Westpfälzisch-südsaarländische Bibel Es lewennische Wort (ELW) – Tidus

Uf äner vun seine letschde Räse hat de Paulus de Tidus, wo met em sesammegeschafft hat, uf de Insel Kreda serickgelosst. De Tidus hat die Gemäne dort betreie solle. Das war kä leichdi Ufgab. Met harde Worde kridisiert de Paulus, wie sich die Mensche, wo uf Kreda gewohnt hann, verhall hann. Er wäß, wie schnell die gutt Nohricht vun Jesus Chrischdus dort verwässert un verfälscht wor is. In de Gemäne hat Unordnung geherrscht, un e paar Leit hann jedi Gelähehät genutzt, fer Durchnanner anserichde.

Die Zustänn uf Kreda hann em Paulus dann de Anstoß gebb, fer em Tidus se schreiwe un em genaue Instruktione se gewe, wie er die Gemäne organisiere soll. Gleichzeidich enthallt der Brief aach e Haufe Anreechunge fer’s Läwe vun jedem änzelne Chrischt – Anreechunge fer e Läwe, wo meh saht wie e Haufe Worde.

1

DE PAULUS GRIESST DE TIDUS: 1,1-4

1 Das do schreibt de Paulus, wo Gott dient un e Aposchdel vun Jesus Chrischdus is. Gott hat mich geschickt, fer die Mensche, wo er sich ausgewählt hat, dohin se fiehre, dass’e glawe un erkenne, was wohr is un dass’e erkenne, wie mer Gott verehre soll. 2 Se solle uf’s ewiche Läwe hoffe känne. Gott, wo net lieht, hat’s ewiche Läwe schun versproch, eeb’s die Zeit gebb hat. 3 Durch die Preddicht hat er ans Licht gebrung, was er gesaht hat, wie die Zeit dodefor komm war, un ich hann die Preddicht im Ufdraach vun Gott, unserm Redder, anvertraut krieht.

4 Ich schreiwe’m Tidus, meim echde Kind uf Grund vun dem Glawe, wo mer sesamme hann, un winsche’m Gnad, Erbarme un Friede vun Gott, em Vadder, un vum Herr Jesus Chrischdus, unserm Redder!

DE PAULUS BESCHREIBT EM TIDUS SEI UFGAWE: 1,5-3,11

Setz geeichende Ällschde in!

5 De Grund, fer was ich dich uf de Insel Kreda serickgelosst hann, is der, dass du ordne sollscht, was noch geordnet werre muss, un dass du in jeder Stadt Ällschde insetze sollscht, so wie ich der’s ufgedrah hott. 6 A’me Ällschde darf nix aussesetze sinn. Er muss de Mann vun nur äner Fra sinn,^a un sei Kinner misse glawe. Mer darf seine Kinner net vorwerfe känne, dass’e wild oder ufsässich sinn.

1:6^a Was do der Versdäl bedeit, werd noch debaddiert. Er werd oft so verstann, dass er sich uf de Familliestand vun de Fiehrer vun de Gemän bezieht un die Mannsleit vum Ällschdedienscht ausschließt, wo net verheirat sinn oder in de Vileh läwe oder geschied sinn oder noh’m Dod vun ihrer Fra wider geheirat hann. Manche Ausleher glawe aach, dass die Bedeidung is: Er muss seiner Fra trei sinn.

7 Als Verwalder, wo vun Gott ingesetzt wor is, darf an äm, wo die Ufsicht hat,^a nix aussesetze sinn. Er darf net iwerheblich un net jähzornich sinn. Er darf sich net besaufe, kä Gewalt anwenne un net noh moßlosem Gewinn strewe. 8 Er muss im Gähedäl Gäscht gäre ufnemme un uf das, was gutt is, aus sinn. Er muss verninfdich un gerecht un heilich sinn un muss sich selwer in de Gewalt hann. 9 Er muss e Mann sinn, wo sich an die Botschaft hallt, wo zuverlässich is un dem entsprecht, was mer de Leit beibringe. Dann kann er die Mensche met de gesund Lehr ermahne un die iwerfiehre, wo sich de gesund Lehr widersetze.

