About Bible Thianghlim | ©

BibleThianghlim – 2 Samuel

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

2 Samuel

12345678910
11121314151617181920
21222324

• A ngantu: Theih a si lo
• Thil cang kum: B.C. 1011-971
• Ngan kum: B.C. 900 hnu hrawng

Samuel bu khatnak le bu hnihnak hi a thawk ah cun cazual pakhat ih kăwm a si.

Theih lo mi ngantu (ngantupawl) hin Solomon thih hnu le Israel lalram pahnih ih a ṭhenawk hnu (1Sam 27:6, “Judah siangpahrangpawl”) kum tampi hnaṭuan thu a ngan. Hi cabu ngantu (ngantupawl) in kum reipi hnuah a ngan ko nân, hlanlai thu le hla pawl cu a ṭhumawknak ah a hmang. Siangpahrang Saul-ih uknak cemnak le David-ih uk thawknak cu Samuel bu hnihnak a thawknakah kan hmu (B.C. 1011). David-ih uknak hmuahhmuah cu hi cabu sungah kan hmu ih, a ni netabik pawl cu Siangpahrang bu khatnak bung 1 le 2 ah a lang (B.C. 971).

Hi cabu in bung khatnak ah (1:14, 16) “Bawipaih Hriak thih mi” thuhla a rel. Cumi cu Samuel bu khatnak in a theihter zo mi thupi a si ti casiartu in a theih a ṭul (1Sam 2:10). Samuel bu hnihnak hin “hriak thih” ti ṭawngkam hi Thukham Hlun bu dang hnakin a hmang tam (vei 30 hnak tam a hmang). A tamsawn cu Samuel bu khatnak ah a si ih, Saul cu Pathian ruat mi a si ti David in a theihthiam thu a langter. David in ni khat khat ah siangpahrang a si ding ti a thei, asinan cucu Pathian in a sian tiktikah a si ding ti khal a thei, cule David in Pathian thu a lung. Cuih cān cu Samuel bu hnihnak ah a thleng. Israel-mipawl in siangpahrang an ngĕnnak cu an tlunih Pathian uknak an hnáwng tinak a si (1Sam 8:7). Asinan Bawipa in an tlunah a uk thotho, ziangahtile anih cun an siangpahrangpawl kha a hril ih, hriak a thih hai.

Cuih thutak cu Siangpahrang bu khatnak le bu hnihnak ah a nawlh leuhleuh. Milai hmuhnak cun, thuanthu cu David-ih thuhla a si. A kau zawngih thlir cun, thuanthu cu Pathian thuhla le a mipawl hnenih a rinumzia, a tumtahpawl le a thutiamkampawl thuhla a si. Hi cabu sungah thil thupi tampi a cangsuak: David in Jerusalem a neh ih, cucu Pathian biaknak hmun ah a tuah (bung 5-6); Pathian in David le a tesinfapawl thawn kumkhaw thukham a tuah (bung 7); David in Bathsheba hnenah thil sual a tuah, Pathian in a kawk ih, David a siraw (bung 11-12); David in sungkua buainak a nei, a hleicein a fapa Absalom thawn (bung 13-19); David in a ralkappawl mipum a siar ih, Pathian in amah cu dān a tat, asinan cuih dāntatnak cu Pathian in temple hmun hrilnak hrangah a hmang (bung 24).

David thawi Pathian thukham cu David le Pathian Fapa Jesu hrangih lamzin sialnak hrangih a ruahmannakpawl lakih pakhat te lawng a si (Luk 1:31-33). Hruaitu dingih Pathian ih a hril mi cu ziangtin Pathian in a kilhim ih a timlam ti Samuel bu khatnak in a langter. Pathian hril mi hruaitu si cingin famkim lo zetih Pathian ṭihzahnak thawi uktu cu ziangtin Pathian in a kilhim ih a kilkhawi ti Samuel bu hnihnak in a langter (23:1-3).

1

Saul Thih Thu Simthannak

1 ^aSaul a thih hnuah hitin a si, David cu Amalek-mipawl a thahnak ihsin a ra tlunkir hnuah, Ziklag ah David cu ni hnih a cam ta, 2 ^ba ni thumnak ah, ngai hnik, hitin a si, Saul-ih ṭanhmun khuarnak ihsin mi pakhat a hnipuan thlekin le a lu ih leivut thawn a ra. Cun hitin a si, cu pa cu David hnen a thlen tikah lei ah a hlăwnaw ih a băwkkhup.

1:1^a Sem 14:7; Mip 13:29; 1Sam 26:10; 30:17; 1San 10:13

1:2^b Sem 37:7; 1Sam 4:12; 2Sam 4:10; Job 2:12; Eze 27:30

3 Cule David in a hnenah, “Khui tawk ihsin na ra?” tiah a ti.

Cule anih in David hnenah, “Israel ṭanhmun khuarnak ihsin ka tlânsuak a si,” tiah a ti.

4 Cun David in a hnenah, “Thil umtudān ziangtin a si? Zangfahten i sim aw,” tiah a ti.

Cule anih in, “Ral doawknak ihsin mipi an tlânsia, mipi tampi an rīl ih an thi, cule Saul le a fapa Jonathan khal an thi ve,” tiah a ti.

5 Cu tikah David in amah thusimtu tlangvalpa hnenah, “Saul le a fapa Jonathan an thi ti cu ziangtin na thei?” tiah a ti.

6 ^aCun amah thusimtu tlangvalpa cun, “Rin lo pi-ah Gilboa tlang ah ka va suak, Saul cu a feipi a vâwk; cule ngai hnik, rang lêngpawl le rang ralkappawl in a dung ihsin man ziktein an dawi. 7 A dung lam a hei zoh tikah, i hmu ih i ko. Cule kei in, ‘Hinah ka um,’ tiah ka sawn. 8 ^bCule anih in ka hnenah, ‘Zo na si?’ tiah i ti. Cu tikah kei in, ‘Keimah cu Amalek-mi ka si,’ tiah amah cu ka sawn. 9 ^cAnih in ka hnenah, ‘Zangfahten ka kiangah dīng awla i that aw, ziangahtile mangbang anhainak ka parah a thleng zo, asinan ka nunnak keimah ah a tāng lai a si,’ tiah i tibêt. 10 ^dCun kei cu a kiangah ka dīng ih a tlûk hnu cun a nung thei lo ding ti ka theih ruangah amah cu ka that. Cule a lu parih lallukhum le a bān ih kutkhih cu ka lâk ih, cupawl cu hi tawk ka bawi hnenah ka rak keng,” tiah a ti.

1:6^a 1Sam 28:4

1:8^b 1Sam 15:2

1:9^c Lai 9:54

1:10^d 2Sp 11:12

11 ^aCule David cun a hnipuanpawl cu a kai ih a thlek, cule a zawngih um mipa hmuahhmuah khal in cu vekin an tuah ve. 12 Cule ralnâm in an thih ruangah, Saul hrangah le a fapa Jonathan hrangah, Jehovah-ih mipawl hrangah le Israel sungkuapawl hrangah ni tlak tiang an sûn, an ṭap ih rawl an ul.

1:11^a Sem 37:29; Mip 14:6

13 ^aCun David in thu ra simtu tlangval hnenah, “Khui tawkin na ra?” tiah a ti.

1:13^a 1Sam 14:48

Cule anih in, “Keimah cu khawtluang mi-ih fapa, Amalek-mi ka si,” tiah a ti.

14 ^aCu tikah David in a hnenah, “Ziangtin Jehovah-ih hriak thih mi that dingin ṭih riai loin na kut na suah ngam?” tiah a ti. 15 Cun David in a zawngih um tlangvalpawl lakih pakhat a ko ih, “Va naih awla amah cu that aw,” tiah a ti. Cule Amalek pa cu a vuak ih, anih cu a thi. 16 ^bCule David in mithi pa hnenah cun, “^cNa thisen cu nangmai lu parah a um a si, ziangahtile nangmai kâ rori in nangmah dokalhin, ‘Jehovah-ih hriak thih mi ka that tiah,’ a theihter zo,” tiah a ti.

1:14^a 1Sam 24:6; 31:4

1:16^b Pui 20:9; Mat 27:24-25; Apo 18:6

1:16^c Na thisen cu nangmai lu parah: Thukham Hlun san laiah mi thattu in thisen suah man mawhphurh a nei. Dāntatnak a co ding.

David in Saul le Jonathan a Ṭah

17 ^aCun David in Saul le a fapa Jonathan cu himi ṭah hla in a ṭah hai ih, 18 ^bThál Hla cu Judah-ih tefapawl zirh dingin a sim hai; ngai hnik, cumi cu Jasher-ih Cazual sungah ngan a si.

1:17^a Sem 50:10

1:18^b Jos 10:13

19 ^a“Israel-ih mawinak cu na hmun sâng pawl ah thah a si!
Ziangtin so micak an tluk!
20 ^bCumi cu Gath khua sim hlah uh,
Cumi cu Ashkelon kăwtthler ah thăn hlah uh,
Culole Filisṭia-mipawlih falapawl lungawi aipuangin an um pang ding,
Culole serh zim tan lo pawlih fanupawl in an neh pang ding.
21 ^cMaw Gilboa tlangpawl,
Nan parah daifim siseh, ruah siseh um hlah sehla,
^dLópawlih thilhlănpawl khal um hlah seh.
Ziangahtile cu tawkah micak ralphaw cu na zetih hlăwn a si!
Saul-ih ralphaw, hriak culh a si lo.
22 ^eThah mi thisen ihsin,
Micak thau ihsin,
Jonathan-ih thál a kirsal lo ih,
Saul-ih ralnâm kawlawngin a kirsal lo.
23 ^fSaul le Jonathan cu an nun laiah
Duhdawt mi le miduhum an si,
Cule an thihnak ah an ṭhenaw lo;
Annih cu muvanlaipawl hnakin an rangsawn,
Kiosapawl hnakin an caksawn.
24 ^gMaw Israel fanupawl,
Năwmcennak thawi puan senlar ih a lo thuamtu,
Nan hnipuan parih ceiawknak sui thawi a lo ceitu,
Saul cu ṭah rero uh.
25 Ral doawk laiah ziangtin micak an rīl!
Nan hmun sâng pawl ah Jonathan cu thah a si.
26 ^hKa unaupa Jonathan, nangmah ruangah ka van a sâng a si;
Ka hrangah duhnungza zet na si;
Ka parih na duhdawtnak hi khawruahharza a si,
Nunaupawlih duhdawtnak a hleih.
27 ⁱZiangtin micak an rīl men ih,
Ral donak hriamhreipawl cu ṭhiahbăl an si!”

1:19^a 2Sam 1:27; Sam 29:1

1:20^b Jos 13:3; 1Sam 18:6; 31:8; Mik 1:10

1:21^c Sem 27:28; 1Sam 31:1; Isa 18:4; Eze 31:15

1:21^d Lópawlih thilhlănpawl: Lóram ihsi suak mi thilhlănpawl tinak a si.

1:22^e Dnp 32:42; Isa 34:3, 7

1:23^f Dnp 28:49; Lai 14:18

1:24^g Lai 5:30

1:26^h 1Sam 18:1; 20:42; Jer 22:18

1:27ⁱ 1Sam 2:4

2

David Hriak Thih a Si

1 ^aCuih hnuah hitin a si, David in, “Judah khawpipawl lakih pakhat khat ah ka so pei maw?” tiin Jehovah a ráwn.

2:1^a Sem 13:18; 1Sam 23:2, 11-12

Cule Jehovah in a hnenah, “So aw,” tiah a ti.

David in, “Khui tawkah ka so ding?” tiah a ti.

Cule anih in, “Hebron ah,” tiah a ti.

2 ^aCule David cu, a nupi pahnih, Jezreel-mi Ahinoam le Karmel-mi Nabal-ih nupi Abigail te thawn cuih hmun ah a so. 3 ^bCule David in mi kip anmai sungkua cio thawn a hnenih um mipapawl cu a hruai hai. Cutin annihpawl cu Hebron khawpipawl ah an cêng.

2:2^a 1Sam 25:42-43

2:3^b Sem 13:18; 1Sam 27:2; 30:31; 1San 12:22

4 ^aCun Judah mipapawl an ra ih, cu tawkah David cu Judah sungza tlunah siangpahrang ah hriak an thih. Cule annih in David hnenah, “Jabesh Gilead mipapawl cu Saul phumtu an si,” tiah an sim.

2:4^a Lai 21:8; 1Sam 31:11-13; 1San 12:23-40

5 ^aCu tikah David in Jabesh Gilead mipapawl hnenah palaipawl a thlah ih, an hnenah, “Nan bawi, Saul parah himi ngilneihnak nan rak langter ih, amah nan rak phum ruangah, nannih cu Jehovah ih thlawsuah mi nan si. 6 ^bCule atu-ah Jehovah in ngilneihnak le thutak cu nan hnenah langter hram seh. Hi thil nan rak tuah ruangah kei khal in hi ṭhatnak hi nan parah ka tuah ve ding. 7 ^cCuruangah atu-ah, nan kutpawl cak sehla, ralṭha uh, ziangahtile nan pu Saul cu a thi ih, Judah sungza in keimah cu an parih siangpahrang ah hriak in rak thih a si,” tiah a ti.

2:5^a Rut 2:20; 1Sam 23:21; 2Ti 1:16

2:6^b Suah 34:6

2:7^c Jos 1:6

Israel Siangpahrang ah Ishbosheth

8 ^aAsinan Saul-ih ralkap burpi hotu Ner-ih fapa Abner in Saul-ih fapa Ishbosheth cu a hruai ih Mahanaim ah a thlenpi. 9 ^bCule amah cu Gilead-mipawl tlun, Ashur-mipawl tlun, Jezreel-mipawl tlun, Efraim-mipawl tlun, Benjamin-mipawl tlun le Israel miphun zate tlunah siangpahrang ah a tuah. 10 Saul-ih fapa Ishbosheth cu Israel tlunih siangpahrang ṭuan a thawk tikah kum 40 mi a si, cule kum hnih sung a lal. Asinan David cu Judah sungza lawngin an rak thlun. 11 Cule Hebron ah Judah sungza tlunih David siangpahrang a ṭuan sung cu kum sarih le thla ruk sung a si.

2:8^a Sem 32:2; 1Sam 14:50; 1San 8:33

2:9^b Mip 32:25-26; Jos 19:24-31; 1San 12:29

Israel le Judah Doawknak

12 ^aNer-ih fapa Abner le Saul fapa Ishbosheth-ih siahhlawhpawl cu Mahanaim ihsin Gibeon ah an feh. 13 ^bCule Zeruiah-ih fapa Joab le David-ih siahhlawhpawl cu an păwksuak ih annihpawl cu Gibeon tidawl kiangah an va táwng. Annihpawl cu tili khat lam kapah bur khat, tili khat lam kapah bur khat tiin an to. 14 Cun Abner in Joab hnenah, “Atu-ah tlangvalpawl kha tho hai sehla, kan hmaiah zuamaw hai seh,” tiah a ti.

2:12^a Jos 9:3

2:13^b 1Sp 1:7; 1San 2:16

Cule Joab in, “Suak hai seh,” tiah a ti.

15 Cutin annih cu an tho ih, ziang zat ti siarawin, Benjamin hnám, Saul-ih fapa Ishbosheth thluntupawl ihsin mi hleihnih, cule David-ih siahhlawhpawl ihsin mi hleihnih pawl cu an fehsuak. 16 ^aCule pakhat cio in mai tum cio an lu in an kai ih, mai ralnâm in mai tum cio hnak ah an sun; cule hmunkhat ah an rīlkhawm. Curuangah cuih hmun cu ^bHelkath Hazzurim tiih kawh a si, cumi cu Gibeon ah a um. 17 Cutin cuih ni ah a nasa zet mi doawknak a um ih, Abner le Israel mipapawl cu David-ih siahhlawhpawl in an neh.

2:16^a Lai 3:21

2:16^b Helkath Hazzurim: A sullam cu ralnâm hriam pawlih lóram tinak a si.

Asahel in Abner a Dawi

18 ^aZeruiah-ih fapa pathum: Joab le Abishai le Asahel pawl cu, cu tawkah an um. Cule Asahel cu hramlak sakhi pinu ke tlukin a zuan a zâng. 19 Cule Asahel in Abner a dawi ih, Abner a dawi laiah keh lamah siseh, vawrh lamah siseh a pial lo. 20 Cun Abner cun a dung lam a hawi ih, “Asahel na simaw?” tiah a ti.

2:18^a 1Sam 26:6; 1Sp 1:7; 1San 2:16; 12:8; Thf 6:5; Sol 2:9

Anih in, “Ka si,” tiah a sawn.

21 Cule Abner in a hnenah, “Na vawrh lamah, asilole na keh lamah pial awla, tlangvalpawl lakih pakhat khat kha kai aw, cule nangmai hrangah an ralthuam la aw,” tiah a ti. Asinan Asahel cun a dawinak ihsin a pial cuang lo. 22 Cun Abner in Asahel hnenah, “I dawinak ihsin i pialsan aw. Ziangah so lei ah ka lo sahthluk ding? Ziangtin na unaupa Joab hmel ka hmuh ngam ding?” tiah a tisal. 23 Sikhalsehla, anih cun sirih pial cu a êl. Curuangah Abner in a pum ah feipi bīl lamin a sawh, cutin a feipi cu a phurhsam ah a tlăng; cule cu tawkah cun a rīl ih a thicih. Cun hitin a si, Asahel rilhnak le thihnak hmun ih ratu pauhpauh cu an dīng cuahco.

24 Joab le Abishai khal in Abner cu an dawi ve. Cule Gibeon Ramṭhing lamzin kiang Giah hmaiih um Ammah tlang an thlen tikah ni a tla. 25 Benjamin-ih tefapawl cu Abner-ih dungah hmunkhat ah an fĭnaw ih, bur khat ah an cang, cule tlang zimah ṭanhmun an la. 26 ^aCun Abner in Joab a ko ih, “Ralnâm in a dawlh kumkhua ding maw? A netnak lamah cun a khâ deuhdeuh ding ti na thei lo maw? Anmai unau dawi rero tu minungpawl tlungkir dingin ziangtik tiang so sim loih na um ding?” tiah a ti.

2:26^a Dnp 32:42; Jer 46:10, 14; Nah 2:13

27 Cule Joab in, “Pathian a nun rori bangin, cutiin rak ṭawng lo awla cu, mi zaten anmai unau dawinak ihsin zing lam lawngah an cawl ding,” tiah a ti. 28 ^aCun Joab in tuu pa ki a phaw, cule mi zaten an dīng ih, Israel cu an dawi nawn lo, a do khal an do nawn lo. 29 ^bCun Abner le a mipapawl cu cuih zan ah zanvar Arabah phairawn hrawhsuakin an feh, Jordan tiva an tán ih, Bithron hmuahhmuah an lansuak, cule Mahanaim an thleng.

2:28^a Lai 3:27

2:29^b Sem 32:2

30 Joab cu Abner a dawinak ihsin a tlungkir. Cule mi hmuahhmuah hmunkhat ih a fĭnkhawm thluh hai tikah, David-ih siahhlawh mipa hleikua le Asahel an kim lo. 31 Asinan David-ih siahhlawhpawl in Benjamin-mi mi tampi le Abner-ih mipapawl cu an that ih, mi 360 an thi. 32 ^aCun Asahel cu an thiar ih, Bethlehem ih a paih thlān ah an phum. Cule Joab le a mipapawl cu zanvar an feh ih, zing lam khawvan zawngah Hebron an thleng.

2:32^a Sem 49:29

3

David-ih Fapapawl

1 ^aCun Saul sungza le David-ih sungza karlakah rei zet doawknak a um. Asinan David cu a cak deuhdeuh ih, Saul sungza cu an cak lo deuhdeuh. 2 ^bHebron ah David in fapapawl tla a nei: a fapa upabik cu Jezreel-mi Ahinoam ih hrinsak mi Amnon a si; 3 ^ca pahnihnak cu Karmel-mi Nabal-ih nuhmei Abigail ih hrin mi Kileab a si; a pathumnak cu Geshur siangpahrang Talmai-ih fanu Maakah ih hrin mi Absalom a si; 4 ^da palitnak cu, Haggith-ih fapa Adonijah a si; a pangatnak cu Abital-ih fapa Shefatiah a si; 5 cule a paruknak cu David-ih nupi Eglah ih hrin mi Ithream a si. Hipawl cu David in Hebron ih a neih mi fapapawl an si.

3:1^a 1Sp 14:30

3:2^b 1Sam 25:43

3:3^c 1Sam 25:42

3:4^d 1Sp 1:5, 11

Abner in David a Kăwp

6 ^aCun hitin a si, Saul sungza le David-ih sungza karlakih ral doawknak a um laiah, Abner cun Saul sungza ah a dinhmun a cakter vivo. 7 ^bCule Saul in nusun a nei, a hmin cu Rizpah a si, Aiah-ih fanu a si. Cule Ishbosheth in Abner hnenah, “Ziangah ka paih nusun hnenih na rak luh?” tiah a ti.

3:6^a 1Sam 14:50

3:7^b 2Sam 21:8-11

8 ^aCu tikah Ishbosheth-ih ṭawngkampawl parah Abner a thin a heng zet ih, “Keimah cu Judah-ih uico lu maw ka si? Tuihsun ah na pa Saul-ih sungza hnenah, a unaupawl hnenah le a rualpipawl hnenah ngilneihnak ka langter ih, David kut ah ka lo pe lo; cule tuihsun ah nang in hi nunau thawn pehparin mawh neiah i puh? 9–10 ^bSaul sungza ihsin lalram cu la tahratin Israel tlunah le Judah tlunah, Dan ihsin ^cBeersheba tiang David-ih laltokham dĭn dingih Jehovah in David hnenih sia a rak săm vekih ka tuah lo asile, Abner parah Pathian in a titiin ti seh, cuhnakih nasa khalin,” tiah a ti. 11 Cule amah a ṭih ruangah ṭawngkam dang in Abner cu a sawn lo.

3:8^a 1Sam 17:43; 2Sp 8:13

3:9-10^b Lai 20:1; 1Sam 15:28; 25:28-31

3:9-10^c Beersheba: “Thukam tikhur” asilole “pasarih tikhur” tinak a si.

12 Cun Abner in amai aiah David hnenah palaipawl a thlah ih, “Leiram cu zo-ih ta a si?” tiin le, “Keimah thawn na thukham tuah aw, ngai hnik, na hnenih Israel miphun zaten thlenpi dingin ka kut cu na hnenah a um ding,” tiin a simbêt.

13 ^aCule David in, “A ṭha, nangmah thawn thukham ka tuah ding. Asinan na hnenah thil pakhat ka lo dil a si. Ka hmel hmu dingih na rat tikah Saul-ih fanu Mikal na rak hruai lo asile, ka hmel na hmu lo ding,” tiah a ti. 14 ^bCule David in Saul-ih fapa Ishbosheth hnenah, “Filisṭia-mipawlih vun zim 100 ih ka rak ham mi ka nupi Mikal i rak pe aw,” tiin palaipawl a thlah.

3:13^a Sem 43:5

3:14^b 1Sam 18:27

15 ^aCule Ishbosheth in mi a thlah ih, Mikal cu a pasal Laish-ih fapa Paltiel hnen ihsin a lâk. 16 Cun a pasal cun ṭap phahin a dung ihsin Bahurim tiang a thlun. Cu tikah Abner in a hnenah, “Feh aw, tlungkir aw!” tiah a ti. Cule anih cu a tlungkir.

3:15^a Dnp 24:1-4; 1Sam 25:44

17 Cun Abner in Israel upapawl cu a bia ih, “A liam cia mi cān ah nan tlunih siangpahrang dingah David nan rak hawl. 18 ^aAtu-ah cuti cun tuah uh! Ziangahtile David-ih thuhla ah Jehovah in, ‘Ka siahhlawh David kut in Filisṭia-mipawlih kut le an ral hmuahhmuah pawlih kut ihsin ka mi Israel ka run ding,’ a ti,” tiah a ti. 19 ^bCule Abner in Benjamin-mipawlih hnatheih ah a rel fawn. Cun Abner cu Israel-mipawl le Benjamin sungza pumpuluk ih ṭha an ti mi zaten Hebron ah David ih hnatheih ih rel dingin a feh fawn. 20 Cuti cun Abner cu Hebron ih David hnenah mipa 20 thawn an va feh. Cule David in Abner le a zawngih um mipapawl hrangah puai a tuah. 21 ^cCun Abner in David hnenah, “Ka tho ding ih ka feh ding, cule nangmah thawi thukham an tuah thei nak dingah le na thinlung duhhiarnak hmuahhmuah vekih na uk thei nak dingah, Israel zaten ka bawipa siangpahrang hnenah ka khawm ding,” tiah a ti. David in Abner cu a thlahsuak ih, anih cu hnangamten a feh.

