About Bible Thianghlim | ©

BibleThianghlim – Apostol

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Apostol

12345678910
11121314151617181920
2122232425262728

• A ngantu: Luke
• A siartu: Zentel zumtupawl
• Ngan kum: A.D. 61

Thukham Hlun in Messiah-ih rawngbawlnak ding a rak simsung cia. Isaiah in Messiah-ih rawngbawlnak cu Jew-pawl le Zentelpawl hnen tiang a si ding thu a sim (Isa 42:1-7; 49:1-7). Jesu in leitlun ih rawngbawlnak a rak neih laiah a tambik cu Jew-pawl hnenah a si. Apostolpawlih cangvaihnak cabu in Zentelpawl hnen tiang thuthangṭha a darhnak thu in sim. Pentikos ni ah Khrih in zumtupawl hnenah a Thlarau a burh ih, leitlun ram kip ah anmah cu a thlah hai. Himi cabu câng hmaisabik in Apostolpawlih cangvaihnak cabu hi Luke in Theofilas hnenih a vei hnihnak ca a kuat mi a si ti in sim (Luke thuhmaihruai zoh aw). Curuangah Zentel zumtupawl pitlinternak dingah hi cabu sungah kawhhran thuanthu ngan a si. Hi cabu sungih thil cang mipawl hi A.D. 30 ihsin 60 karlakih thil cang mipawl an si. Luke in A.D. 61 hrawngah hi cabu hi a ngan a si men thei.

Kawhhran thawhkehdān Zentel zumtupawl in hna ih an theih tikah thusuhnak le theih duhnak tampi an rak nei men thei ih, cubang thusuhnakpawl lehnak cu hi cabu ah kan hmu. Hi cabu in Khrih thihnak, phum a sinak le a thawhsalnak cu tuihni hrangih a thupitzia a tarlang. Khristian sakhua le Jew sakhua pehtlaihawkdān a tarlang ih, Khristian sakhua in Jew le Zentel a huapdān a langter. Khristian sakhua hi Rom uknak hnaihnawktu a si lozia a langter. Huham thawn leitlun pumpi ih Khristian sakhua a rak karhdān thuanthu hi cabu sungah Luke in a ngan.

Khristian sakhua ram khat hnu ram khat a darhdān zulhin Apostolpawlih Cangvaihnak cabu sungah Luke in a rĕmkhawm. A tlangpithuin hi cabu in 1:8 ih zumtu hmaisa pawl hnenih Bawipa in rawngbawl hna a rak pek mi zulhin a ngan.

Hi cabu sungih Luke in thunetnak a tuah mi ah Khrih-ih rawngbawl hna a cem hrih lozia a tarlang. Khrih cun a kamsuakthu hmangin le a dungthluntupawl hmangin a Thlarau in a kawhhran dĭn a peh vivo (13:47; Isa 49:6 thawn zohkăwp aw).

1

Thlarau Thianghlim Tiamkamnak

1 ^aMaw Theofilas, Jesu in tuah le zirh a rak thawk zo mi hmuahhmuah, 2 ^btlun lamih lâksoh a si ni tiangih, Jesu ih tuah mi kha na hrangah ka ca hmaisa sungah khan ka rak ngan. A hril cia zo mi apostolpawl cu Thlarau Thianghlim hmangin thu a pe hai. 3 ^cA tuar hnuah cuih a hril mipawl hnenah amah rori a phuanglangaw ih, a nung rori a si ti nemhngehnak tampi pein ni 40 sung an hnenah a lang. Pathian uknak thu thawi pehparaw mi thilpawl a sim. 4 ^dCule hmunkhat ih an tawnkhawmawk laiah, an hnenah, Jerusalem suahsan loin, Paih tiamkam mi rak hngak sawn dingin thu a pe hai. Anih in, “Himi cu ka hnen ihsi nan rak theih mi thutiam a si, 5 ^eziangahtile John cun ti ah baptisma a pe taktak ko, asinan atu ihsin ni rei lo teah nannih cu Thlarau Thianghlim ah baptisma nan si ding,” tiah a ti.

1:1^a Luk 1:1-4; 3:23

1:2^b Mat 28:19-20; Mar 16:19; Joh 13:18

1:3^c Mat 28:17; Luk 24:34, 36; Joh 20:19; 1Ko 15:5-7

1:4^d Sam 27:14; Luk 24:49; Joh 14:16

1:5^e Mar 1:4

Jesu Van ih Lâksohnak

6 ^aCuruangah hmunkhat ih an tawnkhawmawk ṭumah, dungthluntupawl in, “Bawipa, tuih cān ah hin Israel-mi hnenah lalram cu na dĭntharsal ding maw?” tiah an sut.

1:6^a Mat 17:11

7 ^aCule an hnenah, “Cuih tikcucān le ni cu Pa in amai thuneihnak in a khiah mi a si ih, nannih ih theih ding a si lo. 8 ^bAsinan Thlarau Thianghlim nan parih a rung thlen tikah, huham nan ngah ding; cule Jerusalem ah, Judia peng pumpi ah, Samaria peng pumpi ah le leilung tlun dĕng tiangin ka thutheitu nan si ding a si,” tiah a ti.

1:7^a Dnp 29:29; Sam 102:13; Mat 24:36

1:8^b Mat 28:19; Luk 24:48

9 ^aCun hi thilpawl a sim hnuah, an zoh keukeu laiah anih cu lâksoh a si ih, mero in a tuam ih an hmu thei nawn lo. 10 ^bCule a kaisoh laiah le van lam zoh cuahcoih an um laiah, ngai hnik, mi pahnih puan var sĭnin an kiangah an rung ding. 11 ^cAnnih in, “Nannih Galili-mipawl, ziangah so hi tawkah van lam zoh cuahcoih nan dīn? Nan hnen ihsin van ih lâksoh mi, hih Jesu rori hi atu van ih a kaisoh lai nan hmuh vekin, a ra kirsal ding a si,” tiah an ti.

1:9^a Mar 16:19

1:10^b Joh 20:12

1:11^c Mat 16:27

Mathias Hrilnak

12 ^aCun annih cu Sabbath ni ^bfeh sian zat fáng a si mi, Jerusalem kiangih um, Olif Tlang an ti mi ihsin Jerusalem ah an kir. 13 ^cCule inn ah an va lut ih, Peter, James, John, Andru, Filip, Thomas, Bartholomeo, Mathai, Alfias-ih fapa James, ^dZilot an ti mi pa Simon, James-ih fapa Judas tepawl cu an umnak hmun pindan tlunta ah an hung kai. 14 ^eCuih mipapawl hmuahhmuah cu nunau hrekkhat le Jesu-ih nu Mary le Jesu-ih naupalepawl thawn lungrualten catbang loih thlacam le dilin an um.

1:12^a Mat 21:1; Luk 24:52

1:12^b feh sian zat: Farlung 6 (Jerusalem in Olif Tlang tiang).

1:13^c Mat 10:2-4; Mar 3:16-19; Luk 6:14-16

1:13^d Zilot: Phunhnám ṭăn zet tu poliṭik mi tinak a si. Khrih dungthluntu a si hlanah, Simon hi phunhnám ṭăn zet tu poliṭik mi a rak si dah.

1:14^e Mat 12:46; Luk 18:1; Rom 1:10

15 Cule cuih cān ah Peter cu mipum 120 hrawng umnak dungthluntupawl lakah a hung ding ih, 16 ^a“Pulepawl le unaupawl, Thlarau Thianghlim in David kâ ihsin hlanih a rak sim cia mi Jesu kaitupawl hruaitu Judas-ih thuhla Cathiang ih a sim cia mi cu a kim tengteng a ṭul a si. 17 ^bZiangahtile anih cu kan lakih tel ve mi pakhat a si ih, himi rawngbawlnak ah covo a nei ve.

1:16^a Sam 41:9; Mat 1:22; 10:4; Rom 7:1

1:17^b Joh 6:70-71

18 ^a“Hi pa hin a thil sual tuah mi man ih a ngah mi in ló a lei; cule cu tawkah a lingletin a tla, a laifangin a kuai ih, a sungrilpawl zaten an pawt thluh. 19 ^bCule Jerusalem ih cêng mi zate in hi thu cu an thei ṭheh. Cun anmai ṭawng in cuih ló cu Akeldama tiah an ti. A sullam cu, ‘Thisen ló,’ tinak a si.

1:18^a Mat 26:14; 27:3-10

1:19^b Joh 5:2

20 ^a“Ziangahtile Sam Cazual sungah,

1:20^a Sam 69:25; 109:8

‘A cēnnak hmun cu lawnglakin um sehla,
A sungah zohman um hlah hai seh,’ tiin le,
‘A dinhmun cu mi dang in luah seh,’

tiih ngan a si.

21 “Curuangah kan hnenih um mi lak ihsin mi pakhat kan hril a ṭul. Cu pa cu Bawipa Jesu kan lakah suak le lut ih a um sung hmuahhmuah ih kan hnenih um ringring ve tu a si pei. 22 ^aJohn in Jesu baptisma a pek ihsin Jesu kan hnen ihsin lâksoh a si ni tiang kan hnenih um a si pei, an lakih pakhat cu kan zawngih Jesu-ih thawhsalnak theihpitu pakhat a si pei,” tiah a ti.

1:22^a Mar 1:4; Luk 24:48

23 Cule mi pahnih: Jasṭas tiih an kawh mi Barsabas an ti mi Joseph le Mathias an hril. 24–25 ^aCule annih in, “Mi hmuahhmuah thinlung theitu Bawipa, amai hmun ih a feh thei nak dingah Judas in a tlûksan mi hi rawngbawlnak le Apostol hna luah dingin hi mi pahnih lakah zo deuh na hril ti in hmuh aw,” tiah thla an cam. 26 Cule an pahnih hrangah camcawhfung an zûk ih, cuih fung cu Mathias parah a tla. Cule amah cu apostol hleikhat lakih siartel a si.

1:24-25^a 1Sam 14:41; Thu 2:23

2

Thlarau Thianghlim a Rung Thleng

1 ^aPentikos ni a thlen tikah, an zaten hmunkhat ah lungrualten an umkhawm. 2 Cule hmakhatteah van ihsin thlipi nasa zet hrang vek awnthawm a rung thleng ih, an tokhawmnak inn a khat ṭheh. 3 Cun meisa alh vek a si mi, a ṭhenaw mi leipawl cu an hnenah an lang ih, mi pakhat par cio ah an ṭhumaw. 4 ^bCule an zaten Thlarau Thianghlim in an khat ih, Thlarau in ṭawng phun dangdangih ṭawng thei nak a pek vekin ṭawng an thawk.

2:1^a Pui 23:15; 1Ko 16:8

2:4^b Mar 16:17; Luk 1:15

5 ^aCule van rāng hnuaiih miphun zakip lak ihsin a ra mi, sakhawmi, Jew-pawl Jerusalem ih an cēn laifang a si. 6 Cuih thawmvâng an theih tikah, mipi an rakhawm. A ra mipawl in an ṭawng mi cu anmai ṭawng ciar ih ṭawngin an theih ruangah an thin a buai. 7 Cun cuih thil cang mi ruangah, an zaten khawruahhar le mangbang zetin an um ih, pakhat le pakhat, “Zoh hnik, a ṭawng rero tupawl hi Galili-mi an si thluh ko lo maw? 8 Ziangtin saw kanmai suahkeh ṭawng cio ih kan theih? 9 ^bKannih cu Parthia ram, Media ram, Elam ram le Mesopotamia ram ih umpawl, Judia ram le Kappadosia ram, Ponṭas ram le Asia ram, 10 ^cFrizia ram le Pamfilia ram, Izip ram le Libia ram sung Sairin khaw kiang ihsin a ra mi, Rom ihsin a ra mi Jew-pawl le an sakhua ih a lut mipawl, 11 Khirit tikulhmi le Arabia rammi tla kan si. Pathian ih thilmak tuah mipawl an sim tikah, kanmai ṭawng cio in kan rak thei,” tiah an tiaw. 12 An zaten cuih thil cang mi ah cun an mang a bang zet ih, an thin a buai. Pakhat le pakhat, “Hihi a sullam ziang a si pei?” tiah an tiaw.

2:5^a Luk 2:25

2:9^b Rom 16:5; 1Ko 16:19; 2Ko 1:8; 1Pe 1:1; Thu 1:4

2:10^c Mat 27:32

13 ^aAsinan mi dang pawl cun hmuhsuam phahin, “Hipawl hi sabit zu thar an ri a si hi!” tiah an ti.

2:13^a 1Ko 14:23; Efe 5:18

Peter-ih Thusim

14 Peter cu apostol hleikhat pawl zawngah a hung ding, aw ring zetin thu a sim ih an hnenah hitin a ti, “Judia mipapawl le Jerusalem khaw sungih cêngpawl hmuahhmuah, hihi theihter si uhla, ka ṭawngkampawl ngai hnik uh. 15 ^aZiangahtile atu hi zing nazi pakua lawng a si lai ih, nan ruah vekin hipawl hi an ri lo. 16 ^bCuhnakin, hihi profet Joel in:

2:15^a 1Th 5:7

2:16^b Joe 2:28-32

17 ^a‘Ni netabik cān ah hih thilpawl hi a cang ding, Pathian in a ti,
Milai zate parah ka Thlarau ka burh ding.
Nan fapapawl le nan fanupawl in profet thuphuan in thu an phuang ding,
Nan minopawl in larnakpawl an hmu ding,
Nan putarpawl in mang an man ding.
18 Cule cuih cān ah ka siahhlawh mipapawl le ka siahhlawh nunaupawl tlun khalah,
Ka Thlarau ka burh ding ih,
Profet thuphuan in thu an phuang ding.
19 ^bTlun van ah, mangbangzapawl le
Thuai lam leilung ah hminsinnakpawl ka langter ding:
Thisen, meisa le meikhu sah zet pawl cu.
20 ^cBawipaih ni ropi le maksak a thlen hlanah,
Ni a thim ding ih thla thisen ah a cang ding.
21 ^dCule hitin a si ding,
Zokhal Bawipaih hmin a kotu cu rundam a si ding,’

2:17^a Mip 11:25; Isa 44:3; Eze 39:29; Joh 7:37-39

2:19^b Luk 21:11

2:20^c Mat 24:29

2:21^d Sem 4:26; Sam 105:1; Joe 2:28-32; Rom 10:13; 1Ko 1:2; 2Ti 2:22

tiih a rak sim mi kha a si.

22 ^a“Israel-mipawl, hi ṭawngkampawl hi ngai hnik uh, Pathian in Nazareth Jesu cu nan lakah thilmakpawl, mangbangzapawl le hminsinnakpawl amah Jesu hmangih Pathian ih a tuah mipawl in nanmah rori ih nan theih vek khan a nĕmhnget a si. 23 ^bPathian khawkhan cia vek le ziang a cang ding ti a theih cia nak vekin, Pathian in Jesu cu nan hnenah a lo pe a si. Nannih in dān nei lo pawl kut in nan kai, nan khengbĕt ih, nan that. 24 ^cAsinan Pathian in thihnakih tuarharnak cu a cemter ih, a thotersal zo. Ziangruangahtile a parah thihnak in kaihtān thei nak huham a nei lo. 25 Ziangahtile amah thawn pehparin David in,

2:22^a Mar 1:24; Joh 4:48

2:23^b Isa 53:10; Mat 16:21; Luk 24:20

2:24^c Joh 20:9; Rom 6:4; 1Ko 6:14; Efe 1:20; Kol 2:12; Heb 13:20; 1Pe 1:21

‘Bawipa cu ka hmaiah ka hmu ringring.
Amah cu ka vawrh lamih a um ruangah ka hnîn lo ding.
26 Curuangah ka thinlung cu lungawi aipuangin a um ih ka lei cu a lung a awi.
Cuihhleiah ka taksa khal ruahsannak ah a cawlhahdam ding.
27 Ziangahtile ka thlarau cu mithi khua ah na tân ta lo ding ih,
Na Mi Thianghlim cu a ṭawihrál khal na siang lo ding.
28 ^aNang cun nunnak lamzin i hmuh zo;
Na hmaika ah aipuannak in i khatter ding,’

2:28^a Sam 16:8-11

tiah a ti a si.

29 ^a“Pulepawl le unaupawl, purêng David a thih thu le an phum thu ngam zetin lo sim ning. Tuihni tiang a thlān cu kan hnenah a um. 30 ^bProfet a si ruangah le taksa dān ih a rilrah lak ihsin amai laltokham parih to dingin Khrih cu a thoter ding ti Pathian in a hnenah thutiamkam thawn sia a rak săm ti a theih ruangah, 31 ^canih in hihi hmu cia in Khrih thawhsalnak thu cu a rak sim cia, Pathian in a thlarau cu mithi khua ah a tân ta lo. A titsa khal a ṭawihrál lo tiah a ti. 32 ^dCuih Jesu cu Pathian in a thoter a si ti cu kan zate hin a theihpitu kan si. 33 ^eCuruangah Pathian in Jesu cu a khaisâng ih a vawrh lamah a ret. Cule Pa in a tiamkam mi Thlarau Thianghlim cu a hnenah a pe, atu-ih nan hmuh le nan theih mi hi Jesu ih thletbŭng mi a si.

2:29^a 1Sp 2:10; Neh 3:16

2:30^b 2Sam 7:12-13; Sam 132:11; Mat 1:1

2:31^c Sam 16:10

2:32^d Luk 24:48

2:33^e Mar 16:19; Fil 2:9

34 “Ziangahtile David cu van ah a hung kai lo, asinan amah rori in,

‘Bawipa in ka Bawipa hnenah,
“Na ralpawl na ke retnak ih ka tuah hlanlo,
35 ^aKa vawrh lamah to aw,” a ti,’

2:35^a Sam 110:1; Mat 22:44

tiah a ti.

36 ^a“Curuangah Israel sungza hmuahhmuah in hihi fiangfaiten thei uh, nan khĕnthat mi Jesu kha Pathian in Lal le Khrih ah a tuah zo a si,” tiah a ti.

2:36^a Mat 28:18; Luk 2:11

37 ^aMipi in cuih thu an theih tikah, an thin a sun nâ tuk ih, Peter le apostol dang pawl hnenah, “Pulepawl le unaupawl, ziang so kan tuah ding?” tiah an ti.

2:37^a Luk 3:10

38 ^aCun Peter in an hnenah, “Nan sualpawl ngaidam a si thei nak dingah lungthlĕng uhla, nan zaten Jesu Khrih hmin in baptisma co uh, cule Thlarau Thianghlim thilpek nan co ding. 39 ^bZiangahtile thutiamkam cu nanmah, nan fāte le hlapi ih a um mipawl hrang khalah a si. Bawipa kan Pathian ih a kawh ding mipawl hmuahhmuah hrang khalah a si,” tiah a ti.

2:38^a Jer 36:3; Mar 1:4; Luk 24:47; Joh 20:22; Kol 2:12

2:39^b Isa 44:3; 57:19; Efe 2:13

40 ^aCule Ṭawngkam dang tampi in a theihter hai ih an hnenah, “Tulai misualrálpawl lak ihsin thiarfihlimaw uh,” tiah tha a pe hai. 41 Cun lungawi zetih a ṭawngkam a rak cohlangtupawl in baptisma an co ih, cuih ni ah mi 3000 hrawngin an hnenah an ra bêt.

2:40^a Dnp 32:5; Fil 2:15

Pawlkăwmawknak

42 ^aCule apostolpawlih zirhnak ah le pawlkăwmawknak ah, sang phel le thlacamin fekten an umpeh vivo. 43 Cun mi hmuahhmuah parah ṭihnak a thleng, cule apostolpawl in mangbangza le hminsinnak tampi an tuah. 44 A zumtu hmuahhmuah cu hmunkhat ah an umkhawm ih, thil ziangkim an neih mi an ṭawmaw. 45 ^bCule an thil neih mipawl le an thilripawl an zuar ih, an ṭuldān cio vekin an zuar man sum cu an zaten an zemaw.

2:42^a Mat 14:19; 28:20

2:45^b Mat 19:21; Luk 12:33

46 ^aNi tin lungrualten temple kulh sungah an táwngkhawmaw. Inn khat hnu inn khat ah sang an phel ih, lungawinak le tăngdawrnak thinlung thawn rawl an eikhawm. 47 ^bPathian an thangṭhat ih, mi zate hnenin duhsaknak an ngah. Cule ni tin Bawipa in rundam mipawl cu kawhhran ah a bêt vivo.

2:46^a Mat 14:19; Luk 24:53

2:47^b Rom 14:18

3

Kebái Kutdawh Damternak

1 ^aNi khat cu Peter le John kha thlacam tikcu sîm lam nazi pathum ah temple kulh sungah an feh. 2 ^bCule a suahkeh ihsin a ke a bái mi pa pakhat cu Mawi tiih an kawh mi, temple kulh kăwtka ah băwmnak thilpek dil dingah ni tin an rak ret. Temple kulh sungih lutpawl hnenah băwmnak thilpek a dil. 3 Anih in temple kulh sungih Peter le John an luh zik kha a hmuh tikah, băwmnak thilpek a dil hai. 4 Cule Peter cun John thawn cu pa cu mit ṭhep loin ṭhaten a zoh ih, “In zoh hnik,” tiah a ti. 5 Anih cun an hnen ihsin thil pakhat khat ngah ding beiseiin, ṭha zetin a zoh hai.

3:1^a Sam 55:17; Luk 22:8

3:2^b Luk 16:20; Joh 9:8

6 ^aCun Peter in, “Sui le ngun ka nei lo, asinan ka neih mi ka lo pe, Nazareth Jesu Khrih hmin in ding awla, feh aw,” tiah a ti. 7 Cule Peter cun cu paih vawrh lam kut in a kai ih, a dīnter. Hmakhatteah cu paih ke le a kemit ruhpawl cu an cak. 8 ^bA hung tho ih a ke in a ding, cule a feh. Cutin feh phah, khir phahin Pathian a thangṭhat ih, anmai zawngah temple kulh sungah a lut. 9 Cutiih feh phahih Pathian a thangṭhat cu mi zate in an hmu. 10 Cun Mawi tiih an kawh mi temple kulh kăwtka ih to i băwmnak thilpek diltu a si ti kha an theih tikah, a parih thil cang mi ruangah an mang a bang ih an khawruah a har ngaingai.

3:6^a Mar 1:24

3:8^b Isa 35:6

Peter-ih Thusim

11 ^aAn damter mi kebái pa cu Peter le John hnenih a um ringring kha an hmuh tikah, mi zaten an mang a bang zet ih, Solomon hulhliap an ti mi ah, an hnenah an ra tlankhawm. 12 Cumi cu Peter in a hmuh tikah, an hnenah, “Israel-mipawl, ziangah so himi ah nan mang a bang ih, kanmah riangri mit ṭhep loih in zoh? Kanmai huham le kanmai Pathian ngaihsaknak in hi pa kan fehter ah maw nan ruah? 13 ^bAbraham, Isak le Jakob ih Pathian, kan pupápawlih Pathian cun a Siahhlawh Jesu cu a sunlawih zo. Anih cu Pilat in suah dingih thu a relcatsak cia zo mi, mipi hnenih nan pek mi pa, Pilat hmai roriah nan rak phatsan mi pa kha a si. 14 ^cMi Thianghlim le Mi Dingfel cu nan rak hnáwng ih, laithat pa nan hnenih suah dingin nan dil riangri. 15 ^dCule nunnak Búlhrampi cu nan that. Asinan Pathian in anih cu mithi lak ihsin a thoter zo ih, cuih thu a theihpitu cu kanmah hi kan si. 16 Nan hmuh le nan theih mi, hi kebái pa hi Jesu hmin zumnak in cahter a si. Jesu thawngih a ra mi zumnak in nan zate hmaiah hih damngah verver nak hi amah cu pek a si.

3:11^a Luk 22:8; Joh 10:23

3:13^b Suah 3:6; Mat 27:2; Luk 23:4

3:14^c Mar 1:24; 15:11; Luk 23:18-25

3:15^d Luk 24:48

17 ^a“Sikhalsehla ka u le ka nau tla, nan hruaitupawl khal in thutak thei lo piin cuih thilpawl cu an rak tuah vekin nannih khal in nan tuah a si ti ka thei. 18 ^bAsinan cuih thilpawl cu Pathian in a profetpawl zate ih kâ in Khrih in a tuar ding tiih thăn cia zo mi cu, Jesu in a tlamtlingter thluh zo. 19 ^cCuruangah Bawipa hnen ihsin thawsuah cān a thlennak dingah le nan sualpawl thaihloh a sinak dingah, lungthlĕng uhla, Pathian lamah hawikir uh, 20 ^dcule a hlanih nan hnenih an rak sim zo mi, Khrih Jesu cu nan hnenih a run thlahnak dingah a si. 21 ^ePathian ih thil ziangkim a rĕmthar cān a thlen hlanlo, Jesu cu van ah a um ding ti mi cu Pathian in a thianghlim mi profetpawl hmuahhmuah ih kâ in leilung um thawk ihsin a rak tiamkam cia zo. 22 Ziangahtile Mosi in pupápawl hnenah a rak sim ngai a si, ‘Bawipa nan Pathian in keimah vek Profet nan unaupawl lak ihsin nan hrangah a suakter ding. Nan hnenih a sim mi pauhpauh, ziangkim in amah cu nan ngaithla pei. 23 ^fCule hitin a si ding, cuih Profet thu a ngaithla lo tu cu miphun lak ihsin sahthlak lellel a si ding,’ tiah a ti. 24 ^gA si, profet Samuel ihsin cumi hnuih a ra mi profetpawl zate in tuih san thupawl hi an rak sim cia a si. 25 ^hNannih cu profetpawlih tefa le Pathian in kan pupápawl hnenih a tuah mi thukham ro cotu nan si. Abraham hnenah, ‘Na cithlah ah leilung tlunih hrin zaten thlawsuah an si ding,’ tiah a sim. 26 ⁱNan ṭhatlonak ihsin hawikirsalnak thlawsuah a lo pek cio nak dingah, Pathian in a Siahhlawh Jesu a thawhter hnuah, a hmaisabikah nan hnenah a thlah a si,” tiah a let hai.

3:17^a Luk 23:34

3:18^b Mat 1:22; Luk 24:27

3:19^c Sam 51:1; Isa 43:25; 44:22

3:20^d Luk 2:11

3:21^e Mat 17:11; Luk 1:70

3:23^f Dnp 18:15, 18-19

3:24^g Luk 24:27

3:25^h Sem 12:3; 22:18; 26:4; Rom 9:4-5

3:26ⁱ Rom 1:16

4

Sanhedrin hmaiah Peter le John

1 ^aMipi hnenih thu an sim rero laiah, an hnenah puithiampawl, temple kiltu bawi le Sadusipawl an ra thleng. 2 Apostolpawl in Jesu thawngin mithi thawhsalnak a um ding ti an zirh le an thăn ruangah hruaitupawl cu an thin a buai. 3 Cule Peter le John cu an kai ih, khua a tlâi zo ruangah thawnginn ah a thaisun tiang an khum. 4 Sikhalsehla kamsuakthu theitu mi tampi in an zum ih, patling hlir 5000 hrawng an si.

4:1^a Mat 3:7; 16:1, 6; Luk 22:4

5 ^aCule hitin a si, a thaisun ah hruaitupawl, miupapawl le Dān zirhtupawl Jerusalem ah an táwngkhawmaw. 6 ^bCu tawkah puithiam lu bik Annas, Kaiafas, John, Alexander le puithiam lu bik ih sungkhat dang pawl khal an um. 7 Peter le John cu an hruai ih an laiah an ret, “Ziang huham in, asilole ziang hmin in hihi nan tuah?” tiah an sut.

4:5^a Luk 23:13

4:6^b Mat 26:3

8 ^aCun Peter cu Thlarau Thianghlim in a khat ih an hnenah, “Mipi hruaitupawl le Israel upapawl, 9 midam lo pa parih thil ṭha tuah mi thu ah tuihsun ah ziangtin damter a si ti in sut asile, 10 ^bnan zaten hihi thei uh, Israel mipi hmuahhmuah khal in thei uh. Nan khĕnbet mi, Pathian in mithi lak ihsin a kaihthawh mi, Nazareth Jesu Khrih hmin in hi pa cu damngah verver in, nan hmaiah a ding a si. 11 ^cCuih Jesu cu, nannih inn saktupawl ih nan hnawn mi lungto kha, a kilih lungto pawimawhbik ih ra cang mi a si. 12 ^dRundamnak cu zo dang hnen hmanah a um lo, ziangahtile van rāng hnuaiih minung lakah rundam kan si thei nak dingah pek mi hmin dang a um lo,” tiah a ti.

4:8^a Luk 1:15; 23:13

4:10^b Mar 1:24

4:11^c Sam 118:22; Isa 28:16; Zek 10:4; Mat 21:42; Efe 2:20; 1Pe 2:7

4:12^d Mat 1:21; Joh 14:6; Rom 11:14; 1Ti 2:5

13 ^aPeter le John-ih ralṭhatzia an hmu ih, tlawngkai lo le zirnak nei lo an si ti an theih tikah, an mang a bang zet. Annih cu Jesu hnenih rak um dah rero an si ti an thei. 14 Cule damter mi pa cu an hnenih a dīn kha an hmu ih, dodalnak zianghman an ṭawng thei lo. 15 ^bCule Sanhedrin thuṭhennak ihsin suak dingin thu an pe ih, anmah te lawng thu an rel, 16 ^c“Hipawl hi ziangtin kan tuah pei? Anmah hmangih hminsin tlak thilmak tuah mi cu Jerusalem khaw sungih a cêng mi zate hnenah a fĕng tuk zo ruangah, kan êl thei lo. 17 Asinan hih thu mipi hnenih a karhzailonak dingah, Jesu hmin in zo hnen hmanah thusim nawn lo dingin, nasa zetin kan hro pei,” tiah an ti.

