Westpfälzisch-südsaarländische Bibel Es lewennische Wort (ELW) – Judas

Es is net bekannt, an wene do der Brief gericht is. Das Problem, wo de Judas anschwätzt, is awer klar. Er warnt vor Gemäneglieder, wo die Erkenntnis, dass Gott gnädich is, als Freibrief fer e verkommenes, liederliches Läwe missbraucht hann un wo nur uf ihr eichener Vordäl aus ware. Se hann stolze Redde gehall un e Haufe Anhänger gefunn. Deshalb ermahnt de Judas aach die Gemän, dass’e sich im Glawe net irr mache losse un ihr Vertraue nur uf Gott setze soll.

In de Verse 24 un 25 schreibt er: „Gott kann eich awer beschitze, dass ner net falle, un er kann eich so vor sei Herrlichkät stelle, dass ner die Fräd all allän hann un dass nix an eich aussesetze is. Er hat ganz allän Weishät, un er dut uns redde. Ihm stehn die Herrlichkät un die Hohhät, die Gewalt un die Macht zu – jetz un fer immer! Amen.“

1

DE JUDAS GRIESST SEI LÄSER: 1-2

1 Das do schreibt de Judas, wo Jesus Chrischdus dient un e Bruder vum Jakobus is. Ich schreiwe an die Leit, wo vun Gott beruf wor sinn. Gott, de Vadder, hat eich heilich gemacht un dut eich fer Jesus Chrischdus erhalle. 2 Ich bäde dodrum, dass er eich sei Erbarme un Friede un Lieb im Iwerfluss zudäl werre losst.

DE JUDAS WARNT VOR LEIT, WO FALSCHE LEHRE VERBRÄDE: 3-16

Manche Leit leihe ganz denäwe!

3 Ihr Liewe! Ich hann schun lang vorgehat, fer eich ebbes iwer die Reddung se schreiwe, wo mer allegar Andäl dran hann. Awer ich halle’s jetz fer needich, fer eich met do dem Brief se ermahne. Kämpfen fer dene Glawe, wo dene Mensche, wo heilich sinn, än fer allemo iwergebb wor is! 4 E paar Leit hann sich nämlich heimlich bei eich ingeschlich, wo vun de Heilich Schrift schun vor langer Zeit fer das Gericht, wo ich gleich beschreiwe, vorgemerkt wor sinn. Se wolle nix vun Gott wisse un missbrauche die Gnad vun unserm Gott dodezu, fer ausgeloss se läwe. Se dun aach Gott, de änziche Herrscher, un Jesus Chrischdus, unser Herr, verleichne.

Wie Gott met dene Mensche verfahrt, wo nix vun ihm wisse wolle

5 Ihr wisse das do zwar schun, awer ich will eich trotzdem dran erinnere: De Herr hat sei Volk seeerscht aus Ägypde gerett, awer späder hat er die, wo net geglabt hann, umkomme gelosst. 6 Aach die Engel, wo ihr Wohnsitz ufgebb un net an ihrm Machtbereich feschtgehall hann, hat er met ewiche Fessele in de diefscht Dunggelhät gefang gehall, fer se am große Gerichtsdaach se richde. 7 In ähnlicher Art un Weis wie die Engel, wo net an ihrm Machtbereich feschtgehall hann, hann sich aach die Mensche vun Sodom un Gomorra un die vun dene Städt drum erum de Hurerei hingebb un hann met Wese vun erer anner Art verkehrt. Se diene als Beispiel un misse jetz als Strof es ewiche Feier erdulde.

Noch annere Beispiele vun Mensche, wo vun Gott nix hann wolle wisse

8 Uf dieselwe Art un Weis dun aach do die Leit, wo sich bei eich ingeschlich hann, agiere! Als Ergebnis vun dem, was se dräme, dun se sich an ihrm eichene Leib vergehn. Außerdem dun se sich käner Herrschaft unnerordne un läschdere die herrliche Wese im Himmel. 9 Sogar de Erzengel Michael hat sich net getraut, fer e abwerdendes Urdäl iwer de Deiwel se fälle, wie er Streit met em krieht u’met em iwer de Leichnam vum Mose verhannelt hat. Er hat im Gähedäl gesaht: „De Herr soll dich strofe!“

10 Do die Leit läschdere awer iwer alles, was se net kenne, un se gehn an dem zugrunn, was se wie’s unverninfdiche Vieh vun Nadur aus verstehn. 11 Wie schrecklich fer se! Se gehn nämlich dene Wääch, wo de Kain aach ingeschlah hott. Wäh Geld dun se sich dem Irrdum, wo de Bileam aach schun drinn verfang war, verschreiwe, un weil se wie de Korach ufsässich sinn, komme se emo um.

