Westpfälzisch-südsaarländische Bibel Es lewennische Wort (ELW) – Jakobus

De Jakobus dut sei Brief an Glaiwiche richde, wo offesichtlich Schwierichkäde met de prakdische Konsequenze vun ihrm Glawe hodde. Er geht dodebei uf e ganzi Reih vun Probleme ausfiehrlich in: Manche Chrischde hann dodemet angebb, dass’e reich ware, un hann die Arme vun owe erunner behannelt, annere hann vil Unglick angericht, weil se schlecht iwer ihr Metmensche geschwätzt un se erunnergemacht hann. Noch annere ware iwerheblich un voll Vorurdäle, un Streit war an de Daachesordnung.

De Jakobus hat’s sich deshalb zur Ufgab gemacht, fer met seim Brief de Mangel an Ufrichdichkät un Konsequenz im Läwe vun de Glaiwiche se bekämpfe. Er froht in Kabidel 2, Vers 14 die Gemäne: „Mei liewe Geschwischder! Was nutzt’s dann schun, wann jemand behaupde dut, er dät glawe un setzt sich net in? Kann’e so e Glawe redde?“ De Jakobus stellt dodemet in de Vordergrund, was de Jesus selwer schun formuliert hott: Wer an Gott glabt, macht aach, was Gott vu’m verlangt.

1

DE JAKOBUS GRIESST DIE GLAIWICHE: 1,1

1 Das do schreibt de Jakobus, wo Gott un em Herr Jesus Chrischdus dient. Ich grieße die zwällef Stämm,^a wo uf de ganz Welt verstraut läwe.

1:1^a Gemännt sinn wahrscheinlich jidische Chrischde, wo sich in de eerscht Chrischdeverfolchung vun Jerusalem aus in auslännische Städt geflicht un iwerall neie chrischtliche Gemäne gegrinnt hodde (vgl. Apg 8,1; 11,19).

DE JAKOBUS WEIST DODRUF HIN, DASS DE GLAWE UF DIE PROB GESTELLT WERD: 1,2-2,26

Durch Bewährungsprowe werd de Glawe stark

2 Mei liewe Geschwischder! Betrachden’s als lauder Fräd, wann’er uf verschiedeni Art un Weis uf die Prob gestellt werre! 3 Ihr wisse doch: Wann sich eier Glawe bewährt, bewirkt das Ausdauer. 4 Un die Ausdauer muss ihr Werk zum Abschluss bringe, dass ner reif un vollstännich sinn un dass es eich an nix fählt.

5 Wann awer jemand vun eich net genunk Weishät hat, soll er se vun Gott verlange. Gott gebt se’m dann! Er gebt nämlich jedem gäre un macht nimand e Vorwurf. 6 Wer noh Weishät verlangt, soll Gott awer glawe un soll net zweifele! Wer nämlich zweifelt, gleicht erer Well im Meer, wo vum Wind ufgewiehlt un hin- un hergeschmiss werd. 7 So e Mensch soll net männe, dass er ebbes vum Herr krieht. 8 Wer zweifelt, is nämlich unbestännich in allem, was er macht.

Arme un Reiche

9 Geschwischder, wo nidrich gestellt sinn, solle stolz dodruf sinn, dass’e bei Gott hooch angesiehn sinn, 10 un Mensche^a, wo reich sinn, dass’e bei Gott nidrich gestellt sinn. Se vergehn nämlich emo wie e Blum im Gras. 11 Kaum geht die Sunn uf met ihrer Glut, werd’s Gras schun dirr. Sei Blum fallt ab, un was scheen a’m aussieht, dut vergehn. Genauso vergehn aach emo die, wo reich sinn, in allem, was se unnernemme.

1:10^a Oder: Geschwischder.

Versuchunge komme net vun Gott

12 Glicklich is der Mensch se nenne, wo standhaft bleibt, wann er uf die Prob gestellt werd.^a Wann er sich nämlich bewährt hat, gebt em de Herr die Kron, wo er dene versproch hat, wo ne lieb hann: es ewiche Läwe. 13 Nimand, wo versucht werd, soll sahn: „Gott hat mer do die Versuchung geschickt!“ Gott kann nämlich net in die Versuchung komme, fer ebbes Beeses se mache, un selwer fiehrt er nimand in Versuchung. 14 Jeder Mensch kommt awer in Versuchung, wann er vun seim eichene Verlange gereizt un gelockt werd. 15 Dodenoh werd’s Verlange befrucht un bringt uf die Welt, was sindich is, un wann das, was sindich is, voll entwiggelt is, bringt’s de Dod hervor.

