BibleThianghlim – Ṭah Hla
Old Testament
Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi
New Testament
Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation
Ṭah Hla
- A ngantu: Jeremiah
- A huap sung cān: B.C. 586
- Ngan kum: B.C. 586 hrawng
Hi cabu sungah profet Jeremiah cu Jew-pawlih sualnak ruangih Pathian in Judah le a khawpi Jerusalem parih a burh ding mi nunsimnak nasa zet ruangah a ṭap. Kanaan ah hruai dingin Izip ram ihsin a hruaisuah hai ihsi khan (Pui 26:27-29; Dnp 28:49-57), kum 800 sung ralring dingin cān a rak pe. Pathian in Judah ralrin peknak ah Jeremiah telin profet tampi a hmang (Jer 19:1-11). Ṭah Hla cabu ah cun Pathian in ralrinnak a rak pek vekin a thleng taktak thlang (Ṭah 2:20-21; 4:10-11). Babilon-mipawl in Judah-mipawl kha sál ah an hruai ih (B.C. 605 le 597), sál ih hruai a netabikah Jerusalem khawpi le a temple cu an ṭhiatbăl ṭheh (B.C. 586). Cuih hnuah Ṭah Hla in a thu parih Pathian rinumzia a phuanglang. Hi cabu fate ah hin thinnatnak tam zet a um, asinan cuih thinnatnak ah ruahsannak khal a lang (3:22-38).
Ṭah Hla hi thinlung tuarnak nasa zet tarlăngnak le thil cang mi fiang zetih ngannak cabu mawi zet a si. Bung 1-4 hi hla hleice pali an si. Bung khatnak ah, Jerusalem rămnak thuhla a rel (1:2, 9, 16, 17, 21). Bung hnihnak ah, Jeremiah in Pathian thinlingnak in Jerusalem răm ko a tuah thu a simfiang. Bung thumnak ah, Jerusalem siatnak lakah Pathian zahngainak hnget kan hmu. Bung litnak ah, a hmaisa Jerusalem ropi le atu-ih dinhmun se zet a khaikhin. Bung ngatnak ah, Pathian hnenah Jerusalem runsuak dingin Jeremiah thla a cam.
Ṭah Hla cabu-ih thucah cu Pathian in a mipawl a diknak le a rinumnak in a thunun hai ti mi hi a si. Cutiih a tuahnak săn cu anmah rĕm dingah le tungdingsal dingah a si. Hi cabu sungah zir ding thil pathum kan hmu. A pakhatnak ah nunsimdān le cumiih rahsuah a simfiang. A pahnihnak ah, Pathian nunsimnak thlentu sual phun dangdang a tarlang. A pathumnak le a pawimawhbik cu, Pathian in a mipawl nun a sim tikih an umdān ding simfiang hi a si. Riahsiatnak ni ah ruahsannak a um ti hi Jeremiah in mi zangfah thiam Pathian a ruah rero nak ihsin kan hmuh mi a si (3:21-38). Thuṭhimnakah, “Jehovah-ih zahngainak zarah kannih cu kan riaral lo, ziangruangahtile a lainatnak a tlawlh dah lo,” ti thu ropi tla kan hmu (3:22). Curuangah Pathian in a mipawl tungdingsal dingin Jeremiah in thla a cam.
Thu Hlawm Ṭhen
- I. Jeremiah in Jerusalem a rămzia a ausuak (bung 1)
- II. Jeremiah in Pathian thinlingnak in Jerusalem tuarnak a thlen thu a simfiang (bung 2)
- III. Jeremiah a bulpâk in Jerusalem siatnak thu ah a buai (bung 3)
- IV. Jeremiah in ziangruangah Pathian in Jerusalem thu a ṭhen ti a phuanglang (bung 4)
- V. Pathian runsuaknak hrangah Israel thla a cam (bung 5)
Jerusalem Rămnak
1 aMipi rak khah dah nak khawpi,
Lileng phiarphiten a to!
Miphunpawl lakih rak ropi dah,
Nuhmei vekah a cang ta!
Ramṭhenpawl lakih lalnu cu sál ah a rak cang aw!
2 bZan ah lungkuai zetin a ṭap,
A mitthli a biang ah a luangthla;
Amah duhtupawl zate lakah,
Amah hnemtu zohman an um lo.
A ṭhianrualpawl zaten a parah an rinum lo;
Anmah cu a ral ah an cang.
3 cJudah cu ralkaih ah a feh,
Thinharnak le a har mi sál hnaṭuan ah;
Anih cu miphunpawl lakah a cêng,
Cawlhhahdamnak a hmu lo;
Amah hremtupawl hmuahhmuah in a vansan laifangah amah cu an man.
4 dKhiah cia mi puaipawl ah zohman an rat lo ruangah,
Zion zinpawl an hrûm.
A kulh kăwtkapawl zaten an ṭhing reprep;
A puithiampawl an ai ruangro,
A fala him pawl zăwnzaihter an si ih,
Anih cu thinnain a um.
5 eA dotupawl bawi ah an cang,
A ralpawl an ṭhangso;
Ziangahtile a dān pahbălnakpawl ruangah amah cu Jehovah in a rak zawnzaiter.
