Westpfälzisch-südsaarländische Bibel Es lewennische Wort (ELW) – Lukas

Wer Gott noh dem froht, was er brauch, krieht’s vun Gott

5 Dodenoh hat de Jesus zu seine Jinger gesaht: „Angenumm, äner vun eich hat e Freind, un er geht midde in de Naacht bei sei Freind un saht zu’m: ‚Freind, lehn mer mo drei Laib Brot. 6 E Freind vu’mir, wo uf de Durchräs is, is grad bei mich komm, un ich hann nix, was ich em anbiede kann.’ 7 Angenumm, der Freind drinn im Haus saht dodruf: ‚Loss mich in Ruh! Die Dir is schun zu, u’mei Kinner un ich sinn schun im Bett. Ich kann jetz net ufstehn un der ebbes gewe.’ 8 Ich sahn eich: Wann er schun net ufsteht un em ebbes gebt, weil er sei Freind is, steht er dann doch uf un gebt em, was er brauch, weil er net in Ruh gelosst werd vu’m.“

9 „Aach ich sahn eich: Bidden, dann kriehn’er! Suchen, dann finne ner! Klobben an, dann werd eich ufgemacht! 10 Jeder, wo bidde dut, krieht nämlich. Wer sucht, finnt, un wer anklobbt, dem werd ufgemacht. 11 Wer vun eich, wo ner Vadder sinn, gebt seim Bub schun e Stän, wann der froht, ob er Brot hann kann? Oder wer gebt em anstell vu’me Fisch e Schlang? 12 Oder e Skorpion, wann er froht, ob er e Ei hann kann? 13 Wann ihr also, wo ner wirklich bees sinn, das ferdich bringe, fer eiere Kinner gudde Geschengge se gewe, wiffel meh gebt de Vadder im Himmel dann de Heiliche Geischt dene, wo ne noh’m frohe!“

Kann sich de Deiwel selwer ausdreiwe?

14 Ämo hat de Jesus e Dämon ausgedrieb, wo net hat känne schwätze. Wie der Dämon ausgefahr war, hat der Mann, wo bis dohin kä Wort erausgebrung hat, geschwätzt. Do hann sich die Leit dodriwer gewunnert. 15 E paar vun’e hann awer gesaht: „Der dreibt die Dämone durch de Belzebub, de Owerschde vun de Dämone, aus.“ 16 Annere hann de Jesus uf die Prob stelle wolle un hann e Zääche vum Himmel vu’m verlangt.

17 De Jesus hat awer gewisst, was se gedenkt hann. Deshalb hat er zu ne gesaht: „Jedes Reich, wo met sich selwer net änich is, geht zugrunn, un e Famillie, wo gäh sich selwer schafft, flieht ausenanner. 18 Wann also de Deiwel met sich selwer net änich is, wie kann dann sei Reich bestehn? Ihr sahn doch, ich dät die Dämone durch de Belzebub ausdreiwe. 19 Wann ich die Dämone wirklich durch de Belzebub ausdreiwe, durch wene dreiwe se’nn dann eier Anhänger aus? Eier eichene Leit sinn deshalb emo die, wo eich richde! 20 Gott sei Reich is awer bei eich komm, wann ich die Dämone durch Gott sei Finger ausdreiwe.“

21 „Solang wie e starger Mann, wo e Haufe Waffe hat, sei Haus un Hof bewacht, is alles, was er hat, im Friede. 22 Wann’e awer äner, wo stärger is wie er, angreift un iwerwäldicht, hollt der em sei Waffe, wo er sich druf verloss hat, allegar ab un dält aus, was er met Gewalt an sich gebrung hat.“

23 „Wer net uf meiner Seit steht, is gäh mich, un wer net met mer sammelt, straut ausenanner.“

Was bassiert, wann e unsauwerer Geischt serickkommt

24 „Wann e unsauwerer Geischt aus eme Mensch erausgefahr is, zieht er durch Geechende, wo’s kä Wasser gebt, un sucht sei Ruh. Awer weil er kä Ruh finnt, saht er sich: ‚Ich gehn serick i’mei Haus, wo ich devun fortgang bin.’ 25 Un wann er dann kommt, finnt er das Haus sauwer gekehrt un scheen serechtgemacht vor. 26 Dann geht er un hollt siwe annere Geischder, wo noch schlimmer sinn wie er selwer. Sesamme ziehe se dann in un hause dort metenanner. So geht’s dem Mensch am Enn schlimmer wie vorher.“

Wer wirklich glicklich is

27 Wie de Jesus so geschwätzt hat, hat em e Fra, wo unner dene Leit war, zugeruf: „Glicklich is der Leib, wo dich gedrah hat, un die Bruscht, wo du dran gedrunk hascht!“ 28 „Jo“, hat de Jesus do gesaht, „awer noch glicklicher sinn die, wo heere, was Gott saht, un sich dran halle!“

Es Zääche vum Prophet Jona

29 Wie immer meh Leit sesammegelaf sinn, hat de Jesus gesaht: „Do die Generation is bees! Se verlangt e Zääche, awer se krieht kä anneres Zääche wie nur es Zääche vum Prophet Jona. 30 Wie de Jona nämlich e Zääche fer die Mensche vun Ninive war, so bin aach ich, de Menschesohn, emo e Zääche fer do die Generation. 31 Im Gericht steht die Keenichin aus em Side^a emo gäh die Mannsleit vun do der Generation uf un dut se verurdäle. Se is nämlich vum Enn vun de Erd komm, fer se heere, was de Salomo Schlaues se sahn hott. Do is awer äner, wo greßer is wie de Salomo! 32 Im Gericht stehn aach emo die Mannsleit vun Ninive gäh do die Generation uf un dun se verurdäle. Se hann ihr Instellung nämlich geännert, wie de Jona gepreddicht hat. Do is awer äner, wo greßer is wie de Jona!“

11:31^a Die Keenichin vun Saba. Saba leiht im sidliche Arabie un war seinerzeit es Enn vun de bekannt Welt (vgl. 1Keen 10,1-3).

Vum Licht un vun de Dunggelhät. Es Gleichnis vum Au

33 „Nimand steckt e Eellamp an un stellt se dann an e geheimer Platz oder unner e Kiwel. Er stellt se im Gähedäl uf e Stänner, dass die Leit, wo erinkomme, ebbes siehn känne. 34 Es Au gebt deim Leib Licht. Wann dei Au klar is, is aach dei ganzer Leib voll Licht. Wann’s awer bees is, is dei ganzer Leib voll Dunggelhät. 35 Bass deshalb uf, dass es Licht in dir kä Dunggelhät is! 36 Wann also dei ganzer Leib voll Licht is un wann kä Däl a’m dunggel is, dann is er ganz voll Licht, wie wann dich e Lamp met ihrm Schein anstrahlt.“

De Jesus geht met de Pharisäer u’met dene Mannsleit, wo em Mose sei Gesetz unnerrichde, ins Gericht

37 De Jesus war noch am schwätze, do hat ne e Pharisäer ingelad, fer bei’m se Meddaach se esse. Do is de Jesus bei dem Pharisäer ins Haus gang un hat sich an de Disch gehuckt. 38 Der Pharisäer hat sich awer gewunnert, wie er gesiehn hat, dass sich de Jesus vor’m Esse net als Eerschdes gewäscht hat.^a 39 Do hat de Herr zu’m gesaht: „Oh, ihr Pharisäer! Ihr halle zwar eier Becher un Schissele auße sauwer, awer in eich drinn sinn’er nur druf aus, fer se klaue un fer schlecht se sinn. 40 Wie dumm sinn’er dann?! Gott, wo gemacht hat, was auße is, hat doch aach gemacht, was inne is, oder net? 41 Gewen liewer als Almose, was in eierm Becher un in eierer Schissel is, dann is fer eich alles rein!“

11:38^a Sich vor’m Esse se wäsche war e relischjeeser jidischer Brauch, wo die Pharisäer fer wichdich gehall hann.

42 „Awer weh eich, ihr Pharisäer! Ihr gewe de zehnde Däl vun eiere Minzplänzjer un Raudestäckcher un vun sämtliche Gardekraitcher, awer fer’s Recht un die Lieb zu Gott dun’er nix. Mer sollt awer das äne mache un das annere net unnerlosse! 43 Weh eich, ihr Pharisäer! Ihr wolle in de Synagooche gäre die vorderschde Plätz hann un uf de Marktplätz gegrießt werre. 44 Weh eich, [ihr Schriftgelehrde un Pharisäer, ihr Scheinheiliche]! Ihr sinn wie Gräwer, wo mer nemmeh sieht. Die Mensche gehn iwer se, ohne dass’e’s merge.“^a

11:44^a Dodedurch hann sich die Judde relischjees verunreinicht. Gräwer sinn deshalb gekennzäächent wor.

45 Dodruf hat äner vun dene, wo em Mose sei Gesetz unnerricht hann, zu’m gesaht: „Määschder, met dem, was du do sahscht, dusch’e aach uns beleidiche!“ 46 De Jesus hat awer weidergeschwätzt: „Weh aach eich, wo ner em Mose sei Gesetz unnerrichde! Ihr lade de Mensche Laschde uf, wo se fascht net drahn känne, selwer mache ner awer kä Finger dodefor krumm. 47 Weh eich! Eier Vorfahre hann die Prophede umgebrung, un ihr baue aweile Grabmäler fer se. 48 Dodemet dun’er bestädiche, was eier Vorfahre gemacht hann, un dun’s aa’noch billiche. Eier Vorfahre hann die Prophede datsächlich umgebrung, un ihr baue Grabmäler fer se. 49 Deshalb hat Gott in seiner Weishät^a aach gesaht: ‚Ich schigge Prophede un Aposchdele bei se. E paar vun’e bringe se um, un annere dun se verfolche.’ 50 Deshalb werd aach emo vun do der Generation es Blut vun all dene Prophede gefordert, wo vun do an, wo Gott die Welt gemacht hat, umgebrung wor sinn, 51 angefang vum Abel seim Blut bis hin zum Blut vum Sacharia,^b wo zwische’m Brandopferaldar un em Tembel umkomm is. Jo, ich sahn eich: Vun do der Generation werd das ganze Blut emo serickgefordert!“

11:49^a Gott in seiner Weishät. Wärtlich: die Weishät, wo Gott hat. Manche Ausleher vermude, dass es dodebei um de Tidel vu’me Buch oder um e Stell i’me Buch geht.

11:51^b Im hebräische Alde Teschdament is de Abel de eerschde un de Sacharia de letschde Prophet, wo umgebrung wor is (vgl. 1Mo 4,1-16; 2Chr 24,20-21).

52 „Weh eich, wo ner em Mose sei Gesetz unnerrichde! Ihr hann dene Schlissel fortgeschafft, wo mer die Dir zum Haus vun de Erkenntnis demet ufsperre kann. Selwer sinn’er net eningang, un die, wo eningewollt hann, hann’er aa’noch dran gehinnert.“

53 Wie de Jesus das zu dene Leit, wo in dem Haus dort beinanner ware, gesaht hott, hann die Schriftgelehrde un Pharisäer angefang, fer ne bees se triweliere un iwer all meechliche Sache aussefrohe. 54 So hann se ne abgeheert un versucht, fer ebbes aus seiner Redd eraussepigge, wo se ne demet anklaache kännde.

12

De Jesus warnt vor de Scheinheilichkät vun de Pharisäer

1 Derweil sinn Dausende Mensche beinannergelaf, so dass äner dem annere uf die Fieß getappt hat. Do hat de Jesus angefang se schwätze, seeerscht nur zu seine Jinger: „Nemmen eich in Acht vor’m Sauerdääch vun de Pharisäer, das hääscht vor dene ihrer Scheinheilichkät. 2 Es is nämlich nix zugedeckt, was net emo ufgedeckt werd, un es is nix versteggelt, was net bekannt gemacht werd. 3 Deshalb heert mer aach änes Daachs am hellichde Daach alles, was ner im Dunggele sahn, un was ner hinner zune Dire pischbere, werd vun de Hausdächer gepreddicht.“

Vor wem mer wirklich Angscht hann sollt

4 „Eich awer, meine Freinde, sahn ich: Ihr brauche kä Angscht vor dene se hann, wo eier Leib umbringe, awer dodenoh nix meh mache känne. 5 Ich will eich awer weise, vor wem ner Angscht hann solle: Vor Gott misse ner Angscht hann, wo die Macht hat, fer eier Leib umsebringe un eich dann in die Häll se schmeiße. Jo, ich sahn eich: Vor dem misse ner Angscht hann! 6 Werre net finnef Spatze fer zwä kläne Minze^a verkaf? Un trotzdem vergesst Gott net äner vun’e! 7 Awer bei eich hat er sogar jedes Hoor uf em Kopp gezehlt. Deshalb brauche ner kä Angscht se hann. Ihr sinn vil meh wert wie e Haufe Spatze.“

12:6^a Wärtlich: fer zwä Assaria. E Assarion war’s zwättklänschde reemische Geldstick, wo zu der Zeit im Umlaf war.

8 „Ich sahn eich: Jeder, wo sich vor de Mensche zu mir bekennt, zu dem dun aach ich, de Menschesohn, mich emo vor Gott seine Engel bekenne. 9 Wer awer vor de Mensche net zu mir steht, zu dem stehn aach ich, de Menschesohn, net vor Gott seine Engel.“

10 „Jeder, wo ebbes gäh mich, de Menschesohn, saht, krieht das vergebb. Wer awer iwer de Heiliche Geischt läschdert, dem vergebt Gott net!“

11 „Machen eich kä Sorje dodriwer, wie oder met was ner eich verdeidiche oder was ner sahn solle, wann se eich vor die Synagoochegerichde un vor die schläfe, wo herrsche un die Macht hann. 12 Wann’s druf ankommt, bringt eich de Heiliche Geischt nämlich alles bei, was ner sahn solle.“

De Jesus warnt dodevor, fer nur uf’s Geld aus se sinn

13 Dodrufhin hat äner, wo unner dene Leit war, zum Jesus gesaht: „Määschder, sah doch meim Bruder, er soll die Erbschaft met mer däle!“ 14 De Jesus hat zu’m gesaht: „Mei Guttschder, wer hat mich dann als Richder iwer eich ingesetzt, oder fer eier Erbschaft se verdäle?“ 15 Dodenoh hat de Jesus zu de Leit^a gesaht: „Bassen uf un nemmen eich dodevor in Acht, fer immer meh hann se wolle. Es Läwe vu’me Mensch hängt nämlich net dodevun ab, dass er alles im Iwerfluss hat.“

12:15^a Oder: zu seine Jinger. Genauso in Vers 16.

Es Gleichnis vu’me reiche Bauer, wo sich verkehrt verhall hat

16 Dodezu hat de Jesus de Leit e Gleichnis verzehlt: „Uf em Land vu’me reiche Mann hat emo es Kore arich gutt gestann. 17 Do hat sich der Mann gefroht: ‚Was soll ich’enn jetz mache? Ich hann net genunk Platz, fer mei Frucht unnersebringe.’ 18 Am Enn hat er sich gesaht: ‚Ich wäß aweile, was ich mache! Ich reiße mei Scheiere ab un baue greßere. Dort bring ich dann alles, was mer nei gewachs is, u’mei alder Vorrot unner. 19 Un dann sahn ich mer: Mei Liewer, du hascht jetz e großer Vorrot uf Laacher, wo fer e Reih Johre langt. Ruh dich emo aus! Ess, drink, un genieß es Läwe!’ 20 Awer Gott hat zu’m gesaht: ‚Wie dumm du doch bischt! Noch in do der Naacht werd dei Seel vun der gefordert. Wem geheert’enn dann alles, was du fer dich uf e Haufe gescharrt hascht?’“

21 „So geht’s emo jedem, wo nur uf sei eichener Gewinn aus, awer vor Gott gar net reich is.“

Machen eich kä unneediche Sorje!

