About Bible Thianghlim | ©

BibleThianghlim – Amos

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Amos

123456789

• A ngantu: Amos
• A siartu: Sak lam Lalram, Israel
• Ngan kum: B.C. 765-757 hrawng

Amos cu sak lam lalram ah thu a phuang, asinan amah cu thlang lam lalram Tekoa khawmi a si. Tekoa khua cu Judah ramṭhing zimah a um ih, Amos cu ran khāltu a si. Neta lamah mifarahpawl ih ei mi thei rah phun, “Theikung rah kilkhawitu,” a si thu a rel (7:14). Hih cān ah Judah le Israel cun an lalram cu Solomon uk lai tiat in an kauh. Hih cān cu Israel hrangih hmuingil cān a si. Israel a hmuingil laiah, midingfel mineinung in mifarahpawl an băwm ding Pathian in a beisei (Dnp 15:4-5). Cuti si loin, milem bia Israel mineinungpawl cun an sumpai le an thiltitheinak cu micak lo palbĕtnak ah an hmang.

Amos in a thuphuan cu miphunpawl parih thiam lo coternakpawl a dotdotin a thawk (2:16). A netabik le a saubik thiam lo coternak cu Amos in Israel parah a phuang. Hih thiam lo coternak a phuan hnuah Amos in Pathian “Kamsuakthu hi ngaithla uh” tiin mipi a sawm. Pathian par le pakhat le pakhat karlakih an sualnakpawl a rel tikah “Kamsuakthu hi ngaithla uh” ti hi vei thum a rel (3:1-5:17). Sual in dāntatnak a thlen ih, Amos in hmakhaw pihnak pahnih mipi parah a phuang (5:18-6:14). Hi cabu hi Bawipa in Amos a hmuh mi thil pahnih thawn a netter: a hmaisaah dāntatnak, cuih hnuah tundīnsalnak (7:1-9:15). Amos in micak lo pawl an palbĕt ruangah an parah Pathian in kharbawkpawl, ni ling le nehnak a thlenter ding thu a phuang. Asinan a siraw mipawl cu Pathian in a tundinsal hai ding thu khal a tiamkam. Ni ni khat khat ah David cithlah ihsin siangpahrang pakhat ih uk dingin, Israel cu a ram ah Pathian in a hruaikir leh ding.

A thuphuan mi a ngannak ah, Amos cu Puithiam Hnaṭuannak bung 26 le Dān Peksalnak bung 28 thu ah a ṭhumawsal cingcing. Israel in Pathian thu a lun lo asile, a parih thleng ding mi dāntatnakpawl kha hi bung pahnih hin cipciar zetin an rel. Hih dāntatnakpawl hi an thleng ding a si tiah mipi ralrinnak a pe. Amos hin Thukham Thar khalah hmun pawimawh a luah. David-ih sungza tundinsal a si tikah, Zentelpawl cu Bawipaih hmin ih kawh an si ding, tiah a sim (9:11-12). Khrih van a kai hnuah, hihi a thlengkim thawk ih James in Amos 9:11-12 hi a vun la (Apo 15:14-21), cu tawkih a rel duh mi cu thuthangṭha thu ih Pathian ih ruahmannak ah miphunpawl an tel ti le thuthangṭha an zum tikah Jew-mi ih va can ṭul kherkher loin, Zentel an si kumkhua ding ti mi a si.

1

1 ^aJudah siangpahrang Uzziah san lai le Israel siangpahrang Jehoash-ih fapa Jeroboam san lai, linghnîn hlan kum hnih laiah, Israel thuhla ah Tekoa hmun ih ran khāltupawl lakih pakhat Amos ih hmuh mi kamsuakthupawl.

1:1^a 2Sam 14:2; 2San 26:23

2 ^aCule anih in,

1:2^a Isa 42:13; Jer 12:4; Joe 3:16; Amo 9:3

“Zion ihsin Jehovah a hûk ih,
Jerusalem ihsin a aw a suah;
Tuu khāltupawlih ran tlannak hmun a ṭap ih,
Karmel tlang zim a ro,”

tiah a ti.

Miphunpawl Dāntatnak

3 ^aJehovah in hitin a sim:

1:3^a Thf 30:15; Isa 7:8; Amo 2:6

“Damaskas ih a thil sual tuah mi pathum ruang le pali ruangah,
A dāntatnak ka lakir lo ding,
Ziangruangahtile fangcīlnak thir thawn Gilead a cil.
4 ^aCule Hazael-ih inn sungah meisa ka thlah ding ih,
Cumi cun Ben-Hadad siangpahrang innpawl a kangrál ding.
5 ^bDamaskas kăwtka tlâng khal ka băl ding ih,
Aven phaikuam luahtupawl le
Beth Eden ihsin siangpahrang kianghrăwl kengtu ka sâtcat ding.
Siria-mipawl cu Kir ram ah ralkaih ah an feh ding,” tiah Jehovah in a ti.

1:4^a Jer 49:27; Eze 30:8

1:5^b Isa 7:16; Jer 49:27; 51:30; Zek 9:1

6 ^aJehovah in hitin a sim:

1:6^a Sem 10:19; 14:6; Oba 1:11; Zef 2:4

“Gaza ih thil sual tuah mi pathum ruang le pali ruangah,
A dāntatnak ka lakir lo ding,
Ziangruangahtile Edom pek dingah,
Mipi zaten an hruaihlo thluh.
7 Cule Gaza khaw kulh parah meisa ka thlah ding ih,
Cumi cun a hauhruangpawl a kangrál ding.
8 ^aAshdod luahtu le Ashkelon ihsin siangpahrang kianghrăwl kengtu ka sâtcat ding;
Ekron dokalhin ka kut ka văi ding ih,
Filisṭia tāngsŭn an hloral ding,” tiah Bawipa Jehovah in a ti.

1:8^a Isa 14:28-32; 34:8; Eze 25:16; Amo 3:9; Zef 2:4-7

9 ^aJehovah in hitin a sim:

1:9^a 1Sp 5:1; Jer 25:22; Joe 3:4; Mat 11:21

“Ṭaiar ih thil sual tuah mi pathum ruang le pali ruangah,
A dāntatnak ka lakir lo ding.
Ziangruangahtile Edom pek dingah,
Mipi zaten an hruaihlo thluh ih,
Unau sinak thukham an cîng nawn lo.
10 ^aCule Ṭaiar khaw kulh parah meisa ka thlah ding ih,
Cumi cun a hauhruangpawl a kangrál ding,” tiin.