4:13^a Mat 11:25; Mar 3:14; Luk 22:8

4:15^b Mat 5:22

4:16^c Joh 11:47

18 ^aCule an ko hai ih, Jesu hmin ih thusimsal le thuzirhsal nawn hrimhrim lo dingin thu an pe. 19 Asinan Peter le John cun an sawn ih an hnenah, “Nanmai thulun maw, Pathian thulun so, Pathian mithmuh ah diksawn ti hi nanmah in ṭhencat hnik uh. 20 ^bZiangahtile kan hmuh mi le kan theih mi thilpawl hi sim loin kan um thei lo a si,” tiah an ti. 21 ^cCule anmah cu an hrobêt ih an thlah, mi hmuahhmuah in Pathian ih thil tuah mi ruangah Pathian an thangṭhat. Curuangah anmah cawhkuan pek thei nak lamzin an hmu thei lo. 22 Ziangahtile himi damnak hminsinnak tuahsak mi pa cu kum 40 tlun mi a si.

4:18^a Amo 7:13

4:20^b Job 32:18; Jer 20:9; Amo 3:8; Luk 24:48

4:21^c Mat 9:8

Zumtupawlih Thlacamnak

23 Peter le John cu thlah an si tikah, an rualpipawl hnenah an feh ih, puithiam sâng pawl le miupapawl ih an sim mi thupawl cu an va sim. 24 ^aCuih thu cu hna ih an theih tikah, Pathian hnenah aw suahin lungrualten, “Maw Bawipa, nang cu lei le van le tifinriat le a sungih um mi zate tuahtu Pathian na si. 25 Na siahhlawh David kâ in, nang cun thu na sim,

4:24^a Neh 9:6; Job 41:11; Isa 37:16

‘Ziangah so miphunpawl an thin a so ih,
Minungpawl hin thil ṭhahnem lo phiarsawmnak an tuah?
26 ^aBawipa le Khrih dokalhin,
Leilung siangpahrangpawl an ding ih,
Hruaitupawl hmunkhat ah an pungkhawm a si,’

4:26^a Sam 2:1-2; Dan 9:25; Luk 4:18

tiah na rak ti.

27 ^a“Ziangahtile hriak na thih mi na Siahhlawh thianghlim Jesu dokalh dingah ^bHerod le Ponṭias Pilat cu Zentelpawl le Israel-mipawl thawn an rak pungkhawm ngaingai. 28 Na kut cak le na remruahnak in cangsuak leh dingih na rak khiah cia mi kimter dingah a si. 29 ^cAtu-ah, Bawipa, zoh hnik, an mihro rero nak hi hminsin aw, na siahhlawhpawl in ralṭha zetih na kamsuakthu an phuan thei nak dingah bawm hai hram aw. 30 ^dNa Siahhlawh thianghlim Jesu hmin in mi damter dingah le hminsinnakpawl le mangbangzapawl tuah dingah na kut pharh hram aw,” tiah thla an cam.

4:27^a Mat 14:1; 27:2; Luk 23:12

4:27^b Herod: Nauhakpawl thattu Herod-ih fapa Herod Anṭipas a si.

4:29^c Sam 138:3; Efe 6:19; Fil 1:14

4:30^d Joh 4:48

31 ^aNasa zetih thla an cam ṭheh tikah, an umkhawmnak hmun cu a hnîn. Cule an zaten Thlarau Thianghlim in an khat ih, ralṭha zetin Pathian kamsuakthu an phuang.

4:31^a Luk 1:15; Heb 4:12

Zumtupawl an Thil Neih an Ṭawmaw

32 Zumtu mipi cu an zaten thinlung le ruahnak hmunkhatten an um. Zohman in an neih mi thil kha ka bul ta a si ti loin an neih mi thil zaten an ṭawmaw. 33 ^aHuham nasa zet thawn apostolpawl cun Bawipa Jesu thawhsalnak thu cu an theihter. Cule an zate parah zangfahnak nasa zetin a um. 34 ^bAn lakah tlasam zohman an um lo, ziangahtile ló neitupawl le inn neitupawl in an ram le an inn pawl an zuar ih, an ngah mi tangka cu an rak keng, 35 cule apostolpawlih ke hramah an ret. Cun cuih tangka cu mi kip an ṭuldān vek cio in, apostolpawl in an zem.

4:33^a Luk 24:48; Rom 3:24

4:34^b Mat 19:21

36 ^aSaipras tikulh ih um, Levi-mi Joses cu a ra. Apostolpawl in amah cu Barnabas tiah hmin an sak. A tican cu “Thapetu” tinak a si. 37 A neih mi a ló a zuar ih, a paisa cu kengin apostolpawlih ke hramah a ret.

4:36^a 1Ko 9:6; Gal 2:1, 9, 13

5

Ananias le Safira

1 Mi pakhat Ananias an ti mi pa in a nupi Safira thawn an neih mi thil an zuar. 2 ^aCule a nupiih theihpinak in a ló man hrekkhat cu a sūp ih, a hrekkhat lawng kengin apostolpawlih ke hramah a ret.

5:2^a Jos 7:11

3 ^aAsinan Peter in, “Ananias, Thlarau Thianghlim hnenah thuphan per ding le na ló man hrekkhat sūp dingin ziangah so Setan in na thinlung a lo luahkhat? 4 ^bNa ló na zuar hlanah, na ló cu na ta a si lo maw? Na zuar hnu khalah, a man cu nangmai thuneihnak hnuaiah a um thotho a si lo maw? Ziangah so hiti vekih ti dingin na thinlung sung ihsin na tum? Milai hnenah thuphan na per a si lo ih, Pathian hnenah thuphan na per sawn a si,” tiah a ti.

5:3^a Dnp 23:21; Mat 4:10; Joh 13:2, 27

5:4^b Pui 6:2; Dnp 23:22

5 ^aAnanias in cuih ṭawngkampawl a theih tikah, a tlu ih a thi. Cule hih thilpawl a theitu zate parah ṭihnak nasa zet a thleng. 6 ^bCule tlangvalpawl an tho ih Ananias-ih ruak cu an tuam, lengah an zawnsuak ih an phum.

5:5^a Sam 5:6

5:6^b Joh 19:40

7 Cuih hnu nazi pathum hrawng reiah ziang thil a cang ti thei loin, a nupi cu tawnkhawmawknak hmun ah a ra lut. 8 Cule Peter in a sawn ih a hnenah, “Hi zat hi nan ló nan zuar man zate a simaw?” tiah a ti.

Anih in, “A si, kan ló man zate a si,” tiah a ti.

9 Cun Peter in a hnenah, “Bawipaih Thlarau hniksak dingah ziangtin so nan lung a rual? Zoh hnik, na pasal phumtupawlih kepawl cu sângka hramah an um, nang khal an lo zawnsuak ding,” tiah a ti. 10 Hmakhatteah anih khal Peter-ih ke hramah a tlu ih a thi. Cule tlangvalpawl an rung lut ih, a thi zo ti kha an hmu. Cule an zawnsuak ih a pasal kiangah an phum. 11 Cule kawhhran mipi hmuahhmuah le cuih thu a theitu hmuahhmuah tlunah ṭihnak nasa zet a thleng.

Mi Tampi Damternak

12 ^aApostolpawl in mipi lakah hminsinnak tampi le mangbangza tampi an tuah. Zumtupawl hmuahhmuah cu Solomon Hulhliap ah lungrualten an táwngkhawmaw ṭheu. 13 Mipi in an zohsâng zet hai nân, zohman an hnenah an tel ngam taktak lo. 14 Cule mipa le nunau zumtu tampi cu Bawipa hnenih bêt deuhdeuh an si. 15 Cumi ruangah, minapawl cu kăwtthler ah an run hruai ih, Peter an kiangih a feh tikah a thlam talin a hliahngah hai thei nak dingah tiin ihkhun parah le pher parah an hlum. 16 ^bJerusalem ah a kiangkapih khuapawl ihsin mipi an ra ih, minapawl le thlarau bawrhhlawh pawl ih zăwnzaihter mipawl an rak hruai. Cule an zaten damnak an ngah.

5:12^a Joh 4:48; 10:23

5:16^b Mat 8:16; Mar 16:17

Apostolpawl Hremnak

17 Cun Puithiam lu bik le a hnenih um hmuahhmuah, Sadusipawl, cu an dīng ih, annih cu aithawknak in an khat. 18 Cule Apostolpawl cu an kai ih, mipi thawnginn ah an khum. 19 ^aAsinan Bawipaih vancungmi in cuih zan ah thawnginn sângkapawl cu a áwng ih, lengah a suah hai. 20 ^bCule an hnenah, “Feh uhla, temple kulh sungah va dīngin, hi nunnak kamsuakthu hmuahhmuah hi mipi hnenah va sim uh,” tiah a ti hai.

5:19^a Sem 16:7; Suah 3:2; Sam 34:7; Mat 1:20; 28:2; Luk 1:11; Joh 20:12

5:20^b Joh 6:63, 68

21 ^aCule apostolpawl in cuih thu an theih hnuah, zingpit teah temple kulh sungah an lut ih, mipi thuzirh an thawk. Culaifangah puithiam lu bik le a hnenih um mipawl cu an ra ih, Sanhedrin thuṭhentu le Israel tefapawlih upapawl zaten thu relkhawm dingin an kokhawm. Thawnginn ihsin Apostolpawl hruai dingah mi an hei thlah.

5:21^a Mat 5:22

22 Asinan thawnginn an va thlen tikah, temple kiltupawl cun apostolpawl cu an hmu lo. An kirsal ih, thawng an thăn. 23 “Thawnginn cu ṭhaten a hrenaw ko, sângka hmaiah a kiltupawl an ding. Asinan sângka kan ăwn tikah, a sungah zohman kan hmu lo,” tiah an ti. 24 Cuih thu an theih tikah, puithiam lu bik le temple kiltu bawi le puithiam sâng pawl cu ziang a cang si pei, tiah khawruahhar zetin an um.

25 Cule mi pakhat a ra thleng ih, “Zoh hnik uh, thawng sungih nan thlak mipawl kha temple kulh sungah dīngin, mipi thu an zirh rero,” tiah a ti. 26 Cun temple kiltu bawi cu temple kiltupawl thawn an va feh ih, apostolpawl cu an run hruai. Mipi in lungto in an deng pang ding ti an ṭih ruangah, hramhram cun an hruai lo.

27 ^aCule apostolpawl cu an run hruai, Sanhedrin hmaiah an dīngter ih, puithiam lu bik in thu a sut hai. 28 ^bAn hnenah, “Hi paih hmin in thuzirh nawn lo dingin khoh zetin thu kan lo pe zo a si lo maw? Zoh hnik uh, Jerusalem cu nan zirhnak in nan khatter ṭheh zo. Hi paih thisen mawh kan parih tlakter nan duh a si!” tiah a ti hai.

5:27^a Mat 5:22

5:28^b Mat 23:35

29 ^aCule Peter le apostol dang pawl cun an let ih, “Milai thu hnakin Pathian thu kan lung sawn ding. 30 ^bThing parih nan thlaithat mi Jesu cu kan pupápawlih Pathian in a thoter zo. 31 ^cPathian in Israel-mipawl lungthlĕngnak a pe ih, an sualpawl a ngaidamnak dingah, Pathian in anih cu a vawrh lamah Lal ah le Rundamtu ah a khaisâng zo. 32 ^dKannih cu cuih thilpawl a theihpitu kan si ih, Pathian in amai thu lungtupawl hnenih a pek mi, Thlarau Thianghlim khal cuih thilpawl theihpitu a si ve,” tiah an ti.

5:29^a Suah 1:17

5:30^b Gal 3:13

5:31^c Mar 1:4; 16:19; Luk 2:11; 24:47

5:32^d Luk 24:48; Joh 15:26

33 Cuih thu an theih tikah, an thin a so ih, apostolpawl cu that dingin thu an relcat. 34 ^aAsinan Sanhedrin lakih tel Farasi, a hmin Gamaliel, Dān zirhtu le mi hmuahhmuah ih upat mi pa cu a hung dīng ih, apostolpawl cu cān málte sung a lengih suakter dingin thu a pe. 35 Cule an hnenah, “Nannih Israel-mipawl, hipawl parih tuah nan tum mi hi fimkhur uh. 36 Ziangahtile hi hlanah Theudas a suak ih, amah le amah mithupi pakhat ka si a tiaw ih, patling 400 hrawngin amah cu an thlun. Asinan amah cu an that ih amah thluntu zaten an ṭekdarh ṭheh ih an cem. 37 ^bCu pa hnuah, mipum siar laiah Galili-mi Judas a hung suak ih, mi tampi a hnenah a hîp. Cu pa khal cu a hloral ih, amah rinsantupawl khal an ṭekdarh ṭheh. 38 ^cAtu-ah hih thu thawn pehparin nan hnenah ka lo sim a si, hipawl hi sipsan uh, tibuai duh hlah uh. Ziangahtile hih hnaṭuannak le khawkhannak cu milai hnen ihsi ra asile, zianghmanlo ah a cang ding. 39 ^dAsinan Pathian hnen ihsin a si ahcun, nan siatsuah thei cuang lo ding. Pathian dokalh rero tu ah nan cang riangri sawn thei a si,” tiah a ti.

5:34^a Luk 2:46

5:37^b Luk 2:1-2

5:38^c Mat 15:13

5:39^d 2San 13:12; Thf 21:30; Isa 46:10

40 ^aCule Sanhedrinpawl in an lungkimpi ih, Apostolpawl cu an ko, cule an vuak hnuah Jesu hmin ih thusim nawn lo dingin thu an pe ih an thlah. 41 ^bJesu hmin ruangih ningzahnak tuar tlakih ruah an si ruangah apostolpawl cu Sanhedrin thuṭhennak ihsin aipuang zetin an fehsuak. 42 Cule ni tinten temple kulh sungah le inn khat hnu inn khat ah, Jesu cu Khrih a si ti zirh le phuan an cawl lo.

5:40^a Mat 10:17

5:41^b Mat 5:12; Joh 15:21

6

Mi Pasarih Hrilnak

1 ^aCu laiah, dungthluntupawl an karhzai vivo tikah, ni tin rawl zemnak ah Grik ṭawng hmangpawlih nuhmeipawl cu thlauthlak an si ruangah, Jew-mi ^bGrik ṭawng hmang zumtupawl cu Hebru ṭawng hmang zumtupawl parah an phunzai. 2 ^cCun hleihnih pawl in dungthluntu mi tampi an hnenah an kokhawm ih, “Pathian kamsuakthu thlauthla in cabuai hna kan ṭuan ding cu kan hrangah thil dik a si lo. 3 ^dCuruangah u le nau pawl, nan lak ihsin mi pasarih mi hminṭha, Thlarau Thianghlim le fimnakih khat hril uhla, hih ṭuanvo hi kan pe ding; 4 kannih tu cu thlacamnak ah le kamsuakthu rawngbawlnak ah kan peaw lan vivo ding,” tiah an ti.

6:1^a 1Ti 5:3

6:1^b Grik ṭawng hmang: Jew si si, Grik ṭawng hmang le nunphung lapawl an si.

6:2^c Heb 4:12

6:3^d Suah 18:21; Neh 13:13; Luk 1:15

5 ^aCule cuih thu cun mipi zate ih lung a hmuiter ih, zumnak le Thlarau Thianghlim ih khat Stefen, Filip, Prokoras, Nikanor, Timon, Parmenas le Anṭiok khawmi Jew sakhua ih lut Nikolas pawl an hril. 6 ^bCupawl cu apostolpawl hmaiah an run hruai ih, apostolpawl in thla an camsak hnuah, an parah an kut an suang.

6:5^a Luk 1:15

6:6^b Mip 8:10; Mar 5:23; 1Ti 4:14

7 Cun Pathian kamsuakthu cu a darhzai ih, Jerusalem ah dungthluntu mipum khal nasa zetin an karhzai. Cule Puithiam tampi in zumnak thu cu an thlun.

Stefen Kaihnak

8 ^aCule Stefen cu zumnak le huham in a khat ih, mipi lakah a nasa zet mi mangbangzapawl le hminsinnakpawl a tuah. 9 ^bCun miluatpawlih sinakok an ti mi sung ihsin dodalnak a suak. Cuih dodalnak ah cun Sairin ram, Alexandria khua, Silisia ram le Asia ram ih Jew-mi an tel. Cupawl cun Stefen thu an êl. 10 ^cCule fimnak le Thlarau ih a ṭawng mi cu an dokalh thei lo.

6:8^a Joh 4:48

6:9^b Mat 27:32

6:10^c Luk 21:15

11 ^aCun, “Mosi le Pathian dokalhin thangsiatnak ṭawngkampawl a ṭawng kan thei a si,” tiih thuphan per dingin mi hrekkhat a thupten nawhthuh an pe.

6:11^a 1Sp 21:10; Mat 26:59-61

12 ^aCule mipi, miupapawl le Dān zirhtupawl kha an căwkphur; cun Stefen hnenah an ra ih amah cu an kai. Cun Sanhedrin thuṭhentu hmaiah an hruai. 13 ^bTheihpitu dik lo pawl an ret ih, cupawl cun, “Hi pa hin hi hmun thianghlim le Dān dokalhin thangsiatnak ṭawngkampawl ṭawng a bāng dah lo; 14 ^cziangahtile Nazareth Jesu in hi hmun hi a ṭhiatbăl ding ih, Mosi ih in pek mi nunphungpawl a thleng ṭheh ding tiih a ṭawng lai kan thei,” tiah an ti.

6:12^a Mat 5:22

6:13^b Suah 23:1; Sam 27:12; Mat 24:15

6:14^c Joh 2:19

15 ^aCule Sanhedrin thuṭhentu sungih to hmuahhmuah in, Stefen cu ti keukeuin an zoh ih, a hmai cu vancungmi hmai vekin an hmu.

6:15^a Mat 5:22

7

Stefen-ih Thusim

1 Cun puithiam lu bik in, “Hi thilpawl hi cuti vek cun an si ngaingai maw?” tiah a ti.

2 ^aCule Stefen in, “U le nau pawl le palepawl, i ngai hnik uh! Kan pa Abraham cu Mesopotamia ram ih a um lai, Haran khua ih a um hlanah ropitnak Pathian cu a hnenah a rung lang ih, 3 ^ba hnenah, ‘Na ram le na sungkhat hnen ihsin fehsuak awla, ka lo hmuh ding mi ram ah feh aw,’ tiah a ti. 4 Cun Kaldia rammipawl cu a suahsan hai ih, Haran khua ah a cêng. A pa a thih hnuah atu-ih nan cēnnak ram ah hin Pathian in a ṭhawnter. 5 ^cCule cu tawkah ro zianghman a pe lo, a ke palnak ding hrang daih tawk hmun hman a pe lo. Asinan Abraham in fāte a neih lo laiah, Pathian in hi ram hi amah le amai hnuih a cithlahpawlih ta si dingin thu a tiamkam. 6 ^dPathian in hitin a sim, ‘Na cithlahpawl cu anmai ta a si lo mi ram ah a langte sung an cêng ding. Uktupawl in sál ah an tuah ding ih kum 400 sung an palbĕt ding. 7 ^eCule an rĕn mi miphun cu thu ka ṭhen ding. Cuih hnuah cuih ram ihsin an suak ding ih, hi hmun ah keimah in rian ding,’ tiah Pathian in a rak ti. 8 ^fCun Pathian in Abraham hnenah serh zim tānnak thukham a pe, cutin Abraham cu Isak a hrin hnu ni riatnak ah Isak-ih serh zim a tansak. Cule Isak in Jakob a hring ih, Jakob in purêng hleihnih pawl a hring.

7:2^a Sem 11:31; 15:7; Sam 29:3

7:3^b Sem 12:1

7:5^c Sem 12:7; 13:15; 15:18; 17:8; 24:7; Heb 11:13

7:6^d Suah 1:8-11

7:7^e Sem 15:13-14; Suah 3:12

7:8^f Sem 17:9-14; 21:2-4

9 ^a“Purêngpawl in Joseph an iksik ruangah, Izip ram ah an zuar. Asinan Joseph cu Pathian in a umpi. 10 ^bA buainak hmuahhmuah ihsin Pathian in anih cu a runsuak ih, Izip Siangpahrang Faro-ih mithmuh ah duhsaknak le fimnak a pek. Faro in Joseph cu a ram pumpi tlunah le a inn hmuahhmuah tlunih uktu ah a tuah. 11 ^cIzip ram le Kanaan ram pumpi ah mangṭam le buainak nasa zet a tlung ih, kan pupápawl cun rawl zianghman an nei lo. 12 ^dJakob in Izip ah sangvut a um ti hna in a theih tikah, kan pupápawl cu a vei khatnak a hei thlah hai. 13 ^eCule a vei hnihnak an fehnak ah Joseph in a ulepawl hnenah zo a si ti a phuangaw ih, Joseph-ih sungkuapawl cu Faro ih mi theihah an rung cang. 14 ^fCun Joseph in a pa Jakob le a sungkuapawl zaten a ko ih, an zaten minung 75 an si. 15 ^gCule Jakob cu Izip ram ah a vung feh ih, cuih ram ah a thi. Kan pupápawl khal cuih ram ah an thi. 16 ^hAn ruak cu Shekem khua ah an thiar ih, Shekem-ih pa, Hamor-ih fapapawl hnen ihsin Abraham in paisa ih a rak lei mi thlān ah an phum hai.

7:9^a Sem 37:4, 11, 28; 39:2, 21, 23; Sam 105:17; Hag 2:4

7:10^b Sem 41:37-43; Sam 105:20-22

7:11^c Sem 41:54

7:12^d Sem 42:1-2

7:13^e Sem 45:1-4

7:14^f Sem 45:9-10; 46:26-27; Suah 1:5; Dnp 10:22

7:15^g Sem 46:5-7; Suah 1:6

7:16^h Sem 23:16-20; Jos 24:32

17 ^a“Pathian in Abraham hnenih sesămawih thu a kam mi a thlenkimnak ding tikcu a nai vivo tikah, Izip ram ah cuih minungpawl cu an ṭhang ih, an karhzai. 18 ^bCule Joseph thei lo tu siangpahrang dang a ra suah tiangin an karh sinsin. 19 ^cCu pa cun kan unaupawl hnen ihsin fimhrăwkhrawl zetin hlawknak a la ih, kan pupápawl cu a palbĕt hai. An fa suak thar pawl cu thi dingin a hlăwnter hai. 20 ^dCuih cān ah Mosi a suak ih, Pathian mithmuh ah Mosi cu naute mawi zet a si. Thla thum sung a paih inn ah an kilkhawi. 21 ^eMosi an hlăwn tikah, Faro Siangpahrang fanu in a sar ih amai fapa dingah a kilkhawi. 22 ^fMosi cu Izip fimnak zaten zirter a si ih, a ṭawngkampawl le a hnaṭuanpawl ah huham nasa zet a nei.

7:17^a Suah 1:7; Sam 105:24

7:18^b Suah 1:8

7:19^c Suah 1:10-22

7:20^d Suah 2:2; Heb 11:23

7:21^e Suah 2:3-10

7:22^f 1Sp 4:30; Isa 19:11

23 “Mosi cu kum 40 a kim tikah a unau, Israel-mipawl va leng dingin thu a ruatcat. 24 An lakih mi pakhat dik lo zetih a tuar lai a hmu ih a va hum, cule sawisat tuartu pa cu phuba a lâksak ih Izip pa cu a that. 25 Ziangahtile amai kut hmangin Pathian in anmahpawl runsuak a tum ti a unaupawl in an theithiam si hmang tiah a ruat, asinan an rak theithiam lo. 26 A thaisun ah Mosi cu a sualaw rero mi Israel-mi pahnih hnenah a va ih, remawkter tumin, ‘Milaipawl, nannih cu unau nan si. Ziangah so nannih cu pakhat le pakhat dik lo zetih nan tiawk rero?’ tiah a ti.

27 ^a“Asinan a innhnen pa dik lo zetih a titu pa cun Mosi cu a tûl ih, ‘Kan tlunih uktu le thuṭhentu ah zo in a lo tuah? 28 ^bMizansun ih Izip-mi na rak thah bangin, thah ve i duh maw si?’ tiah a ti. 29 ^cCun Mosi in cumi a theih tikah, Midian ram ah a tlân. Cu tawkah mikhual in a va cêng ih, fapa pahnih a nei.

7:27^a Sem 19:9; Mip 16:13

7:28^b Suah 2:14

7:29^c Suah 2:11-15

30 “Cule kum 40 a kim hnuah, Sinai tlang kiang ramṭhing ah Bawipaih vancungmi cu thing bŭk meisa alh in Mosi hnenah a rung lang. 31 ^aMosi in cumi a hmuh tikah, a hmuh mi ah a mang a bang. Zohhliah dingin a va naih ih, Bawipaih aw cun a hnenah, 32 ^b‘Kei cu na pupápawlih Pathian, Abraham-ih Pathian, Isak-ih Pathian le Jakob-ih Pathian ka si,’ tiah a ti. Cule Mosi cu a khūr ih a zoh ngam lo. 33 ^cCun Bawipa in a hnenah, ‘Na kedam phawih aw, ziangahtile na dīnnak hmun hi lei thianghlim a si. 34 ^dThungaiin, Izip ram ih um, ka mipawl ih palbĕt an tuarnak cu ka hmu a si. An aihramnak ka thei ih, anmah runsuak dingah ka ra. Atu ra aw, Izip ram ah ka lo thlah ding,’ tiah a ti.

7:31^a Suah 3:1-4

7:32^b Suah 3:6

7:33^c Suah 3:5; Jos 5:15

7:34^d Suah 3:5, 7-10

35 ^a“‘Zo in so uktu le thuṭhentu ah a lo tuah?’ tiih an hnawn dah mi pa Mosi cu thing bŭk ih rung lang, vancungmi kut in hruaitu le runsuaktu dingah Pathian in a thlah mi pa kha a si. 36 ^bAnih cun Izip ihsin annih cu a hruaisuak hai ih, Izip ram ah le Tipi Sen sungah mangbangza le hminsinnakpawl tla a tuah. Kum 40 sung ramṭhing ah mangbangzapawl le hminsinnakpawl a tuah.

7:35^a Suah 2:14

7:36^b Suah 12:41; Joh 4:48

37 ^a“Israel-mipawl hnenah, ‘Bawipa nan Pathian in nan unaupawl lak ihsin nan hrangah keimah vek Profet a suakter ding. Amah cu nan ngaithla pei,’ tiih titu kha hih Mosi hi a si.

7:37^a Dnp 18:15

38 ^a“Sinai tlang parih a hnenih thu a simtu vancungmi thawi ramṭhing ih mipi umkhawm lakih rak umtu le kan pupápawl thawn kan hnenih pek ding mi a nung mi thusim mipawl dawngtu pa cu amah hi a si. 39 ^bKan pupápawl in a thu lung duh loin, amah cu an hnáwng riangri. Cule an thinlung cu Izip ram ah a kirsal. 40 ^cAaron hnenah, ‘Izip ram ihsin in hruaisuaktu hi Mosi parah ziang a cang ti kan thei lo, curuangah kan hmaiih fehtu ding pathianpawl in tuahsak aw,’ tiah an ti. 41 ^dCuih cān ah caw no lem an tuah ih, cuih caw no lem hmaiah raithawinak an tuah. An kut ih tuahcawp mi thil ah lungawi aipuangin an um. 42 ^eCun Pathian in a hawisan hai ih, profetpawlih cazual sungih ngan vekin van ih thilmak rual be dingin a thlahthlam hai. Profetpawlih cazual sungah,

7:38^a Suah 19:17; Dnp 32:45-47; Rom 3:2; Heb 4:12

7:39^b Mip 14:3-4

7:40^c Suah 32:1, 23

7:41^d Suah 32:4-6; Thu 9:20

7:42^e Jos 24:20; Isa 63:10; Jer 19:13

‘Maw Israel sungza,
Kum 40 sung ramṭhing ah ran nan thah mi raithawinakpawl le thilhlănpawl nan pek tikah, ka hnenah in pe a si lo maw?
43 ^abMolok ih biakbûk le nan ^cRefan pathian-ih arsi nan keng.
Cuih milempawl cu nan biak dingah nan tuah.
Curuangah nannih cu Babilon pawn lamah ka lo kuathlo ding,’

7:43^a Amo 5:25-27

7:43^b Molok: Ammon-mipawlih pathian a si.

7:43^c Refan: Izip-mipawlih pathian pakhat a si.

tiih ngan a si.

