BibleThianghlim – Kolosa

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Kolosa

1 2 3 4

A ngantu: Paul
A siartu: Kolosa khua ih zumtupawl
Ngan kum: A.D. 60

Kolosa khua hi Asia Minor, Efesa ihsin nisuahnak lam peng 100 hrawng hlatnak ah a um ih, Hierapolis (4:13) le Laodisia (2:1; 4:16) thawi naihaw a si. Kolosa khua hi sumdawnnak zinpi kapih um a si bangin leitlun hmun kip ih um mipawl a hîp zet.

Kolosa le Loadisia khawpipawl ah Paul a thleng dah lo nân, Bawipa in cuih khawpipawl ah kawhhran a rak dĭn (2:1). Kolosa-mipawl in sumtuahin Efesa khua an feh tikah, Paul-ih rawngbawlnak ihsin thuthangṭha rak cohlang tahratin (Apo 19:10), an khua ih an kir tikah kawhhran an va dĭn a si men thei. Epafras (1:7-8; 4:12-13), Timothy (1:1) le Arkippas (4:17) pawl in cu tawkah cān dangdangah rawng an rak bawl. Arkippas hi Kolosa khua ih Filemon inn ih a khawmaw mi kawhhran pastor siin a lang (Filemon Thuhmaihruai siar aw).

Paul thawng a tlak laiah (4:3, 10, 18) Epafras in Kolosa kawhhran thuhla a hnenah a sim (1:8). Zumtupawl cu an ṭhang vivo, asinan zirhnak dik lo pawl in buainak a rak thlen. Cuih zirhnak dik lo pawl cun sakhua dān le dūn (2:16), vancungmipawl biaknak (2:18), thu theihawkternak (2:18-19) le taksa retheihawkter (2:20-23) lam an uar. Khrih hi an nunnak ih a thupibik a sizia theihter dingin A.D. 60 hrawngah an hnenah hi cakuat hi Paul in a rak ngan. Hi cakuat hi Ṭaikikas le Onesimas a hei kenter (4:7-9).

Hih cakuatih nunzirhnak hi Efesa khua ih zumtupawl hnenih cakuat thawn an bangaw zet (A hleicein Kol 3-4). A thu rĕmdān hrimhrim khal an bangaw zet. Hi cabu hmaisa lam a hrek cu thurin lam a si ih, a netasawn cu thurin nunpinak lam thu a si. Kolosa cakuat hi Efesa cakuat thawn bangawknak tampi a nei nân, danglamnak khal a nei thotho. Efesa cakuat cun kawhhran hi Khrih-ih taksa a si thu a rel uar ih, Kolosa cakuat cun Khrih cu kawhhran Lu a si thu a rel uar (1:18). Anih cu thihnak ihsin a thosal mi Bawipa a si ruangah amah hi ziangkim tlunih Lu a si taktak (1:18)!

Zumtu hrangah Khrih cu kan “nunnak” a si (3:4). Rundamnak hrangah amah kan cohlan hnuah, zumtu sinak vekin amah ah kan tlanglêng (2:6). A rak tuah mi le a sinak ruangah Khrih in kan nunnak ah hmun pawimawhbik a co a ṭul hrimhrim.

Thu Hlawm Ṭhen

I. Thuhmaihruai (1:1-14)
II. Khrih cu ziangkim tlunah a cungnung (1:15-2:23)
III. Khrih cu zumtu nun ah cungnung ding a si (3:1-4:6)
IV. Thukharnak (4:7-18)

Cibaibûknak

1 ^aPathian duh zawngih Jesu Khrih-ih apostol Paul le kan unaupa Timothy in, 2 ^bKolosa khua ih um, Khrih ih mithiangpawl le mirinum unaupawl hnenah:

1:1^a 1Ko 1:1; 2Ko 1:1

1:2^b Rom 1:7

Kan Pa Pathian le Bawipa Jesu Khrih hnen ihsin zangfahnak le hnangamdaihnak nan hnenah um hram seh.