3:18^a 1Sam 9:16

3:19^b 1San 12:2, 29

3:21^c 2Sam 3:10, 12; 1Sp 11:37

Joab in Abner a That

22 Cule zoh hnik, David-ih siahhlawhpawl le Joab cu ralkap burpi dûmnak ihsin an ra tlung ih, an zawngah ralthillâk tampi an run tlŭn. Asinan Abner cu Hebron ah David hnenah a rak um lo, ziangahtile a rak thlahsuak zo ih, anih cu hnangamten a rak feh a si. 23 Joab le a zawngih um ralkap burpi zaten an ra thlen tikah, annih in Joab hnenah, “Ner-ih fapa Abner cu siangpahrang David hnenah a ra, cule David in a rak thlah, cun Abner cu hnangamten a rak feh,” tiin an sim.

24 Cun Joab cu siangpahrang hnenah a feh ih, “Ziang so na rak tuah? Zoh hnik, Abner cu na hnenah a ra. Ziangruangah amah cu na rak fehsuakter ih, a rak fehhloh mai? 25 Ner-ih fapa Abner cu nangmah lo bum dingin, na suah le na luh lo thei dingin le na tuah mi hmuahhmuah thei dingin a ra a si ti na thei,” tiah a sim.

26 Cule David hnen ihsi Joab a suah hnuah, anih in Abner dung ihsin palaipawl a thlah, annih in amah cu Sirah tikhur ihsin an run hruaikir. Asinan cucu David in a rak thei lo. 27 ^aCule Hebron ih Abner a rak kir tikah, Joab in anih cu a dang deuhah kăwt ah amah te lawngih be dingin a hruai ih, cu tawkah Abner cu a pum ah a sŭn, cutin anih cu a unaupa Asahel thisen ruangah a thi.

3:27^a Suah 21:14; 2Sam 2:23; 1Sp 2:5, 32

28 ^aLehhnuah, David in cuih thu a theih tikah, “Ner-ih fapa Abner-ih thisen thu ah Jehovah hmaiah keimah le ka uknak cu mawhnak nei lo kumkhua kan si. 29 ^bCumi cu Joab le a paih sungza hmuahhmuah lu parah tla seh, cule Joab sungza ah pakhat hman thisen dăwk siseh, phār nat siseh, kianghrăwl vāwkcawpih um siseh, ralnâm ih thi siseh, rawl tlasam siseh um loin um hlah seh,” tiah a ti. 30 Cuti cun Gibeon ih ral doawknak ah Abner in an unaupa Asahel a rak thah ruangah Joab le a unaupa Abishai in Abner cu an that.

3:28^a Dnp 21:9

3:29^b Pui 15:2; 20:9; 1Sp 2:31-33

David in Abner a Ṭah

31 ^aCun David in Joab le a zawngih um mi zate hnenah, “Nan hnipuan thlek uh, buri hnipuan in thuamaw uhla, Abner ṭah uh,” tiah a ti. Cule siangpahrang David in lâng cu a thlun. 32 ^bCun Hebron ah Abner cu an phum, cule siangpahrang cu a aw a suah ih, Abner thlān ah cun a ṭap, cule mipi zaten an ṭap ṭheh. 33 ^cCun siangpahrang in Abner ṭah hla a seh ih,

3:31^a Sem 37:34; Sam 30:11; Isa 20:2

3:32^b Mip 14:1; Thf 24:17

3:33^c Sem 50:10

“Abner cu mi-â thih menin maw a thih ding?
34 ^aNa kutpawl tla ṭawn an si lo ih,
Na ke khal thir hri khih an si lo,
Misualrálpawl hmaiih mi a tluk vekih na tluk men,”

3:34^a Job 36:8; Nah 3:10

tiah a ti.

Cun mipi zaten amah cu an ṭahsal.

35 ^aCule sun a si hrih laiah mipi zaten an ra ih rawl ei dingin David an hnêk, David cun, “Ni a tlak hlanah sang siseh, thil dang siseh, ka tep asile, Pathian in a tuah tuahin i tuah sehla, cuhnakih nadeuh khalin,” tiin sia a săm. 36 Mipi zaten cumi cu an hminsin ih, cumi cun mipi lung a hmuiter, ziangahtile siangpahrang ih tuah mi pauhpauh in mi zate ih lung a hmuiter. 37 Ziangahtile mipi hmuahhmuah le Israel miphun zaten cuih ni ah Ner-ih fapa Abner thah cu siangpahrang ih thil tum a rak si lo ti an theithiam. 38 Cun siangpahrang cun a siahhlawhpawl hnenah, “Tuihni ah Israel lakah hotu le miropi a thi ti nan thei lo maw? 39 ^bCule siangpahrang dingih hriak thih mi ka si ko na cingin, tuihsun ah hin ka ṭawnṭai a si. Cule hi mipapawl, Zeruiah-ih fapapawl hi ka hrangah an siakhâ tuk. Jehovah in thil ṭha lo a tuahtu cu amai sualralnak zulhin lehrūl ko seh,” tiah a ti.

3:35^a Rut 1:17; 2Sam 1:12; Jer 16:7

3:39^b Lai 18:26; 1Sp 2:5-6, 31-32

4

Saul Fapa Thihnak

1 Saul-ih fapa in Hebron ah Abner a thi ti a theih tikah a ralṭhatnak a hlo; cule Israel miphun zaten an buai. 2 ^aCun Saul-ih fapa in ralkap burpi hotu mi pahnih a nei. Pakhat ih hmin cu Baanah a si ih, a dang pakhat ih hmin cu Rekab a si. Benjamin tefa, Beeroth-mi Rimmon-ih fapapawl an si. Ziangahtile Beeroth cu Benjamin ram ih siartelh khal a si, 3 ^bBeeroth-mipawl cu Gittaim ah an tlân ih, tuihni tiangin cu tawkah mikhual vekih an um ta ruangah a si.

4:2^a Jos 9:17; 18:25

4:3^b Neh 11:31-33

4 ^aSaul-ih fapa, Jonathan in fapa kebái a nei. Jezreel ihsin Saul le Jonathan thuhla a thlen tikah anih cu kum nga mi a si, cule amah umtu in a pawm ih a tlanpi. Cule hitin a si, manhlap tukih a tlanpi laiah anih cu a tla ih kebái ah a cang. A hmin cu Mefibosheth a si.

4:4^a Pui 21:18; 1Sam 18:1; 31:6; 1San 8:34

5 ^aCun Beeroth-mi Rimmon-ih fapapawl, Rekab le Baanah cu an păwk ih, Ishbosheth-ih inn ah cun sun ni sat vanglai ah sun laili ih a ihkhun parih a zau laiah an thleng. 6 Cule sangvut la ding vekin inn sung lamah cun an lut ih, a pum ah an sŭn. Cun Rekab le a unaupa Baanah cu an tlânsuak. 7 ^bZiangahtile inn sung an luh tikah, anih cu a ihnak pindan a ihkhun parah a rak it. Cun annih in amah cu an sŭn ih an that, a lu an tán ih a lu cu an la, cule Arabah phairawn fehtlăngin zanvar an tlân. 8 ^cCule annih in Ishbosheth-ih lu cu Hebron ih David hnenah an hei keng ih siangpahrang David hnenah cun, “Zoh hnik, na nunnak hawltu, na doral Saul-ih fapa Ishbosheth-ih lu hi; Jehovah in ka bawi siangpahrangih phuba cu tuihsun ah Saul le a cithlah parah a lo samsak a si,” tiah an ti.

4:5^a 2Sam 2:8-9

4:7^b Dnp 3:17

4:8^c Mip 31:3; 1Sam 24:4; 2Sp 10:7

9 ^aCule David in Beeroth-mi Rimmon-ih fapapawl, Rekab le a unaupa Baanah cu a sawn hai ih, “Harsatnak hmuahhmuah ihsi ka nunnak i rak tlentu Jehovah a nun rori vekin, 10 mi pakhat in thuthangṭha kengah ruatawin, ‘Zoh hnik, Saul a thi a si,’ tiin in sim ih amah cu ka kai, cule Ziklag ah ka that. Cumi cu a thuthang lawmman hrangih ka pek mi a si. 11 ^bMisualrálpawl in amai inn sung ihkhun parih it lai midingfel pakhat an thah tikah cun ziang tlukin a nasa sinsin pei? Curuangah atu-ah a thisen man cu nan kut ah lo dil loin le leilung par ihsin lo thaihlo loin ka um ding maw?” tiah a ti. 12 Cun David in tlangvalpawl thu a pe hai ih, cupawl cu an that, an kut le an ke an tán ih, Hebron tili kiangah an thlai. Asinan Ishbosheth-ih lu cu an lâk ih, Hebron ah Abner-ih thlān ah an phum.

4:9^a Sem 48:16; 1Sp 1:29

4:11^b Sem 4:10; Sam 9:12

5

David in Israel Miphun Zaten a Uk

1 ^aCun Israel miphun zaten Hebron ah David hnenah an ra ih, “Ngai hnik, kanmah cu na ruh le na titsa kan si. 2 ^bCuihtlunah, hi hlanah, kan tlunih Saul siangpahrang a si laiah, nangmah cu Israel hruaisuaktu le hruailuttu na si. Cule Jehovah in na hnenah, ‘Ka mi Israel na kilkhawi pei ih, Israel tlunah uktu na si ding,’ a lo ti,” tiah an ti. 3 ^cCule Israel upapawl zaten siangpahrang hnenah Hebron ah an ra ih, Siangpahrang David in anmahpawl thawn Hebron ah Jehovah hmaiah thukham a tuah. Cule annih in David cu Israel tlunih siangpahrang ah hriak an thih. 4 ^dDavid a lal thawk tikah amah cu kum 30 mi a si ih, kum 40 sung a lal. 5 ^eHebron ihsin kum sarih le thla ruk sung Judah a uk ih, Jerusalem ihsin Judah le Israel miphun zate tlunah kum 33 sung a lal.

5:1^a Sem 29:14

5:2^b Sem 48:15; 1Sam 16:1; 18:5, 13; Mat 2:6; Joh 21:16

5:3^c Dnp 17:15

5:4^d 1Sp 2:11; 1San 3:4; 26:31; Luk 3:23

5:5^e 2Sam 2:11; 1San 3:4

Jerusalem Nehnak

6 ^aCule siangpahrang le a mipapawl cu cuih ram luahtu Jebus-mipawl do dingin Jerusalem ah an feh, cupawl cun David a lut thei lo ding ti ruatin, David hnenah, “Hi tawkah na lut lo pei, mitcaw le kebáipawl in an lo khir ding,” tiah an ti. 7 ^bSikhalsehla David in Zion ral hruangkulh cu a lak, cumi cu David-ih Khawpi a si.

5:6^a Jos 15:8; Lai 1:8

5:7^b 1Sp 2:10; Sam 76:2; Isa 29:1; Jer 21:13; 25:29

8 ^aCule cuih ni ah David in, “Tikáwng ihsin kai tahratih Jebus-mipawl le David rori ih huat mi kebáipawl le mitcawpawl a nehtu pauhpauh lubân le hotu ah cang seh,” tiah a ti. Curuangah annih in, “Mitcaw le kebái cu inn sungah an lut lo pei,” tiah an ti.

5:8^a 2Sp 20:20; 2San 32:30; Mat 21:14

9 ^aCun David cu ral hruangkulh sungah a cêng ih, cumi cu David-ih Khawpi tiih kawh a si. Cule David in ral hruangkulh cu Millo ihsin a sung lam a dâwl. 10 ^bCutin David cu a ropi deuhdeuh ih, ralkap rualpawlih Pathian Jehovah in a umpi.

5:9^a 1Sp 9:15, 24

5:10^b Sam 24:10

David-ih Inn le Fātepawl

11 ^aCun Ṭaiar siangpahrang Hiram in David hnenah palaipawl a thlah ih, sidar thingpawl, lettamapawl le lungser thiam pawl a kuat. Cule annih in David cu inn an saksak. 12 ^bCule David in Israel tlunah siangpahrang ah amah cu Jehovah in a dĭn zo ih, a mi Israel ruangah a uknak cu a rak khaisâng zo a si ti a thei.

5:11^a 1Sp 5:1, 18; 2San 2:3

5:12^b Mip 24:7

13 ^aCule David cun Hebron ihsi a rat hnuah, Jerusalem ihsin nusun tam sinsin le nupi tam sinsin a nei. Fapa tam sinsin le fanu tam sinsin khal David in a nei. 14 ^bCun hipawl hi Jerusalem ih an hrinsak mipawlih hmin cu an si: Shammua, Shobab, Nathan, Solomon, 15 Ibhar, Elishua, Nefeg, Jafia, 16 Elishama, Eliada le Elifelet.

5:13^a Dnp 17:17

5:14^b 1San 3:5; Luk 3:31

Filisṭia-mipawl Duainak

17 ^aCun Israel tlunih siangpahrang ah David cu hriak an thih zo ti Filisṭia-mipawl in hna ih an theih tikah, Filisṭia-mipawl zaten David hawl dingin an so. Cule David in cuih thu cu hna in a thei ih ral hruangkulh ah a suk. 18 ^bFilisṭia-mipawl cu an feh ih, Refaim phaikuam ah an pharhaw. 19 ^cCun David in, “Filisṭia-mipawl do dingin ka so pei maw? Annih cu ka kut ah in pe pei maw?” tiin Jehovah a ráwn.

5:17^a 1San 11:16

5:18^b Jos 15:8

5:19^c Lai 18:5; 1Sam 23:2

Cule Jehovah in David hnenah, “So aw, ziangahtile na kut ah Filisṭia-mipawl cu ka lo pe tengteng ding a si,” tiah a ti.

20 ^aCule David cu Baal Perazim ah a feh ih, cu tawkah annih cu David in a neh hai. Cule anih in, “Tilian cak bangin Jehovah in ka doralpawl cu ka hmaiah a ṭekdarhter hai,” tiah a ti. Curuangah cuih hmun cu a hmin ah Baal Perazim tiah an ko. 21 ^bCule Filisṭia-mipawl in cu tawkah an milimpawl an tân ta ih, David le a milaipawl in cupawl cu an thiar.

5:20^a Sem 38:29

5:21^b Dnp 7:5; Isa 46:1-2

22 Cun Filisṭia-mipawl cu an păwksal lala ih, Refaim phaikuam ah an pharhaw. 23 Curuangah David in Jehovah a ráwn ih, anih in, “Kaiso hlah uh, an dung lam ihsin anmah cu kulh uhla, thingtheihmu kungpawl hmai zawnah ra suak uh. 24 ^aCule hitin a si ding, thingtheihmu kungpawl zim ih feh ṭhupṭho thâwm nan theih tikah, zamrang zetin năm lohli uh. Ziangahtile Jehovah cu Filisṭia-mipawlih ralkappawl do dingin nan hmaiah a feh ding a si,” tiah a ti. 25 ^bCule David in cuti vek cun Jehovah ih amah thu a pek vekin a tuah. Cule Filisṭia-mipawl cu Geba ihsin Gezer tiang a that vivo hai.

5:24^a Suah 14:24; Lai 4:14

5:25^b Jos 10:33; Isa 28:21

6

Jerusalem ah Kuang Thiar a Si

1 David in Israel mipapawl lak ihsi hril mi zate, mipa 30000 a khawmsal. 2 ^aCule David cu a tho ih, Judah ram ih Baale khua ihsin cherub-pawl karlakih cêng ralkap rualpawlih Jehovah hmin an putter mi Pathian Kuang cu laso dingin a hnenih mi um mi zate thawn a feh. 3 ^bCuti cun Pathian Kuang cu caw lêng thar parah an ret ih, mual ih um Abinadab inn ihta an lasuak. Cule Abinadab-ih fapa Uzza le Ahio in caw lêng thar cu an mâwng. 4 Cule mual ih um, Abinadab inn ihta cu Pathian Kuang telcih in an la ih, Kuang hmaiah cun Ahio a feh. 5 ^cCun David le Israel sungza hmuahhmuah in Jehovah hmaiah far thing ih tuah mi hmanrua phunphun, ṭingṭangpawl, cawngcingpawl, khuangtepawl, sehserpawl le sumselpawl tla an tum.

6:2^a Suah 25:22; Pui 24:16; Dnp 28:10; Jos 15:9; 1Sam 4:4; Sam 99:1; Isa 63:14

6:3^b Suah 25:12-15; Mip 7:4-9; 1Sam 6:7

6:5^c Suah 15:20; Ezr 3:10; Neh 12:27; Sam 150:5

6 ^aCule Nakon-ih hruih hmun an thlen tikah, caw cang pawl an tal hnuaihni ruangah, Pathian Kuang lamah Uzza in a kut a suah ih, Pathian Kuang cu a rak kai. 7 Cun Jehovah-ih thinhengnak cu Uzza parah a tho ih, amah cu a thil ti sual mi ruangah cu tawkah Pathian in a vuak. Cule anih cu Pathian Kuang kiang, cu tawkah a thi. 8 ^bUzza parih Jehovah-ih aithawhnak a puakkuai ruangah David a thin a heng, cule tuihni tiangin cuih hmun cu a hmin ah Perez Uzza tiah an ko.

6:6^a Mip 4:15

6:8^b Sem 38:29; Sam 7:11

9 ^aCuih ni ah cun David in Jehovah a ṭih. Cule, “Ziangtin ka hnenah Jehovah-ih Kuang cu a ra thleng thei pei?” tiah a ti. 10 ^bDavid in Jehovah-ih Kuang cu amai hnen David-ih Khawpi ah ṭhawn loin, Gath-mi Obed-Edom-ih inn sawnah a thiar. 11 ^cJehovah-ih Kuang cu Gath-mi, Obed-Edom inn ah thla thum sung a um. Cule Jehovah in Obed-Edom le a sungkua zaten mal a sawm.

6:9^a 1Sam 6:20

6:10^b 1San 15:18

6:11^c Sem 30:27

12 ^aCule Siangpahrang David cu, “Pathian Kuang ruangah Obed-Edom sungkua le a neih mi zaten Jehovah in mal a rak sawm,” tiin an sim. Cu tikah David cu a feh ih, Pathian Kuang cu Obed-Edom inn ihsin David-ih Khawpi ah lungawi zetin a tlunpi. 13 ^bCule hitin a si, Jehovah-ih Kuang zâwntupawl kal ruk an kal tikah, caw cang pawl le cawm thau tuu in rai a thawi. 14 ^cCun David cu a theihpatawp suahin Jehovah hmaiah a lâm; cule David cu pat zai fêmte ih tah mi Puithiam Kâwrcung a hruh. 15 ^dCun David le Israel sungza hmuahhmuah cu au phah le tuu pa ki awn thawn Jehovah-ih Kuang cu an thiarso.

6:12^a 1Sp 8:1

6:13^b 1Sp 8:5; Ezr 6:17

6:14^c Suah 15:20; 1Sam 2:18; Sam 30:11

6:15^d Jos 6:5; Sam 47:5

16 ^aCule hitin a si, David-ih Khawpi sungih Jehovah-ih Kuang a thlen tikah, Saul-ih fanu Mikal in tukvirh ihsin a rak zoh ih, Siangpahrang David cu Jehovah hmaiah khir le herawin a hmu. Cule Mikal in a thinlung ten David cu a nautat.

6:16^a 1Sam 18:27

17 ^aJehovah-ih Kuang cu an thiar ih, a retnak dingih David in a rak zar mi, puanthlam sungah cun an ret. Cun David in Jehovah hmaiah Meiur Thilhlănpawl le Remnak Thilhlănpawl a hlan. 18 ^bCule David in Meiur Thilhlănpawl le Remnak Thilhlănpawl hlăn a ṭheh tikah, ralkap rualpawlih Jehovah hmin in mipi thlawsuah a pe. 19 ^cCun amah in mipi zate lakah, Israel mi senpi pumpi lakah, mipapawl le nunaupawl cu sang hlăwm khat cio, sa sem khat cio, sabit rah car hlawm khat cio a zem hai. Cule mipi an zaten mai inn cio ah an tin.

6:17^a Pui 1:1-17; 1Sp 8:6, 62-64; 1San 15:1

6:18^b Suah 39:43; 1Sp 8:22

6:19^c Dnp 26:12-13; Neh 8:10; Hos 3:1

20 ^aCun David cu amai sungkua thlawsuah pe dingin a kir. Cule Saul-ih fanu Mikal cu David hmuak dingin a ra suak ih, “Tuihsun ah Israel siangpahrang cu a va ropi tak em, mimumal lo pawl lakih pakhat ningzah thei loih khuhaw loih a um vekin, tuihsun ah a siahhlawhpawlih siahhlawh nunaupawl mithmuh ah ^ba siangpahrang kâwrfual a phawih!” tiah a ti.

6:20^a 1Sam 19:24

6:20^b a siangpahrang kâwrfual a phawih: A siangpahrang kâwr leng lawng a phawih.

21 ^aCu tikah David in Mikal hnenah, “Cumi cu na pa le a sungza hmuahhmuah aiawhin i hril ih, Jehovah-ih mi, Israel tlunih uktu ih i ruattu Jehovah hmaiah a si. Curuangah Jehovah hmaiah ka hlim ding. 22 Cule himi hnakih zahpiumin ka um sinsin ding ih, keimah roriih mithmuh ah tăngdawrten ka um ding. Sikhalsehla na rel mi siahhlawh nunaupawlih upatin ka um ding,” tiah a ti. 23 Curuangah Saul-ih fanu Mikal cu a thih ni tiang fa a nei lo.

6:21^a 1Sam 13:14; 1San 5:2; Mik 5:2

7

David thawi Pathian Thukham

1 ^aCule hitin a si, siangpahrang cu a inn ah a cêng ih, Jehovah in a kiangkap hmuahhmuah ih a doralpawl zate hnen ihsin cawlhhahdamnak a pek hnuah, 2 ^bprofet Nathan hnenah siangpahrang in, “Atu-ah zoh hnik, kei cu sidar thing inn sungah ka um, asinan Pathian Kuang cu puanthlam puanzar sungah a um,” tiah a ti.

7:1^a 1San 22:18

7:2^b Suah 26:1; 2Sam 5:11; 1Sp 3:1; 1San 29:29; 2San 8:1; 9:29; Jer 22:14-15; Hag 1:4; Apo 7:46

3 ^aCun Nathan in siangpahrang hnenah, “Feh awla na thinlung ih um zaten tuah thluh aw, ziangahtile Jehovah in a lo umpi a si,” tiah a ti.

7:3^a 1Sam 10:7

4 Cuih zan lala ah hitin a si, Nathan hnenah Jehovah-ih kamsuakthu a thleng ih, 5 ^a“Feh awla ka siahhlawh David kha va sim aw, ‘Jehovah in hitin a ti, ka cēnnak dingah nang in inn i saksak ding maw? 6 ^bZiangahtile Izip ram ihsin Israel tefapawl ka hruaisuah ni thawkin tuihni tiang inn ah ka cêng lo, cuhnakin puanthlam sungah le Biakbûk sungah ka ṭhawn vivo sawn a si. 7 ^cIsrael tefapawl zate lakih ka fehnak kip ah, ka mi Israel kilveng dingih thu ka pek mi, Israel hnám zo hnen talah, “Ziangruangah sidar thing inn i saksak lo ka ti dah maw?” tiin.’ 8 ^dCuruangah atu-ah, ka siahhlawh David hnenah hitin sim aw, ‘Ralkap rualpawlih Jehovah cun hitin a ti a si, ka mi, Israel uktu dingah ran tlannak ihta, ran na khalh laiah ka lo la. 9 ^eCule na fehnak kip ah ka lo umpi ih, na hmai ihsin na ralpawl zaten ka sâtcat thluh, cule leilung parih miropipawlih hmin vekin nangmah cu hmin ropi ah ka lo tuah. 10–11 ^fCuihtlunah ka mi Israel hrangah hmun ka ruat ding ih, anmai hmun ah an cêng ih an ṭhawnawk nawn lo nak dingah, hi hlanih ka mi Israel tlunih laireltupawl ka ruat laiih sualralnak fapapawl in an ti ṭheu vek khan an palbĕt nawn fawn lo nak dingah anmah cu ka phun hai ding. Na ralpawl hmuahhmuah hnen ihsin ka lo cawlhahdamter ding. Jehovah in sungza lo dĭnsak dingin a lo sim fawn.

