka duhdawt zet mi ka Fapa a si, a parah ka lung a hmui zet,” tiah a ti.

3:16^a Isa 11:2; Eze 1:1; Joh 1:51; Apo 7:56; Thu 4:1

3:17^b Dnp 4:12; Sam 2:7; Isa 42:1; Mat 17:5; Mar 1:11; Luk 3:22; Apo 13:33; Heb 1:1-5; 2Pe 1:17

4

Setan in Jesu Sual a Fawrh

1 ^aJesu cu Diabol ih sualfawrh dingah Thlarau in ramṭhing ah a hruai. 2 ^bNi 40 le zan 40 rawl a ulh hnuah, Jesu cu a ril a râwng. 3 ^cCule a hnenah sualfawrhtu cu a ra ih, “Nangmah cu Pathian Fapa na si le, hi lungtopawl hi sang ih cang dingin thu pe aw,” tiah a ti.

4:1^a Sem 3:1-7; Heb 4:15

4:2^b Suah 34:28; 1Sp 19:8

4:3^c Mar 3:11; Luk 1:35; Joh 1:34, 49; Apo 9:20; Rom 1:4; 1Th 3:5; 1Joh 5:10-13, 20; Thu 2:18

4 ^aJesu in a sawn ih, “‘Milai cu sang lawngin a nung lo ding, cuhnakin Pathian kâ ihsi a suak mi kamsuakthu tin in a nung sawn ding,’ tiih ngan a si,” tiah a ti.

4:4^a Dnp 8:3; Joh 4:34

5 ^aCun Diabol in Jesu cu khawpi thianghlim ah a hruai ih, temple kulh a sannak bik ah a ret. 6 ^bCule Jesu hnenah, “Pathian Fapa na si le, dawpthla hnik aw. Ziangahtile,

4:5^a Neh 11:1; Dan 9:24

4:6^b Sam 91:11-12

‘Na cungcangthu ah a vancungmipawl thu a pe ding,
Cule an kut in an lo dăwm ding,
Culole na ke in lungto a khawngngah pang ding,’

tiih ngan a si,” tiah a ti.

7 ^aJesu in a hnenah, “‘Bawipa na Pathian na hniksak lo pei,’ tiih ngansal a si,” tiah a ti.

4:7^a Dnp 6:16; Rom 16:20; 2Ko 2:11; 2Th 2:9; Thu 12:9

8 Cule Jesu cu Diabol in tlang sâng zetah a hruaisal ih, milai umnak leitlun lalrampawl hmuahhmuah le an ropitnak hmuahhmuah tla a hmuh. 9 Cule Diabol cun a hnenah, “Băwkkhup tahratin i biak asile, hi thil hmuahhmuah hi na hnenah ka lo pe ding,” tiah a ti.

10 ^aCun Jesu in a hnenah, “Setan, fehhlo aw! Ziangahtile, ‘Bawipa na Pathian na be pei ih, amah lawng na rian pei,’ tiih ngan a si,” tiah a ti.

4:10^a Dnp 6:13; 1San 21:1; Job 1:6-9; Mar 4:15; Luk 10:18

11 ^aCule Diabol cun amah cu a tlansan, cule ngai hnik, vancungmipawl an ra ih, amah cu an rian.

4:11^a Luk 22:43; Heb 1:14; Jam 4:7

Jesu in Rawngbawl a Thawk

12 Cule Jesu in John kha thawng ah an thlak zo ti a theih tikah, Galili peng ah a păwksuak. 13 ^aNazareth khua suahsanin Jesu cu a feh ih, Zebulun le Naftali ram, tili kapih um Kapernaum khua ah a va um. 14 Hitiih a umnak cu profet Isaiah ih a rak sim cia mi a kim thei nak dingah a si. 15 Isaiah in,

4:13^a Mar 1:21; Luk 4:23, 31; Joh 2:12

“Zebulun ram le Naftali ram,
Tipi lamzin, Jordan tiva ral,
Zentelpawl umnak Galili,
16 ^aThim lakih a rak to mipawl in tleu nasa zet an rak hmu.
Thihnak thlahlim ram ih a to mipawl hnenah tleu a rak thleng zo,”

4:16^a Isa 9:1-2; Luk 2:32; Joh 5:35

tiah a ti a si.

17 Cuih cān ihsin Jesu in, “Lungthlĕng uh, ziangahtile vancung uknak cu a nai zo a si,” tiih thusim le rel a thawk.

Dungthluntu Hmaisa Pawl Kawhnak

18 ^aCule Jesu cu Galili Tili kapih a feh laiah, unau pahnih Peter tiih an kawh mi Simon le a naupa Andru kha tili sungih sur vawrh reroin a hei hmu, ziangahtile annih cu nga kaitu an si. 19 ^bCun Jesu in an hnenah, “I thlun uh, cule minung kaitu ah ka lo tuah ding,” tiah a ti hai. 20 Cule hmakhatteah an sûrpawl an tân ta ih, amah cu an thlun.

4:18^a Mar 7:31; Joh 6:1

4:19^b Mar 10:21, 28, 52; Luk 5:28; Joh 1:43

21 ^aCu tawk ihsin Jesu cu a feh ih, a dang unau hnih Zebedi-ih fapa James le a naupa John tla a hmu. Anmah cu an pa Zebedi thawn an lăwng sungah an um ih, an sûrpawl an thawlh rero. Jesu in a ko hai ih, 22 annih in an lăwng le an pa an tlansan lohli ih, amah cu an thlun.

4:21^a Mar 3:17; Luk 8:51; Joh 21:2

Jesu in Mipi a Damter

23 ^aJesu cun Galili peng hmun zakip a fángsuak, an sinakokpawl ah a zirh ih lalram thuthangṭha a phuang. Cule mipi lakah nathri phun zakip le natnak phun zakip a damter. 24 ^bCun a thuhla cu Siria ram pumpi ah a thang thluh ih, nathri phunphun le tuarnak phunphun ih zăwnzaihter mi le khawse pawlh mipawl, merai nat neipawl le mizéngpawl: mina zaten a hnenah an rak hruai ih, anih in a damter hai. 25 ^cCule Galili le ^dDekapolis peng, Jerusalem le Judia peng le Jordan tiva khat lam ral ihsin mipi tampi in Jesu cu an thlun.

4:23^a Mar 1:39; 3:10; Luk 4:15, 44; Joh 6:59; Apo 10:38; 20:25

4:24^b Mar 1:32; 2:3

4:25^c Mar 3:7; Luk 6:17

4:25^d Dekapolis: Khawpi pahra dĭnkhawm mi a si.

5

Mithlawsuak

1 Cule mipi a hmuh tikah tlang parah a hung kai, a to tikah a dungthluntupawl a hnenah an ra. 2 Cun a kâ a ang ih, an hnenah thu a zirh. Hitin a ti,

3 “Thinlung tăngdawr pawl cu mithlawsuak an si,
Ziangahtile vancung uknak cu anmai ta a si.
4 ^aNinghang lungsia pawl cu mithlawsuak an si,
Ziangahtile annih cu hnĕm an si leh ding.
5 ^bMinunnempawl cu mithlawsuak an si,
Ziangahtile leilung hi ro ah an co leh ding.
6 ^cDingfelnak duh ih rilrawng le tihâl pawl cu mithlawsuak an si,
Ziangahtile annih cu an tlai leh ding.
7 ^dMi dang parih zahngainak neipawl cu mithlawsuak an si,
Ziangahtile zahngainak an co leh ding.
8 ^eThinlung thiang pawl cu mithlawsuak an si,
Ziangahtile Pathian an hmu leh ding.
9 ^fRemnak tuahtupawl cu mithlawsuak an si,
Ziangahtile Pathian fāte tiih kawh an si leh ding.
10 ^gDingfelnak ruangih hremnak tuarpawl cu mithlawsuak an si,
Ziangahtile vancung uknak cu anmai ta a si.

5:4^a Isa 61:2-3; Thu 7:17

5:5^b Sam 37:11; Rom 4:13

5:6^c Isa 55:1-2

5:7^d Jam 2:13

5:8^e Heb 12:14; Thu 22:4

5:9^f Rom 8:14; 14:19

5:10^g 1Pe 3:14

11 ^a“Keimah ruangah mi in an lo zăwkzet, an lo hrem ih, ṭawngkam ṭha lo phun zakip in nanmah dokalhin thuphan an lo puh tikah, nannih cu mithlawsuak nan si. 12 ^bLungawi aipuangin um uhla, nasa zetin lungawi uh, ziangahtile vanram ih nan lawmman cu a ropi a si. Ziangahtile cuti vekin nan hlanih profetpawl khal an rak hrem a si.

5:11^a Isa 51:7; Joh 15:21

5:12^b Apo 7:52; 2Ko 6:10; Kol 1:24; Jam 1:2; 1Pe 1:6

Cite le Meito

13 ^a“Nannih cu leilung cite nan si, asinan cite in a alnak hloh ta hnik sehla, ziangtin so a alsal thei ding? Mi ih hlăwn ding le an ke ih an pal men ding siarlo, ziang hrang hmanah a ṭha lo.

5:13^a Mar 9:50; Luk 14:34

14 ^a“Nannih cu leitlun tleu nan si. Tlang parih dĭn mi khua cu phĕn theih a si lo. 15 ^bMi zohman in meito vâng tahratin kho hnuaiah an ret dah lo, cuhnakin meito ṭhuam parah an ret ih, inn sungih minung um mi hmuahhmuah a tlêt thluh sawn a si. 16 ^cMi in nan thil ṭha tuah mipawl an hmuh ih, van ih nan Pa an thangṭhatnak dingah nan tleu cu mi hmaiah êng seh.

5:14^a Joh 8:12

5:15^b Mar 4:21; Luk 8:16

5:16^c 1Ko 10:31; Fil 1:11; Tit 2:14

Dān Kimternak

17 ^a“Dān thu siseh, Profetpawl ih ngan mipawl siseh hloralter dingih ra ah in ruat hlah uh. Cupawl hloralter dingah ka ra lo ih, famkimter dingah ka ra sawn a si. 18 ^bZiangahtile thungaiin ka lo sim, lei le van a hlohral hlanlo cu Dān sungih ^ccafáng tebik pakhat siseh, thai khatte siseh a zaten a thlenkim hlanlo a hloral hrimhrim lo ding. 19 ^dCuruangah hivek thupekpawl lakih a fatebik pakhat a pahbăl ih, mi dang khal pahbăl dingin a va zirhtu pauhpauh cu vancung uknak sungah mitenaubik tiah kawh an si ding. Asinan zokhal cuih thupekpawl thlun ih a zirhtu cu vancung uknak sungah miropi tiah kawh a si ding. 20 ^eZiangahtile nan hnenah nan dingfelnak in Dān zirhtupawl le Farasipawlih dingfelnak a hleih lo ahcun, vancung uknak sungah nan lut hrimhrim lo ding ti ka lo sim a si.

5:17^a Joh 10:34; Rom 3:31

5:18^b Isa 40:8; Mar 13:31; Luk 16:17

5:18^c cafáng tebik: Grik cafáng tebik iota a sim duhnak a si.

5:19^d Jam 2:10

5:20^e Isa 26:2; Joh 3:5

Thinhengnak le Laithahnak

21 ^a“‘Lai na that lo pei, lai thattu zokhal thuṭhennak a táwng ding,’ tiin hlanlai mipawl ih an sim mi cu nan rak thei zo. 22 ^bAsinan kei cun săn um loih amai unau parih a thin a hengtu zokhal thuṭhennak a táwng ding. Cun amai unau hnenah, ‘Misantlailo pa!’ titu zokhal Sanhedrin thuṭhennak a táwng ding. Cun, ‘Nang mi-â!’ tiah mi a titu zokhal hell meisa a táwng ding, tiah ka lo sim a si. 23 Curuangah biakṭheng ih na thilpek na ken tikah, na unaupa in na parah lungkimlonak a nei ti na theihsuahsal asile, 24 cu tawk biakṭheng hmaiah na thilpek cu tân tain va feh aw; na unaupa hnenah remawknak tuah hmaisa ta aw; cu ṭhehin kirsal awla, na thilpek cu hlan aw.

5:21^a Suah 20:13; Dnp 5:17

5:22^b Ths 7:9; Mar 9:43; Luk 16:24; 1Ko 13:5; Efe 4:26; Jam 1:19-20

25 “Thuṭhennak hmun ih a lo hruaitu na ral pa thawn lamzin ih nan fehtlang laiah amah thawn remawknak tuah lohli aw. Cu lo asile na ral pa in thuṭhentu hnenah a lo thlen ding ih, thuṭhentu in a kut thuai bawi hnenah a lo thlen ding. Cule anih in thawng a lo thla ding. 26 Thungaiin ka lo sim, ^akuadron tiangin na pek ṭheh thluh lai hlanlo ziangti lam hmanin na suak lo ding.

5:26^a kuadron: Grik ṭawng a si ih paisa man malbik lakih pakhat a si.

Uiretnak le Ṭhenawknak

27 ^a“‘Na uire lo pei,’ tiin hlanlai mipawl ih an sim mi cu nan rak thei zo. 28 ^bAsinan zokhal câkhiarnak thawi nunau a zohtu cun a thinlung in cu nu lakah a uire zo a si tiah ka lo sim. 29 ^cNa vawrh lam mit in a lo tlukter asile phawrhsuak awla, na hnen ihsin hlăwn aw. Ziangahtile na taksaruangpum pumhlum ih hell sungih paih a si ding hnakin na taksa ṭêk pakhat a hlohral cu na hrangah a hlawksawn. 30 Na vawrh lam kut in a lo tlukter asile tán awla, na hnen ihsin hlăwn aw. Na taksaruangpum pumhlum ih hell sungih paih a si ding hnakin na taksa ṭêk pakhat a hlohral ding cu na hrangah a hlawksawn.

5:27^a Suah 20:14; Dnp 5:18

5:28^b Thf 6:25; 2Pe 2:14

5:29^c Mar 9:42-47; Luk 17:2; Rom 14:21; 1Ko 8:13; 2Ko 6:3

31 ^a“Cule, ‘Mai nupi matu pauhpauh cun mâknak ca ken seh,’ tiah an rak ti. 32 ^bAsinan kei cun nan hnenah, zokhal nunau-mipa sualnak siarlo ah a nupi matu cun a nupi a uireter a si. Zokhal mâk mi nu a ṭhitu cu a uire a si, tiah ka lo ti.

5:31^a Dnp 24:1

5:32^b Luk 16:18

Jesu in Sesăm a Kham

33 ^a“Cuihtlunah, ‘Sesămnak dik lo na tuah lo pei, cuhnakin na thukam mi cu Bawipa hnenah na hlensuak sawn pei,’ tiin hlanlai mipawl ih an sim mi cu nan rak thei zo. 34 ^bAsinan kei cun nan hnenah ka lo sim a si, siasăm hrimhrim hlah uh: van sālin siseh, ziangahtile cumi cu Pathian tokham a si; 35 ^cleilung sālin siseh, ziangahtile cumi cu Pathian ke retnak a si; Jerusalem sál khalin siseh, ziangahtile cumi cu Siangpahrang ropi ih khua a si. 36 Sám phang pakhat khal na varterin na dumter thei lo ruangah, na lu sâl khalin siasăm hlah. 37 ^dCuhnakin na ṭawngkam cu, ‘A si,’ cu ‘A si,’ ti si sehla, ‘A si lo,’ cu ‘A si lo,’ ti si seh. Ziangahtile cuih tlun lam pauhpauh cu miṭha lo pa hnen ihta a si.

5:33^a Pui 19:12; Mip 30:2; Dnp 23:21, 23

5:34^b Isa 66:1; Jam 5:12

5:35^c Sam 48:2

5:37^d Joh 17:15; Efe 6:16; 2Th 3:3; Jam 5:12; 1Joh 2:13-14

Phulei Samnak

38 ^a“‘Mit aiah mit, hâ aiah hâ,’ tiih an sim mi cu nan rak thei zo. 39 ^bAsinan kei cun nan hnenah, miṭha lo cu va dokalh hlah uh. Na vawrh lam biang a lo bengtu pauhpauh hnenah khat lam khal tŭn lawlaw aw. 40 Mi pakhat in na angki lâk duhah taza a lo cuai asile, na kâwrfual khal lâkter lawlaw aw. 41 Lo theih loin peng khat feh a lo fialtu pauhpauh cu a zawngah peng hnih feh aw. 42 ^cA lo diltu cu pe awla, na hnen ihsin thil lo cawi a duhtu cu dungtun hlah.

5:38^a Suah 21:24; Pui 24:20; Dnp 19:21

5:39^b Luk 6:28; Rom 12:17, 19; 1Pe 3:9

5:42^c Dnp 15:8; Luk 6:30

Na Ral Duhdawt Aw

43 ^a“‘Na innhnen na duhdaw pei ih, na ral na hua pei,’ an ti mi cu nan rak thei zo. 44 ^bAsinan kei cun nan hnenah, nan ralpawl duhdaw uhla, a lo camsetupawl thlawsuah va pe uh. A lo huatupawl hnenah thil ṭha tuah uhla, a lo tuah se tupawl le a lo hremtupawl hrangah thlacam uh.

5:43^a Pui 19:18; Sam 139:21-22; Mar 12:31; Luk 10:27; Rom 13:9; Gal 5:14; Jam 2:8

5:44^b Luk 6:27-28; Joh 15:20; Apo 7:60; Rom 8:35; 1Ko 4:12; 1Pe 2:23

45 ^aVancung nan Paih fapa nan si thei nak dingah cucu tuah uh. Ziangahtile anih cun amai ni cu miṭha par le miṭha lo par khalah a tlangter ih, midingfel par le midingfel lo parah ruah a surter. 46 ^bZiangahtile nanmah a lo duhdawtupawl lawng nan duhdaw asile, ziang lawmman so nan neih ding? Siah khawngtupawl hmanin cu vekin an tuah ve a si lo maw? 47 Cule nan unaupawl lawng cibai nan bûk asile, mi dang hnakin a hleiih nan tuah mi ziang a um? Siah khawngtupawl hmanin cutin an tuah ve a si lo maw? 48 ^cCuruangah van ih nan Pa a famkim vekin famkim ve uh.

5:45^a Job 25:3; Luk 6:35; Rom 8:14

5:46^b Luk 6:32

5:48^c Pui 19:2; 1Pe 1:16

6

Băwmnak Thilpek

1 “Băwmnak thilpek nan pek mi cu mi in in hmu hai seh tiin mi hmaiih tuah lo dingin fimkhur uh. Cu lo ahcun van ih a um mi nan Pa hnen ihsin lawmman nan ngah lo ding. 2 “Curuangah băwmnak thilpek na pek tikah, midepdepawl in mipi ih lăwm dingin sinakokpawl ah le kăwtthler ih an tuah vekin na hmaiah tawtawrawt phaw hlah. Thungaiin ka lo sim, an lawmman cu an ngah zo. 3 Cuhnakin băwmnak thilpekpawl na pek tikah na vawrh lam kut ih a tuah mi cu na keh lam kut in thei hlah seh. 4 ^aBăwmnak thilpek na pek mi cu a thuptein si seh. Cule minung ih hmuh lo mi hmutu na Pa amah in langhnganin lawmman a lo pe ding.

6:4^a Kol 3:23-24

Zohṭhim ding Thlacam

5 ^a“Cule thla na cam tikah midepdepawl vek na si lo pei. Ziangahtile annih cun mi in in hmu hai seh tiah sinakokpawl ah le zalamzin tawnawknak hmunpawl ah dīngin thlacam an duh. Thungaiin ka lo sim, annih cun an lawmman an ngah zo. 6 ^bAsinan nang cun thla na cam tikah na inn pindan sungah lut awla, sângka na khar hnuah zohman ih hmuhlonak ih um na Pa hnenah thlacam aw. Cule zohman ih hmuh lo mi hmutu na Pa in langhnganin lawmman a lo pe ding. 7 ^cCule thla nan cam tikah Zentelpawl vekin sullam nei lo salnawlh rero mi hmang hlah uh. Ziangahtile annih cun an ṭawngkam tampi ruangah theihsak an si ding tin an ruat. 8 Curuangah nannih cu anmah vek si hlah uh. Ziangahtile a hnenih nan dil hlanah nan ṭul mi thilpawl cu nan Pa in a thei.

6:5^a Mar 11:25; Luk 18:10-14

6:6^b 2Sp 4:33

6:7^c 1Sp 18:26-29; Ths 5:2

9 ^a“Curuangah thla nan camdān ding cu hitin a si:

6:9^a Jer 3:19; Mal 2:10; 1Pe 1:17

‘Vancung ih a um mi kan Pa,
Na hmin thianghlim seh.
10 Na uknak thleng hram seh.
Vancung ih na duhnak tuah a si bangin,
Leitlun khalah na duhnak tuah si hram seh.
11 ^aKan ni tin rawl tuihsun ah in pe aw.
12 Cule kan parih leibatupawl kan ngaidam vekin,
Kan leibapawl in ngaidam ve aw.
13 ^bCule sualfawrhnak ah in hruai loin,
Miṭha lo pa hnen ihsin in run sawn aw.
Ziangahtile uknak le huham le ropitnak cu a kumkhuain nangmai ta a si. Amen.’

6:11^a Thf 30:8

6:13^b Jam 1:13

14 ^a“Ziangahtile mi mawhsualnakpawl nan ngaidam asile, van ih a um mi nan Pa khal in a lo ngaidam ve ding. 15 Asinan mi mawhsualnakpawl nan ngaidam lo asile, nan Pa khal in nan mawhsualnakpawl a lo ngaidam ve lo ding.

6:14^a Mar 11:25-26; Efe 4:32; Kol 3:13

Rawl Ulh Thu

16 ^a“Cuihtlunah rawl nan ulh tikah midepdepawl vekin riahsia mithmai in um hlah uh. Ziangahtile annih cun rawl an ul ti mi hnenih an lăng thei nak dingah an hmel an pâwrter. Thungaiin ka lo sim, annih cun an lawmman an ngah zo a si. 17 Asinan nang cun rawl na ulh tikah na lu hriak thih awla, na hmai phiah aw. 18 Mi in rawl na ul ti hmu loin, zohman ih hmuhlonak ih um na Pa lawngin a lo hmuh thei nak dingah cutin tuah sawn aw. Cule zohman ih hmuh lo mi hmutu na Pa in langhnganin lawmman a lo pe ding.

6:16^a Pui 16:29, 31; Mip 24:7; Isa 58:5; Zek 7:5

Van ih Hlawnthil Khawl

19 ^a“Tlap le sunhrûl ih a siatsuah thei nak le fifirpawl in an bauh ih, an rûk thei nak hi leitlun ah nanmai hrangah hlawnthil khawl hlah uh. 20 ^bCuhnakin tlap le sunhrûl ih siatsuah thei lo nak le fifirpawl in an bauh ih, an rûk thei lo nak hmun van ah nanmai hrangah hlawnthil khawl sawn uh. 21 ^cZiangahtile nan hlawnthil umnak hmun ah nan thinlung khal a um ve ding.

6:19^a Thf 23:4; Luk 12:16-21; Heb 13:5; Jam 5:2-3

6:20^b Luk 12:33; 1Ti 6:19

6:21^c Luk 12:34

Taksaruangpumih Meito

22 “Mit cu taksaruangpumih meito a si. Curuangah na mit a harhdam asile, tleu in na taksaruangpum pumhlum a luahkhat ding. 23 Asinan na mit a ṭhat lo asile, thim in na taksaruangpum pumhlum cu a luahkhat ding. Curuangah na sungih um tleu cu a thim asile, cuih thim cu ziang tlukin so a natsat ding!

Bawi Pahnih

24 ^a“Zohman in bawi pahnih a riankăwp thei lo; ziangahtile pakhat a hua ding ih, pakhat a duhdaw ding, asilole pakhat parah rinum tahratin pakhat deuh cu a nautat ding. Pathian le sumpai nan riankăwp thei lo.

6:24^a Luk 16:13

Dawnhar Hlah Uh

25 ^a“Curuangah nan hnenah ka lo sim, nan nunnak thu ah, ‘Ziang kan ei ding ih, ziang kan in ding,’ tiah dawnhar hlah uh. Nan taksaruangpum thu ah, ‘Ziang kan hruh ding,’ ti khal dawnhar hlah uh. Rawl hnakin nunnak a thupisawn ih, hnipuan hnakin taksaruangpum a thupisawn a si lo maw? 26 ^bTlun zuang vatepawl khi zoh hnik uh, ziangahtile thlaici an tuh lo ih an at fawn lo, cule cuam sung khalah rawl an khawl lo. Cuti cingin van ih a um mi nan Pa in a câwm hai a si. Nannih cu annih hnakin nan man nasa zetin a khungsawn a si lo maw? 27 ^cNanmah lakah dawnharnak ruangin zo in so amai dam sung ni dawng khat a bêt thei?

6:25^a Luk 10:41

6:26^b Job 38:41; Sam 104:21

6:27^c Sam 39:5

28 “Cule ziangah so hnipuan thu ah nan dăwn a har? Ramlak lily parpawl tla khi ziangtin an ṭhang ti ruat hnik uh: hna an ṭuan lo, pat khal an hnûk lo. 29 ^aSikhalsehla ka lo sim a si, Solomon rori hman a ropitnak hmuahhmuah ih a thăwmawk lai hmanah hi lily parpawl lakih pakhat te hman a tluk lo. 30 ^bMaw nannih zumnak mál pawl, tuihsun ah ramlak ah a um ih, thaisun ah thŭk sungih an paih mi hrampi hman Pathian in cu tlukin a thăwm asile, nannih cu nasa sinsinin a lo thuam lo ding maw? 31 Curuangah dawnhar hlah uh, ‘Ziang kan ei ding?’ tiin simaw, ‘Ziang kan in ding?’ tiin simaw, ‘Ziang kan hruh ding?’ tiin simaw, ti hlah uh. 32 Ziangahtile Zentelpawl in cuih thil hmuahhmuah cu an hawl. Ziangahtile van ih nan Pa in cuih thil hmuahhmuah nan ṭul ti a thei. 33 ^cCuhnakin Pathian uknak le a dingfelnak hawl hmaisasawn uh, cule cuih thil hmuahhmuah cu pekbêt nan si ding. 34 Curuangah thaisun hrangah dawnhar hlah uh, ziangahtile thaisun cun amai thilpawl hrangah a dăwn a har leh ding. Ni khat hrangih ni khat buai cu a tawk a si.

6:29^a 1Sp 10:4-7

6:30^b Luk 12:28

6:33^c Sam 37:4

7

Thuṭhen Hlah

1 ^a“Thuṭhensak nan silonak dingah, thu va ṭhen hlah uh. 2 ^bZiangahtile mi thu nan ṭhensaknak in thuṭhensak nan si ve ding, cule mi nan tahnak khan tah nan si ve ding. 3 Nangmai mit sungih thing tluan hman ruat loin, ziangah so na unaupaih mit sungih mit hnawm fate cu na zoh? 4 Asilole ngai hnik, nangmai mit sungah thing tluan um siin, ziangtin so na unaupa hnenah, ‘Na mit hnawm ka lo cawihsak ding na ti ngam?’ 5 Midepde pa! Na mit sungih thing tluan kha hlăwn hmaisa ta awla, na unaupaih mit sungih mit hnawm fate cawih ding mi cu fiangten na hmu thei ding.

7:1^a Luk 6:37; Rom 14:4; 1Ko 4:5; Jam 4:11-12

7:2^b Eze 35:11; Mar 4:24; Luk 6:38; Rom 2:1

6 “A thianghlim mi thil cu uicopawl pe hlah uhla, nan keplungpawl khal văwk hmaiah thlak fawn hlah uh, cu lo ahcun an ke hnuaiah an pál ding ih, herkirin an lo taithlek thluh pang ding.