Lungawi Thu Simnak le Thlacamnak

3 ^aNan hrangah thlacam ringringin, Pathian le kan Bawipa Jesu Khrih-ih Pa hnenah lungawi thu kan sim ṭheu. 4 ^bKhrih Jesu nan zumnak le mithiangpawl hmuahhmuah nan duhdawtzia kan theih ruangah le 5 ^cvan ih nan hrangih ret mi ruahsannak ruangah lungawi thu kan sim a si. Cuih ruahsannak cu thuthangṭha thutak kamsuakthu ah khan nan rak thei. 6 ^dCuih thuthangṭha cu nan rak ngaithlak le a takih Pathian zangfahnak nan rak theih ni thawkin, cuih thuthangṭha cu leitlun pumpi ih a thlen vekin, nan hnen khalah a thleng ve. Cule nanmah ih rah a suah bangtukin leitlun pumpi khalah rah a suah a si. 7 ^eCucu duhdawt mi kan siahhlawhpi, Epafras hnen khalih nan rak zir vekin, anih cu nan hrangah Khrih rawngbawltu mirinum a si. 8 ^fAnih cu Thlarau hnen ihsin nan ngah mi nan duhdawtnak thu kan hnenih thăntu a si.

1:3^a Rom 1:8

1:4^b Apo 9:13; Gal 5:6; Efe 1:15

1:5^c 1Th 5:8; 2Ti 2:15

1:6^d Joh 15:16; Rom 10:18

1:7^e Flm 1:23

1:8^f Rom 15:30

Khrih Cungnunnak

9 ^aHimi ruangah nan thuhla kan theih ni thawkin thlarau lam fimnak hmuahhmuah le thlarau lam theihthiamnak hmuahhmuah thawn a duh zawng theihnak ih nan khah thei nak dingah, kannih khal nan hrangih thlacam kan bâng lo. 10 ^bHnaṭuan ṭha tinkim ah rah nan suah ih, Pathian nan theihnak cu a ṭhan ih ziangkimah Bawipa lunghmui tlakih nan feh thei nak ding hrangah thla ka cam ṭheu. 11 ^cZiang vek cān khalih thinsau le aipuang zetih mi dawrh thei nak nan neih thei nak dingah, a huham ropi zulhin thiltitheinak hmuahhmuah thawn a lo cakter a si. 12 ^dTleu ah mithiangpawl ro conak ih ṭawmpi ve tlakih in tuahtu, Pa hnenah lungawi thu kan sim. 13 ^eAnih cun thim thuneihnak sung ihsin in runsuak ih, a duhdawt mi a Fapaih uknak sungah in ṭhawn zo. 14 ^fFapa ah cun a thisen zarah sualpawl ngaidamnak, tlennak kan nei.

1:9^a Rom 1:10; Efe 1:15, 17

1:10^b 2Ko 5:9; Efe 4:15

1:11^c Efe 1:2, 4; Fil 4:13

1:12^d Apo 20:32; 26:18; Efe 5:20

1:13^e 2Pe 1:11

1:14^f Rom 3:2; Efe 1:7

Khrih Lu bik a Sinak

15 ^aAnih cu hmuh thei lo Pathian băngpi, sersiam mi zate lakah fatir a si. 16 ^bZiangahtile amah in thil ziangkim: van ih a um mipawl, leilung parih a um mipawl, hmuh theih pawl le hmuh theih lo pawl, laltokhampawl, lalnakpawl, uktupawl le thuneitupawl cu a sersiam. Thil hmuahhmuah hi amai hrangah amah in a sersiam. 17 ^cCule anih cu thil hmuahhmuah hlanah a um ih, thil hmuahhmuah hi amah in hmunkhat ah a kaikhawm thluh. 18 ^dCun amah cu kawhhran a si mi taksaruangpi-ih lu a si. Thil ziangkimah cungnungbik a si thei nak dingah, anih cu búlhrampi, mithi lak ihsin fatir a si.

