About Bible Thianghlim | ©

BibleThianghlim – Malaki

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Malaki

1234

• A ngantu: Malaki
• A siartu: Persia-mipawlih an uk laiih Jew-pawl
• A huap sung cān: B.C. 420-395

Malaki in a cabu cu “Jehovah-ih thuphuan kamsuakthu” ti ṭawngkam in a thawk. Malaki hlan kum 100 hrawngah, temple sak an ngaihsak lo ruangah mipi kawk dingin Jehovah in Haggai le Zekariah a rak thlah. Malaki rawng a bawl hlan kum 25 hrawngah, Persia siangpahrang in Jerusalem kulh dĭntharsal dingin mipi hruaitu dingah Nehemiah thu a rak pe. Jehovah in anmah cu nasa zetin thlawsuah a pe hai, asinan annih in temple siseh, temple rawngbawl hna siseh, temple sungih biak mi Jehovah siseh an bawrhbangter. Mipi in Malaki ih phuan mi thucah cu Pathian hnen ihsin a si tiah an rak cohlang lo. Mi tamsawn cu an lung a ruh ih, Pathian kamsuakthu dokalhin an hél sawn riangri.

Nehemiah cu Judah uktu a si lai khalah mipi cu thlarau lamah ṭumsuk an thawk. Judah ram ih kum hleihnih uktu a si hnuah (Neh 5:14), Nehemiah cu Persia siangpahrang inn ah a kirsal (B.C. 433 hrawngah). Tawkfang a rei hnuah, siangpahrang hnen ihsin Jerusalem ih kirsal siannak a ngah. Cuih cān ah mipi cu thlarau lamah nasa zetin an ṭumsuk zo, Pathian kamsuakthu lamih mipi tundinsal an ṭulzia Nehemiah in a hmu. Malaki in thuphuan a thawk tikah, puithiampawl le mipi thlarau nun cu Nehemiah uktu a si lai hnakin a sia sinsin. Curuangah Malaki cu Nehemiah uktu a si hnu kum ziangmaw zat hnuah rawng a bawl a si men thei; a rawngbawl cān cu B.C. 420 le 395 karlak a si a zumum.

Mipi in Jehovah-ih kamsuakthu an el natsatzia Malaki cabu ah kan hmu. Mipi in ningzakza thusuhnak in Pathian an êl. Ṭhimnakah, Jehovah in a duhdawt hai ti a sim tikah, “Ziangti zawngin in duhdawt?” tiah an sawn (1:2). Pathian duh zawng si lo thawinakpawl in Jehovah an upat lo ruangah Malaki in puithiampawl a kawk hai tikah, “Ziangti zawngin na hmin kan nautat?” (1:6) ih, “Ziangti zawngin kan lo bawrhhlawhter?” tiah an sawn (1:7). Cuti vekih elnak cu hi cabu pumpi ah a khat. Pathian ih sual puhnak zaten thusuhnak butut in an let (ṭhimnakah 2:14, 17; 3:7, 8, 13). Sikhalsehla mi hrekkhat in profet-ih kamsuakthu cu an rak cohlang. Cupawl hnenah Jehovah in a thutiamkam khawruahharza thukham cu a ap hai (3:16-18; 4:2-6).

1

Pathian ih Duhdawt Mi Israel

1 ^aMalaki hmangih Israel hnenih Jehovah-ih thuphuan kamsuakthu.

1:1^a Nah 1:1; Apo 7:38; Rom 3:1-2

2 ^aJehovah in, “Ka lo duhdawt a si,” tiah a ti.

1:2^a Dnp 4:37; Isa 41:8-9; Jer 46:27; Rom 9:13

Asinan nannih in, “Ziangti zawngin so in duhdawt?” tiah nan ti.

Jehovah in,

“Esau cu Jakob-ih u a si lo maw?
Jakob cu ka duhdawt;
3 ^aAsinan Esau cu ka hua,
Cule a tlangpawl ka rămter ih,
A ro cu ramṭhing cinghniapawl hrangah ka canter,”

1:3^a Jer 49:10; Eze 35:3-4, 7

tiah a ti.