A fātepawl cu ral hmaiah ralkaih ah an rak feh.
6 fCule a lianngannak hmuahhmuah cun Zion fanu a tlansan.
A uktupawl cu tlimno hmu lo zuknêng vekah an cang,
Anmah dawitu hmaiah tha nei loin an tlân.
7 gA thinhar le a vahvaih nipawl ah,
Jerusalem cun hlanlai ih a rak neih dah mi a thil duhumpawl hmuahhmuah a máng.
A mipawl ral kut sungih an tlûk tikah,
Amah bawmtu zohman an um lo,
A dotupawl cun amah cu an hmu ih,
A siatnak ah an hnihsan.
8 hJerusalem cu nasa tukin a rak sual,
Curuangah anih cu a rak bawrhbang tata.
A taklawngnak an hmuh ruangah amah upattupawl hmuahhmuah in an nautat;
A si rori, anih cu a hrûm ih khat lam a hawisan.
9 iA thianlonak cu a hni sunghruhpawl ah a um;
Anih cun a cān netnak ding a rak ruat lo;
Curuangah a tluk sawprăwpnak cu khawruahharza a si;
Hnemtu zohman a nei lo.
“Maw Jehovah, ngai hnik, ka thinharzia hi,
Ziangahtile doral cu a khaisângaw.”
10 jA thil duhumpawl zate parah a ral cun a kut a rak pharh;
Ziangahtile na mipi pungkhawm lakah lut lo dingih thu na rak pek mi miphunpawl
A hmun thianghlim sungih an luh a rak hmu.
11 kA mipi zaten aihramin,
Rawl an hawl,
Nun humhimnak dingah rawl aiah an thil mankhung pawl an rak pe.
“Zoh hnik, Maw Jehovah, ngai hman,
Ziangahtile kei cu hmuhsuam ka si,” a ti.
12 l“Nannih lamzin ih fehpawl hmuahhmuah tla, cucu nan hrangah zianghmanlo men a simaw?
Ngai hnik uhla, zoh hnik uh,
Jehovah in a thinheng natsat ni ih a thlenter mi,
Ka parih nasa zetih a thlenter mi ka riahsiatnak vek riahsiatnak a um maw si?
13 m“Tlun lam ihsin ka ruhpawl sungah meisa a thlak ih,
Cu cun a neh thluh hai;
Anih cun ka ke hrangah sur a zar ih,
Dung lamah i kirter;
Ṭhing ko i tuah ih,
Sunnihlawhin ka cau.
14 n“Ka dān pahbălnak hngawngkol cu ka hngawng ah bât a si;
A kut in a phiarkhawm ih,
Ka hngawng ah a thlaih.
Anih cun ka thazang a duaiter;
Ka neh thei lo ding mipawlih kut ah Bawipa in i thlen.
15 o“Kan lakih ka micak zaten Bawipa in a ke hnuaiah a pal;
Ka tlangvalpawl duaiter dingah,
Keimah dokalhin mipi a kokhawm;
Judah fanu himte cu,
Sabit sawr mi bangin Bawipa in a pál.
16 p“Hi thilpawl ruangah ka ṭap;
Ka mit, ka mit ihsin tidai a luang;
Ziangruangahtile hnemtu, ka nun harhthartertu ding cu
Ka hnen ihsin hlapi ah a um.
Ral in an neh ruangah ka falepawl cu an ṭhing reprep.”
17 qZion cun a kut a san,
Asinan amah cu zohman in an hnem lo;
Jakob thuhla ah a kiangkapih umpawl cu a doral cang dingah Jehovah in thu a rak pe;
An lakah Jerusalem cu thil bawrhbang ah a cang.
18 r“Jehovah cu a dingfel a si,
Ziangahtile a thupek mi dokalhin ka rak hél.
Mi hmuahhmuah in atu-ah thei hnik uhla, ka riahsiatnak hi ngai hnik uh;
Ka fala him pawl le ka tlangvalpawl cu ralkaih ah an rak feh.
19 s“I duhtupawl ka ko,
Asinan annih cun in rak bum;
An nun humhimnak dingih rawl an hawl laiah,
Ka puithiampawl le ka upapawl cu khawpi sungah an hloral.
20 t“Maw Jehovah, ka thinharzia hi zoh hnik;
Ka nun a buai;
Ka sungah ka thinlung a linglet,
Ziangahtile mihél nasa tak ka rak si.
Inn lengah ralnâm in a that,
Inn sungah thihnak vek a si.
21 u“Annih in ka hrūm an thei,
Asinan zohman in in hnem lo.
Ka ralpawl hmuahhmuah in ka harsatnak an rak thei thluh;
Na tuah mi parah an lung a awi.
Keimah vek an can thei nak dingah,
Na rak thăn cia mi ni run thlengter aw.
22 v“An sualralnak hmuahhmuah na hmaiah thleng sehla,
Ka dān pahbălnak hmuahhmuah ruangah ka parih na tuah bangin,
An parah tuah ve aw;
Ziangahtile ka hrūmnak a tam ih, ka thinlung a cau,” a ti.