1:15^a Joh 1:18; 14:9; Heb 11:27

1:16^b Joh 1:3; Rom 11:36; Efe 1:20-21

1:17^c Joh 1:2

1:18^d Apo 26:23; Rom 8:29; Heb 1:6; Thu 1:5

19–20 ^aZiangahtile famkimnak zaten amai sungih a cēn ding le a khraws thisen zarah amah hmangih remnak a rak tuahnak in, leitlun ih thilpawl siseh, van ih thilpawl siseh, thil ziangkim amah thawi amah hmangih remawkter hi Paih lunghmui zawng a si.

1:19-20^a Joh 1:16; Rom 5:10; Efe 1:5, 10

21 ^aCun nannih cu thil sualrál tuahnak ruangah, Pathian hnen ihsin ṭhen mi le nan lungthin ah a ral nan rak si dah, 22 ^basinan atu-ah cun thianghlim le sawisel ding um lo le a mithmuh ah mawhthluk ding um loih lo langter dingah thihnak thawngin a taksaruangpum ah amah thawn a lo remawter zo a si. 23 ^cHram hnget bun le fek zetih zumnak ih nan umpeh vivo ih, hna ih nan rak theih mi thuthangṭha ruahsannak ihsin nan ṭhawnhlo lo asile, a mithmuh ah a lo langter ding a si. Cumi cu van hnuaiih sersiam tinkim hnenih an phuan mi kha a si ih, kei, Paul hi cuih thuthangṭha rawngbawltu ah ka cang.

1:21^a Rom 5:10; Efe 2:3

1:22^b Rom 5:10; 7:4

1:23^c Rom 11:22; 1Ko 3:5; Efe 3:17

Kawhhran hrangih Paul Hnaṭuan

24 ^aAtu-ah nan hrangih ka tuarnakpawl ah lungawi aipuangin ka um, cule Khrih-ih zăwnzaihnak ṭulsăm mipawl cu amai taksaruangpum a si mi kawhhran ruangah ka taksa ah ka silhkhat rero lai a si. 25 ^bPathian kamsuakthu tlamtlingter dingah, Pathian in nan hrangah ka hnenih i pek mi ṭuanvo bangtukin, kei cu kawhhran rawngbawltu ah ka cang. 26 ^cThuthup, kum tampi le san tampi a rak thupaw mi cu atu-ah a mithiangpawl hnenah lăngter a si. 27 ^dCuih thuthup ropi ih lenzia kha Zentelpawl lakah Pathian in mithiangpawl hnenah lăngter a duh, cumi cu nan sungih um Khrih, ropitnak ih ruahsannak kha a si.

1:24^a 2Ko 1:5; 6:10; 11:25-27

1:25^b 1Ko 3:5; Efe 3:2; Heb 4:12

1:26^c Rom 16:25

1:27^d Mat 13:11; Rom 2:4; 8:10

28 ^aMi kip Khrih Jesu ah famkim zetih kan lăngter thei nak dingah, fimnak hmuahhmuah thawn mi kip nunsimin le zirhin amai thu kan phuang. 29 ^bCumi hrangah nasa zetin hna ka ṭuan, Khrih-ih hnaṭuannak ka sungih cak zetih a ṭuandān zulhin nasa zetin ka ṭang a si.

1:28^a 1Ko 2:6-7; Efe 5:27

1:29^b 1Ko 15:10; 2Ko 11:23; Efe 1:19

1 ^aZiangahtile nanmah le Laodisia khua ih umpawl le taksa ih ka hmel hmu lo tu hmuahhmuah hrangah, ziang tluk maksak doawknak ka táwng ti nan theih ka duh. 2 ^bCuti cun an thinlung cu thazang pek mi siin, duhdawtnak ah pehzăwmawin, cule theihthiamnak hnget famkimih lennak zaten an nei ding ih, Pa le Khrih-ih ta a si mi Pathian thuthup an thei famkim ding. 3 ^cKhrih ah fimnak le theihnak hlawnthil zaten thuhin a um.

