BibleThianghlim – 1 Peter

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 Peter

1 2 3 4 5

A ngantu: Peter
A siartu: Asia Minor sak lamih zumtupawl
Ngan kum: A.D. 62-65

Kawhhran cu a ram zawngin le a mipum zawngin a karhzai vivo vekin hremnak khal a sosâng vivo. Zumtupawl cun Rom nunphung an thlun duh lo ruangah Rom uknak sungih zumlotupawl in anmah cu an hua (4:3-4). Cuvek hremnak in zumtupawl cu Asia Minor sak lamih um mi Ponṭas, Galatia, Kappadosia, Asia le Bithinia (1:1) rampawl ah a dawiṭek hai. Cuih rampawl an thlen hnu khalah Khrih thawn an pehtlaihawknak ruangah (4:14-19) le a dik mi tuah an duhnak ruangah (3:14) an tuar vivo thotho. Hih cakuat dawngtu hi Jew-mi khal an tel ve ko ding nân, Zentel an tambik ding (1:18; 2:10; 4:3-4). Hih zumtupawl in thil ṭha an tuah vivo thei nak dingah thapek an ṭul.

Apostol Peter hi zumtupawl hnenah hivek thapeknak cakuat ngan dingah Pathian ih hril mi a si. A rawngbawlnak lam tluanah Peter in hremnak nasa zet a tuar ringring (Apo 4:3; 5:17-42; 8:1; 12:1-19). Curuangah Bawipa in amah a rak zirh mi cawngin anih cun thurawn ṭha a pe. Hi apostol hi a Bawipaih tuarnak rak hmungahtu a si ih, hih zumtupawl thapeknak ah dingfelnak ruangih Jesu-ih tuarnak cu zohṭhim dingah a hmang (2:21-25; 3:18-22). Hi cakuat hi Peter in a nun cemnak a naih lamih a ngan mi a si. Khristian hremnak a sosanbik tikcu A.D. 62-65 hrawngih a ngan mi a si men thei.

Apostol in a cabu sungah tuarnak thu a sim leuhleuh (vei 16), asinan Pathian zangfahnak khal a phuanglang thotho. A cakuat hi Pathian-ih mangbangza rundamnak thu in a thawk (1:1-12) ih, an rundamnak ropi zulhin Pathian mi si dingin thupek 34 hrawng hmangin tha a pe hai.

Hi cakuat hi zumtupawl zumnak ah an dīn thei nak ding le an dīn vivo thei nak ding hrangih Pathian zangfahnak dik hi a pawimawh a si ti hmuhsaknak maktak a si (5:12). Himi Pathian zangfahnak thotho hin tuarnak lakah hril mi zumtupawl hnenah nehnak a pe hai.

Thu Hlawm Ṭhen

I. Thuhmaihruai (1:1-2)
II. Rundamnak ih Pathian zangfahnak khan nun thianghlim ih nung dingin zumtu a hruai ding a si (1:3-2:10)
III. Tuarnak ih Pathian zangfahnak khan zumtu cu dik zetih tuartheinak a pe ding a si (2:11-4:19)
IV. Rawngbawlnak ih Pathian zangfahnak cun zumtu cu tăngdawr zetih rawngbawl dingin a kaihruai ding a si (5:1-14)

Cibaibûknak

1 ^aJesu Khrih-ih apostol, Peter in Ponṭas, Galatia, Kappadosia, Asia le Bithinia pengpawl ih a ṭekvai mi, mikhual vekih a rak um mipawl hnenah ca ka lo kuat a si. 2 ^bPa Pathian-ih theih cia nak bangtukih hril mi nan si ih, Jesu Khrih thisen theh cotu dingah le thulung dingah Thlarau ih tithianghlim nan si.

1:1^a Mat 24:22; Apo 2:9; Heb 11:13; 2Pe 1:1

1:2^b Rom 1:7; 8:29; 2Th 2:13; Heb 10:22

Nan parah zangfahnak um sehla, nan hnangamdaihnak cu karh sinsin hram seh.