44 ^a“A pianhmang a rak hmuh mi bangtukih tuah dingah, Mosi hnenih thusimtu Pathian ih thu a pek vekin, kan pupápawl in ramṭhing ah theihpinak biakbûk an nei. 45 ^bCumi cu annih in an dawngsáwng sin, kan pupápawl hmaika ah Pathian in miphunpawl a dawisuak, an ram an lâk laiah cumi cu kan pupápawl in Joshua thawn an run kenglut ih, David-ih san tiangin a um. 46 ^cDavid cun Pathian duhsaknak a co ih, Jakob-ih Pathian cēnnak ding hmun ngah duhin a dil. 47 ^dAsinan Pathian hrangah Solomon in inn a sak.

7:44^a Suah 25:8-9, 40; 38:21; Mip 1:50

7:45^b Jos 3:14-17; 2Sam 7:2, 6

7:46^c 2Sam 7:8-16; 1Sp 8:17

7:47^d 1Sp 6:1-38

48 ^a“Sikhalsehla Cungnung Bik Pathian cu minung kut ih sak mi temple-pawl ah a cêng lo. Profet in:

7:48^a 1Sp 8:27; 2San 2:6; Mar 5:7

49 ^a‘Bawipa in, “Van cu ka laltokham a si ih,
Leilung cu ka ke retnak a si.
Ka hrangah ziang vek inn so in saksak ding?
Ka cawlhnak hmun cu ziang so a si?
50 ^bHipawl hi ka kut ih tuah mi an si lo maw?” tiih,’

7:49^a Mat 5:34-35

7:50^b Isa 66:1-2

a ti vek khan a si.

51 ^a“Nannih cu nan pupápawl vek nan si. Nannih lungruhpawl le thinlung le hna serh tan lo pawl, Thlarau Thianghlim nan dokalh ringring a si. 52 ^bNan pupápawl in profet pakhat tal an hrem lo mi an um maw? Midingfel Pa rat ding phuangtupawl an rak that. Atu-ah nannih cu cu Pa zuartu le thattu, 53 ^cvancungmipawl băwmnak in Dān cohlang ih cuih Dān a thlun lo tu ah nan cang,” tiah a ti.

7:51^a Suah 32:9; Dnp 10:16; Jer 4:4

7:52^b Mat 5:12; 1Th 2:15

7:53^c Gal 3:19; Heb 2:2

Lungto in Stefen an Deng

54 Sanhedrin thuṭhentupawl in cuih thilpawl an theih tikah an thin a heng tuk ih, an hacâng an rialhnawh. 55 ^aAsinan Stefen cu Thlarau Thianghlim in a khat ih, van lam a hun zoh ngernger. Cule Pathian ropitnak le Pathian vawrh lamah Jesu dīngin a hmu. 56 ^bCule anih in, “Zoh hnik uh, van áwngaw le Pathian vawrh lamah Minung Fapa dīngin ka hmu,” tiah a ti.

7:55^a Mar 16:19; Luk 1:15

7:56^b Mat 3:16; 8:20

57 Cun Sanhedrin thuṭhentupawl cu ring zetin an au ih, an hna an phit, cule lungrualten Stefen cu an va zuanhnawh. 58 ^aCule amah cu khaw lengah an dirsuak ih, lungto in an dêng. Theihpitupawl in an hnipuan cu Saul an ti mi mino pakhat paih ke hramah an ret. 59 ^bCule Stefen cu lungto in an den rero laiah, Bawipa hnenah a au ih, “Bawipa Jesu, ka thlarau cohlang aw,” tiah a ti. 60 ^cCun a khuk a bil ih, “Bawipa, hi sual hi a mawh phurter hai hlah aw,” tiah ring zetin a au. Cutiih a ti ṭhehin a itthat.

7:58^a Pui 24:14, 16; Dnp 17:7; Luk 4:29

7:59^b Sam 31:5; Luk 23:46

7:60^c Mat 5:44; 9:24; Luk 22:41

8

Kawhhran Hremnak

1 Stefen an thah cu Saul a lung a kim ve. Cuih ni ihsin Jerusalem kawhhran parah hremnak nasa zet thlen a thawk. Cule apostolpawl siarlo zumtupawl cu Judia peng le Samaria peng ah an ṭekdarh ṭheh. 2 Cule Pathian ṭihzahtupawl in Stefen cu an phum ih, nasa zetin an ṭah.

3 ^aSaul cun nasa zetin kawhhran siatsuah a thawk, inn khat hnu inn khat a lut ih, mipa siseh, nunau siseh a dirsuak, cule thawng a thlak hai.

8:3^a 1Ko 15:9; Gal 1:13, 23; Fil 3:6; 1Ti 1:13

Samaria ah Filip

4 Curuangah a ṭekdarh mipawl cu an fehnak kip ah kamsuakthu an phuang. 5 Cun Filip cu Samaria khua ah a vung feh ih, an hnenah Khrih thu a phuang. 6 Cule Filip ih thilmak tuah mipawl cu mipi in an thei ih an hmu. Lungrualten Filip ih thusim cu ṭha zetin an ngai. 7 ^aZiangahtile thlarau bawrhhlawh pawl cu ring zetih au phahin mi tampi sung ihsin an suak. Mizéng tampi le kebáipawl an dam. 8 Cule cuih khaw sungah aipuannak nasa zet a um.

8:7^a Mat 4:24; Mar 16:17

Dawithiam Simon

9 Cuih cān ah miropi ka si tiaw ih a hlanah cuih khaw sungah dawi thiamnak rak hmangin Samaria rammipawl khawruahharter ṭheu tu Simon an ti mi pa a rak um. 10 Mi hmuahhmuah in, mithupibik in misantlailobik tiang, ṭha zetin a thu an ngai, “Hi pa hi Pathian-ih huham ropi a si,” tiah an ti. 11 Cān reipi a dawi thiamnak thawn mipi an khawruah a harter ṭheh ruangah, a thu ṭha zetin an ngai. 12 ^aFilip cun Pathian uknak le Jesu Khrih hmin thawi pehparaw mi thuthangṭha a sim. Filip ih thusim mi an zum tikah, mipapawl le nunaupawl in baptisma an co. 13 Cun Simon rori khal in a zum ve; cule baptisma a co ih, amah cu Filip hnenah a umlan vivo. Cule Filip ih a tuah mi thilmakpawl le hminsinnakpawl a hmuh tikah a mang a bang zet.

8:12^a Mat 3:2

14 ^aJerusalem ih um apostolpawl in, Samaria-mipawl in Pathian kamsuakthu an cohlang ti an theih tikah, an hnenah Peter le John an thlah. 15 ^bAn va thlen tikah, Thlarau Thianghlim an co thei nak dingah thla an camsak hai. 16 ^cZiangahtile Thlarau Thianghlim cu zo hnen hmanah a thleng hrih lo. Bawipa Jesu hmin in baptisma an co lawng hi a rak si. 17 ^dCun Peter le John in an parah an kut an suang ih, Thlarau Thianghlim an co.

8:14^a Luk 22:8; Heb 4:12

8:15^b Joh 20:22

8:16^c Mat 28:19

8:17^d Joh 20:22

18 Cule apostolpawl ih kut suannak hmangin Thlarau Thianghlim pek a si kha Simon in a hmuh tikah an hnenah paisa a pe, 19 cule, “Ka kut suan mi pauhpauh in Thlarau Thianghlim an co thei nak dingah, hih huham hi in pe ve uh,” tiah a ti.

20 ^aCu tikah Peter in a hnenah, “Pathian thilpek cu paisa ih lei thei dingih na ruah ruangah na tangka cu nangmai zawngah riaral seh! 21 ^bPathian mithmuh ih na thinlung a dik lo ruangah hi rawngbawlnak ah nang in telnak na nei lo ih, covo khal na nei lo. 22 Curuangah hi na sualralnak ihsin lungthlĕng awla, Pathian hnenah dil aw, na thinlung ih na tumtah mi cu a lo ngaidam mahna. 23 Ziangahtile hnit vekih khâtnak in a lo luahkhat ti le dingfellonak in a lo ṭemṭawn ti ka hmu a si,” tiah a ti.

8:20^a 2Sp 5:16; Dan 5:17; Mat 10:8

8:21^b Neh 2:20; Sam 78:37

24 ^aCun Simon in a sawn ih, “Na sim mi thil zianghman ka parih a thlenlonak dingah Bawipa hnenah i dilsak aw,” tiah a ti.

8:24^a Suah 8:8; Mip 21:7; 1Sp 13:6; Jer 42:2

25 Cule annih in Bawipaih kamsuakthu an theihter ih an phuang, cule Samaria khaw tampi ah thuthangṭha sim phah vivoin Jerusalem ah an kirsal.

Filip le Ethiopia Pa

26 Cule Bawipaih vancungmi in Filip hnenah, “Tho awla, Jerusalem ihsin Gaza khua ih a suk mi zin zawhin thlang lamah feh aw,” tiah a ti. Cuih lamzin cu ramṭhing zin a si. 27 ^aCun Filip cu a tho ih a feh. Cule ngai hnik, Ethiopia pa pakhat, Ethiopia siangpahrang bawinu Kandake-ih hlawnthil hmuahhmuah kilkhawitu, thuneihnak sâng zet nei, tilper pa cu Pathian be dingin Jerusalem ah a ra. 28 A kir lamah, a rang lêng ah toin profet Isaiah cazual a siar rero. 29 Cun Thlarau in Filip hnenah, “Hi rang lêng hi va naih awla, a kiangin feh aw,” tiah a ti.

8:27^a 1Sp 8:41-43; Sam 68:31; Isa 56:3-5; Zef 3:10; Joh 12:20

30 Filip cu cu pa hnenah a va tlân ih, profet Isaiah cazual siar reroin a theih tikah, “Na siar rero mi hi a sullam na theithiam maw?” tiah a sut.

31 Cule Ethiopia pa cun, “Zo talih in simfiang lo ahcun, ziangtin saw ka theihthiam thei ding?” tiah a ti. Cule cu pa in Filip cu a rang lêng parah kaiin a hnenih to dingin a sawm. 32 A siar rero mi Cathiang cu:

“Anih cu ran thattu hnenih tuu an hruai bangin an hruai.
A hmul mettu hmaiih tuu fa no daiteih a um bangin a kâ a ang lo.
33 ^aZahthlak zetin an tuah ih, thuṭhensaknak dik a co lo.
A cithlahpawlih thuhla zo in a thăn nawn ding?
Ziangahtile a nunnak cu leitlun ihsin an lâksak,”

8:33^a Isa 53:7-8

ti a si.

34 Tilper pa in Filip cu a sawn ih, “Hi profet ih sim mi hi zo-ih thu a si ti i sim dingin ka lo ngen a si, amai thu maw mi dangih thu so a si?” tiah a ti. 35 ^aCun Filip cu a kâ a ang ih, cuih Cathiang in a thawk ih, Jesu-ih thuthangṭha cu a hnenah a sim.

8:35^a Mat 5:2; Luk 24:27

36 Cutin lamzin ah an feh vivo ih, tidai umnak hmun an thleng. Cule tilper pa cun, “Ngai hnik, hi tawkah tidai a um! Baptisma co dingah ziang in so i kham?” tiah a ti.

37 Cun Filip in, “Na thinlung zate ih na zum ahcun, baptisma na co thei ko,” tiah a ti.

Cule tilper pa cun a let ih, “Jesu Khrih cu Pathian Fapa a si ti ka zum,” tiah a ti.

38 Cule anih in rang lêng cu cawl dingin thu a pe. Cun Filip le tilper pa cu an pahnih in ti sungah an vung ṭum ih, Filip in baptisma a pek. 39 ^aTi sung ihsin an hung suah tikah, Bawipaih Thlarau in Filip cu a lahlo, cutin tilper pa in amah cu a hmu nawn lo. Cule anih cu aipuang zetin lamzin zawhin a feh vivo. 40 Asinan Filip cu Azoṭas khua ah an hmu. Cule Filip cu a lan vivo ih, Kaisaria khua a thlen tiang khaw kip ah thuthangṭha a sim vivo.

8:39^a 1Sp 18:12; 2Sp 2:16; Eze 3:12, 14; 2Ko 12:2; 1Th 4:17; Thu 12:5

9

Saul-ih Thlĕngawknak

1 Cule Saul cun Bawipaih dungthluntupawl kha that dingin a hro rero thotho, puithiam lu bik hnenah a va feh ih, 2 ^abLamzin zawhtupawl mipa siseh, nunau siseh a tawn mi pauhpauh ṭawn ih Jerusalem ih a hruai thei nak dingah, Damaskas sinakokpawl ih va pek ding ca a hnenah a dil.

9:2^a Isa 17:1; Jer 49:23

9:2^b Lamzin: Khristianpawl cu nunnak lamzin zawhtu tiawpawl relnak ah Bible san laiih an hman ṭheu mi ṭawngkam a si. Khristianpawl ti thawn a bangaw.

3 ^aCutiih khual a tlawn lai, Damaskas khua a thlen zik zawngah, rin lo piin van ihsin tleu in a kimvel a run tlêt. 4 ^bCun lei ah a tlu ih, “Saul, Saul, ziangah so i hrem rero?” tiih a hnenih run titu aw a thei.

9:3^a 1Ko 15:8

9:4^b Isa 6:8

5 Cule anih in, “Bawipa, zo so na si?” tiah a ti.

Cun Bawipa in, “Na hrem rero mi Jesu ka si. Na hrangah fung zum sit cu a har a si,” tiah a ti.

6 ^aSaul cun khūr le khawruahharin, “Bawipa, ziang so tuahter i duh?” tiah a ti.

9:6^a Eze 3:22

Cun Bawipa in a hnenah, “Tho awla, khawpi sungah lut aw, cule na tuah ding mi sim na si ding,” tiah a ti.

7 ^aSaul thawi khualtlawng pawl cu ṭawng loin, cu tawkah cun an ding, aw cu an thei nân, zohman an hmu lo. 8 Cun Saul cu leilung ihsin a hung tho ih a mit a hun meng, asinan zohman a hmu thei lo. Cule a kut in an hruai ih, Damaskas khaw sungah an fehpi. 9 Ni thum sung khua a hmu lo ih, ei lo le in loin a um.

9:7^a Dan 10:7; Joh 12:29

10 Cuih cān ah Damaskas khaw sungah dungthluntu pakhat Ananias ti mi pa a um. Larnak ah Bawipa in a hnenah, “Ananias,” tiah a ti.

Cule anih in, “Ngai hnik, hinah ka um, Bawipa,” tiah a ti.

11 Cule Bawipa in a hnenah, “Tho awla, ‘Zin Dĭng’ an ti mi ah va feh aw. Judas-ih inn ah Tarsas khua ihsi ra, Saul kha va hawl aw: ziangahtile ngai hnik, anih cu thla a cam lai rero. 12 ^aKhua a hmuhsal thei nak dingah, Larnak ah Ananias an ti mi pa a rung lut ih a parah a kut suangin a hmu,” tiah a ti.

9:12^a Mar 5:23

13 ^aCun Ananias in, “Bawipa, mi tampi hnenin hi paih thuhla hi ka thei zo, Jerusalem ih na mithiangpawl hnenah thil ṭha lo tampi a tuah. 14 Na hmin kotu zaten ṭawn dingin, Puithiam lu bik hnen ihsin thuneihnak thawn hi tawkah a ra a si,” tiah a let.

9:13^a Rom 1:7; Efe 1:1; Fil 1:1

15 ^aAsinan Bawipa in a hnenah, “Feh aw, ziangahtile anih cu Zentelpawl hmaiah le siangpahrangpawl hmaiah le Israel-mipawl hmaiih ka hmin kengtu ding ka hmanrua ah hril a si zo. 16 ^bZiangahtile ka hmin ruangih a tuar ding mi thil tam zet amah ka hmuh ding,” tiah a ti.

9:15^a Rom 1:1; 11:13; Gal 1:15-16; 1Ti 1:12

9:16^b 2Ko 6:4-10; 2Ti 1:8; 2:3, 9

17 ^aCule Ananias cu a feh ih, inn sungah a lut; cule Saul parah a kut a suang ih, “Unaupa Saul, na rat laiih lamzin ih na hnenih rung lang Bawipa Jesu in khua na hmuhsal ih, Thlarau Thianghlim ih na khahnak dingah i thlah a si,” tiah a ti. 18 Hmakhatteah a mit ihsin phawhir vek a tla ih, khua a hmu theisal lohli, cule a tho ih baptisma a co.

9:17^a Luk 1:15

Damaskas le Jerusalem ah Saul

19 Cule rawl a ei hnuah, a tha a caksal. Cun Damaskas khua ah Saul cu dungthluntupawl hnenah ni tampi a câm.

20 ^aHmakhatteah Saul in sinakokpawl ah Khrih cu Pathian Fapa a si ti thu a sim. 21 Cun a theitu hmuahhmuah an mang a bang zet ih, “Hi pa cu Jerusalem ih hih hmin kotupawl siatrálter ding tumtu pa kha a si lo maw? Mi ṭemṭawnin puithiam sâng pawl hnenih thlenpi dingah hi tawkah a ra a si lo maw?” tiah an ti.

9:20^a Mat 4:3

22 ^aAsinan Saul cu a cak deuhdeuh. Jesu cu Khrih a si ti a fiangter ih, Damaskas khua ih um Jew-pawl mangbang ko a tuah hai.

9:22^a Luk 2:11

23 Ni tampi a liam hnuah, Saul that dingin Jew-pawl in khua an khâng. 24 Asinan Saul in an khawkhan mi cu a thei. Cule amah that dingah kăwtkapawl cu a sun a zanin an kil. 25 ^aCun dungthluntupawl in Saul cu an hruai ih, zan ah khawpi kulh ihsin khopi in an vun ṭhum.

9:25^a 1Sam 19:12

26 ^aSaul cu Jerusalem a va thlen tikah, dungthluntupawl kha va bên a tum; asinan dungthluntu ah a cang zo ti an zum lo ruangah an zaten amah cu an ṭih. 27 Asinan Barnabas in anih cu a hruai ih, apostolpawl hnenah a fehpi. Cule an hnenah lamzin ah Saul in ziangtin Bawipa a hmu ih, Bawipa in Saul hnenah ziangtin thu a sim tipawl le Damaskas khua ah Jesu hmin in ralṭha zetih thu a sim thupawl a simfiang hai. 28 Cule Saul cu apostolpawl hnenah Jerusalem ah lut le suakin a um. 29 ^bCule Bawipa Jesu hmin in ralṭha zetin Paul cu thu a sim ih, Grik ṭawng hmang Jew-pawl thawn thu an êl-aw, asinan annih cun amah cu thah an tum. 30 Cumi cu unaupawl in an theihsuah tikah, Kaisaria khua ah amah cu an fehpi ih, Tarsas khaw lamah an thlah.

9:26^a Gal 1:17-18

9:29^b 2Ko 11:26

31 Cun Judia peng, Galili peng le Samaria peng ih kawhhranpawl hmuahhmuah cu hnangamten an um ih an tha a cak. Bawipa ṭihzah le Thlarau Thianghlim thlangamnak ih an nun ruangah mipum an karh vivo.

Aenias le Dorkas

32 Cule hitin a si, cuih cān ah Peter cu hmun tin ah a tlawng ih, Lidda khua ih cêng mithiangpawl hnen khal a va thleng. 33 Cu tawkah Aenias an ti mi pa a táwng, cu pa cu zéng nat tuarin kum riat sung ihkhun ah a lum. 34 Peter in a hnenah, “Aenias, Jesu Khrih in a lo damter a si. Tho awla, na ihphah zual aw,” tiah a ti. Cule anih cu a tho lohli. 35 ^aCule Lidda le Sharon ih cêng hmuahhmuah in amah cu an hmu ih, Bawipa lamah an hawi.

9:35^a 1San 5:16; Sol 2:1; Isa 33:9

36 ^aJoppa khua ah ^bTabitha an ti mi dungthluntu pakhat a um, a hmin cu lehlinin “^cDorkas” a si. Cuih nunaunu cun thil ṭha tuah le băwmnak thilpek a ṭuan ringring. 37 Cule hitin a si, cuih cān ah cu nu cu a na ih a thi. A ruak an khawlh ṭheh hnuah inn tlunta pindan ah an hlum. 38 Lidda khua cu Joppa khua thawn a naiawte. Cule dungthluntupawl in Peter cu Lidda ah a um ti an theih tikah, a hnenah mi pahnih an hei thlah. Annih cun, “Zangfahten, ra vurvo aw,” tiah an ti.

9:36^a Jos 19:46; 2San 2:16; Ezr 3:7; Jon 1:3; 1Ti 2:10; Tit 3:8

9:36^b Tabitha: Aramik ṭawng a si ih, sakhi tinak a si.

9:36^c Dorkas: Grik ṭawng a si ih, sakhi tinak a si.

39 ^aCun Peter cu a tho ih, an zawngah a feh. A va thlen tikah, inn tlunta pindan ah an hruai. Nuhmeipawl zaten Peter kiangah an dīng ih an ṭap. Dorkas an hnenih a um laiih a tuah mi kâwrfualpawl le a dang sinfenpawl kha an hmuh. 40 ^bAn zaten Peter in pindan sung ihsin a suahter ṭheh, cule a khuk a bil ih thla a cam. A ruak lam a hawi ih, “Tabitha, tho aw,” tiah a ti. Cule cu nu cu a mit a hun meng ih, Peter a hmuh tikah, a hung to. 41 Cun Peter in Dorkas-ih kut in a kai ih a dīngter; cule mithiangpawl le nuhmeipawl a ko ih nungdamin an hnenah a ap hai. 42 Cuih thu cu Joppa khaw sung hmuahhmuah ah a thang thluh ih, mi tampi in Bawipa an zum. 43 Cule hitin a si, Peter cu Joppa khua ah savun ih thil tuahtu Simon inn ah ni tampi a câm.

9:39^a 1Ti 5:3

9:40^b Mat 9:25; Luk 7:14; 22:41

10

Kornelias in Peter a Ko

1 Cuih cān ah Kaisaria khua ah Kornelias an ti mi pa a um, amah cu Italy ^aralkap bur tiih kawh mi ah ralkap 100 hotu a si. 2 Amah le a sungkua hmuahhmuah cu Pathian ngaihsak le ṭihzahtu an si, băwmnak thilpek hna a ṭuan ih, nasa zetin Pathian hnenah thla a cam ringring. 3 ^bNi khat cu zan lam nazi pathum hrawngah larnak ah Pathian-ih vancungmi a hnenih ra fiang zetin a hmu ih, vancungmi in, “Kornelias,” tiah a ko.

10:1^a ralkap bur: Mat 27:27 simfiangnak zoh aw.

10:3^b Sam 55:17

4 ^aCule Kornelias cun vancungmi cu ti keukeuin a zoh, a ṭih tuk ih, “Ziang so, Bawipa?” tiah a ti.

10:4^a Sam 20:3; Mat 10:42; Thu 8:4

Cule vancungmi in, “Na thlacampawl le na băwmnak thilpekpawl cu Pathian hmaiah an hung thleng zo ih, cupawl cu Pathian in a hngilh lo a si. 5 Atu-ah Joppa khua ah Peter tiih kawh mi Simon ko dingin mi thlah aw. 6 Cu pa cu savun ih thil tuahtu Simon hnenah a câm, a inn cu tifinriat kapah a um. Anih in na tuah ding mi a lo sim ding,” tiah a ti.

7 Cule a hnenih thusimtu vancungmi a fehhlo tikah, Kornelias in a inn ih um hnenum pahnih le amah kil ringring tu lak ihsin Pathian ngaihsak zet ralkap pakhat cu a ko hai. 8 Kornelias in cuih thil hmuahhmuah cu an hnenah a simfiang ih, Joppa khua ah a thlah hai.

Peter in Larnak a Hmu

9 ^aA thaisun ah annih cu an tlawngsuak ih, khua an va thlen zik tikah, sun laifang hrawngah Peter cu thlacam dingin inn parah a hung kai. 10 Cun a ril a râwng tuk ih, ziang simaw ei a câk; asinan rawl an timlam rero laiah Peter cu zelhin a um. 11 ^bCule van áwngawin, a kil pali ih khai mi puan hlaipi vek thil pakhat, a hnenih rung ṭum, leilung ih ṭhum mi a hmu. 12 Cumi ah cun ke li nei lei rannung phun zakip, sahrangpawl, bawkvâkpawl le tlun zuang vatepawl an um. 13 Cule Peter hnenah aw pakhat a thleng ih, “Peter, tho aw, that awla, ei aw,” tiah a ti.

10:9^a Mat 24:17

10:11^b Mat 3:16

14 ^aCu tikah Peter in, “Si lo e, Bawipa! Ziangahtile a thiang lo mi le a bawrhhlawh mi thil ka ei dah lo,” tiah a ti.

10:14^a Pui 11:4-8; Dnp 14:3-20; Eze 4:14

15 ^aCule aw cun a vei hnihnak a hnenah, “Pathian in a thianter zo mi cu thiang lo ah ruat hlah,” tiah a ti. 16 Himi hi vei thum tiang a cang. Cule hmakhatteah cuih puan cu van ah lâksohsal a si.

10:15^a Sem 9:3; Mat 15:11; Luk 11:41; Rom 14:14, 17, 20; 1Ko 10:25; 1Ti 4:3-4; Tit 1:15

17 Cun Peter in larnak ih a hmuh mipawlih sullam cu ziang a si pei tiih a ruah rero laiah, ngai hnik, Kornelias ih thlah mipawl cun Simon-ih inn umnak an zingzawi hnuah, kăwtka hmaiah an ding. 18 Cule annih in an vun auh ih, Peter an ti mi Simon, cu tawkih a riah le riah lo an vun sut.

19 Peter cun cuih larnak a ruah rero laiah, Thlarau in a hnenah, “Ngai hnik, mi pathum in an lo hawl. 20 Curuangah tho aw, vung ṭum awla, an hnenah feh aw, rinhlelhnak zianghman nei hlah; ziangahtile annih cu ka thlah mi an si,” tiah a ti.

21 Cun Peter cu Kornelias in a hnenih a thlah mipawl hnenah a vung ṭum ih an hnenah, “Ngai hnik uh, nan hawl mi cu keimah hi ka si. Ziang thu ruangah so nan rat?” tiah a ti hai.

22 Cule annih in, “Midingfel le Pathian ṭihzahtu, Jew-pawl zate ih an upat zet mi ralkap 100 hotu Kornelias cu na ṭawngkampawl ngaithla dingin a inn ih lo ko dingah a thianghlim vancungmi in amah cu a fial a si,” tiah an ti. 23 Cun Peter in annih cu a kolut hai ih, an riahnak ding hmun a pe.

A thaisun ah Peter cu an zawngah a feh ih, Joppa khua ihsin unau hrekkhat in amah cu an thlun.

24 Cule a thaisun ah Kaisaria khua an thleng. Kornelias cun anmah a rak hngak ringring ih, a sungkhatpawl le a rualpi ṭha pawl a kokhawm hai. 25 Peter cu inn ih a vung luh zawngah Kornelias in a rak hmuak, cule Peter-ih ke hramah a băwk ih a bia. 26 ^aAsinan Peter in a kaitho ih a hnenah, “Ding aw, kei khal minung ka si ve,” tiah a ti.

10:26^a Thu 19:10; 22:8-9

27 Peter cu cu pa be rero phahin, pindan sungah a lut ih, mi tampi umkhawm kha Peter in a hmu. 28 ^aCun an hnenah, “Jew-mi in miphun dang va len le pawlkăwm cu sian a si lo ti nan thei. Asinan Pathian in mi zohman mithiang lo le mibawrhhlawh ka tilonak dingah i hmuh zo. 29 Curuangah in ra kawh tikah lo êl riai loin, nan hnenah ka ra. Curuangah ka lo sut hai, ziang thu ruangah so in ra kawh?” tiah a ti.

10:28^a Joh 4:9

30 ^aCule Kornelias in, “A liam zo mi ni li, tu vek cān ah rawl ka ul. Zan lam nazi pathum ah ka inn ah thla ka cam, cule ngai hnik, mi pakhat cu a tle mi hnipuan hruhin ka hmaiah a ding. 31 Anih cun, ‘Kornelias, na thlacam cu theih a si ih, Pathian mithmuh ah băwmnak thilpek na ṭuan mipawl khal cīn an si. 32 Curuangah Joppa khua ah Peter tiih kawh mi Simon va ko dingah mi thlah aw. Anih cu savun ih thil tuahtu Simon-ih inn ah a riak, cucu tifinriat kapah a si. Anih a rat tikah thu a lo sim ding,’ tiah i ti. 33 Cun na hnenah mi ka rak thlah vurvo ih, na rat cu na ti ṭha zet a si. Curuangah Pathian ih thu a lo pek mi thil hmuahhmuah na sim ding mi ngai dingah kan zaten hi tawkah Pathian hmaiah kan ra a si,” tiah a ti.

10:30^a Joh 20:12

Zentelpawl Thuthangṭha an Dawngsáwng

34 ^aCun Peter cu a kâ a ang ih, “Pathian in mi thleidan a nei lo ti dik zetin ka hmu. 35 Ziang vek miphun a si khalle Pathian a ṭihzahtu le thil dik a tuahtu zokhal Pathian in a cohlang a si. 36 ^bZiangkim tlunih Lal, Jesu Khrih zarih Pathian in remnak thuthangṭha Israel-mipawl hnenih kamsuakthu a thlah mi cu nan thei ko. 37 Judia peng hmuahhmuah ah ziang a cang ti nan thei. John in baptisma thu a phuan hnuah, cuih kamsuakthu cu Galili peng ihsin a thawk. 38 ^cNazareth Jesu cu Pathian in Thlarau Thianghlim le huham in ziangtin a thuam ti nan thei. A hnenih Pathian a um ruangah, anih cu hmun kip ah fehin thil ṭha a tuah ih, Diabol ih palbĕt mipawl zaten a damter.