1:10^a Isa 23:1-18; Jer 47:4; Eze 26:2-4; Zek 9:1-4

11 ^aJehovah in hitin a sim:

1:11^a Mip 20:14-21; 2San 28:17; Sam 63:10; 83:6; Eze 25:12-14; Zek 1:15

“Edom ih thil sual tuah mi pathum ruang le pali ruangah,
A dāntatnak ka lakir lo ding,
Ziangruangahtile ralnâm thawn a unaupa a dawi ih,
Zawnruahnak zaten a hlăwn thluh.
A thinhengnak a reh lo ih,
A thinlingnak cu kumkhuain a pai.
12 ^aCule Teman khua parah meisa ka thlah ding ih,
Cumi cun Bozrah hauhruangpawl a kangrál ding,” tiin.

1:12^a Sem 36:11, 15; 1San 1:44; Jer 25:21

13 ^aJehovah in hitin a sim:

1:13^a Sem 19:38; Hos 13:16

“Ammon-mipawl ih thil sual tuah mi pathum ruang le pali ruangah,
A dāntatnak ka lakir lo ding.
Ziangruangahtile an ramri kauhter duhah,
Gilead nunau farai pawl an raipăwp hai.
14 ^aCule Rabbah khaw kulh parah meisa ka thlah ding ih,
Cumi cun a hauhruangpawl cu ral do ni ih ral auaw lakah le phusîng tlun tikih thli hrang lakah a kangrál ding.
15 ^bAn siangpahrang cu sál tānnak ah a feh ding,
Amah le a ralbawipawl khal sál ah an fehtlang ding,” tiah Jehovah in a ti.

1:14^a Dnp 3:11; 2Sam 12:26; Isa 30:30

1:15^b Jer 49:1

2

1 ^aJehovah in hitin a sim:

2:1^a Isa 16:6; 33:12

“Moab ih thil sual tuah mi pathum ruang le pali ruangah,
A dāntatnak ka lakir lo ding,
Ziangruangahtile anih in Edom siangpahrangih ruhpawl vâm dingin a ur.
2 ^aCule Moab parah meisa ka thlah ding ih,
Cumi cun Kerioth hauhruangpawl a kangrál ding;
Moab cu buai culcinak thawn,
Ral authâwm le tuu pa ki phawt awn lakah a thi ding.
3 ^bCule hruaitupawl cu an lak ihsin ka that hai ding ih,
A ralbawipawl zaten amai zawngah ka that hai ding,” tiah Jehovah in a ti.

2:2^a Jos 6:20; Job 39:25; Jer 48:24

2:3^b Sam 2:10; Eze 25:8-11; Zef 2:8-9

Judah parih Dāntatnak

4 ^aJehovah in hitin a sim:

2:4^a Suah 34:15; Dnp 31:20; 2Sp 17:19; 22:13; Sam 4:2; Isa 9:16; Jer 6:19; 9:14; 16:19; Eze 20:24; Hos 12:2

“Judah ih thil sual tuah mi pathum ruang le pali ruangah,
A dāntatnak ka lakir lo ding,
Ziangruangahtile Jehovah-ih Dān an hnáwng ih,
A thupekpawl an thlun lo.
Anmah cu an pupápawl ih thlun mi,
An thuphan per mi in a hruaipêng hai.
5 ^aCule Judah parah meisa ka thlah ding ih,
Cumi cun Jerusalem hauhruangpawl a kangrál ding,” tiin.

2:5^a 2Sp 25:9; 2San 36:19; Jer 17:27; Hos 8:14; Amo 3:11

Israel parih Dāntatnak

6 ^aJehovah in hitin a sim:

2:6^a Joe 3:3; Amo 1:3; 8:6

“Israel ih thil sual tuah mi pathum ruang le pali ruangah,
A dāntatnak ka lakir lo ding,
Ziangruangahtile midingfelpawl cu ngun ah an zuar ih,
Mifarahpawl cu kedam kăwp khat ah.
7 ^aMifarahpawlih lu cu leilung leivut parah an palbĕt,
Cule mităngdawrpawlih lamzin an merhkâwi.
Ka hmin thianghlim bawrhbangter dingah,
Mi pakhat le a pa in nunau pakhat an pantlang.
8 ^bTiamkamawknak ih an lâk mi hnipuan phahin biakṭheng kiang i kip ah an zau ih,
Cawhkuan vekih an rak lâk mi sabit zu cu an pathian inn ah an in.
9 ^cCu cingin, Sidar thing vekih sâng le Elon thing vekih khoh Amor-mi an hmaiih thahsaktu cu keimah ka si.
Tlun lamih amai rah le hnuai lamih amai hrihrampawl ka tisiat.
10 ^dCuihtlunah Amor-miih ram luah dingin, Izip ram ihsi lo hruaisuaktu le ramṭhing ih kum 40 sung lo hruaitu khal keimah ka si.
11 ^eNan fapa hrekkhat cu profet ah ka tuah hai ih,
Nan tlangval hrekkhat cu Nazir-mi ah.
Maw Israel tefapawl, cuti cun a si ko lo maw? tiah Jehovah in a ti.
12 ^f“Asinan Nazir-mipawl cu sabit zu nan inter ih,
‘Thuphuang hlah uh,’ tiin profetpawl thu nan rak pe.
13 ^gNgai hnik, fâng tēl thawi khat lêng a niam bangin,
Kei khal nannih in in niamter.
14 ^hCuruangah mi tlân cak pawl khal in relhnak an nei lo ding.
Micak in cahnak a nei nawn lo ding ih,
Ral do thiam khal in amai nunnak a runhim fawn lo ding.
15 ⁱThál kengtu a dīng thei lo ding ih,
Mitlancak khal a tlânsuak lo ding,
Rang totu in amai nunnak a runhim lo ding.
16 ^jCuih ni ah raldo thiam pawl lakih ralṭhabik cu taklawng in a tlân ding,” tiah Jehovah in a ti.

