Westpfälzisch-südsaarländische Bibel Es lewennische Wort (ELW) – 2. Petrus

Do der Brief, wo vum Petrus kurz vor seim Dod geschrieb wor is, dut sich wie sei eerschder Brief an die Gemäne in Klänasie richde. Dort ware falsche Prophede ufgeträt, wo met großardiche Worde e Haufe Leit zu’me sindhafde Läwe verfiehrt hann. Se hann die chrischtlich Freihät missbraucht, fer nur das se mache, wo se Luscht druf hodde. Se hann de Jesus lächerlich gemacht un hann Gott als Liehner hingestellt. Die Zusaach, dass de Jesus emo widerkommt un dass er dann fer immer met seiner Gemän sesamme is, hann se net ernscht genumm.

De Petrus will met seim Brief die Gemäne vor dene falsche Aposchdele warne un will em Dreiwe vun dene Aposchdele e Enn mache. Er fordert die Glaiwiche uf, fer sich net vun ihrm Glawe abbringe se losse. Se solle ihr Hoffnung im Gähedäl weider uf das setze, was Gott zugesaht hat, un e Läwe, wo Gott gefallt, fiehre.

1

DE PETRUS GRIESST DIE GLAIWICHE: 1,1-2

1 Das do schreibt de Simon^a Petrus, wo Jesus Chrischdus dient^b un sei Aposchdel is. Ich schreiwe an die Mensche, wo vun unserm Gott un Redder Jesus Chrischdus deselwe koschtbare Glawe wie mir Aposchdele krieht hann, weil Chrischdus gerecht is. 2 Ich bäde dodrum, dass eich Gott immer reichlicher Gnad un Friede schenkt, weil ner ihne un unser Herr Jesus erkenne.

1:1^a De griechische Text gebraucht an do der Stell die hebräisch Form vun dem Name: Simeon.

1:1^b Das Wort beschreibt e leibeichener Knecht oder Sklave un drickt aus, dass de Petrus met Leib un Läwe seim Herr geheert.

DE PETRUS ERKLÄRT DIE WOHRHÄT, WO UNS IWERLIWERT WOR IS: 1,3-21

Gott hat uns alles gebb, was mer brauche

3 Alles, was dodezu beidraht, dass mer läwe un Gott verehre känne, hat uns de Jesus in seiner Macht als Gott geschenkt. Er hat uns Gott erkenne gelosst, dene Gott,^a wo uns durch sei Herrlichkät un Kraft beruf hat. 4 Durch sei Herrlichkät un Kraft hat er uns die allergreeschde un koschtbarschde Zusaache gemacht. Ihr solle dodedurch em Verderwe, wo durch die Leideschaft in de Welt herrscht, entkomme un solle an de gättlich Nadur Andäl kriehn.

1:3^a Oder: hat uns Gott in seiner gättlich Macht geschenkt. Er hat uns de Jesus erkenne gelosst.

5 Aus dem Grund solle ner aach alles dodran setze, fer met dem, was ner glawe, es richdiche Verhalle se verbinne, me’m richdiche Verhalle die Erkenntnis, 6 met de Erkenntnis die Fähichkät, fer eich selwer se beherrsche, met der Fähichkät, fer eich selwer se beherrsche die Geduld, met de Geduld die Verehrung, wo ner Gott erweise, 7 met der Verehrung, wo ner Gott erweise, die Lieb zu de Geschwischder u’met de Lieb zu de Geschwischder die Lieb zu all de annere Mensche. 8 Wann das nämlich alles bei eich do is un zunemmt, losst’s eich, was es Erkenne vun unserm Herr Jesus Chrischdus angeht, net uneffekdiv un net unprodukdiv werre. 9 Wer das alles awer net hat, is kurzsichdich un blind un hat vergess, dass er vun seine friehere Sinde gereinicht wor is.

10 Ihr liewe Geschwischder! Setzen deshalb alles dodran, fer sichersestelle, dass ner vun Gott beruf un ausgewählt wor sinn! Wann’er das nämlich mache, bleiwe ner nie uf de Streck! 11 Uf dem Wääch macht eich Gott nämlich die Dir weit uf, fer ins ewiche Reich vun unserm Herr un Redder Jesus Chrischdus eninsegehn.