7:5^a 1Sp 8:19; 1San 22:8

7:6^b Jos 18:1; Apo 7:44

7:7^c Pui 26:11-12

7:8^d 1Sam 16:10-11; 1San 21:17; 2San 6:8; Amo 7:15

7:9^e Sem 12:2; 1Sam 18:14

7:10-11^f Suah 15:17; Lai 2:16; 1Sam 12:9-11; Isa 5:1-7; 54:14; Mat 1:1; Luk 1:32-33

12 ^a‘Na tikcu a kim ih na pupápawl hnenih na cawlh tikah, na lehhnuah na sung ihsi ra suak ding mi na ci ka tungding ding ih, a uknak ka hngetter ding. 13 ^bAnih cun ka hmin hrangah inn a sak ding ih, kei in a laltokham ka hngetter kumkhua ding. 14 ^cKei cu a Pa ka si ding ih, anih cu ka fapa a si ding. Mawhsualnak a tuah asile, minungpawlih fungfêk le minung fapapawl vuaknak hmangin amah cu nun ka sim ding. 15 ^dAsinan na hmaiih ka ṭhawnhlo mi Saul hnen ihta ka lâk vek khan ka zahngainak in anih cu a suahsan lo ding. 16 ^eCule na hmaiah na sungza le na uknak cu dĭn kumkhua a si ding. Na laltokham khal dĭnhngeh kumkhua a si ding,’ tiin na sim pei,” tiah a ti. 17 Hih ṭawngkampawl hmuahhmuah bangtukin le hi larawknak hmuahhmuah bangtukin Nathan in David a sim.

7:12^a Sem 15:15; 1Sp 2:1; Jer 30:21; Apo 13:36

7:13^b 1Sp 5:5; 6:12; Isa 9:7

7:14^c Sam 89:26; Heb 1:5

7:15^d 1Sam 15:23

7:16^e Sam 89:36-37

David in Pathian a Thangṭhat

18 ^aCun Siangpahrang David cu a lut ih, Jehovah hmaiah a to. Cule anih in, “Maw Bawipa Jehovah, keimah cu zo so ka si? Ka sungza teh ziang so maw an si ih, hi tiangtiang ih i hruai? 19 ^bMaw Bawipa Jehovah, cumi cu na mithmuh ah cun thil tenau a si. Cule nang cun hmai lam hlatpi cān ih na siahhlawhih sungkua rung um vivo dān ding thu khal na rak rel. Maw Bawipa Jehovah, cumi cu milai tidān a si maw? 20 ^cCun David hin na hnenah ziang a simbêt thei ding? Ziangahtile nang, Bawipa Jehovah, in na siahhlawh cu na thei a si. 21 Na kamsuakthu ruangah le nangmai thinlung zulhin, hi thil ropi pawl hmuahhmuah hi na siahhlawh theihter dingah na rak tuah. 22 ^dCuruangah, Maw Bawipa Jehovah, nangmah cu na ropi a si. Ziangahtile kan hna ih kan rak theih mi hmuahhmuah bangtukin nangmah vek an um lo ih, nangmah siarlo Pathian an um fawn lo. 23 ^eIzip ram ihsin, miphunpawl le an pathianpawl lak ihsin na hrangih na tlen mi, na mipawl hmaiah na hmin thanter dingin, nangmai hrang le na ram hrangih thil ti ropi le maksak pawl tuah dingin, Pathian in a mi si dingah a hrangih a vung tlen mi, na mi, Israel vek, hi leilung tlunah ziang miphun so um? 24 ^fZiangahtile kumkhua na mi dingah nangmai hrangah na mi Israel cu na dĭn. Cule nang, Jehovah cu an Pathian ah na cang.

7:18^a Suah 3:11

7:19^b Isa 55:8-9

7:20^c Joh 21:17

7:22^d Suah 8:10; 9:14; 10:2; Lai 6:13

7:23^e Dnp 4:32-38; Sam 40:5

7:24^f Suah 6:6-7; Dnp 26:18; Sam 48:14

25 ^a“Cun atu-ah, Maw Jehovah Pathian, na siahhlawh thuhla le a sungza thuhla ih na sim mi thu cu kumkhuain dĭn hnget awla, na rak sim vekin tuah aw. 26 ^bCun, ‘Ralkap rualpawlih Jehovah cu Israel tlunih Pathian a si,’ tiin na hmin cu kumkhua cawimawiin um seh. Cule na siahhlawh David-ih sungza cu na hmaiah dĭn hngeh si hai seh. 27 Ziangahtile, Maw ralkap rualpawlih Jehovah, Israel-ih Pathian, nang in na siahhlawh hnenah, ‘Sungza ka lo dĭnsak ding,’ tiin na rak phuanglang. Curuangah na siahhlawh in hi thlacamnak hi na hnenih cam dingin a thinlung sungah a rak hmu a si. 28 ^cCule atu-ah, Maw Bawipa Jehovah, nangmah cu Pathian na si ih, na kamsuakthupawl cu an dik, cule hi ṭhatnak hi na siahhlawh hnenah na rak tiamkam zo. 29 ^dCuruangah atu-ah, na siahhlawhih sungza cu na hmaiih an um kumkhua thei nak dingah malsawm pek cu na lunghmui zawng si hram seh. Ziangahtile, Maw Bawipa Jehovah, nang in cumi cu na rak ṭawngsuak zo ih, na malsawmnak in na siahhlawhih sungza cu kumkhuain malsawm si hai seh,” tiah a ti.

7:25^a Mip 23:19; 2San 1:9

7:26^b Suah 6:3; 1Sam 25:28; Neh 9:5; Sam 72:19; Luk 1:32-33

7:28^c Suah 34:6; Joh 17:17

7:29^d Mip 6:23-27

8

David in a Neh Vivo

1 ^aCumi hnuah hitin a si, David in Filisṭia-mipawl a do ih, a duaiter hai. Cule David cun Metheg Ammah khawpi cu Filisṭia-mipawlih kut ihsin a lâk. 2 ^bCun anih in Moab a neh. Lei ah hramhramin a băwkter hai ih, hri in a tah hai. Tlar hnih cu thah dingin a tah hai ih, tlar khat cu a tluanih nungih zuah dingin a tah. Cule Moab rammipawl cu David-ih siahhlawh ah an cang ih, ngunkhuai an pe.

8:1^a Sam 60:8; Heb 11:32

8:2^b Sem 19:37; Mip 21:29; 24:17; Lai 3:15

3 ^aDavid cun Zufraṭis tiva ah a ramṭhen la leh sal dingin a feh phahah Zobah siangpahrang Rehob-ih fapa, Hadadezer khal a neh. 4 ^bDavid in cu pa hnenin lêng 1000 le rang ralkap mipa 700 le ke ralkap mipa 20000 a lâk. Cuihtlunah David cun lêng 100 hrangih a zuah mi siarlo, lêng hnûktu rang zaten an kaiza thahri a sahcatsak ṭheh.

8:3^a Sem 2:14; 1Sam 14:47; 1Sp 11:23

8:4^b Jos 11:6, 9

5 ^aDamaskas ihsin Siria-mipawl cu Zobah siangpahrang Hadadezer bawm dingih an rat tikah, David in Siria mipa 22000 a rak that. 6 ^bCun David in Siria ram ih Damaskas ah ṭanhmun kiltu ralkappawl a ret, cule Siria-mipawl cu David-ih siahhlawh ah an cang, cule ngunkhuai an rak pe. Jehovah in David cu a fehnak kip ah a humhim. 7 ^cCule Hadadezer-ih siahhlawhpawl parih um sui ralphawpawl cu David in a lâk ih, Jerusalem ah a tlŭn. 8 ^dCuihtlunah Hadadezer-ih khawpi, Betah le Berothai ihsi khalin Siangpahrang David cun dar tam ngaingai a la.

8:5^a Sem 14:15; 1Sp 11:24; 2Sp 8:7

8:6^b 1Sp 20:34

8:7^c 1Sp 10:17; 2Sp 11:10

8:8^d Eze 47:16

9 ^aHamath siangpahrang Toi in Hadadezer-ih ralkap zaten David in a neh thluh ti a theih tikah, 10 ^bToi in a fapa Joram cu Siangpahrang David cibaibûk ding le thlaza camsak dingin a thlah, ziangruangahtile anih in Hadadezer a do ih a neh, ziangahtile Hadadezer cu Toi thawn an rak doaw ṭheu. Cule Joram cun ngun thilpawl, sui thilpawl le dar thilpawl a rak sum. 11 ^cCupawl cu a neh mi miphunpawl hmuahhmuah hnen ihsi sui le ngun a serhhran mi thawn Siangpahrang David in Jehovah hnenah a serhhran. 12 Cucu Siria hnen, Moab hnen, Ammon-mipawl hnen, Filisṭia-mipawl hnen, Amalek hnen le Zobah siangpahrang Rehob-ih fapa Hadadezer hnen ihsi a lawn mi thil an si.

8:9^a 1Sp 8:65; 2Sp 14:28; 2San 8:4

8:10^b Luk 14:31-32

8:11^c 1Sp 7:51; 1San 26:26; 2San 5:1

13 ^aCule David cu Cite Phaikuam ah Siria-mi 18000 a thahnak ihsi a ra tlun tikah, amai hrangah hmin a tuah. 14 ^bAnih in Edom ah ṭanhmun kiltu ralkappawl a ret, cule Edom ram pumpi hmun tin ah kiltu ralkappawl a ret ih, Edom-mipawl an zaten David-ih siahhlawh ah an cang. Cule Jehovah in David cu a fehnak kip ah a humhim.

8:13^a 2Sp 14:7; 1San 18:12

8:14^b Sem 27:29; Mip 24:17-18; Sam 108:9; Isa 34:5; Jer 49:7; Eze 25:12

David-ih Bawipawl

15 ^aCuti cun David cu Israel miphun zate tlunah a lal. Cule David in a mipi zate hnenah dik zet le dingfel zetin lai a rel. 16 ^bZeruiah-ih fapa Joab cu ralkappawl hotu lu bik a si, Ahilud-ih fapa Jehoshafat cu ngankhumtu a si, 17 ^cAhitub-ih fapa Zadok le Abiathar-ih fapa Ahimelek cu puithiam an si, Seraiah cu cangantu a si, 18 ^dJehoiada-ih fapa Benaiah cu Kereth-mipawl le Peleth-mipawl hotu a si ih, David-ih fapapawl cu uktu lu bik an si.

8:15^a Sem 18:19; 1Sp 11:38; 2Sp 12:2; Job 29:14; Sam 5:12; Heb 11:32-33

8:16^b 1Sp 4:3; Isa 36:3, 22

8:17^c 1Sam 2:35; 1Sp 1:8; 2Sp 12:10; 1San 6:8, 53; 24:3; 2San 31:10; Eze 40:46; Mar 2:26

8:18^d 1Sam 30:14; 1Sp 1:8, 38

9

Mefibosheth parih David-ih Ngilneihnak

1 ^aCule David in, “Jonathan ruangih ngilneihnak ka lăngter thei nak dingah Saul sungkua lak ihsin a tāng mi zo tal an um maw?” tiah a ti.

9:1^a 1Sam 20:14-17, 42

2 Cule Saul sungkua-ih siahhlawh pakhat a hmin Ziba a um. Amah cu David hnenih an kawh tikah, siangpahrang in a hnenah, “Ziba na simaw?” tiah a ti.

Cule anih in, “Na siahhlawh ka si ko!” tiah a ti.

3 ^aCun siangpahrang in, “Pathian ngilneihnak a hnenih ka lăngter thei nak dingah Saul sungkua zo tal an um lai maw?” tiah a ti.

9:3^a Pui 21:18; 1San 8:34

Cule Ziba in siangpahrang hnenah, “Jonathan-ih fapa kebái pakhat a um lai,” tiah a ti.

4 Cu tikah siangpahrang in a hnenah, “Amah cu khuiah a um?” tiah a ti.

Cule Ziba in siangpahrang hnenah, “Ngai hnik, amah cu Lo Debar khua ah, Ammiel-ih fapa Makir-ih inn ah a um,” tiah a ti.

5 Cun Siangpahrang David in mi a thlah ih, cu pa cu Lo Debar khua ih Ammiel-ih fapa Makir-ih inn ihta cu an va hruai. 6 Cule Saul fapa Jonathan-ih fapa Mefibosheth cu David hnenah a ra, a hmaiah a kûn ih a băwkkhup. Cun David in, “Mefibosheth,” tiah a ko.

Cule anih in, “Zoh hnik, na siahhlawh cu,” tiah a sawn.

7 ^aCule David in a hnenah, “Ṭih hlah, ziangahtile na pa Jonathan ruangah ngilneihnak ka lo hmuh tengteng ding ih, na pu Saul-ih ram pumpi ka lo neitersal ding. Cule ka cabuai ah rawl na ei ringring ding,” tiah a ti.

9:7^a 1Sam 20:14-15; 1Sp 2:7; 2Sp 25:29; Jer 52:33

8 Cun anih cu a băwkkhup ih a hnenah, “Kei uico thi vek men, na siahhlawh hi ziang so maw a si ih na ngaihsak?” tiah a ti.

Ziba cu Mefibosheth Rian ding a Si

9 Cule siangpahrang in Saul-ih siahhlawh Ziba cu a ko ih, a hnenah, “Saul-ih thil hmuahhmuah le a sungkuapawlih thil zaten na pu-ih fapa ka pe ṭheh a si. 10 Curuangah nangmah le na fapa le na siahhlawhpawl in a hrangah lei nan lehsak pei ih, na pu-ih fapa in ei ding a neih thei nak dingah nan ṭuan rah cu nan run keng pei. Asinan na pu-ih fapa Mefibosheth cu ka cabuai ah rawl a ei ringring pei,” tiah a ti. Ziba in fapa hleinga le siahhlawh kul a nei.

11 ^aCun Ziba in siangpahrang hnenah, “Siangpahrang ka bawi ih a siahhlawh thu a rak pek bangtukin na siahhlawh in a tuah ding,” tiah a ti.

9:11^a 2Sam 16:1-4; 19:24-30; Job 36:7; Sam 113:8

“Mefibosheth bélte cu siangpahrang fapapawl lakih pakhat vekin ka cabuai ah a ei pei,” tiah siangpahrang cun a ti. 12 Mefibosheth in fapa tleirawl a nei ih, a hmin cu Mika a si. Cule Ziba sungza hnenih cêng mi zaten Mefibosheth-ih siahhlawh an si. 13 Cutin Mefibosheth cu Jerusalem ah a cêng, ziangahtile anih cu siangpahrang cabuai ah a ei ve ringring. Amah cu a ke pahnih in a bái.

10

David le Siangpahrang Hanun

1 Himi hnuah hitin a si, Ammon-mipawlih siangpahrang a thi ih, a aiah a fapa Hanun a lal. 2 ^aCun David in, “A pa in ka parih ngilneihnak a rak lăngter bangin, Nahash-ih fapa Hanun parah ngilneihnak ka langter ve ding,” tiah a ti. Cun David in a hnenah a paih thuhla ah hnem dingin a siahhlawhpawl a thlah. Cule Ammon-mipawlih ram ah David-ih siahhlawhpawl cu an va feh.

10:2^a 1Sam 11:1

3 ^aCule Ammon-mipawlih tlangsuak upapawl in an bawi Hanun hnenah, “Mihnemtupawl na hnenih a rak thlah ruangah David in na pa a upat ngaingai tiah maw na ruah? David in a siahhlawhpawl hi khua zingzawi dingin, khua thlingthla dingin le khua siatsuah dingin a run thlah hai a si lo maw?” tiah an ti.

10:3^a Mip 21:32

4 ^aCuruangah Hanun in David-ih siahhlawhpawl cu a kai hai ih, an khabe hmul a hrek fai ko a ziahsak, cule an taw tiang lawng tingin an sinfenpawl cu a laiin a tansak hai ih, a thlahhlo. 5 David an sim tikah anih in anmah hmuak dingin mi a thlah, ziangahtile a milaipawl an ning a zak tuk. Cule siangpahrang in, “Nan kha hmul a cerh sau hlanlo Jeriko ah cām uhla, cuih hnuah tlung leh uh,” tiah a ti.

10:4^a Pui 19:27; Isa 7:20; 20:4; Jer 48:37; Eze 5:1

6 ^aAmmon-mipawl in David-ih ngei mi ah an tuahaw ti an hmuh tikah, Ammon-mipawl cun mi an thlah ih Beth Rehob ih Siria-mipawl le Zobah ih Siria-mipawl, ke ralkap 20000 le Maakah siangpahrang hnen ihsin pacang 1000 le Ish-Tob hnen ihsin pacang 12000 cu man phalhin an kâwlruai.

10:6^a Sem 34:30; Mip 13:21; Dnp 3:14; Lai 11:3-5; 1Sam 14:47

Ammon-mipawl Neh an Si

7 David in cuih thu a theih tikah, Joab le a ralkap micak zaten a thlah. 8 Cun Ammon-mipawl an ra suak ih, kăwtsuah hmaiah ral do dingin an tlaraw. Cule Zobah le Beth Rehob ih Siria-mipawl le Ish-Tob le Maakah-mipawl cu mah te mah te in ramlak ah an um.

9 Joab in dung lam le hmai lamin an run do ding ti a hmuh tikah, Israel miṭhabik pawl lakih mi hrekkhat a hril ih, Siria-mipawl do dingin a tlarawter hai. 10 ^aCule Ammon-mipawl do dingin a tlar ih a ret thei hai nak dingah, a tāng lai mi mipi zaten a unaupa Abishai kut ah a ret thluh. 11 Cule anih in, “Siria-mipawl hi ka hrangih an cak tuk asile, in bawm pei, asinan na hrangah Ammon-mipawl an cak tuk asile, ka ra ding ih ka lo bawm ding. 12 ^bRalṭhain um uhla, kan mipi hrangah le kan Pathian khawpipawl hrangah cak uhsi, cule Jehovah in a mithmuh ih ṭha a ti mi tuah seh,” tiah a ti.

10:10^a 1Sam 26:6

10:12^b Dnp 1:21; Lai 10:15; Neh 4:14; Efe 6:10

13 Cun Joab le a zawngih um mipi cu Siria-mipawl do dingin an va naih, cule annih cu a hmaiah an tlân. 14 Ammon-mipawl in Siria-mipawl an tlân ti an hmuh tikah, annih khal Abishai hmaiah an tlân ve ih, khaw sungah an lut. Cule Joab cu Ammon-mipawl hnen ihsin a kir ih Jerusalem ah a tlung.

Siria-mipawl Neh an Si

15 Siria-mipawl in Israel in a neh hai zo ti an hmuh tikah, hmunkhat ah an fĭnaw. 16 Cun Hadadezer in mi a thlah ih, Zufraṭis tiva ralkhat ih um Siria-mipawl cu a hruaisuak hai ih, Helam an thleng. Cule Hadadezer-ih ralkap rualpawlih ralbawipi Shobak in hmai a hruai hai. 17 Cuih thu cu David an sim tikah, Israel miphun zaten hmunkhat ah a fĭnkhawm ih, Jordan an tankai, cule Helam ah an feh. Cule Siria-mipawl cu David do dingin an tlaraw ih amah cu an do. 18 Cun Siria-mipawl cu Israel hmaiah an tlân, cule David in Siria-mi rang lêng mâwngtu 700 le rang ralkap mi 40000 a that, an ralbawipi Shobak khal a vuak ih, cu tawkah a thi. 19 ^aCule Hadadezer-ih siahhlawh ih um siangpahrangpawl zaten anmah cu Israel in a neh hai zo ti an hmuh tikah, Israel thawn remawknak an tuah ih, anmah an rian. Cule Siria-mipawl in Ammon-mipawl an bawm ngam nawn lo.

10:19^a 2Sam 8:6; 1Sp 11:25; 2Sp 5:1

11

David Uiretnak

1 ^aHitin a si, ^bkum thawhtirah, siangpahrangpawl doaw dingih an suah tikcucān ah David in Joab le a siahhlawhpawl cu Israel miphun zate thawn a thlah hai ih, Ammon-mipawl an that ṭheh. Cule Rabbah khua an kulh. Asinan David cu Jerusalem ah a tāng ta.

11:1^a Dnp 3:11; 1Sp 20:22; 1San 20:1

11:1^b kum thawhtirah: Israel-mipawlih kum thawk March-April a si.

2 ^aCun hitin a si, ni tlak zawng lamah David cu a ihkhun ihsin a tho ih, siangpahrang ^binn tlunah a feh. Cule cuih inn tlun ihsin nunau pakhat tak khawlh lai a hmu ih, cuih nunau cu zoh mawi zet a si. 3 ^cDavid cun mi a thlah ih, cuih nunau thuhla cu a zingzawi. Cule mi pakhat in, “Hih nunau cu Heth-mi Uriah nupi, Eliam-ih fanu Bathsheba a si lo maw?” tiah a ti. 4 ^dCun David in palaipawl a thlah ih, cu nu cu an hruai. Cule David hnenah a ra ih, David in a ihpi, ziangahtile cu nu cu a thianlonak ihsin a thian lai a si, cule cu nu cu a inn ah a tin.

11:2^a Dnp 22:8; Jos 2:8; Mat 5:28

11:2^b inn tlunah: Inn tlun hi rawn in an tuah.

11:3^c 1San 3:5

11:4^d Pui 15:25-30; 20:10; Dnp 22:22; Jam 1:14-15

5 Cule cuih nunau cu nau a pai. Cu nu in mi a thlah ih David hnenah, “Nau ka pai,” tiah a sim.

Uriah in David Thu a Lung Lo

6 ^aCun David in Joab hnenah, “Heth-mi, Uriah kha ka hnenah rak thlah aw,” tiin mi a thlah. Cule Joab in David hnenah Uriah cu a thlah. 7 Uriah a hnen a thlen tikah, David in Joab le mipipawl ziang an bang, ral doawknak ah teh ziang an bang, tiah a sut. 8 ^bCule David in Uriah hnenah, “Na inn ah tin awla, na ke khawlh aw,” tiah a ti. Cuti cun Uriah cu siangpahrang inn ihsin a suak, cule amah cu siangpahrang hnen ihsin ei ding thilpek in a thluncih. 9 Asinan Uriah cu a bawi-ih siahhlawhpawl hmuahhmuah zawngah siangpahrang inn sângka ah a it ih, a inn lamah a tin lo.

11:6^a 1San 11:41

11:8^b Sem 18:4

10 Cuih thu cu David hnenah, “Uriah cu a inn ah a tin lo,” tiah an sim.

David in Uriah hnenah, “Khualtlawnnak ihsin na ra tlung a si lo maw? Ziangah so na inn ah na tin lo?” tiah a ti.

11 ^aCu tikah Uriah in David hnenah, “Kuang le Israel-mipawl le Judah-mipawl cu puanthlampawl ah an cêng ih, ka bawi Joab le ka bawi-ih siahhlawhpawl cu ramlak ah ral do dingin an riak. Kei cu ka inn ah ei le in dingin le ka nupi hnenih it dingin ka tin ding maw? Na nun vekin le na thlarau a nun vekin hi thil cu ka tuah lo ding,” tiah a ti.

11:11^a 2Sam 7:2, 6

12 Cun David in Uriah hnenah, “Tuihsun khal hi tawkah rak hngak awla, thaisun ah ka lo fehter ding,” tiah a ti. Cutin Uriah cu Jerusalem ah, cuih ni le a thaisun cu a um. 13 David in Uriah cu a ko, anih cu David hmaiah a ei ih a in, cule David in ri ko a tuah. Cule tlâi ah cun a inn lamah tin loin, a bawipaih siahhlawhpawl hnenah it dingin a feh.

