Westpfälzisch-südsaarländische Bibel Es lewennische Wort (ELW) – 2. Johannes

Do der kurze Brief, wo vum Johannes geschrieb wor is, dut sich an e unbekanndi Gemän wenne. Dodrinn halt de Johannes die Glaiwiche dodezu an, fer uf falsche Lehre se achde. Die Probleme sinn fascht dieselwe wie die, wo er in seim eerschde Brief angeschwätzt hat. Deshalb is aach in do dem Brief de zentrale Punkt es Bekenntnis zu Jesus Chrischdus: Er, Gott sei Sohn, is e Mensch aus Flääsch un Blut wor.

1

DE JOHANNES GRIESST DIE FRA, WO VUN GOTT AUSGEWÄHLT WOR IS: 1-3

1 Das do schreibt de Ällschde an die vornehm Fra, wo vun Gott ausgewählt wor is, un an der ihr Kinner.^a Ich hann eich wirklich lieb – awer aach all die annere, wo erkannt hann, was wohr is, un net nur ich. 2 Ich hann eich lieb, weil das, was wohr is, in uns bleibt un fer immer bei uns is.

1:1^a Bei dene Kinner geht’s meechlicherweis um e Gemän un um die Glieder vun der Gemän (genauso in Vers 13). Noh erer anner Uffassung geht’s um e Chrischdin, wo Eklekta (ausgewählt) oder Kyria (Herrin) gehääscht hat, un um der ihr leibliche Kinner.

3 Ich winsche eich Gnad, Erbarme un Friede vun Gott, em Vadder, un vum Herr Jesus Chrischdus, em Vadder seim Sohn. Ihr solle in dem, was wohr is, un in de Lieb läwe.

DE JOHANNES VERLANGT WOHRHÄT UN LIEB: 4-6

4 Ich ha’mich arich gefreit, dass ich unner deine Kinner e paar gefunn hann, wo sich noh dem, was wohr is, richde, so wie’s uns de Vadder ufgedrah hat. 5 Awer ich bidde dich jetz, vornehmi Fra: Mir wolle enanner doch lieb hann! Ich schreiwe der nix, was Gott eerscht vor kurzem angeordnet hat. Ich schreiwe der im Gähedäl ebbes, was mer schun vun Anfang an gehat hann. 6 Gott lieb se hann dut nämlich bedeide, dass mer uns noh dem, was er gebott hat, richde.^a Un was er gebott hat, so wie ner’s vun Anfang an geheert hann, besteht dodrinn, dass ner eier Läwe vun de Lieb bestimme losse solle.

1:6^a Oder: Enanner lieb se hann dut nämlich bedeide, dass mer uns noh dem, was Gott gebott hat, richde.

DE JOHANNES WARNT VOR DE FALSCHE PROPHEDE: 7-11

7 Es sinn nämlich schun e Haufe Verfiehrer in die Welt komm, Verfiehrer, wo net anerkenne, dass Jesus Chrischdus i’me menschliche Leib komm is. Wer das net anerkennt, verfiehrt annere un is de falsche Messias! 8 Nemmen eich in Acht, dass mer de volle Lohn kriehn un das, wo mer defor geschafft hann, net verliere!

9 Nimand hat Gott, wo zu weit geht un net bei dem bleibt, was uns Chrischdus beigebrung hat. Wer awer bei dem, was uns Chrischdus beigebrung hat, bleibt, hat de Vadder un de Sohn. 10 Wann jemand bei eich kommt un eich ebbes anneres beibringt, dann nemmen ne net ins Haus^a uf un dun’e aach net grieße! 11 Wer ne nämlich grießt, is fer das Beese, wo er macht, met verantwortlich.

1:10^a Entweder e Privathaus (wo eme Irrlehrer als Basis fer sei Arwet diene kännt) oder e Haus, wo sich die Gemän drinn versammelt (wo’s zu erer offiziell Begrießung komme dät).

DE JOHANNES GEBT GRIESS WEIDER: 12-13

12 Ich hätt eich noch vil se schreiwe, awer ich will’s net met Babier un Tinde mache. Ich hoffe awer, dass ich bei eich komme un perseenlich met eich schwätze kann. Dann is unser Fräd perfekt.

13 Die Kinner vun deiner Schweschder, wo aach vun Gott ausgewählt wor is, losse dich grieße!^a Amen.

1:13^a Die Kinner vun der Schweschder, wo aach vun Gott ausgewählt wor is, sinn meechlicherweis die Glieder vun der Gemän, wo de Johannes dezugeheert hat (vgl. Vers 1).