Westpfälzisch-südsaarländische Bibel Es lewennische Wort (ELW) – 1. Johannes

Am Enn vum eerschde Johrhunnert hann falsche Lehre iwer die Person vum Jesus un iwer de chrischtliche Glawe immer meh Beachdung gefunn. Sogar in de Gemäne sinn so Ansichde oft met erer groß Bereitschaft un ohne geprieft se werre iwernumm wor. Manche Irrlehrer hann zum Beispiel abgestritt, dass Jesus Chrischdus, Gott sei Sohn, e Mensch aus Flääsch un Blut war. Aus dem Grund macht de Aposchdel Johannes in do dem Brief deitlich, uf was es beim chrischtliche Glawe ankommt un an was mer Chrischde erkennt: Chrischde bekenne, dass Gott Mensch wor is un uns sei Lieb erwies hat, wie er sei Läwe fer uns hergebb hat. Se hann sei Lieb selwer erfahr un wolle se an annere weidergewe.

De Johannes erinnert in Kabidel 2, Vers 6 an die Konsequenze, wo so e Erfahrung met sich bringt: „Wer also behaupde dut: ‚Ich bleiwe met Gott verbunn!’, soll aach selwer so läwe, wie Jesus Chrischdus geläbt hat.“

1

DE JOHANNES SCHREIBT IWER’S LEWENNICHE WORT: 1,1-4

De Jesus is das Wort, wo’s Läwe schenkt

1 Es war vun Anfang an do. Mir hann’s schwätze geheert u’met unsere eichene Aue gesiehn. Mir hann’s betracht un hann met unsere Hänn drangefahr: das Wort, wo’s Läwe schenkt. 2 Es Läwe is erschien, u’mir hann’s gesiehn. Mir dun’s bestädiche un verkinniche eich es ewiche Läwe, wo beim Vadder war un uns erschien is. 3 Was mer gesiehn un schwätze geheert hann, du’mer eich verkinniche, dass aach ihr met uns Gemänschaft hann känne. Un die Gemänschaft, wo mer metenanner hann, besteht aach me’m Vadder u’met seim Sohn Jesus Chrischdus. 4 Mir schreiwe eich das do, fer eier Fräd vollkomme se mache.

DE JOHANNES DUT’S LÄWE IN DE GEMÄNSCHAFT MET GOTT BESCHREIWE: 1,5-2,17

Gott is Licht

5 Do die Botschaft ha’mer vun Chrischdus geheert un dun se eich verkinniche: Gott is Licht, un bei Gott gebt’s absolut kä Dunggelhät. 6 Wa’mer behaupde: „Mir hann Gemänschaft met Gott!“ un läwe weider in de Dunggelhät, dann liehe mer un mache net, was wohr is. 7 Läwe mer awer im Licht, so wie Gott im Licht is, dann ha’mer Gemänschaft metenanner, un’s Blut vun Jesus Chrischdus, seim Sohn, dut uns vun allem, was sindich is, reiniche.

8 Wa’mer behaupde: „Mir dun nie sindiche!“, verfiehre mer uns selwer, un die Wohrhät is net in uns. 9 Gewe mer awer unser Sinde zu, dann is Gott trei un gerecht, dass er uns die Sinde vergebt un uns vun jeder Ungerechdichkät reinicht. 10 Wa’mer behaupde: „Mir hann net gesindicht!“, stelle mer Gott als Liehner hin, un das, was er gesaht hat, is net in uns!

2

De Jesus setzt sich fer uns in

1 Mei liewe Kinner! Ich schreiwe eich das do, weil ich will, dass ner net sindiche. Wann awer doch jemand sindicht, dann ha’mer äner, wo sich beim Vadder fer uns insetzt: Jesus Chrischdus, wo gerecht is. 2 Jesus Chrischdus is nämlich das Opfer, wo unser Sinde uf die Seit schafft. Er is das awer aach fer die Sinde vun de ganz Welt un net nur fer unser Sinde.

3 Wa’mer uns an das halle, was Gott gebott hat, wisse mer dodedurch, dass mer Gott kenne. 4 Wer behaupde dut: „Ich kenne Gott!“ un hallt sich net an das, was Gott gebott hat, is e Liehner. In so’me Mensch is net die Wohrhät! 5 Awer in dem, wo sich an das hallt, was Gott gesaht hat, is die Lieb, wo vun Gott kommt, wirklich zum Ziel komm.^a Mir erkenne dodran, dass mer met Gott verbunn sinn. 6 Wer also behaupde dut: „Ich bleiwe met Gott verbunn!“, soll aach selwer so läwe, wie Jesus Chrischdus geläbt hat.

