Westpfälzisch-südsaarländische Bibel Es lewennische Wort (ELW) – Matthäus

Was rein un was unrein is

10 Dodenoh hat de Jesus die Leit bei sich geruf un hat zu ne gesaht: „Horchen emo her un begreifen! 11 Net das, was durch de Mund in de Mensch eninkommt, macht ne unrein. Im Gähedäl! Was aus em Mund erauskommt, das macht ne unrein.“

12 Dodrufhin sinn die Jinger bei de Jesus komm un hann zu’m gesaht: „Wääscht du aach, dass sich die Pharisäer geärjert hann, wie se geheert hann, was du do gesaht hascht?“ 13 Dodruf hat de Jesus gesaht: „Jedi Planz, wo net vu’meim Vadder im Himmel geplanzt wor is, werd ausgerobbt. 14 Lossen se schwätze! Se sinn Blinde, wo annere Blinde fiehre, un wann äner Blinder e annerer Blinder fiehrt, falle se allezwä in de Grawe.“

15 Do hat de Petrus zu’m gesaht: „Erklär uns es Gleichnis vun dem, was unrein macht!“ 16 „Sinn ihr dann aach so unverstännich?“, hat de Jesus do gesaht. 17 „Siehn’er dann noch net in, dass alles, was durch de Mund in de Mah geht, vun dort wider ausgeschied werd? 18 Was awer aus em Mund erauskommt, kommt aus em Herz, un das macht de Mensch unrein. 19 Aus em Herz kommt’s nämlich, dass e Mensch Beeses denkt, dass er annere umbringt, näwenausgeht, hurt, klaut, lieht un schlecht iwer annere schwätzt. 20 Das is es, was de Mensch unrein macht, awer met ungewäschde Hänn se esse macht ne net unrein!“

De Jesus macht erer Kanaaniderin ehr Dochder gesund

21 Dodenoh is de Jesus vun dort fortgang un hat sich in die Geechend vun Tirus un Sidon serickgezoh. 22 Do is uf ämo e kanaanidischi Fra aus der Geechend dort bei ne komm un hat geruf: „Herr, du Sohn vum David, erbarm dich iwer mich! Mei Dochder werd furchbar vu’me Dämon gequeelt.“ 23 Awer de Jesus hat er met käm Wort e Antwort gebb. Do sinn sei Jinger bei ne komm un hann’e triweliert: „Schick die Fra doch fort! Se krääscht nämlich dauernd hinner uns her.“ 24 Awer de Jesus hat dodruf gesaht: „Gott hat mich nur bei die verlorene Schäf vum Volk Israel geschickt.“ 25 Do is die Fra komm un is vor’m Jesus uf die Knie gefall. „Herr, helf mer!“, hat se gebeddelt. 26 Awer de Jesus hat dodruf gesaht: „Es is net richdich, wa’mer de Kinner es Brot ewegnemmt un dut’s de Hinncher hinschmeiße!“ 27 „Jo, Herr“, hat die Fra gesaht, „awer die Hinncher fresse doch aach vun dene Brotkrimele, wo vum Disch vun ihre Herre erunnerfalle.“ 28 Do hat de Jesus zu rer gesaht: „Fra, dei Glawe is groß! Was du willscht, sollsch’e kriehn!“ Vun do der Stunn an war ihr Dochder gesund.

De Jesus macht e Haufe Krangge gesund

29 Dodenoh is de Jesus dort fortgang un is an de See vun Galiläa komm. Dann is er uf e Berch gang un hat sich dort hingehuckt. 30 Massich Leit sinn bei ne komm un hann Lahme, Blinde, Stumme, Verkribbelde un e Haufe annere Krangge bei sich gehat. Die hann se vor sei Fieß geleht, un er hat se gesund gemacht. 31 Do hann sich die Leit gewunnert, wie se gesiehn hann, dass die Stumme geschwätzt hann, die Kribbel gesund wor sinn, die Lahme hin- un hergang sinn un die Blinde gesiehn hann, un hann de Gott vum Volk Israel gelobt.

Wie de Jesus 4.000 Leit ebbes se esse gebb hat

32 Dodenoh hat de Jesus sei Jinger bei sich geruf un hat gesaht: „Die Leit dauere mich! Die sinn nämlich schun seit drei Daache bei mer un hann nix meh se esse. Ich will se net uf nichdere Mah hämmschigge, sunscht kännde se unnerwäächs noch sesammebreche.“ 33 Do hann sei Jinger zu’m gesaht: „Wo solle mer dann in do der abgeläh Geechend genunk Brot herkriehn, fer so vil Leit satt se mache?“ 34 De Jesus hat se gefroht: „Wiffel Brot hann’er dann?“ „Siwe Laib“, hann se do gesaht, „un noch e paar Fisch.“

35 Do hat de Jesus die Leit gehääscht, fer sich uf de Boddem se hugge. 36 Dann hat er die siwe Laib Brot un die Fisch genumm, hat Gott dangge gesaht un hat se durchgebroch un seine Jinger gebb, un die hann se an die Leit verdält. 37 Do hann die Leit allegar gess un sinn satt wor. Dodrufhin hann die Jinger die Brogge, wo iwerich geblieb ware, ingesammelt – zwällef Kärb voll. 38 Es ware awer 4.000 Mannsleit, wo gess hodde, die Weibsleit un Kinner net metgerechent.

39 Dodenoh hat de Jesus die Leit hämmgeschickt un is ins Boot gestieh un in die Geechend vun Magdala gefahr.

16

Die Pharisäer un Sadduzäer verlange e Zääche vum Jesus

1 Dodenoh sinn die Pharisäer un Sadduzäer bei de Jesus komm, fer ne uf die Prob se stelle. „Loss uns e Zääche vum Himmel siehn!“, hann se vu’m verlangt. 2 Dodruf hat de Jesus awer zu ne gesaht: „Owends sahn’er: ‚Es gebt scheenes Wedder. De Himmel is nämlich rot.’ 3 Un morjens sahn’er: ‚Heit werd’s stirmisch. De Himmel is rot un dunggel.’ [Ihr Scheinheiliche!] Ihr känne beurdäle, wie de Himmel aussieht, awer die Zääche vun de Zeit känne ner net beurdäle. 4 Do die Generation, wo bees un treilos is, verlangt e Zääche, awer se krieht kä anneres Zääche wie nur es Zääche vum Prophet Jona.“^a Dodenoh hat de Jesus die Pharisäer un Sadduzäer stehn gelosst un is fortgang.

16:4^a Die drei Daache, wo de Prophet Jona im Bauch vu’me große Fisch war, sinn wie die drei Daache, wo de Jesus im Grab geläh hat (vgl. Mt 12,40).

De Jesus warnt die Leit vor de Pharisäer un Sadduzäer

5 Wie em Jesus sei Jinger uf die anner Seit vum See komm sinn, hann se vergess gehat, fer Brot metsenemme. 6 Do hat de Jesus zu ne gesaht: „Bassen uf un nemmen eich vor de Pharisäer un Sadduzäer ihrm Sauerdääch in Acht!“ 7 Do hann se sich Gedangge gemacht un hann zuenanner gesaht: „Das saht er, weil mer kä Brot metgenumm hann.“ 8 Wie de Jesus gemerkt hat, was se beschäfdicht hat, hat er zu ne gesaht: „Was hann’er doch nur so wenich Glawe! Fer was mache ner eich dann Gedangge, weil ner kä Brot metgenumm hann? 9 Begreife ner dann immer noch nix? Erinnere ner eich net an die finnef Laib Brot fer die 5.000 Mensche un dodran, wiffel Kärb voll Brogge dass ner ufgeläst hann? 10 Oder an die siwe Laib Brot fer die 4.000 Mensche un dodran, wiffel Kärb voll Brogge dass ner do ufgeläst hann? 11 Fer was begreife ner dann net, dass ich met eich net iwer’s Brot geschwätzt hann? Vor de Pharisäer un Sadduzäer ihrm Sauerdääch solle ner eich in Acht nemme!“ 12 Do hann die Jinger verstann, dass er net gemännt hat, se sollde sich vor dem Sauerdääch, wo mer Brot demet backt, in Acht nemme. Se hann sich im Gähedäl vor dem in Acht nemme solle, was die Pharisäer un Sadduzäer de Leit beibringe.

De Petrus bekennt sich zum Jesus

13 Wie de Jesus in die Geechend vun Cäsarea Philibbi komm is, hat er sei Jinger gefroht: „Fer wene halle mich, de Menschesohn, die Leit eichentlich?“ 14 „Die äne halle dich fer de Johannes, wo gedaft hat“, hann die Jinger do gesaht, „annere fer de Elija un noch annere fer de Jeremia oder äner vun de annere Prophede.“ 15 Do hat er se gefroht: „Un ihr, fer wene halle ihr mich?“ 16 „Du bischt de Messias, de Sohn vum lewenniche Gott!“, hat de Simon Petrus dodruf gesaht.

17 Dodrufhin hat de Jesus zum Petrus gesaht: „Du bischt glicklich se nenne, Simon, Sohn vum Jona. Mei Vadder im Himmel hat der das nämlich offebart un net e Mensch aus Flääsch un Blut! 18 Deshalb sahn ich der aach: Du bischt e Felse, Petrus,^a un uf dene Felse^b dun ich mei Gemän baue. Un die Gewalde^c vum Dodereich känne se net iwerwäldiche! 19 Ich gewe der die Schlissel vum Himmelreich. Was du uf de Erd verbiede duscht, is aach im Himmel verbott, un was du uf de Erd erlawe duscht, is aach im Himmel erlabt!“

16:18^a Petrus dut Stän oder Felse oder Felsbrogge bedeide.

16:18^b Griechisch petra. Das dut Felsmassiv bedeide.

16:18^c Wärtlich: die Dore.

20 Dodrufhin hat de Jesus seine Jinger gebott, se sollde nimand sahn, dass er, de Jesus, de Messias is.

De Jesus kinnicht zum eerschde Mo an, dass er vil durchmache un sterwe muss

21 Vun do an hat de Jesus angefang, fer seine Jinger se weise, dass er noh Jerusalem gehn un wäh de Ällschde, de Hoheprieschder un de Schriftgelehrde vil Schweres durchmache muss. Er hat ne gesaht, dass er umgebrung werre un am dridde Daach wider ufstehn muss.

22 Do hat ne de Petrus uf die Seit genumm un hat angefang, fer em Vorwirf se mache. „Bloß net, Herr!“, hat er gesaht. „Das do darf der net bassiere!“ 23 Awer de Jesus hat sich erumgedräht un hat zum Petrus gesaht: „Mach, dass de fortkommscht, du Deiwel! Du willscht mich zu Fall bringe! Du hascht nämlich im Sinn, was die Mensche wolle, un net das, was Gott will.“

Vum richdiche Läwe me’m Jesus

24 Dodenoh hat de Jesus zu seine Jinger gesaht: „Wer mir nohkomme will, soll sich selwer ufgewe un soll sei Kreiz uf sich nemme u’met mer komme! 25 Wer nämlich sei Läwe redde will, dut’s verliere. Wer awer sei Läwe wäh mir verliert, der dut’s finne! 26 Was nutzt’s dann schun eme Mensch, wann er die ganz Welt gewinnt, awer dodebei sei Seel verliert? U’met was for’me Preis kann e Mensch sei Seel serickkafe? 27 Ich, de Menschesohn, komme nämlich emo in de Herrlichkät vu’meim Vadder u’met meine Engel. Dann bezahl ich jedem noh dem serick, was er gemacht hat.

28 „Das äne sahn ich eich: Vun dene, wo do stehn, sterwe e paar net, bis se mich, de Menschesohn, met all meiner Macht als Keenich komme siehn.“

17

De Jesus werd ganz annerschder

1 Sechs Daache späder hat de Jesus de Petrus, de Jakobus un dem sei Bruder, de Johannes, metgenumm un is met ne uf e hoocher Berch gang, wo se allän ware. 2 Dort is er vor ihre Aue uf emo ganz annerschder wor. Sei Gesicht hat wie die Sunn geschien, un sei Kläder sinn so weiß wie’s Licht wor. 3 Uf ämo sinn aach de Mose un de Elija vor ne erschien. Die hann me’m Jesus geschwätzt. 4 „Herr“, hat de Petrus do zum Jesus gesaht, „es is gutt, dass mer do sinn! Wann du willscht, wolle mer do drei Haisjer baue, äns fer dich, äns fer de Mose un äns fer de Elija.“ 5 Wie er noch geschwätzt hat, hat uf ämo e helli Wolk ihr Schadde uf se geschmiss. Un aus der Wolk hat e Stimm geruf: „Das do is mei liewer Sohn, wo ich mei Fräd dran hann. Uf dene solle ner heere!“

6 Wie die Jinger das geheert hann, hann se’s orndlich met de Angscht se dun krieht un sinn me’m Gesicht noh vore uf de Boddem gefall. 7 De Jesus is awer bei se komm un hat an se drangefahr. „Stehn uf!“, hat er gesaht, „ihr brauche kä Angscht se hann!“ 8 Un wie se ufgeguckt hann, hann se nimand meh gesiehn wie nur de Jesus.

De Jesus un de Elija

9 Wie se dann vun dem Berch erunnergang sinn, hat ne de Jesus gebott: „Sahn nimand ebbes, was ner gesiehn hann, bis ich, de Menschesohn, vun de Dode uferstann bin!“

10 Do hann’e sei Jinger gefroht: „Fer was sahn’enn die Schriftgelehrde, dass de Elija seeerscht komme muss?“ 11 Dodruf hat de Jesus zu ne gesaht: „Es stimmt, de Elija kommt seeerscht un bringt alles wider in die Reih. 12 Ich sahn eich awer: De Elija is schun komm, awer die Leit hann’e net erkannt. Se hann im Gähedäl met em gemacht, was se gewollt hann. Genauso hann aach ich, de Menschesohn, noch Schweres wäh dene durchsemache!“ 13 Do hann’s die Jinger bekäppt: Er hat iwer de Johannes, wo gedaft hat, met ne geschwätzt.

