About Bible Thianghlim | ©

BibleThianghlim – 1 Timothy

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 Timothy

123456

  • A ngantu: Paul
  • A siartu: Timothy
  • Ngan kum: A.D. 64-65

Paul in a missionary khualtlawn a vei khatnak ah Listra khua a pal phahah Timothy a táwng. Timothy-ih nu cu Jew-mi a si ih, a pa cu Grikmi a si. A nu le a pi hi zumtu an si ih, Thukham Hlun thu hmangin a nauhak lai hmuahhmuah Timothy zirhtu an si (1:5; 3:15). Timothy hi a rak zir mi thu ruangah, asilole Paul ih a vei khatnak missionary khual a tlawn ṭumih a thusim mi a theih ruangah zumtu ih cang mi a si men thei (Apo 14:6, 21). Paul in a missionary khualtlawn a vei hnihnak ah Listra a pál. Cuih cān ah Timothy cu Bawipaih hna ah dungthluntu rinum a rak si zo (Apo 16:1-2). Timothy cu Paul zawngah a feh ih Filipi, Thessalonika, Berea le Korinth kawhhranpawl hrangih hnaṭuannak ah a bawm (Apo 16:1-17:16; 18:5). Timothy cakuat pakhatnak hi cuih khualtlawnnakpawl hnupi ah Paul ih a ngan mi a si.

Apostolpawlih cangvaihnak cabu-ih thil cang mipawl thlen ṭheh hnuih ngan mi a si. Apostolpawlih Cangvaihnak cabu cu A.D. 60-62 hrawngih Rom khawpi ih Paul thawng a tlak thu in a cem. A netnakah Paul cu Rom-mipawl in an thlahsal (Fil 1:23-27; 2:24; Flm 22). Cumi hnuah Efesa ah Timothy thawn an fehsal. Cu ṭhehin Paul cu Masidonia ah a feh ih, Timothy cu Efesa khua ah a tān ta (1Ti 1:3).

Timothy cakuat pakhatnak hi A.D. 64-65 hrawngah, Paul in a kirsal lohli thei lo ding thu a theihawk tikah Timothy hnenih a kuat mi a si (3:14-15; 4:13). Efesa kawhhran kilkhawiih a um rero lai mi a hnaṭuanpi tlangvalpa hnenih Paul in a bulpâk thurawn peknak cakuat a si (Efesa Thuhmaihruai siar aw).

Timothy hnenih Paul cakuat a pakhatnak ah tual sung kawhhran hrangih man nei mi thurawn peknak a tel. Ziangruangahtile kawhhran cu “thutak ṭhuam le ṭhumawknak” a si ruangah, a tuah mi thil ziangkimah Pathian thu thlun ding hi tual sung kawhhran hrangah a thupi tuk lawmmam (3:15).

Thu Hlawm Ṭhen

  • I. Thuhmaihruai (1:1-2)
  • II. Paul in Timothy kha a nun in zumtupawl ih zohṭhim ding si dingin thu a cah (1:3-20)
  • III. Paul in kawhhran ih thil ṭulpawl a rel (2:1-6:19)
    • A. Pathian biak tikih umdān (2:1-15)
    • B. Pastor le dikhon tlinnakpawl (3:1-16)
    • C. Tluksiatnak (4:1-5)
    • D. Timothy-ih bulpâk nun (4:6-16)
    • E. Kawhhran sungih minung phun dangdang hnenih Timothy-ih ṭuanvo le Pathian lamih an ṭuanvopawl (5:1-6:19)
  • IV. Thukharnak (6:20-21)

1

Cibaibûknak

1 aIn Rundamtu Pathian le kan ruahsan mi Bawipa Jesu Khrih thupek bangtukih Jesu Khrih-ih apostol Paul in, 2 bzumnak ih ka fa taktak Timothy hnenah:

1:1a Tit 1:3

1:2b Apo 16:1; 1Ko 4:17; 1Th 2:11

Kan Pa Pathian le kan Bawipa Khrih Jesu hnen ihsin, zangfahnak, zahngainak le hnangamdaihnak um hram seh.

