Westpfälzisch-südsaarländische Bibel Es lewennische Wort (ELW) – Kolosser

Bleiwen fescht!

21 Ihr hann Gott frieher fremd un feindlich gähiwer gestann, weil ner gedenkt un gemacht hann, was bees is. 22 Jetz hat eich Gott awer dodedurch met sich versehnt, dass sei Sohn de Dod als Mensch uf sich genumm hat. Er hat eich heilich vor sich hinstelle wolle un ohne dass ebbes aussesetze wär un ohne dass mer eich anklaache kännt. 23 Ihr misse awer im Glawe gegrinnt un fescht bleiwe un dirfe eich net vun der Hoffnung, wo vun de gutt Nohricht kommt, abbringe losse. Iwerall uf de Welt hann die Mensche die gutt Nohricht gepreddicht krieht. Ihr hann se aach geheert, un ich, de Paulus, dun ihr diene.

DE PAULUS SCHREIBT IWER SICH UN IWER DIE GEMÄN: 1,24-2,23

De Paulus dut de Gemän diene

24 Ich freie mich jetz iwer das, was ich fer eich durchmache muss. Fer de Leib vun Chrischdus – die Gemän – dun ich met meim Leib ergänze, was an dem noch fählt, was mer Chrischdus fer durchsestehn uferleht hat. 25 Ich diene de Gemän durch das Amt, wo mer vun Gott fer eich iwerdrah wor is: Ich soll im volle Umfang verkinniche,^a was Gott gesaht hat. 26 Dodebei geht’s um das Geheimnis, wo er seit ewiche Zeide un Generatione versteggelt hott un wo er jetz dene Mensche, wo heilich sinn un ihm geheere, offebart hat. 27 Gott hat ne bekannt mache wolle, wie reich un herrlich do das Geheimnis unner de Välger is. Das Geheimnis besteht dodrinn, dass Chrischdus in eich läbt un die Hoffnung uf die Herrlichkät is!

1:25^a Oder: Ich soll vervollstänniche.

28 Chrischdus du’mer verkinniche, u’mir warne jeder Mensch un belehre ne met aller Weishät. Verbunn met Chrischdus Jesus wolle mer die Mensche nämlich allegar vollkomme vor Gott hinstelle. 29 Fer das bewerkstellicht se kriehn, schaff un kämpf ich met Chrischdus seiner Kraft, wo mächdich i’mer wirkt.

2

De Paulus kämpft fer die Gemän

1 Ihr solle wisse, wie schwär ich fer eich un fer die Glaiwiche in Laodicea^a un fer all die annere, wo mich perseenlich noch net gesiehn hann, kämpfe. 2 Dodedurch solle se Mut gemacht kriehn. Se solle in de Lieb sesammehalle, fer die dief un reich Insicht se kriehn un das Geheimnis, wo iwer Gott, de Vadder, un iwer Chrischdus schwätzt, se erkenne. 3 Gott hat nämlich de ganze Schatz an Weishät un Erkenntnis in Chrischdus versteggelt.

2:1^a Laodicea hat 15 km nordweschtlich vun Kolossä geläh.

4 Ich sahn das do, dass eich nimand met Argumende hinner’s Licht fiehrt, met Argumende, wo sich zwar gutt anheere, awer verkehrt sinn. 5 Wann ich aach perseenlich net do bin – im Geischt bin ich bei eich. Ich freie mich, weil ich siehn, dass ner orndlich läwe un fescht an Chrischdus glawe.

Nur Chrischdus is wichdich

6 Ihr hann Chrischdus Jesus als Herr angenumm. Läwen deshalb aach so wie Mensche, wo Chrischdus geheere! 7 Bleiwen fescht in Chrischdus verwurzelt un uf Chrischdus ufgebaut, un hallen so am Glawe fescht, wie ner’s beigebrung krieht hann! Heeren net uf, fer se glawe un Gott dangge se sahn!