E Bub, wo besess is, werd frei

14 Wie de Jesus met seine drei Jinger bei die Leit serickkomm is, is e Mann bei ne komm un is vor’m uf die Knie gefall. 15 „Herr“, hat er gesaht, „erbarm dich iwer mei Bub! Der is nämlich mondsichdich, un was der durchmacht, is furchbar. Oft fallt er ins Feier oder ins Wasser. 16 Ich hann’e bei dei Jinger gebrung, awer die hann’e net gesund mache känne.“

17 „Ach, was sinn’er doch for e unglaiwichi un verkehrdi Generation!“, hat de Jesus dodruf gesaht. „Wie lang muss ich noch bei eich bleiwe? Wie lang muss ich eich noch aushalle? Bringen mer dene Bub emo doher!“ 18 Dodrufhin hat de Jesus dem Dämon gedroht. Do is er aus dem Bub ausgefahr, un der Bub war vun der Stunn an gesund.

19 Dodenoh sinn die Jinger allän bei de Jesus komm un hann’e gefroht: „Fer was ha’mir dann do dene Geischt net ausdreiwe känne?“ 20 „Weil ner kä Glawe hann!“, hat de Jesus do zu ne gesaht. „Das äne sahn ich eich: Wann eier Glawe aach nur so groß wie e Senneftkäre wär, kännde ner zu do dem Berch sahn: ‚Rick vun do noh dort!’ un er dät dorthin rigge. Nix wär fer eich dann unmeechlich! [ 21 Do die Sort fahrt awer nur aus äm eraus, wa’mer bäde un faschde dut!“]

De Jesus kinnicht zum zwädde Mo an, dass er vil durchmache un sterwe muss

22 Wie sich de Jesus met seine Jinger in Galiläa ufgehall hat, hat er zu ne gesaht: „Ich, de Menschesohn, werre in die Gewalt vun de Mensche ausgeliwert, 23 un se bringe mich um, awer am dridde Daach dun ich wider ufstehn!“ Do sinn die Jinger ganz draurich wor.

Die Tembelsteier

24 Wie de Jesus un sei Jinger dann noh Kapernaum komm sinn, sinn die Mannsleit, wo die Dobbeldrachme^a ingedrieb hann, bei de Petrus gang un hann gefroht: „Bezahlt eier Määschder die Dobbeldrachme eichentlich net?“ 25 „Doch!“, hat de Petrus do gesaht.

17:24^a Das is der Bedraach, wo jeder jidische Mann im Februar/März fer de Tembel hat misse bezahle. Er hat em Wert vun dem entsproch, was jemand an zwä Daache verdient hat.

Wie de Petrus dann ins Haus komm is, hat em de Jesus vorgegriff un hat ne gleich gefroht: „Was männsch’e dann, Simon? Vun wem dreiwe die Keeniche vun do der Erd Zoll un Steiere in? Vun ihre eichene Kinner oder vun de annere Leit?“ 26 „Vun de annere Leit!“, hat de Petrus do zu’m gesaht. Dann hat de Jesus zu’m gesaht: „Also sinn die Kinner devun befreit! 27 Mir wolle awer die Leit, wo die Dobbeldrachme indreiwe, net vor de Kopp stoße. Geh deshalb an de See un schmeiß dei Angelschnur aus. Nemm de eerschde Fisch, wo du erausziehscht, un mach em’s Maul uf! Dort finnsch’e dann e Vierdrachme-Geldstick! Nemm das un gebb’s fer mich un fer dich ab!“

18

DE MATTHÄUS VERZEHLT, WIE DE JESUS IWER DIE DEMUT UN IWER’S VERGEWE GESCHWÄTZT HAT: 18,1-35

Wer is de Greeschde?

1 In derselwe Stunn sinn die Jinger bei de Jesus komm un hann gefroht: „Wer is’enn eichentlich de Greeschde im Himmelreich?“ 2 Do hat de Jesus e Kind bei sich geruf un hat’s midde unner se gestellt 3 un gesaht: „Das äne sahn ich eich: Wann’er eich net bekehre un wie die Kinner werre, komme ner net ins Himmelreich! 4 Wer so demiedich werd wie do das Kind, is de Greeschde im Himmelreich! 5 Un wer so e Kind i’meim Name ufnemmt, der dut mich ufnemme.“

De Jesus warnt vor de Verfiehrung

6 „Wer awer äner vun do dene Kläne, wo a’mich glawe, zum Beese verfiehrt, fer dene wär’s besser, wa’mer’m e Miehlestän an de Hals hängge un’e dodemet im diefe Meer versengge dät!“

7 „Weh de Welt wäh dene Sache, wo Mensche demet verfiehrt werre! Es losst sich zwar net vermeide, dass so Sache bassiere, awer weh dem Mensch, wo dodran Schuld is!“

8 „Hack dei Hand oder dei Fuß ab un schmeiß se fort, wann se dich zum Beese verfiehre! Es is besser fer dich, wann du lahm oder ohne Hand ins ewiche Läwe gehscht, als wie wann du zwä Hänn oder zwä Fieß hascht un ins ewiche Feier geschmiss werscht! 9 Un reiß dei Au aus un schmeiß es fort, wann’s dich zum Beese verfiehrt! Es is besser fer dich, wann du nur met äm Au ins ewiche Läwe gehscht, als wie wann du zwä Aue hascht un ins Feier vun de Häll geschmiss werscht!“

Es Gleichnis vu’me Schof, wo verlorgang is

10 „Nemmen eich in acht, dass ner net äner vun do dene Kläne verachde! Ich sahn eich: Ihr Engel im Himmel siehn die ganz Zeit es Gesicht vu’meim himmlische Vadder! [ 11 Ich, de Menschesohn, bin nämlich komm, fer se redde, was verlor is.“]

12 „Was männe ner? Angenumm, jemand hat hunnert Schäf, un äns devun dut sich verlafe. Losst der net die 99 annere Schäf in de Berche serick un macht sich uf de Wääch, fer das äne se suche, wo sich verlaf hat? 13 Das äne sahn ich eich: Wann er’s finnt, freit er sich iwer das äne meh wie iwer die 99 annere, wo sich net verlaf hann. 14 Genauso is es bei eierm Vadder im Himmel: Er will net, dass äns vun do dene Kläne verlor geht.“

Vun de Verantwordung fer de Bruder

15 „Geh un weis dei Bruder unner vier Aue serecht, wann er sich an der versindicht! Heert er dann uf dich, hasch’e dei Bruder gewunn. 16 Wann er awer net uf dich heert, geh met äm oder zwä annere wider bei ne. Jedi Sach soll nämlich durch das entschied werre, was zwä oder drei Zeihe aussahn. 17 Wann er uf die aach net heert, sah’s de Gemän. Heert er awer aach net uf die Gemän, dann soll er in deine Aue wie äner sinn, wo Gott net kennt, oder wie e Zällner.“

18 „Das äne sahn ich eich: Alles, was ner uf de Erd verbiede, is aach im Himmel verbott, un alles, was ner uf de Erd erlawe, is aach im Himmel erlabt.“

19 „Un noch ebbes sahn ich eich: Wann sich zwä vun eich do uf de Erd in irjend erer Sach änich werre, fer ebbes se bidde – was immer das is –, dann kriehn se das vu’meim Vadder im Himmel! 20 Wo nämlich zwä oder drei i’meim Name sesammekomme, bin ich midde unner ne!“

Berät, fer em Bruder alles un immer se vergewe

21 Dodenoh is de Petrus bei de Jesus komm un hat gefroht: „Herr, wie oft muss ich’enn meim Bruder vergewe, wann er sich a’mer versindicht? Bis zu siwemo?“ 22 Dodruf hat de Jesus zu’m gesaht: „Ich sahn der: net bis zu siwemo, awer bis zu sibzichmo siwemo!“^a

18:22^a Das hääscht e unbegrenzdi Anzahl vun Mole.

Es Gleichnis vu’me Schuldner, wo die Schuld erloss krieht un wo selwer eme annere die Schuld net erlosst

23 „Aus dem Grund is es me’m Himmelreich aach wie met eme Keenich, wo met seine Diener hat wolle abrechene. 24 Wie er dodemet angefang hat, is äner bei ne gebrung wor, wo em e Millionebedraach^a schullich war. 25 Un weil er dene net hat känne serickbezahle, hat sei Herr Order gebb, fer ne met seiner Fra un seine Kinner u’met allem, was er hott, se verkafe un die Schuld se begleiche. 26 Do is der Diener vor’m uf die Knie gefall un hat gebeddelt: ‚Herr, sei gedullich met mer! Ich bezahle der alles serick!’“

18:24^a Wärtlich: 10.000 Talende. Das war in de Zeit vum Jesus die greescht Geldinhät. E Talent war 6.000 Drachme bzw. Denare wert, das hääscht de Lohn vun 6.000 Daache oder de Lohn fer rund 20 Johr Arwet.

27 „Do hat dene Herr sei Diener gedauert, un er hat ne freigebb un em die Schuld erloss. 28 Kaum war der Diener die Dir draus, hat er äner vun seine Metdiener gedroff, wo em 100 Denare^a schullich war. Dene hat er gegriff un hat em de Hals zugedrickt un gesaht: ‚Bezahl, was de mir schullich bischt!’ 29 Do is sei Metdiener vor sei Fieß nidergefall un hat ne angebeddelt: ‚Sei gedullich met mer! Ich bezahle der alles serick!’ 30 Er hat awer net dodruf ingehn wolle. Er is im Gähedäl fortgang un hat ne ins Gefängnis schmeiße gelosst, bis er serickbezahlt hätt, was er schullich war. 31 Wie die annere Diener gesiehn hann, was vorgefall war, ware se zudiefscht bedrickt un sinn bei ihr Herr gelaf un hann em alles verzehlt, was vorgefall war.“

18:28^a Vergleichsweis wenich Geld.

32 „Dodrufhin hat der Herr dene eerschde Diener rufe gelosst un hat zu’m gesaht: ‚Du raulicher Diener! Die ganz Schuld hann ich der erloss, weil du mich so angebeddelt hascht. 33 Hättscht du dann do met deim Metdiener net aach Erbarme hann misse, so wie ich met dir Erbarme hott?’ 34 Dodenoh is sei Herr ganz bees wor un hat ne de Folderknechde iwergebb, bis er alles serickbezahlt hätt, was er’m schullich war.“

35 „Genauso geht aach mei Vadder im Himmel emo met jedem vun eich um, wo seim Bruder [sei Verfählunge] net vun ganzem Herz vergebt!“

19

DE MATTHÄUS DUT BERICHDE, WIE DE JESUS UN SEI JINGER NOH JERUSALEM GANG SINN: 19,1-23,39

De Jesus macht sich met seine Jinger uf noh Judäa

1 Wie de Jesus ferdich war, fer das alles se sahn, is er aus Galiläa fortgang un is uf de anner Seit vum Jordan ins Gebiet vun Judäa komm. 2 E Haufe Leit sinn em nohgelaf, un er hat se dort gesund gemacht.

Iwer die Eh un die Eheschädung

3 Do sinn die Pharisäer bei de Jesus komm un hann’e uf die Prob stelle wolle. „Darf sich e Mann aus irjend eme Grund vun seiner Fra schäde losse?“, hann se ne gefroht. 4 Dodruf hat de Jesus zu ne gesaht: „Hann’er dann net geläst, dass Gott, wo alles gemacht hat, die Mensche am Anfang als Mann un als Fra gemacht hat? 5 Un dass er gesaht hat: Aus dem Grund geht e Mann aach vun seim Vadder un vun seiner Mudder fort un dut sich an sei Fra binne. Die zwä sinn dann äner Leib? 6 Se sinn also äner Leib un nemmeh zwä. Deshalb: Was Gott sesammegebrung hat, darf e Mensch net ausenannerreiße!“

7 Do hann’e die Pharisäer gefroht: „Fer was hat’enn de Mose dann vorgeschrieb, dass mer der Fra e Schädungsurkund ausstelle un se fortschigge soll?“ 8 Dodruf hat de Jesus zu ne gesaht: „Nur weil ner so hartherzich sinn, hat eich de Mose erlabt, fer eich vun eiere Weibsleit schäde se losse. Awer am Anfang war das net so. 9 Ich sahn eich: Wer sich vun seiner Fra schäde losst un e anneri heiradt – außer wann se’m untrei wor is^a –, der geht näwenaus. [Un wer e Fra heiradt, wo geschied is, geht aach näwenaus.]“

19:9^a Wärtlich: außer wann e Fall vun Hurerei vorleiht.

10 Do hann die Jinger zum Jesus gesaht: „Wann’s zwische Mann un Fra so steht, is es besser, wa’mer gar net heirade dut.“ 11 „Net jeder begreift, was ich grad gesaht hann“, hat de Jesus dodruf zu ne gesaht. „Nur die begreife’s, wo Gott es Verständnis defor gebb hat. 12 Manche Mensche sinn nämlich schun vun Geburt an unfähich, fer se heirade. Annere werre durch e Ingriff vun Mensche unfähich dezu gemacht, un noch annere verzichde vun sich aus uf e Eh, dass’e ganz fer’s Himmelreich do sinn känne. Wer’s begreife kann, soll’s begreife!“

De Jesus dut die Kinner seechne

13 Dodenoh hann die Leit Kinner bei de Jesus gebrung un hann gewollt, dass er ne die Hänn uflehe un fer se bäde dät, awer die Jinger hann die Leit barsch abgewies. 14 Do hat de Jesus gesaht: „Lossen doch die Kinner bei mich komme un hallen se net dodevun ab! So Mensche geheert nämlich es Himmelreich.“ 15 Dodrufhin hat er de Kinner die Hänn ufgeleht un is vun dort weidergezoh.