Die Prophedie in de Heilich Schrift

12 Deshalb will ich’s aach net losse, fer eich immer an do die Sache se erinnere, obwohl ner se schun kenne un in dem, was wohr is un was ner jetz hann, fescht gegrinnt sinn. 13 Ich halle’s awer fer richdich, fer eich dodran se erinnere un wach se halle, solang wie ich noch in do dem Zelt^a läwe. 14 Ich wäß nämlich, dass ich mei Zelt ball uf die Seit lehe muss. Unser Herr Jesus Chrischdus hat mich dodruf hingewies. 15 Ich will awer defor sorje, dass ner eich aach noh meim Dod immer noch an alles erinnere känne.

1:13^a Met dem Zelt männt de Petrus sei Leib.

16 Wie mir Aposchdele eich bekannt gemacht hann, wie mächdich unser Herr Jesus Chrischdus is un dass er widerkommt, ha’mer uns nämlich net uf raffinierde Geschichde gestitzt, uf Geschichde, wo sich jemand ausgedenkt hat. Mir hann im Gähedäl met unsere eichene Aue gesiehn, wie majesdädich de Jesus is. 17 Gott, de Vadder, hat ne nämlich geehrt un verherrlicht – seinerzeit, wie er, die majesdädich Herrlichkät, e Stimm an’e erklinge gelosst hat. Die Stimm hat gesaht: „Das do is mei liewer Sohn, wo ich Gefalle dran hann.“ 18 Mir hann die Stimm, wo vum Himmel komm is, selwer geheert, wie mer me’m Jesus uf dem heiliche Berch ware.^a

1:18^a De Petrus bezieht sich an do der Stell uf dene Daach, wo de Jesus verwannelt wor is (vgl. Mt 17,1-5; Mk 9,2-7; Lk 9,28-35).

19 Was die Prophede gesaht hann, is dodedurch fer uns nur noch feschder wor. Ihr dun gutt dran, wann’er dodruf achde wie uf e Licht, wo a’me dunggele Ort scheint, bis es Daach werd un de Morjestern in eierm Herz ufgeht. 20 Dodebei misse ner vor allem das do wisse: Kä Prophedie in de Heilich Schrift darf mer noh eichene Vorstellunge auslehe.^a 21 Es is nämlich noch nie e Prophedie zustann komm, weil e Mensch das gewollt hat. Im Gähedäl! Vum Heiliche Geischt gedrieb hann die heiliche Mensche, wo vun Gott geschickt wor sinn, geschwätzt.

1:20^a Oder: Kä Prophedie in de Heilich Schrift kommt durch das zustann, was sich e Prophet ausdenkt.

2

DE PETRUS WARNT VOR FALSCHE LEHRE: 2,1-22

Irrlehrer komme uf

1 Im Volk Israel hat’s awer aach falsche Prophede gebb, genauso wie’s bei eich emo Leit gebt, wo eich verkehrde Sache beibringe. So Leit fiehre heimlich Irrlehre^a, wo ins Verderwe fiehre, in un verleichne sogar dene Herrscher, wo se freikaf hat. Awer dodedurch stirze se sich selwer schnell ins Verderwe. 2 E Haufe Mensche mache emo ihr verdorwener Läwensstil noh un bringe dene Wääch, wo in die Wohrhät fiehrt, in Verruf. 3 Weil do die Irrlehrer nur uf’s Geld aus sinn, zogge se eich met Geschichde ab, wo se selwer erfunn hann. Awer das Gericht, wo schun seit langem iwer se verhängt is, kommt, un das Verderwe, wo ne droht, losst net uf sich warde.

2:1^a Das Wort beschreibt net nur falsche Lehre. Es dut aach die Grubbierunge beschreiwe, wo sich um die falsche Lehre schare, also Sekde.

Dene Irrlehrer droht’s Gericht

4 Gott hat nämlich die Engel, wo gesindicht hann, aach net verschont. Er hat se im Gähedäl met Dunggelhät gefesselt un in de Abgrund gestoßt. Dort hallt er se fescht, bis er se richde dut. 5 Aach die Welt, wo frieher exischdiert hat,^a hat er net verschont. Nur iwer de Noah, wo gepreddicht hat, was gerecht is, un iwer siwe annere Mensche hat er die Hand gehall, wie er die groß Flut iwer e Welt vun gottlose Mensche gebrung hat. 6 Die Städt Sodom un Gomorra hat er zu Äsche verbrennt un dodezu verurdält, fer unnersegehn. Dodemet hat er e Exembel staduiert fer die Mensche, wo in spädere Zeide gottlos hann wolle läwe. 7 De gerechde Lot hat er awer gerett. Der war schoggiert iwer dene Läwensstil vun Mensche, wo kä Prinzibie hodde un unmoralisch geläbt hann. 8 Obwohl de Lot gerecht war, hat er midde unner dene Mensche geläbt, un Daach fer Daach hat er met ansiehn u’met anheere misse, was se Kriminelles gedrieb hann. Das alles hat sei gerechdi Seel gequeelt.

