About Bible Thianghlim | ©

BibleThianghlim – Mikah

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Mikah

1234567

• A ngantu: Mikah
• A siartu: Judah
• A huap sung cān: Kum zabi pariat neta lam

Mikah cu Filisṭia-mipawlih khawpi Gath kiangih um, Judah khua Moresheth ihsin a si. Anih cu Isaiah thawi san khat ih rawngbawl a si ih, anih khal Judah rammipawl hnenah thu a phuang. Mikah cun Jotham a lal lai, sak lam lalram ih Samaria a tlûk hlanah (1:1, 6) thuphuan a thawk, cule Sennakerib in Judah a sîm ih, Jerusalem a kharkhum cān ah thu a phuang (1:1, 8-16).

Mosi thukham an pahbăl ruangah Judah-mipawl in Pathian dāntatnak an tawn ding thu Mikah in a phuang (6:1-5). A hleicein Judah-mipawl cun milem an bia ih (1:6-7; 6:16), mifarah an palbĕt (2:2; 3:1-3). Sikhalsehla, hi dāntatnak thu simsung mi cu ruahsannak thuphuan in a thlun. Abraham thawi thukham ruangah, Pathian in Israel dung a tŭn lo ding (7:20). Zion ih a khawmsal ding mi a tāngsŭnpawl cu a runsuak ding (2:12; 4:6; 5:3).

Ni khat khat ah David cithlah ihsin Siangpahrang pakhat in Zion ihsin a uk leh ding, cule miphun dang pawl hmuahhmuah, cu tawkah Pathian be dingih hīp an si ding (2:12; 4:1-3, 13). Mikah in cuih Siangpahrang suahnak ding hmun Bethlehem khal a phuang cia (5:2; Mat 2:5-6).

Pathian ropitnak cu Mikah cabu ah a lang. Judah hnenah dāntatnak thim thucah phuang ding si khal sehla, Mikah cun Pathian cu lung a thlĕng mipawl le amah naihtupawl lamah zangfahnak le zahngainak a nei ti khal a phuang. Mikah ih phuanlăng mi zahngainak nei Pathian ah Khristianpawl cu lungawi aipuangih um ding kan si, ziangahtile amah vek zohman an um lo (7:18).

1

1 ^aJudah siangpahrang Jotham, Ahaz le Hezekiah san laiah Samaria le Jerusalem thuhla ih Moresheth khawmi Mikah in a hmuh mi a hnenih Jehovah-ih kamsuakthu thleng cu hihi a si.

1:1^a 2Sp 15:5, 7, 32-38; 1San 3:12-13; 2San 27:1-9; Isa 1:1; Jer 26:17-19; Hos 1:1

Israel parih Thleng ding mi Dāntatnak

2 ^aNannih miphunpawl, ngai uh!
Maw leilung le a sungih um mi hmuahhmuah, ngai uh!
Bawipa cu amai temple thianghlim sung ihsin;
Bawipa Jehovah cu nanmah dokalhih a lo theihpitu si seh.
3 ^bZiangahtile zoh hnik uh, Jehovah cu a umnak hmun ihsin a ra rero lai;
A rung ṭum ding ih,
Leilung hmun sâng pawl a pál ding.
4 ^cAmai hnuaiah tlangpawl an zupral ding ih,
Meisa hmaiih sa thau a um vekin le
Suk lamih tipi luangthla bangin,
Phaikuampawl cu an phel ding.
5 ^dHimi hmuahhmuah hi Jakob ih dān pahbălnak ruangah le
Israel sungza-ih sualpawl ruangah a si.
Jakob ih dān pahbălnak cu ziang a si?
Samaria a si lo maw?
Cule Judah-ih hmun sâng pawl teh ziang a si?
Jerusalem a si lo maw?
6 ^eCuruangah Samaria cu ramlak ah siatnak penkhawm ah,
Sabit phunnak hmun ah ka tuah ding;
A lungtopawl cu phaikuam ah ka sûngbung ding ih,
Samaria lungphumpawl cu lang ko ka tuah ding.
7 ^fA sercawp milim zaten vuakdarh ṭheh an si ding ih,
A hlawhhlan man zaten meisa ih urkăng a si ding;
A milempawl zaten ṭhing ko ka tuah ding,
Ziangahtile cupawl cu a hlawhhlan man ih a lâkkhawm mi an si ih,
Hlawhhlang nuih hlawh man ah hman an si leh ding.

