Westpfälzisch-südsaarländische Bibel Es lewennische Wort (ELW) – 1. Petrus

De eerschde Brief, wo de Aposchdel Petrus geschrieb hat, is e Rundschreiwe an die Gemäne in Klänasie. De Anstoß dodezu hat die schwierich Siduation vun de Glaiwiche dort gebb: Wäh ihrm Glawe hann se e Haufe Leit gäh sich gehat, un se sinn verspott wor. Deshalb hann se aach in de Gefahr gestann, fer sich ansebasse oder met Gewalt Widerstand se leischde.

De Petrus erinnert se dodran, dass’e berät sinn misse, fer wäh dem, was se glawe, aach Läd uf sich se nemme. Wie sich e Chrischt verhalt, fordert nämlich die Mensche, wo um ne erum läwe, oft eraus.

In dem Brief stehn näwe grundsätzliche Feschtstellunge aach noch e ganzi Reih Rotschlääch, wie sich die Glaiwiche in schwieriche Siduatione verhalle solle. De Petrus kommt dodebei immer wider uf die Hoffnung vun de Chrischde serick, uf die Hoffnung, wo se devun läwe. Er saht dene Mensche, wo sei Brief läse, in Kabidel 4, Vers 13: „Freien eich in dem Moß, wie ner an all dem Läd, wo Chrischdus durchgemacht hat, dälnemme känne! Dann känne ner eich aach emo riesich freie, wann sei Herrlichkät offebart werd.“

1

DE PETRUS GRIESST DIE GEMÄNE: 1,1-2

1 Das do schreibt de Petrus, wo e Aposchdel vun Jesus Chrischdus is. Ich schreiwe an die Leit, wo vun Gott ausgewählt wor sinn un wo e Zeitlang als Fremde in de Provinze Pondus, Galatie, Kappadozie, Asie un Bidynie^a verstraut wohne. 2 So, wie er’s geplant hat, hat eich Gott, de Vadder, im Voraus ausgewählt un macht eich durch sei Geischt heilich. Ihr solle uf Jesus Chrischdus heere u’met seim Blut besprenggelt werre.^b

1:1^a Reemische Provinze un Landschafde in Klänasie (im Weschde vun de heidich Tirgei).

1:2^b De Wortgebrauch in do dem Vers is de Opfersprooch vum alde Bund entlehnt. Persone un Sache sinn seinerzeit met Blut besprenggelt un gereinicht wor, was vorschadde dut, dass de Jesus am Kreiz gestorb is (vgl. 2Mo 24,3-8; 29,21; 3Mo 16,14-15). Heit dut uns das Blut, wo de Jesus geopfert hat, vun unsere Sinde reiniche.

Ich winsche eich immer reichlicher Gnad un Friede!

DE PETRUS ERINNERT DIE GLAIWICHE DODRAN, DASS’E GERETT SINN UN RUFT ZU’ME HEILICHE LÄWE UF: 1,3-2,10

Mir hann e lewennichi Hoffnung

3 Lowen de Gott un Vadder vun unserm Herr Jesus Chrischdus! Der war so iweraus barmherzich, dass er uns e neii Geburt geschenkt hat. Jetz ha’mer e lewennichi Hoffnung, weil Jesus Chrischdus vun de Dode uferstann is, 4 un kriehn e Erbschaft, wo nie vergeht. Die Erbschaft krieht aach kä Plagge un dut ihr Scheenhät net verliere. Gott hebt se im Himmel fer uns uf. 5 Weil Gott Macht hat, dut er uns dodedurch beschitze, dass mer glawe. Mir solle die Reddung erfahre, wo berät steht, fer in de letscht Zeit ans Licht se komme.

6 Iwer das alles freie ner eich, aach wann eich jetz – wann’s dann sinn muss – verschiedene Arde vun Anfeschdunge fer e kurzi Zeit draurich mache. 7 Dodedurch soll sich eier Glawe bewähre – er is koschtbarer wie Gold, wo durch’s Feier getescht werd un doch vergeht – un eich Lob, Ehr un Herrlichkät inbringe, wann Jesus Chrischdus erscheint.