22 Dodrufhin hat de Jesus zu seine Jinger gesaht: „Aus dem Grund sahn ich eich: Machen eich kä Sorje iwer eier Läwe un dodriwer, was ner esse solle, aach net iwer eier Leib un iwer das, was ner andun solle. 23 Es Läwe is nämlich wichdicher wie’s Esse un de Leib wichdicher wie die Kläder. 24 Guggen eich doch nur emo die Rawe an: Die säe nix un dun nix ernde. Se hann aach kä Speicher un kä Scheiere, un trotzdem dut se Gott ernähre. Un ihr sinn so vil meh wert wie die Vächel! 25 Wer vun eich kann sich dodedurch, dass er sich Sorje macht, sei Läwe aach nur e klänes Stickche länger mache? 26 Wann’er also net emo so ebbes Klänes ferdichbringe, fer was mache ner eich’enn dann Sorje wäh all dem annere? 27 Guggen eich doch nur emo an, wie die Lilie wachse! Die schaffe nix un dun sich aach kä Kläder nähe, awer ich sahn eich: Sogar de Salomo war in all seiner Pracht net so scheen angedun wie äni vun ihne. 28 Wann Gott awer schun es Gras so scheen andut, wo heit uf em Feld steht un morje in de Oowe geschmiss werd,^a wiffel meh gebt er eich dann Kläder, ihr met eierm kläne Glawe! 29 Frohen deshalb net noh dem, was ner esse oder was ner dringge solle, un machen eich net worres! 30 Hinner all dem sinn die Mensche in de Welt her, wo Gott net kenne. Eier Vadder wäß, dass ner das alles brauche. 31 Eich muss es awer um Gott sei Reich gehn! Dann gebt eich Gott all das annere noch debei.“

12:28^a Die Mensche in Israel hann zu der Zeit nur wenich Feierholz gehat. Deshalb hann se aach es verdruggelde Gras als Brennmaderial benutzt.

Dort, wo eier Schatz is, is aach eier Herz

32 „Ihr brauche kä Angscht se hann, weil ner nur e kläni Herd sinn! Eierm Vadder gefallt’s nämlich, fer eich sei Reich se gewe. 33 Verkafen, was ner hann, un gewen’s Geld de Arme! Machen eich Geldbeidel, wo net alt werre, das hääscht: Lehen eich e Schatz im Himmel an, wo net kläner werd! Im Himmel kommt nimand, wo ebbes klaue will, an dene Schatz, un die Modde känne ne net fresse. 34 Dort, wo eier Schatz is, is nämlich aach eier Herz.“

Warden dodruf, dass de Jesus widerkommt!

35 „Lossen de Girdel um de Bauch geschnallt, un lossen eier Lichder net ausgehn! 36 Ihr misse wie Mensche sinn, wo dodruf warde, dass ihr Herr vun erer Hochzeit serickkommt. Wann er kommt un an de Dir klobbt, soll em sei Diener nämlich sofort ufmache känne. 37 Glicklich sinn die Diener se nenne, wo vun ihrm Herr wach vorgefunn werre, wann er kommt. Das äne sahn ich eich: Er binnt sich e Schirz um un gebt ne e Platz an seim Disch. Dann kommt er un dut se bediene. 38 Villeicht kommt er awer eerscht midde in de Naacht oder sogar eerscht, wann’s schun wider hell werd. Wann er se dann aach noch wach finnt, sinn se glicklich se nenne!“

E Vergleich met eme Hausherr, wo gutt ufbasst

39 „Denggen dran: E Hausherr kann net wisse, in was for rer Stunn jemand kommt, wo ebbes klaue will. Wann er das wisse dät, kännt er jo wach bleiwe un braicht net zuselosse, dass in sei Haus ingebroch werd. 40 Aus dem Grund misse ihr aach immer barat sinn! Ich, de Menschesohn, komme nämlich in erer Stunn, wo ner net demet rechene.“

E Vergleich met eme treie u’met eme untreie Diener

41 Do hat de Petrus de Jesus gefroht: „Herr, männsch’e met do dem Gleichnis nur uns Aposchdele oder aach all die annere?“ 42 De Herr hat do gesaht: „Wer is’enn der treie un verstänniche Verwalder, wo vum Herr iwer sei Diener gestellt werd, dass er ne beizeide das Esse ausdäle soll, wo ne zusteht? 43 Wann de Herr kommt un merkt, dass sei Knecht macht, was er ufgedrah krieht hat, dann ka’mer dene Knecht glicklich nenne. 44 Das äne sahn ich eich: Sei Herr losst ne dann alles, was er hat, verwalde. 45 Awer angenumm, der Knecht saht sich: ‚Mei Herr kommt so ball noch net!’, un fangt an, fer Mannsleit wie Weibsleit vun de Dienerschaft se schlahn. Un angenumm, er esst un drinkt un dut sich die Zeit met Wein verdreiwe. 46 Dann kommt sei Herr a’me Daach, wo er net uf ne warde dut, un in erer Stunn, wo er net kennt. Sei Herr hackt ne dann in Stigger un losst ne sei Schicksal met dene däle, wo net glawe.“

47 „Wann e Knecht wäß, was sei Herr will, un sich net barathallt un aach net macht, was sei Herr will, dann krieht er vil Schläh! 48 Wann e Knecht awer net wäß, was sei Herr will un ebbes macht, was Schläh verdient, krieht er wenich Schläh! Vun jedem, wo vil krieht hat, sucht mer nämlich vil, un vun dem, wo vil iwerdrah krieht hat, verlangt mer umso meh.“

De Jesus dut Trennunge verursache

49 „Ich bin komm, fer Feier uf die Erd se bringe, un wie froh wär ich, wann’s schun brenne dät! 50 Ich muss awer noch e Daf metmache, un was is mer das e schwäri Lascht, bis das gedun is! 51 Männe ner wirklich, ich wär komm, fer Friede uf die Erd se bringe? Nä, sahn ich eich, im Gähedäl, ich bin komm, fer e Riss unner eich se bringe! 52 Vun jetz an sinn nämlich i’me Haus finnef Leit unänich metenanner. Drei sinn gäh zwä un zwä gäh drei. 53 De Vadder is gäh de Sohn un de Sohn gäh de Vadder, die Mudder gäh die Dochder un die Dochder gäh die Mudder, die Schwiehrmudder is gäh ihr Schwiehrdochder un die Schwiehrdochder gäh ihr Schwiehrmudder.“

Die Zääche vun de Zeit

54 Dodenoh hat de Jesus zu de Leit gesaht: „Wann’er vum Weschde her Wolge komme siehn, sahn’er gleich: ‚Es gebt Rähn!’ Un so kommt’s dann aach. 55 Un wann die Luft aus em Side kommt, sahn’er: ‚Es werd häß!’ Un aach das dut sich instelle. 56 Ihr Scheinheiliche! Es Aussiehn vum Himmel un vun de Erd känne ner richdich uffasse, awer wie kommt’s nur, dass ner do die Zeit net richdich uffasse känne?“

Mach beizeide Friede met deim Geechner!

57 „Fer was dun’er dann net vun eich selwer aus urdäle, was richdich is? 58 Wann du met äm, wo dich anklaacht, vor Gericht gehscht, dann gebb der noch unnerwäächs Mieh, fer änich me’m se werre, sunscht schläft er dich vor de Richder, un de Richder gebt dich an de Gerichtsdiener, un de Gerichtsdiener schmeißt dich ins Gefängnis. 59 Ich sahn der: Dort kommsch’e net eraus, bis de dei Schuld bis uf die letscht Minz^a abbezahlt hascht.“

12:59^a Wärtlich: bis uf de letschde Lepton. Das war’s klänschde Geldstick, wo zu der Zeit im Umlaf war.

13

Umkehre oder umkomme

1 Zu der Zeit sinn e paar Leit bei de Jesus komm un hann em vun dene Galiläer verzehlt, wo vum Piladus umgebrung gelosst wor sinn, wie se grad ihr Opfer gebrung hann. Ihr Blut hat sich met dem vun ihre Opferdiere vermischt. 2 Do hat de Jesus zu dene Leit, wo em das verzehlt hann, gesaht: „Männe ner villeicht, do die Galiläer wäre schlimmere Sinder geween wie all die annere Galiläer, weil ne das zugestoßt is? 3 Nä, sahn ich eich, awer wann ihr eier Instellung net ännere, komme ner allegar aach so um! 4 Oder die achtzeh Mensche, wo de Schiloacher Turm^a drufgefall is un se dotgeschlah hat – männe ner, die hädde meh Schuld uf sich gelad gehat wie all die annere Leit, wo in Jerusalem wohne? 5 Nä, sahn ich eich, awer wann ihr eier Instellung net ännere, komme ner allegar aach so um!“

13:4^a De Schiloacher Turm hat in de Näh vum Schiloacher Weiher gestann gehat, ganz im Side vun Jerusalem.

Es Gleichnis vu’me unfruchtbare Feichebam

6 Dodenoh hat de Jesus do das Gleichnis verzehlt: „E Mann hat emo e Feichebam gehat, wo in seim Weinberch gestann hat. Er is komm un hat geguckt, ob Feiche dran sinn, awer er hat kän gefunn. 7 Do hat er zu seim Winzer gesaht: ‚Guck emo, jetz komm ich schun drei Johr un suche Feiche an do dem Bam, awer ich finne kän. Mach ne um! Fer was soll er’nn noch länger de Boddem aussauche?’ 8 ‚Herr’, hat sei Winzer dodruf zu’m gesaht, ‚loss ne das do Johr noch stehn. Ich grawe de Boddem um ne erum uf un gewe’m Dinger. 9 Villeicht krieht er dann noch Feiche. Wann net, kannsch’e ne immer noch ummache.’“

De Jesus macht a’me Sabbat e verkribbeldi Fra gesund

10 A’me Sabbat hat de Jesus emo die Leit in erer Synagooch unnerwies. 11 Dort war e Fra, wo vu’me Geischt besess war. Der Geischt hat se schun achtzeh Johr lang krank gemacht gehat. Ihr Buggel war krumm, un se hat nemmeh grad stehn känne. 12 Wie de Jesus die Fra gesiehn hat, hat er se bei sich geruf un hat zu rer gesaht: „Fra, du bischt vun deiner Krankhät erleest!“ 13 Dann hat er die Hänn uf se geleht. Do is se uf de Stell grad wor un hat Gott gelobt. 14 De Synagoochevorsteher is awer bees wor, weil de Jesus die Fra am Sabbat gesundgemacht hat. Er hat zu de Leit gesaht: „Es gebt sechs Daache, wo fer se schaffe do sinn. An dene känne ner komme un eich gesund mache losse, awer net am Sabbat.“ 15 De Herr hat dodruf zu’m gesaht: „Du Scheinheilicher! Binnt net jeder vun eich am Sabbat sei Ochs oder sei Esel vum Fudderplatz los un fiehrt ne ans Wasser? 16 Un do die Fra, wo doch e Dochder vum Abraham is un wo vum Deiwel ganze achtzeh Johr lang gefesselt wor is – sollt mer die net am Sabbat vun ihre Fessele befreie dirfe?“

17 Wie de Jesus das gesaht hat, hat sich jeder schame misse, wo gäh ne war. Die Leit hann sich awer allegar iwer all die herrliche Sache gefreit, wo de Jesus gemacht hat.

Es Gleichnis vum Senneftkäre

18 Dodenoh hat de Jesus gesaht: „Wem is’enn Gott sei Reich ähnlich? Met was soll ich’s vergleiche? 19 Es is wie e Senneftkäre, wo e Mann geholl un in sei Garde gesät hat. Der Käre is ufgang un e großer Bam wor, un die Vächel unner’m Himmel hann ihr Neschder in seine Zweiche gebaut.“

Es Gleichnis vum Sauerdääch

20 Dodenoh hat de Jesus wider gesaht: „Met was soll ich Gott sei Reich vergleiche? 21 Es is wie Sauerdääch, wo e Fra geholl un heimlich unner e halwer Sack^a Mähl gemischt hat, bis der ganze Dääch sauer war.“

13:21^a Wärtlich: unner drei Sada. Das sinn ungefähr 22 Lider, noh erer anner Berechnung ungefähr 40 Lider.

Die eng Dir

22 Uf em Wääch noh Jerusalem is de Jesus vun äner Stadt in die anner un vun äm Dorf ins annere gezoh un hat sei Lehr gepreddicht. 23 Ämo hat ne jemand gefroht: „Herr, werre nur wenich Mensche gerett?“ Do hat er zu de Leit gesaht: 24 „Bemiehen eich met ganzer Kraft, fer durch die eng Dir in Gott sei Reich se gehn! Ich sahn eich nämlich: E Haufe Leit versuche emo, fer eninsekomme, awer se bringe’s net ferdich. 25 Wann de Hausherr emo ufgestann is un die Dir zugesperrt hat, stehn’er drauß un klobbe an de Dir un rufe: ‚Herr, Herr, mach uns uf!’ Awer de Hausherr saht eich dann: ‚Ich kenne eich net un wäß aach net, wo ner her sinn.’ 26 Dann fange ner so an un sahn: ‚Mir hann doch met der gess un gedrunk, un du hascht uf unsere Stroße dei Lehr gepreddicht.’ 27 De Hausherr saht dann zu eich: ‚Ich sahn eich: Ich kenne eich net un wäß aach net, wo ner her sinn! Machen, dass ner fortkomme, ihr allegar, wo ner mache, was net richdich is.’ 28 Drauß vor de Dir heile ner dann un klabbere met de Zänn, wann’er de Abraham, de Isaak un de Jakob un all die Prophede in Gott seim Reich siehn un bekäbbe, dass ner selwer drauß bleiwe misse. 29 Die Mensche komme emo vum Oschde un vum Weschde un vum Norde un vum Side un hugge sich in Gott seim Reich an de Disch. 30 Dann sinn manche vun de Letschde die Eerschde un manche vun de Eerschde die Letschde.“

De Jesus losst sich net vun seim Ufdraach abbringe

31 Am selwe Daach sinn e paar Pharisäer komm un hann zum Jesus gesaht: „Mach dich uf de Wääch, un sieh zu, dass de vun do fortkommscht! De Herodes will dich nämlich umbringe.“ 32 De Jesus hat zu ne gesaht: „Gehn un sahn dem Fuchs: ‚Äns musch’e wisse: Ich dreiwe heit un morje Dämone aus un mache Krangge gesund. Eerscht am dridde Daach bin ich am Ziel.’ 33 Awer heit un morje un iwermorje muss ich noch mei Wääch gehn. Es kann nämlich net sinn, dass e Prophet außerhalb vun Jerusalem umkommt.“

De Jesus klaacht sei Läd iwer Jerusalem

34 „Oh Jerusalem, oh Jerusalem! Du bringscht die Prophede um un duscht die stäniche, wo bei dich geschickt werre. Wie oft hann ich dei Kinner schun insammele wolle, so wie e Gluck ihr Biebelcher unner ihr Flidde insammelt, awer ihr hann net gewollt. 35 Guggen nur emo! Gott gebt eier Haus^a uf, un es werd ganz gabutt gemacht. Das äne sahn ich eich: Ihr sieh’mich nemmeh, bis die Zeit kommt, wo ner sahn: ‚Geseechent is der, wo im Name vum Herr kommt.’“

13:35^a Gemännt is entweder de Tembel oder die Stadt Jerusalem selwer.