Dil, Hawl, King

7 ^a“Dil uhla, pek nan si ding; hawl uhla, nan hmu ding; king uhla, ăwnsak nan si ding. 8 ^bZiangahtile a diltu kip in an ngah, a hawltu cun a hmu ih, a kingtu cu sângka ăwnsak a si ding. 9 Asilole nan lakih mi pakhat cu a fapa in sang dil sehla, lungto a pe pei maw? 10 Asilole nga dil sehla, rul a pe pei maw? 11 ^cMiṭha lo si na cingin nannih hmanin nan fale hnenah thilpek ṭha pawl pek nan thiam a si ahcun, van ih um nan Pa cun amah diltupawl hnenah thil ṭha tamsin a pe lo ding maw!

7:7^a 1Sp 3:5; Joh 14:13-14; Jam 1:5-8; 1Joh 3:22

7:8^b Thf 8:17; Jer 29:12-13

7:11^c Jam 1:17

12 ^a“Curuangah mi in nan parah tuah hai seh ti nan duh mi zaten an par khalah va tuah uh, ziangahtile hihi Dān le Profetpawlih cazualpawl cu a si.

7:12^a Luk 6:31; Rom 13:8-10; Gal 5:14

A Fiak Mi Kăwtka

13 ^a“A fiak mi kăwtka ihsin lut uh, ziangahtile kăwtka kau le lamzin kau cun siatnak ah mi a hruai ih, mi tampi cu cuih kăwtka ihsin an lut rero. 14 Ziangruangahtile nunnak ih hruaitu kăwtka cu a fiak ih, a lamzin khal a har, cule mi málte lawngin cumi cu an hmungah.

7:13^a Luk 13:24; Joh 10:7, 9

An Rah in nan Thei Ding

15 ^a“Tuu phaw sĭn ih nan hnenih ra, profet deu pawl kha ralring uh, an sung lam cu cinghnia koham an si. 16 ^bAnmah cu an rah ihsin nan thei ding. Mi in hling kung ihsin sabit rah le lenhling ihsin theipi an khawm dah maw? 17 Cu vekin thingkung ṭha kip in rah ṭha an rah ih, thingkung sia cun rah sia a rah. 18 ^cThingkung ṭha in rah sia a rah thei lo ih, thingkung sia in rah ṭha a rah thei fawn lo. 19 Rah ṭha a rah lo mi thingkung kip in hauthluk an si ding ih, meisa sungah paih an si ding. 20 Curuangah anmah cu an rah ihsin nan thei ding.

7:15^a Jer 23:16; Luk 6:26; Apo 20:29; 2Pe 2:1; 1Joh 4:1; Thu 16:13

7:16^b Luk 6:44; Jam 3:12

7:18^c Luk 6:43

21 ^a“ ‘Bawipa, Bawipa,’ tiih i kotu kip in vancung uknak sungah an lut lo ding, vancung ih a um mi ka Paih duhnak a tuahtu lawng an lut ding a si. 22 ^bCuih ni ah mi tampi in, ‘Bawipa, Bawipa, na hmin in thu kan sim, na hmin in khawsiapawl kan dawisuak ih, thilmak tampi na hmin in kan tuah a si lo maw?’ tiah in ti ding. 23 ^cCule kei in an hnenah, ‘Ka lo thei dah hai lo, nannih dān pahbăltupawl ka hnen ihsin tlân uh,’ tiah ka thăn ding.

7:21^a Hos 8:2; Joh 13:13; Rom 2:13; Jam 1:22; 1Joh 3:18

7:22^b Luk 10:20; 1Ko 13:1-3

7:23^c Sam 6:8; Luk 13:25-27

Lungpi parih Inn Sak

24 ^a“Curuangah zokhal hi ka sim mi thupawl hna ih thei ih, cupawl a tuahtu cu lungpi parih a inn a saktu mifim pa ka bangter ding a si: 25 ruahpi a sur, ti a lian ih, thli a hrang, cule thlipi in cuih inn cu a nuai ciamco nân, a tlu lo; ziangahtile a ṭohram cu lungpi parih bun a si. 26 Cule hi ka sim mi thupawl thei ko naih, cupawl a tuah lo tu kip cu vunnel parih a inn a saktu mi-â pa thawn an bangaw ding: 27 ruahpi a sur, ti a lian ih, thli a hrang, thlipi in cuih inn cu a nuai ih, a tlu, cule a cimdān cu rapthlak tak a si,” tiah a ti.

7:24^a Jam 1:22-25

28 ^aCule hitin a si, Jesu in cuih thupawl a sim ṭheh tikah, mipi cu a thuzirh mi ah an khawruah a har. 29 Ziangahtile Dān zirhtupawl vekin zirh loin, thuneitu pakhat vekin a zirh.

7:28^a Mar 1:22; Luk 4:32; Joh 7:46

8

Miphar Damternak

1 Tlang par ihsin Jesu a rung ṭum tikah, mipi tampi in amah an thlun. 2 ^aCule ngai hnik, miphar pakhat a ra ih, amah cu a bia, “Bawipa, na duh ahcun i thiangter thei a si,” tiah a ti.

8:2^a Pui 13:45; Luk 5:12

3 Cun Jesu cun a kut a suah ih a hei thâm, “Ka duh a si, thiang aw,” tiah a ti. Cule hmakhatteah a phār nat cu a thiang. 4 ^aCule Jesu in a hnenah, “Zohman sim lo dingin fimkhur aw, cuhnakin va feh awla, puithiam hnenah na taksa va hmuh sawn aw. Cule mi in an lo theihpinak dingah Mosi thupek mi thilpek va hlan aw,” tiah a ti.

8:4^a Pui 14:2-32; Mar 5:43; Luk 4:41; 17:14

Ralkap Zakhat Hotu Paih Zumnak

5 Kapernaum khua ih Jesu a luh tikah, ralkap 100 hotu a hnenah a ra ih băwmnak a dil. 6 “Bawipa, ka hnenum pa cu zéng nat bese zet tuarin inn ah a it,” tiah a ti.

7 Jesu in a hnenah, “Ka ra ding ih, ka damter ding,” tiah a ti.

8 ^aAsinan ralkap 100 hotu in a sawn ih, “Bawipa, ka luangpi hnuaiih nang ra lut dingah kei ka tlak lo. Kam khatte ṭawng men awla, ka hnenum pa cu a dam mai ding. 9 Ziangahtile keimah khal mi thuneihnak hnuaiih um ka si, ka kut hnuaiah ralkappawl an um ve. Pakhat hnenah, ‘Feh aw,’ ka ti le a feh; a dang pakhat hnenah, ‘Ra aw,’ ka ti le a ra. Ka siahhlawh hnenah, ‘Hihi tuah aw,’ ka ti le a tuah,” tiah a ti.

8:8^a Sam 107:20

10 Jesu in cuih thu a theih tikah, mak a ti ih, amah thluntupawl hnenah, “Thungaiin ka lo sim, Israel-mipawl lak hmanah hivek zumnak nasa ka hmu hrih lo! 11 ^aNan hnenah ka lo sim a si, nisuahnak lam le nitlaknak lam ihsin mi tampi an ra ding ih, Abraham, Isak le Jakob tla thawn vancung uknak ah an to ding. 12 ^bAsinan lalram fātepawl cu leng lam thim lakah hlăwn an si ding. Cu tawkah ṭah le hacâng rialnak a um ding,” tiah a ti.

8:11^a Sam 107:3; Isa 49:12; Mal 1:11; Luk 13:29

8:12^b Luk 13:28

13 Cun Jesu in ralkap 100 hotu hnenah, “Va tlung aw, na zum vek khan na hrangah tuah si seh,” tiah a ti. Cule cuih tikcu cekci ah a hnenum pa cu a dam.

Jesu in Mi Tampi a Damter

14 Peter-ih inn sungih Jesu a va luh tikah, Peter nupi-ih nu kha khawsik nat tuarin a ih kha a hmu. 15 Cule Jesu in a kut a thamsak ih, a khawsik nat cu a reh. Cule a tho ih, anmah a rian hai.

16 Zan lam a thlen tikah khawse pawlh mi, mi tampi Jesu hnenah an ratpi. Cule anih in khawse ṭha lo pawl cu a ṭawngkam khat in a dawisuak hai ih, mina zaten a damter. 17 ^aCumi cu profet Isaiah ih a sim mi a kim thei nak dingah a si. Isaiah in,

8:17^a Isa 53:4

“Kan cahlonakpawl tla a la ih,
Kan natnakpawl tla a phur,”

a ti a si.

Dungthluntu Si Man

18 ^aJesu in a kiangkapah mipi tampi a hmuh tikah, a dungthluntupawl kha tili khat lam ralih feh dingin thu a pe hai. 19 Cun Dān zirhtu pakhat a ra ih a hnenah, “Zirhtu pa, na fehnak kip ah ka lo thlun ding,” tiah a ti.

8:18^a Mar 4:35

20 ^aCule Jesu in a hnenah, “Sihál in kua an nei ih, tlun zuang vate in bu an nei. Asinan Minung Fapa cun lu retnak ding hmun a nei lo,” tiah a ti.

8:20^a Dan 7:13; Mar 2:10

21 Cun a dungthluntupawl lakih pakhat in Jesu hnenah, “Bawipa, va feh ih ka pa va phum hmaisak ta i siang hram aw,” tiah a ti.

22 Asinan Jesu in a hnenah, “I thlun aw, mithipawl in anmai mithipawl cu phum hai seh,” tiah a ti.

Thli sia le Tisuar in Jesu-ih Thu an Lung

23 Cule lăwng sungih Jesu a luh tikah, a dungthluntupawl in an thlun. 24 Ngai hnik, thlipi tili parah a hrang ih, tisuar in an lăwng cu a khuh. Asinan Jesu cu a itthat. 25 Cun a dungthluntupawl cu a hnenah an ra ih, amah cu an ra ṭhang, “Bawipa, in run aw! Kan pil cuahco a si!” tiah an ti.

26 ^aCule anih in an hnenah, “Nannih zumnak mál pawl, ziangah so nan ṭih?” tiah a ti hai. Cun a hung tho ih thlipi le tili cu a kawk hai, cule tili cu a dai khepkhep.

8:26^a Sam 65:7; 107:29

27 Cutin annihpawl cu an mang a bang ih, “Hi pa hi ziang vek minung a si pei, thlipi le tipi hmanin a thu an lun hi?” tiah an ti.

Khawse Pawlh Mi Pahnih Damternak

28 Jesu cu tili khat lam ral ^aGergesa ram a thlen tikah, cu tawkah khawsiapawl ih pawlh mi, mi pahnih cu thlānmual ihsin an ra ih, Jesu cu an táwng. Cute pahnih cu an hrohran tuk ruangah zohman in cuih zin an zawh ngam lo. 29 ^bCule ngai hnik, “Pathian Fapa, Jesu, nang le kannih hi ziang pehtlaihawknak so kan neih? A tikcu a thlen hlanah in hrem dingin na ra maw si?” tiah auin an ti.

8:28^a Gergesa: Bible hrekkhat ah cun Gadara an ti.

8:29^b Lai 11:12; 2Sam 16:10; 1Sp 17:18; Mar 1:24; Joh 2:4; 2Pe 2:4

30 An hnen ihsin tawkfang a hlatnak hmun ah văwk rual tampi rawl an ei rero. 31 Cule khawsiapawl in, “In dawisuak asile, văwk rual sungih luh in siang hram aw,” tiah Jesu an dil.

32 Cule Jesu in an hnenah, “Feh uh,” tiah a ti. Cun cuih mi pahnih sung ihsin an suak ih, văwk rual sungah an lut. Ngai hnik, văwk rual zaten kham hrâp ihsin tili sungah an tlânthla ih, ti sungah an thi ṭheh. 33 Văwk kiltupawl cu an tlân ih, khaw sungah an feh. Khawse pawlh mite parih thil cang mi telin thil ziangkim an va thăn. 34 ^aCule ngai hnik, khaw sung mi hmuahhmuah cu Jesu táwng dingah an ra ih, amah an hmuh tikah an ram sung ihsin suak dingin an dil.

8:34^a Luk 5:8; Apo 16:39

9

Jesu in Mizéng Pa a Damter

1 Jesu cu lăwng sungah a lut, khat lam ralah a kai ih, amai khua a thleng. 2 ^aCule ngai hnik, mizéng pakhat a ihphah thawn Jesu hnenah an rak zâwn. Jesu in an zumnak a hmuh tikah, mizéng pa hnenah, “Ka fapa, ṭih hlah, na sualpawl ngaidam ṭheh a si zo,” tiah a ti.

9:2^a Luk 7:48; Joh 16:33

3 ^aCule ngai hnik, Dān zirhtu mi hrekkhat in an thinlung sungin, “Hi pa hin Pathian a thangsiat a si!” tiah an ti.

9:3^a Joh 10:33

4 ^aCule Jesu in an ruahnakpawl cu a thei ih, “Ziangah so nan thinlung in thil ṭha lo nan ruat? 5 Ziangahtile, ‘Na sualpawl ngaidam ṭheh a si zo,’ ti maw, ‘Tho awla, feh aw,’ ti so áwlsawn? 6 Sikhalsehla Minung Fapa in leitlun ah sualpawl ngaidam thei nak thuneihnak a nei a si ti nan theihnak dingah hihi tuah a si,” tiah a ti ih, mizéng pa hnenah, “Tho aw, na ihphah la awla, na inn ah tlung aw,” tiah a ti.

9:4^a Sam 94:11; Luk 6:8; Joh 2:25

7 Cule mizéng pa cu a tho ih, a inn lamah a tlung. 8 ^aMipi in cumi an hmuh tikah an mang a bang ih, cuvek thuneihnak minung hnenih petu Pathian cu an thangṭhat.

9:8^a Luk 7:16; Joh 15:8; Apo 4:21

Siah Khawngtu Mathai

9 Cuih hmun ihsin Jesu cu a feh ih, siahkhawnnak bûk ih Mathai an ti mi a to lai kha a hei hmu. Cule Jesu in a hnenah, “I thlun aw,” tiah a ti. Cule Mathai cu a tho ih, Jesu a thlun.

10 Cule hitin thil a cang, Jesu cu inn sungih cabuai a hil laiah, ngai hnik, siah khawngtu tampi le misualpawl an ra ih, Jesu le a dungthluntupawl an hilpi. 11 ^aCumi cu Farasipawl in an hmuh tikah a dungthluntupawl hnenah, “Ziangah so nan zirhtu pa cu siah khawngtupawl le misualpawl hnenih rawl a ei?” tiah an ti.

9:11^a Luk 5:30; Gal 2:15

12 Jesu in cuih thu a theih tikah an hnenah, “Miharhdampawl in sibawi an ṭul lo, minapawl lawngin an ṭul. 13 ^aVa feh uhla, ‘Thawinak si loin zahngainak ka duh,’ ti miih tican zir sawn uh. Ziangahtile midingfelpawl ko dingah ka ra lo, misualpawl lungthlĕng dingih ko dingah ka ra sawn a si,” tiah a ti.

9:13^a Hos 6:6; Mik 6:6-8; Luk 19:10; 1Ti 1:15

Rawl Ulh Thu Jesu an Sut

14 ^aCun John-ih dungthluntupawl Jesu hnenah an ra ih, “Kannih le Farasipawl cu rawl kan ul ṭheu, ziangah so na dungthluntupawl hmuah rawl an ulh ve lo?” tiah an ti.

9:14^a Luk 18:12

15 ^aCule Jesu in an hnenah, “Mo neitu pa an hnenih a um sungah mo lawmtupawl an riah a se thei maw si? An hnen ihsin mo neitu pa lâkhloh ni a thleng leh ding, cuih cān ah rawl an ul leh ding.

9:15^a Joh 3:29; Apo 13:2-3

16 “Zohman in a cawm thei mi puanthan thar belcâwng in sinfen hlun an belh kel lo, ziangahtile an belh mi in sinfen cu a dir ding ih, a tlêk kau sin ding. 17 Sabit zu thar kha savun thâwl hlun sungah an thun kel lo, an thun asile sabit zu in savun thâwl hlun cu a kekter ding ih, sabit zu cu a dăwk ding, cule savun thâwl hlun khal cu a siat ding. Sabit zu thar cu savun thâwl thar sungah an thun sawn ih, an pahnih in an siat lo ding,” tiah a ti.

Mina nu le Mithi nute

18 ^aCuih thilpawl an hnenih a sim hai rero laiah, ngai hnik, sinakok uktu pakhat a ra ih, Jesu hmaiah a băwkkhup. Cule, “Atu teah ka fanu a thi, cuti si khal sehla ra awla, a parah na kut ra suang aw, cule a nung ding,” tiah a ti. 19 Cule Jesu cu a tho ih, cu pa cu a thlun, a dungthluntupawl khal in an thlun ve.

9:18^a Mar 5:23

20 ^aCule ngai hnik, kum hleihnih sung thi put nat tuar nunau pakhat Jesu dung ihsin a ra ih a sinfen zim a thâm. 21 Ziangahtile “A sinfente hman ka tham asile, ka dam ding,” tiah a thinlung sungin amah le amah a tiaw.

9:20^a Mar 3:10; Luk 6:19

22 ^aCule Jesu cu a herkûal ih, nunaunu a hmuh tikah, “Ka fanu, ṭih hlah, na zumnak in a lo damter zo,” tiah a ti. Cule cuih tikcucān ah nunaunu cu a dam.

9:22^a Mar 10:52; Luk 7:50; Joh 16:33

23 ^aUktu paih inn sungih Jesu a luh tikah, phirivau tumtupawl le mipi hnăwkbuai culci ih an um kha a hmu. 24 ^bCule anih in an hnenah, “Rak kiang uh, ziangahtile hi nauhak nu hi a thi lo, a itthat sawn a si,” tiah a ti. Cu tikah Jesu cu an rak hnihsan.

9:23^a 2San 35:25; Jer 9:17-18

9:24^b Sam 76:5; Dan 12:2; Joh 11:11-14; Apo 20:10; 1Ko 11:30; 1Th 4:13-16

25 ^aLengih mipi suahter thluh an si hnuah, Jesu cu a lut ih, nauhak nuih kut a vun kai, cule nauhak nu cu a hung tho. 26 ^bCule cuih thuthang cu cuih ram pumpi ah a thang.

9:25^a Luk 7:14

9:26^b Mar 1:28; Luk 4:14, 37

Mitcaw Pahnih Damternak

27 ^aCu tawk hmun ihsin Jesu a fehsuak tikah, mitcaw pahnih in au phahin Jesu an thlun ih, “David-ih Fapa, kan parah zahngai hram aw!” tiah an ti.

9:27^a Mar 10:47

28 ^aCule Jesu inn sungih a luh tikah, mitcaw pahnih a hnenah an ra. Cule Jesu in an hnenah, “Hihi ka tuah thei ti nan zum maw?” tiah a ti hai.

9:28^a Apo 14:9

Annih in a hnenah, “Zum e, Bawipa,” tiah an ti.

29 Cun Jesu in an mit cu a thâm ih, “Nan zumnak vekin nan parah cang seh,” tiah a ti. 30 Cule an mit cu vanter a si. Cule Jesu in an hnenah, “Zohman in hi thu hi thei hlah hai seh,” tiah khoh zetin thu a pe hai.

31 ^aAsinan an fehsuak ih, Jesu-ih thu cu cuih ram pumpi ah an thăn.

9:31^a Mar 7:36

Ṭawng Thei Lo a Ṭawng

32 An fehsuak laiah, ngai hnik, khawse pawlh mi, ṭawng thei lo pa pakhat Jesu hnenah an rak hruai. 33 ^aJesu in khawsia a dawisuak hnuah ṭawng thei lo pa cu a rak ṭawngsuak. Cule mipi cu an mang a bang ih, “Israel ram ah hivek hi hmuh a rak si dah lo!” tiah an ti.

9:33^a Mar 2:12

34 Asinan Farasipawl cun, “Khawsiapawlih lal thawngin khawsiapawl a dawisuak a si,” tiah an ti.

Jesu-ih Lainatnak

35 Cun Jesu cu khawpipawl le khawtepawl hmuahhmuah a fángsuak, an sinakokpawl ah a zirh ih lalram thuthangṭha a phuang. Cule mipi lakah nathri phun zakip le natnak phun zakip a damter. 36 ^aCun Jesu in mipi a hmuh tikah, khāltu nei lo tuu rual bangin cau le vâkdarh ih an um ruangah a lainat hai. 37 ^bCule Jesu in a dungthluntupawl hnenah, “Thlairawl khawm ding a tam tuk, asinan hnaṭuantu an mál. 38 Curuangah thlairawl khawm ding neitu Bawipa hnenah a thlairawl khawmnak hmun ih hnaṭuantupawl thlah dingin thlacam uh,” tiah a ti.

9:36^a Mip 27:17; 1Sp 22:17; Eze 34:5-6; Zek 10:2; Mar 8:2

9:37^b Luk 10:2; Joh 4:35

10

Apostol Hleihnih

1 ^aJesu in a dungthluntu hleihnih pawl cu a hnenah a kokhawm hai ih, thlarau bawrhhlawh pawl dawisuak dingin an parih thuneihnak le nathri phun zakip le natnak phun zakip damter dingin thuneihnak a pek hai. 2 Apostol hleihnih pawlih hmin cu: a hmaisabikah, Peter tiih an kawh mi, an hotu pa Simon le a naupa Andru, Zebedi-ih fapa James le a naupa John, 3 Filip le Bartholomeo, Thomas le siah khawngtu Mathai, Alfias-ih fapa James le Thaddias tiih an kawh mi Lebbias, 4 ^bKanaan-mi Simon le Jesu phiarsawmtu Judas Iskariot tla an si.

10:1^a Mar 3:13-15; Luk 4:36

10:4^b Mar 14:10; Apo 1:16

Jesu in Mi Hleihnih a Thlah

5 ^aCuih hleihnih pawl cu Jesu in a thlah hai ih, an hnenah hitin thu a pe, “Zentelpawl lakah va feh hlah uhla, Samaria-mipawlih khuapawl ah va lut hlah uh. 6 ^bCuhnakin a hlo mi tuu run Israel sungza hnenah va feh sawn uh. 7 Nan va feh tikah, ‘Vancung uknak cu a nai zo a si,’ ti hi phuang uh. 8 Mina damter uh, mithi thoter uh, miphar thiangter uh, khawsia dawisuak uh. A lakin nan ngah ih, a lakin pe uh.

10:5^a 1Sp 16:24; 2Sp 17:24; Luk 9:52; Joh 4:4-9; Apo 8:5, 25

10:6^b Jer 50:6

9 ^a“Nan taiṭawn paisa bawm sungah sui siseh, ngun siseh, dar siseh keng hlah uh. 10 ^bCun khualtlawnnak zâl siseh, kâwrfual zun hnih siseh, kedam hlei siseh, kianghrăwl siseh keng fawn hlah uh; ziangahtile hnaṭuantu cu ei tlak a si.

10:9^a Luk 22:35

10:10^b 1Ti 5:18

11 “Cule khawpi ah siseh, khawte ah siseh nan va luhnak pauhpauh ah mitling tlak zo a si ti sut uh, cule cuih khua nan suahsan hlan sung cuih inn ah cun cām uh. 12 ^aCule cuih inn sungih nan va luh tikah, cibaibûk uh. 13 Cuih sungkua cu a tling tlak mi an si le, nan daihnak cu cuih sungkua ah um seh. Asinan cuih sungkua cu a tlak lo asile, nan daihnak cu nan parah kirsal seh. 14 ^bNanmah lo cohlang loin, nan ṭawngkampawl khal ngaithla duh lo tu pauhpauh cu, cuih inn simaw, cuih khua simaw nan suahsan tikah nan ke ih leivut cu thingtla ta uh. 15 ^cThungaiin ka lo sim, thuṭhen ni ah cuih khua hnakin Sodom le Gomorrah ram cu an tuar a dêmsawn ding.

10:12^a 1Sam 25:6

10:14^b Neh 5:13; Mar 6:11; Luk 9:5; Apo 13:51

10:15^c Apo 17:31; 2Pe 2:6; 1Joh 4:17; Jud 1:7

Jesu Dungthluntupawl Hrem an Si Ding

16 ^a“Ngai hnik uh, cinghnia rual lakih tuu rual vekin ka lo thlah a si. Curuangah rul vekin fim uhla, thuro vekin pawikhawih loin um uh. 17 ^bAsinan minungpawl kha va ralring uh, ziangahtile khawnsilpawl hnenah an lo thlen ding ih, an sinakokpawl ah an lo vaw ding. 18 ^cKeimah ruangah uktupawl le siangpahrangpawl hmaiah anmah le Zentelpawl hnenah thutheihpitu ah hruai nan si ding. 19 ^dAsinan anmahpawl hnenih an lo thlen tikah, ziangtin tiin le ziang ka ṭawng ding tiin nan dawnhar hlah uh. Ziangahtile nan ṭawng ding mi cu cuih tikcu teah cumi cu pek nan si ding. 20 ^eZiangahtile a ṭawngtu ding cu nanmah nan si lo, nan Paih Thlarau in nanmah hmangin a ṭawng sawn ding a si.

10:16^a Luk 10:3; Apo 20:29; 1Ko 14:20

10:17^b Mar 13:9; Apo 5:40

10:18^c Apo 25:24-26

10:19^d Suah 4:12

10:20^e Luk 12:11-12

21 ^a“Unau le unau thi dingin an phiarsawmaw ding, pa in fa a phiarsawm ding. Falepawl in an nu le an pa an dodal ding ih, thihnak tiang an thlen ding. 22 ^bKa hmin ruangah mi hmuahhmuah in an lo hua ding. Asinan a cemnet tiangih a tuarsuaktu cu rundam a si ding. 23 ^cKhaw pakhat ih an lo hrem tikah, khaw dangah tlân uh. Ziangahtile thungaiin ka lo sim, Minung Fapa a rat hlanah, Israel ram ih khuapawl nan pál thluh lo ding.

10:21^a Mar 13:12

10:22^b Mar 13:13; Luk 21:19; Joh 15:21; Thu 2:10

10:23^c Luk 17:30

24 ^a“Dungthluntu cu a zirhtu pa hnakin a cungnungsawn lo ih, siahhlawh khal a bawipa hnakin a cungnungsawn lo. 25 ^bDungthluntu cu a zirhtu pa tluk a si ih, siahhlawh khal a bawipa tluk asile a tawk a si. Intêk pa kha Beelzabub tiih an kawh a si ahcun, a sungkuapawl cu ziang tluk nasa sinsinin an ko pei?

10:24^a Joh 13:16

10:25^b Mar 3:22

Pathian Ṭih Aw, Minung Ṭih Hlah

26 ^a“Curuangah annihpawl kha ṭih hlah uh. Ziangahtile phuanlăng leh lo dingih khuh mi zianghman a um lo ih, theih leh lo dingih thuh mi khal zianghman a um lo. 27 Thim ih ka lo sim mi kha tleu ah va rel uh; cule nan hna ih nan theih mi kha, inn par ihsin phuang uh. 28 ^bCule taksaruangpum that thei naih, thlarau that thei lo tu minungpawl kha va ṭih hlah uh. Cuhnakin taksaruangpum le thlarau a pahnih ih hell sungih a hloralter thei tu pa kha ṭih sawn uh. 29 Sunṭam pahnih kha ^cassarion pakhat ah an zuar a si lo maw? Cule nan Pai siannak lo cun cupawl lakih pakhat hman lei ah a tla lo ding. 30 ^dCun nan lu parih sám phang hman a zaten siar thluh a si. 31 Curuangah ṭih hlah uh, nannih cu sunṭam tampi hnakin nan man a khungsawn a si.

10:26^a Mar 4:22; Luk 8:17

10:28^b Isa 8:12-13; Heb 10:31

10:29^c assarion: Rom dar paisa a si ih, dinari ṭhen 16 ih ṭhen khat tluk a si. Dinari khat cu ni khat hlawh a si.

10:30^d 1Sam 14:45; 2Sam 14:11; 1Sp 1:52; Luk 21:18; Apo 27:34

32 ^a“Curuangah zokhal milai hmaiih i ṭantu cu, kei khal in van ih a um mi ka Paih hmaiah ka ṭăn ve hai ding. 33 ^bAsinan zokhal milai hmaiih i hnáwngtu cu, van ih a um mi ka Paih hmaiah ka hnáwng ve ding.