Zirhnak dik lo lakih Kilvengaw dingih Fawrhnak

3 aZirhnak danglam zirh lo dingin mi hrekkhat thu na cah hai thei nak dingah, Efesa khua ah rak um ringring aw, cucu Masidonia peng ka feh zawngih ka lo ngĕn mi kha a si. 4 bAnmah cu phuahcawp thuanthu lam le cem ti nei lo cithlah sâwngawknak lam ngaihsak lo dingin thu cah hai aw. Cumi cun zumnak ih a um mi Pathian lam tuahṭhatawknak suah loin, elawknak a suakter sawn. 5 cCun thupekih tumtah mi cu thinlung thianghlim, sia le ṭha theihnak ṭha le zumnak dik ihsin a suak mi duhdawtnak a si. 6 Mi hrekkhat in cupawl cu an pialsan ih, thu mumal lo relnak lamah an her. 7 dZiang an ṭawng ti le ziang thil an nĕmhnget ti thei loin, Dān zirhtu si an duh.

1:3a Apo 16:9; Gal 1:4, 7

1:4b 2Ti 4:4; Tit 1:1

1:5c Gal 5:6; 2Ti 1:5

1:7d Job 38:2; Efe 4:11

8 aSikhalsehla mi in a sidān vekih a hman asile, Dān cu a ṭha ti kan thei. 9 bHi khal hi kan thei: dān cu midingfelpawl hrangih tuah mi a si lo ih, dān nei lo pawl le thulung lo pawl hrang, Pathian ngaihsak lo pawl le misualpawl hrang, mithianghlim lo pawl le Pathian zah lo tupawl hrang, pale thattupawl le nule thattupawl hrang, mi thattupawl hrang, 10 cnunau-mipa sualnak tuahtupawl hrang, tawka hur pawl hrang, minung rûkhmangpawl hrang, thuphan perpawl hrang, thuphan thu ih sesămpawl hrang le zirhawknak ziktluak dodaltu thil pauhpauh hrangah a si. 11 dCuih zirhawknak ziktluak cu thangṭhat tlak Pathian thuthangṭha ropi milin a si ih, cucu Pathian in i ap a si.

1:8a Rom 7:12

1:9b Gal 3:9, 19; 5:23

1:10c 2Ti 1:13; Tit 1:9

1:11d Gal 2:7; 1Th 2:4; Tit 1:3

Paul parih Pathian Zahngainak

12 aCule i caktertu Khrih Jesu, kan Bawipa hnenah lungawi thu ka sim, anih cun mirinum ih i siar ruangah, rawngbawl dingin i ruat a si. 13 bHi hlanah kei cu mi thangsiattu, mi hremtu le mi tinatu rak si hman ningla, zum loin thei loih ti ka si ruangah, zahngainak ka co. 14 cCule kan Bawipaih zangfahnak cu Khrih Jesu ih a um mi zumnak le duhdawtnak thawn nasa zetin a rak luangliam.

1:12a Apo 9:15; Fil 4:13

1:13b Apo 8:3; 26:9

1:14c 2Ko 4:15; 1Th 1:3; 2Ti 1:13

15 a Khrih Jesu cu misualpawl rundam dingin leitlun ah a ra ti cu rin tlak mi ṭawngkam a si ih, a pumhlum ih pawm thluh ding a si; keimah cu an lakah misual bik ka si. 16 bCuti si khal sehla, himi ruangah a si zahngainak ka rak co, cutin kumkhaw nunnak an conak dingah tuih hnuih amah zumtu ding pawl ih zohṭhim ding mi si dingin, Jesu Khrih cun a thinsaunak zaten keimah ah a langter hmaisa a si. 17 cCule kumkhaw Siangpahrang, thi thei lo, hmuh theih lo, Pathian fim umsŭn hnenah cawimawinak le ropitnak cu a kumkhuain kumkhua um hram seh. Amen.