8 Ihr hann Chrischdus lieb, obwohl ner ne noch nie gesiehn hann. Ihr glawe an’e, obwohl ner ne aach jetz net siehn un freie eich met erer Fräd, wo mer net met Worde ausdrigge kann un wo herrlich is. 9 Ihr erreiche nämlich es Ziel vun dem, was ner glawe: Eier Seele werre gerett. 10 Noh der Reddung hann schun die Prophede intensiv gesucht un geforscht, un se hann prophedisch vun der Gnad geschwätzt, wo eich hat solle zudäl werre. 11 Se hann nohgeforscht, uf wene un uf was for e Zeit de Geischt vum Messias, wo in ihne war, hinweise dät, wie er schun im Voraus all das Läd, wo iwer de Messias hat solle komme, un die Herrlichkät dodenoh angekinnicht hat.

12 Gott hat de Prophede offebart, dass’e met ihre Prophezeiunge uns hann solle diene un net sich selwer. Un jetz hann eich die, wo eich die gutt Nohricht gebrung hann, alles verkinnicht. In de Kraft vum Heiliche Geischt, wo vum Himmel geschickt wor is, hann se’s gemacht. Sogar die Engel däde nur zu gäre in das alles eningugge.

Mir solle e heiliches Läwe fiehre

13 Deshalb solle ner eich gedanklich aach beräthalle, fer eier Sach se mache!^a Bleiwen nichdere, un richden eier Hoffnung ganz uf die Gnad aus, uf die Gnad, wo eich vun Gott zudäl werd, wann Jesus Chrischdus erscheint! 14 Bassen eich als Mensche, wo uf Gott heere, net dene Leideschafde an, wo ner frieher gedient hann, wie ner’s noch net besser gewisst hann! 15 Ihr misse im Gähedäl in allem, was ner mache, heilich sinn, ganz so wie Gott, wo eich beruf hat, aach heilich is. 16 Es steht nämlich geschrieb: Ihr solle heilich sinn, weil ich heilich bin.

1:13^a Wärtlich: Deshalb solle ner aach die Hifde vun eierm Sinn hoochbinne! Bei dem Satz geht’s um e Sproochbild, wo aus em Alldaach vun de Mensche im Nahe Oschde stammt. Fer sich frei bewehe se känne, hann sich die Mannsleit seinerzeit ihr lange Gewänder met eme Girdel hoochgebunn, wann se schaffe gang sinn oder wann se sich schnell fortbewehe hann misse.

17 Ihr rufe Gott als Vadder an. Der dut ohne e Unnerschied zwische de Mensche se mache jeder noh dem richde, was er macht. Fiehren deshalb eier Läwe im Reschbekt vor Gott, solang wie ner do uf de Erd als Fremde läwe. 18 Ihr wisse doch, dass eich Gott net met vergängliche Wärde wie Silwer oder Gold vun eierer nutzlos Art fer se läwe freikaf hat. Die nutzlos Art fer se läwe hann eich eier Vorfahre iwerliwert gehat. 19 Er hat eich awer met Chrischdus seim koschtbare Blut freikaf. Chrischdus is wie e Opferlamm, wo kä Fähler un kä Plagge hat. 20 Dodefor hat Gott Chrischdus zwar schun im Voraus ausgewählt gehat, eeb er die Welt gemacht hott, awer wäh eich hat er ne eerscht in do der letscht Zeit offebart. 21 Durch Chrischdus glawe ner an Gott, wo ne vun de Dode uferstehn gelosst un herrlich gemacht hat. Deshalb känne ner jetz aach an Gott glawe un uf ne hoffe.

22 Ihr hann uf das, was wohr is, [durch de Heiliche Geischt] geheert un hann eier Seele dodedurch gereinicht, fer eich als Geschwischder ufrichdich lieb se hann. Heeren deshalb aach net uf, fer eich gäheseidich aus eme reine Herz eraus lieb se hann. 23 Gott hat eich nämlich e neii Geburt geschenkt, un zwar net aus eme Some, wo vergeht. Er hat se eich im Gähedäl aus eme Some, wo net vergeht, geschenkt, aus seim lewenniche Wort, wo [fer immer] bleibt.