E Reicher froht noh’m ewiche Läwe

16 Dann is e Mann bei de Jesus komm un hat ne gefroht: „Gudder Määschder, was an Guddem muss ich’enn mache, fer’s ewiche Läwe se kriehn?“ 17 „Fer was nennsch’e mich dann gutt?“, hat de Jesus do zu’m gesaht. „Gutt is nur Gott, sunscht nimand! Hall, was Gott gebott hat, wann de ins Läwe ingehn willscht!“

18 „Was dann vun dem, was Gott gebott hat?“, hat der Mann de Jesus do gefroht, un de Jesus hat gesaht: „Das do: Bring nimand um, geh net näwenaus, klau net, lieh net, 19 ehr dei Vadder un dei Mudder un: Du sollscht dei Nägschder genauso lieb hann wie dich selwer!“ 20 Do hat der junge Mann zum Jesus gesaht: „Das hann ich alles vun Kind an genauso gemacht! Was fählt mer dann jetz noch?“

21 De Jesus hat zu’m gesaht: „Geh un verkaf alles, was de hascht, wann de vollkomme sinn willscht, un gebb’s Geld, wo de dodefor kriescht, an die Arme. Dann hasch’e e Schatz im Himmel! Un dann komm, un geh met mer!“ 22 Wie der junge Mann das geheert hat, is er draurich fortgeschlich. Er war nämlich zimlich reich.

23 Dodrufhin hat de Jesus zu seine Jinger gesaht: „Das äne sahn ich eich: E Reicher hat’s schwär, fer ins Himmelreich se komme. 24 Un noch ebbes sahn ich eich: Es is leichder fer e Kamel, fer durch’s Nodelehr se gehn als wie fer e Reicher, fer in Gott sei Reich se komme!“ 25 Wie sei Jinger das geheert hann, ware se entsetzt un hann gesaht: „Wer kann’enn dann iwerhaupt noch gerett werre?“ 26 Do hat se de Jesus angeguckt un hat zu ne gesaht: „Bei de Mensche is das unmeechlich, awer bei Gott is alles meechlich!“

Vum Lohn, wo die kriehn, wo ihr Wääch me’m Jesus gehn

27 Do hat de Petrus zum Jesus gesaht: „Guck emo, mir hann alles stehn- un leihegelosst un sinn met der gang. Un was krieh’mer dodefor?“ 28 „Das äne sahn ich eich“, hat de Jesus do zu ne gesaht, „wann Gott die Welt nei macht un wann ich, de Menschesohn, uf meim herrliche Thron hugge, dann hugge ihr, wo ner met mer komm sinn, aach uf zwällef Throne un richde die zwällef Stämm vum Volk Israel. 29 Un jeder, wo wäh mir Haiser, Brieder oder Schweschdere, Vadder oder Mudder, Fra, Kinner oder Felder sericklosst, krieht das hunnertfach serick un dut’s ewiche Läwe erwe! 30 Vil awer, wo jetz die Eerschde sinn, sinn dann die Letschde, un die Letschde sinn die Eerschde.“

20

Es Gleichnis vun dene Leit, wo im Weinberch geschafft hann

1 „Me’m Himmelreich is es nämlich wie met eme Mann, wo e Weinberch hott. Morjens frieh is er aus em Haus gang, fer Leit insestelle. Die hann in seim Weinberch schaffe solle. 2 Er hat sich met ne uf de iebliche Daacheslohn vun äm Denar geänicht. Dann hat er se in sei Weinberch geschickt. 3 Um 9 Uhr is er wider enausgang un hat noch annere gesiehn, wo uf em Marktplatz erumgestann hann un nix se dun hodde. 4 ‚Gehn ihr doch aach i’mei Weinberch schaffe!’, hat er zu ne gesaht. ‚Ich gewe eich dodefor e gerechder Lohn.’ 5 Do sinn die gang. Gäh Meddaach un um 3 Uhr nohmeddaachs is der Mann wider enausgang un hat Leit ingestellt. 6 Un wie er um 5 Uhr enausgang is, hat er immer noch e paar gefunn, wo do erumgestann hann un nix se dun hodde. ‚Fer was stehn’er dann de ganze Daach do erum, ohne ebbes se schaffe?’, hat er se gefroht. 7 ‚Es hat uns nimand Arwet gebb’, hann se’m do gesaht. Dodruf hat er zu ne gesaht: ‚Gehn ihr aach noch i’mei Weinberch schaffe! [Ihr kriehn dodefor e gerechder Lohn.]’“

8 „Wie’s Owend wor is, hat der Mann, wo dene Weinberch hott, zu seim Verwalder gesaht: ‚Ruf die Leit, wo geschafft hann, sesamme un bezahl ne de Lohn aus! Fang bei de Letschde an un heer bei de Eerschde uf!’ 9 Do sinn die Mannsleit, wo eerscht um 5 Uhr nohmeddaachs angefang hodde, noh vore komm un hann jeder e Denar krieht. 10 Wie dann die Eerschde noh vore komm sinn, hann se gemännt, se däde meh kriehn, awer aach sie hann jeder nur äner Denar krieht. 11 Do hann se angefang, fer iwer dene Mann, wo dene Weinberch hott, se meggere. 12 ‚Do die Letschde hann nur e änzichi Stunn geschafft’, hann se gesaht, ‚un du hascht se genauso wie uns behannelt, wo mer die Lascht vum Daach un die Hitz ausgehall hann!’ 13 Do hat der Mann, wo dene Weinberch hott, zu äm vun’e gesaht: ‚Freindche, ich dun der kä Unrecht! Hascht du dich dann net met mir uf äner Denar geänicht gehat? 14 Nemm also dei Geld un geh! Ich will awer do dem Letschde genauso vil gewe wie dir. 15 Darf ich dann net met dem, was mein is, mache, was ich will? Oder bisch’de neidisch, weil ich so gutt bin?’“

16 „Es kommt also emo so, dass die Letschde die Eerschde un die Eerschde die Letschde sinn. [Gott hat nämlich e Haufe Leit geruf, awer er hat sich nur wenich ausgewählt.]“

De Jesus kinnicht zum dridde Mo an, dass er vil durchmache un sterwe muss

17 Dodenoh is de Jesus noh Jerusalem enufgang. Unnerwäächs hat er die zwällef Jinger uf die Seit genumm un hat zu ne gesaht: 18 „Horchen emo her! Mir gehn jetz noh Jerusalem. Dort werr’ich, de Menschesohn, an die Hoheprieschder un Schriftgelehrde ausgeliwert. Die verurdäle mich dann zum Dod 19 un gewe mich weider an Leit, wo kä Judde sinn, dass die mich verspodde, gääschele un kreiziche känne. Awer am dridde Daach stehn ich wider uf.“

Streit um die beschde Plätz in Gott seim Reich

20 Dodenoh is die Mudder vum Zebedäus seine Buwe met ihre zwä Buwe bei de Jesus komm un is vor’m uf die Knie gefall, weil se ebbes vu’m hat wolle hann. 21 „Was hättscht du dann gäre?“, hat se de Jesus do gefroht. Do hat se zu’m gesaht: „Loss mei zwä Buwe in deim Reich näwe der hugge, der äne rechts un der annere links vun der.“^a 22 Do hat de Jesus gesaht: „Ihr wisse gar net, was ner do verlange! Känne ihr dann dene Kelch ausdringge, wo ich ausdringge muss? [Känne ihr die Daf uf eich nemme, wo ich demet gedaft werre?]“^b „Das känne mer!“, hann se do zum Jesus gesaht. 23 Dodrufhin hat de Jesus zu ne gesaht: „Ihr dringge zwar emo aus meim Kelch [un nemme die Daf uf eich, wo ich demet gedaft werre], awer die Plätz rechts un links vu’mir se vergewe, is net mei Sach. Uf dene Plätz hugge emo die, wo mei Vadder dodefor bestimmt hat.“

20:21^a Die mächdichde Leit i’me Reich hann frieher rechts un links vum Keenich gehuckt.

20:22^b De Jesus froht sei Jinger an do der Stell, ob se dieselwe schreckliche Sache durchmache känne, wo ihm zustoße däde.

24 Wie die annere zeh Jinger das geheert hann, ware se schlecht uf die zwä Brieder se schwätze. 25 De Jesus hat se do allegar bei sich geruf un hat gesaht: „Ihr wisse doch: Die Herrscher vun de Välger dun die Välger unnerdrigge, un die Owerschde missbrauche ihr Macht gäh se. 26 Awer bei eich soll das net so sinn! Im Gähedäl! Wer bei eich groß werre will, soll eier Diener sinn, 27 un wer bei eich de Eerschde sinn will, soll eier Knecht werre. 28 Ich, de Menschesohn, bin jo aach net komm, fer mich bediene se losse. Ich bin im Gähedäl komm, fer se diene un fer mei Läwe als Bezahlung fer e Haufe Mensche hersegewe!“

Die zwä Blinde vun Jericho

29 Wie de Jesus met seine Jinger vun Jericho aus weidergezoh is, sinn e Haufe Leit met em gang. 30 Am Wääch hann awer zwä Blinde gehuckt, un wie die geheert hann, dass de Jesus vorbeigeht, hann se laut geruf: „Herr, du Sohn vum David, erbarm dich iwer uns!“ 31 Die Leit hann se awer angefahr un hann’e gebott, fer ruhich se sinn. Do hann se awer als noch lauder geruf: „Herr, du Sohn vum David, erbarm dich iwer uns!“ 32 Do is de Jesus stehn geblieb un hat die zwä bei sich geruf. „Was soll ich’enn fer eich mache?“, hat er gefroht. 33 „Herr, mir wolle siehn känne!“, hann die Blinde do zu’m gesaht. 34 Do hat se de Jesus gedauert, un er is an ihr Aue drangefahr. Un im selwe Aueblick hann se siehn känne un sinn hinner’m Jesus hergang.

21

De Jesus kommt in Jerusalem an

1 Wie de Jesus un sei Jinger dann in die Näh vun Jerusalem komm sinn un schun bis noh Betfage am Eelberch komm ware, hat de Jesus zwä Jinger fortgeschickt 2 un hat zu ne gesaht: „Gehn emo in das Dorf, wo do vor eich leiht! Ihr finne dann uf de Stell e Eselin, wo dort angebunn is un e klänes Eselche bei sich hat. Machen se los un bringen se doher bei mich! 3 Un wann jemand ebbes zu eich saht, sahn’er: ‚De Herr brauch se un schickt se gleich wider serick!’“ 4 Das alles is bassiert, weil hat solle indreffe, was durch de Prophet gesaht wor is:

5 „Sahn de Zionsstadt:^a
Guck nur emo: Dei Keenich kommt bei dich.
Er is sanft un dut uf eme Esel reide
un uf eme Eselsfohle, em Junge vu’me Laschtdier.“

21:5^a Wärtlich: Sahn de Dochder Zion!

6 Do sinn die zwä Jinger fortgang un hann gemacht, was ne de Jesus ufgedrah hott. 7 Se hann die Eselin un ihr klänes Eselche gebrung un hann ihr Kläder uf se geleht. Dann hann se de Jesus uf se gehuckt. 8 Do hann e Haufe Leit ihr Kläder uf em Wääch ausgebrät. Annere hann Äscht vun de Bäm abgeschnitt un hann se uf de Wääch gestraut.^a 9 Die Leit, wo vor un hinner’m Jesus hergang sinn, hann laut geruf: „Hosianna em Sohn vum David! Geseechent is der, wo im Name vum Herr kommt. Hosianna in de Heh!“

21:8^a Kläder un Äscht uf em Wääch aussebräde war bei de Judde e Meechlichkät, fer e wichdichi Person se ehre.

10 Wie de Jesus in Jerusalem ingezoh is, is die ganz Stadt in helli Ufreechung gerot, un die Leit hann gefroht: „Wer is’enn do der Mann?“ 11 Die, wo bei’m Jesus ware, hann do gesaht: „Das is de Jesus, der Prophet aus Nazaret in Galiläa.“

De Jesus schmeißt die Händler un Geldwechsler aus em Tembel

12 Dodenoh is de Jesus in Gott sei Tembel gang un hat die Händler un die Leit, wo dene ihr Sache im Tembel kaf hann, allegar enausgeschmiss. Die Dische vun de Geldwechsler un die Stänn vun de Dauwehändler hat er umgeschmiss 13 un hat zu dene Leit, wo dort Hannel gedrieb hann, gesaht: „In de Heilich Schrift steht: Mei Haus soll e Bäthaus genennt werre. Ihr hann awer e Raiwerhehl draus gemacht!“

14 Dodenoh sinn Blinde un Lahme im Tembel bei de Jesus komm, un er hat se gesund gemacht. 15 Die Hoheprieschder un die Schriftgelehrde hann die Wunner gesiehn, wo er gedun hat. Se hann aach die Kinner geheert, wo im Tembel laut geruf hann: „Hosianna em Sohn vum David!“ Do sinn se bees wor 16 un hann zum Jesus gesaht: „Heerscht du iwerhaupt, was die do rufe?“ „Sicher!“, hat de Jesus do zu ne gesaht, „awer hann’er dann nie geläst: Aus em Mund vun Unmindiche un kläne Kinner loscht du dei Lob erklinge?“ 17 Dodemet hat er se stehn gelosst un is aus de Stadt enaus noh Bedanie gang. Dort is er iwer Naacht geblieb.

De Jesus verflucht e Feichebam

18 Wie de Jesus frieh am nägschde Morje in die Stadt serickgang is, hat er Hunger gehat. 19 Do hat er am Wääch e änzelner Feichebam gesiehn un is uf ne zugang. Er hat awer nix wie nur Blädder a’m gefunn. Do hat er zu dem Bam gesaht: „An dir soll nie meh e Frucht wachse!“ Un uf de Stell is der Feichebam verdruggelt.