2:7^a Pui 18:21; Amo 5:11-12

2:8^b Suah 22:26; Dnp 24:12-13; Hos 7:14; Amo 4:1; Hab 2:6

2:9^c Mip 13:32; Jos 10:12; 2Sp 19:30; Job 18:16; Sam 29:9; Isa 10:33; Eze 17:9

2:10^d Suah 3:8; Mip 21:25; Dnp 2:7; 8:2

2:11^e Dnp 18:18; Lai 13:5; Jer 7:25

2:12^f Isa 30:10; Jer 11:21; Amo 7:12; Mik 2:6

2:13^g Amo 7:16-17

2:14^h Job 11:20; Sam 33:16; Ths 9:1; Isa 30:16-17

2:15ⁱ Suah 15:21; Ths 9:11; Eze 39:3; Zek 10:5

2:16^j Jer 48:41

3

Pathian in Israel Ralrinnak a Pe

1 ^aMaw Israel tefapawl nanmah dokalhih Jehovah-ih kamsuakthu hi ngaithla uh. Cumi cu Izip ram ihsi ka hruaisuah mi sungkua pumpi dokalhnak thu a si:

3:1^a Amo 2:10; Zef 2:5

2 ^a“Leilung tlun sungkuapawl zate lakah nangmah lawng hi ka lo thei hleice;
Curuangah nan mawhsualnak ruangah dān ka lo tat ding.
3 An lung a rual lo asile, mi pahnih cu an fehtlang thei ding maw?
4 ^bKiosa in deh ding sa a neih lo tikah, tupi sungah a hûk maw si?
Kiosa vanglai in zianghman dehngah loin, a pûk ah a hngirhngir maw si?
5 ^cTarh mi tháng um loin, vate cu leilung parih tháng sungah a ṭum maw si?
Thang in zianghman awk loin, lei par ihsin a pelh maw si?
6 ^dKhawpi sungih tuu pa ki an phawt asile, mipi an khūr lo ding maw?
Khawpi sungah vanduainak a um asile, Jehovah ih tuah mi a si lo ding maw?
7 ^eA siahhlawh profetpawl hnenah a thuthup phuang loin,
Bawipa Jehovah in zianghman a tuah hrimhrim lo.
8 ^fKiosa a hûk e!
Zo so ṭih lo um ding?
Bawipa Jehovah a ṭawngsuak e!
Zo so thuphuang loih um thei ding?” tiin.
9 ^gAshdod hauhruangpawl le
Izip ram ih hauhruangpawl ah phuang uh,
“Samaria tlang parah pungkhawmaw uh,
Amai sungih buainak maksak le amai sungih palbĕt mipawl cu zoh uh,” tiin.
10 ^h“Ziangahtile a dik mi ziangti vekih tuah ding ti an thei lo, Jehovah in a ti.
Annih cun an hauhruangpawl ah nunrawnnak le mi suamnak an khawlkhawm,” tiin.

3:2^a Suah 19:6; Dnp 7:6; 1Pe 4:17

3:4^b Sam 104:21; Isa 42:13; Hos 5:14

3:5^c Sam 119:110

3:6^d Mip 10:2; Job 39:24; Isa 31:2; Jer 4:21

3:7^e Sem 18:17; Dan 9:22

3:8^f Dnp 18:18; Jer 20:9; Jon 1:1-3; Apo 4:20

3:9^g Jos 13:3; Amo 4:1

3:10^h Amo 5:7; 6:14

11 Curuangah Bawipa Jehovah in hitin a sim:

“Ram kiangkap hmuahhmuah ah doral a um ding;
Na hnen ihsin na cahnak a băwtthlek ding ih,
Na hauhruangpawl cu răm an si ding.

12 ^a“Jehovah in hitin a sim:

3:12^a 1Sam 17:34; Est 1:6; Amo 6:4

Kiosa kâ sung ihsin tuu khāltu in a tuu ke pahnih, asilole a hna themte a lawnsak bangin,
Ihkhun tlâng themte le tokham tuamnak puan themte thawn
Samaria ih cêng Israel tefapawl cu lawnsak an si ding.
13 ^aNgaithla uhla Jakob sungza dokalhin theihter uh, tiah Bawipa Jehovah, ralkap rualpawlih Pathian in a ti.
14 ^bAn thil sual tuah mipawl ruangih Israel dān ka tat ni ah,
Bethel biakṭhengpawl khal dān ka tat ding;
Cule biakṭheng kipawl sahcat an si ding ih,
Lei ah an tla ding.
15 ^cThlatang inn cu ṭhal inn zawngah ka tisiat ding;
Vui ho innpawl an hloral ding ih,
Inn ropi zetzet pawl an cem ding,” Jehovah in a ti.

3:13^a Eze 2:7

3:14^b Sem 12:8; Suah 27:2; Pui 26:18; Amo 5:5-6

3:15^c Lai 3:20; 1Sp 22:39; Sam 45:8; Isa 34:5; Jer 36:22; Hos 10:5-8; Amo 5:11

4

Samaria Nunaupawl Ralrin Peknak

1 ^aSamaria tlang parih um nannih Bashan caw pi pawl,
Mifarahpawl palbĕttu,
Mitlasampawl nambettu,
Nan pasalpawl hnenih, “Sabit zu rak keng uh, in uhsi,” tiih titupawl,
Hi kamsuakthu hi ngaithla uh.

4:1^a Dnp 24:14; Sam 22:12; Isa 58:6; Jer 44:19; Eze 18:12; Amo 2:8; 3:9

2 ^aBawipa Jehovah in a thianhlimnak in sia a săm:

4:2^a 2Sp 19:28; Isa 19:8; Jer 31:31; Amo 6:8

“Ngai hnik uh, sa thurnak ih a lo lâkhloh ni a ra thleng ding ih,
Nan lakih a netabik tiangin ngasio in a lahlo ding.
3 ^aKhaw kulh păwp ihsin nan pâwtsuak ding ih,
Mi tin mai hmai zawn cio ah,
Cule nang cu Harmon tlang lamah hlăwn na si ding, Jehovah in a ti.