14

De Jesus macht a’me Sabbat e Mann gesund, wo die Wassersucht hat

1 A’me Sabbat is de Jesus emo ins Haus vu’me hoochrangiche Pharisäer gang, fer dort se esse. Die Leit am Disch hann’e genau im Au gehat. 2 Uf ämo hat e Mann vor’m gestann, wo die Wassersucht hott.^a 3 Do hat de Jesus die Mannsleit, wo em Mose sei Gesetz unnerricht hann, un die Pharisäer angeguckt un hat se gefroht: „Is es erlabt, fer am Sabbat jemand gesund se mache?“ 4 Die Mannsleit, wo em Mose sei Gesetz unnerricht hann, un die Pharisäer hann em awer kä Antwort gebb. Do hat de Jesus dene Mann geholl un hat ne gesund gemacht un gehn gelosst. 5 Dodenoh hat er zu dene Mannsleit, wo em Mose sei Gesetz unnerricht hann, un zu de Pharisäer gesaht: „Wann äm vun eich e Esel oder e Ochs in de Brunne fallt, zieht er ne doch uf de Stell wider eraus, aach wann grad Sabbat is, oder net?“ 6 Aach dodruf hann se’m kä Antwort gewe känne.

14:2^a Das is e Krankhät, wo de Leib immer meh anschwelle losst.

E gudder Rot fer Gäscht

7 Wie de Jesus gemerkt hat, wie sich die Gäscht die beschde Plätz ausgesucht hann, hat er das als Vergleich benutzt un hat zu ne gesaht: 8 „Huck dich net uf de beschde Platz, wann du vun jemand uf e Hochzeitsfeier ingelad werscht. Es kännt nämlich jemand ingelad sinn, wo noch meh darstellt wie du. 9 Dann misst der, wo eich zwä ingelad hat, komme un zu der sahn: ‚Gebb dei Platz do dem Gascht!’ Dann dätscht du dich schame un mischt dich uf de letschde Platz hugge. 10 Nä, geh un huck dich gleich uf de letschde Platz, wann de ingelad werscht. Wann dann der kommt, wo dich ingelad hat, kann er zu der sahn: ‚Mei Gudder, rick emo weider do nuffer!’ Das bringt der dann Ehr bei dene in, wo met der am Disch hugge. 11 Jeder, wo sich selwer groß macht, werd nämlich klän gemacht, un wer sich selwer klän macht, der werd groß gemacht.“

E gudder Rot fer Leit, wo jemand inlade

12 Dodenoh hat de Jesus zu dem Mann, wo ne ingelad hott, gesaht: „Lad net dei Freinde oder dei Brieder un aach net dei Verwande oder reiche Nochbare in, wann de meddaachs oder owends e Esse machscht, sunscht lade die dich aach wider in, un dodemet hasch’e dann dei Lohn krieht. 13 Nä, lad Arme, Kribbel, Lahme un Blinde in, wann du e Esse machscht. 14 Dann ka’mer dich glicklich nenne. Die, wo arm, verkribbelt, lahm un blind sinn, hann nämlich nix, was se der serickgewe kännde. Gott gebt der awer emo e Belohnung dodefor, wann die Gerechde aus de Gräwer ufstehn.“

Es Gleichnis vum große Feschtesse

15 Wie äner vun dene, wo me’m Jesus sesamme am Disch gehuckt hann, das do geheert hat, hat er zu’m gesaht: „Glicklich is, wer’s Brot in Gott seim Reich esst!“ 16 Do hat de Jesus zu’m gesaht: „E Mann hat emo e großes Esse gericht un e Haufe Leit ingelad. 17 Wie’s Fescht hat solle anfange, hat er sei Diener fortgeschickt, fer de Gäscht Beschäd se sahn: ‚Kommen jetz! Es is schun alles hergericht!’ 18 Awer äner noh’m annere hat angefang, fer sich erausseschwätze. Der Eerschde hat zu dem Diener gesaht: ‚Ich hann grad e Stick Land kaf un muss unbedingt dorthin, fer mer’s ansegugge. Sei so gutt un nemm mer’s net iwel!’ 19 E annerer hat gesaht: ‚Ich hann finnef Ochsegespanne kaf un bin grad uf em Wääch, fer se se prowiere. Sei so gutt un nemm mer’s net iwel!’ 20 Noch e annerer hat gesaht: ‚Ich hann grad eerscht geheirat. Deshalb kann ich net komme.’“

21 „Dodrufhin is der Diener serickgang un hat seim Herr alles verzehlt, was er se heere krieht hat. Do is de Hausherr bees wor un hat zu seim Diener gesaht: ‚Geh schnell enaus uf die Stroße un Gasse vun de Stadt un holl all die erin, wo arm, verkribbelt, lahm un blind sinn.’ 22 Net lang dodenoh hat der Diener gemellt: ‚Ich hann alles gemacht, was du mer ufgedrah hascht, Herr, awer mir hann immer noch Platz.’ 23 ‚Dann geh uf die Landstroße un an die Zain’, hat de Herr zu dem Diener gesaht, ‚un schaff mer die Leit do erin! Mei Haus soll voll werre! 24 Äns sahn ich eich awer: Vun dene Mannsleit, wo ich seeerscht ingelad hott, krieht käner ebbes vu’meim Disch se esse!’“

Was es koscht, wa’mer me’m Jesus läwe will

25 Wie emo e Haufe Leit me’m Jesus gezoh sinn, hat sich de Jesus erumgedräht un hat zu de Leit gesaht: 26 „Wann jemand bei mich kommt un hat sei Vadder un sei Mudder, sei Fra un sei Kinner un sei Brieder un Schweschdere, jo sogar sei eichenes Läwe liewer wie mich, dann kann er net mei Jinger sinn. 27 Un wer sei Kreiz net draht un net hinner mer herkommt, kann aach net mei Jinger sinn.“

28 „Angenumm, äner vun eich will e Turm baue. Huckt der sich net seeerscht hin un iwerschlaht die Koschde, fer se siehn, ob er genunk Geld hat, fer ne aach hoochsebringe? 29 Wann er das net macht, leht er es Fundament un kann dene Turm dodenoh villeicht gar net ferdichbaue. Jeder, wo das sieht, fangt dann an, fer ne se verspodde. 30 ‚Der do hat angefang se baue’, saht er, ‚awer er hat’s net geschafft, fer ferdich se werre!’“

31 „Oder angenumm, e Keenich will losmarschiere, fer gäh e annerer Keenich Kriech se fiehre. Huckt der sich net seeerscht hin un iwerleht, ob er sich met seine zehdausend Mann gäh dene stelle kann, wo met zwansichdausend gäh ne ufmarschiert? 32 Wann er das net kann, schickt er e paar vun seine Leit, solang wie der annere Keenich noch weit fort is, un froht, ob mer net iwer e Friede verhannele kännt.“

33 „So kann also käner vun eich mei Jinger sinn, wann er sich net vun allem losreißt, was er hat.“

Vum Salz

34 „Es Salz is ebbes Guddes. Wann’s Salz awer sei Geschmack verliert, met was soll mer’m dann sei Wirzkraft serickgewe? 35 Mer kann’s dann nemmeh fer de Erdboddem un aach nemmeh fer de Komposchthaufe gebrauche. Die Leit schmeiße’s fort.“

„Wer Ohre hat fer se heere, soll heere!“

15

Es Gleichnis vu’me Schof, wo verlorgang is

1 Dodenoh sinn die Zällner un Sinder allegar beim Jesus beinannerkomm, fer em zuseheere. 2 Awer die Pharisäer un Schriftgelehrde hann gemeggert. „Der do gebt sich met Sinder ab un dut sogar met ne esse!“, hann se gesaht.

3 Do hat ne de Jesus do das Gleichnis verzehlt: 4 „Angenumm, jemand vun eich hat hunnert Schäf un verliert äns vun’e. Losst der net die 99 annere Schäf in de Wildnis serick un geht dem noh, wo verlorgang is? Sucht er’s net so lang, bis er’s finnt? 5 Un wann er’s gefunn hat, freit er sich un leht’s uf sei Schullere. 6 Wann er hämmkommt, ruft er sei Freinde un Nochbare sesamme un saht zu ne: ‚Freien eich met mer! Ich ha’mei Schof gefunn, wo verlorgang war.’ 7 Ich sahn eich: Genauso is aach emo im Himmel meh Fräd iwer äner änzicher Sinder, wo sei Instellung ännert, als wie iwer 99 Gerechde, wo’s net needich hann, fer ihr Instellung se ännere.“

Es Gleichnis vu’me wertvolle Geldstick, wo e Fra verlor un widergefunn hat

8 „Oder angenumm, e Fra hat zeh Silwerminze^a un verliert äni dodevun. Macht die net e Lamp an un kehrt’s ganze Haus un sucht genau, bis se das Geldstick finnt? 9 Un wann se’s gefunn hat, ruft se ihr Freindinne un Nochbarinne beinanner un saht: ‚Freien eich met mer! Ich ha’mei Geldstick gefunn, wo ich verlor hott.’ 10 Ich sahn eich: Genauso freie sich aach Gott sei Engel iwer äner änzicher Sinder, wo sei Instellung ännert.“

15:8^a Wärtlich: zeh Drachme. E Drachme dut eme Denar entspreche. Das is das, was zu der Zeit jemand pro Daach verdient hat. Jedi Fra in Israel, wo noch net verheirat war, hat so lang gespart, bis se zeh Drachme sesamme hott. Die hat se dann als Gähewert fer ihr Hochzeit zu erer Halskett sesammegebunn. So verstann hat de Verluscht vun so’me Geldstick e symbolischer Wert dargestellt un net nur e wirtschaftlicher.

Es Gleichnis vu’me Vadder un seine zwä Buwe

11 Dodenoh hat de Jesus gesaht: „E Mann hat emo zwä Buwe gehat. 12 Vun dene hat der Jingere zu seim Vadder gesaht: ‚Babba, gebb mer dene Däl vun allem, was mer hann un was mir zusteht!’ Do hat der Vadder unner ne ufgedält, was er hott.^a 13 Net lang dodenoh hat der Jingscht sei siwe Sache gepackt un hat sich uf de Wääch gemacht in e Land, wo weit fort war. Dort hat er in Saus un Braus geläbt un alles drufgebutzt, was er hott. 14 Un wie er alles verläbt hott, is in dem Land e großi Hungersnot ausgebroch, un es hat net lang gedauert, do is es em richdich dreggich gang. 15 Do is er bei äner gang, wo in dem Land gewohnt hat, un hat bei dem schaffe wolle. Der hat ne dodrufhin uf sei Felder geschickt, fer die Schwein se hiede.^b 16 Er wär froh geween, wann er sich an dene Fudderscheele^c, wo die Schwein gefresst hann, hätt känne satt esse, awer nimand hat em ebbes dodevun gebb. 17 Do is er in sich gang un hat gesaht: ‚Wiffel Leit, wo bei meim Vadder schaffe, hann meh wie genunk se esse, un ich komme do noch um vor lauder Hunger! 18 Ich mache mich uf de Wääch un gehn bei mei Vadder un sahn zu’m: Babba, ich ha’mich am Himmel un an dir versindicht. 19 Ich bin’s nemmeh wert, dass mich jemand dei Bub nennt. Behannel mich wie äner vun dene Leit, wo bei der schaffe.’ 20 Dodrufhin hat er sich uf de Wääch gemacht un is bei sei Vadder gang.“

15:12^a Es Erbdäl schun se verlange, eeb de Vadder gestorb war, war zu der Zeit zwar erlabt, hat sich awer net geheert.

15:15^b Uf’s Feld geschickt se werre, fer die Schwein se hiede, war fer e Judd ebbes Entehrendes, weil die Schwein zu de unreine Diere geheert hann (vgl. 3Mo 11,7).

15:16^c Die Fruchthilse vum Johannisbrotbam. Die hann e sießlicher Geschmack. Arme Mensche hann se zu der Zeit vermutlich aach gess.

„Wie er awer noch weit fort war, hat ne sei Vadder schun gesiehn, un er hat ne arich gedauert. Er is em entgähgelaf un um de Hals gefall un hat em e Kuss gebb. 21 ‚Babba’, hat der Bub do zu’m gesaht, ‚ich ha’mich am Himmel un an dir versindicht. Ich bin’s nemmeh wert, dass mich jemand dei Bub nennt.’ 22 Sei Vadder hat awer zu seine Knechde gesaht: ‚Bringen emo es beschde Kläd her, un dun’s em an! Steggen em aach e Ring an sei Finger, un gewen em Schuh fer sei Fieß! 23 Un hollen das Kalb, wo mer gemäscht hann, un dun’s schlachde! Mir wolle esse un e Fescht feiere! 24 Mei Bub war nämlich dot un is wider lewennich wor! Er war verlor un is widergefunn wor!’ Dodenoh hann se angefang fer se feiere.“

25 „Dem Vadder sei älderer Bub war awer noch uf em Feld. Wie der hämmgang un in die Näh vum Haus komm is, hat er die Danzmussik geheert. 26 Do hat er äner vun dene Knechde geruf un hat gefroht, was das dann soll. 27 Der Knecht hat zu’m gesaht: ‚Dei Bruder is komm, un dei Vadder hat das Kalb schlachde gelosst, wo mer gemäscht hann, weil er ne gesund serickkrieht hat.’ 28 Do is der äldere Bub bees wor un hat net ins Haus gehn wolle. Awer sei Vadder is erauskomm un hat em gutt zugeschwätzt. 29 Dodruf hat er zu seim Vadder gesaht: ‚So vil Johre plotz ich jetz schun wie e Sklave fer dich un hann nie obbeniert, wann de mich ebbes gehääscht hascht, awer du hascht mer noch nie aach nur e Hammel gebb, dass ich met meine Freinde e Feschtche hätt känne feiere. 30 Un jetz, wo der do hämmkomm is, dei Bub, wo dei Geld met Hure drufgebutzt hat, jetz hasch’e gleich das Kalb, wo mer gemäscht hann, fer ne schlachde gelosst!’ 31 ‚Bub’, hat sei Vadder do zu’m gesaht, ‚du bischt doch immer bei mer, un alles, was mein is, is aach dein. 32 Mir hann uns doch freie un e Fescht feiere misse! Dei Bruder war nämlich dot un is wider lewennich wor. Er war verlor un is widergefunn wor.’“

16

Es Gleichnis vu’me unehrliche Verwalder

1 Dodenoh hat de Jesus zu seine Jinger gesaht: „E reicher Mann hat emo e Verwalder gehat. Dem hann se bei dem reiche Mann die Schuld gebb, er dät ebbes, was seim Herr geheert, unnerschlahn. 2 Do hat der reiche Mann dene Verwalder rufe gelosst un hat zu’m gesaht: ‚Was muss ich’enn do vun dir heere? Leh mer emo die Abrechnunge vun deiner Verwalderei vor! Du kannscht nemmeh länger mei Verwalder sinn!’ 3 Do hat sich der Verwalder gesaht: ‚Was soll ich’enn jetz mache? Mei Herr nemmt mer die Verwaldung ab. Ich bin net stark genunk, fer e Feld erumsegrawe, un ich schame mich, fer se beddele. 4 Doch! Jetz wäß ich, was ich mache muss, dass mich die Leit in ihre Haiser ufnemme, wann ich als Verwalder abgesetzt bin!’ 5 Dodrufhin hat er äner noh’m annere vun dene, wo bei seim Herr Schulde hodde, bei sich geruf. ‚Wiffel bisch’enn du meim Herr schullich?’, hat er de Eerschde gefroht. 6 ‚Hunnert Fässjer^a Oliveeel’, hat der do gesaht. Do hat der Verwalder zu’m gesaht: ‚Do hasch’e dei Schuldschein! Huck dich jetz gleich do hin, un schreib fuffzich!’ 7 Dann hat er de Nägschde gefroht: ‚Un du, wiffel bischt du em schullich?’ ‚Hunnert Sack^b Wäz’, hat der gesaht. Do hat der Verwalder zu’m gesaht: ‚Do hasch’e dei Schuldschein! Schreib achtzich!’“

16:6^a Wärtlich: Bat. E Bat sinn ungefähr 37 Lider.