Uriah Thi dingih Thupeknak

14 ^aA thaizing ah, hitin a si, David in Joab hnenah ca a ngan ih, cumi cu Uriah-ih kut in a kuat. 15 Cule ca sungah cun, “Uriah cu vuak a si ih, a thih thei nak dingah ral doawknak a luarnak bik hmun ah hmaitawngter uhla, sipsan uh,” tiin a ngan. 16 Cun hitin a si, Joab in khawpi a zohhliah laiah, miralṭha ṭha umnak tiih a theihnak hmun ah Uriah cu a ṭangter. 17 Cun cuih khawmipawl cu an suak ih, Joab cu an do. Cule David-ih siahhlawh mi hrekkhat an thi, cule Heth-mi Uriah khal a thi ve.

11:14^a 1Sp 21:8

Doawknak Thu Simthannak

18 Cun Joab cun mi a thlah ih doawknak thuhla zaten David a sim, 19 cule a palai hnenah cun, “Siangpahrang hnenah doawknak thuhla na sim ṭheh tikah, 20 siangpahrang thinlingnak suak tahratin, na hnenah, ‘Ziangah so nan do tikah khawpi naih tukih nan va pan? Phar ihsin an lo sai ding ti nan thei lo maw si? 21 ^aJerubbesheth-ih fapa Abimelek kha zo in a that? Phar ihsin nunau pakhat in rial lung kuaiṭek a parah a thlak ih, Thebez ah a thi a si lo maw? Ziangruangah phar naih tukih na va feh?’ a lo ti asile, ‘Na siahhlawh Heth-mi, Uriah khal a thi ve,’ na ti pei,” tiah a cah.

11:21^a Lai 8:31; 9:50-54

22 Cuti cun palai cu a feh ih, a va thleng, cule Joab ih a thlahnak săn hmuahhmuah cu David a sim. 23 Cule a thlah mi palai cun David hnenah, “Mi in in neh ih, kan umnak ramlak ah in ra pan. Cun kannih in annih cu kăwtsuah tiang kan năwrsal ve. 24 Thálsai thiam pawl in phar ihsin na siahhlawhpawl cu an sai, cule siangpahrang siahhlawh hrekkhat an thi ih, na siahhlawh Heth-mi, Uriah khal a thi ve,” tiah a sim.

25 Cule David in palai hnenah cun, “Joab hnenah hitin va sim aw, ‘Hi thil hin na ^athinlung nuam loin lo umter hlah seh, ziangahtile ralnâm cun mi pakhat le a dang khal a that. Nasa sinsinin khawpi cu do uhla, tisiat uh,’ tiin amah cu thape uh,” tiah a ti.

11:25^a thinlung nuam lo: A ṭawng hrampi ah, “Mithmuh ah thil ṭha lo a si,” ti a si.

David in Uriah Nupi a Ṭhi

26 Uriah-ih nupi in a pasal Uriah a thi ti a theih tikah, a pasal cu a sûn. 27 ^aCule a sūnnak a ṭheh tikah, David in mi a thlah ih cu nu cu a inn ah a hruaiter, cule a nupi ah a cang ih fapa a hrinsak. Asinan David ih thil ti mi cun Jehovah lung a hmuiter lo.

11:27^a Dnp 34:8; Sam 51:4-5

12

Nathan in David Thiam lo a Coh

1 Cun Jehovah in David hnenah Nathan a thlah. Cule Nathan cu a hnenah a feh ih, a hnenah cun, “Khaw pakhat ah mi pahnih an um, pakhat cu milian a si ih a dang pakhat cu mifarah a si. 2 Milian pa cun rante rual tam zet le ranpi rual tam ngaingai a nei. 3 Asinan mifarah pa cun tuu fa no fāte, a nu pakhat a rak lei ih a câwm, cumi siarlo zianghman a nei lo. Cule cumi cu a hnenah a falepawl thawi ṭhangliantlang a si. Cuih tuu nu cun cu paih rawl a ei, a no ihta a in ih, a ṭāng sungah a zau. Cule cumi cu a hrangah fanu vek a si. 4 Cule milian pa hnenah cun khualtlawng pa pakhat a ra thleng, milian pa cun a hnenih thleng mi mikhual pa hrangih pakhat timtuah dingah amai rante rual lak ihsin le ranpi rual lak ihsin lâk siang loin, cuih mifarah paih tuu fa no a nu cu a lâk ih a hnenih thleng pa hrangah cucu a timtuah,” tiah a ti.

5 ^aCule David-ih thinhengnak cu nasa zetin cu pa dokalhin a tho ih, Nathan hnenah, “Jehovah a nun rori vekin, cutiih rak tuahtu pa cu ^ba thi tengteng ding a si! 6 ^cCule hivek thil a tuah ruangah le zawnruahnak a rak neih lo ruangah a tuu fa no nu cu a let li in a rul ding a si,” tiah a ti.

12:5^a 1Sam 14:39; 1Sp 20:40; Rom 2:1

12:5^b a thi tengteng ding: A ṭawng hrampi ah cun, “thihnak fapa,” ti a si.

12:6^c Suah 22:1

Nathan in David a Kawk

7 ^aCun Nathan in David hnenah, “Cu pa cu nangmah hi na si! Israel-ih Pathian Jehovah in hitin a ti, ‘Israel tlunah siangpahrang ah hriak ka lo thih ih, Saul kut ihsin ka lo runsuak. 8 Na pu-ih inn ka lo pe ih na pu-ih nupipawl khal na kilkhawi dingah ka lo pe, cule Israel sungkua le Judah sungkua khal ka lo pe. Cule cumi cu a rak mál tuk asile, tam sinsin ka rak lo pe ding a si si! 9 ^bZiangruangah Jehovah thupek cu zianghman siar loin, a mithmuh ah thil ṭha lo na tuah? Ralnâm in Heth-mi Uriah na that. Na nupi dingah a nupi na rak láwng ih, amah cu Ammon-mipawlih ralnâm in na that. 10 ^cCuruangah ralnâm in na sungkua a suahsan dah lo ding, ziangahtile nang cun zianghman i rak siar lo ih, na nupi dingah Heth-mi Uriah-ih nupi na láwng,’ tiah a ti. 11 ^dJehovah in hitin a ti, ‘Ngai hnik, nangmah dokalhin nangmai sungkua ihsin thil ṭha lo ka suakter ding. Cule na mithmuh roriah na nupipawl ka la ding ih, na innhnen ka pe ding, cule anih in sunvâng ah na nupipawl cu a ihpi ding. 12 Ziangahtile nang in a thupten na tuah, asinan kei cun cumi cu Israel miphun zate hmaiah, sunvâng ah ka tuah ding,’ a ti,” tiah a ti.

12:7^a 1Sam 2:35; 1Sp 20:42; Dan 4:22

12:9^b Mip 15:31; 1Sam 13:14; 1Sp 15:5; Sam 26:9

12:10^c 1Sp 2:25

12:11^d Dnp 28:30; 2Sam 16:21-22

13 ^aCule David in Nathan hnenah, “Jehovah parah ka rak sual a si,” tiah a ti.

12:13^a Sem 13:13; Pui 20:10; Mip 22:34; Thf 28:13; Isa 43:25; Jer 2:35; Mik 7:18-19; Zek 3:4, 9

Cule Nathan in David hnenah, “Jehovah in na sual cu a hlăwnhlo zo, na thi lo ding. 14 ^aSikhalsehla hi thil na tuahnak in Jehovah-ih doralpawl hnenah thangsiat dingah cān remcâng zet na tuahsak ruangah, na neih lai ding mi fapa khal a thi tengteng ding,” tiah a ti. 15 ^bCun Nathan cu a inn lamah a tin. Cule Uriah-ih nupi in David a hrinsak mi naute cu Jehovah in a vuak ih, naute cu a nâ.

12:14^a Isa 52:5; Rom 2:24

12:15^b 1Sam 25:38

David-ih Fapa Thihnak

16 ^aCuruangah David in naute hrangah Pathian a ngen, cule David cu rawl a ul ih a lut, lei ah zanvar a it. 17 ^bCule a sungkua ihsin upapawl an suak ih lei ihsin amah kaitho dingin a hnenah an feh. Asinan a tho duh cuang lo, an zawngah rawl khal a ei lo. 18 Cun hitin a si, a ni sarihnak ah naute cu a thi. Cule David-ih siahhlawhpawl in naute a thi, tiih sim an ṭih. Ziangahtile, “Ngai hnik, naute a nun laiah a hnenah kan sim ih, kan aw zianghman a ngaithla lo. Ziangtin naute a thi, tiah kan sim thei ding? A tuahmawhaw pang lo ding maw!” tiah an ti.

12:16^a Sam 6:7

12:17^b Sem 37:35; Dan 6:18

19 David in a siahhlawhpawl beaw thuktho a hmuh tikah, David in naute a thi zo, ti a theithiam. Curuangah David in a siahhlawhpawl hnenah, “Naute a thi maw si?” tiah a ti hai.

Cule annih in, “A thi,” tiah an ti.

20 ^aCu tikah David cu lei ihsin a tho, a khawlhaw ih hriak a hnihaw, cule a hnipuan a thlĕng. Cule Jehovah inn sungah a lut ih Pathian a bia. Cun amai inn ah a tin. Cule a dil hai ih a hmaiah rawl an hŭn, cule a ei. 21 Cun a siahhlawhpawl in a hnenah, “Na thil tidān hi ziangtin a si? Naute a nun laiah hmuah rawl na ul ih na ṭap, asinan naute a thih tikah na tho ih, rawl na ei riangri,” tiah an ti.

12:20^a Sem 41:14; Job 1:20; Mat 6:17

22 ^aCule anih in, “Naute a nun laiah cun rawl ka ul ih ka ṭap, ziangahtile ‘Naute a nun thei nak dingah Jehovah in i zangfah tla a si thei, zo in a sim thei?’ tiah ka ti. 23 ^bAsinan atu-ah cun anih cu a thi, ziangah so rawl ka ulh ding? Amah ka hruaikirsal thei ding maw? A hnenah ka feh ding, sihmansehla anih cu ka hnenah a kirsal lo ding,” tiah a ti.

12:22^a Isa 38:1-5; Jon 3:9

12:23^b Sem 37:35; Job 7:8-10

Solomon Hrinnak

24 ^aCun David in a nupi Bathsheba cu a hnem, a hnenah a lut ih a ihpi. Cule Bathsheba cun fapa a hring ih, David in a hmin ah ^bSolomon a sak. Cule Jehovah in anih cu a duhdawt ih, 25 ^cprofet Nathan hmangin thu a cah. Jehovah ruangah David in a hmin ah ^dJedidiah tiah a sak.

12:24^a 1Sp 1:11; 1San 22:9; Mat 1:6

12:24^b Solomon: Hebru ṭawngfáng shelomoh ti mi awsuah vek a si ih, Hebru ṭawng “hnangamdaihnak” ihsi ra a si men thei.

12:25^c Neh 13:26

12:25^d Jedidiah: Jehovah-ih duh zet mi tinak a si.

Rabbah Lâknak

26 ^aCun Joab in Ammon-mipawlih khawpi Rabbah cu a do ih, cuih siangpahrang khawpi cu a lâk. 27 Cule Joab in David hnenah palaipawl a thlah ih, “Rabbah ka do ih, khawpi tidai ka lâkngah zo. 28 Curuangah atu-ah a tāng lai mi mipi cu hmunkhat ah khawm uhla, khawpi dokalhin ṭanhmun khuar uh, cule khawpi cu la uh. Cu lo asile keimah in khawpi cu ka la ding ih, ka hmin ka puter ding,” tiah a ti. 29 Cun David in mipi zaten hmunkhat ah a fĭnkhawm ih Rabbah lamah a feh, cule cuih khua cu a do ih, a lâk. 30 ^bCun David in an siangpahrangih lallukhum cu a lu ihsin a lâk. Cumiih rihzia cu sui talent pakhat khing a si, lung mankhung pawl khal an tel. Cule cumi cu David lu tlunih ret a si. Cuihtlunah khawpi sungah ralthillâk tam ngaingai a lasuak. 31 ^cCule David in khawpi sungih um mipi cu a suahpi hai ih, hluahpawl le leilehnak thir zum pawl le thir hreitlungpawl tla in hnaṭuanter dingin a ret hai ih, tlăkrawh rawhnak hmun ah a fehter hai. Cuti cun Ammon-mipawlih khawpipawl hmuahhmuah cu a tuah thluh. Cun David le mipi hmuahhmuah cu Jerusalem ah an tlung.

12:26^a Dnp 3:11

12:30^b Est 8:15; Sam 21:3

12:31^c 1Sam 14:47

13

Amnon le Tamar

1 ^aCumi hnuah David-ih fapa Absalom in duhnungza farnu a nei, a hmin cu Tamar a si. Cule cu nu cu David-ih fapa Amnon in a duh. 2 Amnon cu a farnu Tamar ruangah cun nasa zetin a van a sâng ih a nâ, ziangahtile anih cu fala him a rak si. Cule Tamar parih thil ziang simaw tuah cu Amnon hrangah cun ti ci a si lo. 3 ^bAsinan Amnon in rualpi pakhat a nei ih a hmin cu Jonadab a si, David-ih unaupa Shimea-ih fapa a si. Jonadab cu mihrăwkhrawl zet a si. 4 Cule Jonadab cun Amnon hnenah, “Nang siangpahrang fapa rori, ziangruangah ni khat hnu ni khat na ṭawl deuhdeuh? I sim lo ding maw?” tiah a ti.

13:1^a 1San 3:9

13:3^b 1Sam 16:9

Amnon in a hnenah, “Ka unaupa Absalom-ih farnu Tamar ka duh,” tiah a ti.

5 Cu tikah Jonadab in a hnenah, “Na ihkhun ah it awla, mina bangin umawter aw. Cule lo veh dingin na pa a rat tikah a hnenah, ‘Zangfahten ka farnu Tamar ra sehla, rawl i pe seh, cule a timlam mi rawl cu ka hmu ih a kut ihta ka ei thei nak dingah, ka mithmuh ah rawl i timlamsak seh,’ ti aw,” tiah a ti.

6 Cun Amnon cu a it ih a naawter. Cule amah veh dingih siangpahrang a rat tikah Amnon in siangpahrang hnenah, “Zangfahten ka farnu Tamar ra sehla, a kut ihsin ka ei thei nak dingah ka mithmuh ah sang per pahnih i tuahsak seh,” tiah a ti.

7 Cule David in Tamar-ih inn ah, “Na ṭapa Amnon teih inn ah atu-ah va feh awla rawl timtuahsak aw,” tiin thu a cah. 8 Cule Tamar cu a ṭapa Amnon inn ah a feh, Amnon cu a it. Cun Tamar in sangphŭt cu a la ih, a kut in a nâwng, cule a mithmuh ah sang per pawl a tuah ih a káng. 9 ^aCule Tamar in khēng dau cu a la ih, sang per pawl cu Amnon hmaiah a ret, asinan a ei duh lo.

13:9^a Sem 45:1

Cun Amnon in, “Mi hmuahhmuah in i suahsan thluh hai seh,” tiah a ti. Cule an zaten a hnen ihsin an suak thluh. 10 Cun Amnon in Tamar hnenah, “Na kut ihta ka ei thei nak dingah rawl cu ihnak pindan sungah rak keng aw,” tiah a ti. Cule Tamar in a tuah mi sang per pawl cu a keng ih, a ṭapa Amnon hnenah ihnak pindan sungah cun a kenglut. 11 ^aTamar in ei dingah Amnon hnenih a hei ken tikah amah cu a rak kai ih a hnenah, “Ra aw, ka hnenah it aw, ka farnu,” tiah a ti.

13:11^a Sem 38:16; 39:12

12 ^aCule anih in, “It lo e, ka ṭapa, i hnêk hlah aw, ziangahtile Israel lakah hivek hi ti ding a si lo. Hi mualphoza thil cu tuah hlah aw! 13 ^bCule kei in ka mualphonak cu khuiah ka heih ding? Nang khal Israel mi-âpawl lakih pakhat vek na si ding. Curuangah zangfahten atu-ah siangpahrang sim aw, ziangahtile anih in nangmah neih ding i dawn lo ding,” tiah a ti. 14 ^cSikhalsehla, Amnon cun Tamar-ih ṭawng cu a ngaithla lo ih, amah hnakih a cahdeuh ruangah Amnon in Tamar cu a nâm ih a ihpi.

13:12^a Sem 34:7; Pui 20:17

13:13^b Pui 18:9; Dnp 22:21, 23-24

13:14^c Sem 34:2; Eze 22:11

15 Cun Amnon in amah cu nasa zetin a hua leh, a huatnak cu a duh laiih a duh dohdoh hnak hmanih nasain a hua. Cule Amnon in a hnenah, “Tho awla, tlanhlo aw,” tiah a ti.

16 Cu tikah Tamar in a hnenah, “Si lamlam hlah, hi i dawihlohnak thil ṭha lo hi ka parih na rak tuah zo mi a dang hnakin a ṭha lo sawn a si,” tiah a ti.

Asinan anih in Tamar cu a ngaithla lo. 17 Cun amah riantu a siahhlawh cu a ko ih, “Hi nu hi ka hnen ihsin dawisuak awla, a dung ihsin sângka kalh aw,” tiah a ti. 18 ^aTamar cun kâwrfual răwng phunphun nei a hruh, ziangahtile cuvek hnipuan cu siangpahrang fanu fala him pawl in an hruk ṭheu. Cule a siahhlawh cun Tamar cu lengah a suah ih, a dung ihsin sângka a kalh.

13:18^a Sem 37:23

19 ^aCun Tamar in a lu parah vutcâm a phulh ih, a parih um răwng phunphun nei a kâwrfual cu a thlek, cule a lu parah a kut a suang ih, nasa zetih ṭap phahin a fehsuak. 20 Cule a ṭapa Absalom in a hnenah, “Na ṭapa Amnon in a lo ihpi maw si? Asinan daiten um men aw, ka farnu. Anih cu na ṭapa a si, hi thil cu na thinlung ah ret duh hlah,” tiah a ti. Cuti cun Tamar cu a ṭapa Absalom inn ah ngui zetin a um ta. 21 ^bAsinan cuih thil hmuahhmuah cu David siangpahrang in a theih tikah a thin a heng tuk. 22 ^cCule Absalom in a unaupa Amnon hnenah a sia siseh, a ṭha siseh, zianghman a rel lo. Ziangahtile a farnu Tamar a năm ruangah Amnon cu Absalom in a hua.

13:19^a Jos 7:6; Est 4:1; Dan 9:3

13:21^b Sem 34:7

13:22^c Sem 31:24; Pui 19:17-18; 1Joh 2:9-11

Absalom in Amnon a That

23 ^aCule hitin a si, kum hnih pumhlum a liam hnuah, Efraim kiang Baal Hazor ah Absalom in tuu hmul mettupawl a nei. Cule Absalom in siangpahrang fapapawl zaten a sawm. 24 Cun Absalom cu siangpahrang hnenah a ra ih, “Zoh hnik, na siahhlawh in tuu hmul mettupawl a nei. Zangfahten siangpahrang le a siahhlawhpawl cu na siahhlawh hnenah feh ve hai seh,” tiah a ti.

13:23^a 1Sam 25:7

25 Asinan siangpahrang in Absalom hnenah, “Si lo e, ka fapa, kan zaten kan feh lo pei, cu lo asile kannih cu na phurrit ah kan cang pang ding,” tiah a ti. Cun Absalom in siangpahrang cu a ngen nasa nân, siangpahrang cu a feh cuang lo. Cule David in anih cu mal a sawm.

26 Cun Absalom in, “Cuti asilole, ka unaupa Amnon kha kan hnenah feh ve seh,” tiah a ti.

Cule siangpahrang in a hnenah, “Ziangruangah na hnenah a feh ve ding?” tiah a ti. 27 Asinan Absalom in siangpahrang cu a ngen ih, anih in Amnon le siangpahrang fapapawl zaten a hnenah a fehter thluh.

28 ^aCule Absalom in a siahhlawhpawl cu, “Atu-ah thlingthla hnik uh, Amnon-ih thinlung cu sabit zu thawi a năwmawk tikah, nan hnenah, ‘Amnon vaw uh,’ ka ti tikah amah cu that uh. Ṭih hlah uh. Thu ka lo pe a si lo maw? Ralṭha zetin um uhla, ngam uh,” tiah thu a pe hai. 29 Cuti cun Absalom ih thu a rak pek hai vekin, Amnon parah Absalom-ih siahhlawhpawl in an tuah. Cun siangpahrang fapapawl zaten an tho ih, anmai lākrang cio parah toin an tlân.

13:28^a Rut 3:7

30 Cule hitin a si, lamzin ih an um laiah, cuih thuthang cu David hnenah, “Absalom in siangpahrang fapapawl zaten a that ih, pakhat hman an tâng lo,” tiin a thleng. 31 ^aCu tikah siangpahrang cu a tho ih, a sinfen a thlek, lei ah a băwk, cule a siahhlawhpawl zaten an hnipuan thlekin a kiangah an ding.

13:31^a Mip 14:6

32 Cun David-ih unaupa Shimea-ih fapa Jonadab in a let ih, “Ka bawi in siangpahrang fapa tlangval zaten an that ṭheh a si ti cu zum hlah seh, ziangahtile Amnon lawng a thi a si. Ziangahtile a farnu Tamar a năm ni thawkin Absalom in hitiih ti dingin a rak ruat cia zo. 33 Curuangah ka bawi, siangpahrang in siangpahrang fapapawl zaten an thi ti zumin a thinlung ah hi thil cu ret hlah seh. Ziangahtile Amnon pakhat lawng a thi a si,” tiah a ti.

Geshur ah Absalom a Tlân

34 Cun Absalom cu a tlanhlo. Cule ralvengtu tlangval in khuacuanin a zoh. Cule zoh hnik, a dung lamih tlang sir lamzin ihsin mi tampi an ra luihlo. 35 Cule Jonadab in siangpahrang hnenah, “Zoh hnik, siangpahrang fapapawl cu an ra rero lai, na siahhlawh ih a sim vek khan a si taktak,” tiah a ti. 36 Cun hitin a rak si, a ṭawng a cem veten, zoh hnik, siangpahrang fapapawl cu an ra thleng, cule an aw an suah ih an ṭap. Siangpahrang le a siahhlawhpawl khal nasa zetin an ṭap ve. 37 Asinan Absalom cu Geshur siangpahrang Ammihud-ih fapa Talmai hnenah a tlân. Cule David in a fapa cu ni tin a ṭah. 38 Absalom cu a tlân ih Geshur ah a feh, cule cu tawkah kum thum a um. 39 Cule Siangpahrang David cun Absalom hnenih feh a duh tuk. Ziangahtile Amnon thuhla ah amah cu hnĕm a rak si zo, ziangruangahtile Amnon cu a thi zo.

14

Joab-ih Khawkhannak

1 Zeruiah-ih fapa Joab in siangpahrang thinlung in Absalom a ngaihtuah ti a thei. 2 ^aCule Joab in Tekoa khawmi a thlah ih, cu tawkih nunau fim pakhat cu a hruaiter, cule a hnenah, “Zangfahten lusûn bangin umawter awla, lusûn hnipuan hruh aw. Hriak thihaw loin, reipi mithi sūn nunau vekin um aw. 3 Cule siangpahrang hnenah feh awla, a hnenah hitin thu na va sim pei,” tiah a ti. Cule Joab in a kâ sungah thu a ret.

14:2^a Rut 3:3; Neh 3:5; Isa 1:6; Jer 6:1; Amo 1:1

4 Cule Tekoa nunaunu in siangpahrang hnenih thu a sim tikah lei lam hawiin a tlu ih a băwkkhup, cule, “Maw siangpahrang, i bawm hram aw,” tiah a ti.

5 Cun siangpahrang in a hnenah, “Na harsatnak ziang a si?” tiah a ti.

Cule anih in, “Keimah cu nuhmei taktak ka si, ka pasal cu a thi zo. 6 Atu-ah na siahhlawh nu hin fapa pahnih a nei, cule an pahnih in ramlak ah pakhat le pakhat an sualaw ih, zohman ṭhentu an um lo ih, pakhat in a dang pakhat cu a vuak ih, a that. 7 ^aCule zoh hnik, an sungkurûn in na siahhlawh nu dokalhin an rak tho ih, annih in, ‘A unaupa thattu cu a unaupa a thah ruangah kan thah ve thei nak dingah suah aw. Cule ro cotu ding khal kan hloralter ding,’ tiah an ti. Cuti cun a tāng mi ka meiling cu an mitter ding ih, leilung tlunah ka pasal cu hmin nei lo le cithlah tâng nei loin a um ding,” tiah a ti.