1:2^a Sem 31:50; Dnp 4:26; 32:1; Sam 11:4; 50:7; Isa 1:2; Jer 6:19

1:3^b Isa 18:3-4; 64:1-3; Amo 4:11-13

1:4^c Mip 16:31-33; Job 9:4-5; Sam 46:1-2, 6-7; Nah 1:5-6

1:5^d 2Sp 23:4-7, 10; Amo 8:14

1:6^e Dnp 20:6; Eze 13:14; Amo 5:11

1:7^f Suah 32:20; Dnp 9:20-21; 23:17-18; Eze 6:4-7; Hos 2:5, 12

Israel le Judah Ṭahhnawhnak

8 ^aCuruangah ka ṭap ding ih ka râk ruangro ding,
Kelawng le taklawng in ka feh ding;
Cinghniapawl bangin ka kû ding ih,
Kalauk vapawl bangin ka râk ding.
9 ^bZiangahtile a hriamhmapawl cu tidam theih an si lo.
Ziangahtile cumi cu Judah hnenah a thleng zo;
Ka mipawlih kăwtka,
Jerusalem a thleng zo.
10 ^cCucu Gath ah sim hlah uhla,
Ṭap hrimhrim hlah uh;
^dBeth Afrah leivut ah rīl aw.
11 ^eNannih Safir luahtupawl taklawng le ningzakin fehhlo uh;
Zaanan luahtupawl an fehsuak lo.
Beth Ezel cu a ṭap;
A dīnnak ding hmun nan hnen ihsin lâkhlo a si.
12 ^fZiangahtile Maroth luahtupawl cu ṭhatnak hngakin an ṭawl,
Asinan siatnak cu Jehovah hnen ihsin
Jerusalem kăwtka ah a ra thleng.
13 ^gNannih Lakish luahtupawl,
Rang zam ṭha cu lêng thluah uh;
Anih cu Zion fanu parih sual tuahthăwktu a si,
Ziangahtile Israel ih dān pahbălnak cu nangmah ah hmuh a si.
14 ^hCuruangah Moresheth Gath hnenah laksawng na pe ding;
Akzib khua ih innpawl cu Israel siangpahrangpawl hrangah bumnak an si ding.
15 ⁱMaw Mareshah luahtupawl, nan hnenah ram latu ka hruai ding;
Israel-ih ^jropitnak cu Adullam ah a feh ding.
16 ^kA sunglawi mi na fāte ruangah,
Na sám met awla na lu kawng aw;
Mulukawlh bangin na lukawlh kauter aw,
Ziangahtile na hnen ihsin ralkaih ah an feh ding.

1:8^a Isa 15:3; 20:2-6

1:9^b 2Sp 18:13; Isa 3:25-26; Jer 10:19; 46:11

1:10^c 2Sam 1:17, 19-20

1:10^d Beth Afrah: Leivut inn tinak a si.

1:11^e Eze 23:28-31

1:12^f Isa 59:9-12; Jer 14:19-21; 40:2-3; Amo 3:6

1:13^g Jos 10:3; Sam 9:13-14; Isa 36:2; Eze 23:4, 11

1:14^h Jos 15:20-21, 44; 2Sp 16:8; Jer 15:15-19

1:15ⁱ Jos 12:7, 15; 15:44; 2San 11:5, 7-8

1:15^j ropitnak: Siangpahrangpawl relnak a si.

1:16^k Pui 13:40; Dnp 4:27; Job 1:20; Amo 5:26-27; 7:11, 16-17; Mik 4:9-10

2

Thil ṭha lo Tuahtupawl Hmakhaw Pihnak

1 ^aMawhsualnak khawkhângtu le
An ihkhun parih thil ṭha lo tuahtupawl cu an hmakhua a pit a si!
Zing lam khawvan tikah cucu an tuah,
An kut ah tuah thei nak an neih ruangah a si.
2 ^bLórampawl mi an daw ih mi an láwng,
Innpawl khal mi an daw ih an lâksak men.
Mi pakhat cu a inn thawn,
Mi pakhat cu a ro thawn an palbĕt.
3 ^cCuruangah Jehovah in hitin a ti:
Ngai hnik, hi innsang dokalhin vansiatnak khua ka khâng rero,
Cumi ihsin nan hngawng nan phawih thei lo ding;
Hngal zetin nan feh fawn lo ding,
Ziangahtile cucu cān ṭha lo a si ding.
4 ^dCuih cān ah mi in nanmah dokalhin an lo hnihsan ding ih,
Nasa zetin an lo ṭah ding,
“Kannih cu faifilik ih tisiat kan si!
Anih in ka mipawlih covo a thlĕng ṭheh;
Ka hnen ihsin a lahlo a si hi!
Midungtawlh hnenah kan rampawl a pe,” tiin.
5 ^eCuruangah Jehovah-ih mipungkhawm lakah
Camcawhfung zûknak ih ramri ṭhensaktu na nei lo ding.