16:7^b Wärtlich: Kor. E Kor sinn ungefähr 370 Lider.

8 De Herr^a hat dene unehrliche Verwalder gelobt, weil er sich so schlau verhall hat.^b

16:8^a Me’m Herr kann anstatt vum Jesus aach der reiche Mann vun Vers 1, also de Chef vun dem Verwalder, gemännt sinn. In dem Fall misst der ganze Vers in die wärtlich Redd vum Jesus eningenumm werre.

16:8^b Noh’m domoliche Brauch war der Verwalder dodezu berechdicht.

„Die Mensche, wo nur fer do die Welt läwe, sinn nämlich im Umgang met ihresgleiche schlauer wie die Mensche, wo zum Licht geheere.“

Wie mer me’m Geld umgehn sollt

9 „Ich sahn eich: Machen eich Freinde met eierm Mammon, wo so vil Unrecht dran kläbt, dass ner in die ewiche Zelde ufgenumm werre, wann’s met eich zu Enn geht!“

10 „Wer in de klänschde Sache zuverlässich is, is aach zuverlässich, wann’s um vil geht, un wer bei de klänschde Sache unehrlich is, is es aach, wann’s um vil geht. 11 Wann’er also im Umgang me’m ungerechde Geld net zuverlässich sinn, wer dut eich’enn dann de wirkliche Reichdum anvertraue? 12 Un wann’er im Umgang met dem, was eme annere geheert, net zuverlässich sinn, wer gebt eich’enn dann das, was eich zusteht?“

13 „Kä Haussklave kann zwä Herre diene. Entweder dut er dene äne hasse un hat dene annere gäre, oder er hallt zu dem äne un dut dene annere verachde. Ihr känne net Gott un em Geld diene.“

Die Pharisäer un das Gesetz, wo vun Gott gebb wor is

14 Das Ganze hann aach die Pharisäer geheert, wo arich uf’s Geld aus ware. Do hann se de Jesus ausgelacht. 15 Awer de Jesus hat zu ne gesaht: „Ihr stelle eich vor die Leit un mache wunnerscht, wie gerecht ihr wäre, awer Gott kennt eier Herz! Was bei de Mensche Indruck macht, is Gott e Greiel.“

16 „Bis in die Zeit vum Johannes^a hann em Mose sei Gesetz un die Schrifde vun de Prophede alles bestimmt, awer seit der Zeit werd Gott sei Reich gepreddicht, un jeder drängelt sich met Gewalt enin. 17 Awer eher vergeht de Himmel un die Erd, wie dass aach nur de klänschde Buschdawe vum Gesetz ewegfallt!“

16:16^a De Johannes, wo gedaft hat. Der hat de Leit gepreddicht, dass de Messias komme dät (vgl. Mt 3, Lk 3,1-22).

18 „Wer sich vun seiner Fra schäde losst un e anneri heiradt, geht näwenaus, un wer e Fra heiradt, wo vun ihrm Mann geschied is, geht aach näwenaus.“

De reiche Mann un de arme Lazarus

19 „Es hat emo e reicher Mann geläbt, wo deiere Kläder aus rodem un weißem Stoff angedun un daachaus daachin e Läwe uf großem Fuß gefiehrt hat. 20 Vor dem seiner Hausdir hat e armer Mann geläh, wo Lazarus^a gehääscht hat. De Lazarus war voll met Geschwiere 21 un hätt sich gäre an dene Abfäll satt gess, wo vum Disch vun dem reiche Mann gefall sinn. Sogar die Hunn sinn komm un hann sei Geschwiere abgeleckt.“

16:20^a Lazarus, hebräisch Eleasar, dut Gott helft bedeide.

22 „Dann is der arme Mann gestorb, un die Engel hann’e in de Schoß vum Abraham gedrah. Dodenoh is aach der reiche Mann gestorb, un die Leit hann’e begrab. 23 Im Dodereich, wo er e schrecklichi Pein durchgestann hat, hat er noh owe geguckt un hat weit drowe de Abraham un in seim Schoß de Lazarus gesiehn. 24 Do hat er geruf: ‚Vadder Abraham, erbarm dich iwer mich, un schick mer de Lazarus! Loss ne sei Fingerspitz ins Wasser tungge u’mei Zung kiehle! Ich hann nämlich e furchbari Pein in do dem Feier.’ 25 Awer de Abraham hat gesaht: ‚Denk emo dran, mei Bub: Du hascht dei Läbdaach alles Gudde krieht. De Lazarus hat awer nur krieht, was schlecht war. Jetz werd de Lazarus do getreescht, un du werscht gequeelt. 26 Außerdem leiht zwische uns un eich e diefer Abgrund. Nimand kann vun uns aus bei eich eniwergehn, selbscht wann er das wollt, un aach vun eich aus kann nimand bei uns eriwerkomme.’ 27 ‚Dann bitt ich dich, Vadder: Schick de Lazarus ins Haus vu’meim Vadder!’, hat der reiche Mann do gesaht. 28 ‚Ich hann nämlich noch finnef Brieder. De Lazarus soll se warne, dass’e net aach noch an do dene Ort komme, wo mer nur gequeelt werd.’ 29 De Abraham hat awer zu’m gesaht: ‚Dei Brieder hann em Mose sei Gesetz un die Schrifde vun de Prophede. Loss se doch uf die heere!’ 30 ‚Nä, Vadder Abraham’, hat der reiche Mann do gesaht, ‚es misst äner vun de Dode bei se komme. Dann däde se ihr Instellung ännere.’ 31 Awer de Abraham hat zu’m gesaht: ‚Wann se net uf de Mose un net uf die Prophede heere, losse se sich aach net iwerzeihe, wann äner vun de Dode ufsteht!’“

17

De Jesus warnt vor de Verfiehrung

1 Dodenoh hat de Jesus zu de Jinger gesaht: „Es is net se vermeide, dass Sache bassiere, wo Mensche dedurch verfiehrt werre. Awer weh dem, wo dodran Schuld is! 2 Fer dene wär’s besser, wa’mer’m e Miehlestän um de Hals hängge un’e dodemet ins Meer schmeiße dät, als wie dass er äner vun do dene Kläne zum Beese verfiehrt. 3 Bassen also uf!“

„Weis dei Bruder serecht, wann er sich an der versindicht, un vergebb em, wann er sei Instellung ännert. 4 Selbscht wann er sich siwemo am Daach an der versindicht un siwemo am Daach bei dich kommt un saht: ‚Ich ännere mei Instellung’, sollscht du em vergewe!“

Wie groß is unser Glawe?

5 Dodenoh hann die Aposchdele zum Herr gesaht: „Gebb uns noch meh Glawe!“ 6 De Herr hat do gesaht: „Wann eier Glawe aach nur so groß wär wie e Senneftkäre, kännde ner zu do dem Maulbeerfeichebam sahn: ‚Heb dich metsamt deine Wurzele aus em Boddem, un verplanz dich ins Meer!’ Er dät dann uf eich heere.“

Berät, fer bedingungslos se diene?

7 „Angenumm, äner vun eich hat e Sklave, wo zaggert oder die Schäf hiet. Wann der Sklave vum Feld hämmkommt, saht sei Herr doch net gleich: ‚Komm un huck dich emo do an de Disch!’, oder doch? 8 Er saht doch eher zu’m: ‚Mach mer’s Esse ferdich un binn der e Schirz um! Bedien mich, bis ich ferdich gess un gedrunk hann! Dodenoh kannsch’e aach ebbes esse un dringge.’ 9 Saht er dem Sklave villeicht noch dangge dodefor, dass er gemacht hat, was er gehääscht wor is? Ich glab als ganz net. 10 So soll’s bei eich aach sinn! Wann’er alles gemacht hann, was ner gehääscht wor sinn, dann sahn: ‚Mir sinn unwirdiche Sklave un hann nur gemacht, was mer hann misse mache.’“

De Jesus macht zeh Aussätziche gesund

11 Uf seim Wääch noh Jerusalem is de Jesus midde durch Samarie un Galiläa gezoh. 12 Un wie er in e Dorf hat wolle gehn, sinn em zeh aussätziche Mannsleit entgähkomm. Die hann scheen Abstand gehall, sinn stehn geblieb 13 un hann laut geruf: „Jesus, Määschder, erbarm dich iwer uns!“ 14 Wie de Jesus die Aussätziche gesiehn hat, hat er zu ne gesaht: „Gehn, un weisen eich de Prieschder!“ Do hann se sich uf de Wääch gemacht un sinn unnerwäächs gesund^a wor. 15 Wie äner vun’e gemerkt hat, dass er gesund wor is, is er serickkomm un hat Gott met lauder Stimm gelobt. 16 Er hat sich vor’m Jesus seine Fieß uf de Boddem geschmiss un hat em dangge gesaht. Un das war e Mann aus Samarie. 17 De Jesus hat awer gesaht: „Ihr sinn doch alle zeh gesund wor, oder net? Wo sinn’enn die annere nein? 18 Hat’s sunscht käner fer needich gefunn, fer sericksekomme un Gott die Ehr se gewe wie nur do der Fremde?“ 19 Dodrufhin hat de Jesus zu dem Mann gesaht: „Steh uf un geh! Dei Glawe hat dich gerett!“

17:14^a Wärtlich: sauwer oder: rein. Genauso in Vers 17.

Wie’s is, wann de Jesus widerkommt

20 Wie die Pharisäer de Jesus emo gefroht hann, wann Gott sei Reich kommt, hat er zu ne gesaht: „Gott sei Reich kommt net so, dass mer’s siehn kann. 21 Mer kann aach net sahn: ‚Guggen emo, do is es!’ oder: ‚Guggen, do hinne is es!’ Mergen eich: Gott sei Reich is schun midde unner eich.“

22 Dodenoh hat de Jesus zu seine Jinger gesaht: „Es kommt emo die Zeit, wo ner Verlange denoh hann, fer aach nur äner vun dene Daache se siehn, wo ich, de Menschesohn, wider do bin, awer ihr siehn ne net. 23 Die Leit sahn dann zu eich: ‚Guggen emo, do is de Menschesohn!’ oder: ‚Guggen, dort is er!’ Gehn net hin, un lafen ne net noh! 24 So wie de Blitz nämlich ufleicht un de Himmel vun äm Enn bis ans annere hell macht, genauso bin aach emo ich, de Menschesohn, an dem Daach, wo ich komme. 25 Seeerscht muss ich awer noch vil durchmache un vun do der Generation eweggestoßt werre.“

26 „In dene Daache, wo ich, de Menschesohn, komme, geht’s emo so zu wie in de Zeit vum Noah. 27 Domols hann die Mensche gess un gedrunk, se hann geheirat un sinn verheirat wor – bis zu dem Daach, wo de Noah in das große Schiff gang is. Dann is die Flut komm un hat se allegar umgebrung. 28 Genauso is es aach in de Zeit vum Lot zugang. Die Mensche hann gess un gedrunk, se hann Sache kaf un verkaf, un se hann geplanzt un Haiser gebaut. 29 Awer an dem Daach, wo de Lot vun Sodom fortgang is, hat’s Feier un Schwefel vum Himmel erunnergerähnt un hat se allegar umgebrung. 30 Genauso is es emo an dem Daach, wo ich, de Menschesohn, mich offebare.“

31 „Wer an dem Daach uf de Dachterrass^a is un sei Sache im Haus hat, soll nemmeh enunnergehn, fer se se holle, un wer uf em Feld is, soll aach nemmeh serickgehn. 32 Denggen am Lot sei Fra! 33 Wer sei Läwe redde will, dut’s verliere, un wer’s verliert, dut’s gewinne. 34 Ich sahn eich: Vun zwä Mensche, wo in der Naacht i’me Bett leihe, werd äner metgenumm un der annere serickgelosst. 35 Vun zwä Weibsleit, wo sesamme Kore mohle, werd äni metgenumm un die anner serickgelosst. [ 36 Un vun zwä Mannsleit, wo uf em Feld schaffe, werd äner metgenumm un der annere serickgelosst.“]

17:31^a In Israel hann die Haiser Flachdächer, wo mer sich druf ufhalle kann.

37 Do hann die Jinger de Jesus gefroht: „Wo bassiert’enn das emo, Herr?“ De Jesus hat zu ne gesaht: „Wo ebbes Dodes leiht, do sammele sich aach die Geier.“

18

Es Gleichnis vun erer Witfra un eme ungerechde Richder

1 Dodenoh hat de Jesus seine Jinger met eme Gleichnis gesaht, dass mer immer bäde un dodemet net nohlosse sollt: 2 „In erer Stadt hat emo e Richder geläbt, wo kä Reschbekt vor Gott hott un uf kä Mensch Ricksicht genumm hat. 3 In derselwe Stadt hat awer aach e Witfra geläbt, wo immer wider bei dene Richder gang is un gesaht hat: ‚Verschaff mer mei Recht in der Sach met meim Geechner!’ 4 Der Richder hat als net dodruf ingehn wolle. Dann hat er sich awer gesaht: ‚Ich hann zwar kä Reschbekt vor Gott un nemme uf kä Mensch Ricksicht, 5 awer weil mer do die Witfra kä Ruh losst, verschaff ich er ihr Recht! Sunscht kommt se andauernd gelaf un hollt mer noch de letschde Nerv.’“

6 Dodrufhin hat de Herr gesaht: „Horchen, was der ungerechde Richder saht! 7 Verschafft Gott do dene Mensche, wo er sich ausgewählt hat un wo Daach un Naacht zu’m rufe, net eerscht recht ihr Recht? Sollt er se lang warde losse? 8 Ich sahn eich: Er verschafft ne schnell ihr Recht! Awer dun ich, de Menschesohn, emo uf de Glawe uf de Erd treffe, wann ich widerkomme?“

Es Gleichnis vu’me Pharisäer un eme Zällner

9 Dodenoh hat de Jesus e paar Leit, wo dodevun iwerzeicht ware, dass’e gerecht sinn un wo vun owe uf die annere geguckt hann, do das Gleichnis verzehlt: 10 „Zwä Mannsleit sinn emo in de Tembel gang, fer se bäde. Der äne war e Pharisäer un der annere e Zällner. 11 Der Pharisäer hat sich vore hingestellt un hat bei sich selwer gebät: ‚Ich dangge der, Gott, dass ich net so bin wie die annere Mensche. Ich bin kä Raiwer un net ungerecht un gehn net näwenaus, un ich bin net so wie do der Zällner. 12 Ich faschde zwämo in de Woch un gewe de zehnde Däl vun allem, was ich verdiene.’ 13 Der Zällner hat scheen Abstand gehall, is stehn geblieb un hat sich noch net emo getraut, fer noh owe se gugge. Er hat sich im Gähedäl an die Bruscht geschlah un hat gesaht: ‚Gott, sei gnädich met mir Sinder!’“

14 „Ich sahn eich: Der Zällner is als Gerechder in sei Haus serickgang, der Pharisäer net! Jeder, wo sich selwer groß macht, werd nämlich klän gemacht, un wer sich selwer klän macht, der werd groß gemacht.“

De Jesus dut die Kinner seechne

15 Die Leit hann aach die kläne Kinner bei de Jesus gebrung un hann gewollt, dass er ne die Hänn uflehe dät. Wie die Jinger das gesiehn hann, hann se die Leit barsch abgewies. 16 Awer de Jesus hat die Kinner bei sich geruf un hat gesaht: „Lossen doch die Kinner bei mich komme, un hallen se net dodevun ab! So Mensche geheert nämlich Gott sei Reich. 17 Das äne sahn ich eich: Wer Gott sei Reich net so annemmt wie e Kind, kommt net enin!“

E reicher Mann froht noh’m ewiche Läwe

18 Dodenoh hat äner vun de Owerschde de Jesus gefroht: „Gudder Määschder, was muss ich’enn mache, fer’s ewiche Läwe se erwe?“ 19 „Fer was nennsch’e mich dann gutt?“, hat de Jesus do zu’m gesaht. „Gutt is nur Gott, sunscht nimand! 20 Du wääscht doch, was Gott gebott hat: Geh net näwenaus, bring nimand um, klau net, lieh net, un ehr dei Vadder un dei Mudder.“ 21 Do hat der Mann gesaht: „Das hann ich alles vun Kind an genauso gemacht.“ 22 Wie de Jesus das geheert hat, hat er zu’m gesaht: „Äns fählt der awer noch! Verkaf alles, was de hascht, un verdäl das Geld, wo de dodefor kriehscht, an die Arme. Dann hasch’e e Schatz im Himmel. Un dann komm, un geh met mer.“ 23 Wie der Mann das geheert hat, is er ganz draurich wor. Er war nämlich zimlich reich.