10:32^a Rom 10:9

10:33^b Mar 8:38; 2Ti 2:12

34 “Hi leitlun ah remnak run keng ih ra ah in ruat hlah uh. Remnak thlen dingah ka ra lo ih, ralnâm thlengter dingah ka ra sawn a si. 35 Ziangahtile

Mi pakhat in a pa doter dingah,
Fanu in a nu doter dingah le
Mo in a ni doter dingah ka ra a si.
36 ^aMi pakhat ih ral cu amai sungkaw-mi an si ding.

10:36^a Mik 7:6

37 ^a“A pa simaw, a nu simaw keimah hnakih a duhdaw sawn tu cu ka hrangah a tlak lo. Cule a fapa simaw, a fanu simaw keimah hnakih a duhdaw sawn tu cu ka hrangah a tlak lo. 38 ^bCule amai khraws la tahratih i thlun lo tu cu ka hrangah a tlak lo. 39 ^cA nunnak hmutu cun a nunnak a hloh ding, keimah ruangih a nunnak hlohtu cun a nunnak a hmu ding.

10:37^a Luk 14:26

10:38^b Luk 14:27

10:39^c Joh 12:25

40 ^a“A lo cohlangtu cun keimah i cohlang, cule keimah i cohlangtu cun i thlahtu a cohlang a si. 41 Profet pakhat kha profet hmin ih cohlangtu cun profet-ih lawmman a ngah ding. Cule midingfel pakhat kha midingfel hmin ih cohlangtu cun midingfel paih lawmman a ngah ding. 42 ^bCule dungthluntuih hmin in hi nauhak te pawl lakih pakhat in dingah tidai no khat a petu zokhal, thungaiin ka lo sim, a lawmman a hloh hrimhrim lo ding,” tiah a ti.

10:40^a Suah 16:8; Luk 9:48; Joh 12:44; Gal 4:14

10:42^b Thf 14:31; Mar 9:41; Apo 10:4; Heb 6:10

11

Baptisma Petu John le Jesu

1 Cule hitin a si, Jesu in a dungthluntu hleihnih pawl thu a pek ṭheh hnuah, cu tawk hmun ihsin cuih kiangkap khuapawl ah thuzirh le thusim dingin a păwksuak.

2 Thawnginn sungih um John in Khrih-ih hnaṭuan mipawl a hna in a theih tikah, a dungthluntupawl lak ihsin mi pahnih a hei thlah ih, 3 ^aa hnenah, “Nangmah hi a ra ding mi Pa cu na simaw, asilole a dang kan rak thlir hrih ding saw?” tiah an ti.

11:3^a Sam 118:26; Joh 11:27; Heb 10:37

4 Cule Jesu in a sawn hai ih an hnenah, “Va feh uhla, nan theih mi le nan hmuh mi thilpawl hi John va sim uh. 5 ^aMitcawpawl in khua an hmu ih, kebáipawl an feh; mipharpawl an thiang ih, hnasetpawl in an thei thei; mithipawl an tho ih, mifarahpawl hnenah thuthangṭha phuan a si. 6 Keimah ruangih a tlubah lo tu cu, mithlawsuak a si,” tiah a ti.

11:5^a Isa 35:4-6; Luk 4:18-19

7 John-ih dungthluntupawl an tlun hnuah, Jesu in John-ih thuhla mipi hnenih sim a thawk. “Ziang zoh dingah so ramṭhing ah nan va feh? Thli ih a sĕmhnin rero mi câlte kung zoh dingah maw? 8 Ziang zoh dingah so nan va feh? Sinfen nêm hruhtu pa zoh dingah maw nan feh? Ngai hnik uh, sinfen nêm hruhtupawl cu siangpahrang innpawl ah an um. 9 ^aZiang zoh dingah so nan feh? Profet zoh dingah maw? Nan hnenah ka lo sim, a dik a si, John cu profet hnakin a ropisawn. 10 ^bZiangahtile,

11:9^a Luk 1:76

11:10^b Mal 3:1; Mar 1:2; Luk 7:27; Joh 3:28

‘Ngai hnik, na hmaiah ka palai ka thlah ding,
Anih in na lamzin cu na hmaiah a timlam ding,’

tiih a thuhla an ngan mi pa cu hi pa hi a si.

11 “Thungaiin ka lo sim, nunau hrin mi lakah baptisma petu John hnakih ropi an um lo. Asinan vancung uknak ih mitenaubik cu, John hnakin a ropisawn a si. 12 Cule baptisma petu John san ihsin tuihsun tiangah vancung uknak in thahrum suahnak a tuar ih, thahrum suahtupawl in cumi cu hramhramin an la. 13 ^aZiangahtile John a lăng hlan tiang cu profetpawl hmuahhmuah le Dān in an rak simsung cia a si. 14 ^bCumi cu nan pawm duh asile, amah hi a ra ding mi pa Elijah cu a si. 15 ^cTheihnak hna a neitu cun thei seh!

11:13^a Luk 16:16

11:14^b Mal 4:5; Luk 1:17; Joh 1:21

11:15^c Mar 4:23; Luk 14:35; Thu 2:7

16 “Tuih san minungpawl hi ziang thawn ka khaikhin hai pei? Annih cu dawr hmun ih to nauhakpawl, an hawipipawl tla koin,

17 ‘Phirivau kan rak lo tumsak ih, nan lâm lo;
Mithi ṭahnak hlapawl kan lo saksak ih, nan ṭap lo,’

tiih tiawtu nauhakpawl an bang.

18 ^aZiangahtile John cu ei lo le in loin a ra ih, annih in, ‘Khawsia a nei a si,’ tiah an ti. 19 Minung Fapa cu ei le in in a ra, cule annih in, ‘Zoh hnik uh, rawl pham le sabit zu pham, siah khawngtupawl le misualpawlih rualpi khi!’ tiah an ti. Asinan ^bfimnak cu a falepawl in thiam an coter a si,” tiah a ti.

11:18^a Luk 1:15

11:19^b fimnak cu a falepawl in thiam an coter a si: Mifimpawlih ṭawngkam cu mifimpawl in an theithiam tinak a si.

Lungthlĕng lo Khuapawl

20 Jesu in thilmak tambik a rak tuahnak khuapawl an lung an thlĕng lo ruangah kawk a thawk. 21 ^a“Maw Korazin, na hmakhua a pit a si! Maw Bethsaida, na hmakhua a pit a si! Ziangahtile nan sungih tuah mi thilmak tampi pawl hi Ṭaiar khua le Sidon khua ah tuah rak si ta sehla, buri sĭnin vutcâm lakah an lung an thlĕngnak a rei zo ding. 22 Asinan ka lo sim a si, thuṭhen ni ah cun nannih hnakin Ṭaiar khua le Sidon khua cu an tuar a dêmsawn ding. 23 ^bCule van tiang khaisan mi, nang, Kapernaum, mithi khua ah dirhtlak na si ding; ziangahtile na sungih tuah mi thilmak tampi hi Sodom khua ah tuah rak si ta sehla, anih cu tuihni tiangin a tang lai ding. 24 Asinan nan hnenah ka lo sim a si, nanmah hnakin Sodom ram in thuṭhen ni ah cun a tuar a dêmsawn ding,” tiah a ti.

11:21^a Amo 1:9; Mar 6:45; Luk 9:10; Joh 1:44; Apo 12:20

11:23^b Isa 14:13-15

Jesu in Cawlhhahdamnak Taktak a Pe

25 ^aCuih cān ah Jesu in a sawn ih, “Maw ka Pa, lei le van ih Lal, ka lo thangṭhat, ziangahtile nang cun hih thilpawl hi mifim le mithiam pawl hnenah na thup ih, mi menmen pawl hnenah na phuanglang. 26 A si, ka Pa, cuti vekih na tuah mi cun na lung a lo hmuiter zet.

11:25^a Luk 22:42; Joh 11:41

27 ^a“Ka Pa in thil hmuahhmuah ka hnenah i pe zo. Pa siarlo zohman in Fapa hi an thei lo. Cule Fapa le an hnenih Fapa in phuanlăng a duh mipawl siarlo zohman in Pa an thei lo.

11:27^a Joh 3:35; 10:15

28 ^a“Nannih hnaṭuan har zet ṭuantupawl le thil rit phurtupawl hmuahhmuah, ka hnenah ra uh, cawlhhahdamnak ka lo pe ding. 29 ^bKa hngawngkol bât uhla, ka hnen ihsin zir uh. Ziangahtile kei cu minunnem le thinlung tăngdawr mi ka si ih, nan thlarau hrangah cawlhhahdamnak nan hmu ding. 30 ^cZiangahtile keiih hngawngkol cu hman a hahdam ih, ka phur khal a zâng a si,” tiah a ti.

11:28^a Suah 33:14

11:29^b Sam 116:7; Jer 6:16; Joh 13:15; Fil 2:5; 1Pe 2:21; 1Joh 2:6

11:30^c 1Joh 5:3

12

Jesu cu Sabbath Lal a Si

1 ^aCuih cān ah Jesu cu Sabbath ni ah sangvut ló lakin a feh. Cule a dungthluntupawl an ril a râwng ih, sangvut vuipawl sih le ei an thawk. 2 ^bFarasipawl in cumi an hmuh tikah Jesu hnenah, “Zoh hnik, na dungthluntupawl in Dān in Sabbath ni ih tuah a sian lo mi an tuah hi!” tiah an ti.

12:1^a Dnp 23:25

12:2^b Suah 20:10; Dnp 5:14; Luk 13:14; Joh 5:10

3 ^aAsinan anih in an hnenah, “David in amah le a zawngih umpawl an ril a rawn tikah, 4 ^b ziang vekin Pathian-ih inn sungah lutin, a hrang le a zawngih umpawl hrangih Dān in ei a sian lo mi puithiampawl hrang lawngih ei sian mi Sangserh a ei ti kha nan rak siar lo maw? 5 ^cAsilole puithiampawl in Sabbath ni ah temple sungah Sabbath an bawrhbangter ih, annih cu sawihnăwm kai loin an um a si ti Dān sungah nan siar dah lo maw? 6 Ka lo sim a si, temple hnakih ropisawn mi hi tawkah a um. 7 ^d‘Thawinak si loin zahngainak ka duh,’ ti ngan miih tican thei uhla cu, mawhnak nei lo cu thiam lo nan rak coter lo ding nan! 8 Ziangahtile Minung Fapa cu Sabbath tlun hmanah Lal a si,” tiah a ti.

12:3^a 1Sam 21:6

12:4^b Pui 24:5, 9

12:5^c Mip 28:9-10; Joh 7:22-23

12:7^d Hos 6:6; Mik 6:6-8

Sabbath Ni ih Mi Tidam

9 Cule cuih hmun ihsin Jesu cu a păwksuak ih, an sinakok sungah a lut. 10 ^aCule ngai hnik, cu tawkah kut ro pa pakhat a rak um. Jesu kha sual an puh thei nak dingah, “Sabbath ni ah Dān in mi damter a siang maw?” tiah Jesu hnenah hi thusuhnak hi an sut.

12:10^a Mar 3:2; Luk 11:54

11 ^aCun Jesu in an hnenah, “Nanmah lakah mi pakhat cu Sabbath ni ah a neihsŭn tuu pakhat kha khur sungah tla sehla, la ih suah lo ding an um ding maw? 12 Minung cu tuu hnakin nasa zetin a man a khung a si. Curuangah Sabbath ni ih thil ṭha tuah cu Dān ah a thiang a si,” tiah a ti.

12:11^a Luk 14:5

13 Cun cu pa hnenah Jesu in, “Na kut hawi hnik,” tiah a ti. Cule a kut cu a hun hawi ih a khat lam vekin a dam. 14 ^aCun Farasipawl cu an suak ih, Jesu thah thei dān ding thu an rawnawkhawm.

12:14^a Sem 37:18; Sam 71:10; Mar 3:6; Luk 6:11; Joh 5:18

Farasipawl in Jesu Thah an Tum

15 Asinan Jesu in cumi a theih tikah cu tawk hmun ihsin a sîp. Cule mipi in an thlun ih, an zaten a damter hai. 16 Cun a thuhla mi dang theihter lo dingin an hnenah a tiam hai. 17 Cuti zawng cun profet Isaiah ih a rak sim mi cu a thlengkimter. 18 ^aIsaiah in,

12:18^a Joh 3:34

“Ngai hnik, hihi ka hril mi ka siahhlawh a si.
Ka duhdawt zet mi a si ih, ka thinlung cu a parah a lung a hmui!
A parah ka Thlarau ka ret ding ih,
Anih in Zentelpawl hnenah diknak thu a thăn ding.
19 Anih cun mi a to lo ding ih,
A au fawn lo ding.
Zohman in kăwtthlerpawl ah a aw an thei lo ding.
20 Diknak cu nehnak ih a hruai lai hlanlo,
A phusuih mi câlte kung hman a tán lo ding ih,
Meica khu a mitter lo ding.
21 ^aCule Zentelpawl in a hmin an rinsan ding,”

12:21^a Isa 42:1-4

tiah a ti.

Jesu le Beelzabub

22 Cule khawse pawlh mi, mitcaw le ṭawng thei lo pa pakhat Jesu hnenah an rak hruai. Cuih mitcaw le ṭawng thei lo pa cu Jesu in a damter, cutin cu pa cu a ṭawng thei ih khua a hmu. 23 Cule mipi zaten an mang a bangtuk ih, “Hi pa hi David-ih Fapa a si ko lo maw?” tiah an ti.

24 ^aAsinan Farasipawl in cuih thu an theih tikah, “Hi pa in khawsiapawlih lal Beelzabub thawng lo cun khawsiapawl a dawisuak lo ding,” tiah an ti.

12:24^a Mar 3:22

25 Cule Jesu in an ruahnakpawl cu a thei ih an hnenah, “Ziang ram khal ṭhenawih amah le amah a doawtu cu a siatrál ding. Cun ziang khua khal siseh, ziang sungkua khal siseh ṭhenawih amah le amah a doawtu cu a dingsuak thei lo ding. 26 Setan in Setan lala a dawisuak asile, amah le amah a doaw ih a ṭhenaw. Ziangtin so a uknak cu a dĭnsuak thei ding? 27 ^aBeelzabub thawngin khawsiapawl ka dawisuak asile, nan fapalepawl in teh zo thawngin so an dawisuak? Curuangah anmah cu nan thuṭhentu an si ding. 28 Asinan kei in Pathian Thlarau thawngin khawsiapawl ka dawisuak asile, Pathian uknak cu nan hnenah a rung thleng zo taktak a si.

12:27^a Apo 19:13

29 “Asilole mi pakhat in micak pa cu a ṭembĕt hmaisak ta lo ahcun ziangtin so micak paih inn ah lutin a thilri a lâksak thei ding? A ṭembĕt hnu lawngah a inn sung ihsin a thilripawl a lâksak thei ding. 30 ^aKa lamih a ṭang lo tu cu i dotu a si ih, i fĭnkhawmpi lo tu cun a ṭhekdarh a si.

12:30^a Mar 9:40; Luk 11:23

31 ^a“Curuangah ka lo sim a si, mi ih an tuah mi sual phun zakip le Pathian an thangsiatnak cu ngaidam a si ding. Asinan Thlarau Thianghlim a thangsiattu cu ngaidam a si lo ding. 32 ^bMinung Fapa dokalhih ṭawngkam a ṭawngsuaktu pauhpauh cu ngaidam an si ding; asinan zokhal Thlarau Thianghlim dokalhih a ṭawngsuaktu cu tuih san ah siseh, a ra lai ding mi san ah siseh ngaidam a si lo ding.

12:31^a Mar 3:28-29; Luk 12:10

12:32^b Mar 10:30; Luk 20:34-35; Efe 1:21; Heb 6:5

A Rah in Nan Thei Ding

33 ^a“Thingkung cu ṭha ko tuah uhla a rah khal a ṭha ding, asilole thingkung cu se ko tuah uhla a rah khal a se ding. Ziangahtile thingkung cu a rah in theih a si. 34 ^bNannih cu rulngân cithlah nan si! Miṭha lo si na cingin ziangtin so thil ṭha nan ṭawng thei ding? Ziangahtile kâ cun thinlung sungih a khatliam mi a ṭawngsuak a si. 35 Miṭha cun a thinlung sungih hlawnthil ṭha a khawl mi a suah ih, miṭha lo cun a thinlung sungih hlawnthil ṭha lo a khawl mi a suah. 36 Asinan ka lo sim a si, minung in ralring loih an ṭawng mi kip kha thuṭhen ni ah ziangruangah an ṭawng ti an relsuak leh ding. 37 ^cZiangahtile na ṭawngkampawl hmangin thiamcoter na si ding ih, na ṭawngkampawl lala hmangin thiam lo coter na si ding,” tiah a ti.

12:33^a Mat 7:15-20; Luk 6:43-44

12:34^b Luk 6:45

12:37^c Job 15:6; Thf 10:14; Jam 3:2

Jonah-ih Hminsinnak

38 ^aCun Dān zirhtu hrekkhat le Farasi hrekkhat pawl in an let ih, “Zirhtu pa, na hnen ihsin hminsinnak hmuh kan duh,” tiah an ti.

12:38^a Mar 8:11-12; Luk 11:16; Joh 2:11, 18; 1Ko 1:22

39 ^aAsinan anih in a sawn hai ih an hnenah, “A sualrál le a uire mi san minungpawl in hminsinnak an duh zet. Sikhalsehla profet Jonah-ih hminsinnak siarlo, hminsinnak dang pek an si lo ding. 40 ^bZiangahtile ngapi pum sungih Jonah ni thum le zan thum sung a um bangin, Minung Fapa khal leilung sungah ni thum le zan thum sung a um ve ding. 41 ^cNineveh khawmipawl cu thuṭhen ni ah tuih san minungpawl zawngah an dīng ding ih, thiam lo an coh ding. Ziangahtile Jonah in thu a sim tikah an lung an thlĕng. Cule ngai hnik uh, Jonah hnakih ropisawn hi tawkah hin a um. 42 ^dThlang lam siangpahrang bawinu khal thuṭhen ni ah tuih san minungpawl zawngah a tho ding ih, thiam lo a coh hai ding. Ziangahtile anih cu Solomon-ih fimnak ngai dingah leilung dĕngpawl ihsin a ra. Ngai hnik uh, Solomon hnakih ropisawn hi tawkah hin a um a si.

12:39^a Luk 11:29

12:40^b Jon 1:17

12:41^c Jon 1:2; 3:5

12:42^d 1Sp 10:1; 2San 9:1

43 “Mi pakhat sung ihsin thlarau bawrhhlawh a suah tikah, cuih khawsia cu cawlhnak hawlin ram car hmunpawl ah a vâk rero ih, a hmu lo. 44 Cun anih in, ‘Ka suahsan mi inn ah ka kirsal ding,’ tiah a ti. Cule a va feh ih cuih inn cu kawlawng le phiahfai le ceimawiin a hmu. 45 ^aCun a feh ih, amah hnakih sualrálsawn a dang khawsia pasarih a va hruai, cule cuih hmun ah cun an lut ih an cêng. Cu paih dinhmun neta cu a hmaisa hnakin a siasawn. Cu vekin tuih san minung sualrál pawl hnen khalah a si ve ding,” tiah a ti.

12:45^a 2Pe 2:20

Jesu-ih Nu le a Naupalepawl

46 ^aMipi hnenih Jesu a ṭawng rero laiah, ngai hnik, amah biak duhin, a nu le a naupalepawl cu lengah an rak ding. 47 Cule mi pakhat in Jesu hnenah, “Zoh hnik, na nu le na naupalepawl cu nangmah lo biak duhin lengah an ding,” tiah a sim.

12:46^a Luk 1:43; Joh 2:1-2, 12; Apo 1:14; 1Ko 9:5; Gal 1:19

48 Cule Jesu in a sawn ih, “Ka nu cu zo a si ih, ka naupalepawl cu zo an si?” tiah a hnenih thusimtu pa hnenah cun a ti.

49 Cule Jesu cun a dungthluntupawl lam kha a kut in a khih ih, “Ngai hnik uh, hipawl hi ka nu le ka naupalepawl cu an si. 50 ^aZiangahtile zokhal van ih a um mi ka Paih duh zawng a tuahtu cu ka naupa le ka farnu le ka nu a si,” tiah a ti.

12:50^a Joh 15:14

13

Thlaici Vawrh Tahṭhimnak

1 Cuih ni thothoah Jesu cu cuih inn ihsin a suak ih, tili kapah a to. 2 ^aMipi tampi in an kulh ruangah Jesu cu lăwng sungah a lut ih a to. Mipi hmuahhmuah cu tili kapah an ding. 3 Cun tahṭhimnakpawl hmangin an hnenah thil tampi a sim, “Ngai hnik uh, thlaici vawrhtu cu thlaici vawrh dingin a fehsuak. 4 Cule thlaici cu a vawrh tikah, a hrekkhat cu lamzin kap tluanah an tla; vatepawl an ra ih, an cuk thluh. 5 A hrekkhat cu lung umnak lei sedâp ah an tla ih, lei a sah lo ruangah thlaici cu an keuh lohli. 6 Asinan ni a hung sat tikah thlai ṭo pawl cu ni sa in a em hai ih, hrám an neih lo ruangah an ro ṭheh. 7 Cule thlaici hrekkhat cu hling rûl lakah an tla ih, hling rûl an ṭhan tikah thlaikungpawl kha an zâp. 8 ^bAsinan thlaici dang cu leiram ṭha ah an tla ih, rah an suah. A hrekkhat cu a let 100, a hrekkhat cu a let 60, a hrekkhat cu a let 30 in rah an suah. 9 Theihnak hna a neitu cun thei seh,” tiah a ti.

13:2^a Luk 5:3

13:8^b Sem 26:12

10 Cule dungthluntupawl cu a hnenah an ra ih, “Ziangruangah mipi hnenah tahṭhimnak hmangih thu na sim?” tiah an sut.

11 ^aCule anih in a sawn hai ih an hnenah, “Ziangahtile vancung uknak thu thawn pehparin thuthuppawl theih thei nak pek nan si zo, asinan cumi cu mi dang hnenah cun pek a rak si hrih lo. 12 Ziangahtile zokhal a neitu cu tam sinsinin pek a si ding ih, tam zet a nei ding. Asinan zokhal a nei lo tu cu a neih cia mi hman a hnen ihsin lâksak a si ding. 13 ^bCuruangah an hnenah tahṭhimnak in thu ka sim a si. Ziangruangahtile hmu na cingin theihthiamnak thawn an hmu lo. Ngaithla na cingin an thei lo ih a theih khal an theithiam lo. 14 Profet Isaiah in,

13:11^a 1Ko 2:10, 14; Kol 1:27; 1Joh 2:20, 27

13:13^b Dnp 29:4; Jer 5:21; Eze 12:2

‘Ngaithla na cingin, nan theithiam lo ding.
Hmu na cingin, theihthiamnak thawn nan hmu lo ding.
15 ^aZiangahtile hi minungpawlih thinlung cu a cawlăwl ih hnaset vekin an um,
An mit khal an rak sîng.
Cu lo asile an mit in an hmu ding ih, an hna in an thei pang ding,
Cu lo asile an thinlung in an theithiam ding, cule an hawikir ding ih,
Ka damter hai pang ding,’

13:15^a Isa 6:9-10; Joh 12:40; Apo 28:26-27; Rom 11:8

tiih a rak simsung mi cu anmah ah a thlengkim a si.

16 “Asinan an hmuh ruangah nan mit cu mit hualvanṭha an si ih, an theih ruangah nan hna cu hna hualvanṭha an si. 17 ^aThungaiin ka lo sim, profet tampi le midingfel tampi in nan hmuh mipawl hi hmuh an rak hiar zet nân, an rak hmu lo. Nan hna ih nan theih mipawl hi theih an rak hiar zet nân, an rak thei lo.

13:17^a Joh 8:56; Heb 11:13; 1Pe 1:10-12

18 “Curuangah thlaici vawrh tahṭhimnakih tican hi ngai hnik uh: 19 mi pakhat khat in Pathian uknak thawn pehparin kamsuakthu a thei ih, cumi cu a theithiam lo. Cule misualrál pa a ra ih, thlaici vawrhtu in a thinlung sungih a vawrh mi kamsuakthu cu a lâkhlosak. Cumi cu thlaici vawrhtu in lamzin kap tluanih a vawrh mi thlaici an si. 20 Lung umnak lei sedâp ih a vawrh mi thlaici cu kamsuakthu a thei ih, lungawi zetih a cohlang lohli tu vek a si. 21 Asinan amah ah hrám a neih lo ruangah, cān rei lo te sung lawng a daih. Kamsuakthu ruangih harsatnak le hremnak a ra thlen tikah a tlu lohli. 22 ^aCule thlaici vawrhtu in hling rûl lakih a vawrh mi thlaicipawl cu kamsuakthu a thei ko naih tulai khawvel dawnharnak le lennakih bumnak in cuih kamsuakthu cu a zâp ih, rah nei loih a cang mi vek a si. 23 Cule thlaici vawrhtu in leiram ṭha ih a vawrh mi thlaicipawl cu kamsuakthu a thei ih cumi cu a theithiam. Rah a suah ih, a hrekkhat cu a let 100, a hrekkhat cu a let 60, a hrekkhat cu a let 30 ih rahsuah ngaingai tu vek a si,” tiah a ti.

13:22^a 1Ti 6:9-10, 17

Sangvut le Sangvut Lem Tahṭhimnak

24 ^aJesu in an hnenah tahṭhimnak dang a sim, “Vancung uknak cu mi pakhat a ló sungih thlaici ṭha vawrhtu pa vek a si. 25 Mi an ihthah laiah, a ral pa a ra ih sangvut lakah sangvut ci lem a vawrh, cule a fehhlo. 26 Asinan sangvut a hung ṭhang ih a vuih tikah, sangvut lem pawl khal cu an lang ve.

13:24^a Mar 4:26, 30

27 “Cun intêk paih siahhlawhpawl cu a hnenah an feh ih, ‘Bawipa, na ló ah thlaici ṭha na vawrh a si lo maw? Khui lam ihsin saw sangvut lem an rat?’ tiah an ti.

28 “Cule anih in an hnenah, ‘Cumi cu ral pa in a rak tuah a si,’ tiah a ti. Cun a siahhlawhpawl in a hnenah, ‘Va feh in, va phawi nungla na duh maw?’ tiah an ti.

29 “Asinan anih in, ‘Phawi hlah uh, culole sangvut lem nan phawi tikah sangvut kung nan phawicih pang ding. 30 Sangvut khawm a cût hlanlo sangvut kung le sangvut lem cu ṭhangtlang ko hai seh. Sangvut khawm a cût tikah sangvut attupawl hnenah, “A hmaisabikah sangvut lem kha khawm uhla, urkăng dingah tăwm uh. Cuih hnuah ka cuam sungah rawl cu khawm uh,” tiah ka ti hai ding,’ tiah a ti,” tiin.

Anṭam Ci Tahṭhimnak

31 ^aJesu in an hnenah tahṭhimnak dang a sim, “Vancung uknak cu mi pakhat in anṭam ci la tahratin a ló ih a vawrh mi vek a si. 32 ^bAnṭam ci cu ci hmuahhmuah lakih a fatebik mi a si taktak; asinan a hung ṭhan tikah cun thlai dang pawl hnakin a tumsawn ih, kungpi ah a hung cang, cutin tlun zuang vatepawl tla an ra ih, a hngeṭêkpawl ah an riak,” tiah a ti.

13:31^a Luk 17:6

13:32^b Sam 104:12; Eze 17:23; Dan 4:12

Thilnu Tahṭhimnak

33 ^aCule an hnenah a dang tahṭhimnak a simsal, “Vancung uknak cu nunau pakhat in thilnu la tahratin sangphŭt ^bsaton thum sungah phum ih, sangphŭt hmuahhmuah thotertu thilnu vek a si,” tiah a ti.