2:1^a Sam 36:4; Isa 29:20; Hos 7:6-7

2:2^b 1Sam 8:14; 1Sp 1:21; Thf 30:14; Isa 1:23; 5:8; Jer 22:17; Eze 46:18

2:3^c Isa 2:11-12; Jer 18:11-12; Amo 3:1-2; 5:13

2:4^d Pui 26:31; Jer 4:13; 6:12-14

2:5^e Mip 34:13-15; Dnp 32:13; Jos 18:3-6

Thuphan Per Profetpawl

6 ^a“Ṭawngsuak hlah uh,” tiah an ṭawngsuak.
Hi thil thuhla ah an ṭawngsuak lo ding;
Hmuhsuamnak cu lâkhlo a si lo ding.
7 ^bJakob sungzapawl tla,
Jehovah-ih Thlarau in a zāwi thei lo maw si?
Hipawl hi amai tuah mi an simaw?
Dĭng teih fehtu parah ka kamsuakthupawl cun thil ṭha a tuah lo maw?
8 Tlâi khawpi hnuah ka mipawl cu doral vekin an rak tho,
Ral donak ihsi ra tlung mipawl bangih
Ralmûang zetih fehtupawlih sinfen na dirhthlaksak hai.
9 ^cKa mipawl lakih nunaupawl cu
An inn nuam ihsin nan dawisuak cio hai.
An fātepawl hnen ihsin ka ropitnak cu nan lâkhlosak kumkhua hai.
10 ^dTho uhla păwk uh,
Ziangahtile hihi cawlhnak hmun a si lo;
Ziangruangahtile himi cu a bawrhbang ih, siatbălnak namen loin a siatbăl a si.
11 ^eZianghmanlo le thuphan simtu mi pakhat suakin,
“Sabit zu le zupi thuhla ka phuang ding,” a ti asile,
Cu pa cu hi minungpawl hnenih thuphuangtu a si ding!

2:6^a Sam 44:13; Jer 18:16; Amo 2:11-12; Mik 6:16; Apo 17:18

2:7^b Sam 15:1-5; 119:65

2:9^c Jer 10:20

2:10^d Pui 18:24-29; Dnp 12:9; Sam 106:37-39; Ṭah 4:13-17

2:11^e Pui 10:9; 2San 36:16; Isa 30:8-11; Jer 5:30-31; 2Ti 4:2-4

Israel Tundinsal a Si

12 ^aMaw Jakob, nan zaten ka lo fĭnkhawm tengteng ding,
Israel tāngsŭn cu ka hruaikhawm tengteng ding;
Hruangkulh sungih tuu bangin,
Rante rual an tlannak ih um bangin
Hmunkhat ah ka khawm hai tengteng ding.
Cuih hmun ah mipi awthâwm a um leh ding.
13 ^bAn hmaiah bălpawptu a feh ding;
Kăwt an băl ding ih, an fehsuak ding.
An hmaiah an siangpahrang a feh ding,
An lu bik ah Jehovah.

2:12^a Neh 1:8-9; Mik 4:1, 6-7

2:13^b Isa 52:9-12; 60:11-12; Hos 3:5

3

Uktu Sualrál Pawl le Profet Sualrál Pawl

1 ^aCule kei in,

3:1^a Jer 5:3-7

“Nannih Jakob-ih lubânpawl le Israel sungza uktupawl, atu-ah ngai hnik uh;
Diknak cu nan theih ding mi a si lo maw?
2 ^aNannih ṭhatnak hua ih siatnak ngainatupawl;
Ka mipawlih vun hâwktu le
An ruh ihsin an tit hâwktupawl;
3 ^bKa mipawlih sa eitupawl,
An vun nan lip,
An ruh nan khiak ih,
Bel sungih ret ding mi sa bangin cip ko nan sat,
Ukāng sungih sa bangin.
4 ^cCun Jehovah hnenah an au ding,
Asinan anih in a ngai hai lo ding;
Cuih cān ah an hnen ihsin a hmai a thup ding,
Ziangruangahtile an thil ti mipawl a ṭha lo.”
5 ^dKa mipawl hruaipêngtu profetpawlih thuhla Jehovah ih sim mi cu hitin a si:
Ei ding an neih laiah cun, “Hnangamdaihnak,” tiah an au,
Asinan an kâ hrangih ei ding pe lo tu cu an do;
6 ^e“Curuangah zan a thleng ding ih larnak nan nei lo ding,
Khua a thim ding ih simsungnak nan nei lo ding;
Profetpawl parah ni a tla ding ih,
An hrangah sun a thim ding.
7 ^fgHmutupawl an ning a zak ding ih,
Simsung thiam pawl mualphoter an si ding;
A si, an zaten an kâ an hup ding;
Ziangahtile Pathian hnen ihsin thulehnak zianghman a um lo.”
8 ^hAsinan kei cu Jakob hnenih a dān pahbălnak thăn dingah le
Israel hnenih a sual thăn dingah,
Huham, Jehovah-ih Thlarau,
Diknak le cahnak thawn ka khat.
9 ⁱNannih diknak fihtu le a dĭng mi zate merhkâwitu,
Jakob sungza lubânpawl le
Israel sungza uktupawl,
10 ^jThisen suah phahih Zion dĭntupawl le
Mawhsualnak thawi Jerusalem dĭntupawl,
Atu-ah hihi ngai hnik uh:
11 ^kA lubânpawl in nawhthuh eiin thu an ṭhen,
A puithiampawl in paisa hlawhin an zirh,
Cule a profetpawl in paisa hlawhin simsungnak an tuah.
Cuti cingin Jehovah an hngauhsan ih,
“Kan lakah Jehovah a um a si lo maw?
Kan parah vanduainak a thleng thei lo ding,” tiah an ti.
12 ^lCuruangah nanmah ruangah Zion cu ló bangin leh a si ding,
Jerusalem cu siatnak penkhawm mi ah a cang ding ih,
Temple tlang cu tupi tlangmûalpawl vek a si ding.