1:12^a Uf die Prob stelle un versuche is im Griechische esselwe Wort. Das erklärt die Verbindung vun do dem Vers me’m nägschde. Jedi Prob is gleichzeidich aach e Versuchung.

16 Irren eich net, mei liewe Geschwischder! 17 Alles, was gutt is un was mer kriehn, un jedes vollkommene Geschenk, kommt vun owe erunner, vum Vadder, wo die Sterne erschaff hat.^a Beim Vadder gebt’s kä Verännerung un aach kä Schadde, wo variiert. 18 Durch die Botschaft, wo wohr is, hat er uns e neii Geburt geschenkt, weil er das so gewollt hat. Mir hann so ebbes wie die eerscht Frucht vun allem, was er erschaff hat, sinn solle.^b

1:17^a Wärtlich: vum Vadder vun de Lichder.

1:18^b Es Volk Israel hat de eerschde Däl vun allem, was es geernt hat, un alles, was beim Vieh als eerschdes uf die Welt komm is, als heilich angesiehn un Gott geopfert (vgl. 3Mo 23,9-14; 5Mo 26,1-11). In dem Sinn geheere die Glaiwiche vum neie Bund Gott in besunnerer Weis un sinn ihm geweiht.

Heere, was Gott gesaht hat, un’s in die Praxis umsetze geheert sesamme

19 Deshalb, mei liewe Geschwischder, soll jeder Mensch schnell sinn, fer zuseheere un langsam, fer se schwätze oder bees se werre. 20 Wann e Mensch nämlich bees werd, macht er net, was in Gott seine Aue richdich is. 21 Deshalb solle ner alles, was dreggich is, un de ganze Rescht an Boshät uf die Seit lehe! Nemmen die Botschaft, wo vun Gott in eier Herz geplanzt wor is un wo eier Seele redde kann, demiedich an.

22 Heeren eich die Botschaft net nur an! Machen aach denoh, sunscht dun’er eich selwer iwer’s Ohr haue! 23 Wer die Botschaft nämlich heert un net denoh macht, is wie äner, wo sich sei Gesicht im Spichel anguckt. 24 Un wann er sich betracht hat, geht er fort un vergesst sofort, wie er aussieht. 25 Wer sich awer in das vollkommene Gesetz, wo die Freihät schenkt, verdieft un wer a’m feschthalt, wer’s net nur heert un dann wider vergesst, wer im Gähedäl das macht, was es verlangt, der is glicklich in dem, was er macht.

26 Angenumm, jemand [vun eich] männt, er dät Gott diene, un angenumm, er hat sei Zung net unner Kontroll. Dann macht er sich selwer ebbes vor, un sei Goddesdienscht is nix wert. 27 E Goddesdienscht, wo in de Aue vun Gott, em Vadder, rein is un wo nix dran aussesetze is, besteht dodrinn, dass mer dene Kinner, wo kä Eldere meh hann, un de Witwe beisteht, wann se in Not sinn, un dass mer sich vor’m schlechde Influss vun de Welt abschirmt.

2

Ziehen die Reiche de Arme net vor!

1 Mei liewe Geschwischder! Verbinnen de Glawe an Jesus Chrischdus, unser herrlicher Herr, net dodemet, dass ner e Unnerschied zwische de Mensche mache. 2 Angenumm, in eier Versammlung^a kommt e Mann, wo Ringe aus Gold un elegande Kläder anhat. Un angenumm, e annerer, wo arm is un schäbiche Kläder anhat, kommt aach erin. 3 Dann gugge ner villeicht noh dem, wo die elegande Kläder anhat, un sahn zu’m: „Huck dich do uf dene gudde Platz!“ Un zu dem Arme sahn’er: „Bleib du do iwe stehn!“ oder: „Huck dich do unne näwe mei Fußbänggelche!“ 4 Wann’er eich so verhalle, verursache ner doch Trennunge unner eich un richde noh verwerfliche Grundsätz, oder net?

2:2^a Wärtlich: Synagooch.

