Westpfälzisch-südsaarländische Bibel Es lewennische Wort (ELW) – 1. Timotheus
Altes Testament
Neues Testament
Matthäus Markus Lukas Johannes Aposchdelgeschicht Reemer 1. Korinder 2. Korinder Galadder Epheser Philibber Kolosser 1. Thessalonicher 2. Thessalonicher 1. Timotheus 2. Timotheus Tidus Philemon Hebräer Jakobus 1. Petrus 2. Petrus 1. Johannes 2. Johannes 3. Johannes Judas Offebarung
1. Timotheus
Do der Brief, wo vum Paulus aller Wahrscheinlichkät noh kurz vor seim Dod geschrieb wor is, is an sei Freind un Metarweider, an de Timotheus, gericht. De Timotheus war in Ephesus geblieb, weil de Paulus das so gewollt hat. Er hat dort verhinnere solle, dass falsche Lehre iwer die gutt Nohricht verbrät werre. De Paulus hat selwer aach wider noh Ephesus komme wolle, is awer ufgehall wor. Deshalb schreibt er em Timotheus jetz un macht em Mut, fer sei Arwet met Obdimismus weidersemache.
De Timotheus hat in Ephesus met e paar Probleme se kämpfe: Geschwätz un Streit ware an de Daachesordnung. Manche Leit hann de Chrischde es Heirade verbiede wolle, un annere hann Vorschrifde, wo’s Esse bedroff hann, fer verbindlich erklärt. Deshalb schreibt de Paulus dann aach ausfiehrlich iwer e ganzi Reih Frohe vum Gemäneläwe. Was er ausfiehrt, soll e Hilf fer die Gemän in Ephesus sinn, dass’e sich wider uf’s Fundament besinne kann: uf Jesus Chrischdus un uf die Erleesung, wo Gott de Mensche anbiede dut. Gott will nämlich, dass jeder Mensch gerett werd un erkennt, was wohr is. Deshalb dirfe Chrischde aach die Wohrhät net verschleiere. Se solle im Gähedäl so läwe, dass ihr Glawe Auswirgunge hat, wo mer siehn kann.
De Paulus grießt de Timotheus: 1,1-2De Paulus warnt vor falsche Lehre un saht Grundsätzliches: 1,3-20De Paulus leht die richdich Ordnung in de Gemäne nider: 2,1-6,19De Paulus gebt abschließende Anweisunge un winscht Gott sei Seeche: 6,20-21
DE PAULUS GRIESST DE TIMOTHEUS: 1,1-2
1 Das do schreibt de Paulus. Gott, wo uns redde dut, un de Herr Jesus Chrischdus, wo mer druf hoffe, ha’mer die Vollmacht gebb, fer e Aposchdel vun Jesus Chrischdus se sinn.
2 Ich schreiwe’m Timotheus, wo durch de Glawe e richdicher Sohn fer mich wor is, un winsche’m Gnad, Erbarme un Friede vun Gott, unserm Vadder, un vun Chrischdus Jesus, unserm Herr.
DE PAULUS WARNT VOR FALSCHE LEHRE UN SAHT GRUNDSÄTZLICHES: 1,3-20
Irrlehre bedrohe die Gemän
3 Schun wie ich mich uf de Wääch noh Mazedonie gemacht hann, hann ich der Mut gemacht gehat, fer weiderhin in Ephesus se bleiwe. Du hascht dort e paar Leit verbiede solle, fer falsche Lehre se verbräde 4 un sich met Legende un endlose Geschlechtsregischder se beschäfdiche. So Sache fiehre nämlich nur zu Streit un diene net dem, was Gott geplant hat un was durch de Glawe erkannt werd. 5 De Zweck vun dem, was Gott gebott hat, is awer, dass sich die Glaiwiche lieb hann, un zwar aus eme reine Herz un aus eme gudde Gewisse eraus un aus eme Glawe, wo frei vun Scheinheilichkät is. 6 Dodevun sinn e paar Leit abgeirrt un hann sich läärem Geschwätz zugewennt. 7 Se wolle Lehrer vum gättlichea Gesetz sinn, awer se verstehn nix vun dem, was se sahn un so selbschtsicher behaupde.
1:7a Oder: mosaische.