1:15a Mar 2:17; 2Ti 2:11; Tit 3:8

1:16b Mat 25:46; Joh 3:15; Rom 2:4

1:17c Rom 11:36; Kol 1:15; Jud 1:25; Thu 15:3

Doawknak Ṭha Do Aw

18 aKa fapa Timothy, na thuhla an rak phuan cia mi bangin ral donak ṭha na do thei nak dingah, hi thucah hi na hnenah ka lo ap. 19 bZumnak le sia le ṭha theihnak ṭha cu kai hngetin do aw. Mi hrekkhat cun cucu an hlăwnhlo ih, an zumnak cu a siat mi lăwng vekah a cang. 20 cAn lakah Haimenias le Alexander an tel; Pathian thangsiat lo an zir thei nak dingah, annih cu Setan kut ah ka hlan hai a si.

1:18a 2Ti 2:3

1:19b 2Ti 2:18

1:20c 1Ko 5:5; 2Ti 2:17; 4:14

2

Thlacamdān Zirhnak

1 aCuruangah a hmaisabikah, dilnak siseh, thlacamnak siseh, mi dang hrang thlacamnak siseh, lungawi thu simnak siseh mi zate hrangah tuah uh tiah ka lo fawrh a si. 2 bPathian ngaihsaknak hmuahhmuah le thil zahum hmuahhmuah tuahin, daite le remawtei kan nunkhawm thei nak dingah, siangpahrangpawl le thuneitupawl hmuahhmuah hrang khalah thlacam uh. 3 cZiangahtile himi cu in Rundamtu Pathian mithmuh ah a ṭha ih cohlan tlak a si. 4 dPathian cun mi hmuahhmuah rundam ih an um ding le thutak an theih ding a duh. 5 eZiangahtile Pathian pakhat a um ih, Pathian le minung karlakah remnak Palai pakhat, Minung Khrih Jesu a um. 6 fAnih cu mi hmuahhmuah tlennak hrangah amah le amah a peaw, cucu a tikcucān teah theihter a si. 7 gCuih thu theihter dingah kei cu thusimtu ah le apostol ah le zumnak ah le thutak ah Zentelpawl zirhtu ah ruat ka si. Khrih ah thutak ka sim, thuphan ka per lo.

2:1a Efe 6:18

2:2b Rom 13:1; 2Ti 3:5

2:3c Luk 1:47

2:4d Eze 18:23; Joh 3:17; Rom 11:14; 2Ti 2:25

2:5e Rom 3:29-30; Gal 3:20

2:6f Mat 20:28; 1Ko 1:6; Tit 1:3

2:7g Rom 9:1; 2Ti 1:11

Kawhhran sungah Nunau le Mipa

8 aCuruangah hmun tin ah mipapawl cu an kut thianghlim thlirin, thinlingnak le rinhlelhnak um loih thla an cam ding ka duh.

2:8a Luk 24:50

9 aCuti vek thothoin, nunaupawl khal in a mawi tawk mi hnipuan le lungput ṭha thawn thuamaw hai sehla, sám phiar simaw, sui simaw, keplung simaw, a mankhung mi hnipuan thawn simaw thuamaw loin, 10 bnunaupawl cu hnaṭuan ṭha thawn thuamaw sawn hai sehla ka duh. Cucu Pathian ngaihsak tiaw nunaupawl ih ti ding mawi a si.

2:9a 1Pe 3:3

2:10b Thf 31:13

11 aNunau cun tlukluhnak hmuahhmuah thawn daiten umin, zir seh. 12 bCule nunau ih thuzirh ding simaw, mipa tlunih thu a neih ding simaw cu ka siang lo, daiten um sawn seh. 13 cZiangahtile Adam cu sersiam hmaisa a si ih, cuih hnuah Evi cu sersiam a si. 14 dCule Adam cu bumin a um lo, nunau sawn cu bumin a um ih, dān pahbăltu ah a cang. 15 Sikhalsehla zumnak le duhdawtnak le a mawi tawkten thianhlimnak ih an umpeh vivo asile, nau hrin ah rundam a si ding.

