About Bible Thianghlim | ©

BibleThianghlim – Obadiah

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Obadiah

1

• A ngantu: Obadiah
• A siartu: Judah le Edom
• Ngan kum: B.C. 840 hrawng

Obadiah hi Thukham Hlun ih cabu tawibik a si. A ngantuih thuhla hi a hmin siarlo theih ding a um lo. Hi cabu hi Judah ram ih nisuahnak thlang lam tlang ram ih um Edom dokalhih thuphuan tawite a si. Hih cabu in a cān a rel lo, asinan Jehoram a lal lai cān ih ngan mi a si zum a um. Jehoram lal laiah Edom in Judah uknak ihsin an hél (2Sp 8:20-22; 2San 21:8-10). Hih cān ah Filisṭia-mipawl le Arabia-mipawl cu Jerusalem ah an lut ih, siangpahrang hlawnthil le siangpahrang sungkua tiangin an thiarhlo (2San 21:16-17; Oba 11; 16 zoh). Câng 12-14 in hmai lam cān ih Judah donak ah Edom tel lo dingin ralrinnak a pe. Hih ralrin peknak câng 16 hin Babilon in Jerusalem a tisiatnak rel si sehla cu umzia a nei lo ding. Obadiah cabu-ih Jerusalem donak thu hi Babilon in Jerusalem a run donak si loin, Jehoram san laiih ral in Jerusalem an donak thu lamih kan lak asile umzia a nei sawn (câng 11).

Tlang ram ih an um ruangah, Edom-mipawl cu an hngal ih, ziang ral khal in anmah an neh thei dingah an ruat lo. Asinan Edom in Judah bawm loin, Judah-ih harsatnak cu remcānnak ih a lâk sawn ruangah Pathian dāntatnak cu Edom parah a tla ding tiah Obadiah in a sim. Edom in Judah a do leh pang asile tiin Obadiah in Edom cu ralrinnak a pesal, ziangruangahtile Edom hrangih dāntatnak ni cu a nai a si.

Cuih dāntatnak ni cu “Jehovah-ih ni” tiih kawh a si. Obadiah hin “Jehovah-ih ni” ti mi hi ni neta cān ih dāntatnak hrangih hmangtu hmaisabik a si men thei. Jehovah-ih ni ti mi ih a sawhkhih mi cu leilung tlun thuhla felfaiternak dingih Pathian a run hrawlhawk cān a sawhkhih a si. Cuih ni cu a tlangpithuin dāntatnak ni a si. Jehovah-ih ni ti mi hin dāntatnak cān dangdang a sawhkhih thei, asinan Jehovah-ih ni netnak cu hi san cemnakah a vei hnihnak Khrih ratsalnak thawn pehparin a ra thleng leh ding. Obadiah-ih thuphuannak ah Jehovah-ih ni ti mi cun Judah-ih doral parih dāntatnak a sawhkhih, asinan neta lamah profetpawl in Judah-mipawl le Israel-mipawl cu an sual an sir tengteng ding a si tiin ralrinnak a pe ih, an sual an sir lo asile, anmai hrang khalah Jehovah-ih ni cu dāntatnak ni a si ding tiin a phuang.

1

Edom Dāntatnak

1 ^aObadiah-ih larnak.

1:1^a Sem 25:14; Isa 1:1; 11:14; 18:2; Jer 6:4-5; 49:7-22; Eze 25:12-14; Amo 1:11-12

Edom thuhla Bawipa Jehovah in hitin a sim:

Jehovah hnen ihsin thucah kan thei ih,
Miphunpawl lakah palai thlah a si,
“Tho uhla, amah do dingin ding uhsi,” tiah a au.
2 ^aNgai hnik, miphunpawl lakah mitenau ah ka lo tuah ding;
Nang cu nasa zetih hmuhsuam na si ding.
3 ^bNang lungpi hrâp pawl karlakih um,
Na thinlung hngalnak in a rak lo bum,
Na cēnnak cu a sâng;
Na thinlung in,
“Zo in so lei ah i dirtla ding?” tiah na ti.
4 ^cMuvanlai bangin tlun sâng ah kaiin, arsipawl lakah bu tuah hman awla,
Cu tawk ihsin ka lo dirtla thotho ding, Jehovah in a ti.
5 ^dNang cu ziangti tlukih ṭhiahbăl si lai ci maw!
Na hnenah fifir ra hai hnik sehla,
Suamhmangpawl khal zan ah,
An duhtawkin an lo ru lo ding maw?
Sabit khawmtupawl na hnenah ra hnik hai sehla,
Sabit hrekkhat cu an tân ta lo ding maw?
6 Maw, Esau cu ziangti tlukih thaidarh si tak pei maw!
A thuh mi a hlawnthilpawl cu ziangti tlukih hawlsuak si tak pei maw!
7 ^eNangmah thawi lungkimnak tuahtu minungpawl hmuahhmuah in ramri tiang an lo năwr ding;
Remnak na tuahpi mipawl in an lo bum ding ih, an lo neh ding.
Na rawl eitupawl in tháng an lo kam ding.
Amah ah theihthiamnak a um lo.
8 ^fCuih ni ah Edom hnen ihsin mifimpawl le Esau tlang ihsin
Theihthiamnak ka siatsuah ṭheh lo ding maw? Jehovah in a ti.
9 ^gCun Maw Teman khawpi, na miralṭhapawl cu an lung a phâng ding ih,
Esau tlang ih um mi pauhpauh cu thah cimit ṭheh an si ding.