2:1^a Thu 1:11

2:2^b Rom 16:25; Efe 6:22

2:3^c Isa 11:2; Rom 11:33; 1Ko 1:24, 30

4 ^aCun zohman in ṭawngkam thiamnak ih an lo bumlonak dingah, hihi ka lo sim a si. 5 ^bZiangahtile taksa in nan hnenah um lo hman ningla, thlarau in nan hnenah ka um a si, mawitei nan um le Khrih ih nan zumnak a hngehzia ka theih tikah, ka ai a puang zet.

2:4^a Rom 16:18

2:5^b 1Ko 5:4; 1Pe 5:9

Khrih Nun Ṭawmpinak

6 ^aCuruangah Bawipa Khrih Jesu nan rak cohlan zo bangin, amah ah cun feh uh. 7 ^bAmah ah hram bun uhla, sak hngetaw uh, cule zumnak ah dĭn hngetaw uh, an lo zirh zo bangin lungawi thu simnak thawn cumi ah luangliam uh.

2:6^a Joh 13:13

2:7^b Efe 3:17; 4:21

8 ^aRalring uh, cu lo asile mi in Khrih-ih zirhnak vek si lo, milai fimnak le bumawknak thulolak menmen, minung thurosiah zulh le leitlun thuhramthawh zirhawknak zulhin, rallâk in an lo la pang ding.

2:8^a Gal 4:3; 1Ti 6:20

9 ^aZiangahtile Pathian famkimnak zaten Khrih ah taksa in a cêng a si. 10 ^bCun nannih cu amah ah nan famkim, anih cu uktu hmuahhmuah le thuneitu hmuahhmuah ih lu a si. 11 ^cKhrih hmangih serh zim tan nak thawngin taksaruangpumih tisa sualpawl hlihnak in, nannih khal amah ah kut tel loih serh zim tan nan si. 12 ^dBaptisma ah amai zawngah phumih umin, mithi lak ihsin amah kaithotu Pathian-ih hnaṭuan zumnak ruangah amai zawngah kaihthawhin nan um.

2:9^a Joh 1:16

2:10^b Mat 28:18; Efe 1:22

2:11^c Rom 2:29; Gal 5:24; Fil 3:3

2:12^d Mat 28:9; Rom 6:5

13 ^aCule nan mawhsualnakpawl le taksa ih serh zim tan lo nan sinak ih thi nan rak si laiah khan, Khrih zawngah a lo nungter ih, nan mawhsualnak zaten a lo ngaidam a si. 14 ^bKanmah dokalhtu le kan ral a si ṭheu mi, kut ih ngan mi thupekpawl cu a phiathlo. Cule cumi cu lain, khraws ah a khengbĕt. 15 ^cCule uktupawl le thuneitupawl cu dirtlain khraws hmangin cupawl cu a neh ih, langsar zetin a mualphoter hai.

2:13^a Efe 2:1, 5; 4:32

2:14^b Efe 2:15; 1Pe 2:24

2:15^c Mat 12:29; Luk 10:18; Joh 12:31; Efe 6:12

16 ^aCuruangah ei thu ah simaw, in thu ah simaw, ni serh thu ah simaw, thla thar thu ah simaw, sabbath-pawl thu ah simaw zohman in thu lo ṭhen hlah hai seh. 17 ^bCupawl cu thil ra thleng ding mipawlih thlam an si, a taktak sawn cu Khrih-ih ta a si. 18 ^cHnuaidawrawkternak le vancungmi biak duhtu in nan lawmman hloter dingin lo bum hlah seh. Cuvek mi cu a hmuh lo mi thilpawl ah a hrawlhaw ih, a tisa lungthin pu-in zianghmanlo in a duhaw. 19 ^dCuvek mi cun lu cu a pāwk hnget lo, taksaruangpum hmuahhmuah ṭhannak cu Lu ihsin a si. Pathian ih a ṭhanterdān vekin taksa cu a ṭhang. Hlikhlăwkpawl le thahripawl in taksaruangpi an câwmdâwl ih hmunkhat ah an kaikhawm.