10:34^a Dnp 10:17; 2San 19:7; Job 34:19; Mar 12:14; Rom 2:11; Gal 2:6; Efe 6:9; Kol 3:25; Jam 2:1; 1Pe 1:17

10:36^b Mat 28:18; Luk 2:14; 1Joh 1:5

10:38^c Mat 4:23; Joh 3:2

39 ^a“Cule kannih cu Jew-pawlih ram le Jerusalem khaw sungih a tuah mi thil hmuahhmuah a theihpitu kan si, amah cu thing parah an khai ih an that. 40 Anih cu Pathian in a ni thumnak ah a thoter ih, langhnganin a hmuh hai. 41 ^bMi hmuahhmuah hnenah si loin, Pathian in hlanih a rak hril mi a thutheitu, mithi lak ihsin a thawhsal hnuih amah thawn ei le in tu kanmahpawl hnen lamah a si sawn. 42 ^cCule anih in hi pa cu Pathian in a nung mi le a thi mi parah thuṭhentu ih a ruat mi Pa a si thu kha mipi hnenih sim ding le theihter dingah thu in pe. 43 ^dProfetpawl hmuahhmuah in amai thu an sim ih, zokhal amah zumtu cu amai hmin in sualpawl ngaidamnak a co ding,” tiah a ti.

10:39^a Luk 24:48

10:41^b Luk 24:43; Joh 14:17, 22; 21:13

10:42^c Mat 28:19-20; Joh 5:22; Rom 14:9; 2Ko 5:10; 2Ti 4:1; 1Pe 4:5

10:43^d Isa 53:11; Luk 24:27; Joh 3:15

44 ^aPeter in cuih kamsuakthupawl a sim rero laiah, cuih kamsuakthu ngaithlatu zate parah Thlarau Thianghlim a rung thleng. 45 Cule Peter thluntu, serh zim tan zumtupawl cu cumi ah an khawruah a har zet. Ziangruangahtile Pathian in Zentelpawl hnen khalah Thlarau Thianghlim thilpek a burh a si. 46 ^bZiangahtile cupawl in ṭawng phun dangdangih Pathian an thangṭhat kha an thei.

10:44^a Luk 1:15

10:46^b Mar 16:17

Cun Peter in a sawn ih, 47 ^a“Kanmah vekih Thlarau Thianghlim co zo tupawl hi, baptisma an colonak dingah zo in so tidai a kham thei?” tiah a ti. 48 Cule Bawipaih hmin in baptisma co dingin thu a pe hai. Cun ni tawkfang an hnenih cām hrih dingin Peter cu an ngen.

10:47^a Joh 20:22

11

Peter in a Căngvaihnakpawl a Simfiang

1 ^aCuih cān ah Judia peng ih um apostolpawl le unaupawl in Zentelpawl khal in Pathian kamsuakthu an cohlang ve ti hna in an rak thei. 2 Cule Jerusalem ih Peter a hung soh tikah, serh zim tan zumtupawl in Peter cu an do. 3 ^b“Serh zim tan lo mipawl hnenah na feh ih, an zawngah na ei,” tiah an ti.

11:1^a Heb 4:12

11:3^b Gal 2:12

4 Asinan Peter in a thawk ih an hnenih thil cang mi cu a sangsángten a thawk ihsin a simfiang hai ih, 5 “Joppa khua ih thla ka cam laiah, zelhin ka um ih larnak ka hmu, puan hlaipi vek thil pakhat rung ṭum, a kil pali in van ihsin run ṭhum mi, ka hnenah a rung. 6 Cumi cu ka zohhliah ih ke li nei lei rannungpawl, sahrangpawl, bawkvâkpawl le tlun zuang vatepawl tla ka hmu. 7 Cule aw pakhat in, ‘Peter, tho aw, that awla, ei aw,’ tiih i ti ka thei. 8 Asinan kei in, ‘Si lo e, Bawipa! Ziangahtile a thiang lo mi le a bawrhhlawh mi zianghman ka kâ sungah a lut dah kel lo,’ tiah ka ti. 9 Asinan van ihsin aw cun a vei hnihnak, ‘Pathian in a thianter zo mi cu thiang lo ah ruat hlah,’ tiah i sawnsal. 10 Cule cumi cu vei thum tiang a cang, cule a zaten van ah dirhsohsal thluh an si. 11 Cule ngai hnik, cumi laifangah Kaisaria khua ihsin ka hnenih an rak thlah mi, mi pathum kha ka riahnak inn hmaiah an rak ding. 12 ^aCun rinhlelhnak zianghman um loin, anmah hnenih feh dingin Thlarau in i fial. Cuihtlunah hi unau paruk pawl khal ka zawngah an ra ve ih, Kornelias inn ah kan lut. 13 Cule Kornelias in a inn ih vancungmi ding a hmuhdān in sim, vancungmi cun a hnenah, ‘Joppa khua ah mi thlah awla, Peter tiih an kawh mi Simon va ko aw. 14 ^bAnih in kamsuakthupawl a lo sim ding ih, cumi cun nangmah le na sungkua hmuahhmuah a lo rundam ding a si,’ tiah a ti. 15 Cule thusim ka thawh tikah, Thlarau Thianghlim cu a tirih kan parih a ra thlen vek khan an parah a rung thleng ve. 16 ^cCun Bawipaih kamsuakthu, ‘John cun ti ah baptisma a pe taktak, asinan nannih cu Thlarau Thianghlim ah baptisma nan si ding,’ tiih a ti mi ka vun máng. 17 Curuangah Bawipa Jesu Khrih a zumtu kanmah hnenih Pathian in thilpek in pek mi vek an hnen khalih a pek a si ahcun, Pathian dawn dingah kei cu zo so ka si?” tiah a ti.

11:12^a Rom 3:22

11:14^b Joh 4:53; 1Ko 1:11, 16

11:16^c Mar 1:4, 8

18 ^aCuih thilpawl an theih tikah daiten an um; cule, “Pathian in nunnak an co thei nak dingah lungthlĕngnak cu Zentelpawl hnen khalah a pe ve a si hi!” tiin Pathian an thangṭhat.

11:18^a Rom 10:12-13; 2Ko 7:10

Anṭiok Kawhhran

19 ^aStefen parih a suak mi hremnak hnuih a ṭekdarh mipawl cu Fonisia peng, Saipras tikulh le Anṭiok khua tiang an thleng ih, Jew-pawl hnen siarlo mi dang zo hnen hmanah kamsuakthu an phuang lo. 20 ^bCule mi hrek cu Saipras tikulhmi le Sairinmi an si ih, Anṭiok an thlen tikah ^cGrik ṭawng hmang Jew-pawl hnen khalah Bawipa Jesu-ih thuthangṭha an phuang. 21 ^dCule Bawipaih kut cu an hnenah a um, cule mi tampi in an zum ih, Bawipa lam an hawi.

11:19^a Gal 2:11

11:20^b Mat 27:32

11:20^c Grik ṭawng hmang: Jew si si, Grik ṭawng hmang le nunphung lapawl an si.

11:21^d Luk 1:66

22 Cuih thilpawlih thuthang cu Jerusalem ih um kawhhran hnen a thleng, cule annih in Barnabas cu Anṭiok tiangih feh dingin an thlah. 23 Barnabas cu a va feh ih, Pathian zangfahnak a va hmuh tikah a lung a awi, cule an zaten Bawipa hnenih kăwp ringring dingin an thinlung in thuṭhencatnak nei dingin tha a pe hai. 24 ^aZiangahtile anih cu miṭha, zumnak le Thlarau Thianghlim ih khat a si. Cule mi tampi cu Bawipa hnenih bêt an si.

11:24^a Luk 1:15

25 Cun Barnabas cu Saul hawl dingin Tarsas ah a feh. 26 ^aA va hmuh tikah, Anṭiok ah a hruai. Cun hitin a si, kum khat sung annih cu cuih kawhhran thawn an táwngkhawmaw ih, mi tampi an zirh. Cule Anṭiok khua ah dungthluntupawl kha Khristian tiah kawh hmaisabik an si.

11:26^a 1Pe 4:16

27 ^aCuih cān ah Jerusalem ihsin Anṭiok ah profetpawl an feh. 28 ^bAn lakih mi pakhat Agabas an ti mi pa cu a dīng ih, leitlun pumpi ah mangṭam maksak a tlung cing ding, tiah Thlarau theihternak in a phuang. Cuih pampi cu Kaisar Klaudias san ah a thleng. 29 ^cDungthluntupawl cun mah le tithei tawk cio in, Judia peng ih cêng unaupawl băwmnak pe dingin an relcat. 30 ^dCule cumi cu an tuah ih, an thilpek cu Barnabas le Saul kut in elder-pawl hnenah an kuat.

11:27^a 1Ko 11:4; Efe 4:11

11:28^b Mat 24:14

11:29^c Rom 15:26; 2Ko 8:1-4

11:30^d 1Ti 5:17; Tit 1:5; Jam 5:14; 1Pe 5:1; 2Joh 1:1

12

James Thahnak le Peter Thawngthlaknak

1 ^aCuih cān hrawngah ^bHerod Siangpahrang in kawhhranmi mi hrekkhat se zetih hrem dingah a kai hai. 2 ^cCun John-ih upa James cu ralnâm in a that. 3 ^dCumi cun Jew-pawl a lunghmuiter ti a hmuh ruangah, Peter khal a kaiter hai lala. Cucu Thilnu telh lo Sang Puai Nipawl laiah a si. 4 ^ePeter a kaih hnuah, thawng sungah a khum. An kil dingah, bur khat ah ralkap pali um ralkap bur li pawl hnenah a pek. Lanta Puai ṭheh hnuah Peter cu mipi hmaiah suahih a thu rel dingin Herod in khua a khâng.

12:1^a Joh 15:20

12:1^b Herod: Nauhakpawl thattu Herod-ih tupa Herod Agrippa I a si.

12:2^c Mat 4:21; Mar 10:39

12:3^d Suah 12:15

12:4^e Joh 11:55

5 ^aCuruangah Peter cu thawngthlak a si, asinan kawhhran in a hrangah Pathian hnenah cat loin thla an cam.

12:5^a Rom 15:30-31; Efe 6:18

Peter Runsuahnak

6 Herod in a thu rel dingih a hruaisuah zik, a mizan ah Peter cu thawnginn ralkap pahnih lakah a it. Thir cikcin pahnih in an khit ih, kiltupawl in thawnginn sângka in an kil. 7 ^aCule ngai hnik, Bawipaih vancungmi a ra ih, tleu in thawnginn sung cu a tlêt. Cule vancungmi cun Peter-ih hnak a vun beng ih, a kaitho, “Zamrangten tho aw!” tiah a ti. Cule Peter-ih kut ihsin thir cikcinpawl cu an tla.

12:7^a Sam 107:14

8 Cun vancungmi in a hnenah, “Na tai khap awla, na kedam khal bun aw,” tiah a ti. A ti vekin Peter cun a tuah. Cule vancungmi cun, “Na sinfen hruh awla, i thlun aw,” tiah a ti. 9 Peter cu a fehsuak ih vancungmi cu a hei thlun, cule vancungmi ih a tuah mi cu thungai a si ti a thei lo, larawknak ka hmu a si ding tiah a ruat sawn. 10 A pakhatnak le a pahnihnak sentari kilnak an hei lan ih, khaw sung fehnak thir kăwtka an thleng. Cuih kăwtka cu amah tein an hrangah a áwngaw ih, cumi cun an suak. Lamzin thler pakhat an zawh ṭhehin hmakhatteah vancungmi cun a tlansan.

11 ^aCule Peter cu a lung a hung fim ih, “Bawipa in a vancungmi a thlah ih, Herod-ih kut sung ihsin le Jew-pawl in ka parih tuah an beisei mi hmuahhmuah lak ihsin i runsuak a si ti atu-ah cun ka thei taktak thlang a si,” tiah a ti.

12:11^a Sam 34:7; Dan 3:28; Luk 15:17; 2Ko 1:10; 2Pe 2:9

12 ^aCule thil cang mi a theihngah hnuah, Mark an ti mi John-ih nu Mary-ih inn ah a feh. Cu tawkah cun mi tampi umkhawmin thla an rak cam rero. 13 ^bCule Peter in kăwtka sângka a vun king ih, va dawngsáwng dingin hnenum nu Rhoda ti mi cu a feh. 14 ^cCu nu in Peter-ih aw a si ti a theih tikah, a lungawi tuk ruangah sângka áwng loin, inn sungah a tlân sawn ih kăwtka hmaiah Peter a ding, tiah a sim hai. 15 ^dAsinan annih in a hnenah, “Na â a si hi!” tiah an ti. Sikhalsehla anih in a si rori tiin a ṭangbĕt feufeu. Cule annih in, “Cucu a vancungmi a si ding,” tiah an ti.

12:12^a Kol 4:10; 2Ti 4:11; Flm 1:24; 1Pe 5:13

12:13^b Joh 18:16-17

12:14^c Luk 24:41

12:15^d Mat 18:10

16 Asinan Peter cun cat loin a king rero; cule sângka an ăwn tikah, Peter an hmu ih an khawruah a har. 17 Daiten um dingin Peter cun a kut a hei zâp hai, cule thawnginn sung ihsin Bawipa ih a hruaisuahdān kha an hnenah a sim. Cule anih in, “Va feh uh, hi thilpawl hi James le unaupawl hnenah sim uh,” tiah a ti. Cule a suak ih, hmun dangah a feh.

18 Zing khua a van tikah, Peter parih thil cang mi thuhla ah ralkappawl lakah buainak namen lo a um. 19 Herod in amah cu ṭha zetin a hawl nân, a hmuh lo tikah, kiltupawl cu ṭha zetin a zăwihnit hai ih, annih cu thah si dingin thu a pe. Cule Herod cu Judia peng ihsin a suk ih Kaisaria khua ah cān tawkfang a va um.

Herod Thihnak

20 ^aCule Herod cu Ṭaiar-mipawl le Sidon-mipawl parah a thin a heng zet. Asinan cuih khawmipawl cu lungrualten a hnenah an ra ih, siangpahrang ihnak pindan kilkhawitu Blasṭas kha anmah ṭanpitu dingih an lēmneh ruangah le an ram cu siangpahrang uk mi ram in a cawm ruangah remnak an dil.

12:20^a 1Sp 5:9, 11; Eze 27:17; Mat 11:21

21 A ni khiah ni ah Herod cu a siangpahrang thuam a hruk ih a thuṭhennak laltokham parah toin, mipi hnenah thu a sim. 22 Cule mipi in, “Cucu pathian aw a si, milai aw a si lo!” tiah cat loin an au. 23 ^aCule sunlawihnak Pathian a pek lo ruangah, hmakhatteah Bawipaih vancungmi in a vuak. Cule anih cu khukrul in an ei ih a thi.

12:23^a 1Sam 25:38; 2Sam 24:16-17; 2Sp 19:35

24 ^aAsinan Pathian kamsuakthu cu a ṭhang ih a karhzai.

12:24^a Heb 4:12

25 Cule Barnabas le Saul cu an rawngbawlnak an ṭheh tikah Jerusalem ihsin an kirsal ih, Mark an ti mi John cu an hnenah an hruai.

13

Barnabas le Saul Thlahnak

1 ^aAnṭiok kawhhran ah profetpawl le zirhtupawl hrekkhat an um. Cupawl cu Barnabas, Niker an ti mi Simeon le Sairin peng-mi Lusias, ^bHerod tetrak thawi a ṭhangliantlang mi Manaen le Saul tla an si. 2 Anmahpawl cu Bawipa lamih rawngbawlnak tuahin le rawl ulih an um laiah, Thlarau Thianghlim in, “Anmah ka kawhnak săn hna hrangah Barnabas le Saul kha ka hrangah serhhran uh,” tiah a ti. 3 Cun rawl ulin thla an cam hnuah, an lu parah kut an suang ih an thlahsuak.

13:1^a Mat 14:1; 27:32; Efe 4:11

13:1^b Herod: Nauhakpawl thattu Herod-ih fapa Herod Anṭipas a si.

Saipras Ah

4 Cule Thlarau Thianghlim ih thlahsuaknak in, Seleusia khua ah an vung feh, cule cu tawk ihsin Saipras tikulh ah lăwng in an feh. 5 ^aSalamis khua an um laiah, Jew-pawlih sinakokpawl ah Pathian kamsuakthu an sim. Anmah bawmtu dingah John khal an hruai.

13:5^a Heb 4:12

6 ^aCule tikulh pumpi an fang thluh ih, Pafos khua tiang an thleng, cu tawkah dawithiam le profet deu, Jew-mi pakhat an táwng. A hmin cu Bar Jesu a si. 7 Cu pa cu mifim zet, ramṭhen uktu, Serzias Paulas hnenih um a si. Serzias Paulas cun Pathian kamsuakthu ngai a duh ruangah Barnabas le Saul cu a ko hai. 8 ^bAsinan dawithiam pa tiih anmai ṭawng ih kawh mi Elimas cun anmah a do ih, ramṭhen uktu pa kha zumnak ihsin pialter a tum. 9 ^cCun Paul ti khalih an kawh mi Saul cu, Thlarau Thianghlim in a khat ih Elimas cu mit ṭhep loin a zoh. 10 ^dCule, “Nang Diabol-ih fapa, dingfelnak hmuahhmuah ih doral, hrăwkhrawlnak phun zakip le mi bumnak phun zakip ih khat, Bawipaih lamzin dĭng pawl merhkâwi hi na bansan lo ding maw? 11 ^eAtu-ah ngai hnik, na parah Bawipaih kut a um, na mit a caw ding ih, tawkfang sung cu ni hmu loin na um ding,” tiah a ti. Cule hmakhatteah mero le thim in a tlakhnawh ih a kut ih hruaitu ding hawlin a dap dundo. 12 Cun ramṭhen uktu cun cuih thil cang mi a hmuh tikah a zum, ziangahtile Bawipaih thuhla an zirh mi in a khawruah a harter zet.

13:6^a Mat 7:15

13:8^b Isa 30:11

13:9^c Luk 1:15

13:10^d Hos 14:9; Mat 13:38; Joh 8:44

13:11^e Suah 9:3; 1Sam 5:6-7; Sam 32:4

Pisidia Ram Anṭiok Ah

13 Pafos khua ihsin Paul le a hawipipawl cu lăwng in an feh ih, Pamfilia ram Perga khua an thleng. Cu tawk ihsin John in a tân ta hai ih, Jerusalem ah a kir. 14 Perga khua ihsin an feh ih, Pisidia ram Anṭiok an thleng. Sabbath ni ah sinakok ah an lut ih an to. 15 Cule Dān thu le Profetpawl ih ngan mi thupawl an siar ṭheh hnuah, sinakok hruaitupawl in an hnenah mi an hei thlah ih, an hnenah, “Pulepawl le unaupawl, mipi hrangah thazang peknak ṭawngkam nan neih asile sim uh,” tiah an ti.

16 Cun Paul cu a ding, a kut a hei zâp ih thu a sim, “Israel-mipawl le nannih Pathian a ṭihzahtupawl, i ngai hnik uh! 17 ^aHi Israel-mipawlih Pathian in kan pupápawl cu a hril ih, Izip ram ah a langte sung an um laiah, annih cu a hmuingilter. Cule a bân tha cak in cu tawk ihsin a hruaisuak hai. 18 ^bCule kum 40 hrawng ramṭhing ah an nundān thinsauten a zāwi hai. 19 ^cCule Kanaan ram ih miphun pasarih pawl a siatsuah thluh hnuah, cuih ram cu camcawhfung zûknak in a zem hai.

13:17^a Suah 6:6; Dnp 7:6-8

13:18^b Mip 14:33; Dnp 1:31; Sam 95:10

13:19^c Dnp 7:1; Jos 19:51; Sam 78:55

20 ^a“Cuih hnuah profet Samuel cān a thlen hlanlo, kum 450 hrawng Pathian in anmah cu laireltupawl a pe. 21 ^bCule cuih hnuin, Israel-mipawl in siangpahrang an dil ih, Pathian in kum 40 sung hrangah Benjamin hnám, Kish-ih fapa Saul cu anmah a pe. 22 ^cPathian in Saul a ṭhawnhloh hnuah, David kha an siangpahrang ah a tungding. Cu paih thu cu Pathian in hitin a theihter fawn, ‘Jessi-ih fapa David, ka thinlung vek pu mi ka hmu zo, anih cun tuahter ka duh mi zaten a kimter ding,’ tiin.

13:20^a Lai 2:16; 1Sam 3:19-20

13:21^b 1Sam 8:5, 19; 9:1-2; 10:1

13:22^c 1Sam 13:14; 15:23, 26; Sam 89:20; Isa 44:28; Jer 3:15

23 ^a“A thutiamkam vekin, Pathian in Israel-mipawl hrangah David cithlah ihsin Rundamtu Jesu a suakter. 24 ^bA rat hlanah, John in Israel-mi zate hnenah lungthlĕngnak baptisma co dingah thu a rak sim hmaisa. 25 ^cJohn in a hnaṭuan a ṭheh zik zawngah, ‘Kei cu zo ah in ruat? Kei cu amah pa cu ka si lo. Asinan ngai hnik uh, ka hnuah Mi pakhat a ra, kei cu a kedam phawihsaktu ding hmanah ka tlak lo,’ tiah a ti.

13:23^a Jer 30:9; Mat 1:1, 21

13:24^b Mar 1:4

13:25^c Mat 3:11; Joh 1:20, 27

26 ^a“Pulepawl le unaupawl, Abraham-ih tesinfapawl le nan lakih Pathian ṭihzahtupawl hmuahhmuah tla, nan hnenah hi rundamnak thu hi thlen a si. 27 ^bZiangahtile Jerusalem ih cêngpawl le an hruaitupawl in amah cu an rak theithiam lo ih, Sabbath ni tinteih an siar ṭheu mi, profetpawlih aw hman an rak theihthiam lo ruangah, cupawl cu amah thiam lo coternak in an kimter. 28 ^cCule thihnak tlak thu zianghman an hmu lo nân, amah cu that dingin Pilat an dil. 29 ^dA thuhla rak ngan cia mipawl hmuahhmuah kha an tlamtlinter hnuah, thing par ihsin an lathla ih, thlān ah an hlum. 30 ^eAsinan Pathian in amah cu mithi lak ihsin a thoter. 31 ^fMipi hnenih a thutheihpitu Galili peng ihsin Jerusalem ih a zawngih hung so pawl in amah cu ni tampi sung an hmu.

13:26^a Luk 3:8

13:27^b Mat 1:22; Luk 24:27

13:28^c Mat 27:20-25

13:29^d Mat 1:22; Luk 18:31; 23:53

13:30^e Mat 16:21

13:31^f Mat 28:16; Luk 24:48

32 ^a“Cule kan pupápawl hnenih rak tuah mi thutiamkam lungawiumza thuthang cu nan hnenah kan thăn a si. 33 ^bJesu a thawhtersalnak in Pathian in kannih an tesinfapawl hnenah cuih thutiamkam cu a thlengkimter a si. Cumi cu Sam pahnihnak sungih,

13:32^a Isa 40:9; Rom 1:2; 9:4

13:33^b Sam 2:7; Mat 3:17

‘Nang cu ka Fapa na si,
Tuihsun ah ka lo hring a si,’

tiih ngan vek khan a si.

34 ^a“Cule a ruak cu a ṭawihrallonak dingah, Pathian in Jesu cu mithi lak ihsin a thoter, hihi a sim mi a si,

13:34^a Isa 55:3

‘David hnenih ka pek mi a thianghlim mi rin tlak thukampawl kha ka lo pe ding,’

tiin.

35 ^a“Curuangah a dang Sam khalah anih in,

13:35^a 2Sam 7:12; 1Sp 2:10; 2San 29:28; Sam 16:10; Mat 9:24

‘Na Mi Thianghlim cu a ṭawihrál khal na siang lo ding,’

tiah a ti.

36 “Ziangahtile Pathian duhdān in David cu amai san minungpawl a rĕn hnuah, a itthat, a pupápawl hnenah phum a si ih, a ruak cu a ṭawihrál ta. 37 Asinan Pathian ih a thawhtersal mi Jesu cu a ṭawihrál lo. 38 ^aCuruangah u le nau pawl, hihi thei uh, Jesu zarih sualpawl ngaidamnak thu cu nan hnenah phuan a si. 39 ^bMosi Dān hmangin thiam a lo coter thei lo nak lak ihsin amah zumtu pauhpauh cu thil hmuahhmuah ihsin Pathian in thiam a coter a si. 40 Curuangah ralring uh, culole Profetpawl ih,

13:38^a Luk 24:47

13:39^b Joh 3:15; Rom 3:28

41 ^a‘Ngai hnik uh, nannih mi nautathmang pawl,
Nan mangbang uhla hloral uh!
Ziangahtile an lo sim khalih
Nan zum lo ding mi thil pakhat, nanmai san ah thil pakhat ka tuah ding,’

13:41^a Hab 1:5

tiih an rak sim mi kha nan parah a thleng pang ding,” tiah a ti.

42 Jew-pawl in sinakok an suahsan tikah, Paul le Barnabas cu Zentelpawl in hmai Sabbath ni ah an ṭawngkampawl pehsal dingin an ngen. 43 ^aSinakok ih mipi umkhawm an ṭiak tikah, Jew-mi lakih mi tampi le an sakhua ih a lut mi Zentel Pathian ngaihsak mi tampi in Paul le Barnabas cu an thlun. Annih in an hnenah thu an sim ih, Pathian zangfahnak ih um ringring dingin an fawrh.

13:43^a Rom 3:24

44 A hmai zarh Sabbath ni ah an khawsen deuhthawin Pathian kamsuakthu ngai dingin an rakhawm. 45 ^aAsinan Jew-pawl in mipi tam zet an hmuh tikah, iksiknak in an khat; cule Paul ih thusim mipawl cu an êl ih, a thusim dokalhin ṭawng sia an ṭawng. 46 ^bCu tikah Paul le Barnabas in ralṭha zetin, “Pathian kamsuakthu nan hnenih sim hmaisak a ṭul hrimhrim, asinan cucu nannih in nan êl ih nanmah le nanmah kumkhaw nunnak co tlakih nan ruahawk lo ruangah, ngai hnik uh, Zentelpawl hnenah kan her thlang a si. 47 ^cZiangahtile Bawipa in thu in pek mi cu hitin a si,

13:45^a 1Th 2:16; 1Pe 4:4; Jud 1:10

13:46^b Mat 21:41; Rom 11:11

13:47^c Isa 49:6; Luk 2:32

‘Zentelpawl hnenih tleu si dingah ka lo ret,
Cutin leilung dĕng tiang rundamnak thlentu na si ding,’ a ti,”

tiah an ti.

48 Zentelpawl in cuih thu an theih tikah, an lung a awi zet ih, Bawipaih kamsuakthu cu an sunlawih. Cule kumkhaw nunnak co dingin Pathian ih a ruat mipawl cun an zum.

49 Cule Bawipaih kamsuakthu cu ram pumpuluk ah a thangdarh. 50 ^aAsinan Jew-pawl in Pathian ngaihsak mi upat tlak nunaupawl le khaw sungih hotu mipapawl kha an tawkhrăwk. Cule Paul le Barnabas dokalhin hremnak an thawk ih an ram ihsin an dawisuak. 51 ^bPaul le Barnabas cun anmah dokalhin an ke leivut an thingtla ih, Ikoniam ah an feh. 52 ^cCule dungthluntupawl cu aipuannak le Thlarau Thianghlim in an khat.

13:50^a 1Th 2:16

13:51^b Mat 10:14

13:52^c Luk 1:15

14

Ikoniam Ah

1 Cun hitin a si, Ikoniam khua ah Paul le Barnabas cu Jew-pawlih sinakok ah an luttlang ih thu an sim, cule Jew mi tampi le Grikmi mi tampi in an zum. 2 Asinan zumlotu Jew-pawl in Zentelpawl an tawkhrăwk ih, unaupawl tlunah thinlung sia nei ko an tuah. 3 ^aCuruangah Paul le Barnabas cu cu tawkah reipi an cam, Bawipaih thuhla cu ralṭha zetin an sim vivo. Cule a zangfahnak kamsuakthu an phuan mi nemhngehnak ah hminsinnakpawl le mangbangzapawl an kut ih tuah thei nak pek an si.

14:3^a Joh 4:48

4 Asinan khaw sung mipi cu an ṭhenaw: mi hrek in Jew-pawl an ṭan, mi hrek in apostolpawl an ṭan. 5 Cule Jew-pawl khal in Zentelpawl le an uktupawl thawn apostolpawl cu mualphoter ding le lungto ih den an tum. 6 ^aApostolpawl in cumi cu an thei ih, Listra, Darbi, Likaonia ram khawpipawl le a kiangkap ram ah an tlân. 7 Cule cu tawkah thuthangṭha an sim vivo.