20 Wie die Jinger das gesiehn hann, hann se sich gewunnert. „Wie is’enn der Feichebam so schnell verdruggelt?“, hann se gefroht. 21 Dodruf hat de Jesus zu ne gesaht: „Das äne sahn ich eich: Wann’er glawe un net zweifele, känne ner net nur mache, was ich met dem Feichebam gemacht hann. Ihr känne dann sogar zu do dem Berch sahn: ‚Heb dich hooch un schmeiß dich ins Meer!’ Das bassiert dann. 22 Alles, was ner im Gebät verlange, kriehn’er, wann’er glawe!“

Die Hoheprieschder frohe de Jesus noh seiner Vollmacht

23 Wie de Jesus wider in de Tembel gang is un die Leit dort unnerwies hat, sinn die Hoheprieschder un die Ällschde vum Volk bei ne komm un hann gefroht: „Met was for’me Recht machsch’enn du das alles? Un wer hat der die Vollmacht dodezu gebb?“

24 „Ich will eich aach ebbes frohe“, hat de Jesus zu ne gesaht. „Wann’er mer dodruf e Antwort gewe, sahn ich eich aach, met was for’me Recht ich das mache. 25 Die Daf vum Johannes – wo war die her? Vum Himmel oder vun de Mensche?“ Do hann se simeliert un hann zuenanner gesaht: „Wa’mer sahn: ‚Vum Himmel’, dann saht er zu uns: ‚Fer was hann’er’nn em Johannes dann net geglabt?’ 26 Sah’mer awer: ‚Vun de Mensche!’, dann misse mer vor de Leit Angscht hann. Die glawe nämlich allegar, dass de Johannes e Prophet war.“ 27 Deshalb hann se em Jesus entgähgehall: „Mir wisse’s net!“ „Dann sahn ich eich aach net, met was for’me Recht ich das mache!“, hat de Jesus do zu ne gesaht.

Es Gleichnis vu’me Vadder un seine zwä Buwe

28 „Was halle ner’nn dodevun? E Mann hat emo zwä Buwe gehat. Er is bei de eerschde gang un hat gesaht: ‚Kind, geh un schaff heit i’meim Weinberch!’ 29 Dodruf hat der Bub gesaht: ‚Ich will awer net!’ Späder hat em das läd gedun, un er is doch gang. 30 Dodenoh is der Mann bei de zwädde Bub gang un hat’s selwe gesaht. Der zwädde Bub hat dodruf gemännt: ‚Jo, Babba^a, ich gehn jo!’, awer hingang is er doch net. 31 Wer vun dene zwä hat’enn jetz gemacht, was der Vadder gewollt hat?“ „Der eerschde!“, hann die Hoheprieschder un Ällschde do zum Jesus gesaht.

21:30^a Wärtlich: Herr.

Do hat de Jesus zu ihne gesaht: „Das äne sahn ich eich: Die Zällner un Hure komme eher wie ihr in Gott sei Reich! 32 De Johannes^a is nämlich bei eich komm un hat eich dene Wääch gewies, wo in die Gerechdichkät fiehrt. Ihr hann em awer net geglabt. Awer die Zällner un Hure hann em geglabt. Ihr hann das gesiehn, un trotzdem hann’er’s eich net annerschder iwerleht un hann em Johannes immer noch net geglabt.“

21:32^a De Johannes, wo gedaft hat.

Es Gleichnis vun de schlechde Winzer

33 „Horchen noch e anneres Gleichnis! E Mann, wo e Hof hott, hat emo e Weinberch angeleht un e Mauer drumerum gebaut. Dann hat er e Loch gegrab, fer e Drauwepress se mache un hat e Wachturm gebaut. Dodenoh hat er dene Weinberch an e paar Winzer verpacht un is ins Ausland gang. 34 Wie die Zeit komm is, fer die Drauwe absemache, hat er sei Knechde bei die Winzer geschickt, fer sei Andäl vum Erdraach abseholle. 35 Die Winzer hann awer sei Knechde gegriff. Dene äne hann se geschlah, dene annere umgebrung un dene dridde gestänicht. 36 Do hat der Mann annere Knechde geschickt, noch meh wie beim eerschde Mo. Awer die Winzer hann se genauso behannelt.“

37 „Zu gudder Letscht hat der Mann dann sei Bub bei die Winzer geschickt, weil er gedenkt hat: ‚Vor meim Bub werre se doch wohl Reschbekt hann!’ 38 Wie die Winzer awer sei Bub gesiehn hann, hann se zuenanner gesaht: ‚Der do erbt emo dene Weinberch! Kommen, dene bringe mer um un iwernemme sei Erbschaft!’ 39 Do hann se ne gegriff un hann’e aus em Weinberch geschmiss un umgebrung.“

40 „Was macht’enn jetz de Herr vun dem Weinberch met dene Winzer, wann er kommt?“ 41 Do hann die Hoheprieschder un Ällschde^a zum Jesus gesaht: „Ei, er dut defor sorje, dass die beese Leit e beeses Enn finne un dut de Weinberch an annere Winzer verpachde, wo em beizeide die Pacht bezahle.“

21:41^a Oder: Do hann die Leit.

42 Do hat de Jesus zu ne gesaht: „Hann’er dann noch nie in de Heilich Schrift geläst:

Der Stän, wo die Leit am Bau fortgeschmiss hann,
is zum Eckstän wor.
Das hat de Herr gemacht,
un es is ebbes Wunnerbares in unsere Aue!?

43 Deshalb sahn ich eich: Gott nemmt eich sei Reich eweg un vertraut’s eme Volk an, wo die Frucht bringt, wo vun seim Reich verlangt werd. 44 Wer iwer do dene Stän fallt, brecht sich de Hals, un wann der Stän uf jemand fallt, macht er Stab aus em.“

45 Wie die Hoheprieschder un die Pharisäer em Jesus sei Gleichnisse geheert hodde, hann se gemerkt, dass er vun ihne geschwätzt hat. 46 Do hädde se ne gäre greife gelosst, awer se hann Angscht vor de Leit gehat, weil die de Jesus fer e Prophet gehall hann.

22

Es Gleichnis vum große Feschtesse

1 Dodenoh hat de Jesus wider met Gleichnisse met de Hoheprieschder un Ällschde geschwätzt: 2 „Me’m Himmelreich is es wie met eme Keenich, wo fer sei Bub die Hochzeit vorberät hat. 3 Er hat sei Diener losgeschickt, fer die Leit rufe se losse, wo uf’s Fescht ingelad ware. Awer die hann net komme wolle. 4 Dodrufhin hat der Keenich noch annere Diener losgeschickt un hat gesaht: ‚Sahn dene Leit, wo ingelad sinn: Horchen emo her! Ich ha’mei Feschtesse vorberät. Mei Ochse u’mei Maschtkälwer sinn geschlacht, un alles steht berät. Kommen doch uf die Hochzeit!’ 5 Die Leit, wo ingelad ware, hann sich awer net dodrum gekimmert un sinn fortgang – äner uf sei Feld un e annerer in sei Lade. 6 Die Iweriche hann sogar dem Keenich sei Diener gegriff un hann se schlecht behannelt un umgebrung.“

7 „Wie der Keenich das geheert hat, is er bees wor. Er hat sei Soldade geschickt un hat die Märder umbringe un ihr Stadt niderbrenne gelosst. 8 Dodenoh hat er zu seine Diener gesaht: ‚Es steht zwar alles berät fer die Hochzeit, awer die Leit, wo ich ingelad hott, ware’s net wert, fer uf die Hochzeit se komme. 9 Schaffen eich enaus uf die Stroß un laden all die, wo eich grad entgähkomme, fer die Hochzeit in!’ 10 Do sinn die Diener uf die Stroß gang un hann all die beinanner geschafft, wo se dort gefunn hann. Se hann beese un gudde Mensche gebrung, un de Hochzeitssaal war schnell voll met Gäscht.“

11 „Wie der Keenich dann erinkomm is, fer sich die Gäscht ansegugge, hat er im Saal äner gesiehn, wo kä bassende Kläder fer e Hochzeit anhott. 12 ‚Freindche, wie bisch’enn du ohne die bassende Kläder fer e Hochzeit do erinkomm?’, hat er ne do gefroht. Do sinn dem Mann die Worde im Hals stegge geblieb. 13 Dodenoh hat der Keenich seine Diener gebott: ‚Dun em die Hänn un die Fieß fessele! [Hollen ne dann] un schmeißen ne enaus in die diefscht Dunggelhät! Dort heile die Mensche dann un klabbere met de Zänn.’ 14 Gott hat nämlich e Haufe Leit beruf, awer er hat sich nur wenich ausgewählt.“

Die Froh vun de Steiere

15 Dodenoh sinn die Pharisäer beinannerkomm un hann e Plan gemacht, wie se de Jesus met seine eichene Worde in e Fall logge kännde. 16 Se hann ihr Jinger sesamme me’m Herodes seine Leit^a bei ne geschickt un hann’e frohe gelosst: „Määschder, mir wisse, dass der’s nur um die Wohrhät geht un dass du die Leit wirklich unnerweise duscht, wie mer noh dem, was Gott will, läwe soll. Du gebbscht nix druf, was die Leit sahn, weil du kä Unnerschied zwische de Mensche machscht. 17 Sah uns emo: Darf mer deiner Mänung noh em Kaiser Steiere bezahle oder net?“

22:16^a Die Pharisäer ware degäh, fer em reemische Staat Steiere se bezahle, die Anhänger vum Herodes defor. Egal, was de Jesus jetz dodruf sahn dät: Die Fiehrer vum Volk hann gehofft, fer jetz endlich ebbes in die Hand se kriehn, was se gäh de Jesus verwenne kännde.

18 De Jesus hat awer ihr falsches Spiel durchschaut un hat gesaht: „Ihr Scheinheiliche! Fer was dun’er mer dann e Fall stelle? 19 Weisen mer emo die Minz her, wo ner eier Steiere demet bezahle!“ Do hann se’m e Denar gereicht. 20 Do hat er se gefroht: „Wem sei Bild un wem sei Ufschrift sinn’enn das do?“ 21 „Es Bild un die Ufschrift vum Kaiser!“, hann se do zu’m gesaht. Do hat de Jesus zu ihne gesaht: „Dann gewen em Kaiser, was em Kaiser geheert, un Gott, was Gott geheert!“ 22 Wie se das geheert hann, hann se sich gewunnert. Dann hann se ne stehn gelosst un sinn fortgang.

Die Froh vun de Uferstehung vun de Dode

23 Aach vun de Sadduzäer, wo behaupde, es dät kä Uferstehung gewe, sinn an dem Daach e paar bei de Jesus komm. Die hann’e gefroht: 24 „Määschder, de Mose hat bestimmt: Wann e Mann sterbt un kä Kinner hat, soll sei Bruder die Fra heirade un dem Verstorwene Nohkomme verschaffe. 25 Jetz ware do bei uns emo siwe Brieder. Der eerschde hat geheirat, is awer ohne Nohkomme gestorb un hat sei Fra seim Bruder hinnerloss. 26 Der is awer aach ohne Nohkomme gestorb, un genauso der dridde. Un so is das weidergang bis zum sibde. 27 Als Letschdes vun’e all is aach die Fra gestorb. 28 Wem vun dene siwe sei Fra is se dann jetz, wann die Dode ufstehn? Se ware doch allegar met er verheirat.“

29 Dodruf hat de Jesus zu ne gesaht: „Ihr irre eich, weil ner die Heilich Schrift net kenne un net wisse, wie mächdich Gott is! 30 Wann die Mensche nämlich uferstehn, dun se nemmeh heirade un werre aach net verheirat. Dann sinn se wie die Engel im Himmel, wo Gott diene.“

31 „Was awer die Uferstehung vun de Dode angeht: Hann’er dann net geläst, was eich Gott dodriwer gesaht hat? Er saht: 32 ‚Ich bin de Gott vum Abraham, de Gott vum Isaak un de Gott vum Jakob!‘ Gott is awer doch net e Gott vun de Dode. Er is im Gähedäl der vun de Lewenniche!“

33 Wie die Leit das geheert hann, ware se vun dem, was ne de Jesus beigebrung hat, dief beindruckt.

Es Wichdichde, was Gott gebott hat

34 Dodenoh hann die Pharisäer geheert, dass de Jesus de Sadduzäer es Maul gestoppt hott. Do sinn se sesammekomm, 35 un äner vun’e, wo em Mose sei Gesetz unnerricht hat, hat em e Fall gestellt un gefroht: 36 „Määschder, was vun dem, was Gott im Gesetz gebott hat, is’enn eichentlich es Wichdichde?“ 37 De Jesus hat do zu’m gesaht: „Du sollscht de Herr, dei Gott, vun ganzem Herz, vun ganzer Seel u’met all deine Gedangge lieb hann! 38 Das is es Eerschde un Wichdichde, was Gott gebott hat. 39 Es Zwädde is awer genauso wichdich: Du sollscht dei Nägschder genauso lieb hann wie dich selwer! 40 An do dene zwä Sache, wo Gott gebott hat, hängt’s ganze Gesetz vum Mose un die Schrifde vun de Prophede.“

Em David sei Sohn oder em David sei Herr?

41 Wie die Pharisäer noch beinanner ware, hat se de Jesus gefroht: 42 „Was dengge ner dann iwer de Messias? Wem sei Sohn is er?“ „Der is em David sei Sohn!“, hann se do zum Jesus gesaht. 43 Do hat de Jesus zu ihne gesaht: „Wie kommt’s’enn dann, dass ne de David, vum Heiliche Geischt gefiehrt, Herr nennt? De David saht nämlich:

44 ‚De Herr hat zu meim Herr gesaht:
Huck dich do rechts vu’mir hin,
bis ich dei Feinde zum Schemel vun deine Fieß gemacht hann.‘

45 Wann de David de Messias also Herr nennt, wie kann er’nn do sei Sohn sinn?“

46 Käner hat em Jesus dodruf e Antwort gewe känne, un nimand hat sich vun dem Daach an meh getraut, fer ne noch ebbes se frohe.

23

De Jesus warnt die Leit vor de Schriftgelehrde un Pharisäer

1 Dodenoh hat sich de Jesus an die Leit un an sei Jinger gewennt 2 un hat gesaht: „Uf de Lehrstuhl vum Mose hann sich die Schriftgelehrde un die Pharisäer gehuckt. 3 Richden eich deshalb noh allem, was se eich sahn, un hallen’s in! Richden eich awer net noh dem, was se mache! Se mache nämlich nur Worde un verhalle sich net denoh. 4 Se binne schwäre Laschde^a sesamme, wo mer fascht net drahn kann, un lade se de Mensche uf de Buggel. Selwer mache se awer kä Finger krumm, fer se se drahn.“

23:4^a Die schwäre Laschde ware die vile Vorschrifde un Verbodde, wo die Schriftgelehrde aus em Alde Teschdament, vor allem aus em Gesetz vum Mose, abgelät hodde. In de Zeit vum Jesus hat mer 613 so heiliche Vorschrifde gezehlt.

