About Bible Thianghlim | ©

BibleThianghlim – Habakkuk

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Habakkuk

123

• A ngantu: Habakkuk
• A siartu: Judah (Pathian-ih minungpawl)
• A huap sung cān: B.C. 606 hrawng

Habakkuk cu Judah thuanthu ih tikcucān harsat cān ah rawng a bawl.

Pathian duh zawngih tundinsal tumtu Josiah lalnak hnuaiah (B.C. 640-609) Judah-mipawl cun ṭhangphawknak fate an tep. Asinan amah cu B.C. 609 ah thah a si. Amah hnuih siangpahrangpawl in mipi cu sual maksak sinsin ah an hruai. Cuvek buainakpawl hleiah, uktu Assiria cu uktu thar Babilon kut ah B.C. 612 ah a tlu ih, Babilon cu leitlun pumpuluk uktu a hung si. Habakkuk in amai san ih lalram le lalram karlakih thil thleng mipawl a ruah tikah, Pathian thuṭhennak theithiam loin thusuhnak a nei.

Bung 1-2 ah Habakkuk-ih thusuhnakpawl, vuivainakpawl le Pathian ih thu a lehnakpawl a dotdotin kan hmu.

Habakkuk san ah Judah-mipawl an sual zet laiah a dingfel mi Pathian in zianghman ti loih a um menmen hi ziangruangah a si, tiin Habakkuk in thu a sut (1:2-4). A hmaisabik Pathian ih thulehnak cu anih in Judah-mipawlih sualnak cu hmu loin a umsan men lo; Babilon-mipawl kha Judah dāntattu ding hmanrua ah a tungding ding ti a si (1:5-11).

Babilon-mipawl cu zahngainak nei lo le an hlawhtlinnak cu rairing mipawlih pathianpawl ruangah a si ti zumtu an si. Curuangah Habakkuk cu a buai sinsin. Pathian in a tumtah mi tisuaktu dingah miphun sualrál sinsin a hmang ding ih, cuih Babilon-mipawl cun an nehnak cu an milem pathianpawl ruangah a si tiah thangṭhatnak an pe ding.

Habakkuk cabu-ih a laimu Bible bung le câng cu 2:2-5 hi a si. Amai cān teah Pathian a cangvai ding. Babilon-mipawl vek mihngalpawl cu thiam lo coter an si ding ih, dāntat an si ding, asinan midingfel cu rinnak in a nung ding ti hi Habakkuk in a cinken tengteng a ṭul. A mipawl in amah an rinsan ding Pathian in a duh.

Harsatnak cān khalah a mipawl in amah ah himnak le ruahsannak an hmuh ding a duh.

Pathian-ih săwnnak a pahnihnak cu 2:6-20 hi a si. Babilon-mipawl cu an nun sualralnak ruangah Pathian in thiam lo a coter hai (2:6, 9, 12, 15, 19). Pathian in annihpawl cu dān a tat hai ding.

Habakkuk in a theihthiam hnuih a thusim mi cu thangṭhatnak hla a si. Habakkuk cu Pathian thawn an táwngaw ih, khawruahharin a um (3:1-2). Pathian-ih săwnnak 3:3-15 cu a mipawl parih Izip ram ih an um ihsin Kanaan ram ih an luh (B.C. 1450-1390) tiangih khawruahharza a thil ti mipawl thlirsalnak a si. Cuih tikcucān cu Pathian huham le kilkhawinak phuanlăngnak a si.

A netabik Habakkuk-ih thulehnak cu 3:16-19 ah kan hmu. Siatnak maksak lakah Pathian ka rinsan thei! Curuangah Pathian cu hnangamten ka hngak thei, boruak harsa lakah lungawi aipuangin ka um thei ih, Jehovah ah nehnak ka co thei ti hi Habakkuk-ih thulehnak a si.

1

1 ^aProfet Habakkuk ih dăwn mi thuphuan.

