About Bible Thianghlim | ©

BibleThianghlim – Zekariah

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Zekariah

12345678910
11121314

• A ngantu: Zekariah
• A siartu: Persia-mi uknak hnuaiih Jew-pawl
• A huap sung cān: B.C. 519

Zekariah cu puithiam upa tuk lo (2:4; Neh 12:4, 16) Haggai zawng le a hnu khalih thuphuang a si. Jerusalem temple saksalnak thuhla ih Haggai ih thuphuan mi a nĕmhnget. A thuken cu: Israel in buainak le harsatnak táwng hman sehla, an Siangpahrang le Rundamtu Jehovah-ih Vancungmi hmangin Jehovah in Israel-mipawl cu a danglamter ding ih, a sunlawih hai ding.

Haggai in a thuphuan hmaisabik a phuan hnu thla hnih hnuah, Zekariah in rawngbawl a thawk. Cumi cu mipi in temple saksal an sunzăwmsal hnu zarhkar ziangmaw zat hnuah a si. Lungthlĕngnak dik lo tuahtu, an pupápawlih sualnak ih tlu lo dingin temple saktupawl cu Zekariah in ralrinnak a pe hai (1:1-6). Temple sak an thawk thla nga hnuah zan khat ah profet Zekariah in larnak pasarih a dáwng. Hngeṭêk a si mi Messiah in lallukhum a cohlan tikah cuih larnakpawl cu an cem. Cun temple ṭhehfel a si hlan kum khat duhah thusuhnak khirhkhan zetzet profet in a sut. Cuih thusuhnakpawl cun Pathian lalram co thei nak dinhmunpawl le thutiamkampawl a sim (bung 7-8).

A neta lamah Zekariah in thuphuan pahnih a nei (9:1; 12:1). Cupawl cun rairingpawlih lalrampawl ziangtin an tlu ding ti le ziangtin Israel tlen a si ding ih, sunlawih a si ding ti an phuanglang (bung 9-14). Hih lalrampawl hin Jerusalem cu la khal hai sehla, a mipawl tlen ding le run dingah Jehovah a ra ding. A netnakah, leitlun miphunpawl cu Jerusalem ah Pathian be dingin an ra.

1

Sual sir dingih Kawhnak

1 ^aDarias a lal kum hnihnak, thla riatnak ah Iddo-ih fapa, Berekiah-ih fapa profet Zekariah hnenah Jehovah-ih kamsuakthu a thleng, 2 ^b“Nan pupápawl parah Jehovah a thin a heng zet. 3 ^cCuruangah an hnenih ralkap rualpawlih Jehovah ih sim mi cu hihi a si tiah sim hai aw: ‘Ka hnenah ra kir uh, ralkap rualpawlih Jehovah in a ti, cule kei khal nan hnenah ka kir ve ding, ralkap rualpawlih Jehovah in a ti. 4 ^d“Nan lamzin ṭha lo pawl ihsin le nan thil ti ṭha lo pawl ihsin atu-ah ra kirsal uh, ralkap rualpawlih Jehovah in a ti,” tiih hlanlai profetpawl ih an simhnawh mi nan pupápawl vek si hlah uh. Annih cun an ngaithla lo ih, keimah in ngaihsak lo, tiah Jehovah in a ti.

1:1^a Ezr 5:1; Zek 1:7; 7:1; Mat 23:35; Luk 11:51

1:2^b Jer 44:6

1:3^c Job 22:23; Isa 44:22; Mal 3:7

1:4^d 2Sp 17:13-14; 2San 24:19; 36:15; Sam 78:8; 106:6; Jer 6:17; 23:22; Eze 20:18-21; 33:11

5 ^a‘Nan pupápawl khuiah so an um? Cule profetpawl teh, kumkhua an nung maw? 6 ^bCuti si khal sehla ka siahhlawh profetpawl ka pek mi thupek ka kamsuakthupawl le ka sakhaw dānpawl cun nan pupápawl hnakin a daih rei a si lo maw? Cule an lamlêt ih, “Kan nundān zulhin le kan thil ti zulhin ralkap rualpawlih Jehovah in kan hnenih tuah dingih a rak ruahcat cia vekin anih cun kan hnenah a tuah,” tiah an ti,’ tiah sim aw,” tiin.

1:5^a Ṭah 5:7

1:6^b Isa 44:26; Jer 12:14-17; 23:20; 44:28; Ṭah 2:17; Hos 5:9; Amo 9:10

Larnak Pakhatnak: Rangpawl

7 Darias a lal kum hnihnak, thla hleikhatnak, Shebat thla ni 24 ah Iddo-ih fapa Berekiah-ih fapa profet Zekariah hnenah Jehovah-ih kamsuakthu hitin a thleng: 8 ^a“Zan ih ka hmuh mi cu, zoh hnik, ka hmaiah mi pakhat rang sen a to ih, cuih rang cu tivakua ih keuh hadas kung lakah a ding, cule cu paih dungah a sen, a pâwl le a var mi rangpawl khal ka hmu hai. 9 ^bCun kei in, ‘Ka bawipa, hipawl hi ziang an si?’ tiah ka ti.

1:8^a Zek 1:10-11; 6:2-7; Thu 6:4

1:9^b Zek 4:1, 4-5; 6:4

“Keimah i be rero tu vancungmi in ka hnenah, ‘Ziang an si ti ka lo hmuh ding,’ tiah i ti.

10 ^a“Cule hadas kungpawl lakih dīng pa cun i let ih, ‘Hipawl cu leitlun hmun kip hrawh dingih Jehovah ih thlah mi an si,’ tiah a ti.

1:10^a Zek 6:5-8

11 ^a“Cun hadas kungpawl lakih ding Jehovah-ih vancungmi cu an sawn ih, ‘Leilung tlun kan hrawhsuak thluh ih, zoh hnik hman, leilung tlun hmuahhmuah cu hnangamten an um huahhi,’ tiah an ti.

1:11^a Sam 103:20-21; Isa 14:7

12 ^a“Cun Jehovah-ih vancungmi in a sawn ih, ‘Maw ralkap rualpawlih Jehovah, kum 70 sung an parih na thinhengnak Jerusalem parah le Judah khawpipawl parah ziangtik tiang so zahngainak nei loih na um ding?’ tiah a ti.

1:12^a Sam 74:10; Jer 25:11; Dan 9:2; Hab 1:2

13 ^a“Cule keimah i betu vancungmi hnenah Jehovah in ṭawngkam ṭha le thlangamnak ṭawngkam thawn a sawn. 14 ^bCule keimah i betu vancungmi in ka hnenah, ‘Ralkap rualpawlih Jehovah in hitin a ti tiin tlangau aw, i ti:

1:13^a Isa 35:4; 40:1-2; Jer 29:10; Zek 4:1

1:14^b Isa 26:11; Joe 2:18; Zek 8:2

‘Jerusalem cu ka thîk ih,
Zion cu thîknak nasa zet thawn.
15 ^aNuam zetih um miphunpawl parah ka thin a heng zet;
Ziangahtile málte lawng ka thin a heng laiah,
Vanduainak an bêt.
16 ^bCuruangah Jehovah in hitin a sim,
Zahngainak thawn Jerusalem ah ka kirsal ding;
Cu tawkah ka inn cu sak a si ding ih,
Tahnak hri cu Jerusalem tlunah dirh-rin a si ding, ralkap rualpawlih Jehovah in a ti.
17 ^cPhuangsal aw, ralkap rualpawlih Jehovah in hitin a sim tiin:
Ka khawpipawl cu hmuingilnak thawn an luangliamsal ding ih,
Jehovah in Zion cu a thlangăm leh ding,
Cule Jerusalem a hril leh sal ding,’

1:15^a 2San 28:9; Sam 69:26; 123:3-4; Isa 47:6; Jer 48:11; Amo 1:11

1:16^b Ezr 1:1-3; Isa 54:8-10; Zek 8:3

1:17^c Isa 14:1; 44:26; 54:8-10; 61:4; Zek 2:12

tiah i ti,” tiin.

Larnak Pahnihnak: Kipawl

18 ^aCun tlun lam cuanin khua ka zoh ih, ki pali ka hmu. 19 ^bCule i betu vancungmi hnenah, “Hipawl hi ziang an si?” tiah ka sut.

1:18^a Ṭah 2:17

1:19^b 1Sp 22:11

Anih in, “Hipawl cu Judah, Israel le Jerusalem ṭekdarh ko tuahtu ki an si,” tiah i sawn.

