About Bible Thianghlim | ©

BibleThianghlim – Judas

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Judas

1

• A ngantu: Judas
• A siartu: Zumtupawl
• Ngan kum: A.D. 67-80

Hi cakuatih thuanthu dinhmun hi Peter cakuat pahnihnak thawn an bangaw (Peter cakuat pahnihnak thuhmaihruai siar aw). Asinan hi cakuat ah cun, kawhhran ah Pathian ngaihsak lo pawl an rak lut zo (câng 4). Annih cu zumtupawl lakah an um, asinan zumtupawl in cu tlukih thil ṭihnung an lakih a um thu khal an rak thei lo. Curuangah Judas in zumtupawl hnenih cakuat lohli an ṭul tuk ti a hmu. “Cotlang mi rundamnak,” thu ngan a tum. Asinan an hrangih ṭul bik mi ngan hmaisa ṭulin a thei (câng 3). Peter cakuat pahnihnak thu a hmantel ruangah a cakuat hi Peter cakuat pahnihnak hnuih ngan mi a si men thei. Hih cakuat hi A.D 67 le 80 karlak hrawngih a ngan mi a si ding. Zumtu an si ti mi siarlo a cakuat dawngtupawl zo an si ti a simfiang lo (câng 1).

Judas hi taksa dān ah Jesu-ih nau a si ko nân, “Jesu Khrih-ih sál” ti lawngin a relaw. A unaupa James khal taksa dān ah Jesu-ih nau a si.

Jesu Khrih-ih naupa a si ko nân, Judas hin amah le amah “Jesu Khrih-ih sál” ti lawngin a relaw. A unaupa James khal hi Jesu-ih naupa a si. Jesu suah hnuah Mary in fāte dangdang Joseph a hrinsak (Mar 6:3). Judas le James hin leilung tlunih rawng a bawl laiah Bawipa hi an rak zum lo (Joh 7:3-8). Neta lamah cun an zum, ziangruangahtile annih khal Pentikos ni ah zumtu dang pawl zawngah an um ve (Apo 1:14). Cuti cun Judas cu khualtlawngih thuthangṭha simtu ah a cang (1Ko 9:5).

Hi cakuat ah Judas in zumtupawl kha Jesu in kawhhran hnenih a ap ta mi an zumnak a si mi thutak zaten hum dingin thungaithlakin a fawrh. Cibaibûknak a ṭheh hnuah, an lakih um Pathian ngaihsak lo zirhtu dik lo pawl thuhla ah ralrinnak pein, zumnak hum dingin sawmnak hmanhmawh a tarlang (câng 3-4). Thukham Hlun tahṭhimnak pathum hmangin a thleng taktak ding mi Pathian dāntatnak thu a sim (câng 5-7). Zumnak humnak ding săn a theihtersal. Pathian ngaihsak lo pawlih sualralnak le an tuar ding mi hremnak thupawl tla a sim (câng 8-16). Thlarau lam ral donak ah zumtupawlih mawhphurh khal a sim (câng 17-23). Hi cakuat sungah kăwp thum a si mi ziangmaw zat a rel. Cule zumtupawlih mawhphurh a tarlăng mi cu cuti vek zawng thothoin a rel. Zumtupawl in apostolpawlih ṭawngkam cîng ringringin, Pathian duhdawtnak ah um hngetin le Pathian ngaihsak lo pawl ih buaiter mipawl an runsuak ding a si. Pathian ngaihsak lo pawl lak ihsin humhimtu Pathian thangṭhatnak in Judas in a cakuat a cemter.

Pathian lawng hi Pathian ngaihsak lo pawlih kut ihsin in humhim thei taktak tu a si. Amah lawng in “a ropitnak hmaiih aipuannak nasa zet” thawn in dīngter thei a si (câng 24).