4:3^a Eze 12:5

Israel in Nunrĕmnak a Pawm Lo

4 ^a“Bethel ah feh uhla, thil sual tuah uh,
Gilgal ah thil sual karhzaiter uh;
Zing tin nan raithawi mipawl rak keng uh,
Kum thum dan ah nan ṭhen hra ṭhen khat pawl khal.
5 ^bLungawi thu sim raithawinak cu thilnu thawn hlan uh,
Mai palungsuak thawhhlawmpawl phuang uhla thăn uh;
Ziangahtile nannih Israel tefapawl, cucu tuah nan duh mi a si! Bawipa Jehovah in a ti.
6 ^c“Nan khawpipawl hmuahhmuah ah, ^dhâ fainak ka lo pe.
Cule nan umnak kip ah sang tlaksamnak ka lo pe;
Sikhalsehla ka hnenah nan ra kir cuang lo, Jehovah in a ti.
7 ^eCuihtlunah fang ah cān thla thum duhah ruah ka lo phihsak.
Khaw pakhat ah ruah ka surter,
Khaw dangah ruah ka kaitâng.
Hmun pakhat ah ruah a sur ih,
Hmun dangah ruah sur loin a car.
8 ^fTidai in duhah khaw hnih maw, khaw thum cu khaw dangah an vâkvai,
Asinan an khawp cuang lo.
Cuti cing khalin ka hnenah nan ra kir cuang lo, Jehovah in a ti.
9 ^gThil hring rocarnak le thil hring pangmăn kainak thawn ka lo vua.
Nan hmuanpawl,
Nan sabit hmuanpawl,
Nan theipi kungpawl le nan olif kungpawl an karh tikah,
Kharbawk in an lo eisak ṭheh.
Cuti cing khalin ka hnenah nan ra kir cuang lo, Jehovah in a ti.
10 ^hIzip ih ka rak thlah bangin, nan lakah nathri sia ka thlah;
Nan minopawl ralnâm in ka that, nan rallâk rangpawl thawn;
Nan ṭanhmun khuarnak rim thu cu nan hnar sungah ka lutter,
Sikhalsehla ka hnenah nan ra kir cuang lo, Jehovah in a ti.
11 ⁱPathian in Sodom le Gomorrah a tisiat bangin ka lo tisiat,
Cule meisa sung ihsin thingthu zûk mi vek nan si;
Cuti cing khalin ka hnenah nan ra kir cuang lo, Jehovah in a ti.
12 “Curuangah Maw Israel, hihi nan parah ka tuah ding:
Himi hi nan parih ka tuah ding ruangah,
Maw Israel, na Pathian táwng dingin timtuahaw aw!” tiah a ti.
13 ^jZiangahtile ngai hnik,
Tlangpawl tuahtu,
Thli sersiamtu,
Minung hnenih a ruahnak phuangtu,
Zing khawvâng thim ko tuahtu,
Leilung sannak hmunpawl páltu,
A hmin cu ralkap rualpawlih Pathian Jehovah a si.

4:4^a Mip 28:3; Dnp 14:28; Jos 7:2; Hos 4:15; Amo 5:21-22

4:5^b Pui 7:13; 22:18-21; Dnp 12:6

4:6^c Isa 3:1; Jer 5:3; Ṭah 2:12; Hag 2:17

4:6^d hâ fainak: Ei ding tlaksam a simnak a si.

4:7^e Suah 9:4, 26; Dnp 11:17; 2San 7:13; Isa 5:6; Jer 3:3; Zek 14:17

4:8^f Job 36:31; Jer 3:7; Hag 1:6

4:9^g Suah 10:13; Dnp 28:22; Joe 1:7; 2:25

4:10^h Dnp 28:21; Isa 9:13, 17; 34:3

4:11ⁱ Sem 19:24; Jer 23:14

4:13^j Isa 47:4; Dan 2:28; Amo 5:8, 27; Mik 1:3

5

Israel hrangih Ṭahnak

1 ^aMaw Israel sungza, nanmah dokalhih ṭah hla ka ken mi thu hi ngai hnik uh:

5:1^a Jer 4:8; 7:29; Eze 19:1

2 ^a“Fala him Israel cu a tlu;
A thosal nawn lo ding.
Amai ram ah thlauthlakin a um;
Amah kaithotu ding zohman an um lo,” ti hi.

5:2^a 2Sp 19:21; Amo 8:14

3 ^aZiangahtile Bawipa Jehovah in hitin a sim:

5:3^a Isa 6:13; Amo 6:9

“Ralkap 1000 thlahsuaktu khawpi ah 100 lawng an tâng ding ih,
Ralkap 100 thlahsuaktu Israel sungza ah pahra lawng an tâng ding,” tiin.

Pathian Hawl Aw

4 ^aZiangahtile Israel sungza hnenah Jehovah in hitin a sim:

5:4^a Dnp 4:29; 30:15; Isa 55:3; Jer 29:13; Eze 18:9

“I hawl uhla, nung uh;
5 ^aAsinan Bethel hawl hlah uhla,
Gilgal ah lut fawn hlah uh,
Beersheba khal kân hlah uh;
Ziangahtile Gilgal cu ralkaih ah a feh tengteng ding ih,
Bethel cu zianghmanlo ah a cang ding,” tiin.
6 ^bJehovah hawl uhla nung uh,
Cu lo asile meisa bangin Joseph sungza a phiatfai pang ding,
A kangrál hai ding,
Zohman in Bethel hrangah an hmit thei lo ding.
7 Nannih diknak kha la-ana kung khâ ih cangtertupawl le
Dingfelnak leilung ih hlăwnthlatupawl tla!
8 ^cAnih cun Kimah le Kesil a tuah,
Thim mepmep cu zing khawvâng ah a cangter ih,
Sun cu zan khawthim ah a tuah.
Tifinriat tipi a ko ih,
Leilung vangdâp parah a thlebung;
A hmin cu Jehovah a si.
9 ^dMicakpawl hnenah siatnak a surter,
Cutin siatbălnak cu kulhhnget parah a thleng.
10 ^eKăwtsuah ih mi nun rĕmtu an hua ih,
Dik zetih thusimtu an fih.
11 ^fCule miretheipawl nan palbĕt ih,
An hnen ihsin thlairawl siahpawl nan lâk ruangah,
Lungto ser hlir in inn sak hman uhla,
A sungah nan cêng lo ding;
Sabit hmuan ṭha zet nan tuah ko nain,
Cumi ihsin sabit zu nan in cuang lo ding.
12 ^gZiangahtile nan thil sual tuah mi liangluang le nan sualpawl a nasatzia ka thei:
Midik cu harsatnak nan pe ih, nawhthuh nan la;
Kăwtsuah ah mifarahpawl nan hawisan.
13 ^hCuruangah, cuti vek cān ah cun khawruat thiam pawl daiten an um men,
Ziangahtile cucu cān ṭha lo a si.
14 Nan nun thei nak dingah thil ṭha lo hawl loin,
Thil ṭha hawl uh;
Nan rak ti bang khan,
Ralkap rualpawlih Pathian Jehovah in a lo umpi ding.
15 ⁱThil ṭha lo hua uh, thil ṭha duh uh;
Kăwtsuah ah diknak dĭn uh.
Ziangmaw ti talin ralkap rualpawlih Pathian Jehovah in
Joseph hnám tāngsŭn parah
Zangfahnak a nei nahman maw!

