Westpfälzisch-südsaarländische Bibel Es lewennische Wort (ELW) – Reemer

De Paulus war e jidischer Gelehrder, wo Chrischt wor is, wie em de Jesus noh seiner Uferstehung selwer begähnt is. E ganzi Reih vun de neiteschdamentliche Briefe stamme aus em Paulus seiner Fedder. In dene Briefe beschreibt er, was es me’m chrischtliche Glawe uf sich hat. Awer aach Frohe, wo unner de Chrischde ufkomm sinn, greift er uf un gebt e Antwort uf se. Sei Brief an die Gemän in Rom hat er in de Zeit vun seiner dritt Missionsräs geschrieb. Der Brief is e Darstellung vun de Grundlaach vum chrischtliche Glawe. In der Darstellung werd alles sesammehängend un geordnet beschrieb.

De Paulus weist uf, wie sich die Mensche gäh Gott uflehne, wie se missachde, was Gott will un wie se’s deshalb verdient hädde, dass Gott vun’e abrickt. Awer Gott iwerlosst se net ihrm Schicksal. Was sich käner verdiene kann, schenkt Gott aus freie Stigger. Er nemmt uns an, weil Chrischdus die Strof an unserer Stell uf sich genumm hat. Jeder, wo sich dodruf verlosst, kann vor Gott bestehn. Das is e Sachverhalt, wo’s Läwe vu’me Chrischt vun Grund uf bestimmt.

Als jidischer Gelehrder hat de Paulus besunnerscht sei Landsleit im Au un dut ausfiehrlich ihr Verhältnis zum chrischtliche Glawe behannele. Am Schluss gebt de Paulus noch e paar Hinweise, wie Chrischde läwe solle: Weil Gott sei Kinner lieb hat, känne se sei Lieb an annere weidergewe.

1

DE PAULUS GRIESST DIE REEMER: 1,1-7

1 Das do schreibt de Paulus, wo Jesus Chrischdus dient. Gott hat mich zum Aposchdel beruf un dodezu bestimmt, fer sei guddi Nohricht bekannt se mache. 2 Er hat die gutt Nohricht schun im Voraus durch sei Prophede in de Heiliche Schrifde angekinnicht gehat. 3 Die gutt Nohricht schwätzt iwer sei Sohn Jesus Chrischdus, unser Herr.^a Der is seiner menschlich Abstammung noh e Nohkomme vum David. 4 Wie er vun de Dode uferstann is, hat ne Gott durch dene Geischt, wo heilich macht, in seiner Macht als Sohn vun Gott ingesetzt. 5 Durch Chrischdus hat uns Gott die Gnad un’s Aposchdelamt gebb, fer in seim Name Mensche aus jedem Volk dohin se fiehre, dass’e an’e glawe un uf ne heere. 6 Ihr geheere aach zu dene Mensche, wo vun Jesus Chrischdus beruf wor sinn.

1:3^a Die Worde Jesus Chrischdus, unser Herr sinn aus em Vers 4 vorgezoh, fer die komplex griechisch Satzstrukdur verständlicher se mache.

7 Ich schreiwe an all die in Rom, wo vun Gott geliebt werre un dodezu beruf wor sinn, fer heilich se sinn. Ich winsche eich Gnad un Friede vun Gott, unserm Vadder, un vum Herr Jesus Chrischdus.

DE PAULUS SAHT GOTT DANGGE UN GEBT'S THEMA VUM BRIEF AN: 1,8-17

De Paulus hat vor, fer noh Rom se komme

8 Als Eerschdes sahn ich meim Gott durch Jesus Chrischdus dangge fer eich allegar, weil in de ganz Welt dodevun geschwätzt werd, dass ner glawe. 9 Ich diene Gott met Leib un Seel dodemet, dass ich die gutt Nohricht, wo iwer sei Sohn schwätzt, verkinniche. Gott is mei Zeihe, dass ich net ufheere, fer an eich se dengge. 10 Jedes Mo, wann ich bäde, dun ich ne dodrum bidde, dass er mer’s doch endlich emo meechlich macht, fer bei eich se komme – wann er das will. 11 Ich verlange nämlich denoh, fer eich se siehn un fer eich ebbes vun dem se gewe, was mer de Heiliche Geischt geschenkt hat, dass ner dodedurch stärger werre. 12 Oder besser gesaht: Ich hätt gäre, dass mer uns bei meim Besuch gäheseidich durch dene Glawe treeschde, wo uns metenanner verbinnt – ihr mich durch eier Glawe un ich eich durch mei Glawe.

13 Ihr liewe Geschwischder! Ihr solle wisse, dass ich schun oft vorgehat hann, fer bei eich se komme. Bis jetz bin ich awer dodran gehinnert wor. So wie bei de annere Välger, hann ich aach bei eich e bissje Frucht infahre wolle. 14 Ich bin’s ne allegar schullich: de Grieche un dene, wo kä Grieche sinn, dene, wo ebbes studiert hann un dene, wo nix studiert hann. 15 Deshalb dät ich aach gäre, so vil wie a’mir leiht, eich in Rom die gutt Nohricht preddiche.

Fer was de Paulus do dene Brief geschrieb hat

16 Ich schame mich net fer die gutt Nohricht, [wo iwer Chrischdus schwätzt.] Se is nämlich die Kraft, wo Gott benutzt, fer jeder se redde, wo an se glabt, die Judde seeerscht, dann awer aach die Grieche. 17 In de gutt Nohricht weist uns Gott nämlich sei Gerechdichkät, e Gerechdichkät, wo aus em Glawe kommt un zum Glawe fiehrt. So steht’s schun geschrieb: Wer gerecht is, läbt dodedurch, dass er glabt.

DE PAULUS LEHT DAR, DASS DIE MENSCHE ALLEGAR VOR GOTT SCHULLICH SINN: 1,18-3,20

Die Välger läwe ohne Gott

18 Gott weist nämlich sei Zorn. Vum Himmel her drefft er die ganze gottlose un ungerechde Mensche, wo die Wohrhät durch ihr Ungerechdichkät knewele. 19 Was die Mensche nämlich vun Gott wisse känne, is ne bekannt. Gott hat’s ne selwer bekannt gemacht. 20 Vun do an, wo er die Welt erschaff hat, känne die Mensche sei unsichtbares Wese – sei ewichi Macht un gättlichi Nadur – met ihrm Verstand an dem, was er gemacht hat, erkenne. Deshalb hann se aach kä Entschuldichung. 21 Se hann nämlich Gott erkannt, hann’e awer net als Gott geehrt un hann em aach net dangge gesaht. Ihr Gedangge sinn im Gähedäl ins Lääre gelaf, un in ihrm Herz, wo ganz unverstännich war, is es dunggel wor. 22 Weil se behaupt hann, se hädde Weishät, sinn se Narre wor. 23 Se hann die Herrlichkät vum unvergängliche Gott gäh Bilder gedauscht, Bilder, wo vergängliche Mensche oder Vächel oder vierbäniche Diere oder Schlange darstelle.

24 Deshalb hat se Gott aach em sindiche Verlange vun ihrm Herz ausgeliwert un de Unsittlichkät iwerloss, dass’e ihr Leiwer unnernanner entehre. 25 Se hann die Wohrhät iwer Gott gäh das, was geloh is, gedauscht un hann das, was Gott erschaff hat, angebät un em gedient anstatt Gott, wo’s erschaff hat un wo fer immer gelobt werd! Amen.

26 Deshalb hat se Gott aach Leideschafde ausgeliwert, wo se entehre. Ihr Weibsleit hann nämlich de nadierliche Geschlechtsverkehr gäh de unnadierliche ingedauscht. 27 Genauso hann aach die Mannsleit de nadierliche Geschlechtsverkehr met ihre Weibsleit ufgebb un sinn vun wildem Verlange nohenanner ergriff wor. Mannsleit hann met Mannsleit Hurerei gedrieb un hann an ihrm eichene Leib dene Lohn krieht, wo ihr Verirrung verdient hott.

28 Weil se’s net fer needich gefunn hann, fer Gott anseerkenne, hat se Gott eme verwerfliche Dengge ausgeliwert, dass’e Sache mache, wo se nie hädde mache dirfe. 29 Jedi Art vun Ungerechdichkät is bei ne se finne. Se dun hure un sinn voll Schlechdichkät. Se sinn nur uf’s Geld aus un sinn beesardich. Ihr Läwe is voll Neid, un se bringe annere um. Se hann Streit metenanner un sinn hinnerlischdich. Se sinn raffiniert un traatsche. 30 Se schwätze schlecht iwer annere un hasse Gott. Se sinn brudal, un se sinn stolz un gewe an. Se erfinne Beeses un heere net uf ihr Eldere. 31 Se sinn unverstännich un halle net, was se versproch hann. Se sinn herzlos un unversehnlich un kenne kä Erbarme. 32 Dodebei wisse se ganz genau, wie Gott dodriwer urdält: Wer sich so verhalt, verdient de Dod! Trotzdem dreiwe se’s net nur selwer so. Se gewe im Gähedäl aach noch dene Beifall, wo’s genauso mache.

2

An Judde un an Mensche, wo kä Judde sinn, werd dieselwe Messlatt angeleht

1 Deshalb kannsch’e dich aach net entschuldiche – wer du aach bischt, Mensch –, wann du Gericht hallscht. Wo du nämlich e annerer demet richde duscht, verurdälsch’e dich selwer, weil de genau esselwe machscht, was du richde duscht. 2 Mir wisse awer: Gott verurdält die zu Recht, wo’s wie owe beschrieb mache, un sei Urdäl werd de Wohrhät gerecht. 3 Obwohl du bloß e Mensch bischt, dusch’e die verurdäle, wo so Sache mache. Selwer machsch’e se awer aach. Rechensch’e wirklich dodemet, dass de devunkomme kannscht, wann de vun Gott gericht werscht? 4 Gott is iwer die Moße gutt un mild un gedullich. Dusch’e das verachde? Weil er so gutt is, will er dich dohin fiehre, dass de dei Instellung ännerscht. Wääsch’e das net? 5 Awer du bleibscht hart, un dei Herz will sich net bekehre! Dodemet bringsch’e’s so weit, dass immer meh Strof beinannerkommt, bis se dich am Daach vun de Abrechnung trefft – an dem Daach, wo Gott sich als Richder weist un e gerechdes Gericht hallt. 6 Er bezahlt jedem noh dem serick, was er gemacht hat. 7 Es gebt Mensche, wo Guddes dun, ohne sich irr mache se losse, Mensche, wo noh Herrlichkät, Ehr un Unvergänglichkät suche. Dene gebt Gott es ewiche Läwe. 8 Annere awer dengge nur an sich selwer un wehre sich gäh das, was wohr is. Se losse sich zum Arwetsgescherr vum Unrecht mache. Iwer die dut Gott riguros richde. 9 Iwer jedi Menscheseel, wo beese Sache macht, dut er Drangsal un Verzweiflung ausschidde. Das gilt seeerscht fer die Judde un dann aach fer die Grieche. 10 Awer jedem, wo Guddes dut, schenkt Gott Herrlichkät, Ehr un Friede. Aach das gilt seeerscht fer die Judde un dann fer die Grieche. 11 Gott macht nämlich kä Unnerschied zwische de Mensche.

12 Die, wo sindiche un em Mose sei Gesetz gar net kenne, gehn allegar ohne em Mose sei Gesetz verlor. Awer die, wo unner’m Gesetz vum Mose sindiche, werre met seim Gesetz verurdält. 13 Vor Gott sinn nämlich net die gerecht, wo’s Gesetz heere. Gott erklärt awer die Leit fer gerecht, wo sich an’s Gesetz halle. 14 Wann die annere Välger, wo’s Gesetz net hann, vun sich aus mache, was es Gesetz verlangt, sinn se sich selwer e Gesetz, obwohl se’s Gesetz vum Mose net hann. 15 Se dun dodemet beweise, dass das, was es Gesetz fordert, in ihr Herz geschrieb is. Ihr Gewisse dut das aach bestädiche, un ihr Gedangge dun sich gäheseidich verklaache oder verdeidiche. 16 All das weist sich an dem Daach, wo Gott durch Jesus Chrischdus riche dut, was im Mensch versteggelt is. So is es noh der gutt Nohricht, wo ich preddiche.