5 Horchen emo her, mei liewe Geschwischder! Hat sich Gott net die, wo in do der Welt arm sinn, ausgewählt, dass’e im Glawe reich werre un das Reich erwe, wo er dene versproch hat, wo ne lieb hann? 6 Ihr awer hann dene, wo arm is, veracht! Sinn dann net die Reiche die, wo eich unnerdrigge? Un schläfe net grad die eich vor Gericht? 7 Die Reiche sinn’s doch, wo dene gudde Name, wo iwer eich ausgeruf wor is,^a läschdere, oder net?

2:7^a Wahrscheinlich, wie se zum Glawe komm un gedaft wor sinn. Glaiwiche werre nämlich uf de Name vum Jesus gedaft (vgl. Apg 2,38).

8 Do das keenichliche Gesetz steht in de Heilich Schrift: Du sollscht dei Nägschder genauso lieb hann wie dich selwer. Wann’er das wirklich halle, mache ner eier Sach richdich! 9 Wann’er awer e Unnerschied zwische de Mensche mache, dun’er sindiche, un’s Gesetz weist eich noh, dass ner’s gebroch hann. 10 Wer nämlich es ganze Gesetz hallt, awer i’me änziche Punkt degäh verstoßt, is am ganze Gesetz schullich wor. 11 Gott, wo gesaht hat: „Geh net näwenaus!“, hat nämlich aach gesaht: „Bring nimand um!“ Wann du zwar net näwenausgehscht, awer jemand umbringe duscht, hasch’e trotzdem es Gesetz gebroch.

12 Ihr solle so schwätze un eier Sach so mache wie Mensche, wo durch das Gesetz, wo die Freihät schenkt, gericht werre! 13 Gott dut nämlich emo dene Mensch, wo net barmherzich war, unbarmherzich richde. Die Barmherzichkät triumfiert awer iwer’s Gericht.

E Glawe, wo sich net insetzt, is nix wert

14 Mei liewe Geschwischder! Was nutzt’s dann schun, wann jemand behaupde dut, er dät glawe un setzt sich net in? Kann’e so e Glawe redde? 15 Angenumm, e Bruder oder e Schweschder brauch Kläder un hat net jede Daach genunk se esse. 16 Un angenumm, äner vun eich dät zu ne sahn: „Gehn im Friede eier Wääch! Wärmen eich, un essen eich satt!“ Wann’er ne net gewe, was se fer se läwe brauche, dut das doch nix nutze, oder doch? 17 Genauso is es aach me’m Glawe! Wann er sich net insetzt, is er dot in sich selwer!

18 Jetz kännt villeicht jemand sahn: „Du glabscht, un ich du’mich insetze.“ Dem misst ich entgähhalle: „Weis mer mo dei Glawe met dem, wo du dich demet insetze duscht! Dann weis ich der mei Glawe met dem, wo ich mich demet insetze.“ 19 Du glabscht, dass es nur äner Gott gebt? Do dusch’e gutt dran! Awer das glawe die Dämone aach – un ziddere!

20 Du gedanggeloser Mensch! Willsch’e dann net endlich insiehn, dass das, was de glabscht, ohne dei Insatz dot is? 21 Wäh was hat’enn Gott de Abraham, unser Stammvadder, fer gerecht erklärt? Doch wäh seim Insatz, wie er de Isaak, sei Bub, uf de Opferaldar geleht hat, oder net? 22 Du siehscht also: Das, was de Abraham geglabt hat, un sei Insatz ware sesamme am Werk, un sei Glawe is durch sei Insatz vollkomme wor. 23 So is ingedroff, was die Heilich Schrift saht: De Abraham hat Gott geglabt, un das hat em Gott als Gerechdichkät angerechent. Un: Die Mensche hann de Abraham Gott sei Freind genennt. 24 Ihr siehn also: Gott erklärt e Mensch wäh seim Insatz fer gerecht un net nur wäh dem, was er glabt.

25 War’s dann bei’m Rahab, wo e Hur war, net genauso? Gott hat’s doch wäh seim Insatz fer gerecht erklärt, wie’s die jidische Kundschafder ufgenumm un uf eme annere Wääch wider fortgeschickt hat, oder net?