2:16^a Mar 7:19; Rom 14:17; Gal 4:10

2:17^b Heb 4:3; 8:5; 10:1

2:18^c 1Ko 9:24; Fil 3:14

2:19^d Efe 1:22; 4:16

Ralrin Peknak

20 ^aCuruangah hi leitlun thuhramthawh zirhawknakpawl cu, Khrih zawngah nan thihsăn zo. Cuvek mi si na cingin, ziangah so leitlun mipawl vek menih leitlun thupekpawl hnuaiih nan tlukluh? 21 “Tham hlah,” “Tep hlah,” “Kai hlah,” tipawl hi! 22 ^bCupawl hmuahhmuah cu hman phahih cemrál men ding thil an si, ziangahtile cupawl cu minung thupekpawl le zirhnakpawl parih ṭhumaw mi an si. 23 Hih thilpawl cu fim hmel pu vekin an lang taktak ih, cumi ah phuahcawp sakhua, hnuaidawrawkternak le mai taksaruangpum hremawknak pawl an tel, asinan tisa câkhiarnak neh dingin huham an nei lo.

2:20^a Rom 6:6; Gal 4:3, 9

2:22^b Mat 15:9; 1Ko 6:13

Nundān Thianghlim

1 ^aCuruangah Khrih thawi kaihthawhih nan um zo a si ahcun, Pathian vawrh lam Khrih tonak ih um, tlun lam thilpawl kha hawl uh. 2 ^bLeitlun thilpawl parah si loin, tlun lam thilpawl parah nan lungthin ret uh. 3 ^cZiangahtile nannih cu nan thi zo ih, nan nunnak cu Khrih hnenah Pathian ah thuhin a um. 4 ^dKan nunnak a si mi, Khrih a rung lăng tikah nannih khal amai zawngah ropi in nan lang ding.

3:1^a Mar 16:19; Rom 6:5

3:2^b Fil 3:19-20

3:3^c Rom 6:2; 2Ko 5:14

3:4^d Gal 2:20; 1Pe 1:13; 1Joh 3:2

5 ^aCuruangah nan taksa ih leitlun thil nunau-mipa sualnak, bawrhhlawhnak, sūp theih lo câkhiarnak, câkhiarnak ṭha lo, milem biak a si mi duhhamnak pawl cu that uh. 6 Cuih thilpawl ruangah Pathian thinlingnak cu thulung lo fātepawl parah a thleng a si. 7 ^bCuih thilpawl ih nan um laiah cun, nannih khal cuih thilpawl ah nan rak nung dah.

3:5^a Rom 6:2; Gal 5:24

3:7^b Efe 2:2

8 ^aAsinan atu-ah cun hi thil hmuahhmuah: thinhengnak, thinlingnak, lungput siava, mi thangsiatnak, ṭawng bawrhhlawh nan kâ ihsi suak mipawl cu hlîtthla uh. 9 ^bMinung hlun cu a thil tipawl thawn nan hlihthlak zo ruangah, pakhat le pakhat bumaw nawn hlah uh. 10 ^cCule minung thar nan hruh zo, cuih minung thar cu amah sersiamtu băngnak kengin, theihnak lamah tuahtharin a um. 11 ^dCumi ah cun Grikmi siseh, Jew-mi siseh, serh zim tan mi siseh, serh zim tan lo mi siseh, barbaros-mi siseh, Sikithiami siseh, sál siseh, miluat ti siseh a um lo. Cuhnakin Khrih cu ziangkim si sawnin ziangkimah a um a si.