Es gebt kä Ausnahm fer die Judde

17 Also, du nennscht dich e Judd un duscht dich uf’s Gesetz vum Mose verlosse. Du bischt stolz uf dei Beziehung zu Gott 18 un wääscht, was er will, un weil du dich im Gesetz auskennscht, kannsch’e beurdäle, uf was es ankommt. 19 Du trauscht der zu, fer die Blinde se fiehre un fer dene es Licht se bringe, wo im Dunggele läwe. 20 Weil du im Gesetz es Muschder vun de Erkenntnis un vun de Wohrhät hascht, trausch’e der aach zu, fer die Unverstänniche se erziehe un die kläne Kinner se unnerweise. 21 Du duscht also annere belehre, dich selwer awer belehrsch’e net. Du duscht preddiche, mer soll net klaue un duscht selwer klaue. 22 Du sahscht, mer soll net näwenausgehn un gehscht selwer näwenaus. Du egelscht dich vor de Gätze un duscht in ihre Tembele klaue. 23 Du gebbscht me’m Gesetz an, raubscht Gott awer die Ehr, weil du gäh’s Gesetz verstoße duscht. 24 So steht’s schun in de Heilich Schrift: Wäh eich Judde werd Gott sei Name unner de Välger geläschdert.

25 Aach die Beschneidung nutzt der nur ebbes, wann de dich an’s Gesetz hallscht. Wann de awer gäh’s Gesetz verstoße duscht, is es so, wie wann de net beschnitt wor wärscht. 26 Wann awer e Mensch, wo net beschnitt wor is, alles macht, was es Gesetz fordert, stellt ne Gott doch dem gleich, wo beschnitt is, oder net? 27 Wer an seim Leib net beschnitt wor is, awer es Gesetz erfillt, hallt emo iwer dich Gericht. Obwohl du nämlich als Judd es Gesetz hascht un beschnitt bischt, dusch’e doch gäh’s Gesetz verstoße. 28 Der is nämlich kä Judd, wo’s noh auße hin is, un das is kä Beschneidung, wo bloß auße am Leib vollzoh werd. 29 Der is awer e Judd, wo’s innewenzich is, un das is e Beschneidung, wo am Herz gemacht werd. Se kommt durch de Heiliche Geischt zustann un net dodedurch, dass mer Vorschrifde genau inhallt. So e Judd werd net vun Mensche gelobt. Er werd awer vun Gott gelobt.

3

Gott bleibt trei

1 Was for e Vordäl hann’enn jetz die Judde? Oder was hann se devun, dass’e beschnitt sinn? 2 Uf’s Ganze gesiehn arich vil! Vor allem hat Gott de Judde in die Hänn geleht, was er gesaht hat. 3 Wie steht’s dann awer dodemet, dass e paar vun’e Gott net trei ware? Hinnert ihr Treilosichkät Gott dodran, fer trei se bleiwe? 4 Uf käne Fall! Gott leiht wirklich richdich, awer jeder Mensch is e Liehner. So steht’s schun in de Heilich Schrift:

Du, Gott, duscht met dem, was du sahscht, Recht behalle,
un wa’mer iwer dich zu Gericht huckt,
drahscht du de Siech devun.

5 Wann unser Ungerechdichkät awer bestädicht, dass Gott gerecht is, was wolle mer’nn dann sahn? Ich schwätze wie e Mensch: Is Gott dann net ungerecht, wann er uns stroft? 6 Uf käne Fall! Wie kännt er’nn sunscht die Welt richde? 7 Wann nämlich durch mei Liehe Gott sei Wohrhät eerscht so richdich erauskommt un so sei Herrlichkät noch greßer werd, fer was werr ich’enn dann noch als Sinder gericht? 8 Zehlt am Enn das, wo mer demet schlecht gemacht werre un was uns e paar Leit in de Mund lehe: „Kommen, mir mache ebbes Beeses, dass ebbes Guddes debei erauskommt?“ So Leit werre zu Recht verurdält!

Die Mensche sinn vor Gott allegar schullich

9 Awer wie is’enn das jetz? Si’mir Judde besser dran wie die annere Välger? Iwerhaupt net! Mir hann nämlich grad klargestellt, dass die Judde genauso wie die Grieche allegar in de Gewalt vum Sindiche sinn. 10 So steht’s schun geschrieb:

Es gebt käner, wo gerecht is,
aach net äner änzicher!
11 Es gebt käner, wo verstännich is,
käner, wo noh Gott froht.
12 Se sinn allegar abgefall.
Net e änzicher kann Gott meh gebrauche.
Käner macht, was gutt is,
aach net äner änzicher!
(Ps 14,1-3; 53,2-4)
13 Ihr Rache gleicht eme offene Grab.
Met ihrer Zung dun se annere hinnergehn.
Hinner ihre Libbe is Schlangegift.
14 Ihr Mund is voll Fluche un Bidderkät.
15 Se sinn schnell debei, fer annere umsebringe.
16 Verwieschdung un Elend losse se uf ihre Wääche serick,
17 un dene Wääch, wo zum Friede fiehrt, kenne se net.
18 Vor Gott Reschbekt se hann, kommt ne net in de Sinn.

19 Mir wisse awer: Was em Mose sei Gesetz saht, saht’s dene Mensche, wo em Gesetz unnerworf sinn. Deshalb kann sich aach käner erausredde, un die ganz Welt steht schullich vor Gott. 20 Durch’s eichene Dun, wo vum Gesetz verlangt werd, gilt nämlich käner als gerecht vor Gott. Durch’s Gesetz kommt’s nämlich dodezu, dass mer erkennt, was sindich is.

DE PAULUS ERKLÄRT, WIE MER VOR GOTT GERECHT WERRE KANN: 3,21-5,21

Die Mensche werre durch de Glawe fer gerecht erklärt

21 Jetz hat Gott uns awer ohne es Gesetz vum Mose die Gerechdichkät, wo vun ihm kommt, gewies. Se werd vum Gesetz un vun de Prophede ihre Biecher bestädicht. 22 Es is die Gerechdichkät, wo vun Gott geschenkt werd un wo durch de Glawe an Jesus Chrischdus bei all [un uf all] die kommt, wo glawe. Es gebt nämlich kä Unnerschied zwische de Judde un de annere Välger. 23 Se hann allegar gesindicht un verfähle die Herrlichkät, wo se vor Gott hann sollde. 24 Ohne dass’e’s verdient hann, erklärt se Gott fer gerecht, weil er gnädich is. Gott macht das durch Chrischdus Jesus, wo se erleest hat. 25 Durch das Blut, wo de Jesus am Kreiz geopfert hat, hat Gott de Jesus als Zääche vun de Versehnung ingesetzt. Un durch de Glawe krieh’mer e Andäl dodran. So hat Gott de Beweis gebrung, dass er gerecht is. Lang hat er die Sinde, wo frieher bassiert sinn, ungestroft gelosst. 26 Er hat se gedullich gedrah. Awer jetz, in unserer Zeit, hat er de Beweis gebrung, dass er gerecht is. Jo, er is wirklich gerecht un erklärt die fer gerecht, wo an de Jesus glawe.

27 Ka’mer do jetz noch dickdun? Ausgeschloss! Un durch was for e Gesetz is es ausgeschloss? Durch das Gesetz, wo eichenes Dun fordert? Nä, es is ausgeschloss durch das Gesetz, wo zum Glawe uffordert. 28 Mir komme also zu’me Schluss: Gott erklärt e Mensch fer gerecht, weil er glabt, un net, weil er macht, was em Mose sei Gesetz verlangt. 29 Oder is Gott nur de Judde ihr Gott? Is er net aach de annere Välger ihr Gott? Ei jo, er is aach de annere Välger ihr Gott! 30 Es is nämlich än un deselwe Gott, wo die Judde fer gerecht erklärt, wann se glawe, un wo die Mensche aus de annere Välger fer gerecht erklärt, wann se glawe. 31 Setze mer jetz em Mose sei Gesetz durch de Glawe außer Kraft? Uf käne Fall! Mir dun’s im Gähedäl bestädiche!

4

Em Abraham sei Beispiel

1 Misse mer jetz net frohe: Was hat’enn de Abraham, unser leiblicher Stammvadder, erreicht? 2 Wann Gott de Abraham durch das, was er gemacht hat, fer gerecht erklärt hat, hat de Abraham ebbes fer ansegewe – awer net bei Gott. 3 Was saht nämlich die Heilich Schrift? Se saht: De Abraham hat Gott geglabt, un das hat em Gott als Gerechdichkät angerechent. 4 Wer schaffe geht, dem werd de Lohn net als ebbes Unverdiendes angerechent. Er werd em im Gähedäl als ebbes angerechent, wo er e Anspruch druf hat. 5 Wer kä Leischdunge vorseweise hat, awer an Gott glabt, wo die Gottlose fer gerecht erklärt, dem werd sei Glawe als Gerechdichkät angerechent. 6 Genauso nennt aach de David dene Mensch glicklich, wo vun Gott unabhängich vun seine Leischdunge fer gerecht erklärt werd. Er saht:

7 Glicklich sinn die se nenne,
wo ihr Verfählunge vergebb
un ihr Sinde zugedeckt krieht hann!
8 Glicklich is der Mann se nenne,
wo sei Sinde vum Herr net angerechent krieht.

9 Werre do nur die Mensche, wo beschnitt sinn, glicklich genennt, oder gilt das aach fer die, wo net beschnitt sinn? Mir hann jo schun gesaht, dass Gott em Abraham de Glawe als Gerechdichkät angerechent hat. 10 Awer wann hat er em Abraham de Glawe angerechent? Wie de Abraham beschnitt war oder wie er noch net beschnitt war? Es war net, wie er schun beschnitt war. Es war im Gähedäl, wie er noch net beschnitt war. 11 Dass er dann beschnitt wor is, war e aißeres Zääche. Dodedurch is besiechelt wor, dass ne Gott schun uf Grund vun seim Glawe fer gerecht erklärt hott, wie er noch net beschnitt war. Er hat nämlich de Stammvadder vun all dene Mensche werre solle, wo glawe, aach wann se net beschnitt sinn. Un deshalb rechent Gott aach dene Mensche ihr Glawe als Gerechdichkät an. 12 De Abraham bleibt nadierlich aach de Vadder vun dene, wo beschnitt wor sinn. Awer net nur deshalb, weil se beschnitt sinn, nä, aach deshalb, weil se in de Fußspure vun dem Glawe unnerwäächs sinn, wo de Abraham, unser Stammvadder, schun hott, wie er noch net beschnitt war.

Es kommt uf de Glawe an

13 Die Zusaach, fer emo die Welt se erwe, hat Gott em Abraham oder seine Nohkomme net wäh’m Gesetz vum Mose gebb. Er hat se ne im Gähedäl wäh der Gerechdichkät gebb, wo aus em Glawe kommt. 14 De Glawe is nämlich iwerflissich, wann die, wo sich uf’s Gesetz verlosse, Erwe sinn. Dann is aach das, was Gott versproch hat, hinfällich. 15 Es Gesetz bewirkt nämlich, dass Gott Gericht hallt. Awer dort, wo’s kä Gesetz gebt, werd aach käns gebroch.