1:1a Pui 26:43; 1Sp 4:21; Isa 3:26; 47:8; Jer 42:2; Eze 5:5
1:3c Suah 15:9; Dnp 28:65; Jer 13:19
1:4d Sam 137:1; Isa 27:10; Joe 1:8-13
1:5e Sam 5:10; Isa 22:5; Jer 10:20; 30:15; Ṭah 2:17
1:6f Pui 26:36
1:7g 2Sp 14:26; Jer 37:7; Ṭah 4:17
1:8h Sam 6:6; 38:8; Isa 59:2-13; Jer 13:22, 26
1:9i Dnp 32:28-29; Ths 4:1; Jer 13:18; 16:7; Eze 24:13
1:10j Dnp 23:3; Sam 74:7-8; 79:1; Isa 64:11; Jer 51:51
1:11k Jer 37:21; Ṭah 1:19; 2:12
1:12l Isa 10:4; 13:13; Jer 18:16; 30:24
1:13m Job 18:8; 30:30; Sam 102:3; Jer 44:6
1:14n Dnp 28:48; Thf 5:22; Isa 47:6; Jer 32:5
1:15o 2Sp 19:21; Isa 5:5; 63:3; Jer 14:17; 18:21; 37:10
1:16p Sam 69:20; 119:136; Ths 4:1; Isa 22:4; Jer 13:17; 16:7; Ṭah 2:11, 18
1:17q Pui 18:25-28; Isa 1:15; Jer 4:31
1:18r Suah 9:27; Dnp 28:32, 41; Ezr 9:15
1:19s Jer 14:15; 22:20; Ṭah 2:20
1:20t Dnp 32:25; Job 20:2; Jer 4:19; Ṭah 2:11; Eze 7:15
1:21u Sam 6:6; Jer 30:16; Ṭah 1:8; 2:15
1:22v Neh 4:5; Sam 6:6; Jer 18:23
Pathian-ih Ralrin Peknak a Thleng
1 aBawipa in a thinhengnak khawdur in
Zion fanu a rak khuh hi!
Israel ropitnak cu van ihsin leilung ah a hlăwnthlak ih,
A thinheng ni ah a ke retnak a cîng lo.
2 bBawipa in a dawlh thluh ih,
Jakob-ih cēnnak hmunpawl a zangfah lo.
Judah fanuih ral hruangkulhpawl cu a thinlingin a hlăwnthla;
Leilung thleng ko a dirtla hai;
Lalram le a uktupawl cu a rak bawrhbangter.
3 cAnih in a thinling maksak in Israel-ih dki kip in a sattán;
Doral hmai ihsin a vawrh lam kut a lakir.
Kil i kip kāngfaitu meisa hliau bangin,
Anih in Jakob cu a rak ur.
4 eDoral bangih dīngin a thál a rak nawp;
Doral bangin, a vawrh lam kut in,
A mit ih duh mi hmuahhmuah a that;
Zion fanu deute parah,
A thinso cu meisa bangin a thlebung.
5 fBawipa cu doral bangtukah a cang.
Anih in Israel a dawlh thluh,
A siangpahrang inn zaten a dawlh thluh;
A ral hruangkulhpawl a siatbăl ih,
Judah fanu lakah ninghang riahsia le lungzûr ṭahnak a karhter.
6 gHmuan parih a tuah bangtukin,
A biakbûk parah râwng zetin kut a thlak;
A pumkhawmnak hmun a ṭhiatbăl;
Jehovah in Zion ah ni khiah cia mi puaipawl le Sabbath-pawl a hngilhter.
A ling i ling a aithawknak in siangpahrang le puithiam ziangah a siar lo.
7 hBawipa in amai biakṭheng ziangah a siar lo,
A hmun thianghlim a tân ta;
A siangpahrang inn pharpawl khal doral kut ah a pek thluh.
Khiah mi puai ni bangin Jehovah inn ah thawmvâng an rak tuah.
8 iJehovah in Zion fanuih hauhruang ṭhiatbăl a rak tum.
Anih in ri a rîn,
Ṭhiatbălnak ihsin a kut a sūp lo;
Curuangah phentu leipâwng le hauhruang cu ṭap ko a tuah hai;
An riaraltlang.
9 jA kulh kăwtkapawl lei sungah an pil;
Anih in a tlângpawl a ṭhiatbăl ih, a khiak hai.
A siangpahrang le a uktupawl cu miphunpawl hnenah an feh;
Dān a um nawn lo ih,
A profetpawl in Jehovah hnen ihsin larnak an hmu lo.
10 kZion fanuih upapawl cu leilung ah an to ih, daiten an um;
An lu parah leivut an phulh ih,
Buri in an ngerhaw.
Jerusalem fala him pawl leilung ah an lu an kûn.
11 lMitthli in ka mit a siatter,
Ka thinlung a buai;
Ka mipawlih fanu siathloralnak ruangah le,
Nauhak le nausente khawpi sung kăwtthler ih caupawl ruangah,
Ka hnit leilung ah a bung.
12 mAn nulepawl hnenah,
“Khuiah thlairawl le sabit zu a um?” tiah an ti.
Hriamhma baih mi bangin
Khawpi kăwtthler ah an cau,
An nunnak cu an nulepawlih ṭāng ah thletbŭng a si.