20 Cun Jehovah in zungthiam mi pali i hmuh. 21 ^aCule kei in, “Hipawl in ziang an ra tuah ding?” tiah ka sut.

1:21^a 1Sp 22:11; Sam 75:4-5, 10; Isa 54:16; Zek 12:9

Anih in, “Hipawl cu zohman an lu tung thei lo dingih, Judah ṭekdarhtertu ki an si; asinan kut zungthiampawl cu Judah ram dokalhin ṭekdarhter dingih an kipawl khaisângtu miphunpawlih ki hlăwnhlo dingin le anmah thlaphângter dingin an ra,” tiah i ti.

2

Larnak Pathumnak: Tahnak Hri

1 ^aCun tlun lam ka cuan ih ka zoh, cule zoh hnik, mi pakhat a kut ah tahnak hri keng ka hmu. 2 ^bKei in, “Khuiah na feh ding?” tiah ka ti.

2:1^a Eze 40:3

2:2^b Eze 40:3; Thu 11:1; 21:15-17

Cule anih in ka hnenah, “Jerusalem ziang can a kau ih, ziang can a sau ti tah dingin ka feh ding,” tiah i ti.

3 Cule i betu vancungmi cu a fehsuak ih, a dang vancungmi pakhat keimah táwng dingin a ra, 4 ^aanih cun a hnenah, “Tlân awla, khaih tlangval kha hitin sim aw: ‘A sungih minung le rannung an tam tuk ruangah, Jerusalem cu khawtepawl vekin kulh nei loin luah a si ding. 5 ^bZiangahtile kei cu amah kimvelah meisa kulh ka si ding, Jehovah in a thăn, a sungah sunlawinak ka si ding,’ tiin,” tiah a ti.

2:4^a Isa 49:20; Jer 30:19; 31:27-28; Eze 38:11

2:5^b Sam 46:5; 125:2; Isa 10:17; 26:1; 60:18-19; Eze 38:14; Thu 21:23

6 ^a“Khai law, khai law! Sak lam ram ihsin tlân aw, Jehovah in a ti, ziangahtile nang cu van ih thli pali vekin kau pin ka lo darhter zo, Jehovah in a ti. 7 ^bKhai law, Zion! Nang Babilon fanu hnenih cêng, tlânsuak aw. 8 ^cZiangahtile ralkap rualpawlih Jehovah in hitin a sim: sunlawinak hnuah nanmah lo rămtu miphunpawl hnenah amah in i thlah, ziangahtile nanmah lo tăwktu cu amai mit mu a tăwk tinak a si. 9 ^dZiangahtile ngai hnik, anmah dokalhin ka kut ka thing ding ih, an siahhlawhpawl hrangah ralthillâk an si ding. Cun nannih in kei cu ralkap rualpawlih Jehovah thlah mi ka si ti in thei ding.

2:6^a Sam 44:11; Isa 48:20; Jer 3:18; 31:10; Eze 17:21

2:7^b Isa 48:20; Jer 3:18; 51:6

2:8^c Dnp 32:10

2:9^d Isa 14:2; 19:16; Zek 4:9

10 ^a“Maw Zion fanu, hlasak awla lungawi aipuangin um aw! Ziangahtile zoh hnik, ka ra ding ih nan lakah ka um ding, Jehovah in a ti. 11 ^bCuih ni ah miphun tampi in Jehovah an kăwp ding ih, ka mi ah an cang ding. Cule nan lakah ka cêng ding,” tiah a ti. Cun kei cu ralkap rualpawlih Jehovah in nan hnenah i thlah a si, ti nan thei ding. 12 ^cCule Judah cu Jehovah in ram thianghlim ah a ro ah a nei ding ih, Jerusalem a hrilsal ding.

2:10^a Isa 65:18; Zek 8:3; 9:9; Thu 21:3

2:11^b Isa 2:2-3; Mik 4:2

2:12^c Dnp 32:9; Sam 33:12

13 ^aMilai zate, Jehovah hmaiah daiten um uh, ziangahtile anih cu a umnak hmun thianghlim ihsin a tho a si!

2:13^a Dnp 26:15; Hab 2:20

3

Larnak Palitnak: Puithiam Lu Bik

1 ^aCun anih in Jehovah-ih vancungmi hmaiih ding puithiam lu bik Joshua le amah hēk dingih a kut vawrh lamih ding Setan cu i hmuh. 2 ^bCule Jehovah in Setan hnenah, “Setan, Jehovah in a lo kawk a si! Jerusalem hriltu Jehovah in a lo kawk! Hi pa hi meisa sung ihsi dirhsuah mi thingthu bultán a si lo maw?” tiah a ti.

3:1^a Ezr 5:2; Sam 109:6; Hag 1:1

3:2^b Amo 4:11; Jud 1:9

3 Joshua cu sinfen bāl pawl thawn a thuamaw ih vancungmi hmaiah a ding.

4 ^aCun vancungmi cun a hmaiih ding vancungmipawl hnenah, “A hnen ihsin a sinfen bāl pawl cu hlit uh,” tiah a ti. Cule anih in Joshua hnenah, “Zoh hnik, na hnen ihsin na mawhsualnak ka hlăwnhlo zo ih, kâwrfual mankhung ka lo hruhter ding,” tiah a ti.

3:4^a Isa 52:1; 61:10; Thu 19:8

5 ^aCule kei in, “A lu ah lupâwng fai pâwngter hai seh,” tiah ka ti. Cutin a lu ah cun lupâwng fai cu an pâwngter ih, hnipuan an hruhter. Cule a kiangah Jehovah-ih vancungmi a ding.

3:5^a Job 29:14

6 Jehovah-ih vancungmi cun Joshua cu tha a pe, 7 ^a“Ralkap rualpawlih Jehovah ih sim mi cu hitin a si: ka lamzinpawl nan zawh ih ka thupek nan thlun asile ka temple khal nan fingkhawi ding ih, ka tualrawn khal ṭuanvo nan la ding; hi tawkih a dīng mipawl lakah luhsuah thei nak zalĕnnak ka lo pe ding. 8 ^bPuithiam lu bik, Maw Joshua, nangmah le na hmaiih to, a ra lai ding mi hmuhsaknak a si mi na hawipipawl thawn ngaithla uh, ziangahtile zoh hnik, ka Siahhlawh Hngeṭêk ka run hruai ding. 9 ^cZiangahtile, zoh hnik, Joshua hmaiih lungto ka ret mipawl, lungto pakhat in mit pasarih a nei. Zoh hnik, a parih ṭelh mi cu keimah in ka kher ding ih, cuih ram ih mawhsualnak cu ni khat sungah ka thaihlo ding, ralkap rualpawlih Jehovah in a ti. 10 ^dCuih ni ah, mi kip in mai sabit hri hnuai le mai theipi kung hnuaiah mai innhnen cio an sawm ding, ralkap rualpawlih Jehovah in a ti,” tiin.

3:7^a Dnp 17:9; 1Sp 3:14; Jer 15:19

3:8^b Dnp 28:46; Isa 11:1; 42:1; Eze 12:11

3:9^c 2San 16:9; Isa 28:16; Jer 31:34; 50:20; Zek 4:10

3:10^d 1Sp 4:25; Job 11:18; Isa 36:16; Mik 4:4

4

Larnak Pangatnak: Meito Ṭhuam le Olif Thingkungpawl

1 ^aKeimah i betu vancungmi cu a ra kir ih, mi itthat lai an ṭhang vekin i ra ṭhang. 2 ^bAnih in ka hnenah, “Ziang na hmu?” tiah i ti.

4:1^a Jer 31:26; Dan 8:18

4:2^b Suah 25:31; Jer 1:13; Zek 5:2; Thu 1:12; 4:5

Cule kei in, “Ka zoh ih, ngai hnik, sui hlir ih tuah mi meito ṭhuam, a luzim ah kheng kûm a um, a parah meito pasarih a um, cuih meito pasarih cun an luzim ah hmur pasarih cio an nei. 3 ^aA kiangah olif thingkung pahnih khal an um, pakhat cu kheng kûm vawrh lamah a um ih, pakhat deuh cu a keh lamah a um,” tiah ka ti. 4 Cule keimah i betu vancungmi hnenah ka sawn ih, “Ka bawipa, hipawl tla hi ziang an si?” tiah ka ti.

4:3^a Sam 1:3; Thu 11:3-4

5 ^aCun keimah i betu vancungmi cun i sawn ih, “Hibangpawl hi ziang an si na thei lo maw?” tiah i ti.

4:5^a Zek 1:9; 4:13

Cule kei in, “Ka thei lo, ka bawipa,” tiah ka ti.