5 „Alles, was se mache, mache se nur, fer die Mensche se beindrugge! Se mache ihr Gebätsrieme extra brät un de Saum [an ihre Kläder]^a extra groß. 6 Bei jedem Fescht wolle se die Ehreplätz un in de Synagooche die vorderschde Sitze hann. 7 Se hann’s gäre, wa’mer se uf de Marktplätz grießt un wann se vun de Leit dauernd Määschder genennt werre.“

23:5^a Noh 4. Mose 15,37-41 war e Saum oder Quaschde bzw. Franse an de vier Egge vum Owergewand, fer an das se erinnere, was Gott gebott hott.

8 „Ihr awer solle eich net Määschder nenne losse! Es is nämlich nur äner eier Lehrmääschder: Chrischdus. Ihr sinn awer allegar Brieder. 9 Ihr solle aach nimand uf de Erd eier Vadder nenne! Nur äner is nämlich eier Vadder: der im Himmel! 10 Lossen eich aach net Lehrmääschder nenne! Es is nämlich nur äner eier Lehrmääschder: Chrischdus! 11 De Greeschde vun eich soll eier Diener sinn! 12 Wer sich selwer groß macht, werd nämlich klän gemacht, un wer sich selwer klän macht, der werd groß gemacht!“

De Jesus geht met de Schriftgelehrde un Pharisäer ins Gericht

13 „Weh eich, ihr Schriftgelehrde un Pharisäer! Ihr Scheinheiliche! Ihr sperre de Mensche es Himmelreich vor de Nas zu. Selwer komme ner net enin, un die, wo enin wolle, losse ner net enin. [ 14 Weh eich, ihr Schriftgelehrde un Pharisäer! Ihr Scheinheiliche! Ihr schwätze de Witwe ihr Haiser ab un mache zum Schein lange Gebäde. Deshalb werre ner emo arich bees gestroft!“]

15 „Weh eich, ihr Schriftgelehrde un Pharisäer! Ihr Scheinheiliche! Ihr räse iwer Land un Meer, fer e änzicher Mensch fer eier Glawe se gewinne, un wann’er ne gewunn hann, mache ner ne zu’me Anwärder fer die Häll, wo dobbelt so schlimm is wie ihr selwer!“

16 „Weh eich, wo ner blind sinn un annere fiehre wolle! Ihr sahn: ‚Wann jemand beim Tembel schweert, hat das nix se bedeide. Wann awer jemand beim Gold vum Tembel schweert, is er an das gebunn, was er geschweert hat.’ 17 Was sinn’er doch dumm un blind! Was is dann wichdicher: es Gold oder de Tembel, wo’s Gold eerscht heilich macht? 18 Ihr sahn aach noch: ‚Wann jemand beim Brandopferaldar schweert, hat das nix se bedeide. Wann awer jemand beim Opfer uf em Brandopferaldar schweert, is er an das gebunn, was er geschweert hat.’ 19 Was sinn’er doch dumm un blind! Was is dann wichdicher: es Opfer oder de Aldar, wo’s Opfer eerscht heilich macht? 20 Wer also beim Brandopferaldar schweert, schweert beim Brandopferaldar un bei allem, was drufleiht. 21 Un wer beim Tembel schweert, schweert beim Tembel un bei Gott, wo im Tembel wohnt. 22 Un wer beim Himmel schweert, schweert bei Gott seim Thron un bei Gott, wo uf em Thron huckt.“

23 „Weh eich, ihr Schriftgelehrde un Pharisäer! Ihr Scheinheiliche! Ihr gewe de zehnde Däl vun de Minz, vum Dill un vum Kimmel un losse es Wichdichde vum Gesetz außer Acht, nämlich die Gerechdichkät, die Barmherzichkät un de Glawe! Mer sollt awer das äne mache un das annere net unnerlosse! 24 Was sinn’er doch blind un wolle dodebei annere fiehre! Die Migge dun’er aussiewe, awer Kamele schlugge ner enunner!“

25 „Weh eich, ihr Schriftgelehrde un Pharisäer! Ihr Scheinheiliche! Ihr halle eier Becher un Schissele außerum sauwer, awer innewenzich sinn se voll met dene Sache, wo ner eich gierich sesammegeklaut hann. 26 Du blinder Pharisäer! Mach de Becher un die Schissel seeerscht innedrinn sauwer! Dann werre se aach außerum sauwer.“

27 „Weh eich, ihr Schriftgelehrde un Pharisäer! Ihr Scheinheiliche! Ihr sinn wie Gräwer, wo weiß angestrich sinn:^a Vun auße siehn se zwar scheen aus, awer inne sinn se voll met Knoche vun de Dode un voll met all Sorde Dreck. 28 Genauso is es aach bei eich! Noh auße komme ner de Mensche vor, wie wann’er gerecht wäre, awer innewenzich sinn’er durch un durch scheinheilich un gesetzlos.“

23:27^a Gräwer sinn in de Zeit vum Jesus met Kalk getincht wor, dass mer se weithin hat känne siehn un dass sich kä Judd aus Versiehn an’e verunreinicht hat (vgl. 4Mo 19,11).

Die Strof kommt ganz sicher

29 „Weh eich, ihr Schriftgelehrde un Pharisäer! Ihr Scheinheiliche! Ihr baue Grabmäler fer die Prophede un richde die Gräwer vun de Gerechde scheen her 30 un behaupde: ‚Wa’mir in de Zeit vun unsere Vorfahre geläbt hädde, hädde mer uns net met ne am Blut vun de Prophede schullich gemacht.’ 31 Dodemet dun’er selwer bestädiche, dass ner die Nohkomme vun dene sinn, wo die Prophede umgebrung hann. 32 Jo, machen nur es Moß vun eiere Vorfahre voll! 33 Ihr hämdiggische Giftschlange! Wie wolle ner eich dann emo vor dem Gericht, wo eich in die Häll bringt, redde?“

34 „Heeren deshalb emo genau zu: Ich schigge Prophede un Mannsleit met vil Weishät un Lehrer, wo eich die Heilich Schrift erkläre, bei eich. E paar vun’e bringe ner um un dun se kreiziche. Annere gääschele ner in eiere Synagooche un dun se vun äner Stadt in die anner verfolche. 35 So kommt emo all das gerechde Blut, wo mer sich uf de Erd dran vergang hat, iwer eich, angefang vum Blut vum Abel, wo gerecht war, bis hin zum Blut vum Sacharia,^a em Berechja seim Bub, wo ner zwische’m Tembel un em Brandopferaldar umgebrung hann. 36 Das äne sahn ich eich: Die Strof fer all das kommt emo uf do die Generation zu!“

23:35^a Im hebräische Alde Teschdament is de Abel de eerschde un de Sacharia de letschde Prophet, wo umgebrung wor is (vgl. 1Mo 4,1-16; 2Chr 24,20-21).

De Jesus klaacht sei Läd iwer Jerusalem

37 „Oh Jerusalem, oh Jerusalem! Du bringscht die Prophede um un duscht die stäniche, wo bei dich geschickt werre. Wie oft hann ich dei Kinner schun insammele wolle, so wie e Gluck ihr Biebelcher unner ihr Flidde insammelt, awer ihr hann net gewollt. 38 Guggen nur emo! Gott gebt eier Haus^a uf, un es werd ganz gabutt gemacht! 39 Ich sahn eich nämlich: Vun jetz an siehn’er mich nemmeh, bis ner rufe: ‚Geseechent is der, wo im Name vum Herr kommt.’“

23:38^a Gemännt is entweder de Tembel oder die Stadt Jerusalem selwer.

24

DE MATTHÄUS BESCHREIBT, WIE DE JESUS IWER’S ENN VUN DE WELT GESCHWÄTZT HAT: 24,1-25,46

De Jesus kinnicht an, dass de Tembel nidergeriss werd

1 Dodenoh is de Jesus aus em Tembel komm un is fortgang. Do sinn sei Jinger bei ne komm un hann em die Tembelbaude gewies. 2 „Siehn’er das alles?“, hat se de Jesus do gefroht. „Das äne sahn ich eich: Kä Stän bleibt dort uf em annere! Es werd alles nidergeriss!“

Iwer’s Enn vun de Welt

3 Späder hat de Jesus uf em Eelberch gehuckt, un nur sei Jinger ware bei’m. Do hann se sich an’e gewennt un hann’e gefroht: „Sah uns doch: Wann bassiert das, un an was for’me Zääche ka’mer erkenne, dass du widerkommscht un dass es Enn vun de Welt^a ball do is?“

24:3^a Oder: un dass es Enn vun do dem Zeitalder.

4 Dodruf hat de Jesus zu ne gesaht: „Bassen uf, dass eich nimand verfiehrt! 5 Es kommt nämlich emo so manch äner i’meim Name un dut behaupde: ‚Ich bin de Messias!’ un bringt e Haufe Leit vum richdiche Wääch ab. 6 Ihr heere dann vil iwer Krieche, un Nohrichde iwer Krieche dun eich beunruhiche. Bassen uf, dass ner net verschregge! Das muss alles so komme! Awer es is noch net es Enn! 7 Än Volk dut sich nämlich gäh’s annere ufstelle un än Reich gäh’s annere. In verschiedene Geechende gebt’s Hunger un Epidemije un Erdbewe. 8 Awer das alles is eerscht de Anfang vun de Geburtswehe!“

9 „Ihr werre dann verrot, fer drangsaliert un umgebrung se werre! Wäh meim Name werre ner vun jedem Volk gehasst. 10 In der Zeit falle e Haufe Leit vum Glawe ab un verrode un hasse enanner. 11 E Haufe falsche Prophede träde uf un verfiehre vil Mensche. 12 Un weil die Ungerechdichkät iwerhand nemmt, dut die Lieb bei de meischde Mensche abkiehle. 13 Wer awer bis ans Enn durchhallt, werd gerett! 14 Die gutt Nohricht, dass Gott regiert, werd in de ganz Welt gepreddicht. Jedes Volk soll vun er heere. Dann eerscht kommt’s Enn.“

Wann die Not am greeschde is...

15 „Der ‚Abscheiliche, wo Verderwe bringt’, wo de Prophet Daniel devun schwätzt, steht dann uf em heiliche Platz. (Dan 9,27; 11,31; 12,11) Wer das läst, soll iwerlehe, was es bedeide dut! Wann’er ne dort stehn siehn, 16 solle die Leit, wo in Judäa wohne, uf die Berche abhaue. 17 Wer grad uf de Dachterrass is, soll nemmeh enunnersteihe, fer ebbes aus seiner Wohnung metsenemme. 18 Un wer uf em Feld is, soll net sericklafe, fer sei Kläder se holle. 19 Weh dene Weibsleit, wo in dene Daache e Kind kriehn oder äns an de Bruscht hann!“

20 „Awer bäden defor, dass ner net im Winder oder a’me Sabbat abhaue misse. 21 Dann werre die Mensche nämlich so stark drangsaliert, wie se bis jetz noch nie drangsaliert wor sinn seit em Anfang vun de Welt un wie se aach späder nie meh drangsaliert werre. 22 Wann Gott die Daache net kirzer gemacht hätt, dät nimand gerett werre. Awer wäh dene Mensche, wo er sich ausgewählt hat, hat er die Zeit kirzer gemacht.“

23 „Wann dann jemand zu eich saht: ‚Guggen emo, do is de Messias!’ oder: ‚Dort is er!’, dann glawen’s net! 24 Falsche Messiasse un falsche Prophede träde dann nämlich uf un bringe große Zääche un Wunner ferdich, fer sogar die Mensche, wo vun Gott ausgewählt wor sinn, se verfiehre, falls das meechlich wär. 25 Denggen dran: Ich hann eich das alles schun im Voraus gesaht.“

26 „Wann eich die Leit sahn: ‚Guggen emo do, de Messias is in de Wildnis!’, dann gehn net enaus! Un wann se sahn: ‚Guggen, er is im Zimmer!’, dann glawen’s net! 27 So wie de Blitz nämlich im Oschde ufleichde dut un bis in de Weschde se siehn is, genauso is es aach emo, wann ich, de Menschesohn, komme. 28 Wo nämlich ebbes Dodes leiht, do sammele sich aach die Geier.“

Wie de Menschesohn emo kommt

29 „Gleich noh dene Daache, wann die Mensche emo nemmeh drangsaliert werre, werd die Sunn dunggel, un de Mond scheint nemmeh. Dann falle die Sterne vum Himmel, un die Kräfde vum Universum gerode durchnanner. 30 Dodenoh erscheint’s Zääche vu’mir, em Menschesohn, am Himmel, un unner sämtliche Välger vun de Erd^a dut diefi Drauer herrsche. Se sieh’mich, de Menschesohn, dann met großer Macht un Herrlichkät uf de Wolge vum Himmel komme. 31 Ich schigge mei Engel met stargem Posauneschall aus, u’mei Engel bringe die, wo ich mer ausgewählt hann, vun all de vier Himmelsrichdunge sesamme, vun äm Enn vum Himmel bis ans annere.“

24:30^a Oder: un unner sämtliche Stämm vum Land (vgl. Sach 12,10-12).

E Vergleich met eme Feichebam

32 „Prächen eich ebbes me’m Gleichnis vum Feichebam in! Wann die Äscht vum Feichebam Saft ziehe un Blädder dreiwe, wisse ner, dass es ball Sommer werd. 33 Genauso is es aach, wann’er siehn, wie das do alles bassiert. Dann wisse ner, dass ich, de Menschesohn,^a grad vor de Dir stehn. 34 Das äne sahn ich eich: Do die Generation vergeht net, bis das do alles bassiert. 35 De Himmel un die Erd vergehn, awer das, was ich sahn, vergeht net!“

24:33^a Oder: dass es Enn.