Ruahsannak Nung

3 ^aPathian le kan Bawipa Jesu Khrih-ih Pa cu thangṭhatin um seh, anih cun mithi lak ihsin Jesu Khrih a thawhsalnak zarah ruahsannak nung nei dingin a nasa zet mi a zahngainak in in hring, 4 ^ba ṭawihrál thei lo mi, a bawrhhlawh lo mi le a cuai thei lo mi ro nan co ding mi cu van ah ret cia in a um. 5 ^cZumnak ruangih rundamnak, cān netaah langter dingih timtuah cia mi cu co dingin Pathian huham ih kilven nan si.

1:3^a Joh 1:13; 2Ko 1:3; Efe 1:3; Tit 3:5; Heb 3:6

1:4^b Apo 20:32; Rom 8:17; Kol 1:5; 2Ti 4:8

1:5^c 1Sam 2:9; Joh 10:28; Rom 11:8-18

6 ^aAtu-ah a ṭul a si ahcun, harsatnak phun zakip ruangah cān rei lo te sung cu thinnain um hrih hman uhla, himi ah nasa zetin lungawi aipuangin nan um. 7 ^bMeisa ih hniksak si na cing hmanih a siatrál thotho mi sui hnakin, a man a khungsawn mi nan zumnak takzia cun Jesu Khrih a rung lăng tikah, thangṭhatnak, upatnak le sunlawihnak a thlengter ding. 8 ^cAmah cu nan hmu dah lo nân, nan duhdawt. Atu-ah amah cu hmu lo hman uhla nan zum thotho ih, nan zumnak ih a hmuitin mi nan thlarau rundamnak coin, 9 ^dkâ ih sim thei lo mi lungawi aipuannak thawn nan ai a puang.

1:6^a Rom 5:2; Jam 1:1

1:7^b Isa 48:10; 2Ko 4:17; 1Th 2:19; Jam 1:3

1:8^c Joh 20:20

1:9^d Rom 6:22

10 ^aCuih rundamnak cu profetpawl in ngunngaih zetin an rak hliakhlai ih, an rak hawl. Nan hnenih a thleng ding mi zangfahnak cu an rak phuang cia. 11 ^bCuih profetpawl hnenih um, Khrih Thlarau cun Khrih ih a tuar ding mipawl le cumi hnuih sunlawih a si ding thu cu a theihter cia. Profetpawl cun cumi cu ziang a si ti theihsuah tumin le ziang tikah a thleng ding tiin an hawl. 12 ^cVancungmipawl in bih an hiar zet mi thilpawl van ihsin run thlah mi Thlarau Thianghlim thawngin nan hnenih thuthangṭha phuangtupawl hmangih atu-ih nan hnenih an thăn mi thilpawl ah hin anmai hrangah si loin, kanmai hrang sawnah rawng an rak bawl a si ti kha cuih profetpawl hnenah phuanlăng a rak si.

1:10^a Mat 13:17; 26:24

1:11^b Mat 26:24; Apo 16:7; 2Pe 1:21

1:12^c Luk 24:44; Rom 4:24

Thianghlim dingih Kawhnak

13 ^aCuruangah hnaṭuan dingin nan lungthin timtuahin harhvâng uh, cule Jesu Khrih a rung lăng tikih nan hnenih a run ken ding mi zangfahnak parah nan ruahsannak zaten ṭhum uh. 14 ^bNan rak theih lo laiih nan hlanlai câkhiarnak vekih um loin, zawnlung mi fāte vekin um uh. 15 ^cA lo kotu a thianhlim bangin, nannih khal nan nuntukhawsakdān hmuahhmuah ah thianghlim uh. 16 ^dZiangahtile, “Kei ka thianhlim ruangah nannih khal thianghlim ve uh,” tiih ngan a si.