8 Mir wisse awer, dass es Gesetz gutt is, wa’mer’s richdich gebraucht
9 un bericksichdicht: Gott hat eme Mensch, wo gerecht is, kä Gesetz uferleht. Er hat’s awer dene uferleht, wo’s breche un rebellisch, gottlos un sindich, unheilich un gemein sinn. Er hat’s Leit uferleht, wo ihr Vadder oder ihr Mudder umbringe, Mensche ermorde,
10 hure, met Partner aus em selwe Geschlecht verkehre, Sklavehannel bedreiwe, liehe, ebbes Verkehrdes schweere oder mache, was sunscht noch im Widerspruch zu de gesund Lehr steht.
11 Die gesund Lehr stimmt met der gutt Nohricht iwerin, wo mer vun Gott anvertraut wor is un wo de herrliche un hoochgelobde Gott offebare dut.a
1:11a Oder: un wo iwer de herrliche un hoochgelobde Gott schwätzt.
De Paulus is e lewenniches Beispiel dodefor, dass sich Gott iwer uns erbarmt
12 Chrischdus Jesus, unser Herr, hat mer Kraft gebb. Ich sahn em dangge dodefor, dass er mich fer vertrauenswirdich gehall un in sei Dienscht gestellt hat. 13 Frieher hann ich ne geläschdert un verfolcht gehat un hann Gewalt angewennt gehat, awer er hat sich iwer mich erbarmt, weil ich’s ohne besser se wisse un im Unglawe gemacht hott. 14 Unser Herr hat mer awer sei Gnad im Iwerfluss geschenkt u’met ihr de Glawe un die Lieb, wo mer krieht, wa’mer Chrischdus Jesus geheert. 15 Uf do die Feschtstellung ka’mer sich verlosse, un se is es wert, dass’e ganz angenumm werd: „Chrischdus Jesus is in die Welt komm, fer sindiche Mensche se redde.“ Vun dene Mensche bin ich de schlimmschde! 16 Awer Gott hat sich deshalb iwer mich erbarmt, dass Jesus Chrischdus a’mir als em schlimmschde Sinder sei ganzi Geduld beweise kännt, un sei Geduld met mir dient als Vorbild fer die, wo in Zukunft an Chrischdus glawe un’s ewiche Läwe kriehn däde.
17 Dem ewiche Keenich, wo nie sterbt un wo mer net siehn kann, dem Gott, wo ganz allän Weishät hat, stehn fer immer un ewich die Ehr un die Herrlichkät zu! Amen.
Kämpf de gudde Kampf vum Glawe!
18 Timotheus, mei Bub, ich lehe der do die Anweisung ans Herz. Se stimmt met dem iwerin, was Prophede frieher iwer dich gesaht hann. Loss der dodevun Mut mache, fer dene gudde Kampf se kämpfe
19 un de Glawe un e guddes Gewisse feschtsehalle! E paar Leit hann ihr guddes Gewisse nämlich vun sich gestoßt un sinn deshalb im Glawe uf Grund gelaf.
20 Zu dene geheere de Himenäus un de Alexander, wo ich em Deiwel iwergebb hann,a dass’e beigebrung kriehn, fer Gott nemmeh se läschdere.
1:20a Wahrscheinlich dodedurch, dass’e aus de Gemän ausgeschloss wor sinn (vgl. 1Kor 5,5.13).
DE PAULUS LEHT DIE RICHDICH ORDNUNG IN DE GEMÄNE NIDER: 2,1-6,19
Bäden fer all Mensche!
1 Ich ermahne eich deshalb zu allereerscht: Bidden Gott, dass er jedem gebt, was er brauch! Bäden fer annere! Bäden fer all Mensche, un sahn Gott dangge fer das, was er fer se gemacht hat! 2 Bäden aach fer die Keeniche un fer all die, wo an de Macht sinn, dass mer Gott in allem verehre un uns richdich verhalle un e ruhiches un stilles Läwe fiehre känne. 3 Das is nämlich gutt, un es gefallt Gott, wo uns redde dut. 4 Gott will, dass jeder Mensch gerett werd un erkennt, was wohr is.
5 Es gebt nämlich nur äner Gott
un nur äner,
wo zwische Gott un de Mensche vermiddelt:
der Mensch Chrischdus Jesus.