13 nZiangtin so maw ka lo hnem ding?
Maw Jerusalem fanu,
Ziang thawn so ka lo ṭhim ding?
Maw Zion fanu fala himte,
Ka lo hnĕmnak dingah ziang thawn ka lo ṭhim ding?
Ziangahtile na siatbălzia cu tifinriat tlukin a kau;
Zo in a lo damter thei ding?
14 oNa profetpawl cun thuphan le
Bumawknak larnak na hrangah an hmu;
Na vanneihnak tungdingsal dingah,
Na mawhsualnak an rak phawrhsuak lo,
Asinan simsungnak dik lo le
Bumnakpawl na hrangah an rak hmu.
15 pLamzin ih feh hmuahhmuah in an za an lo bĕnghnawh;
Jerusalem fanu heheuin an lu an thinhnawh:
“ ‘Mawi famkim,
Leitlun pumpuluk lungawi aipuannak,’ tiih kawh mi khawpi a si lo maw?” tiah an ti.
16 qNa doral hmuahhmuah in nangmah dokalhin an kâ an ang;
An lo heheu ih, an hacâng an lo rialhnawh.
Annih in, “Amah cu kan dawlh thluh zo!
Thungaiten hihi kan rak hngah mi ni a si;
Cumi cu kan rak táwngngah zo, kan rak hmungah zo!” tiah an ti.
17 rJehovah in a tumtah mi a tuah zo;
Hlan lai piih thu a rak pek mi a thu a tlamtlingter zo.
Anih in a hlăwnthla ih a zangfah lo,
Cule ralpawl cu na tlunih lungawi aipuang dingin a tuah;
Na doralpawlih ski a rak khaisâng.
18 tBawipa hnenah an thinlung a ausuak,
“Maw Zion fanu hauhruang,
Tiva bangin sun le zan mitthli luangthla seh;
Cawlhahdam hlah aw;
Na mit cawlhahdamter hlah.
19 uTho aw, zan ah ausuak aw,
Zan hngah cān thawhtirah;
Bawipa hmaiah tidai bangin na thinlung thlebung aw.
Kăwtthler tăwntir kip ih rilrawn ruangih cau,
Na falepawlih nunnak ruangah amai hnen lamah na kut thlir aw,” tiin.
20 vZoh hnik, Maw Jehovah, ngai hman!
Zo hnenah so hihi na rak tuah?
An rak hrin mi, duat zetih an kilkhawi mi an fanau tete,
An cithlah cu nunaupawl in an ei ding maw?
Puithiam le profet teh Bawipaih hmun thianghlim ah,
Thah an si ding maw?
21 wKăwtthler leilung parah mino le tar an rīl teptep;
Ka fala him pawl le ka tlangvalpawl ralnâm in an rīl;
Na thinheng ni ah na rak that hai,
Zangfah hai loin, na that hai.
22 xKhiah mi puai ni ih mi na sawm bangin
Ka hrangih ṭihnungzapawl cu kil i kip ihsin na sawm.
Jehovah-ih thinheng ni ah cun zohman raltlân le zuah mi an um lo.
Ka hrin mi le ka cawm mipawl cu
Ka ralpawl in an that ṭheh.
2:1a 1San 28:2; Sam 99:5; 132:7; Ṭah 3:44
2:2b Sam 21:9; Isa 25:12; Ṭah 3:43; Mik 5:11
2:3c Sam 74:11; 75:5, 10; Isa 42:25; Jer 21:4-5, 14
2:3d ki: Cahnak hmuhsaknak a si.
2:4e Job 16:13; Sam 48:2; Isa 42:25; Jer 4:20; 7:20; Eze 20:34
2:5f 2Sp 25:9; Jer 7:20; 30:14
2:6g 2San 36:19; Isa 5:12; 43:28; Jer 52:13; Zef 3:18
2:7h Pui 26:31; Sam 74:7-8; Isa 64:11; Jer 21:4; 33:4-5; Eze 7:21-22, 24
2:8i 2Sp 21:13; Sam 48:13; Isa 3:26; Jer 39:8
2:9j Dnp 28:36; 1Sam 3:1; 2Sp 24:15; 2San 15:3; Neh 1:3; Isa 45:2; Jer 16:13; Hos 3:4; Amo 8:11
2:10k Jos 7:6; Job 2:12-13; Isa 3:24, 26; Ṭah 3:28; Eze 27:30-31
2:11l Job 30:27; Sam 22:14; 119:82; Isa 15:3; Jer 9:1; Ṭah 1:16, 20; 4:4
2:12m Job 3:24; Isa 24:11; Ṭah 4:4
2:13n Isa 1:6; Jer 8:22; Ṭah 1:12
2:14o Jer 2:8; 8:11; 28:15; Eze 13:3
2:15p Dnp 28:37; Sam 45:11; 48:2; Jer 19:8; Ṭah 1:21; Eze 16:14; 25:6; Nah 3:19
2:16q Job 16:9; Sam 22:13; 35:25; Ṭah 3:46; Eze 36:3; Mik 4:11
2:17r Dnp 28:15-45; Sam 89:42; Jer 39:16; Ṭah 1:5; Eze 5:11; Zek 1:6
2:17s ki: Câng 3 simfiangnak zoh aw.