12 Do die Leit sinn gefährliche Riffe, wann’er beinanner sinn, fer metenanner se esse. Ohne sich se scheie, stobbe se sich voll un warde nur sich selwer uf. Se sinn Wolge ohne Wasser, wo vum Wind hin- un hergedrieb werre, un Bäm im Spätherbscht, wo kä Frucht bringe un zwämo abgestorb un entwurzelt sinn. 13 Stirmische Meereswelle, wo ihr eichene Schanddade an Land spiele, sinn se un Sterne, wo vun ihrer Bahn abkomm sinn. Gott hat fer immer die diefscht Dunggelhät fer se reserviert!

14 Aach de Henoch, wo in de sibt Generation noh’m Adam geläbt hat, hat schun prophedisch vun’e geschwätzt. „Bassen emo uf!“, hat er gesaht. „De Herr kommt met seine heiliche Zehdausende, 15 fer die Mensche allegar se richde un fer all die vun’e, wo vun ihm nix wisse wolle, se iwerfiehre. Er dut se vun ihrm ganze gottlose Dreiwe, wo se sich demet vergang hann, iwerfiehre un vun all dene harde Worde, wo sie – die gottlose un sindiche Mensche – gäh ne gesaht hann.“

16 Do die Leit meggere nur un beschwäre sich iwer ihr Schicksal. Dodebei losse se sich vun ihrer Luscht beherrsche. Aus ihrm Mund komme großspuriche Worde, un se schleime sich bei annere in, weil se nur uf ihr eichener Vordäl aus sinn.

DE JUDAS RUFT DEZU UF, FER GOTT TREI SE BLEIWE UN SICH UM GESCHWISCHDER SE KIMMERE, WO IN GEFAHR SINN: 17-23

17 Ihr awer, ihr Liewe, sollde eich an die Sache erinnere, wo die Aposchdele vun unserm Herr Jesus Chrischdus schun im Voraus angekinnicht hann! 18 Se hann eich nämlich erklärt, dass in de letscht Zeit emo Mensche komme, wo spodde un sich vun ihrer eichen gottlos Luscht beherrsche losse. 19 Un genau die Leit sinn’s, wo Spaldunge unner eich verursache! Es sinn driebhafde Mensche, wo de Heiliche Geischt net hann.

20 Ihr awer, ihr Liewe, solle eich uf eier hoochheilichder Glawe^a ufbaue! Bäden so, wie eich de Heiliche Geischt fiehrt,^b 21 un hallen an der Lieb, wo Gott zu uns hat, fescht!^c Warden dodruf, dass ner vun unserm Herr Jesus Chrischdus in seiner Barmherzichkät ins ewiche Läwe ingefiehrt werre!

1:20^a Das hääscht, uf das Glawensgutt, wo die Aposchdele de Glaiwiche in de heiliche Schrifde iwerliwert hann (vgl. Vers 3).

1:20^b Oder: Bäden in de Kraft vum Heiliche Geischt.

1:21^c Oder: un hallen dodran fescht, fer Gott lieb se hann!

22 Erbarmen eich iwer die äne, wo zweifele, 23 un redden annere reschbektvoll dodedurch, dass ner se aus em Feier reiße! Hassen aach das Kläd, wo vun ihrer sindich Nadur dreggich gemacht wor is!^a

1:23^a Das hääscht: Sinn vorsichdich, dass ner net vun ihre Sinde angesteckt werre.

DE JUDAS DUT GOTT LOWE: 24-25

24 Gott kann eich awer beschitze, dass ner net falle, un er kann eich so vor sei Herrlichkät stelle, dass ner die Fräd all allän hann un dass nix an eich aussesetze is. 25 Er hat ganz allän Weishät, un er dut uns redde. Ihm stehn die Herrlichkät un die Hohhät, die Gewalt un die Macht zu – jetz un fer immer! Amen.