3:2^a Sam 53:4; Eze 22:27

3:3^b Job 24:14; Sam 14:4; Eze 11:3, 6-7, 11; 34:2-6, 11, 16; Zef 3:3-4

3:4^c Dnp 1:42-45; 31:16-17; 1Sam 8:18; Job 15:31; Sam 18:40-42; Isa 1:15; 58:4; Jer 11:11-12; Eze 8:17-18

3:5^d Isa 3:12; Jer 4:9-10, 14; 6:13; Eze 13:9-10, 19

3:6^e Isa 8:19-22; 29:10-12; Jer 23:33-40; Eze 7:25-26; 12:24; 13:22-23; Amo 8:11-12

3:7^f Pui 13:45-46; Est 6:11-12; Isa 44:25; Eze 20:3-4

3:7^g Hmutupawl: Profet tinak a si.

3:8^h Isa 57:10-14; 58:1

3:9ⁱ Sam 58:1-2; Isa 1:23

3:10^j Jer 22:13, 17; Mik 7:1-2; Nah 3:1-3; Hab 2:12

3:11^k Isa 1:23; 10:20; 28:14-18; Jer 6:13; Ṭah 4:13; Eze 34:2; Hos 4:6-9, 18; Mik 7:3-4; 1Ko 10:11-15

3:12^l Pui 26:27-31; Jer 17:3-4; 26:18; Ṭah 5:17-19; Eze 5:14-15

4

Zion ih Jehovah ih Uknak

1 ^aNi netaah cun hitin a si ding,
Jehovah inn umnak tlang cu tlangpawl lakih sangbik ah dĭn a si ding ih,
Tlangmûalpawl tlunah cawisan a si ding;
Cule miphunpawl cu cumi ah an feh hluarhlo ding.
2 ^bMiphun tampi an ra ding ih,
“Ra uhla, Jehovah-ih tlang ah so uhsi,
Jakob-ih Pathian inn ah;
Anih in a lamzinpawl in zirh ding ih,
A zinpawl kan zawh ding,” tiah an ti ding.
Ziangahtile Zion ihsin dān a ra suak ding ih,
Jerusalem ihsin Jehovah-ih kamsuakthu.
3 ^cAnih cun miphunpawl karlakah thu a ṭhen ding ih,
Hlapi ih um miphun cak pawl hrangah thutluknak a tuah ding;
An ralnâmpawl cu leilehnak ah an ser ding ih,
An feipipawl tla leicawhnak thir zúm ah an ser ding;
Miphun pakhat in miphun pakhat dokalhin ralnâm a hawi lo ding ih,
Ral dodān khal an zir nawn hrimhrim lo ding.
4 ^dCuhnakin mi kip mai sabit hri hnuai le theipi kung hnuaiah an to ding ih,
Zohman in annih cu lungphâng ko an tuah lo ding;
Ziangahtile ralkap rualpawlih Jehovah-ih kâ ihsin phuansuah a si zo.
5 ^eZiangahtile mi zaten anmai pathian hmin in an feh cio,
Asinan kannih cu Jehovah kan Pathian hmin in a kumkhuaih kumkhua tiang kan feh ding.

4:1^a Sam 22:27-28; 48:1-2; Isa 2:1-5; Jer 3:17; Eze 17:22-24; Dan 2:28, 34-35; Zek 8:3

4:2^b Dnp 18:15, 18-19; Sam 25:8-10; Isa 54:13; Jer 31:6-7; Eze 20:40; Zek 2:10-13; Mar 1:2-4