16 Deshalb is das, was Gott zugesaht hat, aach an de Glawe gebunn. Es soll in Erfillung gehn, weil Gott gnädich is. Nur so bleibt das, was er versproch hat, fer die gesamde Nohkomme gildich. Net nur fer die, wo sich uf’s Gesetz verlosse, nä, aach fer die, wo so glawe, wie de Abraham geglabt hat. De Abraham is de Vadder vun uns allegar. 17 So steht’s schun in de Heilich Schrift: Ich hann dich zum Vadder vu’me Haufe Välger gemacht. In de Aue vun Gott, wo er dran geglabt hat, is de Abraham das aach – in de Aue vun dem Gott, wo die Dode lewennich macht un ins Läwe ruft, was noch net do is, wie wann’s schun do wär.

18 Wo nix meh se hoffe war, hat de Abraham voller Hoffnung geglabt, dass er de Vadder vu’me Haufe Välger werre dät, so wie’s em Gott versproch hott: So zahlreich sinn emo dei Nohkomme. 19 Er is im Glawe net schwach wor un hat net uf sei eichener Leib geguckt, wo schun verbraucht war, weil er schun fascht 100 Johr alt war. Er hat aach net uf em Sara sei Leib geguckt. Das hat eichentlich kä Kinner meh kriehn känne. 20 Un was Gott versproch hott, hat er net unglaiwich in Froh gestellt. Er is im Gähedäl stark wor, weil er geglabt hat, un hat Gott die Ehr gebb. 21 Er war fescht devun iwerzeicht: Gott hat die Macht, fer das, was er zugesaht hat, aach se mache. 22 Deshalb hat em Gott aach de Glawe als Gerechdichkät angerechent.

23–24 Dass Gott em Abraham de Glawe angerechent hat, steht awer aach wäh uns in de Heilich Schrift un net nur wäh ihm. Aach uns soll de Glawe angerechent werre, uns, wo mer an dene Gott glawe, wo unser Herr Jesus vun de Dode uferstehn gelosst hat. 25 Gott hat de Jesus nämlich wäh unsere Verfählunge in de Dod gebb, un er hat ne uferstehn gelosst, dass mir als gerecht gille känne.

5

Die Frucht dodevun, dass mer durch de Glawe gerecht wor sinn

1 Weil uns Gott also fer gerecht erklärt hat, weil mer glawe, ha’mer Friede met Gott durch unser Herr Jesus Chrischdus. 2 Durch Chrischdus ha’mer aach e freier Zugang zu der Gnad krieht, wo jetz unser Grundlaach is. Un im Glawe nemme mer das in Anspruch. Mir sinn stolz, weil mer die fescht Hoffnung hann, dass uns Gott an seiner Herrlichkät dälnemme losst. 3 Awer net nur das! Mir sinn aach stolz, wa’mer drangsaliert werre, weil mer wisse: Drangsaliert se werre macht gedullich. 4 Die Geduld awer bringt äm bei, fer sich se bewähre, un die Bewährung bringt äm bei, fer se hoffe. 5 Die Hoffnung schlussendlich dut uns net enttaische. Gott hat sei Lieb nämlich in unser Herz komme gelosst. Durch de Heiliche Geischt, wo er uns gebb hat, hat er das gemacht.

6 Zu der Zeit, wo vun Gott feschtgesetzt wor is, un wie mer noch schwach ware, is Chrischdus fer gottlose Mensche gestorb. 7 Jetz sterbt awer kaum jemand fer e Gerechder. Fer äner, wo Guddes dut, getraut sich villeicht jemand se sterwe. 8 Dass Gott uns lieb hat, beweist er awer dodedurch, dass Chrischdus fer uns gestorb is, wie mer noch Sinder ware. 9 Un weil mer jetz durch Chrischdus sei Blut fer gerecht erklärt sinn, werre mer durch Chrischdus eerscht recht vor’m Strofgericht gerett! 10 Wie mer Gott noch als Feinde gähiwer gestann hann, hat er uns durch de Dod vun seim Sohn met sich selwer versehnt. Un jetz, wo mer versehnt sinn, werre mer eerscht recht dodedurch gerett, dass sei Sohn läbt. 11 Awer net nur das! Mir sinn aach stolz uf Gott durch unser Herr Jesus Chrischdus. Durch Chrischdus si’mer jetz schun met Gott versehnt.

De Adam un de Jesus

12 Deshalb: Durch äner änzicher Mensch is in die Welt komm, was sindich is, un das, was sindich is, hat de Dod met sich gebrung. So sinn die Mensche allegar em Dod verfall. Se hann nämlich allegar gesindicht. 13 Was sindich is, war zwar schun in de Welt, eeb’s em Mose sei Gesetz gebb hat. Es werd awer dort, wo’s kä Gesetz gebt, net angerechent. 14 Un trotzdem hat de Dod vum Adam bis zum Mose aach iwer die geherrscht, wo net met deselwe Verfählung wie de Adam gesindicht hodde. De Adam is es Gähebild zu dem, wo hat solle komme.

15 Awer die Begnadichung is net änfach es Gähestick zu de Verfählung. Wann nämlich e Haufe Mensche gestorb sinn, weil sich äner änzicher Mensch verfählt hat, werd das durch Gott sei Gnad meh wie ufgewoh – so reich sinn e Haufe Mensche beschenkt wor, weil äner änzicher, Jesus Chrischdus, gnädich war. 16 Was Gott schenkt un was der äne, wo gesindicht hat, verursacht hat, ka’mer iwerhaupt net metenanner vergleiche. Dass Gott Gericht gehall hat, is nämlich die Antwort uf e änzichi Verfählung un hat dodezu gefiehrt, dass die Mensche allegar verurdält werre. Awer Gott sei Gnad fiehrt se dohin, dass’e aus erer Unzahl vun Verfählunge fer gerecht erklärt werre. 17 Wann nämlich de Dod durch dene äne die Herrschaft iwernumm hat, weil sich der äne Mensch verfählt hat, läwe un herrsche eerscht recht emo die, wo die Gnad un’s Geschenk vun de Gerechdichkät in so reichem Moß krieht hann. Se herrsche emo durch dene äne: Jesus Chrischdus!

18 Also: Wie’s durch die Verfählung vu’me änziche Mensch dezu komm is, dass die Mensche allegar verurdält werre, so kommt’s aach durch die Gerechdichkät vu’me änziche Mensch dezu, dass die Mensche allegar fer gerecht erklärt werre un läwe känne. 19 Genauso wie aus eme Haufe Mensche Sinder gemacht wor sinn, weil äner änzicher Mensch net gespurt hat, werre aach aus eme Haufe Mensche Gerechde gemacht, weil äner änzicher Mensch gespurt hat. 20 Em Mose sei Gesetz is nohdrächlich debeikomm, dass es Moß vun dem, was sindich is, voll werre dät. Awer dort, wo’s Moß vun dem, was sindich is, voll wor is, hat sich die Gnad in ihrer ganz Greß gewies. 21 So wie nämlich das, was sindich is, geherrscht un de Dod gebrung hat, so soll aach die Gnad durch das, was gerecht is, herrsche, fer durch Jesus Chrischdus, unser Herr, es ewiche Läwe se bringe.

6

DE PAULUS BESCHREIBT'S LÄWE VU'ME MENSCH, WO VUN GOTT FER GERECHT ERKLÄRT WOR IS: 6,1-8,39

E neies Läwe durch Chrischdus

1 Was wolle mer’nn jetz sahn? Solle mer an dem, was sindich is, feschthalle, dass sich die Gnad in vollem Moß auswirkt? 2 Uf käne Fall! Mir sinn fer das, was sindich is, gestorb. Wie känne mer do noch weider dodrinn läwe? 3 Oder wisse ner net, dass mir allegar, wo mer uf Chrischdus Jesus gedaft sinn, uf sei Dod gedaft wor sinn?^a 4 Durch die Daf si’mer also met Chrischdus in de Dod eningedaft wor, un so wie Chrischdus durch die herrlich Macht vum Vadder vun de Dode uferstann is, so solle aach mir als neie Mensche läwe. 5 Wa’mer nämlich met Chrischdus äns gemacht un in seim Dod so wie er wor sinn, si’mer aach emo in de Uferstehung so wie er. 6 Mir wisse jo, dass der alde Mensch, wo mer frieher emo ware, met Chrischdus gekreizicht wor is. Unser Leib, wo sindiche will, hat so unwirksam gemacht werre solle, dass mer dem, was sindich is, nemmeh diene. 7 Wer nämlich gestorb is, is vun dem, was sindich is, befreit wor. 8 Wa’mer met Chrischdus gestorb sinn, glawe mer, dass mer aach emo met em läwe. 9 Mir wisse jo, dass Chrischdus, wo vun de Dode uferstann is, nemmeh sterbt. De Dod kann nemmeh iwer ne herrsche. 10 Dodedurch, dass er gestorb is, is er nämlich fer das, was sindich is, än fer allemo dot. Awer das Läwe, wo er jetz läbt, läbt er fer Gott. 11 Genauso solle aach ihr vun eich dengge: Fer das, was sindich is, sinn’er dot, awer fer Gott dun’er läwe, weil ner Chrischdus Jesus, [unserm Herr,] geheere.

6:3^a Das hääscht durch die Daf, wo de Heiliche Geischt bewirkt un wo e glaiwicher Mensch in Chrischdus beziehungsweis in sei Leib eninversetzt (vgl. 1Kor 12,13). Die Wasserdaf weist als Zääche uf do die geischtlich Wirklichkät hin.

12 Lossen also das, was sindich is, in eierm sterbliche Leib nemmeh herrsche. Ihr solle nemmeh uf das herre, wo eier Leib Luscht druf hat. 13 Stellen die Glieder vun eierm Leib net in de Dienscht vun dem, was sindich is – se solle kä Werkzeiche vum Unrecht sinn. Stellen eich im Gähedäl Gott als Leit zur Verfiechung, wo vun de Dode lewennich wor sinn. Stellen aach die Glieder vun eierm Leib in Gott sei Dienscht – se solle Werkzeiche vun seiner Gerechdichkät sinn. 14 Was sindich is, soll net iwer eich herrsche. Ihr läwe nämlich unner de Gnad un net unner’m Gesetz vum Mose.

Mer kann nur äm diene: dem, was sindich is, oder dem, was gerecht is

15 Was soll’enn das jetz hääsche? Dirfe mer sindiche, weil mer unner de Gnad läwe un net unner’m Gesetz vum Mose? Uf käne Fall! 16 Wisse ner dann net: Wem ner eich als Sklave unnerstelle, fer uf ne se heere, dem sei Sklave sinn’er un misse uf ne heere? Dodebei geht’s entweder um das, was sindich is – was zum Dod fiehrt – oder dodrum, dass ner uf Gott heere – was zu’me gerechde Läwe fiehrt. 17 Ihr ware emo Sklave vun dem, was sindich is. Awer Gott sei Dank! Jetz hann’er vun ganzem Herz uf die Gestalt vun der Lehr geheert, wo eich iwergebb wor is. 18 Gott hat eich vun dem, was sindich is, frei gemacht, un ihr hann eich in de Dienscht vun de Gerechdichkät stelle gelosst.

19 Ich gebrauche e menschlicher Vergleich, weil ner sunscht Schwierichkäde hann fer se verstehn.^a Frieher hann’er die Glieder vun eierm Leib de Unsittlichkät un de Ungerechdichkät als Sklave zur Verfiechung gestellt gehat, fer Unrecht se dun. Jetz awer solle ner se de Gerechdichkät als Sklave zur Verfiechung stelle, fer e heiliches Läwe se fiehre. 20 Wie ner nämlich Sklave vun dem, was sindich is, ware, ware ner de Gerechdichkät gähiwer frei. 21 Awer was for e Frucht hann’er dann zu der Zeit gehat? Lauder Sache, wo ner eich jetz driwer schame. Ihr Enn is nämlich de Dod. 22 Jetz, wo ner vun dem, was sindich is, frei gemacht un Gott sei Knechde wor sinn, hann’er eier Frucht, wo dohin fiehrt, dass ner e heiliches Läwe fiehre un wo als Enn es ewiche Läwe bringt. 23 De Lohn vun dem, was sindich is, is nämlich de Dod, awer was Gott schenkt, is es ewiche Läwe, weil mer Chrischdus Jesus, unserm Herr, geheere.