4 ^aEdom in, “Kannih cu vuakthluk kan si, asinan kan kirsal leh ding ih, a ṭhing mi hmunpawl kan dĭn leh ding,” tiin a ti hmanah, ralkap rualpawlih Jehovah in,

1:4^a Isa 9:9-10; 11:14; Jer 49:16; Ṭah 4:22; Eze 25:12-14; Amo 5:11

“An dĭn ngaingai tla a si men ding, asinan ka ṭhiatbăl thotho ding;
Annih cu ‘Sualralnak Ram,’ tiin le,
‘Jehovah aithawhnak co kumkhua tu mipi,’ tiah an ti ding,”

tiah a ti.

5 ^aNan mit in nan hmu ding ih,
“Jehovah cu Israel ramri lan tiang a cungnung a si,” tiah nan ti ding.

1:5^a Sam 35:27; Mik 5:4

Thilhlăn Bawrhhlawh

6 ^a“Fapa in a pa a upat ih,
Siahhlawh in a pu a upat.
Cule keimah cu Pa ka si le cu,
In upatnak teh khuiah so?
Kei cu Bawi ka si le,
In ṭihzahnak teh khuiah so?

1:6^a Pui 20:9; Dnp 31:12; Isa 1:2; Mal 2:1-9, 14; Mat 15:4; Luk 6:46

Ralkap rualpawlih Jehovah in ka hmin nautattu nannih puithiampawl hnenah a lo ti.

“Asinan nannih in, ‘Ziangti zawngin na hmin kan nautat?’ tiah nan ti.

7 ^a“Ka biakṭheng parah sang bawrhhlawh nan hlan, asinan nannih in, ‘Ziangti zawngin so kan lo bawrhhlawhter?’ tiah nan ti. ‘Jehovah-ih cabuai cu hmuhsuamumza a si,’ nan tinak hin a si.

1:7^a Pui 21:6; Eze 41:22

8 ^a“Cule raithawinak hrangah rannung mitcaw nan hlăn tikah,
Cumi cu a ṭha lo a si lo maw?
Cule rannung kebái le rannung cawrna nan hlăn tikah,
Cumi cu a ṭha lo a si lo maw?
Cuvek pakhat khat kha nan uktu hnenah pe hnik uh!
Nan parah a lung a hmui pei maw?
Duhsaknak a lo pe pei maw? Ralkap rualpawlih Jehovah in a ti.

1:8^a Pui 1:3; 22:20-22; Dnp 15:21; Isa 43:23

9 ^a“Asinan atu-ah kan parih zangfahnak a neih thei nak dingah tiin, Pathian duhsaknak dil uh. Nan kut in khati vek raithawinak nan pek laiah, duhsaknak thawn a lo cohlang ding maw? Ralkap rualpawlih Jehovah in a ti. 10 ^bKa biakṭheng parih ṭhathnemnak nei loin mei nan muahlonak dingah, nanmah lakah sângka khar thei pakhat tal um uhci la maw! Nan parah lunghmuinak ka nei lo ih, nan kut ihsin thilhlăn ka cohlang lo ding, ralkap rualpawlih Jehovah in a ti.

1:9^a Sam 51:17; Jer 6:20; Amo 5:22; Mik 6:6-8

1:10^b Isa 1:11-14; Jer 14:12; Hos 5:6; Mal 2:12

11 ^a“Ziangahtile ni a suah ihsin ni a tlak tiang miphunpawl lakah ka hmin a ropi ding.
Ka hmin in rimhmui le a thiang mi thilhlăn hmun kip ah an pe ding.
Ziangahtile ka hmin cu miphunpawl lakah a ropi ding, ralkap rualpawlih Jehovah in a ti.

1:11^a Sam 113:3; Isa 6:3; 24:15; 60:6-7; 66:18-19; 1Ti 2:8; Thu 5:8

12 ^a“Asinan nannih puithiampawl in, ‘Jehovah-ih cabuai cu a bawrhbang a si, a thei rah le a rawl khal nautatumza a si,’ tiin nan ti vivo tikah, ka hmin cu zianghmanlo ah nan cangter a si. 13 ^bNannih puithiampawl in, ‘Aw, a va bangthlak ve!’ tiin nan hnar nan phîtphît, ralkap rualpawlih Jehovah in a ti.