6 ^aAnih in in sawn ih ka hnenah, “Himi hi Zerubbabel hnenih thleng mi Jehovah-ih kamsuakthu a si: cahnak in si loin, thiltitheinak khalin si loin, ka Thlarau sawnin a si, ralkap rualpawlih Jehovah in a ti. 7 ^bMaw tlang tumpi, zo na si? Zerubbabel hmaika ah phairawn ah na cang ding! Cule anih in luanglu ih lung cu, ‘A parah zangfahnak, zangfahnak um seh,’ tiih auaw thawn hmai lamah a keng ding,” tiah a ti.

4:6^a 2San 32:7-8; Ezr 5:2; Neh 9:20; Isa 11:2-4; Hos 1:7; Efe 6:17

4:7^b Ezr 3:10-13; 6:15

8 Cuihtlunah Jehovah-ih kamsuakthu cu ka hnenah hitin a thleng: 9 ^a“Hi temple lungphum cu Zerubbabel kut ih phum mi a si; amai kut thotho in a sak ṭheh ding. Cun ralkap rualpawlih Jehovah in nan hnenah i thlah ti nan thei ding. 10 ^bZiangahtile zo in so thil tenau thlen ni a hmuhsuam ding? Ziangahtile hi pasarih pawl in Zerubbabel kut ih darhlumthlai hri an hmuh tikah lungawi aipuangin an um ding. Hi pasarih pawl cu leitlun pumpuluk hrawhtu Jehovah-ih mit an si,” tiah a ti.

4:9^a Ezr 3:8-11; 5:16; Hag 2:18; Zek 6:12-13

4:10^b 2San 16:9; Hag 2:3; Thu 5:6

11 ^aCun kei in ka sut ih a hnenah, “Hi meito ṭhuam keh lam le vawrh lamih um olif thingkung pahnih teh ziang an si,” tiah ka ti. 12 Cule keimah thotho in a vei hnihnak ka sutbêt ih a hnenah, “Sui hriak sunbŭngnak sui titler pahnih kiangih olif thing hngeṭêk pahnih teh ziang an si?” tiah ka ti.

4:11^a Zek 4:3; Thu 11:4

13 Cun anih in i sawn ih ka hnenah, “Hipawl hi ziang an si ti na thei lo maw si?” tiah i ti. Cule kei in, “Ka thei lo, ka bawipa,” tiah ka ti.

14 ^aCule anih in, “Hipawl cu leilung tlun pumpi ih Bawi kiangih ding, hriak thih mi, mi pahnih an si,” tiah a ti.

4:14^a Suah 29:7; Dan 9:24-26; Thu 11:4

5

Larnak Paruknak: Cazual Zam

1 ^aCun ka heraw ih tlun lam ka cuan, cule cu tawkah cazual zam ka hmu. 2 ^bCule vancungmi cun ka hnenah, “Ziang na hmu?” tiah i ti.

5:1^a Jer 36:2, 4; Eze 2:9; Thu 5:1

5:2^b Zek 4:2

Kei in, “Cazual zam ka hmu. A sau lam dawng 20 a si ih, a kauh lam dawng hra a si,” tiah ka sawn.

3 ^aCun vancungmi in ka hnenah, “Himi hi leitlun pumpi hrawhsuaktu camsiatnak a si: fifir pauhpauh cazual khat lamih ngan bangtukin dawisuak an si ding ih, dik lo zetih sesămtu pauhpauh cazual khat lamih ngan bangtukin dawisuah an si ding. 4 ^bRalkap rualpawlih Jehovah in, ‘Camsiatnak ka thlahsuak ding ih, fifir inn le dik lo zetih ka hmin ih sesămtu inn ah a lut ding. Cumi cu a inn ah a tāng ding ih, a inn cu a eirál ding, thingphel le lungtopawl tiangin,’ a ti,” tiah a ti.

5:3^a Suah 20:7, 15; Pui 19:11-12; Isa 24:6; Jer 26:6; Mal 3:8-9

5:4^b Pui 14:34-45; Thf 3:33; Hab 2:9-11; Zek 8:17; Mal 3:5

Larnak Pasarihnak: Kho sungih Nunau

5 Cun i betu vancungmi cu hmai lamah a suak ih ka hnenah, “Atu-ah tlun lam cuan awla, thil feh rero lai hi ziang a si ti zoh hnik?” tiah i ti.

6 ^aCun kei in, “Hihi ziang a si?” tiah ka sut.

5:6^a Pui 19:36

Cule anih in, “Himi hi a feh rero lai mi tahnak kho a si,” tiah i ti. Amah thotho in, “Himi hi leilung tlun pumpuluk ih an mit a si,” tiah i ti. 7 Suan ih tuah mi a sīn cu a áwng ih, kho sungah nunau pakhat a to.

8 ^aCule anih in, “Himi cu sualralnak a si!” tiah a ti. Cule anih in nunaunu cu kho sungah a tûl ih, a sīn cu kho kâ ah a thlak. 9 ^bCun tlun lam ka cuan ih, ka zoh, nunau pahnih an thla ih thli thawn an ra; ziangahtile vaca thla vek thla an nei ih, annih in kho cu lei le van karlakah an khaikâng.

5:8^a Amo 8:5

5:9^b Pui 11:13, 19

10 I betu vancungmi hnenah, “Khui tawkah kho an thiar zik?” tiah ka sut.

11 ^aCule anih in ka hnenah, “Amai hrang inn saknak dingah Shinar ram ah an thiar zik; cuih inn cu timlamfel a si tikah kho cu a umnak hmun kel ah ret a si ding,” tiah i ti.

5:11^a Sem 10:10; Isa 11:11; Dan 1:2

6

Larnak Pariatnak: Rang lêng Pali

1 ^aCun ka heraw ih tlun lam cuanin ka zoh, cule zoh hnik, rang lêng pali cu tlang pahnih karlakin an rung suak, tlangpawl cu dar tlang an si. 2 ^bRang lêng hmaisabik cun rang sen pawl a nei hai ih, a pahnihnak lêng cun rang dum pawl a nei. 3 ^cA pathumnak lêng cun rang var pawl tla a nei ih, a palitnak cun rang ṭial pawl tla a nei, an zaten rang cak an si. 4 ^dCun i betu vancungmi hnenah ka sut ih, “Hihi ziang an si, ka bawipa?” tiah ka ti.

6:1^a Zek 1:18

6:2^b Thu 6:4-5

6:3^c Thu 6:8

6:4^d Zek 1:9

5 ^aCule cuih vancungmi in i sawn ih ka hnenah, “Hipawl hi leilung hmuahhmuah ih Bawi hmaiih an dīn hnuih fehsuak van thlarau pali an si. 6 ^bRang dum pawl ih dirh mi lêng cu sak lam ram panin a so, rang var pawl in an dung ihsin an thlun ih, rang pâwl pawl cun thlang lam ram an pan,” tiah i ti. 7 ^cCun rang cak pawl an feh ih, leitlun pumpi hrawhsuak ding an hiar tuk. Cule anih in, “Păwk uh, leilung tlun hrawhsuakin feh uh,” tiah a ti. Cule annih cun leilung tlun an hrawhsuak. 8 ^dCule amah in i rak ko ih i bia, “Zoh hnik, sak lam ram panih fehpawl cun sak lam ram ah ka thinhengnak an rehter,” tiah a ti.

6:5^a Jer 49:36; Eze 37:9; Mat 24:31; Thu 7:1

6:6^b Jer 1:14-15

6:7^c Zek 1:8, 10

6:8^d Eze 5:13; Zek 1:15

Joshua Lallukhum Khumter dingih Thupeknak

9 Cun Jehovah-ih kamsuakthu ka hnenah a thleng, 10 ^a“Cun Babilon ihsi ra thleng ralkaih Heldai, Tobijah le Jedaiah pawl hnen ihsin thilpek cohlang awla, cuih ni thothoah fehin, Zefaniah fapa Josiah-ih inn ah lut aw. 11 ^bSui le ngun la awla, lallukhum tuah aw, cule cumi cu Jehozadak-ih fapa puithiam lu bik Joshua-ih lu ah khumter aw.

6:10^a Ezr 7:14-16; 8:26-30

6:11^b 1San 6:15; Ezr 3:2; Sam 21:3; Hag 1:1; Zek 3:1

12 ^a“Cun a hnenah, ‘Ralkap rualpawlih Jehovah in hitin a sim:

6:12^a Ezr 3:8-10; Isa 4:2; 11:1; Eze 17:22

Zoh hnik, a hmin Hngeṭêk a si mi, mi pakhat a um!
Anih cu amai hmun ihsin a ṭêksuak ding,
Cule amah in Jehovah-ih temple a sak ding.
13 ^aA si, amah in Jehovah-ih temple a sak ding.
Amah in ropitnak a keng ding ih,
A laltokham ah toin a uk ding;
Amah cu a laltokham parah puithiam a si ding ih,
An pahnih karlakah remawknak thurawn pek a um ding,’

6:13^a Isa 22:24

ti aw.