2:11a 1Pe 3:3-4

2:12b Efe 5:22

2:13c 1Ko 11:8

2:14d 2Ko 11:3

3

Kawhhran Hotuih Tlinnak

1 aMi pakhat in bishop si a duh ahcun, hnaṭuan ṭha a duh a si ti mi hi, rinsan tlak mi ṭawngkam a si. 2 bBishop cu sawihnăwm kai lo, nupi pakhat nei, sūpaw thei, fimkhur thiam, nuncan ṭha, khual ṭha, mi zirh thei, 3 csabit zu ri lo, mi tawhhmang lo, paisa duham lo, mizaidam, mi thu-elhmang lo, sumpai ngaina lo a si ding a si. 4 dMai innsang ṭha zetih uk thiam, zahum zetih fāte thu hnuaiih ret thei a si ding a si. 5 eZiangahtile mi pakhat in amai innsang ziangtiih uk ding ti a theih lo ahcun, ziangtin saw Pathian kawhhran cu a kilkhawi thei ding? 6 fZumtu thar si hlah seh, cu lo asile puarthaunak thawn a hngal ding ih, Diabol bangin thiam lo coternak ah a tlu pang ding. 7 gCuihtlunah a leng lam mipawlih simṭhat mi a si ding a si, culole mawhthluknak ah le Diabol-ih tháng ah a tlu pang ding.

3:1a Tit 1:7

3:2b Rom 12:13; 2Ti 2:24; Tit 1:6-8; 2:2

3:3c 2Ti 2:24; 1Pe 5:2

3:4d Tit 1:6

3:5e 1Ko 10:32

3:6f 2Ti 3:4; 2Pe 2:4

3:7g Mar 4:11; 2Ti 2:26

Dikhon Tlinnak

8 aCuvek thothoin, dikhonpawl khal mizahum, lei phir nei lo, sabit zu pham lo le paisa duham lo, 9 bsia le ṭha theihnak thiang ih zumnak thuthup kai hnget tu an si ding a si. 10 Cupawl khal cu hniksak hmaisak si ta sawn hai sehla, sawihnăwm kai lo dikhon dinhmun in rawngbawl hai seh.

3:8a Fil 1:1; Tit 1:7

3:9b Apo 23:1

11 aCuti vek thothoin, an nupipawl khal mizahum, mi relsiathmang lo, sūpaw thei, thil ziangkimih rinsan tlak an si ding a si.

3:11a 2Ti 3:5; Tit 2:3

12 Dikhonpawl cu nupi pakhat nei, anmai innsang le an fāte ṭhatei uk thei tu si hai seh. 13 Ziangahtile ṭha zetih rian zo tu dikhonpawl cun anmai hrangah dinhmun ṭha le Khrih Jesu ih um zumnak lamah ralṭhatnak nasa zet an nei.

Pathian Ngaihsaknak Thuthup

14 A rei hlanah na hnenih rat beiseiin, hi thilpawl hi na hnenah ka ngan a si. 15 aSikhalsehla ka cām rei pangah Pathian-ih innsang ah nangmah rori in ziangtiih um ding ti na theih thei nak dingah ka ngan. Pathian-ih innsang cu thutak ṭhuam le ṭhumawknak Pathian nung kawhhran hi a si.

3:15a Mat 16:16; 1Ko 10:32

16 aCule el ding um loin Pathian ngaihsaknak thuthup cu a ropi a si:

3:16a Mat 1:23; Mar 16:19; Joh 1:14; Rom 1:3-4; 16:25-26; Kol 1:23

Pathian cu taksa ah a rung cang,
Thlarau in a dingfel ti a langter,
Vancungmipawl in an hmu,
Zentelpawl hnenah phuan a si,
Leitlun mipawl in an zum ih,
Ropitnak sungah lâksohin a um.