14:7^a Mip 35:19; Dnp 19:10-13

8 ^aCu tikah siangpahrang in nunaunu hnenah, “Na inn ah tin awla, na thuhla ah thu ka pe ding,” tiah a ti.

14:8^a 1Sam 25:35

9 ^aCule Tekoa nunaunu in siangpahrang hnenah, “Ka bawi, Maw siangpahrang, mawhsualnak cu ka par le ka paih sungkua parah tla ko sehla, siangpahrang le a laltokham cu mawhnak nei loin um seh,” tiah a ti.

14:9^a 1Sam 25:24, 28; Mat 27:25

10 Cule siangpahrang in, “Zokhal na hnenih ziang simaw a ṭawngtu cu ka hnenah rak hruai hai awla, a lo dai nawn lo ding,” tiah a ti.

11 ^aCun nunaunu in, “Thisen suahtupawl parah phuba latupawl in tihlorál nawn lo dingin, zangfahten siangpahrang in Jehovah na Pathian cîng ringring seh, cu lo asile ka fapa hi an hloralter pang ding,” tiah a ti.

14:11^a Mip 35:12, 21; 1Sam 14:45; Mat 10:30

Cule anih in, “Jehovah a nun rori vekin, na fapaih sám phang khat hman lei ah a tla lo ding,” tiah a ti.

12 Curuangah nunaunu in, “Zangfahten, na siahhlawh nu hin ka bawi siangpahrang hnenah a dang ṭawngkam hun ṭawng hrih seh,” tiah a ti.

Cule anih in, “Ṭawng ko aw,” tiah a ti.

13 ^aCule nunaunu in, “Cuti asile ziangruangah Pathian mipawl dokalhin hiti vekih ti na tum? Siangpahrang in a mi dawi mi a tlunkirtersal lo ruangah siangpahrang cu mawhnak nei mi vekin hi thil hi a ṭawng a si. 14 ^bZiangahtile kan thi tengteng ding ih, lei parih tidai bung mi ruhkirsal thei lo vek kan si. Pathian in nunnak hi a lahlo a si lo, cuhnakin a dawi mipawl cu a hnen ihsin dawihlo an si lan ta lo nak dingah rem a ruat hi a si sawn. 15 Cule atu-ah, mipi in ṭih ko in tuah ruangah hi thu lo sim dingin siangpahrang ka bawi hnenah ka ra a si. Cule na siahhlawh nu in, ‘Siangpahrang hnenah ka sim phawt hnik ding, siangpahrang in a siahhlawh nuih dilnak cu a tuahsuak mahna. 16 ^cZiangahtile siangpahrang in keimah le ka fapa hi hmunkhat ih Pathian ro co lo dingih tihlorál tumtu kut ihsin a siahhlawh nu hi a hna in a thei ding ih a runsuak ding,’ tiah a ti. 17 ^dCule na siahhlawh nu in, ‘Ka bawi siangpahrangih ṭawngkam cu hnĕmawknak si hram seh, ziangahtile ka bawi siangpahrang cu a sia le a ṭha thleidannak ah Pathian-ih vancungmi vek a si. Cule Jehovah na Pathian in lo umpi seh,’ a ti,” tiah a ti.

14:13^a 2Sam 13:37-38

14:14^b Mip 35:15, 25-28; Job 14:10-12; Sam 22:14; 58:7; Heb 9:27

14:16^c Suah 34:9; 1Sam 26:19

14:17^d 1Sam 29:9; 1Sp 3:9; Dan 2:21

18 Cun siangpahrang in a sawn ih, nunaunu hnenah, “Zangfahten ka lo suh mi ziangkhal ka hnen ihsin thup hram hlah aw,” tiah a ti.

Cule nunaunu in, “Zangfahten, siangpahrang ka bawi cu ṭawng seh,” tiah a ti.

19 Cu tikah siangpahrang in, “Hi thu hmuahhmuah ah hin na hnenah Joab-ih kut a tel maw?” tiah a ti.

Cule nunaunu in a sawn ih, “Ka bawi siangpahrang, na nun bangin, ka bawi siangpahrang ih a rak sim mi ihsin, zohman in keh lamah simaw, vawrh lamah simaw an pialsan thei lo. Ziangahtile na siahhlawh Joab in thu i rak pe ih, hi thu hmuahhmuah hi na siahhlawh nuih kâ ah a ret. 20 ^aThuhla umtudān dangawter deuh dingin hi thil cu na siahhlawh Joab in a rak tuah a si. Asinan ka bawi cu leilung tlunih thil um mi tinkim thei dingin, Pathian vancungmi-ih fimnak bangtukin a fim a si,” tiah a ti.

14:20^a 2Sam 19:27; 1Sp 3:12, 28; Isa 28:6

21 Cule siangpahrang in Joab hnenah, “Zoh hnik, hi thil hi ka tuah a si. Curuangah feh awla, tlangval Absalom hruaikirsal aw,” tiah a ti.

Absalom Kirsalnak

22 Cun Joab cu lei lam hawiin a tlu ih a băwkkhup, cule siangpahrang hnenah lungawi thu a sim. Cule Joab in, “Maw siangpahrang, ka bawi, siangpahrang in a siahhlawhih dilnak cu a hlawhtlinter ruangah tuihsun ah na siahhlawh hin na mithmuh ah duhsaknak ka co ti ka thei,” tiah a ti.

23 Joab cu a tho ih Geshur ah a feh, cule Jerusalem ah Absalom a rak hruai. 24 Cule siangpahrang in, “Anih cu amai inn ah kir sehla, ka hmel i hmu hlah seh,” tiah a ti. Cutin Absalom cu amai inn ah a tin ih, siangpahrang hmel a hmu lo.

25 Cun Israel miphun zate lakah Absalom tlukih a mawi ruangih simfak mi zohman an um lo. A ke zaphak ihsin a lu ih lallukhum tiang amah ah sawisel ding a um lo. 26 Cule a lu ih sám a meh tikah, kum cem zawngah a met ṭheu, ziangruangahtile a parah a sám cu a rit tuk, a meh tikah a lu ih sám cu siangpahrang ^akhīngkhainak ih a thlai tikah shekel 200 a rit. 27 ^bCun Absalom in fapa pathum le fanu pakhat a nei ih, a fanu hmin cu Tamar a si. Amah cu nunau pian mawi zet a si.

14:26^a khīngkhainak: A ṭawng hrampi ah, “lung” ti a si.

14:27^b 2Sam 18:18

David in Absalom a Ngaidam

28 Cule Absalom cu Jerusalem ah kum hnih sung a cêng nân, siangpahrang hmel a hmu lo. 29 Curuangah Absalom in siangpahrang hnenih amah thlah dingin Joab a cah, asinan anih cu a hnenah a ra lo. Cule a vei hnihnak a cah leh ih, a ra cuang lo. 30 Cu tikah a siahhlawhpawl hnenah, “Zoh hnik uh, ka kiangah Joab-ih ló a um ih, cu tawkah barli sangvut a nei, feh uhla cuih ló cu meisa in duah uh,” tiah a ti hai. Cule Absalom-ih siahhlawhpawl in cuih ló cu meisa an duah.

31 ^aCun Joab cu a tho ih, Absalom inn ah a feh, cule a hnenah, “Ziangruangah na siahhlawhpawl in meisa in ka ló an duah?” tiah a ti.

14:31^a Lai 15:5

32 ^aCule Absalom in Joab cu, “Zoh hnik, ‘Siangpahrang hnenah ka lo thlah thei nak dingah hi tawkah ra aw, “Ziangruangah so Geshur ihsin ka ra tlun? Cu tawkah rak um hrih men ningla ka hrangah a ṭhasawn ding nân,” tiih va sim dingah,’ tiin na hnenah mi ka rak thlah kha. Curuangah atu-ah, siangpahrang hmel cu hmu ko ning, asinan keimah ah mawhsualnak a um asile, anih in i that ko seh,” tiin a sawn.

14:32^a 1Sam 20:8

33 ^aCule Joab cu siangpahrang hnenah a feh ih a sim. Cun siangpahrang in Absalom cu a ko ih, a hnenah a feh, cule siangpahrang hmaiah leisin bihin a băwkkhup. Cule siangpahrang in Absalom cu a hnam.

14:33^a Luk 15:20

15

Absalom Helnak

1 ^aCuih hnuah hitin a si, Absalom in rang lêngpawl, rangpawl le a hmaiih tlântu ding mipa 50 a timtuah. 2 ^bCun Absalom cu zing zetin a tho ih, kăwt luhnak zin kiangah a ding, cule hitin a si, thuṭhennak tuahsak dingin siangpahrang hnenih thubuai run thlentu pauhpauh cu Absalom in a hnenah a rak ko hai ih, “Khui khawmi so na si?” tiah a ti.

15:1^a 1Sam 8:11

15:2^b Sem 23:10

Cule anih in, “Na siahhlawh cu Israel hnámpawl lakih hnám pakhat a si,” tiah a ti.

3 ^aCun Absalom in a hnenah, “Zoh hnik, na thuhla cu a ṭha ih a dik, asinan siangpahrang lam ihsin lo ngaithlatu ding an um lo,” tiah a ti. 4 ^bCuihtlunah Absalom in, “Kei hi hi ram ah laireltu ih tuah si ta hnik ningla maw, lungkimlonak nei le thubuai nei pauhpauh cu ka hnenah an ra ding, cun kei in an hnenah diknak ka pe hai ding,” tiah a ti. 5 Cule hitin a si, zokhal a hnenih kûn dingih an ra naih tiktikah a kut a suah ih, a kai ih, a hnam. 6 ^cCuti vek cun Absalom in siangpahrang hnenih lairelsak dingih ra Israel miphun zate parah a rak tuah. Cutin Absalom in Israel mipapawlih thinlung cu a fir.

15:3^a Thf 12:2

15:4^b Lai 9:29

15:6^c Rom 16:18

7 Cule hitin a si, ^akum 4 hnuah Absalom in siangpahrang hnenah, “Zangfahten Hebron ih Jehovah hnenih ka tuah mi thutiam hlensuak dingah i fehter aw. 8 ^bZiangahtile na siahhlawh hin Siria ram Geshur ih ka um laiah, ‘Jehovah in Jerusalem ih i hruaisal taktak asile, Jehovah ka rian ding,’ tiin thutiam a tuah a si,” tiah a ti.

15:7^a kum 4 hnuah: Masoretic text ah cun kum 40 ti a si. Khuahlan Bible dang pawl khalin kum 4 an ti.

15:8^b Sem 28:20-21

9 Cule siangpahrang in a hnenah, “Hnangamten feh aw,” tiah a ti. Cuti cun anih cu a tho ih, Hebron ah a feh.

10 ^aCun Absalom in, “Tuu pa ki tawtawrawt awn nan theih veten, ‘Absalom cu Hebron ah siangpahrang a si,’ nan ti pei,” tiin Israel hnám hmuahhmuah hnenah thlingthlatupawl a rak thlah. 11 Cule Absalom hnenah a mi sawm mi, mipa 200 Jerusalem ihsin an ra ve, lung thiangten an feh ih, zianghman an rak thei lo. 12 ^bCun Absalom in raithawinakpawl a hlăn laiah, Gilon-mi Ahithofel, David-ih thurawn petu cu, a khua Giloh ihta a cah. Cule phiarawknak cu a nasa deuhdeuh, ziangahtile Absalom hnenih mipi cu mipum an pung vivo.

15:10^a 1Sp 1:34, 39; 2Sp 9:13

15:12^b Jos 15:51; 1San 27:33; Job 19:14; Sam 3:1; 41:9

Jerusalem ihsin David a Tlânsuak

13 Cule, “Israel mipapawlih thinlung cu Absalom lamah a um,” ti simin David hnenah palai pakhat a ra thleng.

14 ^aCule David in Jerusalem ih a hnenih um a siahhlawhpawl zate hnenah, “Tho uhla, tlân uhsi, culole Absalom hnenin kan luat lo ding. Păwksuak dingin hmanhmawh uh, cu lo asile hmakhatteah in man ding ih, kan parah siatnak a thlengter ding, cule ralnâm hriam in khua hi a run do pang ding,” tiah a ti.

15:14^a 2Sam 19:9; Sam 3:1

15 Cule siangpahrangih siahhlawhpawl in siangpahrang hnenah, “Zoh hnik, kannih cu na siahhlawh kan si, ka bawi siangpahrang in a hril mi ziangkhal tuahsuak dingin kan tiar a si,” tiah an ti. 16 Cun siangpahrang cu a suak ih a sungkuapawl hmuahhmuah in a dung ihsin an thlun. Asinan siangpahrang in inn hngaktu dingah nunau pahra, nusunpawl cu a tān ta. 17 Cule siangpahrang cu a suak ih mi hmuahhmuah in a dung ihsin an thlun, cule inn pawntabik ah an cawl. 18 ^aCun a siahhlawhpawl zaten a hmaiah an lan, cule Kereth-mi hmuahhmuah, Peleth-mi hmuahhmuah le Gath-mi hmuahhmuah, mipa 600 Gath khua ihsin amah thluntupawl cu siangpahrang hmaiah an lan.

15:18^a 1Sam 30:14; 1Sp 1:38, 44; 1San 18:17

19 ^aCun siangpahrang in Gath-mi Ittai hnenah, “Ziangah so kan hnenih na feh ve? Kir awla siangpahrang hnenah um aw. Ziangahtile nang cu ram dang mi na si ih, nangmai hmunram ihsi dawi mi na si fawn. 20 ^bMizan lawngih ra na si ih, tuihsun ah kan zawngah a suk le a so ah ka lo vâkter ding maw? Ziangahtile khuiah ka feh ding ti ka thei lo, kir awla, na unaupawl hi hruaikir aw. Ngilneihnak le thutak in lo umpi seh,” tiah a ti.

15:19^a Sem 31:15; 2Sam 18:2

15:20^b 1Sam 22:2

21 ^aCule Ittai in siangpahrang hnenah a sawn ih, “Jehovah a nun rori bangin le ka bawi siangpahrang a nun bangin, thungaiten ka bawi siangpahrang umnak kip ah thih le thih a si ding ih, nun le nun a si ding, cu tawk khalah na siahhlawh hi a um ve ding,” tiah a ti.

15:21^a Rut 1:16-17; Thf 17:17

22 Cu tikah David in Ittai hnenah, “Feh awla, tankai aw,” tiah a ti. Cun Gath-mi Ittai cu a mipapawl hmuahhmuah le a hnenih um nauhakpawl hmuahhmuah thawn an tankai. 23 ^aCule ram pumpi in aw ring zetin an ṭap ih, mipi zaten an tankai. Siangpahrang amah rori khal ramṭhing lamzin lam panin Kidron Hawrkuam cu a paltlăng, cule mipi hmuahhmuah khal in an paltlăng ve.

15:23^a 1Sp 2:37; 2Sp 23:12; 2San 15:16; Job 2:12; Jer 31:40; Joh 18:1

Zadok Kirsalnak

24 ^aCule zoh hnik, Zadok khal a hnenih Levi-mi hmuahhmuah thawn, Pathian Thukham Kuang zawnin a ra ve. Cule Pathian Kuang cu an ṭhum ih, mipi zaten khua an suahsan kim thluh tiangin, Abiathar cu a so. 25 ^bCun siangpahrang in Zadok hnenah, “Pathian Kuang cu khaw sungah zawnkir uh. Jehovah-ih mithmuh ah duhsaknak ka hmuh asile, anih in i hruaikir leh ding ih, cuih Kuang le amai cēnnak hmun i hmuh leh ding. 26 ^cAsinan anih in, ‘Nangmah ah lungsinak ka nei lo,’ tiih a ti asile, zoh hnik, hi tawkah hin ka um ko, ṭha a ti vekin ka parah tuah ko seh,” tiah a ti. 27 ^dSiangpahrang in puithiam Zadok hnen khalah, “Nangmah cu ^ehmutu na si lo maw? Na fapa pahnih, na fapa Ahimaaz le Abiathar-ih fapa Jonathan thawn khawpi sungah hnangamten kir uh. 28 Zoh hnik, kei cu na hnen ihsin thuhla in run theihter hlanlo ramṭhing phairawn in ka rak lo hngak ringring ding,” tiah a ti. 29 Curuangah Zadok le Abiathar in Jerusalem ah Pathian Kuang cu an zawnkir. Cule annih cu, cu tawkah an um ta.

15:24^a Mip 4:15; 1Sam 22:20; 1Sp 2:26

15:25^b Suah 15:13; Sam 43:3

15:26^c Lai 10:15

15:27^d 1Sam 9:9; 1Sp 1:42

15:27^e hmutu: Profet kawhnak hmin dang a si.

Ahithofel cu Miphiarsawmtu a Si

30 ^aCun David cu Olif Tlang kainak ah a so vivo ih, a soh phahin a ṭap, cule a lu a khuh ih a kelawng in a feh. Cule a hnenih um mipi hmuahhmuah khal an lu an khuh ih, ṭap phahin an feh vivo. 31 Cun mi pakhat in David cu, “Ahithofel cu Absalom lamah ṭangin miphiartupawl lakah a tel ve,” tiin a sim. Cule David in, “Maw Jehovah, Ahithofel-ih thurawn pek cu atnak ah cangter dingin ka lo ngen a si,” tiah a ti.

15:30^a Mip 25:6; Est 6:12; Sam 30:5

32 ^aCun hitin a rak cang, David cu tlang zim a hung thlen tikah Pathian a bia. Cule zoh hnik, Arki-mi Hushai in a kâwrfual thlekin le a lu ah leivut phulhin David hmuak dingin a ra. 33 David in a hnenah, “Ka hnenih na feh vivo asile, ka hrangah phurrit na si ding. 34 ^bHmansehla khaw sungah kir tahratin Absalom hnenah, ‘Maw siangpahrang, na siahhlawh ka si ding, hi hlanih na paih siahhlawh ka rak si vekin, atu khalah nangmai siahhlawh ka si ding,’ tiih na ti asile, ka hrangah Ahithofel-ih thurawn pek cu na neh khal a si thei. 35 Cule cu tawkah na hnenah puithiam Abiathar le Zadok khal an um a si lo maw? Curuangah hitin a si ding, siangpahrang inn ihsi na theih mi ziangkhal puithiam Zadok le Abiathar na sim ṭheu hai pei. 36 ^cNgai hnik, an fapa pahnih Zadok-ih fapa Ahimaaz le Abiathar-ih fapa Jonathan khal an hnenih an um ve kha, na theih mi tinkim cu anmah hmangin i rak kuat pei,” tiah a ti. 37 ^dCuti cun David-ih rualpi Hushai cu khawpi sungah a lut. Cule Absalom cu Jerusalem ah a lut.

15:32^a Jos 7:6; 16:2; 1Sp 4:16

15:34^b Thf 11:14

15:36^c 1Sp 1:42

15:37^d 1San 27:33

16

Mefibosheth-ih Siahhlawh

1 ^aCun David cu tlang zim málte a lăn tikah, ngai hnik, dăm mi lāk pahnih thawn an parah sang per 200, sabit rah car bawr 100, ṭhal thing rah pum 100 le sabit zu thâwl khat phurterin Mefibosheth-ih siahhlawh Ziba cun David cu a rak hmuak. 2 Cule siangpahrang in Ziba hnenah, “Hipawl hi ziang na ti duhnak an si?” tiah a ti.

16:1^a 1Sam 25:18; 2Sam 9:2; 1San 12:40

Cu tikah Ziba in, “Lākpawl cu siangpahrang sungkua to dingah, sang le ṭhal thing rah cu tlangvalpawl ei dingah, cule sabit zu cu ramṭhing ih tha cem pawl ih in dingah a si,” tiah a ti.

3 Cun siangpahrang in, “Na pu Saul-ih fapa cu khuiah so a um?” tiah a ti.

Cule Ziba in siangpahrang hnenah, “Ngai hnik, Mefibosheth cu Jerusalem ah a um, ziangahtile anih cun, ‘Tuihsun ah Israel sungkuapawl in ka paih uknak ka hnenah in pe leh sal ding,’ a ti,” tiah a ti.

4 Cule siangpahrang in Ziba hnenah, “Ngai hnik, Mefibosheth-ih ta zaten na ta an si,” tiah a ti.

Cule Ziba in, “Na mithmuh ih duhsaknak ka co thei nak dingah tăngdawrten na hmaiah ka kûn a si, ka bawi, Maw siangpahrang!” tiah a ti.

Shimei in David a Camsiat

5 ^aCun Bahurim khua ih Siangpahrang David a thlen tikah, ngai hnik, Saul sungkua ih innsungsang ihsin mi pakhat, Gera-ih fapa a hmin Shimei cu, cu tawk ihsin a ra suak. Anih cun feh phahin a camsiat vivo. 6 Cule anih in David le Siangpahrang David-ih siahhlawhpawl zaten lungto in a deng hai. Cule mipi hmuahhmuah le micakpawl hmuahhmuah cu David-ih vawrh lamah le a keh lamah an um. 7 Cun Shimei in a camsiat tikah hitin a ti fawn, “Tlânsuak aw! Tlânsuak aw! Nang thisen suahhmang pa le nang misantlailo pa! 8 ^bA uk aiih na rak uknak pa Saul sungkua thisen zaten na parah Jehovah in a run thlenter ih, Jehovah in na fapa Absalom hnenah uknak a pe zo. Cule zoh hnik, nangmah cu thisen suahhmang pa na si ruangah nangmai thil ṭha lo ah nangmah cu kaihtān na si,” tiah a ti.

16:5^a Suah 22:28; 1Sp 2:8-9, 36, 44

16:8^b Sam 55:3

David in Abishai a Êl

9 ^aCun Zeruiah-ih fapa Abishai in siangpahrang hnenah, “Ziangruangah himi uico thi hin ka bawi siangpahrang cu a camsiat? Zangfahten va fehin, a lu va la ning,” tiah a ti.

16:9^a 1Sam 26:6; Luk 9:54

10 ^aAsinan siangpahrang in, “Nannih Zeruiah-ih fapapawl, nannih le kei hi ziang pehtlaihawknak so kan neih? Jehovah in a hnenah, ‘David camsiat aw,’ a ti ruangih camsia a si ahcun, ‘Ziangruangah cu vekih na tuah?’ tiah zo in a ti thei ding?” tiah a ti.

16:10^a Rom 9:20

11 ^aCule David in Abishai le a siahhlawhpawl zate hnenah, “Zoh hnik uh, ka fapa, ka taksa rori ihsi suak cun ka nunnak a hawl. Ziang tlukin so hi Benjamin-mi cun a hawl sinsin pei? Zianghman ti hlah uh, camse ko seh, ziangahtile Jehovah in a rak fial a si. 12 ^bJehovah in ka harsatnak hi a run zoh ding ih, Jehovah in tuihsun ih a camsiatnak hi ṭhatnak thawn in rak rul leh tla a si thei,” tiah a ti. 13 Cule David le a mipawl cu lamzin ah an feh vivo ih Shimei cu David-ih ralden tlang sirin a feh vivo, a feh phahin a camse rero, lungto in David a deng thul, leivut tla a sit. 14 Cun siangpahrang le a zawngih um mipi hmuahhmuah cu an cau. Cule cu tawkah anmah le anmah an tha an tharawter.

16:11^a Sem 45:5; 1Sam 26:9

16:12^b Dnp 23:5; Sam 4:1; 109:28; Rom 8:28

Ahithofel-ih Thurawn Peknak

15 Culaifangah Absalom le mipi zate, Israel mipapawl cu Jerusalem an thleng, Ahithofel cu an zawngah a tel ve. 16 Cule hitin a si, David-ih rualpi Arki-mi Hushai cu Absalom hnenih a feh tikah Hushai in Absalom hnenah, “Siangpahrang a nunkhua sau hram seh! Siangpahrang a nunkhua sau hram seh!” tiah a ti.

17 Cu tikah Absalom in Hushai hnenah, “Himi hi na rual pa parih na rinumnak cu a simaw? Ziangah na rual pa zawngih na rak feh lo?” tiah a ti.

18 Cule Hushai in Absalom hnenah, “Si lo e, Jehovah le hi mipipawl le Israel mipapawl zate ih an hril mi thuthu in ka um sawn ding ih, a hnenah ka kăwp ding. 19 Cuihleiah, zo ka rian cuang ding? A fapa hmaiah rawng ka bawl lo ding maw? Na pa hmaiih rawng ka bawl vekin, na hmaiah ka bawl ding a si,” tiah a ti.