36 „De Daach un die Stunn, wann das bassiert, kennt awer nimand. Aach die Engel im Himmel kenne se net. Die kennt nur mei Vadder.“

37 „Wann ich, de Menschesohn, komme, geht’s emo so zu wie in de Zeit vum Noah. 38 In de Zeit vor de groß Flut hann die Mensche nämlich gess un gedrunk, se hann geheirat un sinn verheirat wor – bis zu dem Daach, wo de Noah uf das große Schiff gang is. 39 Die Mensche hann awer nix gemerkt, bis die groß Flut komm is un se allegar met sich geriss hat. Genauso is es aach, wann ich, de Menschesohn, widerkomme.“

40 „Vun zwä Mannsleit, wo dann uf em Feld schaffe, werd der äne metgenumm un der annere serickgelosst. 41 Vun zwä Weibsleit, wo met de Handmiehl mahle, werd die än metgenumm un die anner serickgelosst.“

42 „Bleiwen also wach! Ihr wisse nämlich net, in was for rer Stunn dass ich, eier Herr, komme.“

E Vergleich met eme Hausherr, wo gutt ufbasst

43 „Denggen dran: E Hausherr kann net wisse, in was for rer Stunn in de Naacht der kommt, wo ebbes klaue will. Wann er das wisse dät, dät er wach bleiwe un net zulosse, dass in sei Haus ingebroch werd. 44 Deshalb misse ihr eich aach beräthalle! Ich, de Menschesohn, komme nämlich in erer Stunn, wo ner net demet rechene.“

E Vergleich met eme treie u’met eme untreie Diener

45 „Wer is’enn der treie un verstänniche Knecht, wo sei Herr iwer sei Dienerschaft gestellt hat, dass er ne beizeide es Esse ausdäle soll? 46 Wann de Herr kommt un merkt, dass sei Knecht macht, was er ufgedrah krieht hat, ka’mer dene Knecht glicklich nenne. 47 Das äne sahn ich eich: Sei Herr losst ne dann alles, was er hat, verwalde. 48 Awer angenumm, der Knecht is e raulicher Kerl un saht sich: ‚Mei Herr kommt so ball noch net!’ 49 un fangt an, fer die annere Diener se schlahn. Un angenumm, er fangt an, fer met dene Leit, wo sich die Zeit met Wein verdreiwe, se esse un se dringge. 50 Dann kommt sei Herr a’me Daach, wo er net uf ne warde dut, un in erer Stunn, wo er net kennt. 51 Sei Herr hackt ne dann in Stigger un losst ne sei Schicksal met de Scheinheiliche däle. Dort heilt er dann un dut met de Zänn klabbere.“

25

Es Gleichnis vun finnef gewitzde un finnef unverstänniche junge Weibsleit

1 „Wann ich, de Menschesohn, widerkomme, is es me’m Himmelreich wie met zeh junge Weibsleit, wo ihr Eellambe genumm hann un em Braidigam entgähgang sinn. 2 Finnef vun’e ware gewitzt, un finnef ware unverstännich. 3 Die Unverstänniche hann zwar ihr Eellambe metgenumm, awer kä Eel. 4 Die Gewitzde dodegäh hann außer ihre Eellambe aach noch Behälder met Eel debei gehat. 5 Wie jetz de Braidigam lang net komm is, sinn se allegar mied wor un sinn ingeschloft.“

6 „Midde in de Naacht hat uf ämo jemand lauthals geruf: ‚De Braidigam kommt! Gehn enaus, fer ne se begrieße!’ 7 Do sinn die junge Weibsleit allegar ufgestann un hann ihr Eellambe hergericht. 8 Die Unverstänniche hann awer zu de Gewitzde gesaht: ‚Gewen uns e bissje vun eierm Eel! Unser Eellambe gehn nämlich aus.’ 9 Awer die Gewitzde hann dodruf gesaht: ‚Nä, sunscht langt’s Eel net fer uns un fer eich aach net. Gehn doch bei die Händler un kafen eich selwer, was ner brauche!’ 10 Wie die Unverstänniche dann fort ware, fer Eel se kafe, is de Braidigam komm. Die junge Weibsleit, wo berät ware, sinn met em in de Hochzeitssaal gang, un die Dir is zugesperrt wor.“

11 „Späder sinn aach die annere junge Weibsleit komm un hann geruf: ‚Herr, Herr, mach uns uf!’ 12 Awer de Braidigam hat dodruf gesaht: ‚Ich kann eich nur das äne sahn: Ich kenne eich net!’“

13 „Bleiwen also wach! Ihr kenne nämlich net de Daach un aach net die Stunn, [wann ich, de Menschesohn, komme]!“

Es Gleichnis vum anvertraude Geld

14 „Es is wie bei’me Mann, wo hat wolle verräse. Der Mann hat sei Diener geruf un hat ne gebb, was er hott, fer druf ufsebasse. 15 Dem äne hat er finnef Talende^a gebb, eme annere zwä Talende un noch eme annere än Talent – jedem noh seine Fähichkäde. Dodenoh is er gleich abgeräst. 16 Der Diener, wo die finnef Talende krieht hat, hat do angefang, fer met dem Geld se schaffe, un hat finnef annere Talende debei verdient. 17 Genauso aach der Diener, wo die zwä Talende krieht hat: Der hat aach zwä annere Talende debei verdient. 18 Der Diener awer, wo das äne Talent krieht hat, is fortgang un hat e Loch in die Erd gegrab un hat’s Geld vun seim Herr versteggelt.“

25:15^a E Talent war in de Zeit vum Jesus die greescht Geldinhät. E Talent war 6.000 Drachme bzw. Denare wert, das hääscht de Lohn vun 6.000 Daache oder de Lohn fer rund 20 Johr Arwet.

19 „Noh langer Zeit is de Herr vun dene Diener dann serickkomm un hat se gehääscht, fer met em abserechene. 20 Do is der Diener, wo die finnef Talende krieht hott, komm un hat die annere finnef Talende metgebrung un gesaht: ‚Herr, du hascht mer finnef Talende gebb gehat. Guck: Ich hann noch annere finnef Talende debeigewunn.’ 21 ‚Ei prima, du bischt emo e gudder un treier Diener!’, hat sei Herr do zu’m gesaht. ‚Du hascht met wenich anstännich gewirtschaft. Deshalb vertrau ich der vil an! Komm erin un frei dich met deim Herr!’“

22 „Dodenoh is aach der Diener komm, wo die zwä Talende krieht hott. ‚Herr’, hat der gesaht, ‚du hascht mer zwä Talende gebb gehat. Guck: Ich hann noch annere zwä Talende debeigewunn!’ 23 ‚Ei prima, du bischt emo e gudder un treier Diener!’, hat sei Herr do zu’m gesaht. ‚Du hascht met wenich anstännich gewirtschaft. Deshalb vertrau ich der vil an! Komm erin un frei dich met deim Herr!’“

24 „Zuletscht is aach der Diener komm, wo das äne Talent krieht hott. ‚Herr’, hat der gesaht, ‚ich hann gewisst, dass du e harder Mann bischt. Du machscht die Ernt ab, wo du net gesät hascht, un duscht insammele, wo du net ausgestraut hascht. 25 Deshalb hann ich Angscht gehat. Ich war fortgang un hann dei Talent im Boddem versteggelt gehat. Do hasch’e serick, was dir geheert!’“

26 „Dodruf hat sei Herr zu’m gesaht: ‚Du raulicher un fauler Diener! Du hascht also gewisst, dass ich die Ernt abmache, wo ich net gesät hann, un insammele, wo ich net ausgestraut hann. 27 Do hättscht du mei Geld doch wenichdens uf die Bank bringe känne. Dann hätt ich’s met Zinse serickkrieht, wann ich serickkomm wär.‘ 28 ‚Nemme’m deshalb das Talent ab un gewen’s dem, wo die zeh Talende hat!’“

29 „Jeder, wo ebbes hat, krieht nämlich noch ebbes debei! Dann hat er meh wie er brauch. Wer awer ball nix hat, krieht aach das noch abgenumm, was er hat! 30 Un do dene Diener, wo nix daut, schmeißen enaus in die diefscht Dunggelhät! Dort heilt er dann un dut met de Zänn klabbere!’“

Es Gericht iwer die Välger

31 „Wann ich, de Menschesohn, i’meiner Herrlichkät komme un wann die heiliche Engel allegar met mer komme, huck ich mich uf mei herrlicher Thron. 32 Dodenoh werre die Välger allegar vor mir versammelt, un ich dun die Mensche vunenanner trenne, genauso wie e Hirt die Schäf vun de Gäße trennt.^a 33 Die Schäf stell ich rechts vu’mir uf un die Gäße links.“

25:32^a In Israel hann die Hirde naachts die Gäße vun de Schäf getrennt, weil die Gäße die Kält net so gutt verdrah hann wie die Schäf un deshalb e wärmerer Platz fer se schlofe gebraucht hann.

34 „Dodrufhin sahn ich, de Keenich, zu dene rechts vu’mir: ‚Eich hat mei Vadder geseechent. Kommen un erwen das Reich, wo schun vun do an, wo er die Welt gemacht hat, fer eich vorberät wor is! 35 Ich hann nämlich Hunger gehat, un ihr ha’mer ebbes se esse gebb. Ich hann Durscht gehat, un ihr ha’mer ebbes se dringge gebb. Ich war e Fremder, un ihr ha’mich ufgenumm. 36 Ich hann nix fer ansedun gehat, un ihr ha’mer Kläder gebb. Ich war krank, un ihr hann eich um mich gekimmert. Ich war im Gefängnis, un ihr ha’mich besucht.’“

37 „Dann frohe mich die Gerechde: ‚Herr, wann ha’mer dich gesiehn, wie du Hunger hoscht, un hann der ebbes se esse gebb? Wann ha’mer dich gesiehn, wie du Durscht hoscht, un hann der ebbes se dringge gebb? 38 Wann ha’mer dich als Fremder gesiehn un hann dich ufgenumm oder als äner, wo nix fer ansedun hott, un hann der Kläder gebb? 39 Wann ha’mer dich gesiehn, wie du krank oder im Gefängnis warscht, un hann dich besucht?’“

40 „Dodruf sahn ich, de Keenich, dann zu ne: ‚Das äne sahn ich eich: Was ner fer äner vu’meine Geschwischder do gemacht hann – un wäre se noch so unbedeidend –, das hann’er fer mich gemacht!’“

41 „Dodenoh sahn ich, de Keenich, zu dene links vu’mir: ‚Gott hat eich verflucht! Fort vu’mir ins ewiche Feier, wo fer de Deiwel un fer sei Engel vorberät wor is! 42 Ich hann nämlich Hunger gehat, un ihr ha’mer nix se esse gebb. Ich hann Durscht gehat, un ihr ha’mer nix se dringge gebb. 43 Ich war e Fremder, un ihr ha’mich net ufgenumm. Ich hann nix fer ansedun gehat, un ihr ha’mer kä Kläder gebb. Ich war krank un im Gefängnis, un ihr hann eich net um mich gekimmert.’“

44 „Dann frohe mich die aach: ‚Herr, wann ha’mer dich gesiehn, wie du Hunger oder Durscht hoscht? Wann ha’mer dich als Fremder oder ohne Kläder oder krank oder im Gefängnis gesiehn un hann der net geholf?’“

45 „Dodruf sahn ich, de Keenich, dann zu ne: ‚Das äne sahn ich eich: Was ner bei äm vu’meine Geschwischder do unnerloss hann – un wäre se noch so unbedeidend –, das hann’er a’mir unnerloss.’“

46 „Se gehn dann dorthin, wo se fer immer gestroft werre. Die Gerechde gehn awer ins ewiche Läwe!“

26

DE MATTHÄUS VERZEHLT, WIE DE JESUS GESTORB UN UFERSTANN IS: 26,1-28,20

De Hohe Rot dut entscheide, fer de Jesus umsebringe

1 Wie de Jesus ferdich war, fer do die Sache allegar ausselehe, hat er zu seine Jinger gesaht: 2 „Ihr wisse, dass in zwä Daache es Passahfescht anfangt. Ich, de Menschesohn, werre dann verrot un gekreizicht.“

3 Dodenoh hann sich die Hoheprieschder [un Schriftgelehrde] un die Ällschde vum Volk im Palascht vum owerschde Prieschder, wo Kaiphas gehääscht hat, versammelt. 4 Se hann e Plan gemacht, wie se de Jesus met eme Schlich verhafde un umbringe kännde. 5 „Nur net uf em Fescht!“, hann se awer gesaht, „dass es kä Ufstand im Volk gebt.“

De Jesus werd in Bedanie met Eel gesalbt

6 De Jesus war awer in Bedanie im Haus vum Simon, wo frieher emo aussätzich war. 7 Wie er am Disch gehuckt hat, is e Fra met eme Alabaschderfläschje voll met deierem Salbeel bei ne komm un hat em das Eel uf de Kopp geschutt. 8 Em Jesus sei Jinger sinn bees wor, wie se das gesiehn hann, un hann gesaht: „Was soll’enn do die Verschwendung? 9 Mer hätt do das Eel doch deier verkafe un’s Geld de Arme gewe känne!“

10 De Jesus hat awer gemerkt, was se beschäfdicht hat, un hat zu ne gesaht: „Fer was mache ner’s der Fra dann so schwär? Se hat doch e guddes Werk a’mer gedun! 11 Arme Leit hann’er immer bei eich, awer mich hann’er net immer bei eich. 12 Wie die Fra do das Salbeel uf mei Leib geschutt hat, hat se das gemacht, fer mich uf mei Beerdichung vorseberäde. 13 Das äne sahn ich eich: Iwerall uf de Welt, wo do die gutt Nohricht gepreddicht werd, dut mer se net vergesse un verzehlt emo, was se gemacht hat.“

De Judas werd zum Verräder

14 Dodenoh is äner vun de zwällef Jinger, Judas Ischariot hat er gehääscht, bei die Hoheprieschder gang 15 un hat gesaht: „Was wolle ner mer dann gewe, wann ich de Jesus an eich ausliwere?“ Do hann se’m 30 Silwerminze gebott. 16 Vun do an hat de Judas noh erer bassend Gelähehät gesucht, fer de Jesus ausseliwere.