24 Wie de Jesus gesiehn hat, dass er ganz draurich wor is, hat er gesaht: „Wie schwär is es doch fer Leit, wo vil hann, fer in Gott sei Reich se komme! 25 Es is leichder fer e Kamel, fer durch’s Nodelehr se gehn als wie fer e Reicher, fer in Gott sei Reich se komme!“ 26 Do hann die Leit, wo das geheert hann, gefroht: „Wer kann’enn dann iwerhaupt noch gerett werre?“ 27 De Jesus hat gesaht: „Was bei de Mensche unmeechlich is, is bei Gott meechlich!“

Vum Lohn, wo die kriehn, wo ihr Wääch me’m Jesus gehn

28 Dodrufhin hat de Petrus gesaht: „Guck emo, mir hann alles stehn- un leihegelosst un sinn met der gang.“ 29 „Das äne sahn ich eich“, hat de Jesus do zu ne gesaht, „jeder, wo wäh Gott seim Reich sei Haus oder sei Eldere, sei Brieder oder sei Fra oder sei Kinner sericklosst, 30 krieht’s in do der Zeit schun zichfach serick, un in der Welt, wo eerscht kommt, krieht er es ewiche Läwe.“

De Jesus kinnicht zum dridde Mo an, dass er vil durchmache un sterwe muss

31 Dodenoh hat de Jesus die Zwällef uf die Seit genumm un hat zu ne gesaht: „Horchen emo her! Mir gehn jetz noh Jerusalem. Dort bassiert dann alles, was die Prophede iwer mich, de Menschesohn, geschrieb hann: 32 Ich werre an Leit ausgeliwert, wo kä Judde sinn. Die du’mich dann verspodde un schlecht behannele. Se spauze uf mich, 33 un wann se mich gegääschelt hann, bringe se mich um, awer am dridde Daach stehn ich wider uf.“ 34 Die Jinger hann das alles awer net verstann. De Sinn vun dene Worde war ne e Rätsel. Se hann net begriff, iwer was de Jesus geschwätzt hat.

Der Blinde vun Jericho

35 Wie de Jesus in die Näh vun Jericho komm is, hat dort e Blinder am Wääch gehuckt un hat gebeddelt. 36 Der hat geheert, dass Leit vorbeigang sinn, un hat gefroht: „Was hat’enn das se bedeide?“ 37 „De Jesus vun Nazaret kommt vorbei“, hann em die Leit do erklärt. 38 Do hat er geruf: „Jesus, du Sohn vum David, erbarm dich iwer mich!“ 39 Die Leit, wo vor’m Jesus hergang sinn, hann’e dodrufhin angefahr un hann em gebott, fer ruhich se sinn, awer er hat nur noch lauder gekrisch: „Du Sohn vum David, erbarm dich iwer mich!“ 40 Do is de Jesus stehngeblieb un hat de Leit Order gebb, se sollde ne mo bei ne bringe. Wie der Mann näherkomm is, hat ne de Jesus gefroht: 41 „Was soll ich’enn fer dich mache?“ „Herr, ich will wider siehn känne!“, hat er gesaht. 42 „Du sollscht siehn känne!“, hat de Jesus do zu’m gesaht. „Dei Glawe hat dich gerett!“ 43 Un im selwe Aueblick hat er wider siehn känne. Do is er hinner’m Jesus hergang un hat Gott die Ehr gebb. Un all die Leit, wo das gesiehn hann, hann Gott gelobt.

19

De Jesus un de Zachäus

1 Dodenoh is de Jesus noh Jericho komm un is durch die Stadt gang. 2 In Jericho hat e Mann gewohnt, wo Zachäus gehääscht hat. Der war de owerschde Zällner un war reich. 3 De Zachäus hat gäre siehn wolle, wer de Jesus is, awer er hat net iwer die Leit driwernausgugge känne, weil er kurz gewachs war. 4 Do is er vorenausgelaf un uf e Maulbeerfeichebam^a gekrawelt, fer de Jesus se siehn. An der Stell hat de Jesus nämlich durchkomme solle. 5 Wie de Jesus dann an die Stell komm is, hat er noh owe geguckt un hat de Zachäus gesiehn. „Zachäus“, hat er do zu’m gesaht, „komm schnell do erunner! Heit bin ich nämlich e geladener Gascht in deim Haus.“ 6 Do is de Zachäus schnell erunnergekrawelt un hat de Jesus arich froh met sich hämmgenumm. 7 Wie die Leit das gesiehn hann, hann se awer allegar emo gemeggert. „Bei’me Sinder bleibt er iwer Naacht!“, hann se gesaht.

19:4^a E Maulbeerfeichebam hat aach unne große Äscht. Deshalb ka’mer leicht uf ne krawele. Er werd bis zu 15 Meder groß.

8 De Zachäus is awer ufgestann un hat zum Herr gesaht: „Guck emo, Herr! Die Hälft vun allem, was ich hann, gew’ich de Arme, un wann ich äm ebbes abgenumm hann, gew’ich em viermo so vil serick.“ 9 Do hat de Jesus zu’m gesaht: „Heit is die Reddung fer do das Haus komm, weil do der Mann aach e Nohkomme vum Abraham is. 10 Ich, de Menschesohn, bin nämlich komm, fer se suche un se redde, was verlor war.“

Es Gleichnis vum anvertraude Geld

11 Weil de Jesus schun in de Näh vun Jerusalem war, hann die Leit, wo das geheert hann, gemännt, Gott sei Reich dät jetz gleich erscheine. Deshalb hat ne de Jesus noch e Gleichnis verzehlt. 12 Er hat gesaht: „E Mann vun Adel is emo ganz weit eweg in e anneres Land gefahr, fer sich dort zum Keenich kreene se losse un dann sericksekomme. 13 Er hat zeh vun seine Diener geruf un Geld im Wert vun zeh Miene unner ne verdält un hat zu ne gesaht: ‚Machen Geschäfde dodemet, bis ich serickkomme.’ 14 Sei Landsleit hann’e awer gehasst un hann e Delegation hinner’m hergeschickt un erkläre gelosst: ‚Do dene Mann wolle mer net als Keenich hann.’“^a

19:12-14^a De Jesus spielt meechlicherweis uf Ereichnisse vun seiner Zeit an: Wie de Herodes de Große gestorb war, is nämlich sei Bub, de Herodes Archelaus, noh Rom geräst, fer sich an seiner Stell als Keenich kreene se losse. Dodrufhin hann die Judde e Delegation hinner’m hergeschickt, fer sich gäh die Sach se stelle.

15 „Se hann’e awer doch zum Keenich gekreent. Un wie er hämmkomm is, hat er die Diener, wo vun ihm das Geld krieht hodde, bei sich rufe gelosst. Er hat wisse wolle, was for e Gewinn jeder dodemet gemacht hat. 16 Do is der eerschde komm un hat gesaht: ‚Herr, dei Mien hat zeh annere Miene gebrung.’ 17 ‚Ei prima!’, hat der Keenich do zu’m gesaht. ‚Du bischt e gudder Diener. Weil du im Klänschde trei warscht, sollscht du Herr iwer zeh Städt sinn.’ 18 Dodenoh is der zwädde komm un hat gesaht: ‚Herr, dei Mien hat finnef annere Miene gebrung.’ 19 Zu dem hat der Keenich gesaht: ‚Du sollscht iwer finnef Städt herrsche.’ 20 Jetz is e annerer Diener komm un hat gesaht: ‚Do hasch’e dei Mien serick, Herr. Ich hann se in e Duuch gewiggelt un ufgehob. 21 Ich hann nämlich Angscht vor der gehat, weil du e strenger Mann bischt. Du duscht abhewe, was du net inbezahlt hascht, un duscht ernde, was du net gesät hascht.’ 22 Do hat der Keenich zu’m gesaht: ‚Met deine eichene Worde dun ich dich richde, du raulicher Diener! Du hascht also gewisst, dass ich e strenger Mann bin? Dass ich abhewe, was ich net inbezahlt hann, un ernde, was ich net gesät hann? 23 Fer was hasch’e’nn do mei Geld net uf die Bank gebrung? Dann hätt ich’s met Zinse abhewe känne, wann ich serickkomme!’ 24 Dodrufhin hat der Keenich zu dene annere Diener, wo dort erumgestann hann, gesaht: ‚Holle’m die Mien ab, un gewen se dem, wo die zeh Miene hat.’ 25 ‚Awer Herr’, hann die Diener do zu’m gesaht, ‚der hat doch schun zeh Miene!’ 26 Der Keenich hat gesaht: ‚Ich sahn eich: Wer ebbes hat, krieht noch debei. Wer awer nix hat, krieht aach das noch abgenumm, was er hat.“

27 „Awer jetz zu meine Feinde, wo net gewollt hann, dass ich ihr Keenich werre: Bringen se mo do her, un schlahn se vor meine Aue dot!’“

DE LUKAS BESCHREIBT DIE LETSCHDE DAACHE, WO DE JESUS IN JERUSALEM WAR: 19,28-21,38

De Jesus kommt in Jerusalem an

28 Wie de Jesus das gesaht hott, is er weider enuffer uf em Wääch noh Jerusalem gang. 29 Un wie er in die Näh vun Betfage un Bedanie komm is, an dene Berch, wo Eelberch hääscht, hat er zwä vun seine Jinger fortgeschickt 30 un hat gesaht: „Gehn emo in das Dorf, wo do vor eich leiht! Wann’er eninkomme, finne ner e klänes Eselche, wo dort angebunn is. Uf dem is noch nie e Mensch geritt. Machen’s los, un bringen’s do her! 31 Un wann eich jemand froht: ‚Fer was binne ihr dann das Eselche do los?’, sahn er’m: ‚De Herr brauch’s.’“

32 Do hann sich die zwä uf de Wääch gemacht un hann alles so gefunn, wie’s ne de Jesus gesaht hott. 33 Wie se das kläne Eselche dann losgemacht hann, hann die Leit, wo iwer’s se bestimme hodde, zu ne gesaht: „Fer was binne ihr dann das Eselche do los?“ 34 „De Herr brauch’s!“, hann se do gesaht. 35 Dann hann se das kläne Eselche bei de Jesus gebrung un hann ihr Kläder uf’s geleht un de Jesus ufsteihe gelosst. 36 Wie de Jesus dann weidergezoh is, hann die Leit ihr Kläder uf em Wääch ausgebrät.

37 Un wie er schun an die Stell komm is, wo de Wääch de Eelberch enunnerlaft, hann die Jinger allegar angefang, fer sich se freie un Gott met lauder Stimm fer all die Wunner se lowe, wo se meterläbt hodde. 38 „Geseechent is der Keenich, wo im Name vum Herr kommt!“, hann se geruf. „Im Himmel is Friede un Herrlichkät in de Heh!“ 39 Do hann e paar Pharisäer, wo unner dene Leit ware, zum Jesus gesaht: „Määschder, bring dei Jinger zur Vernunft!“ 40 Awer de Jesus hat dodruf zu ne gesaht: „Ich sahn eich: Wa’mei Jinger nix sahn däde, däde die Stän kreische!“

De Jesus heilt iwer Jerusalem

41 Wie de Jesus näherkomm is un die Stadt gesiehn hat, hat er iwer se heile misse 42 un hat gesaht: „Wann du doch bloß gemerkt hättscht – wenichdens an heit dem Daach –, was der Friede bringt! Awer jetz is es versteggelt. Du siehscht’s net. 43 Fer dich kommt awer emo die Zeit, wo dei Feinde e Wall um dich erum ufschidde un dich inkräse un vun jeder Seit in die Zang nemme. 44 Se robbe alles bis uf dei Grundmauere ab un bringe die Mensche in der um. Se losse kä Stän in dir uf em annere, weil du net uf die Zeit Acht gebb hascht, wo dich Gott hat wolle redde.“

De Jesus schmeißt die Händler aus em Tembel

45 Dodenoh is de Jesus in de Tembel gang un hat angefang, fer die Händler [un die Leit, wo dene ihr Sache im Tembel kaf hann,] enausseschmeiße. 46 Er hat zu ne gesaht: „In de Heilich Schrift steht: Mei Haus is e Bäthaus. Ihr hann awer e Raiwerhehl draus gemacht.“

47 De Jesus hat die Leit jede Daach im Tembel unnerwies, awer die Hoheprieschder un Schriftgelehrde un die annere Fiehrer vum Volk hann noh erer Meechlichkät gesucht, fer ne umsebringe. 48 Se hann awer net gewisst, wie se’s hann solle anfange. Es ganze Volk hat nämlich a’m gehonk un hat em zugeheert.

20

Die Schriftgelehrde frohe de Jesus noh seiner Vollmacht

1 Wie de Jesus an äm vun dene Daache es Volk im Tembel unnerwies un die gutt Nohricht gepreddicht hat, sinn die Hoheprieschder un die Schriftgelehrde sesamme met de Ällschde bei ne komm 2 un hann’e gefroht: „Sah uns emo: Met was for'me Recht machsch’enn du das alles? Oder wer hat der die Vollmacht dodezu gebb?“

3 „Ich will eich aach ebbes frohe!“, hat de Jesus dodruf zu ne gesaht. „Sahn mer: 4 Die Daf vum Johannes, war die vum Himmel oder vun de Mensche?“ 5 Do hann se simeliert un hann zuenanner gesaht: „Wa’mer sahn: ‚Vum Himmel!’, dann saht er: ‚Fer was hann’er’nn em Johannes dann net geglabt?’ 6 Un wa’mer sahn: ‚Vun de Mensche!’, dann dut uns es ganze Volk stäniche. Die Leit sinn nämlich allegar dodevun iwerzeicht, dass de Johannes e Prophet war.“ 7 Se hann dann dodruf gesaht, se däde net wisse, wo em Johannes sei Daf herkomm is. 8 „Dann sahn ich eich aach net, met was for’me Recht ich das alles mache!“, hat de Jesus do zu ne gesaht.