13:33^a Sem 18:6; Gal 5:9

13:33^b saton: Grik ṭawng a si ih, saton pakhat cu no 28 hrawng a si.

Simsungnak le Tahṭhimnak

34 ^aJesu in hi thil zaten mipi hnenah tahṭhimnakpawl hmangin a sim hai. An hnenah tahṭhimnak tel loin a sim lo. 35 ^bCuti vek cun profet in thil cang ding mi a sim mi cu a thlengkimter. Profet in,

13:34^a Joh 16:25

13:35^b Sam 78:2; Rom 16:25-26; 1Ko 2:7; Efe 3:9; Kol 1:26

“Tahṭhimnak hmangin ka kâ ka ang ding.
Leitlun hramthăwk ihsin thuh mi thilpawl ka ṭawngsuak ding,”

tiah a ti.

Sangvut Lem Tahṭhimnak Simfiangnak

36 Jesu in mipi a tlunter hai ih, inn sungah a lut. Cule a dungthluntupawl a hnenah an ra ih, “Ló sungih sangvut lem tahṭhimnak kha in simfiang aw,” tiah an ti.

37 Cule anih in a sawn hai ih an hnenah, “Minung Fapa hi thlaici ṭha vawrhtu cu a si. 38 ^aLó cu hi leitlun hi a si, thlaici ṭha ti mi cu lalram fātepawl an si. Asinan sangvut lem cu misualrál paih fātepawl an si. 39 ^bSangvut lem rak vawrhtu ral pa cu Diabol a si, sangvut khawm ti mi cu san cemnak a si ih, sangvut attupawl cu vancungmipawl an si.

13:38^a Joh 8:44; 1Joh 3:10

13:39^b Joe 3:13; Thu 14:15

40 “Curuangah sangvut lem cu an khawm ih, meisa ih an ur bangin, san cemnakah cun a si ve ding. 41 Minung Fapa in a vancungmipawl a thlah ding ih, mi a tlutertu thil hmuahhmuah le dān pahbăltupawl cu a uknak sung ihsin an hlăwnsuak ding. 42 Cule cupawl cu rawhtitnak meisa sungah an paih ding. Cuih hmun ah ṭahnak le hacâng rialnak a um ding. 43 ^aCun midingfelpawl cu an Paih uknak sungah ni bangin an tlang ding. Theihnak hna a neitu cun thei seh!

13:43^a Dan 12:3

Thuh Mi Hlawnthil Tahṭhimnak

44 ^a“Vancung uknak cu ló sungih thuh mi hlawnthil bangtuk a si fawn. Mi pakhat in cumi cu a hmuh tikah a thup, a aipuan tuk ruangah a feh ih, a neih mi zaten a zuar ih cuih ló cu a lei.

13:44^a Fil 3:7-8

Keplung Tahṭhimnak

45 “Vancung uknak cu keplung ṭhabik hawltu sumtuahtu pa bangtuk a si fawn. 46 Cu pa in cuih keplung pakhat mankhung a hmuh tikah a feh ih, a neih mi zaten a zuar, cule cumi cu a lei.

Sur Tahṭhimnak

47 “Vancung uknak cu nga phun zakip khawmtu, tili sungih an vawrh mi sur bangtuk a si fawn. 48 Cuih sur a khah tikah ti kapah an dirsuak. Cule an to ih, nga ṭha pawl cu an bawm sungah an sănkhawm ih, nga ṭha lo pawl cu an hlăwnhlo. 49 Cu vekin san cemnakah cun a si ding. Vancungmipawl an fehsuak ding ih, midingfelpawl hnen ihsin misualrálpawl an thleidang ding. 50 Cule cupawl cu rawhtitnak meisa sungah an paih ding. Cuih hmun ah ṭahnak le hacâng rialnak a um ding,” tiah a ti.

51 Jesu in an hnenah, “Hibang thil hmuahhmuah tla hi nan theithiam maw?” tiah a ti.

Annih in a hnenah, “Kan theithiam a si, Bawipa,” tiah an ti.

52 Cun anih in an hnenah, “Curuangah vancung uknak thu zirh dawngtu Dān zirhtu kip in a thil retnak sung ihsin thil hlun pawl le thil thar pawl a suahtu inn neitu pa bangtuk an si,” tiah a ti.

Nazareth Khua ah Jesu an Hnáwng

53 Cule hitin a si, Jesu in cuih tahṭhimnakpawl a sim ṭheh tikah, cuih hmun ihsin a ṭhawn. 54 Amai khua a va thlen tikah, an sinakok sungah thuzirh a thawk. A thuzirhdān cun an khawruah a harter ngaingai ih, “Hi pa hin khui tawk ihsin hi fimnak le hi thilmakpawl tla hi a ngah a si pei? 55 ^aHi pa cu lettama paih fapa a si lo maw? A nu cu Mary an ti mi kha a si lo maw? Cule a naupalepawl cu James, Joses, Simon le Judas an si lo maw? 56 Cule a farnulepawl hmuahhmuah tla kan hnenah an um a si lo maw? Khui lam ihsin hi pa hin hi thil hmuahhmuah hi a ngah a si pei?” tiah an ti. 57 ^bCule amah ah an bah.

13:55^a Luk 3:23; Joh 6:42

13:57^b Luk 4:24; Joh 4:44; 6:61

Asinan Jesu in an hnenah, “Profet cu amai khawmi le amai innsang siarlo ah cun upat a si,” tiah a ti.

58 An zumlonak ruangah cu tawkah thilmak tampi a tuah lo.

14

Baptisma Petu John Lu Tán a Si

1 ^aCuih cān ah ^bHerod Tetrak in Jesu hminthanzia a rak thei. 2 Cule a siahhlawhpawl hnenah, “Hi pa cu baptisma petu John a si, mithi lak ihsin a thosal a si. Curuangah thilmakpawl amah ah an lang a si hi,” tiah a ti. 3 ^cZiangahtile Herod in a unaupa ^dFilip-ih nupi ^eHerodias ruangah John cu a kai ih a ṭawn, cule thawng ah a thlak. 4 ^fZiangruangahtile John in a hnenah, “Amah na ṭhit cu Dān in a siang lo,” tiah a ti. 5 Cule Herod in John thah ding a duh zet nân mipi a ṭih. Ziangruangahtile John cu profet a si tiah an ruah mi a si.

14:1^a Mar 8:15; Luk 3:1, 19; 9:7-9; Apo 4:27

14:1^b Herod: Nauhakpawl thattu Herod-ih fapa Herod Anṭipas a si.

14:3^c Luk 3:19-20

14:3^d Filip: Nauhakpawl thattu Herod-ih fapa Herod Filip I a si.

14:3^e Herodias: Nauhakpawl thattu Herod-ih tunu a si.

14:4^f Pui 18:16; 20:21

6 Asinan Herod-ih suahcam a thlen tikah, Herodias-ih fanu cu Herod le a mipi hmaiah a lām ih, Herod-ih lung a hmuiter zet. 7 Curuangah Herod in a hnenah a dil mi pauhpauh pe dingah sesămin thu a kam. 8 A nu ih a rak fawrh cia vekin, “Baptisma petu John-ih lu kha khēng in hi tawkah i rak pe aw,” tiah a ti.

9 Cumi cun siangpahrang riah a seter. Asinan sesămin thu a rak kăm zo ruangah le a rawl hilpipawl ruangah cumi cu pe dingin thu a rak pe. 10 Cule thawnginn sungah John-ih lu va tán dingin mi a thlah. 11 Cule a lu cu khēng in a rak keng ih, cuih falanute cu a pe. Cule anih in a nu a pe sin. 12 ^aCun John-ih dungthluntupawl cu an va feh ih, a ruak an la, cule an phum. Cule an feh ih, Jesu an sim.

14:12^a Apo 8:2

Mi 5000 Rawl Donak

13 Cuih thu Jesu in a theih tikah, cuih hmun ihsin a sīp ih, lăwng in amah te lawngin ramṭhing ah a feh. Asinan mipi in cuih thu an theih tikah, an khua cio ihsin ke in amah an thlun. 14 Jesu cu a fehsuak ih, mipi tampi a hmuh tikah a lainat hai, cule an minapawl a damter.

15 Zan lam a thlen tikah, a dungthluntupawl cu a hnenah an ra ih, “Hi hmun hi ramṭhing a si, khua khal a sîm zo. Khaw sung pawl ah feh in anmai hrangih rawl lei dingin mipi kha thlah hai aw,” tiah an ti.

16 Asinan Jesu in an hnenah, “Annih feh a ṭul lo. Nanmah in an ei ding rawl pe uh,” tiah a ti.

17 Cule annih in a hnenah, “Hi tawkah sang hlăwm nga le nga pahnih lawng kan nei,” tiah an ti.

18 Anih in, “Cupawl cu hi tawkah ka hnenah rak keng uh,” tiah a ti.

19 ^aCun mipi cu hrampi parih to dingin thu a pe hai. Cule sang hlăwm nga le nga pahnih cu a la ih, van lam hawiin lungawi thu a sim ih a phel. Cule sang cu a dungthluntupawl a pek ih, a dungthluntupawl in mipi an pe. 20 Cun an zaten an ei ih, an khawp zet, cule an hlah mi nepnawi cu an sar ih, kho hleihnih a khat. 21 A eitupawl cu nunaupawl le nauhakpawl hleiah patling 5000 hrawng an si.

14:19^a 1Sam 9:13; Mar 8:6; Luk 9:16; Apo 2:42; 1Ko 10:16; 1Ti 4:4

Jesu Ti parah a Feh

22 Jesu in mipi a tlunter hai laiah a hlanah tili khat lam ralah rak feh sung dingin a dungthluntupawl cu lăwng sungah a lutter lohli. 23 ^aCule mipi a tlunter hnuah, thlacam dingin amah lawng tlang parah a kai. Khua a sim tikah, cu tawkah cun amah te lawng a um. 24 Lăwng cu tili laitakah a um, anmah lamih thlipi a hran ruangah tisuar in an lăwng cu suk le so ah a thēn ciamco.

14:23^a Luk 3:21

25 Cun zan sentari kil a ṭum litnak ah Jesu cu anmah lam panin tili parah a feh. 26 ^aTili parih a feh kha a dungthluntupawl in an hmuh tikah an ṭih zet. “Thla a si!” tiah an ti. Cule ṭihin an ausuak.

14:26^a Luk 24:37

27 ^aAsinan hmakhatteah Jesu in an hnenah a ṭawng ih, “Ṭih hlah uh! Keimah sokhaw ka si, ṭih hlah uh,” tiah a ti hai.

14:27^a Dan 10:12; Luk 1:13, 30; Apo 18:9; 23:11; Thu 1:17

28 Cule Peter in a sawn ih a hnenah, “Bawipa, nangmah na si le, ti parin na hnenih feh dingah thu i pe aw,” tiah a ti.

29 Cule Jesu in, “Ra aw,” tiah a ti. Cule Peter cu lăwng sung ihsin a suak ih, ti parin Jesu lam panin a feh. 30 Asinan thli a cak tuk ti a hmuh tikah, Peter in a ṭih. Cule pil a thawk ih, “Bawipa, i run aw!” tiah a au.

31 Cule hmakhatteah Jesu in a kut a hei dawh ih, Peter cu a kai. Cule a hnenah, “Maw nang zumnak mál pa, ziangah so na rinhlelh?” tiah a ti. 32 Cule lăwng sungih an luh tikah, thlipi cu a reh.

33 ^aCun lăwng sungih um mipawl cu an ra ih, Jesu an bia, “Nangmah cu Pathian Fapa rori na si,” tiah an ti.

14:33^a Mat 4:3

34 Tili an tanngah tikah, Genesareth ram an va thleng. 35 Cule cu tawkih minungpawl in Jesu a si ti an theihthiam tikah, cuih ram kiangkappawl hmuahhmuah ah mi an thlah ih, a hnenah mina hmuahhmuah an ratpi. 36 Cule a sinfen zimte tal thamter siang dingin Jesu an dil. Cule a thâmngahtu zaten an dam.

15

Thil Thiang le Thiang Lo

1 Dān zirhtupawl le Farasipawl kha Jerusalem ihsin Jesu hnenah an ra ih, 2 “Ziangah so na dungthluntupawl in kan pupápawlih thurosiah an thlun lo? Ziangruangahtile rawl an ei tikah an kut an khawlh lo a si,” tiah an ti.

3 Jesu in a sawn hai ih an hnenah, “Nannih teh ziangah so nan thurosiah ruangah Pathian thupek nan pahbăl? 4 ^aZiangahtile Pathian in, ‘Na nu le na pa upat aw,’ tiin le ‘A nu le a pa dokalhih ṭawng sia a ṭawngtu cu thah a si pei,’ tiah thu a pe.

15:4^a Suah 20:12; 21:17; Pui 20:9; Dnp 5:16; Efe 6:2

5 “Asinan nannih cun, ‘Zokhal in a pa hnenah simaw, a nu hnenah simaw, “Ka hnen ihsin nan rak ngah ding mi hlawknak pauhpauh cu Pathian hrangih thilpek a si,” tiah nan ti, cule cu pa cu a nu le a pa upat ding mawhphurhnak a nei nawn lo,’ tiah nan ti. 6 Cuti cun nan thurosiah ruangah Pathian thupek cu zianghmanlo ah nan canter. 7 Nannih midepdepawl! Isaiah in nan thuhla a phuan tikah, a ti ṭha riai a si.

8 ‘Hi minungpawl cun an kâ in in ra naih ih,
An hmur in in upat;
Asinan an thinlung cu ka hnen ihsin a hla zet.
9 ^aIn biaknak cu a lak men a si,
An thurin zirh mipawl khal minung ih thupek men an si,’ a ti,”

15:9^a Isa 29:13; Mal 2:2; Kol 2:20-22

tiah a ti.

10 Jesu in mipi cu a hnenah a ko hai ih, an hnenah, “Ngaithla uhla, theithiam uh. 11 ^aMilai cu a kâ sungih a lut mi in a bawrhbangter lo, cuhnakin a kâ sung ihsin a hung suak mi in a bawrhbangter sawn a si,” tiah a ti.

15:11^a Apo 10:14-15

12 Cun a dungthluntupawl an ra ih, a hnenah, “Hih thu an hna ih an theih tikah, Farasipawl an lung a si lo ti hi na thei maw?” tiah an ti.

13 ^aAsinan Jesu in a sawn hai ih, “Vancung ih a um mi ka Pa ih a rak phun lo mi kung zaten phawi a si ding. 14 ^bAnmah ten um ko hai seh. Annih cu mitcawpawl hruaitu mitcaw an si. Mitcaw in a dang mitcaw a hruai a si ahcun, an pahnih in khur sungah an tla ding,” tiah a ti.

15:13^a Isa 60:21

15:14^b Luk 6:39; Rom 2:19

15 Cun Peter in a sawn ih, a hnenah, “Himi tahṭhimnak thu hi in simfiang aw,” tiah a ti.

16 Cu tikah Jesu in, “Nannih khal nan theithiam hrih lo maw? 17 Kâ sungih a lut mi pauhpauh cu pum sungah a feh ih, dailennak hmun ah hlăwnsuahsal a si ti nan theithiam hrih lo maw? 18 ^aAsinan kâ sung ihsin a suak mi thilpawl cu thinlung ihsin an suak ih, cumi cun milai a bawrhbangter sawn a si. 19 ^bZiangahtile thinlung sung ihsin ruahnak ṭha lo, laithahnak, uiretnak, nunau-mipa sualnak, rûkrûknak, theihpinak dik lo le mi thangsiatnakpawl tla an ra suak. 20 ^cMilai a bawrhbangtertu cu cuih thilpawl cu an si. Asinan kut khawlh loih rawl ei cun milai a bawrhbangter lo,” tiah a ti.

15:18^a Luk 6:45; Jam 3:6

15:19^b Gal 5:19-21

15:20^c Rom 14:14

Siria Fonisia nu in a Zum

21 Jesu in cuih hmun a suahsan ih, Ṭaiar ram le Sidon ram lamah a feh. 22 Cule ngai hnik, Kanaan nunau pakhat cu cuih ram ihsin a ra suak ih, “David-ih Fapa, Maw Bawipa, ka parah zahngai hram aw! Ka fanu cu siava zetin khawsia in a pawlh a si,” tiah a au.

23 Asinan Jesu in cu nu cu kam khat hman a rak sawn lo. Cule a dungthluntupawl a hnenah an ra ih, “Hi nu hi dawihlo aw, ziangahtile kan dung lamah a au rero,” tiah Jesu an dil.

24 ^aJesu in a sawn hai ih, “Pathian in Israel sungza tuu hlo pawl hnen lawngah i thlah,” tiah a ti.

15:24^a Rom 15:8

25 Cu nu cu a feh ih Jesu hmaiah a khuk a bil ih, “Bawipa, i bawm hram aw!” tiah a ti.

26 Asinan Jesu in a sawn ih, “Falepawlih rawl lâksak tahratih uico tete pawl pek cu a ṭha lo,” tiah a ti.

27 Cule nunaunu in, “A si ko, Bawipa, uico tete pawl khal in an pulepawlih cabuai ihsin rawl ṭilfuan cu an ei ve a si kha!” tiah a ti.

28 Cun Jesu in a sawn ih a hnenah, “Maw nunau, zumnak ropi na nei a si! Na duh vekin na hnenah thleng seh,” tiah a ti. Cule cuih tikcucān roriah a fanu cu a dam.

Mi 4000 Rawl Donak

29 Cuih hmun ihsin Jesu cu a suak ih, Galili Tili kapin a feh. Cule tlang parah a hung kai ih, cuih hmun ah cun a to. 30 Mipi tampi a hnenah an ra ih, kebái, mitcaw, ṭawngsuak thei lo, taksa kim lo pawl le mi dang tampi tla an rak hruai, cule Jesu-ih ke hramah an ret ih, Jesu in an zaten a damter hai. 31 Ṭawngsuak thei lo pawl an ṭawng thei, taksa kim lo pawl an ṭhasal, kebáipawl an feh ih, mitcawpawl in khua an hmuhziapawl tla an hmuh tikah, mipi an mang a bang. Cule Israel-ih Pathian cu an thangṭhat.

32 Jesu in a dungthluntupawl cu a hnenah a ko hai ih, “Mipi parah lainatnak ka nei a si, ziangruangahtile ka hnenah ni thum an um zo ih, ei ding zianghman an nei lo. Rilrawngin tlunter ding cu ka duh lo, lamlak ah an va ṭāmsāwl pang ding,” tiah a ti.

33 Cule a dungthluntupawl cun a hnenah, “Mipi tampi hi zozai khawp ding rawl cu hi ramṭhing ah khuiah kan hmuh thei ding?” tiah an ti.

34 Jesu in an hnenah, “Sang hlăwm ziang zat nan nei?” tiah a ti.

Cule annih in, “Hlawm sarih le nga fate te málte kan nei,” tiah an ti.

35 Cule Jesu in mipi cu lei parih to dingin thu a pe hai. 36 Cun Jesu in sang hlăwm sarih le nga cu a lâk ih, lungawi thu a sim hnuah a phel ih, a dungthluntupawl hnenah a pek. Cule dungthluntupawl in mipi an zem. 37 An zaten an ei ih, an khawp zet, an hlah mi nepnawi khopi sarih khat an sar. 38 Nunau le nauhak hleiah, a eitu patling 4000 an si. 39 Cun mipi a tlunter hai hnuah, Jesu cu lăwng sungah a lut ih, Makdala ram lamah a feh.

16

Farasipawl le Sadusipawl in Hminsinnak an Hawl

1 ^aFarasipawl le Sadusipawl an ra ih, Jesu an hniksak. Van ihsin hminsinnak an hnenah hmuh dingin an dil.

16:1^a Apo 4:1

2 Jesu in a sawn hai ih an hnenah, “Nannih in, ‘Zan lam a thlen tikah van a sen ruangah nikhua a ṭha ding,’ tiah nan ti. 3 ^aCule zing lamah, ‘Van a sen ih, khua a dur ruangah nikhua a se ding,’ tiah nan ti. Nannih midepdepawl! Nannih in van lăngdan in nikhua nan theithiam, asinan cān hminsinnakpawl cu nan theithiam thei lo. 4 A sualrál le a uire mi san minungpawl in hminsinnak an duh zet. Sikhalsehla profet Jonah-ih hminsinnak siarlo hminsinnak dang pek an si lo ding,” tiah a let hai. Cule Jesu cun a suahsan hai ih a fehhlo.

16:3^a Luk 12:54-56

Farasipawl le Sadusipawlih Thilnu

5 A dungthluntupawl tili ralkhat lam an thlen tikah, sang ken an rak hngilh. 6 ^aCun Jesu in an hnenah, “Farasipawl le Sadusipawlih thilnu khi ralring uhla, fimkhur uh,” tiah a ti.

16:6^a Luk 12:1

7 Cule annih in cuih thu cu an relkhawm ih, “Hitiih a tinak săn cu sang zianghman kan rak ken lo ruangah a si ding,” tiah an ti.

8 Asinan Jesu in ziang an relkhawm rero ti a thei ih, an hnenah, “Maw nannih zumnak mál pawl, ziangah so sang zianghman nan neih lo thu nanmah lakah nan relkhawm rero? 9 Patling 5000 hrangih sang hlăwm nga le kho ziang zat nan sar ti kha nan theithiam hrih lo a si lo maw, nan cîng lo maw? 10 Patling 4000 hrangih sang hlăwm sarih le khopi ziang zat nan sar ti kha nan cing lo maw? 11 Ziangtin so sang thuhla ka rel mi a si lo ti nan theihthiam lo? Farasipawl le Sadusipawlih thilnu khi va ralring sawn uh,” tiah a ti.

12 ^aCun a dungthluntupawl in sang tuahnak ih an hman mi thilnu lakah ralring uh a ti hai mi si loin, Farasipawl le Sadusipawlih zirhnak lakih an ralrin ding thu a sim sawn a si ti an rak theithiam.

16:12^a Apo 4:1

Jesu, Khrih a Si ti Phuannak

13 Kaisaria Filipi ram ih Jesu a thlen tikah, a dungthluntupawl kha, “Minung Fapa, Keimah hi mi in zo a si in ti?” tiah a sut hai.

14 ^aCu tikah annih in, “Mi hrekkhat in baptisma petu John a si an lo ti. Mi dang pawl in Elijah a si an lo ti. Cule mi dang pawl in Jeremiah, asilole a dang profet pakhat khat a si an lo ti,” tiah an ti.

16:14^a Mar 6:15; Joh 1:21

15 Jesu in an hnenah, “Nannih in teh kei hi zo ka si tiah in ti?” tiah a ti hai.

16 ^aSimon Peter in a sawn ih, a hnenah, “Nangmah cu a nung mi Pathian Fapa, Khrih na si,” tiah a ti.

16:16^a Sam 42:2; Jer 10:10; Apo 14:15; 2Ko 6:16; 1Th 1:9; 1Ti 3:15; Heb 10:31

17 ^aCule Jesu in a sawn ih a hnenah, “Jonah-ih fapa Simon, nang cu mithlawsuak na si, ziangahtile milai titsa le thisen in hih thu hi na hnenah a phuanglang lo, van ih a um mi ka Pa in cuih thu cu na hnenah a phuanglang sawn a si. 18 ^bNa hnenah hihi ka lo sim, nangmah cu Peter na si ih, hih lungpi parah ka kawhhran ka remso ding. Cumi cu mithi khua kăwtkapawl in an neh lo ding. 19 ^cCule vancung uknak tawhfungpawl ka lo pe ding ih, leitlun ih na ṭawn mi pauhpauh cu van ah ṭawn a si ding, cule leitlun ih na phawih mi pauhpauh cu van ah phawih a si ding,” tiah a sawn. 20 ^dCun Jesu in a dungthluntupawl kha amah cu Jesu Khrih a si ti zohman sim lo dingin thu a pe hai.

16:17^a 1Ko 15:50; Efe 6:12; Heb 2:14

16:18^b Joh 1:42; Efe 2:20

16:19^c Isa 22:22; Joh 20:23; Thu 3:7

16:20^d Mar 8:30

Jesu in a Thih ding le a Thawhsal ding Thu a Phuang

21 ^aCuih cān thawk ihsin Jerusalem ah a feh tengteng ding thu le miupapawl le puithiam sâng pawl le Dān zirhtupawl hnen ihsin thil tampi a tuardān ding le an that ding ih, a ni thumnak ih thawhtersal a si ding thu tla a dungthluntupawl Jesu in theihter a thawk.

16:21^a Sam 22:6; Isa 53:3; Hos 6:2; Mar 9:31; Luk 9:22, 51; 17:25; 24:21, 46; Joh 2:19; 18:22; Apo 2:23; 1Ko 15:3-4

22 Cun Peter in a dang deuhah Jesu cu a hruai ih, kawk a thawk. “Bawipa, cuvek cu si hram hlah seh, na hnenah cuvek a thleng hrimhrim lo ding!” tiah a ti.

23 Asinan Jesu cu a her ih Peter hnenah, “Setan, ka dungah feh aw! Nang cu ka hrangah tlûknak na si, ziangahtile nang cun Pathian thilpawl ngaihsak loin, minung thilpawl na ngaihsak sawn a si,” tiah a ti.

24 ^aCun Jesu in a dungthluntupawl hnenah, “Zokhal keimah i thlun duhtu cun amah le amah êl-aw sehla, amai khraws lain i thlun seh. 25 ^bZiangahtile zokhal a nunnak humhim a duhtu cun a nunnak a hloh ding, asinan zokhal keimah ruangih a nunnak a hlohtu cun a nunnak a hmu ding. 26 Ziangahtile mi pakhat in leitlun pumpi hi neiin amai nunnak a hloh asile, a hrangah ziang hlawknak so a um? Asilole a nunnak thlĕngnak ding hrangah minung in ziang so a pek ding? 27 ^cZiangahtile Minung Fapa hi a Paih ropitnak le a vancungmipawl thawn a rasal ding, cule mi kip anmai ṭuan mi bangtuk cio in lawmman a pe ding.

16:24^a Luk 14:27

16:25^b Joh 12:25

16:27^c Job 34:11; Sam 28:4; 62:12; Thf 24:12; Jer 17:10; Eze 18:20; Luk 17:30; Joh 14:3; Apo 1:11; Rom 2:6; 1Ko 1:7; 2Ko 5:10; 1Th 2:19; Thu 1:7; 22:12

28 “Thungaiin ka lo sim, hi tawkih a dīng mi, mi hrekkhat cu a uknak thawi Minung Fapa a rat an hmuh lai hlanlo thihnak tep hrimhrim lo ding mi an um,” tiah a ti.

17

Jesu Hmuihmel Thlĕngnak

1 Ni ruk hnuah Jesu in Peter, James le a naupa John cu a hruai hai ih, anmah vial tlang sâng parah a kaisohpi. 2 Cule Jesu cu an hmaiah a hmuihmel a thlĕng. A hmai cu ni vekin a êng ih, a hnipuan cu tleu vekin a var. 3 Cule ngai hnik, an hnenah Mosi le Elijah an rung lang ih, Jesu thawn an beaw rero.

4 Cun Peter in a sawn ih Jesu hnenah, “Bawipa, hi tawkih kan um hi a ṭha; na duh asile, thlam pathum in kan sak pei, na hrangah pakhat, Mosi hrangah pakhat, Elijah hrangah pakhat,” tiah a ti.

5 ^aA ṭawng rero laiah, ngai hnik, mero var zetin anmah a hliap hai. Cule ngai hnik, mero lak ihsin hmakhatteah aw pakhat a ra suak ih, “Hihi ka duhdawt zet mi ka Fapa a si, a parah ka lung a hmui zet. A thu ngaithla uh!” tiah a ti.

17:5^a Apo 3:22-23

6 Dungthluntupawl in cuih aw an theih tikah, an băwkkhup ih, an ṭih zet. 7 Cule Jesu cu a feh ih, a thâm hai. “Tho uh, ṭih hlah uh,” tiah a ti.