4:3^c Sam 46:8-11; Isa 2:4; 11:3-4; Joe 3:9-17; Zek 8:20-23; 9:10

4:4^d Pui 26:3-6; 1Sp 4:25; Isa 1:19-20; Eze 39:25-26; Zek 3:10

4:5^e Jos 24:14-16; Isa 26:8; Zek 10:11-12; Apo 14:12-18

Hmai lam Cān ih Zion-ih Nehnak

6 ^aJehovah in, “Cuih ni ah,
Kebáipawl ka khawm ding,
Thlauthlak mipawl le
Ka zăwnzaihter mipawl ka khawm ding.
7 ^bKebáipawl cu a tāngsŭn ah ka tuah hai ding ih,
Thlauthlak mipawl cu miphun cak ah ka tuah hai ding.
Atu thawkin, kumkhua tiang
Jehovah in anmah cu Zion tlang ihsin a uk hai ding.
8 ^cCule nang, Maw rante rualpawlih dawlsâng,
Zion fanuih hauhruang,
Na hnenah cucu a thleng ding,
Hlanlai ih uknak tiang a thleng ding;
Jerusalem fanuih lalram cu,” tiah a ti.
9 ^dZiangah atu-ah ring zetih na au?
Nan lakah siangpahrang a um lo maw?
Na thurawn petu a hloral maw si?
Ziangahtile nunau fahrin nat tuar lai bangin tuarnak in a rak lo kai.
10 ^eMaw Zion fanu,
Nunau fahrin nat tuar bangin tuarin sawltâl rero aw.
Ziangahtile atu-ah nang cu khaw sungin na suak ding ih,
Hramlak ah na cêng ding,
Cule Babilon ah na feh ding.
Cu tawkah runsuah na si ding;
Cuih hmun ah Jehovah in na ralpawl kut ihsin a lo tlen ding.
11 ^fAtu khalah miphun tampi cu nangmah dokalhin an pungkhawm,
“Amah cu bawrhbanter si seh,
Cule kan mit in dirĕmin Zion zoh seh,” tiah an ti.
12 ^gAsinan annih cun Jehovah ruahnak an thei lo ih,
A thurawn pek mi an theithiam fawn lo;
Ziangahtile anih cun hruih hmun ih fâng tēl an khawm bangin, a khawm hai zo.
13 ^hMaw Zion fanu, tho awla cīl aw;
Ziangahtile na ki cu thir ah ka tuah ding ih,
Na ke tínpawl cu dar ah ka tuah ding;
Miphun tampi na vawdarh ding;
Ralthillawn ih an ngah mi cu Jehovah hnenah na serhhran ding ih,
An lennak cu leilung pumpuluk Bawi hnenah.

4:6^a Sam 106:45-47; Jer 31:8; Eze 34:13, 16; Zef 3:19-20

4:7^b Sem 12:2; Isa 24:23; Dan 2:44; Joe 2:32; Mik 2:12; Luk 1:31-33; Thu 11:15

4:8^c Isa 1:26-27; Zek 9:9

4:9^d Sem 3:16; Jer 8:18-19; 30:6-7

4:10^e 2Sp 20:17-18; Sam 107:1-3; Isa 43:14; 45:1-4, 13; Amo 5:27; Thu 12:1-2

4:11^f Ṭah 2:16; Oba 1:1, 10-14; Mik 7:8-9

4:12^g Sem 50:19-20; Isa 55:8-9; Rom 11:33-36

4:13^h Isa 21:9-10; 23:17-18; 41:14-16; 45:1; Dan 2:44; Zek 12:1-8; 14:14

5

Bethlehem ihsin Uktu

1 ^aMaw nang ralkap burpipawlih fanu,
Ralkap burpi pi ah tuahaw uh;
Kanmah dokalhin anih in in kulhkhŭm zo.
Annih in Israel thuṭhentu cu kianghrăwl in a biang ah an vaw ding.
2 ^bAsinan nang, Bethlehem Efrathah,
Judah ram hrin tampi lakah fate zet hman awla,
Israel Uktu ding Pa cu na sung ihsin ka hrangah a ra ding.
Amai thawknak cu hlanlaipi ihsin,
Catuan ihsin a si.
3 ^cCuruangah anih in fahrin nat tuar lai nunau in fa a hrin tiangin,
Anmah a thlauthla hai ding;
Cun amai unau umsŭnpawl cu
Israel tefapawl hnenah an kir ding.
4 ^dCule anih cu a dīng ding ih
Jehovah-ih cahnak in,
Jehovah a Pathian hmin cungnunnak in a rante rualpawl a câwm ding.
Cule annih cu thlangamten an um ding,
Ziangahtile cuih cān ah anih cu leilung dĕng tiang a ropi ding.
5 ^eCule anih cu an hnangamdaihnak a si ding.
Assiria-mi kan ram sungih a rat tikah le
Kan hauhruangpawl a pal tikah,
Amah dokalhin tuu khāltu pasarih le hruaitu mi pariat kan thoter ding.
6 ^fAnnih in Assiria ram, Nimrod ram luhnakpawl ah ralnâm in an uk ding ih,
Kan ram sungih Assiria-mi a rat tikah le
Kan ramri sung a pal tikah
Anih in in run ding.

5:1^a Sam 3:7; Ṭah 3:30

5:2^b Sem 35:16, 19; 48:7; Mip 24:17, 19; 1Sam 13:13-14; 2Sam 6:21; 2San 7:18; Sam 102:25-27; Mat 2:4-6; Luk 2:3-4, 10-11; Joh 7:41-42

5:3^c Jer 7:29; Mik 7:18

5:4^d Sam 72:8; Isa 40:11; 49:9-10; 52:13; Eze 34:11-15, 23-24; Mik 7:14-15; Zek 9:10; Luk 1:32