20 Cun Absalom in Ahithofel hnenah “Ziang kan tuah ding ti thurawn in pe aw,” tiah a ti.

21 Cule Ahithofel in Absalom hnenah, “Inn hngaktu dingih a rak tān ta mi na paih nusunpawl hnenah va ^alut aw. Cule Israel miphun zaten nangmah cu na pa in a lo fih ti an hna in an thei ding. Cun na hnenih ṭang hmuahhmuah pawlih kut cu a cak ding,” tiah a ti. 22 ^bCuti cun Absalom hrangah ^cinn tlunah puanthlam an zarsak ih, Absalom cu Israel miphun zate mithmuh ah a paih nusunpawl hnenah a ^dlut. 23 Cule cu lai cān ih a rak pek mi, Ahithofel-ih thurawn pek cu Pathian ṭawngkam thurawn pek mi vek a si, cuti vek cun Ahithofel-ih thurawn pek mi zaten David le Absalom in an ruat a si.

16:21^a lut: Ihpi tinak a si.

16:22^b 2Sam 12:11

16:22^c inn tlunah: 11:2 simfiangnak zoh aw.

16:22^d lut: Câng 21 simfiangnak zoh aw.

17

1 Cuihtlunah Ahithofel in Absalom hnenah, “Mipa 12000 ka hril ding, cule tuihzan ah ka tho ding ih, David ka dawi ding. 2 ^aA cauh lai le a cah lo laiah ka va man ding ih, ṭih ko ka tuah ding. Cun a hnenih um mi zaten an tlân ding, cule siangpahrang lawng ka that ding. 3 Cun mi hmuahhmuah cu na hnenah ka run hruaikir thluh ding. Na hawl mi pa siarlo, an zaten an ra tlun tikah mi hmuahhmuah cu hnangamten an um ding,” tiah a ti. 4 Cule cuih thu cun Absalom le Israel upa zate a lunghmuiter.

17:2^a 1Sp 22:31; Zek 13:7

Hushai-ih Thurawn Pek

5 Cun Absalom in, “Atu-ah Arki-mi Hushai khal ko uhla, ziang a sim ve ti thei hnik uhsi,” tiah a ti. 6 Cule Absalom hnenih Hushai a rat tikah, Absalom in a hnenah, “Ahithofel in hitin a ti ih, a ti vekin kan tuah pei maw? Kan tuah lo ding asile hun ṭawng hnik aw,” tiah a ti.

7 Cu tikah Hushai in Absalom hnenah, “Ahithofel-ih thurawn pek mi cu tuih cān ah cun a ṭha lo a si,” tiah a ti. 8 ^aHushai in a ṭawng a peh ih, “Ziangahtile na pa le a mipapawl cu na thei, annih cu micak, lungthin sungih thinsosa, ramlak savâwm fa no lawn mi vek an si. Cule na pa cu ralthiam a si ih, mipi lakah a riak lo ding. 9 Ngai hnik, atu hmanah anih cu khui tawk khur ah simaw, khui hmun ah simaw a relh ding. Cule hitin a si ding, a tirih mi hrekkhat an tlûk tikah a theitu pauhpauh in, ‘Absalom thluntu lakah thahawknak a um,’ tiah an ti ding. 10 ^bCule kiosa vek thinlung nei, miralṭha hman a zupral thluh ding. Ziangahtile Israel miphun zaten na pa cu micak a si ti le a hnenih um mipawl khal miralṭha an si ti an thei. 11 ^cCuruangah Israel miphun zaten Dan ihsin Beersheba tiang, tifinriat vunnel zat ih tam in na hnenah khawmaw thluh hai sehla, doawknak ah nangmah rori feh aw, tiah thurawn ka lo pe a si. 12 Cutin amah hmuh a sinak hmun hmun ah kan pan ding ih, lei parih daifim tla vekin a parah kan tlakhnawh ding. Cule amah le a hnenih um mi zaten pakhat hman kan zuah lo ding. 13 ^dCuihtlunah khaw sungih a sīp asile, Israel miphun zaten hridai kengin khaw sungah kan va luhhnawh ding ih, cu tawkah lungte pakhat hman hmuh ding um loin tiva sungah kan dirtla thluh ding,” tiah a ti.

17:8^a 1Sam 16:18; Hos 13:8

17:10^b Jos 2:9, 11; 1San 11:11; 12:8

17:11^c Sem 12:2; Jos 11:4; Lai 20:1

17:13^d Mik 1:6

14 ^aCun Absalom le Israel mipa zaten, “Arki-mi Hushai-ih thurawn pek cu Ahithofel-ih thurawn pek mi hnakin a ṭhasawn,” tiah an ti. Ziangahtile Jehovah in Absalom parih siatnak a thlenter thei nak dingah, Jehovah in Ahithofel-ih thurawn pek ṭha a pek mi cu neh dingin a rak tumtah cia.

17:14^a 2San 10:8; Neh 4:15; Sam 9:16

Hushai-ih Ralrin Peknak

15 Cun Hushai in puithiam Zadok le Abiathar hnenah, “Ahithofel in Absalom le Israel upapawl, cutin khatin tiin thurawn a pe hai ih, kei in cutin khatin tiin thurawn ka pe hai. 16 Curuangah atu-ah, zamrang zetin David hnenah mi thlah uhla, ‘Tuihzan cu ramṭhing phairawn ah riak loin, a rang thei bikin tankai sawn aw, cu lo asile siangpahrang le a hnenih um mi hmuahhmuah cu dawlh thluh an si pang ding,’ tiin sim uh,” tiah a ti. 17 ^aJonathan le Ahimaaz cu En Rogel hmun ah an um, ziangahtile khaw sungih an luh lai an hmuh ding an ngam lo. Cun annih cu siahhlawh nunau pakhat a va feh ih, a sim hai ṭheu, cule annih cu an feh ih, Siangpahrang David an sim sin ṭheu. 18 Sikhalsehla annih cu nauhak pakhat in a rak hmu hai ih, Absalom a sim. Asinan an pahnih in zamrang zetin an tlânsuak ih, Bahurim khua ah mi pakhat a tual ih tikhur nei inn ah an va thleng, cule cuih tikhur ah cun an lut.

17:17^a Jos 15:7; 1Sp 1:9

19 ^aCun nunaunu in a sīn cu a la ih, tikhur kâ ah a pharh, cule a tlunah thlairawl a pho, a thil ti mi cu theih a si lo. 20 ^bCule Absalom-ih siahhlawhpawl cu nunaunu hnenah inn ah an va thleng ih, “Ahimaaz le Jonathan khuiah an um?” tiah an ti.

17:19^a Jos 2:6

17:20^b Suah 1:19; Jos 2:4-5

Cu tikah nunaunu cun an hnenah, “Tiva te an tankai zo,” tiah a ti hai.

Cule an hawl ih an hmuh lo tikah Jerusalem ah an tlungkir. 21 Cun hitin a rak si, an fehsuah hnuah tikhur sung ihsin annih cu an hung suak, an feh ih Siangpahrang David an sim, cule David hnenah, “Tho awla, tidai cu tankai zâng aw. Ziangahtile hitin Ahithofel in nangmah dokalhin thurawn a rak pe,” tiah an ti. 22 Cule David le a hnenih um mi hmuahhmuah cu an tho ih, Jordan ralah an kai. Zing khua a hung van tikah mi pakhat hman Jordan tankai man lo an um lo.

23 ^aCun Ahithofel in a thurawn pek mi cu thlun a si lo ti a hmuh tikah a lāk a dăm ih, a păwk, cule amai khua, a inn ah a tlung. Cun a sungkuapawl nuntukhawsakdān ding felfaiteih a tawlrel hnuah, amah le amah a khaiaw ih a thi, cule anih cu a paih thlān ah an phum.

17:23^a 2Sp 20:1

Amasa cu Ralkap Hotu ah

24 ^aCun David cu Mahanaim ah a feh. Cule Absalom cu a hnenih um, Israel mipapawl hmuahhmuah thawn Jordan an tán. 25 ^bCule Absalom in Joab aiawhah Amasa cu ralkappawl hotu ah a tuah. Hih Amasa hi mi pakhat a hmin Ithra, Israel-mi Joab-ih nu, Zeruiah-ih naunu, Nahash-ih fanu Abigail hnenih ^cluttu a si. 26 Cun Israel le Absalom cu Gilead ram ah ṭanhmun an khuar.

17:24^a Sem 32:2

17:25^b 1Sp 2:5, 32; 1San 2:13-17; 12:18

17:25^c luttu: Ihpitu tinak a si.

27 ^aCule hitin a rak cang, Mahanaim khua ih David a thlen tikah, Rabbah ihsin Amnon tefapawl, Nahash-ih fapa Shobi, Lo Debar ihsin Ammiel-ih fapa Makir le Rogelim ihsin Gilead-mi Barzillai tepawl an hnenah an ra. 28 Annih in ihkhunpawl, cawhtawlhpawl, lei belpawl le sangvut, barli sangvut le sangphŭt, vainim kăn le bete, pe le bete kăn an rak keng. 29 ^bCuihtlunah khuai tizu le thawphāt, tuu le ranpi hnawi hlap pawl cu David le a zawngih um, milaipawl ih ei dingah an rak keng. Ziangahtile annih in, “Mipi cu ramṭhing ah rilrawng le cau le tihâlin an um,” tiah an ti.

17:27^a 1Sam 11:1; 2Sam 9:4; 1Sp 2:7; Ezr 2:61

17:29^b 2Sam 16:2, 14

18

Absalom Duainak le Thihnak

1 Cule David in a hnenih um minungpawl a siar ih, mipi tlunah ralkap 1000 hotupawl le ralkap 100 hotupawl a ret. 2 ^aCun David in mipi ṭhen thum ṭhen khat cu Joab kut hnuaiah, ṭhen thum ṭhen khat cu Joab-ih unaupa Zeruiah-ih fapa Abishai kut hnuaiah, ṭhen thum ṭhen khat cu Gath-mi Ittai kut hnuaiah tiin a thlahsuak hai. Cule siangpahrang in mipi hnenah, “Keimah rori nan zawngah ka feh ve tengteng ding,” tiah a ti.

18:2^a Lai 7:16; 1Sam 11:11

3 ^aAsinan mipi in, “Na feh lo ding! Ziangahtile kannihpawl hi tlanhlo hman nungla pawi an ti lo ding, a hrek hman thi nungla pawi an ti cuang lo ding. Asinan nang cu kanmahpawl 10000 tluk na si. Curuangah nang cu khaw sung ihsin in bawm dingin tiar cia ih na um cu a ṭhasawn a si,” tiah an let.

18:3^a 1Sam 18:7

4 Cun siangpahrang in an hnenah, “Ṭha nan ti dandanin ka tuah ding,” tiah a ti. Cule siangpahrang cu kăwtka kiangah a rak dīng ih, mipi hmuahhmuah cu a za a za le a thawng a thawngin an fehsuak. 5 Cun siangpahrang in, Joab, Abishai le Ittai tla, “Keimah ruangah tlangval Absalom cu dimdawih zetin ti uh,” tiin thu a rak pe hai. Cule siangpahrang in Absalom thuhla ah ralkap hotu hmuahhmuah thupek a rak pek tikah mipi zaten an rak thei.

6 ^aCun mipi cu Israel donak hmun lamah an feh. Cule doawknak cu Efraim thing rûl lakah a si. 7 Cu tawkah Israel-mipawl cu David-ih siahhlawhpawl hmaiah nehin an um ih, cuih ni ah cu tawk hmun ah nasa zetih mi 20000 thahnak a thleng. 8 Ziangahtile cu tawkih doawknak cu ram pumpi ah a darh. Cule cuih ni ah ralnâm ih mi a ^bdawlh mi hnakin thing rûl ih a dawlh mi an tamsawn. 9 Cun Absalom in David-ih siahhlawhpawl a rak táwng. Absalom cu lākrang parah a to. Lākrang cu ela thingkung ṭêk rulbŭk zet hnuaiah a lut ih, Absalom-ih lu cu ela thingkung in a awk, cutin anih cu van le lei karlakah thlaiawin a tâng. Cule a hnuaiih lākrang cu a tlan vivo. 10 Cule mi pakhat in cumi cu a hmu ih Joab a sim, “Zoh hnik, ela thingkung ah Absalom thlaiawin ka hmu,” tiah a ti.

18:6^a Jos 17:15

18:8^b dawlh: That tinak a si.

11 ^aCu tikah Joab in amah ra simtu pa hnenah, “Zoh hnik, na hmu zo ih, ziangah so amah cu lei ah na vuakthlak lo? Ngun shekel pahra le taikhap pakhat ka lo pe ding nân,” tiah a ti.

18:11^a 1Sam 18:4

12 Asinan cu pa in Joab hnenah, “Shekel ngun 1000 hman ka kut in dawng ding si hman ningla, siangpahrang fapa dokalhin ka kut ka suah lo ding. Ziangahtile ka hnatheih ah siangpahrang in, nangmah le Abishai le Ittai hnenah, ‘Ralring uh, tlangval Absalom cu zohman in dai hlah hai seh,’ tiin thu a rak lo pek kha. 13 Cu lo asile ka nunnak dokalh zawngin dik lo zetin thil ka rak ti ding a si si. Ziangahtile siangpahrang hnen ihsin zianghman thuh theih a um lo ih, nangmah rori cu keimah dokalhin na tuahaw ding,” tiah a ti.

14 Cu tikah Joab in, “Na hnenah rei um man hlah ing e,” tiah a ti. Cule a kut in fungfêk zum pathum a keng ih, ela thingkung lakih nung lai Absalom-ih thinhna ah a sŭn. 15 Cule Joab-ih ralthuam kensaktu tlangval pahra pawl in Absalom cu an ra kulh ih, an vuak ih an that. 16 Cule Joab in tuu pa ki a phaw ih, mipi cu Israel dawinak ihsin an kir. Ziangahtile Joab in mipi a rak dāwn. 17 ^aCule Absalom cu an zâwn ih, thing rûl lakih khur kaupi sungah an thlak, cule a parah lung sang zetin an peng. Cun Israel miphun zaten anmai puanthlam cio ah an tlân.

18:17^a Jos 7:26; 8:29

Absalom Hngilhlonak

18 ^aAbsalom in a nun laiah Siangpahrang Phaikuam sungah amai hrangah lungphun a rak phun. Ziangahtile anih in, “Ka hmin hlo lo dingin fapa ka nei fawn si lo ih,” tiah a ti. Cuih lungphun hmin ah amai hmin a rak sak. Cule tuihni tiang cumi cu Absalom Hngilhlonak ti a si.

18:18^a Sem 14:17; Mip 32:42; 2Sam 14:27

Kush-mi le Ahimaaz an Tlân

19 ^aCun Zadok-ih fapa Ahimaaz in, “Atu-ah ka va tlân pei ih, Jehovah in a doralpawl phuba a laksakdān thuthang hi siangpahrang cu ka va sim pei,” tiah a ti.

18:19^a 2Sam 15:36

20 Cule Joab in a hnenah, “Tuihsun ah hi thuthang cu na va sim lo pei, ziangahtile ni dangah hi thuthang cu na va sim leh pei. Siangpahrang fapa a thih ruangah tuihni ah cun ziang thuthang hman na phur ding a si lo,” tiah a ti. 21 Cun Joab in Kush-mi hnenah, “Va feh awla na thil hmuh mi siangpahrang va sim aw,” tiah a ti. Cuti cun Kush-mi cu Joab hmaiah a kûn ih a tlân.

22 Cule Zadok-ih fapa Ahimaaz in Joab hnenah, “Ziang a va si khalle, zangfahten kei khal Kush-mi paih dung ihsin tlân ve ko ning,” tiah a tisal.

Cu tikah Joab in, “Ka fapa, thuthang sim ding na nei si loih, ziangah so na tlan ding?” tiah a ti.

23 Asinan ziang a can a si khalle, “Ka tlân ko ding,” tiah a ti.

Cu tikah anih in, “Tlân aw,” tiah a ti. Cun Ahimaaz cu phairawn lamin a tlân ih, Kush-mi cu a khelh.

24 ^aDavid cu kăwt pahnih lakah a to. Cule ralvengtu cu kăwtka pawnta deuh tlunah a kaiso ih, khuacuanin a zoh. Cule ngai hnik, mi pakhat amah te lawng a ra tlân rero. 25 Cun ralvengtu cu a au ih, siangpahrang a sim. Cule siangpahrang in, “Amah te lawng asile, a kâ ah thuthang a phur ko ding,” tiah a ti. Cule cu pa cu rang zetin a ra ih, a nai deuhdeuh.

18:24^a 1Sam 14:16; Jer 51:12

26 ^aCun ralvengtu in mipa dang pakhat ra tlan lai a hmu ih, ralvengtu in kăwtka kiltu a ko ih, “Ngai hnik, a dang mipa pakhat amah te lawng ra tlân rero khi,” tiah a ti.

18:26^a 1Sp 1:42; Isa 52:7

Cule siangpahrang in, “Anih khal thuthang a phur ko ding,” tiah a ti.

27 ^aCun ralvengtu in, “A hmaisadeuh ra tlântu paih tlandān cu Zadok-ih fapa Ahimaaz a bang,” tiah a ti.

18:27^a 2Sp 9:20

Cule siangpahrang in, “Anih cu miṭha a si ih, thuthang ṭha thawn a ra ko ding,” tiah a ti.

28 Cule Ahimaaz cu a au ih siangpahrang hnenah, “Ziangkim a ṭha,” tiah a ti. Cun siangpahrang hmaiah a hmai leisin bihin a kûn ih, “Ka bawi dokalhih an kut suahtupawl nehtu, Jehovah na Pathian cu thangṭhatin um ko seh,” tiah a ti.

29 Siangpahrang in, “Tlangval Absalom a himdam maw?” tiah a sut.

Ahimaaz in, “Joab in siangpahrang siahhlawh le kei na siahhlawh in thlah laiah an buai luihlo lai ka hmu, hmansehla ziang a si, ti ka thei lo,” tiah a ti.

30 Cule siangpahrang in, “Sirah her awla hi tawkah ding aw,” tiah a ti. Cun anih cu sirah a her ih, a dīng cuahco.

31 Cule zoh hnik, Kush-mi a ra thleng ih, Kush-mi cun, “Ka bawi siangpahrang, thuthang ṭha a um a si! Ziangahtile nangmah dokalhih thotupawl hmuahhmuah ih phuba cu tuihsun ah Jehovah in a lo lâksak zo a si,” tiah a ti.

32 ^aCule siangpahrang in Kush-mi hnenah, “Tlangval Absalom a himdam maw?” tiah a ti.

18:32^a Lai 5:31; 1Sam 25:26

Cu tikah Kush-mi cun, “Ka bawi siangpahrangih doralpawl le nangmah tuahmawh dingih a lo dotu zaten, cuih tlangval bangin si hai seh,” tiah a ti.

David in Absalom a Ṭah

33 ^aCun siangpahrang cu a khūr ih, kulh kăwtka tlunih pindan ah a lut ih a ṭap. Cule a feh phahin, “Maw ka fapa Absalom, ka fapa, ka fapa Absalom, na aiah keimah thih sawn tâk ding! Maw Absalom ka fapa, ka fapa!” tiah a ti.

18:33^a Sem 43:14; Suah 32:32

19

Joab in David a Kawk

1 Cule Joab hnenah, “Ngai hnik, siangpahrang cu Absalom a ṭah ih a sûn,” tiah an sim. 2 Cun cuih ni ih nehnak cu mi hmuahhmuah hrangah lusûn ṭahnak ah a cang. Ziangahtile, “Siangpahrang cu a fapa ruangah a thin a nâ,” an ti mi cu mipi in cuih ni ah an rak thei. 3 Cule mipi cu ral doawknak ih an tlanhloh tikih an mualpho ruangih an thuhawk bangin, cuih ni ah khaw sungah an thupaw. 4 Asinan siangpahrang cu a hmai a hup ih, “Maw ka fapa Absalom! Maw Absalom, ka fapa, ka fapa!” tiin aw ring zetin a au.

5 Cun Joab cu inn sungah siangpahrang hnenah a lut ih, “Na nunnak siseh, na fapapawl le na fanupawlih nunnak siseh, na nupipawl le na nusunpawl ih nunnak siseh, na nunnak runtu na siahhlawhpawl zaten tuihsun ah an ningzak ko na tuah, 6 a lo huatupawl na duhdawt ih a lo duhdawtupawl na huatnak ah hin. Ziangahtile tuihni ah mizahumpawl le siahhlawhpawl cu zianghman ih rel lo vekin na langter, ziangahtile tuihni ah Absalom nungin kannih hmuahhmuah hi thi thluh nungla, cumi cun na lung a lo hmuiter ding ti ka thei. 7 ^aCuruangah atu-ah, tho awla suak aw, cule na siahhlawhpawl hnĕmnak thu sim aw. Ziangahtile na suah lo asile, Jehovah sālin sia ka săm a si, tuihzan ah mi pakhat hman na hnenih riak an um lo ding. Cule cucu na hrangah na no lai ihsin tuihni tiang na parih thil ṭha lo thleng mi zate hnakin a sedeuh ding,” tiah a ti.

19:7^a Thf 14:28

8 Cun siangpahrang cu a tho ih kăwt ah a to. Cule annih in mipi hmuahhmuah hnenah, “Zoh hnik uh, kăwt ah siangpahrang a to,” tiin an sim. Cun mipi hmuahhmuah cu siangpahrang hmaiah an ra.

Ziangahtile Israel-mi, mi kip cu mai puanthlam cio ah an rak tlântlung zo a si.

Jerusalem ah David a Kir

9 “Siangpahrang in kan ralpawl kut ihsin in run ih, Filisṭia-mipawl kut ihsin in runsuak, cule atu-ah amah cu hih ram ihsin Absalom ruangah anih cu a tlânsuak. 10 Cule kan tlunih um dingih hriak kan thih mi Absalom cu doawknak ah a thi. Cun atu-ah, ziangah saw siangpahrang hruaikir ding zianghman rel loih nan um men?” tiin Israel hnám zate lakah mi zaten an êlaw.

11 Cule Siangpahrang David in puithiam Zadok le Abiathar hnenah, “Judah upapawl hnenah, ‘Ziangruangah siangpahrang amai inn ih hruaikir netabik tu ih nan can? Israel miphun zate ih ṭawngkampawl cu siangpahrang hnenah, amai inn roriah a rak thleng zo. 12 Nannih cu ka unau nan si, nannih cu ka ruh le ka titsa nan si. Ziangruangah siangpahrang hruaikir dingah a netabikih nan ṭăn riangri?’ tiin sim uh. 13 ^aCule Amasa hnenah, ‘Nangmah cu ka ruh le ka titsa na si lo maw si? Nangmah cu Joab aiah ka ralbawi ih ka lo tuah ringring lo asile, Pathian in ka parah a duh duhin tuah sehla, cuhnakih tamsin khalin tuah seh,’ a ti, va ti uh,” tiin mi a thlah. 14 Cule Judah mipapawl hmuahhmuah ih thinlung cu mi pakhat thinlung vekin a hmin ih, cutin siangpahrang hnenah, “Na siahhlawhpawl hmuahhmuah thawn ra kir uh,” ti dingin mi an thlah.

19:13^a Rut 1:17; 2Sam 17:25

Shimei in David a Ngen

15 ^aCun siangpahrang cu a ra kir ih, Jordan a thleng. Cule Judah cu siangpahrang hmuak ih, siangpahrang cu Jordan ralih hruai dingin Gilgal khua ah an feh. 16 Cule Bahurim khawmi Benjamin-mi Gera-ih fapa Shimei cu zamrang zetin Siangpahrang David hmuak dingin, Judah mipapawl zawngah a feh. 17 ^bA hnenah Benjamin mipa 1000 le Saul sungkuapawlih siahhlawh Ziba, a fapa hleinga le a siahhlawh kul cu a hnenah an rak um. Cule annihpawl cu siangpahrang hmaiah Jordan ralkhat lamah an feh. 18 Cun siangpahrangih sungkuapawl hruai dingin le ṭha a ti dandanih a tuah dingah lăwng a tankaipi. Cule Jordan a tăn hnuah Gera-ih fapa Shimei cu siangpahrang hmaiah a băwkkhup.