14 ^a“Cuih lallukhum cu Heldai, Tobijah, Jedaiah le Zefaniah-ih fapa Hen mantersalnak hrangah hngilhlonak ah Jehovah-ih temple sungah a um ding. 15 ^bHmun hlapi ih um mipawl khal an ra ding ih, Jehovah-ih temple an ra sak ding. Cun keimah cu ralkap rualpawlih Jehovah in nan hnenah i thlah ti nan thei ding. Cule Jehovah nan Pathian-ih thu nan lun pumhlum asile, cumi cu a thleng ding,” tiin.

6:14^a Zek 6:11

6:15^b Isa 58:10-14; 60:10; Jer 7:23; Zek 2:9-11; 3:7

7

Rawl Ulhnak Dik Lo

1 ^aSiangpahrang Darias a lal kum litnak, thla kua, ni li, Khislev thla ah, Jehovah-ih kamsuakthu cu Zekariah hnenah a rung thleng. 2–3 ^bRalkap rualpawlih Jehovah inn ih um puithiampawl le profetpawl hnenah, “Kum tampi ka rak tuah ṭheu bangin thla nga kimnak ah ṭapin rawl ka ul ding maw?” tiah thusut ih, Jehovah-ih duhsaknak hawl dingin Bethel khawmipawl in Sherezer cu Regem-Melek le a mipawl thawn an rak thlah zo a si.

7:1^a Ezr 5:1; Neh 1:1

7:2-3^b 1Sp 13:6; Ezr 3:10-12; Jer 26:19; Zek 8:19, 21; Mal 2:7

4 Cun ralkap rualpawlih Jehovah-ih kamsuakthu ka hnenah a rung thleng, 5 ^a“Ram sungih um mipi zate le puithiampawl hnenah sim aw: ‘Hi kum 70 sungah atu a thla ngatnak le thla sarihnak ih rawl nan ulh le nan ṭah tikah keimah hrang taktakah nan ul maw? 6 ^bNan ei ih nan in tikah, nanmah hrangah nan ei ih nan in a si lo maw? 7 ^cJerusalem le a kiangkap khawpipawl luah le hmuingil ih an um lai, Negev le ^dhmunphai lam luah an si laiah khan tuih hlan profetpawl hmangih Jehovah ih thuphuan mipawl cu hipawl hi an si lo maw?’ tiah a ti,” tiin.

7:5^a Isa 1:11-12; 58:1-9; Dan 9:2

7:6^b 1San 29:22

7:7^c Jer 13:19; 22:21; 32:44; Zek 1:4

7:7^d hmunphai: Mediṭerenian kap tluan phairawn le Judia tlang ram karlakih um phairawn a relnak a si.

A Dik Mi Tuah Aw

8 Cun Jehovah-ih kamsuakthu cu Zekariah hnenah a rung thleng, 9 ^a“Ralkap rualpawlih Jehovah ih sim mi cu hitin a si: ‘Thuṭhennak diktak thawn thuṭhen uh, mi kip in a unaupa hnenah zahngainak le lainatnak langter seh. 10 ^bNuhmei siseh, pa nei lo siseh, khawtluang mi siseh, mirethei siseh palbĕt hlah uh. Nanmah lakah zohman in a thinlung in a unaupa dokalhin thil ṭha lo khuakhâng hlah seh,’ tiin.

7:9^a Jer 22:3; Mik 6:8; Zek 8:16

7:10^b Suah 22:22; Thf 22:22; Jer 49:11; Mik 6:8

11 ^a“Asinan annih in zianghman ah an siar lo ih, lungruh zetin an pialhlo, cule thei thei lo dingin an hna an ^bphit. 12 ^cA si, an thinlung cu daimon hak vekin an hakter ih, hi hlan profetpawl paltlăngin a Thlarau hmangih ralkap rualpawlih Jehovah in a rak thlah mi Dān le kamsuakthupawl ngaithlak an êl. Curuangah ralkap rualpawlih Jehovah hnenin thinlingnak rapthlak a suak. 13 ^dCuruangah hitin a si, thu ka rak phuang ih in ngaithlak lo vekin, nan au ih ka lo ngaithla ve hai lo, tiah ralkap rualpawlih Jehovah in a ti. 14 ^eCule an rak theih dah lo mi miphunpawl lakah phusîng in anmah cu ka ṭhekdarh hai. An tān tâk mi ram cu a ṭhing ih, mi veivâk zohman an um lo; ziangahtile ram nuam cu ṭhing ko an tuah,” tiah a ti.

7:11^a Neh 9:29; Jer 17:23

7:11^b phit: A ṭawng hrampi ah cun, “ritter” ti a si.

7:12^c Neh 9:29; Jer 17:1; Eze 3:7-9; Dan 9:11-12

7:13^d Thf 1:24-28; Isa 1:15; Jer 11:10-11

7:14^e Dnp 4:27; 28:64; Jer 12:10; Eze 12:19

8

Zion hrangih Thutiamkam

1 Ralkap rualpawlih Jehovah-ih kamsuakthu cu a rung thlengsal, 2 ^a“Ralkap rualpawlih Jehovah in hitin a sim: thîknak nasa zetin Zion hrangah ka thîk; a hrangah nasa zetih thinheng tiangin ka thîk a si. 3 ^bJehovah in hitin a ti: Zion ah ka kir ding ih, Jerusalem sungah ka cêng ding. Jerusalem cu Thutak Khawpi tiih kawh a si ding, ralkap rualpawlih Jehovah-ih Tlang cu Tlang Thianghlim tiah kawh a si ding.

8:2^a Zek 1:14

8:3^b Isa 2:2; Mik 4:1; Zek 2:10; 8:16, 19

4 ^a“Ralkap rualpawlih Jehovah in hitin a sim: Jerusalem kăwtthler ah putar le pitar an tosal leh ding, an upat tuk ruangah mi kip an kut ih anmai kianghrăwl cio thawn. 5 ^bKhawpi lamzinpawl cu mipa nauhak pawl le nunau nauhak pawl an khat ding, kăwtthler ah an lek celcel ding.

8:4^a Isa 65:20

8:5^b Jer 30:19-20

6 ^a“Ralkap rualpawlih Jehovah in hitin a sim: cuih cān ah a tāngsŭn mipi mithmuh ah hihi mangbangza a si ruangah, keimai mithmuh ah teh mangbangza a si pei maw? tiah ralkap rualpawlih Jehovah in a ti.

8:6^a Jer 32:17, 27

7 ^a“Ralkap rualpawlih Jehovah in hitin a sim: zoh hnik, ka mipawl cu nisuahnak ram ihsin le nitlaknak ram ihsin ka runsuak hai ding. 8 ^bAnmah cu ka hruaikirsal hai leh ding ih, Jerusalem khawpi sungah an cêng ding. Annih cu ka mi an si ding ih, thutak le dingfelnak ah keimah cu an Pathian ka si ding.

8:7^a Sam 107:3; Isa 11:11

8:8^b Jer 11:4; Zef 3:20; Zek 10:10; Heb 8:10

9 ^a“Ralkap rualpawlih Jehovah in hitin a sim: ralkap rualpawlih Jehovah inn lungphum an phum ni ih tel ve profetpawlih kâ ihsin hi kamsuakthupawl tuih cān ih a ngaithlatu nannih tla, temple saksuak a si thei nak dingah nan kutpawl cakter uh. 10 ^bZiangahtile cuih nipawl hlanah cun minung hrangah siseh, rannung hrangah siseh, hlawh man ngah ti a rak um lo. Doral ruangah a veivâkpawl hrangah ralmuannak a um lo; ziangahtile mi hmuahhmuah, mi kip mai innhnen dokalh dingin ka tuah. 11 ^cAsinan atu-ah cun hlanih ka rak tuah hai bangin, hi mitangsŭnpawl hnenah ka tuah hai nawn lo ding, ralkap rualpawlih Jehovah in a ti. 12 ^dZiangahtile thlaici ṭhaten an keuh ding, sabit hri in rah a suah ding ih, lei khal in a rah a suah ding, cule van in an daifim an pe ve ding. Hi thil hmuahhmuah co dingah hi mipi tāngsŭn pawl hi ka tuah hai ding. 13 ^eCule hitin a si ding, miphunpawl lakah nanmah camsiat nan si vekin, maw Judah sungza le Israel sungza, ka lo runsuak ding ih, thlawsuah nan si ding. Ṭih hlah uh, nan kutpawl cakter uh, tiah a ti.