1:12^a Mal 1:7

1:13^b Dnp 15:21; Isa 43:22-24; 61:8

“Rûkcawp siseh, kebái rannung siseh, rannung cawrna siseh nan rak keng; cuti vekin thilhlăn nan rak keng! Nan kut ihsin ka lo cohlang ding maw? Jehovah in a ti. 14 ^aA rante rual lakah a pa nei na cingih, thutiam khal tuah ko naih, sawisel ding um rannung Bawipa hnenih raithawinak ih petu mi bumtu cu camsiatin um seh. Ziangahtile keimah cu Siangpahrang ropi ka si, ralkap rualpawlih Jehovah in a ti. Ka hmin cu miphunpawl lakah ṭihzah ding a si.

1:14^a Suah 12:5; Pui 22:18-21; Dnp 28:58; Sam 47:2; 95:3; Zek 14:9; 1Ti 6:15

2

Puithiam Bawrhhlawh

1 “Cule atu-ah, Maw puithiampawl, hi thupek hi nan hrangah a si.
2 ^aKa hmin sunlawihnak pe dingin,
Nan ngaithla lo ih,
Nan thinlung ih nan lâkluh lo asile,
Nan parah camsiatnak ka thlah ding ih,
Nan malsawm dăwn mipawl ka camsiat ding, ralkap rualpawlih Jehovah in a ti.
A si, nan thinlung ih nan lâkluh lo ruangah ka rak camsiat hai zo a si.
3 ^bNgai hnik uh, nan tesinfapawl ka kawk ding ih,
Nan hmaiah êk ka lo măn ding,
Nan raithawinak puaipawl ih ran êk rori cu;
Cule cuih êk thawn lâkhlo nan si ding.
4 ^cCun Levi thawi ka thukham a peh vivo thei nak dingah,
Hi thupek hi nan hnenah ka lo kuat ti nan thei ding, ralkap rualpawlih Jehovah in a ti.
5 ^dAmah thawi ka thukham cu nunnak hrang le hnangamdaihnak a si.
I ṭihzah thei nak dingah cucu a hnenah ka pe,
Levi cun i ṭihzah ih, ka hmin upatin a ding a si.
6 ^eA kâ ah dān diktak a um ih,
A hmur ah diklonak hmuh a si lo.
Ka zawngah hnangamten le dingfelten a feh ih,
Mi tampi mawhsualnak ihsin a kirter.
7 ^fZiangahtile puithiam hmur in theihnak a kil ṭha ding ih,
A kâ ihsin mi in dān an hawl ding a si,
Ziangahtile amah cu ralkap rualpawlih Jehovah thuphurtu a si.
8 ^gAsinan nang cu zin na pial zo;
Na zirhnak in mi tampi na tlubahter.
Levi-ih thukham na bawrhhlawhter, ralkap rualpawlih Jehovah in a ti.
9 ^hCuruangah kei khal in mi zate hmaiah hmuhsuam dingin le tiniam dingin ka lo tuah.
Ziangruangahtile nang in ka zinpawl na zawh lo ih,
Na dān ah mi thleidan na nei,” tiin.

2:2^a Pui 26:14; Dnp 11:26; 28:14-15; Jer 13:17; Mal 3:9; Mat 15:7-9; Thu 5:12-13