14:6^a Mat 10:23

Listra le Darbi Ah

8 Listra khua ah mi pakhat a ke ah tha zianghman um lo, a nu ih a hrinthlak ihsi kebái, vei khat hman feh dah lo pa a to. 9 ^aCu pa cun Paul ih thusim a thei. Paul in cu pa cu a zoh keukeu ih, Bawipa in a damter ding ti zumnak a nei ti kha a hmu. 10 ^bCule aw ring zetin, “Na ke in dĭngten ding aw!” tiah a ti. Cule cu pa cu a hung khir ih a feh.

14:9^a Mat 9:28

14:10^b Eze 2:1

11 Mipi in Paul ih tuah mi an hmuh tikah an au ih, Likaonia ṭawng in, “Minung vekah pathianpawl cu cangin, kan hnenah an rung ṭum a si hi!” tiah an ti. 12 ^aCule Barnabas cu ^bZeus an ti ih, Paul cu thusimtu bik a si ruangah ^cHermes tiah an ko. 13 Zeus-ih temple cu an khaw lengah a um, cuih puithiam cun mipipawl thawn an hnenih raithawi a duh ruangah caw cang pawl le pangpar kûal pawl kăwtka ah a rak keng.

14:12^a Suah 7:1

14:12^b Zeus: Grik ṭawng a si ih, Laṭin ṭawng cun Jupiter an ti. Rairing mi pathianpawl lakih sangbik ih an ruah mi a si.

14:12^c Hermes: Laṭin ṭawng in Mercury ti a si ih, Grikmipawl le Rom-mipawlih pathianpawl aiawhih thuphuangtu si ih ruah a si.

14 ^aCumi cu apostol Barnabas le apostol Paul in an theih tikah an hnipuan an thlek ih, mipi lakah an tlân ih an au, 15 ^bcule, “Pulenuh, ziangah so hivek thilpawl nan tuah rero? Kannih khal nanmah vek milai menmen kan si ve. Kannih cun a ṭhahnem lo mi hi thilpawl ihsin lei le van le tifinriat le a sungih um mi zate a tuahtu Pathian nung hnen lamih nan hawinak dingah, nan hnenah thuthangṭha kan lo sim a si. 16 ^cHlanlai ah cun Pathian in miphun zaten anmai duh mi lamzin ih feh a siang hai. 17 ^dSikhalsehla thil ṭha a tuah mi in amah le amah minung hnenah phuangaw loin a um lo. Van ihsin ruahpi le thlairahpawl anmai cān teah in pe, kan nunnak cu rawl le lungawinak thawn a khatter,” tiah an ti. 18 Cuih thupawl an sim na cing hmanin an hnenih raithawi lo dingin mipi an dawn thei ceu.

14:14^a Mar 14:63

14:15^b Sem 1:1; 1Sam 12:21; Sam 146:6; Mat 16:16; 1Th 1:9; Thu 14:7

14:16^c Sam 81:12; Mik 4:5

14:17^d Dnp 11:14; Job 5:10; Sam 4:7; 65:10; Rom 1:20

19 ^aCun Jew-pawl cu Anṭiok khua le Ikoniam khua ihsin cu tawkah an ra ih, mipi an lēmneh hnuah, Paul cu lungto in an dêng. A thi zo ah an ruat ih khaw lengah an dirsuak. 20 Asinan dungthluntupawl in an kulh vialvi laiah, a tho ih khaw sungah a lut. Cule a thaisun ah Paul cu Barnabas thawn Darbi khua ah a feh.

14:19^a 2Ko 11:25; 2Ti 3:11

21 Cule cuih khua ah thuthangṭha an sim ih, dungthluntu tampi an tuah. Cuih hnuah Listra khua, Ikoniam khua le Anṭiok khua ah an kir. 22 ^aDungthluntupawlih thinlung an hngetter ih, zumnak ah um ringring dingin tha an pe. Cule, “Pathian uknak sungih a luttu ding cun harsatnak tampi kan tawng hrimhrim ding a si,” tiah an ti. 23 Cun kawhhran tin ah elder-pawl an ruatsak vivo, rawl ulin thla an cam hnuah, zumtupawl cu an zum mi Bawipa hnenah an ap ta vivo.

14:22^a Joh 16:33; 1Th 3:3; 2Ti 3:12

Siria Anṭiok ah Paul le Barnabas an Kir

24 Pisidia ram an lan hnuah, Pamfilia ram an thleng. 25 Perga khua ih kamsuakthu an phuan hnuah, Attalia khua ah an feh. 26 Cu tawk ihsin Anṭiok khua ah lăwng in an feh, cu tawk hmun cu an rak ṭheh zo mi hna kha ṭuan dingin unaupawl in Pathian zangfahnak ih an rak apnak hmun a si.

27 ^aAn thlen tikah kawhhran mipawl an kokhawm ih, anmah hmangin Pathian in a tuah mi zate le Zentelpawl hnenih zumnak sângka a ăwnsakzia pawl tla an sim. 28 Cutin cu tawkah dungthluntupawl hnenah reipi an câm.

14:27^a 1Ko 16:9; 2Ko 2:12; Kol 4:3; Thu 3:8

15

Jerusalem Khawnsil

1 ^aJudia peng ihsin mi hrekkhat Anṭiok khua ah an ra ih, “Mosi thupek bangtukin serh zim nan tan lo asile, rundam nan si thei lo ding,” tiah unaupawl an zirh. 2 Curuangah Paul le Barnabas cun lungkimlonak nasa zet an nei ih, cutepawl cu an êl. Cule Paul, Barnabas le unau dang hrekkhat cu Jerusalem ah vung fehin hih thu hi apostolpawl le elder-pawl hnenih thlen dingin unaupawl in an relcat.

15:1^a Gal 2:12; 5:2-3

3 Cun kawhhran in annih cu an thlah ih, Fonisia ram le Samaria ram pál phahin Zentelpawl thlĕngawknak thu cu an sim phah vivo. Annih in unaupawl hmuahhmuah cu nasa zetih aipuang ko an tuah. 4 Jerusalem an thlen tikah, kawhhran le apostolpawl le elder-pawl cun an rak hmuak, cule annih in anmah hmangin Pathian ih a rak tuah mi thil zaten an sim. 5 ^aAsinan Farasipawl lakih zumtu hrekkhat cu an dīng ih, “Zentelpawl cu serh zim an tan tengteng a ṭul ih, Mosi Dān thlun dingin thu kan pek a ṭul a si,” tiah an ti.

15:5^a Mat 3:7

6 Cule hi thu ruatkhawm dingah, apostolpawl le elder-pawl an táwngkhawmaw. 7 Reipi an relkhawm hnuah, Peter cu a dīng ih an hnenah, “Pulepawl le unaupawl, Zentelpawl in thuthangṭha kamsuakthu ka kâ ihsin an theihih an zumnak dingah hlandeuhah Pathian in kan lakah a hril hai a si ti nan thei. 8 ^aCule thinlung theitu Pathian cun kan hnenih Thlarau Thianghlim a pek bang khan, an hnen khalah pein a pawm hai a si. 9 Zumnak in an thinlung cu a thianfaiter zo ruangah, Pathian in anmah le kanmah karlakah danglamnak a umter lo. 10 ^bCuruangah kanmah le kan pupápawl ih phurh thei lo mi hngawngkol cu, dungthluntupawlih hngawng ah bâtin, ziangah so Pathian nan hniksak? 11 ^cAnmah vek thothoin Bawipa Jesu Khrih-ih zangfahnak thawngin rundam kan si ve ding ti kan zum sawn a si,” tiah a ti.

15:8^a Thu 2:23

15:10^b Mat 23:4; Gal 5:1

15:11^c Rom 3:24; Gal 2:16; Efe 2:5-8

12 ^aCun mipi zaten daiten an um ih, Barnabas le Paul in anmah hmangih Pathian in Zentelpawl lakih thilmakpawl le mangbangzapawl a tuah mi hmuahhmuah thawng an thăn mi cu an ngai. 13 ^bCule daiteih an um hnuah, James in a let ih, “Pulepawl le unaupawl, i ngai hnik uh: 14 ^camai hmin putu ding mi hril dingah, Pathian in Zentelpawl a hmaisabik a vehvaihdān Simon in in simfiang zo. 15 Cuih thu cu Profetpawlih ṭawngkampawl thaw khalin a milaw a si. Hitin ngan a si:

15:12^a Joh 4:48

15:13^b 1Ko 15:7; Gal 1:19

15:14^c 2Pe 1:1

16 ‘Himi hnuah ka kirsal ding ih,
A tlu zo mi David-ih puanthlam ka dĭnsal ding.
A siatbăl mipawl ka dĭnsal ding ih,
Ka tungding ding.
17 ^aCutin a tāng mi minungpawl in Bawipa an hawl ding,
Ka hmin ih kawh mi Zentelpawl hmuahhmuah hmanin an hawl ding.
Hi thil hmuahhmuah tuahtu Bawipa in a ti,’

15:17^a Amo 9:11-12

tiin.

18 ^a“Leilung semtir ihsin Pathian in amai hnaṭuan hmuahhmuah cu a thei ṭheh. 19 Curuangah Pathian lamih a hawi mi Zentelpawl cu kan buaiter lo ding ti hi ka thuṭhendān a si, 20 ^bmilempawl ih an bawrhhlawhter mi thilpawl siseh, nunau-mipa sualnak siseh, hngawng rek ih thah mi sa siseh, sa thi siseh hrial dingin ca kan kuat sawn pei. 21 ^cZiangahtile Sabbath ni tin in sinakokpawl ah Mosi Dān cu an rak siar ruangah hlanlai sanpawl ihsin cumi cu khaw tin ah an rak phuang zo,” tiah a ti.

15:18^a Isa 45:21

15:20^b Sem 9:4; Pui 3:17; Dnp 12:16, 23; 1Ko 8:7-13; 10:7-8; Thu 2:14, 20

15:21^c 2Ko 3:14-15

Zentel Zumtupawl hnenih Khawnsil Cakuat

22 ^aCun apostolpawl, elder-pawl le kawhhran zaten Anṭiok khua ih thlah ding mi anmah lak ihsin hril ding cu thil ṭha ah an ruat. Paul le Barnabas zawngih feh dingah unaupawl lakih hruaitu Barsabas ti khalih an kawh mi Judas le Silas an hril ih, 23 ^banmah hnenin hi ca hi an kuat,

15:22^a 2Ko 1:19; 1Th 1:1; 1Pe 5:12

15:23^b Luk 2:2; Jam 1:1

“Kannih apostolpawl le elder-pawl le unaupawl in Anṭiok khua, Siria ram le Silisia ram ih um Zentel unaupawl cibai kan lo bûk.

24 ^a“Kan hnen ihsin mi hrekkhat nan hnenah rain an ṭawngkam in buainak an lo pe ih, nan thinlung an lo buaiter ti kan thei. An hnenih cuvek thupek kan pek lo mipawl in ‘Serh zim nan tán tengteng pei ih, Dān nan thlun tengteng pei,’ an lo ti. 25 Kan duhdawt mi Barnabas le Paul zawngih hril mipawl nan hnenih thlah cu thil ṭha a si ding tiah táwngkhawmawin, lungrualten kan ruat. 26 ^bBarnabas le Paul cu kan Bawipa Jesu Khrih hmin ruangah an nunnak tiang a pe siangtu an si. 27 Curuangah Judas le Silas kan rak thlah ih, annih in kan ngan mi ṭawngkampawl cu an kâ in an lo sim ding. 28 Ziangahtile Thlarau Thianghlim le kannih cun hi thil ṭul pawimawh pawl hnakih ritsawn lo phurhter lo ding cu, thil ṭha ah kan ruat. 29 Thil ṭul mipawl tla cu: milem hnenih an hlăn mi rawl siseh, sa thi siseh, hngawng rek ih thah mi sa siseh, nunau-mipa sualnak siseh hrial uh. Cuih thilpawl nan hrial asile nan ti ṭha ding. Damten,” tiin.

15:24^a Gal 1:7; 5:10

15:26^b 1Ko 15:30

30 Cun an thlah hnuin, Anṭiok khua ah an feh; cule mipi an kokhawm ih, cakuat cu an pe. 31 Cuih ca an siar ṭheh tikah, cuih thapeknak thucah ruangah lungawi aipuangin an um. 32 Judas le Silas khal profet an si ih, unaupawl cu tha an pe ih, ṭawngkam tampi hmangin tha an cakter. 33 ^aCule cu tawkih tawkfang an cām hnuah, unaupawl in apostolpawl hnenah hnangamten kirsal dingin an thlah.

15:33^a 1Sam 1:17; Mar 5:34; Luk 7:50; 1Ko 16:11

34 Sikhalsehla Silas cun cu tawkih tān ta hrih cu ṭhain a ruat. 35 Paul le Barnabas khal Anṭiok khua ah cun an tâp ta ih, mi dang tampi thawn Bawipaih kamsuakthu an zirh ih an phuang.

Paul le Barnabas Lungruallonak

36 Cun ni tawkfang hnuah Paul in Barnabas hnenah, “Bawipaih kamsuakthu kan rak sim zo nak khaw tin ah fehsalin unaupawl ziang an bang ti kan va zoh pei,” tiah a ti. 37 Barnabas in Mark an ti mi John kha an zawngih hruai a duh. 38 Asinan Pamfilia ram ah anmah tlunsanin hnaṭuannak ih an zawngih feh ve lo tu Mark hruai cu Paul in ṭhain a ruat lo. 39 An karlakah lungruallonak a nasa tuk, cutin pakhat le pakhat an ṭhenaw. Barnabas cun Mark a hruai ih, Saipras tikulh lamah lăwng in an feh. 40 Cun unaupawl in Paul cu Pathian zangfahnak ah an ap, cule anih in Silas a hril ih an feh. 41 ^aCule Siria ram le Silisia ram a fáng ih, kawhhranpawl a cakter vivo.

15:41^a Luk 2:2

16

Timothy in Paul le Silas a Thlun

1 ^aCun Paul cu Darbi khua le Listra khua a thleng. Cule ngai hnik, cu tawkah zumtu Jew nuih fapa Timothy ti mi dungthluntu pakhat a um; asinan a pa cu Grikmi a si. 2 Amah cu Listra khua le Ikoniam khua ih unaupawl in an fak zet. 3 ^bPaul in Timothy cu a khualtlawnnak ih hruai a duh; cule a hruai ih serh zim a tansak, ziangruangahtile cuih ram kiangkapih Jew-pawl hmuahhmuah in Timothy-ih pa cu Grikmi a si ti an thei. 4 Jerusalem ih apostolpawl le elder-pawl in an thlun dingih an relcatsak mi dānpawl cu khawpipawl an pal phahah an sim phah vivo. 5 Cun kawhhranpawl cu zumnak ah an cak sinsin ih, ni tin mipum an karh.

16:1^a 1Ko 4:17; 2Ko 1:1, 19; Fil 1:1; 2:19; 1Th 3:2, 6; 1Ti 1:2, 18; 2Ti 1:2, 5-6

16:3^b Gal 2:3

Masidonia Kawhnak

6 ^aCule Frizia ram le Galatia ram an fang, Thlarau Thianghlim in annih cu Asia ram ih kamsuakthu phuan ding a kham hai. 7 ^bMisia peng an thlen tikah, Bithinia ram sung luh an tum, asinan Thlarau in an luh ding a siang lo. 8 ^cCun Misia peng hrialin, Troas khua ah an feh. 9 ^dCule zan ah Paul hnenah larnak a lang. Masidonia ram ihsin mi pakhat cu dīngin, “Masidonia ram ah ra awla, in ra bawm aw,” tiah a ngen. 10 Paul in larnak a hmuh hnuah, Masidonia ram ih feh dingin kan timtuahaw lohli, an hnenih thuthangṭha sim dingin Bawipa in in ko a si hi tiah kan ruatcat.

16:6^a Gal 1:2

16:7^b Rom 8:9; Gal 4:6; Fil 1:19; 1Pe 1:11

16:8^c 2Ko 2:12; 2Ti 4:13

16:9^d Rom 15:26; 1Ko 16:5; 1Th 1:7-8

Lydia Lungthlĕngnak

11 Curuangah Troas khua ihsin lăwng in dĭngten Samothrace tikulh ah kan feh, cule a thaisun ah Nipolis khua kan thleng. 12 ^aCu tawk ihsin Masidonia peng ih khawpi pawimawhbik, Rom-mipawl ih uk mi, duhsaknak hleice co Filipi khua ah kan feh. Cuih khua ah ni tawkfang kan câm. 13 Cule thla an cam ṭheu nak hmun khaw leng tiva kapah, Sabbath ni ah kan feh; cule kan to ih, cu tawkih a rakhawm mi nunaupawl hnenah thu kan sim. 14 ^bThiatira khawmi, puan sendup zuartu, Lydia ti mi nu cu Pathian betu a si ih, Paul ih thusim mipawl ṭhatei ngai dingin Bawipa in a thinlung a ăwnsak. 15 Cule amah le a sungkua zaten baptisma an co ṭheh hnuah, “Bawipa ah mirinum si ih in ruah asile, ra uhla ka inn ah ra cām uh,” tiah in ngen. Cun hramhramin in sawm.

16:12^a Fil 1:1; 1Th 2:2

16:14^b Luk 24:45; Thu 1:11; 2:18, 24

Paul le Silas Thawng Sungah

16 ^aCule hitin a si, thlacamnak hmun ih kan feh laiah, khawse pawlh mi hmai lam thu a simsung thei tu hnenum nu pakhat in in rak táwng. Hmai lam thu a simsungnak in a pulepawl hrangah hlawknak tampi a ngahsak. 17 ^bCu nute cun Paul le kanmah in thlun ih, “Hipawl hi Cungnung Bik Pathian siahhlawh an si, kan hnenah rundamnak lamzin thu an phuang a si,” tiah a au vivo. 18 ^cCuti vekin ni tampi a tuah.

16:16^a Dnp 18:11; 1Sam 28:3, 7

16:17^b Mar 5:7

16:18^c Mar 16:17

Paul cu thinna zetin khawse lamah cun a heraw ih, “Hi nuih sung ihsin suak dingin Jesu Khrih hmin in thu ka lo pe,” tiah a ti. Cule hmakhatteah cu nu cu khawsia in a suahsan. 19 ^aAsinan a pulepawl in an ruahsan mi hlawknak a um nawn lo ti an hmuh tikah, Paul le Silas cu an kai ih, thuneitupawl hmaiih dīngter dingin dawr hmun ah an dirlut.

16:19^a Jam 2:6

20 Cule khawpi uktu bawipawl hnenah an hruai ih, “Hipawl hi Jew-mi an si ih, kan khaw sungah buainak nasa zet an suakter. 21 ^aKannih Rom-mi hrangih kan cohlan thei lo mi le kan thlun thei lo mi dān kalh mi nunphungpawl tla an zirh,” tiah an ti. 22 ^bCun mipi cu Paul le Silas dokalhin an tho; cule khawpi uktu bawipawl in an hnipuan an thleksak ih, anmah cu fungfêkpawl ih vaw dingin thu an pe. 23 Vei tampi an vuak hnuah, thawng sungah an hlăwn ih, thawnginn kiltu pa kha ṭhatei kil dingin thu an pe. 24 ^cCuih thupek a dawn hnuah, Paul le Silas cu thawnginn sungta pindan ah a hlăwn hai ih, an ke ah hreng a sut.

16:21^a Est 3:8

16:22^b 2Ko 11:25; 1Th 2:2

16:24^c Job 13:27; Jer 20:2-3

Thawngtla Kiltu Paih Lungthlĕngnak

25 ^aZanṭim ah Paul le Silas cu thla an cam ih, Pathian thangṭhatnak hla an sak, cule thawngtlapawl in an ngai. 26 Rin lo pi-ah nasa zetin ling a hnîn ih, thawnginn lungphumpawl a hnîn ṭheh; cule hmakhatteah thawnginn sângkapawl an áwngaw ṭheh ih, thawngtlapawl hmuahhmuah ih thir cikcinpawl an phawihaw ṭheh. 27 Cule thawngtla kiltu pa cu a ihthahnak ihsin a hung ṭhang ih, thawnginn sângkapawl áwngawin a hmu, thawngtlapawl an tlânsuak ṭheh zo ah a ruat, cule a ralnâm a zûk ih, amah le amah thahawk a tum. 28 Cu tikah Paul cu aw ring zetin a au ih, “Nangmah le nangmah tuahmawhaw hlah law, ziangahtile kan zaten hi tawkah kan um thluh ko,” tiah a ti.

16:25^a Sam 119:55, 62; Efe 5:19

29 Cule thawngtla kiltu cun meifar a dil ih a tlânlut, ṭihin a khūr rero ih, Paul le Silas ke hramah a băwk. 30 Cule annih cu lengah a hruai hai ih, “Pulenuh, rundam si dingah ziang ka tuah ding?” tiah a ti.

31 ^aCule annih in, “Bawipa Jesu Khrih zum awla, rundam na si ding, nangmah le na sungkuapawl thawn,” tiah an ti. 32 Cun Bawipaih kamsuakthu cu amah le a inn ih umpawl zate hnenah an sim. 33 Cule cuih zan lala ah Paul le Silas cu a hruai hai ih, an hriamhmapawl a khawlhsak. Cule amah le an sungkua zaten baptisma an cocih. 34 A inn ih a hruai hai hnuah, an hmaiah rawl a hunsak; amah le a sungkua hmuahhmuah in Pathian an zum ruangah an ai a puang zet.

16:31^a Joh 3:15; Rom 11:14

35 Cule khua a van tikah khawpi uktu bawipawl in palik bawipawl an hei thlah ih, “Khapawl kha thlah uh,” tiah an ti.

36 Cule thawngtla kiltu pa in cuih ṭawngkampawl cu Paul hnenah thawng a thăn ih, “Khawpi uktu bawipawl in nanmah lo suah dingin thu in pe zo. Curuangah atu-ah nan suak thei a si, hnangamten feh uh,” tiah a ti.

37 Asinan Paul in palik bawipawl hnenah, “Rom-mi kan si ve ko nain, thu zianghman zăwihliah ta loin langhnganin in vua ih, thawng sungah in hlăwn. Atu-ah a thupten in dawihlo ding maw si? A si thei hrimhrim lo! Anmah rori ra in in ra suah hai seh,” tiah a ti.

38 Cule palik bawipawl in cuih ṭawngkampawl cu khawpi uktu bawipawl an sim tikah, Rom-mi an si ti an thei ih an ṭih. 39 ^aCun an va feh ih, thawnginn ihsin an suah hnuah khaw sung ihsin suak dingin an dil. 40 Paul le Silas cu thawnginn ihsin an suah hnuah, Lydia-ih inn ah an lut. Cu tawkah unaupawl an táwng ih tha an pe, cule an fehsuak.

16:39^a Mat 8:34; Luk 8:37

17

Thessalonika Ah

1 ^aPaul le Silas cu Amfipolis khawpi le Apollonia khua an tlawngsuak ih, Thessalonika khua an thleng, cu tawkah Jew-pawlih sinakok a um. 2 A ti ṭheu dān vekin, Paul cu an hnenah a vung lut ih, Sabbath ni ni thum sung anmah thawn Cathiangpawlih sung thu an relkhawm. 3 ^bKhrih cun a tuar tengteng a ṭul ti le mithi lak ihsin a thawhsal tengteng a ṭul ti cu Paul in a simfiang hai ih a nĕmhnget. Cule anih in, “Nan hnenih ka phuan mi Jesu hi Khrih cu a si,” tiah a ti. 4 Cule mi hrekkhat in an zum ih, Paul le Silas an va bên; cule Pathian ngaihsaktu Grik mi tampi le nunau hotu mi tampi in an bên ve.

17:1^a Fil 4:16; 1Th 1:1; 2Th 1:1; 2Ti 4:10

17:3^b Luk 24:26, 46

5 ^aAsinan a thusim pawm lo tu Jew-pawl cun an nahsuah ih, dawr hmun ihsin miṭha lo pawl kha an sawmkhawm ih, khaw sungah buainak tuah an thawk. Mipi hmaiih hruai dingin Jason-ih inn cu an va luhhnawh ih an hawl. 6 ^bAn hmuh lo tikah, Jason le unau hrekkhat cu khawpi uktu bawipawl hmaiah an dirsuak ih, “Leitlun linglettupawl hi tawk khalah an ra thleng. 7 ^cAnnih cu Jason in a rak cohlang hai ih, an zaten Kaisar-ih thusuah an dokalh. Siangpahrang dang a um, a hmin cu Jesu a si an ti,” tiin an au. 8 Cutiih an au cu mipi le khawpi uktu bawipawl in an theih tikah, an buai ṭheh. 9 Cule Jason le a dangpawl cu âmkhāmnak tangka an pekter ih an thlah.

17:5^a Rom 16:21; 1Th 2:16

17:6^b Mat 24:14

17:7^c Luk 23:2; Joh 19:12

Beria Ah

10 Cun zan ah unaupawl in Paul le Silas cu Beria khua ah an thlah lohli. An thlen tikah, Jew-pawlih sinakok ah an feh. 11 ^aCu tawkih mipawl cu Thessalonika khawmipawl hnakin an duhumsawn, kamsuakthu cu hlawptlo zetin an cohlang ih, Paul ih thusim mi cu a dik maw dik lo ti thei dingah ni tinten fimkhur zetin Cathiangpawl an hliakhlai. 12 Curuangah mi tampi in an zum ih, upat tlak Grik nunaupawl le Grik mipa tampi khal in an zum.

17:11^a Dnp 29:29; Luk 16:29; Joh 5:39

13 ^aAsinan Thessalonika khua ih Jew-pawl in Paul in Beria khua khalah Pathian kamsuakthu a sim ti an theih tikah, cu tawk khalah Jew-pawl cu an feh ih, mipi an tawkhrăwk. 14 Cun unaupawl in hmakhatteah Paul kha tifinriat lamih feh dingin an thlah; asinan Silas le Timothy cu cu tawkah an rung tâng. 15 ^bPaul cu a thlahtupawl in Athen khua tiang an hruai; cule a rang thei bikin Silas le Timothy kha amai hnenih ra dingin thupek an ngah hnuah, a thlahtupawl cu an tlung.

17:13^a Heb 4:12

17:15^b 1Th 3:1

Athen Ah

16 Paul in Silas le Timothy kha Athen khua ihsin a hngah hai laiah, cuih khawpi cu milem in a khat ti a hmuh tikah a thinlung a na zet. 17 Curuangah Jew-pawl le Pathian ngaihsaktu mi dang pawl cu sinakok sungah thu a relpi hai ih, ni tinten dawr hmun ih a tawn mi hmuahhmuah thu a relpi. 18 Cun khawruat thiam mifim Epikuras-ih dungthluntupawl le Stoa-mipawl khal in Paul cu an táwng. Cule mi hrek in, “Hi mi tlăwkciar pa hin ziang so sim a duh?” tiah an ti.

Mi dang pawl in, “Ram dang pathianpawlih thuhla a phuang a bang,” tiah an ti, ziangruangahtile an hnenah Jesu le thawhsalnak thu a sim.

19 ^aCule Paul cu an hruai ih, Areopagas ah an fehpi, cule, “Na aupi mi zirhnak thar hi ziang a si ti kan thei thei pei maw? 20 Ziangahtile kan hna ah thil lamdang pawl na run keng a si. Curuangah hih thilpawlih tican theih kan duh,” tiah an ti. 21 Ziangahtile Athen khawmipawl hmuahhmuah le cu tawkih um ram dang mipawl cu thil dang zianghman tuah loin, thu thar simnak ah simaw, ngaithlaknak ah simaw an cān lawng hmuahhmuah cu an hmang.

17:19^a Mar 1:27

22 Cun Paul cu Areopagas laiah a dīng ih an hnenah, “Nannih Athen khawmipawl, thil ziangkimah sakhua ngaihsak zet mi nan si ti ka thei. 23 ^aZiangahtile ka len phahah nan biak mipawl ka zoh ih, biakṭheng pakhat ka hmu. Cuih parah cun,

17:23^a Joh 4:22

THEIH LO MI PATHIAN HNENAH,

tiih ngan mi ka hmu. Curuangah thei lo piih nan biak mi pa cu nan hnenih ka phuan mi hi a si. 24 ^aCuih Pathian cun leilung le a sungih um mi hmuahhmuah hi a tuah. Anih cu lei le van ih Lal a si ruangah, minung kut ih sak mi temple-pawl ah a cêng lo. 25 ^bAmah in mi hmuahhmuah hnenah nunnak, thaw le thil hmuahhmuah a pek ruangah, ṭulsăm mi nei vekin minungpawl in an kut ih amah an rĕn ding khal a ṭul lo. 26 ^cCule leilung vangdâp hmuahhmuah parih cêng dingah thisen pakhat ihsin miphun hmuahhmuah a tuah. Cule tikcucānpawl le an cēnnak ding hmun ramripawl tla a ruatsak. 27 ^dAnih cu kanmah lakih zo thaw hmanin a hlat lo na cingin, minungpawl in Bawipa cu an hawl, an dap ih an hmuhsuak thei nak dingah, Pathian in hihi a tuah a si. 28 ^eZiangahtile amai zarin kan nung, kan cangvai, kan um a si. Thungaiten, nan hla phuah thiam mi hrekkhat in, ‘Ziangahtile kannih cu a tefa kan si,’ an ti a si. 29 ^fCutiih Pathian tefa kan si ruangah, Pathian-ih sinak cu minung thiamnak le ruahnak ih tuah mi sui, ngun le lungto milem thawi bangawin kan ruat ding a si lo. 30 ^gHlanlai ah Pathian in an theih lo lai cānpawl kha hmu lo vekin a umsan; asinan atu-ah cun hmun kip ih mi hmuahhmuah lungthlĕng dingin thu a pe. 31 ^hZiangruangahtile a ruah cia zo mi pa hmangin dik zetih leitlun thu a ṭhen ding ni cu a khiah zo. Cucu mithi lak ihsin amah thawhter a sinak khan, Pathian in mi hmuahhmuah hnenah himi thuhla a fĕngzia a langter a si,” tiah a ti.