Es Gleichnis vun de schlechde Winzer

9 Dodenoh hat de Jesus angefang, fer em Volk do das Gleichnis se verzehle: „E Mann hat emo e Weinberch angeleht un an e paar Winzer verpacht. Dann is er fer e langi Zeit ins Ausland gang. 10 Un wie’s an de Zeit war, hat er e Knecht bei die Winzer geschickt, fer sei Andäl vum Erdraach vun dem Weinberch se kassiere. Die Winzer hann’e awer geschlah u’met lääre Hänn fortgeschickt. 11 Do hat der Mann e annerer Knecht geschickt. Dene hann se aach geschlah. Se hann’e gescholl u’met lääre Hänn fortgejaht. 12 Dodrufhin hat er noch e dridder geschickt. Dene hann se bludich geschlah un enausgeschmiss. 13 Do hat sich de Herr vun dem Weinberch gefroht: ‚Was soll ich’enn jetz mache? Ich schigge mei Bub, wo ich lieb hann. Wann se dene siehn, werre se doch wohl Reschbekt hann!’ 14 Wie die Winzer sei Bub gesiehn hann, hann se metenanner iwerleht un hann gesaht: ‚Der do erbt emo dene ganze Weinberch! Kommen, dene bringe mer um, dass mir die Erbschaft kriehn!’ 15 Do hann se ne aus em Weinberch geschmiss un umgebrung.“

„Was macht’enn jetz de Herr vun dem Weinberch met ne? 16 Er kommt un bringt die Winzer um un dut dene Weinberch an annere Pächder gewe!“

Wie die Leit das geheert hann, hann se gesaht: „Nur das net!“ 17 Awer de Jesus hat se angeguckt un hat gefroht: „Was dut’enn das do bedeide, was in de Heilich Schrift steht: Der Stän, wo die Leit am Bau fortgeschmiss hann, is zum Eckstän wor? 18 Jeder, wo iwer dene Stän fallt, brecht sich de Hals, un wann der Stän uf jemand fallt, macht er Stab aus em!“

19 Do hädde die Hoheprieschder un die Schriftgelehrde de Jesus gäre uf de Stell verhaft, awer se hann Angscht vor’m Volk gehat. Se hann gemerkt, dass de Jesus met dem Gleichnis sie gemännt hat.

Die Froh vun de Steiere

20 Dodenoh hann die Hoheprieschder un die Schriftgelehrde de Jesus nemmeh aus de Aue gelosst un hann Spitzele geschickt. Die hann so gemacht, wie wann se gerecht wäre. Se hann de Jesus met ebbes, was er saht, in e Fall logge wolle, dass’e ne an die Gerichde un in die Gewalt vum Gouverneer ausliwere kännde. 21 Die Spitzele hann de Jesus gefroht: „Määschder, mir wisse, dass du frei un frank schwätze un die Leit unnerweise duscht. Du duscht die Mensche wirklich unnerweise, wie mer noh dem, was Gott will, läwe soll, un machscht kä Unnerschied zwische de Leit. 22 Also, dirfe mer em Kaiser Steiere bezahle oder net?“

23 De Jesus hat awer ihr falsches Spiel durchschaut un hat zu ne gesaht: „[Fer was dun’er mer dann e Fall stelle?] 24 Weisen mer mo e Denar! Wem sei Bild un wem sei Ufschrift sinn’enn do druf?“ „Es Bild un die Ufschrift vum Kaiser!“, hann se dodruf gesaht. 25 Do hat de Jesus zu ne gesaht: „Dann gewen em Kaiser, was em Kaiser geheert, un Gott, was Gott geheert!“

26 Se hann de Jesus met dem, was er vor de Leit gesaht hat, net in e Fall logge känne. Iwer sei Antwort hann se sich gewunnert un hann dann de Mund gehall.^a

20:20-26^a Im Johr 6/7 n. Chr. is de Zensus, die reemisch Kopp- un Grundsteier, aach in Judäa un Samarie ingefiehrt wor. Die jidische Fromme, vor allem die sogenannde Zelode, hann’s Bezahle vun Steiere als e Verrot an Gott angesiehn. Uf em reemische Silwerdenar war zu der Zeit e Bild vum Kaiser Tiberius (14-37 n. Chr.) un die Ufschrift: „De Tiberius, de Cäsar, em gättliche Auguschdus sei Sohn, de Auguschdus“.

Die Froh vun de Uferstehung vun de Dode

27 Aach vun de Sadduzäer, wo behaupde, es dät kä Uferstehung gewe, sinn e paar bei de Jesus komm. Die hann’e gefroht: 28 „Määschder, de Mose hat uns vorgeschrieb: Wann jemand sterbt, wo e Fra, awer kä Kinner hat, dann soll sei Bruder die Fra heirade un fer Nohkomme fer ne sorje. 29 Jetz ware do emo siwe Brieder. Der eerschde hat e Fra geheirat un is gestorb, ohne Kinner se hann. 30 Do hat der zwädde die Fra geheirat. Awer der is aach ohne Kinner gestorb. 31 Dodenoh hat der dridde die Fra geheirat, un genauso die annere bis zum sibde. Käner hat Kinner hinnerloss, wie er gestorb is. 32 Als Letschdes vun’e all is aach die Fra gestorb. 33 Wem sei Fra is se dann jetz, wann die Dode ufstehn? Die siwe ware doch allegar met rer verheirat.“

34 De Jesus hat dodruf zu ne gesaht: „Nur in do der Welt heirade die Mensche un werre verheirat. 35 Awer die, wo vun Gott fer wirdich gehall werre, fer vun de Dode ufsestehn un an der anner Welt dälsehann, heirade dann nemmeh un werre aach net verheirat. 36 Se känne dann nämlich nemmeh sterwe. Se sinn dann wie die Engel un Gott sei Kinner, weil se uferstann sinn. 37 De Mose hat awer schun in der Geschicht vum Dorestrauch deitlich gemacht, dass die Dode wider ufstehn. Dort nennt er de Herr de Gott vum Abraham, de Gott vum Isaak un de Gott vum Jakob. 38 Er is awer doch net e Gott vun de Dode. Er is im Gähedäl der vun de Lewenniche. Fer ihne sinn se nämlich allegar lewennich.“

39 Dodrufhin hann e paar Schriftgelehrde gesaht: „Määschder, du hascht e guddi Antwort gebb!“ 40 Es hat sich awer nimand meh getraut, fer de Jesus noch ebbes se frohe.

Em David sei Sohn oder em David sei Herr?

41 Dodenoh hat de Jesus die Leit, wo zugeheert hann, gefroht: „Wie känne’nn die Schriftgelehrde behaupde,^a dass de Messias e Sohn vum David is? 42 De David saht doch selwer im Buch vun de Psalme:

20:41^a Oder: Dodenoh hat de Jesus die Schriftgelehrde gefroht: „Wie känne’nn die Leit behaupde.

‚De Herr hat zu meim Herr gesaht:
Huck dich do rechts vu’mir hin,
43 bis ich dei Feinde zum Schemel vun deine Fieß gemacht hann.’

44 De David nennt ne also Herr! Wie kann er’nn do sei Sohn sinn?“

De Jesus warnt vor de Schriftgelehrde

45 Die Leit hann allegar noch zugeheert, wie de Jesus dann zu seine Jinger gesaht hat: 46 „Bassen uf met de Schriftgelehrde! Die lafe gäre in lange Kläder durch die Geechend un losse sich uf de Marktplätz met Reschbekt grieße. Die wolle aach in de Synagooche uf de vorderschde Plätz hugge un bei jedem Fescht die Ehreplätz hann. 47 Die schwätze de Witwe ihr Haiser ab un mache zum Schein lange Gebäde. Die Sort Leit werd emo arich bees gestroft!“

21

E Witfra gebt e großes Opfer

1 Dodenoh hat de Jesus hoochgeguckt un hat gesiehn, wie die reiche Leit ihr Spende in de Opferkaschde geschmiss hann. 2 Er hat awer aach e armi Witfra gesiehn, wo zwä kläne Geldstigger eningeschmiss hat.^a 3 Do hat er gesaht: „Das äne sahn ich eich: Do die arm Witfra hat meh gebb wie all die annere. 4 Die hann nämlich allegar nur eningeschmiss, was se iwerich hodde, fer’s Gott se gewe, awer do die Fra, wo fascht nix fer se läwe hat, hat alles gebb, was se hott, ihr ganzer Läwensunnerhalt.“

21:2^a Wärtlich: wo zwä Lepda eningeschmiss hat.

De Jesus kinnicht an, dass de Tembel nidergeriss werd

5 Wie e paar sich dann dodriwer unnerhall hann, wie de Tembel doch met scheene Stän un Opfergawe erausgebutzt is, hat de Jesus gesaht: 6 „Es kommt emo die Zeit, wo vun dem, was ner do siehn, kä Stän uf em annere bleibt! Es werd alles nidergeriss!“

Iwer’s Enn vun de Welt

7 Do hann se de Jesus gefroht: „Määschder, wann bassiert’enn das, un an was for’me Zääche ka’mer erkenne, dass es anfangt?“

8 „Bassen jo uf, dass ner net verfiehrt werre!“, hat de Jesus do gesaht. „Es kommt nämlich emo so manch äner i’meim Name un dut behaupde: ‚Ich bin de Messias!’ un: ‚Die Zeit is do.’ Lafen dene net noh! 9 Verschreggen net, wann’er vun Krieche un Unruhe heere! Das muss seeerscht bassiere! Awer das is noch net gleich es Enn.“

10 Dodenoh hat de Jesus zu ne gesaht: „Än Volk dut sich emo gäh’s annere ufstelle un än Reich gäh’s annere. 11 Es gebt schwäre Erdbewe in verschiedene Geechende un Hunger un Epidemije. Es bassiere beese Sache, un am Himmel sieht mer iwergroße Zääche. 12 Awer noch eeb das alles bassiert, werre ner verhaft un verfolcht. Wäh meim Name werre ner an die Synagoochegerichde ausgeliwert un ins Gefängnis geschmiss un vor Keeniche un Gouverneere geschläft. 13 Do hann’er dann Gelähehät, fer als Zeihe fer mich ufseträde. 14 Nemmen eich awer fescht vor, fer eich net im Voraus ebbes serechtselehe, wie ner eich verdeidiche solle. 15 Ich gewe eich nämlich e Fähichkät fer se schwätze un e Weishät, wo all eier Geechner nix degäh sahn un wo se net degäh ankomme känne. 16 Sogar eier Eldere un Geschwischder un eier Verwande un Freinde verrode eich emo. Dann werre manche vun eich umgebrung, 17 un wäh meim Name werre ner vun jedermann gehasst. 18 Trotzdem geht kä Hoor vun eierm Kopp verlor. 19 Hallen durch, un gewinnen dodemet eier Läwe!“

Jerusalem werd zersteert

20 „Wann’er siehn, dass feindliche Heere Jerusalem inkräse, känne ner dodran erkenne, dass die Stadt ball verwiescht werd. 21 Dann solle die Leit, wo in Judäa wohne, in die Berche abhaue. Wer in de Stadt is, soll sich fortschaffe, un wer sich uf em Land ufhallt, soll net in die Stadt komme. 22 Das sinn nämlich die Daache, wo Jerusalem vun Gott gestroft werd un wo alles indrefft, was geschrieb steht. 23 Awer weh dene Weibsleit, wo in dene Daache in annere Umstänn sinn oder e Kind an de Bruscht hann. Dann is die Not im Land nämlich groß, un do das Volk werd bees gestroft. 24 Die Mensche werre me’m Schwert umgebrung oder als Gefangene in all Länner fortgeschläft. Fremde Välger trambele Jerusalem nider, bis die Zeit vun de Välger abgelaf is.“

Wie de Menschesohn emo kommt

25 „An de Sunn, am Mond un an de Sterne ka’mer dann Zääche siehn, un die Välger uf de Erd hann Angscht un wisse sich kä Rot meh, weil’s Meer so braust un so riesiche Welle schlaht. 26 Die Mensche vergehn, weil se Angscht hann un uf das warde, was noch iwer die Erd kommt. Die Kräfde vum Universum gerode nämlich durchnanner. 27 Dodenoh siehn se mich, de Menschesohn, dann met großer Macht un Herrlichkät in erer Wolk komme. 28 Stehn awer uf, wann das alles losgeht, un hann Couraasch: Eier Erleesung is dann nämlich ball do!“

E Vergleich met eme Feichebam

29 Dodenoh hat ne de Jesus e Gleichnis verzehlt: „Guggen eich emo de Feichebam un all die annere Bäm an: 30 Wann’er siehn, dass’e Blädder dreiwe, wisse ner ganz vun selwer, dass es ball Sommer werd. 31 Genauso is es aach, wann’er siehn, dass das do alles bassiert. Dann wisse ner, dass Gott sei Reich ball do is. 32 Das äne sahn ich eich: Do die Generation vergeht net, bis das alles bassiert. 33 De Himmel un die Erd vergehn, awer das, was ich sahn, vergeht net!“

Bleiwen wach!

34 „Nemmen eich in Acht, dass eier Herz net met Fresse un Saufe u’met dene ganze Alldaachssorje in Beschlaach genumm werd un dass eich der Daach, wo ich, de Menschesohn, komme, net vun jetz uf grad iwerrascht. 35 So wie e Fall zuschnappt, fallt er nämlich iwer jeder Mensch her, wo uf de Erd wohnt. 36 Ihr misse also immer wach bleiwe un bäde, dass ner fer wirdich befunn werre, fer all dem, was noch bassiere soll, se entgehn un fer vor mir, em Menschesohn, se stehn.“

37 Daachsiwer war de Jesus im Tembel un hat die Leit unnerwies, awer owends is er enaus an dene Berch gang, wo Eelberch hääscht, un hat dort iwernaacht. 38 Morjens frieh sinn die Leit dann allegar bei ne in de Tembel komm, fer’m zusehorche.

22

DE LUKAS DUT BERICHDE, WIE DE JESUS GESTORB UN UFERSTANN IS: 22,1-24,53

De Hohe Rot dut entscheide, fer de Jesus umsebringe

1 Es war nemmeh weit bis zum Fescht vum ungesaierde Brot, wo aach Passahfescht genennt werd. 2 Do hann die Hoheprieschder un die Schriftgelehrde noh erer Meechlichkät gesucht, wie se de Jesus umbringe kännde. Se hann awer Angscht vor de Leit gehat.

De Judas dut de Jesus verrode

3 Do is de Deiwel in de Judas, wo aach Ischariot genennt wor is un äner vun de zwällef Jinger war, gefahr. 4 De Judas is fortgang un hat met de Hoheprieschder u’met de Hauptleit vun de Tembelwach geschwätzt, fer eraussekriehn, wie er de Jesus an se ausliwere kännt. 5 Do hann die sich awer gefreit un hann me’m abgemacht, dass s’em Geld gewe. 6 De Judas hat geschnappt un hat vun do an noh erer bassend Gelähehät gesucht, fer de Jesus an se ausseliwere, ohne dass die Leit dodevun ebbes hann solle metkriehn.