2:5^a Oder: is die Lieb zu Gott wirklich vollkomme wor.

Das Neie un zugleich Alde, was Gott gebott hat

7 Ihr liewe Geschwischder! Ich schreiwe eich nix, was Gott eerscht vor kurzem angeordnet hat. Ich schreiwe eich im Gähedäl ebbes, was er schun vor langer Zeit gebott hott un was ner vun Anfang an hodde. Das, was er schun vor langer Zeit angeordnet hat, is die Botschaft, wo ner [vun Anfang an] geheert hann. 8 Un doch schreiw ich eich ebbes, was Gott eerscht vor kurzem gebott hat un was sich in Chrischdus un in eich als wohr erweist. Die Dunggelhät vergeht nämlich, un’s wirkliche Licht scheint schun.

9 Wer behaupde dut: „Ich läwe im Licht!“ un hasst sei Bruder oder sei Schweschder, der läbt immer noch in de Dunggelhät. 10 Nur wer sei Bruder oder sei Schweschder lieb hat, bleibt im Licht, un bei dem^a gebt’s nix, was annere^b zu Fall bringe kännt. 11 Wer awer sei Bruder oder sei Schweschder hasst, läbt in de Dunggelhät un tappt im Dunggele. Der wäß aach net, wo er hingeht, weil die Dunggelhät sei Aue geblendt hat.

2:10^a Oder: un im Licht.

2:10^b Oder: was ne.

Chrischde un die Welt

12 Ich schreiwe eich, ihr Kinner, weil ner eier Sinde wäh Chrischdus vergebb krieht hann. 13 Ich schreiwe eich, wo ner Vadder sinn, weil ner Chrischdus, wo schun vun Anfang an do war, kenne. Ich schreiwe eich, ihr junge Mannsleit, weil ner de Deiwel^a in die Knie gezwung hann. 14 Ich schreiwe eich, ihr Kinner, weil ner de Vadder kenne. Ich hann eich, wo ner Vadder sinn, geschrieb, weil ner Chrischdus, wo schun vun Anfang an do war, kenne. Ich hann eich, ihr junge Mannsleit, geschrieb, weil ner stark sinn. Was Gott gesaht hat, bleibt in eich, un ihr hann de Deiwel in die Knie gezwung.

2:13^a Wärtlich: de Beese. Genauso in Vers 14.

15 Ihr solle die Welt un das, was in de Welt is, net lieb hann!^a Wer die Welt nämlich lieb hat, hat die Lieb zum Vadder^b net in sich, 16 weil nix vun dem, was in de Welt is, vum Vadder kommt. Die Luscht vun unserer sindich Nadur, es Verlange vun de Aue un e iwerheblicher Läwensstil – das kommt alles vun de Welt. 17 Un die Welt vergeht met ihrer Luscht. Wer awer macht, was Gott will, läbt fer immer!

2:15^a Met de Welt is an do der Stell net die Erd an sich gemännt un aach net die Mensche, wo uf de Erd läwe. Met de Welt is im negadive Sinn alles gemännt, was gäh Gott gericht is un sich gäh Gott stellt, alles, was vum Beese beherrscht werd un bewuscht oder unbewuscht em Deiwel dient.

2:15^b Oder: hat die Lieb, wo vum Vadder kommt.

DE JOHANNES MAHNT ZUM DURCHHALLE IM GLAWE: 2,18-3,24

De Johannes warnt vor’m falsche Messias

18 Ihr Kinner, die letscht Stunn hat geschlah! Ihr hann geheert, dass de falsche Messias emo kommt, un bis jetz sinn schun e Haufe falsche Messiasse ufgeträt. Dodran erkenne mer, dass die letscht Stunn geschlah hat. 19 Die falsche Messiasse sinn zwar aus unsere Reihe hervorgang, awer se hann net wirklich zu uns geheert. Wann se nämlich zu uns geheert hädde, wäre se bei uns geblieb. Es hat awer ans Licht komme solle, dass käner vun’e zu uns geheert hat. 20 Eich awer hat Chrischdus^a, wo heilich is, gesalbt, un ihr wisse^b alles. 21 Ich schreiwe eich net, weil ner net wisse, was wohr is. Ich schreiwe eich im Gähedäl, grad weil ner das wisse un weil aus de Wohrhät nix kommt, was geloh is.

