Westpfälzisch-südsaarländische Bibel Es lewennische Wort (ELW) – 3. Johannes
Altes Testament
Neues Testament
Matthäus Markus Lukas Johannes Aposchdelgeschicht Reemer 1. Korinder 2. Korinder Galadder Epheser Philibber Kolosser 1. Thessalonicher 2. Thessalonicher 1. Timotheus 2. Timotheus Tidus Philemon Hebräer Jakobus 1. Petrus 2. Petrus 1. Johannes 2. Johannes 3. Johannes Judas Offebarung
3. Johannes
Do das kurze Schreiwe is e perseenlichi Nodiz vum Aposchdel Johannes. Er macht em Gajus, seim Freind, Mut, fer Missionare, wo durchräse un die gutt Nohricht verkinniche, se unnerstitze. Met dem, was de Johannes verlangt, dut er dann e Warnung vor Iwerheblichkät de annere Gemäneglieder gähiwer verbinne. Chrischde sollde enanner beistehn, fer die Botschaft vun Jesus Chrischdus se verbräde, un sollde net iwerheblich sinn.
De Johannes grießt de Gajus: 1-4De Johannes lobt de Gajus, weil er trei is: 5-8De Johannes weist de Diotrephes serecht un dut de Demetrius emfehle: 9-12De Johannes winscht em Gajus Friede: 13-15
DE JOHANNES GRIESST DE GAJUS: 1-4
1 Das do schreibt de Ällschde an de liewe Gajus, wo ich wirklich lieb hann.
2 Mei Liewer, ich wäß, dass es deiner Seel gutt geht, un ich bäde dodrum, dass der’s in allem annere aach gutt geht un dass de gesund bleibscht.
3 Ich ha’mich nämlich arich gefreit, wie e paar Geschwischder komm sinna un bestädicht hann, dass du trei zu de Wohrhät stehscht un dodenoh läwe duscht.
4 Es gebt fer mich kä greßeri Fräd als wie se heere, dass mei Kinnerb in de Wohrhät läwe!
1:3a Es kännt um Missionare gehn, wo im Dienscht vun de gutt Nohricht unnerwäächs ware.
1:4b Dodemet männt de Johannes Mensche, wo durch ihne zum Glawe an Jesus Chrischdus komm sinn bzw. Mensche, wo er sich als Lehrer un Seelsorjer defor verantwortlich wäß.
DE JOHANNES LOBT DE GAJUS, WEIL ER TREI IS: 5-8
5 Mei Liewer, du bischt trei in dem, was du fer die Geschwischder machscht, aach fer die, wo der fremd sinn.a
6 Unser Geschwischder hann do vor de Gemän bestädicht, dass du se lieb hascht. Du duscht gutt dodran, wann du so Leit aach weiderhin fer ihr Weiderräs so, wie’s Gott gefallt, ausstadde duscht.
7 Fer Chrischdus se dieneb hann se sich nämlich uf de Wääch gemacht un nemme vun Mensche, wo Gott net kenne, kä Hilf an.
8 Deshalb misse mir Glaiwiche so Leit aach ufnemme, dass mer met dem, was wohr is, sesammeschaffe.
1:5a Bei dene Geschwischder, wo em Gajus fremd ware, geht’s wahrscheinlich um Preddicher un Missionare, wo uf de Durchräs ware un in die Gemän komm sinn. Die hann em Gajus do dene Brief wahrscheinlich metgebrung.
1:7b Wärtlich: Wäh’m Name.
DE JOHANNES WEIST DE DIOTREPHES SERECHT UN DUT DE DEMETRIUS EMFEHLE: 9-12
9 Ich hann de Gemän geschrieb, awer de Diotrephes, wo gäre die eerscht Geih bei ne spiele will, nemmt uns net an. 10 Deshalb bring ich alles, was er macht, zur Sprooch, wann ich komme. Met beese Worde hetzt er nämlich gäh uns un gebt sich dodemet noch net emo sefride! Selwer nemmt er die Geschwischder net uf, dut awer die, wo se ufnemme wolle, dodran hinnere un schließt se aus de Gemän aus.
11 Mei Liewer, mach das, was schlecht is, net noh! Mach im Gähedäl es Gudde noh! Wer nämlich Guddes dut, geheert zu Gott. Wer awer macht, was schlecht is, hat Gott net gesiehn.
12 De Demetrius werd vun all de Leit un vun de Wohrhät selwer bestädicht. Aach mir dun’e bestädiche, un ihr wisse, dass das, was mer bestädiche, wohr is.
DE JOHANNES WINSCHT EM GAJUS FRIEDE: 13-15
13 Ich hätt noch vil se schreiwe, awer ich will der’s net met Fedder un Tinde metdäle. 14 Ich hoffe awer, dass ich dich ball siehn kann. Dann schwätze mer unner vier Aue metenanner.
15 Ich winsche der Friede! Die Freinde losse dich grieße! Grieß du aach die Freinde dort met Name!