Es Passahlamm werd vorberät

7 So is der Daach vum ungesaierde Brot komm, wo’s Passahlamm geschlacht hat werre misse. 8 Do hat de Jesus de Petrus un de Johannes in die Stadt geschickt. „Gehn emo“, hat er gesaht, „un beräden es Passahlamm fer uns vor, dass mer’s esse känne.“ 9 „Wo solle mer’s dann vorberäde?“, hann’e die Zwä do gefroht. 10 Un de Jesus hat zu ne gesaht: „Horchen emo her: Wann’er in die Stadt komme, kommt dort e Mann uf eich zu, wo e Wasserkruuch draht. Gehn hinner dem her bis in das Haus, wo er eningeht, 11 un sahn zum Hausherr dort: ‚De Määschder losst dich frohe: Wo is’enn das Zimmer, wo ich met meine Jinger es Passahlamm esse kann?’ 12 De Hausherr weist eich dann im eerschde Stock e großi Stubb, wo met allem Neediche gericht is. Machen dort alles serecht.“ 13 Do hann sich die zwä Jinger uf de Wääch gemacht un hann alles genauso vorgefunn, wie’s ne de Jesus gesaht hott. Dodrufhin hann se es Passahlamm ferdich gemacht.

De Jesus dut’s Naachtmohl insetze

14 Wie’s an de Zeit war, hat sich de Jesus met de zwällef Aposchdele an de Disch gehuckt. 15 Dann hat er zu ne gesaht: „Wie hann ich mich doch denoh gesehnt, fer do das Passahlamm met eich se esse, eeb ich vil Schweres durchmache muss! 16 Ich sahn eich nämlich: In Zukunft ess ich nemmeh vun em, bis es sei Erfillung in Gott seim Reich finnt.“ 17 Dodenoh hat de Jesus de Kelch genumm un hat Gott dangge gesaht. „Nemmen do dene Wein, un verdälen ne unner eich“, hat er gesaht. 18 „Ich sahn eich nämlich: Ich dringge jetz nemmeh vun de Frucht vum Weinstock, bis Gott sei Reich kommt.“

19 Dann hat er’s Brot genumm un hat Gott dangge gesaht. Er hat’s durchgebroch un seine Aposchdele gebb un hat gesaht: „Das do is mei Leib, wo fer eich hergebb werd. Machen das, dass ner a’mich dengge!“ 20 Genauso hat er noh’m Esse aach de Kelch genumm un hat gesaht: „Do der Kelch is de neie Bund. Der werd met meim Blut besiechelt, wo fer eich geopfert werd.“

21 „Awer guggen nur, die Hand vun dem, wo mich ausliwert, is met mer uf em Disch. 22 Ich, de Menschesohn muss zwar mei Wääch gehn, so wie’s Gott beschloss hat. Awer weh dem Mensch, wo mich verrode dut.“ 23 Do hann die Aposchdele angefang, fer enanner se frohe, wer vun ihne das wohl sinn kännt, wo so ebbes macht.

Herrsche oder diene?

24 Dodenoh hann die Aposchdele noch dodriwer gezankt, wer vun ihne als de Greeschde angesiehn werre sollt. 25 Do hat de Jesus zu ne gesaht: „Die Keeniche vun de Välger herrsche iwer ihr Välger, un die, wo iwer se Macht hann, losse sich Wohldäder nenne. 26 Awer bei eich soll das net so sinn! De Greeschde vun eich soll im Gähedäl wie de Jingschde sinn un de Anfiehrer wie de Diener. 27 Wer is dann schun greßer: der, wo am Disch huckt, oder der, wo bedient? Nadierlich der, wo am Disch huckt! Ich awer bin midde unner eich wie der, wo bedient.“

28 „In all meine Priefunge hann ihr bei mer ausgehall. 29 Deshalb vermach ich eich aach es Reich, genauso wie mei Vadder mir’s vermacht hat: 30 Ihr solle i’meim Reich a’meim Disch esse un dringge, un ihr solle uf Throne hugge un die zwällef Stämm vum Volk Israel richde.“

De Jesus kinnicht an, dass de Petrus abstreide dut, dass er ne kennt

31 [Dodenoh hat de Herr gesaht:] „Simon, Simon, bass bloß uf! De Deiwel hat verlangt, dass er eich Aposchdele so durchriddele darf, wie mer de Wäz siebt. 32 Ich hann awer fer dich gebät, dass du dei Glawe net verlierscht. Mach dei Brieder stark, wann du dich späder emo bekehrscht!“ 33 Do hat de Petrus zu’m gesaht: „Herr, ich bin sogar berät, fer met der ins Gefängnis se gehn u’met der se sterwe!“ 34 „Ich sahn der, Petrus“, hat de Jesus do gesaht, „eeb de Hahn heit kräht, dusch’e dreimo abstreide, dass de mich kennscht.“

Berät sinn is alles

35 Dodenoh hat de Jesus sei Jinger gefroht: „Wie ich eich ohne Geldbeidel, ohne Vorrotsdasch un ohne Schuh losgeschickt hann, hat eich do ebbes gefählt?“ „Nä!“, hann se do gesaht. 36 Dodrufhin hat er zu ne gesaht: „Vun jetz an gilt awer: Wer e Geldbeidel oder e Vorrotsdasch hat, soll se metnemme, un wer kä Schwert hat, soll sei Mandel verkafe un sich e Schwert anschaffe. 37 Ich sahn eich nämlich: Bei mir muss aach noch das do indreffe, was in de Heilich Schrift steht: Er is bei die Verbrecher gezehlt wor. Alles, was iwer mich geschrieb steht, dut nämlich indreffe.“ 38 Do hann die Jinger gesaht: „Guck emo Herr, do sinn zwä Schwerder.“ Awer de Jesus hat zu ne gesaht: „Aweile langt’s!“

Im Garde Getsemane

39 Dodenoh is de Jesus so, wie er’s gewehnt war, aus de Stadt enaus an de Eelberch gang. Sei Jinger sinn hinner’m hergang. 40 Wie er am Eelberch ankomm is, hat er zu ne gesaht: „Bäden, dass ner de Versuchung widerstehn känne!“ 41 Dann hat er sich ungefähr so weit vun’e serickgezoh, wie mer e Stän schmeiße kann, un hat sich dort hingekniet un gebät: 42 „Vadder, wann du willscht, nemm do dene biddere Kelch eweg vu’mir! Es soll awer bassiere, was du willscht, un net das, was ich will!“ 43 Do is vum Himmel e Engel bei ne komm un hat em Kraft gebb. 44 In seiner Dodesangscht hat er als noch stärger gebät, un de Schwäß is em ausgang un wie Blutsdrobbe uf de Boddem gedripst.

45 Wie er vum Gebät ufgestann un bei sei Jinger serickkomm is, hat er se gedroff, wie se am Schlofe ware, so ferdich ware se vor lauder Kummer. 46 „Wie känne ner dann jetz nur schlofe?“, hat er do zu ne gesaht. „Stehn uf un bäden, dass ner de Versuchung widerstehn känne!“

De Jesus werd verhaft

47 Wie de Jesus noch am Schwätze war, sinn uf ämo Leit komm, un der, wo Judas gehääscht hat un äner vun de zwällef Jinger war, is vor ne hermarschiert. Er is uf de Jesus zugang, fer em e Begrießungskuss se gewe. 48 De Jesus hat awer zu’m gesaht: „Judas, met eme Begrießungskuss duscht du mich, de Menschesohn, verrode?“ 49 Die Jinger hann um de Jesus erumgestann. Wie se gemerkt hann, uf was es enauslaft, hann se de Jesus gefroht: „Herr, solle mer me’m Schwert eninschlahn?“ 50 Do hat aach schun äner vun’e uf de Diener vum owerschde Prieschder drufgehau un hat em’s rechtse Ohr abgehackt. 51 De Jesus hat awer gesaht: „Lossen noh!“ Dann hat er an das Ohr vun dem Mann drangefahr un hat ne wider gesund gemacht.

52 Zu de Hoheprieschder, zu de Hauptleit vun de Tembelwach un zu de Ällschde, wo gäh ne angerickt ware, hat de Jesus awer gesaht: „Wie wann ich e Raiwer wär, sinn’er met Schwerder un Knibbel komm. 53 Daach fer Daach war ich bei eich im Tembel, un ihr hann eich net getraut, fer gäh mich vorsegehn. Awer jetz is eier Stunn komm. Jetz hat die Dunggelhät die Macht.“

De Petrus dut abstreide, dass er de Jesus kennt

54 Dodrufhin hann die Mannsleit de Jesus gegriff un hann’e abgefiehrt. Se hann’e ins Haus vum owerschde Prieschder gebrung. De Petrus is awer vun weidem hinner ne hergang. 55 Wie die Leit dann midde uf em Innehof e Feier gemacht un sich beinannergehuckt hann, hat sich de Petrus bei se gehuckt. 56 E Dienerin hat ne awer am helle Feier hugge gesiehn. Do hat se ne sich genau angeguckt un hat gesaht: „Der do war aach me’m Jesus sesamme!“ 57 Awer de Petrus hat nix me’m Jesus se dun hann wolle. „Fra“, hat er gesaht, „ich kenne dene Mann net!“

58 Net lang dodenoh hat ne e annerer gesiehn un hat gesaht: „Du bischt doch aach äner vun do dene Leit!“ „Mann“, hat de Petrus do gesaht, „das bin ich net!“

59 Ungefähr e Stunn späder hat noch emo jemand fescht behaapt: „Datsach, der do war aach me’m Jesus sesamme. Der is doch aach e Galiläer!“ 60 Awer de Petrus hat gesaht: „Mensch, ich wäß net, vun was du schwätze duscht!“

Im selwe Aueblick, wie er das noch gesaht hat, hat de Hahn gekräht. 61 Dodrufhin hat sich de Herr erumgedräht un hat de Petrus angeguckt. Do is em Petrus ingefall, was de Herr zu’m gesaht hott: „Eeb de Hahn kräht, dusch’e dreimo abstreide, dass de mich kennscht.“ 62 Do is er enausgang un hat bidderlich geheilt.

De Jesus werd verspott un geschlah

63 Die Mannsleit, wo de Jesus gefang gehall hann, hann’e verspott un schlecht behannelt. 64 Se hann em die Aue verbunn [un hann em ins Gesicht geschlah] un’e gefroht: „Du bischt doch e Prophet! Sah uns: Wer hat dich geschlah?“ 65 Se hann em aach noch e ganzer Haufe beese Name gebb.

De Jesus werd vum Hohe Rot verheert

66 Wie’s hell wor is, sinn die Ällschde vum jidische Volk, das hääscht die Hoheprieschder un Schriftgelehrde, beinannerkomm. Se hann de Jesus vor ihr Hoher Rot bringe gelosst un hann gesaht: 67 „Wann du de Messias bischt, sah’s uns doch!“ De Jesus hat do zu ne gesaht: „Wann ich’s eich sahn, glawe ner mir’s jo doch net, 68 un wann ich eich ebbes frohe, gewe ner mer kä Antwort, [un ihr du’mich aach net freilosse]. 69 Awer vun jetz an huck ich, de Menschesohn rechts vum allmächdiche Gott!“ 70 Do hann se allegar gesaht: „Dann bischt du also Gott sei Sohn?“ De Jesus hat dodruf zu ne gesaht: „Ihr sahn’s jo selwer – ich bin’s!“ 71 „Ei, was brauche mer jetz noch Zeihe?“, hann se do geruf. „Mir hann jo selwer geheert, was er gesaht hat.“

23

De Jesus werd an de Piladus ausgeliwert

1 Dodrufhin sinn se all ufgestann. Se hann de Jesus bei de Piladus gebrung 2 un hann angefang, fer ihr Klaache gäh ne ansebringe. „Mir hann feschtgestellt, dass do der Mann es Volk ufhetzt“, hann se gesaht. „Er hallt die Leit devun ab, fer em Kaiser Steiere se bezahle un dut behaupde, er wär de Messias un e Keenich.“ 3 Do hat ne de Piladus gefroht: „Bischt du de Keenich vun de Judde?“ „So is es!“, hat de Jesus dodruf zu’m gesaht. 4 Dodenoh hat de Piladus zu de Hoheprieschder un zum Volk gesaht: „Bei do dem Mann kann ich kä Schuld finne!“ 5 Se hann awer net nohgelosst un hann gesaht: „Der hetzt es ganze Volk uf un dut sei Lehre iwerall in Judäa erumverzehle. In Galiläa hat er angefang, un jetz is er schun do bei uns.“

De Herodes dut de Jesus verspodde

6 Wie de Piladus ebbes vun Galiläa geheert hat, hat er gefroht: „Is do der Mann e Galiläer?“ 7 Un wie er geheert hat, dass de Jesus aus em Herodes seim Bezirk stammt, hat er ne bei de Herodes bringe gelosst. Der war in dene Daache nämlich aach grad in Jerusalem.

8 De Herodes hat sich arich gefreit, wie em de Jesus unner die Aue komm is. Er war nämlich schun lang dodruf aus, fer ne emo se siehn. Er hat jo aach schun vil vu’m geheert gehat. Jetz hat er gehofft, er dät siehn, wie de Jesus e Wunner^a dut. 9 Deshalb hat er ne e Haufe Sache gefroht, awer de Jesus hat em kä Antwort gebb. 10 Die Hoheprieschder un die Schriftgelehrde hann debeigestann un hann de Jesus schwär verklaacht. 11 Aach de Herodes un sei Soldade hann de Jesus ihr Verachdung spiere gelosst. Se hann ihr Spott me’m gedrieb un hann em e scheener Mandel iwer die Schullere gehonk. So hat ne de Herodes dann bei de Piladus serickgeschickt. 12 Vor der Zeit hann sich de Piladus un de Herodes net ausstehn känne, awer an dem Daach is äner em annere sei Freind wor.

23:8^a Wärtlich: Zääche.

Es Dodesurdäl werd gefällt

13 De Piladus hat die Hoheprieschder un die Owerschde un’s Volk beinannergeruf 14 un hat zu ne gesaht: „Ihr ha’mer do dene Mann hergebrung un hann behaupt, er dät’s Volk ufhetze. Ich selwer hann’e verheert, wie ner debei ware. Ich hann’e awer in käm vun dene Anklaachepunkde, wo ner gäh ne anbringe, fer schullich befunn. 15 De Herodes iwerichens aach net. Ich hann eich nämlich bei de Herodes geschickt gehat. Ihr siehn also: Der Mann hat nix gemacht, wo die Dodesstrof druf steht. 16 Deshalb loss ich ne jetz gääschele un losse ne dann frei.“

[ 17 Am Passahfescht hat de Piladus em Volk immer e Gefangener freilosse misse.] 18 Do hann die Leit allegar wie aus äm Mund gebrillt: „Fort met dem do! Loss uns de Barabbas frei!“ 19 De Barabbas war awer wäh’me Ufstand, wo’s in de Stadt gebb hott, un weil er jemand umgebrung hott, ins Gefängnis komm. 20 Do hat de Piladus noch emo uf die Leit ingeredd, weil er de Jesus hat wolle freilosse. 21 Awer se hann als gebrillt: „Schlah ne ans Kreiz, schlah ne ans Kreiz!“ 22 De Piladus hat’s noch e driddes Mo versucht un hat zu de Leit gesaht: „Was hat er dann Beeses gedun? Ich hann nix bei’m gefunn, wo er de Dod defor verdient hätt. Deshalb loss ich ne jetz gääschele un losse ne dann gehn!“ 23 Die Leit hann de Piladus awer met ihrm laude Gebrill in die Eng gedrieb un hann verlangt, dass de Jesus gekreizicht werre soll. Ihr Gebrill [un das vun de Hoheprieschder] hat sich durchgesetzt.