24 Die Mensche sinn nämlich allegar wie Gras,
un die ganz Herrlichkät vum Mensch is wie e Blum im Gras.
Es Gras werd dirr, un sei Blum fallt ab,
25 awer das, was de Herr gesaht hat, bleibt fer immer bestehn.

Un das is die Botschaft, wo ner als guddi Nohricht gepreddicht krieht hann.

2

Jesus Chrischdus, der lewenniche Stän

1 Deshalb solle ner aach alles, was bees un Bedruuch is, uf die Seit lehe, aach die Scheinheilichkät, de Neid un alles schlechde Schwätze iwer annere Mensche! 2 Was Gott gesaht hat, is net gefälscht. Verlangen denoh, so wie Kinner, wo grad eerscht uf die Welt komm sinn, noh Milch verlange. Dodedurch solle ner wachse. 3 Ihr hann nämlich schun erfahr, dass de Herr freindlich is.

4 Kommen her bei de Herr, dene lewenniche Stän! Die Mensche hann’e zwar als unbrauchbar fortgeschmiss, awer Gott hat ne fer sich ausgewählt, un er is in seine Aue wertvoll. 5 Deshalb lossen aach ihr eich jetz als lewenniche Stän ufbaue – als e geischtliches Haus^a un e heiliches Prieschderdum –, fer durch Jesus Chrischdus geischtliche Opfer darsebringe, Opfer, wo Gott gefalle. 6 Deshalb steht aach in de Heilich Schrift:

2:5^a De altteschdamentliche Tembel war e Vorschaddung vun do dem geischtliche Haus, wo sich aus jedem Glaiwiche sesammesetzt (vgl. 1Kor 3,16; Eph 2,19-22).

Guggen emo do!
Ich lehe uf em Zionsberch e Eckstän hin,
wo ich mer ausgewählt hann un wo wertvoll is.
Wer an dene glabt, geht net zugrunn.

7 Fer eich, wo ner glawe, is der Stän wertvoll. Fer die Unglaiwiche gilt awer:

Der Stän, wo die Leit am Bau fortgeschmiss hann,
is zum Eckstän wor.
8 Er is aach e Stän, wo sich die Mensche dran stoße,
un e Felsbrogge, wo se sich driwer ärjere.

Se stoße sich, weil se net uf das, was Gott gesaht hat, heere. Un genauso hat’s Gott fer se bestimmt.

9 Ihr sinn awer e Geschlecht, wo vun Gott ausgewählt wor is, un e keenichliches Prieschderdum! Ihr sinn e heiliches Volk un Mensche, wo Gott geheere. Ihr solle verkinniche, wie uniwertrefflich der is, wo eich aus em Dunggele in sei wunnerbares Licht geruf hat. 10 Frieher ware ner kä Volk, awer heit sinn’er das Volk, wo Gott geheert. Frieher hat’s fer eich kä Erbarme gebb, awer heit hann’er sei Erbarme gefunn.

DE PETRUS WEIST UF DIE VERANTWORDUNG VUN DE GLAIWICHE AACH IN NOTZEIDE HIN: 2,11-4,19

Die Chrischde im Staat

11 Ihr Liewe, ihr sinn in do der Welt nur Fremde un Auslänner. Deshalb bitt ich eich indringlich: Gewen de Leideschafde vun eierer sindich Nadur net noh! Die kämpfe nämlich gäh eier Seel. 12 Eier Läwe unner dene Mensche, wo Gott net kenne, muss rechtschaffe sinn! So Mensche sahn eich zwar manchemo all meechliche schlechde Sache noh, awer se solle durch das, was ner Guddes dun, zur Insicht komme un Gott an dem Daach, wo er die Mensche ufsucht,^a die Ehr gewe.

2:12^a Das is de Daach vun de Gnad un Bekehrung (Lk 1,68; 19,44), awer aach de Daach vum Gericht.