19:15^a 1Sam 11:15

19:17^b 2Sam 9:2

19 Cun anih in siangpahrang hnenah, “Ka bawi in mawhsualnak neiah i puh hram hlah sehla, ka bawi siangpahrang in Jerusalem a suahsan ni ih na siahhlawh in dik lo zetih a rak lo ti mi cu cîng ringring hlah seh, siangpahrang in a thinlung ah ret hlah seh. 20 Ziangahtile kei, na siahhlawh in thil sual ka rak ti a si ti ka thei. Curuangah zoh hnik, Joseph-ih sungkuapawl zate lakah ka bawi siangpahrang hmuak dingah tuihsun ah a ra suak hmaisabik ka si,” tiah a ti.

21 ^aAsinan Zeruiah-ih fapa Abishai in a sawn ih, “Jehovah hriak thih mi a camsiat ruangah Shimei cu thah a si lo ding maw?” tiah a ti.

19:21^a Suah 22:28; 1Sam 26:6, 9

22 ^aCule David in, “Nannih Zeruiah-ih fapapawl, in dotu ah tuihsun ih nan ṭan hi, nannih le kei hi ziang pehtlaihawknak so kan neih? Tuihsun ah Israel ram ah mi pakhat khat thah ding a simaw? Tuihsun ah Israel parih siangpahrang ka si hi thei lo maw ka si?” tiah a ti. 23 ^bCun siangpahrang in Shimei hnenah, “Na thi lo ding,” tiah a ti. Cule siangpahrang in a hnenah that lo dingin sia a săm.

19:22^a 1Sam 11:13

19:23^b 1Sp 2:8, 42

Mefibosheth in Ziba a Mawhthluk

24 Cun Saul-ih fapa Mefibosheth cu siangpahrang hmuak dingin a rung suk. Cule siangpahrang a pawh ni ihsin hnangamteih inn ih a ra kir ni tiangin a kepawl cu a kilkhawi lo, a kha hmul a met lo ih, a hnipuan khal a sawp lo. 25 Cule hitin a rak si, siangpahrang hmuak dingih Jerusalem ih a feh cu siangpahrang in a hnenah, “Mefibosheth, ziangruangah ka zawngih na feh ve lo?” tiah a ti.

26 ^aCu tikah anih in, “Maw siangpahrang, ka bawi, ka siahhlawh in i rak bum a si. Ziangahtile na siahhlawh in, ‘A parah ka to ih siangpahrang hnenih ka feh thei nak dingah keimah hrangah lāk ka dăm ding,’ tiah ka ti, ziangruangahtile na siahhlawh cu kebái a si si. 27 ^bCule anih in ka bawi siangpahrang hnenah na siahhlawh hi a rak zuarthlai, asinan ka bawi siangpahrang cu Pathian-ih vancungmi vek a si. Curuangah na mithmuh ih ṭha na ti dandanin tuah ko aw. 28 Ziangahtile ka paih sungkuapawl zaten siangpahrang ka bawi hmaiah cun mithi vek an si. Cuti cingin na siahhlawh hi na cabuai ih rawl eitupawl lakah na ret. Curuangah siangpahrang hnenah ziang titheinak so ka lo dil nawn ding?” tiin a let.

19:26^a Pui 21:18

19:27^b 1Sam 29:9; 2Sam 16:3

29 Cun siangpahrang in a hnenah, “Ziangah so nangmai thuhla hi na rel ṭheu? ‘Nang le Ziba cun ram hi ṭhenaw uh,’ ka lo ti kha,” tiah a ti.

30 Cu tikah Mefibosheth in siangpahrang hnenah, “Ka bawi siangpahrang cu a inn ah hnangamten a rak kir zo ruangah, amah in la thluh seh,” tiah a ti.

Barzillai parih David Ngilneihnak

31 ^aCule Gilead-mi Barzillai cu Rogelim hmun ihsin a ra ih, siangpahrang cu Jordan ralih fehpi dingin a zawngah Jordan a tankai ve. 32 ^bBarzillai cu kum upa zet a si, kum 80 mi a si. Cule Mahanaim khua ih siangpahrang a um sung hmuahhmuah ei ding rawl a rak tum thluh, ziangahtile anih cu milian zet a si. 33 Cule siangpahrang in Barzillai hnenah, “Ka hnenah tankai ve awla, Jerusalem ah ka hnenih na um sung hmuahhmuah ka lo câwm ding,” tiah a ti.

19:31^a 1Sp 2:7

19:32^b 2Sam 17:27-29

34 Asinan Barzillai in siangpahrang hnenah, “Siangpahrang hnen Jerusalem ih so dingin, kum ziat so ka nun cuang ding? 35 ^aTuihsun ah keimah cu kum 80 ka si. Asia le a ṭha thleidang thei teh ka si maw si? Na siahhlawh hin ka ei le ka in mi a thawtzia teh ka thei thei nawn maw si? Nunaupawl le mipapawl hlasak aw teh ka thei thei nawn maw si? Ziangah so na siahhlawh hi ka bawi siangpahrang hrangih phurrit ka si bêt ding? 36 Na siahhlawh cu siangpahrang zawngah Jordan lan fangfang lawng a feh ding. Ziangah cuvek lawmman thawi siangpahrang in i rulh kherkher ding? 37 ^bKa nu le ka paih thlān kiang, ka khua ih ka thih thei nak dingah na siahhlawh cu zangfahten tlungter aw. Asinan zoh hnik, na siahhlawh Khimham hi, anih hi ka bawi siangpahrang hnenah tankai ve sehla, a hrangah ṭha na ti dandanin tuah aw,” tiah a ti.

19:35^a 2San 35:25; Ezr 2:65; Sam 90:10; Ths 2:8

19:37^b Sem 49:29; Jer 41:17

38 Cule siangpahrang in, “Khimham cu ka zawngah a tankai ding ih, ṭha na ti dandanin a hrangah ka tuahsak ding. I dil mi ziangkhal ka lo tuahsak ding,” tiah thu a let. 39 ^aCun mipi zaten Jordan ralkhat ah an feh. Cule siangpahrang khal a tankaisuah tikah, siangpahrang in Barzillai cu a hnam ih, mal a sawm, cule amai inn ah a tlung.

19:39^a Sem 47:7

Judah Parih Phunzainak

40 Cule siangpahrang cu Gilgal khua ah a feh vivo ih, Khimham in a thlun. Cule Judah-mi zaten siangpahrang cu an hruai ih, Israel mipi a hrek khal an tel ve. 41 ^aCule zoh hnik, Israel mipa hmuahhmuah cu siangpahrang hnenah an ra ih, siangpahrang hnenah, “Ziangruangah kan unau Judah mipapawl in an lo ru ih, siangpahrang le a sungkuapawl le David-ih mipapawl hmuahhmuah cu Jordan tiva ralah an hruai?” tiah an ti.

19:41^a Lai 8:1

42 Cu tikah Judah mipapawl hmuahhmuah in Israel mipapawl hnenah, “Siangpahrang cu kan sungkhat nai a si ruangah a si. Ziangah so hih thu ah nan thin a heng? Siangpahrang kan eisak mi a um maw si? Asilole anih in thilpek ziang tal in rak pe maw?” tiah an sawn.

43 Cule Israel mipapawl in Judah mipapawl cu an sawn ih, “Siangpahrang parah covo pahra kan nei, curuangah kannih in nannih hnakin David thawn kan pehparaw sawn a si. Ziangah so in hmuhsuam men, kannihpawl hi siangpahrang hruaikir dingih ruahnak pe hmaisa tu kan si lo maw?” tiah an ti. Cu cingin Judah mipapawlih ṭawngkampawl cu Israel mipapawlih ṭawngkampawl hnakin a hrothakdeuh thotho.

20

Sheba Helnak

1 ^aCule cu tawkah Benjamin-mi, Bikhri fapa, a hmin Sheba, misantlailo pa a rak um. Cule anih cun tuu pa ki a phaw ih,

20:1^a Sem 31:14; 1Sam 22:7-8; 1Sp 12:16

“David ah covo kan nei lo,
Jessi-ih fapa khalah ro kan nei lo,
Maw Israel, mai puanthlam cio ah tin uh,”

tiah a ti.

2 Cun Israel-mi, mi kip in David cu an tân ih, Bikhri-ih fapa Sheba an thlun. Asinan Judah mipapawl lawngte cun Jordan ihsin Jerusalem tiang an siangpahrang hnenah rinumten an kăwp. 3 Cun David cu Jerusalem ih a inn ah a thleng. Cule siangpahrang in nunau pahra, a inn kiltu dingih a tān ta mi a nusunpawl cu a hruai ih a khum hai, cule a câwm hai, asinan an hnenah a ^alut lo. Cutin an thih ni tiangin annih cu kharkhumin an um ih, nuhmei dinhmun in an nung.

20:3^a lut lo: Ihpi lo tinak a si.

Joab in Amasa a That

4 Cule siangpahrang in Amasa hnenah, “Ni thum sungah Judah mipapawl ka hnenah i rak hruaikhawmsak awla, nangmah khal hi tawkah na rak um ve pei,” tiah a ti. 5 Cuti cun Amasa cu Judah mipapawl hruaikhawm dingin a feh. Asinan David in a hrangih cān a khiahsak mi hnakin a va reideuh. 6 Cule David in Abishai hnenah, “Atu-ah Bikhri-ih fapa Sheba in Absalom hnakin in tuahmawh nasadeuh ding. Na bawipaih siahhlawhpawl hruai awla amah cu dawi aw, cu lo asile amai hrangah kulh nei khuapawl a hmusuak ding ih, kan hnen ihsin a tlânsuak pang ding,” tiah a ti. 7 ^aCun Joab-ih mipapawl cun Kereth-mipawl, Peleth-mipawl le micakpawl hmuahhmuah thawn amah cu an dawi. Cule Jerusalem ihsin Bikhri-ih fapa Sheba dawi dingin an fehsuak. 8 ^bGibeon khua ih lungpi tûm zet umnak an va thlen tikah, Amasa cu an hmaiah a feh. Cule Joab cu ral doawknak ralthuam a hruh, cumi parah cun ralnâm a kawm thawn taikhap ah a tâi ah a thlaih. Cule hmai lamih a feh tikah, cumi cu a tla. 9 Cun Joab in Amasa hnenah, “Na dam maw, ka unaupa?” tiah a ti. Cule Joab in Amasa hnam dingin a kha hmul cu a vawrh lam kut in a kaihsak. 10 ^cAsinan Amasa in Joab kut ih ralnâm um cu a rak zohhliah lo. Cule Joab in cumi thawn Amasa-ih pum ah a sŭn ih a rilpawl cu lei ah an tla, cule a sunbêt nawn lo. Cutin anih cu a thi. Cun Joab le a unaupa Abishai in Bikhri fapa Sheba cu an dawi vivo. 11 Cu laiah Joab-ih tlangvalpawl lakih pakhat cu Amasa kiangah a dīng ih, “Joab duhsaktu pauhpauh le David lam ṭang pauhpauh cun Joab thlun uh,” tiah a ti. 12 Asinan Amasa cu zinpi laifangah amai thisen ah a ciahaw. Cule cu pa in mipi zate dīng cuahcoih a hmuh hai tikah Amasa-ih ruak cu zinpi ihsin ramlak ah a ṭhawn ih, a kiangih fehtu pauhpauh ding vivo ih a hmuh hai tikah, a parah sinfen a hlăwn. 13 Zinpi ihsin Amasa ṭhawn a si hnuah, Bikhri-ih fapa Sheba dawi dingin mipa hmuahhmuah in Joab cu an thlun vivo.

20:7^a 1Sam 30:14

20:8^b Jos 9:3

20:10^c Lai 3:21; 1Sp 2:5

Sheba Thihnak

14 ^aCule Sheba in Abel khua le Beth Maakah khua tiang Israel hnám zate le Beri-mi zaten a hrawhsuak thluh. Beri-mipawl cu hmunkhat ah an pungkhawm ih Sheba dung khal an thlun. 15 ^bCun Joab-ih milaipawl cu Abel khua le Beth Maakah khua ah an ra ih, amah cu an kulhkhŭm, cule khawpi kap tluanah lei an sûngpâwng ih, cumi cu kulh hrulah a um. Cule Joab hnenih a um mi milai hmuahhmuah in cimter dingin kulh cu an su ciamco.

20:14^a Mip 21:16

20:15^b 1Sp 15:20; 2Sp 15:29; Isa 37:33; Jer 6:6

16 Cun nupinu fim pakhat cu khawpi sung ihsin, “Ngai u law, ngai u law! Zangfahten Joab hnenah, ‘Thu ka lo sim thei nak dingah ra nai aw,’ a ti, tiah sim uh,” tiah a au. 17 Cu nuih hnenih a va naih tikah nunaunu in, “Joab na simaw?” tiah a ti.

Anih in, “Ka si ko,” tiah a let.

Cun nupinu in a hnenah, “Na siahhlawh nuih ṭawngkampawl hi ngai aw,” tiah a ti.

Cule anih in, “Ka ngai a si,” tiah a let.

18 Cu tikah cu nu cun, “Hlanlai ah, ‘Abel khua ah kaihhruainak an hawl tengteng ding,’ an ti ṭheu ih, cutin elawknak an cemter ṭheu. 19 ^aKei hi Israel lakih remawk duh le mirinum lakih mi ka si. Nang cun Israel ram ih khua pakhat le nu pakhat tisiat dingin na hawl rero. Ziangah so Jehovah-ih ro cu na dawlh ding?” tiah a ti.

20:19^a 1Sam 26:19

20 Cule Joab in a let ih, a hnenah, “Ka dawlh ding le ka tisiat ding cu ka hnen ihsin hla seh, hla seh! 21 Cuti vek lam a si lo. Cuhnakin Efraim tlang ram ihsin mi pakhat Bikhri-ih fapa, a hmin Sheba in siangpahrang dokalhin, David dokalhin a kut a rak hawi sawn a si. Cu pa cu pesuak uhla, hi khua hi ka suahsan ding,” tiah a ti.

Cu tikah nunaunu in Joab hnenah, “Zoh hnik hman, phar tlun ihsin na hnenah a lu cu hlăwnthlak a si ding,” tiah a ti. 22 ^aCun nunaunu cu a fimnak hmangin mi zate hnenah a feh. Cule Bikhri fapa Sheba-ih lu cu an tán ih, Joab hnenah an hlăwn. Cun Joab cun tuu pa ki a phaw ih, khawpi ihsin mi kip mai puanthlam cio ah an sīpkir. Cule Joab cu siangpahrang hnen, Jerusalem ah a tlungkir.

20:22^a Ths 9:13-16

David-ih Bawipawl

23 Cule Joab cu Israel ralkappawl hmuahhmuah tlunih lu bik a si. Jehoiada-ih fapa Benaiah cu ^aKereth-mipawl le Peleth-mipawl hotu a si. 24 ^bAdoram cu hramhramih ṭuanter mipawl hotu a si. Ahilud-ih fapa Jehoshafat cu ngankhumtu a si. 25 ^cSheva cu cangantu a si, Zadok le Abiathar cu puithiam an si. 26 Cule Jair-mi, Ira cu David-ih puithiam a si.

20:23^a Kereth-mipawl: Siangpahrang inn le temple kiltu ralkappawl tinak a si.

20:24^b 2Sam 8:16; 1Sp 4:6

20:25^c 1Sam 2:35

21

David in Gibeon-mipawl Phuba a La

1 ^aCun David dam laiah a pehpehin kum thum sung mangṭam a thleng. Cule David in Jehovah thu a ráwn. Jehovah in, “Himi cu Saul le thisen suahhmang a sungkuapawl ruangah a si, ziangruangahtile anih in Gibeon-mipawl a that,” tiah a let.

21:1^a Sem 12:10; Suah 32:11

2 ^aCu tikah siangpahrang in Gibeon-mipawl cu a ko hai ih, a be hai. Gibeon-mipawl cu Israel tefapawl an si lo ih, Amor-mipawl tāngsŭn an si sawn. Israel tefapawl in anmah kilhim dingin sia an rak săm, asinan Saul in Israel tefapawl le Judah-ih tefapawl hrangih ṭhahnem a ngainak ruangah anmah that dingin a hawl.

21:2^a Jos 9:15

3 ^aCuruangah David in Gibeon-mipawl hnenah, “Nan hrangah ziang ka lo tuahsak ding? Cule Jehovah-ih ro mal nan sawm thei nak dingah ziang thawn sualkhuhthawinak ka tuah pei?” tiah a ti.

21:3^a 1Sam 26:19; 2Sam 20:19

4 ^aCule Gibeon-mipawl in a hnenah, “Saul le a sungkuapawl hnen ihsin sui siseh, ngun siseh kan nei lo ding ih, kan hrangah mi zokhal Israel ram ah kanmah ruangah na that lo pei,” tiah an ti.

21:4^a Mip 35:33-34

Cu tikah David in, “Nan ti mi pauhpauh, nan hrangah ka tuah ding,” tiah a ti.

5 Cun annih in siangpahrang hnenah, “Israel ramṭhen khui tawk hmun khalih tâng loih tihloral kan si thei nak dingih in cimittertu pa le kanmah in bawhthuptu cu, 6 ^aa tesinfa mi pasarih cu kan hnenih pek si sehla, Jehovah ih hril mi Saul-ih umnak Gibeah khua ah Jehovah hmaiah anmah cu kan thlai ding,” tiah an ti.

21:6^a Mip 25:4; 1Sam 10:24

Cule siangpahrang in, “Ka lo pe ding,” tiah a ti.

7 ^aAsinan siangpahrang cun an karlak, David le Saul fapa Jonathan karlakih Jehovah-ih thukamnak ruangah Saul fapa Jonathan-ih fapa Mefibosheth cu a zuah.

21:7^a 1Sam 18:3

8 ^aCun siangpahrang in Aiah-ih fanu Rizpah in Saul fapa pahnih a hrinsak mi Armoni le Mefibosheth cu a hruai hai. Cule Meholath-mi Barzillai-ih fapa Adriel hrangih, Saul-ih fanu Mikal in fapa panga a cawmsak mipawl thawn, 9 ^bcupawl cu Gibeon-mipawlih kut ah a pek ih, annih in Jehovah hmaiah tlang parah an thlai. Cun an pasarih ten hmunkhat ah an tla ih fang ah cān, ni khatnak, barli sangvut lâk thawhtirah an that.

21:8^a 1Sam 18:19; 2Sam 3:7

21:9^b Rut 1:22

Rizpah in Mithi Ruak a Kil

10 ^aCun Aiah-ih fanu Rizpah in buri dip a lâk ih, cumi cu amai hrangah fang ah tir ihsin vanruah in an parih a surh hai hlanlo um dingin lungpi parah a pharh. Cule an parih sun ih tlun zuang vatepawl fut le zan ih ramsapawl um khal a siang lo. 11 Cule Aiah-ih fanu Saul-ih nusun ih thil tuah mi cu David an sim.

21:10^a Dnp 21:23; 1Sam 17:44

Saul le Jonathan-ih Ruh

12 ^aCun David cu a feh ih Saul-ih ruhpawl le a fapa Jonathan-ih ruhpawl cu Filisṭia-mipawl in Gilboa ih Saul an thah ni ah, Filisṭia-mipawl in Beth Shan zin ih an thlai mi firtu, Jabesh Gilead pacangpawl hnen ihsin a la. 13 Cule cu tawk ihsin Saul-ih ruhpawl le a fapa Jonathan-ih ruhpawl cu a run keng, cule an thlai mipawlih ruhpawl cu an fĭnkhawm. 14 ^bSaul-ih ruhpawl le a fapa Jonathan-ih ruhpawl cu Benjamin ram, Zelah khua ih a pa Kish thlān ah an phum. Cun siangpahrang thupek bangin an tuah thluh. Cule cuih hnuah ram hrangih dil mi cu Pathian in a thei.

21:12^a Jos 17:11; Lai 21:8; 1Sam 11:1; 31:8-13

21:14^b Jos 7:26; 18:28; 2Sam 24:25

Filisṭia Mimangkawngpawl Thahnak

15 Filisṭia-mipawl in Israel cu an dosal lala. Cule David le a siahhlawhpawl cu an suk ih Filisṭia-mipawl cu an do, cule David cu a tha a cem deuhdeuh. 16 Cun Ishbi-Benob, mimangkawng tesinfapawl lakih pakhat, a dar fei shekel 300 rit, ralnâm thar keng cun David thah a tum. 17 ^aAsinan Zeruiah-ih fapa Abishai in a bawm ih, Filisṭia pa cu a vuak ih a that. Cun David-ih milaipawl in, “Doawknak ah kan hnenah na feh nawn lo ding, cu lo asile Israel meito na mitter pang ding,” tiin a hnenah sia an săm.

21:17^a 1Sp 11:36; 2Sp 8:19; 2San 21:7; Sam 132:17

18 ^aCule himi hnuah, hitin a si, Filisṭia-mipawl thawn Gob ah doawknak a um leh sal. Cun Hushath-mi Sibbekhai in mimangkawng fapapawl lakih pakhat, Saf a that. 19 ^bGob ah Filisṭia-mipawl thawn doawknak a umsal ih, Bethlehem khawmi Jaare-Oregim fapa Elhanan in Gath-mi, Goliath-ih unaupa a that, a feipi ngul cu thiam tlâng tlukih tûm a si.

21:18^a 1San 11:29

21:19^b 1Sam 17:4, 7

20 Gath ah doawknak a umsal lala, cu tawkah misâng zet, kut khat lam le khat lamih zung paruk veve nei, ke khat lam le khat lamih ke zung paruk veve nei, a zaten zung 24 nei pa a um, cule anih khal mimangkawngpawl lakih hrin mi a si ve. 21 ^aCu pa in Israel a va hmuhsuam hai tikah, David-ih upa Shimei-ih fapa Jonathan in amah cu a that. 22 Hi mi pali pawl hi Gath khua ih mimangkawngpawl lakih suak an si ih, annih cu David-ih kut le a siahhlawhpawlih kut in an tlu.