4

Zumnak Tlansannak

1 aCān neta lamah cun mi hrekkhat in zumnak an tlansan ding ih, bumnak thlaraupawl le khawsiapawlih zirhnak an ngaihven sawn ding ti atu-ah Thlarau cun fiang zetin a sim a si. 2 bCuvek mipawl cu depde zetih thuphan per, an sia le ṭha theihnak cu thir ling ih dehpit mi vek a si. 3 cNupi-pasal neih an kham ih, a zumtu le thutak a theitupawl in lungawi thu simnak thawi an cohlan ding mi Pathian sersiam mi sapawl ei lo dingin an kham. 4 dZiangahtile Pathian sersiam mi tinkim hi an ṭha thluh ih, lungawi thu simnak thawi kan cohlan a si ahcun, hnawn ding zianghman a um lo. 5 eZiangahtile cumi cu Pathian kamsuakthu le thlacamnak in thianhlimter a si.

4:1a Mar 13:5; Joh 16:13; 1Ko 2:10; 2Ti 3:1; 2Pe 3:3

4:2b Efe 4:19

4:3c Rom 14:6; 1Ko 10:30; Kol 2:16; Heb 13:4

4:4d Mar 7:18-19; Apo 10:15; Rom 14:14-18

4:5e Heb 4:12

Khrih Rawngbawltu Ṭha

6 aZumnak kamsuakthupawl ah cawm mi siin le zirhnak ṭha fimkhur zetih na thlun zo mipawl kha unaupawl na simfiang hai asile, Jesu Khrih-ih rawngbawltu ṭha na si ding. 7 bAsinan Pathian zahlonak le nutarpawlih thuanthu phuahcawp kha hrial awla, Pathian ngaihsaknak lamah sawizăwiaw sawn aw. 8 cZiangahtile taksa sawizăwiawknak cun hlawknak málte a nei, asinan Pathian ngaihsaknak cun thutiamkam atu-ih nunnak hrangah le a ra thleng lai ding mi nunnak hrangah a neih ruangah ziangkimah a hlawk a si.

4:6a 2Ti 3:15

4:7b 2Ti 2:16

4:8c Mat 6:33; Mar 10:29-30

9 Hihi rinsan tlak le cohlan thluh tlak ṭawngkam a si. 10 aZiangahtile mi hmuahhmuah Rundamtu, a hleicein a zumtupawl Rundamtu Pathian nung kan ruahsan ruangah, nasa zetin kan ṭuan ih mawhthluknak kan tuar a si. 11 Hi thilpawl hi thu pe hai awla, zirh hai aw.

4:10a Mat 16:16; Luk 1:47

Na Rawngbawlnak ah Fimkhur Aw

12 aMino na sinak hi zohman in lo nautat hlah hai seh, cuhnakin ṭawngkam ah siseh, umtlandān ah siseh, duhdawtnak ah siseh, lungput ah siseh, zumnak ah siseh, thianhlimnak ah siseh, zumtupawlih zohṭhim ding si sawn aw. 13 bKa ra thlen lai hlanlo, casiar siseh, mi thazang pek siseh, mi va zirh siseh nasa zetin tuah aw. 14 cNangmah ih um thilpek, elder-pawl na parih kut an suan laiih simsungnak hmangih pek mi kha thlahthlam hlah.

4:12a 1Th 1:7; 2Th 3:9; 2Ti 1:7; Tit 2:7; 1Pe 5:3

4:13b Luk 4:16; Apo 13:14-16; Kol 4:16; 1Th 5:27

4:14c Apo 6:6; 2Ti 1:6

15 Mi hmuahhmuah hnenih na ṭhansonak a lăng thei nak dingah, hih thupawl hi ngunngaih zetin ngaihtuah awla, cupawl ah cun na pumhlum in um aw. 16 aNangmah hrangah le na thuzirh mi hrangah fimkhur awla, cupawl ah cun um ringring aw. Ziangahtile cutiih na tuah a si ahcun, nangmah le na thu ngaithlatupawl na humhim ding a si.