2:18t Sam 119:145; Jer 9:1; Ṭah 1:16; 3:49
2:19u 1Sam 1:15; Sam 28:2; Isa 26:9; 51:20
2:20v Dnp 28:53; Sam 78:64; Ṭah 1:19; Eze 5:10
2:21w 2San 36:17; Sam 78:63; Jer 6:11; Ṭah 3:43; Zek 11:6
2:22x Job 27:14; Sam 31:13; Hos 9:13
A Hnget mi Pathian Zahngainak
1 aAmai thinlingnak kianghrăwl ih zăwnzaihnak hmutu pa cu keimah ka si.
2 bAnih cun tleu ah si loin
Thim lakah i hruai ih, i fehter.
3 cThungaiten sunnihlawhin
Atu le atu ka parah a kut a thlak.
4 dAmah in ka titsa le ka vun tar ko i tuah ih,
Ka ruhpawl a khiak.
5 eAnih in khâtnak le hmakhaw pihnak thawn
I kulh ih, i vel.
6 fReipi laiih mithi bangin,
Hmun thim pawl ah i ret.
7 gKa suah thei lo nak dingin anih cun hruang in i kulh;
Ka cikcin rit zetin a tuah.
8 hṬapin ka au tik hmanah,
Anih cun ka thlacam i kharsak.
9 iKa lamzinpawl cu lungto in a khambĕt;
Ka zinpawl kĕlkawi ko a tuah.
10 jAmah cu mi bawhthuptu kiosa le,
Ka hrangih mi bawhthuptu savâwm vek a rak si.
11 kAnih cun ka lamzinpawl a pêngter ih, cip nêknêkin i băwtthlek;
Anih in ṭhing reprep ko i tuah.
12 lA thál a nawp ih,
A thál fung hrangih hmui bah mi ah i ret.
13 mA thál fung bawm sungih nthál fungpawl tla
Ka kailengpawl suntlăng ko a tuah.
14 oKa mipawl hmuahhmuah hnenah hnihsan mi ah ka cang ih,
Sunvu teih nautat ih an hlasakhnawh mi ah ka cang.
15 pAnih cun khâtnak thawn i khatter,
Anih cun la-ana kung khâ i inter.
16 qAnih cun lungte hrâwl in ka hâ a khiak fawn ih,
Vutcâm in i khuh.
17 Ka nunnak cu hnangamdaihnak ihsin hlapi ah na ṭhawn;
Lungawinak ka rak hngilh.
18 rCule kei in, “Ka thazang le ka ruahsannak cu
Jehovah hnen ihsin a hloral zo,” tiah ka ti.
19 Ka zăwnzaihnak le ka vahvaihnak,
Ka hrangih la-ana kung khâ
20 sKa nunnak cun a cîng lai ih,
Ka sungah a kûn.
21 Himi hi ka vun mangsal,
Curuangah ruahsannak ka nei:
22 tJehovah-ih zahngainak zarah kannih cu kan riaral lo,
Ziangruangahtile a lainatnak a tlawlh dah lo.
23 uCupawl cu zing tin an thar;
Na rinumnak cu a ropi a si.
24 v“Jehovah cu ka covo a si,
Curuangah amah cu ka ruahsan!” tiah ka nunnak in a ti.
25 wAmah hngaktupawl hrangah Jehovah cu a ṭha,
Amah hawltu hrangah.
26 xMi in Jehovah-ih runsuahnak daiteih a hngah cu a ṭha a si.
27 Milai in a no laiih hngawngkol a phurh cu thil ṭha a si.
28 yAmah lawngin to sehla, daiten um seh,
Ziangruangahtile cumi cu anih in a parah a ṭhum a si.
29 zLeivut ah a kâ ret seh,
Ruahsan ding a um nahman maw!
30 aaAmah bengtu hnenah a biang tŭn seh,
Cule nautatnak in khat seh.
31 Ziangahtile Bawipa in a hlăwnhlo kumkhua lo ding.
32 abAnih in thinnatnak suakter hman seh,
A zahngainak a tam bangin
Lainatnak a hmuh leh thotho ding.
33 Ziangahtile anih cun aca duh hrimhrim ruangih zawnzaiter le,
Minung falepawl thinnater a si fawn lo.
34 Lei thawngtla hmuahhmuah
A ke hnuaiih palbĕt,
35 Cungnung Bik hmaiah mi pakhat dik lo ih thuṭhensak le,
36 adMi pakhat a thuhla herhkawisak cu Bawipa in a pawm lo.
37 aeBawipa in thu a pek lo tikah,
Thusim ih, cumi cangsuaktertu cu zo a si?
38 afHmakhaw Pihnak le ṭhatnak cu
Cungnung Bik kâ ihsin a si lo maw?
39 Minung pakhat a sualpawl ruangih cawhkuan pek a si tikah,
Ziangruangah anih cu a phunzai ding?
40 agKan lamzinpawl zawtsuak uhsi la, cekfel uhsi,
Cule Jehovah hnenah kirsal uhsi.