8 Bassen uf, dass eich nimand met seiner Philosophie un läärem Bedruuch infangt! Das alles stitzt sich nämlich nur uf e menschlichi Iwerliwerung un dut de Grundprinzibie vun do der Welt entspringe un net Chrischdus.^a 9 In Chrischdus wohnt nämlich alles vun de Gotthät leibhafdich, 10 un weil ner Chrischdus geheere, hann’er alles, was ner brauche. Chrischdus dut nämlich iwer jedi Macht un Gewalt herrsche.^b 11 Weil ner Chrischdus geheere, sinn’er aach beschnitt wor, awer net durch e aißerer Ingriff. Eier Beschneidung hat Chrischdus vorgenumm, un dodemet hat er eich vun eierm alde, sindiche Wese abgetrennt. 12 Wie ner gedaft wor sinn, hat eich Gott sesamme met Chrischdus begrab. Durch die Daf hat er eich aach sesamme met Chrischdus uferstehn gelosst. Er hat das gemacht, weil ner glawe, dass Gott mächdich gewirkt hat. Gott hat Chrischdus nämlich vun de Dode uferstehn gelosst. 13 Ihr ware geischtlich dot, weil ner eich verfählt hodde un weil eier sindich Nadur net beschnitt war.^c Sesamme met Chrischdus hat eich Gott awer lewennich gemacht. Er hat eich jedi Verfählung vergebb. 14 Die Anklaacheschrift, wo gäh uns ausgestellt war un wo sich gäh uns gericht hott, hat er metsamt ihre Forderunge annulliert. Er hat se ans Kreiz geheft un dodedurch aus de Welt geschafft. 15 So hat er de Mächde un Gewalde^d die Waffe abgenumm un hat se vor alle Leit bloßgestellt. Durch Chrischdus^e hat er iwer se triumfiert.^f

2:8^a Oder: un dut vun dene Geischtwese stamme, wo im Universum herrsche, un net vun Chrischdus.

2:10^b Vgl. die Anmergung zu Kabidel 1,16.

2:13^c Das hääscht weil die Kolosser Häde ware.

2:15^d Vgl. die Anmergung zu Kabidel 1,16.

2:15^e Oder: Durch’s Kreiz.

2:15^f De Paulus hat an do der Stell wahrscheinlich die reemische Triumfziech vor Aue. Bei dene hann die besiechde Keeniche un jeder besiechde General unner’m Hohn vun de Bevälgerung hinner’m Streitwahn vun dem reemische Befehlshawer, wo se besiecht hat, hergehn misse.

Wa’mer Chrischdus geheere, si’mer frei

16 Lossen eich also vun nimand verurdäle, nur weil ner bestimmde Sache esse oder dringge oder weil ner bestimmde Feierdaache oder Neimondfeschde oder Sabbade net inhalle. 17 Das alles is doch nur e Schadde vun dem, was hat solle komme! Die Wirklichkät is awer Chrischdus selwer! 18 Lossen net zu, dass eich jemand verurdält, jemand, wo sich dodrinn gefallt, dass er sich demiedicht un die Engel verehrt un wo sich met Sache inlosst, wo er net gesiehn hat. So jemand is ohne Grund ingebillt un dut nur menschlich dengge. 19 Er hallt sich aach net an Chrischdus, wo’s Haupt is. Vun Chrischdus aus werd de ganze Leib nämlich durch Gelengge un Sehne versorcht un sesammegehall un dut so wachse, wie’s Gott will.

20 Ihr sinn doch sesamme met Chrischdus de Grundprinzibie vun do der Welt^a gestorb. Fer was losse ner eich dann noch vorschreiwe, wie wann’er noch in de Welt läwe däde: 21 „Das do darfsch’e net angreife, dodevun net esse, an das do net drankomme!?“ 22 Das sinn doch alles nur Sache, wo dodezu bestimmt sinn, dass mer se benutzt un verbraucht! Bei Vorschrifde iwer so Sache geht’s doch nur um das, was eich Mensche dikdiere un beibringe. 23 Es werd zwar behaupt, es dät Weishät in so Vorschrifde leihe, weil se e rigoroser Goddesdienscht, Demut un e schonungslosi Behandlung vum Leib verlange. Se hann awer kä Wert un stelle nur unser sindich Nadur sefride.

2:20^a Oder: dene Geischtwese, wo im Universum herrsche.