2:20^a Oder: Gott.

2:20^b Oder: verstehn.

22 Wer is also der, wo lieht? Doch wohl der, wo abstreide dut, dass de Jesus de Messias is! Wer de Vadder un de Sohn abweist, is de falsche Messias! 23 Jeder, wo de Sohn abweist, hat aach de Vadder net. Wer awer de Sohn anerkennt, hat aach de Vadder. 24 Fer eich gilt: Was ner vun Anfang an geheert hann, soll in eich bleiwe.^a Wann das, was ner vun Anfang an geheert hann, in eich bleibt, dann bleiwe aach ihr me’m Sohn u’me’m Vadder verbunn. 25 Un was uns de Sohn^b zugesaht hat, is es ewiche Läwe.

2:24^a Das hääscht die aposchdolisch Verkinnichung, wo im Neie Teschdament feschtgehall is.

2:25^b Oder: Un was uns Gott.

26 Das do schreiw ich eich iwer die Leit, wo eich verfiehre wolle. 27 Fer eich gilt awer: De Heiliche Geischt, wo eich Chrischdus^a demet gesalbt hat,^b bleibt in eich, un ihr brauche eich vun nimand belehre se losse.^c De Heiliche Geischt dut eich im Gähedäl in allem unnerweise. Was er eich beibringt, is^d wohr un net geloh. Deshalb solle ner so met Chrischdus verbunn bleiwe, wie’s eich de Heiliche Geischt^e beigebrung hat.

2:27^a Oder: Gott.

2:27^b Wärtlich: Die Salwung, wo ner vun ihm krieht hann.

2:27^c E Anspielung uf gnoschdische Sekde. Die hann Leit geschickt gehat, wo de Mensche beigebrung hann, dass die Erkenntnis (Gnosis), wo se vermiddele, heilsnotwennich wär.

2:27^d Wärtlich: Wie eich die Salwung selwer iwer alles belehrt, so is es.

2:27^e Wärtlich: wie’s eich die Salwung.

Bleiwen trei!

28 Jo, ihr liewe Kinner, bleiwen met Chrischdus verbunn! Dann känne mer zuversichtlich sinn, wann er erscheint. Dann misse mer uns aach net vor’m schame, wann er widerkommt. 29 Wann’er wisse, dass Chrischdus^a gerecht is, dann erkennen doch aach: Jeder, wo macht, was richdich is, hat Gott zum Vadder.

2:29^a Oder: Gott.

3

Chrischde sinn Gott sei Kinner

1 Guggen emo, wie groß die Lieb is, wo Gott, de Vadder, uns entgähgebrung hat! Mir solle sei Kinner genennt werre. Wann uns die Welt net kennt, leiht das dodran, dass’e Gott^a net erkannt hat. 2 Ihr Liewe, mir sinn jetz schun Gott sei Kinner! Gott hat uns awer noch net gewies, was mer späder emo sinn. Äns wisse mer awer: Wann Chrischdus erscheint, si’mer emo so wie er. Mir siehn’e dann nämlich so, wie er wirklich is. 3 Jeder, wo do die Hoffnung hat – e Hoffnung, wo uf Chrischdus ausgericht is –, dut sich selwer reiniche, weil Chrischdus aach rein is.

3:1^a Oder: Chrischdus.

4 Wer sindicht, lehnt sich gäh Gott sei Gesetz uf. Se sindiche dut nämlich bedeide, dass mer sich gäh sei Gesetz uflehnt! 5 Ihr wisse awer, dass Chrischdus erschien is, fer unser Sinde uf die Seit se schaffe. In Chrischdus selwer gebt’s nix, was sindich is. 6 Wer met Chrischdus verbunn bleibt, heert uf se sindiche. Wer awer weiderhin sindicht, hat Chrischdus net gesiehn un aach net erkannt.

7 Ihr liewe Kinner, lossen eich vun nimand verfiehre! Wer macht, was richdich is, is gerecht, genauso wie Chrischdus gerecht is. 8 Wer awer sindicht, geheert em Deiwel, weil de Deiwel schun vun Anfang an gesindicht hat. Gott sei Sohn is extra dodefor erschien, fer dem, was de Deiwel uf die Bän stellt, e Enn se mache. 9 Wer Gott zum Vadder hat, heert uf se sindiche. Es Erbgutt vun seim Vadder^a bleibt nämlich in em. Er kann net weidersindiche, weil Gott sei Vadder is. 10 Mer kann also erkenne, wer Gott sei Kinner un wer die Kinner vum Deiwel sinn: Jeder, wo net macht, was richdich is, un wer sei Bruder oder sei Schweschder net lieb hat, geheert net zu Gott.