26 Genauso wie de menschliche Leib ohne de Läwensgeischt dot is, is aach das, was jemand glabt, ohne sei Insatz dot.

3

DE JAKOBUS BESCHREIBT DIE REALIDÄT VUM GLAWE, GETESCHT DURCH’S BEHERRSCHE VUN DE ZUNG: 3,1-18

Hallen eier Zung im Zaum!

1 Mei liewe Geschwischder! Net vil vun eich sollde Lehrer werre!^a Ihr wisse doch, dass Gott uns Lehrer emo umso strenger richde dut. 2 Mir mache nämlich allegar e Haufe Fähler. Wer awer met dem, was er saht, nie e Fähler macht, is e vollkommener Mensch un kann sei ganzer Leib unner Kontroll halle.

3:1^a Das hääscht Lehrer in de Gemän bzw. Persone, wo die annere Glaiwiche im Glawe un in de biblisch Lehr unnerweise. De Lehrdienscht geheert im Neie Teschdament näwe’m Dienscht vun de Aposchdele un Prophede zu dene drei Dienschde, wo am wichdichde sinn (vgl. Apg 13,1; Reem 12,7; 1Kor 12,28; Eph 4,11).

3 Denggen emo an die Pär! Mir lehe ne es Zaumzeich ins Maul, fer se uns gefiechich se mache, un lengge so ihr ganzer Leib. 4 Oder denggen an die Seechelschiffe! Obwohl se so groß sinn un vu’me raue Wind vorwärtsgedrieb werre – e ganz klänes Steierruder dut se dorthin lengge, wo se die fescht Hand vum Steiermann hin hann will! 5 Genauso is aach die Zung nur e kläner Kärberdäl, awer se gebt groß an. Denggen emo dodriwer noh: Schun e klänes Feier kann e riesicher Wald in Brand stegge! 6 Un die Zung – die Welt voll Ungerechdichkät – is e Feier! So nemmt se ihr Platz unner unsere Kärberdäle in un dut de ganze Leib infiziere. Se steckt de Kräslaf vum Läwe in Brand un werd selwer vun de Häll in Brand gesteckt.

7 Jedi Art vun wilde Diere un Vächel, vun Schlange un Diere im Meer, werd gebännicht un is vum Mensch schun gebännicht wor. 8 Awer die Zung kann kä Mensch bänniche! Se is e unruhiches Iwel un voll Gift, wo de Dod bringt. 9 Met de Zung lowe mer Gott, de Vadder, u’met de Zung du’mer die Mensche, wo vun Gott noh seim Bild erschaff wor sinn, verfluche. 10 Aus em selwe Mund kommt Lowe un Fluche. Das, mei liewe Geschwischder, soll so net sinn! 11 Losst dann e Quell aus em selwe Spalt sauweres un dreggiches Wasser^a sprudele? 12 Kann e Feichebam Olive oder e Weinstock Feiche drahn, mei liewe Geschwischder? Nadierlich net! Genauso wenich kann aus erer Quell salziches un frisches^b Wasser komme!

3:11^a Wärtlich: sießes un bidderes Wasser.

3:12^b Wärtlich: sießes.

Wirklichi Weishät kommt vun Gott

13 Wer vun eich hat’enn Weishät, un wer is verstännich? Der soll durch e gudder Läwenswannel bescheide un insichdich weise, was er macht. 14 Gewen awer net noch an met eierer Weishät, wann’er bidderer Neid un selbschtsichdiche Modive in eierm Herz hann, un verdrähen net die Wohrhät! 15 So e „Weishät“ kommt nämlich net vum Himmel erunner. Se is im Gähedäl vun do der Welt. Se is ungeischtlich un dämonisch! 16 Wo nämlich Neid un selbschtsichdiche Modive herrsche, gebt’s aach Unordnung un jedi Art vun schlechdem Verhalle.

17 Die Weishät, wo vum Himmel kommt, is awer als eerschdes rein. Dann dut se Friede stifde un is mäßich un berät, fer nohsegewe. Se is voll Barmherzichkät un reich an gudder Frucht, un se is unpardeiisch un frei vun Scheinheilichkät. 18 Die Mensche, wo Friede stifde un im Friede säe, ernde als Frucht die Gerechdichkät.