8 Khua an hun tăn tikah, Jesu siarlo zohman an hmu lo. 9 ^aCule tlang par ihsin an rung ṭum laiah, Jesu in an hnenah, “Minung Fapa hi mithi lak ihsin a thawhsal lai hlanlo nan hmuh mi larnak hi zohman sim hlah uh,” tiah thu a pe hai.

17:9^a Mar 8:30

10 Cule a dungthluntupawl in a hnenah, “Ziangah so Dān zirhtupawl in Elijah a ra hmaisa tengteng ding an ti?” tiah an sut.

11 ^aJesu in a sawn hai ih an hnenah, “Elijah cu a ra hmaisa taktak ding ih, thil hmuahhmuah a rĕmṭhasal thluh ding. 12 Asinan nan hnenah ka lo sim a si, Elijah cu a ra zo nân an rak theithiam lo. An tuah duh mi hmuah in a parah an rak tuah sawn riangri. Cuvek thothoin, Minung Fapa khal an kut a tuar ve ding,” tiah a sawn hai.

17:11^a Mal 4:6; Luk 1:16-17

13 Cu tikah dungthluntupawl in an hnenah baptisma petu John-ih thuhla a rel a si ti an rak theithiam.

Nauhak pa Damternak

14 Jesu le a dungthluntu pathum tla mipi hnen an thlen tikah, mi pakhat in Jesu a ra pan ih, a hmaiah khukbilin, 15 “Bawipa, ka fapa parah zahngai hram aw, ziangahtile merai nat a nei ih, siava zetin a tuar. Meisa sungah le ti sungah a tla leuhleuh. 16 Na dungthluntupawl hnenah ka rak hruai nân an tidam thei lo,” tiah a ti.

17 Cun Jesu in a sawn ih, “Maw zumnak nei lo le zin pêng zawh tuih san minungpawl, ziangtik tiang so nan hnenah ka um ding ih, ziangtik tiang so ka lo zāwi ding? Nauhak pa cu hi tawk ka hnenah rak hruai hnik uh,” tiah a ti. 18 Cule Jesu in khawsia cu a kawk ih, nauhak pa hnen ihsin a suak. Nauhak pa cu cuih tikcucān roriah a dam.

19 Cun Jesu hnenah a dungthluntupawl anmah vial lawng an ra ih, “Ziangah so kannih hmuah in kan dawisuak thei lo?” tiah an ti.

20 ^aCu tikah Jesu in an hnenah, “Nan zumlonak ruangah a si. Ziangahtile thungaiin ka lo sim, anṭam ci vek zumnak nan neih asile, hi tlang hnenah, ‘Hi tawk ihsin ṭhawn aw,’ nan ti ding ih a ṭhawn mai ding. Cule nan hrangah thil cang thei lo mi a um lo ding. 21 Sikhalsehla khavek khawsia cu thlacamnak le rawl ulhnak siarlo cun an suak lo ding,” tiah a ti.

17:20^a Luk 17:6; 1Ko 13:2

Jesu in a Thihnak ding le a Thawhsalnak ding Thu a Simsal

22 Cule dungthluntupawl cu Jesu thawn Galili peng ih an umkhawm laiah, Jesu in an hnenah, “Minung Fapa hi mi kut ah phiarsawm a si zikte thlang. 23 Amah cu an that ding ih ni thumnak ah thawhter a si ding,” tiah a ti. Cule nasa zetin dungthluntupawl cu an riah a sia.

Peter le Jesu in Siah an Pe

24 ^aKapernaum khua an va thlen tikah, ^btemple siah khawngtupawl in Peter an ra pan ih, “Nan zirhtu pa hin temple siah a pe lo maw si?” tiah an ti.

17:24^a Suah 30:13

17:24^b temple siah: Grik ṭawng ah cun didarakma ti a si ih darakma pahnih tinak a si. Hihi mi pakhat hrangih kum khat hrang temple siah a si. Darakma pakhat cu ni khat tha a si.

25 ^aPeter in, “Pe e,” tiah a ti.

17:25^a Rom 13:7

Cule inn sungih a luh tikah, Peter a ṭawng hlanah Jesu in a hnenah, “Simon ziangtin na ruat? Leitlun siangpahrangpawl in siah simaw, ^angunkhuai simaw zo hnenah so an lak? An falepawl hnenah maw, mi dang pawl hnenah so an dil?” tiah a ti.

17:25^a ngunkhuai: Cuzah hnenih pitling mipa lu man siah a si.

26 Peter in, “Mi dang pawl hnenah,” tiah a ti.

Cule Jesu in a hnenah, “Falepawl cun an pek a ṭul lo. 27 ^aSikhalsehla kan tlukterlonak dingah tili ah va feh awla, ti sungah sio va thla aw. Cule na kaih hmaisabik nga kha la awla, a kâ na kau pei ih, tangka shekel khat na hmu ding. Cumi cu la awla, na hrang le ka hrangah an hnenah siah va pe aw,” tiah a ti.

17:27^a Joh 6:61

18

Zo So Mithupibik?

1 Cuih cān ah dungthluntupawl cu Jesu hnenah an ra ih, “Vancung uknak ah zo so mithupibik?” tiah an sut.

2 Cun Jesu in nauhak te pakhat a hnenah a ko ih, an laiah a ret. 3 ^aCule anih in, “Thungaiin ka lo sim, nan thlĕngawk ih, nauhak te pawl vek nan si lo ahcun, vancung uknak ah nan lut hrimhrim lo ding. 4 ^bCuruangah zokhal hi nauhak te vekih a hnuaidawrtu cu vancung uknak ah mithupibik a si. 5 Cule zokhal ka hmin in hi nauhak te vek nauhak pakhat a cohlangtu cu keimah i cohlang a si.

18:3^a 1Pe 2:2

18:4^b Mar 9:35

Tlûkbahnak Thu

6 ^a “Zokhal keimah i zumtu hi nauhak te pawl lakih pakhat a tlutertu cu, a hngawng ah rial lung thlaih tahratin tifinriat thûk zet sungah pilter sehla a hrangah a ṭhasawn a si.

18:6^a Mar 9:42; Luk 17:2

7 ^a“Tlûkbahnak thil ruangah leitlun mipawl cu an hmakhua a pit a si! Ziangahtile tlûkbahnak thil cu a thleng tengteng ding, asinan tlûkbahnak thil thlengtertu cu a hmakhua a pit a si! 8 Na kut in simaw, na ke in simaw a lo tlukter asile tán awla, na hnen ihsin hlăwn aw. Kebái in simaw, taksa kim loin simaw nunnak sungih na luh cu, kut hnih simaw, ke hnih simaw thawi kumkhaw meisa sungih thlak na si hnakin na hrangah a ṭhasawn. 9 Cule na mit in a lo tlukter asile, phawrhsuak awla, na hnen ihsin hlăwn aw. Mit pakhat thawi nunnak sungih na luh ding cu, na mit pahnih thawi hell meisa sungih thlak na si hnakin na hrangah a ṭhasawn.

18:7^a Luk 17:1

A Hlo Mi Tuu Tahṭhimnak

10 ^a“Hi nauhakpawl lakih pakhat nautat lo dingin fimkhur uh, ziangahtile vanram ih an vancungmipawl in, van ih a um mi ka Paih mithmai an hmu ringring a si. 11 Ziangahtile Minung Fapa cu a hlo mipawl rundam dingah a ra.

18:10^a Sem 48:16; Sam 34:7; Apo 12:11, 15; Heb 1:14

12 “Ziangtin nan ruat? Mi pakhat in tuu 100 a nei ih, pakhat cu lamzin a pialhlo asile, a tuu 99 pawl cu tân tain, a pialhlo mi tuu hawl dingin tlangpawl ah a feh lo ding maw? 13 A va hmuh asile, thungaiin ka lo sim, a pialhlo lo mi 99 pawl par hnakin, a hmuhsal mi tuu hlo pakhat parah lungawi aipuangin a um sawn a si. 14 Cuvek thothoin hi nauhakpawl lakih pakhat an siatrál ding khal van ih a um mi nan Paih duh zawng a si lo.

Thil Sual a Tuahtu Unau

15 ^a“Cuihtlunah na unaupa in na parah sual a tuah asile va feh awla, nanmah pahnih theih lawngah a mawhsualnak cu va sim aw. Na thu a lo ngaithla asile, na unaupa cu na ngahsal a si. 16 ^bAsinan na unaupa in na thu a lo ngaithla lo asile, mi dang pakhat simaw, pahnih simaw amah hnenah hruai aw. Cutin Dān vekin, ‘Theihpitu pahnih simaw, pathum simaw ih kâ ihsin ṭawngkam kip cu hngehter a si ding.’ 17 ^cCule an thu ngaithlak a el asile, cuih thu cu kawhhran hnenah sim aw. Kawhhran thu ngaithlak khal a êl thotho asile, cu pa cu Zentel le siah khawngtu vekah ruat uh.

18:15^a Pui 19:17; Luk 17:3; Gal 6:1; Jam 5:19-20

18:16^b Mip 35:30; Dnp 17:6; 19:15; Joh 8:17; 2Ko 13:1; 1Ti 5:19; Heb 10:28

18:17^c Rom 16:17; 1Ko 6:1-6

18 ^a“Thungaiin ka lo sim, leitlun ih nan ṭawn mi pauhpauh cu van ah ṭawn a si ding, cule leitlun ih nan phawih mi pauhpauh cu van ah phawih a si ding.

18:18^a Mat 16:19; Joh 20:23

19 ^a“Nan hnenah ka lo simsal, nan lakih mi pahnih in leitlun ah lungrualin ziang thil khal an dil asile, van ih a um mi ka Pa in cumi cu an hrangah a tuahsak ding. 20 ^bZiangahtile mi pahnih simaw, pathum simaw ka hmin ih an punkhawmnak hmun ah kei cu an lakah ka um a si,” tiah a ti.

18:19^a Mat 7:7

18:20^b Mat 28:20

Mi Ngaidam Lo Siahhlawh Tahṭhimnak

21 ^aJesu hnenah Peter a feh ih, “Bawipa, ka unaupa in ka parih thil sual a tuah mi vei ziang zat tiang so ka ngaidam ding? Vei sarih tiang ka ngaidam ding maw si?” tiah a ti.

18:21^a Mat 6:14; Luk 17:4

22 ^aJesu in a hnenah, “Vei sarih lawng ka lo ti lo, vei sarih ih let 70 na ngaidam ding a si. 23 ^bZiangahtile vancung uknak cu siangpahrang pakhat a siahhlawhpawl thawi sum tifelaw thluh dingih cazin zohfel a duhtu thawn an bangaw. 24 Sum cazin zohfel a thawk tikah tangka ^ctalent 10000 a bâktu pa pakhat a hnenah an rak hruai. 25 ^dAsinan a sam thei lo ruangah amah le a nupi le a fātepawl le a neih mi hmuahhmuah tla zuar ṭheh ih a leiba sam dingin an pu in thu a pe.

18:22^a Sem 4:24

18:23^b Mat 13:24; 25:19

18:24^c talent: Grik ṭawng a si ih talent pakhat cu dinari 6000 tluk a si. Dinari pakhat cu ni khat hlawh a si. Talent pakhat rih lam cu cuai 20 hrawng a si.

18:25^d Pui 25:39; 2Sp 4:1; Neh 5:5, 8; Luk 7:42

26 “Curuangah siangpahrang hmaiah cuih siahhlawh cu a khuk a bil, ‘Bawipa, i rak hngak hrih hram awla, a zaten ka lo sam ṭheh ding,’ tiah a ti. 27 Cun cuih siahhlawh paih pu cun a lainat ih, a suah, cule a leiba cu a rak ngaidam.

28 “Asinan cuih sál pa cu a fehsuak ih, amah dinari 100 a rak bâktu a hnaṭuanpi siahhlawh pakhat a táwng. Cu pa cu a kai ih, a hngawng in a rek, cule, ‘I bâk mi i pe aw,’ tiah a ti.

29 “Cuih a hnaṭuanpi siahhlawh pa cun a ke hramah băwk tahratin, ‘I rak hngak hrih hram awla, a zaten ka lo sam ṭheh ding,’ tiah a dil.

30 “Cule anih in a duh cuang lo, a feh ih, a bâk mi zaten a sam thluh lai hlanlo thawng ah a thlak riangri sawn. 31 A hnaṭuanpi siahhlawh dang pawl in cutiih a tuah an hmuh tikah, an thin a na zet. Cule an feh ih, thil cang mi zaten an pu hnenah an sim.

32 “Cun cuih siahhlawh pa cu a pu in a ko ih, ‘Nang siahhlawh sualrál! I rak dil tikah khan na leiba zaten ka lo ngaidam thluh. 33 Na parih zah ka ngai vekin, na hnaṭuanpi siahhlawh pa parah zah na ngai ve a mawi lo maw?’ tiah a ti. 34 Cule a pu cu a parah a thin a heng tuk ih, a leiba zaten a sam thluh lai hlanlo cu pa cu amah sawisatu ding pawl kut ah a pek.

35 ^a“Cule nan thinlung sung ihsin nan unaupawlih mawhsualnakpawl nan ngaidam lo asile, van ih ka Pa in nan hnenah cu vekin a ti ve ding,” tiah a ti.

18:35^a Jam 2:13

19

Nupi Mâk Thu

1 Cule hitin thil a cang, cuih thupawl Jesu in a sim ṭheh tikah, Galili peng a suahsan ih, Jordan tiva khat lam ral Judia peng ah a thleng. 2 Cule mipi tampi in amah an thlun ih, cu tawkah a tidam hai.

3 Amah hniksak dingah Farasipawl khal a hnenah an ra ih, “Ziang vek thu ruang khalah pasal in a nupi mâk hi Dān in a siang maw?” tiah an ti.

4 ^aCule Jesu in a sawn hai ih an hnenah, “Anmah tuahtu in a tirah mipa le nunau a tuah. 5 ^b‘Cuti a si ruangah mipa in a nu le a pa a tân ta ding ih a nupi a kăwp ding. Cule pahnih cu taksa pumkhat ah an cang ding,’ tiah a ti mi hi nan rak siar dah lo maw? 6 Cutin annih cu mi pahnih an si nawn lo ih, taksa pumkhat an si sawn a si. Curuangah Pathian ih a kăwm zo mi cu minung in ṭhen hlah seh,” tiah a ti.

19:4^a Sem 1:27; 5:2

19:5^b Sem 2:24; 1Ko 6:16; Efe 5:31

7 ^aAnnih in Jesu hnenah, “Cuti asile ziangah so Mosi in mi in a nupi cu mâknak ca a pe ding ih, a mâk thei a si tiah thu a rak pek?” tiah an ti.

19:7^a Dnp 24:1-4

8 Jesu in an hnenah, “Nan lung a ruh tuk ruangah nan nupi nan mâk ding Mosi in a lo sĕn a si. Asinan a hramthăwk ihsin cuti vek a si lo. 9 ^aNan hnenah ka lo sim a si, zokhal nunau-mipa sualnak siarlo ih a nupi a ma ih, nunau dang a ṭhitu cu a uire a si; cule zokhal mâk mi nu a ṭhitu cu a uire a si,” tiah a ti.

19:9^a Luk 16:18

10 A dungthluntupawl in Jesu hnenah, “Nupi thu ah pasal cu, cuti vek a si ahcun, nupi neih lo hi a ṭhasawn,” tiah an ti.

Jesu in Nupi le Pasal Nei Lo ih Um Thu a Zirh

11 ^aJesu in an hnenah, “Cuih nan ti mi thu cu mi hmuahhmuah in an cohlang thei lo. Asinan pek mipawl lawngin an cohlang thei. 12 Ziangahtile mi hrekkhat cu an nuih pum sung ihsin tilper cia mi an um. Mi hrekkhat cu minung ih persakcawp mi an si ih, mi hrekkhat cu vancung uknak ruangah anmah le anmah tilper mi vekin an um. Cuih thu a cohlang thei tu cun cohlang seh,” tiah a ti.

19:11^a 1Ko 7:7-9, 17

Jesu le Nauhakpawl

13 ^aCun an parah a kut suang ding le thlacamsak dingah Jesu hnenah, nauhak tete pawl tla an rak hruai. Asinan a rak hruaitupawl cu a dungthluntupawl in an rak kawk. 14 ^bAsinan Jesu in, “Nauhak tete pawl kha ka hnenah ra hai seh, kham hlah uh; ziangahtile vancung uknak cu hivek mipawlih ta a si,” tiah a ti. 15 An lu parih a kut a suan hnuah, cu tawk ihsin a fehsuak.

19:13^a Mar 5:23

19:14^b 1Pe 2:2

Milian Tlangvalpa

16 ^aCule ngai hnik, mi pakhat a hnenah a ra ih, “Zirhtu ṭha, kumkhaw nunnak ka neih thei nak dingah ziang thil ṭha so ka tuah pei?” tiah a ti.

19:16^a Luk 10:25

17 ^aCu tikah Jesu in a hnenah, “Ziangah so kei cu miṭha i ti? Pathian siarlo zohman miṭha an um lo. Asinan nunnak sungih luh na duh asile, thupekpawl kha thlun aw,” tiah a ti.

19:17^a Pui 18:5

18 ^aCu pa cun Jesu hnenah, “Ziang thupek bik so?” tiah a ti.

19:18^a Suah 20:12-16; Dnp 5:16-20; Jam 2:11

Cule Jesu in, “Lai na that lo pei, na uire lo pei, rûk na ru lo pei, theihpinak dik lo na rel lo pei, 19 ^ana nu le na pa upat aw, nangmah le nangmah na duhdawtawk vekin na innhnen na duhdaw pei,” tiah a ti.

19:19^a Pui 19:18

20 Tlangvalpa in a hnenah, “Ka no lai ihsin cuih thil hmuahhmuah cu ka rak thlun thluh zo. Ziang ka sam hrih?” tiah a ti.

21 ^aJesu in a hnenah, “Famkim na duh asile va feh aw, na neih mi zuarin mifarahpawl va pe aw, cule vanram ah hlawnthil na nei ding. Cule ra awla, i thlun aw,” tiah a ti.

19:21^a Mat 5:48; Apo 2:45

22 Asinan cuih thu cu tlangvalpa in a theih tikah, riahse zetin a fehhlo, ziangahtile anih cun thil tampi a nei a si.

23 ^aCun Jesu in a dungthluntupawl hnenah, “Thungaiin ka lo sim, milian vancung uknak sungih luh ding cu a har a si. 24 Cule nan hnenah ka lo simsal, Pathian uknak sungih milian luh hnakin ṭhim hna kua sungih kalauk luh a áwlsawn,” tiah a ti.

19:23^a 1Ti 6:9-10

25 A dungthluntupawl in cuih thu an theih tikah, an khawruah a har ngaingai, “Cuti asile zo so rundam si thei ding?” tiah an ti.

26 ^a Cule Jesu in anmah cu a zoh hai ih an hnenah, “Cumi cu milai hrangah cun a cang thei lo, asinan Pathian hrangah cun thil hmuahhmuah a cang thei a si,” tiah a ti.

19:26^a Sem 18:14; Job 42:2; Jer 32:17; Luk 1:37; Rom 4:21

27 Cun Peter in a sawn ih a hnenah, “Ngai hnik, ziang hmuahhmuah tân tain nangmah kan lo thlun si khawh, ziang so kan ngah ding?” tiah a ti.

28 ^aCu tikah Jesu in an hnenah, “Thungaiin ka lo sim, thil hmuahhmuah tharter a si ih, laltokham ropi parih Minung Fapa a to tikah, keimah i thluntu nannih khal laltokham hleihnih parah toin, Israel hnám hleihnih pawl thu nan ṭhen ding. 29 ^bCule ka hmin ruangih innpawl siseh, unaupawl siseh, farnupawl siseh, pa siseh, nu siseh, nupi siseh, fātepawl siseh, leirampawl siseh a tansăntu cun a let 100 le kumkhaw nunnak ro ah a co ding. 30 ^cAsinan mi tampi a hmaisabik pawl kha a netabikah an cang ding ih, a netabik pawl kha a hmaisabikah an cang ding.

19:28^a Luk 22:28-30; Thu 3:21

19:29^b Mat 6:33

19:30^c Mar 10:31; Luk 13:30

20

Sabit Hmuan Hnaṭuantupawl

1 “Ziangahtile vancung uknak cu a sabit hmuan sungih hnaṭuantu ding pawl hlawhphalh dingih zingpit teih a fehsuaktu ló neitu pa thawn a bangaw. 2 A hnaṭuantupawl ni khat hlawh man ah dinari paisa pakhat pe dingin a lung a kim ih, a sabit hmuan ah cun a hei thlah hai.

3 “Cule zing lam nazi pakua hrawngah a fehsuak ih, dawr hmun ah zianghman tuah loih ding lak men pawl a va hmu. 4 An hnenah, ‘Nannih khal ka sabit hmuan ah hnaṭuan dingin feh uh. Cule a mawi tawkin ka lo pe ding,’ tiah a ti hai. Cule annih khal an feh. 5 ^aCun sun nazi hleihnih le sîm lam nazi pathum hrawngah a ti kel vekin a tisal. 6 Zan lam nazi panga hrawngah a fehsuak ih, zianghman tuah loih dīngpawl a va hmu. Cule an hnenah, ‘Ziangah so hi tawkah zianghman tuah loin sunnihlawhih nan dīn?’ tiah a ti hai.

20:5^a Isa 62:11; Zek 9:9

7 “Annih in a hnenah, ‘Zohman in hlawh in phalh ve si lo,’ tiah an ti.

“Cule anih in an hnenah, ‘Nannih khal sabit hmuan ah va feh uhla, a mawi tawkin nan ngah ding,’ tiah a ti.

8 ^a“Cuti cun zan lam a rung thleng ih sabit hmuan neitu cu a sum cazin kaitu hnenah, ‘Hnaṭuantupawl kha ko awla, an hlawh man pe aw. A netabikih ka phalh mipawl ihsin thawk awla, a hmaisabik lamah feh vivo aw,’ tiah a ti.

20:8^a Pui 19:13; Dnp 24:15

9 “Zan lam nazi panga hrawngih a phalh mi hnaṭuantupawl an ra ih, an zaten dinari paisa pakhat cio an ngah. 10 A hmaisabikih a phalh mipawl an rat tikah, tamdeuh ngah dingah an ruataw. Annih khal cun dinari paisa pakhat cio an ngah ve. 11 Cumi an ngah tikah, ló neitu pa parah an vuivai. 12 ^a‘Netabikih na phalh mipawl cun nazi pakhat sung lawng an ṭuan. Asinan kannih sunnihlawhih phurrit phurtu le ni sa tuartupawl thawn bangrepin in ngahtlangter,’ tiah an ti.

20:12^a Luk 12:55; Jam 1:11

13 “Asinan anih in an lakih mi pakhat cu a sawn ih, ‘Rual pa, a dik lo mi na parah ka tuah lo. ^aDinari paisa pakhat hlawh dingin na lung a kim a si lo maw? 14 Na ta cu la awla, feh aw. Netabikih ka phalh mi pa khal nan hnenih ka lo pek mi zat thotho pek ka duh a si. 15 ^bKeimai ta a si mi parah cun ka duhdān ih tuah thei nak thu ka nei a si lo maw? Nan iksiknak săn cu ka ṭhat ruangah a si lo maw?’

20:13^a Dinari: 20:2 simfiangnak zoh aw.

20:15^b Dnp 15:9; Mar 7:22

16 “Cu vekin a netabik pawl kha a hmaisabikah an cang ding ih, a hmaisabik pawl kha a netabik ah an cang ding. Ziangahtile mi tampi kawh an si nân, mi málte lawng hril an si,” tiah a ti.

Jesu in a Thih ding le a Thawhsal ding Thu a Vei Thumnak a Sim

17 Jesu cu Jerusalem lam panin a hung so ih, lamzin ih an feh laiah a dungthluntu hleihnih kha a dang teah a hruai hai, cule an hnenah thu a sim. 18 ^a“Ngai hnik uh, Jerusalem ah kan hung so ding ih, Minung Fapa cu puithiam sâng pawl le Dān zirhtupawl hnenah phiarsawm a si ding. Cun annih in thi dingin thu an ṭhen ding, 19 ^b an hmuhsuam, an vuak ih, an khenbĕt thei nak dingah Zentelpawlih kut ah an thlen ding. Cule a ni thumnak ah a thosal ding,” tiah a ti hai.

20:18^a Luk 9:51

20:19^b Apo 2:23

Ropitnak cu Mi va Rĕn hi a Si

20 ^aZebedi fapapawlih nu cu Jesu hnenah a fapale thawn a ra ih, Jesu hmaiah a băwkkhup, cule a hnenah thil pakhat a dil.

20:20^a Mat 4:21

21 Cule Jesu in a hnenah, “Ziang na duh?” tiah a ti.

Anih in Jesu hnenah, “Hi ka fapale pahnih hi na lalram ah na vawrh lamah pakhat, na keh lamah pakhat to dingin thu pe aw,” tiah a ti.

22 ^aCu tikah Jesu in a sawn ih, “Nan dil mi nan theithiam lo, ka in ding mi no nan in thei ding maw? Ka co ding mi baptisma nan co thei ding maw?” tiah a ti.

20:22^a Isa 51:17, 22; Jer 49:12; Mar 14:36; Luk 22:42; Joh 18:11

Cule annih in a hnenah, “Kan ti thei ding,” tiah an ti.

23 ^aJesu in an hnenah, “Ka no cu nan in taktak ko ding, ka co ding mi baptisma khal nan co ko ding. Asinan ka vawrh lam le ka keh lamih to dingih lo pek ding cu keimai thu a si lo. Ka Pa in a rak timtuah cia mipawl hrangah a si sawn,” tiah a ti.

20:23^a Apo 12:2; Thu 1:9

24 ^aA dang dungthluntu pahra pawl in cuih thu an theih tikah, cute unau hnih parah nasa zetin an lung a awi lo. 25 Asinan Jesu in a hnenah a kokhawm hai ih, “Zentel uktupawl cu an uk mipawl parah an lal zet ih, an mithupipawl in an mipi parah thuneihnak an hmang ti nan thei. 26 ^bAsinan nannih lakah cun cu vekin si hlah seh; cuhnakin zokhal nan lakih mithupi si a duhtu cu nan siahhlawh si sawn seh. 27 Cule zokhal nan lakih mithupibik si a duhtu cu, nan sál si ta seh. 28 ^cCu vekin Minung Fapa cu mi ih rĕn mi si dingah a ra lo, mi rian dingin le mi tampi tlen dingah a nunnak pe dingin a ra sawn a si,” tiah a ti.

20:24^a Luk 22:24-25

20:26^b Mar 9:35

20:28^c Suah 30:12; Isa 42:1; 44:22; Luk 12:37; Joh 13:13-16; 2Ko 8:9; Fil 2:7; 1Ti 2:6; Tit 2:14; Heb 9:28; 1Pe 1:18-19

Mitcaw Pahnih in Khua an Hmu

29 Jeriko khua ihsin an pawhsuak laiah, mipi tampi in Jesu an thlun. 30 Cule ngai hnik, lamzin kapih to mitcaw pahnih in Jesu a ra ti an theih tikah, an au ih, “Maw Bawipa, David-ih Fapa, kan parah zahngai hram aw!” tiah an ti.

31 Cu tikah mi tampi in daiten um dingin an rak kawk nân, an au ring deuhdeuh. “David-ih Fapa, Maw Bawipa, kan parah zahngai hram aw!” tiah an ti.

32 Cule Jesu cu a dīng ih, an pahnih in a hnenah a ko hai, “Ziang lo tuahsak so nan duh?” tiah a ti.

33 Annih in, “Bawipa, kan mit khua in hmuter awla kan duh,” tiah an ti. 34 Jesu in a lainat hai ih an mit cu a thâm. Cule hmakhatteah khua an hmu ih, amah an thlun.