6:19^a Wärtlich: wäh de Schwachhät vun eierm Flääsch.

7

Chrischde sinn nemmeh an’s Gesetz vum Mose gebunn

1 Ihr liewe Geschwischder! Wisse ner dann net – ich schwätze jo met Leit, wo em Mose sei Gesetz kenne –, dass es Gesetz nur solang iwer e Mensch herrscht, wie der läbt? 2 Zum Beispiel is e Fra, wo verheirat is, durch’s Gesetz an ihr Mann gebunn, solang wie der läbt. Wann der Mann awer sterbt, is se frei vun dem Gesetz, wo se an ihr Mann gebunn hat. 3 Wann se jetz eme annere sei Fra werd, solang wie ihr Mann läbt, werd se e Ehebrecherin genennt. Wann ihr Mann awer sterbt, is se frei vun dem Gesetz, wo se an ihr Mann binnt. Se werd dann net zur Ehebrecherin, wann se die Fra vu’me annere Mann werd.

4 Also sinn aach ihr, mei liewe Geschwischder, durch Chrischdus sei Leib fer’s Gesetz gestorb, so dass ner eme annere geheere, nämlich dem, wo vun de Dode uferstann is. Dem geheere mer, fer Gott Frucht bringe se känne. 5 Wie mer nämlich noch vun unserer sindich Nadur bestimmt ware, hann sich die sindiche Leideschafde, wo vum Mose seim Gesetz hervorgeruf wor sinn, so in unserm Leib ausgewirkt, dass mer em Dod Frucht gebrung hann. 6 Awer jetz si’mer vum Gesetz freikomm. Mir sinn dot fer’s Gesetz, wo uns gefang gehall hott, so dass mer Gott i’me neie Läwe, wo vun seim Geischt geschafft werd, diene känne – un nemmeh uf die alt Art noh’m Buschdawe vum Gesetz.

Es Gesetz vum Mose werd vun dem, was sindich is, missbraucht

7 Was wolle mer also sahn? Is em Mose sei Gesetz sindich? Uf käne Fall! Ohne es Gesetz vum Mose hätt ich awer net erkannt, was sindich is. Ich hätt zum Beispiel net begriff, was Begehrlichkät is, wann’s Gesetz net gesaht hätt: Du sollscht net begehre. 8 Was sindich is, hat durch das, was es Gesetz vorschreibt, die Gelähehät genutzt un hat i’mir all Sorde vun Begehrlichkät bewirkt. Ohne es Gesetz is das, was sindich is, nämlich dot. 9 Frieher, wie’s Gesetz noch net do war, hann ich geläbt. Wie dann awer komm is, was es Gesetz vorschreibt, is das, was sindich is, lewennich wor. 10 Ich awer bin gestorb, un ich hann feschtstelle misse, dass mer die Vorschrift, wo mer’s Läwe hat solle erhalle, de Dod gebrung hat. 11 Was sindich is, hat nämlich durch das, was es Gesetz vorschreibt, die Gelähehät genutzt. Es hat mich hinnergang un hat mich durch die Vorschrift umgebrung. 12 Em Mose sei Gesetz is also heilich, un aach das, was es vorschreibt, is heilich, gerecht un gutt!

13 Hat jetz ebbes, was gutt is, mei Dod verursacht? Uf käne Fall! Schuld dodran war das, was sindich is. Es hat mei Dod verursacht un hat dodezu ebbes Guddes benutzt. Dodedurch hat’s sei wohres Gesicht gewies. Durch die Vorschrift hat sich nämlich das, was sindich is, in seim ganze Ausmoß als sindich erweise solle.

De gudde Wille dem gähiwer, was sindich is, is machtlos

14 Mir wisse, dass es Gesetz vum Mose vum Heiliche Geischt bestimmt is. Ich bin awer meiner sindich Nadur ausgeliwert un an das verkaf, was sindich is. 15 Ich wäß net, was ich mache. Ich mache nämlich das, was ich hasse, un net das, was ich will. 16 Wann ich awer das mache, was ich net will, gew’ich zu, dass es Gesetz gutt is. 17 Jetz is es awer das, was sindich is un i’mir wohnt, wo macht, was ich hasse, un nemmeh ich.

18 Ich wäß, dass i’mir, das hääscht, i’meiner sindich Nadur, nix Guddes wohnt. Es fählt mer zwar net am Wolle, awer ich bringe’s net ferdich, fer se mache, was gutt is. 19 Das Beese nämlich, wo ich net will, mach ich, un das Gudde, wo ich will, mach ich net. 20 Wann ich awer das mache, was ich net will, is es das, was sindich is un i’mir wohnt, wo’s macht un nemmeh ich. 21 Ich stelle also do die Gesetzmäßichkät bei mir fescht: Obwohl ich mache will, was gutt is, bring ich nur Beeses zustann. 22 Em innere Mensch noh stimm ich Gott seim Gesetz zu un freie mich iwer’s. 23 Ich siehn awer e anneres Gesetz in de Glieder vu’meim Leib, wo gäh das Gesetz, wo die Zustimmung vu’meim Verstand hat, kämpft. Un genau das Gesetz nemmt mich unner das Gesetz gefang, wo i’meine Glieder steckt un dohin fiehrt, dass mer sindicht. 24 Ich elender Mensch! Wer dut mich vun do dem Leib, wo em Dod verfall is, erleese? 25 Ich sahn Gott dangge, dass er mich durch Jesus Chrischdus, unser Herr, erleest!

Jetz dien ich also me’m Verstand Gott seim Gesetz, awer met meiner sindich Nadur dem Gesetz, wo dohin fiehrt, dass mer sindicht.

8

Es Läwe in de Kraft vum Heiliche Geischt

1 Es gebt jetz also kä Verurdälung meh fer Mensche, wo Chrischdus Jesus geheere [un wo ihr Läwe vum Heiliche Geischt bestimme losse un net vun ihrer sindich Nadur]. 2 Das bewirkt das Gesetz, wo vum Heiliche Geischt bestimmt is un wo durch Chrischdus Jesus es Läwe schenkt. Es hat mich frei gemacht vun dem Gesetz, wo nur das, was sindich is, un de Dod bringt.

3 Was em Mose seim Gesetz nämlich net meechlich war, weil’s durch unser sindich Nadur geschwächt wor is, das hat Gott gemacht: Er hat sei eichener Sohn in de Gestalt vu’me sindiche Mensch geschickt. Der hat als Opfer fer unser Sinde diene solle. So hat Gott das, was sindich is, dort verurdält, wo’s sich auswirge dut: in de menschlich Nadur. 4 So hat die Gerechdichkät, wo vum Gesetz gefordert werd, in uns verwirklicht werre solle, in uns, wo mer unser Läwe vum Heiliche Geischt bestimme losse un net vun unserer sindich Nadur. 5 Die Mensche, wo sich vun ihrer sindich Nadur bestimme losse, sinn nämlich uf das ausgericht, was ihr sindich Nadur will. Wer sich awer vum Heiliche Geischt bestimme losst, is uf das ausgericht, was de Heiliche Geischt will. 6 Was unser sindich Nadur will, bringt de Dod. Was awer de Heiliche Geischt will, bringt Läwe un Friede. 7 Uf was unser sindich Nadur ausgericht is, steht Gott feindlich gähiwer. Es unnerwerft sich net Gott seim Gesetz. Es kann’s aach gar net. 8 Deshalb känne die, wo sich vun ihrer sindich Nadur bestimme losse, Gott net gefalle.

9 Ihr losse eich awer vum Heiliche Geischt bestimme un net vun eierer sindich Nadur, weil Gott sei Geischt jo in eich wohnt. Wer awer Chrischdus sei Geischt net hat, geheert net zu Chrischdus. 10 Wann Chrischdus in eich läbt, is eier Leib zwar em Dod verfall, weil ner sindiche, awer eier Geischt is lewennich, weil eich Gott als gerecht angenumm hat. 11 Wann also de Geischt vun dem, wo de Jesus vun de Dode uferstehn gelosst hat, in eich wohnt, macht derselwe, wo Chrischdus vun de Dode uferstehn gelosst hat, aach eier sterbliche Leiwer lewennich. Er macht das durch sei Geischt, wo in eich wohnt.

12 Mir sinn also unserer sindich Nadur nix schullich, ihr liewe Geschwischder, dass mer uns vun ihr bestimme losse missde. 13 Wann’er nämlich noh eierer sindich Nadur läwe, misse ner sterwe. Wann’er awer durch de Heiliche Geischt de Untade vum Leib de Dodesstoß versetze, läwe ner. 14 Die Mensche, wo sich vun Gott seim Geischt fiehre losse, sinn allegar Gott sei Kinner. 15 Der Geischt, wo ner krieht hann, macht eich nämlich net zu Sklave, dass ner wider Angscht hann missde. Ihr hann im Gähedäl dene Geischt krieht, wo eich zu Kinner macht un wo mer dedurch rufe: „Abba, Vadder!“ 16 De Heiliche Geischt selwer dut sesamme met unserm Geischt bestädiche, dass mer Gott sei Kinner sinn. 17 Wa’mer awer Kinner sinn, si’mer aach Erwe. Mir erwe ebbes vun Gott – genauso wie Chrischdus, un sesamme met Chrischdus. Wa’mer wirklich Schweres met Chrischdus durchmache, solle mer aach sei Herrlichkät met em däle.

Hoffnung un Gewisshät

18 Ich bin dodevun iwerzeicht: Es Läd vun do der Zeit is es net wert, fer met der Herrlichkät verglich se werre, wo an uns offebart werre soll. 19 Alles, was Gott erschaff hat, wart nämlich gespannt un voll Verlange dodruf, dass Gott offebart, wer sei Kinner sinn. 20 Was er erschaff hat, is nämlich de Vergänglichkät unnerworf, awer net freiwillich. Es is im Gähedäl wäh dem^a unnerworf wor, wo’s unnerworf hat. Dodemet verbunn is awer e Hoffnung: 21 Gott macht emo alles, was er erschaff hat, vun de Sklaverei vun de Vergänglichkät frei un losst’s an de Freihät un Herrlichkät vun seine Kinner dälhann. 22 Mir wisse nämlich, dass alles, was Gott erschaff hat, bis uf de heidiche Daach stehnt un in Wehe leiht wie e Fra, wo grad ihr Kind krieht. 23 Awer net nur das: Aach mir selwer, wo mer schun als eerschder Däl vun dem, was Gott schenkt, de Heiliche Geischt hann, aach mir stehne innerlich un warde uf die voll Verwerklichung vun dem, was uns Gott als seine Kinner zugedenkt hat: dass unser Leib erleest werd. 24 Met der Hoffnung hat uns Gott nämlich gerett. Wa’mer awer uf ebbes hoffe, was mer schun siehn, dann is das gar kä Hoffnung meh. Wer hofft schun uf das, was er siehn kann? 25 Wa’mer awer uf das hoffe, was mer noch net siehn, dann warde mer met Geduld dodruf.

8:20^a Gemännt is wahrscheinlich Gott. Manche Ausleher sinn der Uffassung, dass de Deiwel dodemet gemännt is. Noch annere dengge an de Adam.

26 Genauso helft uns aach de Heiliche Geischt, weil mer schwach sinn. Mir wisse nämlich net, wie mer richdich bäde solle. De Heiliche Geischt selwer dut awer met eme Stehne, wo mer net in Worde fasse kann, fer uns inträde. 27 Un Gott, wo unser Herz erforscht, wäß, was de Heiliche Geischt im Sinn hat. De Heiliche Geischt dut nämlich fer die Mensche, wo heilich sinn, so inträde, wie’s Gott will.