1:1^a Nah 1:1

Habakkuk-ih Thusuhnak

2 ^aMaw Jehovah, ziangtik tiang so ka au ding ih,
I ngaithla loih na um ding?
Na hnenah, “Thahrum suahnak!” tiih ka au hmanah,
Nang in i run lo ding.
3 ^bZiangah mawhsualnak i hmuh ih,
Buainak hmu ko i tuah?
Ziangahtile sualralnak le thahrum suahnak ka hmaiah an um;
Ĕltaiawknak le tawhawknak a suak.
4 ^cCuruangah dān cu a zéng ih,
Diknak khal nunpi a si dah lo.
Ziangahtile misualrál in midingfel a kharkhum;
Curuangah thuṭhennak cu merhkâwi a si.

1:2^a Sam 6:3; 13:1-2; Jer 14:9; Zek 1:12

1:3^b Job 9:23; Sam 55:9; Jer 20:8

1:4^c Job 19:7; Sam 94:3; 119:126; Isa 1:23; 29:21

Jehovah-ih Thulehnak

5 ^a“Miphunpawl lakah zoh uhla, thlir hnik uh;
Khawruahhar zetin um uh!
Ziangahtile an lo sim khalih nan zum lo ding mi nanmai san ah thil pakhat ka tuah ding.
6 ^bZiangahtile zoh hnik uh, anmai cēnnak hmun a si lo mi co dingah,
Leilung pumpi hrutsuak thluh tu,
Misualrál le mi rămhmang miphun Kaldia-mipawl ka tungding a si.
7 ^cAnmah cu ṭihnungza le tuksumza an si;
An thuṭhennak le an thuneihnak cu anmah ihsin a suak.
8 ^dAn rangpawl tla tlavangpawl hnakin an rangsawn ih,
Zanthim ih cinghnia rual hnakin ṭih an nung sawn.
An rang ralkappawl an săwt ṭhupṭho ih,
An rang ralkappawl ram hlapi ihsin an ra;
Muvanlai in sa ei dingih a ṭum zurzo bangin an zam.
9 An zaten thahrum suah dingin an ra;
An hmai in hmai lam an hawih cio.
Vunnel bangin, ralkaihpawl an fĭnkhawm.
10 ^eSiangpahrangpawl an hmuhsuam ih,
Hruaitupawl an nautat.
Ralhruang kip in an hnihsan,
Ziangahtile la dingin lei an sûngkhawm.
11 ^fCun thli bangin an nuai ding ih, an feh vivo ding,
Sihmansehla an cahnak kha an pathian ih ringtupawl cu
Mawhsualnak neiih puh an si ding.”

1:5^a Isa 29:9; Apo 13:41

1:6^b Dnp 28:49; 2Sp 24:2; Jer 13:20; Thu 20:9

1:7^c Jer 39:5-9

1:8^d Sem 49:27; Jer 4:13; Hos 8:1

1:10^e 2San 36:6; Jer 33:4

1:11^f Jer 4:11-12; Dan 4:30; 5:4

Habakkuk-ih Thusuhnak Pahnihnak

12 ^aMaw Jehovah ka Pathian,
Ka Mi Thianghlim, nang cu catuan ihsin na si lo maw si?
Kan thi lo ding.
Maw Jehovah, annih cu thuṭhennak hmanrua hrangah na ruat hai zo;
Maw Lungpi, annih cu dāntatnak hmanrua dingah na hminsin hai zo.
13 ^bThil ṭha lo zoh menmen ding cun na mit cu a thiangfai tuk,
Sualralnak na zoh menmen thei lo.
Ziangah so hrăwkhrawl zetih thil titupawl na zoh men ih,
Misualrál in amah hnakih midingfel a dawlh tikah na lei na sūp men?
14 Ziangah so minungpawl cu tifinriat sungih nga vekih na rak tuah,
An tlunih uktu nei lo thilnung bawkvâkpawl bangin?
15 ^cAn zaten sio in an awk ṭheh,
An sur in an hnûk ih,
An lenkhâng sungah an hnûkkhawm.
Curuangah annih cu an ai a puang ih, an lung a awi.
16 ^dCuruangah an sur hnenah rai an thawi ih,
An lenkhâng hnenah meiur thilhlăn an ur;
Cupawl ruangah an kaih mi cu a tam ngaingai,
An rawl khal a tam zet.
17 ^eCuruangah an sur kawlawngterin zangfahnak nei hlĕng loin
Miphunpawl an that vivo ding maw?