6 Der hat sich selwer als Bezahlung fer jeder Mensch hergebb,
un das hat zu seiner Zeit bestädicht werre solle.
7 Zu dem Zweck hat mich Gott aach als Preddicher un Aposchdel ingesetzt. Ich sahn die Wohrhät, [weil ich Chrischdus geheere,] un liehe net! Gott hat mich ingesetzt, fer die Mensche, wo kä Judde sinn, im Glawe un in de Wohrhät se unnerweise.
Wie sich Mannsleit un Weibsleit in de Gemän verhalle solle
8 Deshalb will ich aach, dass die Mannsleit iweralla bäde un dodebei heiliche Hänn hoochhewe.b Se solle net bees werre un aach kä Zores mache!
2:8a Das hääscht iwerall dort, wo sich die Glaiwiche versammele bzw. in jeder Gemän.
2:8b Die Hänn hoochhewe war äni vun de Gebätshaldunge bei de Judde (vgl. 2Mo 9,29; 1Keen 8,22).
9 Außerdem will ich, dass sich die Weibsleit anstännich, schamhaft un serickhallend andun. Ihr Schmuck soll net aus ufwenniche Frisure oder Gold un aach net aus Perle oder deiere Kläder bestehn.
10 Er soll im Gähedäl aus gudde Werge sesammegesetzt sinn. So geheert sich das nämlich fer Weibsleit, wo sich dezu bekenne, dass’e Gott verehre.
11 E Fra soll sich still un in aller Unnerordnung belehre losse.
12 Unnerricht se gewe erlaw ich erer Fra awer net, aach net, dass’e iwer de Mann herrscht! Se soll sich im Gähedäl still verhalle!
13 Gott hat nämlich seeerscht de Adam erschaff un dann es Eva.
14 De Adam hat sich aach net verfiehre gelosst. Es war die Fra, wo verfiehrt wor is un wo sich iwer das, was Gott gebott hott, eweggesetzt hat.
15 E Fra werd awer dodedurch gerett, dass’e Kinner uf die Welt bringt, vorausgesetzt, se hallt sich serick un bleibt im Glawe un in de Lieb un in de Heilichung.
Anweisunge fer die Mannsleit, wo die Ufsicht in de Gemän hann
1 Uf do die Feschtstellung ka’mer sich verlosse: „Wer dodruf aus is, fer die Ufsicht ausseiewe,a strebt noh erer gutt Ufgab.“
2 Deshalb darf aach an äm, wo die Ufsicht hat, nix aussesetze sinn. Er muss de Mann vun nur äner Frab un nichdere, verninfdich un anstännich sinn. Er muss Gäscht gäre ufnemme un fähich sinn, fer annere se unnerrichde.
3 Er darf sich net besaufe un kä Gewalt anwenne [un aach net noh moßlosem Gewinn strewe]. Er muss im Gähedäl freindlich sinn un darf kä Streit suche un net am Geld hängge.
4 Er muss seiner Famillie gutt vorstehn un sei Kinner dodezu erziehe, fer sich in allem reschbektvoll unnerseordne.
5 – Wann jemand seiner eichen Famillie net vorstehn kann, kann er fer die Gemän, wo Gott geheert, doch aach net sorje, oder doch? –
6 Er darf net eerscht vor kurzem zum Glawe komm sinn, sunscht werd er wo meechlich noch arrogant un dut em selwe Gericht wie de Deiwel verfalle.
7 Er muss aach e gudder Ruf bei dene hann, wo net zu de Gemän geheere, sunscht werd er schlecht gemacht un verfangt sich in de Schling vum Deiwel.
3:1a Traditionell: Wer noh’me Bischofsamt strebt.
3:2b Was do der Versdäl bedeit, werd noch debaddiert. Er werd oft so verstann, dass er sich uf de Familliestand vun de Fiehrer vun de Gemän bezieht un die Mannsleit vum Ufseherdienscht ausschließt, wo net verheirat sinn oder in de Vileh läwe oder geschied sinn oder noh’m Dod vun ihrer Fra wider geheirat hann. Manche Ausleher glawe aach, dass die Bedeidung is: Er muss seiner Fra trei sinn.