28 Mir wisse: Bei dene, wo Gott lieb hann, draht alles zum Beschde bei, bei dene, wo Gott noh seim Plan beruf hat. 29 Die nämlich, wo er im Voraus ausersiehn hat, hat er aach im Voraus dodezu bestimmt, fer am Wese un an de Gestalt vun seim Sohn dälsehann. Sei Sohn soll nämlich de Eerschtgeborene unner’me Haufe Geschwischder sinn. 30 Die Leit awer, wo Gott vorherbestimmt hat, hat er aach beruf, un die, wo er beruf hat, hat er aach fer gerecht erklärt. Die awer, wo er fer gerecht erklärt hat, hat er aach verherrlicht.

Nix kann uns dodevun trenne, dass Gott uns lieb hat

31 Was wolle mer jetz zu all dem sahn? Wann Gott uf unserer Seit steht, wer kann dann gäh uns sinn? 32 Gott hat sogar sei eichener Sohn net verschont. Er hat ne im Gähedäl fer uns allegar hergebb. Wie sollt er uns do net alles met em schengge? 33 Wer kann die Mensche, wo vun Gott ausgewählt wor sinn, anklaache? Gott selwer erklärt se doch fer gerecht! 34 Wer kann se verurdäle? Chrischdus, wo gestorb is – meh noch: wo aach uferstann is – huckt doch rechts vun Gott un setzt sich fer uns in! 35 Wer kann uns dodevun trenne, dass mer vun Chrischdus geliebt werre? Kann’s bassiere, wa’mer drangsaliert werre oder Angscht hann? Wa’mer verfolcht werre oder nix se esse hann? Wa’mer nix ansedun hann? Wa’mer in Läwensgefahr sinn oder hingericht werre? 36 Es geht uns wirklich so, wie’s in de Heilich Schrift steht:

Wäh dir, Herr, si’mer de ganze Daach vum Dod bedroht.
Mir werre wie Schäf behannelt,
wo mer dodezu bestimmt hat,
fer geschlacht se werre.

37 In dem allem drah’mer awer e iwerwäldichender Siech durch Chrischdus, wo uns geliebt hat, devun. 38 Ich bin nämlich dodevun iwerzeicht: Ob mer sterwe oder läwe, ob Engel oder Dämone, ob irjendwelle Gewalde, ob Sache, wo jetz bassiere oder Sache, wo noch komme, 39 ob die Welt iwer uns oder die Welt unner uns oder irjend ebbes anneres, was Gott erschaff hat – nix kann uns dodevun trenne, dass uns Gott durch Chrischdus Jesus, unser Herr, lieb hat.

9

DE PAULUS WEIST DODRUF HIN, DASS ISRAEL AACH NOCH GERETT WERD: 9,1-11,36

De Paulus is draurich, weil’s Volk Israel sei Messias ablehnt

1 Ich sahn die Wohrhät, weil ich Chrischdus geheere – ich liehe net! U’mei Gewisse, wo vum Heiliche Geischt gesteiert werd, dut mer bestädiche: 2 Ich bin dief draurich, un de Schmerz i’meim Herz heert net uf, 3 wann ich a’mei Geschwischder dengge, an die Mensche aus meim eichene Volk. Wann das meechlich wär, dät ich’s uf mich nemme, fer selwer an ihrer Stell verflucht un vun Chrischdus getrennt se sinn. 4 Se sinn Israelide, un Gott hat se als sei Kinner angenumm un hat ne sei Herrlichkät gewies. Er hat sei Abkomme met ne abgeschloss un hat ne es Gesetz, die Ordnunge vum Goddesdienscht un sei Zusaache gebb. 5 Se sinn de Patriarche ihr Nohkomme,^a un aus ihrer Midde is Chrischdus seiner menschlich Herkunft noh hervorgang. Chrischdus steht iwer allem un is fer immer de hoochgelobde Gott! Amen.

9:5^a Em Abraham, em Isaak un em Jakob ehr Nohkomme.

Gott dut sei Wahl treffe

6 Es is jetz net so, dass das, was Gott gesaht hat, hinfällich is. Awer es geheere halt net all die, wo aus Israel stamme, aach wirklich zu Israel. 7 Se sinn aach net allegar deshalb schun em Abraham sei Kinner, weil se sei Nohkomme sinn. Gott hat im Gähedäl zum Abraham gesaht: „Nur em Isaak sei Nohkomme hääsche emo dei Nohkomme.“ 8 Das dut bedeide: Net die leiblich Abstammung macht Mensche zu Gott seine Kinner. Zum Abraham seiner wirklich Nohkommeschaft werre im Gähedäl nur die gerechent, wo ufgrund vun dem, was Gott em Abraham versproch hott, vun ihm abstamme. 9 Was Gott versproch hott, is das do: „Es nägscht Johr um do die Zeit komm ich wider. Dann hat’s Sara e Bub.“

10 So war’s awer aach bei’m Rebegga un net nur beim Sara. Em Rebegga sei Kinner hann än un deselwe Vadder gehat: de Isaak, unser Vorfahr. 11–12 Die Kinner ware noch net uf de Welt un hann noch nix Guddes oder Beeses gedun gehat. Do hat Gott zum Rebegga gesaht: „Der, wo älder is, dut emo dem, wo jinger is, diene.“ Dodemet hat Gott klargestellt, dass es allän vun seim freie Entschluss abhängt, wann er e Mensch auswählt. Es kommt dodebei nur dodruf an, dass Gott beruft, un net uf menschliche Leischdunge. 13 So steht’s schun in de Heilich Schrift: „De Jakob hann ich lieb gehat, awer de Esau hann ich verschmäht.“

Gott schenkt sei Erbarme, wem er will

14 Was wolle mer’nn jetz sahn? Is Gott ungerecht? Uf käne Fall! 15 Er saht nämlich zum Mose: „Ich schengge dem mei Erbarme, wo ich Erbarme demet hann, un weise dem mei Metläd, wo ich Metläd demet hann.“ 16 Es kommt also dodruf an, dass Gott barmherzich is, un net, dass e Mensch willich is un sich bemieht. 17 Die Heilich Schrift saht nämlich zum Pharao: „Ich hann dich nur deshalb als Keenich ingesetzt, fer mei Macht an der se demonschtriere, un fer mei Name uf de ganz Welt bekannt se mache.“ 18 Gott schenkt also sei Erbarme, wem er will, un er verstockt, wene er will.

19 Jetz frohscht du mich villeicht: „Fer was dut uns Gott dann noch beschulliche? Wer kann sich’enn schun dem, was Gott will, widersetze?“ 20 Mensch, wer bischt du eichentlich, dass du Gott kridisiere willscht? Froht aach e Stick Gescherr dene, wo’s geformt hat: „Fer was hasch’enn du mich so gemacht?“ 21 Hat e Hawemacher net es Recht, fer aus deselwe Mass zwä verschiedene Stigger Gescherr se mache: äns fer e ehrevoller Zweck un äns fer e wenicher ehrevoller Zweck? 22 Un was sahscht du dodezu, dass Gott hat wolle weise, dass er bees is un dass er sei Macht hat wolle bekannt mache? Trotzdem hat er die^a met großer Geduld gedrah, wo’s verdient hodde, dass er bees is un wo fer’s Verderwe bestimmt ware. 23 So dut’s Gott mache, dass er an dene Stigger Gescherr, wo er Erbarme demet hat, bekannt mache kann, wie reich sei Herrlichkät is – an dene, wo er im Voraus fer die Herrlichkät bestimmt hat. 24 Un das si’mir, wo er beruf hat – aach vun de annere Välger un net nur vun de Judde. 25 So saht er aach durch de Hosea:

9:22^a Wärtlich: die Stigger Gescherr.

„Was net mei Volk war, nenn ich ‚mei Volk‘,
un die Fra, wo ich net lieb hott, nenn ich ‚mei Liewes‘.
26 Grad dort, wo se gesaht krieht hann: ‚Ihr sinn net mei Volk!‘,
werre se emo ‚em lewenniche Gott sei Kinner genennt.’“

27 De Jesaja ruft iwer Israel aus: „Un wann die Zahl vun de Israelide wie de Sand am Meer wär – es werd nur e kläner Rescht gerett. 28 De Herr fiehrt nämlich emo e abschließendi un schnelli Abrechnung in Gerechdichkät durch, jo, e summarischi Abrechnung iwer die Erd.“ 29 Es is so, wie’s de Jesaja im Voraus gesaht hat: „Wann uns de Herr vun de himmlische Heere kä Nohkomme iwerich gelosst hätt, wäre mer wie Sodom wor un hädde Gomorra geglich.“

Israel hat’s Ziel verfählt

30 Was wolle mer’nn jetz sahn? Es is doch so: Mensche aus de annere Välger sinn vun Gott fer gerecht erklärt wor, ohne dass’e sich dodrum bemieht hann. Se hann die Gerechdichkät krieht, wo aus em Glawe kommt. 31 Awer Israel hat noh’me Gesetz gestrebt, wo em die Gerechdichkät hat solle bringe. Es hat das Gesetz awer net erreicht. 32 Un fer was net? Weil die Grundlaach, wo se druf gebaut hann, Leischdunge ware, [wo em Mose sei Gesetz verlangt], un net de Glawe. Se hann sich nämlich an dem Stän gestoßt, wo sich die Mensche dran stoße. 33 In de Heilich Schrift steht:

„Guggen emo do! Ich lehe uf em Zionsberch e Stän hin,
wo sich die Mensche dran stoße,
e Felsbrogge, wo se sich driwer ärjere.
Awer jeder, wo an’e glabt, geht net zugrunn.“
(Jes 8,14; 28,16)

10

1 Ihr liewe Geschwischder! Ich winsche vun ganzem Herz un bäde zu Gott, dass Israel gerett werd. 2 Ich kann ne bestädiche, dass’e Eifer fer Gott hann. Es is awer e Eifer ohne Erkenntnis. 3 Se erkenne nämlich net, um was es bei der Gerechdichkät, wo vun Gott kommt, geht, un versuche, ihr eicheni Gerechdichkät ufserichde. Dodemet hann se sich der Gerechdichkät, wo ne Gott schengge will, net unnergeordnet. 4 Chrischdus is nämlich es Enn vum Gesetz, un jeder, wo an Chrischdus glabt, werd fer gerecht erklärt.

Wer an de Jesus glabt, werd gerett

5 De Mose schreibt vun der Gerechdichkät, wo aus em Gesetz kommt: „Wer die Vorschrifde vum Gesetz inhallt, gewinnt dodedurch es Läwe.“ 6 Die Gerechdichkät, wo uf em Glawe ruht, saht awer das do: „Froh net in deim Herz: ‚Wer steiht in de Himmel enuf?’“ – als ob mer Chrischdus vun dort erunnerholle misst – 7 oder: „Wer steiht in de Abgrund enunner?“ – als ob mer Chrischdus vun de Dode erufholle misst. 8 Was saht awer die Gerechdichkät, wo uf em Glawe ruht?^a „Die Botschaft is ganz nah bei dir. Se is in deim Mund un in deim Herz.“ Gemännt is die Botschaft, wo Glawe verlangt un wo mir verkinniche. 9 Wann du also met deim Mund bekennscht: „De Jesus is de Herr!“ un in deim Herz glabscht, dass ne Gott vun de Dode uferstehn gelosst hat, wersch’e gerett. 10 Mer werd nämlich fer gerecht erklärt, wa’mer me’m Herz glabt, u’mer werd gerett, wa’mer sei Glawe me’m Mund bekennt. 11 Die Heilich Schrift saht iwer Chrischdus: „Jeder, wo an’e glabt, geht net zugrunn.“ 12 Es gebt nämlich kä Unnerschied zwische de Judde un de Grieche. Se hann allegar de selwe Herr, un aus seim Reichdum gebt er jedem, wo ne anruft, Geschengge. 13 Wer nämlich em Herr sei Name anruft, werd gerett.

10:8^a Oder: Was saht awer die Heilich Schrift?