17:24^a Dnp 10:14; 1Sp 8:27; Isa 42:5; 66:1-2; Mat 11:25

17:25^b Sam 50:10-12; Isa 42:5

17:26^c Dnp 32:8; Job 12:23

17:27^d Dnp 4:7; Isa 55:6; Jer 23:23-24

17:28^e Dnp 30:20; Job 12:10; Dan 5:23

17:29^f Isa 40:18-20; Rom 1:23

17:30^g Luk 24:47; Rom 3:25; Tit 2:11-12; 1Pe 1:14

17:31^h Sam 9:8; 96:13; Mat 10:15

32 Cule mithi thawhsalnak thu an theih tikah, mi hrekkhat in an hmuhsuam, mi dang pawl in, “Hi thu hi na hnen ihsin ngaithlaksal kan duh,” tiah an ti. 33 Cule Paul cu an hnen ihsin a fehsuak. 34 Sikhalsehla mi málte cun Paul an bên ih an zum, cupawl lakah Areopagas sung tel pakhat Dionisias a tel, Damaris an ti mi nu pakhat le mi dang khal an hnenah an tel ve.

18

Korinth Ah

1 ^aCuih thilpawl hnuah Paul cu Athen khua suahsanin Korinth khua ah a feh. 2 ^bCu tawkah Ponṭas ram ih suak, Jew-mi pakhat Akuila ti mi a táwng. Rom Siangpahrang Klaudias in Jew-mi zaten Rom suahsan dingin thu a pek ruangah, Akuila cu Italy ihsin a nupi Prisilla thawn tubaite ah Korinth ah an ra. Cule an hnenah Paul a va feh. 3 ^cAn hnaṭuan a bangawk ruangah, an hnenah a um ih hna a ṭuan; ziangahtile an hnaṭuan cu puanthlam ṭhit a si. 4 Cule Sabbath ni tinten Paul cun sinakok ah thu a relpi hai ih, Jew-pawl le Grikmipawl simfiang a tum.

18:1^a 1Ko 1:2; 2Ko 1:1, 23; 2Ti 4:20

18:2^b Rom 16:3; 1Ko 16:19; 2Ti 4:19

18:3^c 1Ko 4:12; 1Th 2:9; 2Th 3:8

5 Masidonia ram ihsin Silas le Timothy an ra thlen tikah, Thlarau in Paul cu a turhnawh ih, Jew-pawl hnenah Jesu cu Khrih a si ti thu a theihter. 6 ^aCule an do ih, anmah dokalhnak ṭawng sia an ṭawng tikah, Paul cu a sinfen a thing ih, “Nan thisen cu nanmai lu parah tla seh; kei cu nan thisen ihsin ka thiang a si. Atu thawkin Zentelpawl hnenah ka feh thlang ding,” tiah a ti.

18:6^a 2Sam 1:16; Eze 3:17-19; 33:4; Mat 10:14

7 Cu tawk ihsin Paul cu a suak ih, Jasṭas an ti mi paih inn ah a lut, cu pa cu Pathian betu a si ih, a inn cu sinakok kiang teah a um. 8 ^aCun sinakok hruaitu Khrispas le a sungkua hmuahhmuah in Bawipa cu an zum. Cumi an theih tikah Korinth khawmi mi tampi in an zum ih baptisma an co.

18:8^a Mar 5:22; 1Ko 1:14

9 ^aZan ah larnak in Bawipa in Paul hnenah, “Ṭih hlah, thusim aw, daiten um hlah; 10 ^bziangahtile ka lo umpi a si, lo tuahmawh dingin zohman in na parah kut an thlak lo ding, ziangahtile hi khua ah minung tampi ka nei,” tiah a sim. 11 ^cCule Paul cu cu tawkah kum khat le thla ruk a um, an hnenah Pathian kamsuakthu a zirh.

18:9^a Mat 14:27

18:10^b Mat 28:20

18:11^c Heb 4:12

12 ^aGallio cu Akaia ramṭhen uktu a si laiah, lungrualten Jew-pawl in Paul cu an do ih, thuṭhennak tokham ah an hruai. 13 Cule “Hi pa in Dān thawi kalhawin Pathian be dingah mipi neh a tum a si,” tiah an ti.

18:12^a Rom 15:26; 1Ko 16:15; 2Ko 9:2; 1Th 1:7-8

14 Cule Paul cu a kâ a ān zik zawngah, Gallio in Jew-pawl hnenah, “Nannih Jew-pawl, dingfellonak thu asilole bumawknak siava thu ih phunzai si uhla cu, nan thu ka lo ngai ding. 15 Asinan ṭawngkampawl, hminpawl le nanmai dān thuhla ih thusuhnak an si ahcun nanmah tein tifel uh. Ziangahtile khavek thil thuṭhentu si ka duh lo,” tiah a ti. 16 Cule thuṭhennak tokham ihsin a dawisuak hai. 17 ^aCun Grikmipawl hmuahhmuah in sinakok hruaitu Sosthenes cu an kai ih, thuṭhennak tokham hmaiah an vuak. Asinan Gallio cun cuih thilpawl cu zianghman ah a siar lo.

18:17^a 1Ko 1:1

Prisilla, Akuila le Apollos

18 ^aCun Paul cu Korinth khua ah reipi a um, cule unaupawl hnenah damten tiah a ti ih, Siria ram ah lăwng in a feh. A zawngah Prisilla le Akuila khal an feh ve. Kenkeria khua ah a sám a met, ziangahtile thukamnak a rak tuah. 19 ^bCule Efesa khua a thleng ih, cu tawkah Prisilla le Akuila cu a tān ta hai; Paul amah rori cu sinakok ah a lut ih, Jew-pawl thu a relpi. 20 Jew-pawl in an hnenih cān reideuh cam dingin an dil tikah, a lung a kim lo. 21 ^cCuhnakin damten ti phahin an hnenah, “Jerusalem ih um cing ding mi puai cu ziangti lam khalin ka hman tengteng a ṭul; asinan Pathian in rem a ti asile, nan hnenah ka ra kirsal ding,” tiah a ti. Cule Efesa khua ihsin lăwng in a feh.

18:18^a Mip 6:2, 5, 18; Luk 2:2; Rom 16:1

18:19^b 1Ko 15:32; Efe 1:1; 1Ti 1:3; Thu 1:11; 2:1

18:21^c Rom 1:10; 1Ko 4:19; Jam 4:15

22 Cule Kaisaria khua ih a ṭum hnuah a hung so ih, kawhhran mipawl cibai a bûk, cule Anṭiok ah a rung suk. 23 Cu tawkih cān tawkfang a hman hnuah, a păwksuak ih, a sangsángten Galatia le Frizia ram a tlawng, dungthluntupawl hmuahhmuah a cakter vivo.

24 ^aCule Alexandria khua ih suak, Jew-mi pakhat Apollos ti mi cu Efesa khua ah a ra thleng, amah cu ṭawngkam thiam zet le Cathiangpawl thu thei zet a si. 25 ^bHi pa hi Bawipaih lamzin thuhla rak zirh zo mi a si; cule anih cun John-ih baptisma lawng a thei ko nân, a thinlung ih duhnak nasa zet thawn Bawipaih thuhla cu dik zetin a sim ih, a zirh. 26 Cule sinakok ah ralṭha zetin thusim a thawk. Akuila le Prisilla in a thusim an theih tikah, a dang deuhah an hruai ih, Pathian lamzin thu cu diksinin an simfiang.

18:24^a 1Ko 1:12; Tit 3:13

18:25^b Mar 1:4; Rom 12:11

27 Apollos cu Akaia peng ih feh a duh tikah, unaupawl in cu tawkih dungthluntupawl hnenah amah rak cohlang dingin fawrhnak ca an ngan. A va thlen tikah, zangfahnak ruangih a zumtupawl kha nasa zetin a bawm hai. 28 Ziangahtile langhnganih elawknak ah Jew-pawl cu Apollos cun a neh nêknêk hai ih, Jesu cu Khrih a si ti Cathiangpawl ihsin a simfiang hai.

19

Efesa ah Paul

1 Cule hitin a si, Korinth khua ih Apollos a um laiah, Paul cu Efesa khua thleng dingin tlun lam rampawl hrut vivoin a tlâwng. Cu tawkah dungthluntu hrekkhat a táwng hai ih, 2 ^aanih in an hnenah, “Nan zum tikah khan, Thlarau Thianghlim nan rak co maw?” tiah a ti hai.

19:2^a Joh 20:22

Cule annih in, “Thlarau Thianghlim a um le um lo hman hna in kan thei lo,” tiah an ti.

3 Cule Paul in an hnenah, “Ziang baptisma so nan co?” tiah a ti.

Cule annih in, “John-ih baptisma kan co,” tiah an ti.

4 ^aCun Paul in, “John cun lungthlĕngnak baptisma a pe taktak, a hnuih a ra ding mi pa zum dingin mipi a sim, cumi cu Khrih Jesu zum dingin a si,” tiah a ti.

19:4^a Mar 1:4; Joh 1:7

5 Cuih thu an theih tikah, Bawipa Jesu hmin in baptisma an co. 6 ^aPaul in an parah a kut a suang ih, an parah Thlarau Thianghlim a rung thleng, cule ṭawng phun dangdang in an ṭawng ih, profet thuphuan in thu an phuang. 7 An zaten patling hleihnih hrawng an si.

19:6^a Mar 16:17

8 ^aCule Paul cu sinakok ah a lut ih, thla thum sung ralṭha zetin thu a sim, Pathian uknak thu mi a relpi ih, mi a fiangter. 9 Asinan mi hrekkhat cu an thinlung an hakter ih an zum lo, mipi tam zet hmaiah cuih ^bLamzin thu dokalhin ṭawng sia an ṭawng ciamco sawn riangri. Cu tikah anmahpawl cu Paul in a tlansan hai ih, dungthluntupawl kha amai zawngah a hruai hai, cule Tirannas-ih thu zirhnak inn ah ni tin thu a relpi hai. 10 Cuti vekin kum hnih sung a um ih, Asia ram ih cêng Jew-mi le Grikmi zate in Bawipa Jesu-ih kamsuakthu cu hna in an thei ṭheh.

19:8^a Mat 3:2

19:9^b Lamzin: 9:2 simfiangnak zoh aw.

11 Cule Pathian in Paul kut hmangin thilmak hleice pawl a tuah, 12 cutin a taksaruangpum ihsin pavuapawl le taingerh puanpawl tla minapawl hnenah an keng ih, an nathripawl in a tlansan hai, cule an sung ihsin khawse siava pawl an suak.

13 ^aCun khawse siava dawisuakih hmun kip ih vâkvai Jew mi hrekkhat cu tawkah an um. Cupawl cun khawse siava pawl parah Bawipa Jesu hmin ko vein, “Paul ih sim mi Jesu hmin in suak dingin thu kan lo pe,” tiah an ti. 14 Jew-mi puithiam sâng a si ve mi, Skeva an ti mi paih fapa pasarih pawl cun, cuti vekih tuah ve an um.

19:13^a Mat 12:27; Mar 9:38

15 Cule khawse siava in a sawn ih, “Jesu ka thei, Paul khal ka thei, asinan nanmah cu zo nan si?” tiah a ti hai.

16 Cun khawse siava neitu pa cu an parah a khir ih an zaten a neh ṭheh hai, an zate hnakin a caksawn, curuangah cuih inn ihsin taklawng le hriamhma thawn an tlânsuak. 17 Cuih thu cu Efesa khua ih cêng Jew-pawl le Grikmipawl hmuahhmuah in an theih tikah, an zate parah ṭihnak a thleng ih, Bawipa Jesu hmin an thangṭhat. 18 Cule cu tawkah a rak zum tu mi tampi rain an sual an phuang ih, thil ṭha lo an tuah mipawl an phuangsuak. 19 Mitkher hmang mi tampi khal in an cazualpawl an rak kengkhawm ih, mi zapi hmaiah an ur. Cule cuih cazualpawlih man cu an kăwm tikah ^angun tangka 50000 a si. 20 Cuti vekin Bawipaih kamsuakthu cu nasa zetin a karhzai ih, nehnak a ngah.

19:19^a ngun tangka: Darakma a si men thei. Darakma pakhat cu mi pakhat ni khat hlawh a si.

21 ^aHih thilpawl a can ṭheh hnuah, Paul in Masidonia peng le Akaia peng tlawng tain Jerusalem ih feh dingin a thinlung sungin a tum. Cule, “Cu tawk ka thlen hnuah, Rom khal ka hmuh tengteng a ṭul,” tiah a ti. 22 ^bCun amah riantu mi pahnih Timothy le Erasṭas cu Masidonia ram ah a thlah hai ih, amah cu Asia ram ah málte sung a rung tâng.

19:21^a Rom 15:24-25, 28

19:22^b Rom 16:23; 2Ti 4:20

Efesa ih Buainak

23 Cuih cān hrawngah Lamzin thuhla ah buainak nasa zet a suak. 24 Ziangahtile ngun bur thiam Demeṭrias an ti mi pa in ^aArṭemis khawzingnuih ^binnte kha ngun in a tuah ih zungthiampawl cu hlawknak tampi a pe. 25 Amah in cupawl le cuvek hnaṭuan a ṭuantupawl cu a kokhawm ih an hnenah, “Pulenuh, hi hnaṭuannak ihsin sum lâkluhnak ṭha kan nei ti nan thei. 26 ^cCuihtlunah Efesa khua lawngah si loin, Asia ram pumpi zuakzo ah hih Paul hin mi tampi cu nehin a hruaipêng ti cu nan hmu ih nan thei. Milai kut ih tuahcawp mipawl cu pathian an si lo tiah a ti. 27 Kan sumtuahnak hi a hmin a se pang ding ti phan a um lawng si loin, Asia ram ih um mi hmuahhmuah ih an biak mi le leilung tlun khua zakip khalih biak mi a ropi zet mi Arṭemis khawzingnuih temple khal hi nautat a si ding ih, a ropitnak khal siatsuah a si pang ding ti phan a um fawn,” tiah a ti.

19:24^a Arṭemis: Grik khawzingnu. A Rom hmin cu Diana a si.

19:24^b innte: Hihi pathian biaknak innte a si.

19:26^c Dnp 4:28; Sam 115:4; Isa 44:10-20; Jer 10:3-5; 1Ko 8:4; Thu 9:20

28 Cumi cu mipi in hna in an theih tikah, thinlingnak in an khat ih, “Efesa khawmipawlih Arṭemis cu a ropi a si!” tiah an au. 29 ^aCun khaw sung cu buainak in a khat ih, mipi cun Paul-ih khualtlawnpi Masidonia-mi Kaias le Aristarkas cu an kai ih, lungrualten zohnuam zohnak tualrawnpi ah an tûllut. 30 Cule Paul cu mipi lakih luh a duh nân, dungthluntupawl in an siang lo. 31 Cun Asia ram ih thuneitupawl lakih a rualpi hrekkhat khal in cuih zohnuam zohnak hmun ih va feh hrimhrim lo dingin thu an cah ih, an ngen. 32 Mipungkhawm lakih buainak a um ruangah, mi hrek in thu pakhat an au ih, mi hrek in thu dang an au; mi tamsawn in ziangruangah an ra pungkhawm ti an thei lo. 33 Cule mipi lak ihsin Alexander cu an dirsuak ih, Jew-pawl in hmai lamah an tûl. Cule Alexander cun daiteih um dingin mipi cu a kut a zâp ih, mipi hmaiih amah le amah humawk a duh. 34 Asinan Jew-mi a si ti an theih tikah, an zaten aw rual zetin nazi pahnih sung hrawng, “Efesa khawmipawlih Arṭemis cu a ropi a si!” tiah an au ciamco.

19:29^a Rom 16:23; 1Ko 1:14; Kol 4:10; Flm 1:24

35 Cuih khawpi cazi pa in mipi cu a daiter ih, an hnenah, “Nannih Efesa khawmipawl, Efesa khawpi cu Arṭemis khawzingnuih temple le van ihsin a tla mi milem kilkhawitu a si ti thei lo zo so um? 36 Hi thilpawl cu phat thei rual a si lo ruangah, daiten nan um le ruat ta loin zianghman nan tuah lo a ṭha ding. 37 ^aZiangahtile annihpawl cu temple-pawl suamtu an si lo ih, nan khawzingnu dokalhin ṭawng sia ṭawngtu khal an si lo nân, hi tawkah nan rak hruai. 38 Curuangah Demeṭrias le a hawipi zungthiampawl in mi pakhat khat sual mawhthluk ding an neih asile, thuṭhennak hmun cu ăwn a si ih, ramṭhen uktupawl an um ko. Cu tawkah pakhat le pakhat sual puhaw hai seh. 39 Asinan a dang thu zăwihnit nan duh asile, dān vekih punkhawmnak ih relcat ding a si. 40 Ziangahtile tuihsun ih thil cang mi ruangah nan hél a si tiah sual in puh ding ti phan a um. Ziangahtile himi punkhawmnak thu ah a săn rel thei ding zianghman kan nei lo,” tiah a ti. 41 Cutiih a ti hnuah punkhawmnak cu a ṭiakter.

19:37^a Rom 2:22

20

Masidonia le Grik Ram ah Paul

1 Buainak a cem hnuah, Paul in dungthluntupawl cu a hnenah a ko hai, cule damten maw, tiah a ti ih, Masidonia ram lam tlawng dingin a păwksuak. 2 Cuih rampawl cu a tlawng vivo ih, ṭawngkam tampi in tha a pe hai, cule Grik ram a thleng. 3 ^aCu tawkah thla thum a um. Cule Siria ram lamah lăwng ih a feh zik zawngah Jew-pawl in amah dokalhin thil ṭha lo an ruahthup ruangah, Masidonia ram ihsin kirsal dingin thutluknak a tuah. 4 ^bCule Beria khawmi Sopaṭa, Thessalonika khawmi Aristarkas le Sekundas, Darbi khawmi Kaias le Timothy, Asia rammi Ṭaikikas le Trofimas tla in Paul cu Asia ram tiang an fehpi. 5 Cupawl cu an rak feh sung ih, Troas khua ihsin in rak hngak. 6 Thilnu telh lo Sang Puai Nipawl a cem hnuah, Filipi ihsin lăwng in kan feh ih ni nga hnuah an hnen Troas khua kan thleng, cu tawkah ni sarih kan câm.

20:3^a Luk 2:2; 2Ko 11:26; 1Th 2:16

20:4^b Efe 6:21; Kol 4:7; 2Ti 4:20; Tit 3:12

Zuṭikas Thawhternak

7 ^aZarh khat ih a ni khatnak ah, sang phel dingin dungthluntupawl an táwngkhawmaw. A thaizing fehsuak ding a si ruangah, Paul cun an hnenah zanṭim tiangin thu a sim. 8 An khawmnak tlunta pindan ah cun meito tampi a um. 9 Cule Zuṭikas an ti mi tlangval pakhat cu tukvirh ah a to ih, Paul ih reipi thu a sim laiah thithlepin a rak itthat. A ihthah ṭhat laiah dot thumnak ihsin a tla. An vung sar tikah a rak thi zo. 10 ^bPaul cu a vung ṭum ih tlangvalpaih parah a băwk ih a pawm, cule, “Buai ruri hlah uh, ziangahtile a sungah a nunnak a um lai,” tiah a ti. 11 ^cCule Paul cu tlunta pindan ah a hung kaisal, sang a phel ih a ei. Cule reipi khawvâng tiang a ṭawng ih a fehsuak. 12 Tlangvalpa cu nungdamin an hruai ih, an hna a ngam zet.

20:7^a Mat 14:19; 1Ko 16:2; Thu 1:10

20:10^b 1Sp 17:21; 2Sp 4:34; Mat 9:23-24

20:11^c Mat 14:19

Efesa Elder-pawl le Paul

13 Cun Assos khua ah lăwng in kan feh sung ih, cu tawkah Paul sawm phah kan tum, ziangahtile amai khawkhan cia vekin ke ih rak feh cia a tum. 14 Cule Assos khua ih in rak tawn tikah, lăwng parah kan hruai ih, Miṭilin khua ah kan feh. 15 ^aCu tawk ihsin lăwng in kan feh ih a thaisun ah Kios tikulh kiang kan thleng. A tipsun ah Samos tikulh kan thleng ih, Trozilliam khua ah kan câm. A thiamsŭn ah Mileṭas khua kan thleng. 16 Paul cun Asia ram ih cām rei a duh lo ruangah, lăwng in Efesa khua cu fehlansan a tum; ziangahtile a cang thei asile, Jerusalem ah Pentikos puai ni khelh a duh ih a manhlap zet.

20:15^a 2Ti 4:20

17 Paul in Mileṭas khua ihsin Efesa khua ah mi a thlah ih, kawhhran elder-pawl a kokhawm hai. 18 A hnen an ra thlen tikah an hnenah, “Asia ram kan ra thlen ih a ni khatnak ihsin nan hnenah ziangti vekin ka nung ti nan thei; 19 ^atăngdawr zet le vei tam zet mitthli thawn le Jew-pawlih phiarsawmnak ih cang mi hniksaknak tuarin, Bawipa ka rian a si. 20 ^bNan hlawknak ding zianghman ka sûp lo, cuhnakin mipi hmaiah siseh, inn khat hnu inn khat ah siseh ka phuangsuak ih ka lo zirh sawn. 21 ^cJew-pawl le Grikpawl hnenah Pathian lamah lungthlĕng dingin le kan Bawipa Jesu Khrih zum dingin fiang zetin thu ka sim. 22 Cule atu-ah ngai hnik uh, Jerusalem ih feh dingin Thlarau ih ṭemṭawn ka si, cu tawkah ka parah ziang thilpawl a cang ding ti ka thei lo. 23 Ka theihsŭn cu, cu tawkin thawngtlaknak le harsatnak in in hngak a si tiah khaw tin ah Thlarau Thianghlim in fiang zetin a theihter mi lawng hi a si. 24 ^dAsinan Pathian zangfahnak thuthangṭha theihter dingah, aipuannak thawn ka tlanzuamnak le Bawipa Jesu hnen ihsi ka ngah mi rawngbawl hna cu a cemnet tiang ka ṭhehsuak thei nak dingah cuih thilpawl lakih pakhat hmanin i hnînter lo ih, ka nunnak khal seherh tlakah ka ruat lo.

20:19^a Sam 6:6

20:20^b Sam 40:10; Jer 26:2; 42:4

20:21^c Efe 1:15; Kol 2:5; Flm 1:5

20:24^d 2Ko 4:1; Gal 1:1; 2Ti 4:7; Tit 1:3

25 ^a“Cule ngai hnik uh, Pathian uknak thu simin nan lakah ka rak vâk, atu-ah ngai hnik uh, nan zaten ka hmel in hmusal nawn lo ding ti ka thei. 26 ^bCuruangah mi hmuahhmuah thisen ihsin ka thiang a si tiah tuihsun ah nan hnenah ka lo theihter. 27 Ziangahtile Pathian ih thil tum mi zaten sûp loin, nan hnenah ka phuang. 28 ^cPathian kawhhran, amai thisen ih a lei mi tuu rual câwm dingin Thlarau Thianghlim in an lakih bishop ih a lo ruah hai zo ruangah nanmah hrangah le tuu rual zate hrangah fimkhur uh. 29 ^dZiangahtile hihi ka thei a si, ka feh hnuah nan lakah cinghnia hrang an ra lut ding ih, tuu rual hi an zuah lo ding. 30 Nanmai sung rori ihsi khalin, dungthluntupawl anmah lamih hruai dingin mi an suak ding ih, anmah rori ih merhkâwi mi thuphan an sim ding. 31 Curuangah ralring uh, sun le zan mitthli thawn kum thum sung cawl loin, mi hmuahhmuah ralrinnak ka lo pek kha cîng ringring uh.

20:25^a Mat 4:23

20:26^b Eze 3:17-19

20:28^c Joh 21:16; Rom 3:25; 1Ko 6:20; 10:32; 1Ti 3:1

20:29^d Eze 34:5; Mat 7:15

32 ^a“U le nau tla, atu-ah Pathian hnenah le a lo tuahṭha thei tu le mithiangpawl hmuahhmuah lakah co ding ro khal a lo pe thei tu a zangfahnak kamsuakthu ah ka lo ap a si. 33 ^bSui siseh, ngun siseh, hnipuan siseh zo-ih ta hman ka daw lo. 34 A si, hi kutpawl hin keimah le ka hnenih umpawl ih ṭul mi a pesuak ti nanmah rori in nan thei. 35 Micak lo pawl nan băwm thei nak dingah, hiti vekin hnaṭuanin ziangkimah ka lo hmuh zo. Bawipa Jesu-ih kamsuakthupawl hi cing uh, anih in, ‘Ngah lam hnakin pek lamah thlawsuah a tamsawn,’ a ti,” tiah a ti.

20:32^a Mat 25:34; Efe 1:4; Kol 1:12; Heb 9:15; 1Pe 1:4

20:33^b 1Sam 12:3; 1Ko 9:12; 2Ko 2:17; 1Th 2:5

36 ^aCule cuih thilpawl a sim hnuah, Paul cu a khuk a bil ih an zaten thla a campi. 37 ^bCun an zaten ring zetin an ṭap, Paul cu an pawm ih an hnam. 38 A hmel an hmusal nawn lo ding ti a sim mi ṭawngkampawl cun an riah a seter cuang. Cule lăwng tiang an hei thlah.

20:36^a Luk 22:41

20:37^b Luk 15:20

21

Jerusalem Lamah

1 Cule hitin a si, anmah kan fehsan hnuah lăwng in dĭngten kan feh ih, Kos tikulh kan thleng. A thaisun ah Rhodes tikulh ah kan feh, cule cu tawk ihsin Patara khua ah kan feh. 2 Cu tawkah Fonisia ram lamih feh ding mi lăwng kan hmu, cuih lăwng cu kan to ih kan fehlan. 3 ^aSaipras tikulh kan hmuh hnuah, thlang lam ihsin kan lan ih, Siria ram fehtlăngin Ṭaiar khua ah kan cawl; ziangahtile cuih khua ah lăwng thil phurh mipawl thlak ding a si. 4 Cule cu tawkah dungthluntupawl kan táwng ih an hnenah ni sarih kan câm. Thlarau ih simnak in cuih dungthluntupawl cun Paul hnenah, “Jerusalem ah feh hlah,” tiah an ti. 5 ^bKan umtlang cān a net tikah, kan suak ih kan khualtlawn kan peh; cule dungthluntupawl hmuahhmuah cun an nupi le an fātepawl thawn khaw leng tiang in thlah. Cule ti kapah kan khuk kan bil ih thla kan cam. 6 Pakhat le pakhat, damten maw, kan tiawk hnuah, lăwng parah kannih kan kai ih annih cu anmai inn ah an kirsal.

21:3^a Luk 2:2

21:5^b Luk 22:41

7 Cule tipi parih khualtlawn kan ṭheh hnuah, Ṭaiar khua ihsin Ptolemais khua kan thleng, cu tawkah unaupawl kan cibai ih an hnenah ni khat kan câm. 8 ^aA thaisun ah Paul-ih tlawnpi kannih cu kan păwksal ih, Kaisaria khua kan thleng. Cule mi pasarih lakih pakhat a si mi evangelist Filip-ih inn ah kan lut ih a hnenah kan câm. 9 ^bCu pa cun profet thuphuanih thuphuang fala him fanu pali a nei.

21:8^a Efe 4:11; 2Ti 4:5

21:9^b Suah 15:20; Lai 4:4; Neh 6:14; Luk 2:36; 1Ko 11:5

10 Cu tawkah ni tampi kan cam hnuah, Judia peng ihsin profet pakhat Agabas an ti mi a rung. 11 ^aKan hnenah a ra ih, Paul-ih taikhap a la ih a ke le a kut pawl a ṭawnaw, cule, “Thlarau Thianghlim in hitin a ti, ‘Hih taikhap neitu pa hi Jerusalem ah Jew-pawl in an ṭawn ding ih, Zentelpawl kut ah an pe ding,’ a ti,” tiah a ti.

21:11^a 1Sp 22:11; Isa 20:2-4; Jer 13:1-11; Mat 20:19

12 Cuih thu cu kannih le cu tawk hmun ih um mipawl in kan theih tikah, Paul cu Jerusalem ih feh lo dingin kan ngen ciamco. 13 ^aCun Paul in, “Ziangah nan ṭap ih ka thinlung in kuaiter? Ziangahtile Jerusalem ah cun thawngthlak lawng si loin, Bawipa Jesu Khrih hmin ruangah thih khal ka tiar a si,” tiah in sawn.