Anweisunge fer die Leit, wo e Dienscht in de Gemän iwerdrah kriehn
8 Genauso aach die Leit, wo e Dienscht iwernemme:a Mer muss se reschbekdiere känne, un se dirfe nix sahn, was se net männe. Se dirfe net zu vil Wein dringge un net noh moßlosem Gewinn strewe. 9 Am Geheimnis vum Glawe misse se met eme reine Gewisse feschthalle. 10 Mer muss se seeerscht priefe, un nur wann nix an’e aussesetze is, solle se ihr Dienscht dun.
3:8a Traditionell: Genauso aach die Diakone. Analooch in Vers 12.
11 Genauso muss mer aach ihra Weibsleit reschbekdiere känne. Se dirfe net abfällich iwer annere schwätze un misse nichdere un in allem zuverlässich sinn.
3:11a Oder: die. In dem Fall wäre Diakoninne angeschwätzt.
12 Vun dene Leit, wo e Dienscht iwernemme, muss jeder de Mann vun nur äner Fra sinn.a Se misse ihre Kinner un ihrer Famillie gutt vorstehn.
13 Wann se ihr Dienscht nämlich gutt versiehn, verschaffe se sich e gudder Ruf un känne frei eraus iwer ihr Glawe an Chrischdus Jesus schwätze.
3:12a Vgl. die Anmergung zu Vers 2.
Es Geheimnis vum Glawe
14 Ich schreiwe der das do, obwohl ich hoffe, dass ich schun ball bei dich komme kann. 15 Falls sich mei Besuch awer noch enauszieht, sollscht du schun wisse, wie mer sich in der Famillie, wo Gott geheert, verhalle muss. Die Famillie, wo Gott geheert, is die Gemän vum lewenniche Gott – de Stitzpeiler un’s Fundament vun dem, was wohr is. 16 Es Geheimnis dodevun, dass mer Gott verehre, is ohne Zweifel groß:
Gott is i’me menschliche Leib erschien;
de Heiliche Geischt hat bestädicht, dass er gerecht is;
Engel hann’e gesiehn;
Mensche, wo kä Judde sinn, hann’e gepreddicht krieht;
in de Welt hat er Glawe gefunn,
un in die Herrlichkät is er ufgenumm wor.
De Paulus warnt vor Irrlehrer
1 De Heiliche Geischt saht ausdricklich: In spädere Zeide falle manche Leit vun dem, was mer glawe, ab. Se losse sich uf Geischder in, wo se verfiehre, un nemme an, was ne die Dämone beibringe.
2 Scheinheiliche Leit, wo liehe un in ihrm Gewisse gebranntmarkt sinn,a fiehre se hinner’s Licht.
3 So Leit verbiede de Mensche, fer se heirade un verlange, dass’e dodruf verzichde, fer bestimmde Sache se esse, Sache, wo Gott doch geschaff hat. Die, wo glawe un erkenne, was wohr is, solle Gott awer fer die Sache dangge sahn un se genieße.
4 Alles, was Gott geschaff hat, is nämlich gutt, un nix is verwerflich, wa’mer’s annemmt un Gott dangge dodefor saht.
5 Es werd nämlich durch das, was Gott gesaht hat, un durch’s Gebät heilich gemacht!
4:2a Kriminelle un Sklave, wo fortgelaf ware, hat mer zu der Zeit met eme Brandmol versiehn.
Anweisunge fer Mensche, wo Gott trei diene
6 Wann du das de Geschwischder vor Aue hallscht, dienscht du Jesus Chrischdus gutt un ernährscht dich vun dem, was unser Glawe un die gutt Lehr, wo du dich immer dran gehall hascht, sahn. 7 Weis awer unheiliche un absurde Legende ab,a un trainier dich dodrinn, fer Gott se verehre! 8 De Leib se trainiere nutzt nämlich nur wenich, awer Gott se verehre is fer alles nitzlich, weil e Zusaach fer do das Läwe un fer das Läwe, wo noch kommt, dodemet verbunn is. 9 Uf do die Feschtstellung ka’mer sich verlosse, un se is es wert, dass’e ganz angenumm werd.b 10 Dodefor schaffe mer nämlich aach un werre schlecht gemacht, weil mer uf de lewenniche Gott hoffe. De lewenniche Gott is der, wo die Mensche allegar redde dut, besunnerscht awer die, wo glawe. 11 Schärf das de Leit in un bring’s ne bei!