3:8^a Efe 4:22, 29, 31

3:9^b Rom 6:6; Efe 4:25

3:10^c Rom 6:4; 12:2; 2Ko 4:16; Efe 2:10; 4:23

3:11^d Rom 10:12; 1Ko 7:19; 12:13; Gal 3:28; Efe 1:23

12 ^aCuruangah nannih cu Pathian hril mi, thianghlim le duhdawt mi vekin, lainatnak nasa tak, ngilneihnak, hnuaidawrnak, nunnemnak, mi dawrh thei nak pawl tla hruh uh. 13 ^bPakhat le pakhat zāwiaw uhla, pakhat le pakhat ngaithiamaw uh. Mi pakhat khat in mi dang hnenah pawntam ding a neih a si khalle, Khrih ih a lo ngaidam bangin ngaidamaw ve uh. 14 ^cCule hi thil hmuahhmuah tlunah duhdawtnak hruk uh, cucu famkim zetih a lo ṭawntu a si.

3:12^a 2Ko 6:6; Gal 5:22-23; Efe 4:2; Fil 2:3

3:13^b Efe 4:2, 32

3:14^c Rom 15:5; 1Ko 13:1-13

15 ^aCun Pathian-ih hnangamdaihnak in nan thinlung lo uk seh, cumi hrangah taksaruangpum pakhat ih kawh nan si; cule lungawi hna khal thiam uh. 16 ^bKhrih-ih kamsuakthu cu fimnak hmuahhmuah thawn nanmah ah khatliamin um seh, pakhat le pakhat Sam hlapawl, thangṭhatnak hlapawl, thlarau lam hlapawl in zirhaw uhla, nun khihhmuhaw uh. Bawipa hnenah nan thinlung sungin zangfahnak thawn hlasak uh. 17 ^cCule nan tuah mi pauhpauh cu ṭawngkam in simaw, tuahnak in simaw, Bawipa Jesu hmin in tuah uhla, Pathian le Pa hnenah amai zarah lungawi thu sim uh.

3:15^a Joh 14:27; Rom 12:5; 14:19

3:16^b Sam 47:7; Rom 10:17; Efe 5:19

3:17^c 1Ko 10:31; Efe 5:20

Khristian Innsang

18 ^aNupipawl, Bawipa ah thil āwm a si vekin, nanmai pasal hnenah tlulut uh.

3:18^a Efe 5:22

19 Pasalpawl, nan nupi duhdaw uhla, an parah siakhâ hlah uh.

20 Falepawl, Bawipaih lunghmui zawng a si ruangah, ziangkimah nan nu le nan paih thu lung uh.

21 Palepawl, nan fātepawl thinhengter hlah uh, culole an bei a dawng pang ding.

22 Sálpawl, thil ziangkimah taksa lamih nan bawipawlih thu lung uh, an lo zoh lai lawngah an lunghmuiter tum loin, thinlung takin le Pathian ṭih sawnin an thu lung uh. 23 Cule nan tuah mi pauhpauh, milai hnenih tuah vekin si loin, Bawipa hnenih tuah vekin, nan thinlung zaten tuah uh. 24 ^aBawipa hnen ihta ro cu lawmman ah nan co ding ti nan theih ruangah, cu vekin tuah uh; ziangahtile Bawi Khrih nan rian a si. 25 ^bAsinan thil a tuah sual tu cun cuih a thil tuah sual mi man a ngah ding, thleidanawknak a um lo.

3:24^a Mat 16:27; Apo 20:32

3:25^b Apo 10:34

1 ^aBawiletla, nannih khal in van ah Bawi nan nei ve ti theiin, nan sálpawl hnenah a dik mi le a bangrān mi pe uh.