24 Do hat de Piladus beschloss, fer ihrer Forderung nohsegewe. 25 Er hat ne dene Mann freigelosst, wo se gefordert hann, dene, wo wäh’me Ufstand un weil er jemand umgebrung hott, im Gefängnis gehuckt hat. Awer de Jesus hat er ausgeliwert, dass’e met em mache kännde, was se gewollt hann.

De Jesus werd gekreizicht

26 Wie die Soldade dann de Jesus abgefiehrt hann, hann se e Mann angehall, wo aus Kyrene war un Simon gehääscht hat. Der is grad vum Feld komm. Se hann dem Mann es Kreiz ufgelad, un er hat’s hinner’m Jesus herdrahn misse.

27 Aach e Haufe annere Leit sinn hinner’m Jesus hergang, aach Weibsleit, wo iwer ne gejomert un geheilt hann. 28 Do hat sich de Jesus zu dene Weibsleit erumgedräht un hat gesaht: „Ihr Dächder vun Jerusalem, heilen net iwer mich! Heilen besser iwer eich selwer un iwer eier Kinner! 29 Es kommt nämlich emo die Zeit, wo die Leit sahn: ‚Glicklich sinn die Weibsleit, wo kä Kinner kriehn känne un wo nie äns uf die Welt gebrung un an de Bruscht dringge gelosst hann.’ 30 Die Leit fange dann aach an, fer zu de Berche se sahn: ‚Fallen uf uns!’, un zu de Hiwele sahn se: ‚Deggen uns zu!’ 31 Wa’mer me’m griene Holz schun so verfahrt, was bassiert’enn dann emo me’m dirre?“

32 Sesamme me’m Jesus sinn noch zwä annere Mannsleit, zwä Verbrecher, abgefiehrt wor, fer sesamme met em hingericht se werre.

33 Wie die Soldade uf dene Platz komm sinn, wo „Dodekoppplatz“ hääscht, hann se de Jesus dort sesamme met dene zwä Verbrecher gekreizicht, dene äne rechts un dene annere links vum Jesus. 34 De Jesus hat awer gesaht: „Vadder, vergebb ne! Se wisse net, was se mache!“ Dodrufhin hann die Soldade sei Kläder verlost un verdält.

35 Die Leit hann dort gestann un hann zugeguckt, un ihr Owerschde hann sesamme met ne gespott. „De annere hat er geholf“, hann se gesaht. „Soll er sich jetz doch selwer helfe, wann er de Messias is, wo vun Gott ausgewählt wor is.“ 36 Aach die Soldade hann ihr Spott me’m Jesus gedrieb. Se sinn bei ne gang un hann em Weinessich angebott 37 un gesaht: „Helf der doch selwer, wann du de Keenich vun de Judde bischt!“

38 Iwer’m Jesus hann die Soldade e Schild feschtgemacht gehat. Uf dem hat [in griechischer, ladeinischer un hebräischer Schrift] gestann: „Das do is de Keenich vun de Judde.“

39 Äner vun dene Verbrecher, wo dort gehonk hann, hat iwer de Jesus geläschdert un hat gesaht: „Helf der doch selwer un uns aach, wann du de Messias bischt!“ 40 Do hat ne der annere Verbrecher serechtgewies. „Net emo du hascht vor Gott Reschbekt“, hat er zu’m gesaht, „wo du doch genauso schlimm bestroft werscht wie er? 41 Mir zwä werre zu Recht bestroft! Mir kriehn nämlich de Lohn fer das, was mer angestellt hann. Awer der do hat nix Unrechdes gedun.“ 42 Dann hat er zum Jesus gesaht: „Herr, denk a’mich, wann du in deiner Macht als Keenich kommscht!“ 43 De Jesus hat do zu’m gesaht: „Du kannscht dich dodruf verlosse: Heit noch bischt du met mir im Paradies!“

De Jesus sterbt

44 Es war ungefähr zwällef Uhr meddaachs, wie’s im ganze Land uf ämo dunggel wor is. Das hat bis um drei Uhr nohmeddaachs gedauert. 45 Die Sunn hat sich zugezoh, un de Vorhang im Tembel is in de Midde ausenannergeriss. 46 Dann hat de Jesus laut geruf: „Vadder, in dei Hänn iwergew’ich mei Geischt.“ Un wie er das gesaht hott, is er gestorb.

47 E reemischer Hauptmann hat bei de Kreizichung die Ufsicht gehat. Wie der gesiehn hat, was bassiert is, hat er Gott gelobt un hat gesaht: „Do der Mann war wirklich gerecht!“ 48 Un die vile Leit, wo fer das Schauspiel beinannergelaf ware un gesiehn hann, was bassiert is, hann sich an die Bruscht geschlah un sinn bedripst hämmgezoh.

49 All die Leit, wo de Jesus gekennt hann, un die Weibsleit, wo vun Galiläa aus met em gang ware, hann awer weider weg gestann un hann sich alles angeguckt.

De Josef vun Arimadäa leht de Jesus in sei eichenes Grab

50 Zum Hohe Rot hat e Mann geheert, wo Josef gehääscht hat un wo vun Arimadäa, erer jidisch Stadt, war. Der war e gudder un e gerechder Mann 51 un hat selwer aach dodruf gewart, dass Gott sei Reich kommt. Er hat net jo gesaht gehat zu dene Sache, wo die annere vum Hohe Rot beschloss un gemacht hann. 52 Er is bei de Piladus gang un hat gefroht, ob er em Jesus sei Leich kriehn kännt. 53 Dann hat er die Leich vum Kreiz erunnergeholl un hat se in e Leinduuch gewiggelt un in e Grab geleht, wo in e Felse gehau war. In dem Grab hat vorher noch nimand geläh gehat. 54 Das is alles noch am Vorberädungsdaach bassiert, kurz vor’m Sabbat.

55 Die Weibsleit, wo me’m Jesus aus Galiläa komm ware, sinn hinner’m Josef gelaf un hann sich’s Grab angeguckt. Se hann aach zugeguckt, wie em Jesus sei Leichnam eningeleht wor is. 56 Dann sinn se serick in die Stadt gang un hann Salwe met Gewirze un Salbeel ferdich gemacht. De ganze Sabbat hann se awer Ruh gehall, so wie’s es jidische Gesetz vorschreibt.

24

De Jesus steht vun de Dode uf

1 Am eerschde Daach vun de Woch sinn die Weibsleit [u’met ihne noch e paar annere Leit] morjens ganz frieh ans Grab gang. Die Gewirzsalwe, wo se vorberät hodde, hann se metgenumm. 2 Se hann dann feschtgestellt, dass der Stän vor’m Ingang vun de Grabkammer eweggerollt war. 3 Do sinn se in die Kammer gang, awer de Leichnam vum Herr Jesus hann se net gefunn. 4 Wie se dodriwer kä Rot meh gewisst hann, hann uf ämo zwä Männer bei ne gestann. Die hann Kläder angehat, wo hell geleicht hann. 5 Do sinn die Weibsleit verschrock un hann uf de Boddem geguckt, awer die Männer hann zu ne gesaht: „Fer was suche ner dann dene, wo läbt, bei de Dode? 6 De Jesus is net do! Er is uferstann! Denggen emo an das, was er eich gesaht hat, wie er noch in Galiläa war: 7 ‚Ich, de Menschesohn, muss in die Gewalt vun sindiche Mensche ausgeliwert un gekreizicht werre, awer am dridde Daach muss ich wider ufstehn.’“ 8 Do is dene Frae ingefall, was de Jesus gesaht hott.

9 Dodenoh sinn se vum Grab in die Stadt serickgang un hann dene ellef Aposchdele un all de annere Jinger alles verzehlt, was se erläbt hodde. 10 Die Frae ware es Maria vun Magdala, es Johanna un das annere Maria, em Jakobus sei Mudder, außerdem noch e paar annere Weibsleit, wo bei ne ware. Se hann de Aposchdele alles verzehlt, 11 awer die Aposchdele hann das, was die Weibsleit gesaht hann, fer lääres Geschwätz gehall un hann’e net geglabt. 12 Do is de Petrus ufgestann un is ans Grab gelaf. Dort hat er sich noh vore gebickt un hat gesiehn, dass nur noch die Leindiecher, wo de Jesus drinn ingewiggelt war, in de Grabkammer geläh hann. Do is er wider hämmgang un hat sich iwer das gewunnert, was bassiert war.

Uf em Wääch noh Emmaus

13 Am selwe Daach sinn zwä vum Jesus seine Jinger in e Dorf gang, wo Emmaus gehääscht hat. Emmaus leiht so zwä Stunne Fußmarsch^a hinner Jerusalem. 14 Unnerwäächs hann se metenanner iwer alles geschwätzt, was bassiert war. 15 Un wie se so gesproocht un ihr Gedangge ausgedauscht hann, is de Jesus selwer bei se komm un is met ne gang. 16 Mer hätt känne männe, dass’e blind wäre, weil se ne net erkannt hann.

24:13^a Wärtlich: leiht 60 Stadie. Das sinn so ellef Kilomeder.

17 „Was sinn’enn das for Sache, wo ner do unnerwäächs so metenanner driwer schwätze?“, hat de Jesus die zwä do gefroht. „Un fer was mache ner so bedaierliche Gesichder?“ 18 Der äne vun’e – Kleopas hat er gehääscht – hat dodruf zum Jesus gesaht: „Du bischt ganz gewiss de Änzichde, wo sich grad in Jerusalem ufhallt un net wäß, was in de letschde Daache dort los war?“ 19 De Jesus hat die zwä gefroht: „Was dann?“ „Ei, das me’m Jesus vun Nazaret“, hann se do zu’m gesaht. „Der war e Prophet, u’met dem, was er vor Gott un vor’m ganze Volk gemacht un gesaht hat, hat er gewies, was for e Macht dass er hat. 20 Unser Hoheprieschder un Owerschde hann’e awer zum Dod verurdäle un kreiziche gelosst. 21 U’mir hann gehofft gehat, er wär der, wo Israel erleese dut. Dodebei sinn’s heit schun drei Daache, wo das bassiert is. 22 Dodezu hann uns aach noch e paar Weibsleit aus unserer Grupp ganz durchenanner geschafft. Die ware heit Morje schun frieh am Grab, 23 awer sei Leichnam hann se net gefunn. Wie se serickkomm sinn, hann se verzehlt, es wäre ne Engel erschien un hädde ne gesaht, er dät läwe. 24 Dodrufhin sinn e paar vun uns ans Grab gang un hann alles so gefunn, wie’s die Weibsleit gesaht hodde. De Jesus selwer hann se awer net gesiehn.“

25 Do hat de Jesus zu dene zwä gesaht: „Sinn ihr emo schwär vun Begriff! Es fallt eich arich schwär, fer an all das se glawe, was die Prophede gesaht hann! 26 De Messias hat doch das do alles durchmache un dann in sei Herrlichkät komme misse, oder net?“ 27 Dann hat er ne aus de ganz Heilich Schrift erklärt, was uf ihne geminzt war. Me’m Mose seine Biecher u’met de ganze Schrifde vun de Prophede hat er angefang.

28 So sinn se in die Näh vun dem Dorf komm, wo se hingewollt hann. De Jesus hat gemacht, wie wann er hat wolle weidergehn, 29 awer die zwä sinn em in de Arm gefall. „Bleib doch bei uns!“, hann se gesaht. „Es is schun Owend, un gleich werd’s dunggel.“ Do is de Jesus met ne ins Haus gang, fer bei ne se bleiwe.

30 Wie er dann met ne am Disch gehuckt hat, hat er’s Brot genumm un hat Gott dangge gesaht. Dann hat er’s durchgebroch un hat’s ne gebb. 31 Do is es dene zwä Jinger wie Schubbe vun de Aue gefall. Se hann de Jesus erkannt, awer do is er aach schun vor ihre Aue verschwunn. 32 Dodruf hat der äne zu dem annere gesaht: „War unser Herz net Feier un Flamm, wie er unnerwäächs met uns geschwätzt un uns die Heilich Schrift erklärt hat?“

33 Noch in derselwe Stunn sinn die zwä ufgestann un sinn noh Jerusalem serickgang. Dort hann se die ellef Aposchdele un die annere Jinger beinanner gefunn. 34 Die hann gesaht: „De Herr is wirklich uferstann! Er hat sich em Simon gewies.“ 35 Do hann se selwer aach verzehlt, was unnerwäächs bassiert war un wie se ne in dem Moment erkannt hann, wo er’s Brot gebroch hat.

De Jesus dut seine Jinger erscheine

36 Wie die zwä noch am Verzehle ware, was bassiert war, hat de Jesus uf ämo selwer midde unner de Jinger gestann un hat zu ne gesaht: „Ich winsche eich Friede!“ 37 Do sinn se verschrock un hann’s met de Angscht se dun krieht. Se hann nämlich gemännt, se däde e Geischt siehn. 38 „Fer was sinn’er dann so verschrock?“, hat se de Jesus do gefroht. „Un fer was losse ner Zweifel in eierm Herz ufsteihe? 39 Guggen eich doch nur emo mei Hänn u’mei Fieß an: Ich bin’s wirklich! Fahren a’mich dran un guggen! E Geischt hat nämlich kä Flääsch un kä Knoche, so wie ner se bei mir siehn känne.“ 40 Wie de Jesus das gesaht hat, hat er ne sei Hänn un sei Fieß gewies. 41 Do ware se ganz verwunnert. Se hann’s awer vor lauder Fräd immer noch net glawe känne. Do hat se de Jesus gefroht: „Hann’er ebbes se esse do?“ 42 Se hann em e Stick gebrotner Fisch gebb, un e Stiggelche Honichwawe. 43 Die hat de Jesus do genumm un vor ihre Aue gess.

44 Dodenoh hat er zu ne gesaht: „Das do sinn die Worde, wo ich eich gesaht hott, wie ich noch bei eich war: ‚Es muss alles indreffe, was im Mose seim Gesetz, in de Biecher vun de Prophede un in de Psalme iwer mich geschrieb steht.’“ 45 Dann hat de Jesus de Jinger Verstand gebb, fer die Heilich Schrift se bekäbbe. 46 „So steht’s doch geschrieb“, hat er zu ne gesaht, „un so hat de Messias vil Schweres durchmache un am dridde Daach vun de Dode uferstehn misse, 47 un in seim Name muss all de Välger gepreddicht werre: ‚Änneren eier Instellung, dann vergebt eich Gott eier Sinde!‘ In Jerusalem muss das anfange, 48 un ihr sinn Zeihe vun all dem, was bassiert is. 49 Ihr känne ganz sicher sinn: Ich schigge eich, was mei Vadder versproch hat! Bleiwen awer in de Stadt Jerusalem, bis die Kraft aus de Heh iwer eich kommt.“

De Jesus werd in de Himmel ufgenumm

50 Dodenoh hat de Jesus sei Jinger aus de Stadt enaus bis in die Näh vun Bedanie gefiehrt. Dort hat er sei Hänn hoochgehob un hat se geseechent. 51 Un wie er noch debei war, fer se se seechne, is er vun’e fortgang un is in de Himmel enufgehob wor. 52 Do hann’e die Jinger angebät un sinn arich froh noh Jerusalem serickgang. 53 Se sinn die ganz Zeit im Tembel geblieb un hann Gott gelobt un gedankt. Amen.