14 Wie solle die Mensche awer dene anrufe, wo se net dran glawe? Un wie solle se an dene glawe, wo se nix devun geheert hann? Wie solle se heere ohne jemand, wo ne die Botschaft verkinnicht? 15 Un wie solle Mensche die Botschaft verkinniche, wann se vun nimand geschickt werre? Das is gemännt, wann’s in de Heilich Schrift hääscht: Was for e Fräd is es, wa’mer die komme sieht, wo die gutt Nohricht vum Friede bringe, die gutt Nohricht vun dem, was gutt is.

Israel heert net uf Gott

16 Die Israelide hann awer net allegar uf die gutt Nohricht geheert. Schun de Jesaja froht: „Herr, wer hat dem, was mer preddiche, geglabt?“ 17 De Glawe kommt also aus de Preddicht un die Preddicht aus dem, was Gott gesaht hat. 18 Ich frohe jetz: „Hann die Israelide dann die Preddicht net geheert?“ Nadierlich hann se se geheert!

Die Stimm vun de Botschafder is jo uf de ganz Erd geheert wor,
un was se gesaht hann, bis ans Enn vun de Welt.

19 Ich frohe weider: „Hat Israel die Preddicht net verstann?“ De Mose gebt als Eerschder e Antwort:

„‚Ich mache eich Israelide uf e Volk eifersichdich,
wo gar kä Volk is‘, saht Gott.
‚Uf e Volk, wo kä Insicht hat,
mach ich eich bees.’“

20 De Jesaja getraut sich sogar un saht:

„‚Ich ha’mich vun dene finne gelosst,
wo mich net gesucht hann‘, saht Gott.
‚Ich ha’mich dene se erkenne gebb,
wo net noh mer gefroht hann.’“

21 Iwer Israel saht er awer:

„De ganze Daach hann ich mei Hänn noh’me Volk ausgestreckt,
wo net spurt un wo widerspensdich is.“

11

Nur e Däl vum Volk Israel is verstockt

1 Ich frohe also: Hat Gott sei Volk verstoßt? Uf käne Fall! Ich bin nämlich aach e Israelit, e Nohkomme vum Abraham un aus em Stamm Benjamin. 2 Gott hat sei Volk net verstoßt, wo er sich schun im Voraus ausgewählt hott. Ihr wisse doch, was die Heilich Schrift iwer de Elija saht, oder net? De Elija hat sich bei Gott iwer Israel beschwärt. 3 „Herr“, hat er gesaht, „se hann dei Prophede umgebrung un dei Aldär abgeriss. Ich bin allän iwerich geblieb, un jetz wolle se mich a’noch umbringe.“ 4 Was for e Antwort hat em Gott dann dodruf gebb? Die do: „Ich ha’mer 7.000 Mann iwerich behall, wo vor’m Baal net uf die Knie gefall sinn.“ 5 Genauso is es aach in de heidich Zeit: Gott hat e Rescht vun seim Volk iwerich gelosst, e Rescht, wo er sich ausgewählt hat, weil er gnädich is. 6 Wann er sich dene Rescht awer ausgewählt hat, weil er gnädich is, dann hat er das net gemacht, weil Leischdunge erbrung wor sinn. Sunscht wär die Gnad kä Gnad meh. [Hat er sich dene Rescht awer ausgewählt, weil Leischdunge erbrung wor sinn, dann hat er’s net gemacht, weil er gnädich is. Sunscht wär e Leischdung kä Leischdung meh.]

7 Was hat’enn das jetz se bedeide? Es dut bedeide, dass Israel das, wo’s denoh strebt, net erreicht hat. Nur der ausgewählde Rescht hat’s erreicht. Die annere sinn verstockt wor. 8 In de Heilich Schrift steht: Gott hat e Geischt iwer se komme gelosst, wo se in e diefer Schlof versetzt. Er hat ne Aue gebb, wo net siehn un Ohre, wo net heere – bis uf de heidiche Daach. 9 Un de David saht:

„Ihr Opferdisch soll ne zur Schling un zur Fall,
zu’me Grund fer hinsefalle un zur Bestrofung werre.
10 Ihr Aue solle blind werre, dass’e nix meh siehn känne.
Mach ihr Buggel fer immer krumm.“

Israel un die Reddung vun de annere Välger

11 Ich frohe also: Hann sich die Judde an Chrischdus gestoßt, dass’e fer immer zu Fall komme solle? Uf käne Fall! Awer weil se sich verfählt hann, hann die annere Välger gerett werre känne, un das soll die Judde eifersichdich mache. 12 Wann awer schun ihr Verfählung die Welt reich gemacht hat un wann das, was se verlor hann, die annere Välger reich gemacht hat, wie is es’enn dann eerscht emo, wann se sich in voller Zahl bekehre!

13 Eich, wo ner kä Judde sinn, sahn ich: Grad weil ich de Aposchdel vun dene Mensche bin, wo kä Judde sinn, bring ich mei Dienscht zu Ehre. 14 Villeicht kann ich dodedurch mei Landsleit eifersichdich mache un e paar vun’e redde. 15 Gott hat se nämlich verworf, fer die Welt met sich se versehne. Wann er se jetz awer wider annemmt, bedeit das doch nix anneres, als wie dass Dode lewennich werre, oder net? 16 Wann de eerschde Däl vun dem Dääch, wo als Opfer dargebrung werd, heilich is, is aach der ganze Dääch heilich! Un wann die Wurzel vum Eelbam heilich is, sinn aach die Zweiche heilich!

De Paulus warnt die Välger devor, fer iwerheblich se werre

17 E paar Zweiche sinn awer abgebroch wor, un du bischt als neier Zweich unner die annere ingesetzt wor. Obwohl du vu’me wilde Eelbam stammscht, hascht du jetz Andäl am Saft aus de Wurzel vun dem edle Eelbam. 18 Gebb also net uf Koschde vun dene Zweiche, wo abgebroch wor sinn, an! Wann du das awer trotzdem machscht, dann loss der gesaht sinn: Die Wurzel draht dich un net du die Wurzel! 19 Villeicht sahscht du jetz: „Gott hat doch die Zweiche abgebroch, dass ich hann känne ingesetzt werre.“ 20 Das is wohr! Se sinn abgebroch wor, weil se net geglabt hann. Awer du stehscht an ihrer Stell, weil du glawe duscht. Sei also net iwerheblich! Sei im Gähedäl uf de Hut! 21 Wann Gott schun die nadierliche Zweiche net verschont hat, verschont er dich meechlicherweis aach net. 22 Guck der nur emo an, wie gutt un wie streng Gott is: streng gäh die, wo gefall sinn un gutt gäh dich, vorausgesetzt, du heerscht net uf, fer dich dodruf se verlosse, dass Gott gutt is. Sunscht werscht du nämlich aach abgeschnitt. 23 Awer aach die Judde werre wider ingesetzt, wann se net an ihrm Unglawe feschthalle. Gott hat nämlich die Macht, fer se wider insesetze. 24 Wann du vun dem Eelbam, wo vun Nadur aus wild is, abgeschnitt un gäh die nadierlich Ordnung in dene edle Eelbam ingesetzt wor bischt, wiffel eher werre dann die Judde als die nadierliche Zweiche wider in ihr eichener Eelbam ingesetzt!

Am Enn werd Israel gerett

25 Ihr liewe Geschwischder! Ihr solle eich selwer net fer schlau halle. Deshalb will ich, dass eich do das Geheimnis bekannt is: Verstoggung is iwer e Däl vum Volk Israel komm, awer die dauert nur so lang, bis die voll Zahl vun Mensche aus de annere Välger de Wääch zu Gott gefunn hat. 26 Dann werd’s ganze Volk Israel gerett. In de Heilich Schrift steht:

De Redder kommt vum Zionsberch
un schafft vum Jakob seine Nohkomme alles,
was gottlos is, fort.
27 „Un das do is das Bindnis,
wo ich met ne ingehn,
wann ich ihr Sinde ewegnemme“, saht Gott.

28 Was die gutt Nohricht angeht, gilt: Die Judde sinn Gott sei Feinde wor – was eich, wo ner kä Judde sinn, zugutt kommt. Awer was Gott sei Wahl angeht, gilt: Die Judde bleiwe die, wo vun Gott geliebt werre – wäh ihre Vorfahre. 29 Wann Gott nämlich jemand beruft un em sei Gnad schenkt, nemmt er das nemmeh serick. 30 Ihr, wo ner kä Judde sinn, hann Gott frieher jo aach net geglabt. Jetz hat er eich awer sei Erbarme geschenkt, weil die Judde net geglabt hann. 31 Genauso glawe die Judde Gott jetz net, weil er eich, wo ner kä Judde sinn, sei Erbarme hat wolle schengge. Un das soll dohin fiehre, dass aach die Judde Erbarme finne. 32 Gott hat die Mensche nämlich allegar zu Gefangene vun ihrm Unglawe gemacht, fer sich iwer se allegar se erbarme.

De Paulus lobt die wunnerbare Wääche, wo Gott met de Mensche geht

33 Wie unermesslich reich is Gott doch!
Wie abgrunddief sei Weishät un das, was er wäß!
Wer kann erforsche, was er beschließe dut?
Wer kann seine Wääche uf de Grund gehn?
34 Wer hat erkannt, was de Herr denkt?
Oder wer war sei Beroder?
35 Wer hat Gott jemols ebbes gebb,
dass em Gott ebbes serickgewe misst?
36 Vun Gott kommt alles,
durch Gott besteht alles,
un zu Gott geht alles.
Ihm steht fer immer die Ehr zu! Amen.

12

DE PAULUS GEBT UNNERRICHT, WIE MER DE GLAWE PRAKDISCH AUSLÄWE SOLL: 12,1-15,13

E lewenniches Opfer fer Gott

1 Ihr liewe Geschwischder! Weil Gott so vil Erbarme met uns hat, bidd ich eich: Bringe’m eier Leib als e lewenniches un heiliches Opfer dar, e Opfer, wo ihm gefallt. Das is eier verninfdicher Goddesdienscht. 2 Un bassen eich net do der Welt an! Lossen eich im Gähedäl vun Gott umwannele, dass eier Dengge erneiert werd. Dann känne ner beurdäle, was Gott will: das, was gutt is, das, was em gefallt un das, was vollkomme is.

Wie die Fähichkäde, wo vum Heiliche Geischt geschenkt werre, ingesetzt werre solle

3 Ufgrund vun der Gnad, wo mer Gott zudäl werre gelosst hat, sahn ich jedem vun eich: Denggen net heher vun eich, wie’s angemess is. Achden im Gähedäl dodruf, dass ner bescheide bleiwe, jeder noh dem Moß vum Glawe, wo em vun Gott zugedält wor is. 4 Es is wie bei unserm Leib: Der besteht aus erer Reih Kärberdäle, wo e änzicher Leib bilde un wo doch jeder devun sei besunneri Funktion hat. 5 Genauso bilde mir – so vil wie mer aach sinn – äner Leib, weil mer Chrischdus geheere, un wie die Glieder vun unserm Leib si’mer äner uf de annere angewies. 6 Mir hann verschiedene Fähichkäde, je noh der Gnad, wo Gott uns zudäl werre gelosst hat. Wann jemand die Fähichkät hat, fer prophedisch se schwätze, soll er se in Iwerinstimmung met dem, was er glabt,^a insetze. 7 Wann jemand die Fähichkät hat, fer se diene, soll er diene. Wann jemand die Fähichkät hat, fer se unnerweise, soll er die Mensche unnerweise. 8 Wann jemand die Fähichkät hat, fer annere se ermahne, soll er se ermahne. Wann jemand die Fähichkät hat, fer annere maderiell se unnerstitze, soll er’s ohne Hinnergedangge mache. Wann jemand die Fähichkät hat, fer de Gemän vorsestehn, soll er’s eifrich mache. Un wann jemand die Fähichkät hat, fer sich um die se kimmere, wo in Not sinn, soll er’s met eme frohe Herz mache.

12:6^a Oder: was mer glawe.

Hallen als Glaiwiche sesamme!