4:1^a Pui 25:43, 53

Thapeknak

2 ^aCatbang loin nasa zetin thlacam uhla, lungawi thu sim phahin ngaihven uh. 3 ^bKhrih-ih thuthup sim dingin Pathian in kamsuakthu hrangih sângka in ăwnsaknak dingah, kan hrang khalah thla in camsak uh, cuih thuthup ruangah cikcin ih ṭawn ka si. 4 Cuih thuthup cu ka sim ding vekih ka simsuak thei nak dingah, thlacam uh. 5 ^cLeng lam mipawl hnenah fim zetin um uhla, a ṭha thei bikin nan cān hmang uh. 6 ^dMi tin hnenah ziangtiih săwn ding a si ti nan theih thei nak dingah, ci thawn thawterin nan ṭawngkam cu zangfahnak tel mi si ringring seh.

4:2^a Luk 18:1

4:3^b Apo 14:27; 21:33; Rom 16:25

4:5^c Mar 4:11; Efe 5:15-16

4:6^d Mar 9:50; Efe 4:29; 1Pe 3:1

Cibaibûknak Netabik

7 ^aKa thuhla zaten Ṭaikikas in a lo sim ding, amah cu Bawipa ah duhdawt mi unaupa, rawngbawltu rinum le siahhlawhpi a si. 8 ^bHimi tumtahnak rori hrangah nan thuhla a theih thei nak dingah le nan thinlung a lo thlangăm thei nak dingah amah cu nan hnenah ka rak thlah a si. 9 ^cNan lakih mi pakhat, mirinum le duhdawt mi unaupa Onesimas thawn ka rak thlah a si. Annih in hi tawkih thil cang mi zaten an lo sim ding.

4:7^a Apo 20:4; Efe 6:21-22

4:8^b Efe 6:21-22

4:9^c Flm 1:10

10 ^aKa thawngtlakpi Aristarkas khal in cibai a lo bûk, cun Barnabas-ih ^bunaupa Mark khal in cibai a lo bûk. Amai thuhla ah thupekpawl nan rak dăwn zo kha! Nan hnenih a rat asile, rak cohlang uh. 11 ^cCule Jasṭas an ti mi Jesu khal in cibai a lo bûk. Annihpawl hi serh zim tan mi an si. Annihpawl lawng hi Jew-mi Pathian uknak hrangih ka hnaṭuanpi umsŭn le ka hna in ngamtertu an si.

4:10^a Apo 19:29

4:10^b unaupa: A pa asilole a nuih unau fapa.

4:11^c Fil 2:25

12 ^aEpafras, nan lakih mi, Khrih-ih sál hin cibai a lo bûk, Pathian duh zawng tinkimih nan khah thei nak dingah le famkimih nan dīn thei nak dingah, nan hrangah ṭhahnemngai zetin thlacamnak thawn nasa zetin ṭan a la. 13 Ziangahtile anih cu nanmah hrangah le Laodisia khua ih umpawl le Hierapolis khua ih umpawl hrangah a tha a tho zet ti theihpitu ka si. 14 ^bDuhdawt mi sibawi Luke le Demas in cibai an lo bûk. 15 ^cLaodisia khua ih unaupawl, Nimfas le cu paih inn ih kawhhran kha cibai in bûksak uh.

4:12^a Rom 15:30; 1Ko 2:6; Flm 1:23

4:14^b 2Ti 4:10; Flm 1:24

4:15^c Rom 16:5

16 ^aCun hih cakuat hi nan lakih siar a si hnuah, Laodisia kawhhran khalah siarter ve uh. Cuvek thothoin nannih khal in Laodisia khua ih ka cakuat mi kha rak siar ve uh.

4:16^a 2Th 3:14; 1Ti 4:13

17 ^aCule Arkippas hnenah, “Bawipa ah na cohlan mi rawngbawlnak hlensuak dingin fimkhur aw,” tiah sim uh.

4:17^a 2Ti 4:5; Flm 1:2

18 ^aKeimah, Paul in hih cibaibûknak hi ka kut rori ih ka ngan mi a si. Cikcin ih ṭawn ka si hi máng ringring uh. Zangfahnak nan hnenah um seh. Amen.

4:18^a 1Ko 16:21; 1Ti 6:21; 2Ti 4:22; Tit 3:15; Heb 13:25