Westpfälzisch-südsaarländische Bibel Es lewennische Wort (ELW) – Philemon

De Brief an de Philemon is de kirzeschde Brief vum Aposchdel Paulus, wo uns erhall geblieb is. De Philemon hat zu de Gemän vun Kolossä geheert. Äner vun seine Sklave, wo Onesimus gehääscht hat, war em durchgebrennt un noh Rom komm. Un dort hat er de Aposchdel Paulus gedroff. De Onesimus hat geheert, was de Jesus aach fer ihne gemacht hat, un is zum Glawe komm. Dodrufhin hat er sich berät erklärt, fer bei sei Herr sericksegehn, aach wann der ne schwär bestrofe dät.

De Paulus hat dann do dene Brief geschrieb, fer bei’m Philemon um Toleranz un Nohsicht em Onesimus gähiwer ansehalle. Immerhin war de Onesimus, genauso wie de Philemon aach, zum Glawe an de Jesus komm.

Obwohl de Paulus die Inrichdung vun de Sklaverei, wo zu der Zeit bestann hat, rechtlich gille losst, macht er doch in de Verse 15 un 16 deitlich, dass es jetz e neies Verhältnis zwische’m Philemon un em Onesimus gebt: „Villeicht war de Onesimus nur deshalb e Zeitlang vun der getrennt, dass du ne fer immer serickkriehscht, die do Tour awer net nur als Sklave. Du sollscht ne im Gähedäl als e liewer Bruder serickkriehn, was besser is wie e Sklave.“

1

DE PAULUS GRIESST DE PHILEMON: 1-3

1 Das do schreibt de Paulus, wo wäh Chrischdus Jesus im Gefängnis is, un de Timotheus, unser Bruder. Mir schreiwe an de Philemon, wo mer lieb hann un wo met uns sesammeschafft. 2 Aach an’s Apphia, wo mer lieb hann, schreiwe mer, an de Archibbus, wo sesamme met uns kämpft, un an die Gemän, wo sich im Philemon seim Haus versammelt.^a

1:2^a Es Apphia war wahrscheinlich em Philemon sei Fra un de Archibbus ihr Bub. Manche Ausleher vermude im Archibbus e Bruder vum Philemon oder e Freind vun de Famillie.

3 Mir winsche eich Gnad un Friede vun Gott, unserm Vadder, un vum Herr Jesus Chrischdus!

DE PAULUS SAHT GOTT DANGGE: 4-7

4 Wann ich bäde, Philemon, sahn ich meim Gott dangge un dengge immer an dich. 5 Ich heere nämlich devun, wie du an de Herr Jesus glabscht un wie du die Mensche, wo heilich sinn, allegar lieb hascht. 6 Ich bäde dodrum, dass der Glawe, wo uns metenanner verbinnt, in der wirkt, un dass du durch Chrischdus Jesus all das Gudde, wo in eich is, erkennscht. 7 Dodedurch, dass du die Glaiwiche lieb hascht, si’mer nämlich arich froh wor un hann dodedurch Mut gemacht krieht. Bruder, du hascht’s Herz vun dene Mensche, wo heilich sinn, erfrischt!

DE PAULUS SETZT SICH FER DE ONESIMUS IN: 8-20

8 Deshalb hat mer Chrischdus aach die voll Freihät geschenkt, fer der vorseschreiwe, was du mache sollscht. 9 Awer weil ich dich lieb hann, zieh ich’s vor, fer dich nur se bidde. Ich, de Paulus, mache’s als alder Mann, wo jetz aach noch wäh Jesus Chrischdus im Gefängnis is. 10 Ich bidde dich fer de Onesimus^a, mei Kind im Glawe. Do im Gefängnis bin ich sei geischtlicher Vadder wor.^b 11 Frieher war er der net vun Nutze, awer jetz is er dir u’mir nitzlich. 12 Ich schigge ne jetz serick. Nemm ne uf, wie wann er e Däl vu’mir selwer wär! 13 Ich hätt ne gäre bei mer behall, dass er mer an deiner Stell diene kännt, solang wie ich wäh de gutt Nohricht im Gefängnis bin. 14 Awer ohne dass du ingewillicht hascht, hann ich nix mache wolle. Das Gudde, wo du machscht, soll freiwillich sinn un net erzwung.

1:10^a Onesimus dut nitzlich bedeide. Dodruf werd in de Verse 11 un 16 angespielt.

1:10^b Das hääscht, de Paulus hat de Onesimus zum Glawe an de Jesus gefiehrt, wie er im Gefängnis war.

15 Villeicht war de Onesimus nur deshalb e Zeitlang vun der getrennt, dass du ne fer immer serickkriehscht, 16 die do Tour awer net nur als Sklave. Du sollscht ne im Gähedäl als e liewer Bruder serickkriehn, was besser is wie e Sklave. E liewer Bruder is er uf jede Fall fer mich, un wiffel meh dann fer dich – als Mensch un aach als äner, wo em Herr geheert! 17 Nemm also de Onesimus so uf, wie du mich ufnemme dätscht, wann de mich fer jemand hallscht, wo Gemänschaft met der hat. 18 Un stell mir’s in Rechnung, wann er dich geschädicht hat oder dir ebbes schullich is! 19 Ich, de Paulus, schreiwe das do met meiner eichen Hand: Ich dun der’s erstadde! – Ich brauch der jo net se sahn, dass aach du mir ebbes schullich bischt: dich selwer. 20 Jo, Bruder, loss mich wäh’m Herr e Nutze^a vun der hann! Erfrisch mei Herz, weil mer em Herr geheere!

1:20^a Villeicht e Wortspiel me’m Onesimus seim Name, wo nitzlich bedeide dut.

DE PAULUS WINSCHT GOTT SEI SEECHE: 21-25

21 Ich schreiwe der im Vertraue dodruf, dass du uf mich heerscht un weil ich wäß: Du machscht noch meh wie das, was ich verlange.^a 22 Un noch ebbes: Mach aach e Gäschdezimmer fer mich berät! Ich hoffe nämlich, dass Gott eier Gebät erheert u’mich eich serickgebt.

1:21 Manche Ausleher siehn in do dene Worde e diskredi Inladung an de Philemon, fer de Onesimus frei se losse. Wann die Tradition stimmt, hat er das aach gemacht. Dann is der ehemoliche Sklave späder äner vun de Verantwortliche vun de Gemän in Ephesus wor.^a

23 De Epaphras, wo met mir wäh Chrischdus Jesus im Gefängnis is, losst dich grieße, 24 genauso de Markus, de Arisdarch, de Demas un de Lukas, wo met mer sesammeschaffe.

25 Ich bäde dodrum, dass die Gnad vun unserm Herr Jesus Chrischdus met eierm Geischt is! Amen.