1:13^a Apo 24:25; 1Ko 1:7; Heb 3:6

1:14^b Rom 12:21; Efe 4:18

1:15^c Isa 35:8; 1Th 4:7; 1Joh 3:3

1:16^d Pui 11:44-45; 19:2

17 ^aCule thleidan nei loin mi tin an tuah mi zulhih thu a ṭhentu, Pa hnenih thla nan cam asile, hi leitlun ih nan um sung hmuah amah ṭihzahten nan cān liamter uh. 18 ^bNan pupápawl hnen ihsi thurosiah hmangih nan ngah mi ṭhathnemnak nei lo nan nundān lak ihsin thil siat thei mi, sui le ngun ih tlen nan si lo ih, 19 ^csawisel ding um lo le bawrhhlawh kai lo tuufano thisen vek a si mi, a sunglawi mi Khrih thisen thawi tlen nan rak si sawn ti nan thei. 20 ^dThungaiin Pathian in leilung hram a bun hlanah cuih Khrih cu a rak ruat cia nân, tuih cān neta lamah nanmai hlawknak ding hrangah a langter a si. 21 ^eNan zumnak le ruahsannak cu Pathian ih a ṭhumawk thei nak dingah, Khrih cu mithi lak ihsin Pathian in a kaitho ih, ropitnak a pe. Amah zarah Pathian zumtu nan si.

1:17^a Mat 6:9; 16:27; Heb 11:13; 12:28

1:18^b Mat 20:28; 1Ko 6:20; Gal 4:3

1:19^c Suah 12:5; Joh 1:29; Rom 3:25

1:20^d Mat 25:34; Efe 1:4; Heb 9:26

1:21^e Rom 4:24; Fil 2:7-9; Heb 2:9; 3:6

22 ^aThlarau zarah thutak nan thlunnak hmangin nan thinlung cu nan thiangfaiter zo ih, unau duhdawtnak taktak nan nei. Curuangah thinlung thiangten pakhat le pakhat nasa zetin duhdawaw uh. 23 ^bA siat thei mi ci hmangin si loin, kumkhuaih a nung mi le a hmun mi, a siat thei lo mi, Pathian kamsuakthu hmang sawnin hrinsal mi nan si. 24 Ziangruangahtile,

1:22^a Joh 13:34; Rom 12:10; Jam 4:8

1:23^b Joh 1:13; 3:5; Heb 4:12

“Milai hmuahhmuah hi hrampi vek an si ih,
An ropitnak hmuahhmuah khal hrampi par vek men a si.
Hrampi cu an vuai ih, a par cu a ṭil.
25 ^aSikhalsehla Bawipaih kamsuakthu cu kumkhuain a hmun a si.”

1:25^a Isa 40:6-8; Jam 1:10

Nan hnenih phuan mi thuthangṭha hi cuih kamsuakthu cu a si.

A Nung Mi Lungto le Hril Mi Miphun

1 ^aCuruangah mi dang parih lungput siava hmuahhmuah, bumawknak hmuahhmuah, tiawkternak, iksiknak le mi dang relsiatnak hmuahhmuah cu bansanin, 2 ^bnausen suakpek vekin, zianghman rawi lo hnawi ti thiang, Pathian kamsuakthu hâl uh, cumi hmangin nan ṭhanglian thei ding. 3 ^cBawipa cu zangfahnak ih khat a si ti nan teh zo asile cumi cu hâl uh.

2:1^a Efe 4:22; Jam 4:11

2:2^b 1Ko 3:2; Efe 4:15-16

2:3^c Sam 34:8; Heb 6:5

4 ^aMilaipawl ih hnawn mi, Pathian bélte ih hril le a man a khung zet mi hnenah cun a nung mi lungto hnenih thleng vekin nan thleng. 5 ^bJesu Khrih zarah Pathian cohlan tlak thlarau lam raithawinakpawl hlan dingin, nanmah rori khal a nung mi lungtopawl bangin thlarau lam inn, puithiam thianghlim si dingin sak rero nan si.

2:4^a Isa 42:1

2:5^b 1Ko 3:9; Efe 2:20-22; Fil 4:18; Heb 13:15

6 ^aCuruangah Cathiang sung khalah,

2:6^a Isa 28:16; Rom 9:32; Efe 2:20

“Ngai hnik uh, Zion ah
Ka hril mi, a mankhung mi, a kilih lungto pawimawhbik cu ka ret,
Amah zumtu cu ningzahter a si hrimhrim lo ding,”

ti mi a um.