41 ahVan Pathian hnenah
Kan thinlung le kan kut thlir uhsi.
42 aiDān kan rak pahbăl ih, kan rak hél;
Nang cun in rak ngaithiam lo.
43 ajNang cu thinhengnak thawn na khuhaw ih,
In rak dawi;
Zangfah loin na rak that.
44 akThlacamnak fehtlăng thei lo dingin,
Khawdur in na khuhaw.
45 alNang cun miphunpawl lakih hnawm le bāl ah in rak tuah.
46 amKan doralpawl hmuahhmuah in
Kanmah dokalhin an kâ an rak ang.
47 anṬihnak le tháng kan parah a thleng,
Ṭhin reprep nak le siatbălnak.
48 aoKa mipawlih fanu siatnak ruangah
Ka mitthli tiva bangin a luang.
49 apKa mitthli a luang ih, a reh lo,
Dawnkhamtu um loin,
50 aqJehovah in van ihsin a run zoh ih,
A hmuh tiangin.
51 Ka khawpi fanupawl hmuahhmuah ruangah
Ka mit in ka thinlung a nater.
52 arVate pêl bangin săn um loin,
Ka ralpawl in in pêl.
53 asKhur sungah ṭawng loin atkeimah cu in ret ih,
Ka parah lungto in thlak.
54 auKa lu tlunah tidai a luang;
Kei in, “Kei cu sahtan ka si,” tiah ka ti.
55 avMaw Jehovah, khur thûkbik sung ihsin
Na hmin ka ko.
56 aw“Ka thawpi suah mi ihsin le băwmnak dilih ka aunak ihsin
Na hna thup hram hlah,” ka ti mi aw na rak thei.
57 axKa lo kawh ni ah nang in i rak naih ih,
“Ṭih hlah,” tiah i ti.
58 ayMaw Bawipa, ka nunnak ih thubuai i relsak;
Ka nunnak na rak tlen.
59 azMaw Jehovah, palbĕt ka sizia na hmu;
Ka thuhla ṭhen aw.
60 baAn phulei samnak zaten na hmu zo,
Keimah dokalhih an thil tum mi hmuahhmuah khal.
61 bbAn mi hmuhsuamnak zaten na rak thei,
Maw Jehovah, keimah dokalhih an thil tum mi hmuahhmuah khal.
62 bcKa doralpawlih hmur le
An ṭawng thektho nak cun sunnihlawhin keimah in dokalh.
63 bdAn to le an dīn lai zoh hnik aw,
Keimah cu an setet mi hla ka si.
64 beLehrūl hai aw, Maw Jehovah,
An kut hnaṭuan bangtukin.
65 bfThinlung khoh pe hai aw,
An parah na camsiatnak um seh!
66 bgJehovah-ih van hnuai ihsin
Na thinhengnak in
Dawi hai awla, hloralter hai aw.
3:1a Job 19:21; Sam 88:7; Jer 15:17-18
3:2b Dnp 28:29; Job 19:8; Sam 82:5
3:3c Sam 38:2; Isa 5:25; 63:10
3:4d Sam 51:8; Jer 50:17; Ṭah 4:8
3:6f Sam 88:5-6; Isa 59:10
3:9i Isa 63:17; Ṭah 3:11; Hos 2:6
3:12l Sam 7:12-13; 38:2; Ṭah 2:4
3:13n thál fungpawl: Hihi hriamhrei relnak hrangah, Hebrumipawl in “thál fapa” ti le “a thál fapapawl” ti ṭawngkam hi an hmang ṭheu.
3:14o Job 30:9; Sam 22:6-7; Jer 20:7; 48:27
3:15p Isa 51:17; Jer 9:15; 25:15-18
3:20s Sam 42:5, 11; 43:5
3:22t Sam 78:38; 130:7; Hos 11:9
3:23u Suah 34:6; Isa 33:2; Zef 3:5
3:24v Sam 119:57; 142:5
3:25w Sam 27:14; 33:18; Isa 25:9; 30:18; 40:31; Jam 5:7
3:28y Jer 15:17; Ṭah 2:10
3:29z Job 2:8; Jer 31:17; Jon 3:9
3:30aa Job 16:10; Isa 50:6; Mik 5:1
3:33ac a duh hrimhrim: A ṭawng hrampi ah cun, “a thinlung ihsin” ti a si.
3:37ae Sam 33:9-11; Thf 19:21
3:38af Job 2:10; Jer 30:15; 32:42; Mik 7:9
3:40ag Sam 119:59; Zek 1:3; 2Ko 13:5
3:42ai Jer 5:7-9
3:43aj Sam 44:19; Ṭah 2:2, 17, 21
3:44ak Isa 58:4; Ṭah 2:1; Zek 7:13
3:45al 1Ko 4:13
3:46am Sam 22:13; Ṭah 2:16
3:47an Isa 24:17-18; Jer 48:43
3:48ao Jer 9:1, 18; Ṭah 1:16; Rom 9:1-3
3:49ap Jer 14:17; Ṭah 2:18
3:50aq Sam 14:2; 80:14-15; Isa 63:15
3:52ar 1Sam 26:18; Sam 35:7
3:53at keimah: A ṭawng hrampi ah cun nunnak ti a si.