3

DE PAULUS GEBT UNNERRICHT IWER’S CHRISCHTLICHE LÄWE: 3,1-4,6

Wa’mer Chrischdus geheere, ha’mer e neies Läwe

1 Ihr sinn sesamme met Chrischdus uferstann. Strewen deshalb noh dem, was im Himmel is, wo Chrischdus rechts vun Gott huckt!^a 2 Richden eier Gedangge uf das, was im Himmel is un net uf das, was uf de Erd is! 3 Ihr sinn nämlich gestorb, un eier Läwe is jetz met Chrischdus in Gott versteggelt. 4 Chrischdus is unser Läwe, un wann Chrischdus wider erscheint, erscheine aach ihr met em un däle sei Herrlichkät.

3:1^a Der Platz rechts vun Gott is de Platz vun heegschder Ehr un greeschder Macht.

5 Aus dem Grund solle ner aach allem, was an eich noch zu de Erd geheert, de Dodesstoß versetze: em Hure un eme unmoralische Läwe, de Leideschaft, em beese Verlange un de Geldgier – was Gätzedienscht is. 6 All das zieht’s nämlich noh sich, dass Gott emo die Mensche, wo net uf ne heere, richde dut. 7 Frieher hann ihr eich aach so verhall, wie eier Läwe noch vun do dene Sinde gepräächt war. 8 Jetz misse ner das awer alles uf die Seit lehe, aach de Zorn, die Wut un die Boshät! Lossen kä Läschderunge un kä gemeines Wort iwer eier Libbe komme! 9 Beliehen eich net gäheseidich! Ihr hann nämlich dene alde Mensch met dem, was er prakdiziert, ausgedun 10 un dene neie Mensch angedun. Der neie Mensch is vun Gott geschaff wor un werd noh seim Bild erneiert, so dass ner Gott^a erkenne känne. 11 Wo so e Erneierung stattfinnt, is es nemmeh wichdich, ob ner Grieche oder Judde sinn, ob beschnitt oder net beschnitt, ob unzivilisiert oder Skythe, ob Sklave oder freie Mensche. Was dann zehlt, is, dass Chrischdus alles un in jedem vun eich is!

3:10^a Oder: Chrischdus.

12 Gott hat eich fer sich ausgewählt un hat heiliche Mensche aus eich gemacht. Er hat eich lieb. Dun deshalb e herzliches Erbarme, Freindlichkät, Demut, Sanftmut un Geduld an! 13 Kommen metenanner aus, un vergewen eich gäheseidich, wann äner em annere ebbes vorsewerfe hat! Genauso wie Chrischdus eich vergebb hat, misse aach ihr eich gäheseidich vergewe! 14 Iwer das alles dun awer die Lieb an! Die dut eich vollkomme metenanner verbinne. 15 Lossen in eierm Herz dene Friede, wo vun Gott kommt, regiere! Fer dene Friede se hann, hat eich Gott nämlich in dem äne Leib sesammegeruf. Sinn dankbar! 16 Lossen das, was Chrischdus gesaht hat, reichlich bei eich wohne! Belehren un warnen eich gäheseidich met aller Weishät! Singen em Herr dankbar un vun ganzem Herz Psalme, Hymne un Lidder, so wie se de Heiliche Geischt ingebt! 17 Was ner aach immer sahn, un was ner aach immer schaffe: Machen alles im Name vum Herr Jesus, un sahn Gott, em Vadder, durch de Jesus dangge!

Anweisunge fer’s Famillieläwe

18 Ihr Weibsleit, ordnen eich eiere Mannsleit unner, so wie’s fer Mensche, wo em Herr geheere, angemess is!

19 Ihr Mannsleit, liewen eier Weibsleit, un gehn net grob met ne um!

20 Ihr Kinner, heeren in allem uf eier Eldere! Das gefallt nämlich em Herr.

21 Ihr, wo ner Vadder sinn, provozieren eier Kinner net, sunscht verliere se de Mut!

Anweisunge fer’s Berufsläwe

22 Ihr Sklave, heeren in allem uf eier leibliche Herre! Machen’s awer net nur, wann se eich beowachde un weil ner ne gefalle wolle! Heeren im Gähedäl berätwillich uf se, weil ner Reschbekt vor Gott hann! 23 Was ner aach immer schaffe: Machen’s gäre, wie wann’s fer de Herr un net fer Mensche wär. 24 Ihr wisse doch, dass eich de Herr emo met eierm Erbdäl ausbezahlt. Ihr diene nämlich Chrischdus, em Herr. 25 Wer awer Unrecht dut, werd emo dodefor bestroft! Gott macht nämlich kä Unnerschied zwische de Mensche.