4:7a Oder: Weis awer unheiliche Legende, wo alde Weibsleit so gäre verzehle, ab.
4:9b Die Feschtstellung, wo mer sich druf verlosse kann un wo’s wert is, dass’e ganz angenumm werd, bezieht sich entweder uf Vers 8 oder uf Vers 10b: Mir hoffe uf de lewenniche Gott, wo die Mensche allegar redde dut, besunnerscht awer die, wo glawe.
12 Nimand soll vun owe uf dich erunnergugge, weil du noch jung bischt! Sei awer de Glaiwiche met dem, was du sahscht un läbscht un wie du annere lieb hascht, e Vorbild! Sei’s aach [im Geischt u’] met dem, was du glabscht un wie du dich rein hallscht!
13 Mach weider, fer de Leit aus de Heilich Schrift vorseläse un’e Mut se mache un se se unnerweise, bis ich komme!
14 Vernohlässich net die Fähichkät, wo in der is! Gott hat der se durch e prophedischi Botschaft gebb, wie der die Ällschde die Hänn ufgeleht hann.
15 Setz das do alles in die Praxis um, un läb denoh! Dann ka’mer in allem siehn, dass du Fortschridde machscht.
16 Bass gutt uf dich uf un uf das, was du de Leit beibringscht, un hall dodran fescht! Wann du das nämlich machscht, dusch’e dich selwer redde un die, wo der zuheere.
Wie mer met äldere un jingere Leit in de Gemän umgehn soll
1 Geh met eme äldere Mann net grob um! Du ne im Gähedäl ermahne, wie wann er dei Vadder wär. Behannel jingere Mannsleit wie Brieder,
2 äldere Weibsleit wie e Mudder un jingere Weibsleit wie Schweschdere! Mach’s met absoluder Serickhaldung!
Wie mer Witwe unnerstitze soll
3 Kimmer dich um die Witwe, wo ganz allän uf sich gestellt sinn!a 4 Wann e Witfra awer Kinner oder Enggelkinner hat, solle die sich seeerscht emo aneichne, fer sich ihrer Famillie gähiwer ehrfirchdich se verhalle un ihre Eldere un Großeldere sericksegewe, was se selwer vun’e krieht hann. Das is nämlich gutt un dut Gott gefalle. 5 E Witfra awer, wo ganz allän uf sich gestellt un veränsamt is, hofft uf Gott un heert net uf, fer Daach un Naacht bei Gott se beddele un se bäde. 6 Awer äni, wo nur läbt, fer sich se vergnieche, is schun dot, obwohl se noch läbt. 7 Schärf aach das de Glaiwiche in, dann is nix an’e aussesetze! 8 Wann awer jemand net fer sei Angeheeriche, besunnerscht fer sei Familliemetglieder, sorcht, hat er sich vun seim Glawe losgesaht un is schlimmer wie jemand, wo gar nix glabt.
5:3a Wärtlich: Ehr die Witwe, wo wirklich Witwe sinn! „Ehre“ schließt in do dem Sesammehang maderielli Unnerstitzung met in. Witwe ohne Angeheeriche ware in de domolich Zeit im Alder ohne Versorjung. Die Gemän hat ihr Versorjung unner bestimmde Bedingunge scheinbar iwernumm.
9 E Witfra darf nur dann ins Witweverzäächnisa ufgenumm werre, wann se minneschdens 60 Johr alt is un die Fra vu’me änziche Mann war. 10 Außerdem sollt bekannt sinn, dass’e gemacht hat, was gutt is. Hat se Kinner groß gezoh? Hat se Gäscht gäre ufgenumm? Hat se dene Leit, wo heilich sinn, die Fieß gewäscht?b Hat se dene, wo drangsaliert wor sinn, geholf? Kurz: Hat se sich bei allem Mieh gebb, fer Guddes se dun?
5:9a Wann sich e Witfra ins Verzäächnis vun dene Witwe, wo vun de Gemän unnerstitzt wor sinn, indrahn gelosst hat, war das meechlicherweis met erer Verflichdung verbunn, fer in de Gemän metseschaffe (vgl. V.11-12).