5:5^a Sem 21:31; Hos 4:5; Amo 8:14

5:6^b Pui 18:5; Dnp 4:24; Sam 22:26; Isa 9:18-19; 31:1; Hos 10:4; Amo 3:10, 14; 6:12; Zef 2:3

5:8^c Sem 1:16; Job 38:11-12; Sam 104:6-9, 20; Isa 42:16; Jer 16:21; Amo 4:13; 8:9

5:9^d Jer 50:32; Mik 5:11

5:10^e 1Sp 22:8; Isa 29:21; Gal 4:16

5:11^f Dnp 28:30; Mik 1:6; 6:15; Zef 1:13

5:12^g Isa 1:23; 5:23; Eze 5:8; Amo 2:6-7

5:13^h Est 4:14; Ths 3:7; Mik 2:3

5:15ⁱ Sam 52:3; Joe 2:14; Mik 5:8; Zek 8:16

16 ^aCuruangah ralkap rualpawlih Pathian Jehovah, Bawipa in hihi a sim:

5:16^a Jer 9:17; Amo 8:3

“Kăwtthler hmuahhmuah ah râk ruangro nak a um ding ih,
Zinpipawl hmuahhmuah ah,
‘Ai law! Ai law!’ tiah an ti ding.
Lóthlopawl cu ṭap dingin an ko ding ih,
Ṭahthiampawl cu râk ruangro dingin.
17 ^aSabit hmuan hmuahhmuah ah ṭahnak a um ding,
Ziangahtile nanmah ka lo hruttlăng ding,” tiah Jehovah in a ti.
18 ^bAi law, Jehovah-ih ni a duhtupawl hnenah cun!
Ziangahtile nan hrangah Jehovah-ih ni cu ziang a ṭhahnem?
Cuih ni cu thim le tleu umlonak a si ding.
19 ^cCumi cu mi pakhat kiosa hnen ihsin tlân ih,
Savâwm táwng thotho vek le,
A inn ah tlânlut ih,
Phar parih kut ret ih, rul ih cuk vek a si.
20 ^dJehovah-ih ni cu tleu si loin thim a si lo maw?
Cumi cu vâng um riai lo, thim mepmep a si lo maw?
21 ^e“Nan puai nipawl cu ka hua ih ka fih,
Cule nan tawnkhawmawknak hleice pawl par khalah lungsinak ka nei lo.
22 ^fNan Meiur Thilhlănpawl le nan Thlairawl Thilhlănpawl cu in pe khal uhla,
Ka lo cohlang hai cuang lo ding,
Nan ran thau Remnak Thilhlăn khal ka ngaihsak lo ding.
23 ^gNan hla thawmvângpawl tla ka hnen ihsin lahlo uh,
Ziangahtile nan hri nei tum mipawlih awnmawi ka ngaithla lo ding.
24 ^hCuhnakin diknak cu tiva bangin luang sawn sehla,
Dingfelnak cu tiva te luang ringring bangin luang sawn seh.
25 ⁱ“Maw Israel sungza, ramṭhing ah kum 40 sung raithawinakpawl le thilhlănpawl in rak pe maw?
26 ^jNan siangpahrang Sikkuth, nan hrangih nan tuah mi nan arsi pathian Kiun, cupawlih milimpawl khal nan rak zâwn.
27 ^kCuruangah Damaskas pawn lamah ralkaih ah ka lo kuat ding,” tiah a hmin ralkap rualpawlih Pathian, Jehovah in a ti.

5:17^a Isa 16:10; Jer 48:33

5:18^b 1Sam 2:9; Isa 2:12; 5:19, 30; Jer 30:5, 7; Joe 2:2

5:19^c Dnp 32:24; Job 20:24; Ths 10:8; Isa 24:17-18; Jer 15:2-3; Ṭah 3:10

5:20^d 1Sam 2:9; Isa 13:10; Eze 7:7; Oba 1:15

5:21^e Jer 6:20; Eze 23:18; Hos 2:11

5:22^f Pui 26:31; Sam 40:6; Isa 1:11-16; Mik 6:6-7

5:23^g Amo 6:5

5:24^h Isa 45:9; Jer 22:3; Mik 6:8

5:25ⁱ Suah 16:35; Isa 43:23

5:26^j Pui 18:21; Eze 18:6

5:27^k Jer 38:17; Amo 4:13; Apo 7:42

6

Zion le Samaria Ralrin Peknak

1 ^aZion ih nuam huahhi ih umpawl le,
Samaria tlang ih ralmûang zetih umpawl nan hmakhua a pit a si!
Nannih cu miphunpawl lakih a ṭhabik pawl lak ihsin hril sin mi nan si,
Israel sungza ih run pan mi nan si.
2 ^bKalneh khua ah feh uhla, zoh hnik uh;
Cule cu tawk ihsin hmun ropi Hamath lamah feh uh;
Cun Filisṭia-mipawlih khawpi Gath lamah suk uh.
Hih lalrampawl hnakin nan ṭhasawn maw si?
Asilole an ramkulh cu nan ramkulh hnakin a ropisawn maw si?
3 ^cNannih vansan ni hlăwnhlotupawl le, Nunrâwng lalnak run keng nai tupawl?
4 ^dAnnih cu vui ho ihkhunpawl parah an zau,
Ihkhun nuam parah an lāwng tûalto,
Rante rual lak ihsi tuu fa no le
Hruang sungih caw pa no pawl an ei;
5 ^eAnnih cun hri nei tum mipawl tumdān an phuahcawp ih,
David bangin anmai hrangah hla an phuahcawp;
6 ^fNo tumpi hmangin sabit zu an in ih,
Hriak ṭhabik an hnihaw,
Sihmansehla Joseph-ih zăwnzaihnak ah an thin a na lo.
7 ^gCuruangah anmah cu ralkaih hmaisabik pawl vekin ralkaih ah an feh ding ih,
Puai hmun ih zau huahhi pawl kha an um nawn lo ding.
8 ^hBawipa Jehovah in amai nunnak sālin sia a săm,
Ralkap rualpawlih Pathian Jehovah in,
“Jakob-ih hngalnak ka fih ih,
A hauhruangpawl ka hua;
Curuangah hi khawpi le
A sungih um minung zaten ka hlan ding,” tiah a ti.