1:12^a Sem 21:33; 49:24; Suah 33:22; Sam 118:7; Isa 10:6; 31:1

1:13^b Job 21:7; Sam 18:26; 25:3; Ṭah 3:34-36

1:15^c Job 18:8; Jer 5:26; 16:16; Amo 4:2

1:16^d Dnp 8:17; Jer 44:8

1:17^e Isa 14:6

2

1 ^aKa ral vennak ah ka dīng ding ih,
Lei sūnpâwng parah ka um ding,
Cule ka hnenah ziang a sim ding ti le
Nun rĕm ka si tikah ziang ka sawn ding, ti ka zoh ding.

2:1^a Sam 5:3; 48:13; 85:8; Isa 21:8, 11; Eze 3:17

Jehovah-ih Săwnnak

2 ^aCun Jehovah in i sawn ih,

2:2^a Isa 30:8; Eze 24:2; Rom 4:24; Thu 1:19

“Tlân phahih siar thei dingin,
Larnak ih na hmuh mi cu ngan awla,
Lung pheng pawl parah fiangfaiten ngan aw.
3 ^aZiangahtile larnak cu cān khiah cia hrangah a si hrih;
Asinan a cemnetnak cu a nai deuhdeuh, a tlawlh lo ding.
Muang deuh khal sehla, cucu hngak ṭenṭo aw;
Ziangruangahtile a thleng tengteng ding,
A tlâi lo ding.
4 ^bZoh hnik mipuarthau pa khi,
A thinlung a dik lo;
Asinan mifel cu a zumnak in a nung ding.
5 ^cA si, sabit zu in a bum,
Amah cu mipuarthau pa a si,
Cule a um menmen thei lo.
A câkhiarnak cu Sheol vekin a kauter ih,
Anih cu khawh ti nei lo thihnak vek a si,
Miphunpawl hmuahhmuah cu amai hnenah a khawm ih,
Amai hrangah minungpawl hmuahhmuah cu a pengkhawm.
6 ^d“Hipawl hmuahhmuah in,
‘Mah ta si lo mi karhter vivo tu le
Tiamkamawknak tampi thawi mai hrangih khawlkhawmtu hnenah
A hmakhua a pit a si.
Ziangtik tiang so?’ tiin nautat le hmuhsuamin an hnihsan lo ding maw?
7 ^eNa sum cawinakpawl cu hmakhatteah an tho lohli lo ding maw?
A lo palbĕttu an ṭhangharh lo ding maw?
Cule an hrangah ralthillâk ah na cang ding.
8 ^fMiphun tampi na rak răm ruangah,
A tāngsŭnpawl in an lo răm ve ding,
Ziangruangahtile minungpawlih thisen le
Ram le khawpi le
A sungih cêngpawlih thahrum suahnak ruangah.
9 ^gTlun sang ih a bu a sak thei nak ding le,
Vansiatnak huham ihsi runsuah a si thei nak dingah
A inn saknak dingih dik loih sum ngahtu cu a hmakhua a pit a si!
10 ^hMiphun tampi thahnak in le
Na nunnak dokalhih sual tuahnak in,
Na inn ah ningzakza thurawn na pe.
11 ⁱZiangahtile khaw kulh ihsin lungto a ausuak ding ih,
Khansuk thingphelpawl ihsin an rak sawn ding.
12 ^jThisen suahnak ih khawpi dĭntu le
Mawhsualnak ih khaw dĭntu cu a hmakhua a pit a si!
13 ^kNgai hnik, minung hnaṭuan cu meisa hrangah a si ih,
Miphunpawl zianghmanlo ih anmah le anmah an cauhawkternak cu ralkap rualpawlih Jehovah hnen ihsin a si lo maw?
14 ^lZiangahtile tipi in tifinriat a khuh bangin,
Leilung cu Jehovah ropitzia theihnak in a khat ding.
15 ^mMai innhnen in ding zu petu cu a hmakhua a pit a si,
A taklawngnak na hmuh thei nak dingah
Na tûr na thle ih,
Zu na riter!
16 ⁿNang cu sunlawinak hnakin ningzahnak in na khat.
Nangmah khal na in ih,
Na serh zim khal na langter!
Jehovah-ih kut vawrh lamih no cu nangmah dokalhin na hnenah a ra ding ih,
Na sunlawinak parah ningzahnak nasa zet a thleng ding.
17 ^oZiangahtile Lebanon parih na thahrum suahnak in a lo khuhsal ding,
Ramsa na siatsuah ih an lo ṭihnak in a lo khuhsal ding,
Minungpawlih thisen,
Ram, khawpi le
A sungih cêngpawlih thahrum suahnak ruangah.
18 ^p“A tuahtu in a tuah mi milim, thuphan per zirhtu burcawp milim in ṭhathnemnak a nei maw?
A tuahtu in a kutsuak a rinsan ih,
Ṭawng thei lo milempawl a tuah.
19 ^qZanthing hnenah, ‘Ṭhangharh aw!’ titu le ṭawng thei lo lungto hnenah,
‘Tho aw! A lo zirh ding!’ titu cu a hmakhua a pit a si.
Ngai hnik, cumi cu sui le ngun ih khût a si,
Sikhalsehla a sungah thaw a um lo.
20 ^rAsinan Jehovah cu a temple thianghlim ah a um.
Leilung tlun mi zaten a hmaiah daiten um hai seh,” tiin.