21:13^a Joh 15:21

14 ^aKan dăwn thei lo ruangah daiten kan um ih, “Bawipa in a duhnak vekin tuah ko seh,” tiah kan ti.

21:14^a Rut 1:18; Mat 26:39

15 Cuih hnuah kan tim kan tuah ih, Jerusalem ah kan hung so. 16 Kaisaria khua ihsin dungthluntu hrekkhat khal kan hnenah an tel ve ih, kan riahnak ding Manason inn ah in hruai. Amah cu Saipras tikulhmi a si ih, dungthluntu hmaisabik pawl lakih pakhat a si.

Paul le James

17 Cule Jerusalem kan thlen tikah, unaupawl cun lungawi zetin in rak hmuak. 18 A thaisun ah Paul le kannihpawl cun James kan va leng ih, cu tawkah elder-pawl hmuahhmuah an rak um. 19 Paul in cibai a bûk hai hnuah, a rawngbawlnak ihsin Pathian in Zentelpawl lakih a thil tuah mipawl pakhat hnu pakhat a simfiang hai. 20 ^aCule cuih thu an theih tikah, Bawipa an thangṭhat. Cule Paul hnenah, “Unaupa, Jew-pawl lak ihsin mi thawng tampi in an zum zo ih, cupawl cu an zaten Dān thu ih ṭhahnemngai zet an sizia cu na hmu. 21 ^bZentelpawl lakih um Jew-pawl hmuahhmuah cun Mosi Dān thlauthla ding le an fātepawl serh zim tan lo dingin le nunphung khal thlun lo dingin na zirh tiah hipawl hnenah mi hrekkhat in an theihter zo. 22 Ziangtin kan tuah ding? Mipi an ra pungkhawm tengteng ding, ziangahtile na ra thleng zo ti an thei. 23 ^cCuruangah kan lo sim mi vekin tuah tengteng aw: thukamnak tuah mi patling pali kan hnenah an um a si. 24 Cupawl cu hruai awla, an zawngah thianfaiaw aw, cule an lu meh man khal peksak aw. Cule na thuhla an thăn mi cu a dik lo ti mi hmuahhmuah in an thei ding. Cutin Dān thu na thlun ti le Dān vekin na nung ti an lo thei ding. 25 Asinan Zentel zumtupawl thuhla ah cun hih thilpawl cu tuah lo dingin ca kan rak kuat zo. Annih cun milem hnenih an hlăn mi thil, sa thi le hngawng rek ih thah mi sa, nunau-mipa sualnak pawl hrial dingin kan relcat a si,” tiah an ti.

21:20^a Rom 10:2; Gal 1:14; Fil 3:6

21:21^b 1Ko 7:18-19

21:23^c Mip 6:2, 5, 18

26 ^aCun a thaisun ah Paul in cuih mi pali cu a hruai hai ih, anmai zawngah a thianfaiaw. Cule temple kulh sungah a lut ih, thianfainak cān ziangtik ni ah a cem ding ti le cuih cān ah pakhat ciar hrangah thilhlăn a pe ding ti a sim.

21:26^a Mip 6:13-20

Paul Kaihnak

27 ^aNi sarih a cem zik tikah, Asia ram ihsi ra Jew-pawl in Paul kha temple kulh sungah an hmu. Cule mipi zaten an căwktho ih, Paul cu an kai. 28 ^bAn au ih, “Israel-mipawl, in bawm uh! Hi pa hin kan mipi, Dān le hi hmun dokalhin hmun kip ah mi hmuahhmuah thu a zirh. Cuihtlunah Grikpawl khal temple sungah a hruai ih, hih hmun thianghlim hi a bawrhbangter,” tiah an ti. 29 ^cCutiih an aunak săn cu Efesa khawmi Trofimas kha Jerusalem ah an hmu ih, Paul in temple sungah a rak luhpi ko ding tiih an ruah ruangah a si.

21:27^a Jer 26:8; 1Th 2:16

21:28^b Mat 24:15

21:29^c 2Ti 4:20

30 Cuih thu cun an khawsen in a căwkbuai, cule mipi an ra tlankhawm, Paul cu an kai ih temple kulh sung ihsin an dirsuak, cule kăwtkapawl cu an khar lohli. 31 Mipi in Paul thah an duh laiah, Rom ^aralkap bur khat hotu ralbawipi hnenah Jerusalem khaw pumpi a buai luihlo ti thu a thleng. 32 Hmakhatteah cu pa cun ralkappawl le ralkap 100 hotupawl kha a hruai ih an hnenah an va tlân. Ralbawipi le ralkappawl an hmuh tikah, Paul an vuak lai cu an cawl. 33 ^bCun ralbawipi cu a feh ih, Paul a kaih hnuah thir cikcin pahnih thawn ṭawn dingin thu a pek. Cule zo a si ti le ziang a tuah ti a sut. 34 Cule mipi sung ihsin mi hrekkhat in phun khat in an au ih, mi hrekkhat cun phun dang in an au. Thawmvâng a tam tuk ruangah anih in thufiang a thei thei lo ih, Paul cu ralkap khemp ih hruai dingin thu a pek. 35 Nasa tukih mipi an buai ruangah, Paul cu kaiṭen a thlen fangah ralkappawl in an zâwn. 36 ^cZiangahtile mipi tam zetin an thlun ih, “That uh!” tiah an au phah vivo.

21:31^a ralkap bur khat: Mat 27:27 simfiangnak zoh aw.

21:33^b Efe 6:20; 2Ti 2:9

21:36^c Luk 23:18; Joh 19:15

Paul Thusimnak

37 Cun ralkap khemp sungih an hruai zik zawngah, Paul in ralbawipi hnenah, “Na hnenah thu ka lo sim thei pei maw?” tiah a ti.

Cule anih in, “Grik ṭawng na thiam maw? 38 ^aHi hlan tawkfangih helnak suaktertu le ramṭhing ih mi thattu mi 4000 hruaitu Izip pa kha na simaw?” tiah a let.

21:38^a Mat 24:26

39 Asinan Paul in, “Keimah cu Silisia ram khaw pawimawh Tarsas khua ih suak Jew-mi ka si. Mipi hnenih thusim i siang hram dingin ka lo ngen a si,” tiah a ti.

40 ^aThusim thei nak pek a si hnuah, Paul cu kaiṭen parah dīngin mipi hnenah a kut a hei zâp ih, daiteih an um hnuah ^bHebru ṭawng in an hnenah thu a sim.

21:40^a Joh 5:2

21:40^b Hebru ṭawng: Luk 23:38 simfiangnak zoh aw.

22

1 Paul cun, “U le nau le pale tla, atu nan hnenih ka humawknak thu ka sim mi hi ngai hnik uh,” tiah a ti. 2 ^aAn hnenah ^bHebru ṭawng in thu a sim ti hna in an theih tikah, daiten an um sinsin.

22:2^a Joh 5:2

22:2^b Hebru ṭawng: Luk 23:38 simfiangnak zoh aw.

3 ^aCule Paul cun, “Keimah cu Silisia ram Tarsas khaw suak, Jew-mi ngaingai, Gamaliel-ih tlawngta, hi khua ih ṭhanglian ka si. Anih in kan pupápawlih dān cu famkim zetin i zirh ṭheh, cule tuihsun ih nan zate vek hin Pathian hrangih ṭhahnemngai zet tu ka rak si ve dah.

22:3^a 1Sp 19:10; Luk 10:39

Paul in a Thlĕngawknak Thu a Sim

4 “Hih ^aLamzin thluntu mipa siseh, nunau siseh ṭawn tahratin thawng ka thlak hai ih, thi tiangin ka hrem hai. 5 ^bCuih thu cu puithiam lu bik le Sanhedrin thuṭhentupawl zaten in theihpi. Damaskas khua ih umpawl cu ṭem tahratin Jerusalem ah hruaiih cawhkuan pe dingin, an hnen ihsin unaupawl hnenih pek ding ca ka ngah hnuin cuih khua ah ka feh.

22:4^a Lamzin: 9:2 simfiangnak zoh aw.

22:5^b Luk 22:66; Rom 7:1

6 “Cule hitin a si, sun lai hrawngih Damaskas khua ka thlen zik zawngah, rin lo piin van ihsin tleu nasa zetin ka kimvel a run tlêt. 7 Cule lei ah ka tlu ih aw pakhat in ka hnenah, ‘Saul, Saul, ziangah so i hrem rero?’ tiah i ti ka thei. 8 ^aCule kei in, ‘Bawipa, zo so na si?’ tiah ka let. Cule anih in ka hnenah, ‘Na hrem rero mi, Nazareth Jesu ka si,’ tiah i ti.

22:8^a Mar 1:24

9 “Cule ka hnenih umpawl cun tleu cu an hmu rori ih, ṭihnak in an khat, asinan ka hnenih ṭawngtu paih aw cu an thei lo. 10 Cun kei in, ‘Bawipa, ziang ka tuah ding?’ tiah ka ti. Cule Bawipa in ka hnenah, ‘Tho awla, Damaskas khaw sungah feh aw, cule cu tawkah na tuah dingih ka ruah cia mi thil a zaten an lo sim ding,’ tiah i ti. 11 Cule cuih tleu ih tle cu a natsat tuk ruangah khua ka hmu thei lo. Cule ka hnenih umpawl in ka kut in in hruai ih, Damaskas khaw sungah ka lut.

12 “Cun cu tawkah Ananias ti mi pa a um, amah cu Dān vekih Pathian ngaihsak le kha tawkih cêng Jew-pawl hmuahhmuah ih an fak mi a si. 13 Ka hnenah a ra ih, ka kiangah a ding. Cule ka hnenah, ‘Unaupa Saul, khua hmu aw,’ tiah i ti. Cuih tikcu roriah amah cu ka hun zoh. 14 ^aCun anih in, ‘Pathian duh zawng thei dingah le Midingfel Pa hmu dingah le a kâ ihsin a aw thei dingah, kan pupápawlih Pathian in a lo hril zo. 15 Ziangahtile nang cu mi hmuahhmuah hnenah amai hrangah na hmuh mi le na theih mi theihpitu na si ding. 16 ^bAtu hi ziangah so na hngah rero? Tho awla, baptisma co aw, cule Bawipaih hmin koin, na sualpawl khawlhfai aw,’ tiah i ti.

22:14^a 1Ko 15:8

22:16^b Pui 8:6; Sam 51:2; Eze 36:25; Joh 3:5; Rom 10:13; 1Ko 6:11; Efe 5:26; Tit 3:5; Heb 10:22; 1Pe 3:21

17 “Cule hitin a si, Jerusalem ih ka kirsal hnuah, temple kulh sungih thla ka cam laiah zelhin ka um. 18 Jesu ka hmu ih, anih in ka hnenah, ‘Zamrang aw, Jerusalem ihsin suak lohli aw, ziangahtile ka thuhla na phuan mi an pawm lo ding,’ tiah i ti. 19 ^aCun kei in, ‘Bawipa, sinakok tin ih nangmah lo zumtupawl thawng ka thlak hai ih ka vuak hai zia cu anmah rori in an thei. 20 Cule na thutheitu Stefen thisen an suah laiah, kei khal an kiang naite ah ka ding. An thah cu ka lung a kim ih, a thattupawlih hnipuan ka rak kilsak hai,’ tiah ka ti. 21 Cun Jesu in ka hnenah, ‘Feh aw, ziangahtile lam hlapi ih Zentelpawl hnenah ka lo thlah ding,’ i ti,” tiah a ti.

22:19^a Mat 10:17

Paul cu Rom-mi a Si

22 Cuih ṭawngkam tiang cu Jew-pawl in an ngai, cule an au ih, “Khavek mi kha lei par ihsin lahlo uh, ziangahtile nung tlak a si lo!” tiah an ti. 23 Cun annih in au phahin an hnipuan an hlăwn ih, thli lakah leivut an theh ciamco. 24 Ralbawipi in Paul cu ralkap khemp sungih hruai dingin le ziangruangah mipi khati vekin an au ti a theih thei nak dingah, savun hri in vua ih thusut dingin thu a pe. 25 Cule Paul cu lengah an suah ih, savun hri in an ṭawn. Paul in cu tawkah a kiangih ding ralkap 100 hotu hnenah, “A thu relsak hrih lo Rom-mi pakhat vuak cu na hrangah sian a si maw?” tiah a ti.

26 Cucu ralkap 100 hotu pa in a theih tikah, ralbawipi hnenah a feh ih, “Na thil tuah ding mi ah ralring aw, ziangahtile hi pa hi Rom-mi sokhaw a si,” tiah a sim.

27 Cu tikah ralbawipi cu, Paul hnenah a feh ih, “Rom-mi na simaw? I sim hnik,” tiah a ti.

Anih in, “Ka si,” tiah a ti.

28 Ralbawipi cun, “Rom-mi sinak ding hrangah tangka tampi ka pe,” tiah a sawn.

Cule Paul in, “Kei cu suahkeh in Rom-mi ka si,” tiah a ti.

29 Cuveten Paul vuak le thusuh a tumtupawl cu dungah an sīp ṭheh; cule ralbawipi khal in Paul cu Rom-mi a si ti le Rom-mi a ṭemṭawn ti a theih tikah, a ṭih ve.

Sanhedrin hmaiah Paul

30 ^aRalbawipi cun ziangruangah Jew-pawl in Paul an hêk ti theih a duh ruangah a thaisun ah Paul cu ṭawnnak ihsin a suah ih, puithiam sâng pawl le Sanhedrin thuṭhentu zaten táwngkhawmaw dingah thu a pe. Cule Paul cu a run hruai ih an hmaiah a ret.

22:30^a Mat 5:22

23

1 ^aCun Paul in Sanhedrin thuṭhentupawl cu hmaităwnin a zoh hai ih, “Pulepawl le unaupawl, tuihni tiang Pathian hmaiah thinlung zate thiangin ka nung a si,” tiah a ti. 2 ^bCule puithiam lu bik Ananias in Paul kiangih dīngpawl kha a kâ ah beng dingin thu a pe hai. 3 ^cCun Paul in a hnenah, “Nang cu si râng hnih mi phar vek na si, Pathian in a lo beng ding. Ziangahtile Dān vekih thu i ṭhen dingah na to ih, Dān kalh zawngin keimah beng dingin thu na pe hai maw si?” tiah a ti.

23:1^a 1Ko 4:4; 2Ko 1:12; 1Ti 1:5, 19; 2Ti 1:3; Heb 9:14; 1Pe 3:16, 21

23:2^b Joh 18:22

23:3^c Pui 19:15; Dnp 25:1-2; Mat 23:27; Joh 7:51

4 Cule Paul kiangih dīngpawl in, “Pathian-ih puithiam lu bik na hmuhsuam ding maw?” tiah an ti.

5 ^aCun Paul in, “U le nau pawl, puithiam lu bik a si ti ka thei lo pi; ziangahtile, ‘Na mipawl hotu dokalhin ṭawng sia ṭawng hlah,’ tiih ngan a si,” tiah a ti.

23:5^a Suah 22:28

6 ^aAsinan Paul in mi hrekkhat cu Sadusi an si ih, mi hrekkhat cu Farasi an si ti a theih tikah, Sanhedrin thuṭhentupawl hmaiah cun a au ih, “Pulepawl le unaupawl, keimah cu Farasi-ih fapa, Farasi ka si. Ruahsannak thu le mithi thawhsalnak thu ah thuṭhen dingih kawh ka si,” tiah a ti.

23:6^a Fil 3:5

7 Cutiih a ti hnuah, Farasipawl le Sadusipawl karlakah thuelawknak nasa zet a suak; cule mipungkhawm cu an ṭhenaw. 8 ^aZiangahtile Sadusipawl cun thawhsalnak a um lo, vancungmi siseh, thlarau siseh a um lo tiah an ti. Asinan Farasipawl cun cupawl hmuahhmuah cu an pawm hnget. 9 ^bCun auaw nasa zet a suak ih, Dān zirhtu hrekkhat, Farasi lam ṭangpawl cu an ding ih nasa zetin an êl, “Thu sia zianghman hi pa ah kan hmu lo, vancungmi in simaw, thlarau in simaw a hnenih thu a sim a si ahcun, Pathian kan dodal lo pei uh,” tiah an ti.

23:8^a Mat 22:23; 1Ko 15:12

23:9^b Jer 26:16; Mar 2:16; Luk 23:4

10 Elawknak nasa zet a suah tikah, ralbawipi in Paul kha an băwtthlek thluh pang ding ti a phan ruangah, ralkappawl kha vung feh ih, mipi hnen ihsin Paul kha hramhramih hruai dingin le ralkap khemp ih fehpi dingin thu a pe.

11 ^aAsinan a thaizan ah Bawipa cu Paul kiangah a dīng ih, “Paul, ṭih hlah, ziangahtile Jerusalem ih ka thu na theihter zo vekin, Rom khalah na theihter tengteng ding a si,” tiah a ti.

23:11^a Mat 14:27

Paul Thah an Tum

12 Cule khua a van tikah, Jew-pawl lakih mi hrekkhat cu khua an khângkhawm ih, anmah le anmah siatcamawin, Paul an thah hlanlo ziangkhal ei lo le in loih um dingin an tiaw. 13 Cutiih phiarthupnak a tuahtupawl cu mi 40 hnakih tam an si. 14 Puithiam sâng pawl le miupapawl hnenah an feh ih, “Kanmah le kanmah siatcamawknak thawn kan ṭemṭawnaw zo, Paul kan thah hlanlo, ziangkhal kan ei lo ding. 15 Curuangah atu-ah nanmah le Sanhedrin thuṭhentupawl in Paul kha nan hnenah thaisun ah run hruai dingin, ralbawipi hnenah ruahnak pe uhla, amai thuhla ah famkim deuhin zăwi kan duh tiin tiawter uh. Cule Paul a ra thlen hlanah amah that dingin kan rak tiar cia ding,” tiah an ti.

16 Cule Paul-ih farnuih fapa in cutiih an bawhthup thu a theih tikah, ralkap khemp ah a lut ih Paul cu a va sim. 17 Cun Paul in ralkap 100 hotupawl lak ihsin pakhat kha a ko ih a hnenah, “Hih tlangvalpa hi ralbawipi hnenah hei hruai aw, ziangahtile a hnenah thusim ding a nei,” tiah a ti. 18 ^aCule anih cun a fehpi ih, ralbawipi hnenah a hruai, cule, “Thawngtla pa Paul in a hnenah i ko ih, hih tlangvalpa na hnenih ratpi dingin i dil. Anih in thu lo sim ding a nei,” tiah a ti.

23:18^a Efe 3:1

19 Cun ralbawipi cun tlangvalpa cu a kut in sirah a hruai ih, “Ziang thu so i sim duh?” tiah thu a sut.

20 Cule anih in, “Jew-pawl in thaisun ah Paul kha Sanhedrin thuṭhennak ah run hruai aw tiah lo dil dingin an lung a kim zo. A thuhla kha famkim deuhin theih an duhawter ding. 21 Asinan an thu lung hlah aw, ziangahtile mi 40 hnak tam in amah cu an bawh. Cupawl cu anmah le anmah siatcamawin an ṭemṭawnaw, Paul an thah hlanlo zianghman an ei lo ding ih, an in lo ding. Atu-ah nangmai thutiamkam lawng hngakin an um,” tiah a ti.

22 Cule ralbawipi in tlangvalpa cu, “Ka hnenih na sim mi thilpawl hi zohman sim hlah,” tiah thu a pek ih a tlunter.

Kaisaria ah Paul an Ṭhawn

23 Cule ralkap hotu bawi bik in a ralkap 100 hotu pahnih cu a ko hai ih, “Zan nazi pakua ah Kaisaria khua tiang feh dingin ralkap 200, rang ralkap 70 le fei hmang ralkap 200 timtuah uh. 24 Paul ih to dingah to mi ṭilvapawl timtuah uhla, ram uktu Filix hnenah himdamten va thlah uh,” tiah thu a pe.

25 Ralbawipi cun hitin ca a ngan:

26 ^a“Kei, Klaudias Lisias in ram uktu upat tlak Filix na hnenah ca ka ngan a si: cibai ka lo bûk.

23:26^a Luk 1:3

27 “Jew-pawl in hi pa hi an kai ih thah an tum laiah, Rom-mi a si ti ka thei ih, ralkappawl thawn ka va runsuak. 28 Cule ziangruangah sual an puh ti theih ka duh tikah, amah cu Sanhedrin hmaiah ka hruai. 29 An Dān thusuhnak thu ah sual an puh ih, thihnak tlak le thawngtlaknak tlak thu zianghman a um lo ti ka hmu. 30 Cule Jew-pawl in hi pa thahnak ding khua an khâng ti in sim tikah amah cu na hnenah ka rak kuat lohli, cule amah sual puhtupawl khal amah sual an puhnak thu cu na hmaiih thlen dingin ka sim hai. Damten,” tiin.

31 Cun thupek an si vekin ralkappawl cun Paul cu an fehpi ih, zan ah Anṭipaṭris khua tiang an hruai. 32 A thaisun ah ralkappawl in Paul hnenih fehtu ding rang ralkappawl cu an tân ta ih, an ralkap khemp lamah an tlungkir. 33 Rang ralkappawl cu Kaisaria khua an thlen tikah, cakuat cu ram uktu hnenah an pek ih, Paul khal cu a hnenah an ap. 34 Cule ram uktu pa cun cakuat cu a siar ih, amah cu khui ram in a si ti a sut. Cule Silisia ram ihsin a si ti a theih tikah, 35 Paul hnenah, “Sual a lo puhtupawl an thlen tikah, na thuhla cu ka ngaithla leh ding,” tiah a ti. Cule Paul cu Herod-ih praetorium sungah ret dingin thu a pe.

24

Filix hmaiih Paul Thuṭhensaknak

1 Cun ni nga hnuah puithiam lu bik Ananias cu miupa hrekkhat le sihni Tertullas thawn Kaisaria khua ah an vung suk. Sihni pa in ram uktu pa hnenah Paul sual an puhnak thu cu a thlen.

2 Cule Paul cu an ko ih, Tertullas cun Filix hnenah Paul-ih thu cu hitin sim a thawk, “Nangmai hnuaiah cān reipi sung hnangamten kan um zo ih, na remruahnak in hi miphun ṭhansonak nasa zet na thlen zo. 3 ^aZah tlak miropi Filix, hmun kip ah le ziangtik lai khalah lungawinak nasa zet thawn kan lo cohlang ringring a si. 4 Sikhalsehla reipi ka lo hnaihnăwklonak dingah, zangfahten ṭawngkam málte in ngaisak hram dingin ka lo dil. 5 Ziangahtile hi pa hi buainak tuahtu a si ti kan hmungah zo, leitlun pumpi ih Jew-pawl hmuahhmuah héltertu le ^bNazir-mipawlih sakhua hruaitu a si. 6 Temple sung bawrhbangter khal a tum ih, kan kaih; kanmai Dān vekin thuṭhen kan duh. 7 Asinan ralbawipi Lisias a ra ih, kan kut ihsin hramhramin a ra hruai. 8 Lisias cun Paul sual puhtupawl kha na hnenah ra dingin thu a pe hai. Amah cu nangmah rori in na zingzawi tikah, sual kan puhnak thil zaten na theikim thei ding,” tiah a ti. 9 ^cCule Jew-pawl khal an lung a kim ih, hi thilpawl hi a dik a si, tiah an ti.

24:3^a Luk 1:3

24:5^b Nazir-mipawl: Jesu dungthluntu hmuhsuamnak ṭawngkam a si. Khristian tinak tluk a si.

24:9^c 1Th 2:16

10 Cun ram uktu pa in Paul kha thusim ve dingin a kut a hei zâp ih, Paul cun a sawn ih a hnenah, “Kum tampi sung hi miphun thuṭhentu na si ti ka lo theih ruangah, lungawi zetin keimah le keimah ka humaw a si. 11 Ziangruangahtile Jerusalem ah Pathian be dingin ka hung fehnak hi ni hleihnih hnakin a tam hrih lo ti cu áwlten na thei ko ding. 12 Cule temple kulh sungah zo thaw hmanih thu kan relkhawm in hmu lo, sinakok ah siseh, khawpi sungah siseh mipi ka căwkbuai lo. 13 Cule atu-ih sual in puhnak thilpawl cu a dikzia khal na hnenah an lo hmuh thei lo ding. 14 Asinan pawl hran an ti mi ^aLamzin zulhin, Dān cazual sung le Profetpawlih cazual sungih ngan mi thil hmuahhmuah zumin, in thlahtupawl Pathian ka bia ti na hnenah ka phuang a si. 15 ^bMidingfelpawl le midingfel lo pawl cu thihnak ihsin an thosal leh ding tiah anmah vek thothoin, Pathian ah ruahsannak ka nei. 16 Cumi ruangah, Pathian lamah le minung lamah sia le ṭha theihnak fiang nei dingin ka zuam ringring.

24:14^a Lamzin: 9:2 simfiangnak zoh aw.

24:15^b Mat 25:46

17 ^a“Kum reipi sung ka um nawn lo hnuah, ka miphun hnenah băwmnak thilpekpawl le thilhlănpawl pe dingin ka vung feh. 18 Jew mi hrekkhat Asia ram ihsin an ra ih, temple kulh sungih keimah le keimah ka thenfaiawk in hmu. Ka hnenah mipi an um lo ih, buainak zianghman ka tuah lo. 19 Sual puh ding in neih asile, na hmaiah anmah rori in sual in puh hai seh. 20 Cu lo asile hi tawkih a um mipawl hin Sanhedrin hmaiih ka rak dīn laiih, keimah ih diklonak an hmuh asile anmah rori in rel hai seh. 21 Hih thil pakhat lawng hi a si ko ding, an hmaiih ka dīn laiah, ‘Mithi thawhsalnak thu ruangah tuihsun ah nan hmaiah thuṭhenin ka um a si,’ tiah ka au,” tiah a ti.

24:17^a Rom 15:25-28; 1Ko 16:1-4, 15; 2Ko 8:1-4; Gal 2:10

22 Cupawl cu Filix in a theih tikah, Lamzin thu cu fiang zetin a theih ruangah, “Ralbawipi Lisias a rat tikah, na thu cu ka relcat leh ding,” tiah thurel lai cu a bānter. 23 Cule ralkap 100 hotu pa kha Paul kil dingin le zalĕnnak málte pe dingin le a rualpipawl in a ṭulhai mipawl tawlrelsak dingin thu a pe.

24 Ni málte a rei hnuah, Filix cu a nupi ^aDrusilla thawn an ra kirsal, Drusilla cu Jew-mi a si. Filix in Paul a ko ih, Khrih zumnak thuhla a sim mi kha a ngai. 25 ^bPaul in dingfelnak thu, sūpawknak thu le a ra thleng ding mi thuṭhennak thupawl a rel tikah, Filix cun a ṭih ih, “Atu cu feh hrih ko aw; cān remcâng ka hmuh tikah ka lo ko leh ding,” tiah a let. 26 Cuih cān ah Filix cun Paul in a suahnak dingah paisa in pe ding ti a beisei. Curuangah amah cu a ko leuhleuh ih, a be ṭheu.

24:24^a Drusilla: Herod Agrippa I-ih fanu a si. A pasal cu Filix a si.

24:25^b Jer 36:16; Gal 5:23; 1Th 5:6; 1Pe 4:7; 2Pe 1:6

27 Asinan kum hnih a rei hnuah, Porsias Fesṭas in Filix-ih ai a run awh. Filix cun Jew-pawl lungawiter a duh ruangah, Paul cu thawng sungah a tān ta.

25

Fesṭas hmaiih Paul Thuṭhensaknak

1 Fesṭas cu cuih ram a thlennak ni thum a rei hnuah, Kaisaria ihsin Jerusalem ah a hung feh. 2 Cun puithiam lu bik le Jew hruaitupawl in a hnenah Paul sual an puhnak thuhlapawl cu an rak sim. 3 Annih cun Paul cu lamzin ah rak bawh ih that dingin khua an khanthup ruangah, Jerusalem ih thlah dingin Fesṭas an dil. 4 Asinan Paul cu Kaisaria ah ret a si ding ih, amah rori khal a feh ding a si tiin Fesṭas in a let hai. 5 Anih in, “Curuangah nan lakih thuneihnak neitupawl kha ka hnenah nan ra thei a si. Hi paih thu ah sualralnak ziang simaw a um pang asile, sual an puh thei ding,” tiah a ti.

6 Fesṭas cu an lakah ni hra hnakih tam a cām hnuah, Kaisaria ah a suk. A thaisun ah thuṭhennak tokham parah a to ih, Paul hruai dingin thu a pe. 7 ^aPaul a thlen hnuah, Jerusalem ihsi ra, Jew-pawl cu a kimvelah an dīng ih, a dik rori a si tiih an lăngter thei lo mi, nasa zetzetin sual tampi an puh. 8 Paul cu amah le amah a humaw ih, “Jew-pawlih Dān dokalhin siseh, temple dokalhin siseh, Kaisar dokalhin siseh zianghman ka tuah lo,” tiah a ti.

25:7^a Mar 15:3; Luk 23:2, 10

9 Asinan Fesṭas cun Jew-pawl lungawiter a duh ruangah, Paul cu a sawn ih, “Jerusalem ah hung so in, cu tawkah sual an lo puhnakpawl ka hmaiih suh na duh maw?” tiah a ti.