6:1^a Isa 32:9-11; Amo 3:9; Luk 6:24

6:2^b Sem 10:10; 2San 26:6; Nah 3:8

6:3^c Isa 56:12; Eze 12:22; Amo 9:10

6:4^d Thf 7:17; Isa 1:11; Eze 34:2-3; Amo 3:12; Jam 5:5

6:5^e 1San 15:16; Sam 137:2; Isa 14:11; Amo 5:23

6:6^f Isa 28:1; Eze 9:4; 16:49; Amo 2:8

6:7^g Jer 16:9; Ṭah 4:5; Amo 5:27

6:8^h Pui 26:19; Sam 47:4; Jer 22:5; Amo 4:2

9 ^aCun hitin a si ding, inn pakhat ah mi pahra an tān asile, an thi thluh ding. 10 ^bCule mithi sungkhat pakhat phum dingih hriak thihtu, inn sung ihsin inn lengih ruh run cawisuak dingih dăwmtu cun inn sungrilbik ih um mi hnenah, “Na hnenah an um lai maw?” tiah a ti ding.

6:9^a Amo 5:3

6:10^b 1Sam 31:12; Amo 8:3

Cun anih in, “Um nawn lo,” tiah a ti ding.

Cule anih in, “Daiten um aw! Ziangahtile Jehovah hmin kan sal ngam lo,” tiah a ti ding.

11 ^aZiangahtile zoh hnik, Jehovah in thupek a pe ding ih:
Inn tumpi cu tlabăl remremin le,
Inn fate cu sawprăwp thluh ko a ṭhiatbăl ding.
12 ^bLungpi parah rang an tlân maw si?
^cCuih hmun ah caw cang pawl in lei an let maw si?
Cuti cingin nannih cun diknak cu thihsi ah nan cangter ih,
Dingfelnak rah cu la-ana kung khâ ah nan cangter.
13 ^dNannih ^eLo Debar khawpi parih lungawi aipuangtupawl in,
“Kanmai cahnak in Karnaim khawpi kan la a si lo maw?” tiah nan ti.
14 ^f“Asinan, zoh hnik uh, ralkap rualpawlih Pathian Jehovah in, Maw Israel sungza, nanmah dokalhin miphun ka tungding ding.
Annih in Hamath luhnak ihsin Arabah phairawn tiva te tiang an lo dekcăwk vivo ding,” tiah a ti.

6:11^a Isa 34:5; 55:11; Amo 3:15

6:12^b Isa 1:21; Hos 10:4; Amo 3:10; 5:7

6:12^c Cuih hmun: Tifinriat a si men thei.

6:13^d Job 8:15; Isa 28:14-15

6:13^e Lo Debar: Zianghmanlo tinak a si.

6:14^f Mip 13:21; Jer 5:15; Amo 3:11

7

Kharbawk Larnak

1 ^aBawipa Jehovah ih i hmuh mi cu hihi a si: ngai hnik, ruah hmaisa thlairawl a keuh thawk cān ah kharbawk burpi a suakter. Ngai hnik, cumi cu siangpahrangih ^bfang an ah hnuih ruah hmaisa thlairawl a si. 2 ^cCule hitin a si, cuih ram thlairawl cem viar an ei ṭheh tikah, kei in,

7:1^a Sam 78:46; Jer 5:14; Joe 1:4; Amo 8:1

7:1^b fang an ah hnuih: Siangpahrang tuu hmul meh hnu a si men thei.

7:2^c Suah 10:15; Sam 130:3; Isa 37:4; Eze 11:13; Amo 4:9

“Maw Bawipa Jehovah, ngaidam hram aw!
Ziangtin Jakob cu a ding thei ding,
Ziangahtile anih cu a derthawm tuk,”

tiah ka ti.

3 ^aHimi thuhla ah Jehovah a lamlêt leh sal. “A thleng lo ding,” tiah Jehovah in a ti.

7:3^a Suah 32:14; Dnp 32:36; Jer 18:8; Hos 11:8

Meisa Larnak

4 ^aBawipa Jehovah in in hmuh mi cu hihi a si: ngai hnik, Bawipa Jehovah in meisa hmangin buainak a ko ih, cumi cun ti thûk zet cu a eirál ih, ram tla a kangrál. 5 ^bCun kei in,

7:4^a Dnp 32:22; Isa 66:16; Joe 1:19; Thu 8:7-8

7:5^b Joe 2:17

“Maw Bawipa Jehovah, zangfahten bāng aw!
Ziangtin Jakob a ding thei ding,
Ziangahtile anih cu a derthawm tuk!”

tiah ka ti.

6 ^aCule Jehovah cu himi thuhla ah a lamlêt leh sal. “Himi khal tuah a si lo ding,” tiah Bawipa Jehovah in a ti.

7:6^a Suah 32:14; Jer 18:8; 42:10; Eze 9:8; Jon 3:10

Tah diknak Hri Larnak

7 ^aHihi anih ih i hmuh mi cu a si: zoh hnik, Bawipa cu a kut ah darhlumthlai hri kengin, darhlumthlai hri thawi dawl mi kulh kiangah a ding. 8 ^bCule Jehovah in ka hnenah, “Amos, ziang na hmu?” tiah i ti.

7:7^a 2Sp 21:13

7:8^b 2Sp 21:13; Jer 1:11, 13; 15:6; Eze 7:2-9; Amo 8:2

Cule kei in, “Darhlumthlai hri!” tiah ka ti.

Cun Bawipa in, “Zoh hnik, ka mi Israel lakah darhlumthlai hri ka ret. Anmah cu ka zuah hai nawn lo ding.

9 ^aIsak-ih hmun sâng pawl cu a ṭhing ding ih,
Israel-ih hmun thianghlim pawl cu a lawnglak ding.
Jeroboam sungza dokalhin ralnâm thawn ka tho ding,”

7:9^a Sem 26:23; Pui 26:30-31; 1Sp 13:34; 2Sp 15:9; Isa 63:18; Hos 10:8

tiah a ti.

Amaziah-ih Phunzainak

10 ^aCun Bethel puithiam Amaziah in Israel siangpahrang Jeroboam hnenah hitin thu a cah, “Israel sungza lakah Amos in nangmah dokalhin a lo phiarthup a si. A ṭawngkampawl hmuahhmuah cu ram hin a phur thei lo ding. 11 ^bZiangahtile Amos ih sim mi cu hihi a si:

7:10^a Jos 7:2; 2Sp 14:23-24; Jer 38:4

7:11^b Jer 36:16; Amo 5:27

‘Jeroboam cu ralnâm in a thi ding ih,
Israel cu anmai ram ihsin ralkaih ih hruaihlo an si tengteng ding,’ ”

tiin.