13 Ordnen eich deshalb wäh’m Herr jeder menschlich Ordnung unner, ganz egal, ob em Keenich als Staatsowerhaupt 14 oder de Gouverneere als dene, wo vun ihm ingesetzt^a wor sinn. De Keenich hat die Gouverneere ingesetzt, fer die, wo Beeses dun, se bestrofe un fer die, wo mache, was gutt is, aussezäächne. 15 Gott will nämlich, dass ner mache, was gutt is, un dass ner dodemet die Mensche, wo nix wisse un unverstännich sinn, dodezu bringe, dass’e de Mund halle. 16 Ordnen eich als freie Leit unner, un missbrauchen eier Freihät net, fer irjend ebbes, was bees is, zusedegge! Ordnen eich als Mensche, wo Gott diene, unner! 17 Erweisen jedem Mensch die Ehr, un liewen eier Geschwischder! Reschbekdieren Gott, un ehren de Keenich!

2:14^a Wärtlich: geschickt.

De Jesus is unser Vorbild

18 Ihr Haussklave, ordnen eich eiere Herre ganz reschbektvoll unner! Heeren aach uf die, wo launisch sinn, un net nur uf die, wo gutt un freindlich sinn. 19 Es is nämlich lowenswert, wann jemand Kränggunge aushallt un zu Unrecht Schweres durchmache muss, nur weil er Gott gähiwer gewissehaft is.

20 Was for Anerkennung verdiene ner dann schun, wann’er gedullich Schläh aushalle, weil ner gesindicht hann? Wann’er awer mache, was gutt is, un dodefor Schweres durchmache misse un wann’er das Schwäre gedullich aushalle, dann is das lowenswert vor Gott. 21 Gott hat eich nämlich dodezu beruf, fer Schweres gedullich durchsestehn, weil Chrischdus aach Schweres fer uns durchgemacht hat. Er hat uns e Vorbild hinnerloss, dass ner seine Fußspure nohgehn solle. 22 Chrischdus hat nie gesindicht, un iwer sei Libbe is nie ebbes komm, was geloh war.^a 23 Wie er gescholl wor is, hat er net serickgescholl, un wie er Schweres durchgemacht hat, hat er net gedroht. Er hat awer alles Gott, wo gerecht richde dut, iwergebb. 24 Unser Sinde hat er selwer an seim eichene Leib uf’s Kreiz^b enufgedrah, dass mer dem, was sindich is, absterwe un fer das, was gerecht is, läwe. Durch sei Wunne sinn’er gehält wor. 25 Ihr ware wie Schäf, wo in die Irr gehn, awer ihr hann eich jetz zu dem bekehrt, wo eier Seele hiede un beschitze dut.^c

2:22^a Oder: was Bedruuch war oder: was falsch war.

2:24^b Wärtlich: uf’s Holz.

2:22-25^c De Petrus greift in do dene Verse wahrscheinlich uf e urchrischtliches Bekenntnis serick, wo in Anlehnung an Jesaja 53 formuliert wor is.

3

Mann un Fra in de Eh

1 Genauso wie sich die Haussklave ihre Herre unnerordne solle, solle sich aach die Weibsleit ihre eichene Mannsleit unnerordne. Wann e paar Mannsleit dem, was Gott gesaht hat, net glawe, solle se dodedurch, wie sich ihr Weibsleit verhalle, gewunn werre – aach ohne Worde. 2 Eier Mannsleit siehn dann nämlich, dass eier Verhalle rein un reschbektvoll is.

3 Eier Scheenhät soll net vun erer aißerlich Ufmachung abhängich sinn, dodevun, dass ner eich die Hoor ufwennich hoochstegge, Schmuck aus Gold umhängge oder modische Kläder andun. 4 Se soll im Gähedäl vum innere Mensch, wo mer net siehn kann, abhängich sinn, vun der Scheenhät, wo net vergeht un wo aus eme sanfde un stille Geischt besteht. So e Scheenhät hat e großer Wert bei Gott. 5 So hann sich nämlich die heiliche Weibsleit, wo uf Gott gehofft hann, frieher aach scheen gemacht: Se hann sich ihre Mannsleit unnergeordnet. 6 Es Sara zum Beispiel hat uf de Abraham geheert un hat ne „Herr“ genennt. Ihr Weibsleit sinn em Sara sei Kinner wor, wann’er mache, was gutt is un eich vun käner Drohung inschichdere losse.