5:5^e Isa 8:7-8; 9:6; 10:5-6, 24-27; Luk 2:14; Kol 1:19-20

5:6^f Sem 10:8-12; Isa 14:24-25; Nah 2:8-13; Zef 2:13

Israel Tāngsŭnpawl

7 ^aCun Jakob tāngsŭnpawl cu
Miphun tampi lakah Jehovah hnen ihsi daifim vek,
Milai hngak lo,
Minung fapapawl hrang khalih khawtlai lo,
Hrampi parih ruahti vek an si ding.
8 ^bCule Jakob tāngsŭnpawl cu
Miphunpawl lakah an um ding,
Minung tampi lakah,
Tupi sahrangpawl lakih kiosa bangin le
A feh phahih palbĕtin le băwtthlekin,
Zohman in a hnen ihsin an run thei lo mi,
Rante rual lakih kiosa vanglai bangin an um ding.
9 ^cNa ralpawl dokalhin na kut na hawi ding ih,
Na doralpawl zaten thah an si ding.
10 ^d Jehovah in, “Cule cuih ni ah hitin a si ding, nan lak ihsin nan rangpawl ka that ding,
Nan rang lêngpawl ka tisiat ding.
11 ^eNan ram sungih khawpipawl ka tisiat ding ih,
Nan hauhruangpawl zaten ka ṭhiatbăl ding.
12 ^fNa kut ihsin dawithiampawl ka that ding ih,
Aizoh thiam na nei lo ding.
13 ^gKhercawp na milimpawl ka tisiat ding ih,
Nan lakih um na ṭhuamserhpawl ka tisiat ding;
Na kutsuak na be nawn lo ding;
14 ^hNan lak ihsin Asherah-pawl ka phawng ding ih,
Na khawpipawl ka tisiat ding.
15 ⁱCule ka thu ngaithla lo miphunpawl parah
Thinheng le thinsoin phuba ka la ding,” tiah a ti.

5:7^a Sem 27:27-28; Sam 133:1-3; Isa 44:2-4; Amo 5:15; Mik 2:12

5:8^b Sem 49:9-10; Mip 24:9-10; Sam 50:22; Isa 5:28-29; Hos 5:13-14; Mik 4:13; Zek 10:5-6

5:9^c Sam 10:11-18

5:10^d Suah 15:4; Dnp 17:14-16; Sam 20:7; 33:16-18; Thf 21:30-31; Isa 2:6-7; 22:18; Hos 14:3; Hag 2:22; Zek 9:10

5:11^e Isa 6:11; Hos 10:14-15; Amo 5:9

5:12^f Dnp 18:10-12; Isa 2:6

5:13^g Nah 1:14; Zek 13:2

5:14^h Suah 34:12-14; Lai 3:5-7; 2Sp 17:9-14

5:15ⁱ Isa 65:12

6

Pathian in Israel a Ngen

1 ^aAtu-ah Jehovah ih sim mi ngai aw.
Tho aw, na thuhla cu tlangpawl hmaiah ngen awla,
Mualpâwngpawl in na aw thei hai seh.
2 ^bMaw nannih tlangpawl le
Nannih leilung lungphum hnget pawl,
Jehovah ih phunzainak hi ngai hnik uh;
Ziangahtile Jehovah in a mipawl dokalhin phunzainak a nei ih,
Israel a dokalh ding.
3 ^c“Maw ka mipawl, nan parah ziang ka rak tuah?
Ziangtin cau ko ka lo tuah?
Keimah dokalhin theihter hnik uh.
4 ^dZiangahtile Izip ram ihsin ka rak lo hruai,
Sál tānnak ram ihsin ka lo tlen;
Cule nan hmaiah Mosi, Aaron le Miriam tla ka thlah.
5 ^eMaw ka mipawl, Jehovah-ih dingfelnak nan theih thei nak dingah,
Atu-ah Moab siangpahrang Balak in ziang thurawn pek a pe ti le
Beor-ih fapa Balaam in a hnenah ziang a sawn ti le
Shittim ihsin Gilgal tiang ziang thil a cang ti kha cîng ringring uh.”
6 ^f“Jehovah hmaiah ziang thawn ka feh ding ih, hmun sâng ih um Pathian hmaiah ka kûn ding?
Meiur Thilhlăn, caw pa no kum khat kim thawn,
A hmaiah ka feh ding maw?
7 ^gJehovah cu tuu cang thawng tampi le
Hriak tiva thawngza tampi ah a lung a hmui pei maw?
Ka dān pahbălnak hrangah ka fatir,
Ka sualnak hrangah ka taksa rah ka pe pei maw?”
8 ^hMaw minung, anih cun thil ṭha a lo hmuh zo;
Cule Jehovah in nan hnenih a lo ngĕn mi cu:
Dik zetih thil ti,
Zahngainak duh le
Na Pathian thawi tăngdawr teih fehtlang tipawl a si lo maw?