7 ^aCuruangah nannih zumtu hrangah anih cu a sunglawi a si; asinan a zum lo tupawl hrangah cun,

2:7^a Sam 118:22; Apo 4:11; 2Ko 2:16

“Inn saktupawl ih an hnawn mi lungto kha,
A kilih lungto pawimawhbik ah a cang,”

8 ^aCule,

2:8^a Isa 8:14; Luk 2:34; Rom 9:22

“Amah cu bahnak lung le tlûknak lungpi a si.”

Thu an lun lo ruangah kamsuakthu ah an tlu ih, cumi ding hrangih ruat mi khal an rak si.

9 ^aSikhalsehla thim sung ihsin amai tleu mak zet sungih a lo kotuih tlinzia nan phuansuah thei nak dingah, nannih cu hril mi miphun, siangpahrang hrin puithiam, miphun thianghlim le amai mihleice nan si. 10 ^bHlanah cun Pathian-ih minung nan rak si lo, asinan atu-ah cun Pathian-ih minung nan si; hlanah cun zahngainak nan rak co lo nân, atu-ah cun zahngainak nan co zo.

2:9^a Suah 19:5-6; Dnp 7:6; 10:15; Isa 43:21; 62:12; Apo 26:18; Tit 2:14

2:10^b Hos 1:6, 9-10; 2:1, 23; Rom 9:25-26

11 ^aKa duhdawt mitla, mikhual le khualtlawng lai nan si ruangah, thlarau a do ṭheu tu tisa câkhiarnakpawl ihsin thiarfihlimaw dingin ka lo ngen hai a si. 12 ^bZentelpawl lakih nan nundān cu mawi zetin si seh. Thil ṭha lo tuahhmang vekih an lo rel tikah, thil ṭha nan tuah mi hmangin thuṭhen dingih Pathian a rat ni ah amah cu an thangṭhat leh ding.

2:11^a Rom 13:14; 1Ko 10:14; Gal 5:16; Heb 11:13; Jam 4:1

2:12^b Mat 9:8; Fil 2:15; Tit 2:8; 1Pe 3:16

Uktu hnenih Tlukluh

13 ^aCuruangah milai tuah mi zīn le dān kip ah Bawipa ruangah tlulut uh, siangpahrang dān cu thuneitu sangbik a si khalle tlulut uh. 14 ^bThil ṭha lo tuahtupawl cawhkuan pek ding le thil ṭha tuahtupawl lawm dingin siangpahrang ih a thlah mi ram uktupawl hnen khalah tlulut uh. 15 ^cZiangahtile thil ṭha nan tuah tikah mi-âpawl in thei loih thudik lo an ṭawng mi dai ko nan tuah thei ding, cucu nan tuah dingah Pathian duh mi a si. 16 ^dMizalenpawl vekin um uh, asinan nan zalĕnnak cu sual khuhnak ah hmang loin, Pathian sál vekin um sawn uh. 17 ^eMi hmuahhmuah upat uh. Unaupawl duhdawt uh. Pathian ṭihzah uh. Siangpahrang cu upat uh.

2:13^a Rom 13:1; Tit 3:1

2:14^b Rom 13:3-4

2:15^c 1Pe 3:17

2:16^d Joh 8:32; Rom 6:22; Gal 5:13

2:17^e Thf 24:21; Rom 13:7

18 ^aSálpawl, ṭihzah zet nak thawn nan bawipawl hnenah tlulut uh. Miṭha le mizaidam hnen lawngah si loin, mihrohrangpawl hnen khalah tlulut uh. 19 ^bZiangahtile mi pakhat in Pathian a theih ruangah a tuar lo ding mi tuarin thinnatnak a tuar ṭenṭo asile, cucu Pathian lăwm tlak a si. 20 Nan ti sualnak ruangah kutthlak nan tawn tikah, tuar ṭenṭo hman uhla ziang lăwmnak so a um? Asinan thil ṭha nan tuah ih, cumi ruangih nan tuar tikah, nan tuar ṭenṭo asile cucu Pathian lăwm tlak a si. 21 ^cZiangahtile Khrih khal in kan hrangih a tuar ruangah cuvek ti dingih kawh nan si. A kenehpawl nan thlun thei nak dingah zohṭhim ding in tăn ta:

2:18^a Efe 6:5; Jam 3:17

2:19^b 1Pe 3:14, 17

2:21^c Mat 11:29; Rom 8:28; Fil 1:29

22 ^a“Anih cun sual a tuah lo ih,
A kâ khalah bumnak hmuh a si lo.”