8:9^a Ezr 5:1; 6:14; Hag 2:4

8:10^b Isa 19:2; Amo 3:6; Hag 1:6

8:11^c Isa 12:1

8:12^d Sem 27:28; Pui 26:3-6; Sam 67:6; Hos 2:21-23; Oba 1:17

8:13^e Sem 12:2; Isa 19:24; Jer 42:18; Dan 9:11; Joe 2:14; Hag 2:5

14 ^a“Ziangahtile ralkap rualpawlih Jehovah in hitin a sim: nan pupápawl ih in thinlingter laiah nanmah dān lo tat dingin ka rak ruatcat ih, ka lamlêt lo bangin, ralkap rualpawlih Jehovah in a ti, 15 ^btuih cān ah Jerusalem le Judah sungza parah thil ṭha tuah ka tum leh sal. Ṭih hlah uh. 16 ^cHipawl hi nan tuah ding mi thil an si: mi kip in thudik simawtăwn cio hai seh; nan kăwtsuahpawl ah thudik, diknak le remnak hrangah thuṭhen uh. 17 ^dNanmah lakah zohman in nan innhnen dokalhin nan thinlung in thil ṭha lo ruat hlah uh; cule dik lo zetih thukam duh hlah uh. Ziangahtile cupawl cu ka huat mi thil an si, Jehovah in a ti,” tiin.

8:14^a Jer 4:28; Eze 24:14

8:15^b Jer 29:11; 31:28; Mik 7:18-20; Zek 8:13

8:16^c Sam 15:2; Isa 9:7; Eze 45:9; Amo 5:15; Zek 7:9; 8:3; Efe 4:25

8:17^d Thf 3:29; 6:16-19; Jer 4:14; Zek 5:4

Rawl Ulhnak cu Puai ah a Cang Ding

18 Cun ralkap rualpawlih Jehovah-ih kamsuakthu ka hnenah a rung thleng, 19 ^a“Ralkap rualpawlih Jehovah in hitin a sim: thla litnak rawl ulh, thla ngatnak rawl ulh, thla sarihnak rawl ulh le thla hratnak ih rawl ulh cu Judah sungza hrangah aipuannak, lungawinak le năwmnak puai a si ding. Curuangah thutak le remnak duh uh.

8:19^a Est 8:17; Sam 30:11; Luk 1:74-75

20 ^a“Ralkap rualpawlih Jehovah ih sim mi cu hihi a si: miphunpawl an ra hrih ding, khawpi tampi luahtupawl cu; 21 ^b‘Jehovah-ih duhsaknak dil dingin le, ralkap rualpawlih Jehovah hawl dingin fehlan uhsi. Keimah rori khal ka feh ve ding,’ tiin. Khawpi pakhat luahtupawl cu a dangah an feh ding. 22 ^cA si, minung tampi le a cak mi miphunpawl cu ralkap rualpawlih Jehovah hawl dingin le, Jehovah-ih duhsaknak dil dingin Jerusalem ah an ra ding.

8:20^a Jer 16:19

8:21^b Zek 7:2

8:22^c Sam 86:9; Isa 2:2-3; 60:3-12; 66:23; Zek 2:11

23 ^a“Ralkap rualpawlih Jehovah in hitin a sim: cuih cān ah miphunpawl lakih ṭawng tinkim ihsin mipa pahra in Jew mipa pakhat ih sinfen zim fekten an kai ding ih, ‘Na hnenah feh ve nung, ziangahtile nang cu Pathian in a lo umpi a si ti kan rak thei,’ an ti ding,” tiah a ti.

8:23^a Isa 45:14, 24; 60:14

9

A Ralpawl lak ihsin Israel Humnak

1 ^aJehovah-ih thuphuan kamsuakthu cun
Hadrak ram le
A tĭn mi hmun Damaskas a dokalh,
Ziangahtile minungpawlih mit le
Israel hnám zate ih mit cu Jehovah parah a fu;
2 ^bDamaskas ramri ih um Hamath par khalah,
Fim zet hman hai sehla,
Ṭaiar le Sidon par khalah.
3 ^cZiangahtile Ṭaiar cun amah ten dawlsâng a dĭn,
Ngun cu leivut men bangin a pengkhawm,
Cule sui cu khawlak ciarbêk bangin a pengkhawm.
4 ^dNgai hnik, a neih thilri cu Jehovah in a hlăwnsuak ding;
A neihnunnak cu tifinriat ah a tisiat ding ih,
Amah cu meisa in a kangrál ding.
5 ^eAshkelon in cumi cu a hmu ding ih a ṭih ding;
Gaza khal a riah a sia zet ve ding,
Ekron khal; ziangahtile a ruahsannak cu a cuai.
Siangpahrang khal Gaza ihsin a hloral ding ih,
Ashkelon cu luah a si lo ding.
6 ^fAshdod cu miphun căwkcawrawi in an luah ding ih,
Filisṭia-mipawlih hngalnak ka sattán ding.
7 ^gA kâ ihsin thisen le a hâ karlak ihsin thil fihnungza pawl ka lahlo ding.
Asinan a tāngsŭnpawl cu kan Pathian ta an si ding ih,
Judah ram ah hrin pakhat vek an si ding,
Cule Ekron cu Jebus-mi vek a si ding.
8 ^hRalkappawl ruangah,
Suk le so rero tu amah pa ruangah,
Ka inn ka kulh ding.
Mi palbĕttu zohman in amah cu an paltlăng nawn lo ding,
Ziangahtile atu-ah ka mit rori in ka hmu zo a si.

9:1^a Jer 49:23-27; Amo 1:5

9:2^b 1Sp 17:9; Jer 49:23; Eze 28:1-19

9:3^c Jos 19:29; Eze 28:4

9:4^d Isa 23:1, 11; Eze 26:3-5; 28:18

9:5^e Jer 47:5; Zef 2:4-5

9:6^f Amo 1:8

9:7^g Jer 47:1-7; Joe 3:4; Zef 2:4

9:8^h Sam 34:7; Isa 52:1; 54:14; 60:18; Joe 3:17

A Ra lai ding Mi Siangpahrang

9 ^aMaw Zion fanu, nasa zetin lungawi aipuangin um aw!
Maw Jerusalem fanu, au aw!
Zoh hnik, na Siangpahrang cu na hnenah a ra;
Anih cu midik a si ih runsuahnak a nei,
Anih cu minunnem a si ih lāk parah a to,
Cumi cu lāk fa no, lāk note a si.
10 ^bEfraim hnenin rang lêng le Jerusalem hnenin rang ka sattán ding;
Cule doawknak thál sahtan a si ding.
Anih in miphunpawl hnenah remnak thu a sim ding;
A uknak cu tifinriat ihsin tifinriat tiang le Zufraṭis tiva ihsin leilung dĕng tiang a si ding.

9:9^a Isa 57:15; 62:11; Jer 23:5-6; Zef 3:14; Zek 2:10; Mat 21:5; Joh 12:15

9:10^b Sam 72:8; Isa 2:4; Hos 1:7; 2:18; Mik 4:2-4

Pathian in a Mipawl a Run Ding

11 ^aNa hrang lawngte ah cun,
Nangmah thawi ka thisen thukham ruangah,
Na thawngtlapawl cu tidai um lo khur sung ihsin ka suah hai ding.
12 ^bNannih ruahsannak nei thawngtlapawl,
Nan hauhruang ah ra kir uh.
A letin ka lo rul ding tiah tuihsun ah ka phuang a si.
13 ^cZiangahtile ka thál bangin Judah ka nawp ding,
Thál ah cun Efraim ka thluah ding,
Maw Grik, na fapapawl dokalh dingin,
Maw Zion, na fapapawl ka kaitho ding.
Nangmah cu raldo thiam ralnâm vekin ka lo tuah ding.
14 ^dCun an tlunah Jehovah a lang ding ih,
Nimthlakau bangin a thál fung a fehsuak ding.
Bawipa Jehovah in tuu pa ki a phaw ding ih,
Thlang lam phusîng zawngah a feh ding.
15 ^eRalkap rualpawlih Jehovah in anmah a hum ding;
Annih in an eirál ding ih herhli lung hlum pawl thawn an duaiter ding.
An in ding ih, sabit zu ri bangin an au tluaktlo ding;
Biakṭheng kil pawlih cawhtawlhpawl vekin thisen in an khat ding.
16 ^fCuih ni ah Jehovah an Pathian in anmah cu a run ding,
A tuu rual mipi an si ruangah.
Ziangahtile annih cu anihih ram tlunah tlein
Lallukhum parih keplung vek an si ding.
17 ^gAw, ziangti tlukih ṭha le mawi si tak pei maw!
Thlairawl cun tlangvalpawl a ṭhangter ding ih,
Sabit zu thar in fala tleirawlpawl.