4:16a Rom 11:14

5

Zumtu lakih Umdān Ding

1 aKum upadeuh cu na zetin kawk hlah awla, pa vekin thape sawn aw, minodeuh pawl cu unau vekin thape hai aw. 2 Nunau kum upadeuh pawl cu nu vekin, minodeuh pawl cu thianhlimnak hmuahhmuah thawn farnu vekin thape hai aw.

5:1a Pui 19:32; Tit 2:2

Nuhmei diktak Upat Aw

3 Nuhmei a si ngaingai mi nuhmei cu upat aw. 4 aAsinan nuhmei, zo vek khal in fātepawl siseh, tupawl siseh a neih ahcun, cupawl cun a hmaisabikah an inn lamah Pathian ngaihsakdān le an nu le pa rulhsaldān zir hai seh. Ziangahtile cucu Pathian hmaiah a ṭha ih, pawm tlak a si. 5 bNuhmei a si taktak mi, mah lawngih um cun Pathian a rinsan ih a sun a zanin dilnak le thlacamnak a nei ringring. 6 cAsinan nuamtawl ih nung nuhmei cu a nun lai khalah a thi a si. 7 Cule zumtupawl cu sawihnăwm kai lo an si thei nak dingah, hi thilpawl hi nunpi dingin thu pe hai aw. 8 dAsinan zokhal amai mi le sa, a hleicein amai sungkua rori hman a ngaihsak lo a si ahcun, zumnak a phatsan ih, zumlotu hnakin a ṭha lo sawn a si.

5:4a Rom 12:2; Efe 5:10; 6:1-2

5:5b Luk 2:37; Rom 1:10; 1Ko 7:34; 1Pe 3:5

5:6c Luk 15:24

5:8d 2Pe 2:1; Jud 1:4

9 Kum 60 kim hrih lo mi nuhmei cu nuhmei lakah siartelh ding an si lo. Mi pakhat ih nupi rak si dah, 10 ahna ṭha ṭuan ruangih simṭhat mi, fāte rak cawm pitling, mikhualpawl rak thlengterin, mithiangpawl ke rak khawlhsakin, mizawnzaipawl rak bawmin, hna ṭha pauhpauh taima zetih a ṭuan ah cun, nuhmei ah siartel aw.

5:10a Luk 7:44; Apo 9:36; Rom 12:13; 1Pe 2:12

11 Asinan nuhmei nodeuh pawl cu telh hai hlah, ziangahtile an tisa câkhiarnak a ṭhan tikah, Khrih thawn a hlatawter hai ih, pasal neih an duh leh sal ṭheu. 12 An zumnak hmaisasawn an hlăwn ruangah thuṭhen an si. 13 aCun zangzel an zir ih, inn khat hnu inn khat an vâktawi vivo. Cule zangzel lawng si loin mi an rel ih, mi dang thuhla ah rak hrawlhaw vein, an rel lo ding mi thilpawl an rel ṭheu. 14 bCuruangah kum nodeuh pawl cun pasal nei hai sehla, fāte neiin innsungsang lam kilkhawi hai seh, mawhthluknak ding remcâng zianghman ral pa hmuter lo hai sehla ka duh. 15 cZiangahtile mi hrekkhat Setan lamih an hawikir zo ruangah a si.

5:13a Rom 1:29; 2Th 3:11

5:14b 1Ko 7:9

5:15c Mat 4:10

16 Zumtu mipa, asilole nunau in nuhmei umpi a neih asile, anmah in câwmdawl hai sehla, kawhhran in nuhmei a si taktak mi an cawmdawl thei nak dingah kawhhran buaipiter hlah hai seh.

Elder-pawl Upat Aw

17 aṬhateih mi kaihruai thei tu elder-pawl, a hleicein kamsuakthu le zirhnak lamih nasa zetih a ṭuantupawl cu a letih sunlawih tlakih ruah si hai seh. 18 bZiangahtile Cathiang in, “Caw cang in thlairawl a cīl laiah a hmur na ṭem lo pei,” tiah a ti ih, “Hnaṭuantu cu a ṭuan man hmu tlak a si,” tiah a ti fawn.