2:22^a Isa 53:9; 2Ko 5:21

23 ^aMi in an zăwkzet tikah, a rak zăwkzet ve lo, a tuar lai khalah a rak hro ve lo, dik zetih thuṭhentu hnenah amah le amah a peaw sawn. 24 ^bCutin sualpawl lamih a thi zo mi kannih in dingfelnak lamih kan nun thei nak dingah anih cun amai taksaruangpum rori in thing parah kan sualpawl cu a phur. An vuaknak hriamhma in a lo tidam zo. 25 ^cZiangahtile nannih cu tuu bangin zin pêng nan rak zawh, asinan atu-ah cun nan nunnak Kilvengtu le Tuu khāltu hnenah nan rak kirsal zo.

2:23^a Isa 53:7; Luk 23:46; Heb 12:3

2:24^b Isa 53:4-5, 11-12; Heb 9:28

2:25^c Isa 53:6; Eze 34:6; Joh 10:11

Nupi le Pasal Thu

1 ^aCuti vekin nannih nupipawl, pasal hrekkhat pawl in Pathian kamsuakthu lung lo khal hai sehla, annih cu thusimnak si loin, nupilepawlih nundān in neh an si thei nak dingah, nanmai pasal hnenah tlulut cio uh. 2 Ṭihzah zet teih nan nundān thianghlim an hmuh tikah, neh an si ding. 3 ^bNan ceiawknak cu leng lam ceiawkdan, sám phiar simaw, sui thawi thuamawk simaw, hnipuan ṭha hruh simaw si loin, 4 ^chnipuan siat thei lo zaidamnak le thinlung tăngdawrnak in sung lam minung cu thuam sawn uh, cucu Pathian mithmuh ah a hlú zet mi a si. 5 ^dZiangahtile cu vekin hlanlai ih nunau thianghlim, Pathian rinsantupawl khal in anmai pasal hnen cio ah tlulutin an rak ceiaw. 6 ^eSarah in Abraham-ih thu a ngai ih, amah cu bawipa tiah a ko, nannih khal thil ṭha nan tuah ih, ziang vek ṭihnungza hman nan ṭih lo asile, Sarah-ih fāte nan si ding.

3:1^a 1Ko 7:16; Efe 5:22

3:3^b Isa 3:18-23; 1Ti 2:9

3:4^c Rom 2:29; 7:22; Efe 3:16

3:5^d Est 2:15; 1Ti 5:5

3:6^e Sem 18:12

7 ^a Cuvek thothoin, nannih pasalpawl khal, nan thlacamnakpawl khamih a umlonak dingah, theihthiamnak in nan nupipawl thawn cêngtlang uhla, bungbel kuai áwlsawn vekin le zangfahnak nunnak ro lo copitu an si vekin upat uh.

3:7^a Efe 5:25-33; Kol 3:19

Thil ṭha Tuah ruangih Tuar

8 ^aNetabikah, nan zaten lungthin hmunkhatin um uh, pakhat le pakhat lainataw uhla, unau vekin duhdawaw uh. Thinlung nem nei uhla, nēl-um zetin um uh. 9 ^bThil ṭha lo cu thil ṭha lo in lehrūl hlah uhla, hmuhsuamnak cu hmuhsuamnak in lehrūl fawn hlah uh, cuhnakin mal rak sawm sawn uh. Ziangahtile malsawmnak ro co dingin Pathian in a lo ko a si ti nan thei. 10 Ziangahtile,

3:8^a Rom 12:10; 15:5; Efe 4:2

3:9^b Mat 5:44; Rom 8:28; 12:17; 1Th 5:15; Heb 6:14

“Nun a duhtu le
Ni ṭha hmuh a duhtu cun,
Thil ṭha lo ihsin a lei kilveng sehla,
Mi bumnak ihsin a hmur kilveng seh.
11 Thil ṭha lo tlansanin thil ṭha tuah seh.
Remdaihnak hawlin, dawi seh.
12 ^aZiangahtile Bawipaih mit cu midingfelpawl parah a fu ih,
A hna cu an thlacamnak lamah a thawng.
Asinan Bawipaih mithmai cun thil ṭha lo tuahtupawl a dokalh.”