Es Passahlamm werd vorberät

17 Am eerschde Daach vum Fescht vum ungesaierde Brot sinn die Jinger bei de Jesus komm un hann’e gefroht: „Wo solle mer dann es Passahesse fer dich vorberäde?“ 18 Do hat de Jesus gesaht: „Gehn emo in die Stadt bei de So un so un sahn zu’m: ‚De Määschder losst der sahn: Mei Zeit is komm. Ich will’s Passahfescht met meine Jinger bei dir feiere.’“ 19 Do hann die Jinger gemacht, was ne de Jesus ufgedrah hott, un hann’s Passahlamm ferdich gemacht.

De Jesus kinnicht an, dass er verrot werd

20 Wie’s Owend wor is, hat sich de Jesus met seine zwällef Jinger an de Disch gehuckt. 21 Un wie se gess hann, hat er gesaht: „Das äne sahn ich eich: Äner vun eich dut mich verrode!“ 22 Do sinn die Jinger ganz draurich wor, un jeder vun’e hat ne gefroht: „Herr, ich bin’s doch net, oder doch?“ 23 „Der, wo die Hand met mer in die Schissel getunkt hat, dut mich verrode!“, hat de Jesus dodruf gesaht. 24 „Ich, de Menschesohn, gehn zwar mei Wääch, so wie’s iwer mich geschrieb steht, awer weh dem Mensch, wo mich verrode dut! Fer dene Mensch wär’s besser, wann er nie uf die Welt komm wär.“ 25 Do hat de Judas, wo ne verrot hat, gefroht: „Määschder, ich bin’s doch net, oder doch?“ De Jesus hat zu’m gesaht: „Doch, du bischt’s.“^a

26:25^a Wärtlich: Du hascht’s gesaht.

De Jesus dut’s Naachtmohl insetze

26 Wie se noch am Esse ware, hat de Jesus es Brot genumm un hat’s geseechent. Dann hat er’s durchgebroch un hat’s seine Jinger gebb un gesaht: „Nemmen un essen das! Das is mei Leib.“ 27 Dodenoh hat er de Kelch genumm un hat Gott dangge gesaht. Er hat ne seine Jinger gebb un hat gesaht: „Dringgen allegar dodraus! 28 Das is nämlich mei Blut, es Blut vum neie Bund. Das werd fer vil Mensche geopfert, dass ne die Sinde vergebb werre. 29 Ich sahn eich awer: Vun jetz an drink ich nemmeh vun de Frucht vum Weinstock bis zu dem Daach, wo ich met eich im Reich vu’meim Vadder nei devun dringge.“

De Jesus geht an de Eelberch

30 Dodenoh hann se die Dankpsalme gesung un sinn enaus an de Eelberch gang.

31 Unnerwäächs hat de Jesus zu seine Jinger gesaht: „In do der Naacht dun’er eich allegar iwer mich ärjere! Es steht nämlich geschrieb: Ich schlahn de Hirt dot, un die Schäf, wo zu de Herd geheere, verlafe sich. 32 Awer wann ich emo uferstann bin, gehn ich vor eich her noh Galiläa.“

33 Do hat de Petrus zu’m gesaht: „Un wann se sich allegar iwer dich ärjere – ich niemols!“ 34 Dodruf hat de Jesus zu’m gesaht: „Das äne sahn ich der: Heit Naacht noch, eeb de Hahn kräht, dusch’e dich dreimo vu’mir lossahn!“ 35 De Petrus hat em awer erklärt: „Un wann ich met der sterwe misst – ich sah’mich net vun der los!“ Esselwe hann aach all die annere Jinger gesaht.

Im Garde Getsemane

36 Dodenoh is de Jesus met seine Jinger an e Grundstick komm, wo Getsemane hääscht. Dort hat er zu seine Jinger gesaht: „Huggen eich emo do hin un warden, bis ich do iwe hingang bin un gebät hann.“ 37 Dodenoh hat er de Petrus un em Zebedäus sei zwä Buwe metgenumm un hat angefang, fer ganz draurich un unruhich se werre. 38 „Mei Seelequal bringt mich fascht um“, hat er zu ne gesaht. „Bleiwen emo do un hallen eich met mer wach!“

39 Dann is er e bissje weidergang un hat sich dort hingeschmiss, me’m Gesicht uf de Boddem, un hat gebät: „Mei Vadder, wann’s meechlich is, dann loss do dene biddere Kelch a’mer vorbeigehn. Es soll awer bassiere, was du willscht, un net das, was ich will!“ 40 Dodenoh is er bei die drei Jinger serickkomm un hat se gedroff, wie se am Schlofe ware. Do hat er zum Petrus gesaht: „Hann’er eich dann net emo wenichdens fer äni Stunn met mer wachhalle känne? 41 Bleiwen wach un bäden, dass ner de Versuchung widerstehn känne! Eier Geischt will zwar es Richdiche, awer eier Leib is schwach.“

42 Dodenoh is de Jesus noch e zwäddes Mo fortgang un hat gebät: „Mei Vadder, wann do der biddere Kelch net a’mer vorbeigehn kann, ohne dass ich ne dringge, dann soll bassiere, was du willscht!“ 43 Un wie er serickkomm is, hat er die Jinger wider gedroff, wie se am Schlofe ware. Die Aue ware ne nämlich zugefall.

44 Do hat er se schlofe gelosst un is wider fortgang un hat e driddes Mo met de selwe Worde wie vorher gebät. 45 Dodenoh is er bei sei Jinger serickkomm un hat zu ne gesaht: „Schlofe ner dann immer noch, un ruhe ner eich immer noch aus? Guggen emo: Die Stunn is komm. Gleich werr ich, de Menschesohn, in die Gewalt vun sindiche Mensche geliwert! 46 Stehn uf! Mir gehn jetz. Guggen nur: Der Mann, wo mich verrode dut, is schun do!“

De Jesus werd gefesselt un abgefiehrt

47 Wie de Jesus noch am Schwätze war, is de Judas schun komm, wo äner vun de zwällef Jinger war. De Judas hat e Haufe Leit bei sich gehat, wo Schwerder un Knibbel bei sich hodde. Die Hoheprieschder un Ällschde vum Volk hann se geschickt gehat. 48 De Judas, wo de Jesus verrot hat, hat met dene Leit, wo bei’m ware, e Zääche abgemacht gehat. „Wem ich e Begrießungskuss gewe, der is es!“, hat er gesaht gehat. „Dene misse ner verhafde.“ 49 De Judas is do direkt uf de Jesus zugang un hat gesaht: „Grieß dich, Määschder!“, un hat em e Kuss gebb. 50 „Freind, fer was bischt du komm?“, hat de Jesus dodrufhin zu’m gesaht. Un schun sinn die Mannsleit komm un hann de Jesus gegriff un verhaft.

51 In dem Moment hat äner vun dene, wo bei’m Jesus ware, die Hand ausgestreckt un hat sei Schwert gezoh. Er hat uf de Diener vum owerschde Prieschder drufgehau un hat em e Ohr abgehackt. 52 De Jesus hat awer zu’m gesaht: „Steck dei Schwert serick an sei Platz! Jeder, wo zum Schwert greift, kommt nämlich durch’s Schwert um. 53 Oder glabscht du net, dass ich mei Vadder jetz bidde kännt un dass er mer meh wie zwällef Legione Engel schigge dät? 54 Wie kännt dann awer indreffe, was die Heiliche Schrifde angekinnicht hann? Es muss doch so komme!“

55 In derselwe Stunn hat de Jesus zu de Leit gesaht: „Wie wann ich e Raiwer wär, sinn’er met Schwerder un Knibbel ausgezoh, fer mich se fange. Daach fer Daach hann ich bei eich im Tembel gehuckt un hann die Leit unnerwies, un ihr ha’mich net verhaft. 56 Awer das is alles bassiert, dass hat solle indreffe, was die Prophede geschrieb hann.“

Do hann’e die Jinger allegar im Stich gelosst un sinn fortgelaf.

De Jesus werd vum Hohe Rot verheert

57 Die Leit, wo de Jesus verhaft hann, hann’e bei de owerschde Prieschder, de Kaiphas, gebrung, wo sich die Schriftgelehrde un die Ällschde versammelt hodde. 58 De Petrus is awer vun weidem bis an de Hof vum owerschde Prieschder seim Palascht hinner’m Jesus hergang. Dann is er eningang un hat sich bei die Wächder gehuckt, fer se siehn, wie das alles ausgehn dät.

59 Die Hoheprieschder [un Ällschde] un de ganze Hohe Rot hann noh erer falsch Zeiheaussaach gäh de Jesus gesucht, fer ne umbringe se känne, 60 awer se hann käni gefunn. Obwohl e Haufe falsche Zeihe ufgeträt sinn, hann se trotzdem käni gefunn. 61 Zu gudder Letscht sinn noch zwä falsche Zeihe komm un hann gesaht: „Der do hat behaupt: ‚Ich kann Gott sei Tembel abreiße un in drei Daache wider ufbaue!’“ 62 Do is de owerschde Prieschder ufgestann un hat de Jesus gefroht: „Willsch’e dann nix zu dem sahn, was do die Leit gäh dich vorbringe?“ 63 Awer de Jesus hat kä Wort gesaht. Dodrufhin hat de owerschde Prieschder zu’m gesaht: „Ich verlange vun dir, dass du bei’m lewenniche Gott schweerscht un uns sahscht, ob du de Messias, de Sohn vun Gott, bischt!“ 64 „Es is, wie du gesaht hascht!“, hat de Jesus do zu’m gesaht. „Un ich sahn eich: Vun jetz an siehn’er mich, de Menschesohn, rechts vum Allmächdiche hugge un uf de Wolge vum Himmel komme!“

65 Do hat de owerschde Prieschder sei Kläder verroppt un hat geruf: „Der sell hat Gott geläschdert! Was brauche mer noch Zeihe? Jetz hann’er’s selwer geheert, dass er geläschdert hat. 66 Was männe ner?“ „Er is schullich un muss sterwe!“, hann die Ällschde dodruf gesaht.

67 Dodrufhin hann se’m ins Gesicht gespauzt un hann’e met de Faischt geschlah. Annere hann em hinner die Ohre geschlah 68 un hann gesaht: „Du bischt doch e Prophet, Messias! Sah uns: Wer hat dich geschlah?“

De Petrus dut abstreide, dass er de Jesus kennt

69 De Petrus hat drauß uf em Hof gehuckt. Do is e Dienschtmahd bei ne komm un hat gesaht: „Du warscht doch aach met do dem Jesus aus Galiläa sesamme.“ 70 Awer de Petrus hat das vor all de Leit abgestritt. „Ich wäß net, vun was du schwätze duscht!“, hat er gesaht.

71 Wie er dodenoh ans Ingangsdor gang is, hat ne e anneri Mahd gesiehn un hat zu dene, wo dort gestann hann, gesaht: „Der do war doch aach met dem Jesus vun Nazaret sesamme!“ 72 Awer er hat’s wider abgestritt un hat geschweert: „Ich kenne dene Mann net!“

73 E bissje späder sinn die Leit, wo dort erumgestann hann, bei de Petrus komm un hann gesaht: „Na klar bischt du äner vum Jesus seine Leit! Dei Dialekt dut dich verrode.“ 74 Do hat de Petrus angefang, fer sich se verfluche^a un se schweere: „Ich kenne dene Mann net!“ Gleich dodenoh hat e Hahn gekräht.

26:74^a Das hääscht, de Petrus hat e Fluch iwer sich selwer ausgeschwätzt, wo ne hat solle treffe, wann er net die Wohrhät saht.

75 Do is em Petrus ingefall, was de Jesus zu’m gesaht hott: „Eeb de Hahn kräht, dusch’e dich dreimo vu’mer lossahn.“ Do is er enausgang un hat bidderlich geheilt.

27

De Jesus werd an de Piladus ausgeliwert

1 Wie’s Daach wor is, hann die Hoheprieschder un die Ällschde vum Volk sesamme beschloss, fer de Jesus umsebringe. 2 Se hann’e fessele un abfiehre gelosst un hann’e an de reemische Gouverneer, de Pontius Piladus, ausgeliwert.

De Judas dut sich ufhängge

3 De Judas hat de Jesus verrot gehat, awer wie er gesiehn hat, dass de Jesus zum Dod verurdält wor is, hat’s em Läd gedun, was er angestellt hott. Er hat de Hoheprieschder un de Ällschde die 30 Silwerminze serickgebrung 4 un hat gesaht: „Ich ha’mich versindicht, weil ich unschulliches Blut verrot hann.“ „Was geht’enn uns das an?“, hann die Hoheprieschder un Ällschde do gesaht. „Das is dei Problem!“ 5 Do hat de Judas das Geld in de Tembel geschmiss un is fortgang un hat sich ufgehonk.

6 Die Hoheprieschder hann die Minze ufgehob un hann gesaht: „Do das Geld darf mer net in de Tembelschatz lehe, weil Blut dran kläbt.“ 7 Se hann iwer die Sach berot un hann dann vun dem Geld es Feld vu’me Hawemacher kaf, fer dort Fremde se beerdiche. 8 Deshalb werd das Feld aach bis heit „Blutfeld“ genennt. 9 So is ingedroff, was durch de Prophet Jeremia gesaht wor is: „Se hann die 30 Silwerminze geholl – das is de Preis, wo die Israelide fer ne feschtgesetzt hodde – 10 un hann fer das Geld es Feld vu’me Hawemacher kaf. So hat mer’s de Herr gebott gehat.“^a (Sach 11,12-13; Jer 19,1-13; 32,6-15)

27:9-10^a De Wortlaut finnt mer bei’m Sacharia. Es finne sich awer Parallele zwische de Gedangge vum Matthäus un dene vum Jeremia. Es geht um e Mischzidat. Bei dem werd nur der zidierde Verfasser genennt, wo am meischde bekannt is.

Die Verhandlung vor’m Piladus

11 Wie de Jesus vor’m reemische Gouverneer gestann hat, hat der ne gefroht: „Bischt du de Keenich vun de Judde?“ „So is es!“, hat de Jesus do zu’m gesaht. 12 Dann hann’e die Hoheprieschder un die Ällschde verklaacht, awer er hat kä Antwort gebb. 13 Do hat de Piladus zu’m gesaht: „Heerscht du dann net, was die alles gäh dich vorbringe?“ 14 De Jesus hat awer kä Wort dodruf zu’m gesaht. Uf kä änzichi Anschullichung hat er ebbes gesaht. Do hat sich de Gouverneer arich gewunnert.