6:1^a Sam 50:1, 4, 6-7; Eze 6:2-3

6:2^b Isa 1:18; 57:16; Hos 12:1-2

6:3^c Isa 5:3-4; 43:22-26; Jer 2:5; Mal 1:13-14

6:4^d Suah 3:10; 15:20; 20:1-2; Sam 77:19-20

6:5^e Mip 22:2, 5-6; 25:1; Lai 5:9-11; Jer 23:5-6; Heb 1:8; 2Pe 2:15-16; Thu 2:14

6:6^f Sam 40:6-10; 95:1-3

6:7^g Suah 13:2, 11-13; Pui 18:21; Sam 50:7-17; Isa 1:11-17; Amo 5:21-24

6:8^h Sem 5:22, 24; 17:1; 18:17-19; Dnp 10:12-13, 16; 1Sam 15:22-23; Isa 1:16-17; 57:15; Jer 22:3; Hos 6:6-7; 12:6; Zek 7:9-11; Mat 9:10-13; Mar 12:33; Luk 11:42

Israel Diklonak Dāntatnak

9 ^aJehovah-ih aw cu khawpi ah a au,
Fimnak in na hmin a hmu ding:
“Kianghrăwl ngaithla uh!
Cucu zo in a ruat cia?
10 ^bMisualrálpawl inn ah sualralnak hlawnthil le
Fihnungza a si mi tahnak tawite a um hrih lai maw?
11 ^cCuailung sualrál le tahnak dik lo dip thawn milai cu mithiang tiah ka siar ding maw?
12 ^dZiangahtile a milianpawl cu nunrawnnak ih khat an si,
Amah luahtupawl cun thuphan an per ih,
An kâ sungih an lei cu mi bumhmang a si.
13 ^eCuruangah kei khal in dān lo tatnak in ka lo nater ding,
Na sualpawl ruangah ṭhing ko ka lo tuah ding.
14 ^fNan ei ding nân, nan puar lo ding;
Nan lakah rilrawnnak a um ding.
Na thiarhlo ding, asinan rŭn an si lo ding;
Cule na rŭnhim mi cu ralnâm ka pe ding.
15 ^gNa tuh ding, asinan na at lo ding;
Olif na cīl ding, asinan a hriak na thihaw-ngah lo ding;
Cule sabit zu thlum na tuah ding, asinan sabit zu na inngah lo ding.
16 ^hZiangahtile Omri-ih sakhaw dānpawl na thlun;
Ahab sungkua ih tuah mi zaten na tuah ve ih,
An thurawn pek mi na zawh,
Curuangah ṭhing riapri ko ka lo tuah ding ih,
Na sungih umpawl cu dirĕm an si ding.
Curuangah ka mipawlih hmuhsuamnak cu nang in na phur ding,” tiin.

6:9^a Isa 11:4; Thu 11:18

6:10^b Eze 45:9-10; Amo 3:10

6:11^c Pui 19:35-36; Dnp 25:13-16; Hos 12:7-8

6:12^d Sam 35:20-22; Isa 1:23; 3:8; Jer 9:1-8; Mik 2:1-2

6:13^e Isa 1:5-9

6:14^f Isa 9:19-20; 30:1-7; Hos 4:8-10

6:15^g Dnp 28:38-40; Job 24:11; Jer 12:13; Amo 5:11; Zef 1:13; Hag 1:5-11

6:16^h Dnp 28:37; 1Sp 16:23-34; 21:25-26; 2Sp 21:1-3; Jer 7:21-26; 25:8-9; 51:51; Mik 2:6-7

7

Israel-ih Sualpawl ruangih Riahsiatnak

1 ^aKa hmakhua a pit a si!
Ziangahtile kei cu ṭhal thing rahpawl khawmtu vek le
Sabit rah hrelh pawl ló tu vek ka si;
Sabit rah bawr ei ding a um lo,
Ka thinlung ih a hiar duahdo mi theipi rah hmin hmaisabik a um lo.
2 ^bMirinum cu leilung ihsin a hloral ih,
Minung lakah midĭng pakhat hman an um lo.
An zaten thisen suah ding hngakin an băwk;
Mi kip in anmai unau lala sur in an pêl.
3 ^cThil ṭha lo thuhla lawngte ah cun an kut pahnih in an tuah.
Bawi in nawhthuh a dil,
Thuṭhentu khal in,
Miropi in a thinlungih duhhiar zawng a aupi;
Cule khua an khângkhawm.
4 ^dAn lakih miṭhabik cu hling kung vek a si,
Midĭng bik cu hāwi hling hnakin a hriamdeuh;
Na ralvengtupawlih ni, na dāntatnak ni cu a ra thleng;
Cule an buai cān a si ding.
5 ^eNa innhnen rinsan hlah;
Na rinsannak cu na hawipi parah ret hlah;
Na ṭāng sungih zautu nu hnen ihsin
Na kamsuak thu kilveng aw.
6 ^fZiangahtile fapa in pa a upat lo,
Fanu cu a nu dokalhin a ding,
Mo in a ni a dokalh;
Mi pakhat ih ral cu amai sungkua mi an si.
7 ^gAsinan kei lawngte cun Jehovah ka thlir ding;
Ka runsuahnak ka Pathian ka hngak ding;
Ka Pathian in i ngaithla ding.