5:10b De Gäscht die stawiche Fieß se wäsche war in neiteschdamentlicher Zeit ebbes, was Gäscht erwarde hann känne (vgl. Lk 7,44). Normalerweis hann Sklave dene Dienscht gedun, awer de Jesus hat seine Jinger ufgedrah, fer ne selwer demiedich aussefiehre (vgl. Joh 13,4-5).
11 Jingere Witwe nemm net ins Verzäächnis uf! Wann nämlich ihr Leideschaft stärger werd wie das, wo se sich Chrischdus gähiwer defor verflicht hann, wolle se wider heirade
12 un ziehe sich so dene Vorwurf zu, se wäre dem, was se seeerscht versproch hodde, untrei wor.
13 Außerdem gewehne se sich an, fer faul se sinn un vun Haus zu Haus se lafe. Un net nur faul werre se! Nä, se werre aach geschwätzich un vorwitzich un sahn Sache, wo sich net geheere.
14 Deshalb will ich, dass die jingere Witwe wider heirade un Kinner kriehn un dass’e ihr Haushalt fiehre un eme Geechner kä Gelähehät gewe, fer schlecht iwer uns se schwätze.
15 E paar vun de jingere Witwe hann sich nämlich schun abgewennt un sinn em Deiwel nohgelaf.
16 Wann [e glaiwicher Mann oder] e glaiwichi Fra Witwe im Haus hat, solle se fer se sorje. Die Gemän soll dodemet net belascht werre, dass’e die Witwe, wo ganz allän uf sich gestellt sinn, versorje kann.
Wie mer sich de Ällschde gähiwer verhalle soll
17 Die Ällschde, wo de Gemän gutt vorstehn, verdiene e dobbeldi Anerkennung,a besunnerscht die, wo ihr ganzi Kraft insetze, fer se preddiche un eich se unnerweise.
18 Die Heilich Schrift saht nämlich:
5:17a Oder: e dobbeldes Honorar.
21 Ich ermahne dich indringlich vor Gott, vor’m Herr Jesus Chrischdus un vor dene Engel, wo vun Gott ausgewählt wor sinn: Hall do die Reechelunge vorurdälsfrei in, un beginschdich nimand! 22 Leh nimand vorschnell die Hänn uf,a un mach dich net metschullich an de Sinde vun annere! Hall dich selwer rein!
5:22a Das hääscht, fer em e Ufgab in de Gemän se iwerdrahn.
23 Drink nemmeh nur Wasser! Benutz im Gähedäl aach e bissje Wein wäh deim Mah un weil du so oft krank bischt!
24 Die Sinde vun manche Mensche sinn leicht se erkenne un komme schun vor ne im Gericht an, awer die Sinde vun annere Mensche komme eerscht hinner ne her dorthin.
25 Genauso sinn aach die gudde Sache, wo gemacht werre, leicht se erkenne, un bei dene, wo sich’s annerschder verhalt, kann’s aach net versteggelt bleiwe.
Wie sich Sklave verhalle solle
1 Die Glaiwiche, wo unner’m Joch vun de Sklaverei läwe, solle ihre Herre jedi Ehr erweise! Dann werd de Name vun Gott un das, was mer de Leit beibringe, net schlecht gemacht.
2 Sklave, wo glaiwiche Herre hann, solle ihr glaiwiche Herre awer net wenicher achde, nur weil se Brieder sinn. Se solle ne im Gähedäl umso besser diene, weil ihr Herre Glaiwiche un Geliebde sinn un vum Dienscht vun ihre Sklave profidiere. Bring das de Leit bei un mach ne Mut dodezu!
De Paulus warnt vor Irrlehrer un vor de Lieb zum Geld
3 Wann jemand falsche Lehre verbrädt un sich net an die gesunde Worde vun unserm Herr Jesus Chrischdus hallt un an die Lehr, wo dem entsprecht, dass mer Gott verehrt, 4 dann is der arrogant un versteht nix! Er hat im Gähedäl e krankhafder Hang, fer se dischbediere un wäh Worde Zores se mache. Aus all dem entsteht Neid un Streit, Diffamierunge, beese Verdächdichunge 5 un endlose Ausenannersetzunge. So Mensche sinn in ihrm Dengge verdorb, un die Wohrhät werd ne vorenthall. Se männe, Gott se verehre wär e Middel, fer Profit se mache. [Geh so Leit aus em Wääch!]