9 Eier Lieb soll net scheinheilich sinn! Hassen das, was bees is, un hallen an dem fescht, was gutt is! 10 Lossen im Umgang metenanner zum Ausdruck komme, dass ner eich als Brieder un Schweschdere herzlich lieb hann! Un ehren eich gäheseidich in zuvorkommender Art un Weis! 11 Lossen met eierm Eifer net noh! Lossen eich vum Heiliche Geischt zum Brenne bringe, un dienen em Herr! 12 Freien eich iwer die Hoffnung, wo ner hann! Hallen durch, wann’er drangsaliert werre, un erweisen eich als ausdauernd, wann’er bäde! 13 Helfen dene Mensche, wo heilich sinn, wann se in Not sinn! Machen’s eich zur Ufgab, fer Gäscht gäre ufsenemme! 14 Seechnen die, wo eich verfolche! Seechnen se, un dun se net verfluche! 15 Freien eich met dene, wo sich freie, un heilen met dene, wo heile! 16 Läwen im Friede metenanner!^a Strewen net hooch enaus. Gewen eich im Gähedäl aach fer undankbare Ufgawe her!^b Un bilden eich net in, ihr däde schun alles wisse! 17 Bezahlen nimand Beeses met Beesem serick! Un gewen eich Mieh, fer se mache, was in de Aue vun all de Mensche gutt is! 18 Wann’s meechlich is un soweit wie’s an eich leiht, läwen met jedem im Friede! 19 Iwerlossen’s Strofe Gott, ihr Liewe, un rächen eich net selwer! Es steht nämlich geschrieb: „Es Unrecht se räche, is mei Sach! Ich dun serickbezahle!“, saht de Herr. 20 Deshalb: Gebb deim Feind ebbes se esse, wann er Hunger hat, un wann er Durscht hat, gebb em se dringge! Wann du das nämlich machscht, bringsch’e ne dohin, dass er sich schamt.^c 21 Loss dich net vum Beese unnerkiehn! Iwerwinn im Gähedäl es Beese met dem, was gutt is!

12:16^a Oder: Lossen eich im Umgang metenanner dodevun bestimme, dass ner sesamme än Ziel hann!

12:16^b Oder: Wennen eich im Gähedäl dene zu, wo wenicher angesiehn sinn!

12:20^c Wärtlich: sammelscht du gliediche Kohle uf sei Kopp.

13

Wie dut mer sich de Staatsgewalt gähiwer richdich verhalle?

1 Jeder Mensch soll sich de Dräächer vun de Staatsgewalt unnerordne. Es gebt nämlich kä staatlichi Macht, wo net vun Gott stammt. Die jeweiliche Amtsdräächer sinn vun Gott ingesetzt. 2 Deshalb: Wer sich de Staatsgewalt widersetzt, widersetzt sich der Ordnung, wo vun Gott gestift wor is, un wer sich Gott widersetzt, zieht sich selwer es Gericht zu. 3 Wer awer macht, was gutt is, brauch vor dene, wo die Macht ausiewe, kä Angscht se hann. Angscht muss nur der hann, wo Beeses dut. Mach also, was gutt is, wann de ohne Angscht vor de Staatsgewalt läwe willscht. Dann kriehsch’e ihr Anerkennung. 4 Se dient nämlich Gott, un durch sie soll der Guddes zudäl werre. Wann du awer Beeses duscht, muscht du wirklich Angscht hann! Se draht nämlich es Schwert net fer nix. Se dient Gott dodemet un vollzieht sei Strofgericht an dem, wo Beeses dut. 5 Deshalb muss mer sich de staatlich Gewalt unnerordne, aach wäh’m Gewisse un net nur, weil mer Angscht vor de Strof hat. 6 Aus dem Grund bezahle ner jo aach Steiere. Die Verdräder vum Staat diene nämlich Gott un dun nur sorchfäldich ihr Flicht. 7 Gewen also jedem, was ner’m schullich sinn! Wem Steiere zustehn, dem bezahlen Steiere! Wem Zoll zusteht, dem bezahlen Zoll! Wem Reschbekt zusteht, dem erweisen Reschbekt! Un wem Ehr zusteht, dem erweisen Ehr!

In de Lieb werd’s ganze Gesetz sesammegefasst

8 Bleiwen nimand ebbes schullich! Was ner eich enanner awer immer schulde, is die Lieb. Wer nämlich de annere lieb hat, hat em Mose sei Gesetz erfillt. 9 Was Gott gebott hat: Geh net näwenaus, bring nimand um, klau net, [lieh net,] gebb de Begehrlichkät kä Raum, un was Gott sunscht noch gebott hat, das is in do dem äne Satz sesammegefasst: Du sollscht dei Nägschder genauso lieb hann wie dich selwer! 10 Wer sei Nägschder lieb hat, dut em nix Beeses. Also dut die Lieb em Mose sei Gesetz erfille.

E Chrischt soll berät sinn, wann de Jesus widerkommt

11 Läwen so, weil ner wisse, in was for rer entscheidend Zeit mir läwe. Fer uns is es nämlich heegschdi Zeit,^a fer aus em Schlof wach se werre, weil uns die Reddung jetz näher is wie zu der Zeit, wie mer zum Glawe komm sinn. 12 Die Naacht^b is fascht vorbei, un ball is es Daach^c. Deshalb wolle mer uns vun allem trenne, was im Dunggele gedrieb werd, un zu dene Waffe greife, wo mer demet im Licht kämpft!^d 13 Mir wolle e ehrbares Läwe fiehre, wie’s zum helle Daach basst, e Läwe ohne Sauf- un Fressgelaache, ohne Bettgeschichde un Sexorgie un ohne Streit un Eifersucht. 14 Dun im Gähedäl de Herr Jesus Chrischdus an, un beschäfdichen eich net länger dodemet, wie ner die Gier vun eierer sindich Nadur befriediche känne.

13:11^a Wärtlich: Fer uns is die Stunn nämlich schun komm.

13:12^b Naacht werd an do der Stell symbolisch fer die sindich Welt gebraucht, fer die Welt, wo mer drinn läwe un wo ball zu Enn geht.

13:12^c Daach werd an do der Stell symbolisch fer die gutt Zeit gebraucht, wo kommt, wa’mer bei Gott sinn.

13:12^d Wärtlich: Deshalb wolle mer die Werge vun de Dunggelhät ausdun un die Waffe vum Licht andun!

14

Iwer’s Sesammeläwe in de Gemän

1 Nemmen dene an, wo im Glawe schwach is, ohne dass ner iwer verschiedene Uffassunge met em streide. 2 Der äne glabt, dass er alles esse darf. Wer awer schwach is, esst kä Flääsch. 3 Wer Flääsch esst, soll dene net verachde, wo käns esst, un wer kä Flääsch esst, soll dene net verurdäle, wo’s esst. Gott hat ne doch angenumm. 4 Wer bisch’enn du eichentlich, dass du eme annere sei Haussklave verurdälscht? Ob er met seim Dun bestehn kann oder net, geht nur sei Herr ebbes an. Un er dut bestehn! Gott hat nämlich die Macht, fer ne bestehn se losse.

5 Der äne macht e Unnerschied zwische de Daache, fer de annere is äner Daach wie de anere. Jeder soll do seiner Mänung sicher sinn. 6 Wer e bestimmder Daach bevorzuucht, macht das, fer de Herr se ehre. [Wer kä bestimmder Daach bevorzuucht, macht das aach, fer de Herr se ehre.] Wer Flääsch esst, esst’s, fer de Herr se ehre. Er saht Gott nämlich dangge dodefor. Un wer kä Flääsch esst, macht das aach, fer de Herr se ehre. Aach er saht Gott dangge. 7 Käner vun uns läbt fer sich selwer, un käner sterbt fer sich selwer. 8 Wa’mer läwe, läwe mer fer de Herr, un wa’mer sterwe, sterwe mer fer de Herr. Es is also ganz egal, ob mer läwe oder sterwe: Mir geheere em Herr! 9 Chrischdus is nämlich deshalb aach gestorb [un uferstann] un wider lewennich wor, fer iwer die Dode un iwer die Lewenniche Herr se sinn.

10 Fer was duscht du also dei Bruder oder dei Schweschder verurdäle? Un du, fer was duscht du dei Bruder oder dei Schweschder verachde? Mir stehn doch allegar emo vor Chrischdus seim Richderstuhl. 11 Es steht nämlich geschrieb:

„Ich schweere bei mer selwer“, saht de Herr,
„vor mir geht emo jeder uf die Knie,
vun jedi Zung dut emo bekenne,
dass ich Gott bin.“

12 Jeder vun uns muss also emo iwer sich selwer vor Gott Recheschaft ablehe!

Nemmen Ricksicht uf die Schwache!

13 Heere mer also uf, fer uns gäheseidich se verurdäle! Achden im Gähedäl dodruf, dass ner eierm Bruder oder eierer Schweschder kä Anstoß gewe un se net zu Fall bringe! 14 Weil ich em Herr Jesus geheere, wäß ich un bin ich iwerzeicht: An sich is nix unrein. Wann awer jemand ebbes fer unrein hallt, is es fer dene wirklich unrein. 15 Wann dei Bruder oder dei Schweschder wäh irjend ebbes, was du esse duscht, verletzt werd, läbscht du nemmeh so, wie’s die Lieb verlangt. Stirz durch das, was du esse duscht, käner, wo Chrischdus defor gestorb is, ins Verderwe. 16 Das Gudde, wo ner hann, darf doch net verläschdert werre. 17 In Gott seim Reich geht’s nämlich net um das, was jemand esst oder drinkt. Es geht im Gähedäl um das, was de Heiliche Geischt bewirkt: Gerechdichkät un Friede un Fräd. 18 Wer Chrischdus dodrinn dient, gefallt Gott un werd vun de Mensche geschätzt.

19 Wolle mer also noh dem strewe, was zum Friede beidraht un äner de annere ufbaut! 20 Zersteer das, was Gott zustann gebrung hat, net wäh irjend ebbes, was du esse duscht! Es is zwar alles rein, awer verwerflich is es, wann jemand durch das, was er esst, e annerer zu Fall bringt.^a 21 Deshalb is es am Beschde, du duscht kä Flääsch esse un kä Wein dringge un duscht aach sunscht alles vermeide, wo dei Bruder oder dei Schweschder Anstoß dran nemme [oder zu Fall komme oder schwach werre] kännt. 22 Behannel das, wo du devun iwerzeicht bischt, als e Sach zwische dir un Gott. Glicklich is der se nenne, wo sich bei dem, was er fer richdich hallt, net se verurdäle brauch. 23 Wer awer beim Esse zweifelt, ob das, was er macht, richdich is, der is schun verurdält, weil er’s net aus em Glawe eraus macht. Un alles, was net aus em Glawe kommt, is sindich.

14:20^a Oder: awer schlimm is es, wann jemand ebbes esst, obwohl er Anstoß dran nemmt.

15

Das Beispiel, wo Chrischdus uns gebb hat

1 Mir, wo mer stark sinn, solle die Schwäche vun dene, wo schwach sinn, met drahn. Mir solle net nur fer uns selwer läwe. 2 Jeder vun uns soll nämlich uf sei Nägschder Ricksicht nemme un dodenoh frohe, was gutt fer ne is un was ne ufbaut. 3 Chrischdus hat nämlich aach net nur fer sich selwer geläbt. Im Gähedäl! In de Heilich Schrift steht: Die Schmähunge vun dene, wo dich, Gott, schmähe, ha’mich gedroff. 4 Was in de Heilich Schrift steht, is im Voraus ufgeschrieb wor, fer uns se belehre. Die Heilich Schrift gebt uns Geduld un macht uns Mut, bis das indrefft, wo mer druf hoffe. 5 Ich bäde zu Gott, wo Geduld un Mut schenkt, dass er eich fähich macht, fer harmonisch metenanner se läwe. Gehn metenanner so um, wie’s Chrischdus Jesus vorgeläbt hat. 6 Dann känne ner Gott, de Vadder vun unserm Herr Jesus Chrischdus, allegar wie aus äm Mund lowe!