1:7^a Oder traditionell: darf a’me Bischof.

Bekämpf die Irrlehrer!

10 Es gebt nämlich e Haufe Leit, besunnerscht unner de bekehrde Judde, wo ufsässich sinn. Die schwätze dummes Zeich un verfiehre annere. 11 Mer muss ne es Wort verbiede, weil se ganze Famillie uf de Kopp stelle un de Leit wäh moßlosem Gewinn beibringe, was sich net geheert. 12 Sogar äner vun ihre eichene Prophede hat emo gesaht: „Die Leit uf Kreda sinn vun je her Liehner, beesardiche Diere un faule Pänz.“^a 13 Die Feschtstellung is wohr! Deshalb sollscht du die Glaiwiche^b aach scharf serechtweise, dass’e im Glawe gesund werre 14 un sich net met jidische Legende beschäfdiche. Se solle sich aach net met dem beschäfdiche, was Mensche, wo vun de Wohrhät abrigge, vorschreiwe. 15 Dene, wo rein sinn, is zwar alles rein. Awer de Unreine un dene, wo net glawe, is nix rein. Sogar was se dengge, un ihr Gewisse is unrein.^c 16 Se behaupde, se däde Gott kenne, awer met dem, was se mache, dun se ne verleichne. Se sinn abscheilich un heere uf nix un sinn unfähich, fer irjend ebbes Guddes se mache.

1:12^a Das Zidat stammt vum Epimenides, dem beriehmde Dichderphilosoph un Staatsmann aus Knossos (6. Johrhunnert v. Chr.).

1:13^b Oder: die Irrlehrer.

1:15^c Fer Mensche, wo net bekehrt sinn un fer Glaiwiche, wo kä moralisch sauweres Läwe fiehre, is nix riduell rein. Uf de anner Seit is fer die, wo moralisch sauwer läwe, aach alles riduell rein.

2

Wie Chrischde in de Gemän sesammeläwe solle

1 Preddich du awer, was met de gesund Lehr iwerinstimmt! 2 Sah de äldere Mannsleit, se solle nichdere un ehrbar sinn. Bring ne bei, fer verninfdich un im Glawe, in de Lieb un in de Ausdauer gesund se sinn.

3 Sah genauso aach de äldere Weibsleit, se solle sich so benemme, wie sich das fer Mensche, wo e heiliches Läwe fiehre, geheert. Se dirfe net abfällich iwer annere schwätze un net vilem Wein erläh sinn. Se solle awer unnerrichde, was gutt is. 4 Dann känne se die junge Weibsleit anhalle, fer ihr Männer un Kinner lieb se hann 5 un verninfdich un rein se sinn. Se känne se anhalle, fer ihr Haushalt orndlich se fiehre, gutt se sinn un sich ihre Mannsleit unnerseordne. Dann werd aach das, was Gott gesaht hat, net schlecht gemacht.

6 Ermahn genauso die junge Mannsleit, dass’e verninfdich sinn solle. 7 Dich selwer erweis in allem dodedurch, dass du machscht, was gutt is, als e Vorbild. Mach’s ungefälscht, ernschthaft un unverdorb, wann de die Leit unnerweise duscht. 8 Gebrauch gesunde Worde, wo mer net anfechde kann. Dann misse sich die Geechner schame, weil se eich nix Schlechdes nohsahn känne.

9 Ermahn die Sklave, dass’e sich ihre Herre unnerordne un versuche solle, fer ne in allem se gefalle. Se solle ne net widerspreche 10 un nix veruntreie. Se solle sich im Gähedäl immer als gutt un trei erweise. Dann mache se die Lehr, wo iwer Gott, unser Redder, schwätzt, in jedem Stick attrakdiv.