6 Gott se verehre stellt awer wirklich e großer Profit dar, vorausgesetzt, mer is met dem, was mer hat, sefride.
7 Mir hann nämlich nix in die Welt gebrung. Deshalb is aach klar, dass mer nix enausbringe känne.
8 Wa’mer awer genunk se esse un ansedun hann, wolle mer dodemet sefride sinn!
9 Die Leit, wo reich werre wolle, werre dodemet nämlich uf die Prob gestellt un verfange sich in Schlinge. Se kriehn e großi Luscht uf unverninfdiche un schädliche Sache, wo die Mensche ruiniere un ins Verderwe stirze.
10 „Am Geld se hängge is nämlich e Wurzel vun allem, was bees is.“a E paar Leit, wo unbedingt reich werre wolle, sinn vum Glawe abkomm un hann sich selwer vil Pein gemacht.
6:10a De Paulus zidiert an do der Stell e beliebdes Sprichwort, wo sich in de Lideradur vun seiner Zeit oft finnt.
Behall’s Ziel im Au!
11 Awer du sollscht als Mensch, wo Gott geheert, vor dem allem fortlafe! Streb awer denoh, fer dich gerecht se verhalle un fer Gott se verehre, fer se glawe, fer annere Mensche lieb se hann, fer Geduld ufsebringe un fer freindlich se sinn!
12 Kämpf gutt fer das, was mer glawe, un ergreif’s ewiche Läwe! Dodezu hat dich Gott aach beruf, un dodezu hascht du dich vor’me Haufe Zeihe met eme gudde Bekenntnis bekannt.
13 Ich gewe der Order vor Gott, wo allem Läwe schenkt, un vor Chrischdus Jesus, wo vor’m Pontius Piladus e guddes Bekenntnis abgeleht hat:
14 Fiehr dei Ufdraach vorbildlich aus un so, dass nix dran aussesetze is, bis unser Herr Jesus Chrischdus erscheint!
15 Dass er wider erscheint, bewirkt zu seiner Zeit de hoochgelobde un ganz allän gewaldiche Gott,a de Keenich vun de Keeniche un de Herr vun de Herre.
16 Er is der, wo ganz allän unsterblich is, der, wo i’me Licht wohnt, wo nimand hinkomme kann, der, wo noch nie vu’me Mensch gesiehn wor is un aach net gesiehn werre kann. Ihm stehn die Ehr un ewichi Macht zu! Amen.
6:15a Oder: de hoochgelobde un änziche Herrscher.
Wie sich Glaiwiche, wo reich sinn, verhalle solle
17 Schärf dene Leit, wo in do der Welt reich sinn, in, se solle net arrogant sinn un aach net uf ebbes hoffe, wo so unsicher is wie de Reichdum. Se solle im Gähedäl uf de lewenniche Gott hoffe, wo uns met allem reichlich versorcht, dass mer’s genieße känne.
18 Mensche, wo reich sinn, solle mache, was gutt is, un an gudde Werge reich werre, un se solle gäre gewe un berät sinn, fer met annere se däle.
19 So schaffe se sich e gudder Grundstock fer die Zukunft un känne es ewiche Läwe ergreife.
DE PAULUS GEBT ABSCHLIESSENDE ANWEISUNGE UN WINSCHT GOTT SEI SEECHE: 6,20-21
20 Ach Timotheus, hall fescht, was der Gott anvertraut hat! Geh em unheiliche, lääre Geschwätz un de Gäheargumende vun der „Erkenntnis“,a wo fälschlicherweis so genennt werd, aus em Wääch! 21 Zu der „Erkenntnis“ hann sich e paar Leit bekannt un sinn dodedurch vum Glawe abgefall.
6:20a Griechisch Gnosis. Dodebei geht’s um e hädnischi Irrlehr, wo versucht hat, fer in die chrischtliche Gemäne Ingang se finne.
Ich winsche der Gnad! Amen.