9:11^a Suah 24:8; Isa 42:7; 51:14; Mat 26:28; Luk 22:20; Heb 10:1-4

9:12^b Isa 49:9; 61:7; Joe 3:16

9:13^c 2Sam 22:35; Sam 45:3; Isa 49:2; Jer 51:20; Joe 3:6

9:14^d Sam 18:14; Isa 21:1; 27:13; 31:5; 66:15; Hab 3:11; Zek 2:5

9:15^e Suah 27:2; Job 41:28; Sam 78:63; Isa 37:35; Zek 12:6, 8; 14:3

9:16^f Isa 10:20; 62:3; Jer 31:10-11

9:17^g Jer 31:12

10

Judah le Israel Tundīnsalnak

1 ^aṬhal tawp ruah sur cān ah Jehovah ruah dil uh.
Jehovah cu khawpiri le khawdur tuahtu a si;
Anmah cu ruahpi tak zet a pe hai ding,
Mi kip hrangah ló ah thlaikung.
2 ^bZiangahtile sungkaw milempawl in thulolak an sim,
Simsung thiam pawl in larnak thuphan an rak hmu ih,
Mang dik lo an rel;
Thulolak in mi an thlangăm.
Curuangah mipi cu tuu bangin an vâkvai;
Tuu khāltu um lo ruangah vansanglamin an um.
3 ^c“Tuu khāltupawl parah ka thinhengnak cu a alh ih,
^dMe cang pawl dān ka tat hai ding.
Ziangahtile ralkap rualpawlih Jehovah in a rante rual,
Judah sungza a vehvai ding ih,
Anmah cu ral donak ih siangpahrang rang vekah a tuah hai ding.
4 ^eA hnen ihsin a kilih lungto pawimawh a suak ding ih,
A hnen ihsin puanthlam khenkilhnak,
A hnen ihsin ral donak thál,
A hnen ihsin uktu an zaten hmunkhat ah.
5 ^fAnmah cu ral donak kăwtthler ih ciarbêk ah ralpawl palbĕttu
Miralṭhapawl vek an si ding.
Jehovah in a umpi hai ruangah an do ding ih,
Rang parih topawl cu ningzahter an si ding.
6 ^g“Judah sungza ka cakter hai ding ih,
Joseph sungza ka runhim ding.
Ka hruaikirsal hai ding,
Ziangahtile an parah zahngainak ka nei.
Anmah cu ka hnawn dah lo mi vek an si ding;
Ziangahtile keimah cu Jehovah an Pathian ka si ih,
Ka ngaithla hai ding.
7 ^hEfraim cu miralṭha vek a si ding ih,
Sabit zu in a lungawiter vekin an thinlung cu a lungawi ding.
A si, an fātepawl in cucu an hmu ding ih, an lung a awi ding;
An thinlung cu Jehovah ah lungawi aipuangin a um ding.
8 ⁱAnmah cu hurhuk in ka ko hai ding ih, ka khawm hai ding,
Ziangahtile ka tlen hai ding;
Cule hlanih an rak tam bang khan an tamsal ding.
9 ^jMiphunpawl lakah ṭekdarhter hai hman ningla,
Ram hlapi pawl ihsin keimah in máng ringring ding;
An fātepawl thawn an um ding ih,
An ra tlungkir ding.
10 ^kIzip ram ihsi khalin ka hruaikirsal hai ding ih,
Assiria ihsin ka fĭnkhawm hai ding.
Umnak hman tlem lo tiangin
Gilead le Lebanon ram ah ka hruailut hai ding.
11 ^lHarsatnak tifinriat a paltlăng ding ih,
Tifinriat suar săwp lai a vaw ding: Nâl tiva pi thûknak zaten a ro thluh ding.
Cule Assiria hngalnak cu dirhtlak a si ding ih,
Izip siangpahrang kianghrăwl a cem ding,
12 ^mJehovah ah anmah ka cakter hai ding ih,
Amai hmin in an veivâk ding,” tiah Jehovah in a ti.

10:1^a Pui 26:4; Dnp 11:13-14; 1Sp 8:36; Jer 10:13; Joe 2:23

10:2^b Jer 23:16; 27:9; Eze 21:21; 34:5-8; Mar 6:34

10:3^c Jer 25:34-36; Eze 34:8-10

10:3^d Me cang pawl: Hruaitupawl a relnak a si.

10:4^e Sam 118:22; Isa 22:23; Zek 9:10; Luk 20:17; Apo 4:11; 1Pe 2:6-7

10:5^f 2Sam 22:43; Amo 2:15; Mik 7:10; Hag 2:22

10:6^g Sam 102:13; Isa 14:1; 54:8; Eze 36:37; Hos 1:7; Zek 1:16; 8:7-8; 13:9

10:7^h Isa 54:13; 60:5; Eze 37:25; Zek 9:15

10:8ⁱ Isa 5:26; Jer 33:22; Eze 36:11, 37

10:9^j 1Sp 8:47-48; Eze 6:9

10:10^k Isa 11:11; 49:19-20; Jer 50:19; Zek 8:8

10:11^l Isa 11:15; 19:5-7; Eze 30:13; Zef 2:13

10:12^m Mik 4:5; Zek 10:6

11

Thingpawl Thuṭhennak

1 ^aNa sidar thingpawl meisa in a kangrál thluh nak dingah, Maw Lebanon, na sângkapawl áwng aw.
2 ^bMaw mirang far thing, râk rero aw, ziangahtile sidar thing cu a tlu zo,
Ziangruangahtile thing ropi pawl an siat.
Maw Bashan elon thingpawl, râk uh,
Ziangahtile tupi sah zet a cem zo.
3 ^cTuu khāltupawlih râk thâwm a um!
Ziangahtile an ropitnak a siat.
Kiosa hûk thawmvâng a um!
Ziangahtile Jordan hngalnak a siat.

11:1^a Jer 22:6-7; Eze 31:3; Zek 12:6

11:2^b Isa 10:34; 32:19; Eze 31:3

11:3^c Jer 2:15; 25:34-36; 50:44

Tuu Khāl Mifim le Mi-â

4 ^aJehovah ka Pathian in hitin a sim, “Thah ding mi rante rual khāl uh, 5 ^ba neitupawl in anmah cu an that ih, mawh nei ih ruah an si lo; a zuartupawl in, ‘Jehovah cu thangṭhat si ko seh, ziangahtile ka lian thlang,’ tiah an ti cio; cule an tuu khāltupawl in an zangfah hai lo. 6 ^cZiangahtile ram luahtupawl ka zangfah hai nawn lo ding, Jehovah in a ti. Asinan zoh hnik, mi kip an innhnen kut ah le anmai siangpahrang cio kut ah ka pe thluh ding. Annih in cupawlih ram cu an do ding, cule an kut ihsin ka runsuak hai lo ding,” tiin.

11:4^a Sam 44:22; Jer 25:34

11:5^b Jer 50:7; Eze 34:2-3; Hos 12:8

11:6^c Sam 50:22; Isa 9:19-21; Jer 13:14; Mik 5:8; Zek 14:13

7 ^aCun thah ding mi rante rual cu ka rak khāl hai, a hleicein rante rual lakih zawnzaibik pawl. Keimah hrangah kianghrăwl pahnih ka la: pakhat cu Duhsak tiah ka ko ih, a dang pakhat cu Ṭangrual tiah ka ko; cule rante rual ka khāl. 8 ^bThla khat sungah tuu khāl pathum ka cawlter hai. Ka thinlung in a zāwi thei hai lo ih, an thinlung in in zāwi thei ve lo. 9 ^cCun kei in, “Ka lo khāl lo ding. A thi ding cu thi ko seh, a siatrál ding cu siatrál ko seh. A tāng lai mipawl cu pakhat le pakhat an sa eiaw hai seh,” tiah ka ti. 10 ^dCule Duhsak ti mi ka kianghrăwl cu ka lâk ih, miphunpawl hmuahhmuah thawi ka rak tuah mi thukham ka pahbăl thei nak dingah pahnih ah ka tăn. 11 ^eCule cumi cu cuih ni ah pahbăl a si. I rak thlirtu rante rual zawnzai pawl cun himi cu Jehovah-ih kamsuakthu a si ti an thei. 12 ^fCun kei in an hnenah, “Nan lungkim asile, ka hlawh man i pe uhla nan lungkim lole in pe hlah uh,” tiah ka ti. Cule ka hlawh man hrangah ngun paisa 30 an thlai.