21

Jerusalem ah ropi zetin Jesu a Lut

1 ^a Jerusalem an naih vivo ih, Olif Tlang hramih um Betfat khua an thlen tikah, Jesu in dungthluntu pahnih a hei thlah. 2 Cule an hnenah, “Nan hmaiih khua ah khin va feh uhla, an hren mi lāk pi, a fa no thawn nan hmucih ding. Cumi cu phawih hai uhla ka hnenah rak hruai uh. 3 Cule mi pakhat khat in thil pakhat khat a lo suh asile a hnenah, ‘Bawipa in a ṭul hai a si,’ tiah va ti uh. Cule anih in a lo hruaiter hai cih ding,” tiah a ti.

21:1^a Mar 14:26; Luk 19:37; Joh 8:1; Apo 1:12

4 Profet ih a rak ṭawng mi Jesu in a kimter thei nak dingah hi thil hi a cang a si. 5 ^aProfet in,

21:5^a Isa 62:11; Zek 9:9

“Zion fanu hnenah,
‘Zoh hnik, na Siangpahrang cu na hnenah a ra;
Anih cu minunnem a si ih, lâk parah a to,
Cumi cu lāk fa no, lāk note a si,’ tiah sim uh,”

tiah a ti.

6 Cun a dungthluntupawl cu an feh ih, Jesu ih a rak sim hai vekin an tuah. 7 Lāk pi le lāk fa no cu an hei hruai ih, an parah an hnipuanpawl an phah, cule an hnipuanpawl parah Jesu cu an toter. 8 ^aCule mipi tampi in lamzin ah an hnipuanpawl an rak phah. Mi dang in hnahsâwl an sat ih, lamzin ah an rak phah. 9 ^bJesu hmaiih feh mipi le a dung lam ihsin a thluntu pawl an au ih,

21:8^a 2Sp 9:13

21:9^b Sam 118:25-26; Luk 2:14

“David-ih Fapa hnenah Hosana!
Bawipaih hmin ih ra cu thangṭhatin um seh!
Cungnungbikah Hosana!”

tiah an ti.

10 Jerusalem khaw sungih Jesu a luh tikah, an khawpawh in an sa hiamhiam ih, “Hi pa hi zo a si?” tiah an ti.

11 ^aCule mipi in, “Hi pa cu Galili peng, Nazareth khawmi profet Jesu a si,” tiah an ti.

21:11^a Dnp 18:15; Luk 7:16, 39; Joh 1:21, 25

Jesu in Temple a Thianfai

12 ^aCun Jesu cu Pathian temple kulh sungah a lut ih, temple kulh sungih thil zuartupawl le leitupawl hmuahhmuah tla a dawisuak ṭheh. Paisa thlĕngtupawlih cabuaipawl le thuro zuartupawlih tonakpawl khal a linglet ṭheh. 13 ^bCule an hnenah,

21:12^a Suah 30:13; Pui 1:14; Dnp 14:26

21:13^b Isa 56:7; Jer 7:11

“ ‘Ka inn cu thlacamnak inn tiah kawh a si ding,’

tiih ngan a si. Asinan suamhmangpawl pûk ah nan cangter a si,” tiah a ti.

14 Mitcawpawl le kebáipawl cu Jesu hnenah temple kulh sungah an ra, cule anih in a damter hai. 15 ^aCun puithiam sâng pawl le Dān zirhtupawl in mangbangza thilpawl a tuah mi le temple kulh sungih nauhakpawl in, “David-ih Fapa hnenah Hosana!” tiih an au mi an hmuh tikah an thin a heng tuk ih, 16 ^bJesu hnenah, “Hi nauhakpawl ih an ṭawng rero mi hi na thei maw?” tiah an ti.

21:15^a Luk 19:39

21:16^b Sam 8:2

Cu tikah Jesu in an hnenah, “Thei e,

‘Nausenpawl le nausente hnawi fawp lai pawl kâ ihsin,
Thangṭhatnak famkim na co,’

a ti mi kha nan rak siar dah lo maw si?” tiah a ti hai.

17 ^aJesu cun a fehsan hai ih, Jerusalem khaw sung ihsin Bethany khua ah a feh, cule cu tawkah a va riak.

21:17^a Mar 11:1; Luk 24:50; Joh 11:1, 18

Theipi Kung Camsiatnak

18 Jerusalem khaw lam panin zingpit teih a kir laiah, Jesu cu a ril a râwng. 19 ^aCule lamzin kapah theipi kung a hmu ih, a va pan. A parah a hnah siarlo zianghman a hmu lo. Cule Jesu in theipi kung hnenah, “Na parah kumkhuain rah um nawn hlah seh,” tiah a ti. Hmakhatteah cuih theipi kung cu a ro.

21:19^a Isa 34:4; Jer 8:13

20 A dungthluntupawl in cumi an hmuh tikah, an mang a bang ih, “Ziangtin saw theipi kung cu a ro lohli?” tiah an ti.

21 ^aCu tikah Jesu in a sawn hai ih an hnenah, “Thungaiin ka lo sim, zumnak nan neih ih, nan rinhlelh lo asile theipi kung parih thil cang mi vek hi nan tuah thei ding. Culawng si loin, hi tlang hnen khalah, ‘Ṭhawn awla, tipithuanthum sungah va tla aw,’ nan ti asile, nan ti vekin a cang ding. 22 Cule ziangkim zumin thlacamnak ih nan dil mi pauhpauh cu nan ngah ding,” tiah a ti.

21:21^a Luk 17:6; 1Ko 13:2; Jam 1:6

Jesu-ih Thuneihnak Thu an Sut

23 ^aTemple kulh sungah Jesu a lut ih thu a zirh rero laiah, puithiam sâng pawl le mipipawlih miupapawl a hnenah an ra ih, “Ziang thuneihnak in so hih thilpawl hi na tuah? Zo in hih thuneihnak hi a lo pe?” tiah an ti.

21:23^a Apo 4:7

24 Cu tikah Jesu in a sawn hai ih an hnenah, “Kei khal in thu pakhat ka lo sut ve ding, cumi in sim asile, ziang thuneihnak in hih thilpawl ka tuah ti ka lo sim ve ding. 25 John-ih baptisma kha khui ihsin so a si? Van ihsin maw, milai hnen ihsin so a si?” tiah a ti.

Cule cumi cu anmah ten an relkhawm ih, “ ‘Van ihsin a si,’ kan ti asile, ‘Cuti asile ziangah so amah cu nan zum lo?’ tiah in ti ding. 26 Cun, ‘Milai hnen ihsin a si,’ tiah kan ti asile, mipi kan ṭih fawn, ziangahtile mipi zaten John cu profet a si tiah an rak pawm,” tiah an ti.

27 Cule annih in Jesu cu an sawn ih, “Kan thei lo,” tiah an ti.

Cule anih in an hnenah, “Kei khal in ziang thuneihnak in hih thilpawl hi ka tuah ti ka lo sim ve lo ding.

Fapa Pahnih Tahṭhimnak

28 “Asinan ziangtin nan ruat? Mi pakhat in fapa pahnih a nei. A pakhatnak hnenah cun a feh ih, ‘Fapa, tuihsun cu ka sabit hmuan ah va feh awla, hna va ṭuan aw,’ tiah a ti. 29 Anih cun a sawn ih, ‘Ka feh paih lo,’ tiah a ti. Asinan netaah a lung a thlĕng ih a fehsal. 30 Cun a fapa pahnihnak hnenah a va feh ih, cuti vek thothoin a va ti ve. Cule a fapa in a sawn ih, ‘Bawipa, ka feh ding,’ tiah a ti. Asinan a feh lo. 31 ^aCute pahnih lakah zo in so a paih duh zawng a tuah?” tiah a ti hai.

21:31^a Luk 7:29, 50

Annih in a hnenah, “A pakhatnak pa in,” tiah an ti.

Jesu in an hnenah, “Thungaiin ka lo sim, siah khawngtupawl le hlawhhlangpawl cu nan hlanah Pathian uknak ah an lut ding. 32 ^aZiangahtile John cu dingfelnak lamzin in nan hnenah a ra nân, amah cu nan rak zum lo. Asinan siah khawngtupawl le hlawhhlangpawl cun amah cu an zum a si. Amah cu nan rak hmu ko nân, nan lung nan thlĕng lo ih nan zum lo.

21:32^a Luk 3:12-13; 7:36-50

Sabit Hmuan Ṭuanhlawhtupawl

33 ^a“A dang tahṭhimnak thu hi ngai hrih uh: ló neitu pa pakhat in sabit hmuan a tuah. Cuih a hmuan cu hruang in a kulh. Cule sabit sawrnak ding hrangah khur a lai ih, dawlsâng a sak. Cule hmuan ṭuanhlawhtupawl hnenah a pek ta ih, khualtlawngin a feh. 34 Cule sabit rah lawh a cût zik tikah, hmuan ṭuanhlawhtupawl hnenah a siahhlawhpawl cu a rah va la dingin a thlah hai. 35 ^bA hmuan ṭuanhlawhtupawl in a siahhlawhpawl cu an kai ih, pakhat an vua, pakhat an that ih, a dang pakhat cu lungto in an dêng. 36 A hmaisa hnakih tamdeuh a siahhlawh dang pawl a hei thlahsal. Cule a hmuan ṭuanhlawhtupawl cun a hmaisa vek thothoin an rak tuah. 37 Cun a netabikah an hnenah a fapa a hei thlah. ‘Ka fapa cu an ṭihzah ko ding,’ tiah a ti.

21:33^a Sam 80:8; Isa 5:1-7

21:35^b 2San 24:21; Heb 11:36-37

38 ^a“Asinan hmuan ṭuanhlawhtupawl in a fapa an hmuh tikah, anmah le anmah lakah, ‘Hi pa hi ro cotu pa a si, ra uh, that uhsi la, a co ding mi ro lâksak uhsi,’ tiah an tiaw. 39 Cutin cu pa cu an kai, cule sabit hmuan sung ihsin an hlăwnsuak ih, an that.

21:38^a Sam 2:8; Heb 1:2

40 “Curuangah sabit hmuan neitu pa a rat tikah, cuih a hmuan ṭuanhlawhtupawl parah ziang a tuah pei?” tiah a sut hai.

41 ^aAnnih in a hnenah, “Cuih misualrálpawl cu siava zetin a that ṭheh hai ding ih, a sabit hmuan cu sabit a rah cān kip ih a covo rah petu ding hmuan ṭuanhlawhtu mi dang pawl hnenah a pe ding,” tiah an ti.

21:41^a Apo 13:46

42 ^aJesu in an hnenah, “Cathiangpawl in,

21:42^a Sam 118:22-23; Apo 4:11

‘Inn saktupawl ih an hnawn mi lungto kha,
A kilih lungto pawimawhbik ah a cang.
Himi hi Bawipa ih tuah mi a si ih,
Kan mithmuh ah mangbangza a si,’

a ti mi kha nan rak siar dah lo maw?

43 “Curuangah nan hnenah ka lo sim a si, Pathian uknak cu nan hnen ihsin lâk a si ding ih, Pathian uknak rah a suahtu ding miphun hnenah pek a si ding. 44 ^aCule zokhal hih lung parih tla cu a kekkuai ding, cuih lung ih a tlakngah mi cu leivut vekin a cip nêknêk ding,” tiah a ti.

21:44^a Luk 2:34

45 Cun puithiam sâng pawl le Farasipawl in a tahṭhimnak thupawl an theih tikah, anmai thuhla a rel a si ti an rak theithiam. 46 Cule amah kaihdān ding lamzin an hawl nân, mipi in Jesu cu profet a si tin an pawm ruangah mipi an ṭih.

22

Mo Puai Tahṭhimnak

1 Jesu in an hnenah tahṭhimnak thupawl in a sawn hai ih a simsal hai. 2 “Vancung uknak cu a fapa hrangih mo puai timtuahsaktu siangpahrang thawn a bangaw. 3 Cuih mo puai ih ra tel dingih a rak sawm cia mipawl ko dingah a siahhlawhpawl a thlah. Asinan an ra tel duh lo.

4 “A siahhlawh dang pawl a thlahsal ih, ‘Ka sawm mipawl hnenah, “Ngai hnik uh, zanriah ka timtuah ṭheh zo; ka caw cang pawl le ka ṭilva thau zetzet pawl ka that zo ih, thil ziangkim timtuah cia a si. Mo puai ah cun ra thlang uh,” tiah va sim uh,’ tiah a ti.

5 “Asinan annih in an rak pawisa lo, anmai duhnak ah an fehsan men. Pakhat cu a ló ah a rak feh, a dang pakhat cu a thil zuarnak hmun ah a feh. 6 Cule a tāng lai mipawl in a siahhlawhpawl cu an kai, ningzak mualphoin an tuah ih an that. 7 ^aSiangpahrang in cuih thu a theih tikah, a thin a so. Cule a ralkappawl a thlah ih, cuih laithattupawl cu an that ih an khua an ur.

22:7^a Luk 19:27

8 “Cun a siahhlawhpawl hnenah, ‘Mo puai cu tiar cia a si zo, asinan ka sawm mipawl kha a tlak mi an rak si lo. 9 ^aCuruangah zinpipawl ah va feh uhla, nan hmuh zatzat mo puai ah va sawm uh,’ tiah a ti. 10 Cule cuih siahhlawhpawl cu zinpipawl ah an va feh ih, an tawn mi hmuahhmuah misia siseh, miṭha siseh an rak hruaikhawm ih, puai tuahnak hmun cu mikhual an khat.

22:9^a Eze 21:21

11 “Asinan rawl ei dingih a to mipawl zoh dingin siangpahrang a ra luh tikah, cu tawkah mo puai zawhtupawl ih hruk ding mi sinfen hruh lo tu pa pakhat a hmu. 12 Cule a hnenah, ‘Rual pa, ziangtin mo puai sinfen hruh loin hi tawkih na luh?’ tiah a ti. Cu pa cun ṭawng ding a thei lo.

13 “Cun siangpahrang in a siahhlawhpawl hnenah, ‘A kut le a ke ṭawn uh, hruaisuak uhla, khaw leng a thimnak sungah hlăwn uh. Cu tawkah ṭap le hacâng rialin a um ding,’ tiah a ti.

14 ^a“Ziangahtile mi tampi kawh an si nân, mi málte lawng hril an si,” tiah a ti.

22:14^a Thu 17:14

Kaisar hnenih Ngunkhuai Pek Thu

15 Cun Farasipawl cu an pawk ih, amai ṭawng mi in Jesu awk thei dingin an rawnawkhawm. 16 ^aJesu hnenah Farasipawl in an dungthluntupawl le ^bHerod-ih milaipawl an hei thlah ih, “Zirhtu pa, nang cu midik na si ih, Pathian lamzin cu dik zetin na zirh ti kan thei. Hmaisăwng mi zohman na nei lo ih mi thleidăn na nei lo ti kan thei. 17 Curuangah in sim hnik, ziangtin na ruat? Kaisar hnenih ^cngunkhuai pek hi Dān in a siang maw, siang lo?” tiah an sut.

22:16^a Mar 3:6

22:16^b Herod: Nauhakpawl thattu Herod a si.

22:17^c ngunkhuai: Cuzah hnenih pitling mipa lu man siah a si.

18 Asinan Jesu in an sualralzia a rak thei ih, “Midepdepawl, ziangah so in hniksak rero? 19 ^aNgunkhuai hrangih an hman mi paisa cu in rak hmuh hnik uh,” tiah a ti.

22:19^a Ngunkhuai: Câng 17 zoh aw.

Cule a hnenah dinari paisa pakhat an rak keng.

20 Cule Jesu in an hnenah, “Hihi zo-ih zuk a si ih, ziang a ngan aw?” tiah a ti.

21 ^aAnnih in, “Kaisar-ih zuk le hmin,” tiah an ti.

22:21^a Rom 13:7

Cule anih in an hnenah, “Curuangah Kaisar-ih thilpawl cu Kaisar hnenah pe uhla, Pathian-ih thilpawl cu Pathian hnenah pe uh,” tiah a ti. 22 ^aCuih kamsuakthupawl an theih tikah an mang a bang zet. Cule Jesu cu an tan ta ih, an fehhlo.

22:22^a Mar 12:12

Thawhsalnak Thusuhnak

23 ^aCuih ni thothoah thawhsalnak a um lo titu, Sadusipawl cu Jesu hnenah an ra ih, thu an sut. 24 ^b“Zirhtu pa, Mosi in, ‘Mi pakhat cu fāte nei loin a thih asile, a nupi cu a naupa in a ṭhi pei ih a u hrangah ci a thlahsak pei,’ tiah a ti. 25 Cule kan lakah unau pasarih an um. Upabik cu nupi a ṭhit hnuah a thi. Cithlah mi nei loin a naupa hnenah a nupi cu a tān ta. 26 A pahnihnak le a pathumnak pa hnen khalah, cuvek thothoin a cang. A pasarihnak tiangin cu vekin a cang vivo. 27 Netabikah cu nu khal cu a thi ve. 28 Curuangah thawhsalnak ah cu nu cu an pasarih lakah zo bik ih nupi a si ding? Ziangahtile an zaten nupi ah an rak nei,” tiah an ti.

22:23^a Apo 4:1; 23:8; 1Ko 15:12

22:24^b Dnp 25:5

29 ^aJesu in a sawn hai ih an hnenah, “Cathiangpawl le Pathian huham nan theih lo ruangah nan fehpêng a si. 30 Ziangahtile thawhsalnak ah an ṭhiaw nawn lo ding ih, ṭhitumnak khal a um nawn lo ding, vanram ih Pathian-ih vancungmipawl vek an si sawn ding. 31 Asinan mithi thawhsalnak thu ah cun, Pathian in, 32 ^b‘Keimah cu Abraham-ih Pathian, Isak-ih Pathian le Jakob-ih Pathian ka si,’ tiih nan hnenih a sim mi nan rak siar dah lo maw si? Pathian cu mithipawlih Pathian a si lo, a nung mipawlih Pathian a si sawn,” tiah a ti. 33 Mipi in cuih thu an theih tikah, a zirhnak cun an khawruah a harter ngaingai.

22:29^a Joh 20:9

22:32^b Suah 3:6, 15; Apo 7:32

Thupek Pawimawhbik

34 ^aAsinan Farasipawl in Jesu in Sadusipawl ṭawng ding thei lo ko a rak tuah hai ti hna in an theih tikah, an táwngkhawmaw. 35 ^bAnmai lakih Dānthiam pakhat in Jesu kha hniksak phahin thu a sut, 36 “Zirhtu pa, Dān thu lakah thupek pawimawhbik ziang a si?” tiah a ti.

22:34^a Apo 4:1

22:35^b Luk 7:30

37 ^aJesu in a hnenah, “‘Bawipa na Pathian cu na thinlung zaten, na nunnak zaten le na ruahnak zaten na duhdaw pei.’ 38 Cumi cu a pakhatnak le a pawimawhbik mi thupek a si. 39 ^bCule a pahnihnak cu a pakhatnak vek thotho a si: ‘Nangmah le nangmah na duhdawtawk vekin na innhnen na duhdaw pei.’

22:37^a Dnp 6:5

22:39^b Pui 19:18

40 ^a“Hi thupek pahnih parah Dān thupawl hmuahhmuah le Profetpawl ih ngan mi thupawl hmuahhmuah a ṭhumaw ṭheh a si,” tiah a ti.

22:40^a Luk 10:25-28

Khrih cu Zo-ih Fapa a Si?

41 Farasipawl an rak tawnkhawmawk tikah, Jesu in thu a rak sut hai, 42 “Khrih thuhla cu ziangtin nan ruat? Zo-ih Fapa a si?” tiah a ti.

Cule annih in a hnenah, “Anih cu David-ih Fapa a si,” tiah an ti.

43 Anih in an hnenah, “Cuti asile ziangah so Thlarau ih a ṭawngtu David in amah cu, ‘Bawipa,’ tiih a kawh? David in,

44 ^a‘Bawipa in ka Bawipa hnenah,
“Na ralpawl na ke retnak ih ka tuah hlanlo,
Ka vawrh lamah to aw,” a ti,’

22:44^a 1Sp 5:3; Sam 110:1; Apo 2:34-35; 1Ko 15:25; Heb 1:13

tiah a ti. 45 Curuangah David in ‘Bawipa,’ tiih a kawh asile, ziangtin so a Fapa a si thei ding?” tiah a ti. 46 ^aZohman in Jesu cu kam khat hman an sawn thei lo. Cule cuih ni thawk ihsin zohman in thu dang an sut ngam nawn lo.

22:46^a Mar 12:34; Luk 20:40

23

Dān Zirhtupawl le Farasipawl an Hmakhua a Pit

1 Jesu in mipi le a dungthluntupawl hnenah thu a sim: 2 ^a“Dān zirhtupawl le Farasipawl cu Mosi-ih tonak ah an to. 3 Curuangah thlun dingih an lo fial mi hmuah cu thlun uhla, tuah uh. Asinan an sim mi anmah in an tuah lo ruangah an tuah vekin tuah hlah uh. 4 ^bZiangahtile annih cun phurh har zet mi, phurrit zetzet an tawm ih, mi liang parah an suang. Asinan anmah cun cuih phurrit ṭhawn dingah an kut zung khatte hman an suah duh lo.

23:2^a Ezr 7:6, 25

23:4^b Luk 11:46; Apo 15:10; Gal 6:13

5 ^a“Mi ih hmuh dingah an hnaṭuan mi hmuahhmuah hi an tuah. Curuangah an fulakṭeripawl cu an tumter ih, an sinfen zim fêm an fûalter. 6 ^bPuai hmun ah a sangbik hmunpawl an duh ih, sinakok sungah tonak pawimawhbik bik an duh. 7 ^cDawr hmunpawl ah mi ih upatnak pek an duh ih, mi ih ‘Rabbi, Rabbi,’ tiih kawh an duh.

23:5^a Suah 13:9; Mip 15:38; Dnp 6:8; 22:12

23:6^b Luk 11:43

23:7^c Joh 1:38, 49

8 “Asinan nannih cu mi in Rabbi tiah lo ko hlah hai seh. Ziangahtile zirhtu pakhat lawng nan nei ih, amah cu Khrih a si, nannih cu nan zaten unau rual nan si. 9 ^aMi pakhat hman leitlun ah ka pa tiah ko hlah uh; ziangahtile Pa pakhat lawng nan nei ih, anih cu vanram ah a um. 10 Cule mi in zirhtu pa ti khalin lo ko hlah hai seh; ziangahtile zirhtu pakhat lawng nan nei ih, amah cu Khrih a si. 11 ^bAsinan nan lakih a ropibik cu nan siahhlawh a si ding a si. 12 ^cCule zokhal amah le amah a khaisângawtu cu niamter a si ding ih, amah le amah hnuai a dawrtu cu khaisan a si ding.

23:9^a Mal 1:6

23:11^b Mar 9:35

23:12^c 1Sam 2:8; Sam 18:27; Thf 3:34; Isa 57:15; Eze 21:26; Luk 1:52

13 ^a“Asinan nannih midepde Dān zirhtupawl le Farasipawl, nan hmakhua a pit a si! Ziangahtile nannih cun mi dang hrangah vancung uknak sângka nan khar ih, nanmah le nan lut fawn lo. A lut duhtupawl le nan siang fawn lo. 14 Nannih midepde Dān zirhtupawl le Farasipawl nan hmakhua a pit a si! Ziangahtile nuhmeipawlih inn nan láwng ih, mi bumnak ah rei zetzet thla nan camawter. Curuangah thuṭhennak nasasin nan tuar ding.

23:13^a Luk 11:52

15 ^a“Nannih midepde Dān zirhtupawl le Farasipawl, nan hmakhua a pit a si! Ziangahtile mi pakhat nan sakhua ih lalut dingah cun khawmual le tifinriat ah nan tlâwng. Mi pakhat nan lâkluhngah tikah, nanmah hnakih hell fāte let hnih ah nan cangter.

23:15^a Apo 13:43

16 ^a“Nannih hruaitu mitcawpawl, nan hmakhua a pit a si! ‘Mi pakhat in temple sālih sia a săm asile, zianghman a ṭhahnem lo. Asinan zokhal temple sungih a um mi sui sālin sia a săm asile, a sesăm mi in amah le amah a kaihrengaw a si,’ tiah nan ti. 17 ^bNannih mi-â le mitcawpawl! Khui mi so ropideuh, sui maw, sui thianghlimtertu temple so ropideuh? 18 Nannih cun, ‘Zokhal biakṭheng sālih sesămtu cu, cumi cu zianghman a ṭhahnem lo, asinan zokhal biakṭheng parih thilhlăn mi sālih sesămtu cu a sesăm mi in amah le amah a kaihrengaw,’ tiah nan ti. 19 ^cNannih mi-â le mitcawpawl! Khui mi so ropideuh, thilhlăn maw, thilhlăn thianghlimtertu biakṭheng so ropideuh? 20 Curuangah mi pakhat in biakṭheng sālih sia a săm tikah, biakṭheng le a parih um mi thil zaten sia a săm a si. 21 ^dTemple sālih sesămtu cun cuih temple le a sungih cêngtu paih hmin in sia a săm a si. 22 ^eCule van sālih sesămtu cun Pathian laltokham le a parih totu paih hmin in sia a săm a si.

23:16^a Isa 9:16

23:17^b Suah 30:29

23:19^c Suah 29:37

23:21^d 1Sp 8:13; Sam 26:8

23:22^e Sam 11:4

23 ^a“Nannih midepde Dān zirhtupawl le Farasipawl, nan hmakhua a pit a si! Ziangahtile nannih cun ^bkuṭinan, ^canethon le ^dkumin pawl tiang ṭhen hra ṭhen khat nan pe. Asinan a thupisawn mi diknak, zahngainak le rinumnak dānpawl cu nan tān ta. Cupawl cu rak tuah zo ding nan mawi a si, a dangpawl khal kha tuah ṭhulh cuang loin. 24 Nannih lam hruaitu mitcawpawl, fikte fate zetzet cu nan hăpfâi nân, kalauk cu nan dawlh!

23:23^a Pui 27:30; Mik 6:8; Luk 11:42

23:23^b kuṭinan: Hmuan ih cīn mi a si ih a hnah cu rawl le in ding mi rimhmuiternak ih hman a si.

23:23^c anethon: Grik ṭawng a si ih, thlaikung rimhmui phun khat a si.

23:23^d kumin: Grik ṭawng a si ih, rawl hmeh ih an thlak ṭheu mi mu fate takte nei thlaikung a si.

25 ^a“Nannih midepde Dān zirhtupawl le Farasipawl, nan hmakhua a pit a si! Ziangahtile no le khēng leng lam cu fai zetin nan khawlh nân, a sung lam cu mi thil lawn duhnak le thlahdahawknak in a khat. 26 Nannih Farasi mitcawpawl, no le khēng a leng lam faiter dingah a sung lam khawlh hmaisa uh.

23:25^a Mar 7:4; Luk 11:39

27 ^a“Nannih midepde Dān zirhtupawl le Farasipawl, nan hmakhua a pit a si! Ziangahtile nannih cu si râng hnih mi thlān vek nan si taktak. A leng lam cun mi in mawi zetin an hmu nân, a sung lamah cun milai ruhpawl le bawrhhlawh hlir in a khat. 28 Cuti vek thothoin nannih khal a leng lamah cun midingfel ah mi in an lo hmu ding. Asinan nan sung lam cu depdetnak le dān pahbălnak in a lo luahkhat a si.

23:27^a Luk 11:44; Apo 23:3

29 ^a“Nannih midepde Dān zirhtupawl le Farasipawl, nan hmakhua a pit a si! Ziangahtile profetpawlih thlānpawl nan tuah ih, midingfelpawlih lungphunpawl nan ceimawi. 30 Nannih in, ‘Kan pupápawlih san ah hin rak nung ve ta nungla, profetpawlih thisen an suahnak ah kan tel ve lo ding,’ tiah nan ti. 31 Cutiih nan ti ruangah nannih cu profetpawl rak thattupawlih tesinfa nan si tiin nanmah le nanmah dokalhawin theihpitu nan si. 32 ^bNan pupápawlih tahnak cu nannih in khatter lawlaw uh.