2:5^a Wärtlich: Aach die alt Welt, das hääscht die Welt vor de groß Flut vun 1. Mose 6-8.

9 Ihr siehn also: De Herr versteht sich dodruf, fer die Mensche, wo ne verehre, aus de Versuchung se redde. Er versteht sich awer aach dodruf, fer die Ungerechde weider se strofe un fer de Daach vum Gericht feschtsehalle. 10 Das gilt besunnerscht fer die, wo sich vun ihrer unrein Leideschaft un vun ihrm Leib beherrsche losse un nimand als Herr iwer sich anerkenne.

De Wääch vun de Verfiehrer

Do die Irrlehrer sinn waachhalsich un iwerheblich. Se schregge net devor serick, fer die herrliche Wese im Himmel se läschdere. 11 Un dodebei bringe die Engel, wo doch vil stärger un mächdicher sinn, beim Herr kä abwerdendes Urdäl gäh so Wese vor.

12 Do die Irrlehrer sinn awer aach wie’s unverninfdiche Vieh, wo vun Nadur aus dodefor uf die Welt komm is, fer gefang se werre un umsekomme. Se dun iwer Sache, wo se net verstehn, läschdere un komme so wie’s Vieh um. 13 So kriehn se de Lohn fer ihr ungerechdes Dreiwe. Se halle’s fer e Pläsier, fer schun daachsiwer ibbich se läwe. Als Dreck- un Schandplagge dun se sich in ihrer Verschlahehät amisiere, wann se sesamme met eich schmause. 14 Se hann fer nix anneres Aue wie nur fer Weibsleit, wo se demet schlofe känne, un se heere nie uf se sindiche. Se dun haltlose Mensche anlogge un hann sich selwer dodrinn trainiert, fer hinner’m Geld her se sinn. Gott hat se verflucht! 15 Weil se de grade Wääch hinner sich gelosst hann, sinn se in die Irr gang un hann dene Wääch ingeschlah, wo de Bileam, em Beor sei Bub, aach gang is. De Bileam war nur uf de Lohn vun seim ungerechde Dreiwe aus. 16 Er is awer wäh seiner Verfählung serechtgewies wor: Der sunscht stumme Esel hat met erer menschlich Stimm geschwätzt un hat dene Prophet so dodevun abgehall, fer ebbes Unsinniches se mache.

17 Do die Irrlehrer sinn awer Brunne ohne Wasser un Wolge, wo vum Sturm vor sich hergedrieb werre. Gott hat [fer immer] die diefscht Dunggelhät fer se reserviert. 18 Se halle nämlich großspuriche Redde, wo nix dehinner is, u’met de Leideschaft vum Leib u’met Unzucht dun se Mensche anlogge, Mensche, wo doch in Wirklichkät dene, wo im Irrdum läwe, entkomm sinn. 19 Do die Irrlehrer verspreche de Mensche die Freihät, obwohl se selwer Sklave vun dem sinn, was se ins Verderwe fiehrt. – Jeder is nämlich de Sklave vun dem, was ne beherrscht. – 20 Se ware em Dreck vun de Welt entkomm, weil se Jesus Chrischdus, de Herr un Redder, erkannt hodde. Wann se sich awer vun neiem in de Dreck ziehe un beherrsche losse, is es am Enn schlimmer met ne wie am Anfang. 21 Fer sie wär’s nämlich besser, wann se de richdiche Wääch nie erkannt hädde, als wie wann se ne erkenne un dann vun der heilich Weisung, wo mer ne iwergebb hat, abrigge. 22 Uf sie trefft awer do das Sprichwort, wo wohr is, zu: „E Hund kommt bei das serick, was er ausgekotzt hat“ un: „E Sau, wo gewäscht wor is, wänzelt sich wider im Dreck.“