11:7^a Zek 11:4

11:8^b Hos 5:7

11:9^c Jer 15:2; 43:11

11:10^d Sam 89:39; Jer 14:21

11:11^e Zef 3:12

11:12^f Suah 21:32; Mat 26:15

13 ^aCule Jehovah in ka hnenah, “Ka man hrangih tam lutuk ih an ruah mi cu, bel tuahtu hnenah hlăwn aw,” tiah i ti. Cun ngun paisa 30 cu ka la ih, bel tuahtu hnenah Jehovah inn sungah ka hlăwn. 14 Cun Judah le Israel teih unau sinak ka tisiat thei nak dingah a dang ka kianghrăwl Ṭangrual ti mi cu pahnih ah ka tăn.

11:13^a Suah 21:32; Mat 27:9-10; Apo 1:18-19

15 ^aCule Jehovah in ka hnenah, “Tuu khāltu mi-â hmanruapawl cu nangmah hrangah la hrih aw. 16 ^bZiangahtile zoh hnik, cuih ram ah tuu khāltu ka tungding ding, anih cun a hloral rero mipawl a ngaihsak lo ding, a ṭekdarh mipawl a hawl lo ding, hriamhma tuar a tidam lo ding, a harhdam mipawl rawl a pe lo ding. Cuhnakin anih cun sa thauthau a ei sawn ding ih, an ke tín a thlekdarh ding.

11:15^a Zek 11:17

11:16^b Eze 34:1-10

17 ^a“Rante rual tlansantu tuu khāltu ṭhahnem lo cu a hmakhua a pit a si!
Ralnâm in a bân a dokalh ding ih,
A mit vawrh lam khal a dokalh ding;
A bân a ro thluh ding ih,
A vawrh lam mit a caw reprep ding,”

11:17^a Jer 23:1

tiah i ti.

12

Judah Runsuaktu Ratnak

1 ^aIsrael thuhla ih Jehovah-ih thuphuan kamsuakthu. Van pharhtu, leilung lungphum phumtu le minung sungih minung thlarau sersiamtu Jehovah in hitin a ti: 2 ^b“Ngai hnik, Jerusalem cu a kiangkap minungpawl hrangah mihawrtertu no ah ka tuah ding; Jerusalem an kulhkhŭm tikah, Judah khal an kulhkhŭm ve ding. 3 ^cCule cuih ni ah hitin a si ding, Jerusalem cu minungpawl hmuahhmuah hrangah lungto rit zetah ka tuah ding; cuih lung cawitu hmuahhmuah cu nasa zetin an tuahmawhaw ding. Sikhalsehla leilung tlun miphunpawl hmuahhmuah in cuih lung dokalhin an fĭnkhawmaw. 4 ^dCuih ni ah, rang pauhpauh buai ko ka vaw ding ih, an parih topawl â ko ka tuah ding; ngunngaih zetin Judah sungza ka zoh ding ih, miphunpawlih rang cu an mitcaw ko ka vaw ding, Jehovah in a ti. 5 ^eCule Judah hotupawl in an thinlung sungin, ‘Jerusalem luahtupawl kha an Pathian, ralkap rualpawlih Jehovah thawngin kan cahnak a si,’ tiah an ti ding. 6 ^fCuih ni ah Judah hotupawl cu tihthing pen parih suan bel le cangpâwl lakih meisa alh bangin ka tuah hai ding; vawrh lam le keh lamih um miphunpawl zaten an eirál thluh ding, asinan Jerusalem khawmipawl cun amai hmun kel ah Jerusalem an luahsal ding.

12:1^a Sam 102:25; 104:2; Isa 42:5; 57:16; Jer 51:15; Heb 1:10

12:2^b Sam 60:3; 75:8; Isa 51:17, 22; Zek 14:14

12:3^c Isa 66:18; Dan 2:34; Zek 14:2; Mat 21:44

12:4^d Sam 76:6; Zek 10:5

12:5^e Eze 30:24

12:6^f Isa 10:17-18; Oba 1:18; Zek 2:4; 8:3-5; 11:1

7 ^a“Judah hnakin David-ih sungza-ih ropitnak le Jerusalem luahtupawlih ropitnak a natsatsawn lo nak dingah, Jehovah in a hmaisabikah Judah puanthlampawl a runsuak ding. 8 ^bCuih ni ah Jerusalem luahtupawl cu Jehovah in a humhim hai ding; an lakih micak lo cu cuih ni ah David vek a si ding ih, David-ih sungza cu Pathian vek le an hmaiah Jehovah-ih vancungmi vek an si ding. 9 ^cCuih ni ah hitin a si ding, Jerusalem dotu miphun zate hloralter dingin ka kărsuak ding.

12:7^a Jer 30:18; Amo 9:11

12:8^b Suah 14:19; Sam 91:4; Joe 3:16; Zek 9:14-15

12:9^c Isa 29:7; Zek 14:2-3

Fei Sŭn Mi Pa Ṭah a Si

10 ^a“Cule David-ih sungza parah le Jerusalem luahtupawl parah zangfahnak Thlarau le zangfah dilnak ka burh ding; cun an sŭn mi keimah in zoh ding. A si, mi in a fapa neihsŭn a ṭah vekin amah an ṭah ding ih, mi in a fatir ruangih a thin a nat vekin amah ruangah an thin a na ding. 11 ^bCuih ni ah Jerusalem ah Megiddo phaikuam ih Hadad Rimmon ih lusûn ṭahnak vekin nasa zetih lusûn ṭahnak a um ding. 12 ^cCule cuih ram cun lu a sūn ding, sungkua tin anmah te cio in, David-ih sungza hrinpawl khal anmah tein, cun an nupipawl khal anmah ten; Nathan sungza hrinpawl khal anmah ten, cule an nupipawl khal anmah ten; 13 Levi sungza hrinpawl khal anmah ten, cun an nupipawl khal anmah ten; Shimei hrin anmah ten, cun an nupipawl khal anmah ten; 14 hrin dang a tāng mipawl hmuahhmuah, hrin tin in anmah ten, cun an nupipawl khal anmah ten lusūn in an ṭap ding.

12:10^a Isa 44:3; Jer 31:19; Eze 39:29; Joe 2:28; Amo 8:10; Joh 19:37; Thu 1:7

12:11^b Jer 50:4; Mat 24:30

12:12^c Mat 24:30; Thu 1:7

13

1 ^a“Cuih ni ah David-ih sungza hrangah le Jerusalem luahtupawl hrangah an sualnak le an bawrhhlawhnak khawlhfainak hrangah tihna ăwnsak a si ding.

13:1^a Sam 51:2; Isa 1:16; Jer 17:13; Heb 9:14

Profet Lempawl Ningzahternak

2 ^a“Cuih ni ah hitin a si ding, ram sung ihsin milempawlih hmin ka ṭhiatbăl thluh ding ih, theih an si nawn lo ding. Profetpawl le thlarau bawrhhlawh pawl cuih ram ihsin ka hlăwnhlo hai ding, ralkap rualpawlih Jehovah in a ti. 3 ^bHitin a si ding, mi pakhat khat in thu a phuan asile, a hringtu a nu le a pa in a hnenah, ‘Jehovah hmin ih thuphan na sim ruangah na nung lo ding,’ tiah an ti ding. Cun thu a phuan tikah amah cu a hringtu a nu le a pa in an dawttlăng ding.

13:2^a Suah 23:13; Jer 23:14-15; Eze 6:6; 36:25; Hos 2:17

13:3^b Dnp 13:6-11; 18:20; Jer 23:34; Eze 14:9

4 ^a“Cuih ni ah hitin a si ding, profet pauhpauh in thu an phuan tikah an larnak an zahpi ding. Mi bum dingin sahmul kâwrfual an hruh lo ding. 5 ^bCuhnakin, ‘Kei cu profet ka si lo, lóthlo pa men ka si; ziangahtile ka no lai ihsin mi pakhat in sál ah in rak zuar,’ tiah a ti sawn ding. 6 Cule mi pakhat in a hnenah, ‘Na ^cbānpawl karlakih hriamhma hi ziang an si?’ tiah a ti ding. Cule anih in, ‘Ka rualpipawl inn ih in rak tuahmawh mi hriamhma an si,’ tiah a ti ding.

13:4^a Jer 6:15; Eze 12:24; Mik 3:7; Mat 3:4

13:5^b Amo 7:14

13:6^c bānpawl: Taksaruangpum a relnak a si men thei.