21:21^a 1Sam 16:9; 17:10

22

Pathian Runsuahnak

1 ^aCun David in a ralpawl hmuahhmuah kut ihsin le Saul kut ihsin Jehovah ih a runsuah ni ah hih hla thupawl hi Jehovah hnenah a seh. 2 ^bAnih in,

22:1^a Suah 15:1; Sam 18:1-50

22:2^b 1Sam 2:2; Sam 31:3; 144:2

“Jehovah cu ka lungpi, ka kulh hnget le i runsuaktu a si.
3 ^aKa lungpi Pathian, amah cu ka rinsan ding,
Ka ralphaw le ka runsuahnak ki,
Ka hauhruang le ka răwlhimnak,
I rundamtu, nang in thahrum suahnak lak ihsin i run.
4 ^bThangṭhat tlak Jehovah cu ka ko ding,
Cule keimah cu ka ralpawl lak ihsin rŭn ka si ding.
5 Thihnak tisuarpawl in i kulh tikah,
Pathian ngaihsaklonak tilian in i thlaphângter.
6 ^cSheol riahsiatnakpawl in in kulh,
Thihnak thangpawl in in pah.
7 ^dKa vansannak ihsin Jehovah ka ko ih,
Ka Pathian hnenah ka ausuak,
Anih cun a temple ihsin ka aw a rak thei,
Cule ka auaw cu a hna sungah a lut.
8 ^eCun leilung cu a hnîn ih a khūr,
A thin a heng ruangah
Van ṭohrampawl an hnîn ih an khūr.
9 ^fA hnar kuapawl ihsin meikhu a suak ih,
A kâ ihsin mikāngraltu meisa,
Cumi in meiholpawl a alhter.
10 ^gAnih in van khal a kûnter ih,
A ke tăngih thim thawn a rung suk.
11 ^hAnih cu cherub parah a to ih, a zam,
Cule thlipi thlapawl parah hmuh a si.
12 ⁱThim cu amah kimvelah bûk ah a tuah,
Tipi dum khemkhem le vanih khawdur sah pawl cu.
13 ^jA hmaiih tlêtnak ihsin
Meilingpawl an alh.
14 ^kJehovah cu van ihsin khawpiri vekin a thang ih,
Cungnung Bik cun a aw a suah.
15 ^lThál fungpawl a sai ih, anmah cu a ṭekdarhter,
Nimthla a kauter ih, anmah cu a vaivuanter hai.
16 ^mCun Jehovah kawknak le a hnar ih thaw in a sĕm ruangah,
Tifinriat luannakpawl hmuh an si,
Leilung ṭohrampawl an langsuak.
17 ⁿAnih in tlun lam ihsin a run dawh ih i la,
Tidai nasa zet sung ihsin i dirsuak.
18 ^oA cak mi ka ral lak ihsin i runsuak,
I huatupawl hnen ihsi khalin,
Ziangahtile annihpawl cu ka hrangah an cak tuk.
19 ^pAnnih cun ka vanduai ni ah keimah dokalhin in hmuak,
Asinan Jehovah cu ka ṭhumawknak a si.
20 ^qCuihhleiah anih cun hmun kaupi ah i hruaisuak,
Ka parih a lungsi ruangah i runsuak.
21 ^rJehovah in ka dingfelnak zulhin lawmman i rak pe,
Ka kut thianfainak zulhin i rak rul.
22 ^sZiangahtile Jehovah-ih lamzinpawl ka thlun ih,
Ka Pathian cu sualrál zetin ka rak suahsan dah lo.
23 ^tZiangahtile a zīn le dān pawl zaten ka hmaiah an um,
Cule a sakhaw dānpawl cu ka suahsan dah lo.
24 ^uKeimah khal a hmaiah sawihnăwm kai lo ka si ih,
Ka mawhsualnak lak ihsin ka kilhimaw.
25 Curuangah Jehovah in ka dingfelnak zulhin,
A mithmuh ih ka thiannak zulhin i rak lehrūl.
26 Zahngainak thawi khat mi hnenah na zahngainak na hmuh ding,
Sawihnăwm kai lo mi hnenah sawihnăwm kai loin na langawter ding,
27 ^vMithiang hnenah na thianzia na hmuh ding,
Cule mikhêrmei hnenah na khermeizia na hmuh ding.
28 ^wNang in mităngdawrpawl na run ding,
Asinan mipuar na dirhtlak thei nak dingah an parah na mit a fu.
29 ^xZiangahtile, Maw Jehovah, nangmah cu ka meito na si,
Jehovah in ka thimnak cu a tleuter ding.
30 Ziangahtile nangmah ruangah ralkap burpi ka năwr thei,
Ka Pathian ruangah hruang tlunah ka khir thei.
31 ^yPathian hrangah cun, a lamzin cu a famkim,
Jehovah-ih kamsuakthu cu hniksak a si,
Anih cu amah rinsantupawl hmuahhmuah hrangah ralphaw a si.
32 ^zZiangahtile Jehovah siarlo Pathian zo so um?
Cule kan Pathian siarlo lungpi zo so um?
33 Pathian cu ka cahnak le huham a si ih,
Anih in ka lamzin a famkimter.
34 ^aaAnih in zuknêng ke vekin ka ke a tuah ih,
Ka hmun sâng pawl ah i ret.
35 ^abKa bānpawl in dar thál kūlter thei dingin,
Amah in ka kutpawl tla ral do dingin a zirh.
36 ^acNang in na runsuahnak ralphaw khal i rak pe,
Na zaidamnak in miropi ah i tuah.
37 ^adKa hnuaiah ka zin na kauter,
Cule ka ke a nâl lo.
38 Ka ralpawl ka dawi ih ka hloralter hai,
Thah an si lai hlanlo dungah ka kirsal lo.
39 ^aeCule anmahpawl cu ka hloralter hai ih, hriamhma ka baih hai,
Cutin an tho thei lo,
Ka ke tăngah an rīl.
40 ^afZiangahtile nang in ral donak hrangah cahnak thawn i rak thuam,
Keimah dokalhih thotupawl kha ka ke hnuaiah na rak duaiter hai.
41 ^agI rak huatupawl ka hlohralter thei nak dingah,
Ka ralpawlih ^ahhngawngpawl khal i rak pe.
42 ^aiAnnih cun khua an zoh, hmanseh runtu ding zohman an um lo,
Jehovah hnen rori khalah, asinan anih in a let hai lo.
43 ^ajCun anmah cu leilung leivut vekin ka vawdip hai,
Kăwtthler ih ciarbêk vekin anmah cu ka cīl hai,
Cule ka thehdarh hai.
44 ^akNang in ka mipawl an sualawknak ihsi khalin i runsuak,
Miphunpawlih lubân ah i rak kilhim.
Ka rak theih lo mi minungpawl in in rian ding.
45 ^alRam dang mipawl ka hnenah an tlulut,
An hna ih an theih veten ka thu an lung.
46 ^amRam dang mipawl cu an ziam ih,
An hruangkulh ihsin khūr phahin an ra suak.
47 ^anJehovah cu a nung a si!
Ka lungpi cu thangṭhatin um seh!
Ka runsuahnak lungpi,
Pathian cu khaisan si seh.
48 ^aoPhuba i lâksaktu cu Pathian a si ih,
Ka hnuaiah miphunpawl a duaiter.
49 ^apAnih in ka ralpawl lak ihsin i runsuak.
Nang khal in keimah doih thotupawl tlunah i khaisâng,
Nang cun thahrum suah pa lak ihsin i runsuak.
50 ^aqCuruangah Maw Jehovah, miphunpawl lakah na hnenah lungawi thu ka sim ding,
Cule na hmin thangṭhatnak hla ka sak ding.
51 ^arAnih cu a siangpahrang hnenah runsuahnak dawlsâng a si ih,
Cule a hriak thih mi parah lainat duhdawtnak a langter,
David le a cithlahpawl hnenah kumkhuain,”

22:3^a Sem 15:1; Sam 9:9; 14:6; Thf 10:29; Isa 25:4; Jer 16:19; Joe 3:16; Luk 1:69

22:4^b Sam 48:1; 145:3

22:6^c Sam 116:3; Apo 2:24

22:7^d Sem 35:3; Sam 4:1

22:8^e Lai 5:4; Sam 68:8

22:9^f Sam 50:3; Heb 12:29

22:10^g Suah 20:21; 1Sp 8:12; Sam 97:2

22:11^h Sem 3:24; Suah 25:22; Sam 104:3

22:12ⁱ Suah 19:9

22:13^j Job 37:3; Sam 77:18

22:14^k 1Sam 2:10

22:15^l Dnp 32:23

22:16^m Suah 15:8; Isa 30:33

22:17ⁿ Suah 2:10; Sam 144:7

22:18^o Luk 1:71

22:19^p Sam 23:4

22:20^q Sam 31:8; 118:5

22:21^r 1Sam 26:23; Sam 24:4

22:22^s Sem 18:19; Sam 128:1; Thf 8:32

22:23^t Sam 119:6

22:24^u Sem 6:9; Efe 1:4

22:27^v Pui 26:23-24; Mat 5:8

22:28^w Suah 3:7; Isa 2:12, 17

22:29^x Sam 27:1

22:31^y Dnp 32:4; Sam 12:6

22:32^z 1Sam 2:2; Sam 18:31

22:34^aa Isa 35:6; Hab 3:19

22:35^ab Sam 7:12; 144:1; Zek 9:13

22:36^ac Efe 6:16

22:37^ad Thf 4:11-12

22:39^ae Sam 44:5; Mal 4:3

22:40^af 1Sp 5:3

22:41^ag Suah 23:27; Jos 10:24

22:41^ah hngawngpawl: Siangpahrang in a neh mi siangpahrang cu a băwkter ding ih a hngawng a pál.

22:42^ai 1Sam 28:5-6

22:43^aj Sam 18:42; Isa 10:6; Mik 7:10

22:44^ak Dnp 28:13; Isa 55:3-5

22:45^al Sam 66:3

22:46^am Mik 7:17

22:47^an Suah 15:2; Sam 18:46; 89:26

22:48^ao Mip 31:3; Sam 144:2

22:49^ap Sam 27:6; 140:1

22:50^aq Sam 9:11; Rom 15:9

22:51^ar 1Sam 16:13; Sam 21:1; 89:20, 24, 29; Apo 13:23

tiah a ti.

23

David-ih Netabik Ṭawngkampawl

1 ^aHipawl hi David-ih ṭawngkam netabik an si.

23:1^a Suah 11:3; 1Sam 2:10; Sam 18:50; 78:70-71; Isa 45:1; Hab 3:13

Jessi-ih fapa David,
Sang zetih khaisan milai, Jakob-ih Pathian ih hriak thih,
Israel-ih hla mawi phuahtu cun hitin a sim,
2 ^a“Jehovah Thlarau cu keimah hmangin a ṭawng ih,
A kamsuakthu cu ka lei ah a um.
3 ^bIsrael-ih Pathian cun a sim,
Israel-ih lungpi cun ka hnenah,
‘Milai uktu cu dik tengteng seh,
Pathian ṭihzahnak ih uktu cu.
4 ^cCule anih cu ni a suah tikih khawdur um lo, zing khawvâng vek a si ding,
Ruah sur hnuih nikhaw thiang ih leilung ih hrampi no cerh vek a si ding,’ tiah a ti.
5 ^d“Ka sungkua cu Pathian zawngah um lo khal hai sehla,
Amah in kumkhaw thukham cu ka hnenah a tuah thotho,
Ziangkim rem thlipthlep le hngetkhoh zetin.
Ziangahtile himi hi ka runsuahnak zate le ka duhhiar mi zate a si,
Anih in cumi cu a karhter lo ding maw?
6 ^eAsinan mihlothlaupawl cu an zaten hlăwnhloh mi hling vek an si ding,
Ziangruangahtile annih cu kut ih lâk theih an si lo.
7 Asinan anmah daitu pa cun
Thir le fei ngul in a thuamaw tengteng ding,
Cule annih cu anmai hmun ah meisa ih urkăng thluh an si ding,” tiah a ti.

23:2^a Mat 22:43; Mar 12:36; 2Pe 1:21

23:3^b Sem 42:18; Dnp 32:4; 1Sam 2:2; Isa 11:1-5

23:4^c Dnp 32:2; Lai 5:31; Thf 4:18; Mat 13:43; Joh 1:5

23:5^d Sam 9:16; 89:29

23:6^e Isa 5:6; Mik 7:4; Nah 1:10; Mat 13:40-41

David-ih Micakpawl

8 ^aHipawl hi David-ih neih mi micak ralthiampawlih hmin cu an si: Takhmon-mi Josheb-Basshebeth cu ralbawipawl lakih lu bik a si. Anih cun ṭum khat ah mi 800 a thah ruangah Ezni-mi Adino tiih kawh a si. 9 ^bCule amah sangtu cu Ahoh-mi Dodo-ih fapa Eleazar a si. Cu pa cu ral do dingih cu tawkih táwngkhawmaw Filisṭia-mipawl zuamtaitu, Israel mipapawl an tlanhloh thluh laiih David zawngih micak ralthiam pathum pawl lakih pakhat a si. 10 Anih cun tho tahratin a kut a kham hlanlo, a kut ralnâm parih erhaw tiangin Filisṭia-mipawl cu a sat hai. Cuih ni ah Jehovah in nehnak maksak a thlengter, cule mipi cu a dungah ralthillâk la dingin an kirsal. 11 Cule cumi sangtu cu Harar-mi Agee-ih fapa Shammah a si. Bete cīnnak hmun ah Filisṭia-mipawl cu ralkap burpi pakhat ah an fĭnkhawmaw. Cule mipi cun Filisṭia-mipawl an tlansiatsan. 12 Asinan anih cu ló sungah a ding, ló cu a hum ih, Filisṭia-mipawl cu a that hai. Cutin Jehovah in nehnak maksak a pe.

23:8^a 1San 27:2

23:9^b 1San 8:4; 11:12; 27:4

Bethlehem Tidai Ngainak

13 ^aCun hotu 30 lakih pathum cu fang ah cān ah an suk ih, David hnenah Adullam pûk ah an feh. Cule Filisṭia-mipawlih ralkap burpi cu Refaim phaikuam ah ṭanhmun an khuar. 14 ^bDavid cu ral hruangkulh sungah a um ih, Filisṭia ṭanhmun kiltu ralkappawl cu Bethlehem ah an um. 15 Cule David cun ngai kuahkoin, “Bethlehem kăwtka kiangih tikhur ihta tidai in ding zo tal in simaw i pe sehla maw!” tiah a ti. 16 ^cCule micak ralthiam pathum pawl cun Filisṭia-mipawlih ṭanhmun khuarnak an pahtlăng ih, kăwtka kiangih um, Bethlehem tikhur ihta tidai cu an va khai, cule an la ih David hnenah an run keng. Sikhalsehla anih cun cumi cu a in duh lo ih, Jehovah hrangah a thlebung sawn. 17 ^dCule anih in, “Maw Jehovah, himi tuah ding cu ka hnen ihsin hla seh! Himi cu an nunnak thāpih fehsuaktupawlih thisen a si lo maw?” tiah a ti. Curuangah anih cun cumi cu a in duh lo. Hi thilpawl cu micak ralthiam pathum pawl ih tuah mi a si.

23:13^a Sem 38:1; Jos 12:15; 1Sam 22:1

23:14^b Rut 1:19; 1Sam 22:4-5

23:16^c Sem 35:14

23:17^d Pui 17:10-12

18 ^aZeruiah-ih fapa Joab-ih unaupa Abishai cu a dang mi pathum pawl lakah lu bik a si. Anih in mi 300 pawl dokalhin a feipi a khai ih a that hai, cule an pathum lakah a hmin a thang bik. 19 Amah cu pathum lakah hlir bik mi a si lo maw? Curuangah amah cu an hotu ah a cang. Cuti si khal sehla anih cun a hmaisa pathum pawl cu a tluk hrih lo.

23:18^a 1Sam 26:6

20 ^aCule Kabzeel ihsi micak fapa Jehoiada-ih fapa Benaiah in thil tampi a rak tuah. Cu pa cun kiosa bang Moab miralṭha pahnih a that. A rung suk ih, vur tlak ni ah khur sungah kiosa a that fawn. 21 Cule Izip-mi, mituak zet pa pakhat khal Benaiah cun a that. Cuih Izip-miih kut ah feipi a um, asinan Benaiah in cu pa cu fungfêk thawn a run pan ih, Izip paih kut ihta feipi cu a lawn, cule a feipi cun amah cu a that. 22 Hi thilpawl cu Jehoiada-ih fapa Benaiah in a tuah ih, micak ralthiam pathum pawl lakah a hmin a thang bik. 23 Amah cu khaih mi 30 pawl hnakih hlir mi a si, asinan a hmaisa pathum pawl cu a tluk cuang lo. Cule David in cu pa cu amah kiltupawl hotu ah a ret.

23:20^a Jos 15:21; 1San 27:5

24 Joab-ih unaupa Asahel cu khaih mi 30 pawl lakih pakhat a si ve, Bethlehem khawmi Dodo-ih fapa Elhanan, 25 ^aHarod-mi Shammah le Harod-mi Elika, 26 ^bPalti-mi Helez, Tekoa-mi Ikkesh-ih fapa Ira, 27 ^cAnathoth-mi Abiezer, Hushath-mi Mebunnai, 28 ^dAhoh-mi Zalmon, Netofat-mi Maharai, 29 ^eNetofat-mi Baanah-ih fapa Heleb, Benjamin tefa Gibeah khawmi Ribai-ih fapa Ittai, 30 ^fPirathon-mi Benaiah, Gaash tiva ih um Hiddai, 31 Arbath-mi Abi-Albon, Barhum-mi Azmaveth, 32 Shaalbon-mi Jashen fapapawl lakih Eliahba, Jonathan, 33 Harar-mi Shammah, Harar-mi Sharar-ih fapa Ahiam, 34 ^gMaakath-mi Ahasbai-ih fapa Elifelet, Gilon-mi Ahithofel-ih fapa Eliam, 35 ^hKarmel-mi Hezrai, Arbi-mi Paarai, 36 ⁱZobah khawmi Nathan-ih fapa Igal, Gad-mi Bani, 37 ^jAmmon-mi Zelek, Beeroth-mi Naharai (Zeruiah-ih fapa Joab-ih ralthuam kengtu), 38 ^kIthri-mi Ira, Ithri-mi Gareb le, 39 Heth-mi Uriah pawl tla an si, an zaten 37 an si.

23:25^a Lai 7:1

23:26^b 1San 27:9-10

23:27^c Jos 21:18; 1San 27:12

23:28^d 2Sp 25:23; 1San 27:13; Ezr 2:22; Neh 7:26; Jer 40:8

23:29^e Jos 15:57; 1San 27:15

23:30^f Jos 24:30; Lai 12:13

23:34^g Dnp 3:14

23:35^h Jos 12:22

23:36ⁱ 1Sam 14:47

23:37^j Jos 9:17

23:38^k 1San 2:53

24

David-ih Mipum Siarnak

1 ^aJehovah-ih thinhengnak cu Israel parah a thosal, cule anmah dokalhin, “Feh uhla, Israel le Judah mipum siar uh,” titer dingin anih in David a căwktho.

24:1^a Suah 30:12; 1San 27:23; Job 1:6; Zek 3:1

2 ^aCun siangpahrang in a hnenih um ralkappawl hotu lu bik Joab hnenah, “Israel hnám zate lakah Dan ihsin Beersheba tiang hrawhsuak awla, mipum ziang zat an si ti ka theih thei nak dingah mipum siar thluh aw,” tiah a ti.

24:2^a 2San 2:17

3 ^aCule Joab in siangpahrang hnenah, “Atu-ah Jehovah na Pathian in mipi cu cu tawkih um mi hnakih a let 100 in bêt sehla, ka bawi siangpahrang mit in hmu seh. Asinan ka bawi siangpahrang in ziangruangah hi thil hi a duh?” tiah a ti. 4 Sihmansehla siangpahrangih ṭawngkam cun Joab le ralkap hotupawl cu a neh. Curuangah Joab le ralkap hotupawl cu Israel-mipawl siar dingin siangpahrang hnen ihsin an fehsuak.

24:3^a Dnp 1:11

5 ^aCule Jordan ral an kai ih, Gad hawrkuam laifang vawrh lamih khaw um Aroer ah Jazer tiangin ṭanhmun an khuar. 6 ^bCun Gilead ram le Tahtim Hodshi ram an thleng. Dan Jaan an thleng ih, Sidon lamah an feh. 7 ^cCule Ṭaiar khaw hauhruang an thleng ih, Hiv-mipawl le Kanaan-mipawlih khua zaten an pál thluh. Cun Judah ram Negev lamah Beersheba tiang an feh. 8 Cuti cun ram pumpi an fansuah thluh hnu, thla kua le ni kul cemnakah Jerusalem an thleng. 9 ^dCun Joab in siangpahrang hnenah mipi mipum zat cu a pe. Cule Israel ram ah miralṭha, ralnâm kai thei hlirah mipa ting riat an um ih, Judah mipa ting nga an um.

24:5^a Mip 21:32; Jos 13:9

24:6^b Sem 10:19; Lai 1:31

24:7^c Sem 21:31; Suah 3:8; Dnp 1:7; Jos 19:29

24:9^d Mip 1:44-46

David Sualphuannak

10 ^aCule mipi a siar hnuah David cu a thin a nuam lo. Cun David in Jehovah hnenah, “Ka thil ti mi ah nasa zetin ka rak sual a si, sikhalsehla atu-ah Maw Jehovah, na siahhlawhih mawhsualnak hi hlăwnhlo dingin ka lo dil, ziangahtile atthlak zetin thil ka rak tuah a si,” tiah a ti.

24:10^a Mip 12:11; 22:34; 1Sam 24:5

11 ^aCun zingpitih David a thawh tikah, Jehovah-ih kamsuakthu cu profet Gad, David-ih ^bhmutu hnenah, 12 “Va feh awla David hnenah, ‘Jehovah in hitin a ti, “Thil pathum ka lo pe, na parih ka tuah dingah cumipawl lakah nangmai hrangah pakhat hril aw,” a ti,’ tiin,” sim aw. 13 ^cCule Gad cu David hnenah a feh ih, a sim, cule a hnenah, “Na ram sungah kum sarih sung mangṭam na parih thlen maw, na ralpawl hmaiih an lo dawi rero cingih thla thum sung tlan maw, na ram sungih ni thum sung nathri sia thlen na duh? I thlahtu hnenah ziang thulehnak so ka simkirsal ding, atu-ah ruat awla i sim aw,” tiah a ti.

24:11^a 1Sam 9:9; 22:5

24:11^b hmutu: Profet tinak a si.

24:13^c Suah 5:3; Pui 26:25; Dnp 28:21-28, 38-42, 48

14 ^aCule David in Gad hnenah, “Nasa zetih vansanglamin ka um a si. Jehovah-ih kut ah tlu mai uhsi, ziangahtile a zahngainak cu a nasa a si, asinan milai kut ah cun i tluter hlah aw,” tiah a ti.

24:14^a Neh 9:28; Sam 130:4; Isa 54:7; Jer 33:8; Dan 9:9

Israel hnenih Nathri Sia Thlahnak

15 ^aCun Jehovah in Israel parah zing ihsin khiah mi cān tiang nathri sia a thlah. Dan ihsin Beersheba tiang mipa 70000 an thi.

24:15^a 1San 27:24

16 ^aCule vancungmi in tisiat dingin Jerusalem tlunih a kut a hawi tikah, Jehovah in thil ṭha lo tuah a tum mi cu a lamlêt ih, mi tisiattu vancungmi hnenah cun, “A tawk zo, na kut sūp thlang aw,” tiah a ti. Cule Jehovah-ih vancungmi cu Jebus-mi, Araunah-ih hruih hmun kiangah a um.

24:16^a Sem 6:6; 16:7; Suah 12:23; Apo 12:23

17 ^aCun David in minungpawl thattu vancungmi a hmuh tikah Jehovah hnenah a ṭawng ih, “Ngai hnik, ka rak sual a si, sualrál zetin thil ka tuah a si, asinan hi tuupawl hin ziang an rak tuah ih? Ka lo dil a si, na kut cun keimah i dokalh seh, ka paih sungkua dokalh seh,” tiah a ti.

24:17^a Sem 18:23; Sam 74:1; Jon 1:12

David in Biakṭheng a Dâwl

18 ^aCule cuih ni ah David hnenah Gad a ra ih, a hnenah, “Hung so awla, Jebus-mi Araunah-ih hruih hmun ah Jehovah hrangah biakṭheng dâwl aw,” tiah a ti. 19 Cun David cu Jehovah in thu a pek bangtukin, Gad-ih ṭawngkam vekin a hung so. 20 Cun Araunah cu khua a tang ih, siangpahrang le a siahhlawhpawl a hnen lamih ra cu a hmu. Cu tikah Araunah cu a fehsuak ih siangpahrang hmaiah leisin bihin a kûn.

24:18^a Sem 22:2; 2San 3:1

21 ^aCun Araunah in, “Ziangruangah ka bawi siangpahrang cu a siahhlawh hnenih a rat?” tiah a ti.

24:21^a Mip 16:44-50

Cule David in, “Mipi lak ihsin pulh nat lâkkirsal a si thei nak dingah Jehovah hrangih biakṭheng dawlnak dingah na hruih hmun lei dingin ka ra,” tiah a ti.

22 Cule Araunah in David hnenah, “Ka bawi siangpahrang in ṭha a ti mi cu la sehla hlan seh. Zoh hnik, hi tawkah Meiur Thilhlăn hrangah caw cang pawl tla an um, cule tihthing hrangah hruih hmanruapawl le caw cang pawlih hngawngkolpawl tla an um cia. 23 ^aMaw siangpahrang, hi thil hmuahhmuah hi Araunah in siangpahrang a pe thluh a si,” tiah a ti. Cule Araunah in siangpahrang hnenah, “Jehovah na Pathian in lo cohlang hram seh,” tiah a ti.

24:23^a Sem 23:11

24 ^aCule siangpahrang in Araunah hnenah, “Si lo e, man neiin ka lo lei hrimhrim ding, man nei lo mi thil in Jehovah ka Pathian hnenah Meiur Thilhlănpawl ka hlan lo ding,” tiah a ti. Cule David in hruih hmun le caw cang pawl cu ngun tangka shekel 50 in a lei. 25 ^bCule cu tawkah David in Jehovah hrangah biakṭheng a dâwl ih, Meiur Thilhlănpawl le Remnak Thilhlănpawl a hlan. Cule Jehovah in an ram hrangih dilnakpawl cu a ngai ih, pulh nat cu Israel lak ihsin a lakirsal.

24:24^a Sem 23:16; Mal 1:13-14

24:25^b 2Sam 21:14