3

DE PETRUS DUT BESTÄDICHE, DASS CHRISCHDUS BALL WIDERKOMMT: 3,1-16

Mensche, wo spodde, träde uf

1 Das do is schun de zwädde Brief, wo ich eich schreiwe, ihr Liewe. Met meine zwä Briefe will ich eier Erinnerung uffrische un eich zu erer gesund Instellung verhelfe. 2 Ihr solle an das dengge, was die heiliche Prophede im Voraus angekinnicht hann, un an das, was eich de Herr un Redder durch uns, die Aposchdele, als Weisung gebb hat! 3 Dodebei misse ner vor allem das do wisse: Am Enn vun de Daache komme emo Mensche, wo spodde un sich vun ihrer eichen Luscht beherrsche losse. 4 Se sahn: „De Jesus hat doch versproch, fer widersekomme. Wo bleibt er dann? Seit unser Vorfahre gestorb sinn, geht alles so weider, wie’s vun Anfang an, wie Gott die Welt erschaff hat, war.“

5 Se vergesse dodebei awer absichtlich: Durch das, was Gott gesaht hat, hat schun vor langer Zeit de Himmel exischdiert, un die Erd is aus em Wasser un durch’s Wasser entstann. 6 Wasser hat aach die Welt, wo zu der Zeit exischdiert hat, iwerschwemmt un zersteert. 7 Durch’s selwe, was Gott gesaht hat, werd awer der Himmel un die Erd, wo jetz bestehn, fer’s Feier ufgespart. Se werre bis zu dem Daach erhall, wo Gott die Mensche, wo gottlos sinn, richde un verdamme dut.

Chrischdus dut net warde, fer widersekomme

8 Äns dirfe ner awer net vergesse, ihr Liewe: Beim Herr is äner Daach wie dausend Johr un dausend Johr wie äner Daach. 9 De Herr dut net zaudere, fer se mache, was er versproch hat, wie e paar Leit zaudere verstehn. Er hat im Gähedäl Geduld met uns, weil er will, dass jeder sei Instellung ännert, un weil er net will, dass jemand verlor geht.

10 Der Daach, wo de Herr serickkommt, kommt awer emo so unerwart wie jemand, wo naachts ebbes klaue will. An dem Daach vergeht de Himmel met großem Prassele, un die Elemende^a schmelze vor lauder Hitz. Die Erd un alles uf er dut verbrenne.

3:10^a Oder: die Himmelskärber. Analooch in Vers 12.

11 Wann do die Sache also allegar ufgeleest werre, wiffel meh sollde ner eich dann durch e heilicher Läwenswannel un dodedurch, dass ner Gott verehre, auszäächne! 12 Ihr sollde uf dene Daach, wo Gott widerkommt, warde un sollde ne herbeisehne! An dem Daach dut sich de Himmel nämlich im Feier ufleese, un die Elemende dun vor lauder Hitz schmelze. 13 Gott hat awer e neier Himmel un e neii Erd, wo die Gerechdichkät drinn wohnt, versproch. Uf dene Himmel un uf die Erd warde mer.

Was die Briefe, wo de Paulus geschrieb hat, bestädiche

14 Weil ner uf das alles warde, ihr Liewe, misse ner aach alles dran setze, dass eich Gott ohne Plagge un Fähler un im Friede met sich vorfinne kann. 15 Bedenggen: Unser Herr is deshalb gedullich, weil ner gerett werre solle. Das hat eich aach schun de Paulus, unser liewer Bruder, met der Weishät, wo er vun Gott krieht hat, geschrieb. 16 Es steht in all seine Briefe, wo er dodevun schwätzt. Manches in dene Briefe is schwär se verstehn, un die Leit, wo net unnerricht sinn un noch net fescht stehn, dun’s verdrähe, genauso wie se’s met de annere heiliche Schrifde aach mache – zu ihrm eichene Verderwe.^a

3:16^a In do dem Vers dut de Petrus bestädiche, dass die Briefe, wo vum Aposchdel Paulus geschrieb wor sinn, zu de Heilich Schrift geheere, un dass’e in aposchdolischer Zeit schun als Heilichi Schrift anerkannt ware.

DE PETRUS WINSCHT WACHSDUM IM GLAWE UN LOBT DE HERR: 3,17-18

17 Ihr awer, ihr Liewe, wisse das jetz im Voraus. Bassen deshalb uf, dass ner eich net vum Irrdum vun dene Mensche, wo kä Prinzibie hann, met fortreiße losse un eier eichener feschder Stand verliere! 18 Wachsen awer in de Gnad vun unserm Herr un Redder Jesus Chrischdus un dodrinn, fer ne se erkenne! Ihm steht die Herrlichkät zu – jetz un fer immer!^a Amen.

3:18^a Wärtlich: un fer de Daach vun de Ewichkät!