23:29^a Luk 11:47-48

23:32^b Eze 20:4; 1Th 2:16

33 “Nannih rulpawl, rulngân cithlahpawl! Ziangtin hell thuṭhennak ihsin nan luat thei ding? 34 ^aCuruangah, ngai hnik uh, nan hnenah profetpawl, mifimpawl le Dān zirhtupawl ka thlah a si. Cule nannih in a hrekkhat cu nan that ding ih, nan khengbĕt ding. A dangpawl cu nan sinakokpawl ah nan vaw ding ih, khaw khat hnu khaw khat nan hrem vivo ding. 35 ^bCuruangah leitlun ih midingfelpawl thisen nan rak suah mi hmuahhmuah, midingfel Abel thisen ihsin temple le biakṭheng karlakih nan rak thah mi Berekiah-ih fapa Zekariah thisen tiang mawhnak cu nanmai parah a tla ṭheh ding. 36 ^cThungaiin ka lo sim a si, cuih thil hmuahhmuah cu tuih san minungpawl parah a rung thleng leh ding.

23:34^a Luk 11:49

23:35^b Sem 4:8; 2San 24:21; Zek 1:1; Heb 11:4

23:36^c Luk 11:50-51

Jesu in Jerusalem a Ṭah

37 ^a“Maw Jerusalem, Jerusalem, profetpawl na that ih, na hnenih Pathian in a thlah mipawl cu lungto in na dengthat. Arpi in a fātepawl a thla hnuaiih a ăwp vekin na falepawl cu vei ziang zat meng so lo khawmsak ka rak tum, asinan nan rak duh lo! 38 ^bNgai hnik uh, nan inn cu ṭhing reprepin tansăn a si. 39 ^cZiangahtile ka lo sim a si,

23:37^a 2San 24:21; Sam 57:1; Isa 31:5

23:38^b 1Sp 9:7-8; Jer 22:5

23:39^c Sam 118:26

‘Bawipaih hmin ih ra cu thangṭhatin um seh!’

tiih nan ti lai hlanlo, tuihsi thawkin in hmu nawn hrimhrim lo ding,” tiah a ti.

24

Jesu in Temple Siat ding Thu a Sim

1 Temple kulh sung ihsin Jesu cu suakin a feh, cule a dungthluntupawl a hnenah an ra ih, temple innpawl cu an hei khih. 2 ^aCule Jesu in an hnenah, “Hi thil hmuahhmuah hi nan hmu a si lo maw? Thungaiin ka lo sim, lungto pakhat parih lungto a suangaw mi pakhat hman tâng loin hlăwn ṭheh an si leh ding,” tiah a ti.

24:2^a Luk 19:44

San Cemnak ding Hminsinnakpawl

3 ^aOlif Tlang parih Jesu a to laiah, a dungthluntupawl anmah te lawngin a hnenah an ra ih, “Cuih thilpawl cu ziang tikah a thleng ding? Na ratsalnak ding le san cemnak ding hminsinnak cu ziang vek a si ding? In sim aw,” tiah an ti.

24:3^a Luk 17:30

4 ^aCule Jesu in a let hai ih an hnenah, “Zohman ih an lo bumlonak dingah va fimkhur uh. 5 ^bZiangahtile ka hmin in mi tampi an ra ding ih, ‘Khrih cu keimah hi ka si,’ tiah an ti ding, cule mi tampi an bum ding. 6 Ral doawknak thupawl le ral doawk ding titi thupawl nan thei ding, nan thin a phanlonak dingah fimkhur uh. Ziangahtile cuih thilpawl hmuahhmuah cu an ra thleng tengteng ding, asinan a cemnetnak cu a si hrih lo ding. 7 ^cZiangahtile miphun pakhat le pakhat an doaw ding ih, ram khat le ram khat an doaw ding. Cule mangṭampawl, nathri sia pawl le linghnînpawl tla hmun dangdangah a thleng ding. 8 Hipawl hmuahhmuah cu nau hrin nat hramthăwknak an si.

24:4^a Mar 13:5

24:5^b 1Joh 2:18

24:7^c Isa 19:2; Apo 11:28

9 ^a“Cun harsatnak ah an lo thlen ding ih, an lo that ding, cule ka hmin ruangah miphun hmuahhmuah in an lo hua ding. 10 Cule mi tampi an tlu ding, pakhat le pakhat an phiarsawmaw ding ih, pakhat le pakhat an huaaw ding. 11 ^bCun profet deu tampi an suak ding ih, mi tampi an bum ding. 12 Dān pahbălnak a karh ding ruangah, mi tampi ih duhdawtnak a dai ding. 13 Asinan a cemnet tiangih a tuarsuaktu cu rundam a si ding. 14 ^cCule hi lalram thuthangṭha hi leitlun pumpi ah phuan a si ding. Cumi cu miphun zate hnenah theihpitu a si ding, cule a cemnetnak a thleng ding.

24:9^a Joh 15:21; 16:2

24:11^b Mar 13:5

24:14^c Luk 2:1; Apo 11:28; Rom 10:18; Thu 3:10

Harsatnak Rapthlak

15 ^a“Curuangah profet Daniel ih sim mi fihnungza siatnak cu hmun thianghlim ih a dīn nan hmuh tikah, cumi a siartu cun theithiam seh. 16 Cumi nan hmuh tikah, Judia peng ih umpawl cu tlangpawl ah tlân hai seh. 17 ^bInn parih um cu thil la dingin a inn sungah rung ṭum hlah seh. 18 Cule ló ih um cu a hnipuan la dingin a inn ah tlungkir hlah seh. 19 ^cCuih cān ih favun mipawl le nausen hnawi fawp neipawl an hmakhua a pit a si! 20 Nan tlan cān cu thlatang le Sabbath ni a silonak dingah thlacam uh. 21 ^dZiangahtile leilung hramthăwk ihsin atu tiangih a um dah kel lo mi le hmai lam khalih a umsal nawn lo ding mi harsatnak rapthlak a thleng ding. 22 Cuih cān cu tawiter a si lo ahcun, zohman a tāng an um lo ding. Asinan hril mipawl ruangah cuih cān cu tawiter a si ding.

24:15^a Dan 9:27; 11:31; 12:11; Apo 6:13

24:17^b 1Sam 9:25; Luk 12:3; Apo 10:9

24:19^c Luk 23:29

24:21^d Eze 5:9; Dan 12:1; Joe 2:2

23 ^a“Cun zo in simaw, ‘Zoh hnik, Khrih cu hi tawkah a um,’ tiin simaw, ‘Khi tawkah a um,’ an lo ti asile, va zum hlah uh. 24 ^bZiangahtile khrih deu pawl le profet deu pawl an suak ding ih, cang thei sehla, hril mipawl hman an bum thei nak dingah, hminsinnak ropi pawl le mangbangzapawl an hmuh ding. 25 Ngai hnik uh, a hlankhanin ka lo sim cia a si.

24:23^a Luk 17:23

24:24^b Suah 7:11; 2Th 2:9-11; Thu 13:13

26 “Curuangah ngai hnik, ‘Anih cu ramṭhing ah a um,’ an lo ti asile, va feh hlah uh. ‘Ngai hnik, anih cu inn sung dĕng pindan ah a um,’ an lo ti khalle, va zum hlah uh. 27 ^aZiangahtile Minung Fapa cu nisuahnak lam ihsin nitlaknak lam tiang nimthlakau a tlêtsuak vekin a rung lang ding. 28 ^bZiangahtile mithi ruak umnak kip ah mulukawlh an fĭnkhawmaw ding.

24:27^a Luk 17:24, 30

24:28^b Luk 17:37

Minung Fapa Ratsalnak

29 ^a“Cuih harsatnak nipawl a cem veten ni a thim ding ih, thlapi in a êng a suah lo ding, arsipawl tla van ihsin an tla ding ih, van-ih huhampawl tla an hnîn ding.

24:29^a Isa 13:10; 34:4; Eze 32:7; Joe 2:10, 31; Zef 1:15; Thu 6:12-13

30 ^a“Cun Minung Fapaih hminsinnak cu van ah a lang ding ih, leilung tlunih hnám hmuahhmuah an ṭap ding. Cule Minung Fapa cu huham le ropitnak nasa zet thawn van mero parih a rat kha an hmu ding. 31 ^bCule tawtawrawt awn ring zet thawn a vancungmipawl a thlah ding ih, lei kil li ihta le van hram khat lam dĕng ihsin khat lam dĕng tiangih a um mi a hril mipawl kha an fĭnkhawm ding.

24:30^a Dan 7:13; Thu 1:7

24:31^b Isa 27:13; Zek 9:14; 1Th 4:16; Thu 8:2

Theipi Kung Thu

32 “Hi tahṭhimnak hi theipi kung ihsin zir hnik uh: a hnge note te suakin, a hnahpawl an cerhsuah tikah, ṭhal cān a nai thlang a si ti nan thei. 33 ^aCuvek thothoin, nannih khal in cuih thil hmuahhmuah nan hmuh tikah, Minung Fapa rat cān cu a nai tuk thlang, cumi cu sângka hram a thleng ti thei uh. 34 Thungaiin ka lo sim, cuih thil hmuahhmuah a kim thluh lai hlanlo tuih san minungpawl hi an hloral hrimhrim lo ding. 35 Lei le van an hloral ding, asinan ka kamsuakthupawl cu an hloral hrimhrim lo ding.

24:33^a Jam 5:9

Zohman in a Ni le a Tikcu an Thei Lo

36 ^a“Asinan cuih ni le cuih tikcucān cu zohman in an thei lo, van ih um vancungmipawl hmanin an thei lo, ka Pa lawngin a thei. 37 ^b Cule Noah san lai vek khan, Minung Fapa a rat tikah a si ve ding. 38 ^cZiangahtile ti a lik hlanah annihpawl cu an ei ih an in, an ṭhiaw ih an hamaw, Noah lăwng sungih a luh ni tiang cutin an um. 39 ^dTilik a tlung ih an zaten a fĕnhlo thluh hlanlo zianghman an rak thei lo. Minung Fapa a rat tik khalah cu vekin a si thotho ding. 40 ^eCun mi pahnih ló ah an um ding, pakhat lâk a si ding ih a dang pakhat cu tān ta a si ding. 41 ^fNunau pahnih rial lung an rial laiah pakhat cu lâk a si ding ih, pakhat cu tān ta a si ding.

24:36^a Apo 1:7

24:37^b Sem 6:5

24:38^c Luk 17:27

24:39^d Luk 17:30

24:40^e Luk 17:34

24:41^f Luk 17:35

42 ^a“Curuangah ralringin um uh, ziangahtile ziang tikah nan Bawipa a ra ding ti nan thei lo. 43 ^b Asinan hihi thei uh, intêk pa in fifir rat ding zan tikcucān kha rak thei sehla cu, a ralring ding ih, fifir cu a inn sungah a lutter lo ding. 44 ^cCuruangah nannih khal tiar ringring uh, ziangahtile nan rin lo cān ah Minung Fapa cu a ra ding a si.

24:42^a Luk 12:40

24:43^b Luk 12:39

24:44^c 1Th 5:6

Siahhlawh Rinum le Siahhlawh Ṭha Lo

45 “A tikcu teih anmah rawl petu ding, a sungkaw siahhlawhpawl hotu dingih a pu in a ret mi siahhlawh rinum le fim cu zo so a si? 46 ^aA pu a rat tikih a ṭuan ding mi hnaṭuan rero ih a hmuh mi siahhlawh cu, mithlawsuak a si. 47 Thungaiin ka lo sim, cuih siahhlawh pa cu a pu in a thilri neih mi hmuahhmuah tlunih hotu ah a ret ding. 48 Asinan cuih siahhlawh ṭha lo cun a thinlung tein, ‘Ka pu cu a ra cing lo ding,’ tiah a ti. 49 ^bCule a rualpi siahhlawh dang pawl kha vuak a thawk ih, zuripawl thawn in le ei in an um. 50 Cuih siahhlawh paih pu cu a rin lo ni le a theih lo cān ah a ra ding ih, 51 a siahhlawh pa cu tan hnih ah a sattán ding, cule midepdepawl ih co vek a coter ding. Cuih hmun ah ṭap le hacâng rialin a um ding.

24:46^a Thu 16:15

24:49^b Luk 21:34

25

Fala Him Pahra Tahṭhimnak

1 ^a“Vancung uknak cu mo neitu pa hmuak dingin an meito la ih a fehsuaktu fala him pahra thawn an bangaw ding. 2 Cuih lakih panga cu an fim ih, panga cu an â. 3 Fala â pawl cun an meito an keng ih, mei ti an keng lo. 4 Asinan fala fim pawl cun mei ti cu an thâwlpawl in an meitopawl thawn an kengtlang. 5 ^bMo neitu pa a rat tlâi ruangah, an zaten an ih a hmu ih an rak itthat ṭheh.

25:1^a Luk 12:35-38; Apo 20:8; Thu 4:5

25:5^b 1Th 5:6

6 “Cule zanṭim ah mi pakhat a au ih, ‘Ngai hnik uh, mo neitu pa a ra, amah hmuak dingah va feh uh!’ tiah a ti. 7 Cu tikah cuih fala him pawl cu an zaten an ṭhang ih an meito an timtuah. 8 ^aCule a â pawl cun a fim pawl hnenah, ‘Kan meito an mih cuahco ruangah, nan mei ti ziangmaw zat tal in pe ve uh,’ tiah an ti.

25:8^a Luk 12:35

9 “Asinan a fim pawl cun an let ih, ‘Kan lo pe lo ding, nanmah le kanmah hrangah in daih lo pang ding. Cuhnakin mei ti zuarpawl hnenah va feh sawn uhla, nanmai hrangah va lei uh,’ tiah an ti. 10 ^aCule mei ti lei dingin lamzin ih an feh laiah, mo neitu pa cu a ra thleng. A rak tiar mi fala him pawl cu amah thawn mo puai ah an lut, cule sângka an khar.

25:10^a Thu 19:9

11 “Cuih hnuah a dang fala him pawl khal cu an rak thlengsal ih, ‘Bawipa, Bawipa, sângka in rak ăwn aw!’ tiah an ti.

12 “Asinan anih in a sawn hai ih, ‘Thungaiin ka lo sim, ka lo thei hai lo,’ tiah a ti.

13 ^a“Curuangah minung Fapa rat ding ni le tikcucān nan theih lo ruangah ralringten um uh.

25:13^a Mar 13:35; Luk 12:40

Talent Tahṭhimnak

14 ^a“Ziangahtile vancung uknak cu mi pakhat a siahhlawhpawl koin, a neih mi thilpawl an kilkhawi dingin an hnenah ap tahratih khualtlawng pa vek a si. 15 Sál pakhat hnenah, talent panga, a dang pakhat hnenah talent pahnih, a dang pakhat hnenah talent pakhat tiin anmai tithei tawk ciar in a pe. Cule hmakhatteah khual a tlawnsan hai. 16 Talent panga cotu pa cu a feh ih, cumi cun sum a tuah. Cule a dang talent panga a ngahbêt. 17 Cuvek thothoin talent pahnih cotu pa khal in a dang pahnih a ngahbêt ve. 18 Asinan talent pakhat cotu pa cu a va feh ih, lei ah khur a lai ih, a pu-ih tangka cu a thup.

25:14^a Luk 19:12

19 “Cān reipi hnuah cuih siahhlawhpawlih pu cu a ra tlung ih, anmah thawn sum cazin an tifelaw. 20 Talent panga cotu pa cu a ra ih, a dang talent panga a rak keng, cule, ‘Bawipa, nang in talent panga i rak pe; zoh hnik, a dang talent panga ka rak ngah,’ tiah a ti.

21 ^a“Cule a pu in a hnenah, ‘Na ti ṭha riai, siahhlawh ṭha le rinum. Nang cu thil málte parah na rinum a si, thil tampi uktu ah ka lo tuah ding. Na pu-ih aipuannak sungah va lut aw,’ tiah a ti.

25:21^a Luk 16:10

22 “Talent pahnih cotu pa khal a ra ih, ‘Bawipa, talent pahnih i rak pe, zoh hnik, a dang talent pahnih ka rak ngah,’ tiah a ti. 23 Cule a pu in a hnenah, ‘Na ti ṭha riai, siahhlawh ṭha le rinum. Nang cu thil málte parah na rinum a si, thil tampi uktu ah ka lo tuah ding. Na pu-ih aipuannak sungah va lut aw,’ tiah a ti.

24 “Cun talent pakhat cotu pa cu a ra ih, ‘Bawipa, nang cu mitikherkher na si ti ka lo thei. Na tuhlonak hmun ah na at ih, thlaici na vawrhlonak hmun ah na khawm. 25 Cule ka ṭih ih, ka va feh ih na talent cu lei sungah ka thup. Zoh hnik, na ta cu hi tawkah a um ko,’ tiah a ti.

26 “A pu cun a sawn ih a hnenah, ‘Siahhlawh sualrál le zangzêl, ka tuhlonak hmun ah ka at ih, thlaici ka vawrhlonak hmun ah ka khawm ti na thei. 27 Cuti asile, ka tangka cu paisa cawihtupawl hnenah rak ret zo ding na si. Cule ka ra tlunkirsal tikah ka paisa cu a ṭhang thawn ka rak la ding nân! 28 Curuangah a hnen ihsin talent cu la uhla, talent tangka pahra neitu hnenah pe uh.

29 ^a‘Ziangahtile a neitu kip hnenah tam sinsinin pek an si ding ih, tam zet a nei ding. Asinan a nei lo tu cu a neih cia mi hman lâksak a si ding. 30 Cule khaih siahhlawh santlailo pa kha a leng khawthim lakah hlăwn uh. Cuih hmun ah ṭah le hacâng rialnak a um ding,’ tiah a ti.

25:29^a Mar 4:25; Luk 8:18

Tuu le Me Thuṭhennak

31 ^a“Minung Fapa cu a ropitnak ih thuamawin a thianghlim vancungmipawl hmuahhmuah thawn a rat tikah, a laltokham parah ropitnak thawn a to ding. 32 ^bA hmaiah miphun zaten an fĭnkhawmaw ding. Cule tuu khāltu in a tuupawl me lak ihsin a thliardan bangin a thliardang hai ding. 33 Cule tuupawl cu a vawrh lamah a ret ding ih, mêpawl cu a keh lamah a ret ding. 34 ^cCun Siangpahrang in a vawrh lamih umpawl hnenah, ‘Nannih ka Pa ih thlawsuah rak pek zo mipawl, ra uh, leilung semtir ihsin nan hrangih a rak timtuah mi lalram cu nan ro ah co uh. 35 ^dZiangahtile ka ril a rawn laiah nannih in ka ei dingah rawl in pe. Ka ti a hāl laiah nannih in ka in ding in pe. Mikhual ka si laiah nan inn ah in thlengter. 36 ^eTaklawng ih ka um laiah hruh ding in pe; ka nat laiah in ra veh; thawng ka tlak laiah ka hnenah nan ra,’ tiah a ti hai ding.

25:31^a Luk 17:30

25:32^b Eze 34:17, 20; Mal 3:18

25:34^c Apo 20:32; 1Ko 15:50; Gal 5:21; Heb 4:3; Jam 2:5; Thu 13:8

25:35^d Job 31:32; Heb 13:2

25:36^e Isa 58:7; Eze 18:7; 2Ti 1:16; Jam 1:27; 2:15-16

37 “Cun midingfelpawl cun, ‘Bawipa, ziang tikah na rilrawn kan lo hmu ih rawl kan lo pek? Asilole ziang tikah na tihal kan lo hmu ih in ding kan lo pek? 38 Ziang tikah mikhual na si lai kan lo hmu ih kan inn ah kan lo thlengter? Ziang tikah taklawng ih na um kan lo hmu ih hnipuan kan lo pek? 39 Asilole ziang tikah na nat le thawng na tlak kan lo hmu ih na hnenih kan rat dah?’ tiah an let ding.

40 ^a“Cule Siangpahrang cun a let hai ding ih an hnenah, ‘Thungaiin ka lo sim, ka unaulepawl lakih a tenaubik pakhat parih nan rak tuah mi cu ka parih tuah nan si,’ tiah a ti ding.

25:40^a Heb 13:2

41 ^a“Cun a keh lamih um mipawl hnenah, ‘Nannih camsiat mipawl, Diabol le a vancungmipawl hrangih rak timtuah mi kumkhaw meisa sungah ka hnen ihsin feh uh. 42 Ziangahtile ka rilrawn laiah ka ei dingah rawl in rak pe lo; ka ti a hāl laiah ka in ding in rak pe lo. 43 Mikhual ka si laiah in thlengter lo; taklawng ih ka um laiah hruh ding in rak pe lo; ka nat lai le thawng ka tlak laiah in rak veh lo,’ tiah a ti hai ding.

25:41^a Isa 66:24; Mar 9:43; Luk 3:17; 2Pe 2:4; Jud 1:7

44 “Cun annih khal in, ‘Bawipa, ziang tikah rilrawng le tihâlin siseh, mikhual le taklawng in siseh, nâ le thawngtla in kan lo hmu na cingin lo tuamhlawm loih kan um?’ tiah an let ding.

45 ^a“Cu tikah anih in an hnenah, ‘Thungaiin ka lo sim, hi minungpawl lakih a tenaubik pakhat parih nan tuah lo mi cu ka parih tuah lo nan si,’ tiah a let hai ding. 46 ^bCule annih cu kumkhaw cawhkuan peknak sungah an fehhlo ding ih, midingfelpawl cu kumkhaw nunnak sungah an feh ding,” tiah a ti.

25:45^a Thf 14:31

25:46^b Dan 12:2; Joh 3:15-16, 36; Apo 24:15; Rom 2:7; Gal 6:8; 1Joh 1:2

26

Jesu Thah an Tum

1 Cun hitin a rak si, Jesu in cuih thupawl hmuahhmuah a sim ṭheh tikah, a dungthluntupawl hnenah, 2 ^a“Tuih hnu ni hnihnak ah Lanta Puai a um ding ti nan thei. Cule Minung Fapa cu khengbĕt dingah pek a si ding,” tiah a ti hai.

26:2^a Joh 11:55

3 ^aCun puithiam sâng pawl, Dān zirhtupawl le mipipawlih miupapawl cu Kaiafas an ti mi puithiam lu bik ih inn tual ah an táwngkhawmaw ih, 4 hrăwkhrawl zetin Jesu kaihdān ding le thah thei dān ding an ruatkhawm. 5 Asinan annih cun “Puai ni ah cun si hlah seh, mipi an buai pang ding,” tiah an ti.

26:3^a Sam 2:2; Luk 3:2; Joh 11:47-50; Apo 4:6

Bethany ah Jesu Hriak Thih a Si

6 Jesu cu Bethany khua ah a rak phār dah mi Simon inn ih a um laiah, 7 nunau pakhat cu a hnenah alabasṭa lung ih tuah mi thâwl in hriak rimhmui mankhung zet a rak keng ih, rawl ei dingin Jesu cabuai a kil laiah a lu ah cuih hriak cu a burh. 8 A dungthluntupawl in cumi an hmuh tikah, an thin a heng ih, “Ziangah so a riarálter men? 9 Ziangahtile cuih hriak cu man tampi ah zuarin mifarahpawl rak pek tak ding,” tiah an ti.

10 Asinan Jesu in cuih thu a theih tikah, an hnenah, “Ziangah so cuih nunau cu nan tibuai rero? Anih in ka parah thil ṭha a tuah a si. 11 ^aZiangahtile mifarahpawl cu nan hnenah an um ringring ko. Asinan kei cu nan hnenah ka um ringring lo ding. 12 ^bZiangahtile ka taksaruangpum parih hriak rimhmui a burh hi, keimah phumnak ding a rak timtuah a si. 13 Thungaiin ka lo sim, hi thuthangṭha an simnak leitlun pumpi ah, hi nuih tuah mi khal amah hngilhlonak ah an sim ringring ding,” tiah a ti.

26:11^a Dnp 15:11

26:12^b Joh 19:40

Judas in Jesu Phiarsawm ding a Lung a Kim

14 Cun hleihnih lakih pakhat, Judas Iskariot an ti mi pa cu puithiam sâng pawl hnenah a va feh ih, 15 ^a“Nan hnenih Jesu ka lo pek asile, ziang in pe ding?” tiah a ti hai. Cule annih in ^bngun paisa 30 pe dingin an lung a kim. 16 Cuih cān thawk ihsin Judas in Jesu phiarsawm thei nak ding cān remcâng a hawl.

26:15^a Suah 21:32; Zek 11:12

26:15^b ngun paisa: Ngun paisa pakhat hi darakma pali tluk a si ih, darakma pakhat cu mi pakhat ni khat hlawh a si.

Lanta Puai le Bawipaih Zanriah

17 ^aThilnu telh lo Sang Puai a ni khatnak ah Jesu hnenah a dungthluntupawl an feh ih, “Khuiah so na ei ding mi Lanta Puai rawl lo timtuahsak ding in duh?” tiah an ti.

26:17^a Suah 12:18-20; Dnp 16:5-8

18 ^aCule anih in, “Khawpi sungih mi pakhat hnenah va feh uhla, a hnenah cun, ‘Zirhtu pa in, “Ka cān a nai thlang, ka dungthluntupawl thawn na inn ah Lanta Puai ka hmang ding,” a ti,’ tin va sim uh,” tiah a ti.

26:18^a Mar 14:35, 41; Joh 7:6, 8

19 Cule a dungthluntupawl cun Jesu ih a cah mi vekin an tuah ih, Lanta Puai rawl cu an timtuah.

20 Zan lam a thlen tikah, Jesu cu hleihnih pawl thawn cabuai a hil. 21 ^aCule an ei laiah, Jesu in, “Thungaiin ka lo sim, nan lakih mi pakhat in i phiarsawm ding,” tiah a ti.

26:21^a Luk 22:21-23; Joh 13:21

22 Cule annih cu nasa zetin an riah a sia ih, pakhat hnu pakhat a hnenah, “Bawipa, keimah ka simaw?” ti an thawk.

23 ^aAnih in a sawn hai ih, “Keimah thawn khēng sungih sang a hnimtlangtu in i phiarsawm ding a si. 24 ^bA thuhla ngan a si vekin, Minung Fapa cu a feh taktak ding. Asinan Minung Fapa a phiarsawmtu pa cu a hmakhua a pit a si. Rak suak lo lawlaw sehla a hrangah a ṭhasawn ding,” tiah a ti.

26:23^a Sam 41:9; Joh 13:18

26:24^b Isa 50:6; Dan 9:26; Mar 9:12; Luk 24:25-27; Apo 17:2-3; 1Pe 1:10-11

25 Cun Jesu phiarsawmtu ding Judas in a sawn ih, “Rabbi, keimah ka simaw?” tiah a ti.

Jesu in a hnenah, “A si, na sim vek hin a si ko,” tiah a ti.

26 Rawl an ei laiah, Jesu in sang a la ih, lungawi thu a sim hnuah, a phel ih a dungthluntupawl a pek hai ih, “La uhla, ei uh, hihi ka taksa a si,” tiah a ti.

27 ^aCun no cu a la ih, lungawi thu a sim hnuah a pe hai. “Nan zaten in uh. 28 ^bZiangahtile himi cu sualpawl ngaidamnak ding hrangih mi tampi hrangih thlet mi ka thisen thukham thar a si. 29 ^cKa lo sim a si, ka Paih uknak sungah nanmah thawn a thar ka insal ni a thlen lai hlanlo, hi sabit ti cu ka in nawn lo ding,” tiah a ti.

26:27^a 1Ko 10:16

26:28^b Suah 24:6-8; Zek 9:11; Mal 2:5; Mar 1:4; Heb 9:20

26:29^c Apo 10:41

30 Cule thangṭhatnak hla an sak hnuah, Olif Tlang ah an feh.

Jesu in Peter ih a Phat ding Thu a Phuang

31 ^aCun Jesu in an hnenah, “Tuihzan ah keimah ruangah nan zaten nan tlu ṭheh ding. Ziangahtile,

26:31^a Zek 13:7; Joh 16:32

‘Tuu khāltu ka vaw ding ih,
Tuu runrual an ṭekdarh ding,’

tiih ngan a si.