2:3^a Sam 27:14; Eze 12:25; Dan 8:7; 11:27

2:4^b Eze 18:9; Rom 1:17; Gal 3:11; Heb 10:37

2:5^c Thf 20:1; 27:20; Isa 2:11; Hab 1:9

2:6^d Isa 14:4; Amo 2:8

2:7^e Thf 29:1

2:8^f Isa 33:1; Jer 50:17; Oba 1:15; Hab 2:17

2:9^g Isa 10:14; Jer 22:13; 51:13

2:10^h Jer 26:19; Nah 3:6

2:11ⁱ Jos 24:27; Zek 5:4; Luk 19:40

2:12^j Jer 22:13; Mik 3:10; Nah 3:1

2:13^k Isa 47:13; 50:11; Jer 51:58

2:14^l Mip 14:21; Sam 72:19; Isa 11:9

2:15^m Sem 9:22; Hos 7:5

2:16ⁿ Pui 10:9; Isa 51:22; Hos 4:7

2:17^o Jer 50:15; 51:35

2:18^p Pui 26:1; Lai 10:14; 1Sam 12:21; Sam 115:4-5; Isa 40:19; Jer 5:21; 1Ko 12:2

2:19^q 1Sp 18:27; Sam 135:15-17; Jer 10:4; Dan 5:4, 23; Hos 4:12

2:20^r Sam 11:4; Isa 41:1; Zef 1:7; Zek 2:13

3

Habakkuk Thlacam Hla

1 Profet Habakkuk thlacamnak, ^aShigionoth zulhin.

3:1^a Shigionoth: Hla thu asilole hlasakdān ding simfiangnak a si men thei.