1:2^a Mip 24:18

1:3^b 2San 25:11-12; Isa 16:1, 6

1:4^c Job 20:6; Isa 10:14; 14:13

1:5^d Dnp 4:27; Sam 41:9; Isa 24:13; Jer 30:14; 49:9

1:7^e Sam 41:9

1:8^f Job 5:12; Isa 29:4

1:9^g Sem 36:11, 34

Edom-ih Sualnak

10 ^aNa unaupa Jakob parih na nunrawn ruangah,
Ningzahnak in a lo khuh ding ih,
Sahcat na si kumkhua ding.
11 ^bMikhualpawl in a neih mi thilri an lâk ni ah,
Ram dang mipawl in a kăwtkapawl ah lut tahratin
Jerusalem lâknak ding hrangih camcawhfung an zuk ni ah nang cu hlapi ah na ding,
Anmah lakih pakhat vekin na um.
12 ^cAsinan na unaupaih ni, a vanduai ni ah dirĕmin zoh hlah;
Judah-ih tefapawl an siat ni ah an parah lungawi aipuangin um hlah;
Thungaiten, an vansanglam ni ah ^dpuarthau zetin ṭawng fawn hlah.
13 ^eKa mipawl an vanduai ni ah an kăwtka sungah na lut lo pei.
A si, an vanduai ni ah an harsat tuar dirĕmin na zoh lo pei,
An vansanglam ni ah an neih thil na ru fawn lo pei.
14 ^fAn lakih tlânsuakpawl satthat dingin, lam ṭêk pawl ah na ding lo pei;
Cuihtlunah a harsat ni ah a tāngsŭnpawl cu kaiter fawn hlah.

1:10^a Sam 137:7; Eze 25:12-14; Amo 1:11-12; Joh 3:19

1:11^b Job 6:27; Eze 24:6; Amo 1:6

1:12^c Job 31:29; Sam 137:7; Thf 17:5; 24:17; Eze 25:6; 35:15; Mik 4:11; 7:8

1:12^d puarthau zetin ṭawng: A ṭawng hrampi ah cun, “na hmur na khaisâng” ti a si (Eze 35:13 khal zoh aw).

1:13^e Thf 17:5; Eze 35:5

1:14^f 1Sp 18:4

Jehovah-ih Ni

15 ^aZiangahtile miphunpawl zate parah
Jehovah-ih ni cu a nai thlang;
Na tuah vekin na parah tuah a si ve ding;
Na thil tuah mi cu nangmai lu parah a thlengkirsal ding.
16 ^bZiangahtile ka tlang thianghlim parih na rak in vekin
Miphunpawl hmuahhmuah in an inpeh vivo ding;
A si, an in ding ih an dawlh ding,
Cule annih cu um dah lo vek an si ding.

1:15^a Jer 46:10; Joe 2:31; Amo 5:18; Hab 2:8

1:16^b Suah 15:17; Isa 51:17; Jer 25:15; Ṭah 4:21-22; Eze 25:12

Israel Runsuahnak Ding

17 ^aAsinan Zion tlang ah runsuahnak a um ding ih,
Cu tawkah thianhlimnak a um ding;
Jakob sungza in an neih thilpawl an nei ta ding.
18 ^bJakob sungza cu meisa an si ding ih,
Joseph sungza cu meialh an si ding;
Asinan Esau sungza cu cangpâwl an si ding;
Annih in ^canmah cu an ur ding ih, an cem ṭheh ding,
Cule Esau sungza nungdam an um lo ding,
Ziangahtile Jehovah in a rak sim zo.
19 ^dNegev ih umpawl in Esau-ih tlangpawl an co ding ih,
Hmun rawn ih umpawl in Filisṭia rampawl an co ding.
Annih in Efraim rampawl le Samaria rampawl an co ding.
Benjamin in Gilead a co ding.
20 ^eCule hi Israel tefa ralkaihpawl hin Kanaan-mipawlih ram Zarefath tiang an co ding.
Sefarad ih um Jerusalem ralkaihpawl in Negev khuapawl an co ding.
21 ^fCun Esau-ih tlangpawl thuṭhen dingin,
Runsuaktupawl cu Zion tlang ah an so ding,
Cule lalram cu Jehovah-ih ta a si ding.

1:17^a Sam 69:35; 74:2; Isa 4:3; 14:1-2; Joe 2:32; Amo 9:11-15; Zek 8:12

1:18^b Isa 1:1; Jer 49:10; Zek 12:6

1:18^c anmah: Esau sungza an si.

1:19^d Mip 1:6; Isa 11:14; Jer 31:5

1:20^e 1Sp 17:9-10; Jer 33:13; Luk 4:26

1:21^f Sam 22:28; Dan 2:44; Zek 14:9, 16; Mal 1:14; Thu 11:15