7:1^a Sol 2:13, 15; Isa 17:6; 28:4; Hos 9:10

7:2^b Sam 10:8-9; Thf 6:16-17; Isa 3:5; 57:1; Jer 5:26-29; Mik 3:10

7:3^c Suah 23:6-8; Thf 4:16; Eze 22:12-14; Mik 3:11

7:4^d Mip 33:55-56; 2Sam 23:6-7; Isa 22:5; Eze 2:6; Hos 9:6-8

7:5^e Dnp 28:56-57; Jer 9:4-5

7:6^f Eze 22:7; Mat 10:34-39; Mar 13:12-13; Luk 12:51-53

7:7^g Sam 4:3, 5, 8; 130:5-8; Isa 21:8-9; 25:7-9; Ṭah 3:22-36

Israel Sualphuannak le Thlangamnak

8 ^aMaw ka doral, ka tlunah lungawi aipuangin um hlah;
Tlu khal ningla, ka thosal ding;
Thim lakah to hman ningla,
Jehovah cu ka hrangah tleu a si ding.
9 ^bAmah dokalhih thil sual ka rak tuah ruangah,
Anih in ka thuhla a ngĕn hlan le ka hrangih diknak a tuahsuak hlan sung cu
Jehovah-ih thinhengnak ka tuar ko ding.
Amah in tleu ah i hruai ding ih,
Amai dingfelnak ka hmu ding.
10 ^cCule ka doral a si mi amah nu in a hmu ding ih,
“Jehovah na Pathian cu khuiah so a um?” tiih i titu nu cu ningzahnak in a khuh ding.
Ka mit in cu nu cu a hmu ding;
Amah cu kăwtthler ih lei bêk pal bangin pal a si ding.
11 ^dCumi cu na khaw kulhpawl dĭn ding ni a si ding,
Cuih ni ah cun ramri cu kauhter a si ding.
12 ^eCuih ni ah mipi cu Assiria le Izip khawpipawl ihsin,
Izip ihsin Zufraṭis tiva tiang,
Tifinriat ihsin tifinriat tiang,
Tlang pakhat ihsin tlang pakhat ah, na hnenah an ra ding.
13 ^fA sungih cêngpawl ruangah le
An thil ti mipawlih rah ruangah ram cu a ṭhing ding.

7:8^a 2Sam 22:29; Sam 18:28; 37:23-24; Thf 24:15-20; Isa 9:2; Amo 9:11; Mat 4:12-17; Joh 1:4-5; 3:19-21; Apo 13:47; 2Ko 4:8-10

7:9^b Sam 119:154; Isa 46:12-13; Jer 50:33-34; Ṭah 3:39-40

7:10^c Sam 18:37-38, 42; 42:2-3, 9-10; Isa 5:5; 51:21-23; Zek 10:5-6

7:11^d Isa 54:11; Amo 9:11

7:12^e Sam 72:8; Isa 11:11, 16; 19:23-25

7:13^f Isa 3:9-11; Eze 12:19-20

Pathian in Israel a Ngaidam Ding

14 ^aKarmel tlang laifang,
Thing rûl lakih mah lawng um,
Ro ih na co mi na rante rual,
Na kianghrăwl thawn na mipawl khāl aw;
Khuahlan lai bangin,
Bashan le Gilead ah rawl pe hai aw.
15 ^bIzip ram ihsi na suah ni bangin,
Anmah cu mangbangzapawl ka hmuh ding.
16 ^cCumi cu miphunpawl cun an hmu ding ih an thiltitheinak zaten an zahpi ding;
An kut in an kâ an hup ding;
An hna a set ding.
17 ^dRul bangin leivut an liak ding;
Leilung ih bawkvâkpawl bangin.
Jehovah kan Pathian hnenah an hauhruang ihsin ṭih le khūrin an ra ding ih,
Nangmah an lo ṭih ding.
18 ^eMawhsualnak ngaidam ih,
A co mi ro a tāngsŭnpawl ih dān pahbălnak lan ta tu, nangmah vek Pathian cu zo a si?
A thinhengnak a kaitâng kumkhua lo,
Ziangahtile lainat duhdawtnak ah a lung a awi.
19 ^fAnih cun kan parah lainatnak a neisal ding ih,
Kan mawhsualnakpawl a cīl ding.
Kan sualpawl zaten tifinriat thûk zetah na hlăwn ding.
20 ^gHlan lai piih kan pupápawl hnenih sia na rak săm mi,
Jakob hnenah rinumnak le,
Abraham hnenah lainat duhdawtnak na pe ding.

7:14^a Sam 23:1-6; 28:9; 95:6-9; Sol 4:1; Mik 5:2, 4

7:15^b Suah 3:19-20; 34:10; Sam 44:1; 78:10-12; Jer 16:14-15

7:16^c Lai 18:19; Isa 26:11

7:17^d Sem 3:14; 2Sam 22:45-47; Sam 72:9; Isa 25:2-3; 49:23; Jer 33:9

7:18^e Suah 8:9-10; 2San 30:8-9; Sam 103:8-13; Isa 43:25; Jer 50:20; Eze 33:10-11; Joe 2:32; Amo 5:15; Mik 2:12; Zek 3:3-4

7:19^f Sam 103:12; Isa 43:25; Jer 31:31-34

7:20^g Dnp 7:7-11; Sam 85:10; 108:3-5; Luk 1:72-73; Joh 1:16-17; Gal 3:16