2:3^b Suah 29:14; Pui 26:16; Dnp 28:38; 1Sp 14:10; Nah 3:6

2:4^c Mip 3:11-13

2:5^d Mip 25:12-13; Dnp 14:23; 33:9; Sam 103:17-18; Heb 7:22; 12:28

2:6^e Dnp 33:8-10; Sam 119:160; Jer 23:22; Jam 5:19

2:7^f Pui 10:11; Mip 27:21; 2San 17:6-9; 36:15; Neh 8:7; Jer 18:18; Hag 1:13

2:8^g Suah 32:8; Neh 13:29; Jer 2:8; 18:15; Eze 22:26; Hos 4:6

2:9^h Pui 19:15; Dnp 1:17; Mik 3:11; Apo 10:34; Rom 2:11

Rinumlonak ih Rahsuah

10 ^aKan zaten Pa pakhat kan nei lo maw si?
Pathian pakhat ih sersiam kan si lo maw si?
Ziangruangah kan pupápawlih thukham cu thulolak menah cangter dingin unau pakhat le pakhat parah rinum loih kan um?
11 ^bJudah cun rinum loin a nung ih,
Israel ram ah le Jerusalem ah thil fihnungza tuah a si,
Ziangahtile Jehovah in a duhdawt mi a hmun thianghlim cu Judah in a bawrhbangter;
Ram dang pathian fanu a ṭhit.
12 ^cHimi tuahtu pa cu zo vek a si khalle,
Ralkap rualpawlih Jehovah hnenih thilhlăn a ken a si khalle
Jehovah in Jakob-ih puanthlampawl ihsin sâtcat seh.
13 ^dCule hihi a pahnihnak thil na tuah mi a si:
Jehovah-ih biakṭheng cu mitthli, ṭahnak le aukionak thawn na khuh ṭheh;
Ziangahtile anih in na thilhlănpawl cu zianghman ah a siar nawn lo ih,
Na thilhlănpawl tla na kut ihsin lungsi zetin a cohlang nawn lo.
14 ^eCuti cingin nang cun, “Ziangruangah maw?” tiah na ti.
A săn cu, Jehovah cu nangmah le na no laiih na nupi karlakih theihpitu a si,
Na nupi cu na kăwppi le thukham hmangih na ṭhit mi a si ko nân,
A lakah rinum loin na nung.
15 ^fAsinan Jehovah in annih cu Thlarau neitu, pumkhat ah a rak tuah hai a si lo maw?
Cule ziangruangah annih cu pumkhat ah a rak tuah hai?
Jehovah cun Pathian mi cithlah a hawl a si.
Curuangah na thinlung ah fimkhur awla,
Zohman a no laiih a nupi lakah rinum loin nung hlah seh.
16 ^g“Ziangahtile ^hmâkawk ka hua, Israel-ih Pathian Jehovah in a ti,
Cule a sinfen ih nunrawnnak khuhtu ka hua, ralkap rualpawlih Jehovah in a ti.
Curuangah na nupi lakih rinum loih na umlonak dingah,
Na thinlung ah fimkhur aw.”

2:10^a Suah 19:4-6; Jos 24:3; Isa 63:16; Jer 9:4; 1Ko 8:6; Efe 4:6

2:11^b Suah 34:16; Ezr 9:1-2; Neh 13:23; Jer 3:7-9

2:12^c Pui 18:29; Neh 13:29; Mal 1:10, 13

2:13^d Isa 1:11, 15; Jer 11:14; 14:12

2:14^e Thf 2:17; Mal 3:5

2:15^f Suah 20:14; Pui 20:10

2:16^g Dnp 24:1; Sam 51:10; Thf 4:17; Isa 59:6; Mat 5:31-32; Mar 10:4-9

2:16^h mâkawk: A ṭawng hrampi ah dawihlo ti a si.

Jehovah Ning Ko Tuah

17 ^aNa ṭawngkampawl in Jehovah ning ko na tuah;
Cu cingin, “Ziangtin maw amah cu ning ko kan tuah?” na ti lai hrih.
“Thil ṭha lo tuahtu pauhpauh Jehovah-ih mithmuh ah an ṭha ih, an parah a lung a hmui,”
Asilole “Diknak Pathian cu khuiah so a um?” tiah nan ti mi hin amah ning ko nan rak tuah a si.

2:17^a Sem 18:25; Job 8:3; Sam 5:4; Isa 1:14; 5:20; 43:22, 24; Eze 18:25; 2Pe 3:4