2 ^aMaw Jehovah, na thuhla ka rak thei ih ka lung a phâng;
Maw Jehovah, kan san sungah na hna tharthawhsal aw!
Kan san sungah cucu theihter aw;
Thinlingnak ah zahngainak mang aw.
3 ^bTeman ihsin Pathian a ra,
Paran tlang ihsin Mi Thianghlim. Selah
A ropitnak in van a khuh ih,
Leilung cu amah thangṭhatnak in a khat.
4 ^cA tlêtzia cu tleu vek a si,
A kut ihsin tle a suak ih,
Cu tawkah a huham thuh a si.
5 ^dA hmaiah nathri sia a feh ih,
Khawsik nat in a ke a thlun.
6 ^eA dīng ih leilung a tah;
A zoh ih miphunpawl a hnînter hai;
Cule kumkhaw tlangpawl cu an ṭekdarh,
Khuahlan tlangmûal um ringring mipawl an kûn.
A lamzinpawl cu kumkhaw hmun mi an si.
7 ^fKushan puanthlampawl in zăwnzaihnak a tuar ka hmu;
Midian ram ih puanzar an rak hnîn.
8 ^gMaw Jehovah, tivapawl parah lunghmui loin na um maw si?
Na thinhengnak in tivapawl a dokalh maw si?
Na thinlingnak in tifinriat a dokalh maw si?
Himi ruangah maw na rangpawl parih na to,
Na runsuahnak rang lêngpawl parah?
9 ^hNa thál cu thu na pe;
Na thál fungpawl parah sesămin thukamnakpawl na tuah. Selah
Nang in leilung cu tivapawl in na ṭhen.
10 ⁱTlangpawl in nang an lo hmu ih an khūr;
Tilian cu a luang rero.
Ti thûk in a aw a suah ih,
A kutpawl tla sâng ah a khai.
11 ^jNi le thlapi anmai umnak ah an ding;
Annih cu na thál fungpawlih tleu ah, na feipi tle zerzer ah an fehhlo.
12 ^kAithawkin leilung hrawhin na feh;
Thinhengin miphunpawl na rak cīl hai.
13 ^lNa mipawl runsuahnak hrangah na fehsuak,
Na Hriak Thih Mi-ih runsuahnak hrangah.
A cāwnpi ihsin a hngawng tiang lawngfangkheh in na tuah ih,
Misualrál inn ih lubân cu na vuak. Selah
14 ^mAmai thál fungpawl in a ralkappawlih lupawl na suntlăng.
Annih cu keimah in ṭekdarhter dingin phusîng vekin an ra suak;
A thupteih mifarahpawl eirál ding vekin lungawi aipuangin an um.
15 ⁿNa rangpawl thawn tifinriat na paltlăng,
Tipi săwp luihlo lakah.
16 ^oKa theih tikah ka thin a khūr,
A aw ah ka hmur an tur dukdo,
Ṭawihnak cu ka ruhpawl ah an lut,
Cule ka umnak hmun ah ka khūr.
Cuti si khal sehla, in run sîmtu miphunpawl parih harsatnak thlen ding ni cu daiten ka rak hngak ding.
17 ^pTheipi kung cerh loin,
Sabit hri ah rah um lo khal seh;
Olif khal in rahsuah loin,
Ló in thlairawl suah lo khal seh;
Hruangkulh sung ihsin rante rual thah thluh si khal seh,
Ran inn ah ranpi rual um lo khal seh,
18 ^qJehovah ah lungawi aipuangin ka um thotho ding,
Ka runsuahnak ka Pathian ah ka aipuang ding.
19 ^rJehovah Pathian cu ka cahnak a si;
Ka ke cu zuknêng ke bangin a tuah ding ih,
Ka tlangmûal sâng pawl ah i fehter ding.

3:2^a Job 26:14; Sam 44:1; 90:16; 119:120; Isa 54:8

3:3^b Sem 36:11; Mip 10:12; Sam 8:1; 48:10; Isa 31:1

3:4^c Job 9:6; Isa 18:4

3:5^d Pui 26:25

3:6^e Sem 21:33; 49:26; Suah 19:18; Sam 18:7; 114:1-6; Nah 1:5

3:7^f Sem 25:2; Suah 15:4; Mip 25:15; Lai 7:24

3:8^g Dnp 33:26; 2Sp 2:11; Sam 68:4, 17; 77:16; Hab 3:15

3:9^h Dnp 32:23; Sam 7:12-13; 78:15

3:10ⁱ Suah 14:22; Jos 3:16; Sam 77:16; 93:3; 98:7

3:11^j Jos 12:14; Sam 18:14; 144:6; Zek 9:14

3:12^k Isa 41:15; Jer 51:33

3:13^l Jos 10:24; Sam 20:6; 68:21

3:14^m Lai 7:22; Sam 64:2-5

3:15ⁿ Suah 15:8; Job 9:8

3:16^o Job 4:14; Sam 119:120; Jer 23:9

3:17^p Joe 1:10-12, 18

3:18^q Sam 97:12; Isa 61:10; Fil 4:4

3:19^r Dnp 33:29; Sam 18:33

Hla hruaitu hrangah. Hri nei tum mi thawn.