5:17a Apo 11:30; Fil 2:29; 1Th 5:12

5:18b Pui 19:13; Dnp 25:4; Mat 10:10; Luk 10:7; 1Ko 9:9, 14

19 aElder an hēknak cu theihpitu pahnih simaw, pathum simaw hnen ihsi lo cun rak pawm hlah. 20 bElder thil sual tuahtupawl cu elder dang pawl khal in an ṭih thei nak dingah, mi zapi hmaiah kawk aw.

5:19a Mat 18:16; Apo 11:30

5:20b Dnp 13:11; 2Ti 4:2; Tit 1:13

21 aPathian le Bawipa Jesu Khrih le hril mi vancungmipawl hmaika ah khoh zetin thu ka lo cah a si, mi pakhat duh sawnin, thleidannak thawn zianghman tuah loin, hi thilpawl hi thlun aw.

5:21a 2Ti 4:1

22 aZo par hmanah áwlten na kut suang hlah awla, mi dang pawlih sualpawl khalah va tel hlah; thianghlimten nangmah le nangmah kilaw aw.

5:22a Sam 18:26; Apo 6:6; Efe 5:11

23 Tidai lawnglawng in loin, na pum ruangah le na dam lo ṭheu ruangah sabit zu málten hmang aw.

24 Mi hrekkhat ih sualpawl cu an langsar ih, an thuhla cu thuṭhennak hmun ah anmai hlanah a thleng, asinan mi hrekkhat cu nehhnu lawngah an ra lang. 25 Cuti vek thothoin, mi hrekkhat ih hnaṭuan ṭha cu an langsar ih, a langsar lo mi hnaṭuan ṭha khal thuh theih an si cuang lo.

6

Nan Bawipawl Upat Uh

1 aPathian hmin le a zirhnak thangsiat a silonak dingah, sál hngawngkol bâttu hmuahhmuah in an bawipawl cu upatnak hmuahhmuah co tlak an si ti thei hai seh. 2 bCule sál, zumtu bawi neitupawl cun an bawipawl cu unau an si ruangah nautat hlah hai seh, cuhnakin hlawknak cotupawl cu zumtu le duhdawt mi an si ruangah nasa sinsinin an bawipawl cu rian sawn hai seh. Hih thilpawl hi zirh awla, fawrh aw.

6:1a Efe 6:5; Tit 2:5, 8

6:2b Flm 1:16

Zirhtu dik lo le Lungkim Tawknak Dik

3 Mi pakhat khat in zirhnak phun dang a zirh ih, kamsuakthu hrisel pawl, kan Bawipa Jesu Khrih kamsuakthu le Pathian ngaihsaknak lam zirhawknak vekin a pawm lo a si ahcun, 4 aanih cu mipuarthau a si, zianghman theih mi a nei lo ih, thuelawknak le ṭawngkam sullam thu ih el-awk hiar nak hrisel lo a nei sawn. Cumi ihsin iksiknak, tawhawknak, mi dang relsiatnak, rinhlelhawknak ṭha lo pawl an suak. 5 bCuti vekih mi elhmang pawl cu lungthin bawrhhlawh le thutak pai lo, Pathian ngaihsak hi sumpai hlawknak lamzin a si tiih ruattupawl an si. Cupawl hnen ihsin nangmah le nangmah thiarfihlimaw aw.