32 “Asinan thawhtersal ka si hnuah, nan hmaiah Galili peng ah ka feh ding,” tiah a ti.

33 Peter in a sawn ih a hnenah, “Nangmah ruangah an zateih an tlûk ṭheh hmanah, kei cu ka tlu dah lo ding,” tiah a ti.

34 ^aJesu in a hnenah, “Thungaiin ka lo sim, tuihzan ar khuan hlanah, vei thum i phatsan ding,” tiah a ti.

26:34^a Joh 13:38

35 ^aPeter in a hnenah, “Na zawngih thi ve ding si hman ningla, ka lo phatsan hrimhrim lo ding!” tiah a ti. Dungthluntu zaten cutin an ti ṭheh.

26:35^a Joh 13:37

Gesmani Hmuan ah Jesu

36 Jesu cu a dungthluntupawl thawn Gesmani ti mi hmun an va thleng ih, a dungthluntupawl hnenah, “Khi tawkah feh ih thla ka cam sung hmuah, hi tawkah rak to uh,” tiah a ti. 37 Cule a hnenah Peter le Zebedi-ih fapa pahnih tla a hruai hai ih, Jesu cu riahsia le vansang zetih um a thawk. 38 ^aCun anih in an hnenah, “Ka thinlung hi thihnak tlak khawpin, nasa zetin a riah a sia. Hi tawkah hin rak um uhla, in menpi uh,” tiah a ti hai.

26:38^a Joh 12:27

39 ^aCule málte hladeuhah a va feh ih a băwkkhup, cule, “Maw ka Pa, a cang thei asile hi no hi ka hnen ihsin lanter aw. Asinan ka duh vekin si hlah seh, nangmai duh vekin si sawn seh,” tiah thla a cam.

26:39^a Sam 40:6-8; Isa 50:5; Joh 4:34

40 Cun a dungthluntupawl hnenah a ra kir ih an itthat ṭheh ti a hmuh tikah, Peter hnenah, “E khai, nazi pakhat te tal in menpi thei lo maw? 41 Meng uhla thlacam uh, cu lo asile sualfawrhnak ah nan lut pang ding. Thlarau cun a huam taktak ko nân, taksa cu a cak lo a si hi!” tiah a ti.

42 A vei hnihnak a va fehsal ih thla a cam, “Maw ka Pa, hi no hi in loin ka hnen ihsin a lan thei lo ding asile, nangmai duhnak vekin si ko seh,” tiah a ti.

43 Cule a ra kirsal ih an ihthah ṭheh kha a hmu lala, ziangahtile an ih a hmu tuk. 44 Cun a tân ta hai ih a fehsal, cule a vei thumnak a cam kel mi vekin thla a cam.

45 Cun a dungthluntupawl hnenah a kirsal ih an hnenah, “Itthat hrih uhla, cawl hrih ko uh. Ngai hnik uh, a tikcu a thleng zo. Minung Fapa cu misualpawl kut ah phiarsawm a si thlang. 46 Tho uh, feh uhsi. Zoh hnik uh, i phiarsawmtu pa a ra nai zo khi!” tiah a ti.

Jesu an Kai

47 Cutiih a ṭawng rero laiah, ngai hnik, hleihnih lakih pakhat Judas cu, puithiam sâng pawl le mipipawlih miupapawl ih rak thlah mi, ralnâm le talhtum keng mi tampi thawn a ra thleng. 48 Jesu phiarsawmtu pa cun puithiam sâng pawl le miupapawl cu theihthiamnak a rak pek cia, “Ka hnăm ding mi pa cu nan kaih duh mi pa a si, kai uh,” tiah a ti.

49 Jesu cu a pan vurvo ih, “Rabbi, cibai!” a ti ih a hnam.

50 Cule Jesu in a hnenah, “Rual pa, ziangah so na rat?” tiah a ti.

Cun mipi an ra ih, an kut an suah ih, Jesu cu an kai. 51 ^aCule ngai hnik, Jesu hnenih a um mipawl lakih mi pakhat in a kut a suah ih a ralnâm a zûk, puithiam lu bik ih siahhlawh pa cu a sat ih, a hna a sahthlak.

26:51^a Luk 22:36, 38; Joh 18:10

52 ^aCule Jesu in a hnenah, “Na ralnâm kha a kawm sungah retsal aw. Ziangahtile ralnâm lēntu zaten ralnâm in an thi ding. 53 ^bAsilole vancungmi lizon hleihnih hnakih tam i run pe dingin, ka Pa hnenih dil thei lo ah maw i ruah? 54 Asinan cu vekin si hnik sehla, Cathiangpawl ih sim mi cu ziangtin a kim thei ding?” tiah a ti.

26:52^a Sem 9:6; Suah 21:12; Thu 13:10

26:53^b 2Sp 6:17; Dan 7:10

55 ^aCuih cān ah Jesu in mipi hnenah, “Suamhmang kai ding bangin ralnâm le talhtum thawn keimah kai dingah maw nan rat? Ni tin temple kulh sungah thuzirhin nan hnenah ka to ko nân in kai fawn lo. 56 Profetpawlih ngan mipawl a kim thei nak dingah, hi thil hmuahhmuah hi a cang a si,” tiah a ti. Cu tikah a dungthluntu zaten Jesu cu tân tain an tlanhlo ṭheh.

26:55^a Mar 12:35; Luk 21:37; Joh 7:14, 28

Kaiafas le Sanhedrin hmaiah Jesu

57 Cule Jesu kaitupawl in Dān zirhtupawl le miupapawl an rak punkhawmnak hmun puithiam lu bik Kaiafas hnenah an hei hruai. 58 ^aAsinan Peter cun hla nawnin puithiam lu bik inn tual tiang a hei thlun. Cule ziang vekin thil a cang pei ti hmuh duhah a lut ih, temple kiltupawl hnenah a to.

26:58^a Mar 14:66; Luk 11:21; 22:55; Joh 18:15

59 Puithiam sâng pawl, miupapawl le Sanhedrinpawl hmuahhmuah cun Jesu dokalhin amah thah thei nak ding theihpinak dik lo an hawl nân, zianghman an hmu lo. 60 ^aTheihpitu dik lo tampi hmai lamah an ra suak ko nân, zianghman an rak hmu lo. A netnakah theihpitu dik lo mi pahnih an ra suak ih, 61 ^b“Hi pa hin, ‘Pathian temple ka ṭhiatbăl thei ih, ni thum sungah ka saksal thei,’ a ti,” tiah an ti.

26:60^a Dnp 19:15; Sam 27:12; Apo 6:13

26:61^b Joh 2:19

62 Cule puithiam lu bik a hung ding ih, Jesu hnenah, “Ziang tal na sawn ve hai lo ding maw? Hipawl in nangmah dokalhih an thutheihter mipawl hi ziangtin a si?” tiah a ti.

63 ^aAsinan Jesu cu daiten a um. Cule puithiam lu bik cun a sawn ih a hnenah, “Nangmah cu Pathian Fapa, Khrih na si ahcun in sim dingin a nung mi Pathian sālin sia ka lo sămter a si!” tiah a ti.

26:63^a Pui 5:1; Mar 14:61; Luk 22:67

64 ^aJesu in a hnenah, “Na sim mi vekin a si ko. Sikhalsehla, nan hnenah ka lo sim, hmai lam cān ah Minung Fapa cu huham neitu Paih vawrh lamih a to le van mero parih a rat kha nan hmu ding,” tiah a ti.

26:64^a Sam 110:1; Dan 7:13; Mar 16:19; Luk 22:70; Thu 1:7

65 ^aCun puithiam lu bik cun a hnipuan a thlek ih, “Hi pa in Pathian a thangsiat zo! Theihpitu dang pawl kan ṭul nawn maw si? Zoh hnik uh, Pathian a thangsiatzia cu atu-ah khan nan thei a si! 66 ^bZiangtin nan ruat?” tiah a ti.

26:65^a Mar 14:63

26:66^b Pui 24:16; Joh 19:7

Annih in an sawn ih, “Anih cu thi tlak a si,” tiah an ti.

Jesu an Hmuhsuam

67 Cun a hmaiah cīl an phui ih an thăwng, cule mi dang pawl in an kut zaphak in an beng. 68 ^a“Nang Khrih, profet thuphuan in kan hnenah thu phuang aw, a lo veltu hi zo a si?” tiah an ti.

26:68^a Luk 22:63-65

Peter in Jesu a Phat

69 Cuih cān ah Peter cu leng lam tual ah a rak to. Cule hnenum nu pakhat a hnenah a ra ih, “Nang khal Galili peng-mi, Jesu thawi umtlang mi na si,” tiah a ti.

70 Asinan anih in, “Na sim mi cu ka thei lo,” tiah an zate hmaiah a pha.

71 Cule Peter cu inn hmai kăwtka lamah a va feh ih, cu tawkah hnenum nunau dang pakhat in a rak hmu ih, cu tawkih um mipawl hnenah, “Hi pa khal hi Nazareth Jesu hnenih um mi a si,” tiah a sim hai.

72 Cule Peter in, “Cu pa cu ka thei lo!” tiah sesămin a pha lala.

73 Cuih hnu málte reideuh ah, cu tawkih a dīng mipawl in Peter hnenah, “Nang khal hi an lakih mi pakhat na si rori, ziangahtile na awcawi in a lang a si,” tiah an ti.

74 Cun Peter cun siatcamawk le sesăm a thawk ih, “Cu pa cu ka thei lo!” tiah a ti. Cuveten ar a khuang. 75 ^aCule Peter cun Jesu in a hnenih, “Ar khuan hlanah vei thum i phatsan ding,” a ti mi ṭawngkam kha a vun máng. Cule lengah a suak ih, nasa zetin a ṭap.

26:75^a Joh 13:38

27

Sanhedrin hmaiah Jesu

1 ^aZingpit teah puithiam sâng pawl hmuahhmuah le mipipawlih miupapawl hmuahhmuah cu, Jesu dokalhin amah that dingah thu an ruatkhawm. 2 ^bCule Jesu cu an ṭawn ih an hruai, cule uktu bawi Ponṭias Pilat hnenah an thlen.

27:1^a Mar 15:1; Luk 22:66

27:2^b Mar 15:1; Luk 13:1; Apo 3:13; 1Ti 6:13

Judas a Thlaithataw

3 Cun Jesu a rak phiarsawmtu Judas in Jesu thiam lo an coh ti a hmuh tikah, a siraw ih, ^angun paisa 30 rual cu puithiam sâng pawl le miupapawl hnenah a va khirhsal, 4 cule, “Mawhnak nei lo thisen phiarsawmin thil sual ka rak tuah a si,” tiah a ti.

27:3^a ngun paisa: 26:15 simfiangnak zoh aw.

Asinan annih in, “Cucu kan hrangah a pawinak ziang a um? Nangmah na titiin va ti aw,” tiah an ti.

5 ^aCule ngun paisapawl cu temple hmun thianghlim sungah a hlăwn ih a suak. Cule a va feh ih amah le amah a thlaithataw.

27:5^a Luk 1:9, 21; Apo 1:18

6 Cule puithiam sâng pawl cun cuih ngun paisapawl cu an la ih, “Himi cu thisen man a si ruangah temple sung hlawnthil bawm ih ret ding cu kan dān in a siang lo,” tiah an ti. 7 Cule an relkhawm ih, cuih paisa in bel tuahtu paih ló an lei. Cumi cu ram dang mipawl phumnak hmun ah an hmang. 8 ^aCuruangah cuih ló cu tuihni tiangin Thisen Ló tiah an ko.

27:8^a Apo 1:19

9 Cumi cun profet Jeremiah in thil cang ding mi a rak sim cia mi cu a kimter. Profet Jeremiah in, “Israel-mipawl in a parih a man an rak khiah mi ngun paisa 30 cu an la ih, 10 ^aBawipa in thu i pek mi vekin, bel tuahtuih ló hrangah cuih paisa cu an pe,” tiah a ti.

27:10^a Jer 32:6-9; Zek 11:12-13

Pilat in Jesu a Hliakhlai

11 Jesu cu uktu bawi hmaiah a ding ih, uktu bawi cun, “Jew-pawlih Siangpahrang na simaw?” tiah a sut.

Jesu in a hnenah, “Na sim vekin a si ko,” tiah a ti.

12 ^aPuithiam sâng pawl le miupapawl in sual an puh rero laiah, zianghman a let lo. 13 Cun Pilat in a hnenah, “Nangmah dokalhin hi tluk tam thu an theihter hi na thei lo maw?” tiah a ti. 14 ^bAsinan Jesu in kam khat hman a săwn lo ruangah, uktu bawi cu a mang a bang zet.

27:12^a Mar 14:61

27:14^b Mar 14:61

Jesu in Barabbas-ih Hmun a Luah

15 ^aLanta Puai tinten uktu bawi in mipi ih an duh mi thawngtla pakhat an hnenah a suah ṭheu. 16 Cuih cān ah, mi hmuahhmuah ih an theih mi thawngtla pakhat, Barabbas an ti mi pa a um. 17 Curuangah an punkhawmawk hnuah, Pilat in an hnenah, “Zo ka lo suahsak nan duh? Barabbas maw, Khrih an ti mi Jesu deuh?” tiah a ti hai. 18 Ziangahtile iksiknak ruangah a kut ah Jesu cu an thlen ti a thei.

27:15^a Joh 18:39

19 ^aThuṭhennak tokham parih Pilat a to laiah, a nupi in, “Khaih midingfel pa parah zianghman rak tuah hlah, ziangahtile amah ruangah ka mang ah tuihsun ah thil tampi ka rak tuar a si,” tiin thu a cah.

27:19^a Sem 20:6; Mip 12:6; Job 33:14-16; Joh 19:13

20 ^aAsinan puithiam sâng pawl le miupapawl in Barabbas cu dil ih, Jesu cu that dingin mipi an rak hminngah cia. 21 Uktu bawi cun a sawn ih an hnenah, “Hi mi pahnih lakah zo deuh suah ningla nan duh?” tiah thu a let hai.

27:20^a Apo 3:14

Cule annih in, “Barabbas!” tiah an ti.

22 Pilat in an hnenah, “Cuti asile, Khrih an ti mi Jesu hi ziangtin ka tuah ding?” tiah a ti hai.

An zaten, “Khengbĕt aw!” tiah an ti.

23 Cun uktu bawi cun, “Ziangruangah, ziang thil ṭha lo so a tuah?” tiah a ti.

Asinan annih cun, “Khengbĕt aw!” tiah an au sinsin.

24 ^aPilat in zianghman tisuak thei mi a nei lo ih, buainak a suak sawn ding ti a hmuh tikah, tidai a la ih, mipi hmaiah a kut a khawlh. “Kei cu hi midingfel paih thisen ah mawhnak ka nei lo. Nanmah nan titiin ti uh,” tiah a ti.

27:24^a Dnp 21:6-8; Sam 26:6

25 ^aCule mipi zaten an sawn ih, “A thisen cu kan par le kan falepawl parah um ko seh,” tiah an ti.

27:25^a Jos 2:19; Apo 5:28

26 ^aCule Barabbas cu an hnenah uktu bawi cun a suah ih, Jesu cu a ralkappawl a vuakter hnuah, khengbĕt dingin an kut ah a pe.

27:26^a Isa 53:5; Joh 19:1

Jesu an Hmuhsuam

27 ^aCun uktu bawi-ih ralkappawl in Jesu cu Praetorium sungah an luhpi ih, ^bralkap bur khat pumpin an kulh. 28 ^cCule a hnipuan an hlihsak ih, kâwrfual senlar an hruhter. 29 ^dHling ih an phiar mi lukhum a lu ah an khumter ih, a vawrh lam kut ah câlte fung an kengter. Cule a hmaiah an khuk an bil ih, an hmuhsuam, cule, “Jew-pawlih Siangpahrang, salam kan lo pe!” tiah an ti. 30 Cun a parah cīl an phui, câlte fung an lâk ih, a lu ah an vua. 31 ^eAn hmuhsuam hnuah, a kâwrfual an hlihsak ih, amai hnipuan an hruhter, cule khengbĕt dingin an hruaisuak.

27:27^a Joh 18:28

27:27^b ralkap bur khat: Rom ralkap legion khat ṭhen hra ih ṭhen khat a si ih, ralkap 600 hrawng an um.

27:28^c Joh 19:2

27:29^d Isa 53:3; Joh 19:2-3

27:31^e Isa 53:7

Khraws parah Siangpahrang

32 ^aCutiih an feh laiah, Sairin ram ihsin mi pakhat Simon an ti mi pa an táwng ih, hramhramin Jesu-ih khraws cu an putter. 33 ^bCule Golgotha ti mi hmun an va thleng, Golgotha ti cu Lu Ruh Hmun tinak a si. 34 ^cCu tawkah, a in dingah Jesu cu thil khâ thawi rawi mi sabit zu thûr an pek. A tep ih, a in duh lo.

27:32^a Mar 15:21; Luk 23:26; Apo 2:10; Heb 13:12

27:33^b Joh 19:17

27:34^c Sam 69:21

35 ^aCule,

27:35^a Sam 22:18

“Anmah lakah ka sinfen an rak ṭhenaw ih,
Ka hnipuan hrangah camcawhfung an zûk,”

tiih profet in thil cang ding mi a sim mi a kim thei nak dingah, an khĕnbet hnuah camcawhfung zûkin a sinfen cu an zemaw.

36 Cuih hmun ah cun an to ih, amah cu an kil. 37 Cule Jesu-ih lu tlunah sual an puhnak,

“HI PA HI JEW-PAWLIH SIANGPAHRANG JESU A SI,”

tiih ngan mi an tar.

38 ^aCun amah thawn suamhmang pahnih, a vawrh lamah pakhat, a keh lamah pakhat an khengbĕt. 39 ^bCule a kiangih fehpawl in Jesu cu an thangsiat, dirĕm zetin an lu an thinhnawh ih, 40 ^c “Nang temple ṭhiatbăl ih, ni thum sungih saksaltu, nangmah le nangmah runaw aw! Pathian Fapa na si ahcun, khraws parin rung ṭum aw,” tiah an ti.

27:38^a Isa 53:12

27:39^b Sam 22:7; Ṭah 2:15

27:40^c Joh 2:19

41 Cuvek thothoin puithiam sâng pawl, Dān zirhtupawl le miupapawl cun hmuhsuamin, 42 ^a“Mi dang cu a run hai nân, amah le amah cu a runaw thei lo. Israel-mipawlih Siangpahrang a si ahcun, khraws par ihsin atu roriah rung ṭum sehla, amah cu kan zum ding. 43 ^bAnih cun Pathian a rinsan a si; Pathian in a duh asile, atu roriah runsuak seh, ziangahtile amah in, ‘Keimah cu Pathian Fapa ka si,’ a ti,” tiah an ti.

27:42^a Joh 1:49

27:43^b Sam 22:8

44 Amah zawngih an khĕnbet mi suamhmang pahnih khal in cuvek thothoin amah cu an zăwkzet ve.

Khraws parah Jesu a Thi

45 ^aSun nazi hleihnih ihsin sîm lam nazi pathum tiang, ram pumpi ah thimkhawzing a tlung. 46 ^bCule sîm lam nazi pathum hrawngah Jesu cu, “Eli, Eli, lama sabakthani?” tiah ring zetin a au. A tican cu,

27:45^a Amo 8:9

27:46^b Sam 22:1

“Ka Pathian, ka Pathian, ziangah so i fehsan?” tinak a si.

47 Cu tawkih a dīng mi, mi hrekkhat in, cumi an theih tikah, “Hi pa hin Elijah a ko a si hi!” tiah an ti. 48 ^aAn lakih mi pakhat a va tlân lohli ih, tihawp a lâk, cumi cu sabit zu thûr sungah a hnīm ih, câlte ko zimah a ṭêm, cule in dingah Jesu a pe.

27:48^a Sam 69:21

49 A dangpawl in, “Um hrih hnik seh, amah run dingah Elijah a rat le rat lo zoh hnik uhsi,” tiah an ti.

50 ^aCule Jesu cu ring zetin a ausal ih, a thlarau a thlah.

27:50^a Joh 19:30

51 ^aCun ngai hnik, temple hmun thianghlim sungih puanzar cu a luzim ihsin a tawdĕng tiang ṭhen hnih ah a tlêk. Cule leilung a hnîn ih, lungpipawl tla an kuai. 52 Thlānpawl an áwngaw ih, a rak itthat zo mi, mithiang taksaruang tampi an tho. 53 Cule Jesu a thawhsal hnuah annihpawl cu thlān sung ihsin an suak, khawpi thianghlim sungah an lut ih, mi tampi hnenah an lang.

27:51^a Suah 26:31-33; Heb 9:3, 8

54 Ralkap 100 hotu le a zawngih um mi, Jesu ruak kiltupawl in linghnîn le thil cang mipawl an hmuh tikah, an ṭih tuk lawmmam ih, “Hi pa cu Pathian Fapa rori a rak si ko e!” tiah an ti.

55 ^aCule cu tawkah nunau tampi an rak um. Cupawl cu Galili peng ihsin Jesu rak thlun ih rak tuamhlawmtupawl an si ih, hla nawnin an hei cuan. 56 ^bCupawl lakah Mary Magdalin, James le Joses teih nu Mary le Zebedi fapalepawlih nu tla an tel.

27:55^a Luk 8:2-3

27:56^b Mar 15:47; Luk 24:10; Joh 19:25

Jesu an Phum

57 Zan lam a hung si tikah, Arimathia khua ihsin cu tawkah milian pa pakhat a ra thleng. A hmin cu Joseph a si ih, anih khal Jesu dungthluntu pakhat a rak si ve. 58 Cu pa cu Pilat hnenah a feh ih, Jesu-ih ruak cu a dil. Pilat in a ruak cu amah pe dingin thu a rak pe. 59 Joseph in Jesu-ih ruak cu a la ih, a fai zet mi puan nem páte in a tuam. 60 ^aCule lungpi a virh mi amai thlān thar sungah a vui. Cule lung tûm zet thlan kâ ah a hril ih a fehsan. 61 Cun Mary Magdalin le a dang Mary cu thlan kâ zawnah an to.

27:60^a Mar 16:4; Apo 13:29

Pilat in Kiltu a Ret

62 Puai hrangih timlamawk ni, a thaisun ah puithiam sâng pawl le Farasipawl cu Pilat hmaiah an tawngkhawmaw. 63 Cule annih in, “Bawipa, khaih mi bumtu pa khan a nun laiah, ‘Ni thum hnuah ka thosal ding,’ tiah a ti mi kha kan cîng lai. 64 Curuangah atu ihsin ni thum a kim hlanlo, thlān kha ṭhaten kil dingin thu pe aw. Cu lo asile zan ah a dungthluntupawl an ra ding ih, a ruak an ru ding, cule mipi kha mithi lak ihsin a rak tho zo tiah an sim ding. Bumawknak netasawn cu bumawknak hmaisasawn hnakin pawi a khawih sawn ding,” tiah an ti.

65 Pilat in an hnenah, “Kiltupawl nan nei a si si, va feh uhla, thlān kha a cang theipatawpin him ko tuah uh,” tiah a ti.

66 ^aCule an va feh ih, thlān kha a him theipatawpin an tuah, cuih lung cu hminsinnak an tuah ih, a kiltu an va ret ta.

27:66^a Dnp 6:17

28

Jesu a Thosal

1 ^aSabbath ni a liam ih, zarh khat ih a ni khatnak, zingthlapit khawfingcah zawngah, thlān zoh dingin Mary Magdalin le a dang Mary cu, cu tawkah cun an va feh.

28:1^a Luk 8:2

2 ^aCule ngai hnik, nasa zetin ling a hnîn; ziangahtile Bawipaih vancungmi cu van ihsin a rung ṭum, cule a ra ih, lung cu thlan kâ ihsin a hril ih, a parah a to. 3 ^bCuih vancungmi lăngdan cu nimthlakau vek a si ih, a hnipuan cu vur bangin a var. 4 Cule thlān kiltupawl in an ṭih tuk ruangah an khūr ih, mithi vekah an cang.

28:2^a Joh 20:12; Apo 5:19

28:3^b Dan 7:9; Mar 9:3; Joh 20:12

5 Cule vancungmi in a sawn hai ih nunaupawl hnenah, “Ṭih hlah uh, ziangahtile an khĕnbet mi Jesu nan hawl a si ti ka lo thei. 6 Anih cu hi tawkah a um lo, ziangahtile a rak sim cia vekin a thosal zo. Ra uhla, Bawipa an phumnak hmun khi zoh hnik uh. 7 Cule zamrang zetin va feh uhla, a dungthluntupawl kha, ‘Anih cu mithi lak ihsin thawhtersal a si zo, zoh hnik uh, nan hmaiah Galili peng ah a feh, cu tawkah nan va hmu ding,’ tiah va sim uh. Ngai hnik uh, ka lo sim a si,” tiah a ti.

8 Cule zamrangten thlān ihsin an fehsuak ih, ṭih phah le aipuang zetin a dungthluntupawl hnenih va thăn dingah an tlân. 9 ^aCule a dungthluntupawl va sim dingih an feh laiah, ngai hnik, Jesu in a rak táwng hai ih, “Cibai!” tiah a ti. Cule an va pan ih a ke an pawm, cule amah cu an bia. 10 ^bCun Jesu in an hnenah, “Ṭih hlah uh. Va feh uhla, ka unaupawl kha Galili peng ih feh dingin sim uh, cule cu tawkah in hmu ding,” tiah a ti hai.

28:9^a Joh 20:14-18

28:10^b Mar 3:34; Joh 20:17; Heb 2:11-13, 17

Ralkappawl Nawhthuh an Pe

11 Cuih nunau pahnih te cu an feh rero laiah, ngai hnik, thlān kiltu hrekkhat cu khawpi sungah an feh ih, thil cang mipawl zaten puithiam sâng pawl an sim. 12 Cun puithiam sâng pawl le miupapawl an táwngaw ih, thu an ruattlangkhawm. Cule ralkappawl kha paisa tampi an pe ih, 13 “ ‘Kan rak ihthah sungah a dungthluntupawl kha zan ah an ra ih, amah cu kan hnen ihsin an rûk a si,’ tiah nan ti pei. 14 Cuih thu cu uktu bawi hna a thlen asile, kanmah in kan lēm ding ih, harsatnak sung ihsin kan lo hum ding,” tiah an ti.

15 Cule thlān kiltupawl in paisa cu an la ih, puithiam sâng pawl ih an sim mi vekin an tuah. Cuih thu cu Jew-pawl lakah tuihsun ni tiangih an rel rero mi a si.

Thupek Ropi

16 Cun dungthluntu hleikhat pawl cu Jesu ih a rak tiam cia nak Galili peng, tlang parah an feh. 17 Amah an hmuh tikah, amah cu an bia. Asinan an lakih mi hrekkhat cun an ringhlel. 18 ^aCule an hnenah Jesu a ra ih thu a sim, “Lei le van ih thuneihnak hmuahhmuah ka hnenah pek a si zo. 19 ^bCuruangah va feh uhla, miphun zaten ka dungthluntu ah va tuah uh, Pa le Fapa le Thlarau Thianghlim hmin in baptisma va pe uh. 20 ^cNan hnenih thu ka lo pek mi thil hmuahhmuah kha thlun dingin va zirh uh. Cule ngai hnik uh, san cem tiangin nan hnenah ka um ringring ding,” tiah a ti. Amen.

28:18^a Dan 7:13-14; Luk 10:22; Joh 3:35; 1Ko 15:27; Efe 1:20-22; Fil 2:9-10

28:19^b Isa 49:6; Mar 16:15-16; Luk 24:47; Apo 1:8; Rom 6:3-4; Gal 3:27; Kol 2:12

28:20^c Dnp 31:6; Hag 1:13; Joh 14:26; Apo 2:42; 18:10