3:12^a Sam 34:12-16

13 ^aCule thil ṭha tuahtupawl cawngtu nan si ahcun, zo in so a lo tina ding? 14 ^bAsinan dingfelnak ruangah tuar ding nan si le, mithlawsuak nan si.

3:13^a Tit 2:14

3:14^b Isa 8:12-13

“An lo hronak cu ṭih hlah uhla, a buai khal buai hlah uh.”

15 ^a Cuhnakin Bawipa Pathian cu nan thinlung in thianghlim ah ruat sawn uh, cule nan sungih um ruahsannakih a săn lo suttu pauhpauh hnenah nunnemnak le upatnak thawn thulet dingin rak tiar ringring uh. 16 ^bThil ṭha lo tuahtu si vekih an lo relsiat laiah, sia le ṭha theihnak thiang neiin sawn uh, cuti cun Khrih ih nan umdān ṭha zăwkzettupawl cu ningzakin an um ding. 17 Ziangahtile Pathian remti zawng a si ahcun, thil sia tuah ruangih tuar hnakin thil ṭha tuah ruangih tuar cu a ṭhasawn.

3:15^a Kol 4:6; Heb 3:6

3:16^b Apo 23:1

18 ^aZiangahtile Pathian hnenih in hruai thei nak dingah, Khrih khal in sualpawl hrangah vei khat mi hmuahhmuah hrangah a tuar. Midingfel cun midingfel lo hrangah a tuar ih, taksa ah cun thah a si ko nân, Thlarau in a nungter a si. 19 Thawnginn sungih thlaraupawl hnen khalah cuih Thlarau hmangin a feh ih thu a phuang. 20 ^bCuih thlaraupawl cu hlanlai Noah san, lăwng timlam a si lai, Pathian in thinsaunak thawi a hngah hai lai ih, thungai lo pawl kha an si. Cuih lăwng ah cun mi málte, mi pariat nunnak lawng ti hmangin rundam an si. 21 ^cCumi in a hmuhsak mi baptisma cun Jesu Khrih thawhsalnak ruangah tuih cān ah rundamin kan um. Cuih baptisma cu taksa bawrhhlawh hlăwnhlohnak men si loin, sia le ṭha theihnak thiang neiin, Pathian lamih tiamkamnak hi a si sawn. 22 ^dVancungmipawl, thuneihnakpawl le huhampawl cu Jesu in amai thuthu ih um dingin a tuah hnuah, van ah a feh ih, Pathian vawrh lamah a um.

3:18^a Rom 5:2; Kol 1:2; Heb 7:27

3:20^b Sem 6:3, 5, 13-14; 8:18; Rom 2:4; Heb 11:7

3:21^c Apo 22:16; 23:1

3:22^d Mat 28:18; Mar 16:19; Rom 8:28; Heb 4:14

Pathian hrangih Nun

1 ^aKhrih cun a taksa in kan hrangih a tuar ruangah, nannih khal cuvek lungthin thawn thuamaw uh, ziangahtile taksa ih a rak tuar zo tu cun sual a bansan zo a si. 2 ^bCuti cun a tāng lai mi a taksa nunnak cān cu milai câkhiarnak lamah nung nawn loin, Pathian duh zawng lamah a nung sawn thlang ding. 3 ^cZiangahtile hi hlanih kan nunpi mi, Zentelpawlih duh zawng: fihnungza hursual tuahnak, câkhiarnak, zu rîtnak, zu hmun năwmcennak, zu intlangnak, fihnungza milem nan biaknak pawl kha a liam zo. 4 Cumi ah anmah thawn năwmcennak ih nan um nawn lo ruangah danglam an ti ih, an lo thangsiat a si. 5 ^dMinung le mithi pawl thuṭhensak dingih a tiartu hnenah an thuhla anmah rori in an thlen ding. 6 Cumi ruangah, milai dān in taksa ah thuṭhen si khal hai sehla, Pathian duh zawngin thlarau ih an nun thei nak dingah atu-ih a thi zo mipawl hnen khalah thuthangṭha cu sim a rak si.