3:54au Sam 31:22; 69:2; 88:5; Eze 37:11; Jon 2:3-5
3:55av Sam 88:6; 130:1; Jon 2:2
3:58ay Sam 34:22; Jer 50:34; 51:36
3:59az Sam 35:23; Jer 18:19-20
3:62bc Eze 36:3
3:63bd Job 30:9
3:65bf Suah 14:8; Dnp 2:30; Isa 6:10
3:66bg Sam 35:6; Ṭah 3:43
Zion Hremnak
1 aZiangtin so sui cu a rak dál!
Ziangtin so sui hlirhlăng cu a thlĕngawk!
Hmun thianghlim lungpawl cu
Kăwtthler kip tăwntir ah an darhsarh thluh.
2 bA sunglawi mi Zion Fapapawl,
Sui hlirhlăng vekih mankhung,
Ziangtin so bel tuahtuih kutsuak,
Leitlak bel vek menih ruah an si!
3 cRam uipawl hmanin
An fa no cawmnak ah an hnawi an fawh;
Asinan ka mipawlih fanu cu a nun a râwng,
Thlaler ih kalauk va
4 dTihal ruangah nausente lei cu a sangkhâr ah a bĕt;
Nauhakpawl in ei ding an dil,
Asinan zohman in an pe lo.
5 eRawl thaw ei ṭheu tupawl,
Kăwtthler ah kutlawng in an um;
Hnipuan senlar thawi ṭhanglianpawl vutcâm pâwng an bawh.
6 fKa mipawlih fanu mawhsualnak cu
Sodom mawhsualnak hnakin a nasasawn,
Cumi cu mit ṭhep karah hlăwn a si ih,
Amah cu zawih kut hmanin an bawm lo!
7 A Nazir-mipawl cu vur hnakin an tlesawn ih,
Hnawi hnakin an varsawn;
An taksa cu keplung hnakin an sensawn,
An hmel cu safaira bangtukin.
8 gAn hmel cu rapṭing hnakin an dumsawn,
Theihthiam theih loin kăwtthler ah an feh.
An vun cu an ruhpawl ah a bet,
Cumi cu zanthing vekih ro ah a cang.
9 hRalnâm ih thah mipawl cu
Rilrawng ih thipawl hnakin an van a ṭhasawn;
Ziangahtile annih cu lóram rahsuah tlaksam ruangah hliam tuarin an riaral.
10 iMi lainat nei nunaupawl kut in
Anmai faletla an suang;
Annih cu an rawl ah an cang,
Ka mipawlih fanu siatralnak ah cun.
11 jJehovah in a thinsonak a phawrhsuak ṭheh,
A thinheng alh cu a thlebung.
Zion ah meisa a muah ih,
Cumi cun a hramṭohnakpawl a kāng ṭheh.
12 kJerusalem kulh kăwtkapawl sungah doralpawl le ralpawl
An lut thei ti leitlun siangpahrangpawl le,
Leilung luahtupawl hmuahhmuah in an rak zum lo.
13 lA sungih midik thisen suahtu,
A profetpawlih sualpawl ruangah le
A puithiampawlih mawhsualnakpawl ruangah a tuar a si.
14 mAnnih cu kăwtthler ah mitcaw in an vâkvai.
Thisen thawn an bawrhbangawter,
Cutin zohman in an sinfen an thâm thei lo.
15 nAnnih in an hnenah,
“Tlanhlo uh, mithiang lo pawl!
Tlanhlo uh, tlanhlo uh,
In thâm hlah uh!” tiin an au.
An tlân ih an vahvaih tikah,
Miphunpawl lakih mipawl in,
“Hi tawkah an cêng nawn lo ding,” tiah an ti.
16 oJehovah thinheng mithmai in anmah cu a ṭhekdarh,
Anih in a ngaihsak hai nawn lo.
Annih in puithiampawl an upat lo ih,
Upapawl hnenah duhsaknak an langter fawn lo.
17 pIn bawmtu ding thlir lak men nak ah kan mit a khám;
Kan thlir tikah in runsuak thei lo tu ding miphun kan thlir.
18 qKan kăwtthler ih kan fehlonak dingah
Annih in kan kenehpawl an zâwt.
Kan cemnetnak cu a nai;
Kan cān a cem,
Ziangahtile kan cemnetnak a thleng zo.
19 rIn dawitupawl cu vanih muvanlaipawl hnakin an rangsawn.
Annih cun tlangpawl ah in dûm ih,
Thlaler ah in bawhthup.
20 s“A thlahlim hnuaiah miphunpawl lakah kan damsuak ding,” tiih kan ruah mi,
Kan nunnak thaw, Jehovah ih hriak thih mi cu an tháng ah awh a si.
21 tMaw Edom fanu, Uz ram ih cêng, aipuang awla lungawi aw!
Sihmansehla, cuih no cu na par khalah a thleng ding,
Na ri ding ih, lawngfangkheh ah na tuahaw ding.
22 uMaw Zion fanu,
Na mawhsualnak cawhkuan cu ṭheh a si thlang,
Anih in sál tānnak ah a lo kuat nawn lo ding.