Aach die Mensche, wo kä Judde sinn, heere die gutt Nohricht

7 Nemmen eich deshalb gäheseidich an, genauso wie Chrischdus uns aach angenumm hat, dass Gott geehrt werd. 8 Ich sahn awer: Gott saht die Wohrhät! Deshalb is Jesus Chrischdus e Diener vun de Judde wor, fer se bestädiche, was Gott ihre Vorfahre versproch hott. 9 Die annere Välger solle Gott awer lowe, weil er barmherzich is. So steht’s schun in de Heilich Schrift:

Deshalb low ich dich unner de Välger
un singe dir Loblieder.

10 Weider hääscht’s:

Ihr Välger, freien eich met Gott seim Volk!

11 Un noch weider:

Lowen de Herr, all ihr Välger!
Riehmen ne, all ihr Natione!

12 Un de Jesaja saht:

Der Spross, wo aus em Wurzelstock vum Isai hervorgehnt, kommt!
Er steht uf, fer iwer die Välger se herrsche.
Uf ihne hoffe die Välger dann.

13 Ich bäde zu Gott, wo eich Hoffnung schenkt, dass er eich in eierm Glawe met aller Fräd un allem Friede erfillt. Dann dut eier Hoffnung durch die Kraft vum Heiliche Geischt iwer jedes Moß enaus wachse.

DE PAULUS GEBT SEI RÄSEPLÄN BEKANNT UN GRIESST E HAUFE LEIT MET NAME: 15,14-16,27

Fer was de Paulus do dene Brief geschrieb hat

14 Mei liewe Geschwischder! Was eich angeht, bin ich dodevun iwerzeicht: Ihr sinn selwer in de Laach, fer se mache, was gutt un richdich is. Es fählt eich an käner Erkenntnis, un ihr sinn fähich, fer eich gäheseidich se ermahne. 15 Fer eich awer e paar Sache in Erinnerung se rufe, hann ich eich zum Däl ganz deitlich geschrieb, [ihr liewe Geschwischder]. Ich hann das durch die Gnad gemacht, wo mer Gott gebb hat. 16 Als Jesus Chrischdus sei Diener hann ich unner de Välger wirge un die gutt Nohricht, wo vun Gott kommt, wie e Prieschder verwalde solle. Die Välger hann nämlich e Opfer werre solle, äns, wo Gott gefallt un wo durch de Heiliche Geischt geheilicht is.

17 Weil ich Chrischdus Jesus geheere, bin ich stolz uf das, was ich fer Gott mache. 18 Ich dät mich net getraue, fer iwer das se schwätze, was ich gemacht hann, wann net Chrischdus durch mich gewirkt hätt – nämlich dass sich Mensche aus jedem Volk Gott unnerstelle. Chrischdus hat durch das, was ich gesaht un gemacht hann, gewirkt. 19 Aach in de Kraft vun Zääche un Wunner un in de Kraft vun Gott seim Geischt hat er gewirkt. So hann ich die gutt Nohricht, wo iwer Chrischdus schwätzt, vun Jerusalem aus in weidem Bohe bis noh Illirie iwerall verbrät. 20 Dodebei war mer’s immer e Ehresach, fer die gutt Nohricht nur dort se preddiche, wo Chrischdus sei Name noch net bekannt gemacht wor is. Ich hann net uf eme Fundament baue wolle, wo jemand anneres geleht hat. 21 Ich ha’mich im Gähedäl an das gehall, was in de Heilich Schrift steht:

Dene, wo noch nie ebbes vu’m gesaht krieht hann,
gehn emo die Aue uf,
un die, wo noch nie ebbes vu’m geheert hann,
komme zur Insicht.

De Paulus hat vor, fer noh Rom se komme

22 Das is aach de Grund, fer was ich so oft dodran gehinnert wor bin, fer bei eich se komme. 23 Jetz hann ich awer in dene Geechende kä neies Arwetsfeld meh. Außerdem sehn ich mich schun seit erer ganz Reih vun Johre denoh, fer bei eich se komme, 24 wann ich noh Spanie gehn. Uf em Wääch dorthin hoff ich, dass ich eich besuche kann un dass ich vun eich fer die Weiderräs met allem Neediche ausgestatt werre. Awer vorher will ich mich noch e Zeitlang an de Gemänschaft met eich erfreie.

25 Jetz gehn ich awer noh Jerusalem, fer dene Mensche, wo heilich sinn, e Dienscht se dun. 26 Die Gemäne in de Provinze Mazedonie un Achaja hann nämlich beschloss, fer die Mensche in Jerusalem, wo heilich un arm sinn, met erer Geldsammlung se unnerstitze. 27 Se hann das fer richdich gehall. Se sinn’s ne awer aach schullich. Wann die Välger nämlich an de Judde ihrm geischtliche Seeche Andäl krieht hann, hann se aach die Flicht, fer de Judde met maderielle Sache se diene. 28 Wann ich do die Sach zum Abschluss gebrung un de Glaiwiche in Jerusalem de Erdraach vun der Sammlung sicher iwergebb hann, komm ich uf em Wääch noh Spanie bei eich vorbei. 29 Ich wäß awer: Wann ich bei eich komme, komm ich me’m volle Seeche, wo vun Chrischdus [durch die gutt Nohricht] vermiddelt werd.

Die Chrischde in Rom solle fer de Paulus bäde

30 Ihr liewe Geschwischder! Im Name vun unserm Herr Jesus Chrischdus un bei der Lieb, wo de Heiliche Geischt schenkt, bitt ich eich: Kämpfen met mer un bäden fer mich zu Gott, 31 dass ich vor de Nohstellunge vun de Unglaiwiche in Judäa gerett werre un dass mei Dienscht, wo ich fer Jerusalem dun, vun dene Mensche dort, wo heilich sinn, gutt angenumm werd. 32 Dann kann ich, wann Gott das will, bei eich komme u’mich freie un ka’mich e bissje bei eich erholle.

33 Ich bäde dodrum, dass Gott, wo de Friede schenkt, eich allegar beisteht! Amen.

16

De Paulus dut perseenlich grieße

1 Ich emfehle eich es Phebe,^a unser Schweschder, wo im Dienscht vun de Gemän in Kenchreä steht. 2 Nemmen’s im Name vum Herr uf, so wie Mensche, wo heilich sinn, das mache sollde. Stehn em in jeder Sach, wo’s eich brauch, bei. Es hat nämlich schun vil Leit geholf – mir selwer aach.

16:1^a Vermutlich hat’s Phebe do dene Brief iwerbrung.

3 Grießen’s Priszilla un de Aquila.^a Die schaffe im Dienscht fer Chrischdus Jesus met mer sesamme 4 un hann ihr Kopp fer mei Läwe hingehall. Net nur ich bin ne dodefor dankbar, nä, aach jedi Gemän, wo’s unner de verschiedene Välger gebt. 5 Grießen aach die Gemän, wo sich in ihrm Haus versammelt. Grießen de Epänedus, wo ich lieb hann. Der war de Eerschde, wo sich in de Provinz Achaja zu Chrischdus bekehrt hat. 6 Grießen’s Maria, wo sich so vil fer uns abgemieht hat. 7 Grießen de Andronigus un de Junias,^b wo zu meim Volk geheere un sesamme met mir im Gefängnis ware. Se sinn angesiehn unner de Aposchdele un hann sich schun vor mir zu Chrischdus bekehrt gehat.

16:3^a Vgl. Apg 18,1-3. 18-19. 26; 1Kor 16,19; 2Tim 4,19.

16:7^b Oder: un’s Junia. De Unnerschied im griechische Grundtext is nur e Akzent. In dene Manuskripde, wo de Text zum eerschde Mo met Betonungszääche versiehn hann, is der Name weiblich. In de ältschde Handschrifde sinn noch kä Akzentzääche verwendt wor.

8 Grießen de Amplias, wo ich lieb hann un wo em Herr geheert. 9 Grießen de Urbanus, wo im Dienscht fer Chrischdus met uns sesammeschafft, un grießen de Stachys, wo ich lieb hann. 10 Grießen de Apelles, wo sich im Glawe an Chrischdus bewährt hat. Grießen die Leit, wo zum Arischdobulus seiner Famillie geheere. 11 Grießen de Herodion, wo zu meim Volk geheert. Grießen die, wo zum Narzissus seiner Famillie geheere un an de Herr glawe. 12 Grießen’s Tryphäna un’s Tryphosa, wo sich fer de Herr abmiehe. Grießen’s Persis, wo mer lieb hann un wo sich so vil fer de Herr abgemieht hat. 13 Grießen de Rufus, wo vum Herr ausgewählt wor is. Grießen sei Mudder, wo aach fer mich wie e Mudder is. 14 Grießen de Asynkridus un de Phlegon, de Hermas un de Patrobas, de Hermes un die Geschwischder, wo bei ne sinn. 15 Grießen de Philologus un’s Julia, de Nereus un sei Schweschder, de Olymbas un all die, wo heilich sinn un wo bei ne sinn.

16 Grießen eich unnernanner met eme heiliche Kuss. Die Gemäne, wo sich zu Chrischdus bekenne, losse eich grieße.

De Paulus warnt vor Irrlehrer

17 Ich bidde eich, ihr liewe Geschwischder: Nemmen eich vor dene Mensche in Acht, wo Spaldunge verursache un eich ebbes anneres beibringe wie das, was ner beigebrung krieht hann. Se wolle eich vum Glawe abbringe. Gehn ne aus em Wääch! 18 So Leit diene nämlich ihre eichene Intresse^a un net unserm Herr Jesus Chrischdus. Met indrucksvolle Redde un schmäächleriche Worde verfiehre se leichtglaiwiche Mensche.^b 19 Es is awer jedem bekannt, dass ihr uf Gott heere. Deshalb frei ich mich aach iwer eich! Ich will awer, dass ner Weishät hann, fer Guddes se dun un fer eich vum Beese net beinflusse se losse. 20 Gott, wo de Friede schenkt, dut de Deiwel ball unner eiere Fieß in Klänholz verwannele.

16:18^a Wärtlich: ihrm eichene Bauch.

16:18^b Wärtlich: verfiehre se es Herz vun änfache Mensche.

Ich bäde dodrum, dass die Gnad vun unserm Herr Jesus Chrischdus met eich is! Amen.

Die Leit, wo me’m Paulus sesammeschaffe, dun grieße

21 De Timotheus, wo met mer sesammeschafft, losst eich grieße; genauso de Lucius, de Jason un de Sosipader, wo zu meim Volk geheere. 22 Ich, de Tertius, hann do dene Brief nidergeschrieb^a un grieße eich im Name vum Herr.

16:22^a De Paulus hat em Tertius do dene Brief wahrscheinlich dikdiert.

23 De Gajus losst eich grieße. Ich bin sei Gascht, un die ganz Gemän kommt in seim Haus sesamme. Aach de Eraschdus, wo die Stadtkass verwalde dut, un de Quardus, unser Bruder, losse eich grieße.

[ 24 Ich bäde dodrum, dass die Gnad vun unserm Herr Jesus Chrischdus met eich allegar is! Amen.]

E Lobpreis zum Schluss

25 Gott hat die Macht, fer eich durch die gutt Nohricht,
wo mir anvertraut is,
un durch die Preddicht vun Jesus Chrischdus fescht se mache.
Er hat uns das Geheimnis offebart,
wo seit ewiche Zeide geheim gehall wor is.
26 Jetz is es awer durch die Schrifde vun de Prophede ans Licht komm.
Weil de ewiche Gott de Befehl dodezu gebb hat,
is es unner all de Välger bekannt gemacht wor,
dass’e an Gott glawe un uf ne heere solle.
27 Gott, wo allän Weishät hat,
steht durch Jesus Chrischdus fer immer die Ehr zu! Amen.