3:9^a Wärtlich: De gättliche Some.

Mensche, wo Gott geheere, hann sich lieb

11 Das do is nämlich die Botschaft, wo ner vun Anfang an geheert hann: Mir solle enanner lieb hann! 12 Mir dirfe awer net so sinn wie de Kain, wo em Deiwel geheert^a un sei Bruder umgebrung hat. Un fer was hat er ne umgebrung? Weil das, was er gemacht hat, bees war! Was sei Bruder gemacht hat, war awer gerecht.

3:12^a Wärtlich: wo aus dem, wo bees is, war.

13 Mei liewe Geschwischder! Wunneren eich net, wann eich die Welt hasst! 14 Mir wisse, dass mer vum Dod ins Läwe eniwergang sinn, weil mer die Geschwischder lieb hann. Wer sei Bruder oder sei Schweschder net lieb hat, bleibt in de Gewalt vum Dod. 15 Jeder, wo sei Bruder oder sei Schweschder hasst, is e Märder, un ihr wisse, dass kä Märder ewiches Läwe hat, wo in em bleibt. 16 Was Lieb is, ha’mer dodran erkannt, dass Jesus Chrischdus sei Läwe fer uns hergebb hat. Deshalb solle aach mir unser Läwe fer unser Geschwischder hergewe! 17 Angenumm, jemand hat alles, was er fer se läwe brauch un sieht, dass sei Bruder oder sei Schweschder in Not is, un angenumm, er hat kä Erbarme met seim Bruder oder met seiner Schweschder. Wie kann’enn do die Lieb, wo vun Gott kommt,^a in em bleiwe? 18 Mei liewe Kinner! Wolle mer uns doch net nur met Worde u’me’m Mundwerk lieb hann! Wolle mer uns im Gähedäl aach met dem, was mer mache, u’met dem, was wohr is, lieb hann!

3:17^a Oder: die Lieb zu Gott.

Chrischde sinn zuversichtlich

19 Dodran erkenne mer nämlich, dass mer zu de Wohrhät geheere, un dodemet bringe mer unser Herz vor Gott zur Ruh. 20 Wann uns unser Herz nämlich verurdält, wisse mer: Gott is greßer wie unser Herz, un er wäß alles! 21 Ihr Liewe, wann uns unser Herz net verurdält, si’mer Gott gähiwer zuversichtlich. 22 Er gebt uns dann aach alles, wo mer ne denoh frohe, weil mer uns an das, was er gebott hat, halle un mache, was ihm gefallt.

23 Was Gott gebiede dut, is das do: Mir solle an de Name vun seim Sohn Jesus Chrischdus glawe, u’mir solle enanner lieb hann – so wie Gott^a uns das ufgedrah hat. 24 Wer sich an das hallt, was Gott gebott hat, bleibt met Gott verbunn, un Gott bleibt met ihm verbunn. Un dass Gott met uns verbunn bleibt, erkenne mer an dem Geischt, wo er uns gebb hat.

3:23^a Oder: Chrischdus.

4

DE JOHANNES GEBT E UNNERWEISUNG IWER DE GLAWE ALS WÄÄCH ZUM LÄWE: 4,1-5,12

Priefen die Geischder!

1 Ihr Liewe, glawen net jedem Geischt! Priefen awer die Geischder, fer eraussefinne, ob se vun Gott sinn! Es sinn nämlich schun e Haufe falsche Prophede in die Welt enausgang. 2 Gott sei Geischt erkenne ner dodran: Jeder Geischt, wo anerkennt, dass Jesus Chrischdus i’me menschliche Leib komm is, is vun Gott, 3 un jeder Geischt, wo net anerkennt, dass Jesus Chrischdus i’me menschliche Leib komm is, is net vun Gott. Das is de Geischt vum falsche Messias, wo ner devun geheert hann, dass er komme dät. Un de Geischt vum falsche Messias is jetz schun in de Welt.

4 Ihr liewe Kinner! Ihr geheere zu Gott un hann die falsche Prophede in die Knie gezwung. Der, wo in eich is,^a is nämlich stärger wie der, wo in de Welt is.^b 5 Die falsche Prophede geheere zu de Welt. Deshalb schwätze se aach so wie die Welt, un die Welt heert uf se. 6 Mir geheere awer zu Gott, un wer Gott kennt, heert uf uns. Wer net zu Gott geheert, heert net uf uns. Dodran erkenne mer de richdiche Geischt un de falsche Geischt.