3

A Ra lai ding Mi Thuphurtu

1 ^a“Ngai hnik, ka palai ka thlah ding ih,
Anih in ka hmaiah lamzin a timlam ding.
Cule nan hawl rero mi Bawipa cu a temple ah a ra lohli ding,
A parih nan lunghmui mi, thukham palai cu.
Zoh hnik uh, anih cu a ra a si,” ralkap rualpawlih Jehovah in a ti.
2 ^bZo in so a rat ni cu tuar thei ding?
A ra lăng tikah zo so a dīng thei ding?
Ziangahtile anih cu erfainak meisa vek a si ih,
Puan sawptuih sahbûan vek a si.
3 ^cAnih cu ngun erfaitu le thianfaitu bangin a to ding;
Jehovah hnenah dingfelnak ih thilhlăn an pek thei nak dingah,
Levi fapapawl a thianfai ding,
Sui le ngun bangin annih cu a thianfai hai ding.
4 ^dCun Judah le Jerusalem ih thilhlăn cu hlanlai le kum liam cia bangin,
Jehovah-ih lungawi zawng a si ding.
5 ^e“Cule thuṭhen dingin na kiangah ka ra ding;
Keimah cu dawithiampawl dokalhin,
Uirepawl dokalhin,
Dik lo zetih sesămhmangpawl dokalhin,
Hlawhfapawlih hlawh man hlēpsakhmangpawl le
Nuhmeipawl le nu le pa nei lo pawl dekcăwkhmangpawl dokalhin le
Khawtluang mipawl dawihlohmangpawl le
Keimah i ṭih lo tupawl dokalhin an parah theihpitu rang zet ka si ding, ralkap rualpawlih Jehovah in a ti.
6 ^fZiangahtile kei cu Jehovah ka si, ka thlĕngaw dah lo;
Curuangah a si, nannih Jakob-ih fapapawl nan hlohral lo.

3:1^a 2San 36:15; Isa 40:3; 63:9; Mat 3:3; Mar 1:2; Luk 7:27

3:2^b Eze 22:14; Zek 13:9; Mat 3:10-12; Thu 1:7; 6:17

3:3^c Sam 4:5; 51:19; Isa 1:25; Dan 12:10; 1Pe 1:7; Thu 3:18

3:4^d 2San 7:1-3, 12; Sam 51:17-19; Eze 20:40; Mal 1:11

3:5^e Suah 22:22-24; Isa 47:9; Jam 5:4

3:6^f Mip 23:19; Ṭah 3:22-23; Heb 7:21; Jam 1:17

Pathian Suam Hlah

7 ^a“Nan pupápawl san lai ihsin ka sakhaw dānpawl nan pialsan ih,
Nan rak thlun lo.
Ka hnenah ra kir uh, cule nan hnenah ka ra kir ve ding, ralkap rualpawlih Jehovah in a ti.
Asinan nannih in, ‘Ziangti zawngin so kan ra kir ding?’ tiah nan ti.
8 ^b“Minung in Pathian a suam ding maw?
Nannih cun kei in suam a si!
Asinan nannih in, ‘Ziangti zawngin so kan lo suam?’ tiah nan ti.
Ṭhen hra ṭhen khat pawl le thawhhlawmpawl ah in suam a si.
9 ^cKeimah in suam ruangah nannih cu camsiatnak hmangih camsiat nan si,
Ziangahtile nannih in keimah in suam,
Hi miphun pumpuluk hin.
10 ^dKa inn ih rawl a um thei nak dingah,
Ṭhen hra ṭhen khat zaten ka thawhhlawm inn ah rak keng uh,
Cule van tukvirhpawl lo ăwnsakin
Thlawsuah dăwn cawk lo ka lo burh le burh lo in hniksak hnik uh, ralkap rualpawlih Jehovah in a ti.
11 ^eCule eiráltu ka lo kawksak ding,
Cule anih in nan lei rah a siatsuah lo ding ih,
Nan ló ih sabit khal nan hrangah rah loin a um lo ding, ralkap rualpawlih Jehovah in a ti.
12 ^fCule miphunpawl hmuahhmuah in mithlawsuak tiah an lo ti ding,
Ziangahtile duhnungza leiram nan nei ding, ralkap rualpawlih Jehovah in a ti.