4

DE JAKOBUS RUFT DODEZU UF, FER DIE WELTLICHKÄT SERICKSEWEISE: 4,1-17

Freindschaft met de Welt is Feindschaft gäh Gott

1 Wohär komme’nn bei eich Konflikde un Streidichkäde? Doch nur vun eiere Leideschafde, wo in eierm Innere kämpfe, oder net? 2 Ihr wolle unbedingt ebbes hann un kriehn’s net. Ihr bringe annere um un sinn neidisch, awer ihr känne’s net an eich bringe. Ihr leihe im Streit metenanner un drahn Konflikde aus, awer ihr kriehn net, was ner hann wolle, weil ner Gott net dodenoh frohe! 3 Oder ihr frohe ne denoh un kriehn’s net, weil ner met beese Absichde frohe, nämlich fer’s in eiere Leideschafde aussegewe.

4 [Ihr Mannsleit un] ihr Weibsleit, wo ner näwenausgehn,^a wisse ner dann net, dass die Freindschaft met de Welt Feindschaft gäh Gott is? Wer also e Freind vun de Welt sinn will, macht sich Gott zum Feind! 5 Oder männe ner, die Heilich Schrift dät ohne Grund sahn: „Gott wacht eifersichdich iwer dem Geischt, wo er in uns wohne gelosst hat?“ 6 Er schenkt awer umso meh Gnad. Deshalb saht die Heilich Schrift aach: Gott widersetzt sich dene, wo iwerheblich sinn, awer de Demiediche schenkt er Gnad.

4:4^a Mer kann aach iwersetze: Ihr Mannsleit un ihr Weibsleit, ihr Abtrinniche oder: Ihr Mannsleit un ihr Weibsleit, ihr Treilose. Die Welt lieb se hann kommt eme geischtliche Ehebruch gleich, eme Abfall vun Gott, fer sich met eme annere Gott se verbinne.

7 Unnerwerfen eich also Gott! Dun em Deiwel widerstehn, dann macht er sich vun eich fort! 8 Kommen Gott nah, dann kommt Gott eich aach nah! Wäschen eich die Schuld vun de Hänn, ihr Sinder, un dun eier Herz reiniche, ihr Halbherziche! 9 Fiehlen eier Elend! Dun klaache un heile! Eier Lache soll sich in Draurichkät verwannele un eier Fräd in Nidergeschlahehät! 10 Machen eich vor’m Herr klän, dann macht er eich groß!

Richden nimand!

11 Ihr liewe Geschwischder! Ihr dirfe net schlecht iwernanner schwätze! Wer schlecht iwer e Bruder oder iwer e Schweschder schwätzt un se richde dut, schwätzt schlecht iwer’s Gesetz un dut’s Gesetz richde. Wann du awer es Gesetz richde duscht, duscht du’s net inhalle. Dann spielscht du dich im Gähedäl zum Richder uf. 12 Es gebt nur äner, wo’s Gesetz gebb hat. Nur der kann die Mensche redde oder verdamme. Wer bisch’enn du do, dass du iwer’me annere zu Gericht huckscht?

Machen kä leichtsinniche Plän!

13 Komme mer jetz zu eich, wo ner sahn: „Heit oder morje geh’mer in die än oder anner Stadt un bleiwe e Johr dort. Mir dreiwe Hannel un verdiene dort unser Geld!“ 14 Ihr wisse doch gar net, was morje is! Was is dann eier Läwe? Es is doch nur e Dunscht, wo mer fer e kurzi Zeit sieht un wo sich dann ufleese dut. 15 Ihr sollde liewer sahn: „Wann de Herr das will, läwe mer noch un mache das äne oder das annere.“ 16 Awer anstatt das se sahn, sinn’er stolz uf eier Plän un gewe dodemet an. So ansegewe is awer ohne Ausnahm bees! 17 Wer also wäß, wie er mache kann, was gutt is, un macht’s net, der dut sindiche!