4:4^a Das is Gott oder Jesus Chrischdus oder de Heiliche Geischt.

4:4^b Das is de Deiwel, wo im un durch de falsche Messias wirkt.

Gott is die Lieb!

7 Ihr Liewe, wolle mer enanner doch lieb hann! Die Lieb kommt nämlich vun Gott, un jeder, wo annere lieb hat, hat Gott zum Vadder un kennt Gott. 8 Wer annere awer net lieb hat, hat Gott net erkannt. Gott is nämlich die Lieb. 9 Dass Gott uns lieb hat, hat er dodedurch gewies, dass er sei änzicher Sohn in die Welt geschickt hat, dass mer durch dene läwe solle. 10 Die Lieb besteht net dodrinn, dass mir Gott lieb hodde. Se besteht im Gähedäl dodrinn, dass er uns lieb hott un dass er sei Sohn als Opfer geschickt hat, wo unser Sinde uf die Seit schafft.

11 Ihr Liewe, wann uns Gott so lieb hott, misse aach mir enanner lieb hann! 12 Nimand hat Gott jemols gesiehn. Wa’mir enanner lieb hann, bleibt Gott met uns verbunn. Dann is aach sei Lieb in uns zum Ziel komm. 13 Mir wisse, dass mer met Gott verbunn bleiwe un dass er met uns verbunn bleibt, weil er uns Andäl an seim Geischt gebb hat. 14 Außerdem ha’mer gesiehn un dun bestädiche, dass de Vadder de Sohn geschickt hat, fer die Welt se redde. 15 Wann jemand anerkennt, dass de Jesus Gott sei Sohn is, dann bleibt Gott met ihm verbunn, un er bleibt met Gott verbunn. 16 Mir erkenne also, dass uns Gott lieb hat, un dun dodran glawe.

Gott is die Lieb, un wer sich vun de Lieb bestimme losst, bleibt met Gott verbunn, un Gott bleibt met ihm verbunn. 17 Dodedurch is die Lieb bei uns zum Ziel komm, so dass mer am Daach vum Gericht zuversichtlich sinn känne. In do der Welt si’mer nämlich so wie Jesus Chrischdus. 18 Angscht gebt’s in de Lieb käni. Die Lieb, wo vollkomme is, dut im Gähedäl die Angscht verdreiwe! Die Angscht rechent nämlich met erer Strof. Die Lieb is awer bei dem, wo Angscht hat, noch net zum Ziel komm.

19 Mir hann Gott lieb, weil Gott uns seeerscht lieb hott. 20 Wann jemand behaupde dut: „Ich hann Gott lieb!“ un hasst sei Bruder oder sei Schweschder, dann is der e Liehner! Wer nämlich sei Bruder oder sei Schweschder, wo er sieht, net lieb hat, der kann doch Gott, wo er net sieht, net lieb hann, oder doch? 21 Chrischdus^a hat uns do die Anweisung gebb: Wer Gott lieb hat, soll aach sei Bruder oder sei Schweschder lieb hann!

4:21^a Oder: Gott.

5

Was mir glawe, behallt de Siech iwer die Welt

1 Jeder, wo glabt, dass de Jesus de Messias is, hat Gott zum Vadder, un jeder, wo sei Vadder lieb hat, hat aach die annere Kinner vun seim Vadder lieb. 2 Mir erkenne dodran, dass mer Gott sei Kinner lieb hann, wa’mer Gott lieb hann un uns an das halle, was er gebott hat. 3 Gott lieb se hann dut nämlich bedeide, dass mer uns an das, was er gebott hat, halle, un dem, was Gott gebott hat, nohsekomme is net schwär. 4 Jeder, wo Gott zum Vadder hat, dut nämlich die Welt in die Knie zwinge, un das, was mer glawe, is der Siech, wo iwer die Welt triumfiert hat. 5 Wer dut also die Welt in die Knie zwinge? Doch nur der, wo glabt, dass de Jesus Gott sei Sohn is!