7 Ihr Mannsleit misse eich entsprechend verhalle! Läwen ricksichtsvoll met eiere Weibsleit sesamme, weil se de schwächere Partner sinn! Ehren se! Se erwe nämlich sesamme met eich es Läwe aus lauder Gnad. Wann’er eich so verhalle, steht eierm Bäde nix im Wääch.

Bezahlen net Beeses met Beesem serick!

8 Schlussendlich misse ner allegar dieselwe Instellung un Metgefiehl hann! Liewen eich als Geschwischder, un gehn herzlich un freindlich metenanner um! 9 Bezahlen nimand Beeses met Beesem oder Beleidichung met Beleidichung serick! Dun die Mensche im Gähedäl seechne, weil [ner wisse, dass] ner dodezu beruf wor sinn, fer Seeche se erwe.

10 Wem nämlich es Läwe lieb is
un wer gudde Daache siehn will,
soll sich dodevor hiede,
fer ebbes Beeses se sahn oder fer unufrichdich se schwätze!^a
11 Er soll vun dem, was bees is, abrigge
un soll mache, was gutt is!
Er soll Friede suche
u’met ganzer Kraft hinner’m Friede her sinn!
12 De Herr hat nämlich e offenes Au fer die, wo gerecht sinn,
un e offenes Ohr fer das, was se bäde.
Awer er stellt sich dene in de Wääch,
wo mache, was bees is.^b

3:10^a Wärtlich: soll sei Zung vum Beese serickhalle un sei Libbe, dass’e net unufrichdich schwätze!

3:12^b Wärtlich: Em Herr sei Aue gugge nämlich uf die Gerechde, un sei Ohre merge uf ihr Gebät. Awer em Herr sei Gesicht is gäh die gericht, wo Beeses dun.

13 Wer sollt eich schun schade, wann’er das, was gutt is, nohmache? 14 Wann’er awer trotzdem wäh dem, was richdich is, Schweres durchmache misse, dirfe ner eich glicklich nenne! Ihr brauche kä Angscht vor dene Mensche se hann, wo eich drohe! Lossen eich net aus de Ruh bringe! 15 Erkennen awer Gott, de Herr, in eierm Herz als heilich an! Ihr misse immer berät sinn, fer eich vor jedem se verantworde, vor jedem, wo eich noh’m Grund vun der Hoffnung, wo in eich is, froht. 16 Machen’s freindlich un reschbektvoll, un erhallen eich e guddes Gewisse! Dann misse sich die Leit, wo eich schlechde Sache nohsahn, weil ner Chrischdus geheere un e guddes Läwe fiehre, schame, weil se schlecht iwer eich geschwätzt hann. 17 Es is nämlich besser, wann’er Schweres durchmache, weil ner Guddes gedun hann – wann Gott das dann so will – als wie wann’er Schweres durchmache, weil ner Schlechdes gemacht hann.

Chrischdus dut iwer alles herrsche

18 Chrischdus hat nämlich aach Schweres durchgemacht, un zwar än fer allemo fer unser Sinde. Er, wo gerecht is, hat’s fer die, wo ungerecht sinn, durchgestann, fer uns zu Gott fiehre se känne. Im Leib is er umgebrung wor, awer de Heiliche Geischt hat ne wider lewennich gemacht.^a 19 Als Geischt^b is er aach fortgang un hat dene Geischder, wo im Gefängnis sinn, gepreddicht. 20 Die Geischder im Gefängnis hann vor langer Zeit net geglabt, wie Gott än fer allemo gedullich gewart hat. Das war in de Daache vum Noah, wie das große Schiff gebaut wor is. In das Schiff sinn nur wenich, nämlich acht Mensche, entkomm un sinn vor’m Wasser gerett wor. 21 Es Wasser symbolisiert die Daf, wo aach uns jetz redde dut, weil Jesus Chrischdus uferstann is. Durch die Daf werd net de Dreck vun unserm Leib abgewäscht. Mir bidde Gott awer durch die Daf dodrum, dass er uns e guddes Gewisse schenkt. 22 Jesus Chrischdus is in de Himmel gang un is jetz rechts vun Gott, un die Engel un annere Geischtwese, wo Gewalt un Macht hann, sinn em unnerworf.