1

Cibaibûknak

1 ^aJesu Khrih-ih sál le James-ih unaupa, Judas in, Pa Pathian ih tithianghlim mi, Jesu Khrih ah kilhim mi le kawh mipawl hnenah:

1:1^a Mat 13:55; Joh 14:22; 17:12

2 ^aZahngainak le hnangamdaihnak le duhdawtnak cu karh sinsin hram seh.

1:2^a Rom 1:7; Gal 6:16

Zirhtu dik lo pawl Thuṭhennak

3 ^aDuhdawt mitla, kan cotlang mi rundamnak thu nan hnenih ngan ṭenṭo ka tum tikah, mithiangpawl hnenah Pathian in sankhuk daihih vei khat a rak pek mi zumnak hrangah ṭhahnemngai zetih nan donak dingah tha lo pe dingin nan hnenih ca ka ngan cu a ṭul rori a si.

1:3^a Apo 6:7; 9:13; 1Ko 10:14; 1Ti 6:12; Tit 1:4

4 ^aZiangah cutin ka ti tile a thupteih luttu mi hrekkhat in Pathian zangfahnak cu fihnungza hursual tuahnak ah an cangter ih, Bawipa Pathian umsŭn le kan Bawipa Jesu Khrih cu an hnáwng fawn. Cupawl cu Pathian ngaihsak lo le hlanlaipi ihsin hivek thuṭhennak co dingih hminsin cia mi an si.

1:4^a Gal 2:4; Tit 1:16; 2Pe 2:1; 1Joh 2:22

5 ^aCuruangah Bawipa in Izip ram ihsin ziangtin Israel-mipawl a runsuak ih, cumi hnuih a zum lo tupawl a siatsuah thupawl hi, nan theih zo mi si khal sehla lo theihthartersal ka duh. 6 ^bCule vancungmi, an sinak hmaisa rak kai ringring loih, anmai umnak hmun tlansantupawl cu thuṭhennak ni rapthlak zet hrangah thim hnuaiah kumkhaw cikcin ih ṭawnin a ret hai a si. 7 ^cCuti vek thothoin Sodom khawpi le Gomorrah khawpi le anmah vekih a nung ve mi an kiangkap khawpipawl cu, nunau-mipa sualnak ah an peaw ih, tidān lo vekin an pawlaw. Cupawl cu sankhuk meipi thawi hrem ding mipawlih zohṭhim dingah tarlăng an si.

1:5^a Mip 14:29; 1Ko 10:1-5; Heb 3:16; 2Pe 1:12-13; 1Joh 2:20

1:6^b 2Pe 2:4, 9

1:7^c Mat 10:15; 25:41; 2Pe 3:7

8 ^aCuvek thothoin hi suangtuahtupawl hin an taksaruangpum an bawrhbangter, thuneitupawl an nautat ih, huham ropi neitupawl an relsia. 9 ^bCuti a si nân, vancungmi cungnungbik Maikal cun Mosi-ih ruang thu ah Diabol thawn thu an el-awk laiah khan, Diabol cu a thangsiat zawngin sual a puh ngam lo ih, “Bawipa in lo kawk seh!” tiah a ti. 10 ^cAsinan cuih minungpawl cun an theih lo mi pauhpauh cu an relsia. Cule ramsa â in thil a theih vekin pianphung sinak ih an theih mi thilpawl ah anmah le anmah an bawrhhlawhawter.

1:8^a 2Pe 2:10

1:9^b Dan 10:13, 21; Zek 3:2; 1Th 4:16; Thu 12:7

1:10^c 2Pe 2:12

11 ^aAn hmakhua a pit a si! Ziangahtile Kain lamzin an zawh ih, hlawknak hmu dingih Balaam a fehsualnak ah khan duhham zetin an tlân ih, Korah-ih helnak sual ah an hloral.