Gott dut Jesus Chrischdus dreifach bestädiche

6 Er selwer, Jesus Chrischdus, is der, wo met Wasser u’met Blut komm is. Er is awer met Wasser u’met Blut komm un net nur met Wasser,^a un de Heiliche Geischt dut das bestädiche. De Heiliche Geischt is nämlich die Wohrhät. 7 Es gebt drei, wo’s [im Himmel] bestädiche: [de Vadder, es Wort un de Heiliche Geischt, un die drei sinn äns. 8 Un es gebt drei, wo’s uf de Erd bestädiche:] de Geischt, es Wasser un’s Blut, un die drei stimme metenanner iwerin. 9 Wa’mer schun die Zeiheaussaache vun Mensche annemme, dann hat das, was Gott als Zeihe aussaht, noch vil meh Gewicht. Es is nämlich die Aussaach, wo er iwer sei Sohn gemacht hat. 10 Wer an Gott sei Sohn glabt, hat in sich, was Gott als Zeihe ausgesaht hat. Wer Gott awer net glabt, stellt ne als Liehner hin, weil er der Aussaach, wo Gott iwer sei Sohn gemacht hat, net glabt.

5:6^a Wahrscheinlich es Wasser vun seiner Daf un’s Blut vun seim Dod. Wie de Jesus gedaft wor is, hat sei Dienscht vor alle Leit angefang, un wie er gestorb is, is sei Dienscht zum Abschluss komm. Manche Ausleher siehn im Wasser un im Blut aach e Hinweis uf Johannes 19,34, annere äner uf die Daf un’s Naachtmohl als Erinnerung an das, was de Jesus fer uns gemacht hat.

11 Was Gott als Zeihe ausgesaht hat, besteht dodrinn, dass er uns es ewiche Läwe gebb hat un dass es ewiche Läwe in seim Sohn is. 12 Wer de Sohn hat, hat’s ewiche Läwe. Wer Gott sei Sohn awer net hat, hat aach es ewiche Läwe net.

DE JOHANNES KOMMT UF’S SINDICHE UN UF’S EWICHE LÄWE SE SCHWÄTZE: 5,13-21

Gott dut unser Gebät erheere

13 Eich, wo ner an de Name vun Gott seim Sohn glawe, schreiw ich das do. Ihr solle wisse, dass ner es ewiche Läwe hann, [un ihr solle weiderhin an de Name vun Gott seim Sohn glawe]! 14 Das do is die Zuversicht, wo mer Gott gähiwer hann: Er heert uf uns, wa’mer noh ebbes frohe, wo met dem, was er will, iwerinstimmt. 15 Un wa’mer wisse, dass er uf uns heert – ganz egal, noh was mer frohe –, dann wisse mer aach, dass er uns das, wo mer ne denoh gefroht hann, schun gebb hat.

16 Angenumm, jemand sieht, wie sei Bruder oder sei Schweschder met ebbes, wo de Dod net noh sich zieht, sindicht. Dann soll er bäde. Gott gebt dem Bruder oder der Schweschder dann es Läwe. Er gebt’s awer nur dene Leit, wo met ebbes sindiche, wo de Dod net noh sich zieht. Es gebt ebbes, was sindich is un was de Dod noh sich zieht,^a un ich sahn net, dass mer dodefor bäde soll. 17 Alles, was ungerecht is, is sindich, awer net alles, was sindich is, zieht de Dod noh sich.

5:16^a Dodebei geht’s meechlicherweis um e bewuschdes Feschthalle an erer gottlos Instellung un a’me gottlose Verhalle, so wie’s bei de Irrlehrer de Fall war – e vorsetzlichi Ablehnung, fer sich zu Jesus Chrischdus se bekehre. Es is awer aach meechlich, dass de Johannes Glaiwiche im Au hat, wo Gott me’m physische Dod bestroft, weil se trotz grundsätzlicher Bekehrung immer weidersindiche (vgl. 1Kor 11,30).

E dreifachi Gewisshät

18 Mir wisse, dass nimand, wo Gott zum Vadder hat, weidersindicht. Wer Gott zum Vadder hat, schitzt sich im Gähedäl selwer, un de Deiwel^a kann em nix anhann. 19 Mir wisse, dass mer zu Gott geheere un dass de Deiwel die ganz Welt in seiner Gewalt hat. 20 U’mir wisse, dass Gott sei Sohn komm is un uns Insicht gebb hat, dass mer de wohrhafdiche Gott erkenne. Mir sinn me’m wohrhafdiche Gott u’met seim Sohn Jesus Chrischdus verbunn. Jesus Chrischdus is de wohrhafdiche Gott un’s ewiche Läwe.

5:18^a Wärtlich: de Beese. Genauso in Vers 19.

21 Ihr Kinner, nemmen eich in Acht vor de Gätze! Amen.