3:18^a Wärtlich: Im Flääsch is er umgebrung, awer im Geischt wider lewennich gemacht wor.

3:19^b Oder: In de Kraft vum Geischt.

4

Vor Gott muss sich emo jeder verantworde

1 Weil Chrischdus also an seim eichene Leib Schweres [fer uns] durchgemacht hat, solle aach ihr eich dieselwe Instellung zu eiche mache! Wer nämlich an seim Leib Schweres durchgemacht hat, hat met dem, was sindich is, Schluss gemacht. 2 Verläwen deshalb die Zeit, wo eich do uf de Erd noch bleibt, im Dienscht vun dem, was Gott will, un nemmeh im Dienscht vun de menschliche Leideschafde! 3 Fer uns langt’s nämlich, dass mer die Läwenszeit, wo schun vergang is, so zugebrung hann, wie’s die Unglaiwiche wolle. Mir hann uns nämlich in Sinnlichkät un Leideschaft, in Suff un Orgie, in Zechgelaache un i’me abscheiliche Gätzedienscht gehn gelosst gehat.

4 De Unglaiwiche kommt’s fremd vor, dass ner eich nemmeh met ne in deselwe heillose Schlamm stirze. Deshalb dun se eich aach schlecht mache. 5 Se misse sich awer emo vor Gott verantworde. Un der hallt sich schun berät, fer die Lewenniche un die Dode se richde. 6 Aus dem Grund hann aach die, wo schun dot sinn, die gutt Nohricht gepreddicht krieht. Die solle zwar wie Mensche – was de Leib angeht – gericht werre, awer wie Gott in ihrer geischtlich Exischdenz läwe.

Jeder soll die Fähichkäde, wo em Gott gebb hat, richdich insetze

7 Es Enn vun allem is nah! Behallen deshalb e klarer Kopp, un bleiwen nichdere, dass ner bäde känne! 8 Vor allem misse ner e ufrichdichi Lieb ferenanner hann! Die Lieb dut nämlich e Haufe Sinde zudegge. 9 Nemmen eich gäheseidich gäre als Gäscht uf, ohne se meggere, 10 un dienen enanner als gudde Verwalder vun der vilfäldich Gnad, wo eich vun Gott geschenkt werd. Jeder soll met der Fähichkät, wo em Gott gebb hat, diene. 11 Wann jemand preddicht, soll er weidergewe, was Gott gesaht hat. Wann jemand dient, soll er’s met der Kraft, wo vun Gott berätgestellt werd, mache. In allem soll Gott durch Jesus Chrischdus verherrlicht werre. Die Herrlichkät un die Macht geheere Jesus Chrischdus^a fer immer un ewich! Amen.

4:11^a Oder: geheere Gott.

Es Läd geheert met zu’me Läwe als Chrischt

12 Ihr Liewe, lossen eich durch die Feierprob, wo unner eich entstann is, net verunsichere, wie wann eich ebbes Ungewehnliches zustoße dät. 13 Freien eich im Gähedäl in dem Moß, wie ner an all dem Läd, wo Chrischdus durchgemacht hat, dälnemme känne! Dann känne ner eich aach emo riesich freie, wann sei Herrlichkät offebart werd.

14 Wann’er wäh Chrischdus seim Name schlecht gemacht werre, dirfe ner eich glicklich nenne! Der Geischt, wo herrlich is un vun Gott kommt, ruht nämlich uf eich. [Bei de Unglaiwiche werd er geläschdert, awer bei eich werd er verherrlicht.] 15 Nimand vun eich soll Schweres durchmache misse, weil er jemand umgebrung oder ebbes geklaut hat oder weil er sunscht ebbes, was bees is, gemacht hat oder weil er sei Nas in fremde Angelähehäde gesteckt hat! 16 Wann er awer Schweres durchmache muss, weil er Chrischt is, soll er Gott in der Sach verherrliche un sich net schame. 17 Die Zeit is nämlich komm, dass es Gericht in Gott seim Haus anfangt. Wann’s awer bei uns anfangt, was nemmt’s’enn dann emo for e Enn bei dene, wo der gutt Nohricht, wo vun Gott kommt, net glawe?