Es Dodesurdäl werd gefällt

15 Am Fescht hat de Gouverneer die Gewohnhät gehat, fer e Gefangener freiselosse. Dene hann sich die Leit aussuche dirfe. 16 Domols hann die Reemer grad e bekannder Mann im Gefängnis gehat, wo Barabbas gehääscht hat. 17 De Piladus hat deshalb die Leit, wo beinannerkomm ware, gefroht: „Was wolle ner dann? Wene soll ich eich freilosse: de Barabbas oder de Jesus, wo Messias genennt werd?“ 18 Er hat nämlich gewisst, dass die Hoheprieschder un die Ällschde de Jesus nur an’e ausgeliwert hodde, weil se neidisch ware.

19 Wie de Piladus dann uf em Richderstuhl gehuckt hat, hat em sei Fra ausrichde gelosst: „Loss die Finger eweg vun do dem gerechde Mann! Wäh dem hann ich heit Naacht nämlich gedrämt un hann dodebei schwere Stunne durchgemacht!“

20 In de Zwischezeit hann die Hoheprieschder un die Ällschde die Leit dezu verschwätzt gehat, fer se verlange, dass de Barabbas freigelosst un de Jesus hingericht werd. 21 De Gouverneer hat die Leit dodrufhin wider gefroht: „Wene vun dene zwä soll ich eich freilosse?“ Do hann die Leit geruf: „De Barabbas!“ 22 „Un was soll ich me’m Jesus mache, wo Messias genennt werd?“, hat se de Piladus gefroht. „Schlah ne ans Kreiz!“, hann se do allegar geruf. 23 Dodrufhin hat de Gouverneer gefroht: „Was hat er dann verbroch?“ Se hann awer nur noch lauder gekrisch: „Schlah ne ans Kreiz!“

24 De Piladus hat gesiehn, dass er nix erreicht hat. Es hat im Gähedäl fascht e Ufstand gebb. Do hat er sich Wasser bringe gelosst un hat sich vor all de Leit die Hänn gewäscht un gesaht: „Ich bin unschullich am Blut vun do dem gerechde Mann! Was jetz bassiert, is eier Problem!“ 25 Do hat’s ganze Volk geruf: „Sei Blut soll iwer uns un unser Kinner komme!“ 26 Dodenoh hat ne de Piladus de Barabbas freigelosst. De Jesus hat er awer gääschele gelosst un hat ne dann de Soldade iwergebb, fer gekreizicht se werre.

Die Soldade dun de Jesus verspodde

27 Die Soldade vum Gouverneer hann de Jesus dodrufhin geholl un hann’e ins Gerichtshaus gefiehrt. Dort hann se de Rescht vun ihre Kamerade um ne erum versammelt 28 un hann’e ausgezoh un em e roder Soldademandel umgehonk. 29 Dann hann se e Kron aus Dore geflecht. Die hann se’m uf de Kopp gedrickt un hann em e Stegge in die rechts Hand gebb. Se sinn aach vor’m uf die Knie gefall un hann’e verspott. „Heil dir, du Keenich vun de Judde!“, hann se gesaht. 30 Dann hann se uf ne gespauzt un hann dene Stegge genumm un em dodemet uf de Kopp geschlah.

31 Wie se ihr Spott me’m gedrieb hodde, hann se’m dene rode Soldademandel abgenumm un hann em sei eichene Kläder wider angedun.

De Jesus werd gekreizicht

Dodenoh hann die Soldade de Jesus abgefiehrt, fer ne se kreiziche. 32 Unnerwäächs hann se e Mann vun Kyrene gedroff, wo Simon gehääscht hat. Dene hann se gezwung, fer em Jesus es Kreiz se drahn.

33 So sinn se uf dene Platz komm, wo Golgada genennt werd. Das dut „Dodekoppplatz“ bedeide. 34 Dort hann se em Jesus Weinessich, wo met Gall^a vermischt war, se dringge gebb. Wie er awer e bissje dodevun probiert hott, hat er nix meh dringge wolle.

27:34^a Die ingemischt Gall war meechlicherweis als zusätzlichi Queelerei gedenkt. Villeicht hat se awer aach als Beteiwungsmiddel gedient. Se is e Anspielung an Psalm 69,22.

35 Dodrufhin hann’e die Soldade gekreizicht un hann sei Kläder verlost un verdält. [So hat indreffe solle, was Gott durch de Prophet gesaht hat: Se ha’mei Kläder unner sich ufgedält, u’mei Gewand hann se verlost.] 36 Dodenoh hann se sich bei’m Kreiz hingehuckt un hann uf de Jesus ufgebasst.

37 Iwer seim Kopp hann se e Schild feschtgemacht, wo die Ursach angebb hat, fer was er verurdält wor is: „Das do is de Jesus, de Keenich vun de Judde.“

38 Sesamme me’m Jesus sinn zwä Raiwer gekreizicht wor, der äne rechts un der annere links vum Jesus.

39 Die Leit, wo dort annegang sinn, hann de Kopp geschiddelt un hann iwer ne geläschdert 40 un gesaht: „Un du willscht de Tembel abreiße un in drei Daache wider ufbaue! Helf der doch selwer! Komm vum Kreiz erunner, wann du Gott sei Sohn bischt!“ 41 Genauso hann aach die Hoheprieschder un die Schriftgelehrde un Ällschde gespott un gesaht: 42 „Annere hat er geholf, awer sich selwer kann er net helfe. Wann er de Keenich vun Israel is, soll er doch jetz vum Kreiz erunnerkomme! Dann glawe mer an’e. 43 Er hat Gott vertraut. Der soll ne jetz befreie, wann er Gefalle a’m hat. Er hat doch gesaht: ‚Ich bin de Sohn vun Gott!’“

44 Genauso hann’e aach die Raiwer erunnergemacht, wo met em gekreizicht wor sinn.

De Jesus sterbt

45 Meddaachs is es im ganze Land uf ämo dunggel wor. Das hat bis um drei Uhr nohmeddaachs gedauert. 46 Gäh drei Uhr hat de Jesus dann laut geruf: „Eli, Eli, lama sabachtani?“ Das dut bedeide: „Mei Gott, mei Gott, fer was hasch’e mich allän gelosst?“ 47 Wie e paar vun dene Leit, wo dort gestann hann, das geheert hann, hann se gesaht: „Der ruft noh’m Elija.“^a 48 Dodrufhin is direkt äner vun’e losgelaf un hat e Schwamm geholl. Dene hat er dann in Essich getunkt un hat ne uf e Stegge gesteckt un em Jesus se dringge gebb. 49 Awer die annere hann gesaht: „Warden emo! Mir wolle doch emo siehn, ob de Elija kommt un’e redde dut.“ 50 De Jesus hat awer noch emo lauthals gekrisch. Dann is er gestorb.

27:47^a Hebräisch Eli un aramäisch Eloi hat sich in de Ohre vun dene Leit, wo dort erumgestann hann, wie de Name vum Prophet Elija angeheert. Der hat ca. 850 v. Chr. geläbt.

51 In dem Moment is de Vorhang im Tembel vun owe bis unne in zwä Stigger geriss. Die Erd hat gebebt, un die Felse sinn ausenannergeriss. 52 Die Gräwer sinn ufgang, un e Haufe Leiwer vun heiliche Mensche, wo schun gestorb ware, sinn uferstann. 53 Se sinn aus ihre Gräwer komm, wie de Jesus uferstann war, un sinn in die heilich Stadt gang un vil Leit erschien.

54 Der reemische Hauptmann un die Soldade, wo sesamme met em uf de Jesus ufgebasst hann, hann metkrieht, wie die Erd gebebt hat un was sunscht noch bassiert is. Do hann se’s orndlich met de Angscht se dun krieht un hann gesaht: „Do der Mann war wirklich Gott sei Sohn!“

55 Es ware aach e Haufe Weibsleit dort, wo vun weidem zugeguckt hann. Die ware frieher in Galiläa me’m Jesus metgang un hann em gedient gehat. 56 Unner dene ware es Maria vun Magdala, das annere Maria – em Jakobus un em Joses ihr Mudder – un die Mudder vum Zebedäus seine Buwe.

De Josef vun Arimadäa leht de Jesus in sei eichenes Grab

57 Wie’s Owend wor is, is e reicher Mann komm, wo aus Arimadäa gestammt hat. Der hat Josef gehääscht un war selwer aach e Jinger vum Jesus. 58 De Josef is bei de Piladus gang un hat gefroht, ob er em Jesus sei Leich kriehn kännt. Do hat de Piladus Order gebb, fer em die Leich se iwerlosse.

59 De Josef hat se dann geholl un hat se in e sauweres Leinduuch gewiggelt. 60 Dodenoh hat er se in e neies Grab geleht, wo er fer sich selwer in e Felse haue gelosst hott. Vor de Ingang vun dem Grab hat er e großer Stän gerollt un is dann fortgang.

61 Es Maria vun Magdala un das annere Maria ware aach dort un hann sich gähiwer vum Grab hingehuckt gehat.

Soldade dun’s Grab bewache

62 Am nägschde Daach sinn die Hoheprieschder un die Pharisäer bei’m Piladus sesammekomm. Es war de Daach noh’m Vorberädungsdaach. 63 „Herr“, hann se gesaht, „uns is ingefall, dass do der Verfiehrer, wie er noch geläbt hat, behaupt hat: ‚Noh drei Daache stehn ich wider uf!’ 64 Gebb deshalb Order, dass bis zum dridde Daach uf’s Grab gutt ufgebasst werd. Sunscht kännde sei Jinger [in de Naacht] komme un die Leich klaue un em Volk gähiwer behaupde, er wär vun de Dode uferstann. Dann wär die letscht Verfiehrung noch schlimmer wie die eerscht.“ 65 Do hat de Piladus zu ne gesaht: „Ihr solle eier Wach hann! Gehn un bassen uf’s Grab uf, so gutt wie ner känne!“ 66 Do sinn se fortgang, fer uf’s Grab ufsebasse. Se hann dene Stän versiechelt un hann die Wachmannschaft dort gelosst.

28

De Jesus steht vun de Dode uf

1 Noh’m Sabbat sinn’s Maria vun Magdala un das annere Maria komm, wie’s am eerschde Daach vun de Woch hell wor is, fer noh’m Grab se gugge. 2 Uf ämo hat die Erd orndlich angefang se bewe. E Engel vum Herr war nämlich vum Himmel komm un war bei die Grabhehl gang. Er hat dene Stän vum Ingang eweggerollt un hat sich uf ne gehuckt. 3 Sei Gestalt hat wie e Blitz geleicht, un sei Kläder ware so weiß wie Schnee. 4 Die Wächder hann geziddert, weil se Angscht vor’m hodde, un sinn wie dot uf de Boddem gefall.

5 Der Engel hat awer zu dene Weibsleit gesaht: „Ihr brauche kä Angscht se hann! Ich wäß, dass ner de Jesus suche, wo gekreizicht wor is. 6 Der is nemmeh do! Er is nämlich uferstann, genauso wie er’s angekinnicht hott. Kommen un guggen eich die Stell an, wo de Herr geläh hat. 7 Un dann gehn schnell bei sei Jinger un sahn ne, dass er vun de Dode uferstann is un vor eich her noh Galiläa geht. Dort siehn’er ne dann. Mergen eich, was ich eich gesaht hann!“

8 Do sinn die Weibsleit schnell aus dem Grab enausgang. Se hann Angscht gehat, hann sich awer doch arich gefreit. Se sinn bei die Jinger vum Jesus gelaf, fer ne se verzehle, was bassiert war. 9 [Wie se noch unnerwäächs ware, fer em Jesus seine Jinger alles se verzehle,] is ne de Jesus uf ämo entgähkomm un hat gesaht: „Ich grieße eich!“ Do sinn se bei ne gang un hann sei Fieß umklammert un’e angebät. 10 „Ihr brauche kä Angscht se hann!“, hat de Jesus do zu ne gesaht. „Gehn un sahn meine Brieder,^a se solle noh Galiläa gehn. Dort siehn se mich dann!“

28:10^a De Jesus männt an do der Stell sei Jinger.

Die Hoheprieschder besteche die Soldade, wo uf’s Grab ufgebasst hodde

11 Wie die Weibsleit noch unnerwäächs ware, sinn e paar vun dene Wächder in die Stadt komm un hann de Hoheprieschder alles verzehlt, was bassiert war. 12 Dodenoh sinn die Hoheprieschder met de Ällschde sesammekomm un hann e Beschluss gefasst: Se hann dene Soldade richdich Geld gebb 13 un hann gesaht: „Verzehlen de Leit: ‚Sei Jinger sinn in de Naacht komm, wie mer geschloft hann, un hann’e geklaut!’ 14 Wann de Gouverneer ebbes dodevun metkrieht, beruhiche mer ne un sorje defor, dass ner nix se befirchde hann.“ 15 Do hann die Soldade das Geld genumm un hann alles so gemacht, wie se’s gesaht krieht hann. So kommt’s, dass do die Geschicht bei de Judde bis uf de heidiche Daach verbrät is.

De Jesus schickt sei Jinger aus

16 Dodenoh sinn die ellef Jinger noh Galiläa uf dene Berch gang, wo se de Jesus hinbestellt hott. 17 Un wie se ne gesiehn hann, sinn se vor’m nidergefall.^a E paar hann awer gezweifelt.

28:17^a Oder: hann se ne angebät.

18 Dodrufhin is de Jesus bei se komm un hat met ne geschwätzt. „Gott hat mer die ganz Vollmacht im Himmel un uf de Erd gebb!“, hat er gesaht. 19 „Gehn deshalb bei jedes Volk un machen die Mensche zu meine Jinger! Dafen se uf de Name vum Vadder un vum Sohn un vum Heiliche Geischt, 20 un brengen ne bei, fer alles insehalle, was ich eich gebott hann! Un verlossen eich druf: Ich bin jede Daach bei eich, bis ans Enn vun de Welt!“ Amen.