10 Cule Paul in, “Thuṭhen ka sinak ding hmun, Kaisar-ih thuṭhennak tokham hmaiah ka ding a si. Na theihfiang zet vekin, Jew-pawl hnenah thil sual zianghman ka tuah lo. 11 Cutiih ka tinak săn cu dingfellonak le thihnak tlak thil sual ziang simaw tal ka tuah asile, thih ka êl lo. Asinan hipawl ih sual in puh mi pakhat hman a dik lo a si ahcun, zohman in an kut ah in pe thei lo, Kaisar hnenah lu ka pu ding,” tiah a ti.

12 Cun Fesṭas cun a khawnsil upapawl thawn thu an rawnawk hnuah, “Kaisar hnenah na thlen maw? Kaisar hnenah cun na feh ding a si!” tiah thu a let.

Fesṭas in Siangpahrang Agrippa Thu a Ráwn

13 Ni tawkfang hnuah Siangpahrang ^aAgrippa le ^bBernis cu Fesṭas cibaibûk dingin Kaisaria khua an ra thleng. 14 Cu tawkih ni tampi an um hnuah, Fesṭas in Paul-ih thuhla cu siangpahrang hnenah a rel, “Filix in thawng a thlak ta mi pa hi tawkah hin a um, 15 Jerusalem ih ka um laiah, puithiam sâng pawl le Jew-pawlih miupapawl in sual an puh ih amah cu thuṭhen dingin in dil. 16 Kei in an hnenah, ‘Sual an puh mi pa in sual a puhtupawl kha hmaităwnin sual an puh mipawl ihsin amah le amah humawknak cān nei seh, cumi a tuah hlanah thi dingih pek cu Rom-mipawlih nunphung a si lo,’ tiah ka sawn hai. 17 Curuangah an ratkhawm tikah, tlaiter loin a thaisun ah thuṭhennak tokham parah ka to ih, cu pa cu rak hruailut dingin thu ka pe. 18 Sual a puhtupawl cu an dīng ih an ṭawng tikah, ka beisei vekin sual puh thei mi an nei lo, 19 ^ccuhnakin anmai sakhua thuhla le Jesu an ti mi pa a thi ih a nungsal a si tiih Paul ih a sim mi thu ah elnak hrekkhat an nei sawn. 20 Cule cuih an thuelnakpawl cu ziangti lamih zăwihnit ding ti ka theih lo ruangah, Jerusalem ah fehin cu tawkih sual an puhnakpawl rel sehla a duh le duh lo thu ka sut. 21 Asinan a thuhla cu Augasṭas ih relcat dingin hi tawkah in ret uh tiin Paul in a ngĕn ruangah, Kaisar hnenih ka kuat hlan sung ṭhaten kilhim dingin thu ka pek,” tiah a ti.

25:13^a Agrippa: Herod Agrippa I-ih fapa Herod Agrippa II a si. Herod Agrippa I hi nauhakpawl thattu Herod-ih fapa a si.

25:13^b Bernis: Herod Agrippa I-ih fanu a si. Herod Agrippa I hi nauhakpawl thattu Herod-ih fapa a si.

25:19^c Apo 18:15; 23:29

22 Cu tikah Agrippa cun Fesṭas hnenah, “Keimah rori khal in cu paih thusim ngaithlak ka duh a si,” tiah a ti.

Fesṭas in, “Thaisun ah na ngaithla ding,” tiah a ti.

23 Cule a thaisun ah Agrippa cu Bernis thawn an ra thleng, tawnkhawmawknak pindan sungah cun ropi zetin an rung lut ih, ralbawipipawl le khaw sung upapawl in an thlun. Fesṭas ih thupeknak in Paul cu an run hruailut. 24 Cule Fesṭas in, “Siangpahrang Agrippa le kan hnenih a um mi hmuahhmuah in hi pa hi nan hmu, Jerusalem ah siseh, hi tawk khalah siseh, Jew mipungkhawm zaten a thuhla ka hnenah an thlen ih, hi pa cu nung ding a tlak nawn lo tiah an ausuak. 25 Asinan hi pa hin thihnak tlak zianghman a tuah lo ti ka hmu, cule amah rori in Augasṭas hnenih a thuhla a thlĕn ruangah kuat dingin amah cu ka ruatcat zo. 26 Ka bawipa Augasṭas hnenih a thuhla ka ngan tikah, a cekciih ngan ding zianghman ka nei lo. Curuangah nan zate hmaiah, a hleicein Siangpahrang Agrippa na hmaiah ka hun suahpi a si, kan zăwihnitngah hnuah ngan ding ziang tal ka neih pangah tiah a si. 27 Ziangahtile thawngtla pakhat dokalhin sual an puh mi a cekci fiangter loih kuat cu a awm lo ding tiah ka ruat,” tiah a ti.

26

Agrippa hmaiah Paul

1 Cun Agrippa in Paul hnenah, “Nangmai hrangah na thuhla na sim ding ka lo siang a si,” tiah a ti. Cule Paul cu a kut a hun pharh ih a thiamthu a rel. 2 ^a“Siangpahrang Agrippa, tuihsun ah na hmaiih Jew-pawlih sual in puh mi thil hmuahhmuah ihsin ka thiamthu ka rel ding ruangah mithlawsuak ah ka ruataw. 3 Nangmah cu Jew-pawl lakih nunphung le elawknak hmuahhmuah thei zet tu na si ruangah ka lung a awi hleice. Curuangah thinsauten i rak ngaithla hram aw tiah zangfah ka lo dil.

26:2^a Sam 119:46

4 ^a“A thawktein Jerusalem ih ka mipawl lakah ka um a si. Jew-pawl hmuahhmuah in ka nauhak lai ihsin ka nuntukhawsakdān cu an thei. 5 ^bA tir ihsin in thei tuk zo, an duh asile, kan sakhua ih pawl fekbik Farasi pakhat ka sizia an simfiang thei ding. 6 ^cCule kan pupápawl hnenah Pathian ih a pek mi thutiam ruahsannak ka neih ruangah, atu-ah thuṭhensak siin ka ding a si. 7 ^dCuih thutiam cu kan hnám hleihnih pawl cun a sun a zan ṭhahnemngai zetin Pathian an biak ruangah congah ding ruahsannak an nei. Siangpahrang Agrippa, cuih ruahsannak thu ruangah Jew-pawl in sual in puh a si. 8 Pathian in mithi a thoter ti cu ziangah so zum tlak loih nan ruah?

26:4^a Gal 1:13-14; Fil 3:5

26:5^b Fil 3:5

26:6^c Rom 15:8

26:7^d 1Th 3:10; 1Ti 5:5; Jam 1:1

Paul in a Thlĕngawknak Thu a Sim

9 ^a“Thungaiten, Nazareth Jesu hmin dokalhin thil tampi ka tuah ding tiah ka rak ruat dah. 10 Cumi cu Jerusalem ih ka rak tuah dah mi kha a si, puithiam sâng pawl hnen ihsin thuneihnak ka ngah ih, mithiang tampi thawng ah ka thlak; cule thah an si tikah ka lungkimpi hai. 11 ^bCule sinakok tin ah cawhkuan ka pe hai ṭheu ih, lo theih loin Pathian thangsiatter hai dingin ka rak zuam. Anmah dokalhin ka thin a heng tuk ih, anmah hrem dingin ram dang khawpipawl tiangin ka thleng.

26:9^a Joh 15:21; 16:2; 1Ti 1:13

26:11^b Mat 10:17

12 “Cutin puithiam sâng pawl hnen ihsin thuneihnak le thupek thawn Damaskas khua ah ka feh. 13 Maw siangpahrang, sun laifangih lamzin ih ka feh rero laiah, ni hnakih a tlesawn mi êng cun keimah le ka fehpipawl kimvelah van ihsin a run tlêt kha ka hmu. 14 ^aCule kan zaten leilung ah kan tlu ih, ^bHebru ṭawng in aw pakhat in ka hnenah, ‘Saul, Saul, ziangah so i hrem rero? Na hrangah fung zum sit cu a har mi a si,’ i run ti ka thei.

26:14^a Joh 5:2

26:14^b Hebru ṭawng: Luk 23:38 simfiangnak zoh aw.

15 “Cun kei in, ‘Bawipa, zo so na si?’ tiah ka ti.

“Cule anih in, ‘Na hrem rero mi Jesu ka si. 16 ^aTho awla, na ke in dīng aw; ziangahtile na hmuh mi thilpawl le ka lo hmuh lai ding mi thilpawl hrangih rawngbawltu le theihpitu dingah ka lo hril zo, cumi tumtahnak ruangah na hnenah ka rung lang a si. 17 ^bNangmah cu atu-ah Jew-pawl le Zentelpawl hnenah ka lo thlah ih, an hnen ihsin ka lo runsuak ding. 18 ^cCucu an mit ka vanternak dingah le thim ihsin tleu ah le Setan thuneihnak ihsin Pathian hnenih an kirsal ih sualpawl ngaidamnak an conak dingah le keimah in zumnak thawngin tithianhlim mipawl thawi ro an cotlangnak dingah ka lo thlah a si,’ tiah i ti.

26:16^a Eze 2:1; Dan 10:11

26:17^b Jer 1:8

26:18^c Sam 18:28; Isa 35:5; 42:7, 16; Luk 24:47; Efe 5:8; Kol 1:13; 1Pe 2:9

19 ^a“Curuangah Siangpahrang Agrippa, van ihsin larnak ka hmuh mi cu lung loin ka rak um lo. 20 ^bCuhnakin a hmaisabikah Damaskas khua le Jerusalem le Judia peng pumpi le Zentelpawl hnenah, annih cu lungthlĕng ih Pathian lam hawi dingin le lungthlĕngnak thawi milaw mi hnaṭuan ṭha ṭuan dingin thu ka sim hai sawn. 21 Himi thupawl ruangah temple kulh sungih ka um laiah, Jew mi hrekkhat in in kai ih, thah in tum. 22 ^cCuruangah Pathian ih băwmnak in tuihni tiang ka ding ih, mitum le mite pawl hnenah Mosi le Profetpawl in a ra thleng ding an ti mi siarlo a dang thil ka theihter hai lo. 23 ^dAn ti mi cu, Khrih in a tuar ding ih, anih cu mithi lak ihsi tho hmaisabik a si ding, Jew-pawl hnen le Zentelpawl hnen khalah tleu thu a phuang ding,” tiah Paul in a ti.

26:19^a Isa 50:5

26:20^b Jer 18:11; Mat 3:8; Luk 3:8

26:22^c Luk 24:27, 44

26:23^d Mat 16:21; Luk 2:32; 1Ko 15:20, 23; Kol 1:18; Thu 1:5

24 ^aCuti vekih a thiamthu a rel laiah, Fesṭas cu aw ring zetin a au ih, “Paul, na â a si hi! Tam tuk na zirnak in a lo atter zo a si hi!” tiah a ti.

26:24^a Joh 7:15; 10:20; 1Ko 4:10

25 Asinan Paul in, “Zah tlak Fesṭas, ka â riai lo, thutak thupawl le ruah tlak thupawl ka sim sawn a si. 26 Ziangahtile hih thilpawl cu siangpahrang in a thei ih a hnenah ralṭha zetin ka sim a si. Ziangahtile hih thil hmuahhmuah hi a kĕlkawm ih tuah mi an si lo ruangah, siangpahrang in a thei ṭheh ti ka theifiang. 27 Siangpahrang Agrippa, Profetpawl ih sim mi na zum maw? Na zum ti ka thei,” tiah a ti.

28 Cun Agrippa in Paul hnenah, “Hih cān tawite sungah Khristian cang ko i hmĭn zik leuleu a si si!” tiah a ti.

29 Cule Paul in, “Hi ka kut ih thir cikcin siarlo, nangmah lawng si loin, tuihsun ih ka thu a theitu hmuahhmuah khal keimah vek nan si zik lawng si loin, nan si pumhlum ding hi Pathian hnenih ka thlacam mi a si,” tiah a ti.

30 Cuih thilpawl a sim ṭheh tikah, siangpahrang, ram uktu le Bernis le a hnenih topawl cu an tho. 31 Cule hmun dangih an suahsan hnuah, pakhat le pakhat, “Hi pa hin thihnak tlak le thawngtlaknak tlak zianghman a tuah lo,” tiah an tiaw.

32 Cun Agrippa in Fesṭas hnenah, “Amah in Kaisar hnenah a thuhla hi thlen lo sehla cu, kan luatter thei mai ding nân,” tiah a ti.

27

Rom ah Paul a Feh

1 Cule Italy ram ah lăwng in kan feh ding tiah an relcat, Paul le a dang thawngtla hrekkhat cu Augasṭas-ih ^aralkap bur lakih ralkap 100 hotu Julias kut ah an pe. 2 Cun Adaramiṭiam khua ihsi ra, Asia ram lăwng cawlhnak kip ih cawl phah vivo ding mi lăwng ah kan to ih, kan feh. Thessalonika khua ihsin Masidonia-mi pakhat Aristarkas khal kan hnenah a tel ve.

27:1^a ralkap bur: Mat 27:27 simfiangnak zoh aw.

3 ^aCule a thaisun ah Sidon khua kan thleng. Cule Julias in Paul cu ṭha zetin a tuamhlawm ih a rualpipawl in a ṭulhai mi an pek thei nak dingah Paul kha an hnenih va feh a siang. 4 Cu tawk ihsin lăwng in kan păwksuak tikah thli cu kanmah hmaităwn zawngin a hrang, curuangah Saipras tikulh phenin kan feh. 5 Cule Silisia ram le Pamfilia ram naih tifinriat kan lan hnuah, Lisia peng ih um, Mira khawpi kan thleng. 6 Cu tawkah ralkap 100 hotu in Italy ram ih feh ding mi Alexandria khua ihsi ra, lăwng a hmu ih, cuih lăwng sungah in ret. 7 ^bNuamte ten ni tampi kan feh hnuah, harsa zetin Sinidas khaw zawn kan thleng. Cu tawk lam ihsin fehbêt ding cu thli in in kham ruangah, Salmone khat lam ral Khirit tikulh phenin kan feh. 8 Harsa zetin cucu kan lan ih, lăwng cawlhnak “Hmun Mawi” tiih an kawh mi hmun kan va thleng. Cucu Lasi khawpi kiangah a si.

27:3^a Mat 11:21

27:7^b Tit 1:5

9 ^aCān tampi a liam zo ih, atu-ah cun lăwng thawi khualtlawn cu a ṭihnung thlang, ziangahtile ^brawl ulh ni a liam zo ruangah, Paul in an hnenah ralrinnak a pe hai. 10 An hnenah, “Pulenuh, kan khualtlawnnak cu ṭihnungza a si ti ka hmu, lăwng le nan phurh mi thilri lawng si loin, kan nunnak hrang khalah siatralnak nasa tak a si ding,” tiah a ti. 11 Sikhalsehla ralkap 100 hotu cun Paul ih thusim mipawl hnakin lăwng mâwngtu bawi le lăwng neitupawlih thu a zum sawn. 12 Cule an lăwng cawlhnak cu thlatang cān ah cawlhnak a ṭhat lo ruangah, mi tamsawn in feh vivo dingin an lung a kim. Finik khua thlen thei ding le cu tawkih thlatang sung um an beisei. Cucu Khirit tikulh ih lăwng cawlhnak hmun a si ih, nitlaknak thlang lam le nitlaknak sak lam hawiin a um.

27:9^a Pui 16:29-31; Mip 29:7

27:9^b rawl ulh ni: Cucu tlennak ni, September thla cem lam a si. Himi cān hrawngah hin thlipi ruangah tifinriat ih khualtlawn a ṭihnung ṭheu.

Thlipi

13 Thlang lam thli nemteih a hung hran tikah, an duhthusam hmungah zo ah an ruat. Cule an păwk ih, Khirit tikulh kapin an feh. 14 ^aAsinan a rei hlanah, ^bZurokhalidon an ti mi thli sia cu, tikulh lam ihsin a rung thawk ciamco. 15 Thlipi cun kan lăwng a run nuai ih, thli lakah hmai lam kan pan thei nawn lo ruangah lăwng cu kan thlah ih, thli cun in fehpi vivo. 16 Cule Kalauda an ti mi tikulh fate phenin kan tlan laiah harsa zetin văwkkuang lăwng cu kan hum. 17 Cuih hnuah ^cvăwkkuang lăwng cu lăwng kimvelah hridai in hnget zetin an ṭawn. Sirṭis vunnel pâwng rawtngah pang an phan ruangah, lăwng puanzar an ṭhum; cule thli in a fehpi vivo. 18 ^dCule thlipi in kan lăwng a hlăwn sukso tuk ruangah, a thaisun ah lăwng sungih phurh rit pawl hlăwn an thawk. 19 A ni thumnak ah kan kut rori in lăwng thilripawl kan hlăwn. 20 Ni tampi sung ni siseh, arsipawl siseh an lang lo ih, thlipi cu nasa zetin a hrang ringring, luat dingih kan ruahsannak zaten a hlo ṭheh.

27:14^a Mar 4:37

27:14^b Zurokhalidon: Grik ṭawng a si ih, nisuahnak thlang lam thli a si.

27:17^c văwkkuang lăwng: Buainak an tawn tikih humhimawknak ding hrangih lăwngpi ih an phurh ṭheu mi lăwngte a si.

27:18^d Jon 1:5

21 Rawl ei loin ni tampi an um hnuah, Paul cu an lakah a dīng ih, “Ruallenuh, nannih in ka thusim rak ngaiin Khirit tikulh ihsin rak păwksuak lo nungla cu, hiti vek siatralnak le hlohnak hi kan táwng lo ding. 22 Asinan atu-ah cun thinhnangamten um dingin ka lo ngen hai a si, ziangahtile zo-ih nunnak hman a hlo lo ding, lăwng lawng kan hloh ding. 23 ^aZiangahtile i neitu le a rawng ka bawl, Pathian-ih vancungmi cu mizan ah ka kiangah a dīng ih, 24 ‘Paul, ṭih hlah, nangmah cu Kaisar hmaiah na dīng ding; ngai hnik, nangmah thawi lăwng ih khualtlawngpawl hmuahhmuah ih nunnak cu Pathian in na hnenah a lo pe zo,’ tiah i ti. 25 ^bCuruangah pulenuh, hnangamten um uh, ziangahtile Pathian ka zum ih, i sim mi vek cekciin a cang taktak ding. 26 Sikhalsehla tikulh pakhat khat ah tāng ko kan tlân tengteng ding a si,” tiah a ti.

27:23^a Rom 1:9; 2Ti 4:17

27:25^b Rom 4:20-21

27 A ni hleilitnak zan ah thli cun a suk a so ah Adria tifinriat ah cun in nuai ciamco, zanṭim hrawngah lăwng mâwngtupawl in khawmual kan naih thlang ding tiah an ruat. 28 Ti thûk lam an tah tikah, ti cu pi 120 a thûk ti an thei. Málte hladeuh an feh hnuah an tahsal ih, pi 90 a thûk ti an thei. 29 Cun lungpipawl kan sawh pang ding ti an phan ruangah, lăwng mei ihsin thir kâwnpi pali an thlak ih, khawvan ding dilin thla an cam. 30 Cule lăwng mâwngtupawl cu tlansuah an duh ih, lăwng hmai lam ihsin thir kâwnpi pawl thla ding vekin an umawter ih, ^avăwkkuang lăwng cu tifinriat sungah nuamte ten an thlak. 31 Paul in ralkap 100 hotu le ralkappawl hnenah, “Hipawl hi lăwng sungih an um lo asile, nan luat thei lo ding,” tiah a ti. 32 Cun ralkappawl in văwkkuang lăwng hri cu an sâtcat ih an fĕnhloter.

27:30^a văwkkuang lăwng: Câng 17 simfiangnak zoh aw.

33 Cule khua a van zik zawngah an zaten rawl ei dingin Paul in nasa zetin a ngen hai, an hnenah, “Zianghman ei lo le rawl loih nan hngahnak a ni hleilitnak a si zo. 34 ^aCuruangah rawl ei dingin ka lo fawrh a si. Harhdamnak ṭha nan neihnak dingah nan ṭul a si, ziangahtile nan lakah mi zohman in a lu ih a sám phang khat hman a hloh lo ding,” tiah a ti. 35 ^bCuih thupawl a sim hnuah, sang a lâk ih an zate hmaiah Pathian hnenah lungawi thu a sim. Cule a phel ih ei a thawk. 36 Cumi cun an zaten an hna a ngamter ih, annih khal in rawl an ei ve. 37 Lăwng sungih um mi zaten 276 kan si. 38 ^cAn ei khawp hnuah, lăwng zângter dingah sangvutpawl cu tifinriat sungah an hlăwn.

27:34^a Mat 10:30

27:35^b Mat 14:19

27:38^c Jon 1:5

Lăwng Siatnak

39 Khua a van tikah, khui khawmual a si ti an thei lo; asinan ti kĕl ih tikap lei an hmu ih, a cang thei asile, cu tawkih an lăwng mawnluh an tum. 40 Cule thir kâwnpi pawl cu an sâtcat ih, tifinriat sungah an tān ta. Hri in an ṭawn mi lăwng hlaunak cu an phawih; cule lăwng hmai lam puanzar kha thli ih hrăn dingin an zar ih, tikap lam an pan. 41 ^aAsinan tifinriat pahnih tawnawknak hmun ah kan thleng ih, lăwng cun lei a sawh, cule a hmai lam zum a dawtaw hnget ih ṭhawn theih loin a um. Tisuar in a mei cu vuakparh a thawk.

27:41^a 2Ko 11:25

42 Thawngtlapawl kha ti leuhsuakin an tlân pang ding ti ralkappawl in an phan ruangah, thah an duh. 43 Asinan ralkap 100 hotu pa in Paul humsuak a duh ruangah, an thil tum mi cu tuahsuak lo dingin a dawn hai. Ti leuh thei pawl cu ti sungih dawp hmaisa ih khawmual lamih leuh dingin thu a pe. 44 A tāng mipawl cu thing pheng pawl simaw, lăwng kekkuai mi simaw toin suak dingin thu a pe. Cuti cun an zaten khawmual ah himdamten an thleng.

28

Malṭa Tikulh Ah

1 Cun himdamten tikap an thlen tikah, cuih tikulh cu Malṭa tikulh a si ti an thei. 2 Cule barbaros-mipawl cun nasa zetin kan parah ṭhatnak an langter; cuih cān ah ruah a sur ih a daih tuk ruangah annih cun meisa in tihsak ih ṭha zetin in cohlang. 3 Paul in zanthing tăwm khat a khawm ih, meisa ah a thlak, cule a sat ruangah rulngân a suak ih a kut a cuk. 4 ^aCu tawk tikulh ih minungpawl cun a kut ih rul thlaiaw an hmuh tikah, pakhat le pakhat, “Hi pa cu laithat a si tengteng ding, tifinriat ihsin himdamten a suak ko nân, ^bDiknak cun nun sau a siang lo a si hi!” tiah an tiaw. 5 ^cAsinan Paul in rul cu meisa sungah a thingtla ih amah cu a zianghman a pawi lo. 6 Sikhalsehla a thling ding ih hmakhatteah tlu-in a thi ding, tiah an ruat. Asinan reipi an zoh hnuah, a parah thil dang zianghman a cang lo ti an hmuh tikah, an thinlung an thlĕng ih, “Hi pa hi pathian a si,” tiah an ti.

28:4^a Mar 16:18; Luk 13:2

28:4^b Diknak: Grik ṭawng in Dike a si ih, amah hi diknak khawzingnu a si tiih zumlotupawl ih an zum mi a si.

28:5^c Luk 10:19

7 Cuih cān ah tikulh hotu pa Publias an ti mi in cuih hmun kiangkapah lóram a nei, cu pa cun ni thum sung ṭha zetin in cohlang. 8 ^aCule hitin a si, cuih cān ah Publias-ih pa cu khawsik le santēn thi thawhin a na ih a it. Paul cu a hnenah a lut ih thla a camsak hnuah, a parah a kut a suang ih a damter. 9 Cutiih a tuah ruangah cuih tikulh ih um nathri nei zaten an ra ih, annih cu damter an si. 10 ^bUpatnak tampi in pek, lăwng in feh kan tum tikah, kan ṭul mi thil hmuahhmuah in pe.

28:8^a Jam 5:14

28:10^b Sam 15:4

Rom ah Paul a Thleng

11 Thla thum hnuah thlatang sung hmuahhmuah tikulh ih um, Alexandria khua ihsi ra, hminsinnak dingih fapa phir zuk cuang mi lăwng in kan păwk. 12 Cule Sirakus khawpi ah kan cawl ih, cu tawkah ni thum sung kan câm. 13 Cu tawk hmun ihsin suakin kan helkûal ih, Rezium khawpi kan thleng. Ni khat hnuah thlang lam thli a hrang ih, a ni hnihnak ah Puteoli khua kan thleng. 14 Cu tawkah unaupawl kan hmu ih, an hnenah ni sarih sung cām dingin in sawm. Cule Rom lam panin kan feh. 15 Rom ih unaupawl in kan thuhla an theih tikah, Appias Bazaar khua le Khualbûk Pathum khua tiang in hmuak dingin an ra. Paul in a hmuh hai tikah, Pathian hnenah a lung a awi ih a hna a ngam. 16 Rom kan thlen tikah, ralkap 100 hotu pa in thawngtlapawl cu thawngtla kiltu hotu bik hnenah a ap; asinan Paul cu amah kiltu ralkap pakhat thawn amah te lawng cêng dingin a siang.

Paul le Jew Hruaitupawl

17 Cule hitin a si, ni thum hnuah Paul in Jew-pawl lakih an hruaitupawl a kokhawm. Cutin an ratkhawm tikah an hnenah, “Pulepawl le unaupawl, kan mipi le kan pupápawlih nunphung kalh zawngin zianghman ka tuah lo, cuti cingin Jew-pawl in Jerusalem ihsin Rom-mipawl hnenah thawngtla pakhat dinhmun in in ap. 18 Rom-mipawl in in zăwihliah tikah thlah in duh, ziangruangahtile thihnak tlak sual ka tuah lo ti an hmu. 19 Asinan Jew-pawl in dokalhin an el tikah, lo theih loin Kaisar hnenah lu ka pu a si; ka mipipawl dokalhnak zianghman ka nei lo. 20 Curuangah nanmah lo hmuh le nan hnenih thu lo sim ka dilnak săn a si. Thir cikcin ih in ṭawnnak săn cu Israel-mipawlih ruahsannak ruangah a si,” tiah a ti.

21 Cun annih in a hnenah, “Nangmai thu thawn pehparin Judia peng ihsin cakuat zianghman kan ngah lo, cule cu tawk ihsi ra, unaupawl lakih zohman in na thuhla zianghman an rel lo ih, na thuhla sia zianghman an rel fawn lo. 22 Asinan na ruahdān na hnen ihsin kan ngai a ṭha ding, tiah kan ruat; ziangahtile hmun kip ah hipawlih thuhla dokalhnak rel a si ti kan thei,” tiah an ti.

Rom ih Paul Thusimnak

23 ^aCule ni an tĭn hnuah a riahnak hmun ah mi tampi an ra ih, zing ihsin zan lam tiang Pathian uknak thu cu an hnenah a simfiang ih, fimkhur zetin a theihter hai. Mosi-ih Dān cazual le Profetpawlih cazual sung ihsin Jesu-ih thuhla in hmĭn thei hai dingin a zuam. 24 Cule a sim mi thu cu mi hrek in an zum ih, mi hrek cun an zum lo. 25 ^bCun pakhat le pakhat an lung a rual lo, an ṭhenawk hlanah Paul in netabikah ṭawngkam pakhat a rel, “Thlarau Thianghlim in kan pupápawl hnenah profet Isaiah hmangin thu dik zetin a sim. 26 A sim mi thu cu,

28:23^a Mat 3:2

28:25^b Heb 3:7

‘Hih minungpawl hnenah va feh awla,
“Ngaithla na cingin, nan theithiam lo ding.
Hmu na cingin, theihthiamnak thawn nan hmu lo ding.
27 ^aZiangahtile hi minungpawlih thinlung cu a cawlăwl ih,
Hnaset vekin an um, an mit khal an rak sîng.
Cu lo asile an mit in an hmu ding ih, an hna in an thei pang ding,
Cu lo asile an thinlung in an theithiam ding, cule an hawikir ding ih,
Ka damter hai pang ding,” tiah sim aw,’

28:27^a Sam 119:70; Isa 6:9-10; Mat 13:15

ti hi a si.

28 ^a“Curuangah Zentelpawl hnenah Pathian rundamnak cu pek a si zo ti le cumi cu annih in an ngaithla ding ti kha thei uh!” tiah a ti. 29 Cule cuih thupawl a sim hnuah, Jew-pawl cu an fehhlo ih, anmah le anmah lakah nasa zetin an relkhawm.

28:28^a Luk 2:30-31

30 Cun Paul cu amai sān mi inn ah kum hnih khêng a um ih, a hnenih ra hmuahhmuah a cohlang hai. 31 ^aRalṭha zet le khamtu zohman um loin, Pathian uknak thu phuang le Bawipa Jesu Khrih thuhla zirhin a um ringring.

28:31^a Mat 4:23