Die Gnad, wo die Reddung bringt

11 Gott sei Gnad, wo die Reddung bringt, is nämlich jedem Mensch erschien. 12 Se erzieht uns dodezu, dass mer uns vun de Gottlosichkät un de weltliche Leideschafde lossahn un in do der Welt verninfdich un gerecht läwe un Gott verehre. 13 Mir warde dodebei dodruf, dass unser geseechendi Hoffnung in Erfillung geht un dass die Herrlichkät vun unserm große Gott un Redder Jesus Chrischdus erscheint. 14 Der hat sich selwer fer uns hergebb, fer uns vun aller Ungerechdichkät se erleese un fer sich selwer e reines Volk se schaffe, wo nur ihm geheert un eifrich denoh strebt, fer se mache, was gutt is.

15 Sah das de Leit! Ermahn se, un weis se indringlich serecht! Nimand soll dich verachde.

3

Chrischde im Staat un in de Gesellschaft

1 Erinner die Glaiwiche dodran, dass’e sich dene, wo regiere un die Macht hann, unnerordne un uf se heere. Se misse berät sinn, fer alles se mache, was gutt is. 2 Se dirfe nimand schlecht mache u’met nimand Streit suche. Se misse Ricksicht nemme u’met jedem Mensch ganz reschbektvoll umgehn.

3 Mir ware nämlich frieher selwer aach unverninfdich un hann uf nix geheert. Mir sinn in die Irr gefiehrt wor un hann all Sorde vun Leideschafde un Vergniechunge gedient. Boshät un Neid hann unser Läwe bestimmt gehat. Mir hann uns verhasst gemacht, un äner hat de annere gehasst. 4 Wie awer ans Licht komm is, dass Gott, unser Redder, freindlich is un dass er die Mensche lieb hat, 5 hat er uns gerett. Er hat das gemacht, weil er barmherzich is un net, weil mer gemacht hädde, was richdich is. Durch das Bad, wo uns de Heiliche Geischt e neii Geburt demet schenkt un uns erneiert, hat er uns gerett. 6 Gott hat de Heiliche Geischt durch Jesus Chrischdus, unser Redder, in reichem Moß uf uns komme gelosst. 7 Weil er uns durch sei Gnad gerecht gemacht hat, solle mer’s ewiche Läwe, wo mer druf hoffe, erwe. 8 Do die Botschaft is glabwirdich!

Ich will, dass du indringlich uf do dene Sache bestehscht! Die, wo zum Glawe an Gott komm sinn, solle sich eifrich Mieh gewe, fer se mache, was gutt is. Das is nämlich gutt un de Mensche nitzlich.

De Paulus warnt noch emo vor de Irrlehrer

9 Geh awer dumme Ausenannersetzunge un Geschlechtsregischder aus em Wääch, genauso em Streide un Zangge iwer’s jidische Gesetz. Das is nämlich alles nutzlos un fiehrt zu nix. 10 E sekdiererischer Mensch weis ab, wann du ne ämo oder zwämo ermahnt hascht. 11 Du wääscht doch, dass so e Mensch uf em verkehrde Wääch is un dass er sindicht un sich selwer verurdält.

DE PAULUS GEBT PERSEENLICHE METDÄLUNGE WEIDER UN WINSCHT GOTT SEI SEECHE: 3,12-15

12 Komm so schnell wie meechlich bei mich noh Nikopolis, wann ich de Ardemas oder de Tichigus bei dich schigge. Ich hann nämlich entschied, fer de Winder iwer dort se bleiwe. 13 Schick de Zenas, wo em Mose sei Gesetz unnerrichde dut,^a un de Apollos gleich los, un loss es ne an nix fähle! 14 Außerdem solle’s aach unser Leit iniewe, fer sich eifrich Mieh se gewe un Guddes se dun, wo’s needich is, sunscht bleibt ihr Läwe ohne Frucht.

3:13^a Oder: wo e Rechtsgelehrder is.

15 Die, wo bei mer sinn, losse dich allegar grieße! Grieß du aach die Leit, wo uns lieb hann un wo durch de Glawe met uns verbunn sinn! Ich winsche eich allegar Gnad! Amen.