18 Un wann schun der, wo gerecht is,
nur met knabber Not gerett werd,
wo bleibt’enn dann der,
wo gottlos un sindich is, ab?

19 Die Mensche, wo Schweres durchmache misse, weil Gott das so will, solle ihr Seele deshalb Gott als dem, wo trei is un alles erschaff hat, anvertraue. Un dodebei solle se mache, was gutt is.

5

DE PETRUS RUFT DIE GLAIWICHE DODEZU UF, FER DEMIEDICH SE SINN UN SE DIENE: 5,1-9

E Wort an die Ällschde vun de Gemäne un an die Glaiwiche

1 Jetz noch e Wort an die Ällschde unner eich. Ich bin selwer aach e Ällschder un hann gesiehn, was Chrischdus durchgemacht hat. Aach an der Herrlichkät, wo offebart werre soll, kriehn ich mei Andäl. Deshalb bitt ich eich: 2 Hieden die Herd, wo eich vun Gott anvertraut wor is, un iewen die Ufsicht aus! Machen’s awer, weil ner wolle un net, weil ner misse! Machen’s aach, weil ner eifrich sinn un net, weil ner eich finanzielle Vordäle verschaffe wolle. 3 Spielen eich net als Herre iwer die Mensche, wo unner eierer Verantwordung sinn, uf! Gewen im Gähedäl de Herd e Vorbild! 4 Wann dann de owerschde Hirt erscheint, kriehn’er e Kron, wo herrlich is un wo ihr Scheenhät net verliert.

5 Genauso ihr Jingere, ordnen eich de Ällschde unner! Ihr solle eich allegar äner em annere unnerordne un an de Demut feschthalle. Gott widersetzt sich nämlich dene, wo iwerheblich sinn, awer de Demiediche schenkt er Gnad. 6 Stellen eich deshalb demiedich unner Gott sei gewaldichi Hand! Dann kann er eich aach groß mache, wann die Zeit dodefor komm is. 7 Laden alles, was eich Sorje macht, bei Gott ab! Gott dut nämlich fer eich sorje!

8 Bleiwen nichdere un wachsam! Eier Geechner, de Deiwel, streift nämlich do erum wie e Leeb, wo brillt. Er sucht jemand, wo er fresse kann. 9 Widerstehn em met eme feschde Glawe! Ihr wisse doch, dass eier Geschwischder uf de ganz Welt esselwe Läd durchstehn misse.

DE PETRUS WINSCHT GOTT SEI SEECHE UN LOBT DE HERR: 5,10-14

Seeche un Grieß

10 Gott erweist uns awer sei ganzi Gnad un hat uns dodezu beruf, fer sei ewichi Herrlichkät met em se däle, weil mer Chrischdus Jesus geheere. Wann’er e kurzi Zeit Schweres durchgemacht hann, stellt er eich wider her un dut eich stark mache. Er gebt eich Kraft un stellt eich uf e feschder Grund. 11 Gott steht fer immer un ewich die Herrlichkät un die Macht zu! Amen.

12 Ich bin dodevun iwerzeicht, dass de Silvanus e treier Bruder is. Der hat mer geholf, fer eich kurz se schreiwe. Ich hann eich Mut mache un eich bestädiche wolle, dass die Gnad, wo eich vun Gott geschenkt werd un wo ner drinn stehn, die richdich is.

13 Die Gemän do in Babylon, wo sesamme met eich vun Gott ausgewählt wor is, un de Markus, mei Bub im Glawe,^a losse eich grieße. 14 Grießen ihr eich unnernanner met dem Kuss, wo ausdrickt, dass ner eich lieb hann.

5:13^a De Johannes Markus, em Barnabas sei Kusseng. Der hat aach es Markusevangelium geschrieb (vgl. Apg 12,12.25; 13,13; 15,37-39; Kol 4,10; Phlm 24). Das Wort Bub dut wahrscheinlich bedeide, dass de Markus durch de Petrus zum Glawe an de Jesus komm is.

Ich winsche eich, wo ner Chrischdus Jesus geheere, allegar Friede! Amen.