4:1^a Rom 6:18

4:2^b Rom 6:2

4:3^c Rom 13:13; Efe 2:2

4:5^d Apo 10:42

7 ^aThil hmuahhmuah cemnetnak cu a nai zo; curuangah ralring uhla, thla nan cam thei nak dingah thununaw uh. 8 ^bCule thil dang hmuahhmuah hnakin pakhat le pakhat duhdawtawk hi uar uh, ziangahtile “Duhdawtnak in sual tampi a khuh a si.” 9 ^cPhunzai loin pakhat le pakhat ṭha zetin mikhual awtăwn uh. 10 ^dMi tin in thilpek nan co fingfing bangtukin, Pathian zangfahnak lamzin phunphun kilkhawitu ṭha vekin pakhat le pakhat rianaw uh. 11 ^eJesu Khrih zarah Pathian cu thil ziangkimah thangṭhatih a um thei nak dingah mi pakhat khat in thu a sim asile, Pathian kamsuakthu a sinak vek rori in sim sehla, mi pakhat khat in mi a rĕn asile, Pathian in titheinak a pek vekin rian seh. Ropitnak le huham cu kumkhuain kumkhua tiang amai ta a si. Amen.

4:7^a Apo 24:25; Rom 13:11

4:8^b Thf 10:12; Jam 5:20

4:9^c Rom 12:13; Fil 2:14

4:10^d Rom 12:6-7; 1Ko 4:2

4:11^e Rom 11:36; Efe 6:10; 1Th 2:4

Khristian Si ruangih Tuarnak

12 Duhdawt mitla, nanmah hniksaknak dingih meisa vek tuarnak ra thleng mi hi, thil danglam zet nan parih ra thleng vekin lâu hlah uh. 13 ^aCuhnakin a ropitnak a rung lăng tikah aipuannak maksak thawi nan lungawi sinsin thei nak dingah, Khrih-ih tuarnakpawl tuarpitu nan si ruangah lungawi aipuangin um sawn uh. 14 ^bRopitnak Thlarau le Pathian Thlarau cu nanmah ih a um ruangah, Khrih hmin ruangih mawhthluk nan tuar asile, mithlawsuak nan si. Annih lamah Khrih cu thangsiat a si ih, nannih lamah cun sunlawih a si. 15 Asinan nan lakih mi zohman laithat a si ruangah simaw, fifir a si ruangah simaw, thil ṭha lo tuahtu a si ruangah simaw, mi dang thu ih hrawlhawkhmang a si ruangah simaw tuar hlah seh. 16 ^cCuti cingin mi pakhat khat in Khristian a si ruangah a tuar asile, a ningzak hlah seh, cuhnakin hi thu ruangah Pathian thangṭhat sawn seh. 17 ^dZiangahtile thuṭhennak cu Pathian sungkua ihsin thawh a cu zo. Kanmah ihsin a thawh hmaisak asile, Pathian thuthangṭha lung lo tupawlih cemnetnak cu ziang vek a si pei? 18 ^eCule,

4:13^a Mat 5:12; Rom 8:17; 2Ko 1:5

4:14^b Mat 5:11; Joh 15:21

4:16^c Apo 5:41

4:17^d Jer 25:29; Eze 9:6; Amo 3:2; 2Th 1:8; 1Ti 3:15

4:18^e Thf 11:31; Luk 23:31

“Midingfel hmanin rundamnak harsa zetin a co a si ahcun,
Pathian ngaihsak lo le misual parah cun ziang vek tak thleng pei maw?”