5

DE JAKOBUS WARNT DIE REICHE: 5,1-6

Wie Gott iwer die Reiche urdält

1 Komme mer jetz zu eich, wo ner reich sinn: Heilen un kreischen wäh dem ganze Elend, wo uf eich zukommt! 2 Eier Reichdum is verrott, un die Modde hann Lächer in eier Kläder gefresst. 3 Eier Gold un Silwer hann Roscht angesetzt, un ihr Roscht dut emo als Beweismaderial diene, fer eich anseklaache. Er fresst eier Flääsch wie e Feier. Ihr hann in do dene Daache, wo die letschde sinn, e großer Reichdum gehort. 4 Vergessen net: De Lohn vun dene Leit, wo geschafft un eier Felder abgeernt hann, de Lohn, wo ner ne vorenthall hann, krääscht zum Himmel, un em Herr vun de himmlische Heere is zu Ohre komm, wie laut die, wo eier Ernt ingefahr hann, prodeschdiere! 5 Ihr hann do uf de Erd im Luxus geläbt un hann eich em Vergnieche hingebb. Wie fer dene Daach, wo geschlacht werd, hann’er eich selwer gemäscht.^a 6 Ihr hann gerechde Mensche, wo sich eich net widersetze, verurdält un umgebrung.

5:5^a Das hääscht: Ihr benemme eich wie die unverninfdiche Diere, wo net wisse, dass’e ball geschlacht werre.

DE JAKOBUS GEBT E GUDDER ROT, WEIL DE HERR WIDERKOMMT: 5,7-18

Lossen eich net entmudiche!

7 Ihr liewe Geschwischder! Gedulden eich deshalb, bis de Herr widerkommt! Denggen emo dodriwer noh: E Bauer wart dodruf, dass die Erd ihr koschtbari Frucht hervorbringt. Er hat Geduld met de Frucht, bis es im Herbscht un im Friehjohr uf se gerähnt hat. 8 Deshalb gedulden ihr eich aach, un fassen Mut!^a Es dauert nämlich nemmeh lang, bis de Herr widerkommt. 9 Ihr liewe Geschwischder! Beschwären eich net iwernanner, sunscht werre ner noch gericht! Bedenggen: De Richder steht schun vor de Dir!

5:8^a Wärtlich: un stärgen eier Herz!

10 Nemmen eich e Beispiel an dem, was die Prophede, wo im Name vum Herr geschwätzt hann, an Unrecht durchgemacht un gedullich gedrah hann, mei liewe Geschwischder! 11 Ihr wisse doch, dass mer die, wo standhaft durchhalle, glicklich nenne! Ihr hann dodevun geheert, wie standhaft de Hiob war un hann gesiehn, was de Herr am Enn fer ne gemacht hat. De Herr hat nämlich ganz vil Metläd un is barmherzich met uns.

Schweeren net!

12 Schweeren vor allem net, mei liewe Geschwischder! Machen’s net beim Himmel un net bei de Erd un aach net bei irjend ebbes annerem! Sahn änfach jo, wann’er jo männe, un nä, wann’er nä männe, sunscht verfalle ner noch em Gericht!

Bäden fer die Krangge!

13 Wann jemand vun eich Unrecht durchmache muss, soll er bäde! Is jemand glicklich, dann soll er Loblieder singe! 14 Wann jemand vun eich krank is, dann soll er die Ällschde vun de Gemän bei sich rufe. Die Ällschde solle dann iwer’m bäde un’e im Name vum Herr met Eel salwe. 15 Was se vertrauensvoll bäde, dut dann dene, wo krank is, redde, un de Herr dut ne ufrichde un vergebt em, wann er gesindicht hat. 16 Bekennen äner em annere eier Verfählunge un bäden ferenanner, dass ner gesund werre! Was jemand, wo gerecht is, bäde dut, hat nämlich e großi Macht un dut sich als wirksam erweise. 17 De Elija war e Mensch vum selwe Schlaach wie mir. Er hat ernschthaft gebät, dass es net hat solle rähne. Dodrufhin hat’s im Land drei Johr un sechs Monade lang net gerähnt. 18 Dann hat er wider gebät. Do hat’s vum Himmel erunnergerähnt, un die Erd hat ihr Frucht wider hervorgebrung.

DE JAKOBUS ERINNERT DODRAN, DASS DIE GLAIWICHE FER JEMAND, WO IN DIE IRR GEHT, VERANTWORTLICH SINN: 5,19-20

19 Ihr liewe Geschwischder! Angenumm, jemand vun eich dut vun de Wohrhät abirre, un e annerer bringt ne wider serick. 20 Dann soll der wisse: Wer e Sinder vun seim Irrwääch serickbringt, dut e Seel vum Dod redde un deckt e Haufe Sinde zu.