1:11^a Heb 11:4; 2Pe 2:15; 1Joh 3:12

12 ^aCuih minungpawl cu nanmai duhdawtnak puai ih hnawmbāl an si. Nan hnenih rawl an ei tikah ṭihnak um riai loin anmah te an ei ding mi lain an ei mai. Annih cu thli in a suk le a so ih a hrăn mi ruahti pai lo khawdur vek, favāng cān ih thingkung rah nei lo vek, vei hnih thi zo, a hram ihsin phawisuah mi vek an si. 13 ^bCupawl cu tifinriat tisuar cak zet vek an si, an ningzahnak cu ti parih tiphûl vekin a suak; arsi zuang vek an si, thim sah mepmep cu an hrangah retsak kumkhua a si.

1:12^a Mat 15:13; Efe 4:14; 2Pe 2:13, 17

1:13^b Isa 57:20; Fil 3:19; 2Pe 2:17

14 ^aCun Adam ihsin a pasarihnak Enok khal in hipawlih thuhla cu profet thuphuan in thu a rak phuang, “Ngai hnik, Bawipa cu thawngza tampi a mithiangpawl thawn a ra ding. 15 ^bMi hmuahhmuah parih thuṭhennak thlengter dingah le Pathian ngaihsak lo pawl hmuahhmuah in Pathian ngaihsaklonak hna, Pathian ngaihsak lo cingih an ṭuan mi hmuahhmuah thu ah le cuvek misualpawl in amah dokalhin ṭawng hrohrang an ṭawng mi hmuahhmuah an ti sualzia theihter dingah a ra ding,” tiah a ti. 16 ^cCupawl cu phunciarhmang, mi sawiselhmang, anmai câkhiarnak thluntupawl an si. Cule an kâ in pawrhawknak ṭawngkam nasa zetzet an ṭawng ih, mai hlawknak duh ruangah mi va fakawter an si.

1:14^a Sem 5:18, 21-24; Dnp 33:2

1:15^b 1Ti 1:9; 2Pe 2:6-9

1:16^c 1Ko 10:10; 2Pe 2:18

Tuarfai dingih Kawhnak

17 ^aSikhalsehla duhdawt mitla, nannih cun kan Bawipa Jesu Khrih-ih apostolpawl in hi hlanih an rak sim mi kamsuakthupawl kha cîng ringring uh. 18 ^bCān netaah cun mi hmuhsuamhmang pawl le anmai Pathian ngaihsaklonak câkhiarnak vekih nungtu an um ding tiah an lo sim kha. 19 ^cCupawl cu khawvel mi, ṭhenawknak tuahtu, Thlarau nei lo pawl an si.

1:17^a Efe 4:11; Heb 2:3; 2Pe 3:2

1:18^b 1Ti 4:1; 2Ti 3:1

1:19^c 1Ko 2:14-15

20 ^aAsinan duhdawt mitla, nannih cu nan zumnak thianghlimbik parah nanmah ten sakṭhaaw vivo uh, cule Thlarau Thianghlim ah thlacam uh. 21 ^bSankhuk nunnak ih mi hruaitu kan Bawipa Jesu Khrih-ih zahngainak nan hngah laiah Pathian duhdawtnak ah nanmah le nanmah kilhimaw uh.

1:20^a Efe 6:18; Kol 2:7

1:21^b Mat 25:46; Heb 9:28; 2Pe 3:12

22 Cule mi hrekkhat parah lainatnak nei uhla, fimkhur zetin thuṭhenfel thiamnak hmang uh. 23 ^aCun mi dang pawl cu meisa sung ihsin dirsuak uhla, ṭih cingin runsuak uh, tisa ih fate zet a bawrhbanter mi nan sinfen hman hua uh.

1:23^a Amo 4:11; Zek 3:2-5; 1Ko 3:15; Thu 3:4

24 ^aCule tlûknak ihsin a lo kilhim thei tu le

1:24^a Joh 5:44; Rom 11:36; 1Ti 1:17; Heb 13:8

Mawhnak nei loin a ropitnak hmaiih
Aipuannak nasa zet thawi lo dīngter theitu,
25 In Rundamtu Pathian fim umsŭn hnenah
Thangṭhatnak le cungnunnak, huham le thuneihnak cu
Atu le kumkhua tiang um seh. Amen.