19 Curuangah Pathian duhdān vekih a tuartupawl cun, thil ṭha tuah vivoin an nunnak cu Sersiamtu rinum hnenah ap hai seh.

Pathian Tuu Rual Cawm

1 ^aNan lakih elder-pawl kha Khrih-ih tuarnakpawl theihpitu le a rung lang leh ding mi ropitnak co ve tu ding pa kei, nan elder-pi hin tha ka pe a si. 2 ^bNan lakih Pathian tuu rualpawl kha kawhhran hotu nan si bangin câwm uh. Ti ding a si ruang men lawngih ti si loin, duhnak hrimhrim sawnin, a dik lo mi hlawknak duh menah si loin thatho zetin rian sawn uh. 3 ^cNan kilkhawi dingah Pathian in nan hnenih a lo pek mi parah lalawter loin, tuu rualpawl ih zohṭhim ding mi si sawn uh. 4 ^dCule Tuu khāltu Lu bik a rung lăng tikah, a ziamral thei lo mi ropitnak lallukhum nan ngah ding.

5:1^a Luk 24:48; Apo 11:30; Thu 1:9

5:2^b Joh 21:16; 2Ko 9:7; Fil 1:14; 1Ti 3:3

5:3^c Eze 34:4; Mat 20:25-28; 1Ti 4:12

5:4^d Joh 10:11; 1Ko 9:25

5 ^aCuvek thothoin, nannih minopawl, kum upadeuh pawl hnenah tlulut uh. A si, nan zaten pakhat le pakhat hnenah tlulutawtăwn uhla, tăngdawrnak thawn thuamaw uh. Ziangahtile,

5:5^a Thf 3:34; Mat 23:12; Efe 5:21

“Pathian in mipuarthaupawl a dokalh,
Asinan mităngdawrpawl hnenah zangfahnak a pe.”

6 ^aCuruangah a tikcu teih a lo khaisan thei nak dingah, Pathian kut cak hnuaiah hnuaidawr uh. 7 ^bAnih in a lo ngaihsak ruangah a parah nan mangbangnak hmuahhmuah ṭhum uh.

5:6^a Job 5:11; Jam 4:10

5:7^b Sam 55:22; Mat 6:25; Heb 13:5

8 ^aNan doral pa Diabol cu a hûk rero mi kiosa bangin a deh ding hawlih a tawihvah rero ruangah, harhvâng uhla, ralring uh. 9 ^bLeitlun hmun dangih a um mi nan unaupawl hnenah cuti vek tuarnakpawl cu a thleng ve ti theiin, amah cu do uhla, zumnak ah ding hnget uh.

5:8^a Job 1:7; Apo 24:25; 2Ti 4:17

5:9^b Apo 14:22; Kol 2:5; Jam 4:7

10 ^aSikhalsehla zangfahnak hmuahhmuah ih Pathian, a sankhuk ropitnak co dingih Khrih Jesu ih in kotu khan rei lo te sung nan tuar hnuah a lo tuahṭha famkim ding ih, a lo tungding ding. A lo cakter ding ih, a lo hngetter ding. 11 ^bA hnenah ropitnak le huham cu kumkhuain kumkhua tiang um hram seh. Amen.

5:10^a Rom 8:28; 2Th 2:17; 2Ti 2:10

5:11^b Rom 11:36

Cibaibûknak Netabik

12 ^aNan dīn hngeh nak Pathian zangfahnak a dik a si ti theihter ding le tha lo pe dingin nan hnenah tawiten ca ka lo kuat. Cucu kan unaupa mirinum a si ti ka theihfiang mi Silas-ih băwmnak in tawiten ka run ngan a si.

5:12^a Apo 5:22; 1Ko 16:13; Heb 13:22

13 ^aNanmah thawi bangrepih hril mi, Babilon khua ih um nu in cibai a lo bûk. Cuvek thothoin ka fapa Mark khal in cibai a lo bûk hai. 14 ^bPakhat le pakhat duhdawtawten hnămawknak in cibaibûkaw uh.

5:13^a Apo 12:12

5:14^b Rom 16:16; Efe 6:23

Nannih Khrih Jesu ih umpawl hmuahhmuah hnenah hnangamdaihnak um hram seh. Amen.