Runsuaktu Tuu Khāl

7 ^a“Maw ralnâm, ka tuu khāltu dokalhin le,
Ka kăwppi pa dokalhin ṭhang aw, ralkap rualpawlih Jehovah in a ti.
Tuu khāltu vaw awla,
Tuupawl an ṭekdarh ding;
Cun minautapawl parah ka kut ka thlak ding.
8 ^bCule ram sung hmuahhmuah ah hitin a si ding, ram sungih ṭhen thum ṭhen hnih cu sahtan an si ding ih an thi ding, Jehovah in a ti.
Asinan ṭhen thum ṭhen khat lawng ram sungah an tāng ding.
9 ^cṬhen thum ṭhen khat cu meisa ah ka paih ding,
Ngun erfai bangin ka erfai hai ding ih,
Sui hniksak vekin ka hniksak hai ding.
Ka hmin an ko ding ih,
Ka rak sawn hai ding.
Kei in, ‘Hipawl hi ka mi an si,’ tiah ka ti ding.
Cule, ‘Jehovah cu ka Pathian a si,’ tiah an ti cio ding,” tiin.

13:7^a Isa 40:11; Jer 23:5; 47:6; Eze 21:3-5; Mat 26:31; Mar 14:27

13:8^b Isa 6:13; Eze 5:2-4, 12; Zek 14:2

13:9^c Pui 26:12; Sam 50:15; Isa 30:19; 44:5; Jer 29:12; 30:22; Eze 20:38; Hos 2:23; Zek 10:6

14

Jehovah-ih Ni

1 ^aZoh hnik, Jehovah-ih ni cu a ra thleng ding ih, na ralthillâkpawl cu nan lakah ṭhen a si ding. 2 ^bZiangahtile Jerusalem dokalhih ral tho dingin miphunpawl zaten ka fĭnkhawm ding; khawpi cu lâk a si ding, innpawl cu ṭhiahbăl an si ding ih, nunaupawl sualpi an si ding. Khawpi hrek cu sál tānnak ih hruai an si ding, asinan a tāng mipawl cu khawpi ihsin sahtan an si lo ding.

14:1^a Isa 2:12; 13:6; Zek 14:14; Mal 4:1

14:2^b Isa 13:6; Ṭah 5:11; Zek 13:8

3 ^aCun Jehovah in doawk ni ih a do vekin, cuih miphunpawl dokalhin a fehsuak ding ih a do hai ding. 4 ^bCule cuih ni ah Jerusalem nisuahnak lamih Olif Tlang parah a ke a ṭhum ding. Cule Olif Tlang cu nisuahnak lam ihsin nitlaknak lamah hmun hnih ah a ṭhenaw ding, phaikuam kau ngaingai a tuahaw ding; cuih tlang a hrek cu sak lamah a ṭhawn ding ih, a hrek cu thlang lamah a ṭhawn ding. 5 ^cCun ka tlang phaikuam ah nan tlân ding, ziangahtile cuih tlang phaikuam cu Azal tiang a thleng ding. A si, Judah siangpahrang Uzziah san laiih linghnîn ruangih nan tlan bangin nan tlân ding. Cule Jehovah ka Pathian cu mithiangpawl hmuahhmuah thawn nan hnenah a ra ding.

14:3^a Zek 9:14-15; 12:9

14:4^b Eze 11:23; Joe 3:12

14:5^c Sam 96:13; Isa 29:6; Amo 1:1; Mat 16:27; Jud 1:14

6 ^aCuih ni ah hitin a si ding, tleu a um lo ding; tlepawl khal a rau ding. 7 ^bCumi cu Jehovah lawngih theih mi, sun um lo, zan khal um lo, ni lamdang a si ding, asinan zan a thlen tikah tleu a um ding. 8 ^cCule cuih ni ah hitin a si ding, Jerusalem ihsin tinung a luang ding, a hrek cu nisuahnak lam tifinriat ah le a hrek cu nitlaknak lam tifinriat ah a luang ding; fur le ṭhal ti loin cumi cu a luang ding. 9 ^dCule Jehovah cu leilung pumpi ah Siangpahrang a si ding. Cuih ni ah a umsŭn cu Jehovah lawng a si ding ih, hmin umsŭn khal amai hmin lawng a si ding.

14:6^a Isa 13:10; Jer 4:23; Joe 2:30-32

14:7^b Isa 13:10; Jer 30:7; Amo 8:9

14:8^c Isa 30:25; Eze 47:1-12; Joe 3:18; Joh 7:38; Thu 22:1-2

14:9^d Dnp 6:4; Isa 45:23; Zek 9:9; Thu 11:15

10 ^aRam pumpi cu Geba ihsin Jerusalem thlang Rimmon tiang hmun rawn ah a thlĕngaw ding. Benjamin Kăwt ihsin Kăwt Hmaisabik tiang, cun a Kil Kăwtka tiang, cun Hananel Dawlsâng ihsin siangpahrang sabit sawrnak tiang Jerusalem cu a umnak hmun kel ah santer a si ding.

14:10^a Jos 15:32; 2Sp 14:13; Jer 31:38; Amo 9:11; Zek 12:6

11 ^aA sungah mi an cêng ding; cule cu tawkah camsiatnak a um nawn lo ding, cuhnakin Jerusalem cu ralmûangin a um huahhi sawn ding.

14:11^a Sam 48:8; Eze 34:25-28; Zek 2:4; Thu 22:3

12 ^aCule Jerusalem dokalhih dotu mi zaten Jehovah in a vuaknak ding nathri sia cu hihi a si ding:

14:12^a Pui 26:16; Dnp 28:22; Isa 11:4

An ke ih an dīn laiah an taksa a ṭawih ding,
An mit cu a kua sungah a ṭawih ding ih,
An kâ sungah an lei a ṭawih ding.
13 ^aCuih ni ah hitin a si ding,
Lungphannak rapthlak Jehovah hnen ihsin an lakah a um ding.
Mi tin in anmai innhnen kut an rêk ding ih,
An innhnen kut dokalhin anmai kut cio an suah ding;
14 ^bJudah khal in Jerusalem ah ral a do ve ding.
Cule a kiangkap miphunpawl hmuahhmuah ih lennak cu fĭnkhawm a si ding:
Sui, ngun le hnipuan a tawrin a um ding.
15 Cuti vekin nathri sia cu
Rang le lākrang,
Kalauk le lāk le ṭanhmun khuarnakpawl ih um rannung zate parah a um ding.
Cuih nathri sia cu cutin a um ding.

14:13^a Lai 7:22; 1Sam 14:15, 20; Zek 11:6

14:14^b Isa 23:18; Zek 12:2, 5; 14:1

16 ^aCule hitin a si ding, Jerusalem dokalhih ra miphunpawl hmuahhmuah lak ihsin a nungdam mipawl cu ralkap rualpawlih Jehovah, Siangpahrang be dingin le Bûkte Puai hmang dingin, kum tinten an so ding. 17 ^bCule hitin a si ding, ralkap rualpawlih Jehovah, Siangpahrang be dingin Jerusalem ih so ve lo leilung tlunih sungkua pauhpauh parah ruah a sur lo ding. 18 ^cIzip sungza hung so loin le lut loin an um asile, an parah ruah a sur lo ding. Bûkte Puai hmang dingih so ve lo tu miphunpawl cun Jehovah in vuaknak ih a hman mi nathri sia an co ding. 19 ^dHimi cu Izip dāntatnak le Bûkte Puai hmang dingih feh duh lo miphunpawl zaten dāntatnak hrangah a si ding.

14:16^a Pui 23:34-44; Isa 19:21; 60:6-9; 66:18-21; Mik 4:2

14:17^b Jer 14:3-6; Amo 4:7

14:18^c Zek 14:12, 15

14:19^d Ezr 3:4

20 ^aCuih ni ah “JEHOVAH HRANGAH A THIANGHLIM” ti mi cu rang kuangpawl parah kher a si ding. Jehovah inn sungih belpawl cu Biakṭheng hmaiih kheng kûm pawl vek an si ding. 21 ^bA si, Jerusalem le Judah ih bel pauhpauh cu ralkap rualpawlih Jehovah hrangah thianghlim an si ding. Raithawitu pauhpauh an ra ding ih cuih belpawl cu an la ding, cule a sungah rawl an suang ding. Cuih ni ah ralkap rualpawlih Jehovah inn sungah Kanaan-mipawl an um nawn lo ding.

14:20^a Suah 28:36; 39:30; Eze 46:20

14:21^b Neh 8:10; Eze 44:9; Zek 9:8; Rom 14:6; 1Ko 10:31