4

1 Ihr Herre, dun eier Sklave gerecht un fair behannele! Ihr wisse jo, dass aach ihr e Herr im Himmel hann.

Läwen fer annere Mensche!

2 Erweisen eich ausdauernd, wann’er bäde! Bleiwen dodebei hellwach, un sahn Gott dangge! 3 Bäden in deselwe Zeit aach fer uns, dass uns Gott Meechlichkäde gebt, fer se schwätze, dass mer das Geheimnis, wo iwer Chrischdus schwätzt, weidersahn känne. Wäh dem Geheimnis bin ich nämlich im Gefängnis. 4 Bäden, dass ich das Geheimnis so klar verkinniche kann, wie ich’s sollt.

5 Verhallen eich dene Mensche gähiwer, wo net zu de Gemän geheere, kluuch, un nutzen die Zeit aus! 6 Was ner sahn, muss immer freindlich un anziehend sinn.^a Ihr solle nämlich wisse, wie ner jedem änzelne Antwort gewe misse.

4:6^a Wärtlich: u’met Salz gewirzt sinn.

DE PAULUS GEBT PERSEENLICHE METDÄLUNGE WEIDER UN WINSCHT GOTT SEI SEECHE: 4,7-18

Die Geschwischder losse grieße

7 De Tichigus, unser liewer Bruder, dut eich ausfiehrlich verzehle, wie mer’s geht. Er helft mer ganz trei un dient sesamme met mir em Herr. 8 Ich schigge ne jetz extra bei eich, dass er alles iwer eich se heere krieht un dass er eich Mut mache kann. 9 Er kommt me’m Onesimus, dem treie un liewe Bruder, wo jo äner vun eich is. Die zwä verzehle eich alles, was do vor sich geht.

10 De Arisdarch, wo sesamme met mir im Gefängnis is, un de Markus, em Barnabas sei Kusseng, losse eich grieße. – Wäh’m Markus hann ich eich schun Anweisunge gebb. Nemmen ne uf, wann er bei eich kommt! – 11 De Jesus, wo aach Juschdus genennt werd, losst eich aach grieße. De Arisdarch, de Markus un de Jesus sinn die änziche, wo aus em Juddedum stamme un^a sesamme met mir fer Gott sei Reich schaffe. Durch die bin ich getreescht wor. 12 De Epaphras, wo aach äner vun eich is, losst eich aach grieße. Er dient Chrischdus un kämpft immer fer eich, wann er bäde dut. Ihr solle vollkomme dostehn un ganz vun dem, was Gott will, durchdrung sinn. 13 Ich dun em Epaphras bestädiche, dass er sich eifrich um eich un um die Glaiwiche in Laodicea un Hierapolis bemieht.^b 14 Aach de Lukas, unser liewer Dogder, un de Demas losse eich grieße.

4:11^a Wärtlich: sinn die änziche aus de Beschneidung, wo.

4:13^b Laodicea un Hierapolis ware zwä Städt, wo im selwe Dal wie Kolossä geläh hann.

15 Grießen ihr die Geschwischder in Laodicea un de Nimphas un die Gemän, wo sich in seim Haus versammelt.

16 Sorjen defor, dass do der Brief aach in de Gemän vun Laodicea vorgeläst werd, wann er bei eich vorgeläst wor is, un dass ner dene vun Laodicea^a se läse kriehn. 17 Sahn em Archibbus: „Gebb Acht, dass du dene Dienscht duscht, wo de vum Herr iwerdrah krieht hascht.“

4:16^a Der Brief an die Gemän in Laodicea exischdiert heit nemmeh. Es kännt awer sinn, dass dodemet de Epheserbrief gemännt is. Beim Epheserbrief geht’s meechlicherweis um e Rundschreiwe, wo zu der Zeit grad in Laodicea war.

18 Ich, de Paulus, schreiwe do dene Gruß met meiner eichen Hand. Denggen dran, dass ich im Gefängnis bin! Ich winsche eich Gnad! Amen.