12 ^aCun Amaziah in Amos hnenah,

7:12^a 1Sam 9:9; Mat 8:34

“Nang hmutu, feh aw!
Judah ram ah tlân aw.
Cu tawkah rawl ei awla,
Cu tawkah thuphuang aw.
13 ^aAsinan Bethel ah cun thuphuangsal nawn hlah,
Ziangahtile himi cu siangpahrang hmun thianghlim a si ih,
Siangpahrang inn a si,”

7:13^a 1Sp 12:29; Amo 2:12; Apo 4:18

tiah a ti.

14 ^aCun Amos in a sawn ih, Amaziah hnenah,

7:14^a 1Sp 10:27; 2Sp 2:5; Zek 13:5

“Kei cu profet ka si lo,
Profet fapa khal ka si lo,
Keimah cu tuu khāltu le ^asikamor rah kilkhawitu men ka si sawn.
15 ^bCun rante rual ka thlun hai laiah Jehovah in i hruai ih,
Jehovah in ka hnenah, ‘Feh aw, ka mi Israel hnenah thuphuang aw,’ tiah i ti.
16 ^cCuruangah Jehovah-ih kamsuakthu thei aw:
Nang in, ‘Israel dokalhin thuphuang hlah,
Cule Isak sungza dokalhin ṭawng hlah,’ tiah na ti.

7:14^a sikamor: 1Sp 10:27 simfiangnak zoh aw.

7:15^b Jer 7:1-2; 26:12; Eze 2:3-4

7:16^c Eze 4:13; Hos 9:3; Amo 2:12; 5:27

17 ^a“Curuangah himi hi Jehovah ih sim mi a si:

7:17^a Jer 28:16

‘Na nupi cu khawpi sungah hlawhhlang ah a cang ding;
Na fanupawl le fapapawl cu ralnâm in an thi ding;
Na ram cu tah a si ding ih, ṭhen a si ding;
Nang cu ram bawrhbang ah na thi ding ih,
Israel cu amai ram ihsin ralkaih ih hruaihlo tengteng a si ding,’ tiin,”

tiah a ti.

8

Ṭhal Thing Rah Larnak

1 ^aBawipa Jehovah ih i hmuh mi cu hihi a si: ngai hnik, ṭhal thing rah kho khat a um. 2 ^bCule anih in, “Amos, ziang na hmu?” tiah i ti.

8:1^a Amo 7:1

8:2^b Jer 1:13; Eze 7:2-9; Amo 7:8

Cule kei in, “Ṭhal thing rah kho khat,” tiah ka ti.

Cun Jehovah in ka hnenah,

“Ka mi Israel hrangah a cemnak a thleng thlang;
Ka zuah hai nawn lo ding.
3 ^aCule cuih ni ah, temple hlapawl cu
Ṭahaihramnak ah a cang ding, Bawipa Jehovah in a ti.
Hmun kip ah ruak a tawrin a um ding,
Cupawl cu thawmvâng um lo ten hlăwn an si ding,”

8:3^a Jer 47:2; Amo 5:16; 6:10

tiah i ti.

4 ^aNannih mitlasampawl dawlh thluh tu le
Ram sungih mifarahpawl palbĕttu, hihi ngaithla uh,
5–6 ^b“Thlairawl kan zuar thei nak dingah,
Ziang tikah Thla Thar a cem ding?
Sangvut kan zuar thei nak dingah,
Efa kan fatetter thei nak dingah,
Shekel kan tumter thei nak dingah,
Cuai thlainak dik lo hmangin mi kan bum thei nak dingah,
Mifarahpawl ngun ih kan lei thei nak dingah,
Mitlasampawl kedam kăwp khat ih kan lei thei nak dingah le,
Sangvut ṭha lo tiangih kan zuar thei nak dingah,
Ziang tikah Sabbath a cem ding,” tiah nan ti.
7 ^cJakob-ih ^dhngalnak sālin Jehovah in sia a săm:
“An tuah mi pauhpauh ka hngilh dah hrimhrim lo ding,” tiin.
8 ^eHimi ruangah ram cu khūr loin le ram sungih um zaten ṭap loin an um ding maw?
A ram sung zaten Nâl tiva pi bangin a tho ding,
Izip tiva pi bangin a tho ding, a suar ding ih a rehsal ding.
9 ^f“Cule cuih ni ah hitin a si ding,” Bawipa Jehovah in a ti,
“Sun hnuah ni ka tlakter ding ih,
Sunvâng laiah leilung ka thimter ding.
10 ^gNan puaipawl cu lusûn ṭahnak ah ka cangter ding ih,
Nan hlapawl hmuahhmuah cu ṭahnak ah ka cangter ding;
Cule mi kip tâi ah buri ka ret ding ih,
Mi kip lu cu ka kawngter ding.
Nan dinhmun cu fapa neihsŭn lusûn bangin ka tuah ding,
Cule a netnak cu a khâ mi ni vek a si ding.
11 ^h“Ngai hnik, ram sungah pām ka thlenter ding ni cu a ra lai, Bawipa Jehovah in a ti,
Rawl pām a si lo,
Tihal khal a si lo,
Jehovah-ih kamsuakthupawl theihnak pām a si sawn,
12 ⁱTifinriat pakhat ihsin tifinriat pakhat ah,
Sak lam ihsin nisuahnak lamah an vâkvai ding;
Jehovah-ih kamsuakthu hawlin
Suk le so ah an tlân ding,
Asinan an hmu lo ding.
13 ^j“Cuih ni ah fala him pawl le
Tlangvalpawl cu tihâlin an cau ding.
14 ^klSamaria sualnak sālih sesămtupawl le,
‘Na pathian a nun vekin, Maw Dan!’ tiih sesămtupawl le,
‘Beersheba lamzin a nun vekin!’ tiih sesămtupawl cu an tlu ding ih,
An thosal nawn lo ding,” tiin.

8:4^a Job 20:19; Sam 14:4; Thf 30:14; Amo 2:7

8:5-6^b Sem 31:7; Dnp 25:15; Neh 10:31; 13:15-16; Eze 45:10-12; Hos 12:7; Amo 2:6; 5:11; Mik 6:10-11; Zek 5:6

8:7^c Job 35:15; Sam 47:4; Hos 8:13

8:7^d hngalnak: Pathian a relnak a si.