3:7^a Isa 55:7; Zek 1:3; Jam 4:8

3:8^b Neh 13:10-12

3:9^c Dnp 11:26; Mal 2:2

3:10^d Suah 22:29; Pui 25:21; Dnp 12:6; 2Sp 7:2; Neh 13:12; Thf 3:9-10; Joe 2:14, 24; 2Ko 9:8-11

3:11^e Dnp 28:39; Joe 2:25; Amo 4:9

3:12^f Dnp 28:3-12; 2San 31:10; Isa 61:9; 62:4

Mipi Phunzainak

13 ^a“Ka parih nan ṭawngkampawl hi an nâ a si, Jehovah in a ti.
Asinan nannih cun, ‘Nangmah dokalhin ziang so kan ṭawng,’ tiah nan ti.
14 ^bNannih in, ‘Pathian rĕn hi zianghman ṭhathnemnak a um lo;
A thucah kan rak thlun le
Ralkap rualpawlih Jehovah hmaiih mininghangpawl bangih kan nun rero teh hi ziang hlawknak so a um?
15 ^cCule mipuarthaupawl kha mithlawsuakpawl tiah kan ti,
Ziangahtile sualralnak tuahtupawl an ṭhangso lawng si loin,
Pathian an hniksak ih an luat sapbai,’ nan ti,” tiin.

3:13^a Mal 2:17

3:14^b Jos 22:5; Job 21:14; Sam 73:13; Isa 57:10; 58:3; Jer 2:25; 18:12

3:15^c Job 21:7; Sam 14:1; 73:12; 95:9; Isa 2:22; Jer 7:10; Mal 4:1

Hngilhlonak Cazual

16 ^aCun Jehovah ṭihzahtupawl cu pakhat le pakhat an beaw ih,
Jehovah in a ngaithla hai ih, a hna in a thei hai.
Jehovah ṭihzahtupawl le
A hmin ngaisangtupawl hrangah
A hmaiah hngilhlonak cazual cu ngan a si.
17 ^b“Ka hlawnthil hleice ka tuah ni ah an zaten ka ta an si ding, ralkap rualpawlih Jehovah in a ti.
Cule mi in amah riantu a fapa a zuah bangin,
Anmah cu ka zuah hai ding.
18 ^cCun midingfel le misualrál karlak le
Pathian riantu le rian lo tu karlak na thliardang ding.

3:16^a Sam 34:15; Dan 12:1; Luk 10:20; Heb 3:13

3:17^b Isa 43:1, 21; 1Pe 2:9

3:18^c Sem 18:25; Dnp 32:4; Amo 5:15; Mat 25:32-33, 41

4

Pathian Ni Rapthlak

1 ^a“Ziangahtile ngai hnik,
Rawhtitnak meipi vekih kāngin, ni cu a ra thleng a si.
Mipuarthaupawl hmuahhmuah, a si, thil sual tuahtu hmuahhmuah cu cangpâwl vek an si ding.
Cule annih cu a ra thleng mi ni in a kangrál hai ding ih,
A hram siseh, a ṭêk siseh, an hnenah tān ta a si lo ding, ralkap rualpawlih Jehovah in a ti.
2 ^bAsinan nannih ka hmin ṭihzahtu hrangah
Dingfelnak Ni a suak ding ih,
A thlapawl ah damnak a um ding;
Cule nan fehsuak ding ih,
Caw inn ih caw pa no pawl vekin nan khir ding.
3 ^cMisualrálpawl nan cīl ding,
Ziangahtile annih cu hi thil ka tuah ni ah
Nan kephah hnuaiih vutcâm ah an cang ding,
Ralkap rualpawlih Jehovah in a ti.
4 ^d“Ka siahhlawh Mosi Dān,
Israel miphun zate hrangah Horeb ih a hnenih thu ka rak pek mi,
Ka sakhaw dānpawl le ka zīn le dān pawl kha máng ringring uh.
5 ^eNgai hnik uh, Jehovah-ih ni rapthlak le tuksumza a ra thlen hlanah,
Nan hnenah profet Elijah ka thlah ding.
6 ^fCule anih in pupápawlih thinlung cu falepawl lamah a hawikirter ding ih,
Falepawlih thinlung cu pupápawl lamah a hawikirter ding.
Culole ka ra ding ih, leilung cu camsiatnak thawn ka vaw pang ding,” tiin.

4:1^a Nah 1:5; 2Pe 3:7

4:2^b 2Sam 23:4; Isa 35:6

4:3^c Job 40:12; Eze 28:18; Mik 7:10

4:4^d Dnp 4:10, 23; 8:11, 19

4:5^e Joe 2:31; Mat 11:14; Joh 1:21

4:6^f Isa 11:4; Luk 1:17; Thu 19:15