Maw Edom fanu,
Anih cun na mawhsualnak cawhkuan a pe ding;
Na sualpawl a khuh lo ding!
4:1a Eze 7:19
4:2b Isa 51:18
4:3c Job 39:16
4:4d Dnp 28:48; Sam 22:15; Ṭah 2:11-12
4:5e Isa 3:26; Jer 6:2; Amo 6:3-7
4:8g Job 30:28; Sam 102:3-5; Ṭah 3:4
4:9h 2Sp 25:3; Jer 15:2; Ṭah 5:10
4:10i Pui 26:29; Dnp 28:53-57; Ṭah 2:20; Eze 5:10
4:11j Dnp 32:22; 2San 34:21; Jer 17:27; Eze 22:31; Nah 1:6; Zef 2:2
4:13l 2Sp 21:16; Jer 5:31; Eze 22:28; Mik 3:11
4:15n Pui 13:46; Jer 44:14; Mik 2:10
4:16o Isa 9:14-16; Ṭah 2:6; 5:12
4:17p Isa 20:5; Jer 37:7; Ṭah 1:7; Eze 29:16
4:18q Eze 7:2-12; Amo 8:2
4:19r Dnp 28:49; Isa 5:26-28; Jer 52:7
4:20s 1Sam 26:9; 2Sam 19:21; Sam 91:1; Jer 39:5; Eze 12:12-13
4:21t Sem 36:28; Sam 16:5; Eze 25:14; Amo 1:11; Oba 1:16; Hab 2:16
4:22u Sam 137:7; Isa 40:2; Jer 33:8; Eze 25:1-14; Mal 1:4
Tundīnsalnak hrang Thlacam
1 aMaw Jehovah, kan parih thil thleng mi hi cîng ringring aw;
Zoh hnik, hmuhsuam kan sinak hi hmu hnik aw!
2 bKan ro cu mikhualpawl hnenih pek an si ih,
Kan innpawl cu khawtluang mipawl hnenah.
3 cKannih cu pa nei lo le hngakṭah ah kan cang,
Kan nulepawl cu nuhmei vek an si.
4 dKan in mi tidai man kan pe ih,
Kanmai tihthing ding kan lei.
5 eKan hngawng cu hremnak tăngah a um;
Bāng zetin kan ṭuan ih, cawlh ti kan nei lo.
6 fRawl khawp ngah dingah, Izip le
Assiria-mipawl hnenah kan kut kan rak san.
7 gKan pupápawl an rak sual ih, an um nawn lo,
Asinan kannih in an mawhsualnakpawl kan phur.
8 hSiahhlawhpawl in in uk;
An kut ihsi in runsuaktu ding zohman an um lo.
9 Thlaler ih ralnâm ruangah,
Kan nun tiang pe ngam in kan rawl kan ngah.
10 iPām natsat tuk ruangah,
Kan vun cu thŭk vekin a sa.
11 jAnnih in Zion ah nunaupawl an kaihrem,
Falapawl cu Judah khawpipawl ah.
12 kAn kut in tlangsuak upapawl an thlai ih,
Upapawl cu zahpah an si lo.
13 Tlangvalpawl in rial lung an rial;
Mipa nauhakpawl thing tum rit hnuaiah an tlu zăwk rero.
14 lKulh kăwtka ah upapawl an um nawn lo ih,
Tlangvalpawl in an awnmawi an tum nawn lo.
15 mKan thinlung aipuannak a reh;
Kan lāmnak cu lusūnnak ah a cang.
16 nKan lu ihsin lallukhum a tla.
Kan rak sual ruangah kan hmakhua a pit a si.
17 oHimi ruangah kan thinlung a cau,
Himi thilpawl ruangah kan mit a rau.
18 pA ṭhing reprep mi Zion tlang ruangah,
Tlang parah sihál rual an tawivâk rero.
19 qMaw Jehovah, nang cun kumkhuain na uk,
Na laltokham cu san khat hnu san khat a hmun.
20 rZiangah so in hngilh kumkhua ih,
Rei tuk in thlauthlak?
21 Maw Jehovah na hnen lam in hawitersal awla, tuahṭhatsal kan si ding;
Hlanlai vek khan kan nun titharsal aw,
22 sIn hnáwng lan ta lawlaw lo ih,
Kan parih na thin a heng tuk lawmmam lo ah cun!
5:1a Sam 44:13-16; 89:50
5:2b Sam 79:1; 109:11; Jer 17:4; Zef 1:13
5:3c Suah 22:24; Jer 15:8
5:4d Isa 3:1; Eze 4:16-17
5:5e Jos 1:13; Neh 9:37; Isa 47:6
5:10i Job 30:30; Ṭah 4:8-9
5:12k Pui 19:32; Ṭah 2:6; 4:16
5:16n Job 19:9; Sam 89:39; Isa 3:11
5:17o Sam 6:7; Isa 1:5; Jer 8:18
5:18p Sam 74:2-3; Isa 27:10; Mik 3:12
5:19q 1San 16:31; Sam 45:6; 102:12, 24-27
5:20r Sam 13:1; 71:11; 80:3; Isa 60:20-22