8:8^e Job 9:6; Sam 18:7; Jer 46:8; Amo 9:5

8:9^f Job 5:14; Isa 59:9-10; Jer 13:16; Eze 32:7; Amo 5:8; Mik 3:6; Mat 27:45; Mar 15:33

8:10^g Sem 21:16; Pui 13:40; 26:31; Isa 3:17; Jer 2:19; Ṭah 5:15; Eze 7:18; Hos 2:11

8:11^h 1Sam 3:1; 2San 15:3; Isa 30:20; Jer 30:3

8:12ⁱ Eze 20:3, 31; Amo 4:8

8:13^j Isa 9:17; 41:17; Hos 2:3

8:14^k 1Sp 12:29; Sam 46:2; Amo 5:2, 5; Mik 1:5

8:14^l Samaria sualnak: Siria-mipawlih nunau pathian (Ashima) a relnak a si.

9

Thuṭhennak a Thleng Tengteng Ding

1 ^aBiakṭheng kiangah Bawipa dīng lai ka hmu ih, anih cun,

9:1^a Sam 68:21; Jer 11:11; Amo 2:14

“Sângka hnuai zawn zialpawl hnîn dingin, a parih lu bol pawl thawi aw,
Cule an zate lu parah bălthla hai aw.
Ralnâm in a tāng mipawl ka that hai ding.
Pakhat hman an tlânsuak lo ding ih,
Pakhat hman an luat lo ding.
2 ^aSheol tiang lai hman hai sehla,
Cu tawk ihsin ka kut in a lasuak hai ding;
Van ah an kai a si khalle,
Cu tawk ihsin ka dirtla hai thotho ding.
3 ^bCule Karmel tlang zim ih an relh a si khalle,
Cu tawk ihsin ka hawl hai ding ih ka la hai ding;
Ka hnen ihsin tifinriat tawdĕngah thupaw hman hai sehla,
Cu tawk ihsin rul thu ka pe ding ih, a cuk hai ding.
4 ^cAn doralpawl hmaiah ralkaih ah feh khal hai sehla,
Cu tawk ihsin ralnâm thu ka pe ding ih,
A that hai ding.
An parah ṭhatnak hrang si loin,
Siatnak hrangah ka mit ka ret ding,”

9:2^a Job 7:9; Jer 51:53; Eze 26:20; Oba 1:4

9:3^b Sem 49:17; Job 11:20; Sam 68:22; 139:8, 10; Isa 27:1; Jer 16:16; Amo 1:2

9:4^c Pui 26:33; Jer 21:10; Eze 5:12; 15:7

tiah a ti.

5–6 ^aRalkap rualpawlih Jehovah Bawipa, a hmin cu Jehovah a si.
Anih in leilung a thâm ih, a zupral,
Cu tawkih cêng mi zaten an ṭap,
Cuih leilung vangdâp parih um zaten Nâl tiva pi bangin an tho ih,
Izip tiva pi bangin an rehsal.
Van ah a pindan tlunta a sak ih leilung ah lei hnuai pindan a dĭn;
Tifinriat tipi a ko ih leilung vangdâp parah a burh.
7 ^b“Maw Israel tefapawl, nannih cu ka parah
Kush-mipawl vek nan si lo maw? Jehovah in a ti.
Israel cu Izip ram ihsin ka hruaisuak a si lo maw,
Filisṭia-mipawl cu Kaftor ihsin,
Siria-mipawl cu Kir ihsin?
8 ^cNgai hnik, Bawipa Jehovah-ih mit cu lalram sualrál parah a fu ih,
Cuih ram cu leilung vangdâp ihsin ka thaihlo ding;
Sikhalsehla Jakob sungza cu ka thaihlo thluh hai lo ding, Jehovah in a ti.
9 ^dZiangahtile thu ka pe hrimhrim ding ih,
Israel sungza cu miphun zate lakah ṭangṭa ih fang khei vekin ka khei ding;
Cuti cing khalin fáng khat hman lei ah a tla cuang lo.
10 ^eKa mipawl lakih misual zaten ralnâm in an thi ding,
‘Vanduainak cun in man lo ding ih, in pah fawn lo ding,’ tiih a titupawl thawn an thi ding.

9:5-6^a Sam 46:2, 6; 104:1-3, 5; Amo 5:8; 8:8

9:7^b 2San 12:3; Isa 20:4; Amo 2:10

9:8^c Jer 4:27; 30:11; 44:27

9:9^d Isa 30:28; Jer 31:36; Dan 9:7; Luk 22:31

9:10^e Jer 5:12; 49:37; Eze 20:38; Amo 6:3

Israel Tundinsal a Si Ding

11 ^a“Cuih ni ah a tlu zo mi David-ih puanthlam ka tungding ding ih,
A siatbăl mipawl ka rĕm ding;
A siatnakpawl ka rĕmṭha ding ih, hlanlai vekin ka dĭnsal ding.
12 ^bCutin Edom tāngsŭn pawl le,
Ka hmin ih kawh mi miphunpawl hmuahhmuah an congah thei ding,
Tiah himi tuahtu Jehovah in a ti.
13 ^cNgai hnik, lei lettu in fang attu a dawiman ding cān le
Sabit palsawrtu in a ci tuhtu a dawiman ding cān a thleng ding, Jehovah in a ti.
Tlangpawl ihsin sabit zu thlum a fawr ding ih,
Tlangmûalpawl zaten a ciapter thluh ding.
14 ^dKa minung Israel-ih vanneihnak ka tungdingsal ding;
Annih in khawpi ṭhing pawl an sakṭha ding ih, an luah ding.
Sabit hmuan khal an tuah ding ih, cumi ihsin sabit zu an in ding;
Hmuanpawl khal an tuah ding ih, cumi ihsin a rah an ei ding.
15 ^eAnnih cu anmai ram ah ka phun hai ding ih,
Anmah ka pek mi ram ihsin phawi an si dah nawn lo ding,” tiah Jehovah na Pathian in a ti.

9:11^a Sem 26:22; Sam 53:6; 80:12; Isa 7:2; 49:8; Eze 17:24; Mik 7:8, 11; Zek 12:7; 14:10

9:12^b Mip 24:18; Isa 43:7; Jer 25:29; Apo 15:16-17

9:13^c Pui 26:5; Lai 9:27; Rut 2:3; Jer 31:38; Joe 2:24; 3:18

9:14^d 2Sp 19:29; Isa 32:18; 62:9; Jer 29:14; 33:7; Amo 5:11

9:15^e Suah 15:17; Isa 60:21; Jer 23:8; 24:6; Joe 3:20; Oba 1:17