6:4a 2Ti 2:14; 3:4

6:5b 2Ti 3:8; Tit 1:15

6 aCun lungkim tawknak thawi Pathian ngaihsaknak cu hlawknak ropi a si. 7 bZiangahtile hi leitlun ah zianghman kan kenglut lo ih, zianghman kan kengsuak thei fawn lo ding. 8 cCule rawl le hnipuan kan neih mi thawn lungkim tawk uhsi. 9 dAsinan len a duhtu cun sualfawrhnak ah, tháng ah le thil atthlak tampi câkhiarnak le mi siatsuah thei câkhiarnak cak zet tampi ah an tlu; cumi cun siatralnak le hlohralnak ah mi a hlăwnpil. 10 eZiangahtile paisa ngainat cu ṭhatlonak hmuahhmuah ih hrampi a si, mi hrekkhat cun sumpai mi an daw ih, zumnak ihsin an fehpêng, cule riahsiatnak tampi thawn anmah le anmah an suntlăngaw.

6:6a Fil 4:11; Heb 13:5

6:7b Job 1:21; Ths 5:15

6:8c Thf 30:8; Heb 13:5

6:9d Thf 15:27

6:10e Jos 7:21; Jam 5:19

Zumnak Doawknak Ṭha

11 aAsinan nang, Maw Pathian mi, cuih thilpawl cu tlansan awla, dingfelnak, Pathian ngaihsaknak, zumnak, duhdawtnak, tuartheinak, zaidamnak pawl cu dawi aw. 12 bZumnak doawknak ṭha cu do aw, kumkhaw nunnak cu pâwk ringring aw, cumi hrangah kawh khal na si. Theihpitu tampi hmaika ah phuansuahnak ṭha na phuang zo. 13 cPathian, thil ziangkim tinungtu mithmuh ah le Khrih Jesu, Ponṭias Pilat hmaika ih phuansuahnak ṭha theihtertuih hmaika ah thu ka lo cah. 14 dKan Bawipa Jesu Khrih a rung lăng hlanlo thianghlim le sawihnăwm kai loin, hi thupek hi kil aw. 15 eCucu Pathian in amai cān teah thangṭhat mi le fHukim umsŭn, siangpahrangpawlih Siangpahrang le bawipawlih Bawi cun Khrih cu a langter leh ding. 16 gAmah lawngin thih thei lo nak a nei ih, zohman ih naih theih lo tleu ah a cêng. Amah cu zohman in an hmu lo ih, a hmuh khal an hmu thei lo, a hnenah cawimawinak le kumkhaw uknak um seh. Amen.

6:11a 2Ti 2:22; 3:17

6:12b Mat 25:46; 1Ko 9:25; Fil 3:12; Heb 3:1

6:13c Joh 18:33-37; 2Ti 4:1

6:14d 1Ko 1:7; 2Ti 1:10

6:15e Dan 2:47; Tit 1:3; Thu 1:5

6:15f Hukim: Huham nei kim tinak a si.

6:16g Joh 1:18; Rom 11:36; 1Joh 1:7

Milianpawl hnenih Thucah

17 aTuih san milianpawl kha ngaisangaw lo ding le a hnget lo mi lennakpawl rinsan loin, thil hmuahhmuah năwmpi dingih tam zetih in petu a nung mi Pathian rinsan sawn dingin thu pe hai aw. 18 b Thil ṭha tuah dingin, thil ṭha tuahnak ih lian dingin le tirhsiang zet le mi dang hlawm duhnak nei dingin thupe hai aw. 19 cCutin anmai hrangah a ra thleng lai ding mi cān hrangah ṭohram ṭha an khawlkhawm thei ding ih, kumkhaw nunnak an pāwk thei ding.

6:17a Luk 12:20; Apo 14:17

6:18b Rom 12:8; Efe 4:28

6:19c Mat 6:20; Fil 3:12

Zumnak Hum Aw

20 aMaw Timothy! Na hnenih ap mi thil cu kil ṭha awla, Pathian zahlonak le sullam nei lo phunnawinakpawl le mi in dik lo zetih theihnak an ti mi dokalhnak cu hrial aw. 21 bMi hrekkhat in cuih theihnak cu ka nei an ti ih zumnak an ṭhelh. Zangfahnak na hnenah um seh. Amen.

6:20a 2Ti 1:12, 14; 2:16

6:21b Kol 4:18; 2Ti 2:18